"ന്യായം വിധിച്ചു കിട്ടാന്‍, അന്യായം ഫയല്‍ ചെയ്യുന്നു. വിധി വരുമ്പോള്‍, വാദിക്കും പ്രതിക്കുമല്ല; ശിക്ഷ സാക്ഷികള്‍ക്കാകുന്നു'"അന്യായം'...കവിതയുടെ പേരും അങ്ങനെ തന്നെയാണ്. കവിയാകട്ടെ, ജീവിതത്തിന്‍റെ സായംസന്ധ്യയിലും എഴുത്തിന്‍റെ പറുദീസയില്‍ കസേരയിട്ടിരുന്നു കാലത്തെയും ലോകത്തെയും വിളക്കിചേര്‍ക്കുന്നൊരാള്‍... കാലഹരണപ്പെട്ടതെന്നു നാം കരുതുന്ന വാക്കുകള്‍കൊണ്ട് പഴയകാലത്തെയും അതിന്‍റെ വീര്യത്തെയും നമ്മിലേക്ക് തിരികെയെത്തിക്കുന്നൊരാള്‍...റിയലായും വൈറലാകേണ്ടൊരാള്‍! തൊണ്ണൂറ്റിയെട്ടാം വയസിലും കഥയുടെയും കവിതയുടെയും ലോകത്തു സജീവ സഞ്ചാരം തുടരുന്ന തൈശേരിയാണ് ആ "എഴുത്ത് മുത്തച്ഛന്‍'.
ഫോറസ്റ്ററുടെ നുകം!
1927ല്‍ കുട്ടനാട്ടില്‍ എടത്വ പാണ്ടങ്കരി ഗ്രാമത്തിലെ തൈശേരി വീട്ടില്‍ ജനിച്ച കുരുന്നപ്പന്‍ സ്കൂള്‍ പഠനകാലത്തു തന്നെ കവിതകള്‍ എഴുതിത്തുടങ്ങിയിരുന്നു. സീരിയസായി എഴുത്തിന്‍റെ ലോകത്തേക്കു പ്രവേശിച്ചപ്പോള്‍ വീട്ടു പേരായ "തൈശേരി' തന്നെ തൂലിക നാമമാക്കി. സാഹിത്യ മാസികകളിലും ആനുകാലികങ്ങളിലും കഥകളും കവിതകളുമെഴുതി. 1974ല്‍ വനം വകുപ്പില്‍ ഫോറസ്റ്ററായി ജോലി ചെയ്യുമ്പോഴാണ് ആദ്യ നോവലായ "നുകം'പ്രസിദ്ധീകരിച്ചത്. ജനിച്ചു വളര്‍ന്ന കുട്ടനാടിന്‍റെ പശ്ചാത്തലത്തില്‍ എഴുതിയ നോവല്‍ നിരൂപകരുടെയും വായനക്കാരുടെയും പ്രശംസ പിടിച്ചുപറ്റി.
പക്ഷേ, പിന്നീട് മൂന്നു പതിറ്റാണ്ടോളം, തൈശേരിയിലെ എഴുത്തുകാരന്‍ നിതാന്തമായ ഒരു മൗനത്തിലേക്കു ചേക്കേറി. റൈറ്റേഴ്സ് ബ്ലോക്ക് മാത്രമായിരുന്നില്ല പ്രശ്നം, വനം വകുപ്പിലെ ജോലിയിലുണ്ടായിരുന്ന ഭാരിച്ച ചുമതലകളും എഴുത്തിനു വിഘാതമായി. മൂന്നു പതിറ്റാണ്ടിനു ശേഷം 82ാം രണ്ടാം വയസില്‍ വീണ്ടും എഴുതിത്തുടങ്ങിയപ്പോള്‍ അത് അക്ഷരങ്ങളുടെ തേരിലെ ആശയങ്ങളുടെ ഘോഷയാത്രയായി...
പിന്നെ പിറന്നത് ഇരുപതോളം പുസ്തകങ്ങള്‍. നോവലുകള്‍, കഥകള്‍, ഓര്‍മക്കുറിപ്പുകള്‍, ചരിത്ര കഥകള്‍, ബൈബിള്‍ കഥകളെ ആസ്പദമാക്കിയുള്ള രചനകള്‍, ജീവിതാനുഭവങ്ങളുടെ പുനര്‍നിര്‍മാണങ്ങള്‍...അങ്ങനെ നീണ്ടു പോകുന്നു പുസ്തകങ്ങളുടെ ആ "ജോണറുകള്‍'.
18 പുസ്തകങ്ങൾ
ആദ്യ നോവലായ "നുകം’ കുട്ടനാട്ടിലെ ഒരു കര്‍ഷക കുടുംബത്തിന്‍റെ ജീവിതാവസ്ഥകള്‍ പശ്ചാത്തലമാക്കിയപ്പോള്‍, "നീല ഞരമ്പുകള്‍' എന്ന നോവലിലൂടെ അനാഥത്വത്തിന്‍റെ ദുഃഖം പേറി ജീവിക്കുന്ന മനുഷ്യരുടെ വേദനകള്‍ അദ്ദേഹം വരച്ചിട്ടു.
മൊളോക്കോയിലെ വിശുദ്ധ ഡാമിയനെ കുറിച്ചെഴുതിയ "എറ്റുവാങ്ങിയ പാനപാത്രം', വിശുദ്ധ വിന്‍സെന്‍റ് ഡി പോളിനെ കുറിച്ച് "അഗ്നി സാഗരത്തില്‍ ഒരു സ്വര്‍ഗസഞ്ചാരി' എന്നീ പുസ്തകങ്ങള്‍ രചിച്ച തൈശേരി, ക്രിസ്തുവിനെ ക്രൂശിച്ച കുരിശ് നിര്‍മിക്കാന്‍ ഉപയോഗിച്ച തടിയെ കുറിച്ച് "കുരിശമ്പകം' എന്ന പേരിലും ഒരു പുസ്തകമെഴുതി.
"ഒരു മഞ്ഞു തുള്ളിയും ഒരു പൂമൊട്ടും' എന്ന പേരില്‍ കവിത സമാഹാരവും "വാദി ഭാഗം ഒന്നാം സാക്ഷി' എന്ന പേരില്‍ കഥാസമാഹാരവും പുറത്തിറക്കി. എഴുത്ത് ജീവിതത്തിന്‍റെ രണ്ടാം വരവില്‍ അങ്ങനെ പ്രസിദ്ധീകൃതമായത് ആകെ 18 പുസ്തകങ്ങള്‍! ഇത് എൺപത്തിരണ്ടാം വയസിനു ശേഷമുള്ള എഴുത്താണെന്നോർക്കണം.
കുട്ടനാട് കൂടെ
പുതുവര്‍ഷത്തില്‍ അദ്ദേഹത്തിന്‍റേതായി പ്രസിദ്ധീകൃതമാകാന്‍ ഒരുങ്ങുന്നത് മൂന്നു രചനകളാണ്. അതിനു പുറമെ "പൊടിയരിക്കഞ്ഞി' എന്ന നോവല്‍ എഴുതിക്കൊണ്ടിരിക്കുന്നു. എട്ട് അധ്യായത്തിലേറെ എഴുതി പൂര്‍ത്തിയാക്കി. ഹൃദയസംബന്ധമായ ബുദ്ധിമുട്ടുകള്‍ ഉണ്ടെങ്കിലും എഴുത്ത് ആവേശിച്ചാല്‍ പിന്നെ തൈശേരി ഹൃദയം പറയുന്നതു മാത്രമേ കേള്‍ക്കൂ!
പുലർച്ചെതന്നെ ഉണരും. വര്‍ഷങ്ങളായുള്ള ശീലം. അപ്പോഴാണ് ആശയങ്ങള്‍ പിറവികൊള്ളുക. കിടക്കയ്ക്കരികില്‍ സൂക്ഷിച്ച കടലാസിലേക്ക് അവ പകര്‍ത്തി വയ്ക്കും. പകല്‍ മുഴുവന്‍ അതേക്കുറിച്ച് ആലോചന. രാത്രി അത്താഴവും മരുന്നും കഴിഞ്ഞ് ഒന്‍പത് മുതല്‍ 11 വരെ പൂര്‍ണമായും എഴുത്തിന്‍റെ ലോകത്ത്. നോട്ടുബുക്കില്‍ വെടിപ്പായി ഓരോ വാക്കും എഴുതിവയ്ക്കും. വെട്ടിയും തിരുത്തിയും മാറ്റിയെഴുതിയും തൃപ്തിവരും വരെ അങ്ങനെ മുന്നോട്ട്.
സര്‍ക്കാര്‍ ജീവനക്കാരനായി പല ദേശങ്ങളില്‍ സഞ്ചരിച്ച കുരുന്നപ്പന്‍, പോയിടത്തെല്ലാം കുട്ടനാടിനെ കൂടെ കൊണ്ടുപോയി. കഥയിലും കവിതയിലും ആ നാട് കൂടെ വന്നതില്‍ പിന്നെന്ത് അതിശയോക്തി. റേഞ്ച് ഓഫീസറായി ജോലിയില്‍നിന്നു വിരമിച്ച ശേഷം, കഴിഞ്ഞ 55 വര്‍ഷമായി തലസ്ഥാനത്താണ് താമസം. നാട്ടുപച്ചയുടെ നന്മകള്‍ ഇപ്പോഴും ആവോളമുണ്ട് ഉള്ളില്‍. അതു കൊണ്ടാകണം തിരുവനന്തപുരം കാഞ്ഞിരംപാറയിലെ തൈശേരി വീട് പച്ചപ്പ് നിറഞ്ഞ ഒരിടമായത്.
മുത്തച്ഛൻ കഥകൾ
എണ്‍പത്തിരണ്ടാം വയസില്‍ വീണ്ടും എഴുതി തുടങ്ങിയപ്പോള്‍, മനസില്‍ നിറഞ്ഞത് ആദ്യാക്ഷരം കുറിച്ചപ്പോള്‍ തോന്നിയ അതേ ആവേശമാണ്. ആഹ്ലാദമാണ്. പറയാന്‍ ബാക്കിവച്ചതെല്ലാം ആവേശത്തോടെ എഴുതി. ഇനിയുമിനിയും എഴുതണം. നിറയെ എഴുതണം. എഴുത്തില്‍ നിറയണം.
കുടുംബത്തിന്‍റെ ഉത്തരവാദിത്വങ്ങളെല്ലാം മക്കളെ ഏല്‍പ്പിച്ചു; വിരമിച്ച ശേഷം തുടങ്ങിയ തടി ഡിപ്പോ ഉള്‍പ്പെടെ. മക്കളായ ബെന്നിയും വിനീതയും നോബിളും ലതയും കവിതയും അച്ചാച്ചന് കൂട്ടാണ്; എഴുത്തിലും ജീവിതത്തിലും. അച്ചാച്ചന് സ്വസ്ഥമായിരുന്ന് എഴുതട്ടെ, പ്രൂഫ് നോക്കാനും പബ്ലിഷറെ കാണാനും എഴുത്തുകാരനെ കാണാന്‍ വീട്ടിലേക്കെത്തുന്ന അതിഥികളെ വരവേല്‍ക്കാനും അവരിലാരെങ്കിലും എപ്പോഴും റെഡി. എല്ലാത്തിനും പിന്തുണയുമായി ഭാര്യ മേരിക്കുട്ടിയും ഒപ്പമുണ്ട്.
മുത്തശ്ശി കഥകള്‍ മാത്രം കേട്ടു ശീലിച്ചവര്‍, ഇടയ്ക്കൊക്കെ ഇങ്ങോട്ടേക്കും പോര്. പോയ കാലത്തിന്‍റെ കഥകള്‍ പറയാന്‍ ഒരു മുത്തച്ഛനുണ്ട് ഇവിടെ; മാവുകള്‍ തണല്‍ വിരിക്കുന്ന മുറ്റത്ത്, എഴുതാന്‍ ഏറെയുണ്ടെങ്കിലും, പറയാന്‍ ഒരു മടിയുമില്ലാതെ...
ഡി. ദിലീപ്