ADVERTISEMENT

ADVERTISEMENT

അഖില കേരള പുത്തൻപാന, പിയാത്ത മത്സരം സംഘടിപ്പിച്ചു

തൃശൂർ: തിരുഹൃദയ ലത്തീൻ ദേവാലയത്തിൽ മൂന്നാമത് അഖില കേരള പുത്തൻപാന പിയാത്ത മത്സരം ദേവാലയം റെക്ടർ ഫാ. ജോഷി മുട്ടിക്കൽ ഉദ്ഘാടനം ചെയ്തു. മത്സരത്തിൽ ഒന്നാംസ്ഥാനം കൊടുങ്ങല്ലൂർ സെന്‍റ് തോമസ് ചർച്ച ും രണ്ടാം സ്ഥാനം കുട്ടനെല്ലൂർ സെന്‍റ് ജൂഡും മൂന്നാംസ്ഥാനം തൃശൂർ എഫാത്ത ക്വയർ ടീമും കരസ്ഥമാക്കി.

സിസ്റ്റർ വിനീത സമ്മാനദാനം നടത്തി. സഹ. വികാരി ഫാ. അനീഷ് ജോസഫ് പുത്തൻപറന്പിൽ, പാരിഷ് കൗണ്‍സിൽ സെക്രട്ടറി ബ്രിസ്റ്റോ തൈപ്പാടത്ത്, കേന്ദ്രസമിതി പ്രസിഡന്‍റ് ബെന്നി ചക്കാലക്കൽ, സെക്രട്ടറി ആർ.എസ്. ഷാരോണ്‍, കൈക്കാരന്മാരായ മൈക്കിൾ നോറോണ, റോമി തോമസ് എന്നിവർ പ്രസംഗിച്ചു. സഹവികാരി മിഥിൻ ടൈറ്റസ് പുളിക്കത്തറ നന്ദി പറഞ്ഞു.

ADVERTISEMENT

കൊടുങ്ങല്ലൂർ ക്രാഫ്റ്റ് ആശുപത്രിയിൽ രക്തബാങ്ക് ആരംഭിക്കുന്നു

കൊടുങ്ങല്ലൂർ: രക്തഘടകങ്ങൾ വേർതിരിച്ച് സൂക്ഷിക്കുന്നതിനുള്ള സൗകര്യങ്ങൾ ഉൽപ്പടെ ഏറ്റവും ആധുനിക രീതിയിലുള്ള രക്ത ബാങ്ക് കൊടുങ്ങല്ലൂർ ക്രാഫ്റ്റിൽ പ്രവർത്തനം ആരംഭിക്കുന്നു. ക്രാഫ്റ്റ് രക്തബാങ്കിന്‍റെ ഉദ്ഘാടനം ഇന്ന് ഉച്ചയ്ക്ക് 12ന് നഗരസഭ ചെയർപേഴ്‌സൺ ടി.കെ. ഗീത നിർവഹിക്കും. ക്രാഫ്റ്റ് ആശുപത്രി ഗ്രൂപ്പ് ചെയർമാൻ ഡോ. സി. മുഹമ്മദ് അഷറഫ് അധ്യക്ഷനാകും. രണ്ട് കോടിയോളം രൂപ മുതൽമുടക്കിയാണ് ബ്ലഡ് ബാങ്ക് സജ്ജീകരിച്ചിട്ടുള്ളതെന്ന് ക്രാഫ്റ്റ് ആശുപത്രി ഗ്രൂപ്പ് സിഇഒ ഡോ. ജോയ് ഇന്നസെന്‍റ്്, മെഡിക്കൽ സൂപ്രണ്ട് ഡോ. ജി ജയരാജ്, ഗൈനക്കോളജി വിഭാഗം ഉപ മേധാവി ഡോ. അലീഷ ഷഫ്‌ജീർ, ബ്ലഡ് ബാങ്ക് മാനേജർ സഞ്ജു എന്നിവർ വാർത്താസമ്മേളനത്തിൽ പറഞ്ഞു. ചാവക്കാട് മുതൽ വരാപ്പുഴ വരെയുള്ള തീരദേശ മേഖലയിൽ ഇത്രയും വിപുലമായ ഒരു രക്തബാങ്ക് ഇതാദ്യമാണ്. രക്തഘടകങ്ങൾ വേർതിരിക്കാനും സൂക്ഷിക്കാനുമുള്ള സംവിധാനം സമൂഹത്തിന് ഒരു മുതൽ‌കൂട്ടാണ്. ഒരാൾ രക്തം ദാനം ചെയ്യുമ്പോൾ അത് കുറഞ്ഞത് നാലു ഘടകങ്ങൾ ആയി വേർതിരിക്കപ്പെടുകയും അങ്ങനെ നാലു പേർക്ക് ഒരേ സമയം ഇതുകൊണ്ടുള്ള പ്രയോജനം ലഭിക്കുകയും ചെയ്യുന്നു. ഏകദേശം 600 യൂണിറ്റ് രക്തം ഒരേസമയം സൂക്ഷിക്കുവാനുള്ള രക്ത ബാങ്കാണ് സജ്ജീകരിച്ചിരിക്കുന്നത്. അപൂർവ രക്തഗ്രൂപ്പുകൾ ശേഖരിക്കുന്നതിനും ദാതാക്കളെ രക്തം നൽകുന്നതിന്‍റെ ആവശ്യകത ബോധ്യപ്പെടുത്തുന്നതിനും വിവിധതരം കാമ്പയിനുകൾ ആവിഷ്‌കരിച്ചിട്ടുണ്ട്. 24 മണിക്കൂറും പ്രവർത്തിക്കുന്ന രീതിയിലാണ് രക്ത ബാങ്കിന്‍റെ പ്രവർത്തനം. ജനങ്ങൾക്ക് എളുപ്പത്തിൽ എത്തിച്ചേരാൻ സാധിക്കുന്ന തരത്തിൽ ദേശീയ പാതക്കരികിലുള്ള പഴയ കെ.ജെ. ആശുപത്രി കെട്ടിടത്തിൽ ആണ് ബ്ലഡ് ബാങ്ക് പ്രവർത്തനം ആരംഭിക്കുന്നതെന്നും അവർ പറഞ്ഞു.

കത്തീഡ്രല്‍ ഇടവകയില്‍ ലഹരിക്കെതിരേ സിഗ്നേച്ചര്‍ കാമ്പയിനു തുടക്കമായി

ഇരിങ്ങാലക്കുട: ലഹരിയുടെ പ്രചാരകര്‍ ഒരു സമൂഹത്തെയാണ് കൊന്നെടുക്കുന്നതെന്നു ബിഷപ് മാര്‍ പോളി കണ്ണൂക്കാടന്‍. സെന്‍റ്് തോമസ് കത്തീഡ്രല്‍ ഇടവകയിലെ യുവജന സംഘടനകളായ കെസിവൈഎം, സിഎല്‍സി, ജീസസ് യൂത്ത് എന്നിവരുടെ നേതൃത്വത്തില്‍ നടന്ന ലഹരിക്കെതിരേയുള്ള സിഗ്നേച്ചര്‍ കാമ്പയില്‍ ഉദ്ഘാടനംചെയ്തു സംസാരിക്കുകയായിരുന്നു ബിഷപ്. ജീവിതം അമൂല്യമാണ്, അതു തല്ലിക്കെടുത്തരുത്. മയക്കുമരുന്നില്‍ മരുന്നില്ല മരണമാണെന്ന യാഥാര്‍ഥ്യം ഏവരും തിരിച്ചറിയണം. സര്‍ക്കാരിന്‍റെ യും സന്നദ്ധസംഘടനകളുടെയും പ്രവര്‍ത്തനങ്ങളില്‍ പങ്കുചേര്‍ന്ന് നിശ്ചയദാര്‍ഢ്യത്തോടും ആത്മവിശ്വാസത്തോടുംകൂടെ ലഹരിക്കെതിരേയുള്ള പേരാട്ടം ശക്തമാക്കണം. അതിലൂടെ സുന്ദരമായ ഒരു ഭാവിതലമുറയെ വാര്‍ത്തെടുക്കുവാന്‍ സാധിക്കണമന്നും ബിഷപ് കൂട്ടിച്ചേര്‍ത്തു. കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍ അധ്യക്ഷത വഹിച്ചു. അസിസ്റ്റന്‍റ് വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്‍റണി നമ്പളം, കെസിവൈഎം പ്രസിഡന്‍റ്് ഗോഡ്‌സണ്‍ റോയ്, സിഎല്‍സി പ്രസിഡന്‍റ്് അജയ് ബിജു, ജീസസ് യൂത്ത് കോ- ഓര്‍ഡിനേറ്റര്‍ ബെന്‍സണ്‍ തോമസ്, ട്രസ്റ്റി സി.എം. പോള്‍, കുടുംബസമ്മേളന കേന്ദ്രസമിതി പ്രസിഡന്‍റ്് ജോമി ചേറ്റുപുഴക്കാരന്‍, കെസിവൈഎം ആനിമേറ്റര്‍ ജോസ് മാമ്പിള്ളി എന്നിവര്‍ നേതൃത്വം നല്‍കി.

ആനന്ദപുരത്ത് സൗജന്യ പ്രഷര്‍ - ഷുഗര്‍ പരിശോധന ആരംഭിച്ചു

ആനന്ദപുരം: റൂറല്‍ സൊസൈറ്റിയുടെ ജീവകാരുണ്യ പ്രവര്‍ത്തനങ്ങളുടെ ഭാഗമായുള്ള സൗജന്യ പ്രഷര്‍-ഷുഗര്‍ പരിശോധന ക്യാമ്പ് ഐബിഎം സൊസൈറ്റി പ്രസിഡന്‍റ്് ആന്‍റോ പെരുമ്പുള്ളി ഉദ്ഘാടനം ചെയ്തു. റൂറല്‍ സൊസൈറ്റി പ്രസിഡന്‍റ് ജോമി ജോണ്‍ അധ്യക്ഷത വഹിച്ചു. കാട്ടൂര്‍ സര്‍വീസ് സഹകരണ ബാങ്ക് പ്രസിഡന്റ് ജോമോന്‍ വലിയവീട്ടില്‍, റൂറല്‍ സൊസൈറ്റി വൈസ് പ്രസിഡന്റ് പി.സി. ഭരതന്‍, ഡയറക്ടര്‍ ശാരിക രാമകൃഷ്ണന്‍ എന്നിവര്‍ പ്രസംഗിച്ചു. ഇരിങ്ങാലക്കുട ഐസിഎല്‍ മെഡിലാബുമായി സഹകരിച്ച് നടത്തുന്ന പരിശോധന ക്യാമ്പ് എല്ലാ മാസങ്ങളിലും രണ്ടാം ശനിയാഴ്ചകളില്‍ രാവിലെ ഏഴ് മുതല്‍ ഒമ്പത് വരെ ആനന്ദപുരം ഐസിഎല്‍ ലാബില്‍ നടക്കും.

കുട്ടന്‍കുളം നവീകരണം ഉത്സവശേഷം ആരംഭിക്കുമെന്ന് പൊതുമരാമത്തുവകുപ്പ് കെട്ടിടവിഭാഗം

ഇരിങ്ങാലക്കുട: കൂടല്‍മാണിക്യം കിഴക്കേനടയിലെ കുട്ടന്‍കുളം നവീകരണം ഉത്സവശേഷം ആരംഭിക്കുമെന്ന് പൊതുമരാമത്തുവകുപ്പ് കെട്ടിടവിഭാഗം. മണ്ണുപരിശോധന പൂര്‍ത്തിയാക്കി ചീഫ് എന്‍ജിനീയറില്‍നിന്ന് സാങ്കേതികാനുമതി ലഭിച്ച് ടെന്‍ഡര്‍ നടപടികള്‍ പൂര്‍ത്തിയാക്കിയിരുന്നു. ഏപ്രില്‍ 19 നുശേഷം ടെൻഡര്‍ തുറന്ന് കരാറുകാരെ ചുമതലപ്പെടുത്തുമെങ്കിലും കുളം നവീകരണത്തിന് മുന്നൊരുക്കം ആവശ്യമുള്ളതിനാല്‍ ഉത്സവത്തിനുശേഷം മാത്രമേ ആരംഭിക്കുകയുള്ളൂവെന്ന് പൊതുമരാമത്തുവിഭാഗം വ്യക്തമാക്കി. മേയ് എട്ടു മുതല്‍ 18 വരെയാണ് ഉത്സവം. കുട്ടന്‍കുളത്തിന്‍റെ ഇടിഞ്ഞുവീണ തെക്കേ മതിലടക്കം നാലരികിലും മതില്‍ കെട്ടി കുളം വൃത്തിയാക്കി നവീകരിക്കാനാണ് പദ്ധതി. ഇതിനായി സംസ്ഥാന സര്‍ക്കാര്‍ ബജറ്റില്‍ അനുവദിച്ച നാലുകോടി രൂപയാണ് പൊതുമരാമത്ത് വകുപ്പിന് അനുവദിച്ചിരിക്കുന്നത്. പ്രസിദ്ധമായ കുട്ടംകുളം സമരം നടന്ന ചരിത്രപ്രാധാന്യമുള്ളതും കുളം നിര്‍മിച്ച ആളുടെ പേരില്‍ അറിയപ്പെടുന്നതുമായ അപൂര്‍വം കുളങ്ങളില്‍ ഒന്നാണിത്. ഒരു ഏക്കറിലധികം വിസ്തൃതിയില്‍ വളരെ ശാസ്ത്രീയമായ രീതിയില്‍ ദീര്‍ഘചതുരാകൃതിയില്‍ നിര്‍മിച്ച ഈ കുളത്തില്‍ നിഴല്‍ വീഴില്ലെന്ന പ്രത്യേകതയുമുണ്ട്.

തേജസ് അങ്കണവാടി കെട്ടിടം നിര്‍മാണോദ്ഘാടനം നടത്തി

കാറളം: കാറളം പഞ്ചായത്തില്‍ തേജസ് അങ്കണവാടി കെട്ടിടത്തിന്‍റെ നിര്‍മാണോദ്ഘാടനം ഉന്നത വിദ്യാഭ്യാസ സാമൂഹ്യനീതി വകുപ്പ് മന്ത്രി ഡോ. ആര്‍. ബിന്ദു നിര്‍വഹിച്ചു. ഇരിങ്ങാലക്കുട എംഎല്‍എയും സാമൂഹ്യനീതി വകുപ്പ് മന്ത്രിയുമായ ഡോ. ആര്‍. ബിന്ദുവിന്‍റെ ആസ്തി വികസന ഫണ്ടില്‍ നിന്നും 25 ലക്ഷം രൂപ വിനിയോഗിച്ചാണ് പുതിയ അങ്കണവാടി കെട്ടിടം നിര്‍മിക്കുന്നത്. പുതിയ അങ്കണവാടി കെട്ടിടത്തില്‍ സൗകര്യങ്ങളോട് കൂടിയ ഹാള്‍, കിച്ചണ്‍, ശിശു സൗഹൃദ ടോയ്‌ലറ്റ്, റാമ്പ് സൗകര്യം എന്നിവ സജ്ജമാക്കും. ഗ്രാമപ്പഞ്ചായത്ത് പ്രസിഡന്‍റ് ബിന്ദു പ്രദീപ് അധ്യക്ഷത വഹിച്ചു. വാര്‍ഡ് മെമ്പറും സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണുമായ അമ്പിളി റെനില്‍ സ്വാഗതം പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ്് ലളിത ബാലന്‍, ബ്ലോക്ക് പഞ്ചായത്ത് വൈസ് പ്രസിഡന്‍റ്് കെ.എസ്. രമേഷ്, ഗ്രാമപ്പഞ്ചായത്ത് വൈസ് പ്രസിഡന്‍റ് സുനില്‍ മാലാന്ത്ര തുടങ്ങിയവര്‍ മുഖ്യാതിഥികളായി. ബ്ലോക്ക് സെക്രട്ടറി നിഖില്‍, ഐസിഡിഎസ് സൂപ്പര്‍വൈസര്‍ ഐശ്വര്യമോള്‍ ഫ്രാന്‍സിസ് എന്നിവര്‍ പങ്കെടുത്തു.

പഞ്ചായത്ത് കമ്മിറ്റി തീരുമാനിക്കാതെ അങ്കണവാടി ഉദ്ഘാടനം; യുഡിഎഫ് അംഗങ്ങൾ പ്രതിഷേധിച്ചു

കാടുകുറ്റി: ഗ്രാമപഞ്ചായത്തിലെ അഞ്ചാം വാർഡിലെ ഒൻപതാം നമ്പർ അങ്കണവാടിക്കായി നിർമിച്ച പുതിയ കെട്ടിടത്തിന്‍റെ ഉദ്ഘാടനം പഞ്ചായത്ത് കമ്മിറ്റി തീരുമാനമെടുക്കാതെ നടത്തിയതിൽ യുഡിഎഫ് അംഗങ്ങൾ പ്രതിഷേധിച്ചു. കെട്ടിടത്തിന്‍റെ ഉദ്ഘാടനം മേയ് 16ന് നടത്താനുള്ള തീരുമാനം ഇന്നലെ ചേർന്ന പഞ്ചായത്ത് കമ്മിറ്റിയിലെ അജൻഡയിൽ ഉൾപ്പെടുത്തിയതായി തങ്ങളെ അറിയിച്ചതാണെന്നും എന്നാൽ അതിനു വിഭിന്നമായി ഇന്നലെ തന്നെ ഉദ്ഘാടനം നടത്തിയ നടപടി പഞ്ചായത്ത് പ്രസിഡന്‍റിന്‍റെ ധാർഷ്ട്യവും ധിക്കാരവുമാണെന്ന് പാർലിമെന്‍ററി പാർട്ടി ലീഡർ മോളി തോമസ് പറഞ്ഞു. പഞ്ചായത്ത് അറിയാതെ നടത്തിയ ഉദ്ഘാടനത്തിന്‍റെ ചെലവ് എഴുതി എടുക്കാനുള്ള തീരുമാനത്തിനെതിരെ യുഡിഎഫ് അംഗങ്ങൾ വിയോജനം രേഖപ്പെടുത്തി. യുഡിഎഫ് അംഗങ്ങളായ ഡെയ്സി ഫ്രാൻസിസ്, കെ.സി. മനോജ്, ലിജി അനിൽകുമാർ, ജീജ സെബാസ്റ്റ്യൻ എന്നിവർ പ്രസംഗിച്ചു. പുതിയ കെട്ടിടം പൂർത്തിയായ സാഹചര്യത്തിൽ ഒന്നര വർഷമായി ഇൻഡോർ സ്റ്റേഡിയത്തിൽ താത്കാലികമായി പ്രവർത്തിച്ചിരുന്ന അങ്കണവാടി അടിയന്തര പ്രാധാന്യത്തോടെ മാറ്റുക മാത്രമായിരുന്നു ലക്ഷ്യമെന്നും മറ്റൊരു ദുരുദ്ദേശമുണ്ടായിരുന്നില്ലെന്നും പ്രസിഡന്‍റ് പ്രിൻസി ഫ്രാൻസീസ് പ്രതികരിച്ചു. 15നായിരുന്നു പഞ്ചായത്ത് കമ്മിറ്റി കൂടാൻ ആദ്യം തീരുമാനിച്ചിരുന്നതെന്നും ഒഴിച്ചുകൂടാനാകാത്ത സാഹചര്യത്തിലാണ് ഇന്നലെ നടത്തിയതെന്നും പ്രസിഡന്‍റ് പറഞ്ഞു. അജൻഡയിൽ 16.4.2025ന് പകരം 16.5.2025 എന്നെഴുതിയത് സങ്കേതിക പിഴവ് മാത്രമായിരുന്നെന്നും ഫോണിൽ വിളിച്ച് മുഴുവൻ മെമ്പർമാരെയും ഉദ്ഘാടനം അറിയിച്ചിരുന്നതാണെന്നും പ്രസിഡന്‍റ്് പറഞ്ഞു. പഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തിയാണ് 397 ചതുരശ്രമീറ്റർ വിസ്തൃതിയിൽ അങ്കണവാടി നിർമിച്ചിരിക്കുന്നത്. 2023-24 സാമ്പത്തിക വർഷത്തിലെ വികസന ഫണ്ട് 10 ലക്ഷവും 2024-25 ലെ മെയിന്‍റനൻസ് ഗ്രാന്‍റ് 5 ലക്ഷം രൂപയാണ് അടുക്കള, സ്റ്റാേർ, ടോയ്‌ലറ്റ്, ചുറ്റുമതിൽ, മുകൾനിലയിലെ ട്രസ് വർക്ക് തുടങ്ങിയവയ്ക്കായി വിനിയോഗിച്ചത്.

ചാലക്കുടി നഗരസഭയ്ക്ക് പുതിയ മാസ്റ്റർപ്ലാൻ തയാറാക്കുന്നു

ചാലക്കുടി: നഗരസഭയ്ക്ക് പുതിയ മാസ്റ്റർ പ്ലാൻ തയാറാക്കുന്നു. അമൃത് 2.0 പദ്ധതിയുടെ ഭാഗമായാണ് മാസ്റ്റർപ്ലാൻ തയാറാക്കുന്നത്. ആദ്യഘട്ടം ഡ്രോൺ സർവേ ആരംഭിച്ചു. കേന്ദ്ര സർക്കാരിനുവേണ്ടി സർവേ ഓഫ് ഇന്ത്യയ്ക്കാണ് മാസ്റ്റർപ്ലാൻ തയാറാക്കുന്നതിന്‍റെ ഭാഗമായ ഡ്രോൺ സർവേയുടെ ചുമതല. ഇവർക്കുവേണ്ടി സബ്ട്രിഷി എന്ന സ്ഥാപനമാണ് ഡ്രോൺ സർവേ നടത്തുന്നത്. രാജ്യത്തെ അമ്പതിനായിരത്തിലധികം ജനസംഖ്യയുള്ള പട്ടണങ്ങളെയാണ് അമൃത് പദ്ധതിയിൽ ഉൾപ്പെടുത്തി മാസ്റ്റർപ്ലാൻ തയാറാക്കാൻ കേന്ദ്ര സർക്കാർ തെരഞ്ഞെടുത്തിട്ടുള്ളത്. 75 ലക്ഷം രൂപ ചാലക്കുടി നഗരസഭയുടെ മാസ്റ്റർപ്ലാൻ തയാറാക്കുന്നതിനായി അനുവദിച്ചിട്ടുണ്ട്. ഡ്രോൺ സർവേക്കുശേഷം ജില്ലാ ടൗൺ പ്ലാനിംഗ് വിഭാഗമാണ് മാസ്റ്റർപ്ലാൻ തയാറാക്കുക. വിവിധ നടപടിക്രമങ്ങൾക്ക് ശേഷം അന്തിമ മാസ്റ്റർപ്ലാൻ സർക്കാർ അംഗീകരിച്ച് വിജ്ഞാപനം ചെയ്യുമ്പോൾ, നഗരസഭയുടെ നിലവിലുള്ള മാസ്റ്റർപ്ലാൻ ഇല്ലാതാകും. നഗരസഭയ്ക്ക് ആദ്യമായ് സമ്പൂർണ മാസ്റ്റർപ്ലാൻ തയാറാക്കി വിജ്ഞാപനം ചെയ്തത് 2022ലാണ്. 2012 ലാണ് ഈ മാസ്റ്റർപ്ലാൻ തയാറാക്കുന്നതിനുള്ള നടപടികൾ ആരംഭിച്ചത്. നിലവിൽ പ്രസിദ്ധീകരിച്ചിട്ടുള്ള മാസ്റ്റർ പ്ലാനിലെ പല ഡാറ്റകളും 10 വർഷം മുൻപത്തെയാണ്. പുതിയ മാസ്റ്റർ പ്ലാൻ തയാറാകുമ്പോൾ നിലവിലുള്ള ഇപ്പോഴത്തെ ഡാറ്റകളെല്ലാം ഉൾപ്പെടുത്തി പുതുക്കാൻ സാധിക്കും. ഇപ്പോഴത്തെ മാസ്റ്റർപ്ലാനിലെ വിട്ടുപോയ നിർദേശങ്ങൾ ഉൾപ്പെടുത്താനും സാധിക്കും. നിലവിലെ റോഡ്, തോട്, വീടുകൾ, മറ്റ് കെട്ടിടങ്ങൾ തുടങ്ങി എല്ലാ വിവരങ്ങളും ഉൾപ്പെടുന്ന ജിയോ ഡാറ്റാ ബേയ്സ് നഗരസഭക്ക് ലഭിക്കും.നഗരസഭ വികസന പ്രവർത്തനങ്ങൾക്കും ഇതിന്‍റെ ഭാഗമായി പദ്ധതികൾ തയാറാക്കുന്നതിനും ഇത് ഉപകരിക്കും. മാസ്റ്റർപ്ലാൻ തയാറാക്കുന്നതുമായ് ബന്ധപ്പെട്ട ഡ്രോൺ സർവേയുടെ ഉദ്്ഘാടനം ചെയർമാൻ ഷിബു വാലപ്പൻ നിർവഹിച്ചു. വൈസ് ചെയർപേഴ്സൻ സി. ശ്രീദേവി അധ്യക്ഷയായി. സ്റ്റാൻഡിംഗ് കമ്മിറ്റി ചെയർമാൻമാരായ ബിജു എസ്. ചിറയത്ത്, പ്രീതി ബാബു, ദിപു ദിനേശ്, എം.എം. അനികുമാർ, പ്രതിപക്ഷനേതാവ് സി.എസ്. സുരേഷ്, മുൻ ചെയർമാൻമാരായ വി.ഒ. പൈലപ്പൻ, ആലീസ് ഷിബു, വാർഡ് കൗൺസിലർ റോസി ലാസർ, സെക്രട്ടറി കെ. പ്രമോദ്, സൂപ്രണ്ട് ദിലേഷ് പൊന്നമ്പി എന്നിവർ പ്രസംഗിച്ചു.

പാവറട്ടി തീർഥകേന്ദ്രത്തിൽ ബുധനാഴ്ച ആചരണം പൂർത്തിയായി

പാവറട്ടി: സെന്‍റ് ജോസഫ് തീർഥ കേന്ദ്രത്തിൽ വലിയനോമ്പിലെ ബുധനാഴ്ച ആചരണം പൂർത്തിയായി. വിശുദ്ധ യൗസേപ്പിതാവിന്‍റെ വലിയ തിരുനാളിന് ഒരുക്കമായിട്ടാണ് അമ്പതുനോമ്പിലെ ഏഴ് ബുധനാഴ്ചകളിൽ തിരുനാൾ ആഘോഷിക്കുന്നത്. നേർച്ച ഊട്ടിന്‍റെ വെഞ്ചരിപ്പുകർമം റെക്ട‌ർ ഫാ. ആന്‍റണി ചെമ്പകശേരി നിർവഹിച്ചു. പാട്ടുകുർബാനയ്ക്ക് ഫാ. തോമസ് ഊക്കൻ മുഖ്യകാർമികത്വം വഹിച്ചു. തിരുനാൾ ദിവ്യബലിയെതുടർന്ന് പാരീഷ് ഹാളിൽ നടന്ന സൗജന്യ നേർച്ച ഊട്ടിൽ ആയിരക്കണക്കിനു വിശ്വാസികൾ പങ്കുചേർന്നു. തീർഥകേന്ദ്രം അൾത്താരയിൽ നടന്ന കുട്ടികൾക്കുള്ള ആദ്യ ചോറൂണിനും പ്രത്യേക പ്രാർഥനകൾക്കും നിരവധിപേർ എത്തി. ബുധനാഴ്ച ആചരണത്തിന്‍റെ ഭാഗമായി വിശുദ്ധനു ലില്ലിപ്പൂസമർപ്പണം, അടിമ ഇരുത്തൽ എന്നിവ നടന്നു. സഹവികാരിമാരായ ഫാ. ഗോഡ്‌വിൻ കിഴക്കൂടൻ, ഫാ. ലിവിൻ കുരുതുകുളങ്ങര എന്നിവർ തിരുക്കർമങ്ങൾക്ക് സഹകാർമികരായി. ട്രസ്റ്റിമാരായ ഒ.ജെ. ഷാജൻ, പിയൂസ് പുലിക്കോട്ടിൽ, കെ.ജെ.വിൻസെന്‍റ്, വിത്സൻ നീലങ്കാവിൽ, ഊട്ട്കമ്മിറ്റി കൺവീനർ ഡേവിസ് തെക്കേക്കര, ഭാരവാഹികളായ സേവിയർ അറയ്ക്കൽ, സി.വി. സേവിയർ, റാഫി നീലങ്കാവിൽ, എൻ.ജെ. ലിയോ, സുബിരാജ് തോമസ്, ഇ.ജെ.ടി. ദാസ്, കെ.ഒ. ബാബു, ഒ.എം. ഫ്രാൻസിസ്, വി.എൽ. ഷാജു, ഒ.ജെ. ജസ്റ്റിൻ തുടങ്ങിയവർ ആഘോഷപരിപാടികൾക്ക് നേതൃത്വം നൽകി.

ഗുരുവായൂരില്‍ ലോക പൈതൃക ദിനാഘോഷം നാളെ

ഗുരുവായൂര്‍: പൈതൃകം ഗുരുവായൂരിന്‍റെ നേതൃത്വത്തില്‍ ലോക പൈതൃകം ദിനാഘോഷവും സമാദരണ സംഗമവും നാളെ നടക്കുമെന്ന് ഭാരവാഹികള്‍ പത്രസമ്മേളനത്തിൽ അറിയിച്ചു. ഉച്ചകഴിഞ്ഞ് മൂന്നിന് നഗരസഭാ ഇഎംഎസ് ചത്വരത്തില്‍ സംഗീത നാടക അക്കാദമി ചെയര്‍മാന്‍ മട്ടന്നൂര്‍ ശങ്കരന്‍കുട്ടി മാരാർ ഉദ്ഘാടനം ചെയ്യും. ക്ഷേത്രം ഊരാളന്‍ മല്ലിശേരി പരമേശ്വരന്‍ നമ്പൂതിരിപ്പാട് ഭദ്രദീപം കൊളുത്തും. മേള പ്രാമാണികന്‍ കക്കാട് രാജപ്പന്‍ മാരാര്‍ക്ക് പൈതൃകം പുരസ്‌കാരം നല്‍കും. തുള്ളല്‍ ഗുരുനാഥ കേരളശേരി പ്രഭാവതി, എം.ഡി. കമ്മ്യൂണിറ്റി മെഡിസിനില്‍ ഒന്നാം റാങ്ക് നേടിയ ഡോ. ഗായത്രി ശ്രീകാന്ത്, മോഹിനിയാട്ടം കലാകാരി വി.കെ.ഷാലിമ എന്നിവരെ ആദരിക്കും. പൈതൃകം കലാക്ഷേത്രയുടെ പഞ്ചാരിമേളം, ഭജന്‍സ് എന്നിവയും വൃക്ഷത്തെ വിതരണവും ഉണ്ടാകും. ഭാരവാഹികളായ രവി ചങ്കത്ത്, മധു കെ.നായര്‍, വൈശ്രവണത്ത് നാരായണന്‍ നമ്പൂതിരി, കെ.കെ.വേലായുധന്‍, കെ.ദിവാകരന്‍ തുടങ്ങിയവര്‍ പത്ര സമ്മേളനത്തിൽ പങ്കെടുത്തു .

വടക്കാഞ്ചേരി പുഴ നവീകരണം: ചെളിയും മണ്ണും ലേലംചെയ്യും

വടക്കാഞ്ചേരി: പുഴ നവീകരണത്തിന്‍റെ ഭാഗമായി അടിഞ്ഞുകൂടിയ ചെളിയും മണ്ണും നീക്കം ചെയ്യുന്നതിന് ലേല നടപടികൾക്ക് അംഗീകാരമായതായി സേവ്യർ ചിറ്റിലപ്പിള്ളി എംഎൽഎ അറിയിച്ചു. പ്രളയത്തിലും അതിവർഷത്തിലും അടിഞ്ഞുകൂടിയതുൾപ്പെടെ പുഴയിൽ നിന്നെടുക്കുന്ന മണ്ണ് നീക്കം ചെയ്യുന്നതിനുള്ള നടപടിക്രമങ്ങൾ ലഘൂകരിക്കുന്നതിനാണ് സ്പോട്ട് ലേലം നടത്തുക. വാഴാനി ജലസേചന പദ്ധതിയുടെ സമഗ്രമായ വികസനത്തിനുള്ള പദ്ധതി സംസ്ഥാന സർ ക്കാരിന്‍റെ പരിഗണനയിലുണ്ടെന്നു ജലവിഭവമന്ത്രി റോഷി അഗസ്റ്റിൻ ഉറപ്പു നൽകിയിട്ടുണ്ട്. ജില്ലയിലെ പ്രധാനപ്പെട്ട ജലസേചന പദ്ധതിയായ വാഴാനിയുടെ പ്രളയാനന്തര വീണ്ടെടുപ്പിനും സമഗ്രമായ നവീകരണത്തിനുമായി ബൃഹദ് പദ്ധതി നബാർഡ് ഉൾപ്പെടെയുള്ള ഏജൻസികളുടെ സഹായ ത്തോടെ ആവിഷ്കരിച്ച് നടപ്പാക്കണമെന്ന് ആവശ്യപ്പെട്ടു പദ്ധതി നിർദേശം സമർപ്പിച്ചതായി എംഎൽഎ പറഞ്ഞു. മണ്ണുകൊണ്ട് നിർമിച്ച വാഴാനി ഡാമിൽനിന്ന് ആരംഭിച്ച് വടക്കാഞ്ചേരി, കുന്നംകുളം, മണലൂർ നിയോജകമണ്ഡലങ്ങളിലായി 4313 ഹെക്ടറിൽ ജലസേചനത്തിനായി 1959-ൽ പൂർത്തീകരിച്ചതാണ് വാഴാനി ജലസേചന പദ്ധതി. 65 വർഷം മുൻപ് പൂർത്തീകരിച്ച ഈ പദ്ധതിയെ ആശ്രയിച്ചാണ് ജില്ലയിലെ വലിയ പങ്ക് ജനങ്ങൾ കാർഷിക, കുടിവെള്ള ആവശ്യം നിറവേറ്റുന്നത്. വിവിധ ചിറകളുടെ നവീകരണവും നിയമസഭയിൽ എംഎൽഎ സബ്‌മിഷനിലൂടെ ആവശ്യപ്പെട്ടിട്ടുണ്ട്.

ലോറി അപകടം വീണ്ടും; ഡ്രൈവർക്കു പരിക്ക്

ചാവക്കാട്: മരത്തടി കഷണങ്ങൾ കയറ്റി വന്ന ലോറി മറിഞ്ഞു ഡ്രൈവർക്ക് പരിക്ക്. കണ്ണൂർ സ്വദേശി മോഹനന് (67)നിസാര പരിക്കേറ്റു. ഇന്നലെപുലർച്ചെ രണ്ടുമണിയോടെ മണത്തല പള്ളിക്ക് മുൻവശമാണ് അപകടം. കണ്ണൂരിൽ നിന്നും മരകഷണങ്ങൾ കയറ്റി പെരുമ്പാവൂരിലേക്ക് പോകുകയായിരുന്നു. അമിതമായി ലോഡ് കയറ്റി വന്ന ലോറി റോഡിന്‍റെ വശത്തെ കയറ്റിറക്കത്തിൽ ചാടിയതാണ് മറിയാൻ കാരണമായത്. കുറെ സമയം ഗതാഗതം തടസപ്പെട്ടു. രണ്ടാഴ്ചക്കിടയിൽ ദേശീയപാത മണത്തല മേഖലയിൽ ലോറി മറിയുന്നത് മൂന്നാം തവണയാണ് . ഇക്കഴിഞ്ഞ നാലാം തിയതി ഇരുമ്പു പൈപ്പുകൾ കയറ്റി വന്ന ലോറി മറിഞ്ഞിരുന്നു. ദേശീയപാത 66 ന്‍റെ നിർമാണ പ്രവർത്തനങ്ങൾ നടക്കുന്നതിനാൽ റോഡിൽ പലസ്ഥലങ്ങളിലും അപകടം പതിയിരിക്കുകയാണ്. റോഡിന്‍റെ അപാകതയും വാഹനത്തിലെ അമിത ഭാരവുമാണ് അപകടത്തിന് കാരണമാകുന്നത്. പോലീസ് പരിശോധനകൾ നടത്തുന്നില്ലെന്ന് ആക്ഷേപമുണ്ട്.

നെല്ല് സപ്ലൈകോ കൊണ്ടുപോയില്ല; മഴയിൽ മുളപൊട്ടി നശിച്ചു

പുന്നയൂർക്കുളം: ഉപ്പുങ്ങൽ കോൾ പടവിൽ ചാക്കിലാക്കിയ നെല്ല് മുളപൊട്ടി നശിച്ചു. എട്ട് ക്വിന്‍റൽ നെല്ലാണ് ഉപയോഗശൂന്യമായത്. കൊയ്ത്ത് കഴിഞ്ഞ് ചാക്കിലാക്കിവച്ച നെല്ല് സപ്ലൈകോ സംഭരിക്കാത്തതു കാരണമാണ് നശിച്ചതെന്ന് നെൽകർഷകൻ ചെറവല്ലൂർ പ്രാരത്ത് സുബ്രഹ്മണ്യൻ പറഞ്ഞു. 25 ദിവസമായി പാടശേഖരയോരത്ത് ടാർപോളിൻ ഷീറ്റിട്ടു മൂടിയ നെല്ലാണ് മഴ പെയ്തതിനെ തുടർന്നുണ്ടായ ഈർപ്പത്തിൽ മുള പൊട്ടിയത്. ബാക്കിയുള്ള നെല്ലും സപ്ലൈക്കോ കൊണ്ടുപോകാൻ തയാറായിട്ടില്ല. 2000 കിലോയോളം നെല്ല് സ്വകാര്യ സ്കൂൾ ഗ്രൗണ്ടിൽ കൂട്ടിയിട്ടിരിക്കുകയാണ്. ഇതിനിടെ, വേനൽമഴയെ തുടർന്ന് പരൂർ കോൾപടവിൽ നെല്ല് നിലംപതിച്ചു. കഴിഞ്ഞ ദിവസം പെയ്ത മഴയിലാണ് പടവിലെ മിക്ക ഭാഗങ്ങളിലും നെല്ല് വീണത്. കൃഷിയിടങ്ങളിൽ വെള്ളം കെട്ടി നിൽക്കുന്നതിനാൽ വീണ നെൽച്ചെടികൾ കിളിർക്കാൻ സാധ്യതയുമുണ്ട്. പാടത്ത് കൊയ്ത്ത് ആരംഭിച്ചിട്ടുണ്ടെങ്കിലും മഴ പെയ്തു കൃഷിയിടങ്ങളിൽ വെള്ളം കെട്ടി നിൽക്കുന്നതു കാരണം കൊയ്ത്ത് ഭാഗികമായാണ് നടക്കുന്നത്. ഇതു കർഷകർക്ക് അധിക ബാധ്യത വരുത്തി വയ്ക്കും.

കുട്ടികളെ കൊണ്ടുവന്നോളൂ... കുട്ടിക്കഥകൾ നിറഞ്ഞ ഈ വീട്ടിലേക്ക്

തൃശൂർ: ഈ അവധിക്കാലത്തു കുട്ടികളെയുംകൊണ്ട് തൃശൂർ വെളിയന്നൂരിലേക്കു വരിക. അവിടെ കുട്ടിക്കഥകളും കുട്ടിക്കവിതകളുമൊക്കെ നിറഞ്ഞ ഒരു കൊച്ചുവീടുണ്ട്. ഈ അവധിക്കാലം കുട്ടികൾ സ്റ്റേറ്റ് ചിൽഡ്രൻസ് ലൈബ്രറിയുടെ തൃശൂരിലെ ലൈബ്രറിക്കൊപ്പം ആഘോഷിക്കട്ടെ. നാടെങ്ങും ലഹരിവിരുദ്ധപോരാട്ടം നടക്കുന്പോൾ കുട്ടികളെ വായനയുടെ ലഹരിയിലേക്കു ചേർത്തുവയ്ക്കാൻ ലൈബ്രറിയിലെ അസംഖ്യം പുസ്തകങ്ങൾ ധാരാളം. കഥ. നോവൽ, കവിതാ പുസ്തകങ്ങൾക്കുപുറമെ യാത്രാവിവരണം, പ്രസംഗം, മലയാളസാഹിത്യപഠനം, ഇന്ത്യാ ചരിത്രം, കൊച്ചുകുട്ടികളുടെ ഇഷ്ടപുസ്തകങ്ങളായ ജെറോണിം സ്റ്റിൽറ്റർ, നാൻസി ഡ്യൂ, ടോണ്‍ ഗെയിറ്റ്സ് തുടങ്ങി വൈവിധ്യമാർന്ന പുസ്തകശേഖരമാണ് വെളിയന്നൂർ ക്ഷേത്രത്തിന് എതിർവശത്തുള്ള റോഡിൽ സ്ഥിതിചെയ്യുന്ന സ്റ്റേറ്റ് ചിൽഡ്രൻസ് ലൈബ്രറിയിലുള്ളത്. പതിനെട്ടുവയസുവരെയുള്ള വായനാപ്രേമികളെ ലക്ഷ്യമിട്ടാണ് പുസ്തകങ്ങൾ ക്രമീകരിച്ചിട്ടുള്ളത്. ഒരു കുട്ടിക്ക് ഒരുസമയം മൂന്നു പുസ്തകംവരെയെടുക്കാം. രണ്ടാഴ്ച കഴിഞ്ഞാൽ പുസ്തകം തിരച്ചുകൊണ്ടുവരണം. ലൈബ്രറി മെംബർഷിപ്പിന് ആദ്യം അംഗത്വഫീസായി അന്പതുരൂപയും ഒരു വർഷത്തെ വരിസംഖ്യയായി അന്പതുരൂപയുമടക്കം നൂറുരൂപ അടയ്ക്കണം. പിന്നീട് ഓരോ വർഷവും അന്പതു രൂപവീതം നൽകണം. അംഗത്വ അപേക്ഷയിൽ പഠിക്കുന്ന സ്ഥാപനത്തിലെ ഹെഡ്മാസ്റ്ററുടെയോ പ്രിൻസിപ്പലിന്‍റെയോ ഒപ്പും സീലും പതിക്കണം. ലോക്കൽ വായനശാലയിലെ സെക്രട്ടറിയിൽനിന്നുള്ള കത്തായാലും മതി. മാതാപിതാക്കളുടെ തിരിച്ചറിയിൽ കാർഡിന്‍റെ കോപ്പിയും അപേക്ഷയ്ക്കൊപ്പം നൽകണം. രാവിലെ ഒന്പതുമുതൽ പന്ത്രണ്ടുവരെയും വൈകീട്ട് മൂന്നുമുതൽ ആറുവരെയുമാണ് ലൈബ്രറിയുടെ പ്രവർത്തനസമയം. ബുധനാഴ്ചകളിൽ ലൈബ്രറി മുടക്കമാണ്. അവധിക്കാലം തുടങ്ങിയതോടെ കൂടുതൽ കുട്ടികൾ ലൈബ്രറിയിലെത്തുന്നുണ്ട്. അഞ്ഞൂറോളം കുട്ടിയംഗങ്ങൾ ഇവിടെയുണ്ട്. രാവിലെ വന്നു പുസ്തകമെടുത്തു കൊണ്ടുപോയി ഉച്ചയാകുന്പോഴേക്കും വായിച്ച് തിരിച്ചുകൊണ്ടുവരുന്ന മിടുക്കൻമാരും മിടുക്കികളും കൂട്ടത്തിലുണ്ടെന്ന് ലൈബ്രേറിയൻ സീന രവീന്ദ്രൻ പറഞ്ഞു. വിവിധ മത്സരങ്ങളും ലൈബ്രറിയുടെ നേതൃത്വത്തിൽ സംഘടിപ്പിക്കുന്നുണ്ട്. വായനമത്സരം, കഥപറയൽ, ചിത്രരചന, ക്വിസ് എന്നിവ അതിൽ ചിലതുമാത്രം. വായിച്ച പുസ്തകത്തെക്കുറിച്ച് കുട്ടികൾ ആസ്വാദനക്കുറിപ്പു തയാറാക്കുന്പോൾ വായനയ്ക്കൊപ്പം എഴുത്തിന്‍റെ ലോകവും കുട്ടികൾക്കുമുന്നിൽ തുറക്കപ്പെടുന്നു. അപ്പോൾ മാതാപിതാക്കളേ, ഇനി വൈകേണ്ട... കുട്ടികളെയുംകൊണ്ട് കുട്ടിക്കഥകൾ നിറഞ്ഞ ഈ വീട്ടിലേക്കുവരാൻ...

പിഴിഞ്ഞെടുക്കാൻ കോർപറേഷൻ; പേട്ടക്കാശിൽ കുത്തനേ വർധന വാടകവർധനവിനും വിലക്കയറ്റത്തിനും സാധ്യത

തൃശൂർ: അരിയങ്ങാടി, നായരങ്ങാടി മേഖലയിൽ വരുന്ന ചരക്കുവാഹനങ്ങൾക്കു പേട്ടക്കാശ് എന്നപേരിൽ പിരിക്കുന്ന നിരക്ക് കോർപറേഷൻ ക്രമാതീതമായി വർധിപ്പിച്ചതിനെതിരേ ചേംബർ ഓഫ് കൊമേഴ്സ് രംഗത്ത്. കഴിഞ്ഞദിവസംവരെ ചുരുങ്ങിയനിരക്കിൽ നൽകിയിരുന്ന പേട്ടക്കാശ് ഒറ്റയടിക്കു മൂന്നും നാലും ഇരട്ടിയായി ഉയർത്തിയതാണ് പ്രതിഷേധത്തിനു കാരണമായത്. ഇതുമൂലം ചരക്കുമായി വരുന്ന വാഹനങ്ങൾക്കു ഭീമമായ നഷ്ടം ഉണ്ടാകാൻ ഇടയുള്ളതിനാൽ വാഹനങ്ങളുടെ വാടകവർധനവും സാധനങ്ങൾക്കു വിലവർധനവുമുണ്ടാകും. മാർക്കറ്റിനു പുറത്തുള്ള ഇടങ്ങളിൽ വ്യാപാരം ചെയ്യുന്നവർക്ക് ഇത്തരം ചെലവുകൾ ഇല്ലാത്തതിനാൽ അവരുമായി മത്സരിച്ച് കച്ചവടം ചെയ്യുക എന്നുള്ളത് ബുദ്ധിമുട്ടാവുമെന്നും മാർക്കറ്റിന്‍റെ നിലനിൽപ്പിനെത്തന്നെ നിരക്കുവർധന ബാധിക്കുമെന്നും ചേംബർ അറിയിച്ചു. പുതുക്കിയ നിരക്കുപ്രകാരം മൂന്നുചക്ര വാഹനങ്ങൾക്കു 30 രൂപ, നാലുചക്രം 70 രൂപ, ആറുചക്രം 140 രൂപ, 10 ചക്രം 180 രൂപ, 12 ചക്രം 265, 14 ചക്രം 325 രൂപ,16 ചക്രം 649 രൂപ എന്നിങ്ങനെയാണ് ഇനി കോർപറേഷൻ ഈടാക്കുക. മാർക്കറ്റിൽ എത്തുന്ന വാഹനങ്ങളിൽനിന്നു മുഴുവൻ ചരക്കുകളും കടകളിൽ ഇറക്കുന്നില്ല എന്നിരിക്കെ കച്ചവടക്കാർക്കും പുതുക്കിയ നിരക്ക് വലിയ തലവേദന സൃഷ്ടിക്കും. അയൽസംസ്ഥാനങ്ങളിൽ നിന്നു മുൻകാലങ്ങളിൽ വന്നിരുന്ന ചരക്കുവാഹനങ്ങൾ അവധിദിവസങ്ങളിൽ ഒന്നിലധികം ദിവസം നിർത്തിയിട്ടു വിശ്രമിച്ചിരുന്നെങ്കിൽ ഇനി ഓരോ ദിവസത്തിനും ഭീമമായ തുക നൽകേണ്ടിവരും. കഴിഞ്ഞ രണ്ടുമാസങ്ങളിലായി പല റോഡുകളിലും അറ്റകുറ്റപ്പണികൾ നടക്കുന്നതിന്‍റെ പേരിൽ ദുരിതം അനുഭവിക്കുന്നതിനുപിറകെയാണ് ഇടിത്തീ പോലുള്ള പുതിയ നിരക്കുവർധനവെന്നും ഇതു പിൻവലിക്കണമെന്നും ചേംബർ ഓഫ് കൊമേഴ്സ് സെക്രട്ടറി സോളി തോമസ് കവലക്കാട്ട് ആവശ്യപ്പെട്ടു.

തിപ്പലശേരി റോഡിന്‍റെ ശോചനീയാവസ്ഥ പരിഹരിക്കണം; കോൺഗ്രസ് ഒപ്പുശേഖരണം നടത്തി

എരുമപ്പെട്ടി: കടങ്ങോട് പഞ്ചായത്തിലെ വെള്ളറക്കാട് തിപ്പലശേരി റോഡിന്‍റെ ശോചനീയാവസ്ഥ പരിഹരിക്കണമെന്ന് ആവശ്യപ്പെട്ട് കോൺഗ്രസിന്‍റെ നേതൃത്വത്തിൽ ഒപ്പു ശേഖരണവും പ്രതിഷേധ ധർണയും നടത്തി. കടങ്ങോട് പഞ്ചായത്തിലെ രണ്ട്, മൂന്ന്, ഒമ്പത് വാർഡുകളിൽ ഉൾപ്പെട്ട റോഡ് തകർന്നു കുണ്ടും കുഴിയും നിറഞ്ഞിട്ട് വർഷങ്ങളായി. കുന്നംകുളം -വടക്കാഞ്ചേരി സംസ്ഥാനപാതയെയും അക്കിക്കാവ് എരുമപ്പെട്ടി ബൈപാസ് റോഡിനേയും ബന്ധിപ്പിക്കുന്ന റോഡാണ് തകർന്ന് കാൽനട യാത്രയ്ക്ക് പോലും സാധ്യമാകാത്ത അവസ്ഥയിൽ ആയിരിക്കുന്നത്. മഴപെയ്താൽ റോഡ് ചെളിക്കുണ്ടായി മാറും. അധികൃതരുടെ അവഗണനയ്ക്കെതിരെ കോൺഗ്രസ് രണ്ട്, മൂന്ന്, ഒമ്പത് വാർഡ് കമ്മറ്റികളുടെ നേതൃത്വത്തിലാണ് ഒപ്പ് ശേഖരണവും പ്രതിഷേധവും സംഘടിപ്പിച്ചത്. മണ്ഡലം പ്രസിഡന്‍റ് ഷറഫു പന്നിത്തടം ഉദ്ഘാടനം ചെയ്തു. വാർഡ് പ്രസിഡന്‍റ് സി.കെ ശിവരാമൻ അധ്യക്ഷനായി. നേതാക്കളായ കെ.യു. സണ്ണി, സി.ജി. ജാക്സൻ, പി.സി. ഗോപാലകൃഷ്ണൻ, സലാം വലിയകത്ത്, സജീവ് ചാത്തനാത്ത്, ഒ.എസ്. വാസുദേവൻ, പി.വി. കൃഷ്ണൻകുട്ടി, പഞ്ചായത്ത് മെമ്പർമാരായ ജോളി തോമസ്, സൈബുന്നിസ ഷറഫു, രജിത ഷാജി തുടങ്ങിയവർ പ്രസംഗിച്ചു.

കത്തിക്കുത്തിൽ യുവാവിന് ഗുരുതര പരിക്ക്; രണ്ടുപേർ പിടിയിൽ

ചേലക്കര: ചേലക്കര വെങ്ങാനെല്ലൂരിൽ കഴിഞ്ഞദിവസം രാത്രിയുണ്ടായ വാക്കുതർക്കത്തെ തുടർന്ന് യുവാവിന് കുത്തേറ്റു. വെങ്ങാനെല്ലൂർ സ്വദേശി ഷാനുബി (19)നാണ് കുത്തേറ്റത്. പരിക്കേറ്റ ഷാനുബിനെ ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് വെങ്ങാനെല്ലൂർ പെരുമ്പാവൂർ വീട്ടിൽ വിപിൻ, പാലേരി വീട്ടിൽ പ്രദീപ് എന്നിവരെ ചേലക്കര പോലീസ് അറസ്റ്റ് ചെയ്തു. വാഹനത്തിന് സൈഡ് കൊടുത്തില്ലന്നു പറഞ്ഞുണ്ടായ തർക്കത്തെ തുടർന്നാണ് കത്തിക്കുത്തിൽ കലാശിച്ചത്. ചേലക്കര പോലീസ് സ്റ്റേഷൻ സിഐ കെ. സതീഷ്കുമാറിന്‍റെ നേതൃത്വത്തിൽ അന്വേഷണം നടത്തിവരുന്നു.

ഗുരുവായൂരിൽ 139 വിവാഹങ്ങൾ; നടപ്പുരനിറഞ്ഞ് ജനം

ഗുരുവായൂർ: ക്ഷേത്രത്തിൽ ഇന്നലെ 139 വിവാഹങ്ങൾ നടന്നു. ദേവസ്വം വേണ്ടത്ര മുന്നൊരുക്കങ്ങൾ നടത്താത്തതിനാൽ വിവാഹത്തിനെത്തിയവരും ഭക്തജനങ്ങളുമായി നടപ്പുര നിറഞ്ഞു. വധൂവരന്മാർ മണ്ഡപത്തിലേക്കെത്താൻ ബുദ്ധിമുട്ടി. വിവാഹങ്ങൾ കൂടുതലുള്ള ദിവസങ്ങളിൽ സാധാരണ ദേവസ്വം മുന്നൊരുക്കം നടത്താറുണ്ട്. കിഴക്കേ നടപ്പുരയിൽ വൺവേ സംവിധാനം ഏർപ്പെടുത്തുന്നതിനാൽ വിവാഹത്തിനെത്തുന്നവർക്ക് തിരക്കനുഭവപ്പെടാതെ വിവാഹമണ്ഡപത്തിലെത്താനാകും. കൂടുതൽ പോലീസിനേയും നിയോഗിക്കാറുണ്ട്. എന്നാൽ ഇന്നലെ ഈ സംവിധാനങ്ങളൊന്നും ഏർപ്പെടുത്തിയില്ല. സെക്യൂരിറ്റി മാത്രമാണ് ജനങ്ങളെ നിയന്ത്രിക്കാൻ ഉണ്ടായിരുന്നത്. നാലു വിവാഹമണ്ഡപങ്ങളിലുമായാണു വിവാഹങ്ങൾ നടന്നത്. ദർശനത്തിനും വലിയ തിരക്കാണ് അനുഭവപ്പെട്ടത്.

പാറമേക്കാവിന്‍റെ പൂരപ്പന്തലിനു കാൽനാട്ടി

തൃശൂർ: പാറമേക്കാവിന്‍റെ പൂരപ്പന്തലിനു കാൽനാട്ടി. മണികണ്ഠനാലിൽ പാറമേക്കാവ് വിഭാഗം ഉയർത്തുന്ന പൂരപ്പന്തലിനാണ് കാൽനാട്ടിയത്. ഇന്നലെ രാവിലെ പാറമേക്കാവ് മേൽശാന്തി കാരേരക്കാട്ട് രാമൻ നന്പൂതിരിയുടെയും കീരംപിള്ളി വാസുദേവൻ നന്പൂതിരിയുടെയും കാർമികത്വത്തിൽ ഭൂമിപൂജ നടത്തിയശേഷമായിരുന്നു പന്തൽകാൽനാട്ട്. ദേവസ്വം ഭാരവാഹികളും തട്ടകക്കാരും പൂരപ്രേമികളും ചേർന്നു കാൽനാട്ടു നടത്തിയപ്പോൾ ആഹ്ലാദസൂചകമായി ആർപ്പുവിളികളുയർന്നു. മുൻമന്ത്രി വി.എസ്. സുനിൽകുമാർ, പാറമേക്കാവ് ദേവസ്വം പ്രസിഡന്‍റ് ഡോ. ബാലഗോപാൽ, സെക്രട്ടറി ജി. രാജേഷ്, വൈസ് പ്രസിഡന്‍റ് ജി. വേണുഗോപാൽ, ജോയിന്‍റ് സെക്രട്ടറി പി.വി. നന്ദകുമാർ, കണ്‍വീനർ കെ. ഉണ്ണികൃഷ്ണൻ, കൊച്ചിൻ ദേവസ്വം ബോർഡ് പ്രസിഡന്‍റ് രാജേന്ദ്രൻ തുടങ്ങിയവർ പങ്കെടുത്തു. എടപ്പാൾ നാദം സൗണ്ട് ഇലക്ട്രിക്കൽസിലെ സി. ബൈജുവാണ് പന്തൽ നിർമിക്കുന്നത്. പാറമേക്കാവിനുവേണ്ടി ബൈജു ഇത് അഞ്ചാംവർഷമാണ് പൂരപ്പന്തൽ നിർമിക്കുന്നത്. പകൽസമയത്തെ രൂക്ഷമായ ചൂട് കണക്കിലെടുത്ത് പരമാവധി പന്തൽപണികൾ രാത്രിയിൽ നടത്താനാണ് തീരുമാനം.

തൃശൂർ പൂരം ഭംഗിയായി നടത്തേണ്ടതു സർക്കാരിന്‍റെ കടമ: തിരുവന്പാടി ദേവസ്വം

തൃശൂർ: വിശ്വപ്രസിദ്ധമായ തൃശൂർ പൂരം ഭംഗിയായി നടത്തേണ്ടതു സർക്കാരിന്‍റെ ചുമതലയാണെന്നു തിരുവന്പാടി ദേവസ്വം. പൂരത്തിന്‍റെ വിജയകരമായ നടത്തിപ്പിനു കേന്ദ്ര, സംസ്ഥാന സർക്കാരുകൾ പ്രത്യേക പാക്കേജ് അനുവദിക്കണമെന്നും ഭാരവാഹികൾ പറഞ്ഞു. വെടിക്കെട്ടും പൂരവുമായി ബന്ധപ്പെട്ട് കഴിഞ്ഞ ഏതാനും വർഷങ്ങളായി തുടരുന്ന വിവാദങ്ങൾ തുടർന്നുള്ള വർഷങ്ങളിൽ ഉണ്ടാകാതിരിക്കാൻ ആഘോഷങ്ങൾക്കു പ്രത്യേക ചട്ടക്കൂട് ഒരുക്കേണ്ടതുണ്ട്. നിലവിൽ വെടിക്കെട്ട് നടത്താമെന്നു നിയമോപദേശം ലഭിച്ചതു സന്തോഷം പകരുന്ന കാര്യമാണ്. പൊതുവെ പെസോ നിയമങ്ങളാണ് വെടിക്കെട്ട് തടസപ്പെടുത്തുന്നത് എന്നുപറയുന്നതിൽ അർഥമില്ല. അവരല്ല നിയമങ്ങൾ പറയുന്നത്. കേന്ദ്ര സർക്കാരാണ് അവ കൊണ്ടുവരുന്നത്. സുരക്ഷിതമായ വെടിക്കെട്ട് നടത്താനുള്ള കാര്യങ്ങൾക്കാണ് പെസോ ശ്രമിക്കുന്നത്. നിലവിൽ പതിവുവർഷങ്ങളെപ്പോലെ വെടിക്കെട്ട് നടത്താൻ കഴിയുമെന്നു കരുതുന്നു. വെടിക്കെട്ടിനു മുൻപുമാത്രം വെടിക്കോപ്പുകൾ കൊണ്ടുവരുന്നതിനാൽ അവ സൂക്ഷിക്കേണ്ട മാഗസിന്‍റെ പ്രാധാന്യമില്ലെന്നു കോടതിയെ ബോധ്യപ്പെടുത്തിയിട്ടുണ്ട്. മറ്റു സംസ്ഥാനങ്ങളിൽ വെടിക്കെട്ടിനു ഡിസ്പ്ലേ ലൈസൻസ് ഇല്ലാതിരിക്കെ സംസ്ഥാനത്ത് അതും നടപ്പാക്കുന്നുണ്ട്. എല്ലാവിധ നിയമങ്ങളും പാലിച്ചാണ് തൃശൂർ പൂരം വെടിക്കെട്ട് നടത്തുന്നത്. അതിനാൽതന്നെ ഇത്തവണ ആശങ്കകൾ ഇല്ലാതെ വെടിക്കെട്ട് നടത്താമെന്നുള്ള ഉറപ്പ് മുഖ്യമന്ത്രി അടക്കമുള്ളവർ നൽകിയിട്ടുണ്ടെന്നും സെക്രട്ടറി കെ. ഗിരീഷ് കുമാറും ജോയിന്‍റ് സെക്രട്ടറി പി. ശശിധരനും അറിയിച്ചു. ഫയർലൈൻ ഉള്ളിലേക്കു നീക്കാൻ സാധ്യത, റൗണ്ടിൽനിന്ന് വെടിക്കെട്ട് കാണാം തൃശൂർ: തൃശൂർ പൂരം വെടിക്കെട്ട് ആളുകൾക്കു സ്വരാജ് റൗണ്ടിൽ നിന്ന് കാണുന്നതിനു ഫയർലൈൻ ഇപ്പോഴത്തേതിനെക്കാൾ ഉള്ളിലേക്കുനീക്കുന്ന കാര്യം ആലോചനയിൽ. പാറമേക്കാവ് ദേവസ്വം ഇതുസംബന്ധിച്ചു സൂചന നൽകി. മാഗസിൻ വെടിക്കോപ്പുകൾ ഒന്നുംവയ്ക്കാതെ കാലിയാക്കിയിടുന്നതിനാൽ വെടിക്കെട്ട് നടത്തുന്നത് കുറച്ചുകൂടി ഉള്ളിലേക്കുനീക്കിയാൽ ആളുകൾക്കു നിയമതടസമില്ലാതെ റൗണ്ടിൽ നിന്ന് വെടിക്കെട്ട് ആസ്വദിക്കാൻ സാധിക്കുമോ എന്ന കാര്യമാണ് ചർച്ചചെയ്യുന്നത്.

കോർപറേഷന്‍റെ വിവിധ വികസന ‌പദ്ധതികളുടെ ഉദ്ഘാടനം ഇന്ന്

തൃശൂർ: കോർപറേഷന്‍റെ വിവിധ വികസന പദ്ധതികളുടെ ഉദ്ഘാടനം ഇന്നു നടക്കും. അത്യാധുനികസൗകര്യങ്ങളോടെ 5.50 കോടി രൂപ ചെലവിൽ നിർമിച്ച പനംകുറ്റിച്ചിറയിലെ ഒല്ലൂർ മേഖലാ ഓഫീസ് രാവിലെ 10 നു മന്ത്രി എം.ബി. രാജേഷ് ഉദ്ഘാടനം ചെയ്യും. മന്ത്രി കെ. രാജൻ ലിഫ്റ്റിന്‍റെ ഉദ്ഘാടനം നിർവഹിക്കും. അടുത്ത ഘട്ടത്തിൽ മാർക്കറ്റും ഷോപ്പിംഗ് കോംപ്ലക്സും ടൗണ്‍ഹാളും മേഖലാ കാര്യാലയത്തിന്‍റെ ഭാഗമാകുമെന്നും മേയർ എം.കെ. വർഗീസ് പത്രസമ്മേളനത്തിൽ പറഞ്ഞു. രണ്ടുകോടി രൂപ ചെലവിൽ നിർമിച്ച പൂത്തോൾ ബിഎംബിസി റോഡിന്‍റെ സമർപ്പണം വൈകീട്ട് 4.30 നും പുനരുദ്ധാരണം പൂർത്തീകരിച്ച നെട്ടിശേരി പനഞ്ചകം ചിറയുടെ സമർപ്പണം വൈകീട്ട് 5.30 നും മന്ത്രി കെ. രാജൻ നിർവഹിക്കും. പി. ബാലചന്ദ്രൻ എംഎൽഎ കരാറുകാരനെ ആദരിക്കും. പനഞ്ചകം ചിറയിലെ അവധിക്കാല നീന്തൽ പരിശീലനവും എംഎൽഎ ഉദ്ഘാടനം ചെയ്യും. നിർമാണം പുരോഗമിക്കുന്ന കൂർക്കഞ്ചേരി - കുറുപ്പം റോഡ് കോണ്‍ക്രീറ്റിംഗും അനുബന്ധനിർമാണ പ്രവർത്തനങ്ങളും പൂരത്തിനുമുൻപേ പൂർത്തീകരിക്കുമെന്നും മേയർ അറിയിച്ചു. ഡെപ്യൂട്ടി മേയർ എം.എൽ. റോസി, സ്റ്റാൻഡിംഗ് കമ്മിറ്റി ചെയർമാൻമാരായ പി.കെ. ഷാജൻ, വർഗീസ് കണ്ടംകുളത്തി, സാറാമ്മ റോബ് സണ്‍, കരോളിൻ ജെറീഷ് പെരിഞ്ചേരി എന്നിവരും പത്രസമ്മേളനത്തിൽ പങ്കെടുത്തു. പെസഹാദിനത്തിലെ ഉദ്ഘാടനങ്ങൾ; ബഹിഷ്കരിക്കുമെന്നു കോണ്‍ഗ്രസ് തൃശൂർ: പെസഹാദിനമായ ഇന്ന് കോർപറേഷന്‍റെ വിവിധ വികസനപ്രവർത്തനങ്ങളുടെ ഉദ്ഘാടനം നടക്കാനിരിക്കെ പ്രതിഷേധവുമായി കോണ്‍ഗ്രസ് രംഗത്ത്. ക്രൈസ്തവരുടെ പുണ്യദിനമായ പെസഹാദിനവും ദുഃഖവെള്ളിയും സംസ്ഥാന സർക്കാർ അവധി പ്രഖ്യാപിച്ചിട്ടും കോർപറേഷൻ വിവിധ പദ്ധതികൾ ഇന്ന് ഉദ്ഘാടനം ചെയ്യാൻ തീരുമാനിച്ചതും മന്ത്രി മാർ അതിന് അനുവാദം നൽകിയതും അംഗീകരിക്കാൻ കഴിയില്ലെന്നും ഉദ്ഘാടനം മാറ്റിവയ്ക്കണമെന്നും പ്രതിപക്ഷനേതാവ് രാജൻ ജെ. പല്ലനും ഉപനേതാവ് ഇ.വി. സുനിൽരാജും പറഞ്ഞു. ചടങ്ങുകൾ ബഹിഷ്കരിക്കുമെന്നും ഇവർ പറഞ്ഞു. ഒല്ലൂർ സോണൽ ഓഫീസ് കെട്ടിടംപണി പൂർത്തീകരിച്ച് മാസങ്ങളോളം പൂട്ടിയിട്ട നിലയിലായിരുന്നു. കൗണ്‍സിൽ യോഗങ്ങളിലും മാധ്യമങ്ങളിലും വിമർശനങ്ങൾ ഉയർന്നപ്പോഴാണ് എൽഡിഎഫ് ഭരണനേതൃത്വം ഉദ് ഘാടത്തിനുതന്നെ തയാറായത്. എന്നാൽ പണി പൂർത്തീകരിച്ച് മാസങ്ങളോളം പൂട്ടിയിട്ട കെട്ടിടം പെസഹാവ്യാഴാഴ്ച തന്നെ ഉദ്ഘാടനം ചെയ്യാൻ നിശ്ചയിച്ചതു സമൂഹത്തോടുള്ള അനീതിയാണെന്നും ഈസ്റ്റർ കഴിഞ്ഞുള്ള ദിവസങ്ങളിൽ മേയർക്കും സംഘങ്ങൾക്കും ടൂർ പോകുന്നതിനുവേണ്ടിയാണ് ഇതെന്നും പ്രതിപക്ഷം ആരോപിച്ചു. ഞാനും ക്രിസ്ത്യാനി, ഏതു ദിനമാണ് പ്രധാനമെന്ന് അറിയാം: മേയർ തൃശൂർ: കോർപറേഷന്‍റെ വികസനപ്രവർത്തനങ്ങൾക്കെതിരേയുള്ള കോണ്‍ഗ്രസ് ആക്ഷേപം മുഖവിലയ്ക്കെടുക്കുന്നില്ലെന്നു മേയർ എം.കെ. വർഗീസ്. ഞാനും ഒരു ക്രിസ്ത്യാനിയാണെന്നും ദിവസങ്ങളും അവയുടെ പ്രാധാന്യവും തനിക്കറിയാമെന്നും മേയർ പറഞ്ഞു. ദുഃഖവെള്ളിയും ഈസ്റ്ററുമാണ് പ്രധാനം. അതിൽ ദുഃഖവെള്ളിദിനത്തിൽ ക്രിസ്ത്യാനികളായവർ പൊതുപരിപാടികളോ ആഘോഷങ്ങളോ നടത്താറില്ലെന്നും കോണ്‍ഗ്രസ് അനാവശ്യ ആരോപണങ്ങൾ ഉന്നയിക്കുന്നതാണെന്നും അദ്ദേഹം പറഞ്ഞു.

പീഡാനുഭവ സ്മരണയിൽ ദേവാലയങ്ങളും വിശ്വാസികളും

താലത്തിൽ വെള്ളമെടുത്തു വെൺകച്ചയുമരയിൽ ചുറ്റി മിശിഹാതൻ ശിഷ്യന്മാരുടെ പാദങ്ങൾ കഴുകി... ഇന്നു രാവിലെ ക്രൈസ്തവദേവാലയങ്ങളിൽനിന്നും ഈ ഗാനവീചികൾ അന്തരീക്ഷത്തിലലിയുന്നതോടെ ക്രൈസ്തവമേലധ്യക്ഷന്മാരും വൈദികരും കാൽകഴുകൽശുശ്രൂഷ ആരംഭിക്കും. യേശു തന്‍റെ ശിഷ്യന്മാരുടെ പാദങ്ങൾ കഴുകി ചുംബിച്ചതിന്‍റെ ഓർമയ്ക്കായി 12 പേരുടെ പാദങ്ങൾതന്നെയാണ് ഇവരും കഴുകി ചുംബിക്കുക. ഗുരുവിന്‍റെ പാദസേവചെയ്യുന്ന ശിഷ്യന്മാരുള്ള ലോകത്ത് ശിഷ്യരുടെ പാദങ്ങൾ കഴുകി വിനയത്തിന്‍റെ മാതൃകകാട്ടിയ ലോകത്തിലെ ഒരേയൊരു ഗുരുവായി യേശു ഉയരുന്നതും സവിശേഷമായ ഈ പ്രവൃത്തിയിലൂടെയാണ്. പാദക്ഷാളനകർമത്തിനുശേഷം വിശുദ്ധകുർബാനസ്ഥാപനത്തിന്‍റെ ഓർമയാചരണവും വിശുദ്ധ കുർബാനയർപ്പണവും ദിവ്യകാരുണ്യപ്രദക്ഷിണവും നടക്കും. തുടർന്ന് അഖണ്ഡ ആരാധന ആരംഭിക്കും. ഓശാനഞായറോടെതന്നെ ദേവാലയവും പരിസരവുമെല്ലാം വിശുദ്ധിയുടെ മേലാപ്പ് ചാർത്തിക്കഴിഞ്ഞു. പലയിടങ്ങളിലും വാർഷികധ്യാനവും വചനപ്രഘോഷണവുംകൊണ്ട് ആത്മീയാന്തരീക്ഷം സംജാതമായി. ആണ്ടുകുന്പസാരം നടത്തി പാപപരിഹാരയാത്രയുംചെയ്ത് തിരുനാളുകളുടെ തിരുനാളായ ഉയിർപ്പുതിരുനാളിനെ വരവേൽക്കാനുള്ള മാനസികവും ആത്മീയവുമായ ഒരുക്കം നടത്തിക്കഴിഞ്ഞു വിശ്വാസികൾ. ഇന്നു ദിവ്യകാരുണ്യ ആരാധനയിൽ പങ്കെടുത്തു കൽത്തപ്പം മുറിച്ച് പെസഹാകുറുക്കും കഴിച്ച് പുത്തൻപാനയും വായിച്ച് കുടുംബങ്ങൾ ദുഃഖവെള്ളിക്കൊരുങ്ങും. ഉപവാസദിനമായ ദുഃഖവെള്ളിയിൽ ദേവാലയങ്ങളിൽ പീഡാനുഭവചരിത്രവായനയും പ്രദക്ഷിണവും വൈകീട്ട് പീഡാനുഭവയാത്രയും നഗരികാണിക്കലും പീഡാനുഭവസന്ദേശവും ഉണ്ടായിരിക്കും. "ഗാഗുൽത്താമലയിൽനിന്നും വിലാപത്തിൻ മാറ്റൊലികേൾപ്പൂ'എന്ന ഗാനം ഏവരുടെയും അധരങ്ങളിൽനിന്നും ഉയരും. അപൂർവമായെങ്കിലും "അമ്മകന്യ മണിതന്‍റെ നിർമലദുഃഖങ്ങളിപ്പോൾ' എന്ന പുത്തൻപാനപദവും കേൾക്കാം. കയ്പ്പിലയും കുറുക്കും കഴിച്ച് വി ശ്വാസികൾ ക്രിസ്തു കുരിശിൽകിടന്ന് കയ്പുനീർ രുചിച്ചതിന്‍റെ സ്മരണ പുതുക്കും. വലിയ ശനിയാഴ്ച രാവിലെ മാമ്മോദീസാവ്രത നവീകരണവും പുതുവെള്ളവും തിരിയും വെഞ്ചരിപ്പും വിശുദ്ധകുർബാനയും ഉണ്ടാകും. ലത്തീൻ ദേവാലയങ്ങളിൽ ശനിയാഴ്ച രാത്രി പത്തരയോടെയേ തിരുക്കർമങ്ങളുള്ളൂ. ദീപാർച്ചന, പെസഹാപ്രഘോഷണം, ജ്ഞാനസ്നാനവ്രതനവീകരണം, പുതുവെള്ളം വെഞ്ചരിപ്പ്, തുടർന്ന് ഉയിർപ്പുതിരുനാൾ ദിവ്യബലിയും ഉണ്ടാകും. സീറോമലബാർ ദേവാലയങ്ങളിൽ ശനിയാഴ്ച രാത്രി പതിനൊന്നരയോടെ ഈസ്റ്റർ തിരുക്കർമങ്ങൾ ആരംഭിക്കും.

ആനത്തലയോളം സംശയങ്ങളുമായി കുട്ടിപ്പട്ടാളം

തൃശൂർ: ലക്ഷ്മിക്കുട്ടിയുടെ ചർമംകണ്ടാൽ പ്രായം തോന്നില്ല. അതുകൊണ്ടുതന്നെ പതിവുതെറ്റിക്കാതെ ഇത്തവണയും കുട്ടികളോടു കളിക്കാനും കൂട്ടുകൂടാനും ലക്ഷ്മിക്കുട്ടി എന്ന ആനക്കുട്ടി ജവഹർ ബാലഭവനിൽ എത്തി. തൃശൂർ തിരുവമ്പാടി ദേവസ്വത്തിന്‍റെ വിജയലക്ഷ്മി എന്ന ലക്ഷ്മിക്കുട്ടി മുടങ്ങാതെ 15 വർഷത്തോളമായി ബാലഭവനിലെ അവധിക്കാല അതിഥിയാണ്. തിരുവമ്പാടി ക്ഷേത്രത്തിലെ രാവിലത്തെ ശീവേലി കഴിഞ്ഞാൽ ഒരുദിവസം നേരേ ബാലഭവനിലേക്ക്. കഴിഞ്ഞ ഒന്നരപതിറ്റാണ്ടായി തെറ്റാത്ത ചിട്ട. ഇന്നലെയും പതിവു തെറ്റിയില്ല. ലക്ഷ്മിക്കുട്ടിയെ കാത്തിരുന്ന കുട്ടിക്കൂട്ടത്തിനുമുന്നിലേക്കു പതിവുപോലെ കുണുങ്ങിക്കുണുങ്ങി അവൾ കയറിവന്നപ്പോൾ ആർപ്പുവിളികളോടെയാണ് കുട്ടികൾ വരവേറ്റത്. കുട്ടികൾ കൈവീശി ആർത്തുവിളിച്ചപ്പോൾ ലക്ഷ്മിക്കുട്ടിയും തുമ്പിക്കൈയുയർത്തി കുട്ടികളെ അഭിവാദ്യംചെയ്തു. അതോടെ കുട്ടിക്കൂട്ടം ഇളകി മറിഞ്ഞു. വർഷങ്ങളായി ലക്ഷ്മിക്കുട്ടിയെ കുട്ടികൾക്കു പരിചയപ്പെടുത്തുന്ന പ്രശസ്ത ആനചികിത്സകൻ ഡോ. പി.ബി.ഗിരിദാസും ബാലഭവനിൽ എത്തിയിരുന്നു. കഴിക്കാനായി തണ്ണിമത്തനും ജിലേബിയും വെള്ളരിയും കൊടുത്തപ്പോൾ ലക്ഷ്മിക്കുട്ടിക്കു ക്ഷ പിടിച്ചു. ആനവായിലേക്ക് അതെല്ലാം പോകുന്നതു കുട്ടികൾ കൗതുകത്തോടെ നോക്കിയിരുന്നു. ആന 200 കിലോ ഭക്ഷണവും 200 ലിറ്റർ വെള്ളവും കഴിക്കുമെന്നു ഡോ. ഗിരിദാസ് പറഞ്ഞത് അദ്ഭുതത്തോടെയാണ് കുട്ടികൾ വാതുറന്നു കേട്ടത്. ലക്ഷ്മിക്കുട്ടിയുടെ ഭാരം 3500 കിലോ ആണെന്നും ഡോക്ടർ വ്യക്തമാക്കി. അപ്പോഴേക്കും കുട്ടിപ്പട്ടാളം നൂറായിരം സംശയങ്ങൾ ചങ്ങല പൊട്ടിച്ചു. ആനയുടെ തുമ്പിക്കൈയിൽ ഉറുമ്പ് പോയാൽ എന്തുചെയ്യും, ആനയ്ക്കു കുട്ടികൾ ഉണ്ടോ, എത്ര പല്ലുണ്ട്, പല്ല് എങ്ങനെയാണ്, കാലിൽ നഖമുണ്ടോ, കൊമ്പെന്താ ഇത്ര ചെറുത്, ആന പാവമാണോ... അതിനെല്ലാം ഡോ. ഗിരിദാസ് വിശദമായി മറുപടി നൽകി. ആനയെ തൊടണോ എന്നു ഗിരിദാസ് ചോദിച്ചപ്പോഴേക്കും കുട്ടികൾ ആനയെ വളഞ്ഞു. പിന്നെ ആനയെ തൊടാനുള്ള തിക്കുംതിരക്കും ബഹളവുമായി. ആന ചിന്നം വിളിക്കുന്നത് എങ്ങനെയാണെന്ന് കേൾപ്പിച്ചുകൊടുത്തപ്പോൾ കുട്ടികൾക്കു വീണ്ടും അത്ഭുതം. ബാലഭവനിലെ ഒരു കുട്ടിയെ ലക്ഷ്മിക്കുട്ടിയുടെ പുറത്തു കയറ്റുകയും ചെയ്തു. കുട്ടികൾക്ക് ഏറെ ഇഷ്ടമുള്ള മൃഗമായതുകൊണ്ടാണ് ആനയെ എല്ലാവർഷവും ബാലഭവനിലേക്കു കൊണ്ടുവരുന്നതെന്നു ബാലഭവനിലെ നാടക അധ്യാപകനായ നിപിൻ ഉണ്ണി പറഞ്ഞു. തൃശൂർ എസ്പിസിഎ ഇൻസ്‌പെക്ടർ അനിൽ, തൃശൂർ റിട്ട. അസിസ്റ്റന്‍റ് ഫോറസ്റ്റ് വെറ്ററിനറി ഓഫീസർ ഡോ.കെ.ജി. അശോകൻ എന്നിവരും ഗിരിദാസിനൊപ്പം കുട്ടികൾക്ക് ആനയെ പരിചയപ്പെടുത്താൻ ഉണ്ടായിരുന്നു. ഒരു മണിക്കൂറിനുശേഷം ലക്ഷ്മിക്കുട്ടി മടങ്ങുമ്പോൾ യാത്രയാക്കാൻ കുട്ടികൾക്കു മനസുണ്ടായിരുന്നില്ല.

വാഹനാപകടം: മരണം രണ്ടായി

പുന്നയൂർക്കുളം: നന്നംമുക്ക് പൂച്ചപ്പടിയിൽ ടോറസ് സ്കൂട്ടിയിൽ ഇടിച്ചുണ്ടായ അപകടത്തിൽ മരണം രണ്ടായി. അപകടത്തിൽ സാരമായി പരിക്കേറ്റ് തൃശൂരിലെ സ്വകാര്യ ആശുപത്രിയിൽ ചികിത്സയിൽ കഴിഞ്ഞിരുന്ന മൂക്കുതല മാക്കാലി താമരശേരി വീട്ടിൽ ലക്ഷ്മണന്‍റെ മകൻ ആദിത്യൻ (20) ഇന്നലെ മരിച്ചു. കഴിഞ്ഞ വെള്ളിയാഴ്ചയുണ്ടായ അപകടത്തിൽ കോലൊളന്പ് കിഴക്കേവട്ടപ്പറന്പിൽ നന്ദനന്‍റെ മകൻ നിധിൻ (20) മരിച്ചിരുന്നു. പോലീസ് നടപടിക്കുശേഷം മൃതദേഹം സംസ്കരിച്ചു. പെരുന്പടപ്പ് ബ്ലോക്ക് പഞ്ചായത്ത് മെന്പർ ആശാലതയാണ് ആദിത്യന്‍റെ അമ്മ. പഴഞ്ഞി എംഡി കോളജിലെ ഒന്നാംവർഷ ബികോം വിദ്യാർഥികളായിരുന്നു നിധിനും ആദിത്യനും. കോളജിലേക്കു പോകുന്നതിനിടെയായിരുന്നു അപകടം.

വയോധികൻ മരിച്ചനിലയിൽ

വടക്കാഞ്ചേരി: ബംഗളൂരു സ്വദേശിയായ യാചകവയോധികനെ മരിച്ചനിലയിൽ കണ്ടെത്തി. ഇന്നലെ രാവിലെ വടക്കാഞ്ചേരി ബസ് സ്റ്റാൻഡിലെ കാത്തിരിപ്പുകേന്ദ്രത്തിലാണ് മരിച്ചനിലയിൽ കണ്ടത്. ബംഗളൂരു സ്വദേശി മുനിസ്വാമി(80) ആണ് മരിച്ചത്. ഇയാളുടെ ഭാര്യയും ഒപ്പമുണ്ടായിരുന്നു. ഇവർ വർഷങ്ങളായി വടക്കാഞ്ചേരിയിലും സമീപപ്രദേശങ്ങളിലും ഉണ്ട്. വടക്കാഞ്ചേരി പോലീസ് സ്ഥലത്തെത്തി മേൽനടപടികൾ സ്വീകരിച്ചു.

വീട്ടിൽ മരിച്ചനിലയിൽ

വടക്കാഞ്ചേരി: വീട്ടിൽ തനിച്ച് താമസിക്കുന്നയാളുടെ അഴുകിയ മൃതദേഹം കണ്ടെത്തി. വെട്ടിക്കാട്ടിരി 15ാം പാലത്തിനു സമീപം കുന്നുമ്മേൽ വീട്ടിൽ പരേതനായ വേലായുധന്‍ മകൻ മണികണ്ഠൻ(56) ആണ് മരിച്ചത്. മൃതദേഹത്തിന് രണ്ടുദിവസത്തെ പഴക്കമുണ്ടെന്ന് പോലീസ് പറഞ്ഞു. വീട്ടിൽ നിന്ന് ദുർഗന്ധം വന്നതിനെത്തുടർന്ന് നാട്ടുകാർ നോക്കിയപ്പോഴാണ് മൃതദേഹം കണ്ടെത്തിയത്. ഭാര്യ: ഗിരിജ. മക്കൾ: മിനി, മിഥുൻ. മരുമകൻ: ബിജുമോൻ. ചെറുതുരുത്തി പോലീസ് സ്ഥലത്തെത്തി മേൽനടപടികൾ സ്വീകരിച്ചു.

പരിയാരം സെന്‍റ് ജോർജ് ദേവാലയത്തിൽ തിരുനാൾ

പരിയാരം: സെന്‍റ് ജോർജ് ദേവാലയത്തിൽ വിശുദ്ധ ഗീവർഗീസ് സഹദായുടെ ഊട്ടുതിരുനാളിന് വികാരി ഫാ. വിൽസൺ ഏലുവത്തിങ്കൽ കൂനൻ കൊടി ഉയർത്തി. ഫാ. സ്റ്റീഫൻ കൂള സഹകാർമികത്വംവഹിച്ചു. തിരുനാളിന് ഒരുക്കമായി നവനാൾകുർബാന ദിവസവും രാവിലെ 6.30നും ആറിനും ഉണ്ടായിരിക്കും. 27ന് ഊട്ടുതിരുനാൾദിവസം രാവിലെ ആറിനും 8.30നും ദിവ്യബലി, 10.30ന് ആഘോഷമായ തിരുനാൾപാട്ടുകുർബാനയ്ക്ക് ഫാ. ബെന്നറ്റ് എടാട്ടുകാരൻ കാർമികത്വംവഹിക്കും. ഫാ. ജോബി മേനോത്ത് സന്ദേശംനല്കും. ഉച്ചകഴിഞ്ഞു 3.30ന് വിശുദ്ധ കുർബാന, തിരുനാൾപ്രദക്ഷിണം. കൈക്കാരന്മാരായ ജിജോ പരുത്തിപ്പറമ്പിൽ, ബെന്നി ഉദനിപ്പറമ്പിൽ, ജോൺ തെക്കേക്കര (ജൂണിയർ), ജനറൽ കൺവീനർ ജോസ് പാറയ്ക്ക, ഊട്ടുകൺവീനർ കണ്ണമ്പിള്ളി തോമസ്, മേഴ്സി സേവിയർ, ജോവിഷ് ജോസ് എന്നിവരുടെ നേതൃത്വത്തിൽ തിരുനാളിന് വിപുലമായ കമ്മിറ്റികൾ രൂപീകരിച്ചു.

രോഗീസംഗമം സംഘടിപ്പിച്ചു

മറ്റത്തൂര്‍: മൂന്നുമുറി സെന്‍റ ജോണ്‍ ദി ബാപ്റ്റിസ്റ്റ് ഇടവകയിലെ മാതൃസംഘത്തിന്‍റെ നേതൃത്വത്തില്‍ രോഗീസംഗമം സംഘടിപ്പിച്ചു. ഇരിങ്ങാലക്കുട രൂപത ഹൃദയ പാലിയേറ്റീവിന്‍റെ സഹകരണത്തോടെനടന്ന സംഗമം ഫാ. ഷാജു ചിറയത്ത് ഉദ്ഘാടനംചെയ്തു. വികാരി ഫാ. ജോര്‍ജ് വേഴപ്പറമ്പില്‍, ഫാ. ജെയ്‌സണ്‍ ചെവല്ലൂര്‍, ബ്രദര്‍ ജോഫിന്‍ താക്കോല്‍ക്കാരന്‍, പാലിയേറ്റീവ് പ്രസിഡന്‍റ് ബെന്നി തൊണ്ടുങ്ങല്‍, മാതൃസംഘം പ്രസിഡന്‍റ് സ്മിത കണ്ണമ്പുഴ എന്നിവര്‍ നേതൃത്വംനല്‍കി. ഇതോടനുബന്ധിച്ചുനടന്ന ദിവ്യബലിക്ക് ഫാ. ജോസഫ് മാളിയേക്കല്‍ കാര്‍മികത്വംവഹിച്ചു.

ലഹരിക്കെതിരേ ജനകീയസമിതിയുടെ പ്രവർത്തനങ്ങൾ ശക്തമാക്കും

കയ്പമംഗലം: ലഹരിക്കെതിരേ ജനകീയസമിതിയുടെ പ്രവർത്തനങ്ങൾ കയ്പമംഗലം മണ്ഡലത്തിൽ കൂടുതൽ ശക്തമാക്കും. ഇ.ടി. ടൈസൺ എംഎൽഎയുടെ നേതൃത്വത്തിൽ രൂപീകരിച്ച ജനകീയസമിതിയുടെ മണ്ഡലംതല അവലോകനയോഗത്തിലാണ് തീരുമാനം. മണ്ഡലത്തിലെ മുഴുവൻ ജനപ്രതിനിധികൾ, സർക്കാർ സംവിധാനങ്ങൾ, രാഷ്ട്രീയ സാമൂഹിക കലാ-കായിക സംഘടനകൾ, വിമുക്തി, യോദ്ധാവ് സ്നേഹത്തോൺ പദ്ധതികളുടെ സംഘാടകർ എന്നിവരെയെല്ലാം സംയോജിപ്പിച്ചു നടത്തിയ കാമ്പയിനുകൾ യോഗം വിലയിരുത്തി. മതിലകം ബ്ലോക്ക് പഞ്ചായത്ത് പ്രസിഡന്‍റ് സി.കെ. ഗിരിജ, ഗ്രാമപഞ്ചായത്ത് പ്രസിഡന്‍റുമാരായ കെ.പി. രാജൻ, എം.എസ്. മോഹനൻ, സീനത്ത് ബഷീർ, വിനീത മോഹൻദാസ്, ശോഭന രവി തുടങ്ങിയവർ പ്രസംഗിച്ചു.

പീലാർമുഴിയിൽ വീണ്ടും കാട്ടാന: കൃഷി നശിപ്പിച്ചു

കുറ്റിച്ചിറ: പീലാർമുഴിയിൽ കാട്ടാനകൾ ഇറങ്ങി കൃഷി നശിപ്പിച്ചു. ചിറമ്മൽ പാപ്പച്ചന്‍റെ 150 വാഴകള്‌, 10 പ്ലാവുകൾ, അഞ്ചു റമ്പുട്ടാൻ എന്നിവ നശിപ്പിച്ചു. കുറിഞ്ഞിക്കാട്ട് സെബാസ്റ്റ്യന്‍റെ പറമ്പിലും കാട്ടാന റബർമരങ്ങൾ തളളിയിട്ടു. അര്‌ധരാത്രിയെത്തിയ ആനകളെ നാട്ടുകാരും വനപാലകരും പടക്കംപൊട്ടിച്ചും ബഹളംവച്ചും ഓടിക്കാൻ ശ്രമിച്ചിട്ടും പോയില്ല. പുലർച്ചെ യോടെയാണ് ആനകൾ തിരികേപോയത്.

പ്രായപൂര്‍ത്തിയാകാത്ത പെണ്‍കുട്ടിക്ക് അശ്ലീലചിത്രങ്ങള്‍ അയച്ചു: യുവാവ് അറസ്റ്റില്‍

ഇരിങ്ങാലക്കുട: പ്രായപൂര്‍ത്തിയാകാത്ത പെണ്‍കുട്ടിക്ക് അശ്ലീലചിത്രങ്ങള്‍ അയച്ച യുവാവ് അറസ്റ്റില്‍. കോണത്തുകുന്ന് ചിലങ്ക സ്വദേശി തരുപീടികയില്‍ ഷാനവാസി(43)നെയാണ് ഇരിങ്ങാലക്കുട പോലീസ് അറസ്റ്റ് ചെയ്തത്. സമാന പ്രായക്കാരിയായ പെണ്‍കുട്ടിയെന്ന് തെറ്റിദ്ധരിപ്പിച്ച് വാട്‌സ്ആപ്പ് വഴി പരിചയപ്പെട്ട് സൗഹൃദം സ്ഥാപിച്ചശേഷം അശ്ലീലചിത്രങ്ങളയച്ചു നല്‍കുകയായിരുന്നു. സംഭവത്തില്‍ പെണ്‍കുട്ടിയുടെ പരാതിയില്‍ ഇരിങ്ങാലക്കുട പോലീസ് സ്റ്റേഷനില്‍ കേസ് രജിസ്റ്റര്‍ രജിസ്റ്റര്‍ ചെയ്തിരുന്നു. ഇരിങ്ങാലക്കുട സിഐ എം.എസ്. ഷാജന്‍, എസ്‌ഐ ക്ലീറ്റസ്, എഎസ്‌ഐ മാരായ മെഹറുന്നിസ, ഉമേഷ് എന്നിവരാണ് അന്വേഷണ സംഘത്തില്‍ ഉണ്ടായിരുന്നത്.

പ്രായപൂര്‍ത്തിയാകാത്ത കുട്ടികള്‍ക്കു മുന്‍പില്‍ നഗ്നതാപ്രദര്‍ശനം; യുവാവ് അറസ്റ്റില്‍

ആളൂര്‍: പ്രായപൂര്‍ത്തിയാകാത്ത കുട്ടികള്‍ക്കു മുന്നില്‍ നഗ്നതാപ്രദര്‍ശനം നടത്തിയ കോടാലി സ്വദേശി പുത്തന്‍വീട്ടില്‍ ഗോപാല്‍(28) അറസ്റ്റില്‍. വെള്ളിയാഴ്ചയാണ് കേസിനാസ്പദമായ സംഭവം. വീട്ടുമുറ്റത്തു കുട്ടികള്‍ കളിക്കുന്നിടത്തേക്കുവന്ന് ഇയാള്‍ നഗ്നതാപ്രദര്‍ശനം നടത്തുകയായിരുന്നു. സംഭവം അറിഞ്ഞയുടനെ പോലീസ് അന്വേഷണം ആരംഭിച്ചിരുന്നു. സംഭവശേഷം പല ഉള്‍വഴികളിലൂടെ സഞ്ചരിച്ച് രക്ഷപ്പെട്ട ഇയാളെ കഴിഞ്ഞദിവസം രാത്രി കോടാലി മൂന്നുമുറിയില്‍നിന്നാണ് പിടികൂടിയത്. ഇയാള്‍ സഞ്ചരിച്ച കാറും കസ്റ്റഡിയിലെടുത്തു. കോടതില്‍ ഹാജരാക്കിയ ഗോപാലിനെ റിമാന്‌ഡ് ചെയ്തു. ഇരിങ്ങാലക്കുട ഡിവൈഎസ്പി കെ.ജി. സുരേഷ്, ആളൂര്‍ എസ്‌ഐ എം. അഫ്‌സല്‍, എഎസ്ഐ വി.എം. മിനിമോള്‍, സീനിയര്‍ സിപിഒ ഇ.എസ്. ജീവന്‍, സിപിഒ കെ.എസ്. ഉമേഷ് എന്നിവരാണ് പോലീസ് സംഘത്തിലുണ്ടായിരുന്നത്.

അപകടശേഷം വാഹനം നിര്‍ത്താതെപോയ പ്രതി അറസ്റ്റില്‍

കാട്ടൂര്‍: അപകടശേഷം നിര്‍ത്താതെപോയ വാഹനാപകടക്കേസിലെ പ്രതിയെ അറസ്റ്റുചെയ്തു. വാഹനമായ യമഹ സ്‌കൂട്ടറും കണ്ടെടുത്തു. കാട്ടൂര്‍ ലേബര്‍ സെന്‍റര്‍ സ്വദേശി ചുരയ്ക്കല്‍വീട്ടില്‍ ഉണ്ണികൃഷ്ണന്‍(48) ആണ് പിടിയിലായത്. ജനുവരി 15ന് വൈകുന്നേരം 7.30ന് ലേബര്‍ സെന്‍ററില്‍വച്ച് കാട്ടൂര്‍ ഫാത്തിമ മാതാ പള്ളിയില്‍ പ്രാര്‍ഥനകഴിഞ്ഞു അയല്‍വാസിക്കൊപ്പം വീട്ടിലേക്ക് മടങ്ങുകയായിരുന്ന കാട്ടൂര്‍ നെടുമ്പുര ലേബര്‍സെന്‍ററില്‍ താമസിക്കുന്ന ചിറ്റിലപ്പിള്ളി വീട്ടില്‍ ജോസഫ് ഭാര്യ ക്രിസ്റ്റീന(58)യെയാണ് സ്‌കൂട്ടര്‍ ഇടിച്ചത്. ക്രിസ്റ്റീനയുടെ തലയോട്ടിപൊട്ടി ഗുരുതരപരിക്കേല്‍ക്കുകയും മണം തിരിച്ചറിയാനുള്ള സംവേദനശേഷി നഷ്ടപെടുകയും ചെയ്തു. ഇവരുടെ പരാതിയില്‍ കാട്ടൂര്‍ പോലീസ‌്സ്റ്റേഷനില്‍ എഫ്‌ഐആര്‍ രജിസ്റ്റര്‍ചെയ്ത് കേസെടുത്തു. കാട്ടൂര്‍ സിഐ ഇ.ആര്‍. ബൈജുവിന്‍റെ നേതൃത്വത്തിലുള്ള അന്വേഷണസംഘം സിസിടിവി കാമറകള്‍ പരിശോധിച്ചുലഭിച്ച തെളിവുകളുടെ അടിസ്ഥാനത്തിലാണ് പ്രതിയെ പിടികൂടിയത്. അസിസ്റ്റന്‍റ് സബ് ഇന്‍സ്‌പെക്ടര്‍ എം.കെ. അസീസ്, സിപിഒ കിരണ്‍ എന്നിവരും അന്വേഷണസംഘത്തില്‍ ഉണ്ടായിരുന്നു.

പടക്കംപൊട്ടിച്ചതിനെതുടർന്ന് ആക്രമണം: രണ്ടുപേർ അറസ്റ്റിൽ

കയ്പമംഗലം: പടക്കംപൊട്ടിച്ചതിനെ തുടർന്നുണ്ടായ അക്രമസംഭവത്തിൽ രണ്ടുപേർ അറസ്റ്റിൽ. കയ്പമംഗലം പുന്നയ്ക്കച്ചാൽ മാടത്തിങ്കൽ വീട്ടിൽ ലാലു(53), കയ്പമംഗലം കൈതവളപ്പിൽ വീട്ടിൽ അക്ഷയ് (20) എന്നിവരെയാണ് കയ്പമംഗലം പോലീസ് അറസ്റ്റ് ചെയ്തത്. പതിമൂന്നിന് രാത്രി 10 മണിയോടെ അക്ഷയും സുഹൃത്ത് ആദിത്യനും ബീച്ചിന് സമീപം പടക്കംപൊട്ടിച്ചതിന്‍റെ വിരോധത്തിൽ ലാലു അക്ഷയെയും ആദിത്യനെയും പിടിച്ചുതള്ളുകയും ലാലുവിന്‍റെ കൂടെയുണ്ടായിരുന്ന ഒരാൾ ആദിത്യനെ മർദിക്കുകയും ചെയ്തു. തുടർന്ന് ലാലു തൊട്ടടുത്തുള്ളവീട്ടിൽനിന്നു കത്തിയുമായിവന്ന് വീശുകയും അക്ഷയുടെ ഷോൾഡറിൽ ഗുരുതരമായ പരിക്കുപറ്റുകയുമായിരുന്നു. തടയാൻവന്ന ആദിത്യന്‍റെ കഴുത്തിൽവെട്ടി ഗുരുതരപരിക്കേൽപ്പിക്കുകയുംചെയ്തു. ലാലുവിനെ മര്‌ദിക്കുകയും ലാലുവിന്‍റെ ഭാര്യയെ ചവിട്ടുകയും ചെയ്ത സംഭവത്തിലാണ് അക്ഷയ് അറസ്റ്റിലായത്. കയ്പമംഗലം സിഐ കെ.ആർ. ബിജു, സബ് ഇൻസ്പെക്ടർമാരായ അഭിലാഷ്, ജൈസൺ, മുഹമ്മദ് സിയാദ്, സീനിയർ സിവിൽ പോലീസ് ഓഫിസർ അൻവറുദ്ദീൻ, സിവിൽ പോലീസ് ഓഫിസർമാരായ സൂരജ്, ശ്യാംകുമാർ, ഗില്‍ബട്ട് ജേക്കബ് എന്നിവരാണ് പ്രതികളെ പിടികൂടിയത്.

ബാറിൽ അതിക്രമിച്ചുകയറി ജീവനക്കാരെ ആക്രമിച്ചു: ഏഴുപേര്‌ അറസ്റ്റില്‌

മൂന്നുപീടിക: അറവുശാല ചാന്ദ്‌വി ബാറില്‌ അതിക്രമിച്ചുകയറി സെക്യൂരിറ്റി ജീവനക്കാരനെയും മറ്റു സ്റ്റാഫുകളെയും ആക്രമിച്ച കേസിൽ ഏഴു യുവാക്കളെ പോലീസ് അറസ്റ്റ് ചെയ്തു. നാട്ടിക ബീച്ച് ദേശത്ത് കരേപറമ്പിൽവീട്ടിൽ അമൽ(23), വലപ്പാട് കളരിക്കൽവീട്ടിൽ ആദർശ്(24), നാട്ടിക ബീച്ച് പുളിക്കൽവീട്ടിൽ എബൽ(24), വലപ്പാട് ഡിസ്കോ സെന്‍റർ ചാണാടിക്കൽവീട്ടിൽ അഖിൻ കൃഷ്ണ(25), നാട്ടിക വില്ലേജിൽ തൃപ്രയാർ കളരിക്കൽ വീട്ടിൽ അഭിഷേക്(19), നാട്ടിക ബീച്ച് ദേശത്ത് പാണാട്ടുകയിൽവീട്ടിൽ മുഹമ്മദ് ഹസൻ(20), വലപ്പാട്, അഞ്ചലശേരിവീട്ടിൽ അക്ഷയ്(23) എന്നിവരെയാണ് കയ്പമംഗലം പോലീസ് അറസ്റ്റ് ചെയ്തത്. വിഷുദിവസം പുലർച്ചെ 1.30 മണിയോടെ ഇവര്‌ ഇരുമ്പ് പൈപ്പുകൾ കൈവശംവച്ച് ബാറിലെ സെക്യൂരിറ്റി ജീവനക്കാരനായ ജയന്തനെ മർദിക്കുകയും ബാറില്‌ അതിക്രമിച്ചുകയറി സ്റ്റാഫുകളെ ആക്രമിച്ചെന്നുമാണ് കേസ്. സംഭവത്തെത്തുടർന്ന് കയ്പമംഗലം പോലീസ് നടത്തിയ അന്വേഷണത്തിൽ ഏഴ് പ്രതികളെയും അറസ്റ്റ് ചെയ്യുകയായിരുന്നു.കയ്പമംഗലം സ്റ്റേഷൻ ഇൻസ്പെക്ടർ കെ.ആർ. ബിജു, സബ് ഇൻസ്പെക്ടർമാരായ അഭിലാഷ്, ജൈസൺ, മുഹമ്മദ് സിയാദ്, സീനിയർ സിവിൽ പോലീസ് ഓഫിസർ അൻവറുദ്ദീൻ, സിവിൽ പോലീസ് ഓഫിസർമാരായ സൂരജ്, ശ്യാംകുമാർ, ഗില്‍ബട്ട് ജേക്കബ് എന്നിവരാണ് പ്രതികളെ പിടികൂടിയത്.

നെട്ടിശേരി പൂരം മുടങ്ങിയ സംഭവം: ദേവസ്വം ബോർഡ് വിശ്വാസികളെ വഞ്ചിച്ചുവെന്ന് ഉത്സവക്കമ്മിറ്റി

തൃശൂർ: നെട്ടിശേരി ധർമശാസ്താക്ഷേത്രത്തിൽ പൂരം മുടങ്ങിയ സംഭവത്തിൽ കൊച്ചിൻ ദേവസ്വം ബോർഡിനെതിരേ പ്രതിഷേധം തുടരുന്നു. ആനകളെ കൃത്യമായി എത്തിച്ചുനൽകാത്ത ദേവസ്വം ബോർഡ് വിശ്വാസികളെ വഞ്ചിച്ചുവെന്നും ഉത്സവാഘോഷ കമ്മിറ്റി. വിഷയത്തിൽ അന്വേഷണം നടത്തി കുറ്റക്കാർക്കെതിരേ നിയമനടപടി സ്വീകരിച്ചില്ലെങ്കിൽ പ്രതിഷേധം ദേവസ്വം ബോർഡിനു മുൻപിലേക്കു വ്യാപിപ്പിക്കുമെന്നും മുന്നറിയിപ്പ്. കഴിഞ്ഞ 11 നാണ് ക്ഷേത്രത്തിലെ പൂരാഘോഷം നടന്നത്. ആവശ്യമുള്ള ആനകളെ നൽകാതെ ദേവസ്വം ആഘോഷങ്ങൾ മുടക്കി എന്നാരോപിച്ച് വിശ്വാസികൾ കുത്തിയിരിപ്പുസമരം നടത്തിയിട്ടും, പ്രശ്നം നടന്ന് ദിവസങ്ങൾ പിന്നിട്ടിട്ടും ബന്ധപ്പെട്ട അധികാരികൾ തിരിഞ്ഞുനോക്കിയില്ലെന്ന് ആക്ഷേപമുണ്ട്. ആവശ്യമായ ആനകളെ നൽകിയെന്ന ദേവസ്വം ബോർഡിന്‍റെ പ്രസ്താവന അടിസ്ഥാനരഹിതമാണെന്നും ഭാരവാഹികൾ പറഞ്ഞു. പകൽപ്പൂരം മുടങ്ങിയതിനുപിന്നാലെ രാത്രിയിൽ നടക്കേണ്ടിയിരുന്ന തറയ്ക്കൽ പൂരവും മുടങ്ങിയിരുന്നു. തുടർന്നു രണ്ടു എഴുന്നള്ളിപ്പുകളും ചടങ്ങുകളായി നടത്തേണ്ടിവന്നു. പ്രതിഷേധം ശക്തമായതോടെ രാത്രി വൈകിയാണ് അസിസ്റ്റന്‍റ് കമ്മീഷണർ പദവിയിലുള്ള ഒരു ഉദ്യോഗസ്ഥനെങ്കിലും എത്തിയത്. ‌പത്രമ്മേളനത്തിൽ ഉത്സവാഘോഷകമ്മിറ്റി പ്രസിഡന്‍റ് കെ.കെ. ഉണ്ണികൃഷ്ണൻ, ഇ. സരീഷ്, യു. മോഹൻദാസ്, സി.എസ്. രഘുനന്ദനൻ, ടി. രാമചന്ദ്രൻ എന്നിവർ പങ്കെടുത്തു.

ലഹരിക്കെതിരേ പുസ്തകവിതരണം

മണ്ണുത്തി: ലഹരിക്കെതിരേ പുസ്തകവിതരണവുമായി തൃശൂർ ദേവമാത സ്കൂളിലെ അധ്യാപകനായ എ.ഡി. ഷാജു. വായനയിലൂടെ ലഹരി ജീവിതം എന്ന മുദ്രവാക്യവുമായി ലഹരി ജീവിതം എന്ന പുസ്തകം എഴുതി സൗജന്യമായാണ് 500 പേർക്കു നല്കിയത്. ദേവമാത സ്കൂൾ, നെല്ലിക്കുന്ന് പള്ളി, സെന്‍റ് സെബാസ്റ്റ്യൻ സ്കൂൾ, മണ്ണുത്തി സെന്‍റർ, അതിരൂപത പാസ്റ്ററൽ സെന്‍റർ, സീനിയർ സംഗമം എന്നിവിടങ്ങളിലെ വിവിധ കൂട്ടായ്മകളിലും ഫോർമേഷൻ ക്യാമ്പുകളിലുമാണു പുസ്തകങ്ങൾ നൽകിയത്. തൃശൂരിൽ പുസ്തകവിതരണം അതിരൂപത വികാരി ജനറാൾ മോൺ. ജോസ് കോനിക്കരയും നെല്ലിക്കുന്നിൽ കൗൺസിലർ മേഴ്സി അജിയും ഉദ്ഘാടനം ചെയ്തു. ലോക പുസ്തകദിനത്തിന്‍റെ ഭാഗമായി 22നും 23നും സാഹിത്യ അക്കാദമിയിലും ലഹരിമുക്ത പുസ്തകവിതരണം നടത്തും.

കുട്ടംകുളം പള്ളിയിൽ വിശുദ്ധ കുരിശ് സ്ഥാപിച്ചു

വേലൂർ: കുട്ടംകുളം സെന്‍റ് ജോൺ ദ ഇവാഞ്ചലിസ്റ്റ് നവദേവാലയത്തിൽ വിശുദ്ധ കുരിശ് സ്ഥാപിച്ചു. അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് വെഞ്ചരിച്ച് ആശീർവദിച്ച കുരിശ് ആഘോഷമായ ദിവ്യബലിക്ക് ശേഷം അതിരൂപത സഹായ മെത്രാൻ മാർ ടോണി നീലങ്കാവിൽ പ്രതിഷ്‌ഠിച്ചു. ഇടവകയിലെ കുഞ്ഞുമക്കൾ മുതൽ എല്ലാ പ്രായത്തിലുള്ളവരും വൈകുന്നേരങ്ങളിൽ വന്ന് അധ്വാനിച്ചുകൊണ്ടാണ് പള്ളി നിർമാണം മുന്നോട്ട് പോകുന്നത്. കുരിശ് സ്ഥാപിച്ചതോടെ ദേവാലയ നിർമാണം പുതിയ ഘട്ടത്തിലേക്ക് ചുവടുവച്ചു. ഇടവക വികാരി ഫാ. സോബിൻ പായ്യിക്കാട്ട് അധ്യക്ഷത വഹിച്ചു. ഫാ. സേവി പുത്തിരി, കൈകാരന്മാരായ ലോറൻസ് കിടങ്ങൻ, വർഗീസ് ചീരമ്പൻ, ജോസഫ് കിടങ്ങൻ എന്നിവർ നേതൃത്വം നൽകി.

വീടെന്ന സ്വപ്നം യാഥാർഥ്യമായി

ഗുരുവായൂർ: സർക്കാരിന്‍റെ പിഎംഎവൈ ഭവനപദ്ധതിയിലെ തുകയും വാർഡ് കൗൺസിലറുടെ ഇടപെടലും കൂടി ആയതോടെ നിർധന കുടുംബത്തിന് വീടെന്ന സ്വപ്നം യാഥാർഥ്യമായി. മമ്മിയൂർ പടിഞ്ഞാറെനടയിലെ കസ്തൂർബ ബാലികസദനം റോഡിലെ പെരിങ്ങാടൻ കൃഷ്ണനും ഭാര്യ പ്രസന്നകുമാരി, ഓട്ടിസം ബാധിച്ച മകൻ ഹരികൃഷ്ണൻ എന്നിവർക്കാണ് പുതിയ വീട് നിർമിച്ച് നൽകിയത്. വിഷുദിനത്തിൽ കുടുംബം പുതിയ വീട്ടിൽ താമസം തുടങ്ങി. 15-ാം വാർഡ് കൗൺസിലർ രേണുക ശങ്കർ, വാർഡിലെ താമസക്കാരിയും എൻജിനീയറുമായ നിഷ വർമ എന്നിവരുടെ നേതൃത്വത്തിൽ സർക്കാർ തുകക്കൊപ്പം സുമനസുകളുടെ സഹകരണത്തോടെയാണ് വീടു നിർമാണത്തിന് ആവശ്യമായ ബാക്കി തുക കണ്ടെത്തിയത്. പിഎംഎവൈ പദ്ധതിയിൽ നാലു ലക്ഷമാണ് ലഭിക്കുക. ഇതിന് പുറമെ തൊഴിലുറപ്പ് പദ്ധതിയിൽ പെടുത്തി 31000 രൂപയും ലഭിക്കും. 3.60 ലക്ഷം നഗരസഭ കൈമാറി. വീടിന്‍റെ പൂർത്തീകരണ സർട്ടിഫിക്കറ്റ് നൽകിയാൽ അവസാന ഗഡു ലഭിക്കും. എട്ട് ലക്ഷം ചെലവിൽ 500 ചതുരശ്ര അടി വിസ്തീർണമുള്ള വീടാണ് നിർമിച്ചിട്ടുള്ളത്. വിഷു ദിനത്തിൽ പുതിയ വീട്ടിലേക്ക് മാറാനായ സന്തോഷത്തിലാണ് കൃഷ്ണനും കുടുംബവും.

ഫ്രാൻസിസ്കൻ അല്മായസഭ അതിരൂപത മഹോത്സവം

കുറുമാൽ: ഫ്രാൻസിസ്കൻ അല്മായസഭ (എസ്എഫ്ഒ) അതിരൂപത മഹോത്സവം കുറുമാൽ ഗാഗുൽത്താ ധ്യാനകേന്ദ്രത്തിൽ നടത്തി. സഹായമെത്രാൻ മാർ ടോണി നീലങ്കാവിൽ ഉദ്ഘാടനം നിർവഹിച്ചു. അതിരൂപത പ്രസിഡന്‍റ് ടി.കെ. ഡേവിസ് അധ്യക്ഷനായി. സെക്രട്ടറി പി.എൽ. പോൾ റിപ്പോർട്ട് വായിക്കുകയും ട്രഷറർ ഷാജു കോട്ടപ്പറന്പിൽ കണക്കുകൾ അവതരിപ്പിക്കുകയും ചെയ്തു. സെന്‍റ് തോമസ് പ്രൊവിൻസ് പ്രൊവിൻഷ്യൽ സുപ്പിരിയർ ഫാ. ജെയ്സണ്‍ കാളൻ അനുഗ്രഹപ്രഭാഷണവും വൈസ് പ്രൊവിൻഷ്യൽ ഫാ. ലോട്ടസ് മലേക്കുടി, എഫ്സിസി പ്രൊവിൻഷ്യൽ സുപ്പീരിയർ സിസ്റ്റർ ഫോണ്‍സി മരിയ എന്നിവർ പ്രസംഗിച്ചു. മുൻ നാഷണൽ വൈസ് മിനിസ്റ്റർ ഡോ. ജെറി ജോസഫ്, മുൻ അതിരൂപത പ്രസിഡന്‍റ് പി.ഐ.സൈമണ്‍ മാസ്റ്റർ, ലോഗോസ് ക്വിസ് അതിരൂപത തല റാങ്ക് ജേതാക്കൾ, അതിരൂപത ക്വിസ് മത്സര വിജയികൾ, ഫ്രാൻസിസ്കൻ അത്മായ സഭയിൽ 50 വർഷം പൂർത്തീകരിച്ചവർ, ദേശീയതലങ്ങളിൽ അംഗീകാരം ലഭിച്ച അംഗങ്ങൾ, കഴിഞ്ഞ വർഷം തിരുപ്പട്ടവും നിത്യവ്രതവും സ്വീകരിച്ച വൈദികരുടെയും, സന്യസ്തരുടെയും മാതാപിതാക്കളെയും ചടങ്ങിൽ ആദരിച്ചു. അതിരൂപത ഡയറക്ടർ ഫാ. സിജോ അരിക്കാട്ട് സ്വാഗതവും എക്സിക്യൂട്ടീവ് മെന്പർ സി.കെ.ജോണ്‍സണ്‍ നന്ദിയും പറഞ്ഞു. തുടർന്ന് കുരിയച്ചിറ സെന്‍റ് ജോസഫ് യൂണിറ്റ് അവതരിപ്പിച്ച സ്കിറ്റും അരങ്ങേറി. വിശുദ്ധകുർബാന, വ്രതവാഗ്ദാനം, സ്നേഹവിരുന്ന് എന്നിവയും ഉണ്ടായിരുന്നു.

വായനശാല കെട്ടിടം മന്ത്രി ഉദ്ഘാടനം ചെയ്തു

ചാവക്കാട്: ബ്ലാങ്ങാട് രചന ലൈബ്രറി ആൻഡ് വായനശാല കെട്ടിടത്തിന്‍റെ ഉദ്ഘാടനം മന്ത്രി ആർ. ബിന്ദു നിർവഹിച്ചു. എൻ.കെ. അക്ബർ എംഎൽഎ അധ്യക്ഷത വഹിച്ചു. എംഎൽഎയുടെ വികസന ഫണ്ടിൽ നിന്ന് 15.5 ലക്ഷം രൂപ ചെലവഴിച്ചാണ് കെട്ടിടം നിർമിച്ചത്. മുൻ എംഎൽഎ കെ.വി. അബ്ദുൽ ഖാദർ മുഖ്യാതിഥിയായിരുന്നു. കടപ്പുറം പഞ്ചായത്ത് പ്രസിഡന്‍റ് സാലിഹ ഷൗക്കത്ത്, ബ്ലോക്ക് പഞ്ചായത്ത് മെമ്പർ ഷൈനി ഷാജി, വാർഡ് മെമ്പർ അഡ്വ. മുഹമ്മദ് നാസിഫ്, ലൈബ്രറി പ്രസിഡന്‍റ് എ.പി. മുഹമ്മദ് ഷെരീഫ്, സെക്രട്ടറി ഒ.കെ. വത്സലൻ എന്നിവർ പ്രസംഗിച്ചു.

വിഷുക്കണി ദർശനം; കണ്ണനെ കാണാൻ വൻ ഭക്തജനത്തിരക്ക്

ഗുരുവായൂർ: വിഷുപ്പുലരിയിൽ ദർശന പുണ്യം തേടി ആയിരങ്ങൾ ക്ഷേത്രത്തിലെത്തി. കണ്ണനെ കൺ കുളിർക്കെ കണ്ട് ഭക്തർ ദർശന സായൂജ്യം നേടി. വിഷുദിനമായ ഇന്നലെ പുലർച്ചെ 2.45 മുതൽ 3.45 വരെയായിരുന്നു വിഷുക്കണി ദർശനം. മേൽശാന്തി കവപ്ര മാറത്ത് അച്യുതൻ നമ്പൂതിരി അദ്ദേഹത്തിന്‍റെ മുറിയിൽ കണി കണ്ടശേഷം പുലർച്ചെ രണ്ടോടെ ശ്രീലക വാതിൽ തുറന്ന് നാളികേര മുറിയിൽ നെയ്യ് ഒഴിച്ച് ദീപം തെളിയിച്ച് ഗുരുവായൂരപ്പനെ കണികാണിച്ചു. ഗുരുവായുരപ്പന്‍റെ തങ്കതിടമ്പ് ആലവട്ടവും വെഞ്ചാമരവും കൊണ്ടലങ്കരിച്ച് സ്വർണ സിംഹാസനത്തിൽ വച്ചിരുന്നു. ഇതിന് തഴെയായി ശാന്തിയേറ്റ കീഴ്ശാന്തിമാർ ചേർന്ന് ഓട്ടുരുളിയിൽ കണിക്കോപ്പ് ഒരുക്കിയിരുന്നു. പുലർച്ചെ 2.45 മുതൽ ഭക്തരെ ക്ഷേത്രത്തിലേക്ക് പ്രവേശിപ്പിച്ചു. ആദ്യം ദർശനത്തിനെത്തിയവർക്ക് മേൽശാന്തി വിഷുകൈനീട്ടവും നൽകി. ശ്രീലകത്തിനു പുറമേ നമസ്കാരം മണ്ഡപത്തിലും കണി ഒരുക്കിയിരുന്നു. കണിദർശനം അവസാനിച്ചതോടെ വാകചാർത്തും അഭിഷേകവുമടക്കമുള്ള പതിവ് പൂജകൾ ആരംഭിച്ചു. കണി ദർശനത്തിന് ശേഷവും ഭക്തജന തിരക്ക് തുടർന്നു. ക്ഷേത്രത്തിൽ സമ്പൂർണ നെയ് വിളക്കായാണ് വിഷു വിളക്ക് ആഘോഷിച്ചത്. രമേശ് ചെന്നിത്തല, എഡിജിപി എം.ആർ. അജിത്കുമാർ, വ്യവസായി രവി പിള്ള തുടങ്ങിയ പ്രമുഖർ ദർശനത്തിനെത്തി. വിഷു സദ്യക്കും ആയിരങ്ങൾ പങ്കെടുത്തു.

കരിയന്നൂരിൽ വൻ മണ്ണെടുപ്പ്; ജിയോളജി, റവന്യൂ വകുപ്പുകളുടെ അനുമതിയോടെയെന്ന്

എരുമപ്പെട്ടി: കരിയന്നൂരിൽ വൻ മണ്ണെടുപ്പ്. ജിയോളജി റവന്യൂ വകുപ്പുകളുടെ അനുമതിയുണ്ടെന്ന് അറിയിച്ചാണ് കുന്നിടിച്ച്‌ വൻതോതിൽ മണ്ണ് കടത്തുന്നത്. എരുമപ്പെട്ടി പഞ്ചായത്തിലെ 18-ാം വാർഡിൽ ഉൾപ്പെട്ട കരിയന്നൂർ കുന്നിലാണ് വൻതോതിലുള്ള മണ്ണെടുപ്പ് നടത്തുന്നത്. യത്തീംഖാനയ്ക്ക് സമീപമാണ് കുന്ന് സ്ഥിതിചെയ്യുന്നത്. നിർമാണപ്രവൃത്തികളുടെ മറവിലാണ് കുന്നിടിച്ച് മണ്ണ് കടത്തുന്നത്. വലിയ ടോറസ് ടിപ്പറുകളിലാണ് മണ്ണ് കൊണ്ടുപോകുന്നത്. കുന്നിന്‍റെ പകുതി ഭാഗവും തുരന്നെടുത്ത നിലയിലാണ്. പരിശോധന നടത്താതെയാണ് ജിയോളജി വകുപ്പ് അനുമതി നൽകുന്നതെന്ന് ആരോപണമുണ്ട്. അനുമതി നൽകുന്ന അധികൃതർ പിന്നീട് പ്രദേശത്തക്കു തിരിഞ്ഞുനോക്കുന്നില്ല. ചെറിയ അളവിൽ മണ്ണെടുക്കുവാനുള്ള അനുമതി നേടി വൻതോതിൽ മണ്ണെടുത്ത് വിൽപ്പന നടത്തുകയാണെന്ന് നാട്ടുകാർക്ക് പരാതിയുണ്ട്. പഞ്ചായത്ത്, വില്ലേജ് അധികൃതർ ഇടപ്പെട്ട് മണ്ണെടുപ്പ് നിർത്തിവെയ്ക്കാൻ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

എഐഎസ്എഫ് ജില്ലാ സമ്മേളനം

തൃശൂർ: പിഎം ശ്രീ പദ്ധതിയിൽ കേരളം ഭാഗമായാൽ ഒരു ബ്ലോക്കിലെ രണ്ടു സ്കൂളുകൾവീതം കേന്ദ്രനിയന്ത്രണത്തിലാവുന്ന സ്ഥിതിവിശേഷമുണ്ടാകുമെന്നും കേന്ദ്രപാഠ്യപദ്ധതി പൊതുവിദ്യാഭ്യാസത്തെ രണ്ടുതട്ടിലാക്കുമെന്നും എഐഎസ്എഫ് ജില്ലാ സമ്മേളനം വിലയിരുത്തി. മന്ത്രി കെ. രാജൻ ഉദ്ഘാടനം ചെയ്തു. സിപിഐ ജില്ലാ സെക്രട്ടറി കെ.കെ. വത്സരാജ്, അസി. സെക്രട്ടറിമാരായ പി. ബാലചന്ദ്രൻ, അഡ്വ. ടി.ആർ. രമേഷ്കുമാർ, ടി. പ്രദീപ് കുമാർ, കെ.എസ്. ജയ, എഐവൈഎഫ് ജില്ലാ സെക്രട്ടറി പ്രസാദ് പറേരി, പ്രസിഡന്‍റ് ബിനോയ് ഷബീർ, പി. കബീർ, ആർ.എസ്. രാഹുൽരാജ്, കെ.എ. അഖിലേഷ്, അർജുൻ മുരളീധരൻ എന്നിവർ പ്രസംഗിച്ചു.

എയ്ഡഡ് സ്കൂളുകളിലെ എല്ലാ നിയമനവും പാസാക്കണം: അഡ്വ. ജോസഫ് ടാജറ്റ്

തൃശൂർ: സുപ്രീംകോടതിവിധിയുടെ പശ്ചാത്തലത്തിൽ എയ്ഡഡ് സ്കൂളുകളിലെ എല്ലാ നിയമനവും പാസാക്കണമെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ്. കെപിഎസ്ടിഎ നടത്തിയ രാപ്പകൽ സമരം ഉദ്ഘാടനം ചെയ്യുകയായിരുന്നു അദ്ദേഹം. ഭിന്നശേഷിയുടെ പേരിൽ കേരളത്തിലെ എയ്ഡഡ് സ്കൂളുകളിലെ നിയമനങ്ങൾ സർക്കാർ തടഞ്ഞിരിക്കുകയാണെന്ന് അദ്ദേഹം കുറ്റപ്പെടുത്തി. ജില്ലാ പ്രസിഡന്‍റ് പി.സി. ശ്രീപത്മനാഭൻ അധ്യക്ഷത വഹിച്ചു. ജോസ് വള്ളൂർ, എം.പി. വിൻസെന്‍റ്, ഷാഹിദ റഹ്‌മാൻ, സാജു ജോർജ് എന്നിവർ പ്രസംഗിച്ചു. ജില്ലാ സെക്രട്ടറി ജയപ്രകാശ് പാറപ്പുറത്ത് സ്വാഗതവും ട്രഷറർ മുഹമ്മദ് റാഫി നന്ദിയും പറഞ്ഞു. രാപ്പകൽസമരത്തിന്‍റെ സമാപനസമ്മേളനം ഇന്നു രാവിലെ ഒന്പതിന് യുഡിഎഫ് ചെയർമാൻ ടി.വി. ചന്ദ്രമോഹൻ ഉദ്ഘാടനം ചെയ്യും.

ചെപ്പാറയിൽ കൃഷിഭൂമി പിടിച്ചെടുക്കാൻ അക്രമം; കർഷകകുടുംബം നിരാഹാരസമരത്തിൽ

വടക്കാഞ്ചേരി: 1976നു മുന്പുമുതൽ പരന്പരാഗതമായി കൃഷി ചെയ്തുവരുന്ന ഭൂമി കളിസ്ഥലമായി വിട്ടുനൽകണമെന്നാവശ്യപ്പെട്ട് സിപിഎമ്മിന്‍റെ നേതൃത്വത്തിൽ അക്രമവും കൈയേറ്റവുമെന്നു കുടുംബത്തിന്‍റെ പരാതി. ചെപ്പാറയ്ക്കു സമീപം വടക്കേടത്ത് ചിറയിൽവീട്ടിൽ ജോസഫിന്‍റെ കൈവശഭൂമിയിലാണ് ഇന്നലെ രാവിലെ അക്രമം അരങ്ങേറിയത്. അക്രമത്തിൽ പ്രതിഷേധിച്ച് പത്തുവയസിനുതാഴെയുള്ള മൂന്നു കുട്ടികളക്കം ആറംഗകുടുംബം കൃഷിഭൂമിയിൽ അനിശ്ചിതകാലനിരാഹാരസമരം തുടങ്ങി. വിഷയത്തിൽ ശാശ്വതപരിഹാരം ഉണ്ടാകുംവരെ നിരാഹാരസമരം തുടരുമെന്ന് ജോസഫിന്‍റെ മകൻ ജോബി ദീപികയോടു പറഞ്ഞു. കോടതി ഉത്തരവുപ്രകാരം സംരക്ഷിതവേലി കെട്ടുന്നതിനിടയിലാണ് സംഘടിച്ചെത്തിയവർ അക്രമം അഴിച്ചുവിട്ടത്. ജോസഫിനെയും കുടുംബത്തെയും കൈയേറ്റംചെയ്ത് കാർഷിക ഉപകരണങ്ങൾ നശിപ്പിക്കുകയും തൊഴിലാളികളെ ഭീഷണിപ്പെടുത്തുകയും ചെയ്തു. ജോബിയെ കൊല്ലുമെന്നു ഭീഷണിപ്പെടുത്തി. സംരക്ഷണം ആവശ്യപ്പെട്ട് പോലീസിനെ വിളിച്ചെങ്കിലും വൈകിയെത്തിയ വടക്കാഞ്ചേരി സിഐയുടെ നേതൃത്വത്തിലുള്ള പോലീസ് തങ്ങൾക്കു സംരക്ഷണം നൽകുന്നതിനു പകരം അക്രമികൾക്കൊപ്പം നിൽക്കുകയായിരുന്നുവെന്നു കുടുംബം ആരോപിച്ചു. സമരം നടത്തുന്ന വൃദ്ധനായ ജോസഫിനും കുടുംബത്തിനും ജീവനു ഭീഷണിയാകുന്ന തരത്തിൽ എന്തെങ്കിലും സംഭവമുണ്ടായാൽ സിപിഎം നേതൃത്വവും പോലീസും മറുപടി പറയേണ്ടിവരുമെന്ന് സ്ഥലം സന്ദർശിച്ച വടക്കാഞ്ചേരി ബ്ലോക്ക് കോണ്‍ഗ്രസ് പ്രസിഡന്‍റ് പി.ജി. ജയദീപിന്‍റെ നേതൃത്വത്തിലുള്ള പ്രതിനിധിസംഘം മുന്നറിയിപ്പു നൽകി. ഡിസിസി ജനറൽ സെക്രട്ടറി എൻ.ആർ. സതീശൻ, തെക്കുംകര മണ്ഡലം കോണ്‍ഗ്രസ് പ്രസിഡന്‍റ് ജെയ്സണ്‍ മാത്യു, യൂത്ത് കോണ്‍ഗ്രസ് നിയോജകമണ്ഡലം പ്രസിസന്‍റ് ഒ. ശ്രീകൃഷ്ണൻ, നേതാക്കളായ ജയൻ മംഗലം, ഫിലിപ് ജേക്കബ്, കെ.കെ. അബൂബക്കർ, ജോണി ചിറ്റിലപ്പിള്ളി, ജോഷി കല്ലേയിൽ എന്നിവരടങ്ങിയ പ്രതിനിധിസംഘമാണ് സ്ഥലം സന്ദർശിച്ചത്.

പാലപ്പിള്ളിയിൽ കൂട്ടംതെറ്റിയെത്തിയ കാട്ടാന ഭീതിപരത്തി

പാലപ്പിള്ളി: കാരികുളത്ത് കൂട്ടംതെറ്റിയെത്തിയ കാട്ടാന ഭീതിപരത്തി. ചൊക്കന റോഡിൽ കാരികുളം ഡിസ്പെൻസറിക്കുസമീപത്തെ തെങ്ങിൻതോട്ടത്തിലാണ് ആനയിറങ്ങിയത്. റോഡിനോടുചേർന്നുള്ള പറമ്പിൽ മണിക്കൂറുകളോളമാണ് ആന നിലയുറപ്പിച്ചത്. വാഹന‌യാത്രക്കാർക്കുനേരെ ആന പാഞ്ഞടുക്കുമോയെന്ന ഭീതിയും നാട്ടുകാർക്കുണ്ടായി. വനപാലകരും നാട്ടുകാരും ചേർന്ന് വൈകീട്ടോടെയാണ് ആനയെ കാടുകയറ്റിയത്. ജനവാസമേഖലയിൽ മാസങ്ങളായി കാട്ടാനശല്യം രൂക്ഷമാണെന്നു നാട്ടുകാർ പറഞ്ഞു. വേനൽ കടുത്തതോടെ നാട്ടിലിറങ്ങുന്ന ആനക്കൂട്ടത്തെ കാടുകയറ്റാൻ അധികൃതർ നടപടിയെടുക്കണമെന്നു പ്രദേശവാസികൾ ആവശ്യപ്പെട്ടു.

നാളെ പെസഹാ; മറ്റന്നാൾ ദുഃഖവെള്ളി

തൃശൂർ: ലോകമെന്പാടുമുള്ള ക്രൈസ്തവർ നാളെ പെസഹാതിരുനാൾ ആചരിക്കുകയാണ്. ക്രിസ്തുനാഥൻ വിശുദ്ധ കുർബാന സ്ഥാപിച്ച ദിനമാണ് പെസഹാ. "പെസഹാ' എന്ന വാക്കിന്‍റെ അർഥം "കടന്നുപോകൽ' എന്നാണ്. ഈജിപ്തിലെ ഫറവോയുടെ അടിമത്തത്തിൽനിന്നും ഇസ്രായേൽ ജനത്തെ ദൈവം രക്ഷിച്ച കഥ അനുസ്മരിക്കുന്നതായിരുന്നു അന്നുവരെ പെസഹ. പഴയനിയമത്തിന്‍റെ തുടർച്ചയെന്നോണം ശിഷ്യരുമൊത്ത് പെസഹാ അപ്പം മുറിക്കാനായി ഇരുന്ന ക്രിസ്തു പതിവിൽനിന്നു വിഭിന്നമായി അപ്പവും വീഞ്ഞുനിറച്ച കാസയും എടുത്ത് "ഇതെന്‍റെ ശരീരവും രക്തവുമാകുന്നു; നിങ്ങൾ ഇതുവാങ്ങി ഭക്ഷിക്കുകയും പാനംചെയ്യുകയും ചെയ്യുവിൻ' എന്നരുൾചെയ്തു. ഈ വിശുദ്ധകുർബാനസ്ഥാപനത്തിന്‍റെ തിരുനാളാണ് നാളെ. യേശു തന്‍റെ ശിഷ്യരുടെ പാദങ്ങൾ കഴുകി വിനയത്തിന്‍റെ അത്യുദാത്തമാതൃക തീർത്തതും പെസഹാദിനത്തിലാണ്. ഈ രണ്ട് ഒാർമകളും ലോകമെന്പാടുമുള്ള ക്രൈസ്തവർ നാളെ അനുസ്മരിക്കുകയും ആചരിക്കുകയും ചെയ്യും. സീറോ മലബാർ - മലങ്കര സഭകളിൽ രാവിലെയും ലത്തീൻ സഭയിൽ വൈകീട്ടുമാണ് തിരുക്കർമങ്ങൾ. വിശുദ്ധ കുർബാന സ്ഥാപനദിനമായതിനാൽ രാവിലെ മുതൽ വൈകീട്ടുവരെ അഖണ്ഡ ആരാധനയും രാത്രി പൊതു ആരാധനയും അപ്പംമുറിക്കൽ ശുശ്രൂഷയും നടക്കും. ലത്തീൻ സഭയിൽ അർധരാത്രിവരെ ആരാധന നടക്കും. യേശുക്രിസ്തു ഗാഗുൽത്തായിലെ കുരിശിൽ ജീവൻ വെടിഞ്ഞ് ലോകത്തെ മുഴുവൻ പാപത്തിൽനിന്നും രക്ഷിച്ചുവെന്നാണ് ക്രൈസ്തവവിശ്വാസം. ഇതിന്‍റെ ഒാർമയാണ് ദുഃഖവെള്ളി ആചരണം. രാവിലെ ദേവാലയങ്ങളിൽ പീഡാനുഭവ ചരിത്രവായന ഉൾപ്പടെയുള്ള തിരുക്കർമങ്ങൾ നടക്കും. വൈകീട്ട് പീഡാനുഭവപ്രദക്ഷിണം, നഗരികാണിക്കൽ ശുശ്രൂഷ, പീഡാനുഭവസന്ദേശം എന്നിവ ഉണ്ടായിരിക്കും. ലത്തീൻ സഭയിൽ വൈകീട്ടാണു പീഡാനുഭവ ചരിത്രവായന ഉൾപ്പടെയുള്ള തിരുക്കർമങ്ങൾ. രാത്രി പത്തരയോടെ കബറടക്കവും നടക്കും. വലിയ ആഴ്ചയിലെ ദിനങ്ങളിൽ വിശ്വാസികൾ മലയാറ്റൂർ, കനകമല എന്നിവിടങ്ങളിലേക്കു പാപപരിഹാരയാത്രയും നടത്താറുണ്ട്. തൃശൂർ ലൂർദ് കത്തീഡ്രലിൽ പെസഹാദിനത്തിൽ രാവിലെ 6.30 ന് വിശുദ്ധ കുർബാന, കാൽകഴുകൽ ശുശ്രൂഷ, ദിവ്യകാരുണ്യപ്രദക്ഷിണം എന്നിവയ്ക്കു സഹായമെത്രാൻ മാർ ടോണി നീലങ്കാവിൽ മുഖ്യകാർമികത്വം വഹിക്കും. രാവിലെ ഒന്പതുമുതൽ രാത്രി 7.30 വരെ ആരാധന. ഏഴരയ്ക്കു പൊതു ആരാധന. എട്ടിന് പെസഹാ അപ്പം മുറിക്കൽ ശുശ്രൂഷ. ദുഃഖവെള്ളിയാഴ്ച രാവിലെ ആറിന് ആരാധന. 6.30 ന് പീഡാനുഭവചരിത്രവായന, തിരുക്കർമങ്ങൾ എന്നിവയ്ക്ക് ആർച്ച്ബിഷപ് മാർ ആൻഡ്രൂസ് താഴത്ത് മുഖ്യകാർമികത്വം വഹിക്കും. വൈകീട്ട് അഞ്ചിന് നഗരികാണിക്കൽ പ്രദക്ഷിണവും കുരിശിന്‍റെ വഴിയും. ഫാ. ഷിജോ ചിരിയങ്കണ്ടത്ത് പീഡാനുഭവദിന സന്ദേശം നൽകും. വ്യാകുലമാതാവിൻ ബസിലിക്കയിൽ പെസഹാദിനത്തിൽ രാവിലെ 6.30 ന് വിശുദ്ധ കുർബാന, കാൽകഴുകൽശുശ്രൂഷ, ദിവ്യകാരുണ്യപ്രദക്ഷിണം എന്നിവയ്ക്ക് ആർച്ച്ബിഷപ് മാർ ആൻഡ്രൂസ് താഴത്ത് മുഖ്യകാർമികത്വം വഹിക്കും. രാവിലെ ഒന്പതുമുതൽ രാത്രി ഏഴുവരെ ആരാധന. ഏഴിന് പൊതു ആരാധന. എട്ടിന് പെസഹാ അപ്പം മുറിക്കൽ ശുശ്രൂഷ, നാടകം. ദുഃഖവെള്ളിയാഴ്ച രാവിലെ 6.30 ന് പീഡാനുഭവചരിത്രവായന, തിരുക്കർമങ്ങൾ എന്നിവയ്ക്ക് സഹായമെത്രാൻ മാർ ടോണി നീലങ്കാവിൽ കാർമികത്വം വഹിക്കും. വൈകീട്ട് 4.30 ന് ഫാ. ഡേവിസ് വിതയത്തിൽ ഒഎഫ്എം കപ്പൂച്ചിൻ പീഡാനുഭവദിനസന്ദേശം നൽകും. തുടർന്ന് ആർച്ച്ബിഷപ് മാർ ആൻഡ്രൂസ് താഴത്തിന്‍റെ നേതൃത്വത്തിൽ സ്വരാജ് റൗണ്ടിലൂടെ നഗരികാണിക്കൽ പ്രദക്ഷിണവും കുരിശിന്‍റെ വഴിയും. ഇരിങ്ങാലക്കുട സെന്‍റ്് തോമസ് കത്തീഡ്രലില്‍ പെസഹാദിനത്തിൽ രാവിലെ ഏഴിന് വിശുദ്ധ കുർബാന, കാൽകഴുകൽ ശുശ്രൂഷ, ദിവ്യകാരുണ്യപ്രദക്ഷിണം എന്നിവ നടക്കും. ബിഷപ് മാർ പോളി കണ്ണൂക്കാടൻ മുഖ്യകാർമികത്വം വഹിക്കും. തുടര്‍ന്ന് ഒമ്പതുമുതല്‍ രാത്രി ഏഴുവരെ ആരാധന. രാത്രി ഏഴിന് പൊതു ആരാധന, എട്ടിന് പെസഹാ അപ്പം മുറിക്കല്‍ ശുശ്രൂഷ. ദുഃഖവെള്ളിദിനത്തില്‍ രാവിലെ ആറിന് ആരാധന, ഏഴിന് പീഡാനുഭവശുശ്രൂഷ. ഉച്ചതിരിഞ്ഞ് മൂന്നിനു പീഡാനുഭവസന്ദേശം, നഗരികാണിക്കല്‍ ശുശ്രൂഷ എന്നിവയ്ക്ക് ബിഷപ് മാർ പോളി കണ്ണൂക്കാടൻ മുഖ്യകാർമികത്വം വഹിക്കും. കോട്ടപ്പുറം സെന്‍റ് മൈക്കിൾസ് കത്തീഡ്രലിൽ പെസഹാദിനത്തിൽ രാവിലെ 7.30 ന് ബിഷപ് ഡോ. അംബ്രോസ് പുത്തൻവീട്ടിലിന്‍റെ മുഖ്യകാർമികത്വത്തിൽ രൂപതയിലെ മുഴുവൻ വൈദികരും സഹകാർമികരായുള്ള തൈലപരികർമബലി. വൈകീട്ട് 5.30 ന് ബിഷപ്പിന്‍റെ മുഖ്യകാർമികത്വത്തിൽ തിരുവത്താഴപൂജ, പാദക്ഷാളനകർമം. ഫാ. ജൊവാക്കിം കുഞ്ഞുമോൻ കണ്ണങ്കേരിൽ വചനസന്ദേശം നൽകും. തുടർന്ന് അർധരാത്രി 12 വരെ ആരാധന. ദുഃഖവെള്ളിദിനത്തില്‍ വൈകീട്ട് അഞ്ചിന് പീഡാനുഭവവായന, കുരിശാരാധന, ദിവ്യകാരുണ്യ സ്വീകരണം, നഗരികാണിക്കൽ എന്നീ തിരുക്കർമങ്ങൾക്ക് ബിഷപ് ഡോ. അംബ്രോസ് പുത്തൻവീട്ടിൽ മുഖ്യകാർമികത്വം വഹിക്കും. ഫാ. ജോബി ജോസഫ് ആര്യഞ്ചേരി പീഡാനുഭവസന്ദേശം നൽകും. തൃശൂർ മാർത്ത് മറിയം വലിയ പള്ളിയിൽ പെസഹാദിനത്തിൽ രാവിലെ ഏഴിന് ധ്യാനപ്രസംഗം. 8.30ന് മൽക്യ കൂദാശ. മാർ ഔഗിൻ കുര്യാക്കോസ് മെത്രാപ്പോലീത്ത മുഖ്യകാർമികത്വം വഹിക്കും. ഉച്ചതിരിഞ്ഞ് 2.15ന് കാൽകഴുകൽ ശുശ്രുഷ, വിശുദ്ധ കുർബാന, പെസഹാ ഉൗട്ട്. ദുഃഖവെള്ളിദിനത്തില്‍ രാവിലെ ആറിന് കുരിശുചായ്ക്കൽ ശുശ്രൂഷ. ഏഴിനു പ്രാർഥനയും ധ്യാനപ്രസംഗവും. ഉച്ചതിരിഞ്ഞ് നാലിന് പ്രാർഥന, കഷ്ടാനുഭവധ്യാന പ്രസംഗം.

പൂരം വെടിക്കെട്ട് ഗംഭീരമായി നടത്തും: മന്ത്രിമാർ

തൃശൂർ: സുരക്ഷയിൽ വിട്ടുവീഴ്ചയില്ലാതെ തൃശൂർ പൂരം വെടിക്കെട്ട് ഗംഭീരമായി നടത്തുമെന്നു മന്ത്രിമാരായ അഡ്വ. കെ. രാജനും ഡോ. ആർ. ബിന്ദുവും പത്രസമ്മേളനത്തിൽ പറഞ്ഞു. സാധാരണരീതിയിൽ വെടിക്കെട്ട് നടത്തുന്നതിൽ പ്രയാസമില്ല. വെടിമരുന്ന് സൂക്ഷിക്കുന്ന അറ (മാഗസിൻ) ശൂന്യമാക്കിവയ്ക്കണമെന്ന പൊതുനിബന്ധന പാലിച്ചാണ് ഇപ്രാവശ്യം പൂരത്തിനു വെടിക്കെട്ട് നടത്തുക. പൂരത്തിന്‍റെ എല്ലാ ശോഭയും വെടിക്കെട്ടിനുണ്ടാകുമെന്നും നിയമോപദേശം സ്വീകരിച്ച് വേണ്ട നടപടികൾ സ്വീകരിക്കുമെന്നും മന്ത്രി കെ. രാജൻ പറഞ്ഞു. ജനങ്ങൾക്കു ബുദ്ധിമുട്ടില്ലാത്ത രീതിയിൽ പൂർണസുരക്ഷ ഉറപ്പുവരുത്തി എല്ലാവർക്കും വെടിക്കെട്ട് ആസ്വദിക്കാൻവേണ്ട നടപടികൾ സ്വീകരിക്കും. നിയമപരമായി പ്രയാസങ്ങളില്ലാത്ത രീതിയിൽ ജനങ്ങളുടെ അഭിലാഷത്തിനനുസരിച്ചു വെടിക്കെട്ട് നടത്താൻ വേണ്ട നടപടികൾ ജില്ലാ ഭരണകൂടം സ്വീകരിക്കുന്നുണ്ടെന്നു മന്ത്രി ഡോ. ആർ. ബിന്ദു പറഞ്ഞു. കളക്ടറേറ്റ് കോൺഫറൻസ് ഹാളിൽ നടന്ന പത്രസമ്മേളനത്തിൽ ജില്ലാ കളക്ടർ അർജുൻ പാണ്ഡ്യനും പങ്കെടുത്തു.

സർക്കാർ നെൽകർഷകരെ വലയ്ക്കുന്നു: അഡ്വ. ജോസഫ് ടാജറ്റ്

അയ്യന്തോൾ: തൊടുന്യായങ്ങൾ നിരത്തി നെല്ലുസംഭരണം യഥാസമയം നടത്താതെ സർക്കാർ നെൽകർഷകരെ വലയ്ക്കുകയാണെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ്. നെല്ലുസംഭരണത്തിലെ അപാകതകൾ അടിയന്തരമായി പരിഹരിക്കണമെന്ന് ആവശ്യപ്പെട്ട് കോൺഗ്രസ് മണ്ഡലം കമ്മിറ്റി നടത്തിയ കളക്ടറേറ്റ് മാർച്ചും ധർണയും ഉദ്ഘാടനംചെയ്യുകയായിരുന്നു അദ്ദേഹം. പതിരു കൂടുതലാണെന്നും ഈർപ്പമുണ്ടെന്നുംപറഞ്ഞ് ശേഖരിക്കുന്ന നെല്ലിനു തൂക്കത്തിൽ കുറവ് ആവശ്യപ്പെടുകയാണ്. കൂടാതെ സപ്ലൈകോ ഒരു ക്വിന്‍റൽ നെല്ലിന് 64 കിലോയ്ക്കു പകരം 68കിലോ ആവശ്യപ്പെടുന്നുവെന്നുപറഞ്ഞ് മറ്റു കിഴിവുകൾക്കും കർഷകരെ നിർബന്ധിക്കുന്നു. നാലുവർഷമായി താങ്ങുവില കൂട്ടിനൽകിയിട്ട്. എല്ലാം പരിശോധിച്ചാണു സർക്കാർ 28.32 രൂപ നൽകുന്നത്. അതുതന്നെ കുറവായി കർഷകർ ജീവിക്കാനായി പാടുപെടുമ്പോഴാണ് തൂക്കത്തിൽ കുറവുചോദിച്ച് കർഷകരെ വലയ്ക്കുന്നത്. കർഷകന്‍റെ കണ്ണീർ കാണാൻ ഇനിയെങ്കിലും അധികൃതർ തയാറാകണമെന്നു ജോസഫ് ടാജറ്റ് പറഞ്ഞു. മണ്ഡലം പ്രസിഡന്‍റ് കെ. സുരേഷ് അധ്യക്ഷത വഹിച്ചു. കെപിസിസി സെക്രട്ടറി എ. പ്രസാദ് മുഖ്യപ്രഭാഷണം നടത്തി. ബൈജു വർഗീസ്, സിജോ കടവിൽ, ഫ്രാൻസീസ് ചാലിശേരി തുടങ്ങിയവർ പങ്കെടുത്തു.

കാറിടിച്ച് സൈക്കിൾ യാത്രികനായ ലോട്ടറി വില്പനത്തൊഴിലാളി മരിച്ചു

ചാലക്കുടി: ഇന്നോവ കാറിടിച്ച് സൈക്കിൾ യാത്രക്കാരൻ മരിച്ചു. ചാലക്കുടി കൂടപ്പുഴ പടിയുക്കാരൻ ചാക്കപ്പൻ മകൻ ജോണി (71) ആണ് മരിച്ചത്. തിങ്കളാഴ്ച രാത്രി 7.30 ന് പഴയ ദേശീയപാതയിൽ മഡോണയ്ക്കു സമീപമായിരുന്നു അപകടം. ലോട്ടറി വില്പന കഴിഞ്ഞു വീട്ടിലേക്ക് മടങ്ങുമ്പോൾ വേഗതയിലെത്തിയ കാർ ജോണിയെ ഇടിച്ചുവീഴ്ത്തിയശേഷം നിറുത്താതെ പോകുകയായിരുന്നു. പരിക്കേറ്റ് റോഡിൽ വീണുകിടന്ന ജോണിയെ എറെ നേരം കഴിഞ്ഞ് സെന്‍റ് ജെയിംസ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ബൈക്ക് യാത്രക്കാരെയാണ് ആദ്യം ഇന്നോവ കാർ ഇടിക്കേണ്ടിയിരുന്നത്. ബൈക്ക് യാത്രക്കാർ ഒഴിഞ്ഞുമാറിയതിനാൽ രക്ഷപ്പെട്ടു. ഇതിനു ശേഷം സൈക്കിളിൽ ഇടിച്ച് നിർത്താതെ പോയ കാറിനെ ബൈക്ക് യാത്രികർ പിന്തുടർന്നുവെങ്കിലും രക്ഷപ്പെട്ടു. കാറിന്‍റെ നമ്പർ ബൈക്ക് യാത്രികർ പോലീസിനു കൈമാറുകയും വാഹനഉടമയെ തിരിച്ചറിയുകയും ചെയ്തിട്ടുണ്ട്. ജോണി കോൺഗ്രസ് കൂടപ്പുഴ ബൂത്ത് പ്രസിഡന്‍റാണ്. സംസ്കാരം നടത്തി. ഭാര്യ: ലിസി. മകൻ: ഷെറിൻ.

വാഹനാപകടത്തിൽ പരിക്കേറ്റ വാദ്യകലാകാരൻ മരിച്ചു

പറപ്പൂർ: സെന്‍ററിൽ ടെംമ്പോ ട്രാവലറും ബൈക്കും കൂട്ടിയിടിച്ച് ഗുരുതരമായി പരിക്കേറ്റ് ചികിത്സയിലായിരുന്ന യുവാവ് മരിച്ചു. പറപ്പൂർ ഓട്ടുകമ്പനിക്കു സമീപം ചാലയ്ക്കൽ ഓമനയുടെയും കോഞ്ഞങ്ങത്ത് രാജന്‍റെയും മകനായ രവിജിത്ത്(30) ആണ് മെഡിക്കൽ കോളജിൽ ചികിത്സയിലിരിക്കെ മരിച്ചത്. രവിജിത്ത് വാദ്യകലാകാരനാണ്. ഏപ്രിൽ രണ്ടിന് രാത്രിയായിരുന്നു സംഭവം. അശ്രദ്ധമായി റോഡ് മുറിച്ചു കടക്കുന്നതിനിടെ രവിജിത്തിന്‍റെ ബൈക്കിൽ ഗുരുവായൂരിലേക്ക് പോവുകയായിരുന്ന ടെംമ്പോ ട്രാവലർ ഇടിക്കുകയായിരുന്നു. ഉടൻ തന്നെ പറപ്പൂർ ആക്ട്‌സ് പ്രവർത്തകർ രവിജിത്തിനെ സ്വകാര്യആശുപത്രിയിൽ എത്തിക്കുകയും പിന്നീട് വിദഗ്ധ ചികിത്സയ്ക്കായി മെഡിക്കൽ കോളജിലേക്ക് മാറ്റുകയും ചെയ്തു. എന്നാൽ ചികിത്സയിലിരിക്കെ രവിജിത്ത് മരണത്തിന് കീഴടങ്ങി. സംസ്കാരം നടത്തി.

ബൈക്ക് മറിഞ്ഞ് യുവാവ് മരിച്ചു

ഗുരുവായൂർ: ബൈക്ക് നിയന്ത്രണം വിട്ട് മറിഞ്ഞ് യുവാവ് മരിച്ചു. മുതുവട്ടൂർ ചെട്ട്യാലിക്കൽ ക്ഷേത്രത്തിനു സമീപം കൂവപാട്ടിൽ കൃഷ്ണൻകുട്ടിയുടേയും ജാനകിയുടേയും മകൻ സുബിൻ(കണ്ണൻ-45) ആണ് മരിച്ചത്. തിങ്കളാഴ്ച രാത്രി 11.45ഓടെ കോട്ടപ്പടി ഫോർട്ട് ഗേറ്റ് ബാറിനു സമീപമാണ് അപകടം. കുന്നംകുളം മങ്ങാടുള്ള ഭാര്യ വീട്ടിൽ നിന്ന് മുതുവട്ടൂരിലെ വീട്ടിലേക്ക് വരുന്നതിനിടെയാണ് അപകടം. ലൈഫ് കെയർ ആംബുലൻസ് പ്രവർത്തകർ കുന്നംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ഭാര്യ: സബിത. മകൾ: അശ്വനന്ദ.

ബൈക്കിടിച്ച് ചികിത്സയിലായിരുന്ന യുവാവ് മരിച്ചു

എരുമപ്പെട്ടി: എരുമപ്പെട്ടിയിൽ ബൈക്ക് ഇടിച്ച് പരിക്കേറ്റ് ചികിത്സയിൽ കഴിഞ്ഞിരുന്ന യുവാവ് മരിച്ചു. എരുമപ്പെട്ടി സീരകത്ത് വീട്ടിൽ അനീസ്(29) ആണ് മരിച്ചത്. ഞായറാഴ്ച വൈകുന്നേരം എരുമപ്പെട്ടി ഐശ്വര്യ കല്യാണമണ്ഡപത്തിനു സമീപമായിരുന്നു അപകടം. റോഡ് മുറിച്ചു കടക്കുന്നതിനിടയിൽ ബൈക്ക് ഇടിക്കുകയായിരുന്നു. തലയ്ക്ക് ഗുരുതരമായി പരിക്കേറ്റ അനീസിനെ എരുമപ്പെട്ടി ആക്ട്സ് പ്രവർത്തകർ തൃശൂർ മെഡിക്കൽ കോളജ് ആശുപത്രിയിൽ എത്തിച്ചിരുന്നു. ചികിത്സയിലിരിക്കെ ഇന്നലെ രാവിലെ മരിച്ചു.

വാടാനപ്പിള്ളി സ്വദേശി മക്കയിൽ മരിച്ചു

വാടാനപ്പള്ളി: ഉംറ നിർവഹിക്കാൻ മക്കയിലെത്തിയ വാടാനപ്പിള്ളി സ്വദേശി മരിച്ചു. രായംമരക്കാർ വീട്ടിൽ മുഹമ്മദ് (81) ആണ് മക്കയിൽ മരിച്ചത്. ഏഴിനാണ് ഉംറക്കായി എത്തിയത്. ഉംറ കഴിഞ്ഞ വെള്ളിയാഴ്ച ഹറമിൽ വച്ച് പക്ഷാഘാതം സംഭവിച്ചതിനെ തുടർന്ന് മക്കയിലെ കിംഗ് അബ്ദുൾ അസീസ് ആശുപത്രിയിൽ പ്രവേശിപ്പിച്ചിരുന്നു. ഭാര്യ: സുഹറ. മക്കൾ: ഷെമീർ മുഹമ്മദ്(ഷാർജ), സജനി.

വയോധികൻ കുഴഞ്ഞുവീണ് മരിച്ചു

എരുമപ്പെട്ടി: റോഡിൽ കുഴഞ്ഞുവീണ് വയോധികൻ മരിച്ചു. തിപ്പല്ലൂർ ശിവാർച്ചനം വീട്ടിൽ നന്ദകുമാർ (69) ആണ് മരിച്ചത്. ഇന്നലെ ഉച്ചയ്ക്ക് 12ഓടെയാണ് സംഭവം. തിപ്പല്ലൂരിൽ നിന്ന് എരുമപ്പെട്ടിയിലേക്ക് നടന്നു വരുന്നതിനിടയിൽ റോഡിൽ കുഴഞ്ഞുവീഴുകയായിരുന്നു. ഉടൻ തന്നെ എരുമപ്പെട്ടി ആക്ട്സ് പ്രവർത്തകർ വടക്കാഞ്ചേരി ജില്ലാ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്ന് രാവിലെ 11ന് ഐവർമഠത്തിൽ. ഭാര്യ: സുലോചന. മക്കൾ: സിനി, അമരീഷ്. മരുമകൻ: ശിവദാസൻ.

വാഹനാപകടത്തിൽ പരിക്കേറ്റ തൊഴിലാളി മരിച്ചു

വെള്ളാങ്കല്ലൂർ: പട്ടേപ്പാടം വാഹനാപകടത്തിൽ പരിക്കു പറ്റി ചികിത്സിയിലായിരുന്ന മരംമുറി തൊഴിലാളി മരിച്ചു. എടപ്പുള്ളി ചന്ദ്രൻ എന്ന് വിളിക്കുന്ന ലാൽ(43) ആണ് മരിച്ചത്. കഴിഞ്ഞ വെള്ളിയാഴ്ച വൈകീട്ട് പണി കഴിഞ്ഞ് വീട്ടിലേക്ക് ബൈക്കിൽ മടങ്ങവേ കുതിരത്തടം പള്ളിക്കു സമീപം വച്ച് മറ്റൊരു ബൈക്കുമായി കൂട്ടിയിടിക്കുകയായിരുന്നു. തൃശൂർ മെഡിക്കൽ കോളജിൽ വച്ചായിരുന്നു അന്ത്യം. സംസ്കാരം നടത്തി. അവിവാഹിതനാണ്. പിതാവ്: പരേതനായ വേലായുധൻ. മാതാവ്: പരേതയായ കാർത്ത്യായനി.

നഗരസഭ വിഷുക്കൈനീട്ടം നൽകി

ചാലക്കുടി: നഗരസഭ ഹരിത കർമ്മ സേനംഗങ്ങൾക്ക് വിഷു കൈനീട്ടം നൽകി സനീഷ് കുമാർ ജോസഫ് എംഎൽഎ ഉദ്ഘാടനം ചെയ്തു. ചെയർമാൻ ഷിബു വാലപ്പൻ അധ്യക്ഷനായി. വൈസ് ചെയർപേഴ്സൺ സി ശ്രീദേവി,സ്ഥിരം സമിതി അധ്യക്ഷരായ ദിപു ദിനേശ്, പ്രീതി ബാബു, എം എം അനിൽകുമാർ, പ്രതിപക്ഷ നേതാവ് സി.എസ് സുരേഷ്,മുൻ ചെയർമാൻമാരായ വി.ഒ. പൈലപ്പൻ, എബി ജോർജ്ജ്,ആലീസ് ഷിബു, കൗൺസിലർ റോസി ലാസർ, ഹെൽത്ത് ഇൻസ്പെക്ടർ സുമിത സുനിൽകുമാർ, ആര്യ ഉണ്ണികൃഷ് ണൻ എന്നിവർ പ്രസംഗിച്ചു.

ഇൻകം ടാക്സ് ചെന്നൈ ജേതാക്കൾ

കയ്പമംഗലം: എടത്തിരുത്തി നവകിരൺ ആർട്സ് ആൻഡ് സ് പോ ർട്സ് ക്ലബ്ബിന്‍റെ അഖിലേന്ത്യ വോളിബോൾ ടൂർണമെന്‍റിൽ ഇൻകം ടാക്സ് ചെന്നൈ ജേതാക്കളായി. വാശിയേറിയ ഫൈനൽ മത്സരത്തിൽ എതിരില്ലാതെ മൂന്ന് സെറ്റുകൾക്ക് ഇന്ത്യൻ ആർമിയെയാണ് പരാജയപ്പെടുത്തിയത്. സി.പി. ട്രസ്റ്റ് ചെയർമാനും ഇന്ത്യ - ആഫ്രിക്ക ട്രേഡ് കമ്മീഷണറുമായ സി.പി. സാലിഹ് സമ്മാനദാനം നിർവഹിച്ചു. എടത്തിരുത്തി ഗ്രാമപഞ്ചായത്ത് പ്രസിഡന്‍റ് ടി.കെ. ചന്ദ്രബാബു അധ്യക്ഷനായി. ഇ.ടി. ടൈസൺ എംഎൽഎ മുഖ്യാതിഥിയായി. ക്ലബ് പ്രസിഡന്‍റ് പ്രശോഭിതൻ മുനപ്പിൽ, സെക്രട്ടറി പി.ആർ. ശ്രീനിവാസൻ, മുൻ വോളിബോൾ താരങ്ങളായ ഗോപിദാസ്, പ്രചോദ് പണിക്കശേരി, അൻവർ ഹുസൈൻ, ഷിറാസ് കാവുങ്ങൽ, ഉത്തമൻ തുടങ്ങിയവർ പങ്കെടുത്തു.

കോൺഗ്രസ് ഭരണസമിതികൾ തിരികെവരണം: ജോസഫ് ടാജറ്റ്

ചാലക്കുടി: തദ്ദേശസ്വയംഭരണ സ്ഥാപനങ്ങളിലേക്ക് നടക്കാൻ പോകുന്ന തെരഞ്ഞെടുപ്പുകളിൽ കോൺഗ്രസ് നേതൃത്വം നൽകുന്ന ഭരണസമിതി തിരികെ വരണമെന്നാണു നാട്ടിലെ ജനങ്ങൾ ആഗ്രഹിക്കുന്നതെന്ന് ജില്ലാ കോൺഗ്രസ് അധ്യക്ഷൻ അഡ്വ. ജോസഫ് ടാജറ്റ്. പരിയാരം ബ്ലോക്ക് കോൺഗ്രസ് നേതൃത്വയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പിണറായി ഭരണത്തിൽ തദ്ദേശസ്വയംഭരണ സ്ഥാപനങ്ങളുടെ അധികാരങ്ങൾ വെട്ടിക്കുറച്ചു വികസനം താറുമാറാക്കിയ കാലമാണു കടന്നുപോയത്. എല്ലാ മേഖ ലകളിലും ജനങ്ങൾ പൊറുതിമുട്ടിക്കഴിയുമ്പോൾ അവരുടെ രക്ഷയ്ക്കായി എത്തേ ണ്ട ഉത്തരവാദിത്വം കോൺഗ്രസിനാണെന്നാണു ജനങ്ങൾ ചിന്തിക്കുന്നതെന്നും അതിനായി കോൺഗ്രസ് ഒറ്റക്കെട്ടായി പ്രവർത്തിക്കണമെന്നും ഡിസിസി പ്രസിഡന്‍റ് ഒാർമിപ്പിച്ചു. ചാലക്കുടി ബ്ലോക്ക് പ്രസിഡന്‍റ്് വി.ഒ. പൈലപ്പൻ അധ്യക്ഷത വഹിച്ചു. സനീഷ് കുമാർ ജോസഫ് എംഎൽഎ മുഖ്യപ്രഭാഷണം നടത്തി. രാജേന്ദ്രൻ അരങ്ങത്ത്, സുനിൽ അന്തിക്കാട്, ഷാജി കോടങ്കണ്ടത്ത്, എം.പി. വിൻസന്‍റ്്്, എം.ടി. ഡേവിസ്, സി.ജി. ബാലചന്ദ്രൻ, കെ. ജെയിംസ് പോൾ, പി.കെ. ഭാസി, പി.കെ. ജേക്കബ്, മേരി നളൻ, ഒ.എസ്. ചന്ദ്രൻ, സി. ശ്രീദേവി, കെ.പി. ജെയിംസ്, ജോണി പുല്ലൻ തുങ്ങിയവർ പ്രസംഗിച്ചു.

ലഹരിക്കെതിരേ ക്രൈസ്തവ യുവജനങ്ങള്‍ നടത്തുന്ന പ്രവര്‍ത്തനങ്ങള്‍ പ്രശംസനീയം: മന്ത്രി ആര്‍. ബിന്ദു

ഇരിങ്ങാലക്കുട: ലഹരി വിമുക്ത സമൂഹത്തിനായി ക്രൈസ്തവ യുവജനങ്ങള്‍ നടത്തുന്ന പ്രവര്‍ത്തനങ്ങള്‍ ഏറെ മാതൃകാപരവും പ്രശംസനീയവുമാണെന്ന് ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു അഭിപ്രായപ്പെട്ടു. ഇരിങ്ങാലക്കുട സെന്‍റ് തോമസ് കത്തീഡ്രലിലെ യുവജനസംഘടനകളുടെ നേതൃത്വത്തില്‍ ലഹരിക്കെതിരെ നടത്തുന്ന ബോധവത്കരണ പരിപാടികളുടെ ഭാഗമായി സംഘടിപ്പിച്ച ഇരു ചക്രവാഹന റാലി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. ലഹരിയുടെ ഉപയോഗം കാന്‍സര്‍ രോഗത്തെപ്പോലെ മനുഷ്യനെയും സമൂഹത്തെയും മരണത്തിലേക്കു നയിക്കുകയാണ്. യുവജനങ്ങളുടെ മനസും മസ്തിഷ്കവും മരവിപ്പിച്ചും കര്‍മശേഷിയും ഊര്‍ജസ്വലതയും സര്‍ഗശേഷിയും കെടുത്തിക്കൊണ്ടും സാമൂഹ്യവിരുദ്ധ സ്വഭാവത്തിലേക്കു നയിക്കുയാണ്. ലഹരിയുടെ ഉപയോഗംവഴി സാമൂഹിക പ്രതിബന്ധതയില്ലാത്ത യുവജനങ്ങളായി മാറുന്നതായാണ് സമീപകാല സംഭവങ്ങള്‍ സൂചിപ്പിക്കുന്നത്. ഇതിനെ പ്രതിരോധിക്കേണ്ട സമയം അതിക്രമിച്ചുവെന്നും അതിനായി ലഹരിക്കെതിരെ ഒറ്റക്കെട്ടായി നാം ഉണര്‍ന്നു പ്രവര്‍ത്തിക്കണമെന്നും മന്ത്രി കൂട്ടിചേര്‍ത്തു. നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. ഇന്നസെന്‍റ് സോണറ്റ് മുഖ്യാതിഥിയായിരുന്നു. കത്തീഡ്രല്‍ അസി. വികാരി ഫാ. ഓസ്റ്റിന്‍ പാറക്കല്‍ എന്നിവര്‍ പ്രസംഗി ച്ചു. ഇരിങ്ങാലക്കുട നഗരസഭ ഓഫീസിനു മുന്നില്‍ നിന്നും ആരംഭിച്ച ഇരുചക്ര വാഹനറാലി ബസ് സ്റ്റാൻഡ്, ഠാണ ജംഗ്ഷന്‍ വഴി കത്തീഡ്രല്‍ അങ്കണത്തില്‍ സമാപിച്ചു.

രണ്ടു കുടുംബങ്ങള്‍ക്കുകൂടി കാരുണ്യഭവനങ്ങള്‍ നിര്‍മിച്ചുനല്‍കി മൂന്നുമുറി ഇടവക

കോടാലി: മൂന്നുമുറി സെന്‍റ്് ജോണ്‍ ദി ബാപ്റ്റിസ്റ്റ് ഇടവകയുടെ നേതൃത്വത്തില്‍ ഒമ്പതുങ്ങലില്‍ പണികഴിപ്പിച്ച രണ്ടു കാരുണ്യ ഭവനങ്ങളുടെ വെഞ്ചരിപ്പു കര്‍മവും താക്കോല്‍ദാനവും ഇടവക വികാരി ഫാ. ജോര്‍ജ് വേഴപ്പറമ്പില്‍ നിര്‍വഹിച്ചു. ദേവാലയം പുതുക്കി നിര്‍മിച്ചപ്പോള്‍ നിര്‍ധന കുടുംബങ്ങള്‍ക്കു കാരുണ്യ ഭവനങ്ങള്‍ പണിതുകൊടുക്കണമെന്ന വലിയ ആശയത്തിന്‍റെ തുടര്‍ച്ചയായി നിര്‍മിച്ചതാണ് ഒമ്പതുങ്ങലിലെ കാരുണ്യ ഭവനങ്ങള്‍. നേരത്തെ ഈ പദ്ധതി പ്രകാരം ഏതാനും വീടുകള്‍ നിര്‍മിച്ചു നല്‍കിയിരുന്നു. അസി. വികാരി ഫാ. ജയ്‌സണ്‍ ചൊവ്വല്ലൂര്‍, കാരുണ്യഭവനങ്ങള്‍ക്കായി സ്ഥലം നല്‍കിയ ഗ്രേസി ജോര്‍ജ് ആലപ്പാടന്‍, ഗ്രാമപഞ്ചായത്തംഗങ്ങളായ സുമേഷ് മൂത്തമ്പാടന്‍, ഷൈനി ബാബു, കാരുണ്യ ഭവന നിര്‍മാണകമ്മിറ്റി ജനറല്‍ കണ്‍വീനര്‍ ജോണ്‍സണ്‍ മാമ്പ്രക്കാരന്‍, സെക്രട്ടറി ജോണ്‍സണ്‍ വിതയത്തില്‍, ട്രഷറര്‍ ആന്‍റോ ആട്ടോക്കാരന്‍, നൈജോ ആന്‍റോ എന്നിവര്‍ പ്രസംഗിച്ചു. കമ്മിറ്റി അംഗങ്ങളായ ബെന്നി വെള്ളച്ചാലില്‍, സേവിയര്‍ കരുമാലിക്കല്‍, ജിമ്മി പൊയ്യക്കാരന്‍, കൈക്കാരന്മാരായ ബിജു തെക്കന്‍, ജോഷി മഞ്ഞളി, ജോണ്‍ ചേനത്തുപറമ്പില്‍ എന്നിവര്‍ നേതൃത്വം നല്‍കി.

ചാലക്കുടി പ്രസ്ക്ലബ് സ്മൃതിസംഗമം നടത്തി

ചാലക്കുടി: പ്രസ് ക്ലബ് സ്മൃതി സംഗമവും പുരസ്കാര വിതരണവും നടത്തി. ഗവ.ചീഫ് വിപ്പ് പ്രഫ. എൻ. ജയരാജ് ഉദ്ഘാടനം ചെയ് തു. പ്രാദേശിക പത്രപ്രവർത്ത കർക്കു ക്ഷേമനിധി ഏർപ്പെടുത്താനുള്ള ബില്ല് നിയമസഭയിൽ കൊണ്ടുവരുമെന്ന് അദ്ദേഹം പറഞ്ഞു. പ്രസ് ക്ലബ് പ്രസിഡന്‍റ്് പി.കെ. സിദ്ദിഖ് അധ്യക്ഷത വഹിച്ചു. ബെന്നി ബഹനാൻ എംപി, സനീഷ്കുമാർ ജോസഫ് എംഎൽഎ എന്നി വർ മുഖ്യാതിഥികളായി. നഗരസഭ ചെയർമാൻ ഷിബു വാലപ്പൻ ചികിത്സാസഹായവും ബ്ലോക്ക് പഞ്ചായത്ത് പ്രസിഡന്‍റ് വേണു കണ്ഠരുമഠത്തിൽ വിദ്യാഭ്യാസ അവാർഡും നൽകി. മൺ മറഞ്ഞ പ്രസ് ക്ലബ് അംഗങ്ങളെ സി.കെ. പോൾ അനുസ്മരിച്ചു. നഗരസഭ പ്രതിപക്ഷ നേതാവ് സി.എസ്. സുരേഷ്, ഫാ. വർഗീസ് പാത്താടൻ, നഗരസഭാംഗം വി.ജെ. ജോജി, പ്രസ് ക്ലബ് സെക്രട്ടറി കെ.വി. ജയൻ, ജോ യിന്‍റ് സെക്രട്ടറി ഐ.ഐ. അബ്ദുൾ മജീദ് എന്നിവർ പ്രസംഗിച്ചു. മികച്ച സാമൂഹിക പ്രവർത്തകനുള്ള കെ.കെ. ചന്ദ്രസേനൻ പുര സ്കാരം പരിസ്ഥിതി പ്രവർത്തകൻ എസ്.പി. രവിക്കും എ.പി. തോമസ് ദൃശ്യ പ്രതിഭ പുരസ്കാരം സുനി നീലത്തിനും ജില്ലയിലെ മികച്ച പ്രാദേശിക പത്രപ്രവർത്തകനുള്ള പി.എൻ. കൃഷ്ണൻ നായർ പുരസ്കാരം ഇ.പി. രാജീവിനും സമ്മാനിച്ചു. അഖില കേരള ഫോട്ടോഗ്രഫി മത്സരത്തിൽ പ്രോത്സാഹന സമ്മാനം വിനോദ് അത്തോളി, സുരേഷ് കിഴുത്താനി, അനൂപ് കൃഷ് ണ എന്നിവർ ഏറ്റുവാങ്ങി.

മച്ചാട് പള്ളിയിൽ രോഗീബന്ധു സംഗമം സംഘടിപ്പിച്ചു

പുന്നംപറമ്പ്: മച്ചാട് പള്ളിയിൽ രോഗീബന്ധു സംഗമം സംഘടിപ്പിച്ചു. മച്ചാട് സെന്‍റ് ആന്‍റണീസ് ഇടവകാതിർത്തിയിലെ മുഴുവൻ കിടപ്പുരോഗികളെയും മറ്റുരോഗികളെയും അവരുടെ ബന്ധുക്കളെയും ഉൾപ്പെടുത്തിയാണ് രോഗീബന്ധു സംഗമംസംഘടിപ്പിച്ചത്. പിയാത്ത പെയിൻ ആന്‌ഡ് പാലിയേറ്റീവ് സംഘടനയുടെ നേതൃത്വത്തിലാണ് പരിപാടി സംഘടിപ്പിച്ചത്. ഇടവക വികാരി ഫാ. ആന്‍റോ ഒല്ലൂക്കാരന്‍റെ മുഖ്യ കാർമികത്വത്തിൽ ദിവ്യബലിയും അനുബന്ധപ്രാർഥനകളുംനടന്നു. സ്നേഹവിരുന്നുമുണ്ടായി. ചടങ്ങുകൾക്ക് മദർ സിസ്റ്റർ സെലസ്റ്റി, ഡെന്നി തോമസ്, വി.ടി. ജിനോ, യാക്കോബ് പുത്തൂർ, ബീന ജോൺസൻ, സിബി സജി തുടങ്ങിയവർ നേതൃത്വംനൽകി.

ഗവ. സ്‌കൂളിന്‍റെ സ്ഥലം കൈയേറി; കോടതി തടഞ്ഞു

ചാവക്കാട്: കൊച്ചന്നൂര്‍ ഗവ. സ്‌കൂളിന്‍റെ കളിസ്ഥലം കൈയേറി റോഡ് വെട്ടാനുള്ള സ്വകാര്യ വ്യക്തിയുടെ ശ്രമം കോടതി തടഞ്ഞു. സ്‌കൂള്‍ കളിസ്ഥലം അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്‍റെ ഭാഗമായി നവീകരിക്കാനായി എന്‍.കെ. അക്ബര്‍ എംഎല്‍എ 31 ലക്ഷം രൂപ അനുവദിച്ച് ചുറ്റുമതില്‍ നിര്‍മാണം ആരംഭിച്ചു. നിര്‍മാണം തുടങ്ങിയതോടെ സ്വകാര്യവ്യക്തി സ്‌കൂള്‍ ഗ്രൗണ്ടിന്‍റെ കിഴക്കുവശംചേര്‍ന്ന് 10 അടി വീതിയിലുള്ള റോഡ്, പഞ്ചായത്ത് റോഡിലേക്ക് ഉണ്ടെന്നും ഇതു തനിക്കവകാശപ്പെട്ടതാണെന്നും സ്‌കൂള്‍ അധികൃതര്‍ മതില്‍കെട്ടി ഗതാഗതം തടയുകയാണെന്നും ആരോപിച്ചു. കലക്ടര്‍, ജില്ലാ വിദ്യാഭ്യാസ ഓഫീസര്‍ എന്നിവരെ എതിര്‍കക്ഷികളാക്കി ഗതാഗതം തടസപ്പെടുത്തരുത് എന്ന ഉത്തരവിനായി ചാവക്കാട് മുന്‍സിഫ് കോടതിയില്‍ ഇഞ്ചക്ഷന്‍ ഹര്‍ജിയുംനല്‍കി. ഇതേ തുടര്‍ന്ന് നിര്‍മാണം നിര്‍ത്തിവച്ചു. പിന്നീട് സര്‍ക്കാര്‍ കോടതിയില്‍ നല്‍കിയ ഹര്‍ജി പരിഗണിച്ച്, മുമ്പ് സ്ഥലംപരിശോധിച്ച് റിപ്പോര്‍ട്ട് നല്‍കിയ അഡ്വക്കേറ്റ് കമ്മീഷൻ വീണ്ടും സ്ഥലംപരിശോധിച്ചു. അഡ്വക്കേറ്റ് കമ്മീഷൻ കോടതിയില്‍ ഫയല്‍ചെയ്ത റിപ്പോര്‍ട്ടില്‌ സ്‌കൂള്‍ ഗ്രൗണ്ടിലൂടെയുള്ള വഴി, ഹര്‍ജിക്കാരന്‍ കേസ് കൊടുക്കുന്നതിനു തൊട്ടുമുമ്പ് കൃത്രിമമായി നിര്‍മിച്ചതാണെന്നും വഴി ചെന്നെത്തുന്നത് സ്വകാര്യ റോഡിലേക്കാണെന്നും ഹര്‍ജിക്കാരന്‍ സര്‍ക്കാര്‍ ഭൂമി കൈയേറി റോഡ് നിര്‍മിച്ചതാണെന്നും അറിയിച്ചു. വാദം അംഗീകരിച്ച കോടതി ഹര്‍ജിക്കാരന് അനുകൂലമായി നേരത്തെനല്‍കിയ താല്‍ക്കാലിക സ്റ്റേ ഉത്തരവ് തള്ളി മതിൽ നിർമിക്കാൻ അനുമതിനൽകി. അഡീഷണല്‍ ഗവ.പ്ലീഡര്‍ അഡ്വ.കെ.ആര്‍. രജിത് കുമാര്‍, അഡ്വ.കെ.കെ. സിന്ധു എന്നിവര്‍ ഹാജരായി.

മദ്യലഹരിയിൽ കാർ യാത്രികരുടെ അതിക്രമം

പാലിയേക്കര: ടോൾപ്ലാസയിൽ കാർ നിർത്തിയിട്ട് സംഘർഷമുണ്ടാക്കിയ യാത്രികരുടെ പേരിൽ കേസെടുത്തു. ഞായറാഴ്ച പുലർച്ചെ 1.30നായിരുന്നു സംഭവം. ടോൾപ്ലാസയിലെത്തിയ കാർ, ടോൾബൂത്ത് കടന്നതിനുശേഷം ട്രാക്കിൽ നിർത്തിയിട്ട് ജീവനക്കാരെ അസഭ്യംപറയുകയും കൈയേറ്റംചെയ്യാൻ ശ്രമിക്കുകയുമായിരുന്നു. കാർയാത്രക്കാർ മദ്യലഹരിയിലായിരുന്നുവെന്ന് പോലീസ് പറഞ്ഞു. ടോൾപ്ലാസയിലെ ട്രാക്കുകളിൽ കാർ മാറ്റിമാറ്റിയിട്ട് ഇവർ പ്രശ്നമുണ്ടാക്കുന്നത് തുടർന്നു. ചോദ്യംചെയ്യാൻ ശ്രമിച്ച ജീവനക്കാരെ കാറിന്‍റെ ജാക്കിലിവർ ഉപയോഗിച്ച് ആക്രമിക്കാൻ ശ്രമിച്ചതായും പോലീസ് പറഞ്ഞു. ഇതിനിടെ ടോൾ അധികൃതർ അറിയിച്ചതിനെ തുടർന്ന് പോലീസ് സ്ഥലത്തെത്തിയതോടെ ഇവർ കാറുമായി കടന്നു. സംഭവത്തിന്‍റെ സിസിടിവി ദൃശ്യങ്ങൾ സഹിതം ടോൾപ്ലാസ അധികൃതർ പുതുക്കാട് പോലീസിൽ പരാതിനൽകി. ഇതേതുടർന്ന് വാഹനനമ്പർ ഉപയോഗിച്ച് ഉടമയുമായി ബന്ധപ്പെടുകയും ഞായറാഴ്ച സ്റ്റേഷനിൽ ഹാജരാകാൻ നിർദേശിക്കുകയും ചെയ്തു. എന്നാൽ കാർ യാത്രികർ പോലീസ് അക്രമത്തെ തുടർന്ന് ആശുപത്രിയിൽ ചികിത്സ തേടിയെന്നും അറിയുന്നു.

ലോറിയുടമകളുടെ പ്രതിഷേധം; ടോൾബൂത്ത് തുറന്ന് വാഹനങ്ങൾ വിട്ടു

പാലിയേക്കര: ടോൾപ്ലാസയിൽ ലോറിയുടമകളുടെ പ്രതിഷേധം. ഇന്നലെ ഉച്ചയോടെയായിരുന്നു സംഭവം. പാലിയേക്കരയിലെ ടോൾപിരിവ് അവസാനിപ്പിക്കണമെന്ന് ആവശ്യപ്പെട്ട് തൃശൂർ ജില്ല ലോറി ഓണേഴ്സ് അസോസിയേഷന്‍റെ നേതൃത്വത്തിൽ നടത്തിയ പ്രതിഷേധമാണ് സംഘർഷത്തിൽ കലാശിച്ചത്. ദേശീയപാതയിൽ പ്രതിഷേധവുമായെത്തിയ ലോറിയുടമകൾ ടോൾബൂത്തുകളിൽ കയറി ബാരിക്കേഡുകൾതുറന്ന് വാഹനങ്ങൾ കടത്തിവിടുകയായിരുന്നു. വിഷു അവധിയെ തുടർന്ന് ടോൾപ്ലാസയിൽ വലിയ വാഹനത്തിരക്കുള്ള സമയമായിരുന്നു ഇത്. ടോൾപ്ലാസ അധികൃതർ വിവരമറിയിച്ചതിനെ തുടർന്ന് പുതുക്കാട് പോലീസ് സ്ഥലത്തെത്തി. പ്രതിഷേധക്കാരെ ടോൾബൂത്തുകളിൽനിന്ന് നീക്കുകയും രണ്ടുപേരെ കൊണ്ടുപോവുകയുംചെയ്തു. രണ്ടുപേർ ഓടിരക്ഷപ്പെട്ടു.

പുത്തൻകോവിലകം കടവ് പാലം തകർന്നു

അന്തിക്കാട്: പുത്തൻകോവിലകം കടവ് റോഡുമായി അന്തിക്കാട് കോൾപാടശേഖരത്തെ ബന്ധിപ്പിക്കുന്ന പ്രധാന പാലം തകർന്നുവീണു. ഇന്നലെ ഉച്ചയോടെയാണ് അപകടം. ഏറെകാലങ്ങളായി ഈ പാലത്തിന്‍റെ ഏതാനും സ്ലാബുകളുടെ അടിഭാഗം തകർന്നതുമൂലം മേൽഭാഗം ഇടിഞ്ഞ നിലയിലായിരുന്നു. കഴിഞ്ഞ കോൾപ്പാടശേഖരത്തിലെ വിളവെടുപ്പുമായി ബന്ധപ്പെട്ട നിരവധി വാഹനങ്ങൾ കടന്നുപോയതോടെ പാലം വീണ്ടും രൂക്ഷമായ തകർച്ചാഭീഷണിയിലായിരുന്നു. വാഹനം കടന്നുപോയി നിമിഷങ്ങൾക്കുള്ളിലാണ് പാലം തകർന്നത്. രണ്ട് സ്ലാബ് തകർന്ന് കനാലിലേക്കുവീണ നിലയിലാണ്. ബാക്കിയുള്ള ഒരു സ്ലാബിലൂടെ ഇരുചക്ര വാഹനങ്ങളും മറ്റും കടന്നുപോകുന്നുണ്ട്. ഇത് അപകടത്തിന് കാരണമായേക്കുമെന്ന് ഭീതിയും ഉയർന്നിട്ടുണ്ട്. പാലം തകർച്ചാഭീഷണി നേരിടുന്ന വിവരം നിരവധിതവണ മാധ്യമങ്ങൾ റിപ്പോർട്ട് ചെയ്തിരുന്നുവെങ്കിലും അടിയന്തര ഇടപെടൽ നടത്താൻ കെഎൽഡിസിയോ മറ്റ് അധികൃതരോ തയാറായില്ലെന്ന് കർഷകർ പറയുന്നു. റീ ബിൽഡ് കേരളയിൽവച്ച് പാലം നിർമിക്കുന്നതിനുള്ള ശ്രമങ്ങൾ നടക്കുന്നുണ്ടെങ്കിലും കാര്യങ്ങൾക്ക് വേഗതയില്ലെന്ന ആക്ഷേപം വ്യാപകമാണ്.

ചുഴലിക്കാറ്റും കനത്ത മഴയും: കുന്നംകുളത്ത് വ്യാപക നാശനഷ്ടം

കുന്നംകുളം: കാട്ടകാമ്പാല്‍ ഗ്രാമപഞ്ചായത്ത് പ്രദേശത്ത് ഇന്നലെ പുലര്‍ച്ചയോടെ വീശിയടിച്ച ചുഴലിക്കാറ്റും കനത്തമഴയും വ്യാപകമായ നാശനഷ്ടങ്ങളുണ്ടാക്കി. പെങ്ങാമുക്ക്, കരിച്ചാല്‍, കാഞ്ഞിരത്തിങ്കല്‍, ആനപ്പറമ്പ് കാട്ടകാമ്പാല്‍, പലാട്ടുമുറി, നടുമുറി, ചിറയ്ക്കല്‍, സ്രായിക്കടവ്, ചിറയന്‍കാട്, രാമപുരം എന്നിവിടങ്ങളില്‍ മരംപൊട്ടി വീണ് വീടുകള്‍ക്കും ചിറയ്ക്കല്‍ സെന്‍ററിലെ ട്രാന്‍സ്ഫോര്‍മറിനും കേടുപാടുകൾ സംഭവിച്ചു. അറുപതില്‍പരം കെഎസ്ഇബി പോസ്റ്റുകള്‍ക്കും വൈദ്യുതി ലൈനുകള്‍ക്കും നാശനഷ്ടങ്ങളുണ്ടായി. എ.സി. മൊയ്തീന്‍ എംഎല്‍എ, എസ്‌സി എസ്ടി കമ്മീഷന്‍ അംഗം ടി.കെ. വാസു, ത്രിതല പഞ്ചായത്ത് പ്രതിനിധികള്‍ തുടങ്ങിയവര്‍ ദുരന്തബാധിത സ്ഥലങ്ങള്‍ സന്ദര്‍ശിച്ചു. വിവിധ വകുപ്പുകളുടെ ഏകോപനം ഉറപ്പുവരുത്താനുള്ള നിര്‍ദേശങ്ങള്‍ നല്‍കിയതായി എംഎല്‍എ അറിയിച്ചു. ദുരന്തപ്രതികരണനിധിയില്‍നിന്നു അടിയന്തര സഹായം ദുരന്തബാധിതര്‍ക്ക് അനുവദിക്കണമെന്ന് റവന്യുമന്ത്രിയോടും ജില്ല കളക്ടറോടും എംഎല്‍എ ആവശ്യപ്പെട്ടു. തഹസില്‍ദാരുടെ നേതൃത്വത്തില്‍ നാശനഷ്ടങ്ങളുടെ കണക്ക് ശേഖരിക്കുന്നു. കെഎസ്ഇബി ജീവനക്കാര്‍ വൈദ്യുതബന്ധം പുനസ്ഥാപിക്കുന്നതിനുള്ള പരിശ്രമത്തിലാണ്.

ഗുരുവായൂരിലെ ഹൈടെക് ഗോശാല സമർപ്പണം ഇന്ന്

ഗുരുവായൂർ: ദേവസ്വത്തിന്‍റെ ഹൈടെക് ഗോശാല ഇന്നു സമർപ്പിക്കും. കിഴക്കേനടയിൽ പഴയ ദേവസ്വം ഓഫീസിനോട് ചേർന്ന് 18 സെന്‍റ് സ്ഥലത്ത് നാലുനിലകളിലായി 10,000 ചതുരശ്ര അടിയിൽ ആറുകോടിയോളം ചെലവിലാണ് ഗോശാല നിർമിച്ചിട്ടുള്ളത്. തമിഴ്നാട് പുതുക്കോട്ടയിലെ മാണിക്കം ട്രസ്റ്റിന്‍റെ സമർപ്പമാണിത്. 60 പശുക്കളേയും ട്രസ്റ്റ് നൽകുന്നുണ്ട്. ആദ്യനില അണ്ടർഗ്രൗണ്ടിലാണ്. ഇവിടെ സീവറേജ് ട്രീറ്റ്മെന്‍റ് പ്ലാന്‍റാണ്. ആദ്യനിലയിലും രണ്ടാംനിലയിലും പശുക്കൾക്ക് നിൽക്കുന്നതിനുള്ള സംവിധാനമാണ്. ഏറ്റവും മുകളിലെ നിലയിൽ പശുവിന് തീറ്റ, മരുന്നുകൾ എന്നിവ സൂക്ഷിക്കുന്നതിനുള്ള സ്ഥലം, ലിഫ്റ്റുകൾ, റാമ്പ് എന്നിവയുണ്ട്. ഓട്ടോമാറ്റിക് കുടിവെള്ള സംവിധാനം, മിൽക്ക് പ്രൊസസിംഗ് യൂണിറ്റ് എന്നിവയും ഒരുക്കിയിട്ടുണ്ട്. പശുവിന് ചൂട് ഏൽക്കാതിരിക്കുന്നതിന് ഫാൻ, വെള്ളം കൊണ്ടുള്ള ശീതീകരണസംവിധാനം എന്നിവയുമുണ്ട്. ഗോപൂജ മണ്ഡപവും ഇവിടെയുണ്ട്. 18ന് ഗോശാലയുടെ ഒൗദ്യോഗിക സമർപ്പണം മന്ത്രി നിർവഹിക്കും.

അറവുമാലിന്യ പ്ലാന്‍റ്: തളി ഗ്രാമവാസികൾ രാത്രിസമരം നടത്തി

എരുമപ്പെട്ടി: അതിജീവനത്തിനായി രാത്രിസമരംനടത്തി വരവൂർ തളി ഗ്രാമവാസികൾ. തങ്ങളുടെ ജീവിതം ദുരിതമാക്കുന്ന അറവുമാലിന്യ പ്ലാന്‍റിനെതിരേ രാത്രിയിൽ നടത്തിയ പ്രക്ഷോഭത്തിൽ ഗ്രാമം ഒന്നായിഅണിചേർന്നു. സ്ത്രീകളും കുട്ടികളും വയോധികരും ഉൾപ്പടെ ആയിരത്തോളംപേർ പങ്കെടുത്തു. കോഴി അവശിഷ്ടങ്ങൾ ഉൾപ്പടെയുള്ള അറവുമാലിന്യങ്ങൾ സംഭരിച്ച് പൊടിച്ച് പൗഡറാക്കുന്ന വലിയ പ്ലാന്‍റാണ് തളി നടുവട്ടത്ത് പ്രവർത്തനം ആരംഭിച്ചത്. കഴിഞ്ഞ വെള്ളിയാഴ്ച രാത്രി ട്രയൽ റൺ നടത്തിയപ്പോൾ പ്ലാന്‍റിൽനിന്ന് അതിരൂക്ഷമായ ദുർഗന്ധം ഉയർന്നിരുന്നു. തുടർന്ന് പ്രദേശത്ത് സ്ത്രീകളും കുട്ടികളും ഉൾപ്പടെയുള്ള നാട്ടുകാർ പ്രതിഷേധവുമായി തടിച്ചുകൂടി. ഇതിനിടയിൽ സ്ഥലത്തെത്തിയ എരുമപ്പെട്ടി പോലീസ് ലാത്തിചാർജ് നടത്തുകയും സ്ത്രീകളും കുട്ടികളും ഉൾപ്പടെ നിരവധിപേർക്ക് പരിക്കേൽക്കുകയുംചെയ്തു. കൂടാതെ മുപ്പതോളംപേർക്കെതിരെ പോലീസ് കേസെടുക്കുകയുംചെയ്തു. പ്ലാന്‍റിലെ ജീവനക്കാരെ കൊണ്ടുപോവുകയായിരുന്ന പോലീസ് വാഹനം തടഞ്ഞുവെന്ന് ആരോപിച്ചാണ് ലാത്തിചാർജ് നടത്തിയത്. എന്നാൽ ഇൻസ്പെക്ടറോട് പരാതിപറയാൻ പോലീസ് വാഹനത്തിനടുത്തുചെന്ന വീട്ടമ്മമാരെ പോലീസ് മുന്നറിയിപ്പില്ലാതെ ആക്രമിക്കുകയായിരുന്നുവെന്ന് നാട്ടുകാർപറയുന്നു. അകാരണമായ പോലീസ് നടപടിക്കെതിരേയും ദുർഗന്ധംവമിക്കുന്ന പ്ലാന്‍റിന്‍റെ പ്രവർത്തനംതടയണമെന്ന് ആവശ്യപ്പെട്ടുമാണ് ഇന്നലെരാത്രിയിൽ വൻ പ്രതിഷേധംനടന്നത്. കോടതിയിൽ കേസ് നിലനിൽക്കുമ്പോൾ പ്ലാന്‍റിന് പ്രവർത്തിക്കാൻ ലൈസൻസ് നൽകിയ വരവൂർ പഞ്ചായത്തിനെതിരേയും പ്രതിഷേധമുയർന്നു. സമരത്തെ നേരിടാൻ വൻ പോലീസ് സന്നാഹം ഒരുക്കിയിരുന്നെങ്കിലും സമരം സമാധാനപരമായിരുന്നു. അതേസമയം ശക്തമായ തുടർസമരങ്ങളുമായി മുന്നോട്ടുപോകാനാണ് തീരുമാനമെന്ന് സമരസമിതി നേതാക്കൾ അറിയിച്ചു. ആക്ഷൻ കൗൺസിൽ നേതാക്കളായ സി.യു. അബൂബക്കർ, പരീദ്, കെ.എസ് മുഹമ്മദ്, വിപിൻ കൂടിയേടത്ത്, സുഭാഷ്, കെ.എം ഹനീഫ, ഫാസിൽ, അനിത, ഫാത്തിമ്മ, കോച്ചിയമ്മ, അസ്ഹർ എന്നിവർ നേതൃത്വംനൽകി.

വിശ്വാസം വിളിച്ചോതി കനകമല കുരിശുമുടി മഹാതീര്‍ഥാടനം

കൊടകര: അചഞ്ചലമായ വിശ്വാസം വിളിച്ചോതി കനകമല മഹാതീര്‍ഥാടനത്തില്‍ പങ്കുചേര്‍ന്ന് അനേകര്‍ കുരിശുമല ചവിട്ടി. 86-ാമത് കനകമല നോമ്പുകാല തീര്‍ഥാടനത്തിന്‍റെ ഭാഗമായി ഇന്നലെ വൈകീട്ട് നടന്ന മഹാതീര്‍ഥാടനം ഇരിങ്ങാലക്കുട രൂപത മെത്രാന്‍ മാര്‍ പോളി കണ്ണൂക്കാടന്‍ ഉദ്ഘാടനം ചെയ്തു. വികാരി ജനറാൾ‍ മോണ്‍. വില്‍സണ്‍ ഈരത്തറ അധ്യക്ഷത വഹിച്ചു. വികാരി ജനറാൾ‍ മോണ്‍. ജോസ് മാളിയേക്കല്‍ അനുഗ്രഹ പ്രഭാഷണം നടത്തി. കൊടകര ഫൊറോന വികാരി ഫാ. ജെയ്‌സണ്‍ കരിപ്പായി, കനകമല തീര്‍ഥാടന കേന്ദ്രം റെക്ടര്‍ ഫാ. മനോജ് മേക്കാടത്ത്, അസിസ്റ്റന്‍റ് വികാരി ഫാ. റൈസണ്‍ തട്ടില്‍, ജനറല്‍ കണ്‍വീനര്‍ തോമസ് കുറ്റിക്കാടന്‍, കൈക്കാരന്‍ ജോജു ചുള്ളി, പിആര്‍ഒ ഷോജന്‍ ഡി. വിതയത്തില്‍, കേന്ദ്ര സമിതി പ്രസിഡന്‍റ് ജോയി കുയിലാടന്‍, സിസ്റ്റര്‍ ലിസ മരിയ എന്നിവര്‍ പ്രസംഗിച്ചു. തുടര്‍ന്ന് കുരിശുമുടിയിലേക്ക് നടന്ന പ്രാര്‍ഥനയാത്രക്ക് ബിഷപ് മാര്‍ പോളി കണ്ണൂക്കാടന്‍ നേതൃത്വം നല്‍കി. നിരവധി വിശ്വാസികള്‍ വിശ്വാസികള്‍ പ്രാര്‍ഥനയാത്രയില്‍ അണിനിരന്നു. വൈകീട്ട് ഏഴിന് കുരിശുമുടി തീര്‍ഥകേന്ദ്രത്തില്‍ നടന്ന ദിവ്യബലിക്ക് മാര്‍ പോളി കണ്ണൂക്കാടന്‍ മുഖ്യ കാര്‍മികനായി. അടിവാരം പള്ളിയിലെ ദിവ്യബലിക്ക് മോണ്‍. വില്‍സണ്‍ ഈരത്തറ കാര്‍മികത്വം വഹിച്ചു. കൈക്കാരന്മാരായ ജോസ് വെട്ടുമണിക്കല്‍, ജോസ് കറുകുറ്റിക്കാരന്‍, ജോയി കളത്തിങ്കല്‍, കണ്‍വീനര്‍മാര്‍, യൂണിറ്റ് പ്രസിഡന്‍റുമാര്‍ എന്നിവര്‍ നേതൃത്വം നല്‍കി.

ആന്പല്ലൂരിൽ വില്ലൻ സർവീസ് റോഡ്; ഇഴഞ്ഞിഴഞ്ഞ് കലുങ്ക് നിർമാണം

ആന്പല്ലൂർ: അടിപ്പാത നിർമാണമാണ് ആന്പല്ലൂരിലും വാഹനങ്ങൾക്കു വില്ലൻ. അവധിക്കാലത്തെ തിരക്കുകൂടിയായപ്പോൾ വാഹയാത്ര ഇഴയുകയാണ്. അടിപ്പാതയുടെ ബോക്സ് നിർമാണം പൂത്തിയായെങ്കിലും സർവീസ് റോഡിന്‍റെ കലുങ്ക് നിർമാണം ഇഴയുന്നതാണു പ്രശ്നം. അടിപ്പാത നിർമിക്കുന്നയിടത്തെ റോഡിന്‍റെ സ്ഥിതിയും മോശമാണ്. വരന്തരപ്പിള്ളി, കല്ലൂർ ഭാഗങ്ങളിൽ നിന്നെത്തുന്ന വാഹനങ്ങളും സർവീസ് റോഡിലേക്ക് എത്തുന്നതോടെ കുരുക്കു മുറുകും. പല സമയത്തും തൃശൂർ ഭാഗത്തേക്കുള്ള പാതയിലെ തിരക്ക് പുതുക്കാട് വരെയാണ് നീളാറുള്ളത്. ചെറിയ അപകടങ്ങളുണ്ടായാൽ നിര പിന്നെയും നീളും. അടിപ്പാത നിർമാണം ആരംഭിക്കുന്നതിനു മുൻപേയാണ് സർവീസ് റോഡ് പൊളിച്ചത്. പലയിടത്തും റോഡിൽ മണ്‍കൂനകളായി. ഡ്രെയിനേജുകൾ പൂർത്തിയാക്കാത്തതുമൂലം മഴവെള്ളം ഒഴുകിപ്പോകാൻ കഴിയാത്ത അവസ്ഥയിലാണ്. ദിനവും ആയിരക്കണക്കിന് വാഹനങ്ങൾ കടന്നുപോകുന്ന ടോൾ പാതയിൽ ദേശീയപാത അഥോറിറ്റിയും ടോൾ കരാർ കന്പനിയും നടത്തുന്ന നവീകരണ പ്രഹസനങ്ങൾക്ക് ഇരയാകുകയാണു യാത്രക്കാർ.

ചിറങ്ങരയിൽ പ്രതിസന്ധി രൂക്ഷം പ്രായോഗിക ബുദ്ധിമുട്ട് കണ്ടില്ലെന്നു നടിച്ചു, നാലുപാടും പ്രതിസന്ധി

കൊരട്ടി: ദേശീയപാത 544ൽ വാളയാർ- അങ്കമാലി മേഖലയിൽ 12 അടിപ്പാതകളുടെ നിർമാണം ഒരേ സമയം ആരംഭിച്ചതുമൂലമുള്ള പ്രതിസന്ധിക്ക് അയവില്ല. നിലവിലുള്ള ഡിവൈൻ അടിപ്പാതയും മുരിങ്ങൂർ, കൊരട്ടി, ചിറങ്ങര ജംഗ്ഷനുകളിലെ നിർദിഷ്ട അടിപ്പാതകളുമടക്കം ആറു കിലോമീറ്ററിനുള്ളിൽ നാല് അടിപ്പാതകൾക്ക് പകരം എലവേറ്റഡ് ഹൈവേ എന്ന ആശയം ജനം മുന്നോട്ടുവച്ചിരുന്നു. ഇതു തള്ളിയ എൻഎച്ച്എഐ ഒരേസമയം മൂന്നിടങ്ങളിലും അടിപ്പാത നിർമിക്കാനിറങ്ങിയതാണ് പ്രതിസന്ധി രൂക്ഷമാക്കിയത്. സർവീസ് റോഡിലൂടെ വാഹനങ്ങൾ കടത്തിവിട്ടതോടെ കുരുക്ക് അതികഠിനമായി. മുരിങ്ങൂർമുതൽ പൊങ്ങംവരെ പൂർണമായി സർവീസ് റോഡ് നിർമിച്ചശേഷം മാത്രമേ അടിപ്പാതയ്ക്കായി പ്രധാന പാത പൊളിക്കാവൂ എന്ന നിർദേശംതള്ളി നിർദിഷ്ട ഇടങ്ങളിൽമാത്രം ബദൽ പാതയൊരുക്കി വാഹനങ്ങൾ കടത്തിവിട്ടതാണു മാസങ്ങളായി നേരിടുന്ന കുരുക്കിന്‍റെ പ്രധാന കാരണം. അഞ്ചര കിലോമീറ്ററിനുള്ളിൽ മൂന്ന് അടിപ്പാതകൾ നിർമിക്കുന്പോഴുണ്ടാകുന്ന ബുദ്ധിമുട്ട് മുൻകൂട്ടി കാണാൻ കഴിയാതെപോയി. പുതുതായി നിർമിച്ച ഡ്രെയിനേജുകൾ പലവട്ടം പൊളിച്ചുപണിതു. ചിറങ്ങരയിലെ അടിപ്പാതയുടെ ബേസ്മെന്‍റ് പണിക്കായി കെട്ടിയ കന്പികൾ അഴിച്ചുമാറ്റി വീണ്ടും കെട്ടേണ്ടിവന്നു. മുരിങ്ങൂരിലും ചിറങ്ങരയിലും അടിപ്പാത നിർമാണം പൂർത്തിയായതിനു ശേഷം മാത്രം കൊരട്ടിയിൽ നിർമാണ പ്രവൃത്തികൾക്കായി പ്രധാനപാത പൊളിച്ചാൽ മതിയെന്ന വാദം ശക്തമാണ്. കൂടാതെ മൂന്നു സ്പാനുകൾ എന്നത് കൂടുതൽ സ്പാനുകളിലുള്ള പാലമാക്കി പുനഃക്രമീകരിക്കണം എന്ന ആവശ്യവും നാട്ടുകാർ ഉന്നയിക്കുന്നുണ്ട്. വൈദ്യുതി തൂണുകൾക്കായി റോഡിന്‍റെ ഘടനയിലും മാറ്റംവരുത്തുന്നത് ഭാവിയിൽ പ്രശ്നമാകും. ഇരു ഭാഗത്തുള്ള ഡ്രെയിനേജുകൾക്കു പുറമെ രണ്ടു മീറ്റർ വീതമുള്ള യൂട്ടിലിറ്റി കോറിഡോർ അനിവാര്യമാണ്. ഗതാഗതക്കുരുക്ക് ഒഴിവാക്കാൻ ടോൾ പിരിവു നിർത്തമെന്ന ആവശ്യവും ശക്തമാണ്.

ദേശീയപാതയിലെ കുരുക്കിന് ഉടൻ പരിഹാരമില്ല

തൃശൂർ: അടിപ്പാത നിർമാണം ആരംഭിച്ചതിനുശേഷം ദേശീയപാതയിൽ രാപ്പകലില്ലാതെ കുരുക്കു തുടരുകയാണ്. കഴിഞ്ഞ ദിവസങ്ങളിൽ 15 കിലോമീറ്ററോളം വാഹനങ്ങൾ പെട്ടുകിടന്നു. ദേശീയപാതയ്ക്കു സമാന്തരമായ ചെറു വഴികളിലും വാഹനത്തിരക്കുമൂലം വീർപ്പുമുട്ടി. ചിറങ്ങരയിൽ വാഹനങ്ങൾക്ക് കടന്നുപോകാനുള്ള മതിയായ സ്ഥലമില്ലാത്തതാണു പ്രതിസന്ധിക്കിടയാക്കുന്നത്. ചിറങ്ങരയിൽനിന്നു വാഹനങ്ങളുടെ നിര ചാലക്കുടിവരെ നീണ്ടതോടെ വൻ പ്രതിഷേധത്തിനും ഇടയാക്കി. ഇതിനു പുറമേ, തൃശൂർ കുറ്റിപ്പുറം പാതയിൽ ഉൾപ്പെടുന്ന പുഴയ്ക്കലും വൻ തിരക്കാണ് അനുഭവപ്പെട്ടത്. വിഷുവിനോടനുബന്ധിച്ചുള്ള അവധികൂടിയെത്തിയതോടെ പുഴയ്ക്കൽ കടക്കാൻ മണിക്കൂറുകൾ കാത്തിരിക്കണം. സമയ നഷ്ടത്തിനൊപ്പം ഇന്ധന നഷ്ടവും സാന്പത്തിക നഷ്ടവും സഹിക്കേണ്ട ഗതികേടിലാണു യാത്രക്കാർ. മഴ ശക്തമായാൽ സ്ഥിതി കൂടുതൽ രൂക്ഷമാകും. അടിപ്പാതകളുടെ അനുബന്ധ ഭിത്തികൾ പലയിടത്തും പൊളിച്ചിട്ടുണ്ട്. മഴപെയ്താൽ ഈ ഭാഗങ്ങൾ ഇടിയാനും സാധ്യതയുണ്ട്. കൊട"കരകയറ്റം' കഠിനം! പതിവു കുരുക്ക് പേരാന്പ്രമുതൽ പെരിങ്ങാംകുളം വരെ കൊടകര: പേരാന്പ്ര പള്ളി ജംഗ്ഷനിൽ അടിപ്പാതയുടെ നിർമാണമാണു കൊടകരയെ കുരുക്കിലാക്കുന്നത്. രാവിലെയും വൈകുന്നേരവും കുരുക്കു രൂക്ഷമാണ്. ചരക്കുലോറികൾ സർവീസ് റോഡിലൂടെ ഒറ്റവരിയായി പോകുന്നതാണ് പ്രതിസന്ധി. പേരാന്പ്രമുതൽ കൊടകര പെരിങ്ങാംകുളംവരെ വാഹനങ്ങളുടെ നീണ്ട നിരയാണ്. അപ്പോളോ പടി മുതൽ പെട്രോൾ പന്പുവരെയുള്ള ഭാഗങ്ങളിൽ പ്രധാനപാതയിൽ പ്രവേശനമില്ലാത്തതിനാൽ സർവീസ് റോഡാണ് ആശ്രയം. ബസുകൾ യാത്രക്കാരെ ഇറക്കാൻ നിർത്തിയാൽ കുരുക്കും രൂക്ഷമാകും. അവധിക്കാലത്തെ വാഹനപ്പെരുക്കവും മറ്റൊരു കാരണമാണ്. എന്നാൽ, മറ്റിടങ്ങളെ അപേക്ഷിച്ചു കൊടകരയിൽ കുരുക്കുകുറവാണെന്നു നാട്ടുകാർ പറഞ്ഞു. സർവീസ് റോഡുകൾ, കാനകൾ എന്നിവയുടെ നിർമാണം പൂർത്തിയാക്കി പ്രധാനപാതയിൽ ഗതാഗതം കേന്ദ്രീകരിച്ചതാണു സഹായമായത്. അടിപ്പാതയുടെ ഒരുഭാഗത്തിന്‍റെ കോണ്‍ക്രീറ്റിംഗ് രണ്ടുമാസംമുന്പ് പൂർത്തിയായി. വടക്കുഭാഗത്തേക്കുള്ള പാതയിലാണ് പണി നടക്കാനുള്ളത്. മറുവശത്ത് ഒരാഴ്ചയ്ക്കകം കോണ്‍ക്രീറ്റിംഗ് പൂർത്തിയാകും. അടിപ്പാതയ്ക്ക് ഇരുഭാഗത്തുമുള്ള പ്രധാനപാതകളെ സർവീസ് റോഡിൽനിന്നു വേർതിരിക്കാനുള്ള സംരക്ഷണഭിത്തിയുടെ ചാലുകീറുന്ന പണികളും പുരോഗമിക്കുന്നു. നിർമാണത്തിൽ തടസമുണ്ടായില്ലെങ്കിൽ ഈവർഷം അവസാനം അടിപ്പാത യാഥാർഥ്യമാകും.

മണലിപ്പുഴയിൽ മരിച്ചനിലയിൽ

തൃക്കൂർ: മണലിപ്പുഴയിൽ വയോധികനെ മരിച്ചനിലയിൽ കണ്ടെത്തി. തൃക്കൂർ കോനിക്കര സ്വദേശി തെക്കുംപീടിക കൊച്ചാപ്പു മകൻ ജോർജ്(64) ആണ് മരിച്ചത്. തൃക്കൂർ പാലത്തിനു താഴെ രാവിലെ മീൻ പിടിക്കാൻ എത്തിയവരാണ് മൃതദേഹം കണ്ടെത്തിയത്. പിന്നീട് പോലീസിൽ വിവരമറിയിക്കുകയായിരുന്നു. പുതുക്കാട് പോലീസും നാട്ടുകാരും ചേർന്ന് മൃതദേഹം പുറത്തെടുത്തു. ഓർമക്കുറവുള്ള ജോർജ് പുഴയിൽ വീണതാകാമെന്നാണ് പ്രാഥമിക നിഗമനം. സംസ്കാരം നടത്തി. മാതാവ്: മേരി. സഹോദരങ്ങൾ: ജോസഫ്, ജോൺസൻ, അൽഫോൻസ.

മത്സ്യബന്ധനത്തിനിടെ തൊഴിലാളി മരിച്ചു

ചാവക്കാട്: മത്സ്യബന്ധനത്തിനിടെ ഹൃദയാഘാതം അനുഭവപ്പെട്ട മത്സ്യത്തൊഴിലാളി ആശുപത്രിയിൽ മരിച്ചു. കടപ്പുറം കുറിയൻ പുരക്കൽ മുഹമ്മദ് അബ്ദുൽ ഖാദർ മകൻ ഷാഫി(51)യാണ് ഇന്നലെ മരിച്ചത്. കൂട്ടായി സ്വദേശിയുടെ ജീലാനി വള്ളത്തിലെ തൊഴിലാളിയായിരുന്നു. മത്സ്യബന്ധനത്തിനിടെ ശനിയാഴ്ച വൈകീട്ട് മന്ദലാംകുന്ന് ആഴക്കടലിൽ വച്ചാണ് നെഞ്ചുവേദന അനുഭവപ്പെട്ടത്. ചെറുവള്ളത്തിൽ കരയിൽ എത്തിച്ച് സ്വകാര്യ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. ഭാര്യ: ഫാത്തിമ. മക്കൾ: ഫൈസൽ, ഫാസില.

നാടാകെ വിഷു ഒരുക്കങ്ങളിലേക്ക്

തൃശൂർ: നാളെ വിഷു. നാടാകെ വിഷു ഒരുക്കങ്ങളുടെ തിരക്കിലാണ്. ഇന്ന് ഞായറാഴ്ചയാണെങ്കിലും വിഷുത്തലേന്നായതിനാൽ കച്ചവടസ്ഥാപനങ്ങളെല്ലാം തുറക്കും. വിഷുത്തലേന്ന് കച്ചവടം പൊടിപൊടിക്കുമെന്ന പ്രതീക്ഷയിലാണ് വ്യാപാരികൾ. പടക്കക്കടകളിൽ തിരക്ക് നേരത്തേ തുടങ്ങി. മുൻവർഷങ്ങളെ അപേക്ഷിച്ച് ഇത്തവണ വലിയ വിലക്കൂടുതൽ പടക്കങ്ങൾക്കില്ല. വിഷുസദ്യ ഒരുക്കാനുള്ള പച്ചക്കറികൾ വാങ്ങാൻ ആളുകൾ ഇന്ന് കൂടുതലായി എത്തുമെന്നാണ് ശക്തൻ നഗറിലെ പച്ചക്കറി വ്യാപാരികൾ ഉൾപ്പടെയുള്ളവർ പ്രതീക്ഷിക്കുന്നത്. പച്ചക്കറി വിലയിലും വലിയ കുതിപ്പ് ഇത്തവണയില്ല. പലയിടത്തും റെഡിമെയ്ഡ് വിഷുസദ്യകൾ വിഭവസമൃദ്ധമായ കറികളും പപ്പടവും പായസങ്ങളുമടക്കം വിതരണം ചെയ്യുന്നുണ്ട്. ഇത്തരം സദ്യകൾക്ക് വലിയ ഡിമാന്‍റാണ് ഇത്തവണ. കണിക്കൊന്നപ്പൂക്കൾ ഇന്നു പുലർച്ചെയോടെ വിഷുവിപണിയിലെത്തും. ഇന്നലെ വൈകുന്നേരത്തോടെ പൂത്തുലഞ്ഞു നിൽക്കുന്ന കൊന്നമരങ്ങളിൽനിന്ന് കൊന്നപ്പൂക്കൾ പറിച്ചെടുക്കാനുള്ള തിക്കും തിരക്കുമായിരുന്നു പലയിടത്തും. വിഷുവിന് പുതുവസ്ത്രങ്ങൾ വാങ്ങാൻ തുണിക്കടകളിലും തിരക്കനുഭവപ്പെടുന്നുണ്ട്.ഓണത്തിന്‍റെ ഉത്രാടപ്പാച്ചിൽ പോലെ ഇന്ന് വിഷുത്തലേന്നുള്ള പാച്ചിലിന്‍റെ ദിവസമാണ്. ഗുരുവായൂരിൽ വിഷുക്കണി ദർശനം പുലർച്ചെ 2.45 മുതൽ ഗുരുവായൂര്‍: ക്ഷേത്രത്തില്‍ വിഷുക്കണി ദര്‍ശനവും വിഷു വിളക്കും നാളെ നടക്കും. പുലര്‍ച്ചെ 2.45 മുതല്‍ 3.45 വരെയാണ് വിഷുക്കണി ദർശനം. മേല്‍ശാന്തി കാവപ്രമാറത്ത് അച്യുതൻ നമ്പൂതിരി പുലര്‍ച്ചെ രണ്ടിന് മുറിയില്‍ കണികണ്ടതിനുശേഷം തീര്‍ഥക്കുളത്തില്‍ കുളിച്ചെത്തി ശ്രീലക വാതില്‍ തുറന്ന് ഗുരുവായൂരപ്പനെ കണികാണിക്കും. തുടര്‍ന്നാണ് ഭക്തര്‍ക്ക് വിഷുക്കണി ദര്‍ശനം. ഇന്നു രാത്രി അത്താഴപ്പൂജക്ക് ശേഷം കീഴ്ശാന്തി നമ്പൂതിരിമാര്‍ ചേര്‍ന്ന് ക്ഷേത്ര മുഖമണ്ഡപത്തില്‍ കണി ഒരുക്കും. ഓട്ടുരുളിയില്‍ ഉണക്കലരി, പുതുവസ്ത്രം, ഗ്രന്ഥം, സ്വര്‍ണം, വാല്‍ക്കണ്ണാടി, കണിക്കൊന്ന, വെള്ളരി, ചക്ക, മാങ്ങ, പഴങ്ങള്‍, നാളികേരം എന്നിവയാണ് കണിക്കോപ്പുകൾ. നമസ്കാര മണ്ഡപത്തിലും കണി ഒരുക്കും. ഇത് ഭക്തർക്ക് കണികാണുന്നതിന് കൂടുതൽ സൗകര്യമാണ്. പുലര്‍ച്ചെ 2.15ന് മുഖമണ്ഡപത്തിലെ വിളക്കുകള്‍ തെളിയിക്കും. നാളികേരമുറിയില്‍ നെയ് വിളക്ക് തെളിയിച്ചശേഷം മേല്‍ശാന്തി ഗുരവായൂരപ്പനെ കണികാണിക്കും. തുടര്‍ന്ന് ഗുരുവായൂരപ്പന്‍റെ തങ്ക തിടമ്പ് സ്വര്‍ണ സിംഹാസനത്തില്‍ ആലവട്ടം, വെഞ്ചാമരം എന്നിവകൊണ്ട് അലങ്കരിച്ചുവയ്ക്കും. സിംഹാസനത്തിന് താഴെയായി ഓട്ടുരുളിയില്‍ ഒരുക്കിയ കണിക്കോപ്പുകളും വയ്ക്കും. തുടര്‍ന്നാണ് ഭക്തര്‍ക്ക് കണി ദര്‍ശനം. വിഷുപ്പുലരിയില്‍ കണ്ണനെ കണികണ്ട് അനുഗ്രഹം നേടാന്‍ ആയിരങ്ങളാണ് ഗുരുവായൂരിലെത്തുക. വർഷങ്ങളായി വിഷു ദിനത്തിൽ ചുറ്റുവിളക്ക് ലണ്ടനിലെ വ്യവസായിയായ തെക്കുമുറി ഹരിദാസിന്‍റെ വകയാണ്. ഹരിദസിന്‍റെ മരണശേഷവും അദ്ദേഹത്തിന്‍റെ വീട്ടുകാരാണ് വിളക്ക് നടത്തുന്നത്. ക്ഷേത്രത്തിൽ രാവിലെയും വൈകീട്ടും മേളത്തോടെയുള്ള കാഴ്ച ശീവേലിയും രാത്രി വിളക്കെഴുന്നെള്ളിപ്പുമാണ്. സന്ധ്യക്ക് തായമ്പകയും ഉണ്ടാവും. സ്വന്തം ലേഖകൻ

വിശ്വദീപ്തി തട്ടിപ്പ്: ഭരണസമിതിക്കെതിരേ ജീവനക്കാർ രംഗത്ത്

തൃശൂർ: വിശ്വദീപ്തി മൾട്ടി സ്റ്റേറ്റ് അഗ്രി കോ-ഓപറേറ്റീവ് സൊസൈറ്റി ലിമിറ്റഡിലെ നിക്ഷേപ തട്ടിപ്പിൽ പരാതിയുമായി ജീവനക്കാർ രംഗത്ത്. കേസിൽ ഭരണസമിതി അംഗങ്ങൾക്കു പകരം നിക്ഷേപകരെ ചേർത്തിയ തങ്ങളുടെ പേരിലാണ് പോലീസ് കേസ് രജിസ്റ്റർ ചെയ്തതെന്നും ഇത് ഒഴിവാക്കണമെന്നും ജീവനക്കാർ പറഞ്ഞു. മികച്ച ശന്പളവും ആനുകൂല്യങ്ങളും വാഗ്ദാനംചെയ്താണ് തങ്ങളെ ജോലിക്കു കയറിയത്. എന്നാൽ കഴിഞ്ഞ അഞ്ചു മാസത്തോളമായി ശന്പളംപോലും ലഭിച്ചിട്ടില്ല. ഇതിനിടെ നിക്ഷേപകർ പരാതികളുമായി വന്നപ്പോൾ, അതിനു ഉത്തരംപറയേണ്ടത് മാനേജ്മെന്‍റ് ആണെന്നും മറ്റുള്ളവർ പ്രതികരിക്കേണ്ടതില്ലെന്നും ബുദ്ധിമുട്ടുള്ളവർക്ക് പിരിഞ്ഞുപോകാമെന്നുമാണു ഭരണസമിതി അറിയിച്ചതെന്നും അവർ പറഞ്ഞു. നിലവിൽ കാർഷിക മേഖലയെ മുൻനിർത്തിയാണ് നിക്ഷേപങ്ങൾ സ്വീകരിച്ചത്. ഇതിനുപുറമെ കൊച്ചിയിൽ വലിയ കെട്ടിടസമുച്ചയം കാണിച്ചും അത് സൊസൈറ്റിയുടേതാണെന്ന് പറഞ്ഞും ഭരണസമിതി കബളിപ്പിക്കുകയായിരുന്നു. എന്നാൽ ഇതൊന്നും ഉൾക്കൊള്ളാൻ തയാറാകാതെ നിക്ഷേപകർ കോർ കമ്മിറ്റി ചേർന്ന് ജീവനക്കാരെ കേസുകളിൽ കുടുക്കുകയാണ്. അതേസമയം കേസുകളിൽപ്പെടാതെ ഭരണസമിതി സ്വതന്ത്രമായി നടക്കുകയാണ്. നിലവിൽ ഒരു ജീവനക്കാരിയെയാണ് റിമാൻഡ് ചെയ്തിരിക്കുന്നത്. നിക്ഷേപകർ തങ്ങളുടെ പേരിലല്ല, 11 അംഗ ഭരണസമിതിയുടെ പേരിലാകണം പരാതികൾ നൽകേണ്ടതെന്നും അവർ പറഞ്ഞു. പത്രസമ്മേളനത്തിൽ മുൻജീവനക്കാരായ ഫെബി ജോബി, വി. സ്വപ്‍ന, ജീവനക്കാരായ അബി ഫ്രാൻസിസ്, പി.ജെ. ജോഫി എന്നിവർ പങ്കെടുത്തു.

ഇന്ന് ഓശാന ഞായർ

തൃശൂർ: ക്രൈസ്തവരുടെ വലിയ നോന്പിലെ വലിയ ആഴ്ചയാചരണത്തിന് ഇന്ന് ഓശാനത്തിരുനാളോടെ തുടക്കം. യേശു‌ക്രിസ്തു ജറുസലേം ദേവാലയത്തിലേക്ക് കഴുതക്കുട്ടിയുടെ പുറത്ത് എഴുന്നള്ളിയപ്പോൾ വഴിയിൽ വസ്ത്രം വിരിച്ചും ഒലിവിലക്കന്പുകൾ വീശി ഓശാന‌പാടിയും ജനം വരവേറ്റതിന്‍റെ ഒാർമയാണ് ഒാശാനത്തിരുനാൾ. "കർത്താവേ, ഞങ്ങളെ രക്ഷിക്കണമേ'എന്നാണ് ഒാശാന എന്ന വാക്കിനർഥം. കേരള സഭയിൽ കുരുത്തോല പെരുന്നാൾ എന്നും ഒാശാന തിരുനാൾ അറിയപ്പെടുന്നുണ്ട്. കുരുത്തോല പ്രദക്ഷിണം എല്ലാ ദേവാലയങ്ങളിലും ഉണ്ടെങ്കിലും ചിലയിടങ്ങളിൽ മാത്രമാണ് ടാബ്ലോയും ദൃശ്യാവിഷ്കാരങ്ങളും അരങ്ങേറുക. വീടുകളിൽ ഉണ്ടാക്കുന്ന കൊഴുക്കട്ടയും പീച്ചംപൊടിയും ആണ് ഒാശാനതിരുനാളിന്‍റെ മുഖ്യപലഹാരം. അതുകൊണ്ടുതന്നെ കൊഴുക്കട്ട പെരുന്നാൾ എന്നും വിളിക്കാറുണ്ട്. വിശുദ്ധ വാരത്തിലെ ദിനങ്ങളെല്ലാം പ്രാർഥനയുടെയും ധ്യാനത്തിന്‍റെയും ഒരുക്കത്തിന്‍റെയും ദിനങ്ങളാണ്. ആണ്ടുകുന്പസാരവും ഈ ദിനങ്ങളിലെ പ്രത്യേകതയാണ്. വ്യാഴാഴ്ചയാണ് യേശുക്രിസ്തു വിശുദ്ധ കുർബാന സ്ഥാപിച്ച പെസഹ തിരുനാൾ. യേശുദേവൻ തന്‍റെ ശിഷ്യരുടെ പാദങ്ങൾ കഴുകി ചുംബിച്ചതിന്‍റെ ഒാർമയാചരണം കൂടിയാണിത്. പെസഹ എന്ന വാക്കിന്‍റെ അർഥം "കടന്നുപോകൽ' എന്നാണ്. പിറ്റേന്നാണ് യേശുക്രിസ്തുവിന്‍റെ കുരിശുമരണത്തിന്‍റെ സ്മരണയാചരിക്കുന്ന ദുഃഖവെള്ളി. 20 നാണു "തിരുനാളുകളുടെ തിരുനാൾ'എന്നറിയപ്പെടുന്ന ഈസ്റ്റർ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]