ADVERTISEMENT

ADVERTISEMENT

പുഷ്പഗിരിയിൽ ലോക ഫാർമസിസ്റ്റ് ദിനാഘോഷം

തിരുവല്ല: ലോക ഫാർമസിസ്റ്റ് ദിനാചരണത്തിന്‍റെ ഭാഗമായി പുഷ്പഗിരി കോളജ് ഓഫ് ഫാർമസിയിൽ എൻഎസ്എസ് യൂണിറ്റും കോളജ് സ്റ്റുഡൻസ് യൂണിയനും സംയുക്തമായി വിവിധ പരിപാടികൾ സംഘടിപ്പിച്ചു.
ബിലീവേഴ്സ് മെഡിക്കൽ കോളജ് ഹോസ്പിറ്റൽ ക്ലിനിക്കൽ വിഭാഗം മേധാവി ഡോ. ഗ്രേസ് മേരി ജോൺ പരിപാടികൾ ഉദ്ഘാടനം ചെയ്തു. സ്റ്റുഡന്‍റ്സ് യൂണിയൻ ചെയർപേഴ്സൺ കാരൽ ടോം അധ്യക്ഷത വഹിച്ചു. പുഷ്പഗിരി ഇൻസ്റ്റിറ്റ്യൂഷൻസ് ഡയറക്ടർ ഫാ. എബി വടക്കുംതല, വൈസ് പ്രിൻസിപ്പൽമാരായ ഡോ. നിതിൻ മനോഹർ, ജിനു ജോസഫ് തുടങ്ങിയവർ പ്രസംഗിച്ചു. യോഗത്തിൽ കോളജിലെ ഫാർമസിസ്റ്റുകളെയും വിവിധ കലാപരിപാടികളിൽ വിജയികളായവരെയും അനുമോദിച്ചു.

ADVERTISEMENT

ലൈഫ് മിഷന്‍ പദ്ധതിയില്‍ കിട്ടിയ വീട് കേരള ബാങ്ക് ജപ്തി ചെയ്തു

പത്തനംതിട്ട: ലൈഫ് മിഷന്‍ പദ്ധതിയില്‍ ലഭിച്ച ഭവനം കേരള ബാങ്ക് ജപ്തി ചെയ്തു. മല്ലപ്പള്ളി കൊറ്റനാട് കൊച്ചുകളീക്കല്‍ പ്രഹ്ലാദന്‌റെ മൂന്നു സെന്‌റ് സ്ഥലവും വീടുമാണ് കേരള ബാങ്ക് ജപ്തി ചെയ്തത്. വീട്ടില്‍ ആരും ഇല്ലാതിരുന്ന സമയത്ത് കഴിഞ്ഞ ദിവസം രാവിലെ 11ഓടെയായിരുന്നു ജപ്തി. തുടര്‍ന്ന് സര്‍ഫാസി പ്രകാരമുള്ള നടപടികള്‍ വിശദീകരിച്ച് ബോര്‍ഡ് വച്ചു. വിവരമറിഞ്ഞെത്തിയ കോണ്‍ഗ്രസ്, യൂത്ത് കോണ്‍ഗ്രസ് പ്രവര്‍ത്തകര്‍ പൂട്ടു പൊളിച്ച് പുറത്താക്കപ്പെട്ട കുടുംബത്തെ അകത്ത് പ്രവേശിപ്പിച്ചു. അതേസമയം, പത്തനംതിട്ട ചീഫ് ജുഡീഷൽ മജിസ്ട്രേറ്റ് കോടതിയുടെ ഉത്തരവിനെത്തുടര്‍ന്നാണ് ജപ്തി ഉണ്ടായതെന്ന് ജില്ലാ ജനറല്‍ മാനേജര്‍ വിശദീകരിച്ചു. വായ്പയ്ക്ക് ഈടുവച്ച ഭൂമി കൈമാറ്റം ചെയ്യപ്പെട്ട വിവരം രണ്ടുവര്‍ഷം മുന്‍പ് തിരിച്ചറിഞ്ഞു. തുടര്‍ന്ന് കോടതിയെ സമീപിക്കുകയും പോലീസില്‍ പരാതി നല്‍കുകയും ചെയ്തിരുന്നുവെന്നും കേരള ബാങ്ക് ജില്ലാ ജനറല്‍ മാനേജര്‍ ശ്രീദേവി അമ്മ പ്രതികരിച്ചു. 2017 ജൂണ്‍ മാസത്തിലാണ് പ്രഹ്ലാദന്‍ സമീപവാസിയായ വിജയകുമാറില്‍ നിന്നും സ്ഥലം വാങ്ങിയത്. ഇടപാടിന് രണ്ടു മാസം മുന്‍പേ ഈ സ്ഥലം, ഈടുവച്ച് വിജയകുമാര്‍ മൂന്നുലക്ഷം രൂപ വായ്പ നേടിയിരുന്നു. ഇത് പ്രഹ്ലാദന്‍ അറിഞ്ഞിരുന്നില്ലന്ന് പറയുന്നു. ഇതിനിടയിലും മാസങ്ങള്‍ക്ക് മുമ്പ് ബാങ്ക് അധികൃതര്‍ എത്തി, വായ്പാ വിഷയം ധരിപ്പിച്ചിരുന്നതായി പ്രഹ്‌ളാദന്‍റെ ബന്ധു പറയുന്നു. മന്ത്രിമാര്‍ അടക്കം നിരവധി പേരെ കണ്ടു. പക്ഷേ ഗുണം ഉണ്ടായില്ലെന്ന് ജപ്തി ചെയ്ത വീടിന്‍റെ ഉടമയുടെ ബന്ധുവായ ജിഷ പറഞ്ഞു. വസ്തു സംബന്ധിച്ച മുഴുവന്‍ രേഖകളും പരിശോധിച്ച് ഉറപ്പാക്കിയാണ് ലൈഫ് പദ്ധതിയില്‍ പ്രഹ്ലാദന് വീട് അനുവദിച്ചത്.

സഹകരണ ദിനാഘോഷം നടത്തി

തിരുവല്ല: സർക്കിൾ സഹകരണ യൂണിയന്‍റെ നേതൃത്വത്തിൽ അന്തർദേശീയ സഹകരണ ദിനാഘോഷം നടത്തി. സംസ്ഥാന സഹകരണ എംപ്ലോയീസ് വെൽഫെയർ ഫണ്ട് ബോർഡ് വൈസ് ചെയർമാൻ ആർ. സനൽകുമാർ യോഗം ഉദ്ഘാടനം ചെയ്തു. സർക്കിൾ സഹകരണ യൂണിയൻ ചെയർമാൻ പ്രമോദ് ഇളമൺ അധ്യക്ഷത വഹിച്ച യോഗത്തിൽ മികച്ച രീതിയിൽ നിക്ഷേപ സമാഹരണങ്ങൾ നടത്തിയ സംഘങ്ങളെ അവാർഡുകൾ നൽകി ആദരിച്ചു. സംഘങ്ങളിലെ ജീവനക്കാരുടെയും ബോർഡ് അംഗങ്ങളുടെയും മികച്ച വിജയം കൈവരിച്ച കുട്ടികൾക്ക് പുരസ്കാരങ്ങളും വിതരണം ചെയ്തു. സംസ്ഥാന സഹകരണ യൂണിയൻ സഹകരണ സ്റ്റാമ്പിന്‍റെ പ്രകാശനവും നടന്നു. സംസ്ഥാന കോ-ഓപ്പറേറ്റീവ് യൂണിയൻ ഇൻസ്ട്രെക്ടർ രേഷ്മ മനോഹരൻ ക്ലാസ് നയിച്ചു. തിരുവല്ല സഹകരണ അസി. റജിസ്ട്രാർ വി.ബിനു, ബെൻസി കെ. തോമസ്, പി.എസ്. റെജി, പ്രകാശ് ബാബു, എസ്. ഹരികുമാർ, ഉഷാ രാജു എന്നിവർ പ്രസംഗിച്ചു.

മാരാമണ്ണിൽ ഫ്രൂട്ട് ഫെസ്റ്റിനു തുടക്കമായി

മാരാമൺ: പഴവര്‍ഗ പ്രദര്‍ശനവും വിപണനവുമായി തോട്ടപ്പുഴശേരി ഗ്രാമപഞ്ചായത്തിന്‍റെ സമൃദ്ധി ഫ്രൂട്ട് ഫെസ്റ്റിനു തുടക്കമായി. മാരാമണ്‍ നെടുമ്പ്രയാര്‍ സെന്‍റ് ജോസഫ് കാത്തലിക് ചര്‍ച്ച് ഓഡിറ്റോറിയത്തില്‍ ഗ്രാമപഞ്ചായത്ത് പ്രസിഡന്‍റ് ആര്‍. കൃഷ്ണകുമാര്‍ ഉദ്ഘാടനം നിര്‍വഹിച്ചു. ഗ്രാമപഞ്ചായത്ത് വൈസ് പ്രസിഡന്‍റ് സിസിലി തോമസ് അധ്യക്ഷത വഹിച്ചു. ടൂറിസം മാപ്പ് പ്രകാശനം ജില്ലാ പഞ്ചായത്തംഗം സാറാ പി. തോമസ് നിര്‍വഹിച്ചു. ബ്ലോക്ക് പഞ്ചായത്തംഗം എല്‍സി ക്രിസ്റ്റഫര്‍ ആദ്യവില്പന നടത്തി. സമൃദ്ധി ഫ്രൂട്ട് ഗ്രാമം പദ്ധതിയുടെ ഭാഗമായി കൃഷി, വ്യവസായം, ടൂറിസം വകുപ്പുകളുടെ സഹകരണത്തോടെ സമൃദ്ധി കര്‍ഷകസംഘമാണ് ഫെസ്റ്റ് നടത്തുന്നത്. ഇന്നു സമാപിക്കും. രാവിലെ 9.30 മുതല്‍ രാത്രി ഏഴുവരെയാണ് പ്രദര്‍ശനം. വിവിധ തരം പഴങ്ങൾ, ഫ്രൂട്ട് ജൂസുകള്‍, പഴങ്ങളില്‍ നിന്നുള്ള മൂല്യവർധിത ഉത്പന്നങ്ങൾ, ഫലവൃക്ഷത്തൈകൾ, ആധുനിക കാര്‍ഷിക ഉപകരണങ്ങൾ, നവീന ജലസേചനവിദ്യകള്‍, ഫാം ടൂറിസത്തിന്‍റെ സാധ്യതകള്‍ എന്നിവയെല്ലാം ഫെസ്റ്റിലൂടെ അറിയാം. ഗ്രാമപഞ്ചായത്ത് സ്ഥിരം സമിതി അധ്യക്ഷരായ ലത ചന്ദ്രൻ, ജെസി മാത്യു, അംഗങ്ങളായ രശ്മി ആർ. നായര്‍, ടി.കെ. രാമചന്ദ്രന്‍ നായർ, റെന്‍സിന്‍ കെ. രാജൻ, ജില്ലാ വ്യവസായ കേന്ദ്രം ജനറല്‍ മാനേജര്‍ പി.എൻ. അനില്‍ കുമാര്‍, ജില്ലാ ടൂറിസം വകുപ്പ് ഡെപ്യൂട്ടി ഡയറക്ടര്‍ പി. ഐ. സുബൈര്‍കുട്ടി, പ്രിന്‍സിപ്പല്‍ കൃഷി ഓഫീസര്‍ ഷേര്‍ളി സഖറിയാസ്, കൃഷി ഓഫീസര്‍ ലത മേരി തോമസ്, തിരുവല്ല താലൂക്ക് എഡിഐഒ സ്വപ്ന ദാസ്, പഞ്ചായത്ത് സെക്രട്ടറി വി. സുമേഷ് കുമാർ, സമൃദ്ധി കര്‍ഷക സംഘം പ്രസിഡന്‍റ് സി. പി. ഗോപകുമാർ, ത്രിതലപഞ്ചായത്തംഗങ്ങള്‍, കൃഷി വകുപ്പ് ഉദ്യോഗസ്ഥർ, കാര്‍ഷിക വികസന സമിതി അംഗങ്ങള്‍ തുടങ്ങിയവര്‍ പ്രസംഗിച്ചു. വിദേശ ഫലങ്ങളുടെ വിളനിലം മാരാമൺ: തോട്ടപ്പുഴശേരി ഗ്രാമപഞ്ചായത്തിന്‍റെ ആഭിമുഖ്യത്തില്‍ വിദേശഫലങ്ങളുടെ സ്വദേശമാകാന്‍ ഒരുങ്ങി സമൃദ്ധി കര്‍ഷകസംഘം. വിദേശ ഫലം കൃഷി ചെയ്ത് പ്രാദേശിക സമ്പദ് വ്യവസ്ഥയെ കാര്‍ഷിക മേഖലയിലൂടെ ശക്തിപ്പെടുത്തുന്നതാണ് ഫ്രൂട്ട് ഗ്രാമം പദ്ധതി. ഗ്രാമപഞ്ചായത്ത്, കൃഷി, വ്യവസായം, ടൂറിസം വകുപ്പുകളുടെ സഹകരണത്തോടെയാണ് പദ്ധതി നടപ്പാക്കുന്നത്. കര്‍ഷകരുടെ വരുമാനം വര്‍ധിപ്പിക്കുക, പുതിയ തൊഴിലവസരം സൃഷ്ടിക്കുക എന്നിവയും ലക്ഷ്യമിടുന്നു. കാലാവസ്ഥയ്ക്കനുസൃതമായി മാംഗോസ്റ്റീന്‍, അവക്കാഡോ, ഡൂറിയാന്‍, റമ്പൂട്ടാന്‍ തുടങ്ങിയവയാണ് കൃഷി ചെയ്യുന്നത്. വിദേശ ഫലങ്ങളുടെ ആവശ്യാനുസരണം ആഭ്യന്തര ഉത്പാദനം വര്‍ധിപ്പിച്ചു സ്വയം പര്യാപ്തത നേടുകയാണ് ലക്ഷ്യം. വിവിധ തരം പഴവര്‍ഗങ്ങളുടെ കൃഷി പ്രോത്സാഹിപ്പിക്കുന്നതിലൂടെ കര്‍ഷകര്‍ക്ക് പുതിയ വരുമാന മാര്‍ഗമാണ് പദ്ധതിയിലൂടെ പഞ്ചായത്ത് നടപ്പാക്കാനൊരുങ്ങുന്നത്. തരിശുഭൂമികള്‍ ഫലപ്രദമായി ഉപയോഗപ്പെടുത്താനൊപ്പം കൃഷി, വിളവെടുപ്പ്, സംസ്‌കരണം, വിപണനം തുടങ്ങി നിരവധി തൊഴിലവസരങ്ങളും പ്രാദേശികമായി ലഭിക്കും. പഴങ്ങളില്‍നിന്ന് ജാം, സ്‌ക്വാഷ്, അച്ചാര്‍ തുടങ്ങിയ മൂല്യവര്‍ധിത ഉത്പന്നങ്ങള്‍ വില്‍ക്കുന്നതിനായി റീട്ടെയില്‍ ഷോപ്പും ആരംഭിക്കും. വിപണന സാധ്യത വര്‍ധിപ്പിക്കാനും ഉപഭോക്താക്കള്‍ക്ക് വേഗത്തില്‍ ഉത്പന്നങ്ങള്‍ ലഭ്യമാകുന്നതിനും കഴിയും. ഫാം ടൂറിസം, കാര്‍ഷിക പ്രദര്‍ശനം എന്നിവ പ്രോത്സാഹിപ്പിക്കുന്നതിലൂടെ ടൂറിസത്തിനുള്ള സാധ്യതയും പദ്ധതി തുറക്കുന്നു. ഉയര്‍ന്ന ഗുണമേന്മയുള്ള വിദേശ ഫലസസ്യങ്ങളുടെ തൈകള്‍ ഉത്പാദിപ്പിക്കുന്നതിനും വിപണനം നടത്തുന്നതിനും ഫ്രൂട്ട് നഴ്സറിയും അനുബന്ധമായി സ്ഥാപിക്കും. പദ്ധതിയിലൂടെ തോട്ടപ്പുഴശേരിയെ പ്രധാന പഴവര്‍ഗ ഉത്പാദന കേന്ദ്രമാക്കി മാറ്റി സാമ്പത്തികമായി സ്വയം പര്യാപ്തമാക്കാനാണ് ലക്ഷ്യമിടുന്നതെന്ന് ഗ്രാമപഞ്ചായത്ത് പ്രസിഡന്‍റ് ആര്‍. കൃഷ്ണകുമാര്‍ പറഞ്ഞു.

കാട്ടുപന്നിയെ നശിപ്പിക്കാനുള്ള അധികാരം കർഷകനു നൽകണം: ഡി.കെ. ജോൺ

പത്തനംതിട്ട: കൃഷിയിടങ്ങളിൽ നാശം വരുത്തുന്ന പന്നിയെ കൊല്ലാനുള്ള അധികാരം കർഷകനു തന്നെ ലഭ്യമാക്കണമെന്ന് കേരള കോൺഗ്രസ് വൈസ് ചെയർമാൻ പ്രഫ.ഡി.കെ. ജോൺ. കാടുവിട്ട് നാട്ടിലിറങ്ങി പെറ്റുപെരുകിയ പന്നിക്ക് കാട്ടുപന്നി എന്നതിന്‍റെ സംരക്ഷണം നൽകേണ്ടതില്ല. കാട്ടിൽ ജീവിക്കുന്ന പന്നിയാണ് കാട്ടുപന്നിയുടെ ഗണത്തിൽ പെടുകയെന്നും നാട്ടിലിറങ്ങി മനുഷ്യ ജീവനും സ്വത്തിനും ഭീഷണിയാകുന്നവയെ സംരക്ഷിക്കേണ്ടതില്ലെന്നും ജോൺ പറഞ്ഞു. കാട്ടുപന്നിയെ നശിപ്പിക്കാൻ പഞ്ചായത്തുകൾക്ക് അധികാരവും ഫണ്ടും നൽകിയിട്ടു കാര്യമായ പ്രയോജനമുണ്ടാകുന്നില്ലെന്ന് കഴിഞ്ഞ നാലുവർഷത്തെ അനുഭവം വ്യക്തമാക്കുന്നു. കാട്ടുപന്നി നിർമാർജ്ജനം എന്ന പേരിൽ ഫണ്ട് പാഴാക്കിക്കളയുകയാണ്. പകരം കാട്ടുപന്നിയെ കൃഷിയിടത്തിൽ തന്നെ നശിപ്പിക്കാനുള്ള അവകാശം കർഷകനു നൽകുകയാണ് വേണ്ടതെന്നും ഡി.കെ. ജോൺ അഭിപ്രായപ്പെട്ടു.

ആധുനിക അറവുശാല ഇരവിപേരൂരില്‍ ഉദ്ഘാടനം 14ന്

ഇരവിപേരൂർ: ആധുനികവും ആരോഗ്യകരവും സുരക്ഷിതവുമായ അറവുശാല സജ്ജമാക്കി ഇരവിപേരൂര്‍ ഗ്രാമപഞ്ചായത്ത്. വൃത്തിയുള്ള അന്തരീക്ഷത്തില്‍ ആധുനിക സാങ്കേതികവിദ്യയും ഉപകരണങ്ങളും ഉപയോഗിച്ചു ഉയര്‍ന്ന നിലവാരമുള്ള മാംസം ഉത്പാദിപ്പിച്ച് വിപണിയില്‍ എത്തിക്കുകയാണ് പദ്ധതിയുടെ ലക്ഷ്യം. 1.20 കോടി രൂപ വിനിയോഗിച്ച് പൊതു-സ്വകാര്യപങ്കാളിത്തത്തോടെയാണ് പഞ്ചായത്ത് പദ്ധതി നടപ്പാക്കുന്നത്. അറവുശാലയുടെ ഉദ്ഘാടനം 14നു രാവിലെ 11ന് വള്ളംകുളത്ത് മന്ത്രി എം.ബി. രാജേഷ് നിര്‍വഹിക്കും. മന്ത്രി വീണാ ജോര്‍ജ് അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം മുഖ്യപ്രഭാഷണം നടത്തും. കോയിപ്രം ബ്ലോക്ക് പഞ്ചായത്ത് പ്രസിഡന്‍റ് ജെസി സൂസന്‍ ഫിലിപ്പ്, ഇരവിപേരൂര്‍ ഗ്രാമപഞ്ചായത്ത് പ്രസിഡന്‍റ് കെ.ബി. ശശിധരന്‍പിള്ള തുടങ്ങിയവര്‍ പങ്കെടുക്കും. കശാപ്പ് മുതല്‍ മാലിന്യസംസ്‌കരണം വരെ എല്ലാ പ്രക്രിയകളും സജ്ജമാക്കിയാണ് അറവുശാല നിർമിച്ചിട്ടുള്ളത് പ്രതിദിനം 10 മുതല്‍ 15 കന്നുകാലികളെ കശാപ്പ് ചെയ്യാനുള്ള യന്ത്രങ്ങളാണുള്ളത്. ഇവയുടെ സഹായത്തോടെ മാംസംമുറിക്കൽ, എല്ലുകള്‍ നീക്കം ചെയ്യൽ, അറവുമാലിന്യങ്ങള്‍ വേര്‍തിരിക്കല്‍ എന്നിവയെല്ലാം വേഗത്തില്‍ ചെയ്യാനാകും. കട്ടിംഗ് മെഷീൻ, ഹാംഗര്‍, കണ്‍വെയര്‍, സംഭരണസ്ഥലം, കന്നുകാലികളെ സൂക്ഷിക്കുന്നതിനുള്ള പ്രത്യേക സ്ഥലം എന്നിവ ഒരുക്കിയിട്ടുണ്ട്. ഗുണനിലവാരവും ശുചിത്വവും ഉറപ്പാക്കാന്‍ കന്നുകാലിയുടെ ഭാരം അളന്നു വെറ്ററിനറി ഡോക്ടറുടെ നേതൃത്വത്തില്‍ ആരോഗ്യനില പരിശോധിക്കും. അണുവിമുക്തമാക്കിയ കന്നുകാലികളെയാകും കശാപ്പ് ചെയ്യുക. കശാപ്പ് കഴിഞ്ഞാലുടന്‍ തല, രക്തം, മറ്റ് ഭാഗങ്ങള്‍ എന്നിവ യന്ത്രങ്ങളുപയോഗിച്ച് വേര്‍പെടുത്തി പ്രത്യേക ഇടങ്ങളിലേക്ക് മാറ്റും. അരിഞ്ഞു പായ്ക്ക് ചെയ്ത ഇറച്ചി വിപണിയില്‍ എത്തിക്കുന്നതിനു പുറമേ പ്രദേശവാസികള്‍ക്ക് ഇവിടെനിന്ന് വാങ്ങാനാകും. വിവിധ ഘട്ടങ്ങളിലൂടെ നീക്കംചെയ്യുന്ന അറവ് മാലിന്യം ഡ്രൈനേജ് സംവിധാനത്തിലേക്കും മാലിന്യം വളമാക്കുന്ന പ്ലാന്‍റിലേക്കും മാറ്റും. മാംസാവശിഷ്ടങ്ങള്‍ സംസ്‌കരിച്ച് വളവും നായബിസ്‌കറ്റും കോഴിത്തീറ്റയും ഉത്പാദിപ്പിക്കും. ശാസ്ത്രീയ മാലിന്യസംസ്‌കരണത്തിനായി ബയോഗ്യാസ് പ്ലാന്‍റും സ്ഥാപിച്ചു. പ്രത്യേകമായി സജ്ജീകരിച്ചിരിക്കുന്ന ശീതീകരിച്ച മുറി, ഫ്രീസര്‍ പ്ലോട്ട് എന്നിവ അറവു മാംസത്തിലുണ്ടാകുന്ന ബാക്ടീരിയളെ ചെറുത്തുനിര്‍ത്തും. ഗുണനിലവാരത്തോടെ ശുദ്ധമായ മാംസം ഇരവിപേരൂര്‍ മീറ്റ്സ് എന്ന ലേബലില്‍ വിപണിയില്‍ എത്തിക്കുമെന്ന് പ്രസിഡന്‍റ് കെ. ബി. ശശിധരന്‍ പിള്ള പറഞ്ഞു

പത്തനംതിട്ടയിൽ വീണ്ടും നായ ആക്രമണം; നിരവധി പേർക്കു കടിയേറ്റു

പത്തനംതിട്ട: പത്തനംതിട്ട നഗര പരിധിയിൽ വീണ്ടും തെരുവുനായ ആക്രമണം. പെരിങ്ങമ്മല , തോണിക്കുഴി, കുമ്പാങ്ങൽ ഭാഗത്താണ് ഇന്നലെ രാവിലെ നിരവധിപേർക്ക് തെരുവുനായയുടെ ആക്രമണത്തിൽ പരിക്കേറ്റു. അഞ്ച് പേരെ നായ വിവിധയിടങ്ങളിലായി കടിച്ചതായാണ് വിവരം. കടിയേറ്റവർ പത്തനംതിട്ട ജനറൽ ആശുപത്രിയിൽ ചികിത്സ തേടി. പ്രദേശത്തെ നിരവധി വളർത്തുനായ്ക്കൾക്കും കന്നുകാലികൾക്കും കടിയേറ്റിട്ടുണ്ട്. രാവിലെ ആറോടെ തെരുവുനായ ഓടിനടന്ന് ആക്രമിക്കുകയായിരുന്നു. ആളുകളെയും മൃഗങ്ങളെയും ആക്രമിച്ച നായയെ പിന്നീട് ചത്ത നിലയിൽ കണ്ടെത്തി. ഇതോടെ പ്രദേശവാസികൾ ആശങ്കയിലാണ്. നായയുടെ ജഡം പോസ്റ്റ്മോർട്ടത്തിനായി നീക്കി. ഫലം വന്നശേഷമേ പേവിഷബാധ സ്ഥിരീകരിക്കാനാകൂ. നഗരത്തിന്‍റെ വിവിധ ഭാഗങ്ങളിൽ തെരുവുനായ ശല്യം രൂക്ഷമായി തുടരുകയാണ്. പത്തനംതിട്ട ടൗണിൽ പോലും നായ്ക്കളുടെ ശല്യം രൂക്ഷമാണ്. ബസ് സ്റ്റാൻഡ് പരിസരങ്ങളിലും സെൻട്രൽ ജംഗ്ഷനിലും ഫുട്പാത്തുകളിലുമെല്ലാം നായ്ക്കൾ വിഹരിക്കുകയാണ്. നഗരത്തിൽ ആളുകൾക്ക് കടിയേൽക്കുന്നത് നിത്യസംഭവമായിട്ടും യാതൊരു നടപടിയും അധികൃതരുടെ ഭാഗത്തുനിന്നുണ്ടാകുന്നില്ല. റാന്നിയിൽ നായ്ക്കളുടെ വിളയാട്ടം റാന്നി: റാന്നി ടൗൺ, ഇട്ടിയപ്പാറ ബസ് സ്റ്റാൻഡ്, പെരുന്പുഴ ഭാഗങ്ങളിൽ തെരുവുനായ്ക്കൾ വിളയാടുകയാണ്. കഴിഞ്ഞ പൊതുപണിമുടക്ക് ദിവസം ആളുകളെ നായ്ക്കൾ ആക്രമിച്ചു. പണിമുടക്കിന് ഐക്യദാർഢ്യവുമായെത്തിയ തൊഴിലാളികൾക്കാണ് കടിയേറ്റത്. മഴക്കാലമായതോടെ നായ്ക്കൾ ബസ് സ്റ്റാൻഡിലെ വെയ്റ്റിംഗ് ഏരിയായിലും കടത്തിണ്ണകളിലും അഭയം തേടുകയാണ്. ഇവയെ ഓടിച്ചുവിടാനുള്ള ശ്രമത്തിനിടെയാണ് പലരെയും ആക്രമിക്കുന്നത്. പ്രതിദിനം നായ്ക്കളുടെ എണ്ണം കൂടിവരികയുമാണ്. റാന്നിയിലെ പഴവങ്ങാടി, അങ്ങാടി, റാന്നി ഗ്രാമപഞ്ചായത്തുകളിൽ തെരുവുനായ നിയന്ത്രണത്തിനു യാതൊരു നടപടികളുമുണ്ടാകുന്നില്ല.

പ്രതിരോധ കുത്തിവയ്പിനുശേഷം വീണ്ടും മരണം; ആശങ്ക ഒഴിയുന്നില്ല

തെരുവുനായ നിയന്ത്രണ നടപടികളിൽ മെല്ലപ്പോക്ക് പത്തനംതിട്ട: വളർത്തുനായ, പൂച്ച തുടങ്ങിയവയുടെ കടിയേറ്റ് പ്രതിരോധ വാക്സിൻ നൽകിവരവേ ഒരു മരണംകൂടി ഉണ്ടായതോടെ ജില്ലയിൽ ആശങ്ക വർധിച്ചു. വളർത്തുപൂച്ചയുടെ ആക്രമണത്തിൽ പരിക്കേറ്റ് ചികിത്സയിലായിരുന്ന ആറാംക്ലാസ് വിദ്യാർഥിനി പന്തളം കടയ്ക്കാട് സ്വദേശി ഹന്ന ഫാത്തിമ കഴിഞ്ഞദിവസം മരിച്ചു. കഴിഞ്ഞ ഏപ്രിലിൽ പുല്ലാട് സ്വദേശിയായ മറ്റൊരു പെൺകുട്ടിയും പ്രതിരോധ കുത്തിവയ്പ് സ്വീകരിച്ചശേഷം മരിച്ചിരുന്നു. കഴിഞ്ഞദിവസം മരിച്ച ഹന്ന ഫാത്തിമയ്ക്കാകട്ടെ വളർത്തുപൂച്ചയുടെ നഖംകൊണ്ട് മുറിവേൽക്കുക മാത്രമാണു ചെയ്തത്. ആദ്യ ഡോസ് വാക്സിൻ സ്വീകരിച്ച കുട്ടി രണ്ടാം ഡോക്സ് സ്വീകരിച്ചശേഷമാണ് അസ്വസ്ഥത പ്രകടിപ്പിച്ചത്. പിന്നീട് ചികിത്സയിലിരിക്കേ മരിക്കുകയായിരുന്നു. ഹന്നയുടെ മരണ കാരണം സ്ഥിരീകരിച്ചിട്ടില്ലെന്നാണ് ആരോഗ്യ വകുപ്പ് അധികൃതർ പറയുന്നത്. വിശദ പരിശോധയ്ക്കായി സാന്പിൾ ശേഖരിച്ചിട്ടുണ്ടെന്ന് ഡിഎംഒ ഡോ.എൽ. അനിതാ കുമാരി പറഞ്ഞു. തെരുവുനായ്ക്കളെ പിടികൂടുന്നതിൽ നടപടിയില്ലെന്നിരിക്കേ വളർത്തുമൃഗങ്ങൾക്ക് പ്രതിരോധ കുത്തിവയ്പ് നൽകുന്നതിലും ഇപ്പോൾ മെല്ലപ്പോക്ക് തുടരുകയാണ്. വീടുകളിൽ വളർത്തുന്ന നായ്ക്കൾ, പൂച്ചകൾ എന്നിവയ്ക്ക് കുത്തിവയ്പ് നിർബന്ധമാക്കിയിട്ടുണ്ട്. എന്നാൽ കുത്തിവയ്പ് നൽകി സർട്ടിഫിക്കറ്റ് സൂക്ഷിക്കണമെന്ന നിർദേശം പലരും പാലിക്കുന്നില്ല. ജനിച്ച് മൂന്നു മാസത്തിനുള്ളിൽ തന്നെ വളർത്തുനായ്ക്കൾക്കും പൂച്ചകൾക്കും പ്രതിരോധ കുത്തിവയ്പ് എടുക്കണമെന്നാണ് നിർദേശം. തുടർന്നുള്ള എ ല്ലാ വർഷവും ബൂസ്റ്റർ ഡോസുകൾ എടുക്കുകയും വേണം. സർട്ടിഫിക്കറ്റ് ചാർജ് ഉൾപ്പെടെ 55 രൂപയാണ് ചെലവ്. എല്ലാ പ്രവൃത്തിദിനങ്ങളിലും മൃഗാശുപത്രികളിൽ വളർത്തു മൃഗങ്ങൾക്ക് പേവിഷ പ്രതിരോധ കുത്തിവയ്പിനുള്ള സൗകര്യമുണ്ടെന്ന് അധികൃതർ പറഞ്ഞു. കുട്ടികൾ മരിച്ചത് നാഡികളിലൂടെ വൈറസ് വേഗം ശരീരത്തിൽ കടന്നതിനാലെന്ന് ആരോഗ്യവകുപ്പ് പത്തനംതിട്ട: നായയുടെ കടിയേറ്റ് അടുത്തയിടെ മൂന്ന് കുട്ടികൾ ഒരു മാസത്തിനിടെ മരിച്ചത് നാഡികളിലൂടെ വൈറസ് വേഗം ശരീരത്തിൽ കടന്നതിനാലെന്ന് ആരോഗ്യവകുപ്പ് ഡയറക്ടറേറ്റ് വ്യക്തമാക്കി. പത്തനംതിട്ടയിലെ കോഴഞ്ചേരി, മലപ്പുറത്തെ തേഞ്ഞിപ്പലം, കൊല്ലത്തെ പത്തനാപുരം എന്നിവിടങ്ങളിൽ നടന്ന കുട്ടികളുടെ മരണകാരണങ്ങളെക്കുറിച്ച് സമഗ്ര അന്വേഷണം ആവശ്യപ്പെട്ട് ഹൈക്കോടതി അഭിഭാഷകനും പൊതുപ്രവർത്തകനുമായ കുളത്തൂർ ജയ്‌സിംഗ് നൽകിയ പരാതിയിൽ ബാലാവകാശ കമ്മീഷൻ ആരോഗ്യ വകുപ്പ് ഡയറക്ടറോട് വിശദീകരണം തേടിയിരുന്നു. ഇതു സംബന്ധിച്ച് ആരോഗ്യ വകുപ്പ് ഡയറക്ടറേറ്റ് കമ്മീഷനു നൽകിയ റിപ്പോർട്ടിലാണ് വൈറസ് വേഗം ശരീരത്തിൽ പ്രവേശിച്ചതിനാലാണ് മരണം സംഭവിച്ചതെന്ന വിവരമുള്ളത്. പേവിഷബാധ പ്രതിരോധ വാക്സിനുകൾ കൃത്യമായ ഡോസുകൾ എടുത്തിട്ടും മരണം സംഭവിച്ചു . വൈറസ് വേഗം ശരീരത്തിൽ പ്രവേശിച്ചതിനാൽ നൽകിയ മരുന്നുകൾ ഫലപ്രദമായില്ലെന്ന് ആരോഗ്യ വകുപ്പുതന്നെ വിലയിരുത്തുന്നു. വൈറസിന് വേഗം നാഡിയിലൂടെ ശരീരത്തിൽ പ്രവേശിക്കുന്നതിന് സാധിക്കുന്ന ഭാഗങ്ങളായ കഴുത്ത്, തല, കൈ എന്നീ ഭാഗങ്ങളിലാണ് മൂന്ന് കുട്ടികൾക്കും കടിയേറ്റത്. കുട്ടികളുടെ മരണം ആരോഗ്യ വകുപ്പ് അതീവ ഗൗരവമായി എടുത്ത് പരിശോധന നടത്തിവരികയാണെന്നും റിപ്പോർട്ടിൽ പറയുന്നു. കോഴഞ്ചേരി സ്വദേശിയായ പെൺകുട്ടിക്ക് സ്കൂൾ ബസ് കത്ത് നിൽക്കവേയാണ് അയൽവാസിയുടെ വളർത്തുനായയിൽ നിന്നും കടിയേറ്റത്. ഈ പ്രദേശത്ത് കഴിഞ്ഞ ഡിസംബറിൽ തന്നെ നായ്ക്കൾക്ക് കുത്തിവയ്പ് നൽകിയെങ്കിലും വിദ്യാർഥിനിയെ കടിച്ച വളർത്തുനായയ്ക്ക് കുത്തിവയ്പ് നല്കിയിരുന്നില്ലെന്നും ആരോഗ്യവകുപ്പ് വ്യക്തമാക്കുന്നു. കഴിഞ്ഞ ഡിസംബർ 13നാണ് കുട്ടിയെ നായ കടിച്ചത്. ഏപ്രിൽ ഒന്പതിനായിരുന്നു മരണം. മൂന്ന് ആശുപത്രിയിൽ ചികിത്സ തേടിയ കുട്ടി കൊച്ചി അമൃത ആശുപത്രിയിൽ മരിച്ചു.

സ്കൗട്ട്സ് ആൻഡ് ഗൈഡ്സ് ലഹരിവിരുദ്ധ കാന്പയിൻ ജില്ലാതല ഉദ്ഘാടനം ഇന്ന്

പത്തനംതിട്ട: ഭാരത് സ്കൗട്ട്സ് ആൻഡ് ഗൈഡ്സ് ലഹരി വിരുദ്ധ കാന്പയിന്‍റെ ജില്ലാതല ഉദ് ഘാടനം ഇന്ന് പത്തനംതിട്ടയിൽനടക്കും. രാവിലെ ഒന്പതിന് പത്തനംതിട്ട ടൗൺ സ്ക്വയറിൽനിന്നും ലഹരി വിരുദ്ധറാലി ആരംഭിക്കും. റാലി പത്തനംതിട്ട എക്സൈസ് സിഐ അരുൺ അശോക് ഫ് ളാഗ്ഓഫ് ചെയ്യും. പത്തിന് ടൗൺഹാളിൽ നടക്കുന്ന യോഗം നഗരസഭ ചെയർമാൻ ടി. സക്കീർ ഹുസൈൻ ഉദ്ഘാടനം ചെയ്യും. സ്കൗട്ട് ആൻഡ് ഗൈഡ്സ്, റോവർ, റേഞ്ചർ യൂണിറ്റുകളിൽ നിന്നായി 500 ഓളം കുട്ടികൾ ലഹരി വിരുദ്ധ റാലിയിൽ പങ്കെടുക്കും . 2026 മാർച്ച് വരെ എല്ലാ യൂണിറ്റുകളിലും പഠനമാകട്ടെ ലഹരി എന്ന പേരിൽ ലഹരി വിരുദ്ധ കാമ്പെയിൻ നടത്തും. ഇതിന്‍റെ ഭാഗമായി സൈക്കിൾ റാലികൾ, കൗൺസിലിംഗ്, ഫ്ളാഷ്മോബുകൾ, കൂട്ടയോട്ടം, അയൽക്കൂട്ട യോഗങ്ങൾ, ചിത്ര പ്രദർശനങ്ങൾ തുടങ്ങിയ പരിപാടികൾ സംഘടിപ്പിക്കും. ലഹരി വ്യാപനം തടയുന്നതിൽ കഴിഞ്ഞവർഷവും സ്കൗട്ട് ആൻഡ് ഗൈഡ്സ് നടത്തിയ പ്രവർത്തനങ്ങൾ വിജയകരമായിരുന്നു. ലഹരിക്ക് അടിമകളായ കുട്ടികളെ കണ്ടെത്തി അവർക്കു ചികിത്സയും കൗൺസലിംഗും നൽകുന്നതടക്കമുള്ള പ്രവർത്തങ്ങളിലും സ്കൗട്ട്, ഗൈഡ്സ് പ്രവർത്തകർ വ്യാപൃതരാണെന്ന് ജില്ലാ ഭാരവാഹികൾ പറഞ്ഞു. ജില്ലാ കൺവീനർ മാത്യൂസൺ പി. തോമസ്, സെക്രട്ടറി എം. ആർ. ലീല, ട്രെയ്നിംഗ് കമ്മീഷണർ കെ. ബി .ലാൽ , ജോയിന്‍റ്സെക്രട്ടറി ജിതിൻ സണ്ണി എന്നിവർ പത്രസമ്മേളനത്തിൽ പങ്കെടുത്തു.

വന്യമൃഗങ്ങൾക്കു നൽകിയ മയക്കുവെടി ഏറ്റത് വനംമന്ത്രിക്കെന്ന് ജനങ്ങൾക്ക് സംശയം: സണ്ണി ജോസഫ്

പത്തനംതിട്ട: കാട്ടാനയെയും കടുവയെയും തുരത്താൻ നൽകിയ മയക്കുവെടി വനംമന്ത്രിക്കാണോ ഏറ്റതെന്ന കേരളത്തിലെ ജനങ്ങളുടെ സംശയം ശരിയാണെന്നു തെളിയിക്കുന്ന സമീപനമാണ് വനംവകുപ്പിൽ നിന്നുണ്ടായിക്കൊണ്ടിരിക്കുന്നതെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. പത്തനംതിട്ട ഡിസിസി സംഘടിപ്പിച്ച സമരസംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വന്യമൃഗ സംഘർഷം കാരണം പത്തനംതിട്ടയിലടക്കം മലയോര മേഖലയിൽ സാധാരണ ജനജീവിതം തടസപ്പെട്ടിരിക്കുകയാണ്. ഇതുമായി ബന്ധപ്പെട്ട് ക്രിയാത്മകമായ ഒരു ഇടപെടലും വനംമന്ത്രി നടത്തിയിട്ടില്ല. കേരളത്തിലെ ആരോഗ്യമന്ത്രി വീണ പോലെയായി. കഴിഞ്ഞ നിയമസഭ സമ്മേളന കാല‍യളവിൽ തന്നെ ആരോഗ്യമേഖലയിലെ പ്രശ്നങ്ങൾ സംബന്ധിച്ച പ്രതിപക്ഷം അടിയന്തര പ്രമേയം കൊണ്ടുവന്നിരുന്നു. എന്നാൽ അന്ന് അതിന് അനുമതി നൽകിയില്ല. വിദ്യാഭ്യാസ മേഖലയാണ് മറ്റൊരു വിഷയം. സാധാരണക്കാരായ കുട്ടികളുടെ ഭാവിയെ പന്താടുന്ന സമീപനങ്ങളാണ് ഉണ്ടായിക്കൊണ്ടിരിക്കുന്നത്. അക്രമ സമരങ്ങളിലൂടെ വിദ്യാഭ്യാസ മേഖലയിൽ അരക്ഷിതാവസ്ഥ സൃഷ്ടിക്കുകയാണ് ഭരണകക്ഷി സംഘടനകളെന്നും സണ്ണി ജോസഫ് കുറ്റപ്പെടുത്തി. ജനദ്രോഹ സർക്കാർ നയങ്ങൾക്കെതിരേ യുഡിഎഫ് സമരം ശക്തമാക്കും. തുടങ്ങിവച്ച സമരപോരാട്ടങ്ങൾക്ക് കേരളത്തിലെ ജനങ്ങൾ നൽകിയ പിൻതുണയാണ് നിലമ്പൂർ ഉപതെരഞ്ഞെടുപ്പിലെ വിജയമെന്നും കെപിസിസി പ്രസിഡന്‍റ് അഭിപ്രായപ്പെട്ടു. ഡിസിസി പ്രസിഡന്‍റ് പ്രഫ. സതീഷ് കൊച്ചുപറന്പിൽ അധ്യക്ഷത വഹിച്ചു. എഐസിസി സെക്രട്ടറി ഡോ. അറിവഴകൻ, യുഡിഎഫ് കൺവീനർ അടൂർ പ്രകാശ് എംപി, കെപി സി് വർക്കിങ് പ്രസിഡന്‍റുമാരായ എ. പി. അനിൽകുമാർ എംഎൽഎ, പി. സി. വിഷ്ണുനാഥ് എംഎൽഎ, യൂത്ത് കോൺഗ്രസ് സംസ്ഥാന പ്രസിഡന്‍റ് രാഹുൽ മാങ്കൂട്ടത്തിൽ എംഎൽഎ, രാഷ്ട്രീയകാര്യസമിതിയംഗങ്ങളായ പ്രഫ.പി.ജെ. കുര്യൻ, ഷാനിമോൾ ഉസ്മാൻ, ജനറൽ സെക്രട്ടറിമാരായ എം.എം. നസീർ, പഴകുളം മധു‌, ഡിസിസി മുൻ പ്രസിഡന്‍റുമാരായ കെ. ശിവദാസൻ നായർ, പി. മോഹൻരാജ്, വൈസ് പ്രസിഡന്‍റ് എ. സുരേഷ് കുമാർ, ജനറൽ സെക്രട്ടറി സാമുവേൽ കിഴക്കുപുറം തുടങ്ങിയവർ പ്രസംഗിച്ചു. കെഎസ്‌യു മാർച്ച് നടത്തും പത്തനംതിട്ട: കീം പ്രവേശനത്തിൽ നിരുത്തരവാദ നിലപാട് സ്വീകരിച്ച് വിദ്യാർഥികളുടെ ഭാവി സർക്കാർ അപകടത്തിലാക്കിയതിൽ പ്രതിഷേധിച്ച് ഉന്നത വിദ്യാഭ്യാസ മന്ത്രിയുടെ ഓഫീസിലേക്ക് തിങ്കളാഴ്ച കെഎസ്‌യു മാർച്ച് നടത്തുമെന്ന് സംസ്ഥാന പ്രസിഡന്‍റ് അലോഷ്യസ് സേവ്യർ അറിയിച്ചു. വിഷയത്തിൽ എസ്എഫ്ഐ നിലപാട് വ്യക്തമാക്കണം. വിദ്യാർഥികളെ ബാധിക്കുന്ന ഒരു വിഷയത്തിലും എസ്എഫ് ഐ നിലപാട് അറിയിക്കുന്നില്ല. കെടുകാര്യസ്ഥതയുടെ കൂത്തരങ്ങാണ് വിദ്യാഭ്യാസവകുപ്പെന്നും അലോഷ്യസ് കുറ്റപ്പെടുത്തി.

ആശിച്ച ഭൂമി ആദിവാസിക്ക് ഉറപ്പാക്കി; പട്ടയവിതരണം 15ന്

റാന്നി: ളാഹ മഞ്ഞ തോട്ടിലെ വനമേഖലയിൽ താമസിക്കുന്ന 17 മലമ്പണ്ടാരം വിഭാഗത്തിൽപ്പെട്ട ആദിവാസികൾക്കും ഭൂമി ലഭ്യമാക്കിയതായി പ്രമോദ് നാരായൺ എംഎൽഎ അറിയിച്ചു. 37 പേരിൽ 20 പേർക്ക് നേരത്തെ ഭൂമി അനുവദിച്ചു ലഭിച്ചിരുന്നു. പമ്പ ത്രിവേണി ചാലക്കയം എന്നിവിടങ്ങളിലെ ഉന്നതികളിൽ വനത്തിനുള്ളിൽ താമസിച്ചു വന്നവർക്കാണ് ഇപ്പോൾ ഭൂമി അനുവദിച്ചിരിക്കുന്നത്. ഇനി ഇവർക്ക് സ്വന്തമായി വീട് നിർമിക്കുന്നതിനു വേണ്ട നടപടികൾ സ്വീകരിക്കുമെന്നും എംഎൽഎ കൂട്ടിച്ചേർത്തു. ചാലക്കയം ഉന്നതിയിലെ ഭാസ്കരൻ, അന്നമ്മ, പാർവതി, ഓമന കുഞ്ഞുപിള്ള , കല്യാണി , പൊന്നൻ, തനു, കുഞ്ഞുമോൾ, രാജമ്മ, കുഞ്ഞുപിള്ള , ശകുന്തള , ഭവാനി, കൊച്ചുപെണ്ണ്, വിജില, റെജി, തങ്കമ്മ രാജൻ, മിനി രാജൻ എന്നിവരാണ് ഒരേക്കർ വീതം ഭൂമിയുടെ അവകാശികളായി മാറിയത്. 15ന് പത്തനംതിട്ടയിൽ നടക്കുന്ന ജില്ലാതല പട്ടയമേളയിൽ മന്ത്രി കെ. രാജൻ ഇവരുടെ പട്ടയങ്ങൾ കൈമാറും. ഇതോടെ വനത്തിനുള്ളിൽ ടാർപോളിന്‍റെ കീഴിൽ യാതൊരു സുരക്ഷയും ഇല്ലാതെ കഴിഞ്ഞ 37 പേർക്കാണ് സ്വന്തമായി വസ്തു ഉറപ്പാക്കാൻ ആയത്. അടച്ചുറപ്പുള്ള വീടാണ് അടുത്ത ലക്ഷ്യം. നേരത്തെ ഭൂമി ലഭിച്ച 20 പേരുടെ താത്കാലിക വീടുകളിലേക്ക് വൈദ്യുതി എത്തിച്ചു നൽകാൻ കഴിഞ്ഞതും മറ്റൊരു വലിയ നേട്ടമാണ്. പട്ടിക വർഗം, വനം വകുപ്പ്, റവന്യൂ വകുപ്പ്, വൈദ്യുതി വകുപ്പ് എന്നിവരുടെ സഹകരണത്തോടെയാണ് ഇവർക്ക് വൈദ്യുതി എത്തിച്ചത്. ഇവിടെ താമസം ഉറപ്പിച്ച ആദിവാസി കുട്ടികളെ വിദ്യാസമ്പന്നരാക്കുകയാണ് മറ്റൊരു ലക്ഷ്യമെന്ന് എംഎൽഎ പറഞ്ഞു. ഇതിന്‍റെ ഭാഗമായി ഇവിടെ നിന്ന് പത്താം ക്ലാസ് വിജയിച്ച മൂന്നു കുട്ടികൾക്ക് തുടർപഠനത്തിനും താമസത്തിനുമുള്ള സൗകര്യം വടശേരിക്കര മോഡൽ റെസിഡൻഷൽ സ്കൂളിൽ ഒരുക്കി നൽകിയിട്ടുണ്ട്. മറ്റു കുട്ടികൾക്കും രക്ഷിതാക്കൾക്കും ഉള്ള ബോധവത്കരണ ക്ലാസുകൾ ഉടൻ ഏർപ്പെടുത്തും.

ധന്യൻ മാർ ഈവാനിയോസ് അനുസ്മരണ പദയാത്രയ്ക്കു വരവേല്പ്

അടൂർ: പുനരൈക്യ ശില്പി ധന്യൻ മാർ ഈവാനിയോസ് മെത്രാപ്പോലീത്തയുടെ 72 -ാമത് ഓർമപ്പെരുന്നാളിനോടനുബന്ധിച്ച് തിരുവനന്തപുരത്തേക്കുള്ള അനുസ്മരണ തീർഥാടന പദയാത്രയ്ക്ക് അടൂരിൽ വരവേല്പ്. റാന്നി പെരുനാട് കുരിശുമല തീർഥാടന ദേവാലയത്തിൽ വ്യാഴാഴ്ച രാവിലെ കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ ആശിർവദിച്ച പ്രധാന പദയാത്ര സംഘം ഇന്നലെ രാവിലെ പുത്തൻപീടിക ദേവാലയത്തിലെ വിശുദ്ധ കുർബാനയ്ക്കുശേഷം യാത്ര പുനരാരംഭിച്ചു. ഓമല്ലൂരിൽ തിരുവല്ല അതിരൂപതയിൽ നിന്നെത്തിയ തീർഥാടക സംഘവും ഒപ്പം ചേർന്നു. തുടർന്ന് കൈപ്പട്ടൂർ വഴി ചന്ദനപ്പള്ളി ദേവാലയത്തിലെത്തി. പ്രാർഥനയ്ക്കുശേഷം കൊടുമൺ, ആനന്ദപ്പള്ളി ദേവാലയങ്ങളിലെ സ്വീകരണം ഏറ്റുവാങ്ങി വൈകുന്നേരത്തോടെ അടൂർ തിരുഹൃദയ ദേവാലയത്തിലെത്തി. അടൂർ വൈദിക ജില്ലയുടെ നേതൃത്വത്തിൽ പറക്കോട് സെന്റ് മേരീസ് മലങ്കര കത്തോലിക്കാ ദേവാലയത്തിൽ നിന്ന് ആരംഭിച്ച തീർ‌ഥാടക സംഘവും അടൂരിൽ പ്രധാന പദയാത്രാ സംഘത്തോടൊപ്പം ചേർന്നു. അടൂർ തിരുഹൃദയ മലങ്കര കത്തോലിക്കാ ദേവാലയത്തിൽ തീർഥാടക സംഘത്തെ ഡൽഹി ഗുഡ്ഗാവ് ഭദ്രാസന അധ്യക്ഷൻ ഡോ. തോമസ് മാർ അന്തോണിയോസ് മെത്രാപ്പോലീത്ത, ജില്ലാ വികാരി ഫാ.ശാന്തൻ ചരുവിൽ, എംസിവൈഎം ഡയറക്ടർ ഫാ.അജോ കളപ്പുരക്കൽ, ഫാ.തോമസ് കിഴക്കുംകര, ഫാ.തോമസ് കുറ്റിയിൽ, ഫാക്ലിം പരിക്കൂർ, ഫാ.ഡൊമിനിക് സാവിയോ, ഫാ. ജേക്കബ് ചാലിൽ , എംസിവൈഎം വൈദിക ജില്ലാ പ്രസിഡന്‍റ് ക്രിസ്, സെക്രട്ടറി ഡൈന, ട്രഷറർ മാത്യു ജയ്സൺ തുടങ്ങിയവരുടെ നേതൃത്വത്തിൽ സ്വീകരിച്ചു. ആർ‌ച്ച് ബിഷപ് ഡോ.തോമസ് മാർ കൂറിലോസ്, ബിഷപ്പുമാരായ സാമുവേൽ മാർ ഐറേനിയോസ്, തോമസ് മാർ അന്തോണിയോസ്, ആന്‍റണി മാർ സിൽവാനോസ്, മാത്യൂസ് മാർ പക്കോമിയോസ് എന്നിവർ പദയാത്രാ സംഘത്തെ അനുഗമിക്കുന്നുണ്ട്. തീർഥാടക സംഘം പുതുശേരി ഭാഗം ദേവാലയത്തിലെത്തി വിശ്രമിച്ചു. ഇന്നു രാവിലെ യാത്ര തുടർന്ന് കലയപുരം, കൊട്ടാരക്കര വഴി ആയൂർ ദേവാലയത്തിൽ വിശ്രമിക്കും. പിരപ്പൻകോട് വഴി 14നു വൈകുന്നേരം പട്ടം സെന്‍റ് മേരീസ് കത്തീഡ്രലിലെ കബറിങ്കലെത്തും. അടൂർ വൈദികജില്ലാ പദയാത്ര അടൂർ: ധന്യൻ മാർ ഈവാനിയോസ് മെത്രാപ്പോലീത്തയുടെ 72-ാം ഓർമപ്പെരുന്നാളിനോടനുബന്ധിച്ച് എംസിവൈഎം അടൂർ വൈദികജില്ലയുടെ നേതൃത്വത്തിലുള്ള തീർഥാടന പദയാത്ര പറക്കോട് സെന്‍റ് മേരീസ് മലങ്കര കത്തോലിക്കാ ദേവാലയത്തിൽ നിന്ന് ഇന്നലെ ആരംഭിച്ചു. അടൂരിൽ റാന്നി പെരുനാട്ടിൽ നിന്നും ആരംഭിച്ച പ്രധാന തീർഥാടക സംഘത്തോടൊപ്പം ചേർന്നു.

അടുപ്പിൽ അഗ്നി പകർന്നു; ആറന്മുള വള്ളസദ്യ നാളെമുതൽ

കോഴഞ്ചേരി: പ്രശസ്തമായ ആറന്മുള വള്ളസദ്യകള്‍ക്കു നാളെ തുടക്കം. വള്ളസദ്യയുടെ ഒരുക്കത്തിന്‍റെ ഭാഗമായി ഇന്നലെ അടുപ്പിൽ അഗ്നി പകർന്നു. ഒക്ടോബർ രണ്ടുവരെയാണ് വള്ളസദ്യകാലം. ഇതിനിടയിൽ അഷ്ടമിരോഹണി വള്ളസദ്യയും ഉത്രട്ടാതി ജലോത്സവവും കടന്നുവരും. ഇന്നലെ രാവിലെ 9 30ന് ക്ഷേത്രമേല്‍ശാന്തി ശ്രീകോവിലില്‍ നിന്നുള്ള ദീപം പള്ളിയോടം പ്രസിഡന്‍റ് കെ.വി. സാംബദേവൻ പകര്‍ന്നു നല്‍കി. അദ്ദേഹം പാചകപ്പുരയിലെ നിലവിളക്കില്‍ ഭദ്രദീപം തെളിയിച്ചു. തുടര്‍ന്ന് മുതിര്‍ന്ന പാചക കരാറുകാരന്‍ ഗോപാലകൃഷ്ണന്‍ നായര്‍ കൃഷ്ണവേണി പാചകപ്പുരയിലെ അടുപ്പിലേക്ക് തീ പകര്‍ന്നു. പാലും അരിയു പഞ്ചസാരയും ഉരുളിയിലേക്ക് പള്ളിയോട സേവാസംഘം ഭാരവാഹികള്‍ ഭക്തിപൂര്‍വം സമര്‍പ്പിച്ചു. പാല്‍പ്പായസം തയ്യാറാക്കി ഭക്തര്‍ക്ക് വിളമ്പി. വഞ്ചിപ്പാട്ടിന്റെയും വാദ്യമേളങ്ങളുടെയും അകമ്പടിയോടെ പള്ളിയോട പ്രതിനിധികള്‍, പാചക കരാറുകാര്‍, ദേവസ്വം ജീവനക്കാര്‍, ഭക്തജനങ്ങള്‍ എന്നിവരുടെ സാന്നിധ്യത്തിലാണ് ചടങ്ങ് നടന്നത്. റാന്നി - ഇടക്കുളം മുതല്‍ ചെന്നിത്തലവരെ പത്തനംതിട്ട, ആലപ്പുഴ ജില്ലകളിലായി വ്യാപിച്ചുകിടക്കുന്ന 52 പള്ളിയോട കരകളും തങ്ങളുടെ പള്ളിയോടങ്ങളുമായി ആറന്മുളയിലേക്കു പുറപ്പെടാനുള്ള തയാറെടുപ്പിലാണ്. നാളെ ആരംഭിക്കുന്ന വള്ളസദ്യയില്‍ആദ്യദിവസം ഏഴ് പള്ളിയോടങ്ങള്‍ പങ്കെടുക്കും. ഓതറ, വെണ്‍പാല, കോഴഞ്ചേരി, തെക്കേമുറി, പൂവത്തൂര്‍പടിഞ്ഞാറ്, ളാക - ഇടയാറന്മുള, കോടിയാറ്റുകര എന്നീ കരകളില്‍ നിന്നുള്ള പള്ളിയോടങ്ങളാണ് ആദ്യദിനത്തില്‍ പങ്കെടുക്കുന്നത്. രാവിലെ 11ന് മന്ത്രി കെ.ബി. ഗണേഷ് കുമാർ വള്ളസദ്യയുടെ ഉദ്ഘാടനം നിർവഹിക്കും. 15 സദ്യ കരാറുകാരാണ് വള്ളസദ്യ ഒരുക്കുന്നത്. ക്ഷേത്ര മതിലകത്തും പുറത്തുമായി 15 സദ്യാലയങ്ങളാണ് ഇതിനുവേണ്ടി ക്രമീകരിച്ചിരിക്കുന്നത്. വള്ളസദ്യകളില്‍ പങ്കെടുക്കുന്നവര്‍ക്ക് നിര്‍ബന്ധമായി പാസുകള്‍ ഏര്‍പ്പെടുത്തിയിട്ടുണ്ട്. 400 സദ്യകള്‍ ഇതേവരെ ബുക്ക് ചെയ്തിട്ടുണ്ട്. ജൂലൈയിൽ സദ്യകളുടെ എണ്ണം കുറവാണെങ്കിലും ഓഗസ്റ്റ്, സെപ്റ്റംബര്‍ മാസങ്ങളിലാണ സദ്യകള്‍ ഏറെയുള്ളത്. വള്ളസദ്യയിലും തുടര്‍ന്നുള്ള ഉത്രട്ടാതി ജലമേളയിലും പങ്കെടുക്കുന്നതിനുവേണ്ടി പള്ളിയോടങ്ങളുടെ നവീകരണവും കരകളില്‍ പുരോഗമിക്കുകയാണ്. ഉമയാറ്റുകര, മാലക്കര, ളാക-ഇടയാറന്മുള എന്നീ പള്ളിയോടങ്ങളുടെ നവീകരണം പൂര്‍ത്തീകരിച്ച് അടുത്ത ദിവസങ്ങളില്‍ തന്നെ നീരണിയും. മേലുകര, ആറാട്ടുപുഴ, ഓതറ - കുന്നേകാട് എന്നീ പള്ളിയോടങ്ങളുടെ നവീകരണ ജോലികള്‍ നടക്കുകയാണ്. ഓഗസ്റ്റ് ആദ്യവാരത്തില്‍ ഈ പള്ളിയോടങ്ങള്‍ നീരണിയും. അറിയിപ്പു തോണിയും നവീകരിക്കും കുമാരനെല്ലൂര്‍ മങ്ങാട്ട് ഭട്ടതിരി ആറന്മുളയിലെത്തുന്ന തോണിയുടെ നവീകരണവും പുരോഗമിക്കുകയാണ്. മങ്ങാട്ട് ഇല്ലക്കാരുടെ ആവശ്യപ്രകാരം ഇപ്പോള്‍ ഉപയോഗിച്ചുവരുന്ന തോണി ഫൈബര്‍ ഗ്ലാസ് പൊതിഞ്ഞാണ് നവീകരണം നടത്തുന്നത്. ഇതനാവശ്യമായ മുഴുവന്‍ തുകയും പള്ളിയോട സേവാസംഘം വഹിക്കുമെന്ന് പ്രസിഡന്‍റ് കെ. വി. സാംബദേവനും, സെക്രട്ടറി പ്രസാദ് ആനന്ദഭവനും അറിയിച്ചു. യുഎസില്‍ താമസിക്കുന്ന അനൂപ് നാരായണ ഭട്ടതിരിയാണ് തോണിയില്‍ കുമാരനെല്ലൂരില്‍ നിന്ന് ആറന്മുളയിലെത്തുന്നത്. പരിചയ സമ്പന്നരായ തുഴച്ചില്‍കാരാണ് തോണി നിയന്ത്രിക്കുന്നതെന്നും പള്ളിയോട സേവാസംഘം ഭാരവാഹികള്‍ പറഞ്ഞു. കെഎസ്ആർടിസി ബജറ്റ് ടൂറിസം സർവീസുകളും നാളെ മുതൽ ആറന്മുള വള്ളസദ്യയില്‍ പങ്കെടുക്കുന്നതിനും പഞ്ച പാണ്ഡവ ക്ഷേത്രങ്ങള്‍ ദര്‍ശിക്കുന്നതിനുവേണ്ടി കെഎസ്ആര്‍ടിസി ആരംഭിച്ചിട്ടുള്ള ബജറ്റ് ടൂറിസം പദ്ധതിയും നാളെ ആരംഭിക്കും. ബജറ്റ് ടൂറിസം സെല്ലിന്റെ പഞ്ചപാണ്ഡവ ക്ഷേത്ര ദര്‍ശന യാത്ര പാഞ്ചജന്യം ഓഫീസിന് മുമ്പില്‍ നാളെ മന്ത്രി കെ.ബി. ഗണേഷ്കുമാർ ഉദ്ഘാടനം ചെയ്യും. പാറശാല മുതല്‍ കാസര്‍ഗോഡ് വരെയുള്ള കെഎസ്ആര്‍ടിസി ഡിപ്പോകളില്‍ ഇതുമായി ബന്ധപ്പെട്ട ബുക്കിംഗുകള്‍ ആരംഭിച്ചു കഴിഞ്ഞു. വള്ളസദ്യ കാലയകളവില്‍ 400 ട്രിപ്പുകളാണ് ബഡ്ജറ്റ് ടൂറിസം പദ്ധതിയില്‍ ഉള്‍പ്പെടുത്തി നടപ്പിലാക്കാന്‍ കെഎസ്ആര്‍ടിസി ലക്ഷ്യമിടുന്നതെന്ന് അധികൃതര്‍ പറഞ്ഞു.

ഉദ്യോഗസ്ഥ പിൻബലമില്ല; ക്വാറികളിലെ പരിശോധനകൾ ദുർബലം

പത്തനംതിട്ട: ക്വാറികളിലെ നിയമലംഘനങ്ങൾ കണ്ടെത്തുന്നതിൽ ഉദ്യോഗസ്ഥ സംവിധാനങ്ങൾ ദുർബലം. 1400ൽ പരം പരം ക്വാറികൾ പ്രവർത്തിക്കുന്ന കേരളത്തിൽ മൈൻ സേഫ്റ്റിഓഫീസ് ഇതേവരെ അനുവദിച്ചിട്ടില്ല. പാറ ഖനനം അടക്കമുള്ളവയുടെ സുരക്ഷാ ചുമതല ഡയറക്ടർ ജനറൽ മൈൻ സേഫ്റ്റിക്കാണ്. നിലവിൽ ബംഗുളൂരുവിലുള്ള ഓഫീസിന്‍റെ കീഴിലാണ് കേരളത്തിലെ ഖനന മേഖല പ്രവർത്തിക്കുന്നത്. ഉരുൾ പൊട്ടൽ, ഖനന ദുരന്തം അടക്കമുള്ള നിരവധി ദാരുണ സംഭവങ്ങൾ കേരളത്തിൽ നടന്നിട്ടും മൈൽ സെഫ്റ്റി ഓഫീസ് സംസ്ഥാനത്ത് ആരംഭിക്കണമെന്ന ആവശ്യം മുന്നോട്ടു വയ്ക്കാൻ സംസ്ഥാന സർക്കാരുകൾ തയാറായിട്ടുമില്ല. സുരക്ഷ മുൻ കരുതൽ ഉൾപ്പെടെയുള്ള വിഷയങ്ങളിൽ സംസ്ഥാനത്തെ വിവിധ വകുപ്പുകൾ വിട്ടുവീഴ്ച ചെയ്യുന്നതാണ് ഇപ്പോഴത്തെ നടപടികൾ ദുർബലപ്പെടാനുള്ള കാരണം. റവന്യൂ, ജിയോളജി, മലിനീകരണ നിയന്ത്രണം, തദ്ദേശ സ്ഥാപനം, പോലീസ്, വനം വകുപ്പുകൾ ക്വാറി പ്രവർത്തനങ്ങളിൽ ഇടപെടാറുണ്ട്. ഓരോ വകുപ്പുകളും അവരവരുടേതായ പരിധികളിൽ നിന്നുള്ള അനുമതിയാണ് നൽകുന്നത്. പ്രാദേശിക തദ്ദേശസ്ഥാപനങ്ങൾക്കും അവരുടേതായ ഉത്തരവാദിത്വം നിർവഹിക്കാനുണ്ട്. എന്നാൽ‌ രാഷ്‌ട്രീയ സമ്മർദം കാരണം എല്ലാ അനുമതികളും വേഗത്തിൽ തരപ്പെടുത്താൻ ക്വാറി ഉടമകൾക്ക് കഴിയും. മൈൻ സേഫ്റ്റി ഓഫീസ് ഇല്ലാത്തതിനാൽ നിബന്ധനകളിൽ കർശന സ്വഭാവം ഒരു വകുപ്പും കാട്ടാറില്ല. കോന്നി, പയ്യനാമൺ ചെങ്കുളത്ത് പാറമടയിൽ രണ്ട് ജോലിക്കിടെ രണ്ട് ഇതര സംസ്ഥാന തൊഴിലാളികൾ മരിക്കാൻ ഇടയായ സംഭവമാണ് സർക്കാരിന്‍റെ അലംഭാവത്തിലേക്ക് വിരൽ ചൂണ്ടുന്നത്. സംസ്ഥാനത്ത് ആകെ 1446 പാറമടകൻ ഉണ്ടെന്നാണ് സർക്കാർ കണക്ക്. എന്നാൽ ഖനന വകുപ്പിന്‍റെ കണക്കു പ്രകാരം ആകെയുള്ളത് 561 പാറമടകൾ മാത്രം. 1678 പാറമടകളുടെ അപേക്ഷ ഖനന വകുപ്പിന് ലഭിച്ചിട്ടുണ്ട്. ഇതിൽ 522 എണ്ണം ലാറ്ററൈറ്റ് ക്വാറികളും 1156 എണ്ണം ഗ്രാനൈറ്റ് മടകളുമാണ്. ഇത്രയും ഖനന കേന്ദ്രങ്ങളുള്ള കേരളത്തിലാണ് ഇത്തരത്തിലുള്ള അനാസ്ഥ തുടരുന്നത്. ബംഗുളൂവിലുള്ള ഡയറക്ടർ ജനറൽ മൈൻ സെഫ്റ്റി ഓഫീസിൽ നിന്നും ഉദ്യോഗസ്ഥരാരും കേരളത്തിലേക്ക് വരാറില്ല.ഏതെങ്കിലും തരത്തിലുള്ള പരാതിയെ തുടർന്നാണ് വരുന്നതെങ്കിൽ കൃത്യമായി വിവരം ക്വാറി ഉടമയ്ക്ക് ലഭിച്ചിരിക്കും. പുതിയ പാറമട തുടങ്ങുകയാണെങ്കിൽ അധികൃതർ സ്ഥലത്തെത്തി മൈൻ സെഫ്റ്റി നിയമം അനുസരിച്ചാണ് പ്രവർത്തന അനുമതി നൽകേണ്ടത്. കൂടാതെ നിയമം പാലിക്കുന്നുണ്ടൊ എന്ന് ഇടയ്ക്കിടെ പരിശോധിക്കുകയും വേണം. ദുരന്തം നടന്നാൽ, കാരണം കണ്ടെത്താനും ഇവർ വരണം. പക്ഷേ കേരളത്തിൽ ഇതൊന്നും നടക്കുന്നില്ലെന്നാണ് ആരോപണം. പദ്ധതിക്ക് അനുമതി നൽകുക എന്നതു മാത്രമാണ് ജിയോളജി വകുപ്പിന്‍റെ കടമ. ഏതെങ്കിലും വിധത്തിലുള്ള മലിനീകരണം പദ്ധതി മൂലം ഉണ്ടാകാൻ സാധ്യതയുണ്ടൊ എന്ന് കണ്ടെത്തുക മാത്രമാണ് മലിനീകരണ നിയന്ത്രണ ബോർഡ് ചെയ്യേണ്ടത്. പരാതികളുണ്ടായാൽ അന്വേഷണം പ്രഹസനമാകുകയും ചെയ്യും. നടപടികൾ ദുർബലപ്പെടുത്തി ദുരന്ത നിവാരണം ശക്തമായ മഴ പെയ്യുന്ന സാഹചര്യത്തിൽ കോന്നി അടക്കമുള്ള അതീവ ദുർബല മേഖലയിൽ ഖനനം തടയാൻ നിർദ്ദേശം നൽകേണ്ടത് റവന്യൂ വകുപ്പിന്‍റെ നിയന്ത്രണത്തിലുള്ള ദുരന്തനിവാരണ വകുപ്പാണ്. ദുരന്തസാധ്യത മുൻകൂട്ടി കണ്ടാണ് നടപടി എടുക്കേണ്ടത്. ഇവരുടെ നിർദേശത്തെ തുടർന്നാണ് ജില്ലാ കളക്ടർ നടപടി സ്വീകരിക്കേണ്ടത്. പത്തനംതിട്ട ജില്ലയിൽ സമീപകാലത്ത് റെഡ് അലർട്ട് പ്രഖ്യാപിച്ച ദിവസങ്ങളിൽ രണ്ടോ മൂന്നോ ദിവസമാണ് ഖനന നിയന്ത്രണമുണ്ടായിരുന്നത്. സർക്കാർ നിയന്ത്രണത്തിൽ ഇതര ജില്ലകളിൽ നടക്കുന്ന ജോലികൾക്ക് പാറയും ക്രഷർ ഉത്പന്നങ്ങളും വേണമെന്ന പേരിൽ നിരോധന ഉത്തരവുകൾ പെട്ടെന്നു തന്നെ പിൻവലിക്കപ്പെടും. ആവശ്യത്തിൽ അധികം സ്ഫോടക ശേഖരം ക്വാറികളുടെ ശേഷി അനുസരിച്ചാണ് ആവശ്യത്തിന് സ്ഫോടക ശേഖരം കരുതാൻ അനുമതി നൽകുന്നത്. പെട്രോളിയം ആൻഡ് എക്സ്പ്ലോസീവ് സെഫ്റ്റി നിയന്ത്രണത്തിലാണിത്. എന്നാൽ നിയമങ്ങൾ ആരും പാലിക്കാറില്ല. ആവശ്യത്തിനു വേണ്ടതിനേക്കാൾ ഇരട്ടിയിലധികം സ്ഫോടക വസ്തുക്കൾ അനധികൃതമായി കരുതുന്നവർ ഉണ്ടെന്നാണ് അറിവ്. ഇത്തരത്തിലുള്ള അധിക ശേഖരം സംബന്ധിച്ച് നിരവധി കേസുകൾ സംസ്ഥാനത്ത് റിപ്പോർട്ട് ചെയ്തിട്ടുണ്ട്. യഥാസമയം പരിശോധന നടക്കാത്തതാണ് ഇതിനു കാരണം. ചെങ്കുളത്ത് പാറമടയിലെ ദുരന്തത്തേ തുടർന്ന് എല്ലാ ക്വാറികളും പരിശോധിച്ചു റിപ്പോർട്ട് നൽകാൻ ജില്ലാ കളക്ടർ നിർദേശം നൽകിയിട്ടുണ്ടെങ്കിലും പരിശോധനകൾ ദുർബലപ്പെടും. ആവശ്യമായ സംവിധാനങ്ങളോ ഉദ്യോഗസ്ഥരെ വകുപ്പുകൾക്കില്ല എന്നതു തന്നെ പ്രധാന കാരണം. കോന്നി പാറമട ദുരന്തം: മൃതദേഹം നാട്ടിലേക്ക് അയച്ചു കോന്നി പാറമട ദുരന്തത്തില്‍ മരിച്ച തൊഴിലാളികളുടെ മൃതദേഹം നാട്ടിലേക്ക് അയച്ചു. ഇന്നലെ പുലര്‍ച്ചെ 5.25 ന് നെടുമ്പാശേരിയില്‍ നിന്ന് ഇന്‍ഡിഗോയുടെ 6ഇ702 വിമാനത്തിലാണ് ഇരുവരുടെയും മൃതദേഹങ്ങള്‍ നാട്ടിലേക്ക് അയച്ചത്. കഴിഞ്ഞ തിങ്കളാഴ്ച ഉച്ചകഴിഞ്ഞ് കന്നി പയ്യനാമണ്‍ ചെങ്കുളത്ത് ക്വാറിയിലാണ് പാറ ഇടിഞ്ഞുവീണ് ഒഡീഷ സ്വദേശി അജയ് റായ്, ബീഹാര്‍ സ്വദേശി മഹാദേവ് പ്രദാന്‍ എന്നിവര്‍ മരിച്ചത്. പത്തനംതിട്ട ജനറല്‍ ആശുപത്രിയില്‍ പോസ്റ്റ്‌മോര്‍ട്ടം നടത്തി. തുടര്‍ന്ന് മൃതദേഹങ്ങള്‍ കോട്ടയത്ത് എംബാം ചെയ്തു. ഭുവനേശ്വറിനുള്ള വിമാനത്തിലാണ് നെടുന്പാശേരിയിൽ നിന്നു ഇവരുടെ നാട്ടിലേക്ക് അയച്ചത്. മൃതദേഹം നാട്ടിലെത്തിക്കാനുള്ള ചെലവ് ക്വാറി ഉടമയാണ് വഹിക്കുന്നതെന്ന് ജില്ലാ കളക്ടർ അറിയിച്ചിരുന്നു.

മാക്ഫാസ്റ്റിൽ കോഴ്സുകളുടെ ഉദ്ഘാടനം നടത്തി

തിരുവല്ല: മാർ അത്തനേഷ്യസ് കോളജ് ഫോർ അഡ്വാൻസ്ഡ് സ്റ്റഡീസിൽ ഓണേഴ്സ് ബിരുദ കോഴ്സുകളുടെയും ബിരുദാനന്തര ബിരുദ ബാച്ചുകളുടെയും ഉദ്ഘാടനം ഹയർ എഡ്യുക്കേഷൻ കൗൺസിൽ മെംബർ സെക്രട്ടറി ഡോ. രാജൻ വർഗീസ് നിർവഹിച്ചു. മാക്ഫാസ്റ്റ് മാനേജർ ഫാ. ഈപ്പൻ പുത്തൻപറന്പിൽ പ്രാർഥന നയിച്ചു. എംജി സർവകലാശാലയുടെ നാലുവർഷ ഓണേഴ്സ് ബിരുദ പ്രോഗ്രാമുകളായ ബിസിഎ, ബികോം, ബിഎസ്‌സി ഫുഡ്ടെക്നോളജി, ബിബിഎ, വിവിധ എംഎസ്‌സി പ്രോഗ്രാമുകൾ, എംഎസ്ഡബ്ല്യു എന്നീ പ്രോഗ്രാമുകളാണ് ഉദ്ഘാടനം ചെയ്തത്. ആർച്ച്ബിഷപ് ഡോ. തോമസ് മാർ കൂറിലോസ് അധ്യക്ഷത വഹിച്ച യോഗത്തിൽ മാക്ഫാസ്റ്റ് പ്രിൻസിപ്പൽ ഡോ. വർഗീസ് കെ. ചെറിയാൻ, വകുപ്പുമേധാവികളായ ടിജി തോമസ്, ഡോ. സുദീപ് ബി. ചന്ദ്രമന, ഡോ. ജെനി ജേക്കബ്, ഡോ. ബീന ചെറിയാൻ എന്നിവർ പ്രസംഗിച്ചു.

പാറമട അപകടം: ജില്ലാ ഭരണകൂടത്തിന് ഉത്തരവാദിത്വത്തിൽനിന്ന് ഒഴിഞ്ഞുമാറാനാവില്ല

കോന്നി: ചെങ്കുളത്ത് പാറമടയിൽ നടന്ന ദാരുണ സംഭത്തിന്‍റെ ഉത്തരവാദിത്വത്തിൽനിന്ന് ജില്ലാ കളക്ടർ ഉൾപ്പെടെയുള്ള ഉദ്യോഗസ്ഥർക്ക് ഒഴിഞ്ഞു മാറാനാകില്ലെന്ന് കെപിസിസി അംഗം മാത്യു കുളത്തുങ്കൽ. പാറമട വിഷയത്തിൽ യുഡിഎഫ് കോന്നി മണ്ഡലം കമ്മിറ്റിയുടെ നേതൃത്വത്തിൽ കോന്നി മിനി സിവിൽ സ്റ്റേഷനു മുമ്പിലേക്ക് നടത്തിയ പ്രതിഷേധ മാർച്ചും ധർണയും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. നാട്ടുകാരുടെ നിരന്തരമായ പരാതിയുണ്ടായിട്ടും അന്വേഷിക്കാൻ തയാറാകാത്ത ഉദ്യോഗസ്ഥർ കുറ്റക്കാരാണെന്നും പാറമട ടമയ്ക്കെതിരേ നരഹത്യയ്ക്ക് കേസ് എടുക്കണമെന്നും മാത്യു കുളത്തുങ്കൽ ആവശ്യപ്പെട്ടു. യുഡിഎഫ് മണ്ഡലം ചെയർമാൻ അബ്ദുൾ മുത്തലിഫ് അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് റോബിൻ പീറ്റർ, യുഡിഎഫ് നിയോജക മണ്ഡലം ചെയർമാൻ എസ്. സന്തോഷ് കുമാർ, ഡിസിസി സെക്രട്ടറി എലിസബത്ത് അബു, ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ദീനാമ്മ റോയി, യുഡിഎഫ് മണ്ഡലം കൺവീനർ റോജി ഏബ്രഹാം, പഞ്ചായത്ത് പ്രസിഡന്‍റ് അനി സാബു, എബ്രഹാം ചെങ്ങറ, ശാന്തിജൻ ചൂരക്കുന്ന്, പ്രവീൺ പ്ലാവിളയിൽ തുടങ്ങിയവർ പ്രസംഗിച്ചു.

വയോധികയെ കാടിനോടു ചേര്‍ന്ന് കണ്ടെത്തി; ചുമന്നു റോഡിലെത്തിച്ച് പോലീസ് ഇൻസ്പെക്ടർ

പത്തനംതിട്ട: കാണാതായ വയോധികയെ കാടിനോടു ചേര്‍ന്ന് അവശനിലയില്‍ കണ്ടെത്തി. മലയാലപ്പുഴ വടക്കുപുറം നല്ലൂര്‍ തേവള്ളില്‍ കൊല്ലംപറമ്പില്‍ സരസ്വതിയെയാണ് (77) മലയാലപ്പുഴ എസ്എച്ച്ഒ ബി.എസ്.ശ്രീജിത്തിന്‍റെ നേതൃത്വത്തിലുള്ള പോലീസ് സംഘം വടക്കുപുറം മീന്‍മുട്ടിക്കല്‍ വെള്ളചാട്ടത്തിന് സമീപം കാടിനോടുചേര്‍ന്ന് കണ്ടെത്തിയത്. പതിവുപോലെ രാവിലെ അമ്പലത്തില്‍ പോയ മാതാവ് ഇതുവരെ തിരികെ എത്തിയിട്ടില്ലെന്നുള്ള പരാതിയുമായി ഇവരുടെ മകന്‍ ബിജു പോലീസ് സ്റ്റേഷനിലെത്തുന്നത്. തുടര്‍ന്ന് ബിജുവിന്‍റെ മകനെയും കൂട്ടി പോലീസ് സംഘം സമീപ പ്രദേശങ്ങളില്‍ അടക്കം തിരച്ചില്‍ നടത്തുകയായിരുന്നു. ഒടുവില്‍ കാടിനോട് ചേര്‍ന്ന് ഏറെ അവശയായ നിലയില്‍ സരസ്വതിയെ കണ്ടെത്തി. കാഴ്ചക്കുറവിന്‍റെ പ്രയാസം അലട്ടുന്ന അവര്‍ രണ്ടു പേരുടെ കൈയില്‍ പിടിച്ചെങ്കിലും നടക്കാനാകുമായിരുന്നില്ല. തുടര്‍ന്ന് മലയാലപ്പുഴ എസ്എച്ച്ഒ ബി.എസ്.ശ്രീജിത്ത് വയോധികയെ കൈകളില്‍ കോരിയെടുത്ത് മുക്കാല്‍ കിലോമീറ്ററോളം ദൂരം തോളിലേറ്റി റോഡിലെത്തിച്ചു. ആശുപത്രിയിലെത്തിച്ച് പ്രഥമശുശ്രൂഷക്ക് ശേഷം മകന്‍ ബിജുവിനൊപ്പം കൂട്ടിയയക്കുകയും ചെയ്തു. സരസ്വതി തനിച്ചാണ് താമസം.

അപകടാവസ്ഥയിലായ സ്കൂൾ കെട്ടിടം പൊളിക്കണം; പ്രതിഷേധ സമരം ഇന്ന്

ആനിക്കാട് : വായ്പൂര് എംആർഎസ്എൽബിവി ഹയർ സെക്കൻഡറി സ്കൂളിലെ അപകടാവസ്ഥയിലായ പഴയ കെട്ടിടം പൊളിച്ചു മാറ്റണമെന്നാവശ്യം ശക്തമായി. സ്കൂളിന്‍റെ മുൻവശത്തുള്ള ആദ്യ കെട്ടിടമാണിത്. ജീർണാവസ്ഥയിലായ കെട്ടിടം ഏതുനിമിഷവും താഴെ വീഴാവുന്ന സ്ഥിതിയാണ്. ക്ലാസ് മുറിയായി ഇതുപയോഗിക്കുന്നില്ലെങ്കിലും കുട്ടികൾ ഇതിനുള്ളിൽ കയാറുന്നതാണ് ആശങ്കയ്ക്കിടയാക്കുന്നത്. തിരുവിതാംകൂർ രാജകുടുംബാംഗത്തിന്‍റെ നാമധേയത്തിലുള്ള സംസ്ഥാനത്തെ അപൂർവം സ്ഥാപനങ്ങളിലൊന്നാണിത്. അപകടാവസ്ഥയിലുള്ള കെട്ടിടം പൊളിച്ചു നീക്കണമെന്നാവശ്യപ്പെട്ട് നിരവധി പരാതികൾ ഇതിനു മുന്പു നൽകിയിരുന്നു. കെട്ടിടം പൊളിച്ചു മാറ്റണമെന്നാവശ്യപ്പെട്ട് കേരള കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ ഇന്ന് 12 ന് സ്കൂൾ കവാടത്തിൽ പ്രതിഷേധ സമരം നടത്തും. പ്രസിഡന്‍റ് തോമസ് മാത്യുവിന്‍റെ അധ്യക്ഷതയിൽ കേരള കോൺഗ്രസ് സീനിയർ ജനറൽ സെകട്ടറി കുഞ്ഞുകോശി പോൾ ഉദ്ഘാടനം ചെയ്യും.

വിപണിയിൽ മരുന്നിനു തീവില; സർക്കാർ ആശുപത്രികളിൽ ക്ഷാമം

റാന്നി: ജീവൻരക്ഷാ ഔഷധങ്ങൾ ഉൾപ്പെടെ എല്ലാ മരുന്നുകൾക്കും വില ഉയർത്തി മരുന്നു കമ്പനികൾ. മാർക്കറ്റിൽ ഉയർന്ന വിലയുള്ള കമ്പനികളുടെ മരുന്നുകൾ ഒട്ടുമിക്ക ഡോക്ടർമാരും കുറിക്കുന്നതുമൂലം വില താങ്ങാനാകാതെ വലയുകയാണ് രോഗികളും കുടുംബങ്ങളും. റാന്നി താലൂക്കാശുപത്രിയിലുൾപ്പെടെ വൻ കൊള്ളയാണ് നടക്കുന്നതെന്ന് രോഗികളും ബന്ധുക്കളും പറയുന്നു. ആശുപത്രിയിൽ അവശ്യ മരുന്നു പോലും ഇല്ലാത്ത സ്ഥിതിയാണ്. സർവസാധാരണമായ ഏതാനും ഗുളികളൊഴിച്ച് മുഴുവൻ പുറത്തുള്ള മെഡിക്കൽ സ്റ്റോറുകളിലേക്ക് കുറിപ്പെഴുതുകയാണ് ഡോക്ടർമാർ. അസ്ഥി സംബന്ധമായ രോഗങ്ങളാൽ അലട്ടുന്നവർക്കും ഞരന്പു സംബന്ധമായ രോഗികൾക്കും മാനസിക ചികിത്സ ക്ലിനിക്കിനെ ആശ്രയിക്കുന്ന രോഗികൾക്കുമൊന്നും ആശുപത്രിയിൽ നിന്ന് മരുന്നു കിട്ടില്ലെന്നാണ് പരാതി. മാത്രമല്ല, ഇത്തരം മരുന്നുകൾക്ക് പുറത്ത് മെഡിക്കൽ സ്റ്റോറുകളിൽ തീവിലയാണ്. ഗുളിക ഒന്നിന് 10 മുതൽ 20 രൂപ വരെയാണ് വിലയെന്ന് പലരോഗികളുടെയും ബന്ധുക്കൾ സാക്ഷ്യപ്പെടുത്തുന്നു. ഇത്തരം രോഗികൾക്ക് മാസങ്ങളും ചിലപ്പോൾ വർഷങ്ങളോളവും മരുന്നുകൾ കഴിക്കേണ്ട അവസ്ഥയുണ്ടെങ്കിലും വൻ വില നൽകി ഇവ പുറത്തു നിന്നു വാങ്ങുന്നവരുടെ നിസഹായതകാണാൻ ആരോഗ്യ വകുപ്പിനോ സർക്കാരിനൊ കണ്ണില്ല. സർക്കാർ താലൂക്കാശുപത്രിയോടനുബന്ധിച്ച് സാധാരണക്കാർക്ക് ന്യായവിലയിൽ ഇത്തരം മരുന്നുകൾ ലഭ്യമാക്കാൻ ആരോഗ്യ വകുപ്പിനോ സർക്കാരിനോ കഴിയുമെന്നിരിക്കേ ഇതിനായി യാതൊരു നടപടികളും ഉണ്ടാകുന്നതുമില്ല. റാന്നി താലൂക്ക് ആശുപത്രി പൂർണതോതിൽ പ്രവർത്തനം തുടങ്ങിയ കാലഘട്ടത്തിൽ മെച്ചമായ രീതിയിലാണ് നടന്നുവന്നത്. കോവിഡ് കാലഘട്ടത്തിൽ സംസ്ഥാനത്തു തന്നെ ശ്രദ്ധേയമായ പ്രവർത്തനം ആശുപത്രിയിലുണ്ടായി. സർക്കാർ ആശുപത്രികളോടനുബന്ധിച്ചുള്ള സംവിധാനങ്ങൾ ഉണ്ടായാലും അവ പക്ഷഭേദമില്ലാതെ മുഴുവൻ രോഗികൾക്കും ഗുണകരമാകുന്ന അവസ്ഥയാണ് സംജാതമാക്കേണ്ടത്. ഇതോടൊപ്പം അപകടത്തിലും മറ്റും പെട്ട് രാത്രികാലങ്ങളിലും മറ്റും കൊണ്ടുവരുന്ന രോഗികളെ നേരെ മെഡിക്കൽ കോളജുകളിലേക്കും സ്വകാര്യ ആശുപത്രികളിലേക്കും ഉടൻ പറഞ്ഞു വിടാനുള്ള വ്യഗ്രതയാണ് ഡോക്ടർക്കും ജീവനക്കാർക്കുമെന്നും പരാതിയുണ്ട്. കാഷ്വാലിറ്റിയിൽ എല്ലാ വിഭാഗങ്ങളിലും അത്യാവശ്യം അറിവുള്ള ഡോക്ടർമാരെ നിയമിക്കണമെന്ന ആവശ്യവും ശക്തമാണ്.

സംസ്ഥാന ഇന്‍റർ പോളിടെക്നിക് കലോത്സവം അടൂരിൽ ആരംഭിച്ചു

അടൂർ: സംസ്ഥാന ഇന്‍റർപോളിടെക്നിക് കലോത്സവം സുമുദ് അടൂർ ഗവ. പോളിടെക്നിക് കോളജിൽ ആരംഭിച്ചു. നാലു ദിവസം നീണ്ടുനിൽക്കുന്ന കലോത്സവം സിനിമാ നടൻ വിനയ് ഫോർട്ട് ഉദ്ഘാടനം ചെയ്തു. ഇന്‍റർ പോളിടെക്‌നിക് കോളജ് യൂണിയൻ ചെയർമാൻ മുഹമ്മദ് അൻസൽ അധ്യക്ഷത വഹിച്ചു. ഏറത്ത് ഗ്രാമപപഞ്ചായത്ത് വൈസ് പ്രസിഡന്‍റ് ശ്രീജാകുമാരി, ബ്ലോക്ക് പഞ്ചായത്തംഗം റോഷൻ ജേക്കബ്, സീനിയർ ജോയിന്‍റ് ഡയറക്ടർ അനി ഏബ്രഹാം, ഡെപ്യൂട്ടി ഡയക്ടർ ജനറൽ ആർ.എസ്. ഷിബു ഇന്‍റർ പോളി ടെക്ന‌ിക് യൂണിയൻ ജനറൽ സെക്രട്ടറി വൈഷ്‌ണ നാരായണൻ, ഐജു തോമസ്, കെ.ജി. സിനോജ്, ഡി.എസ്. ആവണ്യ, ബി. ബിപിൻ, അനന്ദു മധു എന്നി‌വർ പ്രസംഗിച്ചു. ഞായറാഴ്ച കലോത്സവം സമാപിക്കും.

കളഞ്ഞുകിട്ടിയ പഴ്സ് തിരികെനൽകി യുവാവ് മാതൃകയായി

അടൂർ: കളഞ്ഞുകിട്ടിയ പണവും രേഖകളും അടങ്ങിയ പഴ്സ് ഉടമസ്ഥയ്ക്ക് തിരികെ നൽകി യുവാവ്. പന്തളം പുത്തൻതുണ്ടിൽ കാർത്തിക്കാണ് പഴ്സ് ഉടമസ്ഥയ്ക്ക് തിരികെ നൽകിയത്. അടൂർ പുഷ്പ തടത്തിൽ കീർത്തിയുടേതായിരുന്നു പഴ്സ്. 13,500 രൂപയും, ആധാർ കാർഡും മറ്റു രേഖകളുമാണ് പഴ്സിൽ ഉണ്ടായിരുന്നത്. വ്യാഴാഴ്ച രാവിലെ കടയിൽ പോയി തിരികെ ഓട്ടോറിക്ഷയിൽ വരുമ്പോൾ അടൂർ കോടതിക്കു സമീപത്താണ് പഴ്സ് നഷ്ടമായത്. റോഡരികിൽക്കിടന്ന പഴ്സ് കാർത്തിക്കിന്‍റെ ശ്രദ്ധയിൽപ്പെടുകയായിരുന്നു. തുടർന്ന് സമീപത്തെ കടയിൽ വിവരം പറഞ്ഞ ശേഷം പഴ്സ് അടൂർ പോലീസ് സ്റ്റേഷനിൽ എത്തിക്കുകയായിരുന്നു. ഉടമയെ വിളിച്ചുവരുത്തി പോലീസ് പഴ്സ് കൈമാറി.

മിനി സിവിൽ സ്റ്റേഷൻ കെട്ടിടം ശോച്യാവസ്ഥയിൽ; വേറിട്ട പ്രതിഷേധവുമായി യൂത്ത് കോൺഗ്രസ്

പത്തനംതിട്ട: അപകടാവസ്ഥയിലായ പത്തനംതിട്ട മിനി സിവിൽ സ്റ്റേഷൻ കെട്ടിടം കൃത്യമായ പരിപാലനം ഇല്ലാതെ ശോചനീയാവസ്ഥയിലായതിനെത്തുടർന്ന് വേറിട്ട പ്രതിഷേധവുമായി യൂത്ത് കോൺഗ്രസ്. നിരന്തരം ദ്രവിച്ച കോൺക്രീറ്റ് പാളികൾ ഇളകിവീഴുന്നതുമൂലം കെട്ടിടത്തിൽ ജോലി ചെയ്യുന്ന ജീവനക്കാരും പലവിധ ആവശ്യങ്ങൾക്കായി വരുന്ന പൊതുജനങ്ങളും സുരക്ഷിതരല്ലാത്ത സാഹചര്യമാണ് നിലവിലുള്ളത്. നിരന്തരമായ ഓർമപ്പെടുത്തലുകളും മാധ്യമ ഇടപെടലുകളും നടത്തിയിട്ടുണ്ടെങ്കിലും ഗവൺമെന്‍റോ സ്ഥലം എംഎൽഎയും മന്ത്രിയുമായ വീണാ ജോർജോ ഈ വിഷയത്തിൽ നാളിതുവരെ യാതൊരു നടപടിയും സ്വീകരിക്കാത്തതിലാണ് യൂത്ത് കോൺഗ്രസ് പ്രതിഷേധം. കെട്ടിടം ഉടനടി പുതുക്കിപ്പണിയുന്നില്ലെങ്കിൽ ജനങ്ങളുടെയും ജീവനക്കാരുടെയും സുരക്ഷ മുൻനിർത്തി എല്ലാവർക്കും ഓരോ ഹെൽമറ്റും ഫസ്റ്റ് എയ്‌ഡ്‌ കിറ്റെങ്കിലും ലഭ്യമാക്കണമെന്ന് കോഴഞ്ചേരി തഹസീൽദാർക്ക് യൂത്ത് കോൺഗ്രസ് സംസ്ഥാന സെക്രട്ടറി നഹാസ് പത്തനംതിട്ടയുടെ നേതൃത്വത്തിൽ നിവേദനം നൽകി. ഫസ്റ്റ് എയ്‌ഡ്‌ കിറ്റും ഹെൽമറ്റും കൈമാറുകയും ചെയ്തു.

ലഹരിമുക്ത സമൂഹത്തിനായി കൈകോർക്കണം: മാർ ക്രിസോസ്റ്റോമോസ്

തിരുവല്ല: ലഹരിമുക്ത സമൂഹത്തിനായി സമൂഹം കൈകോർക്കേണ്ട കാലത്തിലാണ് നാം ജീവിക്കുന്നതെന്ന് നിരണം ഭദ്രാസനാധിപൻ ഡോ. യൂഹാനോൻ മാർ ക്രിസോസ്റ്റോമോസ് മെത്രാപ്പോലീത്ത. ഓർത്തഡോക്സ് ക്രൈസ്തവ യുവജനപ്രസ്ഥാനം കേന്ദ്രസമിതിയുടെ നേതൃത്വത്തിൽ ലഹരിയെ തുരത്താൻ ഒരുമിക്കാം എന്ന സന്ദേശവുമായി നടത്തുന്ന ലഹരിവിരുദ്ധ സന്ദേശ യാത്രക്ക് നിരണം ഭദ്രാസനത്തിന്‍റെ നേതൃത്വത്തിൽ എംജിഎം ഹയർ സെക്കൻഡറി സ്കൂൾ അങ്കണത്തിൽ നൽകിയ സ്വീകരണ സമ്മേളനത്തിൽ അധ്യക്ഷത വഹിച്ചു പ്രസംഗിക്കുകയായിരുന്നു അദ്ദേഹം. സബ് കളക്ടർ സുമിത്കുമാർ ഠാക്കൂർ സമ്മേളനം ഉദ്ഘാടനം ചെയ്തു. മലങ്കര സഭ അസോസിയേഷൻ സെക്രട്ടറി ബിജു ഉമ്മൻ മുഖ്യ സന്ദേശം നൽകി. സ്കൂൾ പ്രിൻസിപ്പൽ പി.കെ. തോമസ്, ഹെഡ്മിസ്ട്രസ് ദീപ മേരി ജേക്കബ്, യുവജന പ്രസ്ഥാനം കേന്ദ്ര വൈസ് പ്രസിഡന്‍റ് ഫാ. ജെയിൻ സി. മാത്യു, ജനറൽ സെക്രട്ടറി ഫാ. വിജു ഏലിയാസ്, ട്രഷറർ രഞ്ചു എം. ജോയി,സഭാ മാനേജിംഗ് കമ്മിറ്റിയംഗങ്ങളായ സജി മാമ്പ്രക്കുഴി, മത്തായി ടി. വർഗീസ്, ജോജി പി. തോമസ്, ഭദ്രാസന കൗൺസിൽ അംഗം തോമസ് മണലേൽ, ബെന്നി സ്കറിയ, യുവജന പ്രസ്ഥാനം കേന്ദ്ര റീജണൽ സെക്രട്ടറി അബുഏബ്രഹാം വീരപ്പള്ളി, ഭദ്രാസന വൈസ് പ്രസിഡന്‍റ് ഫാ. ബിബിൻ മാത്യു, സെക്രട്ടറി റെനോജ് ജോർജ് ഗീവർഗീസ്, ട്രഷറാർ രോഹിത് കെ. ജോൺ, ജോയിൻ്റ് സെക്രട്ടറി ജോജി ജോർജ്,എന്നിവർ പ്രസംഗിച്ചു.

ലഹരിവിരുദ്ധ സന്ദേശയാത്രയ്ക്കു സ്വീകരണം നൽകി

പത്തനംതിട്ട: ഓർത്തഡോക്സ് ക്രൈസ്തവ യുവജനപ്രസ്ഥാനം കേന്ദ്ര കമ്മിറ്റിയുടെ നേതൃത്വത്തിൽ നടത്തുന്ന ലഹരി വിരുദ്ധ സന്ദേശയാത്രക്ക് തുമ്പമൺ ഭദ്രാസന യുവജനപ്രസ്ഥാനത്തിന്റെ നേതൃത്വത്തിൽ കാതോലിക്കേറ്റ് ഹയർ സെക്കൻഡറി സ്കൂളിൽ സ്വീകരണം നൽകി. ഡോ. ഏബ്രഹാം മാർ സെറാഫിം മെത്രാപ്പോലീത്ത അധ്യക്ഷതയിൽ ജില്ലാ കളക്ടർ എസ്. പ്രേം കൃഷ്ണൻ സമ്മേളനം ഉദ്ഘാടനം ചെയ്തു. കുര്യാക്കോസ് മാർ ക്ലീമിസ് വലിയ മെത്രാപ്പോലീത്ത അനുഗ്രഹ പ്രഭാഷണം നടത്തി. ഭദ്രാസന സെക്രട്ടറി ജോൺസൺ കല്ലിട്ടതിൽ കോർ എപ്പിസ്കോപ്പ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു, നഗരസഭാ ചെയർമാൻ ടി. സക്കീർ ഹുസൈൻ, ജില്ലാ പഞ്ചായത്ത് അംഗം റോബിൻ പീറ്റർ, ഡിവൈഎസ്പി ബി. അനിൽ, നഗരസഭ കൗൺസിലർ കെ. ജാസിംകുട്ടി, സ്കൂൾ പ്രിൻസിപ്പൽ ജേക്കബ് ജോർജ് കുറ്റിയിൽ, ഹെഡ്മിസ്ട്രസ് പി.എം. ജയമോൾ, കേന്ദ്ര വൈസ് പ്രസിഡന്‍റ് ഫാ. ജയിൻ സി. മാത്യു, ജനറൽ സെക്രട്ടറി ഫാ. വിജു ഏലിയാസ്, ട്രഷറർ രെഞ്ചു എം. ജോയ്, ഭദ്രാസന വൈസ് പ്രസിഡന്‍റ് ഫാ. എബി എ. തോമസ്, ജനറൽ സെക്രട്ടറി നിതിൻ മണക്കാട്ടുമണ്ണിൽ, ജോയിന്‍റ് സെക്രട്ടറിമാരായ ലിന്റോ മണ്ണിൽ, അൻസു മേരി വർഗീസ്, ട്രഷറർ ജെറിൻ ജോയിസ്, സഭാ മാനേജിംഗ് കമ്മിറ്റി അംഗങ്ങളായി ഫാ. ജിജി സാമുവേൽ, ഫാ. ബിജു മാത്യു പ്രക്കാനം, അനിൽ പി. വർഗീസ് തുടങ്ങിയവർ പ്രസംഗിച്ചു.

സമഗ്ര പ്രസിഷൻ മെഡിസിൻ സേവനങ്ങൾ ബിലീവേഴ്സ് ആശുപത്രിയിൽ

തിരുവല്ല: ഓരോ രോഗിയുടെയും രോഗാവസ്ഥയ്ക്കും ആരോഗ്യത്തിനും അനുസൃതമായി മരുന്നിന്റെ അളവ് നിശ്ചയിച്ച് നിർദിഷ്ടഫലം ലഭിക്കുന്നതിനായി സമഗ്ര പ്രസിഷൻ മെഡിസിൻ സേവനങ്ങൾ ബിലീവേഴ്സ് ആശുപത്രിയിൽ ആരംഭിച്ചു. കേരളത്തിൽ ഇദംപ്രഥമമായി ആരംഭിച്ച ഈ സേവന സംരംഭം രോഗീപരിചരണത്തിലും ഫലപ്രാപ്തിയിലും ചികിത്സാച്ചെലവിലും വലിയ സ്വാധീനം ചെലുത്തും. തെറാപ്യൂട്ടിക് ഡ്രഗ് മോണിറ്ററിംഗ് സംബന്ധമായി ബിലീവേഴ്സ് ചർച്ച് മെഡിക്കൽ കോളജ് സംഘടിപ്പിച്ച ഏകദിന ശില്പശാലയുടെ ഭാഗമായാണ് പ്രസിഷൻ മെഡിസിൻ സേവനങ്ങൾക്ക് തുടക്കം കുറിച്ചത്. ബിലീവേഴ്സ് ആശുപത്രി ഡയറക്ടറും സിഇഒയുമായ ഡോ. ജോർജ് ചാണ്ടി മറ്റീത്ര അധ്യക്ഷത വഹിച്ച യോഗത്തിൽ ഫാ. ലിജു രാജു താമരക്കുടി പ്രസിഷൻ മെഡിസിൻ സേവനങ്ങളുടെ ഉദ്ഘാടനം നിർവഹിച്ചു. അമൃത ആശുപത്രി കൺസൾട്ടന്റ് ഓങ്കോളജിസ്റ്റായ ഡോ. കെ. പവിത്രൻ മുഖ്യാതിഥിയായിരുന്നു. ഫാർമക്കോളജി വിഭാഗം മേധാവി ഡോ. ജേക്കബ് ജസുറൻ, ഡോ. സുമിത് കെ. മാത്യു, ഫാ. തോമസ് വർഗീസ് എന്നിവർ പ്രസംഗിച്ചു. തെറാപ്യൂട്ടിക് ഡ്രഗ് മോണിറ്ററിംഗ്, ഫാർമക്കോ ജീനോമെക്സ്, ഫാർമക്കോ മെട്രിക്സ് എന്നിവയെല്ലാം സംയോജിപ്പിച്ച് ആരംഭിച്ച സമഗ്ര പ്രസിഷൻ മെഡിസിൻ സേവനങ്ങളിലൂടെ വ്യക്തി കേന്ദ്രീകൃതമായ ആരോഗ്യപരിചരണം ഉറപ്പുവരുത്താനാകുമെന്ന് ഫാർമക്കോളജി വിഭാഗം മേധാവി ഡോ.ജേക്കബ് ജസുറൻ പറഞ്ഞു. ഇതിന്‍റെ ഭാഗമായി ഡോ. സുമിത് കെ. മാത്യുവിന്‍റെ നേതൃത്വത്തിൽ ബിലീവേഴ്സ് ആശുപത്രിയിൽ പ്രവർത്തിക്കുന്ന അനലിറ്റിക്കൽ കെമിസ്ട്രി ലാബ്, ആശുപത്രി കേന്ദ്രീകരിച്ച് പ്രവർത്തിക്കുന്ന ഇന്ത്യയിലെ ആദ്യത്തെ ലബോറട്ടറി ആണ്.

ഉത്തരവിറങ്ങി; ജനറൽ ആശുപത്രിയിലെ ശസ്ത്രക്രിയാ വിഭാഗങ്ങൾ കോന്നി മെഡിക്കൽ കോളജിലേക്ക്

പത്തനംതിട്ട: സാങ്കേതിക തടസങ്ങൾ പറഞ്ഞ് മാറ്റിവച്ചിരുന്ന ഉത്തരവ് ഇന്നലെ പുറത്തുവന്നു. പത്തനംതിട്ട ജനറൽ ആശുപത്രിയിൽ ശോച്യാവസ്ഥയിലായ ബി ആൻഡ് സി ബ്ലോക്ക് നവീകരിക്കുന്നതിന്‍റെ ഭാഗമായി ഇവിടെ പ്രവർത്തിച്ചിരുന്ന ശസ്ത്രക്രിയ വിഭാഗങ്ങൾ കോന്നി സർക്കാർ മെഡിക്കൽ കോളജിലേക്ക് മാറ്റിക്കൊണ്ടുള്ളതാണ് ഉത്തരവ്. പ്രധാന ശസ്ത്രക്രിയ വിഭാഗങ്ങളായ ഒബ്സ്റ്റട്രിക്സ് ആൻഡ് ഗൈനക്കോളജി, അസ്ഥിരോഗവിഭാഗം, ജനറൽ സർജറി, ഇഎൻടി എന്നിവയാണ് മെഡിക്കൽ കോളജിലേക്ക് മാറ്റുന്നത്. ഇതു സംബന്ധമായി മന്ത്രിതലത്തിലുൾപ്പെടെ ചർച്ച നടത്തി തീരുമാനമെടുത്തിരുന്നുവെങ്കിലും ഡോക്ടർമാരുടെ ഭാഗത്തു നിന്ന് എതിർപ്പുണ്ടായതോടെ ഉത്തരവ് വൈകുകയായിരുന്നു. ഗൈനക്കോളജി വിഭാഗം പൂർണമായി കോന്നി മെഡിക്കൽ കോളജിലേക്ക് മാറ്റും. രണ്ടിടങ്ങളിലെയും ഇതു സംബന്ധമായ വിഭാഗങ്ങൾ ഇനി ഒറ്റ യൂണിറ്റായിരിക്കുമെന്ന പ്രത്യേക പരാമർശമുണ്ട്. മറ്റ് വിഭാഗങ്ങളിൽ നേരത്തെ ശസ്ത്രക്രിയ നിശ്ചയിച്ചിട്ടുള്ളവർക്ക് ജില്ലാ ആശുപത്രിയിലും മറ്റ് താലൂക്ക് ആശുപത്രികളിലുമായി പൂർത്തിയാക്കണം. ഡോക്ടർമാരെയും മെഡിക്കൽ കോളജിലേക്ക് പുനർവിന്യസിക്കേണ്ടിവരുന്ന തരത്തിലാണ് ഉത്തരവ്. എന്നാൽ മൈനർ ശസ്ത്രക്രിയ പത്തനംതിട്ട ജനറൽ ആശുപത്രിയിൽ തന്നെ തുടരും. ആശുപത്രി കെട്ടിടം തകരാറിലാണെന്ന റിപ്പോർട്ട് ലഭിച്ചതിനു പിന്നാലെ കെട്ടിടം അടച്ചിട്ട് നവീകരണ ജോലികൾ ആരംഭിക്കണമെന്ന തീരുമാനമുണ്ടായതാണ്. എന്നാൽ സാങ്കേതിക പ്രശ്നങ്ങളിൽ കുടുങ്ങി ഉത്തരവ് പുറത്തിറക്കാൻ നാലുമാസം വേണ്ടിവന്നു. ബി ആൻഡ് സി ബ്ലോക്ക് കൂടി അടച്ചിടുന്നതോടെ ജനറൽ ആശുപത്രിയിൽ ഇനി ഒപി വിഭാഗവും നൂറിൽ താഴെ കിടക്കകളുമാകും. 414 കിടക്കകളാണ് ബി ആൻഡ് സി ബ്ലോക്കിൽ ഉണ്ടായിരുന്നത്. പഴയ അത്യാഹിത വിഭാഗം കെട്ടിടം പൊളിച്ചതോടെ അവിടെയുണ്ടായിരുന്ന വാർഡുകളും ഇല്ലാതായി. ശസ്ത്രക്രിയാ ഉപകരണങ്ങൾ മാറ്റും ഉത്തരവിറങ്ങിയതോടെ ജനറൽ ആശുപത്രിയിലെ പ്രധാന ശസ്ത്രക്രിയ ഉപകരണങ്ങൾ കോന്നി മെഡിക്കൽ കോളജിലെത്തിച്ചെങ്കിൽ മാത്രമേ അവിടെ ശസ്ത്രക്രിയകൾ നടത്താനാകൂ. ജനറൽ ആശുപത്രിയിലെ ശസ്ത്രക്രിയ ഉപകരണങ്ങൾ പായ്ക്ക് ചെയ്തു കൊണ്ടുപോകാനായി ടെൻഡർ നൽകിയെങ്കിലും അനുയോജ്യരായവരെ ലഭിച്ചിട്ടില്ല. ഉപകരണങ്ങൾ നീക്കുന്നതിലേക്ക് എൻഎച്ച്എം പ്രത്യേക ഫണ്ടായി 30 ലക്ഷം രൂപ അനുവദിച്ചിരുന്നു. എല്ലാ ഉപകരണങ്ങളും കൊണ്ടുപോകേണ്ടതിലലെന്നാണ് ഇപ്പോഴത്തെ തീരുമാനം. ബി ആൻഡ് സി ബ്ലോക്കിന്‍റെ നവീകരണം പൂർത്തിയാകുന്നതോടെ ഈ ഉപകരണങ്ങൾ തിരികെ എത്തിക്കേണ്ടതുണ്ട്. സംവിധാനങ്ങൾ മാറ്റുന്നതിനൊപ്പം ഡോക്ടർമാരും ജീവനക്കാരും അടക്കം കുറെയധികം ആളുകളെ താത്കാലികാടിസ്ഥാനത്തിൽ മെഡിക്കൽ കോളജിലേക്കു മാറ്റാനാണ് നിർദേശം. എന്നാൽ ആരോഗ്യ വകുപ്പിനു കീഴിലുള്ള ജനറൽ ആശുപത്രിയിൽ ജോലിയെടുക്കുന്നവരെ ആരോഗ്യ വിദ്യാഭ്യാസ വകുപ്പിനു കീഴിലുള്ള മെഡിക്കൽ കോളജിലേക്കു മാറ്റുന്നതുമായി ബന്ധപ്പെട്ട സാങ്കേതികത്വം എങ്ങനെ പരിഹരിക്കുമെന്നതിലും തീരുമാനമില്ല. സര്‍ക്കാര്‍ ഏജന്‍സിയായ ഇന്‍കെലിനെയാണ് ബി ആൻഡ് സി ബ്ലോക്ക് നവീകരണ ജോലികള്‍ക്ക് ചുമതലപ്പെടുത്തിയിരിക്കുന്നത്. ഊരാളുങ്കല്‍ ലേബര്‍ സൊസൈറ്റിയെയാണ് പണികള്‍ ഏല്പിച്ചിരിക്കുകയാണ്. 21 ന് പണികള്‍ ആരംഭിക്കാനുള്ള ക്രമീകരണമാണ് ചെയ്തിരിക്കുന്നതെന്ന് പറയുന്നു.

രക്ഷാപ്രവര്‍ത്തനം നടത്തിയ ഉദ്യോഗസ്ഥര്‍ക്ക് ആദരം

കോന്നി: പയ്യനാമണ്‍ പാറമട ദുരന്ത്തില്‍ അപകടകരമായ അവസ്ഥയില്‍ രക്ഷാപ്രവര്‍ത്തനം നടത്തിയ വിവിധ ഉദ്യോഗസ്ഥരെയും കോന്നി പ്രിയദര്‍ശനി ഹാളില്‍ നടന്ന ചടങ്ങില്‍ കെ.യു. ജനീഷ് കുമാര്‍ എംഎല്‍എയും ജില്ലാ കളക്ടര്‍ എസ്.പ്രേം കൃഷ്ണനും ചേര്‍ന്ന് ആദരിച്ചു. ദുരന്തത്തില്‍ രണ്ട് ഇതരസംസ്ഥാന തൊഴിലാളികള്‍ മരിച്ചിരുന്നു. പ്രതികൂല കാലാവസ്ഥയേയും പാറ ഇടിഞ്ഞുവീഴുന്ന സാഹചര്യത്തെയും അതിജിവിച്ചാണ് രണ്ടു പേരുടെയും മൃതദേഹം കണ്ടെത്തിയത്. ഫയര്‍ ഫോഴ്സ്, എന്‍ഡിആര്‍എഫ്, പോലീസ് ഉദ്യോഗസ്ഥരെയും ലോംഗ് ബൂം എസ്‌കവേറ്റര്‍ ഓപ്പറേറ്റര്‍ കണ്ണനെയുമാണ് ചടങ്ങില്‍ ആദരിച്ചത്. എല്ലാ സമര്‍ദത്തെയും അതീജിവിച്ചായിരുന്നു ഉദ്യോഗസ്ഥരുടെ പ്രവര്‍ത്തനമെന്ന് ചടങ്ങ് ഉദ്ഘാടനം ചെയ്ത എംഎല്‍എ പറഞ്ഞു. ജില്ലാ കളക്ടറുടെ നേതൃത്വവും പ്രശംനീയമായിരുന്നു. ദുരന്തം ഉണ്ടായ ഉടന്‍ സ്ഥലത്തെത്തിയ അദ്ദഹം രക്ഷാപ്രവര്‍ത്തനം ഏകോപിച്ചതായി എംഎല്‍എ ചൂണ്ടികാട്ടി. രക്ഷാപ്രവര്‍ത്തകരുടെ സുരക്ഷയ്ക്കാണ് ആദ്യ പ്രാധാന്യം നല്‍കിയതെന്ന് മുഖ്യ അതിഥിയായ ജില്ലാ കളക്ടര്‍ എസ്. പ്രേം കൃഷ്ണന്‍ പറഞ്ഞു. രക്ഷാപ്രവര്‍ത്തനത്തിനിടെ പാറ ഇടിഞ്ഞുവീഴുന്ന സാഹചര്യമുണ്ടായി. തുടര്‍ന്നാണ് ലോംഗ് ബൂം എസ്‌കവേറ്റര്‍ അടക്കം വലിയ ഉപകരണം എത്തിച്ചത. ആലപ്പുഴ ജില്ലാ കളക്ടറുമായി ബന്ധപ്പെട്ടാണ് ഇതു സാധ്യമാക്കിയത്. കോന്നി ഗ്രാമപഞ്ചായത്ത് പ്രസിഡന്റ് ആനി സാബു അധ്യക്ഷത വഹിച്ചു. അടൂര്‍ ആര്‍ഡിഒ എം. ബിപിന്‍ കുമാര്‍, ദുരന്തനിവാരണം ഡെപ്യൂട്ടി കളക്ടര്‍ ആര്‍.രാജലക്ഷ്മി, ജില്ലാ ഫയര്‍ഫോഴ്സ് മേധാവി പ്രതാപ് ചന്ദ്രന്‍, കോന്നി തഹസില്‍ദാര്‍ എന്‍.വി.സന്തോഷ്, കോന്നി ഡിവൈഎസ്പി ജി.അജയ്നാഥ്, ജനപ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ക്വാറികളിൽ പരിശോധനയ്ക്കു നിർദേശം; ചെങ്കുളത്ത് പാറമടയ്ക്കെതിരേ ശക്തമായ നടപടി

കോന്നി: രണ്ടുപേരുടെ മരണത്തിനിടയാക്കിയ അപകടം നടന്ന കോന്നി പയ്യനാമണ്‍ ചെങ്കുളത്ത് ക്വാറി ഉടമയ്ക്കെതിരേ കൂടുതൽ വകുപ്പുകള്‍ ചുമത്തുന്നത് പരിശോധിക്കാന്‍ പോലീസിനോടു നിർദേശിച്ചതായി കെ.യു. ജനീഷ് കുമാർ എംഎൽഎ. നിലവില്‍ അസ്വാഭാവിക മരണത്തിനാണ് കേസ് എടുത്തിരിക്കുന്നത്. എന്നാല്‍, സുരക്ഷ സംവിധാനം പാലിക്കാതെയാണ് ക്വാറി നടത്തിയതെന്ന ആരോപണം ഉയര്‍ന്നതിനേതുടര്‍ന്നാണ് എംഎല്‍എയുടെ നിര്‍ദേശം. പാറമട അപകടവുമായി ബന്ധപ്പെട്ട് കോന്നി താലൂക്ക് ഓഫീസ് കോണ്‍ഫറന്‍സ് ഹാളില്‍ ജില്ലാ കളക്ടര്‍ എസ്. പ്രേം കൃഷ്ണന്‍റെ സാന്നിധ്യത്തില്‍ ചേര്‍ന്ന ഉദ്യോഗസ്ഥരുടെയും ജനപ്രതിനിധികളുടെയും യോഗത്തിലാണ് എംഎല്‍എയുടെ നിര്‍ദേശം. പാറമടയ്ക്കെതിരായ മുഴുവന്‍ പരാതികളും പരിശോധിക്കും. ക്വാറി ഉടമ പഞ്ചായത്ത് വഴി കൈയേറി ഗേറ്റ് സ്ഥാപിച്ചതായി തെളിഞ്ഞാല്‍ പോലീസിനെ ഉപയോഗിച്ച് പൊളിച്ചു മാറ്റും. പഞ്ചായത്ത് രാജ് ആക്ട് പ്രകാരമായിരിക്കും നടപടി. ജലസോത്രസുകളിലേക്ക് ക്വാറിയില്‍നിന്ന് മാലിന്യം ഒഴുകുന്നതിനെക്കുറിച്ചുള്ള ആരോപണം അന്വേഷിക്കും. ഉരുള്‍പൊട്ടല്‍ മേഖലയിലാണ് ക്വാറി പ്രവര്‍ത്തിക്കുന്നതെന്ന വാദവും പരിശോധിക്കും. ജില്ലാ ഭരണകൂടവും സര്‍ക്കാരും ജനങ്ങള്‍ക്കൊപ്പമാണെന്ന് എംഎല്‍എ പറഞ്ഞു. കോന്നി, റാന്നി മേഖലയിലടക്കം ജില്ലയില്‍ പ്രവര്‍ത്തിക്കുന്ന എല്ലാ പാറമടകളിലും അന്വേഷണം നടത്തി പത്തു ദിവസത്തിനുള്ളില്‍ റിപ്പോര്‍ട്ട് സമര്‍പ്പിക്കാന്‍ വിവിധ വകുപ്പ് ഉദ്യോഗസ്ഥരോട് ജില്ലാ കളക്ടര്‍ എസ്. പ്രേംകൃഷ്ണന്‍ ആവശ്യപ്പെട്ടു. ചെങ്കുളത്ത് ക്വാറി നിയമവിരുദ്ധമായാണോ പ്രവര്‍ത്തിച്ചതെന്ന് പരിശോധിക്കും. നിലവില്‍ ക്വാറി പ്രവര്‍ത്തനം നിര്‍ത്തിയിരിക്കുകയാണ്. അന്വേഷണത്തിന് ശേഷമേ തുടര്‍ പ്രവര്‍ത്തനത്തിന് അനുമതി നല്‍കൂ. റവന്യൂ ഭൂമി കൈയേറി‌ ഖനനം നടത്തിയെന്ന ആരോപണം പരിശോധിക്കാന്‍ ഡ്രോണ്‍ സര്‍വേ നടത്താന്‍ ജില്ലാ കളക്ടര്‍ നിര്‍ദേശിച്ചു. അടൂര്‍ ആര്‍ഡിഒ എം. ബിപിന്‍ കുമാര്‍, ദുരന്തനിവാരണം ഡെപ്യൂട്ടി കളക്ടര്‍ ആര്‍. രാജലക്ഷ്മി, ജില്ലാ ഫയര്‍ഫോഴ്സ് മേധാവി പ്രതാപ് ചന്ദ്രന്‍, കോന്നി തഹസില്‍ദാര്‍ എന്‍.വി.സന്തോഷ്, കോന്നി ഡിവൈഎസ്പി ജി.അജയ്നാഥ്, ജനപ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. ക്വാറി അപകടം: കൊലക്കുറ്റത്തിനു കേസെടുക്കണം കോന്നി: പയ്യനാമൺ ചെങ്കുളത്ത് ക്വാറിയി ഉണ്ടായ ദുരന്തത്തിന് ഉത്തരവാദികൾ സർക്കാരും ബന്ധപ്പെട്ട വകുപ്പുകളുമാണെന്നും അവർക്കും ക്വാറി ഉടമയ്ക്കുംഎതിരേ കൊലക്കുറ്റത്തിന് കേസ് എടുക്കണമെന്നും കെപിസിസി ജനറൽ സെക്രട്ടറി പഴകുളം മധു ആവശ്യപ്പെട്ടു. ജില്ലയിലെരാഷ്ട്രീയ ഭരണ നേതൃത്വമാണ് നിയമ ലംഘനത്തിന് ഒത്താശ ചെയ്തു കൊടുക്കുന്നതെന്നും ക്വാറി സന്ദർശിച്ചശേഷം മധു ആവശ്യപ്പെട്ടു. ജിയോളജി, റവന്യൂ, മാലിനീകരണ നിയന്ത്രണ ബോർഡ്, പോലീസ്, ആരോഗ്യ വകുപ്പ് എന്നിവയെല്ലാം ക്വാറിയിൽ സുരക്ഷാ മാനദണ്ഡങ്ങൾ ഉണ്ടെന്ന് ഉറപ്പുവരുത്തുന്നതിൽ പരാജയപ്പെട്ടു. എല്ലാ നിയമങ്ങളും ലംഘിച്ചു ക്വാറി പ്രവർത്തിക്കാൻ അനുമതി നൽകിയത് ഈ ഉദ്യോഗസ്ഥരാണ്. അപകടം ഉണ്ടാകുമെന്ന് അറിഞ്ഞുകൊണ്ട് നടത്തിയ നിയമലംഘനമാണ്. നിയമം ലംഘിച്ച ക്വാറി ഉടമയും അതിന് കണ്ണടച്ച് കൊടുത്തവരും കൊലക്കേസിൽ പ്രതികളാകണം. ഈ അപകടം ഉണ്ടായ സാഹചര്യത്തിൽ കോന്നി പഞ്ചായത്തിൽ പ്രവർത്തിക്കുന്ന എല്ലാ പാറമടകളുടെയും അനുമതി റദ്ദാക്കണമെന്നും മധു ആവശ്യപ്പെട്ടു. പാറ ഉടമയെയും ഉദ്യോഗസ്ഥരെയും സംരക്ഷിക്കുന്ന നിലപാടാണ് കോന്നി എം എൽ എ യും സിപിഎം നേതൃത്വവും സ്വീകരിച്ചിട്ടുള്ളത്. അവ‌ടെ സംരക്ഷണയിലാണ് നിയമലംഘനങ്ങളെന്നും അദ്ദേഹം കുറ്റപ്പെടുത്തി. ഡിസിസി വൈസ് പ്രസിഡന്‍റ് വെട്ടൂർ ജ്യോതിപ്രസാദ്, സേവാദൾ ജില്ലാ ചെയർമാൻ ശ്യാം എസ്.കോന്നി, സംസ്കാര സാഹിതി ജില്ലാ ചെയർമാൻ ബിജു കൂടൽ, മോൻസി പയ്യനാമൺ, കെഎസ് യു ജില്ലാ വൈസ് പ്രസിഡന്‍റ് ക്രിസ്റ്റോ വർഗീസ് മാത്യു, ജസ്റ്റിൻ തരകൻ തുടങ്ങിയവരും സംഘത്തിലുണ്ടായിരുന്നു.

തുരുത്തിക്കാട് ബിഎഎം കോളജ് ആഗോള പൂർവവിദ്യാർഥീ സംഗമം 15ന്

പത്തനംതിട്ട: തുരുത്തിക്കാട് ബിഎഎം കോളജ് വജ്രജൂബിലി ആഘോഷങ്ങളുടെ ഭാഗമായ പൂർവ വിദ്യാർഥി സംഗമം 15ന് ഉച്ചകഴിഞ്ഞ് മൂന്നിന് നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. ബാംക എന്ന പേരിൽ രജിസ്ട്രേഷനോടെ പ്രവർത്തിക്കുന്ന പർവവിദ്യാർഥി സംഘടനയാണിത്. കോളജ് ഓഡിറ്റോറിയത്തിൽ നടക്കുന്ന സംഗമം പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. ബാംക പ്രസിഡന്‍റ് കോശി പി. സഖറിയ അധ്യക്ഷത വഹിക്കും. ആന്‍റോ ആന്‍റണി എംപി, രാജ്യസഭ മുൻ ഉപാധ്യക്ഷൻ പ്രഫ.പി.ജെ. കുര്യൻ, ജില്ലാ പഞ്ചായത്തംഗം സി.കെ. ലതാകുമാരി, മല്ലപ്പള്ളി ബ്ലോക്ക് പഞ്ചായത്ത് പ്രസിഡന്‍റ് ബാബു കൂടത്തിൽ, കല്ലൂപ്പാറ ഗ്രാമപഞ്ചായത്ത് പ്രസിഡന്‍റ് ഗീത ശ്രീകുമാർ എന്നിവർ മുഖ്യാതിഥികളാകും. കലാപരിപാടികൾ, പൂർവ വിദ്യാർഥികളുടെ സൗഹൃദ കൂട്ടായ്മ, സ്നേഹവിരുന്ന് എന്നിവയും ഉണ്ടാകും. സംഗമത്തിൽ പൂർവ വിദ്യാർഥികൾ, പൂർവ അധ്യാപകർ, മുൻ ജീവനക്കാർ എന്നിവരോടൊപ്പം കോളജിലെ അധ്യാപക, അനധ്യാപക ജീവനക്കാരും വിദ്യാർഥികളും പങ്കെടുക്കും. നാട്ടിലെത്താൻ കഴിയാതിരുന്ന പൂർവവിദ്യാർഥികൾക്ക് ഓൺലൈനായും സംഗമത്തിൽ പങ്കെടുക്കാനാകും. വിവിധ മേഖലകളിൽ പ്രശസ്തരായ നിരവധി പൂർവവിദ്യാർഥികൾ ലോകത്തിന്‍റെ നാനാഭാഗങ്ങളിലുണ്ട്. കോളജ് മാനേജർ ഡോ.മാത്യു പി. ജോസഫ്, പ്രിൻസിപ്പൽ ജി.എസ്. അനീഷ് കുമാർ, പൂർവവിദ്യാർഥി സംഘടന പ്രസിഡന്‍റ് കോശി പി. സഖറിയ, സെക്രട്ടറി ജേക്കബ് തോമസ്, എൻസ് മാത്യൂസ്, ബിജു നൈനാൻ, റെനി കെ. ജേക്കബ് എന്നിവർ പത്സമ്മേളനത്തിൽ പങ്കെടുത്തു.

റാന്നി സെന്‍റ് തോമസ് കോളജ് വജ്രജൂബിലി സമാപനവും പൂർവ വിദ്യാർഥീ സംഗമവും നാളെ

പത്തനംതിട്ട: റാന്നി സെന്‍റ് തോമസ് കോളജ് വജ്രജൂബിലി സമാപനവും പൂർവ വിദ്യാർഥി സംഗമവും നാളെ നടക്കും. ഇതിനു മുന്നോടിയായ വിളംബര ജാഥ ഇന്ന് 1.30ന് കോളജ് അങ്കണത്തിൽ റാന്നി ഡിവൈഎസ്പി ആർ. ജയരാജ് ഫ്ലാഗ് ഓഫ് ചെയ്യുമെന്ന് മാനേജർ പ്രഫ. റോയി മേലേലും പ്രിൻസിപ്പൽ ഇൻ ചാർജ് ഡോ. സ്നേഹ എൽസി ജേക്കബും പത്രസമ്മേളനത്തിൽ പറഞ്ഞു. നാളെ രാവിലെ 9.30ന് വജ്രജൂബിലി സമാപന സമ്മേളനം ഗോവ ഗവർണർ പി.എസ്. ശ്രീധരൻ പിള്ള ഉദ്ഘാടനം ചെയ്യും. കോളജ് മാനേജർ പ്രഫ.റോയി മേലേൽ അധ്യക്ഷത വഹിക്കും. ആന്‍റോ ആന്‍റണി എംപി, പ്രമോദ് നാരായൺ എംഎൽഎ, അലുമ്നി അസോസിയേഷൻ പ്രസിഡന്‍റ് രാജു ഏബ്രഹാം, വലിയ പള്ളി വികാരി ഫാ.എം.സി. സഖറിയ, കോളജ് സെക്രട്ടറി ഷെവ. പ്രഫ.പ്രസാദ് ജോസഫ് തുടങ്ങിയവർ പ്രസംഗിക്കും. കോളജ് വിദയാർഥികളും താജ് പത്തനംതിട്ടയും ചേർന്നൊരുക്കുന്ന കലാപരിപാടികളും സമ്മേളനത്തിന്‍റെ ഭാഗമായി ഒരുക്കിയിട്ടുണ്ട്. കഴിഞ്ഞ ഒരുവർഷമായി നടന്നുവന്ന വജ്രജൂബിലി ആഘോഷങ്ങളുടെ ഭാഗമായി എൻഎസ്എസ് നേതൃത്വത്തിൽ കോളജിലെ ഒരു വിദ്യാർഥിക്ക് വീടു നിർമിച്ചു നൽകി. പ്രഫ.വർഗീസ് പടിയറ, പ്രഫ.കെ.എ. മാത്യു സ്മാരക പ്രസംഗ മത്സരങ്ങൾ, പി. ജേക്കബ് സ്റ്റീഫൻ സ്മാരക ലെഗസി അവാർഡ്, തുടങ്ങിയവ ക്രമീകരിച്ചു. 1979 - 81 പ്രീഡിഗ്രി ബാച്ച് മാതാപിതാക്കൾ നഷ്ടപ്പെട്ട രണ്ട് വിദ്യാർഥിനികളുടെ പേരിൽ ഒരോ ലക്ഷം രൂപയുടെ സ്ഥിരനിക്ഷേപം നൽകുകയും അവരുടെ വീടുകൾ പുനരുദ്ധരിക്കുകയും ചെയ്തു. വിവിധ സെമിനാറുകൾ, ചലച്ചിത്രോത്സവം റൂസ ഫണ്ടുപയോഗിച്ചുള്ള കെട്ടിടങ്ങളുടെ ഉദ്ഘാടനം എന്നിവ ഇതോടനുബന്ധിച്ച് നടന്നു. അലുമ്നി അസോസിയേഷൻ സെക്രട്ടറി ഡോ.എം.കെ. സുരേഷും പത്രസമ്മേളനത്തിൽ പങ്കെടുത്തു.

പ്രൗഡ് കേരള വാക്കത്തോൺ 14ന് പത്തനംതിട്ടയിൽ

പത്തനംതിട്ട: മുൻ പ്രതിപക്ഷ നേതാവ് രമേശ് ചെന്നിത്തല നേതൃത്വം നൽകുന്ന വാക്ക് എഗെൻസ്റ്റ് ഡ്രഗ്സ് കാന്പെയിന്‍റെ ഭാഗമായ വാക്കത്തോൺ 14നു രാവിലെ പത്തനംതിട്ടയിൽ‌ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. യുവാക്കൾക്കിടയിൽ പടരുന്ന ലഹരി ഉപയോഗത്തിനെതിരേ എല്ലാ വിഭാഗത്തിൽപെട്ട ജനങ്ങളെയും അണിനിരത്തി ജനകീയ പ്രതിരോധം തീർക്കാനുള്ള പ്രവർത്തനങ്ങളുടെ ഭാഗമായാണ് വാക്കത്തോൺ. 14ന് രാവിലെ ആറിന് പത്തനംതിട്ട മാക്കാംകുന്ന് സെന്‍റ് സ്റ്റീഫൻസ് ഓർത്തഡോക്സ് കത്തീഡ്രലിനു സമീപത്തുനിന്ന് പ്രഭാത നടത്തം തുടങ്ങും. രമേശ് ചെന്നിത്തല നേതൃത്വം നൽകും. മാർത്തോമ്മ സഭയുടെ സഫ്രഗൻ മെത്രാപ്പോലീത്ത ഡോ.ജോസഫ് മാർ ബർണബാസ്, ഓർത്തഡോക്സ് സഭ തുന്പമൺ ഭദ്രാസനാധിപൻ ഡോ.ഏബ്രഹാം മാർ സെറാഫിം, എൻഎസ്എസ് യൂണിയൻ പ്രസിഡന്‍റ് ഹരിദാസ് ഇടത്തിട്ട, എസ്എൻഡിപി യൂണിയൻ ചെയർമാൻ കെ. പത്മകുമാർ, അബ്ദുൾ ഷുക്കൂർ മൗലവി അൽഖാസിം, ഡെപ്യൂട്ടി സ്പീക്കർ ചിറ്റയം ഗോപകുമാർ, സിപിഎം ജില്ലാ സെക്രട്ടറി രാജു ഏബ്രഹാം, ആന്‍റോ ആന്‍റണി എംപി, നഗരസഭ ചെയർമാൻ ടി. സക്കീർ ഹുസൈൻ തുടങ്ങിയവർ വാക്കത്തോണിൽ പങ്കാളികളാകും. സെന്‍റ് പീറ്റേഴ്സ് ജംഗ്ഷനിലൂടെ പത്തനംതിട്ട ടൗൺ സ്ക്വയർ വരെയാണ് പ്രഭാത നടത്തം. തുടർന്ന് ടൗൺ സ്ക്വയറിൽ ലഹരിക്കെതിരേ പ്രതിജ്ഞയും സമ്മേളനവും ചേരും. പ്രൗഡ് കേരള ജില്ലാ കൺവീനർ വെട്ടൂർ ജ്യോതി പ്രസാദ്, കോ ഓർഡിനേറ്റർ റോജി കാട്ടാശേരി, ഫെലിസിറ്റേറ്റർ തട്ടയിൽ ഹരികുമാർ, എക്സിക്യൂട്ടീവ് അംഗം ജോൺസൺ വിളവിനാൽ എന്നിവർ പത്രസമ്മേളനത്തിൽ പങ്കെടുത്തു.

തിരുവല്ല അതിരൂപത പദയാത്രയ്ക്കു തുടക്കം

തിരുവല്ല: ധന്യൻ മാർ ഈവാനിയോസ് മെത്രാപ്പോലീത്തയുടെ മാർ ഈവാനിയോസ് പിതാവിന്‍റെ പെരുന്നാളിനോടനുബന്ധിച്ച് എംസിവൈഎം തിരുവല്ല അതിരൂപതയുടെ നേതൃത്വത്തിലുള്ള പദയാത്ര ഇന്നലെ രാവിലെ സെന്‍റ് ജോൺസ് മെത്രാപ്പോലീത്തൻ കത്തീഡ്രലിൽനിന്നാരംഭിച്ചു. എംസിവൈഎം തിരുവല്ല അതിഭദ്രാസന ഡയറക്ടർ ഫാ. ചെറിയാൻ കുരിശുമൂട്ടിലിന്റെയും അതിഭദ്രാസനത്തിലെ വൈദിക ശ്രേഷ്ഠരുടെയും കാർമികത്വത്തിൽ സമൂഹബലിയേ തുടർന്ന് തിരുവല്ല അതിഭദ്രാസനാധ്യക്ഷൻ ഡോ. തോമസ് മാർ കൂറിലോസ് മെത്രാപ്പോലീത്തയുടെ നേതൃത്വത്തിൽ ധൂപപ്രാർഥന നടത്തി. വള്ളിക്കുരിശ് ആശിർവദിച്ച് എംസിവൈഎം തിരുവല്ല അതിഭദ്രാസന പ്രസിഡന്‍റ് സിറിയക് വി. ജോണിനും , പേപ്പൽ പതാക അതിഭദ്രാസന വൈസ് പ്രസിഡന്‍റ് അലീന മരിയയ്ക്കും എംസിവൈഎം പാതാക ജനറൽ സെക്രട്ടറി സച്ചിൻ രാജു സക്കറിയയ്ക്കും കാതോലിക്ക പതാക തിരുവല്ല മേഖലാ പ്രസിഡന്‍റ് അഡ്വ. അഹിയാ മേരിക്കും കൈമാറിക്കൊണ്ടായിരുന്നു പദയാത്രയുടെ തുടക്കം. ആർച്ച്ബിഷപ് ഡോ. തോമസ് മാർ കൂറിലോസ് പദയാത്രയെ അനുഗമിക്കുന്നുണ്ട്. തിരുവല്ല കത്തീഡ്രലിൽനിന്ന് ആരംഭിച്ച പദയാത്ര തിരുവല്ല പുഷ്പഗിരി മെഡിക്കൽ കോളജ്, തോട്ടഭാഗം, ഇരവിപേരൂർ, കുമ്പനാട്, പുല്ലാട് ദേവാലയങ്ങളിലൂടെ ഉച്ചഭക്ഷണത്തിനു ശേഷം മാരാമൺ , ഇലന്തൂർ, ചീക്കനാൽ എത്തി പദയാത്രയുടെ ആദ്യദിനം പൂർത്തിയാക്കി. തിരുവല്ല അതിഭദ്രാസന ഡയറക്ടർ ഫാ. ചെറിയാൻ കുരിശുമൂട്ടിൽ , പ്രസിഡന്‍റ് സിറിയക് വി. ജോൺ, ജനറൽ സെക്രട്ടറി സച്ചിൻ രാജു എന്നിവർ തിരുവല്ലയിൽനിന്നുള്ള പദയാത്രയ്ക്ക് നേതൃത്വം നൽകി. വെണ്ണിക്കുളം, മല്ലപ്പള്ളി, റാന്നി, എരുമേലി മേഖലകളിൽനിന്നുള്ള പദയാത്രികർ വെണ്ണിക്കുളം സെന്‍റ് തോമസ് ദേവാലയത്തിലെ വിശുദ്ധ കുർബാനയെത്തുടർന്ന് പുല്ലാട് എത്തി തിരുവല്ലയിൽ നിന്നുള്ള പദയാത്രയുമായി സംഗമിച്ചു. തിരുവല്ല അതിഭദ്രാസന മുഖ്യ വികാരി ജനറാൾ ഫാ. ഐസക് പറപ്പള്ളി, വെണ്ണിക്കുളം മേഖല ഡയറക്ടർ ഫാ. മാത്യു പൊട്ടുക്കുളത്തിൽ, മേഖല പ്രസിഡന്‍റ് ജോബിൻ ജോയ്, റാന്നി മേഖലാ ഡയറക്ടർ ഫാ. ജിബു കരപ്പനശേരിമലയിൽ , മേഖലാ പ്രസിഡന്‍റ് ജെറിൻ പ്ലാച്ചേരി എന്നിവർ വെണ്ണിക്കുളത്തുനിന്നുള്ള പദയാത്രയ്ക്ക് നേതൃത്വം നൽകി.

സ്വീകരണം നൽകി

കോന്നി: ധന്യൻ ആർച്ച് ബിഷപ് മാർ ഈവാനിയോസ് അനുസ്മരണ തീർഥാടന പദയാത്രയ്ക്ക് മലങ്കര കാത്തലിക് അസോസിയേഷൻ കോന്നി വൈദി‌ക ജില്ലാ നേതൃത്വത്തിൽ കോന്നി ടൗണിൽ സ്വീകരണം നൽകി. വിവിധ യൂണിറ്റ് പ്രതിനിധികൾ പങ്കെടുത്തു. സ്വീകരണ സമ്മേളനം എംസിഎ രൂപതാ എക്സിക്യൂട്ടീവ് അംഗം ജോബിൻ ഈനോസ് ഉദ്ഘാടനം ചെയ്തു. ജില്ലാ പ്രസിഡന്റ് വിൽസൺ പട്ടേരിൽ അധ്യക്ഷത വഹിച്ചു. ജില്ലാ സെക്രട്ടറി ജോൺസൺ ജോസഫ്, ട്രഷറർ റോയി തോമസ് എന്നിവർ പ്രസംഗിച്ചു. വടശേരിക്കര: ദൈവദാസൻ മാർ ഈവാനിയോസ് അനുസ്മരണ തീർഥാടന പദയാത്രയ്ക്ക് വടശേരിക്കര സെന്‍റ് തോമസ് കനാനായ കുരിശടിയിൽ യുസിഎനേതൃത്വത്തിൽ സ്വീകരണം നല്കി. സെക്രട്ടറി ബെന്നി പുത്തൻപറമ്പിൽ കാട്ടുവള്ളി കുരിശിൽ പ്രത്യേക ഹാരം അണിയിച്ച് സ്വീകരിച്ചു. ഫാ. ജോബ് പതാലിൽ, സർവീസ് സഹകരണ ബാങ്ക് പ്രസിഡന്‍റ് പി.എം. വർഗീസ്, സന്തോഷ് കെ. ചാണ്ടി, മർത്തമറിയം പള്ളി സെക്രട്ടറി റോയി സൈമൺ, ഷാജി പന്തോളിപ്പീടികയിൽ, അനു വടശേരിക്കര, തോമസ് ചാക്കോ എന്നിവർ നേതൃത്വം നൽകി.

പദയാത്രയ്ക്കു പുല്ലാട്ട് സ്വീകരണം

പുല്ലാട്: മലങ്കര സുറിയാനി കത്തോലിക്കാ സഭയുടെ പ്രഥമ മെത്രാപ്പോലീത്തൻ ആർച്ച്ബിഷപ്പായിരുന്ന ധന്യൻ മാർ ഈവാനിയോസിന്‍റെ ഓർമപ്പെരുന്നാളിനോടനുബന്ധിച്ച് വെണ്ണിക്കുളം മേഖലയിൽ നിന്നുള്ള തീർഥാടന പദയാത്രയ്ക്ക് പുല്ലാട് ശ്രീവിവേകാനന്ദ ഹൈസ്കൂളിൽ സ്വീകരണം നൽകി. സ്കൂൾ സ്ഥാപകനായ വരിക്കണ്ണാമല വൈദ്യൻ എൻ. നാരായണപ്പണിക്കരും ഈവാനിയോസ് മെത്രാപ്പോലീത്തയും തമ്മിലുള്ള സുദൃഢമായ സാഹോദര്യത്തിന്‍റെ സ്മരണകളുമായി എത്തുന്ന പദയാത്രയെ അധ്യാപകരും അനധ്യാപകരും മാനേജ്മെന്‍റ് പ്രതിനിധികളും ചേർന്ന് സ്വീകരിച്ചു. സ്കൂൾ പ്രഥമാധ്യാപകൻ സുധീർ ചന്ദ്രനും പിടിഎ പ്രസിഡന്‍റ് കെ.ജി. ജി രാജേന്ദ്രൻ നായരും കുരിശിൽ ഷാൾ അണിയിച്ച് പദയാത്രയെ സ്വീകരിച്ചു. വികാരി ജനറൽ ഡോ. ഐസക് പറപ്പള്ളി അനുഗ്രഹ പ്രഭാഷണം നടത്തി. എംസിഎ പ്രസിഡന്‍റ് ഷാജി പൂച്ചേരി നന്ദി പറഞ്ഞു. ‌വരിക്കണ്ണാമല കുടുംബാംഗങ്ങൾക്കു വേണ്ടി അനീഷ് വരിക്കണ്ണാമലയുടെ നേതൃത്വത്തിൽ സ്വീകരിച്ചു. പുല്ലാട് ജംഗ്ഷനിൽ തിരുവല്ല അതിരൂപതാധ്യക്ഷൻ തോമസ് മാർ കൂറിലോസ് മെത്രാപ്പോലീത്തയുടെ നേതൃത്വത്തിലെത്തിയ പദയാത്രയെ അമൃത ഗോശാല ചെയർമാൻ അജയകുമാർ വല്ല്യുഴത്തിലിന്‍റെ നേതൃത്വത്തിൽ സ്വീകരിച്ചു.

കാഷായധാരികളായി തീർഥാടകർ, മാർ ഈവാനിയോസ് സ്മരണയിൽ വീഥികൾ

പത്തനംതിട്ട: ധന്യൻ മാർ ഈവാനിയോസ് മെത്രാപ്പോലീത്തയുടെ സ്മരണയിൽ തിരുവനന്തപുരം പട്ടം സെന്‍റ് മേരീസ് കത്തീഡ്രലിനെ ലക്ഷ്യമാക്കി നീങ്ങുന്ന കാഷായ വസ്ത്രധാരികളെക്കൊണ്ട് വീഥികൾ നിറഞ്ഞു. റാന്നി പെരുനാട്ടിൽ നിന്നും പുറപ്പെട്ട പ്രധാന തീർഥാടക സംഘം ഇന്നലെ വൈകുന്നേരം മൈലപ്രയിലെത്തിയപ്പോൾ കോന്നിയിൽ നിന്നുള്ള പദയാത്രികരും ഒപ്പം ചേർന്നു. പത്തനംതിട്ട നഗരത്തിലൂടെ സെന്‍റ് പീറ്റേഴ്സ് കത്തീഡ്രൽ ദേവാലയത്തിലെത്തിയ തീർഥാടകർക്ക് ഇടവക സ്വീകരണം നൽകി. തുടർന്ന് പുത്തൻപീടിക സെന്‍റ് തോമസ് ദേവാലയത്തിലെത്തിയ തീർഥാടകർ ഇന്നലെ രാത്രി അവിടെ തങ്ങി. ഇന്നലെ രാവിലെ പെരുനാട്ടിൽ കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ ആശിർവദിച്ച പദയാത്രയ്ക്ക് നേതൃത്വം നൽകി ബിഷപ്പുമാരായ തോമസ് മാർ അന്തോണിയോസും ആന്‍റണി മാർ സിൽവാനോസും മുന്പിലുണ്ട്. നിരവധി വൈദികരും സന്യസ്തരും അടക്കം നൂറു കണക്കിനാളുകളാണ് പദയാത്രയിൽ പങ്കാളിയായിരിക്കുന്നത്. ഇന്നു രാവിലെ പുത്തൻപീടികയിൽ പുറപ്പെടുന്ന സംഘത്തോടൊപ്പം തിരുവല്ല അതിരൂപത പദയാത്ര സംഘം ഓമല്ലൂരിൽ സംഗമിക്കും. കൈപ്പട്ടൂർ, ചന്ദനപ്പള്ളി, കൊടുമൺ, ആനന്ദപ്പള്ളി വഴിയാണ് തീർഥാടകസംഘം അടൂരിലെത്തുന്നത്. തുടർന്ന് തീർഥാടകർ എംസി റോഡു വഴി തിരുവനന്തപുരത്തേക്ക് നീങ്ങും. ഇന്ന് പുതുശേരിഭാഗം ദേവാലയത്തിലാണ് തങ്ങുന്നത്. കോന്നി വൈദിക ജില്ല പദയാത്ര മുറിഞ്ഞകല്ലിൽനിന്ന് ധന്യൻ ആർച്ച് ബിഷപ് മാർ ഈവാനിയോസിന്‍റെ ഓർമപ്പെരുന്നാളിനോടനുബന്ധിച്ച് മലങ്കര കാത്തലിക് യൂത്ത്മൂവ്മെന്‍റ് കോന്നി വൈദികജില്ലയുടെ നേതൃത്വത്തിലുള്ള തീർഥാടന പദയാത്ര മുറിഞ്ഞകൽ സെന്‍റ് തേരേസ ദേവാലയത്തിൽ നിന്നും ഇന്നലെ രാവിലെ ആരംഭിച്ചു. വൈദികജില്ലയിലെ വൈദികരുടെ മുഖ്യകാർമികത്വത്തിൽ നടന്ന സമൂഹബലിക്ക് ഫാ. വർഗീസ് കൈതോൺ മുഖ്യകാർമികത്വം വഹിച്ചു. ആശിർവദിച്ച വള്ളിക്കുരിശ് വൈദികജില്ല പ്രസിഡന്റ്‌ പ്രിൻസ് റെജിയും എംസിവൈഎം പതാക ജില്ലാ സെക്രട്ടറി അബു മോനാച്ചനും ഏറ്റുവാങ്ങി. വകയർ, കോന്നി, കിഴവള്ളൂർ, കുമ്പഴ ദേവാലയങ്ങളിലൂടെ മൈലപ്ര തിരുഹൃദയ ദേവാലയത്തിൽ പെരുനാട്ടിൽ നിന്നുള്ള തീർഥാടകസംഘവുമായി ചേർന്നു. ജില്ലാവികാരി ഫാ. വർഗീസ് കൈതോൺ, എംസിവൈഎം ജില്ലാ ‍ഡയറക്ടർ ഫാ. വർഗീസ് തയ്യിൽ, ജോസഫ് കുരുമ്പിലേത്ത് കോർ എപ്പിസ്കോപ്പ, ഫാ. ജോർജ് മാത്യു, ഫാ. വർഗീസ് കൂത്തനേത്ത്, ഫാ സ്ലീബാദാസ് ചരിവുപുരയിടത്തിൽ, ഫാ ബിജോയി ജേക്കബ് തുണ്ടിയത്, ഫാ. ജോർജ് വർഗീസ് പുതുപ്പമ്പിൽ, ഫാ. സിജോ ജെയിംസ്, ഫാ. ജീമോൻ കുന്നുംപുറത്ത്, ഫാ. ജസ്റ്റിൻ പരുവപ്ലാക്കൽ, സിസ്റ്റർ നിലീന എസ്ഐസി, ജില്ലാ ഭാരവാഹികളായ തേജസ് എസ്. തോമസ്, ഹെന്‍ റി ജിയോ റെജി, പ്രിൻസ് ഏബ്രഹാം, റിയ അന്ന വർഗീസ് തുടങ്ങിയവർ സന്നഹിതരായിരുന്നു.

കോൺഗ്രസ് സമരസംഗമം നാളെ

പത്തനംതിട്ട: സംസ്ഥാന സര്‍ക്കാരിന്‍റെ കെടുകാര്യസ്ഥത, അഴിമതി, ജനദ്രോഹ നടപടികൾ, വന്യജീവി ആക്രമണം, ആരോഗ്യമേഖലയുടെ തകര്‍ച്ച എന്നിവയ്ക്കെതിരേ ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നാളെ രാവിലെ 10ന് പത്തനംതിട്ട റോയല്‍ ഓഡിറ്റോറിയത്തില്‍ സമര സംഗമം സംഘടിപ്പിക്കും. കെപിസിസി പ്രസിഡന്‍റ് സണ്ണി ജോസഫ് എം‌എല്‍എ സമരസംഗമം ഉദ്ഘാടനം ചെയ്യും.

അടൂർ ഗവൺമെന്‍റ് ഹൈസ്കൂളിന്‍റെ ഗേറ്റ് പണിമുടക്ക് അനുകൂലികൾ ബന്ധിച്ചു

അടൂർ: ഗവൺമെന്‍റ് ഹൈസ്കൂളിൽ ജോലിക്കെത്തിയ അധ്യാപകരെ തിരികെ വിടാതിരിക്കാൻ കവാടത്തിലെ ഗേറ്റ് പണിമുടക്കനുകൂലികൾ ചങ്ങലയിട്ട് ബന്ധിച്ചു ഗേറ്റിന്‍റെ ഇരുപാളികളും ചേർത്തടച്ച ശേഷം ചങ്ങലകൊണ്ട് ചുറ്റി ഓടാമ്പലിൽ കമ്പി കഷണം വളച്ച് ഗേറ്റ് തുറക്കാനാകാത്ത വിധം ബന്ധിക്കുകയായിരുന്നു. പ്രതിഷേധം വകവയ്ക്കാതെ സ്കൂളിൽ ഇരുന്ന അധ്യാപകരെ തിരികെ വിടാതിരിക്കാൻ ഇന്നലെ രാവിലെ 10.30 നാണ് ഗേറ്റ് പൂട്ടിയതെന്ന് പറയുന്നു. വൈകുന്നേരം അധ്യാപകർ തിരികെ വന്നപ്പോഴാണ് ഗേറ്റ് തുറക്കാനാകാത്ത വിവരം അറിയുന്നത്. പിന്നീട് പോലീസെത്തി തുറക്കുകയായിരുന്നു.

കോയിപ്രം, കുളനട പഞ്ചായത്ത് ഓഫീസുകളിൽ ജോലിക്കെത്തിയവരെ തടഞ്ഞു

കോഴഞ്ചേരി: കോയിപ്രം ഗ്രാമപഞ്ചായത്ത് ഓഫീസിൽ ജോലിക്കെത്തിയവരെ തടഞ്ഞത് ബഹളത്തിനിടയാക്കി. എൻജിഒ അസോസിയേഷൻ, എൻജിഒ സംഘ് സംഘടനയിൽപെട്ടവർ ജോലിക്കെത്തിയതോടെ സമരാനുകൂലികൾ ഓഫീസിൽ കയറി ബഹളമുണ്ടാക്കുകയായിരുന്നു. വിവരം അറിഞ്ഞെത്തിയ പോലീസ് സംഘം സമരക്കാരെ നീക്കിയതോടെയാണ് പ്രശ്നപരിഹാരമായത്. സംയുക്ത സമരസമിതി കോഴഞ്ചേരി മേഖലാ കമ്മിറ്റിയുടെ നേതൃത്വത്തില്‍ കോഴഞ്ചേരി ടിബി ജംഗ്ഷനില്‍ നിന്ന് ടൗണിലേക്ക് പ്രതിഷേധ പ്രകടനവും യോഗവും നടന്നു. സിഐടിയു നേതാവ് റ്റി.വി. സ്റ്റാലിന്‍ ഉദ്ഘാടനം ചെയ്തു. ജോണ്‍സണ്‍ ചക്കനാട് അധ്യക്ഷത വഹിച്ച യോഗത്തില്‍ ടിയുസിഐ ജില്ലാ സെക്രട്ടറി കെ.ഐ. ജോസഫ്, സിപിഐ ജില്ലാ എക്‌സിക്യൂട്ടീവ് അംഗം ശരത്ചന്ദ്രകുമാർ, രാജന്‍ വര്‍ഗീസ്, ബിജിലി പി. ഈശോ, നൈജില്‍ കെ. ജോണ്‍ തുടങ്ങിയവർ പ്രസംഗിച്ചു. കുളനട: ഗ്രാമപഞ്ചായത്ത് ഓഫീസിൽ ജോലിക്കെത്തിയവരും ട്രേഡ് യൂണിയൻ പ്രവർത്തകരുമായി തർക്കം. ബിജെപി ഭരിക്കുന്ന ഗ്രാമപഞ്ചായത്തിൽ കൂടുതൽ ജീവനക്കാർ രാവിലെ തന്നെ ഓഫീസിൽ എത്തിയിരുന്നു. പോലീസെത്തി ജോലി തടസപ്പെടുത്തരുതെന്നറിയിച്ചതോടെ സമരക്കാർ ഓഫീസിന് മുമ്പിൽ കുത്തിയിരുന്നു. ഇടയ്ക്ക് ഓഫീസ് വിട്ടുപോകാൻശ്രമിച്ച ജീവനക്കാരെ സമരക്കാർ തടഞ്ഞു. ഓഫീസ് സമയമായ അഞ്ചുവരെ ജോലിചെയ്തശേഷം പോയാൽ മതിയെന്നായിരുന്നു സമരക്കാരുടെ ആവശ്യം. പോലീസെത്തി ജീവനക്കാർക്ക് സംരക്ഷണം നൽകി. അഞ്ചിനു ശേഷം ജീവനക്കാർ പുറത്തിറങ്ങുന്നത് തടയാൻശ്രമിച്ച സമരാനുകൂലികളെ പോലീസ് ബലം പ്രയോഗിച്ച് നീക്കംചെയ്തു.

ഹെൽമറ്റ് ധരിച്ച് കെഎസ്ആർടിസി ഡ്രൈവർ

അടൂർ: സ്വന്തം തല സംരക്ഷിക്കാനായി ഹെൽമറ്റ് ധരിച്ച് പണിമുടക്ക് ദിവസം ബസോടിച്ച് കെഎസ്ആർടിസി ബസ് ഡ്രൈവർ. പത്തനംതിട്ട കെഎസ്ആർടിസി ഡിപ്പോയിലെ ഡ്രൈവർ കുമ്പളാംപൊയ്ക സ്വദേശി ഷിബു തോമസാണ് ഹെൽമറ്റ് ധരിച്ച് ബസോടിച്ചത്. കണ്ടക്ടറായി കീരുകുഴി പാലവിളയിൽ ഡിക്സൺ കെ. ഡൊമനിക്കും ഒപ്പം കൂടി. കെഎസ്ആർടിസിയിൽ താത്കാലിക ജീവനക്കാരാണ് ഇരുവരും. പത്തനംതിട്ട ഡിപ്പോയിൽ നിന്നും രാവിലെ 6.20നു കൊല്ലത്തേക്കുള്ള ആർഎൻകെ 482 ചെയിൻ സർവീസ് ബസിലാണ് ഇരുവരും ജോലിക്കെത്തിയത്. രാവിലെ ബസ് പുറപ്പെടുന്പോൾ യാത്രക്കാരും ഉണ്ടായിരുന്നു. എന്നാൽ അടൂരിൽ ബസ് എത്തിയപ്പോൾ സമരാനുകൂലികൾ തടഞ്ഞു. സർവീസ് പാതിവഴിയിൽ അവസാനിപ്പിക്കേണ്ടി വന്നതോടെ ഷിബുവിനും ഡിക്സനും ജോലി തുടരാനായില്ല. ബസിന് നേരേ ആരെങ്കിലും കല്ല് വലിച്ചെറിത്താൽ അപകടം സംഭവിക്കാതിരിക്കാനാണ് ഹെൽമറ്റ് ധരിച്ചതെന്ന് ഡ്രൈവർ പറഞ്ഞു. ജോലി ചെയ്തെങ്കിൽ മാത്രം കൂലി ലഭിക്കുന്ന തങ്ങൾ പണിമുടക്കിയിട്ടെന്തു കാര്യമെന്ന് ഇരുവരും ചോദിക്കുന്നു.

പണിമുടക്ക് പൂർണം; ജനജീവിതത്തെ ബാധിച്ചു

പത്തനംതിട്ട: സംയുക്ത ട്രേഡ് യൂണിയനുകൾ ആഹ്വാനം ചെയ്ത പൊതുപണിമുടക്കിൽ ജനജീവിതം സ്തംഭിച്ചു. ഇടതു, വലതു ട്രേഡ് യൂണിയനുകൾ വ്യത്യസ്ത വേദികളിലായാണ് ഇത്തവണ പൊതുപണിമുടക്കിൽ പങ്കെടുത്തത്. പണിമുടക്കിനേ തുടർ‌ന്ന് ഓഫീസുകളുടെയും സ്കൂളുകളുടെയും പ്രവർത്തനം തടസപ്പെട്ടു. കടകന്പോളങ്ങൾ അടഞ്ഞു കിടന്നു. പൊതുഗതാഗതവും തടസപ്പെട്ടു. രാവിലെ ചുരുക്കം ചില കെഎസ്ആർടിസി ബസുകൾ ഓടിയെങ്കിലും ഉച്ചയോടെ ഇവയും തടസപ്പെട്ടു. തുറന്ന ഓഫീസുകൾ അടപ്പിക്കാനും സർവീസ് നടത്തിയ ബസുകൾ നിർത്തിവയ്പിക്കാനും ചില ശ്രമങ്ങൾ നടന്നതൊഴിച്ചാൽ പണിമുടക്ക് പൊതുവെ സമാധാനപരമായിരുന്നു. യുഡിഎഫ്, ബിജെപി അനുകൂല സർവീസ് സംഘടനകളും അധ്യാപകരും പണിമുടക്കിൽ നിന്നുവിട്ടു നിന്നിരുന്നു. ഇവർ ജോലിക്കെത്തിയെങ്കിലും പലയിടങ്ങളിലും തടസങ്ങളുണ്ടായി. ജില്ലാ ആസ്ഥാനത്തേതുൾപ്പെടെ മിക്ക സർക്കാർ ഓഫീസുകളും അടഞ്ഞു കിടന്നു. ഓഫീസ് മേധാവികൾ എത്താതിരുന്നതിനാൽ ഇവ തുറക്കാനായില്ല. സെറ്റോ സർവീസ് സംഘടനകൾ പണിമുടക്കിൽ പങ്കെടുത്തിരുന്നില്ല. ജോലിക്കെത്തിയ ഇവരെ പിന്തിരിപ്പിക്കാൻ ഇടത് സംഘടനകൾ ശ്രമിച്ചതായും പരാതിയുണ്ട്. ചില സ്കൂളുകളിൽ ജോലിക്കെത്തിയ അധ്യാപകരെയും തടയാൻ ശ്രമമുണ്ടായി.

ഓമല്ലൂരിൽ സിപിഎം - ബിജെപി സംഘർഷം

പത്തനംതിട്ട: ഓമല്ലൂര്‍ - പന്ന്യാലിയില്‍ സിപിഎം - ബിജെപി സംഘർഷത്തിൽ മൂന്നു പേർക്ക് പരിക്ക്. ബിജെപി പ്രവര്‍ത്തകനായ ടി.പി. അഖില്‍ (26), സിപിഎം പ്രവര്‍ത്തകരായ പ്രദീപ്, അരുണ്‍ എന്നിവര്‍ക്കാണ് പരിക്കേറ്റത്. പ്രദീപിനും അരുണിനും തലയ്ക്ക് വെട്ടേറ്റു. ഇന്നലെ വൈകുന്നേരമാണ് സംഭവം. തങ്ങളെയാണ് ആദ്യം ആക്രമിച്ചത് എന്നാണ് ഇരുകൂട്ടരും പറയുന്നത്. രണ്ടു വാഹനങ്ങളിലായി അഞ്ചെട്ടു പേര്‍ വീട്ടിലേക്ക് മാരകായുധങ്ങളുമായി അതിക്രമിച്ചു കയറി അഖിലിനെ ആക്രമിച്ചുവെന്നാണ് മാതാവ് പ്രസന്നകുമാരിയുടെ മൊഴി. കുഞ്ഞിനെയും എടുത്തുകൊണ്ടു നിന്ന തന്നെയും തള്ളി വീഴ്ത്താന്‍ ശ്രമിച്ചതായി ഇവർ പറഞ്ഞു. അതേസമയം, പൊതുവഴിയിലൂടെ പോയ സിപിഎം പ്രവർത്തകരായ യുവാക്കളെ ടി.പി. അഖില്‍ ആക്രമിക്കുകയായിരുന്നുവെന്ന് സിപിഎം ലോക്കല്‍ സെക്രട്ടറി ബൈജു ഓമല്ലൂര്‍ പറഞ്ഞു.

‘സുമുദ് ’ഇന്‍റർ പോളിടെക്‌നിക് കലോത്സവം ഇന്നുമുതൽ അടൂരിൽ

പത്തനംതിട്ട: സംസ്ഥാന ഇന്‍റർ പോളിടെക്‌നിക് കലോത്സവമായ സുമുദ് 2025 ന് ഇന്നു തിരിതെളിയും. അടൂർ മണക്കാല പോളിടെക്‌നിക് കോളജിലാണ് കലോത്സവം. 2024-25 വർഷത്തെ സംസ്ഥാന പോളിടെക്നിക് കോളജ് വിദ്യാർഥി യൂണിയനും സംഘാടകസമിതിയും ചേർന്നാണ് സംസ്ഥാനത്തെ സാങ്കേതിക വിദ്യാർഥികളുടെ കലാമേള അടൂരിൽ സംഘടിപ്പിക്കുന്നത്. 13വരെ നീളുന്ന കലോത്സവത്തിൽ നൂറിലധികം കോളജുകളിൽ നിന്നുള്ള 5000ത്തോളം പ്രതിഭകൾ ആറുവേദികളിലായി നടക്കുന്ന മത്സരങ്ങളിൽ പങ്കെടുക്കും. ഇന്ന് വൈകുന്നേരം നാലിന് ചലച്ചിത്ര താരം വിനയ് ഫോർട്ട് കലോത്സവം ഉദ്ഘാടനം ചെയ്യും.സംസ്ഥാന ഇന്‍റർപൊളിടെക്‌നിക് കോളജ് യൂണിയൻ ചെയർമാൻ മുഹമ്മദ്‌ അൻസിൽ അധ്യക്ഷത വഹിക്കും. ഡെപ്യൂട്ടി സ്‌പീക്കർ ചിറ്റയം ഗോപകുമാർ,ഡെപ്യൂട്ടി ഡയറക്ടർ ഷിനു ഏബ്രഹാം,പോളിടെക്‌നിക് യൂണിയൻ ജനറൽ സെക്രട്ടറി വൈഷ്ണ നാരായണൻ, സീനിയർ ജോയിന്‍റ് ഡയറക്ടർ ആനി ഏബ്രഹാം, കൺവീനർ അനന്ദു മധു തുടങ്ങിയർ പ്രസംഗിക്കും.

ധന്യൻ മാർ ഈവാനിയോസ് അനുസ്മരണ പദയാത്രയ്ക്ക് ഇന്നു തുടക്കം

പത്തനംതിട്ട: ധന്യൻ മാർ ഈവാനിയോസ് 72 -ാമത് ഓർമപ്പെരുന്നാളിനോടനുബന്ധിച്ച അനുസ്മരണ പദയാത്ര ഇന്നു രാവിലെ റാന്നി പെരുന്നാട്ടിൽ നിന്നാരംഭിക്കും. രാവിലെ 6.30ന് പ്രഭാത പ്രാർഥനയേ തുടർന്ന് മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവയുടെ പ്രധാന കാർമികത്വത്തിൽ പെരുനാട് കുരിശുമല തീർഥാടന ദേവാലയത്തിൽ വിശുദ്ധ കുർബാന അർപ്പിക്കും. തുടർന്ന് പദയാത്രയുടെ ഉദ്ഘാടനം കർദിനാൾ മാർ ബസേലിയോസ് ക്ലീമിസ് ബാവ നിർവഹിക്കും. പത്തനംതിട്ട ഭദ്രാസനാധ്യക്ഷൻ ഡോ.സാമുവേൽ മാർ ഐറേനിയോസ്, മുൻ അധ്യക്ഷൻ യൂഹാനോൻ മാർ ക്രിസോസ്റ്റം, ഗുഡ്ഗാവ് രൂപതാധ്യക്ഷൻ ഡോ.തോമസ് മാർ അന്തോണിയോസ്, കൂരിയ ബിഷപ് ഡോ. ആന്‍റണി മാർ സിൽവാനോസ് തുടങ്ങിയവർ പങ്കെടുക്കും. തുടർന്ന് പദയാത്രയുടെ വള്ളിക്കുരിശ് എംസിവൈഎം പത്തനംതിട്ട ഭദ്രാസന പ്രസിഡന്‍റ് ബിൻ ഏബ്രഹാമും കാതോലിക്ക പതാക സഭാതല പ്രസിഡന്‍റ് മോനു ജോസഫും എംസിവൈഎം പതാക പത്തനംതിട്ട ഭദ്രാസന ജനറൽ സെക്രട്ടറി സുബിൻ തോമസും ഏറ്റുവാങ്ങും. സഭാ പിതാക്കൻമാരുടെ നേതൃത്വത്തിൽ ആരംഭിക്കുന്ന പദയാത്ര വടശേരിക്കര വഴി വൈകുന്നേരം പത്തനംതിട്ട സെന്‍റ് പീറ്റേഴ്സ് കത്തീഡ്രലിൽ എത്തും. പത്തനംതിട്ടയിൽ കോന്നി, പത്തനംതിട്ട വൈദികജില്ലകളുടെ പദയാത്രകൾ പ്രധാന പദയാത്രാ സംഘവുമായി സംഗമിക്കും. നാളെ രാവിലെ പത്തനംതിട്ടയിൽ നിന്നു യാത്ര പുറപ്പെടുന്ന തീർഥാടകസംഘത്തോടൊപ്പം ഓമല്ലൂരിൽ തിരുവല്ല അതിരൂപതയിൽ നിന്നും പദയാത്രാ സംഘവും ചേരും. അടൂർ, പുതുശേരിഭാഗം, ഏനാത്ത്, കൊട്ടാരക്കര, ആയൂർ, പിരപ്പൻകോട് വഴി തീർഥാടകർ 14നു വൈകുന്നേരം തിരുവനന്തപുരത്തെത്തും. കത്തിച്ച മെഴുകുതിരികളുമേന്തി പട്ടം സെന്‍റ് മേരീസ് കത്തീഡ്രലിൽ ധന്യൻ മാർ ഈവാനിയോസ് മെത്രാപ്പോലീത്തയുടെ കബറിങ്കലാണ് പദയാത്ര സമാപിക്കുന്നത്. പദയാത്രയുടെ ഒരുക്കധ്യാനത്തിനു മുന്നോടിയായി ഇന്നലെ വൈകുന്നേരം നടന്ന വിശുദ്ധ കുർബാനയ്ക്ക് ബിഷപ് ഡോ.തോമസ് മാർ അന്തോണിയോസ് കാർമികത്വം വഹിച്ചു. ഫാ. ജോഷ്വാ കൊച്ചുവിളയിൽ ധ്യാനം നയിച്ചു. തുടർന്ന് മഹാരഥൻ മാർ ഈവാനിയോസ് എന്ന ധന്യൻ മാർ ഈവാനിയോസിന്‍റെ ജീവചരിത്രത്തിന്‍റെ കഥാപ്രസംഗ ആവിഷ്കാരം കാഥികൻ കല്ലട വി.വി. ജോസ് അവതരിപ്പിച്ചു. നിലയ്ക്കലിൽ നിന്നുള്ള വള്ളിക്കുരിശ് പ്രയാണത്തിന് ഇന്നു രാവിലെ പെരുനാട് ദേവാലയത്തിൽ സ്വീകരണം നൽകും. സ്വീകരണം നൽകും വെണ്ണിക്കുളം: മലങ്കര സുറിയാനി കത്തോലിക്കാ സഭയുടെ പ്രഥമ മെത്രാപ്പോലീത്തൻ ആർച്ച് ബിഷപ്പായിരുന്ന ധന്യൻ മാർ ഈവാനിയോസിന്‍റെ ഓർമപ്പെരുന്നാളിനോടനുബന്ധിച്ച് വെണ്ണിക്കുളം മേഖലയിൽ നിന്നും തിരുവനന്തപുരം കബറിങ്കലേക്കുള്ള തീർഥാടന പദയാത്രയ്ക്ക് ഇന്ന് രാവിലെ 11.30 ന് പുല്ലാട് വരിക്കണ്ണാമല കുടുംബം സ്വീകരണം നൽകും. വരിക്കണ്ണാമല വൈദ്യൻ എൻ. നാരായണപ്പണിക്കരും ഈവാനിയോസ് മെത്രാപ്പോലീത്തയും തമ്മിലുള്ള സുദൃഢമായ സാഹോദര്യ ബന്ധത്തിന്‍റെ സ്മരണകളുയർത്തിയാണ് സ്വീകരണം.

വെൽഡൺ, റെസ്ക്യൂ ടീം

പത്തനംതിട്ട: അത്യന്തം അപകടകരമായ സാഹചര്യത്തിൽ രണ്ടുദിവസം നീണ്ട രക്ഷാദൗത്യത്തിൽ പങ്കെടുത്ത ഫ‍യർഫോഴ്സ്, എൻഡിആർഎഫ് സംഘാംഗങ്ങളുടെ പ്രവർത്തനങ്ങൾ ഏറെ ശ്ലാഘിക്കപ്പെട്ടു. കോന്നി പയ്യനാമൺ ചെങ്കുളത്ത് ക്വാറിയിലെ അപകടവിവരം അറിഞ്ഞ ഉടൻ സ്ഥലത്തെത്തിയ ഫയർഫോഴ്സ് സംഘത്തിന് ആദ്യം അപകടത്തിന്‍റെ രൂക്ഷത അത്രയും വെളിവായില്ല. പാറമടയ്ക്കുള്ളിൽ അടർന്നുവീണ പാറയ്ക്കടയിൽ ഒരു മൃതദേഹം അപ്പോൾ തന്നെ കാണാനായി. ഇതു പുറത്തെടുക്കാനാകുമെന്ന പ്രതീക്ഷയിൽ പ്രവർത്തനം തുടങ്ങിയ സംഘത്തിനു വെല്ലുവിളിയായത് തുടർച്ചയായ പാറ ഇടിച്ചിൽ ആയിരുന്നു. പല കോണുകളിൽ നിന്നും കല്ലുകൾ അടർന്നു വീഴാൻ തുടങ്ങിയതോടെ പ്രവർത്തനം ദുഷ്കരമായി. കൂടുതൽ സേനാംഗങ്ങൾ വടവും ചങ്ങലയും ക്രെയിനുമായി സ്ഥലത്തെത്തി. ജില്ലയിൽ ക്യാന്പ് ചെയ്തിരുന്ന 27 അംഗ എൻഡിആർഎഫ് സംഘവും പാഞ്ഞെത്തി. വൈകുന്നേരത്തോടെ പാറകൾ നീക്കി ഒരു മൃതദേഹം പുറത്തെടുത്തതിനു പിന്നാലെ ഉണ്ടായ പാറ ഇടിച്ചിലാണ് ഇനിയുള്ള രക്ഷാദൗത്യത്തെ പിന്നോട്ടടിച്ചത്. മൃതദേഹം പുറത്തെടുക്കാൻ നാലംഗഫയർഫോഴ്സ് സംഘം ഇറങ്ങിയ അതേ സ്ഥാനത്തേക്ക് അടർന്നുവീണ പാറക്കെട്ടുകൾ കണ്ട് എല്ലാവരും ഭയന്നു. അല്പ സമയം മുന്പാണ് ഇതു സംഭവിച്ചിരുന്നതെങ്കിൽ എന്നോർത്ത് സ്ഥലത്തുണ്ടായിരുന്ന ജില്ലാ കളക്ടർ എസ്. പ്രേംകൃഷ്ണൻ അടക്കം നെടുവീർപ്പിട്ടു. ചൊവ്വാഴ്ച രാവിലെ രക്ഷാദൗത്യം പുനരാരംഭിച്ചത് മാസ്റ്റർ പ്ലാനിന്‍റെ അടിസ്ഥാനത്തിലായിരുന്നുവെങ്കിലും പാറ ഇടിച്ചിൽ തുടർന്നതോടെ ഇതു നിർത്തിവയ്ക്കേണ്ടിവന്നു. മനുഷ്യസാധ്യമല്ല തുടർ പ്രവർത്തനമെന്നു മനസിലാക്കിയതോടെയാണ് ഉപകരണങ്ങൾ തേടിയത്. വൈകുന്നേരത്തോടെ ആലപ്പുഴയിൽ നിന്നു ലോംഗ് ബൂം ഹിറ്റാച്ചി സ്ഥലത്തെത്തി. പിന്നീടു കാര്യങ്ങൾ വേഗത്തിലായി. പാറമടയുടെ കരയിൽ നിന്നുകൊണ്ട് ഹിറ്റാച്ചിയുടെ കൈ ഉപയോഗിച്ച് കുടുങ്ങിക്കിടക്കുന്ന ഹിറ്റാച്ചിയെ തൊടാമെന്നായി. സമീപത്തെ പാറക്കല്ലുകൾ നീക്കി ഹിറ്റാച്ചിയുടെ കാബിൻ ഉയർത്താനായി പിന്നീടുള്ള ശ്രമം. രണ്ടര മണിക്കൂറോളം നീണ്ട ശ്രമത്തിനൊടുവിൽ ചൊവ്വാഴ്ച രാത്രി 8.30ഓടെ അജയ് റായിയുടെ മൃതദേഹം ഹിറ്റാച്ചിക്കുള്ളിൽ കണ്ടു. അഗ്നിരക്ഷാ സേനയുടെ പ്രത്യേക ദൗത്യസംഘത്തിലെ അമൽ, ജിത്ത്, ബിനുമോൻ എന്നിവർ വടത്തിൽ സാഹസികമായി താഴേക്ക് ഇറങ്ങി. മൃതദേഹം ഇവർ പുറത്തെത്തിച്ചതോടെ സാഹസികമായ ഒരു ദൗത്യം പൂർത്തിയായി. ഫയർ ആൻഡ് റസ്ക്യൂ വിഭാഗത്തിന്‍റെ 20 അംഗ ടീമാണ് രാവിലെ മുതൽ ദൗത്യം നടത്തിയത്. ജില്ലാ ഭരണകൂടത്തിന്‍റെ മേൽനോട്ടത്തിലാണ് അഗ്നിസുരക്ഷാ സേന, എൻഡിആർഎഫ് എന്നിവയുടെ പ്രവർത്തനം ഏകോപിപ്പിച്ചത്. ജില്ലാ കളക്ടർ എസ്. പ്രേംകൃഷ്ണൻ രണ്ടുദിവസവും സ്ഥലത്തു ക്യാന്പ് ചെയ്തിരുന്നു. എഡിഎം ബി. ജ്യോതി, ദുരന്ത നിവാരണ വിഭാഗം ഡെപ്യൂട്ടി കളക്ടർ ആർ. രാജ‌ലക്ഷ്മി തുടങ്ങിയവരും സ്ഥലത്തുണ്ടായിരുന്നു. ഫയർഫോഴ്സ് ജില്ലാ ഓഫീസർ ബി.എം. പ്രതാപചന്ദ്രൻ, അസിസ്റ്റന്‍റ് സ്റ്റേഷൻ ഓഫീസർ എ. സാബു എന്നിവരാണ് രക്ഷാദൗത്യത്തിനു നേതൃത്വം നൽകിയത്. ദേശീയ ദുരന്ത നിവാരണ സേന നാലാം ബറ്റാലിയൻ ടീം കമാൻഡർ സഞ്ജയ് സിംഗ് മൽസുനിയുടെ നേതൃത്വത്തിൽ 27 അംഗ എൻഡിആർഎഫ് സംഘമാണ് സ്ഥലത്തെത്തിയിരുന്നത്.

പോസ്റ്റ്മോർട്ടം പൂർത്തിയായി, തൊഴിലാളികളുടെ മൃതദേഹം നാട്ടിലെത്തിക്കും

പത്തനംതിട്ട: കോന്നി പയ്യനാമൺ ചെങ്കുളത്ത് പാറമട അപകടത്തിൽ മരിച്ച ഇതര സംസ്ഥാന തൊഴിലാളികളായ ഒഡീഷ സ്വദേശി അജയ് കുമാർ റായ്, ബീഹാർ സ്വദേശി മഹാദേവ് പ്രദാൻ എന്നിവരുടെ പോസ്റ്റ്മോർട്ടം പൂർത്തിയായി. പത്തനംതിട്ട ജനറൽ ആശുപത്രിയിലായിരുന്നു പോസ്റ്റ്മോർട്ടം. മൃതദേഹം എംബാം ചെയ്യുന്നതിന് കോട്ടയത്തേയ്ക്ക് മാറ്റും. അവിടെനിന്ന് ഇവരുടെ നാടുകളിലേക്ക് മൃതദേഹം എത്തിക്കുന്നതിനുള്ള ക്രമീകരണം ചെയ്തുവരികയാണ്. അജയ് റായിയുടെ സഹോദരൻ സച്ചിദാനന്ദ റായ് മൃതദേഹത്തെ അനുഗമിക്കും. മരിച്ചവരുടെ കുടുംബത്തിനുള്ള നഷ്ടപരിഹാരം ഉൾപ്പെടെയുള്ള കാര്യങ്ങളിൽ തീരുമാനമായിട്ടില്ല. മൃതദേഹം നാട്ടിലെത്തിക്കാനുള്ള എല്ലാ ചെലവും വഹിക്കാൻ ക്വാറി ഉടമയ്ക്ക് ജില്ലാ കളക്ടർ നിർദേശം നൽകിയിട്ടുണ്ട്. കോന്നി പോലീസാണ് സംഭവത്തിൽ കേസെടുത്ത് അന്വേഷണം നടത്തിവരുന്നത്. പാറമടയിൽ ഹിറ്റാച്ചി നിയന്ത്രിച്ചിരുന്ന അജയ്റായിയുടെ മൃതദേഹം ചൊവ്വാഴ്ച രാത്രി 8.30 ഓടെയാണ് കണ്ടെടുത്തത്. ആലപ്പുഴയിൽ നിന്നെത്തിച്ച ലോംഗ് ബൂം ഹിറ്റാച്ചി ഉപയോഗിച്ചുള്ള തെരച്ചിലിൽ പാറമടയിൽ കുടുങ്ങിക്കിടന്ന ഹിറ്റാച്ചിയുടെ കാബിനുള്ളിൽ കുടുങ്ങിയ നിലയിലാണ് അജയ് റായിയുടെ മൃതദേഹം കണ്ടെത്തിയത്. തിങ്കളാഴ്ച ഉച്ചകഴിഞ്ഞ് മൂന്നോടെയാണ് പാറമടയിൽ അപകടം ഉണ്ടായത്. അന്നു വൈകുന്നേരം തന്നെ തൊഴിലാളിയായ മഹാദേവ് പ്രദാന്‍റെ മൃതദേഹം പുറത്തെടുത്ത് മോർച്ചറിയിലേക്ക് മാറ്റിയിരുന്നു. രണ്ടുദിവസത്തെ ശ്രമകരമായ ദൗത്യത്തിനൊടുവിലാണ് അജയ് റായിയുടെ മൃതദേഹം പുറത്തെടുക്കാനായത്. ഒഡീഷ സ്വദേശിയായ അജയ് റായ് (38) കുടുംബത്തിന്‍റെ ആശ്രയമായിരുന്നു. മൂന്ന് മക്കളും ഭാര്യയും അങ്ങുന്ന കുടുംബം അജയ് യുടെ വരുമാനത്തിലാണ് കഴിഞ്ഞിരുന്നതെന്ന് സഹോദരൻ സച്ചിദാനന്ദ റായ് പറഞ്ഞു. photo : അപകടത്തിൽ മരിച്ച അജയ റായിയുടെ സഹോദരൻ സച്ചിദാനന്ദ റായ് ജില്ലാ കളക്ടർ എസ്. പ്രേംകൃഷ്ണനു മുന്പിൽ പൊട്ടിക്കരയുന്നു.

പയ്യനാമൺ ക്വാറി ദുരന്തം: പ്രതിഷേധവുമായി നാട്ടുകാർ

നിയമലംഘനത്തിന് ചൂട്ടുപിടിച്ച്, ദുർബല വകുപ്പുകൾ ചുമത്തി എഫ്ഐആർ പത്തനംതിട്ട: പാറക്കൂട്ടം അടർന്നു വീണ് രണ്ട് തൊഴിലാളികൾ ദാരുണമായി കൊല്ലപ്പെട്ട കോന്നി പയ്യനാമൺ ചെങ്കുളത്ത് ക്വാറിയിലെ നിയമലംഘനങ്ങൾ കണ്ടില്ലെന്നു നടിക്കുന്ന അധികൃതരുടെ നിലപാടിൽ പ്രദേശവാസികൾക്കിടയിൽ ശക്തമായ പ്രതിഷേധം. ക്വാറിക്ക് പ്രവർത്തന ലൈസൻസുണ്ടെങ്കിലും താത്കാലികമായ നിരോധനമാണ് ജില്ലാ കളക്ടർ നൽകിയിരിക്കുന്നത്. എന്നാൽ ക്വാറിയുടെ പ്രവർത്തനവുമായി ബന്ധപ്പെട്ട് മുന്പ് നാട്ടുകാർ നൽകിയ പരാതികൾ മറച്ചുപിടിച്ചാണ് അധികൃതരുടെ അന്വേഷണമെന്ന് പറയുന്നു. കാർമല, ചേരിക്കൽ നിവാസികൾ മുന്പ് പാറമടയ്ക്കെതിരേ പരാതി നൽകിയിരുന്നു. അപകടത്തേ തുടർന്നു സ്ഥലത്തെത്തിയ റവന്യൂ, ജിയോളജി, പോലീസ് ഉദ്യോഗസ്ഥർക്ക് നിയമലംഘനങ്ങൾ വ്യക്തമായിട്ടും തുടർ നടപടികളിൽ മെല്ലപ്പോക്ക് തുടരുകയാണ്. ബാലിശമായ വകുപ്പുകൾ ചുമത്തിയാണ് അപകടവുമായി ബന്ധപ്പെട്ടു കോന്നി പോലീസ് എഫ്ഐആറിട്ടിരിക്കുന്നത്. അടൂർ ആർഡിഒ കോടതിയിലാണ് ഇതു സമർപ്പിച്ചത്. അസ്വാഭാവിക മരണത്തിനു മാത്രമാണ് കേസ് ചുമത്തിയിരിക്കുന്നത്. ക്വാറി പ്രവർത്തനവുമായി ബന്ധപ്പെട്ടു നൽകിയിട്ടുള്ള നിർദേശങ്ങൾ മറികടന്നായിരുന്നു പ്രവർത്തനമെന്നു ബോധ്യപ്പെട്ട സാഹചര്യത്തിൽ തൊഴിലാളികളുടെ മരണം കൊലപാതകമായി കണ്ട് നടപടിയുണ്ടാകണമെന്നാണ് ആവശ്യം. തുടർച്ചയായ സ്ഫോടനങ്ങളും അപകടകരമായ സാഹചര്യങ്ങളും ബോധ്യപ്പെട്ടിട്ടും തൊഴിലാളികളെക്കൊണ്ട് പണിയെടുപ്പിച്ചത് ഗുരുതരമായ വീഴ്ചയാണെന്ന് പ്രദേശവാസികൾക്കുവേണ്ടി ചെറുവാഴക്കുന്നിൽ റോഷൻ ഈപ്പൻ ജില്ലാ പോലീസ് മേധാവിക്കു നൽകിയ പരാതിയിൽ പറയുന്നു. ഇതിനിടെ ക്വാറി പ്രവർത്തനം സംബന്ധിച്ച വകുപ്പുതല യോഗം അടുത്ത ദിവസം ചേരുമെന്നും പരാതി സംബന്ധിച്ച് വിശദമായി അന്വേഷിച്ച് നടപടി സ്വീകരിക്കുമെന്നും ജില്ലാ കളക്ടർ എസ്. പ്രേംകൃഷ്ണൻ അറിയിച്ചു.

ആംബുലൻസ് ഓട്ടോറിക്ഷയിൽ ഇടിച്ച് ഒരാൾക്ക് പരിക്ക്

തിരുവല്ല: രോഗിയുമായി പോയ ആംബുലൻസ് ഓട്ടോറിക്ഷയുമായി കൂട്ടിയിടിച്ചു ഉണ്ടായ അപകടത്തിൽ ഒരാൾക്ക് പരിക്ക്. ഓട്ടോറിക്ഷ യാത്രക്കാരൻ പരിക്കേൽക്കാതെ രക്ഷപ്പെട്ടു. ഓട്ടോറിക്ഷ ഡ്രൈവറായ കുരിശുകവല ശങ്കരത്തുംങ്കൽ താഴ്ചയിൽ ശരത്തിനാണ് (36) പരിക്കേറ്റത്. തിങ്കളാഴ്ച രാത്രി പത്തോടെ തിരുവല്ല കുരിശുകവല ജംഗ്ഷനിൽ ആയിരുന്നു അപകടം. ചെങ്ങന്നൂർ ഭാഗത്തുനിന്നും രോഗിയുമായി കോട്ടയം മെഡിക്കൽ കോളജ് ആശുപത്രിയിലേക്ക് പോകുകയായിരുന്ന ആംബുലൻസും കാവുംഭാഗം റോഡിലേക്ക് തിരിയുകയായിരുന്ന ഓട്ടോറിക്ഷയും തമ്മിലാണ് കൂട്ടിയിടിച്ചത്. തലകീഴായി മറിഞ്ഞ ഓട്ടോറിക്ഷയിൽ നിന്നും ശരത് റോഡിലേക്ക് തെറിച്ചു വീണു. ശരത്തിനെ തിരുവല്ല താലൂക്ക് ആശുപത്രിയിൽ പ്രവേശിപ്പിച്ചു. ആംബുലൻസിന്‍റെ മുൻവശത്തെ ടയർ പൊട്ടിയതിനേതുടർന്ന് രോഗിയെ മറ്റൊരു ആംബുലൻസിൽആശുപത്രിയിലേക്ക് അയച്ചു.

സ്കൂൾ സമയത്ത് ചരക്കുലോറികൾ നിയന്ത്രിക്കണം

പത്തനംതിട്ട: പുനലൂർ - മൂവാറ്റുപുഴ റോഡിൽ സ്കൂൾ സമയത്ത് ഓടുന്ന ചരക്ക് ലോറികൾക്കെതിരേ നടപി വേണമെന്ന് കോഴഞ്ചേരി താലൂക്ക് വികസന സമിതി ആവശ്യപ്പെട്ടു. ഓമല്ലൂര്‍ ഗ്രാമപഞ്ചായത്ത് പ്രസിഡന്‍റ് ജോണ്‍സണ്‍ വിളവിനാല്‍ അധ്യക്ഷത വഹിച്ചു. കേടുകൂടാതെ സുരക്ഷിതമായി ഉപയോഗിക്കാവുന്ന ആന്‍റി റാബിസ് വാക്‌സിനുകളായ എച്ച്ആര്‍ഐജി, റാബിഷില്‍ഡ്, ഈആര്‍ഐജി തുടങ്ങിയവ സര്‍ക്കാര്‍ ആശുപത്രികളില്‍ ഉറപ്പാക്കണം. പത്തനംതിട്ട, കോഴഞ്ചേരി ജില്ലാ ആശുപത്രിയിലെ ടിബി സെന്‍റര്‍ പ്രവര്‍ത്തിക്കുന്ന കെട്ടിടം, കെഎച്ച്ആര്‍ഡബ്ലുസിയുടെ പേവാര്‍ഡ് എന്നിവയുടെ ശോചനീയവസ്ഥ അടിയന്തിരമായി പരിഹരിക്കണമെന്നും യോഗം ആവശ്യപ്പെട്ടു. കോഴഞ്ചേരി തഹസില്‍ദാര്‍ ടി.കെ.നൗഷാദ്, ഡെപ്യൂട്ടി തഹസില്‍ദാര്‍ എൽ.സന്ധ്യാറാണി, വിവിധ രാഷ്‌ട്രീയ പാര്‍ട്ടി പ്രതിനിധികള്‍, താലൂക്ക്തല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

താലൂക്ക് വായനപക്ഷാചരണ സമാപനം നടത്തി

അടൂർ: താലൂക്ക് ലൈബ്രറി കൗണ്‍സില്‍ സംഘടിപ്പിച്ച വായനപക്ഷാചരണ സമാപനവും ഐ.വി. ദാസ് അനുസ്മരണവും സര്‍ക്കാര്‍ ബോയ്സ് ഹയര്‍ സെക്കന്‍ഡറി സ്‌കൂളില്‍ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ ഉദ്ഘാടനം ചെയ്തു. താലൂക്ക് ലൈബ്രറി കൗണ്‍സില്‍ പ്രസിഡന്‍റ് മുണ്ടപ്പള്ളി തോമസ് അധ്യക്ഷത വഹിച്ചു. സംസ്ഥാന ലൈബ്രറി കൗണ്‍സില്‍ വൈസ് പ്രസിഡന്‍റ് എ.പി. ജയന്‍ ഐ.വി. ദാസ് അനുസ്മരണ പ്രഭാഷണം നടത്തി. ജില്ലാ ലൈബ്രറി കൗണ്‍സില്‍ വൈസ് പ്രസിഡന്‍റ് ബി. സതികുമാരി, താലൂക്ക് സെക്രട്ടറി വിജു രാധാകൃഷ്ണൻ, വൈസ് പ്രസിഡന്‍റ് കെ.ജി. വാസുദേവന്‍, ജോയിന്‍റ് സെക്രട്ടറി വിനോദ് മുളമ്പുഴ,എക്സിക്യൂട്ടീവ് അംഗങ്ങളായ സിംലകുമാരി മീരാ സാഹിബ്, തെങ്ങമം ഗോപകുമാർ, ബിനു വെള്ളച്ചിറ, പ്രിന്‍സിപ്പല്‍ സജി വര്‍ഗീസ് എന്നിവര്‍ പ്രസംഗിച്ചു.

ബാലികയെ വെട്ടി പരിക്കേല്പിച്ച കേസിൽ പ്രതിക്ക് ജീവപര്യന്തം

വെട്ടേറ്റത് അമ്മയ്ക്കു നേരേയുള്ള ആക്രമണം തടയുന്നതിനിടെ പത്തനംതിട്ട: 12 വയസുള്ള പെണ്‍കുട്ടിയുടെ കൈപ്പത്തിക്ക് വെട്ടി ഗുരുതരമായി പരിക്കേല്പിച്ച കേസില്‍ പ്രതിക്ക് ജീവപര്യന്തം കഠിന തടവും ലക്ഷം രൂപ പിഴയും. കൂടല്‍ അതിരുങ്കല്‍ അഞ്ചുമുക്ക് പറങ്കാം തോട്ടത്തില്‍ ഗീവര്‍ഗീസ് തോമസി (അനിയൻകുഞ്ഞ്, 42) നെയാണ് പത്തനംതിട്ട അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് കോടതി ഒന്ന് ജഡ്ജി ജി.പി. ജയകൃഷ്ണന്‍ കുറ്റക്കാരനെന്ന് കണ്ടെത്തി ശിക്ഷ വിധിച്ചത്. പട്ടികജാതി,വര്‍ഗവിഭാഗങ്ങള്‍ക്കെതിരായ അതിക്രമങ്ങള്‍ തടയല്‍ നിയമത്തിലെ വകുപ്പ് പ്രകാരമാണ് ജീവപര്യന്തം ശിക്ഷിച്ചത്. ഗുരുതരമായി പരിക്കുകള്‍ ഏല്പിച്ചതിനു അഞ്ച് വര്‍ഷം കഠിന തടവും 50,000 രൂപയും, വീട്ടില്‍ അതിക്രമിച്ചുകടന്നതിനു മൂന്നു വർഷം കഠിന തടവും 25,000 രൂപ പിഴയും ശിക്ഷിച്ചു. ശിക്ഷാകാലയളവ് ഒരുമിച്ചു അനുഭവിച്ചാല്‍ മതിയാകും. പിഴത്തുക കുട്ടിക്ക് നല്‍കാനും, ഒടുക്കിയില്ലെങ്കില്‍ വസ്തുക്കളില്‍ നിന്നും കണ്ടുകെട്ടി നല്‍കാനുള്ള നടപടി സ്വീകരിക്കാനും വിധിയില്‍ പറയുന്നു. 2016 മാര്‍ച്ച് 18നാണ് കേസിനാസ്പദമായ സംഭവം. സ്ഥലത്ത് സ്ഥിരമായി മദ്യപിച്ച് ബഹളമുണ്ടാക്കുന്ന ഇയാ‌ളെ സംബന്ധിച്ചു കൂടല്‍ പോലീസില്‍ വിളിച്ചറിയിക്കുമെന്ന് പറഞ്ഞ അയല്‍വാസി മേടക്കര വീട്ടില്‍ പ്രിയ ദിലീപിനെയാണ് വെട്ടുകത്തിയുമായി ആക്രമിച്ചത്. ഈസമയം വീട്ടില്‍ യുവതിക്കൊപ്പം ഉണ്ടായിരുന്ന 12 കാരിയായ മകള്‍ കൈകള്‍ കൊണ്ട് തടഞ്ഞു. കൈകള്‍ക്ക് വെട്ടേറ്റു, ഇടതുകൈപ്പത്തിക്ക് താഴെ റിസ്റ്റിന്‍റെ ഭാഗത്ത് പ്രധാന ഞരമ്പ് മുറിഞ്ഞു മാറി. അതിന് താഴെയുള്ള അസ്ഥിക്ക് മുറിവും സംഭവിച്ചു. വലതു കൈവെള്ളഭാഗത്ത് ആഴത്തില്‍ മുറിവേല്‍ക്കുകയും ചെയ്തു. കൂടാതെ, പ്രിയയും കുടുംബവും വീട് വിറ്റ് പോകാത്തതിലുള്ള മുന്‍വിരോധവും ആക്രമണകാരണമായി. ഗുരുതര പരിക്കുകളോടെ കോട്ടയം മെഡിക്കല്‍ കോളജ് ആശുപത്രിയില്‍ ചികില്‍സ തേടി. കൂടല്‍ അഡിഷണല്‍ എസ്ഐ ആയിരുന്ന വി.ടി.രാജു കേസ് അന്വേഷണം നടത്തി. കോടതിയില്‍ കുറ്റപത്രം സമര്‍പ്പിച്ചത് അന്നത്തെ അടൂര്‍ ഡിവൈഎസ്പി റഫീഖ് ആയിരുന്നു. പ്രോസിക്യൂട്ടര്‍മാരായ ടി ഹരികൃഷ്ണന്‍, ഹരി ശങ്കര്‍ പ്രസാദ് എന്നിവര്‍ കോടതിയില്‍ ഹാജരായായി.

കുട്ടികളുടെ യാത്രയ്ക്ക് ഡബിൾ ബെൽ മുഴക്കി എംഎൽഎ

റാന്നി: വെച്ചൂച്ചിറ കോളനി ഗവൺമെന്‍റ് ഹയർ സെക്കൻഡറി സ്കൂളിലെ വിദ്യാർഥികളുടെ യാത്രാക്ലേശം പരിഹരിക്കാനായി പുതിയ ബസ് സർവീസ്. മുക്കൂട്ടുതറ ഭാഗത്തുനിന്നും കോളനി സ്കൂളിലേക്ക് വരുന്ന കുട്ടികൾക്ക് യാത്രാ സൗകര്യം ഒരുക്കുന്നതിന്‍റെ ഭാഗമായാണ് നവോദയ ജംഗ്ഷൻ വരെ എത്തി സർവീസ് നടത്തിയിരുന്ന കെഎസ്ആർടിസി ബസ് ചാത്തൻതറയിലേക്ക് നീട്ടിയത്. ബസ് സർവീസ് ഉദ്ഘാടനം ചെയ്തശേഷം യാത്ര ചെയ്തെത്തിയ പ്രമോദ് നാരായൺ എംഎൽഎയെ സ്വീകരിക്കാൻ നാട്ടുകാർ ഒന്നടങ്കം എത്തിയിരുന്നു. എംഎൽഎയെ അഭിനന്ദിക്കാൻ കുട്ടികൾ ഒത്തുകൂടുകയും ചെയ്തു. രാവിലെ 8.10 ന് ചാത്തൻതറയിൽ നിന്നും നവോദയയിലേക്ക് ആരംഭിക്കുന്ന സർവീസിന്‍റെ ഫ്ലാഗ് ഓഫ് എംഎൽഎ നിർവഹിച്ചു. ദിവസം 100 രൂപയിൽ അധികം മുടക്കി ഓട്ടോറിക്ഷയും മറ്റും പിടിച്ചായിരുന്നു ഇതുവരെ കുട്ടികൾ സ്കൂളിൽ പോയിരുന്നത്. ചാത്തൻതറയിൽ നിന്നും രാവിലെ ബസ് സർവീസ് ഇല്ലാത്തതിനാൽ ഇവിടെയുള്ള വിദ്യാർഥികളും ഉദ്യോഗസ്ഥരും എരുമേലി വഴി ഇരട്ടി ദൂരം സഞ്ചരിച്ച് ചുറ്റിയാണ് ഇപ്പോൾ റാന്നി എത്തിയിരുന്നത്. ഇതിനും ഇതോടെ പരിഹാരമാവുകയാണ്. കുട്ടികളും യാത്രക്കാരും അനുഭവപ്പെടുന്ന യാത്രാക്ലേശം ശ്രദ്ധയിൽപെടുത്തിയപ്പോഴാണ് എംഎൽഎ തന്നെ ഇടപെട്ട് പത്തനംതിട്ട ഡിടിഒയുടെ സാന്നിധ്യത്തിൽ സ്കൂൾ അധികൃതരുടെയും നാട്ടുകാരുടെയും യോഗം വിളിച്ചുചേർത്ത് ബസ് സർവീസ് നീട്ടാൻ തീരുമാനിച്ചത്. ഇതുനോടൊപ്പം മണ്ണടിശാലയിൽ നിന്നും കടുമീൻചിറ ഗവ. ഹയർ സെക്കൻഡറി സ്കൂളിലേക്ക് നീട്ടിയ കെഎസ്ആർടിസി ബസ് സർവീസിന്‍റെ ഉദ്ഘാടനവും എംഎൽഎ നിർവഹിച്ചു. മധുരപരഹാരങ്ങൾ നൽകിയാണ് കുട്ടികൾ എംഎൽഎ സ്വീകരിച്ചത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]