ADVERTISEMENT

ADVERTISEMENT

മഹിള കോൺഗ്രസ് മാവേലി സ്റ്റോറിലേക്ക് മാർച്ച്‌ നടത്തി

കള്ളാർ: നിത്യോപയോഗ സാധനങ്ങളുടെ വിലവർധനവിലും സപ്ലൈകോ സെന്‍ററുകളിൽ സബ്സിഡി സാധനങ്ങളുടെ കുറവിലും പ്രധിഷേധിച്ച് മഹിള കോൺഗ്രസ് ബളാൽ ബ്ലോക്ക്‌ കമ്മിറ്റിയുടെ നേതൃത്വത്തിൽ കള്ളാറിലെ മാവേലി സ്റ്റോറിലേക്ക് മാർച്ചും ധർണയും നടത്തി. കെപിസിസി അംഗം മീനാക്ഷി ബാലകൃഷ്ണൻ ഉദ്ഘാടനം ചെയ്തു.

മഹിള കോൺഗ്രസ് ബ്ലോക്ക്‌ പ്രസിഡന്‍റ് ലക്ഷ്മി തമ്പാൻ അധ്യക്ഷത വഹിച്ചു.ജില്ലാ പ്രസിഡന്‍റ് മിനി ചന്ദ്രൻ, കള്ളാർ പഞ്ചായത്ത് പ്രസിഡന്‍റ് ടി.കെ. നാരായണൻ, മഹിള കോൺഗ്രസ് ജില്ലാ സെക്രട്ടറിമാരായ ബിൻസി ജെയിൻ, അനിത, പ്രഭ, ബ്ലോക്ക് പഞ്ചായത്തംഗം സി. രേഖ എന്നിവർ സംസാരിച്ചു.

ADVERTISEMENT

കാസര്‍ഗോട്ടെ ട്രെയിന്‍ യാത്രക്കാരുടെ പ്രശ്‌നങ്ങള്‍ പരിഹരിക്കണം

കാസര്‍ഗോഡ്: അത്യുത്തര കേരളത്തിലെ റെയില്‍ യാത്രക്കാര്‍ നേരിടുന്ന സൗകര്യങ്ങളുടെ അപര്യാപ്തത സംബന്ധിച്ചും അതില്‍ അടിയന്തിരമായി സ്വീകരിക്കേണ്ട നടപടികള്‍ സംബന്ധിച്ചും രാജ്‌മോഹന്‍ ഉണ്ണിത്താന്‍ എംപി നല്‍കിയ നിര്‍ദേശങ്ങളില്‍ തുടര്‍ നടപടി വേഗത്തിലാക്കാന്‍ കാസര്‍ഗോഡ് റെയില്‍വേ പാസഞ്ചേഴ്‌സ് അസോസിയേഷന്‍ പ്രസിഡന്‍റ് ആര്‍. പ്രശാന്ത്കുമാര്‍ ദക്ഷിണ റെയില്‍വേ പാലക്കാട് ഡിവിഷന്‍ അഡിഷണല്‍ ഡിവിഷണല്‍ റെയില്‍വേ മാനേജര്‍ എം. ജയകൃഷ്ണന് നിവേദനം നല്‍കി. കോഴിക്കോട് ഭാഗത്ത് നിന്ന് വൈകുന്നേരം മുതല്‍ പാതിരാത്രി വരെ കാസര്‍ഗോട്ടേക്കും തിരിച്ചും പ്രതിദിന ഹൃസ്വ ദൂരവണ്ടികള്‍ ഇല്ലാത്തതും ഈ ഭാഗത്തുള്ള സ്റ്റേഷനുകളുടെ അടിസ്ഥാന സൗകര്യങ്ങളുടെ അപര്യാപ്തത, സീസണ്‍ ടിക്കറ്റ് യാത്രക്കാരുടെ ദുരിതങ്ങള്‍ എന്നിവ പരിഹരിക്കാനുള്ള നിര്‍ദേശങ്ങളില്‍ അനുഭാവ പൂര്‍ണമായ നടപടികള്‍ കൈകൊള്ളുമെന്നു എഡിആര്‍എം പ്രതികരിച്ചു. ഇതുസംബന്ധിച്ച് യാത്രക്കാരുടെ പ്രതിനിധികളുടെ സാന്നിധ്യത്തില്‍ കാസര്‍ഗോഡ് വെച്ചു ചര്‍ച്ച ചെയ്യാന്‍ റെയില്‍വേ ഉന്നത ഉദ്യോഗസ്ഥരുടെ യോഗം വിളിച്ചു ചേര്‍ക്കണമെന്ന് ആവശ്യപ്പെട്ട് എംപി റയില്‍വേ സോണ്‍ ജനറല്‍ മാനേജര്‍ക്ക് മെയില്‍ അയച്ചിട്ടുണ്ട്.

കമ്പല്ലൂരിൽ ചെണ്ടുമല്ലി കൃഷിക്ക് തുടക്കമായി

കമ്പല്ലൂർ: സിആർസി ഗ്രന്ഥാലയത്തിന്‍റെ നേതൃത്വത്തിൽ നടത്തുന്ന ചെണ്ടുമല്ലി കൃഷിയുടെ നടീൽ ഉത്സവം പഞ്ചായത്ത് പ്രസിഡന്‍റ് ജോസഫ് മുത്തോലി ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് കെ.പി. ദാമോദരൻ അധ്യക്ഷത വഹിച്ചു. ഗ്രന്ഥശാലയ്ക്ക് സമീപത്തുള്ള കെ.പി. നാരായണന്‍റെ സ്ഥലത്താണ് ചെണ്ടുമല്ലി കൃഷി നടത്തുന്നത്. ഓണക്കാലം ലക്ഷ്യമിട്ട് ആയിരത്തോളം തൈകളാണ് ഗ്രന്ഥശാലയുടെ നേതൃത്വത്തിൽ നട്ടു പരിപാലിക്കുന്നത്. ചടങ്ങിൽ പഞ്ചായത്ത് അംഗം പി.വി. സതീദേവി, കൃഷി ഓഫീസർ അബിൻ സി. അജിത്ത്, എം. മനോജ് കുമാർ, പി.കെ. മോഹനൻ, എ.ആർ. വിജയകുമാർ, പി.ഡി. വിനോദ്, കെ.പി. ബൈജു, എം.വി. ബാലകൃഷ്ണൻ എന്നിവർ സംബന്ധിച്ചു.

എകെസിസി ഫൊറോന സമ്മേളനം

പാലാവയൽ: കത്തോലിക്ക കോൺഗ്രസ് തോമാപുരം ഫൊറോന സമ്മേളനം കാവുന്തല സെന്‍റ് ജോസഫ് പാരിഷ് ഹാളിൽ എകെസിസി ഫൊറോന ഡയറക്ടർ ഫാ. മാത്യു വളവനാൽ ഉദ്ഘാടനം ചെയ്തു. ഫൊറോന കമ്മിറ്റി പ്രസിഡന്‍റ് സാജു പടിഞ്ഞാറേട്ട് അധ്യക്ഷത വഹിച്ചു. അതിരൂപത പ്രസിഡന്‍റ് ഫിലിപ്പ് വെളിയത്ത് മുഖ്യപ്രഭാഷണം നടത്തി. കാവുന്തല പള്ളി വികാരി ഫാ. എബിൻ മടപ്പാംതോട്ടുങ്കൽ, തോമസ് മണ്ണനാനിക്കൽ, സെബാസ്റ്റ്യൻ വട്ടപറമ്പിൽ, ടോമി നടുവിലേക്കുറ്റ് എന്നിവർ പ്രസംഗിച്ചു. ഫൊറോനയിൽ എകെസിസി യൂണിറ്റ് ഇല്ലാത്ത ഇടവകകളിൽ പുതിയ യൂണിറ്റുകൾ രൂപീകരിക്കാനും ഫൊറോന, യൂണിറ്റ് തലങ്ങളിൽ ഫണ്ട് ശേഖരണാർത്ഥം സമ്മാന കൂപ്പണുകൾ വിതരണം ചെയ്യാനും ഫൊറോന ഡയറക്ടർ ഫാ. മാത്യു വളവനാലിന്‍റെ നേതൃത്വത്തിൽ യൂണിറ്റുകൾ സന്ദർശിക്കാനും തീരുമാനിച്ചു.

കോൺഗ്രസ് പ്രതിഷേധം

ചിറ്റാരിക്കാൽ: കോട്ടയം മെഡിക്കൽ കോളജിൽ കെട്ടിടം തകർന്ന് വീട്ടമ്മ മരിക്കാനിടയാക്കിയ സംഭവത്തിന്‍റെ ഉത്തരവാദിത്വം ഏറ്റെടുത്തുകൊണ്ട് ആരോഗ്യമന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ടുകൊണ്ട് ഈസ്റ്റ് എളേരി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ചിറ്റാരിക്കാലിൽ പ്രതിഷേധ പ്രകടനം നടത്തി. കെപിസിസി അംഗം ശാന്തമ്മ ഫിലിപ്പ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോർജ് കരിമഠം അധ്യക്ഷത വഹിച്ചു. ടോമി പ്ലാച്ചേരി, തോമസ് മാത്യു, ജോസ് കുത്തിയതോട്ടിൽ, മാത്യു സെബാസ്റ്റ്യൻ, ബെന്നി കോഴിക്കോട്, അഗസ്റ്റിൻ ജോസഫ്, ഡൊമിനിക്, ജോണി, ജോൺസൺ മുണ്ടമറ്റം, അയൂബ്, ജോസഫ് വാഴക്കൻ, മനോജ്, അനീഷ് എന്നിവർ നേതൃത്വം നല്കി. രാജപുരം: കോട്ടയം മെഡിക്കൽ കോളജിലുണ്ടായ അപകടവുമായി ബന്ധപ്പെട്ട് തികഞ്ഞ അനാസ്ഥ കാട്ടിയ ആരോഗ്യമന്ത്രി രാജിവയ്ക്കണമെന്നാവശ്യപ്പെട്ടുകൊണ്ട് കള്ളാർ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധം നടത്തി. പ്രതിഷേധ പരിപാടിയും മണ്ഡലം കോൺഗ്രസ് നേതൃയോഗവും കർഷക കോൺഗ്രസ് ജില്ലാ പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. മണ്ഡലം പ്രസിഡന്‍റ് എം.എം. സൈമൺ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ടി.കെ. നാരായണൻ, ബ്ലോക്ക് സെക്രട്ടറി വി.കെ. ബാലകൃഷ്ണൻ, വനജ ഐത്തു, ഇ.കെ. ഗോപാലൻ എന്നിവർ പ്രസംഗിച്ചു.

നീലേശ്വരം-ഇടത്തോട് റോഡ് വികസനത്തിന് വീണ്ടും ജീവൻ വയ്ക്കുന്നു

നീലേശ്വരം: വർഷങ്ങൾ നീണ്ട കാത്തിരിപ്പിനും മെല്ലെപ്പോക്കിനും അനുബന്ധ പ്രശ്നങ്ങൾക്കുമൊടുവിൽ നീലേശ്വരം-ഇടത്തോട് റോഡ് വികസനത്തിന് വീണ്ടും ജീവൻ വയ്ക്കുന്നു. നീലേശ്വരം പേരോലിൽ റെയിൽവേ മേൽപ്പാലം മുതൽ താലൂക്ക് ആശുപത്രി വരെയുള്ള ഭാഗത്ത് റോഡ് വികസനത്തിനായി ഏറ്റെടുത്ത സ്ഥലത്തെ കെട്ടിടങ്ങൾ പൊളിച്ചുമാറ്റാൻ ടെൻഡറായി. ദീർഘനാളത്തെ നിയമപ്രശ്നങ്ങൾക്കു ശേഷമാണ് ഇവിടെ 1.3 കിലോമീറ്റർ ദൂരത്തിലുള്ള സ്ഥലവും കെട്ടിടങ്ങളും റോഡ് വികസനത്തിനായി നഷ്ടപരിഹാരം നല്കി ഏറ്റെടുത്തത്. കെട്ടിടങ്ങൾ പൊളിച്ചുമാറ്റുന്നതിനായി നേരത്തേ പലതവണ ഓൺലൈൻ ടെൻഡർ വിളിച്ചെങ്കിലും ആരും കരാറെടുക്കാൻ മുന്നോട്ടുവന്നിരുന്നില്ല. പിന്നീട് കെആർഎഫ്ബി പ്രൊജക്ട് ഡയറക്ടർ മുഖേന സാധാരണ ലേല നടപടികളിലൂടെയാണ് ടെൻഡർ നല്കിയത്. കെട്ടിടങ്ങൾ പൊളിച്ചുമാറ്റുന്നതിനു പിന്നാലെ ഈ ഭാഗത്തെ റോഡ് വികസനവും മറ്റു ഭാഗങ്ങളിൽ പൂർത്തിയാകാതെ കിടക്കുന്ന പ്രവൃത്തികളും ഒരുമിച്ച് ചേർത്ത് പുതിയ ടെൻഡർ വിളിച്ച് കഴിവതുംവേഗത്തിൽ പ്രവൃത്തികൾ പുനരാരംഭിക്കാനാണ് ധാരണ. 2018 ലാണ് കിഫ്ബി പദ്ധതിയിൽ 42.1 കോടി രൂപ ചെലവിൽ നീലേശ്വരം-ഇടത്തോട് റോഡിന്‍റെ നവീകരണ പ്രവൃത്തികൾ ആരംഭിച്ചത്. എന്നാൽ തുടക്കംമുതൽ ഇഴഞ്ഞുനീങ്ങിയ പ്രവൃത്തികൾ നാട്ടുകാർക്കും വാഹനയാത്രക്കാർക്കും തീരാദുരിതമായി. റോഡിന്‍റെ സമീപപ്രദേശങ്ങൾ പലതവണ പൊടിയിൽ മുങ്ങി. കെആർഎഫ്ബി അധികൃതർ പലതവണ സമയം നീട്ടിനല്കിയിട്ടും പ്രവൃത്തികൾ കൃത്യമായി പൂർത്തീകരിക്കാൻ കരാറുകാരന് കഴിയാതെവന്നതോടെ രണ്ടുവർഷം മുമ്പ് കരാർ റദ്ദാക്കുകയായിരുന്നു. ഇഴഞ്ഞുനീങ്ങിയ പ്രവൃത്തികൾ അതിനുമുമ്പുതന്നെ പാതിവഴിയിൽ നിലച്ചിരുന്നു. അവശേഷിക്കുന്ന പ്രവൃത്തികളുടെ പുതുക്കിയ എസ്റ്റിമേറ്റ് തയ്യാറാക്കിയതിനു ശേഷമാകും പുതിയ ടെൻഡർ വിളിക്കുക. ഈ മഴക്കാലം കഴിയുന്നതോടെ തന്നെ പുതിയ ടെൻഡർ വിളിച്ച് പ്രവൃത്തികൾ പുനരാരംഭിക്കാൻ കഴിയുമെന്നാണ് പ്രതീക്ഷ.

ജില്ലയിലെ സർവകലാശാല കാമ്പസുകളിൽ ആളൊഴിയുന്നു

നീലേശ്വരം: മൾട്ടി കാമ്പസ് സർവകലാശാല എന്ന ആശയത്തോടെ തുടങ്ങിയ കണ്ണൂർ സർവകലാശാല ഇപ്പോൾ കോഴ്സുകളെല്ലാം സർവകലാശാല ആസ്ഥാനത്തുതന്നെ കേന്ദ്രീകരിക്കുന്ന സാമ്പ്രദായിക രീതിയിലേക്ക് മാറാനൊരുങ്ങുമ്പോൾ ജില്ലയിലെ സർവകലാശാല കാമ്പസുകളിൽ ആളൊഴിയുന്നു. കേരളത്തിലെ ഒരു സർവകലാശാലയുടെ ആദ്യത്തെ വില്ലേജ് കാമ്പസ് എന്ന വിശേഷണത്തോടെ തുടങ്ങിയ നീലേശ്വരം പാലാത്തടത്തെ ഡോ.പി.കെ. രാജൻ മെമ്മോറിയൽ കാമ്പസിൽനിന്ന് മലയാള വിഭാഗത്തെ മാങ്ങാട്ടുപറമ്പ് കാമ്പസിലേക്ക് മാറ്റാനുള്ള ശ്രമമാണ് ഏറ്റവുമൊടുവിൽ നടക്കുന്നത്. പുതിയ നാലുവർഷ ബിരുദ കോഴ്സുകൾക്കും ഇന്‍റഗ്രേറ്റഡ് കോഴ്സുകൾക്കും അനുസൃതമായി ബിരുദാനന്തര ബിരുദ കോഴ്സുകളെ പുനക്രമീകരിക്കുമ്പോൾ എല്ലാ കോഴ്സുകളും ഒരിടത്തായിരിക്കുന്നതാണ് സൗകര്യപ്രദമെന്നാണ് അധികൃതരുടെ നിലപാട്. മലയാളം കോഴ്സ് പഠിക്കുന്നവർക്ക് മറ്റു ഭാഷകളും ജേർണലിസം, ചരിത്രം തുടങ്ങിയ വിഷയങ്ങളും ഇലക്ടീവ് ആയി തെരഞ്ഞെടുത്ത് പഠിക്കാൻ ഇതുവഴി അവസരമൊരുങ്ങും. ഈ വിഷയങ്ങൾ മുഖ്യവിഷയമായി പഠിക്കുന്നവർക്ക് മലയാളവും പഠിക്കാൻ കഴിയും. ഇതേ വിശദീകരണത്തിന്‍റെ അടിസ്ഥാനത്തിലാണ് കഴിഞ്ഞവർഷം എം എസ് സി മോളിക്യുലാർ ബയോളജി കോഴ്സ് നീലേശ്വരത്തു നിന്ന് തലശേരി പാലയാട് കാമ്പസിലേക്ക് മാറ്റിയത്. മൈക്രോബയോളജി പോലുള്ള സമാനമായ മറ്റു ശാസ്ത്രവിഷയങ്ങളുള്ളത് പാലയാട് കാമ്പസിലാണെന്നും കോഴ്സുകൾ ഒരേ സ്ഥലത്താക്കിയാൽ വിദ്യാർഥികൾക്ക് ഇഷ്ടവിഷയങ്ങൾ ഇലക്ടീവായി ചേർത്തു പഠിക്കാൻ കഴിയുമെന്നുമാണ് അന്നും പറഞ്ഞത്. എംഎ മലയാളം കൂടി മാറ്റിയാൽ പാലാത്തടം കാമ്പസിൽ ആകെ അവശേഷിക്കുക എംഎ ഹിന്ദിയും എംബിഎയും മാത്രമായിരിക്കും. ഭാഷാവിഷയങ്ങളുടെ ഏകീകരണത്തിന്‍റെ പേരിൽ ഹിന്ദിയും ഏതുനിമിഷവും മാങ്ങാട്ടുപറമ്പിലേക്ക് മാറ്റിയേക്കാം. അതോടെ വിശാലമായ സ്ഥലസൗകര്യവും കെട്ടിടങ്ങളുമെല്ലാമുള്ള പാലാത്തടം കാമ്പസ് ഒരു സ്വാശ്രയ എംബിഎ പഠനകേന്ദ്രം മാത്രമായി ഒതുങ്ങും. കണ്ണൂർ സർവകലാശാലയുടെ ബഹുഭാഷാ പഠന ഗവേഷണകേന്ദ്രമാക്കാൻ ലക്ഷ്യമിട്ടിരുന്ന മഞ്ചേശ്വരം കാമ്പസ് ഇപ്പോൾ ലോ കോളജായും കാസർഗോഡ് ചാല കാമ്പസ് ബിഎഡ് സെന്‍ററായും മാത്രമാണ് ഫലത്തിൽ പ്രവർത്തിക്കുന്നത്. കാസർഗോഡ് എംബിഎ കോഴ്സും നീലേശ്വരത്ത് എംസിഎ കോഴ്സും നേരത്തേ തുടങ്ങിയിരുന്നെങ്കിലും അടിസ്ഥാന സൗകര്യങ്ങളുടെ കുറവും ആവശ്യത്തിന് കുട്ടികളെ കിട്ടാനില്ലാത്തതും കാരണം നിർത്തുകയായിരുന്നു. പരമ്പരാഗത കോഴ്സുകൾ പുതിയ കാലത്തിന്‍റെ ആവശ്യങ്ങൾക്കനുസരിച്ച് പുനക്രമീകരിക്കുന്നത് നല്ല കാര്യമാണെങ്കിലും അങ്ങനെ ചെയ്യുമ്പോൾ ജില്ലയിലെ കാമ്പസുകളെ പൂർണമായും ഒഴിച്ചുനിർത്തുന്നത് ശരിയല്ലെന്ന് വിദ്യാർഥികളും അധ്യാപകരും നാട്ടുകാരുമെല്ലാം ചൂണ്ടിക്കാട്ടുന്നു. ജില്ലയിലെ കാമ്പസുകളിലെ സൗകര്യങ്ങൾ മെച്ചപ്പെടുത്തി പുതുതലമുറയുടെ ആവശ്യങ്ങൾക്കൊത്ത കോഴ്സുകൾ ഇവിടെയും തുടങ്ങാൻ സർവകലാശാല നടപടി സ്വീകരിക്കണമെന്നാണ് എല്ലാവരുടെയും ആവശ്യം.

കഞ്ചാവ് മിഠായി കൊറിയറിൽ; വിദ്യാർഥി എക്സൈസ് പിടിയിൽ

കാഞ്ഞങ്ങാട്: സ്വകാര്യ കൊറിയർ സർവീസ് വഴി ഉത്തർപ്രദേശിൽ നിന്ന് പാഴ്സലായെത്തിയ കഞ്ചാവ് മിഠായികളുടെ പായ്ക്കറ്റ് ഏറ്റുവാങ്ങാനെത്തിയ വിദ്യാർഥി എക്സൈസിന്‍റെ പിടിയിലായി. കാഞ്ഞങ്ങാട് സൗത്ത് തൈവളപ്പിലെ ദിൽജിത്തിനെയാണ് (19) എക്സൈസ് ഇൻസ്പെക്ടർ ഇ.വി.ജിഷ്ണുകുമാറിന്‍റെ നേതൃത്വത്തിലുള്ള സംഘം പിടികൂടിയത്. വെള്ളിക്കോത്ത് പ്രവർത്തിക്കുന്ന സ്വകാര്യ കെറിയർ സ്ഥാപനത്തിലേക്കാണ് പാഴ്സലെത്തിയത്. കോളജ് വിദ്യാർഥിയായ ദിൽജിത്ത് കഞ്ചാവ് മിഠായികളുടെ വിതരണവുമായി ബന്ധപ്പെട്ട് നേരത്തേ എക്സൈസിന്‍റെ നിരീക്ഷണത്തിലായിരുന്നു. ഇതിന്‍റെ ഭാഗമായാണ് എക്സൈസ് സംഘം ഇയാളെ പിന്തുടർന്ന് കെറിയർ സ്ഥാപനത്തിനു സമീപമെത്തിയത്. വെള്ളിക്കോത്ത് മഹാകവി പി സ്മാരക ഗവ.സ്കൂളിന്‍റെ എതിർവശത്തുള്ള കൊറിയർ സ്ഥാപനത്തിൽ നിന്ന് പാഴ്സൽ വാങ്ങി പുറത്തിറങ്ങിയ ഉടൻതന്നെ ഇയാളെ കൈയോടെ പിടികൂടുകയായിരുന്നു. രണ്ടു പായ്ക്കറ്റുകളിലായി ഉണ്ടായിരുന്ന 448 ഗ്രാം കഞ്ചാവ് മിഠായി ഇയാളിൽ നിന്നു പിടിച്ചെടുത്തു.

പശുവിനെ വാങ്ങിയപ്പോള്‍ കിട്ടിയത് മുട്ടന്‍പണി; ഒടുവില്‍ കോടതി വഴി ബെന്നിക്ക് നീതി

ഷൈബിന്‍ ജോസഫ് കാസര്‍ഗോഡ്: ഒരു പശുവിനെ വാങ്ങിയത് ഇത്ര വലിയ പൊല്ലാപ്പാകുമെന്ന് ബദിയഡുക്ക ബേളയിലെ ബെന്നി കണ്ണംപള്ളി എന്ന കെ.എ. മത്തായി (51) സ്വപ്‌നത്തില്‍ പോലും കരുതിയില്ല. തന്നെ വഞ്ചിച്ചതിനും ദ്രോഹിച്ചതിനുമെതിരെ പോലീസ് സ്‌റ്റേഷനും കോടതിയും കയറിയിറങ്ങി മൂന്നുവര്‍ഷം നീണ്ടുനിന്ന ഒറ്റയാള്‍ പോരാട്ടത്തിനൊടുവിലാണ് ഈ കര്‍ഷകനെ തേടി നീതിയെത്തുന്നത്. 16 ലിറ്റര്‍ പാല്‍ ഗാരണ്ടി 2022ലാണ് സംഭവം. തന്‍റെ സുഹൃത്ത് പറഞ്ഞതനുസരിച്ചാണ് മുജംഗാവിലെ കെ.എസ്. ഗണേഷ് റാവുവിന്‍റെ വീട്ടില്‍ പശുവിനെ വാങ്ങാനെത്തുന്നത്. സഹിവാള്‍ ഇനത്തില്‍പെട്ട നല്ല വലുപ്പമുള്ള പശുവായിരുന്നു ഇത്. ഗര്‍ഭിണിയായ പശു ഒരാഴ്ചയക്കുള്ളില്‍ പ്രസവിക്കുമെന്നാണ് വീട്ടുകാര്‍ പറഞ്ഞിരുന്നത്. ആദ്യ പ്രസവത്തില്‍ ദിവസവും 16 ലിറ്റര്‍ പാല്‍ കിട്ടിയിരുന്നതായും ഇത്തവണ 18 ലിറ്റര്‍ കിട്ടുമെന്നും 16 ലിറ്ററില്‍ കുറഞ്ഞാല്‍ പശുവിനെ തങ്ങള്‍ തന്നെ തിരിച്ചെടുത്തേക്കാമെന്നും ഗണേഷ് റാവു പറഞ്ഞു. എന്നാല്‍ 14 ലിറ്റര്‍ പാല്‍ കിട്ടിയാല്‍ താന്‍ തൃപ്തനാണെന്ന് ബെന്നി മറുപടി നല്‍കി. 36,500 രൂപയാണ് വില പറഞ്ഞത്. പണം സംഘടിപ്പിക്കുന്നതില്‍ താമസം വന്നതിനാല്‍ പശുവിനെ വാങ്ങല്‍ അല്പം വൈകിയപ്പോള്‍ ഗണേഷ് റാവുവിന്‍റെ ഭാര്യ പലതവണ ബെന്നിയെ വിളിച്ചു. മംഗളൂരുവില്‍ പഠിക്കുന്ന മകള്‍ക്ക് ഹോസ്റ്റല്‍ ഫീസ് അടയ്ക്കാന്‍ അത്യാവശ്യമായി 20,000 രൂപ വേണമെന്നും അല്ലാത്തപക്ഷം ഹോസ്റ്റലില്‍നിന്നും പുറത്താക്കുമെന്നും ബാക്കി പണം പിന്നീട് തന്നാല്‍ മതിയെന്നും പശുവിനെ വാങ്ങണമെന്നും നിര്‍ബന്ധിച്ചു. അവരുടെ സാമ്പത്തികബുദ്ധിമുട്ട് കണ്ട് മനസലിഞ്ഞ ബെന്നി പറഞ്ഞ തുക മുഴുവനും നല്‍കി ഏപ്രില്‍ ഒമ്പതിന് പശുവിനെ വാങ്ങി. കറക്കാന്‍ സമ്മതിക്കാത്ത പശു പശുവിനെ വീട്ടിലേക്ക് കൊണ്ടുവന്ന് 20 ദിവസം കഴിഞ്ഞ് ഏപ്രില്‍ 29നാണ് പ്രസവം നടക്കുന്നത്. എന്നാല്‍ പാല്‍ കറക്കാന്‍ ചെന്നപ്പോഴാണ് വിവരമറിയുന്നത്. ആക്രമണകാരിയായ പശു തന്‍റെ അടുത്തേക്ക് കറവപാത്രവുമായി വരാന്‍പോലും ആരെയും അനുവദിച്ചില്ല. മാത്രമല്ല, സ്വന്തം കിടാവിനെ മുലയൂട്ടാന്‍ പോലും പശു തയാറായില്ല. ഭാര്യ സൗമ്യയുടെ കൂടി സഹായത്തോടെ വളരെ കഷ്ടപ്പെട്ട് ബെന്നി കറന്നുനോക്കിയപ്പോള്‍ കിട്ടിയത് വെറും രണ്ടു ലിറ്റര്‍ പാല്‍ മാത്രം. ആദ്യത്തെ 11 ദിവസവും ഇതുതന്നെ അവസ്ഥ. ഇക്കാര്യം ഗണേഷ് റാവുവിനോട് പറഞ്ഞപ്പോള്‍ എങ്ങനെയാണ് ഈ പശുവിനെ കറക്കേണ്ടതെന്ന് നേരിട്ടുവന്ന് കാണിച്ചുതരാമെന്നു പറഞ്ഞെങ്കിലും വന്നില്ല. ബെന്നി പലതവണ ഫോണില്‍ വിളിച്ചിട്ടും റാവു വരാന്‍ കൂട്ടാക്കിയില്ല. വാദിയെ പ്രതിയാക്കി പോലീസില്‍ പരാതി ഇതിനിടെയാണ് കുമ്പള പോലീസ് സ്റ്റേഷനില്‍നിന്ന് ബെന്നിക്ക് ഫോണ്‍ വരുന്നത്. ഫോണില്‍ വിളിച്ചു ഭീഷണിപ്പെടുത്തിയെന്ന് പറഞ്ഞ് ഗണേഷ് റാവുവിന്‍റെ ഭാര്യ തനിക്കെതിരെ പരാതി നല്‍കിയെന്നും സ്റ്റേഷനിലേക്കു ചെല്ലണമെന്നും പറഞ്ഞപ്പോള്‍ ബെന്നി ഞെട്ടി. സ്റ്റേഷനിലേക്കു ചെന്നപ്പോള്‍ പോലീസുകാര്‍ പരുഷമായി പെരുമാറുകയും തല്ലാനോങ്ങുകയും ചെയ്തു. എന്നാല്‍ പശുവില്പനയുമായി ബന്ധപ്പെട്ട തര്‍ക്കമാണ് പരാതിക്കു പിന്നിലെന്നും പരാതിക്കാരിയോട് സംസാരിച്ചാല്‍ ഇക്കാര്യം വ്യക്തമാകുമെന്നും എന്നിട്ടു വേണമെങ്കില്‍ തന്നെ തല്ലിക്കോയെന്നും ബെന്നി പറഞ്ഞു. പരാതിക്കാരിയെ വിളിച്ചു ചോദിച്ചപ്പോള്‍ പോലീസിന് സത്യം ബോധ്യപ്പെട്ടു. ബെന്നിയോട് പശുവിനെ ഗണേഷ് റാവുവിന്‍റെ വീട്ടില്‍ കൊണ്ടുചെന്നാക്കാനും 10 ദിവസത്തിനുശേഷം പശുവിന് കൂടുതല്‍ പാല്‍ കിട്ടുന്നുണ്ടോയെന്നും പരിശോധിക്കാനും നിര്‍ദേശിച്ചു. അന്നേദിവസം തന്നെ ബെന്നി പശുവിനെ അവിടെ കൊണ്ടുചെന്നാക്കി. നിയമപോരാട്ടത്തിലേക്ക് മേയ് 21നാണ് ബെന്നിക്ക് ഗണേഷ് റാവുവിന്‍റെ ഫോണ്‍ വരുന്നത്. പശുവിന് 12 ലിറ്റര്‍ പാല്‍ കിട്ടാന്‍തുടങ്ങിയെന്ന് പറഞ്ഞു. പുലര്‍ച്ചെ അഞ്ചിനു തന്നെ ബെന്നി 10 കിലോമീറ്റര്‍ അകലെയുള്ള റാവുവിന്‍റെ വീട്ടിലെത്തി. അവിടെ കണ്ട കാഴ്ചയെക്കുറിച്ച് ബെന്നി പറയുന്നു. ""റാവു വലിയൊരു വടിയുമായി നില്‍ക്കുന്നു. അദ്ദേഹത്തിന്‍റെ അമ്പലത്തിലെ പ്രസാദം നല്‍കി പശുവിന്‍റെ ശ്രദ്ധ മാറ്റുന്നു. ഇതിനിടെ ഭാര്യ കഷ്ടപ്പെട്ട് പശുവിനെ കറക്കുന്നു. എന്നിട്ട് കിട്ടിയതാകട്ടെ വെറും രണ്ടരലിറ്റര്‍ പാലും.'' ബെന്നി വിവരം പോലീസിനെ അറിയിച്ചു. പണം മടക്കിക്കൊടുക്കാന്‍ പോലീസ് റാവുവിന് നിര്‍ദേശം നല്‍കി. എന്നാല്‍ റാവു അതിന് തയാറായില്ല. തുടര്‍ന്ന് കേസ് ഒത്തുതീര്‍പ്പാക്കാന്‍ പോലീസ് ജില്ലാ നിയമസേവന അഥോറിറ്റിക്ക് വിട്ടു. 30,000 രൂപയെങ്കിലും തന്നാല്‍ കേസ് ഒത്തുതീര്‍പ്പാക്കാമെന്ന് ബെന്നി പറഞ്ഞു. എന്നാല്‍ ഒത്തുതീര്‍പ്പിന് തയാറാകാതിരുന്ന റാവു തനിക്ക് ബെന്നിയെ പരിചയമില്ലെന്നും പശുവിനെ താന്‍ വിറ്റിട്ടില്ലെന്നുമാണ് അഥോറിറ്റിയോട് പറഞ്ഞത്. തനിക്ക് പണം നല്‍കിയെങ്കില്‍ അതിന്‍റെ തെളിവ് ഹാജരാക്കണമെന്നും റാവു ആവശ്യപ്പെട്ടു. ഇതേത്തുടര്‍ന്ന് കേസ് ജില്ലാ ഉപഭോക്തൃകോടതിക്ക് വിട്ടു. അഭിഭാഷകനെ വയ്ക്കാതെ സ്വന്തം നിലയ്ക്കാണ് ബെന്നി കോടതിയില്‍ വാദിച്ചത്. പോലീസിന്‍റെ മൊഴിയും തനിക്കെതിരെ റാവുവിന്‍റെ ഭാര്യ കൊടുത്ത പരാതിയും കേസ് ബെന്നിക്ക് അനുകൂലമാക്കി. 20,000 രൂപ നഷ്ടപരിഹാരമടക്കം 56,500 രൂപ 30 ദിവസത്തിനകം ബെന്നിക്ക് നല്‍കാന്‍ 2023 ജൂണ്‍ 20നു കോടതി ഉത്തരവായി. എന്നാല്‍ പണം കൊടുക്കാന്‍ റാവു ഒരുക്കമായിരുന്നില്ല. ഇയാള്‍ തിരുവനന്തപുരത്തെ സംസ്ഥാന ഉപഭോക്തൃകോടതിയില്‍ അപ്പീലിന് പോയി. ഇതിനായി നഷ്ടപരിഹാരത്തുകയുടെ പകുതി (28,250 രൂപ) ഇയാള്‍ കോടതിയില്‍ കെട്ടിവയ്ക്കുകയും ചെയ്തു. എന്നാല്‍ മേല്‍ക്കോടതിയും റാവുവിന്‍റെ വാദം തള്ളിക്കളഞ്ഞു. ഗ്രാമപ്രദേശങ്ങളില്‍ പശുവില്പനയില്‍ ബില്ലോ രസീതോ പോലുള്ള രേഖകള്‍ പ്രതീക്ഷിക്കാനാകില്ലെന്ന് നിരീക്ഷിച്ച കോടതി റാവു കെട്ടിവച്ച പണം ബെന്നിക്ക് കൈമാറാന്‍ നിര്‍ദേശം നല്‍കി. അതേസമയം കേസ് നടക്കുന്ന കാലയളവില്‍ റാവു നിയമവിരുദ്ധമായി ഈ പശുവിനെയും കിടാവിനെയും വില്‍ക്കുകയും പണം കീശയിലാക്കുകയും ചെയ്തു. ""റബര്‍ ടാപ്പിംഗും പശുവളര്‍ത്തലും ഒരുമിച്ചുകൊണ്ടുപോകാമെന്നായിരുന്നു ആഗ്രഹം. എന്നാല്‍ ഇങ്ങനെയൊരു ദുരനുഭവമുണ്ടായതോടെ ഉണ്ടായിരുന്ന മറ്റു മൂന്നു പശുക്കളെയും വിറ്റു. ഇപ്പോള്‍ റബര്‍തോട്ടം പാട്ടത്തിനെടുത്ത് ടാപ്പിംഗ് നടത്തുകയാണ്. വൈകിയെങ്കിലും നീതി നടപ്പായതില്‍ സന്തോഷം.''-ബെന്നി പറഞ്ഞു.

ജെസിഐ പഴശി എൻജിനിയറിംഗ് സ്കോളർഷിപ് നൽകും

മട്ടന്നൂർ: പ്ലസ്ടുവിന് അമ്പതു ശതമാനത്തിന് മുകളിൽ മാർക്ക്‌ നേടിയ യോഗ്യരായ കുട്ടികൾക്ക് സ്കോളർഷിപോടുകൂടി എൻജിനിയറിംഗ് പഠിക്കാൻ അവസരം ഒരുക്കുന്നു. മലബാർ ഇൻസ്റ്റിറ്റ്യൂട്ട് ഓഫ് ടെക്നോളജി അഞ്ചരക്കണ്ടിയുമായി സഹകരിച്ചു കൊണ്ടാണ് ജെസിഐ പഴശി അവസരം ഒരുക്കുന്നത്. ഇന്നു രാവിലെ 11 മുതൽ ഉച്ചകഴിഞ്ഞ് രണ്ടുവരെ മട്ടന്നൂർ കൈലാസ് ഓഡിറ്റോറിയത്തിൽ നടക്കുന്ന ക്യാമ്പിൽ കുട്ടികൾക്ക് അഡ്മിഷൻ എടുക്കാം. പത്രസമ്മേളനത്തിൽ ജെസിഐ പഴശി പ്രസിഡന്‍റ് ലിപിൻ കെ. ഗോപാൽ, മട്ടന്നൂർ നഗരസഭാ വിദ്യാഭ്യാസ സ്റ്റാന്‍റിംഗ് കമ്മിറ്റി ചെയർമാൻ വി.കെ. സുഗതൻ, മലബാർ ഇൻസ്റ്റിറ്റ്യൂട്ട് ഓഫ് ടെക്നോളജി പ്രിൻസിപ്പൽ പ്രഫ. ഡി.ആർ. റഹൂഫ്, സി.വി. രജിത് എന്നിവർ പങ്കെടുത്തു. ക്യാമ്പിൽ പങ്കെടുക്കാൻ പേര് രജിസ്റ്റർ ചെയ്യേണ്ടതാണ്. ഫോൺ: 90485 67476, 96560 36410.

പയ്യന്നൂരില്‍ നിരീക്ഷണ കാമറ 23; കണ്ണടച്ചത് 19

പയ്യന്നൂര്‍: പയ്യന്നൂരിന്‍റെ ക്രമസമാധാന പരിപാലന രംഗത്ത് സഹായകമാകാനുദ്ദേശിച്ച് സ്ഥാപിച്ച നിരീക്ഷണ കാമറകളില്‍ കണ്ണടച്ചിട്ട് മാസങ്ങളായിട്ടും അറ്റകുറ്റപ്പണികൾ നടത്താതെ അധികൃതർ. 2022 മാര്‍ച്ചിലാണ് പയ്യന്നൂര്‍ പോലീസ് കണ്‍ട്രോള്‍ റൂമിന്‍റെ ഭാഗമായി നിരീക്ഷണ കാമറകള്‍ സ്ഥാപിച്ചത്. നഗരത്തിന്‍റെ മുക്കും മൂലയും ഒപ്പിയെടുക്കാന്‍ പറ്റുന്ന വിധത്തില്‍ 23 കാമറകളാണ് വിവിധയിടങ്ങളിലായി സ്ഥാപിച്ചിരുന്നത്. പയ്യന്നൂരില്‍ പോലീസ് കണ്‍ട്രോള്‍ റൂം ആരംഭിച്ചപ്പോള്‍ ഇതിനോടനുബന്ധിച്ച് നഗരത്തില്‍ നിരീക്ഷണ കാമറകള്‍ സ്ഥാപിക്കാനുള്ള തീരുമാനം കുറച്ചു വൈകിയാണെങ്കിലും നടപ്പാക്കുകയായിരുന്നു. ഇതോടെ കൃത്യമായ തെളിവ് ലഭിക്കുമെന്നതിനാല്‍ നഗരത്തിലെ സാമൂഹ്യ വിരുദ്ധ പ്രവര്‍ത്തനങ്ങള്‍ക്കും കുറ്റകൃത്യങ്ങള്‍ക്കും തടയിടുവാനും കഴിഞ്ഞിരുന്നു. മുമ്പ് ഗതാഗത നിയമം പാലിക്കാത്ത വാഹനങ്ങള്‍ക്കെതിരെ കാമറകളുപയോഗിച്ച് പോലീസ് നടപ്പാക്കിയ നടപടികള്‍ ഫലപ്രദമായിരുന്നതിന്‍റെ വെളിച്ചത്തിലായിരുന്നു കാമറകള്‍ സ്ഥാപിച്ചത്. പയ്യന്നൂരിലെ വ്യാപാരി സമൂഹത്തിനും ആശ്വാസം പകരുന്ന നടപടിയായിരുന്നു ഇത്. എന്നാലിപ്പോള്‍ കേബിളുകളുടെ തകരാറും കാമറകളുടെ തകരാറും കാരണം ഇതില്‍ 19 കാമറകള്‍ പ്രവര്‍ത്തന രഹിതമാണ്. അവശേഷിക്കുന്ന നാല് കാമറകള്‍ മാത്രമാണ് ഇപ്പോള്‍ പ്രവര്‍ത്തിക്കുന്നത്. തകരാറിലായ കാമറകള്‍ പ്രവര്‍ത്തന ക്ഷമമാക്കാന്‍ ആരും മുന്നോട്ടുവരാത്ത അവസ്ഥയാണ്. പയ്യന്നൂരിലെ വ്യാപാരി സമൂഹത്തിന്‍റെ സഹായത്തോടെ വര്‍ഷങ്ങള്‍ക്ക് മുമ്പ് പയ്യന്നൂര്‍ നഗരത്തില്‍ സ്ഥാപിച്ചിരുന്ന നിരീക്ഷണ കാമറകള്‍ അറ്റകുറ്റപ്പണികള്‍ ചെയ്യാത്തതിനെ തുടര്‍ന്ന് ഉപയോഗശൂന്യമായിരുന്നു. പയ്യന്നൂര്‍ നഗരസഭ നിരീക്ഷണ കാമറകള്‍ സ്ഥാപിക്കുന്നതിനായി പത്തുലക്ഷം രൂപ ബജറ്റില്‍ വകയിരുത്തിയിരുന്നതുമാണ്.

യൂത്ത് ലീഗ് ഡിഎംഒ ഓഫീസ് മാർച്ചിൽ സംഘർഷം, ജലപീരങ്കി പ്രയോഗിച്ചു

കണ്ണൂർ: കണ്ണൂർ ജില്ലയിലെ ആശുപത്രികളോടുള്ള സർക്കാരിന്‍റെ അവഗണന അവസാനിപ്പിക്കണമെന്നാവശ്യപ്പെട്ട് മുസ്‌ലിം യൂത്ത് ലീഗ് ഡിഎംഒ ഓഫീസിലേക്ക് നടത്തിയ മാർച്ചിൽ സംഘർഷം. പോലീസ് ജലപീരങ്കി പ്രയോഗിച്ചു. എകെജി ആശുപത്രി പരിസരത്തുനിന്നും പ്രകടനമായെത്തിയ പ്രവർത്തകർ പള്ളിക്കുന്ന് ഗവ. നഴ്സിംഗ് കോളജ് കാന്പസിൽ പ്രവർത്തിക്കുന്ന ഡിഎംഒ ഓഫീസിലേക്ക് കടക്കാൻ ശ്രമിച്ചതാണ് സംഘർഷത്തിനിടയാക്കിയത്. പോലീസ് അടച്ച് ബന്തവസാക്കിയ ഗേറ്റ് തള്ളിത്തുറക്കാനും ഗേറ്റ് മറികടന്ന് കാന്പസിലേക്ക് കടക്കാനുമുള്ള പ്രവർത്തകരുടെ ശ്രമം പോലീസ് തടഞ്ഞു. തുടർന്ന് പോലീസും സമരക്കാരും തമ്മിൽ ഉന്തും തള്ളുമുണ്ടായി. സംഘർഷാവസ്ഥ ഒഴിവാക്കാൻ പോലീസ് ജലപീരങ്കി പ്രയോഗിച്ചു. യൂത്ത് ലീഗ് സംസ്ഥാന ട്രഷറർ ഇസ്മയിൽ വയനാട് സമരം ഉദ്ഘാടനം ചെയ്തു. ജില്ലാപ്രസിഡന്‍റ് നസീർ നെല്ലൂർ അധ്യക്ഷത വഹിച്ചു. മാർച്ച് ഉദ്ഘാടനം ചെയ്തതിനു പിന്നാലെ പ്രവർത്തകർ വീണ്ടും ഗേറ്റ് തള്ളിത്തുറന്ന് ഡിഎംഒ ഓഫീസിലേക്ക് തള്ളിക്കയറാൻ ശ്രമിച്ചതാണ് രണ്ടാമതും സംഘർഷാവസ്ഥയ്ക്കിടയാക്കിയത്. സമരക്കാരെ പിന്തിരിപ്പിക്കാനായി പോലീസ് വീണ്ടും ജലപീരങ്കി പ്രയോഗിക്കുകയും അറസ്റ്റ് ചെയ്യുകയുമായിരന്നു. ‍ യൂത്ത് ലീഗ് ജില്ലാജനറൽ സെക്രട്ടറി പി.സി. നസീർ, കെ.കെ.ഷിനാജ്, ഷംസീർ മയ്യിൽ, അഷ്ക്കർ കണ്ണാടിപ്പറന്പ്, ഷബീർ എടയന്നൂർ, ജംഷീർ ആലക്കാട് എന്നിവരെയാണ് അറസ്റ്റ് ചെയ്തത്. അറസ്റ്റിലായവരെ പോലീസ് ജീപ്പിൽ സ്റ്റേഷനിലേക്ക് കൊണ്ടു പോകുന്നത് പ്രവർത്തകർ തടഞ്ഞു. വാഹനത്തിന് മുന്നിൽ നിരന്നുനിന്ന് പ്രതിരോധം തീർക്കുകയായിരന്നു. ഇത് പോലീസും പ്രവർത്തകരും തമ്മിലുള്ള ഉന്തിലും തള്ളിലും കലാശിച്ചു. പോലീസ് സംയമനം പാലിച്ചതിനാലാണ് ലാത്തിച്ചാർജ് ഒഴിവായത്. ഇതിനിടെ നേതാക്കൾ ഇടപെട്ട് പ്രവർത്തകരെ ശാന്തരാക്കി വാഹനത്തിന് കടന്നു പോകാൻ സൗകര്യമൊരുക്കുകയായിരുന്നു. അറസ്റ്റിലായവരെ സ്റ്റേഷൻ ജാമ്യത്തിൽ വിട്ടയച്ചു.

വോർക്കാടിയിൽ വീടിനുനേരെ വെടിവയ്പ്; ജനൽച്ചില്ല് തകർന്നു

മഞ്ചേശ്വരം: വോർക്കാടിയിൽ അർധരാത്രിക്കുശേഷം വീടിനുനേരെ വെടിവയ്പ്. നല്ലങ്കിപദവിലെ ബി.എം. ഹരീഷിന്‍റെ വീടിനു നേരെയാണ് ഇന്നലെ പുലർച്ചെ രണ്ടരയോടെ അജ്ഞാതസംഘം വെടിയുതിർത്തത്. വെടിയേറ്റ് വീടിന്‍റെ ജനൽച്ചില്ല് തകർന്നു. ശബ്ദംകേട്ട് വീട്ടുകാർ ഉണർന്നുനോക്കിയപ്പോൾ ഒരു കാറും ബൈക്കും സ്റ്റാർട്ട് ചെയ്ത് പോകുന്നത് കണ്ടതായി ഹരീഷ് മഞ്ചേശ്വരം പോലീസിൽ നല്കിയ പരാതിയിൽ പറഞ്ഞു. പോലീസും ഫോറൻസിക് വിദഗ്ധരും സ്ഥലത്തെത്തി പരിശോധന നടത്തി. ജനൽച്ചില്ലിൽ വെടിയുണ്ട തുളച്ചുകയറിയതിന്‍റെ പാടുകൾ സ്ഥിരീകരിച്ചു. കരുതിക്കൂട്ടിയുള്ള ആക്രമണമാണോ അതോ കാട്ടുപന്നിയെ വെടിവയ്ക്കാനെത്തിയ നായാട്ടുസംഘത്തിന് ലക്ഷ്യം തെറ്റിയതാണോ എന്ന കാര്യത്തിൽ അന്വേഷണം നടക്കുകയാണ്. പ്രദേശത്ത് രാത്രികാലങ്ങളിൽ നായാട്ടുസംഘങ്ങൾ സജീവമാണെന്ന് പോലീസിന് വിവരം ലഭിച്ചിട്ടുണ്ട്.

കണ്ണൂർ സെൻട്രൽ ജയിലിൽ ജയിൽ മ്യൂസിയം ഒരുങ്ങുന്നു

കണ്ണൂർ: കണ്ണൂർ സെൻട്രൽ ജയിലിലെ ഒരു വിഭാഗം ഉദ്യോഗസ്ഥർ ജയിൽ മ്യൂസിയം ഒരുക്കുന്ന തിരക്കിലാണ്. ഈസ്റ്റ ഇന്ത്യാ കന്പനിയുടെ കീഴിലെ ഭരണപ്രദേശമായിരുന്നപ്പോൾ മലബാർ മേഖലയുടെ മുഴുവൻ കുറ്റവാളികളേയും അടച്ചിട്ടിരുന്നതും സ്വതന്ത്ര്യ സമരഭടന്മാരെ ഉൾപ്പെടെ താമസിപ്പിച്ചിരുന്നതുമായ ജയിലിന്‍റെ ഒരു ഭാഗമാണ് മ്യൂസിയമാക്കുന്നത്. പ്രധാന ഗേറ്റിൽനിന്ന് വഴിയൊരുക്കി ജയിലിന്‍റെ മറ്റു ഭാഗങ്ങളിലേക്ക് കടക്കാതെയാണ് ഒരേക്കർ സ്ഥലത്ത് ജയിൽ മ്യൂസിയം തയാറാക്കുന്നത്. ത‌ടവുകാരുടേയും നാ‌ടിനു വേണ്ടി പോരാടി ജയിലിനുള്ളിൽ തൂക്കിലേറ്റപ്പെട്ടവരുടേയും ഓർമകൾ പുതുക്കാൻ അവസരം നൽകും. ജയിലിൽ കഴിഞ്ഞ സ്വാതന്ത്ര്യ സമര സേനാനികളുടെ ഉൾപ്പെടെ ചരിത്രം മനസിലാക്കി അര ദിവസം സന്ദർശകർക്ക് ചെലവഴിക്കാനുള്ള അവസരമാണ് ഒരുക്കുന്നത്. ജയിൽ വളപ്പിലെ പഴയ ക്വാറന്‍റ്വൈൻ ഇരുനില കെട്ടി‌ടം ഇപ്പോൾ പഴകി നശിക്കാറായ സ്ഥിതിയിലാണ്. ഉദ്ഘാടനചടങ്ങ് വരും മാസങ്ങളിൽ നടക്കുമെന്ന് കെ.വി. സുമേഷ് എംഎൽഎ പറഞ്ഞു. ദേശീയപാതയോരത്ത് 91.12 ഏക്കറിലാണ് ജയിൽ സ്ഥിതി ചെയ്യുന്നത്. ചുറ്റിനും കോട്ടപോലുള്ള മതിൽ കെട്ട്. സ്വാതന്ത്ര്യ സമരത്തിൽ പങ്കെടുത്തവരേയും മലബാർ കലാപകാരികളേയും പാർപ്പിച്ച തടവറ. സ്വാതന്ത്യ്ര സമരകാലത്ത് എത്രയോ സമര ഭടന്മാരുടെ ജീവിതം ഈ തടവറയിൽ അവസാനിച്ചു. പേടിപ്പെടുത്തിയിരുന്ന തടവറയാണിത്. മലബാർ കലാപത്തിൽ ഏറനാട്, വള്ളുവനാട് താലൂക്കുകളിൽ സ്വാതന്ത്ര്യ സമരമായി ആരംഭിച്ച സമരം, മലബാർ കലാപമായി വഴിമാറിയപ്പോൾ മാപ്പിള കലാപകാരികളെ കൂട്ടമായി പിടികൂടി കണ്ണൂർ സെൻട്രൽ ജയിലിലേക്കാണ് അയച്ചത്.1921 നവംബർ 20-ന് തിരൂരിൽനിന്നു പിടികൂടി കോയന്പത്തൂർ ജയിലിലേക്ക് കൊണ്ടുപോകാനായി റെയിൽവേയുടെ ചരക്ക് വാഗണിൽ അടച്ച് യാത്ര തുടർന്നപ്പോൾ 64 സമര ഭടന്മാർ ശ്വാസം മുട്ടി മരിച്ചതാണ് കുപ്രസിദ്ധമായ വാഗ‌ൺ ‌ട്രാജഡി. ഈ സംഭവത്തിന്‍റെ 14-ാം നാൾ 1921 ഡിസംബർ നാലിന് കണ്ണൂർ സെൻട്രൽ ജയിലിൽ കലാപകാരികളായ 30 മാപ്പിളമാർ മരിച്ചതായി ജയിൽ രേഖകളിൽ പറയുന്നു. സമരത്തിനിറങ്ങി ജയിലിൽ ജീവൻ പോയവരിൽ ചിലരുടെ പേരുമാത്രമാണിത്. കിരാത മർദന മുറകളും ദുരിതങ്ങളും സമ്മാനിച്ച കണ്ണൂർ സെൻട്രൽ ജയിൽ സ്വാതന്ത്ര്യ സമര കാലത്ത് സ്വാതന്ത്ര്യത്തിനായി സമരത്തിനിറങ്ങിയവരുടെ പേടി സ്വപ്നമായിരുന്ന രാവണൻ കോട്ടയായിരുന്നു. തീരുന്നില്ല, ജയിൽ രേഖകളിലെ രഹസ്യങ്ങൾ. കയ്യൂർ സമര നേതാക്കളെ തൂക്കിലേറ്റിയത് ഈ ജയിലിനുള്ളിലാണ്. അടിയന്തരാവസ്ഥക്കാലത്ത് പിടികൂടിയ കമ്യൂണിസ്റ്റ്, സോഷ്യലിസ്റ്റ്, ജനസംഘം നേതാക്കളെ ഈ ജയിലിലാണ് അടച്ചത്. മുഖ്യമന്ത്രി പിണറായി വിജയൻ ഉൾപ്പെടെ അടിയന്തരാവസ്ഥക്കാലത്ത് തടവിൽ കിടന്ന ജയിലാണിത്. സ്വന്തം ലേഖകൻ

നിർഭയത്വം മോൺ. തൈത്തോട്ടത്തിന്‍റെ മുഖമുദ്ര: മാർ ജോസഫ് പാംപ്ലാനി

തലശേരി: ദുർമോഹങ്ങളില്ലാത്ത മനസും ദുർമേദസില്ലാത്ത ശരീരവുമാണ് മോൺ. തോമസ് തൈത്തോട്ടമെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. മോൺ. തൈത്തോട്ടത്തിന്‍റെ ജീവിതവും പ്രവർത്തനശൈലിയും പരിചയപ്പെടുത്താൻ സ്നേഹകൂട്ടായ്മ പുറത്തിറക്കിയ "പ്രതിബദ്ധതയുടെ പ്രതീകം' പുസ്തകം പ്രകാശനം ചെയ്തു പ്രസംഗിക്കുകയായിരുന്നു ആർച്ച്ബിഷപ്. ലഹരിക്കെതിരേയും കുടിയിറക്കിനെതിരേയും ഐതിഹാസികമായ സമരങ്ങൾക്ക് നേതൃത്വം നല്കിയ വ്യക്തിത്വമാണ് തൈത്തോട്ടം. നിർഭയത്വമാണ് തൈത്തോട്ടത്തിന്‍റെ മുഖമുദ്ര. സ്ഥാനമാനങ്ങൾക്ക് പിന്നാലെ പോയിട്ടില്ല. ആറു പതിറ്റാണ്ട് അദ്ദേഹം നടത്തിയ പോരാട്ടങ്ങൾ എന്നും ഓർമിക്കപ്പെടും. വൈദികനാകാനുള്ള പ്രേരണ തന്നിൽ ജനിപ്പിച്ചത് ഫാ. തൈത്തോട്ടത്തിന്‍റെ പ്രവർത്തനങ്ങളാണെന്നും ആർച്ച്ബിഷപ് പറഞ്ഞു. കെപിസിസി പ്രസിഡന്‍റ് സണ്ണി ജോസഫ് എംഎൽഎ പുസ്തകം ഏറ്റുവാങ്ങി. മലബാറിന്‍റെ പൊതു സ്വത്താണ് തൈത്തോട്ടമെന്ന് സണ്ണി ജോസഫ് പറഞ്ഞു. കശുവണ്ടി കർഷകസമരത്തിനും ലഹരി വിരുദ്ധ പോരാട്ടങ്ങൾക്കും ശക്തമായ നേതൃത്വം നൽകി. മനുഷ്യഹൃദയങ്ങളിൽ തെളിനീര് ഒഴുക്കുന്നതാണ് തൈത്തോട്ടത്തിന്‍റെ പ്രസംഗങ്ങളെന്നും സണ്ണി ജോസഫ് പറഞ്ഞു. പ്രതീക്ഷ ഡയറക്ടർ ഫാ. കുര്യാക്കോസ് കോലക്കുന്നേൽ അധ്യക്ഷത വഹിച്ചു. മൈനർ സെമിനാരി റെക്ടർ ഫാ. തോമസ് മേൽവെട്ടം അനുഗ്രഹപ്രഭാഷണം നടത്തി. ഈയ്യച്ചേരി കുഞ്ഞിക്കൃഷ്ണൻ, മാത്യു എം. കണ്ടത്തിൽ, ടി.പി.ആർ. നാഥ്, സിസ്റ്റർ ഡോ. ആൻസി, രാജൻ തിയറത്ത്, ടോമി വെട്ടിക്കാട്ട്, ഷിനോ പാറയ്ക്കൽ, ജോൺ പ്ലാമൂട് എന്നിവർ പ്രസംഗിച്ചു. മോൺ. തോമസ് തൈത്തോട്ടം മറുപടി പ്രസംഗം നടത്തി. ഡോ. ജോസ്‌ലെറ്റ് മാത്യു, ആന്‍റണി മേൽവെട്ടം എന്നിവർ പ്രസംഗിച്ചു.

25 പേര്‍ക്ക് കേരള പൂരക്കളി അക്കാദമി അവാര്‍ഡ്

പയ്യന്നൂര്‍: കേരള പൂരക്കളി അക്കാദമി 2024 വര്‍ഷത്തെ അവാര്‍ഡ് പ്രഖ്യാപിച്ചു. സമഗ്ര സംഭാവനക്കുള്ള അവാര്‍ഡ് നീലേശ്വരം കരിന്തളം സ്വദേശി അണ്ടോള്‍ ബാലകൃഷ്ണ പണിക്കര്‍ക്ക്. ചാത്തമത്ത് എം.വി. കുഞ്ഞിരാമന്‍ പണിക്കര്‍ക്കാണ് ഫെലോഷിപ്പ്. 23 പേര്‍ക്ക് പൂരക്കളി-മറത്തുകളി അവാര്‍ഡുകള്‍. അവാര്‍ഡിനായി പരിഗണിച്ച 80 അപേക്ഷകളില്‍നിന്നാണ് അവാര്‍ഡിനര്‍ഹരായവരെ തെരഞ്ഞെടുത്തത്. പയ്യന്നൂരില്‍ നടന്ന പത്രസമ്മേളനത്തില്‍ ടി.ഐ. മധുസൂദനൻ എംഎല്‍എ ആണ് അവാര്‍ഡ് ജേതാക്കളെ പ്രഖ്യാപിച്ചത്. പൂരക്കളി-മറത്തുകളി രംഗത്ത് ഏഴുപതിറ്റാണ്ടായി പ്രവര്‍ത്തിക്കുന്ന അണ്ടോള്‍ ബാലകൃഷ്ണന്‍ പണിക്കര്‍ക്കാണ് സമഗ്ര സംഭാവനക്കുള്ള അവാര്‍ഡ്. കേരള സംഗീത നാടക അക്കാദമി അവാര്‍ഡ്, കേരള പൂരക്കളി അക്കാദമിയുടെ ഫെലോഷിപ്പ് എന്നിവ നേരത്തെ ലഭിച്ചിട്ടുണ്ട്. പൂരക്കളി- മറത്തുകളി രംഗത്ത് 55 വര്‍ഷത്തെ സജീവതയും പൂരക്കളി രംഗത്തെ അംഗീകാരമായ പട്ടും വളയും ലഭിച്ചിട്ടുള്ള ചാത്തമത്ത് എം.വി. കുഞ്ഞിരാമന്‍ പണിക്കര്‍ക്കാണ് ഫെലോഷിപ്പ് ലഭിച്ചത്. അവാര്‍ഡ് ലഭിച്ചവര്‍: പുറക്കുന്നിലെ നാണിയില്‍ കുഞ്ഞിക്കണ്ണന്‍, അന്നൂര്‍ പടിഞ്ഞാറേക്കരയിലെ പുതിയ പുരയില്‍ രാഘവന്‍, തൃക്കരിപ്പൂര്‍ തങ്കയത്തെ പനക്കീല്‍ കണ്ണന്‍, കടന്നപ്പള്ളി പടിഞ്ഞാറേക്കരയിലെ കിഴക്കേപുരയില്‍ അമ്പു, ഉപ്പിലക്കൈ മോനാച്ചയിലെ എം.വി. ശശീന്ദ്രന്‍, തൃക്കരിപ്പൂര്‍ ഒളവറയിലെ കെ.വി. കൃഷ്ണന്‍, അടോട്ട് സ്വദേശി നാരായണന്‍ വെളിച്ചപ്പാടന്‍, കാഞ്ഞങ്ങാട് സൗത്തിലെ കെ. ബാലന്‍, ചെറുവത്തൂര്‍ മടിക്കുന്നിലെ പി.പി. നാരായണന്‍, നീലേശ്വരം പാലായിയിലെ സി.സി. നാരായണന്‍, കരിവെള്ളൂര്‍ നോര്‍ത്ത് മണക്കാട് സ്വദേശി ടി.ടി.വി. കുഞ്ഞികൃഷ്ണന്‍, പഴയങ്ങാടി വയലപ്രയിലെ വൈക്കത്ത് രാഘവന്‍, കാനായി തോട്ടംകടവിലെ തുരുത്തിപ്പള്ളി രാമദാസന്‍ പണിക്കര്‍, തൃക്കരിപ്പൂര്‍ ഇളമ്പച്ചിയിലെ കാനക്കീല്‍ കമലാക്ഷന്‍ പണിക്കര്‍, ചെറുവത്തൂര്‍ കാരിയിലെ എന്‍. കുഞ്ഞിക്കണ്ണന്‍, കയ്യൂര്‍ പലോത്ത് സ്വദേശി കെ. അമ്പാടിക്കുഞ്ഞി, ചെറുവത്തൂര്‍ പിലിക്കോട് സ്വദേശി ടി.വി. കൃഷ്ണന്‍, കുഞ്ഞിമംഗലത്തെ തായമ്പത്ത് ഗോവിന്ദന്‍, വെള്ളൂരിലെ എം.വി. കരുണാകരന്‍, കാസര്‍ഗോഡ് ഹരിപുരത്തെ കയയില്‍ മുത്തുപ്പണിക്കര്‍, പരിയാരം കോരന്‍പീടികയിലെ എന്‍. ജനാര്‍ദനന്‍, കാസര്‍ഗോഡ് കാറഡുക്കയിലെ കൊണല ഹൗസില്‍ കൃഷ്ണന്‍ പണിക്കര്‍, കല്യോട്ട് പെരിയയിലെ കല്യോട്ട് നാരായണന്‍ പണിക്കര്‍ എന്നിവരാണ് അവാര്‍ഡിനായി തെരഞ്ഞെടുക്കപ്പെട്ടവര്‍. ഓഗസ്റ്റ് ആദ്യവാരം അവാര്‍ഡ് സമര്‍പ്പണം നടക്കുമെന്ന് പത്രസമ്മേളനത്തില്‍ പങ്കെടുത്ത അക്കാദമി ചെയര്‍മാന്‍ കെ. കുഞ്ഞിരാമന്‍, സെക്രട്ടറി വി.പി. മോഹനന്‍, എ.വി. അജയകുമാര്‍, വിപിന്‍ പണിക്കര്‍, സന്തോഷ് പാലായി എന്നിവര്‍ അറിയിച്ചു.

കൊട്ടിയൂർ വൈശാഖ മഹോത്സവത്തിന് തൃക്കലശാട്ടോടെ ഇന്നു സമാപനം

കൊട്ടിയൂർ: തൃക്കലശാട്ടത്തോടെ വൈശാഖ മഹോത്സവം ഇന്ന് സമാപിക്കും. രാവിലെ വാകചാർത്തോടെയാണ് ചടങ്ങുകൾ ആരംഭിക്കുക. തുടർന്ന് തേങ്ങ മുറികളിലേക്ക് നാളം പകർന്ന ശേഷം വിളക്കുകൾ കെടുത്തും. ഇതോടൊപ്പം അക്കരെ സന്നിധാനത്തെ എല്ലാ വിളക്കുകളും അണയ്ക്കും. നമ്പീശൻ,വാരിയർ എന്നിവരുടെ നേതൃത്വത്തിൽ ശ്രീകോവിലിന്‍റെ നാലു തൂണുകൾ കടപുഴക്കിയെടുത്ത് തിരുവഞ്ചിറയിൽ നിക്ഷേപിക്കും. ഇതോടെ മണിത്തറ തൃക്കലശാട്ടിന് ഒരുങ്ങും. കലശമണ്ഡപത്തിൽ പൂജിച്ചു വച്ച കളഭകുംഭങ്ങൾ വാദ്യഘോഷങ്ങളോടെ മുഖമണ്ഡപത്തിലേക്ക് എഴുന്നള്ളിച്ച് പ്രധാന തന്ത്രിമാരുടെ കാർമികത്വ ത്തിൽ സ്വയംഭൂവിൽ ആടും. മുഴുവൻ ബ്രാഹ്മണരും ചേർന്ന് സമൂഹ പുഷ്പാഞ്ജലിയും പ്രധാന തന്ത്രിയുടെ പൂർണ പുഷ്പാഞ്ജലിയും നടക്കും. പുഷ്പാഞ്ജലി കഴിഞ്ഞാൽ തീർഥവും പ്രസാദവും നൽകുന്നതോടപ്പം ആടിയ കളഭവും നൽകും. ഒരു ചെമ്പ് നിവേദ്യച്ചോറും കടുംപായസവും തിടപ്പള്ളിയിൽ ഇരുന്ന് കുടിപതികൾ കഴിക്കും. മുളക്, ഉപ്പ് എന്നിവ മാത്രം ചേർത്ത് കഴിക്കുന്ന തണ്ടുമ്മൽ ഊണ് എന്ന ചടങ്ങാണിത്. കൂത്തരങ്ങിൽ ഭണ്ഡാരം തിരിച്ചെഴുള്ളത്തിനുള്ള ഏറ്റുവാങ്ങൽ നടത്തും. തുടർന്ന് അമ്മാറക്കൽ തറയിൽ തൃച്ചന്ദനപ്പൊടി അഭിഷേകം നടത്തും. ശേഷം ആചാര്യൻമാരിൽ ഒരാൾ യാത്രബലി നടത്തും. യാത്രബലിക്ക് മുന്പ് തന്ത്രിയും പരികർമ്മിയും ഓച്ചറും പന്തക്കിടങ്ങാളും അല്ലാതെ ബാക്കിയെല്ലാവരും അക്കരെ സന്നിധാനത്തിൽ നിന്ന് പുറത്ത് കടക്കും. ഭണ്ഡാരങ്ങളും വാളുകളും ആദ്യം ഇക്കരേയ്ക്ക് കടക്കും. തുടർന്ന് മണത്തണ കരിമ്പന ഗോപുരത്തി ലേക്ക് എഴുന്നള്ളിക്കും. അത്തം നാളിൽ വാളാട്ടം, കുടിപതികളുടെ തേങ്ങയേറ്, പായസ നിവേദ്യം, കൂത്ത് സമർപ്പണം എന്നിവ നടന്നു. പന്തീരടിക്ക് അവസാനത്തെ ശീവേലിയും നടന്നു. ശീവേലി സമയത്ത് ചപ്പാരം ക്ഷേത്രത്തിലെ മൂന്ന് വാളുകളും എഴുന്നള്ളിച്ച് ഏഴില്ലക്കാരായ വാളശൻമാർ വാളാട്ടം നടത്തി. തിടമ്പുകൾ വഹിക്കുന്ന ബ്രാഹ്മണർക്കഭിമുഖമായി മൂന്ന് പ്രദക്ഷിണം വച്ചു. തിടമ്പുകളിൽ നിന്ന് ദേവചൈതന്യം വാളുകളിലേക്ക് ആവാഹിക്കപ്പെടുമെന്നാണ് വിശ്വാസം. തുടർന്ന് കുടിപതികൾ പൂവറക്കും അമ്മാറക്കൽ തറയ്ക്കും മധ്യേയുള്ള സ്ഥാനത്ത് കുടിപതികളുടെ നേതൃത്വത്തിൽ തേങ്ങയേറ് നടത്തി. നാലാമത് വലിയവട്ടളം പായസം ഭഗവാന് നിവേദിച്ചു. തുടർന്ന് കൂത്ത് സമർപ്പണവും നടന്നു.

കത്തോലിക്ക കോൺഗ്രസ് സെന്‍റ് തോമസ് ദിനാചരണം നടത്തി

തലശേരി: ഭാരതത്തിൽ ക്രിസ്തുമതം പ്രചരിപ്പിച്ച വിശുദ്ധ തോമാശ്ലീഹായുടെ ഓർമതിരുനാൾ ദിനമായ ഇന്നലെ കത്തോലിക്കാ കോൺഗ്രസ് തലശേരി അതിരൂപത കമ്മിറ്റി സഭാ ദിനാചരണം നടത്തി.ചെമ്പേരി, ചെറുപുഴ, തളിപ്പറമ്പ്, എടൂർ, പേരാവൂർ, മേരിഗിരി, ചെമ്പൻതൊട്ടി, കുന്നോത്ത്, പൈസക്കരി, നെല്ലിക്കാംപൊയിൽ, മണിക്കടവ്, വായാട്ടുപറമ്പ്, ആലക്കോട്, തോമാപുരം, വെള്ളരിക്കുണ്ട്, മാലോം, പനത്തടി, കാസർഗോഡ്, കാഞ്ഞങ്ങാട് മേഖലകളിലെ 200 കേന്ദ്രങ്ങളിൽ പതാക ഉയർത്തി. കത്തോലിക്കാ കോൺഗ്രസ് തലശേരി അതിരൂപത ഭാരവാഹികളുടെയും ഫൊറോന, യൂണിറ്റ് ഭാരവാഹികളുടെയും പ്രവർത്തകരുടെയും സമുദായാംഗങ്ങളുടെയും സാന്നിധ്യത്തിലാണ് സഭാദിനാചരണ പരിപാടികൾ നടത്തിയത്.

പോക്‌സോ: അധ്യാപകന്‍ അറസ്റ്റില്‍

കാഞ്ഞങ്ങാട്: സ്റ്റാഫ് റൂമിലേക്ക് വിളിച്ചുവരുത്തി പതിനഞ്ചുകാരിയായ വിദ്യാര്‍ഥിനിയുടെ ശരീരത്തില്‍ സ്പര്‍ശിക്കുകയും അശ്ലീലവീഡിയോ കാണിക്കുകയും ചെയ്‌തെന്ന പരാതിയില്‍ അധ്യാപകന്‍ അറസ്റ്റില്‍. ഹൊസ്ദുര്‍ഗ് പോലീസ് സ്‌റ്റേഷന്‍ പരിധിയിലെ സ്‌കൂളിലെ അധ്യാപകനായ കണ്ണൂര്‍ മട്ടന്നൂര്‍ അയ്യല്ലൂര്‍ സ്വദേശി ഒ.കെ. ശ്രീജനെയാണ് (51) അറസ്റ്റ് ചെയ്തത്. 2024ല്‍ നവംബര്‍ മാസത്തിലാണ് കേസിനാസ്പദമായ സംഭവം നടന്നത്. കൗണ്‍സിലിംഗിലാണ് പെണ്‍കുട്ടി ഇക്കാര്യം വെളിപ്പെടുത്തിയത്.

കാസർഗോഡ് ഗവ. മെഡിക്കൽ കോളജിൽ ഉപേക്ഷിച്ച കെട്ടിടം ഇപ്പോഴും പ്രവർത്തനനിരതം

കാസർഗോഡ്: ദിവസങ്ങൾക്കു മുമ്പുമാത്രം ഗവ. മെഡിക്കൽ കോളജ് ആശുപത്രിയായി രൂപംമാറിയ കാസർഗോഡ് ജനറൽ ആശുപത്രിയിൽ നേരത്തേ ഉപേക്ഷിച്ച കെട്ടിടം ഇപ്പോഴും പ്രവർത്തനനിരതം. അബാൻഡന്‍റ് ബിൽഡിംഗ് എന്ന് ബോർഡുവച്ച കെട്ടിടത്തിലാണ് ജില്ലാ ടിബി കേന്ദ്രത്തിന്‍റെ ഒപി വിഭാഗവും സാമ്പിൾ കളക്ഷൻ സെന്‍ററും പ്രവർത്തിക്കുന്നത്. നേരത്തേ ജില്ലാ ടിബി കേന്ദ്രം പ്രവർത്തിച്ചിരുന്ന കെട്ടിടം കാലപ്പഴക്കം മൂലം പൊളിച്ചുമാറ്റിയതിനെ തുടർന്നാണ് ഇങ്ങോട്ട് മാറ്റിയത്. അന്നുതന്നെ ഈ കെട്ടിടത്തിന്‍റെ അപകടാവസ്ഥ പലരും ചൂണ്ടിക്കാട്ടിയിരുന്നെങ്കിലും ഫലമുണ്ടായില്ല. കെട്ടിടത്തിന്‍റെ കോൺക്രീറ്റ് മേൽക്കൂര മഴ പെയ്യുമ്പോൾ ചോർന്നൊലിക്കുന്ന നിലയിലാണ്. ഉള്ളിലേക്ക് വെള്ളം വീഴാതിരിക്കാൻ ഇതിനു മുകളിൽ പൂർണമായും പ്ലാസ്റ്റിക് ഷീറ്റ് കൊണ്ട് മൂടിയിരിക്കുകയാണ്. മുഴുവൻ സമയവും ഇതിനകത്ത് കഴിയാൻ വിധിക്കപ്പെട്ട ജീവനക്കാരും ചികിത്സയ്ക്കെത്തുന്ന രോഗികളും ഉൾഭയത്തോടെയാണ് ഈ കെട്ടിടത്തിനുള്ളിൽ കഴിയുന്നത്.

പൊതുനിരത്തുകളില്‍ കന്നുകാലിശല്യം; കര്‍ശന നടപടിക്കൊരുങ്ങി നഗരസഭ

കാസര്‍ഗോഡ്: പൊതുസ്ഥലങ്ങളില്‍ കന്നുകാലികള്‍ അലയുന്നതായി ശ്രദ്ധയില്‍ പെട്ടാല്‍ ഉടമസ്ഥരില്‍ നിന്നും പിഴ ഈടാക്കുമെന്ന് കാസര്‍ഗോഡ് നഗരസഭ. കന്നുകാലികളെ അതാത് ഉടമസ്ഥര്‍ കെട്ടി പരിപാലിക്കാത്ത പക്ഷം ഉടമസ്ഥര്‍ക്കെതിരെ പിഴ ഈടാക്കുകയും പിടിച്ചെടുത്ത കന്നുകാലികളെ ലേലം ചെയ്തു വില്‍ക്കുകയും അതിനു വരുന്ന ചെലവുകള്‍ ഉടമസ്ഥരില്‍ നിന്ന് ഈടാക്കുകയും ചെയ്യും. നഗരസഭാ പരിധിയില്‍ പുതിയ ബസ് സ്റ്റാന്‍ഡിനു സമീപം അഴിച്ചുവിടുന്ന കന്നുകാലികള്‍ പൊതുജനങ്ങള്‍ക്കും യാത്രികര്‍ക്കും ശല്യമുണ്ടാക്കുന്നതായി ശ്രദ്ധയില്‍ പെട്ടതിനെ തുടര്‍ന്നാണ് നടപടി.

വിദ്വാൻ പി ദേശീയ സാംസ്കാരികകേന്ദ്രത്തെ ഒറ്റനിലയിൽ ഒതുക്കാനുള്ള തീരുമാനത്തിൽ പ്രതിഷേധം

കാഞ്ഞങ്ങാട്: ആദ്യകാല നാടകപ്രവർത്തകനും നവോത്ഥാന നായകനുമായിരുന്ന വിദ്വാൻ പി കേളുനായരുടെ സ്മാരകമായി സാംസ്കാരികവകുപ്പിനു കീഴിൽ വെള്ളിക്കോത്ത് നിർമിക്കുന്ന വിദ്വാൻ പി ദേശീയ സാംസ്കാരികകേന്ദ്രത്തെ ഒറ്റനിലയിൽ ഒതുക്കാനുള്ള തീരുമാനത്തിൽ പ്രതിഷേധം വ്യാപകമാകുന്നു. നാടകപരിശീലനകേന്ദ്രവും അതിഥിമുറികളുമടക്കം രണ്ടു നിലകളുള്ള കെട്ടിടത്തിനാണ് നേരത്തേ രൂപരേഖ തയ്യാറാക്കിയിരുന്നത്. എന്നാൽ നിലവിൽ ഇതിനായി അനുവദിച്ച അഞ്ച് കോടി രൂപയുടെ ഫണ്ടിൽനിന്ന് നികുതിയും മറ്റു ചെലവുകളും കഴിച്ചാൽ പിന്നെ ഇരുനിലക്കെട്ടിടത്തിന്‍റെ നിർമാണത്തിന് മതിയാകില്ലെന്നാണ് പൊതുമരാമത്ത് വകുപ്പിന്‍റെ വിലയിരുത്തൽ. അതുകൊണ്ട് രൂപരേഖയിൽ കാണിച്ചിരിക്കുന്ന താഴത്തെ നിലയുടെ നിർമാണം മാത്രമാണ് ഇപ്പോൾ നടക്കുന്നത്. മുകളിലത്തെ നിലയിലേക്കുള്ള സ്റ്റെയർകേസിന്‍റെ നിർമാണമുൾപ്പെടെ നടത്തുന്നുണ്ടെങ്കിലും ഒന്നരക്കോടി രൂപയുടെയെങ്കിലും അധിക ഫണ്ട് ലഭ്യമായാൽ മാത്രമേ മുകളിലത്തെ നിലയുടെ നിർമാണം നടത്താനാകൂ എന്നാണ് അവരുടെ നിലപാട്. ഇ. ചന്ദ്രശേഖരൻ റവന്യുമന്ത്രിയായിരുന്ന കാലത്താണ് വിദ്വാൻ പി സ്മാരകത്തിന്‍റെ നിർമാണത്തിന് അഞ്ചുകോടി രൂപ അനുവദിച്ചത്. കെട്ടിടനിർമാണത്തിനായി സ്ഥലം കണ്ടെത്തുന്നതും ഈ സ്ഥലത്ത് വിദ്വാൻ പിയുടെ കാലത്ത് നിർമിച്ച വിജ്ഞാനദായിനി ദേശീയ വിദ്യാലയത്തിന്‍റെ കെട്ടിടം നിലനിർത്തുന്നതുമായി ബന്ധപ്പെട്ടുണ്ടായ തർക്കങ്ങൾ മൂലം സാംസ്കാരികകേന്ദ്രത്തിന്‍റെ നിർമാണം തുടങ്ങാൻ വർഷങ്ങളോളം വൈകി. കാലപ്പഴക്കം മൂലം ദുർബലാവസ്ഥയിലായിരുന്ന കെട്ടിടം പൊളിച്ചുമാറ്റിയാണ് ഇപ്പോൾ സാംസ്കാരികകേന്ദ്രം നിർമിക്കുന്നത്. വർഷങ്ങളുടെ കാലതാമസം മൂലം എസ്റ്റിമേറ്റിലുണ്ടായ വ്യത്യാസമാണ് ഇപ്പോൾ ഫണ്ട് മതിയാകാത്ത നിലയിലെത്തിച്ചത്. രണ്ട് നിലകളിലായി രൂപകല്പന ചെയ്ത സ്മാരക മന്ദിരം ഒറ്റ നിലയിലേക്ക് ചുരുങ്ങുന്നതോടെ സാംസ്കാരികകേന്ദ്രത്തിൽ വിഭാവനം ചെയ്ത പ്രധാന സൗകര്യങ്ങളെല്ലാം നഷ്ടപ്പെടുമെന്ന നിലയാണെന്ന് കഴിഞ്ഞ ദിവസം ചേർന്ന വിദ്വാൻ പി സ്മാരക ട്രസ്റ്റ് വാർഷിക പൊതുയോഗം ചൂണ്ടിക്കാട്ടി. ഉടൻ ഒന്നരക്കോടി രൂപ കൂടി അധികമായി അനുവദിച്ച് പൊതുമരാമത്ത് വകുപ്പ് ആദ്യ രൂപകല്പന ചെയ്ത രീതിയിൽ തന്നെ മന്ദിരം യാഥാർഥ്യമാക്കണമെന്ന് യോഗം ആവശ്യപ്പെട്ടു. ട്രസ്റ്റ്ചെയർമാൻ കുഞ്ഞിക്കണ്ണൻ കക്കാണത്ത് അധ്യക്ഷത വഹിച്ചു. സെക്രട്ടറി എസ്. ഗോവിന്ദരാജ് വാർഷിക റിപ്പോർട്ട് അവതരിപ്പിച്ചു. രാജ്മോഹൻ നീലേശ്വരം, സി.പി. ശുഭ, കെ. പ്രസേനൻ, പി.പി. കുഞ്ഞിക്കൃഷ്ണൻ നായർ, പ്രതീഷ് ഓളിയക്കാൽ, പി. മധുസൂദനൻ, പി.വി. ജയരാജ് എന്നിവർ പ്രസംഗിച്ചു. ഭാരവാഹികളായി കുഞ്ഞിക്കണ്ണൻ കക്കാണത്ത് (ചെയർമാൻ), സി.പി. ശുഭ (വൈസ് ചെയർപേഴ്സൺ), പി.വി. ജയരാജ് (സെക്രട്ടറി), പ്രതീഷ് ഓളിയക്കാൽ (ജോയിന്‍റ് സെക്രട്ടറി), കെ. പ്രസേനൻ (ട്രഷറർ) എന്നിവരെ തെരഞ്ഞെടുത്തു.

കർഷകസഭയും ഞാറ്റുവേല ചന്തയും നടത്തി

പടന്ന: പഞ്ചായത്ത് കൃഷിഭവന്‍റെ നേതൃത്വത്തിൽ കർഷകസഭയും ഞാറ്റുവേല ചന്തയും വിള ഇൻഷൂറൻസ് പക്ഷാചരണവും നടത്തി. കർഷകരിൽ നിന്ന് ശേഖരിച്ച വിവിധ കാർഷികോത്പന്നങ്ങൾ, നീലേശ്വരം അഗ്രോ സർവീസ് സെന്‍ററിൽ നിന്നുള്ള ഫലവൃക്ഷ തൈകൾ, പച്ചക്കറി തൈകൾ, കേരള ഗ്രോ ബ്രാൻഡഡ് ഷോപ്പിന്‍റെ വിവിധ ജൈവ ഉത്പന്നങ്ങൾ, മില്ലറ്റ് ഉത്പന്നങ്ങൾ എന്നിവയുടെ പ്രദർശനവും വില്പനയും നടന്നു. പഞ്ചായത്ത് പ്രസിഡന്‍റ് പി.വി. മുഹമ്മദ് അസ്ലം ഉദ്ഘാടനം ചെയ്തു. കാർഷിക വികസന സമിതി അംഗം എം.വി. ഭവാനി അധ്യക്ഷയായി. കൃഷി ഓഫീസർ അരവിന്ദൻ കൊട്ടാരത്തിൽ കാർഷിക വിള ഇൻഷൂറൻസ്, വിവിധ കാർഷിക വികസന പദ്ധതികൾ എന്നിവ വിശദീകരിച്ചു. കൃഷി അസിസ്റ്റന്‍റുമാരായ പി.പി. കപിൽ, പി.പി. ദീപ്തി, ആത്മ അസി. ടെക്നോളജി മാനേജർ ടി. സജിത്ത്, ടി.വി. തങ്കമണി, കെ. പ്രസന്ന, എം. സന്തോഷ് കുമാർ, കെ.വി. ജതീന്ദ്രൻ, റസാഖ് പുഴക്കര, കെ. കൃഷ്ണൻ, പി.പി. വിജയൻ, വി. കരുണാകരൻ, കെ. ശശിധരൻ, കെ.വി. ദാമോദരൻ, ഒ.കെ. രമേശൻ എന്നിവർ സംബന്ധിച്ചു.

ഉള്‍ച്ചേര്‍ക്കല്‍ സമഗ്രത പദ്ധതി: ജില്ലാതല യോഗം ചേര്‍ന്നു

കാസര്‍ഗോഡ്: കേന്ദ്ര ധനകാര്യ സേവന വകുപ്പിന്‍റെ നേതൃത്വത്തില്‍ പഞ്ചായത്ത്, നഗര തദ്ദേശസ്ഥാപന തലങ്ങളില്‍ സാമ്പത്തിക ഉള്‍ച്ചേര്‍ക്കല്‍ പദ്ധതികളുടെ സമഗ്രത മെച്ചപ്പെടുത്തുക എന്ന ലക്ഷ്യത്തോടെ രാജ്യത്തെ എല്ലാ പഞ്ചായത്തുകളിലും സംഘടിപ്പിക്കുന്ന പ്രചാരണ പരിപാടിയുമായി ബന്ധപ്പെട്ട ജില്ലാതല യോഗം ചേര്‍ന്നു. എഡിഎം പി. അഖില്‍ അധ്യക്ഷതവഹിച്ചു. ഓണ്‍ലൈനായി നടന്ന യോഗത്തില്‍ എല്‍എസ്ജിഡി ജോയിന്‍റ് ഡയറക്ടര്‍ കെ.വി. ഹരിദാസ്, എല്‍ഡിഎം ദീപേഷ്, നബാര്‍ഡ് ഡിഡിഎം ഷാരോണ്‍വാസ് എന്നിവര്‍ പങ്കെടുത്തു. ജൂലൈ ഒന്നു മുതല്‍ സെപ്റ്റംബര്‍ 30 വരെ ജില്ലയിലെ എല്ലാ പഞ്ചായത്തുകളിലും തദ്ദേശസ്വയംഭരണ സ്ഥാപനങ്ങളിലും കാമ്പയിന്‍ നടക്കും. പ്രചാരണ പരിപാടിയുടെ ഭാഗമായി ക്യാമ്പുകളില്‍ എല്ലാ സേവിംഗ്‌സ് ബാങ്ക് അക്കൗണ്ട് ഉടമകളുടെയും പുനര്‍ കെവൈസി പ്രക്രിയ, പിഎംജെഡിവൈ പ്രകാരം ബാങ്ക് അക്കൗണ്ടുകളില്ലാത്ത മുതിര്‍ന്നവര്‍ക്ക് അക്കൗണ്ട് തുറക്കല്‍, പ്രധാന്‍മന്ത്രി ജീവന്‍ ജ്യോതി ബീമ യോജന , പ്രധാന്‍മന്ത്രി സുരക്ഷാ ബീമ യോജന, അടല്‍ പെന്‍ഷന്‍ യോജന എന്നിവയില്‍ അംഗത്വം നല്‍കല്‍,ഡിജിറ്റല്‍ തട്ടിപ്പുകള്‍ തടയല്‍, അവകാശവാദമുന്നയിക്കാത്ത നിക്ഷേപം ലഭ്യമാക്കല്‍, പരാതി പരിഹാരം എന്നിവ സംബന്ധിച്ച് ബോധവത്കരണ ക്ലാസുകള്‍ അക്കൗണ്ടുകളിലെ നാമനിര്‍ദേശം പുതുക്കല്‍, തുടങ്ങിയ സേവനങ്ങള്‍ ലഭ്യമാക്കും.

ഞാറ്റുവേല ചന്ത സംഘടിപ്പിച്ചു

നീലേശ്വരം: കൃഷിഭവന്‍റെ നേതൃത്വത്തിൽ സംഘടിപ്പിച്ച ഞാറ്റുവേല ചന്ത നഗരസഭാധ്യക്ഷ ടി.വി. ശാന്ത ഉദ്ഘാടനം ചെയ്തു. വികസനകാര്യ സ്ഥിരം സമിതി അധ്യക്ഷ വി. ഗൗരി അധ്യക്ഷത വഹിച്ചു. സ്ഥിരം സമിതി അധ്യക്ഷരായ കെ.പി. രവീന്ദ്രൻ, പി. ഭാർഗവി, കൗൺസിലർമാരായ പി. ബിന്ദു, വിനയരാജ്, പി.പി. ലത, പി. വത്സല, വി.വി. ശ്രീജ, പി.കെ. ലത, കൃഷി ഓഫീസർ കൃഷ്ണ വേദിക, അസി. കൃഷി ഓഫീസർ മോളി തോമസ് എന്നിവർ സംബന്ധിച്ചു. ഫലവൃക്ഷ തൈകളും പച്ചക്കറി തൈകളും കാർഷികോത്പന്നങ്ങളും ചന്തയിൽ വില്പനയ്ക്കെത്തി. ചോളം പുട്ടുപൊടി, മുളപ്പിച്ച റാഗി, തേൻ, മയ്യൽ അരി, മറയൂർ ശർക്കര എന്നിവ ശ്രദ്ധേയമായി.

ബഹിരാകാശ യാത്രികരുമായി സംവദിച്ച് ഉദിനൂരിലെ ഒമ്പതാം ക്ലാസ് വിദ്യാർഥി

തൃക്കരിപ്പൂർ: ഐഎസ് ആർഒയുടെ സാങ്കേതിക സഹായത്തോടെ ബഹിരാകാശ യാത്രികരുമായി സംവദിക്കാൻ അവസരം ലഭിച്ച വിദ്യാർഥികളുടെ സംഘത്തിൽ കാസർഗോഡ് ജില്ലയുടെ ഏക പ്രതിനിധിയായി ഉദിനൂർ ഗവ. ഹയർ സെക്കൻഡറി സ്കൂളിലെ ഒമ്പതാം തരം വിദ്യാർഥി സി. അഷിത്. സംസ്ഥാനത്തെ പൊതുവിദ്യാലയങ്ങളിൽ നിന്ന് തെരഞ്ഞെടുക്കപ്പെട്ട 145 കുട്ടികളാണ് തിരുവനന്തപുരം ഐഎസ്ആർഒയിൽ വച്ച് ശുഭാംശു ശുക്ല ഉൾപ്പെടെയുള്ള ബഹിരാകാശ യാത്രികരുമായി സംവദിച്ചത്. ബഹിരാകാശത്തു നിന്ന് യാത്രികർ തിരിച്ചുവരുമ്പോൾ അന്തരീക്ഷത്തിലെ ഉയർന്ന താപനിലയെ മറികടക്കുന്നതുമായി ബന്ധപ്പെട്ട ചോദ്യമാണ് അഷിത് ചോദിച്ചത്. ഇതിനായി കുറഞ്ഞ അളവിൽ മാത്രം താപം കടത്തിവിടുന്ന ലോഹങ്ങൾ കൊണ്ടാണ് ബഹിരാകാശ യാത്രികർ സഞ്ചരിക്കുന്ന വാഹനത്തിന്‍റെ ഭാഗങ്ങൾ ഉണ്ടാക്കിയിരിക്കുന്നതെന്ന മറുപടിയാണ് ലഭിച്ചത്. ഓട്ടോറിക്ഷാ ഡ്രൈവറായ ഇടയിലക്കാട്ടെ സതീശന്‍റെയും തൃക്കരിപ്പൂർ സെന്‍റ് പോൾസ് എയുപി സ്കൂളിലെ പ്രീ പ്രൈമറി അധ്യാപിക സി. ആശാലതയുടെയും മകനാണ് അഷിത്.

ലഹരിക്കെതിരേ രമേശ് ചെന്നിത്തലയുടെ നേതൃത്വത്തില്‍ സമൂഹനടത്തം 15ന്

കാഞ്ഞങ്ങാട്: കേരളത്തെ കാര്‍ന്നുതിന്നുന്ന ലഹരി മാഫിയയ്‌ക്കെതിരേ രമേശ് ചെന്നിത്തലയുടെ നേതൃത്വത്തില്‍ സമൂഹനടത്തം സംഘടിപ്പിക്കുന്നു. ലഹരിവിരുദ്ധ പ്രവര്‍ത്തനങ്ങള്‍ക്കു വേണ്ടി പ്രൗഡ് കേരള എന്ന സംഘടനയുടെ നേതൃത്വത്തില്‍ 15നു വൈകുന്നേരം അഞ്ചിന് കാഞ്ഞങ്ങാട് കോട്ടച്ചേരി മുതല്‍ മാന്തോപ്പ് മൈതാനം വരെയാണ് ലഹരിവിരുദ്ധ സമൂഹ നടത്തം. അന്നു നടക്കുന്ന വാക്കത്തോണില്‍ വിദ്യാര്‍ഥികള്‍, യുവജനങ്ങള്‍, സന്നദ്ധ സംഘടനകള്‍, മദ്യവിരുദ്ധ- ലഹരിവിരുദ്ധ സംഘടനകളുടെ പ്രതിനിധികള്‍, സാംസ്‌കാരിക രാഷ്ട്രീയ മണ്ഡലങ്ങളിലെ പ്രമുഖര്‍, ആത്മീയ നേതാക്കള്‍ എന്നിവര്‍ പങ്കെടുക്കുമെന്ന് പ്രൗഡ് കേരള ചെയർമാന്‍ മലയിന്‍കീഴ് വേണുഗോപാല്‍ പത്രസമ്മേളനത്തില്‍ അറിയിച്ചു. കോട്ടച്ചേരിയില്‍ മുന്നില്‍നിന്ന് ആരംഭിക്കുന്ന നടത്തം മാന്തോപ്പ് മൈതാനത്ത് എത്തി ലഹരിവര്‍ജന സന്ദേശം നല്‍കി പ്രതിജ്ഞ ചൊല്ലി സമാപിക്കും. പത്രസമ്മേളനത്തില്‍ ഡിസിസി പ്രസിഡന്‍റ് പി.കെ. ഫൈസല്‍, പ്രൗഡ് കേരള ജില്ലാ കണ്‍വീനര്‍ കെ.കെ. രാജേന്ദ്രന്‍, ഗവേണിംഗ് ബോര്‍ഡ് അംഗം ഡോ. ആര്‍. വത്സലന്‍, രമേശന്‍ കരുവാച്ചേരി, ജില്ലാ കോര്‍ഡിനേറ്റര്‍ ബി.പി. പ്രദീപ് കുമാര്‍, കെ.പി. പ്രകാശന്‍, ഫെസിലിറ്റേറ്റര്‍ കെ.ആര്‍. കാര്‍ത്തികേയന്‍ എന്നിവരും പങ്കെടുത്തു.

അമ്പുവിന് കൈത്താങ്ങേകാൻ നാടൊരുമിക്കുന്നു

ഭീമനടി: വെസ്റ്റ് എളേരി പ്ലാച്ചിക്കരയിലെ എൻ.കെ. അമ്പുവിനെ (52) ജീവിതത്തിലേക്ക് തിരികെ കൊണ്ടുവരാൻ നാട് കൈകോർക്കുന്നു. ആറുമാസം മുന്പാണ് വീഴ്ചയിൽ പരിക്കേറ്റ് അന്പു കിടപ്പിലാകുന്നത്. നിലവിൽ മംഗളുരുവിൽ ചികിത്സയും അതിന്‍റെ തുടർച്ചയായി വീട്ടിൽ നിന്നും എല്ലാ ദിവസവും ഫിസിയോ തെറാപ്പിയും ചെയ്‌തുവരികയാണ്. ഈ പാവപ്പെട്ട കുടുംബത്തിന് താങ്ങാൻ പറ്റുന്നതിലും അധികമാണ് ചികിത്സാചെലവുകൾ. ഒരാളുടെ സഹായം ഇല്ലാതെ ഭക്ഷണം കഴിക്കാനോ പ്രാഥമികകൃത്യങ്ങൾ നിർവഹിക്കാനോ സാധിക്കില്ല. ചെറിയ കട നടത്തി ജീവിച്ചിരുന്ന അമ്പുവിനെ സഹായിക്കാൻ കുടുംബത്തിനു ഒരു കൈതാങ്ങാവാൻ അമ്പു ജനകീയ ചികിത്സ സഹായ കമ്മിറ്റി രൂപീകരിച്ചു. ഫെഡറല്‍ ബാങ്കില്‍ അക്കൗണ്ട് ആരംഭിച്ചു. അക്കൗണ്ട് നമ്പര്‍: 10790200 003576. ഐഎഫ്എസ്‌സി കോഡ്: FDR L0001079. ഭാരവാഹികളായി വി.വി. കുഞ്ഞിരാമൻ (ചെയർപേഴ്സൺ), ജോസ് സെബാസ്റ്റ്യൻ (കൺവീനർ), ഉണ്ണിക്കുട്ടൻ മാസ്റ്റർ (ട്രഷറർ) എന്നിവരെ തെരഞ്ഞടുത്തു. ഫോൺ: 984 6137418, 9495417057, 994615 1683.

കീരാന്‍പാടി നടപ്പാലം തുറന്നു

കോടോം: പരപ്പ ബ്ലോക്ക് പഞ്ചായത്തിന്‍റെ വാര്‍ഷികപദ്ധതിയില്‍ ഉള്‍പ്പെടുത്തി കോടോം-ബേളൂര്‍ പഞ്ചായത്തിലെ കീരാന്‍പാടിയില്‍ നിര്‍മിച്ച നടപ്പാലം ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി ഉദ്ഘാടനം ചെയ്തു. ബ്ലോക്ക് വൈസ്പ്രസിഡന്‍റ് കെ. ഭൂപേഷ് അധ്യക്ഷതവഹിച്ചു. പഞ്ചായത്ത് സ്ഥിരംസമിതി അധ്യക്ഷ കെ. ശൈലജ, ഇ. ബാലകൃഷ്ണന്‍, അനില്‍കുമാര്‍, ജോയിന്‍റ് ബിഡിഒ കെ.ജി. ബിജുകുമാര്‍, ഇ. ബാലകൃഷ്ണന്‍, കെ. ബാലകൃഷ്ണന്‍, കെ. കുഞ്ഞിക്കണ്ണന്‍, എന്‍. ബിജു എന്നിവര്‍ സംസാരിച്ചു. രജനി കൃഷ്ണന്‍ സ്വാഗതവും എന്‍. മധു നന്ദിയും പറഞ്ഞു.

ജോബ് സ്റ്റേഷന്‍ ആരംഭിച്ചു

കാഞ്ഞങ്ങാട്: വിജ്ഞാനകേരളം പദ്ധതിയുടെ ഭാഗമായി കാഞ്ഞങ്ങാട് ബ്ലോക്ക് പഞ്ചായത്തില്‍ ജോബ് സ്റ്റേഷന്‍ ആരംഭിച്ചു. ബ്ലോക്ക് വൈസ്പ്രസിഡന്‍റ് കെ.വി. ശ്രീലത ഉദ്ഘാടനം ചെയ്തു. ക്ഷേമകാര്യ സ്ഥിരംസമിതി അധ്യക്ഷ കെ. സീത, അംഗങ്ങളായ എ. ദാമോദരന്‍, പുഷ്പ, സെക്രട്ടറി എസ്. ഹരികൃഷ്ണന്‍ എന്നിവര്‍ പങ്കെടുത്തു.

മുൻസിഫ് മജിസ്ട്രേറ്റ് കോടതി വെള്ളരിക്കുണ്ടിൽ ആരംഭിക്കണം

വെള്ളരിക്കുണ്ട്: വെള്ളരിക്കുണ്ടിൽ അനുവദിച്ച മുൻസിഫ് മജിസ്ട്രേറ്റ് കോടതി ഉടൻ പ്രവർത്തനം ആരംഭിക്കണമെന്നും തദ്ദേശ സ്വയംഭരണ സ്ഥാപനങ്ങളുടെ ഫണ്ട് ഉപയോഗിച്ച് വെളളരിക്കുണ്ട് ടൗണിൽ സിസിടിവി സ്ഥാപിക്കണമെന്നും വെള്ളരിക്കുണ്ട് കുടുംബാരോഗ്യകേന്ദ്രത്തിൽ മുഴുവൻ സമയ ഡോക്ടർമാരെ നിയമിക്കണമെന്നും വ്യാപാരി വ്യവസായി ഏകോപനസമിതി വെള്ളരിക്കുണ്ട് യൂണിറ്റ് വാർഷിക ജനറൽബോഡിയോഗം ആവശ്യപ്പെട്ടു. വ്യാപാരഭവനിൽ നടന്ന പരിപാടി ജില്ലാ പ്രസിഡന്‍റ് കെ. അഹമ്മദ് ഷെരീഫ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് തോമസ് ചെറിയാൻ അധ്യക്ഷതവഹിച്ചു. ജില്ലാ ജനറൽ സെക്രട്ടറി കെ.ജെ. സജി മുഖ്യപ്രഭാഷണം നടത്തി. തോമസ് കാനാട്ട്, മായ രാജേഷ്, വിജയൻ കോട്ടയ്ക്കൽ, പി.എം. ബേബി, സാം സെബാസ്റ്റ്യൻ, കുസുമം ബിനോയി, ഷോണി എം. ജോർജ് എന്നിവർ സംസാരിച്ചു. യൂണിറ്റ് ജനറൽ സെക്രട്ടറി ബാബു കല്ലറയ്ക്കൽ സ്വാഗതവും ട്രഷറർ പി.വി. ഷാജി നന്ദിയും പറഞ്ഞു.

അപകടക്കെണിയൊരുക്കി നടുറോഡിലെ ബാരിക്കേഡുകള്‍

കാഞ്ഞങ്ങാട്: കാസര്‍ഗോഡ്-കാഞ്ഞങ്ങാട് കെഎസ്ടിപി റോഡില്‍ ആലാമിപ്പള്ളി പുതിയ ബസ് സ്റ്റാന്‍ഡിന് സമീപം നടുറോഡില്‍ സ്ഥാപിച്ച ബാരിക്കേഡുകള്‍ യാത്രക്കാരുടെ ജീവന് ഭീഷണിയാകുന്നു. ദിനംപ്രതി ആയിരക്കണക്കിന് വാഹനങ്ങള്‍ കടന്നുപോകുന്ന റോഡിന്‍റെ നടുവിലായാണ് മുന്നറിയിപ്പ് ഇല്ലാതെ ബാരിക്കേഡ് സ്ഥാപിച്ചിരിക്കുന്നത്. കഴിഞ്ഞ രണ്ടു മാസത്തിനിടയ്ക്ക് ഇരുചക്രവാഹനങ്ങള്‍ ഉള്‍പ്പെടെ നിരവധി വാഹനങ്ങള്‍ ഈ ബാരിക്കേഡില്‍ തട്ടി അപകടത്തില്‍പെട്ടിട്ടുണ്ട്. റോഡിന്‍റെ നടുവിലായുള്ള വലിയ കുഴികളും അപകട ഭീഷണി ഉയര്‍ത്തുന്നുണ്ട്. ഈ വിഷയത്തില്‍ അധികാരികളുടെ ശ്രദ്ധ പതിയാന്‍ യാത്രക്കാരുടെ ജീവന്‍ പൊലിയാണോ എന്നാണ് നാട്ടുകാര്‍ ചോദിക്കുന്നത്.

കരിച്ചേരിക്കുന്നിൽ മണ്ണിടിച്ചിൽ ഭീഷണി

ബന്തടുക്ക: ബന്തടുക്ക-പൊയിനാച്ചി റോഡിൽ അഞ്ച് ഹെയർപിൻ വളവുകൾ ഉൾക്കൊള്ളുന്ന കരിച്ചേരിക്കുന്നിൽ മണ്ണിടിച്ചിൽ ഭീഷണി. ഈ വർഷം മഴക്കാലം തുടങ്ങിയതിനുശേഷം വളവുകളോടു ചേർന്ന് ഒൻപതിടങ്ങളിലാണ് മണ്ണിടിച്ചിലുണ്ടായത്. മണ്ണിടിച്ചിലിന്‍റെ തോത് താരതമ്യേന കുറവായതിനാൽ ഇതുവരെ ഗതാഗത തടസം ഉണ്ടായില്ല. എന്നാൽ ഇത്തവണ മണ്ണിടിച്ചിൽ മുൻവർഷങ്ങളിലേതിനേക്കാൾ കൂടുതലാണെന്ന് നാട്ടുകാർ പറയുന്നു. ചിലയിടങ്ങളിൽ റോഡിനോടു ചേർന്നുള്ള ഭാഗത്ത് മലയിലെ മണ്ണ് ഇടിഞ്ഞുവീഴാൻ പാകത്തിൽ ഇളകിനിൽക്കുന്നതും ആശങ്കയാകുന്നുണ്ട്. ആറുവർഷം മുമ്പാണ് കുന്നിന്‍റെ ഭാഗങ്ങൾ ഇടിച്ച് റോഡ് വീതികൂട്ടി നവീകരിച്ചത്. വയനാട്ടിലേക്കുള്ള ചുരംപാതയെ അനുസ്മരിപ്പിക്കുന്ന തരത്തിലുള്ള ഹെയർപിൻ വളവുകളും വ്യൂ പോയിന്‍റുകളും പാതയുടെ പ്രത്യേകതകളായി എടുത്തുകാണിക്കപ്പെട്ടിരുന്നു. രണ്ടാം നമ്പർ വളവിൽ കരിച്ചേരി വിളക്കുമാടം ക്ഷേത്രത്തിലേക്കുള്ള റോഡ് ആരംഭിക്കുന്ന ഭാഗത്താണ് ഇത്തവണ കാര്യമായി മണ്ണിടിഞ്ഞത്. ഇവിടെ 20 അടിയോളം ഉയരത്തിൽ നിന്നാണ് കല്ലുകളും മണ്ണും റോഡിനോടു ചേർന്ന ഭാഗത്തേക്ക് പതിച്ചിരിക്കുന്നത്. രണ്ടാം നമ്പർ വളവിനും മൂന്നാം നമ്പർ വളവിനും ഇടയിലുള്ള ഭാഗത്തും നാലാമത്തെ വളവിനോടു ചേർന്നും അഞ്ചാം നമ്പർ വളവിന് സമീപം മൂന്നിടങ്ങളിലും മണ്ണിടിഞ്ഞിട്ടുണ്ട്. മണ്ണിടിച്ചിൽ സാധ്യതയുള്ള ഭാഗങ്ങളിൽ മതിയായ സുരക്ഷാ ക്രമീകരണങ്ങൾ ഏർപ്പെടുത്തിയില്ലെങ്കിൽ ഇനിയും മഴ ശക്തിപ്രാപിച്ചാൽ ഇതുവഴി മലയോര മേഖലയിലേക്കുള്ള ഗതാഗതം തടസപ്പെടുന്ന നിലയാകുമെന്ന് നാട്ടുകാർ ചൂണ്ടിക്കാട്ടുന്നു.

മാര്‍ത്തോമ്മാ ബധിരവിദ്യാലയം സ്ഥാപകദിനാഘോഷം

ചെര്‍ക്കള: മാര്‍ത്തോമ്മാ ബധിരവിദ്യാലയത്തിന്‍റെ 45-ാം വാര്‍ഷികാഘോഷം എം. രാജഗോപാലന്‍ എംഎല്‍എ ഉദ്ഘാടനം ചെയ്തു. മാര്‍ത്തോമ്മാസഭ വൈദിക ട്രസ്റ്റി ഫാ. ഡേവിഡ് ഡാമിയന്‍ അധ്യക്ഷതവഹിച്ചു. 2025ലെ എസ്എസ്എല്‍സി, പ്ലസ്ടു വിജയികളായ വിദ്യാര്‍ഥികളെ ചടങ്ങില്‍ ആദരിച്ചു. മികച്ച വിദ്യാര്‍ഥിക്കുള്ള പുരസ്‌കാരം സി.കെ. വര്‍ഷിത ഏറ്റുവാങ്ങി. പഞ്ചായത്ത് വികസനകാര്യ സ്ഥിരംസമിതി അധ്യക്ഷന്‍ ഹസൈനാര്‍ ബദരിയ മുഖ്യാതിഥി ആയിരുന്നു. തിരുവനന്തപുരം ജഗതി ബധിരവിദ്യാലയ അധ്യാപകന്‍ പി. റോബിന്‍സണ്‍, മാര്‍ത്തോമാ ബധിര കോളജ് പ്രിന്‍സിപ്പല്‍ ബിജു ഏബ്രഹാം, വൈസ് പ്രിന്‍സിപ്പല്‍ ഫാ. ജോര്‍ജ് വര്‍ഗീസ്, ഡോ.പി.കെ. ജയരാജ്, എസ്. ഷീല, ആര്‍. ഭാസ്‌കരന്‍ എന്നിവര്‍ സംസാരിച്ചു. സ്‌കൂള്‍ അഡ്മിനിസ്‌ട്രേറ്റര്‍ ഫാ. മാത്യു ബേബി സ്വാഗതവും സ്റ്റാഫ് സെക്രട്ടറി കെ.ടി. ജോഷിമോന്‍ നന്ദിയും പറഞ്ഞു.

കലിയടങ്ങാതെ കടൽ; അജാനൂർ കടപ്പുറത്തെ കോൺക്രീറ്റ് ഭിത്തിയും തകർന്നു

കാഞ്ഞങ്ങാട്: അജാനൂർ കടപ്പുറത്ത് രൂക്ഷമായ കടലേറ്റത്തിൽ ദിവസങ്ങളായി അപകടാവസ്ഥയിൽനിന്ന കോൺക്രീറ്റ് സംരക്ഷണഭിത്തിയും ഒടുവിൽ കടലിലേക്ക് മറിഞ്ഞു. അടുത്തുള്ള ഫിഷ് ലാൻഡിംഗ് സെന്‍റർ കെട്ടിടവും റോഡും സംരക്ഷിക്കുന്നതിനായാണ് ഒരു വർഷം മുമ്പ് പഞ്ചായത്ത് അഞ്ചരലക്ഷം രൂപ ചെലവിട്ട് കോൺക്രീറ്റ് ഭിത്തി നിർമിച്ചത്. ഇത് തകർന്നതിനു പിന്നാലെ തീരദേശത്തേക്കുള്ള ടാർ റോഡിന്‍റെ നല്ലൊരു ഭാഗവും കടലെടുത്തു. ആഞ്ഞടിക്കുന്ന തിരമാലകൾ മണൽ വാരിയെടുത്തതോടെ കോൺക്രീറ്റ് സംരക്ഷണഭിത്തിയുടെ അടിത്തറ പോലും പുറത്തുകാണാവുന്ന വിധത്തിലായതായി ദിവസങ്ങൾക്കുമുമ്പ് ദീപിക റിപ്പോർട്ട് ചെയ്തിരുന്നു. മഴ ഇനിയും ശക്തിപ്രാപിച്ചാൽ ഫിഷ് ലാൻഡിംഗ് സെന്‍റർ കെട്ടിടവും ഭീഷണിയിലാകും. റോഡ് തകർന്നതോടെ ഇവിടേക്കുള്ള വഴിമുട്ടിയിരിക്കുകയാണ്.

ലൈസന്‍സില്ലാത്ത പന്നിഫാമിനെതിരേനടപടി

മഞ്ചേശ്വരം: വോര്‍ക്കാടി പഞ്ചായത്തിലെ ബേക്കറി-തൗടുഗോളി പ്രധാന റോഡരികിലെ ജംഗളയില്‍ ലൈസന്‍സ് ഇല്ലാതെ പ്രവര്‍ത്തിച്ചുവരുന്ന പന്നിഫാമില്‍ തദ്ദേശസ്വയംഭരണ വകുപ്പിന്‍റെ ജില്ലാ എന്‍ഫോഴ്‌സ്‌മെന്‍റ് സ്‌ക്വാഡ് പരിശോധന നടത്തി. പരിശോധനയില്‍ ഗുരുതരമായ നിയമലംഘനങ്ങള്‍ നടക്കുന്നതായി കണ്ടെത്തി. 500 ലധികം പന്നികളെ വളര്‍ത്തുന്ന ഫാമില്‍ നിന്നുള്ള മലിനജലം ഫാം ഉടമയുടെ സ്ഥലത്ത് തന്നെ തുറസായ കുഴിയിലേക്ക് ഒഴുക്കി വിടുകയാണ് ചെയ്തുകൊണ്ടിരിക്കുന്നത്. പുരയിടത്തിന്‍റെ താഴ്ഭാഗത്ത് കൂടി ഒഴുകുന്ന അരുവിയിലേക്കും ഫാമില്‍ നിന്നുള്ള മലിനജനം ഒഴുകിയെത്തുന്നതായി കണ്ടെത്തിയിട്ടുണ്ട്. ഇവിടെ സ്ഥാപിച്ച ബയോഗ്യാസ് പ്ലാന്‍റ് പ്രവര്‍ത്തനരഹിതമാണ്. പരിസരത്തുള്ളവര്‍ക്കും യാത്രക്കാര്‍ക്കും ബുദ്ധിമുട്ടാകുന്ന സ്ഥാപനത്തില്‍ നിന്നും എത്രയും വേഗം നിലവിലുള്ള പന്നികളെ ഷിഫ്റ്റ് ചെയ്യുന്നതിനും ശാസ്ത്രീയമായും ലൈസന്‍സോടുകൂടിയും മാത്രം പുനരാരംഭിക്കുന്നതിനും ഉടമയെ അറിയിക്കുകയും ലംഘനത്തിന് കേരള പഞ്ചായത്ത് രാജ് ആക്ട് 219 കെ പ്രകാരം 25,000 രൂപ പിഴ ചുമത്തുകയും നിയമലംഘനം ആവര്‍ത്തിക്കുന്ന പക്ഷം നിയമനടപടികളുമായി മുന്നോട്ടുപോകുന്നതിന് പഞ്ചായത്തിന് നിര്‍ദേശം നല്‍കുകയും ചെയ്തു.

ഡോക്ടർമാർക്ക് ആദരവുമായി സൈക്കിൾ റൈഡ്

തൃക്കരിപ്പൂർ: ദേശീയ ഡോക്ടേഴ്സ് ദിനത്തിൽ ആതുര സേവന രംഗത്തെ ഡോക്ടർമാർക്ക് ആദരവർപ്പിച്ച് തൃക്കരിപ്പൂർ സൈക്ലിംഗ് ക്ലബിന്‍റെ നേതൃത്വത്തിൽ സൈക്കിൾ റൈഡ് നടത്തി. തീരദേശപാതയിലൂടെ തൃക്കരിപ്പൂരിൽ നിന്നും നീലേശ്വരം വരെയും തിരിച്ചുമായിരുന്നു സൈക്കിൾ യാത്ര. വെല്ലുവിളി നിറഞ്ഞ തൊഴിൽസാഹചര്യങ്ങളിലും യുദ്ധങ്ങളിലും ജീവൻ നഷ്ടമായ ഡോക്ടർമാരെ അനുസ്മരിച്ചാണ് സൈക്കിൾ യാത്ര നടത്തിയത്. അനുബന്ധിച്ച് നടന്ന ആദര ചടങ്ങിൽ തൃക്കരിപ്പൂർ സൈക്ലിംഗ് ക്ലബ് പ്രസിഡന്‍റ് ടി.എം.സി. ഇബ്രാഹിം അധ്യക്ഷതവഹിച്ചു. പയ്യന്നൂർ താലൂക്കാശുപത്രി സീനിയർ കൺസൾട്ടന്‍റ് ഡോ.ടി. അബ്ദുൽ ജലീൽ മുഖ്യാതിഥിയായിരുന്നു. സെക്രട്ടറി അരുൺ നാരായണൻ, ട്രഷറർ ഇർഷാദ് ഇസ്മായിൽ, സിവിൽ പോലീസ് ഓഫീസർ രാജേഷ് കുഞ്ഞിവീട്ടിൽ എന്നിവർ സംസാരിച്ചു. സൈക്കിൾ റൈഡിന് റഹ്‌മാൻ കാങ്കോൽ, സുബിൻ അച്ചാംതുരുത്തി, മുസ്തഫ മാത്താണ്ഡൻ, ബി.സി. യാസിർ, കെ.വി. ഷാജി, എം.സി.ടി. സിഫ്‌സീർ, കാർത്തിക് രാജ് എടാട്ടുമ്മൽ, എ.കെ. ഷൗക്കത്തലി, എ.ജി. ഫായിസ് എന്നിവർ നേതൃത്വം നൽകി.

വി.വി. കുഞ്ഞമ്പു അനുസ്മരണം

ചെറുവത്തൂർ: മുൻ എംഎൽഎയും സിപിഎം നേതാവുമായിരുന്ന വി.വി. കുഞ്ഞമ്പുവിന്‍റെ 53ാം ചരമവാർഷികം വിവിധ പരിപാടികളോടെ ആചരിച്ചു. ടൗണിൽ പ്രകടനവും അനുസ്മരണ സമ്മേളനവും നടന്നു. ചെറുവത്തൂർ ഓപ്പൺ ഓഡിറ്റോയത്തിൽ സിപിഎം സംസ്ഥാന സെക്രട്ടറിയേറ്റ് അംഗം എം.വി. ജയരാജൻ ഉദ്ഘാടനം ചെയ്തു. ടി. നാരായണൻ അധ്യക്ഷതവഹിച്ചു. എം. രാജഗോപാലൻ എംഎൽഎ, എം.വി. ബാലകൃഷ്ണൻ, പി. ജനാർദനൻ, മാധവൻ മണിയറ, രജീഷ് വെള്ളാട്ട്, പി.സി. സുബൈദ, കെ. ബാലകൃഷണൻ, എ.വി. ദാമോദരൻ എന്നിവർ പ്രസംഗിച്ചു.

ജോസ് കൊട്ടാരത്തിലിന് ആദരം

കാഞ്ഞങ്ങാട്: ഭിന്നശേഷിക്കാർക്ക് പഠനവും പരിചരണവും പുനരധിവാസവും നല്കി സമൂഹത്തിന്‍റെ മുഖ്യധാരയിലേക്ക് കൈപിടിച്ചുയർത്തിക്കൊണ്ട് സേവനമേഖലയിൽ വ്യക്തിമുദ്ര പതിപ്പിച്ച കാഞ്ഞങ്ങാട് ജീവോദയ ബഡ്സ് സ്കൂൾ ചെയർമാൻ ജോസ് കൊട്ടാരത്തിലിന് ഡിഫറന്‍റ്‌ലി ഏബിൾഡ് പീപ്പിൾസ് ലീഗിന്‍റെ (ഡിഎപിഎൽ) ആദരം. കാഞ്ഞങ്ങാട് ടൗൺഹാളിൽ നടന്ന ചടങ്ങിൽ മുസ്ലീംലീഗ് സംസ്ഥാന പ്രവർത്തകസമിതി അംഗം എം.പി. ജാഫർ ജോസ് കൊട്ടാരത്തിലിനെ പൊന്നാടയണിയിച്ച് ആദരിച്ചു. എംബിഎം ചാരിറ്റബിൾ ട്രസ്റ്റ് ചെയർമാൻ ഡോ.എം.ആർ. നമ്പ്യാർ, ഭിന്നശേഷിക്കാരുടെ രക്ഷിതാക്കളുടെ സംഘടനയായ പെയ്ഡിന്‍റെ ജില്ലാ പ്രസിഡന്‍റ് ടി. മുഹമ്മദ് അസ്ലം, പെരിയ മഹാത്മ ബഡ്സ് സ്കൂൾ പ്രിൻസിപ്പൽ ദീപ പേരൂർ, കേരള മീഡിയ അക്കാദമി ഫെലോഷിപ്പ് നേടിയ മാധ്യമപ്രവർത്തകൻ ഫസലുർ റഹ്മാൻ എന്നിവരെയും ആദരിച്ചു.

എയിംസിന് മറ്റേതു ജില്ലയേക്കാളും അർഹത കാസർഗോഡിന്: ദയാബായി

രാജപുരം: കേരളത്തിൽ എയിംസിന് ഏറ്റവും അർഹതയുള്ള ജില്ല കാസർഗോഡ് ആണെന്നും മറ്റേതു ജില്ലയെക്കാളും ചികിത്സ അപര്യാപ്തത ഉള്ളത് എവിടെയാണെന്നും സാമൂഹ്യപ്രവർത്തക ദയാബായി രാജപുരം സെന്‍റ് പയസ് ടെൻത് കോളജിലെ വിദ്യാർഥികളുമായി സംവദിക്കവേ അഭിപ്രായപ്പെട്ടു. എൻഡോസൾഫാൻ ദുരിതബാധിതരുടെ പ്രശ്നങ്ങൾ സമാനതകൾ ഇല്ലാത്തതാണ്.ഗുരുതരമായ ചികിത്സാപിഴവുകൾ കാസർഗോഡ് ജില്ലയിൽ റിപ്പോർട്ട് ചെയ്യപ്പെട്ടിട്ടുള്ളത് ചികിത്സ സൗകര്യങ്ങളുടെ അപര്യാപ്തത മൂലമാണ്. കാസർഗോഡ് അനുവദിക്കപ്പെട്ട മെഡിക്കൽ കോളജ്, മെഡിക്കൽ കോളജിന്‍റെ ഗണത്തിൽ ഉൾപ്പെടുത്തുവാൻ പറ്റിയതല്ല. ആവശ്യമായ ചികിത്സാ സൗകര്യങ്ങൾ അവിടെയില്ല. ഏറ്റവും കൂടുതൽ ആരോഗ്യ പ്രശ്നങ്ങൾ റിപ്പോർട്ട് ചെയ്യപ്പെടുന്ന ജില്ലയിലെ രോഗികൾക്ക് കൂടുതലായി കർണാടക സംസ്ഥാനത്തെ ആശുപത്രികളെ ആശ്രയിക്കേണ്ടതായി വരുന്നു. പുതുതലമുറയിൽപ്പെട്ട വിദ്യാർഥികൾ, സമൂഹത്തിൽ എന്താണ് നടക്കുന്നത് എന്നതിനെക്കുറിച്ച് പൂർണ ബോധവാന്മാരാകണം. ഗ്രാമീണ മേഖലകളിലെ ജീവിതം മെച്ചപ്പെടുന്നതിന് ഉപോൽബലകം ആകുന്ന രീതിയിൽ ഉന്നതവിദ്യാഭ്യാസ മേഖലയിലെ സിലബസ് പൊളിച്ചെഴുതണം. സോഷ്യൽ വർക്ക് കോഴ്സിന് പഠിക്കുന്ന കാലത്ത് ഗ്രാമീണ മേഖലയിലെ ജീവിതമാറ്റത്തെക്കുറിച്ച് സ്പർശിക്കാത്ത സിലബസ് കണ്ട് ദുഃഖിതയായി കോഴ്സ് പഠനം അവസാനിപ്പിച്ച അനുഭവവും പിന്നീട് പ്രസ്തുത കോളജ് തന്നെ സിലബസ് പൊളിച്ചെഴുതി മാറ്റങ്ങൾ കൊണ്ടുവന്നതും ദയാബായി ഓർമിച്ചെടുത്തു.

കുടിവെള്ളപദ്ധതി ഉദ്ഘാടനം ചെയ്തു

കണ്ണിവയൽ: ഗവ. ടിടിഐയിൽ ജില്ലാ പഞ്ചായത്ത് നടപ്പാക്കിയ കുടിവെള്ള പദ്ധതിയുടെ ഉദ്ഘാടനം എം. രാജഗോപാലൻ എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് ജോസഫ് മുത്തോലി അധ്യക്ഷത വഹിച്ചു. എൽപി സ്കൂൾ അധ്യാപക തസ്തികയിലേക്കുള്ള പിഎസ് സി പരീക്ഷയിൽ ജില്ലയിൽ ഒന്നാം റാങ്ക് നേടിയ സജിൻ കെ. സതീശനെ ജില്ലാ പഞ്ചായത്ത് പൊതുമരാമത്ത് സ്ഥിരം സമിതി അധ്യക്ഷ കെ. ശകുന്തള അനുമോദിച്ചു. കെ ടെറ്റ് പരീക്ഷയിൽ വിജയം നേടിയ 2023-25 ബാച്ചിലെ വിദ്യാർഥികൾക്കുള്ള അനുമോദനം കാസർഗോഡ് ഡയറ്റ് പ്രിൻസിപ്പൽ ഡോ. രഘുരാമഭട്ട്, ചിറ്റാരിക്കൽ ഉപജില്ല വിദ്യാഭ്യസ ഓഫീസർ ജസിന്ത ജോൺ എന്നിവർ നിർവഹിച്ചു. ഡോ.പി. രതീഷ്, സോജിൻ ജോർജ്, പി.വി. വിജയൻ, എം.എസ്. ഹരികുമാർ, ചൈതന്യ വിജയൻ എന്നിവർ പ്രസംഗിച്ചു.

കാസർഗോഡ് മെഡിക്കൽ കോളജ് അനാസ്ഥയുടെ സ്മാരകം: എം.ലിജു

ഉക്കിനടുക്ക: കേരളത്തിലെ ആരോഗ്യ മേഖലയോട് ഇടതുസർക്കാർ കാണിക്കുന്ന അനാസ്ഥയുടെയും ജില്ലയിലെ ജനങ്ങളോട് ചെയ്യുന്ന കൊടുംവഞ്ചനയുടെയും സ്മാരകമായി മാറിയിരിക്കുകയാണ് ഉക്കിനടുക്കയിലെ കാസർഗോഡ് ഗവ. മെഡിക്കൽ കോളജെന്ന് കെപിസിസി ജനറൽ സെക്രട്ടറി എം.ലിജു പറഞ്ഞു. പിണറായി സർക്കാർ മംഗളൂരുവിലെ ആരോഗ്യമേഖലയിലെ വ്യവസായികളുടെ കച്ചവട താത്പര്യത്തിന് മുന്നിൽ അടിയറവ് പറഞ്ഞുകൊണ്ടാണ് കാസർഗോഡ് ഗവ. മെഡിക്കൽ കോളേജിന്‍റെ പ്രവർത്തനത്തെ അട്ടിമറിച്ചതെന്നും അദ്ദേഹം ആരോപിച്ചു. സംസ്ഥാനത്തെ ആരോഗ്യമേഖലയോടുള്ള സംസ്ഥാന സർക്കാരിന്‍റെ അനാസ്ഥയ്ക്കെതിരെ ജില്ലാ കോൺഗ്രസ്സ് കമ്മിറ്റിയുടെ നേതൃത്വത്തിൽ ഉക്കിനടുക്ക ഗവ.മെഡിക്കൽ കോളജിന് മുന്നിൽ നടത്തിയ പ്രതിഷേധ ധർണ ഉദ്‌ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എൻഡോസൾഫാൻ വിഷമഴയിലൂടെ കാസർഗോഡ് ജില്ലയിലെ ആയിരക്കണക്കിന് കുടുംബങ്ങൾ അനുഭവിക്കുന്ന ഗുരുതര ആരോഗ്യപ്രശ്നങ്ങൾക്കുള്ള പരിഹാരമായാണ് ഉമ്മൻ ചാണ്ടി സർക്കാർ ജില്ലയിൽ ഒരു മെഡിക്കൽ കോളജ് അനുവദിച്ചത്. എന്നാൽ ഇപ്പോൾ ജില്ലയിൽ മെഡിക്കൽ കോളജ് തന്നെ ഇല്ലാതാക്കുന്ന നടപടിക്കെതിരെയാണ് സമരം നടത്തേണ്ടിവരുന്നത്. അടുത്തവർഷം യുഡിഎഫ് സർക്കാർ അധികാരത്തിൽ വന്നാൽ ഈ സ്ഥിതി മാറുമെന്നും ഉക്കിനടുക്ക മെഡിക്കൽ കോളേജ് പൂർണമായും നവീകരിച്ച് പ്രവർത്തനം തുടങ്ങാനുള്ള നടപടികൾ കൈക്കൊള്ളുമെന്നും അദ്ദേഹം പറഞ്ഞു. ഡിസിസി പ്രസിഡന്‍റ് പി.കെ. ഫൈസൽ അധ്യക്ഷത വഹിച്ചു. യുഡിഎഫ് ജില്ലാ കൺവീനർ എ. ഗോവിന്ദൻ നായർ, നേതാക്കളായ ഹക്കീം കുന്നിൽ, കെ. നീലകണ്ഠൻ, എം. അസിനാർ, സാജിദ് മൗവൽ, കെ.കെ. രാജേന്ദ്രൻ, ബി.പി. പ്രദീപ് കുമാർ, എം.സി. പ്രഭാകരൻ, സോമശേഖര ഷേണി, സുന്ദര ആരിക്കാടി, സി.വി. ജെയിംസ്, ഹരീഷ് പി. നായർ, മാഹിൻ കേളോട്ട്, കെ.വി. വിജയൻ, ജോയ് ജോസഫ്, മധുസൂദനൻ ബാലൂർ, കെ.വി. ഭക്തവത്സലൻ, ടി. ഗോപിനാഥൻ നായർ, എം. രാജീവൻ നമ്പ്യാർ, കെ. ഖാലിദ്, എ. വാസുദേവൻ, എം. ബലരാമൻ നമ്പ്യാർ, കെ. വാരിജാക്ഷൻ, എം. ലക്ഷ്മണ പ്രഭു, ശ്യാമപ്രസാദ് മാന്യ, ബി.എസ്. ഗംഭീര എന്നിവർ പ്രസംഗിച്ചു.

കെഎസ്എസ്പിഎ കരിദിനാചരണം

വെള്ളരിക്കുണ്ട്: പെൻഷൻ പരിഷ്കരണ കമ്മീഷനെ നിയമിക്കാത്തതിൽ പ്രതിഷേധിച്ച് കെഎസ്എസ്പിഎ പരപ്പ നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ വെള്ളരിക്കുണ്ട് സബ്ട്രഷറിയ്ക്കു മുമ്പിൽ കരിദിനാചരണം നടത്തി. സംസ്ഥാന കമ്മിറ്റി അംഗം ടി.കെ. എവുജിൻ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് മാത്യു സേവ്യർ അധ്യക്ഷതവഹിച്ചു. ജില്ലാ സെക്രട്ടറി തോമസ് മാത്യു, ശാന്തമ്മ ഫിലിപ്പ്, പി.എം. ഏബ്രഹാം, കെ. കുഞ്ഞമ്പു നായർ, പി.എ. ജോസഫ്, ബി. റഷീദ, എം.കെ. ദിവാകരൻ, ഷേർലി ഫിലിപ്പ്, ജോസുകുട്ടി അറയ്ക്കൽ, എ.കെ. ജയിംസ്, വി.കെ. ബാലകൃഷ്ണൻ, എം.ഡി. ദേവസ്യ, സി.വി. ബാലകൃഷ്ണൻ, പി.എ. ജോസ്, പി.എ. സെബാസ്റ്റ്യൻ, കെ. വേണുഗോപാൽ, വി.ജെ. ജോർജ് എന്നിവർ സംസാരിച്ചു.

ഭൂമി കൈമാറ്റം നടന്നാല്‍ ചീമേനി വ്യവസായപാര്‍ക്ക് യാഥാര്‍ഥ്യമാകും

കാസര്‍ഗോഡ്:ചീമേനി ഐടി പാര്‍ക്കിന് 100 ഏക്കര്‍ ഭൂമിയില്‍ ജനറല്‍ വിഭാഗത്തില്‍ പെട്ട വ്യവസായ പാര്‍ക്കുകള്‍ ആരംഭിക്കാന്‍ സാധിക്കുന്ന വിധത്തില്‍ ഉള്ളതാണെന്നും നിലവില്‍ ഇവിടെ വ്യവസായ പാര്‍ക്ക് ആരംഭിക്കുന്നതിന് തടസങ്ങള്‍ ഒന്നുമില്ലെന്നും വ്യവസായ വാണിജ്യ വകുപ്പ് സെക്രട്ടറി പറഞ്ഞു. ഐടി വകുപ്പ് വ്യവസായ വകുപ്പിന് ഭൂമി കൈമാറ്റം നടത്തിയാല്‍ ചീമേനി ഐടി പാര്‍ക്ക് നിര്‍മാണം വേഗത്തില്‍ യാഥാര്‍ഥ്യമാക്കാന്‍ കഴിയും. പ്രത്യേക സാമ്പത്തിക മേഖലയില്‍ ഉള്‍പ്പെട്ടിരുന്ന ഐടി പാര്‍ക്ക് പ്രദേശം വ്യവസായ പാര്‍ക്കായി മാറ്റുന്നതിന് വേണ്ടി പുനര്‍വിജ്ഞാപനം നടത്തിയിരുന്നു. കെഎസ്‌ഐടി ലിമിറ്റഡിന് കീഴില്‍ ഭൂമി നിലനിര്‍ത്തി കെഎസ്‌ഐഡിസിയുടെ ഭാഗമായി വ്യവസായ പാര്‍ക്ക് ആരംഭിക്കാന്‍ സാധിക്കുമെന്ന് യോഗത്തില്‍ പ്രിന്‍സിപ്പല്‍ സെക്രട്ടറി അറിയിച്ചു. ചെങ്കല്‍ ക്വാറികള്‍ക്ക് അപേക്ഷ പരിശോധിച്ചു അനുമതി നല്‍കാന്‍ നടപടി സ്വീകരിക്കണമെന്ന് മുഖ്യമന്ത്രി നിര്‍ദേശം നല്‍കി. ജില്ലയില്‍ വന്‍തോതില്‍ അനധികൃത ലാറ്ററൈറ്റ് ഖനനം നടക്കുന്നുണ്ട്. ഇതു സംസ്ഥാനത്തിന് വന്‍ വരുമാന നഷ്ടമാണ് ഉണ്ടാക്കുന്നതെന്ന് കളക്ടര്‍ അറിയിച്ചു. കുണ്ടംകുഴി സാവിത്രിഭായ് ഫുലെ മെമ്മോറിയല്‍ ആശ്രമം സ്‌കൂള്‍ എല്‍പി സ്‌കൂള്‍ ഹൈസ്‌കൂള്‍ ആയി ഉയര്‍ത്തിയതായി കളക്ടര്‍ അറിയിച്ചു. മലയോര ഹൈവേയുമായി ബന്ധപ്പെട്ട് സ്ഥലം ഏറ്റെടുക്കുന്നതിന് 4.5 കിലോമീറ്റര്‍ സ്ഥലത്ത് തടസങ്ങള്‍ നിലനില്‍ക്കുന്നു. പകരം ഭൂമി കണ്ടെത്തിയിട്ടുണ്ട്. ഭൂമി ഏറ്റെടുക്കുന്നതിനായി സര്‍ക്കാര്‍ ഉത്തരവ് ലഭ്യമായെന്ന് കളക്ടര്‍ പറഞ്ഞു.

മുത്തലിബ് വധം: അഞ്ചാം പ്രതിയെ വെറുതെവിട്ടു

കാസര്‍ഗോഡ്: ഉപ്പള പത്വാടിയിലെ അബ്ദുള്‍ മുത്തലിബിനെ (38) വെട്ടിക്കൊലപ്പെടുത്തിയ കേസില്‍ അഞ്ചാംപ്രതിയെ കാസര്‍ഗോഡ് അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് കോടതി (മൂന്ന്) വെറുതെവിട്ടു. കര്‍ണാടക ഭദ്രാവതി സ്വദേശി സയ്യിദ് ആസിഫിനെയാണ് വെറുതെവിട്ടത്. പ്രതിക്കെതിരായ കുറ്റം തെളിയിക്കുന്നതില്‍ പ്രോസിക്യൂഷന്‍ പരാജയപ്പെട്ടതായി കോടതി നിരീക്ഷിച്ചു. 2013 ഒക്ടോബര്‍ 24നു രാത്രി 11ഓടെയാണ് ഉപ്പള മണ്ണംകുഴിയിലെ മുത്തലിബിന്‍റെ ഫ്‌ളാറ്റിനു സമീപം ഇയാളെ വെട്ടിയും വെടിവെച്ചും ക്രൂരമായി കൊലപ്പെടുത്തിയത്. അധോലോകസംഘാംഗങ്ങള്‍ തമ്മിലുള്ള കുടിപ്പകയാണ് കൊലപാതകത്തിലേക്ക് നയിച്ചത്. കേസിലെ ഒന്നാംപ്രതിയായിരുന്ന കുപ്രസിദ്ധ ക്രിമിനല്‍ കാലിയ റഫീഖ് വിചാരണ ആരംഭിക്കുന്നതിനു മുമ്പ് കൊല്ലപ്പെട്ടിരുന്നു. രണ്ടാംപ്രതി ഷംസുദ്ദീനെ കുറ്റക്കാരനെന്ന് കണ്ടെത്തി കോടതി ശിക്ഷിച്ചിരുന്നു. മൂന്നും നാലും പ്രതികളായ മുഹമ്മദ് റഫീഖ്, മന്‍സൂര്‍ അഹമ്മദ് എന്നിവരെ നേരത്തെ വിട്ടയച്ചിരുന്നു. അഞ്ചാംപ്രതിയെ കണ്ടുകിട്ടാതിരുന്നതിനെതുടര്‍ന്നാണ് വിചാരണ നീണ്ടുപോയത്. പ്രതിക്കുവേണ്ടി അഡ്വ. രഞ്ജിത് കുണ്ടാര്‍ ഹാജരായി.

സിപിഐ ജില്ലാസമ്മേളനം വെള്ളരിക്കുണ്ടില്‍

വെള്ളരിക്കുണ്ട്: സിപിഐ ജില്ലാ സമ്മേളനം ജൂലൈ 11, 12, 13 തീയതികളില്‍ വെള്ളരിക്കുണ്ടില്‍ നടക്കും. 11ന് പതാക, കൊടിമര ജാഥകളും 12, 13 തീയതികളില്‍ പ്രതിനിധി സമ്മേളനവും നടക്കും. 11നു വെള്ളരിക്കുണ്ട് ടൗണില്‍ നടക്കുന്ന പൊതുസമ്മേളനത്തിന് മുന്നോടിയായി പൊതുസമ്മേളന നഗരിയിലേക്കുള്ള പതാക കയ്യൂരില്‍ നിന്നും പ്രതിനിധിസമ്മേളന നഗരിയിലേക്കുള്ള പതാക മടിക്കൈ കുഞ്ഞിക്കണ്ണന്‍റെ സ്മൃതി മണ്ഡപത്തില്‍ നിന്നും കൊടിമരം എളേരിത്തട്ട് പൊടോര കുഞ്ഞിരാമന്‍ നായരുടെ സ്മൃതി മണ്ഡപത്തില്‍ നിന്നും ജാഥയായി എത്തിക്കും. മൂന്നു ജാഥകളും വെള്ളരിക്കുണ്ടില്‍ സംഗമിച്ച് റെഡ് വോളണ്ടിയര്‍ മാര്‍ച്ചോട് കൂടി പൊതുസമ്മേളന നഗരയിലെത്തിക്കും. തുടര്‍ന്ന് സംഘാടകസമിതി ചെയര്‍മാന്‍ കെ.എസ്. കുര്യാക്കോസ് പതാക ഉയര്‍ത്തും. പൊതുസമ്മേളനം സിപിഐ ദേശീയ എക്‌സിക്യൂട്ടീവംഗം പി. സന്തോഷ് കുമാര്‍ എംപി ഉദ്ഘാടനം ചെയ്യും. 12, 13 തീയതികളില്‍ വെള്ളരിക്കുണ്ട് വീനസ് ഓഡിറ്റോറിയത്തില്‍ നടക്കുന്ന പ്രതിനിധിസമ്മേളനം രാവിലെ 10നു ദേശീയ എക്‌സിക്യൂട്ടീവംഗം കെ. പ്രകാശ് ബാബു ഉദ്ഘാടനം ചെയ്യും. സംസ്ഥാന അസി. സെക്രട്ടറി ഇ. ചന്ദ്രശേഖരന്‍ എംഎല്‍എ, മന്ത്രിമാരായ ജി.ആര്‍. അനില്‍, പി. പ്രസാദ് എന്നിവര്‍ സംബന്ധിക്കും.

മെഡിക്കല്‍ കോളജിന് പ്രധാന പരിഗണന: മുഖ്യമന്ത്രി

കാസര്‍ഗോഡ്: ജില്ലയിലെ സര്‍ക്കാര്‍ ആശുപത്രികളില്‍ അടിസ്ഥാന സൗകര്യം കൂടുതല്‍ ശക്തിപ്പെടുത്തി ആധുനിക സൗകര്യങ്ങള്‍ സജ്ജീകരിക്കുന്നത് പരിഗണിക്കുമെന്ന് മുഖ്യമന്ത്രി പിണറായി വിജയന്‍ പറഞ്ഞു. കാസര്‍ഗോഡ് ഗവ.മെഡിക്കല്‍ കോളജ് ആശുപത്രി പൂര്‍ത്തിയാക്കുന്നതിനു പ്രധാന പരിഗണന നല്‍കും. കണ്ണൂര്‍ പള്ളിക്കുന്ന് കൃഷ്ണ മേനോന്‍ സ്മാരക ഗവണ്‍മെന്‍റ് വനിതാ കോളേജില്‍ നടന്ന മേഖലാതല യോഗത്തില്‍ സംസാരിക്കുകയായിരുന്നു അദ്ദേഹം. കാസര്‍ഗോഡ് ഗവ. മെഡിക്കല്‍ കോളജില്‍ ഈ വര്‍ഷം തന്നെ കോഴ്‌സുകള്‍ ആരംഭിക്കാന്‍ ആവശ്യമായ നടപടികള്‍ പുരോഗമിക്കുകയാണെന്ന് ആരോഗ്യവകുപ്പ് സെക്രട്ടറി രാജന്‍ ഖോബ്രഗഡെ അറയിച്ചു. മെഡിക്കല്‍ കോളജ് ആശുപത്രിയായി കാസര്‍ഗോഡ് ജനറല്‍ ആശുപത്രി പ്രവര്‍ത്തിക്കും. കാസര്‍ഗോഡ് മെഡിക്കല്‍ കോളജില്‍ ഹോസ്പിറ്റല്‍ ബ്ലോക്കിന്‍റെ നിര്‍മാണം കിഫ്ബി പദ്ധതിയില്‍ ഉള്‍പ്പെടുത്തി പൂര്‍ത്തീകരിക്കുന്നതിന് ഉത്തരവായിട്ടുണ്ട്. നിലവില നിര്‍മാണ കരാറുകാരുമായി കരാര്‍ അവസാനിപ്പിക്കുന്നതിനുള്ള ഉടമ്പടികള്‍ കിറ്റ്‌കോ തയാറാക്കിയിട്ടുണ്ട്. മഞ്ചേശ്വരം താലൂക്ക് ആശുപത്രിയില്‍ കിഫ്ബി മുഖേനയുള്ള കെട്ടിടം നിര്‍മ്മിക്കുന്നതിനായി 17.47കോടിയുടെ ഭരണാനുമതി ലഭ്യമാക്കിയിട്ടുണ്ട്. കോവിഡ് കാലത്ത് ടാറ്റ കമ്പനിയുടെ സിഎസ്ആര്‍ ഫണ്ടില്‍ ഉള്‍പ്പെടുത്തി നിർമിച്ച ടാറ്റ ട്രസ്റ്റ് ആശുപത്രിയില്‍ പിഎം - എബിഎച്ച്‌ഐഎം പദ്ധതിയില്‍ ഉള്‍പ്പെടുത്തി 50 കിടക്കകളോടു കൂടിയ ക്രിട്ടിക്കല്‍ കെയര്‍ ബ്ലോക്ക് നിര്‍മ്മിക്കുന്നതിന് 20.75 കോടി രൂപയുടെ ഭരണാനുമതി ലഭ്യമാക്കിയിട്ടുണ്ട്. ഇതിന്‍റെ സങ്കേതിക അനുമതിക്കായി ഉള്ള നടപടികള്‍ പുരോഗമിക്കുന്നു. ലഭിച്ചാല്‍ ഉടന്‍ ടെന്‍ഡര്‍ നടപടി അഭിക്കുമെന്ന് ആരോഗ്യവകുപ്പ് സെക്രട്ടറി അറിയിച്ചു. എന്‍ഡോസള്‍ഫാന്‍ ദുരിതബാധിതരെ കണ്ടെത്തുന്നതിനുള്ള മെഡിക്കല്‍ ക്യാമ്പ് ഈ മാസം പൂര്‍ത്തിയാക്കുമെന്ന് ജില്ലാ കളക്ടര്‍ അറിയിച്ചു. കടലാക്രമണ പ്രതിരോധ പ്രവര്‍ത്തനങ്ങളുടെ ഭാഗമായി വലിയപറമ്പ പഞ്ചായത്തിലെ കടലാക്രമണം തടയാന്‍ ആവശ്യമായ പ്രവര്‍ത്തനങ്ങള്‍ അടുത്ത വര്‍ഷം ആരംഭിക്കുമെന്ന് ജല വിഭവ വകുപ്പ് സെക്രട്ടറി അവലോകന യോഗത്തില്‍ അറിയിച്ചു.

കടലേറ്റത്തിൽ തെങ്ങുകൾ കടപുഴകി

ഉദുമ: ജന്മ കടപ്പുറത്ത് രൂക്ഷമായ കടലേറ്റത്തിൽ നിരവധി തെങ്ങുകൾ കടപുഴകി. അവശേഷിച്ച ഒട്ടനവധി തെങ്ങുകളുടെ വേരുപടലം പൂർണമായും പുറത്തുകാണാവുന്ന നിലയിലാണ്. ഇവിടേക്കുള്ള റോഡിനും കേടുപാടുകൾ സംഭവിച്ചു. നാട്ടുകാർ മണൽച്ചാക്കുകൾ അട്ടിയിട്ടാണ് അവശേഷിക്കുന്ന തെങ്ങുകളേയും റോഡിനെയും സംരക്ഷിച്ചുനിർത്തുന്നത്. തൃക്കണ്ണാട് ക്ഷേത്രത്തിനു മുന്നിലെ പള്ളിവേട്ട മണ്ഡപത്തെ സംരക്ഷിക്കാൻ നാട്ടുകാരുടെയും ക്ഷേത്ര സംഘടനകളുടെയും നേതൃത്വത്തിൽ ചുറ്റുപാടും കരിങ്കല്ലുകൾ പാകി. കഴിഞ്ഞ ദിവസങ്ങളിൽ മണ്ഡപത്തിന്‍റെ അടിത്തറ മുഴുവനും പുറത്തുകാണാവുന്ന വിധത്തിൽ ചുറ്റുപാടുമുള്ള മണലെല്ലാം കടലെടുത്തിരുന്നു. സമീപത്തുള്ള കാപ്പിൽ, കോട്ടിക്കുളം, മാളികവളപ്പ്, ചിറമ്മൽ, ഗോപാലപേട്ട പ്രദേശങ്ങളും കടലേറ്റ ഭീഷണിയിലാണ്.

ഡോക്‌ടേഴ്‌സ് ദിനാചരണം

മാലോം: ഡോക്ടേഴ്സ് ദിനത്തിൽ വള്ളിക്കടവ് സെന്‍റ് സാവിയോ ഇംഗ്ലീഷ് മീഡിയം സ്കൂളിൽ വിവിധ മേഖലകളിൽ നിന്നുള്ള ഡോക്ടർമാരെ ആദരിച്ചു. പ്രിൻസിപ്പൽ സിസ്റ്റർ ടീന എസ്എബിഎസ് ഉദ്ഘാടനം ചെയ്തു. മലയോര മേഖലയിലെ ആദ്യകാല ഡോക്ടറായ കൊന്നക്കാട് കെകെഎം ഹോസ്പിറ്റലിലെ ഡോ. വിലാസിനിയെ വൈസ് പ്രിൻസിപ്പൽ സിസ്റ്റർ അലോൺസ് എസ്എബിഎസ് പൊന്നാടയണിയിച്ച് ആദരിച്ചു. മാലോം ലൂർദ് ദന്താശുപത്രിയിലെ ഡോ. ഫരീൻ, കൊന്നക്കാട് പിഎച്ച്സിയിലെ ഡോ. രേഷ്മ പി.കല്യാൺ, വള്ളിക്കടവ് ജെഎംജെ ആയുർവേദ ആശുപത്രിയിലെ ഡോ. ഭാഗ്യജോതി, മാലോം വി കെയർ ഹോസ്പിറ്റലിലെ ഡോ. വിഷ്ണു എന്നിവരെ അതത് ആശ്രുപതികളിലെത്തി ആദരിച്ചു. അധ്യാപകരായ ഉഷ, മേരി ആന്‍റക്സ്, ദീപ വിജയ്, സിസിലി, അഞ്ജു ഷാജി, സ്കൂൾ ലീഡർ അദ്വൈത് ഷിബു, ആൻ റിയ ഡെന്നി, ഐറിൻ സണ്ണി, ആര്യനന്ദ എന്നിവർ നേതൃത്വം നല്കി. പാലാവയൽ: ഡോക്ടേഴ്സ് ദിനാചരണത്തിന്‍റെ ഭാഗമായി പാലാവയൽ സെന്‍റ് ജോൺസ് ഹയർ സെക്കൻഡറി സ്കൂളിലെ എൻഎസ്എസ് വിദ്യാർഥികൾ ആലീസ് മെഡിക്കൽ സെന്‍ററിലെ ഡോക്ടർമാരെ പൊന്നാടയണിച്ച് ആദരിച്ചു. പ്രിൻസിപ്പൽ ഡോ. മെൻഡലിൻ മാത്യു, എൻഎസ്എസ് പ്രോഗ്രാം ഓഫീസർ സിന്ധു ജെയിംസ്, ജോമി ജോസഫ്, കെ.ജെ. സജിമോൻ എന്നിവർ നേതൃത്വം നല്കി. വെള്ളരിക്കുണ്ട്: സെന്‍റ് ജൂഡ്സ് ഹയർ സെക്കൻഡറി സ്കൂളിലെ എസ്പിസി, എൻസിസി യൂണിറ്റുകളുടെ ആഭിമുഖ്യത്തിൽ ഡോക്ടർമാരായ അബിത തോമസിനേയും ബിനിൽ ഷൈജനേയും പൊന്നാടയണിച്ച് ആദരിച്ചു. സ്കൂൾ മാനേജർ റവ.ഡോ. ജോൺസൺ അന്ത്യാംകുളം, പ്രിൻസിപ്പൽ റവ.ഡോ. സന്തോഷ് കെ. പീറ്റർ, മുഖ്യാധ്യാപകൻ എം.യു. ജോസുകുട്ടി, അശ്വിൻ ബിനു എന്നിവർ നേതൃത്വം നല്കി. കരിവേടകം: ഡോക്ടേഴ്‌സ് ദിനാചരണത്തിന്‍റെ ഭാഗമായി കരിവേടകം എയുപി സ്‌കൂളില്‍ പൂര്‍വിദ്യാര്‍ഥിയായ ഡോ.എസ്. വിദ്യാനാഥിനെ ആദരിച്ചു. റിട്ട. മുഖ്യാധ്യാപകന്‍ കെ. നാരായണന്‍ ഉദ്ഘാടനം ചെയ്തു. പിടിഎ പ്രസിഡന്‍റ് സണ്ണി തോമസ് അധ്യക്ഷതവഹിച്ചു. മുഖ്യാധ്യാപിക സി.ജെ. എല്‍സമ്മ, സ്റ്റാഫ് സെക്രട്ടറി നോബിള്‍ ജോസ്, പ്രോഗ്രാം കണ്‍വീനര്‍ റെനീഷ് തോമസ് എന്നിവര്‍ സംസാരിച്ചു. കാഞ്ഞങ്ങാട്: ഡോക്ടേഴ്‌സ് ദിനാചരണത്തിന്‍റെ ഭാഗമായി കാഞ്ഞങ്ങാട് ബെത്‌ലഹേം മാതൃവേദി ഫൊറോന ഭാരവാഹികളുടെ നേതൃത്വത്തില്‍ വിശ്രമജീവിതം നയിക്കുന്ന കാഞ്ഞങ്ങാട്ടെ സീനിയര്‍ ഡോക്ടര്‍ രമേഷ് ഭട്ടിനെ ആദരിച്ചു. പ്രസിഡന്‍റ് മേഴ്‌സി സജി വാതപ്പള്ളി, സെക്രട്ടറി ത്രേസ്യാമ്മ ഇളമതയില്‍, വൈസ്പ്രസിഡന്‍റ് സിസമ്മ പഴയപറമ്പില്‍, സെനറ്റ് മെംബര്‍ മോളി ബോസ് ഇഞ്ചക്കല്‍ എന്നിവര്‍ സംബന്ധിച്ചു. കാഞ്ഞങ്ങാട്: കാഞ്ഞങ്ങാട് ലയണ്‍സ് ക്ലബിന്‍റെ നേതൃത്വത്തില്‍ ഡോക്ടര്‍മാരേയും ചാര്‍ട്ടേഡ് അക്കൗണ്ടന്‍റുമാരേയും ആദരിച്ചു. ഡോ. ബല്‍റാം നമ്പ്യാര്‍, ഡോ. ബാലസുബ്രഹണ്യന്‍, ഡോ.എം.കെ. ജോസ്, ഡോ. ത്രേസ്യാമ ജോസ്, ഡോ. ജയപ്രസാദ് കോടോത്ത്, ചാര്‍ട്ടേഡ് അക്കൗണ്ടന്‍റുമാരായ കെ. ശ്രീനിവാസ് ഷേണായി, എച്ച്.എസ്. ഭട്ട്, ജോര്‍ജ് തോമസ്, ആനന്ദ് ജോര്‍ജ് എന്നിവര്‍ ആദരം ഏറ്റുവാങ്ങി. പ്രസിഡന്‍റ് കണ്ണന്‍ പാര്‍ഥസാരഥി, സെക്രട്ടറി മധു മഠത്തില്‍, ട്രഷറര്‍ വി.വി. രാജേഷ്, ടൈറ്റസ് തോമസ്, കെ. ഗോപി, പി.പി. കുഞ്ഞികൃഷ്ണന്‍ നായര്‍, വി. സജിത്ത്, പി. ശ്യാംപ്രസാദ് എന്നിവര്‍ സംസാരിച്ചു.

കടലെടുത്തു, കണ്വതീർഥയുടെ വിനോദസഞ്ചാര സ്വപ്നങ്ങൾ

മഞ്ചേശ്വരം: കേരളത്തിന്‍റെ വടക്കേയറ്റമായ മഞ്ചേശ്വരത്തെ വിനോദസഞ്ചാരമേഖലയിൽ അടയാളപ്പെടുത്തുമെന്ന് പ്രതീക്ഷിച്ച കണ്വതീർഥ ബീച്ച് കടലേറ്റത്തിൽ നിലംപരിശായി. വിനോദസഞ്ചാര വികസനത്തിന്‍റെ ഭാഗമായി 15 ലക്ഷം രൂപ ചെലവിൽ ഇവിടെ നിർമിച്ച നടപ്പാതയും ഇരിപ്പിടങ്ങളും റെയിൻ ഷെൽട്ടർ, കുട്ടികളുടെ പാർക്ക്, ബയോഫെൻസിംഗ് തുടങ്ങിയ സംവിധാനങ്ങളും പാടേ തകർന്നു. ബീച്ചിന്‍റെ നടത്തിപ്പിനായി ടെൻഡർ ക്ഷണിക്കാനുള്ള ഒരുക്കങ്ങൾ തുടങ്ങുന്നതിനിടയിലാണ് ഇതുവരെ പൂർത്തിയായ നിർമാണങ്ങളെല്ലാം ഏറെക്കുറെ തകർന്നടിഞ്ഞത്. ചട്ടഞ്ചാലിലെ ടാറ്റ കോവിഡ് ആശുപത്രി പൊളിച്ചുമാറ്റിയപ്പോൾ കിട്ടിയ രണ്ടു വലിയ സ്റ്റീൽ കണ്ടെയ്നറുകൾ നേരത്തേ ഇവിടെ എത്തിച്ചിരുന്നു. ഇവ ബീച്ചിൽ സ്ഥാപിച്ച് അറ്റകുറ്റപണികൾ നടത്തി പെയിന്‍റ് ചെയ്ത് മനോഹരമാക്കി വിശ്രമകേന്ദ്രങ്ങളായി ഒരുക്കാനായിരുന്നു പദ്ധതി. കടലേറ്റത്തിൽ ഇവ രണ്ടും കടലിലേക്ക് മറിഞ്ഞുവീണ നിലയിലാണ്. രണ്ടുവർഷം മുമ്പ് കണ്വതീർഥ ബീച്ചിൽ വികസനപ്രവർത്തനങ്ങൾ തുടങ്ങിയ കാലത്ത് പദ്ധതിപ്രദേശം കടലിൽ നിന്ന് 200 മീറ്ററിലധികം അകലെയായിരുന്നു. ചുരുങ്ങിയ കാലത്തിനുള്ളിൽ ഇത്രയും ഉള്ളിലേക്ക് കടൽ കടന്നുകയറിയതോടെയാണ് പൂർത്തിയായ നിർമാണങ്ങൾപോലും തകരുന്ന നിലയായത്. ബിച്ചിലേക്കുള്ള റോഡിന്‍റെ ഒരു ഭാഗവും കടലേറ്റത്തിൽ തകർന്നു. അടുത്തുള്ള ജല അഥോറിറ്റിയുടെ കൂറ്റൻ കോൺക്രീറ്റ് ടാങ്കും അപകടഭീഷണിയിലാണ്. കടൽ ഇത്രയും അടുത്തെത്തിയതോടെ റോഡിന്‍റെ മറുവശത്ത് താമസിക്കുന്ന കുടുംബങ്ങളും ഭീതിയിലായി. തീരത്തെ കാറ്റാടി, ബദാം മരങ്ങൾക്കിടയിലൂടെ നടപ്പാതയും ഇടയ്ക്ക് കോട്ടേജുകളും ലഘുഭക്ഷണശാലയുമൊക്കെ വിനോദസഞ്ചാര പദ്ധതിയിൽ വിഭാവനം ചെയ്തിരുന്നു. കടലേറ്റത്തിൽ മരങ്ങളിലേറെയും കടപുഴകിയതോടെ അതും പാഴ്ക്കിനാവായി. കണ്വതീർഥയിൽനിന്ന് ഏതാനും കിലോമീറ്ററുകൾ അകലെ കർണാടകയുടെ ഭാഗത്ത് അടുത്തിടെ കടലിന്‍റെ ഒരു ഭാഗം നികത്തി പുലിമുട്ട് നിർമിച്ചതാണ് ഇവിടെ ഇത്രയധികം ഉള്ളിലേക്ക് കടൽ കടന്നുകയറാൻ ഇടയാക്കിയതെന്ന് നാട്ടുകാർ പറയുന്നു. ഉപ്പളയിലും കടലേറ്റത്തിൽ വ്യാപക നാശം ഉപ്പള: രൂക്ഷമായ കടലേറ്റത്തിൽ ഉപ്പള ഹനുമാൻ നഗർ, ശാരദ നഗർ, ബേരിക്ക, പെരിങ്കടി, മുട്ടം, മണിമുണ്ട ഭാഗങ്ങളിൽ വ്യാപക നാശം. ഈ ഭാഗങ്ങളെ ബന്ധിപ്പിക്കുന്ന തീരദേശ റോഡും തകർന്നു. പലയിടങ്ങളിലും കാറ്റാടിമരങ്ങളും തെങ്ങുകളും കടപുഴകി വീണു. ബേരിക്കയിൽ കടലേറ്റം തടയുന്നതിനായി സ്ഥാപിച്ച ജിയോബാഗ് കടൽഭിത്തിയും കടലെടുത്തു. 2018 ൽ കാസർഗോഡ് വികസന പാക്കേജിൽ ഉൾപ്പെടുത്തി നിർമിച്ച ഉപ്പള ഹനുമാൻ നഗർ റോഡ് മുൻവർഷങ്ങളിലും കടലേറ്റത്തിൽ അങ്ങിങ്ങായി ടാറിംഗ് ഇളകി തകർന്നിരുന്നു. ഈ വർഷം വീണ്ടും ലക്ഷങ്ങൾ ചെലവിട്ട് ഈ ഭാഗങ്ങൾ കോൺക്രീറ്റ് ചെയ്തിട്ടും ഫലമുണ്ടായില്ല. പല വീടുകളുടെയും അകത്തേക്കുപോലും തിരമാലകൾ അടിച്ചുകയറി. പുറത്തെങ്ങും ചെളിയും മാലിന്യവും നിറഞ്ഞതോടെ പലർക്കും വീടിനു പുറത്തിറങ്ങാൻ കഴിയാതായി. കടലേറ്റത്തെ കുറച്ചെങ്കിലും തടഞ്ഞുനിർത്താൻ ഇവിടെ കരിങ്കല്ലുകൊണ്ടുള്ള കടൽഭിത്തിയോ ടെട്രാപോഡ് സംവിധാനമോ സ്ഥാപിക്കണമെന്നാണ് നാട്ടുകാരുടെ ആവശ്യം.

റിവൈവ് 2k25 യുവജന സമ്മേളനം

ചിറ്റാരിക്കാൽ: തോമാപുരം ഇടവകയിലെ എസ്എംവൈഎം യുവജന കൂട്ടായ്മ റിവൈവ് 2k25 ഫാ. ആൽബിൻ തെങ്ങുംപള്ളി ഉദ്ഘാടനം ചെയ്തു. ഫൊറോന വികാരി റവ. ഫാ. മാണി വേൽവട്ടം അധ്യക്ഷതവഹിച്ചു. എസ്എംവൈഎം ഫൊറോന ഡയറക്ടർ ഫാ. ജോജി ചക്കനാനിക്കൽ വാർഷിക പദ്ധതി ഡീക്കൻ അമൽ പൂക്കുളത്തേലിന് നൽകി പ്രകാശനം ചെയ്തു. ഫാ. ജൂബിൻ കണിപറമ്പിൽ, സിസ്റ്റർ റോസ്ന എസ്എബിഎസ്, ആനിമേറ്റർ ഷിജിത്ത് കുഴുവേലിൽ, യൂണിറ്റ് പ്രസിഡന്‍റ് ആശിഷ് പുതോത്ത്, ജോയൽ പരവംപറമ്പിൽ, അമിത വാലുമ്മേൽ, ജോബിൻ കോയിക്കൽ, അതുൽ ചിരട്ടയോലിൽ, എബിൻ മഞ്ഞളാങ്കൽ എന്നിവർ സംസാരിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]