ADVERTISEMENT

ADVERTISEMENT

ആരോഗ്യ സംരക്ഷണ സന്ദേശയാത്രയ്ക്കു തുടക്കം

പാലക്കാട്: നമ്മുടെ ആരോഗ്യമാണ് നമ്മുടെ സമ്പത്ത് എന്ന സന്ദേശവുമായി സമഗ്ര വെൽനസ് എജ്യുക്കേഷൻ സൊസൈറ്റി പാലക്കാട് മണ്ഡലത്തിൽ നടത്തുന്ന ആരോഗ്യ സംരക്ഷണ സന്ദേശ യാത്ര- 2024 ന് തുടക്കമായി.

പാലക്കാട് ഗവ. മോയൻസ് മോഡൽ ഗേൾസ് ഹയർ സെക്കൻഡറി സ്കൂളിൽ ഡിഡിഇ പി. സുനിജ ഉദ്ഘാടനം ചെയ്തു. സൊസൈറ്റി വൈസ് പ്രസിഡന്‍റ് ജോസ് ചാലക്കൽ അധ്യക്ഷനായി.

മെഡിക്കൽ ഓഫീസർ ഇൻ ചാർജ് ഡോ.ജെ.എം. ബിൽജ മുഖ്യപ്രഭാഷണം നടത്തി. സംഘടന പ്രസിഡന്‍റ് സണ്ണി എം.ജെ. മണ്ഡപത്തികുന്നേൽ, എക്സൈസ് അസിസ്റ്റന്‍റ് ഇൻസ്പെക്ടർ എം.എൻ. സുരേഷ് ബാബു, പ്രധാന അധ്യാപിക പ്രീജ, സോളമൻ പയസ്, ബിൻസ്, ഡോ. ഫിറോസ്ഖാൻ, രാധാകൃഷ്ണൻ, സായൂജ് എന്നിവർ പ്രസംഗിച്ചു.

ADVERTISEMENT

ജലന്ധർ രൂപതയുടെ നിയുക്ത ബിഷപ്പിനു വടക്കഞ്ചേരിയുമായി അടുത്ത ബന്ധം

വടക്കഞ്ചേരി: പഞ്ചാബിലെ ജലന്ധർ രൂപതയുടെ നിയുക്ത ബിഷപ്പ് മോൺ.ഡോ. ജോസ് സെബാസ്റ്റ്യൻ തെക്കുംചേരിക്കുന്നേലിനു വടക്കഞ്ചേരിയുമായി അടുത്ത ബന്ധം. വടക്കഞ്ചേരി ഫൊറോന പള്ളിയിലെ മുൻവികാരി ഫാ. ജോസ് പൊട്ടേപറമ്പിലിന്‍റെ കാലംമുതൽ 25 വർഷത്തിലേറെയായി ബിഷപ്പിന് വടക്കഞ്ചേരിയും പള്ളിയുമായും ബന്ധമുണ്ട്. ബിഷപ്പിന്‍റെ ഒരു സഹോദരൻ സാക്ഷരതാ മിഷൻ തൃശൂർ ജില്ലാ കോ- ഓർഡിനേറ്റർ കൂടിയായ ഡോ. മനോജ് സെബാസ്റ്റ്യൻ വടക്കഞ്ചേരി ലൂർദ് മാതാ ഇടവകാംഗമാണെന്നതും വടക്കഞ്ചേരിയുമായി കൂടുതൽ അടുക്കാനുള്ള കാരണമായി. മിക്കവാറും എല്ലാവർഷവുംതന്നെ ബിഷപ് വടക്കഞ്ചേരിയിൽ വരാറുണ്ടെന്നു മനോജ് പറഞ്ഞു. വരുമ്പോഴൊക്കെ വടക്കഞ്ചേരി ഫൊറോന പള്ളിയിൽ ദിവ്യബലിയർപ്പിക്കുകയും ഇടവകാംഗങ്ങളുമായി സൗഹൃദം പങ്കുവയ്ക്കുകയും ഇടവകയിലെ വിവിധ സ്ഥാപനങ്ങൾ സന്ദർശിക്കുകയും ചെയ്യും. വടക്കഞ്ചേരിയിൽ വന്നാൽ മേലാർക്കോടും നെന്മാറയിലുമുള്ള കുടുംബബന്ധങ്ങൾ പുതുക്കിയാണ് തിരിച്ചുപോവുക. പാലക്കാട് രൂപതയിലെ ബിഷപ്പുമാരുമായും ബന്ധം പുലർത്തിയിരുന്നു. ഈ മാസം 12ന് രാവിലെ പത്തിനു ജലന്ധറിലെ ട്രിനിറ്റി കോളജ് കാമ്പസിൽ നടക്കുന്ന മെത്രാഭിഷേക തിരുകർമങ്ങളിൽ പങ്കെടുക്കാനും വടക്കഞ്ചേരിക്കാരുടെ സന്തോഷം കൈമാറാനുമായി വടക്കഞ്ചേരി ലൂർദ്മാതാ ഫൊറോന വികാരി ഫാ.അഡ്വ. റെജി പെരുമ്പിള്ളിൽ, ഒലിപ്പാറ പള്ളിവികാരി ഫാ. സേവ്യർ വളയത്തിൽ, കത്തോലിക്ക കോൺഗ്രസ് രൂപത ജനറൽ സെക്രട്ടറി ആന്‍റണി കുറ്റിക്കാടൻ ഉൾപ്പെടെ മനോജും കുടുംബവുമടങ്ങുന്ന സംഘം ബുധനാഴ്ച രാവിലെ ജലന്ധറിലേക്കുപോകും. വടക്കഞ്ചേരിയിലെ മുൻവികാരി ഫാ. ജെയ്സൺ കൊള്ളന്നൂരും ജലന്ധറിലെത്തും. പാലക്കാട് രൂപതയിൽനിന്നും പഞ്ചാബിൽ മിഷൻ പ്രവർത്തനം നടത്തിവരുന്ന വൈദികരും ജലന്ധർ രൂപതയുടെ പ്രവർത്തനങ്ങളിൽ സജീവ സാന്നിധ്യമുള്ള വടക്കഞ്ചേരി ഇടവകാംഗം നിക്സൺ അബ്രഹാം തോലാനിക്കലും മെത്രാഭിഷേക ചടങ്ങുകളിൽ പങ്കെടുക്കുന്നുണ്ട്. വലിയ ദൈവാനുഗ്രഹത്തിന്‍റെ സന്തോഷത്തിലാണ് മനോജിന്‍റെ കുടുംബത്തോടൊപ്പം വടക്കഞ്ചേരി ഇടവകക്കാരും. വടക്കഞ്ചേരിയുമായി അടുത്ത ബന്ധം സൂക്ഷിക്കുന്ന മോൺ. ജോസച്ചൻ ബിഷപ് ആകുന്നതിൽ സന്തോഷങ്ങളും ചെറുതല്ല. ജലന്ധർ രൂപതയുടെ ഫിനാൻഷ്യൽ അഡ്മിനി്ട്രേറ്ററായി സേവനം ചെയ്തുവരുന്ന മോൺ ഡോ. തെക്കുംചേരികുന്നേൽ അവിടുത്തെ മേജർ സെമിനാരിയിലെ വിസിറ്റിംഗ് പ്രഫസർ കൂടിയാണ്. 1991 മുതൽ ജലന്ധർ രൂപതയിൽ വിവിധ സ്ഥാനങ്ങളിൽ വൈദികനായി സേവനം ചെയ്തു വരികയാണ്. പഞ്ചാബിലെ 14 ജില്ലകൾക്കു പുറമെ ഹിമാചൽപ്രദേശിലെ നാലു ജില്ലകളിലുമായി വ്യാപിച്ചുകിടക്കുന്ന വലിയ ഭൂപ്രദേശമാണ് ജലന്ധർ രൂപത. പാലാ കാളക്കെട്ടി തെക്കുംചേരിക്കുന്നേൽ പരേതനായ ദേവസ്യ - ഏലിക്കുട്ടി ദമ്പതികളുടെ പത്തുമക്കളിൽ ആറാമത്തെയാളാണ് നിയുക്ത ബിഷപ്. വള്ളിയോട് പടിഞ്ഞാറെക്കാടാണ് പത്തുമക്കളിലെ ഒമ്പതാമത്തെയാളായ മനോജും കുടുംബവും താമസിക്കുന്നത്. ഭാര്യ കുറ്റിക്കാടൻ കുടുംബാംഗം ലിറ്റി,മംഗലം ഗാന്ധി സ്മാരക യുപി സ്കൂളിലെ അധ്യാപികയാണ്. മക്കളിൽ മൂത്തയാൾ ഡോ. ലിസ ബിഡിഎസ് കഴിഞ്ഞ് ഹൗസ് സർജൻസി ചെയ്യുന്നു. ഇളയ മകൾ ലിൻഡ അടൂർ മൗണ്ട് സിയോൺ മെഡിക്കൽ കോളജിൽ എംബിബിഎസ് ഒന്നാംവർഷ വിദ്യാർഥിനിയാണ്.

മണ്ണാർക്കാട് നഗരസഭയിൽ ആയുർവേദ ഡിസ്പെൻസറി കെട്ടിടമൊരുങ്ങി

മണ്ണാർക്കാട്: നഗരസഭയിൽ ആധുനിക സംവിധാനങ്ങളുള്ള സർക്കാർ ആയുർവേദ ഡിസ്പെൻസറി കെട്ടിടം ഒരുങ്ങി. മുക്കണ്ണം പാലത്തിനു സമീപമാണ് ഇരുനിലകളുള്ള കെട്ടിടം ഒരുങ്ങിയത്. കിടത്തിച്ചികിത്സ, ഉഴിച്ചിൽ തുടങ്ങിയവയെല്ലാം ഇനി പുതിയ കെട്ടിടത്തിൽ തുടങ്ങാനാവും. നിലവിൽ മുൻസിപ്പൽ ബസ് സ്റ്റാന്‍റിനകത്തെ കെട്ടിടത്തിൽ ശോചനീയാവസ്ഥയുടെ നടുവിലാണ് ആയുർവേദ ആശുപത്രി പ്രവർത്തിക്കുന്നത്. മണ്ണാർക്കാട് പഞ്ചായത്തായിരിക്കെ പുതിയ കെട്ടിടത്തിനുവേണ്ടി മുറവിളി ആരംഭിച്ചതാണ്. നഗരസഭയായതോടെ ആശുപത്രി കെട്ടിടത്തിനു രണ്ടുകോടിരൂപ മാറ്റിവയ്ക്കുകയായിരുന്നു. സർക്കാർ അനുമതി നൽകുകയാണെങ്കിൽ പുതിയ കെട്ടിടത്തിൽ ആയുർവേദ മൾട്ടി സ്പെഷാലിറ്റി ആശുപത്രിതന്നെ തുടങ്ങുമെന്നു നഗരസഭാ ചെയർമാൻ സി. മുഹമ്മദ് ബഷീർ ദീപികയോടു പറഞ്ഞു. നഗരസഭയുടെ സ്വപ്നപദ്ധതിയാണു ആയുർവേദ ആശുപത്രിയെന്നും ആയിരക്കണക്കിനു രോഗികൾക്ക് ഇതു ഉപകാരപ്രദമാവുമെന്നും ചെയർമാൻ പറഞ്ഞു. ടിപ്പുസുൽത്താൻ റോഡുകൂടി നവീകരിച്ചതോടെ നഗരത്തിൽനിന്നും അഞ്ചുമിനിറ്റിനുള്ളിൽ ആശുപത്രിയിൽ എത്താനാവും. രാജീവ് ഗാന്ധി സ്മാരക സർക്കാർ ആയുർവേദ ഡിസ്പെൻസറി എന്നാണ് പുതിയ കെട്ടിടത്തിനു പേര് നൽകിയിരിക്കുന്നത്.

പാലക്കയം ഇരുന്പാമുട്ടി പുഴയിൽ കാട്ടാനയുടെ അഴുകിയ ജഡം

കല്ലടിക്കോട്: പാലക്കയം തരിപ്പപ്പതിയിൽ ഇരുമ്പാമുട്ടിപുഴയിൽ ആനയുടെ അഴുകിയ ജഡം കണ്ടെത്തി. ജഡത്തിനു നാലുദിവസം പഴക്കമുണ്ട്. പുഴയിലൂടെ ഒഴുകിവന്ന് കല്ലിൽ തടഞ്ഞുനിൽക്കുന്ന നിലയിലാണ് ജഡം കണ്ടെത്തിയത്. കാൽവഴുതി പുഴയിൽ വീണതാണെന്നു സംശയിക്കുന്നു. ഫോറസ്റ്റ് ഉദ്യോഗസ്ഥർ സ്ഥലത്തെത്തിയെങ്കിലും നടപടികൾ സ്വീകരിക്കാൻ സാധിച്ചില്ല. പുഴയിലെ വെള്ളവും പ്രതികൂല കാലാവസ്ഥയുംമൂലം ജഡം പുഴയിൽനിന്ന് കരയ്ക്കെത്തിക്കാൻ സാധിച്ചിട്ടില്ല. കാഞ്ഞിരപ്പുഴ ഡാമിലേക്കാണ് പുഴയൊഴുകുന്നത്. കുടിവെള്ള പന്പിംഗിനായി ഉപയോഗിക്കുന്ന പുഴവെള്ളം കൂടിയായതിനാൽ എത്രയുംവേഗം കാട്ടാനയുടെ ജഡം പുറത്തെടുത്തു സംസ്കരിക്കണമെന്ന് ആവശ്യം ശക്തമാണ്. കുറെ നാളുകളായി പ്രദേശത്ത് കാട്ടാനകളുടെ ശല്യം രൂക്ഷമായിരുന്നു. ഇന്നലെയും പാലക്കയം അച്ചലേട്ടി ഭാഗത്ത് കാട്ടാനക്കൂട്ടം കൃഷിയിടങ്ങളിൽ എത്തിയിരുന്നു.

കെ.പി. ലോറൻസ് ഫൗണ്ടേഷൻ പ്രവർത്തനത്തിനു തുടക്കം

വടക്കഞ്ചേരി: മുതിർന്ന കോൺഗ്രസ് നേതാവും സാമൂഹ്യ പ്രവർത്തകനുമായിരുന്ന മേലാർകോട് കെ.പി. ലോറൻസിന്‍റെ സ്മരണാർഥം ചാരിറ്റബിൾ ഫൗണ്ടേഷൻ സ്ഥാപനത്തിനും പ്രവർത്തനത്തിനും തുടക്കമായി. വടക്കഞ്ചേരി ഡയാന ടവറിൽ മുൻമന്ത്രി വി.സി. കബീർ മാസ്റ്ററുടെ അധ്യക്ഷതയിൽ നടന്ന യോഗത്തിൽ ഫൗണ്ടേഷനു രൂപം നൽകി. കോൺഗ്രസ് നേതാക്കളായ എ. ഗോപിനാഥൻ മാസ്റ്റർ, കെ.വി. കണ്ണൻ, ചിറ്റിലഞ്ചേരി എംഎൻകെഎം ഹയർ സെക്കൻഡറി സ്കൂൾ മാനേജർ എം.എൻ. സുബ്രഹ്്മണ്യൻ, കേരകേസരി സി.ആർ. ഭവദാസ്, സരസ്വതി രാമചന്ദ്രൻ , ചിദംബരംകുട്ടി മാസ്റ്റർ, ചെന്താമരാക്ഷൻ എലവഞ്ചേരി, സുന്ദരൻ പന്നിയങ്കര, എം.കെ. അശോക് കുമാർ, കെ.എൽ. വിൻസന്‍റ് പ്രതാപ് പ്രസംഗിച്ചു. ഈ മാസം 31ന് അനുസ്മരണ പരിപാടികളും നിർധനർക്കുള്ള സഹായവിതരണവും നടക്കുമെന്നു ഫൗണ്ടേഷൻ ഭാരവാഹികൾ അറിയിച്ചു. ഭാരവാഹികളായി വി. കെ. ശ്രീകണ്ഠൻ എംപി, മുൻ മന്ത്രി വി.സി. കബീർ മാസ്റ്റർ, മുൻ എംഎൽഎ കെ.എ. ചന്ദ്രൻ- രക്ഷാധികാരികൾ, എ. ഗോപിനാഥൻ മാസ്റ്റർ- പ്രസിഡന്‍റ്, വി.കെ. ഭാമ ടീച്ചർ, ചെന്താമര എലവഞ്ചേരി, കെ.എൽ. വിൻസന്‍റ് പ്രതാപ്- വൈസ് പ്രസിഡന്‍റുമാർ. മേലാർകോട് പഞ്ചായത്ത് മെംബറും കോൺഗ്രസ് നേതാവുമായ കെ.വി. കണ്ണൻ- സെക്രട്ടറി, സരസ്വതി രാമചന്ദ്രൻ, എം.കെ. അശോക് കുമാർ, ഗോപകുമാർ മാസ്റ്റർ- ജോയിന്‍റ് സെക്രട്ടറിമാർ, കെ.എൽ. ഫ്രാൻസിസ്- ഖജാൻജി, കെ.ആർ. രാജു- ഓഡിറ്റർ എന്നിവരെ തെരഞ്ഞെടുത്തു.

മാലിന്യപ്രശ്നത്തിനു പരിഹാരമില്ല

വടക്കഞ്ചേരി: ടൗണിൽ കിഴക്കഞ്ചേരി റോഡിലുള്ള തിരക്കേറിയ ബസ് കാത്തിരിപ്പുകേന്ദ്രത്തിനുമുന്നിൽ പുഴുനിറഞ്ഞ മാലിന്യക്കൂമ്പാരം ഒഴിവാക്കാൻ നടപടിയായില്ല. മഴ പെയ്യുമ്പോൾ വെള്ളത്തിലൂടെ ഈ മാലിന്യകൂമ്പാരത്തിൽ നിന്നുള്ള അഴുക്കുവെള്ളം ബസ് കാത്തിരിപ്പുകേന്ദ്രത്തിനു മുന്നിലൂടെ ഒഴുകും. ദുർഗന്ധവും പുഴുക്കളും ഈച്ചയുമായുള്ള ഈ മലിനജലത്തിൽ ചവിട്ടി കടന്നുവേണം യാത്രക്കാർക്ക് ബസിൽ കയറിപ്പറ്റാൻ. മാലിന്യച്ചാക്കുകൾ തള്ളുന്നതും ഇപ്പോൾ ഇവിടെയായി. അഴുക്കുചാലുകൾ യഥാസമയം വൃത്തിയാക്കാത്തതിനാൽ മലിനജലം മുഴുവൻ റോഡിൽ പരന്നൊഴുകാൻ കാരണമാവുകയാണ്. ബസ് കാത്തിരിപ്പുകേന്ദ്രം മാലിന്യക്കൂമ്പാരമായതോടെ യാത്രക്കാർ മുന്നോട്ടും പിറകോട്ടും മാറിനിന്നാണ് ബസിൽ കയറുന്നത്.

മണ്ണാർക്കാട്- ചിന്നത്തടാകം റോഡ്: വിവാദം പുകയുന്നു

നവീകരണം വൈകുന്നതിനു കാരണം എംഎൽഎയും കരാറുകാരനും: സിപിഎം അഗളി: മണ്ണാർക്കാട്- ചിന്നത്തടാകം റോഡ് നവീകരണം സമയബന്ധിതമായി പൂർത്തീകരിക്കാൻ കഴിയാത്തതിനു കാരണം എംഎൽഎയും കരാറുകാരനുമാണെന്നു സിപിഎം അട്ടപ്പാടി ഏരിയ സെക്രട്ടറി സി.പി. ബാബു പത്രക്കുറിപ്പിലൂടെ അറിയിച്ചു. നവീകരണത്തിന്‍റെ ആദ്യഘട്ടം നെല്ലിപ്പുഴ മുതൽ ആനമൂളിവരെ എട്ടു കിലോമീറ്റർ നവീകരണത്തിന് 44.4 കോടി രൂപയ്ക്കാണ് ലീഗ് അനുകൂലിയായ കരാറുകാരൻ ഏറ്റെടുത്തത്. 2023 ഓഗസ്റ്റിൽ പ്രവർത്തനമാരംഭിച്ച നവീകരണപ്രവൃത്തികൾ 15 മാസത്തിനുള്ളിൽ പൂർത്തീകരിക്കേണ്ടതാണ്. ആകെയുള്ള എട്ടുകിലോമീറ്ററിൽ നാലര കിലോമീറ്ററാണ് രണ്ടര വർഷത്തിനുള്ളിൽ ടാറിംഗ് നടത്തിയിട്ടുള്ളത്. ഇക്കാലയളവിൽ എംഎൽഎ ഇടപെട്ട് രണ്ടുതവണയായി ജൂലൈ 31 വരെ കാലാവധി നീട്ടിക്കൊടുത്തിട്ടുണ്ട്. പണിപൂർത്തിയാക്കിയതിന് കരാറുകാരൻ സമർപ്പിച്ച ഇടക്കാല ബില്ലുകൾക്ക് കിഫ്ബി പണം അനുവദിച്ചിട്ടുമുണ്ട്. കള്ളപ്രചരണം നടത്തി കിഫ്ബിക്കും സർക്കാരിനെതിരെ ജനരോഷം ഇളക്കിവിടാൻ എംഎൽഎ അടക്കമുള്ളവരുടെ ബോധപൂർവമുള്ള ശ്രമമാണ് നടന്നുവരുന്നത്. എംഎൽഎ ഇടപെട്ട് കരാറുകാരനെ ബ്ലാക്ക് ലിസ്റ്റിൽ പെടുത്തണമെന്നും പണികൾ വേഗത്തിൽ നടത്താൻ കഴിവുള്ള മറ്റൊരു കരാറുകാരനെ നിയമിക്കണമെന്നും സി.പി. ബാബു ആവശ്യപ്പെട്ടു. വൈകലിനു കാരണം സർക്കാരും കിഫ്ബിയും: എംഎൽഎ അഗളി: അട്ടപ്പാടിയിൽ കിഫ്‌ബി ഏറ്റെടുത്തു നടപ്പാക്കുന്ന റോഡ് നവീകരണ കാലതാമസത്തിന് ഉത്തരവാദി സർക്കാരും കിഫ്ബിയുമാണെന്നു എംഎൽഎ എൻ. ഷംസുദ്ദീൻ. സിപിഎം അട്ടപ്പാടി ഏരിയ കമ്മിറ്റി തനിക്കെതിരെ ഇറക്കിയ പത്രക്കുറിപ്പിനോടു പ്രതികരിക്കുകയായിരുന്നു എംഎൽഎ. പൊതുമരാമത്ത് മന്ത്രിയും ധനകാര്യമന്ത്രിയുമാണ് കിഫ്ബി വർക്കുകൾ കൃത്യസമയത്ത് നോക്കി നടപ്പാക്കേണ്ടത്. കരാറുകാരനെ തെരഞ്ഞെടുക്കുന്നതും കിഫ്ബിയാണ്. ജൂലൈ 31 വരെ കാലാവധി നീട്ടിനൽകിയതും കിഫ്ബി തന്നെയാണ്. കരാറുകാരൻ ആവശ്യപ്പെട്ട പ്രകാരം വാട്ടർ പൈപ്പ്, ഇലക്ട്രിസിറ്റി മാറ്റിക്കൊടുക്കൽ, മരങ്ങൾ മുറിച്ചുനീക്കൽ, വകുപ്പുതലത്തിലുള്ള തർക്കങ്ങൾ എന്നിവയെല്ലാം താൻ ഇടപ്പെട്ട് പരിഹരിച്ചുനൽകി. ഷെഡ്യൂൾ പ്രകാരം മേയ് 31നകം നവീകരണ പ്രവർത്തനങ്ങൾ പൂർത്തീകരിക്കേണ്ടതാണ്. എന്നാൽ കരാറുകാരൻ ഫെബ്രുവരി മുതൽ ഉണർന്നു പ്രവർത്തിച്ചില്ല എന്നതാണ് വസ്തുത. ഇത് സംബന്ധിച്ച് കരാറുകാരനെതിരേ കിഫ്‌ബിയിൽ പരാതിയും നൽകിയിട്ടുണ്ട്. അട്ടപ്പാടി റോഡ് വികസനം സംബന്ധിച്ച് അസംബ്ലിയിൽ 10 തവണ സബ്മിഷൻ അവതരിപ്പിച്ചിട്ടുണ്ട്. നവീകരണ കാലതാമസത്തിന് കാരണം എംഎൽഎ ആണെന്ന് വാദം വിചിത്രമാണ്. 2002 ഡിസംബർ ആദ്യവാരം പൊതുമരാമത്ത് മന്ത്രി മുഹമ്മദ് റിയാസ് ചുരംറോഡ് സന്ദർശിക്കുകയും ഒരുവർഷത്തിനകം റോഡ് നിർമ്മാണം പൂർത്തീകരിക്കുമെന്നും ഓരോ മാസവും നിർമാണ പ്രവർത്തനങ്ങൾ വിലയിരുത്തുമെന്നും ഉറപ്പുനൽകിയെങ്കിലും ഒന്നും നടപ്പായില്ലന്നു എംഎൽഎ ചൂണ്ടിക്കട്ടി. നിലവിൽ സർക്കാരിന്‍റെ പോരായ്മ മറക്കാൻ തന്നെ കരുവാക്കുകയാണെന്നും എംഎൽഎ പറഞ്ഞു.

നീലഗിരി വനത്തിലേക്ക് വിനോദസഞ്ചാരികളെ നിയമവിരുദ്ധമായി കൊണ്ടുപോകുന്നു; അപകടഭീഷണി

കോയന്പത്തൂർ: നീലഗിരി ജില്ലയിലെ മസിനഗുടി, മുതുമല റിസർവുകളിലെ നിരോധിത പ്രദേശങ്ങളിലേക്ക് വിനോദസഞ്ചാരികളെ സ്വകാര്യ വാഹനങ്ങളിൽ കൊണ്ടുപോകുന്നുവെന്ന് ആക്ഷേപം. ജഗന്നാറൈ, മായാർ എന്നീ രണ്ട് ആനപ്പാതകളുണ്ട്. ആനകൾ ജനവാസ മേഖലകളിലേക്കും കൃഷിഭൂമികളിലേക്കും പ്രവേശിക്കുന്ന സംഭവങ്ങൾ വർധിച്ചു. നീലഗിരി ജില്ലയിലെ കുറുമ്പടി, ജഗന്നാറൈ റൂട്ടിലെ ജഗന്നാറൈ, മായാർ റൂട്ടിലെ സിരിയൂർ, മസിനഗുഡി, ബൊക്കപുരം, സിംഗാര, മാവനല്ല, വാഴൈത്തോട്ടം എന്നിവിടങ്ങളിലായി നൂറിലധികം സ്വകാര്യ ഹോട്ടലുകൾ ഉണ്ട്. പ്രകൃതി ടൂറിസത്തിന്‍റെ പേരിൽ നിരോധിത വനപ്രദേശങ്ങളിലേക്ക് റിസോർട്ട് മാനേജ്മെന്‍റ് കൊണ്ടുപോകുന്നു. അവർ നിബിഡവനത്തിൽ മൃഗങ്ങളെ കാണിച്ച് ഗണ്യമായ തുക ഈടാക്കുന്നു. 2013-ൽ സിംഗാര വന സംരക്ഷണ കേന്ദ്രത്തിലെ അച്ചകരൈ പ്രദേശത്ത് ഫോട്ടോ എടുക്കുകയായിരുന്ന ഇംഗ്ലണ്ടിൽ നിന്നുള്ള കോളിൻ എന്ന ടൂറിസ്റ്റും കുറച്ച് വർഷങ്ങൾക്ക് മുമ്പ് ഒരു ജർമൻ വനിതാ ടൂറിസ്റ്റും ആനയുടെ ആക്രമണത്തിൽ കൊല്ലപ്പെട്ടു. വനം വകുപ്പിന്‍റെ അനുമതിയില്ലാതെ റിസോർട്ട് മാനേജ്മെന്‍റ് വിദേശികളെ അനധികൃതമായി കാട്ടിലേക്ക് കൊണ്ടുപോകുകയായിരുന്നു. മസിനഗുഡിയിൽ നിരോധനം ലംഘിച്ച് വനം വകുപ്പ് വിനോദസഞ്ചാരികളെ കാട്ടിലേക്ക് കൊണ്ടുപോകുന്നത് സാധാരണമാണ്. അതിക്രമിച്ചു കയറുന്ന വിനോദസഞ്ചാരികൾക്ക് പിഴ ചുമത്തുകയും അവരുടെ വാഹനങ്ങൾ പിടിച്ചെടുക്കുകയും ചെയ്യുനമെന്ന് വനംവകുപ്പ് ഉദ്യോഗസ്ഥർ അറിയിച്ചു.

നന്ദിയോട് കനാൽപ്പാലത്തിന്‍റെ കൈവരി തകർന്നു

വണ്ടിത്താവളം: നന്ദിയോട് മൂലത്തറ ഇടതുകനാൽപ്പാലത്തിന്‍റെ കൈവരി നിലംപതിച്ചു. നന്ദിയോട് ഹൈസ്കൂളിലേക്ക് എത്തുന്ന വിദ്യാർഥികളും പ്രദേശത്തെ താമസക്കാരും നന്ദിയോട് ജംഗ്ഷനിൽ എത്തണമെങ്കിൽ കൈവരി തകർന്ന പാലം കടക്കണം. കനാലിൽ പൂർണതോതിൽ ജലമിറക്കിയാൽ പിന്നീട് പാലത്തിലൂടെ വിദ്യാർഥികളും പ്രായാധിക്യമുള്ളവരുടെ സഞ്ചാരവും തീർത്തും സുരക്ഷയില്ലാതെയാണ്. മേൽപ്പാടത്ത് താമസക്കാരായ 50 കുടുംബങ്ങളിലുള്ളവർ നന്ദിയോട് എത്തി വേണം ബസ് യാത്ര നടത്താൻ. എട്ട് മാസം മുന്പാണ് ബലക്ഷയം ഉണ്ടായ പാലത്തിന്‍റെ പടിഞ്ഞാറുവശത്തെ കൈവരി വീണ്ടുകീറി ദ്വാരമുണ്ടായത്. പാലത്തിന്‍റെ ദുർബലാവസ്ഥ ബന്ധപ്പെട്ട ജലസേചനവകുപ്പ് മേധാവികളെ ധരിപ്പിച്ചിരുന്നു. സ്ഥലം സന്ദർശിച്ച വകുപ്പ് ജീവനക്കാർ സംരക്ഷണ നടപടികൾ സ്വീകരിക്കുമെന്ന് പറഞ്ഞെങ്കിലും ഒന്നും സംഭവിച്ചില്ല. 1977 ൽ നിർമിച്ച പാലത്തിന്‍റെ അടിഭാഗം കോൺക്രീറ്റ് ഇളകി തുരുന്പിച്ച കമ്പികൾ തള്ളിയ നിലയിലാണുള്ളത്.

യൂത്ത് കോണ്‍ഗ്രസ് മണ്ഡലം കണ്‍വൻഷൻ

കാഞ്ഞിരപ്പുഴ: യൂത്ത് കോണ്‍ഗ്രസ് കാഞ്ഞിരപ്പുഴ മണ്ഡലം കമ്മിറ്റിയുടെ നേതൃത്വത്തിൽ മണ്ഡലം കണ്‍വൻഷൻ സംഘടിപ്പിച്ചു. മണ്ഡലം പ്രസിഡന്‍റ് പി.എം. സുനിൽ അധ്യക്ഷനായ പരിപാടി കെപിസിസി ജനറൽ സെക്രട്ടറി കെ.എ. തുളസി ഉദ്ഘാടനം ചെയ്തു. യൂത്ത് കോണ്‍ഗ്രസ് ജില്ലാ പ്രസിഡന്‍റ് കെ.എസ്. ജയഘോഷ്, ഡിസിസി ജനറൽ സെക്രട്ടറി സി. അച്യുതൻ, യൂത്ത് കോണ്‍ഗ്രസ് സംസ്ഥാന സെക്രട്ടറിമാരായ ഷഫീക്ക് അത്തിക്കോട്, ജിതേഷ് നാരായണൻ, ജില്ലാ ഭാരവാഹികളായ ഗിസാൻ മുഹമ്മദ്, ഇ.കെ. ജസീൽ, പി.ടി. അജ്മൽ, സേവാദൾ ജില്ലാ പ്രസിഡന്‍റ് ചെറൂട്ടി മുഹമ്മദ്, കോണ്‍ഗ്രസ് മണ്ഡലം കമ്മിറ്റി പ്രസിഡന്‍റ് ജോയ് ജോസഫ്, ചെറുകര ബേബി, ബ്ലോക്ക് പഞ്ചായത്ത് മെംബർ ബിജി ടോമി, പഞ്ചായത്ത് മെംബർമാരായ രാജൻ പുത്തൻവീട്ടിൽ, റീന സുബ്രഹ്മണ്യൻ, ശരത് കുമാർ, ടി.കെ. റഫീഖ്, ബാലചന്ദ്രൻ, ലിറാർ, കെ.എം. സുദേവൻ പാലേരി, കെ. രഞ്ജിത്, ഭാഗ്യപ്പൻ ഇരുന്പകച്ചോല, മണികണ്ഠൻ കാഞ്ഞിരം, ബിബു അക്കിയംപാടം, ടി. അനഘ, ഭരത് ടി. അക്ഷയ് തുടങ്ങിയവർ പ്രസംഗിച്ചു.

ബഷീർ ദിനാഘോഷം

മണ്ണാർക്കാട്: ചങ്ങലീരി ജാസ്മിൻ പൊതുജനവായനശാലയുടെ വായനപക്ഷാചരണത്തോടനുബന്ധിച്ച് ചങ്ങലീരി എയുപി സ്കൂൾ ലൈബ്രറിയിലേക്ക് ബഷീർ ദിനത്തിൽ വായനശാല വനിതാവേദിയുടെ ആഭിമുഖ്യത്തിൽ പുസ്തകങ്ങൾ നൽകി. ലൈബ്രറി കൗണ്‍സിൽ താലൂക്ക് പ്രസിഡന്‍റ് ഹബീബുള്ള മാസ്റ്റർ ഉദ്ഘാടനം ചെയ്തു. വൈക്കം മുഹമ്മദ് ബഷീർ അനുസ്മരണം ഹരിദാസൻ മാസ്റ്റർ നിർവഹിച്ചു. പൊതുവിദ്യാഭ്യാസവകുപ്പുമായി ചേർന്ന് ലൈബ്രറി കൗണ്‍സിൽ നടപ്പിലാക്കുന്ന എന്‍റെ പുസ്തകം, എന്‍റെ കുറിപ്പ്, എന്‍റെ എഴുത്തുപെട്ടി ഉദ്ഘാടനം വായനശാല ജോയിന്‍റ് സെക്രട്ടറി കെ. കൂളിക്കൻ വിദ്യാരംഗം സാഹിത്യവേദി കണ്‍വീനർ പ്രഭാവ് മാസ്റ്റർക്ക് നൽകി നിർവഹിച്ചു. ബഷീർ ക്വിസ് മത്സരം വിജയികൾക്കുള്ള സമ്മാനവിതരണം സ്കൂൾ മാനേജർ സിസ്റ്റർ ജനറ്റ് നിർവഹിച്ചു. സ്കൂൾ ലൈബ്രറിയിലേക്കുള്ള പുസ്തകവിതരണം വനിതാവേദി കണ്‍വീനർ ഒ.യു. സിന്ധു നിർവഹിച്ചു. വായനശാല പ്രസിഡന്‍റ് ഒ. സാബു സ്വാഗതം പറഞ്ഞു. ചങ്ങലീരി എയുപി സ്കൂൾ ഹെഡ്മിസ്ട്രസ് ജയലക്ഷ്മി അധ്യക്ഷത വഹിച്ചു. ഒ.യു. രതീഷ് നന്ദി പറഞ്ഞു. വായനശാല കമ്മിറ്റി അംഗങ്ങൾ ആയ കെ. അബ്ദുൾ അസീസ്, ശില്പ, നളിനി ലൈബ്രേറിയൻ ധന്യ എന്നിവരും പങ്കെടുത്തു.

അങ്കണവാടി വർക്കർ നിയമനത്തിൽ ക്രമക്കേടെന്ന് പരാതി

ശ്രീകൃഷ്ണപുരം: കരിമ്പുഴ ഗ്രാമപഞ്ചായത്തിലെ വിവിധ അങ്കണവാടികളിലേക്കുള്ള വർക്കർമാരുടെ നിയമനത്തിൽ വ്യാപകമായ ക്രമക്കേട് ഉള്ളതായി പരാതി. 548 പേർ പങ്കെടുത്ത ഇന്‍റർവ്യൂവിൽ നിന്നും 62 പേരുടെ ലിസ്റ്റ് കഴിഞ്ഞ ദിവസം പ്രസിദ്ധീകരിച്ചിരുന്നു. ഈ ലിസ്റ്റിലാണ് അഴിമതിയും സ്വജനപക്ഷപാതവും ഉള്ളതായി കാണിച്ച് രാഷ്ട്രീയപാർട്ടിക്കാരും ഉദ്യോഗാർഥികളും രംഗത്തുവന്നത്. മാനദണ്ഡങ്ങൾ എല്ലാം കാറ്റിൽ പറത്തി യുഡിഎഫ് അനുഭാവികളെ ആദ്യ പേരുകാരാക്കിയാണ് ലിസ്റ്റ് പ്രസിദ്ധീകരിച്ചതെന്ന് സിപിഎം ആരോപിച്ചു. മുൻപരിചയം ഉള്ളവർ, അങ്കണവാടിക്ക് സ്ഥലം നൽകിയവർ, വിധവകൾ, പട്ടികജാതിക്കാർ തുടങ്ങിയ അർഹത മാനദണ്ഡങ്ങൾ ലംഘിച്ച് ഇന്‍റർവ്യൂ ബോർഡിലുള്ള മുസ്ലിം ലീഗ് നേതാവിന്‍റെ കുടുംബക്കാരെ ആദ്യ പേരുകാരായി നൽകിയാണ് റാങ്ക് ലിസ്റ്റ് പ്രസിദ്ധീകരിച്ചിട്ടുള്ളതെന്നും സിപിഎം ആരോപിച്ചു. മാനദണ്ഡങ്ങൾ പാലിക്കാതെ തയ്യാറാക്കിയ ലിസ്റ്റ് റദ്ദാക്കണമെന്ന് ബ്ലോക്ക് കോൺഗ്രസ് പ്രസിഡന്‍റ് സുരേഷ് തെങ്ങിൻതോട്ടം ആവശ്യപ്പെട്ടു. നിലവിലെ ലിസ്റ്റുമായി മുന്നോട്ടു പോയാൽ കോടതിയെ സമീപിക്കുമെന്നും അദ്ദേഹം പറഞ്ഞു. പരാതികൾ പരിഹരിക്കണം ശ്രീകൃഷ്ണപുരം: കരിമ്പുഴ പഞ്ചായത്തിലെ അങ്കണവാടി വർക്കർമാരുടെ റാങ്ക് ലിസ്റ്റുമായി ബന്ധപ്പെട്ട ഉദ്യോഗാർഥികളുടെ പരാതികൾ പരിഹരിക്കണമെന്നും ലിസ്റ്റ് പുനഃപരിശോധിക്കണമെന്നും മുസ്ലിംലീഗ് പഞ്ചായത്ത് കമ്മിറ്റി ആവശ്യപ്പെട്ടു. ഇന്‍റർവ്യു ബോർഡിൽ ഒരാൾ മാത്രമാണ് മുസ്ലിംലീഗ് നേതൃനിരയിൽ നിന്നുള്ളത്. ബാക്കിയുള്ളവർ പഞ്ചായത്തിലെ വിവിധ രാഷ്ട്രീയ പാർട്ടി പ്രതിനിധികളും ഉദ്യോഗസ്ഥരുമാണ്. റാങ്ക് ലിസ്റ്റിൽ പിഴവ് സംഭവിച്ചിട്ടുണ്ടെങ്കിൽ പരിഹരിച്ച് മുന്നോട്ടു പോവണമെന്നും മുസ്ലിംലീഗ് കരിമ്പുഴ പഞ്ചായത്ത് പ്രസിഡന്‍റ് എൻ.ഹംസ, ജനറൽ സെക്രട്ടറി പി.മുഹമ്മദ് അലി എന്നിവർ ആവശ്യപ്പെട്ടു. ആരോപണങ്ങൾ തെറ്റിദ്ധാരണാജനകം: പഞ്ചായത്ത് പ്രസിഡന്‍റ് ശ്രീകൃഷ്ണപുരം: കരിമ്പുഴ ഗ്രാമപഞ്ചായത്തിൽ അങ്കണവാടി വർക്കർ റാങ്ക് ലിസ്റ്റുമായി ബന്ധപ്പെട്ട് നടക്കുന്ന ആരോപണങ്ങൾ തെറ്റിദ്ധാരണാജനകമാണെന്ന് കരിമ്പുഴ ഗ്രാമപഞ്ചായത്ത് പ്രസിഡന്‍റ് കെ.എം. ഹനീഫ പറഞ്ഞു. പഞ്ചായത്ത് ഭരണസമിതിയാണ് അങ്കണവാടി വർക്കർമാർക്കുള്ള ഇന്‍റർവ്യൂ നടത്തിയത് എന്ന പ്രചാരണം അടിസ്ഥാന രഹിതമാണ്. 9 അംഗ ഇന്‍റർവ്യു ബോർഡിൽ ഭരണസമിതിയിൽ നിന്നും ഗ്രാമപഞ്ചായത്ത് പ്രസിഡന്‍റ് എന്ന നിലക്ക് താൻ മാത്രമാണ് അംഗമായിട്ടുള്ളത്. മറ്റുള്ള അംഗങ്ങൾ പ്രമുഖ രാഷ്ട്രീയപാർട്ടി പ്രതിനിധികളും ഉദ്യോഗസ്ഥരുമാണ്. ഉദ്യോഗാർഥികളുടെ കൂടിക്കാഴ്ചയ്ക്ക് ശേഷം മാർക്ക് ലിസ്റ്റ് ഐസിഡിഎസ് അധികാരികളെ ഏൽപ്പിച്ചു. അവരാണ് മാർക്ക് ക്രോഡീകരിച്ച് ലിസ്റ്റ് തയ്യാറാക്കി പ്രസിദ്ധീകരിച്ചത്. പഞ്ചായത്ത് പ്രസിഡന്‍റിനെതിരേയും ഭരണസമിതിക്കെതിരേയും ഉള്ള ആരോപണങ്ങൾ അടിസ്ഥാനരഹിതം ആണെന്ന് പ്രസിഡന്‍റ് പറഞ്ഞു.

ചോലക്കാട് അമ്പലം പ്രദേശത്ത് കുടിവെള്ളമെത്തി

അഗളി: അട്ടപ്പാടി ചോലക്കാട് അമ്പലം പ്രദേശത്തെ 30 കുടുംബങ്ങൾക്ക് കുടിവെള്ള വിതരണം സാധ്യമായി. അഗളി ഗ്രാമപഞ്ചായത്ത് 17 ലക്ഷം രൂപ ചെലവഴിച്ചാണ് പദ്ധതി നടപ്പാക്കിയത്. ഗ്രാമപഞ്ചായത്ത് പ്രസിഡന്‍റ് അംബിക ലക്ഷ്മണൻ ഉദ്ഘാടനം ചെയ്തു. വാർഡ് മെംബർ സുമിത കൃഷ്ണകുമാർ അധ്യക്ഷയായി. വൈസ് പ്രസിഡന്‍റ് ശ്രീലക്ഷ്മി ശ്രീകുമാർ, പഞ്ചായത്ത് അംഗങ്ങളായ ജോസ് പനക്കമറ്റം, പരമേശ്വരൻ, നിത്യ ഷിജു, സിന്ധു ബാബു എന്നിവർ പ്രസംഗിച്ചു. ബിനോയ് സ്വാഗതവും സുനിൽ നന്ദിയും പറഞ്ഞു.

ഹൈടെക് മാർക്കറ്റ് കർഷകർക്ക് വൻസാധ്യതകൾ തുറക്കും: മന്ത്രി

പാലക്കാട്: ഹൈടെക് മാർക്കറ്റ് കർഷകർക്ക് വലിയ സാധ്യതകൾ തുറക്കുമെന്ന് മന്ത്രി എം.ബി രാജേഷ്. പെരുമാട്ടിയിൽ ഹൈടെക് മാർക്കറ്റ് ആൻഡ് അഗ്രോ പ്രൊസസിംഗ് യൂണിറ്റ് നിർമാണോദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. കർഷകർക്ക് ന്യായവില ഉറപ്പാക്കാനും കാർഷികമേഖലക്ക് ഉണർവേകാനും പദ്ധതിയിലൂടെ കഴിയും. മൊത്തവ്യാപാര മാർക്കറ്റ്, കാർഷിക ഉത്പന്നങ്ങളുടെ തരംതിരിക്കൽ, പാക്കിംഗിനുള്ള കേന്ദ്രം, മൂല്യവർധിത കാർഷിക ഉത്പന്നങ്ങൾക്കുള്ള കേന്ദ്രം എന്നീ സൗകര്യങ്ങൾ ഹൈടെക് മാർക്കറ്റിലൂടെ സാധ്യമാക്കുമെന്നും മന്ത്രി പറഞ്ഞു. മായം കലർത്താത്ത കൃഷിരീതി നടപ്പിലാക്കി പദ്ധതി മുന്നോട്ടുകൊണ്ടുപോകണമെന്ന് അധ്യക്ഷ പ്രസംഗത്തിൽ മന്ത്രി കെ.കൃഷ്ണൻകുട്ടി പറഞ്ഞു. പ്രാദേശിക കാർഷികോത്പന്നങ്ങൾക്ക് പുതിയ വിപണി സാധ്യതകളും കർഷകർക്ക് മികച്ച വരുമാനവുമാണ് ഹൈടെക് മാർക്കറ്റ് ആൻഡ് അഗ്രോ പ്രൊസസിംഗ് യൂണിറ്റിന്‍റെ പ്രധാന ലക്ഷ്യമെന്നും മന്ത്രി പറഞ്ഞു. പ്രാദേശിക കർഷകരുടെ ഉന്നമനം, ഗുണമേന്മയുള്ള കാർഷിക ഉത്പന്നങ്ങളുടെ ഉത്പാദനം, കർഷകരുടെ ജീവിതനിലവാരം മെച്ചപ്പെടുത്തൽ, കാർഷിക വിഭവങ്ങൾ അന്താരാഷ്ട്ര നിലവാരത്തിൽ കയറ്റുമതി ചെയ്യാനുള്ള സാധ്യതകളെല്ലാം ഹൈടെക് മാർക്കറ്റിലൂടെ സാധ്യമാകുമെന്നും മന്ത്രി കൂട്ടിച്ചേർത്തു. കെ.ബാബു എംഎൽഎ മുഖ്യാതിഥിയായി. ചീഫ് എൻജിനീയർ കെ.ജി. സന്ദീപ് റിപ്പോർട്ട് അവതരിപ്പിച്ചു. 2020-21 സാന്പത്തിക വർഷത്തെ ബജറ്റിൽ ഉൾപ്പെടുത്തി 10 കോടി രൂപ വിനിയോഗിച്ചാണ് ഹൈടെക് മാർക്കറ്റ് ആൻഡ് അഗ്രോ പ്രൊസസിംഗ് യൂണിറ്റിന്‍റെ ഒന്നാംഘട്ട നിർമാണ പ്രവർത്തനം നടത്തുന്നത്.

അഗളി ആശുപത്രിക്കുമുന്നിൽ കോൺഗ്രസ് പ്രതിഷേധം

അഗളി: കെട്ടിട അവശിഷ്ടങ്ങൾക്കിടയിൽപ്പെട്ട് വീട്ടമ്മയുടെ ജീവൻനഷ്ടമായ സംഭവത്തിൽ അഗളി കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ സർക്കാർ ആശുപത്രിക്കുമുമ്പിൽ പ്രതിഷേധയോഗം നടത്തി. സർക്കാരിന്‍റെയും ആരോഗ്യ വകുപ്പിന്‍റെയും ഗുരുതര അനാസ്ഥയാണ് സംഭവത്തിനു കാരണമെന്നു യോഗം ചൂണ്ടിക്കാട്ടി. മണ്ഡലം പ്രസിഡന്‍റ് ജോബി കൂരിക്കാട്ടിൽ ഉദ്ഘാടനം ചെയ്തു. കെപിസിസി അംഗം പി.സി. ബേബി,നേതാക്കളായ എൻ.കെ. രഘുത്തമൻ, ഷിബു സിറിയക്, കെ.ടി. ബെന്നി, യു.എ. മത്തായി, ജയ്സൺ ആന്‍റണി, ബിജു ജോസഫ്, ഷൈജു ജോസഫ്, സഫിൻ അട്ടപ്പാടി, മണികണ്ഠൻ, ഷാജി പോത്തനാമൂഴി, ചിത്ര തുടങ്ങിയവർ പങ്കെടുത്തു.

കത്തോലിക്ക കോൺഗ്രസ് മംഗലംഡാം ഫൊറോന സമിതി അനുമോദനം- 2025

മംഗലംഡാം: കത്തോലിക്ക കോൺഗ്രസ് മംഗലംഡാം ഫൊറോന സമിതിയുടെ നേതൃത്വത്തിൽ അനുമോദനം- 2025 സംഘടിപ്പിച്ചു. പത്താം ക്ലാസിലും പ്ലസ്ടുവിനും ഫുൾ എപ്ലസ് നേടിയ വിദ്യാർഥികളേയും വ്രതവാഗ്ദാനത്തിന്‍റെ സുവർണ ജൂബിലി ആഘോഷിക്കുന്ന സിസ്റ്റർ മേരി ആനി ( ഡൊട്ടേഴ്സ് ഓഫ് സെന്‍റ്പോൾ, മുംബൈ), സിഎ പൂർത്തിയാക്കിയ ടോണി ജേക്കബ് കാടൻകാവിൽ തുടങ്ങിയവരെ അനുമോദിച്ചു. വിദ്യാഭ്യാസ പ്രോത്സാഹനത്തിന്‍റെ ഭാഗമായി വിദ്യാർഥികൾക്ക് കാഷ് അവാർഡും മൊമെന്‍റോയും നൽകി. മംഗലംഡാം ഫൊറോന പള്ളി പാരീഷ് ഹാളിൽ നടന്ന അനുമോദന സമ്മേളനം ഫൊറോന വികാരി ഫാ. സുമേഷ് നാല്പതാംകളം ഉദ്ഘാടനം ചെയ്തു. ഫൊറോന പ്രസിഡന്‍റ് ബെന്നി മറ്റപ്പള്ളിൽ അധ്യക്ഷത വഹിച്ചു. ഫൊറോന ഡയറക്ടർ ഫാ. സജി വട്ടുകുളം മുഖ്യപ്രഭാഷണം നടത്തി. രൂപത ജനറൽ സെക്രട്ടറി ആന്‍റണി കുറ്റിക്കാടൻ, രൂപത എക്സിക്യൂട്ടീവ് അംഗം ബിനു മുളമ്പള്ളിൽ, രൂപത സെക്രട്ടറി സേവ്യർ കലങ്ങോട്ടിൽ, പഞ്ചായത്ത് മുൻ മെംബർ ബെന്നി ജോസഫ് പ്രസംഗിച്ചു.

നിപ്പ: ജില്ലയിൽ കനത്ത ജാഗ്രത

പാലക്കാട്: ജില്ലയിൽ നിപ്പ രോഗം സ്ഥീരീകരിച്ച സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്നു അധികൃതർ. പ്രത്യേക ജാഗ്രതാ നിർദേശവും പുറപ്പെടുവിച്ചിട്ടുണ്ട്. കണ്ടെയ്മെന്‍റ് സോണിലുള്ളവർ അനാവശ്യമായി കൂട്ടം കൂടരുത്. എൻ-95 മാസ്ക് നിർബന്ധമായും ധരിക്കണം. കണ്ടെയിൻമെന്‍റ് സോണിൽ നിന്നും പുറത്തേക്കുള്ള യാത്രകൾ ഒഴിവാക്കണം. ഐസൊലേഷൻ, ക്വാറന്‍റൈനിൽ കഴിയുന്നവർ നിർബന്ധമായും എൻ-95 മാസ്ക് ധരിക്കേണ്ടതാണ്. കൃത്യമായും ക്വാറന്‍റൈൻ മാനദണ്ഡങ്ങൾ പാലിക്കണം. ശുചിമുറിയുള്ള റൂമിൽതന്നെ ക്വാറന്‍റൈനിൽ ഇരിക്കുക. ആരുമായും സമ്പർക്കത്തിൽ വരാതെ പ്രത്യേകം ശ്രദ്ധിക്കണം. അവരെ പരിചരിക്കുന്ന വീട്ടിലുള്ള എല്ലാവരും മാസ്ക് എപ്പോഴും ധരിക്കണം. കൈകൾ ഇടയ്ക്കിടയ്ക്ക് സോപ്പും വെള്ളവും ഉപയോഗിച്ചോ സാനിറ്റൈസർ ഉപയോഗിച്ചോ അണുവിമുക്തമാക്കേണ്ടതാണ്. പനി, ചുമ, തലവേദന, ശ്വാസതടസം, മാനസിക വിഭാന്ത്രി, ബോധക്ഷയം തുടങ്ങിയ രോഗലക്ഷണങ്ങളുള്ളവർ ഉടൻതന്നെ വിവരം അടുത്തുള്ള ആരോഗ്യ പ്രവർത്തകരെ ഫോൺ മുഖാന്തിരം അറിയിക്കുകയോ കൺട്രോൾ റൂം നമ്പറിലേക്ക് 0491 - 2504002 വിളിക്കുകയോ ചെയ്യണമെന്നും നിർദേശമുണ്ട്. തച്ചനാട്ടുകര പഞ്ചായത്തിൽ വാർഡ്-7 (കുണ്ടൂർക്കുന്ന്) വാർഡ്- 8 (പാലോട് ) വാർഡ്- 9 (പാറമ്മൽ) വാർഡ്- 11 (ചാമപറമ്പ്) കരിമ്പുഴ പഞ്ചായത്തിൽ വാർഡ്- 17 (ആറ്റശ്ശേരി ) വാർഡ്- 18 ( ചോളക്കുറിശ്ശി) എന്നിവയാണ് നിലവിലെ കണ്ടെയ്ൻമെന്‍റ് സോണുകൾ.

നിരത്തുകൾ കീഴടക്കി തെരുവുനായ്ക്കൂട്ടം

കല്ലടിക്കോട്: ചെറുറോഡുകൾ കൈയടക്കി തെരുവുനായ്ക്കൂട്ടം. പത്തും ഇരുപതും നായകളാണ് കൂട്ടമായി വഴികളിലൂടെ സഞ്ചരിക്കുന്നത്. ഇവ ആളുകളെ ആക്രമിക്കുന്നതും പതിവാണ്. കരിമ്പ പഞ്ചായത്തിലെ കല്ലടിക്കോട്, ടിബി, ദീപ, മാപ്പിളസ്കൂൾ, ഇരട്ടക്കൽ, കൂരിക്കുന്ന്, വാക്കോട്, പാങ്ങ്, ചുങ്കം, കല്ലടി തുടങ്ങി നിരവധി സ്ഥലങ്ങളിലും തെരുവുനായ്ക്കളുടെ ശല്യം രൂക്ഷമാണ്. കഴിഞ്ഞ രണ്ടാഴ്ച മുൻപ് വാക്കോട് ഉന്നതിയിൽ വീട്ടിലെ പശുവിനെ കടിച്ചു പരിക്കേൽപ്പിച്ചിരുന്നു. ഇപ്പോഴും പശുവിനു പ്രതിരോധ കുത്തിവയ്പ്പുകൾ തുടരുകയാണ്. ഉന്നതിയിൽ വളർത്തുന്ന മറ്റു നായകൾക്കെല്ലാം പ്രതിരോധ കുത്തിവയ്പ്പെടുക്കുകയും ചെയ്‌തു. രണ്ടുദിവസങ്ങൾക്കു മുമ്പാണ് സ്കൂളിൽനിന്നും മടങ്ങുകയായിരുന്ന യുവതിയെ നായകടിച്ചത്. രാവിലെ മദ്രസ്സയിലേക്കുപോകുന്ന കുട്ടികൾക്കെതിരെയും നായകളുടെ അക്രമമുണ്ടാകുന്നുണ്ട്, സ്കൂൾ വിദ്യർഥികളും ഇരുചക്ര വാഹനയാത്രികരും ഭയന്നാണ് യാത്ര ചെയ്യുന്നത്. ശക്തമായ നടപടി എടുക്കണമെന്നാണു നാട്ടുകാരുടെ ആവശ്യം.

സ്മാര്‍ട്ട് അങ്കണവാടികളുടെയും വിവിധ റോഡുകളുടെയും നിർമാണോദ്ഘാടനം

ആലത്തൂർ: കാവശ്ശേരി ഗ്രാമപഞ്ചായത്തിലെ വിവിധ റോഡുകളുടെയും, സ്മാര്‍ട്ട് അങ്കണവാടികളുടെയും നിർമാണോദ്ഘാടനം പി.പി സുമോദ് എംഎൽഎ നിർവഹിച്ചു. 2023-24 സാമ്പത്തിക വര്‍ഷത്തിലെ സംസ്ഥാന ബജറ്റില്‍ 20 ശതമാനം ടോക്കണ്‍ പ്രൊവിഷനില്‍ ഉള്‍പ്പെടുത്തിയാണ് ഈ പദ്ധതികള്‍ക്കു തുടക്കം കുറിക്കുന്നത്. ഒരുകോടിരൂപ ചെലവില്‍ ചുണ്ടക്കാട്, കുമ്പാരത്തറ പുഴക്കല്‍ റോഡുകളാണ് നവീകരിക്കുന്നത്. മൂന്നുകോടി രൂപ ചെലവില്‍ തെക്കുമണ്ണ്, കോങ്ങാട്ടുമുറി, ചികോട് എന്നിവിടങ്ങളില്‍ അത്യാധുനിക സൗകര്യങ്ങളോടുകൂടിയ സ്മാര്‍ട്ട് അങ്കണവാടികളും നിര്‍മിക്കുമെന്നു എംഎൽഎ പറഞ്ഞു. ചടങ്ങിൽ കാവശ്ശേരി ഗ്രാമപഞ്ചായത്ത് പ്രസിഡന്‍റ് സി. രമേഷ് കുമാര്‍ അധ്യക്ഷത വഹിച്ചു. ചുണ്ടക്കാട് തീപ്പെട്ടിക്കമ്പനി അങ്കണത്തില്‍ നടന്ന പരിപാടിയിൽ ആലത്തൂർ ബ്ലോക്ക് പഞ്ചായത്ത് മെംബർമാരായ എസ്. ജയകൃഷ്ണൻ, ആസാദ് സുലൈമാൻ, വാസുദേവൻ തെന്നിലാപുരം, കാവശ്ശേരി ഗ്രാമപഞ്ചായത്ത് വൈസ് പ്രസിഡന്‍റ് ഉഷാദേവി സതീശൻ, സ്റ്റാന്‍റിംഗ് കമ്മിറ്റി ചെയർമാൻമാരായ മണി വാവുള്ളിപ്പതി, ഗിരിജ രാജൻ, ബീന ഗോപി, കാവശ്ശേരി ഗ്രാമപഞ്ചായത്ത് മെംബർമാരായ സുചിത്ര,കേശവദാസ് മാസ്റ്റർ, ചാത്തൻ മാസ്റ്റർ, നിത്യ,ടി. കാവശ്ശേരി ഗ്രാമ പഞ്ചായത്ത് സെക്രട്ടറി മാലതി വേലായുധൻ, ഐസിഡിഎസ് സൂപ്പർവൈസർ നിമിഷ പങ്കെടുത്തു.

മാർ ഈവാനിയോസ് അനുസ്മരണവും പദയാത്രയും

കല്ലടിക്കോട്: പുനരൈക്യ പ്രസ്ഥാനത്തിന്‍റെ പ്രണേതാവും മലങ്കര സുറിയാനി കത്തോലിക്ക സഭയുടെ സ്ഥാപകനുമായ ധന്യൻ മാർ ഈവാനിയോസ് പിതാവിന്‍റെ എഴുപത്തിരണ്ടാമത് ഓർമപ്പെരുന്നാൾ കരിമ്പ മേഖലയുടെ ആഭിമുഖ്യത്തിൽ കരിമ്പ നിർമലഗിരി സെന്‍റ്മേരീസ് മലങ്കര സുറിയാനി കത്തോലിക്ക തീർഥാടന പള്ളി അങ്കണത്തിൽ നടത്തി. കൂരിയ ബിഷപ് ഡോ. ആന്‍റണി മാർ സിൽവാനോസ് എപ്പിസ്കോപ്പ തിരുനാളിനു മുഖ്യകാർമികത്വം വഹിച്ചു. ഭക്തിനിർഭരമായ പദയാത്ര കാഞ്ഞിക്കുളം ഹോളി ഫാമിലി പള്ളി അങ്കണത്തിൽ നിന്നും ചിറക്കൽപ്പടി സെൻറ് ജോർജ് ദേവാലയം അങ്കണത്തിൽ നിന്നും ആരംഭിച്ചു നിർമ്മലഗിരി മരിയൻ തീർത്ഥാടന പള്ളി അങ്കണത്തിൽ സംഗമിച്ചു. മേഖല ഫാ. ചെറിയാൻ ചെന്നിക്കര, ഫാ. പൗലോസ് കിഴക്കനേടത്ത്, ഫാ. കുര്യാക്കോസ് മാമ്പ്രക്കാട്ട്, ഫാ.മരിയ ജോൺ, ഫാ.ജോസഫ് പുല്ലുകാലായിൽ, ഫാ. ജേക്കബ് കൈലാത്ത്, ഫാ.പൗലോസ് പരിയാരത്ത് എന്നിവർ നേതൃത്വം നൽകി. വിവിധ ഭക്തസംഘടനകളുടെ സംയുക്താഭിമുഖ്യത്തിൽ സംഘടിപ്പിച്ച അനുസ്മരണ പദയാത്രയിലും ആഘോഷമായ വിശുദ്ധ കുർബാനയിലും പൊതുസമ്മേളനത്തിലും കോയമ്പത്തൂർ സെന്‍റ് തോമസ്, ആരോഗ്യമാത മിഷൻ, ഒലവക്കോട്, കോങ്ങാട്, കാഞ്ഞിക്കുളം, ജെല്ലിപ്പാറ,ചിറക്കൽപ്പടി, ഇരുമ്പാമുട്ടി,മണ്ണാർക്കാട്, കരിമ്പ ഇടവകകളിൽ നിന്നുമുള്ള വിശ്വാസികൾ പങ്കെടുത്തു. സൺഡേ സ്കൂളിലും പൊതു പരീക്ഷകളിലും മികച്ച നേട്ടങ്ങൾ കൈവരിച്ചവരെയും ആദരിച്ചു. മലങ്കര കത്തോലിക്ക യുവജന പ്രസ്ഥാനം കരിമ്പ മേഖല 2025-26 വർഷ കർമ പദ്ധതികളുടെ പ്രഖ്യാപനവും നടത്തി. ആശിർവാദത്തിനുശേഷം സ്നേഹ വിരുന്നോടുകൂടി അനുസ്മരണ സമ്മേളനം സമാപിച്ചു.

സുരക്ഷാ പദ്ധതിയുമായി കേരള ഹോട്ടൽ ആൻഡ് റസ്റ്റോറന്‍റ് അസോസിയേഷൻ

വടക്കഞ്ചേരി: കേരള ഹോട്ടൽ ആൻഡ് റസ്റ്റോറന്‍റ് അസോസിയേഷൻ വടക്കഞ്ചേരി യൂണിറ്റിന്‍റെ നേതൃത്വത്തിൽ സുരക്ഷാ പദ്ധതി വിശദീകരണ യോഗവും ബോണ്ട് വിതരണവും നടന്നു. അംഗങ്ങൾക്ക് പത്തുലക്ഷം രൂപയുടെ സാമ്പത്തിക സുരക്ഷ ഉറപ്പാക്കുന്ന ഈപദ്ധതി മരണപ്പെടുന്ന അംഗങ്ങളുടെ ആശ്രിതർക്ക് വലിയൊരു കൈത്താങ്ങാകുമെന്നു ഭാരവാഹികൾ പറഞ്ഞു. റോയൽ ജംഗ്ഷനിലെ ഷാ പാലസ് ഹോട്ടൽ ഹാളിൽ നടന്ന പരിപാടി സംസ്ഥാന സെക്രട്ടറിയും സുരക്ഷാ പദ്ധതി സംസ്ഥാന ചെയർമാനുമായ പി.എം. ഷിനാജ് റഹ്്മാൻ ഉദ്ഘാടനം ചെയ്തു. യൂണിറ്റ് പ്രസിഡന്‍റ് പി.ജി. ഗോപിനാഥ് അധ്യക്ഷത വഹിച്ചു. അസോസിയേഷൻ ജില്ലാ പ്രസിഡന്‍റ് സി. സന്തോഷ് മുഖ്യപ്രഭാഷണം നടത്തി. സുരക്ഷാ പദ്ധതി ജില്ലാ ചെയർമാൻ എം. കുഞ്ചപ്പൻ, ജില്ലാ വർക്കിംഗ് പ്രസിഡന്‍റ് സഫീർ, യൂണിറ്റ് സെക്രട്ടറി എ.അബ്ദുൾ നാസർ പ്രസംഗിച്ചു.

വിദ്യാർഥികളെ അനുമോദിച്ച് കോരഞ്ചിറ സൗഹൃദ ചാരിറ്റബിൾ സൊസൈറ്റി

വടക്കഞ്ചേരി: കോരഞ്ചിറ സൗഹൃദ ചാരിറ്റബിൾ സൊസൈറ്റിയുടെ നേതൃത്വത്തിൽ എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ വിദ്യാർഥികളെ അനുമോദിച്ചു. കിഴക്കഞ്ചേരി പഞ്ചായത്ത് പ്രസിഡന്‍റ് കവിത മാധവൻ ഉദ്ഘാടനം ചെയ്തു. ടി.സി. ഗീവർഗീസ് മാസ്റ്റർ, അഡ്വ.വി.കെ.സണ്ണി, മജീഷ്യൻ പ്രേംദാസ്, ഭാരവാഹികളായ എൽദോസ് മാത്യു, ഫൈസൽ, കെ.കെ. മത്തായി, ബൈജു പോൾ പ്രസംഗിച്ചു. ഒരു കൂട്ടം ചെറുപ്പക്കാർ രൂപംകൊടുത്ത സൗഹൃദ ചാരിറ്റബിൾ സൊസൈറ്റി കിടപ്പുരോഗികൾക്ക് കട്ടിൽ, എയർബെഡ്, വീൽചെയർ, വാക്കർ, എന്നീ ഉപകരണങ്ങൾ ആവശ്യക്കാർക്ക് ലഭ്യത അനുസരിച്ച് കൊടുക്കുന്നുണ്ടെന്നു ഭാരവാഹികൾ പറഞ്ഞു. വിമാനയാത്ര സ്വപ്നമായി മനസിൽ സൂക്ഷിക്കുന്നവർക്കും സൗഹൃദയുടെ സഹായമുണ്ട്. ആഗ്രഹമുള്ളവരെ കണ്ടെത്തി വിമാനയാത്രയും കൂട്ടായ്മ സംഘടിപ്പിക്കുന്നുണ്ട്.

ആരോഗ്യമന്ത്രി രാജിവയ്ക്കണമെന്നാവശ്യപ്പെട്ട് കോട്ടോപ്പാടം ആരോഗ്യകേന്ദ്രം ഉപരോധിച്ചു

കോട്ടോപ്പാടം: ആരോഗ്യമന്ത്രി രാജിവയ്ക്കണമെന്നാവശ്യപ്പെട്ട് കോട്ടോപ്പാടം ഫാമിലി ഹെൽത്ത് സെന്‍ററിലേക്ക് കോൺഗ്രസ് പ്രതിഷേധമാർച്ച് നടത്തി. മാർച്ച് ബ്ലോക്ക് കോൺഗ്രസ് പ്രസിഡന്‍റ് അസീസ് ഭീമനാട് ഉദ്ഘാടനം ചെയതു. മണ്ഡലം കോൺഗ്രസ് പ്രസിഡന്‍റ് മനച്ചിതൊടി ഉമ്മർ അധ്യക്ഷനായി. പി. മുരളീധരൻ, ബ്ലോക്ക് കോൺഗ്രസ് വൈസ് പ്രസിഡന്‍റുമാരായ കെ.ജി. ബാബു, സി.ജെ. രമേഷ്. സി. എം. അസീസ്, നാസർ വേങ്ങ, ഷിഹാബ് കുന്നത്ത്, കൃഷ്ണ പ്രസാദ്, അൻവർ സാജി, സുകുമാരൻ, അഷറഫ് ഭീമനാട്, ശശി ഭീമനാട്, എ.വി. മത്തായി, സി.എം. മജീദ്, കെ.കെ. സെയതലവി, അസൈനാർ മണലടി, മൊയ്തു കാഞ്ഞിരംകുന്ന്, വേണു കച്ചേരിപറമ്പ്, എ. ദീപ, കെ. വിനീത. അസീസ് ആലായൻ, വി. ചന്ദ്രൻ, വി. സാറ, നിജോ വർഗീസ്, ഉസമാൻ അമ്പലപ്പാറ, അലി ചുങ്കൻ, സി.ടി. ഉമ്മർ, ടി. കുഞ്ഞിപ്പ, സാനിർ ബാബു എന്നിവർ പ്രസംഗിച്ചു.

കയറാടി മൃഗാശുപത്രിയിൽ ഡോക്ടറുടെ സേവനം നിലച്ചിട്ടു മൂന്നുമാസം

നെന്മാറ: അയിലൂർ കയറാടി മൃഗാശുപത്രിയിൽ മൃഗഡോക്ടറുടെ സേവനം നിലച്ചിട്ടു മൂന്നുമാസം കഴിഞ്ഞു. അയിലൂർ പഞ്ചായത്തിലെ കാലിവളർത്തൽകാരുടെ പ്രധാന ചികിത്സാകേന്ദ്രമായിരുന്നു കയറാടിയിൽ പ്രവർത്തിച്ചിരുന്ന മൃഗാശുപത്രി. അയിലൂർ പഞ്ചായത്തിലെ ഏക മൃഗാശുപത്രിയാണ് കയറാടിയിൽ സ്ഥിതിചെയ്യുന്നത്. പ്രദേശത്തെ അടിപ്പെരണ്ട, കല്ലംപറമ്പ്, മാങ്കുറശ്ശി, കയറാടി, അയിലൂർ എന്നീ അഞ്ചു ക്ഷീരസഹകരണ സംഘങ്ങളിലെ കർഷകർ പ്രധാനമായും ആശ്രയിച്ചിരുന്ന കേന്ദ്രമാണിത്. നിലവിൽ അത്യാവശ്യമരുന്നുവിതരണവും കുത്തിവയ്പ്പുകളും മാത്രം നടത്താൻ ഒരു ലൈവ് സ്റ്റോക്ക് ഇൻസ്പെക്ടറുടെ സേവനം മാത്രമാണ് നിലവിൽ ലഭ്യമായിരിക്കുന്നത്. ക്ഷീരകർഷകരുടെ ഉരുക്കളുടെ ചികിത്സയും ഗൃഹസന്ദർശനവും, പഞ്ചായത്ത് മുഖേന നടപ്പാക്കുന്ന വിവിധ മൃഗസംരക്ഷണ പദ്ധതികളുടെ നടത്തിപ്പും ആനുകൂല്യ വിതരണവും നടത്തേണ്ട സ്ഥാപനമാണ് ഡോക്ടർ ഇല്ലാത്തതു മൂലം ബുദ്ധിമുട്ടിലായത്. ക്ഷീരകർഷകർ പശു, എരുമ എന്നിവയുടെ പ്രസവ ചികിത്സയ്ക്കുപകരം സംവിധാനം ഇല്ലാതെ വലയുകയാണ്. സ്ഥലംമാറിയ ഡോക്ടർക്കു പകരം പുതിയ ഡോക്ടറെ നിയമിച്ചില്ല. പോത്തുണ്ടി മൃഗാശുപത്രി ഡോക്ടർക്കാണ് അധിക ചുമതല. ആഴ്ചയിൽ ഒരിക്കൽ ഡോക്ടർ എത്തണമെന്നാണ് ഉത്തരവെങ്കിലും ഡോക്ടറുടെ സേവനം അപൂർവ്വം. മുൻ ഡോക്ടർ സ്ഥലംമാറ്റംവാങ്ങി പോകുമ്പോഴാണ് 15 കിലോമീറ്റർ അകലെയുള്ള പോത്തുണ്ടി മൃഗാശുപത്രി ഡോക്ടർക്കു അധിക ചുമതല നൽകിയത്.

ജനപ്രതിനിധികളും വകുപ്പ് തലവന്മാരുമില്ലാതെ താലൂക്ക് വികസനസമിതി യോഗം പ്രഹസനം

ചിറ്റൂർ: ജനപ്രതിനിധികളും പ്രധാനപ്പെട്ട വകുപ്പുദ്യോഗസ്ഥരും ഇല്ലാതെ വികസന സമിതി യോഗം പ്രഹനനമാവുന്നതായി കഴിഞ്ഞ ദിവസം നടന്ന താലൂക്ക് വികസനസമിതി യോഗത്തിൽ ആരോപണം. വിവിധ വകുപ്പുകളിൽ നിന്നും വിരലിലെണ്ണാവുന്ന ഉദ്യോഗസ്ഥർ മാത്രമാണ് യോഗത്തിൽ പങ്കെടുക്കുന്നത്. പങ്കെടുക്കാതിരുന്ന ഉദ്യോഗസ്ഥർ വിശദീകരണം രേഖാമൂലം അറിയിക്കണമെന്നു തഹസിൽദാർ പതിവു നടപടി ആവർത്തിച്ചു. തുടർന്ന് ചടങ്ങിനുമാത്രമായി വിവിധ വകുപ്പുകളിലെ പ്രശ്നങ്ങൾ ചോദിച്ചറിഞ്ഞ് യോഗം അവസാനിപ്പിച്ചു. കഴിഞ്ഞ താലൂക്ക് വികസന സമിതി യോഗത്തിൽ ഉന്നയിച്ച പ്രശ്നങ്ങളിൽ നടത്തിയ ഇടപെടലുകളെക്കുറിച്ച് ശനിയാഴ്ച ചേർന്ന യോഗത്തിൽ ചർച്ച ചെയ്തെങ്കിലും നടപടിയെടുത്ത വിഷയങ്ങൾ കുറവായിരുന്നു. കഴിഞ്ഞ താലൂക്ക് വികസനസമിതി യോഗത്തിൽ കനാൽ ബണ്ട് പൊട്ടി വെള്ളമൊഴുകി പുരയിടത്തിൽ എത്തുന്നതു തടയണമെന്ന അത്തിക്കോട് സ്വദേശി ഗണേഷ് ബാബു പരാതി നൽകിയിരുന്നു. കനാൽ ബണ്ടിന്‍റെ വശങ്ങൾകെട്ടി സംരക്ഷിക്കുന്നതിനായി 15 ലക്ഷം രൂപയുടെ എസ്റ്റിമേറ്റ് കണക്കാക്കി അനുമതിക്കുവേണ്ടി സമർപ്പിച്ചിട്ടുണ്ടെന്നും തുക ലഭിക്കുന്ന മുറയ്ക്കു നടപടിയുണ്ടാവുകയുള്ളൂവെന്നും വാട്ടർ അഥോറിറ്റി അസിസ്റ്റന്‍റ് എൻജിനീയറുടെ വിശദീകരണം. യോഗത്തിൽ കെ. ബാബു എംഎൽഎ അധ്യക്ഷനായി. തഹസിൽദാർ എം.പി. ആനന്ദകുമാർ, ഭൂരേഖ തഹസിൽദാർ കെ.വി.സനൽകുമാർ, ഡെപ്യൂട്ടി തഹസിൽദാർ ആർ. രമേശ് തുടങ്ങിയവർ ചർച്ചയിൽ പങ്കെടുത്തു.

ബഷീർ കഥാപാത്രങ്ങളായി പേഴുംകര മോഡൽ ഹൈസ്കൂളിലെ കുരുന്നുകൾ

പാലക്കാട്: ബഷീർ ദിനത്തോടനുബന്ധിച്ച് പേഴുംകര മോഡൽ ഹൈസ്കൂളിൽ മലയാളംക്ലബിന്‍റെ ആഭിമുഖ്യത്തിൽ വിവിധ പ്രവർത്തനങ്ങൾ നടത്തി. മൂന്ന്, നാല് ക്ലാസുകളിലെ കുട്ടികൾ ബഷീർ കഥാപാത്രങ്ങളായി അണിനിരന്നു. ബഷീർ, പാത്തുമ്മ , സാറാമ്മ, ആനവാരി രാമൻ നായർ, ഖദീജ, സൈനബ എന്നീ കഥാപാത്രങ്ങളായാണ് കുട്ടികൾ അരങ്ങുവാണത്. പ്രസംഗം, പാട്ട്, പുസ്തകപരിചയം, ചിത്രരചന എന്നിവയും സംഘടിപ്പിച്ചു. പ്രിൻസിപ്പൽ എം.പി. പുഷ്പരാജ് , അഡ്മിനിസ്ട്രേറ്റർ ഡി.എം. മുഹമ്മദ് ഷെരീഫ് , മാനേജർ എൻ.പി. മുഹമ്മദ് അഷ്റഫ്, ദിവ്യ, ഫൗസിയ, സൗമ്യ, റംസാന, ഷഹാന, ഹസ്മാബി, ഷാഹിന, വിജയശ്രീ എന്നീ അധ്യാപകർ നേതൃത്വം നൽകി.

ഔദ്യോഗിക പാന്പുപിടിത്തക്കാരായി 73 പേർകൂടി

പാലക്കാട്: ജില്ലയിൽ ഔദ്യോഗിക പാന്പുപിടിത്തക്കാരായി 73 പേർ കൂടി. വനമഹോത്സവത്തിന്‍റെ ഭാഗമായി സോഷ്യൽ ഫോറസ്ട്രി വിഭാഗം സംഘടിപ്പിച്ച പരിശീലനത്തിൽ പങ്കെടുത്ത 84 പേരിൽ നിന്ന് വിജയകരമായി പൂർത്തിയാക്കിയവരാണ് പുതിയതായി ജില്ലയിൽ മിഷൻ സർപ്പയുടെ ഭാഗമായത്. പരിശീലന പരിപാടിയുടെ സമാപനവും തെരഞ്ഞെടുത്ത വോളന്‍റിയർമാർക്കുള്ള റസ്ക്യൂ കിറ്റ് വിതരണവും ജില്ലാകളക്ടർ ജി. പ്രിയങ്ക നിർവഹിച്ചു. ഈസ്റ്റേൺ സർക്കിൾ ചീഫ് ഫോറസ്റ്റ് കൺസർവേറ്റർ കെ. വിജയാനന്ദൻ അധ്യക്ഷത വഹിച്ചു. അസിസ്റ്റന്‍റ് സൂപ്രണ്ട് ഓഫ് പോലീസ് രാജേഷ്കുമാർ വിശിഷ്ടാതിഥിയായി. പാലക്കാട് ഡിഎഫ്ഒ രവികുമാർ മീണ, അസിസ്റ്റന്‍റ് ഫോറസ്റ്റ് കൺസർവേറ്റർമാരായ വൈ. മുഹമ്മദ് അൻവർ, സി.പി. അനീഷ്, സുമു സ്കറിയ, റേഞ്ച് ഫോറസ്റ്റ് ഓഫീസർ കെ.പി. ജിനേഷ്, അനന്യ എന്നിവർ പ്രസംഗിച്ചു. റേഞ്ച് ഫോറസ്റ്റ് ഓഫീസർമാരായ വി. വിവേക് , കെ.ജി. ജെറിൻ ആന്‍റണി, ഗ്രേഡ് ഡെപ്യൂട്ടി റേഞ്ച് ഓഫീസർ ബി.എസ്. ഭദ്രകുമാർ എന്നിവർ പരിശീലനത്തിനു നേതൃത്വം നൽകി.

വന്യജീവികൾ എത്താതിരിക്കാൻ ആധുനിക സൗകര്യം ഒരുക്കണം

അഗളി: വന്യജീവികൾ ജനവാസകേന്ദ്രത്തിൽ കടക്കാത്തവിധം ആധുനികസംവിധാനം ഏർപ്പെടുത്തണമെന്നു സിപിഐ ജില്ലാ അസിസ്റ്റന്‍റ് സെക്രട്ടറി പൊറ്റശ്ശേരി മണികണ്ഠൻ. അട്ടപ്പാടിയിൽ വർധിച്ചുവരുന്ന വന്യജീവി ആക്രമണത്തിൽ പ്രതിഷേധിച്ച് സിപിഐ അട്ടപ്പാടി മണ്ഡലം കമ്മിറ്റിയുടെ നേതൃത്വത്തിൽ മുക്കാലിയിൽ സംഘടിപ്പിച്ച പ്രതിഷേധയോഗം ഉദ്ഘാടനം ചെയ്യുകയായിരുന്നു അദ്ദേഹം. വന്യജീവി ആക്രമണത്തിൽ കൂടുതൽ ആൾക്കാർ കൊല്ലപ്പെട്ടതു അട്ടപ്പാടിയിലാണ്. വന്യജീവി ആക്രമണത്തിൽ കൃഷിനാശം സംഭവിച്ചവർക്കു വർഷങ്ങളായി നഷ്ടപരിഹാരങ്ങൾ നൽകുന്നില്ല. വന്യജീവി ആക്രമണത്താൽ ജീവിതം വഴിമുട്ടി നിൽക്കുന്ന അട്ടപ്പാടിയെ നിവാസികളെ രക്ഷിക്കാൻ അടിയന്തര നടപടിയെടുക്കണമെന്നും യോഗം ആവശ്യപ്പെട്ടു. സിപിഐ മണ്ഡലം സെക്രട്ടറി ഡി. രവി, ജില്ലാ എക്സിക്യൂട്ടീവ് അംഗം സി. രാധാകൃഷ്ണൻ, അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകൻ, എഐവൈഎഫ് മണ്ഡലം സെക്രട്ടറി കെ.സി. സിനോജ് തുടങ്ങിയവർ പ്രസംഗിച്ചു.

നെന്മാറ ബ്ലോക്ക് പഞ്ചായത്ത് ഒരുക്കിയതു 45 പച്ചത്തുരുത്തുകൾ

നെന്മാറ: ബ്ലോക്ക് പഞ്ചായത്തിന്‍റെ നേതൃത്വത്തിൽ ഏഴു പഞ്ചായത്തുകളിലായി 45 പച്ചത്തുരുത്തുകൾ സ്ഥാപിച്ചു. 2019 മുതലുള്ള കണക്കാണിത്. ജൂണ്‍ അഞ്ചുമുതൽ സെപ്റ്റംബർ 30 വരെയുള്ള വൃക്ഷവത്കരണ കാന്പയിനിന്‍റെ ഭാഗമായി സ്ഥാപിച്ച ഒന്പതു പച്ചതുരുത്തുകൾകൂടി ഇതിൽ ഉൾപ്പെടും. പുതുതായി മൂന്നു പച്ചത്തുരുത്തുകൾ കൂടി സ്ഥാപിക്കാനുള്ള ശ്രമത്തിലാണ് ബ്ലോക്ക് പഞ്ചായത്ത്. പേര, സപ്പോട്ട, ചാന്പക്ക, നാരകം, നാട്ടു മാവ്, പ്ലാവ്, തുടങ്ങി ഇരുപത്തിയഞ്ചോളം തൈകൾ നട്ടുപിടിപ്പിച്ചാണ് പച്ചത്തുരുത്തുകൾ നിർമിച്ചിരിക്കുന്നത്. നെന്മാറ ഗ്രാമപഞ്ചായത്തിൽ ചാത്തമംഗലം പാലത്തിനടുത്ത് ചപ്പാത്തിപ്പുഴയിലെ മൂന്നു പച്ചത്തുരുത്തുകൾ, എലവഞ്ചേരിയിൽ തൂറ്റിപാട് വാതക ശ്മശാനത്തിനടുത്ത് ഗായത്രി പുഴയ്ക്ക് തീരത്തെ രണ്ടു പച്ചത്തുരുത്തുകൾ, പല്ലശ്ശനയിലെ വാമല, ചെട്ടിയാർപാടം, തല്ലുമന്നം എന്നിവിടങ്ങളിലായി നാലു പച്ചത്തുരുത്തുകൾ, മേലാർക്കോട് ആറ്റാലക്കടവിൽ ഒരു പച്ചത്തുരുത്ത് തുടങ്ങിയവയാണ് പ്രധാന പച്ചതുരുത്തുകൾ. കൂടാതെ വിവിധ സ്കൂളുകളിലും പച്ചത്തുരുത്തുകൾ നിർമിച്ചിട്ടുണ്ട്. ഓക്സിജൻ കൂടുതൽ ഉൽപാദിപ്പിക്കുന്ന ഈറ്റ, മുരിങ്ങ, ലൗലോലി, മുളളാത്ത, കടച്ചക്ക, കൈത, കരിന്പന തുടങ്ങിയ വൃക്ഷങ്ങളും പച്ചത്തുരുത്തുകളിൽ ഉൾപ്പെടുത്തിയിട്ടുണ്ട്. പനപർവ്വം പദ്ധതിയുടെ ഭാഗമായി പല്ലശ്ശനയിൽ വാമലയ്ക്ക് താഴെ കരിന്പനകളുടെ കായ്കൾ ശേഖരിച്ച് മുളപ്പിച്ച് നട്ടുപിടിപ്പിക്കുന്നുണ്ട്.

വാണിയംകുളത്തിനു ഫുട്ബോളാണു ലഹരി

ഷൊർണൂർ: കായിക പ്രേമികൾക്കായി വാണിയംകുളം ഗ്രാമപഞ്ചായത്തിലൊരുക്കുന്ന സിന്തറ്റിക് ഫുട്ബോൾ ടർഫ് നിർമാണം അന്തിമ ഘട്ടത്തിൽ. ഗ്രാമപഞ്ചായത്തിന്‍റെ ഒരുഏക്കർ സ്ഥലത്താണ് വിശാലമായ കളിസ്ഥലം ഒരുങ്ങുന്നത്. സംസ്ഥാന സ്പോർട്സ് കൗണ്‍സിലിന്‍റെ 4.32 കോടി രൂപ വിനിയോഗിച്ചാണ് ടർഫ് നിർമിക്കുന്നത്. നിർമാണപ്രവൃത്തി പൂർത്തീകരിച്ചാൽ മേൽനോട്ട ചുമതല ഗ്രാമപഞ്ചായത്തിനു കൈമാറും. കാണികൾക്ക് കളി ആസ്വദിക്കുന്നതിനായി വിശാലമായ ഗാലറി കെട്ടിടം, കളിക്കാർക്കു വിശ്രമിക്കാൻ 1500 സ്ക്വയർ ഫീറ്റ് വിസ്തീർണത്തിൽ പ്രത്യേകംമുറി, ശുചിമുറി എന്നിവയും തയാറാക്കിയിട്ടുണ്ട്. ടർഫിനുചുറ്റും ഫെൻസിംഗ് നിർമാണം, ഇന്‍റർലോക്ക് വിരിക്കുന്ന പ്രവൃത്തി എന്നിവ പുരോഗമിക്കുകയാണ്. കഴിഞ്ഞ സർക്കാറിന്‍റെ കാലത്താണ് പഞ്ചായത്തിൽ ഫുട്ബോൾ ടർഫ് ആരംഭിക്കുന്നതിനുള്ള പ്രഖ്യാപനം നടന്നത്. തുടർന്ന് 2021 ൽ നിർമാണ പ്രവർത്തനങ്ങളും ആരംഭിച്ചു.

ബൈക്കുകൾ കൂട്ടിയിടിച്ച് മുൻ പഞ്ചായത്ത് അംഗം മരിച്ചു

അഗളി: അട്ടപ്പാടി പുതൂർ പഞ്ചായത്തിൽ ചീരക്കടവിൽ ബൈക്കുകൾ കൂട്ടിയിടിച്ച് മുൻ ഗ്രാമപഞ്ചായത്തംഗം മരിച്ചു. ചീരക്കടവ് ഉന്നതിയിലെ പരേതനായ മല്ല മൂപ്പന്‍റെ മകൻ മുരുകൻ (44) ആണ് മരിച്ചത്. ശനിയാഴ്ച രാത്രി ചീരക്കടവിലായിരുന്നു അപകടം. സംസ്കാരം നടത്തി. മാതാവ്: വസന്ത. ഭാര്യ: കുപ്പമ്മ (പുതൂർ ഗ്രാമപഞ്ചായത്ത് മുൻ അംഗം). മക്കൾ: വിനീത്, ശ്രീജ. മരുമകൻ: സന്ദീപ്. (സിപിഐ ചീരക്കടവ് ബ്രാഞ്ച് സെക്രട്ടറി). കൃഷിയിടത്തിൽ കാലിമേയ്ക്കുന്നതിനിടെ കഴിഞ്ഞമാസം കാട്ടാന ആക്രമണത്തിലാണ് മല്ല മൂപ്പൻ മരിച്ചത്.

നെന്മാറ മേഖലയിൽ പച്ചക്കറി വിളവെടുപ്പ് സജീവം

നെന്മാറ: നെന്മാറ, അയിലൂർ പഞ്ചായത്തുകളിൽ പച്ചക്കറിവിളവെടുപ്പ് സജീവം. വിഎഫ്പിസികെയുടെ കീഴിൽ പ്രവർത്തിക്കുന്ന സ്വാശ്രയ കർഷക സമിതികളുള്ള നെന്മാറ - വിത്തനശേരി, അയിലൂർ -പാളിയമംഗലം കേന്ദ്രങ്ങളിലൂടെയാണ് കർഷകർ പ്രധാനമായി പച്ചക്കറികൾ വിപണനം നടത്തുന്നത്. പ്രധാനമായും പാവൽ, പടവലം തുടങ്ങിയവയുടെ വിളവെടുപ്പാണ് തുടങ്ങിയത്. മഴയെത്തുടർന്ന് 25 ദിവസം വൈകിയാണ് വിളവിറക്കിയത്. തരക്കേടില്ലാത്ത വില ഇപ്പോൾ ലഭിക്കുന്നുണ്ടെന്നു കർഷകർ പറയുന്നു. നാടൻ പാവലിന് കിലോയ്ക്ക് 40 രൂപയാണ്. ഹൈബ്രിഡിന് 32 രൂപയും. പടവലത്തിന്‍റെ വില 10 രൂപ കുറഞ്ഞ് 30 രൂപയായത് കർഷകർക്ക് അടിയായി. പീച്ചിങ്ങ 40, പയർ 55 എന്നിങ്ങനെയാണ് നിലവിലെ വില. വിഎഫ്പിസികെയുടെ പ്രധാന സംഭരണ വിതരണ കേന്ദ്രങ്ങളായ പാളിയമംഗലം, വിത്തനശേരി എന്നിവിടങ്ങളിൽ നിന്ന് ആലുവ, കൊച്ചി, കോട്ടയം, തൃശൂർ, ആലപ്പുഴ, പെരുമ്പാവൂർ മാർക്കറ്റുകളിലേക്കും തുടങ്ങി ഗൾഫ് രാജ്യങ്ങളിലേക്കുള്ള കയറ്റുമതിക്കുമായി വിഎഫ്പിസികെ കേന്ദ്രങ്ങളിൽ നിന്നും കർഷകരിൽ നിന്ന് നേരിട്ടുമായി ദിവസേന അഞ്ചും ആറും ടൺ പച്ചക്കറിയാണ് കൊണ്ടുപോകുന്നത്. പ്രമുഖ വാണിജ്യ കേന്ദ്രങ്ങളിലെ കമ്മീഷൻ ഏജന്‍റുമാർ പാവൽ, പടവലം, പയർ എന്നിവ കർഷകരുടെ വിളവെടുപ്പ് കേന്ദ്രങ്ങളിൽ നിന്നുതന്നെ അതിരാവിലെ സംഭരിക്കുന്നുണ്ട്. മറ്റു കർഷകർ വിഎഫ്പിസികെ കേന്ദ്രങ്ങൾ മുഖേനയാണ് വ്യാപാരികൾക്ക് വിൽക്കുന്നത്. പയർ, പീച്ചിങ്ങ, ചുരയ്ക്ക, മുളക്, കുമ്പളം, മത്തൻ, വെണ്ട, വഴുതിന തുടങ്ങിയവയും അയിലൂർ നെന്മാറ പഞ്ചായത്തിലെ വിവിധ പ്രദേശങ്ങളിൽ ഒന്നാംവിള നെല്ല് ഒഴിവാക്കി വിളയിക്കുന്നുണ്ട്. അമിതമഴ വിളവെടുപ്പിനെയും ഉത്പാദനത്തെയും നേരിയ തോതിൽ ബാധിച്ചിട്ടുണ്ടെങ്കിലും തരക്കേടില്ലാത്ത വിളവ് ലഭിക്കുന്നുണ്ടെന്ന് കർഷകർ പറയുന്നു. വിത്തനശേരിയിൽ187 ഏക്കറിലാണ് പച്ചക്കറിക്കൃഷി. 180 കർഷകരുണ്ട്. അയിലൂർ പാളിയമംഗലത്ത് ഒരുമാസം മുൻപ് വിളവെടുപ്പ് തുടങ്ങി. ആഴ്ചയിൽ രണ്ടും മൂന്നും ദിവസം ഇടപെട്ട് പാവൽ, പടവലം, പയർ എന്നിവ വിളവെടുക്കുന്നുണ്ട്.

തെരുവുനായ്ക്കളുടെ ആക്രമണം : കർശനനടപടി ആവശ്യപ്പെട്ട് വ്യാപാരികൾ പ്രക്ഷോഭത്തിലേക്ക്‌

കല്ലടിക്കോട്‌: തെരുവ്‌നായ്ക്കളുടെ ആക്രമണം വ്യാപകമായതോടെ നടപടിയെടുക്കണമെന്നാവശ്യപ്പെട്ട്‌ കല്ലടിക്കോട്ടെ വ്യാപാരികൾ പ്രക്ഷോഭത്തിലേക്ക്‌. മേഖലയിൽ തെരുവ്‌നായ്ക്കളുടെ കടിയേറ്റ്‌ നിരവധിപേരാണ് ചികിത്സയിലുള്ളത്‌. കഴിഞ്ഞദിവസം സ്കൂളിൽ ഉച്ചഭക്ഷണം തയ്യാറാക്കാനെത്തിയ അമ്മയെ സഹായിക്കാൻ വന്ന മകളെ തെരുവ്‌നായ കടിച്ച്‌ പരിക്കേൽപ്പിച്ചിരുന്നു. കഴിഞ്ഞ ആഴ്ച കുന്നേമുറി ഉന്നതിയിൽ വളർത്തുപശുവിനെയടക്കം തെരുവ്‌നായ്ക്കൾ കടിച്ചിരുന്നു. രാത്രിയും പകലുമെന്നില്ലാതെ നായ്ക്കൾ കൂട്ടമായി റോഡിലൂടെ നടന്ന് കടികൂടുന്നതും കാൽനടയാത്രക്കാരുടേയും ഇരുചക്രവാഹനങ്ങളോടിക്കുന്നവരേയും ഓടിച്ചിട്ട്‌ കടിക്കുന്നതും പതിവാണ്. കാലത്ത്‌ മദ്രസയിൽ പോകുന്നവരേയും പള്ളിയിൽ പോകുന്നവരെയും നായ്ക്കൾ കടിക്കാൻ ഓടിക്കുന്നതും പതിവാണ്. നായ ഓടിക്കുമ്പോൾ കടയിലേക്ക്‌ ഓടിക്കയറുന്ന ആളുകളുടെ പിന്നാലെ കുരച്ചുകൊണ്ട്‌ വരുന്നതും സ്ഥിരമാണ്. തെരുവ്‌നായ്ക്കളെ പിടിച്ചുകൊണ്ടുപോയി നാട്ടിൽ സുരക്ഷിതത്വം ഉറപ്പുവരുത്തണെമെന്നാവശ്യപ്പെട്ട്‌ കേരള വ്യാപാരി വ്യവസായി ഏകോപന സമിതി കല്ലടിക്കോട്‌ യൂണിറ്റ്‌ അധികാരികൾക്ക്‌ നിവേദനം കൊടുക്കാനും ശക്തമായ പ്രക്ഷോഭത്തിലേക്ക്‌ നീങ്ങാനും തീരിമാനിച്ചിട്ടുണ്ട്‌. ഏകോപന സമിതി യൂണിറ്റ്‌ പ്രസിഡന്‍റ് അജോ മഞ്ഞാടിക്കൽ അധ്യക്ഷത വഹിച്ചു.

തെരുവുനായ്ക്കൾ വീട്ടുവളപ്പിലും ഭീതി പരത്തുന്നു

കൊഴിഞ്ഞാമ്പാറ: റോഡുകളിൽ മാത്രം തമ്പടിച്ചിരുന്ന തെരുവുനായ്ക്കൾ കൂട്ടമായി വീടുകളിലേക്കും വരുന്നത് ഭീതിപരത്തുന്നു. മുന്പ് കല്ലെറിഞ്ഞാൽ തിരിഞ്ഞോടിയിരുന്ന നായ്ക്കൾ ഇപ്പോൾ ആക്രമണത്തിനു മുന്നോട്ടു പാഞ്ഞുവരികയാണ്. വീടുകളിലെ ആട്, കോഴി ഉൾപ്പെടെ വളർത്തുമൃഗങ്ങൾക്കും ശുനകപ്പട ഭീഷണിയാവുന്നുണ്ട്. ഇത് കാരണം പലരും വളർത്തുമൃഗങ്ങളെ ഇരുമ്പ് കൂടുകളിലാണ് രാത്രി സമയങ്ങളിൽ കെട്ടുന്നത്. വീട്ടുവളപ്പിൽ കോഴികളെ തെരുവുനായ്ക്കൾ ആക്രമിച്ച സംഭവങ്ങൾ സ്ഥിരമാകുന്നു. വീടുകളിലെ വളർത്തുനായ്ക്കളേയും അലഞ്ഞുതിരിഞ്ഞു നടക്കുന്ന നായ്ക്കൾ കടിച്ച് പരിക്കേൽപ്പിക്കുന്നുണ്ട്. അതിനാൽ വളർത്തുമൃഗങ്ങൾക്ക് പേവിഷബാധ ഉണ്ടാകുമോ എന്ന ഭീതിയും നിലനിൽക്കുന്നു. കുട്ടികൾ വരാന്തകളിൽ കളിക്കുന്നതു പോലും രക്ഷിതാക്കൾ വിലക്കുകയാണ്. തെരുവുനായ്ക്കൾ ഇരുചക്ര വാഹനം ഓടിക്കുന്നവരേയും വെറുതെ വിടുന്നില്ല. ഒരു കിലോമീറ്റർ ദൂരം വരെ ഇവ പിറകേ ഓടിവരുന്ന സ്ഥിതിയുണ്ട്. ഇതുകാരണം വാഹനം മറിഞ്ഞ് യാത്രക്കാർക്ക് പരിക്കേൽക്കാറുമുണ്ട്.

ആരോഗ്യമന്ത്രിക്കെതിരേ കോൺഗ്രസ്, യൂത്ത് കോൺഗ്രസ് പ്രതിഷേധം

തച്ചന്പാറ: കോട്ടയം മെഡിക്കൽ കോളജ് കെട്ടിടം തകർന്നുവീണ് ഒരു ജീവൻ നഷ്ടപ്പെട്ടതിൽ ആരോഗ്യമന്ത്രിയുടെ കുറ്റകരമായ അനാസ്ഥയിൽ പ്രതിഷേധിച്ച് യൂത്ത് കോണ്‍ഗ്രസ് തച്ചന്പാറ മണ്ഡലം കമ്മിറ്റിയുടെ നേതൃത്വത്തിൽ തച്ചന്പാറയിൽ വീണാ ജോർജിന്‍റെ കോലം കത്തിച്ചു. യുഡിഎഫ് കോങ്ങാട് നിയോജകമണ്ഡലം ചെയർമാൻ പി.എസ്. ശശികുമാർ പ്രതിഷേധപ്രകടനം ഉദ്ഘാടനം ചെയ്തു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് സച്ചു ജോസഫ് അധ്യക്ഷനായി. മണ്ഡലം പ്രസിഡന്‍റ് റിയാസ് തച്ചന്പാറ, പഞ്ചായത്ത് പ്രസിഡന്‍റ് നൗഷാദ് ബാബു, ബ്ലോക്ക് കോണ്‍ഗ്രസ് സെക്രട്ടറി രാമചന്ദ്രൻ, സക്കീർ, നൗഫൽ പൂന്തൊടി എന്നിവർ പ്രസംഗിച്ചു. വടക്കഞ്ചേരി: ആരോഗ്യവകുപ്പിന്‍റേയും ആരോഗ്യമന്ത്രിയുടെയും നിരുത്തരവാദിത്വപരമായ സമീപനത്തിനെതിരെ കോൺഗ്രസ് വണ്ടാഴി മണ്ഡലം കമ്മിറ്റിയുടെ നേതൃത്വത്തിൽ പ്രകടനം നടത്തി. കർഷക കോൺഗ്രസ്‌ ജില്ലാ സെക്രട്ടറി കെ.സി. അരവിന്ദാക്ഷൻ മാസ്റ്റർ ഉദ്ഘാടനം ചെയ്തു. കോൺഗ്രസ് മണ്ഡലം വൈസ് പ്രസിഡന്‍റ് വി. മനോജ്‌ അധ്യക്ഷത വഹിച്ചു. ഡിസിസി മെംബർ കെ. രാമകൃഷ്ണൻ, കോൺഗ്രസ് ബ്ലോക്ക്, മണ്ഡലം ഭാരവാഹികളായ എം. സുരേഷ്‌കുമാർ, പ്രമോദ് തണ്ടാലോട്, ഗഫൂർ മുടപ്പല്ലൂർ, എൻ.വിഷ്ണു, കെ.പി. കൃഷ്ണൻ, എ.എ. അബ്ദുൾ ലത്തീഫ്, എസ്. ലാലു യൂത്ത് കോൺഗ്രസ് മണ്ഡലം പ്രസിഡന്‍റ് ആർ. അനീഷ്, ഷൗക്കത്ത് വണ്ടാഴി, എം.പി. അരുൺ, കണ്ടമുത്തൻ എന്നിവർ പ്രസംഗിച്ചു. കൊഴിഞ്ഞാമ്പാറ: യുവതി മരിച്ച സംഭവം ആരോഗ്യമന്ത്രിയുടെയും സർക്കാരിന്‍റേയും അനാസ്ഥയാണെന്നും ഇതിനെതിരെ നടപടിയെടുക്കണമെന്നും ആവശ്യപ്പെട്ട് കൊഴിഞ്ഞാമ്പാറ മണ്ഡലം കോൺഗ്രസ് കമ്മിറ്റി പ്രതിഷേധിച്ചു. കൊഴിഞ്ഞാമ്പാറ ബസ് സ്റ്റാൻഡ് പരിസരത്ത് നടന്ന പ്രതിഷേധം ഡിസിസി ജനറൽ സെക്രട്ടറി കെ.എസ്. തണികാചലം ഉദ്ഘാടനം ചെയ്തു. മണ്ഡലം കമ്മിറ്റി പ്രസിഡന്‍റ് എം. രാമകൃഷ്ണൻ അധ്യക്ഷനായി. കെ.എം. സുരേഷ് ബാബു, എ.ടി. ശ്രീനിവാസ്, എസ്. ഷാഹുൽഹമീദ്, സി. ആനന്ദ്, എസ്.സലിം, എ. സെന്തിൽകുമാർ എച്ച്. ഹക്കീം എന്നിവർ പ്രസംഗിച്ചു. കൊല്ലങ്കോട്: കേരളത്തിലെ ആരോഗ്യ സംവിധാനത്തിന്‍റെ കെടുകാര്യസ്ഥതയിൽ പ്രതിഷേധിച്ച് പല്ലശന മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ തല്ലുമന്ദം മുതൽ ചിറാക്കോട് വരെ പ്രതിഷേധപ്രകടനവും ആരോഗ്യ വകുപ്പ് മന്ത്രി വീണ ജോർജിന്‍റെ കോലംകത്തിച്ച് പ്രതിഷേധിച്ചു. പ്രതിഷേധയോഗം ഡിസിസി ജനറൽ സെക്രട്ടറി അഡ്വ. സി.സി. സുനിൽ ഉദ്ഘാടനം ചെയ്തു. മണ്ഡലം പ്രസിഡന്‍റ് പി.എസ്. രാമനാഥൻ അധ്യക്ഷത വഹിച്ചു. യുഡിഎഫ് നെന്മാറ നിയോജകമണ്ഡലം ചെയർമാൻ എസ്. പത്മകുമാർ, യൂത്ത് കോൺഗ്രസ് നെന്മാറ നിയോജകമണ്ഡലം പ്രസിഡന്‍റ് മനു പല്ലാവൂർ, ബ്ലോക്ക് വൈസ് പ്രസിഡന്‍റ് സുധീർ പാറക്കളം, ഐഎൻടിയുസി റീജണൽ പ്രസിഡന്‍റ് എസ്. ഹനീഫ, ദളിത് കോൺഗ്രസ് നിയോജകമണ്ഡലം പ്രസിഡന്‍റ് കൃഷ്ണൻ പടിഞ്ഞാമുറി, ഗ്രാമപഞ്ചായത്ത് അംഗങ്ങളായ എസ്. അശോകൻ, ആർ. ജയനാരായണൻ, യൂത്ത് കോൺഗ്രസ് ജില്ലാ ജനറൽ സെക്രട്ടറി ശ്യാം ദേവദാസ്, എസ്.ബാബു, പി.സി. ശശീന്ദ്രൻ, വി.അനിൽ, വിഷ്ണു കുണ്ടുപറമ്പ് എന്നിവർ പ്രതിഷേധപ്രകടനത്തിന് നേതൃത്വം നൽകി. ആലത്തൂർ: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ദേശീയ മൈതാനിയിൽ പൊതുസമ്മേളനവും ടൗൺ ചുറ്റി പ്രകടനവും നടത്തി . മണ്ഡലം പ്രസിഡന്‍റ് ഹാരിസിന്‍റെ അധ്യക്ഷതയിൽ കൂടിയ ചടങ്ങിൽ ഐഎൻടിയുസി ജില്ലാ സെക്രട്ടറി തൃപ്പാളൂർ ശശി, ഷെരീഫ് സൈദ് മുഹമ്മദ്, ഷാഹിദ് ആലത്തൂർ, എ. അലാവുദ്ദീൻ, ജബ്ബാർ, ജയൻ, ശ്രീജിത്ത്, കുഞ്ഞഹമ്മദ്, ജാഫർ പൊട്ടിമട എന്നിവർ പ്രസംഗിച്ചു. ആലത്തൂർ‌: എരിമയൂർ മണ്ഡലം കോൺഗ്രസ്‌ കമ്മിറ്റിയുടെ ആഭിമുഖ്യത്തിൽ പ്രതിഷേധ പ്രകടനം നടത്തി. കെപിസിസി മെംബർ വി. സുദർശൻ ഉദ്ഘാടനം ചെയ്തു. മണ്ഡലം കോൺഗ്രസ്‌ പ്രസിഡന്‍റ് കെ.പി. മുരളീധരൻ അധ്യക്ഷത വഹിച്ചു. സംസ്കാര സാഹിതി നിയോജകമണ്ഡലം ചെയർമാൻ സജീവ് ചിറ്റിലഞ്ചേരി, ബ്ലോക്ക്‌ കോൺഗ്രസ്‌ കമ്മിറ്റി സെക്രട്ടറിമാരായ കെ.സി. രാമകൃഷ്ണൻ, കെ.കെ. രാധാകൃഷ്ണൻ, ടി. കെ. അപ്പു, സതീഷ് പുള്ളോട്, ഉണ്ണികൃഷ്ണൻ ആറുഴി, എ. കെ. വാസു, നാരായണൻ കൊള്ളക്കപ്പാടം, കെ. കൃഷ്ണൻ, പ്രകാശൻ, രാജൻ എന്നിവർ പങ്കെടുത്തു. ആലത്തൂർ: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധപ്രകടനം നടത്തി. മുൻ ബ്ലോക്ക് കോൺഗ്രസ് പ്രസിഡന്‍റ് സി. മാധവൻകുട്ടി പ്രതിഷേധപ്രകടനം ഉദ്ഘാടനം ചെയ്തു. മണ്ഡലം കോൺഗ്രസ് വൈസ് പ്രസിഡന്‍റ് വി. വിജയമോഹനൻ അധ്യക്ഷത വഹിച്ചു. വടക്കഞ്ചേരി ബ്ലോക്ക് കോൺഗ്രസ് വൈസ് പ്രസിഡന്‍റ് എൻ. രവി, പഞ്ചായത്ത് വൈസ് പ്രസിഡന്‍റ് ഉഷാദേവി സതീശൻ, പഞ്ചായത്ത് മെംബർ പി. കേശവദാസ്, മണ്ഡലം വൈസ് പ്രസിഡന്‍റ് പി. ശിവദാസൻ, ബ്ലോക്ക് കോൺഗ്രസ് സെക്രട്ടറി എസ്. സേതുമാധവൻ പ്രസംഗിച്ചു. കണ്ണന്പ്ര: കാരപ്പൊറ്റയിൽ നടന്ന പ്രകടനം ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. മന്ധലം പ്രസിഡന്‍റ് സുദേവൻ അധ്യക്ഷത വഹിച്ചു. കെ.വി. ഗംഗാധരൻ, ജയരാജൻ കൊന്നഞ്ചേരി, സന്തോഷ് കുമാർ ആറുങ്കൽപ്പാടം, ഉമ്മലു ഹനീഫ, ടി.മോഹൻദാസ് പ്രസംഗിച്ചു. കിഴക്കഞ്ചേരി: കുണ്ടുകാട്ടിൽ നടന്ന പ്രതിഷേധ പ്രകടനവും യോഗവും ഡിസിസി സെകട്ടറി ഡോ. അർസലൻ നിസാം ഉദ്ഘാടനം ചെയ്തു. മണ്ഡലം പ്രസിഡന്‍റ് സി. ചന്ദ്രൻ അധ്യക്ഷത വഹിച്ചു. എം.കെ. ശ്രീനിവാസൻ, വി.ജെ. ജോസഫ്, ലീലാമ്മ ജോസഫ്, ടി.കെ. ഷാനവാസ്, കെ.കെ. പൗലോസ്, സുനിൽ എം.പോൾ, ബിജു മാസ്റ്റർ, സി.കെ. ഉസനാർ പ്രസംഗിച്ചു. വടക്കഞ്ചേരി: ടൗണിൽ ഡിസിസി സെക്രട്ടറി ഡോ. അർസലൻ നിസാം ഉദ്ഘാടനം ചെയ്തു. മണ്ഡലം വൈസ് പ്രസിഡന്‍റ് ബെന്നി പുതുശേരി അധ്യക്ഷത വഹിച്ചു. റെജി കെ. മാത്യു, കെ.മോഹൻദാസ്, കെ.ദേവദാസ്, ശ്രീനാഥ് വെട്ടത്ത്, ബാബു മാധവൻ, വി.എച്ച്. ബഷീർ, ഭാസ്കരൻ, വി.എ. മൊയ്‌തു, കാരയങ്കാട് ശിവരാമകൃഷ്ണൻ, നന്ദകുമാർ, ജോണി ഡയൻ, എ. ജോസ്, സുനിൽ ചുവട്ടുപാടം, പി.എസ്. മുജീബ് പ്രസംഗിച്ചു.

യൂത്ത് കോണ്‍ഗ്രസ് ഡിഎംഒ ഓഫീസിലേക്കു നടത്തിയ മാർച്ചിൽ സംഘർഷം

പാലക്കാട്: ആരോഗ്യമന്ത്രി രാജിവെക്കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് ഡിഎംഒ ഓഫീസിലേക്ക് നടത്തിയ മാർച്ചിൽ സംഘർഷം. സമരക്കാർക്ക് നേരെ പോലീസ് ലാത്തിവീശി. ലാത്തിച്ചാർജിൽ ജില്ലാ പ്രസിഡന്‍റ് കെ.എസ്. ജയഘോഷ്, എൻ. സുബ്രഹ്മണ്യൻ, അന്പിളി മോഹൻദാസ്, സോനു പ്രണവ്, അഖിൽ ജോണ്‍, സുനിൽ ചുവട്ടുപാടം എന്നിവർക്ക് പരിക്കേറ്റു. ഉദ്ഘാടനത്തിന് ശേഷം മുദ്രാവാക്യം വിളിച്ച സമരക്കാരും പോലീസും തമ്മിൽ ഉന്തും തള്ളുമുണ്ടായി. തുടർന്നാണ് ലാത്തിവീശിയത്. നേരത്തെ ഡിസീസ് ഓഫീസിൽ നിന്നും ആരംഭിച്ച മാർച്ച് സിവിൽ സ്റ്റേഷന് മുന്പിൽ പോലീസ് തടഞ്ഞു. സമരം യൂത്ത് കോണ്‍ഗ്രസ് സംസ്ഥാന ജനറൽ സെക്രട്ടറി ഡോ. സോയ ജോസഫ് ഉദ്ഘാടനം ചെയ്തു. ആരോഗ്യമന്ത്രി വീണാ ജോർജ് രാജിവെക്കുംവരെ യൂത്ത് കോണ്‍ഗ്രസ് സമരം നടത്തുമെന്ന് അവർ വ്യക്തമാക്കി. ആരോഗ്യമേഖല തകർന്നതിന്‍റെ ഉത്തരവാദിത്വം മന്ത്രി വീണാ ജോർജിനും വകുപ്പിനുമാണ്. സിസ്റ്റം തകരാറിലായതുകൊണ്ടാണ് കോട്ടയത്ത് ദുരന്തം ഉണ്ടായത് എന്നാണ് മന്ത്രി തന്നെ വ്യക്തമാക്കിയത്. ഭരണപക്ഷത്തിന്‍റെ പിടിപ്പുകേടാണ് ഇത് ചൂണ്ടിക്കാണിക്കുന്നത്. ആരോഗ്യരംഗം അത്യാസന്നമായ നിലയിൽ എത്തിയതിന്‍റെ ഉത്തരവാദിത്വത്തിൽനിന്നും മന്ത്രിക്ക് ഒഴിഞ്ഞുമാറാനാവില്ല. ഭരണം നിർവഹിക്കാൻ കഴിയാത്ത ആരോഗ്യമന്ത്രി അറിയാവുന്ന പണിക്ക് പോകുന്നതാണ് നല്ലതെന്നും സോയാ ജോസഫ് പറഞ്ഞു. ജില്ലാ പ്രസിഡന്‍റ് കെ.എസ്. ജയഘോഷ് അധ്യക്ഷനായി. സംസ്ഥാന ഭാരവാഹികളായ ഷഫീഖ് അത്തിക്കോട്, പ്രതീഷ് മാധവൻ, വിനോദ് ചെറാട്, ജിതേഷ് നാരായണൻ, അരുണ്‍കുമാർ പാലക്കുറുശി, എൻ.സുബ്രഹ്മണ്യൻ, ജില്ലാ ഭാരവാഹികളായ ലിജിത്ത് ചന്ദ്രൻ, പി.ടി. അജ്മൽ, ശ്യാം ദേവദാസ്, രതീഷ് പുതുശേരി, സതീഷ് തിരുവാലത്തൂർ, ഇജാസ്, അന്പിളി മോഹൻദാസ്, എ. ഷഫീഖ്, വി.വത്സൻ, ഡി. ദിലീപ്, നിയോജകമണ്ഡലം പ്രസിഡന്‍റുമാരായ ടി.എം നഹാസ്, ജയശങ്കർ കൊട്ടാരത്തിൽ, വിനോദ് കളത്തൊടി, നസീർ മാസ്റ്റർ, നവാസ്, കെ.സാജൻ, മനു പല്ലാവൂർ, റിനാസ് യൂസഫ്, കഐസ്യു ജില്ലാ പ്രസിഡന്‍റ് നിഖിൽ കണ്ണാടി, സംസ്ഥാന ജനറൽ സെക്രട്ടറി അജാസ് കുഴൽമന്ദം, ഗൗജ വിജയകുമാർ എന്നിവർ നേതൃത്വം നൽകി.

ആരോഗ്യമന്ത്രി രാജിവയ്ക്കണം: രമേശ് ചെന്നിത്തല

പാലക്കാട്: കോട്ടയം മെഡിക്കൽ കോളജിലെ അപകടമരണത്തിന്‍റെ ധാർമിക ഉത്തരവാദിത്വം ഏറ്റെടുത്ത് ആരോഗ്യമന്ത്രി വീണാ ജോർജ് രാജിവെക്കണമെന്ന് കോണ്‍ഗ്രസ് വർക്കിംഗ് കമ്മിറ്റി മെംബർ രമേശ് ചെന്നിത്തല ആവശ്യപ്പെട്ടു. മഹിളാ കോണ്‍ഗ്രസ് ജില്ലാ പ്രസിഡന്‍റ് സിന്ധു രാധാകൃഷ്ണന്‍റെ നേതൃത്വത്തിൽ ജില്ലാ ആശുപത്രിയിലേക്ക് വാമൂടികെട്ടി സംഘടിപ്പിച്ച പ്രതിഷേധസമരം ഉദ്ഘാടനം ചെയ്ത് പ്രസംഗിക്കുകയായിരുന്നു ചെന്നിത്തല. കേരളത്തിലെ ആരോഗ്യമേഖല സന്പൂർണ പരാജയമാണെന്ന് അദ്ദേഹം ആരോപിച്ചു. കേരളത്തിലെ മെഡിക്കൽ കോളജുകളിലും ആശുപത്രികളും രോഗികളെ ചികിൽത്സിക്കാൻ വേണ്ടത്ര ഉപകരണങ്ങളോ മരുന്നുകളോ ഇല്ലാത്ത അവസ്ഥയായി മാറിയിരിക്കുന്നു. വരും ദിവസങ്ങളിൽ ഇടതു സർക്കാരിനെതിരെ സംസ്ഥാനത്തിലെ മുഴുവൻ ജനവിഭാഗങ്ങളെയും സംഘടിപ്പിച്ച് ശക്തമായ സമരം നടത്തുമെന്ന് അദ്ദേഹം പറഞ്ഞു. സമരത്തിൽ വി.എസ്. വിജയരാഘവൻ, കെപിസിസി സെക്രട്ടറി പി.വി. രാജേഷ്, ഡിസിസി സെക്രട്ടറി കെ.സി. പ്രീത്, മഹിളാ കോണ്‍ഗ്രസ് ജില്ലാ ഭാരവാഹികളായ പി.പി. പാഞ്ചാലി, ടി.ഡി. ഗീത ശിവദാസ്, കെ.എ.ഷീബ, ബിന്ദു സുരേഷ് കുമാർ, പ്രേമ രാജേന്ദ്രൻ, പി.ജെ. മോളി, പ്രകാശിനി സുന്ദരൻ, പ്രിയ ബാബു, ഡി.വിജയലക്ഷ്മി, പുഷ്പവല്ലി നന്പ്യാർ, ഉഷ പാലാട്ട്, സാവിത്രി വൽസൻ, പ്രകാശിനി സുന്ദരൻ, യു. പ്രസന്ന, രാജി ദിലീപ്, ബി. വൃന്ദ, കെ.വി. പാർവതി, കെ.എ. സുഭദ്ര, ശാരദ തുളസിദാസ്, പി. പ്രതിഭ, കോമളം, എം. തങ്കം, റോജ സുനിൽ, വാഹിദ, ശ്രീജ സജീവ്, സുജാത കൃഷ്ണദാസ്, അച്ചാമ്മ, സുനിത, ഉമൈബാൻ, കെ. സുലോചന, അനുപമ പ്രശോഭ, മിനി ബാബു, ശാന്ത ശിവൻ, ബി. ഗൗതമി, ജയമാല, ജയകുമാരി, ബിന്ദു മേലാർകോട് എന്നിവർ നേതൃത്വം നൽകി. അഞ്ചുവിളക്കിന് മുന്നിൽനിന്ന് തുടങ്ങിയ സമരം ജില്ലാ ആശുപത്രിക്ക് മുന്നിൽ സമാപിച്ചു.

ശ്രീകുറുംബ ട്രസ്റ്റിന്‍റെ സമൂഹവിവാഹത്തിൽ 13 യുവതികൾകൂടി മംഗല്യവതികളായി

വടക്കഞ്ചേരി: പി.എൻ.സി. മേനോൻ ചെയർമാനായുള്ള ശ്രീ കുറുംബ ട്രസ്റ്റ് നടത്തിയ മുപ്പതാമത് സ്ത്രീധനരഹിത സമൂഹവിവാഹത്തിൽ 13 യുവതികൾ കൂടി മംഗല്യവതികളായി. ട്രസ്റ്റിന്‍റെ മൂലങ്കോടുള്ള കല്യാണ മണ്ഡപത്തിൽ നടന്ന സമൂഹവിവാഹ ചടങ്ങുകൾക്ക് തുടക്കമിട്ട് കെ.ഡി. പ്രസേനൻ എംഎൽഎ തിരിതെളിയിച്ചു. ശോഭ മേനോൻ, മകളും ശോഭ ഗ്രൂപ്പ് ഡയറക്ടറുമായ ബിന്ദു മേനോൻ എന്നിവർ ചടങ്ങുകൾക്ക് നേതൃത്വം നൽകി. പി.പി.സുമോദ് എംഎൽഎ, മുൻ മന്ത്രിമാരായ കെ.ഇ. ഇസ്മയിൽ, വി.സി. കബീർ മാസ്റ്റർ, മുൻ എംഎൽഎ സി.ടി. കൃഷ്ണൻ, കിഴക്കഞ്ചേരി ഗ്രാമപഞ്ചായത്ത് പ്രസിഡന്‍റ് കവിത മാധവൻ, എഡിജിപി പി. വിജയൻ, കണ്ണമ്പ്ര ഗ്രാമപഞ്ചായത്ത് വൈസ് പ്രസിഡന്‍റ് കെ.ആർ. മുരളി, ഗ്രാമപഞ്ചായത്തംഗം ആർ. പ്രമോദ്, സിപിഐ ജില്ലാ സെക്രട്ടറി കെ.പി. സുരേഷ് രാജ്, ട്രസ്റ്റി എ.ആർ. കുട്ടി, ട്രസ്റ്റ് സീനിയർ മാനേജർ പി. പരമേശ്വരൻ, സാമൂഹിക ശാക്തീകരണ വിഭാഗം മാനേജർ എം. ഹരിദാസ് തുടങ്ങിയവർ പങ്കെടുത്തു. 2003 ൽ ട്രസ്റ്റിന്‍റെ നേതൃത്വത്തിൽ ആരംഭിച്ച സമൂഹ വിവാഹത്തിൽ 710 യുവതികൾ ഇതിനകം കുടുംബ ജീവിതത്തിലേക്ക് പ്രവേശിച്ചു.

നൂറുകണക്കിന് വവ്വാലുകൾ; പരാതിപ്പെട്ടിട്ടും നടപടി ഉണ്ടായില്ല

ശ്രീകൃഷ്ണപുരം: നിപ്പ ബാധയുമായി ബന്ധപ്പെട്ട് ആരോഗ്യ വകുപ്പിനുമെതിരെ പരാതിയുമായി നാട്ടുകാർ. നിപ്പ ബാധിച്ച് ചികിത്സയിൽ കഴിയുന്ന യുവതിയുടെ വീടിനു തൊട്ടുള്ള റബർതോട്ടത്തിൽ വസിക്കുന്നത് നൂറുകണക്കിന് വവ്വാലുകളാണ്. ഇക്കാര്യം പലവട്ടം അധികൃതരുടെ ശ്രദ്ധയിൽപ്പെടുത്തിയെന്നും യാതൊരു നടപടിയും ഉണ്ടായില്ലെന്ന് നാട്ടുകാർ പരാതിപ്പെടുന്നു. മഞ്ചേരി മെഡിക്കൽ കോളജിലെ വിദഗ്ധസംഘം സ്ഥലം പരിശോധിച്ചു. ഇന്ന് സംഘം നിപ്പ രോഗലക്ഷണങ്ങൾ രണ്ടുമാസത്തിനിടെ ആർക്കെങ്കിലും ഉണ്ടായിരുന്നോ എന്നും പരിശോധിക്കും. 75 അംഗ സംഘമാണ് പരിശോധന നടത്തുക. കരിമ്പുഴ പഞ്ചായത്തിൽ അതീവജാഗ്രത ശ്രീകൃഷ്ണപുരം: തച്ചനാട്ടുകര പഞ്ചായത്തിലെ കിഴക്കുംപുറം പ്രദേശവുമായി ബന്ധപ്പെട്ട് കിടക്കുന്ന കരിമ്പുഴ ഗ്രാമപഞ്ചായത്തിലെ ആറ്റാശേരി,പനാംകുന്ന്, കൊടുനോട് കരിമ്പന വരമ്പ്, ഇറക്കിങ്ങൽ ഭാഗങ്ങളിൽ അതീവജാഗ്രത നിർദേശവുമായി പഞ്ചായത്ത്, ആരോഗ്യവകുപ്പ്, പോലീസ് എന്നിവർ രംഗത്ത്. പഞ്ചായത്തിലെ രണ്ടു വാർഡുകൾ കണ്ടെയ്മെന്‍റ് സോൺ ആയി മാറിയതിനെ തുടർന്ന് കോട്ടപ്പുറം പ്രാഥമികാരോഗ്യകേന്ദ്രത്തിന്‍റെ നേതൃത്വത്തിൽ ഫീൽഡ് തല നിരീക്ഷണ പ്രവർത്തനങ്ങൾ നടത്തി. ഹെൽത്ത് ഇൻസ്പെക്ടർമാർ, ജൂണിയർ പബ്ലിക് ഹെൽത്ത് നേഴ്സുമാർ, മിഡ്‌ ലെവൽ സർവീസ് പ്രൊവൈഡർമാർ, ആശാ പ്രവർത്തകർ, രാഷ്ട്രീയപ്രവർത്തകർ അടക്കമുള്ള വിവിധ സന്നദ്ധ സംഘടന പ്രവർത്തകർ ഉൾപ്പെട്ട 12 ടീമുകളായാണ് പരിശോധന നടത്തിയത്. ആറ്റാശേരി, ചോലകുർശി വാർഡുകളിലെ 412 വീടുകളിൽ സന്ദർശനം നടത്തി ഏതെങ്കിലും തരത്തിലുള്ള അസുഖബാധിതർ ഉണ്ടോയെന്ന് എന്ന് കണക്കെടുപ്പ് നടത്തി. നിപ്പ ബോധവത്കരണവും നടത്തി. കരിമ്പുഴ ഒന്ന് വില്ലേജിൽ പഞ്ചായത്തിന് നേതൃത്വത്തിൽ മൈക്കിൽ വിളംബരം നടത്തി. രണ്ടു വാർഡുകളിലേക്കുമുള്ള പ്രവേശന കവാടങ്ങൾ പൂർണമായും അടച്ചു. കരിമ്പുഴ ഗ്രാമപഞ്ചായത്തിൽ നേരിട്ട് സമ്പർക്കപട്ടികയിൽ ഉള്ള ആരോഗ്യ പ്രവർത്തകയായ യുവതി ക്വാറന്‍റൈനിൽ തുടരുകയാണ്. നിപ്പ ബാധിച്ച യുവതി മണ്ണാർക്കാട് നഴ്സിംഗ് ഹോമിൽ ചികിത്സയ്ക്കായി എത്തിയപ്പോഴാണ് യുവതിയുമായി സമ്പർക്കം ഉണ്ടായത്. ഇവർക്ക് രോഗലക്ഷണങ്ങൾ ഇല്ലെന്ന് ഹെൽത്ത് ഇൻസ്പെക്ടർ സുരേഷ് പറഞ്ഞു.

യുവമോർച്ചയുടെ നേതൃത്വത്തിൽ ശവമഞ്ചവുമായി പ്രതിഷേധം

പാലക്കാട്: ആരോഗ്യമന്ത്രി വീണാ ജോർജിന്‍റെ രാജി ആവശ്യപ്പെട്ട് യുവമോർച്ചയുടെ നേതൃത്വത്തിൽ ഡിഎംഒ ഓഫീസിലേക്ക് ശവമഞ്ചവുമായി പ്രതിഷേധം സംഘടിപ്പിച്ചു. ബിജെപി ജില്ലാ അധ്യക്ഷൻ പ്രശാന്ത് ശിവൻ പ്രതിഷേധം ഉദ്ഘാടനം ചെയ്തു. യുവമോർച്ച ജില്ലാ ജനറൽ സെക്രട്ടറി കെ. ഷിനു, ജില്ലാ സെക്രട്ടറി വിഷ്ണു ഇടക്കാട്ട്, യുവമോർച്ച നേതാക്കളായ കെ.ആർ. ശ്രേയസ്, അഞ്ജിത്ത് കണ്ണാടി, മുകേഷ് പള്ളത്തേരി, നന്ദു ആൽത്തറ, ബിജെപി ജില്ലാ ജനറൽ സെക്രട്ടറിമാരായ എ.കെ. ഓമനക്കുട്ടൻ, എൻ. ഷണ്മുഖൻ, ജില്ലാ ഉപാധ്യക്ഷ·ാരായ ജി. പ്രഭാകരൻ, സി. മധു, എം. ശശികുമാർ, ആർ.ജി. മിലൻ എന്നിവർ നേതൃത്വം നൽകി.

മേഴ്സി കോളജ് സ്റ്റാർട്ടപ്പ് സെൽ ഉദ്ഘാടനം ചെയ്തു

പാലക്കാട്: മേഴ്സി കോളജിൽ ഇ.ഡി. ക്ലബിന്‍റെ ആഭിമുഖ്യത്തിൽ സ്റ്റാർട്ടപ്പ് സെൽ ഉദ്ഘാടനം ചെയ്തു. വിനീത ജോസഫ് ഉദ്ഘാടനം ചെയ്തു. പ്രിൻസിപ്പൽ സിസ്റ്റർ ഡോ.എൻ.എം. ലൗലി അധ്യക്ഷത വഹിച്ചു. കോയന്പത്തൂർ ഓൾമൈറ്റി ജെംസ് ഗ്രൂപ്പ് ഫൗണ്ടർ ഡോ. വിജയരാജ, ലേണ്‍ ടെക്ക് ഐടി അക്കാദമി മാനേജിംഗ് ഡയറക്ടർ രാജേഷ് ബാബു നായർ, കോയന്പത്തൂർ നിർമൽ കോളജ് ഫോർ വിമൻ പ്രിൻസിപ്പൽ സിസ്റ്റർ ഡോ.മരിയ ഫാബില, ഇൻസ്റ്റന്‍റ് ബുക്ക്സ് ഫൗണ്ടർ അജി ഫ്രാൻസിസ് തുടങ്ങിയവർ പ്രസംഗിച്ചു. ഇ.ഡി. ക്ലബ് കോ- ഓർഡിനേറ്റർ ജെൻസി ബേബി സ്വാഗതവും അധ്യാപിക ഡോ. സി.എസ്. ജിംസി നന്ദിയും പറഞ്ഞു.

കണ്ണമ്പ്രയിൽ കളംനിറഞ്ഞ് സൂംബ ഡാൻസ്

വടക്കഞ്ചേരി: അനുദിനം വ്യായാമം, ആരോഗ്യമുള്ള ജനത എന്ന ആശയവുമായി തരൂർ നിയോജകമണ്ഡലത്തിൽ വിവിധ പഞ്ചായത്തുകളിലെ കളിക്കളങ്ങൾ കേന്ദ്രീകരിച്ച് പി.പി. സുമോദ് എംഎൽഎ ആരംഭിച്ച ഹെൽത്തി തരൂരിന്‍റെ കണ്ണമ്പ്ര ഗ്രാമപഞ്ചായത്ത് ടീം അംഗങ്ങൾ സൂംബ എയ്റോബിക് എക്സസൈസ് കണ്ണമ്പ്ര പഞ്ചായത്ത് ഗ്രൗണ്ടിൽ നടത്തി. ഹെൽത്തി തരൂരിന്‍റെ ഭാഗമായി ദിവസവുമുള്ള വ്യായാമത്തിൽ പങ്കെടുക്കാൻ താത്പര്യമുള്ളവർക്ക് രാവിലെ ആറിന് കണ്ണമ്പ്ര ഗ്രാമപഞ്ചായത്ത് കളിക്കളത്തിൽ എത്തിച്ചേരണമെന്ന് ഹെൽത്തി തരൂർ അധികൃതർ അറിയിച്ചു.

പെരുമാട്ടിയിൽ ഹൈടെക് മാർക്കറ്റ് യാഥാർഥ്യമാകുന്നു

പാലക്കാട്: പ്രാദേശിക കാർഷികോത്പന്നങ്ങൾക്ക് പുതിയ വിപണി സാധ്യതകളും കർഷകർക്ക് മികച്ച വരുമാനവും ലക്ഷ്യമിട്ട് പെരുമാട്ടി ഗ്രാമപഞ്ചായത്ത് ആരംഭിക്കുന്ന ഹൈടെക് മാർക്കറ്റ് ആൻഡ് അഗ്രോ പ്രോസസിംഗ് യൂണിറ്റിന്‍റെ ഒന്നാംഘട്ട നിർമാണോദ്ഘാടനം നാളെ നടക്കും. പ്ലാച്ചിമടയിൽ രാവിലെ 10.30ന് നടക്കുന്ന പരിപാടിയിൽ മന്ത്രി എം.ബി. രാജേഷ് ഉദ്ഘാടനം നിർവഹിക്കും. മന്ത്രി കെ. കൃഷ്ണൻകുട്ടി അധ്യക്ഷനാവും.കെ. രാധാകൃഷ്ണൻ എംപി, കെ. ബാബു എംഎൽഎ, ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ, ജില്ലാ കളക്ടർ ജി. പ്രിയങ്ക, ചിറ്റൂർ ബ്ലോക്ക് പഞ്ചായത്ത് പ്രസിഡന്‍റ് എ. സുജാത എന്നിവർ പങ്കെടുക്കും. 2022-23 സാന്പത്തിക വർഷത്തെ ബജറ്റിൽ ഉൾപ്പെടുത്തി 10 കോടി രൂപ വിനിയോഗിച്ചാണ് ഒന്നാംഘട്ട നിർമാണ പ്രവർത്തനം നടത്തുന്നത്. കർഷകർക്ക് ന്യായവില ഉറപ്പാക്കാനും കാർഷിക മേഖലയ്ക്ക് ഉണർവേകാനുമാണ് പദ്ധതി ലക്ഷ്യമിടുന്നത്. 2014-15 സാന്പത്തിക വർഷത്തിൽ 1.15 കോടി രൂപ മുടക്കി മൂലത്തറ വില്ലേജിലെ കന്പാലത്തറയിൽ അഞ്ച് ഏക്കർ സ്ഥലം ഗ്രാമപഞ്ചായത്ത് ഇതിനായി വാങ്ങിയിരുന്നു. ഈസ്ഥലത്ത് വൈദ്യുതി, റോഡ് തുടങ്ങിയ അടിസ്ഥാന സൗകര്യങ്ങൾ നിലവിൽ ലഭ്യമാണ്. പ്രാദേശിക കർഷകരുടെ ഉന്നമനം, ഗുണമേന്മയുള്ള കാർഷിക ഉത്പന്നങ്ങളുടെ ഉത്പാദനം, കർഷകരുടെ ജീവിതനിലവാരം മെച്ചപ്പെടുത്തൽ, കാർഷിക വിഭവങ്ങൾ അന്താരാഷ്ട്ര നിലവാരത്തിൽ കയറ്റുമതി ചെയ്യാനുള്ള സാധ്യതകൾ എന്നിവയെല്ലാം ഈ മാർക്കറ്റിലൂടെ ലക്ഷ്യമിടുന്നു. ഉൗരാളുങ്കൽ ലേബർ കോണ്‍ട്രാക്ട് കോ-ഓപ്പറേറ്റീവ് സൊസൈറ്റിക്കാണ് നിർമാണ ചുമതല.

പുതുപ്പരിയാരത്തു റെയിൽ ഫെൻസിംഗിന് 18 കോടിയുടെ പ്രപ്പോസൽ സമർപ്പിക്കും

പാലക്കാട്: നിരന്തരം വന്യമൃഗശല്യം അനുഭവപ്പെടുന്ന പഞ്ചായത്തുകളിൽ ഒന്നായ പുതുപ്പരിയാരത്ത് റെയിൽ ഫെൻസിംഗിനായി 18 കോടി രൂപയുടെ പ്രൊപ്പോസൽ സർക്കാരിന് സമർപ്പിക്കും. മന്ത്രി കെ.കൃഷ്ണൻകുട്ടിയും ജില്ലാ കളക്ടർ ജി. പ്രിയങ്കയും വനംവകുപ്പ് മന്ത്രിയുമായി ചർച്ച നടത്തിയതിന്‍റെ അടിസ്ഥാനത്തിൽ വനംമന്ത്രി എ.കെ.ശശീന്ദ്രൻ ആവശ്യപ്പെട്ട പ്രകാരമാണ് സർക്കാരിന് പ്രപ്പോസൽ സമർപ്പിക്കുക. ജില്ലാ പഞ്ചായത്ത് കോണ്‍ഫറൻസ് ഹാളിൽ നടന്ന ജില്ലയിലെ വന്യജീവി ആക്രമണ ലഘൂകരണ ജില്ലാതല നിയന്ത്രണ സമിതി അവലോകന യോഗത്തിലാണ് പ്രപ്പോസൽ സംബന്ധിച്ച് മന്ത്രി അറിയിച്ചത്. മന്ത്രി കെ. കൃഷ്ണൻകുട്ടിയുടെ അധ്യക്ഷതയിലാണ് യോഗം ചേർന്നത്. വന്യമൃഗശല്യം അധികരിച്ചു നിൽക്കുന്ന അകത്തേത്തറ, പുതുപ്പരിയാരം, മലന്പുഴ, മുണ്ടൂർ, പുതുശേരി പഞ്ചായത്ത് ഭാരവാഹികളും ഫോറസ്റ്റ് അധികൃതരും മറ്റ് ഉദ്യോഗസ്ഥരും ഉൾപ്പെട്ട യോഗമാണ് വിളിച്ചുചേർത്തത്. വന്യമൃഗാക്രമണ പ്രതിരോധത്തിനായി ജനജാഗ്രത സമിതിയ്ക്ക് പുറമെ പഞ്ചായത്ത് തലത്തിൽ പോലീസ്് -വനംവകുപ്പ് സംഘം രൂപീകരിക്കണം. ഫോറസ്റ്റ് റേഞ്ച് തലത്തിൽ പരിശീലനം നൽകിയ പ്രദേശികമായി ലഭ്യമാകുന്ന യുവാക്കളായ ഷൂട്ടേഴ്സിനെ ഉൾപ്പെടുത്തി പാനൽ രൂപീകരിക്കണം. യൂക്കാലിപ്സ് മരങ്ങൾക്ക് പകരമായി പ്ലാവ് പോലുളള ഫലവൃക്ഷങ്ങൾ നട്ടു പിടിപ്പിക്കാനായാൽ ഒരു പരിധിവരെ മൃഗങ്ങൾ നാട്ടിലിറങ്ങുന്നതിന് പരിഹാരമാകും. വേഗത്തിൽ കായ്ക്കുന്ന ഫലവൃക്ഷതൈകൾ നടുന്നതിന് പ്രാധാന്യം നൽകണമെന്നും മന്ത്രി നിർദേശിച്ചു. ഒലവക്കോട് റേഞ്ചിലെ മുണ്ടൂർ സെക്ഷൻ പരിധിയിൽ ജനവാസമേഖലകളിലെ അടിക്കാടുകൾ വെട്ടിത്തെളിച്ചിട്ടുണ്ട.് തെരുവ് വിളക്കുകൾക്കായി 20 ലക്ഷം രൂപയുടെ പ്രൊപ്പോസൽ നൽകിയിട്ടുണ്ട്. വൈദ്യുതിലൈൻ വലിക്കാൻ സാധിക്കാത്ത വന്യമൃഗശല്യമുളള പട്ടികജാതിവർഗ കോളനികളിലുൾപ്പെടെ സോളാർ ലൈറ്റുകൾ സ്ഥാപിക്കാവുന്നതാണെന്ന് മന്ത്രി അറിയിച്ചു. സോളാർ സാധ്യമാകാത്ത പ്രദേശങ്ങളിൽ സിസി ടിവി സ്ഥാപിക്കണം. വന്യമൃഗശല്യം നേരിടുന്ന ഇടങ്ങളിൽ സോളാർ ഫെൻസിംഗ് ഉറപ്പാക്കാനും മന്ത്രി നിർദേശിച്ചു. സോളാർ ഫെൻസിംഗിനായി ഓരോ പഞ്ചായത്തും ഫണ്ട്മാറ്റി വെയ്ക്കണമെന്നും മന്ത്രി നിർദേശിച്ചു. വൈദ്യുതി ലൈൻ വലിക്കാൻ സാധിക്കാത്ത വന്യമൃഗശല്യമുളള പട്ടികജാതിവർഗ കോളനികളെ കുറിച്ച് വിവരശേഖരണം നടത്താനും മന്ത്രി അറിയിച്ചു. ഡിവിഷണൽ ഫോറസ്റ്റ് എമർജൻസി ഓപ്പറേഷൻ സെന്‍ററിന്‍റെയും ജില്ലാ എമർജൻസി ഓപ്പറേഷൻ സെന്‍ററിന്‍റെയും ഏകോപനം വഴി കൃത്യമായി വിവരങ്ങൾ ലഭിക്കുന്നുണ്ടെന്ന് ജില്ലാ കളക്ടർ ജി. പ്രിയങ്ക അറിയിച്ചു. 67 തദ്ദേശ സ്വയംഭരണ സ്ഥാപനങ്ങൾ ഇതുവരെ ജനജാഗ്രത സമിതി രൂപീകരിച്ചിട്ടുണ്ട്.ഇനിയും രൂപീകരിക്കാത്ത പഞ്ചായത്തുകൾ ജനജാഗ്രത സമിതികൾ ജൂലൈ 15നകം രൂപീകരിക്കണമെന്ന് ജില്ലാ കളക്ടർ നിർദ്ദേശിച്ചു. കാട്ടാന ആക്രമണം മൂലം മരിച്ച അലൻ ജോസഫ്, കുമാരൻ എന്നിവരുടെ കുടുംബങ്ങൾക്ക് അഞ്ച് ലക്ഷം രൂപ വീതം കൈമാറിയിട്ടുണ്ടെന്ന് ജില്ല കളക്ടർ അറിയിച്ചു. കാട്ടാന ആക്രമണം മൂലം കിടപ്പിലായ ആന്‍റണിയുടെ വീട്ടിലേക്കുള്ള വഴി സഞ്ചാര യോഗ്യമാക്കാനായി തൊഴിലുറപ്പ് പദ്ധതിയിൽ ഉൾപ്പെടുത്തി ഡിഎഫ്ഒ യുടെ നേതൃത്വത്തിൽ പ്രവൃത്തികൾ ആരംഭിക്കാൻ നിർദേശം നൽകി. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ, പാലക്കാട് ഡിഎഫ്ഒ രവികുമാർ മീണ, പഞ്ചായത്ത് പ്രതിനിധികൾ, വനം വകുപ്പ്, വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു.

മാർ ഈവാനിയോസ് അനുസ്മരണവും പദയാത്രയും ഇന്ന്

കല്ലടിക്കോട്: പുനരൈക്യ പ്രസ്ഥാനത്തിന്‍റെ പ്രണേതാവും മലങ്കര സുറിയാനി കത്തോലിക്ക സഭയുടെ സ്ഥാപകനുമായ മാർ ഈവാനിയോസിന്‍റെ 72- ാമത് ഓർമപ്പെരുന്നാൾ കരിമ്പ മേഖലയുടെ ആഭിമുഖ്യത്തിൽ ഇന്ന് കരിമ്പ സെന്‍റ് മേരീസ് മലങ്കര സുറിയാനി കത്തോലിക്ക തീർഥാടന പള്ളി അങ്കണത്തിൽ നടക്കും. കൂരിയ ബിഷപ് ആന്‍റണി മാർ സിൽവാനോസ് എപ്പിസ്കോപ്പ തിരുനാൾ ദിനത്തിൽ മുഖ്യ കാർമികത്വം വഹിക്കും. പദയാത്ര കാഞ്ഞിക്കുളം ഹോളി ഫാമിലി പള്ളി അങ്കണം, ചിറക്കൽപ്പടി സെന്‍റ് ജോർജ് ദേവാലയം എന്നിവിടങ്ങളിൽ നിന്നും ആരംഭിച്ച ്നിർമലഗിരി മരിയൻ തീർഥാടനപള്ളിയിൽ സംഗമിക്കും. തുടർന്ന് വിശുദ്ധ കുർബാനയും അനുസ്മരണ യോഗവും നടക്കും. അനുസ്മരണയോഗത്തിൽ സൺഡേ സ്കൂളിലും പൊതു പരീക്ഷകളിലും മറ്റ് മേഖലകളിൽ മികച്ച നേട്ടങ്ങൾ കൈവരിച്ചവരെയും ആദരിക്കും. സമാപന ആശീർവാദത്തിനുശേഷം സ്നേഹവിരുന്നും നടക്കും.

യുവാവിനു വെട്ടേറ്റു

ഒറ്റപ്പാലം: തൃക്കടീരി വീരമംഗലത്ത് യുവാവിന് നേരെ മുഖംമൂടി ആക്രമണം. കുറ്റിക്കോട് ഉറവകുണ്ടിൽ ഷംസുദീന്‍റെ മകൻ സിയാനുനേരെയാണ് ബൈക്കിൽ എത്തിയ രണ്ടംഗസംഘം ആക്രമണം അഴിച്ചുവിട്ടത്. കൈക്കും കാലിനും വെട്ടേറ്റ സിയാനെ മാങ്ങോട്ട് സ്വകാര്യ ആശുപത്രിയിൽ പ്രവേശിപ്പിച്ചു. കഴിഞ്ഞദിവസം രാത്രി 9 മണിയോടുകൂടിയാണ് സംഭവം. വീടിനടുത്തുള്ള കനാൽ ഭാഗത്ത് ഇരിക്കുകയായിരുന്ന സിയാന് നേരെ മുഖംമൂടി ധരിച്ച് എത്തിയ രണ്ടംഗസംഘം ആക്രമണം നടത്തുകയായിരുന്നു. കൂടെയുണ്ടായിരുന്ന സുഹൃത്ത് ഓടി രക്ഷപ്പെട്ടു. പോലീസ് കേസ് എടുത്ത് അന്വേഷണം ആരംഭിച്ചു.

നെല്ലിയാമ്പതിയിലേക്ക് 33 കെവി വൈദ്യുതി ടവർ ലൈൻ സ്ഥാപിക്കുന്നതിനായി പദ്ധതി

നെല്ലിയാമ്പതി: നെല്ലിയാമ്പതിയുടെ വൈദ്യുതി പ്രതിസന്ധിക്ക് പരിഹാരം കാണാൻ നിലവിലുള്ള ലൈനുകൾക്ക് പകരം 33 കെവിയുടെ ടവർലൈൻ നിർമിക്കാൻ കെഎസ്ഇബി അധികൃതർ പരിശോധനയും സർവേയും നടത്തി. നിലവിൽ കൊല്ലങ്കോട് നിന്ന് സീതാർകുണ്ട് വഴിയാണ് പുലയംപാറ ഊത്തുകുഴി റോഡിലെ പവർ സ്റ്റേഷനിലേക്ക് വൈദ്യുതി എത്തുന്നത്. നെല്ലിയാമ്പതിയിലേക്ക് നിലവിൽ സിമന്‍റ്, മരം ഉപയോഗിച്ചുള്ള ഹൈടെൻഷൻ ലൈൻ മുഖേനയാണ് വൈദ്യുതി എത്തിക്കുന്നത്. കെഎസ്ഇബി പാലക്കാട് സബ് ഡിവിഷൻ അസി. എൻജിനീയർ രഞ്ജിത്തിന്‍റെ നേതൃത്വത്തിലുള്ള സംഘമാണ് നെല്ലിയാമ്പതിയിൽ എത്തി തടസമില്ലാതെ വൈദ്യുതി എത്തിക്കുന്നതിനായി ഹൈടെൻഷൻ ടവർലൈൻ സ്ഥാപിക്കുന്നതിനായി പ്രാഥമികസാധ്യതകൾ പരിശോധിച്ചത്. സീതാർകുണ്ട് വ്യൂ പോയിന്‍റ് ഭാഗത്തുനിന്നും താഴ്ഭാഗത്തേക്കുള്ള ചെരിവ് സംഘം സന്ദർശിച്ച് വിലയിരുത്തി. ജിപിഎസ് മുഖനേ സ്ഥലം പരിശോധന നടത്തി. തുടർന്ന് ഡ്രോൺ മുഖനേ പരിശോധിക്കുമെന്നും അധികൃതർ പറഞ്ഞു. സബ് എൻജിനീയർമാരായ അനീഷ്, ശരത്, വർക്കർ ആന്‍റണി, തൊഴിലാളികളായ ബിനു, രാഹുൽ എന്നിവരും സംഘത്തോടൊപ്പം അനുഗമിച്ചിരുന്നു. വനമേഖലയിലൂടെ വരുന്ന വൈദ്യുതി ലൈനിൽ പലപ്പോഴും മരങ്ങൾ കടപുഴകിയും മരക്കൊമ്പുകൾ വീണും നെല്ലിയാമ്പതിയിലേക്ക് വൈദ്യുതി തടസം പതിവാണ്. റോഡ് ഗതാഗത സൗകര്യം ഇല്ലാത്ത വനമേഖലയിലൂടെ വരുന്ന വൈദ്യുതി ലൈനിലെ പ്രശ്നം പരിഹരിച്ച് വൈദ്യുതിബന്ധം പുനഃസ്ഥാപിക്കുന്നതിന് പലപ്പോഴും ദിവസങ്ങൾ എടുക്കാറുണ്ട്. പ്രധാന വിനോദസഞ്ചാര കേന്ദ്രമായ നെല്ലിയാമ്പതിയിലെ വൈദ്യുതി തടസം മേഖലയിലെ തൊഴിലാളികൾക്കും റിസോർട്ടുകൾക്കും ഹോട്ടൽ, വ്യാപാരസ്ഥാപനങ്ങൾ, ഫാക്ടറികൾ, വിനോദസഞ്ചാരികൾ, കുടിവെള്ളം എന്നിവക്കും പ്രതിസന്ധി സൃഷ്ടിക്കുന്നുണ്ട്. നിലവിലെ സാധാരണ ഹൈടെൻഷൻ വൈദ്യുതി ലൈൻ മാറ്റി ഉയരം കൂടിയ ടവർ ലൈൻ സ്ഥാപിക്കണമെന്ന ആവശ്യം വർഷങ്ങളായി നെല്ലിയാമ്പതിയിൽ നിന്ന് ഉയരുന്നുണ്ടെങ്കിലും പ്രശ്നത്തിന് പരിഹാരം ഉണ്ടായിട്ടില്ല. വനമേഖലയിലൂടെ ടവർ ലൈൻ സ്ഥാപിക്കുന്നതിന് കെഎസ്ഇബി വനംവകുപ്പിന് കത്ത് നൽകിയെങ്കിലും അനുമതി നൽകിയിരുന്നില്ല. വനമേഖലയിലൂടെ പുതിയ വൈദ്യുതി ലൈൻ സ്ഥാപിക്കുന്നതിന് അനുമതിക്കായി ലൈൻ വലിക്കാൻ ഉദ്ദേശിക്കുന്ന സ്ഥലത്തിന്‍റെ സ്കെച്ചും വഴിയും പ്രത്യേകം വേണമെന്ന് വനംവകുപ്പ് ആവശ്യപ്പെട്ടിരുന്നു. ഇക്കാര്യത്തിന് അനുമതി നൽകേണ്ട ആവശ്യം ഉന്നയിച്ച് മുഖ്യമന്ത്രിക്ക് നിവേദനം നൽകിയ നാഷണൽ ജനതാദൾ നെല്ലിയാമ്പതി പഞ്ചായത്ത് കമ്മിറ്റി സെക്രട്ടറി വി.എസ്. പ്രസാദും സംഘത്തിന്‍റെ കൂടെയുണ്ടായിരുന്നു. മേഖലയിലെ പല സംഘടനകളും നെന്മാറ വനം ഡിവിഷൻ ഓഫീസിലും കെഎസ്ഇബി അധികൃതർക്കും നിവേദനം നൽകിയിരുന്നു.

ക്ലീൻ കേരള ശേഖരിച്ചത് 2085 ടണ്‍ മാലിന്യം

പാലക്കാട്: ജില്ലയിൽ കഴിഞ്ഞ മൂന്ന് മാസത്തിൽ ഹരിതകർമ കണ്‍സോർഷ്യങ്ങളിൽ നിന്നും ക്ലീൻ കേരള കന്പനി ശേഖരിച്ച് ശാസ്ത്രീയമായി സംസ്കരിച്ചത് 2085 ടണ്‍ അജൈവ മാലിന്യം. ഇതിൽ 233 ടണ്‍ തരംതിരിച്ച മാലിന്യങ്ങളും1852 ടണ്‍ നിഷ്ക്രിയ മാലിന്യങ്ങളും ഉൾപ്പെടുന്നു. കഴിഞ്ഞ സാന്പത്തിക വർഷത്തിൽ 6743 ടണ്‍ അജൈവ മാലിന്യങ്ങളാണ് ക്ലീൻ കേരള കന്പനി ജില്ലയിൽ നിന്നും ശേഖരിച്ചത്. അന്താരാഷ്ട്ര പ്ലാസ്റ്റിക് ബാഗ് വിരുദ്ധ ദിനാചരണവുമായി ബന്ധപ്പെട്ട യോഗത്തിലാണ് ജില്ലയിലെ അജൈവ മാലിന്യ ശേഖരണ പ്രവർത്തനങ്ങളുടെ അവലോകനം നടന്നത്. സെക്ടർ അടിസ്ഥാനത്തിലുള്ള പ്രവർത്തനം ഉൗർജിതമാക്കുന്നതിനും മാലിന്യമുക്തം നവകേരളം കാന്പയിനിന്‍റെ ഭാഗമായി ഇ വേസ്റ്റ് ശേഖരണത്തിന്‍റെ വ്യാപ്തി വർധിപ്പിക്കുന്നതിനും തീരുമാനം കൈ കൊണ്ടതായി ജില്ലാ മാനേജർ ആദർശ് ആർ. നായർ അറിയിച്ചു.ഹരിതകർമസേനാംഗങ്ങൾ വീടുകളിൽ നിന്നും കടകളിൽ നിന്നും ശേഖരിക്കുന്ന അജൈവ മാലിന്യങ്ങൾ എംസിഎഫിൽ കൊണ്ടുവന്ന് തരംതിരിച്ച് മൂല്യവത്തായ മാലിന്യങ്ങളും നിഷ്ക്രിയ മാലിന്യങ്ങളും പ്രത്യേകമായാണ് ക്ലീൻ കേരളയ്ക്ക് കൈമാറുന്നത്. മൂല്യവത്തായ മാലിന്യങ്ങൾക്ക് (പുനരുപയോഗവും പുനഃചംക്രമണവും സാധ്യമായത്) ക്ലീൻ കേരള ഹരിതകർമസേന ഹരിതകർമ കണ്‍സോർഷ്യത്തിന് തുക നൽകും. നിഷ്ക്രിയ മാലിന്യങ്ങൾ കൊണ്ടുപോയി ശാസ്ത്രീയമായും സുരക്ഷിതമായും സംസ്കരിക്കുന്നതിന് തദ്ദേശ സ്ഥാപനങ്ങൾ ക്ലീൻ കേരളയ്ക്ക് തുക നൽകുന്നു. ക്ലീൻ കേരള കന്പനി എംസിഎഫുകളിൽ നിന്നും കൃത്യമായ ഇടവേളകളിൽ മാലിന്യം നീക്കുന്നു എന്ന് മാത്രമല്ല തദ്ദേശ സ്ഥാപനങ്ങൾക്ക് വേണ്ടി അത് സുരക്ഷിതായി കൈയ്യാഴിയുകയും ചെയ്യുന്നു എന്നത് ജില്ലയിൽ മാലിന്യ സംസ്കരണ പ്രവർത്തനത്തിൽ പ്രത്യേകിച്ച് ശാസ്ത്രീയ മാലിന്യ സംസ്കരണത്തിൽ തദ്ദേശ സ്വയംഭരണ സ്ഥാപനങ്ങൾക്ക് വലിയ പിന്തുണയാണ്.

ആരോഗ്യവകുപ്പിനെതിരേ കോൺഗ്രസ് സമരം

പാലക്കാട്: ആരോഗ്യ മേഖലയുടെ തകർച്ചക്ക് കാരണം ‘വീണാ’ വൈറസാണെന്ന് ഡിസിസി വൈസ്പ്രസിഡന്‍റ് സുമേഷ് അച്യുതൻ. സാമൂഹിക ഒരുമയിലൂടെ ഈ വൈറസിനെ തുരത്താൻ കേരളം കൈകോർക്കണമെന്നും അദ്ദേഹം ആവശ്യപ്പെട്ടു. മെഡിക്കൽ കോളജിൽ കെട്ടിടം തകർന്ന് രോഗി മരിക്കാനിടയായ സംഭവത്തിൽ പ്രതിഷേധിച്ച് പാലക്കാട് ബ്ലോക്ക് കോൺഗ്രസ് കമ്മിറ്റി സ്റ്റേഡിയം ബസ് സ്റ്റാന്‍റിലേക്ക് നടത്തിയ പ്രതിഷേധം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബ്ലോക്ക് കോൺഗ്രസ് പ്രസിഡന്‍റ് സി.വി. സതീഷ് അധ്യക്ഷത വഹിച്ചു. യുഡിഎഫ് നിയോജക മണ്ഡലം ചെയർമാൻ സുധാകരൻ പ്ലാക്കാട്ട്, ഡിസിസി അംഗം സി. കിദർ മുഹമ്മദ്, ഹരിദാസ് മച്ചിങ്ങൽ, മണ്ഡലം പ്രസിഡന്‍റുമാരായ എസ്. സേവ്യർ, രമേശ് പുത്തൂർ, എസ്.എം. താഹ, നേതാക്കളായ വി. മോഹൻ, ബോബൻ മാട്ടുമന്ത, എസ്. രവീന്ദ്രൻ, എ. കൃഷ്ണൻ, എച്ച്.എ. സത്താർ, എസ്.കുപ്ലേലൻ, മനോജ് കളത്തിൽ, റജീഷ് ബാലൻ, എഫ്.ബി. ബഷീർ, ഡി. ഷജിത്ത് കുമാർ, സജീവൻ പൂവക്കോട്, കെ. ബലറാം, പ്രഭുൽകുമാർ, വി. ആറുമുഖൻ, ഫ്രിൻന്‍റോ ഫ്രാൻസിസ്, എ. സലീം, എസ്. ശെൽവൻ കെ.എൻ. സഹീർ, ഷെറീഫ് റഹ്മാൻ, ജൈല എച്ച്. കാജാവുദ്ദീൻ, ശാന്തി നടരാജൻ, പുഷ്പവല്ലി നമ്പ്യാർ, പി.കെ. രാജൻ, ഗോപി മൂത്താൻതറ, കെ. അനീഷ്, ഉമ്മർ ഫാറൂഖ്, ഷമീർ പുതുപ്പള്ളിതെരുവ്, പി.എച്ച്. നാസർ, എം. ശെൽവരാജ് എന്നിവർ പങ്കെടുത്തു.

നിപ്പ: കരിമ്പുഴ പഞ്ചായത്തിലെ രണ്ട് വാർഡുകൾ അടച്ചിടും

ശ്രീകൃഷ്ണപുരം: തച്ചനാട്ടുകര പഞ്ചായത്തിലെ കിഴക്കും പുറത്ത് നിപ്പ സ്ഥിരീകരിച്ചതോടെ പകർച്ച തടയുന്നതിനായി സമീപപഞ്ചായത്തായ കരിമ്പുഴ നടപടികൾ തുടങ്ങി. തച്ചനാട്ടുകര പഞ്ചായത്തിനോട് ചേർന്ന് കിടക്കുന്ന കരിമ്പുഴ പഞ്ചായത്തിലെ ആറ്റാശേരി പതിനേഴാം വാർഡും ചോലകുർശി പതിനെട്ടാം വാർഡും പൂർണമായും അടച്ചിടാൻ പഞ്ചായത്തിൽ ചേർന്ന വിവിധ വകുപ്പുകളുടെയും ജനപ്രതിനിധികളുടെയും യോഗത്തിൽ തീരുമാനമായി. രണ്ടു വാർഡുകളിൽ നിന്നും പുറത്തുപോവാനോ പുറത്തുനിന്ന് വാർഡുകളിലേക്ക് വരാനോ പാടില്ല. സ്കൂൾ, മദ്രസ എന്നിവ അടച്ചിടും. വാർഡുകളിലെ വിദ്യാർഥികൾക്ക് ഓൺലൈൻ ക്ലാസിനുള്ള സൗകര്യം ഒരുക്കും. വാർഡിലെ മുഴുവൻ ആളുകളും മാസ്ക് ധരിക്കുകയും ഇടയ്ക്കിടെ കൈ കഴുകുകയും ചെയ്യണം. രണ്ടു വാർഡുകളിലെ 845 വീടുകളിലും ആരോഗ്യവകുപ്പ് 5,6,7 തിയതികളിൽ പരിശോധന നടത്തും. 12 ഗ്രൂപ്പുകളായി മൂന്നു ദിവസങ്ങളിൽ നടത്തുന്ന പരിശോധനയ്ക്ക് ഹെൽത്ത് ഇൻസ്പെക്ടറോ, ജൂണിയർ ഹെൽത്ത് ഇൻസ്പെക്ടറോ നേതൃത്വം നൽകും. രാവിലെ 7 മണിയോടെ തുടങ്ങുന്ന പരിശോധന ഉച്ചക്ക് 12ന് അവസാനിപ്പിച്ച് വൈകുന്നേരം 5ന് മന്ത്രിക്ക് റിപ്പോർട്ട് നൽകും. പനി വന്ന ഉടൻ ശ്വാസംമുട്ട്, അപസ്മാരം തുടങ്ങിയ ലക്ഷണങ്ങൾ ഉള്ളവർക്ക് അതീവ പരിഗണന നൽകി പരിചരിക്കും. കാര്യമായ അസുഖങ്ങൾ ഇല്ലാതെ പെട്ടെന്ന് ചത്ത വളര്‍ത്തു മൃഗങ്ങളെ കുറിച്ച് ആരോഗ്യവകുപ്പിനെ അറിയിക്കണം. അവശ്യവസ്തുക്കൾ ലഭിക്കുന്ന കടകൾക്ക് രാവിലെ 8 മുതൽ വൈകുന്നേരം 6 വരെ നിബന്ധനകൾക്ക് വിധേയമായി പ്രവർത്തിക്കാം തുടങ്ങിയ തീരുമാനങ്ങളാണ് യോഗത്തിൽ കൈകൊണ്ടത്. കൂടാതെ പഞ്ചായത്തിൽ ഹെൽപ് ഡെസ്ക് തുടങ്ങാനും മൈക്ക് ഉപയോഗിച്ച് വിളംബരം നടത്താനും പോസ്റ്ററുകൾ പ്രചരിപ്പിക്കാനും തീരുമാനമായി. യോഗത്തിൽ കരിമ്പുഴ ഗ്രാമപഞ്ചായത്ത് പ്രസിഡന്‍റ് കെ .എം. ഹനീഫ അധ്യക്ഷത വഹിച്ചു. വാർഡുകളിലെ സ്ഥിതിഗതികൾ വിലയിരുത്തിയതിൽ നിന്നും ആശങ്കപ്പെടാൻ ഒന്നുമില്ലെന്നും ജനങ്ങൾ ജാഗ്രത പാലിക്കണമെന്നും ആരോഗ്യവകുപ്പ് അധികൃതർ അറിയിച്ചു. ലക്ഷണങ്ങൾ ഉള്ളവർ ഉടൻതന്നെ ആരോഗ്യവകുപ്പിന് വിവരമറിയിക്കണമെന്നും അധികൃതർ അറിയിച്ചു.

വനമഹോത്സവം: പ്ലാസ്റ്റിക് നിർമാർജന ശില്പശാല

പാലക്കാട്: വനമഹോത്സവത്തിന്‍റെ ഭാഗമായി സാമൂഹ്യ വനവത്കരണ വിഭാഗം ധോണി ഇക്കോ ടൂറിസം സെന്‍ററിൽ പ്ലാസ്റ്റിക് നിർമാർജന ശില്പശാല നടത്തി. മുണ്ടൂർ ഗ്രാമപഞ്ചായത്തിലെ ഹരിതകർമസേന അംഗങ്ങൾക്കായി നടത്തിയ ശില്പശാല മുണ്ടൂർ ഗ്രാമപഞ്ചായത്ത് പ്രസിഡന്‍റ് എം.വി. സജിത ഉദ്ഘാടനം ചെയ്തു. റേഞ്ച് ഫോറസ്റ്റ് ഓഫീസർ കെ.ജി. ജെറിൻ ആന്‍റണി അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് വി.സി. ശിവദാസൻ, വൈൽഡ് ലൈഫ് ഡെപ്യൂട്ടി ഡയറക്ടർ മനോജ് ബാലകൃഷ്ണൻ, ഗ്രേഡ് ഡെപ്യൂട്ടി റേഞ്ച് ഓഫീസർ ബി.എസ്. ഭദ്രകുമാർ, വില്ലേജ് എക്സ്റ്റൻഷൻ ഓഫീസർ കെ.യു. സൗമ്യ എന്നിവർ പ്രസംഗിച്ചു. പ്ലാസ്റ്റിക് നിർമാർജനം സുസ്ഥിര വികസനത്തിന് എന്ന വിഷയത്തിൽ കെ. ശരവണകുമാർ ക്ലാസ് നയിച്ചു. സെക്ഷൻ ഫോറസ്റ്റ് ഓഫീസർമാരായ ജി.എസ്. ശ്രീലാൽ, കെ. മോഹൻദാസ് എന്നിവർ ധോണി വാട്ടർ ഫാൾസിലേക്കുള്ള വനയാത്രക്ക് നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]