ADVERTISEMENT

ADVERTISEMENT

കാരംസ് ടൂർണമെന്‍റ്: പയ്യാവൂർ സെന്‍റ് ആൻസ് ജേതാക്കൾ

പയ്യാവൂർ: ഐസിഎസ്ഇ സോണൽതല കാരംസ് ടൂർണമെന്‍റിൽ അണ്ടർ-14, അണ്ടർ-17 എന്നീ വിഭാഗങ്ങളിൽ പയ്യാവൂർ സെന്‍റ് ആൻസ് ഇംഗ്ലീഷ് മീഡിയം സ്കൂളിലെ വിദ്യാർഥികൾ ജേതാക്കളായി.

കോഴിക്കോട് സെന്‍റ് മേരീസ് സ്കൂളിനാണ് രണ്ടാം സ്ഥാനം. ഇരിക്കൂർ ബ്ലോക്ക് പഞ്ചായത്ത് അംഗം ജയിംസ് തുരുത്തേൽ ടൂർണമെന്‍റ് ഉദ്ഘാടനം ചെയ്തു. സ്കൂൾ പ്രിൻസിപ്പൽ സിസ്റ്റർ ജിൽസി അധ്യക്ഷത വഹിച്ചു.

ADVERTISEMENT

ഡോക്ടർമാരെ ആദരിച്ചു

നടുവിൽ: നടുവിൽ ബികെഎം ഇംഗ്ലീഷ് സ്കൂളിന്‍റെ ആഭിമുഖ്യത്തിൽ ഡോക്ടേഴ്സ് ഡേയിൽ നടുവിൽ സ്മൈൽ ഡെന്‍റൽ ക്ലിനിക് ഉടമ ഡോ. മാർട്ടിൻ റിച്ചാർഡിനെ ആദരിച്ചു. സ്കൂൾ മാനേജർ കെ.പി. ഹംസ പൊന്നാടണിയിച്ചു. പ്രിൻസിപ്പൽ പ്രേമചന്ദ്രൻ, അഡ്മിനിസ്ട്രേറ്റർ ഷറഫ് കത്തിച്ചാൽ, സ്റ്റാഫ് സെക്രട്ടറി ശാന്തി ജയ്സൺ എന്നിവർ പ്രസംഗിച്ചു. ആലക്കോട്: സെന്‍റ് മേരീസ് കോൺവന്‍റ് സ്കൂളിൽ ഡിസിഎൽ യൂണിറ്റിന്‍റെ ആഭിമുഖ്യത്തിൽ പൂർവ വിദ്യാർഥികളും വിവിധ ആശുപത്രികളിൽ സേവനം ചെയ്യുന്നവരുമായ ഡോ. ജിബിൻ ചാക്കോ, ഡോ. ബിബിൻ ജയിംസ്, ഡോ. അർച്ചന ബേബി, ഡോ. അമൽ ജോസ്, ഡോ. ജാസ്മിൻ ജോസ്, ഡോ. മനു സെബാസ്റ്റ്യൻ എന്നിവരെ ആദരിച്ചു. പ്രിൻസിപ്പൽ സിസ്റ്റർ റോസ് മേരി സിജെ ഉപഹാര സമർപ്പണം നടത്തി. സ്കൂൾ മാനേജർ സിസ്റ്റർ തോമസീന സിജെ അധ്യക്ഷത വഹിച്ചു. അധ്യാപകരായ ഡെയ്സി കിഷോർ, പ്രീതാ സജി,ഡിസിഎൽ കോ-ഓർഡിനേറ്റർ സോജി ജോസഫ്, റീത്താമ്മ റെജി എന്നിവർ പ്രസംഗിച്ചു. കുടിയാന്മല: ഫാത്തിമ യുപി സ്കൂൾ, ചെമ്പേരി റോട്ടറി ക്ലബ് എന്നിവയുടെ സംയുക്താഭിമുഖ്യത്തിൽ ഡോക്ടേഴ്സ് ദിനാചരണത്തിന്‍റെ ഭാഗമായി കുടിയാന്മല പിഎച്ച്സിയിലെ ഡോ. ഷക്കീർ മുഹമ്മദിനെ പൊന്നാടയണിയിച്ച് ആദരിച്ചു. റോട്ടറി ക്ലബ് പ്രസിഡന്‍റ് ജിജി കടുവാതൂക്കിൽ, പ്രഫ. വാസുദേവൻ നായർ, ജോമി ജോസ്, ടിന്‍റോ ജോസഫ്, അധ്യാപിക ജാസ്മിൻ എന്നിവർ പ്രസംഗിച്ചു. നവീൻ കുമാർ നയിക്കുന്ന "സയൻസ് ഓൺ വീൽസ്' ശാസ്ത്ര പരീക്ഷണ ബോ‌ധവത്കരണ ക്ലാസും നടന്നു. ചെമ്പേരി: വൈഎംസിഎ ചെമ്പേരി യൂണിറ്റിന്‍റെ ആഭിമുഖ്യത്തിൽ ഡോക്ടേഴ്സ് ഡേയും ചാർട്ടേഡ് അക്കൗണ്ടന്‍റ്സ് ദിനവും സംയുക്തമായി ആചരിച്ചു. വൈഎംസിഎ ഓഫീസിൽ മുതിർന്ന ചാർട്ടേഡ് അക്കൗണ്ടന്‍റ് പി.ഡി.തോമസ്, ഡോ. സ്റ്റെനിൻ ബാബു, ഡോ. സ്റ്റെമിൻ തോമസ് എന്നിവരെ പൊന്നാടയണിയിച്ച് മെമന്‍റോ നൽകി ആദരിച്ചു. വൈഎംസിഎ പ്രസിഡന്‍റ് ഷീൻ ഏബ്രഹാം അധ്യക്ഷത വഹിച്ചു. റോബി ഇലവുങ്കൽ, ജോസ് മേമടം, ജോഷി കുന്നത്ത്, ജോമി ജോസ് ചാലിൽ, ലിസിയാമ്മ ജോസഫ്, ലിജി ജോമി എന്നിവർ പ്രസംഗിച്ചു.

വളർത്തുനായ്ക്കളെ അഴിച്ചുവിടുന്നത്‌ പ്രദേശത്തെ ഭീതിയിലാക്കുന്നു

തേർത്തല്ലി: വളർത്തുനായ്ക്കളെ കെട്ടിയിടുകയോ കൂടുകളിലാക്കുകയോ ചെയ്യാതെ അഴിച്ചുവിടുന്നത് നാട്ടുകാരെ ഭീതിയിലാക്കുന്നു. ആലത്താംവളപ്പ് ചെറുപാറ റോഡിൽ പീക്കാച്ചേരി പാലത്തിനു സമിപം കൊടുംവളവിൽ റോഡരികിൽ തനിച്ച് താമസിക്കുന്ന സ്ത്രീ വളർത്തുന്ന നാലു നായകളെയാണ് ഏതു സമയവും അഴിച്ചു വിട്ടിരിക്കുന്നത്. റോഡരികിൽ തന്പടിക്കുന്ന ഇവ ഇരുചക്രവാഹാനയാത്രക്കാർക്കും കാൽനടയാത്രക്കാർക്കും കടുത്ത ഭീഷണിയാണ് ഉയർത്തുന്നത്. പലപ്പോഴും അക്രമോസ്തുകത കാട്ടുന്ന നായകൾ ഇരുചക്രവാഹനങ്ങൾ പിന്തുടർന്ന് ഓടുകയും കാൽനടയാത്രികരെ ആക്രമിക്കാൻ ശ്രമിക്കുന്നുമുണ്ട്. വാഹനങ്ങളുടെ ശബ്ദം കേൾക്കുന്പോൾ തന്നെ ആക്രമിക്കാൻ തയാറെടുത്തു നിൽക്കുന്ന നായകൾ വാഹനം അടുത്തെത്തുന്പോൾ ചാടിവീഴുകയാണ്. വാഹനം നിയന്ത്രണം വിട്ട് വീണ് പലർക്കും പരിക്കേറ്റിട്ടുണ്ട്. നിരവധി തവണ നായകളെ പുറത്തേക്ക് അഴിച്ചു വിടരുതെന്ന് ആവശ്യപ്പെട്ടിടും ഉടമ ഇതിനു തയാറാകുന്നില്ലെന്നും നാട്ടുകാർ പറഞ്ഞു. ചില സമയങ്ങളിൽ മറ്റു സ്ഥലങ്ങളിൽ നിന്നും വന്നതടക്കം പത്തോളം നായകളും പ്രദേശത്ത് തന്പടിക്കുന്നുണ്ട്.

നാലു വർഷ ബിരുദ പ്രോഗ്രാം ഉദ്ഘാടനം ചെയ്തു

ചെറുപുഴ: നാലുവർഷ ബിരുദ പ്രോഗ്രാമിലേക്ക് വിദ്യാർഥികളെ വരവേറ്റ് മാത്തിൽ ഗുരുദേവ് ആർട്സ് ആൻഡ് സയൻസ് കോളജ്. നാലുവർഷ ബിരുദ പ്രോഗ്രാമുകളിലേക്കുള്ള ഒന്നാം വർഷ വിദ്യാർഥികളുടെ പ്രവേശനത്തിന്‍റെ ഉദ്ഘാടനം കേരള ഉന്നത വിദ്യാഭ്യാസ മന്ത്രി ആർ. ബിന്ദു നിർവഹിച്ചു. കോഴിക്കോട് ഗവ. കോളജിൽ നടന്ന ചടങ്ങ് ഓൺലൈനിലൂടെ പ്രദർശിപ്പിച്ചു. ഗുരുദേവ് ആർട്സ് ആൻഡ് സയൻസ് കോളജിൽ നടന്ന ഉദ്ഘാടന ചടങ്ങിൽ ഒന്നാം വർഷ വിദ്യാർഥികളും അവരുടെ രക്ഷിതാക്കളും പങ്കെടുത്തു. കോള‌‌‌‌‌‌‌ജ് പ്രിൻസിപ്പൽ റവ. ഡോ. സാമുവൽ പുതുപ്പാടി അധ്യക്ഷത വഹിച്ചു. ഒന്നാം വർഷ വിദ്യാർഥികളെ കോളജിലേക്ക് അദ്ദേഹം സ്വാഗതം ചെയ്തു. കാങ്കോൽ-ആലപ്പടമ്പ് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സതീശൻ ഉദ്ഘാടനം ചെയ്തു. പ്രശസ്ത സിനിമാ താരം കെ.യു. മനോജ്‌ മുഖ്യാതിഥിയായിരുന്നു. കോളജ് ബർസാർ ഫാ. ഏബ്രഹാം പുന്നവിള, കോളജ് വൈസ് പ്രിൻസിപ്പൽ പി. വിനോദ് കുമാർ, പിടിഎ പ്രതിനിധി കെ. ഉണ്ണിക്കണ്ണൻ, കോളജ് കോ-ഓർഡിനേറ്റർ എ. മൃദുല, സ്റ്റാഫ്‌ സെക്രട്ടറി കെ.യു. സന്തോഷ്‌, നാക് കോ-ഓഡിനേറ്റർ പി.കെ. സിന്ധു, എഫ്‌വൈയുജിപി കോ-ഓഡിനേറ്ററും നോഡൽ ഓഫീസറുമായ കെ. സുമേഷ്, എൻഎസ്എസ് പ്രോഗ്രാം ഓഫീസർ ഷജ്ന ഗോവിന്ദൻ, കോളേജ് യൂണിയൻ ചെയർപേഴ്സൺ ദേവിക, നാക് കോ-ഓഡിനേറ്റർ എ.ടി.വി. ശ്രുതി എന്നിവർ പ്രസംഗിച്ചു. തുടർന്ന് ലഹരിവിരുദ്ധ ഫ്ലാഷ്മോബും തെരുവുനാടകവും അവതരിപ്പിച്ചു. സംഗീത നൃത്ത പരിപാടികളും നടന്നു. ശ്രീകണ്ഠപുരം: ശ്രീകണ്ഠപുരം എസ്ഇഎസ് കോളജിലെ നാലുവർഷ ബിരുദ പ്രോഗ്രാമുകളുടെ സ്ഥാപനതല ഉദ്ഘാടനം മുനിസിപ്പൽ വൈസ് ചെയർമാൻ കെ. ശിവദാസൻ നിർവഹിച്ചു. സംസ്ഥാനതല ഉദ്ഘാടനം മന്ത്രി ആർ. ബിന്ദു നിർവഹിച്ചു. കോളജ്തല ഉദ്ഘാടനത്തിന് പ്രിൻസിപ്പൽ ഡോ. റീന സെബാസ്റ്റ്യൻ അധ്യക്ഷത വഹിച്ചു. കോളജ് മാനേജർ വിനിൽ വർഗീസ്, സെക്രട്ടറി കൗൺസിലർ അജിത, സൈജോ ജോസഫ്, ഐക്യുഎസി കോ-ഓർഡിനേറ്റർ ഡോ. പി.പി. സീന, പിടിഎ പ്രതിനിധി രമേശൻ, ഡോ. കെ.വി. പ്രദീപ്, നാലുവർഷ ബിരുദ പ്രോഗ്രാം കോ-ഓർഡിനേറ്റർ അനുമോൾ തോമസ്, കെ.പി. ഫാഇസ്, ജെ.പി.ആദിത്ത്, എം.കെ. പുണ്യ പ്രകാശൻ, ഡോ. സൗമ്യ മരിയ ജേക്കബ് എന്നിവർ പ്രസംഗിച്ചു.

ഓണത്തിന് ഒരുകൊട്ടപ്പൂവ്; പൂക്കൃഷി തുടങ്ങി

ചെമ്പേരി: ഏരുവേശി പഞ്ചായത്ത് ഓണത്തിന് ഒരുകൊട്ടപ്പൂവ് പദ്ധതിയിൽ ഉൾപ്പെടുത്തി അനുഗ്രഹ ജെഎൽജിയുടെ ആഭിമുഖ്യത്തിൽ ചെമ്പേരിയിൽ പൂക്കൃഷി ആരംഭിച്ചു. പഞ്ചായത്ത് വൈസ് പ്രസിഡന്‍റ് മധു തൊട്ടിയിൽ നടീൽ ഉദ്ഘാടനം ചെയ്തു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ മോഹനൻ മൂത്തേടൻ അധ്യക്ഷത വഹിച്ചു. വാർഡ് മെംബർമാരായ ഏബ്രഹാം കാവനാടിയിൽ, അനില ജെയിൻ, അസിസ്റ്റന്‍റ് കൃഷി ഓഫീസർ കെ.വി. അശോക്‌കുമാർ, ജോസഫ് കൊട്ടുകാപ്പള്ളിൽ എന്നിവർ പ്രസംഗിച്ചു. അനുഗ്രഹ ജെഎൽജിയുടെ പ്രവർത്തകരായ രഞ്ജു, സെലിൻ, കാർത്തിക എന്നിവരാണ് കൃഷിക്ക് നേതൃത്വം നൽകുന്നത്. ചെമ്പേരി ബസ് സ്റ്റാൻഡിന് സമീപത്തെ അരയേക്കർ സ്ഥലത്താണ് ചെണ്ടുമല്ലി, വാടാമല്ലി എന്നീയിനങ്ങളിൽപ്പെട്ട ആയിരം ഹൈബ്രിഡ് പൂച്ചെടികൾ കൃഷി ചെയ്തി തിട്ടുള്ളത്. ചെറുപുഴ: ഓണത്തിന് ഒരുകൊട്ടപ്പൂവ് പദ്ധതിയുടെ ചെറുപുഴ പഞ്ചായത്ത്‌തല നടീൽ ഉദ്ഘാടനം നടത്തി. പാറോത്തും നീരിൽ ചെണ്ടുമല്ലിത്തൈകൾ നട്ട് പയ്യന്നൂർ ബ്ലോക്ക് പഞ്ചായത്തംഗം കെ.പി. നസീറ ഉദ്ഘാടനം ചെയ്തു. പഞ്ചായത്തംഗം സന്തോഷ്‌ ഇളയിടത്ത് അധ്യക്ഷത വഹിച്ചു. സിഡിഎസ് ചെയർപേഴ്സൺ കെ.വി. സുനിതകുമാരി, കൃഷി ഓഫിസർ പി. അഞ്ജു, അസി. കൃഷി ഓഫീസർ പി. ഗീത, കൃഷി അസിസ്റ്റന്‍റ് സുരേഷ് കുറ്റൂർ, കെ.ആർ. ശോഭന എന്നിവർ പ്രസംഗിച്ചു. പതിനെട്ടു ജെഎൽജി ഗ്രൂപ്പുകളാണ് ഈ വർഷം ചെണ്ടുമല്ലി കൃഷിയിൽ ഏർപ്പെട്ടിരിക്കുന്നത്.

ആക്രി സാധനങ്ങളുടെ കൈമാറ്റം; തളിപ്പറമ്പ് നഗരസഭയിൽ ക്രമക്കേടെന്ന്

തളിപ്പറമ്പ്: ആക്രി സാധനങ്ങളുടെ കൈമാറ്റവുമായി ബന്ധപ്പെട്ട് തളിപ്പറമ്പ് നഗരസഭയിൽ ക്രമക്കേട് കണ്ടെത്തി. മേയ് 22ന് ചേര്‍ന്ന നഗരസഭാ കൗണ്‍സിലില്‍ പ്രതിപക്ഷാംഗങ്ങൾ നടത്തിയ ആരോപണത്തെ തുടർന്ന് നടത്തിയ അന്വേഷണത്തിലാണ് സെക്ഷന്‍ ക്ലാര്‍ക്ക് വി.വി. ഷാജി ഗുരുതരമായ വീഴ്ച വരുത്തിയതായി സ്റ്റിയറിംഗ് കമ്മിറ്റി കണ്ടെത്തിയത്. സാധനങ്ങളുടെ തൂക്കം രേഖപ്പെടുത്തിയത് സാക്ഷ്യപ്പെടുത്താതിരുന്നത് ഉള്‍പ്പെടെ നഗരസഭയ്ക്ക് അധിക ബാധ്യത വരുത്തിയതില്‍ ഷാജിയുടെ ഭാഗത്ത് ഗുരുതരമായ വീഴ്ചയും അനാസ്ഥയുമുണ്ടായെന്ന് സ്റ്റിയറിംഗ് കമ്മറ്റി വിലയിരുത്തി. ഫയല്‍ പഠിച്ച ശേഷം വി.വി. ഷാജിക്കെതിരെ കൈക്കൊള്ളേണ്ട നടപടി സംബന്ധിച്ച് റിപ്പോര്‍ട്ട് ചെയ്യാന്‍ അന്വേഷണ ഉദ്യോഗസ്ഥയായി റവന്യൂവിഭാഗം അസി. സെക്രട്ടറി പി. ലേഖയെ സ്റ്റിയറിംഗ് കമ്മിറ്റി ചുമതലപ്പെടുത്തിയിട്ടുണ്ട്. 1,81,560 രൂപയ്ക്കാണ് തളിപ്പറമ്പ് മന്നയിലെ അഴീക്കോടന്‍റകത്ത് അബ്ദുള്‍ റഷീദ് സ്‌ക്രാപ്പ് ലേലം കൊണ്ടത്. ഇയാള്‍ക്ക് നല്‍കിയ അറിയിപ്പിന്‍റെ പകര്‍പ്പല്ലാതെ മറ്റ് നടപടിക്രമങ്ങളൊന്നും തന്നെ ഫയലില്‍ രേഖപ്പെടുത്തിയിട്ടില്ല. സാധനങ്ങളുടെ ഇനം തിരിച്ചുള്ള തൂക്കം മേലധികാരികളെക്കൊണ്ട് സാക്ഷ്യപ്പെടുത്തിയില്ലെന്നും കണ്ടെത്തി. 1,10,000 രൂപ മാത്രമാണ് ഈ ഇനത്തില്‍ നഗരസഭ ഫണ്ടില്‍ ഒടുക്കിയിട്ടുള്ളത്. പിതാവിനും മകനും അസുഖമായതിനാലും മകളുടെ വിവാഹത്തിരക്കിനായതിനാലുമാണ് നടപടി ക്രമങ്ങള്‍ പൂര്‍ത്തിയാക്കാതിരുന്നതെന്നാണ് വി.വി. ഷാജി സ്റ്റിയറിംഗ് കമ്മിറ്റിയെ അറിയിച്ചത്. എന്നാൽ, മാസങ്ങൾക്ക് മുന്നേ നടന്ന ക്രമക്കേടിൽ ഈയടുത്ത് നടന്ന വിവാഹം കാരണമായി എന്നു പറയുന്നതിൽ എന്ത് ന്യായമാണ് എന്നാണ് പ്രതിപക്ഷം ആരോപിക്കുന്നത്. ക്രമക്കേടിന് പിന്നിൽ നഗരസഭ ഭരണം നടത്തുന്നവർക്ക് പങ്കുണ്ടെന്നും കോൺഗ്രസ് നിയന്ത്രണത്തിലുള്ള നഗരസഭാ ജീവനക്കാരുടെ സംഘടനയുടെ കണ്ണൂർ-കാസർഗോഡ് ജില്ലാ പ്രസിഡന്‍റാണ് വി.വി. ഷാജിയെന്നും പ്രതിപക്ഷം ആരോപിക്കുന്നു. കൗൺസിൽ യോഗത്തിൽ ഭരണ-പ്രതിപക്ഷ കൈയാങ്കളി ആക്രി സാധനങ്ങൾ കൈമാറ്റം ചെയ്തതിൽ ക്രമക്കട് നടന്നത് സംബന്ധിച്ച് ക്രമക്കേട് നടത്തിയ ഉദ്യോഗസ്ഥനെ സംരക്ഷിക്കുന്നതായി ആരോപിച്ച് തളിപ്പറമ്പ് നഗരസഭാ കൗൺസിൽ യോഗത്തിൽ പ്രതിപക്ഷവും ഭരണപക്ഷവും തമ്മിൽ രൂക്ഷമായ വാക്കേറ്റവും കൈയാങ്കളിയും. ഇന്നലെ രാവിലെ നടന്ന കൗൺസിൽ യോഗത്തിലാണ് ഭരണ പ്രതിപക്ഷങ്ങൾ തമ്മിൽ കൊമ്പുകോർത്തത്. ഇതേക്കുറിച്ച് പ്രതിപക്ഷ അംഗം സി.വി. ഗിരീശൻ ഉന്നയിച്ച ചോദ്യമാണ് ഏറ്റുമുട്ടലിൽ കലാശിച്ചത്. ഫയല്‍ പഠിച്ച ശേഷം വി.വി. ഷാജിക്കെതിരേ കൈക്കൊള്ളേണ്ട നടപടി സംബന്ധിച്ച് റിപ്പോര്‍ട്ട് ചെയ്യാന്‍ അന്വേഷണ ഉദ്യേഗസ്ഥയായി റവന്യൂ വിഭാഗം അസി. സെക്രട്ടറി പി. ലേഖയെ സ്റ്റിയറിംഗ് കമ്മിറ്റി ചുമതലപ്പെടുത്തിയതിനെതിരേ കൗൺസിലിൽ പ്രതിപക്ഷ നേതാവ് ഒ. സുഭാഗ്യം, സി.വി. ഗിരീശൻ, കെ.എം. ലത്തീഫ്, വി. വിജയൻ എന്നിവർ ചോദ്യങ്ങളുമായി എഴുന്നേറ്റു. ഇത് സപ്ലിമെന്‍ററി അജൻഡയിൽ അവസാനമായി ചർച്ച ചെയ്യാമെന്ന ചെയർപേഴ്സൻ മുർഷിദ കൊങ്ങായി പറഞ്ഞത് അംഗീകരിക്കാനാവില്ലെന്നും മുഖ്യ അജൻഡയിൽ ഒന്നാമതായി ഉൾപ്പെടുത്തണമെന്നും പ്രതിപക്ഷം വാദിച്ചു. ഇതിനെതിരേ വൈസ് ചെയർമാൻ കല്ലിങ്കീൽ പദ്മനാഭൻ, പി.സി നസീർ, പി.പി മുഹമ്മദ് നിസാർ, എം.കെ. ഷബിത എന്നിവരും രംഗത്തിറങ്ങി. പിന്നീട് ഇരു വിഭാഗവും തമ്മിൽ ഇരിപ്പിടം വിട്ട് എഴുന്നേറ്റ് വാക്കേറ്റവും കയ്യാങ്കളിയുമായി. തുടർന്ന് ചെയർപേഴ്സൺ കൗൺസിൽ യോഗം പിരിച്ചു വിടുകയായിരുന്നു. ഗുരുതരമായ ക്രമക്കേട് നടന്നതിനെതിരേ അന്വേഷണം വേണമെന്നാവശ്യപ്പെട്ട് ഒ. സുഭാഗ്യത്തിന്‍റെ നേതൃത്വത്തിൽ കൗൺസിലർമാർ നഗരസഭാ ഓഫീസ് കവാടത്തിന് മുന്നിൽ ധർണ നടത്തി. ധർണ നഗരസഭാ മുൻ വൈസ് ചെയർമാനും സിപിഎം നേതാവുമായ ടി. ബാലകൃഷ്ണൻ ഉദ്ഘാടനം ചെയ്തു. പ്രതിപക്ഷം നടത്തിയത് രാഷ്ട്രീയപ്രേരിത നീക്കം: ചെയര്‍പേഴ്‌സന്‍. തളിപ്പറമ്പ് നഗരസഭാ കൗണ്‍സില്‍ യോഗത്തില്‍ പ്രതിപക്ഷമുണ്ടാക്കിയ പ്രശ്‌നങ്ങള്‍ ജനാതിപത്യ പരമല്ലെന്ന് ചെയര്‍പേഴ്സൺ മുര്‍ഷിദ കൊങ്ങായി പ്രസ്താവനയില്‍ അറിയിച്ചു. കൗണ്‍സിലില്‍ ഉന്നയിച്ച വിഷയം തന്നെയാണ് ചോദ്യമായി എഴുതി തന്നത്. അതുകൊണ്ട് തന്നെ ആ ചോദ്യം അജൻഡയില്‍ ഉള്‍പെടുത്താതിരിക്കാനുള്ള വിവേചനാധികാരം ചെയര്‍പേഴ്‌സനുണ്ട്. മുന്‍ കൗണ്‍സിലില്‍ ഉന്നയിച്ച വിഷയം ഇന്നലത്തെ സപ്ലിമെന്‍ററി അജൻഡയില്‍ രണ്ടാമതായി വിശദമായി പ്രതിപാതിച്ചിട്ടുള്ളതാണ്. ചോദ്യം അജൻഡയില്‍ ഉള്‍പെടുത്താതിരുന്നത് കൗണ്‍സിലറുടെ അവകാശം നിഷേധിക്കലല്ല. വീഴ്ച കണ്ടെത്തിയ ഉദ്യോഗസ്ഥനെതിരേ നടപടിയുമായി മുന്നോട്ട് പോകുന്ന സാഹചര്യത്തിലും തികച്ചും രാഷ്ട്രീയ പ്രേരിതമായാണ് ഈ വിഷയങ്ങള്‍ കൗണ്‍സില്‍ അജൻഡ തുടങ്ങുന്നതിനു മുമ്പ് ഉന്നയിച്ച് കൗണ്‍സില്‍ അലങ്കപ്പെടുത്തിയത്. ഇത് തികച്ചും ജനാധിപത്യ വിരുദ്ധമാണ്. വരാന്‍ പോകുന്ന തദ്ദേശ തിരഞ്ഞെടുപ്പ് മുന്നില്‍ കണ്ട് നടത്തുന്ന പ്രതിപക്ഷത്തിന്‍റെ രാഷ്ട്രീയ പ്രേരിതമായ നീക്കങ്ങള്‍ ജനങ്ങള്‍ തിരിച്ചറിയണമെന്നും ചെയര്‍പേഴ്‌സന്ൺ പ്രസ്താവനയില്‍ പറഞ്ഞു.

മലയോരത്ത് നാശം വിതച്ച് കാറ്റും മഴയും

ശ്രീകണ്ഠപുരം: കനത്ത കാറ്റും മഴയും മലയോരത്ത് വ്യാപകനാശം. ശ്രീകണ്ഠപുരം, ചെങ്ങളായി, മലപ്പട്ടം, മടമ്പം, ഇരിക്കൂർ മേഖലയിലാണ് വ്യാപക നാശനഷ്ടമുണ്ടായത്. ശ്രീകണ്ഠപുരം-ഇരിക്കൂർ സംസ്ഥാന പാതയിൽ തൃക്കടമ്പിൽ മരംകടപുഴകി വീണ് ഗതാഗതം തടസപ്പെട്ടു. വൈദ്യുതി ലൈനുകളും തകർന്നു. ശ്രീകണ്ഠപുരം-അഡൂര്‍-മലപ്പട്ടം റോഡില്‍ മണ്ണിടിച്ചില്‍ ഉണ്ടായി. വൈദ്യുത തൂൺ റോഡിലേക്ക് വീണ് ഗതാഗതം തടസപ്പെട്ടു. കെഎസ്ഇബി ജീവനക്കാരും നാട്ടുകാരും വാർഡ് മെംബറുടെ നേതൃത്വത്തിൽ ഏറെ പ്രയാസപ്പെട്ടാണ് മരം മുറിച്ചുമാറ്റിയത്. ചെറുകൊളന്ത കയറ്റത്തിൽ മണ്ണിടിഞ്ഞുവീണ് ഗതാഗതം ഭാഗികമായി തടസപെട്ടു. മരങ്ങളും കടപുഴകിവീണു. താഴ്ന്ന ഭാഗങ്ങളിൽ വെള്ളക്കെട്ട് രൂക്ഷമായി. മലയോരത്ത് നാശം വിതച്ച് കാറ്റും മഴയും വലിയ മരങ്ങൾ കടപുഴകി ചെങ്ങളായി തവറൂലിലെ എം.ടി. വിമലയുടെ വീടിന് മുകളിൽ പതിച്ച് കെട്ടിടത്തിന് സാരമായ കേടുപാടുകൾ സംഭവിച്ചു.

കൊട്ടിയൂരിൽ ഇന്ന് അത്തം ചതുശതവും വാളാട്ടവും; നാളെ തൃക്കലശാട്ട്

കൊട്ടിയൂർ: വൈശാഖ മഹോത്സവത്തിന്‍റെ അത്തം നാളിലെ ചടങ്ങ് ഇന്ന് നടക്കും. വാളാട്ടം, കുടിപതികളുടെ തേങ്ങയേറ്, പായസ നിവേദ്യം, കൂത്ത് സമർപ്പണം എന്നിവ ഉണ്ടായിരിക്കും. അത്തം നാളിലേത് പന്തീരടിക്ക് നടക്കുന്ന അവസാനത്തെ ശീവേലിയായിരിക്കും. ശീവേലി സമയത്ത് ചപ്പാരം ക്ഷേത്രത്തിലെ മൂന്ന് വാളുകളും എഴുന്നള്ളിച്ച് ഏഴില്ലക്കാരായ വാളാശൻമാർ വാളാട്ടം നടത്തും. തിടമ്പുകൾ വഹിക്കുന്ന ബ്രാഹ്മണർക്കഭിമുഖമായി മൂന്ന് പ്രദക്ഷിണം വയ്ക്കും. തിടമ്പുകളിൽ നിന്ന് ദേവചൈതന്യം വാളുകളിലേക്ക് ആവാഹിക്കപ്പെടുമെന്നാണ് വിശ്വാസം. തുടർന്ന് കുടിപതികൾ പൂവറക്കും അമ്മാറക്കൽ തറയ്ക്കും മധ്യേയുള്ള സ്ഥാനത്ത് തേങ്ങയേറും നടത്തും. നാലാമത് വലിയവട്ടളം പായസം അത്തം നാളിൽ ഭഗവാന് നിവേദിക്കും. ഈ ദിവസം ആയിരംകുടം അഭിഷേകവും ഉണ്ടാകും. രാത്രിയിൽ പൂജയോ നിവേദ്യങ്ങളോ ഉണ്ടാകില്ല.അന്നേ ദിവസം കൂത്ത് സമർപ്പണവും നടക്കും. നാളെ തൃക്കലശാട്ടോടെ വൈശാഖോത്സവം സമാപിക്കും.

കൊട്ടിയൂരിലെ കുരുക്കഴിക്കാൻ പോലീസിന്‍റെ മാസ്റ്റർ പ്ലാൻ

കണ്ണൂർ: കൊട്ടിയൂർ മഹാദേവ ക്ഷേത്ര വൈശാഖ മഹോത്സവ സമയത്തുണ്ടാകുന്ന ഗതാഗത കുരുക്ക് ഒഴിവാക്കാൻ പോലീസിന്‍റെ മാസ്റ്റർ പ്ലാൻ. പേരാവൂർ ഡിവൈഎസ്പി എം.പി. ആസാദിന്‍റെ നേതൃത്വത്തിലാണ് മാസ്റ്റർ പ്ലാൻ തയാറാക്കിയത്. 2026 ലെ ഉത്സവസീസൺ തുടങ്ങുന്നതിന് മുന്പ് മാസ്റ്റർ പ്ലാൻ നടപ്പിലാക്കണമെന്നാണ് നിർദേശം. ഉത്തരമേഖലാ ഐജി രാജ്പാൽ മീണ, കണ്ണൂർ റേഞ്ച് ഡിഐജി യതീഷ് ചന്ദ്ര, കണ്ണൂർ റൂറൽ എസ്പി. അനൂജ് പലിവാൽ എന്നിവരുടെ നിർദേശാനുസരണമാണ് മാസ്റ്റർ പ്ലാൻ തയാറാക്കിയത്. പ്രധാനപ്പെട്ട നിർദേശങ്ങൾ 4 വർധിച്ചു വരുന്ന തീർഥാടക പ്രവാഹം പരിഗണിച്ച് കുറഞ്ഞത് പതിനായിരത്തിലധികം വാഹനങ്ങളെങ്കിലും ഒരേസമയം പാർക്ക് ചെയ്യാൻ പറ്റുന്ന തരത്തിൽ പാർക്കിംഗ് സൗകര്യങ്ങൾ വികസിപ്പിക്കണം. സമാന്തര പാതയ്ക്ക് സമീപം ഉൾപ്പെടെ എല്ലായിടത്തും സ്വകാര്യ പാർക്കിംഗ് പ്രോത്സാഹിപ്പിക്കണം. 4എല്ലാ പ്രധാന പാർക്കിംഗുകളുടെയും എൻട്രിയും എക്സിറ്റും മെയിൻ റോഡിലേക്കായതിനാൽ അത് ഗതാഗത കുരുക്കിന് കാരണമാകുന്നുണ്ട്. അത് ഒഴിവാക്കുന്നതിന് കെഎസ്ആർടിസി ബസ് സ്റ്റാൻഡിനോട് ചേർന്ന് പുതുതായി ഒരു ബസ് ബേ നിർമിക്കണം. 4കേളകം ഭാഗത്തുനിന്ന് കൊട്ടിയൂർ ദർശനത്തിനുള്ള ഭക്തരെയും കയറ്റി വരുന്ന എല്ലാ വാഹനങ്ങളും കെഎസ്ആർടിസി ബസ് സ്റ്റാൻഡിനോട് ചേർന്ന് നിർമിക്കാൻ ഉദ്ദേശിക്കുന്ന പുതിയ ബസ് ബേയിൽ ആളുകളെ ഇറക്കിയശേഷം ചെറിയ വാഹനങ്ങൾ പാർക്കിംഗ്-ഒന്നിൽ പാർക്ക് ചെയ്യുകയും ബസുകൾ പുതിയ ബസ് ബേ വഴി മെയിൻ റോഡിൽ കയറി മന്ദംചേരിയിലെ ബസ് പാർക്കിംഗിലേക്ക് പോയി പാർക്ക് ചെയ്യുക. 4കെഎസ്ആർടിസി ബസ് സ്റ്റാൻഡിനോട് ചേർന്നുള്ള പുതുതായി നിർമിക്കുന്ന ബസ് ബേയിൽ ഇറങ്ങുന്ന തീർഥാടകർ മെയിൻ റോഡിൽ പ്രവേശിക്കാതെ ബസ് സ്റ്റാൻഡിനോട് ചേർന്നുള്ള നടപ്പാതയിലൂടെ ഒന്നാം പാലം വഴി അക്കരെ കൊട്ടിയൂരിലേക്ക് പ്രവേശിക്കണം. 4 ഒന്നാം പാലം വഴിയും മന്ദംചേരി പാലം വഴിയും മറ്റ് വഴികളിലൂടെയും അക്കരെ കൊട്ടിയൂർ ക്ഷേത്രത്തിലേക്ക് എത്തുന്ന മുഴുവൻ തീർഥാടകരും ദർശനത്തിനുശേഷം രണ്ടാം പാലം വഴി പുറത്തേക്ക് വരേണ്ടതാണ്. 4നിലവിൽ തിരുവഞ്ചിറയിലേക്ക് ഇറങ്ങുന്ന മേൽപ്പാലത്തിനു സമാന്തരമായി ഇക്കരെ കൊട്ടിയൂരിൽ നിന്നും ഒന്നാം പാലം വഴി വരുന്ന ഭക്തജനങ്ങൾക്കും ശീവേലിക്ക് തടസം വരാത്ത രീതിയിൽ മറ്റൊരു മേൽപ്പാലം പണിയുക. 4 പാമ്പറപ്പാൻ പാലം മുതൽ മന്ദംചേരി ജംഗ്ഷൻ വരെ റോഡിന് ഇരുവശവും നടപ്പാത നിർമിച്ച് തീർഥാടകർ റോഡിലേക്ക് ഇറങ്ങാത്ത രീതിയിൽ നടപ്പാതക്ക് ഇരുവശവും സ്ഥിരം ബാരിക്കേഡുകൾ സ്ഥാപിക്കണം. 4മന്ദംചേരി പുഴക്ക് സമീപമുള്ള പാർക്കിംഗിന് പ്രത്യേകം എൻട്രി എക്സിറ്റ് പാർക്കിംഗിന് ഇരുവശങ്ങളിലുമായി വലിയ വാഹനങ്ങൾക്കു കൂടി കയറുവാനും ഇറങ്ങുവാനും പാകത്തിൽ നിർമിക്കുക. 4സമാന്തരപാതയോട് ചേർന്നുള്ള പാർക്കിംഗിൽ അടിസ്ഥാന സൗകര്യങ്ങൾ വർധിപ്പിക്കുകയും കേളകം ഭാഗത്ത് നിന്നും സമാന്തര പാത വഴി വരുന്ന വാഹനങ്ങൾ പാർക്കിംഗ് രണ്ടിൽ പാർക്ക് ചെയ്യുകയും ചെയ്യുക. 4സമാന്തരപാതയോട് ചേർന്നുള്ള പാർക്കിംഗിൽ ഇറങ്ങുന്ന ഭക്തജനങ്ങൾക്ക് അക്കരെ കൊട്ടിയൂർ ക്ഷേത്രത്തിലേക്ക് പ്രവേശിക്കുന്നതിനായി നടപ്പാത ഉണ്ടാക്കണം. 4 മാനന്തവാടി ഭാഗത്തുനിന്ന് തീർഥാടകരെയും കൊണ്ട് വരുന്ന ബസുകൾ മന്ദംചേരി ബസ് പാർക്കിംഗിൽ ആളുകളെ ഇറക്കുകയും പാർക്ക് ചെയ്യുകയും ചെയ്യുക, ചെറു വാഹനങ്ങൾ മന്ദംചേരി പുഴക്ക് സമീപമുള്ള പാർക്കിംഗിൽ ആളുകളെ ഇറക്കി പാർക്ക് ചെയ്യുക. 4അവധിദിനങ്ങളിലും തിരക്കേറിയ ദിവസങ്ങളിലും വയനാട് ഭാഗത്തേക്ക് പോകുന്നതും വരുന്നതുമായ തീർഥാടകർ ഒഴികെയുള്ള വാഹനങ്ങൾ നിടുംപൊയിൽപേരിയ റോഡ് ഉപയോഗിക്കേണ്ടതാണ്. 4ദർശനം കഴിഞ്ഞു തിരിച്ചു പോകുന്ന തീർത്ഥാടകരെ പാർക്കിംഗിൽ വെച്ചു മാത്രമേ കയറ്റുവാൻ പാടുള്ളൂ. യാതൊരു വാഹനങ്ങളും റോഡിൽ നിർത്തി ആളുകളെ ഇറക്കുവാനോ, കയറ്റുവാനോ പാടുള്ളതല്ല. 4അക്കരെ ഇക്കരെ കൊട്ടിയൂർ ക്ഷേത്രങ്ങളെ ബന്ധിപ്പിച്ച് മെയിൻ റോഡിനു കുറുകെ രണ്ടാം പാലം വഴി മടങ്ങുന്ന തീർത്ഥാടകർക്കായി താല്കാലിക മേൽപാലം പണിയേണ്ടതാണ്. സുരക്ഷാ നിർദേശങ്ങൾ 4 ബാവലി പുഴയിൽ സുരക്ഷാ മാനദണ്ഡങ്ങൾ പാലിച്ചു കൊണ്ടുള്ള സ്ഥിരം സ്നാനഘട്ടം നിർമിക്കണം. 4സ്നാനഘട്ടം ഒഴികെയുള്ള ഭാഗങ്ങളിൽ ഭക്തജനങ്ങൾ പുഴയിലേക്കിറങ്ങാതിരിക്കുവാൻ പുഴയുടെ ഇരുവശവും സ്ഥിരം ബാരിക്കേഡുകൾ നിർമിക്കണം. 4കയർ കെട്ടി തീർഥാടകരെ നിയന്ത്രിക്കുന്നതിന് ഹൈക്കോടതി വിലക്കുള്ളതിനാൽ സ്ഥിരം ബാരിക്കേഡുകൾ സ്ഥാപിച്ച് സെഗ്മന്‍റുകൾ തിരിച്ച് ഭക്തജനങ്ങളുടെ തിരക്ക് നിയന്ത്രിക്കണം. 4 അക്കരെ ഇക്കരെ കൊട്ടിയൂരിൽ അടിസ്ഥാന സൗകര്യങ്ങൾ വർധിപ്പിച്ചു കൊണ്ടുള്ള പോലീസ് കൺട്രോൾ റൂം സ്ഥാപിക്കേണ്ടതാണ്. 4അമ്പായത്തോട് മുതൽ ചുങ്കക്കുന്നുവരെയും സമാന്തര പാതയിലും പാർക്കിംഗുകളിലും അക്കരെ കൊട്ടിയൂർ മുഴുവൻ കവർ ചെയ്യുന്ന രീതിയിലും പുഴയോരങ്ങളിലും സിസിടിവി കാമറകളും അനൗൺസ്മെന്‍റ് സിസ്റ്റവും സ്ഥാപിച്ച് അക്കരെ ഇക്കരെ പോലീസ് കൺട്രോൾ റൂമുകളുമായി ബന്ധിപ്പിക്കേണ്ടതാണ്. 4കാണാതാകുന്നവരെയും വഴി തെറ്റി പോകുന്നവരെയും പ്രായമായ ആളുകളെയും സഹായിക്കുന്നതിനായി കാര്യക്ഷമമായ സംവിധാനം ഏർപ്പെടുത്തേണ്ടതും എല്ലായിടത്തും വിവിധ ഭാഷകളിലുള്ള ദിശാ ബോർഡുകളും അനൗൺസ്മെന്‍റും ഏർപ്പെടുത്തേണ്ടതുമാണ്. 4പതിവിനു വിപരീതമായി രാത്രി കാലങ്ങളിൽ തീർഥാടകരുടെ തിരക്ക് വർധിച്ചു വരുന്നതിനാൽ അക്കരെ ഇക്കരെ കൊട്ടിയൂരിലും പാർക്കിംഗ് ഏരിയകളിലും,പുഴയോരങ്ങളിലും സമാന്തര പാതയിലും കാര്യക്ഷമമായ ലൈറ്റ് സംവിധാനം ഏർപ്പെടുത്തണം. 4ഫയർആൻഡ് റെസ്ക്യൂ, വളണ്ടിയർ സെക്യൂരിറ്റി ഡ്യൂട്ടി ചെയ്യുന്നവരുടെ എണ്ണം വർധിപ്പിക്കണം. 4അക്കരെ-ഇക്കരെ കൊട്ടിയൂരിൽ മതിയായ ശൗചാലയങ്ങളും വിശ്രമകേന്ദ്രങ്ങളും അടിസ്ഥാന സൗകര്യങ്ങളും നിർമിക്കണം. 4കൊട്ടിയൂർ ഉത്സവത്തിന് ഉൾക്കൊള്ളാൻ പറ്റുന്ന വാഹനങ്ങളുടെയും ഭക്തജനങ്ങളുടെയും എണ്ണം പഠനം നടത്തി കണക്കാക്കേണ്ടതും അതിനനുസരിച്ച് വാഹനങ്ങളുടെയും ഭക്തജനങ്ങളുടെയും ഇൻഫ്ലോ ഔട്ഫ്ലോ ക്രമീകരിക്കുന്നതിനായി ചുങ്കക്കുന്നും അമ്പായത്തോടും സ്ഥിരം ചെക്ക് പോസ്റ്റ് നിർമ്മിച്ച് നിയന്ത്രണം ഏർപ്പെടുത്തണം.

ബികെജെഎം സ്കൂൾ ഓഫ് നഴ്സിംഗിൽ "ബിറ്റ് ബ്ലൂം 2025'

തലശേരി: ജോസ്ഗിരി ആശുപത്രിയുടെ ഭാഗമായ ബികെജെഎം സ്കൂൾ ഓഫ് നഴ്സിംഗിലെ 26 ാമത് ബാച്ചിലെ വിദ്യാർഥികളുടെ പാഠ്യേതര പദ്ധതിയുടെ ഭാഗമായി ന്യൂട്രീഷ്യൻ പ്രോഗ്രാം "ബിറ്റ് ബ്ലൂം 2025' അവതരിപ്പിച്ചു. തലശേരി അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി ഉദ്ഘാടനം ചെയ്തു. ഫാസ്റ്റ് ഫുഡിന്‍റെ കാലത്ത് തനതായ ആഹാര ക്രമീകരണത്തിന്‍റെ പ്രാധാന്യത്തെക്കുറിച്ച് ബികെജെഎം സ്കൂൾ ഓഫ് നഴ്സിംഗ് പ്രിൻസിപ്പൽ സിസ്റ്റർ കൊച്ചുറാണി എസ്എബിഎസ് പ്രസംഗിച്ചു. ആരോഗ്യദായകമായ വിവിധ വിഭവങ്ങൾ പരിപാടിയിൽ ഒരുക്കി. ആർച്ച്ബിഷപ് എമരിറ്റസ് മാർ ജോർജ് വലിയമറ്റം, ജോസ്ഗിരി ആശുപത്രി ചാപ്ലയിൻമാരായ ഫാ. സുബീഷ് കൊട്ടുകാപ്പള്ളി, ഫാ. സുബിൻ റാത്തപ്പള്ളി, മൈനർ സെമിനാരി ബ്രദേഴ്സ്, സാൻജോസ് മെട്രോപോളിറ്റൻ സ്കൂൾ കുട്ടികൾ, സന്ദേശ് ഭവനിലെയും ബിഷപ് ഹൗസിലെയും വൈദികർ, ജോസ്ഗിരി ആശുപത്രി അഡ്മിനിസ്ട്രേറ്റർ സിസ്റ്റർ ഡോ. അഞ്ജലി, സിസ്റ്റർ ഡോ. ദീപ, ഡോ. വേണുഗോപാൽ, ഡോ. നദീം, ഡോ. ദേവരാജ്, ബികെജെഎം സ്കൂൾ ഓഫ് നഴ്സിംഗ് മാനേജർ സിസ്റ്റർ ട്രീസ, നഴ്സിംഗ് സൂപ്രണ്ട് സിസ്റ്റർ സ്റ്റെല്ല തുടങ്ങിയവർ പങ്കെടുത്തു.

കണ്ണൂരിൽ"റാഞ്ചിയ'വിമാനത്തിലെ യാത്രക്കാരെ രക്ഷപ്പെടുത്തി'

മട്ടന്നൂർ: കണ്ണൂർ വിമാനത്താവളത്തിൽ "റാഞ്ചിയ' വിമാനത്തിലെ യാത്രക്കാരെ സുരക്ഷിതമായി രക്ഷപ്പെടുത്തി. ഇന്നലെ രാവിലെ 11.20 ഓടെയാണ് ഉദ്യോഗസ്ഥരെയും വിമാനത്താവളത്തിലുള്ളവരെയും നടുക്കിക്കൊണ്ട് എയർ ഇന്ത്യ വിമാനം റാഞ്ചിയതായുള്ള സന്ദേശമെത്തിയത്. തുടർന്ന് സബ് കളക്ടർ കാർത്തിക് പാണിഗ്രാഹിയുടെ നേതൃത്വത്വത്തിൽ എടിസി ടവറിൽ എയ്റോഡ്രോം കമ്മിറ്റി യോഗം ചേരുകയും യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കുകയും ചെയ്തു. ഇതേ സമയം സിഐഎസ്എഫ് ഉദ്യോഗസ്ഥർ റാഞ്ചികളെ കീഴടക്കാനുള്ള നീക്കവും ആരംഭിച്ചു. ഉച്ചയക്ക് 12 ഓടെ റാഞ്ചികളെ കീഴടക്കിയെന്ന സന്ദേശം എടിസി ടവറിലെത്തി. ഇതിനു പിന്നാലെ വിമാനത്താവളത്തിൽ നടന്നത് ആന്‍റ-ഹൈജാക്ക് മോക്ക് എക്‌സര്‍സൈസാണെന്ന അറിയിപ്പു കൂടെ വന്നതോടെയാണ് അരമണിക്കൂറോളമുള്ള ആശങ്കയും ഭീതിയും ഒഴിവായത്. തുടർന്ന് നടന്ന അവലോകനത്തിൽ എക്‌സര്‍സൈസ് വിജയകരമായിരുന്നെന്ന് സബ് കളക്ടര്‍ വിലയിരുത്തി. എയര്‍പോര്‍ട്ട് ചീഫ് ഓപ്പറേറ്റിംഗ് ഓഫീസര്‍ അശ്വനികുമാര്‍ കണ്‍വീനര്‍ ആയിരുന്നു. ചീഫ് എയ്‌റോഡ്രോം സെക്യൂരിറ്റി ഓഫീസര്‍ നിതിന്‍ ത്യാഗി, ചീഫ് സെക്യൂരിറ്റി ഓഫീസര്‍ പി. സതീഷ് ബാബു, എസിപി കെ.വി. പ്രമോദൻ, എഎഐ അസി. ജനറല്‍ മാനേജര്‍ ജോണ്‍സന്‍ ജോസഫ്, ജില്ലാ ഇന്‍ഫര്‍മേഷന്‍ ഓഫീസര്‍ പി.പി. വിനീഷ്, പ്രതിരോധം, സ്‌പെഷല്‍ ബ്യൂറോ, ഐബി, എൻഎസ്ജി, വിവിധ എയര്‍ലൈന്‍സ്, ഗ്രൗണ്ട് ഹാന്‍ഡ്‌ലിംഗ് ഏജന്‍സികളുടെ പ്രതിനിധികള്‍ എന്നിവർ പങ്കെടുത്തു. വിമാനത്താവളത്തിൽ ഒരു വിമാനം റാഞ്ചുകയോ അല്ലെങ്കില്‍ ഏതെങ്കിലും റാഞ്ചപ്പട്ട വിമാനം ഇറങ്ങിയാല്‍ സ്വീകരിക്കേണ്ട നടപടികളും അത്തരം സാഹചര്യത്തിൽ ഒരുക്കേണ്ട സജ്ജീകരണങ്ങളുടെയും അവലോകനമാണ് ആന്‍റി ഹൈജാക്ക് മോക്ക് എക്സർസൈസ്. ബ്യൂറോ ഓഫ് സിവില്‍ ഏവിയേഷന്‍ സെക്യൂരിറ്റിയുടെ മാനദണ്ഡം അനുസരിച്ചാണ് വർഷത്തിൽ ഒരു തവണ ഇത്തരം എക്സൈസ് നടത്തുന്നത്.

പുതിയ ഡിജിപി നിയമനം; പിണറായി-അമിത് ഷാ ബന്ധത്തിന്‍റെ തെളിവ്: രമേശ് ചെന്നിത്തല

കണ്ണൂർ: സംസ്ഥാനത്തെ പുതിയ ഡിജിപിയുടെ നിയമനം കൂത്തുപറമ്പ് രക്തസാക്ഷികളോടുള്ള കടുത്ത വഞ്ചനയും മുഖ്യമന്ത്രി പിണറായി വിജയനും കേന്ദ്ര ആഭ്യന്തര മന്ത്രി അമിത്ഷായും തമ്മിലുള്ള അവിശുദ്ധ ബന്ധത്തിന്‍റെ ഏറ്റവും വലിയ തെളിവും ആണെന്ന് കോൺഗ്രസ് വർക്കിംഗ് കമ്മിറ്റി അംഗം രമേശ് ചെന്നിത്തല ആരോപിച്ചു. കണ്ണൂരിൽ മാധ്യമങ്ങളോട് പ്രതികരിക്കുകയായിരുന്നു അദ്ദേഹം. കൂത്തുപറമ്പ് വെടിവയ്പുമായി ബന്ധപ്പെട്ട് സിപിഎം അന്ന് ആരുടെ പേരിനാണോ സമരം ചെയ്തത്, ആരേയാണോ പ്രതിപ്പട്ടികയിൽ ചേർക്കാൻ കിണഞ്ഞു ശ്രമിച്ചത്, അതേ ഉദ്യോഗസ്ഥനെ ഇന്ന് ഡിജിപിയായി നിയമിക്കുന്നത് രക്തസാക്ഷികളെ വഞ്ചിക്കുന്നതിന് തുല്യമാണ്. സ്വാശ്രയ കോളജു കൾക്കെതിരേ സമരം ചെയ്ത് അഞ്ച് യുവാക്കളുടെ ജീവൻ ബലി നല്കിയവർ, ഇന്ന് അതേ സ്വാശ്രയ നയങ്ങൾ സ്വീകരിക്കുകയും സ്വന്തമായി കോളജുകൾ നടത്തുകയും ചെയ്യുന്നു. ഇത് സിപിഎമ്മിന്‍റെ രാഷ്‌ട്രീയ വഞ്ചനയാണ്. ഈ വിഷയത്തിൽ പി. ജയരാജൻ സ്വീകരിക്കുന്നത് അഴകൊഴമ്പൻ നയമാണ്. ഒരേസമയം സർക്കാർ തീരുമാനത്തെ അംഗീകരിക്കുകയും എന്നാൽ തന്‍റെ മുൻ നിലപാടിൽ ഉറച്ചുനിൽക്കുകയും ചെയ്യു ന്നത് വ്യക്തതയില്ലാത്ത സമീപനമാണ്. കൂത്തുപറമ്പ് സമരം ഒരു തെറ്റായിരുന്നു എന്ന് പരസ്യമായി സമ്മതിക്കാൻ മുഖ്യമന്ത്രിയും സിപിഎമ്മും തയാറാകണം. അമിത് ഷായുമായി ഏറ്റവും അടുപ്പമുള്ള, കേന്ദ്രത്തിൽ സുപ്രധാന പദവികൾ വഹിച്ച ഒരു ഉദ്യോഗസ്ഥനെ ഡിജിപിയായി നിയമിക്കുന്നത് പിണറായി വിജയനും ബിജെപിയും തമ്മിലുള്ള ധാരണയുടെ ഭാഗമാണ്. വയനാട്ടിലെ പുനരധിവാസ പ്രവർത്തനങ്ങൾ ഒച്ചിഴയുന്ന വേഗതയിലാണ് മുന്നോട്ട് പോകുന്നത്. യാതൊരു വ്യക്തതയുമില്ലാതെ പദ്ധതികൾ നീട്ടിക്കൊണ്ടുപോവുകയാണ്. യൂത്ത് കോൺഗ്രസ് ഉൾപ്പെടെയുള്ള സംഘടനകൾ വീട് നിർമിക്കാൻ പണം സമാഹരിച്ച് തയാറായിട്ടും സർക്കാർ ഭൂമി അനുവദിക്കാത്തതിനാൽ പദ്ധതികൾ വൈകുകയാണ്. ഈ വിഷയത്തിൽ സർക്കാർ അടിയന്തരമായി ഇടപെട്ട് ഭൂമി ലഭ്യമാക്കുകയും പുനരധിവാസ പ്രവർത്തനങ്ങൾ വേഗത്തിലാക്കുകയും വേണം. യൂത്ത് കോൺഗ്രസിന്‍റെ ഫണ്ട് പിരിവുമായി ബന്ധപ്പെട്ട് ഒരു പരാതിയും നേതൃത്വത്തിന് ലഭിച്ചിട്ടി ല്ലെന്നും യൂത്ത് കോൺഗ്രസ് മാതൃകാപരമായാണ് പ്രവർത്തിക്കുന്നതെന്നും ചെന്നിത്തല വ്യക്തമാക്കി.

സൂംബ ഡാൻസ് ഉന്മേഷം നൽകുന്ന വ്യായാമം: കത്തോലിക്ക കോൺഗ്രസ്

തലശേരി: സൂംബ ഡാൻസ് വിദ്യാർഥികളിൽ ഉന്മേഷവും ആരോഗ്യവും വർധിപ്പിക്കുന്ന വ്യായാമ പ്രക്രിയയാണെന്ന് കത്തോലിക്ക കോൺഗ്രസ് തലശേരി അതിരൂപത കമ്മിറ്റി. സൂംബ ഡാൻസിനെ നെഞ്ചിലേറ്റിയ കേരളത്തിലെ വിദ്യാർഥികൾ അതൊരു ആഘോഷമാക്കി മാറ്റിക്കഴിഞ്ഞതായി അതിരൂപത കമ്മിറ്റി അഭിപ്രായപ്പെട്ടു. കലാലയങ്ങളെ ലഹരിയുടെ പിടിയിൽനിന്ന് അകറ്റിനിർത്താൻ ഏറ്റവും നല്ല മാനസിക, ആരോഗ്യ, ഉല്ലാസ പദ്ധതിയാണ് സുംബ ഡാൻസെന്നും യോഗം വിലയിരുത്തി. കത്തോലിക്ക കോൺഗ്രസ് ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ ഉദ്ഘാടനം ചെയ്തു. അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. അതിരൂപത ഭാരവാഹികളായ ജിമ്മി ആയിത്തമറ്റം, സുരേഷ് ജോർജ്, ബെന്നിച്ചൻ മഠത്തിനകം, ഐ.സി.മേരി, ടോമി കണയാങ്കൽ, ഷിനോ പാറയ്ക്കൽ, ജയിംസ് ഇമ്മാനുവൽ, കെ.എ. ജോസഫ് കുന്നത്ത്പറമ്പിൽ, സൈജോ ജോസഫ്, ബിജു ഒറ്റപ്ലാക്കൽ, സിജോ കണ്ണേഴത്ത്, വർഗീസ് പള്ളിച്ചിറ, സാജു പടിഞ്ഞാറേട്ട്, ജോബി കുര്യൻ, ബെന്നി ജോൺ ചേരിയ്ക്കത്തടത്തിൽ, സാജു പുത്തൻപുര, മാത്യു വള്ളോംകോട്ട്, ബിജു മണ്ഡപം, ജോസഫ് മാത്യു കൈതമറ്റം, ജയ്സൺ അട്ടാറിമാക്കൽ, ബേബി കോയിക്കൽ, തോമസ് വർഗീസ് എന്നിവർ പ്രസംഗിച്ചു.

നിർമലഗിരി കോളജ് ഓഫ് അഡ്വാൻസ്ഡ് സ്റ്റഡീസിൽ മെറിറ്റ് ഡേ നടത്തി

നിർമലഗിരി: നിർമലഗിരി കോളജ് ഓഫ് അഡ്വാൻസ്ഡ് സ്റ്റഡീസിൽ 2024-25 അധ്യയന വർഷത്തിൽ പാഠ്യ-പാഠ്യേതര വിഷയങ്ങളിൽ മികവ് പുലർത്തിയവരും ഉന്നത വിജയം കൈവരിച്ചവരുമായ വിദ്യാർഥികളെ അനുമോദിച്ചു. മെറിറ്റ് ഡേ കോളജ് രക്ഷാധികാരിയും തലശേരി ആർച്ച്ബിഷപ്പുമായ മാർ ജോസഫ് പാംപ്ലാനി ഉദ്ഘാടനം ചെയ്തു. കണ്ണൂർ യൂണിവേഴ്സിറ്റിയിൽ ബിഎസ്‌സി സൈക്കോളജിയിൽ രണ്ടും മൂന്നും റാങ്കുകൾ കരസ്ഥമാക്കിയ പി. അനുപമ, നിഹാരിക രതീഷ്, യൂണിവേഴ്സിറ്റി പരീക്ഷയിൽ എ പ്ലസ് ഗ്രേഡ് കരസ്ഥമാക്കിയവർ, ഗേറ്റ് പരീക്ഷയിൽ ഉന്നത വിജയം നേടിയ നിഹാല അബ്ദുറഹ്മാൻ, നിഹാരിക രതീഷ്, കണ്ണൂർ യൂണിവേഴ്സിറ്റി ആർട്സ്, സ്പോർട്സ് മത്സരങ്ങളിൽ വിവിധ ഇനങ്ങളിലായി സമ്മാനങ്ങൾ കരസ്ഥമാക്കിയവർ എന്നിവരെ ഫലകങ്ങൾ നൽകി ആദരിച്ചു. കോളജ് മാനേജർ മോൺ. ആന്‍റണി മുതുകുന്നേൽ അധ്യക്ഷത വഹിച്ചു. പ്രിൻസിപ്പൽ ഡോ. കെ.വി. ഔസേപ്പച്ചൻ, വൈസ് പ്രിൻസിപ്പൽ ഡോ. ടെസി ജോർജ് എന്നിവർ പ്രസംഗിച്ചു. കോളജ് ബർസാർ റവ. ഡോ. തോമസ് കൊച്ചുകരോട്ട് സ്വാഗതവും ഡയറക്ടർ റവ. ഡോ. ലൂക്കോസ് മാടശേരി നന്ദിയും പറഞ്ഞു.

400 കെവി ലൈന്‍ നഷ്ടപരിഹാരം: കർണാടക പാക്കേജിൽ മാറ്റമില്ല

ഇരിട്ടി: കാസര്‍ഗോഡ് - വയനാട് 400 കെവി ലൈന്‍ സ്ഥാപിക്കുന്നതുമായി ബന്ധപ്പെട്ട് വൈദ്യുതി മന്ത്രി കെ. കൃഷ്ണന്‍കുട്ടി വിളിച്ചുചേര്‍ത്ത യോഗത്തിലും കാര്യമായ പുരോഗതിയില്ല. നഷ്ടപരിഹാര പാക്കേജ് സംബന്ധിച്ച ചര്‍ച്ചയില്‍ കർണാടക പാക്കേജിൽ മാറ്റം വരുത്താൻ തയാറായില്ല. കൃഷിക്കാ ര്‍ക്ക് നഷ്ടപ്പെടുന്ന കാര്‍ഷിക വിളകള്‍ക്കും സ്ഥലത്തിനും ന്യായമായ നഷ്ടപരിഹാരം ഉറപ്പാക്കുമെന്ന ഉറപ്പ് മാത്രമാണ് മന്ത്രിയിൽ നിന്ന് ലഭിച്ചിരിക്കുന്നത്. ലൈന്‍ കടന്നുപോകുന്ന സ്ഥലങ്ങളില്‍ നടത്തിയ സര്‍വേയുടെ അടിസ്ഥാനത്തിലുള്ള നഷ്ടപരിഹാര തുക സംബന്ധിച്ച് ഏകദേശ രൂപരേഖ യോഗത്തില്‍ അവതരിപ്പിച്ചു. എന്നാല്‍ വീടുകളെ ബാധിക്കുന്ന സാഹചര്യങ്ങളില്‍ ആയവ പ്രത്യേക പാക്കേജായി കണക്കാക്കണമെന്നും നിശ്ചയിച്ച ഭൂമിയുടെ ഏറ്റവും കുറഞ്ഞ ന്യായവില അയ്യായിരം രൂപയില്‍ നിന്ന് പതിനായിരം രൂപയെങ്കിലുമായി ഉയര്‍ത്തണമെന്നും ജനപ്രതിനിധികളും ആക്ഷന്‍ കമ്മിറ്റി ഭാരവാഹികളും ആവശ്യപ്പെട്ടു. ഇക്കാര്യം അനുഭാവപൂര്‍വം പരിഗണിക്കുമെന്നും പാക്കേജ് സംബന്ധിച്ച അന്തിമ തീരുമാനം ഉടന്‍ അറിയിക്കുമെന്നും മന്ത്രി അറിയിച്ചു. കൂടുതലായി ലഭിക്കുന്നത് കാർഷികവിഭവങ്ങളുടെ നഷ്ടപരിഹാരം നിലവിൽ ലൈൻ കടന്നുപോകുന്ന പ്രദേശങ്ങളിലെ നഷ്ടപ്പെടുന്ന കൃഷിയുടെ കണക്കുകൾ ചൂണ്ടിക്കാട്ടിയായിരുന്നു കെഎസ്ഇബി അധികൃതർ കണക്കുകൾ അവതരിപ്പിച്ചത്. ഭൂമിയുടെ വില കൃത്യമായി കണക്കാക്കി അവതരിപ്പിച്ചാൽ മാത്രമേ യഥാർഥ നഷ്ടപരിഹാരം കണ്ടെത്താൻ കഴിയുകയുള്ളൂ. ഇങ്ങനെ കണക്കാക്കിയാലും മാർക്കറ്റ് വില എത്തില്ലെന്നു പറയുന്നു. ഏക്കർ കണക്കിന് ഭൂമി നഷ്ടപ്പെടുന്നവരുടെ കണക്കുകൾ മാത്രമാണ് ഇപ്പോൾ പരിശോധനയ്ക്കായി സമർപ്പിച്ചിരിക്കുന്നത്. ചെറുകിട കർഷകന്‍റെ 10 സെന്‍റ് മുതൽ സ്ഥലങ്ങൾ നഷ്ടപ്പെടുമ്പോൾ ലഭിക്കുന്ന നഷ്ടപരിഹാരം തുച്ഛമായിരിക്കും. പ്രധാന റോഡുകളോട് ചേർന്നു വരുന്ന സ്ഥലങ്ങൾക്കും നഷ്ടപരിഹാരം മാർക്കറ്റ് വിലയെ അപേക്ഷിച്ച് നോക്കുമ്പോൾ കുറവായിരിക്കും. വർഷങ്ങളായി നടക്കുന്ന മാരത്തോൺ ചർച്ചകളിൽ കെഎസ്ഇബിയുടെ പഴയ നഷ്ടപരിഹാര പാക്കേജിൽ നിന്നും കർണാടക പാക്കേജിലേക്ക് എത്തിക്കാൻ കഴിഞ്ഞു എന്നു മാത്രമാണ്. കാർഷിക വിളയുടെ നഷ്ടങ്ങൾ കൂടി കണക്കാക്കുമ്പോൾ നഷ്ടപരിഹാരത്തിൽ ചെറിയ വ്യത്യാസം മാത്രമാണ് ലഭിക്കുക. പദ്ധതിയോട് ചേർന്നുവരുന്ന കർഷകന്‍റെ ബാക്കി വരുന്ന സ്ഥലം വില ലഭിക്കാതെ പോകുമെന്ന ആശങ്കയും നിലനില്ക്കുന്നു. നിലവിലെ തീരുമാനങ്ങളോട് കർഷകരുടെ പ്രതികരണങ്ങൾ ഇനിയും ലഭിച്ചിട്ടില്ല. അലൈന്‍മെന്‍റിലെ ചില മാറ്റങ്ങള്‍ സംബന്ധിച്ച ചർച്ചകൾ പ്രായോഗികമല്ലന്ന നിലപാടാണ് കെഎസ്ഇബി സ്വീകരിച്ചത് . യോഗത്തില്‍ എംഎല്‍എമാരായ സണ്ണി ജോസഫ്, സജീവ് ജോസഫ്, കെഎസ്ഇബി ചെയര്‍മാന്‍ മിര്‍ മുഹമ്മദ് അലി, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍, ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധന്‍, പഞ്ചായത്ത് പ്രസിഡന്‍റുമാരായ പി.സി. ഷാജി, ബേബി ഓടമ്പള്ളി, മിനി ഷൈബി, ജോജി കന്നിക്കാട്ടില്‍, സാജു സേവ്യര്‍, കുര്യാച്ചന്‍ പൈമ്പള്ളി കുന്നേല്‍, പി. ര‍ജനി, സി.ടി. അനീഷ്, കെ.പി. രാജേഷ്, ആക്ഷന്‍ കമ്മിറ്റി ചെയര്‍മാന്‍ തോമസ് വ‍ര്‍‍ഗീസ്, ഭാരവാഹികളായ ഫാ. പയസ് പടിഞ്ഞാറെമുറിയില്‍, ബെന്നി പുതിയാംപുറം, ടോമി കുമ്പിടിമാക്കല്‍, ഒ.വി. ഷാ‍ജു, കെഎസ്ഇബി ഡയറക്ടര്‍ ആർ. ബിജു, ചീഫ് എൻജിനിയര്‍ കെ.എസ്. ഷീബ, എക്സിക്യുട്ടീവ് എൻജിനിയര്‍ എം. കൃഷ്ണേന്ദു തുടങ്ങിയവര്‍ പങ്കെടുത്തു.

അണ്ടർ ബ്രിഡ്ജ് മതിലിലെ കല്ല് താഴേയ്ക്ക് വീണു; ബൈക്ക് യാത്രികൻ രക്ഷപ്പെട്ടത് തലനാരിഴയ്ക്ക്

കണ്ണൂർ: പഴയ ബസ് സ്റ്റാൻഡിനു സമീപത്തെ അണ്ടർ ബ്രിഡ്ജിനോട് ചേർന്ന സ്ഥലത്തെ റെയിൽവേ യുടെ സ്ഥലത്തെ മതിലിന്‍റെ കൂറ്റൻ കല്ല് താഴേയ്ക്ക് വീണുണ്ടായ അപകടത്തിൽ ബൈക്ക് യാത്രികൻ രക്ഷപ്പെട്ടത് തലനാരിഴയ്ക്ക്. ഇന്നലെ രാവിലെ എട്ടോടെയായിരുന്നു സംഭവം. മുനീശ്വരൻ കോവിൽ ഭാഗത്ത് നിന്നും പഴയ ബസ് സ്റ്റാൻഡ് ഭാഗത്തേക്ക് പോകുകയായിരുന്നു ബൈക്ക് യാത്രികൻ. ബൈക്കിന് മുന്നിലാണ് മതിലിന്‍റെ കരിങ്കല്ല് വീണത്. റോഡിൽ മറ്റു വാഹനങ്ങളും നടപ്പാതയിൽ കാൽനടയാത്രക്കാരുമില്ലാത്തതിനാലാണ് ദുരന്തം ഒഴിവായത്. മതിലിൽ ആൽമരം വളർന്നതിനെ തുടർന്ന് മതിൽ വിണ്ടുകീറി കല്ലുകൾ ഇളകിയ നിലയിലാണ്. റെയിൽവേയുടെ സ്ഥലത്ത് നിന്നും മഴവെള്ളവും ഇതിലൂടെ റോഡിലേക്ക് ഒഴുകുന്നുണ്ട്. മതിലിന്‍റെ അപകടാവസ്ഥ ഒഴിവാക്കി റോഡ് യാത്ര സുരക്ഷിതമാക്കാൻ ബന്ധപ്പെട്ടവർ നടപടി സ്വീകരിക്കണമെന്ന ആവശ്യം ശക്തമാണ്.

ഇൻഷ്വറൻസ് ജീവനക്കാർ സ്ഥാപകദിനം ആചരിച്ചു

കണ്ണൂർ: ഇൻഷ്വറൻസ് ജീവനക്കാരുടെ ദേശീയ സംഘടനയായ ഓൾ ഇന്ത്യാ ഇൻഷ്വറൻസ് എംപ്ലോയീസ് അസോസിയേഷന്‍റെ 75-ാമത് സ്ഥാപകദിനം വിവിധ പരിപാടികളോടെ ആചരിച്ചു. ജില്ലയിലെ എൽഐസി ഓഫീസുകൾക്ക് മുന്നിൽ രാവിലെ പതാക ഉയർത്തി. ഉച്ചയ്ക്ക് കവാടയോഗങ്ങളും നടത്തി. കണ്ണൂരിൽ എൽഐസി എംപ്ലോയീസ് യൂണിയൻ പൊതുയോഗം കണ്ണൂർ, കാസർഗോഡ് ജില്ലാ കോ-ഓർഡിനേഷൻ കമ്മിറ്റി കൺവീനർ എം.കെ. പ്രേജിത്ത് പതാക ഉയർത്തി. ഉച്ചയ്ക്ക് നടന്ന പൊതുയോഗം എം.കെ. പ്രേംജിത്ത് ഉദ്ഘാടനം ചെയ്തു. ജില്ലാ കോ-ഓർഡിനേഷൻ കമ്മിറ്റി ജോയിന്‍റ് കൺവീനർ സി.സി. വിനോദ് അധ്യക്ഷത വഹിച്ചു. സംഘടനയുടെ കോഴിക്കോട് ഡിവിഷൻ പ്രസിഡന്‍റ് കെ. ബാഹുലേയൻ, പ്രദീപൻ കണ്ണോത്ത്, ടി. മണി എന്നിവർ പ്രസംഗിച്ചു. തലശേരി ബ്രാഞ്ച് ഒന്നിൽ എ.പി. രജില പതാക ഉയർത്തി. വി. വിജയകുമാർ, പി.വി. രാജേഷ് എന്നിവർ പ്രസംഗിച്ചു. തലശേരി ബ്രാഞ്ച് രണ്ടിൽ എം. അനിൽകുമാർ പതാക ഉയർത്തി. പി. അശോകൻ, പി.പി. സൗമ്യ, വി. തനൂജ എന്നിവർ പ്രസംഗിച്ചു. മട്ടന്നൂരിൽ കെ. രമേശൻ പതാക ഉയർത്തി. ജി. ഉത്തമൻ, ഇ. ചന്ദ്രൻ, എം. മനോജ്‌ എന്നിവർ പ്രസംഗിച്ചു. തളിപ്പറമ്പിൽ പി.വി. ഷിജു പതാക ഉയർത്തി. കെ. ഗണേശൻ, കെ.വി. രജിത, ടി.വി. ജഗദീഷ് ബാബു എന്നിവർ പ്രസംഗിച്ചു. പയ്യന്നൂരിൽ ടി.വി. ഗണേശൻ പതാക ഉയർത്തി. കെ.വി. വേണു, രമേഷ് പുതിയറക്കൽ, കെ. സുമേഷ്, വിനയ കമ്മത്ത്, എം. ചന്ദ്രൻ, ഇ. സുരേന്ദ്രൻ എന്നിവർ പ്രസംഗിച്ചു.

ദേശീയപാത: നടാൽ ഓകെ യുപി സ്കൂൾ പരിസരത്ത് അടിപ്പാത നിർമിക്കണം: കെ. സുധാകരൻ എംപി

കണ്ണൂർ: ദേശീയപാത നിർമാണം പൂർത്തിയായാൽ കണ്ണൂർ-തോട്ടട-തലശേരി റൂട്ടിൽ ഉണ്ടാകാൻ പോകുന്ന യാത്ര ക്ലേശം പരിഹരിക്കുന്നതിന്‍റെ ഭാഗമായി നടാൽ ഓകെ യുപി സ്കൂൾ പരിസരത്ത് അടിപ്പാത നിർമിക്കേണ്ടത് അനിവാര്യമാണെന്ന് കോൺഗ്രസ് പ്രവർത്തകസമിതി അംഗം കെ. സുധാകരൻ എംപി അഭിപ്രായപ്പെട്ടു. അടിപ്പാത നിർമിക്കുന്നതിനായി രണ്ടിലേറെ തവണ കേന്ദ്ര ഉപരിതല ഗതാഗത മന്ത്രി നിധിൻ ഗഡ്കരിയെ കണ്ട് നിവേദനം നൽകി കാര്യങ്ങൾ ബോധ്യപ്പെടുത്തിയിട്ടും ഈ വിഷയത്തിൽ അനുകൂലമായ ഒരു തീരുമാനം ഇതുവരെ ഉണ്ടാകാത്തത് ഖേദകരമാണ്. കണ്ണൂർ പാർലമെന്‍റ് മണ്ഡലത്തിൽ നിരവധി അടിപ്പാതകൾ നിർമിക്കേണ്ടതിന്‍റെ ആവശ്യം അനുഭാവ പൂർവം പരിഗണിച്ച കേന്ദ്ര ഉപരിതലഗതാഗത മന്ത്രി ഈ വിഷയത്തിൽ മാത്രം അനുകൂലമായ ഒരു തീരുമാനം എടുക്കാത്തതിന്‍റെ കാരണം ഇവിടുത്തെ നാഷണൽ ഹൈവേ ഉദ്യോഗസ്ഥരുടെ നിഷേധാത്മക നിലപാടിന്‍റെ ഭാഗമാണോയെന്ന് സംശയിക്കുന്നു. തുടക്കത്തിൽ ഈ അടിപ്പാതയ്ക്ക് വേണ്ടി ശബ്ദമുയർത്താത്ത സംസ്ഥാന സർക്കാർ ഇപ്പോൾ മുന്നോ ട്ടു വന്നതിൽ സന്തോഷമുണ്ട്. ഓകെ യുപി സ്കൂൾ പരിസരത്ത് അടിപ്പാത നിർമിക്കണമെന്ന ആവശ്യവുമായി വീണ്ടും കേന്ദ്ര ഉപരിതല ഗതാഗത മന്ത്രിയെ കാണുകയും, ഈ മാസം നടക്കുന്ന പാർലമെന്‍റ് സമ്മേളനത്തിൽ ഈ വിഷയം ഉന്നയിക്കുകയും ചെയ്യുമെന്ന് കെ. സുധാകരൻ എംപി പറഞ്ഞു. കേരള സംസ്ഥാന കൈത്തറി വികസന കോർപറേഷൻ (ഹാൻഡ് വീവ് ) ജീവനക്കാരുടെയും, കൈത്തറി തൊഴിലാളികളുടെയും മാസങ്ങളായി മുടങ്ങിക്കിടക്കുന്ന ശമ്പളം അടിയന്തരമായി അനുവദിക്കണമെന്ന് ആവശ്യപ്പെട്ട് കെ. സുധാകരൻ എംപി മുഖ്യമന്ത്രിക്ക് കത്തും നൽകി. 2024 ഡിസംബർ മാസത്തെ ശമ്പളമാണ് അവസാനമായി ജീവനക്കാർക്ക് ലഭിച്ചത്. ഇതു തന്നെ ഗഡുക്കളായിട്ടായിരുന്നു അനുവദിച്ചിരുന്നത്. കോർപറേഷനെ ആശ്രയിച്ച് കഴിയുന്ന ആയിരത്തിലധികം നെയ്ത്തു തൊഴിലാളികളുടെ വേതനവും മാസങ്ങളായി മുടങ്ങിക്കിടക്കുകയാണ്. 2022 മുതൽ കോർപറേഷനിൽ നിന്ന് വിരമിച്ച ജീവനക്കാരുടെ റിട്ടയർമെന്‍റ് ആനുകൂല്യവും ഇതുവരെ നൽകിയിട്ടില്ല. അടിയന്തരമായി ഈ വിഷയത്തിൽ ഇടപെട്ട് പരിഹാരം കാണാനുള്ള നടപടികൾ കൈക്കൊള്ളാൻ കെ. സുധാകരൻ എംപി മുഖ്യമന്ത്രിയോട് ആവശ്യപ്പെട്ടു.

കണ്ണൂര്‍ വിമാനത്താവളത്തിലെ ഇന്‍സിനറേറ്റര്‍ മാറ്റി സ്ഥാപിക്കാന്‍ നിര്‍ദേശം

കണ്ണൂർ: അന്താരാഷ്‌ട്ര വിമാനത്താവളത്തിലെ മാലിന്യ സംസ്‌കരണവുമായി ബന്ധപ്പെട്ട് പരാതി ഉയര്‍ന്ന സാഹചര്യത്തില്‍ നിലവിലെ ഇന്‍സിനറേറ്റര്‍ മറ്റൊരു സ്ഥലത്തേക്ക് മാറ്റി സ്ഥാപിക്കാന്‍ വിമാനത്താവള അധികൃതരോട് കെ.കെ. ശൈലജ എംഎല്‍എ നിര്‍ദേശിച്ചു. വിമാനത്താവളവുമായി ബന്ധപ്പെട്ട് നാട്ടുകാര്‍ ഉന്നയിച്ച വിവിധ പരാതികള്‍ പരിഹരിക്കാന്‍ എംഎല്‍എയുടെ നേതൃത്വത്തില്‍ കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗത്തിലാണ് നിര്‍ദേശം. പ്ലാസ്റ്റിക് മാലിന്യം കത്തിക്കുന്നുവെന്ന നാട്ടുകാരുടെ പരാതിയില്‍ ഇന്‍സിനറേറ്റര്‍ മാറ്റി സ്ഥാപിക്കുന്നതുവരെ മാലിന്യം സംസ്‌കരിക്കാന്‍ ഏല്‍പിച്ച ഏജന്‍സിയുടെ പ്രവര്‍ത്തനങ്ങള്‍ കൃത്യമായി മോണിറ്റര്‍ ചെയ്യണമെന്നും എന്തെങ്കിലും പിഴവുകള്‍ കണ്ടെത്തിയാല്‍ ഏജന്‍സിയെ മാറ്റുന്നതടക്കമുള്ള നടപടികള്‍ ആലോചിക്കണമെന്നും എംഎല്‍എ യോഗത്തില്‍ പറഞ്ഞു. വിമാനത്താവളത്തില്‍ നിന്ന് ശുചിമുറി മാലിന്യങ്ങള്‍ അടുത്തുള്ള ജനവാസ മേഖലകളിലേക്കെത്തുന്നെന്ന പരാതിയില്‍ എയര്‍പോര്‍ട്ട് സീവേജ് സിസ്റ്റം പരിശോധിക്കാനും മാലിന്യം മറ്റെവിടുന്നെങ്കിലും വരുന്നതാണോയെന്ന് പരിശോധിക്കാനും ബന്ധപ്പെട്ട വകുപ്പുകളെ ചുമതലപ്പെടുത്തി. വിമാനത്താവളത്തില്‍ നിന്ന് ശക്തമായി മഴവെള്ളം പുറത്തേക്കൊഴുകി കൃഷി നശിക്കുന്നുവെന്ന പരാ തിയില്‍ വെള്ളം ഒഴുകിയെത്തുന്ന കാരത്തോട്, കോതേരിത്തോട് എന്നിവയുടെ സംരക്ഷണ ഭിത്തിയുടെ നിര്‍മാണം പൂര്‍ത്തീകരിക്കാത്ത ഭാഗത്തെ അടിഞ്ഞുകൂടിയ മണ്ണ് നീക്കം ചെയ്യാന്‍ ജലസേചന വകുപ്പ് അധികൃതരോട് യോഗം നിര്‍ദേശിച്ചു. കൂടാതെ കൂടുതല്‍ വെള്ളം പുറത്തേക്കൊഴുകുന്നതുമായി ബന്ധപ്പെട്ട് സംയുക്ത പരിശോധന നടത്താനും നിര്‍ദേശം നല്‍കി. കൃഷി നശിച്ചവര്‍ക്ക് നഷ്ടപരിഹാരം നല്‍കാനുള്ള നടപടികള്‍ സ്വീകരിക്കാൻ കൃഷി വകുപ്പ് അധികൃതർക്ക് നിര്‍ദേശം നല്‍കി. യോഗത്തില്‍ ജില്ലാ കളക്ടര്‍ അരുണ്‍ കെ. വിജയന്‍, കീഴൂര്‍-ചാവശേരി പഞ്ചായത്ത് പ്രസിഡന്‍റ് കെ.വി. മിനി, എല്‍എസ്ജിഡി ജോയിന്‍റ് ഡയറക്ടര്‍ ടി.ജെ. അരുണ്‍, ഡപ്യൂട്ടി കളക്ടര്‍മാരായ കെ.വി. ശ്രുതി, എ കെ. അനീഷ്, കീഴൂര്‍-ചാവശേരി പഞ്ചായത്ത് സെക്രട്ടറി എസ് അജി, മട്ടന്നൂര്‍ പബ്ലിക് ഹെല്‍ത്ത് ഇന്‍സ്‌പെക്ടര്‍ ജൂലി, കിന്‍ഫ്ര, കിയാല്‍, ഇറിഗേഷന്‍, ഹരിത കേരളം മിഷന്‍ എന്നിവയുടെ പ്രതിനിധികള്‍ തുടങ്ങിയവര്‍ പങ്കെടുത്തു.

ദേശീയപാതയിലെ പാലങ്ങളുടെ നിർമാണം പുഴകളുടെ താളം തെറ്റിക്കുന്നു: ശാസ്ത്രവേദി

കണ്ണൂർ: ദേശീയപാത വീതി കൂട്ടുന്നതിനൊപ്പം പുഴയ്ക്കുകുറുകെ പെരുന്പ, കുപ്പം, കുറ്റിക്കോൽ, വളപട്ടണം എന്നിവിടങ്ങളിൽ അശാസ്ത്രീയമായി നിർമിക്കുന്ന പാലങ്ങൾ പുഴകളുടെ സ്വാഭാവിക ഒഴുക്ക് താളം തെറ്റിക്കുകയും അടിത്തട്ടിനും പാരിസ്ഥിതിക ആഘാതം സൃഷ്ടിക്കുകയുമാണെന്ന് ശാസ്ത്രവേദി കണ്ണൂർ ജില്ലാ കമ്മിറ്റിയോഗം. അശാസ്ത്രീയ നിർമാണം തുരുത്തുകൾ രൂപപ്പെടാൻ ഇടയാക്കുന്നതിനൊപ്പം പുഴയുടെ സ്വാഭാവികത നഷ്ടപ്പടുത്തുകയും ചെയ്യുന്നുണ്ടെന്ന് ശാസ്ത്രവേദി ചൂണ്ടിക്കാട്ടി. സംസ്ഥാന വൈസ് പ്രസിഡന്‍റും ഭൗമപഠന ശാസ്ത്രഞ്ജനുമായ ഡോ. കെ.കെ. രാമചന്ദ്രൻ ഉദ്ഘാടനം ചെയ്തു. ജില്ലാ പ്രസിഡന്‍റ് എ.ആർ. ജിതേന്ദ്രൻ അധ്യക്ഷത വഹിച്ചു. ഇരിട്ടി എം.ജി. കോളേജ് മുൻ പ്രിൻസിപ്പൽ പ്രഫ. എം.പി. ലക്ഷ്മണൻ, എം. രാജീവൻ, ആർ. ദിനേശ്, എം. രത്നകുമാർ, കെ.സി. ശ്രീജിത്ത്, ജില്ലാ സെക്രട്ടറി എസ്.പി. മധുസൂദനൻ, ജോയിന്‍റ് സെക്രട്ടറി കെ.എൻ. പുഷ്പലത എന്നിവർ പ്രസംഗിച്ചു. ഭാരവാഹികൾ: ഡോ. ആർ. ബിജു-പ്രസിഡന്‍റ്, എസ്.പി. മധുസൂദനൻ-സെക്രട്ടറി, കെ.സി. ശ്രീജിത്ത്-ട്രഷറർ.15 അംഗ എക്സിക്യുട്ടീവ് കമ്മറ്റിയെയും തെരഞ്ഞെടുത്തു.

ബാരാപോൾ പവർ ഹൗസിന് മുന്നിൽ കോൺഗ്രസ് ധർണ നടത്തി

ഇരിട്ടി: ബാരാപോൾ കനാലിൽ ഗർത്തം രൂപപ്പെട്ടതിന് താഴെ താമസിക്കുന്നവരും സുരക്ഷ ഉറപ്പാക്കുക, കെഎസ്ഇബിയുടെ അനാസ്ഥ അവസാനിപ്പിക്കുക തുടങ്ങിയ ആവശ്യങ്ങളുന്നയിച്ച് കോൺഗ്രസ് അയ്യൻകുന്ന് പഞ്ചായത്ത് കമ്മിറ്റി ബാരാപോൾ പവർ ഹൗസിന് മുന്നിൽ ധർണ നടത്തി. കെപിസിസിയംഗം ചന്ദ്രൻ തില്ലങ്കേരി ഉദ്ഘാടനം ചെയ്തു. ഡിസിസി സെക്രട്ടറി ജയ്സൺ കാരക്കാട്ട് അധ്യക്ഷത വഹിച്ചു. വിജിലൻസ് അന്വേഷണത്തിൽ കുറ്റക്കാരാണെന്ന് കണ്ടെത്തിയ ഉദ്യോഗസ്ഥർക്കെതിരേ രണ്ടുവര്ഷം കഴിഞ്ഞിട്ടും നടപടി സ്വീകരിക്കാത്തത് ഭരണാനുകൂല സംഘടനാംഗങ്ങളായതു കൊണ്ടാണെന്ന് കോൺഗ്രസ് കുറ്റപ്പെടുത്തി. ജില്ലാ പഞ്ചായത്തംഗം ലിസി ജോസഫ്, ബ്ലോക്ക് കോൺഗ്രസ് പ്രസിഡന്‍റ് പി.എ. നസീർ, മണ്ഡലം പ്രസിഡന്‍റ് ജയിൻസ് മാത്യു, ബ്ലോക്ക് പഞ്ചായത്ത് അഗം മേരി റെജി എന്നിവർ പ്രസംഗിച്ചു. പഞ്ചായത്ത് അംഗങ്ങളായ ഐസക് ജോസഫ്, മിനി വിശ്വനാഥൻ, സജി മച്ചിത്താന്നി, ലിസി തോമസ്, സെലീന ബിനോയി, എൽസമ്മ ജോസഫ് എന്നിവർ പ്രസംഗിച്ചു. പി.സി. ജോസ്, എം.കെ. വിനോദ്, ജോസ് കുഞ്ഞ്തടത്തിൽ, ജോഷി കാഞ്ഞമല, ഷിബോ കൊച്ചുവേലിക്കകത്ത്, എൻ.എം. സാജു, തോമസ് വലിയതൊട്ടി, സി.സി. ജോയി, ബിജുനിത്ത് കുറുപ്പംപറമ്പിൽ, റോസിലി വിൽസൺ, അനൂപ് ചെമ്പകശേരി എന്നിവർ നേതൃത്വം നൽകി.

നഷ്ടപരിഹാരം; മന്ത്രിക്ക് നിവേദനം നല്കി മാനന്തവാടി-മട്ടന്നൂർ എയർപോർട്ട് റോഡ് ആക്‌ഷൻ കമ്മിറ്റി

കേളകം: കണ്ണൂർ വിമാനത്താവള റോഡകൾക്കായി വീടും കെട്ടിടങ്ങളും മറ്റ് നിർമിതികളും വിട്ടു നല്കിയവർക്ക് കാലപഴക്കം കണക്കാക്കി വിലനിശ്ചയിക്കണമെന്ന സർക്കാർ തീരുമാനം റദ്ദ് ചെയ്യണമെന്ന് ആവശ്യപ്പെട്ട് മാനന്തവാടി-മട്ടന്നൂർ എയർപോർട്ട് റോഡ് ആക്‌ഷൻ കമ്മിറ്റി നിവേദനം നല്കി. സണ്ണി ജോസഫ് എംഎൽഎയുടെ സാന്നിധ്യത്തിൽ പൊതുമരാമത്ത് മന്ത്രിക്കാണ് ആക്‌ഷൻ കമ്മിറ്റി നിവേദനം നല്കിയത്. കമ്മിറ്റി കൺവീനർ ജിൽസ് എം. മേയ്ക്കൽ, വൈസ് ചെയർമാൻ ബിജു ടി. മാത്യു തോട്ടത്തിൽ, ജോസഫ് പള്ളിക്കാമഠത്തിൽ, സജി ജോർജ് മേച്ചേരി കിഴക്കേൽ എന്നിവർ തിരുവനന്തപുരത്ത് എത്തിയാണ് നിവേദനം നൽകിയത്. വിഷയം ഗൗരവം ഉള്ളതാന്നെന്നും പരിഹരിക്കപ്പെടേണ്ടതാണെന്നും മന്ത്രി അറിയിച്ചു.

അന്തർസംസ്ഥാന പാതയിൽ റോഡിലൂടെ വെള്ളമൊഴുകുന്നു

ഇരിട്ടി: ഇരിട്ടി-കൂട്ടുപുഴ അന്തർസംസ്ഥാന പാതയിൽ ഓവുചാലകൾ അറ്റകുറ്റപ്പണികൾ പൂർത്തിയാക്കാത്തത് യാത്രക്കാരെ വലയ്ക്കുന്നു. അതിശക്തമായ മഴയിൽ മഴവെള്ളം റോഡിലൂടെ ഒഴുകുന്നതാണ് ഇരുചക്ര വാഹനങ്ങളെയും കാൽനട യാത്രക്കാരെയും ദുരിതത്തിലാക്കുന്നത്. മാടത്തിൽ ബെൻഹിൽ സ്കൂളിന് സമീപം വളവിൽ റോഡിലൂടെ ഒഴുകുന്ന മഴവെള്ളം കനത്ത അപകട ഭീഷണിയാണ് സൃഷ്ടിക്കുന്നത്. വേഗത്തിൽ എത്തുന്ന വലിയ വാഹനങ്ങൾ കടന്നുപോകുമ്പോൾ വെള്ളം തെറിച്ച് ഇരുചക്ര വാഹനയാത്രക്കാരും കാൽനട യാത്രക്കാരും ഒരേപോലെ ബുദ്ധിമുട്ടുകയാണ്. അന്തർസംസ്ഥാന പാതയിൽ മഴക്കാലപൂർവ ശുചീകരണങ്ങൾ നടക്കാത്തതാണ് അപകടാവസ്ഥയ്ക്ക് കാരണം. റോഡിന് ഇരുവശവുമുള്ള കാടുകൾ വെട്ടി മാറ്റാത്തത് മറ്റൊരു കാരണമാണ്. കാടുകളും ചപ്പുചവറുകളും നിറഞ്ഞ ഓവുചാലുകളിലൂടെ മഴവെള്ളം ഒഴുകിപ്പോകാൻ പറ്റാത്ത സാഹചര്യമാണ്. പൊതുമരാമത്ത് അധികൃതർ അടിയന്തര നടപടികൾ സ്വീകരിച്ചില്ലെങ്കിൽ ഇവിടെ വാഹനങ്ങൾ അപകടത്തിൽ പെടാനുള്ള സാധ്യതയും കൂടുതലാണ്.

ബാരാപോൾ കനാലിലെ ഗർത്തം ഗുരുതരം : ഉന്നതതല പഠനസംഘം പരിശോധന നടത്തണം: സണ്ണിജോസഫ്

ഇരിട്ടി: ബാരാപോൾ കനാൽ തകർച്ചയെ കുറിച്ച് ഉന്നതതല പഠന സംഘം പരിശോധന നടത്തി ശാശ്വത പരിഹാരമുണ്ടാക്കണമെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ ആവശ്യപ്പെട്ടു. ജനങ്ങളുടെ ആശങ്ക അകറ്റുന്നതിനോടൊപ്പം വൈദ്യുതി വകുപ്പിന് ഉണ്ടാകുന്ന കോടികളുടെ നഷ്ടവും സർക്കാർ പരിഗണിക്കണം. 400 കെവി ലൈനിന്‍റെ നിർമാണ പ്രവൃത്തിയുമായി ബന്ധപ്പെട്ട് തിരുവനന്തപുരത്ത് നടക്കുന്ന ചർച്ചയിൽ ഇക്കാര്യം വൈദ്യുതി മന്ത്രിയുടെ ശ്രദ്ധയിൽപ്പെടുത്തുമെന്നും എംഎൽഎ പറഞ്ഞു. പദ്ധതി പ്രദേശം സന്ദർഷിച്ച ശേഷം മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. നിർമാണത്തിലെ അപാകതയാണ് പ്രശ്‌നങ്ങൾക്ക് കാരണമെന്നാണ് പ്രാഥമിക പരിശോധനയിൽ കണ്ടെത്തിയത്. ജനങ്ങളുടെ ആശങ്ക അകറ്റും വിധം കനാലിൽ 1.4 കിലോമീറ്റർ ഭാഗം പൂർണമായും പുനർനിർമാണം നടത്തണമെന്നും എംഎൽഎ പറഞ്ഞു. വർഷങ്ങളായി തുടരുന്ന ചോർച്ച കാരണം രണ്ട് കുടുംബങ്ങളെ മാറ്റി പാർപ്പിച്ചെങ്കിലും താൻ ഉൾപ്പെടെയുള്ള ജനപ്രതിനിധികൾ ചേർന്നെടുത്ത തീരുമാനം പൂർത്തീകരിക്കാൻ കഴിഞ്ഞിട്ടില്ല. അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പളിക്കുന്നേൽ, സ്ഥിരം സമിതി അധ്യക്ഷൻ ഐസക് ജോസഫ്, പഞ്ചായത്ത് അംഗങ്ങളായ മിനി വിശ്വനാഥൻ, സജി മച്ചിത്താനി, ബിജോയ് പ്ലാത്തോട്ടം, ഇരിട്ടി ബ്ലോക്ക് പഞ്ചായത്ത് അംഗം മേരി റെജി, കോൺഗ്രസ് ഇരിട്ടി ബ്ലോക്ക് പ്രസിഡന്‍റ് പി.എ. നസീർ, അയ്യൻകുന്ന് മണ്ഡലം കോൺഗ്രസ് പ്രസിഡന്‍റ് ജയിൻസ് ടി. മാത്യു, തോമസ് വലിയത്തൊട്ടി, എം.കെ. വിനോദ്, ബിജുനത്ത് കുറുപ്പൻപറമ്പിൽ എന്നിവരും ഒപ്പം ഉണ്ടായിരുന്നു. ഫയർ ഫോഴ്‌സ് പരിശോധന നടത്തി ഇരിട്ടി: ബാരാപോൾ കനാലിൽ ഗർത്തം രൂപപെട്ടതിനെ തുടർന്ന് ഇരിട്ടി അഗ്നി രക്ഷാനിലയം ഓഫീസർ ടി.വി. ഉണ്ണികൃഷ്ണന്‍റെ നേതൃത്വത്തിൽ പരിശാധന നടത്തി. അസി. സ്റ്റേഷൻ ഓഫീസർ എൻ.ജി. അശോകൻ ഫയർ ആൻഡ് സേയ്ഫ്റ്റി ഓഫിസർമാരായ ബിനോയി രാഹുൽ , സിവിൽ ഡിഫൻസ് അംഗം വിനീത് കുമാർ എന്നിവരും ഒപ്പമുണ്ടായിരുന്നു .

കെജിഒയു പ്രതിഷേധ പ്രകടനം നടത്തി

കണ്ണൂർ: ഒരു വർഷമായിട്ടും സർക്കാർ ജീവനക്കാരുടെ ശന്പള പരിഷ്കരണത്തിന് നടപടിയെടുക്കാത്ത സർക്കാർ നിലപാടിൽ പ്രതിഷേധിച്ച് കെജിഒയു കണ്ണൂർ ജില്ലാ കമ്മിറ്റിയുടെ നേതൃത്വത്തിൽ കണ്ണൂർ കളക്ടറേറ്റിനു പ്രതിഷേധ പ്രകടനം നടത്തി. സംസ്ഥാന ജനറൽ സെക്രട്ടറി ബി. ഗോപകുമാർ ഉദ്ഘാടനം ചെയ്തു. ജില്ലാ പ്രസിഡന്‍റ് കെ.പി ഗിരീഷ് കുമാർ അധ്യക്ഷത വഹിച്ചു. സംസ്ഥാന സെക്രട്ടറി സി. ഉണ്ണികൃഷ്ണൻ, ജില്ലാ സെക്രട്ടറി പ്രഫ. മുഹമ്മദ് അനീസ്, കെ.കെ രാജേഷ് ഖന്ന, ടി.ഷജിൽ, ഷിജിൻ മാണിയത്ത്, കെ.എം.ഷാഹുൽ ഹമീദ്, ബിന്ദു ചെറുവാട്ടിൽ എന്നിവർ പ്രസംഗിച്ചു. പി.സി സാബു,കെ.വി.ജയേഷ്, സി.അജിത്ത് കുമാർ, കെ.ശ്രീകാന്ത് എന്നിവർ നേതൃത്വം നൽകി.

ഉളിക്കൽ സിഎച്ച്സിക്ക് വീൽ ചെയർ നൽകി

ഉളിക്കൽ: ഉളിക്കൽ സിറ്റി ലയൺസ് ക്ലബി ഇരിട്ടി, ഉളിക്കൽ ജനമൈത്രി പോലീസ് എന്നിവയുടെ നേതൃത്വത്തിൽ ഉളിക്കൽ സിഎച്ച്സിക്ക് നൽകുന്ന വീൽ ചെയർ ഉളിക്കൽ പോലീസ് സ്റ്റേഷൻ എസ്എച്ച്‌ഒ വി.എം.ഡോളി, മെഡിക്കൽ ഓഫീസർ ഡോ. ടിൻസി ബിനിവിയ്ക്ക് കൈമാറി ഉദ്ഘാടനം ചെയ്തു. ജില്ലാ പോലീസ് മേധാവി അട്ടറഞ്ഞി സങ്കേത്തിൽ നടത്തിയ അദാലത്തിൽ സിഎച്ച്സിയിൽ വീൽ ചെയർ ഇല്ലെന്ന കാര്യം ശ്രദ്ധയിൽപ്പെടുത്തിയിരുന്നു. ഇതേ തുടർന്നാണ് ലയൺസ് ക്ലബ് വീൽചെയർ നൽകിയത്. സിറ്റി ലയൺസ് ക്ലബ് പ്രസിഡന്‍റ് എൻ.കെ. ബിജുമോൻ, ഷിനോ മാത്യു, നിധീഷ് ജോസഫ്, ടി.എസ്. സജുനൻ അഖിൽ മാത്യു , വിജേഷ് ദിവാകരൻ, ആന്‍റണി മുലേപ്ലാക്കൽ, ബെന്നി പാലക്കൽ, എസ്ഐ ഇ.കെ. സുനിൽകുമാർ, എഎസ്ഐ ഇ.പി. ബിജു എന്നിവർ പ്രസംഗിച്ചു.

വിദ്യാർഥികളെ അനുമോദിച്ചു

കണ്ണൂർ: ഉർസുലൈൻ സീനിയർ സെക്കൻഡറി സ്കൂളിൽ ഉന്നത വിജയം കൈവരിച്ച വിദ്യാർഥികൾക്കായി അനുമോദന ചടങ്ങ് നടത്തി. 2024 അക്കാഡമിക്ക് ഇയറിൽ മികച്ച വിജയം കൈവരിച്ച വിദ്യാർഥിനികളെയും സബ്ജക്‌ട് അടിസ്ഥാനത്തിൽ മികവു തെളിയിച്ച അധ്യാപകരെയും അനുമോദിക്കുകയും ആദരിക്കുകയും ചെയ്തു. കണ്ണൂർ-കാസർഗോഡ് ക്രൈംബ്രാഞ്ച് എസ്പി ബാലകൃഷ്ണൻ നായർ ഉദ്ഘാടനം നിർവഹിച്ച് സ്വർണമെഡൽ, മൊമെന്‍റോ, സർട്ടിഫിക്കറ്റ് എന്നിവ വിതരണം ചെയ്തു. പിടിഎ പ്രസിഡന്‍റ് ഷാജി പടിഞ്ഞാറെക്കണ്ടി അധ്യക്ഷത വഹിച്ചു. സ്കൂൾ പ്രിൻസിപ്പൽ സിസ്റ്റർ അർച്ചന പോൾ, അധ്യാപിക വന്ദന, എം.കെ. ഷീബ എന്നിവർ പ്രസംഗിച്ചു.

ഇ -സൈക്കിള്‍ കാര്‍ബണ്‍ ന്യൂട്രല്‍ കേരളത്തിലേക്കുള്ള ആദ്യ ചുവടുവയ്പ്: മന്ത്രി രാജേഷ്

കണ്ണൂർ: ഇ- സൈക്കിള്‍ കാര്‍ബണ്‍ ന്യൂട്രല്‍ കേരളത്തിലേക്കുള്ള ആദ്യ ചുവടുവയ്പാണെന്ന് മന്ത്രി എം.ബി. രാജേഷ്. തദ്ദേശ സ്വയംഭരണ ഊര്‍ജ വകുപ്പുകളും കേന്ദ്ര ഗ്രാമവികസന മന്ത്രാലയവും സംയുക്തമായി ജില്ലയില്‍ വിതരണം ചെയ്യുന്ന ഇലക്ട്രിക് സൈക്കിളുകളുടെ ജില്ലാതല ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. ഈ പദ്ധതിയിലൂടെ സ്ത്രീകളുടെ ജീവിത നിലവാരത്തില്‍ കൂടുതല്‍ പുരോഗതി ഉണ്ടാകുമെന്നും മന്ത്രി കൂട്ടിച്ചേര്‍ത്തു. സംസ്ഥാനത്തെ മികച്ച എഡിഎസായി തെരഞ്ഞെടുക്കപ്പെട്ട മാട്ടറ എഡിഎസി നും മികച്ച ബഡ്‌സ് സ്‌കൂളായി തെരഞ്ഞെടുത്ത പഴശിരാജ ബഡ്‌സ് സ്‌കൂളിനുമുള്ള അവാര്‍ഡ് വിതരണവും മന്ത്രി നിര്‍വഹിച്ചു. മന്ത്രി കടന്നപ്പള്ളി രാമചന്ദ്രന്‍ അധ്യക്ഷത വഹിച്ചു. 2050 ഓടെ കാര്‍ബണ്‍ ന്യൂട്രല്‍ കേരളം സൃഷ്ടിക്കുക എന്ന ലക്ഷ്യത്തോടെയാണ് കുടുംബശ്രീ അംഗങ്ങള്‍ക്ക് ഇ സൈക്കിള്‍ വിതരണം ചെയ്തത്. കണ്ണൂര്‍ ജില്ലയിലെ 71 ഗ്രാമീണ സിഡിഎസുകളിലെ 350 വനിതകള്‍ക്കാണ് ഇ സൈക്കിളുകള്‍ നല്‍കുന്നത്. കാര്‍ബണ്‍ ന്യൂട്രല്‍ കേരളം പദ്ധതിയുടെ ആദ്യഘട്ടമായി കണ്ണൂര്‍, പാലക്കാട് ജില്ലകളിലാണ് കുടുംബശ്രീ അംഗങ്ങള്‍ക്ക് ഇ സൈക്കിളുകള്‍ നല്‍കുന്നത്. 40.000രൂപ വിലമതിക്കുന്ന ഈ സൈക്കിള്‍ 3000 ഗുണഭോക്തൃ വിഹിതം വാങ്ങിക്കൊണ്ടാണ് കുടുംബശ്രീ പ്രവര്‍ത്തകര്‍ക്ക് നല്കുന്നത്.

ഡോക്‌ടേഴ്സ് ദിനാചരണം

കൂത്തുപറന്പ്: നിർമലഗിരി കോളജ് ഓഫ് അഡ്വാൻസ് സ്റ്റഡീസിന്‍റെ നേതൃത്വത്തിൽ കൂത്തുപറമ്പ് തൊക്കിലങ്ങാടി ക്രിസ്തുരാജ ആശുപത്രിയിൽ ഡോക്‌ടേഴ്സ് ദിനാചരണം നടത്തി. ആശുപത്രി അഡ്മിനിസ്ട്രേറ്റർ സിസ്റ്റർ സിൻസി അധ്യക്ഷത വഹിച്ചു. കോളജ് എൻഎസ്എസ് യൂണിറ്റിന്‍റെ (യൂണിറ്റ് 35) നേതൃത്വത്തിൽ നടത്തിയ പരിപാടിയിൽ എൻഎസ്എസ് പ്രോഗ്രാം ഓഫീസർ ഫാ. ജിന്‍റോ പന്തലാനിക്കൽ, കോളജ് അസിസ്റ്റന്‍റ് പ്രിൻസിപ്പൽ ഡോ. ടെസി ജോർജ്, സ്റ്റുഡന്‍റ് ലീഡർ ദേവിക എന്നിവർ പ്രസംഗിച്ചു. തൊണ്ടിയിൽ : ദേശീയ ഡോക്ടേഴ്സ് ദിനത്തോടനുബന്ധിച്ച് പേരാവൂർ സെന്‍റ് ജോസഫ് ഹൈസ്കൂളിൽ നടന്ന ചടങ്ങിൽ താലൂക്ക് ഹോസ്പിറ്റൽ സൂപ്രണ്ട് ഡോ. എ.കെ. സഹീനയെ ആദരിച്ചു. സ്കൂൾ ഹെഡ്മാസ്റ്റർ സണ്ണി കെ. സെബാസ്റ്റ്യൻ അധ്യക്ഷത വഹിച്ചു. അധ്യാപകരായ ബൈജു വർഗീസ്, ജയേഷ് ജോർജ്, റിൻസി പി. കുര്യൻ, സിസ്റ്റർ. വിനയ എന്നിവർ പ്രസംഗിച്ചു. കേളകം: കഴിഞ്ഞ 50 വർഷക്കാലമായി ആതുര ചികിത്സാരംഗത്ത് സേവനം ചെയ്യുന്ന ഡോ. സി.ജെ. ഡാനിയലിനെ ഡോക്ടേഴ്സ് ദിനത്തിൽ കേളകം വൈസ്മെന്‍ ആദരിച്ചു. ഹോമിയോപ്പതിയിൽ ഡോക്ടറേറ്റ് നേടിയ കാലം മുതൽ കേളകത്തെ നൂറുകണക്കിന് രോഗികൾക്കും കുട്ടികൾക്കും ആശ്രയമാണ് ഡോ. സി.ജെ. ഡാനിയൽ. പ്രസിഡന്‍റ് ഷാജി ജോൺ, മുൻ ഡിസ്ട്രിക്ട് ഗവർണർ പി.വി. ജോസ്, ക്ലബ് അംഗങ്ങളായ എം.വി. മാത്യു, ബേബി മഞ്ഞുമ്മൽ, കെ.എസ്. ജോജി, കെ. ദിലീപ് കെ എന്നിവർ പ്രസംഗിച്ചു. കൊളക്കാട്: ഡോക്ടേഴ്സ് ദിനചാരണത്തിന്‍റെ ഭാഗമായി കാപ്പാട് സെന്‍റ് സെബാസ്റ്റ്യൻസ് സ്കൂളിലെ അധ്യാപകരും വിദ്യാർഥികളും ചേർന്ന് കണിച്ചാർ പ്രാഥമിക ആരോഗ്യ കേന്ദ്രത്തിലെത്തി മെഡിക്കൽ ഓഫീസർ ഡോ. പി. അതുലിനെ ആദരിച്ചു. സ്കൂൾ മുഖ്യാധ്യാപിക ജാൻസി തോമസ്, പിടിഎ പ്രസിഡന്‍റ് സന്തോഷ്‌ പെരേപ്പാടൻ, ജൂണിയർ ഹെൽത്ത്‌ ഇൻസ്‌പെക്ടർ എം.വി. നവീന, അധ്യാപകരായ പി.എ. ജെയ്സൺ, റീന ചെറിയാൻ, സിസ്റ്റർ പി.വി. ജയ, ഷൈനി ജോമി, വിദ്യാർഥി പ്രതിനിധികൾ എന്നിവർ പങ്കെടുത്തു.

കെഎസ്എസ്പിഎ ധർണ നടത്തി

ശ്രീകണ്ഠപുരം: കേരളത്തിലെ സർവീസ് പെൻഷൻകാരുടെ പെൻഷൻ പരിഷ്ക്കരണം അട്ടിമറിച്ചതിൽ പ്രതിഷേധിച്ച് കെഎസ്എസ്പിഎ ഇരിക്കൂർ നിയോജക മണ്ഡലം കമ്മിറ്റിയുടെ നേതൃത്വത്തിൽ ശ്രീകണ്ഠപുരം സബ്ട്രഷറിക്ക് മുമ്പിൽ കരിദിനാചരണവും ധർണയും നടത്തി. അസോസിയേഷൻ സംസ്ഥാന സെക്രട്ടേറിയറ്റ് അംഗം പി.പി. ചന്ദ്രാംഗദൻ ഉദ്ഘാടനം ചെയ്തു. വനിതകൾ അടക്കം നൂറ് കണക്കിന് പെൻഷൻകാർ പങ്കെടുത്ത പ്രകടനവും നടന്നു. കുടിശികയായ 18 ശതമാനം ക്ഷാമാശ്വാസം അനുവദിക്കുക, മെഡിസെപ്പ് പദ്ധതി കുറ്റമറ്റതാക്കുക തുടങ്ങിയ ആവശ്യങ്ങളും യോഗം ഉന്നയിച്ചു. നിയോജക മണ്ഡലം പ്രസിഡന്‍റ് ജോസഫ് സഖറിയാസ് അധ്യക്ഷത വഹിച്ചു. സംസ്ഥാന കൗൺസിൽ അംഗം പി.ടി. കുര്യാക്കോസ് മുഖ്യഭാഷണം നടത്തി. കെ.വി. പത്മനാഭൻ, കെ. ദിവാകരൻ, പി. ദിനേശൻ, കെ.സി. ജോൺ, എം.എം. ലീല, പി.സി. മറിയാമ്മ, ജോസ് അഗസ്റ്റിൻ, ഡോ. വി.എ. അഗസ്റ്റിൻ തുടങ്ങിയവർ പ്രസംഗിച്ചു. ആലക്കോട് സബ് ട്രഷറിക്ക് മുന്നിൽ നടന്നധർണ ജില്ലാ ജോയിന്‍റ് സെക്രട്ടറി എം.പി. കുഞ്ഞുമൊയ്‌തീൻ ഉദ്ഘാടനം ചെയ്തു.

ഡോക്‌ടേഴ്സ് ദിനാചരണം

ശ്രീകണ്ഠപുരം: ഡോക്‌ടേഴ്സ് ദിനാചരണത്തിന്‍റെ ഭാഗമായി ശ്രീകണ്ഠപുരം വൈസ്മെൻ ക്ലബിന്‍റെ ആഭിമുഖ്യത്തിൽ ഡോ. അഗസ്റ്റ്യൻ ജോർജിനെ ആദരിച്ചു. ക്ലബ് പ്രസിഡന്‍റ് ജോൺസൺ ടി. സഖറിയാസ് അധ്യക്ഷത വഹിച്ചു. റെജി നെല്ലൻകുഴി, ജോർജ് പി. അഗസ്റ്റിൻ, യു.കെ. ഭാനു, എ.വി. മനീഷ്, റെജി കാര്യാങ്കൽ, മാത്യു വർഗീസ്, വിപിൻ വിൻസെന്‍റ് എന്നിവർ പ്രസംഗിച്ചു. കരുവഞ്ചാൽ: കരുവഞ്ചാൽ വൈഎംസിഎയുടെയും വുമൺസ് ഫോറത്തിന്‍റേയും സംയുക്ത ആഭിമുഖ്യത്തിൽ കരുവഞ്ചാൽ സെന്‍റ് ജോസഫ്സ് ആശുപത്രിയിലെ 15 ഡോക്ടർമാരെ ആശുപത്രി അങ്കണത്തിൽ ആദരിച്ചു. ഹോസ്പിറ്റൽ ഡയറക്ടർ ഫാ. സാബു പുതുശരി, അഡ്മിനിസ്ട്രേറ്റർ ഫാ. അനീഷ് മണവത്ത്, ആലക്കോട് സബ് ഇൻസ്പെക്ടർ എൻ.ജെ. ജോസ് എന്നിവർ പ്രസംഗിച്ചു. വൈഎംസിഎ പ്രസിഡന്‍റ് പോൾ ജോർജ് മേച്ചേരിൽ ഡോക്‌ടേഴ്സ് ദിന സന്ദേശം നൽകി. ജോർജുകുട്ടി കുറ്റിയാനിക്കൽ, ഡോ. ജോസ് ചെറുക്കാവിൽ, സാബു ചാണക്കാട്ടിൽ, രാജു ചെരിയൻ കാലായിൽ, ബോബി നമ്പ്യാപറമ്പിൽ, ജയ്സൺ ഓണംകുളം, ലിജോ കളരിക്കൽ, വുമൺസ് ഫോറം പ്രസിഡന്‍റ് ഷാന്‍റി ഷൈജു, സെക്രട്ടറി അനു ജയ്സൺ എന്നിവർ നേതൃത്വം നൽകി. ചെറുപുഴ: ചെറുപുഴ സെന്‍റ് സെബാസ്റ്റ്യൻസ് ആശുപത്രിയിലെ ഡോക്ടർമാരെ മാനേജ്മെന്‍റിന്‍റേയും ജീവനക്കാരുടേയും നേതൃത്വത്തിൽ ആദരിച്ചു. ആശുപത്രി കവാടത്തിനു മുന്നിൽ പ്രത്യേകം സജ്ജമാക്കിയ വേദിയിലാണ് ആദരിക്കൽ ചടങ്ങ് നടന്നത്. യോഗത്തിൽ ആശുപത്രി അഡ്മിനിസ്ട്രേറ്റർ സിസ്റ്റർ തേജസ് മരിയ, അഡ്മിനിസ്ട്രേറ്റീവ് ഓഫീസർ അനൂപ് തോമസ് എന്നിവർ പ്രസംഗിച്ചു. സിസ്റ്റർ തേജസ് മരിയ ഡോക്ടർമാരെ പൂക്കൾ നൽകി സ്വീകരിച്ചു. തുടർന്ന് കേക്ക് മുറിച്ചു. സിസ്റ്റേഴ്സ്, ആശുപത്രി ജീവനക്കാർ തുടങ്ങിയവർ പങ്കെടുത്തു. ഡോ. ഗോപാൽ, ഡോ. ശിവരാജ്, ഡോ. വി.ജെ. അരുൺ, ഡോ. സുബിൻ ജോളി, ഡോ. അബി പോൾ, ഡോ. അഞ്ജലി, ഡോ. വിഷ്ണു എന്നിവരെയാണ് ആദരിച്ചത്. ചെറുപുഴ: നവജ്യോതി കോളജ് സോഷ്യൽ വർക്ക്‌, സൈക്കോളജി ഡിപ്പാർട്ട്മെന്‍റുകളുടെ നേതൃത്വത്തിൽ ഡോക്‌ടേഴ്സ് ഡേയോടനുബന്ധിച്ച് ചെറുപുഴ സെന്‍റ് സെബാസ്റ്റ്യൻസ് ഹോസ്പിറ്റൽ, പുളിങ്ങോം കുടുംബാരോഗ്യ കേന്ദ്രം എന്നിവിടങ്ങളിലെ ഡോക്ടർമാരെ പൊന്നാടയണിച്ച് ആദരിച്ചു. ചടങ്ങിൽ ഡിപ്പാർട്ട്മെന്‍റ് മേധാവി ഫാ. ബിനോയ്‌ വാഴയിൽ അധ്യക്ഷത വഹിച്ചു. ഡിപ്പാർട്ട്മെന്‍റ് പ്രതിനിധി ആൽബർട്ട് മാത്യു, സ്റ്റാഫ് കോ ഓഡിനേറ്റർസ് സിസ്റ്റർ ഷാരോൺ, ജെയ്മി ജോൺസൺ സ്റ്റുഡന്‍റ് കോ ഓർഡിനേറ്റർ പിജെ. തോമസ് എന്നിവർ പ്രസംഗിച്ചു. ജോസ്ഗിരി: ജോസ്ഗിരി സെന്‍റ് ജോസഫ് യുപി സ്കൂളിൽ പിടിഎ ജനറൽബോഡി യോഗവും ബോധവത്കരണ ക്ലാസും സംഘടിപ്പിച്ചു. യോഗത്തിൽ ഡോക്ടേഴ്സ് ഡേയോടനുബന്ധിച്ച് സ്കൂളിലെ പൂർവ വിദ്യാർഥിയായ ഡോ. അരുൺ ജോയിയെ ആദരിച്ചു. എഫക്റ്റീവ് പാരന്‍റിംഗ് എന്ന വിഷയത്തിൽ അദ്ദേഹം ക്ലാസ് നയിച്ചു. ലഹരിക്കെതിരെ ചെറുപുഴ പോലീസ് സ്റ്റേഷനിലെ സിവിൽ പോലീസ് ഓഫീസർ കെ.സി. രതീഷ് ബോധവത്കരണ ക്ലാസ് നയിച്ചു. പത്തായത്തംഗം ഷാന്‍റി കലാധരൻ ഉദ്ഘാടനം ചെയ്തു. ചടങ്ങിൽ പിടിഎ പ്രസിഡന്‍റ് തോമസ് തള്ളായിൽ അധ്യക്ഷത വഹിച്ചു. സ്കൂൾ മാനേജർ ഫാ. ജസ്റ്റിൻ മേപ്രത്ത് മുഖ്യപ്രഭാഷണം നടത്തി. മുഖ്യാധ്യാപിക ജിബി സെബാസ്റ്റ്യൻ, മദർ പിടിഎ പ്രസിഡന്‍റ് റെക്സി ബിജോയ്, സ്റ്റാഫ് സെക്രട്ടറി ജിനു സെബാസ്റ്റ്യൻ എന്നിവർ പ്രസംഗിച്ചു. പെരുമ്പടവ്: ഡോക്ടേഴ്സ് ദിനത്തിൽ പെരുമ്പടവിലെ ഡോ. സത്യശങ്കറിനെ കരിപ്പാൽ എസ് വിയുപി സ്കൂൾ സയൻസ് ക്ലബിന്‍റെ നേതൃത്വത്തിൽ ആദരിച്ചു. മുഖ്യാധ്യാപിക പി.പി. ബിന്ദു പൊന്നാടയണിയിച്ചു. സയൻസ് ക്ലബ് പ്രവർത്തകരായ വിദ്യാർഥികൾ ഉപഹാരം കൈമാറി. സ്റ്റാഫ് സെക്രട്ടറി വി.കെ. വിനീത, പിടിഎ പ്രസിഡന്‍റ് വി.സി. മൊയ്തു, വൈസ് പ്രസിഡന്‍റ് ഇ. ബിബിൻ, കെ.സി.സന്തോഷ്, കെ.കെ. സനൂപ്, പി.വി. സുജേഷ്, എൻ. കെ. ധനുരാജ്, കെ.കെ ജിതിൻ എന്നിവർ നേതൃത്വം നൽകി. കുടിയാന്മല: യംഗ് മൈൻഡ്സ് ഇന്‍റർനാഷണൽ (വൈഎംഐ) കുടിയാന്മല ക്ലബിന്‍റെ ആഭിമുഖ്യ ത്തിൽ സംഘടിപ്പിച്ച ഡോക്ടേഴ്സ് ദിനാചരണത്തിന്‍റെ ഭാഗമായി കുടിയാന്മലയിൻ മൂന്ന് പതിറ്റാണ്ടി ലേറെയായി ആതുര സേവന രംഗത്ത് ശ്രദ്ധേയനായ ഡോ. വി.സുരേഷ്, ഡോ. ലിവിംഗ്സ്റ്റൺ എന്നിവരെ ആദരിച്ചു. ക്ലബ് പ്രസിഡന്‍റ് പോൾ മഞ്ചപ്പിള്ളിൽ ഇരുവരേയും പൊന്നാടയണിയിച്ചു. ബിജു ഫ്രാൻസിസ്, ബേബി വട്ടക്കുന്നേൽ, സോജൻ ഇരുപ്പക്കാട്ട് എന്നിവർ പ്രസംഗിച്ചു. പയ്യാവൂർ: കേരള വ്യാപാരി വ്യവസായി ഏകോപന സമിതി (കെവിവിഇഎസ്) പയ്യാവൂർ യൂണിറ്റിന്‍റെ ആഭിമുഖ്യത്തിൽ ഡോക്ടേഴ്സ് ഡേ ആചരിച്ചു. പയ്യാവൂർ ടൗണിൽ ദീർഘകാലമായി ആതുര സേവന രംഗത്ത് പ്രവർത്തിച്ചുവരുന്ന ഡോ.എം.വി. ലക്ഷ്മണൻ, ഡോ. ഒ.വി.സനൽ, ഡോ. രാജഗോപാൽ, ഡോ. ദിനേശ്, ഡോ. ഡെൽസ് എന്നിവരെ അവരവരുടെ ക്ലിനിക്കുകളിലെത്തി ഷാൾ അണിയിച്ച് ആദരിച്ചു. ചടങ്ങിൽ കെവിവിഇഎസ് പയ്യാവൂർ യൂണിറ്റ് ഭാരവാഹികളും അംഗങ്ങളും പങ്കെടുത്തു.

അപകടാവസ്ഥയിലായ പാലങ്ങൾ പുനർനിർമിക്കണം: സജീവ് ജോസഫ് എംഎൽഎ

ശ്രീകണ്ഠപുരം: കാലവർഷം ശക്തമായതോടെ വട്ട്യാംതോട് പാലം, കണ്ടകശേരി പാലം, വണ്ണായിക്കടവ് പാലം തുടങ്ങിയവ അപകടാവസ്ഥയിലാണെന്നും ഇവ പുനർനിർമിക്കാനുള്ള നടപടി സ്വീകരിക്കണമെന്നും സജീവ് ജോസഫ് എംഎൽഎ ആവശ്യപ്പെട്ടു. നഗരസഭാ പൊതുമരാമത്ത് പ്രവൃത്തികളുടെ അവലോകന യോഗത്തിൽ സംസാരിക്കുകയായിരുന്നു അദ്ദേഹം. അതിശക്തമായ മഴയിൽ പാലത്തിന് മുകളിലൂടെ വെള്ളംകയറുകയും വാഹനങ്ങൾക്ക് പോകാൻ കഴിയാത്ത സാഹചര്യമുണ്ടാകുകയും ചെയ്തു. പാലത്തിന് മുകളിലൂടെ വെള്ളം കയറി പ്രദേശങ്ങൾ ഒറ്റപ്പെട്ട സ്ഥിതിയിലാണ്.ശ്രീകണ്ഠപുരം - ചെമ്പന്തൊട്ടി - നടുവിൽ, പെരുവമ്പറമ്പ് - കല്ലുവയൽ - നെല്ലിക്കാംപോയിൽ തുടങ്ങിയ റോഡുകളുടെ പ്രവൃത്തി പുരോഗമിക്കുന്നതായും ഡിസംബറിൽ നിർമാണം പൂർത്തീകരിക്കാൻ സാധിക്കുമെന്നും യോഗം വിലയിരുത്തി. നുച്യാട് - മണിക്കടവ് - കാഞ്ഞിരകൊല്ലി റോഡ് നിർമാണത്തിന് പുതിയ കരാറുകാരനെ തെരഞ്ഞെടുത്തതിനാൽ ഉടൻ പ്രവൃത്തി പുനരാരംഭിക്കും. കരുവഞ്ചാൽ - വായാട്ടുപറമ്പ് - പോത്തുകുണ്ട് - നടുവിൽ റോഡ് വീതി കൂട്ടി നവീകരിക്കാൻ എസ്റ്റിമേറ്റ് സമർപ്പിച്ചിട്ടുണ്ട്. കരുവഞ്ചാൽ പാലത്തിന്‍റെ നിർമാണം പുരോഗമിക്കുകയാണ്. ഗവ. യുപിഎസ് അരീക്കാമല സ്കൂൾ കെട്ടിട നിർമാണം അന്തിമ ഘട്ടത്തിലാണെന്നും ഗവ. എച്ച്എസ്എസ് കണിയഞ്ചാൽ സ്കൂളുകളുടെ കെട്ടിട നിർമാണം പുരോഗമിക്കുന്നു. ഗവ. എൽപിഎസ് പരിപ്പായി സ്കൂൾ കെട്ടിട നിർമാണത്തിന് ടെൻഡർ നടപടികൾ സ്വീകരിച്ചിട്ടുണ്ടെന്നും യോഗം വിലയിരുത്തി. ബജറ്റ് പ്രവൃത്തികളായ ചുണ്ടപ്പറമ്പ് - വെള്ളാട് -കരുവഞ്ചാൽ റോഡ്, ഉദയഗിരി - അരിവിളഞ്ഞ പൊയിൽ - ജോസ്ഗിരി റോഡ് തുടങ്ങിയവയ്ക്ക് ഭരണാനുമതി നൽകാനുള്ള നടപടി സ്വീകരിക്കണമെന്ന് എംഎൽഎ ആവശ്യപ്പെട്ടു. യോഗത്തിൽ നഗരസഭാധ്യക്ഷ ഡോ. കെ.വി. ഫിലോമിന, എക്സി. എൻജിനിയർ എം. സജിത്ത്, അസി. എക്സി. എൻജിയർമാരായ കെ. പ്രവീൺ, ആശീഷ് കുമാർ, പി. സജിത്ത്, കെ. ഉമാവതി എൻജിനിയർമാരായ എ.എ. ഉണ്ണി, എംസി. രാജൻ, ജി. സ്വപ്ന, എൻ.കെ. സേതുമാധവൻ തുടങ്ങിയവർ പങ്കെടുത്തു.

മംഗര സെന്‍റ് തോമസ് പള്ളി തിരുനാൾ

മംഗര: മംഗര സെന്‍റ് തോമസ് പള്ളി തിരുനാളിന് തുടക്കം കുറിച്ച് ഇടവക വികാരി ഫാ. റിജേഷ് ലൂയിസ് പുതിയവീട്ടിൽ കൊടിയേറ്റി. തുടർന്നു നടന്ന ദിവ്യബലി, നൊവേന എന്നിവയ്ക്ക് ഫാ. ഷാജു ആന്‍റണി തറമ്മൽ കാർമികത്വം വഹിച്ചു. ഇന്നു വൈകുന്നേരം 5.30ന് ജപമാല, ആറിന് ദിവ്യബലി, നൊവേന എന്നിവയ്ക്ക് ഫാ. ജോണി പുത്തൻവീട്ടിൽ കാർമികത്വം വഹിക്കും. സമാപന ദിനമായ നാളെ വൈകുന്നേരം 5.30ന് ജപമാല, ആറിന് ഫാ. മാർട്ടിൻ രായപ്പന്‍റെ കാർമികത്വത്തിൽ തിരുനാൾ ദിവ്യപൂജ. തുടർന്ന് നേർച്ച ഭക്ഷണം.

ലൈഫും, മാലിന്യ നിർമാർജനവും ആർദ്രവും; കണ്ണൂരിന് പ്രശംസ

കണ്ണൂർ: അതിദാരിദ്ര്യ നിർമാർജനത്തിനായുള്ള ജില്ലയുടെ മികവാർന്ന പ്രവർത്തനങ്ങളെ മേഖലാതലാ അവലോകന യോഗത്തിൽ പ്രസംസിച്ച് മുഖ്യമന്ത്രിയും ചീഫ് സെക്രട്ടറി ഡോ. എ ജയതിലകും. അതിദരിദ്ര വിഭാഗത്തിൽ ജില്ലയിൽ കണ്ടെത്തിയ 3973 കുടുംബങ്ങൾക്ക് ആവശ്യമായ ക്രമീകരണ ഏർപെടുത്തിയതാണ് പ്രശംസയ്ക്ക് വഴിവച്ചത്. അടിസ്ഥാന ജീവിത ആവശ്യങ്ങൾ ലഭിക്കാത്തവർക്ക് ഭക്ഷണ ലഭ്യത, ആരോഗ്യം, വരുമാനം, വാസസ്ഥലം എന്നിവ ഉറപ്പാക്കിയാണ് അതിദാരിദ്ര്യ ലഘൂകരണം സാധ്യമാക്കിയത്. ജില്ലയിൽ പാർപ്പിടം മാത്രം ആവശ്യമുള്ള 392 കുടുംബങ്ങളെയാണ് കണ്ടെത്തിയത്. മുഴുവൻ കുടുംബങ്ങൾക്കും പാർപ്പിടം ലഭ്യമാക്കിക്കഴിഞ്ഞു. വസ്തുവും വീടും ആവശ്യമുള്ള 121 കുടുംബങ്ങളെ കണ്ടെത്തി. ഇവർക്ക് വസ്തു ലഭ്യമാക്കുകയും പാർപ്പിടം ഒരുക്കി നല്കുകയും ചെയ്തു. പെട്ടിപ്പാലം, പുന്നോൽ, മാക്കൂട്ടം പ്രദേശങ്ങളിൽ കടൽക്ഷോഭം മൂലം വീടുകളിൽ വെള്ളം കയറുന്നത് തടയാൻ ഈ പ്രദേശങ്ങളിലെ പ്രവൃത്തികൾ തലശേരിയിലെ ഹോട്ട് സ്‌പോട്ട് ഏരിയയിൽ ഉൾപ്പെടു ത്തി എഡിബി സ്‌കീമിൽ ഫണ്ട് ലഭ്യമാക്കുന്നതിനുള്ള നടപടി സ്വീകരിക്കാമെന്ന് ജലവിഭവ വകുപ്പ് സെക്രട്ടറി അറിയിച്ചു. കണ്ണൂർ സ്പോർട്സ് സ്‌കൂൾ വികസനവുമായി ബന്ധപ്പെട്ട വിഷയത്തിൽ കണ്ണൂർ ടൗൺ സ്പോർട്സ് സ്‌കൂളിൽ തിരുവനന്തപുരം ജിവിരാജ സ്പോർട്സ് സ്‌കൂളിനൊപ്പമുള്ള വികസനമാണ് സർക്കാർ ലക്ഷ്യമിടുന്നതെന്ന് കായിക വകുപ്പ് സെക്രട്ടറി പറഞ്ഞു. അടിസ്ഥാന സൗകര്യ വികസനം ഉൾപ്പെ ടെയുള്ളവ നടപ്പാക്കുമെന്നും സെക്രട്ടറി പറഞ്ഞു. ആറളം ഫാം തൊഴിലാളികൾക്കുള്ള 11 കോടി ശമ്പള കുടിശിക സംബന്ധിച്ച് ധനകാര്യ വകുപ്പ് പരിശോധിച്ചു വരുന്നതായി പട്ടികജാതി-പട്ടികവർഗ വികസന വകുപ്പ് അറിയിച്ചു. പട്ടികജാതി വിഭാഗക്കാർക്കുള്ള ഭവന സമുച്ചയ നിർമാണവുമായി ബന്ധപ്പെട്ട് പട്ടികജാതി വികസന വകുപ്പിന്‍റെ ഉടമസ്ഥതയിലുള്ള ഏഴോം വില്ലേജിലെ 50 സെന്‍റ് ഭൂമിയുടെ ഉടമസ്ഥാവകാശം പട്ടികജാതി വികസന വകുപ്പിൽ നിലനിർത്തി പാട്ട വ്യവസ്ഥയിൽ ജില്ലാ പഞ്ചായത്തിന് വിട്ടു നല്കുന്നതിനുള്ള വിഷയത്തി ന്മേൽ നടപടി സ്വീകരിക്കുന്നതിനായി ജില്ലാ പഞ്ചായത്തിനോട് ആവശ്യപ്പെട്ടിട്ടുണ്ടെന്ന് തദ്ദേശ സ്വയംഭരണ വകുപ്പ് സെക്രട്ടറി അറിയിച്ചു. പയ്യന്നൂർ താലൂക്ക് പുളിങ്ങോം വില്ലേജിലെ കേരള കർണാടക അതിർത്തി തർക്കം പരിഹരിക്കുന്ന തിന് ഇരു സംസ്ഥാനങ്ങളും സംയുക്ത സർവേ നടത്താനുള്ള നടപടികൾ സ്വീകരിക്കുമെന്ന് റവന്യൂ വകുപ്പ് സെക്രട്ടറി അറിയിച്ചു. കല്യാട് അന്താരാഷ്ട്ര ആയുർവേദ സെന്‍ററിന്‍റെ 75 ശതമാനം പണികളാണ് പൂർത്തിയായത്. കാലതാ മസം ഒഴിവാക്കുന്നതിന്‍റെ ഭാഗമായി ഉപകരാറുകാരൻ പണി ഉടൻ ആരംഭിക്കുമെന്നും ആരോഗ്യവകുപ്പ് സെക്രട്ടറി അറിയിച്ചു. പരിയാരത്തെ കണ്ണൂർ മെഡിക്കൽ കോളജിൽ ട്രോമ കെയർ ഉൾപ്പെടെയുള്ള നിർമാണ പ്രവൃത്തി ധന വകുപ്പിന്‍റെ അനുമതി ലഭിച്ചാലുടൻ ആരംഭിക്കാനാകുമെന്നും സെക്രട്ടറി അറിയിച്ചു. ആശുപത്രിയുടെ വിവിധ അറ്റകുറ്റ പ്രവൃത്തികളുടെ 85 ശതമാനവും പൂർത്തീയായി. ശേഷിക്കുന്ന പ്രവൃത്തികൾ വേഗത്തിൽ പൂർത്തിയാക്കും. പരിയാരം മെഡിക്കൽ കോളജിൽ ജോലി ചെയ്തിരുന്ന ജീവനക്കാരെ സർക്കാർ സർവീസിലേക്ക് ഏറ്റെടുക്കുന്നതിന്‍റെ ഭാഗമായി 521 നഴ്സിംഗ് തസ്തികകൾ, 147 മെഡിക്കൽ തസ്തികകൾ, എൻഎം സി മാനദണ്ഡങ്ങൾ പാലിക്കുന്നതിനായി അധിക 100 തസ്തികകളും സൃഷ്ടിച്ചിട്ടുണ്ട്. മന്ത്രിമാരായ കടന്നപ്പള്ളി രാമചന്ദ്രൻ, കെ. കൃഷ്ണൻ കുട്ടി, എം.ബി. രാജേഷ്, പി.എ. മുഹമ്മദ് റിയാസ്, ഒ.ആർ. കേളു, അഡീഷണൽ ചീഫ് സെക്രട്ടറിമാർ, പ്രിൻസിപ്പൽ സെക്രട്ടറിമാർ, വിവിധ വകുപ്പ് സെക്രട്ടറിമാർ, കണ്ണൂർ, കോഴിക്കോട്, വയനാട്, കാസർഗോഡ് ജില്ലകളിലെ കളക്ടർമാർ, ജില്ലാതല ഉദ്യോഗസ്ഥർ തുടങ്ങിയവർ പങ്കെടുത്തു. 332 റോഡുകൾക്ക് സാങ്കേതികാനുമതി മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയിൽ കണ്ണൂർ ജില്ലയിലെ 447 റോഡുകളിൽ 332 റോഡുകൾക്ക് സാങ്കേതികാനുമതിയായി. 203 റോഡുകളുടെ പ്രവൃത്തിക്ക് കരാർ നല്കുകയും 133 റോഡുകളുടെ പ്രവൃത്തി ആരംഭിക്കുകയും ചെയ്തു. 30 ശതമാനം പ്രവൃത്തിയാണ് ആരംഭിച്ചത്. സ്‌കൂളുകളിൽ മഞ്ചാടി പദ്ധതി വ്യാപിപ്പിക്കും വിദ്യാകിരണം പദ്ധതിയുടെ ഭാഗമായി ജില്ലയിലെ 168 സ്‌കൂളുകളിലും മഞ്ചാടി പദ്ധതി ഈ വർഷം വ്യാപിപ്പിക്കുമെന്ന് വകുപ്പ് സെക്രട്ടറി അറിയിച്ചു. ശുചിത്വ വിദ്യാലയം ഹരിത വിദ്യാലയം പദ്ധതി വഴി നടപ്പാക്കുന്ന ജൈവമാലിന്യ സംസ്‌കരണ സംവിധാനം ജില്ലയിലെ 100 ശതമാനം സ്‌കൂളുകളും കൈവരിച്ചു. കിഫ്ബി പദ്ധതിവഴി ജില്ലയിലെ 60 ശതമാനം സ്‌കൂളുകളിൽ ഭൗതിക വികസനം പൂർത്തീകരിച്ചതായും സെക്രട്ടറി അറിയിച്ചു. ലൈഫിൽ സെപ്റ്റംബറോടെ 86 ശതമാനം വീടുകൾ ജില്ലയിൽ ലൈഫ് മിഷൻ പദ്ധതിയിലൂടെ ജൂലൈ മാസത്തിൽ 21,492 (84.72 ശതമാനം), ഓഗസ്റ്റിൽ 21,627 (85.25 ശതമാനം), സെപ്റ്റംബറിൽ 21,915(86.39 ശതമാനം) കൈവരിക്കാൻ സാധിക്കും. മാലിന്യമുക്ത നവകേരള കാമ്പയിനിൽ ഒന്നാമതായി കണ്ണൂർ മാലിന്യ മുക്ത നവകേരളം പദ്ധതിയിലെ 2025 മാർച്ച് വരെയുള്ള പ്രവർത്തനങ്ങളിൽ മാലിന്യ സംസ്‌കരണവുമായി ബന്ധപ്പെട്ട 27 ഓളം നൂതന ആശയങ്ങൾ സംസ്ഥാനത്ത് ആദ്യമായി നടപ്പിലാക്കിയ ജില്ലയാണ് കണ്ണൂർ. മാലിന്യമുക്തം നവകേരള കാമ്പയിൻ പൂർത്തീകരണത്തിൽ ഒന്നാം സ്ഥാനവും കണ്ണൂർ ജില്ലയ്ക്കാണ്. വാതിൽപടി ശേഖരണത്തിൽ 99 ശതമാനവും, യൂസർ ഫീ ശേഖരണത്തിൽ 95 ശതമാനവും നേട്ടം കൈവരിച്ചു. ആരോഗ്യമേഖലയിൽ മുന്നേറ്റം സമഗ്രാരോഗ്യ മുന്നേറ്റത്തിന്‍റെ പാതയിൽ കുതിക്കുകയാണ് കണ്ണൂർ. ആർദ്രം പദ്ധതിയിൽ ഉൾപ്പെടുത്തി കണ്ണൂർ ജില്ലയിൽ 82 കുടുംബാരോഗ്യകേന്ദ്രങ്ങളിൽ 53 എണ്ണത്തിന്‍റെ നവീകരണ പ്രവർത്തനങ്ങൾ പൂർത്തിയായി. ജൂലൈ മാസത്തിൽ 55 എണ്ണവും ഓഗസ്റ്റ് മാസത്തിൽ 56 എണ്ണവും പൂർത്തിയാവും. ബ്ലോക്ക് തല കുടുംബാരോഗ്യ കേന്ദ്രങ്ങളിൽ 14 സ്ഥാപനങ്ങളാണ് തെരഞ്ഞെടു ത്തിട്ടുള്ളത്.

കേരള എൻജിനിയറിംഗ്, ഫാർമസി എൻട്രൻസ് പരീക്ഷയിൽ കണ്ണൂർ, കാസർഗോഡ് ജില്ലകളിൽ മുന്നിലെത്തിയവർ

ഒന്നാമതെത്തി ജസ്‌വിൻ ജോയൽ ചെമ്പേരി: കീം പരീക്ഷയിൽ കണ്ണൂർ ജില്ലയിൽ ഒന്നാം റാങ്ക് കരസ്ഥമാക്കി ചെമ്പേരി സ്വദേശി ജസ്‌വിൻ ജോയൽ. ദേശീയ തലത്തിൽ ഐഐടിയുടെ ജെഇഇ മെയിൻ പരീക്ഷയിൽ 1517, ജെഇഇ അഡ്വാൻസ് പരീക്ഷയിൽ 1982 എന്നിങ്ങനെ റാങ്കുകൾ സ്വന്തമാക്കിയിരുന്നു. ജസ്‌വിൻ പത്താം ക്ലാസ് വരെ ശ്രീകണ്ഠപുരം മേരിഗിരി ഇംഗ്ലീഷ് മീഡിയം സീനിയർ സെക്കൻഡറി സ്കൂളിലും 11, 12 ക്ലാസുകളിൽ മാന്നാനം കെഇ സ്കൂളിലുമാണ് പഠനം നടത്തിയത്‌. പാലാ ബ്രില്യന്‍റ്സിലായിരുന്നു എൻട്രൻസ് പഠനം. ചെമ്പേരി ചെള്ളിക്കുന്നേൽ ജോയി-ടിജിമോൾ ദമ്പതികളുടെ മകനാണ് ജസ്വിൻ. ഐഐടിയിൽ കംപ്യൂട്ടർ സയൻസിൽ പഠനം തുടരുകയാണ് ലക്ഷ്യം. ബിഫാമിൽ മുഹമ്മദ് സമർ കൂത്തുപറന്പ്: കീം പരീക്ഷയിൽ ബിഫാമിൽ ജില്ലയിൽ ഒന്നാം സ്ഥാനവും സംസ്ഥാന തലത്തിൽ നാൽപത്തി രണ്ടാം റാങ്കും നേടി പെരളശേരി മുണ്ടാലൂർ ആമിനാസിൽ എൻ.പി. മുഹമ്മദ് സമർ. പത്താം ക്ലാസ് വരെ മമ്പറം ഹയർ സെക്കൻഡറി സ്കൂളിലായിരുന്നു പഠനം. ചാല ജിഎച്ച്എഎസ്എസിൽ നിന്ന് പ്ലസ്ടു വിജയിച്ചു. മലപ്പുറം കോട്ടക്കലിലെ യൂണിവേഴ്സൽ ഇൻസ്റ്റിറ്റ്യൂട്ടിലായിരുന്നു എൻട്രൻസ് പഠനം. എംബിബിഎസിനു ചേരണമെന്നായിരുന്നു ആഗ്രഹമെന്നും എന്നാൽ വേണ്ടത്ര റാങ്ക് ലഭിക്കാത്തതിൽ ബിഡിഎസിനു ചേരാനാണ് തീരുമാനമെന്നും മുഹമ്മദ് സമർ പറഞ്ഞു. എസ്. മൻസൂർ-എൻ.പി. ആമിന ദമ്പതികളുടെ മകനാണ്. റസീൻ, മാസിൻ, ആയിഷ, ആലിയ എന്നിവർ സഹോദരങ്ങളാണ്. ആദ്യ അവസരത്തില്‍ തന്നെ അരവിന്ദ് ഒന്നാമന്‍ കാഞ്ഞങ്ങാട്: കീം പരീക്ഷയില്‍ ആദ്യ പരിശ്രമത്തില്‍ തന്നെ ജില്ലയില്‍ ഒന്നാമനായി കാഞ്ഞങ്ങാട് ദുര്‍ഗ സ്‌കൂളിനു സമീപത്തെ എസ്.അരവിന്ദ്. 600ല്‍ 570 സ്‌കോര്‍ ചെയ്ത അരവിന്ദ് സംസ്ഥാനതലത്തില്‍ 54-ാം റാങ്ക് കരസ്ഥമാക്കി. ജെഇഇ പരീക്ഷയിലൂടെ താന്‍ സ്വപ്‌നം കണ്ടിരുന്ന മദ്രാസ് ഐഐടി പ്രവേശനം എന്ന നേട്ടം അരവിന്ദ് ഇതിനകം സ്വന്തമാക്കികഴിഞ്ഞു. നേവല്‍ ആര്‍ക്കിടെക്ചര്‍ ആന്‍ഡ് ഓഷ്യന്‍ എന്‍ജിനിയറിംഗ് കോഴ്‌സിനാണ് അഡ്മിഷന്‍ നേടിയിരിക്കുന്നത്. കാഞ്ഞങ്ങാട് കേന്ദ്രീയവിദ്യാലയത്തില്‍നിന്ന് പത്താംക്ലാസില്‍ 98 ശതമാനം മാര്‍ക്ക് നേടി. ദുര്‍ഗ സ്‌കൂളില്‍ ഇംഗ്ലീഷിന് 10 മാര്‍ക്ക് കുറഞ്ഞതുകൊണ്ട് പ്ലസ്ടുവിന് ഫുള്‍ മാര്‍ക്ക് നേട്ടം നഷ്ടമായി. പ്ലസ്ടു പഠനകാലത്തുതന്നെ ഓണ്‍ലൈന്‍ കോച്ചിംഗ് നടത്തിയിരുന്നു. പിന്നീട് ഒരു വര്‍ഷം പാലാ ബ്രില്യന്‍റ് അക്കാദമിയില്‍ കോച്ചിംഗ് നടത്തിയാണ് സ്വപ്‌നനേട്ടം കരസ്ഥമാക്കിയത്. എല്‍ഐസി ഡെവലപ്‌മെന്‍റ് ഓഫീസര്‍ കെ.ശിവരാമന്‍റേയും കാഞ്ഞങ്ങാട് ധനലക്ഷ്മി ബാങ്ക് ചീഫ് മാനേജര്‍ വി. സന്ധ്യയുടെയും മകനാണ്. ചേച്ചി അനഘ സിഎ പഠനം പൂര്‍ത്തിയാക്കി. ഒറ്റയ്ക്കു വഴിവെട്ടി വന്ന ഗൗരിശങ്കര്‍ പെരിയ: കോച്ചിംഗോ ട്യൂഷനോ ഒരുവര്‍ഷം നീണ്ടുനില്‍ക്കുന്ന തയാറെടുപ്പോ ഇല്ലാതെ കീം പരീക്ഷയില്‍ തിളക്കമാര്‍ന്ന നേട്ടം കൈവരിച്ച് പെരിയ നാലക്രയിലെ ആര്‍. പി.ഗൗരിശങ്കര്‍. തന്‍റെ ആദ്യ പരിശ്രമത്തില്‍ തന്നെ 600ല്‍ 460 സ്‌കോര്‍ ചെയ്ത് എസ്ടി വിഭാഗത്തില്‍ സംസ്ഥാനതലത്തില്‍ രണ്ടാംറാങ്കാണ് ഈ മിടുക്കന്‍ സ്വന്തമാക്കിയത്. പൊതുവിഭാഗത്തില്‍ 3457-ാം റാങ്ക് കരസ്ഥമാക്കി. ജെഇഇ പരീക്ഷ പാസായി കോഴിക്കോട് എന്‍ഐടിയില്‍ ഇലക്‌ട്രിക്കല്‍ എന്‍ജിനിയറിംഗില്‍ പ്രവേശനം കാത്തിരിക്കുകയാണ്. തളിപ്പറമ്പ് ചിന്മയ വിദ്യാലത്തില്‍ നിന്നാണ് സ്‌കൂള്‍ വിദ്യാഭ്യാസം പൂര്‍ത്തിയാക്കിയത്. പത്താംക്ലാസില്‍ 96.2 ശതമാനവും പ്ലസ്ടുവില്‍ 97.8 ശതമാനം മാര്‍ക്കും കരസ്ഥമാക്കിയിരുന്നു. പ്ലസ്ടുവിന് ഫിസിക്‌സിനും ബയോളജിക്കും മുഴുവന്‍ മാര്‍ക്കും കെമിസ്ട്രിയില്‍ 99 മാര്‍ക്കും നേടി. കണ്ണൂര്‍ ഗവ.എന്‍ജിനിയറിംഗ് കോളജിലെ മെക്കാനിക്കല്‍ എന്‍ജിനിയറിംഗ് വിഭാഗം അസി.പ്രഫസര്‍ ടി. രാജന്‍റെയും തളിപ്പറമ്പിലെ സഹകരണവകുപ്പ് ഓഡിറ്ററായ കെ. പാര്‍വതിയുടെയും ഏകമകനാണ്.

സർക്കാർ ആശുപത്രികൾ വെന്‍റിലേറ്ററിൽ: കെ.സി. വേണുഗോപാൽ

പരിയാരം (കണ്ണൂർ): ജനങ്ങൾക്ക് ചികിത്സ ഉറപ്പാക്കേണ്ട സർക്കാർ ആശുപത്രികൾ അതീവഗുരുതരാവസ്ഥയിൽ വെന്‍റിലേറ്ററിൽ കഴിയുകയാണെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ എംപി. സർക്കാർ ആശുപത്രികളോട് പിണറായി സർക്കാർ കാണിക്കുന്ന അവഗണനയും അനാസ്ഥയും അവസാനിപ്പിക്കണമെന്നാവശ്യപ്പെട്ട് കോൺഗ്രസ് നടത്തുന്ന സമരത്തിന്‍റെ സംസ്ഥാനതല ഉദ്ഘാടനം പരിയാരത്തെ കണ്ണൂർ ഗവ. മെഡിക്കൽ കോളജിന് മുന്നിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആശുപത്രികളിലെ പ്രശ്നത്തിന് കാരണം സിസ്റ്റത്തിന്‍റെ തകരാറാണെന്ന് പറയുന്ന മന്ത്രിക്ക് ആ സ്ഥാനത്ത് തുടരാൻ അർഹതയില്ല. സർക്കാർ ആശുപത്രികളിൽ ചികിത്സ തേടുന്നവരുടെ അവയവങ്ങൾ പോലും നഷ്ടപ്പെടുന്ന അവസ്ഥയാണ്. എല്ലാ കാര്യത്തിലും കേരളം നന്പർ വൺ എന്നു ആവർത്തിച്ചു പറയുന്ന മുഖ്യമന്ത്രി കുത്തഴിഞ്ഞതും ആളെ കൊല്ലികളുമായ സർക്കാർ ആശുപത്രികളാണോ നന്പർ വൺ എന്നു വ്യക്തമാക്കണം. വസ്തുനിഷ്ഠാപരമായ അന്വേഷണത്തിലൂടെ ആരോഗ്യ മേഖലയിലെ കാര്യങ്ങൾ പുറത്തുകൊണ്ടു വരുന്ന മാധ്യമങ്ങളുടെ പ്രവർത്തനം പ്രശംസനീയമാണ്.‌ വരാനിരിക്കുന്ന വലിയ സമരത്തിനാണ് കോൺഗ്രസ് തുടക്കം കുറിച്ചിരിക്കുന്നത്. എട്ടു മാസത്തിന് ശേഷം ഇതെല്ലാം നേരെയാക്കാൻ കഴിവുള്ളവർ വരുന്നുണ്ടെന്നും കെ.സി. വേണുഗോപാൽ പറഞ്ഞു. കെപിസിസി പ്രസിഡന്‍റ് സണ്ണി ജോസഫ് എംഎൽഎ അധ്യക്ഷത വഹിച്ചു. ഡിസിസി പ്രസിഡന്‍റ് മാർട്ടിൻ ജോർജ്, സജീവ് ജോസഫ് എംഎൽഎ, സോണി സെബാസ്റ്റ്യൻ, മുഹമ്മദ് ബ്ലാത്തൂർ, ഡോ.കെ.വി.ഫിലോമിന എന്നിവർ പ്രസംഗിച്ചു. കെപിസിസി, ഡിസിസി ഭാരവാഹികൾ പങ്കെടുത്തു.

ബാരാപോൾ കനാൽ തകർച്ച: വിദഗ്‌ധ സംഘത്തെ നിയോഗിക്കും: മന്ത്രി കൃഷ്ണൻകുട്ടി

കണ്ണൂർ: ബാരപോൾ ചെറുകിട ജലവൈദ്യുത പദ്ധതിയുടെ കനാൽ തകർച്ച പരിഹരിക്കുന്നതിന് വിദഗ്‌ധ സംഘത്തെ നിയോഗിക്കുമെന്നും ജനങ്ങളുടെ ജീവന് പ്രാധാന്യം നൽകിക്കൊണ്ട് അപകടരഹിത പദ്ധതിയാക്കി മാറ്റുമെന്നും വൈദ്യുതി മന്ത്രി കെ. കൃഷണൻകുട്ടി. കനാലിന്‍റെ തകർന്ന ഭാഗവും പദ്ധതി പ്രദേശവും കനാലിന്‍റെ ആരംഭവും കണ്ടു മനസിലാക്കിയ മന്ത്രി ജനങ്ങൾക്ക് ആശങ്കയില്ലാത്ത വിധം പദ്ധതിയെ മാറ്റാൻ വേണ്ട പ്രപ്പോസൽ സമർപ്പിക്കാൻ ഉദ്യോഗസ്‌ഥർക്ക് നിർദേശം നൽകി. രണ്ട് കിലോമീറ്ററോളം കനാൽകരയിലൂടെ നടന്ന് പരിശോധിച്ചു. നാല് കിലോമീറ്റർ കനാലിൽ 1.4 കിലോ മീറ്റർ ഭാഗമാണ് അപകടമേഖലയായി കണ്ടെത്തിയത്. അപകടങ്ങൾ പൂർണമായും ഒഴിവാ ക്കാൻ വേണ്ടത് ചെയ്യാനാണ് പദ്ധതി പ്രദേശം സന്ദർശിച്ചതെന്ന് മന്ത്രി പറഞ്ഞു. അപകടാവസ്ഥയിലുള്ള 1.4 കിലോ മീറ്റർ കനാലിന് പകരം പൈപ്പ് വഴി ജലം എത്തിക്കാനുള്ള ശ്രമം ആലോചിച്ചു കൂടെയെന്ന് മന്ത്രി ഉദ്യേഗസ്ഥരോട് ആരാഞ്ഞു. എല്ലാ കാര്യവും വിശദമായി പരിശോ ധിച്ച് വൈദ്യുതി ബോർഡിന് അമിത ചെലവ് വരാത്തതും കൂടുതൽ സുരക്ഷിതത്വം ഉറപ്പാക്കുന്ന തുമായ പദ്ധതികൾ തയാറാക്കാൻ മന്ത്രി ഉദ്യോഗസ്ഥർക്ക് നിർദേശം നൽകി. കനാലിന്‍റെ ചോർച്ച കാരണം അപകടാവസ്ഥയിൽ ആയ കുറ്റിയാനിക്കൽ ബിനോയിയുടെ വീട്ടിലും മന്ത്രി സന്ദർശിച്ചു. രണ്ടുവർഷമായി ബിനോയിയുടെ കുടുംബത്തെ ഇവിടെനിന്നും മാറ്റിപാർപ്പിച്ചിരിക്കുകയാണ് . കെഎസ്ഇബി കോഴിക്കോട് ജനറേഷൻ വിഭാഗം എക്സിക്യൂട്ടീവ് എൻജിനിയർ കെ.എം. സലീന, ബാരാപോൾ അസിസ്റ്റന്‍റ് എൻജിനീയർ പി.എസ്. യദുലാൽ, സിവിൽ വിഭാഗം (പഴശി) എക്സിക്യൂട്ടീവ് എൻജിനിയർ കെ.സി. അനിൽകുമാർ, അസിസ്റ്റന്‍റ് എക്‌സിക്യുട്ടീവ് എൻജിനിയർ എം.കെ. അജിത്ത്, അസിസ്റ്റന്‍റ് എൻജിനീയർമാരായ ടി.പി. മനോജ്, എം. കിഷോർ, തുഷാര, എം.സി. ബിന്ദു, സബ് എൻജിനിയർ എം.ടി. സനൂപ്‌ദാസ്, അയ്യൻകുന്ന് പഞ്ചായത്ത് സ്ഥിരം സമിതി അധ്യക്ഷൻ ഐസക് ജോസഫ്, അംഗങ്ങളായ ബിജോയി പ്ലാത്തോട്ടം, സജി മച്ചിത്താനി, ഷൈനി വർഗീസ്, സെലീന ബിനോയി എന്നിവർ ഒപ്പമുണ്ടായിരുന്നു.

കത്തോലിക്ക കോൺഗ്രസ് ഡോക്ടർമാരെ ആദരിച്ചു

പയ്യാവൂർ: ഡോക്ടേഴ്സ് ദിനാചരണത്തിന്‍റെ ഭാഗമായി കണ്ണൂർ- കാസർഗോഡ് ജില്ലകളിൽ ആതുര സേവന രംഗത്ത് പ്രവർത്തിക്കുന്ന ജനകീയ ഡോക്ടർമാരെ കത്തോലിക്കാ കോൺഗ്രസ് തലശേരി അതിരൂപത കമ്മിറ്റിയുടെ ആഭിമുഖ്യത്തിൽ വിവിധ മേഖലകളിലെ ഭാരവാഹികൾ ആദരിച്ചു. ചെമ്പേരി മേഖലയിൽ അതിരൂപത ജനറൽ സെക്രട്ടറി ജിമ്മി ആയിത്തമറ്റം, ഗ്ലോബൽ യൂത്ത് കോ ഓർഡിനേറ്റർ സിജോ കണ്ണേഴത്ത്, ഫൊറോന പ്രസിഡന്‍റ് ബിജു മണ്ഡപത്തിൽ എന്നിവരും ചെമ്പന്തൊട്ടി മേഖലയിൽ അതിരൂപത ട്രഷറർ സുരേഷ് കാഞ്ഞിരത്തിങ്കൽ, ഫൊറോനാ പ്രസിഡന്‍റ് ജോസഫ് മാത്യു കൈതമറ്റം എന്നിവരും നെല്ലിക്കാംപൊയിൽ മേഖലയിൽ ഫൊറോന പ്രസിഡന്‍റ് തോമസ് വർഗീസ് വരമ്പുങ്കലും പൈസക്കരി മേഖലയിൽ രൂപത സെക്രട്ടറി വർഗീസ് പള്ളിച്ചറ, ഫൊറോന സെക്രട്ടറി വിൽസൺ കന്നുകെട്ടിയിൽ എന്നിവരും തളിപ്പറമ്പ് മേഖലയിൽ ഫൊറോന ട്രഷറർ സജീവ് മുക്കാട്ടുകുന്നേലും തോമാപുരം മേഖലയിൽ രൂപത സെക്രട്ടറി ജോസഫ് കൊച്ചുകുന്നത്ത്പറമ്പിൽ, രൂപത എക്സിക്യൂട്ടീവ് മെംബർ ആന്‍റോ തെരുവംകുന്നേൽ എന്നിവരും ചെറുപുഴ മേഖലയിൽ ഫൊറോന പ്രസിഡന്‍റ് സാജു പുത്തൻപുരയ്ക്കൽ, രൂപത യൂത്ത് കോ ഓർഡിനേറ്റർ ഷിന്‍റോ കയ്പനാനി എന്നിവരും തേർത്തല്ലി മേഖലയിൽ രൂപത സെക്രട്ടറി ജയിംസ് പേരുക്കുന്നേലും ഡോക്ടർമാരെ ആദരിച്ചു.

ലങ്കാഡി ചാമ്പ്യൻഷിപ്പിന് ഒമ്പതംഗ മലയാളിപ്പട

പേരാവൂർ: നേപ്പാളിൽ നാലു മുതൽ ഒന്പതു വരെ നടക്കുന്ന ഇന്‍റർനാഷണൽ ലങ്കാഡി ചാമ്പ്യൻഷിപ്പിൽ ഇന്ത്യയെ പ്രതിനിധീ കരിക്കുന്ന കേരള ടീം പുറപ്പെട്ടു. ആറ് പെൺകുട്ടികളും മൂന്ന് ആൺകുട്ടികളും ഉൾപ്പെടെ ഒന്പതു പേരാണ് കേരളത്തിൽ നിന്ന് പങ്കെടുക്കുന്നത്. ടീമംഗങ്ങൾ: എം. അമയ, തനയദാസ്, നിയ റോസ് ബിജു, ദിയ ആൻ ഡെന്നി, കാതറിൻ ബിജു, എഡ്‌വിൻ ജോസ് റോബിൻ (പേരാവൂർ സെന്‍റ് ജോസഫ് ഹൈസ്കൂൾ) പി. പാർത്ഥിപ്, അമർനാഥ് അനീഷ്‌ (തൊണ്ടിയിൽ സെന്‍റ് ജോൺസ് യുപി സ്കൂൾ) ചൈതന്യാ വിനോദ് (മണത്തണ ഗവ. ഹയർ സെക്കൻഡറി സ്കൂൾ) . കേരള ലങ്കാഡി അസോസിയേഷൻ സെക്രട്ടറിയും ഇന്ത്യൻ വുമൺ ടീം കോച്ചുമായ രജില സെൽവകുമാർ, തങ്കച്ചൻ കോക്കാട്ട് എന്നിവർ ടീമിനെ അനുഗമിക്കും. സംസ്ഥാന ജോയിന്‍റ് സെക്രട്ടറി മുഹമ്മദ് ഷെരീഫ്, പാലക്കാട് ജില്ലാ സെക്രട്ടറി എസ്.എസ്. സുനിൽ എന്നിവർ കുട്ടികളെ യാത്രയാക്കാൻ തൃശൂർ റെയിൽവേ സ്റ്റേഷനിൽ എത്തിയിരുന്നു.

ബികോം ലോജിസ്റ്റിക്സിലെ മുഴുവൻ വിദ്യാർഥികൾക്കും പ്ലേസ്മെന്‍റ് ഓഫർ

പയ്യാവൂർ: പൈസക്കരി ദേവമാതാ ആർട്സ് ആൻഡ് സയൻസ് കോളജിലെ ബികോം ലോജിസ്റ്റിക്‌സ് ആദ്യ ബാച്ചിന്‍റെ കോഴ്‌സ് പൂർത്തിയാകുന്നതിന് മുമ്പേ മുഴുവൻ വിദ്യാർഥികൾക്കും ജോലിക്കുള്ള ഓഫർ ലഭിച്ചത് കോളജിന് അഭിമാനനേട്ടമായി. കണ്ണൂർ യൂണിവേഴ്‌സിറ്റിയിൽ ആദ്യമായി 2023 ലാണ് ബികോം ലോജിസ്റ്റിക്സ് കോഴ്‌സ് പൈസക്കരി ദേവമാതാ കോളജിൽ ആരംഭിക്കുന്നത്. കൊച്ചിയിലും മംഗളൂരുവിലും ഗൾഫ് രാജ്യങ്ങളിലുമായി പ്രവർത്തിക്കുന്ന ജാക് വെയ്‌സ്‌ ലോജിസ്റ്റിക്‌സ് എന്ന മൾട്ടി നാഷണൽ കമ്പനിയാണ് ഇന്‍റേൺഷിപ്പിനുശേഷം ജോലി ഓഫർ ചെയ്തിരിക്കുന്നത്. കഴിഞ്ഞദിവസം കോളജിൽ നടന്ന ലോജിസ്റ്റിക് വർക്ക്ഷോപ്പിനെ തുടർന്ന് കമ്പനിയുടെ ഡയറക്‌ടർ ജോജോ തോമസ് കോളജ് പ്രിൻസിപ്പൽ മുഖേനയാണ് ഓഫർ നൽകിയത്. ഇതിൽ കോളജിന് വളരെ സന്തോഷമുണ്ടെന്നും ഇതേസമയത്ത് തന്നെ ആരംഭിച്ച മറ്റൊരു ന്യൂജനറേഷൻ കോഴ്സായ ബിബിഎ ഹോസ്‌പിറ്റൽ അഡ്‌മിനിസ്ട്രേഷൻ കോഴ്സിലെയും മുഴുവൻ വിദ്യാർഥികൾക്കും അവരുടെ ഇന്‍റേൺഷിപ്പിനുശേഷം പ്ലേസ്മെന്‍റ് ലഭ്യമാക്കുന്നതിനുള്ള ശ്രമത്തിലാണെന്നും കോളജ് പ്രിൻസിപ്പൽ ഡോ. എം.ജെ. മാത്യു അറിയിച്ചു. ആദ്യ ബാച്ചിനു തന്നെ നൂറുശതമാനം പ്ലേസ്മെന്‍റ് എന്നത് അപൂർവമാണെന്നും ഈ നേട്ടം കൈവരിച്ച മുഴുവൻ വിദ്യാർഥികളെയും അധ്യാപകരെയും അഭിനന്ദിക്കുന്നതായും കോളജ് മാനേജർ ഫാ. നോബിൾ ഓണംകുളം പറഞ്ഞു.

നാലു വർഷ ബിരുദത്തിലെ തലതിരിഞ്ഞ ഉത്തരവുകൾ വിദ്യാർഥികളുടെ ഭാവി തുലയ്ക്കും: കെപിസിടിഎ

കണ്ണൂർ: നാലു വർഷ ബിരുദ പ്രോഗ്രാമിലെ മൈനർ വിഷയങ്ങൾ തെരഞ്ഞെടുക്കുന്നതിനായി ഉന്നത വിദ്യാഭ്യാസ വകുപ്പും കണ്ണൂർ യൂണിവേഴ്സിറ്റിയും ഇറക്കിയ തെറ്റായ ഉത്തരവുകൾ വിദ്യാർഥികളുടെ ഭാവി തുലയ്ക്കുകയാണെന്ന് കേരള പ്രൈവറ്റ് കോളജ് ടീച്ചേഴ്സ് അസോസിയേഷൻ (കെപിസിടിഎ) മേഖലാ കമ്മിറ്റി യോഗം. തെറ്റായ ഉത്തരവുകൾ റദ്ദാക്കി വിദ്യാർഥികളുടെ ഭാവി സുരക്ഷിതമാക്കാൻ വൈസ്ചാൻസലർ ഇടപെടണമെന്ന് കെപിസിടിഎ ആവശ്യപ്പെട്ടു. ഉന്നത വിദ്യാഭ്യാസ വകുപ്പ് 22/6/2024 ന് നൽകിയ ഉത്തരവ് പ്രകാരം നാലു വർഷ ബിരുദ പ്രോഗ്രാമിൽ മൈനർ വിഷയങ്ങൾ തെരഞ്ഞെടുക്കുന്നതിന്‍റെ ബുദ്ധിമുട്ടുകൾ പരിഹരിക്കാൻ നൽകിയ നിർദേശങ്ങളിൽ മറ്റു ഡിസിപ്ലിനുകളിലെ പഠന ബോർഡുകൾ തയാറാക്കിയ കോഴ്സുകൾ യോഗ്യതയുള്ള അധ്യാപകരുണ്ടെങ്കിൽ അതാത് വകുപ്പുകൾക്ക് പഠിപ്പിക്കാൻ അനുവാദം നൽകുമെന്നറിയിച്ചിരുന്നു. ഇതു പ്രകാരം പഠനം നടത്തി വന്ന വിദ്യാർഥികളെ വെട്ടിലാക്കുന്ന ഉത്തരവാണ് കണ്ണൂർ യൂണിവേഴ്സിറ്റി ജൂൺ 26ന് പുറപ്പെടുവിച്ചത്. ഈ ഉത്തരവ് പ്രകാരം കഴിഞ്ഞ രണ്ടു സെമസ്റ്ററുകളിലും സ്വന്തം ഡിപ്പാർട്ട്മെന്‍റിന് പുറത്തുള്ള വിഷയങ്ങളേ പഠിക്കാൻ പാടുള്ളൂ എന്നാണ് പറയുന്നത്. ഇതോടെ കഴിഞ്ഞ വർഷം മൈനർ വിഷയങ്ങൾ സ്വന്തം ഡിപ്പാർട്ട്മെന്‍റിൽ നിന്ന് തെരഞ്ഞെടുത്ത വിദ്യാർഥികൾ പ്രതിസന്ധിയിലായിരിക്കുകയാണെന്ന് കെപിസിടിഎ മേഖലാ കമ്മിറ്റി ചൂണ്ടിക്കാട്ടി. സർവകലാശാലയുടെ ഉത്തരവിനെ തുടർന്ന് വിദ്യാർഥികൾ തങ്ങളുടെ പ്രതിഷേധം അധ്യാപകരുടെ നേർക്ക് തിരിയുകയാണ്. വിദ്യാർഥികൾക്ക് ആശങ്കയില്ലാതെ ഈ പ്രശ്നം പരിഹരിക്കാൻ വൈസ് ചാൻസലർ അടിയന്തരമായി ഇടപെടണമെന്ന് കെപിസിടിഎമേഖല കമ്മിറ്റി ആവശ്യപ്പെട്ടു. പ്രസിഡന്‍റ് ജോൺസൺ ജോർജ്, ഭാരവാഹികളായ ഡോ. വി.പ്രകാശ്, ഡോ.ആർ. ബിജുമോൻ എന്നിവർ പ്രസംഗിച്ചു.

ഉദ്യോഗസ്ഥർക്ക് സമയബന്ധിതമായി തീരുമാനമെടുക്കാൻ കഴിയണം: മുഖ്യമന്ത്രി

കണ്ണൂർ: ഏതു കാര്യത്തിലും സമയബന്ധിതമായി തീരുമാനം എടുക്കാൻ കഴിയണം എന്നതിൽ ഉദ്യോഗസ്ഥർ ശ്രദ്ധ ചെലുത്തണമെന്ന് മുഖ്യമന്ത്രി പിണറായി വിജയൻ. കണ്ണൂർ കൃഷ്ണമോനോൻ സ്മാരക വനിതാ കോളജിൽ മന്ത്രിമാരും ഉന്നത ഉദ്യോഗസ്ഥരും പങ്കെടുത്ത കണ്ണൂർ, കാസർഗോഡ്, കോഴിക്കോട്, വയനാട് ജില്ലകളുടെ മേഖലാതല അവലോകന യോഗത്തിൽ സംസാരിക്കുകയായിരുന്നു മുഖ്യമന്ത്രി. നമ്മുടെ തലത്തിൽ എടുക്കാൻ കഴിയുന്ന തീരുമാനം മറ്റേതെങ്കിലും തലത്തിലേക്ക് തട്ടിവിടുന്നത് സാധാരണ രീതിയല്ല. തീരുമാനം അതത് തലത്തിൽ എടുത്തു പോകണം. ആ തീരുമാനം സർക്കാരിന് വേണ്ടിയുള്ളതാണ്. നിലവിലുള്ള നിയമവും ചട്ടവും പ്രകാരം എടുക്കുന്ന തീരുമാനമാണ്. അത്തരം നിലപാടുകൾക്ക് സർക്കാരിന്‍റെ കൃത്യമായ പരിരക്ഷയുണ്ടാകുമെന്നും ആരും അതിൽ ശങ്കിച്ചു നിൽക്കാൻ പാടില്ലെന്നും മുഖ്യമന്ത്രി നിർദേശിച്ചു. തൊള്ളായിരത്തോളം സേവനങ്ങൾ ഓൺലൈനാക്കിയിട്ടുണ്ട്. ഇത് കാര്യങ്ങൾ വേഗത്തിലാക്കുന്നുണ്ട്. താലൂക്ക്തല അദാലത്തിൽ പല കാര്യങ്ങളിലും തീരുമാനം ഉണ്ടായിട്ടുണ്ട്. വിവിധ തലത്തിൽ ജനങ്ങളുമായുള്ള സംവേദനം ഇതിനകം സർക്കാർ നടത്തിക്കഴിഞ്ഞു. നവകേരള സദസ് അതിന്‍റെ ഭാഗമായിരുന്നു. വേഗതയിൽ കാര്യങ്ങൾ നിർവഹിക്കുന്പോൾ ചിലർ തെറ്റായ രീതിയിൽ ചിത്രീകരിക്കും. അത്തരം ചിത്രീകരണങ്ങൾ വന്നോട്ടെ. പക്ഷേ നല്ല ദിശാബോധത്തോടെയാണ് സർക്കാർ നീങ്ങുന്നത്. ഓരോ മേഖലയിലും കാര്യങ്ങൾ നിർവഹിക്കുന്നതിലൂടെ മാറ്റങ്ങളുണ്ടാക്കാൻ കഴിഞ്ഞിട്ടുണ്ട്. നാടിന്‍റെ പൊതുവായ കാര്യങ്ങൾക്ക് മുൻഗണന കൊടുത്തുകൊണ്ട് തീരുമാനങ്ങൾ എടുത്തുപോകാൻ ഉദ്യോഗസ്ഥരും ജീവനക്കാരും ശ്രദ്ധിക്കണം. ചുമതലകൾ കൃത്യമായി നിർവഹിക്കാൻ സാധിക്കണം. മന്ത്രിസഭ നയപരമായ കാര്യങ്ങൾക്ക് നേതൃത്വം കൊടുക്കുമെങ്കിലും കാര്യങ്ങൾ നടപ്പാക്കുന്നത് താഴെ തലം മുതൽ ചീഫ് സെക്രട്ടറി വരെയുള്ള ഉദ്യോഗസ്ഥ വൃന്ദമാണ്. ഉദ്യോഗസ്ഥരുടെ കൂട്ടായ പ്രവർത്തനത്തിലൂടെയാണ് നേട്ടങ്ങൾ കൈവരിക്കുന്നതെന്നും മുഖ്യമന്ത്രി പിണറായി വിജയൻ പറഞ്ഞു.സാധാരണ രീതിയിൽ സംസ്ഥാനത്തുണ്ടാകുന്ന ഫയലുകൾ വളരെ കൂടുതലാണ്. തീരുമാനങ്ങൾ എടുക്കുന്നതിൽ പൊതുവേ വേഗത കൂടിയിട്ടുണ്ട്. എന്നാൽ, ഇനിയും നല്ല തോതിൽ വേഗത കൂട്ടാൻ പറ്റണമെന്നും മുഖ്യമന്ത്രി നിർദേശിച്ചു. മന്ത്രിമാരായ കടന്നപ്പള്ളി രാമചന്ദ്രൻ, കെ. കൃഷ്ണൻകുട്ടി, പി.എ.മുഹമ്മദ് റിയാസ്, എം.ബി. രാജേഷ്, ഒ.ആർ. കേളു, ചീഫ് സെക്രട്ടറി ഡോ. എ.ജയതിലക്, വിവിധ വകുപ്പ് സെക്രട്ടറിമാർ, ഡയറക്ടർമാർ, കണ്ണൂർ ജില്ലാ കളക്ടർ അരുൺ കെ. വിജയൻ, കോഴിക്കോട് കളക്ടർ സ്‌നേഹിൽകുമാർ സിംഗ്, വയനാട് കളക്ടർ ഡി.ആർ. മേഘശ്രീ, കാസർഗോഡ് കളക്ടർ കെ. ഇന്പശേഖർ, നാല് ജില്ലകളിലെ ഉന്നത ഉദ്യോഗസ്ഥർ എന്നിവർ സംബന്ധിച്ചു.

മാറുന്ന സമൂഹത്തെ മുന്നിൽക്കണ്ട് മുന്നേറണം: മോൺ. ആന്‍റണി മുതുകുന്നേൽ

നിർമലഗിരി: വിദ്യാർഥികൾ കുടുംബത്തോടും സമൂഹത്തോടും പ്രതിബദ്ധതയുള്ളവരായിരിക്കണമെന്ന് നിർമലഗിരി കോളജ് (ഓട്ടോണമസ്) മാനേജർ മോൺ. ആന്‍റണി മുതുകുന്നേൽ. 2025-26 അധ്യായന വർഷത്തിലെ നാലുവർഷ ബിരുദ കോഴ്സുകളുടെ കോളജ് തല ഉദ്ഘാടനം നിർവഹിച്ച് പ്രസംഗിക്കുകയായിരുന്നു അദ്ദേഹം.മാറുന്ന സമൂഹത്തെ മുന്നിൽക്കണ്ട് പഠനരംഗത്ത് മുന്നേറണം.കണ്ണൂർ യൂണിവേഴ്സിറ്റിയുടെ കീഴിലുള്ള പ്രഥമ ഓട്ടോണമസ് കോളജിലെ ആദ്യ നാലുവർഷ ബിരുദ ബാച്ചാണിത്. എഫ്‌വൈയുജിപി പ്രോഗ്രാം സംസ്ഥാനതല ഉദ്ഘാടനം തിരുവനന്തപുരത്ത് ഉന്നത വിദ്യാഭ്യാസ വകുപ്പ് മന്ത്രി ആർ. ബിന്ദു നിർവഹിക്കുന്ന ചടങ്ങിന് ഓൺലൈനായി അധ്യാപകരും വിദ്യാർഥികളും രക്ഷിതാക്കളും തത്സമയം സാക്ഷികളായി. ഉദ്ഘാടനത്തിനുശേഷം ഒന്നാംവർഷ വിദ്യാർഥികൾക്ക് ബോധവത്കരണ ക്ലാസും നടന്നു. ക്ലാസുകൾക്ക് ശ്രീരാജ് പാറക്കൽ, ജിതിൻ ശ്യാം, പ്രസാദ് മാനിക് എന്നിവർ നേതൃത്വം നൽകി. പ്രിൻസിപ്പൽ സിസ്റ്റർ ഡോ. സെലിൻ മാത്യു അധ്യക്ഷത വഹിച്ചു. കോളജ് വൈസ് പ്രിൻസിപ്പൽ റവ. ഡോ. ജോബി ജേക്കബ്, സീനിയർ അധ്യാപകൻ പ്രഫ. ഡോ. സാബു സെബാസ്റ്റ്യൻ, അസിസ്റ്റന്‍റ് പ്രഫസർമാരായ റോഷിൻ തോമസ്, ദീപു ജോസഫ്, ഇമ്മാനുവൽ ടോം, ഡോ. ദീപാ മോൾ മാത്യു, പിടിഎ വൈസ് പ്രസിഡന്‍റ് കെ. സുരേന്ദ്രൻ എന്നിവർ പ്രസംഗിച്ചു.

ഓട്ടോറിക്ഷാ ഡ്രൈവർ വീട്ടിൽ തൂങ്ങിമരിച്ച നിലയിൽ

മയ്യിൽ: ഓട്ടോറിക്ഷാ ഡ്രൈവറെ വീട്ടിൽ തൂങ്ങിമരിച്ച നിലയിൽ കണ്ടെത്തി. കയരളം കൊവുപ്പാടിയിലെ പൂവത്തുംകണ്ടി അനീഷിനെയാണ് (43) മരിച്ചനിലയിൽ കണ്ടത്. മൃതദേഹത്തിന് ഏകദേശം മൂന്നു ദിവസത്തെ പഴക്കമുണ്ട്. ജൂൺ 27 ന് വൈകുന്നേരം മുതൽ കാണാതായിരുന്ന അനീഷിനെ കണ്ടെത്താനായി വീട്ടുകാർ നടത്തിയ തെരച്ചിലിനിടയിലാണു മുറിയിലെ കഴുക്കോലിൽ മരിച്ചനിലയിൽ കണ്ടത്. പരേതനായ ശ്രീധരൻ-പി.കെ. യശോദ ദമ്പതികളുടെ മകനാണ്. സഹോദരൻ: അഭിനേഷ് (കണ്ടക്കൈ, മയ്യിൽ). പോലീസ് ഇൻക്വസ്റ്റ് നടപടികൾ പൂർത്തിയാക്കി സംസ്കാരം നടത്തി.

വിദ്യാരംഗം കലാസാഹിത്യ വേദി ഉദ്ഘാടനം

തേർത്തല്ലി: മേരിഗിരി ഹയർ സെക്കൻഡറി സ്കൂൾ തേർത്തല്ലി വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെയും ഉദ്ഘാടനം നടത്തി. ആർട്ട് ഡയറക്ടറും സംഗീതജ്ഞനുമായ മനോജ് തോമസ് വിദ്യാരംഗം കലാസാഹിത്യ വേദിയുടെയും, പ്രമുഖ വ്യവസായിയും രാഷ്‌ട്രദീപിക ലിമിറ്റഡ് ഡയറക്‌ടർ അംഗവുമായ ബെന്നി വാഴപ്പിള്ളിൽ വിവിധ ക്ലബുകളുടെയും ഉദ്ഘാടനം നിർവഹിച്ചു. സ്കൂൾ മുഖ്യാധ്യാപകൻ സജി ജയിംസ് കണ്ണന്താനം അധ്യക്ഷത വഹിച്ചു. സ്കൂൾ മാനേജർ ഫാ. അബ്രഹാം മഠത്തിമ്യാലിൽ അനുഗ്രഹ പ്രഭാഷണം നടത്തി. പിടിഎ പ്രസിഡന്‍റ് രാജേഷ് പുതുപ്പറമ്പിൽ, മേരിഗിരി ഹയർ സെക്കൻഡറി സ്കൂൾ പ്രിൻസിപ്പൽ ഫാ. കുര്യാക്കോസ് അറക്കൽ, സ്കൂൾ സീനിയൽ അസിസ്റ്റന്‍റ് രാധാകൃഷ്ണൻ, കുമാരി ആൻ തെരേസ, മാസ്റ്റർ മിലൻ സിബി, സ്റ്റാഫ് സെക്രട്ടറി ബിജു അഗസ്റ്റ്യൻ എന്നിവർ പ്രസംഗിച്ചു. കുട്ടികളുടെ വിവിധ കലാപരിപാടികളും അരങ്ങേറി. വിവിധ മത്സരങ്ങളിൽ വിജയികളായ കുട്ടികൾക്ക് സമ്മാനങ്ങളും വിതരണം ചെയ്തു.

വർക്ക്ഷോപ്പിന് മുകളിൽ മരക്കൊമ്പ് വീണു

ചെറുപുഴ: വർക്ക്ഷോപ്പിനു മുകളിൽ റോഡരികിലെ മരത്തിന്‍റെ ശിഖരം ഒടിഞ്ഞുവീണു. ചെറുപുഴ-പയ്യന്നൂർ റോഡിൽ കാക്കയംചാലിലെ ബ്രില്യന്‍റ് ടുവീലർ വർക്ക് ഷോപ്പിനു മുകളിലാണ് മരക്കൊന്പ് വീണത്. ഇന്നലെ വൈകുന്നേരം ആറോടെയായിരുന്നു. വർക്ക്ഷോപ്പിൽ നിർത്തിയിട്ട ആറ് ഇരുചക്രവാഹനങ്ങൾക്ക് കേടുപാട് സംഭവിച്ചു. ആളുകൾ ഓടി മാറിയതിനാൽ പരിക്കേൽക്കാതെ രക്ഷപ്പെട്ടു. സമീപത്തെ ഓട്ടോ സ്റ്റാൻഡിൽ നിർത്തിയിട്ട ഓട്ടോറിക്ഷകൾക്ക് മുകളിൽ വീഴാതിരുന്നതിനാൽ വൻ അപകടം ഒഴിവായി.

പെരുമ്പടവ്-തിമിരി റോഡ് തകർന്നു

പെരുമ്പടവ്: രണ്ടാഴ്ച മുമ്പ് മെക്കാഡം ടാറിംഗ് നടത്തിയ റോഡിൽ ടാറിംഗ് തകർന്നു. എരമം കുറ്റൂർ, ആലക്കോട് പഞ്ചായത്തുകളിലൂടെ കടന്നുപോകുന്ന പെരുമ്പടവ് -തിമിരി പൊതുമരാമത്ത് വകുപ്പ് റോഡിന്‍റെ ടാറാണ് വെള്ളത്തിൽ ഒഴുകിപ്പോയയത്. ശക്തമായ മഴയത്താണ് ടാറിംഗ് നടത്തിയത്. മാസങ്ങൾക്കു മുന്പാണ് റോഡിന് ഫണ്ട് അനുവദിച്ചത്. ടാറിംഗ് സമയത്ത് വെള്ളം കുത്തിയൊഴുകിയെത്തി പല സ്ഥലങ്ങളിലും ടാറിംഗ് സാധനങ്ങൾ ഒഴുകിപ്പോയിരുന്നു. പല സ്ഥലങ്ങളിലും വലിയ കുഴികൾ രൂപപ്പെട്ടു. ചിലയിടങ്ങളിൽ റോഡിൽ മെറ്റൽ നിരന്ന് കിടക്കുകയുമാണ്. ഇതിനെതിരെ നാട്ടുകാരിൽ വലിയ പ്രതിഷേധം ഉയരുകയാണ്. ഉദ്യോഗസ്ഥർക്കും കരാറുകാർക്കും എതിരെ നടപടി സ്വീകരിക്കണമെന്ന് നാട്ടുകാർ ആവശ്യപ്പെടുന്നു.

ഇരിക്കൂറിൽ ജലജീവൻ മിഷൻ അവലോകനയോഗം നടത്തി

ശ്രീകണ്ഠപുരം: ഇരിക്കൂർ നിയോജക മണ്ഡലത്തിലെ ജലജീവൻ മിഷൻ പ്രവൃത്തികളുടെ പുരോഗതി സംബന്ധിച്ച അവലോകന യോഗം ശ്രീകണ്ഠപുരം നഗരസഭയിൽ നടന്നു.സജീവ് ജോസഫ് എംഎൽഎ അധ്യക്ഷത വഹിച്ചു. ജലജീവൻമിഷന്‍റെ ഭാഗമായി വെട്ടിപൊളിച്ച റോഡുകളുടെ പുനരുദ്ധാരണ പ്രവൃത്തികൾ ത്വരിതപ്പെടുത്തണമെന്ന് എംഎൽഎ ആവശ്യപ്പെട്ടു. കുടിവെള്ളത്തിനായി സ്ഥാപിക്കുന്ന ടാങ്കുകളുടെ നിർമാണം പൂർത്തിയാക്കണമെന്നും ടാങ്കുകൾ സ്ഥാപിക്കാൻ ആവശ്യമായ സ്ഥലം ലഭിക്കാത്തത് ഉടൻ പരിഹരിക്കണമെന്നും യോഗം വിലയിരുത്തി. ജലജീവൻ മിഷന്‍റെ ഭാഗമായുള്ള പ്രവൃത്തി ഏറ്റെടുത്ത കരാറുകാർക്കുള്ള തുക സർക്കാരിൽ നിന്ന് ലഭിക്കാത്തത് പദ്ധതി പൂർത്തീകരണത്തിന് തടസം സൃഷ്ടിക്കുന്നതായും ഇക്കാര്യം സർക്കാരിന്‍റെ ശ്രദ്ധയിൽപ്പെടുത്തുമെന്നും എംഎൽഎ പറഞ്ഞു. യോഗത്തിൽ നഗരസഭാധ്യക്ഷ ഡോ. കെ.വി. ഫിലോമിന, പഞ്ചായത്ത് പ്രസിഡന്‍റുമാരായ പി.സി. ഷാജി, ജോജി കന്നിക്കാട്ട്, സാജു സേവ്യർ,വി.പി. മോഹനൻ, ടി.പി. ഫാത്തിമ തുടങ്ങിയവരും വാട്ടർ അഥോറിറ്റി എക്സി.എൻജിനിയർ പി.പി. ദീപ,അർജുൻ ഗോവിന്ദ്,സുജിത്ത്, സാഗി സാംലാസ്, ആന്‍റണി സണ്ണി, ഹെബിൻ ഹെർബർട്ട് തുടങ്ങിയവർ പങ്കെടുത്തു.

നുച്യാട് പാലം നിര്‍മാണം കിഫ്ബി ഏറ്റെടുക്കണം: സജീവ് ജോസഫ് എംഎല്‍എ

ഉളിക്കൽ: മലയോര ഹൈവേയുടെ ഭാഗമായ നുച്യാട് പാലത്തിന്‍റെ നിര്‍മാണം കിഫ്ബി ഏറ്റെടുക്കണമെന്ന് സജീവ് ജോസഫ് എംഎൽഎ ആവശ്യപ്പെട്ടു. ഇത് സംബന്ധിച്ച് കത്ത് എംഎല്‍എ കിഫ്ബി എക്സിക്യുട്ടീവ് ഡയറക്ടര്‍ക്ക് നല്‍കി. മലയോര ഹൈവേ നിര്‍മാണവുമായി ബന്ധപ്പെട്ട് പ്രസ്തുത പാലത്തിന്‍റെ നിര്‍മാണത്തിന് അനുമതി ലഭിച്ചിരുന്നെങ്കിലും സാങ്കേതിക നടപടിക്രമങ്ങള്‍ നീണ്ടുപോയതിനാല്‍ നിര്‍മാണം തുടങ്ങാന്‍ സാധിച്ചില്ല. ഇത് സംബന്ധിച്ച് ഭരണാനുമതി പുതുക്കി തുക അനുവദിക്കുന്നതിനു വേണ്ടി ഫയല്‍ ധനകാര്യ വകുപ്പിന് നല്‍കിയിരുന്നെങ്കിലും തുക അനുവദിച്ചില്ല. പാലം വളരെ ഇടുങ്ങിയതാണ്. അതിനാൽ വാഹനങ്ങൾക്കും കാൽനടയാത്രക്കാർക്കും ഇതുവഴി കടന്നുപോകുന്നത് വളരെ പ്രയാസമേറിയതും അപകടകരവുമാണ്. ഈ പാലം മലയോര ഹൈവേയുടെ ഭാഗമായതിനാൽ ഗതാഗതക്കുരുക്ക് അതി രൂക്ഷമാണ്. അനുദിനം ഗതാഗതക്കുരുക്ക് വർധിച്ചുവരികയാണ്. ഈ സാഹചര്യത്തിലാണ് പ്രവൃത്തി പൂർത്തീകരിച്ച മലയോര ഹൈവേയുടെ ഭാഗമായ നുച്യാട് പാലത്തിന്‍റെ നിര്‍മാണം മലയോര ഹൈവേ പദ്ധതിയില്‍ ഉള്‍പ്പെടുത്തി നിര്‍മ്മിക്കുന്നതിനാവശ്യമായ നടപടി സ്വീകരിക്കണമെന്ന് കിഫ്‌ബി അധികൃതരോട് എംഎല്‍എ ആവശ്യപ്പെട്ടത്.

പേവിഷബാധ പ്രതിരോധം: സ്‌കൂള്‍ അസംബ്ലികളില്‍ ബോധവത്കരണം

കണ്ണൂർ: പേവിഷബാധയ്‌ക്കെതിരേ ആരോഗ്യ വകുപ്പ് വിദ്യാഭ്യാസ വകുപ്പുമായി സഹകരിച്ച് നടത്തുന്ന ബോധവത്കരണ പരിപാടിയുടെ ഭാഗമായി കണ്ണൂർ ജില്ലയിലെ മുഴുവൻ സ്കൂളുകളിലും പ്രത്യേക ക്ലാസുകൾ സംഘടിപ്പിച്ചു. റാബിസ് സ്പെഷൽ സ്കൂൾ അസംബ്ലിയുടെ കണ്ണൂർ ജില്ലാതല ഉദ്ഘാടനം മന്ത്രി കടന്നപ്പള്ളി രാമചന്ദ്രൻ നിർവഹിച്ചു. കുട്ടികൾക്കായി ആരോഗ്യ വകുപ്പ് തയാറാക്കിയ ബോധവത്കരണ പോസ്റ്ററുകൾ മന്ത്രി പ്രകാശനം ചെയ്തു. ജില്ലയിൽ പൊതു ഇടങ്ങളിൽ സ്ഥാപിക്കുന്ന ബോധവത്കരണ ഹോർഡിംഗ്സും മന്ത്രി പ്രകാശനം ചെയ്തു. കണ്ണൂർ മുൻസിപ്പൽ ഹയർ സെക്കൻഡറി സ്കൂളിൽ നടന്ന പരിപാടിയിൽ മേയർ മുസ്ലിഹ് മഠത്തിൽ അധ്യക്ഷത വഹിച്ചു. സ്‌കൂളുകളിൽ പേവിഷബാധയ്ക്കെതിരേ അവബോധം നല്കുന്നതിനാണ് അസംബ്ലി സമയത്തും പ്രത്യേക അസംബ്ലി വിളിച്ചുച്ചേർത്തും ആരോഗ്യ പ്രവര്‍ത്തകരുടെ നേതൃത്വത്തില്‍ ജില്ലയിൽ ക്ലാസുകൾ സംഘടിപ്പിച്ചത്. മൃഗങ്ങളുടെ കടിയോ മാന്തലോ, പോറലോ ഏറ്റാല്‍ രോഗ പ്രതിരോധത്തിന്‍റെ ഭാഗമായി നല്കേണ്ട പ്രഥമ ശുശ്രൂഷ, വാക്‌സിനേഷന്‍, മൃഗങ്ങളോട് ഇടപഴകുമ്പോള്‍ ശ്രദ്ധിക്കേണ്ട കാര്യങ്ങള്‍ എന്നിവയെപ്പറ്റി കുട്ടികള്‍ക്കും അധ്യാപകര്‍ക്കും ബോധവത്കരണം നൽകി. പേവിഷ ബാധ പ്രതിരോധം സംബന്ധിച്ച ക്ലാസിന് ഡെപ്യൂട്ടി ഡിഎംഒ ഡോ. കെ.സി. സച്ചിൻ നേതൃത്വം നല്കി. പേ വിഷ പ്രതിരോധത്തിനായി കുട്ടികള്‍ക്ക് വേണ്ട മാര്‍ഗനിര്‍ദേശങ്ങള്‍ നല്കുന്ന ലഘുലേഖകൾ പരിപാടിയിൽ വിതരണം ചെയ്തു. ജില്ലയിലെ മുഴുവൻ സ്കൂളുകളിലും പേ വിഷ പ്രതിരോധ ബോധ വത്കരണ പോസ്റ്ററുകൾ സ്ഥാപിക്കും. പേ വിഷ പ്രതിരോധ കാമ്പായിനിന്‍റെ ഭാഗമായി വീഡിയോ പുറത്തിറക്കും. ജൂലൈ മാസത്തില്‍ എല്ലാ അധ്യാപകര്‍ക്കും രക്ഷകര്‍ത്താക്കള്‍ക്കും പിടിഎ യോഗങ്ങളിലൂടെ സമാനമായ ബോധവത്കരണ ക്ലാസുകളും സംഘടിപ്പിക്കും.

ഉന്നത വിജയികളെ അനുമോദിച്ചു

തളിപ്പറമ്പ്: പുളിമ്പറമ്പ് സാൻജോസ് സീനിയർ സെക്കൻഡറി സ്കൂളിൽ വാർഷികൽ ജനറൽബോഡി യോഗവും അനുമോദനവും നടത്തി. സജീവ് ജോസഫ് എംഎൽഎ മുഖ്യാതിഥിയായിരുന്നു. കഴിഞ്ഞവർഷം സിബിഎസ്ഇ പത്താം ക്ലാസിലും പന്ത്രണ്ടാം ക്ലാസിലും ഉന്നത വിജയം നേടിയ കുട്ടികളെ ആദരിച്ചു. മൈക്രോ ബയോളജി, ബയോ ടെക്നോളജി, എംബിഎ തുടങ്ങിയ ഉന്നത പഠനമേഖലകളിൽ യൂണിവേഴ്സിറ്റിതലത്തില് ഒന്നാം റാങ്കുകൾ നേടിയ മൂന്നു പൂർവ വിദ്യാർഥികളെയും ആദരിച്ചു. ഉന്നത വിജയികൾക്കുള്ള സമ്മാനദാനം സജീവ് ജോസഫ് എംഎൽഎ നിർവഹിച്ചു. പ്രിൻസിപ്പൽ സിസ്റ്റർ ദീപ്തി, വൈസ് പ്രിൻസിപ്പൽ സിസ്റ്റർ കാതറിൻ എന്നിവർ പ്രസംഗിച്ചു. തേർത്തല്ലി: തടിക്കടവ് സർവീസ് സഹകരണ ബാങ്കിന്‍റെ നേതൃത്വത്തിൽ എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങളിലും എ പ്ലസ് നേടിയ കുട്ടികളെ ആദരിച്ചു. ചടങ്ങ് ടി.വി. രാജേഷ് ഉദ്ഘാടനം ചെയ്തു. റിസ്ക് ഫണ്ട് വിതരണം ന‌ടത്തി. ബാങ്ക് പ്രസിഡന്‍റ് എം.കെ. പ്രദീപ് കുമാർ അധ്യക്ഷത വഹിച്ചു. രാജേഷ് മാത്യു, ഷൈൻ പുതുപ്പറമ്പിൽ, ബിന്ദു സുരേഷ് എന്നിവർ പ്രസംഗിച്ചു.

കൊക്കായി പാലത്തിന്‍റെ സമാന്തര റോഡ് തുറന്നു

ചെമ്പന്തൊട്ടി: ഏതാനും നാളുകളായി യാത്രാദുരിതമനുഭവിക്കേണ്ടിവന്ന ചെമ്പന്തൊട്ടി നിവാസികൾക്ക് ആശ്വാസമായി കൊക്കായി പാലത്തിന്‍റെ സമാന്തര റോഡ് ഇന്നലെ മുതൽ ഗതാഗതത്തിനായി തുറന്നു കൊടുത്തു. ഭാരം കയറ്റിയ വലിയ ലോറികൾക്ക് ഗതാഗത നിയന്ത്രണമുള്ളതായി അസിസ്റ്റന്‍റ് എക്സിക്യൂട്ടീവ് എൻജിനിയർ സജിത് അറിയിച്ചു. അദ്ദേഹത്തോടൊപ്പം ശ്രീകണ്ഠപുരം നഗരസഭാ കൗൺസിലർ കെ.ജെ ചാക്കോ കൊന്നയ്ക്കൽ, റോഡ് കമ്മിറ്റി അംഗങ്ങളായ വർഗീസ് വയലാമണ്ണിൽ, കെ.എം.ഷംസീർഎന്നിവരുൾപ്പെടെ പ്രദേശവാസികളായവരും പരിപാടിയിൽ പങ്കെടുത്തു.

ആൺ സുഹൃത്തിനൊപ്പം പുഴയിൽ ചാടിയ യുവതി നീന്തി രക്ഷപ്പെട്ടു

കണ്ണൂർ: ആൺ സുഹൃത്തിനൊപ്പം പുഴയിൽ ചാടിയ ഭർതൃമതിയായ യുവതി നീന്തിരക്ഷപ്പെട്ടു. ആൺ സുഹൃത്തിനായി പുഴയിൽ തെരച്ചിൽ ഊർജ്ജിതമാക്കി. ഇന്നലെ രാവിലെയാണ് ബേക്കൽ പെരിയാട്ടടുക്കം സ്വദേശിനിയായ 35കാരിയെ വളപട്ടണം പുഴയുടെ ഓരത്ത് നാട്ടുകാർ കണ്ടത്. തുടർന്ന് വളപട്ടണം പോലീസിൽ വിവരമറിയിക്കുകയായിരുന്നു. സ്ഥലത്തെത്തിയ പോലീസ് യുവതിയെ സ്റ്റേഷനിലേക്ക് കൊണ്ടുപോയി. ബേക്കൽ പോലീസിൽ യുവതിയെ കാണാനില്ലെന്ന പരാതിയെ ത്തുടർന്ന് കേസെടുത്ത് പോലീസ് അന്വേഷണം നടക്കുന്നതിനിടെയാണ് വളപട്ടണം പുഴയുടെ തീരത്ത് യുവതിയെ കണ്ടെത്തിയത്. ഞായറാഴ്ച രാത്രിയിലാണ് കാസർഗോഡുള്ള പോലീസുകാരന്‍റെ ഭാര്യയായ യുവതി ആൺസുഹൃത്തിനൊപ്പം കണ്ണൂരിൽ എത്തിയത്. തുടർന്ന് ഇന്നലെ രാവിലെ വളപട്ടണം പാലത്തിനു മുകളിൽ എത്തി ഇരുവരും പുഴയിലേക്ക് ചാടുകയായിരുന്നു. എന്നാൽ പുഴയിൽ വീണയുടൻ യുവതി നീന്തി കരയ്ക്കു കയറുകയായിരുന്നു. കൂടെയുണ്ടായിരുന്ന യുവാവിനായി പോലീസും ഫയർഫോഴ്സും തെരച്ചിൽ ഊർജിതമാക്കി.

ശ്രവണ ഹിയറിംഗ് എയ്ഡ് സെന്‍റർ നവീകരിച്ച യൂണിറ്റ് മന്ത്രി കടന്നപ്പള്ളി ഉദ്ഘാടനം ചെയ്തു

കണ്ണൂര്‍: ശ്രവണ ഹിയറിംഗ് എയ്ഡ് സെന്‍ററിന്‍റെ കണ്ണൂരിലെ നവീകരിച്ച യൂണിറ്റ് താവക്കരയിൽ പ്രവർത്തനം തുടങ്ങി. മന്ത്രി കടന്നപ്പള്ളി രാമചന്ദ്രൻ ഉദ്ഘാടനം നിർവഹിച്ചു. കേള്‍വിക്കുറവ് പലപ്പോഴും നിശബ്ദമായി നമ്മെ ബാധിക്കുന്ന ഒരു പ്രശ്‌നമാണ്. അത്തരം സാഹചര്യങ്ങളില്‍ കൃത്യമായ പരിചരണവും കരുതലും നല്കുന്ന സ്ഥാപനങ്ങള്‍ സമൂഹത്തിന് വലിയ പ്രതീക്ഷയാണ് നല്കുന്നത്. ശ്രവണ അതിന് ഒരു മികച്ച ഉദാഹരണമാണെന്നും മന്ത്രി കടന്നപ്പള്ളി പറഞ്ഞു.നേരത്തെ ഒന്നാം നിലയില്‍ പ്രവര്‍ത്തിച്ചിരുന്ന ക്ലിനിക് പ്രായമായവര്‍ക്കും ശാരീരിക വെല്ലുവിളികള്‍ നേരിടുന്നവര്‍ക്കും എളുപ്പത്തില്‍ എത്തിച്ചേരുന്നതിനായാണ് ഗ്രൗണ്ട് ഫ്ലോറിലക്ക് മാറ്റിയത്. ഉദ്ഘാടനത്തോടനുബന്ധിച്ച് ഹിയറിംഗ് എയ്ഡ് അപ്ഗ്രേഡ് ആൻഡ് എക്‌സ്‌ചേഞ്ച് ഫെസ്റ്റിവല്‍ ഓഫറും പ്രഖ്യാപിച്ചിട്ടുണ്ട്. ഈ ഓഫറിലൂടെ ഉപഭോക്താക്കള്‍ക്ക് തങ്ങളുടെ പഴയ ഹിയറിംഗ് എയ്ഡുകള്‍ നല്കി ആകര്‍ഷകമായ വിലക്കിഴിവില്‍ പുതിയവ സ്വന്തമാക്കാന്‍ അവസരം ലഭിക്കും. ആധുനിക സാങ്കേതികവിദ്യ, പരിചയസമ്പന്നരായ ഓഡിയോളജിസ്റ്റുകള്‍, വ്യക്തിഗത പരിചരണം എന്നിവയിലൂടെ ഉപഭോക്താക്കള്‍ക്ക് മികച്ച സേവനം നല്കാനാണ് ശ്രവണ എപ്പോഴും ശ്രമിക്കുന്നതെന്ന് മാനേജിംഗ് ഡയറക്ടർ ഇ. ശ്രീജിത്ത് അറിയിച്ചു. ഉദ്ഘാടന ചടങ്ങിൽ ദീപിക കണ്ണൂർ റസിഡന്‍റ് മാനേജർ ഫാ. ജോബിൻ വലിയപറമ്പിൽ, തളിപ്പറമ്പ് വ്യാപാരി വ്യവസായി യൂത്ത് വിംഗ് സ്റ്റേറ്റ് ട്രഷറർ കെ.എസ്. റിയാസ്, ആർ.ജെ. മുസാഫിർ, ശ്രവണ ഡയറക്ടറും ചീഫ് ഓഡിയോളജിസ്റ്റുമായ അശ്വതി ശ്രീജിത്ത്, എം.വി. അനസ് എന്നിവർ പ്രസംഗിച്ചു.

അക്കരെ കൊട്ടിയൂരിൽനിന്ന് സ്ത്രീകളും ഗജവീരൻമാരും വിശേഷ വാദ്യക്കാരും മടങ്ങി

കൊട്ടിയൂർ: ദക്ഷിണ കാശിയിലെ 27 ദിവസം നീണ്ടു നിൽക്കുന്ന കൊട്ടിയൂർ വൈശാഖ മഹോത്സവം സമാപനത്തിന് നാലുനാൾ കൂടി അവശേഷിക്കെ അക്കരെ കൊട്ടിയൂരിൽ നിന്ന് സ്ത്രീകളും, ഗജവീരൻമാരും വിശേഷ വാദ്യക്കാരും മടങ്ങി. ഉത്സവ നഗരിയിൽ നിന്ന് അറിയിപ്പ് ലഭിച്ചതോടെ പെരുമാളിനെ വണങ്ങി ആയിരക്കണക്കിന് സ്ത്രീകളാണ് മഹോത്സവ നഗരിയിൽ നിന്നും വിടവാങ്ങിയത്. മകം നാളിലെ ഉച്ചശീവേലിക്കു ശേഷമാണ് ഗജവീരൻമാർ കൊട്ടിയൂരപ്പനെ വണങ്ങി പ്രസാദവും സ്വീകരിച്ച് അക്കരെ സന്നിധാനത്തു നിന്നും മടങ്ങിയത്. ആനയൂട്ടും നടത്തി. ഇതുവരെ അക്കരെ കൊട്ടിയൂർ സന്നിധിയെ ഭക്തി സാന്ദ്രമാക്കിയിരുന്ന വിശേഷ വാദ്യക്കാരും ഇന്നലെ വിട വാങ്ങി.തിങ്കളാഴ്ച ഭക്തജന പ്രവാഹമായിരുന്നു അക്കരെ സന്നിധിയിൽ അനുഭവപ്പെട്ടത്. ഉച്ചശീവേലിക്കു ശേഷം സ്ത്രീ ജനങ്ങൾ അക്കരെ കൊട്ടിയൂരിൽ നിന്നും പിൻവാങ്ങിയത്തോടെ അക്കരെ സന്നിധി ഗൂഢ പൂജകൾക്ക് വഴിമാറി. മുഴക്കുന്ന് നല്ലൂരിൽ നിന്നും സ്ഥാനികൾ എഴുന്നള്ളിച്ച കലങ്ങൾ അക്കരെ കൊട്ടിയൂരിൽ എത്തിച്ചതോടെ കല പൂജയ്ക്കുള്ള ഒരുക്കങ്ങളും പൂർത്തിയായി. തയന്നൂർ ശ്രീജിത്ത്, എ.കെ . ഗണേശൻ, രോഹിത് രാജ്, കണ്ടോത്ത് സുനിൽകുമാർ എന്നിവരുടെ നേതൃത്വത്തിലുള്ള 12 പേരാണ് കലങ്ങൾ കൊട്ടിയൂരിലേക്ക് എത്തിച്ചത്. ജൂലൈ മൂന്നിന് കലശപൂജ, അത്തം ചതുശതം, വാളാട്ടം. നാലിന് തൃക്കലശാട്ടോടെ ഉത്സവം സമാപിക്കും.

എംവിആറിനെ ഞെട്ടിച്ച പൊള്ളയിൽ അമ്പാടി

നീലേശ്വരം: കണ്ണൂർ ജില്ലാ സെക്രട്ടറിയായിരുന്ന എം.വി.രാഘവൻ സിപിഎമ്മിലെ ചോദ്യം ചെയ്യപ്പെടാത്ത അധികാരകേന്ദ്രമായിരുന്ന കാലത്ത് അദ്ദേഹത്തെ വെല്ലുവിളിക്കാനുള്ള ഉശിരും ആർജവവും കാണിച്ച കമ്യൂണിസ്റ്റുകാരനായിരുന്നു പൊള്ളയിൽ അമ്പാടി. 1972 ൽ സിറ്റിംഗ് എംഎൽഎ വി.വി.കുഞ്ഞമ്പുവിന്‍റെ നിര്യാണത്തെ തുടർന്ന് നീലേശ്വരത്ത് ഉപതെരഞ്ഞെടുപ്പ് വേണ്ടിവന്ന സമയത്തായിരുന്നു അത്. സ്ഥാനാർഥി നിർണയത്തിനായി ചെറുവത്തൂരിൽ പാർട്ടി ഏരിയ, ലോക്കൽ സെക്രട്ടറിമാരുടെ കൺവൻഷൻ വിളിച്ചുചേർത്തു. കയ്യൂരിൽ നിന്നുള്ള പ്രാദേശിക നേതാവായ ടി.കെ.ചന്തനെ സ്ഥാനാർഥിയാക്കണമെന്നായിരുന്നു നീലേശ്വരം മണ്ഡലത്തിലെ ഭൂരിപക്ഷാഭിപ്രായം. എന്നാൽ ജില്ലാ കമ്മിറ്റി അംഗമായ സി. കൃഷ്ണൻ നായരുടെ പേരാണ് ജില്ലാ കമ്മിറ്റി നിർദേശിച്ചത്. നീലേശ്വരം ലോക്കൽ സെക്രട്ടറി എൻ.കെ. കുഞ്ഞമ്പു പ്രതിഷേധവുമായി എഴുന്നേറ്റപ്പോൾ എതിർപ്പുള്ളവർക്ക് യോഗത്തിൽനിന്ന് പുറത്തുപോകാമെന്ന് എംവിആർ പറഞ്ഞു. കമ്യൂണിസ്റ്റ് പാർട്ടിയോട് ഉത്തരവാദിത്വവും കൂറുമുള്ള അംഗങ്ങളോട് യോഗത്തിൽനിന്ന് പുറത്തുപോകാൻ പറയാൻ നിങ്ങൾക്ക് ഒരവകാശവുമില്ലെന്ന് ഉടൻ അമ്പാടി തുറന്നടിച്ചു. എം.വി. രാഘവനാണ് പറയുന്നത് എന്ന് എംവിആർ തന്‍റെ ഘനഗംഭീരസ്വരത്തിൽ പറഞ്ഞയുടനെ ഇത് നീലേശ്വരത്തെ പൊള്ളയിൽ അമ്പാടിയാണെന്ന് അതേ ഗാംഭീര്യത്തോടെ അമ്പാടിയും മറുപടി നല്കി. യോഗത്തിൽ പങ്കെടുത്തവരിൽ ബഹുഭൂരിപക്ഷവും എൻ.കെ. കുഞ്ഞമ്പുവിന്‍റെയും അമ്പാടിയുടെയും നിലപാടിനൊപ്പം ഉറച്ചുനിന്നതോടെ ജില്ലാ കമ്മിറ്റിക്ക് മുട്ടുമടക്കേണ്ടിവന്നു. നീലേശ്വരത്തുകാർ നിർദേശിച്ച ടി.കെ. ചന്തനെ തന്നെ സ്ഥാനാർഥിയായി അംഗീകരിച്ചു. മികച്ച ഭൂരിപക്ഷത്തോടെ അദ്ദേഹം ഉപതെരഞ്ഞെടുപ്പിൽ വിജയിച്ചു. ഒരുവർഷത്തിനിപ്പുറം നീലേശ്വരം പള്ളിക്കര തോക്ക് കേസിൽ പാർട്ടിക്കുവേണ്ടി ഒരുമിച്ച് സമരം നയിച്ച് എംവിആറും അമ്പാടിയും ജയിൽവാസമനുഷ്ഠിക്കുകയും ചെയ്തു.

കനാൽ തകർച്ചയ്ക്ക് കാരണം നിർമാണത്തിലെ അപാകത, ജനങ്ങളെ മാറ്റിപ്പാർപ്പിക്കണം: മാർ ജോസഫ് പാംപ്ലാനി

ഇരിട്ടി: കെഎസ്ഇബിക്ക് കോടികളുടെ നഷ്ടവും ബാരാപോൾ പ്രദേശവാസികളുടെ ജീവിതം ഭീഷണിയുടെ നിഴലിലുമാക്കിയ കനാലിന്‍റെ തകർച്ചയ്ക്ക് പിന്നിൽ നിർമാണത്തിലെ അപാകതയും അഴിമതിയുമാണെന്ന് സംശയിക്കുന്നതായി തലശേരി ആർച്ച്ബിഷപ് മാർ ജോസഫ് പാംപ്ലാനി പറഞ്ഞു. കനാലിൽ ഗർത്തം രൂപപ്പെട്ട ഭാഗം കത്തോലിക്കാ കോൺഗ്രസ് പ്രതിനിധികൾക്കും പ്രവർത്തകർക്കും ഒപ്പം സന്ദർശിച്ചശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. നാല് കിലോമീറ്റർ കനാൽ ശൃംഖലയിൽ 1.4 കിലോമീറ്റർ കോൺക്രീറ്റ് നടത്താതെ ഇരുമ്പുവല വച്ച് കോൺക്രീറ്റ് ചാന്ത് പിടിപ്പിച്ചതിൽ നിർമാണ അപാകതയും അഴിമതിയുമാണെന്ന് സംശയിച്ചാൽ കുറ്റം പറയാനാവില്ല. ചോർച്ച ചൂണ്ടിക്കാണിച്ചിട്ടും പരിഹരിക്കാൻ അധികൃതർ കാണിച്ച കാലതാമസമാണ് കനാൽ ഭിത്തി തകർന്നതിന് പ്രധാന കാരണം. അടിയന്തരമായി നിർമാണ വൈകല്യം പരിഹരിച്ച് ലാഭത്തിൽ പ്രവർത്തിക്കുന്ന പദ്ധതിയെ യാഥാർഥ്യമാക്കണം. താത്കാലിക സംവിധാനങ്ങൾ ഒന്നും ഇവിടെ നടപ്പിലാക്കാൻ കഴിയില്ല. ഒരു ജല ബോംബിനു താഴെ ജനങ്ങളുടെ ജീവന് സർക്കാർ വിലപറയരുത്. അപകട ഭീഷണിയിലായ കനാൽ താഴ്‌വരയിലെ 30 കുടുംബങ്ങളുടെ ഭൂമി പൊന്നും വില നൽകി ഏറ്റെടുത്ത് അവരുടെ ജീവനു സംരക്ഷണം നൽകി മാറ്റിപ്പാർപ്പിക്കാനുള്ള സംവിധാനം സർക്കാർ യുദ്ധകാലാടിസ്ഥാനത്തിൽ പൂർത്തിയാക്കണം. ചൂരൽ മലയ്ക്ക് സമാനമായ ജലദുരന്തം ഒഴിവായത് ദൈവാനുഗ്രഹത്താലാണ്. നാടിന്‍റെ അഭിമാനമാകേണ്ട പദ്ധതിയെ ഈ നിലയിലാക്കിയവരെ നിയമത്തിന് മുന്നിൽ കൊണ്ടുവരണമെന്നും അദ്ദേഹം ആവശ്യപ്പെട്ടു. കനാലിന്‍റെ ചോർച്ചയ്ക്ക് പരിഹാരം കാണാൻ അധികൃതർ വൈകിയാൽ പ്രത്യക്ഷ സമരത്തിലേക്ക് എകെസിസി കടക്കുമെന്നും ജീവൻ കൊടുത്തും എകെസിസി ഇതിനായി കേരളം മുഴുവനും സമരം സംഘടിപ്പിക്കുമെന്നും അവർക്കു പിന്തുണ നല്കുമെന്നും മാർ പാംപ്ലാനി പറഞ്ഞു. കത്തോലിക്കാ കോൺഗ്രസ് ഗ്ലോബൽ ഡയറക്ടർ റവ. ഡോ. ഫിലിപ്പ് കവിയിൽ, ഫാ. സെബാസ്റ്റ്യൻ മൂക്കിലിക്കാട്ട്, ഫാ. മാത്യു പൊട്ടംപ്ലാക്കൽ, ഫാ. ജോസഫ് തേനംമാക്കൽ, ഫാ. ജിസ് കരിങ്ങാലിക്കാട്ടിൽ, കത്തോലിക്ക കോൺഗ്രസ് അതിരൂപത നേതാക്കളായ ഫിലിപ്പ് വെളിയത്ത്, ജിമ്മി ആയിത്തമറ്റം, സുരേഷ് കാഞ്ഞിരത്തിങ്കൽ, ബെന്നി പുതിയാംപുറം, ബെന്നിച്ചൻ മഠത്തിനകം എന്നിവരും ഒപ്പമുണ്ടായിരുന്നു.

ബാരാപോൾ ജലവൈദ്യുത പദ്ധതി കനാലിലെ തകർച്ച: സോയിൽ പൈപ്പിംഗ് പ്രതിഭാസമെന്ന് പ്രാഥമിക നിഗമനം

ഇരിട്ടി: ബാരാപോൾ പദ്ധതിയുടെ കനാലിൽ ഉണ്ടായ ചോർച്ച പഠിക്കാനായി ഇന്നലെ കോഴിക്കോട് നിന്ന് എത്തിയ സിവിൽ വിഭാഗം ഉദ്യോഗസ്ഥർ ഗർത്തത്തിൽ ഇറങ്ങി പരിശോധന നടത്തി. ആറു മീറ്റർ ആഴവും നാലുമീറ്റർ വീതിയും ഏഴു മീറ്റർ നീളവുമുള്ള അഗാധ ഗർത്തമാണ് കനാലിനടിയിൽ രൂപപ്പെട്ടത്. കനാലിന്‍റെ അടിയിൽ നടന്നത് സോയിൽ പൈപ്പിംഗ് ആണെന്ന് സ്ഥിരീകരിച്ചു. കനാലിന് അടിയിലെ മണ്ണ് ഒഴുകിപ്പോകുകയും വലിയ കല്ലുകൾ മാത്രം അവശേഷിക്കുകയുമാണുണ്ടായത്. കനാലിൽ നിന്ന് ചോർച്ചയുണ്ടായി അതുവഴി വെള്ളം ഭൂമിക്കടിയിലൂടെ ഒഴുകിയതോടെ മണ്ണ് നഷ്ടമായി ഗർത്തം രൂപപ്പെടുന്നതാണ് സോയിൽ പൈപ്പിംഗ്. കനാലിലെ വെള്ളം വറ്റിച്ചതിനാൽ വലിയ അപകടം ഒഴിവായതായി ഉദ്യോഗസ്ഥ സംഘം വിലയിരുത്തി. ബാരാപോൾ കനാലിലെ ചോർച്ച സോയിൽ പൈപ്പിംഗ് പ്രതിഭാസമാണെന്ന് ജിയോളജി വിഭാഗത്തിന്‍റെ പരിശോധനയിലും കണ്ടെത്തിയിരുന്നു. കനാലിന്‍റെ അടിത്തട്ടിനടിയിലെ മണ്ണ് സോയിൽ പൈപ്പിംഗ് പ്രതിഭാസത്തിലൂടെ ഒഴുകിപ്പോയതിനാൽ മണ്ണ് ഇടിഞ്ഞുതാഴുകയും കനാലിന്‍റെ ഉപരിതലം കോൺക്രീറ്റോടുകൂടി ഇടിഞ്ഞുതാഴുകയുമായിരുന്നു. അടുത്തയാഴ്ച വിദഗ്‌ധ സംഘം പരിശോധനയ്ക്കെത്തും. മുന്പ് നടത്തിയ പഠനത്തിന്‍റെ അടിസ്ഥാനത്തിൽ കൂടുതൽ ചോർച്ച അനുഭവപ്പെടുന്ന 500 മീറ്റർ ദൂരം 15 കോടി ചെലവിൽ പുനർനിർമിക്കാൻ കെഎസ്ഇബി സിവിൽ വിഭാഗം പദ്ധതി രൂപരേഖ നൽകിയിരുന്നു. അതിനിടയിലാണ് കനാലിൽ വലിയ ഗർത്തം രൂപപ്പെട്ടത്. എന്നാൽ 1.4 കിലോമീറ്റർ പുനർനിർമാണം നടത്താതെ വൈദ്യുതി ഉത്പാദനം നടത്താൻ അനുവദിക്കില്ലെന്ന നിലപാടിലാണ് പ്രദേശവാസികൾ. 1.4 കിലോമീറ്റർ കനാൽ കോൺക്രീറ്റ് ചെയ്യാൻ 45 കോടിയോളം ചെലവ് വരും. നിർമാണത്തിനായി കുറഞ്ഞത് 20 മാസം വേണമെന്നാണ് കണക്കുകൂട്ടൽ. നാലു കിലോമീറ്റർ വരുന്ന കനാല്‍ ശൃംഖലയിൽ 1.4 കിലോമീറ്റർ ദൂരം കോൺക്രീറ്റ് നടത്താതെയാണ് നിർമിച്ചത്. ഈ ഭാഗത്തുകൂടിയാണ് തുടക്കം മുതൽ ചോർച്ച കണ്ടെത്തിയത്. ഓരോ ഉത്പാദന സീസണിലും ചോർച്ച അധികരിക്കുമ്പോഴും പഞ്ചായത്തും പ്രദേശവാസികളും പ്രക്ഷോഭവുമായി എത്തിയെങ്കിലും അധികൃതർ വേണ്ടത്ര പരിഗണന നൽകാത്തതാണ് നിലവിലെ സാഹചര്യത്തിന് കാരണം. കോഴിക്കോട് കെഎസ്ഇബി സിവിൽ വിഭാഗം ഡെപ്യൂട്ടി ചീഫ് എൻജിനിയർ വി.ടി. അബ്ദുൾ കരീം, എക്സിക്യുട്ടീവ് എൻജിനിയർ മണികണ്ഠൻ അസിസ്റ്റന്‍റ് എൻജിനിയർമാരായ ഡൈസൺ ചന്ദന, പി. ഷിബു, എം.സി. ഗിരീഷ് എന്നിവരാണ് സംഘത്തിൽ ഉണ്ടായിരുന്നത്. ബാരാപോളിന്‍റെ ചുമതലയുള്ള പഴശി സിവിൽ വിഭാഗം എക്സിക്യുട്ടീവ് എൻജിനിയർ കെ.സി. അനിൽകുമാർ, അസിസ്റ്റന്‍റ് എക്സിക്യുട്ടീവ് എൻജിനിയർ എം.കെ. അജിത്ത് അസിസ്റ്റന്‍റ് എൻജിനിയർമാരായ ടി.പി. മനോജ്, എം. കിഷോർ എന്നിവരും ഒപ്പം ഉണ്ടായിരുന്നു.

ലഹരി വിരുദ്ധ ബോധവത്കരണ ക്ലാസ് നടത്തി

പുന്നാട്: മീത്തലെ പുന്നാട് യുപി സ്കൂൾ സാമൂഹ്യശാസ്ത്ര ക്ലബിന്‍റെ ആഭിമുഖ്യത്തിൽ ലഹരി വിരുദ്ധ ബോധവത്കരണ ക്ലാസും പുകയില രഹിത വിദ്യാലയം പ്രഖ്യാപനവും നടന്നു. പുകയില രഹിത വിദ്യാലയ പ്രഖ്യാപനം നഗരസഭ കൗൺസിലർ എ.കെ. ഷൈജു നിർവഹിച്ചു. പിടിഎ പ്രസിഡന്‍റ് കെ.വി. രമേശൻ അധ്യക്ഷത വഹിച്ചു. ലഹരി വിരുദ്ധ പ്രതിജ്ഞയെടുത്തു. സിവിൽ എക്സൈസ് ഓഫീസർ ജി. സന്ദീപ് ലഹരി വിരുദ്ധ ബോധവത്കരണ ക്ലാസെടുത്തു. മുഖ്യാധ്യാപിക സി.കെ. അനിത, എസ്ആർജി കൺവീനർ പി.പി. അരുൺ, സാമൂഹ്യശാസ്ത്രം കൺവീനർ കെ.വി. ദിവ്യ എന്നിവർ പ്രസംഗിച്ചു.

വിജയോത്സവവും വിവിധ ക്ലബുകളുടെ ഉദ്ഘാടനവും നടത്തി

മണിക്കടവ്: മണിക്കടവ് സെന്‍റ് തോമസ് യുപി സ്കൂളിൽ വിജയോത്സവവും വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെയും ഉദ്ഘാടനവും സജീവ് ജോസഫ് എംഎൽഎ ഉദ്ഘാടനം ചെയ്തു. സ്കൂൾ മാനേജർ ഫാ. പയസ് പടിഞ്ഞാറെമുറിയിൽ അധ്യക്ഷത വഹിച്ചു. തെയ്യം, നാടൻപാട്ട് കലാകാരനായ എം.പി. സജിത്ത് മുഖ്യാതിഥിയായിരുന്നു. ചടങ്ങിൽ എൽഎസ്എസ്, യുഎസ്എസ് വിജയികൾക്കുള്ള ട്രോഫികൾ വിതരണം ചെയ്തു. സ്കൂൾ അസിസ്റ്റന്‍റ് മാനേജർ ഫാ. ജോസബിൻ ഈറ്റക്കൽ, മുഖ്യാധ്യാപിക മേരിക്കുട്ടി, പിടിഎ പ്രസിഡന്‍റ് ജിയോ തെക്കേപ്പുറം, എംപിടിഎ പ്രസിഡന്‍റ് നിമിഷ ഷിന്‍റോ, ജോമിഷ ജോസ് എന്നിവർ പ്രസംഗിച്ചു. വിവിധ കലാപരിപാടികളും അരങ്ങേറി.

കേരളത്തിൽ തൊഴിൽ നേടാനുള്ള അവസരങ്ങൾ സൃഷ്ടിക്കും: മുഖ്യമന്ത്രി

കണ്ണൂർ: കേരളത്തിൽ തൊഴിൽ നേടാനുള്ള അവസരങ്ങൾ സൃഷ്ടിക്കുന്നത് സംസ്ഥാനത്തിന്‍റെ ഉത്തരവാദിത്തമായി കാണുന്നതായി മുഖ്യമന്ത്രി പിണറായി വിജയൻ. കേരളത്തെ വൈജ്ഞാനിക മേഖലയാക്കാനാണ് ശ്രമിക്കുന്നത്. കണ്ണൂർ കൃഷ്ണമേനോൻ സ്മാരക ഗവ വനിതാ കോളേജിന്‍റെ സുവർണ ജൂബിലി ആഘോഷവും കോളജ് ഓഡിറ്റോറിയത്തിന്‍റെ ഉദ്ഘാടനവും നിർവഹിച്ചു പ്രസംഗിക്കുകയായിരുന്നു മുഖ്യമന്ത്രി. കിഫ്‌ബി പദ്ധതി പ്രകാരം കോളജിൽ 13 കോടിയുടെ നിർമാണ പ്രവർത്തനങ്ങളും അക്കാദമിക് ബ്ലോക്ക്, കാന്‍റീൻ കം സെമിനാർ കോംപ്ലക്സ്, ലൈബ്രറി ബ്ലോക്ക് തുടങ്ങിയവയുടെ നിർമാണവും ന‌ടത്തുമെന്ന് അധ്യക്ഷത വഹിച്ച മന്ത്രി ഡോ ആർ. ബിന്ദു പറഞ്ഞു. മന്ത്രി രാമചന്ദ്രൻ കടന്നപ്പള്ളി, കഥാകാരൻ ടി. പദ്ഭനാഭൻ, കോർപറേഷൻ മേയർ മുസ്‌ലിഹ്‌ മഠത്തിൽ, കെ.വി. സുമേഷ് എംഎൽഎ, ജില്ലാപഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാ കളക്ടർ അരുൺ കെ. വിജയൻ, കോളജ് വിദ്യാഭ്യാസ വകുപ്പ് ഡയറക്ടർ കെ. സുധീർ എന്നിവർ മുഖ്യാതിഥികളായി. വയനാട് മുണ്ടക്കൈ ചൂരൽമല ദുരിതബാധിതരുടെ പുനരധിവാസത്തിനായുള്ള സ്നേഹഭവനകളുടെ നിർമാണത്തിന് നാഷണൽ സർവീസ് സ്കീം ഒന്നാംഘട്ടമായി സമാഹരിച്ച 4.5 കോടിയുടെ ചെക്ക് മുഖ്യമന്ത്രിക്ക് കൈമാറി.

കോൺഗ്രസ് ജില്ലാ ആശുപത്രി സൂപ്രണ്ടിനെ ഉപരോധിച്ചു

കണ്ണൂർ: കണ്ണൂരിൽ തെരുവുനായയുടെ കടിയേറ്റ് പ്രതിരോധ കുത്തിവയ്പ്പിടുത്തിട്ടും പേവിഷബാധയേറ്റ് അഞ്ചു വയസുകാരനയ ഹാരിത്ത് എന്ന വിദ്യാർഥി മരിക്കാനിടയായത് ജില്ലാ ആശുപത്രിയുടെ വീഴ്ചയാണെന്നാരോപിച്ച് കോൺഗ്രസ് പ്രവർത്തകർ ജില്ലാ ആശുപത്രി സൂപ്രണ്ടിനെ ഓഫീസിൽ ഉപരോധിച്ചു. കണ്ണൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിലായിരുന്നു ആശുപത്രി സൂപ്രണ്ട് ഡോ. ഷാജിനെ ഇന്നലെ രാവിലെ ഉപരോധിച്ചത്. സമരക്കാരെ പോലീസ് ഇവിടെ നിന്ന് ബലം പ്രയോഗിച്ച് നീക്കി. പിന്നീട് പ്രവർത്തകർ ഒപി വിഭാത്തിനു മുന്നിൽ കുത്തിയിരിപ്പ് സമരം നടത്തിയതിനെ തുടർന്ന് അറസ്റ്റ് ചെയ്തു നീക്കി.രാഹുൽ കായക്കൂൽ, ഷിബിൻ, ഡൂഡു ജേക്കബ് എന്നിവരെയാണ് അറസ്റ്റ് ചെയ്തത്. സമരത്തിന് കോർപറേഷൻ കൗൺസിലർമാരായ ആസിമ, ജയസൂര്യൻ, നേതാക്കളായ ഷിബു ഫെർണാണ്ടസ്, പി.അനൂപ്,വിനോദ് പുതുക്കുടി, ഗിരീഷൻ നാമത്ത്, ഷീജ അനിൽ എന്നിവർ നേതൃത്വം നൽകി. മുഖത്ത് കടിയേറ്റ ഹാരിത്തിനെ ജില്ലാ ആശുപത്രിയിൽ പ്രവേശിപ്പിച്ച് ആവശ്യമായ കിടത്തിചികിത്സ ഉൾപ്പടെയുള്ള ലഭ്യമാക്കാത്തതാണ് കുട്ടിയുടെ മരണത്തിന് കാരണമെന്നായിരുന്നു സമരക്കാരുടെ ആരോപണം. എന്നാൽ ജില്ലാ ആശുപത്രിയിൽ ആവശ്യമായ ചികിത്സ നൽകിയിരുന്നുവെന്നും പിന്നീട് കണ്ണൂർ ഗവ. മെഡിക്കൽ കോളജിൽ റഫർ ചെയ്യുകയുമായിരുന്നെന്നും ആശുപത്രി സൂപ്രണ്ട് പറഞ്ഞു. പയ്യാന്പലത്ത് വീട്ടു മുറ്റത്ത് കളിച്ചു കൊണ്ടിരിക്കുന്നതിനിടെയാണ് ഹാരിത്തിന് മേയ് 31ന് തെരുവ്നായയുടെ കടിയേറ്റത്. ഇക്കഴിഞ്ഞ 28നായിരുന്നു കുട്ടി മരിച്ചത്. തമിഴ്നാട് സേലം സ്വദേശികളായ മണിമാരൻ-ജാതിയ ദന്പതികളുടെ ഏകമനായിരുന്നു യുകെജി വിദ്യാർഥിയായ ഹാരിത്ത്. പ്രതിഷേധവുമായി കെജിഎംഒഎ കണ്ണൂർ: തെരുവുനായയുടെ കടിയേറ്റ് പേവിഷബാധയേറ്റു അഞ്ചു വയസുള്ള കുട്ടി മരിച്ച അത്യന്തം ദുഃഖകരമായ സംഭവത്തിൽ കെജിഎംഒഎ അനുശോചിച്ചു. എന്നാൽ ഈ സംഭവത്തിൽ ആശുപത്രിയിൽ വീഴ്ച ആരോപിച്ച് ജില്ലാ ആശുപത്രി സൂപ്രണ്ടിനെ ഉപരോധിച്ച സംഭവത്തി ൽ സംഘടന ശക്തമായി പ്രതിഷേധിച്ചു. മുഖത്ത് കടിയേറ്റതിന്‍റെ ഗുരുതരത്വം കണക്കിലെടുത്ത് കുട്ടിയുടെ കൂട്ടിരിപ്പുകാരെ ഈ ആശങ്കകൾ വിശദീകരിച്ച് ബോധവത്കരിച്ചശേഷം കുട്ടിയെ പരിയാരം മെഡിക്കൽ കോളജിലേക്ക് റഫർ ചെയ്യുകയും ചെയ്തു. മുഖത്ത് തെരുവ് നായ കടിയേറ്റാൽ രോഗാണുക്കൾ ഉടൻ മസ്തിഷ്കത്തിലേക്ക് എത്താൻ സാധ്യത കൂടുതലാണെന്നത് ലോക വ്യാപകമായി അംഗീകരിക്കപ്പെട്ട യാഥാർഥ്യമാണ്. അതിനാൽ തന്നെ, ഇത്തരത്തിലുള്ള സംഭവങ്ങളിൽ പേവിഷബാധയിലേക്ക് നയിക്കുന്ന സാധ്യത വളരെ ഉയർന്നതാണ്.ഈ ദു:ഖകരമായ സംഭവത്തിൽ, ആശുപത്രിയെയോ അതിന്‍റെ സൂപ്രണ്ടിനെയോ കുറ്റപ്പെടുത്തുന്നത് രാഷ്ട്രീയ പ്രേരിതമാണ്. ശക്തമായി അപലപിക്കുന്നതായും പ്രസിഡന്‍റ് ഡോ. വി.എസ്. ജിതിനും സെക്രട്ടറി ഡോ. രഞ്ജിത്ത് മാത്യുവും പ്രസ്താവനയിൽ പറഞ്ഞു.

നുച്യാട് പാലം നിര്‍മാണം കിഫ്ബി ഏറ്റെടുക്കണം: സജീവ് ജോസഫ് എംഎല്‍എ

ഉളിക്കൽ: മലയോര ഹൈവേയുടെ ഭാഗമായ നുച്യാട് പാലത്തിന്‍റെ നിര്‍മാണം കിഫ്ബി ഏറ്റെടുക്കണമെന്ന് സജീവ് ജോസഫ് എംഎൽഎ ആവശ്യപ്പെട്ടു. ഇത് സംബന്ധിച്ച് കത്ത് എംഎല്‍എ കിഫ്ബി എക്സിക്യുട്ടീവ് ഡയറക്ടര്‍ക്ക് നല്‍കി. മലയോര ഹൈവേ നിര്‍മാണവുമായി ബന്ധപ്പെട്ട് പ്രസ്തുത പാലത്തിന്‍റെ നിര്‍മാണത്തിന് അനുമതി ലഭിച്ചിരുന്നെങ്കിലും സാങ്കേതിക നടപടിക്രമങ്ങള്‍ നീണ്ടുപോയതിനാല്‍ നിര്‍മാണം തുടങ്ങാന്‍ സാധിച്ചില്ല. ഇത് സംബന്ധിച്ച് ഭരണാനുമതി പുതുക്കി തുക അനുവദിക്കുന്നതിനു വേണ്ടി ഫയല്‍ ധനകാര്യ വകുപ്പിന് നല്‍കിയിരുന്നെങ്കിലും തുക അനുവദിച്ചില്ല. പാലം വളരെ ഇടുങ്ങിയതാണ്. അതിനാൽ വാഹനങ്ങൾക്കും കാൽനടയാത്രക്കാർക്കും ഇതുവഴി കടന്നുപോകുന്നത് വളരെ പ്രയാസമേറിയതും അപകടകരവുമാണ്. ഈ പാലം മലയോര ഹൈവേയുടെ ഭാഗമായതിനാൽ ഗതാഗതക്കുരുക്ക് അതി രൂക്ഷമാണ്. അനുദിനം ഗതാഗതക്കുരുക്ക് വർധിച്ചുവരികയാണ്. ഈ സാഹചര്യത്തിലാണ് പ്രവൃത്തി പൂർത്തീകരിച്ച മലയോര ഹൈവേയുടെ ഭാഗമായ നുച്യാട് പാലത്തിന്‍റെ നിര്‍മാണം മലയോര ഹൈവേ പദ്ധതിയില്‍ ഉള്‍പ്പെടുത്തി നിര്‍മ്മിക്കുന്നതിനാവശ്യമായ നടപടി സ്വീകരിക്കണമെന്ന് കിഫ്‌ബി അധികൃതരോട് എംഎല്‍എ ആവശ്യപ്പെട്ടത്.

ചിക്കൻ സ്റ്റാളിൽ കയറി പണം കവർന്ന മോഷ്ടാവ് അറസ്റ്റിൽ

കണ്ണൂർ: ചിക്കൻ സ്റ്റാളിൽ കയറി പണം കവർന്ന കുപ്രസിദ്ധ മോഷ്ടാവിനെ കണ്ണൂർ ടൗൺ പോലീസ് അറസ്റ്റ് ചെയ്തു. നിരവധി മോഷണ കേസുകളിൽ പ്രതിയായ മത്തായി എന്ന തൊരപ്പൻ മത്തായിയെയാണ്( 60) പോലീസ് അറസ്റ്റ് ചെയ്തത്. ഞായറാഴ്ച പുലർച്ചെ പള്ളിക്കുന്ന് - ഇടച്ചേരി റോഡിലെ നസീറിന്‍റെ ഉടമസ്ഥതയിലുള്ള ചിക്കൻ സ്റ്റാളിൽ കയറിയ മോഷ്ടാവ് മേശവലിപ്പിൽ സൂക്ഷിച്ചിരുന്ന 6500 രൂപയാണ് കവർന്നത്. നിരീക്ഷണ കാമറ ദൃശ്യങ്ങൾ അടക്കം പരിശോധിച്ചാണ് പോലീസ് മോഷ്ടാവിനെ പിടി കൂടിയത്. സമീപത്തെ മറ്റൊരു കടയിലും കയറി സാധനങ്ങൾ വലിച്ചിട്ടെങ്കിലും യാതൊന്നും കിട്ടിയിരുന്നില്ല.ടൗൺ എസ്ഐ അനുരൂപും സംഘവുമാണ് പ്രതിയെ പിടികൂടിയത്.

പേവിഷബാധ പ്രതിരോധം: സ്‌കൂള്‍ അസംബ്ലികളില്‍ ബോധവത്കരണം

കണ്ണൂർ: പേവിഷബാധയ്‌ക്കെതിരേ ആരോഗ്യ വകുപ്പ് വിദ്യാഭ്യാസ വകുപ്പുമായി സഹകരിച്ച് നടത്തുന്ന ബോധവത്കരണ പരിപാടിയുടെ ഭാഗമായി കണ്ണൂർ ജില്ലയിലെ മുഴുവൻ സ്കൂളുകളിലും പ്രത്യേക ക്ലാസുകൾ സംഘടിപ്പിച്ചു. റാബിസ് സ്പെഷൽ സ്കൂൾ അസംബ്ലിയുടെ കണ്ണൂർ ജില്ലാതല ഉദ്ഘാടനം മന്ത്രി കടന്നപ്പള്ളി രാമചന്ദ്രൻ നിർവഹിച്ചു. കുട്ടികൾക്കായി ആരോഗ്യ വകുപ്പ് തയാറാക്കിയ ബോധവത്കരണ പോസ്റ്ററുകൾ മന്ത്രി പ്രകാശനം ചെയ്തു. ജില്ലയിൽ പൊതു ഇടങ്ങളിൽ സ്ഥാപിക്കുന്ന ബോധവത്കരണ ഹോർഡിംഗ്സും മന്ത്രി പ്രകാശനം ചെയ്തു. കണ്ണൂർ മുൻസിപ്പൽ ഹയർ സെക്കൻഡറി സ്കൂളിൽ നടന്ന പരിപാടിയിൽ മേയർ മുസ്ലിഹ് മഠത്തിൽ അധ്യക്ഷത വഹിച്ചു. സ്‌കൂളുകളിൽ പേവിഷബാധയ്ക്കെതിരേ അവബോധം നല്കുന്നതിനാണ് അസംബ്ലി സമയത്തും പ്രത്യേക അസംബ്ലി വിളിച്ചുച്ചേർത്തും ആരോഗ്യ പ്രവര്‍ത്തകരുടെ നേതൃത്വത്തില്‍ ജില്ലയിൽ ക്ലാസുകൾ സംഘടിപ്പിച്ചത്. മൃഗങ്ങളുടെ കടിയോ മാന്തലോ, പോറലോ ഏറ്റാല്‍ രോഗ പ്രതിരോധത്തിന്‍റെ ഭാഗമായി നല്കേണ്ട പ്രഥമ ശുശ്രൂഷ, വാക്‌സിനേഷന്‍, മൃഗങ്ങളോട് ഇടപഴകുമ്പോള്‍ ശ്രദ്ധിക്കേണ്ട കാര്യങ്ങള്‍ എന്നിവയെപ്പറ്റി കുട്ടികള്‍ക്കും അധ്യാപകര്‍ക്കും ബോധവത്കരണം നൽകി. പേവിഷ ബാധ പ്രതിരോധം സംബന്ധിച്ച ക്ലാസിന് ഡെപ്യൂട്ടി ഡിഎംഒ ഡോ. കെ.സി. സച്ചിൻ നേതൃത്വം നല്കി. പേ വിഷ പ്രതിരോധത്തിനായി കുട്ടികള്‍ക്ക് വേണ്ട മാര്‍ഗനിര്‍ദേശങ്ങള്‍ നല്കുന്ന ലഘുലേഖകൾ പരിപാടിയിൽ വിതരണം ചെയ്തു. ജില്ലയിലെ മുഴുവൻ സ്കൂളുകളിലും പേ വിഷ പ്രതിരോധ ബോധ വത്കരണ പോസ്റ്ററുകൾ സ്ഥാപിക്കും. പേ വിഷ പ്രതിരോധ കാമ്പായിനിന്‍റെ ഭാഗമായി വീഡിയോ പുറത്തിറക്കും. ജൂലൈ മാസത്തില്‍ എല്ലാ അധ്യാപകര്‍ക്കും രക്ഷകര്‍ത്താക്കള്‍ക്കും പിടിഎ യോഗങ്ങളിലൂടെ സമാനമായ ബോധവത്കരണ ക്ലാസുകളും സംഘടിപ്പിക്കും.

കണ്ണൂർ ഗവ. മെഡിക്കൽ കോളജിൽ പ്രഥമ ശുശ്രൂഷ പരിശീലനം സംഘടിപ്പിച്ചു

പരിയാരം: കണ്ണൂർ ഗവ. മെഡിക്കൽ കോളജ് എമർജൻസി മെഡിസിൻ വിഭാഗം കണ്ണൂർ യൂണിവേഴ്സിറ്റി ഫിസിക്കൽ എഡ്യുക്കേഷൻ ആൻഡ്‌ സ്പോർട്സ് സയൻസ് വിദ്യാർഥികൾക്കും അധ്യാപകർക്കും ഫസ്റ്റ് എയ്ഡ്- സിപിആർ സ്കിൽസ് വർക്ക്ഷോപ്പ് ട്രെയിനിംഗ് സംഘടിപ്പിച്ചു. സ്പോർട്സ് സംബന്ധമായ അപകടങ്ങളിൽ ഫസ്റ്റ് എയ്ഡ് നൽകുന്നതിനെ കുറിച്ച് നടന്ന ട്രെയിനിംഗ് ക്ലാസിന് എമർജൻസി മെഡിസിൻ വിഭാഗം തലവൻ ഡോ. കെ.ടി. മാധവൻ, കണ്ണൂർ ഗവ. മെഡിക്കൽ കോളജ് കാഷ്വാലിറ്റി ഡപ്യൂട്ടി മെഡിക്കൽ സൂപ്രണ്ട് ഡോ. വിമൽ രോഹൻ, സീനിയർ റസിഡന്‍റ് ഡോ. മധുരഗീത, ഡോ. അരുൺ നിർമൽ, പിജി വിദ്യാർഥികളായ ഡോ. ആൽവിൻ, ഡോ. അബ്ദുൾ കലാം എന്നിവർ നേതൃത്വം നൽകി. ട്രെയിനിംഗിനോടനുബന്ധിച്ച് എമർജൻസി മെഡിസിൻ ഡിപ്പാർട്ട്മെന്‍റ് സന്ദർശനവും ഫിസിക്കൽ മെഡിസിൻ ഡിപ്പാർട്ട്മെന്‍റ് സന്ദർശനവും നടത്തി. ഫിസിക്കൽ മെഡിസിൻ ഡിപ്പാർട്ട്മെന്‍റിനെ കുറിച്ചും ഡിപ്പാർട്ട്മെന്‍റിലെ ഉപകരണത്തെക്കുറിച്ചും ഫിസിക്കൽ മെഡിസിൻ വിഭാഗം മേധാവി ഡോ. സൂരജ് രാജഗോപാൽ, പ്രഫസർ ഡോ. ഹേമലത, അസിസ്റ്റന്‍റ് പ്രഫസർ ഡോ. സാബിർ എന്നിവർ ക്ലാസെടുത്തു. കണ്ണൂർ യൂണിവേഴ്സിറ്റി ഫിസിക്കൽ എഡ്യുക്കേഷൻ മേധാവി പ്രഫ. അനിൽ രാമചന്ദ്രൻ പ്രസംഗിച്ചു.

തെങ്ങ് വീണ് പരിക്കേറ്റ് ചികിത്സയിലായിരുന്ന വീട്ടമ്മ മരിച്ചു

പഴയങ്ങാടി: കാലവർഷത്തിൽ തെങ്ങ് കടപുഴകി വീണ് ഗുരുതരമായി പരിക്കേറ്റ് ചികിത്സയിലായിരുന്ന വീട്ടമ്മ മരിച്ചു. കണ്ണപുരം ഇടക്കേപ്പുറം സ്വദേശി കെ.വി. പ്രശാന്തിനി (48) യാണ് മരിച്ചത്. കഴിഞ്ഞ മേയ് 25ന് ശക്തമായ കാറ്റിലും മഴയിലും വീടിനു സമീപത്തെ തെങ്ങ് കടപുഴകി വീണതിനെ തുടർന്ന് ഗുരുതരമായി പരിക്കേൽക്കുകയായിരുന്നു. ഉടൻ പ്രശാന്തിനിയെ കണ്ണൂരിലെ സ്വകാര്യ ആശുപത്രിയിലും തുടർന്ന് പരിക്ക് ഗുരുതരമായതിനാൽ പരിയാരത്തെ കണ്ണൂർ ഗവ. മെഡിക്കൽ കോളജിൽ പ്രവേശിപ്പിക്കുകയായിരുന്നു. ചികിത്സയിലിരിക്കെ ഇന്നലെ ഉച്ചയോടെ മരണപ്പെടുകയായിരുന്നു. കണ്ണപുരം പൂമാലക്കാവിനു സമീപം താമസിക്കുന്ന കരുണാകരൻ-കെ.വി. മൈഥിലി ദന്പതികളുടെ മകളാണ് പ്രശാന്തിനി. മക്കൾ: കിഷോർ, ആരതി കൃഷ്ണ. സഹോദരങ്ങൾ: പ്രശാന്ത്, പ്രസാദ്, പ്രിയ. കണ്ണപുരം പോലീസ് ഇൻക്വസ്റ്റ് നടത്തിയ മൃതദേഹം പോസ്റ്റ്മോർട്ടത്തിന് ശേഷം കണ്ണപുരം പൊന്നാച്ചിക്കൊവിൽ ശ്മശാനത്തിൽ സംസ്കരിച്ചു.

ബോധവത്കരണ സെമിനാർ സംഘടിപ്പിച്ചു

പയ്യാവൂർ: ചെമ്പേരി നിർമല ഹയർ സെക്കൻഡറി സ്കൂൾ, വൈഎംസിഎ ചെമ്പേരി യൂണിറ്റ് എന്നിവയുടെ സംയുക്‌താഭിമുഖ്യത്തിൽ സംഘടിപ്പിച്ച അന്താരാഷ്ട്ര ലഹരി വിരുദ്ധ ദിനാചരണവും ബോധവത്കരണ സെമിനാറും സ്കൂൾ ഓഡിറ്റോറിയത്തിൽ നടന്നു. ഏരുവേശി പഞ്ചായത്ത് പ്രസിഡന്‍റ് മിനി ഷൈബി ലഹരി വിമുക്ത കാമ്പസ് പ്രഖ്യാപനത്തിന്‍റെ പഞ്ചായത്ത് തല ഉദ്ഘാടനം നിവഹിച്ചു. വൈഎംസിഎ പ്രസിഡന്‍റ് ഷീൻ ഏബ്രഹാം അധ്യക്ഷത വഹിച്ചു. സ്കൂൾ പ്രിൻസിപ്പൽ സി.ഡി. സജീവ് ആമുഖ പ്രഭാഷണവും ചെമ്പേരി ലൂർദ് മാതാ ബസിലിക്ക റെക്ടർ റവ.ഡോ. ജോർജ് കാഞ്ഞിരക്കാട്ട് അനുഗ്രഹ പ്രഭാഷണവും നടത്തി. ഹയർ സെക്കൻഡറി സ്കൂൾ പിടിഎ പ്രസിഡന്‍റ് മാത്തുക്കുട്ടി അലക്സ്, ഏരുവേശി പ്രാഥമികാരോഗ്യകേന്ദ്രം ഹെൽത്ത് ഇൻസ്പെക്ടർമാരായ രാജേഷ് ബാബു, ശ്രീനിവാസൻ, നഴ്സ് അനഘ, വൈഎംസിഎ സെക്രട്ടറി റോബി ഇലവുങ്കൽ എന്നിവർ പ്രസംഗിച്ചു. വിമുക്തഭടനും ചെമ്പേരിയിലെ ഹോം ഗാർഡുമായ മാത്യു വരമ്പകത്തിനെ ആദരിച്ചു. സോഫ്റ്റ് സ്കിൽ ട്രെയിനർ ജോസ് മേമടം ക്ലാസ് നയിച്ചു.ട പ്രോഗ്രാം ഡയറക്ടർമാരായ ബിജു തയ്യിൽ, ബാബുക്കുട്ടി ജോർജ്, വിനോദ് അഗസ്റ്റിൻ, ട്വിങ്കിൾ ജേക്കബ്, ഷൈബി കുഴിവേലിപ്പുറത്ത്, ജോമി ജോസ് ചാലിൽ, ജെയ്സൺ മേക്കലാത്ത്, അജി കൊട്ടാരത്തിൽ, അധ്യാപകർ, സ്കൗട്ട് ആൻഡ് ഗൈഡ് വിദ്യാർഥികൾ എന്നിവർ നേതൃത്വം നൽകി.

എൻപിഎസുകാർക്ക് മിനിമം പെൻഷൻ ഉറപ്പാക്കണം

ശ്രീകണ്ഠപുരം: 12 വർഷത്തോളം സർക്കാർ സർവീസിൽ ജോലി ചെയ്ത് വിരമിക്കുന്ന പങ്കാളിത്ത പെൻഷൻ പദ്ധതിയിൽ ഉൾപെട്ട പെൻഷൻകാർക്ക് മിനിമം പെൻഷൻ ഉറപ്പുവരുത്തണമെന്ന് കേരള സ്റ്റേറ്റ് സർവീസ് പെൻഷനേഴ്സ് അസോസിയേഷന്‍റ്് ശ്രീകണ്ഠപുരം മണ്ഡലം കമ്മിറ്റി വരവേൽപ്പ് സമ്മേളനം ആവശ്യപ്പെട്ടു. സംസ്ഥാന സെക്രട്ടറി കെ. രാമകൃഷ്ണൻ ഉദ്ഘാടനം ചെയ്തു. പ്രസിഡന്‍റ് എൻ.എൽ ചാക്കോ അധ്യക്ഷത വഹിച്ചു. പുതുതായി സംഘടനയിലേക്ക് വന്നവരെ സംസ്ഥാന സെക്രട്ടേറിയറ്റംഗം പി.പി. ചന്ദ്രാംഗതൻ സ്വീകരിച്ചു. എസ്എസ്എൽസി, പ്ലസ് ടു പരീക്ഷയിൽ ഉന്നത വിജയം നേടിയവർക്കുള്ള ഉപഹാരം ജില്ലാ സെക്രട്ടറി സുഖദേവൻ സമ്മാനിച്ചു. എം.പി. കുഞ്ഞിമൊയ്തീൻ, ജോസഫ് സകറിയാസ്, കെ.ബാബു,എം.കെ. ബാലകൃഷ്ണൻ,ഡോ. വി.എ അഗസ്റ്റിൻ, എം.എം.ലീല, എം.ജനാർദ്ദനൻ, വർഗീസ് ജോൺ, ജൈനമ്മ മോഹൻ എന്നിവർ പ്രസംഗിച്ചു

സ്കൂളിൽ മെറിറ്റ് ഡേ സംഘടിപ്പിച്ചു

പൊടിക്കളം: മേരിഗിരി ഇംഗ്ലീഷ് മീഡിയം സ്കൂളിൽ സിബിഎസ്ഇ പരീക്ഷയിൽ 10, 12 ക്ലാസുകളിൽ ഉന്നത വിജയം കൈവരിച്ച വിദ്യാർഥികളെ ആദരിക്കുന്നതിനായി മെറിറ്റ് ഡേ സംഘടിപ്പിച്ചു. സജീവ് ജോസഫ് എംഎൽഎ ഉദ്ഘാടനം ചെയ്തു. സിബിഎസ്ഇ പത്താം ക്ലാസ് ബോർഡ് പരീക്ഷയിൽ 90 ശതമാനത്തിലധികം മാർക്ക് വാങ്ങിച്ച 45 വിദ്യാർഥികൾക്കും പന്ത്രണ്ടാം ക്ലാസിൽ 90 ശതമാനത്തിലധികം മാർക്ക് വാങ്ങിച്ച 75 വിദ്യാർഥികൾക്കും മെറിറ്റ് അവാർഡുകൾ വിതരണം ചെയ്തു. നീറ്റ് തുടങ്ങിയ എൻട്രൻസ് പരീക്ഷകളിൽ മികച്ച റാങ്ക് നേടിയ സ്കൂളിലെ വിദ്യാർഥികളെയും പൂർവ വിദ്യാർഥികളെയും ചടങ്ങിൽ ആദരിച്ചു. അങ്ങാടിക്കടവ് ഡോൺബോസ്കോ കോളജ് പ്രിൻസിപ്പൽ റവ. ഡോ. ഫ്രാൻസിസ് കാഞ്ഞിരക്കാട്ട് മുഖ്യാതിഥിയായിരുന്നു. സ്കൂൾ പ്രിൻസിപ്പൽ ബ്രദർ ഡോ. റെജി സ്കറിയ, മാനേജർ ബ്രദർ ജോണിജോസഫ്, പിടിഎ വൈസ് പ്രസിഡന്‍റ് സുജീഷ, വൈസ് പ്രിൻസിപ്പൽ പി.പി. പ്രദ്യുമ്നൻ, വിൻസെന്‍റ് ഫിലിപ്പ്, പി. റിനി, തോമസ് കുര്യൻ എന്നിവർ പ്രസംഗിച്ചു.

നാടിന്‍റെ മനസറിഞ്ഞ് ഒരു ലയൺസ് ക്ലബ്

ചെറുപുഴ: ജീവകാരുണ്യപ്രവർത്തനങ്ങൾ ഉൾപ്പടെ നിരവധി സന്നദ്ധ പ്രവർത്തനങ്ങൾക്ക് നേതൃത്വം നൽകി വരുന്ന പാടിയോട്ടുചാൽ ലയൺസ് ക്ലബ് പുരസ്കാര നിറവിൽ. ഏറ്റവും മികച്ച ലയൺസ് ക്ലബ് റീജണൽ പ്രസിഡന്‍റിനുള്ള പുരസ്കാരമണ് ഇത്തവണ ക്ലബിനെ തേടിയെത്തിയത്. മികച്ച റീജണൽ പ്രസിഡന്‍റിനുള്ള പുരസ്കാരം ജീവ് ജയിംസ് റീജണൽ ചെയർമാൻ അബൂബക്കർ സിദ്ദിഖിയിൽ നിന്നും ഏറ്റുവാങ്ങി. ജീവ് ജയിംസ് പ്രസിഡന്‍റായി ചുമതലയേറ്റ് ഒരു വർഷത്തിനകം നടപ്പാക്കിയ വ്യത്യസ്ത വിഭാഗങ്ങളിലായുള്ള 19 മെഡിക്കൽ ക്യാന്പുകൾ, ഡ്രഗ്, സൈബർ സെക്യൂരിറ്റി, ട്രാഫിക് റൂൾ, ഹെൽത്ത്, ഫാമിലി വെൽഫെയർ, മെന്‍റൽ ഹെൽത്ത് എന്നിവ ഉൾപ്പെടെ 23 ബോധവത്കരണ ക്ലാസുകൾ, നിർധന രോഗികൾക്കു നടപ്പാക്കിയ സഹായ പദ്ധതികൾ എന്നിവയടക്കമുള്ള പ്രവർത്തനങ്ങൾ പരിഗണിച്ചാണ് പുരസ്കാരം. മൂന്ന് സ്കൂളുകളിൽ കുടിവെള്ള പ്യൂരിഫയർ, നിർധന രോഗികൾക്ക് ചികിത്സാ സഹായം എന്നിവയും പരിസ്ഥിതി പ്രവർത്തനം, പച്ചക്കറി, ജൈവ കന്പോസ്റ്റ് നിർമാണ പദ്ധതികൾക്കൊപ്പം പൊതുസ്ഥലം ശുചിയായി സംരക്ഷിക്കുന്നതിനുള്ള പദ്ധതികളും റോഡ് സുരക്ഷാ പദ്ധതികളും നടപ്പാക്കി. എല്ലാ മാസവും ഹംഗർ റിലീഫ് പദ്ധതികളും നടത്തി വരുന്നതിനൊപ്പം വൃദ്ധസദനങ്ങളിലെ അന്തേവാസികൾക്ക് സൗജന്യമായി മരുന്നും ഭക്ഷണവും ചികിത്സാസഹായവും നൽകുന്നുണ്ട്. പ്രവർത്തന മികവിന്‍റെ അടിസ്ഥാനത്തിൽ ലയൺസ് ക്ലബ് പാടിയോട്ടുചാലിന് നിരവധി അവാർഡുകൾ ലഭിച്ചിട്ടുണ്ട്. മികച്ച പ്രസിഡന്‍റ്, സർവീസ് പ്രോജക്ടുകൾ ചെയ്തതിന് പ്രത്യേക അവാർഡുകൾ, മെംബർഷിപ്പ് ഗ്രോത്ത് അവാർഡ്, ബെസ്റ്റ് ക്ലബ് പ്രസിഡന്‍റ് അവാർഡ് തുടങ്ങിയവയും ക്ലബ്ബിന് ലഭിച്ചിട്ടുണ്ട്.

വിദ്യാർഥികൾക്ക് ക്വിസ് മത്സരം സംഘടിപ്പിച്ചു

തളിപ്പറമ്പ്: വിദ്യാരംഗം തളിപ്പറമ്പ് നോർത്ത് ഉപജില്ലാ കമ്മറ്റിയുടെ നേതൃത്വത്തിൽ വായന മാസാചരണ ഭാഗമായി വിദ്യാർഥികൾക്ക് ക്വിസ് മത്സരം സംഘടിപ്പിച്ചു. തളിപ്പറമ്പ് നോർത്ത് എഇഒ കെ. മനോജ് ഉദ്ഘാടനം ചെയ്തു. എം.എം. ജനാർദനൻ അധ്യക്ഷത വഹിച്ചു. പി. ഇബ്രാഹിം, ജിഷ ചാലിൽ, പി.വി. വന്ദന, കെ. സുമതി എന്നിവർ പ്രസംഗിച്ചു. പി.ജെ. സജി, കൃഷ്ണൻ, എ.എ നിധീഷ് എന്നിവർ ക്വിസ് മത്സരം നയിച്ചു. യുപി വിഭാഗത്തിൽ പട്ടുവം യുപി എസിലെ കെ. സാവേദ് , പുല്യാഞ്ഞോട് യുപിഎസിലെ ധനുഷ് ദേവ്, ഇരിങ്ങൽ യുപിഎസിലെ നിഗിദ് സുരേഷ്, ജി യുപിഎസ് പൂവഞ്ചാലിലെ കെ.വി.അനുനന്ദ എന്നിവരും, എൽപി വിഭാഗത്തിൽ നടുവിൽ എൽപിഎസിലെ കെ.വി. ശിവനന്ദ്, ജിഎൽപിഎസ് പനക്കാടിലെ പി.വ സരോദ്, ഇരിങ്ങൽ യുപിഎസിലെ യു അഥർവദേവ്, കൂനം എൽപിഎസിലെ പി.ആർ. ഋഷിദേവ് എന്നിവരും ഹൈസ്കൂൾ വിഭാഗത്തിൽ എൻഎസ്എസ്എച്ച്എസ്എസിലെ സഞ്ജയ് അനിൽ, ടാഗോർ വിദ്യാനികേതൻ ജിഎച്ച്എസ് എസിലെ എൻ.വി. സിദ്ധാർഥി, ബിവിജെഎംഎച്ച്എസ് എസിലെ എം.ആർ. ശിവാനി , നടുവിൽ എച്ച്എസ് എസിലെ ലക്ഷ്മി കൃഷ്ണ എന്നിവരും സമ്മാനർഹരായി.

കാറിടിച്ച് ബൈക്ക് യാത്രക്കാരനും കുടുംബവും ഗുരുതരാവസ്ഥയിൽ

നടുവിൽ: എതിർദിശയിൽ അമിത വേഗതയിൽ വന്ന കാറിടിച്ച് ബൈക്ക് യാത്രക്കാരനും കുടുംബത്തിനും പരിക്കേറ്റു. കുടുംബശ്രീ കാസർഗോഡ് ജില്ലാ പ്രോഗ്രാം ഓഫീസർ പെരുമ്പടവ് തലവിലെ പി.കെ. രത്നേഷ് (33), ഭാര്യ അശ്വതി (24), മകൾ ഇഷാനി (മൂന്ന്) എന്നിവർക്കാണു ഗുരുതരമായി പരിക്കേറ്റത്. ഇവരെ കണ്ണൂരിലുള്ള സ്വകാര്യ ആശുപത്രിയിലെ അത്യാഹിത വിഭാഗത്തിൽ പ്രവേശിപ്പിച്ചു. ഇന്നലെ ഉച്ചകഴിഞ്ഞ് രണ്ടോടെ മലയോര ഹൈവേയിൽ നടുവിൽ ബിടിഎം ഇംഗ്ലീഷ് മീഡിയം സ്കൂളിന് മുന്നിലായിരുന്നു അപകടം. രത്നേഷും കുടുംബവും തലവില്‍ നിന്നും ചേപ്പറമ്പിലുള്ള ഭാര്യവീട്ടിലേക്കു പോകുമ്പോൾ എതിർ ഭാഗത്തുനിന്നും രണ്ടു വാഹനങ്ങളെ മറികടന്ന് തെറ്റായ ദിശയിൽ അമിതവേഗതയിൽ വന്ന കാർ ഇവരെ ഇടിച്ചുതെറിപ്പിക്കുകയായിരുന്നുവെന്ന് സിസിടിവി ദൃശ്യങ്ങളിൽ നിന്നും വ്യക്തമാകുന്നു. പെരുമ്പടവ് സ്വദേശി പെരുവംകാവുങ്കൽ പി.എ. അനീഷ് (35) വാടകയ്ക്കെടുത്ത കാറാണ് അപകടമുണ്ടാക്കിയത്. ഇയാളായിരുന്നു കാറ് ഓടിച്ചിരുന്നത്. ഇവർ കുടുംബസമേതം കൊട്ടിയൂരിൽ പോയി പെരുമ്പടവിലേക്ക് മടങ്ങുകയായിരുന്നു.

തിരുഹൃദയ തിരുസ്വരൂപ പ്രയാണം നടത്തി

വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് ഫൊറോനാ ഇടവകയും തിരുഹൃദയ സന്യാസിനീ സമൂഹം തലശേരി സെന്‍റ് ജോസഫ്സ് പ്രൊവിൻസും സംയുക്തമായി വായാട്ടുപറന്പ് ഇടവകയിൽ തിരുഹൃദയ തിരുസ്വരൂപ പ്രയാണം നടത്തി. ഫൊറോനാ വികാരി റവ. ഡോ. തോമസ് തെങ്ങുംപള്ളി, അസിസ്റ്റന്‍റ് വികാരി ഫാ. നോയൽ ആനിക്കുഴിക്കാട്ടിൽ, കോ-ഓർഡിനേറ്റർ പി. ജെ.മാത്യു, പാരിഷ് സെക്രട്ടറി ജെയ്സൺ അട്ടാറിമാക്കൽ, കൈക്കാരന്മാർ, ഇടവകാ പ്രതിനിധികളും പ്രയാണത്തിന് നേതൃത്വം നൽകി. തിരുഹൃദയ സന്യാസിനീ സമൂഹം പ്രൊവിൻഷ്യൽ സുപ്പീരിയർ സിസ്റ്റർ ഡോ. ട്രീസ പാലയ്ക്കൽ എസ്എച്ച്, സിസ്റ്റർ ആൻസി ടോം പയ്യമ്പള്ളി എസ്എച്ച്, സിസ്റ്റർ പ്രീതി കണ്ണേഴത്ത് എസ്എച്ച് എന്നിവർ പള്ളിയിലും, താവുകുന്ന് ബാലപുരം എന്നിവിടങ്ങളിലുമായി സന്ദേശം നൽകി. 200ലധികം വാഹനത്തിന്‍റെ അകമ്പടിയോടുകൂടിയായിരുന്നു പ്രയാണം. ഈശോയുടെ തിരുഹൃദയം എല്ലായിടത്തും അറിയപ്പെടാനും ക്രിസ്തീയ കുടുംബങ്ങളിൽ തിരുഹൃദയ പ്രതിഷ്ഠ നടത്തുന്നതിന്‍റെ പ്രാധാന്യവും പ്രഘോഷിച്ചു കൊണ്ട് ഇടവക ദൈവാലയത്തിൽ തിരുഹൃദയ പ്രതിഷ്ഠയ്ക്കും ദിവ്യബലിയ്ക്കും ശേഷം റാലി സമാപിച്ചു. നേർച്ച ഭക്ഷണവും ഒരുക്കിയിരുന്നു.

സിന്‍ഡിക്കറ്റിനെ നോക്കുകുത്തിയാക്കി ബിഎഡ് കോഴ്‌സുകള്‍ റദ്ദാക്കി

കാസര്‍ഗോഡ്: കണ്ണൂര്‍ സര്‍വകലാശാലയുടെ കാസര്‍ഗോഡ് വിദ്യാനഗറിലെ ചാല ബിഎഡ് സെന്‍ററില്‍ മാത്തമാറ്റിക്‌സ്, ഫിസിക്കല്‍ സയന്‍സ് കോഴ്‌സ് ഓപ്ഷന്‍ വൈസ്ചാന്‍സലര്‍ റദ്ദാക്കിയത് സിന്‍ഡിക്കറ്റിനെ മറികടന്ന്. കാമ്പസിനെ സജീവമാക്കിയിരുന്ന ബഹുഭാഷാ പഠനകേന്ദ്രം അടച്ചതിനു പിന്നാലെയാണ് കാസര്‍ഗോഡ് ജില്ലയിലെ വിദ്യാഭ്യാസമേഖലയില്‍ ഒരു പൂട്ടുകൂടി വീണത്. സര്‍വകലാശാല റജിസ്ട്രാറും ഒരു സിന്‍ഡിക്കറ്റ് അംഗവും ഉള്‍പ്പെട്ട ഉപസമിതിയുടെ ശിപാര്‍ശ എന്ന പേരില്‍ വെറും ഫയല്‍ മുഖേന എടുത്ത തീരുമാനത്തിലൂടെയാണ് സിന്‍ഡിക്കറ്റ് അംഗീകാരമില്ലാതെ കോഴ്‌സുകള്‍ റദ്ദാക്കിയതെന്നാണ് ആരോപണം. കോഴ്‌സുകള്‍ അനുവദിക്കുക, ഒഴിവാക്കുക, അധ്യാപകരെ നിയമിക്കുക തുടങ്ങിയ കാര്യങ്ങളില്‍ സിന്‍ഡിക്കറ്റിന്‍റെ തീരുമാനം നിര്‍ണായകമാണ്. കോഴ്സുകള്‍ ഒഴിവാക്കുന്ന വിവരം സംബന്ധിച്ച ഉത്തരവ് ഇറങ്ങിയപ്പോഴാണു സിന്‍ഡിക്കറ്റ് അംഗങ്ങളും അധ്യാപകരും ഉള്‍പ്പെടെ അറിഞ്ഞത് എന്നാണ് പറയുന്നത്. കാമ്പസുകള്‍ ഓരോന്നായി അടച്ച് വിദ്യാര്‍ഥികള്‍ക്കുള്ള അവസരം നിഷേധിക്കുന്നതിന്‍റെ ഭാഗമായാണ് ഈ രഹസ്യനീക്കമെന്ന ആരോപണവുമുണ്ട്. രണ്ടു കോഴ്സ് റദ്ദാക്കിയാല്‍ രണ്ട് അധ്യാപക തസ്തിക കുറയും. ചെലവ് കുറയ്ക്കാന്‍ എന്ന പേരില്‍ കോഴ്‌സുകള്‍ റദ്ദാക്കുമ്പോള്‍ നഷ്ടമാകുന്നത് ഈ മേഖലയിലെ പാവപ്പെട്ട വിദ്യാര്‍ഥികളുടെ അവസരമാണ്. സ്വകാര്യസ്ഥാപനങ്ങള്‍ക്കുവേണ്ടിയാണ് സര്‍ക്കാര്‍ സ്ഥാപനങ്ങളില്‍ കോഴ്സുകള്‍ വെട്ടിക്കുറച്ചതെന്നും ആരോപണവുമുണ്ട്. കേരള-കര്‍ണാടക അതിര്‍ത്തി ജില്ലയെന്ന നിലയില്‍ കാസര്‍ഗോഡ് ജില്ലയില്‍ ഭാഷാ ന്യൂനപക്ഷ പരിഗണനപോലും ലംഘിച്ചാണ് രണ്ടു കോഴ്‌സുകളും റദ്ദാക്കിയതെന്നും പരാതികളുണ്ട്. റിട്ട. ചീഫ് സെക്രട്ടറി പി. പ്രഭാകരന്‍റെ നേതൃത്വത്തില്‍ സര്‍ക്കാരിനു സമര്‍പ്പിച്ച സമഗ്ര കാസര്‍ഗോഡ് വികസന പാക്കേജ് നിര്‍ദേശങ്ങള്‍ക്കും സര്‍വകലാശാലയുടെ തീരുമാനം വിരുദ്ധമാണ്. ആവശ്യത്തിന് വിദ്യാഭ്യാസ സൗകര്യങ്ങളുടെ അഭാവം കാരണം അയല്‍ സംസ്ഥാനങ്ങളെ ആശ്രയിക്കേണ്ട സാഹചര്യത്തില്‍ പലരും പകുതിവഴിയില്‍ പഠനം നിര്‍ത്താന്‍ നിര്‍ബന്ധിതമാകുന്നതായി പ്രഭാകരന്‍ കമ്മിഷന്‍ സംസ്ഥാന സർക്കാരിന് സമര്‍പ്പിച്ച റിപ്പോര്‍ട്ടില്‍ ചൂണ്ടിക്കാട്ടിയിരുന്നു. ജൂലൈ നാലിനു ചേരുന്ന സിന്‍ഡിക്കറ്റ് യോഗം കാസര്‍ഗോഡ് ചാല കേന്ദ്രത്തിലെ രണ്ടു കോഴ്സുകള്‍ റദ്ദാക്കിയ തീരുമാനം ചര്‍ച്ച ചെയ്‌തേക്കും. 12 അംഗ സിന്‍ഡിക്കറ്റ് തീരുമാനം ഈ കോഴ്‌സുകള്‍ പുനഃസ്ഥാപിക്കുന്നതിന് നിര്‍ണായകമാകും. കോഴ്‌സുകള്‍ റദ്ദാക്കാന്‍ ശിപാര്‍ശ ചെയ്ത ഉപസമിതിയെയും റദ്ദാക്കാന്‍ ഉത്തരവിട്ട വിസിയെയും കാര്യങ്ങള്‍ ബോധ്യപ്പെടുത്തി കോഴ്‌സുകള്‍ നിലനിര്‍ത്തുമെന്ന പ്രതീക്ഷയിലാണ് വിദ്യാര്‍ഥികളും ജില്ലയും.

ചുരുളി : നടൻ ജോജുവിനെ തള്ളി കഥാകൃത്ത് വിനോയ് തോമസ്

ഉളിക്കൽ: ചുരുളി സിനിമ സംബന്ധിച്ച് നടൻ ജോജു ഉന്നയിച്ച ആരോപണങ്ങൾ തള്ളി കഥാകൃത്തും എഴുത്തുകാരനുമായ ഉളിക്കൽ സ്വദേശി വിനോയ് തോമസ്. സിനിമയിൽ ജോജ് അഭിനയിച്ച രംഗങ്ങൾ സ്കൂളിൽ പഠിക്കുന്ന മകളെ ആൺസുഹൃത്തുക്കൾ കാട്ടികൊടുത്തതിനെ തുടർന്ന് മകൾ ഇക്കാര്യം ജോജുവിനോട് ചോദിച്ചതോടെയാണ് നടൻ സിനിമയ തള്ളിപ്പറഞ്ഞതും വിവാദം ആരംഭിച്ചതും. ഫിലം ഫെസ്റ്റിവലിൽ പ്രദർശിപ്പിക്കാൻ വേണ്ടി മാത്രമുള്ള സിനിമയാണെന്ന ഉറപ്പിലാണ് താൻ അഭിനയിച്ചതെന്നും എന്നാൽ ചിത്രം തീയറ്റുകളിൽ പ്രദർശിപ്പിച്ചുവെന്നുമാണ് ജോജു ആരോപിച്ചത്.എന്നാൽ നടന്‍റെ ആരോപണങ്ങൾ അടിസ്ഥാന രഹിതമാണെന്ന് അഞ്ചു വർഷത്തിനു ശേഷമുണ്ടായ വിവാദത്തെ കുറിച്ച് കഥാകാരൻ വിനോയ് തോമസ് ദീപികയോട് പറഞ്ഞു. കുറ്റവാളികളുടെയും പോലീസിന്‍റെയും സിനിമയിലൂടെ പറഞ്ഞത്. കേരളത്തിൽ കുറ്റം ചെയ്തതിന് ശേഷം ഒളിവിൽ പോയ പ്രതിയെ തേടി പോകുന്നതാണ് കഥ. പലകുറ്റകൃത്യങ്ങൾക്ക് ശേഷം പലരും ഇതു പോലുളള പ്രദേശങ്ങളിലെക്ക് രക്ഷപെടുന്നുണ്ട്. കുറ്റവാളികളുള്ള ഒരു ഗ്രാമത്തിലെ കഥയിൽ അവർ ഉപയോഗിക്കുന്ന സംസാര ശൈലി മാത്രമാണ് സിനിമയിൽ സംഭാഷണമാക്കിയത്. കഥയെ കഥായി ഉൾക്കൊള്ളണമെന്നും വിനോയ് തോമസ് പറഞ്ഞു. ഒടിടി പ്ലാറ്റ്ഫോമിനായി ഇനിയൊരു സിനിമയും നിർമിക്കില്ല. സിനിമ എവിടെ പ്രദശിപ്പിക്കണം എന്ന് തിരുമാനിക്കുന്നത് നിർമാതവും സംവിധായകനുമാണ്. എങ്കിലും ചുരുളി ഒടിടിയിൽ മാത്രമാണ് പ്രദശിപ്പിച്ചത്. സോണി ലൈവ് എന്ന കമ്പനിക്കാണ് പ്രദർശനാനുമതി. സിനിമ പതിനെട്ട് വയസ് പൂർത്തിയായവർ മാത്രമേ കാണാൻ പാടുള്ളൂ എന്ന് പ്രത്യേകം നിർദേശിച്ചിരുന്നു. ഈ ചിത്രം എങ്ങനെ വിദ്യാർഥികളുടെ കൈകളിൽ എത്തി എന്നത് സർക്കാർ അന്വേഷിക്കണം. സമൂഹ്യ മാധ്യമങ്ങളിൽ പ്രദർശിച്ചവർക്ക് ഐ ടി വകുപ്പനുസരിച്ച് നടപടി സ്വീകരിക്കണം. ചുരുളി ഇറങ്ങുമ്പോൾ ഒ ടി ടി പ്ലാറ്റഫോമിൽ പ്രദർശിപ്പിക്കുന്ന പടങ്ങൾക്ക് സെൻസർ ബോർഡിന്‍റെ അുമതി ആവശ്യമില്ലായിരുന്നു. ചിത്രത്തിൽ മറ്റ് അശ്ലീല രംഗങ്ങൾ ഒന്നുമില്ല. സിനിമയയുടെ പുതുമ അതിലെ സംഭാഷണം തന്നെയാണ്. ചിത്രത്തിലെ എല്ലാ അഭിനേതാക്കൾക്കും അവരുടെ ശമ്പളം കൃത്യമായി നൽകിയിട്ടുണ്ട് എന്നാണ് ബന്ധപ്പെട്ടവരിൽനിന്നും അറിയാൻ കഴിഞ്ഞത്. ജോലി ചെയ്തതിന് കൂലി ലഭിച്ചില്ലെങ്കിൽ അഞ്ചു വർഷത്തോളം മിണ്ടാതിരിക്കുന്നവരുടെ നാടാണ് കേരളമെന്ന് താൻ വ്യക്തി പരമായി കരുതുന്നില്ലെന്നും വിനോയ് തോമസ് പറഞ്ഞു.

കൊട്ടിയൂർ തീർഥാടക സംഘം സഞ്ചരിച്ച വാഹനം ബസിനു പിന്നിലിടിച്ച് ആറുപേർക്കു പരിക്ക്

ഇരിട്ടി: കൊട്ടിയൂർ തീർഥാടകർ സഞ്ചരിച്ച ടെമ്പോ ട്രാവലർ നിയന്ത്രണം വിട്ട് കെഎസ്ആർടിസി ബസിനു പിറകിലിടിച്ച് ആറുപേർക്കു പരിക്ക്. എറണാകുളത്തുനിന്നും എത്തിയ തീർഥാടകർ കൊട്ടിയൂർ ദർശനം കഴിഞ്ഞ് പറശിനിക്കടവിലേക്ക് പോകുന്നതിനിടെയായിരുന്നു അപകടം. കെ. കെ. മായ (57) വടുതല, ഷീല ഹരിദാസ് (58) കുമ്പളം, ശുഭ മുരളി (56) ചിറ്റൂർ, എറണാകുളം സ്വദേശികളായ ശ്രീനികുമാർ (52), ടി.സി. സീമ (45), സി.എസ്. ശ്രീരാഗ് (16) എന്നിവർക്കാണു പരിക്കേറ്റത്. ഇവർ ഇരിട്ടിയിലെ സ്വകാര്യ ആശുപത്രിയിൽ ചികിത്സ തേടി. ഇന്നലെ രാവിലെ 8.30 ഓടെ ഇരിട്ടി-തളിപ്പറമ്പ് റോഡിൽ പെരുമ്പറമ്പ് സ്‌കൂൾ കയറ്റത്തിലായിരുന്നു അപകടം. കൊട്ടിയൂരിൽ ദർശനം കഴിഞ്ഞ് കണ്ണൂർ പറശിനിക്കടവിലേക്ക് പോവുകയായിരുന്ന തീർഥാടക സംഘം സഞ്ചരിച്ച ട്രാവലർ ഇതിനു മുന്നിലായി തളിപ്പറമ്പിലേക്കു പോവുകയായിരുന്ന കെഎസ് ആർടിസി ബസിന്‍റെ പിറകിൽ ഇടിക്കുകയായിരുന്നു. അപകടത്തിൽ ട്രാവലറിന്‍റെ ഉള്ളിൽ കുടുങ്ങിപ്പോയവരെ ഇരിട്ടി സ്റ്റേഷൻ ഓഫീസർ ഉണ്ണികൃഷ്ണന്‍റെ നേതൃത്വത്തിലുള്ള അഗ്നിരക്ഷാസേനയെത്തി വാതിൽ വെട്ടിപ്പൊളിച്ച് പുറത്തെടുത്ത് ആശുപത്രിയിൽ എത്തിക്കുകയായിരുന്നു. അസിസ്റ്റന്‍റ് ഓഫീസർ എൻ.ജി. അശോകൻ, ഫയർമാൻമാരായ എ.സി. ഷാനിഫ്, ജസ്റ്റിൻ ജയിംസ്, സി.വി. സൂരജ്, ഹോംഗാർഡ് വി. രമേശൻ, ധനേഷ്, സരീഷ് എന്നിവരും അഗ്നിരക്ഷാസേനയുടെ സംഘത്തിലുണ്ടായിരുന്നു.

നിയമം നോക്കുകുത്തി; റാഗിംഗ് ക്രൂരത വര്‍ധിക്കുന്നു

സ്വന്തം ലേഖകന്‍ കാസര്‍ഗോഡ്: സ്‌കൂളില്‍ റാഗിംഗിനെതിരെ ബോധവത്കരണങ്ങളും പോലീസ് മുന്നറിയിപ്പുകളുമൊക്കെ ഒരു ഭാഗത്ത് നടക്കുമ്പോഴും ജില്ലയില്‍ റാഗിംഗ് ക്രൂരതയ്ക്ക് ഇരയാകുന്ന കുട്ടികളുടെ എണ്ണത്തില്‍ യാതൊരു കുറവുമുണ്ടാകുന്നില്ല. മഞ്ചേശ്വരം താലൂക്കിലെ സര്‍ക്കാര്‍ സ്‌കൂളില്‍ പ്ലസ് വണ്‍ ഹ്യുമാനിറ്റീസ് വിദ്യാര്‍ഥിയായ നജീബ് (യഥാര്‍ഥ പേരല്ല) സ്‌കൂളില്‍ വന്ന് അഞ്ചാംദിവസമാണ് പ്ലസ്ടു വിദ്യാര്‍ഥികളുടെ ക്രൂരമായ മര്‍ദ്ദനത്തിനിരയായത്. ബസ് സ്റ്റോപ്പില്‍ വെച്ച് താന്‍ മുമ്പ് പഠിച്ച സ്‌കൂളിലെ വിദ്യാര്‍ഥിനിയോട് സംസാരിച്ചതിനാണ് അഞ്ചു സീനിയര്‍ വിദ്യാര്‍ഥികള്‍ ചേര്‍ന്ന് നജീബിനെ പരസ്യമായി മര്‍ദ്ദിച്ചത്. അവരില്‍ ഒരാള്‍ തലയ്ക്കിട്ടാണ് അടിച്ചത്. ജൂണ്‍ 18ന് പ്ലസ് വണ്‍ വിദ്യാര്‍ഥികള്‍ക്കുള്ള ക്ലാസുകള്‍ ആരംഭിച്ചതുമുതല്‍ ഈ സ്‌കൂളില്‍ റാഗിംഗ് ക്രൂരത അരങ്ങേറുന്നു. ഷൂസ് ധരിച്ചതിന് നജീബ് നേരത്തെ ആക്രമിക്കപ്പെട്ടിരുന്നു. സ്‌കൂളില്‍ സീനിയര്‍ വിദ്യാര്‍ഥികള്‍ ജൂണിയര്‍ വിദ്യാര്‍ഥികള്‍ക്ക് ഡ്രസ് കോഡ് ഏര്‍പ്പെടുത്തിയിട്ടുണ്ട്. പ്ലസ് വണ്‍ വിദ്യാര്‍ഥികള്‍ ഫുള്‍ സ്ലീവ് ഷര്‍ട്ട് ധരിക്കണമെന്നും കോളര്‍ ബട്ടണ്‍ ഇടണമെന്നും വാച്ചുകളോ ഷൂസോ ഉപയോഗിക്കരുതെന്നുമാണ് ഇവരുടെ ചട്ടം. കൂടാതെ ജൂണിയര്‍ വിദ്യാര്‍ഥികളെ ശുചിമുറിയില്‍ കൊണ്ടുപോയി പുഷ്-അപ്പ് എടുപ്പിക്കും. എതിര്‍ത്താല്‍ ക്രൂരമായി മര്‍ദ്ദിക്കും. ഈ സ്‌കൂളിലേക്ക് ഇനി പോകുന്നില്ലെന്ന തീരുമാനമെടുത്ത നജീബ് മറ്റൊരു സ്‌കൂളിലേക്ക് മാറ്റത്തിനായി ശ്രമിക്കുകയാണ്. കാസര്‍ഗോഡ് താലൂക്കിലെ മറ്റൊരു ഗവ. സ്‌കൂളില്‍ പ്ലസ് വണ്‍ കൊമേഴ്‌സ് വിദ്യാര്‍ഥിയായ ഫഹദിനെ (യഥാര്‍ഥ പേരല്ല) സീനിയര്‍ വിദ്യാര്‍ഥികള്‍ മര്‍ദ്ദിക്കുകയും തള്ളിയിടുകയും ക്ലാസ് മുറിയില്‍ ഒരു ബെഞ്ച് എറിയുകയും ചെയ്തതിനെ തുടര്‍ന്ന് കൈത്തണ്ട ഒടിഞ്ഞു. ഫഹദിന് ആറ് ആഴ്ച പൂര്‍ണ വിശ്രമം ഡോക്ടര്‍ നിര്‍ദേശിച്ചിട്ടുണ്ട്. അസ്ഥിക്ക് വീണ്ടും സ്ഥാനഭ്രംശം സംഭവിച്ചാല്‍ ശസ്ത്രക്രിയ ആവശ്യമായി വന്നേക്കാം. തലയ്ക്കുനേരെയാണ് ബെഞ്ച് എറിഞ്ഞതെന്നും കൈകൊണ്ട് തടുത്തപ്പോള്‍ കൈയൊടിഞ്ഞതാണെന്നും ഫഹദിന്‍റെ അമ്മ പറയുന്നു. അക്രമമുണ്ടായ ദിവസം വീട്ടിലേക്ക് വന്നപ്പോള്‍ ഷര്‍ട്ടില്‍ മുഴുവന്‍ ഷൂസ് കൊണ്ട് ചവിട്ടിയ പാടുകളായിരുന്നെന്നും അവര്‍ കൂട്ടിച്ചേര്‍ത്തു. ഈ രണ്ടു കേസുകളിലും പോലീസ് കലാപം, നിയമവിരുദ്ധമായ സംഘം ചേരല്‍, തെറ്റായ നിയന്ത്രണം, സ്വമേധയാ പരിക്കേല്‍പ്പിക്കല്‍ തുങ്ങിയ വകുപ്പുകള്‍ പ്രകാരം എഫ്ഐആര്‍ രജിസ്റ്റര്‍ ചെയ്തത്. അതിനാല്‍ തന്നെ റാഗിംഗ് നടത്തിയ കുട്ടികളുടെ സസ്‌പെന്‍ഷനില്‍ ശിക്ഷ ഒതുങ്ങുകയാണ് ചെയ്യുക. ഇത് അവരെ സംബന്ധിച്ചിടത്തോളം അവധിക്കാലം പോലെ മാത്രമാണെന്നാണ് വിമര്‍ശനമുയരുന്നത്. എന്നാല്‍ ഇതുപോലുള്ള സംഭവങ്ങള്‍ക്കായി പ്രത്യേകം ഉദ്ദേശിച്ചിട്ടുള്ള നിയമമായ കേരള റാഗിംഗ് നിരോധന നിയമം ചുമത്തിയിട്ടില്ല. ഈ ആക്ടിലെ സെക്ഷന്‍ നാല് പ്രകാരം കുറ്റം തെളിയിക്കപ്പെട്ടാല്‍ രണ്ടുവര്‍ഷം തടവും 10,000 രൂപ പിഴയും ലഭിക്കും. സെക്ഷന്‍ ആറ് സ്‌കൂളില്‍ നിന്നു പുറത്താക്കാനും മറ്റു വിദ്യാഭ്യാസ സ്ഥാപനങ്ങളില്‍ പ്രവേശനം നേടുന്നതില്‍ നിന്നു മൂന്നുവര്‍ഷം വിലക്കാനും നിര്‍ദേശിക്കുന്നു. എന്നാല്‍ നിയമം പ്രയോഗിക്കാന്‍ പോലീസ് പലപ്പോഴും മടിക്കുകയാണ് അതിനാല്‍ തന്നെ കുറ്റകൃത്യങ്ങളും ഏറുന്നു. റാഗിംഗ് ചെയ്താലുണ്ടാകുന്ന ഭവിഷ്യത്തുകളെക്കുറിച്ച് സ് കൂളിൽ ബോധവത്കരണക്ലാസ് നടത്തിയിരുന്നതായി ഒരു പ്രിന്‍സിപ്പല്‍ പറയുന്നു. എന്നാല്‍ കുട്ടികള്‍ക്കും നിയമത്തെക്കുറിച്ച് നല്ല ബോധ്യമുണ്ടെന്നും ഏതു പോലീസ് സ്റ്റേഷനാണ് റാഗിംഗ് നടത്തിയാല്‍ തങ്ങള്‍ക്ക് ജാമ്യം നല്‍കാത്തതെന്ന് ഒരു കുട്ടി പോലും തന്നോട് ചോദിച്ചതയി അദ്ദേഹം കൂട്ടിച്ചേര്‍ത്തു. ഇന്ന് തങ്ങളുടെ പെണ്‍കുട്ടികളേക്കാള്‍ ആണ്‍കുട്ടികളെ സ്‌കൂളിലേക്ക് അയയ്ക്കാനാണ് ഭയപ്പെടുന്നതെന്ന് ആക്രമണത്തിരയായ കുട്ടികളുടെ അമ്മമാര്‍ പറയുന്നു.

കൃഷിക്കും മനുഷ്യർക്കും ഭീഷണി; ആഫ്രിക്കൻ ഒച്ചുകൾ പെരുകുന്നു

കണ്ണൂർ: കണ്ണൂർ നഗരത്തിലടക്കം ജില്ലയിലെ വിവിധ പ്രദേശങ്ങളിൽ ആഫ്രിക്കൻ ഒച്ചുകൾ പെരുകുന്നു. ജയിന്‍റ് ആഫ്രിക്കൻ സ്നെയിൽ എന്നറിയപ്പെടുന്ന ആഫ്രിക്കൻ ഒച്ച് സസ്യജാലങ്ങൾക്കും മനുഷ്യർക്കും ശരിക്കും ഭീകരൻ കൂടിയാണ്. ജില്ലയിൽ കണ്ണൂർ കോർപറേഷന്‍റെ വിവിധ ഭാഗങ്ങൾ, മുണ്ടേരി, ചക്കരക്കൽ, മയ്യിൽ, അഴിക്കോട്, കണ്ണപുരം, ചെറുകുന്ന്, ഇരിട്ടി, ചപ്പാരപ്പടവ് പഞ്ചായത്തിലെ പതിനേഴാം വാർഡായ എടക്കോം, മഠംതട്ട് എന്നിവിടങ്ങളിലെല്ലാം ഒച്ചുശല്യം രൂക്ഷമാണ്. പച്ചപ്പുകൾ കാർന്നുതിന്നു നശിപ്പിക്കുന്നതിനൊപ്പം വീട്ടിനകത്തും മറ്റും ഇഴഞ്ഞുനീങ്ങുന്നിടങ്ങളിലെ സ്രവവും വലിയ ബുദ്ധിമുട്ടാണ് സൃഷ്ടിക്കുന്നത്. മുട്ടയിൽനിന്ന് വിരിയുന്പോൾ ഒരു കടുകുമണിയോളം മാത്രമുള്ള ആഫ്രിക്കൻ ഒച്ച് കിട്ടിയതെല്ലാം കാർന്നുതിന്ന് ദിവസങ്ങൾക്കുള്ളിൽ വലിപ്പം പ്രാപിക്കും. പച്ചപ്പുകളാണ് പ്രധാന ഭക്ഷണം. പച്ചക്കറി, പൂച്ചെടികൾ, വാഴ, മഞ്ഞൾ, കവുങ്ങ്, കാപ്പി, കിഴങ്ങുവർഗങ്ങൾ, മണ്ണിലേക്ക് തുരന്നിറങ്ങി തെങ്ങിന്‍റെ വേരുകൾ എന്നിവയെല്ലാം ഇവ തിന്നുതീർക്കും. ആഫ്രിക്കൻ ഒച്ചുകൾ കാർഷികമേഖലയ്ക്ക് വലിയ ഭീഷണിയാണ് ഉയർത്തുന്നത്. കിണറുകളും മലിനമാക്കുന്നുണ്ട്. പകൽച്ചെടികളുടെ മറവിലും മണ്ണിലും പുതഞ്ഞ് നിൽക്കുന്ന ഇവ വൈകുന്നേരങ്ങളോടെയാണ് കൂടുതലായും പുറത്തുവരിക. പകൽ വെയിലിന് ചൂടേറുന്പോഴേക്കും സുരക്ഷിത സ്ഥാനങ്ങളിലേക്ക് മാറും. അതു കൊണ്ട് തന്നെ മഴക്കാലത്തും തണുപ്പുകാലത്തുമാണ് ഇവയെ കൂടുതലായി പകൽ സമയങ്ങളിൽ കണ്ടുവരുന്നത്. കട്ടിയുള്ള പുറന്തോടുള്ള ഇവയ്ക്കു മേൽ ഇരുചക്രവാഹനങ്ങൾ കയറി നിയന്ത്രണംവിട്ട് അപകടങ്ങളും സംഭവിക്കുന്നുണ്ട്. ഓമനയായെത്തി ഭീകരനായി അക്കാറ്റിന ഫുലിക് എന്ന ശാസ്ത്രനാമത്തിൽ അറിയപ്പെടുന്ന ആഫ്രിക്കൻ ഒച്ചിന്‍റെ ജന്മദേശം കിഴക്കൻ ആഫ്രിക്കയാണ്. കടൽ ശംഖിനോടു സാമ്യമുള്ള തോടും വലിപ്പവും കാരണം കാഴ്ചക്കാരിൽ കൗതുകം നിറയ്ക്കുന്ന ഇത് ഒരു കാലത്ത് വീടുകളിൽ ചില്ലുകൂട്ടിലെ വളർത്തു ജീവിയായിരുന്നു. പിന്നീട് പലരും ഉപേക്ഷിച്ചതോടെ നാട്ടിൽ പെരുകി. ഒച്ചുകൾ നാട്ടിൽ പെരുകിയതിനെ തുടർന്ന് നടത്തിയ പഠനങ്ങളിൽ ഞെട്ടിപ്പിക്കുന്ന വിവരങ്ങളാണ് കണ്ടെത്തിയത്. മനുഷ്യരിൽ ഈസിനോഫിലിക് മെനിഞ്ചൈറ്റസ് എന്ന മസ്തിഷ്ക ജ്വരത്തിനിടയാക്കുന്ന ജീവികൂടിയാണിതെന്നാണ് ഞെട്ടിപ്പിക്കുന്ന കണ്ടെത്തൽ. രോഗവാഹകരായ നിമ വിരകളെ പടർത്തുന്നതിലും ഇതിന് വലിയ പങ്കുണ്ട്. ആഫ്രിക്കൻ ഒച്ചിന്‍റെ ശരീരം നിമവിരകളുടെ ആവാസ കേന്ദ്രമാണ്. ഇഴഞ്ഞു നീങ്ങുന്നിടങ്ങളിലെ സ്രവങ്ങൾ സ്പർശിച്ച ശേഷം കൈകൾ ശരിയായ രീതിയിൽ കഴുകാതെ ഭക്ഷണം കഴിച്ചാലോ സ്രവം കലർന്ന പച്ചക്കറിയോ പഴ വർഗങ്ങളോ ശരിയാ രീതിയിൽ കഴുകാതെ ഭക്ഷിച്ചാൽ വിരകൾ ശരീരത്തിലേക്ക് കടക്കുകയും രോഗത്തിലേക്ക് നയിക്കുകയും ചെയ്യും. വർഷത്തിൽ അഞ്ചു മുതൽ ആറു തവണ മുട്ടകളിടുന്ന ജീവിയാണ് ആഫ്രിക്കൻ ഒച്ച്. ഒരു തവണ 200 മുട്ടകൾ വരെ ഇടും. ആറു മാസം കൊണ്ട് പൂർണ വളർച്ചയെത്തുന്ന ഇവയുടെ ജീവിത ദൈർഘ്യം അഞ്ചു മുതൽ പത്തു വർഷമാണ്. ജീവിത ചക്രത്തിനിടയിൽ നിരവധി തവണ മുട്ടകളിടുന്നതിനാലാണ് ഒരു പ്രദേശത്ത് പെട്ടെന്ന് ഇവയുടെ പെരുപ്പം അനുഭവപ്പെടുന്നത്. ജൈവാവിശിഷ്ടങ്ങൾ കൂട്ടിയിടുന്നിടങ്ങളിലാണ് ഇവ മുമുട്ടിയിട്ട് പെരുകുന്നത്. ജൈവാവശിഷ്ടങ്ങൾ കൂട്ടിയിടാതിരിക്കലാണ് ഇവയുടെ വംശവർധന തടയാൻ ആദ്യം ചെയ്യേണ്ടത്. പ്രതിരോധ മാർഗങ്ങൾ ആഫ്രിക്കൻ ഒച്ചുകളെ പിടികൂടി ശേഖരിച്ച് നശിപ്പിക്കൽ മാത്രമാണ് പ്രതിരോധ മാർഗമായുള്ളത്. ആഫ്രിക്കൻ ഒച്ചുകളെ പിടികൂടി കുഴി കുത്തി അവയിലിട്ട് അതിനുമേൽ ഉപ്പും കുമ്മായവും വലിയതോതിൽ ഇട്ട് മൂടി ഇവയെ നശിപ്പിക്കാറുണ്ട്. പുളിപ്പിച്ച പൈനാപ്പിൾ, പഴം, ശർക്കര, ഈസ്റ്റ് എന്നിവ ഉപയോഗിച്ച് കെണി ഉണ്ടാക്കി ആകർഷിച്ച് കുഴിയിലിട്ട് ഉപ്പിട്ട് മൂടൽ, തുരിശ് ലായനി തളിക്കൽ, പുകയില-തുരിശ് ലായനി തളിക്കൽ, കാബേജ്, കോളിഫ്ലവർ, പപ്പായ ഇവയിൽ ഏതെങ്കിലും ഒന്നിന്‍റെ ഇലകൾ ചെറുതായി മുറിച്ച് ചതച്ച് നനഞ്ഞ ചാക്കിലോ ബെഡ്ഷീറ്റിലോ ഇട്ട് ഒച്ചുകളെ ആകർഷിപ്പിച്ച ശേഷം തുരിശും ഉപ്പും കലർത്തിയ വെള്ളം സ്പ്രേ ചെയ്ത് കുഴിച്ചു മൂടൽ, ഒരിഞ്ച് താഴ്ചയിൽ കുഴിയുണ്ടാക്കി അതിൽ പുളിപ്പിച്ച പൈനാപ്പിൾ, പഴം, ശർക്കര, ഈസ്റ്റ് എന്നിവ ഇട്ട് ഒച്ചുകളെ ആകർഷിച്ച് ഇവയ്ക്കു മേൽ ഉപ്പു വിതറിയും നശിപ്പിക്കാം. ഒരു ലിറ്റർ വെള്ളത്തിൽ പത്തു ഗ്രാം തുരിശ് കലക്കി തളിക്കുന്നത് ഒച്ചുകളെ നിയന്ത്രിക്കുന്നതിന് ഫലപ്രദമാണ്. പുകയില-തുരിശ് ലായനിയാണ് മറ്റൊരു നിയന്ത്രണ മാർഗം. 25 ഗ്രാം പുകയില 1.5 ലിറ്റർ വെള്ളത്തിൽ തിളപ്പിച്ച് ഒരു ലിറ്ററാക്കി കുറയ്ക്കുക. 60 ഗ്രാം തുരിശ് ഒരു ലിറ്റർ വെള്ളത്തിൽ ലയിപ്പിച്ച് രണ്ടും കൂട്ടിക്കലർത്തി ഒച്ചുകളുടെ മുകളിൽ തളിക്കുകയാണ് ചെയ്യേണ്ടത്. മുട്ടത്തോട്: ഇഴഞ്ഞു നീങ്ങുന്ന പ്രദേശത്ത് മുട്ടത്തോടുകൾ പൊട്ടിച്ചിട്ടാൽ ഇവയുടെ സുഗമമായ സഞ്ചാരം തടസപ്പെടുന്നതായി കാണുന്നുണ്ട്. മുട്ടത്തോടുകൾ ഒച്ചിന്‍റെ ശരീരത്തിലെ സ്രവത്തിൽ പറ്റിപ്പിടിക്കുന്നത് കാരണം ഇവയക്ക് മുന്നോട്ട് പോകാനാവില്ല. പച്ചക്കറികളുടെ തടത്തിൽ മുട്ടത്തോട് ഇടുന്നതിലൂടെ ഒച്ചുകളുടെ ആക്രമണം ഒരു പരിധിവരെ തടയാൻ കഴിയുന്നുണ്ട്.

കരുവഞ്ചാലിൽ അസ്ഥികൂടം കണ്ടെത്തിയ സംഭവത്തിൽ അന്വേഷണം ഊർജിതമാക്കി

കരുവഞ്ചാൽ: കരുവഞ്ചാൽ ഹണി ഹൗസിന് സമീപം പൂട്ടിയിട്ട വീടിന്‍റെ പരിസരത്തു നിന്ന് അസ്ഥികൾ കണ്ടെത്തിയ സംഭവത്തിൽ പോലീസ് അന്വേഷണം ഊർജിതമാക്കി. കണ്ണൂർ റൂറൽ കെ 9 ഡോഗ് സ്കോഡിലെ ലോലയും കണ്ണൂർ ഫോറൻസിക് വിദഗ്ധരും സ്ഥലത്തെത്തി പരിശോധന നടത്തി. പ്രവാസിയായ കുളത്തിനാൽ ബിജുവിന്‍റെ പൂട്ടിയിട്ട വീടും പരിസരവും വൃത്തിയാക്കുന്നതിനിടയിലാണ് ശനിയാഴ്ച വൈകുന്നേരം തലയോട്ടി ഉൾപ്പെടെയുള്ള മനുഷ്യ ശരീരഭാഗങ്ങളുടെ അസ്ഥികൾ കണ്ടെത്തിയത്. വിവരമറിഞ്ഞ് സ്ഥലത്തെത്തിയ ആലക്കോട് പോലീസ് സംഭവ സ്ഥലത്ത് കാവൽ ഏർപ്പെടുത്തുകയും ഞായർ രാവിലെ ഉയർന്ന ഉദ്യോഗസ്ഥർ ഉൾപ്പെടെ സ്ഥലത്തെത്തി കൂടുതൽ പരിശോധന നടത്തുകയുമായിരുന്നു. ഇന്നലെ നടത്തിയ തെരച്ചിലിൽ സ്ഥലത്തുനിന്നും നട്ടെല്ല്, വാരിയെല്ലുകൾ, കൈകാലുകളുടെ ബാക്കിയുള്ള അസ്ഥികൾ എന്നിവ കണ്ടെത്തി. കാവിമുണ്ട്, കള്ളികളുള്ള കറുത്ത ഷർട്ട്, അടിവസ്ത്രം എന്നിവയും കണ്ടെത്തി. ഷർട്ടിന്‍റെ കീശയിൽ നിന്ന് പച്ച നിറത്തിലുള്ള ചെറിയ നീളൻ ചീർപ്പ്, ചുണ്ണാമ്പിന്‍റെ ചെറിയ കുപ്പി, മടക്കിവച്ച രീതിയിൽ നോട്ടുകൾ, പഴയ മോഡൽ മൊബൈൽ ഫോൺ എന്നിവയും കണ്ടെത്തി. ആലക്കോട് എസ്എച്ച്ഒ മഹേഷ് കെ. നായരുടെ നേതൃത്വത്തിൽ ശേഖരിച്ച അസ്ഥികൾ പോലീസ് ഇൻക്വസ്റ്റ് നടത്തി. തുടർന്ന് പോസ്റ്റ്മോർട്ടത്തിനായി പരിയാരത്തുള്ള കണ്ണൂർ സർക്കാർ മെഡിക്കൽ കോളജ് മോർച്ചറിയിലേക്ക് മാറ്റി.

മുഖ്യമന്ത്രി പൊതുജനങ്ങളിൽനിന്ന് നിവേദനങ്ങൾ സ്വീകരിച്ചു

പിണറായി: മുഖ്യമന്ത്രി പിണറായി വിജയൻ പിണറായി കൺവൻഷൻ സെന്‍ററിൽ പ്രവർത്തിക്കുന്ന ധർമടം നിയോജക മണ്ഡലം ഓഫീസിൽ വച്ച് പൊതുജനങ്ങളിൽനിന്ന് നിവേദനങ്ങൾ സ്വീകരിച്ചു. രാവിലെ പത്തുമുതൽ ഉച്ച വരെയായി അഞ്ഞൂറോളം പേർ മുഖ്യമന്ത്രിയെ നേരിട്ടുകണ്ട് നിവേദനങ്ങൾ നൽകി. മണ്ഡലത്തിന് പുറത്തുനിന്നുള്ളവരും നിവേദനങ്ങൾ നൽകാനെത്തിയിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]