ADVERTISEMENT

ADVERTISEMENT

തൃപ്പൂണിത്തുറയിൽ കോൺഗ്രസ് പ്രവർത്തകരുടെ ആഹ്ലാദ പ്രകടനം

തൃപ്പൂണിത്തുറ: കെ. ബാബു എംഎൽഎക്കെതിരേ എൽഡിഎഫ് സ്ഥാനാർഥി എം. സ്വരാജ് നൽകിയ തെരഞ്ഞെടുപ്പ് കേസ് ഹൈക്കോടതി തള്ളിയതിൽ ആഹ്ലാദം പ്രകടിപ്പിച്ച് തൃപ്പൂണിത്തു റയിൽ കോൺഗ്രസ് പ്രവർത്തകർ പ്രകടനം നടത്തി.

തുടർന്ന് സ്റ്റാച്യു ജംഗ്ഷനിൽ നടന്ന സമ്മേളനം ഡിസിസി ജനറൽ സെക്രട്ടറി ആർ. വേണുഗോപാൽ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് പി.സി. പോൾ, ബ്ലോക്ക് മുൻ പ്രസിഡന്‍റ് സി. വിനോദ്, മണ്ഡലം പ്രസിഡന്‍റ് കെ. കേശവൻ, പ്രവീൺ പറയംന്താഴത്ത്, ഡി. അർജുനൻ, പി.ഡി. ശ്രീകുമാർ, എം.ജെ ജോൺസൺ, മാനാത്ത് സുകുമാരൻ, വി.പി. സതീശൻ എന്നിവർ നേതൃത്വം നൽകി.

ADVERTISEMENT

‘കുട്ടന്പുഴ ബംഗ്ലാവ് കടവിൽ പാലം നിർമിക്കണം’

കോതമംഗലം: കുട്ടന്പുഴ പഞ്ചായത്തിലെ അഞ്ച് വാർഡുകൾ അടങ്ങുന്ന വടാട്ടുപാറ പ്രദേശത്തെയും കുട്ടന്പുഴയേയും തമ്മിൽ ബന്ധിപ്പിക്കുന്ന കുട്ടന്പുഴ ടൗണിലെ ബംഗ്ലാവ് കടവിൽ പാലം നിർമിക്കണമെന്ന ആവശ്യം ശക്തമാകുന്നു. 1980-85 കാലഘട്ടത്തിൽ പൂയംകുട്ടി ഇലക്ട്രിക് സിറ്റി പ്രോജക്ടിൽ ഉൾപ്പെടുത്തി കുട്ടന്പുഴയ്ക്ക് സമീപം ഇടമലയാറും കണ്ടൻപാറ പുഴയും തമ്മിൽ സംഗമിക്കുന്ന ആനക്കയം കേന്ദ്രീകരിച്ച് പാലം പണിയുന്നതിന് കെഎസ്ഇബി നടപടികൾ ആരംഭിച്ചിരുന്നു. എന്നാൽ പൂയംകുട്ടി പ്രോജക്ടിന് കേന്ദ്ര സർക്കാർ അനുമതി നിഷേധിച്ചതോടെ പാലം എന്ന സ്വപ്നവും നിലച്ചു. 2009ലെ പിഡബ്ലുഡി ഉത്തരവ് പ്രകാരം നെടുന്പാശേരി - കൊടൈക്കനാൽ സ്റ്റേറ്റ് ഹൈവേയുടെ ഭാഗമായി ഭൂതത്താൻകെട്ട് - വടാട്ടുപാറ - പലവൻപടി - ആനക്കയം - കുട്ടന്പുഴ റോഡ് ഏറ്റെടുക്കുകയുണ്ടായി. ഇതിന്‍റെ ഭാഗമായി ആനക്കയത്ത് പിഡബ്ലുഡിയുടെ നേതൃത്വത്തിൽ പാലം പണിയുവാൻ നടപടികൾ ആരംഭിക്കുകയും സംസ്ഥാന ബജറ്റിൽ ഭരണാനുമതിയില്ലാത്ത ഹെഡിൽ 100 രൂപ ടോക്കണ്‍ അഡ്വാൻസായി ഉൾപ്പെടുത്തുകയും 12 കോടി അടങ്കൽ തുക വരുന്ന എസ്റ്റിമേറ്റ് എടുക്കുകയും ചെയ്തിരുന്നു. ആനക്കയത്ത് പാലം പണിയുന്നതിന്‍റെ ഭാഗമായി വടാട്ടുപാറ-കുട്ടന്പുഴ റോഡിൽ ആനക്കയം ഭാഗത്ത് അപ്രോച്ച് റോഡ് നിർമിക്കുന്നതിനായി വനം വകുപ്പിന്‍റെ 36 സെന്‍റ് സ്ഥലം ഏറ്റെടുക്കേണ്ടതുണ്ടായിരുന്നു. എന്നാൽ ഇത് നടന്നില്ല. ആനക്കയത്ത് വനം വകുപ്പിന്‍റെ ശക്തമായ എതിർപ്പിനെ തുടർന്നും സ്ഥലം വിട്ടുകിട്ടാത്ത സാഹചര്യത്തിലാണ് കുട്ടന്പുഴ ബംഗ്ലാവ് കടവ് കേന്ദ്രീകരിച്ച് പാലം പണിയണമെന്ന ആവശ്യം ഉയർന്നുവന്നത്. ഈ ആവശ്യം ഉന്നയിച്ച് 2016-2017 കാലഘട്ടത്തിൽ കുട്ടന്പുഴ പഞ്ചായത്ത് ഗ്രാമവികസന സമിതി പൊതുമരാമത്ത് മന്ത്രിക്ക് നിവേദങ്ങൾ സമർപ്പിച്ചതിനേതുടർന്ന് പിഡബ്ലുഡി പാലത്തിന്‍റെ എസ്റ്റിമേറ്റ് എടുത്തിരുന്നു. കുട്ടന്പുഴ ബംഗ്ലാവ് കടവ് ഭാഗത്ത് 180 മീറ്റർ നീളത്തിൽ പാലം പണിയുന്നതിന് 18 കോടി ചെലവ് വരുമെന്നാണ് കണക്കാക്കിയിട്ടുള്ളത്. ഇപ്പോൾ ഈ എസ്റ്റിമേറ്റ് തിരുത്തി 18 കോടിയിൽനിന്നും 25 കോടിയാക്കി എസ്റ്റിമേറ്റ് തുക ഉയർത്തിയിട്ടുണ്ട്. കുട്ടന്പുഴ പഞ്ചായത്തിലെ ആകെ ജനസംഖ്യ 24,451 ആണ്. അതിൽ 12,000ത്തിൽപ്പരം ജനങ്ങൾ താമസിക്കുന്നത് വടാട്ടുപാറ പ്രദേശത്താണ്. വടാട്ടുപാറ നിവാസികൾക്ക് കുട്ടന്പുഴ പഞ്ചായത്ത് ആസ്ഥാത്ത് എത്തണമെങ്കിൽ രണ്ട് ബസുകൾ മാറി കയറി 30 കിലോ മീറ്റർ ദൂരം യാത്ര ചെയ്താലേ കുട്ടന്പുഴയിലുള്ള പഞ്ചായത്ത്, വില്ലേജ് ഓഫീസുകൾ, പോലീസ് സ്റ്റേഷൻ, കുടുംബാരോഗ്യ കേന്ദ്രം, ഹയർ സെക്കൻഡറി സ്കൂൾ, മൃഗാശുപത്രി, ട്രൈബൽ ഓഫീസ്, ബാങ്കുകൾ അടക്കമുള്ള സ്ഥാപനങ്ങളിൽ എത്തിചേരുവാൻ കഴിയൂ. ഇത് ഇടമലയാർ - താളുക്കണ്ടം ട്രൈബൽ നിവാസികൾക്കും വളരെയേറെ ഗുണപ്രഥമാകും. 2009 മുതൽ 2025 വരെ കഴിഞ്ഞ 17 വർഷമായിട്ട് ആനക്കയം കുട്ടന്പുഴ ബംഗ്ലാവ് കടവ് പാലം നിർമാണത്തിനായി സർക്കാർ സംസ്ഥാന ബജറ്റിൽ ഭരണാനുമതിയില്ലാത്ത ഹെഡിൽ വെറും 100 രൂപ മാത്രമാണ് ഉൾകൊള്ളിച്ചുവരുന്നത്. ഭരണാനുമതിയുള്ള ഹെഡിൽ ഏറ്റവും ചുരുങ്ങിയത് ഒരു ലക്ഷം രൂപ എങ്കിലും അനുവദിച്ചാലേ 25 കോടി എസ്റ്റിമേറ്റുള്ള കുട്ടന്പുഴ ബംഗ്ലാവ് കടവ് പാലത്തിന് അഡ്മിനിസ്ട്രേറ്റീവ് അനുമതി ലഭിക്കുകയുള്ളു. ഈ കാര്യത്തിൽ ജനങ്ങളെ കബളിപ്പിച്ച് സ്ഥലം എംഎൽഎയും സർക്കാരും ഒത്തുകളിക്കുകയാണെന്ന് പഞ്ചായത്ത് ഗ്രാമവികസന സമിതി കുറ്റപ്പെടുത്തി. കുട്ടന്പുഴ ബംഗ്ലാവ് കടവ് ഭാഗത്ത് പാലം നിർമിക്കുന്ന കാര്യത്തിൽ സർക്കാരും പിഡബ്ലുഡിയും വലിയ ഉദാസീനതകാട്ടിയ സാഹചര്യത്തിൽ കുട്ടന്പുഴ പഞ്ചായത്ത് ഗ്രാമവികസന സമിതി കേരള സംസ്ഥാന മനുഷ്യാവകാശ കമ്മീഷനിൽ ഹർജി ഫയൽ ചെയ്യുകയും തുടർന്ന് 2024 ജൂണ്‍ 21ന് അടിയന്തരമായി പാലം പണിയണമെന്ന് കാണിച്ച് ഉത്തരവുകൾ ഉണ്ടാവുകയും ചെയ്തിട്ടുള്ളതാണ്. നടപടി ഉണ്ടാകാത്തതിനെതുടർന്ന് കുട്ടന്പുഴ പഞ്ചായത്ത് ഗ്രാമവികസന സമിതി ഹൈക്കോടതിയിൽ കേസ് ഫയൽ ചെയ്തിരിക്കുകയാണ്. എത്രയും വേഗത്തിൽ പാലം നിർമിക്കണമെന്ന് കുട്ടന്പുഴ പഞ്ചായത്ത് ഗ്രാമവികസന സമിതിക്ക് വേണ്ടി ഷാജി പയ്യാനിക്കൽ സർക്കാരിനോട് ആവശ്യപ്പെട്ടു.

വീണ ജോർജിന്‍റെ രാജിക്കായി മാർച്ചും ധർണയും നടത്തി

വാഴക്കുളം: മന്ത്രി വീണ ജോർജിന്‍റെ രാജി ആവശ്യപ്പെട്ട് മഞ്ഞള്ളൂർ ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തിൽ കല്ലൂർക്കാട് ഗവ. ആരോഗ്യ കേന്ദ്രത്തിലേക്ക് മാർച്ചും ധർണയും നടത്തി. ധർണ യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്‍റ് ഒ.ജെ. ജനീഷ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സുഭാഷ് കടയ്ക്കോട്ട് അധ്യക്ഷത വഹിച്ചു. കെപിസിസി ജനറൽ സെക്രട്ടറി റോയി കെ. പൗലോസ് മാർച്ച് ഉദ്ഘാടനം ചെയ്തു. കെപിസിസി എക്സിക്യൂട്ടീവംഗം എ. മുഹമ്മദ് ബഷീർ മുഖ്യപ്രഭാഷണം നടത്തി. കോലഞ്ചേരി: മന്ത്രി വീണ ജോർജ് രാജിവയ്‌ക്കുക, സർക്കാർ ആശുപത്രികളുടെ ശോചനീയവസ്ഥയ്ക്ക് പരിഹാരം കാണുക എന്നീ അവശ്യങ്ങൾ ഉന്നയിച്ചു പുത്തൻകുരിശ് ബ്ലോക്ക് കോൺഗ്രസ് കമ്മിറ്റിയുടെ ആഭിമുഖ്യത്തിൽ മാർച്ചും ധർണയും നടത്തി. പുത്തൻകുരിശ് ടൗണിൽനിന്ന് ആരംഭിച്ച മാർച്ച് വടവുകോട് ആശുപത്രിക്ക് സമീപം പോലീസ് തടഞ്ഞു. തുടർന്ന് നടത്തിയ ധർണ കെപിസിസി ന്യൂനപക്ഷ സെൽ ചെയർമാൻ ടി.എം. സക്കീർ ഹുസൈൻ ഉദ്ഘടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് പോൾസൺ പീറ്റർ അധ്യക്ഷത വഹിച്ചു. മന്ത്രി വീണയ്ക്ക് നേരെ കരിങ്കൊടി കോലഞ്ചേരി: വരിക്കോലിയിൽ ആരോഗ്യമന്ത്രി വീണ ജോർജിന് നേരെ കോൺഗ്രസ്, യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ച് പ്രതിഷേധിച്ചു. വരിക്കോലി മുത്തൂറ്റ് എൻജിനീയറിംഗ് കോളജിലെ പരിപാടിയിൽ പങ്കെടുക്കാൻ പോകുന്ന വഴിക്കാണ് കോൺഗ്രസ് പ്രവർത്തകർ പുത്തൻകുരിശ് ടൗണിൽ മന്ത്രിയെ വഴിയിൽ കരിങ്കൊടി കാണിച്ചത്. വരിക്കോലി മുത്തൂറ്റ് കോളജിന് മുന്നിലാണ് യൂത്ത് കോൺഗ്രസ് നിയോജക മണ്ഡലം പ്രസിഡന്‍റ് ജെയ്സൽ ജബ്ബാറിന്‍റെ നേതൃത്വത്തിൽ പ്രവർത്തകർ മന്ത്രിയെ കരിങ്കൊടി കാണിച്ചത്. പുത്തൻകുരിശ് ബ്ലോക്ക് കോൺഗ്രസ് പ്രസിഡന്‍റ് പോൾസൺ പീറ്ററിന്‍റെയും മണ്ഡലം പ്രസിഡന്‍റുമാരായ മനോജ് കാരക്കാട്ട്, എസ്. സുജിത്ത് എന്നിവരുടെ നേതൃത്വത്തിലാണ് കോൺഗ്രസ് പ്രവർത്തകർ മന്ത്രിയെ വഴിയിൽ തടഞ്ഞത്.

പിണ്ടിമന, പൈങ്ങോട്ടൂർ പഞ്ചായത്തുകളിൽ കാട്ടാനശല്യം വ്യാപകം

കോതമംഗലം: കോതമംഗലം താലൂക്കിന്‍റെ പിണ്ടിമന, പൈങ്ങോട്ടൂർ പഞ്ചായത്തുകളിൽ വീണ്ടും കാട്ടാന ശല്യം വ്യാപകം. പിണ്ടിമന പഞ്ചായത്തിലെ വേട്ടാന്പാറ, പടിപ്പാറ പ്രദേശങ്ങളിലും പൈങ്ങോട്ടൂർ പഞ്ചായത്തിലെ കടവൂർ വടക്കേ പുന്നമറ്റം ഭാഗത്തുമാണ് ഇന്നലെ കാട്ടാനകുട്ടത്തിന്‍റെ ആക്രമണമണം നേരിട്ടത്. സന്ധ്യ കഴിഞ്ഞാൽ ആനകൾ നാട്ടിലെത്തും. പടിപ്പാറ - വാവേലി റോഡിലും വേട്ടാന്പാറ - മാലിപ്പാറ റോഡിലും ആനകൾ വനത്തിലെന്നപോലെയാണ് സഞ്ചരിക്കുന്നത്. മറ്റ് ഇട റോഡുകളിലെ അവസ്ഥയും വ്യത്യസ്തമല്ല. വാഹനങ്ങളും കാൽനടക്കാരും ആനയുണ്ടോയെന്ന് നോക്കി വേണം റോഡിലിറങ്ങാൻ. നേരം പുലർന്നാൽ മാത്രമാണ് ജനങ്ങൾക്ക് റോഡിലൂടെ ഭയമില്ലാതെ സഞ്ചരിക്കാൻ കഴിയുക. ഓരോ ദിവസവും നിരവധി പേരുടെ കൃഷിയിടങ്ങളാണ് ആനകളുടെ വിഹാരകേന്ദ്രമാകുന്നത്. നട്ടുവളർത്തിയതെല്ലാം ആനകൾക്ക് തീറ്റയാകുകയോ ചവിട്ടിമെതിക്കപ്പെടുകയോ ചെയ്യും. കഴിഞ്ഞ രാത്രിയിലെത്തിയ ആനക്കൂട്ടം പടിപ്പാറക്ക് സമീപത്തെ റബർ തോട്ടത്തിൽ നിന്നിരുന്ന പന മറിച്ചിട്ട് തിന്നു തീർത്താണ് മടങ്ങിയത്. കൃഷി ചെയ്തിരുന്ന വാഴയും തിന്നു. കയ്യാലകൾ വ്യാപകമായി തകർത്തു. പൈങ്ങോട്ടൂർ പഞ്ചായത്തിലെ കടവൂർ വടക്കേ പുന്നമറ്റത്ത് അടപ്പൂർ ജോണി, ഏനാനിക്കൽ ജോഷി എന്നിവരുടെ കൃഷിയിടത്തിലാണ് കാട്ടാനകൾ നാശം വിതച്ചത്. ആനകൾ മൂലം പൊറുതിമുട്ടിയപ്പോഴും അധികാരികളുടെ ഭാഗത്തുനിന്ന് യാതൊരു ഇടപെടലും ഉണ്ടാകാത്തതിൽ പ്രതിഷേധം വ്യാപകമാണ്. വടക്കേപുന്നമറ്റത്തും കാട്ടാനകൾ പോത്താനിക്കാട്: കടവൂർ, വടക്കേപുന്നമറ്റം പ്രദേശങ്ങളിൽ വീണ്ടും കാട്ടാനകൾ ഇറങ്ങി കൃഷികൾ നശിപ്പിച്ചു. ഇന്നലെ പുലർച്ചെ മൂന്നോടെ വടക്കേപുന്നമറ്റം പള്ളിക്ക് സമീപം എനാനിക്കൽ ജോഷി, അടപ്പൂർ ജോണി എന്നിവരുടെ കൃഷികളാണ് നശിപ്പിച്ചത്. സമീപവാസികളായ ഇരുവരുടെയും റബർ തോട്ടങ്ങളിലെ പൈനാപ്പിൾ, പ്ലാവ്, റബർ തുടങ്ങിയവ ആനകൾ തിന്നുകയും ചവിട്ടി മെതിക്കുകയും ചെയ്‌തു. നൂറുകണക്കിന് കന്നാരകൾ ഇളകി പറിഞ്ഞുപോയിട്ടുണ്ട്. രണ്ട് പ്ലാവുകളുടെ ശിഖരങ്ങൾ ഒടിച്ചാണ് ചക്കകൾ തിന്നതെന്ന് പറമ്പുടമകൾ പറഞ്ഞു. കഴിഞ്ഞ രണ്ട് വർഷമായി ഒറ്റക്കണ്ടം, മുള്ളരിങ്ങാട്, ചാത്തമറ്റം, വടക്കേപുന്നമറ്റം, പുതകുളം, കടവൂർ, നാലാംബ്ലോക്ക് മേഖലകളിലെല്ലാം മാസത്തിൽ രണ്ടും മൂന്നും തവണ കാട്ടാനകൾ കൃഷികൾ നശിപ്പിക്കുന്നുണ്ട്. പ്രദേശങ്ങളിൽ കുരങ്ങ്, കാട്ടുപന്നി, മുള്ളൻപന്നി തുടങ്ങിയവയും കൃഷികൾ നശിപ്പിക്കാറുണ്ട്. കർഷകർ പരാതി പറഞ്ഞാൽ പലപ്പോഴും അവർ പ്രതികരിക്കാറില്ലെന്നും പരക്കെ ആക്ഷേപമുണ്ട്.

വായന പക്ഷാചരണം

മൂവാറ്റുപുഴ: മൂവാറ്റുപുഴ താലൂക്ക് ലൈബ്രറി കൗണ്‍സിൽ മുൻസിപ്പൽ നേതൃസമിതിയുടെ സഹകരണത്തോടെ കിഴക്കേക്കര ഗവ. ഈസ്റ്റ് ഹൈസ്കൂളിൽ നടത്തിയ വായന പക്ഷാചരണത്തിന്‍റെ സമാപന സമ്മേളനവും ഐ.വി. ദാസ് അനുസ്മരണവും എഴുത്തുകാരി ലേഖ കാക്കനാട് ഉദ്ഘാടനം ചെയ്തു. താലൂക്ക് ലൈബ്രറി കൗണ്‍സിൽ പ്രസിഡന്‍റ് ജോഷി സ്കറിയ അധ്യക്ഷത വഹിച്ചു. നഗരസഭാംഗം മേരിക്കുട്ടി ചാക്കോ മുഖ്യ പ്രഭാഷണം നടത്തി. സ്കൂളിലെ വിവിധ ക്ലബുകളുടെ ഉദ്ഘാടനം കവിയും ഗാനരചയിതാവുമായ ജയകുമാർ ചെങ്ങമനാട് നിർവഹിച്ചു. ഗ്രന്ഥശാല പ്രസ്ഥാനത്തെ ജനകീയമാക്കിയ ഐ.വി. ദാസ് അനുസ്മരണ പ്രഭാഷണം താലൂക്ക് ലൈബ്രറി കൗണ്‍സിൽ വൈസ് പ്രസിഡന്‍റും എഴുത്തുകാരിയുമായ സിന്ധു ഉല്ലാസ് നിർവഹിച്ചു. ജില്ലാ ലൈബ്രറി കൗണ്‍സിൽ അംഗം കെ. മോഹനൻ, നേതൃസമിതി കണ്‍വീനർ ആർ. രാജീവ്, താലൂക്ക് എക്സിക്യൂട്ടീവംഗം എം.എ. എൽദോസ്, വി.എൻ. സന്തോഷ് കുമാർ, എൻ.കെ. രാജൻ, സി.കെ. ഉണ്ണി, ടി. വിജയകുമാരി എന്നിവർ പ്രസംഗിച്ചു. തുടർന്ന് അക്ഷരമാണ് ലഹരി എന്ന സന്ദേശമുൾക്കൊള്ളുന്ന കുട്ടികളുടെ സംഗീത ശിൽപ്പവും അവതരിപ്പിച്ചു. കഴിഞ്ഞ 19ന് പി.എൻ. പണിക്കരുടെ ചരമദിനത്തിൽ ആരംഭിച്ച വായന പക്ഷാചരണ പരിപാടി ഐ.വി. ദാസിന്‍റെ ജന്മദിനമായ ഇന്നലെയാണ് സമാപിച്ചത്. താലൂക്കിലെ 73 ഗ്രന്ഥശാലകളിലും സ്കൂൾ, കോളജ് തലങ്ങളിലും വായന പഷാചരണത്തിന്‍റെ ഭാഗമായി വിവിധ പരിപാടികൾ സംഘടിപ്പിച്ചതായി താലൂക്ക് കൗണ്‍സിൽ സെക്രട്ടറി സി.കെ. ഉണ്ണി അറിയിച്ചു.

കോതമംഗലത്ത് പണിമുടക്ക് പൂർണം

കോതമംഗലം: കോതമംഗലം മേഖലയിൽ പണിമുടക്ക് പൂർണം. കെഎസ്ആർടിസി ബസുകൾ മാത്രമായിരുന്നു ജനങ്ങൾക്ക് ആശ്രയം. സ്വകാര്യ ബസുകളില്ലാത്തതിനാൽ അത്യാവശ്യക്കാർ മാത്രമാണ് യാത്രയ്‌ക്കിറങ്ങിയത്. അതിനാൽ ടൗണിൽ പതിവ് ജനതിരക്ക് ഉണ്ടായിരുന്നില്ല. വ്യാപാര സ്ഥാപനങ്ങളിലും കച്ചവടം കുറഞ്ഞു. വിദ്യാഭ്യാസ സ്ഥാപനങ്ങളിൽ വിദ്യാർഥികളുടെ ഹാജർ നിലയും കുറവായിരുന്നു. പണിമുടക്ക് ദുരിതമായി മാറിയെന്ന് പലരും പ്രതികരിച്ചു. ബസ് ഉടമകളും തൊഴിലാളികളും കോതമംഗലത്ത് പ്രകടനവും സമ്മേളനവും നടത്തി.

വിദ്യാഭ്യാസ ഉപഡയറക്ടർ ഓഫീസിന് മുന്നിൽ ധർണ

മൂവാറ്റുപുഴ: വിദ്യാഭ്യാസ രംഗത്ത് ഇടതുപക്ഷ സർക്കാറിന്‍റെ ദീർഘവീക്ഷണമില്ലാത്ത നടപടികൾ വരും തലമുറയെ തകർക്കുമെന്ന് മുസ്ലിം ലീഗ് സംസ്ഥാന സെക്രട്ടേറിയറ്റംഗം കെ.എം. അബ്ദുൽ മജീദ്. കേരളത്തിന്‍റെ സാന്പത്തിക രംഗത്ത് നിസ്തുല സംഭാവനകൾ നൽകിയ അറബി ഭാഷയോട് സർക്കാർ സ്വീകരിക്കുന്ന ചിറ്റമ്മനയം തിരുത്തണമെന്നും അദ്ദേഹം ആവശ്യപ്പെട്ടു. കേരള അറബിക് ടീച്ചേഴ്സ് ഫെഡറേഷൻ എറണാകുളം ജില്ല കമ്മിറ്റി വിദ്യാഭ്യാസ ഉപഡയറക്ടർ ഓഫീസിന് മുന്നിൽ നടത്തിയ ധർണ ഉദ്ഘാടനം ചെയ്യുകയായിരുന്നു അദ്ദേഹം. ഗുണനിലവാര പദ്ധതി (ക്യുഐപി)യിൽ നിന്ന് കെഎടിഎഫിനെ സർക്കാർ ഒഴിവാക്കിയ നടപടി നീതീകരിക്കാൻ സാധിക്കില്ലെന്നും ഹയർ സെക്കൻഡറി പഠിക്കുന്ന കുട്ടികളുടെ എണ്ണം പരിഗണിച്ച് ഭാഷാധ്യാപക നിർണയം നടത്തണമെന്നും ഉച്ചഭക്ഷണത്തിന് തുക കാലാനുസൃതമായി വർധിപ്പിക്കണമെന്നും അബ്ദുൽ മജീദ് ആവശ്യപ്പെട്ടു. കെഎടിഎഫ് ജില്ല പ്രസിഡന്‍റ് എം.എം. നാസർ അധ്യക്ഷത വഹിച്ചു. സംസ്ഥാന സെക്രട്ടറി അബ്ദുൽ റഷീദ് ഖാസിമി മുഖ്യ പ്രഭാഷണം നടത്തി. തുടർന്ന് ജില്ല വിദ്യാഭ്യാസ ഉപഡയറക്ടർക്ക് വിവിധ ആവശ്യങ്ങൾ ഉന്നയിച്ച് നിവേദനവും നൽകി.

മൂവാറ്റുപുഴ കച്ചേരിത്താഴത്ത് ബസ് കാത്തിരിപ്പു കേന്ദ്രം അപകടാവസ്ഥയിൽ

മൂവാറ്റുപുഴ: ഏറെ കൊട്ടിഘോഷിച്ച് ഉദ്ഘാടനം നിർവഹിച്ച കച്ചേരിത്താഴത്തെ ബസ് കാത്തിരിപ്പു കേന്ദ്രം അപകടാവസ്ഥയിൽ. മേൽക്കൂരയെ താങ്ങി നിർത്തുന്ന ഇരുന്പു പൈപ്പുകൾ തുരുന്പെടുത്ത് നശിച്ചതോടെ ഏതു നിമിഷവും താഴേക്കു പതിച്ച് അപകടമുണ്ടാകുന്ന നിലയിലയിലാണ് കച്ചേരിത്താഴം ബസ് കാത്തിരിപ്പു കേന്ദ്രം. വവ്വാൽ ചിറകിന്‍റ മാതൃകയിൽ കച്ചേരിത്താഴത്ത് 40 ലക്ഷം ചെലവഴിച്ചു നിർമിച്ച ബസ് കാത്തുനിൽപ്പ് കേന്ദ്രത്തിന്‍റെ മേൽക്കൂരയാണ് തുരുന്പെടുത്ത് അപകടാവസ്ഥയിലായിരിക്കുന്നത്. കൂറ്റൻ തൂണുകൾക്കു മുകളിൽ ടെൻസൈൽ ഫാബ്രിക് ഉപയോഗിച്ചാണ് മേൽക്കൂര തീർത്തത്. വിലകൂടിയ ടെൻസൈൽ ഫാബ്രിക് ദീർഘകാലം ഈടു നിൽക്കുമെങ്കിലും ഇവ സ്ഥാപിച്ചിരിക്കുന്ന ഇരുന്പു പൈപ്പുകളിലാണ് തുരുന്പ് വ്യാപിച്ചിരുന്നത്. 2019ൽ ആണ് ബസ് കാത്തിരിപ്പു കേന്ദ്രത്തിന്‍റെ നിർമാണം പൂർത്തിയായത്. ഇതിനു ശേഷം ഇന്നു വരെ ഇതിൽ അറ്റകുറ്റപ്പണികൾ നടന്നിട്ടില്ല. പൈപ്പിലെ തുരുന്പ് നീക്കം ചെയ്ത് പെയിന്‍റടിച്ചില്ലെങ്കിൽ മേൽക്കൂര തകർന്നു വീഴാനുള്ള സാധ്യത ഉണ്ടെന്നാണ് ബസ് കാത്തിരിപ്പു കേന്ദ്രത്തിനു സമീപമുള്ള വ്യാപാരികളും യാത്രക്കാരും പറയുന്നത്.

ഹോട്ടലിന് ലൈസൻസില്ല; 5,000 രൂപ പിഴ

ആലുവ: പഞ്ചായത്ത് ഓഫീസിന് മുന്നിൽ വർഷങ്ങളായി പ്രവർത്തിക്കുന്ന ഹോട്ടൽ ലൈസൻസില്ലെത്ത പരാതിയെ തുടർന്ന് പ്രവർത്തനം നിർത്തിവയ്ക്കാൻ സെക്രട്ടറി നോട്ടീസ് നൽകി. ദേശീയപാതയിൽ കമ്പനിപ്പടി മെട്രോ സ്റ്റേഷന് സമീപം പ്രവർത്തിക്കുന്ന മരുഭൂമിയിലെ ചായക്കട എന്ന ഹോട്ടലിനാണ് നിർത്തിവയ്ക്കാനും 5,000 രൂപ പിഴ അടയ്ക്കാനും നോട്ടീസ് ലഭിച്ചത്. കഴിഞ്ഞ ദിവസം ആരോഗ്യ വിഭാഗം നടത്തിയ പരിശോധനയിലാണ് ചൂർണ്ണിക്കര ഗ്രാമപഞ്ചായത്തിൽ നിന്നുള്ള ലൈസൻസ് ഇല്ലാതെയും മതിയായ ശുചിത്വ സംവിധാനങ്ങൾ ഒരുക്കാതെയും ഭക്ഷണ ശാല നടത്തുന്നതായി കണ്ടെത്തിയത്. ചൂർണിക്കര സ്വദേശി നൽകിയ പരാതിയിലാണ് ആരോഗ്യ വിഭാഗം പരിശോധന നടത്തിയത്. എന്നാൽ വർഷങ്ങളായി പ്രവർത്തിക്കുന്ന സ്ഥാപനത്തിന് അധികൃതർ മൗനാനുവാദം കൊടുത്തതായാണ് സൂചന.

സെന്‍റ് തെരേസാസിൽ ബിരുദദാന ചടങ്ങ്

കൊച്ചി: എറണാകുളം സെന്‍റ് തെരേസാസ് കോളജിൽ ബിരുദദാന ചടങ്ങ് ജില്ല അസി. കളക്ടർ പാർവതി ഗോപകുമാർ ഉദ്ഘാടനം ചെയ്തു. സ്ത്രീകൾ ആത്മവിശ്വാസം വളർത്തുകയും സാമ്പത്തികമായി സ്വതന്ത്രയാവുകയും ചെയ്യേണ്ടതു പ്രധാനമാണെന്ന് അവർ ഓർമിപ്പിച്ചു. സിസ്റ്റർ ടെസ, സിസ്റ്റർ ഫ്രാൻസിസ് ആൻ, പ്രിൻസിപ്പൽ ഡോ. അനു ജോസഫ്, ഡോ. അർസല പോൾ എന്നിവർ പ്രസംഗിച്ചു. വിവിധ വിഭാഗങ്ങളിലെ ഉന്നതവിജയികളെ അസി. കളക്ടർ ആദരിച്ചു.

പെരുമ്പാവൂരിൽ വൈസ്‌മെൻ ഇന്‍റർനാഷണൽ സോൺ-ഡിസ്ട്രിക്ട് സമ്മേളനം

പെരുമ്പാവൂർ: ഈ വർഷം ആയിരം ഡയാലിസിസ് രോഗികൾക്ക് സാമ്പത്തിക സഹായം നൽകുമെന്ന് വൈസ്‌മെൻ ഇന്‍റർനാഷണൽ സോൺ-ഡിസ്ട്രിക്ട് ഭാരവാഹികൾ അറിയിച്ചു. വൈസ്‌മെൻ സോൺ-ഡിസ്ട്രിക്റ്റ് സമ്മേളനം പെരുമ്പാവൂരിലെ ലൂക്ക് മെമ്മോറിയൽ പബ്ലിക് സ്കൂളിൽ നടന്നു. ലെഫ്റ്റനന്‍റ് റീജിയണൽ ഡയറക്ടറായി ഡാനി സ്കറിയ ലുക്കും ഡിസ്ട്രിക്ട് ഗവർണറായി മാത്യൂസ് കാക്കൂരാനും ചുമതലയെടുത്തു. സമ്മേളനം മിഡ് വെസ്റ്റ് ഇന്ത്യ റീജിയണൽ ഡയറക്ടർ സാജു എം. കറുത്തേടം ഉദ്ഘാടനം ചെയ്തു. സോൺ-ഡിസ്ട്രിക്റ്റ് ഭാരവാഹികളുടെ സ്ഥാനാരോഹണ ചടങ്ങ് മിഡ് വെസ്റ്റ് ഇന്ത്യ റീജിയണൽ ഡയറക്ടർ പി.ജെ. കുര്യാച്ചൻ നിർവഹിച്ചു. ലെഫ്റ്റനന്‍റ് റീജിയണൽ ഡയറക്ടർ അഡ്വ. വർഗീസ് മൂലൻ സമ്മേളനത്തിൽ അധ്യക്ഷനായിരുന്നു. സോൺ-ഡിസ്ട്രിക്ട് തലത്തിൽ മികച്ച പ്രവർത്തനം കാഴ്ചവെച്ച ക്ലബ്ബുകൾക്കും വ്യക്തികൾക്കും നൽകുന്ന അവാർഡുകളുടെ ഉദ്ഘാടന കർമം വൈസ്‌മെൻ ഇന്‍റർനാഷണൽ കൗൺസിൽ അംഗം മാത്യൂസ് എബ്രഹാം നിർവഹിച്ചു.

ലിറ്റില്‍ സോയ് 2.0യിൽ പുതിയ മെനു

കൊച്ചി: പനന്പിള്ളി നഗറിലെ ലിറ്റില്‍ സോയ് 2.0യിൽ ഇനി വൈവിധ്യമാർന്ന സ്ട്രീറ്റ് ഭക്ഷണ രുചികളും. ബാങ്കോക്കിലെയും പെനാങ്ങിലെയും ജക്കാര്‍ത്തയിലെയും സ്ട്രീറ്റ് ഫുഡ് രുചിയനുഭവങ്ങൾ ഇവിടെ ലഭിക്കും. ‌ തായ് ശൈലിയിലുള്ള ഗ്രില്‍ഡ് സ്റ്റഫ്ഡ് ചിക്കന്‍ വിംഗ്സിന്‍റെ (പീക്ക് ഗായ് യാംഗ്) മയപ്പെടുത്തുന്ന ഗ്ലേസ്, സ്‌പൈസി ബാംഗ് ബാംഗ് സ്‌പൈസി കോളിഫ്‌ളവര്‍, സാംബാല്‍ ചേര്‍ത്ത ഗ്രില്‍ ബാലിനീസ് ബേ പ്രോണ്‍സ്, മലായ് നാസി മാമാക് തുടങ്ങിയവ ഇവിടെയുണ്ടാകും. പ്രശസ്തമായ ഭക്ഷണശാലകളില്‍ നിന്ന് പ്രചോദനം ഉള്‍ക്കൊണ്ട പുതിയ വിഭവങ്ങളാണ് ലിറ്റില്‍ സോയിയുടെ അടുക്കളയില്‍ ഒരുക്കുന്നത്. ക്ലാസിക് വിഭവങ്ങള്‍ക്ക് മാറ്റമില്ല. കൊറിയന്‍ ബുള്‍ഡാക്ക് ചിക്കന്‍, ഇചിറാക്കു രാമെന്‍, എക്‌സ്ഒ ഫ്രൈഡ് റൈസ് ബൗള്‍ തുടങ്ങിയ ജനപ്രിയ വിഭവങ്ങളും ലഭ്യമാണെന്ന് അധികൃതർ അറിയിച്ചു.

തരിശു ഭൂമിയില്‍ നൂറുമേനി വിളയിക്കാന്‍ ഏലൂര്‍ നഗരസഭ

കൊച്ചി: ഏലൂരിലെ കാര്‍ഷിക സമൃദ്ധി വീണ്ടെടുക്കാന്‍ തരിശു പാടങ്ങളില്‍ കൃഷിയിറക്കാന്‍ ഒരുങ്ങി ഏലൂര്‍ നഗരസഭ. 25 വര്‍ഷത്തോളമായി പ്രദേശത്ത് അന്യം നിന്നുപോയ കൃഷിയെ വീണ്ടെടുക്കാന്‍ വിപുലമായ പദ്ധതികളാണ് നഗരസഭ ആവിഷ്‌കരിച്ചിരിക്കുന്നത്. ഇതിന്‍റെ ഭാഗമായി വടക്കുംഭാഗം, കുണ്ടോപ്പാടം പാടശേഖരങ്ങളിലാണ് നെല്‍കൃഷിയിറക്കുന്നത്. ആദ്യഘട്ടം വടക്കുംഭാഗത്തെ 20 ഏക്കര്‍ തരിശു പാടത്താണ് വിത്തിടുന്നത്. 120 ദിവസംകൊണ്ട് മൂപ്പെത്തുന്ന പൗര്‍ണ്ണമി വിത്താണ് കൃഷി ചെയ്യുന്നത്. ഞാറ് തയാറാക്കി മൂന്നാഴ്ചയ്ക്കകം നടീല്‍ ഉത്സവം നടത്താനാണ് പദ്ധതി. രജിസ്‌ട്രേഷന്‍ നടപടികള്‍ പാടശേഖര സമിതി മുഖേന പൂര്‍ത്തിയാക്കിയിട്ടുണ്ട്. ജനകീയ ആസൂത്രണ പദ്ധതിയില്‍ ഹെക്ടറിന് 35,000 രൂപ വച്ച് ഏക്കറിന് ഫണ്ട് വകയിരുത്തിയിട്ടുണ്ട്. അടുത്ത സീസണിലെ കൃഷിക്കുള്ള ജലസേജനത്തിനായി പ്രളയകാലത്ത് നശിച്ച പമ്പും പമ്പ് ഹൗസും നവീകരിക്കുന്നതിന്‍റെ ഭാഗമായി 8.35 ലക്ഷം രൂപ മൈനര്‍ ഇറിഗേഷന് കൈമാറി. പദ്ധതി പ്രദേശത്തെ കര്‍ഷകര്‍ക്ക് പുത്തന്‍ പ്രതീക്ഷയാണെന്ന് ചെയര്‍മാന്‍ എ.ഡി. സുജില്‍ പറഞ്ഞു.

കാപ്പ ചുമത്തി ജയിലിലടച്ചു

പറവൂർ: കൊലപാതക കേസിലെ പ്രതി കുഞ്ഞിത്തൈ പൊയ്യത്തുരുത്തിയിൽ ആഷിക്ക് ജോൺസണെ (28) കാപ്പ ചുമത്തി ജയിലിലടച്ചു. വടക്കേക്കര, മാനന്തവാടി, തൊടുപുഴ പോലീസ് സ്റ്റേഷൻ പരിധികളിൽ കൊലപാതകം, വധശ്രമം, ദേഹോപദ്രവം, ഭീഷണിപ്പെടുത്തൽ, അന്യായതടസം ചെയ്യൽ, അതിക്രമിച്ച് കയറൽ തുടങ്ങി നിരവധി കേസുകളിലെ പ്രതിയാണിയാൾ. കഴിഞ്ഞ മാർച്ചിൽ ബിജു ജോസഫ് എന്നയാളെ കൊലപ്പെടുത്തി തൊടുപുഴ പഞ്ചവടിപ്പാലത്തെ കാറ്ററിംഗ് സ്ഥാപനത്തിന്‍റെ ഗോഡൗണിലെ വേസ്റ്റ് ടാങ്കിൽ മറവ് ചെയ്ത കേസിൽ തൊടുപുഴ പൊലീസ് രജിസ്റ്റർ ചെയ്ത കേസിൽ നാലാം പ്രതിയായതിനെ തുടർന്നാണ് നടപടി.

മനുഷ്യാവകാശ കമ്മീഷന്‍ ഇടപെട്ടു : തിരുവൈരാണിക്കുളം ക്ഷേത്രത്തിലെ ജലമലിനീകരണ പരാതിക്ക് പരിഹാരം

കൊച്ചി: പത്തു ദിവസത്തെ നടതുറപ്പ് മഹോത്സവത്തിന് പതിനായിരങ്ങളെത്തുന്ന തിരുവൈരാണിക്കുളം ദേവീക്ഷേത്രവുമായി ബന്ധപ്പെട്ട് ഉയര്‍ന്ന ജല മലിനീകരണ പരാതിക്ക് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റിസ് അലക്‌സാണ്ടര്‍ തോമസിന്‍റെ ഇടപെടലിലൂടെ പരിഹാരമാകുന്നു. ക്ഷേത്രത്തില്‍ പുതിയ ട്രീറ്റ്‌മെന്‍റ് പ്ലാന്‍റ് പ്രവര്‍ത്തനക്ഷമമാകുന്നതോടെ ജല മലിനീകരണ പ്രശ്‌നങ്ങള്‍ക്ക് ശാശ്വത പരിഹാരമുണ്ടാകുമെന്ന് മലിനീകരണ നിയന്ത്രണ ബോര്‍ഡും ക്ഷേത്ര ഭാരവാഹികളും കമ്മീഷന് ഉറപ്പു നല്‍കി. ട്രീറ്റ്‌മെന്‍റ് പ്ലാന്‍റ് സ്ഥാപിച്ച ശേഷം സമീപവാസിയുടെ കിണര്‍വെള്ളം പരിശോധിച്ച് റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ശ്രീമൂലനഗരം പഞ്ചായത്ത് സെക്രട്ടറിക്ക് നിർദേശം നല്‍കി. ഉത്സവകാലത്ത് കിണര്‍വെള്ളം മലിനമാവുകയാണെന്ന് ആരോപിച്ച് ക്ഷേത്രകവാടത്തില്‍ നിന്ന് 300 മീറ്റര്‍ അകലെ താമസിക്കുന്ന സുജികുമാര്‍ സമര്‍പ്പിച്ച പരാതിയിലാണ് നടപടി. കൊച്ചി സബ് കളക്ടര്‍ കമ്മീഷനില്‍ റിപ്പോര്‍ട്ട് സമര്‍പ്പിച്ചു. കൊച്ചി ദേവസ്വം ബോര്‍ഡ്, മലിനീകരണ നിയന്ത്രണ ബോര്‍ഡ്, ശ്രീമൂലനഗരം പഞ്ചായത്ത് എന്നിവര്‍ക്ക് അടിയന്തര നടപടികള്‍ സ്വീകരിക്കാന്‍ നിർദേശം നല്‍കിയതായി സബ് കളക്ടര്‍ അറിയിച്ചു. തുടര്‍ന്ന് എന്‍വയോണ്‍മെന്‍റല്‍ എന്‍ജിനീയറോട് സ്ഥലപരിശോധന നടത്താന്‍ കമ്മീഷന്‍ നിര്‍ദേശിച്ചു.ആറു ലക്ഷം ലിറ്റര്‍ സംഭരണശേഷിയുള്ള മലിനജലശേഖരണ ടാങ്ക് നിലവിലുണ്ടെന്നും അഞ്ചു ലക്ഷം ലിറ്റര്‍ ശേഷിയുള്ള ടാങ്കിന്‍റെ നിര്‍മാണം പൂര്‍ത്തിയാക്കിയിട്ടുണ്ടെന്നും റിപ്പോര്‍ട്ടില്‍ പറയുന്നു. ട്രീറ്റ്‌മെന്‍റ് പ്ലാന്‍റ് വഴി സംസ്‌കരിച്ച മലിനജലം കൃഷി ആവശ്യങ്ങള്‍ക്കായി ഉപയോഗിക്കാന്‍ ബോര്‍ഡ് നിർദേശം നല്‍കി. ബോര്‍ഡ് മുന്നോട്ടുവച്ച വ്യവസ്ഥകള്‍ പാലിക്കുന്നുണ്ടെന്ന് ഉറപ്പാക്കി മാത്രമേ പുതിയ ട്രീറ്റ്‌മെന്‍റ് പ്ലാന്‍റിന് പ്രവര്‍ത്തനാനുമതി നല്‍കുകയുള്ളൂവെന്നും റിപ്പോര്‍ട്ടില്‍ പറയുന്നു. അടുത്ത ഉത്സവകാലത്ത് ട്രീറ്റ്‌മെന്‍റ് പ്ലാന്‍റിന്‍റെ കാര്യക്ഷമത പൂര്‍ണമായി ഉറപ്പുവരുത്താന്‍ കഴിയുമെന്നും റിപ്പോര്‍ട്ടിലുണ്ട്. സെപ്റ്റംബറില്‍ നടക്കുന്ന സിറ്റിംഗില്‍ വിഷയം വീണ്ടും പരിഗണിക്കുന്പോൾ പരാതിക്കാരനും എന്‍വയോണ്‍മെന്‍റല്‍ എൻജിനീയറും പഞ്ചായത്ത് സെക്രട്ടറിയും ഹാജരാകണമെന്ന് ജസ്റ്റിസ് അലക്‌സാണ്ടര്‍ തോമസ് ആവശ്യപ്പെട്ടു.

ലഹരിക്കെതിരായ ഉദയം പദ്ധതിക്ക് തുടക്കം

കൊച്ചി: ലഹരിക്കെതിരായ കൊച്ചി സിറ്റി പോലീസിന്‍റെ ഉദയം പദ്ധതിക്ക് തുടക്കമായി. കളമശേരി രാജഗിരി സ്‌കൂളില്‍ നടന്ന ചടങ്ങില്‍ മന്ത്രി പി. രാജീവ് ഉദ്ഘാടനം നിര്‍വഹിച്ചു. പരിചയ സമ്പന്നരായ 55 അംഗ വിദഗ്ധ പാനലിലുള്ളവരാണ് ഉദയം പദ്ധതിയിലൂടെ ലഹരിക്കെതിരെ ബോധവത്കരണത്തിന് രംഗത്തിറങ്ങുന്നത്. ചടങ്ങില്‍ കൊച്ചി സിറ്റി പോലീസ് കമ്മീഷണര്‍ പുട്ട വിമാലാദിത്യ അധ്യക്ഷത വഹിച്ചു. ഹൈബി ഈഡന്‍ എംപി മുഖ്യപ്രഭാഷണം നടത്തി. ജില്ലാ കളക്ടര്‍ എന്‍.എസ്.കെ. ഉമേഷ് ലഹരി വിരുദ്ധ പ്രതിജ്ഞ ചൊല്ലിക്കാടുത്തു. പരിപാടിയോടനുബന്ധിച്ച് വിദ്യാര്‍ഥികളുടെ ഫ്ളാഷ്മോബും സ്‌കിറ്റും അരങ്ങേറി.

ബൈക്കിലെത്തി മൊബൈല്‍ മോഷണം; പ്രതികള്‍ അറസ്റ്റില്‍

കൊച്ചി: പൊന്നുരുന്നിയിലെ തട്ടുകടയ്ക്ക് സമീപം നില്‍ക്കുകയായിരുന്ന സ്ത്രീയുടെ മൊബൈല്‍ ഫോണ്‍ ബൈക്കിലെത്തി തട്ടിപ്പറിച്ച കേസില്‍ മൂന്നംഗ സംഘത്തിലെ രണ്ടു പേര്‍ അറസ്റ്റില്‍. കൊല്ലം ഇരവിപുരം സ്വദേശി ആഷിഖ്(19), വടക്കേവിള സ്വദേശി കണ്ണന്‍(23) എന്നിവരെയാണ് കടവന്ത്ര പോലീസ് കൊല്ലം ഇരവിപുരത്തുനിന്ന് പിടികൂടിയത്. കണ്ണന്‍ മയക്കുമരുന്ന് കേസിലും പ്രതിയാണ്. ഒരു പ്രതിയെക്കൂടി പിടികൂടാനുണ്ട്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

കുമ്പളങ്ങി സെന്‍റ് ജോസഫ്സ് സ്കൂളിൽ "ദീപിക നമ്മുടെ ഭാഷാ പദ്ധതി'

ഫോർട്ടുകൊച്ചി: നോർത്ത് കുമ്പളങ്ങി സെന്‍റ് ജോസഫ്സ് എൽപി സ്കൂളിൽ ദീപിക നമ്മുടെ ഭാഷാ പദ്ധതിക്ക് തുടക്കമായി. വികാരിയും സ്കൂൾ മാനേജരുമായ ഫാ. ആന്‍റണി നെടുംപറമ്പിൽ പദ്ധതിയുടെ ഉദ്ഘാടനം നിർവഹിച്ചു. പൂർവ വിദ്യാർഥിയായ നിക്സൺ പൊള്ളയിലാണ് പത്രം സ്പോൺസർ ചെയ്തത്. നിക്സന്‍റെ മാതാപിതാക്കളായ ജോസഫ് പൊള്ളയിൽ, മെയ്ബിൾ ജോസഫ്, പ്രധാനാധ്യാപിക റോസി മിനി, അധ്യാപികമാരായ എൽസാ ലൗബി, ഫെമിലിയ, ട്രീസ അനീറ്റ , സിമി, സീമ,അനിജ , ദീപിക പ്രതിനിധികളായ അനിത അനിൽ, പോൾ ബെന്നി പുളിക്കൽ എന്നിവർ പ്രസംഗിച്ചു.

ഓട്ടിസം ബാധിച്ച വിദ്യാർഥികൾക്ക് പഠനപദ്ധതിയുമായി റോട്ടറി

കൊച്ചി: കൊച്ചിൻ ഡൗൺടൗൺ റോട്ടറി ക്ലബിന്‍റെ പ്രസിഡന്‍റായി സൂസി പോളും സെക്രട്ടറിയായി സാജി ചന്ദ്രനും സ്ഥാനമേറ്റു. ഓട്ടിസം ബാധിച്ച വിദ്യാർഥികൾക്ക് വേണ്ടിയുള്ള പ്രത്യേക 5 കോടി രൂപയുടെ പഠനപദ്ധതിയാണ് ഈ വർഷത്തെ പ്രധാന സേവനപദ്ധതി. ഐ ടി കമ്പനിയായ ടിസിഎസിന്‍റെ സിഎസ്ആർ സഹായത്തോടെ, ആദർശ് ചാരിറ്റബിൾ ട്രസ്റ്റുമായി ചേർന്നാണ്പദ്ധതി തെരഞ്ഞെടുത്ത സ്‌കൂളുകളിൽ നടപ്പാക്കുന്നത്. ഓർഫനേജുകൾക്കും വയോജനകേന്ദ്രങ്ങൾക്കും ഡയാലിസിസ് കേന്ദ്രങ്ങൾക്കുമുള്ള സഹായങ്ങൾ തുടർന്നും ലഭ്യമാക്കുമെന്ന് സ്ഥാനാരോഹണ ചടങ്ങിൽ പ്രസിഡന്‍റ് സൂസി പറഞ്ഞു. റോട്ടറി ഡിസ്‌ട്രിക്‌ട് ഡയറക്ടർ സുധിൻ വിളങ്ങാടൻ, അസി. ഗവർണർ സീജോ തോമസ്, ഡോ. സുജിത് ജോസ്, ആർ. മാധവ് ചന്ദ്രൻ എന്നിവർ സംസാരിച്ചു.

സീനത്തോട് കൈയേറിയെന്ന് : സ്വകാര്യവ്യക്തി നിര്‍മിച്ച മതില്‍ പൊളിച്ച്, കൊച്ചി കോർപറേഷൻ

കൊച്ചി: കലൂര്‍ ജംഗ്ഷനില്‍ സീനത്തോട് കൈയേറിയെന്ന കണ്ടെത്തലിനെതുടർന്ന് വീടിന്‍റെ മതില്‍ കോര്‍പറേഷന്‍ അധികൃതര്‍ പൊളിച്ചുമാറ്റി. കലൂര്‍ ബസ് സറ്റാന്‍ഡിന് എതിര്‍വശം മെലങ്കേത്ത് ലെയിനില്‍ താമസിക്കുന്ന ആര്‍ക്കിടെക്ട് തോമസ് ജേക്കബിന്‍റെ മതിലാണ് ഏറെ തര്‍ക്കത്തിനൊടുവില്‍ പോലീസ് സാന്നിധ്യത്തില്‍ പൊളിച്ചു കളഞ്ഞത്. ആധാരപ്രകാരം തന്‍റെ സ്ഥലത്ത് നിര്‍മിച്ച മതിലാണെന്നും തോട് കോര്‍പറേഷന്‍ ഏറ്റെടുക്കുന്നതുവരെ കൈവശം വയ്ക്കാന്‍ കോടതി ഉത്തരവ് പ്രകാരം അധികാരമുണ്ടെന്നുമുള്ള വാദങ്ങള്‍ ഉടമ ഉന്നയിച്ചെങ്കിലും കോര്‍പറേഷന്‍ ഉദ്യോഗസ്ഥര്‍ വഴങ്ങിയില്ല. മതില്‍ പൊളിക്കാന്‍ ഉടമ തടസം നിന്നതോടെ തര്‍ക്കമായി. തുടര്‍ന്ന് കോര്‍പറേഷന്‍ അസി. എക്‌സിക്യൂട്ടീവ് എന്‍ജിനീയര്‍ ജയപ്രകാശ് എത്തി മതില്‍ പൊളിച്ചു നീക്കാന്‍ നിര്‍ദേശം നല്‍കുകയായിരുന്നു. ഭാര്യയുടെ പേരില്‍ സ്ഥലം വാങ്ങുന്ന ഘട്ടത്തില്‍ മതില്‍ ഉണ്ടായിരുന്നു എന്നാണ് ഉടമയുടെ വാദം. ഓപ്പറേഷന്‍ ബ്രേക്ക് ത്രൂവുമായി ബന്ധപ്പെട്ട് അടഞ്ഞ് കിടക്കുന്ന കാനകള്‍ നന്നാക്കി നീരൊഴുക്ക് സുഗമമാക്കാന്‍ ഹൈക്കോടതി ഉത്തരവിട്ടതിനെ തുടര്‍ന്ന് സീനത്തോടിന്‍റെ നവീകരണത്തിനിടെയാണ് കൈയേറ്റം കോര്‍പറേഷന്‍റെ ശ്രദ്ധയില്‍പ്പെട്ടത്. തുടര്‍ന്ന് കോടതിയില്‍ ഹര്‍ജി എത്തിയപ്പോള്‍ തോട് ഇരിക്കുന്ന സ്ഥലം കോര്‍പറേഷന്‍ ഏറ്റെടുക്കുന്നതു വരെ സ്ഥലം കൈവശം വയ്ക്കാനുള്ള സാവകാശം നല്‍കി. ഇതിനിടെയാണ് പ്രദേശവാസികള്‍ തോട് കൈയേറിയതായി കാട്ടി കോര്‍പറേഷനില്‍ പരാതി നല്‍കിയത്. സ്ഥലത്ത് പരിശോധന നടത്തിയ കോര്‍പറേഷന്‍ ടൗണ്‍ പ്ലാനിംഗ് വിഭാഗം ഉദ്യോഗസ്ഥര്‍ കഴിഞ്ഞ 27ന് മതില്‍ പൊളിച്ചു നീക്കാന്‍ ഉത്തരവിറക്കി. ഉത്തരവ് നടപ്പാക്കാന്‍ അസിസ്റ്റന്‍റ് എന്‍ജിനീയര്‍ സുനിമോളുടെ നേതൃത്വത്തില്‍ ഉദ്യോഗസ്ഥരെത്തിയപ്പോഴാണ് അഭിഭാഷകന്‍റെ സഹായത്തോടെ ഉടമ നടപടികള്‍ തടസപ്പെടുത്തിയത്.

മഴയൊതുങ്ങി; വെള്ളക്കൊഴുവ എത്തി

വൈപ്പിൻ : മഴയൊതുങ്ങി വെയിൽ കണ്ടു തുടങ്ങിയതോടെ തീരക്കടലിൽ മത്സ്യബന്ധനം നടത്തുന്ന ചെറു വള്ളങ്ങൾക്ക് വെള്ളക്കൊഴുവ കിട്ടിത്തുടങ്ങി. സാധാരണ മൺസൂൺ കാലത്തിന്‍റെ തുടക്കത്തിൽ തന്നെ തീരത്ത് വെള്ളക്കൊഴുവ സാന്നിധ്യം കാണാറുള്ളതാണ്. എന്നാൽ ഇക്കുറി മഴ കനത്തതോടൊപ്പം തന്നെ കപ്പലപകടത്തിൽ നേരിട്ട പാരിസ്ഥിതിക പ്രശ്നങ്ങളും മൂലം ആദ്യം കൊഴുവക്കൂട്ടം തീരത്തുനിന്ന് മാറിപ്പോയെന്നാണ് മത്സ്യത്തൊഴിലാളികൾ പറയുന്നത്. നാട്ടിൻ പുറങ്ങളിലും നഗരത്തിലും ഒരേപോലെ പ്രിയങ്കരമായ വെള്ളക്കൊഴുവയ്ക്ക് മാർക്കറ്റിൽ വൻ ഡിമാൻഡാണ് .കിലോയ്ക്ക് 100 മുതൽ 140 രൂപ വരെയാണ് ഇപ്പോഴത്തെ വില. ലഭ്യത കൂടുന്തോറും വില കുറയുമെന്നാണ് മത്സ്യത്തൊഴിലാളികൾ പറയുന്നത്.

കാലടി സമാന്തര പാലം ഏപ്രിലില്‍ പൂര്‍ത്തിയാകും

കൊച്ചി: കാലടി ശ്രീ ശങ്കര പാലത്തിന് സമാന്തരമായി പണിയുന്ന പുതിയ പാലത്തിന്‍റെ പണികള്‍ ദ്രുതഗതിയില്‍ പുരോഗമിക്കുന്നു. എംസി റോഡില്‍ തിരക്കേറിയ കാലടിയിലെ യാത്ര ക്ലേശം പരിഹരിക്കുന്നതിനാണ് അടിയന്തരമായി കാലടിയില്‍ സമാന്തര പാലം നിർമാണം ആരംഭിച്ചത്. നിലവില്‍ അപ്രോച്ച് റോഡിനോടു ചേര്‍ന്നുള്ള പൈലിംഗ് വര്‍ക്കുകള്‍ ആരംഭിക്കാനുള്ള ഒരുക്കത്തിലാണ്. മഴ കാരണം തടസപ്പെട്ട പണികള്‍ പുഴയിലെ ജലനിരപ്പ് താഴ്ന്നതിനനുസരിച്ച് പുനരാരംഭിക്കും. ഏപ്രില്‍ മാസത്തോടുകൂടി പാലത്തിന്‍റെ നിർമാണം പൂര്‍ണമായി പൂര്‍ത്തിയാക്കാന്‍ സാധിക്കുമെന്നാണ് പ്രതീക്ഷിക്കുന്നതെന്ന് അധികൃതര്‍ പറഞ്ഞു. പെരിയാറിനു കുറുകെ നിലവിലുള്ള കാലടി ശ്രീശങ്കരാചാര്യ പാലത്തിന് സമാന്തരമായി 455.40 മീറ്റര്‍ നീളത്തിലാണ് പുതിയ പാലത്തിന്‍റെ നിർമാണം. 30.50 മീറ്റര്‍ നീളത്തിലുള്ള 12 സ്പാനുകളും 13.45 മീറ്റര്‍ നീളത്തിലുള്ള രണ്ട് സ്പാനുകളും 12.50 മീറ്റര്‍ നീളത്തിലുള്ള അഞ്ചു സ്പാനുകളുമാണുള്ളത്. 10.50 മീറ്റര്‍ ക്യാരേജ് വേയും ഇരുവശങ്ങളിലും 1.50 മീറ്റര്‍ വീതിയില്‍ നടപ്പാതയും ഉള്‍പ്പെടെ 14 മീറ്റര്‍ ആണ് പാലത്തിന്‍റെ വീതി.

ആരോഗ്യ മേഖലയിലെ ശോച്യാവസ്ഥ; പ്രതിഷേധവുമായി കോണ്‍ഗ്രസ്

കൊച്ചി: സംസ്ഥാനത്തെ ആരോഗ്യമേഖല താറുമാറായ സാഹചര്യത്തിൽ മന്ത്രി വീണാ ജോര്‍ജ് രാജിവയ്ക്കണമെന്നാവശ്യപ്പെട്ട് കോണ്‍ഗ്രസിന്‍റെ നേതൃത്വത്തില്‍ ജില്ലയില്‍ മാര്‍ച്ചും ധര്‍ണയും നടത്തി. ജില്ലാതല ഉദ്ഘാടനം പെരുമ്പാവൂരില്‍ ബെന്നി ബഹനാന്‍ എംപി നിര്‍വഹിച്ചു. സംസ്ഥാന ആരോഗ്യരംഗത്തെ താറുമാറാക്കി സ്വകാര്യ മേഖലയ്ക്ക് കൊള്ളയ്ക്കുള്ള വഴിവെട്ടുകയാണ് സര്‍ക്കാരെന്ന് അദ്ദേഹം ആരോപിച്ചു. കഴിഞ്ഞ സര്‍ക്കാരിന്‍റെ കാലത്ത് കൊട്ടിഘോഷിച്ച് കൊണ്ടുനടന്ന ആരോഗ്യമേഖലയുടെ നേട്ടങ്ങള്‍ പൊള്ളയാണെന്ന് സമ്മതിക്കേണ്ട ഗതികേടിലാണ് സര്‍ക്കാരെന്നും സ്വന്തം സര്‍ക്കാരിലെ മന്ത്രി പോലും സര്‍ക്കാര്‍ ആശുപത്രികളെ തള്ളുന്ന സാഹചര്യമാണെന്നും അദ്ദേഹം കുറ്റപ്പെടുത്തി. പ്രതിപക്ഷ സമരങ്ങളെ അട്ടിമറിക്കാനും അടിച്ചമര്‍ത്താനുമാണ് സര്‍ക്കാര്‍ ശ്രമിക്കുന്നത്. സാധാരണക്കാരന്‍റെ ആശ്രമായ സര്‍ക്കാര്‍ ആശുപത്രികളെ മരുന്നുകള്‍ പോലും ലഭിക്കാത്ത തരത്തില്‍ ശവപ്പറമ്പാക്കി മാറ്റിയവര്‍ കടലാസുകളിലെ കള്ളക്കണക്കുകള്‍ ജനങ്ങളുടെമേല്‍ ക്യാപ്‌സ്യൂളുകളാക്കി അടിച്ചേല്‍പ്പിക്കാനാണ് ശ്രമിക്കുന്നതെന്നും ബെന്നി ബഹനാന്‍ പറഞ്ഞു. ജില്ലയില്‍ 24 കേന്ദ്രങ്ങളിലാണ് മാര്‍ച്ചും ധര്‍ണയും നടന്നത്.

സപ്ലൈകോയില്‍ ജോലി: വ്യാജ പരസ്യങ്ങളില്‍ വഞ്ചിതരാകരുതെന്ന് അറിയിപ്പ്

കൊച്ചി: സപ്ലൈകോയില്‍ വിവിധ തസ്തികകളില്‍ ജീവനക്കാരെ നേരിട്ട് നിയമിക്കുന്നതായി പ്രചരിക്കുന്ന യൂട്യൂബ് വീഡിയോകളും സമൂഹമാധ്യമ പോസ്റ്റുകളും വ്യാജമെന്ന് സപ്ലൈകോ ജനറല്‍ മാനേജര്‍ വി.കെ അബ്ദുല്‍ ഖാദര്‍ അറിയിച്ചു. സപ്ലൈകോയില്‍ സ്ഥിരം ജീവനക്കാരെ പിഎസ്‌സി മുഖേനയാണ് നിയമിക്കുന്നത്. താത്കാലിക നിയമനങ്ങള്‍ നടത്തുന്നതിന് മുന്പ് മുഖ്യധാരാ പത്രങ്ങളിലും സപ്ലൈകോയുടെ ഔദ്യോഗിക സാമൂഹിക മാധ്യമ പ്ലാറ്റ്‌ഫോമുകളിലും അറിയിപ്പ് പ്രസിദ്ധീകരിക്കും. വ്യാജ പ്രചാരണങ്ങള്‍ വിശ്വസിച്ച് വഞ്ചിതരാകാതിരിക്കാന്‍ പൊതുജനങ്ങള്‍ ജാഗ്രത പുലര്‍ത്തണമെന്ന് സപ്ലൈകോ ജനറല്‍ മാനേജര്‍ മുന്നറിയിപ്പു നല്‍കി. www.supply cokerala.com ആണ് സപ്ലൈകോയുടെ ഔദ്യോഗിക വെബ്‌സൈറ്റ്. ഫേസ്ബുക്ക് പേജ്: https://www.facebook.com/ Supplycoofficial, ഫോണ്‍: 0484 2205165.

മൂരിയുടെ കുത്തേറ്റ് ക്ഷേത്ര കമ്മിറ്റിയംഗം മരിച്ചു

കോതമംഗലം: വാരപ്പെട്ടി മഹാദേവ ക്ഷേത്രത്തിൽ പരിപാലിക്കുന്ന മൂരിയുടെ കുത്തേറ്റ് ക്ഷേത്ര കമ്മിറ്റിയംഗം മരിച്ചു. വാരപ്പെട്ടി പട്ടമ്മാട്ട് പരേതനായ അയ്യപ്പൻ നായരുടെ മകൻ പദ്മകുമാർ (53) ആണ് മരിച്ചത്. ഇന്നലെ രാവിലെ പുല്ല് തീറ്റിക്കുന്നതിനായി അഴിച്ചു കൊണ്ടു പോകുന്നതിനിടെ മൂരി പത്മകുമാറിനെ ആക്രമിക്കുകയായിരുന്നു. ഗുരുതരമായി പരിക്കേറ്റ പദ്മകുമാറിനെ കോതമംഗലത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി. മാതാവ്: ഇന്ദിര. സഹോദരൻ: ഗോപകുമാർ.

ബിജെപി മാർച്ചിൽ സംഘർഷം; പോലീസ് ജലപീരങ്കി പ്രയോഗിച്ചു

കളമശേരി: സംസ്ഥാന സർക്കാരിന്‍റെ ആരോഗ്യമേഖലയിലെ അനാസ്ഥയിലും കെടുകാര്യസ്ഥയിലും പ്രതിഷേധിച്ച് കൊച്ചി മെഡിക്കൽ കോളജിലേക്ക് ബിജെപി നടത്തിയ മാർച്ചിൽ സംഘർഷം. പ്രവർത്തകർക്കു നേരേ പോലീസ് ജലപീരങ്കി പ്രയോഗിച്ചു. ബിജെപി എറണാകുളം നോർത്ത് ജില്ലാ സെക്രട്ടറി സീമ ബിജുവിന് പരിക്കേറ്റു. ഇവരെ മഞ്ഞുമ്മല്ലിലെ സ്വകാര്യ ആശുപത്രിയിൽ പ്രഥമ ശുശ്രൂഷ നൽകി വിട്ടയച്ചു. ഇന്നലെ രാവിലെ കളമശേരി മെഡിക്കൽ കോളജ് റോഡിൽ എൻഐഎ ഓഫീസിന് സമീപത്തു നിന്ന് ആരംഭിച്ച പ്രതിഷേധ പ്രകടനം ബസ് സ്റ്റാൻഡിന് സമീപം പോലീസ് തടഞ്ഞു. തുടർന്ന് പോലീസ് സ്ഥാപിച്ച ബാരിക്കേഡ് പ്രതിഷേധക്കാർ തള്ളിമറിച്ചിട്ടു. ഇതോടെയാണ് പോലീസ് ജലപീരങ്കി പ്രയോഗിച്ചത്. ബിജെപി എറണാകുളം നോർത്ത് ജില്ലാ കമ്മിറ്റിയുടെ നേതൃത്വത്തിൽ ഇന്നലെ രാവിലെ നടത്തിയ മാർച്ച്, യുവമോർച്ച ദേശീയ സെക്രട്ടറി പി. ശ്യാംരാജ് ഉദ്ഘാടനം ചെയ്തു.

മനുഷ്യ, വന്യജീവി സംഘര്‍ഷം നിയന്ത്രിക്കാൻ ജില്ലാതല സമിതി

കൊച്ചി: മനുഷ്യ വന്യജീവി സംഘര്‍ഷം ലഘൂകരിക്കുന്നതിന്‍റെ ഭാഗമായി വന്യജീവികള്‍ക്ക് വനത്തിനകത്ത് തന്നെ ഭക്ഷണം ഉറപ്പാക്കണമെന്ന് മന്ത്രി പി. രാജീവ്. മനുഷ്യ, വന്യജീവി സംഘര്‍ഷം നിയന്ത്രിക്കുന്നതിനായി രൂപീകരിച്ച ജില്ലാ തല നിയന്ത്രണ സമിതി യോഗത്തില്‍ സംസാരിക്കുകയായിരുന്നു അദ്ദേഹം. മലയാറ്റൂര്‍ ഫോറസ്റ്റ് റേഞ്ചിന് കീഴിലുള്ള ഒമ്പത് പഞ്ചായത്തുകളിലാണ് വന്യജീവികള്‍ മൂലമുള്ള ബുദ്ധിമുട്ടുകള്‍. ഈ പ്രദേശങ്ങളിലെ മനുഷ്യ വന്യജീവി സംഘര്‍ഷം കുറക്കുക എന്ന ലക്ഷ്യത്തോടെയാണ് ജില്ലാ നിയന്ത്രണ സമിതി രൂപീകരിച്ചത്. മന്ത്രി പി. രാജീവ് അധ്യക്ഷനായ സമിതിയുടെ കണ്‍വീനര്‍ മലയാറ്റൂര്‍ ഡിഎഫ്ഒ പി.കെ. ആസിഫാണ്. ജില്ലാ കളക്ടര്‍ എന്‍.എസ്.കെ. ഉമേഷ്, ആലുവ റൂറല്‍ എസ്പി എം. ഹേമലത എന്നിവര്‍ ഉള്‍പ്പെടെ വിവിധ വകുപ്പുകളുടെ മേധാവികളാണ് സമിതിയിലെ മറ്റ് അംഗങ്ങള്‍. എല്ലാ മാസവും യോഗം ചേര്‍ന്ന് പ്രവര്‍ത്തനങ്ങള്‍ അവലോകനം ചെയ്യും. ജില്ലാ കളക്ടറേറ്റ് സ്പാര്‍ക്ക് ഹാളില്‍ സമിതിയുടെ ആദ്യ യോഗം ചേര്‍ന്നു. മനുഷ്യ വന്യജീവി സംഘര്‍ഷം കുറക്കുന്നതിനായി വനം വകുപ്പ് ആവിഷ്‌കരിച്ച വിവിധ പദ്ധതികള്‍ യോഗത്തില്‍ ചര്‍ച്ച ചെയ്തു. കുട്ടമ്പുഴ മേഖലയില്‍ ദ്രുത പ്രതികരണ സേന (ആര്‍ആര്‍ടി) രൂപീകരിക്കണമെന്ന വനം വകുപ്പ് ഉദ്യോഗസ്ഥരുടെ ആവശ്യം അധികൃതരെ അറിയിക്കുമെന്ന് പി. രാജീവ് പറഞ്ഞു.

സ്വകാര്യ ബസ് സമരത്തില്‍ വലഞ്ഞ് യാത്രക്കാര്‍ ; ആശ്വാസമായി മെട്രോയും കെഎസ്ആര്‍ടിസിയും

കൊച്ചി: സ്വകാര്യ ബസുകളിലെ നിരക്ക് വര്‍ധനവ് ഉള്‍പ്പടെ ആവശ്യപ്പെട്ട് സംസ്ഥാന വ്യാപകമായി ആരംഭിക്കാനൊരുങ്ങുന്ന അനിശ്ചിതകാല സമരത്തിനു മുന്നോടിയായി ഇന്നലെ നടത്തിയ സൂചനാ സമരത്തില്‍ വലഞ്ഞ് ജനം. സ്വകാര്യ ബസുകളെ കൂടുതലായി ആശ്രയിക്കുന്ന ഗ്രാമമേഖലയിലാണ് യാത്രക്കാര്‍ ഏറെയും ദുരിതത്തിലായത്. കെഎസ്ആര്‍ടിസി അധിക സര്‍വീസ് നടത്തിയത് നഗരമേഖലകളില്‍ ആശ്വാസമായി. മെട്രോയും ഫീഡര്‍ സര്‍വീസുകളും പതിവിലും തിരക്കായിരുന്നു ഇന്നലെ. രാവിലെ ഏതാനും ബസുകള്‍ സര്‍വീസ് ആരംഭിച്ചെങ്കിലും സംഘടനകളുടെ നിര്‍ബന്ധത്തിന് വഴങ്ങി നിര്‍ത്തിവയ്‌ക്കേണ്ടി വന്നു. ബസ് പണിമുടക്കിയതോടെ ഇരുചക്രവാഹനങ്ങളും കാറുകളുമുള്‍പ്പെടെയുള്ളവ നഗരത്തില്‍ ഇറങ്ങിയതോടെ പലയിടങ്ങളിലും ഗതാഗതക്കുരുക്ക് അനുഭവപ്പെട്ടു. കൊച്ചി മെട്രോയില്‍ അനിയന്ത്രിതമായ തിരക്കാണ് അനുഭവപ്പെട്ടത്. ഉള്‍പ്രദേശങ്ങളിലേക്ക് കെഎസ്ആര്‍ടിസി ബസുകള്‍ ഒന്നും ഓടാതിരുന്നത് ജനങ്ങളെ ഏറെ വലച്ചു. ആലുവ മേഖലയില്‍ ബസ് പണിമുക്ക് പൂര്‍ണമായിരുന്നു. ആലുവ മുനിസിപ്പല്‍ ബസ് സ്റ്റാന്‍ഡില്‍ നിന്ന് ഒരു ബസും പുറപ്പെട്ടില്ല. ആലുവയില്‍ നിന്ന് പെരുമ്പാവൂരിലേക്ക് ദേശസാത്കൃത റൂട്ട് കൂടി ഉള്ളതിനാല്‍ പെരുമ്പാവൂര്‍ ടൗണ്‍, ദേശീയപാത വഴി അങ്കമാലി റൂട്ടുകളെ പണിമുടക്ക് ബാധിച്ചില്ല. കളമശേരി, എറണാകുളം യാത്രക്കാര്‍ക്ക് കൊച്ചി മെട്രോ അനുഗ്രഹമായി. സ്വകാര്യ വാഹനങ്ങള്‍ ഏറെ നിരത്തിലിറങ്ങി. പെരുമ്പാവൂര്‍ സ്വകാര്യ ബസ് റൂട്ടിലും പുക്കാട്ടുപടി, കടുങ്ങല്ലൂര്‍, വരാപ്പുഴ, കാലടി മേഖലകളിലും ബസ് സമരം യാത്രക്കാരെ വലച്ചു. കീഴ്മാട് സര്‍ക്കുലര്‍ റൂട്ടില്‍ കെഎസ്ആര്‍ടിസി സര്‍വീസ് നടത്തി. 1800 ലേറെ സ്വകാര്യ ബസുകള്‍ സമരത്തിന്റെ ഭാഗമായെന്നാണ് ബസുടമകളുടെ സംഘടനാ പ്രതിനിധികള്‍ അവകാശപ്പെട്ടത്. സമരം വിജയമായിരുന്നുവെന്നും ഈ സമരം സൂചനമാത്രമാണെന്നും സര്‍ക്കാര്‍ അവകാശങ്ങള്‍ അംഗീകരിച്ചില്ലെങ്കില്‍ 22 മുതല്‍ അനിശ്ചിത കാല സമരം ആരംഭിക്കുമെന്നും സംഘടനാ നേതാക്കള്‍ പറഞ്ഞു. അധിക സര്‍വീസുകള്‍ നടത്തി കെഎസ്ആര്‍ടിസി കെഎസ്ആര്‍ടിസി ബസുകള്‍ ഇന്നലെ പൂര്‍ണ തോതില്‍ സര്‍വീസ് നടത്തിയതു യാത്രക്കാര്‍ക്കു നേരിയ ആശ്വാസമായി. പതിവു സര്‍വീസുകള്‍ക്കു പുറമേ, എല്ലാ ഡിപ്പോകളില്‍ നിന്നും സാധ്യമായ രീതിയില്‍ അധിക സര്‍വീസുകളും നടത്തിയതായി ജില്ലാ ട്രാന്‍സ്‌പോര്‍ട്ട് ഓഫിസര്‍ പറഞ്ഞു. എറണാകുളം, പിറവം, മൂവാറ്റുപുഴ, കൂത്താട്ടുകുളം, പെരുമ്പാവൂര്‍, കോതമംഗലം, ആലുവ തുടങ്ങിയ ഡിപ്പോകളില്‍ നിന്നെല്ലാം അധിക സര്‍വീസകളുണ്ടായിരുന്നു. കൊച്ചി നഗരത്തില്‍ നിന്നുള്ള സര്‍വീസുകള്‍ നിയന്ത്രിക്കുന്ന എറണാകുളം ഡിപ്പോയില്‍ നിന്ന് 74 പതിവു സര്‍വീസുകള്‍ക്കു പുറമേ, ഒന്‍പത് അധിക സര്‍വീസുകള്‍ നടത്തി. തിരക്കേറി മെട്രോ സ്വകാര്യ ബസ് സമരത്തില്‍ യാത്രക്കാര്‍ക്ക് ആശ്രയമായി കൊച്ചി മെട്രോ. പതിവിലും കുടുതല്‍ യാത്രക്കാരാണ് ഇന്നലെ കൊച്ചി മെട്രോയില്‍ യാത്ര ചെയ്തത്. ഇന്നലെ വൈകുന്നേരം അഞ്ചുവരെയുള്ള കണക്ക് പ്രകാരം 84,861 പേര്‍ മെട്രോയില്‍ യാത്ര ചെയ്തു. തൊട്ട് മുന്‍പുള്ള ദിവസം ഇതേ സമയം വരെ 73,882 ആളുകളായിരുന്നു യാത്ര ചെയ്തിരുന്നത്. അതേപോലെ മെട്രോ സ്‌റ്റേഷനുകള്‍ കേന്ദ്രീകരിച്ച് നടത്തുന്ന ഫീഡര്‍ സര്‍വീസുകളിലും തിരക്കേറെയായിരുന്നു ഇന്നലെ.

ദേശീയപാത 66 വികസനം : മൂത്തകുന്നത്തിനും ഇടപ്പള്ളിക്കും ഇടയിൽ മൂന്ന് അടിപ്പാതകള്‍കൂടി

ദേശീയപാത 544 ൽ അങ്കമാലി-കുണ്ടന്നൂര്‍ ബൈപ്പാസ് നിര്‍മാണത്തിലെ സ്ഥലം ഏറ്റെടുപ്പുമായി ബന്ധപ്പെട്ട സര്‍വേ നടപടികള്‍ ഓഗസ്റ്റ് 15 നകം പൂര്‍ത്തിയാക്കാനും ധാരണയായി കൊച്ചി: ദേശീയപാത 66 വികസനവുമായി ബന്ധപ്പെട്ട് മൂത്തകുന്നം മുതല്‍ ഇടപ്പള്ളി വരെയുള്ള ഭാഗത്ത് മൂന്ന് അടിപ്പാതകള്‍ കൂടി നിര്‍മിക്കാന്‍ മന്ത്രി പി. രാജീവിന്‍റെ അധ്യക്ഷതയില്‍ കളക്ടറേറ്റില്‍ ചേര്‍ന്ന യോഗത്തില്‍ തീരുമാനമായി. കൂനമ്മാവ്, പട്ടണം കവല, തൈക്കാവ് എന്നിവിടങ്ങളിലാണു പുതിയ അടിപ്പാതകള്‍ വരുന്നത്. സ്‌കൂള്‍ ഉള്‍പ്പെടെയുള്ള സ്ഥാപനങ്ങള്‍ വരുന്ന പ്രദേശങ്ങളില്‍ ഫുട്ട് ഓവര്‍ ബ്രിഡ്ജ് സ്ഥാപിക്കും. ദേശീയപാത നിര്‍മാണവുമായി ബന്ധപ്പെട്ട് വെള്ളക്കെട്ട് അനുഭവപ്പെടുന്ന മേഖലകളില്‍ അടിയന്തര പ്രാധാന്യത്തോ‌ടെ ക്രോസ് കള്‍വര്‍ട്ടുകള്‍ നിര്‍മിക്കും. തോടുകളുടെ നീരൊഴുക്ക് തടസപ്പെടുത്തുന്ന വിധത്തില്‍ വന്നിട്ടുള്ള നിര്‍മാണവശിഷ്ടങ്ങള്‍ നീക്കം ചെയ്യാന്‍ യോഗത്തില്‍ മന്ത്രി നിര്‍ദേശിച്ചു. മൂത്തകുന്നത്ത് 16 വീടുകളിലേക്ക് പ്രവേശനം തടസപ്പെടുന്ന സാഹചര്യമുണ്ടെന്ന് മന്ത്രി ചൂണ്ടിക്കാട്ടി. ഈ പ്രശ്‌നം പരിഹരിക്കാന്‍ വേണ്ടിവന്നാല്‍ സ്ഥലം ഏറ്റെടുപ്പ് ഉള്‍പ്പെടെയുള്ള നടപടികള്‍ സ്വീകരിക്കണം. നിലവിലെ ദേശീയപാതയില്‍ രൂപപ്പെട്ടിട്ടുള്ള കുഴികള്‍ വേഗത്തില്‍ അടയ്ക്കണം. ആവശ്യമായ ഇടങ്ങളില്‍ സര്‍വീസ് റോഡുകളുടെ നീളം വര്‍ധിപ്പിക്കണമെന്നും മന്ത്രി പറഞ്ഞു. ദേശീയപാത 544 ൽ അങ്കമാലി-കുണ്ടന്നൂര്‍ ബൈപ്പാസ് നിര്‍മാണത്തിലെ സ്ഥലം ഏറ്റെടുപ്പുമായി ബന്ധപ്പെട്ട സര്‍വേ നടപടികള്‍ ഓഗസ്റ്റ് 15 നുള്ളില്‍ പൂര്‍ത്തിയാക്കാനും യോഗത്തില്‍ ധാരണയായി. സര്‍വേ നടപടികള്‍ വേഗത്തില്‍ പൂര്‍ത്തിയാക്കുന്നതിനായി കൂടുതല്‍ ഉദ്യോഗസ്ഥരെ ചുമതലപ്പെടുത്തും. നിലവില്‍ 14 സര്‍വേ ഉദ്യോഗസ്ഥരാണുള്ളത്. ഇവരുടെ എണ്ണം 40 ആയി ഉയര്‍ത്തും. അതിനുപുറമേ ആവശ്യമായ ഡ്രാഫ്റ്റ്മാന്‍മാരുടെ സേവനവും ഉറപ്പുവരുത്തും. സര്‍വേ പുരോഗതി വിലയിരുത്തുന്നതിനായി എല്ലാ തിങ്കളാഴ്ചയും ജില്ലാ കളക്ടറുടെ നേതൃത്വത്തില്‍ അവലോകന യോഗം ചേരാനും തീരുമാനിച്ചു. യോഗത്തില്‍ എംപിമാരായ ബെന്നി ബഹനാന്‍, ഹൈബി ഈഡന്‍, എംഎല്‍എമാരായ കെ.ബാബു, റോജി എം.ജോണ്‍, ടി.ജെ. വിനോദ്, ജില്ലാ പഞ്ചായത്ത് പ്രസിഡന്‍റ് മനോജ് മുത്തേടന്‍, കളക്ടര്‍ എന്‍. എസ്.കെ. ഉമേഷ് തുടങ്ങിയവര്‍ പങ്കെടുത്തു.

മൂരിയുടെ കുത്തേറ്റ് ക്ഷേത്ര കമ്മിറ്റിയംഗം മരിച്ചു

കോതമംഗലം: വാരപ്പെട്ടി മഹാദേവ ക്ഷേത്രത്തിൽ പരിപാലിക്കുന്ന മൂരിയുടെ കുത്തേറ്റ് ക്ഷേത്ര കമ്മിറ്റിയംഗം മരിച്ചു. വാരപ്പെട്ടി പട്ടമ്മാട്ട് പരേതനായ അയ്യപ്പൻനായരുടെ മകൻ പദ്മകുമാർ (53) ആണു മരിച്ചത്. ഇന്നലെ രാവിലെ പുല്ല് തീറ്റിക്കുന്നതിനായി അഴിച്ചു കൊണ്ടുപോകുന്നതിനിടെ മൂരി പത്മകുമാറിനെ ആക്രമിക്കുകയായിരുന്നു. ഗുരുതരമായി പരിക്കേറ്റ പദ്മകുമാറിനെ കോതമംഗലത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി. അമ്മ: ഇന്ദിര. സഹോദരൻ: ഗോപകുമാർ.

‘മഞ്ഞുമ്മല്‍ ബോയ്‌സ്' സാമ്പത്തിക തട്ടിപ്പ്: നടൻ സൗബിന്‍ ഷാഹിറിനെ ചോദ്യം ചെയ്തു

മരട്: ‘മഞ്ഞുമ്മല്‍ ബോയ്‌സ്' സിനിമയുമായി ബന്ധപ്പെട്ട സാമ്പത്തിക തട്ടിപ്പ് കേസില്‍ നടന്‍ സൗബിന്‍ ഷാഹിറിനെ പോലീസ് ചോദ്യം ചെയ്തു. ലാഭവിഹിതം വാഗ്ദാനം ചെയ്ത് ഏഴ് കോടി രൂപ തട്ടിയെടുത്തെ അരൂര്‍ സ്വദേശിയുടെ പരാതിയിലാണ് മരട് പോലീസ് സൗബിനെയും സഹ നിർമാതാക്കളായ ബാബു ഷാഹിര്‍, ഷോണ്‍ ആന്‍റണി എന്നിവരെയും ചോദ്യം ചെയ്തത്. ഇന്നലെ രാവിലെ 11.30 ഓടെ അഭിഭാഷകനൊപ്പമാണ് ഇവര്‍ സ്റ്റേഷനില്‍ ഹാജരായത്. ചോദ്യം ചെയ്യല്‍ രണ്ടു മണിക്കൂറോളം നീണ്ടു. കേസുമായി ബന്ധപ്പെട്ട എല്ലാ കാര്യങ്ങളും പോലീസിനോട് കൃത്യമായി പറഞ്ഞിട്ടുണ്ടെന്ന് ചോദ്യം ചെയ്യലിന് ശേഷം സൗബിന്‍ ഷാഹിര്‍ പ്രതികരിച്ചു. സിനിമയുടെ നിർമാണത്തിനായി ചെലവാക്കിയ തുകയുടെ ഉറവിടത്തെക്കുറിച്ചും ചിത്രത്തിന്‍റെ കളക്ഷന്‍ തുകയെക്കുറിച്ചുമുള്ള വിവരങ്ങള്‍ പോലീസ് ഇവരില്‍നിന്നു ശേഖരിച്ചു. സാമ്പത്തിക തട്ടിപ്പെന്ന പരാതിയില്‍ ചോദ്യംചെയ്യലിന് ഹാജരാകണമെന്നാവശ്യപ്പെട്ട് പോലീസ് മുമ്പ് രണ്ടുതവണ നോട്ടീസ് നല്‍കിയെങ്കിലും മുന്‍കൂര്‍ ജാമ്യം തേടി സൗബിനും സഹ നിര്‍മാതാക്കളും ഹൈക്കോടതിയെ സമീപിക്കുകയായിരുന്നു. മൂന്നുപേരെയും കസ്റ്റഡിയിലെടുത്ത് ചോദ്യം ചെയ്യേണ്ട സാഹചര്യമില്ലെന്ന് നിരീക്ഷിച്ച കോടതി ഇവര്‍ക്ക് മുന്‍കൂര്‍ ജാമ്യം നല്‍കുകയായിരുന്നു. അറസ്റ്റ് ചെയ്താല്‍ ജാമ്യത്തില്‍ വിടണമെന്നും കോടതി നിർദേശിച്ചിരുന്നു. ഇതെ തുടര്‍ന്നാണ് പോലീസ് സ്റ്റേഷനില്‍ മൂന്നുപേരും ഹാജരായത്. മഞ്ഞുമ്മല്‍ ബോയ്‌സ് സിനിമയുടെ ലാഭത്തിന്‍റെ 40 ശതമാനം നല്‍കാമെന്ന് പറഞ്ഞ് ഏഴ് കോടി രൂപ കൈപ്പറ്റിയതിനു ശേഷം കബളിപ്പിച്ചെന്ന് കാട്ടി അരൂര്‍ വലിയവീട്ടില്‍ സിറാജാണ് മരട് പോലീസില്‍ പരാതി നല്‍കിയത്. മുടക്കിയ ഏഴു കോടി രൂപയോ ലാഭവിഹിതമോ തിരിച്ചുനല്‍കിയില്ലെന്നും പരാതിയില്‍ വ്യക്തമാക്കിയിരുന്നു. തുടര്‍ന്ന് ഇതില്‍ അന്വേഷണത്തിന് എറണാകുളം മജിസ്‌ട്രേറ്റ് കോടതി ഉത്തരവിട്ടു. ക്രിമിനല്‍ ഗൂഢാലോചന, വിശ്വാസവഞ്ചന, വ്യാജരേഖ ചമയ്ക്കല്‍ തുടങ്ങി ജാമ്യമില്ലാ വകുപ്പുകളാണ് നിര്‍മാതാക്കള്‍ക്കെതിരെ ചുമത്തിയത്. 2022 നവംബര്‍ 30ന് 5.99 കോടി രൂപ പറവ ഫിലിംസിന്‍റെ കടവന്ത്രയിലെ ബാങ്ക് അക്കൗണ്ടിലേക്ക് നിക്ഷേപിച്ചു. പിന്നീട് 50 ലക്ഷം രൂപ ഷോണ്‍ ആന്‍റണിയുടെ കടവന്ത്രയിലെ ബാങ്ക് അക്കൗണ്ടിലും നല്‍കി. ഇതിനൊപ്പം 51 ലക്ഷം രൂപ പലപ്പോഴായി പണമായി കൈപ്പറ്റിയെന്നും സിറാജ് മൊഴി നല്‍കിയിരുന്നു. കരാര്‍ പ്രകാരം പരാതിക്കാരനു 40 കോടി രൂപയുടെ അര്‍ഹതയുണ്ടെന്നും അതു നല്‍കിയില്ലെന്നും എഫ്‌ഐആറില്‍ വ്യക്തമാക്കിയിരുന്നു.

എംഎസ്‌സി എൽസ3 അപകടം: എൻഐഒ പഠനം നടത്തും

കൊച്ചി: കൊച്ചി പുറംകടലിൽ മുങ്ങിയ ലൈബീരിയൻ ചരക്ക് കപ്പൽ എംഎസ്‌സി എൽസ 3 കപ്പലപകടത്തെക്കുറിച്ച്‌ നാഷണൽ ഇൻസ്‌റ്റിറ്റ്യൂട്ട്‌ ഓഫ്‌ ഓഷ്യനോഗ്രഫി (എൻഐഒ) പഠനം നടത്തും. കപ്പൽ മുങ്ങിയതിനെ തുടർന്ന്‌ വിവിധ മേഖലകളിലുണ്ടായ ആഘാതമാണ്‌ പഠനവിധേയമാക്കുക. അതേസമയം കപ്പലിൽ നിന്നുള്ള എണ്ണ വീണ്ടെടുക്കൽ അടുത്ത മാസം ആദ്യം ആരംഭിച്ചേക്കും. രക്ഷാപ്രവർത്തനത്തിന്‌ സ്‌മിറ്റ്‌ സാൽവേജിന്‍റെ നേതൃത്വത്തിൽ 30 അംഗ ദൗത്യസംഘത്തിനുള്ള പരിശീലനം പുരോഗമിക്കുകയാണ്‌. കപ്പൽ മുങ്ങിയ സ്ഥലത്ത്‌ എണ്ണപ്പാട കണ്ടെത്താൻ കനറ മേഘ കപ്പൽ 24 മണിക്കൂറും നിരീക്ഷണം നടത്തുന്നുണ്ട്‌. പുക അടങ്ങാതെ ‘വാൻഹായ് 503' ബേപ്പൂരിന് സമീപം കടലിൽ തീപിടിച്ച വാൻഹായ് 503 കപ്പലിന്‍റെ പല ഭാഗത്തുനിന്നും പുക ഇപ്പോഴും ഉയരുന്നു. ഇന്ത്യൻ തീരത്തുനിന്ന്‌ നിലവിൽ 135 നോട്ടിക്കൽ മൈൽ അകലെയാണ്‌ കപ്പൽ. അതിനിടെ ഇന്ധന ടാങ്കുകൾക്ക്‌ സമീപത്തെ നാലാംനമ്പർ അറയിലെ താപനില താഴ്‌ത്താൻ സാധിക്കാത്തത് ആശങ്ക ഉയർത്തുന്നു.

വീണ്ടും തീപിടിക്കാൻ സാധ്യതയുള്ളതിനാൽ കപ്പലിനെ തണുപ്പിക്കാനുള്ള പ്രവർത്തനങ്ങൾ കൂടുതൽ ശക്തമാക്കിയിരിക്കുകയാണ്‌ സാൽവേജ്‌ കമ്പനി. അഡ്വാന്‍റിസ്‌ വിർഗോ, എസ്‌സിഐ പന്ന, വാട്ടർ ലില്ലി എന്നീ ടഗ്ഗുകളാണ്‌ രക്ഷാപ്രവർത്തനത്തിൽ ഏർപ്പെട്ടിട്ടുള്ളത്‌. എൻജിൻ മുറിയിൽ കയറിയ വെള്ളം വറ്റിക്കുന്ന പ്രവർത്തനങ്ങളും പുരോഗമിക്കുകയാണ്‌. കപ്പൽ നിലവിൽ ഇന്ത്യയുടെ പ്രത്യേക സാമ്പത്തികമേഖലയ്‌ക്ക്‌ പുറത്താണ്്‌.

തിരയിൽ ‍പെട്ട ചെറുവള്ളത്തിൽ വീണ് രണ്ടു തൊഴിലാളികള്‍ക്ക് പരിക്ക്

വൈപ്പിൻ: തീരക്കടലിൽ മത്സ്യബന്ധനം നടത്തിക്കൊണ്ടിരിക്കെ തിരമാലയില്‍പ്പെട്ട ചെറുവള്ളം അടിയുലഞ്ഞതിനെതുടര്‍ന്നു വഞ്ചിയില്‍ അടിച്ചുവീണ രണ്ടു തൊഴിലാളികള്‍ക്കു സാരമായ പരിക്കേറ്റു. എളങ്കുന്നപ്പുഴ ചാപ്പകടപ്പുറം സ്വദേശികളായ നികത്തിത്തറ ദിനേശന്‍(56), പാലിശേരി പൊന്നപ്പന്‍(62) എന്നിവര്‍ക്കാണ് പരിക്ക്. ഇന്നലെ രാവിലെ സൗത്ത് പുതുവൈപ്പ് തീരത്ത് എൽഎൻജിക്ക് സമീപത്തായിരുന്നു അപകടം. മുഖത്തും കണ്ണിനും പരിക്കേറ്റ ഇവരെ കോട്ടയം, കളമശേരി മെഡിക്കല്‍ കോളജുകളില്‍ പ്രവേശിപ്പിച്ചു. കൂളിവാഹസുധന്‍ എന്ന വള്ളത്തിലെ തൊഴിലാളികളാണ്. നാലുപേരാണ് വഞ്ചിയിൽ ഉണ്ടായിരുന്നത്. കൊല്ലംപറമ്പില്‍ സഹജന്‍, പറമ്പാടി മനീഷ് എന്നിവരാണു വഞ്ചിലുണ്ടായിരുന്ന മറ്റുതൊഴിലാളികള്‍. ഇവര്‍ക്ക് പരിക്കില്ല.

കാലടി സര്‍വകലാശാലയില്‍ നിയന്ത്രണങ്ങള്‍ ഇന്നുമുതൽ

കാലടി: കാലടി സംസ്‌കൃത സര്‍വകലാശാല കാമ്പസില്‍ പുതുതായി ഏര്‍പ്പെടുത്തിയ നിയന്ത്രണങ്ങള്‍ ചെറിയ മാറ്റങ്ങളോടെ ഇന്നു മുതല്‍ നടപ്പാക്കാന്‍ തീരുമാനം. നിര്‍ദിഷ്ട സര്‍ക്കുലറിലെ 12 നിയന്ത്രണങ്ങളില്‍ മൂന്ന് ചെറിയ മാറ്റങ്ങള്‍ മാത്രമാണ് സര്‍വകലാശാല അനുവദിച്ചിരിക്കുന്നതെന്ന് സിന്‍ഡിക്കേറ്റ് യോഗത്തിനുശേഷം നടത്തിയ പത്രസമ്മേളനത്തില്‍ സിന്‍ഡിക്കേറ്റ് അംഗം അഡ്വ. കെ.എസ്. അരുണ്‍കുമാര്‍ പറഞ്ഞു. തിയറ്റര്‍, ഡാന്‍സ്, ഫൈന്‍ ആര്‍ട്‌സ്, ജ്യോഗ്രഫി ഡിപ്പാര്‍ട്ടുമെന്‍റുകളില്‍ വിദ്യാര്‍ഥികള്‍ക്ക് വകുപ്പ് തലവന്‍റെ ഉത്തരവാദിത്വത്തില്‍ വൈകുന്നേരം അഞ്ചിന് ശേഷം ക്ലാസ് മുറികള്‍ ഉപയോഗിക്കാം. അതത് വകുപ്പുകളിലെ ഏതെങ്കിലും അധ്യാപകന്‍റെ സാന്നിധ്യം ഈ സമയം ഉണ്ടാകണം. ബിരുദ വിദ്യാര്‍ഥികള്‍ രാത്രി 7.30 നും പിജി വിദ്യാര്‍ഥികള്‍ 9.30 നും ഗവേഷണ വിദ്യാര്‍ഥികള്‍ 11നും ഹോസ്റ്റലില്‍ പ്രവേശിക്കണം. ലൈബ്രറിയോടനുബന്ധിച്ചുളള റീഡിംഗ് റൂം രാത്രി 11ന് അടയ്ക്കും. പകരം ഹോസ്റ്റലുകളില്‍ റീഡിംഗ് റൂമുകള്‍ ആരംഭിക്കും. സര്‍വകലാശാല സെന്‍ട്രല്‍ ലൈബ്രറിയുടെ പ്രവര്‍ത്തനത്തില്‍ മാറ്റം ഉണ്ടാകില്ല. രാത്രി 7.30 ന് ശേഷം ഇളവുകള്‍ ഉള്ളവരെ ഐഡന്‍റിറ്റി കാര്‍ഡും വകുപ്പ് മേധാവിയുടെ രേഖകള്‍ക്കും അനുമതികള്‍ക്കും വിധേയമായി കാമ്പസിന് പുറത്തുപോകാന്‍ അനുവദിക്കും. രാത്രി 11ന് സര്‍വകലാശാല ഗേറ്റ് പൂര്‍ണമായും അടച്ചശേഷം ആരെയും പ്രവേശിപ്പിക്കുകയോ പുറത്തേക്ക് വിടുകയോ ചെയ്യില്ല. പഠനം പൂര്‍ത്തീകരിച്ചിട്ടും വര്‍ഷങ്ങളായി കാമ്പസിലെ ഹോസ്റ്റലുകളില്‍ തുടരുന്ന വിദ്യാര്‍ഥികളോടെ ഏഴ് ദിവസത്തിനകം ഹോസ്റ്റല്‍ ഒഴിഞ്ഞ് പോകാന്‍ നിര്‍ദേശം നല്‍കി. ഹോസ്റ്റലുകളുടെ സുരക്ഷിതത്വവും അച്ചടക്കവും നിരീക്ഷിക്കുന്നതിന് ഹോസ്റ്റല്‍ മോണിട്ടറിംഗ് കമ്മിറ്റി രൂപീകരിച്ചു. വിദ്യാര്‍ഥികളുടെ കാമ്പസിലെ സുരക്ഷയും അച്ചടക്കവും നിരീക്ഷിക്കുന്നതിനും വിലയിരുത്തുന്നതിനുമായി സിന്‍ഡിക്കേറ്റ് അംഗം ഡോ. എം. സത്യന്‍ കണ്‍വീനറായി അച്ചടക്കസമിതിയും രൂപീകരിച്ചു. പഠനത്തിനൊപ്പം പാര്‍ട്ട് ടൈമായി ജോലി ചെയ്യുന്ന വിദ്യാര്‍ഥികള്‍ക്ക് സ്ഥാപന ഉടമയുടെയും വകുപ്പ് തലവന്‍റെ സര്‍ട്ടിഫിക്കറ്റിന്‍റെ അടിസ്ഥാനത്തില്‍ ഹോസ്റ്റല്‍ പ്രവേശനത്തില്‍ ഇളവ് അനുവദിക്കും. സര്‍വലാശാലയുടെ തീരുമാനങ്ങള്‍ക്ക് വിരുദ്ധമായി 12 അധ്യാപകര്‍ പരസ്യ പ്രസ്താവന നടത്തിയതില്‍ സിന്‍ഡിക്കേറ്റ് യോഗം അതൃപ്തിയും ആശങ്കയും രേഖപ്പെടുത്തി. വൈസ് ചാന്‍സലര്‍ പ്രഫ. കെ.കെ. ഗീതാകുമാരി, സിന്‍ഡിക്കേറ്റ് അംഗങ്ങളായ ആര്‍. അജയന്‍, ഡോ.ബി. അശോക്, ഡോ. ടി.മാത്യൂസ്, ഡോ.ടി. മിനി, ഡോ.എം. സത്യന്‍, ഡോ. പി.വി. ഓമന, ഡോ.വി. ലിസി മാത്യു, രജിസ്ട്രാര്‍ ഡോ. മോത്തി ജോര്‍ജ് എന്നിവര്‍ പത്രസമ്മേളനത്തില്‍ പങ്കെടുത്തു.

ഫോണ്‍ നമ്പര്‍ നൽകിയില്ല; യുവതിക്കും സുഹൃത്തുക്കള്‍ക്കും മര്‍ദനം; മൂന്നുപേര്‍ അറസ്റ്റില്‍

കൊച്ചി: നഗരത്തിലെ ഭക്ഷണശാലയിലെത്തിയ യുവതിക്കും സുഹൃത്തുക്കള്‍ക്കും നേരെ എട്ടംഗ സംഘത്തിന്‍റെ അതിക്രമം. സംഭവത്തില്‍ മൂന്നുപേരെ എറണാകുളം നോര്‍ത്ത് പോലീസ് അറസ്റ്റ് ചെയ്തു. കലൂര്‍ കൈപ്പള്ളി ലെയിനിലുള്ള കടയില്‍ ഞായറാഴ്ച രാത്രി 11.30 ഓടെയായിരുന്നു സംഭവം. കടയില്‍ സുഹൃത്തുക്കള്‍ക്കൊപ്പമെത്തിയ കൊല്ലം കടയ്ക്കല്‍ സ്വദേശിനിക്കും സുഹൃത്തുക്കള്‍ക്കുമാണ് ആക്രമണത്തില്‍ പരിക്കേറ്റത്. സംഭവത്തിന് പിന്നാലെ ഓടിരക്ഷപ്പെട്ട യുവതിയെ അക്രമി സംഘം പിന്തുടര്‍ന്ന് താമസസ്ഥലത്തെത്തിയും മര്‍ദിച്ചു. ഫോണ്‍ നമ്പര്‍ ചോദിച്ചിട്ട് നൽകാത്തതിലുള്ള വിരോധം മൂലമാണ് യുവതിയെ ആക്രമിച്ചതെന്ന് പോലീസ് പറഞ്ഞു. പ്രതികള്‍ ഇവരുടേതുള്‍പ്പെടെ അഞ്ചോളം വാഹനങ്ങളും അടിച്ചു തകര്‍ത്തു. സിസി ടിവി കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളെ പോലീസ് പിടികൂടിയത്.

കപ്പൽ അപകടം: ശ്രദ്ധ ക്ഷണിക്കൽ സമരവുമായി മത്സ്യത്തൊഴിലാളികൾ

കൊച്ചി: വിവിധ ആവശ്യങ്ങളുന്നയിച്ചു ഫിഷറീസ് കോ -ഓർഡിനേഷൻ കമ്മിറ്റിയുടെ നേതൃത്വത്തിൽ കൊച്ചിയിലെ സിഎംഎഫ്ആർഐക്കു മുന്നിൽ ശ്രദ്ധ ക്ഷണിക്കൽ സമരം നടത്തി. ഹൈബി ഈഡൻ എംപി ഉദ്ഘാടനം ചെയ്തു. കപ്പൽ അപകടങ്ങളെ സംബന്ധിച്ച് കോടതിയുടെ ഉത്തരവാദിത്വത്തിൽ വിദഗ്ധസമിതി അന്വേഷിക്കുക, അന്താരാഷ്ട്ര മാനദണ്ഡം അനുസരിച്ചുള്ള നഷ്ടപരിഹാരം മത്സ്യ മേഖലയ്ക്ക് ലഭ്യമാക്കുക, കടൽ മേഖലയെ കുത്തക കമ്പനികൾക്കു തീറെഴുതരുത് തുടങ്ങിയ ആവശ്യങ്ങളുന്നയിച്ചായിരുന്നു സമരം. ‌ജോസഫ് സേവ്യർ കളപ്പുരക്കൽ അധ്യക്ഷത വഹിച്ചു. ജില്ലാ കൺവീനർ ചാൾസ് ജോർജ്, വി. ദിന കരൻ എന്നിവർ പ്രസംഗിച്ചു.

കെഎസ്ആര്‍ടിസിയുടെ ട്രാവല്‍ കാര്‍ഡിന് മികച്ച പ്രതികരണം

കൊച്ചി: ബസിലെ 'ചില്ലറ തര്‍ക്കം' പരിഹരിക്കാന്‍ കെഎസ്ആര്‍ടിസി അവതരിപ്പിച്ച ട്രാവല്‍ കാര്‍ഡിന് എറണാകുളത്ത് മികച്ച പ്രതികരണം. ആദ്യഘട്ടമെത്തിയ 1,000 കാര്‍ഡുകളും ഇതിനോടകം വിതരണം ചെയ്തു. ആവശ്യക്കാരേറിയതോടെ അടുത്തഘട്ടത്തില്‍ കൂടുതല്‍ കാര്‍ഡുകള്‍ എത്തിക്കാനുള്ള ഒരുക്കത്തിലാണ് അധികൃതര്‍. റേഡിയോ ഫ്രീക്വന്‍സി ഐഡന്‍റിഫിക്കേഷന്‍(ആര്‍എഫ്‌ഐഡി) സാങ്കേതികവിദ്യയില്‍ സുരക്ഷാ സംവിധാനങ്ങളോടെയാണ് ട്രാവല്‍ കാര്‍ഡ് ഒരുക്കിയിട്ടുള്ളത്. 100 രൂപയാണ് കാര്‍ഡ് നിരക്ക്. കണ്ടക്ടര്‍ തന്നെ കാര്‍ഡ് യാത്രക്കാര്‍ക്ക് ആക്ടിവേറ്റ് ചെയ്ത് നല്‍കുന്ന തരത്തിലാണ് ക്രമീകരിച്ചിട്ടുള്ളത്. ആദ്യഘട്ടത്തില്‍ തിരുവനന്തപുരം, കൊല്ലം ജില്ലകളില്‍ നടപ്പിലാക്കിയ സംവിധാനം എറണാകുളം ജില്ലയിലേക്കും വ്യാപിപ്പിക്കുകയായിരുന്നു. 50 മുതല്‍ 3000 രൂപ വരെ 50 മുതല്‍ 3,000 രൂപയ്ക്ക് വരെ ട്രാവല്‍ കാര്‍ഡ് റീ ചാര്‍ജ് ചെയ്യാനാകും. നിശ്ചിതകാലത്തേക്ക് റീ ചാര്‍ജ് ചെയ്യാനും സൗകര്യമുണ്ട്. ഇവയ്ക്ക് ഓഫറുകളും കെഎസ്ആര്‍ടിസി ഒരുക്കിയിട്ടുണ്ട്. കാര്‍ഡിലെ തുകയ്ക്ക് ഒരു വര്‍ഷം വരെയാണ് വാറന്‍റി. ഒരു വര്‍ഷത്തിലധികം കാര്‍ഡ് ഉപയോഗിക്കാതിരുന്നാല്‍ ഡീ ആക്ടിവേറ്റാകും. കാര്‍ഡ് കുടുംബാംഗങ്ങള്‍ക്കോ സുഹൃത്തുക്കള്‍ക്കോ കൈമാറ്റം ചെയ്ത് ഉപയോഗിക്കുന്നതിനും നിലവില്‍ തടസമില്ല. എല്ലാം മൊബൈല്‍ വഴി; അന്വേഷണങ്ങളും ബസ് ടിക്കറ്റ് ബുക്കിംഗ് മുതല്‍, ബസിന്‍റെ സമയം, നിലവില്‍ എവിടെ എത്തി തുടങ്ങിയ കാര്യങ്ങളടക്കം ഓണ്‍ലൈന്‍ സംവിധാനത്തിലൂടെ അറിയാന്‍ സാഹചര്യമൊരുങ്ങിയതിന് പിന്നാലെ ഡിപ്പോകളിലെത്തിയുളള യാത്രക്കാരുടെ അന്വേഷണങ്ങള്‍ക്കും ഇനി മൊബൈല്‍ നമ്പറിനെ ആശ്രയിക്കാം. എറണാകുളം കെഎസ്ആര്‍ടിസി ഡിപ്പോയില്‍ വൈകാതെ ഈ സേവനം ലഭ്യമാകും. മൊബൈല്‍ എത്തുന്നതോടെ അന്വേഷണങ്ങള്‍ക്കായി പ്രത്യേകം നിയോഗിക്കുന്ന ജീവനക്കാരനില്ലാതാകും. സ്റ്റേഷന്‍ മാസ്റ്റര്‍ തന്നെയാകും ഇതും കൈകാര്യം ചെയ്യുക. അതിനിടെ, ഉദ്യോഗസ്ഥരുടെ ഡ്യൂട്ടി ഡിപ്ലോയ്‌മെന്‍റ് അടക്കം നോക്കുന്ന സ്റ്റേഷന്‍ മാസ്റ്റര്‍ അന്വേഷണങ്ങള്‍ക്കും മറുപടി നല്‍കുന്നതിനെക്കുറിച്ചും ആശങ്ക നിലനില്‍ക്കുന്നുണ്ട്.

ദേശീയ പണിമുടക്കില്‍ തൊഴില്‍ മേഖലയും

കൊച്ചി: നാളെ നടക്കുന്ന ദേശീയ പണിമുടക്കില്‍ ജില്ലയിലെ തൊഴില്‍ മേഖലയിലുള്ളവരും പങ്കെടുക്കുമെന്ന് സംയുക്ത ട്രേഡ് യൂണിയന്‍ നേതാക്കള്‍ പറഞ്ഞു. ഇന്നു രാത്രി 12 മുതല്‍ നാളെ രാത്രി 12 വരെയാണ് 24 മണിക്കൂർ പണിമുടക്ക്. കൊച്ചി തുറമുഖ തൊഴിലാളികള്‍, കൊച്ചി വിമാനത്താവളത്തിലെ ഗ്രൗണ്ട് ഹാന്‍ഡ്‌ലിംഗ് തൊഴിലാളികള്‍, നേവല്‍ബേസിലെ കരാര്‍ തൊഴിലാളികള്‍, വല്ലാര്‍പാടം ടെര്‍മിനലിലെ ലോറി-ട്രക്ക് തൊഴിലാളികള്‍, ബോട്ട് സര്‍വീസ് തൊഴിലാളികള്‍, വന്‍കിട വ്യവസായ ശാലകളായ എഫ്എസിടി, എച്ച്എംടി, സെസ്, കിന്‍ഫ്രപാര്‍ക്ക്, ഐആര്‍ഇ, ടിസിസി, അപ്പോളോ, ഹിന്‍ഡാല്‍കോ, കൊച്ചി റിഫൈനറി, എച്ച്ഒസി, ടെല്‍ക്, കെല്‍ തുടങ്ങിയ സ്ഥാപനങ്ങളിലെ തൊഴിലാളികള്‍, വാണിജ്യ, വ്യാപാര സ്ഥാപനങ്ങളിലെയും, കയറ്റിറക്ക്, നിര്‍മാണം, മത്സ്യം, ഷോപ്പ്, ടാങ്കര്‍ലോറി, ലൈറ്റ് മോട്ടോര്‍, ബസ് മേഖലയിലെ തൊഴിലാളികള്‍ എന്നിവര്‍ പണിമുടക്കിന്‍റെ ഭാഗമാകുമെന്നും സംയുക്ത ട്രേഡ് യൂണിയന്‍ നേതാക്കള്‍ പറഞ്ഞു. രാവിലെ എട്ട് മുതല്‍ മണ്ഡലം കേന്ദ്രങ്ങളിലും പഞ്ചായത്ത് കേന്ദ്രങ്ങളിലും പ്രതിഷേധ പ്രകടനം നടത്തും. കുടിവെള്ളവിതരണം, പാല്‍, പത്രവിതരണം, ആശുപത്രി എന്നീ മേഖലകളെ പണിമുടക്കില്‍ നിന്ന് ഒഴിവാക്കിയിട്ടുണ്ട്.

ഉപരാഷ്ട്രപതിയുടെ സുരക്ഷാ ഡ്യൂട്ടിക്ക് മദ്യപിച്ചെത്തി; അസി. കമാണ്ടന്‍റിനെ ചുമതലയിൽ നിന്നു മാറ്റി

നെടുമ്പാശേരി: ഉപരാഷ്ട്രപതി ജഗദീപ് ധൻകറിന്‍റെ സുരക്ഷാ ഡ്യൂട്ടിക്കായി മദ്യപിച്ചെത്തിയ ഉദ്യോഗസ്ഥനെ ചുമതലയിൽ നിന്നു മാറ്റിനിർത്തി. കെഎപി-2 പാലക്കാട് യൂണിറ്റിലെ അസിസ്റ്റന്‍റ് കമാണ്ടന്‍റിനെയാണ് മാറ്റിനിർത്തിയത്. ഇയാളെ നെടുമ്പാശേരി പോലീസ് സ്റ്റേഷനിലെത്തിക്കുകയും തുടർന്ന് വൈദ്യപരിശോധനയ്ക്കു വിധേയനാക്കുകയും ചെയ്തിരുന്നു. മദ്യപിച്ചിരുന്നതായി സ്ഥിരീകരിച്ചതോടെയാണ് നടപടി സ്വീകരിച്ചത്.

റേഷന്‍ ഡീലേഴ്‌സ് അസോ. ജില്ലാ സമ്മേളനം 13ന്

കൊച്ചി: ഓള്‍ കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷൻ ജില്ലാ സമ്മേളനം 13ന് രാവിലെ 10ന് പറവൂര്‍ ടൗണ്‍ ഹാളില്‍ പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. ജില്ലാ പ്രസിഡന്‍റ് വി.വി. ബേബി അധ്യക്ഷത വഹിക്കും. സംസ്ഥാന പ്രസിഡന്‍റ് ജോണി നെല്ലൂര്‍, എംഎല്‍എമാരായ ആന്‍റണി ജോണ്‍, അന്‍വര്‍ സാദത്ത്, പറവൂര്‍ നഗരസഭാ ചെയര്‍പേഴ്‌സണ്‍ ബീന ശശിധരന്‍, വൈസ് ചെയര്‍മാന്‍ എം.ജെ. രാജു, എകെആര്‍ആര്‍ഡിഎ സംസ്ഥാന ജനറല്‍ സെക്രട്ടറി ടി. മുഹമ്മദാലി, സംസ്ഥാന വൈസ് പ്രസിഡന്‍റ് പി.ഡി. പോള്‍, സംസ്ഥാന സെക്രട്ടറിമാരായ കെ.കെ. ഇസഹാക്ക്, പി.ഡി. റോയ്, ബേബി തോമസ്, സ്വാഗതസംഘം ജനറല്‍ കണ്‍വീനര്‍ കെ.എസ്. പൗലോസ് തുടങ്ങിയവര്‍ പങ്കെടുക്കും. അസോസിയേഷന്‍റെ സംസ്ഥാന സമ്മേളനം ഓഗസ്റ്റ് 10,11 തീയതികളിൽ ആലപ്പുഴ റെയ്ബാന്‍ ഓഡിറ്റോറിയത്തില്‍ നടക്കും. 11ന് രാവിലെ പ്രതിനിധി സമ്മേളനം മന്ത്രി. ജി.ആര്‍. അനില്‍ ഉദ്ഘാടനം ചെയ്യും. കൊടിക്കുന്നില്‍ സുരേഷ് എംപി മുഖ്യാതിഥിയാകും. സംസ്ഥാന പ്രസിഡന്‍റ് ജോണി നെല്ലൂര്‍ അധ്യക്ഷത വഹിക്കുന്ന ചടങ്ങില്‍ ജനറല്‍ സെക്രട്ടറി ടി. മുഹമ്മദാലി, ഭാരവാഹികളായ ഭരണിക്കാവ് മോഹന്‍, ഉണ്ണികൃഷ്ണപിള്ള, മോഹന്‍പിള്ള, ജോസ് കാവനാട്, ജോണ്‍സണ്‍ വിളവിനാല്‍, കെ.കെ. ഇസഹാക്ക് എന്നിവര്‍ പ്രസംഗിക്കും.

ഗൃഹനാഥയെ കടിച്ച തെരുവുനായയ്ക്ക് പേവിഷബാധ

ആലുവ: എടത്തല മുതിരക്കാട്ടുമുകളിൽ ഗൃഹനാഥയെ കടിച്ച ശേഷം ചത്ത തെരുവുനായയ്ക്ക് പേവിഷബാധയെന്ന് പോസ്റ്റ്മോർട്ടം റിപ്പോർട്ട്. വീട്ടമ്മയെ ആക്രമിച്ചതിന്‍റെ തൊട്ടടുത്ത ദിവസമാണ് തെരുവുനായ ചത്തത്. തുടർന്ന് നടത്തിയ പോസ്റ്റ്മോർട്ടത്തിൽ പേവിഷബാധ സ്ഥിരീകരിക്കുകയായിരുന്നു. ഇവർ പ്രതിരോധ കുത്തിവയ്പ്പ് എടുത്തിട്ടുണ്ട്. എടത്തല പഞ്ചായത്ത് പ്രസിഡന്‍റിന്‍റെ വാർഡ് കൂടിയായ വരയ്ക്കാലകുടി കോളനി മേഖലയിൽ തെരുവുനായ ശല്യം രൂക്ഷമാണെന്ന് നാട്ടുകാർ പരാതിപ്പെടുന്നു. പഞ്ചായത്ത് അധികൃതർ അടിയന്തരമായി നടപടികൾ സ്വീകരിക്കണമെന്ന് പ്രതിപക്ഷം ആവശ്യപ്പെട്ടു.

കുന്ന്-കോട്ടപ്പുറം പാലത്തിന് ഭരണാനുമതി; ഭൂമി ഏറ്റെടുക്കാൻ നാലുകോടി

ആലങ്ങാട്: കളമശേരി നിയമസഭാ മണ്ഡലത്തിലെ കുന്ന് - കോട്ടപ്പുറം പാലം നിർമാണത്തിനായി തത്വത്തിൽ ഭരണാനുമതി നൽകി സർക്കാർ ഉത്തരവ് പുറപ്പെടുവിച്ചു. ഒന്നാം ഘട്ട ഭൂമി ഏറ്റെടുക്കുന്നതിനായി നാല് കോടി രൂപയാണ് അനുവദിച്ചിരിക്കുന്നത്. കരുമാല്ലൂർ - കുന്നുകര പഞ്ചായത്തുകളെ ബന്ധിപ്പിക്കുന്ന കുന്ന്-കോട്ടപ്പുറം പാലം നിർമാണം ഈ വർഷം ആരംഭിക്കുമെന്ന് മന്ത്രി പി. രാജീവ് പറഞ്ഞു. 345.15 മീറ്റർ നീളമുള്ള പാലത്തിന് ഇരു കരകളിലുമായി മൂന്ന് ലാൻഡ് സ്പാനുകൾ വേണ്ടിവരും. രണ്ടു വരി ഗതാഗത സൗകര്യമൊരുക്കി 7.50 മീറ്റർ വീതിയിലായിരിക്കും നിർമാണം. 1.50 മീറ്റർ നടപ്പാതയും ഇരുവശങ്ങളിലും ഉണ്ടാകും. ആകെ വീതി 11 മീറ്റർ. 39.20 കോടി രൂപയാണ് പാലത്തിന്‍റെ ചെലവ് കണക്കാക്കുന്നത്. കുന്നുകര പഞ്ചായത്തിലെ വയൽകരയും കരുമാല്ലൂർ പഞ്ചായത്തിലെ മാമ്പ്രയും തമ്മിൽ ബന്ധിപ്പിക്കുന്നതാണ് പാലം. നിലവിൽ വഞ്ചികളിലും മറ്റുമാണ് പുഴ കുറുകെ കടക്കുന്നത്. ഇരുകരകളിലുമായി മൂന്ന് മീറ്റർ വീതിയുള്ള പഞ്ചായത്ത് റോഡുകൾ ഉള്ളതിനാൽ സ്ഥലമേറ്റെടുക്കുന്നത് താരതമ്യേന എളുപ്പമായിരിക്കും. 9.86 ആർ സ്ഥലം കുന്നുകര ഭാഗത്തും 8.29 ആർ സ്ഥലം കോട്ടപ്പുറം ഭാഗത്തും അപ്രോച്ച് റോഡിനായി ഏറ്റെടുക്കണം. ഇരുവശത്തുമുള്ള പ്രധാന ജംഗ്ഷനുകളായ കുന്നുകരയ്‌ക്കും കോട്ടപ്പുറത്തിനുമിടയിൽ 2.6 കിലോമീറ്ററാണ് ദൂരം. മാളയിൽനിന്ന് എറണാകുളത്തേക്കുള്ള യാത്രാദൂരം ഗണ്യമായി കുറയ്‌ക്കുമെന്ന് മാത്രമല്ല പ്രദേശത്തിന്‍റെ വികസനത്തിലും പാലം വലിയ പങ്കുവഹിക്കും.

തെരുവുനായ ശല്യത്തിനെതിരെ ജില്ലാതല സമരജാഥ

ആലുവ: തെരുവുനായ ശല്യത്തിന് ശാശ്വത പരിഹാരം ആവശ്യപ്പെട്ട് ജനസേവ തെരുവുനായ വിമുക്ത സംഘത്തിന്‍റെ നേതൃത്വത്തിൽ ജില്ലാതല സമരജാഥ ആരംഭിച്ചു. പ്രസിഡന്‍റ് ജോസ്മാവേലി നയിക്കുന്ന സമരജാഥ പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്തു. ഈ വർഷത്തെ ആദ്യ അഞ്ച് മാസങ്ങൾക്കുള്ളിൽ 1,65,000 പേർക്ക് തെരുവ് നായ്ക്കളുടെ കടിയേറ്റതായി രേഖകൾ പറയുന്നു. മുൻ വർഷങ്ങളെ അപേക്ഷിച്ച് അഞ്ചിരട്ടി വർധനയാണ്. സമരജാഥയുടെ എറണാകുളം ജില്ലാ പര്യടനം അവസാനിക്കുന്ന മുറയ്ക്ക് മറ്റ് ജില്ലകളിലേക്കും ജാഥ വ്യാപിപ്പിച്ച് അവസാനം തിരുവനന്തപുരം സെക്രട്ടേറിയറ്റ് നടയിൽ എത്തിച്ചേരുമെന്ന് ജോസ് മാവേലി അറിയിച്ചു.

ദീപിക നമ്മുടെ ഭാഷ പദ്ധതി : പള്ളുരുത്തി സെന്‍റ് അലോഷ്യസ് സ്കൂളിൽ

ഫോർട്ടുകൊച്ചി: വിദ്യാർഥികളിൽ വായനാശീലം വളർത്തുന്നതിനായി ആവിഷ്കരിച്ച ദീപിക നമ്മുടെ ഭാഷാ പദ്ധതി പള്ളുരുത്തി സെന്‍റ് അലോഷ്യസ് ഐസിഎസ്‌‌‌‌സി സ്കൂളിൽ തുടക്കമായി. നവജീവൻ പ്രേക്ഷിത സംഘമാണ് സ്കൂളിൽ പത്രം സ്പോൺസർ ചെയ്തിരിക്കുന്നത്. സംസ്ഥാന കിൻഫ്രാ ചെയർമാൻ സാബു ജോർജ് പദ്ധതി ഉദ്ഘാടനം ചെയ്തു. നഗരസഭ മുൻക്ഷേമകാര്യ സ്ഥിരംസമിതി അധ്യക്ഷ ഷീബലാൽ മുഖ്യ പ്രസംഗം നടത്തി. നവജീവൻ പ്രേക്ഷിത സംഘം പ്രസിഡന്‍റ് മേരി റെയ്ച്ചൽ അധ്യക്ഷത വഹിച്ചു. പ്രിൻസിപ്പൽ സിസ്റ്റർ ജാൻസി ജോസഫ്, സൽമിന, ശ്രീകല എസ്. നായർ, സെറീന, സുമേഷ്, ജോൺസൻ വള്ളനാട്ട്, അനിത അനിൽ, പോൾ ബെന്നി പുളിക്കൽ എന്നിവർ പ്രസംഗിച്ചു. പെരുമ്പാവൂർ ഗവ. ഗേൾസ് ഹൈസ്കൂളിൽ പെരുമ്പാവൂർ: ദീപിക നമ്മുടെ ഭാഷാ പദ്ധതി പെരുമ്പാവൂർ ഗവ. ഗേൾസ് ഹൈസ്കൂളിൽ പ്രധാനാധ്യാപിക സി.വി. അനുശ്രീ വിദ്യാർഥിനി നേബ മറിയത്തിനു ദീപിക പത്രം നൽകി ഉദ്ഘാടനം ചെയ്തു. അമ്പിളി കരുണാകരൻ, മേരി ഫിലിപ്പ്, റിയ, രമ്യ, ടി.എ. നിബിൻ എന്നിവർ പ്രസംഗിച്ചു. വെങ്ങോലയിൽ പ്രവർത്തിക്കുന്ന തുണ്ടത്തിൽ ഏജൻസീസാണ് സ്കൂളിൽ പത്രം സ്പോൺസർ ചെയ്തിരിക്കുന്നത്.

‘പള്ളുരുത്തി മാർക്കറ്റ് സാമൂഹ്യ വിരുദ്ധരുടെ ഒളിത്താവളം’

ഫോർട്ടുകൊച്ചി: കൊച്ചി കോർപറേഷന്‍റെ 50 സെന്‍റ് സ്ഥലത്ത് രണ്ടരക്കോടി രൂപ ചെലവഴിച്ച് നിർമിച്ച ആധുനിക മത്സ്യമാർക്കറ്റ് ഇപ്പോൾ സാമൂഹ്യ വിരുദ്ധരുടെ ഒളിത്താവളമായി മാറുന്നെന്ന് പരാതി. 16000 സ്ക്വയർ ഫീറ്റ് വിസ്തൃതിയിലാണ് മാർക്കറ്റ് കെട്ടിടം പണി പൂർത്തീകരിച്ചത്. അന്നത്തെ ഫിഷറീസ് മന്ത്രിയായിരുന്ന കെ. ബാബുവിന്‍റെ നിർദേശപ്രകാരം നിർമാണം പൂർത്തീകരിച്ച് കോർപ്പറേഷന് കൈമാറുകയും കോർപ്പറേഷൻ ഈ ആധുനിക മാർക്കറ്റ് ടെൻഡർ ചെയ്തു കച്ചവടക്കാർക്ക് കൈമാറുകയും ചെയ്തു. മാർക്കറ്റിന്‍റെ പ്രവർത്തനം സുഗമമായി മുന്നോട്ടു കൊണ്ടുപോകുവാൻ കഴിയാതെ വരികയും ഇതോടെ മാർക്കറ്റിലേക്ക് സാമൂഹ്യവിരുദ്ധരുടെ ശല്യംമൂലം ജനങ്ങൾക്ക് സുഗമമായിക എത്തിച്ചേരാൻ സാധിക്കാത്ത സാഹചര്യമുണ്ടാവുകയും ചെയ്തു. ഭീമമായ നഷ്ടം സംഭവിച്ചതിനാൽ കച്ചവടക്കാർ ഒന്നോന്നായി നിർത്തി. കഴിഞ്ഞ 15 വർഷക്കാലമായി ഈ മാർക്കറ്റിന്‍റെ പ്രവർത്തനം സുഗമമായി നടത്താൻ കോർപ്പറേഷന് കഴിയാതെയായി. പള്ളുരുത്തി കെഎസ്ഇബി മേജർ സെക്ഷൻ വിഭജനത്തെ തുടർന്ന് 2020 ൽ 8000 സ്ക്വയർ ഫീറ്റ് ഏരിയായിൽ കെഎസ്ഇബിയുടെ പുതിയ ഓഫീസിനായി അന്നത്തെ മേയറായിരുന്ന സൗമിനി ജെയിൻ കൗൺസിലിന്‍റെ അനുവാദത്തോടെ നൽകാൻ തീരുമാനിച്ചെങ്കിലും നടന്നില്ല.

ആശുപത്രിയിൽ ചികിത്സയിലായിരുന്ന കുടുംബത്തിന്‍റെ 26 പവൻ മോഷ്ടിച്ചയാൾ പിടിയിൽ

തൃപ്പൂണിത്തുറ: ആശുപത്രിയിൽ ചികിത്സയിലായിരുന്ന കുടുംബത്തിന്‍റെ 26 പവൻ സ്വർണം മോഷ്ടിച്ചയാളെ പിടികൂടി. കട്ടപ്പന ശാന്തിഗ്രാം പയ്യപ്പിള്ളി വീട്ടിൽ ജെനീഷിനെയാണ് (38) ഹിൽപാലസ് പോലീസ് അറസ്‌റ്റ് ചെയ്‌തത്‌. കഴിഞ്ഞ 22നായിരുന്നു മോഷണം. വടക്കേക്കോട്ട വികെഎം ആശുപത്രിയിൽ ചികിത്സയിലായിരുന്ന കുടുംബം വീട്ടിൽ സ്വർണം വയ്ക്കുന്നത് സുരക്ഷിതമല്ലെന്നു കരുതിയാണ് 22 പവന്‍റെ കോയിനും മൂന്ന് മാലയും കൈയിൽ കരുതിയത്. എന്നാൽ ആശുപത്രിയിൽ മോഷണത്തിനെത്തിയ പ്രതി ഇതു കൈക്കലാക്കുകയായിരുന്നു. പരാതിയെ തുടർന്നു നടത്തിയ അന്വേഷണത്തിൽ പ്രതിയെ ഏറ്റുമാനൂരിൽനിന്നു പിടികൂടി. സ്വർണം എറണാകുളത്തുള്ള ജ്വല്ലറിയിൽനിന്നു മാറ്റി വാങ്ങിയ ശേഷം മൂവാറ്റുപുഴയിലെ ജ്വല്ലറിയിൽ പണയംവച്ചു. ഈ പണമുപയോഗിച്ച് പ്രതി കാറും വാങ്ങിയെന്ന് പോലീസ് പറഞ്ഞു. മുന്പും മോഷണ കേസുകളിൽ ഇയാൾ പ്രതിയാണ്.

ഒരു കിലോ കഞ്ചാവുമായി പിടിയിൽ

ആലുവ: ഷോപ്പിംഗ് കോംപ്ലക്സിന്‍റെ പാർക്കിംഗ് ഏരിയയിൽനിന്നു 1.200 കിലോ കഞ്ചാവുമായി ഒരാളെ പിടികൂടി. കടുങ്ങല്ലൂർ മുപ്പത്തടം പഞ്ചയിൽ വീട്ടിൽ അനസിനെ (സുകേശൻ - 37) യാണ് എക്സൈസ് സംഘം അറസ്റ്റ് ചെയ്തത്. ഒറീസയിൽനിന്നു കഞ്ചാവ് കുറഞ്ഞ വിലയ്ക്ക് ട്രെയിൻ മാർഗം എത്തിച്ച് ചെറിയ പൊതികളാക്കി കോളജ്, സ്കൂൾ വിദ്യാർഥികൾക്ക് കൊടുക്കുന്നുവെന്ന് എക്സൈസ് പറഞ്ഞു. സ്കൂൾ, കോളജ് പരിസരങ്ങളിലാണ് വിൽപ്പന. ഇതിനായി കൊടവത്ത് ഷോപ്പിംഗ് കോംപ്ലക്സ് പാർക്കിംഗ് ഗ്രൗണ്ടിൽ എത്തിയപ്പോഴാണ് ഇയാൾ വലയിലായത്.

നായരമ്പലത്തെ തീരസംരക്ഷണത്തിന് 10 ലക്ഷം കൂടി അനുവദിച്ചു

കൊച്ചി: കടലാക്രമണം രൂക്ഷമായ നായരമ്പലത്ത് ജിയോ ബാഗ് ഉപയോഗിച്ച് താത്കാലിക സംരക്ഷണഭിത്തി നിർമിക്കാന്‍ നായരമ്പലം പഞ്ചായത്തിന് 10 ലക്ഷം രൂപകൂടി അനുവദിച്ചതായി കെ.എന്‍. ഉണ്ണിക്കൃഷ്ണന്‍ എംഎല്‍എ അറിയിച്ചു. നേരത്തെ 39.6 ലക്ഷം രൂപ അനുവദിച്ചിരുന്നു. താല്‍ക്കാലിക തീരസംരക്ഷണ ഭിത്തികള്‍ നിർമിക്കുന്നതിന് ഇറിഗേഷന്‍ വകുപ്പില്‍ നിന്നു ലഭിച്ച എസ്റ്റിമേറ്റിനെ തുടര്‍ന്നാണ് ദുരന്ത നിവാരണ അഥോറിറ്റിയുടെ നടപടി. നായരമ്പലം പുത്തന്‍ കടപ്പുറത്തെ സെന്‍റ് ആന്‍റണീസ് പള്ളിക്കു സമീപം 100 മീറ്റര്‍ ഭാഗത്ത് പുതിയ ജിയോ ബാഗ് ഉപയോഗിച്ച് സംരക്ഷണ ഭിത്തി നിർമിക്കും. പള്ളിക്കു സമീപം മൂന്നുവര്‍ഷം മുമ്പ് സ്ഥാപിച്ച ജിയോ ബാഗ് സംരക്ഷണ ഭിത്തി കടലാക്രമണത്തില്‍ തകര്‍ന്നിരുന്നു. തുടര്‍ന്ന് സമീപത്തെ വീടുകളിലും വെള്ളം കയറി നാശനഷ്ടങ്ങളുണ്ടായി. പള്ളിക്കു ചുറ്റും 89 മീറ്റര്‍ നീളത്തില്‍ സംരക്ഷണ ഭിത്തി നിർമിക്കുന്ന പ്രവൃത്തി തുടരുകയാണ്. എന്നാല്‍ കടലാക്രമണത്തിന്‍റെ രൂക്ഷത കണക്കിലെടുത്ത് ഇവിടെ അധികമായി വരുന്ന 100 മീറ്റര്‍ പ്രദേശത്തു കൂടി പുതിയ ജിയോ ബാഗ് പദ്ധതി നടപ്പാക്കുന്നതു ലക്ഷ്യമിട്ടാണ് 10 ലക്ഷം കൂടി അനുവദിച്ചിട്ടുള്ളത്.

ഹൗസ് ചലഞ്ച് പദ്ധതിയിൽ വീടിന് കല്ലിട്ടു

കൊച്ചി: പാലാരിവട്ടം അര്‍പ്പിത കോണ്‍വെന്‍റിന്‍റെ നേതൃത്വത്തില്‍ സുമനസുകളുടെ സഹായത്തോടെ നടപ്പാക്കുന്ന ഹൗസ് ചലഞ്ച് പദ്ധതിയിൽ നിര്‍മിക്കുന്ന 214-ാമത്തെ വീടിന്‍റെ ശിലാസ്ഥാപനം കുമ്പളങ്ങി പഞ്ചായത്ത് പ്രസിഡന്‍റ് സൂസന്‍ ജോസഫ് നിർവഹിച്ചു. കുമ്പളങ്ങി പഴങ്ങാട് സെന്‍റ് ജോര്‍ജ് ഇടവക വികാരി ഫാ.സെബാസ്റ്റ്യന്‍ ശില ആശീര്‍വദിച്ചു. പദ്ധതി സ്ഥാപക സിസ്റ്റര്‍ ലിസി ചക്കാലക്കല്‍ അധ്യക്ഷത വഹിച്ചു. അര്‍പ്പിത കോണ്‍വെന്‍റ് സുപ്പീരിയര്‍ സിസ്റ്റര്‍ സുനിത മിഞ്ച്, കുമ്പളങ്ങി പഞ്ചായത്ത് മെമ്പര്‍മാരായ റീത്താ പീറ്റര്‍, സജീവ ആന്‍റണി, ഡി.ജെ. ആന്‍റണി തെരുവിപറമ്പില്‍, ഡി.ജി.യേശുദാസ് തെരുവി പറമ്പില്‍, ഹൗസ് ചലഞ്ച് കോ-ഓര്‍ഡിനേറ്റര്‍ ലില്ലി പോള്‍ തുടങ്ങിയവര്‍ പ്രസംഗിച്ചു. കുമ്പളങ്ങി മുട്ടങ്കല്‍ ലിസി ജേക്കബിനും കുടുംബത്തിനുമാണ് ഈ വീട് നിര്‍മിക്കുന്നത്.

മാധ്യമ പ്രവർത്തകനെ ആക്രമിച്ചതിൽ പ്രതിഷേധിച്ചു

പറവൂർ: മാധ്യമ പ്രവർത്തകൻ വി. ദിലീപ്കുമാറിനെ ആക്രമിച്ച സംഭവത്തിൽ കേരള ജേർണലിസ്റ്റ് യൂണിയനും നേർത്ത് പറവൂർ പ്രസ് ക്ലബും സംയുക്തമായി പ്രതിഷേധ യോഗം സംഘടിപ്പിച്ചു. നോർത്ത് പ്രസ് ക്ലബ് പ്രസിഡന്‍റ് സുധീഷ് പട്ടണം അധ്യക്ഷനായിരുന്നു. കഴിഞ്ഞ ദിവസം പഴയ കെഎസ്‌ആർടിസി സ്റ്റാൻഡിന് സമീപത്തുവച്ചാണ് നാലംഗ സംഘം ദിലീപിനെ മർദിച്ചത്. പരിക്കേറ്റ ദിലീപ് പറവൂരിലെ സ്വകാര്യ ആശുപത്രിയിൽ ചികിത്സതേടി. സംഭവത്തിൽ പ്രതികളായ മാഞ്ഞാലി മാട്ടുപുറം തേക്കുംകാട്ടിൽ ടി.എസ്. ഷൈബി (46), വടക്കേക്കര പഴമ്പിള്ളിശേരിൽ പി.എസ്. രാജേന്ദ്രപ്രസാദ്, എറിയാട് സ്വദേശി നൗഷിക് (33), മാക്കനായി സ്വദേശി കൃഷ്ണനുണ്ണി (32) എന്നിവരെ പിടികൂടി.

കിഴമ്പലത്ത് സ്വകാര്യ ബസ്‌‌‌‌‌‌‌സ്റ്റാൻഡിലെ പാർക്കിംഗ് തടഞ്ഞ് സിപിഎം

കിഴക്കമ്പലം: കിഴമ്പലത്തെ സ്വകാര്യ ബസ് സ്റ്റാൻഡിലെ പാർക്കിംഗ് തടഞ്ഞ് സിപിഎം പ്രവർത്തകർ. ഇന്നലെ രാവിലെ മുതലാണ് സ്വകാര്യ ബസ് സ്റ്റാൻഡിൽ പാർക്കിംഗിന് എത്തുന്ന കാറുകളും ടൂ വീലറുകളും കിഴക്കമ്പലം സിപിഎം ലോക്കൽ കമ്മിറ്റിയുടെ നേതൃത്വത്തിൽ പ്രവർത്തകർ തടഞ്ഞത്. പിന്നീട് ഇതിലൂടെ പോകുന്ന സ്വകാര്യ ബസുകളിലെ ജീവനക്കാരോട് സ്റ്റാൻഡിൽ കയറാൻ ആവശ്യപ്പെടുകയായിരുന്നു. ഇതന്നുസരിച്ച് പട്ടിമറ്റം, കോലഞ്ചേരി, മൂവാറ്റുപുഴ, കാക്കനാട് പുക്കാട്ടുപടി, എറണാകുളം, ആലുവ എന്നിവടങ്ങളിലേയ്ക്കു പോകുന്ന മുഴുവൻ ബസുകളും സ്റ്റാൻഡിൽ പ്രവേശിച്ചാണ് പോയത്. ഇതുവഴി വരുന്ന ദീർഘദൂര കെഎസ്ആർടിസി ബസുകളും സ്റ്റാൻഡിൽ പ്രവേശിച്ചാണ് പോയത്. യാത്രക്കാരും സ്കൂൾ വിദ്യാർഥികളും സ്റ്റാൻഡിനകത്ത് പ്രവേശിച്ച് ഇരുവശത്തുള്ള കാത്തിരപ്പു കേന്ദ്രത്തിൽ നിന്നാണ് ബസുകളിൽ കയറിയത്. കഴിഞ്ഞ ജൂൺ രണ്ടിന് അനധികൃത പാർക്കിംഗും ഗതാഗത പരിഷ്ക്കാരവും ആരോപിച്ച് ബസുകൾ സ്റ്റാൻഡിന്‍റെ പരിസരത്ത് നിർത്താതിരിക്കുകയായിരുന്നു. ഇത് ജനങ്ങളെ കഷ്ടത്തിലാക്കിയിരുന്നു. ബസ് സ്റ്റാൻഡ് പ്രവർത്തനം സുഗമമാക്കുനതിനായി മർച്ചന്‍റ്സ് അസോസിയേഷനും കോൺഗ്രസ് മണ്ഡലം കമ്മിറ്റിയും സിപിഎം ലോക്കൽ കമ്മറ്റിയും സ്റ്റാൻഡിൽ ധർണ നടത്തിയിരുന്നു.

‘മണപ്പുറത്തും നടപ്പാലത്തിലും മയക്കുമരുന്ന് സംഘങ്ങൾ തമ്പടിക്കുന്നു’

ആലുവ: പെരിയാറിന് കുറുകെ ആലുവ മണപ്പുറത്തെ ക്ഷേത്രത്തിലേക്ക് പോകാനായി ഉപയോഗിക്കുന്ന നടപ്പാലത്തിലും നടപ്പാലത്തിനടിയിലും മയക്കുമരുന്ന് ഉപയോഗിക്കുന്നവർ തമ്പടിക്കുന്നതായി പരാതി. രാവും പകലും സംഘമായെത്തി കുളിയും മയക്കുമരുന്നടിച്ച് മണപ്പുറത്ത് റോന്ത് ചുറ്റലും നടത്തുന്നതായാണ് ഭക്തജനങ്ങളുടെ ആക്ഷേപം.മണപ്പുറം ശിവക്ഷേത്രത്തിന് സമീപമാണ് പട്ടാപകൽ എത്തി കൂട്ടമായി മയക്കുമരുന്ന് ഉപയോഗിക്കുന്നത്. അക്രമാസക്തരാകുമെന്ന ഭയത്താൽ സ്ത്രീകളും കുട്ടികളുമടങ്ങുന്ന ഭക്തജനങ്ങൾ പ്രതികരിക്കാതെ പോകുന്നത് മയക്കുമരുന്നു സംഘങ്ങൾക്ക് ധൈര്യം നൽകുന്നുണ്ട്. കഴിഞ്ഞ ദിവസം നടപ്പാലത്തിനടിയിൽ മയക്കുമരുന്നു ലഹരിയിൽ സംഘങ്ങൾ തമ്മിൽ ഏറ്റുമുട്ടി ഒരാളെ പുഴയിലേക്ക് തള്ളിയിട്ടു. നാട്ടുകാർ എത്തിയാണ് യുവാവിനെ പുഴയിൽനിന്ന് രക്ഷിച്ചത്. പോലീസ് ഇടയ്ക്കിടെ റോന്ത്ചുറ്റുമെങ്കിലും മയകുമരുന്ന് മാഫിയയെ തളയ്ക്കാനാകുന്നില്ലെന്നാണ് ഭക്തജനങ്ങൾ പറയുന്നത്.

ജിയോ ബാഗ്: നായരമ്പലത്തിനു 10 ലക്ഷം കൂടി

വൈപ്പിൻ: ജിയോബാഗ് ഉപയോഗിച്ച് കടൽ തീരത്ത് താൽക്കാലിക സംരക്ഷണ ഭിത്തി നിർമിക്കാൻ നായരമ്പലം പഞ്ചായത്തിന് 10 ലക്ഷം രൂപ കൂടി അനുവദിച്ചതായി കെ.എൻ. ഉണ്ണിക്കൃഷ്ണൻ എംഎൽഎ അറിയിച്ചു. ദുരന്ത നിവാരണ അഥോറിറ്റിയാണ് ഫണ്ട് അനുവദിച്ചിട്ടുള്ളത്. പുത്തൻ കടപ്പുറത്തെ സെന്‍റ് ആന്‍റണീസ് പള്ളിക്കു സമീപം 100 മീറ്റർ ഭാഗത്തുകൂടി പുതുതായി സംരക്ഷണഭിത്തി നിർമിക്കാനാണ് പുതിയ ഫണ്ട്. പള്ളിക്കു സമീപം 89 മീറ്റർ നീളത്തിൽ സംരക്ഷണഭിത്തി നിർമിക്കുന്നതിനുള്ള ഫണ്ടിനു പുറമെയാണിത്.

ബിജെപി മാർച്ചിനിടെ കോതമംഗലത്ത് സംഘർഷം, ഒരാൾക്ക് പരിക്ക്

കോതമംഗലം: ബിജെപി മാർച്ചിനിടയിൽ കോതമംഗലത്ത് സംഘർഷം. ഒരാൾക്ക് പരിക്ക്. ആരോഗ്യ മേഖലയിലെ അഴിമതി അവസാനിപ്പിക്കുക, ആരോഗ്യമന്ത്രി വീണാ ജോർജ് രാജിവയ്ക്കുക തുടങ്ങിയ ആവശ്യങ്ങളുമായി ബിജെപി ഈസ്റ്റ് ജില്ലാ കമ്മിറ്റി സംഘടിപ്പിച്ച കോതമംഗലം താലൂക്ക് ആശുപത്രി മാർച്ചിനിടെയായിരുന്നു സംഘർഷം. ആശുപത്രി കവാടത്തിൽ സമരക്കാരെ പോലിസ് തടഞ്ഞതോടെയാണ് സംഘർഷാവസ്ഥയുണ്ടായത്. പ്രവർത്തകരും പോലീസും തമ്മിൽ ഉന്തുംതള്ളുമുണ്ടായി. പോലിസ് വലയം ഭേദിച്ച് ആശുപത്രി കോന്പൗണ്ടിൽ പ്രവേശിച്ച പ്രവർത്തകയെ പിടിച്ച് പുറത്തെത്തിക്കുകയായിരുന്നു. പോലിസുമായുള്ള പിടിവലിക്കിടെ കോട്ടപ്പടിയിൽ നിന്നുളള റീനാ ലാജുവിന്‍റെ കൈക്ക് പരിക്കേൽക്കുകയും ചെയ്തു. സംഘർഷാവസ്ഥ ഒഴിഞ്ഞതിനേ തുടർന്ന് നടത്തിയ ധർണ സംസ്ഥാന വൈസ് പ്രസിഡന്‍റ് ജെ. പ്രമീളാദേവി ഉദ്ഘാടനം ചെയ്തു. ആരോഗ്യമേഖലയിലെ കെടുകാര്യസ്ഥതയും അഴിമതിയുമാണ് ഇപ്പോൾ വിവിധ സംഭവങ്ങളിലൂടെ പുറത്തുവന്നിരിക്കുന്നതെന്ന് അവർ പറഞ്ഞു. ജില്ലാ പ്രസിഡന്‍റ് പി.പി. സജീവ് അധ്യക്ഷത വഹിച്ചു. എം.എൻ. മധു, സൂരജ് ജോണ്‍, അരുണ്‍ പി. മോഹൻ, കെ. ചന്ദ്രൻ, വിനുകുമാർ, അരുണ്‍ മാമലശേരി, ജില്ലാ ജനറൽ സെക്രട്ടറി ഇ.റ്റി. നടരാജൻ, ഉണ്ണികൃഷ്ണൻ മാങ്ങോട് എന്നിവർ പ്രസംഗിച്ചു.

വിദ്യാസ്പർശം കുഴൽനാടൻസ് മെറിറ്റ് അവാർഡ് വിതരണം

വാഴക്കുളം : ഉന്നത വിജയം കരസ്ഥമാക്കിയ വിദ്യാർഥികളെ ആദരിക്കുന്നതിന് മാത്യു കുഴൽനാടൻ എംഎൽഎ ആരംഭിച്ച വിദ്യാസ്പർശം കുഴൽനാടൻസ് മെറിറ്റ് അവാർഡ് 2025 വിതരണം വാഴക്കുളത്ത് സംഘടിപ്പിച്ചു. വാഴക്കുളം ലിറ്റിൽ തെരേസാസിൽ നടത്തിയ ചടങ്ങിൽ മഞ്ഞള്ളൂർ പഞ്ചായത്തിലെ എസ്എസ്എൽസി, പ്ലസ് ടു, ബിരുദം, ബിരുദാനന്തര ബിരുദം പരീക്ഷകളിൽ ഉന്നത വിജയം നേടിയ വിദ്യാർഥികളെയും നൂറ് ശതമാനം വിജയം നേടിയ സ്കളുകളെയും എംഎൽഎ അവാർഡ് നൽകി ആദരിച്ചു. മഞ്ഞള്ളൂർ പഞ്ചായത്ത് പ്രസിഡന്‍റ് ആൻസി ജോസ് അധ്യക്ഷത വഹിച്ചു. ചടങ്ങിൽ പഞ്ചായത്ത് വൈസ് പ്രസിഡന്‍റ് ടോമി തന്നിട്ടാമാക്കൽ, കോണ്‍ഗ്രസ് മണ്ഡലം പ്രസിഡന്‍റ് സാന്േ‍റാസ് മാത്യു, മൂവാറ്റുപുഴ ബ്ലോക്ക് പഞ്ചായത്ത് വൈസ് പ്രസിഡന്‍റ് ജോസി ജോളി, ജോസ് കൊട്ടുപിള്ളിൽ, ബിന്ദു ഗോപി, രതീഷ് മോഹനൻ, സെലിൻ ഫ്രാൻസിസ്, ജയമോൾ സന്തോഷ്, സ്കൂൾ പ്രധാനാധ്യാപിക സിസ്റ്റർ മെറിൻ സിഎംസി തുടങ്ങിയവർ പ്രസംഗിച്ചു. പാലക്കുഴ: കുഴൽനടൻസ് മെറിറ്റ് അവാർഡിന്‍റെ ഭാഗമായി പാലക്കുഴയിൽ വിദ്യാർഥികളെ ആദരിച്ചു. ആറ് ദിവസങ്ങളിലായി ഓരോ ദിവസവും രണ്ട് പഞ്ചായത്തിൽ വീതമായാണ് വിദ്യാസ്പർശം നടക്കുന്നത്. കോണ്‍ഗ്രസ് പാലക്കുഴ മണ്ഡലം പ്രസിഡന്‍റ് സാജു വർഗീസ് കൊരങ്ങോലിതടത്തിൽ അധ്യക്ഷത വഹിച്ചു. ബ്ലോക്ക് അംഗം സിബി പി. ജോർജ്, ജില്ലാ പഞ്ചായത്ത് മുൻ പ്രസിഡന്‍റ് ഉല്ലാസ് തോമസ് മുഖ്യസന്ദേശം നൽകി. പഞ്ചാത്തംഗം ഇ.കെ മജീഷ്, മുൻ പഞ്ചായത്ത് വൈസ് പ്രസിഡന്‍റുമാരായ ടി.എൻ സുനിൽ, സനിത ബിജു, മുൻ പഞ്ചായത്തംഗങ്ങളായ സോയൂസ് ജേക്കഫ്, ജെയ്സണ്‍ ജോർജ് എന്നിവർ പങ്കെടുത്തു.

ദേശീയ ഗ്രാമീണ തൊഴിലുറപ്പ് പദ്ധതി: കുട്ടന്പുഴ പഞ്ചായത്തിന് പുരസ്കാരം

കോതമംഗലം: കോതമംഗലം ബ്ലോക്കിൽ മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ ഏറ്റവും കൂടുതൽ തൊഴിൽദിനം സൃഷ്ടിച്ച പഞ്ചായത്തിനുള്ള ബ്ലോക്ക് പഞ്ചായത്ത് അവാർഡ് കുട്ടന്പുഴ പഞ്ചായത്തിന് ലഭിച്ചു. 2024-25 സാന്പത്തിക വർഷത്തിൽ ബ്ലോക്ക് പഞ്ചായത്ത് പരിധിയിലെ 10 പഞ്ചായത്തുകളിൽ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ വിവിധ വിഭാഗങ്ങളിലായി തുക ചെലവഴിച്ചത് വിലയിരുത്തിയാണ് അവാർഡ് നൽകിയത്. കഴിഞ്ഞ സാന്പത്തിക വർഷം 1,51,470 തൊഴിൽ ദിനങ്ങളാണ് കുട്ടന്പുഴ പഞ്ചായത്തിൽ നൽകിയത്. അതിൽ 796 കുടുംബങ്ങൾ എസ്ടി വിഭാഗത്തിലുണ്ട്. കൂടാതെ നൂറു തൊഴിൽ ദിനങ്ങൾ ലഭിച്ച 493 കുടുംബങ്ങൾ കുട്ടന്പുഴയിലാണ്. 75,18,000 രൂപയുടെ മെറ്റീരിയൽ വർക്ക് പഞ്ചായത്തിൽ പൂർത്തീകരിച്ചിട്ടുണ്ട്. ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ അവാർഡ് ചടങ്ങ് ഉദ്ഘാടനം ചെയ്തു. വികസന കാര്യ സ്ഥിരം സമിതി അധ്യക്ഷൻ ജോമി തെക്കേക്കര അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി, കുട്ടന്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷൻ ജെയിംസ് കോറന്പേൽ, ബ്ലോക്ക് പഞ്ചായത്തംഗങ്ങളായ നിസമോൾ ഇസ്മായിൽ, റ്റി.കെ. കുഞ്ഞുമോൻ, ആനിസ് ഫ്രാൻസിസ്, സാലി ഐപ്പ്, പഞ്ചായത്തംഗങ്ങളായ കെ.എ. സിബി, ഇ.സി. റോയി, എൽദോസ് ബേബി, ജോഷി പൊട്ടക്കൽ, ബിഡിഒ സി.ഒ. അമിത എന്നിവർ പ്രസംഗിച്ചു.

വായനാപക്ഷാചരണം സമാപനം

മൂവാറ്റുപുഴ: മൂവാറ്റുപുഴ താലൂക്ക് ലൈബ്രറി കൗണ്‍സിൽ മുനിസിപ്പൽ നേതൃസമിതിയുടെ സഹകരണത്തോടെ കിഴക്കേക്കര ഗവ. ഈസ്റ്റ് ഹൈസ്കൂളിൽ നടത്തിയ വായനാ പക്ഷാചരണത്തിന്‍റെ സമാപന സമ്മേളനവും ഐ.വി. ദാസ് അനുസ്മരണവും എഴുത്തുകാരി ലേഖ കാക്കനാട് ഉദ്ഘാടനം ചെയ്തു. താലൂക്ക് ലൈബ്രറി കൗണ്‍സിൽ പ്രസിഡന്‍റ് ജോഷി സ്കറിയ അധ്യക്ഷത വഹിച്ചു. നഗരസഭാംഗം മേരിക്കുട്ടി ചാക്കോ മുഖ്യ പ്രഭാഷണം നടത്തി. സ്കൂളിലെ വിവിധ ക്ലബുകളുടെ ഉദ്ഘാടനം കവിയും ഗാനരചയിതാവുമായ ജയകുമാർ ചെങ്ങമനാട് നിർവഹിച്ചു. ഗ്രന്ഥശാല പ്രസ്ഥാനത്തെ ജനകീയമാക്കിയ ഐ.വി. ദാസ് അനുസ്മരണ പ്രഭാഷണം താലൂക്ക് ലൈബ്രറി കൗണ്‍സിൽ വൈസ് പ്രസിഡന്‍റും എഴുത്തുകാരിയുമായ സിന്ധു ഉല്ലാസ് നിർവഹിച്ചു. ജില്ലാ ലൈബ്രറി കൗണ്‍സിൽ അംഗം കെ. മോഹനൻ, നേതൃസമിതി കണ്‍വീനർ ആർ. രാജീവ്, താലൂക്ക് എക്സിക്യൂട്ടീവംഗം എം.എ എൽദോസ്, പിടിഎ പ്രസിഡന്‍റ് വി.എൻ സന്തോഷ് കുമാർ, സ്കൂൾ സംരക്ഷണ സമിതി ചെയർമാൻ എൻ.കെ രാജൻ, താലൂക്ക് ലൈബ്രറി കൗണ്‍സിൽ സെക്രട്ടറി സി.കെ ഉണ്ണി, സ്കൂൾ പ്രധാനാധ്യാപിക ടി. വിജയകുമാരി എന്നിവർ പ്രസംഗിച്ചു. തുടർന്ന് അക്ഷരമാണ് ലഹരി എന്ന സന്ദേശമുൾക്കൊള്ളുന്ന കുട്ടികളുടെ സംഗീത ശില്പവും അവതരിപ്പിച്ചു.

ലഹരിക്കെതിരെ ജനകീയ കൂട്ടായ്മ

കല്ലൂർക്കാട് : ലഹരിക്കെതിരേ കല്ലൂർക്കാട് ജനകീയ കൂട്ടായ്മ സംഘടിപ്പിച്ചു. കല്ലൂർക്കാട് വൈസ്മെൻ ക്ലബിൽ നടന്ന ജനകീയ കൂട്ടായ്മ കല്ലൂർക്കാട് ഫാർമേഴ്സ് സഹകരണ ബാങ്ക് പ്രസിഡന്‍റ് ജോളി ജോർജ് ഉദ്ഘാടനം ചെയ്തു. ജോളി ജോസഫ് അധ്യക്ഷത വഹിച്ചു. മുവാറ്റുപുഴ അസിസ്റ്റന്‍റ് എക്സൈസ് ഇൻസ്പെക്ടർ പി.പി. ഹസൈനാർ മുഖ്യപ്രഭാഷണം നടത്തി ലഹരി വിരുദ്ധ പ്രതിജ്ഞയും ചൊല്ലിക്കൊടുത്തു. കല്ലൂർക്കാട് എഎസ്ഐ ജിമോൻ ജോർജ് ക്ലാസുകൾ നയിച്ചു. മുവാറ്റുപുഴ ബ്ലോക്ക് പഞ്ചായത്തംഗം പ്രഫ, ജോസ് അഗസ്റ്റിൻ, പഞ്ചായത്തംഗം ബാബു മനക്കപ്പറന്പിൽ എന്നിവർ പ്രസംഗിച്ചു. ഭാരവാഹികളായി ജോളി ജോർജ് -പ്രസിഡന്‍റ്, സിജോ ജോർജ്-വൈസ് പ്രസിഡന്‍റ്, ജോയി തോമസ്-സെക്രട്ടറി, ആർ.സി ഫ്രാൻസിസ്-ജോയിന്‍റ് സെക്രട്ടറി, ബിജു ജോസഫ്-ട്രഷറർ, ജോളി ജോസഫ്-കണ്‍വീനർ എന്നിവരെ തെരഞ്ഞെടുത്തു.

ഇൻവെസ്റ്റിച്ചർ സെറിമണി നടത്തി

ഇലഞ്ഞി: സെന്‍റ് ഫിലോമിനാസ് പബ്ലിക് സ്കൂൾ ആൻഡ് ജൂണിയർ കോളജിൽ സ്കൂൾ ലീഡേഴ്സിന്‍റെയും ജനറൽ ക്യാപ്റ്റന്‍റെയും വിവിധ ഹൗസുകളുടെ ക്യാപ്റ്റൻമാരുടെയും ഇൻവെസ്റ്റിച്ചർ സെറിമണി നടന്നു. ഫാ. ജോണ്‍ എർണ്യാകുളത്തിൽ അധ്യക്ഷത വഹിച്ചു. യോഗത്തിൽ വിസാറ്റ് എൻജിനീയറിംഗ് കോളജ് ചെയർമാനും വിഖ്യാത വ്യവസായിയുമായ രാജു കുര്യൻ പാന്പാടി തെരഞ്ഞെടുക്കപ്പെട്ട കുട്ടികളെ സ്ഥാനചിഹ്നങ്ങൾ അണിയിച്ചു. ജോജു ജോസഫ് സത്യവാചകം ചൊല്ലിക്കൊടുത്തു. ഡോ. വി.എം. മാത്യു, ഡോ. സെൽവി സേവ്യർ, ജാസ്മിൻ ജേക്കബ്, സാലി കെ. മത്തായി, ജോയ്സി പോൾ, ഫെബി തോമസ് ബിജു, ജോവാന ജോസ് എന്നിവർ പ്രസംഗിച്ചു. വിവിധ ക്ലബുകളുടെ പ്രവർത്തനോദ്ഘാടനവും രാജു കുര്യൻ നിർവഹിച്ചു.

ലഹരി വിരുദ്ധ സന്ദേശ യാത്രയ്ക്ക് സ്വീകരണം

കോലഞ്ചേരി: മലങ്കര ഓർത്തഡോക്സ് സുറിയാനി സഭ ഓർത്തഡോക്സ് ക്രൈസ്തവ യുവജന പ്രസ്ഥാനത്തിന്‍റെ നേതൃത്വത്തിൽ നടത്തുന്ന ലഹരി വിരുദ്ധ സന്ദേശ യാത്രയ്ക്ക് കോലഞ്ചേരിയിൽ കണ്ടനാട് വെസ്റ്റ് ഭദ്രാസന യുവജനപ്രസ്ഥാനം സ്വീകരണം നൽകി. ഭദ്രാസന സെക്രട്ടറി ഫാ. ജോസ് തോമസ് പൂവത്തുങ്കൽ അധ്യക്ഷനായി. അഡ്വ. പി.വി. ശ്രീനിജൻ എംഎൽഎ ഉദ്ഘാടനം ചെയ്തു. അനൂപ് ജേക്കബ് എംഎൽഎ ലഹരി വിരുദ്ധ സന്ദേശവും, മലങ്കര സഭ മദ്യവർജന സമിതി പ്രസിഡന്‍റ് യുഹാനോൻ മാർ പോളികാർപോസ് മെത്രാപ്പോലീത്ത മുഖ്യസന്ദേശവും നൽകി. കണ്ടനാട് വെസ്റ്റ് ഭദ്രാസന സഹായ മെത്രാപ്പോലീത്ത സഖറിയ മാർ സേവേറിയോസ് ലഹരി വിരുദ്ധ റാലി ഫ്ലാഗ് ഓഫ് ചെയ്തു. മലങ്കര സഭാ വർക്കിംഗ് കമ്മിറ്റി അംഗം ഫാ. ജേക്കബ് കുര്യൻ ചെമ്മനം, മദ്യവർജന സമിതി പ്രസിഡന്‍റ് റവ. ഡോ. തോമസ് ചകിരിയിൽ, ലഹരി വിരുദ്ധ സന്ദേശ യാത്ര മധ്യ മേഖല കൺവീനർ പേൾ കണ്ണേത്ത്, യുവജനപ്രസ്ഥാനം ഭദ്രാസന വൈസ് പ്രസിഡന്‍റ് ഫാ. ബേസിൽ ജോർജ് മാളിയേക്കൽകുഴിയിൽ, ഫാ. അനു തോമസ്, എൽദോസ് പുള്ളോർമ്മടം, ആൽഡിറിൻ ബെന്നി, ബേസിൽ എന്നിവർ പ്രസംഗിച്ചു.

സംയോജിത കൃഷിക്ക് തുടക്കം

മൂവാറ്റുപുഴ: കൃഷി പ്രോത്സാഹിപ്പിക്കുന്നതിന് സിപിഎം മൂവാറ്റുപുഴ ഏരിയ കമ്മിറ്റിയുടെ നേതൃത്വത്തിൽ വർഗ ബഹുജന സംഘടനകളുടെ സഹകരണത്തോടെ മുളവൂർ ലോക്കൽ കമ്മിറ്റിയിലെ ആട്ടായം കിഴക്കേക്കടവ് പാടത്ത് സംയോജിത കൃഷി കതിർ തുടങ്ങി. പച്ചക്കറികളാണ് ഉത്പാദിപ്പിക്കുക സിപിഎം ജില്ലാ സെക്രട്ടറിയേറ്റംഗം പി.ആർ. മുരളീധരൻ ഉദ്ഘാടനം ചെയ്തു. ഏരിയ സെക്രട്ടറി അനീഷ് എം. മാത്യു അധ്യക്ഷത വഹിച്ചു. ഏരിയ കമ്മിറ്റിംഗങ്ങളായ എം.ആർ. പ്രഭാകരൻ, എം.എ. സഹീർ, ലോക്കൽ സെക്രട്ടറി ഒ.കെ. മുഹമ്മദ്, ഡിവൈഎഫ്ഐ ബ്ലോക്ക് സെക്രട്ടറി ഫെബിൻ പി. മൂസ, പ്രസിഡന്‍റ് കെ.കെ. അനീഷ്. ഇ.എം. ഷാജി, പി.എ. മൈതീൻ, പി.ജി. പ്രദീപ് കുമാർ തുടങ്ങിയവർ പ്രസംഗിച്ചു.

സെമിനാർ സംഘടിപ്പിച്ചു

കോതമംഗലം : കീരംപാറ സെന്‍റ് സെബാസ്റ്റ്യൻസ് ഇടവക സണ്‍ഡേ സ്കൂൾ കുട്ടികളുടെ മാതാപിതാക്കൾക്കായി ഗുഡ് പാരന്‍റിംഗ് ആൻഡ് പോസീറ്റീവ് തിങ്കിംഗ് എന്ന വിഷയത്തിൽ സെമിനാർ സംഘടിപ്പിച്ചു. ഇടവക വികാരി ഫാ. മാത്യു കൊച്ചുപുരയ്ക്കൽ ഉദ്ഘാടനം ചെയ്തു. ഇടുക്കി ജില്ല മുൻ പ്ലാനിംഗ് ഓഫീസർ ഡോ. സാബു വർഗീസ് ക്ലാസ് നയിച്ചു. പ്രധാനാധ്യാപിക ജിൻസി ജോമോൻ അധ്യക്ഷത വഹിച്ചു. അധ്യാപകരായ ജോണ്‍സൻ കറുകപ്പിള്ളിൽ, ജിജി പുളിക്കൽ, ലിനു ഷിബി, ഷോജി കണ്ണംപുഴ, കൈക്കാരൻ ജെയിംസ് തെക്കേക്കര, പിറ്റിഎ പ്രതിനിധികളായ ബിൻസ് ചെരിപ്പുറം, സിജി സജി എന്നിവർ പ്രസംഗിച്ചു.

ഐഎംഎ വനിതാ വിഭാഗം മധ്യമേഖലാ സമ്മേളനം

മൂവാറ്റുപുഴ: ഇന്ത്യൻ മെഡിക്കൽ അസോസിയേഷൻ വനിതാ വിഭാഗം മധ്യമേഖലാ സമ്മേളനം മൂവാറ്റുപുഴയിൽ നടന്നു. വിമ സ്പർശ് എന്ന പേരിൽ നടന്ന സമ്മേളനം ഐഎംഎ സംസ്ഥാന പ്രസിഡന്‍റ് ഡോ. ശ്രീവിലാസൻ ഉദ്ഘാടനം ചെയ്തു. ഹൈക്കോടതിയിലെ ആദ്യ ഡെപ്യൂട്ടി സോളിസിറ്റർ ജനറലായി ചുമതലയേറ്റ ഒ.എം. ശാലീനയെ ചടങ്ങിൽ ആദരിച്ചു. വിമാ സംസ്ഥാന ചെയർപേഴ്സണ്‍ ഡോ. ആശോക വത്സല, സംസ്ഥാന സെക്രട്ടറി ഡോ. സി.ജി ബിന്ദു, മൂവാറ്റുപുഴ ചെയർപേഴ്സണ്‍ ഡോ. മഞ്ജു രാജഗോപാൽ, സെക്രട്ടറി ഡോ. തമന്ന ഷേണായി, ഐഎംഎ മൂവാറ്റുപൂഴ പ്രസിഡന്‍റ് ഡോ. എബ്രഹാം മാത്യു, സെക്രട്ടറി ഡോ. നിഖിൽ മാർട്ടിൻ എന്നിവർ പ്രസംഗിച്ചു. എന്താണ് വനിതകൾക്ക് വേണ്ടത് എന്ന വിഷയത്തിൽ നടന്ന സംവാദത്തിൽ ഡോ. കുക്കു മത്തായി, ജിയാ മത്തായി കണ്ടത്തിൽ, ഡോ. അക്ഷയ് പ്രഭു എന്നിവർ പ്രസംഗിച്ചു. സാംസ്കാരിക പരിപാടികളും അരങ്ങേറി. എറണാകുളം, തൃശൂർ, ഇടുക്കി, കോട്ടയം ജില്ലകളിൽ നിന്നുള്ള പ്രതിനിധികളാണ് പങ്കെടുത്തത്.

മൂവാറ്റുപുഴയിൽ പണിമുടക്ക് വിളംബര റാലി നടത്തി

മൂവാറ്റുപുഴ: ദേശീയ പണിമുടക്കിന് മുന്നോടിയായി സർക്കാർ ജീവനക്കാരുടേയും അധ്യാപകരുടെയും സംയുക്ത സമര സമിതിയുടെ നേതൃത്വത്തിൽ മൂവാറ്റുപുഴയിൽ പണിമുടക്ക് റാലി നടത്തി. തുടർന്ന് നെഹ്റു പാർക്കിൽ ചേർന്ന വിശദീകരണ യോഗം കെഎസ്ടിഎ സംസ്ഥാന എക്സിക്യൂട്ടീവംഗം ഏലിയാസ് മാത്യു ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് ഷാജി ജോണ്‍ അധ്യക്ഷത വഹിച്ചു. എൻജിഒ യൂണിയൻ ജില്ലാ ജോയിന്‍റ് സെക്രട്ടറി കെ.സി സുനിൽകുമാർ, കെജിഒഎ ജില്ലാ സെക്രട്ടറിയേറ്റംഗം ഡി. ഉല്ലാസ്, കെജിഎൻഎ ജില്ലാ വൈസ് എം.എ മുഹമ്മദാലി എന്നിവർ പ്രസംഗിച്ചു.

ശ്രേഷ്ഠ ബാവയ്ക്ക് വരവേൽപ്പും ഇവന്‍റ് സെന്‍ററിന്‍റെ ഉദ്ഘാടനവും

കോതമംഗലം : ചേലാട് സെന്‍റ് ഗ്രിഗോറിയോസ് ഡെന്‍റൽ കോളജിൽ ശ്രേഷ്ഠ ബാവയ്ക്ക് വരവേൽപ്പും ഇവന്‍റ് സെന്‍ററിന്‍റെ ഉദ്ഘാടനവും നവീകരിച്ച കോളജിന്‍റെ കൂദാശയും 10ന് വൈകുന്നേരം അഞ്ചിന് നടക്കും. യാക്കോബായ സഭയുടെ കാതോലിക്കയും കോളജ് ചെയർമാനുമായ ശ്രേഷ്ഠ കാതോലിക്ക ബസേലിയോസ് മാർ ജോസഫ് ബാവയ്ക്ക് കോളജിന്‍റെ ആഭിമുഖ്യത്തിൽ സ്വീകരണം നല്കും. മന്ത്രി റോഷി അഗസ്റ്റിൻ ഉദ്ഘാടനം ചെയ്യും. കോതമംഗലം മേഖല മെത്രാപ്പോലീത്ത ഏലിയാസ് മാർ യൂലിയോസ് അധ്യക്ഷത വഹിക്കും. മലങ്കര കത്തോലിക്ക സഭയുടെ മൂവാറ്റുപുഴ മേഖല മെത്രാപ്പോലീത്ത യോഹന്നാൻ മാർ തെയോഡോഷ്യസ് മുഖ്യപ്രഭാഷണം നടത്തും. ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ, ജനപ്രതിനിധികൾ എഡ്യൂക്കേഷൻ ട്രസ്റ്റ് ഭാരവാഹികൾ, സഭാ ഭാരവാഹികൾ, സഭാ വർക്കിംഗ് കമ്മിറ്റിയംഗങ്ങൾ, ട്രസ്റ്റ് ഷെയർ ഹോൾഡേഴ്സ്, കോളജ് മാനേജിംഗ് കൗണ്‍സിൽ അംഗങ്ങൾ മറ്റ് അതിഥികൾ എന്നിവർ പങ്കെടുക്കെുമെന്ന് പ്രിൻസിപ്പൽ ഡോ. ജെയിൻ മാത്യു, വൈസ് പ്രിൻസിപ്പൽ ഡോ. ടീന ജേക്കബ്, അഡ്മിനിസ്ട്രേറ്റീവ് ഓഫീസർ എൽദോസ് ഐസക് എന്നിവർ അറിയിച്ചു.

ചരക്കുലോറിക്കു പിന്നിലിടിച്ച് ബൈക്ക് യാത്രികൻ മരിച്ചു

നെടുന്പാശേരി: ദേശീയപാതയിൽ അങ്കമാലിക്കു സമീപം ചെറിയ വാപ്പാലശേരിയിൽ ചരക്കു ലോറിക്ക് പിന്നിലിടിച്ച് ബൈക്ക് യാത്രികനായ യുവാവ് മരിച്ചു. അപകടത്തിനിടയാക്കിയ ലോറി നിർത്താതെ പോയി. ഇടുക്കി തോപ്രാംകുടി നെല്ലാനിക്കൽ വീട്ടിൽ തങ്കച്ചന്‍റെ (തങ്കച്ചൻ നാരായണൻ) മകൻ അഭിജിത്താണ് (24) മരിച്ചത്. കുന്നുകര ചുങ്കം ഭാഗത്തെ റൂഫിംഗ് കന്പനിയിലെ (ലേസർ ലൈറ്റ്) സൂപ്പർവൈസറായ അഭിജിത്ത് അങ്കമാലിയിലേക്ക് ബൈക്കിൽ പോകുന്പോഴായിരുന്നു അപകടം . ബൈക്ക് പൂർണമായി തകർന്നു. അവശനിലയിലായ അഭിജിത്തിനെ ഉടനെ അങ്കമാലി ലിറ്റിൽ ഫ്ളവർ ആശുപത്രിയിലെത്തിച്ചെങ്കിലും ജീവൻ രക്ഷിതാനായില്ല . അങ്കമാലി ഗവ. താലൂക്ക് ആശുപത്രിയിൽ പോസ്റ്റുമാർട്ടത്തിനുശേഷം മൃതദേഹം ബന്ധുക്കൾക്ക് വിട്ടുകൊടുത്തു. അപകടത്തിനിടയാക്കിയ ലോറി കണ്ടെത്താൻ പോലീസ് സിസിടിവി കാമറകൾ പരിശോധിച്ച് അന്വേഷണം നടത്തി വരികയാണ്. മരിച്ച അഭിജിത്ത് അവിവാഹിതനാണ്. അമ്മ: ജലജ. സഹോദരങ്ങൾ: ആര്യമോൾ, അർച്ചന.

പെയിന്‍റിംഗ് തൊഴിലാളി ഓട്ടോയിടിച്ച് മരിച്ചു

പിറവം: റോഡ് കുറുകെ കടക്കുന്പോൾ ഓട്ടോറിക്ഷ ഇടിച്ച് പെയിന്‍റിംഗ് തൊഴിലാളിയായ യുവാവ് മരിച്ചു. കക്കാട് ആനക്കാവിൽ മനു രാജ് (39) ആണ് മരിച്ചത്. കഴിഞ്ഞ ഞായറാഴ്ച രാത്രി ഒന്പതരയോടെ പിറവം പള്ളിക്കവലയിൽ പള്ളിയുടെ കവാടത്തിനടുത്താണ് അപകടമുണ്ടായത്. റോഡ് മുറിച്ചു കടക്കുന്പോൾ കക്കാട് ഭാഗത്തുനിന്നു വന്ന ഓട്ടോയിടിക്കുകയായിരുന്നു. പിറവത്തെ സ്വകാര്യ ആശുപത്രിയിൽ പ്രവേശിപ്പിച്ച മനുവിനെ വിദഗ്ധചികിത്സയ്ക്കായി കോട്ടയം മെഡിക്കൽ കോളജ് ആശുപത്രിയിലേക്ക് മാറ്റിയെങ്കിലും തിങ്കളാഴ്ച രാവിലെ മരിച്ചു. കക്കാട് ആനക്കാവിൽ പരേതരായ അയ്യപ്പന്‍റെയും കുഞ്ഞുമോളുടെയും മകനാണ്. സഹോദരൻ അനുരാജ്. സംസ്കാരം ഇന്ന് പത്തിന് കണ്ണീറ്റുമല ശ്മശാനത്തിൽ.

മന്ത്രി വീണ ജോർജ് രാജിവയ്ക്കണം; കോലം കത്തിച്ച് പ്രതിഷേധിച്ചു

മൂവാറ്റുപുഴ: കോട്ടയം മെഡിക്കൽ കോളജിൽ പഴയ കെട്ടിടം തകർന്നു വീണ് വീട്ടമ്മ മരിച്ച സംഭവത്തിൽ മന്ത്രി വീണ ജോർജ് രാജിവെക്കണമെന്ന് ആവശ്യപ്പെട്ട് ബിജെപി മൂവാറ്റുപുഴ മണ്ഡലം കമ്മിറ്റിയുടെ നേതൃത്വത്തിൽ കോലം കത്തിച്ച് പ്രതിഷേധിച്ചു. വെളളൂർകുന്നത്ത് ബിജെപി ജില്ലാ ഓഫീസിൽനിന്ന് ആരംഭിച്ച പ്രകടനം നെഹ്റു പാർക്കിൽ സമാപിച്ചു. തുടർന്ന് ബിജെപി പ്രവർത്തകർ മന്ത്രിയുടെ കോലം കത്തിച്ച് പ്രതിഷേധിച്ചു. പ്രതിഷേധയോഗം ബിജെപി സംസ്ഥാന കൗണ്‍സിൽ അംഗം എം.എൻ. മധു ഉദ്ഘാടനം ചെയ്തു. ബിജെപി മൂവാറ്റുപുഴ മണ്ഡലം പ്രസിഡന്‍റ് ടി. ചന്ദ്രൻ അധ്യക്ഷത വഹിച്ചു.

ദീപിക ബാലസഖ്യം പ്രവര്‍ത്തനവർഷോദ്‌ഘാടനം

മൂവാറ്റുപുഴ: സെന്‍റ് അഗസ്റ്റിൻസ് ഗേൾസ് ഹയർ സെക്കൻഡറി സ്കൂളിൽ ദീപിക ബാലസഖ്യം യൂണിറ്റുതല പ്രവര്‍ത്തനവർഷോദ്‌ഘാടനം നടത്തി. അധ്യാപികയും എഴുത്തുകാരിയുമായ തസ്മിൻ ഷിഹാബ് ഉദ്‌ഘാടനം ചെയ്തു. സ്കൂൾ പ്രധാനധ്യാപിക സിസ്റ്റര്‍ ആനീസ് മരിയ അധ്യക്ഷത വഹിച്ചു. അധ്യാപകരായ ലിജീന ജോളി, കെ.എസ്. ഷൈനി, സിസ്റ്റർ ധന്യ, രേഷ്മ രാജൻ, ജെസ്റ്റി വർഗീസ്, സിസ്റ്റർ ജെയിൻ റോസ്, പി.പി. ശോഭ, അംഗിത ജോൺസൺ എന്നിവർ പ്രസംഗിച്ചു. വിദ്യാർഥികളായ അനുശ്രീ രാജൻ, അമീന സുബീർ എന്നിവർ 2024-25 പ്രവർത്തനവർഷ റിപ്പോർട്ട് അവതരിപ്പിച്ചു.

ആദരിച്ചു

പോത്താനിക്കാട്: വിവിധ പരീക്ഷകളിൽ ഉന്നത വിജയം നേടിയവരേയും മികച്ച സേവനം ചെയ്ത ജില്ലാ പഞ്ചായത്തംഗം റാണിക്കുട്ടി ജോർജിനേയും ആയങ്കര ജനതാ ലൈബ്രറിയുടെ നേതൃത്വത്തിൽ മാത്യു കുഴൽനാടൻ എംഎൽഎ ആദരിച്ചു. ഇതോടൊപ്പം പ്രദേശത്തെ വയോജനങ്ങൾക്ക് പുസ്തകങ്ങളും വിതരണം ചെയ്തു. ലൈബ്രറി പ്രസിഡന്‍റ് എൽദോസ് കൊറ്റം അധ്യക്ഷത വഹിച്ചു.

‘സഭയ്ക്കും സമൂഹത്തിനും കരുത്ത് പകരുന്നവരായി വൈദികർ മാറണം’

കോതമംഗലം: സമർപ്പിതമായ ശുശ്രൂഷകളിലൂടെ സഭയ്ക്കും സമൂഹത്തിനും കരുത്ത് പകരുന്നവരായി വൈദികർ മാറണമെന്ന് ശ്രേഷ്ഠ കാതോലിക്ക ബസേലിയോസ് ജോസഫ് ബാവ ആഹ്വാനം ചെയ്തു. കോതമംഗലം മർത്തമറിയം യാക്കോബായ സുറിയാനി കത്തീഡ്രൽ വലിയ പള്ളിയിൽ അങ്കമാലി ഭദ്രാസന മാർ അത്താനാസിയോസ് വൈദിക സംഘത്തിന്‍റെ വാർഷിക യോഗത്തിലും സ്വീകരണത്തിലും അനുഗ്രഹ പ്രഭാഷണം നടത്തുകയായിരുന്നു ശ്രേഷ്ഠ ബാവ. മാർ അത്താനാസിയോസ് വൈദിക സംഘം ശ്രേഷ്ഠ കാതോലിക്ക ബാവായ്ക്ക് സ്വീകരണം നൽകി. വൈദിക സംഘം വർക്കിംഗ് പ്രസിഡന്‍റ് മാത്യൂസ് മാർ അന്തിമോസ് മെത്രാപ്പോലീത്ത അധ്യക്ഷത വഹിച്ചു. 2025-28 വർഷത്തെ പുതിയ ഭാരവാഹികളെ യോഗം തെരഞ്ഞെടുത്തു.

നിയന്ത്രണം നഷ്ടപ്പെട്ട പിക്കപ്പ് റോഡിൽനിന്ന്‌ തെന്നിമാറി

കല്ലൂർക്കാട്: നിയന്ത്രണം നഷ്ടപ്പെട്ട പിക്കപ്പ് റോഡിൽനിന്ന്‌ തെന്നി നീങ്ങി. കല്ലൂർക്കാട്-കോട്ട റോഡിൽ നേത്രകാന്തി വളവിലാണ് അപകടം. ഇന്നലെ രാവിലെ 8.30നാണ് അപകടമുണ്ടായത്. കല്ലൂർക്കാട് ഭാഗത്തുനിന്ന് ആയവനയ്‌ക്ക് സഞ്ചരിച്ച പടിഞ്ഞാറെ കോടിക്കുളം സ്വദേശികളുടെ പിക്കപ്പാണ് അപകടത്തിൽപ്പെട്ടത്. ആർക്കും പരിക്കില്ല. ഇവിടെ നിരന്തരം അപകടങ്ങളുണ്ടാകുന്നുണ്ട്. ഒരാഴ്ചക്കുള്ളിൽ രണ്ടാമത്തെ അപകടമാണിത്. കഴിഞ്ഞ ചൊവ്വാഴ്ച ഇതേ ഭാഗത്ത് നിയന്ത്രണം നഷ്ടമായ പിക്കപ്പ് ടോറസിൽ ഇടിച്ചിരുന്നു.

വിദ്യാരംഗം കലാസാഹിത്യവേദി ഉദ്ഘാടനം

മൂവാറ്റുപുഴ: കാരക്കുന്നം ഫാത്തിമ മാത എൽപി സ്കൂളിൽ വിദ്യാരംഗം കലാസാഹിത്യവേദിയുടേയും വിവിധ ക്ലബുകളുടേയും ഉദ്ഘാടനം വാർഡ് അംഗം സിജു ഏബ്രഹാം നിർവഹിച്ചു. സ്കൂൾ മാനേജർ ഫാ. ജോർജ് വള്ളോംകുന്നേൽ അധ്യക്ഷത വഹിച്ചു. ഡിഎഫ്സി കോതമംഗലം രൂപത ഡയറക്ടർ റവ. ഡോ. ആന്‍റണി പുത്തൻകുളം, പ്രധാനാധ്യാപകൻ വിൻസന്‍റ് ജോസഫ്, ഹെൽത്ത് ഇൻസ്പെക്ടർ ഇ.പി. ബിനു, ടി.സി. സ്കറിയ, പി.വി. അരുൺ, പ്രീതി ബേബി, ദിവ്യ വിജേഷ്, കെ.കെ. ഷീന, പി. വിനിത, റെമ്മി മാണിച്ചൻ, ജെയ്മി മാത്യു, നിൻസി പി. ജോളി, എൽന എൽദോസ്, ഹരിത കെ. സത്യൻ, ജോയൽ മരിയ ലൂയിസ്, ജിസ്മിയ അമീൻ, അജു ജോർജ്, ലിൻഡ ഫ്രാൻസിസ്, സാന്ദ്ര ജോൺസൺ, ബിനു ജോൺ, ജിൻസി ഷിബു, നിഖില ഷിജു തുടങ്ങിയവർ പങ്കെടുത്തു.

മൂവാറ്റുപുഴ നഗര വികസനത്തിലെ മെല്ലെപ്പോക്ക് : കെആർഎഫ്ബിയോട് വിശദീകരണം ആവശ്യപ്പെട്ട് ഹൈക്കോടതി

മൂവാറ്റുപുഴ: നഗര വികസനത്തിലെ മെല്ലെപ്പോക്കിനെതിരെ നൽകിയ ഹർജിയിൽ കെആർഎഫ്ബി ചീഫ് എൻജിനീയറോട് വിശദീകരണം ആവശ്യപ്പെട്ട് ഹൈക്കോടതി. ഹൈക്കോടതി ചീഫ് ജസ്റ്റീസ് നിഥിൻ ജാംദാറും ജസ്റ്റീസ് ബസന്ത് ബാലിജിയും അടങ്ങുന്ന ബെഞ്ചാണ് ഉത്തരവ് പുറപ്പെടുവിച്ചത്. നഗര റോഡ് വികസനം അനന്തമായി നീളുന്നതിനെതുടർന്ന് മൂവാറ്റുപുഴ ഡവലപ്മെന്‍റ് അസോസിയേഷനുവേണ്ടി സെക്രട്ടറിയും അഭിഭാഷകനുമായ ഒ.വി. അനീഷ് സമർപ്പിച്ച ഹർജിയിലാണ് നടപടി. നേരത്തെ കോടതിയിൽ എക്സിക്യൂട്ടീവ് എൻജിനീയർ സമർപ്പിച്ച വിശദീകരണം തള്ളിക്കൊണ്ടാണ് കെആർഎഫ്ബി ചീഫ് എൻജിനീയറോട് സത്യവാങ് മൂലം ഹൈക്കോടതി ആവശ്യപ്പെട്ടിരിക്കുന്നത്. (കെആർഎഫ്‌ബി) ചീഫ് എൻജിനീയർ ഈ വിഷയം പരിശോധിക്കാനും എക്സിക്യൂട്ടീവ് എൻജിനീയറിൽനിന്ന് ആവശ്യമായ രേഖകൾ ആവശ്യപ്പെടാനും അത് പരിശോധിച്ച ശേഷം ബന്ധപ്പെട്ട ജോലിയെക്കുറിച്ച് സത്യവാങ്മൂലം സമർപ്പിക്കാനുമാണ് നിർദേശം. മൂന്നാം പ്രതി എക്സിക്യൂട്ടീവ് എൻജിനീയർ നൽകിയ വിശദീകരണത്തിൽ തൃപ്തിയില്ലാത്തതിനാലാണു നടപടി. നഗര വികസനത്തിന്‍റെ ഭാഗമായി റോഡിന്‍റെ ഒരു ഭാഗം പൊളിച്ച് നിർമാണ പ്രവർത്തനങ്ങൾ നടക്കുന്നതിനാൽ നിലവിൽ ജനങ്ങൾ വലിയ ദുരിതമാണ് നേരിടുന്നത്. ഇത് ഉദ്യോഗസ്ഥന്മാരുടെയും കരാറുകാരുടെയും നിരുത്തരവാദപരമായ പ്രവൃത്തികൾ മൂലമാണെന്നായിരുന്നു ഹർജി. ജല അഥോറിറ്റിയെ മാത്രം കുറ്റപ്പെടുത്തുന്ന നിലയിലാണ് കെആർഎഫ്ബി മറുപടി നൽകിയത്. പൈപ്പുകൾ മാറ്റി സ്ഥാപിച്ച് റോഡ് കെആർഎഫബിക്കു വിട്ടുനൽകിയാൽ മാത്രമേ മറ്റു ജോലികൾ തുടങ്ങാൻ കഴിയുകയുള്ളൂ എന്നാണ് കെആർഎഫ്ബിയുടെ നിലപാട്.

പഴങ്ങനാട് സെന്‍റ് അഗസ്റ്റിൻസ് പള്ളിയിൽ വിശ്വാസപരിശീലന വാർഷികാഘോഷം

കിഴക്കമ്പലം: സംഗീതവും സർഗവാസനകളും ലഹരിയായാൽ ജീവിതത്തിൽ മറ്റ് ലഹരികൾ അപ്രസക്തമാകുമെന്ന് ഗായിക മിൻമിനി. പഴങ്ങനാട് സെന്‍റ് അഗസ്റ്റിൻസ് പള്ളിയിലെ വിശ്വാസപരിശീലന വാർഷികാഘോഷം പാരിഷ് ഹാളിൽ ഉദ്ഘാടനം ചെയ്തു സംസാരിക്കുകയായിരുന്നു അവർ. വികാരി റവ. ഡോ. പോൾ കൈപ്രമ്പാടൻ അധ്യക്ഷത വഹിച്ച ചടങ്ങിൽ പാരിഷ് വൈസ് ചെയർമാൻ സജി പോൾ, ട്രസ്റ്റി ജിജോ ജോസഫ്, എസ്ഡി കോൺവന്‍റ് സുപ്പീരിയർ സിസ്റ്റർ ലിറ്റിൽ ട്രീസ എന്നിവർ ആശംസാപ്രസംഗം നടത്തി. വിദ്യാർഥി പ്രതിനിധി ജെൻസി സാജു റിപ്പോർട്ട് അവതരിപ്പിച്ചു. വേദപാഠ പരീക്ഷയിൽ ഉന്നത വിജയം നേടിയവർക്ക് മിൻമിനി സമ്മാനങ്ങൾ വിതരണം ചെയ്തു. തുടർന്ന് കലാപരിപാടികൾ നടന്നു. സ്കൂൾ എച്ച്എം നെൽസൺ സ്വാഗതവും വിദ്യാർഥി പ്രതിനിധി അന്നാ സാജു നന്ദിയും പറഞ്ഞു.

അരൂർ-തുറവൂർ ആകാശപ്പാത : മേൽപ്പാലത്തിനു താഴെ നിർമാണസാമഗ്രികൾ ചിതറിക്കിടക്കുന്നതുമൂലം ഗതാഗതക്കുരുക്ക്

അരൂർ: അരൂർ-തുറവൂർ ആകാശപ്പാത നിർമാണത്തിനുള്ള മേൽപ്പാലത്തിലെ ആർച്ച് നിർമാണം പൂർത്തീകരിച്ചിട്ടും ചന്തിരൂർ മുതൽ അരൂർ ജംഗ്ഷൻ വരെയുള്ള പല ഭാഗത്തും നിർമാണ സാധനങ്ങളുടെ ഇരുമ്പ്, കോൺക്രീറ്റ് അവശിഷ്ടങ്ങൾ നീക്കം ചെയ്തിട്ടില്ല. അരൂർ ജംഗ്ഷൻ മുതൽ ബൈപ്പാസ് വരെയുള്ള നിർമാണ പ്രവർത്തനങ്ങൾ പുരോഗമിക്കുംമ്പോൾ തടസങ്ങൾ ഏറെയാണ്. 11 കെവി 110 കെവി ലൈനുകൾ മാറ്റി സ്ഥാപിക്കുന്നതിന് വേണ്ടിയുള്ള കാലതാമസം രൂക്ഷമായ ഗതാഗത തടസം ഉണ്ടാക്കുകയാണ് കഴിഞ്ഞ ദിവങ്ങളിൽ പതിനെട്ട് മണിക്കൂറാണ് ദേശീയ പാതയിൽ തടസമുണ്ടായത്. ഈ ഭാഗത്ത് വച്ച് കേടാകുന്ന വാഹനങ്ങൾ നീക്കിയിട്ടുന്നതിന് ഈ ഭാഗങ്ങൾ ഉപയോഗിക്കുന്നതിനാണ് അരൂർ പോലീസ് പലവട്ടം നിർദേശം നൾകിയത്. എന്നാൽ നിർമാണ കമ്പനി ഇത് കേൾക്കാതെ ഇത്തരത്തിലുള്ള ആക്രിവസ്തുക്കൾ കൂട്ടിയിട്ട് ഗതാഗതക്കുരുക്ക് ഉണ്ടാക്കുകയാണ്.

കുന്നുകരയിൽ വിദ്യാഭ്യാസ അവാർഡുകൾ വിതരണം ചെയ്തു

നെടുമ്പാശേരി : കുന്നുകര പഞ്ചായത്തിന്‍റെ നേതൃത്വത്തിൽ സംഘടിപ്പിച്ച "എക്സലൻസ് അവാർഡ് 2025' വിദ്യാഭ്യാസ അവാർഡ് വിതരണം ഹൈബി ഈഡൻ എംപി ഉദ്ഘാടനം ചെയ്തു. ചടങ്ങിൽ വിവിധ തലങ്ങളിലെ പ്രതിഭകളെ ആദരിച്ചു. എസ്എസ്എൽസി, പ്ലസ്ടു പരീക്ഷകളിൽ മുഴുവൻ വിഷയങ്ങളിലും എ പ്ലസ് ലഭിച്ച വിദ്യാർഥികൾക്കും വിവിധ തലങ്ങളിലെ റാങ്ക് ജേതാക്കൾക്കും വിദ്യാഭ്യാസ അവാർഡുകൾ വിതരണം നടത്തി. പഞ്ചായത്തിലെ മികച്ച പ്രവർത്തനം നടത്തുന്ന സ്കൂളുകളിലെ പ്രധാന അധ്യാപകരെയും ചടങ്ങിൽ ആദരിച്ചു. പഞ്ചായത്ത് പ്രസിഡന്‍റ് സൈന ബാബു ചടങ്ങിൽ അധ്യക്ഷയായിരുന്നു. വൈസ് പ്രസിഡന്‍റ് എം.എ. അബ്‌ദുൽ ജബ്ബാർ സ്വാഗതം പറഞ്ഞു. സ്ഥിരം സമിതി അധ്യക്ഷന്മാരായ ഷിബി പുതുശേരി, സിജി വർഗീസ്, കവിത വി. ബാബു, ബ്ലോക്ക് പഞ്ചായത്തംഗം സി.കെ. കാസിം, പഞ്ചായത്തംഗങ്ങളായ മിനി പോളി, ജിജി സൈമൺ, സുധാ വിജയൻ, പി.ജി. ഉണ്ണികൃഷ്ണൻ, പി.ഡി. ജെയ്സൻ, എ.ബി. മനോഹരൻ, അസിസ്റ്റന്‍റ് സെക്രട്ടറി എസ്. ജയകൃഷ്ണൻ തുടങ്ങിയവർ സംസാരിച്ചു.

റോഡിലേക്ക് ശുചിമുറി മാലിന്യം: അറ്റകുറ്റപ്പണി ഇന്നാരംഭിക്കും

ആലുവ: ആലുവ പൊലീസ് സ്റ്റേഷനിൽ നിന്ന് ശുചിമുറി മാലിന്യം ട്രഷറി റോഡിലേക്ക് പൊട്ടി ഒഴുകുന്നതിന് അഞ്ചാം ദിവസവും പരിഹാരമായില്ല. കഴിഞ്ഞ ശനിയാഴ്ച്ച ആലുവ നഗരസഭ സെക്രട്ടറി നോട്ടീസ് നൽകിയെങ്കിലും സി ഐ യ്ക്ക് സ്ഥലം മാറ്റം ലഭിച്ചതോടെയാണ് അറ്റകുറ്റപ്പണി നീണ്ടുപോയത്. നാൽപ്പത്തഞ്ചോളം പോലീസ് സേനാംഗങ്ങൾ പ്രവർത്തിക്കുന്ന ആലുവ ടൗൺ പോലീസ് സ്റ്റേഷനിൽ നിന്ന് കുറച്ചു ദിവസങ്ങളായി മാലിന്യം ട്രഷറി റോഡിലേക്ക് ഒഴുകുന്നുണ്ട്. ഇത് ടാങ്കർ ലോറിയിൽ മാറ്റാൻ ശ്രമം നടത്തിയെങ്കിലും വിജയിച്ചില്ല. ഇതേക്കുറിച്ച് വഴിയാത്രക്കാരന്‍റെ പരാതിയിലാണ് ആലുവ നഗരസഭ സ്റ്റേഷനിലേക്ക് നോട്ടീസ് നൽകിയത്. വകുപ്പുതല നടപടിക്രമങ്ങൾ വൈകുന്നതിനാൽ താത്കാലിക അറ്റകുറ്റപ്പണിയാണ് ഇന്ന് നടക്കുക.

സ്‌കൂള്‍ ലൈബ്രറിയിലേക്ക് പുസ്തകങ്ങൾ സംഭാവന ചെയ്തു

കൊച്ചി: റോട്ടറി ഡിസ്ട്രിക്ട് 3205 തുടക്കം കുറിക്കുന്ന "ഗിഫ്റ്റ് ഓഫ് റീഡിംഗ് ' പ്രോജക്ടിന്‍റെ ഭാഗമായി റോട്ടറി ക്ലബ് ഓഫ് കൊച്ചിന്‍ റോയല്‍സിന്‍റെ ആഭിമുഖ്യത്തില്‍ കാക്കനാട് കാര്‍ഡിനല്‍ സ്‌കൂളിനും ഇടപ്പള്ളി സെന്‍റ് ജോര്‍ജ് സ്‌കൂളിനും 1,00,000 വില മതിക്കുന്ന ബുക്കുകള്‍ സ്‌കൂള്‍ ലൈബ്രറിയിലേക്ക് സംഭാവന ചെയ്തു. സാഹിത്യകാരന്‍ സിപ്പി പള്ളിപ്പുറം വിശിഷ്ടാതിഥിയായിരുന്നു. റോട്ടറി കൊച്ചിന്‍ റോയല്‍സ് ക്ലബ് നിയുക്ത പ്രസിഡന്‍റ് എം. ഗോപീകൃഷ്ണ, സെക്രട്ടറി അരുണ്‍ ജോര്‍ജ്, ട്രഷറര്‍ എസ്. ആനന്ദ്, പ്രിന്‍സിപ്പല്‍ എല്‍സി ജോസഫ്, ക്ലബ് ഇവന്‍റ് ചെയര്‍ അജിത് പണിക്കാശേരി, മറ്റു സീനിയര്‍ ബോര്‍ഡ് അംഗങ്ങള്‍ എന്നിവര്‍ സന്നിഹിതരായിരുന്നു.

'വിദ്യാഭ്യാസം സാമൂഹിക, സാമ്പത്തിക അസമത്വങ്ങൾക്കുള്ള നല്ല മറുപടി'

കൊച്ചി: കേരള വ്യാപാരി വ്യവസായി സമിതി എറണാകുളം സിറ്റിയുടെ നേതൃത്വത്തിൽ വിദ്യാഭ്യാസ അവാർഡ് വിതരണം നിർവഹിച്ചു. എസ്എസ്എൽസി, പ്ലസ്ടു, ബിരുദ പരീക്ഷകളിൽ ഉന്നത വിജയം നേടിയ എറണാകുളം നഗരത്തിലെ വ്യാപാരികളുടെയും വ്യാപാര സ്ഥാപനങ്ങളിലെ ജീവനക്കാരുടെയും മക്കൾക്കാണ് പുരസ്കാരം നൽകിയത്. എറണാകുളം ബോട്ട് ജെട്ടിയിലെ ടി.കെ. രാമകൃഷ്ണൻ സ്മാരക കൾച്ചറൽ സെൻറിൽ നടന്ന പരിപാടി അസി. കളക്ടർ പാർവതി ഗോപകുമാർ ഉദ്ഘാടനം ചെയ്തു. ചലച്ചിത്ര താരം ചന്തു സലിം കുമാർ മുഖ്യാതിഥിയായിരുന്നു. സാമൂഹിക, സാമ്പത്തിക അസമത്വങ്ങൾക്കുള്ള ഏറ്റവും നല്ല മറുപടിയാണ് വിദ്യാഭ്യാസമെന്ന് പാർവതി ഗോപകുമാർ പറഞ്ഞു. പരീക്ഷയെ ഓട്ട മത്സരമായി കണ്ടാൽ പെട്ടെന്ന് ക്ഷീണിക്കുമെന്നും ജീവിതത്തെയും പഠനത്തെയും മാരത്തണായി കണ്ട് മുന്നോട്ടുപോകണമെന്നും അവർ കൂട്ടിച്ചേർത്തു. ഞാൻ നല്ല കുട്ടി കുടുംബമാണ് എന്‍റെ ലഹരി എന്ന ഒരു വർഷം നീണ്ടുനിൽക്കുന്നലഹരി വിരുദ്ധ കാന്പയിന് തുടക്കമായി. വ്യാപാരി വ്യവസായി സമിതി എറണാകുളം സിറ്റി പ്രസിഡന്‍റ് ബി നായനാർ അധ്യക്ഷത വഹിച്ചു. സുരേഷ് ബാബു, വിനോദ് മാത്യു, സിദ്ദിഖ്, എ.കെ. ഖാലിദ് എന്നിവർ പ്രസംഗിച്ചു. വ്യാപാരി വ്യവസായി സമിതി എറണാകുളം സിറ്റി സെക്രട്ടറി സുൽഫിക്കർ അലി സ്വാഗതം ആശംസിച്ചു.

ചിങ്ങത്തിൽ ഗോശ്രീ കവല സുന്ദരിയാവും

വൈപ്പിൻ : ഗോശ്രീ കവലയെ സുന്ദരിയാക്കുന്ന നടപടികൾ പുരോഗമിക്കുന്നു. മൂന്നാം ഗോശ്രീ പാലത്തിന്‍റെ പടിഞ്ഞാറെ അപ്രോച്ചിന്‍റെ വടക്ക് ഭാഗത്ത് ജിഡ വക സ്ഥലത്ത് 53 മീറ്റർ നീളത്തിലാണ് സൗന്ദര്യവത്കരണ ജോലികൾ നടന്നുവരുന്നത്. ആധുനിക രീതിയിലുള്ള പൂന്തോട്ടം, മ്യൂസിക്കൽ ഫൗണ്ടൻ , ഓപ്പൺ സ്റ്റേജ് , വാക്ക് വേ തുടങ്ങിയവയാണ് സൗന്ദര്യ വത്കരണത്തിന്‍റെ ഭാഗമായി നിർമിക്കുന്നത്ത്. ഏതാണ്ട് 50 ശതമാനത്തിലധികം പിന്നിട്ട പണികൾ ഈ മാസം പൂർത്തിയാക്കി ഓണക്കാലത്ത് തുറന്ന് കൊടുക്കുമെന്നാണ് സൂചന. കൊല്ലം അഭിലാഷ് ആർക്കിടെക്റ്റ് കമ്പനിയുടെ ഡിസൈനിംഗിൽ ഇവർ തന്നെയാണ് നിർമാണം നടത്തുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]