പ്രമാടം: പാട്ട് പാടിയും കൂട്ട് കൂടിയും അറിവ് പങ്കു വച്ചും വാര്‍ഡുകളില്‍ സ്ത്രീകള്‍ക്ക് ഒത്തു ചേരുന്നതിനായി എന്നിടം കള്‍ച്ചറല്‍ ആന്‍ഡ് റിക്രിയേഷന്‍ സെന്‍ററിന്‍റെയും റോഡ് സൗന്ദര്യവത്കരണത്തിന്‍റെയും ജില്ലാതല ഉദ്ഘാടനം നാളെ നടക്കും. രാവിലെ 9.30ന് പ്രമാടം സിഡിഎസിലെ 17-ാം വാര്‍ഡിലെ ജവഹര്‍ ലൈബ്രറി ഹാളില്‍ ജില്ലാ കളക്ടര്‍ എസ്. പ്രേം കൃഷ്ണന്‍ ഉദ്ഘാടനം നിര്‍വഹിക്കും.
കുടുംബശ്രീ 26-ാം വാര്‍ഷികാഘോഷങ്ങളുടെ ഭാഗമായാണ് "എന്നിടം' പദ്ധതി നടപ്പിലാക്കുന്നത്. കുടുംബശ്രീ ത്രിതല സംഘടന സംവിധാനത്തിന്‍റെ മധ്യഘടകമായ എഡിഎസ് സംവിധാനത്തേയും അയല്‍ക്കൂട്ട സംവിധാനത്തേയും കൂടുതല്‍ ചലനാത്കമാക്കുക എന്നീ ലക്ഷ്യങ്ങളോടെയാണ് കുടുംബശ്രീ ദിനമായ നാളെ എഡിഎസ്തല കള്‍ച്ചറല്‍ ആന്‍ഡ് റിക്രിയേഷന്‍ സെന്‍ററുകള്‍ ഉദ്ഘാടനം ചെയ്യുന്നത്.
കുടുംബശ്രീ വാര്‍ഷികാഘോഷ പരിപാടിയുടെ ഭാഗമായി ജില്ലയിലെ പരിസ്ഥിതി സംരക്ഷണപ്രവര്‍ത്തനങ്ങള്‍ നടത്തുന്നതിന് പൊതുയിടങ്ങള്‍ വൃത്തിയാക്കുകയും സൗന്ദര്യവത്കരണം നടത്തുകയും ചെയ്യും.
920 വാര്‍ഡുകളിലും കുറഞ്ഞത് 100 മീറ്റര്‍ സ്ഥലത്ത് ഗതാഗതത്തിനും വെള്ളമൊഴുകുന്നതിനും തടസമാകാത്ത രീതിയില്‍ കുടുംബശ്രീ എഡിഎസുകള്‍ മുഖേന ഇലചെടികളും പൂച്ചെടികളും നട്ടുപ്പിടിപ്പിക്കും. ഇതിലൂടെ ജില്ലയില്‍ 100 കീലോമീറ്റര്‍ നീളമുള്ള ഗ്രീന്‍ ബെല്‍റ്റ് സൃഷ്ടിക്കുകയാണ് ലക്ഷ്യം. എഡിഎസിന്‍റെ നേതൃത്വത്തില്‍ പാതയോരങ്ങള്‍ കണ്ടെത്തി വഴിയോര പൂന്തോട്ടം ഒരുക്കും.
സ്ത്രീകളുടെയും കുട്ടികളുടേയും കലാപരിപാടികള്‍ സംഘടിപ്പിക്കല്‍, സാഹിത്യ ക്യാമ്പ്, സിനിമ പ്രദര്‍ശനം, ഫുഡ് ഫെസ്റ്റ്, ബാലസഭ, ബഡ്‌സിലെ കുട്ടികളുടെ കലാപരിപാടി, കാര്‍ഷിക പ്രദര്‍ശനം, ജെന്‍ഡര്‍ പ്രവര്‍ത്തനങ്ങള്‍, വിപണനമേള തുടങ്ങിയവയും സംഘടിപ്പിക്കും. തദ്ദേശക സ്വയംഭരണ സ്ഥാപനങ്ങള്‍ക്ക് കീഴിലുള്ള ഘടക സ്ഥാപനങ്ങളുടെ മുറികള്‍, വായനശാല, സാംസ്‌കാരിക നിലയങ്ങള്‍, ക്ലബുകള്‍ തുടങ്ങിയവ എഡിഎസ് തല കള്‍ച്ചറല്‍ ആന്‍ഡ് റിക്രിയേഷന്‍ സെന്‍ററുകളുടെ ആസ്ഥാനമന്ദിരമായി ഉപയോഗിക്കും.
കുടുംബശ്രീ മൈന്‍ഡ് ബ്ലോവേഴ്‌സ് പദ്ധതി
പത്തനംതിട്ട: കുട്ടികള്‍ക്ക് അറിവ്, സര്‍ഗാത്മകത, സംരംഭകത്വം എന്നിവയില്‍ നൂതന ആശയങ്ങള്‍ ഉള്‍ക്കൊള്ളുന്നതിനുള്ള മൈന്‍ഡ്‌സെറ്റ് സൃഷ്ടിക്കാനായി കുടുംബശ്രീ ആവിഷ്‌കരിച്ച പദ്ധതിയാണ് കുടുംബശ്രീ മൈന്‍ഡ് ബ്ലോവേഴ്‌സ് പദ്ധതി.
കുടുംബശ്രീ ദേശീയ ഗ്രാമീണ ഉപജീവനമിഷന്‍, ഉദ്യം ലേര്‍ണിംഗ് ഫൗണ്ടേഷന്‍ എന്നിവരുടെ സഹകരണത്തോടെയാണ് പദ്ധതി നടപ്പിലാക്കുന്നത്.
ശുചിത്വോത്സവം 2.0
കുട്ടികളിലൂടെ കുടുംബങ്ങളിലേക്ക്, കുടുംബങ്ങളില്‍നിന്ന് സമൂഹങ്ങളിലേക്കും ശുചിത്വ സുന്ദര കേരളം എന്ന ആശയം പ്രചരിപ്പിക്കുന്നതിനും കുട്ടികള്‍ക്ക് കുടുംബശ്രീ അയല്‍ക്കൂട്ടങ്ങളുടെ സഹായത്തോടെ നടപ്പിലാക്കുന്ന അവബോധ പരിശീലന പരിപാടിയാണ് ശുചിത്വോത്സവം 2.0.
സമൂഹത്തില്‍ നിലനില്‍ക്കുന്ന പ്രശ്‌നങ്ങളെ നിരീക്ഷിക്കാനും അതിലൂടെ ശാസ്ത്രീയമായ പ്രശ്‌ന പരിഹാരങ്ങള്‍ നിര്‍ദേശിക്കാനും കുട്ടികളെ പ്രാപ്തരാക്കുക, പരിസ്ഥിതിയും ആരോഗ്യവും തമ്മിലുള്ള ബന്ധം സംബന്ധിച്ച ശാസ്ത്രീയ അവബോധം സൃഷ്ടിക്കുക, പാഴ്‌വസ്തുക്കളില്‍നിന്നും ഉത്പന്നങ്ങള്‍ നിര്‍മിക്കാന്‍ കുട്ടികളെ പ്രാപ്തരാക്കുക തുടങ്ങിയവയാണ് ഇതിന്‍റെ ലക്ഷ്യങ്ങള്‍.