ADVERTISEMENT

ADVERTISEMENT

വെള്ളച്ചാല്‍ എംആര്‍എസില്‍ വിജയോത്സവം നടത്തി

ചെറുവത്തൂര്‍: പട്ടികജാതി വികസന വകുപ്പിനു കീഴിലുള്ള വെള്ളച്ചാല്‍ മോഡല്‍ റസിഡന്‍ഷ്യല്‍ സ്‌കൂളില്‍ കഴിഞ്ഞ എസ്എസ്എല്‍സി പരീക്ഷയില്‍ മുഴുവന്‍ വിഷയങ്ങളിലും എ പ്ലസ് നേടിയ വിദ്യാര്‍ഥികളെ അനുമോദിച്ചു. വിവിധ കലാ കായിക മത്സരങ്ങളിലെ വിജയികള്‍ക്കും ഉപഹാരം നല്‍കി. എം. രാജഗോപാലന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് അംഗം സി.വി. രാധാകൃഷ്ണന്‍ അധ്യക്ഷത വഹിച്ചു. സംസ്ഥാന പട്ടികജാതി ഉപദേശക സമിതിയംഗം കൊട്ടറ വാസുദേവ് മുഖ്യപ്രഭാഷണം നടത്തി. ജില്ലാ പട്ടികജാതി വികസന ഓഫീസര്‍ എസ്. മീനാറാണി, ഡയറ്റ് പ്രിന്‍സിപ്പല്‍ ഡോ. രഘുരാമ ഭട്ട്, നീലേശ്വരം ബ്ലോക്ക് പട്ടികജാതി വികസന ഓഫീസര്‍ സതീഷ് കുമാര്‍, പി.ബി. ബഷീര്‍, സി. പ്രീതിക, കെ.എന്‍. പ്രഭ, മുഖ്യാധ്യാപകന്‍ ടി.എസ്. അനില്‍ കുമാര്‍, സ്റ്റാഫ് സെക്രട്ടറി എം.സി. നിഖിലേഷ് എന്നിവര്‍ പ്രസംഗിച്ചു.

ADVERTISEMENT

മുൻസിഫ് മജിസ്ട്രേറ്റ് കോടതി വെള്ളരിക്കുണ്ടിൽ ആരംഭിക്കണം

വെള്ളരിക്കുണ്ട്: വെള്ളരിക്കുണ്ടിൽ അനുവദിച്ച മുൻസിഫ് മജിസ്ട്രേറ്റ് കോടതി ഉടൻ പ്രവർത്തനം ആരംഭിക്കണമെന്നും തദ്ദേശ സ്വയംഭരണ സ്ഥാപനങ്ങളുടെ ഫണ്ട് ഉപയോഗിച്ച് വെളളരിക്കുണ്ട് ടൗണിൽ സിസിടിവി സ്ഥാപിക്കണമെന്നും വെള്ളരിക്കുണ്ട് കുടുംബാരോഗ്യകേന്ദ്രത്തിൽ മുഴുവൻ സമയ ഡോക്ടർമാരെ നിയമിക്കണമെന്നും വ്യാപാരി വ്യവസായി ഏകോപനസമിതി വെള്ളരിക്കുണ്ട് യൂണിറ്റ് വാർഷിക ജനറൽബോഡിയോഗം ആവശ്യപ്പെട്ടു. വ്യാപാരഭവനിൽ നടന്ന പരിപാടി ജില്ലാ പ്രസിഡന്‍റ് കെ. അഹമ്മദ് ഷെരീഫ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് തോമസ് ചെറിയാൻ അധ്യക്ഷതവഹിച്ചു. ജില്ലാ ജനറൽ സെക്രട്ടറി കെ.ജെ. സജി മുഖ്യപ്രഭാഷണം നടത്തി. തോമസ് കാനാട്ട്, മായ രാജേഷ്, വിജയൻ കോട്ടയ്ക്കൽ, പി.എം. ബേബി, സാം സെബാസ്റ്റ്യൻ, കുസുമം ബിനോയി, ഷോണി എം. ജോർജ് എന്നിവർ സംസാരിച്ചു. യൂണിറ്റ് ജനറൽ സെക്രട്ടറി ബാബു കല്ലറയ്ക്കൽ സ്വാഗതവും ട്രഷറർ പി.വി. ഷാജി നന്ദിയും പറഞ്ഞു.

അപകടക്കെണിയൊരുക്കി നടുറോഡിലെ ബാരിക്കേഡുകള്‍

കാഞ്ഞങ്ങാട്: കാസര്‍ഗോഡ്-കാഞ്ഞങ്ങാട് കെഎസ്ടിപി റോഡില്‍ ആലാമിപ്പള്ളി പുതിയ ബസ് സ്റ്റാന്‍ഡിന് സമീപം നടുറോഡില്‍ സ്ഥാപിച്ച ബാരിക്കേഡുകള്‍ യാത്രക്കാരുടെ ജീവന് ഭീഷണിയാകുന്നു. ദിനംപ്രതി ആയിരക്കണക്കിന് വാഹനങ്ങള്‍ കടന്നുപോകുന്ന റോഡിന്‍റെ നടുവിലായാണ് മുന്നറിയിപ്പ് ഇല്ലാതെ ബാരിക്കേഡ് സ്ഥാപിച്ചിരിക്കുന്നത്. കഴിഞ്ഞ രണ്ടു മാസത്തിനിടയ്ക്ക് ഇരുചക്രവാഹനങ്ങള്‍ ഉള്‍പ്പെടെ നിരവധി വാഹനങ്ങള്‍ ഈ ബാരിക്കേഡില്‍ തട്ടി അപകടത്തില്‍പെട്ടിട്ടുണ്ട്. റോഡിന്‍റെ നടുവിലായുള്ള വലിയ കുഴികളും അപകട ഭീഷണി ഉയര്‍ത്തുന്നുണ്ട്. ഈ വിഷയത്തില്‍ അധികാരികളുടെ ശ്രദ്ധ പതിയാന്‍ യാത്രക്കാരുടെ ജീവന്‍ പൊലിയാണോ എന്നാണ് നാട്ടുകാര്‍ ചോദിക്കുന്നത്.

കരിച്ചേരിക്കുന്നിൽ മണ്ണിടിച്ചിൽ ഭീഷണി

ബന്തടുക്ക: ബന്തടുക്ക-പൊയിനാച്ചി റോഡിൽ അഞ്ച് ഹെയർപിൻ വളവുകൾ ഉൾക്കൊള്ളുന്ന കരിച്ചേരിക്കുന്നിൽ മണ്ണിടിച്ചിൽ ഭീഷണി. ഈ വർഷം മഴക്കാലം തുടങ്ങിയതിനുശേഷം വളവുകളോടു ചേർന്ന് ഒൻപതിടങ്ങളിലാണ് മണ്ണിടിച്ചിലുണ്ടായത്. മണ്ണിടിച്ചിലിന്‍റെ തോത് താരതമ്യേന കുറവായതിനാൽ ഇതുവരെ ഗതാഗത തടസം ഉണ്ടായില്ല. എന്നാൽ ഇത്തവണ മണ്ണിടിച്ചിൽ മുൻവർഷങ്ങളിലേതിനേക്കാൾ കൂടുതലാണെന്ന് നാട്ടുകാർ പറയുന്നു. ചിലയിടങ്ങളിൽ റോഡിനോടു ചേർന്നുള്ള ഭാഗത്ത് മലയിലെ മണ്ണ് ഇടിഞ്ഞുവീഴാൻ പാകത്തിൽ ഇളകിനിൽക്കുന്നതും ആശങ്കയാകുന്നുണ്ട്. ആറുവർഷം മുമ്പാണ് കുന്നിന്‍റെ ഭാഗങ്ങൾ ഇടിച്ച് റോഡ് വീതികൂട്ടി നവീകരിച്ചത്. വയനാട്ടിലേക്കുള്ള ചുരംപാതയെ അനുസ്മരിപ്പിക്കുന്ന തരത്തിലുള്ള ഹെയർപിൻ വളവുകളും വ്യൂ പോയിന്‍റുകളും പാതയുടെ പ്രത്യേകതകളായി എടുത്തുകാണിക്കപ്പെട്ടിരുന്നു. രണ്ടാം നമ്പർ വളവിൽ കരിച്ചേരി വിളക്കുമാടം ക്ഷേത്രത്തിലേക്കുള്ള റോഡ് ആരംഭിക്കുന്ന ഭാഗത്താണ് ഇത്തവണ കാര്യമായി മണ്ണിടിഞ്ഞത്. ഇവിടെ 20 അടിയോളം ഉയരത്തിൽ നിന്നാണ് കല്ലുകളും മണ്ണും റോഡിനോടു ചേർന്ന ഭാഗത്തേക്ക് പതിച്ചിരിക്കുന്നത്. രണ്ടാം നമ്പർ വളവിനും മൂന്നാം നമ്പർ വളവിനും ഇടയിലുള്ള ഭാഗത്തും നാലാമത്തെ വളവിനോടു ചേർന്നും അഞ്ചാം നമ്പർ വളവിന് സമീപം മൂന്നിടങ്ങളിലും മണ്ണിടിഞ്ഞിട്ടുണ്ട്. മണ്ണിടിച്ചിൽ സാധ്യതയുള്ള ഭാഗങ്ങളിൽ മതിയായ സുരക്ഷാ ക്രമീകരണങ്ങൾ ഏർപ്പെടുത്തിയില്ലെങ്കിൽ ഇനിയും മഴ ശക്തിപ്രാപിച്ചാൽ ഇതുവഴി മലയോര മേഖലയിലേക്കുള്ള ഗതാഗതം തടസപ്പെടുന്ന നിലയാകുമെന്ന് നാട്ടുകാർ ചൂണ്ടിക്കാട്ടുന്നു.

മാര്‍ത്തോമ്മാ ബധിരവിദ്യാലയം സ്ഥാപകദിനാഘോഷം

ചെര്‍ക്കള: മാര്‍ത്തോമ്മാ ബധിരവിദ്യാലയത്തിന്‍റെ 45-ാം വാര്‍ഷികാഘോഷം എം. രാജഗോപാലന്‍ എംഎല്‍എ ഉദ്ഘാടനം ചെയ്തു. മാര്‍ത്തോമ്മാസഭ വൈദിക ട്രസ്റ്റി ഫാ. ഡേവിഡ് ഡാമിയന്‍ അധ്യക്ഷതവഹിച്ചു. 2025ലെ എസ്എസ്എല്‍സി, പ്ലസ്ടു വിജയികളായ വിദ്യാര്‍ഥികളെ ചടങ്ങില്‍ ആദരിച്ചു. മികച്ച വിദ്യാര്‍ഥിക്കുള്ള പുരസ്‌കാരം സി.കെ. വര്‍ഷിത ഏറ്റുവാങ്ങി. പഞ്ചായത്ത് വികസനകാര്യ സ്ഥിരംസമിതി അധ്യക്ഷന്‍ ഹസൈനാര്‍ ബദരിയ മുഖ്യാതിഥി ആയിരുന്നു. തിരുവനന്തപുരം ജഗതി ബധിരവിദ്യാലയ അധ്യാപകന്‍ പി. റോബിന്‍സണ്‍, മാര്‍ത്തോമാ ബധിര കോളജ് പ്രിന്‍സിപ്പല്‍ ബിജു ഏബ്രഹാം, വൈസ് പ്രിന്‍സിപ്പല്‍ ഫാ. ജോര്‍ജ് വര്‍ഗീസ്, ഡോ.പി.കെ. ജയരാജ്, എസ്. ഷീല, ആര്‍. ഭാസ്‌കരന്‍ എന്നിവര്‍ സംസാരിച്ചു. സ്‌കൂള്‍ അഡ്മിനിസ്‌ട്രേറ്റര്‍ ഫാ. മാത്യു ബേബി സ്വാഗതവും സ്റ്റാഫ് സെക്രട്ടറി കെ.ടി. ജോഷിമോന്‍ നന്ദിയും പറഞ്ഞു.

കലിയടങ്ങാതെ കടൽ; അജാനൂർ കടപ്പുറത്തെ കോൺക്രീറ്റ് ഭിത്തിയും തകർന്നു

കാഞ്ഞങ്ങാട്: അജാനൂർ കടപ്പുറത്ത് രൂക്ഷമായ കടലേറ്റത്തിൽ ദിവസങ്ങളായി അപകടാവസ്ഥയിൽനിന്ന കോൺക്രീറ്റ് സംരക്ഷണഭിത്തിയും ഒടുവിൽ കടലിലേക്ക് മറിഞ്ഞു. അടുത്തുള്ള ഫിഷ് ലാൻഡിംഗ് സെന്‍റർ കെട്ടിടവും റോഡും സംരക്ഷിക്കുന്നതിനായാണ് ഒരു വർഷം മുമ്പ് പഞ്ചായത്ത് അഞ്ചരലക്ഷം രൂപ ചെലവിട്ട് കോൺക്രീറ്റ് ഭിത്തി നിർമിച്ചത്. ഇത് തകർന്നതിനു പിന്നാലെ തീരദേശത്തേക്കുള്ള ടാർ റോഡിന്‍റെ നല്ലൊരു ഭാഗവും കടലെടുത്തു. ആഞ്ഞടിക്കുന്ന തിരമാലകൾ മണൽ വാരിയെടുത്തതോടെ കോൺക്രീറ്റ് സംരക്ഷണഭിത്തിയുടെ അടിത്തറ പോലും പുറത്തുകാണാവുന്ന വിധത്തിലായതായി ദിവസങ്ങൾക്കുമുമ്പ് ദീപിക റിപ്പോർട്ട് ചെയ്തിരുന്നു. മഴ ഇനിയും ശക്തിപ്രാപിച്ചാൽ ഫിഷ് ലാൻഡിംഗ് സെന്‍റർ കെട്ടിടവും ഭീഷണിയിലാകും. റോഡ് തകർന്നതോടെ ഇവിടേക്കുള്ള വഴിമുട്ടിയിരിക്കുകയാണ്.

ലൈസന്‍സില്ലാത്ത പന്നിഫാമിനെതിരേനടപടി

മഞ്ചേശ്വരം: വോര്‍ക്കാടി പഞ്ചായത്തിലെ ബേക്കറി-തൗടുഗോളി പ്രധാന റോഡരികിലെ ജംഗളയില്‍ ലൈസന്‍സ് ഇല്ലാതെ പ്രവര്‍ത്തിച്ചുവരുന്ന പന്നിഫാമില്‍ തദ്ദേശസ്വയംഭരണ വകുപ്പിന്‍റെ ജില്ലാ എന്‍ഫോഴ്‌സ്‌മെന്‍റ് സ്‌ക്വാഡ് പരിശോധന നടത്തി. പരിശോധനയില്‍ ഗുരുതരമായ നിയമലംഘനങ്ങള്‍ നടക്കുന്നതായി കണ്ടെത്തി. 500 ലധികം പന്നികളെ വളര്‍ത്തുന്ന ഫാമില്‍ നിന്നുള്ള മലിനജലം ഫാം ഉടമയുടെ സ്ഥലത്ത് തന്നെ തുറസായ കുഴിയിലേക്ക് ഒഴുക്കി വിടുകയാണ് ചെയ്തുകൊണ്ടിരിക്കുന്നത്. പുരയിടത്തിന്‍റെ താഴ്ഭാഗത്ത് കൂടി ഒഴുകുന്ന അരുവിയിലേക്കും ഫാമില്‍ നിന്നുള്ള മലിനജനം ഒഴുകിയെത്തുന്നതായി കണ്ടെത്തിയിട്ടുണ്ട്. ഇവിടെ സ്ഥാപിച്ച ബയോഗ്യാസ് പ്ലാന്‍റ് പ്രവര്‍ത്തനരഹിതമാണ്. പരിസരത്തുള്ളവര്‍ക്കും യാത്രക്കാര്‍ക്കും ബുദ്ധിമുട്ടാകുന്ന സ്ഥാപനത്തില്‍ നിന്നും എത്രയും വേഗം നിലവിലുള്ള പന്നികളെ ഷിഫ്റ്റ് ചെയ്യുന്നതിനും ശാസ്ത്രീയമായും ലൈസന്‍സോടുകൂടിയും മാത്രം പുനരാരംഭിക്കുന്നതിനും ഉടമയെ അറിയിക്കുകയും ലംഘനത്തിന് കേരള പഞ്ചായത്ത് രാജ് ആക്ട് 219 കെ പ്രകാരം 25,000 രൂപ പിഴ ചുമത്തുകയും നിയമലംഘനം ആവര്‍ത്തിക്കുന്ന പക്ഷം നിയമനടപടികളുമായി മുന്നോട്ടുപോകുന്നതിന് പഞ്ചായത്തിന് നിര്‍ദേശം നല്‍കുകയും ചെയ്തു.

ഡോക്ടർമാർക്ക് ആദരവുമായി സൈക്കിൾ റൈഡ്

തൃക്കരിപ്പൂർ: ദേശീയ ഡോക്ടേഴ്സ് ദിനത്തിൽ ആതുര സേവന രംഗത്തെ ഡോക്ടർമാർക്ക് ആദരവർപ്പിച്ച് തൃക്കരിപ്പൂർ സൈക്ലിംഗ് ക്ലബിന്‍റെ നേതൃത്വത്തിൽ സൈക്കിൾ റൈഡ് നടത്തി. തീരദേശപാതയിലൂടെ തൃക്കരിപ്പൂരിൽ നിന്നും നീലേശ്വരം വരെയും തിരിച്ചുമായിരുന്നു സൈക്കിൾ യാത്ര. വെല്ലുവിളി നിറഞ്ഞ തൊഴിൽസാഹചര്യങ്ങളിലും യുദ്ധങ്ങളിലും ജീവൻ നഷ്ടമായ ഡോക്ടർമാരെ അനുസ്മരിച്ചാണ് സൈക്കിൾ യാത്ര നടത്തിയത്. അനുബന്ധിച്ച് നടന്ന ആദര ചടങ്ങിൽ തൃക്കരിപ്പൂർ സൈക്ലിംഗ് ക്ലബ് പ്രസിഡന്‍റ് ടി.എം.സി. ഇബ്രാഹിം അധ്യക്ഷതവഹിച്ചു. പയ്യന്നൂർ താലൂക്കാശുപത്രി സീനിയർ കൺസൾട്ടന്‍റ് ഡോ.ടി. അബ്ദുൽ ജലീൽ മുഖ്യാതിഥിയായിരുന്നു. സെക്രട്ടറി അരുൺ നാരായണൻ, ട്രഷറർ ഇർഷാദ് ഇസ്മായിൽ, സിവിൽ പോലീസ് ഓഫീസർ രാജേഷ് കുഞ്ഞിവീട്ടിൽ എന്നിവർ സംസാരിച്ചു. സൈക്കിൾ റൈഡിന് റഹ്‌മാൻ കാങ്കോൽ, സുബിൻ അച്ചാംതുരുത്തി, മുസ്തഫ മാത്താണ്ഡൻ, ബി.സി. യാസിർ, കെ.വി. ഷാജി, എം.സി.ടി. സിഫ്‌സീർ, കാർത്തിക് രാജ് എടാട്ടുമ്മൽ, എ.കെ. ഷൗക്കത്തലി, എ.ജി. ഫായിസ് എന്നിവർ നേതൃത്വം നൽകി.

വി.വി. കുഞ്ഞമ്പു അനുസ്മരണം

ചെറുവത്തൂർ: മുൻ എംഎൽഎയും സിപിഎം നേതാവുമായിരുന്ന വി.വി. കുഞ്ഞമ്പുവിന്‍റെ 53ാം ചരമവാർഷികം വിവിധ പരിപാടികളോടെ ആചരിച്ചു. ടൗണിൽ പ്രകടനവും അനുസ്മരണ സമ്മേളനവും നടന്നു. ചെറുവത്തൂർ ഓപ്പൺ ഓഡിറ്റോയത്തിൽ സിപിഎം സംസ്ഥാന സെക്രട്ടറിയേറ്റ് അംഗം എം.വി. ജയരാജൻ ഉദ്ഘാടനം ചെയ്തു. ടി. നാരായണൻ അധ്യക്ഷതവഹിച്ചു. എം. രാജഗോപാലൻ എംഎൽഎ, എം.വി. ബാലകൃഷ്ണൻ, പി. ജനാർദനൻ, മാധവൻ മണിയറ, രജീഷ് വെള്ളാട്ട്, പി.സി. സുബൈദ, കെ. ബാലകൃഷണൻ, എ.വി. ദാമോദരൻ എന്നിവർ പ്രസംഗിച്ചു.

ജോസ് കൊട്ടാരത്തിലിന് ആദരം

കാഞ്ഞങ്ങാട്: ഭിന്നശേഷിക്കാർക്ക് പഠനവും പരിചരണവും പുനരധിവാസവും നല്കി സമൂഹത്തിന്‍റെ മുഖ്യധാരയിലേക്ക് കൈപിടിച്ചുയർത്തിക്കൊണ്ട് സേവനമേഖലയിൽ വ്യക്തിമുദ്ര പതിപ്പിച്ച കാഞ്ഞങ്ങാട് ജീവോദയ ബഡ്സ് സ്കൂൾ ചെയർമാൻ ജോസ് കൊട്ടാരത്തിലിന് ഡിഫറന്‍റ്‌ലി ഏബിൾഡ് പീപ്പിൾസ് ലീഗിന്‍റെ (ഡിഎപിഎൽ) ആദരം. കാഞ്ഞങ്ങാട് ടൗൺഹാളിൽ നടന്ന ചടങ്ങിൽ മുസ്ലീംലീഗ് സംസ്ഥാന പ്രവർത്തകസമിതി അംഗം എം.പി. ജാഫർ ജോസ് കൊട്ടാരത്തിലിനെ പൊന്നാടയണിയിച്ച് ആദരിച്ചു. എംബിഎം ചാരിറ്റബിൾ ട്രസ്റ്റ് ചെയർമാൻ ഡോ.എം.ആർ. നമ്പ്യാർ, ഭിന്നശേഷിക്കാരുടെ രക്ഷിതാക്കളുടെ സംഘടനയായ പെയ്ഡിന്‍റെ ജില്ലാ പ്രസിഡന്‍റ് ടി. മുഹമ്മദ് അസ്ലം, പെരിയ മഹാത്മ ബഡ്സ് സ്കൂൾ പ്രിൻസിപ്പൽ ദീപ പേരൂർ, കേരള മീഡിയ അക്കാദമി ഫെലോഷിപ്പ് നേടിയ മാധ്യമപ്രവർത്തകൻ ഫസലുർ റഹ്മാൻ എന്നിവരെയും ആദരിച്ചു.

എയിംസിന് മറ്റേതു ജില്ലയേക്കാളും അർഹത കാസർഗോഡിന്: ദയാബായി

രാജപുരം: കേരളത്തിൽ എയിംസിന് ഏറ്റവും അർഹതയുള്ള ജില്ല കാസർഗോഡ് ആണെന്നും മറ്റേതു ജില്ലയെക്കാളും ചികിത്സ അപര്യാപ്തത ഉള്ളത് എവിടെയാണെന്നും സാമൂഹ്യപ്രവർത്തക ദയാബായി രാജപുരം സെന്‍റ് പയസ് ടെൻത് കോളജിലെ വിദ്യാർഥികളുമായി സംവദിക്കവേ അഭിപ്രായപ്പെട്ടു. എൻഡോസൾഫാൻ ദുരിതബാധിതരുടെ പ്രശ്നങ്ങൾ സമാനതകൾ ഇല്ലാത്തതാണ്.ഗുരുതരമായ ചികിത്സാപിഴവുകൾ കാസർഗോഡ് ജില്ലയിൽ റിപ്പോർട്ട് ചെയ്യപ്പെട്ടിട്ടുള്ളത് ചികിത്സ സൗകര്യങ്ങളുടെ അപര്യാപ്തത മൂലമാണ്. കാസർഗോഡ് അനുവദിക്കപ്പെട്ട മെഡിക്കൽ കോളജ്, മെഡിക്കൽ കോളജിന്‍റെ ഗണത്തിൽ ഉൾപ്പെടുത്തുവാൻ പറ്റിയതല്ല. ആവശ്യമായ ചികിത്സാ സൗകര്യങ്ങൾ അവിടെയില്ല. ഏറ്റവും കൂടുതൽ ആരോഗ്യ പ്രശ്നങ്ങൾ റിപ്പോർട്ട് ചെയ്യപ്പെടുന്ന ജില്ലയിലെ രോഗികൾക്ക് കൂടുതലായി കർണാടക സംസ്ഥാനത്തെ ആശുപത്രികളെ ആശ്രയിക്കേണ്ടതായി വരുന്നു. പുതുതലമുറയിൽപ്പെട്ട വിദ്യാർഥികൾ, സമൂഹത്തിൽ എന്താണ് നടക്കുന്നത് എന്നതിനെക്കുറിച്ച് പൂർണ ബോധവാന്മാരാകണം. ഗ്രാമീണ മേഖലകളിലെ ജീവിതം മെച്ചപ്പെടുന്നതിന് ഉപോൽബലകം ആകുന്ന രീതിയിൽ ഉന്നതവിദ്യാഭ്യാസ മേഖലയിലെ സിലബസ് പൊളിച്ചെഴുതണം. സോഷ്യൽ വർക്ക് കോഴ്സിന് പഠിക്കുന്ന കാലത്ത് ഗ്രാമീണ മേഖലയിലെ ജീവിതമാറ്റത്തെക്കുറിച്ച് സ്പർശിക്കാത്ത സിലബസ് കണ്ട് ദുഃഖിതയായി കോഴ്സ് പഠനം അവസാനിപ്പിച്ച അനുഭവവും പിന്നീട് പ്രസ്തുത കോളജ് തന്നെ സിലബസ് പൊളിച്ചെഴുതി മാറ്റങ്ങൾ കൊണ്ടുവന്നതും ദയാബായി ഓർമിച്ചെടുത്തു.

കുടിവെള്ളപദ്ധതി ഉദ്ഘാടനം ചെയ്തു

കണ്ണിവയൽ: ഗവ. ടിടിഐയിൽ ജില്ലാ പഞ്ചായത്ത് നടപ്പാക്കിയ കുടിവെള്ള പദ്ധതിയുടെ ഉദ്ഘാടനം എം. രാജഗോപാലൻ എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് ജോസഫ് മുത്തോലി അധ്യക്ഷത വഹിച്ചു. എൽപി സ്കൂൾ അധ്യാപക തസ്തികയിലേക്കുള്ള പിഎസ് സി പരീക്ഷയിൽ ജില്ലയിൽ ഒന്നാം റാങ്ക് നേടിയ സജിൻ കെ. സതീശനെ ജില്ലാ പഞ്ചായത്ത് പൊതുമരാമത്ത് സ്ഥിരം സമിതി അധ്യക്ഷ കെ. ശകുന്തള അനുമോദിച്ചു. കെ ടെറ്റ് പരീക്ഷയിൽ വിജയം നേടിയ 2023-25 ബാച്ചിലെ വിദ്യാർഥികൾക്കുള്ള അനുമോദനം കാസർഗോഡ് ഡയറ്റ് പ്രിൻസിപ്പൽ ഡോ. രഘുരാമഭട്ട്, ചിറ്റാരിക്കൽ ഉപജില്ല വിദ്യാഭ്യസ ഓഫീസർ ജസിന്ത ജോൺ എന്നിവർ നിർവഹിച്ചു. ഡോ.പി. രതീഷ്, സോജിൻ ജോർജ്, പി.വി. വിജയൻ, എം.എസ്. ഹരികുമാർ, ചൈതന്യ വിജയൻ എന്നിവർ പ്രസംഗിച്ചു.

കാസർഗോഡ് മെഡിക്കൽ കോളജ് അനാസ്ഥയുടെ സ്മാരകം: എം.ലിജു

ഉക്കിനടുക്ക: കേരളത്തിലെ ആരോഗ്യ മേഖലയോട് ഇടതുസർക്കാർ കാണിക്കുന്ന അനാസ്ഥയുടെയും ജില്ലയിലെ ജനങ്ങളോട് ചെയ്യുന്ന കൊടുംവഞ്ചനയുടെയും സ്മാരകമായി മാറിയിരിക്കുകയാണ് ഉക്കിനടുക്കയിലെ കാസർഗോഡ് ഗവ. മെഡിക്കൽ കോളജെന്ന് കെപിസിസി ജനറൽ സെക്രട്ടറി എം.ലിജു പറഞ്ഞു. പിണറായി സർക്കാർ മംഗളൂരുവിലെ ആരോഗ്യമേഖലയിലെ വ്യവസായികളുടെ കച്ചവട താത്പര്യത്തിന് മുന്നിൽ അടിയറവ് പറഞ്ഞുകൊണ്ടാണ് കാസർഗോഡ് ഗവ. മെഡിക്കൽ കോളേജിന്‍റെ പ്രവർത്തനത്തെ അട്ടിമറിച്ചതെന്നും അദ്ദേഹം ആരോപിച്ചു. സംസ്ഥാനത്തെ ആരോഗ്യമേഖലയോടുള്ള സംസ്ഥാന സർക്കാരിന്‍റെ അനാസ്ഥയ്ക്കെതിരെ ജില്ലാ കോൺഗ്രസ്സ് കമ്മിറ്റിയുടെ നേതൃത്വത്തിൽ ഉക്കിനടുക്ക ഗവ.മെഡിക്കൽ കോളജിന് മുന്നിൽ നടത്തിയ പ്രതിഷേധ ധർണ ഉദ്‌ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എൻഡോസൾഫാൻ വിഷമഴയിലൂടെ കാസർഗോഡ് ജില്ലയിലെ ആയിരക്കണക്കിന് കുടുംബങ്ങൾ അനുഭവിക്കുന്ന ഗുരുതര ആരോഗ്യപ്രശ്നങ്ങൾക്കുള്ള പരിഹാരമായാണ് ഉമ്മൻ ചാണ്ടി സർക്കാർ ജില്ലയിൽ ഒരു മെഡിക്കൽ കോളജ് അനുവദിച്ചത്. എന്നാൽ ഇപ്പോൾ ജില്ലയിൽ മെഡിക്കൽ കോളജ് തന്നെ ഇല്ലാതാക്കുന്ന നടപടിക്കെതിരെയാണ് സമരം നടത്തേണ്ടിവരുന്നത്. അടുത്തവർഷം യുഡിഎഫ് സർക്കാർ അധികാരത്തിൽ വന്നാൽ ഈ സ്ഥിതി മാറുമെന്നും ഉക്കിനടുക്ക മെഡിക്കൽ കോളേജ് പൂർണമായും നവീകരിച്ച് പ്രവർത്തനം തുടങ്ങാനുള്ള നടപടികൾ കൈക്കൊള്ളുമെന്നും അദ്ദേഹം പറഞ്ഞു. ഡിസിസി പ്രസിഡന്‍റ് പി.കെ. ഫൈസൽ അധ്യക്ഷത വഹിച്ചു. യുഡിഎഫ് ജില്ലാ കൺവീനർ എ. ഗോവിന്ദൻ നായർ, നേതാക്കളായ ഹക്കീം കുന്നിൽ, കെ. നീലകണ്ഠൻ, എം. അസിനാർ, സാജിദ് മൗവൽ, കെ.കെ. രാജേന്ദ്രൻ, ബി.പി. പ്രദീപ് കുമാർ, എം.സി. പ്രഭാകരൻ, സോമശേഖര ഷേണി, സുന്ദര ആരിക്കാടി, സി.വി. ജെയിംസ്, ഹരീഷ് പി. നായർ, മാഹിൻ കേളോട്ട്, കെ.വി. വിജയൻ, ജോയ് ജോസഫ്, മധുസൂദനൻ ബാലൂർ, കെ.വി. ഭക്തവത്സലൻ, ടി. ഗോപിനാഥൻ നായർ, എം. രാജീവൻ നമ്പ്യാർ, കെ. ഖാലിദ്, എ. വാസുദേവൻ, എം. ബലരാമൻ നമ്പ്യാർ, കെ. വാരിജാക്ഷൻ, എം. ലക്ഷ്മണ പ്രഭു, ശ്യാമപ്രസാദ് മാന്യ, ബി.എസ്. ഗംഭീര എന്നിവർ പ്രസംഗിച്ചു.

കെഎസ്എസ്പിഎ കരിദിനാചരണം

വെള്ളരിക്കുണ്ട്: പെൻഷൻ പരിഷ്കരണ കമ്മീഷനെ നിയമിക്കാത്തതിൽ പ്രതിഷേധിച്ച് കെഎസ്എസ്പിഎ പരപ്പ നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ വെള്ളരിക്കുണ്ട് സബ്ട്രഷറിയ്ക്കു മുമ്പിൽ കരിദിനാചരണം നടത്തി. സംസ്ഥാന കമ്മിറ്റി അംഗം ടി.കെ. എവുജിൻ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് മാത്യു സേവ്യർ അധ്യക്ഷതവഹിച്ചു. ജില്ലാ സെക്രട്ടറി തോമസ് മാത്യു, ശാന്തമ്മ ഫിലിപ്പ്, പി.എം. ഏബ്രഹാം, കെ. കുഞ്ഞമ്പു നായർ, പി.എ. ജോസഫ്, ബി. റഷീദ, എം.കെ. ദിവാകരൻ, ഷേർലി ഫിലിപ്പ്, ജോസുകുട്ടി അറയ്ക്കൽ, എ.കെ. ജയിംസ്, വി.കെ. ബാലകൃഷ്ണൻ, എം.ഡി. ദേവസ്യ, സി.വി. ബാലകൃഷ്ണൻ, പി.എ. ജോസ്, പി.എ. സെബാസ്റ്റ്യൻ, കെ. വേണുഗോപാൽ, വി.ജെ. ജോർജ് എന്നിവർ സംസാരിച്ചു.

ഭൂമി കൈമാറ്റം നടന്നാല്‍ ചീമേനി വ്യവസായപാര്‍ക്ക് യാഥാര്‍ഥ്യമാകും

കാസര്‍ഗോഡ്:ചീമേനി ഐടി പാര്‍ക്കിന് 100 ഏക്കര്‍ ഭൂമിയില്‍ ജനറല്‍ വിഭാഗത്തില്‍ പെട്ട വ്യവസായ പാര്‍ക്കുകള്‍ ആരംഭിക്കാന്‍ സാധിക്കുന്ന വിധത്തില്‍ ഉള്ളതാണെന്നും നിലവില്‍ ഇവിടെ വ്യവസായ പാര്‍ക്ക് ആരംഭിക്കുന്നതിന് തടസങ്ങള്‍ ഒന്നുമില്ലെന്നും വ്യവസായ വാണിജ്യ വകുപ്പ് സെക്രട്ടറി പറഞ്ഞു. ഐടി വകുപ്പ് വ്യവസായ വകുപ്പിന് ഭൂമി കൈമാറ്റം നടത്തിയാല്‍ ചീമേനി ഐടി പാര്‍ക്ക് നിര്‍മാണം വേഗത്തില്‍ യാഥാര്‍ഥ്യമാക്കാന്‍ കഴിയും. പ്രത്യേക സാമ്പത്തിക മേഖലയില്‍ ഉള്‍പ്പെട്ടിരുന്ന ഐടി പാര്‍ക്ക് പ്രദേശം വ്യവസായ പാര്‍ക്കായി മാറ്റുന്നതിന് വേണ്ടി പുനര്‍വിജ്ഞാപനം നടത്തിയിരുന്നു. കെഎസ്‌ഐടി ലിമിറ്റഡിന് കീഴില്‍ ഭൂമി നിലനിര്‍ത്തി കെഎസ്‌ഐഡിസിയുടെ ഭാഗമായി വ്യവസായ പാര്‍ക്ക് ആരംഭിക്കാന്‍ സാധിക്കുമെന്ന് യോഗത്തില്‍ പ്രിന്‍സിപ്പല്‍ സെക്രട്ടറി അറിയിച്ചു. ചെങ്കല്‍ ക്വാറികള്‍ക്ക് അപേക്ഷ പരിശോധിച്ചു അനുമതി നല്‍കാന്‍ നടപടി സ്വീകരിക്കണമെന്ന് മുഖ്യമന്ത്രി നിര്‍ദേശം നല്‍കി. ജില്ലയില്‍ വന്‍തോതില്‍ അനധികൃത ലാറ്ററൈറ്റ് ഖനനം നടക്കുന്നുണ്ട്. ഇതു സംസ്ഥാനത്തിന് വന്‍ വരുമാന നഷ്ടമാണ് ഉണ്ടാക്കുന്നതെന്ന് കളക്ടര്‍ അറിയിച്ചു. കുണ്ടംകുഴി സാവിത്രിഭായ് ഫുലെ മെമ്മോറിയല്‍ ആശ്രമം സ്‌കൂള്‍ എല്‍പി സ്‌കൂള്‍ ഹൈസ്‌കൂള്‍ ആയി ഉയര്‍ത്തിയതായി കളക്ടര്‍ അറിയിച്ചു. മലയോര ഹൈവേയുമായി ബന്ധപ്പെട്ട് സ്ഥലം ഏറ്റെടുക്കുന്നതിന് 4.5 കിലോമീറ്റര്‍ സ്ഥലത്ത് തടസങ്ങള്‍ നിലനില്‍ക്കുന്നു. പകരം ഭൂമി കണ്ടെത്തിയിട്ടുണ്ട്. ഭൂമി ഏറ്റെടുക്കുന്നതിനായി സര്‍ക്കാര്‍ ഉത്തരവ് ലഭ്യമായെന്ന് കളക്ടര്‍ പറഞ്ഞു.

മുത്തലിബ് വധം: അഞ്ചാം പ്രതിയെ വെറുതെവിട്ടു

കാസര്‍ഗോഡ്: ഉപ്പള പത്വാടിയിലെ അബ്ദുള്‍ മുത്തലിബിനെ (38) വെട്ടിക്കൊലപ്പെടുത്തിയ കേസില്‍ അഞ്ചാംപ്രതിയെ കാസര്‍ഗോഡ് അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് കോടതി (മൂന്ന്) വെറുതെവിട്ടു. കര്‍ണാടക ഭദ്രാവതി സ്വദേശി സയ്യിദ് ആസിഫിനെയാണ് വെറുതെവിട്ടത്. പ്രതിക്കെതിരായ കുറ്റം തെളിയിക്കുന്നതില്‍ പ്രോസിക്യൂഷന്‍ പരാജയപ്പെട്ടതായി കോടതി നിരീക്ഷിച്ചു. 2013 ഒക്ടോബര്‍ 24നു രാത്രി 11ഓടെയാണ് ഉപ്പള മണ്ണംകുഴിയിലെ മുത്തലിബിന്‍റെ ഫ്‌ളാറ്റിനു സമീപം ഇയാളെ വെട്ടിയും വെടിവെച്ചും ക്രൂരമായി കൊലപ്പെടുത്തിയത്. അധോലോകസംഘാംഗങ്ങള്‍ തമ്മിലുള്ള കുടിപ്പകയാണ് കൊലപാതകത്തിലേക്ക് നയിച്ചത്. കേസിലെ ഒന്നാംപ്രതിയായിരുന്ന കുപ്രസിദ്ധ ക്രിമിനല്‍ കാലിയ റഫീഖ് വിചാരണ ആരംഭിക്കുന്നതിനു മുമ്പ് കൊല്ലപ്പെട്ടിരുന്നു. രണ്ടാംപ്രതി ഷംസുദ്ദീനെ കുറ്റക്കാരനെന്ന് കണ്ടെത്തി കോടതി ശിക്ഷിച്ചിരുന്നു. മൂന്നും നാലും പ്രതികളായ മുഹമ്മദ് റഫീഖ്, മന്‍സൂര്‍ അഹമ്മദ് എന്നിവരെ നേരത്തെ വിട്ടയച്ചിരുന്നു. അഞ്ചാംപ്രതിയെ കണ്ടുകിട്ടാതിരുന്നതിനെതുടര്‍ന്നാണ് വിചാരണ നീണ്ടുപോയത്. പ്രതിക്കുവേണ്ടി അഡ്വ. രഞ്ജിത് കുണ്ടാര്‍ ഹാജരായി.

സിപിഐ ജില്ലാസമ്മേളനം വെള്ളരിക്കുണ്ടില്‍

വെള്ളരിക്കുണ്ട്: സിപിഐ ജില്ലാ സമ്മേളനം ജൂലൈ 11, 12, 13 തീയതികളില്‍ വെള്ളരിക്കുണ്ടില്‍ നടക്കും. 11ന് പതാക, കൊടിമര ജാഥകളും 12, 13 തീയതികളില്‍ പ്രതിനിധി സമ്മേളനവും നടക്കും. 11നു വെള്ളരിക്കുണ്ട് ടൗണില്‍ നടക്കുന്ന പൊതുസമ്മേളനത്തിന് മുന്നോടിയായി പൊതുസമ്മേളന നഗരിയിലേക്കുള്ള പതാക കയ്യൂരില്‍ നിന്നും പ്രതിനിധിസമ്മേളന നഗരിയിലേക്കുള്ള പതാക മടിക്കൈ കുഞ്ഞിക്കണ്ണന്‍റെ സ്മൃതി മണ്ഡപത്തില്‍ നിന്നും കൊടിമരം എളേരിത്തട്ട് പൊടോര കുഞ്ഞിരാമന്‍ നായരുടെ സ്മൃതി മണ്ഡപത്തില്‍ നിന്നും ജാഥയായി എത്തിക്കും. മൂന്നു ജാഥകളും വെള്ളരിക്കുണ്ടില്‍ സംഗമിച്ച് റെഡ് വോളണ്ടിയര്‍ മാര്‍ച്ചോട് കൂടി പൊതുസമ്മേളന നഗരയിലെത്തിക്കും. തുടര്‍ന്ന് സംഘാടകസമിതി ചെയര്‍മാന്‍ കെ.എസ്. കുര്യാക്കോസ് പതാക ഉയര്‍ത്തും. പൊതുസമ്മേളനം സിപിഐ ദേശീയ എക്‌സിക്യൂട്ടീവംഗം പി. സന്തോഷ് കുമാര്‍ എംപി ഉദ്ഘാടനം ചെയ്യും. 12, 13 തീയതികളില്‍ വെള്ളരിക്കുണ്ട് വീനസ് ഓഡിറ്റോറിയത്തില്‍ നടക്കുന്ന പ്രതിനിധിസമ്മേളനം രാവിലെ 10നു ദേശീയ എക്‌സിക്യൂട്ടീവംഗം കെ. പ്രകാശ് ബാബു ഉദ്ഘാടനം ചെയ്യും. സംസ്ഥാന അസി. സെക്രട്ടറി ഇ. ചന്ദ്രശേഖരന്‍ എംഎല്‍എ, മന്ത്രിമാരായ ജി.ആര്‍. അനില്‍, പി. പ്രസാദ് എന്നിവര്‍ സംബന്ധിക്കും.

മെഡിക്കല്‍ കോളജിന് പ്രധാന പരിഗണന: മുഖ്യമന്ത്രി

കാസര്‍ഗോഡ്: ജില്ലയിലെ സര്‍ക്കാര്‍ ആശുപത്രികളില്‍ അടിസ്ഥാന സൗകര്യം കൂടുതല്‍ ശക്തിപ്പെടുത്തി ആധുനിക സൗകര്യങ്ങള്‍ സജ്ജീകരിക്കുന്നത് പരിഗണിക്കുമെന്ന് മുഖ്യമന്ത്രി പിണറായി വിജയന്‍ പറഞ്ഞു. കാസര്‍ഗോഡ് ഗവ.മെഡിക്കല്‍ കോളജ് ആശുപത്രി പൂര്‍ത്തിയാക്കുന്നതിനു പ്രധാന പരിഗണന നല്‍കും. കണ്ണൂര്‍ പള്ളിക്കുന്ന് കൃഷ്ണ മേനോന്‍ സ്മാരക ഗവണ്‍മെന്‍റ് വനിതാ കോളേജില്‍ നടന്ന മേഖലാതല യോഗത്തില്‍ സംസാരിക്കുകയായിരുന്നു അദ്ദേഹം. കാസര്‍ഗോഡ് ഗവ. മെഡിക്കല്‍ കോളജില്‍ ഈ വര്‍ഷം തന്നെ കോഴ്‌സുകള്‍ ആരംഭിക്കാന്‍ ആവശ്യമായ നടപടികള്‍ പുരോഗമിക്കുകയാണെന്ന് ആരോഗ്യവകുപ്പ് സെക്രട്ടറി രാജന്‍ ഖോബ്രഗഡെ അറയിച്ചു. മെഡിക്കല്‍ കോളജ് ആശുപത്രിയായി കാസര്‍ഗോഡ് ജനറല്‍ ആശുപത്രി പ്രവര്‍ത്തിക്കും. കാസര്‍ഗോഡ് മെഡിക്കല്‍ കോളജില്‍ ഹോസ്പിറ്റല്‍ ബ്ലോക്കിന്‍റെ നിര്‍മാണം കിഫ്ബി പദ്ധതിയില്‍ ഉള്‍പ്പെടുത്തി പൂര്‍ത്തീകരിക്കുന്നതിന് ഉത്തരവായിട്ടുണ്ട്. നിലവില നിര്‍മാണ കരാറുകാരുമായി കരാര്‍ അവസാനിപ്പിക്കുന്നതിനുള്ള ഉടമ്പടികള്‍ കിറ്റ്‌കോ തയാറാക്കിയിട്ടുണ്ട്. മഞ്ചേശ്വരം താലൂക്ക് ആശുപത്രിയില്‍ കിഫ്ബി മുഖേനയുള്ള കെട്ടിടം നിര്‍മ്മിക്കുന്നതിനായി 17.47കോടിയുടെ ഭരണാനുമതി ലഭ്യമാക്കിയിട്ടുണ്ട്. കോവിഡ് കാലത്ത് ടാറ്റ കമ്പനിയുടെ സിഎസ്ആര്‍ ഫണ്ടില്‍ ഉള്‍പ്പെടുത്തി നിർമിച്ച ടാറ്റ ട്രസ്റ്റ് ആശുപത്രിയില്‍ പിഎം - എബിഎച്ച്‌ഐഎം പദ്ധതിയില്‍ ഉള്‍പ്പെടുത്തി 50 കിടക്കകളോടു കൂടിയ ക്രിട്ടിക്കല്‍ കെയര്‍ ബ്ലോക്ക് നിര്‍മ്മിക്കുന്നതിന് 20.75 കോടി രൂപയുടെ ഭരണാനുമതി ലഭ്യമാക്കിയിട്ടുണ്ട്. ഇതിന്‍റെ സങ്കേതിക അനുമതിക്കായി ഉള്ള നടപടികള്‍ പുരോഗമിക്കുന്നു. ലഭിച്ചാല്‍ ഉടന്‍ ടെന്‍ഡര്‍ നടപടി അഭിക്കുമെന്ന് ആരോഗ്യവകുപ്പ് സെക്രട്ടറി അറിയിച്ചു. എന്‍ഡോസള്‍ഫാന്‍ ദുരിതബാധിതരെ കണ്ടെത്തുന്നതിനുള്ള മെഡിക്കല്‍ ക്യാമ്പ് ഈ മാസം പൂര്‍ത്തിയാക്കുമെന്ന് ജില്ലാ കളക്ടര്‍ അറിയിച്ചു. കടലാക്രമണ പ്രതിരോധ പ്രവര്‍ത്തനങ്ങളുടെ ഭാഗമായി വലിയപറമ്പ പഞ്ചായത്തിലെ കടലാക്രമണം തടയാന്‍ ആവശ്യമായ പ്രവര്‍ത്തനങ്ങള്‍ അടുത്ത വര്‍ഷം ആരംഭിക്കുമെന്ന് ജല വിഭവ വകുപ്പ് സെക്രട്ടറി അവലോകന യോഗത്തില്‍ അറിയിച്ചു.

കടലേറ്റത്തിൽ തെങ്ങുകൾ കടപുഴകി

ഉദുമ: ജന്മ കടപ്പുറത്ത് രൂക്ഷമായ കടലേറ്റത്തിൽ നിരവധി തെങ്ങുകൾ കടപുഴകി. അവശേഷിച്ച ഒട്ടനവധി തെങ്ങുകളുടെ വേരുപടലം പൂർണമായും പുറത്തുകാണാവുന്ന നിലയിലാണ്. ഇവിടേക്കുള്ള റോഡിനും കേടുപാടുകൾ സംഭവിച്ചു. നാട്ടുകാർ മണൽച്ചാക്കുകൾ അട്ടിയിട്ടാണ് അവശേഷിക്കുന്ന തെങ്ങുകളേയും റോഡിനെയും സംരക്ഷിച്ചുനിർത്തുന്നത്. തൃക്കണ്ണാട് ക്ഷേത്രത്തിനു മുന്നിലെ പള്ളിവേട്ട മണ്ഡപത്തെ സംരക്ഷിക്കാൻ നാട്ടുകാരുടെയും ക്ഷേത്ര സംഘടനകളുടെയും നേതൃത്വത്തിൽ ചുറ്റുപാടും കരിങ്കല്ലുകൾ പാകി. കഴിഞ്ഞ ദിവസങ്ങളിൽ മണ്ഡപത്തിന്‍റെ അടിത്തറ മുഴുവനും പുറത്തുകാണാവുന്ന വിധത്തിൽ ചുറ്റുപാടുമുള്ള മണലെല്ലാം കടലെടുത്തിരുന്നു. സമീപത്തുള്ള കാപ്പിൽ, കോട്ടിക്കുളം, മാളികവളപ്പ്, ചിറമ്മൽ, ഗോപാലപേട്ട പ്രദേശങ്ങളും കടലേറ്റ ഭീഷണിയിലാണ്.

ഡോക്‌ടേഴ്‌സ് ദിനാചരണം

മാലോം: ഡോക്ടേഴ്സ് ദിനത്തിൽ വള്ളിക്കടവ് സെന്‍റ് സാവിയോ ഇംഗ്ലീഷ് മീഡിയം സ്കൂളിൽ വിവിധ മേഖലകളിൽ നിന്നുള്ള ഡോക്ടർമാരെ ആദരിച്ചു. പ്രിൻസിപ്പൽ സിസ്റ്റർ ടീന എസ്എബിഎസ് ഉദ്ഘാടനം ചെയ്തു. മലയോര മേഖലയിലെ ആദ്യകാല ഡോക്ടറായ കൊന്നക്കാട് കെകെഎം ഹോസ്പിറ്റലിലെ ഡോ. വിലാസിനിയെ വൈസ് പ്രിൻസിപ്പൽ സിസ്റ്റർ അലോൺസ് എസ്എബിഎസ് പൊന്നാടയണിയിച്ച് ആദരിച്ചു. മാലോം ലൂർദ് ദന്താശുപത്രിയിലെ ഡോ. ഫരീൻ, കൊന്നക്കാട് പിഎച്ച്സിയിലെ ഡോ. രേഷ്മ പി.കല്യാൺ, വള്ളിക്കടവ് ജെഎംജെ ആയുർവേദ ആശുപത്രിയിലെ ഡോ. ഭാഗ്യജോതി, മാലോം വി കെയർ ഹോസ്പിറ്റലിലെ ഡോ. വിഷ്ണു എന്നിവരെ അതത് ആശ്രുപതികളിലെത്തി ആദരിച്ചു. അധ്യാപകരായ ഉഷ, മേരി ആന്‍റക്സ്, ദീപ വിജയ്, സിസിലി, അഞ്ജു ഷാജി, സ്കൂൾ ലീഡർ അദ്വൈത് ഷിബു, ആൻ റിയ ഡെന്നി, ഐറിൻ സണ്ണി, ആര്യനന്ദ എന്നിവർ നേതൃത്വം നല്കി. പാലാവയൽ: ഡോക്ടേഴ്സ് ദിനാചരണത്തിന്‍റെ ഭാഗമായി പാലാവയൽ സെന്‍റ് ജോൺസ് ഹയർ സെക്കൻഡറി സ്കൂളിലെ എൻഎസ്എസ് വിദ്യാർഥികൾ ആലീസ് മെഡിക്കൽ സെന്‍ററിലെ ഡോക്ടർമാരെ പൊന്നാടയണിച്ച് ആദരിച്ചു. പ്രിൻസിപ്പൽ ഡോ. മെൻഡലിൻ മാത്യു, എൻഎസ്എസ് പ്രോഗ്രാം ഓഫീസർ സിന്ധു ജെയിംസ്, ജോമി ജോസഫ്, കെ.ജെ. സജിമോൻ എന്നിവർ നേതൃത്വം നല്കി. വെള്ളരിക്കുണ്ട്: സെന്‍റ് ജൂഡ്സ് ഹയർ സെക്കൻഡറി സ്കൂളിലെ എസ്പിസി, എൻസിസി യൂണിറ്റുകളുടെ ആഭിമുഖ്യത്തിൽ ഡോക്ടർമാരായ അബിത തോമസിനേയും ബിനിൽ ഷൈജനേയും പൊന്നാടയണിച്ച് ആദരിച്ചു. സ്കൂൾ മാനേജർ റവ.ഡോ. ജോൺസൺ അന്ത്യാംകുളം, പ്രിൻസിപ്പൽ റവ.ഡോ. സന്തോഷ് കെ. പീറ്റർ, മുഖ്യാധ്യാപകൻ എം.യു. ജോസുകുട്ടി, അശ്വിൻ ബിനു എന്നിവർ നേതൃത്വം നല്കി. കരിവേടകം: ഡോക്ടേഴ്‌സ് ദിനാചരണത്തിന്‍റെ ഭാഗമായി കരിവേടകം എയുപി സ്‌കൂളില്‍ പൂര്‍വിദ്യാര്‍ഥിയായ ഡോ.എസ്. വിദ്യാനാഥിനെ ആദരിച്ചു. റിട്ട. മുഖ്യാധ്യാപകന്‍ കെ. നാരായണന്‍ ഉദ്ഘാടനം ചെയ്തു. പിടിഎ പ്രസിഡന്‍റ് സണ്ണി തോമസ് അധ്യക്ഷതവഹിച്ചു. മുഖ്യാധ്യാപിക സി.ജെ. എല്‍സമ്മ, സ്റ്റാഫ് സെക്രട്ടറി നോബിള്‍ ജോസ്, പ്രോഗ്രാം കണ്‍വീനര്‍ റെനീഷ് തോമസ് എന്നിവര്‍ സംസാരിച്ചു. കാഞ്ഞങ്ങാട്: ഡോക്ടേഴ്‌സ് ദിനാചരണത്തിന്‍റെ ഭാഗമായി കാഞ്ഞങ്ങാട് ബെത്‌ലഹേം മാതൃവേദി ഫൊറോന ഭാരവാഹികളുടെ നേതൃത്വത്തില്‍ വിശ്രമജീവിതം നയിക്കുന്ന കാഞ്ഞങ്ങാട്ടെ സീനിയര്‍ ഡോക്ടര്‍ രമേഷ് ഭട്ടിനെ ആദരിച്ചു. പ്രസിഡന്‍റ് മേഴ്‌സി സജി വാതപ്പള്ളി, സെക്രട്ടറി ത്രേസ്യാമ്മ ഇളമതയില്‍, വൈസ്പ്രസിഡന്‍റ് സിസമ്മ പഴയപറമ്പില്‍, സെനറ്റ് മെംബര്‍ മോളി ബോസ് ഇഞ്ചക്കല്‍ എന്നിവര്‍ സംബന്ധിച്ചു. കാഞ്ഞങ്ങാട്: കാഞ്ഞങ്ങാട് ലയണ്‍സ് ക്ലബിന്‍റെ നേതൃത്വത്തില്‍ ഡോക്ടര്‍മാരേയും ചാര്‍ട്ടേഡ് അക്കൗണ്ടന്‍റുമാരേയും ആദരിച്ചു. ഡോ. ബല്‍റാം നമ്പ്യാര്‍, ഡോ. ബാലസുബ്രഹണ്യന്‍, ഡോ.എം.കെ. ജോസ്, ഡോ. ത്രേസ്യാമ ജോസ്, ഡോ. ജയപ്രസാദ് കോടോത്ത്, ചാര്‍ട്ടേഡ് അക്കൗണ്ടന്‍റുമാരായ കെ. ശ്രീനിവാസ് ഷേണായി, എച്ച്.എസ്. ഭട്ട്, ജോര്‍ജ് തോമസ്, ആനന്ദ് ജോര്‍ജ് എന്നിവര്‍ ആദരം ഏറ്റുവാങ്ങി. പ്രസിഡന്‍റ് കണ്ണന്‍ പാര്‍ഥസാരഥി, സെക്രട്ടറി മധു മഠത്തില്‍, ട്രഷറര്‍ വി.വി. രാജേഷ്, ടൈറ്റസ് തോമസ്, കെ. ഗോപി, പി.പി. കുഞ്ഞികൃഷ്ണന്‍ നായര്‍, വി. സജിത്ത്, പി. ശ്യാംപ്രസാദ് എന്നിവര്‍ സംസാരിച്ചു.

കടലെടുത്തു, കണ്വതീർഥയുടെ വിനോദസഞ്ചാര സ്വപ്നങ്ങൾ

മഞ്ചേശ്വരം: കേരളത്തിന്‍റെ വടക്കേയറ്റമായ മഞ്ചേശ്വരത്തെ വിനോദസഞ്ചാരമേഖലയിൽ അടയാളപ്പെടുത്തുമെന്ന് പ്രതീക്ഷിച്ച കണ്വതീർഥ ബീച്ച് കടലേറ്റത്തിൽ നിലംപരിശായി. വിനോദസഞ്ചാര വികസനത്തിന്‍റെ ഭാഗമായി 15 ലക്ഷം രൂപ ചെലവിൽ ഇവിടെ നിർമിച്ച നടപ്പാതയും ഇരിപ്പിടങ്ങളും റെയിൻ ഷെൽട്ടർ, കുട്ടികളുടെ പാർക്ക്, ബയോഫെൻസിംഗ് തുടങ്ങിയ സംവിധാനങ്ങളും പാടേ തകർന്നു. ബീച്ചിന്‍റെ നടത്തിപ്പിനായി ടെൻഡർ ക്ഷണിക്കാനുള്ള ഒരുക്കങ്ങൾ തുടങ്ങുന്നതിനിടയിലാണ് ഇതുവരെ പൂർത്തിയായ നിർമാണങ്ങളെല്ലാം ഏറെക്കുറെ തകർന്നടിഞ്ഞത്. ചട്ടഞ്ചാലിലെ ടാറ്റ കോവിഡ് ആശുപത്രി പൊളിച്ചുമാറ്റിയപ്പോൾ കിട്ടിയ രണ്ടു വലിയ സ്റ്റീൽ കണ്ടെയ്നറുകൾ നേരത്തേ ഇവിടെ എത്തിച്ചിരുന്നു. ഇവ ബീച്ചിൽ സ്ഥാപിച്ച് അറ്റകുറ്റപണികൾ നടത്തി പെയിന്‍റ് ചെയ്ത് മനോഹരമാക്കി വിശ്രമകേന്ദ്രങ്ങളായി ഒരുക്കാനായിരുന്നു പദ്ധതി. കടലേറ്റത്തിൽ ഇവ രണ്ടും കടലിലേക്ക് മറിഞ്ഞുവീണ നിലയിലാണ്. രണ്ടുവർഷം മുമ്പ് കണ്വതീർഥ ബീച്ചിൽ വികസനപ്രവർത്തനങ്ങൾ തുടങ്ങിയ കാലത്ത് പദ്ധതിപ്രദേശം കടലിൽ നിന്ന് 200 മീറ്ററിലധികം അകലെയായിരുന്നു. ചുരുങ്ങിയ കാലത്തിനുള്ളിൽ ഇത്രയും ഉള്ളിലേക്ക് കടൽ കടന്നുകയറിയതോടെയാണ് പൂർത്തിയായ നിർമാണങ്ങൾപോലും തകരുന്ന നിലയായത്. ബിച്ചിലേക്കുള്ള റോഡിന്‍റെ ഒരു ഭാഗവും കടലേറ്റത്തിൽ തകർന്നു. അടുത്തുള്ള ജല അഥോറിറ്റിയുടെ കൂറ്റൻ കോൺക്രീറ്റ് ടാങ്കും അപകടഭീഷണിയിലാണ്. കടൽ ഇത്രയും അടുത്തെത്തിയതോടെ റോഡിന്‍റെ മറുവശത്ത് താമസിക്കുന്ന കുടുംബങ്ങളും ഭീതിയിലായി. തീരത്തെ കാറ്റാടി, ബദാം മരങ്ങൾക്കിടയിലൂടെ നടപ്പാതയും ഇടയ്ക്ക് കോട്ടേജുകളും ലഘുഭക്ഷണശാലയുമൊക്കെ വിനോദസഞ്ചാര പദ്ധതിയിൽ വിഭാവനം ചെയ്തിരുന്നു. കടലേറ്റത്തിൽ മരങ്ങളിലേറെയും കടപുഴകിയതോടെ അതും പാഴ്ക്കിനാവായി. കണ്വതീർഥയിൽനിന്ന് ഏതാനും കിലോമീറ്ററുകൾ അകലെ കർണാടകയുടെ ഭാഗത്ത് അടുത്തിടെ കടലിന്‍റെ ഒരു ഭാഗം നികത്തി പുലിമുട്ട് നിർമിച്ചതാണ് ഇവിടെ ഇത്രയധികം ഉള്ളിലേക്ക് കടൽ കടന്നുകയറാൻ ഇടയാക്കിയതെന്ന് നാട്ടുകാർ പറയുന്നു. ഉപ്പളയിലും കടലേറ്റത്തിൽ വ്യാപക നാശം ഉപ്പള: രൂക്ഷമായ കടലേറ്റത്തിൽ ഉപ്പള ഹനുമാൻ നഗർ, ശാരദ നഗർ, ബേരിക്ക, പെരിങ്കടി, മുട്ടം, മണിമുണ്ട ഭാഗങ്ങളിൽ വ്യാപക നാശം. ഈ ഭാഗങ്ങളെ ബന്ധിപ്പിക്കുന്ന തീരദേശ റോഡും തകർന്നു. പലയിടങ്ങളിലും കാറ്റാടിമരങ്ങളും തെങ്ങുകളും കടപുഴകി വീണു. ബേരിക്കയിൽ കടലേറ്റം തടയുന്നതിനായി സ്ഥാപിച്ച ജിയോബാഗ് കടൽഭിത്തിയും കടലെടുത്തു. 2018 ൽ കാസർഗോഡ് വികസന പാക്കേജിൽ ഉൾപ്പെടുത്തി നിർമിച്ച ഉപ്പള ഹനുമാൻ നഗർ റോഡ് മുൻവർഷങ്ങളിലും കടലേറ്റത്തിൽ അങ്ങിങ്ങായി ടാറിംഗ് ഇളകി തകർന്നിരുന്നു. ഈ വർഷം വീണ്ടും ലക്ഷങ്ങൾ ചെലവിട്ട് ഈ ഭാഗങ്ങൾ കോൺക്രീറ്റ് ചെയ്തിട്ടും ഫലമുണ്ടായില്ല. പല വീടുകളുടെയും അകത്തേക്കുപോലും തിരമാലകൾ അടിച്ചുകയറി. പുറത്തെങ്ങും ചെളിയും മാലിന്യവും നിറഞ്ഞതോടെ പലർക്കും വീടിനു പുറത്തിറങ്ങാൻ കഴിയാതായി. കടലേറ്റത്തെ കുറച്ചെങ്കിലും തടഞ്ഞുനിർത്താൻ ഇവിടെ കരിങ്കല്ലുകൊണ്ടുള്ള കടൽഭിത്തിയോ ടെട്രാപോഡ് സംവിധാനമോ സ്ഥാപിക്കണമെന്നാണ് നാട്ടുകാരുടെ ആവശ്യം.

റിവൈവ് 2k25 യുവജന സമ്മേളനം

ചിറ്റാരിക്കാൽ: തോമാപുരം ഇടവകയിലെ എസ്എംവൈഎം യുവജന കൂട്ടായ്മ റിവൈവ് 2k25 ഫാ. ആൽബിൻ തെങ്ങുംപള്ളി ഉദ്ഘാടനം ചെയ്തു. ഫൊറോന വികാരി റവ. ഫാ. മാണി വേൽവട്ടം അധ്യക്ഷതവഹിച്ചു. എസ്എംവൈഎം ഫൊറോന ഡയറക്ടർ ഫാ. ജോജി ചക്കനാനിക്കൽ വാർഷിക പദ്ധതി ഡീക്കൻ അമൽ പൂക്കുളത്തേലിന് നൽകി പ്രകാശനം ചെയ്തു. ഫാ. ജൂബിൻ കണിപറമ്പിൽ, സിസ്റ്റർ റോസ്ന എസ്എബിഎസ്, ആനിമേറ്റർ ഷിജിത്ത് കുഴുവേലിൽ, യൂണിറ്റ് പ്രസിഡന്‍റ് ആശിഷ് പുതോത്ത്, ജോയൽ പരവംപറമ്പിൽ, അമിത വാലുമ്മേൽ, ജോബിൻ കോയിക്കൽ, അതുൽ ചിരട്ടയോലിൽ, എബിൻ മഞ്ഞളാങ്കൽ എന്നിവർ സംസാരിച്ചു.

കുട്ടികളുമായി സംവദിച്ച് പാഠപുസ്തകത്തിലെ കവി

ബാനം: തങ്ങളുടെ പാഠപുസ്തകത്തില്‍ ഇടംനേടിയ കവി സ്‌കൂളില്‍ എത്തിയപ്പോള്‍ കുട്ടികള്‍ക്ക് വിസ്മയം. ബാനം ഗവ. ഹൈസ്‌കൂളിലെത്തിയ പ്രശസ്ത കവി വീരാന്‍കുട്ടിയാണ് കുട്ടികള്‍ക്ക് കൗതുകമായത്. ഇദ്ദേഹത്തിന്‍റെ "സ്മാരകം' എന്ന കവിത ഒന്‍പതാം ക്ലാസിലും "വാവ ജീവനെ കാക്കുന്നു' എന്ന കവിത നാലാം ക്ലാസിലും പാഠപുസ്തകത്തിലുണ്ട്. വിദ്യാരംഗം കലാസാഹിത്യ വേദി, വിവിധ ക്ലബുകള്‍ എന്നിവയുടെ ഉദ്ഘാടനത്തിനാണ് വീരാന്‍കുട്ടി എത്തിയത്. പുതിയ കാലഘട്ടത്തില്‍ നഷ്ടമാകുന്ന സ്‌നേഹബന്ധങ്ങള്‍ ഊട്ടിയുറപ്പിക്കേണ്ടതിന്‍റെ ആവശ്യകതയെക്കുറിച്ച് അദ്ദേഹം കുട്ടികളെ ഓര്‍മപ്പെടുത്തി. പിടിഎ പ്രസിഡന്‍റ് പി. മനോജ്കുമാര്‍ അധ്യക്ഷതവഹിച്ചു. ബാനം കൃഷ്ണന്‍, പാച്ചേനി കൃഷ്ണന്‍, പി.കെ. ബാലചന്ദ്രന്‍, അനിത മേലത്ത് എന്നിവര്‍ സംസാരിച്ചു. മുഖ്യാധ്യാപിക സി. കോമളവല്ലി സ്വാഗതവും വിദ്യാരംഗം കോഓര്‍ഡിനേറ്റര്‍ അനൂപ് പെരിയല്‍ നന്ദിയും പറഞ്ഞു.

സര്‍ക്കാര്‍ സ്‌കൂളുകളില്‍ ക്രിയേറ്റീവ് കോര്‍ണറുകള്‍

കാസര്‍ഗോഡ്: കേവലം പരീക്ഷകള്‍ ജയിക്കുന്നതിനുള്ള ഉപാധിയായി മാത്രം വിദ്യാഭ്യാസത്തെ കാണാതെ പുതിയ കാലത്തിന്‍റെ ആവശ്യമനുസരിച്ച് പഠനത്തില്‍ വിദ്യാര്‍ത്ഥികളുടെ സജീവ പങ്കാളിത്തം ഉറപ്പാക്കുക എന്ന ആശയം അവതരിപ്പിക്കുകയാണ് സര്‍ക്കാര്‍ വിദ്യാലയങ്ങളിലെ ക്രിയേറ്റീവ് കോര്‍ണറുകള്‍. പരമ്പരാഗത ലബോറട്ടറി പഠനത്തിന്‍റെ പരിമിതികള്‍ക്കപ്പുറത്തേക്ക് തൊഴിലധിഷ്ഠിത വിദ്യാഭ്യാസത്തിന് ഊന്നല്‍ നല്‍കുക എന്നതാണ് പദ്ധതിയിലൂടെ ലക്ഷ്യമിടുന്നത്. കേരള പൊതുവിദ്യാഭ്യാസ വകുപ്പ്, കൊച്ചിന്‍ ശാസ്ത്ര സാങ്കേതിക സര്‍വകലാശാല എന്നിവയുടെ സഹകരണത്തോടെ അഞ്ചു ലക്ഷം രൂപ ചെലവഴിച്ച് നിര്‍മിക്കുന്ന 600 ക്ലാസ് മുറികളാണ് ഈ പദ്ധതി വഴി ക്രിയേറ്റീവ് കോര്‍ണറുകള‍ ആയി മാറുന്നത്. വയറിംഗ്, പ്ലംബിംഗ്, കൃഷി, ഫാഷന്‍ ടെക്‌നോളജി, പാചകകല തുടങ്ങിയ മേഖലകളില്‍ നേരിട്ടുള്ള പരിശീലനം ലഭ്യമാക്കുന്ന പുതിയ അധ്യാപനരീതിയാണ് ഇവിടെ സജ്ജീകരിച്ചിരിക്കുന്നത്. 2023-24 അധ്യയന വര്‍ഷത്തിലെ സ്റ്റാര്‍സ് പദ്ധതിയില്‍ ഉള്‍പ്പെടുത്തിയിട്ടുള്ള ഈ പദ്ധതി സംസ്ഥാനത്തെ 300 അപ്പര്‍ പ്രൈമറി സ്‌കൂളുകളില്‍ നടപ്പാക്കും. വിദ്യാലയങ്ങളിലെ പ്രവര്‍ത്തി പരിചയ ക്ലബിന്‍റെ നേതൃത്വത്തില്‍ പ്രവര്‍ത്തിക്കുന്ന ക്രിയേറ്റീവ് കോര്‍ണറുകളിലൂടെ വിവിധ തൊഴില്‍ ബന്ധിത പ്രവര്‍ത്തനങ്ങളിലൂടെ പാഠപുസ്തകത്തിലെ ആശയങ്ങളെ രസകരവും ക്രിയാത്മകവുമായി കുട്ടികളിലേക്ക് എത്തിക്കാനും തൊഴിലും വിജ്ഞാനവും രണ്ടായി നില്‍ക്കേണ്ടതല്ലെന്ന ബോധ്യം കുട്ടികളില്‍ ഉണ്ടാക്കി അതിലൂടെ വിവിധ തൊഴില്‍ മേഖലകളെക്കുറിച്ചുള്ള ശരിയായ മനോഭാവവും ധാരണയും വളര്‍ത്താനും സഹായിക്കും കുട്ടികള്‍ക്ക് തങ്ങളുടെ ക്രിയാത്മകത കൂടി പ്രകടിപ്പിക്കാന്‍ അവസരമുള്ള ഗ്രൂപ്പ് പ്രവര്‍ത്തനങ്ങളാകും നല്‍കുക. നിലവില്‍ ജില്ലയിലെ 12 സര്‍ക്കാര്‍ വിദ്യാലയങ്ങളിലാണ് ക്രിയേറ്റീവ് കോര്‍ണറുകള്‍ ഒരുക്കിയിരിക്കുന്നത്. പിലിക്കോട് ഗവ.യുപി സ്‌കൂളില്‍ നിര്‍മാണം പൂര്‍ത്തീകരിച്ച ക്രിയേറ്റീവ് കോര്‍ണിന്‍റെ ഉദ്ഘാടനം എം. രാജഗോപാലന്‍ എംഎല്‍എ നിര്‍വഹിച്ചു. ബാക്കിയുള്ള മുഴുവന്‍ വിദ്യാലയങ്ങളിലെയും ക്രിയേറ്റീവ് കോര്‍ണറുകളുടെ പണി ഉടന്‍ പൂര്‍ത്തീകരിക്കുമെന്ന് അധികൃതര്‍ അറിയിച്ചു.

പുതുതലമുറ കോഴ്‌സുകള്‍ ഉള്‍പ്പെടുത്തി ഉന്നതവിദ്യാഭ്യാസരംഗം പരിഷ്‌കരിക്കും: മന്ത്രി

കാസര്‍ഗോഡ്: പുതുതലമുറ സാങ്കേതിക കോഴ്‌സുകള്‍ കൂടി ഉള്‍പ്പെടുത്തി കേരളത്തിലെ ഉന്നത വിദ്യാഭ്യാസരംഗത്തെ പരിഷ്‌ക്കരിച്ച് കൂടുതല്‍ ശക്തിപ്പെടുത്തുമെന്ന് ഉന്നത വിദ്യാഭ്യാസമന്ത്രി ആര്‍. ബിന്ദു. എല്‍ബിഎസ് എന്‍ജിനിയറിംഗ് കോളജില്‍ ആര്‍ട്ടിഫിഷ്യല്‍ ഇന്‍റലിജന്‍സ് ആന്‍ഡ് ഡാറ്റ സയന്‍സ്, കമ്പ്യൂട്ടര്‍ സയന്‍സ് ആന്‍ഡ് ബിസിനസ് സിസ്റ്റം എന്നീ ബിടെക് കോഴ്‌സുകളുടെയും അഡിഷണല്‍ ക്ലാസ് റൂം ബ്ലോക്ക്, ഫയര്‍ ആന്‍ഡ് സേഫ്റ്റി സിസ്റ്റം, നവീകരിച്ച ഇലക്ട്രിക്കല്‍ ഡിപ്പാര്‍ട്മെന്‍റ് ബ്ലോക്ക് എന്നീ പദ്ധതികളുടെ ഉദ്ഘാടനവും ഇലക്ട്രിക്കല്‍ ഡിപ്പാര്‍ട്മെന്‍റിന് എന്‍ബിഎ അക്രഡിറ്റേഷന്‍ ലഭിച്ചതിന്‍റെ പ്രഖ്യാപനവും നിര്‍വഹിച്ചു സംസാരിക്കുകയായിരുന്നു മന്ത്രി. സി.എച്ച്. കുഞ്ഞമ്പു എംഎല്‍എ അധ്യക്ഷതവഹിച്ചു. ഡോ. കെ.എം. സുശീന്ദ്രന്‍, പി.വി. മിനി, നബീസ സത്താര്‍, ഡോ.ജെ. ജയമോഹന്‍, രാജീവ് ശ്രീനിവാസ്, മുജീബ് റഹ്‌മാന്‍ മാങ്ങാട്, സി.വി. കൃഷ്ണന്‍ എന്നിവര്‍ സംസാരിച്ചു. തിരുവനന്തപുരം എല്‍ബിഎസ് സെന്‍റര്‍ ഡയറക്ടര്‍ ഡോ.എം. അബ്ദുള്‍ റഹ്‌മാന്‍ സ്വാഗതവും പ്രിന്‍സിപ്പല്‍ ഡോ.ടി. മുഹമ്മദ് ഷുക്കൂര്‍ നന്ദിയും പറഞ്ഞു.

ചാവറഗിരി-വെള്ളരിക്കുണ്ട് ബസ് സർവീസ് തുടങ്ങി

പാലാവയൽ: വർഷങ്ങളായി ബസ് സർവീസ് ഇല്ലാതിരുന്ന ചാവറഗിരിയിൽ നിന്നും താലൂക്ക് ആസ്ഥാന മായ വെള്ളരിക്കുണ്ടിലേക്ക് പുതിയ ബസ് സർവീസ് ആരംഭിച്ചു. രാവിലെ ഏഴിന് ചാവറഗിരിയിൽ നിന്നും പുറപ്പെട്ട് പാലാവയൽ, ചിറ്റാരിക്കൽ, ഭീമനടി, കുന്നുംകൈ, വെള്ളരിക്കുണ്ട് വഴിയാണ് ബസ് സർവീസ്. ബസ് ആരംഭിച്ചതോടെ ഈ പ്രദേശങ്ങളിലെ യാത്രാ ക്ലേശത്തിന് ഒരു പരിധി വരെ പരിഹാര മാകും. ഈസ്റ്റ് എളേരി ഗ്രാമ പഞ്ചായത്ത് പ്രസിഡന്‍റ് ജോസഫ് മുത്തോലി സർവീസിന്‍റെ ഉദ്ഘാടനം നിർവഹിച്ചു, വിശുദ്ധ ചാവറ കുര്യാക്കോസ് ഏലിയാസ് പള്ളി വികാരി ഫാ. സുബേഷ് എസ്‌സിജെ അനുഗ്രഹ പ്രഭാഷണം നടത്തി. ബെന്നി കോഴിക്കോട്ട്, വാർഡ് അംഗം തേജസ് ഷിന്‍റോ, ടോമി പൂക്കുന്നേൽ എന്നിവർ പ്രസംഗിച്ചു.

ഉന്നതവിദ്യാഭ്യാസ മേഖലയില്‍ വിപ്ലവകരമായ മാറ്റം: മന്ത്രി ബിന്ദു

എളേരിത്തട്ട്: അടിസ്ഥാനസൗകര്യ വികസനത്തില്‍ വിപ്ലവകരമായ മുന്നേറ്റമാണ് കേരള ഉന്നതവിദ്യാഭ്യാസ മേഖലയില്‍ ഉണ്ടായതെന്ന് ഉന്നതവിദ്യാഭ്യാസമന്ത്രി ആര്‍. ബിന്ദു. എളേരിത്തട്ട് ഇ.കെ. നായനാര്‍ സ്മാരക ഗവ. കോളജിൽ പുതുതായി നിര്‍മിച്ച ഇക്കണോമിക്‌സ് അക്കാദമിക് ബ്ലോക്ക് കാമ്പസ് റോഡ്, വാട്ടര്‍ ടാങ്ക്, എന്‍എസ്എസ് റൂം, ഐ ക്യു എ സി റൂം, മെഡിക്കല്‍ റൂം എന്നിവ ഉദ്ഘാടനം ചെയ്ത് സംസാരിക്കുകയായിരുന്നു അവർ. ദക്ഷിണേന്ത്യയിലെ ഏറ്റവും മികച്ച ലാബ് കോംപ്ലക്‌സുകള്‍ കേരളത്തിലാണുള്ളത്. തൊഴിലധിഷ്ഠിത വിദ്യാഭ്യാസത്തിന് പ്രാധാന്യം നല്‍കിക്കൊണ്ട് വൈദഗ്ധ്യത്തിന്‍റെ അപര്യാപ്തത നികത്തുന്നതിനായി എല്ലാ കലാലയങ്ങളിലും സ്‌കില്‍ ഡെവലപ്‌മെന്‍റ് ആന്‍ഡ് കരിയര്‍ പ്ലാനിംഗ് സെൽ ആരംഭിക്കുമെന്നും മന്ത്രി പറഞ്ഞു. കഴിഞ്ഞ നാല് വര്‍ഷത്തിനിടയില്‍ 6000 കോടി രൂപയുടെ വികസന പ്രവര്‍ത്തനങ്ങള്‍ കേരളത്തിലെ കലാലയങ്ങളില്‍ നടന്നിട്ടുണ്ട്. നിലവിൽ കോഴ്സുകൾ കുറവായ സാഹചര്യത്തിൽ എളേരിത്തട്ട് കോളജിൽ പുതുതായി ഒരു കോഴ്സ് അനുവദിക്കുമെന്നും മന്ത്രി ഉറപ്പു നൽകി. എം. രാജഗോപാലന്‍ എംഎല്‍എ അധ്യക്ഷതവഹിച്ചു. അസി. എൻജിനിയര്‍ സുനില്‍കുമാര്‍ റിപ്പോര്‍ട്ട് അവതരിപ്പിച്ചു. പഞ്ചായത്ത് പ്രസിഡന്‍റ് ഗിരിജ മോഹനന്‍, വൈസ് പ്രസിഡന്‍റ് പി.സി. ഇസ്മയില്‍, ജില്ലാ പഞ്ചായത്തംഗം ജോമോന്‍ ജോസഫ്, എ.വി. രാജേഷ്, ബിന്ദു മരളീധരന്‍, ശാന്തികൃപ, എ. അപ്പുക്കുട്ടന്‍, എ.വി. ഭാസ്കരൻ, എം.വി. കുഞ്ഞമ്പു, ജാതിയില്‍ അസിനാര്‍, ജയിംസ് മാരൂര്‍, ജെറ്റോ ജോസഫ്, ടി.സി. രാമചന്ദ്രന്‍, സ്കറിയ ഏബ്രഹാം, ടി.ജി. ശശീന്ദ്രന്‍, ഡോ. ടോബി ജോസഫ്, കെ.കെ. മാത്യു, പി.ജെ. പ്രസാദ്, നിഖില്‍ ശര്‍മ, അഞ്ജന പത്മന്‍ എന്നിവര്‍ പ്രസംഗിച്ചു. പ്രിന്‍സിപ്പൽ ഡോ. മാത്യൂസ് പ്ലാമൂട്ടില്‍ സ്വാഗതവും ഡോ.പി.സി. അഷറഫ് നന്ദിയും പറഞ്ഞു.

കാലിക്കടവിൽ പൊതുശ്മശാനം തുറന്നു

ഭീമനടി: വെസ്റ്റ് എളേരി പഞ്ചായത്ത് ഭീമനടി കാലിക്കടവിൽ ആധുനിക രീതിയിൽ നിർമാണം പൂർത്തീകരിച്ച പൊതുശ്മശാനം നിദ്രാതീരത്തിന്‍റെ ഉദ്ഘാടനം രാജ്മോഹൻ ഉണ്ണിത്താൻ എംപി നിർവഹിച്ചു. പഞ്ചായത്ത് പ്രസിഡന്‍റ് ഗിരിജ മോഹനൻ അധ്യക്ഷതവഹിച്ചു. മോളിക്കുട്ടി പോൾ, കെ.കെ. തങ്കച്ചൻ, അന്നമ്മ മാത്യു, പി.ഡി. നാരായണി, ജോസ് കുത്തിയതോട്ടിൽ, ടി.വി. രാജീവൻ, ശാന്തികൃപ, അജേഷ് അന്പു, ലില്ലിക്കുട്ടി ഡെന്നിസ്, ടി.എ. ജയിംസ്, എൻ.വി. പ്രമോദ്, ഓമന കുഞ്ഞിക്കണ്ണൻ, ബിന്ദു മുരളീധരൻ, മുഹമ്മദ് ഷെരീഫ്, റൈഹാനത്ത്, സൗദാമിനി വിജയൻ, പ്രസീത രാജൻ, എ. അപ്പുക്കുട്ടൻ, സി.എ. ബാബു, അബ്ദുൾ റഹ്മാൻ, സുരേഷ് ബാബു എന്നിവർ പ്രസംഗിച്ചു. പഞ്ചായത്ത് വൈസ് പ്രസിഡന്‍റ് പി.സി. ഇസ്മയിൽ സ്വാഗതവും സെക്രട്ടറി ആർ. രജിത് നന്ദിയും പറഞ്ഞു.

കേരള പ്രിന്‍റേഴ്‌സ് അസോസിയേഷന്‍ ജില്ലാസമ്മേളനം

കാസര്‍ഗോഡ്: കേരള പ്രിന്‍റേഴ്‌സ് അസോസിയേഷന്‍ റൂബി ജൂബിലി ജില്ലാസമ്മേളനം ആര്‍കെ മാളില്‍ സംസ്ഥാന പ്രസിഡന്‍റ് വൈ. വിജയന്‍ ഉദ്ഘാടനം ചെയ്തു. ജില്ലാ പ്രസിഡന്‍റ് ടി.പി. അശോക് കുമാര്‍ അധ്യക്ഷതവഹിച്ചു. സിബി കൊടിയംകുന്നേല്‍, റെജി മാത്യു, മൊയ്‌നുദ്ദീന്‍, ജയറാം നീലേശ്വരം, എന്‍. കേളു നമ്പ്യാര്‍, മുഹമ്മദ് സാലി, വി.ബി. അജയകുമാര്‍, പ്രഭാകരന്‍ കാഞ്ഞങ്ങാട്, രാജാറാം പെര്‍ള, നൗഫല്‍ കുമ്പഡാജെ, സിറാജുദ്ദീന്‍ മുജാഹിദ്, ശശിധരന്‍ തൊട്ടിയില്‍, റിജിത്ത്, രാമകൃഷ്ണന്‍ പാലക്കുന്ന് എന്നിവര്‍ സംസാരിച്ചു. മുജീബ് അഹമ്മദ് സ്വാഗതവും സി. സുധീഷ് നന്ദിയും പറഞ്ഞു.

പഞ്ചായത്തിന്‍റെ അവഗണന: റോഡ് നന്നാക്കാൻ നാട്ടുകാർ നേരിട്ടിറങ്ങി

ചീമേനി: പഞ്ചായത്തിന്‍റെ ആസ്തി രജിസ്റ്ററിൽ ഉൾപ്പെട്ട റോഡായിട്ടും ഇതുവരെ ടാറിംഗ് പോലും നടത്താതെ കാട്ടുവഴി പോലെ നിൽക്കുന്ന ചീമേനി കോട്ട - പിലാന്തോളി റോഡിന്‍റെ ശോചനീയാവസ്ഥ പരിഹരിക്കാൻ ഒടുവിൽ നാട്ടുകാർ നേരിട്ടിറങ്ങി. ബന്ധപ്പെട്ട പ്രദേശങ്ങളിലെ സ്ത്രീകളുൾപ്പെടെ ഇറങ്ങിയാണ് റോഡിനെ കല്ലും മണ്ണുമിട്ട് നിരപ്പാക്കി തത്കാലത്തേക്കെങ്കിലും ഗതാഗതയോഗ്യമാക്കിയത്. പിലാന്തോളി ഭാഗത്തുനിന്നുള്ളവർക്ക് ചീമേനി, ചെറുവത്തൂർ ടൗണുകളിലേക്കു പോകാനുള്ള ഏക മാർഗമാണ് ഈ റോഡ്. കുണ്ടും കുഴികളും കയറ്റിറക്കങ്ങളുമായി കിടക്കുന്നതിനാൽ ഓട്ടോറിക്ഷകൾ പോലും ഇതുവഴി പോകാൻ മടിക്കുകയാണ്. റോഡിന്‍റെ ശോചനീയാവസ്ഥ പരിഹരിച്ച് ടാറിംഗ് നടത്തണമെന്നാവശ്യപ്പെട്ട് പഞ്ചായത്ത് അധികൃതരെ പലതവണ സമീപിച്ചിട്ടും ഫലമുണ്ടായില്ലെന്ന് നാട്ടുകാർ പറയുന്നു. ഇനിയും അവഗണന തുടർന്നാൽ വരുന്ന തദ്ദേശ തെരഞ്ഞെടുപ്പിൽ രാഷ്ട്രീയത്തിനതീതമായി ഈ വിഷയം ഉയർത്താനാണ് ഇവരുടെ തീരുമാനം.

കാസർഗോഡ് ഗവ. മെഡിക്കൽ കോളജിലേക്കുള്ള റോഡ് തകർന്നു

ബദിയടുക്ക: മഴക്കാലം തുടങ്ങി അധികനാൾ കഴിയുംമുമ്പേ ചെർക്കള-കല്ലടുക്ക അന്തർസംസ്ഥാനപാതയിൽ അങ്ങിങ്ങ് ടാറിംഗ് ഇളകി കുഴികൾ രൂപപ്പെട്ടു. കഷ്ടിച്ച് മൂന്നുവർഷം മുമ്പ് കിഫ്ബി പദ്ധതിയിൽ 37 കോടി രൂപ ചെലവിട്ട് നവീകരിച്ച റോഡാണിത്. ദേശീയപാതയിലെ ചെർക്കളയിൽ നിന്ന് തിരിഞ്ഞ് നിർദിഷ്ട കാസർഗോഡ് ഗവ. മെഡിക്കൽ കോളജിലേക്ക് പോകേണ്ടത് ഈ റോഡിലൂടെയാണ്. മെഡിക്കൽ കോളജിൽ ഈ വർഷം പ്രവേശനം അനുവദിക്കുന്നതുമായി ബന്ധപ്പെട്ട് ദേശീയ മെഡിക്കൽ കൗൺസിലിൽ നിന്നുള്ള സംഘം പരിശോധനയ്ക്കെത്താനിരിക്കേയാണ് റോഡ് തകർന്നത്. പലയിടങ്ങളിലും ടാറിംഗ് ഇളകി രൂപപ്പെട്ട കുഴികളിൽ വെള്ളംനിറഞ്ഞ് ആഴംപോലും തിരിച്ചറിയാനാകാത്ത നിലയിലാണ്. കാടമന മുതൽ പള്ളത്തടുക്ക വരെയുള്ള ഭാഗത്ത് റോഡ് പാടേ തകർന്നു. ഈ ഭാഗം പിന്നിട്ടാണ് മെഡിക്കൽ കോളജ് കെട്ടിടം സ്ഥിതിചെയ്യുന്ന ഉക്കിനടുക്കയിലെത്തേണ്ടത്. മെഡിക്കൽ കോളജിന് അംഗീകാരം ലഭിച്ച് ക്ലാസുകൾ തുടങ്ങിയാൽ ഇതേ റോഡിലൂടെ 30 കിലോമീറ്ററോളം സഞ്ചരിച്ചാണ് വിദ്യാർഥികൾ മെഡിക്കൽ കോളജ് ആശുപത്രിയായി നിശ്ചയിച്ചിട്ടുള്ള കാസർഗോഡ് ജനറൽ ആശുപത്രിയിലെത്തേണ്ടത്. കാസർഗോഡ് നിന്ന് ബംഗളൂരുവിലേക്കുള്ള ദീർഘദൂര യാത്രക്കാരുൾപ്പെടെ ഉപയോഗിക്കുന്ന റോഡിനെ എത്രയും പെട്ടെന്ന് അറ്റകുറ്റപണികൾ നടത്തി ഗതാഗതയോഗ്യമാക്കണമെന്ന ആവശ്യം ശക്തമായി ഉയർന്നിട്ടുണ്ട്. അതേസമയം നവീകരണം നടത്തി ഇത്രയും ചുരുങ്ങിയ സമയത്തിനുള്ളിൽ റോഡ് തകർന്നതിനെതിരെയും ആക്ഷേപങ്ങ‍ളുയർന്നിട്ടുണ്ട്.

സമൂഹ ഉപവാസം നടത്തി

അമ്പലത്തറ: അനാഥരില്ലാത്ത ഭാരതം, ആശ്രയ-ഗാന്ധിദർശൻ സമിതി എന്നിവയുടെ ആഭിമുഖ്യത്തിൽ മദ്യത്തിനും മയക്കുമരുന്നിനുമെതിരെ ജനമനസാക്ഷി ഉണർത്തുന്നതിനായി അമ്പലത്തറ കേശവ്ജി സ്മാരക പൊതുജന വായനശാലയിൽ സമൂഹ ഉപവാസം നടത്തി. ഫാ. ക്രിസ്റ്റി കപൂച്ചിൻ ഉദ്ഘാടനം ചെയ്തു. ആശ്രയ പ്രസിഡന്‍റ് അനിത മേരി അധ്യക്ഷത വഹിച്ചു. അഡ്വ.ടി.കെ. സുധാകരൻ മുഖ്യപ്രഭാഷണം നടത്തി. പ്രഫ.ടി.എം. സുരേന്ദ്രനാഥ്, സുകുമാരൻ പെരിയച്ചൂർ, തോമസ് രാജപുരം, കെ.പി. ബാലകൃഷ്ണൻ, എം. കുഞ്ഞികൃഷ്ണൻ, ശ്രീധരൻ നമ്പ്യാർ നീലേശ്വരം, കുമാരൻ വൈദ്യർ മടിക്കൈ, അമ്പലത്തറ കുഞ്ഞികൃഷ്ണൻ, പ്രഭാകരൻ കരിച്ചേരി, രാധാകൃഷ്ണൻ, രാജൻ കെ. പൊയിനാച്ചി, പീയുസ് പറയിടം, മുഹമ്മദ്‌ കുഞ്ഞി പട്ള, കെ.വി. രാഘവൻ, സ്കറിയ തോമസ്, കുര്യാക്കോസ് പുത്തൻപറമ്പിൽ, ശശി തോമസ് പടന്നക്കാട്, പി.വി. ജയരാജ്‌, ഭരതൻ പള്ളഞ്ചി എന്നിവർ പ്രസംഗിച്ചു.

ശാസ്ത്രീയപഠനം നടത്തി ദേശീയപാത നിര്‍മാണം പൂര്‍ത്തിയാക്കണം: യുവകലാസാഹിതി

കാഞ്ഞങ്ങാട്: ശാസ്ത്രീയപഠനം നടത്തി അപാകതകള്‍ പരിഹരിച്ച് ദേശീയപാത നിര്‍മ്മാണം പൂര്‍ത്തിയാക്കണമെന്ന് യുവകലാസാഹിതി ജില്ലാ കണ്‍വെന്‍ഷന്‍ ആവശ്യപ്പെട്ടു. കാഞ്ഞങ്ങാട് എംഎന്‍ സ്മാരക മന്ദിരത്തില്‍ നടന്ന പരിപാടി സംസ്ഥാന ജനറല്‍ സെക്രട്ടറി ഡോ. ഒ.കെ. മുരളീകൃഷ്ണന്‍ ഉദ്ഘാടനം ചെയ്തു. സുനില്‍കുമാര്‍ മനിയേരി അധ്യക്ഷതവഹിച്ചു. സിപിഐ ജില്ലാ സെക്രട്ടറി സി.പി. ബാബു, ജയന്‍ നീലേശ്വരം, രാധാകൃഷ്ണന്‍ പെരുമ്പള, കെ. രവീന്ദ്രന്‍, സുനിത കരിച്ചേരി, രവീന്ദ്രന്‍ മാണിയാട്ട്, പി.പി. നാരായണന്‍, ഹാരിസ് പള്ളിക്കര, ഷീബ പൊതാവൂര്‍, രാമചന്ദ്രന്‍ കയ്യൂര്‍, കെ. ബാലകൃഷ്ണന്‍ എന്നിവര്‍ പ്രസംഗിച്ചു. രാഘവന്‍ മാണിയാട്ട് സ്വാഗതവും സുനില്‍കുമാര്‍ മനിയേരി നന്ദിയും പറഞ്ഞു. ഭാരവാഹികള്‍: രാഘവന്‍ മാണിയാട്ട് (പ്രസിഡന്‍റ്), സുനില്‍കുമാര്‍ മനിയേരി, സുനിത കരിച്ചേരി (വൈസ്പ്രസിഡന്‍റുമാര്‍), കെ. രവീന്ദ്രന്‍ (സെക്രട്ടറി), യു. രജീഷ്, ജലീല്‍ പലോത്ത് (ജോയിന്‍റ് സെക്രട്ടറി), കെ. ബാലകൃഷ്ണന്‍ (ട്രഷറര്‍).

നീലേശ്വരത്ത് നാലാം പ്ലാറ്റ്‌ഫോം നിര്‍മിക്കണം: റെയില്‍വേ വികസന ജനകീയ കൂട്ടായ്മ

നീലേശ്വരം: റെയില്‍വേയുടെ അധീനതയില്‍ ഇരുപതിലേറെ ഏക്കര്‍ സ്ഥലമുണ്ടായിട്ടും അവഗണിക്കപ്പെടുന്ന നീലേശ്വരത്ത് ഗുഡ്‌സ് ട്രെയിനുകള്‍ക്ക് വേണ്ടി നാലാം പ്ലാറ്റ്‌ഫോമും പുതിയ റെയില്‍പാതയും നിര്‍മിക്കണമെന്ന് നീലേശ്വരം റെയില്‍വേ വികസന ജനകീയ കൂട്ടായ്മ യോഗം ആവശ്യപ്പെട്ടു. രണ്ടും മൂന്നും പ്ലാറ്റ്ഫോമിന്‍റെ കിഴക്ക് ഭാഗത്ത് എഫ്‌സിഐ ഗോഡൗണ്‍ വരെയുള്ള സ്ഥലം ഇതിനു വേണ്ടി ഉപയോഗിച്ചാല്‍ മഴക്കാലത്ത് വെള്ളം കെട്ടിക്കിടന്ന് ധ്യാന്യങ്ങള്‍ ചീഞ്ഞു ദുര്‍ഗന്ധം വമിക്കുന്നതിനാല്‍ മൂക്കുപൊത്തി റെയില്‍വേ സ്റ്റേഷനില്‍ നില്‍ക്കേണ്ട അവസ്ഥയ്ക്ക് ശ്വാശ്വത പരിഹാരമാകും. അധികമായി നിര്‍മിക്കുന്ന പ്ലാറ്റ്‌ഫോമിലേക്ക് കണ്ണൂരില്‍ നിര്‍ത്തിയിടുന്ന ട്രെയിനുകളില്‍ ഏതെങ്കിലുമെന്ന് കാസര്‍ഗോഡ് ജില്ലയിലേക്ക് നീട്ടാനും സാധിക്കും. കണ്ണൂരില്‍ യാത്ര അവസാനിപ്പിക്കുന്ന മറ്റ് എക്‌സ്പ്രസ് ട്രെയിനുകള്‍ കാസര്‍ഗോഡ്, മഞ്ചേശ്വരം, ഉപ്പള എന്നിവിടങ്ങളിലേക്ക് നീട്ടുന്നതിന് നടപടികള്‍ കൈക്കൊള്ളണമെന്നും യോഗം ആവശ്യപ്പെട്ടു. അടിയന്തിരമായി റെയില്‍വേ സ്റ്റേഷന്‍റെ വടക്കുഭാഗത്തുള്ള ഓവുചാല്‍ വൃത്തിയാക്കി എഫ്‌സിഐ ഗോഡൗണിന് സമീപത്തെ റെയില്‍പാതയ്ക്കരികില്‍ കെട്ടിക്കിടക്കുന്ന വെള്ളം ഒഴുക്കിക്കളയാനുള്ള നടപടികള്‍ സ്വീകരിക്കണമെന്നും ജനകീയ കൂട്ടായ്മ ആവശ്യപ്പെട്ടു. പ്രസ്തുത ആവശ്യങ്ങള്‍ ഉള്‍പ്പെടുത്തി രാജ്‌മോഹന്‍ ഉണ്ണിത്താന്‍ എംപിക്കും റെയിവേ അധികൃതര്‍ക്കും നിവേദനം നല്‍കും. യോഗത്തില്‍ പ്രസിഡന്‍റ് നന്ദകുമാര്‍ കോറോത്ത് അധ്യക്ഷത വഹിച്ചു. സേതു ബങ്കളം, സി.കെ. അബ്ദുള്‍ സലാം, പത്മനാഭന്‍ മാങ്കുളം, ഗോപിനാഥന്‍ മുതിരക്കാല്‍, സി.കെ. ജനാര്‍ദ്ദനന്‍, പി. ഭാര്‍ഗവന്‍, എ.വി. പത്മനാഭന്‍, അശോക് രാജ് വെള്ളിക്കോത്ത് എന്നിവര്‍ സംസാരിച്ചു. സെക്രട്ടറി കെ.വി. സുനില്‍രാജ് സ്വാഗതവും കെ.വി. പ്രിയേഷ്‌കുമാര്‍ നന്ദിയും പറഞ്ഞു.

ചെമ്പക്കാട് പട്ടികവര്‍ഗ ഉന്നതിയിൽ എല്ലാവർക്കും വീടായി

ബേഡകം: സന്തോഷം പറഞ്ഞാല്‍ തീരൂല..നന്ദിയും. പുതിയ വീട്ടിലേക്ക് മാറാല്ലോ.. പട്ടികവര്‍ഗ വികസന വകുപ്പിന്‍റെ ഗ്രാമ വികസന പദ്ധതിയുടെ ഗുണഭോക്തൃ പട്ടികയില്‍ ഉള്‍പ്പെട്ട് പുതിയ വീടിന്‍റെ പണി അവസാന ഘട്ടത്തില്‍ എത്തിനില്‍ക്കുന്ന ചെമ്പക്കാട് ഉന്നതിയിലെ പള്ളിച്ചിയുടെ വാക്കുകളാണിത്. രണ്ടു ആണ്‍മക്കളും മൂത്ത മകന്‍റെ ഭാര്യയും മക്കളുമടങ്ങുന്നതാണ് പള്ളിച്ചിയുടെ കുടുംബം. ചോര്‍ന്നൊലിക്കുന്ന വീട്ടില്‍ നിന്ന് പട്ടികവര്‍ഗ വികസന വകുപ്പ്, ബേഡഡുക്ക പഞ്ചായത്തിന്‍റെ സഹായത്തോടെ ഭൂമി ഏറ്റെടുത്ത് നല്‍കിയത്തില്‍ ലൈഫ് മിഷനിലൂടെ പൂര്‍ത്തിയാക്കിയ മൂത്ത മകന്‍റെ വീട്ടിലാണ് പള്ളിച്ചിയും ഇളയ മകന്‍ രാജുവും നിലവില്‍ താമസിക്കുന്നത്. അംബേദ്കര്‍ ഗ്രാമവികസന പദ്ധതിയില്‍ ഉള്‍പ്പെടുത്തി നടക്കുന്ന 13 വീടുകളുടെയും റോഡിന്‍റെയും ഒരുകോടി രൂപയുടെ വികസന പ്രവര്‍ത്തനങ്ങള്‍ പൂര്‍ത്തീകരണത്തോടടുക്കുകയാണ്. അതില്‍ ഒരു വീട് പള്ളിച്ചിക്കും കുടുംബത്തിനുമാണ്. പൂര്‍ത്തീകരണ ഘട്ടത്തില്‍എത്തിനില്‍ക്കുന്ന വീട്ടിലേക്ക് മാറാനുള്ള തയ്യാറെടുപ്പിലാണ് ഇവരും മരപ്പണിക്കാരനായ മകന്‍ രാജുവും. പട്ടികവര്‍ഗവിഭാഗത്തില്‍ ഏറ്റവും പിന്നോക്കം നില്‍ക്കുന്ന വിഭാഗമായ മലവേട്ടുവ വിഭാഗത്തില്‍പ്പെട്ട 38 കുടുംബങ്ങള്‍ അധിവസിക്കുന്ന ഉന്നതിയാണ് ചെമ്പക്കാട് പട്ടികവര്‍ഗ ഉന്നതി. ബേഡഡുക്ക പഞ്ചായത്തിലെ പട്ടികവര്‍ഗ ഉന്നതികളില്‍ ഏറ്റവും പിന്നാക്കം നിന്നിരുന്ന ഉന്നതിയായിരുന്നു ചെമ്പക്കാട്. നിലവില്‍ പട്ടികവര്‍ഗക്കാരുടെ സമഗ്രവികസനത്തിനായി ഓരോ നിയമസഭാ മണ്ഡലത്തിലും എംഎല്‍എ നിര്‍ദേശിക്കുന്ന, അടിസ്ഥാന സൗകര്യങ്ങളുടെ അഭാവം അനുഭവിക്കുന്ന ഉന്നത്തികളില്‍ വകുപ്പ് നടപ്പിലാക്കി വരുന്ന അംബേദ്കര്‍ ഗ്രാമവികസന പദ്ധതിയിലൂടെ ചെമ്പക്കാട് ഉന്നതിയില്‍ നടക്കുന്ന ഒരു കോടിയുടെ വികസന പ്രവര്‍ത്തനങ്ങള്‍ അവസാനഘട്ടത്തില്‍ എത്തിനില്‍ക്കുന്നു. ഉന്നതിയിലെ 19 കുടുംബങ്ങള്‍ക്ക് സര്‍ക്കാരിന്‍റെ സഹായത്തോടെ നേരത്തെ ഭൂമി ഏറ്റെടുത്ത് നല്‍കുകയും ലൈഫ് മിഷനിലൂടെ വീടുകള്‍ നിര്‍മ്മിച്ച് നല്‍കുകയും ചെയ്തു. അവശേഷിക്കുന്ന കുടുംബങ്ങളില്‍ വീടില്ലാത്ത 13 കുടുംബങ്ങള്‍ക്ക് അംബേദ്കര്‍ ഗ്രാമ വികസന പദ്ധതിയിയുടെ ഒരുകോടി രൂപയുടെ വികസന പ്രവര്‍ത്തനങ്ങളിലൂടെ അനുവദിച്ച വീടുകളുടെ അവസാനഘട്ട പ്രവര്‍ത്തികള്‍ പുരോഗമിക്കുന്നു. ഇത് കൂടാതെ രണ്ട് വീടുകളുടെ നവീകരണവും റോഡ് നിര്‍മാണവും പദ്ധതിയുടെ ഭാഗമായി ഉന്നതിയില്‍ നടക്കുന്ന വികസന പ്രവത്തനങ്ങളില്‍ പെടുന്നു. ഓഗസ്റ്റ് മാസത്തോടെ ഉന്നതിയില്‍ വികസനപ്രവര്‍ത്തനങ്ങള്‍ പൂര്‍ത്തീകരിക്കാന്‍ സാധിക്കുമെന്ന് കാസര്‍ഗോഡ് ട്രൈബല്‍ എക്സ്റ്റന്‍ഷന്‍ ഓഫീസര്‍ വീരേന്ദ്രകുമാര്‍ പറഞ്ഞു.

വനിതാ കമ്മീഷൻ തീരദേശ മേഖലാക്യാമ്പ് സമാപിച്ചു

വലിയപറമ്പ: സംസ്ഥാന വനിതാ കമ്മീഷന്‍റെ കാസര്‍ഗോഡ് തീരദേശ മേഖലാക്യാമ്പ് സമാപിച്ചു. സെമിനാര്‍ പടന്നകടപ്പുറം ജിഎഫ് വിഎച്ച്എസ്എസില്‍ എം. രാജഗോപാലന്‍ എംഎല്‍എ ഉദ്ഘാടനം ചെയ്തു. വനിതാ കമ്മീഷന്‍ അംഗം പി. കുഞ്ഞായിഷ അധ്യക്ഷതവഹിച്ചു. പഞ്ചായത്ത് പ്രസിഡന്‍റ് വി.വി. സജീവന്‍, വൈസ് പ്രസിഡന്‍റ് പി. ശ്യാമള, ബ്ലോക്ക് സ്ഥിരംസമിതി അധ്യക്ഷന്‍ കെ. അനില്‍കുമാര്‍, ഖാദര്‍ പാണ്ഡ്യാല, ഇ.കെ. മല്ലിക, ബുഷ്റ, ഇ.കെ. ബിന്ദു എന്നിവര്‍ സംസാരിച്ചു. അഡ്വ.എം. ആശാലത, ഫിഷറീസ് എക്സ്റ്റന്‍ഷന്‍ ഓഫീസര്‍ എസ്. ഐശ്വര്യ എന്നിവര്‍ ക്ലാസെടുത്തു.

ബസ് കാത്തിരിപ്പുകേന്ദ്രത്തിലെ പടങ്ങൾ നീക്കണമെന്ന് ബിജെപി-സിപിഎം അംഗങ്ങൾ

കുമ്പള: പഞ്ചായത്തിനു കീഴിൽ കുമ്പള-ബദിയടുക്ക റോഡ് ജംഗ്ഷനിൽ നിർമിച്ച ബസ് കാത്തിരിപ്പുകേന്ദ്രത്തിൽ പഞ്ചായത്ത് ഭരണസമിതി അംഗങ്ങളെന്ന നിലയിൽ തങ്ങളുടെ പടങ്ങൾ സ്ഥാപിച്ചത് നീക്കംചെയ്യണമെന്നാവശ്യപ്പെട്ട് ബിജെപിയിലെ ഒൻപത് അംഗങ്ങളും ഏക സിപിഎം അംഗവും പഞ്ചായത്ത് സെക്രട്ടറിക്ക് കത്തുനല്കി. തങ്ങളുടെ അനുമതിയില്ലാതെയാണ് ബസ് കാത്തിരിപ്പുകേന്ദ്രത്തിൽ തങ്ങളുടെ പടങ്ങൾ സ്ഥാപിച്ചതെന്ന് കത്തിൽ ചൂണ്ടിക്കാട്ടി. പഞ്ചായത്തിന്‍റെ പ്ലാൻ ഫണ്ട് ദുരുപയോഗം ചെയ്തുകൊണ്ടാണ് കുമ്പള-ബദിയടുക്ക റോഡിൽ നാല് ബസ് കാത്തിരിപ്പുകേന്ദ്രങ്ങൾ നിർമിച്ചതെന്നും നിർമാണത്തിൽ വ്യാപക ക്രമക്കേടുകൾ നടന്നതായുമുള്ള ആരോപണങ്ങൾ ഉയരുന്നതിനിടയിലാണ് ഭരണസമിതിയിലെ പ്രതിപക്ഷ അംഗങ്ങൾ വിയോജിപ്പുമായി രംഗത്തെത്തിയത്. പുതിയ ബസ് കാത്തിരിപ്പുകേന്ദ്രങ്ങൾ നിർമിച്ചതുമായി ബന്ധപ്പെട്ട് ടൗണിൽ നടപ്പാക്കിയ ഗതാഗത പരിഷ്കാരങ്ങൾ പാളിപ്പോവുകയും ചെയ്തിരുന്നു. ബസ് കാത്തിരിപ്പുകേന്ദ്രങ്ങളുടെ നിർമാണ കരാർ ഏറ്റെടുത്തത് പഞ്ചായത്ത് പ്രസിഡന്‍റ് താഹിറ യൂസഫിന്‍റെ ഭർത്താവ് കെ.വി. യൂസഫായിരുന്നു. ഇതിന്‍റെ ബില്ലുകൾ പാസാക്കാത്തതുമായി ബന്ധപ്പെട്ട് പഞ്ചായത്ത് സെക്രട്ടറിയുടെ ഓഫീസിലെത്തി ബഹളം വച്ചതിന് സെക്രട്ടറിയുടെ പരാതിയിൽ കഴിഞ്ഞ ദിവസം യൂസഫിനെതിരെ കേസെടുത്തിരുന്നു.

വന്യമൃഗ ആക്രമണങ്ങൾക്കും തെരുവു നായ്ക്കൾക്കുമെതിരെ നിയമം കൊണ്ടുവരണം: കേരള കോൺഗ്രസ് -എം

കാഞ്ഞങ്ങാട്: വന്യജീവി വിഷയത്തില്‍ കേന്ദ്ര-സംസ്ഥാനസർക്കാരുകള്‍ക്ക് തുല്യ അധികാരമുള്ളതാണെന്നും കേന്ദ്രസർക്കാർ അനുകൂല നടപടികൾ എടുക്കാത്ത സാഹചര്യത്തിൽ വന്യമൃഗ ആക്രമണങ്ങളില്‍ നിന്ന് മലയോരകര്‍ഷക ജനതയെ രക്ഷിക്കുന്നതിനായി കേരള സർക്കാർ നിയമനിർമാണം നടത്തണമെന്നും കേരള കോൺഗ്രസ് -എം ജില്ലാ കമ്മിറ്റി യോഗം ആവശ്യപ്പെട്ടു. വന്യജീവി ആക്രമണങ്ങള്‍ മൂലം മലയോര ജനത അനുഭവിക്കുന്ന അതേ ഭീഷണിയാണ് നഗരങ്ങളിൽ തെരുവ് നായ്ക്കൾ മൂലം ജനങ്ങൾ അനുഭവിക്കുന്നതെന്നും ആധുനിക കാലഘട്ടത്തിൽ പിഞ്ചുകുഞ്ഞുങ്ങൾ അടക്കം പേവിഷബാധ മൂലം മരിക്കുന്നത് കേരള സമൂഹത്തിന്അപമാനകരമാണെന്നും ഈ പ്രശ്നത്തിലും എത്രയും പെട്ടെന്ന് ശാശ്വത പരിഹാരം കണ്ടെത്താന്‍ സംസ്ഥാന സര്‍ക്കാര്‍ തയ്യാറാകണമെന്നും യോഗം ചൂണ്ടിക്കാട്ടി. ജില്ലാ പ്രസിഡന്‍റ് സജി സെബാസ്റ്റ്യൻ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി കുര്യാക്കോസ് പ്ലാപ്പറമ്പിൽ, ജില്ലാ സെക്രട്ടറിയും ജില്ലാ പഞ്ചായത്ത് അംഗവുമായ ഷിനോജ് ചാക്കോ, ഓഫീസ് ചാർജ് ജനറൽ സെക്രട്ടറി ബിജു തുളുശേരി, ജോയി മൈക്കിൾ, സിജി കട്ടക്കയം, ബാബു നെടിയകാല, കെ.എം. ചാക്കോ, ടി.പി. യൂസഫ്, ജോസ് ചെന്നിക്കോട്ടുകുന്നേൽ, രാഘവ ചേരാല്‍, ടോമി വാഴപ്പള്ളി, ജോയ് തടത്തിൽ, ജോസ് പേണ്ടനത്ത്, ജോബ് കവിയിൽ, ജോസ് പുതുശ്ശേരിക്കാല എന്നിവർ പ്രസംഗിച്ചു.

മാധ്യമങ്ങൾ ഭരണകൂട ഭീകരതയിൽ ശ്വാസം മുട്ടിപ്പിടയുന്നു: രാജ്മോഹൻ ഉണ്ണിത്താൻ

തൃക്കരിപ്പൂർ: കൊളോണിയൽ വാഴ്ചക്കെതിരെ ചെറുത്തുനിൽപ്പ് നടത്തിയ മാധ്യമങ്ങൾ ഇപ്പോൾ ഭരണകൂട ഭീകരതയിൽ ശ്വാസം മുട്ടിപ്പിടയുന്ന സാഹചര്യമാണ് നിലനിൽക്കുന്നതെന്ന് രാജ്മോഹൻ ഉണ്ണിത്താൻ എംപി പറഞ്ഞു. തൃക്കരിപ്പൂർ ഗവ.വൊക്കേഷണൽ ഹയർ സെക്കൻഡറി സ്കൂളിൽ മുതിർന്ന മാധ്യമ പ്രവർത്തകൻ വി.കെ. രവീന്ദ്രന്‍റെ എൺപതാം പിറന്നാൾ ആദരത്തിന്‍റെ ഭാഗമായി സംഘടിപ്പിച്ച മാധ്യമ സെമിനാർ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മീഡിയ കമ്മിറ്റി ചെയർമാൻ കെ.കെ. രാജേന്ദ്രൻ അധ്യക്ഷത വഹിച്ചു. എൻ.പി. സുധർമ മോഡറേറ്ററായി. മാധ്യമ പ്രവർത്തകരായ വെങ്കിടേഷ് രാമകൃഷ്ണൻ, കെ.കെ. ഷാഹിന, മനില സി. മോഹൻ എന്നിവർ സംവാദത്തിൽ പങ്കെടുത്തു. പഞ്ചായത്ത് പ്രസിഡന്‍റ് വി.കെ. ബാവ, പി.പി. കരുണാകരൻ, ടി.വി. ചന്ദ്രദാസ് എന്നിവർ പ്രസംഗിച്ചു.

കാട്ടാനശല്യം: സ്വകാര്യ ഭൂമികളിലെ കാട് വെട്ടിത്തെളിക്കാൻ ഉടമകൾക്ക് നോട്ടീസ് നല്കും

പനത്തടി: റാണിപുരത്തിന് സമീപം പാറക്കടവ്, കുണ്ടുപ്പള്ളി ഭാഗങ്ങളിലെ കാട്ടാന ശല്യം തടയുന്നതിനായി വനത്തോട് ചേർന്ന് കാടുപിടിച്ചുകിടക്കുന്ന സ്വകാര്യ വ്യക്തികളുടെ സ്ഥലങ്ങൾ വെട്ടിത്തെളിക്കാനാവശ്യപ്പെട്ട് ഉടമകൾക്ക് നോട്ടീസ് നല്കും. ഇതിനായി വില്ലേജ് ഓഫീസറെ ചുമതലപ്പെടുത്താൻ പാറക്കടവിൽ ചേർന്ന പഞ്ചായത്ത്, വനം, റവന്യൂ ഉദ്യോഗസ്ഥരുടെ യോഗത്തിൽ തീരുമാനമായി. ജൂലൈ 15 നകം കാട് വെട്ടിത്തെളിക്കാനാണ് നോട്ടീസ് നല്കുക. നോട്ടീസ് ലഭിച്ചിട്ടും കാട് വെട്ടിത്തെളിക്കാൻ തയ്യാറാകാത്തവരുടെ വസ്തുക്കൾ 2023 ലെ ഇഎഫ്എൽ നിയമപ്രകാരം വനം വകുപ്പിലേക്ക് കണ്ടുകെട്ടാൻ ശുപാർശ ചെയ്യാനും യോഗം തീരുമാനിച്ചു. പാറക്കടവിൽ നിലവിലുള്ള സൗരോർജവേലി ഒരു കിലോമീറ്റർ നീളത്തിൽ കൂടി നീട്ടാനും തീരുമാനിച്ചു. ഇതോടൊപ്പം ആവശ്യമായ ഇടങ്ങളിൽ സൗരോർജ വിളക്കുകൾ സ്ഥാപിക്കാൻ വനം വകുപ്പിനോടാവശ്യപ്പെട്ടു. യോഗത്തിൽ പഞ്ചായത്ത് അംഗങ്ങളായ കെ.ജെ. ജെയിംസ്, പി.കെ. സൗമ്യമോൾ, സെക്ഷൻ ഫോറസ്റ്റ് ഓഫീസർ ബി. ശേഷപ്പ, ബീറ്റ് ഫോറസ്റ്റ് ഓഫീസർ ഷിഹാബുദ്ദീൻ, പനത്തടി വില്ലേജ് ഓഫീസർ പി.ഐ. സുബക്, റാണിപുരം വനസംരക്ഷണ സമിതി പ്രസിഡന്‍റ് എസ്. മധുസൂദനൻ, ട്രഷറർ എം.കെ. സുരേഷ്, ജി. രാമചന്ദ്രൻ, അജി ജോസഫ് എന്നിവർ പ്രസംഗിച്ചു.

ഉദ്ഘാടനം ചെയ്ത് ഒരുമാസം പിന്നിട്ടിട്ടും അനക്കമില്ലാതെ ബോവിക്കാനം എബിസി കേന്ദ്രം

കാസര്‍ഗോഡ്: തെരുവുനായ വന്ധ്യംകരണത്തിനായി ഒന്നരകോടി രൂപ ചെലവഴിച്ച് മുളിയാര്‍ പഞ്ചായത്തിലെ ബോവിക്കാനത്ത് നിര്‍മിച്ച എബിസി (അനിമല്‍ ബര്‍ത്ത് കണ്‍ട്രോള്‍) കേന്ദ്രം ഉദ്ഘാടനം ചെയ്ത് ഒരു മാസം കഴിഞ്ഞിട്ടും പ്രവര്‍ത്തനം തുടങ്ങിയില്ല. ഒരാഴ്ചയ്ക്കുള്ളില്‍ പ്രവര്‍ത്തനം ആരംഭിക്കുമെന്ന് പറഞ്ഞ സ്ഥാപനത്തിനാണ് ഈ ദുരവസ്ഥ. തെരുവുനായ ശല്യം ജില്ലയില്‍ വ്യാപകമായി ഭീഷണിയായിരിക്കെയാണ് അധികൃതരുടെ ഈ മെല്ലെപ്പോക്ക്. കഴിഞ്ഞ മാസം 19നു മന്ത്രി ജെ. ചിഞ്ചുറാണിയാണ് എബിസി കേന്ദ്രം ഉദഘാടനം ചെയ്തത്. പട്ടികളെ പിടിക്കാനും വന്ധ്യംകരണം നടത്താനുമുള്ള ഏജന്‍സി, ഉപകരണങ്ങള്‍, കൂട്, കെട്ടിടം തുടങ്ങി എല്ലാം തയാറായ ശേഷമാണ് ഉദ്ഘാടനം നടത്തിയത്. പക്ഷേ ഇതുവരെയായിട്ടും പ്രവര്‍ത്തനം തുടങ്ങിയില്ല. പറഞ്ഞ സമയത്ത് പ്രവര്‍ത്തനം തുടങ്ങിയിരുന്നെങ്കില്‍ ഇതിനകം 700ല്‍ ഏറെ തെരുവു നായകളെ വന്ധ്യംകരിക്കാന്‍ കഴിയുമായിരുന്നു. ജില്ലാ പഞ്ചായത്തും മൃഗസംരക്ഷണ വകുപ്പും ചേര്‍ന്നാണ് അത്യാധുനിക രീതിയിലുള്ള എബിസി കേന്ദ്രം ബോവിക്കാനം എട്ടാംമൈലില്‍ നിര്‍മിച്ചത്. മുളിയാറിലെ വെറ്ററിനറി കേന്ദ്രത്തിനോട് ചേര്‍ന്നാണിത്. 1.40 കോടി രൂപ ചെലവിലാണ് കെട്ടിടവും അനുബന്ധ സൗകര്യങ്ങളുമൊരുക്കിയത്. നെയ്ന്‍ ഫൗണ്ടേഷന്‍ എന്ന ഹരിയാന ആസ്ഥാനമായ സംഘടനയാണ് ഇതിന്‍റെ കരാറെടുത്തത്. പട്ടിയെ പിടികൂടി വന്ധ്യംകരണം നടത്തിയ ശേഷം അതേ സ്ഥലത്ത് തിരികെ വിടാന്‍ 1925 രൂപയാണ് അവര്‍ക്കു കൊടുക്കുക. അഞ്ചുദിവസം കൂട്ടിലിട്ട് ചികിത്സ നല്‍കിയ ശേഷമാണ് തുറന്നുവിടുക. ‍ 2016 ലാണ് കാസര്‍ഗോട്ട് എബിസി കേന്ദ്രം ആരംഭിച്ചത്. അിനുശേഷം തൃക്കരിപ്പൂരില്‍ മറ്റൊരു കേന്ദ്രവും തുടങ്ങി. എന്നാല്‍ 2023ല്‍ രണ്ടിന്‍റെയും പ്രവര്‍ത്തനം നിലച്ചു.

നിക്ഷേപക കമ്പനി പിന്മാറി; ബേക്കല്‍ ടൂറിസം വില്ലേജ് പദ്ധതി അനിശ്ചിതത്വത്തില്‍

കാഞ്ഞങ്ങാട്: ടൂറിസം മന്ത്രി നേരിട്ട് ഇടപെട്ട് നടപ്പിലാക്കാന്‍ ശ്രമിച്ച ബേക്കല്‍ ടൂറിസം വില്ലേജ് പദ്ധതി നിശ്ചലാവസ്ഥയില്‍. നിക്ഷേപക കമ്പനി പിന്മാറിയതോടെയാണ് പദ്ധതി നിലച്ചത്. പകരം ആളെ കണ്ടെത്താന്‍ നടപടികള്‍ തുടങ്ങിയെങ്കിലും ലക്ഷ്യത്തിലെത്തിയില്ല. ടൂറിസം വകുപ്പിനു കീഴിലെ ബേക്കല്‍ റിസോര്‍ട്സ് ഡവലപ്‌മെന്‍റ് കോര്‍പറേഷന്‍ ലിമിറ്റഡുമായി (ബിആര്‍ഡിസി) പദ്ധതിക്ക് കരാര്‍ ഒപ്പിട്ട മോറെക്‌സ് ഗ്രൂപ്പാണ് സെക്രട്ടറിതല യോഗത്തില്‍ പദ്ധതിയില്‍നിന്നു പിന്മാറാന്‍ താല്‍പര്യം അറിയിച്ചത്. നിര്‍മാണം ആരംഭിക്കാനുള്ള കരാര്‍ കാലാവധി കഴിഞ്ഞിട്ടും പണി തുടങ്ങാത്തതിനെ തുടര്‍ന്നാണ് ബിആര്‍ഡിസി മോറെക്‌സസ് ഗ്രൂപ്പിന് നോട്ടിസ് നല്‍കിയത്. പിന്നെയും കാലതാമസം വന്നതോടെയാണ് സെക്രട്ടറി തലത്തില്‍ ഉന്നതതലയോഗം വിളിച്ചത്. രണ്ടുഘട്ടങ്ങളിലായി 250 കോടിയുടെ പദ്ധതികളാണ് നടപ്പിലാക്കാന്‍ ലക്ഷ്യമിട്ടത്. വില്ലേജ് എക്‌സ്പീരിയന്‍സ്, ഫാം ടൂറിസം, ഫിഷിംഗ് ഫാം, സാഹസിക ടൂറിസം പദ്ധതികള്‍, ഡെസ്റ്റിനേഷന്‍ വെഡ്ഡിംഗ്, മീറ്റിംഗ്, എക്‌സിബിഷന്‍ എന്നിവ പദ്ധതിയുടെ ഭാഗമായി നടപ്പിലാക്കുകയായിരുന്നു ലക്ഷ്യം.അജാനൂർ പഞ്ചായത്തിലെ 33.18 ഏക്കര്‍ ഭൂമിയിലാണ് ടൂറിസം വില്ലേജ് നടപ്പാക്കാന്‍ കണ്ടെത്തിയത്. 1996ല്‍ ബിആര്‍ഡിസി റിസോര്‍ട്ട് നിര്‍മാണത്തിനായി വാങ്ങിയ സ്ഥലമാണ് ബേക്കല്‍ ടൂറിസം വില്ലേജ് നിര്‍മിക്കാനായി കൈമാറിയത്. പ്രസ്തുത സ്ഥലം റിസോര്‍ട്ട് നിര്‍മാണത്തിനായി ആദ്യം ലീസിന് എടുത്തവര്‍ ഉപേക്ഷിച്ചതോടെ തൃശൂരിലെ ജോയ്സ് ഗ്രൂപ്പിന് കൈമാറി. എന്നാല്‍ തീരദേശ പരിപാലന നിയമനം കര്‍ശനമായതോടെ ഇവിടെ നിര്‍മാണപ്രവര്‍ത്തനങ്ങള്‍ തടസപ്പെട്ടു. നിയമപ്രകാരം 3.5 ഏക്കര്‍ സ്ഥലത്ത് മാത്രമേ നിര്‍മാണ പ്രവര്‍ത്തനം നടത്താന്‍ കഴിയൂ. ഇതോടെ ജോയ്‌സ് ഗ്രൂപ്പും പദ്ധതി ഉപേക്ഷിച്ചു. റിസോര്‍ട്ട് നിര്‍മാണം തടസപ്പെട്ടതോടെ സ്ഥലം വര്‍ഷങ്ങളായി കാടുമൂടി കിടക്കുകയായിരുന്നു. പിന്നീട് അജാനൂര്‍ പഞ്ചായത്തിന്‍റെ നേതൃത്വത്തില്‍ കാടുമൂടി കിടക്കുന്ന സ്ഥലത്ത് ടൂറിസം പദ്ധതികള്‍ നടപ്പിലാക്കണമെന്ന് ആവശ്യപ്പെട്ട് മന്ത്രിക്കും ബിആര്‍ഡിസി എംഡിക്കും നിവേദനം നല്‍കിയിരുന്നു. ഇതിനെ തുടര്‍ന്നു മന്ത്രി പി.എ. മുഹമ്മദ് റിയാസ് ഇടപെട്ട് വകുപ്പുതല പരിശോധനയ്ക്കു നിര്‍ദേശം നല്‍കി. സ്ഥലം പരിശോധിച്ച സംഘം റിസോര്‍ട്ട് ഇതര ടൂറിസം പദ്ധതികള്‍ക്ക് സ്ഥലം അനുകൂലമാണെന്ന് റിപ്പോര്‍ട്ട് നല്കി.ബിആര്‍ഡിസി എംഡി പദ്ധതി യഥാര്‍ഥ്യമാക്കാനുള്ള നടപടിയും സ്വീകരിച്ചു. ഇതിന്‍റെ അടിസ്ഥാനത്തിലാണ് ബേക്കല്‍ ടൂറിസം വില്ലേജ് പദ്ധതി ഇവിടെ നടപ്പിലാക്കാന്‍ തീരുമാനമായത്.

വൈഎംസിഎ ഭാരവാഹികൾ ചുമതലയേറ്റു

മാലക്കല്ല്: മാലക്കല്ല് വൈഎംസിഎ യൂണിറ്റിന്‍റെ പുതിയ ഭാരവാഹികളുടെ സ്ഥാനാരോഹണവും കുടുംബസംഗമവും മാലക്കല്ല് ലൂർദ് മാതാ പാരിഷ് ഹാളിൽ സംസ്ഥാന എക്സിക്യൂട്ടീവ് അംഗം മാനുവൽ കുറിച്ചിത്താനം ഉദ്ഘാടനം ചെയ്തു. ബേബി പള്ളിക്കുന്നേൽ അധ്യക്ഷത വഹിച്ചു. ഇടവക വികാരി ഫാ. ഡിനോ കുമ്മാനിക്കാട്ട് അനുഗ്രഹപ്രഭാഷണം നടത്തി. കാസർഗോഡ് സബ് റീജിയൺ ചെയർമാൻ സണ്ണി മാണിശേരി, ജനറൽ സെക്രട്ടറി ബൈജു, യൂണി-വൈ സംസ്ഥാനതല ചെയർമാൻ അഖിൽ ജോൺ, സത്യൻ കനകമൊട്ട, കള്ളാർ പഞ്ചായത്ത് വൈസ് പ്രസിഡന്‍റ് പ്രിയ ഷാജി, പഞ്ചായത്തംഗം മിനി ഫിലിപ്പ് എന്നിവർ പ്രസംഗിച്ചു. ജോൺ പുല്ലുമറ്റം സ്വാഗതവും ടോമി നെടുംതൊട്ടിയിൽ നന്ദിയും പറഞ്ഞു. ഭാരവാഹികൾ‌: ബേബി പള്ളിക്കുന്നേൽ (പ്രസിഡന്‍റ്), ടോമി നെടുംതൊട്ടിയിൽ (വൈസ് പ്രസിഡന്‍റ്), ജോൺ പുല്ലുമറ്റത്തിൽ (സെക്രട്ടറി), ബേബി ചെട്ടിക്കതോട്ടത്തിൽ (ജോയിന്‍റ് സെക്രട്ടറി), വിൽസൺ മാവേലിൽ (ട്രഷറർ).

കടലേറ്റം രൂക്ഷം; തുറമുഖം വരും മുമ്പേ കടലെടുക്കുമെന്ന ഭീതിയിൽ അജാനൂർ

കാഞ്ഞങ്ങാട്: വർഷാവർഷം മഴക്കാലത്ത് ഗതിമാറിയൊഴുകുന്ന ചിത്താരിപ്പുഴയും അതിനനുസരിച്ച് കരയിലേക്ക് ആഞ്ഞടിക്കുന്ന കടൽത്തിരകളും അജാനൂർ കടപ്പുറത്തെ നാശോന്മുഖമാക്കുന്നു. കടപ്പുറത്തെ ഫിഷ് ലാൻഡിംഗ് സെന്‍റർ കെട്ടിടവും തീരദേശ റോഡും ഏതു നിമിഷവും കടലെടുക്കുമെന്ന ഭീതിയിലാണ്. പ്രാരംഭ പ്രവർത്തനങ്ങൾ തുടങ്ങിയ മിനി ഹാർബർ എത്രയും പെട്ടെന്ന് യാഥാർഥ്യമായില്ലെങ്കിൽ ഇതൊന്നും ഇനി അധികകാലമുണ്ടാവില്ല. വേനൽക്കാലം കഴിഞ്ഞ് മഴക്കാലമെത്തുമ്പോഴേക്കും ചിത്താരിപ്പുഴ ഒരു കിലോമീറ്ററോളം വീതിയിലാണ് ഗതിമാറിയൊഴുകുന്നത്. ഇതിനനുസരിച്ച് അഴിമുഖത്തിന്‍റെ സ്ഥാനവും മാറും. മറ്റിടങ്ങളിൽ തിരമാലകൾ കരയിലേക്ക് ആഞ്ഞടിക്കുകയും ചെയ്യുന്നു. കഴിഞ്ഞ ദിവസങ്ങളിൽ ആഞ്ഞടിച്ച തിരമാലകൾ തീരദേശ റോഡിന്‍റെ അര കിലോമീറ്ററോളം ഭാഗം അപകടാവസ്ഥയിലാക്കി. റോഡിന്‍റെ അടിവശത്തുനിന്ന് മണ്ണൊഴുകിപ്പോയതോടെ ടാർ ചെയ്ത ഭാഗം ഏതുനിമിഷവും തകരുമെന്ന നിലയിലാണ്. ഇതോടെ റോഡിന്‍റെ മറുവശത്തുള്ള വീടുകളും അപകടഭീഷണിയിലായി. ഇടയ്ക്ക് റോഡിനു മുകളിലൂടെ വീട്ടുപറമ്പുകളിലേക്കുവരെ തിരകൾ ആഞ്ഞടിച്ചിരുന്നു. ഈ വർഷം ഇതുവരെ 10 തെങ്ങുകളാണ് കടപുഴകിയത്. ഇവിടെ കരിങ്കല്ലുകൊണ്ട് നിർമിച്ചിരുന്ന കടൽഭിത്തി വർഷങ്ങൾക്കുമുമ്പ് തകർന്നിരുന്നു. ഫിഷ് ലാൻഡിംഗ് സെന്‍ററിന്‍റെ സംരക്ഷണത്തിനായി അടുത്തിടെ പഞ്ചായത്ത് പദ്ധതിയിൽ നിർമിച്ച കോൺക്രീറ്റ് മതിലും അടിമണ്ണിളകിയതോടെ അപകടാവസ്ഥയിലാണ്. എത്രയും പെട്ടെന്ന് തുറമുഖത്തിന്‍റെ നിർമാണം തുടങ്ങണമെന്നും അതിനുമുമ്പ് കടലേറ്റം തടയാൻ താത്കാലിക സംവിധാനങ്ങൾ ഒരുക്കണമെന്നുമാണ് നാട്ടുകാരുടെ ആവശ്യം.

കോലുവള്ളി കമ്പിപ്പാലത്തിന്‍റെ പലക തകർന്നു; യുവതി രക്ഷപ്പെട്ടത് തലനാരിഴയ്ക്ക്

പാലാവയൽ: കാലങ്ങളായി അപകടാവസ്ഥയിൽ നിൽക്കുന്ന കോലുവളളി കമ്പിപ്പാലത്തിന്‍റെ പലക തകർന്നതിനെ തുടർന്ന് അപകടത്തിൽപ്പെട്ട യുവതി പുഴയിൽ വീഴാതെ രക്ഷപ്പെട്ടത് തലനാരിഴയ്ക്ക്. മുനയംകുന്നിലെ ആനകുത്തിയിൽ സുനു ആണ് കഴിഞ്ഞദിവസം രാത്രി കുലംകുത്തിയൊഴുകുന്ന പുഴയിൽ വീഴാതെ കഷ്ടിച്ച് രക്ഷപ്പെട്ടത്. മകളെ ചെറുപുഴയിലെ ആശുപത്രിയിൽ കാണിച്ച് മടങ്ങുമ്പോഴായിരുന്നു സംഭവം. കാലെടുത്തുവയ്ക്കുമ്പോൾ പാലത്തിന്‍റെ പലക തകർന്നെങ്കിലും അതിനിടയിൽ പാലത്തിന്‍റെ കമ്പിയിൽ പിടുത്തം കിട്ടിയതിനാലാണ് സുനു പുഴയിൽ വീഴാതിരുന്നത്. പലകയുടെ അപകടാവസ്ഥയറിയാതെ കുട്ടി തൊട്ടുമുന്നിൽ കടന്നുപോയിരുന്നു. മലയോരത്തെ ഏറ്റവും നീളം കൂടിയ കമ്പിപ്പാലങ്ങളിൽ ഒന്നാണ് കോലുവള്ളിയിൽ തേജസ്വിനിപ്പുഴയ്ക്ക് കുറുകേയുള്ള പാലം. കാലപ്പഴക്കത്തെ തുടർന്നു പാലത്തിലെ നിരവധി മരപ്പലകകൾ ഇതിനകം തകർന്നു വീണിട്ടുണ്ട്. ഈസ്റ്റ് എളേരി പഞ്ചായത്തിലെ മുനയംകുന്ന് ഭാഗത്തു നിന്നുള്ള വിദ്യാർഥികളടക്കം ഈ കമ്പിപ്പാലം കടന്ന് കോലുവള്ളിയിൽ എത്തിയാണ് സമീപത്തെ പ്രധാന ടൗണായ ചെറുപുഴയിലേക്ക് പോകുന്നത്. അല്ലാത്തപക്ഷം മുനയംകുന്നിൽനിന്ന് ചെറുപുഴ ഭാഗത്തേക്ക് പോകാൻ കിലോമീറ്ററുകൾ ചുറ്റിസഞ്ചരിക്കണം. നേരിട്ട് ബസ് സർവീസുകൾ പോലുമില്ലാത്തതിനാൽ വൻതുക നല്കി ഓട്ടോറിക്ഷ വിളിച്ചാണ് ആശുപത്രി ആവശ്യങ്ങൾക്കുൾപ്പെടെ പോകേണ്ടിവരുന്നത്. ഈ ബാധ്യത താങ്ങാനാവാത്തതിനാലാണ് സാധാരണക്കാർ അപകടാവസ്ഥയിലായിട്ടും കമ്പിപ്പാലം കടന്നുപോകുന്നത്. ചെറുപുഴ ഭാഗത്തെ സ്കൂളുകളിലേക്ക് പോകുന്ന കുട്ടികളെ രക്ഷിതാക്കൾ ഒപ്പംവന്ന് കൈപിടിച്ച് പാലം കടത്തിവിടുകയാണ് പതിവ്. പാലത്തിലെ കൂടുതൽ മരപ്പലകകൾ ഇളകി വീഴാവുന്ന നിലയിലാണുള്ളതെന്ന് നാട്ടുകാർ പറയുന്നു. 2013-14 ൽ പയ്യന്നൂർ ബ്ലോക്ക് പഞ്ചായത്ത് 3.5 ലക്ഷം രൂപ ചെലവഴിച്ച് പാലം പുതുക്കിപ്പണിതിരുന്നു. പിന്നീട് എല്ലാ വർഷവും അറ്റകുറ്റപണികൾ നടത്താറുണ്ടായിരുന്നു. ‌എന്നാൽ ഈ വർഷം അതും നടന്നില്ല. മുനയംകുന്നിനും കോലുവള്ളിക്കും ഇടയിൽ കോൺക്രീറ്റ് പാലവും ചെക്ക്ഡാമും നിർമിക്കണമെന്ന ആവശ്യം വർഷങ്ങളായി ഉള്ളതാണ്. ഇടക്കാലത്ത് ഇതിനായുള്ള നീക്കങ്ങൾ സജീവമായിരുന്നെങ്കിലും പിന്നീട് സ്തംഭനാവസ്ഥയിലാവുകയായിരുന്നു. അടിയന്തിരമായി കമ്പിപ്പാലത്തിന്‍റെ അറ്റകുറ്റപണികളെങ്കിലു നടത്തിയില്ലെങ്കിൽ ഇവിടെ ഇനിയും ഏതു നിമിഷവും അപകടങ്ങൾ സംഭവിക്കാവുന്ന നിലയാണെന്ന് നാട്ടുകാർ ചൂണ്ടിക്കാട്ടുന്നു.

പാടി നഗറിനെ വിട്ടൊഴിയാതെ കാട്ടാന

മാലോം: ബളാൽ പഞ്ചായത്തിലെ പാടി പട്ടികവർഗ നഗറിനെ വിട്ടൊഴിയാതെ കാട്ടാന. കഴിഞ്ഞ ഒരാഴ്ചയായി ഇവിടെ പതിവായി കാട്ടാനയിറങ്ങി കൃഷി നശിപ്പിക്കുകയാണ്. ഇവിടെ താമസിക്കുന്നഅൻപതിലധികം കുടുംബങ്ങൾ രാത്രിയിൽ കാട്ടാനയെ ഭയന്ന് ഉറങ്ങാൻ പോലും കഴിയാത്ത നിലയിലാണ്. വീട്ടിൽനിന്ന് പുറത്തിറങ്ങാനും കഴിയുന്നില്ല. ടാറിട്ട റോഡിൽ പോലും കാട്ടാനകൾ കടന്നുപോയതിന്‍റെ അടയാളങ്ങളാണ്. പ്രശ്നത്തിൽ വനംവകുപ്പിന്‍റെ ഭാഗത്തുനിന്ന് അടിയന്തിര നടപടികൾ ഉണ്ടാകണമെന്നും ജനവാസമേഖലയ്ക്കു സമീപം തമ്പടിച്ചിരിക്കുന്ന കാട്ടാനകളെ ഉൾക്കാട്ടിലേക്ക് തുരത്തണമെന്നും ഇവിടെ സന്ദർശിച്ച പഞ്ചായത്ത് പ്രസിഡന്‍റ് രാജു കട്ടക്കയം ആവശ്യപ്പെട്ടു. ബളാൽ പഞ്ചായത്തിലെ വനാതിർത്തി ഗ്രാമങ്ങളിലെല്ലാം ഒരു മാസത്തിലേറെയായി കാട്ടാനകൾ വിളയാടുകയാണ്. ലക്ഷക്കണക്കിന് രൂപയുടെ കൃഷിയാണ് ഇതിനകം നശിപ്പിക്കപ്പെട്ടത്. ഈ പ്രശ്നത്തിന് അടിയന്തര പരിഹാരം ഉണ്ടായില്ലെങ്കിൽ ശക്തമായ സമരപരിപാടികളിലേക്ക് കടക്കുമെന്നും അദ്ദേഹം മുന്നറിയിപ്പ് നല്കി.

വനിതാ കമ്മീഷൻ തീരദേശ മേഖലാ ക്യാമ്പിന് തുടക്കമായി

വലിയപറമ്പ്: വനിതാ കമ്മീഷൻ തീരദേശ മേഖലാ ക്യാമ്പിന് വലിയപറമ്പ് പഞ്ചായത്തിൽ തുടക്കമായി. തീരദേശമേഖലയിലെ വനിതകളുടെ പ്രശ്നങ്ങളും ആവശ്യങ്ങളും തിരിച്ചറിഞ്ഞ് പരിഹാര മാർഗങ്ങൾക്കായി സർക്കാരിലേക്ക് സമർപ്പിക്കുകയാണ് ക്യാമ്പിന്‍റെ ലക്ഷ്യം. പടന്ന കടപ്പുറത്ത് കിടപ്പുരോഗികളായി വീട്ടിൽ കഴിയുന്ന സ്ത്രീകളെ വനിതാ കമ്മീഷൻ അംഗം പി. കുഞ്ഞായിഷയും പഞ്ചായത്തിലെ ജനപ്രതിനിധികളും ഉദ്യോഗസ്ഥരും സന്ദർശിച്ച് ആവശ്യങ്ങൾ കേട്ടറിഞ്ഞു. പടന്ന കടപ്പുറം ഗവ. ഫിഷറീസ് ഹയർ സെക്കൻഡറി സ്കൂളിൽ നടക്കുന്ന ക്യാമ്പിന്‍റെ ഭാഗമായി വിവിധ ബോധവത്കരണ പരിപാടികളും നിയമസഹായ നടപടികളും സംഘടിപ്പിക്കും. വനിതാ കമ്മീഷൻ അംഗം പി. കുഞ്ഞായിഷ ക്യാമ്പിന്‍റെ ഉദ്ഘാടനം നിർവഹിച്ചു. പഞ്ചായത്ത് പ്രസിഡന്‍റ് വി.വി. സജീവൻ അധ്യക്ഷത വഹിച്ചു. വനിതാ കമ്മീഷൻ പ്രൊജക്ട് ഓഫീസർ എൻ. ദിവ്യ, ഫിനാൻസ് ഓഫീസർ ലിജ ജോസഫ്, ഫിഷറീസ് ഡെപ്യൂട്ടി ഡയറക്ടർ കെ.എ. ലബീബ്, പഞ്ചായത്ത് വൈസ് പ്രസിഡന്‍റ് പി. ശ്യാമള, സ്ഥിരം സമിതി അധ്യക്ഷരായ ഖാദർ പാണ്ട്യാല, കെ. മനോഹരൻ, പഞ്ചായത്തംഗം എം. അബ്ദുൾ സലാം, കുടുംബശ്രീ സിഡിഎസ് അധ്യക്ഷ ഇ.കെ. ബിന്ദു എന്നിവർ പ്രസംഗിച്ചു. പോലീസ്, എക്സൈസ്, റവന്യു, ഫിഷറീസ്, ആരോഗ്യം തുടങ്ങി വിവിധ വകുപ്പുകളുടെ പ്രതിനിധികൾ റിപ്പോർട്ടുകൾ അവതരിപ്പിച്ചു. ഇന്ന് രാവിലെ 10 ന് നടക്കുന്ന സെമിനാർ എം. രാജഗോപാലൻ എംഎൽഎ ഉദ്ഘാടനം ചെയ്യും. വനിതാ കമ്മീഷൻ അംഗം പി. കുഞ്ഞായിഷ അധ്യക്ഷത വഹിക്കും. എം. ആശാലത, എസ്. ഐശ്വര്യ എന്നിവർ വിഷയാവതരണം നടത്തും.

എളേരിത്തട്ട് ഗവ. കോളജില്‍ നാല് കോടിയുടെ വികസന പ്രവര്‍ത്തനങ്ങളുടെ ഉദ്ഘാടനം നാളെ

എളേരിത്തട്ട്: ഇ.കെ. നായനാർ സ്മാരക ഗവ. കോളജിൽ സംസ്ഥാന സർക്കാരിന്‍റെ പദ്ധതി വിഹിതത്തിൽ നിന്നും നാലുകോടി രൂപ ചെലവിൽ നിർമിച്ച ഇക്കണോമിക്സ് സമുച്ചയം, ഇന്‍റേണൽ റോഡ്, വാട്ടർ ടാങ്ക്, ഐക്യുഎസി കോണ്‍ഫറന്‍സ് ഹാള്‍ എന്നിവയുടെ ഉദ്ഘാടനം നാളെ ഉച്ചയ്ക്ക് 12 മണിക്ക് ഉന്നതവിദ്യാഭ്യാസ മന്ത്രി ആർ. ബിന്ദു നിർവഹിക്കും. എം. രാജഗോപാലൻ എംഎൽഎ അധ്യക്ഷത വഹിക്കും. രാജ്മോഹൻ ഉണ്ണിത്താൻ എംപി വിശിഷ്ടാതിഥിയാകും. രണ്ട് കോടി രൂപ ചെലവിലാണ് ഇക്കണോമിക്സ് സമുച്ചയം നിർമിച്ചത്. കാമ്പസിനകത്തെ റോഡ് വികസനത്തിന് 1.34 കോടി രൂപയും വാട്ടർടാങ്ക് നിര്‍മാണത്തിന് 38 ലക്ഷം രൂപയും ഐക്യുഎസി കോണ്‍ഫറന്‍സ് ഹാള്‍ നിർമാണത്തിന് 13 ലക്ഷം രൂപയുമാണ് ചെലവഴിച്ചതെന്ന് പ്രിൻസിപ്പൽ ഡോ. മാത്യൂസ് പ്ലാമൂട്ടിൽ, വൈസ് പ്രിൻസിപ്പൽ ഡോ. ടോബി ജോസഫ്, ഡോ.പി.സി. അഷ്റഫ്, ഡോ.കെ. പ്രകാശൻ, പി.ജെ. പ്രസാദ് എന്നിവർ പത്രസമ്മേളനത്തിൽ അറിയിച്ചു. 1981 ല്‍ ഇ.കെ. നായനാര്‍ മുഖ്യമന്ത്രിയായിരുന്ന സമയത്താണ് മലയോരമേഖലയിലെ ഉന്നത വിദ്യഭ്യാസ വികസനത്തിനായി എളേരിത്തട്ടില്‍ ഒരു ഗവ. കോളജ് അനുവദിച്ചത്. 2019 ലാണ് കോളജിന് ആദ്യമായി നാക് അക്രഡിറ്റേഷന്‍ ലഭിക്കുന്നത്. ഇക്കാലയളവിനുള്ളിൽ അടിസ്ഥാന സൗകര്യ വികസനത്തിലും പാഠ്യ-പാഠ്യേതര പ്രവര്‍ത്തനങ്ങളിലും മികച്ച നേട്ടങ്ങള്‍ കൈവരിക്കാന്‍ കോളജിന് കഴിഞ്ഞിട്ടുണ്ടെന്ന് പ്രിൻസിപ്പൽ പറഞ്ഞു. അടുത്ത ഘട്ടത്തിൽ വിപുലമായ സൗകര്യങ്ങളുള്ള സ്റ്റുഡന്‍റ് അമിനിറ്റി സെന്‍റര്‍ സ്ഥാപിക്കാനുള്ള ഫണ്ട് സര്‍ക്കാരില്‍ നിന്ന് ലഭ്യമായിട്ടുണ്ടെന്നും അതിന്‍റെ രൂപരേഖ തയ്യാറാക്കിയിട്ടുണ്ടെന്നും അദ്ദേഹം അറിയിച്ചു.

അക്ഷത് മോന്‍റെ ചികിത്സാ സഹായത്തിന് സ്‌കൂളിന്‍റെ സംഭാവനയായി 1.08 ലക്ഷം

കാഞ്ഞങ്ങാട്: ഗുരുതരാവസ്ഥയിൽ മംഗളൂരുവിലെ ആശുപത്രിയിൽ കഴിയുന്ന ബല്ല ഗവ. ഹയർ സെക്കൻഡറി സ്‌കൂളിലെ നാലാം തരം വിദ്യാർഥി അക്ഷത് മോന്‍റെ ചികിത്സയ്ക്ക് സ്‌കൂളിന്‍റെ സംഭാവനയായി 1.08 ലക്ഷം രൂപ കൈമാറി. പ്രിൻസിപ്പൽ സി.വി. അരവിന്ദാക്ഷൻ,മുഖ്യാധ്യാപിക എം.എസ്. ശുഭലക്ഷ്മി എന്നിവരിൽ നിന്നും കാഞ്ഞങ്ങാട് നഗരസഭാധ്യക്ഷയും ചികിത്സാ സഹായ സമിതി രക്ഷാധികാരിയുമായ കെ.വി. സുജാത തുക ഏറ്റുവാങ്ങി. പിടിഎ പ്രസിഡന്‍റ് എൻ. ഗോപി അധ്യക്ഷനായി. നഗരസഭ സ്ഥിരം സമിതി അധ്യക്ഷ കെ. ലത, ചികിത്സാ സഹായ കമ്മിറ്റി ചെയർമാൻ എം. ബൽരാജ്, വൈസ് ചെയർമാൻ ഇ.വി. ജയകൃഷ്ണൻ, കൺവീനർ പി. പത്മനാഭ, ട്രഷറർ എസ്. പ്രദീപ്കുമാർ, എസ്. ഗോപാലകൃഷ്ണൻ എന്നിവർ സംബന്ധിച്ചു. കാരാട്ടുവയൽ കൊഴക്കുണ്ട് മുത്തപ്പൻ തറയ്ക്ക് സമീപത്തെ മമതയുടെയും പരേതനായ ഹരീഷിന്‍റെയും മകനായ അക്ഷത് കുടൽമാല ചുറ്റിപ്പിണഞ്ഞുപോയതിനെ തുടർന്നാണ് ഗുരുതരാവസ്ഥയിൽ മംഗളൂരു ഫാദർ മുള്ളേർസ് ആശുപത്രിയിൽ ചികിത്സയിൽ കഴിയുന്നത്. ഇതിനകം രണ്ട് ശസ്ത്രക്രിയകൾ കഴിഞ്ഞു. ഇനിയും ശസ്ത്രക്രിയകൾ വേണ്ടിവരും. 15 ലക്ഷത്തോളം രൂപ ചികിത്സാച്ചെലവ് വേണ്ടിവരുമെന്നാണ് ഡോക്ടർമാർ അറിയിച്ചിട്ടുള്ളത്. സഹായ ഫണ്ടിലേക്ക് ഓരോരുത്തരും അവരവരെക്കൊണ്ട് കഴിയുന്ന തുക സംഭാവന നല്കണമെന്ന് ചികിത്സാ സഹായ സമിതി അഭ്യർഥിച്ചു. ഗൂഗിൾ പേ നമ്പർ: 9605427421 (പ്രമീള).കർണാടക ബാങ്കിന്‍റെ കാഞ്ഞങ്ങാട് ശാഖയിൽ തുടങ്ങിയ അക്കൗണ്ടിന്‍റെ നമ്പർ: 9992505076574901.

വിജയോത്സവ് 2025 സംഘടിപ്പിച്ചു

രാജപുരം: കള്ളാർ മണ്ഡലം പത്താം വാർഡ് കോൺഗ്രസ് കമ്മിറ്റി വിജയോത്സവ് 2025 സംഘടിപ്പിച്ചു. രാജപുരം വ്യാപാരഭവനിൽ നടന്ന പരിപാടി കർഷക കോൺഗ്രസ് ജില്ലാ പ്രസിഡൻന്‍റ് രാജു കട്ടക്കയം ഉദ്ഘാടനം ചെയ്തു. വാർഡ് പരിധിയിൽ നിന്നും എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിച്ചു. വാർഡ് പ്രസിഡന്‍റ് ഒ.സി. ജെയിംസ് അധ്യക്ഷത വഹിച്ചു. മണ്ഡലം കോൺഗ്രസ് പ്രസിഡന്‍റ് എം.എം. സൈമൺ മുഖ്യപ്രഭാഷണം നടത്തി. പഞ്ചായത്ത് പ്രസിഡന്‍റ് ടി.കെ. നാരായണൻ, രാജപുരം ഹോളിഫാമിലി ഹയർ സെക്കൻഡറി സ്കൂൾ അധ്യാപിക മിനി ജോസഫ്, വി. കുഞ്ഞിക്കണ്ണൻ, പി.എ. ആലി, വി.കെ. ബാലകൃഷ്ണൻ, ഇ.കെ. ഗോപാലൻ, ലീല ഗംഗാധരൻ, വനജ ഐത്തു, സി.രേഖ, വാർഡ് സെക്രട്ടറി ജോയി കൊട്ടുപ്പള്ളി, ലീലാമ്മ ജോസ് എന്നിവർ പ്രസംഗിച്ചു.

ലഹരി വിരുദ്ധ ദിനാചരണം

കാഞ്ഞിരടുക്കം: ഉർസുലൈൻ പബ്ലിക് സ്കൂളിൽ ലഹരിവിരുദ്ധ ദിനാചരണത്തോടനുബന്ധിച്ച് ഫ്ളാഷ് മോബും സ്കിറ്റും അവതരിപ്പിച്ചു. പ്രിൻസിപ്പൽ സിസ്റ്റർ ബിജി മാത്യു ലഹരിവിരുദ്ധ സന്ദേശം നല്കി. അധ്യാപികമാരായ എം. മോഹിനി, കെ. ശ്രീജ, കൃപ നിതേഷ് എന്നിവർ നേതൃത്വം നല്കി. കരിവേടകം: ലോക ലഹരിവിരുദ്ധദിനത്തോടനുബന്ധിച്ച് കരിവേടകം എയുപി സ്കൂളിൽ ജൂബിലി ആഘോഷ കമ്മിറ്റിയും ആന്‍റി ഡ്രഗ്സ് സ്റ്റുഡന്‍റ്സ് യൂണിയനും സംയുക്തമായി രക്ഷിതാക്കൾക്കായി ലഹരിവിരുദ്ധ ബോധവത്കരണ ക്ലാസ് നടത്തി. കുറ്റിക്കോൽ പഞ്ചായത്ത് സ്ഥിരം സമിതി അധ്യക്ഷ ലിസി തോമസ് ഉദ്ഘാടനം ചെയ്തു. ബന്തടുക്ക റേഞ്ച് സിവിൽ എക്സൈസ് ഓഫീസർ കെ. ഗണേഷ് ക്ലാസ് നയിച്ചു. സ്കൂൾ മാനേജർ ഫാ. ജോർജ് വെള്ളരിങ്ങാട്ട് അധ്യക്ഷത വഹിച്ചു. ജൂബിലി വർക്കിംഗ് കമ്മിറ്റി ചെയർമാൻ ജോസ് പാറത്തട്ടേൽ, പിടിഎ പ്രസിഡന്‍റ് സണ്ണി തോമസ്, എഡിഎസ് യു ആനിമേറ്റർ റെനീഷ് തോമസ്, ഇ.എ. ഹരികുമാർ, നോബിൾ ജോസ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]