നിളയിൽ വിരുന്നെത്തുന്ന ദേശാടന പക്ഷികൾ പറയുന്നു..... മാ നിഷാദ : Deepika.com Nattu Visesham

ഒറ്റപ്പാലം: പുഴയിൽ തീയിടുന്ന ക്രൂരതയുടെ കരങ്ങൾക്ക് മുന്പിൽ കത്തിയമരുന്ന ദേശാടന പക്ഷികളിൽ പലതിന്‍റെയും പ്രജനനകാലമാണിത്. ഇതു കൊണ്ട് തന്നെയാണ് ഇവ ദേശങ്ങൾ താണ്ടിയെത്തി പുഴയുടെ അടി കാടുകളിൽ അഭയം തേടുന്നത്. എന്നാൽ ഒന്നുമറിയാതെ സ്വയം കത്തിയമരാനാണ് ഇപ്പോൾ ഇവക്ക് യോഗം.
തീയിടൽ കൂടിയായതിനാലാവണം ഭാരതപുഴയിൽ തീ ഇടുന്നവരെ പിടി കൂടാൻ വനം, പോലീസധികൃതരും ഇത്തവണ തുനിഞ്ഞിറങ്ങാനാണ് തീരുമാനം. നിളയുടെ ആവാസവ്യവസ്ഥയെ ഹനിക്കുന്ന വിധത്തിൽ അടിക്കാടുകൾക്ക് തീ ഇടുന്നവരെ പോലീസും, വനം വകുപ്പധികൃതരും ചേർന്ന് ഇനി മുതൽ പിടികൂടാൻ രംഗത്തുണ്ടാവും. ഒൗദ്യോഗിക വേഷത്തിലായിരിക്കില്ല ഇവരുടെ ആഗമനമെന്നുള്ളതും പ്രധാനമാണ്. ഭാരതപുഴയുടെ വിവിധ ഭാഗങ്ങളിൽ സാമൂഹ്യവിരുദ്ധൻമാർ തീ ഇടുന്നത് മുൻ വർഷങ്ങളിലേതുപോലെ ഈ വർഷവും ആവർത്തിച്ചുകൊണ്ടിരിക്കുന്ന സാഹചര്യത്തിലാണ് ഭാരതപ്പുഴയുടെ വിവിധ ഇടങ്ങളിൽ കർശനമായ പരിശോധന നടത്താൻ പോലീസും, വനംവകുപ്പ് അധികൃതരും തീരുമാനം എടുത്തതന്നാണ് സൂചന. ഭാരതപ്പുഴയിൽ കാറ്റുകൊള്ളാൻ എത്തുന്നവരിൽ ചിലർ അലക്ഷ്യമായി വലിച്ചെറിയുന്ന സിഗററ്റ് കുറ്റികളും, ബീഡി കുറ്റികളും, കെടാത്ത തീപ്പെട്ടി കന്പുകളും ഭാരതപ്പുഴയെ തീ പിടിപ്പിക്കുന്നുണ്ട്.
ഉണങ്ങിക്കരിഞ്ഞ് നിൽക്കുന്ന പുൽക്കാടുകളിൽ തീപ്പൊരിയൊന്ന് ചിതറിയാൽ മതി വളരെ വേഗത്തിൽ കത്തിപ്പടരും. കിലോമീറ്ററുകളോളം ഇതിന്‍റെ വ്യാപനവും ഉണ്ടാകും. ഇതുമൂലം നിരവധി ചെറു ജീവികളും ജന്തു ജീവജാലങ്ങളും ആണ് കത്തിയെരിയുന്നത്. ഇര തേടി പുഴയോരത്ത് എത്തുന്ന ഒരുപറ്റം പക്ഷികളുടെയും ജീവികളുടെയും ആവാസവ്യവസ്ഥയാണ് ഇതോടുകൂടി ഇല്ലാതാവുന്നത്. ദേശാടനക്കിളികൾ ഉൾപ്പെടെ അനേകം പക്ഷികൾ എത്തുന്ന സ്ഥലമാണ് ഭാരതപ്പുഴയിലെ മണൽത്തിട്ടകൾ. ഇങ്ങനെയൊരു സ്ഥലത്താണ് കഴിഞ്ഞദിവസം ആരോ തീയിട്ടത്. രണ്ടിടങ്ങളിലായി ഒരു ഏക്കർ സ്ഥലത്താണ് മണൽതിട്ടകളിൽ ഉണങ്ങി നിന്ന അടിക്കാടുകൾക്കും ആറ്റുവഞ്ചി ചെടികൾക്കും തീപടർന്നത്. മായന്നൂർ പരിസര പ്രദേശത്തും ഇത്തരത്തിൽ കഴിഞ്ഞദിവസം തീപിടിത്തമുണ്ടായി. പുഴയ്ക്കു സമീപത്തെ സ്വകാര്യ സ്ഥലത്തുനിന്ന് കത്തി തുടങ്ങിയ തീ പുൽകാടുകളിലേക്ക് വ്യാപിച്ചതാണോയെന്നും സംശയിക്കുന്നുണ്ട്. കഴിഞ്ഞ ജനുവരി മാസത്തിൽ ഒറ്റപ്പാലം ഭാഗത്ത് വളരെ വലിയ രീതിയിൽ തീ പിടിച്ചിരുന്നു. അന്ന് കുങ്കുമ കുരുവികൾ ഉൾപ്പെടെയുള്ള പക്ഷിക്കുഞ്ഞുങ്ങൾ കത്തിയെരിഞ്ഞത് ദയനീയ കാഴ്ചയായിരുന്നു.
തുടർന്ന് പാലക്കാട് ഡിഎഫ്ഒ, ഒറ്റപ്പാലം വനംവകുപ്പ് ഓഫീസധികൃതരോട് റിപ്പോർട്ട് തേടുകയും, പരിശോധനകൾ നടത്തുകയും ചെയ്തിരുന്നു. ഇത്തവണയും സമാനമായ രീതിയിലാണ് ഭാരതപ്പുഴയിൽ തീപിടുത്തം ഉണ്ടായത്. ഒക്ടോബർ മുതൽ ഫെബ്രുവരി വരെയുള്ള കാലഘട്ടം ഭാരതപ്പുഴയോരത്തെ ദേശാടനപക്ഷികളുടെ ആഗമനത്തിന്‍റെ വസന്തകാലം കൂടിയാണ്. റെഡ് മുനിയ. പരുന്ത് വർഗ്ഗത്തിൽപ്പെട്ട മാഷ് ഹാരിയാർ ഓസ്പ്രേ. കുരുവി തുടങ്ങിയ പക്ഷികൾ നിളയോരത്ത് വ്യാപകമായി എത്തും. ഇത്തവണ ഒക്ടോബറിൽ തന്നെ പക്ഷികൾ എത്തിയിട്ടുണ്ട്. ദേശാടനപക്ഷികളുടെ പ്രധാന കേന്ദ്രമാണ് ഭാരതപ്പുഴ. ഭാരതപ്പുഴയിൽ തീപിടുത്തം ഉണ്ടാവുന്നത് സ്വാഭാവികമായി അല്ലെന്നും സാമൂഹ്യവിരുദ്ധരുടെ നടപടിയാണെന്നും വനം വകുപ്പും പോലീസും തിരിച്ചറിഞ്ഞിട്ടുണ്ട്. ഇത്തരം സാഹചര്യത്തിൽ ഫലപ്രദമായി ഇതിനെ പ്രതിരോധിക്കാനാണ് അധികൃതരുടെ തീരുമാനം.
അതേസമയം ഇത്തരക്കാരെ കണ്ടെത്താനുള്ള സാധ്യതകളുടെ പരിമിതി വകുപ്പധികൃതരെ കുഴക്കുന്നുമുണ്ട്. പൊതുജനങ്ങളിൽ സാമൂഹിക അവബോധം സൃഷ്ടിക്കുക മാത്രമാണ് ഇതിന് പ്രതിവിധിയായിട്ടുള്ളൂവെന്നാണ് ഉദ്യോഗസ്ഥരിൽ ഭൂരിപക്ഷത്തിന്‍റെയും അഭിപ്രായം. എന്നാൽ പുഴയ്ക്ക് തീ ഇടുന്ന വർക്കെതിരെ ശക്തമായ നടപടികൾ സ്വീകരിക്കുന്ന പക്ഷം കൂടുതൽ ആളുകൾ ഈ പ്രവണതയിലേക്ക് തിരിയാനുള്ള സാഹചര്യം ഒഴിവാക്കുമെന്നും ചൂണ്ടിക്കാണിക്കപ്പെടുന്നുണ്ട്.