ADVERTISEMENT

ADVERTISEMENT

കെട്ടിടത്തിന്‍റെ ഉദ്ഘാടനം നടത്തി

ചേർത്തല: ബിഷപ്പ് മൂർ വിദ്യാപീഠം സ്കൂളിലെ പുതിയ നോർട്ടൺ ബ്ലോക്ക് കെട്ടിടത്തിന്‍റെ ഉദ്ഘാടനം സിഎസ്ഐ മധ്യകേരള മഹായിടവക ബിഷപ്പും ചെയർമാനുമായ റവ.ഡോ. മലയിൽ സാബു കോശി ചെറിയാൻ നിര്‍വഹിച്ചു. മാനേജർ ഫാ. തോമസ് കെ. പ്രസാദ് അധ്യക്ഷത വഹിച്ചു. പ്രിൻസിപ്പൽ പ്രിനു ചെറിയാൻ, ഫാ. ജോർജ് മാത്യു, ഫാ. ജിജി ജോൺ ജേക്കബ്, ജോസ് പായിക്കാട്, സിബിഎസ്ഇ സിറ്റി കോ-ഓർഡിനേറ്റർ സൂസൻ, വയലാർ പഞ്ചായത്ത് പ്രസിഡന്‍റ് ഓമന ബാനർജി, സ്കൂൾ പിടിഎ പ്രസിഡന്‍റ് രാജേഷ് കുമാർ, മനു ഹർഷകുമാർ, സ്കൂൾ അക്കാഡമിക് ഡറക്ടർ ആശാ കുറുപ്പ് തുടങ്ങിയവർ പ്രസംഗിച്ചു.

ADVERTISEMENT

യാത്രയയപ്പ് നല്‍കി

ചേർത്തല: മുട്ടം ഹോളി ഫാമിലി ഹയർ സെക്കൻഡറി സ്കൂളിന്‍റെ മാനേജരായി നാലുവർഷം സേവനമനുഷ്ഠിച്ച ശേഷം എറണാകുളം-അങ്കമാലി അതിരൂപത വികാരി ജനറാളായി നിയമിതനായി സ്ഥലം മാറിപ്പോകുന്ന റവ. ഡോ. ആന്‍റോ ചേരാംതുരുത്തിക്ക് ചേർത്തല ഹോളി ഫാമിലി ഹയർ സെക്കൻഡറി സ്കൂളിലെ വിദ്യാർഥികളും അധ്യാപകരും പിടിഎയും ചേർന്ന് യാത്രയയപ്പ് നൽകി. സ്കൂൾ ഓഡിറ്റോറിയത്തിൽ ചേർന്ന യോഗത്തിൽ പിടിഎ വൈസ് പ്രസിഡന്‍റ് പാട്രിക് സ്റ്റീഫൻ അധ്യക്ഷത വഹിച്ചു. ചേർത്തല എഇഒ എം. ജയലക്ഷ്മി ഉപഹാരം നൽകി. സാജു തോമസ്, സി.ജെ. വർഗീസ്, വി. ശ്രീഹരി, സിസ്റ്റർ ലിസിയ പുതുശേരി, സിനി തോമസ്, എം.ടി. ജോസഫ്, ക്രിസ്റ്റോ ജൂഡ് ജോഷി, എ. ആദിശേഷ് എന്നിവർ സംസാരിച്ചു. പ്രിൻസിപ്പല്‍ ലിസ കുര്യൻ സ്വാഗതവും പ്രഥമാധ്യാപിക എം. മിനി നന്ദിയും പറഞ്ഞു.

സ്വകാര്യ പണമിടപാട് സ്ഥാപനത്തിലെ ജീവനക്കാർ ഭീഷണിപ്പെടുത്തിയതായി പരാതി ; ഗൃഹനാഥൻ ജീവനൊടുക്കി

ചാരുംമൂട്: സ്വകാര്യ പണമിടപാട് സ്ഥാപനത്തിലെ ജീവനക്കാർ വീട്ടിലെത്തി അപമാനിക്കുകയും ഭീഷണിപ്പെടുത്തുകയും ചെയ്തതിനെ തുടർന്ന് ഗൃഹനാഥൻ ജീവനൊടുക്കിയതായി പരാതി. വള്ളികുന്നം കടുവിനാൽ മലവിളയിൽ ശശി (60) ആണ് വീടിനുള്ളിൽ തൂങ്ങി മരിച്ചത്. കഴിഞ്ഞ ദിവസം വൈകിട്ട് ആറിനായിരുന്നു സംഭവം. വീടുപണിക്കായി സ്വകാര്യ പണമിടപാട് സ്ഥാപനത്തിന്‍റെ മാവേലിക്കര കുറത്തികാട്, താമരക്കുളം എന്നീ ബ്രാഞ്ചുകളിൽനിന്നു ശശിയുടെ ഭാര്യ രാധ ഒന്നര ലക്ഷം രൂപ മൈക്രോ ഫിനാൻസ് വായ്‌പ എടുത്തിരുന്നു. ഇതിന്‍റെ കഴിഞ്ഞ ആഴ്ചയിലെ തവണ അടയ്ക്കാൻ വൈകിയതിനെ തുടർന്ന് സ്ഥാപനത്തിലെ രണ്ടു ജീവനക്കാർ വീട്ടിൽ എത്തി ബഹളം ഉണ്ടാക്കിയെന്നും ഭീഷണി മുഴക്കിയെന്നും ബന്ധുക്കൾ പരാതിയിൽ പറയുന്നു. ഇതിന് പിന്നാലെ ആണ് ഭർത്താവ് ശശി ജീവനൊടുക്കിയതെന്ന് ഭാര്യ രാധ പോലീസിന് മൊഴി നൽകി. ഓച്ചിറയിലെ ഒരു സ്വകാര്യ ആശുപത്രിയിൽ ജോലി ചെയ്യുകയാണ് രാധ. ഫിനാൻസ് ജീവനക്കാർ വീട്ടിലെത്തി പ്രശ്നം ഉണ്ടാക്കിയപ്പോൾ അടയ്ക്കാനുള്ള തുകയുമായി ബസിൽ വീട്ടിലേക്ക് വരികയാണെന്നു പറഞ്ഞിട്ടും അവർ കേട്ടില്ലെന്നും രാധ പോലീസിന് നൽകിയ പരാതിയിൽ പറഞ്ഞു. 720 രൂപ വച്ചാണ് ആഴ്ചയിൽ അടയ്ക്കുന്നത്. ശശി വീട്ടിൽനിന്നു പുറത്തേക്ക് പോയപ്പോൾ ജീവനക്കാർ തടഞ്ഞുനിർത്തിയതായും മരുമകളെ ശശിയുടെ മുന്നിൽ വച്ച് അപമാനിച്ചതായും ബന്ധുക്കൾ പരാതിയിൽ പറയുന്നു. വള്ളികുന്നം പോലീസ് കേസെടുത്ത് അന്വേഷണം ആരംഭിച്ചു. ശശിയുടെ മൃതദേഹം പോസ്റ്റ്‌മോർട്ടത്തിന് ശേഷം കറ്റാനത്തെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംസ്കാരം പിന്നീട്. മക്കൾ ശരൺ,ശരത്ത്. നടപടിയെടുക്കണം: കൊടിക്കുന്നിൽ സുരേഷ് എംപി ചാരുംമൂട്: മൈക്രോ ഫിനാൻസ് സ്ഥാപനങ്ങളുടെ ഭീഷണിക്ക് ഇരയായി വള്ളികുന്നത്ത് ഗൃഹനാഥനായ ശശി ആത്മഹത്യ ചെയ്ത സംഭവത്തിൽ ശക്തമായ നടപടി സ്വീകരിക്കണമെന്ന് കൊടിക്കുന്നിൽ സുരേഷ് എംപി. ശശിയുടെ ആത്മഹത്യക്ക് ഉത്തരവാദികളായ സ്ഥാപനങ്ങളുടെയും ഉദ്യോഗസ്ഥരുടെയും പേരിൽ ആത്മഹത്യാപ്രേരണാക്കുറ്റത്തിൽ കേസെടുത്ത് അടിയന്തരമായി നടപടികൾ സ്വീകരിക്കണമെന്ന് ആലപ്പുഴ ജില്ലാ പോലീസ് മേധാവിയോട് എംപി ആവശ്യപ്പെട്ടു. മൈക്രോ ഫിനാൻസ് സ്ഥാപനങ്ങളുടെ ഇത്തരം പ്രവർത്തനങ്ങൾ നിയന്ത്രിക്കുന്നതിന് കർശന നിയമങ്ങൾ കൊണ്ടുവരാൻ കേന്ദ്ര-സംസ്ഥാന സർക്കാരുകൾ അടിയന്തരമായി ഇടപെടണമെന്നുംഎംപി ആവശ്യപ്പെട്ടു.

വള്ളം മറിഞ്ഞ് മത്സ്യത്തൊഴിലാളിയെ കാണാതായി

തുറവൂർ: കടലിൽ വള്ളം മറിഞ്ഞ് മത്സ്യത്തൊഴിലാളിയെ കാണാതായി. തുറവൂർ പഞ്ചായത്ത് ഒന്നാം വാർഡ് പള്ളിത്തോട് കുരിശിങ്കൽ വീട്ടിൽ കുഞ്ഞുമോന്‍റെ മകൻ അനീഷ് എന്ന ഇമ്മാനുവലി(32)നെയാണ് കാണാതായത്. ഇന്നലെ രാവിലെ 11ന് പള്ളിത്തോട് ചാപ്പക്കടവിനും ചെല്ലാനം ഹാർബറിനും ഇടയിലുള്ള ഭാഗത്തായാണ് വള്ളം മറിഞ്ഞത്. ചെല്ലാനം ഹാർബറിൽനിന്ന് മത്സ്യബന്ധനത്തിനു പോയ ചെല്ലാനം സ്വാദേശി ജോയിയുടെ ഉടമസ്ഥതയിലുള്ള ചെറുവള്ളം ആണ് തിരയിൽപ്പെട്ട് മറിഞ്ഞത്. വള്ളത്തിൽ മൂന്നു പേരാണ് ഉണ്ടായിരുന്നത്. ഇതിൽ ജോയിയും മറ്റൊരാളും നീന്തി രക്ഷപ്പെട്ടു. ഇമ്മാനുവൽ തിരയിൽപ്പെട്ട് കാണാതാവുകയായിരുന്നു. നാട്ടുകാർ അറിയിച്ചതിനെത്തുടർന്ന് കുത്തിയതോട് പോലീസും ഫയർഫോഴ്സും മുങ്ങൽ വിദഗ്ധരും എത്തി തിരച്ചിൽ നടത്തിയെങ്കിലും കണ്ടെത്താനായില്ല. രാത്രി വൈകിയും മത്സ്യത്തൊഴിലാളികളും മറ്റും തിരച്ചിൽ തുടരുകയാണ്. റവന്യു, ഫിഷറീസ്, പഞ്ചായത്ത് ഉദ്യോഗസ്ഥരും സ്ഥലത്തുണ്ട്.

ഡോക്ടർമാരുടെ സുരക്ഷ: സമൂഹം മാറിച്ചിന്തിക്കേണ്ട സമയമെന്ന് ഡോ. ഉമ്മൻ വർഗീസ്

ചെങ്ങന്നൂർ: ആരോഗ്യ പ്രവർത്തകരോടുള്ള സമൂഹത്തിന്‍റെ മനോഭാവത്തിൽ കാതലായ മാറ്റം അനിവാര്യമാണെന്ന് ഇന്ത്യൻ മെഡിക്കൽ അസോസിയേഷൻ ജില്ലാ ചെയർമാനും ചെങ്ങന്നൂർ ഉമ്മൻ ഐ ഹോസ്പിറ്റൽ ഡയറക്ടറുമായ ഡോ. ഉമ്മൻ വർഗീസ്. രോഗികളെ സുഖപ്പെടുത്തുക എന്ന ഏക ലക്ഷ്യത്തോടെ പ്രവർത്തിക്കുന്ന ഡോക്ടർമാരും മറ്റ് ആരോഗ്യ പ്രവർത്തകരും നിർഭാഗ്യകരമായ ചില സാഹചര്യങ്ങളിൽ കുറ്റവാളികളാക്കപ്പെടുകയും ആക്രമിക്കപ്പെടുകയും ചെയ്യുന്ന പ്രവണത വർധിക്കുന്നത് ആശങ്ക ഉയർത്തുന്നുണ്ടെന്നും അദ്ദേഹം പറഞ്ഞു. ഡോക്ടേഴ്‌സ് ദിനത്തോടനുബന്ധിച്ച് നൽകിയ സന്ദേശത്തിലാണ് അദ്ദേഹം ഇക്കാര്യം വ്യക്തമാക്കിയത്. ആരോഗ്യ പ്രവർത്തകർക്ക് സുരക്ഷയൊരുക്കേണ്ടത് സർക്കാരിന്‍റെ മാത്രം ഉത്തരവാദിത്വമല്ല. ഓരോ പൗരനും ഈ വിഷയത്തിൽ തങ്ങളുടെ ചുമതല തിരിച്ചറിയണം. ഡോക്ടേഴ്‌സ് ദിനം, ആരോഗ്യ പ്രവർത്തകരോടുള്ള സമൂഹത്തിന്‍റെ കാഴ്ചപ്പാടിൽ പുതിയ മാറ്റങ്ങൾക്ക് തുടക്കമാകണമെന്നും അവരെ ബഹുമാനിക്കാനും അവരുടെ സുരക്ഷ ഉറപ്പാക്കാനും ഓരോ പൗരനും പ്രതിജ്ഞാബദ്ധരാകണമെന്നും അദ്ദേഹം ആഹ്വാനം ചെയ്തു.

പച്ചയില്‍ എടിഎം തകര്‍ത്ത് മോഷണശ്രമം

എടത്വ: പച്ചയില്‍ എടിഎം തകര്‍ത്ത് മോഷണശ്രമം. ഫെഡറല്‍ ബാങ്ക് പച്ച-ചെക്കിടിക്കാട് ശാഖയിലെ എടിഎം തകര്‍ത്താണ് മോഷണശ്രമം നടന്നത്. ഇന്നലെ പുലര്‍ച്ചെ രണ്ടിനാണ് സംഭവം. കവര്‍ച്ച സമയത്ത് ബാങ്ക് ഹെഡ് ഓഫീസില്‍ ലഭിച്ച സിഗ്‌നലിനെത്തുടര്‍ന്ന് ബാങ്ക് അധികൃതര്‍ പോലീസുമായി ബന്ധപ്പെട്ടു. പോലീസ് സ്ഥലത്തെത്തിയപ്പോൾ മോഷ്ടാവ് ശ്രമം ഉപേക്ഷിച്ച് കടന്നിരുന്നു. പോലീസ് പച്ചയിലെ ബാങ്ക് ജീവനക്കാരെ വിളിച്ചുവരുത്തിയശേഷം സിസിടിവി ദൃശ്യം പരിശോധിച്ചു. റെയിന്‍കോട്ടുകൊണ്ട് ശരീരം പൂര്‍ണമായി മറച്ച വ്യക്തി ഇരുമ്പ് വെട്ടുകത്തി ഉപയോഗിച്ച് എടിഎം തകര്‍ക്കുന്ന ദൃശ്യം സിസിടിവിയില്‍ പതിഞ്ഞിട്ടുണ്ട്. കൃത്യം നടത്തിയ ശേഷം എടത്വ-തകഴി റോഡിനു കുറുകെ തെക്കു ഭാഗത്തേക്കുള്ള ഇടവഴയിലൂടെ നടന്നു പോകുന്നതായി ശ്രദ്ധയില്‍പ്പെട്ടിട്ടുണ്ട്. സംഭവസ്ഥലത്തെത്തിയ ഡിവൈഎസ്പി കെ.എന്‍. രാജേഷ്, ബാങ്ക് മാനേജര്‍ എം. പാര്‍വതിയില്‍നിന്ന് വിവരങ്ങള്‍ അന്വേഷിച്ചറിഞ്ഞു. എടത്വ സിഐ എം. അന്‍വറിന്‍റെ നേതൃത്വത്തില്‍ പോലീസ് സംഘം സംഭവസ്ഥലത്തെത്തി അന്വഷണം ആരംഭിച്ചു. തെളിവുകള്‍ ശേഖരിക്കാന്‍ ഫിംഗര്‍ പ്രിന്‍റ് വിദഗ്ധരേയും ഡോഗ് സ്‌ക്വാഡിനേയും സ്ഥലത്തെത്തിച്ചു. പോലീസ് നായ സച്ചിന്‍ മണം പിടിച്ച് ചെക്കിടിക്കാട് തെക്കേത്തലയ്ക്കല്‍ പാലത്തിന്‍റെ മറുകരയിലുള്ള കുറ്റിക്കാട്ടില്‍ വരെ എത്തിയിരുന്നു. എടത്വ എസ്‌ഐ എന്‍. രാജേഷിനാണ് അന്വഷണ ചുമതല. ഫിംഗര്‍ പ്രിന്‍റ് വിദഗ്ധ പ്രതിഭ, ഫോട്ടോഗ്രാഫര്‍ ബിന്‍സ്, ഡോഗ് സ്‌ക്വാഡില്‍ നിന്ന് ശ്രീകാന്ത്, സീനിയര്‍ സിപിഒമാരായ പ്രതീപ് കുമാര്‍, ശ്രീരാജ്, രാജീവ്, ജസ്റ്റിന്‍ രാജ് എന്നിവര്‍ അന്വഷണത്തിനു നേതൃത്വം നല്‍കി.

തീരദേശത്ത് ഇന്ന് ഹർത്താൽ

തുറവൂർ: വള്ളം മറിഞ്ഞ് മത്സ്യത്തൊഴിലാളിയെ കാണാതായതിനെത്തുടർന്ന് തീരദേശത്ത് ഇന്ന് ഹർത്താൽ. രാവിലെ 6 മുതൽ വൈകിട്ട് 6 വരെയാണ് ഹർത്താൽ. കണ്ണമാലി മുതൽ അർത്തുങ്കൽ വരെയുള്ള ഭാഗങ്ങളിലാണ് തീരദേശ ഹർത്താൽ ആചരിക്കുന്നത്. വെള്ളം മറിഞ്ഞ് കാണാതായ ഇമ്മാനുവലിനെ (32) കൂടാതെ മറ്റു രണ്ടുപേർക്ക് പരിക്കേൽക്കുകയും ചെയ്തിരുന്നു. വള്ളത്തിന്‍റെ ഉടമയായ ചെല്ലാനം സ്വദേശി ജോയിക്ക് ഗുരുതര പരിക്കാണ്. ജോയിയെയും ഒപ്പമുണ്ടായിരുന്ന നോബിയെയും നാട്ടുകാർ തുറവൂർ താലൂക്ക് ആശുപത്രിയിലും തുടർന്ന് എറണാകുളം ജനറൽ ആശുപത്രിയിൽ എത്തിച്ചുവെങ്കിലും ജോയിയുടെ പരിക്ക് ഗുരുതരമായതിനാൽ ഇദ്ദേഹത്തെ കളമശേരി മെഡിക്കൽ കോളജ് ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്.

കപ്പൽ കണ്ടെയ്നറുകൾ കീറാമുട്ടി; വലകള്‍ നശിക്കുന്നു

ചേര്‍ത്തല: കേരള തീരത്ത് അപകടത്തില്‍പ്പെട്ട് കടലില്‍ മുങ്ങി പ്പോയ എംഎസ്‌സി എൽസ-3 കപ്പലിലുണ്ടായിരുന്ന കണ്ടെയ്നറുകൾ കടലിൽ ഒഴുകിനടന്ന് മത്സ്യത്തൊഴിലാളികള്‍ക്ക് വന്‍ നാശനഷ്ടം വരുത്തുന്നതായി പരാതി. വിവിധ ഭാഗങ്ങളില്‍നിന്നും മത്സ്യബന്ധനത്തിനായി പോകുന്നവരുടെ ലക്ഷങ്ങള്‍ വിലയുള്ള വലകളും യാനങ്ങളും കണ്ടെയ്നറുകളുടെ ഇരുമ്പുഭാഗങ്ങളില്‍ തട്ടി നിരന്തരമായി നശിക്കുകയാണ്. കഴിഞ്ഞദിവസം ആലപ്പുഴയ്ക്ക് പടിഞ്ഞാറ് വിവിധയിടങ്ങളിൽ മത്സ്യബന്ധനം നടത്തിയ മത്സ്യബന്ധനവള്ളങ്ങളുടെ വലകൾ കണ്ടെയ്നറുകളിൽ ഉടക്കി ലക്ഷക്കണക്കിന് രൂപയുടെ നാശനഷ്ടം ഉണ്ടായിരുന്നു. വലകൾ നഷ്ടമായി ഫോർട്ട് മട്ടാഞ്ചേരിയിൽനിന്നു കടലിൽ മത്സ്യബന്ധനത്തിനായി പോയ പ്രവാചകൻ, അൽ - റഹ്മാൻ, പ്രത്യാശ, അക്വീലാസ്, ഉന്നതൻ എന്നീ വള്ളങ്ങൾക്കും വൈപ്പിൻ ഗോശ്രീപുരത്തുനിന്നു കടലിലേക്കുപോയ ആദിത്യൻ, അയ്യപ്പജ്യോതി, പരീക്ഷണം, ജലനിധി തുടങ്ങിയ വള്ളങ്ങൾക്കും തിങ്കളാഴ്ച്ച വലകൾ നഷ്ടമായി. ശനിയാഴ്ച ഫോർട്ട് കൊച്ചിയിൽനിന്നുപോയ അറയ്ക്കൽ, പുറപ്പാട് തുടങ്ങിയ വള്ളങ്ങളുടെ വലയും കഴിഞ്ഞ ആഴ്ചയിൽ തോട്ടപ്പള്ളിയിൽനിന്നു പോയ സർവരക്ഷകൻ, ആറാട്ട്, വക്കീൽ, മായാവി, അഖിലാനന്ദന്‍റെ വള്ളം തുടങ്ങി ഏഴു വള്ളങ്ങളുടെ വലകളും നഷ്ടമായി. മത്സ്യബന്ധനം നടത്തുമ്പോൾ വലകൾ കണ്ടെയ്നറുകളിൽ ഉടക്കി കീറുന്നതു പതിവായ സാഹചര്യത്തിൽ ആലപ്പുഴ കടൽമേഖല ഉപേക്ഷിച്ച് മത്സ്യത്തൊഴിലാളികൾ വിവിധ മേഖലയിലേക്ക് വള്ളങ്ങളുമായി പോകേണ്ട സാഹചര്യമാണ്. കനത്ത നിരാശ കപ്പല്‍ അപകടം നടന്ന് ഒരുമാസം പിന്നിട്ടിട്ടും കപ്പലിലെ കണ്ടെയ്നറുകൾ സമയബന്ധിതമായി നീക്കം ചെയ്യണമെന്ന് മത്സ്യത്തൊഴിലാളികൾ നിരന്തരം ആവശ്യപ്പെട്ടിട്ടും നടപടികൾ സ്വീകരിക്കാത്ത സർക്കാരിന്‍റെ നിസംഗതമൂലമാണ് വലകൾ നഷ്ടപ്പെട്ട് മത്സ്യബന്ധനം ഉപേക്ഷിക്കേണ്ട സാഹചര്യമുള്ളത്. തിങ്കളാഴ്ച മാത്രം ഏതാണ്ട് പത്തോളം മത്സ്യബന്ധന യാനങ്ങളുടെ വലകളാണ് കണ്ടെയ്നറുകളിൽ ഉടക്കി നശിച്ചത്. ലക്ഷങ്ങളുടെ വലയും വലയിൽ ഉണ്ടായിരുന്ന ലക്ഷക്കണക്കിന് രൂപ മൂല്യമുള്ള മത്സ്യസമ്പത്തും നശിച്ചതുമൂലം അടുത്ത ഒരാഴ്ച്ചത്തെ സീസൺ പണിക്ക് പോകാൻ പറ്റാത്ത സാഹചര്യം വള്ളം-വല ഉടമകളെയും തൊഴിലാളികളെയും കനത്ത നിരാശയിലാഴ്ത്തിരിക്കുകയാണ്. കപ്പലപകടം വിഴിഞ്ഞം തുറമുഖത്തിന്‍റെ പേരിന് കളങ്കം വരുത്തുമെന്ന കാരണത്താൽ പരാതിപ്പെട്ടാൽ കേസെടുക്കാൻ പോലും തീരദേശ പോലീസ് കൂട്ടാക്കാത്ത സാഹചര്യമാണ്. പാക്കേജ് പ്രഖ്യാപിക്കണം വലകൾ നഷ്ടപ്പെട്ട ഉടമകൾക്കും പണിക്കു പോകാൻ പറ്റാതെ തൊഴിൽദിനങ്ങൾ നഷ്ടമാകുന്ന തൊഴിലാളികൾക്കും അടിയന്തര സഹായമായി കപ്പലപകട സ്കീമിൽ ഉള്‍പ്പെടുത്തി മുൻകൂർ സാമ്പത്തിക പാക്കേജ് പ്രഖ്യാപിക്കാൻ ഫിഷറീസ് വകുപ്പ് തയാറകണമെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷൻ ആലപ്പുഴ ജില്ലാ കമ്മിറ്റി ആവശ്യപ്പെട്ടു. മത്സ്യബന്ധവള്ളുടെ രജിസ്ട്രേഷനും ലൈസൻസ് ഫീസും ഇനത്തിൽ കോടി കണക്കിന് രൂപ ഫീഷറീസ് വകുപ്പിന് ലഭിച്ചിട്ടും അപകടങ്ങളിൽപ്പെടുന്ന മത്സ്യബന്ധയാനങ്ങൾക്ക് അടിയന്തര സഹായം എത്തിക്കുന്നതിൽ സർക്കാർ പരാജയമാണ്. വിഴിഞ്ഞം തുറമുഖത്തെ സംരക്ഷിക്കാൻ വയബലിറ്റി ഫണ്ടടക്കം കോടികൾ ചിലവഴിക്കുന്ന സർക്കാർ കപ്പലപകടം സൃഷ്ടിച്ച ആഘാതത്തിൽ മത്സ്യമേഖലയെ സംരക്ഷിക്കാൻ തയാറാകണമെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷൻ സംസ്ഥാന പ്രസിഡന്‍റ് ജാക്സൺ പൊള്ളയിൽ, ജില്ലാ പ്രസിഡന്‍റ് രാജു ആശ്രയം, സെക്രട്ടറി ആന്‍റണി കുരിശുങ്കൽ എന്നിവർ ആവശ്യപ്പെട്ടു.

അലഞ്ഞുതിരിഞ്ഞ വയോധികനെ ഗാന്ധിഭവൻ സ്നേഹവീട്ടിൽ എത്തിച്ചു

ഹരിപ്പാട്: നാഷണൽ ഹൈവേയിൽ അവശനിലയിൽ കണ്ട വയോധികനെ ഹരിപ്പാട് പോലീസ് ഗാന്ധിഭവൻ സ്നേഹവീട്ടിൽ എത്തിച്ച് സംരക്ഷണം ഒരുക്കി. സംസാരശേഷി ഇല്ലാത്ത ഇതരസംസ്ഥാനക്കാരനായ 70 വയസ് തോന്നിക്കുന്ന വയോധികനെ കരുവാറ്റ പവർ ഹൗസിന് സമീപം കാണുകയും നാട്ടുകാർ പോലീസിനെ വിവരമറിയിക്കുകയുമായിരുന്നു. തുടർന്ന് ഹരിപ്പാട് പോലീസ് ഗാന്ധിഭവന്‍റെ സംരക്ഷണം ആവശ്യപ്പെടുകയായിരുന്നു. പോലീസ് ഉദ്യോഗസ്ഥരായ ബെൽരാജ്, രാകേഷ് എന്നിവർ ചേർന്ന് സ്നേഹവീട്ടിൽ എത്തിച

ആരോഗ്യമന്ത്രി ചരിത്രപരാജയമെന്ന് കൊടിക്കുന്നിൽ സുരേഷ് എംപി

അമ്പലപ്പുഴ: ഇത്രയധികം പരാജയപ്പെട്ട ആരോഗ്യമന്ത്രി കേരളത്തിന്‍റെ ചരിത്രത്തിൽ ഉണ്ടായിട്ടില്ലെന്ന് കൊടിക്കുന്നിൽ സുരേഷ് എംപി. ആരോഗ്യവകുപ്പിന്‍റെ അനാസ്ഥയ്ക്കെതിരേ ആലപ്പുഴ മെഡിക്കൽ കോളജ് ആശുപത്രിയുടെ മുന്നിൽ ജില്ലാ കോൺഗ്രസ് കമ്മിറ്റി സംഘടിപ്പിച്ച പ്രതിഷേധ ധർണ ഉദ്ഘാടനം ചെയ്യുകയായിരുന്നു അദ്ദേഹം. ഓപ്പറേഷനുകൾ നടക്കുന്നില്ല. രോഗികൾക്ക് ആവശ്യമായ മരുന്നുകൾ കിട്ടുന്നില്ല. അത്യാസന്ന നിലയിലായ രോഗികൾക്ക് വേണ്ടത്ര ചികിത്സ കൊടുക്കാൻ സർക്കാരിന് കഴിയുന്നില്ല. ആവശ്യമായ ഡോക്ടർമാരുടെ അഭാവം വലിയ പ്രതിസന്ധിയാണ് സൃഷ്ടിച്ചിരിക്കുന്നത്. ഡോ. ഹാരിസിന്‍റെ വെളിപ്പെടുത്തലുകൾ വന്നപ്പോൾ സിസ്റ്റത്തിന്‍റെ തകരാർ എന്ന് പറഞ്ഞ് ഒഴിയുന്ന നിലപാടാണ് ആരോഗ്യമന്ത്രി സ്വീകരിച്ചത്. മന്ത്രി വീണാ ജോർജിൽനിന്ന് എത്രയും വേഗം ആരോഗ്യവകുപ്പ് മാറ്റണമെന്നും എംപി ആവശ്യപ്പെട്ടു. ഡിസിസി പ്രസിഡന്‍റ് ബി. ബാബുപ്രസാദ് അധ്യക്ഷത വഹിച്ചു.

മെഡിക്കൽ കോളജിൽ കംപ്യൂട്ടർ തകരാറിലായി, ഒപി കൗണ്ടറിലെ രോഗികൾ വലഞ്ഞു

അമ്പലപ്പുഴ: തിരക്കേറിയ സൂപ്പർ സ്പെഷാലിറ്റി ബ്ലോക്കിൽ ഒപി കൗണ്ടറിലെ കംപ്യൂട്ടർ തകരാറിലായി. നൂറുകണക്കിന് രോഗികൾ വലഞ്ഞു. ആലപ്പുഴ മെഡിക്കൽ കോളജ് ആശുപത്രിയിലെ സൂപ്പർ സ്പെഷാലിറ്റി ബ്ലോക്കിലാണ് ഇന്നലെ കംപ്യൂട്ടർ തകരാറിലായത്. ആഴ്ചയിൽ ഒരുദിവസം മാത്രം ഒപി യുള്ള ഗാസ്ട്രോളജി വിഭാഗത്തിൽ ഉൾപ്പെടെ വിവിധ ഒപികളിലായി ചികിത്സതേടി നൂറുകണക്കിന് രോഗികളാണ് രാവിലെ മുതൽ കാത്തുനിന്നത്. ഇതിനിടയിലാണ് ഒപി ടിക്കറ്റ് വിതരണം ചെയ്യുന്ന കംപ്യൂട്ടർ തകരാറിലായത്. പിന്നീട് മണിക്കൂറുകൾ കാത്തുനിന്നശേഷം ഭൂരിഭാഗം രോഗികളും മടങ്ങിപ്പോയി. ഗാസ്ട്രോളജി വിഭാഗത്തിൽ ചികിത്സതേടാൻ ജില്ലയുടെ വിവിധ പ്രദേശങ്ങളിൽനിന്നായി അനേകം രോഗികളാണ് എത്തിയത്. കംപ്യൂട്ടർ തകരാറായെങ്കിലും പകരം സംവിധാനമേർപ്പെടുത്തി ഒപി ടിക്കറ്റ് വിതരണം ചെയ്യാനും അധികൃതർക്ക് കഴിഞ്ഞില്ല.

തണ്ണീർമുക്കം പള്ളിയില്‍ തിരുരക്ത ജപമാല മാസാചരണം

ചേര്‍ത്തല: തണ്ണീർമുക്കം തിരുരക്ത പള്ളിയിൽ 17 വരെ തിരുരക്ത ജപമാല മാസാചരണം നടക്കും. 18ന് തിരുനാൾ കൊടിയേറ്റവും തുടര്‍ന്ന് തിരുരക്ത തിരുനാൾ നവനാൾ ആരംഭിക്കും. 26, 27 തീയതികളിലാണ് പ്രധാന തിരുനാൾ. എല്ലാ വെള്ളിയാഴ്ചകളിലും രാവിലെ 10നും വൈകുന്നേരം അഞ്ചിനും തിരുരക്ത ജപമാലയും ദിവ്യബലിയും പ്രത്യേക തിരുരക്ത തിരുക്കർമങ്ങളും നേർച്ചക്കഞ്ഞി വിതരണവും നടക്കും. തിരുരക്ത ജപമാല മാസാചരണത്തിന്‍റെ ഭാഗമായി 17 വരെ ദിവസങ്ങളിൽ ഇടവകയിലെ കുടുംബങ്ങളെ വിവിധ ഗ്രൂപ്പുകളായി സമർപ്പിച്ച് പ്രത്യേക പ്രാർഥനകളും ഉണ്ടായിരിക്കുമെന്ന് വികാരി ഫാ. സുരേഷ് മല്പാൻ അറിയിച്ചു.

പെരുമ്പളത്തിനൊരു കളിക്കളം; ദ്വീപിന്‍റെ കായിക സ്വപ്നങ്ങള്‍ക്കു കരുത്തുപകര്‍ന്ന് ഒരുകോടി അനുവദിച്ചു

ആലപ്പുഴ: നാടിന് സ്വന്തമായി ഒരു കളിക്കളം വേണമെന്ന പെരുമ്പളം ദ്വീപ് നിവാസികളുടെ സ്വപ്നം യാഥാർഥ്യമാകുന്നു. കായിക, യുവജനകാര്യ വകുപ്പിന്‍റെ ഒരു പഞ്ചായത്തിന് ഒരു കളിക്കളം പദ്ധതിയിൽ ഉൾപ്പെടുത്തിയാണ് കളിക്കളം അനുവദിച്ചത്. ഒരുകോടി രൂപ ചെലവിൽ അത്യാധുനിക സൗകര്യങ്ങളോടെയാണ് കളിക്കളം നിർമിക്കുന്നത്. ഇതിനായി മൊത്തം തുകയുടെ 50 ശതമാനമായ 50 ലക്ഷം രൂപ കായികവകുപ്പ് മുടക്കും. എംഎൽഎ ഫണ്ട്, തദ്ദേശ സ്ഥാപന ഫണ്ട്, സിഎസ്ആർ, പൊതു-സ്വകാര്യ പങ്കാളിത്തം തുടങ്ങിയവയിലൂടെ ബാക്കി തുക കണ്ടെത്തും. രാസലഹരിയുടെ ഉപയോഗവും അക്രമവും യുവാക്കളിലും കൗമാരക്കാർക്കിടയിലും വർധിച്ചുവരുന്ന സാഹചര്യത്തിൽ കായിക മത്സരങ്ങളുടെയും കായിക വിനോദങ്ങളുടെയും നല്ല ലഹരിയിലേക്ക് പുതുതലമുറയെ നയിക്കുന്നതിന് ഇത്തരം പദ്ധതികൾ ഏറെ സഹായകരമാകുമെന്ന് ദലീമ ജോജോ എംഎൽഎ പറഞ്ഞു. പദ്ധതിയുടെ തുടർനടപടികൾ എത്രയും വേഗത്തിലാക്കി സ്വന്തമായി ഒരു കളിക്കളം എന്ന പെരുമ്പളം നിവാസികളുടെ സ്വപ്നം ഉടൻ യാഥാർഥ്യമാക്കാനുള്ള നടപടികൾ കൈക്കൊള്ളുമെന്നും എംഎൽഎ പറഞ്ഞു. കേരളത്തിലെ മുഴുവൻ പഞ്ചായത്തുകളിലും നിലവാരമുള്ള കളിക്കളം ഒരുക്കാൻ ലക്ഷ്യമിട്ടാണ് കായിക, യുവജനകാര്യ വകുപ്പ് പദ്ധതി നടപ്പിലാക്കുന്നത്. 2025-26 സാമ്പത്തിക വർഷത്തിൽ സംസ്ഥാനത്ത് അനുവദിച്ച 36 കളിക്കളങ്ങളിൽ അഞ്ചെണ്ണമാണ് ആലപ്പുഴയ്ക്ക് ലഭിച്ചത്. ഒരെണ്ണം അരൂർ മണ്ഡലത്തിലെ പെരുമ്പളത്തും ബാക്കി നാലെണ്ണം മാവേലിക്കര മണ്ഡലത്തിലെ തെക്കേക്കര, പാലമേൽ, വള്ളികുന്നം, താമരക്കുളം പഞ്ചായത്തുകളിലുമാണ് അനുവദിച്ചത്. പെരുമ്പളം പഞ്ചായത്തിലെ ഏഴാം വാർഡിൽ കളിക്കളം നിർമിക്കാനാണ് ഭരണസമിതി തീരുമാനിച്ചിരിക്കുന്നത്. ഇവിടെ എല്ലാവിധ കായിക ഇനങ്ങൾക്കും പറ്റിയ തരത്തിലുള്ള ഗ്രൗണ്ട്, നടപ്പാത, ഓപ്പൺ ജിം, ശുചിമുറി തുടങ്ങിയ സംവിധാനങ്ങൾ ഒരുക്കുമെന്നും പെരുമ്പളത്തെ ജനങ്ങളുടെ പ്രാദേശിക ഒത്തുചേരലും സാമൂഹിക ഇടപെടലും മെച്ചപ്പെടുത്താൻ സഹായിക്കുന്ന കേന്ദ്രമാക്കി ഇതിനെ മാറ്റുമെന്നും പഞ്ചായത്ത് പ്രസിഡന്‍റ് അഡ്വ. വി.വി. ആശ പറഞ്ഞു.

മൂലം വള്ളംകളി: ട്രാക്കും ഹീറ്റ്‌സും നിശ്ചയിച്ചു

മങ്കൊമ്പ്: ഇത്തവണത്തെ മൂലം ജലോത്സവത്തിലെ മത്സരവള്ളംകളിയിൽ പങ്കെടുക്കുന്ന കളിവള്ളങ്ങളുടെ ട്രാക്കും ഹീറ്റ്‌സും നിശ്ചയിച്ചു. ഇക്കുറി അഞ്ചു ചുണ്ടൻ വള്ളങ്ങൾ, മൂന്നു വീതം എ ഗ്രേഡ്, ബി ഗ്രേഡ് വെപ്പുവള്ളങ്ങളും മത്സരങ്ങളിൽ പങ്കെടുക്കും. കളിവള്ളങ്ങളുടെ ട്രാക്കും ഹീറ്റ്‌സും നിശ്ചയിക്കുന്നതിനുള്ള നറുക്കെടുപ്പ് നെടുമുടി സിഐ നൗഫൽ നിർവഹിച്ചു. ചുണ്ടൻവള്ളങ്ങളുടെ ഒന്നാമത്തെ ഹീറ്റ്‌സിൽ ട്രാക്ക് രണ്ടിൽ നടുഭാഗം, ട്രാക്ക് മൂന്നിൽ ചെറുതന, ഹീറ്റ്‌സ് രണ്ട്-ട്രാക്ക് ഒന്നിൽ ആയാപറമ്പ് പാണ്ടി, ട്രാക്ക് രണ്ടിൽ ചമ്പക്കുളം, ഹീറ്റ്‌സ് മൂന്ന്- ട്രാക്ക് മൂന്നിൽ ആയാപറമ്പ് വലിയദിവാൻജി. ബി ഗ്രേഡ് വെപ്പു വള്ളങ്ങളുടെ മത്സരത്തിൽ ട്രാക്ക് ഒന്നിൽ പി.ജി. കരിപ്പുഴ, ട്രാക്ക് രണ്ടിൽ ചിറമേൽ തോട്ടുകടവൻ, ട്രാക്ക് മൂന്നിൽ പുന്നത്ര പുരയ്ക്കൽ എന്നീ വള്ളങ്ങളും മത്സരിക്കും. എ ഗ്രേഡ് വെപ്പു വള്ളങ്ങളുടെ വിഭാഗത്തിൽ ട്രാക്ക് ഒന്നിൽ നവജ്യോതി, ട്രാക്ക് രണ്ടിൽ അമ്പലക്കടവൻ, ട്രാക്ക് മൂന്നിൽ മണലി എന്നീ വള്ളങ്ങളുമാകും ഏറ്റുമുട്ടുക. ചമ്പക്കുളം ബ്ലോക്കു പഞ്ചായത്ത് പ്രസിഡന്‍റ് ജിൻസി ജോളി യോഗം ഉദ്ഘാടനം ചെയ്തു. നെടുമുടി പഞ്ചായത്ത് പ്രസിഡന്‍റ് മിനി മന്മഥൻ നായർ അധ്യക്ഷത വഹിച്ച യോഗത്തിൽ ചമ്പക്കുളം പഞ്ചായത്ത് പ്രസിഡന്‍റ് ടി.ജി. ജലജാകുമാരി, എം.എസ്. ശ്രീകാന്ത് തുടങ്ങിയവർ പ്രസംഗിച്ചു.

പ്രതിഭാസംഗമം നടത്തി

മങ്കൊമ്പ്: കാവാലം ലിറ്റിൽ ഫ്‌ളവർ ഹൈസ്‌കൂളിലെ പ്രതിഭാസംഗമവും അധ്യാപക രക്ഷാകർതൃ സമ്മേളനവും സ്‌കൂൾ മാനേജർ ഫാ. ജേക്കബ് കാട്ടടി ഉദ്ഘാടനം ചെയ്തു. പിടിഎ പ്രസിഡന്‍റ് എം.സി. ജോയപ്പൻ അധ്യക്ഷത വഹിച്ച യോഗത്തിൽ അതിരമ്പുഴ സെന്‍റ് അലോഷ്യസ് സ്‌കൂൾ ഹെഡ്മിസ്ട്രസ് റോഷ്‌നി ജേക്കബ് എസ്എസ്എൽസി പരീക്ഷയിൽ ഉന്നതവിജയം നേടിയ പ്രതിഭകളെ ആദരിച്ചു. പഞ്ചായത്തംഗം ശ്യാം ശങ്കർ, ഹെഡ്മിസ്ട്രസ് മെർളിക്കുട്ടി ആന്‍റണി, സ്റ്റാഫ് പ്രതിനിധി പ്രശാന്ത് എം. നമ്പൂതിരി, പിടിഎ സെക്രട്ടറി എലിസബത്ത് സി. ജോയ്, വിദ്യാർഥി പ്രതിനിധി ആർച്ച ബി. കൃഷ്ണ, സിസ്റ്റർ കൃപ, അക്ഷയ രതീഷ് തുടങ്ങിയവർ പ്രസംഗിച്ചു. എക്‌സൈസ് ഉദ്യോഗസ്ഥൻ പി.ജെ. അനീഷ് വിദ്യാർഥികൾക്കു ക്ലാസെടുത്തു.

നൈപുണ്യ കോളജിൽ വിദ്യാരംഭം

ചേർത്തല: നൈപുണ്യ കോളജിൽ ബിരുദ വിദ്യാർഥികളെ സ്വീകരിക്കുന്നതിനായി വിദ്യാരംഭം പരിപാടി സംഘടിപ്പിച്ചു. ആലപ്പുഴ ഡെപ്യൂട്ടി കളക്ടർ സി. പ്രേംജി ഉദ്ഘാടനം ചെയ്തു. കോളജ് എക്സിക്യൂട്ടീവ് ഡയറക്ടർ ഫാ. വര്‍ഗീസ് പാലാട്ടി അധ്യക്ഷത വഹിച്ചു. സമ്മേളനത്തിൽ യൂണിവേഴ്സിറ്റി റാങ്ക് ജേതാക്കളെ അനുമോദിച്ചു. അസി. എക്സിക്യൂട്ടീവ് ഡയറക്ടർ ഫാ. ചാക്കോ കിലുക്കൻ, പ്രിൻസിപ്പൽ ഡോ. ബിജി പി. തോമസ്, വൈസ് പ്രിൻസിപ്പൽ പുഷ്പ ജോൺ എന്നിവർ പ്രസംഗിച്ചു.

വള്ളികുന്നം ചിറയിൽ ടൂറിസം പദ്ധതി: നിർമാണം ഉടൻ ആരംഭിക്കും

ചാരുംമൂട്: പ്രകൃതിരമണീയമായ വള്ളികുന്നം ചിറയിലെ ടൂറിസം പദ്ധതിക്കു വീണ്ടും ജീവൻവയ്ക്കുന്നു. നാലു വർഷമായി മുടങ്ങിയ നിർമാണ പ്രവർത്തനങ്ങൾ രണ്ടു മാസത്തിനുള്ളിൽ ആരംഭിക്കാനാണ് ഇപ്പോൾ ലക്ഷ്യമിടുന്നത്. എം.എസ്. അരുൺകുമാർ എംഎൽഎയും ടൂറിസം ഉദ്യോഗസ്ഥരും നിർമാണച്ചുമതലയുള്ള പൊതുമേഖല സ്ഥാപനമായ കേരള ഇലക്‌ട്രിക്കൽ ആൻഡ് അലൈഡ് എൻജിനിയറിംഗ് കമ്പനി ലിമിറ്റഡ് ഉദ്യോഗസ്ഥരുംഇന്നലെ ചിറ സന്ദർശിച്ചു. വിനോദസഞ്ചാരികളെ ആകർഷിക്കുക എന്ന ലക്ഷ്യത്തിലാണ് ഇവിടെ ടൂറിസം പദ്ധതി പ്രഖ്യാപിച്ചിരിക്കുന്നത്. സ്റ്റീൽ ഇൻഡസ്ട്രിയൽസ് കേരള ലിമിറ്റഡാണ് പദ്ധതിയുടെ ഡിപിആർ തയാറാക്കിയിരിക്കുന്നത്. ചിറയുടെ സംരക്ഷണ പ്രവർത്തനങ്ങൾ, പ്രവേശന കവാടം, പാർക്കിംഗ്, വാട്ടർ ടാങ്ക്, ആംഫി തിയറ്റർ, കുട്ടികളുടെ പാർക്ക്, പെഡസ്ട്രിയൽ ബോട്ടിംഗ്, വൈദ്യുതീകരണം, ശൗചാലയ ബ്ലോക്ക് തുടങ്ങിയവയാണ് ആദ്യഘട്ടം ഒരുക്കുന്നത്. പഞ്ചായത്ത് പ്രസിഡന്‍റ് ഡി. രോഹിണി, മുൻ പ്രസിഡന്‍റ് ബിജി പ്രസാദ്, സ്ഥിരം സമിതി അധ്യക്ഷൻ ജെ. രവീന്ദ്രനാഥ്, പഞ്ചായത്തംഗം ബി. കോമളൻ തുടങ്ങിയരും സ്ഥലം സന്ദർശിച്ചു. ചിറയിൽ ടൂറിസം പദ്ധതി നടപ്പാകുന്നതോടെ വള്ളികുന്നം ആഭ്യന്തരടൂറിസം ഭൂപടത്തിൽ ഇടംപിടിക്കും. ഓച്ചിറ-താമരക്കുളം റോഡിൽ പുത്തൻചന്തയിൽനിന്നു കിഴക്കോട്ട് അരക്കിലോമീറ്റർ സഞ്ചരിച്ചാൽ ചിറയിലെത്താം. വള്ളികുന്നം പഞ്ചായത്തിലെ നാലും ഏഴും വാർഡുകളിലായി 18 ഏക്കറിലാണ് ചിറ സ്ഥിതിചെയ്യുന്നത്. ചിറയുടെ രണ്ടുവശങ്ങളിലും വിശാലമായ പുഞ്ചയാണ്. 2012 ൽ നബാർഡിൽനിന്നുള്ള ഒന്നരക്കോടി രൂപ ചെലവഴിച്ചു ചിറ നവീകരിച്ചിരുന്നു. വള്ളികുന്നത്തെ വലുതും പ്രധാനപ്പെട്ടതുമായ ചിറയോടു ചേർന്ന് അനവധി നീർച്ചാലുകളുമുണ്ട്.

കാരുണ്യ പദ്ധതികളുമായി ഹരിപ്പാട് ഗ്രേറ്റർ റോട്ടറി ക്ലബ്

ഹരിപ്പാട്: ഹരിപ്പാട് ഗ്രേറ്റർ റോട്ടറി ക്ലബിന്‍റെ ഭാരവാഹികളുടെ സ്ഥാനാരോഹണവും സുധർമ മുരളീധരൻ വനിതാ രത്ന അവാർഡ് ദാനവും മൂന്നിന് കാർത്തികപ്പള്ളി പോൾ ഹാരീസ് ഹാളിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. റോട്ടറി ഡിസ്ട്രിക്ട് നിയുക്ത ഗവർണർ കൃഷ്ണൻ ജി. നായർ ഉദ്ഘാടനം ചെയ്യും. പുതിയ ഭാരവാഹികളായി ആർ.കെ. പ്രകാശ്(പ്രസിഡന്‍റ് ), സൗമ്യ പ്രമോദ് (സെക്രട്ടറി), സന്തോഷ് വർഗീസ് (ട്രഷറർ) എന്നിവർ ചുമതലയേൽക്കും. ഈ വർഷത്തെ ജീവകാരുണ്യപ്രവർത്തനങ്ങളുടെ ഉദ്ഘാടനവും നടക്കും. പ്രധാന പദ്ധതികളിൽ ഹരിതകർമസേനയ്ക്ക് സൗജന്യ പ്രഭാതഭക്ഷണ വിതരണം, വനിതകൾക്ക് സൗജന്യ കാൻസർ സ്ക്രീനിംഗ്, കിടപ്പുരോഗികൾക്കുള്ള സ്വാന്തന പരിചരണം, ഓപ്പോൾ പദ്ധതിയിലൂടെ നിരാലംബർക്ക് ഭവനനിർമാണം, വിദ്യ എന്ന പേരിൽ വിദ്യാർഥികൾക്കുള്ള പദ്ധതികൾ, നിർമല- ശുദ്ധജല വിതരണം, ആശ -വനിതകൾക്കുള്ള ആരോഗ്യ-തൊഴിൽ പരിശീലന പദ്ധതികൾ, ജനനി- കുട്ടികൾക്കുള്ള കളിപ്പാ വിതരണം, ഭൂമിക- ഫലവൃക്ഷതൈ എന്നിവ ഉൾപ്പെടുന്നു. ഈ പദ്ധതികളുടെ ഉദ്ഘാടനം ഇന്ന് ഒന്നിന് ഡിസ്ട്രിക്ട് ഗവർണർ ഡോ. റ്റീന ആന്‍റണി നിർവഹിക്കും. സുധർമ മുരളീധരൻ വനിതാ രത്ന അവാർഡ് മാവേലിക്കര സ്വദേശിനിയും വ്യവസായ സംരംഭകയുമായ ആർ. ഗീതാലക്ഷ്മിക്ക് സമ്മാനിക്കും. റോട്ടറിയും സുധാ മുരളീ ഫൗണ്ടേഷനും സംയുക്തമായി ഏർപ്പെടുത്തിയ അവാർഡ്, മുൻ റോട്ടറി അംഗം സുധാ മുരളീധരന്‍റെ സ്മരണാർഥമാണ്. വാർത്താസമ്മേളനത്തിൽ പ്രസിഡന്‍റ് ആർ.കെ. പ്രകാശ്‌, സെക്രട്ടറി സൗമ്യ പ്രമോദ്, ട്രഷറർ സന്തോഷ് വർഗീസ്, ക്ലബ്‌ അഡ്മിനിസ്ട്രേറ്റർ മുരുകൻ പാളയത്തിൽ, മെമ്പർഷിപ്പ് കമ്മിറ്റി ചെയർമാൻ മുരളീധരൻ, റോട്ടറി ഫൗണ്ടേഷൻ ചെയർമാൻ പ്രമോദ് ഇട്ടിക്കാട്ടിൽ, ക്ലബ്ബ് ട്രെയിനർ ജേക്കബ് സാമൂവൽ തുടങ്ങിയവർ പങ്കെടുത്തു.

നൂറ്റുവന്‍പാറ ടൂറിസം പദ്ധതിക്ക് ചിറകുമുളയ്ക്കുന്നു

ചെങ്ങന്നൂര്‍: പൗരാണിക ഐതിഹ്യപ്പെരുമയാല്‍ ശ്രധേയമായ പുലിയൂര്‍ പഞ്ചായത്തിലെ നൂറ്റുവന്‍പാറയെ കേന്ദ്രീകരിച്ച് ടൂറിസം പദ്ധതി നടപ്പാക്കാന്‍ സംസ്ഥാന ടൂറിസം വകുപ്പ് രണ്ടു കോടി 20 ലക്ഷം രൂപ അനുവദിച്ചു. മന്ത്രി സജി ചെറിയാന്‍റെ നിര്‍ദേശത്തെത്തുടര്‍ന്നാണ് തീരുമാനം. ചെങ്ങന്നൂരിന്‍റെ പാരമ്പര്യവും സാംസ്‌കാരിക പൈതൃകവും വിളിച്ചോതുന്ന പ്രദേശങ്ങളെ കൂട്ടിയിണക്കി പൈതൃക ടൂറിസം പദ്ധതി നടപ്പാക്കുന്നതിനുള്ള നിരന്തര പരിശ്രമങ്ങളുടെ ഭാഗമായാണ് നൂറ്റുവന്‍പാറ ടൂറിസം പദ്ധതിക്ക് ഇപ്പോള്‍ ഭരണാനുമതി ലഭിച്ചിരിക്കുന്നത്. പദ്ധതിയില്‍ വിഭാവനം ചെയ്യുന്ന പ്രധാന സൗകര്യങ്ങള്‍ പദ്ധതി യാഥാര്‍ഥ്യമാകുന്നതോടെ വിനോദസഞ്ചാരികള്‍ക്ക് നൂറ്റുവന്‍പാറയില്‍ മെച്ചപ്പെട്ട സൗകര്യങ്ങള്‍ ലഭ്യമാകും. വിശ്രമസ്ഥലം, റെയിന്‍ ഷെല്‍ട്ടര്‍, സുരക്ഷാ ഹാന്‍ഡ് റെയിലുകള്‍, കാന്‍റി ലിവര്‍ വ്യൂ പോയിന്‍റ്, സിസിടിവി നിരീക്ഷണം, ആധുനിക ശുചിമുറി സൗകര്യങ്ങള്‍, റോപ്പ് വേ, സുരക്ഷാ ഗാര്‍ഡുകള്‍, മറ്റ് സുരക്ഷാ സംവിധാനങ്ങള്‍ എന്നിവയാണ് ഇതില്‍ ഉള്‍പ്പെടുന്നത്. സന്ദര്‍ശകരുടെ എണ്ണം വര്‍ധിക്കുന്നതിനനുസരിച്ച് കൂടുതല്‍ സൗകര്യങ്ങള്‍ ഏര്‍പ്പെടുത്താനും പദ്ധതി ലക്ഷ്യമിടുന്നുണ്ട്. ചെങ്ങന്നൂരിന് പുതിയ ടൂറിസം സാധ്യതകള്‍ നൂറ്റുവന്‍പാറ ടൂറിസം പദ്ധതി യാഥാര്‍ഥ്യമാകുന്നതോടെ പാണ്ഡവന്‍ പാറ, ആലാ പൂമലച്ചാല്‍, കുതിരവട്ടം ചിറ അക്വാടൂറിസം തുടങ്ങിയ നിലവിലുള്ള പദ്ധതികളുമായി സംയോജിപ്പിച്ച് കൂടുതല്‍ ടൂറിസ്റ്റ് ഡെസ്റ്റിനേഷനുകള്‍ വികസിപ്പിക്കാന്‍ കഴിയും. ഇത് ചെങ്ങന്നൂരിന്‍റെ ടൂറിസം മേഖലയ്ക്ക് വലിയ ഉണര്‍വ് നല്‍കുമെന്ന് മന്ത്രി സജി ചെറിയാന്‍ പറഞ്ഞു. ഈ പദ്ധതി ചെങ്ങന്നൂരിന്‍റെ സാമ്പത്തിക, സാംസ്‌കാരിക രംഗങ്ങളില്‍ പുതിയ അധ്യായം കുറിക്കുമെന്ന പ്രതീക്ഷയിലാണ് പ്രദേശവാസികള്‍.

കല്ലിമേൽ തേനീച്ചവളർത്തൽ കേന്ദ്രം ഹണി മ്യൂസിയമാക്കുന്നു

മാങ്കാംകുഴി: തഴക്കര പഞ്ചായത്തിലെ നൂറേക്കർ ജില്ലാ കൃഷിത്തോട്ടത്തോട് ചേർന്ന് പ്രവർത്തിക്കുന്ന കല്ലിമേൽ തേനീച്ചവളർത്തൽ കേന്ദ്രം ഹണി മ്യൂസിയമാക്കി ഉയർത്തുന്നു. രാജ്യത്തെ ആദ്യ തേനീച്ച സസ്യപാർക്കായി 2018 ലാണ് പ്രവർത്തനം ആരംഭിച്ചത്. ഏഴു വർഷം പിന്നിടുമ്പോൾ തേൻമധുരമുള്ള വിജയകഥയായി കേന്ദ്രം മാറി. ദിവസം 25,000 രൂപവരെയാണ് ഇവിടുത്തെ വിറ്റുവരവ്. അമ്പതിനായിരം കിലോയിലധികം തേനാണ് കർഷകരിൽനിന്നും ശേഖരിച്ച് സംസ്‌കരിച്ച് അമൃത് ഹണിയായി വിൽപ്പന നടത്തിയത്. സർക്കാർ സംവിധാനത്തിലെ ആദ്യത്തെ ആധുനിക തേൻനിർമാണ ശുദ്ധീകരണ വിപണന കേന്ദ്രം കൂടിയാണിത്. മൂന്ന് ഏക്കറിലായാണ് ഹോർട്ടികോർപ്പിന് കീഴിൽ കേന്ദ്രം പ്രവർത്തിക്കുന്നത്. തേനീച്ചകളുടെ പ്രയോജനത്തെക്കുറിച്ച് അവബോധം നൽകുന്നതിന് ഒരുകോടി രൂപ ചെലവിൽ കെട്ടിടം പുനർനിർമിച്ചാണ് പദ്ധതി ആരംഭിച്ചത്. പിന്നീട് വിവിധ ഘട്ടങ്ങളിലായി കേന്ദ്രത്തിന്‍റെ വികസനപ്രവർത്തനങ്ങൾക്ക് രണ്ടുകോടിയിലധികം രൂപ ചെലവഴിച്ചു. പ്രധാനമായും മൂന്നു രീതിയിലാണ് കേന്ദ്രത്തിന്‍റെ പ്രവർത്തനം. തേനീച്ചകളെ വളർത്തി തേൻ ഉത്പാദിപ്പിക്കുക, കർഷകരിൽനിന്ന് തേൻ സംഭരിച്ച് ശാസ്ത്രീയമായി സംസ്‌കരിച്ച് വിപണിയിൽ എത്തിക്കുക, കർഷകർക്ക് പരിശീലനം നൽകുക എന്നിവയാണവ. തേനീച്ച വളർത്തൽ കേന്ദ്രത്തിൽ ഇരുന്നൂറോളം തേനീച്ചക്കൂടുകളാണുള്ളത്. ചെറുതേനീച്ചകളെയും ഇന്ത്യൻ തേനീച്ചകളെയുമാണ് ഇതിൽ പ്രധാനമായും വളർത്തുന്നത്. വർഷം രണ്ടു ടൺ തേൻ ഇവയിൽനിന്നുമാത്രം ഉത്പാദിപ്പിക്കുന്നുണ്ട്. കർഷകർ ഉത്പാദിപ്പിക്കുന്ന തേൻ സർക്കാർ നിശ്ചയിക്കുന്ന തുകയ്ക്ക് നേരിട്ട് സംഭരിക്കുന്നതിലൂടെ കർഷകർക്ക് ന്യായമായ വില ഇവിടെ ഉറപ്പാക്കുന്നുണ്ട്. സംഭരിക്കുന്ന തേൻ ശാസ്ത്രീയമായി സംസ്‌കരിച്ച് തേനിന്‍റെ ഗുണനിലവാരം ഉറപ്പുവരുത്തിയ ശേഷം അമൃത് തേൻ എന്ന ബ്രാൻഡിലാണ് കുറഞ്ഞ വിലയിൽ വിൽക്കുന്നത്. 50 ഗ്രാം മുതലുള്ള അമൃത് ഹണി കാനുകൾ ലഭ്യമാണ്. ഒരു കിലോ തേനിന് 380 രൂപയാണ് വില. അഞ്ചു കിലോ തേൻ 1375 രൂപയ്ക്ക് അമൃത് ഹണി ഔട്ട് ലെറ്റിൽനിന്ന് വാങ്ങാം. ഹണി സോപ് ഉൾപ്പെടെ തേനിൽനിന്നുള്ള മൂല്യവർധിത ഉത്പന്നങ്ങളും ഇവിടെ ലഭ്യമാണ്. ഇരട്ടി മധുരം, നീല അമരി, വിവിധ തരം അരികൾ തുടങ്ങിയവയും ഇവിടെ വിൽപ്പനയ്ക്കുണ്ട്. ഇവിടെ വിജയകരമായി പരിശീലനം പൂർത്തിയാക്കുന്നവർക്ക് തേനീച്ചക്കൂടും അനുബന്ധ ഉപകരണങ്ങളും കേന്ദ്ര, സംസ്ഥാന സർക്കാരുകളുടെ വിവിധ പദ്ധതികൾ വഴി 40 ശതമാനം സബ്സിഡിയിൽ നൽകുന്നുമുണ്ട്. കൂടാതെ ബ്ലോക്ക് അടിസ്ഥാനത്തിൽ 30 കർഷകർക്ക് കൃഷി ഓഫീസറുടെ നിർദേശാനുസരണവും പരിശീലനവും നൽകിവരുന്നു. കൂടാതെ സംസ്ഥാനത്തെ വിവിധ സ്ഥലങ്ങളിൽ തേനീച്ചകളെ ഉത്പാദിപ്പിക്കുന്ന കർഷകരെ തെരഞ്ഞെടുത്ത് അവരിൽനിന്നും തേനീച്ചകളെ സംഭരിക്കുന്ന പ്രവർത്തനങ്ങളും ഇവിടെ നടക്കുന്നുണ്ട്. വിനോദസഞ്ചാരികളെയടക്കം ആകർഷിക്കാൻ കഴിയുന്ന ഹണി മ്യൂസിയമായി കല്ലിമേൽ തേനീച്ച വളർത്തൽ കേന്ദ്രത്തെ മാറ്റുന്നതിനുള്ള പരിശ്രമത്തിലാണ് സർക്കാറെന്ന് എം.എസ്. അരുൺകുമാർ എംഎൽഎ പറഞ്ഞു. സംസ്ഥാനത്തെ 1500ൽ അധികം കർഷകർക്ക് ഇവിടെനിന്ന് പരിശീലനം കൊടുക്കാനായി. പതിനായിരത്തിലധികം കർഷകർക്ക് സബ്‌സിഡിയായി തേനീച്ച കോളനികൾ നിർമിക്കുന്നതിന് സഹായം നൽകി. കർഷകർക്ക് തേനിന്‍റെ ഗുണനിലവാരം പരിശോധിക്കാനായി ലാബ് സ്ഥാപിക്കാനുള്ള അനുമതിയും കേന്ദ്രത്തിന് ലഭിച്ചിട്ടുണ്ടെന്നും രണ്ടു മാസത്തിനുള്ളിൽ ഇതിന്‍റെ നിർമാണപ്രവർത്തനങ്ങൾ ആരംഭിക്കുമെന്നും എംഎൽഎ പറഞ്ഞു. ഹോർട്ടികോർപ്പിന്‍റെ രണ്ടു പതിറ്റാണ്ട് കാലത്തെ പ്രയത്‌നത്തിന്‍റെ ഫലമായി ഇൻഫ്യൂഷൻ സാങ്കേതിക വിദ്യ ഉപയോഗിച്ച് വിവിധ പഴവർഗങ്ങളുടെ രുചിയുള്ള തേനും മാവേലിക്കരയിൽ ഉത്പാദിപ്പിക്കുന്നുണ്ട്. ഇതിനാവശ്യായ ഉപകരണങ്ങളും ഹോർട്ടികോർപ് വികസിപ്പിച്ചിട്ടുണ്ട്.

ജലനിരപ്പിനു നേരിയ കുറവ്; ആശങ്കയിലാക്കി പെരുമഴ

എടത്വ: അപ്പര്‍ കുട്ടനാട്ടില്‍ ജലനിരപ്പിനു നേരിയ കുറവ്. ഇന്നലെ പകല്‍ തെളിഞ്ഞ കാലാവസ്ഥയായിരുന്നെങ്കിലും വൈകിട്ടോടെ വീശിയടിച്ച കാറ്റിലും പെരുമഴയിലും ജനങ്ങള്‍ വീണ്ടും ആശങ്കയിലായിരിക്കുകയാണ്. ശക്തമായ കാറ്റില്‍ നിരവധി മരങ്ങള്‍ കടപുഴകി വീണു. അരമണിക്കൂര്‍ നീണ്ടുനിന്ന പെരുമഴയില്‍ ജലനിരപ്പിനും കാര്യമായ മാറ്റം സംഭവിച്ചിട്ടുണ്ട്. രണ്ടു ദിവസമായി മഴയ്ക്കു നേരിയ ശമനമായെങ്കിലും അപ്പര്‍ കുട്ടനാട്ടില്‍ ജലനിരപ്പ് കാര്യമായി താഴുന്നില്ല. ഒട്ടുമിക്ക പ്രദേശങ്ങളും റോഡുകളും ഇപ്പോഴും മുട്ടോളം വെള്ളത്തിലാണ്. കിഴക്കന്‍ വെള്ളത്തിന്‍റെ വരവ് കുറഞ്ഞതോടെ ജലനിരപ്പ് താഴുമെന്ന് കരുതിയിരിക്കുമ്പോഴാണ് നിനച്ചിരിക്കാതെ പെരുമഴ പെയ്തത്. തലവടി, മുട്ടാര്‍, വീയപുരം, തകഴി, എടത്വ എന്നീ പഞ്ചായത്തില്‍ ജലനിരപ്പ് കുറഞ്ഞു തുടങ്ങിയിരുന്നു. വീടുകളില്‍നിന്ന് വെള്ളം ഇറങ്ങിയെങ്കിലും വീട്ടുപരിസരങ്ങള്‍ വെള്ളക്കെട്ടിലാണ്. അപ്പര്‍ കുട്ടനാട്ടിലെ ഒട്ടുമിക്ക ഗ്രാമീണ റോഡുകളിലും യാത്രക്കാര്‍ക്ക് സഞ്ചരിക്കാന്‍ കഴിയാത്ത നിലയില്‍ വെള്ളം കെട്ടിക്കിടക്കുകയാണ്. ഇതിനോടകം മൂന്നുതവണ വെള്ളം ഉയര്‍ന്ന് ജനജീവിതം സ്തംഭിച്ചിരുന്നു. നിരവധി വീടുകളും തകര്‍ന്നടിയുകയും വിദ്യാര്‍ഥികളുടെ പഠനം മുടങ്ങുകയും ചെയ്തു. അധ്യാപകര്‍ പാഠഭാഗം തീര്‍ക്കാന്‍ പാടുപെടുകയാണ്. ഇന്നലെ കുട്ടനാട് താലൂക്കില്‍ അവധി നല്‍കിയില്ലെങ്കിലും വെള്ളക്കെട്ടിലൂടെ ദുരിതം പേറിയാണ് വിദ്യാര്‍ഥികള്‍ സ്‌കൂളുകളില്‍ എത്തിയത്. സ്‌കൂളുകളില്‍ വിദ്യാര്‍ഥികളുടെ എണ്ണവും കുറവായിരുന്നു.

മെഡിക്കൽ കോളജുകൾ വെന്‍റിലേറ്ററിൽ: കൊടിക്കുന്നിൽ സുരേഷ് എംപി

ചാരുംമൂട്: സംസ്ഥാനത്തെ സർക്കാർ മെഡിക്കൽ കോളജുകൾ വെന്‍റിലേറ്ററിലാണെന്ന് കോൺഗ്രസ് പ്രവർത്തകസമിതി അംഗം കൊടിക്കുന്നിൽ സുരേഷ് എംപി കുറ്റപ്പെടുത്തി. ആരോഗ്യവകുപ്പിന്‍റെ വീഴ്ചയിൽ മുഖ്യമന്ത്രി മൗനം വെടിയണമെന്നും അദ്ദേഹം ആവശ്യപ്പെട്ടു. ആരോഗ്യവകുപ്പ് നയപരമായി തകർന്നു. ആരോഗ്യകേരളം പേരിൽ ഒതുങ്ങി. ചികിത്സ ലഭിക്കാത്തതിനാൽ രോഗികൾ പലവിധ ബുദ്ധിമുട്ടുകൾ അനുഭവിക്കുകയാണ്. ആരോഗ്യവകുപ്പ് മന്ത്രി തന്നെയാണ് ഈ തകർച്ചയുടെ മുഖ്യ ഉത്തരവാദി. എന്ത് അടിസ്ഥാനത്തിലാണ് മന്ത്രി ഇപ്പോഴും പദവിയിൽ തുടരുന്നതെന്ന് സർക്കാർ വ്യക്തമാക്കണമെന്നും കൊടിക്കുന്നിൽ ആവശ്യപ്പെട്ടു. ആലപ്പുഴ, കോഴിക്കോട്, പാലക്കാട്, ഇടുക്കി, തൃശൂർ തുടങ്ങിയ സർക്കാർ മെഡിക്കൽ കോളജുകളിൽ രോഗികൾക്ക് കിടക്കയും ശുചിമുറികളും ചികിത്സയ്ക്കാവശ്യമായ മരുന്നുകളും ലഭ്യമല്ല. ശസ്ത്രക്രിയകൾ മാസങ്ങൾ നീളുന്ന അവസ്ഥയിൽ രോഗികൾ സ്വകാര്യ ആശുപത്രികളിലേക്ക് പോകേണ്ടിവരുന്നത് അവരെ സാമ്പത്തികമായി തകർക്കുകയാണ്. മുൻകാലങ്ങളിൽ ആരോഗ്യരംഗത്ത് കേരളം മാതൃകയായിരുന്നു. ഇന്ന് കേരളത്തിന്‍റെ ആരോഗ്യമന്ത്രി ഈ വകുപ്പിന് അതീവ അപകടം ആണെന്ന് തെളിയിച്ചു കഴിഞ്ഞതായും കൊടിക്കുന്നിൽ പറഞ്ഞു.

എടത്വ ബോട്ട് ജെട്ടിയുടെ മുഖഛായ മാറുന്നു; പുനര്‍നിര്‍മിക്കുന്നതിനായി 50 ലക്ഷം രൂപ

എടത്വ: ഇറിഗേഷന്‍ ഇന്‍ലാന്‍ഡ് നാവിഗേഷന്‍ വകുപ്പ് കുട്ടനാട് പാക്കേജില്‍പ്പെടുത്തി പുനര്‍നിര്‍മിക്കുന്ന എടത്വ ബോട്ട് ജെട്ടിയുടെ നിര്‍മാണോദ്ഘാടനം നടന്നു. ജില്ലാ പഞ്ചായത്ത് വികസന സ്ഥിരസമിതി അധ്യക്ഷ ബിനു ഐസക് രാജു ഉദ്ഘാടനം നിര്‍വഹിച്ചു. ജനങ്ങളുടെ വര്‍ഷങ്ങളായുള്ള ആവശ്യമായിരുന്നു പതിറ്റാണ്ടുകളായി തകര്‍ന്നുകിടന്ന എടത്വ ബോട്ട് ജെട്ടി പുനര്‍നിര്‍മിക്കുക എന്നത്. വെള്ളപ്പൊക്ക സമയത്താണ് കൂടുതല്‍ ദുരിതം അനുഭവിക്കുന്നത്. ബോട്ട് അടുപ്പിച്ചശേഷം കെട്ടാന്‍ പോലും മാര്‍ഗമില്ലായിരുന്നു. മഴയത്തും വെയിലത്തും യാത്രക്കാര്‍ക്ക് നില്‍ക്കുന്നതിനുള്ള കാത്തിരിപ്പു പുരയും ഇല്ല. ചമ്പക്കുളം കഴിഞ്ഞാല്‍ ഏറ്റവും പ്രധാനപ്പെട്ട ജെട്ടിയാണ് എടത്വ. എടത്വ പള്ളിപ്പെരുന്നാള്‍ കാലത്ത് ഒട്ടേറെ ബോട്ടുകള്‍ എത്താറുണ്ട്. നൂറുകണക്കിനു തീര്‍ഥാടകര്‍ കായല്‍ യാത്രയ്ക്കായി ഈ ജെട്ടിയിലാണ് എത്തുന്നത്. നൂതന സാങ്കേതിക വിദ്യയില്‍ എടത്വ മെയിന്‍ ബോട്ട് ജെട്ടിയും ജെട്ടിയോടു ചേര്‍ന്ന് സംരക്ഷണഭിത്തിയും നിര്‍മിക്കാന്‍ മന്ത്രി റോഷി അഗസ്റ്റിന്‍ 47 ലക്ഷം രൂപ അനുവദിക്കുകയും ഇതേത്തുടര്‍ന്ന് നടപടികള്‍ പൂര്‍ത്തീകരിച്ചു പണി ആരംഭിക്കുന്നത്. ടി ഷേപ്പ്ഡ് ജെട്ടിയാണ് നിര്‍മിക്കുന്നത്. ഇതില്‍ മൂന്നു ഡെക്ക് സ്ലാബും ഉണ്ടാകും. കൂടാതെ 69 മീറ്റര്‍ നീളത്തില്‍ സംരക്ഷണഭിത്തിയും കടവും നിര്‍മിക്കും. പ്രധാന ബോട്ട് ജെട്ടിയോടു ചേര്‍ന്ന് കിഴക്ക് ഭാഗത്തുള്ള ജെട്ടിയുടെ അറ്റകുറ്റപ്പണിയും ഇതോടൊപ്പം നടത്തും. റൂഫിംഗ്, ഡക്ക് ടൈല്‍സ് പാകല്‍, ബെഞ്ച് സ്ളാബ് സ്ഥാപിക്കല്‍ എന്നിവക്കായി മൂന്നു ലക്ഷം രൂപ വേറെയും അനുവദിച്ചിട്ടുണ്ട്. 50 ലക്ഷം രൂപയുടെ പണി പൂര്‍ത്തിയാകുമ്പോള്‍ എടത്വ ബോട്ട് ജെട്ടിയുടെ മുഖഛായ മാറുമെന്നു കരുതുന്നു. പഞ്ചായത്ത് പ്രസിഡന്‍റ് ആന്‍സി ബിജോയി അധ്യക്ഷത വഹിച്ചു. ഇറിഗേഷന്‍ വകുപ്പ് മാവേലിക്കര സെക‌്ഷന്‍ അസി. എന്‍ജിനിയര്‍ കെ.വി. വിപിന്‍ പദ്ധതി വിശദീകരിച്ചു. എടത്വ ഫെറോനാ വികാരി ഫാ. ഫിലിപ്പ് വൈക്കത്തുകാരന്‍, പഞ്ചായത്ത് വൈസ് പ്രസിഡന്‍റ് രേഷ്മ ജോണ്‍സണ്‍, പഞ്ചായത്തംഗങ്ങളായ ജി. ജയചന്ദ്രന്‍, പി.സി. ജോസഫ്, ജീമോന്‍ ജോസഫ്, ബെറ്റി ജോസഫ്, ജെയിന്‍ മാത്യു ബിജു, ബാബു മണ്ണാംതുരുത്തില്‍, വിനിത ജോസഫ്, ജലഗതാഗതവകുപ്പ് എടത്വ സ്റ്റേഷന്‍ മാസ്റ്റര്‍ എം. മുജീബ്, ടി.എസ്. സുരേഷ്, ബിനോയി ഉലക്കപ്പാടി, മാത്യു സേവ്യര്‍ കൊച്ചുപറമ്പ്, മധു മംഗലപ്പള്ളി, ബാബു കണ്ണന്തറ, സിബിച്ചന്‍ തെക്കേടം എന്നിവര്‍ പ്രസംഗിച്ചു.

പനിയും ഛർദിയും ബാധിച്ച പത്താം ക്ലാസ് വിദ്യാർഥിയുടെ മരണകാരണം വ്യക്തമല്ല

മാവേലിക്കര: ചെട്ടികുളങ്ങരയിൽ പനിയും ഛർദിയും ബാധിച്ചു പത്താം ക്ലാസ് വിദ്യാർഥി മരിച്ചതിന്‍റെ കാരണം പ്രാഥമിക പോസ്റ്റ്മോർട്ടം റിപ്പോർട്ടിൽ വ്യക്‌തമല്ലെന്ന് അധികൃതർ. ചെട്ടികുളങ്ങര ഈരേഴ തെക്ക് കാങ്കാലിൽ കിഴക്കതിൽ സെൽവരാജ്-ലേഖ ദമ്പതികളുടെ മകൻ ചെട്ടികുളങ്ങര എച്ച്എസ്എസ് വിദ്യാർഥി നവീൻ രാജ് (15) ആണ് കഴിഞ്ഞദിവസം പനിയും ഛർദിയും ബാധിച്ചു മരിച്ചത്. ഇന്നലെ നടന്ന പോസ്റ്റ്മോർട്ടത്തിന്‍റെ പ്രാഥമിക പരിശോധനാ റിപ്പോർട്ടിൽ കാരണം വ്യക്‌തമല്ല എന്നാണ് ആരോഗ്യവകുപ്പ് അധികൃതർ പറയുന്നത്. എന്നാൽ, പനിയെത്തുടർന്നുണ്ടായ ഹൃദയാഘാതമാകാം മരണ കാരണമെന്നു സൂചനയുണ്ട്. ആന്തരിക അവയവങ്ങളുടെ പരിശോധനാ ഫലം ലഭിച്ചാൽ മാത്രമേ മരണകാരണം കൃത്യമാകു. പ്രാഥമിക പരിശോധനയിൽ മരണകാരണം കണ്ടെത്താനായിട്ടില്ലെന്നും അധികൃതർ പറഞ്ഞു. കഴിഞ്ഞദിവസം ഉച്ചയോടെയാണു നവീനെ ആശുപത്രിയിൽ എത്തിച്ചത്. പെട്ടെന്ന് ആരോഗ്യനില വഷളായതിനാൽ അത്യാഹിത വിഭാഗത്തിൽ പ്രവേശിപ്പിച്ചു ചികിത്സ നൽകുന്നതിനിടെയാണ് മരിച്ചത്. പരിശോധനയിൽ കുട്ടിക്ക് എച്ച്‌വൺ എൻവൺ, ഡെങ്കിപ്പനി, എലിപ്പനി എന്നിവയുടെ ലക്ഷണങ്ങൾ ഇല്ലായിരുന്നുവെന്നു സ്‌ഥിരീകരിച്ചു. പോസ്റ്റ്മോർട്ടത്തിനു ശേഷം ചെട്ടികുളങ്ങര എച്ച്എസ്എസിൽ പൊതുദർശനത്തിനു വച്ച മൃതദേഹം വിലാപയാത്രയായി വീട്ടിലെത്തിച്ചു സംസ്കാരം നടത്തി. ആരോഗ്യ വകുപ്പിന്‍റെ നേതൃത്വത്തിൽ ഇന്ന് സ്കൂ‌ളിൽ പനി സംബന്ധിച്ചു ബോധവത്കരണം ക്ലാസ് നടത്തും.

റീൽസ് ചിത്രീകരണം; പള്ളിപ്പുറത്തെ കുടിവെള്ളം മുടങ്ങിയത് മൂന്നു ദിവസം

പൂച്ചാക്കൽ: സോഷ്യൽ മീഡിയ യിൽ വൈറലാകാൻ റീൽസ് ചിത്രീകരിച്ചത് 23 മീറ്ററോളം ഉയരമുള്ള ശുദ്ധജല വിതരണ ടാങ്കിൽ. റീൽസ് കാരണം മൂന്നു ദിവസമായി മുടങ്ങിയിരുന്ന പള്ളിപ്പുറം പഞ്ചായത്തിൽ ശുദ്ധജലവിതരണം ഇന്നലെ ഉച്ചയോടെ പുനഃരാരംഭിച്ചു. ടാങ്കിൽ നിലവിലു ണ്ടായിരുന്ന കുടിവെള്ളം മുഴുവനായി കളഞ്ഞു. പിന്നീട് ടാങ്ക് അണുവിമുക്തമാക്കിയതിനുശേഷം വെള്ളം നിറച്ചു. വെള്ളത്തിന്‍റെ സാമ്പിൾ ശേഖരിച്ച് ജലവിതരണ വിഭാഗത്തിന്‍റെ ആലപ്പുഴയിലെ ക്വാളിറ്റി കൺട്രോൾ വിഭാഗം പരിശോധന നടത്തി മാലിന്യങ്ങൾ ഇല്ലെന്ന് ഉറപ്പുവരുത്തിയതിനു ശേഷമാണ് ശുദ്ധജല വിതരണം ആരംഭിച്ചത്. ചേർത്തല-അരൂക്കുറ്റി റോഡിൽ പള്ളിപ്പുറം മലബാർ സിമെന്‍റ് ഫാക്ടറിക്കു വടക്കുഭാഗത്തെ ജപ്പാൻശുദ്ധജല സംഭണിയിലാണ് കഴിഞ്ഞ 28ന് മൂന്നു യുവാക്കൾ ഇറങ്ങി കുളിച്ചും ടാങ്കിലേക്ക് ചാടിയും വീഡിയോ ചിത്രീകരിച്ചത്. സംഭവത്തിൽ അറസ്റ്റിലായ തൈക്കാട്ടുശേരി മണ്ണാർകാട് യദുകൃഷ്‌ണൻ (25), പുത്തൻനികർത്തിൽ അതുൽകൃഷ്‌ണ(27), പാണാവള്ളി കളരിത്തറ ജയരാജ് (27)എന്നിവരെ റിമാൻഡ് ചെയ്തിരുന്നു. ശുദ്ധജലം മലിനമാക്കൽ പൊതുമുതൽ നശിപ്പിക്കൽ, സർക്കാർ സ്ഥലത്ത് അതിക്രമിച്ചു കടക്കൽ, സംഘം ചേർന്നുള്ള കുറ്റകൃത്യം തുടങ്ങിയ കുറ്റങ്ങളാണ് ഇവർക്കെതിരേ ചുമത്തിയിരിക്കുന്നത്. ജല അഥോറിറ്റി ഉദ്യോഗസ്ഥ രുടെ പരാതിയും മൊഴിയും രേഖപ്പെടുത്തിയതിനുശേഷമാണ് മൂവരുടെയും അറസ്റ്റ് ചേർത്തല പോലീസ് രേഖപ്പെടുത്തിയത്. ശനിയാഴ്ച്ച വൈകിട്ട് ആറോടെയാണ് ഇവർ പിടിയിലായത്. പ്രതികളെ റിമാൻഡ് ചെയ്തു.16 ലക്ഷം ലീറ്റർ സംഭരണശേഷിയുള്ള ജലസംഭരണിയിലാണ് ഇവർ ഇറങ്ങിയത്. നിരപ്പിലെ കോവിണിപ്പടിയിലൂടെ ടവ്വറിനു മുകളിൽ കയറി ജലസംഭണിയിലെ കോവിണിയിലൂടെ ജലത്തിലേക്കിറങ്ങി. ഇറങ്ങിയപ്പോൾ പകുതിയോളം ഭാഗം ജലമുണ്ടായിരുന്നെന്നാണ് വിവരം. 23 മീറ്ററോളം ഉയരമുള്ളതാണ് ജലസംഭരണി. ടവ്വർ പരിസരം ചുറ്റുമതിൽ കെട്ടി സംരക്ഷിച്ചിരുന്നതിൽ അതിക്രമിച്ചു കടക്കുകയായിരുന്നു. വിവരം നാട്ടുകാർ പോലീസിനെ അറിയിക്കുകയുമായിരുന്നു. റീൽസ് ദൃശ്യങ്ങളെടുത്തെന്നും കുളിച്ചെന്നുമെല്ലാം പ്രചാരണമുണ്ടെങ്കിലും പോലീസ് സ്ഥിരീകരിച്ചിട്ടില്ല. സംഭരണിക്കു മുകളിൽ കയറുക എന്ന ലക്ഷ്യമിട്ട് ചെയ്തതാണെന്നാണ് പോലീസ് പറയുന്നത്. സംഭവം മൂലമുണ്ടായ മുഴുവം നഷ്‌ടവും കാരണക്കാരിൽനിന്നും ഈടാക്കണമെന്നും ജലഅഥോറിറ്റി ആവശ്യപ്പെട്ടിട്ടുണ്ട്. ഒന്നരലക്ഷത്തിൽപ്പരം രൂപ നഷ്ടമുണ്ടായതായാണ് പ്രാഥമിക കണക്ക്.

കാവാലം ടെക്‌നിക്കൽ ഹൈസ്‌കൂൾ; സ്ഥലത്തിന്‍റെ രേഖകൾ കൈമാറി

മങ്കൊമ്പ്: നൽപ്പതു വർഷത്തെ കാത്തിരിപ്പിനു വിരാമമിട്ടു കാവാലം ടെക്‌നിക്കൽ ഹൈസ്‌കൂളിന് സ്വന്തമായി സ്ഥലം എന്ന സ്വപ്നം യഥാർഥ്യമായി. സർരക്കാർ ഏറ്റെടുത്ത സ്ഥലത്തിന്‍റെയും കെട്ടിടത്തിന്‍റെയും മഹസറും താക്കോലും കൈമൈറി. ലാൻഡ് അക്യുസിഷൻ തഹസീൽദാർ സൗമ്യ, ടെക്‌നിക്കൽ എഡ്യൂക്കേഷൻ ഡെപ്യൂട്ടി ഡയറക്ടർ ആർ.എസ്. ഷിബു എന്നിവരിൽനിന്നും ടെക്‌നിക്കൽ ഹൈസ്‌കൂൾ സൂപ്രണ്ട് കിരൺ രോഖകൾ ഏറ്റുവാങ്ങി. കഴിഞ്ഞ മുപ്പത്തിയഞ്ചു വർഷമായി ലിസ്യുവിലും പിന്നീട് കുന്നുമ്മയിലും വാടകക്കെട്ടിടത്തിലാണ് സ്‌കൂൾ പ്രവർത്തിച്ചുവന്നിരുന്നത്. സ്‌കൂൾ അധികൃതർ, പഞ്ചായത്ത്, പിടിഎ എന്നിവരുടെ നിരന്തരമായ പരിശ്രമങ്ങൾക്കൊടുവിലാണ് സ്വപ്‌നം യാഥാർഥ്യമാകുന്നത്. ഏറ്റെടുത്ത സ്ഥലത്ത് കെട്ടിടം നിർമിച്ചു സ്‌കൂളിന്‍റെ പ്രവർത്തനം അവിടേക്കു മാറ്റുക എന്നതാണ് അടുത്ത വെല്ലുവിളി. സ്‌കൂളിനായി ഏറ്റെടുത്ത സ്ഥലത്തു നടന്ന ചടങ്ങിൽ പഞ്ചായത്തംഗങ്ങളായ ടിനു കുര്യൻ, സന്ധ്യ രാജപ്പൻ, വൈസ് പ്രസിഡന്‍റ് ഒ.ജി. ഷാജി, സന്ധ്യ രമേശ്, പിടിഎ വൈസ് പ്രസിഡന്‍റ് ജോമോൻ ആന്‍റണി, മുൻ സ്‌കൂൾ സൂപ്രണ്ട് അബൂബക്കർ കുഞ്ഞ്, പി.എൻ. വിജയകുമാർ, സന്തോഷ് കുമാർ, പി.വി. സുനിൽകുമാർ തുടങ്ങിയവർ പ്രസംഗിച്ചു.

ആലപ്പുഴ മെഡിക്കല്‍ കോളജില്‍ സര്‍ജന്‍മാരുടെ ക്ഷാമം

ആലപ്പുഴ: ഗവ. മെഡിക്കല്‍ കോളജില്‍ ശസ്ത്രക്രിയാ ഉപകരണങ്ങള്‍ ഇല്ലാത്തതുകൊണ്ട് ശസ്ത്രക്രിയകള്‍ നിരന്തരം മാറ്റിവയ്ക്കുകയാണെന്ന യൂറോളജി വിഭാഗം മേധാവി ഡോ. ഹാരീസിന്‍റെ വെളിപ്പെടുത്തല്‍ കേട്ടു തലതാഴ്ത്തിരിയിരിക്കുകയാണു കേരളം. ആലപ്പുഴ ഗവ. മെഡിക്കല്‍ കോളജിലെ പ്രശ്‌നം ശസ്ത്രക്രിയ നടത്താനുള്ള ഡോക്ടര്‍മാരില്ല എന്നതാണ്. ജനറല്‍ സര്‍ജറി വിഭാഗത്തില്‍ 18 ഡോക്ടര്‍മാര്‍ വേണ്ടിടത്ത് എട്ടു പേര്‍ മാത്രം. ജനറല്‍ സര്‍ജറി വിഭാഗത്തില്‍ 18 ഡോക്ടര്‍ വേണ്ട സ്ഥാനത്ത് എട്ടു ഡോക്ടര്‍മാര്‍ മാത്രമാണുള്ളത്. അഞ്ചു സര്‍ജറി യൂണിറ്റുകളില്‍ ഒരു യൂണിറ്റിന്‍റെ മേധാവിയെ കഴിഞ്ഞദിവസം സ്ഥലം മാറ്റി. ഡോക്ടര്‍മാര്‍ കുറവായതില്‍ ഒരു യൂണിറ്റ് ഒഴിവാക്കേണ്ടി വരുമെന്ന് കഴിഞ്ഞദിവസം എച്ച്ഡിഎസ് യോഗത്തില്‍ സര്‍ജറി വിഭാഗം അറിയിച്ചു. ദിവസവും ശരാശരി മൂന്നു മേജര്‍ ശസ്ത്രക്രിയകളും പത്തോളം മൈനര്‍ ശസ്ത്രക്രിയകളും നടക്കുന്ന ആശുപത്രിയില്‍ ഡോക്ടര്‍മാരുടെ കുറവ് പ്രതിസന്ധി സൃഷ്ടിക്കുന്നു. ശസ്ത്രക്രിയയുടെ എണ്ണം കുറയ്ക്കാനുള്ള തീരുമാനം എടുക്കാന്‍ ഒരുങ്ങുകയാണ് ഡോക്ടര്‍മാര്‍. കാര്‍ഡിയോളജി വിഭാഗത്തില്‍ ബൈപാസ് ശസ്ത്രക്രിയയ്ക്കാവശ്യമായ ഒരു ഹാര്‍ട്ട് ലങ് യന്ത്രം മാത്രമാണ് നിലവിലുള്ളത്. 2021ല്‍ കേന്ദ്രസര്‍ക്കാര്‍ മറ്റൊരു ഹാര്‍ട്ട് ലങ് യന്ത്രം എത്തിച്ചെങ്കിലും ഇവിടെ സ്ഥലമില്ലെന്നു പറഞ്ഞ് തിരിച്ചയയ്ക്കുകയായിരുന്നു. 2024ല്‍ ഒക്ടോബര്‍, നവംബര്‍, ഡിസംബര്‍ മാസങ്ങളില്‍ ഒരു ശസ്ത്രക്രിയ പോലും നടന്നില്ല. രജിസ്റ്റര്‍ ചെയ്തിരുന്ന നാലു രോഗികളെ പിന്നീടു ശസ്ത്രക്രിയയ്ക്കു സമയം അനുവദിക്കാനായി ഫോണില്‍ വിളിച്ചപ്പോള്‍ അവര്‍ മരിച്ചെന്നു ബന്ധുക്കള്‍ അറിയിച്ചു. ആവശ്യത്തിനു ജീവനക്കാര്‍ ഇല്ലാത്തതിനാല്‍ ആഴ്ചയില്‍ രണ്ടു ബൈപാസ് ശസ്ത്രക്രിയ മാത്രമാണ് ഇവിടെ നടക്കുന്നത്. 10 നഴ്‌സുമാരെയും ഒരു പെര്‍ഫ്യൂഷനിസ്റ്റിനെയും നിയമിച്ചാല്‍ ആഴ്ചയില്‍ നാലും ബൈപാസ് സര്‍ജറി നടത്താം. എണ്‍പതോളം രോഗികളാണു ബൈപാസ് ശസ്ത്രക്രിയയ്ക്കായി കാത്തിരിക്കുന്നത്. ഉദരരോഗ വിഭാഗത്തില്‍ ഒരു സ്ഥിരം ഡോക്ടര്‍ പോലുമില്ല. ആരോഗ്യവകുപ്പില്‍ നിന്ന് വര്‍ക്കിംഗ് അറേഞ്ച്‌മെന്‍റ് അടിസ്ഥാനത്തില്‍ ഒരു അസി. പ്രഫസറെ നിയമിച്ചിരുന്നെങ്കിലും കാലാവധി നീട്ടിക്കൊടുത്തില്ല. തുടര്‍ന്ന് നാലുമാസം ഒപി അടച്ചിടേണ്ടിവന്നു. ഇതിനുശേഷം തിരുവനന്തപുരം മെഡിക്കല്‍ കോളജില്‍ ഒരു ഡോക്ടെ വര്‍ക്കിംഗ് അറേഞ്ച്‌മെന്‍റ് അടിസ്ഥാനത്തില്‍ നിയമിച്ചു. ഈ ഡോക്ടര്‍ ആഴ്ചയില്‍ ഒരു ദിവസമെത്തിയാണ് ഒപിയില്‍ രോഗികളെ നോക്കുന്നത്. ഈ ദിവസം ഇരുനൂറോളം രോഗികള്‍ ഒപിയില്‍ ഉണ്ടാകും. അടുത്തിടെ ഒപിയുള്ള ദിവസം ഈ ഡോക്ടര്‍ക്ക് എത്താനായില്ല. രോഗികള്‍ ബഹളം വച്ചതോടെ മെഡിക്കല്‍ കോളജ് പ്രിന്‍സിപ്പലും സൂപ്രണ്ടും മെഡിസിന്‍ വിഭാഗം മേധാവിയും എത്തിയാണു രോഗികളെ പരിശോധിച്ചത്. ജനറല്‍ മെഡിസിന്‍ ഡോക്ടറായ പ്രിന്‍സിപ്പലും അനസ്തീസിയ വിദഗ്ധനായ സൂപ്രണ്ടും ഉദരരോഗ ചികിത്സാവിഭാഗത്തിലെ രോഗികളെ നോക്കേണ്ടത്ര ദയനീയമാണ് ആലപ്പുഴ മെഡിക്കല്‍ കോളജിലെ ഡോക്ടര്‍ ക്ഷാമം.

മത്സ്യബന്ധന വള്ളം കടലിൽ തകർന്നു; കണ്ടെയ്നറിൽ തട്ടിയെന്ന് സംശയം

അമ്പലപ്പുഴ: മത്സ്യബന്ധന വള്ളം കടലിൽ തകർന്നു. നീർക്കുന്നം തെക്കാലിശേരിൽ വേണുവിന്‍റെ ഉടമസ്ഥതയിലുള്ള ഓണം എന്ന ലയ്‌ലാൻഡ് വള്ളത്തിനാണ് തകരാർ സംഭവിച്ചത്. കഴിഞ്ഞദിവസം രാവിലെ 45 തൊഴിലാളികളുമായി കായംകുളം തുറമുഖത്തുനിന്നാണ് വള്ളം പോയത്. മത്സ്യ ബന്ധനത്തിനിടെ ഉഗ്ര ശബ്ദം കേട്ടതിനുശേഷം വള്ളം ചലിക്കാതെയായി. പിന്നീട് തൊട്ടടുത്തുണ്ടായിരുന്ന മറ്റൊരു വള്ളത്തിന്‍റെ സഹായത്താൽ അപകടത്തിൽപ്പെട്ട വള്ളം കായംകുളം യാർഡിലെത്തിച്ച് പരിശോധിച്ചപ്പോഴാണ് വള്ളത്തിന്‍റെ അടിത്തട്ട് പൂർണമായും തകർന്നത് കണ്ടത്. ഏകദേശം എട്ട് ലക്ഷം രൂപയുടെ നഷ്ടം സംഭവിച്ചതായി വള്ളമുടമ പറഞ്ഞു. കപ്പലപകടത്തിനെത്തുടർന്ന് കടലിന് അടിത്തട്ടിലുള്ള കണ്ടെയ്നറിൽ തട്ടിയതാണ് അപകടകാരണമെന്നു കരുതുന്നു.

അനുഗ്രഹ നിമിഷത്തിന് സാക്ഷിയാകാൻ വിശ്വാസീസാഗരം

മാവേലിക്കര: ദൈവദാസൻ മാർ ഈവാനിയോസ് തിരുമേനിയുടെ ജന്മം കൊണ്ട് അനുഗ്രഹീതമായ മാവേലിക്കരയുടെ മണ്ണിൽ മലങ്കര സുറിയാനി കത്തോലിക്കാ സഭയുടെ മാവേലിക്കര ഭദ്രാസനത്തിന്‍റെ രണ്ടാമത്തെ മെത്രാപ്പോലീത്തയായി ഡോ. മാത്യൂസ് മാർ പോളിക്കോർപ്പസ് അഭിഷിക്തനാവുന്ന സ്ഥാനാരോഹണ ശുശ്രൂഷയിലും പ്രഥമ മെത്രാപ്പോലീത്ത ഡോ. ജോഷ്വാ മാർ ഇഗ്നാത്തിയോസിനു യാത്രയയപ്പ് നൽകാനുമുള്ള അനുഗ്രഹ നിമിഷത്തിൽ വിശ്വാസീ സാഗരം പുന്നമൂട് സെന്‍റ് മേരീസ് കത്തീഡ്രലിലേക്ക് ഒഴുകിയെത്തി. ബിഷപ് ഹൗസ് അങ്കണത്തിൽനിന്നും ഇന്നലെ ഉച്ചകഴിഞ്ഞ് സ്ഥാനാരോഹണ ശുശ്രൂഷയ്ക്കായി മേജർ ആർച്ച്ബിഷപ് കർദിനാൾ മാർ ബസേലിയോസ് ക്ലിമീസ് കാതോലിക്കാബാവയെയും വിവിധ ഭദ്രാസനത്തിൽനിന്നുള്ള ബിഷപുമാരേയും കത്തീഡ്രലിലേക്ക് സ്വീകരിച്ച് ആനയിച്ചു. അനുമോദന സമ്മേളനം കേന്ദ്ര ന്യൂനപക്ഷകാര്യ സഹമന്ത്രി ജോർജ് കുര്യൻ ഉദ്‌ഘാടനം ചെയ്തു. മേജർ ആർച്ച്ബിഷപ് കർദിനാൾ മാർ ബസേലിയോസ് ക്ലിമീസ് കാതോലിക്കാ ബാവ അധ്യക്ഷത വഹിച്ചു. മന്ത്രി സജി ചെറിയാൻ, കൊടിക്കുന്നിൽ സുരേഷ് എംപി, എംഎൽഎമാരായ രമേശ് ചെന്നിത്തല, എം.എസ്. അരുൺകുമാർ, യു. പ്രതിഭ, ചാണ്ടി ഉമ്മൻ, മുൻ കേന്ദ്രമന്ത്രി പ്രഫ. പി.ജെ. കുര്യൻ, അബ്ദുൽ സത്താർ മൗലവി അൽഖാസിമി, നഗരസഭാ ചെയർമാൻ നൈനാൻ സി. കുറ്റിശേരി, ഡി സിസി പ്രസിഡന്‍റ് ബി. ബാബുപ്രസാദ്‌, പന്തളം സുധാകരൻ, ഷോൺ ജോർജ്, ജോൺസൺ ഏബ്രഹാം, ജോസഫ് എം. പുതുശേരി, എബി കുര്യാക്കോസ്, കെ.ആർ. മുരളീധരൻ, അഡ്വ. കെ. കെ. അനൂപ്, സജി പായിക്കാട്ടേത്ത് തുടങ്ങിയ രാഷ്ട്രീയ സാമൂഹ്യ രംഗത്തെ പ്രമുഖർ, വൈദികർ, സന്യസ്തർ തുടങ്ങിയവരും പങ്കെടുത്തു.

നൂറ്റുവന്‍പാറ ടൂറിസം പദ്ധതിക്ക് ചിറകുമുളയ്ക്കുന്നു

ചെങ്ങന്നൂര്‍: പൗരാണിക ഐതിഹ്യപ്പെരുമയാല്‍ ശ്രധേയമായ പുലിയൂര്‍ പഞ്ചായത്തിലെ നൂറ്റുവന്‍പാറയെ കേന്ദ്രീകരിച്ച് ടൂറിസം പദ്ധതി നടപ്പാക്കാന്‍ സംസ്ഥാന ടൂറിസം വകുപ്പ് രണ്ടു കോടി 20 ലക്ഷം രൂപ അനുവദിച്ചു. മന്ത്രി സജി ചെറിയാന്‍റെ നിര്‍ദേശത്തെത്തുടര്‍ന്നാണ് തീരുമാനം. ചെങ്ങന്നൂരിന്‍റെ പാരമ്പര്യവും സാംസ്‌കാരിക പൈതൃകവും വിളിച്ചോതുന്ന പ്രദേശങ്ങളെ കൂട്ടിയിണക്കി പൈതൃക ടൂറിസം പദ്ധതി നടപ്പാക്കുന്നതിനുള്ള നിരന്തര പരിശ്രമങ്ങളുടെ ഭാഗമായാണ് നൂറ്റുവന്‍പാറ ടൂറിസം പദ്ധതിക്ക് ഇപ്പോള്‍ ഭരണാനുമതി ലഭിച്ചിരിക്കുന്നത്. പദ്ധതിയില്‍ വിഭാവനം ചെയ്യുന്ന പ്രധാന സൗകര്യങ്ങള്‍ പദ്ധതി യാഥാര്‍ഥ്യമാകുന്നതോടെ വിനോദസഞ്ചാരികള്‍ക്ക് നൂറ്റുവന്‍പാറയില്‍ മെച്ചപ്പെട്ട സൗകര്യങ്ങള്‍ ലഭ്യമാകും. വിശ്രമസ്ഥലം, റെയിന്‍ ഷെല്‍ട്ടര്‍, സുരക്ഷാ ഹാന്‍ഡ് റെയിലുകള്‍, കാന്‍റി ലിവര്‍ വ്യൂ പോയിന്‍റ്, സിസിടിവി നിരീക്ഷണം, ആധുനിക ശുചിമുറി സൗകര്യങ്ങള്‍, റോപ്പ് വേ, സുരക്ഷാ ഗാര്‍ഡുകള്‍, മറ്റ് സുരക്ഷാ സംവിധാനങ്ങള്‍ എന്നിവയാണ് ഇതില്‍ ഉള്‍പ്പെടുന്നത്. സന്ദര്‍ശകരുടെ എണ്ണം വര്‍ധിക്കുന്നതിനനുസരിച്ച് കൂടുതല്‍ സൗകര്യങ്ങള്‍ ഏര്‍പ്പെടുത്താനും പദ്ധതി ലക്ഷ്യമിടുന്നുണ്ട്. ചെങ്ങന്നൂരിന് പുതിയ ടൂറിസം സാധ്യതകള്‍ നൂറ്റുവന്‍പാറ ടൂറിസം പദ്ധതി യാഥാര്‍ഥ്യമാകുന്നതോടെ പാണ്ഡവന്‍ പാറ, ആലാ പൂമലച്ചാല്‍, കുതിരവട്ടം ചിറ അക്വാടൂറിസം തുടങ്ങിയ നിലവിലുള്ള പദ്ധതികളുമായി സംയോജിപ്പിച്ച് കൂടുതല്‍ ടൂറിസ്റ്റ് ഡെസ്റ്റിനേഷനുകള്‍ വികസിപ്പിക്കാന്‍ കഴിയും. ഇത് ചെങ്ങന്നൂരിന്‍റെ ടൂറിസം മേഖലയ്ക്ക് വലിയ ഉണര്‍വ് നല്‍കുമെന്ന് മന്ത്രി സജി ചെറിയാന്‍ പറഞ്ഞു. ഈ പദ്ധതി ചെങ്ങന്നൂരിന്‍റെ സാമ്പത്തിക, സാംസ്‌കാരിക രംഗങ്ങളില്‍ പുതിയ അധ്യായം കുറിക്കുമെന്ന പ്രതീക്ഷയിലാണ് പ്രദേശവാസികള്‍.

അടിയന്തര ശസ്ത്രക്രിയ വേണ്ടത് മെഡി. കോളജുകള്‍ക്ക്: കെ.സി. വേണുഗോപാല്‍

അന്പലപ്പുഴ: അടിയന്തര ശസ്ത്രക്രിയ വേണ്ടത് മെഡിക്കല്‍ കോളജുകള്‍ക്കും സര്‍ക്കാര്‍ ആശുപത്രികള്‍ക്കുമെന്ന് കെ.സി. വേണുഗോപാല്‍ എംപി. ഡോ. ഹാരീസ് ഹസന്‍റെ വെളിപ്പെടുത്തല്‍ ചൂണ്ടിക്കാണിക്കുന്നത് കേരളത്തിലെ പൊതുജന ആരോഗ്യത്തിന്‍റെ ഏറ്റവും ദയനീയാവസ്ഥയാണ്. കേരളത്തിലെ പൊതുജന ആരോഗ്യത്തിന്‍റെ ഏറ്റവും ദയനീയാവസ്ഥയാണ് തിരുവനന്തപുരം മെഡിക്കല്‍ കോളജിലെ യുറോളജി വിഭാഗം മേധാവി ഡോ. ഹാരീസ് ഹസന്‍റെ വെളിപ്പെടുത്തലിലൂടെ ചൂണ്ടിക്കാണിക്കപ്പെട്ടതെന്നും ഗത്യന്തരമില്ലാതെയാണ് ഡോ. ഹാരീസ് ഇത്തരമൊരു സാഹസത്തിനു മുതിര്‍ന്നതെന്നും അദ്ദേഹം കൂട്ടിച്ചേര്‍ത്തു. പുന്നപ്രയില്‍ മാധ്യമങ്ങളുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. ഒരുകാലത്ത് കേരളത്തിലെ ചികിത്സാരംഗത്ത് അന്തിമവാക്ക് മെഡിക്കല്‍ കോളജുകളുടേതായിരുന്നു. ഇന്നതല്ലൊം നഷ്ടമായി. അതിനു കാരണം അവശ്യത്തിന് ഡോക്ടര്‍മാരില്ലാത്തതും ശസ്ത്രക്രിയ ഉപകരണങ്ങളും മരുന്നും ഇല്ലാത്തതുമാണ്. നമ്മുടെ ആരോഗ്യരംഗം മികച്ചതെന്ന് കൊട്ടിഘോഷിക്കുമ്പോഴാണ് നമ്മുടെ മെഡിക്കല്‍ കോളജുകള്‍ പരിതാപകരമായ അവസ്ഥ നേരിടുന്നത്. ഡോക്ടര്‍മാരുടെയും പാരമെഡിക്കല്‍ ജീവനക്കാരുടെയും നഴ്‌സുമാരുടെയും നിരവധി ഒഴിവുകളുണ്ട്. അത് നികത്താന്‍ സര്‍ക്കാര്‍ നടപടിയെടുക്കുന്നില്ല. ഒഴിവുകളിലേക്ക് ഡോക്ടര്‍മാരെ നിയമിച്ചാലും അവര്‍ ചുമതലയേറ്റെടുക്കാത്ത അവസ്ഥയുണ്ട്. അതെന്തുകൊണ്ടാണെന്ന് പഠിക്കാനോ പരിഹാര നടപടിയെടുക്കാനോ സര്‍ക്കാര്‍ തയാറാകുന്നില്ല. സര്‍ക്കാരിന്‍റെ ഇത്തരം സമീപനങ്ങള്‍ സ്വകാര്യ ആശുപത്രികളെ സഹായിക്കാനാണെന്നും കെ.സി. വേണുഗോപാല്‍ പറഞ്ഞു. മെഡിക്കല്‍ കോളജിലെ ഒഴിവുള്ള തസ്തികകള്‍ നികത്താന്‍ സര്‍ക്കാര്‍ തയാറാകുന്നില്ല. സൂപ്പര്‍ സ്‌പെഷാലിറ്റി സൗകര്യം ഇതുവരെ യാഥാര്‍ഥ്യമാക്കിയില്ല. അറ്റകുറ്റപ്പണി നടത്തുന്നതില്‍ പിഡബ്ല്യുഡിയും ആരോഗ്യവകുപ്പും തമ്മില്‍ ശീതസമരമാണ്. സര്‍ജറി വിഭാഗത്തില്‍ 16 അസി. പ്രഫസര്‍മാരുടെ ഒഴിവുണ്ട്. അതില്‍ പതിനൊന്നെണ്ണവും ഒഴിഞ്ഞുകിടക്കുകയാണ്. റോഡിയോളജി ഡിപ്പാര്‍ട്ടുമെന്‍റില്‍ 13 തസ്തകയില്‍ നാലു പേര്‍മാത്രമാണ് ജോലിയിലുള്ളത്. അതീവഗുരുതരമായ തകര്‍ച്ചയിലേക്കു കേരളത്തിന്‍റെ പൊതുജന ആരോഗ്യരംഗത്തെ നയിക്കുകയാണ് പിണറായി സര്‍ക്കാരെന്നും അതിന്‍റെ തെളിവാണ് ഡോ. ഹാരീസ് ഹസന്‍റെ തുറന്നുപറച്ചിലെന്നും കെ.സി. വേണുഗോപാല്‍ പറഞ്ഞു.

പഠിച്ച സ്കൂളിൽ തന്നെ പ്രഥമ അധ്യാപികയായി ചുമതലയേറ്റ് ക്രിസ്ജ

ത.ുറവൂര്‍: പഠിച്ച വിദ്യാലയത്തില്‍ തന്നെ പ്രഥമ അധ്യാപികയായി ചുമതലയേറ്റ് ക്രിസ്ജ നോര്‍ബര്‍ട്ട്. പള്ളിത്തോട് പുന്നയ്ക്കല്‍ നോര്‍ബര്‍ട്ടിന്‍റെയും ലീലാമ്മയുടെയും മൂത്തമകളും ഇപ്പോള്‍ അര്‍ത്തുങ്കല്‍ താമസക്കാരിയുമായ ക്രിസ്ജ നോര്‍ബര്‍ട്ട് ആണ് കഴിഞ്ഞദിവസം പള്ളിത്തോട് സെന്‍റ് സെബാസ്റ്റ്യന്‍ ഹൈസ്‌കൂളിന്‍റെ പ്രഥമാധ്യാപികയായി ചുമതലയേറ്റത്. പത്താം ക്ലാസ് വരെ പഠിച്ച പള്ളിത്തോട് സെന്‍റ് സെബാസ്റ്റ്യന്‍സ് ഹൈസ്‌കൂള്‍ പ്രഥമ അധ്യാപികയായി ചുമതലയേല്‍ക്കുമ്പോള്‍ ഇരട്ടിമധുരമാണ് ക്രിസ്ജാ ടീച്ചറിനു ലഭിക്കുന്നത്. നൂറുകണക്കിന് വിദ്യാര്‍ഥികള്‍ക്ക് അറിവ് പകര്‍ന്നു നല്‍കിയ തന്‍റെ അമ്മ ലീലാമ്മ നോര്‍ബര്‍ട്ട് പഠിപ്പിച്ച അതേ സ്‌കൂളില്‍തന്നെ പ്രഥമാധ്യാപികയായത് ദൈവാനുഗ്രമായാണ് ടീച്ചര്‍ കരുതുന്നത്. താന്‍ ജനിച്ചുവളര്‍ന്ന പള്ളിത്തോടെന്ന തീരദേശ ഗ്രാമത്തില്‍ ആയിരക്കണക്കിന് വിദ്യാര്‍ഥികള്‍ക്ക് അറിവിന്‍റെ വെളിച്ചമേകി തലയെടുപ്പോടെ ഉയര്‍ന്നുനില്‍ക്കുന്ന പള്ളിത്തോട് സെന്‍റ് സെബാസ്റ്റ്യന്‍സ് ഹൈസ്‌കൂളില്‍ ഭാരിച്ച ഉത്തരവാദിത്വത്തോടെയാണ് ചുമതലയേറ്റിരിക്കുന്നത്. മുമ്പ് ആലപ്പുഴ ലിയോ തേർട്ടീന്ത്, അര്‍ത്തുങ്കല്‍ സെന്‍റ് ആഡ്രൂസ് സ്‌കൂളുകളിലും ടീച്ചര്‍ പഠിപ്പിച്ചിട്ടുണ്ട്. പള്ളിത്തോട് സ്‌കൂളിനെ ഉന്നതിയില്‍ എത്തിക്കുക എന്നതാണ് പ്രഥമ ലക്ഷ്യമെന്ന് ടീച്ചര്‍ പറഞ്ഞു. അര്‍ത്തുങ്കല്‍ കുരിശുങ്കല്‍ കുടുംബാംഗമായ അഗസ്റ്റിനാണ് ഭര്‍ത്താവ്. എക്യുന്‍, എവിന്‍ എന്നിവരാണ് മക്കള്‍.

നിരണം തീര്‍ഥാടനം ആറിന്; സ്വാഗതസംഘം ഓഫീസ് തുറന്നു

ചങ്ങനാശേരി: അതിരൂപതാ യുവദീപ്തി-എസ്എംവൈഎമ്മിന്‍റെ ആഭിമുഖ്യത്തില്‍ ജൂലൈ ആറിന് സംഘടിപ്പിക്കുന്ന നിരണം തീര്‍ഥാടനത്തിനുള്ള സ്വാഗതസംഘം ഓഫീസ് പാസ്റ്ററല്‍ സെന്‍ററില്‍ തുറന്നു. അതിരൂപത ഡയറക്ടര്‍ ഫാ. സാവിയോ മാനാട്ട് ഉദ്ഘാടനം ചെയ്തു. അതിരൂപത പ്രസിഡന്‍റ് അരുണ്‍ ടോം അധ്യക്ഷത വഹിച്ചു. അസിസ്റ്റന്‍റ് ഡയറക്ടര്‍ ഫാ. ടോണി പുതുവീട്ടില്‍ക്കളം, ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസ്, ജനറല്‍ സെക്രട്ടറി ക്രിസ്റ്റി കെ. കുഞ്ഞുമോന്‍, ട്രഷറര്‍ സെബാസ്റ്റ്യ ൻ മഞ്ഞുമ്മേല്‍, കണ്‍വീനര്‍മാരായ ക്രിസ്റ്റിന്‍ സേവ്യര്‍, ലൂസി ഫിലിപ്പോസ്, ഡെന്നി, റിയ റ്റോജി എന്നിവര്‍ പ്രസംഗിച്ചു.

കടലിൽ കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി

അമ്പലപ്പുഴ: പുന്നപ്ര പറവൂര്‍ സെന്‍റ് ആന്‍റണീസ് ചാപ്പലിന്‍റെ തീരത്തു നിന്ന് കടലില്‍ കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി. പൊന്തുവള്ളം മറിഞ്ഞ് കാണാതായപുന്നപ്ര വടക്ക് പഞ്ചായത്ത് 12-ാം വാര്‍ഡ് ചാണയില്‍ വീട്ടില്‍ സ്റ്റീഫ(റോക്കി-55)ന്‍റെ മൃതദേഹമാണ് ഇന്നലെ രാവിലെ പത്തോടെ തോട്ടപ്പള്ളി പൊഴി മുഖത്തടിഞ്ഞത്. പുലിമുരുകന്‍ എന്ന വള്ളത്തിലെ തൊഴിലാളികളാണ് മ്യതദേഹം കണ്ടെത്തിയത്. വെള്ളിയാഴ്ച പുലര്‍ച്ചെ പൊന്തു ഇറക്കുന്നതിനിടയില്‍ ശക്തമായ തിരയില്‍പ്പെട്ടാണ് റോക്കിയെ കാണാതായത്. തുടര്‍ന്ന് തീരദേശ പോലീസും, മത്സ്യത്തൊഴിലാളികളും തെരച്ചില്‍ നടത്തിയെങ്കിലും കണ്ടെത്താനായില്ല. മൃതദേഹം വണ്ടാനം മെഡിക്കല്‍ കോളജ് ആശുപത്രി മോര്‍ച്ചറിയിലേക്കു മാറ്റി. ഭാര്യ: മോളി. മക്കള്‍: പ്രിന്‍സി, റോബിന്‍, മരുമകന്‍: ഡിക്‌സണ്‍.

47 ലക്ഷം രൂപ തട്ടിയ പ്രതി റിമാൻഡിൽ

ചെങ്ങന്നൂര്‍: കുവൈറ്റ് ഓയില്‍ കമ്പനിയില്‍ ജോലി വാഗ്ദാനം ചെയ്ത് പണം തട്ടിയ പ്രതി റിമാന്‍ഡില്‍. വെണ്‍മണി സ്വദേശിയായ യുവതിയെ കുവൈറ്റ് ഓയില്‍ കമ്പനിയില്‍ സ്റ്റാഫ് നഴ്‌സ് ആയി ജോലി വാങ്ങി നല്‍കാമെന്ന് പറഞ്ഞ് കബളിപ്പിച്ച് 47 ലക്ഷത്തോളം രൂപ തട്ടിയെടുത്ത വെണ്‍ണി പടിഞ്ഞാറേ മുറിയില്‍ തെങ്ങുംതറയില്‍ എസ്. വില്ലയില്‍ സജു വര്‍ഗീസിനെ (49) ചെങ്ങന്നൂര്‍ ഒന്നാം ക്ലാസ് ജുഡിഷല്‍ മജിസ്‌ട്രേറ്റ് കോടതി 14 ദിവസത്തേക്ക് മാവേലിക്കര സബ് ജയിലിലേക്ക് റിമാന്‍ഡ് ചെയ്തു. 2023 മുതല്‍ പലതവണകളായി ഗൂഗിള്‍ പേവഴിയും ബാങ്ക് അക്കൗണ്ട് വഴിയും പ്രതി പരാതിക്കാരില്‍നിന്നു പണം തട്ടിയെടുത്തെന്നാണ് കേസ്. തട്ടിപ്പ് നടത്തിയിനുശേഷം പല സ്ഥലങ്ങളിലായി ഒളിവില്‍ കഴിഞ്ഞുവന്നിരുന്ന ഇയാളെ കണ്ടെത്തുന്നതിനായി ചെങ്ങന്നൂര്‍ ഡിവൈഎസ്പി ടി. ബിനുകുമാറിന്‍റെ നേതൃത്വത്തിലുള്ള പോലീസ് സംഘമാണ് ഡല്‍ഹിയില്‍നിന്ന് പ്രതിയെ അറസ്റ്റ് ചെയ്തത്.

ദേശീയപാത കൈയടക്കി തെരുവുനായ്ക്കൾ

അമ്പലപ്പുഴ: ദേശീയപാത ഇരട്ടക്കുളങ്ങര ഭാഗത്ത് യാത്രക്കാർക്കു ഭീക്ഷണിയായി തെരുവുനായ്ക്കൾ. കാക്കാഴം മേൽപ്പാലത്തിൽനിന്ന് അമ്പലപ്പുഴയിലേക്ക് ഏറെ വാഹനങ്ങൾ പോകുന്ന ഭാഗത്താണ് തെരുവുനായ് ക്കൂട്ടം ഭീതിപരത്തുന്നത്. സമീപത്തെ ഇറച്ചി, മത്സ്യവ്യാപാരശാലകളിൽനിന്നു പുറംതള്ളുന്ന അവശിഷ്ടങ്ങൾക്കായി കടിപിടികൂടുന്ന നായ്ക്കൾ ഇരുചക്രവാഹനങ്ങൾക്കും കാൽനടയാത്രക്കാർക്കുമാണ് ഭീഷണിയാകുന്നത്. റോഡിലൂടെ തലങ്ങും വിലങ്ങും പായുന്ന നായയെ തട്ടി വീണുള്ള അപകടങ്ങളും പതിവായി. സമീപത്തെ കാക്കാഴം മുഹ്ദ്ദീയൻപള്ളി, ഇരട്ടക്കുളങ്ങര ശിവക്ഷേത്രം, വിദ്യാഭ്യാസ സ്ഥാപനങ്ങളിലേക്ക് അടക്കം വിശ്വാസികളും വിദ്യാർഥികളും പോകുന്നതാണ്.

അപ്പര്‍ കുട്ടനാട്ടില്‍ ജലനിരപ്പ് താഴുന്നില്ല; ഒട്ടുമിക്ക പ്രദേശങ്ങളും വെള്ളക്കെട്ടില്‍

എടത്വ: മഴയ്ക്ക് ശമനമായെങ്കിങ്കിലും അപ്പര്‍ കുട്ടനാട്ടില്‍ ജലനിരപ്പ് താഴുന്നില്ല. ഒട്ടുമിക്ക പ്രദേശങ്ങളും വെള്ളക്കെട്ടില്‍. കാലവര്‍ഷക്കെടുതിയുടെ ആരംഭഘട്ടത്തില്‍തന്നെ മൂന്നു വെള്ളപ്പൊക്കമാണ് കുട്ടനാട്ടുകാര്‍ നേരിട്ടത്. താഴ്ന്ന പ്രദേശങ്ങളിലെ റോഡുകള്‍ മുട്ടോളം വെള്ളത്തിലാണ്. കിഴക്കന്‍ വെള്ളത്തിന്‍റെ വരവിലും മഴ പെയ്തും ഉയര്‍ന്ന ജലനിരപ്പ് താഴുന്നില്ല. തലവടി, മുട്ടാര്‍, വീയപുരം, തകഴി, എടത്വ എന്നീ പഞ്ചായത്തില്‍ ജലനിരപ്പിന് മാറ്റമില്ലാതെ തുടരുകയാണ്. നിരവധി വീടുകളില്‍ വെള്ളം കയറിയിരുന്നു. വീടുകളില്‍നിന്ന് വെള്ളം ഇറങ്ങിത്തുടങ്ങിയിട്ടില്ല. ഒട്ടുമിക്ക റോഡുകളിലും യാത്രക്കാര്‍ക്ക് സഞ്ചരിക്കാന്‍ കഴിയാത്ത നിലയില്‍ വെള്ളം കെട്ടിക്കിടക്കുകയാണ്. തോട്ടപ്പള്ളി പൊഴിയിലൂടെ കടലിലേക്ക് വെള്ളം ഒഴുകി മാറുന്നുണ്ടെങ്കിലും കിഴക്കന്‍ വെള്ളത്തിന്‍റെ വരവ് തുടരുന്നതാണ് ജലനിരപ്പിന് കാര്യമായ മാറ്റം സംഭവിക്കുന്നില്ല. ഒരുമാസമായി കുട്ടനാട്, അപ്പര്‍ കുട്ടനാട് മേഖലയിലെ ജനങ്ങള്‍ കടുത്ത ദുരിതമാണ് അനുഭവിക്കുന്നത്. ഇതിനോടകം മൂന്നു തവണ വെള്ളം ഉയര്‍ന്ന് ജനജീവിതം സ്തംഭിച്ചിരുന്നു. നിരവധി വീടുകളും തകര്‍ന്നു. വിദ്യാര്‍ഥികളുടെ പഠനവും മുടങ്ങീരിക്കുകയാണ്. അധ്യായനം ആരംഭിച്ച് ഒരു മാസമായിട്ടും വിരലില്‍ എണ്ണാവുന്ന ക്ലാസുകളാണ് നടന്നത്. വിദ്യാര്‍ഥികളുടെ പഠനം മുടങ്ങുന്നതില്‍ രക്ഷിതാക്കള്‍ക്കും അധ്യാപകര്‍ക്കും ആശങ്കയാണ്. കുട്ടനാട്, അപ്പര്‍ കുട്ടനാട് മേഖലയിലെ ജനങ്ങളുടെ തിരാദുരിതത്തിന് സര്‍ക്കാര്‍ തലത്തില്‍ യാതൊരു നടപടിയും ചെയ്യുന്നില്ലന്ന് ആക്ഷേപമുണ്ട്. മഴക്കെടുതികള്‍ക്ക് മുന്‍പേ ജലാശയങ്ങളിലെ ആഴംകൂട്ടല്‍ ഉള്‍പ്പെടെയുള്ള പ്രവര്‍ത്തികള്‍ സമയബന്ധിതമായി നടത്തിയിരുന്നെങ്കില്‍ കുട്ടനാട്ടിലെ ജനങ്ങള്‍ക്ക് വെള്ളപ്പൊക്ക കെടുതിയില്‍നിന്ന് ഒരു പരിധിവരെ രക്ഷനേടാന്‍ കഴിയുമായിരുന്നു. ഇതിനായുള്ള ആസൂത്രണം സര്‍ക്കാര്‍ തലത്തിലോ പഞ്ചായത്ത് തലത്തിലോ ചെയ്തിരുന്നില്ല. തോട്ടപ്പള്ളി പൊഴി തുറക്കുന്നതുപോലും കുട്ടനാട് മുങ്ങിക്കഴിഞ്ഞാണ്. വര്‍ഷാവര്‍ഷം നേരിടുന്ന പ്രതിസന്ധിക്കു ശാശ്വത പരിഹാരം കാണാത്തതിനാല്‍ കുട്ടനാട് ഉപേക്ഷിച്ച് പോകുന്ന കുടുംബങ്ങളുടെ എണ്ണവും വര്‍ധിച്ചു വരുകയാണ്.

കേരള പ്രഫഷണല്‍ ഡ്രാമാ ചേമ്പറിന്‍റെ സംസ്ഥാന സമ്മേളനം

അമ്പലപ്പുഴ: കേരള പ്രഫഷണല്‍ ഡ്രാമാ ചേമ്പറിന്‍റെ ഇരുപത്തി രണ്ടാം സംസ്ഥാന സമ്മേളനം അമ്പലപ്പുഴ കോറല്‍ ഹൈറ്റ്‌സില്‍ നടന്നു. എച്ച്. സലാം എംഎല്‍എ സമ്മേളനം ഉദ്ഘാടനം ചെയ്തു. ചെയര്‍മാന്‍ അഡ്വ. നെയ്യാറ്റിന്‍കര പത്മകുമാര്‍ അധ്യക്ഷനായി. സഹീര്‍ അലി, പ്രമോദ് വെളിയനാട്, രാജേഷ് ഇരുളം, ഹേമന്ദ് കുമാര്‍, രമേശന്‍ ബ്രഹ്‌മ, രമേശന്‍ രംഗഭാഷ, വേണു രംഗഭാഷ, സുരീഷ്, മനേഷ്, സുദര്‍ശനന്‍ വര്‍ണം എന്നിവരെ കേരള സംഗീത നാടക അക്കാദമി സെക്രട്ടറി കരിവെള്ളൂര്‍ മുരളി ആദരിച്ചു. പയ്യന്നൂര്‍ മുരളി ആമുഖ പ്രഭാഷണം നടത്തി. സി.ആര്‍. മഹേഷ് എംഎല്‍എ, ചേമ്പര്‍ രക്ഷാധികാരി സി. രാധാകൃഷ്ണന്‍, വല്‍സന്‍ നിസരി, അപ്പു കുളനട, ധനന്‍ കെ. ചെട്ടിയാഞ്ചേരി, അഷ്‌റഫ് മുഹമ്മദ് എന്നിവര്‍ പ്രസംഗിച്ചു.

മത്സ്യത്തൊഴിലാളി ദിനാചരണവും പുരസ്‌കാര വിതരണവും

ആലപ്പുഴ: റേഡിയോ നെയ്തലും തിയോച്ചന്‍ ചാരിറ്റബിള്‍ ട്രസ്റ്റും ചേര്‍ന്ന് ആലപ്പുഴ പാം ബീച്ച് റിസോര്‍ട്ടില്‍ സംഘടിപ്പിച്ച ലോക മത്സ്യത്തൊഴിലാളി ദിനാഘോഷവും മത്സ്യത്തൊഴിലാളികള്‍ക്കുള്ള പുരസ്‌കാര വിതരണവും നടത്തി. സമ്മേളനോദ്ഘാടനവും പുരസ്‌കാര വിതരണവും മന്ത്രി സജി ചെറിയാന്‍ നിര്‍വഹിച്ചു. ആലപ്പുഴ എഡിഎം ആശാ ഏബ്രഹാം മുഖ്യ പ്രഭാഷണം നടത്തി. റോയി പി. തിയോച്ചന്‍ അധ്യക്ഷനായി. മത്സ്യത്തൊഴിലാളി വിഭാഗത്തില്‍നിന്നു ഏഴു മത്സ്യത്തൊഴിലാളികള്‍ക്ക് പുരസ്‌കാരം നല്‍കി ആദരിച്ചു. കെ.ജെ. സന്ധ്യാവ് പുന്നപ്ര, ഷംജി അമ്പലപ്പുഴ, അറയ്ക്കല്‍ ജേക്കബ്ബ്, പൊള്ളേത്തൈ ജാക്‌സണ്‍, കുഞ്ഞപ്പന്‍ അര്‍ത്തുങ്കല്‍, ബിനു പൊന്നന്‍, ഇമ്മാനുവേല്‍ ചെട്ടികാട്, ജോണി കാട്ടൂര്‍, മേരി ജാന്‍സി വില്‍സണ്‍ എന്നിവരെയാണ് ആദരിച്ചത്. ഫാ. സേവ്യര്‍ കുടിയാംശേരി, ഗര്‍ഷോം രാഹൂല്‍ എന്നിവർ പ്രസംഗിച്ചു.

കാര്‍മല്‍ പോളിടെക്‌നിക്കില്‍ ബിരുദദാനച്ചടങ്ങും റിക്രൂട്ട്‌മെന്‍റ് ഡ്രൈവും

ആലപ്പുഴ: ഹുണ്ടായ് മോട്ടോര്‍ ഇന്ത്യയും കാര്‍മല്‍ പോളിടെക്നിക് പുന്നപ്രയും സംയുക്തമായി നടത്തി വരുന്ന ഹുണ്ടായ് പ്രഫഷണല്‍ ഡെവലപ് സെന്‍ററിലെ രണ്ടാമത്തെ ബാച്ചായ 2022-2025 ലെ ഓട്ടോമൊബൈല്‍ എന്‍ജിനിയറിംഗ് വിദ്യാര്‍ഥികളുടെ ഗ്രാജുവേഷന്‍ സെറിമണിയും റിക്രൂട്ട്‌മെന്‍റ് ഡ്രൈവും ഹുണ്ടായ് മോട്ടോര്‍ ഇന്ത്യ റീജണല്‍ ട്രെയിനിംഗ് മാനേജര്‍ ഹെല്‍വിസ് പി. ക്ലീറ്റസ് ഉദ്ഘാടനം ചെയ്തു. കോളജ് പ്രിന്‍സിപ്പല്‍ ഫാ. ജയിംസ് ദേവസ്യ സിഎംഐ അധ്യക്ഷത വഹിച്ചു. ടെറിട്ടറി പാര്‍ട്‌സ് ആന്‍ഡ് സര്‍വീസ് മാനേജര്‍മാരായ രോഹിത് ജി. കര്‍ത്ത, സേറലതന്‍, ഓട്ടോമൊബൈല്‍ എച്ച്ഒഡി ജോനു ജോസഫ്, അധ്യാപകരായ അനീഷ് യു, ജോബിന്‍ ജോര്‍ജ്, അബിന്‍ പി.ജി, ദീപു വി. കുറുപ്പ് എന്നിവര്‍ പങ്കെടുത്തു. റിക്രൂട്ട്‌മെന്‍റ് ഡ്രൈവില്‍ പോപ്പുലര്‍ ഹ്യുണ്ടായ്, കേഷ്വിന്‍ ഹ്യുണ്ടായ്, ആപ്കോ മോട്ടോര്‍സ് എന്നീ കമ്പനികള്‍ പങ്കെടുത്തു.

പത്തനംതിട്ട എസ്പിക്കെതിരേ മുഖ്യമന്ത്രിക്ക് ആലപ്പുഴ ഡിവൈഎസ്പിയുടെ പരാതി

പത്തനംതിട്ട: എസ്പിക്കെതിരേ മുഖ്യമന്ത്രിക്ക് പരാതി നല്‍കി ഡിവൈഎസ്പി. പത്തനംതിട്ട എസ്പി വി.ജി. വിനോദ് കുമാറിനെതിരേ ആലപ്പുഴ ഡിവൈഎസ്പി എം.ആര്‍. മധുബാബുവാണ് പരാതി നല്‍കിയത്. റൗഡി ഹിസ്റ്ററി ലിസ്റ്റില്‍ ഉള്‍പ്പെട്ട അഭിഭാഷകനെ സ്പെഷല്‍ പബ്ലിക് പ്രോസിക്യൂട്ടര്‍ പട്ടികയില്‍ ഉള്‍പ്പെടുത്തി എസ്പി സര്‍ക്കാരിനെ തെറ്റിദ്ധരിപ്പിച്ചു എന്നാണ് പരാതി. അഭിഭാഷകനായ പത്തനംതിട്ട സ്വദേശി പ്രശാന്ത് വി. കുറുപ്പിനെ പട്ടികയില്‍ ഉള്‍പ്പെടുത്തിയതാണ് പരാതിക്ക് അടിസ്ഥാനം. വ്യക്തിവിരോധം തീര്‍ക്കുന്നതിന് എസ്പി പ്രശാന്ത് വി. കുറുപ്പിനെ സ്പെഷല്‍ പബ്ലിക് പ്രോസിക്യൂട്ടറുടെ പട്ടികയില്‍ ഉള്‍പ്പെടുത്തിയെന്നും പരാതിയില്‍ പറയുന്നു. എന്നാല്‍, തനിക്കെതിരെയുള്ളത് കള്ളക്കേസുകളാണെന്നാണ് പ്രശാന്ത് വി. കുറുപ്പ് പറയുന്നത്. താന്‍ നിരവധി ക്രിമിനല്‍ കേസുകള്‍ വാദിച്ച് പരിചയമുള്ള അഭിഭാഷകനാണെന്നും അദ്ദേഹം പറഞ്ഞു. കൊല്ലപ്പെട്ട ആളുടെ ബന്ധുക്കളുടെ താത്പര്യപ്രകാരം ഹൈക്കോടതിയാണ് തന്നെ സ്പെഷല്‍ പ്രോസിക്യൂട്ടറായി നിയമിച്ചതെന്നും ജില്ലാ പോലീസ് മേധാവിക്ക് തന്നോട് പ്രത്യേക താത്പര്യം ഇല്ലെന്നും പ്രശാന്ത് പറഞ്ഞു.

തീരദേശ റോഡ് കാടുകയറിയ നിലയിൽ; യാത ദുഷ്കരം

തുറവൂര്‍: തീരദേശ റോഡിന്‍റെ ഇരുവശവും കാടുകയറിയതിനെത്തുടര്‍ന്ന് യാത്ര ദുഷ്‌കരം. ചെല്ലാനം മുതല്‍ തൈക്കല്‍ വരെയുള്ള തീരദേശ റോഡാണ് കാടുകയറിയിരിക്കുന്നത്. കുറ്റിക്കാടുകളും മരങ്ങളും റോഡിലേക്ക് വീണുകിടക്കുകയാണ്. ചില സ്ഥലങ്ങളില്‍ റോഡിന്‍റെ മധ്യഭാഗം വരെ കാടുകയറിയ നിലയിലാണ്. കാല്‍നട യാത്രക്കാരാണ് ഏറ്റവും കൂടുതല്‍ ദുരിതമനുഭവിക്കുന്നത്. തീരദേശ റോഡിന്‍റെ വശങ്ങളില്‍ നിരവധി സ്‌കൂളുകളാണ് പ്രവര്‍ത്തിക്കുന്നത്. ഇവിടെ പഠിക്കുന്ന കുട്ടികളാണ് ദുരന്തമുഖത്തുകൂടി യാത്ര ചെയ്യുന്നത്. ദേശീയപാതയില്‍ വികസന പ്രവര്‍ത്തനങ്ങള്‍ നടക്കുന്നതിനാല്‍ കൂടുതല്‍ വാഹനങ്ങളും തീരദേശ റോഡിലൂടെയാണ് സഞ്ചരിക്കുന്നത്. വശങ്ങളിലെ കാടുമൂലം കുട്ടികള്‍ റോഡില്‍ ഇറങ്ങി നടക്കേണ്ട അവസ്ഥയാണ്. ഇത് അപകടങ്ങള്‍ക്ക് കാരണമാകുന്നു. വാഹന ഗതാഗതത്തെയും ഇത് സാരമായി ബാധിച്ചിരിക്കുകയാണ്. അന്ധകാരനഴി മുതല്‍ ചെല്ലാനം വരെയുള്ള ഭാഗം റോഡിന്‍റെ കുറെഭാഗം കാടു പിടിച്ചുകിടക്കുകയാണ്. ഈ ഭാഗങ്ങളില്‍ റോഡ് തകര്‍ന്നുകിടക്കുന്നതും അപകടങ്ങള്‍ വര്‍ധിക്കാന്‍ ഇടയാക്കുന്നു. മുന്‍വര്‍ഷങ്ങളില്‍ തൊഴിലുറപ്പു പദ്ധതിയില്‍പ്പെടുത്തി റോഡിന്‍റെ വശങ്ങളിലെ കാടുകള്‍ വെട്ടിക്കളയുമായിരുന്നു. എന്നാല്‍, ഇപ്പോള്‍ ഇതും നിലച്ചിരിക്കുകയാണ്. തീരദേശ റോഡിന്‍റെ ഇരുവശങ്ങളിലേയും കാട്ടുകള്‍ വെട്ടി തെളിക്കാനുള്ള അടിയന്തര നടപടി സ്വീകരിക്കണമെന്ന ആവശ്യം ശക്തമാകുന്നു.

ആടുകളെ തെരുവുനായ്ക്കള്‍ കടിച്ചുകൊന്നു

ചേര്‍ത്തല: വീടിനോടു ചേര്‍ന്നുള്ള തൊഴുത്തില്‍ കെട്ടിയിരുന്ന ആടുകളെ തെരുവുനായ്ക്കൾ കടിച്ചുകൊന്നു. ചേർത്തല നഗരസഭ എട്ടാം വാർഡ് മാന്നനാടിയിൽ സുനിതയുടെ നാലര വയസുള്ളതും ആറുമാസം പ്രായമുള്ളതുമായ രണ്ടു ആടുകളെയാണ് ഇന്നലെ രാത്രി തെരുവുനായ്ക്കൾ കടിച്ചുകൊന്നത്. ഭർത്താവ് മരണപ്പെട്ട ഈ കുടുംബത്തിന്‍റെ വരുമാന മാർഗമായിരുന്നു ആടുവളര്‍ത്തല്‍. ആടുകളുടെ കരച്ചില്‍ കേട്ട് വീട്ടുകാര്‍ പുറത്തിറങ്ങി നായക്കൂട്ടത്തെ വിരട്ടിയോടിക്കാന്‍ ശ്രമിച്ചെങ്കിലും നടന്നില്ല. പ്രദേശത്ത് തെരുവുനായ്ക്കളുടെ ശല്യം രൂക്ഷമാണ്. നഗരസഭാ അധികൃതര്‍ ഒരു നടപടിയും സ്വീകരിക്കുന്നില്ലെന്ന് നാട്ടുകാര്‍ക്കിടയില്‍ ആക്ഷേപം ഉയര്‍ന്നിട്ടുണ്ട്.

ബംഗ്ലാവിൽ-മംഗലത്ത് റോഡ് തകർന്നു: യാത്ര ദുരിതം

ഹരിപ്പാട്: മുതുകുളം തെക്ക് ബംഗ്ലാവിൽ-മംഗലത്ത് റോഡ് പൊട്ടിപ്പൊളിഞ്ഞു. ഇതുവഴി യാത്ര ചെയ്യുന്നവരും പ്രദേശവാസികളുമെല്ലാം വർഷങ്ങളായി ദുരിതം പേറുകയാണ്. ചുറ്റിക്കറങ്ങി പോകേണ്ടിവരുന്നുണ്ടെങ്കിലും നാട്ടുകാരിൽ പലരും യാത്രയ്ക്കായി ഇപ്പോൾ സമീപത്തെ മറ്റു റോഡുകളെയാണ് ആശ്രയിക്കുന്നത്. കായംകുളം-കാർത്തികപ്പളളി റോഡിൽ ബംഗ്ലാവിൽ ഭാഗത്തുനിന്നു കിഴക്കോട്ട് നൂറുമീറ്ററോളം ദൂരം റോഡ് നാമാവശേഷമായ നിലയിലാണ്. കുണ്ടും കുഴിയും വഴുവഴുപ്പ് ചെളിയും നിറഞ്ഞ ഈ ഭാഗം കടക്കണമെങ്കിൽ യാത്രക്കാർ പെടാപ്പാടുപെടണം. കൂടാതെ, മഴക്കാലത്ത് ഇവിടം വെള്ളത്തിൽ മുങ്ങും. മഴ കടുത്താൽ വീടുകളുടെ പരസരങ്ങളിലേക്കും വെള്ളം കയറുന്ന അവസ്ഥയുണ്ടാകും. കിഴക്കുനിന്നുള്ള വെള്ളവും ഇവിടേക്കാണെത്തുന്നത്. ജനങ്ങൾ തിങ്ങിപ്പാർക്കുന്ന പ്രദേശമാണിവിടം. ജലനിരപ്പുയരുമ്പോൾ ഇവിടങ്ങളിലെ താമസക്കാരുടെ ദുരിതം ഇരിട്ടിയാകും. കഴിഞ്ഞയാഴ്ച മഴ കനത്തപ്പോൾ മണ്ണുമാന്തി യന്ത്രം ഉപയോഗിച്ച് വെള്ളം കായംകുളം-കാർത്തികപ്പള്ളി റോഡിലെ ഓടയിലേക്ക് ഒഴുക്കിവിടുകയായിരുന്നു.റോഡിന്‍റെ തെക്കുവശം മാന്തിയതോടെ അപകടാവസ്ഥയുമുണ്ട്. കിഴക്കു ഭാഗത്തുള്ള വളവിന്‍റെ ഭാഗത്ത് വലിയ കുഴിയും രൂപപ്പെട്ടു. ഇത് യാത്രക്കാർക്ക് വലിയ ഭീഷണിയാണ്. ഇവിടെ വാഹനങ്ങൾ കുഴിയിൽ അകപ്പെടാനുള്ള സാധ്യതയേറെയാണ്. വളവായതിനാൽ കുഴികണ്ട് വെട്ടിക്കുമ്പോൾ വാഹനങ്ങൾ കൂട്ടിമുട്ടിയും അപകടമുണ്ടാ കാം. അപായസൂചനയായി നാട്ടുകാർ ഇവിടെ കൊടി വെച്ചിട്ടുണ്ട്. മതിയായ ജലനിർഗമന മാർഗത്തോടുകൂടി റോഡ് ഉയർത്തി പുനർനിർമിക്കണമെന്നാണ് നാട്ടുകാർ ആവശ്യപ്പെടുന്നത്.

ചെങ്ങന്നൂർ കെഎസ്ആർടിസി സ്റ്റാൻഡിൽ കാത്തിരിപ്പുകേന്ദ്രമില്ല: യാത്രക്കാർ വലയുന്നു

ചെങ്ങന്നൂർ: ചെങ്ങന്നൂർ കെഎസ്ആർടിസി ബസ് സ്റ്റാൻഡ് നവീകരണത്തിന്‍റെ പേരിൽ പൊളിച്ചുമാറ്റി നാലു മാസത്തിലേറെയായിട്ടും യാത്രക്കാരുടെ ദുരിതം തുടരുന്നു. മഴയും വെയിലുമേറ്റ് വലയുന്ന യാത്രക്കാർക്ക് ഒരു താത്കാലിക കാത്തിരിപ്പുകേന്ദ്രം പോലുമില്ലാത്ത അവസ്ഥയാണ് ഇവിടെ. അടിസ്ഥാന സൗകര്യങ്ങളായ ശുചിമുറി പോലും ഇല്ലാത്തത് യാത്രക്കാരുടെ ദുരിതം വർധിപ്പിക്കുകയാണ്. അഭയമില്ലാതെ കനത്ത മഴയോ വെയിലോ വരുമ്പോൾ സാധനങ്ങളുമായി സമീപത്തെ കടത്തിണ്ണകളിലേക്കും കെഎസ്ആർടിസിയുടെ ഗാരേജിലേക്കും ഓടിക്കയറേണ്ട അവസ്ഥയാണ്. കൈക്കുഞ്ഞുങ്ങളുമായി യാത്ര ചെയ്യുന്നവരാണ് ഏറെ ബുദ്ധിമുട്ട് അനുഭവിക്കുന്നത്. ബസ് സ്റ്റാൻഡിൽനിന്ന് വെയിലും മഴയുമേല്ക്കാതെ യാത്രക്കാർ മാറി നില്ക്കുന്നതുമൂലം ബസ് സ്റ്റാൻഡിൽ വരുമ്പോൾ ബസുകൾക്ക് പിന്നാലെ ഓടേണ്ടി വരുന്നുണ്ട്; ഇത് അപകടങ്ങൾക്കു കാരണമാകാനുള്ള സാധ്യതയും യാത്രക്കാർ ചൂണ്ടിക്കാണിക്കുന്നു. ചെളിക്കുണ്ടായി കെട്ടിടം പൊളിച്ചുമാറ്റിയ സ്ഥലം പൂർണമായും ചെളിക്കുണ്ടായി മാറിയിരിക്കുകയാണ്. യാത്രക്കാർക്ക് വെയിലിൽനിന്ന് രക്ഷപ്പെടാൻ ആകെയുള്ളത് ഒരു തണൽമരം മാത്രമാണ്. ഇത് ഏതുനിമിഷവും നിലംപൊത്താവുന്ന അവസ്ഥയിലാണെന്നും യാത്രക്കാർ ആശങ്കപ്പെടുന്നു. അപര്യാപ്തമായ താത്കാലിക ഷെഡാണുള്ളത്. നിലവിൽ ടാർപോളിൻ വലിച്ചുകെട്ടിയ ഒരു ചെറിയ ഷെഡ് മാത്രമാണുള്ളത്. ഇതിൽ നാലു പേർക്കു പോലും നിൽക്കാൻ കഴിയില്ല. മുൻപുണ്ടായിരുന്ന ഇരിപ്പിടങ്ങൾ പൊട്ടിപ്പൊളിഞ്ഞ നിലയിൽ തുറന്ന സ്ഥലത്താണ് കിടക്കുന്നത്.

അധികൃതരുടെ വാഗ്ദാനങ്ങൾ പാഴ്‌വാക്കായി. കെട്ടിടം പൊളിച്ചു തീർന്നാലുടൻ ദിവസങ്ങൾക്കുള്ളിൽ താത്കാലിക ഷെഡ് നിർമിക്കുമെന്ന അധികൃതരുടെ വാഗ്ദാനവും പാഴ് വാക്കായി മാറിയിരിക്കുകയാണ്. വകുപ്പു മന്ത്രിക്ക് ഉൾപ്പെടെ നിരവധി പരാതികൾ അയച്ചിട്ടും പരിഹാരമുണ്ടായില്ല. വിവിധ രാഷ്ട്രീയ സംഘടനകളുടെ നേതൃത്വത്തിൽ സമരപരിപാടികളും നടന്നിരുന്നു. പുതിയ പ്രതീക്ഷ യാത്രക്കാർക്ക് താത്കാലിക ഷെഡ് നിർമിക്കുന്നതിനായി ചെങ്ങന്നൂർ എംഎൽഎയും മന്ത്രിയുമായ സജി ചെറിയാന്‍റെ ഫണ്ടിൽ 4.4 ലക്ഷം അനുവദിച്ചിട്ടുണ്ടെന്ന് അസിസ്റ്റന്‍റ് ട്രാൻസ്പോർട്ട് ഓഫീസർ കെ.ആർ. അജീഷ് കുമാർ പറഞ്ഞു. അന്താരാഷ്ട്ര നിലവാരത്തിൽ 32,000 ചതുരശ്ര അടി വിസ്തീർണത്തിൽ 11.5 കോടി രൂപ ചെലവഴിച്ച് പുതിയ കെട്ടിടം നിർമിക്കാനാണ് പദ്ധതി. കെട്ടിടത്തിന്‍റെ നിർമാണം പൂർത്തിയാകുന്നതു വരെ യാത്രക്കാർക്കായി താത്കാലിക കാത്തിരപ്പു കേന്ദ്രം, ശുചിമുറി, പോലീസ് സേവനം എന്നിവ അടിയന്തരമായി ഏർപ്പെടുത്തണമെന്നാണ് യാത്രക്കാരുടെ പ്രധാന ആവശ്യം. 43 ബസുകളും രണ്ട് സിഫ്റ്റ് ബസുകളുമായി 45 ഷെഡ്യൂളുകൾ ഇവിടെനിന്ന് ഓപ്പറേറ്റ് ചെയ്യുന്നുണ്ട്. തിങ്കൾ, ശനി ദിവസങ്ങളിൽ രണ്ട് അഡീഷണൽ സർവീസും ഓപ്പറേറ്റ് ചെയ്യുന്നു.

അയൽവാസിയെ വെട്ടിപ്പരിക്കേൽപ്പിച്ച കേസ്: പ്രതിക്ക് ഏഴു വർഷവും ഏഴു മാസവും തടവ്

ചെങ്ങന്നൂർ: അയൽവാസിയെ ആക്രമിച്ച കേസിൽ പ്രതിക്ക് ഏഴു വർഷവും ഏഴു മാസവും തടവും 20,000 രൂപ പിഴയും ശിക്ഷ വിധിച്ച് ചെങ്ങന്നൂർ അസിസ്റ്റന്‍റ് സെഷൻസ് കോടതി. ചെറിയനാട് മണ്ഡപരിയാരം പുന്നവട്ടത്ത് പുത്തൻവീട്ടിൽ ജോണി (60) യാണ് ശിക്ഷിക്കപ്പെട്ടത്. ചെങ്ങന്നൂർ അസിസ്റ്റന്‍റ് സെഷൻസ് കോടതി ജഡ്ജി വി.എസ്. വീണയാണ് വിധി പ്രസ്താവിച്ചത്. 2022-ലാണ് കേസിനാസ്പദമായ സംഭവം. ജോണിയുടെ ബന്ധുവിന്‍റെ സ്ഥലം വാങ്ങി വീടുവച്ചതിലുള്ള വൈരാഗ്യമാണ് ആക്രമണത്തിൽ കലാശിച്ചത്. അയൽവാസിയായ പട്ടത്താനത്ത് ജിനു രാജേഷിനെ (33) യാണ് ഇയാൾ വീട്ടിൽക്കയറി വെട്ടിപ്പരിക്കേൽപ്പിച്ചത്. കേസിലെ രണ്ടാം പ്രതിയായിരുന്ന ജോണിയുടെ ഭാര്യ ജോളിയെ കോടതി കുറ്റവിമുക്തയാക്കി. പ്രോസിക്യൂഷനു വേണ്ടി അഡീഷണൽ പബ്ലിക് പ്രോസിക്യൂട്ടർ അഡ്വ. ദിവ്യാ ഉണ്ണിക്കൃഷ്ണൻ ഹാജരായി. അന്നത്തെ ചെങ്ങന്നൂർ എസ്ഐ ആയിരുന്ന എസ്. നിധീഷാണ് കേസിൽ കുറ്റപത്രം സമർപ്പിച്ചത്.

പിണറായി ഭരണത്തിൽ സ്ത്രീകൾക്ക് ദുരിതവും സുരക്ഷിതത്വമില്ലായ്മയും: ജെബി മേത്തർ

കായംകുളം: സ്ത്രീകൾക്ക് വളരെയേറെ ദുരിതവും സുരക്ഷിതത്വം ഇല്ലായ്മയും അനുഭവിക്കേണ്ടിവന്ന ഒരു കാലഘട്ടമാണ് കഴിഞ്ഞ ഒമ്പതു വർഷത്തെ പിണറായി വിജയന്‍റെ ഭരണത്തിലൂടെ സംസ്ഥാനത്ത് സംജാതമായതെന്ന് മഹിളാ കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എംപി. മഹിളാ സാഹസ് കേരളയാത്രയുടെ കായംകുളം നിയോജകമണ്ഡലത്തിലെ സ്വീകരണ പരിപാടിയിൽ പങ്കെടുത്ത് സംസാരിക്കുകയായിരുന്നു അവർ. പുല്ലുകുളങ്ങര ജംഗ്ഷനിൽനിന്ന് ആരംഭിച്ച സ്വീകരണ പരിപാടി കെപിസിസി സെക്രട്ടറി ഇ. സമീർ ഉദ്ഘാടനം ചെയ്തു. മഹിളാ കോൺഗ്രസ് മണ്ഡലം പ്രസിഡന്‍റ് രമ്യ അധ്യക്ഷത വഹിച്ചു. മുൻ എംപി രമ്യാ ഹരിദാസ്, കെപിസിസി ജനറൽ സെക്രട്ടറി കെ.പി. ശ്രീകുമാർ, എ. ത്രിവിക്രമൻ തമ്പി, മഹിളാ കോൺഗ്രസ് ജില്ലാ പ്രസിഡന്‍റ് ബബിത ജയൻ, ബ്ലോക്ക് കോൺഗ്രസ് പ്രസിഡന്‍റ് ടി. സൈനുലാബ്ദീൻ, ഡിസിസി ഭാരവാഹികളായ വേലഞ്ചിറ സുകുമാരൻ, എ.ജെ.ഷാജഹാൻ, എൽ വേലായുധൻ പിള്ള, എൻ. രാജഗോപാൽ, മഹിളകോൺഗ്രസ് ബ്ലോക്ക് പ്രസിഡന്‍റ് പത്മകുമാരി, ആർ. ബിന്ദു, തയ്യിൽ പ്രസന്നകുമാരി, പ്രശോഭ എന്നിവർ പ്രസംഗിച്ചു.

സര്‍ക്കാര്‍ നെല്‍കര്‍ഷകരോട് നീതിപുലര്‍ത്തണം: ‌ഫാ. ഫിലിപ്പ് വൈക്കത്തുകാരന്‍

എടത്വ: സര്‍ക്കാര്‍ നെല്‍കര്‍ഷകരോട് നീതിപുലര്‍ത്തണമെന്ന് എടത്വ ഫൊറോന പള്ളി വികാരി ഫാ. ഫിലിപ്പ് വൈക്കത്തുകാരന്‍. നെല്‍കര്‍ഷക സംരക്ഷണസമിതിയുടെ നേതൃത്വത്തിലുള്ള പ്രതിഷേധാഗ്‌നി "ആഗ്' ഉദ്ഘാടനം ചെയ്തു സംസാരിക്കുകയായിരുന്നു അദേഹം. വ്യത്യസ്തങ്ങളായിട്ടുള്ള വെല്ലുവിളികളെ അതിജീവിച്ച് കേരളത്തിനുവേണ്ടി അന്നം ഉത്പാദിപ്പിക്കുന്ന നെല്‍കര്‍ഷകന്‍റെ ആത്മവീര്യം നഷ്ടപ്പെടാതെ അവനെ ചേര്‍ത്തുപിടിച്ചു അവനോടു നീതിപുലര്‍ത്തണം, കര്‍ഷകരുടെ പിആര്‍എസിന്‍റെ തുക അടിയന്തരമായി വിതരണം ചെയ്യണമെന്നും അദേഹം ആവശ്യപ്പെട്ടു. സംഭരിച്ച നെല്ലിന്‍റെ വില പൂര്‍ണമായി നല്‍കുക, പിആര്‍എസ് വായ്പയിലെ മെല്ലെപ്പോക്ക് അവസാനിപ്പിക്കുക, രണ്ടാംകൃഷിക്കും പുഞ്ചകൃഷിക്കുള്ള നെല്‍വിത്തിന്‍റെ ലഭ്യത ഉറപ്പുവരുത്തുക, തോട്ടപ്പള്ളി സ്പില്‍വേ, തണ്ണീര്‍മുക്കം ഷട്ടറുകളുടെ അറ്റകുറ്റപ്പണികള്‍ കാലേക്കൂട്ടി പൂര്‍ത്തീകരിച്ച് വൃശ്ചികവേലിയേറ്റത്തെ ചെറുക്കത്തക്കരീതില്‍ റഗുലേറ്റ് ചെയ്യാനുള്ള നടപടി സ്വീകരിക്കുക, ഓരുമുട്ടുകള്‍ ശാസ്ത്രീയമായി സ്ഥാപിക്കുക, തുടങ്ങിയ വിഷയങ്ങള്‍ ഉന്നയിച്ചു നടത്തിയ യോഗത്തില്‍ നെല്‍കര്‍ഷക സംരക്ഷണസമിതി വൈസ് പ്രസിഡന്‍റ് കറിയാച്ചന്‍ ചേന്നുകര അധ്യക്ഷത വഹിച്ചു. വി.ജെ. ലാലി, റജീന അഷറഫ്, സോണിച്ചന്‍ പുളിങ്കുന്ന്, പി.ആര്‍. സതീശന്‍, ജോസ് കാവനാട്, പി. വേലായുധന്‍ നായര്‍, ലാലിച്ചന്‍ പള്ളിവാതുക്കല്‍, റോയി ഊരാംവേലി, ഇ.ആര്‍. രാധാകൃഷ്ണപിള്ള, തോമാച്ചന്‍ ഇല്ലിമുറി, സുനു പി. ജോര്‍ജ്, മാത്യു തോമസ്, ജോമോന്‍ തായങ്കരി, പി.സി. ജോസഫ്, ബൈജു ജോസ് എന്നിവര്‍ പ്രസംഗിച്ചു.

തെരുവുനായ ആക്രമണത്തിൽ നാലരവയസുകാരനു പരിക്ക്

ഹരിപ്പാട്: തെരുവുനായ ആക്രമണത്തിൽ നാലര വയസുകാരന് പരിക്ക്. മുതുകുളം വടക്ക് നമ്പാട്ട് വീട്ടിൽ അനിൽകുമാറിന്‍റെയും ദീപയുടെയും മകൻ ധ്രുവിനാണ് കടിയേറ്റത്. ഇന്നലെ രാവിലെ പത്തോടെയാണ് സംഭവം. ഇടതുകൈക്ക് ആഴത്തിൽ മുറിവേറ്റ ധ്രുവിനെ വീടിന് തൊട്ടടുത്തുതന്നെയുളള മുതുകുളം സാമൂഹികാരോഗ്യ കേന്ദ്രത്തിൽ എത്തിച്ച് പ്രാഥമിക ചികിത്സ നൽകി. പിന്നീട് ആലപ്പുഴ മെഡിക്കൽ കോളജിലും ചികിത്സ തേടി. അക്രമകാരിയായ നായ അടുത്ത് വാടകയ്ക്കു താമസിക്കുന്നയാളുടെ ആടിനെയാണ് ആദ്യം കടിച്ചത്. അവിടെനിന്നെത്തിയാണ് കുട്ടിയെ ആക്രമിക്കുന്നത്. നാലു ദിവസം മുമ്പും തെരുവുനായയുടെ ആക്രമണത്തിൽ പ്രദേശവാസിയായ സ്ത്രീക്ക് പരിക്കേറ്റു. ഏതാനം ദിവസം മുമ്പ് ഷാപ്പുമുക്കു ഭാഗത്തുവച്ച് സൈക്കിളിൽ പോകുകയായിരുന്ന മറ്റൊരു കുട്ടിക്കു നേരേ നായ്ക്കൂട്ടം പാഞ്ഞടുത്തിരുന്നു. നാട്ടുകാരുടെ സമയോചിതമായ ഇടപെടൽ കാരണമാണ് ഈ കുട്ടി കടിയേൽക്കാതെ രക്ഷപ്പെട്ടത്. അക്രമകാരിയായ നായകൾക്ക് പേവിഷ ബാധയേറ്റിരിക്കാമെന്നാണ് സംശയിക്കുന്നത്. ഇവിടെ പാണ്ഡവർകാവ്, ആശുപത്രി ജംഗ്ഷൻ, ശാന്തിമുക്ക്, ഷാപ്പുമുക്ക്, പുത്തൻചന്ത, മുലേത്തറ ഭാഗങ്ങളിൽ തെരുവുനായ ക്രമാതീതമായി പെരുകിയിട്ടുണ്ട്. സ്ത്രീയെയും കുട്ടിയെയും കടിച്ച നായ ഇവിടെയെല്ലാമെത്തി മറ്റു തെരുവുനായ്ക്കളെയും കടിച്ചതായി പറയുന്നു. ഇതുകാരണം ഇവിടങ്ങളിലുളളവർ പുറത്തേക്കിറങ്ങാൻ പോലും ഭയപ്പെടുകയാണ്.

രാജ്യം ഭരിക്കുന്നത് ഫാസിസ്റ്റ് സർക്കാർ: ബിനോയ് വിശ്വം

കായംകുളം: ഫാസിസ്റ്റ് സർക്കാരാണ് രാജ്യം ഭരിക്കുന്നതെന്നും ഫാസിസ്റ്റ് അതിന്‍റെ മുഖഛായ ഒറ്റയടിക്ക് കാണിക്കാറില്ലെന്നും സിപിഐ സംസ്ഥാന സെക്രട്ടറി ബിനോയ് വിശ്വം പറഞ്ഞു. സിപിഐ ആലപ്പുഴ ജില്ലാ സമ്മേളനത്തിന്‍റെ പ്രതിനിധി സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഹിറ്റ്‌ലര്‍ തെരഞ്ഞെടുപ്പിലൂടെയാണ് കടന്നുവന്നത്. കേന്ദ്രസര്‍ക്കാരിന്‍റെ നീക്കം ഹിറ്റ്‌ലറിന്‍റെ സ്വഭാവരീതിക്കു സമാനമായിട്ടാണ്. അടിമുടി ഫാസിസ്റ്റായ ബിജെപി, ആര്‍എസ്എസ് സര്‍ക്കാരാണ് രാജ്യത്തുള്ളത്. മോദിയേക്കാൾ വാചാലമായിരുന്നു ഹിറ്റ്‌ലറിന്‍റെ ആദ്യപ്രസംഗങ്ങൾ. എല്ലാം കൈപ്പിടിയില്‍ ഒതുങ്ങിയപ്പോള്‍ ഹിറ്റ‌്‌ലർ‍ ഫാസിസ്റ്റായി എന്നും അദേഹം പറഞ്ഞു. മോദി സര്‍ക്കാര്‍ മുതലാളിത്വ പാര്‍ട്ടിയാണ്. കമ്മ്യൂണിസ്റ്റ് പാര്‍ട്ടിക്ക് അകത്ത് ചര്‍ച്ചയും സംവാദവും നടക്കുന്നത് പാര്‍ട്ടിക്കുവേണ്ടി മാത്രമാണ്. സ്വന്തം താത്പര്യങ്ങളെക്കാള്‍ തൊഴിലാളികളുടേയും നാടിന്‍റെയും സേവകരാണ് കമ്മ്യൂണിസ്റ്റുകാര്‍. മൈക്കും കാമറയും വഴിയല്ല പാര്‍ട്ടി ഉണ്ടാക്കേണ്ടതെന്നും അദേഹം കൂട്ടിച്ചേര്‍ത്തു. പ്രതിനിധി സമ്മേളനത്തിനു മുന്നോടിയായി വിപ്ലവ ഗായിക പി.കെ. മേദിനി പതാക ഉയർത്തി. സ്വാഗതസംഘം ചെയർമാൻ എസ്. സോളമൻ, ദീപ്തി അജയകുമാർ, എം.കെ. ഉത്തമൻ, സി.എ. അരുൺകുമാർ, ബൈരഞ്ജിത്ത്, അജയ് കൃഷ്ണൻ എന്നിവരടങ്ങിയ പ്രിസീഡിയമാണ് സമ്മേളനം നിയന്ത്രിക്കുന്നത്. ദേശീയ കൗണ്‍സില്‍ അംഗം ടി.ടി. ജിസ്മോന്‍ രക്തസാക്ഷി പ്രമേയവും ജില്ലാ എക്സിക്യൂട്ടീവ് അംഗം കെ.ജി. സന്തോഷ് അനുശോചന പ്രമേയവും അവതരിപ്പിച്ചു. സിപിഐ ദേശീയ എക്സിക്യൂട്ടീവ് അംഗം കെ.പി. രാജേന്ദ്രൻ, സംസ്ഥാന അസിസ്റ്റന്‍റ് സെക്രട്ടറി ഇ. ചന്ദ്രശേഖരൻ, മന്ത്രിമാരായ കെ. രാജൻ, പി. പ്രസാദ്, ജെ. ചിഞ്ചുറാണി തുടങ്ങിയവർ സംസാരിച്ചു.

ജില്ലാ കൃഷിത്തോട്ടത്തിലെ ഉരുളി മോഷണം: ട്രാക്ടർ ഡ്രൈവർ അറസ്റ്റിൽ

മാങ്കാംകുഴി: തഴക്കര പഞ്ചായത്തിലെ കോട്ടമുക്കിലെ നൂറേക്കർ ജില്ലാ കൃഷിത്തോട്ടത്തിൽനിന്ന് ഉരുളി മോഷണംപോയ സംഭവത്തിൽ ട്രാക്ടർ ഡ്രൈവറായ സ്ഥിരം ജീവനക്കാരനെ പോലീസ് അറസ്റ്റ് ചെയ്തു. തിരുവനന്തപുരം സ്വദേശി സന്തുവിനെ (39) യാണ് മാവേലിക്കര പോലീസ് അറസ്റ്റ് ചെയ്തത്. മാവേലിക്കര കോടതിയിൽ ഹാജരാക്കിയതിനെത്തുടർന്ന് ഇയാളെ കോടതി പതിനാലു ദിവസത്തേക്ക് റിമാൻഡ് ചെയ്തു. 2018 ൽ പിഎസ്‌സി നിയമനത്തെത്തുടർന്നാണ് ഇയാൾ ജില്ലാ കൃഷിത്തോട്ടത്തിൽ ട്രാക്ടർ ഡ്രൈവറായി ജോലിയിൽ പ്രവേശിച്ചത്. ഇയാളെയും ഒരു താത്കാലിക ജീവനക്കാരിയെയും നിർണായക വിവരങ്ങളുടെ അടിസ്ഥാനത്തിൽ കഴിഞ്ഞ ദിവസം ഉച്ചയ്ക്ക് മാവേലിക്കര പോലീസ് കസ്റ്റഡിയിൽ എടുത്ത് വിശദമായി ചോദ്യം ചെയ്തിരുന്നു. ഇതിൽ സന്തു കുറ്റം സമ്മതിക്കുകയായിരുന്നു. താത്കാലിക ജീവനക്കാരിയെ ചോദ്യം ചെയ്ത് മൊഴി രേഖപ്പെടുത്തിയ ശേഷം പോലീസ് വിട്ടയച്ചു. അന്വേഷണത്തോട് സഹകരിക്കണമെന്നും വിളിച്ചാൽ സ്റ്റേഷനിൽ ഹാജരാകണമെന്നുമുള്ള നിർദേശം നൽകിയാണ് ഇവരെ വിട്ടയച്ചതെന്ന് പോലീസ് പറഞ്ഞു. മാന്നാറിലെ ഒരു കടയിൽനിന്നു സന്തു പുതിയ ഉരുളി വാങ്ങിയതിന്‍റെ സിസിടിവി ദൃശ്യം പോലീസിന് ലഭിച്ചിരുന്നു. ഏകദേശം അരലക്ഷം രൂപ വിലവരുന്ന 38 കിലോ തൂക്കമുള്ള ഹിന്‍റാലിയത്തിന്‍റെ വലിയ ഉരുളിയാണ് കഴിഞ്ഞ ദിവസം ജില്ലാ കൃഷിത്തോട്ടത്തിൽനിന്നു മോഷണം പോയത്. മാവേലിക്കര പോലീസിൽ സൂപ്രണ്ട് പരാതി നൽകിയതിനെ തുടർന്നാണ് പോലീസ് അന്വേഷണം ആരംഭിച്ചത്. പോലീസിൽ പരാതി നൽകിയതിന് പിന്നാലെ ജില്ലാ കൃഷിത്തോട്ടത്തിന്‍റെ പടിഞ്ഞാറു ഭാഗത്തെ കാടു നിറഞ്ഞ പ്രദേശത്തുനിന്ന് ഒരു പുതിയ ഉരുളി കണ്ടെത്തിയിരുന്നു. മെഷീൻ ഉപയോഗിച്ച് പുല്ലുവെട്ടുന്ന തൊഴിലാളികളാണ് പുതിയ ഉരുളി കണ്ടെത്തിയത്. ഈ പുതിയ ഉരുളി വാങ്ങിയ കടകൾ കേന്ദ്രീകരിച്ച് നടത്തിയ അന്വേഷണത്തിലാണ് പോലീസിന് പ്രതിയെ കണ്ടെത്താൻ സഹായകമായത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]