ADVERTISEMENT

ADVERTISEMENT

കോതമംഗലം സഹകരണ ബാങ്ക് 10 ലക്ഷം നൽകി

കോതമംഗലം: കോതമംഗലം സഹകരണ ബാങ്ക് മുഖ്യമന്ത്രിയുടെ ദുരിതാശ്വാസ നിധിയിലേക്ക് പത്തു ലക്ഷം സംഭാവന നൽകി. ബാങ്ക് പ്രസിഡന്‍റ് എൽദോസ് പോൾ പത്തു ലക്ഷം രൂപയുടെ ചെക്ക് ആന്‍റണി ജോണ്‍ എംഎൽഎയ്ക്ക് കൈമാറി.

ADVERTISEMENT

ആരോഗ്യലക്ഷ്മി പദ്ധതി ഉദ്ഘാടനം ചെയ്തു

പോത്താനിക്കാട്: ആയുര്‍വേദ ഡിസ്പെന്‍സറിയില്‍ ആരംഭിച്ച ‘ആരോഗ്യലക്ഷ്മി' പദ്ധതിയുടെ ഉദ്ഘാടനം ജില്ലാ പഞ്ചായത്തംഗം റാണിക്കുട്ടി ജോര്‍ജ് നിര്‍വഹിച്ചു. ആയുര്‍വേദ ചികിത്സയിലൂടെ സ്ത്രീകളുടെയും കുട്ടികളുടെയും ആരോഗ്യം സംരക്ഷിക്കുകയെന്ന ലക്ഷ്യത്തോടെ ആരംഭിച്ച പദ്ധതിയാണിത്. പോത്താനിക്കാട് പഞ്ചായത്ത് പ്രസിഡന്‍റ് സജി കെ. വര്‍ഗീസ് അധ്യക്ഷത വഹിച്ചു. പഞ്ചായത്തംഗങ്ങളായ ജിനു മാത്യു, ഫിജിന അലി, ജോസ് വര്‍ഗീസ്, ഷാജി സി. ജോണ്‍ എന്നിവര്‍ പ്രസംഗിച്ചു.

ഡബ്ല്യുഐഎംഎ മധ്യമേഖലാ സമ്മേളനം ഇന്ന്

മൂവാറ്റുപുഴ: ഇന്ത്യൻ മെഡിക്കൽ അസോസിയേഷൻ വനിതാ വിഭാഗത്തിന്‍റെ (ഡബ്ല്യുഐഎംഎ) മധ്യമേഖലാ സമ്മേളനം ഇന്ത്യൻ മെഡിക്കൽ അസോസിയേഷൻ മൂവാറ്റുപുഴ ശാഖയുടെ ആഭിമുഖ്യത്തിൽ ഇന്ന് മൂവാറ്റുപുഴയിൽ നടക്കും. രാവിലെ ഒൻപത് മുതൽ വൈകിട്ട് നാലു വരെ മൂവാറ്റുപുഴ വൈഎംസിഎ ഹാളിലാണ് സമ്മേളനം. ഐഎംഎ കേരള സ്റ്റേറ്റ് പ്രസിഡന്‍റ് ഡോ. ശ്രീവിലാസൻ ഉദ്ഘാടനം ചെയ്യും. സമ്മേളനത്തിൽ ഡോ. ഫെമീന അസീസ്, ഡോ. പ്രീതി കോര പെരുമാലിൽ എന്നിവർ പ്രസംഗിക്കും. കേരളാ ഹൈക്കോടതി ആദ്യ ഡെപ്യൂട്ടി സോളിസിറ്റർ ജനറലായി ചുമതലയേറ്റ ഒ.എം. ശാലീനയെ ചടങ്ങിൽ ആദരിക്കും. തുടർന്ന് ‘എന്താണ് വനിതകൾക്ക് വേണ്ടത്’ എന്ന വിഷയത്തിൽ നടക്കുന്ന സംവാദത്തിൽ ഡോ. കുക്കു മത്തായി, ജിയാ മത്തായി കണ്ടത്തിൽ, ഡോ. അക്ഷയ് പ്രഭു എന്നിവർ പ്രസംഗിക്കും. ഡോ. തമ്മനാ ഷേണായി (വിമ മൂവാറ്റുപുഴ സെക്രട്ടറി) മോഡറേറ്ററായിരിക്കും. തുടർന്ന് സാംസ്ക്കാരിക പരിപാടികളും അരങ്ങേറും. എറണാകുളം, തൃശൂർ, ഇടുക്കി, കോട്ടയം ജില്ലകളിൽ നിന്നുള്ള തെരഞ്ഞെടുക്കപ്പെട്ട പ്രതിനിധികളാണ് സമ്മേളനത്തിൽ പങ്കെടുക്കുന്നതെന്ന് ഐഎംഎ മുവാറ്റുപുഴ ശാഖ പ്രസിഡന്‍റ് ഡോ. എബ്രഹാം മാത്യു, ഡബ്ല്യുഐഎംഎ മൂവാറ്റുപുഴ ചെയർപേഴ്സണ്‍ ഡോ. മഞ്ചു രാജാഗോപാൽ എന്നിവർ അറിയിച്ചു.

തദ്ദേശ തെരഞ്ഞെടുപ്പ്: ശില്പശാല നടത്തി

വാഴക്കുളം: മഞ്ഞള്ളൂർ, മൂവാറ്റുപുഴ ബ്ലോക്ക് കോണ്‍ഗ്രസ് കമ്മിറ്റികളുടെ ആഭിമുഖ്യത്തിൽ തദ്ദേശ സ്വയംഭരണ തെരഞ്ഞെടുപ്പിനു മുന്നോടിയായി ശില്പശാല നടത്തി. കോണ്‍ഗ്രസ് ജനപ്രതിനിധികൾ, മണ്ഡലം, ബ്ലോക്ക് ഭാരവാഹികൾ എന്നിവർ പങ്കെടുത്തു. വാഴക്കുളം സഹകരണ ബാങ്ക് ഓഡിറ്റോറിയത്തിൽ നടന്ന ശില്പശാല മാത്യു കുഴൽനാടൻ എംഎൽഎ ഉദ്ഘാടനം ചെയ്തു. മഞ്ഞള്ളൂർ ബ്ലോക്ക് പ്രസിഡന്‍റ് സുഭാഷ് കടയ്ക്കോട്ട് അധ്യക്ഷത വഹിച്ചു. മൂവാറ്റുപുഴ നഗരസഭാധ്യക്ഷൻ പി.പി. എൽദോസ് മുഖ്യപ്രഭാഷണം നടത്തി. മൂവാറ്റുപുഴ ബ്ലോക്ക് പ്രസിഡന്‍റ് സാബു ജോണ്‍, നേതാക്കളായ കെ.എം സലീം, ജോസ് പെരുന്പിള്ളിക്കുന്നേൽ, കെ.എം. പരീത് തുടങ്ങിയവർ പങ്കെടുത്തു.

കണ്ണീരൊപ്പുന്ന തലമുറ കാലത്തിന്‍റെ ആവശ്യം: ദയാ ഭായി

മൂവാറ്റുപുഴ: കണ്ണീരൊപ്പുന്നതിൽ അഭിമാനിക്കുന്ന തലമുറയെയാണ് സമൂഹവും കാലവും ആവശ്യപ്പെടുന്നതെന്ന് സാമൂഹ്യ പ്രവർത്തക ദയാ ഭായി. മൂവാറ്റുപുഴ നിർമല കോളജ് സോഷ്യൽ വർക്ക് വിഭാഗത്തിന്‍റെ ഉദ്ഘാടന വേളയിൽ വിദ്യാർഥികളുമായി സംസാരിക്കുകയായിരുന്നു ദയാ ഭായി. ആദിവാസികൾ ഉൾപ്പെടുന്ന ഗോത്രങ്ങളുടെ സംസ്കാരം നശിപ്പിക്കുന്നതും ഒരു തരം ഹിംസയാണെന്നു ദയാ ഭായി പറഞ്ഞു. കോളജ് ഓഡിറ്റോറിയത്തിൽ ജ്ഞാനദീക്ഷ എന്ന പേരിൽ സംഘടിപ്പിച്ച പരിപാടി സാമൂഹ്യപ്രവർത്തക നിഷ ജോസ് കെ. മാണി ഉദ്ഘാടനം ചെയ്തു. ഓരോ വിദ്യാർഥിയും സാമൂഹിക സംരംഭകരാവുക എന്നതാണ് ആവശ്യമെന്ന് നിഷ ജോസ് കെ. മാണി പറഞ്ഞു. കോളജ് മുൻ പ്രിൻസിപ്പൽ ഡോ. ടി.എം. ജോസഫ് അധ്യക്ഷത വഹിച്ചു. കോളജ് പ്രിൻസിപ്പൽ റവ. ഡോ. ജസ്റ്റിൻ കെ. കുര്യാക്കോസ്, ബർസാർ ഫാ. പോൾ കളത്തൂർ, ആവോലി പഞ്ചായത്ത് പ്രസിഡന്‍റ് ഷെൽമി ജോണ്‍സ്, ബിസിഎം കോളജ് സോഷ്യൽ വർക്ക് വിഭാഗം മേധാവി ഡോ. ഐപ്പ് വർഗീസ്, വൈസ് പ്രിൻസിപ്പൽമാരായ ഡോ. സോണി കുര്യാക്കോസ്, ഡോ. ജിജി കെ. ജോസഫ്, കോളജ് സോഷ്യൽ വർക്ക് വിഭാഗം മേധാവി സുജ തോമസ്, സെൽഫ് ഫിനാൻസിംഗ് ഡയറക്ടർ പ്രഫ. സജി ജോസഫ് എന്നിവർ പ്രസംഗിച്ചു. തുടർന്ന് കോളജിലെ ഇംഗ്ലീഷ്, മലയാളം, വുമണ്‍ സെൽ എന്നീ വിഭാഗങ്ങളുടെ സംയുക്താഭിമുഖ്യത്തിൽ സംവാദവും, ദയാ ഭായി അവതരിപ്പിച്ച നാടകവും അരങ്ങേറി.

ഒൻപത് കുടുംബങ്ങൾക്ക് വീടൊരുക്കി ഡോ. സബൈൻ

മൂവാറ്റുപുഴ: നിർധനരായ ഒന്പത് കുടുംബങ്ങളുടെ വീടെന്ന സ്വപ്നം യാഥാർഥ്യമാക്കി സബൈൻ ഹോസ്പിറ്റൽസും അതിഥി ചാരിറ്റബിൾ സൊസൈറ്റിയും. താമസസജ്ജമായ വീടുകളുടെ താക്കോൽ സമർപ്പണം 13ന് വൈകിട്ട് ആറിന് മന്ത്രി കെ. രാജൻ നിർവഹിക്കുമെന്ന് സബൈൻ ആശുപത്രി എംഡി ഡോ. എസ്. സബൈൻ പത്രസമ്മേളനത്തിൽ അറിയിച്ചു. ഡോ. സബൈന്‍റെ പിതാവ് പി.എൻ. ശിവദാസന്‍റെ 18-ാം ചരമ വാർഷികത്തിലാണ് ഒന്പത് കുടുംബങ്ങൾക്ക് വീടു നൽകുന്നത്. പ്രസവം, സിസേറിയൻ എന്നിവ കുറഞ്ഞ നിരക്കിൽ മരുന്നുകളടക്കം ലഭ്യമാക്കാനുള്ള പദ്ധതിക്കും ഇതോടൊപ്പം തുടക്കമാകും. ആരോഗ്യ സുരക്ഷയുടെ ജനാധിപത്യ പ്രക്രിയ ശക്തിപ്പെടുത്തുക എന്ന ലക്ഷ്യത്തോടെ ആശുപത്രിയുടെ ഗവേഷണ വിപുലീകരണ പദ്ധതികളും തുടർന്നുണ്ടാകുമെന്നും ഡോ. സബൈൻ പറഞ്ഞു. മൂവാറ്റുപുഴ പേഴക്കാപ്പിള്ളി സബൈൻ ആശുപത്രി അങ്കണത്തിൽ നടക്കുന്ന ചടങ്ങിൽ മാത്യു കുഴൽനാടൻ എംഎൽഎ അധ്യക്ഷനാകും. ഡീൻ കുര്യാക്കോസ് എംപി, എൽദോസ് കുന്നപ്പിള്ളി എംഎൽഎ, കേരള ബാങ്ക് പ്രസിഡന്‍റ് ഗോപി കോട്ടമുറിക്കൽ, മുസ്‌ലിം ലീഗ് സംസ്ഥാന പ്രസിഡന്‍റ് പാണക്കാട് സയ്യദ് സാദിക്കലി ഷിഹാബ് തങ്ങൾ, മുൻ എംഎൽഎമാരായ ഏൽദോ ഏബ്രഹാം, ജോസഫ് വാഴക്കൻ, ബാബു പോൾ, ജോണി നെല്ലൂർ, ബിജെപി എറണാകുളം ഈസ്റ്റ് ജില്ലാ ജനറൽ സെക്രട്ടറി അരുണ്‍ പി. മോഹൻ തുടങ്ങിയവർ പ്രസംഗിക്കും. അതിഥി ഹോംസ് എന്ന പേരിലാണ് 2.35 കോടി ചെലവഴിച്ച് 35 സെന്‍റ് സ്ഥലത്ത് ഒരേ മാതൃകയിലുള്ള ഒന്പത് വീടുകൾ നിർമിച്ചിരിക്കുന്നത്. 550 ചതുരശ്ര അടി വലിപ്പത്തിൽ നിർമിച്ചിരുക്കുന്ന വീടുകളിൽ രണ്ട് അറ്റാച്ച്ഡ് ബെഡ്റൂമുകൾ, അടുക്കള, സ്വീകരണ മുറി എന്നിവയും മറ്റ് സൗകര്യങ്ങളും ഒരുക്കിയിട്ടുണ്ട്. 3.5 സെന്‍റിലാണ് ഓരോ വീടും. പായിപ്ര പഞ്ചായത്തിലും സമീപ പ്രദേശങ്ങളിൽ നിന്നുള്ള 100 അപേക്ഷകരിൽ നിന്ന് ഏറ്റവും അർഹരായവരെ കണ്ടെത്താൻ പ്രത്യേതം കമ്മറ്റി രൂപവത്കരിച്ചിരുന്നു. ഇവരാണ് വീടുനല്കേണ്ടവരെ നിശ്ചയിച്ചത്. നൂറ് വീടുകളാണ് സൗജന്യമായി നൽകുവാൻ ഉദ്ദേശിച്ചിരിക്കുന്നതെന്നും ഇതിന്‍റെ ആദ്യഘട്ടമാണ് ഒന്പത് വീടുകൾ നൽകുന്നതെന്നും ഡോ. സബൈൻ ശിവദാസ് പറഞ്ഞു. രണ്ടാംഘട്ടം താമസിയാതെ തുടങ്ങും. മലപ്പുറം താനൂരിലും തിരുവനന്തപുരത്തും ഇപ്പോൾ സബൈൻ ആശുപത്രി പ്രവർത്തിക്കുന്നുണ്ട്. അതിഥി ചാരിറ്റബിൾ സൊസൈറ്റി അംഗവും ഭവന പദ്ധതി ചെയർമാനുമായ പി.എ. ബഷീർ, സബൈൻ ഹോസ്പിറ്റൽ സിഇഒ ഡോ. സാന്‍റി സാജൻ, മാർക്കറ്റിംഗ് വിഭാഗം ജനറൽ മാനേജർ ജെ. പ്രദീഷ് എന്നിവരും പത്രസമ്മേളനത്തിൽ പങ്കെടുത്തു.

പെരുവംമുഴി റോഡ് നിർമാണത്തിലെ അനാസ്ഥ: ഹൈക്കോടതി ഇടപെട്ടു

പിറവം: പെരുവ - പിറവം - പെരുവംമുഴി റോഡ് നിർമാണത്തിൽ ഹൈക്കോടതി ഇടപെട്ടു. കരാർ കാലാവധി അവസാനിച്ച പെരുവംമുഴി റോഡ് ഉടൻ പൂർത്തിയാക്കണമെന്നും, തകർന്നു കിടക്കുന്ന റോഡുകളുടെ കുഴികളടച്ച് അടിയന്തിരമായി സഞ്ചാരയോഗ്യമാക്കണമെന്നും ആവശ്യപ്പെട്ട് ഹൈക്കോടതിയിൽ മുളക്കുളം സ്വദേശിയായ അഡ്വ. എൻ.പി. സേതു സമർപ്പിച്ച റിട്ട് ഹർജിയിലാണ് കോടതി ഇടപെട്ടിരിക്കുന്നത്. കോടതിയിൽ അഡ്വ. ജോർജ് സെബാസ്റ്റ്യൻ മാത്തൂർ മുഖേന സമർപ്പിച്ച ഹർജിയിൽ എതിർ കക്ഷികളായ പൊതുമരാമത്ത് വകുപ്പിനും, കെഎസ്ടിപ്പിക്കും നീട്ടി നൽകിയ കാലാവധി കഴിഞ്ഞിട്ടും പൂർത്തിയാക്കാത്ത അനാസ്ഥയുടെ കാരണം കാണിച്ച് രണ്ടാഴ്ചയ്ക്കകം വിശദീകരണം നൽകാൻ ജസ്റ്റീസ് എൻ. നാഗരേഷ് ഉത്തരവ് പുറപ്പെടുവിച്ചു. സർക്കാരിന്‍റെ റീ ബിൽഡ് കേരള പദ്ധതിയിലുൾപ്പെടുത്തി 98 കോടി രൂപയുടെ പെരുവ - പെരുവംമുഴി റോഡ് നിർമാണം നാലു വർഷം മുമ്പാണ് ആരംഭിച്ചത്. നിർമാണ ചുമതലയുണ്ടായിരുന്ന കെഎസ്ടിപി മുംബൈ ആസ്ഥാനമായുള്ള റെ- കമ്പനിക്കായിരുന്നു കരാർ നൽകിയിരുന്നത്. നിർമാണം പ്രാരംഭ ഘട്ടത്തിൽ വളരെ വേഗത്തിലായിരുന്നെങ്കിലും, പിന്നീട് മന്ദഗതിയിലായി. ഇതിനിടെ 21 കിലോമീറ്റോളം നീളമുള്ള റോഡിൽ യാതൊരു പ്രശ്നങ്ങളുമില്ലാത്ത മുളക്കുളത്തെയും, ഊരമനയിലേയും പാലങ്ങൾ പൊളിച്ച് പുതിയ നിർമാണം ആരംഭിച്ചു. റോഡിന്‍റെ പലയിടങ്ങളിലും കലുങ്കുകൾ ഉൾപ്പടെ കുത്തിപ്പൊളിച്ച് താറുമാറാക്കി. ഇതിനിടെ നിർമാണം മന്ദഗതിയിലായതിനാൽ യാത്ര ദുഷ്കരമായതിനെത്തുടർന്ന് പ്രതിഷേധവും വ്യാപകമായി. രണ്ടു പാലങ്ങളുടേയും നിർമാണം പാതിവഴിയിലായിരിക്കുകയാണ്. സമീപത്ത് നിർമിച്ചിരിക്കുന്ന അപ്രോച്ച് റോഡ് വഴിയുള്ള ഗതാഗതം ഏറെ ദുഷ്കരമാണ്. പെരുവംമുഴി റോഡ് ബിഎംബിസി നിലവാരത്തിൽ അഞ്ചര മീറ്റർ വീതിയിൽ നിർമിച്ചതായിരുന്നു. ഇത് അര മീറ്റർ കൂട്ടി ആറ് മീറ്ററിലാക്കുന്നതിനാണ് കോടികൾ മുടക്കി റോഡ് കുത്തിപ്പൊളിച്ച് കുളമാക്കിയിരിക്കുന്നത്. റോഡ് കടന്നുപോകുന്ന തദ്ദേശ സ്വയംഭരണ സ്ഥാപനങ്ങളിലെ ജനപ്രതിനിധികളുമായി ചർച്ചചെയ്യാതെ, ഉദ്യോഗസ്ഥർ സ്വന്തമായി അലൈൻമെന്‍റ് തയാറാക്കിയതിനെതിരെ ആക്ഷേപം ഉയർന്നിട്ടുണ്ട്. സർക്കാർ യഥാസമയം ഫണ്ട് നൽകാത്തതിനെത്തുടർന്നാണ് നിർമാണം സാവധാനത്തിലായതെന്നായിരുന്നു കരാർ കമ്പനിയുടെ വിശദീകരണം. ഏതായാലും ഏതാനും മാസങ്ങൾക്ക് കരാറെടുത്ത റേ - കമ്പനി പണി ഉപേക്ഷിച്ച് പിൻവാങ്ങുകയും ചെയ്തതോടെ റോഡിന് ശനി ദിശയായി. നിർമാണം പുതിയ കമ്പനിയെ ഏൽപ്പിച്ചിട്ടുണ്ടെന്നാണ് അധികൃതർ പറയുന്നത്. രണ്ടാമത് വീണ്ടും റോഡിന്‍റെ കരാർ ആയിട്ടുണ്ടന്നാണ് അറിയുന്നത്. കോടതി പ്രശ്നത്തിൽ ഇടപെട്ട സ്ഥിതിക്ക് പ്രശ്നങ്ങൾക്ക് പരിഹാരമാകുമെന്ന വിശ്വാസത്തിലാണ് നാട്ടുകാർ.

മാതാക്കൾ പ്രകാശവും പ്രത്യാശയും ഉള്ളവരാകണം: മാർ മഠത്തിക്കണ്ടത്തിൽ

മൂവാറ്റുപുഴ: മാതാക്കൾ പ്രകാശവും പ്രത്യാശയും ഉള്ളവരാകണമെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ. മൂവാറ്റുപുഴ നിർമല ഹയർ സെക്കൻഡറി സ്കൂൾ ഓഡിറ്റോറിയത്തിൽ നടന്ന കോതമംഗലം മാതൃവേദി രൂപത പ്രവർത്തനവർഷ ഉദ്ഘാടനം നിർവഹിക്കുകയായിരുന്നു അദ്ദേഹം. മാതാപിതാക്കൾക്ക് ആത്മീയമായ ഉന്നമനം ഉണ്ടായാൽ മാത്രമേ മക്കളെ വിശ്വാസത്തിൽ വളർത്തിക്കൊണ്ടുവരാൻ സാധിക്കൂ. ഉപദേശമല്ല മാതൃകയാണ് ഈ കാലഘട്ടത്തിന്‍റെ ആവശ്യം. കുറ്റങ്ങൾ മാത്രം കണ്ടെത്തി പറയാതെ പോസിറ്റീവ് എനർജി കൊടുക്കുന്ന മാതാക്കളായിരിക്കണം ഈ പുതിയ കാലഘട്ടത്തിന്‍റെ ഭവനങ്ങളിൽ ഉണ്ടായിരിക്കേണ്ടതെന്നും ബിഷപ് കൂട്ടിച്ചേർത്തു. ചടങ്ങിൽ രൂപത പ്രസിഡന്‍റ് ജാൻസി മാത്യു അധ്യക്ഷത വഹിച്ചു. രൂപതാ ഡയറക്ടർ റവ. ഡോ. ആന്‍റണി പുത്തൻകുളം ആമുഖപ്രഭാഷണം നടത്തി. മൂവാറ്റുപുഴ ഹോളി മാഗി ഫൊറോന പള്ളി വികാരി റവ. ഡോ. മാനുവൽ പിച്ചളക്കാട്ട് അനുഗ്രഹ പ്രഭാഷണം നടത്തി. പ്രവർത്തനവർഷത്തെ മാർഗരേഖ മാർ ജോർജ് മഠത്തിക്കണ്ടത്തിൽ രൂപത പ്രസിഡന്‍റ് ജാൻസി മാത്യുവിന് നൽകി പ്രകാശനം ചെയ്തു. രൂപത വൈസ് പ്രസിഡന്‍റ് സെലിൻ ലൂയിസ്, രൂപതാ ആനിമേറ്റർ സിസ്റ്റർ ആനി തെരേസ, സെക്രട്ടറി ജൂഡി ഡാലു എന്നിവർ പ്രസംഗിച്ചു. പ്രീത ജോണി, സിജി ജോമി, സിൽജ ജോളി, മിനി ജോസ് തുടങ്ങിയവർ നേതൃത്വം നൽകി. മാതാപിതാക്കളുടെ വിവിധ കലാപരിപാടികൾ ചടങ്ങിന് മാറ്റുകൂട്ടി. സ്നേഹവിരുന്നോടെ യോഗ പരിപാടികൾ സമാപിച്ചു.

മാലിപ്പുറം ആശുപത്രി : 5,000 പേർ ഒപ്പിട്ട ഭീമഹർജി നൽകും

വൈപ്പിൻ: മാലിപ്പുറം ആശുപത്രിയുടെ ശോച്യാവസ്ഥ പരിഹരിക്കാൻ സമരസമിതി 5,000 പേർ ഒപ്പിട്ട ഭീമ ഹർജി ഡിഎംഒയ്ക്ക് നൽകും. ആവശ്യത്തിന് ഡോക്ടർമാരെ നിയമിച്ച് രാത്രി സേവനവുംകിടത്തിചികിത്സയും പുനരാരംഭിക്കുക, അവശ്യമരുന്നുകളുടെ ലഭ്യത ഉറപ്പു വരുത്തുക തുടങ്ങിയവയാണ് സമരസമിതിയുടെ ആവശ്യങ്ങൾ.

തൃക്കാക്കര‌യിൽ പ്രതിഭാസംഗമം

കാക്കനാട് : തൃക്കാക്കര നഗരസഭയിൽ സംഘടിപ്പിച്ച പ്രതിഭാ സംഗമം ജസ്റ്റിസ് സി.എൻ. രാമചന്ദ്രൻ നായർ ഉദ്ഘാടനം ചെയ്തു. പത്താം ക്ലാസ്, പ്ലസ്ടു, പരീക്ഷകളിൽ മികച്ചവിജയം നേടിയ 350 വിദ്യാർഥികൾക്കും, സർവകലാശാലാ പരീക്ഷകളിൽ മികവു പുലർത്തിയവർക്കുമാണ് പുരസ്കാരങ്ങൾ വിതരണം ചെയ്തത്. സ്പെയിനിൽ നടന്ന ലോക മെഡിക്കൽ ആൻഡ് ഹെൽത്ത് സയൻസിൽ രാജ്യത്തെ പ്രതിനിധീകരിച്ച ഐഎംഎ കൊച്ചി ജോയിന്‍റ് സെക്രട്ടറിയും ഇടുക്കി ഗവ. മെഡിക്കൽ കോളജിലെ കമ്യൂണിറ്റി മെഡിസിൻ അസോസിയേറ്റ് പ്രഫസറുമായ ഡോ. ആൽവിൻ ആന്‍റോണിയേയും ചടങ്ങിൽ ആദരിച്ചു. ചെയർപേഴ്സൺ രാധാമണിപ്പിള്ള, വൈസ് ചെയർമാൻ ടി.ജി. ദിനൂപ്, വിദ്യാഭ്യാസ സ്ഥിരം സമിതി അധ്യക്ഷൻ നൗഷാദ് പല്ലച്ചി തുടങ്ങിയവർ സംബന്ധിച്ചു.

പാനായിക്കുളം-മുപ്പത്തടം മില്ലുപടി റോഡ് ശോച്യാവസ്ഥയിൽ

ആലങ്ങാട്: പാനായിക്കുളം- മുപ്പത്തടം മില്ലുപടി റോഡിന്‍റെ അവസ്ഥ വളരെ ശോചനീയം. അടിക്കടിഅപകടങ്ങളും വാഹനങ്ങൾ റോഡിൽ പൂണ്ടുപോകുന്നതും പതിവ്. ആലങ്ങാട്- കടുങ്ങല്ലൂർ പഞ്ചായത്തുകളെ തമ്മിൽ ബന്ധിപ്പിക്കുന്ന പ്രധാന ലിങ്ക് റോഡാണിത്. ഒന്നര കിലോമീറ്ററോളം നീളമുള്ള റോഡ് കഴിഞ്ഞ കുറേ മാസങ്ങളായി പൂർണമായും തകർന്നു കുണ്ടും കുഴിയുമായി കിടക്കുകയാണ്. മഴ പെയ്താൽ റോഡ് മുഴുവൻ ചെളി നിറയും കുഴികളിലെല്ലാം വെള്ളം കെട്ടിക്കിടന്നു കുഴി കാണാൻ പോലും കഴിയാത്ത അവസ്ഥയാണ്. ശോച്യാവസ്ഥയിലുള്ള റോഡ് നന്നാക്കാൻ ബന്ധപ്പെട്ടവർ തയാറാകാത്തതിനാൽ സൈക്കിളിലും കാൽനടയായും പോകുന്ന വിദ്യാർഥികളും പ്രയാമായവും ഉൾപ്പെടെ ദുരിതത്തിലാണ്. ദിവസവും ഒട്ടേറെ യാത്രക്കാരാണു റോഡിൽ തെന്നി വീഴുന്നത്. പലതവണ പരാതി പറഞ്ഞിട്ടും റോഡിന്റെ ശോചനീയാവസ്ഥ പരിഹരിക്കാൻ അധികൃതർ തയാറാകുന്നല്ലെന്നാണു നാട്ടുകാരുടെ ആക്ഷേപം. എത്രയും വേഗം റോഡ് സഞ്ചാരയോഗ്യമാക്കണമെന്നാണ് താലൂക് വികസന സമിതി യോഗത്തിൽ ഹൈബി ഈഡൻ എംപിയുടെ പ്രതിനിധി എം.പി. റഷീദ് ആവശ്യപ്പെട്ടു.

ഫിസാറ്റ് ബിസിനസ് സ്‌കൂളില്‍ ബിരുദ സമര്‍പ്പണം

കൊച്ചി: അങ്കമാലി ഫിസാറ്റ് ബിസിനസ് സ്‌കൂളില്‍ ഈ വര്‍ഷം കോഴ്‌സ് പൂര്‍ത്തിയാക്കിയ 120 മാനേജ്‌മെന്‍റ് വിദ്യാര്‍ഥികളുടെ ബിരുദ സമര്‍പ്പണം നടന്നു. ബിരുദദാന സമ്മേളനം അസിസ്റ്റന്‍റ് കളക്ടര്‍ പാര്‍വതി ഗോപകുമാര്‍ ഉദ്ഘാടനം ചെയ്തു. മികച്ച പ്രകടനം കാഴ്ചവച്ച വിദ്യാര്‍ഥികള്‍ക്കുള്ള അവാര്‍ഡുകള്‍, ബിരുദം പൂര്‍ത്തിയാക്കിയ വിദ്യാര്‍ഥികള്‍ക്കുള്ള സര്‍ട്ടിഫിക്കറ്റുകള്‍ തുടങ്ങിയവ അസിസ്റ്റന്‍റ് കളക്ടര്‍, ഫിസാറ്റ് ചെയര്‍മാന്‍ പി.ആര്‍. ഷിമിത്ത്, വൈസ് ചെയര്‍മാന്‍ സച്ചിന്‍ ജേക്കബ് പോള്‍, മാനേജ്‌മെന്‍റ് കമ്മിറ്റി അംഗങ്ങള്‍ തുടങ്ങിയവര്‍ വിതരണം ചെയ്തു. ചടങ്ങില്‍ വൈസ് പ്രസിഡന്‍റ് പോള്‍ മുണ്ടാടന്‍, അസോസിയേറ്റ് സെക്രട്ടറി എം.പി. അബ്ദുല്‍ നാസര്‍, ജോര്‍ജ് സി.ചാക്കോ, വി.എം. രാജനാരായണന്‍, കെ. ജയശ്രീ, ഇ.കെ. രാജവര്‍മ്മ, പ്രിന്‍സിപ്പല്‍ ഡോ. ജേക്കബ് തോമസ്, വൈസ് പ്രിന്‍സിപ്പല്‍ ഡോ. പി.ആര്‍. മിനി, ഡീന്‍ ഡോ. ജി. ഉണ്ണികര്‍ത്ത, ഫിസാറ്റ് ബിസിനസ് സ്‌കൂള്‍ ഡയറക്ടര്‍ ഡോ. എലിസബത്ത് ജോര്‍ജ് തുടങ്ങിവര്‍ പങ്കെടുത്തു.

കടമക്കുടിയിലെ രണ്ടു റോഡുകളുടെ അറ്റകുറ്റപ്പണികള്‍ക്ക് 61.50 ലക്ഷം രൂപയുടെ അനുമതി

കൊച്ചി: കടമക്കുടി പഞ്ചായത്തിലെ രണ്ട് റോഡുകള്‍ക്കായി 61.50 ലക്ഷം രൂപയുടെ ഭരണാനുമതി ലഭിച്ചതായി കെ.എന്‍. ഉണ്ണിക്കൃഷ്ണന്‍ എംഎല്‍എ. ഒമ്പതാം വാര്‍ഡിലെ മൈത്രി റോഡിനു 12.50 ലക്ഷവും ആറാം വാര്‍ഡിലെ സെന്‍റ് മേരീസ് റോഡിനു 49 ലക്ഷം രൂപയുമാണ് അനുവദിച്ചത്. എംഎല്‍എയുടെ നിയോജകമണ്ഡലം ആസ്തി വികസന പദ്ധതിയിലാണ് ഭരണാനുമതി. 25-ഓളം വീട്ടുകാര്‍ താമസിക്കുന്ന പ്രദേശത്തെ മൈത്രി മെയിന്‍ റോഡ് 30 വര്‍ഷം മുമ്പാണ് അവസാനമായി അറ്റകുറ്റപ്പണി ചെയ്തത്. കോതാട് എച്ച്എസ്എസില്‍ നിന്നു കണ്ടെയ്‌നര്‍ റോഡിലേക്കുള്ള എളുപ്പമാര്‍ഗമാണ് സെന്‍റ് മേരീസ് റോഡ്. ഹാര്‍ബര്‍ എന്‍ജിനീയറിംഗ് വകുപ്പ് ചീഫ് എന്‍ജിനീയർക്കാണ് ഇരു പദ്ധതികളുടെയും നിര്‍വഹണ ചുമതല.

അജ്ഞാതൻ ഉപേക്ഷിച്ച വളർത്തുനായ നെടുങ്ങാട് ഭീതി വിതയ്ക്കുന്നു

വൈപ്പിൻ: അജ്ഞാതൻ ഉപേക്ഷിച്ച വളർത്തുന്നനായ പതിയിരുന്നു വിദ്യാർഥികൾ ഉൾപ്പെടെ പതിനാറോളം പേരെ കടിച്ചു. നായരമ്പലം നെടുങ്ങാട് സൗത്ത്ഹെർബർട്ട് പാലത്തിന് സമീപമാണ് നായ പതിയിരുന്ന് ആളുകളെ ആക്രമിക്കുന്നത്. ഏതാനും ദിവസങ്ങൾക്കു മുമ്പ് ഈ നായയെ ആരോ വാഹനത്തിൽ കൊണ്ടുവന്ന് ഉപേക്ഷിച്ചതാണെന്നു നാട്ടുകാർ പറയുന്നു. കുട്ടികളെയും വഴിയാത്രക്കാരെയും നിരന്തരമായി ഉപദ്രവിക്കുന്ന നായയെ അടിയന്തരമായി ആയി ഇവിടെ നിന്ന് പിടികൂടി നാട്ടുകാർക്ക് സുരക്ഷ ഒരുക്കണമെന്ന് നെടുങ്ങാട് യൂത്ത് ഫ്രണ്ട് അസോസിയേഷൻ പഞ്ചായത്തിനോട് ആവശ്യപ്പെട്ടു.

സ്വകാര്യബസിന്‍റെ ചക്രം കാനയിൽ കുരുങ്ങി; ഒന്നരമണിക്കൂർ ഗതാഗതം തടസപ്പെട്ടു

പള്ളുരുത്തി: ഓടിക്കൊണ്ടിരുന്ന സ്വകാര്യ ബസിന്‍റെ മുൻ ചക്രം റോഡരികിലെ കാനയിൽ അകപ്പെട്ടതിനെ തുടർന്ന് ഗതാഗതം സ്തംഭിച്ചു. കുമ്പളങ്ങി വഴി - പെരുമ്പടപ്പ് റോഡിൽ ഇന്നലെ രാവിലെ പത്തരയോടെയാണ് സംഭവം. പെരുമ്പടപ്പിൽ നിന്ന് എറണാകുളത്തേക്ക് പോവുകയായിരുന്ന ലിതിൻ ബസാണ് അപകടത്തിൽപ്പെട്ടത്. യാത്രക്കാർ ഉണ്ടായിരുന്നെങ്കിലും ആർക്കും അപകടം സംഭവിച്ചില്ല. കോൺഗ്രസ് പ്രവർത്തകൻ എൻ.ആർ. ശ്രീകുമാറിന്റെ വീടിന്‍റെ മതിലിലാണ് ബസ് തട്ടിയത്. ഇതേത്തുടർന്ന് ഒന്നര മണിക്കൂറോളം പെരുമ്പടപ്പ് റോഡിൽ ഗതാഗതം തടസപ്പെട്ടു. പിന്നീട് ക്രെയിൻ ഉപയോഗിച്ചാണ് കാനയിൽ നിന്നും ബസിന്‍റെ ചക്രം പൊക്കിയെടുത്തത്. ഒരേ സമയം രണ്ട് വാഹനങ്ങൾക്ക് ഇതുവഴി കടന്ന് പോകാൻ കഴിയാത്ത സ്ഥിതിയാണ്. പെരുമ്പടപ്പ് മുതൽ കുമ്പളങ്ങി വഴി വരെ കുടി വെള്ള പൈപ്പിടുന്നതിനായി വെട്ടിപ്പൊളിച്ച റോഡ് മാസങ്ങൾ കഴിഞ്ഞിട്ടും നന്നാക്കാൻ അധികൃതർക്കായിട്ടില്ല. കഴിഞ്ഞ ദിവസം റോഡിലെ കുഴിയിൽ വീണ് യുവതിയുടെ കൈക്ക് പരിക്കേറ്റിരുന്നു.

ആലുവ പോലീസ് സ്റ്റേഷനിലെ ശുചിമുറി മാലിന്യം റോഡിലേക്ക് ഒഴുകി

ആലുവ: ആലുവ പോലീസ് സ്റ്റേഷനിൽ നിന്നും സെപ്റ്റിക് ടാങ്ക് നിറഞ്ഞ് ട്രഷറി റോഡിലേക്ക് ഒഴുകി. ആലുവ ടൗൺ എസ്എച്ച്ഒയ്ക്ക് ആലുവ നഗരസഭ സെക്രട്ടറി രേഖാമൂലം നോട്ടീസ് നൽകി. വഴി യാത്രക്കാരൻ ഫോൺ മുഖേന അറിയിച്ചതിനെ തുടർന്ന് നഗരസഭാ ആരോഗ്യ വിഭാഗം ഉദ്യോഗസ്ഥർ സ്ഥലം സന്ദർശിച്ച ശേഷമാണ് സെക്രട്ടറി നോട്ടീസ് നൽകിയത്. സെപ്റ്റിക് ടാങ്ക് മാലിന്യം ചോർന്ന് ട്രഷറി റോഡിലേക്ക് ഒഴുകുന്നതായും ദുർഗന്ധം വമിക്കുന്നതായുമാണ് നോട്ടീസിൽ പറയുന്നത്. പൊതുജനാരോഗ്യത്തെ ബാധിക്കുമെന്നതിനാൽ അടിയന്തരമായി പ്രശ്നം പരിഹരിക്കണമെന്നും അണുവിമുക്തമാക്കണമെന്നും നോട്ടീസിൽ ആവശ്യപ്പെട്ടിട്ടുണ്ട്. ഇന്നലെ വൈകിട്ടാണ് സിഐ മഞ്ജുദാസിന് ആലുവ നഗരസഭ സെക്രട്ടറി പി.ജെ. ജെസിന്ത രേഖാമൂലം നോട്ടീസ് നൽകിയത്.

മെട്രോ റെയിൽ അങ്കമാലിയിലേക്ക് ദീര്‍ഘിപ്പിക്കണമെന്ന് എംപി

കൊച്ചി: കൊച്ചിയുടെ സമീപ പട്ടണങ്ങളിലെ വര്‍ധിച്ചു വരുന്ന ഗതാഗതക്കുരുക്കിന് പരിഹാരമാകാൻ അങ്കമാലിയിലേയ്ക്ക് നെടുമ്പാശേരി വിമാനത്താവളം വഴി മെട്രോ റെയില്‍ ദീര്‍ഘിപ്പിക്കുന്നതിനുള്ള നടപടികള്‍ സ്വീകരിക്കണമെന്ന് ബെന്നി ബഹനാന്‍ എംപി. അങ്കമാലി - ശബരി റെയിൽവേ പാത പൂർത്തീകരിക്കുന്നതിനുള്ള നടപടികള്‍ കേന്ദ്ര സർക്കാരുമായി ബന്ധപ്പെട്ട് വേഗത്തിലാക്കണമെന്നും അദ്ദേഹം ആവശ്യപ്പെട്ടു. പാര്‍ലമെന്‍റ് സമ്മേളനത്തിന് മുന്നോടിയായി തിരുവനന്തപുരത്ത് മുഖ്യമന്ത്രി വിളിച്ചു ചേര്‍ത്ത എംപി മാരുടെ യോഗത്തിലാണ് ഇക്കാര്യം ഉന്നയിച്ചത്. അങ്കമാലി അയ്യമ്പുഴയിൽ 358 ഏക്കര്‍ സ്ഥലത്ത് ആരംഭിക്കാൻ വിഭാവനം ചെയ്ത ഗിഫ്റ്റ് സിറ്റിയുടെ സ്ഥലമെടുപ്പ് നടപടികൾ ആരംഭിച്ചതിനെ തുടർന്ന് ആ പ്രദേശത്തെ സ്ഥലം വില്പനയ്ക്കോ വായ്പയെടുക്കുന്നതിനോ സാധിക്കാത്ത പ്രതിസന്ധിയിലാണ് ഭൂവുടമകൾ. ഈ പ്രതിസന്ധിക്ക് പരിഹാരം കണ്ട് അടിയന്തരമായി സ്ഥലമെടുപ്പ് നടപടികൾ പൂര്‍ത്തീകരിച്ച് പദ്ധതി സാക്ഷാത്കരിക്കുന്നതിനുള്ള നടപടികൾ സ്വീകരിക്കണം. അങ്കമാലി -കുണ്ടന്നൂർ -കൊച്ചി ബൈപ്പാസിന്‍റെ സ്ഥലമെടുപ്പ് നടപടികൾക്കായി അന്തിമ വിജ്ഞാപനം പുറപ്പെടുവിക്കേണ്ടതുണ്ട്. ഈ നടപടികൾ ഓഗസ്റ്റ് 31നകം പൂർത്തീകരിച്ചില്ലെങ്കിൽ ഇതുവരെ നടത്തിയ നടപടിക്രമങ്ങൾ വീണ്ടും ആദ്യം മുതല്‍ ആരംഭിക്കേണ്ടതായി വരും. നെടുമ്പാശേരി എയർപോർട്ടിന് സമീപത്തായി സ്ഥാപിക്കാൻ ഉദ്ദേശിക്കുന്ന റെയിൽവേ സ്റ്റേഷനു സ്ഥലം കൈമാറുന്നത് ഉള്‍പ്പെടെയുള്ള നടപടിക്രമങ്ങളുംഎത്രയും വേഗം പൂര്‍ത്തീകരിക്കണം. ആലുവ -ദേശം -പുറയാർ, അങ്കമാലി റെയിൽവേ സ്റ്റേഷൻ, നെടുമ്പാശേരിയിലെ അകപ്പറമ്പ് എന്നിവിടങ്ങളിലെ റെയിൽവേ മേൽപാലങ്ങളുടെ അലൈൻമെന്‍റുകൾ തീരുമാനിച്ച് സ്ഥലം ഏറ്റെടുത്ത് റെയില്‍വേ മേല്‍പ്പാലങ്ങള്‍ എത്രയും വേഗം പൂർത്തീകരിക്കുന്നതിന് പ്രത്യേക പരിഗണന നൽകണമെന്നും ബെന്നി ബഹനാൻ ആവശ്യപ്പെട്ടു. മുഖ്യമന്ത്രിയും വകുപ്പ് മന്ത്രിമാരും ചീഫ് സെക്രട്ടറി ഉള്‍പ്പെടെയുള്ള ഉദ്യോഗസ്ഥമേധാവികളും യോഗത്തിൽ പങ്കെടുത്തു.

50 ലക്ഷത്തിന്‍റെ സേവന പദ്ധതികളുമായി തുറവൂർ ലയൺസ് ക്ലബ്

അങ്കമാലി : 2025 -26 വർഷത്തിൽ ലയൺസ് ക്ലബ് വിവിധ മേഖലകളിലായി 50 ലക്ഷം രൂപയുടെ സാമൂഹിക സേവന പദ്ധതികൾ നടപ്പിലാക്കും. 2025 -26 വർഷത്തെ ഭാരവാഹികളായി ഷാജൻ തോമസ് (പ്രസിഡന്‍റ്), എബി ജോസഫ് (സെക്രട്ടറി), മോഹനൻ അയ്യപ്പൻ (ട്രഷറർ) എന്നിവരുടെ നേതൃത്വത്തിലുള്ള ഭരണസമിതി ചുമതല ഏറ്റെടുത്തു. പിഡിജി അഡ്വ. അമർനാഥ് പിഎംജിഎഫ് യോഗം ഉദ്ഘാടനം ചെയ്തു. ടി.ടി. പൗലോസ് അധ്യക്ഷത വഹിച്ചു. ഈ വർഷത്തെ പ്രധാന സർവീസ് പ്രൊജക്ടുകൾ സ്കൂളുകളിൽ നാപ്കിൻ ഇൻസുലേറ്റർ, ഇ-മാലിന്യ ശേഖരണം, കരിയർ മാപ്പിംഗ്, ലഹരി വിരുദ്ധ കാമ്പയിൻ, കുട്ടികളുടെ നേത്ര പരിശോധന, കുട്ടികൾക്ക് വിദ്യാഭ്യാസ സഹായം, ഭവന രഹിതർക്കുള്ള സ്നേഹവീട്, ഹംഗർ പ്രൊജക്റ്റ്, ട്രാഫിക് സിഗ്നൽ സ്ഥാപിക്കൽ, മെഡിക്കൽ ക്യാമ്പുകൾ, വിദ്യാലയങ്ങൾക്കുള്ള ഡിജിറ്റൽ ലൈബ്രറി, വായന കളരി, രോഗികൾക്ക് ധനസഹായം, ചൈൽഡ് ഹുഡ്, കാൻസർ റിലീഫ് തുടങ്ങിയ പദ്ധതികൾ നടപ്പാക്കുമെന്ന് പ്രസിഡന്‍റ് ഷാജൻ തോമസ് അറിയിച്ചു. സർവീസ് ചെയർമാൻ ജൈജു വി. മംഗലി, സെക്രട്ടറി എബി ജോസഫ്, റീജിയണൽ കോ ഓർഡിനേറ്റർ എം.പി. വിൽ‌സൺ , റീജിയണൽ ചെയർമാൻ ടി.ടി. ആന്‍റു, റീജിയണൽ ചെയർമാൻ എം.വി. ഡേവീസ്, സോൺ ചെയർമാൻ ബി.സി. ഷാജു എന്നിവർ സംസാരിച്ചു.

ആയുർവേദത്തിന് പ്രാധാന്യം നൽകണം: പ്രഫ. എം.കെ. സാനു

കൊച്ചി: ജീവിതശൈലീ രോഗങ്ങളാൽ ബുദ്ധിമുട്ടുന്ന ഈ കാലഘട്ടത്തിൽ ആയുർവേദ ചികിത്സാ രീതിക്ക് കൂടുതൽ പ്രാധാന്യം നൽകണമെന്ന് പ്രഫ. എം.കെ. സാനു. ചാവറ കൾച്ചറൽ സെന്‍റർ കാരിക്കാമുറി റെസിഡന്‍റ്സ് അസോസിയേഷൻ, ശാന്തിഗിരി ആയുർവേദ ഹോസ്പിറ്റൽ, റോട്ടറി ക്ലബ് ഓഫ് കൊച്ചിൻ ക്വീൻ സിറ്റി എന്നിവയുടെ നേതൃത്വത്തിൽ സംഘടിപ്പിച്ച ആയുർവേദ ക്യാമ്പിൽ മുഖ്യപ്രഭാഷണം നടത്തുകയായിരുന്നു അദ്ദേഹം. ക്യാമ്പും ആദരവ് ചടങ്ങും ഡോ. സഭാപതി ദീപം ഉദ്ഘാടനം ചെയ്തു. റെസിഡന്‍റ്സ് അസോസിയേഷൻ പ്രസിഡന്‍റ് പി.എ. സദാശിവൻ അധ്യക്ഷത വഹിച്ചു. എറണാകുളം സെൻട്രൽ പോലീസ് ഇൻസ്പെക്ടർ അനീഷ് ജോയ്, ചാവറ കൾച്ചറൽ സെന്‍റർ ഡയറക്ടർ ഫാ. അനിൽ ഫിലിപ്പ്, റോട്ടറി ക്ലബ് കൊച്ചിൻ ക്വീൻ സിറ്റി പ്രസിഡന്‍റ് പി.ജി.ആർ. നായർ, റോട്ടറി ഡിസ്ട്രിക്ട് ഗവർണേഴ്സ് ഗ്രൂപ്പ് പ്രതിനിധി ജയകൃഷ്ണൻ, കോർപറേഷൻ കൗൺസിലർ പദ്മജ എസ്. മേനോൻ തുടങ്ങിയവർ പ്രസംഗിച്ചു.

കെ. കരുണാകരന്‍ അനുസ്മരണം സംഘടിപ്പിച്ചു

കൊച്ചി: കേരളത്തിന്‍റെ വ്യവസായ രംഗത്തിനും സാമൂഹ്യ പുരോഗതിക്കും പുതിയ മാനം നല്‍കിയ മുഖ്യമന്ത്രിയായിരുന്നു കെ. കരുണാകരനെന്ന് കെ. ബാബു എംഎല്‍എ. വികസന പ്രവര്‍ത്തനങ്ങളിലെ അദ്ദേഹത്തിന്‍റെ ദീര്‍ഘവീക്ഷണം ശ്രദ്ധേയമാണെന്നും അദ്ദേഹം പറഞ്ഞു. എറണാകുളം ഡിസിസി സംഘടിപ്പിച്ച കെ. കരുണാകരന്‍ അനുസ്മരണം ഉദ്ഘാടനം ചെയ്യുകയായിരുന്നു അദ്ദേഹം. ഡിസിസി പ്രസിഡന്‍റ് മുഹമ്മദ് ഷിയാസ് അധ്യക്ഷനായി. നേതാക്കളായ ഡൊമിനിക് പ്രസന്‍റേഷന്‍, ശ്രീനിവാസന്‍ കൃഷ്ണന്‍, എം.എ. ചന്ദ്രശേഖരന്‍, കെ.ബി. മുഹമ്മദ് കുട്ടി, ജയ്‌സണ്‍ ജോസഫ്, ടോണി ചമ്മിണി തുടങ്ങിയവര്‍ പങ്കെടുത്തു. ഇന്ദിരാഗാന്ധി കള്‍ച്ചറല്‍ സെന്‍ററിന്‍റെ നേതൃത്വത്തില്‍ സംഘടിപ്പിച്ച അനുസ്മരണ പരിപാടി എഐസിസി അംഗം എന്‍.വേണുഗോപാൽ ഉദ്ഘാടനം ചെയ്തു. ഇന്ദിരാഗാന്ധി കള്‍ച്ചറല്‍ സെന്‍റര്‍ ചെയര്‍മാന്‍ കെ.എം. റഹീം അധ്യക്ഷത വഹിച്ചു. കൊച്ചി കോര്‍പറേഷന്‍ പ്രതിപക്ഷ നേതാവ് ആന്‍റണി കുരീത്തറ മുഖ്യാതിഥിയായി.

കെയ്‌റോസ് 2025: രാജഗിരി ജേതാക്കള്‍

കൊച്ചി: കാക്കനാട് അസീസി വിദ്യാനികേതന്‍ പബ്ലിക് സ്‌കൂള്‍ സംഘടിപ്പിച്ച കെയ്‌റോസ് 2025 കലാമേളയില്‍ കളമശേരി രാജഗിരി പബ്ലിക് സ്‌കൂള്‍ ജേതാക്കളായി. കാക്കനാട് രാജഗിരി ക്രിസ്തുജയന്തി രണ്ടാം സ്ഥാനം നേടി. സ്‌കൂള്‍ സ്ഥാപകനായ റവ. ഡോ. ഫ്രാന്‍സിസ് കണ്ണിക്കലിന്‍റെ സ്മരണയ്ക്ക് സംഘടിപ്പിച്ച മേളയില്‍ വിവിധ സിബിഎസ്ഇ സ്‌കൂളുകളില്‍ നിന്നു 700 ഓളം പ്രതിഭകള്‍ പങ്കെടുത്തു. സ്‌കൂളിലെ പതിനൊന്നാം ക്ലാസ് വിദ്യാര്‍ഥികളായിരുന്നു മുഖ്യസംഘാടകര്‍.

സ്വകാര്യബസുകൾ ഞായറാഴ്ച ട്രിപ്പ് മുടക്കുന്നതായി പരാതി

അങ്കമാലി: അങ്കമാലി - കാലടി മേഖലകളിലെ സ്വകാര്യ ബസുകൾ പലപ്പോഴും ഞായറാഴ്ച ദിവസങ്ങളിൽ ഓടുന്നില്ല . സ്വകാര്യ ബസ് ഉടമകൾക്കെതിരെ വ്യാപകമായ പ്രതിഷേധം. മലയോര പ്രദേശങ്ങളായ പൂതംകുറ്റി, മൂന്നോർപ്പിള്ളി, അയ്യമ്പുഴ, മഞ്ഞപ്ര എന്നിവിടങ്ങൾ വഴി ഞായറാഴ്ച ദിവസങ്ങളിൽ ബസുകൾ ട്രിപ്പുകൾ മുടക്കുന്നതിനാൽ ബസിനെ മാത്രം ആശ്രയിച്ച് യാത്ര ചെയ്യുന്ന തൊഴിലാളികൾ ഉൾപ്പെടെയുള്ള ആളുകൾ ബുദ്ധിമുട്ടനുഭവിക്കുന്നു. ഇതിന് ഉടൻ പരിഹാരം കാണണമെന്ന് ആവശ്യപ്പെട്ടു കൊണ്ട് ബസ് പാസഞ്ചേഴ്സ് അസോസിയേഷൻ ഭാരവാഹികൾ സ്വകാര്യ ബസ് ഉടമകൾക്ക് നിവേദനം നൽകി.

ഫാ. ജേക്കബ് പാലയ്ക്കാപ്പിള്ളി എല്‍എഫ് ആശുപത്രി‍ ഡയറക്ടര്‍

അങ്കമാലി: അങ്കമാലി ലിറ്റില്‍ ഫ്ലവര്‍ ആശുപത്രിയുടെ ഡയറക്ടറായി ഫാ. ജേക്കബ് പാലയ്ക്കാപ്പിള്ളി ചുമതലയേറ്റു. എറണാകുളം - അങ്കമാലി അതിരൂപത വികാരി ജനറാളായി സേവനമനുഷ്ഠിക്കുകയായിരുന്നു. അതിരൂപത കോര്‍പറേറ്റ് മാനേജര്‍, ഭാരതമാതാ കോളജ് മാനേജര്‍, കേരള കത്തോലിക്ക മെത്രാന്‍ സംഘത്തിന്‍റെ ആസ്ഥാനമായ പിഒസിയുടെ ഡയറക്ടര്‍, കെസിബിസി വക്താവ്, ഡെപ്യൂട്ടി ജനറല്‍ സെക്രട്ടറി, കെസിബിസി വിദ്യാഭ്യാസ കമ്മീഷന്‍ സെക്രട്ടറി, കത്തോലിക്ക കോണ്‍ഗ്രസ്, സംസ്ഥാന ഡയറക്ടര്‍ എന്നീ നിലകളിലും സേവനമനുഷ്ഠിച്ചിട്ടുണ്ട്.

ശ്രേഷ്ഠ ബാവയ്ക്ക് ആദരവ്

മരട്: യാക്കോബായ സഭയുടെ തലവനായി സ്ഥാനമേറ്റ ശ്രേഷ്ഠ കാതോലിക്കാ ബസേലിയോസ് ജോസഫ് ബാവയ്ക്ക് മരട് മോസ്ക് റോഡ് റസിഡന്‍റ്സ് അസോസിയേഷൻ ഭാരവാഹികൾ സ്നേഹാദരമർപ്പിച്ചു. ബാവയുടെ ഔദ്യോഗിക വസതിയിൽ നടന്ന ചടങ്ങിൽ എംആർആർഎ പ്രസിഡന്‍റ് വി.ആർ. വിജു , സെക്രട്ടറി ബോബി കാർട്ടർ എന്നിവർ ചേർന്ന് പൊന്നാടയണിയിച്ചു. ഭാരവാഹികളായ കെ.ജി. പ്രകാശൻ, പി.എക്സ്. ജോളി, സന്ദീപ് ചന്ദ്രൻ എന്നിവർ പങ്കെടുത്തു.

ഇടക്കൊച്ചിയിലെ വേലിയേറ്റ വെള്ളക്കെട്ട് : താത്കാലിക തടയണ നിർമാണം എട്ടു മുതൽ

പള്ളുരുത്തി: ഇടക്കൊച്ചിയിൽ കായൽ വേലിയേറ്റ വെള്ളക്കെട്ടിന് 32 ലക്ഷം രൂപ ചെലവഴിച്ച് പ്രദേശത്ത് 250 മീറ്ററോളം നീളത്തിൽ നിർമിക്കുന്ന സംരക്ഷണ ഭിത്തിയുടെ നിർമാണം അവസാന ഘട്ടത്തിൽ. കൗൺസിലർ ജീജ ടെൻസൻ മുൻകൈയെടുത്താണ് സംരക്ഷണ ഭിത്തി പൂർത്തീകരിക്കുന്നത്. കൗൺസിലർമാരുടെ ആവശ്യം പരിഗണിച്ച് ജില്ലാ കളക്ടർ അനുവദിച്ച ദുരന്തനിവാരണ ഫണ്ട് ഉപയോഗിച്ചുള്ള താത്കാലിക തടയണയുടെ നിർമാണം ചൊവാഴ്ച്ച തുടങ്ങുമെന്ന് വാർഡ് കൗൺസിലർ ജീജ ടെൻസൻ പറഞ്ഞു. വേലിയേറ്റ ദുരിതത്തിലായ ഇടക്കൊച്ചി കമ്പനി പറമ്പ് ഭാഗം, കുട്ടികൃഷ്ണൻ വൈദ്യർ റോഡ്, അംബേദ്കർ റോഡ് എന്നിവിടങ്ങളിലാണ് കായൽ വേലിയേറ്റ വെള്ളക്കെട്ട് മൂലം ജനങ്ങൾ ദുരിതം അനുഭവിക്കുന്നത്. ഈ പ്രദേശങ്ങളിലേക്ക് തുറന്നു കിടക്കുന്ന വലിയ കനാലുകൾ വഴിയാണ് കായൽ വെള്ളം ഇവിടേക്ക് ഒഴുകിയെത്തുന്നത്. ഇറിഗേഷൻ വകുപ്പ് നടപ്പിലാക്കുന്ന സ്ലൂയിസുകൾ ടെണ്ടർ നടപടിയായിട്ടുണ്ട്. ഇറിഗേഷൻ വകുപ്പിന്‍റെ സ്ളൂയിസ് നിർമാണം താമസിക്കുന്നതിനാലാണ് താത്കാലിക തടയണക്കായി കളക്ടർ പണം അനുവദിച്ചത്. പ്രദേശത്തെ വേലിയേറ്റ ദുരിതം മനസിലാക്കി മേയർ എം. അനിൽകുമാർ ചെറുതും വലുതുമായി ഏഴ് സ്ളൂയിസുകൾക്ക് അനുമതി നൽകിയിട്ടുണ്ട്. ടെൻഡർ നടപടിയിലായ പ്രവൃത്തിയും താമസിയാതെ ആരംഭിക്കാനാകുമെന്ന് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ വി.എ. ശ്രീജിത്ത് പറഞ്ഞു. ഇറിഗേഷന്‍റെയും നഗരസഭയുടേയും പ്രവൃത്തി പൂർത്തീകരിക്കുന്നതോടെ പ്രദേശത്തെ വേലിയേറ്റ വെള്ളക്കെട്ടിന് ശാശ്വത പരിഹാരമാകുമെന്ന് കൗൺസിലർ ജീജ ടെൻസൻ പറഞ്ഞു.

തെരുവുനായ ശല്യത്തിനെതിരെ യൂത്ത് ഫ്രണ്ട് പ്രതിഷേധം

കൊച്ചി: തെരുവുനായ ശല്യത്തിനെതിരെ പട്ടിക്കൂടുമായി കൊച്ചിന്‍ കോര്‍പറേഷന് മുന്നില്‍ യൂത്ത് ഫ്രണ്ട് എറണാകുളം ജില്ലാ കമ്മിറ്റി നേതൃത്വത്തില്‍ പ്രതിഷേധ സമരം നടത്തി. കേരള കോണ്‍ഗ്രസ് ജില്ലാ പ്രസിഡന്‍റ് ഷിബു തെക്കുംപുറം ഉദ്ഘാടനം ചെയ്തു. യൂത്ത് ഫ്രണ്ട് ജില്ലാ പ്രസിഡന്‍റ് ജോഷ്വാ തായങ്കേരി അധ്യക്ഷത വഹിച്ചു. സേവി കുരിശു വീട്ടില്‍, വിനോദ് തമ്പി, ജിസന്‍ ജോര്‍ജ്, ബോബികുറുപ്പത്ത്, രാജു വടക്കേക്കര, അജേഷ് രാജന്‍, ആദിത്യന്‍ കുട്ടന്‍, ലെവിന്‍ ചുള്ളിയാടന്‍, അര്‍ജുന്‍, ഉണ്ണി വടുതല, സന്തോഷ് വര്‍ഗീസ്, ബേബി പൊട്ടനാനി, ആന്‍റണി മാഞ്ഞൂരാന്‍, ജയന്തന്‍ വൈപ്പിന്‍, റെഡ് സ്റ്റാന്‍ലി, അലിയാര്‍ കുഞ്ഞ്, റോഷന്‍ ചാക്കപ്പന്‍, തോമസ് പെരുമ്പാവൂര്‍, ആന്‍റണി തൃപ്പൂണിത്തുറ, ജേക്കബ് വേട്ടപറമ്പില്‍, സാജു ചേരാനല്ലൂര്‍, ആന്‍റണി നെല്ലിങേരി, ജോസി കുരിശുവീട്ടില്‍, കുട്ടന്‍ ചിറ്റൂര്‍ എന്നിവര്‍ നേതൃത്വം നല്‍കി.

കൊച്ചിയില്‍ ഇന്നും നാളെയും ഗതാഗത നിയന്ത്രണം

കൊച്ചി: ഉപരാഷ്ട്രപതിയുടെ സന്ദര്‍ശനത്തോടനുബന്ധിച്ച് കൊച്ചിയില്‍ ഇന്നും നാളെയും ഗതാഗത നിയന്ത്രണം. ഇന്ന് ഉച്ചകഴിഞ്ഞ് നേവല്‍ ബേസ്, എംജി റോഡ്, ഹൈക്കോടതി, ബോള്‍ഗാട്ടി ഭാഗങ്ങളിലും നാളെ രാവിലെ എട്ടു മുതല്‍ ഉച്ചയ്ക്ക് ഒന്നുവരെ ദേശീയപാത 544, കളമശേരി എസ്‌സിഎംഎസ് മുതല്‍ കളമശേരി എച്ച്എംടി, സീപോര്‍ട്ട് എയര്‍പോര്‍ട്ട് റോഡില്‍ തോഷിബ ജംഗ്ഷന്‍, മെഡിക്കല്‍ കോളജ് റോഡില്‍ കളമശേരി ന്യൂവാല്‍സ് വരെയും ഗതാഗത നിയന്ത്രണം ഉണ്ടായിരിക്കുമെന്ന് കൊച്ചി സിറ്റി പോലീസ് കമ്മീഷണര്‍ അറിയിച്ചു.

അങ്കമാലിയിൽ മന്ത്രി വാസവനുനേരെ കരിങ്കൊടി പ്രതിഷേധം

അങ്കമാലി: അങ്കമാലിയിൽ മന്ത്രി വി.എൻ. വാസവന്‍റെ വാഹനത്തിന് നേരെ യൂത്ത് കോൺഗ്രസ് പ്രവർത്തകർ കരിങ്കൊടികാട്ടി പ്രതിഷേധിച്ചു. അങ്കമാലി അഡ്‌ലക്സ് കൺവൻഷൻ സെന്‍ററിൽ നടന്ന അന്തർദേശീയ സഹകരണ ദിനാഘോഷ പരിപാടികളിൽ പങ്കെടുത്ത് മടങ്ങുകയായിരുന്നു മന്ത്രി. യൂത്ത് കോൺഗ്രസ് പ്രവർത്തകരെ പോലീസ് അറസ്റ്റ് ചെയ്ത് നീക്കി.

പാര്‍ക്കിംഗ് ഫീസ്: കളക്ടര്‍ പരിശോധിക്കണമെന്ന് മനുഷ്യാവകാശ കമ്മീഷന്‍

കൊച്ചി: കളക്‌ടറേറ്റിലെത്തുന്ന വാഹനങ്ങളില്‍നിന്ന് അന്യായമായി പാര്‍ക്കിംഗ് ഫീസ് ഈടാക്കുന്നുവെന്ന പരാതി ജില്ലാ കളക്ടര്‍ പരിശോധിച്ച് രണ്ടു മാസത്തിനകം തീരുമാനമെടുക്കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസ്. പൊതുപ്രവര്‍ത്തകന്‍ രാജു വാഴക്കാലയുടെ പരാതിയിലാണ് നടപടി. പരാതിയും പരിഹാരമാര്‍ഗങ്ങളും പരാതിക്കാരന്‍ ജില്ലാ കളക്ടര്‍ക്ക് നല്‍കണമെന്ന് ഉത്തരവില്‍ പറയുന്നു. സബ് കളക്ടര്‍മാരും ഉദ്യോഗസ്ഥരുമടങ്ങുന്ന ഒരു കമ്മറ്റി ജില്ലാ കളക്ടര്‍ രൂപീകരിച്ച് നിവേദനം പരിശോധിക്കണം. പരാതിക്കാരനെ കേട്ട് ശരിയായ അന്വേഷണം നടത്തി വസ്തുനിഷ്ഠമായ റിപ്പോര്‍ട്ട് പ്രസ്തുത കമ്മിറ്റി ജില്ലാ കളക്ടര്‍ക്ക് സമര്‍പ്പിക്കണം.

കഴുത്തിന് കുത്തേറ്റയാൾ മരിച്ചു; മധ്യവയസ്കൻ അറസ്റ്റിൽ

ആലുവ: നഗര മധ്യത്തിൽ കൂട്ടാളികൾ തമ്മിലുള്ള വാക്കേറ്റത്തിനിടെ കഴുത്തിന് കുത്തേറ്റയാൾ ചികിത്സയിലിരിക്കെ മരിച്ചു. ആലുവ യുസി കോളജിന് സമീപം വലിയപറന്പിൽ വീട്ടിൽ രാജന്‍റെ മകൻ എസ്. സാജൻ (ആനക്കാരൻ -46) ആണ് മരിച്ചത്. സംഭവവുമായി ബന്ധപ്പെട്ട് കോഴിക്കോട് നാദാപുരം സ്വദേശി അഷറഫി(52)നെ ആലുവ പോലീസ് അറസ്റ്റ് ചെയ്തു. ഇന്നലെ രാവിലെ ഒന്പതോടെ ആലുവ പ്രൈവറ്റ് ബസ് സ്റ്റാൻഡിന് പിന്നിലെ ക്ലോക്ക് ടവർ ബിൽഡിംഗിലെ കോഫി ഷോപ്പിന് മുന്നിലായിരുന്നു സംഭവം. കുത്തേറ്റ സാജൻ നിരവധി പേരോട് സഹായം അഭ്യർഥിച്ച ശേഷമാണ് അവിടെ ഉണ്ടായിരുന്ന ഒരാൾ ഇയാളെ സ്വകാര്യ ആശുപത്രിയിൽ എത്തിച്ചത്. പിന്നീട് എറണാകുളം ഗവൺമെന്‍റ് മെഡിക്കൽ കോളജ് ആശുപത്രിയിലേക്ക് കൊണ്ടുപോയെങ്കിലും ജീവൻ രക്ഷിക്കാനായില്ല. അഷറഫിനെ നാട്ടുകാർ പിടികൂടി പോലീസിന് കൈമാറുകയായിരുന്നു. മൂന്നു വർഷമായി ആലുവ മേൽപ്പാലത്തിന് അടിയിലാണ് അഷറഫും സാജനും കഴിഞ്ഞിരുന്നത്. ചെറിയ ജോലികൾക്ക് അഷറഫിനെ സാജൻ വിടാറുണ്ട്. കൂലി സംബന്ധിച്ച് കഴിഞ്ഞ വ്യാഴാഴ്ച ഇരുവരും തമ്മിൽ തർക്കം ഉണ്ടായിരുന്നു. ഇതായിരിക്കാം കത്തിക്കുത്തിനു പ്രകോപനമായതെന്നാണ് കരുതുന്നത്. ഒട്ടേറെ ക്രിമിനൽ കേസുകളിലെ പ്രതിയാണ് കൊല്ലപ്പെട്ട സാജൻ. മൃതദേഹം കളമശേരി മെഡിക്കൽ കോളജ് ആശുപത്രി മോർച്ചറിയിൽ. പ്രതിയെ ഇന്ന് ആലുവ കോടതിയിൽ ഹാജരാക്കും. അഷറഫ് ആലുവ സ്റ്റേഷനിൽ നിരവധി മോഷണ കേസിലെ പ്രതിയാണ്. photo 1 - കൊല്ലപ്പെട്ട സാജൻ photo 2 - അറസ്റ്റിലായ അഷറഫ്

തട്ടിക്കൊണ്ടു പോകൽ: ഒടുവില്‍ ആശങ്ക മാറ്റി പോലീസ് : "ഒമാനി ദമ്പതികള്‍ മിഠായി നല്‍കിയത് സ്‌നേഹത്തോടെ'

കൊച്ചി: അഭ്യൂഹങ്ങള്‍ക്കും ആശങ്കകള്‍ക്കും വിരാമം. എളമക്കരയില്‍ മിഠായി നല്‍കി കുട്ടികളെ തട്ടിക്കൊണ്ടുപോകാന്‍ ശ്രമിച്ചതല്ലെന്ന് പോലീസ് കണ്ടെത്തി. മെഡിക്കല്‍ ടൂറിസത്തിനായി കേരളത്തില്‍ എത്തിയ ഒമാനി ദമ്പതികള്‍ മിഠായി നല്‍കിയത് തങ്ങളെ തട്ടിക്കൊണ്ടുപോകാനാണെന്ന് അഞ്ചും ആറും വയസുള്ള പെണ്‍കുട്ടികള്‍ തെറ്റിദ്ധരിച്ചതാണ് പ്രശ്‌നങ്ങള്‍ക്ക് കാരണമായത്. ഒമാനി ദമ്പതികളെയും കുട്ടികളുടെ രക്ഷിതാക്കളെയും ഒന്നിച്ചിരുത്തി സംഭവം വിശദീകരിച്ചതോടെ ആ ആശങ്ക അകന്നു. ഇടപ്പള്ളി പോണേക്കര മീഞ്ചിറ റോഡില്‍ വെള്ളിയാഴ്ച വൈകിട്ട് 4.30നായിരുന്നു സംഭവം. വെള്ള ഇന്നോവ ടാക്‌സി കാറില്‍ എത്തിയവര്‍ തട്ടിക്കൊണ്ടുപോകാന്‍ ശ്രമിച്ചെന്ന് കുട്ടികള്‍ ട്യൂഷന്‍ ടീച്ചറോട് പറഞ്ഞതാണ് ദുരൂഹതയ്ക്ക് വഴിവച്ചത്. കാറിന്‍റെ പിന്‍വശത്തിരുന്നയാള്‍ തങ്ങള്‍ക്ക് നേരെ മിഠായികള്‍ നീട്ടി. ഇത് വാങ്ങതെ വന്നതോടെ കാറിലുണ്ടായിരുന്നയാള്‍ ഇളയ കുട്ടിയുടെ കൈക്ക് പിടിച്ചു വലിച്ചു, ഈ സമയം മൂത്ത കൂടി കരയുകയും ട്യൂഷനു പോകുന്ന വീട്ടിലേക്ക് കയറിയതോടെ കാര്‍ വേഗത്തില്‍ ഓടിച്ചുപോയെന്നുമായിരുന്നു കുട്ടികളുടെ മൊഴി. സംഭവത്തില്‍ സിസിടിവി കേന്ദ്രീകരിച്ച് നടത്തിയ അന്വേഷണത്തില്‍ കുട്ടികളുടെ അടുത്തെത്തിയ വാഹനം കണ്ടെത്തി. പിന്നാലെ ഇതില്‍ ആ സമയം യാത്ര ചെയ്തിരുന്ന ഒമാനി ദമ്പതികളെ എളമക്കര പോലീസ് വിളിച്ചു വരുത്തുകയായിരുന്നു. അമൃത ആശുപത്രിയില്‍ ചികിത്സയിലുള്ള ബന്ധുവിനെ കാണാന്‍ പോകുന്നതിനിടെയാണ് കുട്ടികള്‍ക്ക് മിഠായി നല്‍കിയതെന്ന് ഇവര്‍ പോലീസിനോട് പറഞ്ഞു. വരുന്ന വഴിയില്‍ ഇവര്‍ മറ്റു പലര്‍ക്കും മിഠായി നല്‍കിയിരുന്നു. ഈ ദൃശ്യങ്ങള്‍ ഇവര്‍ പോലീസിന് കൈമാറി. തുടര്‍ന്ന് കുട്ടികളുടെ രക്ഷിതാക്കളെയും ഒരുമിച്ചിരുത്തി കാര്യങ്ങള്‍ വിശദീകരിക്കുകയായിരുന്നു. സംഭവത്തില്‍ പോലീസ് കേസ് രജിസ്റ്റര്‍ ചെയ്തിരുന്നില്ല.

യാത്ര ചെയ്ത ബസിടിച്ച് നഴ്സിന് ഗുരുതര പരിക്ക്

ആലുവ: യാത്ര ചെയ്തിറങ്ങിയ അതേ ബസിടിച്ച് ഗവ. ആശുപത്രിയിലെ നഴ്സിന് ഗുരുതര പരിക്ക്. ഇരിങ്ങാലക്കുട ഗവ. ആശുപത്രി നഴ്സിംഗ് അസിസ്റ്റന്‍റ് പള്ളിക്കരയിൽ താമസിക്കുന്ന കോലഞ്ചേരി പന്തലുമാവുങ്കൽ വീട്ടിൽ കുമാരന്‍റെ ഭാര്യ ബിന്ദുവി(48)നാണ് ഗുരുതരമായി പരിക്കേറ്റത്. പഴയ ബസ് സ്റ്റാൻഡിന് മുന്നിൽ ബസിറങ്ങി റെയിൽവേ സ്റ്റേഷനിലേക്ക് പോകാനായി റോഡ് മുറിച്ചു കടക്കവേ പിന്നിൽ നിന്ന് വരികയായിരുന്ന അതേ സ്വകാര്യ ബസിന്‍റെ ചക്രം കാലിലൂടെ കയറിയിറങ്ങുകയായിരുന്നു. ഇന്നലെ രാവിലെ 6.30ഓടെയാണ് റെയിൽവേ സ്റ്റേഷൻ ജംഗ്ഷനിലാണ് അപകടം നടന്നത്. പള്ളിക്കരയിൽ നിന്നു കെഎൽ 40 വി 799 എന്ന ത്രീ കിംഗ്സ് എന്ന ബസിലാണ് ബിന്ദു ആലുവയിലെത്തിയത്. ആലുവയിൽ നിന്നും ഇരിങ്ങാലക്കുടയിലേക്ക് ട്രെയിൻ മാർഗം പോകാനാണ് ആലുവയിൽ ഇറങ്ങിയത്. സ്റ്റോപ്പിൽ ബസിറങ്ങിയ ശേഷം മുന്നോട്ടു നടന്ന് സീബ്ര ലൈനിലൂടെ ജംഗ്ഷൻ മുറിച്ചുകടക്കുമ്പോഴാണ് അപകടം. ബിന്ദുവിന്‍റെ ഇടതുകാലിലൂടെ ബസിന്‍റെ മുൻചക്രം കയറിയിറങ്ങി. യാത്രക്കാർ ബഹളം വച്ചപ്പോൾ 15 മീറ്ററോളം നീങ്ങിയാണ് ബസ് നിർത്തിയത്. ഉടൻ ആലുവ ജില്ലാ ആശുപത്രിയിൽ പ്രഥമശുശ്രൂഷ നൽകിയ ശേഷം എറണാകുളം സ്പെഷലിസ്റ്റ് ആശുപത്രിയിലേക്ക് മാറ്റി. പിന്നീട് എറണാകുളത്തെ സ്വ കാര്യ ആശുപത്രിയിൽ സർജറിക്ക് വിധേയമാക്കി. ഇടതുകാൽ മുറിച്ച് നീക്കേണ്ടി വരുമെന്നാണ് ഡോക്ടർമാർ അറിയിച്ചിട്ടുള്ളത്. ഭർത്താവ് കുമാരൻ സ്വകാര്യ സ്ഥാപന ജീവനക്കാരനാണ്.

കുട പെയിന്‍റിംഗ് മത്സരം: രജിസ്ട്രേഷന്‍ തുടങ്ങി

കൊച്ചി: കുട പെയിന്‍റിംഗ് മത്സരമായ "ഫണ്‍ബ്രല്ല'യുടെ ഏഴാം സീസണിന്‍റെ രജിസ്ട്രേഷന്‍ ആരംഭിച്ചു. ആദ്യം രജിസ്റ്റര്‍ ചെയ്യുന്ന 200 പേര്‍ക്കാണ് പങ്കെടുക്കാന്‍ അവസരം. ഹൈസ്‌കൂള്‍ വിദ്യാര്‍ഥികളുടെ സര്‍ഗാത്മകത പരിപോഷിപ്പിക്കുന്നതിനായി എക്‌സിക്യൂട്ടീവ് ഇവന്‍റ്സ് സംഘടിപ്പിക്കുന്ന മത്സരത്തിൽ ഇക്കുറി "കേരളത്തിന്‍റെ മണ്‍സൂണ്‍' ആണ് ഇത്തവണത്തെ വിഷയം. ഓഗസ്റ്റ് 17ന് കൊച്ചി മാരിയറ്റ് ഹോട്ടലിലാണു മത്സരം. മത്സരാഥികൾക്ക് കാൻവാസായി വെളുത്ത കുടയും ഫാബ്രിക്ക് പെയിന്‍റും നൽകും. എട്ടു മുതൽ 10 വരെ ക്ലാസുകളിലെ വിദ്യാർഥികൾക്കാണ് മത്സരത്തിൽ പങ്കെടുക്കാൻ അവസരം. കലാകാരന്മാരും വിദ്യാഭ്യാസ വിദഗ്ധരും ഉള്‍പ്പെടുന്ന പാനലാണ് വിജയികളെ കണ്ടെത്തുക. ഒന്നാം സമ്മാനമായി 25,000 രൂപ നൽകും. രണ്ടാം സമ്മാനം 10,000 രൂപ, മൂന്നാം സമ്മാനം 5,000 രൂപ. പങ്കെടുക്കുന്ന എല്ലാവര്‍ക്കും സര്‍ട്ടിഫിക്കറ്റുകളും പ്രത്യേക സമ്മാനങ്ങളും ഉണ്ടായിരിക്കും. കൂടുതല്‍ വിവരങ്ങള്‍ക്കും രജിസ്‌ട്രേഷനും ഫോൺ: +91 97789 91258, +91 97788 64828.

ഗതാഗതക്കുരുക്കിൽ കൊച്ചി നിലച്ചു

കൊച്ചി: നഗരത്തെ വലച്ച് മണിക്കൂറുകളോളം നീണ്ട ഗതാഗതക്കുരുക്ക്. കലൂര്‍ മുതല്‍ ഇടപ്പള്ളി വരെയും ഇടപ്പള്ളി ബൈപ്പാസിലുമാണ് ഇന്നലെ വൈകിട്ട് മണിക്കൂറുകള്‍ നീണ്ട ഗതാഗതക്കുരുക്ക് അനുഭവപ്പെട്ടത്. ഇതിനുപുറമേ എറണാകുളം എംജി റോഡ്, തേവര ഭാഗം, വൈറ്റില, കരിങ്ങാച്ചിറ- തിരുവാങ്കുളം റൂട്ട് എന്നിവിടങ്ങളിലും ഗതാഗതക്കുരുക്ക് രൂക്ഷമായിരുന്നു. വൈകിട്ട് അഞ്ചോടെ ആരംഭിച്ച കുരുക്ക് അഴിഞ്ഞത് രാത്രി ഏറെ വൈകിയാണ്. ഇതോടെ വഹനയാത്രക്കാര്‍ ദുരിതത്തിലായി. നഗരത്തിലെ ഷോപ്പിംഗ് മാളില്‍ ഓഫര്‍ സെയില്‍ പ്രഖ്യാപിച്ചതും കൊച്ചിയില്‍ ഗതാഗതക്കുരുക്ക് ഇരട്ടിയാകാന്‍ കാരണമായെന്ന് പോലീസ് പറഞ്ഞു. ട്രാഫിക് പോലീസിന് പുറമേ വാഹന യാത്രികരും ഇറങ്ങിയാണ് പലയിടത്തും ഗതാഗതം നിയന്ത്രിച്ചത്. പ്രധാന റോഡുകള്‍ വാഹനംകൊണ്ട് നിറഞ്ഞതിന് പിന്നാലെ കുരുക്കില്‍ നിന്ന് രക്ഷനേടാന്‍ നഗരത്തിനുള്ളിലെ ഇടറോഡുകളിലേക്ക് വലിയ വാഹനങ്ങളടക്കം കൂട്ടത്തോടെ എത്തിയത് അവിടെയും ഗതാഗതക്കുരുക്ക് രൂക്ഷമാക്കി. കൃത്യസമയത്ത് സര്‍വീസ് നടത്താനാകാതെ കെഎസ്ആര്‍ടിസി, സ്വകാര്യ ബസുകളും വലഞ്ഞു. ആലുവ, വൈറ്റില ഭാഗത്തേക്ക് ബസ് സര്‍വീസുകളെ ആശ്രയിച്ച പലരും കുരുക്ക് നീണ്ടതോടെ ഒടുവില്‍ മെട്രോയിലാണ് യാത്ര തുടർന്നത്. മെട്രോ രണ്ടാം ഘട്ട നിര്‍മാണ പ്രവര്‍ത്തനങ്ങള്‍ നടക്കുന്ന പാലാരിവട്ടം-കാക്കനാട് പാതയില്‍ ഗതാഗതക്കുരുക്ക് കാര്യങ്ങള്‍ വഷളാക്കി. കലൂരിലെയും ഇടപ്പള്ളിയിലെയും ട്രാഫിക് സിഗ്നല്‍ സംവിധാനങ്ങള്‍ രാത്രി വൈകിയാണ് സാധാരണ നിലയിലായത്.

മെസി വരുമോ... ഇല്ലയോ... കലൂര്‍ സ്റ്റേഡിയം ഒരുങ്ങിത്തുടങ്ങി

കൊച്ചി: ലോക ചാമ്പ്യന്മാരായ അര്‍ജന്‍റീനയും ലയണല്‍ മെസിയും കേരളത്തിലേക്ക് പന്തുതട്ടാന്‍ വരുമോ... ഇല്ലയോ... എന്ന അനിശ്ചിതത്വം നിലനില്‍ക്കുകയാണെങ്കിലും മത്സര വേദിയായി കണക്കാക്കുന്ന കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തിന്‍റെ നവീകരണ പ്രവര്‍ത്തനങ്ങള്‍ തുടങ്ങി. സ്റ്റേഡിയം പെയിന്‍റ് ചെയ്ത് ഇരിപ്പിടങ്ങള്‍ നവീകരിക്കുന്നതിന് പുറമേ പൊട്ടിപ്പൊളിഞ്ഞ ഭാഗങ്ങള്‍ കോണ്‍ക്രീറ്റ് ചെയ്ത് ബലപ്പെടുത്തുന്നതും ചോര്‍ച്ചകള്‍ പരിഹരിക്കുന്ന പ്രവൃത്തികളുമാണ് ആരംഭിച്ചിരിക്കുന്നത്. അര്‍ജന്‍റീന കേരളത്തിലേക്ക് വരുന്ന കാര്യത്തില്‍ തീരുമാനമായാല്‍ അതിനു മുന്നേ അടിസ്ഥാന ഒരുക്കങ്ങള്‍ പൂര്‍ത്തിയാക്കുന്നതിന്‍റെ ഭാഗമായി കൂടിയാണ് ഇപ്പോഴത്തെ നവീകരണം. അര്‍ജന്‍റീന ടീം വരുന്നതുമായി ബന്ധപ്പെട്ട് നേരത്തെ സ്‌പോര്‍ട്‌സ് കൗണ്‍സില്‍ പ്രതിനിധികള്‍ ജിസിഡിഎയില്‍ എത്തിയിരുന്നു. അന്താരാഷ്ട്ര മത്സര വേദിയാകാന്‍ യോഗ്യമാകും വിധം സ്റ്റേഡിയം ഫിറ്റ് ആണെന്നാണ് ജിസിഡിഎ അധികൃതര്‍ സ്‌പോര്‍ട്‌സ് കൗണ്‍സിലിനെ അറിയിച്ചത്. മാത്രമല്ല 2017ല്‍ ഫിഫ അണ്ടര്‍ 17 ലോക കപ്പ് മത്സരങ്ങള്‍ക്കായി സ്റ്റേഡിയം ഫിഫയുടെ മാനദണ്ഡങ്ങള്‍ പ്രകാരം നവീകരിച്ചിരുന്നു. ഇനി അറ്റകുറ്റപ്പണികള്‍ മാത്രം മതിയെന്നാണ് ജിസിഡിഎയുടെ വിശദീകരണം. സ്റ്റേഡിയത്തിന്‍റെ ഒന്നര ലക്ഷത്തോളം ചതുരശ്ര മീറ്റര്‍ വിസ്തൃതി വരുന്ന ഭാഗത്തിന്‍റെ പെയിന്‍റിംഗാണ് ഇപ്പോള്‍ നടക്കുന്നത്. 1.35 കോടി രൂപയ്ക്ക് ഡുറോലാക് എന്ന സ്ഥാപനമാണ് വര്‍ക്ക് ഏറ്റെടുത്തിട്ടുള്ളത്. ഓഗസ്റ്റ് അവസാനത്തോടെ പെയിന്‍റിംഗ് പൂര്‍ത്തിയാകും. തുടര്‍ന്ന് ഇരിപ്പിടങ്ങളുടെ നവീകരണവും ചോര്‍ച്ച പരിഹരിക്കുന്നതടക്കമുള്ള സിവില്‍ വര്‍ക്കുകളും നടക്കും. അഞ്ച് കോടി രൂപ ചിലവഴിച്ചാണ് നവീകരണം. ഇതോടൊപ്പം ഫ്‌ളെഡ്‌ലിറ്റുകള്‍ നവീകരിക്കുന്ന ജോലികളും ആരംഭിക്കുമെന്ന് ജിസിഡിഎ അറിയിച്ചു. നിലവിലുള്ള ലൈറ്റുകള്‍ അഴിച്ചുമാറ്റി പുതിയ ഫ്രെയ്മുകള്‍ സ്ഥാപിച്ച ശേഷം ലൈറ്റുകള്‍ പുനസ്ഥാപിക്കുന്നതാണ് ഇതോടൊപ്പം ചെയ്യുന്നത്. ഹാലജന്‍ ലൈറ്റുകള്‍ക്ക് പകരം സ്റ്റേഡിയം മുഴുവന്‍ എല്‍ഇഡി പ്രകാശത്തിലേക്ക് മാറ്റുന്നതും ആലോചനയിലുണ്ടെന്നും ജിസിഡിഎ അറിയിച്ചു. 1996ലാണ് ജിസിഡിഎ സ്റ്റേഡിയം നിര്‍മിച്ചത്. 34 ഏക്കർ ഭൂമിയിലെ 12 ഏക്കറില്‍ മൂന്നു നിലകളിലായി 55,000 പേര്‍ക്ക് ഇരിപ്പിട സൗകര്യം സ്റ്റേഡിയത്തിലുണ്ട്. നിരവധി അന്താരാഷ്ട്ര, ദേശീയ ക്രിക്കറ്റ് മത്സരങ്ങള്‍ക്കും ഫുട്‌ബോള്‍ മത്സരങ്ങള്‍ക്കും ഐഎസ്എല്‍ മത്സരങ്ങള്‍ക്കും സ്റ്റേഡിയം വേദിയായി. കേരള ബ്ലാസ്റ്റേഴ്‌സിന്‍റെ ഹോം ഗ്രൗണ്ട് കൂടിയാണ് കലൂര്‍ സ്റ്റേഡിയം.

പോത്താനിക്കാട് സ്വകാര്യ ബസും ഓട്ടോയും ‌ കൂട്ടിയിടിച്ച് രണ്ടുമരണം

പോത്താനിക്കാട്: കക്കടാശേരി-കാളിയാർ റോഡിൽ സ്വകാര്യ ബസും ഓട്ടോറിക്ഷയും കൂട്ടിയിടിച്ച് ഓട്ടോറിക്ഷാ യാത്രക്കാരിയായ വീട്ടമ്മയും ഓട്ടോ ഓടിച്ചിരുന്ന മരുമകനും മരിച്ചു. കൊച്ചുമകൾക്ക് പരിക്കേറ്റു. കോഴിപ്പിള്ളി പാറച്ചാലിപ്പടി കുര്യപ്പാറ ബ്രസി ആന്‍റണി(70)യും ബ്രസിയുടെ മകൾ മേരിയുടെ ഭർത്താവ് കടവൂർ മലേക്കുടിയിൽ ബിജു (43)വുമാണ് മരിച്ചത്. അപകടത്തിൽ സാരമായി പരിക്കേറ്റ ബിജുവിന്‍റെ മകൾ മെറിനെ(16) തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. പൈങ്ങോട്ടൂർ ആയങ്കര മൃഗാശുപത്രിക്ക് സമീപം ഇന്നലെ രാവിലെ 10ഓടെയായിരുന്നു അപകടം. ബിജുവിന്‍റെ വീട്ടിൽനിന്ന് മടങ്ങുകയായിരുന്നു ബ്രസി. മൂവാറ്റുപുഴ ഭാഗത്തുനിന്ന് വന്ന ശ്രീക്കുട്ടി ബസ് എതിർദിശയിൽ നിന്നു വരികയായിരുന്ന ഓട്ടോയിൽ ഇടിക്കുകയായിരുന്നു. ഇടിയുടെ ആഘാതത്തിൽ ഓട്ടോറിക്ഷ തെറിച്ചു മറിഞ്ഞു. ബ്രസി സംഭവസ്ഥലത്തുവച്ചും ബിജു ആശുപത്രിയിൽ ചികിത്സയിലിരിക്കെയുമാണ് മരിച്ചത്. ബ്രസിയുടെ മൃതദേഹം മൂവാറ്റുപുഴ താലൂക്ക് ആശുപത്രി മോർച്ചറിയിൽ. സംസ്കാരം ഇന്ന് ഉച്ചകഴിഞ്ഞ് കോതമംഗലം സെന്‍റ് ജോർജ് കത്തീഡ്രലിൽ. കുത്തുകുഴി പള്ളിക്കുന്നേൽ കുടുംബാംഗമാണ്. ഭർത്താവ്: ആന്‍റണി. മകൻ: ബോബി. മരുമകൾ: ബിന്ദു പനച്ചിക്കുടി കോതമംഗലം. ബിജുവിന്‍റെ മകൻ മെബിൻ.

ബൈക്കും സ്കൂട്ടറും കൂട്ടിയിടിച്ച് യുവാവ് മരിച്ചു

ഇലഞ്ഞി: ബൈക്കും സ്കൂട്ടറും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. ഇരവിമംഗലം ചാക്കരിമുക്ക് ചാർത്താംകാലായിൽ സേവ്യർ തോമസ്-സാലി സേവ്യർ ദന്പതികളുടെ (ഇരുവരും ഇറ്റലി) മകൻ കുര്യാക്കോസ് സേവ്യർ (27) ആണ് മരിച്ചത്. ഇലഞ്ഞി പെട്രോൾ പന്പിനു സമീപം വെള്ളിയാഴ്ച രാത്രി 9.30ഓടെയായിരുന്നു അപകടം. കൂത്താട്ടുകുളം ഭാഗത്തുനിന്നു വരുകയായിരുന്ന ബൈക്ക് എതിർദിശയിൽ നിന്നു വന്ന സ്കൂട്ടറുമായി കൂട്ടിയിടിക്കുകയായിരുന്നു. ഇരുവാഹനങ്ങളിൽ ഉള്ളവർക്ക് കാര്യമായ പരിക്കുകൾ ഉണ്ടായിരുന്നില്ല. എന്നാൽ പിന്നീട് മരണം സംഭവിക്കുകയായിരുന്നു. ആന്തരിക രക്തസ്രാവമാകാം മരണകാരണം എന്നാണ് പ്രാഥമിക നിഗമനം. സംസ്കാരം പിന്നീട്. സഹോദരങ്ങൾ: തോമസ് കുട്ടി സേവ്യർ (യുകെ), ജോസഫ് സേവ്യർ (ജർമനി), ദിയ മരിയ സേവ്യർ (ജർമനി).

പനി ബാധിച്ച് വിദ്യാർഥിനി മരിച്ചു

കാലടി: പനി ബാധിച്ച് ഏഴാം ക്ലാസ് വിദ്യാർഥിനി മരിച്ചു. അയ്യന്പുഴ കൊല്ലക്കോട് പടയാട്ടി ഷിജു - ജാസ്മി ദന്പതികളുടെ മകൾ ജെനീറ്റ (12) ആണ് മരിച്ചത്. രണ്ട് ദിവസമായി പനി ബാധിച്ച് ചികിത്സയിലായിരുന്നു. ഇന്നലെ രാവിലെ പനി കൂടിയതിനെ തുടർന്ന് അങ്കമാലി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മഞ്ഞപ്ര സെന്‍റ് മേരീസ് യൂപി സ്കൂളിലെ വിദ്യാർഥിനിയാണ്. സംസ്കാരം നടത്തി. സഹോദരി: ജെസ്റ്റീന.

കുഴഞ്ഞു വീണു മരിച്ചു

മഞ്ഞപ്ര: മഞ്ഞപ്ര പത്താം വാർഡിൽ ദേവസ്വം ബോർഡ് മുൻ ജീവനക്കാരനായിരുന്ന മുരിയന്പിള്ളി തച്ചിലേത്ത് എം.വി. ഉണ്ണികൃഷ്ണൻ (73) കുഴിഞ്ഞുവീണു മരിച്ചു. സംസ്കാരം നടത്തി. ഭാര്യ: പത്മിനി മഞ്ഞപ്ര തച്ചിലേത്ത് കുടുംബാംഗം. മക്കൾ: ഉപന്യ (പെരുന്പാവൂർ കോടതി), ധന്യ (അധ്യാപിക, ശിവഗിരി ആലുവ). മരുമക്കൾ: രാജീവ് (പ്രൈവറ്റ് കന്പനി), സനൽ (ബിസിനസ്).

ബ്ലോക്കുതല കോണ്‍ഗ്രസ് പ്രതിഷേധം 8ന്

കൊച്ചി: ആരോഗ്യമന്ത്രിയുടെ രാജി ആവശ്യപ്പെട്ട് കോണ്‍ഗ്രസ് ബ്ലോക്ക് കമ്മിറ്റികളുടെ നേതൃത്വത്തില്‍ എട്ടിന് പ്രതിഷേധ മാര്‍ച്ചും ധര്‍ണയും സംഘടിപ്പിക്കും. കളമശേരി മെഡിക്കല്‍ കോളജ് കുത്തഴിഞ്ഞ നിലയിലാണ് പ്രവര്‍ത്തിക്കുന്നതെന്നും എറണാകുളം ജനറല്‍ ആശുപത്രിയില്‍ ആവശ്യത്തിന് മരുന്നുകളും മതിയായ ചികിത്സയും ലഭ്യമല്ലെന്നും ജില്ലാ കോണ്‍ഗ്രസ് കമ്മിറ്റി നേതൃയോഗം ആരോപിച്ചു. കെപിസിസി വൈസ് പ്രസിഡന്‍റ് വി.ജെ.പൗലോസ് യോഗം ഉദ്ഘാടനം ചെയ്തു. ഡിസിസി പ്രസിഡന്‍റ് മുഹമ്മദ് ഷിയാസ് അധ്യക്ഷത വഹിച്ചു. എംഎല്‍എമാരായ കെ.ബാബു, അന്‍വര്‍ സാദത്ത്, നേതാക്കളായ ഡൊമിനിക് പ്രസന്‍റേഷന്‍, അജയ് തറയിൽ തുടങ്ങിയവര്‍ സംസാരിച്ചു. മഹിളാ കോൺഗ്രസ് പ്രതിഷേധിച്ചു കൊച്ചി: ആരോഗ്യമന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ട് മഹിളാ കോൺഗ്രസ് എറണാകുളം ജില്ലാ കമ്മിറ്റിയുടെ നേതൃത്വത്തിൽ എറണാകുളം ഡിഎംഒ ഓഫീസിലേക്ക് പ്രതിഷേധ പ്രകടനം നടത്തി. പ്രവർത്തകർ മന്ത്രിയുടെ കോലം കത്തിച്ചു. ജില്ലാ കോൺഗ്രസ് കമ്മിറ്റി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്തു. ജില്ലാ പ്രസിഡന്‍റ് സുനില സിബി അധ്യക്ഷത വഹിച്ചു. മഹിളാ കോൺഗ്രസ് സംസ്ഥാന വൈസ് പ്രസിഡന്‍റ് മുഖ്യപ്രഭാഷണം നടത്തി.

എംഡിഎംഎയുമായി യുവതിയുൾപ്പെടെ മൂവർ സംഘം പിടിയിൽ

കളമശേരി: കളമശേരിയിൽ എംഡിഎംഎയുമായി യുവതി ഉൾപ്പെടെ മൂവർ സംഘം പിടിയിൽ. ആലുവ കാരോത്തുകുടി കെ.ബി. സലോൺ(27), എടയപ്പുറം കോണത്തുകാട്ടിൽ അഹമ്മദ് ജിൻസ്(30), അങ്കമാലി പുളിയനം മന്നത്ത് അനു ബാബു(25) എന്നിവരെയാണ് പത്തടിപ്പാലത്തുനിന്ന് കളമശേരി പോലീസ് അറസ്റ്റ് ചെയ്തത്. പോലീസ് പട്രോളിംഗിനിടെ പുലർച്ചെ ഒന്നരയോടെയാണ് സംശയാസ്പദമായ സാഹചര്യത്തിൽ കാറിൽ സഞ്ചരിക്കുകായിരുന്നു സംഘത്തെ പിടികൂടി പരിശോധിച്ചത്. ഇവരുടെ പക്കൽനിന്ന് 0.81 ഗ്രാം എംഡിഎംഎ, 21 ഗ്രാം കഞ്ചാവ് എന്നിവ കണ്ടെടുത്തു. അറസ്റ്റ് പ്രതികളെ പിന്നീട് കോടതിയിൽ ഹാജരാക്കി റിമാൻഡ് ചെയ്തു. എസ്ഐ സെബാസ്റ്റ്യൻ പി. ചാക്കോയുടെ നേതൃത്വത്തിൽ എസ്ഐ ആർ.യു. രഞ്ജിത്ത്, സിപിഒമാരായ പ്രദീപ്, വിപിൻ, വിജേഷ് എന്നിവരടങ്ങിയ സംഘമാണ് പ്രതികളെ പിടികൂടിയത്.

കുട്ടികളിലെ ലഹരി ഉപയോഗം : സിറ്റി പോലീസ് കമ്മീഷണർ നേരിട്ട് ഹാജരാകണമെന്ന് ഹൈക്കോടതി

കൊച്ചി: ജില്ലയിലെ കുട്ടികളില്‍ ലഹരി ഉപയോഗം കൂടുതലായി കണ്ടെത്തിയ സാഹചര്യത്തില്‍ കൊച്ചി സിറ്റി പോലീസ് കമ്മീഷണറോട് നേരിട്ട് ഹാജരാകാന്‍ നിര്‍ദേശിച്ച് ഹൈക്കോടതി. കുട്ടികളിലെ ലഹരി ഉപയോഗം എങ്ങനെ തടയുമെന്ന് വിശദീകരിക്കാനാണ് കൊച്ചി സിറ്റി പോലീസ് കമ്മീഷണറോട് ഹാജരാകാനായി ചീഫ് ജസ്റ്റീസ് നിതിന്‍ ജാംദാര്‍, ജസ്റ്റീസ് സി. ജയചന്ദ്രന്‍ എന്നിവരടങ്ങിയ ഡിവിഷന്‍ ബെഞ്ച് നിർദേശിച്ചിരിക്കുന്നത്. 2015 മുതല്‍ 2024 വരെയുള്ള കാലയളവില്‍ 18 വയസില്‍ താഴെയുളള 125 കുട്ടികള്‍ക്കെതിരെ കേസെടുത്തിട്ടുണ്ടെന്ന് സര്‍ക്കാര്‍ അറിയിച്ചതിനെ തുടര്‍ന്നാണ് നടപടി. ഇതില്‍ 56 കേസുകളും എറണാകുളത്തു നിന്നാണെന്ന് ആഭ്യന്തര വകുപ്പ് ഫയല്‍ ചെയ്ത റിപ്പോര്‍ട്ടില്‍ വിശദീകരിക്കുന്നു. കുട്ടികളിലെ മയക്കുമരുന്ന് ഉപയോഗം തടയാന്‍ നടപടി ആവശ്യപ്പെടുന്ന പൊതുതാത്പര്യ ഹര്‍ജിയാണ് കോടതി പരിഗണിച്ചത്. സ്‌റ്റേറ്റ് ക്രൈം റിക്കാര്‍ഡ്‌സ് ബ്യൂറോയുടെ കണക്കാണ് സര്‍ക്കാര്‍ ഹാജരാക്കിയത്. മയക്കുമരുന്നിന് അടിമകളായ 341 കുട്ടികള്‍ക്ക് ജനമൈത്രി സുരക്ഷാ പദ്ധതിയുടെ ഭാഗമായി കൗണ്‍സലിംഗ് നല്‍കിയെന്ന് റിപ്പോര്‍ട്ടില്‍ പറയുന്നു. 112 കുട്ടികള്‍ക്ക് ലഹരിവിമുക്ത ചികിത്സ നല്‍കി. ഡിജിറ്റലായുള്ള ലഹരി വിമുക്ത സേവനങ്ങള്‍ 478 കുട്ടികള്‍ പ്രയോജനപ്പെടുത്തി. പ്രായപൂര്‍ത്തിയായവര്‍ക്കെതിരെ 2015ല്‍ 1,430 മയക്കുമരുന്ന് കേസുകളും 15,973 അബ്കാരി കേസുകളുമാണ് രജിസ്റ്റര്‍ ചെയ്തത്. 2024ല്‍ ഇത് യഥാക്രമം 8,160 ഉം 19,419ഉം ആയി വര്‍ധിച്ചു. ഫൊറന്‍സിക് ലാബുകളില്‍ ആവശ്യത്തിന് സ്റ്റാഫില്ലാത്തത് മയക്കുമരുന്നു കേസുകളുടെ നടത്തിപ്പിനെ ബാധിക്കുന്നുണ്ട്. ഫൊറന്‍സിക് റിപ്പോര്‍ട്ട് കിട്ടാത്തതിനാല്‍ കോടതികളില്‍ തീര്‍പ്പാകാതെ കിടക്കുന്ന എത്ര കേസുകളുണ്ടെന്ന് അറിയിക്കാനും ഹൈക്കോടതി രജിസ്ട്രിയോട് നിര്‍ദേശിച്ചിട്ടുണ്ട്.

ആരോഗ്യമന്ത്രിയുടെ രാജിക്കായി കേരള കോൺഗ്രസ് ഡിഎംഒ ഓഫീസ് മാർച്ചും ധർണയും നടത്തി

കൊച്ചി: കോട്ടയം മെഡിക്കൽ കോളജ് അപകടത്തിൽ അനാസ്ഥ കാട്ടിയ ആരോഗ്യമന്ത്രി രാജിവയ്ക്കണമെന്നാവശ്യപ്പെട്ടു കേരള കോൺഗ്രസ് ജില്ലാ കമ്മിറ്റിയുടെ ആഭിമുഖ്യത്തിൽ എറണാകുളം ഡിഎംഒ ഓഫീസിലേക്ക് മാർച്ചും ധർണയും നടത്തി. ജില്ലാ പ്രസിഡന്‍റ് ഷിബു തെക്കുംപുറം ഉദ്ഘാടനം ചെയ്തു. ആവശ്യ മരുന്നുകളോ, ശസ്ത്രക്രിയാ ഉപകരണങ്ങളോ ഇല്ലാതെ സർക്കാർ ആശുപത്രികൾ വലയുകയാണ്. മരുന്ന് വിതരണക്കാർക്ക് മെഡിക്കൽ സർവീസസ് കോർപറേഷന് കുടിശികയുള്ളത് കോടികളാണ്. അത് കൊടുക്കാതെ 100 കോടി ധൂർത്തടിച്ചു നാലാം വർഷികം ആഘോഷിക്കുകയാണ് പിണറായിയും കൂട്ടരും. സർക്കാർ ആശുപത്രികളിൽ അടിയന്തര ശസ്ത്രക്രിയകൾക്കു രോഗികൾ മാസങ്ങളോളം കാത്തിരിക്കേണ്ട ഗതികേടാണെന്നും ഷിബു തെക്കുംപുറം ചൂണ്ടിക്കാട്ടി. സേവി കുരിശുവീട്ടിൽ അധ്യക്ഷത വഹിച്ചു.

ജനകീയ കുറ്റവിചാരണ സദസ് 16ന്

കൊച്ചി: സംസ്ഥാന ഭരണം കെട്ടഴിഞ്ഞ അവസ്ഥയിലായ സാഹചര്യത്തില്‍ കെപിസിസി ആഹ്വാനപ്രകാരം 16ന് എറണാകുളത്ത് ജനകീയ കുറ്റവിചാരണ സദസ് സംഘടിപ്പിക്കുമെന്ന് ഡിസിസി പ്രസിഡന്‍റ് മുഹമ്മദ് ഷിയാസ് അറിയിച്ചു. ആരോഗ്യ മേഖല നേരിടുന്ന പ്രശ്‌നങ്ങള്‍, കടലോര മേഖലയിലെ ദുസഹമായ ജനജീവിതം , മലയോര മേഖലയിലെ വനം വന്യജീവി പ്രശ്‌നങ്ങള്‍ എന്നീ വിഷയങ്ങളില്‍ സര്‍ക്കാരിന്‍റെ പിടിപ്പുകേട് ജനപക്ഷത്ത് തുറന്നു കാട്ടുകയാണ് ജനകീയ കുറ്റവിചാരണ സദസിലൂടെ ലക്ഷ്യമിടുന്നതെന്ന് അദ്ദേഹം പറഞ്ഞു. 16ന് ഉച്ചകഴിഞ്ഞ് മൂന്നിന് നടക്കുന്ന പരിപാടിയില്‍ പ്രതിപക്ഷ നേതാവ് വി.ഡി.സതീശന്‍, കെപിസിസി പ്രസിഡന്‍റ് സണ്ണി ജേസഫ്, കെപിസിസി വര്‍ക്കിംഗ് പ്രസിഡന്‍റുമാര്‍, മറ്റു ഭാരവാഹികള്‍ തുടങ്ങിയവര്‍ പങ്കെടുക്കും.

കളിയെച്ചൊല്ലി കലഹം; സുഹൃത്തിനെ മർദിച്ച യുവാവ് അറസ്റ്റിൽ

ആലങ്ങാട്: പാനായികുളത്ത് ഫുട്ബോൾ കളിയെച്ചൊല്ലിയുള്ള വാക്കുതർക്കത്തെ തുടർന്നു യുവാവ് സുഹൃത്തിനെ മൂർച്ചയുള്ള ആയുധം ഉപയോഗിച്ച് ആക്രമിച്ചു. പാനായിക്കുളം നാലാംമൈൽ അൽ ഹുദ സ്കൂളിന് സമീപം തോട്ടകത്ത് വീട്ടിൽ അൾഡ്രിന് (21) ആണ് മർദനമേറ്റത്. ഞരമ്പിനു മുറിവു പറ്റിയ അൾഡ്രിനെ കളമശേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. അൾഡ്രിന്‍റെ പരാതിയിൽ സുഹൃത്ത് ആലങ്ങാട് കുന്നേൽ പുതുശേരി വീട്ടിൽ ജോഫിനെ (20) ബിനാനിപുരം പോലീസ് അറസ്റ്റ് ചെയ്തു. കഴിഞ്ഞ രാത്രിയാണു സംഭവം. ഫുട്ബോൾ കളി കഴിഞ്ഞ് വീട്ടിലെത്തിയശേഷം ഇരുവരും പരസ്പരം ഫോണിൽ മെസേജ് അയയ്ക്കുകയും തർക്കം രൂക്ഷമായതോടെ ജോഫിൻ രാത്രി അൾഡ്രിന്‍റെ പാനായിക്കുളത്തെ വീടിന്‍റെ പരിസരത്തെത്തി മൂർച്ചയുള്ള ആയുധം കൊണ്ട് ആക്രമിക്കുകയുമായിരുന്നു.

വാഗ്ദാനം പാലിച്ചില്ല : ഫെര്‍ട്ടിലിറ്റി ക്ലിനിക് 2.66 ലക്ഷം നഷ്ടപരിഹാരം നല്കണം

കൊച്ചി: വന്ധ്യതയ്ക്ക് ചികിത്സ വാഗ്ദാനം ചെയ്ത് ദമ്പതികളിൽനിന്ന് വന്‍ തുക കൈപ്പറ്റി കമ്പളിപ്പിച്ചുവെന്ന പരാതിയില്‍, ഫെര്‍ട്ടിലിറ്റി ക്ലിനിക്ക് 2.66 ലക്ഷം രൂപ നഷ്ടപരിഹാരം നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്ക പരിഹാര കോടതി. 30 ദിവസത്തിനകം തുക നല്കണമെന്നാണ് ഡി.ബി ബിനു അധ്യക്ഷനായ ബെഞ്ച് ഉത്തരവിട്ടത്. വന്ധ്യതാ ചികിത്സയ്ക്ക് എന്ന പേരില്‍ മെഡിക്കല്‍ ക്യാമ്പ് സംഘടിപ്പിച്ച് 100 ശതമാനം വിജയം വാഗ്ദാനം ചെയ്ത് ആദ്യം അഡ്വാന്‍സായി 1000 രൂപ കൈപ്പറ്റി. തുടര്‍ന്ന് 2,40,000 രൂപ ഫീ ഇനത്തില്‍ ദമ്പതിമാരില്‍ നിന്നു വാങ്ങി. പണം മുഴുവന്‍ വാങ്ങിയതിനു ശേഷം ചികിൽസ വിജയിക്കുമോ എന്നത് സംശയാസ്പദമാണെന്ന് പറയുകയും കൂടുതല്‍ പരിശോധനയ്ക്കായി 40000 രൂപ അധികമായി ആവശ്യപ്പെടുകയും ചെയ്തു. പരാതിക്കാരി ആ തുകയും നല്‍കി. തുടര്‍ന്നാണ് ഇവര്‍ മാര്‍ക്കറ്റിംഗ് ഏജന്‍റുമാര്‍ മാത്രമാണെന്നും ഇവരുടെ വാഗ്ദാനത്തില്‍ യാതൊരു അടിസ്ഥാനവുമില്ല എന്നും പരാതിക്കാരിക്ക് ബോധ്യപ്പെട്ടത്. വാങ്ങിയ തുക തിരികെ ആവശ്യപ്പെട്ട് എതിര്‍കക്ഷിയെ സമീപിച്ചെങ്കിലും അത് നല്‍കാന്‍ തയാറാകാത്ത സാഹചര്യത്തിലാണ് ഉപഭോക്തൃ കോടതിയെ സമീപിച്ചത്. എറണാകുളത്തെ ബ്രൗണ്‍ ഹാള്‍ ഇന്‍റര്‍നാഷണല്‍, ഇന്ത്യ എന്ന ഫെര്‍ട്ടിലിറ്റി ക്ലിനിക്കിനെതിരെയാണ് പരാതിക്കാരി കോടതിയെ സമീപിച്ചത്. പരാതിക്കാരിക്കുവേണ്ടി അഡ്വ. ഫിലിപ്പ്. ടി.വര്‍ഗീസ് കോടതിയില്‍ ഹാജരായി.

വിവാഹ വാഗ്ദാനം നല്‍കി പീഡനം: യുവതിയുടെ പരാതിയില്‍ പ്രവാസിക്കെതിരെ കേസെടുത്തു

കൊച്ചി: വിവാഹ വാഗ്ദാനം നല്‍കി പീഡിപ്പിച്ചെന്ന യുവതിയുടെ പരാതിയില്‍ പ്രവാസിക്കെതിരെ പോലീസ് കേസെടുത്തു. 35കാരിയായ കൊല്ലം സ്വദേശിനിയുടെ പരാതിയില്‍ കോട്ടയം കാഞ്ഞിരപ്പള്ളി സ്വദേശിയായ പ്രവാസിക്കെതിരെയാണ് കൊച്ചി സിറ്റി പോലീസ് കേസെടുത്തത്. യുവതിയില്‍ നിന്നും ഇയാള്‍ 34 ലക്ഷത്തോളം രൂപ കൈക്കലാക്കിയെന്നും പരാതിയില്‍ പറയുന്നു. സംഭവത്തില്‍ പോലീസ് എഫ്‌ഐആർ രജിസ്റ്റര്‍ ചെയ്ത് അന്വേഷണം ആരംഭിച്ചു. 2022 ലാണ് കേസിനാസ്പദമായ സംഭവം. പ്രതിയും പരാതിക്കാരിയും വിദേശത്തുവച്ചാണ് പരിചയപ്പെടുന്നത്. പിന്നീട് ഇരുവരും പ്രണയത്തിലായി വീടുപണി പൂര്‍ത്തിയായാല്‍ വിവാഹം കഴിക്കാമെന്ന് ഇയാള്‍ അറിയിച്ചു. തുടര്‍ന്ന് ഇവര്‍ പല തവണകളായി 34 ലക്ഷം രൂപ നല്‍കി. വിവാഹത്തിന് വീട്ടുകാര്‍ സമ്മതിക്കില്ലെന്ന് പ്രതി അറിയിച്ചെങ്കിലും ഒന്നിച്ചു ജീവിക്കണമെന്നതില്‍ യുവതി ഉറച്ചുനിന്നു. തുടര്‍ന്ന് വിവാഹം രജിസ്റ്റര്‍ ചെയ്യാമെന്ന് ഉറപ്പുനല്‍കി കൊച്ചിയില്‍ എത്തിച്ചു. ആഢംബര ഹോട്ടലില്‍ താമസിപ്പിച്ച് പീഡിപ്പിക്കുകയായിരുന്നു. പിന്നീട് വിവാഹം രജിസ്റ്റര്‍ ചെയ്യാന്‍ ഇയാള്‍ തയാറായില്ല. പ്രതി വിവാഹിതനാണെന്ന് അറിഞ്ഞതോടെയാണ് യുവതി ഇപ്പോള്‍ പോലീസിനെ സമീപിച്ചതെന്നാണ് അറിയുന്നത്. യുവതിയുടെ മൊഴി പോലീസ് രേഖപ്പെടുത്തി.

വിദേശ ദന്പതികൾക്ക് ഇംഗ്ലീഷ് ചാനൽ കടക്കാൻ ബോട്ട് കൊച്ചിയിൽനിന്ന്

ഇടക്കൊച്ചി: സമുദ്രയാത്ര ഇഷ്ടപ്പെടുന്ന ഇംഗ്ലണ്ടിൽനിന്നുള്ള ദന്പതികൾക്ക് ഇംഗ്ലീഷ് ചാനൽ കടക്കാൻ യാത്രാബോട്ട് ഇടക്കൊച്ചിയിൽ നിന്ന്. നിക്ക് എന്ന് വിളിപ്പേരുള്ള ജോൺ നിക്കോളാസ് ഫ്രാൻസനും ഭാര്യ ആനിനും യാത്ര ചെയ്യുന്നതിനുള്ള ബോട്ടാണ് ഇംഗ്ളണ്ടിലേക്ക് കപ്പൽ കയറിയത്. ഇംഗ്ലണ്ടിൽ ബോട്ട് നിർമാണം വലിയ ചെലവേറിയതിനാലാണ് ഇവർ ഇന്ത്യയിലേക്ക് എത്തിയത്. ഇന്ത്യയിൽ പലയിടത്തും അന്വേഷണം നടത്തിയെങ്കിലും ഇവരുടെ മനസിന് ഇഷ്ടപ്പെട്ട നിർമാതാക്കളെ കണ്ടെത്താൻ സാധിച്ചില്ല. പിന്നീട് ജലയാനങ്ങൾ നിർമിക്കാൻ മിടുക്കരുള്ള കൊച്ചിയിലേക്ക് എത്തുകയായിരുന്നു. കൊച്ചിയിൽ പല ബോട്ട് നിർമാണ കമ്പനികളുമായി ചർച്ച നടത്തിയ ശേഷം ഇടക്കൊച്ചിയിലെ ദരിയ മറൈൻ എൻജിനീയറിംഗ് സർവീസസ് എന്ന ബോട്ട് നിർമാണ സ്ഥാപനത്തിന് ബോട്ട് നിർമിക്കാൻ ചുമതല നൽകി. സമുദ്രയാത്രാ പ്രിയനായ നിക്കിന്‍റെ മനസിലുള്ള ആശയങ്ങൾക്കനുസരിച്ച് ദരിയ മറൈൻ ആറു മാസം കൊണ്ട് ബോട്ടിന് രൂപം നൽകി. ഓരോ ദിവസത്തേയും ജോലികൾ നിക്കിന് വരച്ച് നൽകി ചിട്ടയായുള്ള നിർമാണമാണ് ദരിയ മറൈൻ നടത്തിയത്. ഇംഗ്ലണ്ടിലേക്ക് മടങ്ങാതെ ആറ് മാസമായി ഇവിടെ തന്നെ തങ്ങിയായിരുന്നു നിക്കിന്‍റെ മേൽനോട്ടം. ഇതിനിടെ ഭാര്യ ആൻ നാട്ടിലേക്ക് മടങ്ങി. ഇവിടെ നിന്ന് പഠിച്ച മലയാളത്തിലൂടെ, നിക്ക് നിർദേശങ്ങൾ നൽകിയിരുന്നതായി ദരിയ മറൈനിലെ ജോലിക്കാർ പറയുന്നു. കമ്പനി തികഞ്ഞ ഉത്തരവാദിത്വത്തോടെ തന്‍റെ മനസിൽ ഉണ്ടായിരുന്ന ബോട്ട് നിർമിച്ചു നൽകിയെന്ന് നിക്ക് പറയുന്നു. ശ്രീലങ്ക വഴി ഇംഗ്ലണ്ടിലേക്ക് പണി പൂർത്തിയാക്കി , അവസാന വട്ട പരീക്ഷണവും നടത്തിയ ബോട്ട് കൊച്ചിയിൽ നിന്ന് ശ്രീലങ്ക വഴിയാണ് ഇംഗ്ലണ്ടിലെത്തിക്കുക. കൊച്ചിയിലെ പസഫി ഓഷ്യൻ ലോജിസ്റ്റിക്സ് ഇന്‍റർനാഷണൽ ലിമിറ്റഡ് എന്ന ഷിപ്പിംഗ് കമ്പനിയാണ് ബോട്ട് ഇംഗ്ലണ്ടിൽ എത്തിക്കാൻ ചുമതല ഏറ്റെടുത്തിട്ടുള്ളത്. കഴിഞ്ഞ ദിവസം ബോട്ട് കപ്പൽ മാർഗം കൊച്ചിയിൽ നിന്ന് ഇംഗ്ലണ്ടിലേക്ക് കയറ്റിവിട്ടു. നിക്ക് കൊച്ചിയിൽ നിന്ന് വിമാനത്തിലും.

ചെല്ലാനം കടല്‍ഭിത്തി : സമയബന്ധിതമായി പൂര്‍ത്തിയാക്കും: മന്ത്രി റോഷി അഗസ്റ്റിന്‍

കൊച്ചി: ചെല്ലാനത്ത് ടെട്രാപോഡ് കടല്‍ ഭിത്തി നിര്‍മാണം സമയബന്ധിതമായി പൂര്‍ത്തിയാക്കുമെന്ന് മന്ത്രി റോഷി അഗസ്റ്റിന്‍. തീരദേശത്തെ ജനങ്ങളുടെ ബുദ്ധിമുട്ടുകള്‍ മനസിലാക്കി തീരസംരക്ഷണം പ്രധാന വിഷയമായാണ് സര്‍ക്കാര്‍ പരിഗണിക്കുന്നതെന്നും അദ്ദേഹം പറഞ്ഞു. ചെല്ലാനം, കണ്ണമാലി പ്രദേശങ്ങളിലെ കടലാക്രമണ ബാധിത പ്രശ്‌നങ്ങള്‍ വിലയിരുത്തുന്നതിനായി ചേര്‍ന്ന യോഗത്തില്‍ സംസാരിക്കുകയായിരുന്നു മന്ത്രി. 7.3 കിലോമീറ്ററില്‍ ടെട്രാപോഡ് കടല്‍ ഭിത്തി നിര്‍മാണം ആദ്യഘട്ടത്തില്‍ പൂര്‍ത്തീകരിച്ചിട്ടുണ്ട്. തുടര്‍ന്നുള്ള 3.5 കിലോമീറ്റര്‍ കൂടി നിര്‍മിക്കുന്നതിനുള്ള തുക നിലവില്‍ അനുവദിച്ചിട്ടുണ്ട്. നിര്‍മാണ പ്രവര്‍ത്തനങ്ങള്‍ സമയബന്ധിതമായി പൂര്‍ത്തിയാക്കും. അതിരൂക്ഷമായ കടലാക്രമണം നേരിടുന്ന പ്രദേശമെന്ന നിലയില്‍ ഈ വിഷയം ഗൗരവപൂര്‍ണമായാണ് സര്‍ക്കാര്‍ കാണുന്നത്. പ്രദേശത്തെ ജനങ്ങളുടെ പ്രതിഷേധം സര്‍ക്കാരിനെതിരല്ല. സര്‍ക്കാര്‍ ചെയ്ത പ്രവൃത്തി അഭിനന്ദിക്കുന്നതോടൊപ്പം തുടര്‍പ്രവർത്തികള്‍ ആവശ്യമാണെന്ന ബോധ്യപ്പെടുത്തലിന് വേണ്ടി നടത്തിയ ജനവികാരത്തിന്‍റെ ഭാഗമായാണ് അതിനെ കണ്ടതെന്നും മന്ത്രി പറഞ്ഞു. ടെട്രാപോഡ് ഉപയോഗിച്ചുള്ള തീര സംരക്ഷണത്തിനും കടല്‍ഭിത്തി നിര്‍മാണത്തിനും ആദ്യമായി തെരഞ്ഞെടുത്ത സ്ഥലം ചെല്ലാനമാണ്. ജില്ലയുടെ ചുമതലയുള്ള മന്ത്രി പി.രാജീവും മന്ത്രി സജി ചെറിയാനും കെ.ജെ.മാക്‌സി എംഎല്‍എയും ഉള്‍പ്പെടെ ഈ വിഷയത്തില്‍ ഒരുമിച്ച് ആലോചിച്ചാണ് ടെട്രാപോഡ് ഉപയോഗിച്ചുള്ള പുനര്‍നിര്‍മാണ പ്രവര്‍ത്തനങ്ങള്‍ക്ക് തുടക്കമിടാന്‍ തീരുമാനിച്ചത്. ചെല്ലാനത്തെ കടല്‍ഭിത്തി നിര്‍മാണ പ്രവര്‍ത്തനങ്ങള്‍ പൂര്‍ണമായി കഴിഞ്ഞാല്‍ കടല്‍ മികച്ച രീതിയില്‍ ആസ്വദിക്കാന്‍ കഴിയുന്ന പ്രദേശമായി ഇതു മാറും. പുറത്തുനിന്ന് വരുന്നവരെ വരെ ആകര്‍ഷിക്കാന്‍ സാധിക്കുന്ന രീതിയില്‍ ടൂറിസം കേന്ദ്രമായി മാറ്റുന്നതിനുള്ള നടപടികള്‍ സ്വീകരിക്കും. സംസ്ഥാനത്തെ കടല്‍ത്തീരത്തെ 24 ഭാഗങ്ങളിലായി ആകെ 41 കിലോമീറ്റര്‍ നീളത്തില്‍ 24 പ്രവൃത്തികള്‍ നടത്തുന്നതിനായി ലോകബാങ്കിന്‍റെ സഹായത്തോടു കൂടിയുള്ള നടപടികള്‍ ആരംഭിച്ചിട്ടുണ്ട്. ഹോട്ട്‌സ്‌പോട്ടുകള്‍ ആയ ശംഖുമുഖം (71.50 കോടി), കൊല്ലങ്കോട് (43.65 കോടി), ആലപ്പാട് (172.50 കോടി), കാപ്പാട് (76.26 കോടി) എന്നിവിടങ്ങളില്‍ സംരക്ഷണ നടപടികള്‍ക്കായി എന്‍സിസിആര്‍ എസ്റ്റിമേറ്റ് ലഭിച്ചിട്ടുണ്ട്. ഓരോ പ്രദേശത്തിന്‍റെയും കടലാക്രമണരീതി അനുസരിച്ച് പ്രവര്‍ത്തികള്‍ ഉടനെ തന്നെ ആരംഭിക്കും. 2021 ബജറ്റില്‍ ആകെ 5300 കോടിയുടെ തീരസംരക്ഷണ പ്രവൃത്തികളാണ് സര്‍ക്കാര്‍ പ്രഖ്യാപിച്ചത്. അതില്‍ 1500 കോടിരൂപ കിഫ്ബിയില്‍ നിന്നും ബാക്കി തുക എഡിബി അല്ലെങ്കില്‍ ലോകബാങ്ക് എന്നിവയുടെ സഹായത്തോടെ നടത്തുമെന്നായിരുന്നു പ്രഖ്യാപിച്ചത്. എന്നാല്‍ ചെല്ലാനം ആദ്യ പ്രവൃത്തിക്കുശേഷം കിഫ്ബിയില്‍ നിന്ന് പണം ലഭിക്കുന്നതില്‍ കാലതാമസം നേരിട്ടപ്പോള്‍ എഡിബി മുഖാന്തിരം ഹോട്ട്‌സ്‌പോട്ടുകള്‍ ഉള്‍പ്പെടെ കൂടുതല്‍ സ്ഥലങ്ങളില്‍ കടല്‍ത്തീര സംരക്ഷണ പ്രവര്‍ത്തനത്തിനായി നടപടികള്‍ ആരംഭിച്ചിട്ടുണ്ട്. എഡിബിയില്‍ നിന്ന് ഇക്കാര്യത്തിനായി ആകെ 466.67 ദശ ലക്ഷം ഡോളര്‍ (ഏകദേശം 4013 കോടി രൂപ) യുടെ പ്രവൃത്തികളാണ് വിഭാവനം ചെയ്തിട്ടുള്ളത്. ഇത് പ്രവൃത്തികളുടെ ആകെ തുകയാണ്. ഇതിന്‍റെ 70 ശതമാനം എഡിബിയും 30 ശതമാനം സംസ്ഥാന സര്‍ക്കാരുമാണ് വഹിക്കുന്നതെന്നും മന്ത്രി പറഞ്ഞു. കണ്ണമാലി സെന്‍റ് ആന്‍റണീസ് പള്ളി പരിസരത്ത് നടന്ന യോഗത്തില്‍ കെ.ജെ.മാക്‌സി എംഎല്‍എ, കൊച്ചി രൂപത പിആര്‍ഒ ഫാ. ജോണി സേവിയര്‍ പുതുക്കാട്, ചെല്ലാനം പഞ്ചായത്ത് പ്രസിഡന്‍റ് കെ.എല്‍. ജോസഫ്, ഇറിഗേഷന്‍ എക്‌സിക്യൂട്ടീവ് എന്‍ജിനീയര്‍ ബി.അബ്ബാസ്, ഇറിഗേഷന്‍ സൂപ്രണ്ടിംഗ് എന്‍ജിനീയര്‍ പി.എസ്.കോശി, ജനപ്രതിനിധികള്‍ തുടങ്ങിയവര്‍ പങ്കെടുത്തു.

മൂവാറ്റുപുഴയിൽ പൈപ്പ് പൊട്ടി ശുദ്ധജലം പാഴാകുന്നു

മൂവാറ്റുപുഴ: ജല അഥോറിറ്റിയുടെ പൈപ്പ് പൊട്ടി കുടിവെള്ളം പാഴാകാൻ തുടങ്ങിയിട്ട് ദിവസങ്ങളായി. മൂവാറ്റുപുഴ നിർമല ഹയർ സെക്കൻഡറി സ്കൂളിന് സമീപം സ്ലാബിനടിയിലാണ് പൈപ്പ് പൊട്ടി ജലം പാഴാകുന്നത്. നിരവധി കാൽനട - വാഹന യാത്രക്കാർ സഞ്ചരിക്കുന്ന റോഡിൽ പൈപ്പ്പൊട്ടി വെള്ളം പാഴാക്കാൻ തുടങ്ങിയിട്ട് അഞ്ചു ദിവസത്തോളമായിട്ടും അറ്റകുറ്റപ്പണികൾ നടത്താൻ അധികൃതർ തയാറാകാത്തതിനെതിരെ പ്രതിഷേധം വ്യാപകമായിട്ടുണ്ട്. പൈപ്പ് പൊട്ടിയതോടെ ദിവസവും ആയിരകണക്കിന് ലിറ്റർ കുടിവെള്ളമാണ് മൂവാറ്റുപുഴ കാവുംപടി റോഡിലൂടെ ഒഴുകുന്നത്. വിദ്യാർഥികളടക്കമുള്ള കാൽനട യാത്രക്കാർ റോഡിലൂടെ ഒഴുകുന്ന വെള്ളത്തിൽ ചവിട്ടി വേണം സഞ്ചരിക്കാൻ. ഇതുകൂടാതെ വാഹനങ്ങൾ കടന്നു പോകുന്പോൾ ദേഹത്തേക്ക് വെള്ളം തെറിക്കുന്നത് കാൽനട യാത്രക്കാരെ ബുദ്ധിമുട്ടിലാക്കുകയാണ്.

മനുഷ്യാവകാശ കമ്മീഷനും ഓംബുഡ്സ്മാനും പരാതി നൽകി

മൂവാറ്റുപുഴ: നഗരത്തിലെയും സമീപ പഞ്ചായത്തുകളും ആശ്രയിക്കുന്ന നഗരസഭ ശ്മശാനം അറ്റകുറ്റപ്പണികളുടെ പേരിൽ തുടരെ അടച്ചിടുന്നതും ഇതിന്‍റെ പേരിൽ നടക്കുന്ന മനുഷ്യാവകാശ ലംഘനങ്ങളും അന്വേഷിക്കണമെന്ന് ആവശ്യപ്പെട്ട് പൊതുപ്രവർത്തകൻ മുണ്ടയ്ക്കൽ എം.ജെ. ഷാജി മനുഷ്യാവകാശകമ്മീഷനും എൽഎസ്ജി ഓംബുഡ്സ്മാനും പരാതി നൽകി. ഉറ്റവരുടെ മൃതദേഹങ്ങളുമായി എത്തുന്ന ബന്ധുക്കളെ നെട്ടോട്ടം ഓടിക്കുകയും അവരെ മാനസികമായി തളർത്തുകയും ചെയ്യുന്നു. ഇവിടെ എത്തിക്കുന്ന മൃതദേഹങ്ങളോട് അനാദരവ് കാണിക്കുന്നുവെന്നാണ് മനുഷ്യാവകാശ കമ്മീഷന് നൽകിയ പരാതിയിൽ പറയുന്നത്. നഗരസഭ സെക്രട്ടറി, ചെയർമാൻ, ഹെൽത്ത് സ്റ്റാന്‍ഡിംഗ് കമ്മിറ്റി ചെയർമാൻ എന്നിവരെ എതിർകക്ഷികളാക്കി അറ്റകുറ്റപ്പണികളുടെ പേരിൽ നടക്കുന്ന ക്രമക്കേടുകളും അഴിമതിയും അന്വേഷിച്ച് നിയമനടപടികൾ സ്വീകരിക്കണമെന്ന് എൽഎസ്ജി ഓംബുഡ്സ്മാന് നൽകിയ പരാതിയിൽ ആവശ്യപ്പെട്ടിട്ടുണ്ട്.

കൈവിരലിൽ കുടുങ്ങിയ മോതിരം അഗ്നിരക്ഷാസേന മുറിച്ച് നീക്കി

കൂത്താട്ടുകുളം: വാഹനാപകടത്തിൽ യുവതിയുടെ കൈവിരലിൽ കുടുങ്ങിയ മോതിരം അഗ്നിരക്ഷാസേനയെത്തി മുറിച്ച് നീക്കി. വ്യാഴാഴ്ച വൈകുന്നേരം വഴിത്തലയിൽ സ്കൂട്ടർ മറിഞ്ഞുണ്ടായ അപകടത്തിലാണ് കാക്കൂർ സ്വദേശിയായ യുവതിയുടെ മോതിരം ഒടിഞ്ഞ് കൈവിരലിൽ കുടുങ്ങിയത്. കൂത്താട്ടുകുളം ദേവമാത ആശുപത്രിയിലെത്തിയ യുവതിയുടെ മോതിരം അഗ്നിരക്ഷാസേന എത്തി നീക്കം ചെയ്യുകയായിരുന്നു.

വൈദ്യുത കന്പിയിൽ കുടുങ്ങിയ പ്രാവിനെ പറത്തിവിട്ട് ഫയർഫോഴസ്

കൂത്താട്ടുകുളം: കാലിൽ നൂല് കുരുങ്ങി വൈദ്യുത കന്പിയിൽ തൂങ്ങിയാടിയ പ്രാവിന് രക്ഷകരായി അഗ്നിരക്ഷാസേന. കോഴിപ്പിള്ളി റോഡിൽ സഹകരണ ആശുപത്രിക്ക് സമീപം ഇന്നലെ ഉച്ചയോടെയാണ് സംഭവം. നാട്ടുകാർ കൂത്താട്ടുകുളം അഗ്നിരക്ഷാ നിലയത്തിൽ നേരിട്ടെത്തി അറിയിച്ചതിനേ തുടർന്ന് സേന സ്ഥലത്തെത്തി വൈദ്യുത കന്പിയിൽനിന്നു പ്രാവിനെ സുരക്ഷിതമായി താഴെയിറക്കി. കാലിൽ കുരങ്ങിയ നൂല് അറുത്തുമാറ്റി പ്രാവിനെ പറത്തിവിട്ടു.

തണൽമരം വീണ് ഗതാഗതം തടസപ്പെട്ടു

മൂവാറ്റുപുഴ: ശക്തമായ കാറ്റിൽ മൂവാറ്റുപുഴ - തൊടുപുഴ സംസ്ഥാന പാതയിൽ തണൽമരം വീണ് ഗതാഗതം തടസപ്പെട്ടു. ഹോസ്റ്റൽ പടിയിൽ ഇന്നലെ ഉച്ചയ്ക്ക് 12ഓടെയുണ്ടായ ശക്തമായ കാറ്റിലാണ് തണൽ മരത്തിന്‍റെ ശിഖരം ഒടിഞ്ഞു വീണത്. 50 ഇഞ്ച് വണ്ണം വരുന്ന വാകമരത്തിന്‍റെ ശിഖരമാണ് കാറ്റിൽ റോഡിലേക്ക് ഒടിഞ്ഞു വീണത്. മൂവാറ്റുപുഴ - തൊടുപുഴ സംസ്ഥാന പാതയിൽ വാഹനങ്ങൾ ഇല്ലാത്ത് സമയത്ത് മരം വീണതിനാൽ വലിയ അപകടം ഒഴിവായി. അഗ്നിശമന രക്ഷാസേന സ്ഥലത്തെത്തി ശിഖരങ്ങൾ മുറിച്ചു മാറ്റി ഗതാഗതം പുനസ്ഥാപിച്ചു.

ഞാറ്റുവേലച്ചന്തയും കർഷകസഭയും

കോലഞ്ചേരി: പൂതൃക്ക പഞ്ചായത്ത് കൃഷിഭവന്‍റെ നേതൃത്വത്തിൽ ഞാറ്റുവേലച്ചന്തയും കർഷകസഭയും കൃഷിഭവൻ അങ്കണത്തിൽ പഞ്ചായത്ത് പ്രസിഡന്‍റ് മാത്യൂസ് കുമ്മണ്ണൂർ ഉദ്ഘാടനം ചെയ്തു. മുൻ പഞ്ചായത്ത് പ്രസിഡന്‍റും പൂതൃക്ക പഞ്ചായത്തംഗവുമായ ടി.പി. വർഗീസ് അധ്യക്ഷനായി. ഞാറ്റുവേല ചന്തയുടെ ഭാഗമായി മണ്ണ് പരിശോധന റിസൽട്ടുകളും പച്ചക്കറി തൈകളും കുരുമുളക് വള്ളികളും കർഷകർക്ക് സൗജന്യമായി വിതരണം ചെയ്തു. മൂവാറ്റുപുഴ: പായിപ്ര പഞ്ചായത്ത് കൃഷിഭവന്‍റെ നേതൃത്വത്തിൽ കർഷകസഭയും ഞാറ്റുവേലച്ചന്തയും സംഘടിപ്പിച്ചു. പഞ്ചായത്ത് പ്രസിഡന്‍റ് എം.എസ്. അലിയാർ ഉദ്ഘാടനം ചെയ്തു. പഞ്ചായത്ത് സ്ഥിരംസമിതി അധ്യക്ഷൻ മുഹമ്മദ് ഷാഫി അധ്യക്ഷത വഹിച്ചു. തുടർന്ന് കാലാവസ്ഥധിഷ്ഠിത ഇൻഷ്വറൻസ് പദ്ധതിയുടെ കാന്പയിൻ, അഗ്രി സ്റ്റാക്ക് കാന്പയ്ൻ എന്നിവയും നടത്തി. കൈരളി ഇക്കോഷോപ്പിൽ നിന്നും വിവിധയിനം ഫലവർഗ തൈകളുടെ വിൽപ്പനയും മൈത്രി കൃഷിക്കൂട്ടത്തിൽ നിന്നുള്ള ഉത്പന്നങ്ങളായ സോപ്പ്, അച്ചാറുകൾ, വിർജിൻ കോക്കനട്ട് ഓയിൽ തുടങ്ങിയവയും കൃഷി ഭവനിൽനിന്നു സൗജന്യമായി പച്ചക്കറി വിത്ത്, പച്ചക്കറി തൈകൾ എന്നിവയുടെ വിതരണവുമുണ്ടായിരുന്നു.

ദീപിക നമ്മുടെ ഭാഷ പദ്ധതി : കാരക്കുന്നം ഫാത്തിമ മാതാ എൽപി സ്കൂളിൽ

മൂവാറ്റുപുഴ: കാരക്കുന്നം ഫാത്തിമ മാതാ എൽപി സ്കൂളിൽ ദീപിക നമ്മുടെ ഭാഷ പദ്ധതി ഡിഎഫ്സി കോതമംഗലം രൂപത ഡയറക്ടർ റവ.ഡോ. ആന്‍റണി പുത്തൻകുളം പ്രധാനാധ്യാപകൻ വിൻസെന്‍റ് ജോസഫിനു പത്രത്തിന്‍റെ കോപ്പി നൽകി ഉദ്ഘാടനം ചെയ്തു. സ്കൂൾ മാനേജർ ഫാ. ജോർജ് വള്ളോംകുന്നേൽ അധ്യക്ഷത വഹിച്ചു. യോഗത്തിൽ വാർഡംഗം സിജു ഏബ്രഹാം, പൗർണമി ക്ലബ് പ്രസിഡന്‍റ് ടി.സി. സ്കറിയ, പിടിഎ പ്രസിഡന്‍റ് പി.വി. അരുണ്‍, പത്രം സ്പോണ്‍സർമാരായ വിനോയി അഗസ്റ്റിൻ, ജോർജ് പറക്കുന്നേൽ, നോബി കൊറ്റം, ജോണ്‍ കന്നപ്പള്ളി, ബോബി കൂടക്കാട്ട്, ജോസ് കൊറ്റം, ഫ്രാൻസിസ് കാവുംപുറം, ജെയിംസ് നാമറ്റത്തിൽ, അധ്യാപകരായ പി. വിനീത, റെമ്മി മാണിച്ചൻ, ജെയ്മി മാത്യു, നിൻസി പി. ജോളി, എൽന എൽദോസ്, ഹരിത കെ. സത്യൻ, ജോയൽ മരിയ ലൂയിസ്, ജിസ്മിയ അമീൻ, അജു ജോർജ്, ലിൻഡ ഫ്രാൻസിസ്, സാന്ദ്ര ജോണ്‍സണ്‍, ബിനു ജോണ്‍, ജിൻസി ഷിബു, നിഖില ഷിജു തുടങ്ങിയവർ പങ്കെടുത്തു.

രാമമംഗലത്ത് സ്‌കൂളിലും കടയിലും മോഷണം

പിറവം: രാമമംഗലം ഹൈസ്‌കൂളിന്‍റെ ഓഫീസ് കുത്തിത്തുറന്ന് മേശയിൽ സൂക്ഷിച്ചിരുന്ന 50,000 രൂപ കവർന്നു. മേശയും അലമാരകളുമെല്ലാം കുത്തിത്തുറന്ന് പരിശോധന നടത്തിയ നിലയിലാണ്. സ്കൂളിലെ നിരീക്ഷണ കാമറയിൽ മോഷ്ടാവിന്‍റെ രൂപം പതിഞ്ഞിട്ടുണ്ട്. രാമമംഗലം സ്റ്റേഷൻ ഇൻസ്പെക്ടർ കെ.ആർ. മോഹൻദാസിന്‍റെ നേതൃത്വത്തിലാണ് അന്വേഷണം. ഓഫീസ് മുറിയുടെ താഴ് തകർത്താണ് മോഷ്ടാവ് അകത്തു കടന്നത്. ഇതേ രാത്രിതന്നെ സ്‌കൂളിന് മുന്നിലെ സ്റ്റേഷനറി കടയിലും മോഷണം നടന്നു. ഗോകുൽ ഡെക്കറേഷൻസ് ഉടമ രാമമംഗലം വരിക്കശേരിൽ ഗോപിനാഥന്‍റെ കടയിലാണ് മോഷണം നടന്നത്. കടയിൽ സൂക്ഷിച്ചിരുന്ന മൂവായിരത്തോളം രൂപ നഷ്ടപ്പെട്ടിട്ടുണ്ടെന്ന് ഗോപിനാഥൻ പറഞ്ഞു. വെള്ളിയാഴ്‌ച രാവിലെ ഏഴോടെ കട തുറക്കാനെത്തിയപ്പോഴാണ് കടയിൽ കവർച്ച നടന്ന വിവരം അറിഞ്ഞത്. കടയുടമയുടെ പരാതിയിൽ രാമമംഗലം പോലീസ് സ്ഥലത്തെത്തി പരിശോധന നടത്തി. പിന്നീട് എട്ടോടെയാണ് സ്‌കൂളിലെ മോഷണ വിവരം പുറത്തറിഞ്ഞത്. വീണ്ടും പോലീസ് സ്ഥലത്തെത്തി പരിശോധന നടത്തി. ആലുവയിൽനിന്ന് വിരലടയാള വിദഗ്‌ധരും കളമശേരിയിൽനിന്ന് ഡോഗ് സ്ക്വാഡും സ്ഥലത്തെത്തി തെളിവുകൾ ശേഖരിച്ചു. സ്‌കൂൾ വളപ്പിൽനിന്ന് മോഷ്ടാവ് ഉപേക്ഷിച്ചുപോയതെന്ന് കരുതുന്ന അടിവസ്ത്രവും കടയുടെ പരിസരത്തുനിന്ന് ബനിയനും കണ്ടുകിട്ടി. സ്‌കൂൾ വളപ്പിൽ മണം പിടിച്ച പോലീസ് നായ ഷിൽഡ ഓഫീസ് മുറിയുടെ കിഴക്കു ഭാഗത്തേക്ക് ഓടി കിഴക്കുഭാഗത്തെ ഗേറ്റിനടത്ത് ചെന്നുനിന്നു. പാൻസും ഷർട്ടും ധരിച്ച് തൊപ്പിവച്ച് മുഖം മൂടിക്കെട്ടി ഗ്ലാസ് ധരിച്ചെത്തിയ മോഷ്ടാവിന്‍റെ ദൃശ്യമാണ് നരീക്ഷണ കാമറയിൽ ലഭിച്ചത്.

മന്ത്രി വീണ ജോർജിന്‍റെ രാജിക്കായി കോണ്‍ഗ്രസ് പ്രകടനവും ധർണയും നടത്തി

മൂവാറ്റുപുഴ: കോട്ടയം മെഡിക്കൽ കോളജിൽ കെട്ടിടം തകർന്നു വീണ് വീട്ടമ്മ മരണപ്പെട്ട സംഭവത്തിന്‍റെ ധാർമിക ഉത്തരവാദിത്തം ഏറ്റെടുത്ത് മന്ത്രി വീണ ജോർജ് രാജിവയ്ക്കണമെന്നും തയാറാക്കാത്ത പക്ഷം മന്ത്രി സഭയിൽനിന്നു പുറത്താക്കണമെന്ന് ആവശ്യപ്പെട്ടും കോണ്‍ഗ്രസ് പ്രകടനവും ധർണയും നടത്തി. ധർണ നഗരസഭാധ്യക്ഷൻ പി.പി. എൽദോസ് ഉദ്ഘാടനം ചെയ്തു. മണ്ഡലം പ്രസിഡന്‍റ് കെ.എ. അബ്ദുൽ സലാം അധ്യക്ഷത വഹിച്ചു.

ശ്രേഷ്ഠ കാതോലിക്ക ബാവയ്ക്ക് സ്വീകരണം

കൊച്ചി: യാക്കോബായ സഭയുടെ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവായെ വരാപ്പുഴ ആർച്ച് ബിഷപ് ഹൗസിൽ ആർച്ച് ബിഷപ് ഡോ. ജോസഫ് കളത്തിപ്പറമ്പിൽ സ്വീകരിച്ചു. സഹായമെത്രാൻ ഡോ. ആന്‍റണി വാലുങ്കൽ, വികാരി ജനറൽ മോൺ. മാത്യു ഇലഞ്ഞിമിറ്റം, ചാൻസിലർ ഫാ. എബിജിൻ അറയ്‌ക്കൽ, ഫാ. സോജൻ മാളിയേക്കൽ, ഫാ. സ്‌മിജോ കളത്തിപ്പറമ്പിൽ, മാത്യൂസ് മാർ അന്തിമോസ് മെത്രാപ്പോലീത്ത, ഫാ. ജോഷി മാത്യു ചിറ്റേത്ത് എന്നിവർ പങ്കെടുത്തു.

വായന പക്ഷാചരണവും അനുസ്മരണവും

മൂവാറ്റുപുഴ: പേഴ്ക്കാപ്പിള്ളി ആസാദ് പബ്ലിക് ലൈബ്രറിയുടെ ആഭിമുഖ്യത്തിൽ വായന പക്ഷാചരണവും പി.എൻ. പണിക്കർ, ഐ.വി. ദാസ്, വൈക്കം മുഹമ്മദ് ബഷീർ, എം. സുകുമാരൻ എന്നിവരുടെ അനുസ്മരണവും നടത്തി. പേഴയ്ക്കാപ്പിള്ളി ഗവ. ഹയർ സെക്കൻഡറി സ്കൂൾ വിദ്യാർഥികളുടെ ലൈബ്രറി സന്ദർശനവും സംഘടിപ്പിച്ചു. ലൈബ്രറി പ്രസിഡന്‍റ് ഫൈസൽ മുണ്ടങ്ങാമറ്റം അധ്യക്ഷത വഹിച്ചു. അധ്യാപികയും എഴുത്തുകാരിയുമായ സ്റ്റാലിന ഭായ് അനുസ്മരണ പ്രഭാഷണം നടത്തി. ലൈബ്രറി സെക്രട്ടറി ടി.ആർ. ഷാജു വായന പക്ഷാചരണ സന്ദേശം നൽകി. താലൂക്ക് ലൈബ്രറി കൗണ്‍സിൽ അംഗങ്ങളായ കെ.കെ. ഉമ്മർ, ഇ.എ. ഹരിദാസ് എന്നിവർ വായന മത്സര പുസ്തകങ്ങളുടെ വിതരണം നടത്തി.

റവ. ഡോ. ആന്‍റോ പൂണോളിക്ക് ഓണററി പൗരത്വം

ചേരാനല്ലൂർ : ലിച്ചെൻസ്റ്റൈൻ രാജ്യത്തെ മുൻസിപ്പൽ തെരഞ്ഞെടുപ്പിൽ റവ. ഡോ. ആന്‍റോ പൂണോളി മൗറൻ മുൻസിപ്പാലിറ്റിയുടെ ഓണറ്റി പൗരനായി തെരഞ്ഞെടുക്കപ്പെട്ടു. മൗറനിലുള്ള വിശുദ്ധ പീറ്റർ ആൻഡ് പോൾ ഇടവകയിൽ കഴിഞ്ഞ 27 വർഷമായി സേവനമനുഷ്ഠിക്കുന്നു. നാൽപ്പതിനായിരത്തിൽപ്പരം മാത്രം ജനസംഖ്യയുള്ള ഒരു ചെറു രാഷ്ട്രമാണിത്. ചേരാനല്ലൂർ മങ്കുഴി തിരുക്കുടുംബ ഇടവകയിൽപെട്ട പൂണോളി റാഫേൽ-ത്രേസ്യ ദമ്പതികളുടെ മകനും, വിൻസെൻഷ്യൽ അങ്കമാലി മേരി മാതാ പ്രൊവിൻസ് അംഗവുമാണ്.

മാണിക്യമംഗലം എൻഎസ്എസ് സ്കൂൾ ലൈബ്രറിക്ക് പുസ്തകങ്ങൾ നല്കി

കാലടി: കാലടി റോട്ടറി ക്ലബിന്‍റെ "ഗിഫ്റ്റ് ഓഫ് റീഡിംഗ് ' പദ്ധതിയുടെ ഭാഗമായി കാലടി മാണിക്യമംഗലം എൻഎസ്എസ് ഹൈസ്കൂളിന് പുസ്തകങ്ങൾ നല്കി. കാലടി റോട്ടറി ക്ലബ് പ്രസിഡന്‍റ് പി.എം. പോളി സ്കൂൾ പ്രധാനാധ്യാപിക സ്മിത എസ്. നായർക്ക് പുസ്തക ശേഖരം നല്കികൊണ്ട് ഉദ്ഘാടനം ചെയ്തു. കാലടി റോട്ടറി ക്ലബ് സെക്രട്ടറി സി.എ. ജോളി സ്റ്റീഫൻ, ട്രഷറർ തോമസ് പടയാട്ടിൽ, മുൻ പ്രസിഡന്‍റ് പി.എസ്. ഉണ്ണികൃഷ്ണൻ, പി. സത്യനാഥ്, ഡോ. കെ. കൃഷ്ണൻ നമ്പൂതിരി, അധ്യാപകരായ വി. മായ, വിഷ്ണുരാജ്, കെ. സാവിത്രി ദേവി എന്നിവർ പങ്കെടുത്തു.

"വായനയുടെ സമ്മാനം' പദ്ധതി‌‌യുമായി റോട്ടറി

കൊച്ചി: റോട്ടറി ക്ലബ് ഓഫ് കൊച്ചിൻ ലോർഡ്സ്, ഇടപ്പള്ളി ക്യാംപ്യൻ സ്കൂളുമായി സഹകരിച്ച് ഡിസ്ട്രിക്ട് ഗവർണർ ഡോ. ജി.എൻ. രമേശിന്‍റെ നേതൃത്വത്തിൽ “വായനയുടെ സമ്മാനം" എന്ന പേരിൽ പ്രഥമ പദ്ധതി ആരംഭിച്ചു. ചടങ്ങിൽ ഡോ. ഗൗർദാസ് ചൗധരി മുഖ്യാതിഥിയായിരുന്നു. ഡോ. കെ.വി. തോമസ് മുഖ്യപ്രഭാഷണം നടത്തി. ജില്ലാ സെക്രട്ടറി തേജസ്, സുധിൻ വിലങ്ങാടൻ, ഡോ. ആന്‍റണി പോൾ, അസി.ഗവർണർ ആർ. ജെ. പ്രഹർഷ്, ആർ. ജിജി, സഞ്ജീവ്കുമാർ, ഡോ. ലീലാമ്മ തോമസ്, ജോജി ഗീവർഗീസ്, കെ.വിഷ്ണുദാസ് എന്നിവർ പങ്കെടുത്തു.

പാറക്കടവ് ബ്ലോക്കിൽ ആശാ പ്രവർത്തകർക്ക് ത്രിദിന പരിശീലന പരിപാടി

നെടുമ്പാശേരി : പാറക്കടവ് ബ്ലോക്ക് പരിധിയിലെ ആശാ പ്രവർത്തകർക്കുള്ള ത്രിദിന പരിശീലന പരിപാടി ആരംഭിച്ചു. ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് ഉദ്ഘാടനം ചെയ്തു. വൈസ് പ്രസിഡന്‍റ് താര സജീവ് അധ്യക്ഷയായിരുന്നു. ചെങ്ങമനാട് , നെടുമ്പാശേരി, പാറക്കടവ്, കുന്നുകര, പുത്തൻവേലിക്കര പഞ്ചായത്തുകളിലെ ആശാപ്രവർത്തകരാണ് പരിശീലനത്തിൽ പങ്കെടുക്കുന്നത്. നൽകുന്ന സേവനങ്ങളുടെ ഗുണനിലവാരം വർധിപ്പിക്കുന്നതിനും, പ്രവർത്തനങ്ങളുടെ കാര്യക്ഷമത വർധിപ്പിക്കുന്നതിനും സഹായകരമാകുന്ന വിധത്തിലാണ് മൂന്ന് ദിവസത്തെ പരിശീലന പരിപാടികൾ ആസൂത്രണം ചെയ്തിരിക്കുന്നത്. ചടങ്ങിൽ ബ്ലോക്ക് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ സി.എം. വർഗീസ്, ബ്ലോക്ക് പഞ്ചായഅംഗങ്ങളായ വി.ടി. സലീഷ്, അമ്പിളിഅശോകൻ, മെഡിക്കൽ ഓഫീസർ ഡോ. വി.വി. പുഷ്പ, എസ്.ബിജോഷ് , പിആർഒ സംഗീത ജോൺ എന്നിവർ പ്രസംഗിച്ചു.

"കീഴ്മാട് പ്രാഥമികാരോഗ്യ കേന്ദ്രത്തിൽ പരിശോധനാ സമയം വെട്ടിച്ചുരുക്കി'

ആലുവ: കീഴ്മാട് പ്രാഥമികാരോഗ്യ കേന്ദ്രത്തിൽ പരിശോധന സമയം വെട്ടിച്ചുരുക്കിയതായി പരാതി. ഡോക്ടർമാരുടേയും ജീവനക്കാരുടെയും സ്ഥലം മാറ്റം കാരണം കുറവ് വന്നതോടെയാണ് ഓ പി സമയം കുറച്ചതെന്ന് അധികൃതർ അറിയിച്ചു. രാവിലെ എട്ടു മണിമുതൽ വൈകിട്ട് ആറുമണിവരെ പ്രവർത്തിച്ചുകൊണ്ടിരുന്ന ഓ പി വിഭാഗമാണ് കഴിഞ്ഞ ഒരു ആഴ്ച ആയി ഉച്ചയ്ക്ക് ഒരുമണിവരെ ആക്കിയിരിക്കുന്നത്. പ്രതിദിനം നൂറുകണക്കിന് രോഗികൾ വരുന്ന ആശുപത്രിയിൽ നിലവിൽ മൂന്ന് ഡോക്ടർമാരാണ് ഓ പി യിൽ ഉണ്ടായിരുന്നത്.

കെഎംഎം കോളജില്‍ യുജി കോഴ്‌സുകൾ ഉദ്ഘാടനം ചെയ്തു

കൊച്ചി: വാഴക്കാല കെഎംഎം കോളജില്‍ 2025-26 വര്‍ഷത്തെ യുജി കോഴ്‌സുകളുടെ ഉദ്ഘാടനം ആകാശവാണി കൊച്ചി എഫ്എം ആര്‍ജെ ബാലകൃഷ്ണന്‍ പെരിയ (ബാലേട്ടന്‍) നിര്‍വഹിച്ചു. കെഎംഎം ഗ്രൂപ്പ് ഓഫ് ഇന്‍സ്റ്റിറ്റ്യൂട്ട് ചെയര്‍മാന്‍ എ.എം. അബൂബക്കര്‍ മുഖ്യപ്രഭാഷണം നടത്തി. ദേശീയ വിദ്യാഭ്യാസ നയത്തിന്‍റെ ഭാഗമായി തൊഴിലധിഷ്ഠിത കോഴ്‌സുകള്‍ക്കാണ് കോളജില്‍ കൂടുതല്‍ പ്രാമുഖ്യം നല്‍കുന്നതെന്ന് അദ്ദേഹം പറഞ്ഞു. കെഎംഎ കോളജ് മാനേജര്‍ ഡോ. സബാന ബക്കര്‍ അധ്യക്ഷത വഹിച്ചു. പ്രിന്‍സിപ്പൽ ഡോ. പി.എം. നൗഷാദ്, ഫാക്കല്‍റ്റി കോ-ഓര്‍ഡിനേറ്റര്‍മാരായ എം.എം. രാഗി, ഫാത്തിമ റെയ്ഹാനത്ത് തുടങ്ങിയവര്‍ പ്രസംഗിച്ചു.

പഴങ്ങനാട് ഇടവകയിലെ വയോജനങ്ങൾക്കു വിമാനയാത്രയൊരുക്കി

കിഴക്കന്പലം: വിശുദ്ധ തോമാശ്ലീഹായുടെ രക്തസാക്ഷിത്വ ദിനത്തോടനുബന്ധിച്ച് വിശുദ്ധന്‍റെ മൈലാപ്പൂർ ഉള്ള കബറിടം സന്ദർശിച്ച് പഴങ്ങനാട് സെന്‍റ് അഗസ്റ്റിൻസ് ഇടവകയിലെ വയോജനങ്ങൾ മാതൃകയായി. ഇടവകയിലെ വയോജനങ്ങൾക്കു ആദ്യ വിമാനയാത്രയും മൈലാപ്പൂർ യാത്രയിലൂടെ സാധിച്ചു. വികാരി റവ. ഡോ. പോൾ കൈപ്രന്പാടന്‍റെ നേതൃത്വത്തിലായിരുന്നു യാത്ര. ഇടവകയിലെ നാൽപതോളം വരുന്ന മാതാപിതാക്കളുടെ ചിരകാല സ്വപ്നമായ വിമാനയാത്ര സാധ്യമാക്കി നടത്തിയ മൈലാപ്പൂർ സന്ദർശനം അവർക്ക് അവിസ്മരണീയമായ അനുഭവമായി മാറി.

ഉദയംപേരൂരിലും നെടുന്പാശേരിയിലും ഞാറ്റുവേലച്ചന്ത

ഉദയംപേരൂർ: ഉദയംപേരൂർ പഞ്ചായത്ത് കുടുംബശ്രീ, കൃഷിഭവൻ, ഉദയംപേരൂർ സർവീസ് സഹകരണ ബാങ്ക്, മണകുന്നം വില്ലേജ് സർവീസ് സഹകരണ ബാങ്ക് എന്നിവയുടെ സംയുക്താഭിമുഖ്യത്തിലാരംഭിച്ച ഞാറ്റുവേലച്ചന്ത പഞ്ചായത്ത് പ്രസിഡന്‍റ് സജിത മുരളി ഉദ്ഘാടനം ചെയ്തു. വൈസ് പ്രസിഡന്‍റ് എസ്.എ.ഗോപി അധ്യക്ഷത വഹിച്ചു. ടി.കെ. ജയചന്ദ്രൻ, സുധാ നാരായണൻ, രാജു പി. നായർ, ടി.ഒ. ദീപ, ബി. ഇന്ദു, കെ.ആർ.ബൈജു, ഉഷ ധനപാലൻ, സീനു ജോസഫ് തുടങ്ങിയവർ പ്രസംഗിച്ചു. നെടുമ്പാശേരി : നെടുമ്പാശേരി പഞ്ചായത്ത് കൃഷിഭവന്‍റെ ഞാറ്റുവേലചന്ത പഞ്ചായത്ത്‌ പ്രസിഡന്‍റ് എ.വി. സുനിൽ ഉദ്ഘാടനം ചെയ്തു. വൈസ് പ്രസിഡന്‍റ് ശോഭ ഭരതൻ അധ്യക്ഷയായി. പഞ്ചായത്ത് അംഗങ്ങളായ ആന്‍റണി കയ്യാല, ബിജി സുരേഷ്, ജെസി ജോർജ്, പാറക്കടവ് ബ്ലോക്ക്‌ അംഗം ആനി കുഞ്ഞുമോൻ കൃഷി ഓഫീസർ ഉണ്ണി കൃഷ്ണൻ എന്നിവർ സംസാരിച്ചു. കർഷകർക്ക് ഗുണമേന്മയുള്ള തൈകൾ, വിത്തുകൾ, മൂല്യ വർദ്ധിത ഉത്പന്നങ്ങൾ തുടങ്ങിയവ മിതമായ നിരക്കിൽ വാങ്ങാൻ അവസരവും ഉണ്ടായിരുന്നു.

ഡിബി ഗിഫ്റ്റ് 2025 സീസൺ-6ന് തുടക്കം

കൊച്ചി: പള്ളുരുത്തി ഡോൺ ബോസ്കോ ബോയ്സ് ഹോമിൽ കുട്ടികളുടെ വിദ്യാഭ്യാസ കലാ-കായിക ഉന്നമനത്തിനായി നടപ്പാക്കുന്ന ഡിബി ഗിഫ്റ്റ് സീസൺ 6നു തുടക്കമായി. കൊച്ചി എക്സൈസ് അസി. ഇൻസ്പെക്ടർ അനിൽകുമാർ ഉദ്ഘാടനം ചെയ്തു. ലഹരിയുടെ സ്വാധീനത്തെപ്പറ്റിയും പ്രതിരോധ മാർഗത്തെപ്പറ്റിയും ബോധവത്കരണ ക്ലാസ് നടത്തി. സ്നേഹഭവൻ എക്സിക്യൂട്ടീവ് ഡയറക്ടർ ഫാ. പി.ഡി. തോമസ് അധ്യക്ഷത വഹിച്ചു. ഫാ. സി.എം. ജോസഫ്, ഫാ. ജോൺ, ഫാ. ജോയ്സൺ, ഫാ. അഭിലാഷ്, ജോബ് തുടങ്ങിയവർ പ്രസംഗിച്ചു.

കുമ്പളങ്ങി-കല്ലഞ്ചേരി റോഡ് പുനർനിർമിക്കും

ഫോർട്ടുകൊച്ചി: കുമ്പളങ്ങി-കല്ലഞ്ചേരി റോഡ് പുനർനിർമിക്കണമെന്ന ജനങ്ങളുടെ ആവശ്യത്തിന് പരിഹാരമായി കെ.ജെ. മാക്സി എംഎൽഎ, പിഡബ്ല്യുഡി ഉദ്യോഗസ്ഥരുമായി സ്ഥലം സന്ദർശിച്ച് എസ്റ്റിമേറ്റ് തയാറാക്കുവാനുള്ള നടപടികൾ സ്വീകരിച്ചു. കല്ലഞ്ചേരി വടക്കേ അറ്റം മുതൽ ചാലാവീട്ടിൽ സ്ലൂയീസ് വരെ ഒരു കിലോമീറ്റർ നീളത്തിൽ റീബിൽഡ് കേരള പദ്ധതിയിൽ ഉൾപ്പെടുത്തി റോഡ് പുനർനിർമിച്ചിരുന്നു. ബാക്കിയുള്ള 620 മീറ്റർ നീളത്തിലാണ് റോഡ് തകർന്നു കിടക്കുന്നത്. പരിസരവാസികളുടെ നേതൃത്വത്തിൽ ഒപ്പുശേഖരണം നടത്തി എംഎൽഎക്ക് ഭീമഹർജി നൽകിയ വേളയിൽ തന്നെ ഹർജിക്കാർക്ക് ഉറപ്പ് നൽകിയിരുന്നു. എംഎൽഎ ക്കൊപ്പം വൻജനാവലിയുമുണ്ടായിരുന്നു. കെ.ജെ. മാക്സി എംഎൽഎ ക്കൊപ്പം സിപിഎം ജില്ലാ കമ്മിറ്റി അംഗം പി.എ. പീറ്റർ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോബി പനക്കൽ, പഞ്ചായത്ത് മെമ്പർമാരായ ജെൻസി ആന്‍റണി, സജീവ് ആന്‍റണി, പി.ടി. സുധീർ, താരാ രാജു, ലോക്കൽ കമ്മിറ്റി സെക്രട്ടറി എൻ.എസ്. സുനീഷ് , മാർട്ടിൻ ആന്‍റണി, ടെൻസൻ കുറുപ്പശേരി തുടങ്ങിയവർ സന്നിഹിതരായിരുന്നു.

പൈപ്പ് പൊട്ടി കുടിവെള്ളം പാഴാകുന്നു

ആലുവ‌‌\ഫോർട്ടുകൊച്ചി: ആലുവ റെയിൽവേ സ്റ്റേഷൻ ജംഗ്ഷനിലും കുമ്പളങ്ങി-എഴുപുന്ന റോഡിലും പൈപ്പ് പൊട്ടി ശുദ്ധജലം പാഴാകുന്നു. ആലുവയിൽ വാഹനങ്ങൾ കയറി കുടിവെള്ള പൈപ്പ് പൊട്ടുകയായിരുന്നു. നേരിട്ട് അറിയിച്ചിട്ടും വാട്ടർ അഥോറിറ്റി നന്നാക്കുന്നില്ലെന്ന് വ്യാപാരികളുടെ പരാതി. ഇന്നലെ രാവിലെയാണ് ആലുവ റെയിൽവേ സ്റ്റേഷൻ ജംഗ്ഷനിൽ റോഡിനോടും പൊതു കാനയോടും ചേർന്ന് രാജാജി ലോഡ്ജിന് മുന്നിലായി കുടിവെള്ള പൈപ്പ് പൊട്ടിയത്. ഇന്നലെ സന്ധ്യവരെ പൈപ്പ് നന്നാക്കാൻ ആളെത്തിയില്ല. കുമ്പളങ്ങി-എഴുപുന്ന റോഡിൽ ഔവർ ലേഡി ഓഫ് ഫാത്തിമ ഹയർ സെക്കൻഡറി സ്കൂളിന് മുന്നിലാണ് പൈപ്പ് പൊട്ടി വെളളം ഒഴുകുന്നത്. പഞ്ചായത്ത് പ്രസിഡന്‍റ് സൂസൻ ജോസഫ്, മെമ്പർ ബെയ്സിൽ പുത്തംവീട്ടിൽ തുടങ്ങിയവർ സംഭവ സ്ഥലം സന്ദർശിച്ചു.ഇവർ വാട്ടർ അഥോറിറ്റിക്ക് പരാതി നല്കി. ശുദ്ധജലം പാഴാക്കുന്നതിനെതിരേയും വാട്ടർ അഥോറിറ്റിയുടെ അനാസ്ഥയ്ക്കെതിരെയും ജനാധിപത്യ കേരള കോൺഗ്രസ് കുമ്പളങ്ങി മണ്ഡലം കമ്മിറ്റിയുടെ നേതൃത്വത്തിൽ സായാഹ്ന പ്രതിഷേധപ്രകടനം സംഘടിപ്പിച്ചു. മണ്ഡലം പ്രസിഡന്‍റ് ടെൻസൺ കുറുപ്പശേരി അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് തങ്കച്ചൻ പെരുമ്പള്ളി ഉദ്ഘാടനം ചെയ്തു.

ജ്ഞാനോദയയില്‍ ആര്‍ട്ട് ഫെസ്റ്റിവല്‍

കാലടി: ചെങ്ങല്‍ ജ്ഞാനോദയ സെന്‍ട്രല്‍ സ്‌കൂളില്‍ സംഘടിപ്പിച്ച ആര്‍ട്ട് ഫെസ്റ്റിവല്‍ ‘ടാലന്‍റ് ഡ്രിസില്‍ 2025’ നടന്‍ ഏലൂര്‍ ജോര്‍ജ് ഉദ്ഘാടനം ചെയ്തു. ലോക്കല്‍ മാനേജര്‍ സിസ്റ്റര്‍ ദയ മരിയ അധ്യക്ഷത വഹിച്ചു. പ്രിന്‍സിപ്പല്‍ സിസ്റ്റര്‍ സിനി റോസ്, അധ്യാപിക ആനി തോമസ്, ആര്‍ട്‌സ് ക്യാപ്റ്റന്‍ മിത്രജ രാജീവ് എന്നിവര്‍ പ്രസംഗിച്ചു. കെജി മുതല്‍ എച്ച്എസ്എസ് വരെ 30 ഇനങ്ങളിലായി കലാമത്സരങ്ങള്‍ നടന്നു.

മഞ്ഞപ്രയിലും നടുവട്ടത്തും ശക്തമായ കാറ്റ്; വ്യാപക നാശനഷ്ടം

കാലടി: ഇന്നലെ ഉച്ചയോടെ വീശിയടിച്ച ശക്തമായ കാറ്റിൽ മഞ്ഞപ്ര മേഖലയിലും, മലയാറ്റൂർ നീലീശ്വരം പഞ്ചായത്തിലെ നടുവട്ടം പ്രദേശത്തും വ്യാപക നാശനഷ്ടമുണ്ടായി. മഞ്ഞപ്രയിൽ ശക്തമായി വീശിയടിച്ച ചുഴലിക്കാറ്റിൽ വീടിന് മുകളിലേക്ക് മരം വീണ് വീട് പൂർണമായും തകർന്നു. വീട്ടിൽ ആൾതാമസമില്ലാതിരുന്നതിനാൽ വലിയ അപകടം ഒഴിവായി. ഇന്നലെ ഉച്ചയ്ക്ക് 12 ഓടെ ശക്തമായി പെയ്ത മഴയോടൊപ്പമാണ് ചുഴലിക്കാറ്റും വീശിയടിച്ചത്. മഞ്ഞപ്ര പഞ്ചായത്ത് അഞ്ചാം വാർഡിൽ താമസിക്കുന്ന പറമ്പി ബെന്നി ജോസഫിന്‍റെ ആൾ താമസമില്ലാത്ത വീടിന് മുകളിലേക്കാണ് മരം വീണത്. വീട് പൂർണമായും തകർന്നു. വീടിന് സമീപം നിന്നിരുന്ന വലിയ തേക്ക് മരം ശക്തമായ കാറ്റിൽ വീടിന് മുകളിലേക്ക് കടപുഴകി വീഴുകയായിരുന്നു. ശക്തമായ കാറ്റിൽ നടുവട്ടം ഭാഗത്തും വ്യാപക കൃഷിനാശവും ഉണ്ടായിട്ടുണ്ട്. കനത്ത കാറ്റിൽ രണ്ടാം വാർഡിലെ പയ്യപ്പിള്ളി ജോബിയുടെ ഇരുപതോളം ജാതി മരങ്ങൾ കടപഴുകി വീണു. നിറയെ ജാതി കായകൾ ഉള്ള മരങ്ങളാണ് മറിഞ്ഞത്. ലക്ഷക്കണക്കിന് രൂപയുടെ നഷ്ടമാണ് ജോബിക്ക് ഉണ്ടായിട്ടുളളത്. ശക്തമായ കാറ്റിൽ, വാഴ, ജാതി, കവുങ്ങ് ഉൾപ്പെടെ കടപുഴകി വീണ് വ്യാപക കൃഷി നാശം മേഖലയിൽ സംഭവിച്ചു.

കെസിവൈഎം കൊച്ചി രൂപത : സുവർണ ജൂബിലി ലോഗോ പ്രകാശനം ചെയ്തു

ഫോർട്ടുകൊച്ചി : കെസിവൈഎം കൊച്ചി രൂപതയുടെ സുവർണ ജൂബിലി ആഘോഷങ്ങൾക്ക് മുന്നോടിയായി ജൂബിലി ലോഗോ പ്രകാശനകർമം കെസിബിസി ഡെപ്യൂട്ടി സെക്രട്ടറി ഫാ. തോമസ് തറയിൽ, ജൂബിലി ലോഗോ രൂപത പ്രസിഡന്റ് ഡാനിയ ആന്‍റണിക്ക് കൈമാറി നിർവഹിച്ചു. ആഗോള കത്തോലിക്കാ സഭയുടെ ജൂബിലിയോടൊപ്പം തന്നെയാണ് കെസിവൈഎം സുവർണ ജൂബിലി ആഘോഷങ്ങൾ നടത്തപ്പെടുന്നതെന്ന് അദ്ദേഹം കൂട്ടിച്ചേർത്തു. സുവർണ ജൂബിലി ആപ്തവാക്യത്തിന്‍റെ പ്രകാശനകർമം സംസ്ഥാന ഡയറക്ടർ ഫാ. ഡിറ്റോ കൂള നിർവഹിച്ചു. ക്രിസ്തുപാതയിൽ നവസമൂഹനിർമിതിക്കായി ഉജ്ജ്വലയുവത്വം എന്നതാണ് സുവർണ ജൂബിലി ആപ്തവാക്യം. കെസിവൈഎം രൂപത ഡയറക്ടർ ഫാ. മെൽട്ടസ് കൊല്ലശേരി, സുവർണ ജൂബിലി ജനറൽ കൺവീനർ കാസി പൂപ്പന, രൂപത വൈസ് പ്രസിഡന്‍റ് ജീവാ റെജി, ട്രഷറർ ജോർജ് ജിക്സൺ, സെക്രട്ടറി സനൂപ് ദാസ്, സംസ്ഥാന സിൻഡിക്കേറ്റ് അംഗം അന്ന സിൽഫ സെബാസ്റ്റ്യൻ, എക്സിക്യൂട്ടീവ് അംഗങ്ങളായ ടോം ആന്‍റണി, ബേസിൽ റിച്ചാർഡ് എന്നിവർ സംസാരിച്ചു.

വിദ്യാലയത്തിനു മുന്നിൽ പോലീസില്ല : റോഡു മുറിച്ചുകടക്കാൻ പാടുപെട്ട് വിദ്യാർഥികൾ

ഫോർട്ടുകൊച്ചി: വിദ്യാലയങ്ങൾക്ക് മുന്നിൽ കുരുന്നുകൾക്ക് രക്ഷകരായി മാറേണ്ട പോലീസുകാരെ പലപ്പോഴും കാൺമാനില്ലെന്ന് രക്ഷിതാക്കളുടെയും സ്കൂൾ അധികൃതരുടേയും പരാതി. സ്കൂൾ തുറന്ന ദിനങ്ങളിലെല്ലാം ഡ്യൂട്ടിക്ക് പോലീസുകാർ ഉണ്ടായിരുന്നുവെങ്കിലും ഇപ്പോൾ കാണാനില്ലെന്നാണ് ആക്ഷേപം. കുന്പളങ്ങി പെരുമ്പടപ്പ് സെന്‍റ് ആന്‍റണീസ് യുപി സ്കൂളിനു മുന്നിൽ കുട്ടികൾ റോഡ് മുറിച്ചു കടക്കുന്നത് സുഗമമാക്കാൻ സിഗ്നൽ ലൈറ്റുകൾ സ്ഥാപിച്ചിട്ടുണ്ടെങ്കിലും സ്റ്റോപ്പ് ലൈറ്റുകൾ തെളിയാത്തതു മൂലം 24 മണിക്കൂറും വാഹനങ്ങൾ ചീറി പായുകയാണ്. സ്കൂളിലേക്ക് വരികയും പോരുകയും ചെയ്യുന്ന വിദ്യാർഥികൾ നന്നേ കഷ്ടപ്പെട്ടാണ് റോഡ് മുറിച്ചു കടക്കുന്നത്. സമീപത്ത് തന്നെ ബസ് സ്റ്റോപ്പ് ഉള്ളതിനാൽ ഗതാഗതക്കുരുക്കും ഈ സമയങ്ങളിൽ ഉണ്ടാകാറുണ്ട്. അപകടങ്ങളും ഇവിടെ നിത്യസംഭവമായി മാറിയിരിക്കുകയാണ്. തുറവൂർ-അരൂർ ആകാശപ്പാത നിർമാണം നടക്കുന്നതിനാൽ ഇരുചക്ര വാഹനമുൾപ്പെടെയുള്ള എല്ലാ വാഹനങ്ങളും കുമ്പളങ്ങി - പെരുമ്പടപ്പ് റോഡിലൂടെയാണ് യാത്ര ചെയ്യുന്നത്. ഇതുമൂലം ഇതിലേയുള്ള വാഹന ഗതാഗതം ഇരട്ടിയായി വർധിച്ചിരിക്കുകയാണ്. കുമ്പളങ്ങി-എഴുപുന്ന റോഡിലൂടെയുള്ള ഗതാഗതവും അപകടങ്ങൾ ക്ഷണിച്ചു വരുത്തുകയാണെന്നും കുമ്പളങ്ങിയിലേയും പെരുമ്പടപ്പിലേയും വിദ്യാലയങ്ങൾക്ക് മുന്നിൽ പോലീസിനേയോ ഹോം ഗാർഡുകളേയോ നിർത്തി വിദ്യാർഥികൾക്ക് സുരക്ഷ ഉറപ്പുവരുത്തണമെന്നും ജനാധിപത്യ കേരള കോൺഗ്രസ് കുമ്പളങ്ങി മണ്ഡലം പ്രസിഡന്‍റ് ടെൻസൻ കുറുപ്പശേരി വകുപ്പ് മന്ത്രിമാർക്ക് നല്കിയ പരാതിയിൽ ആവശ്യപെട്ടിട്ടുണ്ട്.

യൂസുഫ് പല്ലാരിമംഗലത്തിന് വൈക്കം മുഹമ്മദ് ബഷീര്‍ സ്മാരക പുരസ്കാരം

പോത്താനിക്കാട്: തിരുവനന്തപുരം തൈക്കാട് വൈക്കം മുഹമ്മദ് ബഷീര്‍ കള്‍ചറല്‍ ഫോറത്തിന്‍റെ വൈക്കം മുഹമ്മദ് ബഷീര്‍ സ്മാരക പുരസ്കാരത്തിനായി കെ.എ. യൂസുഫ് പല്ലാരിമംഗലത്തിനെ തെരഞ്ഞെടുത്തു. പല്ലാരിമംഗലം ഗവ. വൊക്കേഷണല്‍ ഹയര്‍ സെക്കന്‍ഡറി സ്കൂളിന്‍റെ ചരിത്ര പുസ്തകം തയാറാക്കിയതിനാണ് പുരസ്കാരം. 2023 ഒക്ടോബറിലാണ് പുസ്തകം പ്രകാശനം ചെയ്തത്. ആനുകാലികങ്ങളില്‍ കവിത, കഥ തുടങ്ങിയവ എഴുതുന്ന യൂസുഫ് "പെങ്ങള്‍ നട്ട പൂക്കള്‍’ എന്ന പേരില്‍ കവിതാസമാഹാരവും പുറത്തിറക്കിയിട്ടുണ്ട്. ജൂലൈ അഞ്ചിന് വൈക്കം മുഹമ്മദ് ബഷീര്‍ അനുസ്മരണ ദിനത്തില്‍ തിരുവനന്തപുരം നന്ദാവനം പ്രഫ. എന്‍. കൃഷ്ണപിള്ള ഹാളില്‍ നടക്കുന്ന ചടങ്ങില്‍ പുരസ്കാരം സമ്മാനിക്കും.

ലിറ്റിൽ ഫ്ളവർ ഹൈസ്കൂളിൽ നൊ ബാഗ് ഡേ

ഊന്നുകൽ: ലിറ്റിൽ ഫ്ളവർ ഹൈസ്കൂളിൽ നൊ ബാഗ് ഡേ ഉദ്ഘാടനം നടത്തി. സംസ്ഥാന സർക്കാർ പൊതുവിദ്യാലയങ്ങളെ മികവിന്‍റെ ഇടങ്ങളായി മാറ്റുന്നതിന്‍റെ ഭാഗമായും സമഗ്രഗുണമേന്മ പാഠ്യപദ്ധതിയുടെ ഭാഗമായിട്ടുമാണ് പദ്ധതിക്ക് തുടക്കംകുറിച്ചത്. കുട്ടികളിൽ ഒളിഞ്ഞു കിടക്കുന്ന സർഗവാസനകളെ കണ്ടെത്തി പരിശീലിപ്പിക്കുകയാണ് ലക്ഷ്യം. ബാൻഡ്, ചെണ്ട, കരാട്ടെ, ഡാൻസ്, അബാക്കസ്, സംഗീതം, യോഗ, ഡ്രോയിംഗ്, തയ്യിൽ, പ്രസംഗം എന്നിവയ്ക്കുള്ള പരിശീലനമാണ് ഇതിന്‍റെ ഭാഗമായി ആരംഭിച്ചിരിക്കുന്നത്. എല്ലാ ബുധനാഴ്ചയും പാഠ്യേതര പ്രവർത്തനങ്ങൾക്കുള്ള പരിശീലനം നൽകും. കോതമംഗലം രൂപത കോർപ്പറേറ്റ് ഏജൻസി സെക്രട്ടറി ഫാ. മാത്യു എം. മുണ്ടക്കൽ ഉദ്ഘാടനം നിർവഹിച്ചു. സ്കൂൾ മാനേജർ ഫാ. മാത്യു അത്തിക്കൽ അധ്യക്ഷത വഹിച്ചു.

മദ്യലഹരിയിൽ കാറോടിച്ച് അപകടം

കൂത്താട്ടുകുളം: എംസി റോഡിൽ കൂത്താട്ടുകുളം ടൗണിൽ മദ്യലഹരിയിൽ കാറോടിച്ച് അപകടം. അതിവേഗത്തിൽ കോട്ടയം ഭാഗത്തുനിന്നു ടൗണിലേക്ക് എത്തിയ വാഹനം മൂന്നു വാഹനങ്ങൾ തകർത്ത് പോസ്റ്റിൽ ഇടിച്ചാണ് നിന്നത്. വാഹനം ഓടിച്ചിരുന്ന കൂത്താട്ടുകുളം തേവർകുന്നേൽ ജൂബി ജോസ് (48), വാഹനത്തിലെ യാത്ര ചെയ്തുവന്ന കൂത്താട്ടുകുളം കക്കാട്ടുപിള്ളി കെ.കെ. ശ്രീകാന്ത് (44) എന്നിവരെ പോലീസ് കസ്റ്റഡിയിലെടുത്തു. ഇന്നലെ രാത്രി 8.15ഓടെയാണ് സംഭവം. അപകടത്തിൽ ആർക്കും പരിക്കുകൾ. രാമപുരം കവലയിൽ എയർപോർട്ടിൽനിന്നു യാത്രക്കാരുമായി വന്ന ഇന്നോവയിലാണ് ആദ്യം ഇടിച്ചതെന്ന് നാട്ടുകാർ പറഞ്ഞു. നൂറു മീറ്റർ മാറി ഫെഡറൽ ബാങ്ക് സമീപം കെഎസ്ആർടിസി ബസിന്‍റെ പിൻഭാഗത്ത് ഇടിച്ചു. പിന്നീട് എൻഎസ്എസ് ആർക്കേഡിൽ പാർക്ക് ചെയ്തിരുന്ന ഫോർച്യൂണർ കാറിൽ ഇടിച്ചുകയറി. തുടർന്ന് റോഡരികി വൈദ്യുത കാലിൽ ഇടിച്ചാണ് അപകടമുണ്ടാക്കിയ കാർ നിന്നത്. കാർ ഡ്രൈവറേയും സഹയാത്രികനേയും നാട്ടുകാർ തടഞ്ഞു പോലീസിൽ ഏൽപ്പിക്കുകയായിരുന്നു.

ഡി-അഡിക്ഷൻ സെന്‍ററിന് ആംബുലൻസ് നൽകി

തിരുവാങ്കുളം: ലഹരി വിപത്തിനെതിരെ യാക്കോബായ സുറിയാനി ഓർത്തഡോക്സ് സഭ ആരംഭിക്കുന്ന ലഹരി വിമുക്ത കേന്ദ്രത്തിന്‍റെ പ്രവർത്തനങ്ങൾ കൂടുതൽ വ്യാപിപ്പിക്കുമെന്ന് തിരുവാങ്കുളം ക്യംതാ സെമിനാരി കാതോലിക്കോസ് റെസിഡൻസിൽ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവായുടെ അധ്യക്ഷത ചേർന്ന അവലോകന യോഗം വ്യക്തമാക്കി. കാലഘട്ടത്തിന്‍റെ ആവശ്യമായിക്കൊണ്ടിരിക്കുന്ന ലഹരി വിമുക്ത കേന്ദ്രങ്ങൾ പരിശുദ്ധ സഭയുടെ എല്ലാ ഭദ്രാസനങ്ങളിലും ആരംഭിക്കുമെന്ന് ശ്രേഷ്ഠ കാതോലിക്ക ബാവ പറഞ്ഞു. ഡി-അഡിക്ഷൻ സെന്‍ററിന്‍റെ ചുമതല വഹിക്കുന്ന സഖറിയാസ് മാർ പീലക്സിനോസ് മെത്രാപ്പോലീത്ത പ്രഭാഷണം നടത്തി. കൊച്ചി ഭദ്രാസനത്തിന്‍റെ നേതൃത്വത്തിൽ വെളിയനാട് വട്ടപ്പാറയിൽ ആരംഭിക്കുന്ന ആദ്യ സെന്‍ററിന്‍റെ പ്രവർത്തനങ്ങൾ പുരോഗമിക്കുന്നു. കോട്ടയം ഭദ്രാസനത്തിലെ വടവാതൂർ മാർ അപ്രേം യാക്കോബായ സുറിയാനി പള്ളിയിൽനിന്നു ഡി-അഡിക്ഷൻ സെന്‍ററിലേക്ക് ആംബുലൻസ് നൽകി. ശ്രേഷ്ഠ കാതോലിക്ക ബാവയും മെത്രാപ്പോലീത്തയും ചേർന്ന് പള്ളി വികാരിമാരായ ഫാ. അജു കെ. ഫിലിപ്പ് കോട്ടപ്പുറം, ഫാ. തോമസ് കുര്യൻ കണ്ടാന്തറ എന്നിവരിൽനിന്ന് ആംബുലൻസിന്‍റെ താക്കോൽ സ്വീകരിച്ചു.

റോഡുകളിലെ വെള്ളക്കെട്ട്: എംപിയുടെ നേതൃത്വത്തിൽ സ്ഥലം സന്ദർശിച്ചു

മൂവാറ്റുപുഴ: മണ്ഡലത്തിലെ റോഡുകളിൽ വെള്ളക്കെട്ടുണ്ടായ ഭാഗങ്ങൾ ഡീൻ കുര്യാക്കോസ് എംപിയുടെ നേതൃത്വത്തിലുള്ള സംഘം സന്ദർശിച്ചു. മഴക്കാലമായതോടെ ദേശീയപാത 85ന്‍റെ ഭാഗമായ മൂവാറ്റുപുഴ മണ്ഡലത്തിലെ വെള്ളക്കെട്ടുണ്ടാകുന്ന സ്ഥലങ്ങളാണ് സംഘം സന്ദർശിച്ചത്. മൂവാറ്റുപുഴ മണ്ഡലം ആരംഭിക്കുന്ന പെരുവംമൂഴി പാലം മുതൽ മൂവാറ്റുപുഴ കടാതി വരെയാണ് എംപി സന്ദർശനം നടത്തിയത്. ദേശീയപാത അഥോറിറ്റി ഉദ്യോഗസ്ഥരെയും ഉൾപ്പെടുത്തിയാണ് മേക്കടന്പ്, കടാതി ഷാപ്പുംപടി, ആലിൻചുവട് പ്രദേശങ്ങളിൽ എംപി സന്ദർശനം നടത്തിയത്. ദേശീയപാത വികസന അഥോറിറ്റി ഉദ്യോഗസ്ഥരെക്കൊണ്ട് സ്ഥല പരിശോധന നടത്തുകയും ചെയ്തു. പെരുവംമൂഴി മുതൽ കടാതി വരെ നിരന്തരമായി വെള്ളക്കെട്ട് രൂക്ഷമായ നാല് സ്ഥലങ്ങളിലെ പ്രശ്നപരിഹാരത്തിനായി എംപി ഇടപെടൽ നടത്തിയെങ്കിലും സൂക്ഷ്മ പരിശോധന ആവശ്യമായിരുന്നു. വലിയ വെള്ളക്കെട്ടുണ്ടാകുന്ന പ്രദേശങ്ങളിലെ ഓടയുടെ നിർമാണത്തിൽ ശാസ്ത്രീയമായ പരിഷ്കരണങ്ങൾ നടത്താനാണ് നിലവിൽ തീരുമാനിച്ചിരിക്കുന്നത്. പെരുവംമൂഴി മുതൽ ബഥനിപ്പടി വരെയുള്ള ഓടയുടെ നിർമാണത്തിൽ കണ്ടെത്തിയിട്ടുള്ള അശാസ്ത്രീയത പരിഹരിക്കാനും തീരുമാനമായി. കെഎസ്ഇബിയുടെ പോസ്റ്റുകൾ മാറ്റാത്തത് ഓടയുടെ നിർമാണം പൂർത്തീകരിക്കാൻ തടസമായി. ഓട നിർമാണത്തിലെ അപാകതകൾ പരിശോധിക്കുമെന്നും വിവിധ വകുപ്പുകളുമായി ഏകോപിപ്പിച്ച് നിർമാണ പ്രവർത്തനം ഉടൻ പൂർത്തീകരിക്കുമെന്നും എംപി പറഞ്ഞു.

ഓർമപ്പെരുന്നാൾ ഇന്നാരംഭിക്കും

മൂവാറ്റുപുഴ: വെള്ളൂർക്കുന്നം മൗണ്ട് താബോർ സെന്‍റ് പോൾസ് ചാപ്പലിൽ പൗലോസ് ശ്ലീഹായുടെ ഓർമപ്പെരുന്നാൾ ഇന്ന് തുടങ്ങും. വികാരി ജോർജ് മാന്തോട്ടം കോറെപ്പിസ്കോപ്പ കൊടിയേറ്റി. ഇന്ന് രാവിലെ 6.45ന് പ്രാർഥന, 7.30ന് കുർബാന ഫാ. ജോബി ജോണ്‍ പുളിഞ്ചിയിൽ, 6.30ന് പ്രാർഥന ഫാ. ബാബു പാലക്കുന്നേൽ. നാളെ 6.45ന് പ്രാർഥന, 7.30ന് കുർബാന ഫാ. ജോയി നെല്ലിക്കുന്നേൽ, 6.30ന് പ്രാർഥന, 7.30ന് പ്രദക്ഷിണം. ആറിന് 7.30ന് പ്രാർഥന, 8.30ന് കുർബാന മാത്യുസ് മാർ തീമോത്തിയോസ് മെത്രാപ്പോലീത്ത, പത്തിന് ഉന്നത വിജയം നേടിയ വിദ്യാർഥികളെ ആദരിക്കലും നിർധന രോഗികൾക്ക് ധനസഹായ വിതരണവും, 10.30ന് പ്രദക്ഷിണം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]