ADVERTISEMENT

ADVERTISEMENT

ബളാൽ മണ്ഡലം യൂത്ത്‌ കോൺഗ്രസ് ഭാരവാഹികൾ ചുമതലയേറ്റു

മാലോം: യൂത്ത്‌ കോൺഗ്രസ് ബളാൽ മണ്ഡലം കമ്മിറ്റി ഭാരവാഹികൾ ചുമതലയേറ്റു. മാലോം സാംസ്‌കാരിക നിലയത്തിൽ നടന്ന പരിപാടി ബളാൽ പഞ്ചായത്ത്‌ പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. മുൻ മണ്ഡലം പ്രസിഡന്‍റ് ബിബിൻ അറയ്ക്കൽ അധ്യക്ഷത വഹിച്ചു.

യൂത്ത് കോൺഗ്രസ് സംഘടനാ ചുമതലയുള്ള സംസ്ഥാന ജനറൽ സെക്രട്ടറി ജോമോൻ ജോസ്, ഡിസിസി വൈസ് പ്രസിഡന്‍റ് പി.ജി. ദേവ്, ജനറൽ സെക്രട്ടറി ഹരീഷ് പി. നായർ, കെപിസിസി അംഗം ബി.പി. പ്രദീപ്‌ കുമാർ, യൂത്ത്‌ കോൺഗ്രസ് ജില്ലാ പ്രസിഡന്‍റ് കെ.ആർ. കാർത്തികേയൻ, ജനറൽ സെക്രട്ടറി മാർട്ടിൻ ജോർജ്, ബളാൽ മണ്ഡലം കോൺഗ്രസ് പ്രസിഡന്‍റ് എം.പി. ജോസഫ്, ബ്ലോക്ക് കോൺഗ്രസ് ജനറൽ സെക്രട്ടറി ബാലചന്ദ്രൻ ചുള്ളി, എം. രാധാമണി, അലക്സ് നെടിയകാലായിൽ, മോൻസി ജോയ്, ബിൻസി,ജെയിൻ, പി. പദ്മാവതി, ശ്രീജ രാമചന്ദ്രൻ, ജെസി ചാക്കോ എന്നിവർ പ്രസംഗിച്ചു. ലിബിൻ ജേക്കബ് ആലപ്പാട്ട് പ്രസിഡന്‍റ് ആയി 17 അംഗ മണ്ഡലം കമ്മിറ്റിയാണ് നിലവിൽ വന്നത്.

ADVERTISEMENT

കാർഷിക സംസ്കൃതി പഠനകേന്ദ്രം മുഖ്യമന്ത്രി നാടിന് സമർപ്പിക്കും

പിലിക്കോട്: കേരള കാർഷിക സർവകലാശാലക്ക് കീഴിലെ പിലിക്കോട് ഉത്തരമേഖല കാർഷിക ഗവേഷണ കേന്ദ്രത്തിൽ കവി സുബ്രഹ്മണ്യൻ തിരുമുമ്പിന്‍റെ നാമധേയത്തിൽ ഒരുക്കിയ കാർഷിക സംസ്കൃതി പഠനകേന്ദ്രം ഓഗസ്റ്റ് 10നു മുഖ്യമന്ത്രി പിണറായി വിജയൻ നാടിന് സമർപ്പിക്കും.കാസർഗോഡ് വികസന പാക്കേജിൽ രണ്ടു കോടി രൂപയോളം ചെലവിട്ടാണ് ഈ അഗ്രിടൂറിസം സെന്‍റർ നിർമാണം പൂർത്തീകരിച്ചത്. ഓഡിറ്റോറിയം, വിവിധ ആധുനിക കാർഷിക യന്ത്രങ്ങളുടെ പ്രദർശനശാല, നെൽകൃഷി ഗവേഷണ പാഠങ്ങൾ, എക്സിബിഷൻ ഹാൾ എന്നീ നിർമിതികളും ഹരിതവനം, മിയാവാക്കി, നക്ഷത്രവൃക്ഷങ്ങൾ ഉള്ള ചിൽഡ്രൻസ് പാർക്ക്, സംസ്കൃതി പാർക്ക്, തുടങ്ങി വൈവിധ്യമാർന്ന വിശ്രമ കേന്ദ്രങ്ങളും തിരുമുമ്പ് ഭവനത്തിൽ താമസത്തിന് അത്യാവശ്യ സൗകര്യവും കാസർഗോഡ് കുള്ളൻ പശുക്കൾ, മലബാറി ആട്, മത്സ്യം, താറാവ് സംയോജിത കൃഷിപാഠശാല കൂടിയാണ് അഗ്രി ടൂറിസം സെന്‍ററിൽ ഒരുക്കിയിട്ടുള്ളത്. സംഘാടകസമിതി രൂപീകരണയോഗം ഡെപ്യൂട്ടി കളക്ടർ ലിപു എസ്. ലോറൻസ് ഉദ്ഘാടനം ചെയ്തു. വാർഡ് മെംബർ പി. അജിത അധ്യക്ഷതവഹിച്ചു. ഉത്തരമേഖലാ കാർഷിക ഗവേഷണ കേന്ദ്രം അസോസിയേറ്റ് ഡയറക്ടർ ഡോ.ടി. വനജ, അഡ്മിനിസ്ട്രേറ്റീവ് ഓഫീസർ സാബു ജോസഫ്, സ്റ്റാഫ് സെക്രട്ടറി സി.വി. രാജേഷ് എന്നിവർ സംസാരിച്ചു.

സ്കൂളിലെ പഴയ ശുചിമുറി കുടുംബശ്രീ സ്റ്റാളാക്കി; പരാതിയെത്തുടർന്ന് ആരോഗ്യവകുപ്പിന്‍റെ നടപടി

കാസർഗോഡ്: ദേലംപാടി പഞ്ചായത്തിലെ അഡൂർ ഗവ. ഹയർ സെക്കൻഡറി സ്കൂളിൽ കുടുംബശ്രീയുടെ മാ കെയർ സെന്‍റർ തുടങ്ങിയത് പഴയ ശുചിമുറിയിൽ. വൃത്തിഹീനമായ സാഹചര്യത്തിൽ ഭക്ഷണവിതരണം നടത്തുന്നുവെന്ന് ചൂണ്ടിക്കാട്ടി നാട്ടുകാർ പരാതി നല്കിയതോടെ ആരോഗ്യവകുപ്പ് ഇടപെട്ട് സെന്‍റർ അടച്ചുപൂട്ടി. മാ കെയർ സെന്‍റർ എന്ന പേരിൽ ജില്ലയിലെ എല്ലാ സ്കൂളുകളിലും കുടുംബശ്രീയുടെ വിവിധോദ്ദേശ വിപണന സ്റ്റാളുകൾ തുറക്കാനുള്ള പ്രവർത്തനങ്ങൾ നടന്നുവരികയാണ്. കുട്ടികൾക്കാവശ്യമായ ലഘുഭക്ഷണങ്ങള്‍, സ്റ്റേഷനറി സാധനങ്ങള്‍, പെണ്‍കുട്ടികള്‍ക്കുള്ള സാനിറ്ററി നാപ്കിന്‍ തുടങ്ങിയവയെല്ലാം ഇവിടെ ലഭ്യമാക്കാനാണ് പദ്ധതി. ഇതുവഴി കുട്ടികള്‍ സ്‌കൂളിന് പുറത്തുപോയി സാധനങ്ങൾ വാങ്ങുന്നതിനെ തടയുകയാണ് ലക്ഷ്യം. സ്കൂളിന് പുറത്തുപോകുമ്പോഴാണ് കുട്ടികൾ ലഹരിമാഫിയയുടെയും മറ്റും വലയിൽ അകപ്പെടുന്നതെന്ന വാദമുന്നയിച്ചാണ് കുടുംബശ്രീ ജില്ലാ മിഷന്‍റെ നേതൃത്വത്തിൽ പദ്ധതി ആവിഷ്കരിച്ചത്. ഓരോ സ്കൂളിലും ഒഴിഞ്ഞുകിടക്കുന്ന ക്ലാസ് മുറികളിൽ കുടുംബശ്രീ സ്റ്റാളുകൾ തുടങ്ങാനായിരുന്നു സർക്കാരിന്‍റെ നിർദേശം. ക്ലാസ് മുറികളൊന്നും ഒഴിവില്ലാത്ത സാഹചര്യത്തിലാണ് അഡൂർ സ്കൂളിൽ പഴയ ശുചിമുറിയെ മാ കെയർ സെന്‍ററാക്കിയത്. വർഷങ്ങളായി ഉപയോഗിക്കാതെ കിടന്ന ശുചിമുറിയെ നിർമാണസാമഗ്രികളും മറ്റും സൂക്ഷിക്കുന്നതിനുള്ള സ്റ്റോർ റൂമായി ഉപയോഗിച്ചുവരികയായിരുന്നുവെന്നും ഈ സാധനസാമഗ്രികൾ മാറ്റിയാണ് കുടുംബശ്രീക്ക് സ്റ്റാൾ തുടങ്ങാൻ വിട്ടുനല്കിയതെന്നുമാണ് സ്കൂൾ അധികൃതരുടെ വിശദീകരണം. സ്റ്റാൾ തുടങ്ങുന്നതിനുമുമ്പ് കെട്ടിടം നവീകരിക്കാൻ കുടുംബശ്രീ അധികൃതരോട് നിർദേശിച്ചിരുന്നതായും പറയുന്നു. എന്നാൽ ശുചിമുറി നവീകരിച്ച് അവിടെ ഭക്ഷണസാധനങ്ങളുടെ ഉത്പാദനവും വിതരണവും നടത്താൻ അനുമതി നല്കിയതിനെ ഒരു തരത്തിലും ന്യായീകരിക്കാനാവില്ലെന്ന് നാട്ടുകാർ ചൂണ്ടിക്കാട്ടുന്നു. ദേലംപാടി പഞ്ചായത്തിലെ കുടുംബശ്രീ സിഡിഎസിനു കീഴിലാണ് സ്റ്റാൾ തുറന്നതെന്നതിനാൽ ആരോഗ്യവകുപ്പിന് നേരിട്ടാണ് നാട്ടുകാർ പരാതി നല്കിയത്. ആരോഗ്യവകുപ്പ് കർശനമായി ഇടപെട്ടതോടെ ചൊവ്വാഴ്ച മുതൽ കേന്ദ്രം അടച്ചുപൂട്ടി. സ്കൂളുകൾക്ക് സമീപത്തെ ചെറുകി വ്യാപാരികളെ ലഹരിവസ്തുക്കളുടെ വിതരണക്കാരായി മുദ്രകുത്തി അടച്ചുപൂട്ടിക്കാനും സ്കൂളുകളിൽ കുടുംബശ്രീയുടെ കുത്തകവത്കരണം നടപ്പാക്കാനുമുള്ള നീക്കമാണെന്നാരോപിച്ച് വ്യാപാരി സംഘടനകൾ കുടുംബശ്രീ സ്റ്റാളുകളുടെ വരവിനെ എതിർത്തിരുന്നു. സ്കൂൾ കെട്ടിടങ്ങളിൽ വാണിജ്യ ആവശ്യത്തിനുള്ള കടകൾ തുറക്കുന്നതും തദ്ദേശസ്ഥാപനങ്ങളുടെയും ഭക്ഷ്യസുരക്ഷാ വിഭാഗത്തിന്‍റെയും മാനദണ്ഡങ്ങൾ പാലിക്കാതെ പ്രവർത്തിക്കുന്നതും നിയമവിരുദ്ധമാണെന്ന് വ്യാപാരികൾ ചൂണ്ടിക്കാട്ടിയിരുന്നു. ഇതു ശരിവയ്ക്കുന്ന തരത്തിലാണ് അഡൂരിൽ ആരോഗ്യവകുപ്പിന്‍റെ ഭാഗത്തുനിന്ന് നടപടിയുണ്ടായത്.

പാര്‍ട്ടി അനുകൂലികളെ കോര്‍ത്തിണക്കാനാകാത്തത് പോരായ്മ: പി. സന്തോഷ് കുമാര്‍

വെള്ളരിക്കുണ്ട്: സ്വാതന്ത്ര്യസമരത്തിന്‍റെ പൈതൃകം ഉള്‍ക്കൊള്ളുന്ന കമ്യൂണിസ്റ്റ് പാര്‍ട്ടി ശക്തിപ്പെട്ടേ മതിയാവുവെന്ന് ആഗ്രഹിക്കുന്ന ധാരാളം ആളുകള്‍ പാര്‍ട്ടിക്ക് പുറത്തുണ്ടെന്നും എന്നാല്‍ ഇവരെ കോര്‍ത്തിണക്കാന്‍ നമുക്കാവുന്നില്ല എന്ന കുറവ് നിലനില്‍ക്കുന്നുണ്ടെന്നും സിപിഐ ദേശീയ നിര്‍വാഹകസമിതിയംഗം പി. സന്തോഷ് കുമാര്‍ എംപി. സിപിഐ ജില്ലാസമ്മേളനത്തിന്‍റെ പൊതുസമ്മേളനം വെള്ളരിക്കുണ്ടില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കയ്യൂരും കാവുമ്പായി രക്തസാക്ഷിത്വത്തിന് ഒന്നര പതിറ്റാണ്ട് പൂര്‍ത്തിയാകും മുമ്പേ ദൗര്‍ഭാഗ്യവശാല്‍ കമ്യൂണിസ്റ്റ് പാര്‍ട്ടി പിളരുന്ന സാഹചര്യമുണ്ടായി. അതിന്‍റെ കാരണങ്ങള്‍ക്ക് ഇന്നു യാതൊരു പ്രസക്തിയില്ല. അന്നത്തെ മുദ്രാവാക്യങ്ങളൊക്കെ അപ്രസക്തമാവുന്ന കാലഘട്ടത്തിലാണ് നാം ജീവിക്കുന്നത്. രാജ്യത്തെ കമ്മ്യൂണിസ്റ്റ് പ്രസ്ഥാനത്തിന്‍റെ കരുത്തിനെ അതു നല്ലതുപോലെ ചോര്‍ത്തിക്കളഞ്ഞു എന്നത് എല്ലാവരും ഉള്‍ക്കൊള്ളേണ്ട സത്യസന്ധമായ ഒരു പാഠമാണ്. പല പ്രതിസന്ധികളെയും അവഗണിച്ച് കാസര്‍ഗോഡും കണ്ണൂരും വയനാടും നിര്‍ണായകമായ സ്വാധീനം ചെലുത്താവുന്ന പാര്‍ട്ടിയായി സിപിഐ മാറിയിട്ടുണ്ട്. രാജ്യത്തെ തെരഞ്ഞെടുപ്പ് വളരെ സങ്കീര്‍ണമായ രാഷ്ട്രീയ പ്രക്രിയായി മാറി. പണവും മതവും ജാതിയുമെല്ലാം അതിനകത്ത് നല്ലതുപോലെ സ്വാധീനം ചെലുത്തുന്നു. തെരഞ്ഞെടുപ്പ് പ്രക്രിയയില്‍ അതിന്‍റെ റിസല്‍ട്ടും പങ്കാളിത്തവും വച്ചുകൊണ്ട് കമ്യൂണിസ്റ്റ് പാര്‍ട്ടി രാജ്യത്തൊരു ചെറിയ ശക്തിയാണെന്ന് ആര്‍ക്കും പറയാന്‍ കഴിയില്ല. പാര്‍ട്ടി ഇനിയും കരുത്താര്‍ജിക്കേണ്ട രാഷ്ട്രീയ സാഹചര്യമാണ് നിലവിലുള്ളതെന്നും അതിനുള്ള പ്രവര്‍ത്തനം കൂടുതല്‍ ശക്തമാക്കണമെന്നും അദ്ദേഹം കൂട്ടിച്ചേര്‍ത്തു. ജില്ലാ സെക്രട്ടറി സി.പി. ബാബു അധ്യക്ഷത വഹിച്ചു. സംസ്ഥാന അസി. സെക്രട്ടറി ഇ. ചന്ദ്രശേഖരന്‍ എംഎല്‍എ, മന്ത്രിമാരായ ജി.ആര്‍. അനില്‍, പി. പ്രസാദ്, സംസ്ഥാന എക്സിക്യൂട്ടീവ് അംഗങ്ങളായ സി.പി. മുരളി, കെ.കെ. അഷറഫ്, സംസ്ഥാ കൗണ്‍സിലംഗങ്ങളായ ഗോവിന്ദന്‍ പള്ളിക്കാപ്പില്‍, ടി. കൃഷ്ണന്‍, ജില്ലാ അസി. സെക്രട്ടറിമാരായ വി. രാജന്‍, എം. അസിനാര്‍, കെ.എസ്. കുര്യാക്കോസ്, ബങ്കളം കുഞ്ഞികൃഷ്ണന്‍, കെ.വി. കൃഷ്ണന്‍, പി. ഭാര്‍ഗവി, വി. സുരേഷ് ബാബു, മുതിര്‍ന്ന നേതാവ് പി.എ.നായര്‍ എന്നിവര്‍ സംബന്ധിച്ചു. സംഘാടകസമിതി കണ്‍വീനര്‍ എം. കുമാരന്‍ സ്വാഗതം പറഞ്ഞു.

ഇരട്ടനേട്ടവുമായി തൃക്കരിപ്പൂർ താലൂക്ക് ആശുപത്രി

തൃക്കരിപ്പൂർ: സംസ്ഥാന തലത്തിൽ ഇരട്ട അംഗീകാരം നേടി തൃക്കരിപ്പൂർ ഗവ. താലൂക്ക് ആശുപത്രി. 92 ശതമാനം മാർക്ക് നേടി താലൂക്ക് ആശുപത്രികളിൽ ഒന്നാം സ്ഥാനം നേടിയാണ് 15 ലക്ഷം രൂപയുടെ കായകൽപ് അവാർഡ് സ്വന്തമാക്കിയത്. സംസ്ഥാനത്തെ മികച്ച താലൂക്ക് ഹെഡ്‌ക്വാർട്ടേഴ്സ് പരിസ്ഥിതി സൗഹൃദ അവാർഡുകളുടെ വിഭാഗത്തിൽ 96 ശതമാനം മാർക്ക് നേടി താലൂക്ക് ആശുപത്രി അഞ്ചു ലക്ഷം രൂപയുടെ പരിസ്ഥിതി സൗഹൃദ അവാർഡിനും അർഹത നേടി. നീലേശ്വരം ബ്ലോക്ക് പഞ്ചായത്തി കീഴിലുള്ള തൃക്കരിപ്പൂർ താലൂക്ക് ആശുപത്രി അസുഖ നിവാരണത്തിലും രോഗികളോട് സൗഹൃദപരമായ സമീപനത്തിലും മാലിന്യനിർമാർജനം ഉൾപ്പെടെയുള്ള ശുചിത്വ പ്രവർത്തനങ്ങളിലും തൃക്കരിപ്പൂർ താലൂക്ക് ആശുപത്രി പുലർത്തിയ മാതൃകാപരമായ പ്രവർത്തനം പരിഗണിച്ചാണ് പുരസ്‌കാരം തേടിയെത്തിയത്.

സ്കൂളുകളിൽ കുടുംബശ്രീയുടെ കച്ചവട സ്ഥാപനങ്ങൾ അനുവദിക്കില്ലെന്ന് വ്യാപാരി വ്യവസായി ഏകോപന സമിതി

കാസർഗോഡ്: സർക്കാർ സ്കൂളുകൾക്കകത്ത് യാതൊരുവിധ മാനദണ്ഡങ്ങളും പാലിക്കാതെ കുടുംബശ്രീയുടെ കച്ചവടസ്ഥാപനങ്ങൾ തുടങ്ങാനുള്ള പദ്ധതി ഒരു കാരണവശാലും അംഗീകരിക്കാനാവില്ലെന്ന് വ്യാപാരി വ്യവസായി ഏകോപനസമിതി ജില്ലാ പ്രസിഡന്‍റും സംസ്ഥാന വൈസ് പ്രസിഡന്‍റുമായ കെ. അഹമ്മദ് ഷെരീഫ് പറഞ്ഞു. സംസ്ഥാനത്ത് ചെറുകിട കച്ചവടം നടത്തി ഉപജീവനം തേടുന്ന ലക്ഷക്കണക്കിനാളുകളെ വഴിയാധാരമാക്കാനുള്ള നീക്കമാണ് ഇത്. ഒരു വ്യാപാര സ്ഥാപനം തുടങ്ങണമെങ്കിൽ നിരവധി ലൈസൻസുകൾ ആവശ്യമാണ്. ഫുഡ് & സേഫ്റ്റി ലൈസൻസെടുത്തും വെള്ളം പരിശോധിച്ചുമൊക്കെ നിരവധി കടമ്പകൾ കടന്നാണ് ഓരോ വ്യാപാരിയും സ്ഥാപനങ്ങൾ തുറക്കുന്നത്. ഇതൊന്നുമില്ലാതെ കുടുംബശ്രീ യുണിറ്റുകൾക്ക് സ്കൂളിന്‍റെ കെട്ടിടത്തിൽ തന്നെ വിദ്യാർഥികളെ ലക്ഷ്യമാക്കി സ്ഥാപനങ്ങൾ തുടങ്ങാമെന്നുവരുന്നത് കടുത്ത നിയമലംഘനമാണ്. ചെറുകിട വ്യാപാരികളെ മയക്കുമരുന്ന് വില്പനക്കാരാക്കി ചിത്രീകരിക്കാനുള്ള നീക്കവും അത്യധികം ഹീനമാണ്. പദ്ധതിക്കെതിരെ വ്യാപാരികൾ ശക്തമായ പ്രക്ഷോഭ പരിപാടികൾ ആരംഭിക്കുമെന്ന് അദ്ദേഹം പറഞ്ഞു.

15 വര്‍ഷമായി കളപ്പുരയില്‍ ഒറ്റയ്ക്ക് കാര്‍ത്യായനി: ഇടപെട്ട് മനുഷ്യാവകാശ കമ്മീഷന്‍

കാസര്‍ഗോഡ്: ചുറ്റുമതില്‍ ഇല്ലാതെ കാടുമൂടിയ ഒന്നര ഏക്കര്‍ പറമ്പില്‍ പഴകി ജീര്‍ണിച്ച് തകര്‍ന്ന വീടിനോട് ചേര്‍ന്ന കളപ്പുരയില്‍ 15 വര്‍ഷമായി ഒറ്റയ്ക്ക് താമസിക്കുന്ന കേള്‍വിക്കുറവുള്ള കെ.വി. കാര്‍ത്യായനിയുടെ (69) പരാതികള്‍ പരിശോധിച്ച് പരിഹാരനടപടികള്‍ ഉള്‍പ്പെടുത്തി ഏഴു ദിവസത്തിനകം റിപ്പോര്‍ട്ട് സമര്‍പ്പിക്കണമെന്ന് മനുഷ്യാവകാശ കമ്മീഷന്‍ ജുഡീഷല്‍ അംഗം കെ. ബൈജുനാഥ് ജില്ലാ കളക്ടര്‍ക്കും ജില്ലാ വിമന്‍ ആന്‍ഡ് ചൈല്‍ഡ് ഡെവലപ്‌മെന്‍റ് ഓഫീസര്‍ക്കും നിര്‍ദേശം നല്‍കി. കളപ്പുരയിലേക്കുള്ള വൈദ്യുതി കണക്ഷന്‍ കെഎസ്ഇബി വിച്ഛേദിച്ചു. തൊഴിലുറപ്പിന് പോയാണ് ഭക്ഷണത്തിനുള്ള വക കണ്ടെത്തുന്നത്. പറമ്പ് കാടുമൂടിയതു കാരണം കുറുനരിയും പാമ്പുകളും ധാരാളമുണ്ട്. കുടുംബത്തിന്‍റെ നല്ല കാലത്ത് തേങ്ങയും മറ്റും സൂക്ഷിക്കാന്‍ പണിത കളപ്പുരയിലാണ് വയോധിക താമസിക്കുന്നത്. ഭര്‍ത്താവ് രാമചന്ദ്രന്‍ 15 വര്‍ഷം മുമ്പ് മരിച്ചു. മക്കളില്ലാത്ത വയോധിക അതോടെ അനാഥയായി. വീടും പറമ്പും ഭര്‍തൃപിതാവിന്‍റെ പേരിലാണ്. ഭാഗം വച്ച് അവകാശം ലഭിക്കാത്തതിനാല്‍ വീടിന് വേണ്ടി അപേക്ഷ സമര്‍പ്പിക്കാന്‍ പോലും കഴിയാത്ത അവസ്ഥയിലാണ് കാര്‍ത്യായനി. കളപ്പുരക്ക് പ്രത്യേകം കണക്ഷന്‍ നല്‍കണമെന്ന് നാട്ടുകാര്‍ കെഎസ്ഇബിയോട് ആവശ്യപ്പെട്ടെങ്കിലും അംഗീകരിച്ചില്ല. 17നു കാസര്‍ഗോഡ് പിഡബ്ല്യുഡി റസ്റ്റ് ഹൗസില്‍ നടക്കുന്ന സിറ്റിംഗില്‍ കേസ് പരിഗണിക്കും.

കെ-സ്റ്റോറുകള്‍ സജീവമാക്കും: മന്ത്രി അനില്‍

കാഞ്ഞങ്ങാട്: കുറഞ്ഞ വിലയില്‍ ഗുണമേന്മയുള്ള ഉത്പന്നങ്ങളും ഡിജിറ്റല്‍ സേവനങ്ങളും ലഭ്യമാക്കുന്നതിന് കെ-സ്റ്റോര്‍ പ്രവര്‍ത്തനങ്ങള്‍ സജീവമാക്കുമെന്ന് ഭക്ഷ്യമന്ത്രി ജി.ആര്‍. അനില്‍. കാഞ്ഞങ്ങാട് ചേടിറോഡില്‍ ആരംഭിച്ച സപ്ലൈകോ മാവേലി സൂപ്പര്‍ സ്റ്റോറിന്‍റെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. പാചകവാതകവും മില്‍മ, ശബരി ഉത്പന്നങ്ങളുമടക്കം കെ-സ്റ്റോറുകള്‍ വഴി ലഭ്യമാകും. നിലവില്‍ സംസ്ഥാനത്തെ 390 റേഷന്‍ കടകളില്‍ 38 എണ്ണമാണ് റേഷന്‍ കടകളെ കെ-സ്റ്റോറുകള്‍ ആയി മാറിയിട്ടുള്ളത്. വരും ദിവസങ്ങളില്‍ കെ-സ്റ്റോറുകളുടെ സേവനങ്ങള്‍ കൂടുതല്‍ റേഷന്‍കടകളിലേക്ക് വ്യാപിപ്പിക്കാനാണ് സര്‍ക്കാന്‍ പദ്ധതിയിടുന്നതെന്നും അദ്ദേഹം കൂട്ടിച്ചേര്‍ത്തു. ഇ. ചന്ദ്രശേഖരന്‍ എംഎല്‍എ അധ്യക്ഷതവഹിച്ചു. നഗരസഭ ചെയര്‍പേഴ്സണ്‍ കെ.വി. സുജാത ആദ്യവില്‍പന നിര്‍വഹിച്ചു. വൈസ്‌ചെയര്‍മാന്‍ ബില്‍ടെക് അബ്ദുള്ള, സ്ഥിരംസമിതി അധ്യക്ഷരായ കെ. ലത, കെ.വി. സരസ്വതി, കെ. അനീശന്‍, കെ.വി. പ്രഭാവതി, കൗണ്‍സിലര്‍മാരായ എന്‍.വി. രാജന്‍, പള്ളിക്കൈ രാധാകൃഷ്ണന്‍, പി.വി. മോഹനന്‍, കെ. രവീന്ദ്രന്‍, രാഷ്ട്രീയപാര്‍ട്ടി പ്രതിനിധികളായ, ഉമേശന്‍ വേളൂര്‍, എന്‍. ബാലകൃഷ്ണന്‍, വി. വെങ്കിടേഷ്, സി.കെ. വത്സലന്‍, യു.കെ. ജയപ്രകാശ്, ആനന്ദന്‍ എന്നിവര്‍ സംസാരിച്ചു. സപ്ലൈകോ ജനറല്‍ മാനേജര്‍ വി.കെ. അബ്ദുള്‍ ഖാദര്‍ സ്വാഗതവും ജില്ലാ സപ്ലൈ ഓഫീസര്‍ കെ.എൻ. ബിന്ദു നന്ദിയും പറഞ്ഞു.

കൃഷി രീതികള്‍ സ്മാര്‍ട്ട് ആകണം: മന്ത്രി പ്രസാദ്

ചീമേനി: ആധുനിക സാങ്കേതികവിദ്യകളുടെ സഹായത്തോടെ ജലസേചനം, മണ്ണിന്‍റെ ഘടന, കാലാവസ്ഥ, ഭൂമിശാസ്ത്രപരമായ പ്രത്യേകതകള്‍, മഴയുടെ അളവ് തുടങ്ങിയ വിവരങ്ങള്‍ വിശദമായി മനസിലാക്കാന്‍ കഴിയുമെന്നും ഇതിന്‍റെ അടിസ്ഥാനത്തില്‍ കൃഷിയിലെ ഉത്പാദനക്ഷമത വര്‍ധിപ്പിക്കാനും കര്‍ഷകന്‍റെ വരുമാനം ഉയര്‍ത്താനും സാധിക്കുമെന്നും അതിനാല്‍ കൃഷിയില്‍ സാങ്കേതിക വിദ്യകള്‍ പരമാവധി ഉപയോഗിക്കാന്‍ കഴിയണമെന്നും കൃഷിമന്ത്രി പി. പ്രസാദ്. കയ്യൂര്‍-ചീമേനി പഞ്ചായത്ത് നവീകരിച്ച സ്മാര്‍ട്ട് കൃഷിഭവന്‍ നാടിന് സമര്‍പ്പിച്ചു സംസാരിക്കുകയായിരുന്നു മന്ത്രി. എം. രാജഗോപാലന്‍ എംഎല്‍എ അധ്യക്ഷതവഹിച്ചു. കൃഷിവകുപ്പ് അഡീഷണല്‍ ഡയറക്ടര്‍ എസ്. സപ്ന, ബ്ലോക്ക് പ്രസിഡന്‍റ് മാധവന്‍ മണിയറ, പഞ്ചായത്ത് വൈസ്പ്രസിഡന്‍റ് എം. ശാന്ത, പ്രിന്‍സിപ്പല്‍ കൃഷി ഓഫീസര്‍ പി. രാഘവേന്ദ്ര, കൃഷി ഡെപ്യൂട്ടി ഡയറക്ടര്‍ പി. മിനി മേനോന്‍, അസിസ്റ്റന്‍റ് ഡയറക്ടര്‍ കെ. ബിന്ദു, കുടുംബശ്രീ സിഡിഎസ് ചെയര്‍പേഴ്സണ്‍ ആര്‍. രജിത, പഞ്ചായത്ത് സെക്രട്ടറി കെ. രമേശന്‍, കെ.ടി. ലത, കെ. കരുണാകരന്‍, ടി. ശശിധരൻ, പി. കുഞ്ഞിക്കണ്ണന്‍, ടി.വി. രാഘവന്‍, കരിമ്പില്‍ കൃഷ്ണന്‍, എം.കെ. നളിനാക്ഷന്‍, സി.വി. വിജയരാജ്, ശ്രീവത്സന്‍, മുഹമ്മദ് കൂളിയാട്, പി.സി. ദേവസ്യ, പി.പി. രതീഷ്, കെ. മോഹനന്‍, അഗസ്റ്റിന്‍ എന്നിവര്‍ സംസാരിച്ചു. പഞ്ചായത്ത് പ്രസിഡന്‍റ് എ.ജി. അജിത്കുമാര്‍ സ്വാഗതവും കൃഷി ഓഫീസര്‍ ടി. അംബുജാക്ഷന്‍ നന്ദിയും പറഞ്ഞു.

കാട്ടുപന്നികളുടെ എണ്ണം നിയന്ത്രിക്കാന്‍ തദ്ദേശസ്ഥാപനങ്ങള്‍ നടപടി സ്വീകരിക്കണം: മന്ത്രി ശശീന്ദ്രന്‍

കാസര്‍ഗോഡ്: കാടിനു പുറത്ത് കൃഷിനാശവും മനുഷ്യര്‍ക്ക് അപകടമുണ്ടാക്കുന്നതും ഉള്‍പ്പെടെയുള്ള കാട്ടുപന്നികളുടെ എണ്ണം നിയന്ത്രിക്കാന്‍ തദ്ദേശസ്ഥാപനങ്ങള്‍ നടപടി സ്വീകരിക്കണമെന്ന് മന്ത്രി എ.കെ. ശശീന്ദ്രന്‍. ജില്ലയിലെ വന്യജീവി ആക്രമണം ലഘൂകരിക്കാന്‍ നടത്തിയ പ്രവര്‍ത്തനങ്ങള്‍ അവലോകനം ചെയ്തു സംസാരിക്കുകയായിരുന്നു മന്ത്രി. കാട്ടുപന്നികളെ ഉന്മൂലനം ചെയ്യുന്നതിനും സംസ്‌കരിക്കുന്നതിനുമുള്ള സാമ്പത്തികസഹായം സംസ്ഥാന ദുരന്തനിവാരണനിധിയില്‍ നിന്നു നല്‍കും. കാട്ടുപന്നിയെ കൊല്ലുന്നതിനായി ചുമതലപ്പെടുത്തിയ ലൈസന്‍സ് ഷൂട്ടര്‍ക്ക് പ്രതിഫലം നല്‍കുന്നതിനും കാട്ടുപന്നിയെ മറവുചെയ്യുന്നതിനും തദ്ദേശസ്ഥാപനങ്ങള്‍ക്ക് ഒരു സാമ്പത്തികവര്‍ഷം പരമാവധി ഒരു ലക്ഷം രൂപ വരെ അനുവദിക്കുന്നതിന് ഉത്തരവായിട്ടുണ്ട്. കാട്ടുപന്നികളെ വെടിവക്കുന്നതിനായി നിയോഗിക്കാവുന്ന അംഗീകൃത ഷൂട്ടര്‍മാരുടെ പുതുക്കിയ ലിസ്റ്റ് നിലവിലുണ്ട്. ഈ ലിസ്റ്റ് എല്ലാ പഞ്ചായത്തുകള്‍ക്കും നല്‍കിയിട്ടുണ്ടെന്നും മന്ത്രി പറഞ്ഞു. ഇതു വനംവകുപ്പിന്‍റെ ഔദ്യോഗിക വെബ്സൈറ്റില്‍ അപ്‌ലോഡ് ചെയ്തിട്ടുള്ളതുമാണ്. ജില്ലയില്‍ കൂടുതല്‍ മരണങ്ങള്‍ സംഭവിച്ചിട്ടുള്ളത് പാമ്പുകടിയേറ്റ് ആണ് ജില്ലയിലെ എല്ലാ ആശുപത്രികളിലും ആന്‍റിസ്നേക്ക് വെനത്തിന്‍റെ ലഭ്യത ഉറപ്പുവരുത്താന്‍ നിര്‍ദേശം നല്‍കിയെന്ന് മന്ത്രി പറഞ്ഞു. ജില്ലയില്‍ രണ്ടു റേഞ്ചുകളിലായി 122 ചതുരശ്ര കിലോമീറ്റര്‍ വനപ്രദേശമുണ്ട്. ഇതില്‍ 700 ഹെക്ടറോളം പ്ലാന്‍റേഷന്‍ ആണ്. ആള്‍ത്താമസമില്ലാത്ത സ്വകാര്യ ഉടമസ്ഥതയിലുള്ള പ്രദേശങ്ങള്‍ കാടുമുടി കിടക്കുന്നതിനാല്‍ ഇവിടെ പുലികള്‍, കാട്ടുപോത്ത്, കാട്ടുപന്നികള്‍ ഉള്‍പ്പെടെയുള്ള സസ്തനികള്‍ക്ക് ആവാസവ്യവസ്ഥയും ഒളിത്താവളവുമായി മാറുന്നുണ്ട്. ഈ പ്രദേശങ്ങള്‍ വൃത്തിയാക്കുന്നതിനുള്ള അടിയന്തര നടപടികള്‍ക്ക് തദ്ദേശസ്വയംഭരണ സ്ഥാപനങ്ങള്‍ക്ക് മന്ത്രി നിര്‍ദേശം നല്‍കി. വനങ്ങള്‍ പോലെ കാടുമുടി കിടക്കുന്ന സ്വകാര്യസ്ഥലങ്ങള്‍ ഉടന്‍ വൃത്തിയാക്കാന്‍ പഞ്ചായത്ത് സെക്രട്ടറിമാര്‍ സ്വകാര്യ വ്യക്തികള്‍ക്ക് അടിയന്തര നോട്ടീസ് നല്‍കാന്‍ മന്ത്രി നിര്‍ദേശം നല്‍കി.മുളിയാര്‍, കാറഡുക്ക വനമേഖലകളില്‍ വ്യാപകമായിട്ടുള്ളഅക്കേഷ്യ തൈകളും അടിക്കാടുകളും നിര്‍മാര്‍ജനം ചെയ്യുന്നതിനും ബളാല്‍, കള്ളാര്‍, പനത്തടി പഞ്ചായത്തുകളിലെ വനമേഖലകളില്‍ വ്യാപകമായി കാണുന്ന തോട്ടപ്പയര്‍ മറ്റ് അധിനിവേശ സസ്യങ്ങള്‍ എന്നിവ ഇല്ലായ്മ ചെയ്ത് അവിടങ്ങളില്‍ തദ്ദേശീയ സസ്യ ഇനങ്ങളും ഫലവൃക്ഷത്തൈകളും വെച്ചുപിടിപ്പിക്കുന്നതിനും യോഗത്തില്‍ നിര്‍ദേശിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, ജില്ലാ കളക്ടര്‍ കെ. ഇമ്പശേഖര്‍, ജില്ലാ പോലീസ് മേധാവി വിജയ് ഭാരത് റെഡ്ഡി, കാസര്‍ഗോഡ് ടിഡിഒ കെ.കെ. മോഹന്‍ദാസ്, എല്‍എസ്ജിഡി ഡിഡി കെ.വി. ഹരിദാസ്, ജില്ലാ എസ്‌സി ഓഫീസര്‍ ഇന്‍ ചാര്‍ജ് പി. മിനി, കൃഷിവകുപ്പ് ഡിഡി മിനി മാമന്‍, മൃഗസംരക്ഷണ വകുപ്പ് ഡിഡി ഇന്‍ ചാര്‍ജ് ഡോ.പി. ഷൈജി, ഡിഎംഒ പ്രതിനിധി ഡോ. ബേസില്‍ വര്‍ഗീസ് എന്നിവര്‍ സംസാരിച്ചു. സമിതി കണ്‍വീനര്‍ ഡിവിഷണല്‍ ഫോറസ്റ്റ് ഓഫീസര്‍ കെ. അഷ്റഫ് റിപ്പോര്‍ട്ട് അവതരിപ്പിച്ചു. വന്യജീവി ആക്രമണത്തില്‍ കൊല്ലപ്പെട്ടത് 57 പേര്‍ കാസര്‍ഗോഡ് ഡിവിഷന്‍ രൂപീകരിച്ചത് മുതല്‍ 2024-25 വര്‍ഷം വരെ ജില്ലയില്‍ വന്യജീവി ആക്രമണത്തില്‍ 57 പേര്‍ക്ക് ജീവഹാനി സംഭവിച്ചു. കാട്ടാന ആക്രമത്തില്‍ ഒരാളും കാട്ടുപന്നി ആക്രമത്തില്‍ ഏഴുപേരും പാമ്പ് കടിച്ച് 39 പേരും തേനീച്ചയും കടന്നലും കുത്തി 10 പേരുമാണ് മരിച്ചത്. നിലവില്‍ നഷ്ടപരിഹാരത്തിന്‍റെ ഒന്നാം ഗഡു മഴുവന്‍ പേര്‍ക്കും നല്‍കി കഴിഞ്ഞു. കൃത്യമായ രേഖകള്‍ സമര്‍പ്പിച്ച മുഴുന്‍ ആളുകള്‍ക്കും രണ്ടാം ഗഡു നഷ്ടപരിഹാരവും നല്‍കി. അനന്തരാവകാശ സര്‍ട്ടിഫിക്കറ്റ് ഹാജരാക്കാത്ത മൂന്നുപേര്‍ക്ക് മാത്രമാണ് കുടിശിക നല്‍കാന്‍ ബാക്കിയുള്ളത്. 2024-25 വര്‍ഷം മാത്രം അപേക്ഷ നല്‍കിയ 333 പേര്‍ക്കായി 51 ലക്ഷം രൂപ നഷ്ടപരിഹാരം നല്‍കി. ജീവന്‍ നഷ്ടമായ ഏഴുപേര്‍ക്ക് 10 ലക്ഷം രൂപയും പരുക്കേറ്റ 46 പേര്‍ക്ക് 14.23 ലക്ഷം രൂപയും വളര്‍ത്തുമൃഗങ്ങളെ നഷ്ടമായ ഏഴ് അപേക്ഷകര്‍ക്ക് 80,000 രൂപയും വിളനാശം സംഭവിച്ച 273 അപേക്ഷകര്‍ക്ക് 25.96 ലക്ഷം രൂപയും നഷ്ട പരിഹാരമായി നല്‍കി.

കോണ്‍ക്രീറ്റ് മിക്സിംഗ് വാഹനം കുഴിയില്‍വീണു, ഗതാഗതം തടസപ്പെട്ടു

കാസര്‍ഗോഡ്: അണങ്കൂര്‍ ബെദിരയില്‍ കോണ്‍ക്രീറ്റ് മിക്സിംഗ് ലോറി കുഴിയില്‍ വീണതോടെ വീട്ടില്‍ പുറത്തിറങ്ങാനാകാതെ ജനങ്ങള്‍ വലഞ്ഞു. ഇന്നലെ രാവിലെ ഒന്‍പതോടെ ബെദിര-തുരുത്തി റോഡിലാണ് സംഭവം. വീതി കുറഞ്ഞ റോഡില്‍ വാഹനത്തിന്‍റെ ടയര്‍ റോഡിലെ കുഴിയില്‍ വീഴുകയായിരുന്നു. പിന്നീട് ഈ വാഹനത്തെ പൊക്കിയെടുക്കാന്‍ ഒരു ക്രെയിന്‍ എത്തിയപ്പോള്‍ അതും വഴിയില്‍ കുടുങ്ങി. ശേഷം മണ്ണുമാന്തിയന്ത്രമെത്തി റോഡിന്‍റെ ഭാഗം അല്‍പം മാന്തി വാഹനം കയറിപ്പോകാനുള്ള വഴിയൊരുക്കി. പിന്നീട് മറ്റൊരു ക്രെയിന്‍ എത്തി വൈകുന്നേരം അഞ്ചോടെയാണ് ഈ ഭാഗത്തെ ഗതാഗതം പുനഃസ്ഥാപിച്ചത്.

മണലാരണ്യത്തിൽ നിന്നും മത്സ്യകൃഷിയിലേക്ക്

പടന്ന: പ്രവാസജീവിതത്തിനൊപ്പം നാട്ടിൽ മത്സ്യകൃഷിയും നടത്തുന്ന പടന്ന വടക്കെപ്പുറത്തെ പി.പി. രവിക്ക് സംസ്ഥാന സർക്കാർ പുരസ്കാരം. പിന്നാമ്പുറ മത്സ്യകൃഷി വിത്തുത്പാദനത്തിന് സംസ്ഥാനതലത്തിൽ രണ്ടാംസ്ഥാനമാണ് രവിക്ക് ലഭിച്ചത്. ഇന്ന് കൊല്ലം കൊട്ടാരക്കരയിൽ നടക്കുന്ന ചടങ്ങിൽ അവാർഡ് ഏറ്റുവാങ്ങും. പടന്ന വടക്കെപ്പുറത്ത് വീടിന്‍റെ പരിസരത്ത് പരീക്ഷണാർത്ഥം നടത്തിയ കരിമീൻ കൃഷിയിലെ സാധ്യതകൾ മനസിലാക്കിയാണ് ദുബായിലെ ഒരു സ്വകാര്യ കമ്പനി ജീവനക്കാരനായ രവി ഈ സംരംഭം തുടങ്ങിയത്. ഇതിനായി പടന്ന ഓരി തോടിനടുത്ത് ഒരേക്കർ സ്ഥലം വാങ്ങി കുളം ഉണ്ടാക്കി ഫിഷറീസ് വകുപ്പിന്‍റെ സഹകരണത്തോടെ രണ്ടു വർഷം മുമ്പാണ് മത്സ്യകുഞ്ഞുങ്ങളെ വളർത്താനുള്ള കൃഷിക്ക് തുടക്കമിട്ടത്. പുഴയിൽ നിന്ന് വേലിയേറ്റ സമയത്ത് കയറി വരുന്ന മത്സ്യങ്ങളെ തടഞ്ഞു നിർത്തി വളർത്തിക്കൊണ്ടാണ് മത്സ്യകൃഷിക്ക് തുടക്കമിട്ടത്. ആ കൂട്ടത്തിൽ നിന്ന് വിത്തുത്പാദനം നടന്നപ്പോൾ അതു മികച്ച നിലവാരത്തിലുള്ളതാണെന്ന് ഫിഷറീസ് വകുപ്പ് പരിശോധിച്ച് തീർപ്പാക്കിയതോടെയാണ് വിത്തുത്പാദനം എന്ന ആശയം ഉടലെടുത്തത്. അധികം വൈകാതെ തന്നെ ജില്ലയുടെ വിവിധ ഭാഗങ്ങളിൽ നിന്ന് ഇവിടേക്ക് ആവശ്യക്കാർ എത്തിതുടങ്ങി. എട്ടു മുതൽ 10 സെന്‍റിമീറ്റർ വലുപ്പത്തിലുള്ള കുഞ്ഞുങ്ങളാണ് വിൽപനയ്ക്കുള്ളത്. ഒന്നിന് 10 രൂപ തോതിലാണ് വിൽപന നടത്തുന്നത്. മത്സ്യവിത്തിന് നിലവിൽ ആവശ്യക്കാർ കൂടിവരികയുമാണ്.

നല്ല ഭക്ഷണം നല്ല ആരോഗ്യം പദ്ധതി: പരപ്പ ബ്ലോക്ക് തല ഉദ്ഘാടനം നടത്തി

കരിന്തളം: പോഷകസമൃദ്ധവും സുരക്ഷിതവുമായ ഭക്ഷണത്തിന്‍റെ പ്രാധാന്യം പൊതുജനങ്ങളെ ബോധ്യപ്പെടുത്തുന്നതിനായി പരപ്പ ബ്ലോക്ക് പഞ്ചായത്തിന്‍റെ വാര്‍ഷിക പദ്ധതിയില്‍ ഉള്‍പ്പെടുത്തി നടപ്പിലാക്കുന്ന നല്ല ഭക്ഷണം നല്ല ആരോഗ്യം പദ്ധതിയുടെ ബ്ലോക്ക് തല ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി നിര്‍വഹിച്ചു. കിനാനൂര്‍-കരിന്തളം പഞ്ചായത്തിലെ അഗ്രോ സര്‍വീസ് സെന്‍ററില്‍ നടന്ന പരിപാടിക്ക് ബ്ലോക്ക് പഞ്ചായത്ത് വൈസ് പ്രസിഡന്‍റ് കെ. ഭൂപേഷ് അധ്യക്ഷതവഹിച്ചു. കൃഷി അസിസ്റ്റന്‍റ് ഡയറക്ടര്‍ ഇന്‍ചാര്‍ജ് നിഖില്‍ നാരായണന്‍ പദ്ധതി സംബന്ധിച്ച വിശദീകരിച്ചു. പച്ചക്കറി ഉദ്പാദനത്തില്‍ ജനപങ്കാളിത്തം വര്‍ധിപ്പിക്കുക, ഐ.സിഎം.ആര്‍ നിര്‍ദേശിക്കുന്ന അളവില്‍ പച്ചക്കറികള്‍ ജനങ്ങളുടെ ആഹാരക്രമത്തില്‍ ഉള്‍പ്പെടുത്തുക, സുരക്ഷിത ഭക്ഷണ ഉദ്പാദന രീതികളെ പ്രോത്സാഹിപ്പിക്കുക എന്നിവയാണ് പദ്ധതിയുടെ മുഖ്യലക്ഷ്യങ്ങള്‍. പദ്ധതിയുടെ ഭാഗമായി ജനങ്ങള്‍ക്ക് പരിശീലവം ബോധവത്കരണ ക്ലാസുകളും നടത്തും. ഇതിനായി ആരോഗ്യവകുപ്പും കൃഷിവകുപ്പും ഉള്‍പ്പെടെയുള്ള വിവിധ വകുപ്പുകള്‍ തമ്മില്‍ സംയോജിതമായി പ്രവര്‍ത്തിക്കും. യോഗത്തില്‍ ബ്ലോക്ക് പഞ്ചായത്ത് വികസന സ്ഥിരംസമിതി അധ്യക്ഷ രജനി കൃഷ്ണന്‍, ജോയിന്‍റ് ബിഡിഒ ബിജുകുമാര്‍, അഗ്രോ സര്‍വീസ് സെന്‍റര്‍ ഫെസിലിറ്റേറ്റര്‍ മോഹനൻ, വാര്‍ഡ് മെംബര്‍മാരായ കൈരളി, ധന്യ എന്നിവര്‍ സംസാരിച്ചു. കിനാനൂര്‍-കരിന്തളം കൃഷി ഓഫീസര്‍ ജെ. ജിജി സ്വാഗതവും അസി. അഗ്രികള്‍ച്ചര്‍ ഓഫീസര്‍ സദാനന്ദന്‍ നന്ദിയും പറഞ്ഞു.

ഒരുങ്ങുന്നു, സ്വന്തം ഭൂമിക്ക് ചുറ്റും ഡിജിറ്റല്‍ വേലി

കാസര്‍ഗോഡ്: എല്ലാവര്‍ക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാര്‍ട്ട് എന്ന ലക്ഷ്യത്തോടെ സര്‍വേ വകുപ്പിന് കീഴില്‍ ജില്ലയിലെ ഡിജിറ്റല്‍ സര്‍വേയുടെ പ്രവര്‍ത്തനങ്ങള്‍ പുരോഗമിക്കുന്നു. ഡിജിറ്റല്‍ സര്‍വേ നടത്തി അളന്നു തിരിച്ച് അതിര്‍ത്തി നിര്‍ണയിക്കപ്പെട്ട ഭൂമിക്കും ചുറ്റും ഒരു അദൃശ്യ ഡിജിറ്റല്‍ വേലി രൂപപ്പെടും. ഇത് ഭൂമി കയ്യേറ്റം, അതിര്‍ത്തി തര്‍ക്കം തുടങ്ങി ഭൂവുടമക്ക് ഉണ്ടാകാവുന്ന എല്ലാ തലവേദനകളും നിയമ കുരുക്കുകളും തടയുകയും നിയമ വ്യവഹാരങ്ങളലക്ക് പോകാതെ തന്നെ സര്‍ക്കാര്‍ ഭൂമിയും സ്വകാര്യ ഭൂമിയും കൃത്യമായി തിരിച്ചറിയാന്‍ സഹായിക്കുകയും ചെയ്യുന്നു. ചങ്ങല വലിച്ചും ടോട്ടല്‍ സ്റ്റേഷന്‍ പോലുള്ള പഴയ ഉപകരണങ്ങള്‍ ഉപയോഗിച്ചും നടന്നിരുന്ന സര്‍വ്വേ രീതികളില്‍ നിന്ന് മാറി ഉപഗ്രഹാധിഷ്ഠിതമായി പ്രവര്‍ത്തിക്കുന്ന ആര്‍റ്റികെ റോവര്‍, റോബോട്ടിക് ടോട്ടല്‍ സ്റ്റേഷന്‍ എന്നീ അത്യാധുനിക ഉപകരണങ്ങള്‍ ഉപയോഗപ്പെത്തിയാണ് ഡിജിറ്റല്‍ സര്‍വേ നടത്തുന്നത്. ഭൂപരിഷ്‌കരണം നടപ്പിലാക്കിയ കേരളം പോലുള്ള സംസ്ഥാനത്ത് അതിര്‍ത്തിനിര്‍ണയം ഉയര്‍ത്തുന്ന വെല്ലുവിളികളെ നേരിടുക എന്ന ലക്ഷ്യത്തോടെയാണ് ഡിജിറ്റല്‍ സര്‍വേയുടെ പ്രാരംഭഘട്ട ചര്‍ച്ചകള്‍ 2021ല്‍ ആരംഭിക്കുന്നത്. 2022 ആദ്യഘട്ടത്തില്‍ കാസര്‍ഗോഡ് ജില്ലയില്‍ 18 വില്ലേജുകളില്‍ ഡിജിറ്റല്‍ സര്‍വേ തുടങ്ങുകയും 2023 പകുതി ആയപ്പോഴേക്കും 18 വില്ലേജുകളില്‍ സര്‍വേ പൂര്‍ത്തീകരിക്കുകയും ചെയ്തു. 2024 ല്‍ ജില്ലയില്‍ വീണ്ടും 19 വില്ലേജുകളില്‍ ഡിജിറ്റല്‍ സര്‍വേ ആരംഭികുകയും ഇതില്‍ 12 വില്ലേജുകളിലും ഡിജിറ്റല്‍ സര്‍വേ പൂര്‍ത്തീകരിക്കുകയും ചെയ്തു. നെക്രാജെ, ബേള, ബളാല്‍, മാലോത്ത്, പുല്ലൂര്‍, പെരിയ, പെരുമ്ള,കുബനൂര്‍, മടിക്കൈ വില്ലജുകളില്‍ സര്‍വേ അന്തിമ ഘട്ടത്തിലാണ്. ഈ സാങ്കേതിക വിദ്യ ഉപയോഗിച്ച് കാസര്‍കോട് ജില്ലയിലെ മഞ്ചേശ്വരം താലൂക്കില്‍പ്പെട്ട ഉജ്ജാര്‍ ഉള്‍വാര്‍ വില്ലേജില്‍ ഡിജിറ്റല്‍ സര്‍വേ പൂര്‍ത്തീകരിച്ച് റവന്യൂ ഭരണത്തിന് കൈമാറി. ഉജ്ജാര്‍ ഉള്‍വാര്‍ വില്ലജിലെ ഭൂമി സംബന്ധിച്ച എല്ലാ സേവനങ്ങളും സ്‌കെച്ചുള്‍പ്പെടെ എന്‍റെ ഭൂമി എന്ന ഒറ്റ പോര്‍ട്ടലില്‍ ലഭ്യമാണ്. രാജ്യത്ത് ആദ്യമായി 850 കോടി രൂപ ചെലവിട്ട് കേരളത്തിലെ മുഴുവന്‍ വില്ലേജുകളിലും നാലു വര്‍ഷം കൊണ്ട് എട്ടു ഘട്ടങ്ങളിലായി ഡിജിറ്റല്‍ സര്‍വേ പൂര്‍ത്തീകരിക്കാനാണ് തീരുമാനം. ഓരോ ആറുമാസത്തിലും 200 വില്ലേജുകളില്‍ ഡിജിറ്റല്‍ സര്‍വേ പൂര്‍ത്തിയാക്കും. കാസര്‍ഗോഡ് ജില്ലയില്‍ മാത്രം 2,50,223 പേരുടെ 40560.85 ഏക്കര്‍ ഭൂമിയില്‍ ഡിജിറ്റല്‍ സര്‍വേ നടന്നു.

നഗരമധ്യത്തിൽ കുഴിച്ചുമറിച്ച റോഡ് ഒരുമാസം കഴിഞ്ഞിട്ടും നന്നാക്കിയില്ല

കാസർഗോഡ്: ദേശീയപാത നിർമാണവുമായി ബന്ധപ്പെട്ട് മാറ്റേണ്ടിവന്ന കുടിവെള്ള പൈപ്പ് ലൈൻ പുനഃസ്ഥാപിക്കുന്നതിനായി കുഴിച്ചുമറിച്ച റോഡ് ഒരു മാസം കഴിഞ്ഞിട്ടും ടാറിംഗ് നടത്താത്തത് വ്യാപാരികൾക്കും നാട്ടുകാർക്കും ദുരിതമാകുന്നു. പുതിയ ബസ് സ്റ്റാൻഡിന് സമീപം എംജി റോഡിൽ സുൽത്താൻ ജ്വല്ലറിക്ക് മുന്നിലുള്ള ഭാഗത്താണ് റോഡ് കുഴിച്ചുമറിച്ചത്. പ്രവൃത്തികളുമായി ബന്ധപ്പെട്ട് രണ്ടാഴ്ചയോളം ഇവിടെ വ്യാപാരസ്ഥാപനങ്ങൾ അടച്ചിടേണ്ടി വന്നിരുന്നു. പൈപ്പുകൾ പുനഃസ്ഥാപിച്ച് കുഴി മൂടിയതോടെ വ്യാപാരികൾ വീണ്ടും കട തുറന്നു. എന്നാൽ പിന്നീട് പലതവണ ദേശീയപാത നിർമാണ കരാറുകാരായ ഊരാളുങ്കൽ സൊസൈറ്റി അധികൃതരുടെയും നഗരസഭയുടെയും ശ്രദ്ധയിൽ പെടുത്തിയിട്ടും ഈ ഭാഗം ടാറിംഗ് നടത്തി പഴയപടിയാക്കുന്നതിനുള്ള നടപടികൾ ഉണ്ടായിട്ടില്ലെന്ന് വ്യാപാരികൾ പറയുന്നു. നഗരമധ്യത്തിൽ തന്നെയുള്ള ഭാഗമായിട്ടും പെരുമഴയത്ത് കുഴഞ്ഞുമറിഞ്ഞ് കിടക്കുന്ന അവസ്ഥയിലാണ്. പൈപ്പ് ലൈൻ സ്ഥാപിക്കുന്നതിനായി എടുത്ത കുഴികൾ പൂർണമായി മൂടിയതുതന്നെ വ്യാപാരികളുടെ മുൻകൈയിലാണ്. റോഡ് ഈ അവസ്ഥയിലായതുകാരണം സാധനങ്ങൾ വാങ്ങാൻ ആളുകളെത്തുന്നതും കുറഞ്ഞതായി അവർ പറയുന്നു. അടിയന്തിരമായി റോഡ് പഴയപടി റീ ടാറിംഗ് നടത്തി ഗതാഗതയോഗ്യമാക്കണമെന്നാണ് ഇവരുടെ ആവശ്യം.

സിപിഐ ജില്ലാ സമ്മേളനത്തിന് വെള്ളരിക്കുണ്ടിൽ ഇന്നുതുടക്കം

വെള്ളരിക്കുണ്ട്: സിപിഐ ജില്ലാസമ്മേളനത്തിന് ഇന്നു വെള്ളരിക്കുണ്ടില്‍ തുടക്കം. ഉച്ചകഴിഞ്ഞ് മൂന്നിന് വെള്ളരിക്കുണ്ട് ടൗണിലെ പൊതുസമ്മേളന നഗരിയിലേക്കുള്ള പതാക കയ്യൂരില്‍ നിന്നും എഐവൈഎഫ് ജില്ലാ സെക്രട്ടറി എം. ശ്രീജിത്, എഐഎസ്എഫ് ജില്ലാ സെക്രട്ടറി പ്രഭിജിത്ത് എന്നിവരുടെ നേതൃത്വത്തിലും പ്രതിനിധി സമ്മേളന നഗരിയിലേക്കുള്ള പതാക മടിക്കൈ കുഞ്ഞിക്കണ്ണന്‍റെ സ്മൃതി മണ്ഡപത്തില്‍ നിന്നും മഹിളാസംഘം ജില്ലാ സെക്രട്ടറി പി. ഭാര്‍ഗവിയുടെ നേതൃത്വത്തിലും കൊടിമരം ഏളേരിത്തട്ട് പൊടോര കുഞ്ഞിരാമന്‍ നായരുടെ സ്മൃതി മണ്ഡപത്തില്‍ കിസാന്‍സഭ ജില്ലാ സെക്രട്ടറി കെ. കുഞ്ഞിരാമന്‍റെ നേതൃത്വത്തിലും സമ്മേളന നഗരയില്‍ എത്തിക്കും. മൂന്നുജാഥകളും ഉച്ചകഴിഞ്ഞ് മൂന്നിനു വെള്ളരിക്കുണ്ടില്‍ സംഗമിച്ച് റെഡ് വോളണ്ടിയര്‍ മാര്‍ച്ചോട് കൂടി പൊതുസമ്മേളന നഗരിയില്‍ എത്തിക്കും. പൊതുസമ്മേളന നഗരയിലേക്കുള്ള പതാക എഐടിയുസി ജില്ലാ ജനറല്‍സെക്രട്ടറി ടി. കൃഷ്ണനും പ്രതിനിധി സമ്മേളന നഗരിയിലേക്കുള്ള പതാക സിപിഐ ജില്ലാ സെക്രട്ടറി സി.പി. ബാബുവും കൊടിമരം സംഘാടക സമിതി കണ്‍വീനര്‍ എം. കുമാരനും ഏറ്റുവാങ്ങും. തുടര്‍ന്ന് പൊതുസമ്മേളനം സിപിഐ ദേശീയ എക്‌സിക്യൂട്ടീവംഗം പി.സന്തോഷ് കുമാര്‍ എംപി ഉദ്ഘാടനംചെയ്യും. 12നു വെള്ളരിക്കുണ്ട് വീനസ് ഓഡിറ്റോറിയത്തില്‍ നടക്കുന്ന പ്രതിനിധിസമ്മേളനം രാവിലെ 10നു ദേശീയ എക്‌സിക്യൂട്ടീവംഗം കെ. പ്രകാശ് ബാബു ഉദ്ഘാടനം ചെയ്യും. സിപിഐ സംസ്ഥാന അസി.സെക്രട്ടറി ഇ. ചന്ദ്രശേഖരന്‍ എംഎല്‍എ, മന്ത്രിമാരായ ജി.ആര്‍. അനില്‍, പി. പ്രസാദ് എന്നിവര്‍ സംബന്ധിക്കും. സമ്മേളനം 13നു സമാപിക്കും.

തേങ്ങക്ക് വിലയേറിയപ്പോൾ തെങ്ങുകയറ്റ തൊഴിലാളികളെ കിട്ടാനില്ല

പാലാവയൽ: തേങ്ങയ്ക്ക് നല്ല വില കിട്ടിത്തുടങ്ങിയതോടെ കർഷകർ തെങ്ങിൻതോട്ടങ്ങളെ കാര്യമായി ശ്രദ്ധിച്ചുതുടങ്ങി. കാടുപിടിച്ച തെങ്ങിൻതോട്ടങ്ങളിൽ വീണുകിടക്കുന്ന തേങ്ങകൾ ആഴ്ചയിലോ മാസത്തിലോ ഒരിക്കൽ പെറുക്കിക്കൂട്ടിയിരുന്നതിനു പകരം തേങ്ങയിടാനും തെങ്ങുകൾക്ക് തടമെടുക്കാനും വളമിടാനുമൊക്കെ ആളെ അന്വേഷിക്കുകയാണ് മലയോരത്തെ മിക്ക കർഷകരും. തൊഴിലാളികളുടെ ക്ഷാമവും ഉയർന്ന കൂലിയും തേങ്ങയുടെ വിലയിടിവും മൂലം തെങ്ങിൽ കയറി തേങ്ങയിടീക്കുന്ന ശീലം പലരും വർഷങ്ങൾക്കുമുമ്പേ ഉപേക്ഷിച്ചതായിരുന്നു. ഇപ്പോൾ തോട്ടങ്ങളിൽ വീണുകിടക്കുന്ന തേങ്ങകൾ മോഷണം പോകുന്ന സാഹചര്യംപോലും ഉണ്ടായതോടെയാണ് പലരും വീണ്ടും തെങ്ങുകയറ്റ തൊഴിലാളികളെ അന്വേഷിച്ചുതുടങ്ങിയത്. മലയോരമേഖലയിൽ ഏതാനും വർഷങ്ങൾക്കുമുമ്പ് നൂറുകണക്കിന് തെങ്ങുകയറ്റ തൊഴിലാളികൾ ഉണ്ടായിരുന്നിടത്ത് ഇന്ന് വിരലിലെണ്ണാവുന്നവർ മാത്രമാണുള്ളത്. പരമ്പരാഗത രീതിയിലുള്ള തെങ്ങുകയറ്റം അറിയാവുന്നവർ പുതുതലമുറയിൽ തീരെ കുറവാണ്. ഈ തൊഴിലിന്‍റെ അപകടസാധ്യതയും ഇടക്കാലത്ത് തേങ്ങയുടെ ഉല്പാദനക്കുറവും വിലയിടിവും മൂലം പൊതുവേ ആരും വിളിക്കാതായതുമൊക്കെയാണ് പലരേയും ഈ മേഖലയിൽനിന്ന് പിന്തിരിപ്പിച്ചത്. തെങ്ങിൽ നിന്ന് വീണും മറ്റ് അപകടങ്ങൾ സംഭവിച്ചും ദുരിതത്തിലായവർ പഴയ തലമുറയിൽ ഏറെയുണ്ട്. തൊഴിൽ ചെയ്യാനാകാതെ കിടപ്പിലായാൽ സർക്കാരിൽനിന്നുപോലും കാര്യമായ ആനുകൂല്യങ്ങളൊന്നും കിട്ടില്ലെന്നാണ് പലരുടെയും അനുഭവമെന്ന് തെങ്ങുകയറ്റ തൊഴിലാളിയായ വിൽസൺ പേണ്ടാനത്ത് പറയുന്നു. മലയോരത്തെ തെങ്ങുകളുടെ ഉയരവും തൊട്ടടുത്തുകൂടി കടന്നുപോകുന്ന വൈദ്യുത ലൈനുകളുമെല്ലാം ചെറുതല്ലാത്ത വെല്ലുവിളികളാണ്. നേരിയൊരു കൈപ്പിഴ പോലും ജീവിതം ഇരുട്ടിലാക്കിയേക്കാം. ഒരു തെങ്ങിൽ കയറുന്നതിന് 45 രൂപയാണ് മലയോരമേഖലയിൽ ഇപ്പോഴത്തെ കൂലി. നഗരമേഖലകളിൽ അത് 60 രൂപ വരെയാണ്. 1926 ലെ അഗ്രിക്കൾച്ചർ ആക്ട്, 1976 ലെ ഇൻഡസ്ട്രിയൽ ആക്ട് എന്നിവ പ്രകാരം സർക്കാരിൽനിന്ന് തൊഴിലാളികൾക്ക് ലഭിക്കേണ്ട ആനുകൂല്യങ്ങളൊന്നും തെങ്ങുകയറ്റ തൊഴിലാളികൾക്ക് ലഭിക്കുന്നില്ല. പഞ്ചായത്തുകളിലോ കൃഷിവകുപ്പിലോ നിന്നുപോലും കാര്യമായ ആനുകൂല്യങ്ങളൊന്നും കിട്ടുന്നില്ല. കൃഷിഭവനുകൾ മുഖേന തെങ്ങുകയറ്റയന്ത്രങ്ങളും അതുപയോഗിച്ച് തെങ്ങുകയറാനുള്ള പരിശീലനവും നല്കുന്നതുമാണ് സർക്കാർ തലത്തിൽ ലഭിക്കുന്ന ഏക ആനുകൂല്യം. അതിനുതന്നെ ആവശ്യക്കാർ തീരെ കുറവാണെന്നതാണ് അനുഭവം. നിലവിലുള്ള തെങ്ങുകയറ്റ തൊഴിലാളികൾക്കും പുതുതയി ഈ മേഖലയിലേക്ക് കടന്നുവരുന്നവർക്കും തൊഴിൽ നിയമങ്ങൾ അനുസരിച്ചുള്ള സംരക്ഷണവും ആനുകൂല്യങ്ങളും ഉറപ്പാക്കാൻ സർക്കാർ തയ്യാറാകണമെന്നാണ് ഇവരുടെ ആവശ്യം.

ഓപ്പറേഷന്‍ ധൂമം: സ്‌കൂള്‍ പരിസരത്ത് നിന്ന് പുകയില ഉത്പന്നങ്ങള്‍ പിടികൂടി

നീലേശ്വരം: കേന്ദ്ര പുകയില നിയന്ത്രണ നിയമം ഫലപ്രദമായി നടപ്പിലാക്കുന്നതിന്‍റെ ഭാഗമായി ഓപ്പറേഷന്‍ ധൂമം എന്ന പേരില്‍ ജില്ലാ കളക്ടറുടെ നിര്‍ദേശപ്രകാരം നടന്ന സംയുക്ത പരിശോധനയില്‍ നീലേശ്വരം ബ്ലോക്ക് തല സ്‌ക്വാഡ് നീലേശ്വരം, ചായ്യോത്ത് മേഖലയില്‍ വിവിധ സ്ഥാപനങ്ങള്‍ പരിശോധിച്ചു. രാജാസ് ഹയര്‍ സെക്കന്‍ഡറി സ്‌കൂളിനു സമീപമുള്ള കടയില്‍ നിന്ന് പുകയില ഉത്പന്നങ്ങള്‍ പിടിച്ചെടുത്തു നശിപ്പിക്കുകയും 2000 രൂപ പിഴയിടുകയും ചെയ്തു. നിയമത്തിന്‍റെ ഭാഗമായ ബോര്‍ഡ് വെക്കാത്ത ചായ്യോത്ത് കടയുടമയ്ക്ക് പിഴ ഈടാക്കുകയും ചെയ്തു. കേന്ദ്ര പുകയില നിയന്ത്രണ നിയമപ്രകാരം വിദ്യാലയങ്ങള്‍ക്ക് നൂറുവാര ചുറ്റളവില്‍ പുകയില വില്‍പന നടത്താന്‍ പാടുള്ളതല്ല. പരിശോധനയില്‍ നീലേശ്വരം താലൂക്ക് ആശുപത്രി ഹെല്‍ത്ത് സൂപ്പര്‍വൈസര്‍ അജിത് സി. ഫിലിപ്പ്, നീലേശ്വരം എസ്‌ഐ എ.വി. ശ്രീകുമാര്‍, എക്‌സൈസ് ഇന്‍സ്‌പെക്ടര്‍ എന്‍. വൈശാഖ്, ഹെല്‍ത്ത് ഇന്‍സ്‌പെക്ടര്‍ കെ. ഗിരീഷ്‌കുമാര്‍, ജൂണിയര്‍ ഹെല്‍ത്ത് ഇന്‍സ്‌പെക്ടര്‍ ബി. ശ്രുതി, എക്‌സൈസ് പ്രിവന്‍റീവ് ഓഫീസര്‍മാരായ പ്രസാദ്, പ്രജിത്ത്, സിവില്‍ എക്‌സൈസ് ഓഫീസര്‍മാരായ നിസാമുദ്ദീന്‍, ശൈലേഷ്, രാജീവന്‍, സിവില്‍ പോലീസ് ഉദ്യോഗസ്ഥരായ രാജീവന്‍, സുരേന്ദ്രന്‍ എന്നിവര്‍ പങ്കെടുത്തു.

കോയിത്തട്ട കുന്നിനെ ജൈവവൈവിധ്യ പൈതൃകകേന്ദ്രമായി പ്രഖ്യാപിക്കാൻ പദ്ധതി

കരിന്തളം: കിനാനൂർ-കരിന്തളം പഞ്ചായത്തിലെ കോയിത്തട്ട കുന്നിനെ ജൈവവൈവിധ്യ പൈതൃകകേന്ദ്രമായി പ്രഖ്യാപിക്കാൻ ജില്ലാ പഞ്ചായത്തിന്‍റെ പദ്ധതി. ഇതിന്‍റെ ഭാഗമായി സംസ്ഥാന ജൈവവൈവിധ്യ ബോർഡ് മെമ്പർ സെക്രട്ടറി ഡോ.വി. ബാലകൃഷ്ണനും ജില്ലാ പഞ്ചായത്ത് അംഗങ്ങളും ജൈവവൈവിധ്യ പരിപാലനസമിതി അംഗങ്ങളും നാളെ സ്ഥലം സന്ദർശിക്കും. തുടർന്ന് നാട്ടുകാരുടെ യോഗം വിളിച്ച് പദ്ധതിയുടെ രൂപരേഖ തയ്യാറാക്കും. ജൈവവൈവിധ്യങ്ങളാൽ സമ്പന്നമായ ജില്ലയിലെ ഇടനാടൻ ചെങ്കൽകുന്നുകൾക്ക് സംരക്ഷണമൊരുക്കുന്നതിന്‍റെ ആദ്യപടിയായാണ് പദ്ധതി ആവിഷ്കരിച്ചത്. മൈസൂരിലെയും മലബാറിലെയും ഭൂപ്രകൃതിയും ജൈവവൈവിധ്യവുമായി ബന്ധപ്പെട്ട് 1807 ൽ ഫ്രാൻസിസ് ബുക്കാനൻ എഴുതിയ പുസ്തകത്തിൽ കോയിത്തട്ടയിലെ ചെങ്കൽക്കുന്നുകളെ കുറിച്ച് പരാമർശിക്കുന്നുണ്ട്. ചെങ്കൽപ്പാറകൾക്ക് മുകളിൽ വെള്ളം കെട്ടിനിൽക്കുന്ന ഇടങ്ങളിൽ വളരുന്ന ആമ്പലിനോട് സാദൃശ്യമുള്ള കൃഷ്ണകേസര എന്ന അപൂർവ ജലസസ്യം കോയിത്തട്ട കുന്നിലെ ജൈവവൈവിധ്യങ്ങളിലൊന്നാണ്. മറ്റനവധി അപൂർവ സസ്യജാലങ്ങളും ചെറുജീവികളും ഈ കുന്നിലെ ആവാസവ്യവസ്ഥയിൽ കണ്ടെത്തിയിട്ടുണ്ട്. അമിതമായ മണ്ണെടുപ്പ് മൂലം ജില്ലയിലെ ഇടനാടൻ ചെങ്കൽകുന്നുകളിൽ പലതും നാശത്തിന്‍റെ വക്കിലായ സാഹചര്യത്തിലാണ് ഇവയുടെ സംരക്ഷണത്തിനായി ജില്ലാ പഞ്ചായത്ത് മുന്നിട്ടിറങ്ങുന്നത്.

അരിവാള്‍കോശ രോഗനിര്‍ണയ പരിശോധന ആരംഭിച്ചു

എണ്ണപ്പാറ: അരിവാള്‍ കോശരോഗ നിര്‍ണയപരിശോധനയ്ക്ക് കോടോം-ബേളൂര്‍ പഞ്ചായത്തിലെ കോളിയാര്‍ പട്ടികവര്‍ഗ ഉന്നതിയില്‍ തുടക്കമായി. ക്ഷേമകാര്യ സ്ഥിരംസമിതി അധ്യക്ഷന്‍ പി. ഗോപാലകൃഷ്ണന്‍ ഉദ്ഘാടനം ചെയ്തു. എണ്ണപ്പാറ കുടുംബരോഗ്യകേന്ദ്രം മെഡിക്കല്‍ ഓഫീസര്‍ ഡോ.എം.വി. കൃപേഷ് അധ്യക്ഷതവഹിച്ചു. ജില്ലാ എംസിഎച്ച് ഓഫീസര്‍ സൂസന്‍ ഫിലിപ്പ്, ഡിപിഎച്ച്എന്‍ കെ. ശാന്ത എന്നിവര്‍ സംസാരിച്ചു. ജില്ലാ എഡ്യുക്കേഷന്‍ആൻഡ് മീഡിയ ഓഫീസര്‍ അബ്ദുള്‍ ലത്തീഫ് മഠത്തില്‍ സ്വാഗതവും കുടുംബാരോഗ്യകേന്ദ്രം ഹെല്‍ത്ത് ഇന്‍സ്‌പെക്ടര്‍ പി.കെ. ജിഷ നന്ദിയും പറഞ്ഞു.

മൊഗ്രാൽ ജിവിഎച്ച്എസ്എസിൽ പപ്പായത്തോട്ടം ഒരുങ്ങുന്നു

മൊഗ്രാൽ: ഗവ. വിഎച്ച്എസ്എസിലെ ഇക്കോ ക്ലബിന്‍റെ നേതൃത്വത്തിൽ സ്കൂളിൽ പപ്പായത്തോട്ടമൊരുക്കുന്നു. സിപിസിആർഐയിൽ നിന്നെത്തിച്ച മികച്ചയിനം തൈകളാണ് നട്ടുപിടിപ്പിച്ചത്. മുഖ്യാധ്യാപകൻ ജെ. ജയറാം, പിടിഎ പ്രസിഡന്‍റ് അഷറഫ് പെർവാഡ് എന്നിവർ ചേർന്ന് തൈകൾ നട്ട് ഉദ്ഘാടനം നിർവഹിച്ചു. ഇക്കോ ക്ലബിന്‍റെ നേതൃത്വത്തിൽ നേരത്തേ വാഴകൃഷി ചെയ്തുവരുന്നുണ്ട്. അധികം താമസിയാതെ പച്ചക്കറി കൃഷി കൂടി തുടങ്ങാനാണ് പദ്ധതി. ചടങ്ങിൽ സ്റ്റാഫ് സെക്രട്ടറി വിജു പയ്യാടക്കത്ത്, അധ്യാപകരായ രാജേഷ്, സൈനബ, റിവേഗ, രമ്യ എന്നിവർ പങ്കെടുത്തു.

ആനക്കുട്ടിയുടെ ജഡം മറവുചെയ്തു

പാലാവയൽ: ഇടവരമ്പിനും കോഴിച്ചാലിനുമിടയിൽ പുഴയ്ക്ക് നടുവിലെ തുരുത്തിൽ കണ്ടെത്തിയ ആനക്കുട്ടിയുടെ ജഡം വനംവകുപ്പിന്‍റെ നടപടിക്രമങ്ങളനുസരിച്ച് പോസ്റ്റ്മോർട്ടം നടത്തിയതിനു ശേഷം കാട്ടിൽ മറവുചെയ്തു. കണ്ണൂർ ഡിവിഷണൽ ഫോറസ്റ്റ് ഓഫീസർ എസ്. വൈശാഖിന്‍റെ നിർദ്ദേശാനുസരണം നോർത്തേൺ സർക്കിളിനു കീഴിലുള്ള വെറ്ററിനറി സർജൻ ഇല്യാസ് റാവുത്തറുടെ നേതൃത്വത്തിലാണ് പോസ്റ്റ്മോർട്ടം നടപടികൾ പൂർത്തിയാക്കിയത്. ചെറുപുഴ മൃഗാശുപത്രിയിലെ സർജൻ ഡോ. ജിബിൻ, പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ, എൻജിഒ പ്രതിനിധി വിമൽ ലക്ഷ്മണൻ, സയന്‍റിഫിക് എക്സ്പേർട്ട് മിനി വർഗീസ്, തളിപ്പറമ്പ് റെയ്ഞ്ച് ഫോറസ്റ്റ് ഓഫീസർ പി.വി.സനൂപ് കൃഷ്ണൻ, ഫ്ലയിംഗ് സ്ക്വാഡ് റെയ്ഞ്ച് ഓഫീസർ ജയപ്രകാശ് എന്നിവർ സ്ഥലത്തെത്തിയിരുന്നു.

ജ്യോതിഭവന്‍ ബധിരവിദ്യാലയത്തിന് ഇലക്‌ട്രിക് ഓട്ടോറിക്ഷ നല്‍കി മുത്തൂറ്റ് ഫിനാന്‍സ്

ചായ്യോത്ത്: മുത്തൂറ്റ് ഫിനാന്‍സിന്‍റെ സിഎസ്ആര്‍ പ്രവര്‍ത്തനങ്ങളുടെ ഭാഗമായി ചായ്യോത്ത് ജ്യോതിഭവന്‍ ബധിരവിദ്യാലയത്തിന് ഇലക്‌ട്രിക് ഓട്ടോറിക്ഷ കൈമാറി. കാസര്‍ഗോഡ്, കണ്ണൂര്‍ ജില്ലകളില്‍ നിന്നുള്ള കേള്‍വിശേഷിയില്ലാത്ത 57 കുട്ടികളാണ് ജ്യോതിഭവന്‍ സ്‌കൂളില്‍ പഠിക്കുന്നത്. ഇതില്‍ 30 പേര്‍ സ്‌കൂള്‍ ഹോസ്റ്റലില്‍ താമസിച്ചാണ് പഠിക്കുന്നത്. മറ്റ് 27 പേരും ഉള്‍പ്രദേശങ്ങളില്‍ നിന്ന് ദിവസവും യാത്ര ചെയ്താണ് എത്തുന്നത്. പലപ്പോഴും പൊതുഗതാഗത സംവിധാനങ്ങളാണ് ഇവര്‍ക്ക് ആശ്രയം. സ്‌കൂള്‍ സ്വന്തം നിലയിലാണ് കുട്ടികളുടെ യാത്രാസൗകര്യം ഒരുക്കുന്നത്. ഇതു സ്‌കൂളിന് പ്രതിമാസം വലിയ സാമ്പത്തികബാധ്യതയുണ്ടാക്കി. ഇതോടെയാണ് വിദ്യാര്‍ഥികള്‍ക്ക് സ്ഥിരവും സുരക്ഷിതവും പരിസ്ഥിതി സൗഹൃദവുമായ യാത്ര ഉറപ്പാക്കുന്നതിനായി ഒരു ഇലക്‌ട്രിക്് ഓട്ടോറിക്ഷ വാങ്ങുന്നതിനായി മുത്തൂറ്റ് ഫിനാന്‍സ് സാമ്പത്തിക പിന്തുണ നല്‍കിയത്. ഈ വാഹനം ദിവസവും ഏകദേശം 70 കിലോമീറ്റര്‍ ദൂരം മൂന്നു റൂട്ടുകളിലായി സഞ്ചരിക്കും. മുത്തൂറ്റ് ഫിനാന്‍സ് കോഴിക്കോട് റീജിയണല്‍ മാനേജര്‍ ദീപേന്ദ്രു ഹരീഷ് വാഹനം കൈമാറി. സിഎസ്ആര്‍ മാനേജര്‍ ജാന്‍സന്‍ വര്‍ഗീസ്, മുഖ്യാധ്യാപിക സിസ്റ്റര്‍ ഫിന്‍സി, കാഞ്ഞങ്ങാട് ബ്രാഞ്ച് മാനേജര്‍ കെ. രാജേഷ്, കോഴിക്കോട് റീജിയണല്‍ മാര്‍ക്കറ്റിംഗ് മാനേജര്‍ കെ. രാജേഷ് കുമാര്‍, കണ്ണൂര്‍ ഫോര്‍ട്ട് റോഡ് ബ്രാഞ്ച് മാനേജര്‍ സുധീഷ്, പിടിഎ പ്രസിഡന്‍റ് കെ.ജെ. രാജേഷ് എന്നിവര്‍ പങ്കെടുത്തു.

ജൈവവൈവിധ്യ പുരസ്‌കാരം: കാസര്‍ഗോഡിന് ഇരട്ടനേട്ടം

കാസര്‍ഗോഡ്: സംസ്ഥാന ജൈവവൈവിധ്യ ബോര്‍ഡിന്‍റെ 2023ലെ പ്രവര്‍ത്തനങ്ങള്‍ക്കുള്ള അവാര്‍ഡുകള്‍ പ്രഖ്യാപിച്ചപ്പോള്‍ ജില്ലയ്ക്ക് അഭിമാനമായി ഇരട്ട നേട്ടം. സംസ്ഥാനത്തെ ഏറ്റവും മികച്ച ബിഎംസിയായി കാസര്‍ഗോഡ് ജില്ലാ പഞ്ചായത്ത് ബിഎംസി തെരഞ്ഞെടുക്കപ്പെട്ടപ്പോള്‍ മികച്ച ഹരിതവിദ്യാലയമായി ബേക്കല്‍ ജിഎഫ്എച്ച്എസ്എസ് തെരഞ്ഞെടുക്കപ്പെട്ടു. രാജ്യത്താദ്യമായി ഔദ്യോഗിക വൃക്ഷവും പുഷ്പവും പക്ഷിയും ജീവിയുമുള്ള ജില്ലയായി 2023 ല്‍ കാസര്‍ഗോഡിനെ പ്രഖ്യാപിച്ചിരുന്നു. കാഞ്ഞിരമരം ജില്ലാ വൃക്ഷവുമായും പെരിയ പോളത്താളി ജില്ലാ പുഷ്പമായും വെള്ള വയറന്‍ കടല്‍പ്പരുന്ത് ജില്ല പക്ഷിയായും പാലപ്പൂവന്‍ ആമ ജില്ലാ ജീവിയായും പ്രഖ്യാപിക്കപ്പെട്ടു. .ഈ സ്പീഷീസുകളുടെ സംരക്ഷണ പ്രവര്‍ത്തനങ്ങളും നിലവില്‍ നടന്നു വരുന്നു. സ്റ്റുഡന്‍റ്സ് പോലീസ് കേഡറ്റിന്‍റെ സഹകരത്തോടെ ജില്ലാപഞ്ചായത്ത് സ്‌കൂളുകളില്‍ ഫലവൃക്ഷതോട്ടങ്ങള്‍ തയ്യാറാക്കുന്നതിലേക്ക് നടപ്പിലാക്കിയ മധുരവനം പദ്ധതിയും ശ്രദ്ധേയമായി. ജൈവവൈവിധ്യങ്ങളാല്‍ സമ്പന്നമായ ചെങ്കല്‍ കുന്നുകളുടെ ശോഷണം നാള്‍ക്കുനാള്‍ കൂടി വരുന്ന സാഹചര്യത്തില്‍ ലാറ്ററെറ്റ് റിസര്‍വ് ആയ ചെങ്കല്‍ കുന്നിനെ പൈതൃക കേന്ദ്രങ്ങളായി പ്രഖ്യാപിക്കാനുള്ള പ്രവര്‍ത്തനങ്ങളും ജില്ലാപഞ്ചായത്ത് ബിഎംസിയുടെ നേതൃത്വത്തില്‍ നടന്നുവരികയാണ്. ഒരു ലക്ഷം രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം. ബേക്കല്‍ ജിഎഫ്എച്ച്എസ്എസിന്‍റെ ജൈവവൈവിധ്യ ക്ലബിന്‍റെ മികവാര്‍ന്ന പ്രവര്‍ത്തനങ്ങള്‍ക്കാണ് അംഗീകാരം ലഭിച്ചത്. പൈതൃക വാഴ സംരക്ഷണ കേന്ദ്രം എന്ന നിലയില്‍ ഇന്ത്യയിലെ മറ്റു സംസ്ഥാനങ്ങളിലെ അപൂര്‍വ്വ ഇനങ്ങള്‍ ഉള്‍പ്പെടെ നാല്‍പതോളം വാഴയീനങ്ങളെ സ്‌കൂള്‍ വളപ്പില്‍ സംരക്ഷിക്കുകയും ചെയ്യുന്നതിനു പുറമേ അപൂര്‍വ വൃക്ഷ ഇനങ്ങളെ സംരക്ഷിക്കുന്നതിനും വ്യാപിപ്പിക്കുന്നതിനും ആയി തുടങ്ങിയ നഴ്‌സറിയിലൂടെ 2500 വൃക്ഷത്തൈകള്‍ വലിയ കൂടകളില്‍ നിര്‍മ്മിച്ച സ്ഥാപനങ്ങള്‍ക്കും സ്‌കൂളുകള്‍ക്ക് നല്‍കി. ബേക്കല്‍ പുഴയുടെ തീരത്ത് നാലേക്കറോളം വരുന്ന സ്ഥലത്ത് നടത്തിയ കണ്ടല്‍ത്തുരുത്തുക്കളുടെ സംരക്ഷണവുമായി ബന്ധപ്പെട്ട പ്രവര്‍ത്തനങ്ങളും സ്‌കൂളിന്‍റെ അവാര്‍ഡിന് മാറ്റുകൂട്ടി.നക്ഷത്ര വനത്തിലെ മരങ്ങള്‍ അടക്കം സ്‌കൂളില്‍ അപൂര്‍വ്വയിനം മരത്തൈകള്‍ നട്ട് പരിപാലിക്കുന്നുണ്ട്. 25,000 രൂപയും പ്രശസ്തി പത്രവും അടങ്ങുന്നതാണ് പുരസ്‌കാരം.

എക്‌സൈസ് ഉദ്യോഗസ്ഥരെ പട്ടിയെ വിട്ട് കടിപ്പിച്ച കേസിലെ പ്രതി മദ്യവുമായി അറസ്റ്റില്‍

കാസര്‍ഗോഡ്: സ്‌കൂട്ടറില്‍ കടത്തുകയായിരുന്ന 5.4 ലീറ്റര്‍ മദ്യവുമായി യുവാവ് അറസ്റ്റില്‍. കളനാട് കൈനോത്തെ ഡി. ഉദയനെയാണ് (42) മേല്‍പറമ്പ് നടക്കാനില്‍ നിന്നും എക്‌സൈസ് എന്‍ഫോഴ്‌സ്‌മെന്‍റ് ആന്‍ഡ് ആന്‍റി നാര്‍ക്കോട്ടിക് സ്‌പെഷല്‍ സ്‌ക്വാഡ് ഇന്‍സ്‌പെക്ടര്‍ പ്രമോദ്കുമാറും സംഘവും അറസ്റ്റ് ചെയ്തത്. 180 മില്ലിലീറ്ററിന്‍റെ 28 കുപ്പി മദ്യമാണ് ഇയാളുടെ കൈയില്‍ നിന്നും പിടികൂടിയത്. മുമ്പ് തന്‍റെ വീട്ടില്‍ റെയ്ഡിനു വന്ന എക്‌സൈസ് സംഘത്തെ ഉദയന്‍ പട്ടിയെ അഴിച്ചുവിട്ട് കടിപ്പിച്ചിരുന്നു. കേസില്‍ പ്രതിയെ മൂന്നുവര്‍ഷവും ഒരുമാസവും തടവും 35,800 രൂപ പിഴയടക്കാനും കാസര്‍ഗോഡ് കോടതി ശിക്ഷിച്ചിരുന്നു.

അധ്യാപികയെ പൂട്ടിയിട്ടത് പ്രതിഷേധാർഹം: കെപിഎസ്ടിഎ

വെള്ളരിക്കുണ്ട്: പരപ്പ ജിഎച്ച്എസ്എസ് അധ്യാപികയും കെപിഎസ്ടിഎ ചിറ്റാരിക്കാൽ ഉപജില്ല സെക്രട്ടറിയുമായ ടിജി ദേവസ്യ സ്റ്റാഫ് റൂമിൽ പൂട്ടിയിട്ട സിപിഎം നേതാക്കളുടെ നടപടിക്കെതിരെ കെപിഎസ്ടിഎ ചിറ്റാരിക്കാൽ ഉപജില്ല കമ്മിറ്റി ശക്തമായ പ്രതിഷേധം രേഖപ്പെടുത്തി. കെപിഎസ്ടിഎ ഉൾപ്പെടുന്ന സെറ്റോ സംഘടന പൊതുപണിമുടക്കിൽ പങ്കെടുക്കുന്നില്ല. ഇതു പ്രകാരം തലേദിവസം തന്നെ മുഖ്യാധ്യാപികയോട് സമരത്തിൽ പങ്കെടുക്കാത്തവരുടെ വിവരങ്ങൾ കെപിഎസ്ടിഎ പരപ്പ യൂണിറ്റ് കമ്മിറ്റി രേഖാമൂലം അറിയിച്ചിരുന്നു. അതുപ്രകാരം സമരത്തിൽ പങ്കെടുക്കാത്ത കെപിഎസ്ടിഎ അംഗങ്ങളും കുട്ടികളും സ്കൂളിൽ ഹാജരായി. ഈ സമയം പരപ്പ ലോക്കൽ കമ്മിറ്റിയുടെ നേതൃത്വത്തിൽ സർക്കാർ സർവീസിൽ നിന്ന് വിരമിച്ച ജീവനക്കാരൻ ഉൾപ്പെടെ സ്കൂളിലെത്തുകയും അധ്യാപികയോട് വളരെ പരുഷമായ രീതിയിൽ സംസാരിക്കുകയും സ്റ്റാഫ് റൂമിന് പുറത്തുനിന്ന് കുറ്റിയിടുകയും ചെയ്തു. സ്കൂളിൽ ഹാജരായ വിദ്യാർഥികളെ ഈ നേതാക്കൾ വീട്ടിലേയ്ക്ക് പറഞ്ഞു വിട്ടു. ഇത് വളരെ ഗുരുതരമായ കുറ്റമാണെന്ന് കെപിഎസ്ടിഎ ഭാരവാഹികൾ പറഞ്ഞു. പ്രതിഷേധ യോഗത്തിൽ ഉപജില്ലാ പ്രസിഡന്‍റ് ജിജോ പി. ജോസഫ് അധ്യക്ഷത വഹിച്ചു. സി.എം. വർഗീസ് അലോഷ്യസ് ജോർജ്, പി. ശ്രീജ, വി.കെ. പ്രഭാവതി, മാർട്ടിൻ ജോർജ്, സോജിൻ ജോർജ്, ബിജു അഗസ്റ്റിൻ, ജയിംസ് ചെറിയാൻ, കെ.റ്റി.റോയ്, ബാലചന്ദ്രൻ, ജയൻ മണ്ഡപം എന്നിവർ സംസാരിച്ചു.

ആറുമാസത്തിനിടെ തെരുവുനായയുടെ കടിയേറ്റത് മൂവായിരത്തിലേറെ പേർക്ക്

കാസർഗോഡ്: കഴിഞ്ഞ ആറുമാസത്തിനിടെ ജില്ലയിൽ തെരുവുനായയുടെ കടിയേറ്റത് മൂവായിരത്തിലേറെ പേർക്ക്. ഈ വർഷം ഇതുവരെ ജില്ലയിൽ മൃഗങ്ങളുടെ കടിയേറ്റ് ചികിത്സ തേടി വിവിധ ആശുപത്രികളിലെത്തിയത് 3931 പേരാണ്. ഇതിൽ 95 ശതമാനവും തെരുവുനായ്ക്കളുടെ കടിയേറ്റവരാണ്. നാമമാത്രമായ എണ്ണം ആളുകൾ വളർത്തുനായ്ക്കളുടെയും പൂച്ചകളുടെയും കടിയേറ്റ് ചികിത്സ തേടിയവരാണ്. ജനുവരി- 630, ഫെബ്രുവരി- 638, മാർച്ച്- 718, ഏപ്രിൽ- 634, മേയ്- 696, ജൂൺ- 540 എന്നിങ്ങനെയാണ് ചികിത്സ തേടിയെത്തിയവരുടെ എണ്ണം. ജൂലൈയിൽ ഇതുവരെയുള്ള 10 ദിവസത്തിനകം 75 പേർക്ക് നായയുടെ കടിയേറ്റു. കഴിഞ്ഞ വർഷം ജില്ലയിൽ 6324 പേർക്കും 2023 ൽ 6975 പേർക്കുമാണ് തെരുവുനായ്ക്കളുടെ കടിയേറ്റത്. നിലവിലുള്ള സ്ഥിതി വച്ചുനോക്കിയാൽ ഈ വർഷം ഇതിലും കൂടാനാണ് സാധ്യത. മുറിവേറ്റ ഭാഗം എത്രയും പെട്ടെന്ന് സോപ്പ് ഉപയോഗിച്ച് വൃത്തിയാക്കി 15 മിനിറ്റ് നേരമെങ്കിലും തുടർച്ചയായി പൈപ്പുവെള്ളം പിടിച്ച് നന്നായി കഴുകണമെന്നാണ് ഡോക്ടർമാരുടെ നിർദേശം. ഇതിനു ശേഷമാണ് ആശുപത്രിയിൽ പോകേണ്ടത്. നഖം കൊണ്ടുള്ള മാന്തലും രക്തം വരാത്ത ചെറിയ പോറലുകളും ഏൽക്കുന്നവർക്ക് താരതമ്യേന ശക്തികുറഞ്ഞ ഐഡിആർവി വാക്സിനാണ് നല്കുന്നത്. ഇത് നാലു തവണയായി നല്കണം. പ്രാഥമികാരോഗ്യ കേന്ദ്രങ്ങളുൾപ്പെടെ ജില്ലയിലെ എല്ലാ സർക്കാർ ആരോഗ്യകേന്ദ്രങ്ങളിലും സാധാരണഗതിയിൽ ഈ വാക്സിൻ ഉണ്ടായിരിക്കും. ആഴമേറിയ കടികൾക്ക് നല്കുന്ന ആന്‍റി റാബീസ് ഇമ്യൂണോഗ്ലോബുലിൻ കാഞ്ഞങ്ങാട് ജില്ലാ ആശുപത്രിയിലും കാസർഗോഡ് ജനറൽ ആശുപത്രിയിലും ലഭ്യമാക്കിയിട്ടുണ്ട്.

കെട്ടിടോദ്ഘാടനം നടത്തി

കളനാട്: കുടുംബാരോഗ്യകേന്ദ്രത്തിനായി നിര്‍മിച്ച പുതിയ കെട്ടിടം സി.എച്ച്. കുഞ്ഞമ്പു എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സുഫൈജ അബൂബക്കര്‍ അധ്യക്ഷതവഹിച്ചു. ഷാനവാസ് പാദൂര്‍, മന്‍സൂര്‍ കുരിക്കള്‍, ആയിഷ അബുബക്കര്‍, ഷംസുദ്ദീന്‍ തെക്കില്‍, അബ്ദുള്‍ ക ലാം സഹദുള്ള, വി. ചന്ദ്രന്‍, ഡോ.പി. സന്തോഷ്, അഹമ്മദ് കല്ലട്ര, ചന്ദ്രശേഖരന്‍ കുളങ്ങര, ഇ. മനോജ്കുമാര്‍, സുജാത രാമകൃഷ്ണന്‍, മൈമൂന അബ്ദുള്‍ റഹ്‌മാന്‍, കല്ലട്ര മാഹിന്‍ ഹാജി, ദിവാകരന്‍, അബ്ദുള്‍ ഖാദര്‍ കളനാട്, ചന്ദ്രന്‍ കൊക്കാല്‍, തുളസീധരന്‍ ബളാനം, കെ. കൃഷ്ണന്‍, തമ്പാന്‍ നായര്‍ എന്നിവര്‍ സംസാരിച്ചു. രമ ഗംഗാധരന്‍ സ്വാഗതവും ഡോ. രമ്യ മോഹന്‍ നന്ദിയും പറഞ്ഞു.

പണിമുടക്കില്‍ വലഞ്ഞ് ജനം

കാസര്‍ഗോഡ്: സംയുക്ത ട്രേഡ് യൂണിയന്‍ നടത്തുന്ന പണിമുടക്ക് ജില്ലയില്‍ പൂര്‍ണം. കെഎസ്ആര്‍ടിസി ബസുകളടക്കം സര്‍വീസ് നിര്‍ത്തിവെച്ചതോടെ യാത്രക്കാര്‍ വലഞ്ഞു. സ്വകാര്യബസുകളും ഓട്ടോ - ടാക്‌സി വാഹനങ്ങളും നിരത്തിലിറങ്ങിയില്ല. ഹോട്ടലുകളും വ്യാപാരസ്ഥാപനങ്ങളും അടഞ്ഞുകിടന്നു. സര്‍ക്കാര്‍ ഓഫീസുകളില്‍ ഹാജര്‍നില വളരെ കുറവായിരുന്നു. വിദ്യാഭ്യാസസ്ഥാപനങ്ങളുടെ പ്രവര്‍ത്തനം തടസപ്പെട്ടു. നിരത്തിലിറങ്ങിയ ചരക്കുലോറികളും സ്വകാര്യവാഹനങ്ങളും സമരാനുകൂലികള്‍ തടഞ്ഞു. ഡ്രൈവമാർക്കും പോലീസുകാര്‍ക്കും മര്‍ദ്ദനം സീതാംഗോളി ടൗണില്‍ വാഹനങ്ങള്‍ നിരത്തിലിറക്കിയ ഡ്രൈവര്‍മാരെ സമരാനുകൂലികള്‍ കയ്യേറ്റം ചെയ്തു. തടയാനെത്തിയ പോലീസുകാര്‍ക്കും മര്‍ദ്ദനമേറ്റു. പിക്കപ്പ് ഡ്രൈവറെ സിഐടിയു പ്രവര്‍ത്തകര്‍ കയ്യേറ്റം ചെയ്യുന്ന വിവരമറിഞ്ഞാണ് കുമ്പള പോലീസ് സ്ഥലത്തെത്തിയത്. ഡ്രൈവറെ രക്ഷിക്കാന്‍ ശ്രമിക്കവെ പോലീസുകാരുടെ യൂണിഫോമില്‍ പിടിച്ച് തള്ളുകയും നെയിം ബോര്‍ഡ് വലിച്ചു കീറി മര്‍ദ്ദിക്കുകയും ചെയ്തു. എഎസ്‌ഐ ബാബുരാജ്, സിവില്‍ ഓഫീസര്‍ ഫെബിന്‍രാജ് എന്നിവര്‍ക്കാണ് മര്‍ദ്ദനമേറ്റത്. ഇരുവരെയും ആശുപത്രിയില്‍ പ്രവേശിപ്പിച്ചു. വിവരമറിഞ്ഞെത്തിയ എസ്‌ഐ കെ. ശ്രീജേഷ് സ്ഥലത്തെത്തി സമരക്കാരെ കസ്റ്റഡിയിലെടുക്കാന്‍ ശ്രമിച്ചെങ്കിലും ചെറുത്തു. തുടര്‍ന്ന് കൂടുതല്‍ പോലീസെത്തി മൂന്നുപേരെ അറസ്റ്റ് ചെയ്തു. അരിയപ്പാടിയിലെ കെ.എ. സന്തോഷ്‌കുമാര്‍ (44), ഷേണിയിലെ പി.എം. ബിനീഷ് (35), മുഗുവിലെ പി. മധുസൂദനന്‍ (37) എന്നിവരാണ് അറസ്റ്റിലായത്. അതേസമയം സിഐടിയു പ്രവര്‍ത്തകരെ അകാരണമായി മര്‍ദ്ദിച്ച പോലീസ് ഉദ്യോഗസ്ഥര്‍ക്കെതിരെ കര്‍ശന നടപടി കൈകൊള്ളാന്‍ അധികാരികള്‍ തയ്യാറാ കണാമെന്ന് സിഐടിയു ജില്ലാകമ്മിറ്റി ആവശ്യപ്പെട്ടു. ജീവനക്കാരെ പൂട്ടിയിട്ടു നീലേശ്വരം നഗരസഭയില്‍ ജോലിക്ക് എത്തിയ എന്‍ജിഒ അസോസിയേഷന്‍ പ്രവര്‍ത്തകരായ ഏഴു ജീവനക്കാരെ സമരാനുകൂലികള്‍ പൂട്ടിയിട്ടു. ഒപ്പിട്ടതിനാല്‍ വൈകുന്നേരം വരെ ജോലി ചെയ്തു പോയാല്‍ മതി എന്ന് പറഞ്ഞാണത്രെ സമരാനുകൂലികള്‍ ഇവരെ ഓഫീസിനകത്ത് പൂട്ടിയിട്ടത്. പണിമുടക്കിന് സര്‍ക്കാര്‍ ഡയസ്‌നോണ്‍ പ്രഖ്യാപിച്ചിനെ തുടര്‍ന്നാണ് ഇവര്‍ ജോലിക്കെത്തിയത്. ഒരു മണിക്കൂറോളം ഇവർ ഓഫീസില്‍ കുടുങ്ങിക്കിടന്നു. കോണ്‍ഗ്രസ് നേതാക്കള്‍ വിവരമറിയിച്ചതിനെതുടര്‍ന്ന് ഇന്‍സ്‌പെക്ടര്‍ ദിബിന്‍ ജോയ്, എസ്‌ഐ കെ.വി. രതീശന്‍ എന്നിവരുടെ നേതൃത്വത്തില്‍ പോലീസ് സ്ഥലത്തെത്തിയാണ് ഇവരെ മോചിപ്പിച്ചത്. ഓഫീസില്‍ ജോലിക്കെത്തിയ ജീവനക്കാരന്‍റെ വാഹനത്തിന്‍റെ കാറ്റഴിച്ചുവിട്ടതായും പരാതിയുണ്ട്. വില്ലേജ് ഓഫീസറെ തടഞ്ഞു വെള്ളിക്കോത്ത് പ്രവര്‍ത്തിക്കുന്ന അജാനൂര്‍ വില്ലേജ് ഓഫീസര്‍ കെ.ടി. ജയലക്ഷ്മിയെ സമരാനുകൂലികള്‍ തടഞ്ഞു. പതിവുപോലെ രാവിലെ പത്തിന് ജോലിക്ക് ഇവരെ സിപിഎം പ്രവര്‍ത്തകര്‍ എത്തി ഓഫീസ് അടച്ച് പുറത്ത് പോകാന്‍ ആവശ്യപ്പെടുകയായിരുന്നു. വിവരമറിഞ്ഞ് ഹൊസ്ദുര്‍ഗ് എസ്‌ഐ പ്രേമന്‍റെ നേതൃത്വത്തില്‍ പോലീസ് സംഘം സ്ഥലത്തെത്തി. പോലീസിന്‍റെ നിര്‍ദേശപ്രകാരം വില്ലേജ് ഓഫീസര്‍ ഹൊസ്ദുര്‍ഗ് താലൂക്ക് ഓഫീസിലേക്ക് പോയി. അധ്യാപകർക്ക് നേരെ അക്രമഭീഷണി ഉദിനൂർ ഗവ. ഹയർ സെക്കൻഡറി സ്കൂൾ, വലിയപറമ്പ് പടന്നക്കടപ്പുറം ഗവ. ഫിഷറീസ് ഹയർ സെക്കൻഡറി സ്കൂൾ, ചെറുവത്തൂർ കാടങ്കോട് ഗവ. ഫിഷറീസ് വൊക്കേഷണൽ ഹയർ സെക്കൻഡറി സ്കൂൾ എന്നിവിടങ്ങളിൽ ജോലിക്ക് എത്തിയ അധ്യാപകർക്ക് നേരെ സമരാനുകൂലികളുടെ അക്രമഭീഷണി. ഓഫീസ് മുറി പൂട്ടുമെന്നും പുറത്തു വിടില്ലെന്നുമാണ് ഭീഷണി മുഴക്കിയത്. ഉദിനൂർ ഗവ. ഹയർ സെക്കൻഡറി സ്കൂളിൽ താൽക്കാലിക അധ്യാപകന് നേരെ കൈയേറ്റം നടന്നതായും ആശുപത്രിയിൽ ചികിത്സ തേടിയതായും വിവരമുണ്ട്. സംഭവത്തിൽ അധ്യാപകർക്കിടയിലും രക്ഷിതാക്കൾക്കിടയിലും പ്രതിഷേധമുയർന്നിട്ടുണ്ട്. പണിമുടക്കുന്നവരെപ്പോലെ തന്നെ ഓഫീസുകളിലും വിദ്യാലയങ്ങളിലും ജോലി ചെയ്യാനുമുള്ള അവകാശ നിഷേധത്തിന് ഭരണപക്ഷ സംഘടനകളുടെ പ്രവർത്തകരും സമരാനുകൂലികളും തന്നെ നേരിട്ടിറങ്ങിയതിനെതിരെയാണ് പ്രതിഷേധമുയർന്നിട്ടുള്ളത്. സംഭവത്തിൽ പ്രതിപക്ഷ അധ്യാപക സംഘടനകൾ പ്രതിഷേധിച്ചു. പണിമുടക്കില്‍ പെട്ടുപോയവര്‍ക്ക് തുണയായി പോലീസ് പണിമുടക്കില്‍ പെട്ടുപോയവര്‍ക്ക് തുണയായി ഹൊസ്ദുര്‍ഗ് ജനമൈത്രി പോലീസ്. പരീക്ഷക്കായി എത്തിയ മൂന്നു വിദ്യാര്‍ഥികളെയും രക്ഷിതാക്കളെയും കാഞ്ഞങ്ങാട് റെയില്‍വേ സ്റ്റേഷനില്‍ നിന്നും പോലീസ് വാഹനത്തില്‍ കോട്ടപ്പാറ സനാതന കോളജില്‍ എത്തിച്ചു. കാഞ്ഞങ്ങാട് ഡിവൈഎസ്പി ബാബു പെരിങ്ങേത്തിനോട് സഹായം അഭ്യര്‍ഥിച്ചതിന്‍റെ അടിസ്ഥാനത്തിലാണ് ഇന്‍സ്‌പെക്ടര്‍ പി. അജിത്കുമാറിന്‍റെ നേതൃത്വത്തില്‍ കുട്ടികളെയും രക്ഷിതാക്കളെയും കോളേജില്‍ എത്തിച്ചത്. ഭര്‍ത്താവ് മരണപ്പെട്ട് കാഞ്ഞങ്ങാട് ജില്ലാ ആശുപത്രിയില്‍ ബന്ധുക്കളായ സ്ത്രീകളോടൊപ്പം നില്‍ക്കുകയായിരുന്നു ആളുകളെ നന്മമരം കൂട്ടായ്മയുടെ സഹായത്തോടെ സ്വദേശമായ പടുപ്പിലേക്ക് എത്തിച്ചു.

യുവാവ് പുഴയില്‍ മരിച്ചനിലയില്‍

കാസര്‍ഗോഡ്: യുവാവിനെ പുഴയില്‍ മരിച്ചനിലയില്‍ കാണപ്പെട്ടു. കാസര്‍ഗോഡ് കസബ കടപ്പുറത്തെ രമേശന്‍റെയും മിനിയുടെയും മകന്‍ ആദിത്യന്‍ (22) ആണ് മരിച്ചത്. ചാര്‍ട്ടേഡ് അക്കൗണ്ടന്‍റ് വിദ്യാര്‍ഥിയാണ്. ചൊവ്വാഴ്ച ഉച്ചയോടെ ഹാര്‍ബറിനടുത്തേക്ക് പോകുന്നുവെന്ന് പറഞ്ഞാണ് ആദിത്യന്‍ വീട്ടില്‍ നിന്നിറങ്ങിയത്. പിന്നീട് ഒരു വിവരവും ലഭിച്ചിരുന്നില്ല. ഇന്നലെ രാവിലെ ഹാര്‍ബര്‍ ഗേറ്റിന് സമീപമാണ് പുഴയില്‍ വലയെറിഞ്ഞ മത്സ്യതൊഴിലാളികള്‍ക്ക് ആദിത്യന്‍റെ മൃതദേഹം ലഭിക്കുന്നത്. മൊബൈല്‍ ഫോണും ബൈക്കും ഹാര്‍ബറിനടുത്ത് നിന്നു കണ്ടെത്തിയിട്ടുണ്ട്. മൃതദേഹം കണ്ണൂര്‍ മെഡിക്കല്‍ കോളജില്‍ വിദഗ്ധ പോസ്റ്റുമോര്‍ട്ടം നടത്തി. സഹോദരി:ആതിര.

ആരോഗ്യമേഖലയോടുള്ള സര്‍ക്കാര്‍ അനാസ്ഥയ്ക്കെതിരേ കോണ്‍ഗ്രസ് ധര്‍ണ നടത്തി

കാഞ്ഞങ്ങാട്: ആരോഗ്യമേഖലയോടുള്ള സര്‍ക്കാര്‍ അനാസ്ഥയ്ക്കെതിരെ കാഞ്ഞങ്ങാട്, ഉദുമ ബ്ലോക്ക് കോണ്‍ഗ്രസ് കമ്മിറ്റികള്‍ കാഞ്ഞങ്ങാട് ജില്ലാ ആശുപത്രിക്ക് മുന്നില്‍ സംഘടിപ്പിച്ച ധര്‍ണ ഡിസിസി പ്രസിഡന്‍റ് പി.കെ. ഫൈസല്‍ ഉദ്ഘാടനം ചെയ്തു. ഉമേശന്‍ വേളൂര്‍ അധ്യക്ഷത വഹിച്ചു. ഭക്തവത്സലന്‍, സാജിദ് മൗവ്വല്‍, വി.ആര്‍. വിദ്യാസാഗര്‍, പി.വി. സുരേഷ്, ഗീത കൃഷ്ണന്‍, ധന്യ സുരേഷ്, കെ.പി. ബാലകൃഷ്ണന്‍, മനോജ് തോമസ്, രവീന്ദ്രന്‍ കരിച്ചേരി, ഗോപാലന്‍ ഇരിയ, രാജന്‍ കെ. അരീക്കര, കെ.ആര്‍. കാര്‍ത്തികേയന്‍, ദിവാകരന്‍ കരിച്ചേരി എന്നിവര്‍ പ്രസംഗിച്ചു. രാജപുരം: പൂടംകല്ല് താലൂക്ക് ആശുപത്രിക്ക് മുന്നിൽ നടത്തിയ പ്രതിഷേധ ധർണ യുഡിഎഫ് ജില്ലാ കൺവീനർ എ. ഗോവിന്ദൻ നായർ ഉദ്ഘാടനം ചെയ്തു. മധുസൂദനൻ ബാലൂർ അധ്യക്ഷത വഹിച്ചു. മീനാക്ഷി ബാലകൃഷ്ണൻ, ബി.പി. പ്രദീപ്കുമാർ, ഹരീഷ് പി. നായർ, ടി.കെ. നാരായണൻ, എം.എം. സൈമൺ, വി. ബാലകൃഷ്ണൻ ബാലൂർ, എം.പി. ജോസഫ്, ബാലകൃഷ്ണൻ മാണിയൂർ, വിനോദ് കപ്പിത്താൻ, ബാബു കദളിമറ്റം, എം.യു. തോമസ്, ജോബി ജോസഫ്, പി.എ. ആലി, സി. കൃഷ്ണൻ നായർ, കെ. ഗോപി, നാരായണൻ ചുള്ളിക്കര, പ്രിയ ഷാജി, രാധാമണി, വി.കെ. ബാലകൃഷണൻ, ബാബു മാണിയൂർ എന്നിവർ പ്രസംഗിച്ചു. തൃക്കരിപ്പൂർ: തൃക്കരിപ്പൂർ ഗവ. താലൂക്ക് ആശുപത്രിയിലേക്ക് ബ്ലോക്ക് കോൺഗ്രസ് കമ്മിറ്റി നേതൃത്വത്തിൽ നടത്തിയ ധർണ കെപിസിസി സെക്രട്ടറി എം. അസിനാർ ഉദ്ഘാടനം ചെയ്തു. കെ.വി. വിജയൻ അധ്യക്ഷത വഹിച്ചു. കരിമ്പിൽ കൃഷ്ണൻ, കെ.വി. ഗംഗാധരൻ, കെ.പി. പ്രകാശൻ, പി.കുഞ്ഞിക്കണ്ണൻ, സി. രവി, കെ.വി. ജതീന്ദ്രൻ, കെ. സിന്ധു, കെ. ശ്രീധരൻ, കെ.പി. ദിനേശൻ, എം. രജീഷബാബു, കെ. അശോകൻ, കെ. ജയരാമൻ, ഇ. രാജേന്ദ്രൻ, കെ. കുഞ്ഞമ്പു, പി.കെ. താജുദ്ദീൻ, എം. അബ്ദുൾ സലാം എന്നിവർ പ്രസംഗിച്ചു.

സജി ചെറിയാൻ പറഞ്ഞത് യാഥാർഥ്യം: കെ. സുരേന്ദ്രൻ

തൃക്കരിപ്പൂർ: കേരളത്തിലെ സർക്കാർ മെഡിക്കൽ കോളജിൽ ചികിത്സ തേടി പോയാൽ ജീവൻ ബാക്കിയുണ്ടാവില്ലെന്നും അതു കൊണ്ടാണ് മന്ത്രിമാർ സ്വകാര്യ ആശുപത്രികളെ ആശ്രയിക്കുന്നതെന്നും മന്ത്രി സജി ചെറിയാൻ തന്നെ സാക്ഷ്യപ്പെടുത്തുമ്പോൾ ആതുരശുശ്രൂഷാരംഗത്തിന്‍റെ യഥാർഥ ചിത്രമാണ് പുറത്തു വരുന്നതെന്ന് മുൻ ബിജെപി സംസ്ഥാന പ്രസിഡന്‍റ് കെ. സുരേന്ദ്രൻ. ബിജെപി തൃക്കരിപ്പൂർ മണ്ഡലം കൺവൻഷൻ കെഎംകെ ഓഡിറ്റോറിയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ടി.വി. ഷിബിൻ അധ്യക്ഷത വഹിച്ചു. ജില്ലാ പ്രസിഡന്‍റ് എം.എൽ. അശ്വിനി മുഖ്യപ്രഭാഷണം നടത്തി. എം. ഭാസ്കരൻ, എം. ബൽരാജ്, പി.ആർ. സുനിൽ, സാഗർ ചാത്തമത്ത്, ടി. കുഞ്ഞിരാമൻ, ഇ. അനുപ്രിയ, എം. ശ്യാമപ്രസാദ്, കെ. രമേശൻ, ഇ.എം. സോജു, കെ. പുരുഷോത്തമൻ എന്നിവർ പ്രസംഗിച്ചു.

പാമ്പുകളെ തുറന്നുവിടുന്ന കാര്യത്തില്‍ വനംവകുപ്പിന് ആശയക്കുഴപ്പം

കാസര്‍ഗോഡ്: വീടുകളിലും പരിസരത്തും പാമ്പിനെ കണ്ടാല്‍ ഒരൊറ്റ വിളിയില്‍ വനംവകുപ്പിന്‍റെ സര്‍പ്പ വോളണ്ടിയര്‍മാര്‍ വീട്ടിലെത്തി പാമ്പിനെ പിടികൂടും. ജില്ലയില്‍ അന്പതിലേറെ പേരാണ് പാമ്പുകളെ പിടിക്കാന്‍ വനംവകുപ്പിന്‍റെ ലൈസന്‍സ് എടുത്തിട്ടുള്ളത്. ഈ മഴക്കാലത്ത് മാത്രം ജില്ലയില്‍ നിന്ന് നൂറുകണക്കിന് പാമ്പുകളെയാണ് ഇവര്‍ പിടികൂടി റസ്‌ക്യൂ ചെയ്തത്. പക്ഷേ ഇങ്ങനെ പിടികൂടുന്ന പാമ്പുകളെ തുറന്നുവിടാന്‍ പലയിടത്തും അനുയോജ്യമായ സ്ഥലങ്ങളില്ലാത്തത് വലിയ പ്രതിസന്ധിയാണ്. പിടികൂടുന്ന പാമ്പുകളെ യോജിച്ച ആവാസവ്യവസ്ഥയില്‍ വനംവകുപ്പിന്‍റെ നിര്‍ദേശം. എന്നാല്‍ സംരക്ഷിത വനങ്ങളില്ലാത്ത പ്രദേശങ്ങളില്‍ ഈ പാമ്പുകളെ എവിടെ വിടുമെന്നാണ് ഉയരുന്ന പ്രധാന ചോദ്യം. ഈ ചോദ്യത്തിന് വനംവകുപ്പിന്‍റെ കൈയില്‍ മറുപടിയുമില്ല. ജനവാസമേഖലയോടു ചേര്‍ന്ന സ്ഥലങ്ങളില്‍ വിട്ടാല്‍ അവ വീടുകളിലേക്ക് വീണ്ടും എത്താന്‍ സാധ്യതയുണ്ട്. സര്‍പ്പ വോളന്‍റിയര്‍മാരുടേത് സൗജന്യസേവനമാണ്. യാത്രാചെലവ് പോലും സ്വന്തമായി വഹിച്ചാണ് അവര്‍ പാമ്പുകളെ പിടിക്കാൻ പോകുന്നത്. ഇവയെ തുറന്നുവിടാന്‍ വനപ്രദേശങ്ങള്‍ തേടി കിലോമീറ്ററുകള്‍ പോകുക എന്നത് ഇവര്‍ക്ക് ബുദ്ധിമുട്ടേറിയ കാര്യമാണ്. ഇവര്‍ പിടിക്കുന്ന പാമ്പുകളെ വനംവകുപ്പ് ഉദ്യോഗസ്ഥര്‍ കൊണ്ടുപോകാറുണ്ടെങ്കിലും പിടിക്കുന്നവരുടെയും പാമ്പുകളുടെയും എണ്ണം കൂടിയത് കാരണം പലപ്പോഴും കൃത്യസമത്ത് എത്താന്‍ സാധിക്കാറില്ല. അതുകൊണ്ട് ഒറ്റപ്പെട്ട് കിടക്കുന്ന സ്ഥലങ്ങള്‍ നോക്കി തുറന്നുവിടേണ്ടി വരുന്ന സാഹചര്യമുണ്ട്. രാജവെമ്പാല ഉള്‍പ്പെടെ അപകടകാരികളായ പാമ്പുകള്‍ പുതിയതായി പലയിടത്തും കാണാനുള്ള പ്രധാന കാരണം ഇതെന്നാണ് ആരോപണം. വനത്തോടു ചേര്‍ന്ന സ്ഥലങ്ങളില്‍ പാമ്പുകളുടെ ശല്യം വര്‍ധിക്കുന്നതായും നാട്ടുകാര്‍ ആരോപിക്കുന്നുണ്ട്. സര്‍പ്പ വോളണ്ടിയര്‍മാര്‍ പിടികൂടുന്ന പാമ്പുകളെ ഉള്‍വനത്തില്‍ തുറന്നുവിടാന്‍ വനംവകുപ്പ് പ്രത്യേക ശ്രദ്ധപതിപ്പിക്കണമെന്നാണ് ഇവരുടെ ആവശ്യം.

കോടോത്ത് സ്മാര്‍ട്ട് വില്ലേജ് ഓഫീസ് നാടിന് സമര്‍പ്പിച്ചു

കോടോം: സര്‍ക്കാരിന്‍റെ പ്ലാന്‍ ഫണ്ടില്‍ നിന്ന് 50 ലക്ഷം രൂപ ചെലവഴിച്ച് നിര്‍മിച്ച കോടോത്ത് സ്മാര്‍ട്ട് വില്ലേജ് ഓഫീസ് റവന്യു മന്ത്രി കെ. രാജന്‍ ഓണ്‍ലൈനായി ഉദ്ഘാടനം ചെയ്തു. ഇ. ചന്ദ്രശേഖരന്‍ എംഎല്‍എ അധ്യക്ഷത വഹിച്ചു. നിര്‍മിതികേന്ദ്രം ജനറല്‍ മാനേജര്‍ ഇ.പി. രാജ്‌മോഹന്‍ റിപ്പോര്‍ട്ട് അവതരിപ്പിച്ചു. ഡപ്യൂട്ടി കളക്ടര്‍ ലിപു എസ്. ലോറന്‍സ്, വെള്ളരിക്കുണ്ട് താലൂക്ക് തഹസില്‍ദാര്‍ പി.വി. മുരളി, ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി, പഞ്ചായത്ത് പ്രസിഡന്‍റ് പി. ശ്രീജ, ജില്ലാ പഞ്ചായത്തംഗം ഷിനോജ് ചാക്കോ, ബ്ലോക്ക് പഞ്ചായത്തംഗം പി.വി. ശ്രീലത, പഞ്ചായത്ത് വൈസ് പ്രസിഡന്‍റ് പി. ദാമോദരന്‍, പഞ്ചായത്തംഗങ്ങളായ പി. കുഞ്ഞികൃഷ്ണന്‍, സൂരയ ഗേപാലന്‍, ആന്‍സി ജോസഫ്, രാഷ്‌ട്രീയ പാര്‍ട്ടി പ്രതിനിധികളായ പി. ഗോവിന്ദന്‍, ടി.കെ. രാമചന്ദ്രന്‍, എ. രാമചന്ദ്രന്‍, പി. സാജു ജോസഫ്, രാധാകൃഷ്ണന്‍, എ.യു. മത്തായി എന്നിവര്‍ പ്രസംഗിച്ചു.

ദേശീയപാതയ്ക്ക് ബസ് കാത്തിരിപ്പുകേന്ദ്രങ്ങളോട് അകൽച്ച; മഴ നനഞ്ഞുകുതിർന്ന് യാത്രക്കാർ

കാസർഗോഡ്: തലപ്പാടി-ചെങ്കള റീച്ചിൽ പുതിയ ദേശീയപാതയുടെ നിർമാണം അവസാനഘട്ടത്തിലെത്തിയിട്ടും ബസ് കാത്തിരിപ്പു കേന്ദ്രങ്ങളുടെ നിർമാണം എങ്ങുമെത്തിയില്ല. മംഗളൂരുവിലേക്ക് ചികിത്സയ്ക്ക് പോകുന്ന രോഗികളും വിദ്യാർഥികളുമടക്കമുള്ള യാത്രക്കാർ പെരുമഴയത്തും സർവീസ് റോഡുകളുടെ ഓരത്ത് ബസ് കാത്തുനിൽക്കേണ്ട അവസ്ഥയിലാണ്. പലപ്പോഴും കെഎസ്ആർടിസി അടക്കമുള്ള ദീർഘദൂര ബസുകൾ സ്റ്റോപ്പുകളിൽ നിർത്താതെ പ്രധാനപാതയിലൂടെ മാത്രം പോകുന്നത് യാത്രക്കാർക്ക് ഇരട്ടി ദുരിതമാകുന്നു. ദേശീയപാതയുടെ നിർമാണം തുടങ്ങിയ കാലം മുതൽ മഴയും വെയിലും പൊടിയുമെല്ലാം സഹിച്ച് പാതയോരത്ത് ബസ് കാത്തുനിൽക്കാനാണ് യാത്രക്കാരുടെ വിധി. അതിന് ഇനിയും കാര്യമായ മാറ്റമുണ്ടായിട്ടില്ല. പാതയോരത്തെ പഴയ കെട്ടിടങ്ങളെല്ലാം പൊളിച്ചുമാറ്റിയതോടെ മഴ വന്നാൽ കയറിനിൽക്കാൻ പോലും ഇടമില്ല. തലപ്പാടി-ചെങ്കള റീച്ചിൽ ആകെ 77 ബസ് കാത്തിരിപ്പുകേന്ദ്രങ്ങൾ നിർമിക്കാനാണ് ധാരണയായിട്ടുള്ളത്. ഇതിൽ ഏറിയ പങ്കും ഇനിയും നിർമാണം പോലും തുടങ്ങിയിട്ടില്ലാത്ത നിലയിലാണ്. നിർമാണത്തിലിരിക്കുന്ന ബസ് കാത്തിരിപ്പു കേന്ദ്രങ്ങൾക്കു തന്നെ നീളവും വീതിയും കുറവാണെന്ന പരാതി ഉയർന്നിട്ടുണ്ട്. അകത്ത് മഴ നനയാതിരിക്കാനുള്ള സൗകര്യവും പരിമിതമാണെന്ന് യാത്രക്കാർ ചൂണ്ടിക്കാട്ടുന്നു. മിക്കയിടങ്ങളിലും സർവീസ് റോഡുകൾക്കു തന്നെ ആവശ്യമായ വീതിയിൽ സ്ഥലം കിട്ടാത്ത സാഹചര്യത്തിൽ ബസ് കാത്തിരിപ്പുകേന്ദ്രങ്ങൾ നിർമിക്കാൻ സ്ഥലം തികയാത്ത അവസ്ഥയാണെന്നാണ് ദേശീയപാത അധികൃതർ പറയുന്നത്.

സിപിഐ ജില്ലാ സമ്മേളനം: ഒരുക്കങ്ങൾ പൂർത്തിയായി

വെള്ളരിക്കുണ്ട്: വെള്ളരിക്കുണ്ടിൽ 11, 12, 13 തീയതികളില്‍ നടക്കുന്ന സിപിഐ ജില്ലാ സമ്മേളനത്തിന് ഒരുക്കങ്ങള്‍ പൂര്‍ത്തിയായതായി സംഘാടക സമിതി ഭാരവാഹികള്‍ പത്രമ്മേളനത്തില്‍ അറിയിച്ചു. 11നു പതാക, കൊടിമര ജാഥകളും 12, 13 തീയതികളില്‍ പ്രതിനിധി സമ്മേളനവുമാണ് നടക്കുക. 11നു വൈകുന്നേരം നാലിന് സംഘാടകസമിതി ചെയര്‍മാന്‍ കെ.എസ്. കുര്യാക്കോസ് സമ്മേളന നഗരിയില്‍ പതാക ഉയര്‍ത്തും. പൊതുസമ്മേളനം ദേശീയ എക്സിക്യൂട്ടീവംഗം പി. സന്തോഷ് കുമാര്‍ എംപി ഉദ്ഘാടനം ചെയ്യും. 12, 13 തീയതികളില്‍ വെള്ളരിക്കുണ്ട് വീനസ് ഓഡിറ്റോറിയത്തിൽ നടക്കുന്ന പ്രതിനിധി സമ്മേളനം രാവിലെ 10നു ദേശീയ എക്സിക്യൂട്ടീവംഗം കെ. പ്രകാശ് ബാബു ഉദ്ഘാടനം ചെയ്യും. സിപിഐ സംസ്ഥാന അസി. സെക്രട്ടറി ഇ. ചന്ദ്രശേഖരന്‍ എംഎല്‍എ, മന്ത്രിമാരായ ജി.ആര്‍. അനില്‍, പി. പ്രസാദ്, സംസ്ഥാന എക്സിക്യൂട്ടീവ് അംഗങ്ങളായ സി.പി. മുരളി, കെ.കെ. അഷ്റഫ്, പി. വസന്തം, ടി.വി. ബാലന്‍ എന്നിവര്‍ സംബന്ധിക്കും. പത്ര സമ്മേളനത്തില്‍ ജില്ലാ സെക്രട്ടറി സി.പി. ബാബു, കെ.എസ്. കുര്യാക്കോസ്, കണ്‍വീനര്‍ എം. കുമാരന്‍, ജില്ലാ എക്സിക്യൂട്ടീവംഗം ബങ്കളം കുഞ്ഞികൃഷ്ണന്‍, പബ്ലിസിറ്റി കമ്മിറ്റി കണ്‍വീനര്‍ സി.പി. സുരേശന്‍ എന്നിവര്‍ സംബന്ധിച്ചു.

സ്വകാര്യബസ് പണിമുടക്കില്‍ വലഞ്ഞ് ജനം

കാഞ്ഞങ്ങാട്: സ്വകാര്യബസുടമകള്‍ പ്രഖ്യാപിച്ച പണിമുടക്ക് പൂര്‍ണമായതോടെ യാത്രക്കാര്‍ പെരുവഴിയിലായി. ദേശീയപാതയിലും മലയോരമേഖലയിലുമാണ് യാത്രാക്ലേശം ഏറ്റവും രൂക്ഷമായത്. കെഎസ്ആര്‍ടിസി അധിക സര്‍വീസ് നടത്തുമെന്ന് പറഞ്ഞെങ്കിലും ദേശീയപാതയില്‍ ബസിനായി യാത്രക്കാര്‍ക്ക് മണിക്കൂറുകളോളം കാത്തുനില്‍ക്കേണ്ട സ്ഥിതിയായിരുന്നു. പെരിയ, പൊയിനാച്ചി, ചട്ടഞ്ചാല്‍, ചെര്‍ക്കള ഭാഗങ്ങളിലേക്ക് പോകേണ്ട യാത്രക്കാരാണ് ഏറെ വലഞ്ഞത്. ഏറെ യാത്രക്കാരുള്ള ബന്തടുക്ക, പടുപ്പ്, കുറ്റിക്കോല്‍ ഭാഗത്തേയ്ക്ക് കാഞ്ഞങ്ങാട് നിന്നും ബസ് സര്‍വീസ് പൂര്‍ണമായും നിലച്ചു. വിദ്യാര്‍ഥികളും ജോലിക്കാരും ഉള്‍പ്പെടെ നിരവധിപേര്‍ക്ക് ഇതോടെ യാത്ര ചെയ്യാനായില്ല. കെഎസ്ആര്‍ടിസി ബസുകള്‍ ഇല്ലാത്ത ഗ്രാമപ്രദേശങ്ങളില്‍ നിന്നുള്ള വിദ്യാര്‍ഥികള്‍ക്കും ജോലിക്കാര്‍ക്കും ഇന്നലെ കാഞ്ഞങ്ങാട്, കാസര്‍ഗോഡ് ഭാഗത്തേയ്ക്ക് എത്തിച്ചേരാന്‍ യാതൊരു നിര്‍വാഹവുമില്ലായിരുന്നു. മലയോരമേഖലയില്‍ പാണത്തൂര്‍ റൂട്ടില്‍ മാത്രമാണ് വലിയൊരു യാത്രാദുരിതം അനുഭവപ്പെടാതിരുന്നത്.

കുരുക്കഴിക്കാൻ കാഞ്ഞങ്ങാടിന് വേണം നീലേശ്വരം മാതൃകയിൽ ഒരു ടൗൺ സ്റ്റാൻഡ്

കാഞ്ഞങ്ങാട്: നഗരമധ്യത്തിലുള്ള പഴയ ബസ്‌സ്റ്റാൻഡ് കെട്ടിടം കാലപ്പഴക്കം മൂലം ഇനി അറ്റകുറ്റപ്പണികൾ നടത്താൻ കഴിയാത്ത നിലയിലായതോടെ പകരം സംവിധാനങ്ങളെക്കുറിച്ചുള്ള ചർച്ചകൾ സജീവമാകുന്നു. പഴയ ബസ്‌സ്റ്റാൻഡ് കെട്ടിടം പൊളിച്ചുമാറ്റി ആ സ്ഥാനത്ത് ആധുനിക സംവിധാനങ്ങളോടെയുള്ള പാർക്കിംഗ് പ്ലാസ നിർമിക്കണമെന്ന ആവശ്യം കഴിഞ്ഞ നഗരസഭാ ഭരണസമിതിയുടെ കാലത്ത് ഉയർന്നുകേട്ടിരുന്നു. ബസുകളെ പൂർണമായും ആലാമിപ്പള്ളിയിലെ പുതിയ ബസ്‌സ്റ്റാൻഡിലേക്ക് മാറ്റാമെന്നും പഴയ ബസ്‌സ്റ്റാൻഡ് നിൽക്കുന്ന സ്ഥലം നഗരത്തിലെ പാർക്കിംഗ് പ്രശ്നം പരിഹരിക്കുന്നതിനായി ഉപയോഗപ്പെടുത്താമെന്നുമായിരുന്നു ആശയം. എന്നാൽ, ഈ ആശയം ഇപ്പോൾ പരീക്ഷണാടിസ്ഥാനത്തിൽ നടപ്പാക്കിയപ്പോൾ തന്നെ പരാജയമെന്നു തെളിഞ്ഞിരിക്കുകയാണ്. യാർഡിന്‍റെ അറ്റകുറ്റപ്പണികളുടെ പേരിൽ പഴയ ബസ് സ്റ്റാൻഡ് അടച്ചിട്ടും ബസുകളെ പൂർണമായും ആലാമിപ്പള്ളിയിലേക്ക് മാറ്റാൻ കഴിഞ്ഞിട്ടില്ല. നഗരകേന്ദ്രത്തിൽ നിന്ന് മൂന്നുകിലോമീറ്ററോളം അകലെയുള്ള ആലാമിപ്പള്ളിയിൽ ബസിറങ്ങാനോ കയറാനോ യാത്രക്കാരെ കിട്ടാത്ത നിലയാണ്. പഴയ ബസ്‌സ്റ്റാൻഡിനു മുന്നിൽ നിരനിരയായി നിർത്തി യാത്രക്കാരെ ഇറക്കുകയും കയറ്റുകയും ചെയ്ത ശേഷം ബസുകൾ നാമമാത്രമായി മാത്രം ആലാമിപ്പള്ളി ബസ് സ്റ്റാൻഡിലേക്ക് പോകുകയാണ് ചെയ്യുന്നത്. ഇതോടെ നഗരമധ്യത്തിൽ ഗതാഗതക്കുരുക്കൊഴിയാത്ത നേരമില്ലാതായി. പഴയ ബസ്‌സ്റ്റാൻഡ് കെട്ടിടം പൊളിച്ചുമാറ്റുകയാണെങ്കിൽ പകരം അതേ സ്ഥാനത്ത് പുതിയ കെട്ടിടം നിർമിക്കാതെ നീലേശ്വരത്ത് ചെയ്ത മാതൃകയിൽ യാർഡിന്‍റെ മറുവശത്ത് നിർമിക്കുകയാണെങ്കിൽ നഗരമധ്യത്തിലെ സ്ഥലദൗർലഭ്യത്തിനും ഗതാഗതക്കുരുക്കിനും അത് വലിയൊരളവിൽ പരിഹാരമാകുമെന്ന് നാട്ടുകാർ ചൂണ്ടിക്കാട്ടുന്നു. കൂടുതൽ നീളത്തിലും വലിപ്പത്തിലുമുള്ള ഷോപ്പിംഗ് കോംപ്ലക്സ് നിർമിച്ചുകൊണ്ട് നഗരസഭയ്ക്ക് ഭാവിയിൽ മികച്ച വരുമാനം ഉറപ്പുവരുത്താൻ കഴിയും. നിലവിൽ ബസ്‌സ്റ്റാൻഡ് കെട്ടിടം നിൽക്കുന്ന സ്ഥലവും അതിന്‍റെ മുൻവശവുമെല്ലാം യാർഡിന്‍റെ ഭാഗമകുമ്പോൾ ഇപ്പോൾ റോഡിൽ നിരനിരയായി നിർത്തിയിടുന്ന ബസുകൾക്കും യാത്രക്കാർക്കം മികച്ച സ്ഥലസൗകര്യം ഉറപ്പുവരുത്താനും കഴിയും. ആലാമിപ്പള്ളിയിൽ പ്രധാന ബസ്‌സ്റ്റാൻഡ് ഉള്ളതുകൊണ്ട് ഇതിനെ താരതമ്യേന ചെറിയ ഒരു ടൗൺ സ്റ്റാൻഡായി ഉപയോഗപ്പെടുത്തിക്കൊണ്ട് നഗരമധ്യത്തിലെ കുരുക്കഴിക്കാനാകുമെന്നാണ് പ്രതീക്ഷ.

ഉമ്മൻ ചാണ്ടി പ്രതിഭ പുരസ്കാര വിതരണം

ഭീമനടി: എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങളിലും എ പ്ലസ് നേടിയ കുട്ടികൾക്ക് വെസ്റ്റ് എളേരി മണ്ഡലം യൂത്ത് കോൺഗ്രസ് കമ്മിറ്റിയുടെ നേതൃത്വത്തിൽ ഉമ്മൻ ചാണ്ടി പ്രതിഭ പുരസ്കാരം വിതരണം ചെയ്തു. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ഡോ. സോയ ജോസഫ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോബിൻ പറമ്പ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ജോമോൻ ജോസ് മുഖ്യാതിഥിയായി. പഞ്ചായത്ത് അംഗങ്ങളായ കെ.കെ. തങ്കച്ചൻ, ഷെരീഫ് വാഴപ്പള്ളി, ടി.എ. ജെയിംസ്, നേതാക്കളായ എ.വി. ഭാസ്കരൻ, സി.എ. ബാബു, രാജേഷ് തമ്പാൻ, ജിപിൻ പയ്യന്നൂർ, പി.ടി. ജോസഫ്, ഷോബി തോമസ്, സന്ദീപ് കുടത്തുകാട്, ശ്രീനാഥ്, ചാക്കോ എന്നിവർ പ്രസംഗിച്ചു.

ജില്ലാതല വായന പക്ഷാചരണം സമാപിച്ചു

കാസർഗോഡ്: വായന മനുഷ്യമനസ്സുകളെ വിമലീകരിക്കുന്നുവെന്നും വായനയിലൂടെ ആര്‍ജിക്കുന്ന അനുഭവങ്ങളിലൂടെയാണ് മനുഷ്യന്‍ മറ്റ് ജീവികളില്‍ നിന്ന് വ്യത്യസ്തനാകുന്നതെന്നും എഴുത്തുകാരൻ എന്‍. സന്തോഷ് കുമാര്‍ പറഞ്ഞു. ജില്ലാ ഇന്‍ഫര്‍മേഷന്‍ ഓഫീസിന്‍റെ ആഭിമുഖ്യത്തിൽ പരവനടുക്കം ഗവ. മോഡല്‍ റസിഡന്‍ഷ്യല്‍ സ്‌കൂളില്‍ സംഘടിപ്പിച്ച വായന പക്ഷാചരണത്തിന്‍റെ ജില്ലാതല സമാപന പരിപാടിയില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. എഡിഎം പി. അഖില്‍ പരിപാടി ഉദ്ഘാടനം ചെയ്തു. എംആര്‍എസ് സീനിയര്‍ സൂപ്രണ്ട് കെ.എം. പ്രസന്ന അധ്യക്ഷത വഹിച്ചു. ജില്ലാ ഇന്‍ഫര്‍മേഷന്‍ ഓഫീസര്‍ എം. മധുസൂദനന്‍, അസിസ്റ്റന്‍റ് എഡിറ്റര്‍ എ.പി. ദില്‍ന, വി.എസ്. വിനു, എം. വിനോദ് കുമാര്‍, സുഹര്‍ഷ, ശിവാനി എന്നിവര്‍ പ്രസംഗിച്ചു.

സിപിഐ വിളംബര ജാഥ നടത്തി

വെള്ളരിക്കുണ്ട്: സിപിഐ 25-ാം പാർട്ടി കോൺഗ്രസിനു മുന്നോടിയായുള്ള ജില്ലാ സമ്മേളനം ഈ മാസം 11,12,13 തീയ്യതികളിൽ വെള്ളരിക്കുണ്ടിൽ നടക്കും. പതാക, കൊടിമര ജാഥകൾ 11 ന് നടക്കും. ജില്ലാ സമ്മേളനത്തിന് മുന്നോടിയായി വെള്ളരിക്കുണ്ടിൽ വിളംബര ജാഥ നടത്തി. പോടോര കുഞ്ഞിരാമൻ നായർ സ്മാരക മന്ദിരത്തിൽ നിന്നാരംഭിച്ച വിളംബര ജാഥ വെള്ളരിക്കുണ്ട് ടൗണിൽ സമാപിച്ചു. ജില്ലാ സെക്രട്ടറി സി.പി. ബാബു, കെ.എസ്. കുര്യാക്കോസ്, ബങ്കളം കുഞ്ഞികൃഷ്ണൻ, എം. കുമാരൻ, വി.കെ. ചന്ദ്രൻ, രത്നാകരൻ നമ്പ്യാർ, കെ. ഭാസ്കരൻ അടിയോടി, കെ. ഭൂപേഷ് ബാനം എന്നിവർ നേതൃത്വം നല്കി.

ബിജെപി മാർച്ചിനു നേരെ ജലപീരങ്കി പ്രയോഗം

കാസർഗോഡ്: ആരോഗ്യമന്ത്രി വീണാ ജോര്‍ജിന്‍റെ രാജി ആവശ്യപ്പെട്ട് ബിജെപി ജില്ലാ കമ്മിറ്റിയുടെ നേതൃത്വത്തില്‍ കാസര്‍ഗോഡ് ജനറല്‍ ആശുപത്രിയിലേക്ക് നടത്തിയ മാര്‍ച്ചിനു നേരെ പോലീസിന്‍റെ ജലപീരങ്കി പ്രയോഗം. എൽഐസി ഓഫീസിന് മുന്നില്‍ വെച്ച് മാര്‍ച്ച് പോലീസ് തടഞ്ഞു. ബിജെപി മുന്‍ സംസ്ഥാന സെക്രട്ടറി വി.കെ. സജീവന്‍ മാര്‍ച്ച് ഉദ്ഘാടനം ചെയ്തു. ജില്ലാ പ്രസിഡന്‍റ് എം.എല്‍. അശ്വിനി, ജനറല്‍ സെക്രട്ടറിമാരായ പി.ആര്‍. സുനില്‍, എന്‍. ബാബുരാജ്, മനുലാല്‍ മേലത്ത്, നേതാക്കളായ സവിത ടീച്ചര്‍, വി. രവീന്ദ്രൻ, സതീഷ് ചന്ദ്ര ഭണ്ഡാരി എന്നിവർ നേതൃത്വം നല്കി.

67,778 പേര്‍ക്ക് ജീവിതശൈലി രോഗ സാധ്യത

കാഞ്ഞങ്ങാട്: ആര്‍ദ്രം മിഷന്‍ ഒന്നാംഘട്ടം വാര്‍ഷിക ആരോഗ്യ പരിശോധനയുടെ ഭാഗമായി ജില്ലയില്‍ 30 വയസിനു മുകളില്‍ പ്രായുള്ള ആള്‍ക്കാരില്‍ നടത്തിയ ആരോഗ്യപരിശോധനയില്‍ 67,778 പേര്‍ക്ക് ജീവിതശൈലി രോഗ സാധ്യത കണ്ടെത്തി. 52,302 പേര്‍ക്ക് പരിശോധന പൂര്‍ത്തിയാക്കി. 16,646 പേര്‍ക്ക് രക്തസമ്മര്‍ദ്ദവും 1811 പേര്‍ക്ക് പ്രമേഹവും കണ്ടെത്തി. ഒന്നാം ഘട്ടത്തില്‍ 87 ശതമാനം സര്‍വേ പൂര്‍ത്തീകരിച്ചു. രണ്ടാംഘട്ടത്തില്‍ 185 917 പേര്‍ക്ക് ജീവിതശൈലിരോഗ സാധ്യത കണ്ടെത്തുകയും 32516 പേരുടെ പരിശോധന പൂര്‍ത്തിയാക്കുകയും ചെയ്തു. 7323 പേര്‍ക്ക് പുതുതായി രക്തസമ്മര്‍ദ്ദം 988 പേര്‍ക്ക് പുതുതായി പ്രമേഹവും കണ്ടെത്തി. ജീവിതശൈലി രോഗങ്ങള്‍ പ്രാരംഭ ഘട്ടത്തില്‍ തന്നെ കണ്ടെത്തി ചികിത്സ ഉറപ്പാക്കുന്നതിന് സംസ്ഥാന ആരോഗ്യവകുപ്പ് നടപ്പിലാക്കിവരുന്ന പദ്ധതിയാണ് പോപ്പുലേഷന്‍ ബേസ്ഡ് സ്‌ക്രീനിംഗ്, അഥവാ വാര്‍ഷിക ആരോഗ്യ പരിശോധന. പദ്ധതിയുടെ ഭാഗമായി 30 വയസിനു മുകളിലുള്ള എല്ലാ വ്യക്തികളിലും പരിശോധനനടത്തി ജീവിതശൈലി രോഗങ്ങളും അവയ്ക്ക് വഴിവയ്ക്കുന്ന കാരണങ്ങളും കണ്ടെത്തുന്നു. ഇതിനായി ആരോഗ്യ പ്രവര്‍ത്തകര്‍ പ്രവര്‍ത്തകര്‍ നേരിട്ടു വീടുകളില്‍ എത്തി വിവരശേഖരണം നടത്തും. ശേഖരിച്ച വിവരങ്ങള്‍ ഇ-ഹെല്‍ത്ത് പ്ലാറ്റ്‌ഫോമിലൂടെയാണ് രേഖപ്പെടുത്തുക. ഇതിനായി ശൈലി എന്ന പ്രത്യേക ആപ്പ് സംവധാനവും ഒരുക്കിയിട്ടുണ്ട്.

ലയൺസ് ക്ലബ് ഭാരവാഹികൾ സ്ഥാനമേറ്റു

ചിറ്റാരിക്കാൽ: ചിറ്റാരിക്കാൽ ലയൺസ് ക്ലബിന്‍റെ പുതിയ ഭാരവാഹികളുടെ സ്ഥാനാരോഹണം വെള്ളിയേപ്പള്ളിൽ ഓഡിറ്റോറിയത്തിൽ ലയൺസ് സെക്കൻഡ് വൈസ് ഡിസ്ട്രിക്ട് ഗവർണർ പി.എസ്. സൂരജ് ഉദ്ഘാടനം ചെയ്തു. പ്രസിഡന്‍റ് കെ.കെ. തോമസ് അധ്യക്ഷത വഹിച്ചു. പുതിയ പ്രസിഡന്‍റായി വി.വി. ബിനോയ്, സെക്രട്ടറിയായി സെബാസ്റ്റ്യൻ മാത്യു, ട്രഷററായി ടി.എസ്. സജീവ് എന്നിവർ സ്ഥാനമേറ്റു. മുൻ പ്രസിഡന്‍റുമാരെയും വിവിധ സേവനപ്രവർത്തനങ്ങൾ നടത്തിയ ക്ലബ് അംഗങ്ങളെയും ഉന്നത വിജയം നേടിയ വിദ്യാർഥികളെയും ആദരിച്ചു. റീജണൽ ചെയർമാൻ സി.ജെ. ജോസഫ്, ജിമ്മി തോമസ്, മഞ്ജു അഭിലാഷ്, എൻ.കെ. സാലു, ടി.എസ്. സജീവ്, സെബാസ്റ്റ്യൻ മാത്യു, കെ.സി. തോമസ്, വി.എസ്. കുര്യൻ എന്നിവർ പ്രസംഗിച്ചു.

കോൺഗ്രസ് കുടുംബ സംഗമം നടത്തി

വെള്ളരിക്കുണ്ട്: പഞ്ചായത്ത് തെരഞ്ഞെടുപ്പിന്‍റെ മുന്നൊരുക്കങ്ങളുടെ ഭാഗമായി ബളാൽ പഞ്ചായത്ത് പതിനാലാം വാർഡിൽ കോൺഗ്രസ് മഹാത്മാഗാന്ധി കുടുംബ സംഗമം സംഘടിപ്പിച്ചു. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ഡോ. സോയ ജോസഫ് ഉദ്ഘാടനം ചെയ്തു. വാർഡ് പ്രസിഡന്‍റ് ഷിജോ ജോർജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് രാജു കട്ടക്കയം മുഖ്യാതിഥിയായി. ഡിസിസി വൈസ് പ്രസിഡന്‍റ് പി.ജി. ദേവ്, ജനറൽ സെക്രട്ടറി ഹരീഷ് പി. നായർ, യൂത്ത്‌ കോൺഗ്രസ് സംസ്ഥാന ജനറൽ സെക്രട്ടറി ജോമോൻ ജോസ്, ബ്ലോക്ക്‌ പഞ്ചായത്ത് അംഗം ഷോബി ജോസഫ്, വാർഡ് മെംബർ കെ.ആർ. വിനു, ബ്ലോക്ക് കോൺഗ്രസ് പ്രസിഡന്‍റ് മധുസൂദനൻ ബാലൂർ, മണ്ഡലം പ്രസിഡന്‍റ് എം.പി. ജോസഫ്, മഹിളാ കോൺഗ്രസ് ജില്ലാ ജനറൽ സെക്രട്ടറി ബിൻസി ജെയിൻ, പി. രാഘവൻ, ജോസ് സെബാസ്റ്റ്യൻ, ജോസ് വടക്കേപറമ്പിൽ, ദിലീപ് മാത്യു എന്നിവർ പ്രസംഗിച്ചു.

കാണാമറയത്ത് ലഹരിയുടെ പുതുവഴികൾ തേടി വിദ്യാർഥികൾ

ചിറ്റാരിക്കാൽ: എൽപി ക്ലാസുകൾ മുതൽ കോളജ് തലം വരെയുള്ള വിദ്യാഭ്യാസസ്ഥാപനങ്ങളിൽ ലഹരിവിരുദ്ധ ബോധവത്കരണ പരിപാടികൾ മുറയ്ക്ക് നടക്കുമ്പോഴും ഒരു വിഭാഗം വിദ്യാർഥികളെങ്കിലും കാണാമറയത്ത് ലഹരിയുടെ പുതുവഴികൾ തേടുന്നത് ആശങ്കയാകുന്നു. ബംഗളൂരുവിലും മംഗലാപുരത്തും നിന്നെത്തുന്ന ആധുനിക ലഹരിമരുന്നുകൾ മലയോരമേഖലയിൽ പോലും സുലഭമാകുന്ന നിലയാണ്. ലഹരി ഉപഭോഗത്തിന്‍റെ കാര്യത്തിൽ മുതിർന്നവരുടെ ഇടയിൽ നടക്കുന്ന മാറ്റങ്ങളെല്ലാം അതേ രീതിയിൽ കുട്ടികളുടെ ഇടയിലുമെത്തുന്നു. പാൻപരാഗ്, ഹാൻസ് പോലുള്ള ലഹരിവസ്തുക്കൾ ഇപ്പോൾ പഴയതുപോലെ കാണാനില്ല. എന്നാൽ പല കടകളുടെയും പിന്നാമ്പുറങ്ങളിൽ വിശ്വസ്തരായ ഇടപാടുകാർക്ക് മാത്രം കാപ്സ്യൂളുകളുടെയും ലഹരി മിഠായികളുടെയും രൂപത്തിൽ ഇവ ലഭ്യമാണ്. ഈ ഇടപാടുകാരിൽ പലരും വിദ്യാർഥികൾ തന്നെയാണ്. മറ്റു കുട്ടികളിലേക്ക് ലഹരിവസ്തുക്കൾ എത്തുന്നത് ഈ ഇടനിലക്കാർ മുഖേനയാണ്. പാൻപരാഗ്, റോജ, ഹാൻസ്, ചൈന, തുളസി, മധു, കൂൾ തുടങ്ങിയ പേരുകളിൽ അറിയപ്പെടുന്ന ഈ ലഹരിവസ്തുക്കൾക്ക് പായ്ക്കറ്റിൽ എഴുതിയ വില അഞ്ചുരൂപ മുതൽ 10 രൂപ വരെയാണെങ്കിലും ഇടനിലക്കാർ ആവശ്യക്കാരിൽ നിന്ന് വാങ്ങുന്നത് 20 രൂപ വരെയാണ്. കുട്ടികളായതിനാൽ രഹസ്യമായി എന്തോ വലിയ കാര്യം ചെയ്യുകയാണെന്ന ത്രില്ലോടുകൂടി കൂടുതൽ പണം നല്കാൻ തയ്യാറാവുകയും ചെയ്യുന്നു. രക്ഷിതാക്കളുടെ കൈയിൽ നിന്ന് ആവശ്യത്തിലേറെ പണം കിട്ടുന്നതും ഇതിന് കാരണമാണ്. മൊബൈൽ ഫോണുകൾ സൂക്ഷിക്കാനേല്പിക്കുന്നതിന്‍റെ പേരിലും കുട്ടികൾ കടക്കാരുമായി ബന്ധം സ്ഥാപിക്കുന്നു. ഓൺലൈനിൽ ഓർഡർ ചെയ്യുന്ന ലഹരിവസ്തുക്കൾ വിദ്യാർഥികൾക്ക് പാഴ്സലായും കൊറിയറായും എത്തുന്ന സംഭവങ്ങളുമുണ്ട്. ബംഗളൂരുവിലും മംഗലാപുരത്തും ഉപരിപഠനത്തിനു പോകുന്ന ചിലരെങ്കിലും നാട്ടിലേക്കു വരുമ്പോൾ ലഹരിമരുന്നുകളുടെ കാരിയർമാരാകുന്ന സംഭവങ്ങളും മലയോരത്ത് ഉണ്ടായിട്ടുണ്ട്. ബംഗളൂരുവിൽ പഠിക്കുന്ന മലയോരത്തെ അറിയപ്പെടുന്ന കുടുംബങ്ങളിലെ രണ്ട് കുട്ടികൾ അടുത്തകാലം വരെ എല്ലാ ശനിയാഴ്ചകളിലും നാട്ടിലെത്തിയിരുന്നു. വീട്ടിൽ പറയാതെയുള്ള ഈ വരവിൽ സംശയം തോന്നിയ രക്ഷിതാക്കൾ ഒരുദിവസം ഇവരെ അറിയിക്കാതെ ശനിയാഴ്ച രാവിലെ ഇവർ ബസ്സിറങ്ങുന്നിടത്ത് പോയപ്പോൾ കണ്ടത് ഇതരസംസ്ഥാന തൊഴിലാളികളും വിദ്യാർഥികളുമടക്കം പത്തോളം പേർ ഇവരെ കാത്തുനിൽക്കുന്നതാണ്. വീട്ടിലറിയിക്കാതെയുള്ള യാത്രകൾ അതോടെ അവസാനിച്ചു. മലയോരത്തെ ഒരു ഹയർ സെക്കൻഡറി സ്കൂളിൽ ഒരു വിദ്യാർഥിനിയുടെ സ്വഭാവത്തിലുണ്ടായ മാറ്റം ശ്രദ്ധിച്ച് ബാഗ് പരിശോധിച്ച അധ്യാപിക കണ്ടത് സിഗരറ്റ് പായ്ക്കറ്റുകളും ലഹരിവസ്തുക്കളുമാണ്. രക്ഷിതാക്കളെ വിവരമറിയിച്ചപ്പോൾ സ്കൂളിലെത്തിയ അച്ഛനോടും തട്ടിക്കയറുകയാണ് പെൺകുട്ടി ചെയ്തത്. പിന്നീട് ദിവസങ്ങളോളം നീണ്ട കൗൺസിലിംഗിനു ശേഷമാണ് പെൺകുട്ടിയെ സാധാരണ നിലയിലേക്ക് കൊണ്ടുവരാനായത്. ബൈക്കിൽ സഞ്ചരിച്ച് കൃത്യസമയങ്ങളിൽ വിദ്യാർഥികൾക്കും യുവാക്കൾക്കും ലഹരി വസ്തുക്കൾ എത്തിക്കുന്ന സംഘങ്ങളും മലയോരത്ത് സജീവമാണ്. മിക്കപ്പോഴും കണ്ണൂരിലും കാസർഗോട്ടും മംഗലാപുരത്തുമൊക്കെയാണ് ഇവരുടെ കണ്ണികൾ ചെന്നുചേരുന്നത്. പലപ്പോഴും വൈകുന്നേരങ്ങളിൽ സ്കൂൾ മൈതാനങ്ങൾക്കും മറ്റും സമീപത്താണ് ഇവർ തമ്പടിക്കുന്നത്. പുതുതലമുറയിൽ പുകവലി കുറഞ്ഞെങ്കിലും മദ്യപാനത്തിന് സാമൂഹിക അംഗീകാരം ലഭിച്ചെന്ന നിലയിലാണ് കുട്ടികളടക്കം പെരുമാറുന്നതെന്ന് ചൈൽഡ് ലൈൻ പ്രവർത്തകർ പറയുന്നു. 10 വയസുള്ള കുട്ടികൾ പോലും മദ്യപിച്ചിട്ടുള്ളതായി ഇവരോട് തുറന്നുപറഞ്ഞിട്ടുണ്ട്. ആൺകുട്ടികളും പെൺകുട്ടികളും ഇക്കാര്യത്തിൽ ഒപ്പത്തിനൊപ്പമാണ്. അടുത്തിടെ ഒരു പ്ലസ്ടു സ്കൂളിലെ അഞ്ച് കുട്ടികൾ ക്ലാസ് സമയം കഴിഞ്ഞിട്ടും വീട്ടിലെത്താതിരുന്നതിനെ തുടർന്ന് അന്വേഷിച്ചപ്പോൾസ്കൂൾ കെട്ടിടത്തിനു മുകളിൽ മദ്യപിച്ച് അവശരായി കിടക്കുന്നതാണ് കണ്ടത്. പലപ്പോഴും ഇത്തരം കാര്യങ്ങൾ പുറത്തുവന്നാൽ സ്കൂളുകൾക്ക് പേരുദോഷം വരുമെന്നു ഭയന്ന് സംഭവം മറച്ചുവയ്ക്കാനാണ് ബന്ധപ്പെട്ടവർ ശ്രമിക്കുന്നതെന്ന് അധ്യാപകർ തന്നെ പറയുന്നു. മലയോരത്തെ ഒരു സ്കൂളിൽ രൂപീകരിച്ച ലഹരിവിരുദ്ധ ജാഗ്രതാസമിതിയുടെ ചെയർമാന്‍റെ മകന്‍റെ കൈയിൽനിന്നുതന്നെ ലഹരിവസ്തുക്കൾ കണ്ടെടുത്തത് അടുത്തിടെയാണ്.

എണ്ണപ്പാറ കുടുംബാരോഗ്യ കേന്ദ്രത്തിലുമുണ്ട് തകർന്നുവീഴാൻ പാകത്തിലൊരു കെട്ടിടം

എണ്ണപ്പാറ: എണ്ണപ്പാറ കുടുംബാരോഗ്യകേന്ദ്രത്തിൽ തകർന്നുവീഴാറായ നിലയിൽ നിൽക്കുന്ന പഴയ കെട്ടിടം പൊളിച്ചുമാറ്റണമെന്ന ആവശ്യം ശക്തമാകുന്നു. ഏതാണ്ട് അമ്പതുവർഷം മുമ്പ് എണ്ണപ്പാറയിലെ പ്രാഥമികാരോഗ്യകേന്ദ്രം പ്രവർത്തനം തുടങ്ങിയത് ഈ കെട്ടിടത്തിലാണ്. 10 വർഷം മുമ്പാണ് പുതിയ കെട്ടിടം നിർമിച്ച് അതിലേക്ക് മാറിയത്. ഇതിനു ശേഷവും അങ്കണവാടിയായും കോവിഡ് പരിശോധനാകേന്ദ്രമായുമൊക്കെ ഈ കെട്ടിടം ഉപയോഗിച്ചിരുന്നു. എന്നാൽ ഇപ്പോൾ ഇത് കാലപ്പഴക്കം മൂലം തീർത്തും ദുർബലാവസ്ഥയിലായി. കെട്ടിടത്തിന്‍റെ മേൽക്കൂര തകർച്ചയിലായതോടെ ഓടുകൾ പലതും ഇഴകിവീണു. മഴവെള്ളം ചോർന്നൊഴുകി ചുവരുകളും ദുർബലാവസ്ഥയിലായി. ചുറ്റുപാടും കാടുകയറി ഇഴജന്തുക്കൾക്ക് താവളമാകാനും തുടങ്ങി. ഇത് പൊളിച്ചുമാറ്റിയാൽ ആശുപത്രിയുടെ വികസനപ്രവർത്തനങ്ങൾക്ക് കൂടുതൽ സ്ഥലസൗകര്യം ലഭിക്കും. അതേസമയം കുടുംബാരോഗ്യകേന്ദ്രത്തിനായി 1.8 കോടി രൂപ ചെലവിൽ നിർമിച്ച പുതിയ ഇരുനിലക്കെട്ടിടം ഉദ്ഘാടനം ചെയ്തിട്ട് ഒരുവർഷത്തിലേറെയായിട്ടും പൂർണമായും പ്രവർത്തനസജ്ജമാക്കാൻ കഴിഞ്ഞിട്ടില്ല.

പ്രീതിക്ക് വേണം, സുമനസുകളുടെ കൈത്താങ്ങ്

ഭീമനടി: മാങ്ങോടെ പ്രീതി രാമചന്ദ്രന്‍റെ (40) ചികിത്സയ്ക്കായി നാടൊരുമിക്കുന്നു. ഇരുവൃക്കകളും തകരാറിലായി ഒരു വർഷമായി ചികിത്സയിലാണ് പ്രീതി. ഭർത്താവ് രാമചന്ദ്രൻ വൃക്ക നൽകാൻ തയ്യാറാണ്. ഹാർട്ട് പേഷ്യന്‍റായ മകന്‍റെ ചികിത്സയ്ക്കായി കടക്കെണിയിലായപ്പോഴാണ് ഇരുട്ടടിയായി ഭാര്യയും രോഗത്തിലായത്. കൂലിപ്പണിയെടുത്ത് ജീവിക്കുന്ന രാമചന്ദ്രന് ചികിത്സാ ചെലവ് താങ്ങാനാവുന്നതിലും അപ്പുറമാണ്. ഈ സാഹചര്യത്തിൽ പ്രീതിയുടെ വൃക്കമാറ്റിവെയ്ക്കൽ ശസ്ത്രക്രിയക്ക് വിധേയമാക്കി പുതിയ ജീവിതത്തിലേക്ക് മടക്കിക്കൊണ്ടുവരാൻ പഞ്ചായത്ത് പ്രസിഡന്‍റ് ഗിരിജ മോഹനൻ രക്ഷാധികാരിയായും കെ. രമേശൻ ചെയർമാനായും സി.വി. ശശിധരൻ കൺവീനറായും ബിനോയ് കെ. ജോൺ ട്രഷററായും ചികിത്സാ സഹായ കമ്മറ്റി രൂപീകരിച്ചിട്ടുണ്ട്. കേരള ഗ്രാമീൺ ബാങ്ക് നർക്കിലക്കാട് ശാഖയിൽ അക്കൗണ്ട് ആരംഭിച്ചു. അക്കൗണ്ട് നമ്പർ -40406101 040184, IFSC KLGB0040406.

കാഞ്ഞങ്ങാട് സ്റ്റേഡിയം യാഥാര്‍ഥ്യമാക്കണം

കാഞ്ഞങ്ങാട്: കാഞ്ഞങ്ങാടിന് അനുവദിച്ച സ്റ്റേഡിയം യാഥാര്‍ഥ്യമാക്കാന്‍ നഗരസഭ സ്ഥലം കണ്ടെത്തണമെന്ന് വെറ്ററന്‍സ് അത്‌ലറ്റിക് ഫെഡറേഷന്‍ ജില്ലാകമ്മിറ്റി രൂപീകരണയോഗം ആവശ്യപ്പെട്ടു. മുന്‍ നഗരസഭ ചെയര്‍മാന്‍ വി.വി. രമേശന്‍ ഉദ്ഘാടനം ചെയ്തു. സംസ്ഥാന വൈസ് പ്രസിഡന്‍റ് ബാബു കോട്ടപ്പാറ അധ്യക്ഷതവഹിച്ചു. സംസ്ഥാന പ്രസിഡന്‍റ് വി. ഗിരീശന്‍ മുഖ്യാതിഥിയായി. എം.കെ. വിനോദ്കുമാര്‍, സി. മുഹമ്മദ്കുഞ്ഞി, ഇ.വി. ജയകൃഷ്ണന്‍, സുകുമാരന്‍ പെരിയച്ചൂര്‍, പ്രവീണ്‍ മാത്യു, ബി. മുകുന്ദപ്രഭു എന്നിവര്‍ സംസാരിച്ചു. ഭാരവാഹികള്‍: വി.വി. രമേശന്‍ (പ്രസിഡന്‍റ്), കെ.എം. നാസര്‍, സുകുമാരന്‍ പെരിയച്ചൂര്‍, ബാബു കുന്നത്ത്, ദീപ പേരൂര്‍ (വൈസ്പ്രസിഡന്‍റുമാര്‍), എം.കെ. വിനോദ് കുമാര്‍ (സെകട്ടറി), പ്രവീണ്‍ മാത്യു, പി.എം. അബുള്‍ നാസര്‍, പി. നാരായണന്‍, രാജീവന്‍ ഏഴാംമൈല്‍ (ജോയിന്‍റ് സെക്രട്ടറിമാര്‍), ഇ.വി. ജയകൃഷ്ണന്‍ (ട്രഷറര്‍).

ചുള്ളി ഫാമിന്‍റെ പച്ചക്കറി പന്തലിന് ആവശ്യക്കാരേറുന്നു

ബളാൽ: ചുള്ളി ഫാം ഉടമയും യുവ കർഷകനുമായ പി.സി. ബിനോയ് മട്ടുപ്പാവ് കൃഷിക്കും അടുക്കളത്തോട്ടങ്ങൾക്കും അനുയോജ്യമായ രീതിയിൽ രൂപകല്പന ചെയ്ത പച്ചക്കറി പന്തലിന് ആവശ്യക്കാരേറുന്നു. കൊണ്ടുനടക്കാവുന്നതും മടക്കാവുന്നതുമായ രീതിയിൽ തയ്യാറാക്കിയ പന്തലിന്‍റെ രൂപകല്പനയ്ക്ക് പേറ്റന്‍റും ലഭിച്ചിട്ടുണ്ട്. ചുള്ളി വെജിറ്റബിൾ ക്ലൈംബർ (ട്രെല്ലിസ് സിസ്റ്റം) എന്ന പേരിൽ ഓൺലൈനിലൂടെയും നേരിട്ടും ഇത് വിപണിയിലെത്തിച്ചിട്ടുണ്ട്. പരിമിതമായ സ്ഥലസൗകര്യമുള്ള ഇടങ്ങളിൽ പോലും മത്തങ്ങ, ബീൻസ്, വെള്ളരി, പയർ എന്നിവയടക്കം ഈ സംവിധാനമുപയോഗിച്ച് കൃഷിചെയ്യാം. ഇത് സ്ഥാപിക്കാൻ 27 ചതുരശ്ര അടി സ്ഥലം മാത്രമാണ് ആവശ്യമുള്ളത്. അതേസമയം 43 ചതുരശ്ര അടി സ്ഥലം കൃഷിക്കായി ലഭ്യമാക്കുകയും ചെയ്യുന്നു. സംസ്ഥാന കൃഷിവകുപ്പും കാർഷിക സർവകലാശാലയുമുൾപ്പെടെ ഈ സംവിധാനം വാങ്ങി ഉപയോഗിക്കുന്നുണ്ട്. അടുത്തിടെ ബംഗളൂരുവിൽ നടന്ന നാഷണൽ ഹോർട്ടിക്കൾച്ചർ ഫെയർ എക്സിബിഷനിലും ഇത് ശ്രദ്ധ നേടിയിരുന്നു.

ദേശീയപാത : സംയുക്ത പരിശോധന നടത്തണമെന്ന് നിർദേശം

കാസർഗോഡ്: ദേശീയപാത നിര്‍മാണവുമായി ബന്ധപ്പെട്ട് വിവിധ സ്ഥലങ്ങളിൽ ഉണ്ടായിട്ടുള്ള പ്രശ്‌നങ്ങൾ പരിഹരിക്കുന്നതിനായി ജനപ്രതിനിധികളും ദേശീയപാത അഥോറിറ്റി ഉദ്യോഗസ്ഥരും ചേര്‍ന്ന് ബന്ധപ്പെട്ട സ്ഥലങ്ങളിൽ സംയുക്ത പരിശോധന നടത്തണമെന്ന് ജില്ലാ വികസന സമിതി യോഗം നിര്‍ദേശിച്ചു. ചെങ്കള-നീലേശ്വരം റീച്ചിലുണ്ടായ പ്രശ്നങ്ങളുമായി ബന്ധപ്പെട്ട് കരാര്‍ കമ്പനിക്ക് കാരണം കാണിക്കൽ നോട്ടീസ് നല്‍കിയിട്ടുണ്ടെന്നും ദേശീയപാത അഥോറിറ്റി ആസ്ഥാനത്തുനിന്നുള്ള വിദഗ്ധ സമിതി ജൂണ്‍ 11, 12 തീയതികളിലായി ജില്ലയിലെ വിവിധ നിര്‍മാണ പ്രദേശങ്ങളിൽ പരിശോധന നടത്തിയിട്ടുണ്ടെന്നും പ്രോജക്ട് ഡയറക്ടര്‍ യോഗത്തിൽ അറിയിച്ചു. ഇതുവരെ സ്വീകരിച്ച നിർമാണരീതികള്‍ വിലയിരുത്തുന്നതിനും കൂടുതല്‍ മെച്ചപ്പെടുത്തുന്നതിനുമായി വിദഗ്ധ സമിതിയുടെ റിപ്പോര്‍ട്ട് കാത്തിരിക്കുകയാണെന്നും അദ്ദേഹം അറിയിച്ചു. തീരദേശ ഹൈവേയുടെ അലൈന്‍മെന്‍റ് ജില്ലയിൽ നിർദിഷ്ട തീരദേശ ഹൈവേയുടെ അലൈന്‍മെന്‍റ് പെട്ടെന്നുതന്നെ പൂര്‍ത്തീകരിച്ച് തുടര്‍നടപടികളിലേക്ക് നീങ്ങണമെന്ന് സി.എച്ച്. കുഞ്ഞമ്പു എംഎല്‍എ ജില്ലാ വികസനസമിതി യോഗത്തിൽ ആവശ്യപ്പെട്ടു. കാഞ്ഞങ്ങാട് നിയോജക മണ്ഡലത്തിൽ ആകെയുള്ള 14.92 കിലോമീറ്റർ ദൂരത്തിൽ 4.3 കിലോമീറ്റര്‍ ഒഴികെയുള്ള ഭാഗത്ത് കല്ലിടല്‍ പ്രവൃത്തി പൂര്‍ത്തിയാക്കിയിട്ടുണ്ട്. നഷ്ടപ്പെടുന്ന വീടുകളുടെ എണ്ണം പരമാവധി കുറയ്ക്കുന്ന വിധത്തില്‍ അലൈന്‍മെന്‍റ് മാറ്റി വരയ്ക്കാന്‍ കിഫ്ബി നിര്‍ദേശം നല്കിയിട്ടുണ്ടെന്നും കെആര്‍എഫ്ബി എക്സിക്യൂട്ടീവ് എൻജിനിയര്‍ അറിയിച്ചു. ഉദുമ, കാസര്‍ഗോഡ് നിയോജക മണ്ഡലങ്ങളിൽ 730 മീറ്റർ നീളത്തില്‍ കല്ലിടല്‍ പ്രവൃത്തി പൂര്‍ത്തിയാക്കിയിട്ടുണ്ടെന്നും തുടര്‍ന്നുള്ള ഭാഗങ്ങളില്‍ തീരദേശ ഹൈവേയുടെ നിര്‍മാണം ഒഴിവാക്കി അലൈന്‍മെന്‍റ് നിലവിലുള്ള കാസര്‍ഗോഡ്-കാഞ്ഞങ്ങാട് സംസ്ഥാന പാതയുമായി യോജിപ്പിക്കാൻ തീരുമാനമായിട്ടുണ്ടെന്നും അദ്ദേഹം അറിയിച്ചു. കളക്ടറേറ്റ് മിനി കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ എഡിഎം പി. അഖില്‍ അധ്യക്ഷത വഹിച്ചു. ഡോക്ടര്‍മാരുടെ ഒഴിവുകള്‍ നികത്തണം ജില്ലയിൽ സർക്കാർ ആരോഗ്യകേന്ദ്രങ്ങളിലെ ഡോക്ടര്‍മാരുടെയും ജീവനക്കാരുടേയും ഒഴിവുകള്‍ നികത്തണമെന്ന ആവശ്യം എന്‍. എ. നെല്ലിക്കുന്ന് എംഎല്‍എ വീണ്ടും ജില്ലാ വികസനസമിതി യോഗത്തിൽ ഉന്നയിച്ചു. ജില്ലയില്‍ അടുത്തിടെ 37 ഡോക്ടര്‍മാരെ പിഎസ് സി വഴി നിയമിച്ചെങ്കിലും 19 പേര്‍ മാത്രമാണ് ജോലിയില്‍ പ്രവേശിച്ചത്. ഇതില്‍ 16 പേരും ഉപരിപഠനത്തിനായി അവധിയില്‍ പോവുകയും ചെയ്തു. മൂന്ന് പേര്‍ മാത്രമേ യഥാർഥത്തിൽ ജോലിയില്‍ പ്രവേശിച്ചിട്ടുള്ളൂവെന്ന് അദ്ദേഹം ചൂണ്ടിക്കാട്ടി. ഈ ഒഴിവുകളെല്ലാം വീണ്ടും ആരോഗ്യവകുപ്പ് ഡയറക്ടര്‍ക്ക് റിപ്പോര്‍ട്ട് ചെയ്തിട്ടുണ്ടെന്ന് ജില്ലാ മെഡിക്കല്‍ ഓഫീസര്‍ അറിയിച്ചു. ഭൂമി കണ്ടെത്താൻ നടപടി ജില്ലയില്‍ ഡിജിറ്റല്‍ സര്‍വേ പുരോഗമിക്കുന്ന വില്ലേജുകളില്‍ ഭൂരഹിതരില്ലാത്ത കേരളം പദ്ധതിയില്‍ പട്ടയം ലഭിച്ചവരുടെ ഭൂമി കണ്ടെത്തുന്നതിനും അതിര്‍ത്തി നിര്‍ണയിക്കുന്നതിനുമുള്ള അപേക്ഷകള്‍ ലഭിക്കുകയാണെങ്കില്‍ സ്പെഷ്യല്‍ സര്‍വേ ടീമിനെ ഉള്‍പ്പെടുത്തി സര്‍വേ നടപടികള്‍ വേഗത്തില്‍ പൂര്‍ത്തിയാക്കാനുള്ള നടപടി സ്വീകരിക്കുമെന്ന് ഡെപ്യൂട്ടി കളക്ടര്‍ (എല്‍ആര്‍) അറിയിച്ചു. തങ്കയം ജംഗ്ഷനിൽ റോഡ് വീതി കൂട്ടണം തൃക്കരിപ്പൂര്‍ തങ്കയം ജംഗ്ഷനിലെ അപകട ഭീഷണി ഒഴിവാക്കാൻ വീതി കൂട്ടുന്നതിനുള്ള എസ്റ്റിമേറ്റ് തയ്യാറാക്കാനും പ്രവൃത്തി വേഗത്തില്‍ നടത്താൻ കെഎസ്ഇബി, പൊതുമരാമത്ത് വകുപ്പുകൾ സഹകരിച്ച് പ്രവർത്തിക്കണമെന്നും എം. രാജഗോപാലന്‍ എംഎല്‍എ പറഞ്ഞു. ദേശീയപാതയിലെ ബസുകള്‍ സര്‍വീസ് റോഡ് കൂടി ഉപയോഗിക്കണം ദേശീയപാതയില്‍ സര്‍വീസ് നടത്തുന്ന കെഎസ്ആര്‍ടിസിയടക്കം പല ബസുകളും ഇപ്പോൾ സര്‍വീസ് റോഡുകൾ ഉപയോഗിക്കാതെ പ്രധാന പാതയിലൂടെ മാത്രമാണ് ഓടുന്നതെന്നും സർവീസ് റോഡുകൾക്കു സമീപമുള്ള സ്റ്റോപ്പുകളിൽ ബസ് കാത്തുനിൽക്കുന്ന യാത്രക്കാർക്ക് ബസ് കയറാനാകാത്ത നിലയാണെന്നും എ.കെ.എം.അഷറഫ് എംഎല്‍എ ചൂണ്ടിക്കാട്ടി. ഇത്തരത്തില്‍ സര്‍വീസ് നടത്തരുതെന്ന് നിര്‍ദേശം നല്‍കിയിട്ടുണ്ടെന്നും സ്വകാര്യ സ്റ്റേജ് കാര്യേജ് വാഹനങ്ങള്‍ പ്രധാന പാതയിലൂടെ മാത്രമായി സര്‍വീസ് നടത്തുന്നത് ശ്രദ്ധയില്‍പ്പെട്ടാല്‍ പിഴ ഈടാക്കുന്നതുള്‍പ്പെടെയുള്ള നടപടികള്‍ സ്വീകരിക്കുമെന്നും ആര്‍ടിഒ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]