ADVERTISEMENT

ADVERTISEMENT

പാരിഷ് ഹാൾ കൂദാശ ചെയ്തു

ശ്രീകണ്ഠപുരം: നെടുവാലൂർ ബെഥേൽ മാർത്തോമ്മാ ഇടവകയിൽ പണിപൂർത്തീകരിച്ച ബെഥേൽ മാർത്തോമ്മാ പാരിഷ് ഹാൾ കൂദാശ ചെയ്തു. മാർത്തോമ്മാ സഭ കുന്നംകുളം മലബാർ ഭദ്രാസന അധ്യക്ഷൻ ഡോ.മാത്യൂസ് മാർ മക്കാറിയോസ് എപ്പിസ്കോപ്പ കൂദാശ കർമം നിർവഹിച്ചു.

പൊതുസമ്മേളനം ചെങ്ങളായി പഞ്ചായത്ത് പ്രസിഡന്‍റ് വി.പി മോഹനൻ ഉദ്ഘാടനം ചെയ്തു.
സജീവ് ജോസഫ് എംഎൽഎ, ഇടവക വികാരി റവ.സി.എം ഷാജി, ഇടവകാംഗം റവ. ഡോ.സബു ഫിലിപ്പ്, നെടുമുണ്ട ലത്തീൻ ഇടവക വികാരി ഫാ.വിൽസൺ, കണ്ണൂർ ഇടവക വികാരി ഫാ.നോബിൾ മാത്യു, ഭദ്രാസന കൗൺസിൽ അംഗം ഐബിൻ ജേക്കബ്, ഇടവക ട്രസ്റ്റി കെ.ടി ഏബ്രഹാം, സെക്രട്ടറി ജെൻസൺ ഷാജി, സജി ഫിലിപ്പ് എന്നിവർ പ്രസംഗിച്ചു. ‌

ADVERTISEMENT

വിദ്യാരംഗം കലാസാഹിത്യ വേദി ഉദ്ഘാടനം

തേർത്തല്ലി: മേരിഗിരി ഹയർ സെക്കൻഡറി സ്കൂൾ തേർത്തല്ലി വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെയും ഉദ്ഘാടനം നടത്തി. ആർട്ട് ഡയറക്ടറും സംഗീതജ്ഞനുമായ മനോജ് തോമസ് വിദ്യാരംഗം കലാസാഹിത്യ വേദിയുടെയും, പ്രമുഖ വ്യവസായിയും രാഷ്‌ട്രദീപിക ലിമിറ്റഡ് ഡയറക്‌ടർ അംഗവുമായ ബെന്നി വാഴപ്പിള്ളിൽ വിവിധ ക്ലബുകളുടെയും ഉദ്ഘാടനം നിർവഹിച്ചു. സ്കൂൾ മുഖ്യാധ്യാപകൻ സജി ജയിംസ് കണ്ണന്താനം അധ്യക്ഷത വഹിച്ചു. സ്കൂൾ മാനേജർ ഫാ. അബ്രഹാം മഠത്തിമ്യാലിൽ അനുഗ്രഹ പ്രഭാഷണം നടത്തി. പിടിഎ പ്രസിഡന്‍റ് രാജേഷ് പുതുപ്പറമ്പിൽ, മേരിഗിരി ഹയർ സെക്കൻഡറി സ്കൂൾ പ്രിൻസിപ്പൽ ഫാ. കുര്യാക്കോസ് അറക്കൽ, സ്കൂൾ സീനിയൽ അസിസ്റ്റന്‍റ് രാധാകൃഷ്ണൻ, കുമാരി ആൻ തെരേസ, മാസ്റ്റർ മിലൻ സിബി, സ്റ്റാഫ് സെക്രട്ടറി ബിജു അഗസ്റ്റ്യൻ എന്നിവർ പ്രസംഗിച്ചു. കുട്ടികളുടെ വിവിധ കലാപരിപാടികളും അരങ്ങേറി. വിവിധ മത്സരങ്ങളിൽ വിജയികളായ കുട്ടികൾക്ക് സമ്മാനങ്ങളും വിതരണം ചെയ്തു.

വർക്ക്ഷോപ്പിന് മുകളിൽ മരക്കൊമ്പ് വീണു

ചെറുപുഴ: വർക്ക്ഷോപ്പിനു മുകളിൽ റോഡരികിലെ മരത്തിന്‍റെ ശിഖരം ഒടിഞ്ഞുവീണു. ചെറുപുഴ-പയ്യന്നൂർ റോഡിൽ കാക്കയംചാലിലെ ബ്രില്യന്‍റ് ടുവീലർ വർക്ക് ഷോപ്പിനു മുകളിലാണ് മരക്കൊന്പ് വീണത്. ഇന്നലെ വൈകുന്നേരം ആറോടെയായിരുന്നു. വർക്ക്ഷോപ്പിൽ നിർത്തിയിട്ട ആറ് ഇരുചക്രവാഹനങ്ങൾക്ക് കേടുപാട് സംഭവിച്ചു. ആളുകൾ ഓടി മാറിയതിനാൽ പരിക്കേൽക്കാതെ രക്ഷപ്പെട്ടു. സമീപത്തെ ഓട്ടോ സ്റ്റാൻഡിൽ നിർത്തിയിട്ട ഓട്ടോറിക്ഷകൾക്ക് മുകളിൽ വീഴാതിരുന്നതിനാൽ വൻ അപകടം ഒഴിവായി.

പെരുമ്പടവ്-തിമിരി റോഡ് തകർന്നു

പെരുമ്പടവ്: രണ്ടാഴ്ച മുമ്പ് മെക്കാഡം ടാറിംഗ് നടത്തിയ റോഡിൽ ടാറിംഗ് തകർന്നു. എരമം കുറ്റൂർ, ആലക്കോട് പഞ്ചായത്തുകളിലൂടെ കടന്നുപോകുന്ന പെരുമ്പടവ് -തിമിരി പൊതുമരാമത്ത് വകുപ്പ് റോഡിന്‍റെ ടാറാണ് വെള്ളത്തിൽ ഒഴുകിപ്പോയയത്. ശക്തമായ മഴയത്താണ് ടാറിംഗ് നടത്തിയത്. മാസങ്ങൾക്കു മുന്പാണ് റോഡിന് ഫണ്ട് അനുവദിച്ചത്. ടാറിംഗ് സമയത്ത് വെള്ളം കുത്തിയൊഴുകിയെത്തി പല സ്ഥലങ്ങളിലും ടാറിംഗ് സാധനങ്ങൾ ഒഴുകിപ്പോയിരുന്നു. പല സ്ഥലങ്ങളിലും വലിയ കുഴികൾ രൂപപ്പെട്ടു. ചിലയിടങ്ങളിൽ റോഡിൽ മെറ്റൽ നിരന്ന് കിടക്കുകയുമാണ്. ഇതിനെതിരെ നാട്ടുകാരിൽ വലിയ പ്രതിഷേധം ഉയരുകയാണ്. ഉദ്യോഗസ്ഥർക്കും കരാറുകാർക്കും എതിരെ നടപടി സ്വീകരിക്കണമെന്ന് നാട്ടുകാർ ആവശ്യപ്പെടുന്നു.

ഇരിക്കൂറിൽ ജലജീവൻ മിഷൻ അവലോകനയോഗം നടത്തി

ശ്രീകണ്ഠപുരം: ഇരിക്കൂർ നിയോജക മണ്ഡലത്തിലെ ജലജീവൻ മിഷൻ പ്രവൃത്തികളുടെ പുരോഗതി സംബന്ധിച്ച അവലോകന യോഗം ശ്രീകണ്ഠപുരം നഗരസഭയിൽ നടന്നു.സജീവ് ജോസഫ് എംഎൽഎ അധ്യക്ഷത വഹിച്ചു. ജലജീവൻമിഷന്‍റെ ഭാഗമായി വെട്ടിപൊളിച്ച റോഡുകളുടെ പുനരുദ്ധാരണ പ്രവൃത്തികൾ ത്വരിതപ്പെടുത്തണമെന്ന് എംഎൽഎ ആവശ്യപ്പെട്ടു. കുടിവെള്ളത്തിനായി സ്ഥാപിക്കുന്ന ടാങ്കുകളുടെ നിർമാണം പൂർത്തിയാക്കണമെന്നും ടാങ്കുകൾ സ്ഥാപിക്കാൻ ആവശ്യമായ സ്ഥലം ലഭിക്കാത്തത് ഉടൻ പരിഹരിക്കണമെന്നും യോഗം വിലയിരുത്തി. ജലജീവൻ മിഷന്‍റെ ഭാഗമായുള്ള പ്രവൃത്തി ഏറ്റെടുത്ത കരാറുകാർക്കുള്ള തുക സർക്കാരിൽ നിന്ന് ലഭിക്കാത്തത് പദ്ധതി പൂർത്തീകരണത്തിന് തടസം സൃഷ്ടിക്കുന്നതായും ഇക്കാര്യം സർക്കാരിന്‍റെ ശ്രദ്ധയിൽപ്പെടുത്തുമെന്നും എംഎൽഎ പറഞ്ഞു. യോഗത്തിൽ നഗരസഭാധ്യക്ഷ ഡോ. കെ.വി. ഫിലോമിന, പഞ്ചായത്ത് പ്രസിഡന്‍റുമാരായ പി.സി. ഷാജി, ജോജി കന്നിക്കാട്ട്, സാജു സേവ്യർ,വി.പി. മോഹനൻ, ടി.പി. ഫാത്തിമ തുടങ്ങിയവരും വാട്ടർ അഥോറിറ്റി എക്സി.എൻജിനിയർ പി.പി. ദീപ,അർജുൻ ഗോവിന്ദ്,സുജിത്ത്, സാഗി സാംലാസ്, ആന്‍റണി സണ്ണി, ഹെബിൻ ഹെർബർട്ട് തുടങ്ങിയവർ പങ്കെടുത്തു.

നുച്യാട് പാലം നിര്‍മാണം കിഫ്ബി ഏറ്റെടുക്കണം: സജീവ് ജോസഫ് എംഎല്‍എ

ഉളിക്കൽ: മലയോര ഹൈവേയുടെ ഭാഗമായ നുച്യാട് പാലത്തിന്‍റെ നിര്‍മാണം കിഫ്ബി ഏറ്റെടുക്കണമെന്ന് സജീവ് ജോസഫ് എംഎൽഎ ആവശ്യപ്പെട്ടു. ഇത് സംബന്ധിച്ച് കത്ത് എംഎല്‍എ കിഫ്ബി എക്സിക്യുട്ടീവ് ഡയറക്ടര്‍ക്ക് നല്‍കി. മലയോര ഹൈവേ നിര്‍മാണവുമായി ബന്ധപ്പെട്ട് പ്രസ്തുത പാലത്തിന്‍റെ നിര്‍മാണത്തിന് അനുമതി ലഭിച്ചിരുന്നെങ്കിലും സാങ്കേതിക നടപടിക്രമങ്ങള്‍ നീണ്ടുപോയതിനാല്‍ നിര്‍മാണം തുടങ്ങാന്‍ സാധിച്ചില്ല. ഇത് സംബന്ധിച്ച് ഭരണാനുമതി പുതുക്കി തുക അനുവദിക്കുന്നതിനു വേണ്ടി ഫയല്‍ ധനകാര്യ വകുപ്പിന് നല്‍കിയിരുന്നെങ്കിലും തുക അനുവദിച്ചില്ല. പാലം വളരെ ഇടുങ്ങിയതാണ്. അതിനാൽ വാഹനങ്ങൾക്കും കാൽനടയാത്രക്കാർക്കും ഇതുവഴി കടന്നുപോകുന്നത് വളരെ പ്രയാസമേറിയതും അപകടകരവുമാണ്. ഈ പാലം മലയോര ഹൈവേയുടെ ഭാഗമായതിനാൽ ഗതാഗതക്കുരുക്ക് അതി രൂക്ഷമാണ്. അനുദിനം ഗതാഗതക്കുരുക്ക് വർധിച്ചുവരികയാണ്. ഈ സാഹചര്യത്തിലാണ് പ്രവൃത്തി പൂർത്തീകരിച്ച മലയോര ഹൈവേയുടെ ഭാഗമായ നുച്യാട് പാലത്തിന്‍റെ നിര്‍മാണം മലയോര ഹൈവേ പദ്ധതിയില്‍ ഉള്‍പ്പെടുത്തി നിര്‍മ്മിക്കുന്നതിനാവശ്യമായ നടപടി സ്വീകരിക്കണമെന്ന് കിഫ്‌ബി അധികൃതരോട് എംഎല്‍എ ആവശ്യപ്പെട്ടത്.

പേവിഷബാധ പ്രതിരോധം: സ്‌കൂള്‍ അസംബ്ലികളില്‍ ബോധവത്കരണം

കണ്ണൂർ: പേവിഷബാധയ്‌ക്കെതിരേ ആരോഗ്യ വകുപ്പ് വിദ്യാഭ്യാസ വകുപ്പുമായി സഹകരിച്ച് നടത്തുന്ന ബോധവത്കരണ പരിപാടിയുടെ ഭാഗമായി കണ്ണൂർ ജില്ലയിലെ മുഴുവൻ സ്കൂളുകളിലും പ്രത്യേക ക്ലാസുകൾ സംഘടിപ്പിച്ചു. റാബിസ് സ്പെഷൽ സ്കൂൾ അസംബ്ലിയുടെ കണ്ണൂർ ജില്ലാതല ഉദ്ഘാടനം മന്ത്രി കടന്നപ്പള്ളി രാമചന്ദ്രൻ നിർവഹിച്ചു. കുട്ടികൾക്കായി ആരോഗ്യ വകുപ്പ് തയാറാക്കിയ ബോധവത്കരണ പോസ്റ്ററുകൾ മന്ത്രി പ്രകാശനം ചെയ്തു. ജില്ലയിൽ പൊതു ഇടങ്ങളിൽ സ്ഥാപിക്കുന്ന ബോധവത്കരണ ഹോർഡിംഗ്സും മന്ത്രി പ്രകാശനം ചെയ്തു. കണ്ണൂർ മുൻസിപ്പൽ ഹയർ സെക്കൻഡറി സ്കൂളിൽ നടന്ന പരിപാടിയിൽ മേയർ മുസ്ലിഹ് മഠത്തിൽ അധ്യക്ഷത വഹിച്ചു. സ്‌കൂളുകളിൽ പേവിഷബാധയ്ക്കെതിരേ അവബോധം നല്കുന്നതിനാണ് അസംബ്ലി സമയത്തും പ്രത്യേക അസംബ്ലി വിളിച്ചുച്ചേർത്തും ആരോഗ്യ പ്രവര്‍ത്തകരുടെ നേതൃത്വത്തില്‍ ജില്ലയിൽ ക്ലാസുകൾ സംഘടിപ്പിച്ചത്. മൃഗങ്ങളുടെ കടിയോ മാന്തലോ, പോറലോ ഏറ്റാല്‍ രോഗ പ്രതിരോധത്തിന്‍റെ ഭാഗമായി നല്കേണ്ട പ്രഥമ ശുശ്രൂഷ, വാക്‌സിനേഷന്‍, മൃഗങ്ങളോട് ഇടപഴകുമ്പോള്‍ ശ്രദ്ധിക്കേണ്ട കാര്യങ്ങള്‍ എന്നിവയെപ്പറ്റി കുട്ടികള്‍ക്കും അധ്യാപകര്‍ക്കും ബോധവത്കരണം നൽകി. പേവിഷ ബാധ പ്രതിരോധം സംബന്ധിച്ച ക്ലാസിന് ഡെപ്യൂട്ടി ഡിഎംഒ ഡോ. കെ.സി. സച്ചിൻ നേതൃത്വം നല്കി. പേ വിഷ പ്രതിരോധത്തിനായി കുട്ടികള്‍ക്ക് വേണ്ട മാര്‍ഗനിര്‍ദേശങ്ങള്‍ നല്കുന്ന ലഘുലേഖകൾ പരിപാടിയിൽ വിതരണം ചെയ്തു. ജില്ലയിലെ മുഴുവൻ സ്കൂളുകളിലും പേ വിഷ പ്രതിരോധ ബോധ വത്കരണ പോസ്റ്ററുകൾ സ്ഥാപിക്കും. പേ വിഷ പ്രതിരോധ കാമ്പായിനിന്‍റെ ഭാഗമായി വീഡിയോ പുറത്തിറക്കും. ജൂലൈ മാസത്തില്‍ എല്ലാ അധ്യാപകര്‍ക്കും രക്ഷകര്‍ത്താക്കള്‍ക്കും പിടിഎ യോഗങ്ങളിലൂടെ സമാനമായ ബോധവത്കരണ ക്ലാസുകളും സംഘടിപ്പിക്കും.

ഉന്നത വിജയികളെ അനുമോദിച്ചു

തളിപ്പറമ്പ്: പുളിമ്പറമ്പ് സാൻജോസ് സീനിയർ സെക്കൻഡറി സ്കൂളിൽ വാർഷികൽ ജനറൽബോഡി യോഗവും അനുമോദനവും നടത്തി. സജീവ് ജോസഫ് എംഎൽഎ മുഖ്യാതിഥിയായിരുന്നു. കഴിഞ്ഞവർഷം സിബിഎസ്ഇ പത്താം ക്ലാസിലും പന്ത്രണ്ടാം ക്ലാസിലും ഉന്നത വിജയം നേടിയ കുട്ടികളെ ആദരിച്ചു. മൈക്രോ ബയോളജി, ബയോ ടെക്നോളജി, എംബിഎ തുടങ്ങിയ ഉന്നത പഠനമേഖലകളിൽ യൂണിവേഴ്സിറ്റിതലത്തില് ഒന്നാം റാങ്കുകൾ നേടിയ മൂന്നു പൂർവ വിദ്യാർഥികളെയും ആദരിച്ചു. ഉന്നത വിജയികൾക്കുള്ള സമ്മാനദാനം സജീവ് ജോസഫ് എംഎൽഎ നിർവഹിച്ചു. പ്രിൻസിപ്പൽ സിസ്റ്റർ ദീപ്തി, വൈസ് പ്രിൻസിപ്പൽ സിസ്റ്റർ കാതറിൻ എന്നിവർ പ്രസംഗിച്ചു. തേർത്തല്ലി: തടിക്കടവ് സർവീസ് സഹകരണ ബാങ്കിന്‍റെ നേതൃത്വത്തിൽ എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങളിലും എ പ്ലസ് നേടിയ കുട്ടികളെ ആദരിച്ചു. ചടങ്ങ് ടി.വി. രാജേഷ് ഉദ്ഘാടനം ചെയ്തു. റിസ്ക് ഫണ്ട് വിതരണം ന‌ടത്തി. ബാങ്ക് പ്രസിഡന്‍റ് എം.കെ. പ്രദീപ് കുമാർ അധ്യക്ഷത വഹിച്ചു. രാജേഷ് മാത്യു, ഷൈൻ പുതുപ്പറമ്പിൽ, ബിന്ദു സുരേഷ് എന്നിവർ പ്രസംഗിച്ചു.

കൊക്കായി പാലത്തിന്‍റെ സമാന്തര റോഡ് തുറന്നു

ചെമ്പന്തൊട്ടി: ഏതാനും നാളുകളായി യാത്രാദുരിതമനുഭവിക്കേണ്ടിവന്ന ചെമ്പന്തൊട്ടി നിവാസികൾക്ക് ആശ്വാസമായി കൊക്കായി പാലത്തിന്‍റെ സമാന്തര റോഡ് ഇന്നലെ മുതൽ ഗതാഗതത്തിനായി തുറന്നു കൊടുത്തു. ഭാരം കയറ്റിയ വലിയ ലോറികൾക്ക് ഗതാഗത നിയന്ത്രണമുള്ളതായി അസിസ്റ്റന്‍റ് എക്സിക്യൂട്ടീവ് എൻജിനിയർ സജിത് അറിയിച്ചു. അദ്ദേഹത്തോടൊപ്പം ശ്രീകണ്ഠപുരം നഗരസഭാ കൗൺസിലർ കെ.ജെ ചാക്കോ കൊന്നയ്ക്കൽ, റോഡ് കമ്മിറ്റി അംഗങ്ങളായ വർഗീസ് വയലാമണ്ണിൽ, കെ.എം.ഷംസീർഎന്നിവരുൾപ്പെടെ പ്രദേശവാസികളായവരും പരിപാടിയിൽ പങ്കെടുത്തു.

ആൺ സുഹൃത്തിനൊപ്പം പുഴയിൽ ചാടിയ യുവതി നീന്തി രക്ഷപ്പെട്ടു

കണ്ണൂർ: ആൺ സുഹൃത്തിനൊപ്പം പുഴയിൽ ചാടിയ ഭർതൃമതിയായ യുവതി നീന്തിരക്ഷപ്പെട്ടു. ആൺ സുഹൃത്തിനായി പുഴയിൽ തെരച്ചിൽ ഊർജ്ജിതമാക്കി. ഇന്നലെ രാവിലെയാണ് ബേക്കൽ പെരിയാട്ടടുക്കം സ്വദേശിനിയായ 35കാരിയെ വളപട്ടണം പുഴയുടെ ഓരത്ത് നാട്ടുകാർ കണ്ടത്. തുടർന്ന് വളപട്ടണം പോലീസിൽ വിവരമറിയിക്കുകയായിരുന്നു. സ്ഥലത്തെത്തിയ പോലീസ് യുവതിയെ സ്റ്റേഷനിലേക്ക് കൊണ്ടുപോയി. ബേക്കൽ പോലീസിൽ യുവതിയെ കാണാനില്ലെന്ന പരാതിയെ ത്തുടർന്ന് കേസെടുത്ത് പോലീസ് അന്വേഷണം നടക്കുന്നതിനിടെയാണ് വളപട്ടണം പുഴയുടെ തീരത്ത് യുവതിയെ കണ്ടെത്തിയത്. ഞായറാഴ്ച രാത്രിയിലാണ് കാസർഗോഡുള്ള പോലീസുകാരന്‍റെ ഭാര്യയായ യുവതി ആൺസുഹൃത്തിനൊപ്പം കണ്ണൂരിൽ എത്തിയത്. തുടർന്ന് ഇന്നലെ രാവിലെ വളപട്ടണം പാലത്തിനു മുകളിൽ എത്തി ഇരുവരും പുഴയിലേക്ക് ചാടുകയായിരുന്നു. എന്നാൽ പുഴയിൽ വീണയുടൻ യുവതി നീന്തി കരയ്ക്കു കയറുകയായിരുന്നു. കൂടെയുണ്ടായിരുന്ന യുവാവിനായി പോലീസും ഫയർഫോഴ്സും തെരച്ചിൽ ഊർജിതമാക്കി.

ശ്രവണ ഹിയറിംഗ് എയ്ഡ് സെന്‍റർ നവീകരിച്ച യൂണിറ്റ് മന്ത്രി കടന്നപ്പള്ളി ഉദ്ഘാടനം ചെയ്തു

കണ്ണൂര്‍: ശ്രവണ ഹിയറിംഗ് എയ്ഡ് സെന്‍ററിന്‍റെ കണ്ണൂരിലെ നവീകരിച്ച യൂണിറ്റ് താവക്കരയിൽ പ്രവർത്തനം തുടങ്ങി. മന്ത്രി കടന്നപ്പള്ളി രാമചന്ദ്രൻ ഉദ്ഘാടനം നിർവഹിച്ചു. കേള്‍വിക്കുറവ് പലപ്പോഴും നിശബ്ദമായി നമ്മെ ബാധിക്കുന്ന ഒരു പ്രശ്‌നമാണ്. അത്തരം സാഹചര്യങ്ങളില്‍ കൃത്യമായ പരിചരണവും കരുതലും നല്കുന്ന സ്ഥാപനങ്ങള്‍ സമൂഹത്തിന് വലിയ പ്രതീക്ഷയാണ് നല്കുന്നത്. ശ്രവണ അതിന് ഒരു മികച്ച ഉദാഹരണമാണെന്നും മന്ത്രി കടന്നപ്പള്ളി പറഞ്ഞു.നേരത്തെ ഒന്നാം നിലയില്‍ പ്രവര്‍ത്തിച്ചിരുന്ന ക്ലിനിക് പ്രായമായവര്‍ക്കും ശാരീരിക വെല്ലുവിളികള്‍ നേരിടുന്നവര്‍ക്കും എളുപ്പത്തില്‍ എത്തിച്ചേരുന്നതിനായാണ് ഗ്രൗണ്ട് ഫ്ലോറിലക്ക് മാറ്റിയത്. ഉദ്ഘാടനത്തോടനുബന്ധിച്ച് ഹിയറിംഗ് എയ്ഡ് അപ്ഗ്രേഡ് ആൻഡ് എക്‌സ്‌ചേഞ്ച് ഫെസ്റ്റിവല്‍ ഓഫറും പ്രഖ്യാപിച്ചിട്ടുണ്ട്. ഈ ഓഫറിലൂടെ ഉപഭോക്താക്കള്‍ക്ക് തങ്ങളുടെ പഴയ ഹിയറിംഗ് എയ്ഡുകള്‍ നല്കി ആകര്‍ഷകമായ വിലക്കിഴിവില്‍ പുതിയവ സ്വന്തമാക്കാന്‍ അവസരം ലഭിക്കും. ആധുനിക സാങ്കേതികവിദ്യ, പരിചയസമ്പന്നരായ ഓഡിയോളജിസ്റ്റുകള്‍, വ്യക്തിഗത പരിചരണം എന്നിവയിലൂടെ ഉപഭോക്താക്കള്‍ക്ക് മികച്ച സേവനം നല്കാനാണ് ശ്രവണ എപ്പോഴും ശ്രമിക്കുന്നതെന്ന് മാനേജിംഗ് ഡയറക്ടർ ഇ. ശ്രീജിത്ത് അറിയിച്ചു. ഉദ്ഘാടന ചടങ്ങിൽ ദീപിക കണ്ണൂർ റസിഡന്‍റ് മാനേജർ ഫാ. ജോബിൻ വലിയപറമ്പിൽ, തളിപ്പറമ്പ് വ്യാപാരി വ്യവസായി യൂത്ത് വിംഗ് സ്റ്റേറ്റ് ട്രഷറർ കെ.എസ്. റിയാസ്, ആർ.ജെ. മുസാഫിർ, ശ്രവണ ഡയറക്ടറും ചീഫ് ഓഡിയോളജിസ്റ്റുമായ അശ്വതി ശ്രീജിത്ത്, എം.വി. അനസ് എന്നിവർ പ്രസംഗിച്ചു.

അക്കരെ കൊട്ടിയൂരിൽനിന്ന് സ്ത്രീകളും ഗജവീരൻമാരും വിശേഷ വാദ്യക്കാരും മടങ്ങി

കൊട്ടിയൂർ: ദക്ഷിണ കാശിയിലെ 27 ദിവസം നീണ്ടു നിൽക്കുന്ന കൊട്ടിയൂർ വൈശാഖ മഹോത്സവം സമാപനത്തിന് നാലുനാൾ കൂടി അവശേഷിക്കെ അക്കരെ കൊട്ടിയൂരിൽ നിന്ന് സ്ത്രീകളും, ഗജവീരൻമാരും വിശേഷ വാദ്യക്കാരും മടങ്ങി. ഉത്സവ നഗരിയിൽ നിന്ന് അറിയിപ്പ് ലഭിച്ചതോടെ പെരുമാളിനെ വണങ്ങി ആയിരക്കണക്കിന് സ്ത്രീകളാണ് മഹോത്സവ നഗരിയിൽ നിന്നും വിടവാങ്ങിയത്. മകം നാളിലെ ഉച്ചശീവേലിക്കു ശേഷമാണ് ഗജവീരൻമാർ കൊട്ടിയൂരപ്പനെ വണങ്ങി പ്രസാദവും സ്വീകരിച്ച് അക്കരെ സന്നിധാനത്തു നിന്നും മടങ്ങിയത്. ആനയൂട്ടും നടത്തി. ഇതുവരെ അക്കരെ കൊട്ടിയൂർ സന്നിധിയെ ഭക്തി സാന്ദ്രമാക്കിയിരുന്ന വിശേഷ വാദ്യക്കാരും ഇന്നലെ വിട വാങ്ങി.തിങ്കളാഴ്ച ഭക്തജന പ്രവാഹമായിരുന്നു അക്കരെ സന്നിധിയിൽ അനുഭവപ്പെട്ടത്. ഉച്ചശീവേലിക്കു ശേഷം സ്ത്രീ ജനങ്ങൾ അക്കരെ കൊട്ടിയൂരിൽ നിന്നും പിൻവാങ്ങിയത്തോടെ അക്കരെ സന്നിധി ഗൂഢ പൂജകൾക്ക് വഴിമാറി. മുഴക്കുന്ന് നല്ലൂരിൽ നിന്നും സ്ഥാനികൾ എഴുന്നള്ളിച്ച കലങ്ങൾ അക്കരെ കൊട്ടിയൂരിൽ എത്തിച്ചതോടെ കല പൂജയ്ക്കുള്ള ഒരുക്കങ്ങളും പൂർത്തിയായി. തയന്നൂർ ശ്രീജിത്ത്, എ.കെ . ഗണേശൻ, രോഹിത് രാജ്, കണ്ടോത്ത് സുനിൽകുമാർ എന്നിവരുടെ നേതൃത്വത്തിലുള്ള 12 പേരാണ് കലങ്ങൾ കൊട്ടിയൂരിലേക്ക് എത്തിച്ചത്. ജൂലൈ മൂന്നിന് കലശപൂജ, അത്തം ചതുശതം, വാളാട്ടം. നാലിന് തൃക്കലശാട്ടോടെ ഉത്സവം സമാപിക്കും.

എംവിആറിനെ ഞെട്ടിച്ച പൊള്ളയിൽ അമ്പാടി

നീലേശ്വരം: കണ്ണൂർ ജില്ലാ സെക്രട്ടറിയായിരുന്ന എം.വി.രാഘവൻ സിപിഎമ്മിലെ ചോദ്യം ചെയ്യപ്പെടാത്ത അധികാരകേന്ദ്രമായിരുന്ന കാലത്ത് അദ്ദേഹത്തെ വെല്ലുവിളിക്കാനുള്ള ഉശിരും ആർജവവും കാണിച്ച കമ്യൂണിസ്റ്റുകാരനായിരുന്നു പൊള്ളയിൽ അമ്പാടി. 1972 ൽ സിറ്റിംഗ് എംഎൽഎ വി.വി.കുഞ്ഞമ്പുവിന്‍റെ നിര്യാണത്തെ തുടർന്ന് നീലേശ്വരത്ത് ഉപതെരഞ്ഞെടുപ്പ് വേണ്ടിവന്ന സമയത്തായിരുന്നു അത്. സ്ഥാനാർഥി നിർണയത്തിനായി ചെറുവത്തൂരിൽ പാർട്ടി ഏരിയ, ലോക്കൽ സെക്രട്ടറിമാരുടെ കൺവൻഷൻ വിളിച്ചുചേർത്തു. കയ്യൂരിൽ നിന്നുള്ള പ്രാദേശിക നേതാവായ ടി.കെ.ചന്തനെ സ്ഥാനാർഥിയാക്കണമെന്നായിരുന്നു നീലേശ്വരം മണ്ഡലത്തിലെ ഭൂരിപക്ഷാഭിപ്രായം. എന്നാൽ ജില്ലാ കമ്മിറ്റി അംഗമായ സി. കൃഷ്ണൻ നായരുടെ പേരാണ് ജില്ലാ കമ്മിറ്റി നിർദേശിച്ചത്. നീലേശ്വരം ലോക്കൽ സെക്രട്ടറി എൻ.കെ. കുഞ്ഞമ്പു പ്രതിഷേധവുമായി എഴുന്നേറ്റപ്പോൾ എതിർപ്പുള്ളവർക്ക് യോഗത്തിൽനിന്ന് പുറത്തുപോകാമെന്ന് എംവിആർ പറഞ്ഞു. കമ്യൂണിസ്റ്റ് പാർട്ടിയോട് ഉത്തരവാദിത്വവും കൂറുമുള്ള അംഗങ്ങളോട് യോഗത്തിൽനിന്ന് പുറത്തുപോകാൻ പറയാൻ നിങ്ങൾക്ക് ഒരവകാശവുമില്ലെന്ന് ഉടൻ അമ്പാടി തുറന്നടിച്ചു. എം.വി. രാഘവനാണ് പറയുന്നത് എന്ന് എംവിആർ തന്‍റെ ഘനഗംഭീരസ്വരത്തിൽ പറഞ്ഞയുടനെ ഇത് നീലേശ്വരത്തെ പൊള്ളയിൽ അമ്പാടിയാണെന്ന് അതേ ഗാംഭീര്യത്തോടെ അമ്പാടിയും മറുപടി നല്കി. യോഗത്തിൽ പങ്കെടുത്തവരിൽ ബഹുഭൂരിപക്ഷവും എൻ.കെ. കുഞ്ഞമ്പുവിന്‍റെയും അമ്പാടിയുടെയും നിലപാടിനൊപ്പം ഉറച്ചുനിന്നതോടെ ജില്ലാ കമ്മിറ്റിക്ക് മുട്ടുമടക്കേണ്ടിവന്നു. നീലേശ്വരത്തുകാർ നിർദേശിച്ച ടി.കെ. ചന്തനെ തന്നെ സ്ഥാനാർഥിയായി അംഗീകരിച്ചു. മികച്ച ഭൂരിപക്ഷത്തോടെ അദ്ദേഹം ഉപതെരഞ്ഞെടുപ്പിൽ വിജയിച്ചു. ഒരുവർഷത്തിനിപ്പുറം നീലേശ്വരം പള്ളിക്കര തോക്ക് കേസിൽ പാർട്ടിക്കുവേണ്ടി ഒരുമിച്ച് സമരം നയിച്ച് എംവിആറും അമ്പാടിയും ജയിൽവാസമനുഷ്ഠിക്കുകയും ചെയ്തു.

കനാൽ തകർച്ചയ്ക്ക് കാരണം നിർമാണത്തിലെ അപാകത, ജനങ്ങളെ മാറ്റിപ്പാർപ്പിക്കണം: മാർ ജോസഫ് പാംപ്ലാനി

ഇരിട്ടി: കെഎസ്ഇബിക്ക് കോടികളുടെ നഷ്ടവും ബാരാപോൾ പ്രദേശവാസികളുടെ ജീവിതം ഭീഷണിയുടെ നിഴലിലുമാക്കിയ കനാലിന്‍റെ തകർച്ചയ്ക്ക് പിന്നിൽ നിർമാണത്തിലെ അപാകതയും അഴിമതിയുമാണെന്ന് സംശയിക്കുന്നതായി തലശേരി ആർച്ച്ബിഷപ് മാർ ജോസഫ് പാംപ്ലാനി പറഞ്ഞു. കനാലിൽ ഗർത്തം രൂപപ്പെട്ട ഭാഗം കത്തോലിക്കാ കോൺഗ്രസ് പ്രതിനിധികൾക്കും പ്രവർത്തകർക്കും ഒപ്പം സന്ദർശിച്ചശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. നാല് കിലോമീറ്റർ കനാൽ ശൃംഖലയിൽ 1.4 കിലോമീറ്റർ കോൺക്രീറ്റ് നടത്താതെ ഇരുമ്പുവല വച്ച് കോൺക്രീറ്റ് ചാന്ത് പിടിപ്പിച്ചതിൽ നിർമാണ അപാകതയും അഴിമതിയുമാണെന്ന് സംശയിച്ചാൽ കുറ്റം പറയാനാവില്ല. ചോർച്ച ചൂണ്ടിക്കാണിച്ചിട്ടും പരിഹരിക്കാൻ അധികൃതർ കാണിച്ച കാലതാമസമാണ് കനാൽ ഭിത്തി തകർന്നതിന് പ്രധാന കാരണം. അടിയന്തരമായി നിർമാണ വൈകല്യം പരിഹരിച്ച് ലാഭത്തിൽ പ്രവർത്തിക്കുന്ന പദ്ധതിയെ യാഥാർഥ്യമാക്കണം. താത്കാലിക സംവിധാനങ്ങൾ ഒന്നും ഇവിടെ നടപ്പിലാക്കാൻ കഴിയില്ല. ഒരു ജല ബോംബിനു താഴെ ജനങ്ങളുടെ ജീവന് സർക്കാർ വിലപറയരുത്. അപകട ഭീഷണിയിലായ കനാൽ താഴ്‌വരയിലെ 30 കുടുംബങ്ങളുടെ ഭൂമി പൊന്നും വില നൽകി ഏറ്റെടുത്ത് അവരുടെ ജീവനു സംരക്ഷണം നൽകി മാറ്റിപ്പാർപ്പിക്കാനുള്ള സംവിധാനം സർക്കാർ യുദ്ധകാലാടിസ്ഥാനത്തിൽ പൂർത്തിയാക്കണം. ചൂരൽ മലയ്ക്ക് സമാനമായ ജലദുരന്തം ഒഴിവായത് ദൈവാനുഗ്രഹത്താലാണ്. നാടിന്‍റെ അഭിമാനമാകേണ്ട പദ്ധതിയെ ഈ നിലയിലാക്കിയവരെ നിയമത്തിന് മുന്നിൽ കൊണ്ടുവരണമെന്നും അദ്ദേഹം ആവശ്യപ്പെട്ടു. കനാലിന്‍റെ ചോർച്ചയ്ക്ക് പരിഹാരം കാണാൻ അധികൃതർ വൈകിയാൽ പ്രത്യക്ഷ സമരത്തിലേക്ക് എകെസിസി കടക്കുമെന്നും ജീവൻ കൊടുത്തും എകെസിസി ഇതിനായി കേരളം മുഴുവനും സമരം സംഘടിപ്പിക്കുമെന്നും അവർക്കു പിന്തുണ നല്കുമെന്നും മാർ പാംപ്ലാനി പറഞ്ഞു. കത്തോലിക്കാ കോൺഗ്രസ് ഗ്ലോബൽ ഡയറക്ടർ റവ. ഡോ. ഫിലിപ്പ് കവിയിൽ, ഫാ. സെബാസ്റ്റ്യൻ മൂക്കിലിക്കാട്ട്, ഫാ. മാത്യു പൊട്ടംപ്ലാക്കൽ, ഫാ. ജോസഫ് തേനംമാക്കൽ, ഫാ. ജിസ് കരിങ്ങാലിക്കാട്ടിൽ, കത്തോലിക്ക കോൺഗ്രസ് അതിരൂപത നേതാക്കളായ ഫിലിപ്പ് വെളിയത്ത്, ജിമ്മി ആയിത്തമറ്റം, സുരേഷ് കാഞ്ഞിരത്തിങ്കൽ, ബെന്നി പുതിയാംപുറം, ബെന്നിച്ചൻ മഠത്തിനകം എന്നിവരും ഒപ്പമുണ്ടായിരുന്നു.

ബാരാപോൾ ജലവൈദ്യുത പദ്ധതി കനാലിലെ തകർച്ച: സോയിൽ പൈപ്പിംഗ് പ്രതിഭാസമെന്ന് പ്രാഥമിക നിഗമനം

ഇരിട്ടി: ബാരാപോൾ പദ്ധതിയുടെ കനാലിൽ ഉണ്ടായ ചോർച്ച പഠിക്കാനായി ഇന്നലെ കോഴിക്കോട് നിന്ന് എത്തിയ സിവിൽ വിഭാഗം ഉദ്യോഗസ്ഥർ ഗർത്തത്തിൽ ഇറങ്ങി പരിശോധന നടത്തി. ആറു മീറ്റർ ആഴവും നാലുമീറ്റർ വീതിയും ഏഴു മീറ്റർ നീളവുമുള്ള അഗാധ ഗർത്തമാണ് കനാലിനടിയിൽ രൂപപ്പെട്ടത്. കനാലിന്‍റെ അടിയിൽ നടന്നത് സോയിൽ പൈപ്പിംഗ് ആണെന്ന് സ്ഥിരീകരിച്ചു. കനാലിന് അടിയിലെ മണ്ണ് ഒഴുകിപ്പോകുകയും വലിയ കല്ലുകൾ മാത്രം അവശേഷിക്കുകയുമാണുണ്ടായത്. കനാലിൽ നിന്ന് ചോർച്ചയുണ്ടായി അതുവഴി വെള്ളം ഭൂമിക്കടിയിലൂടെ ഒഴുകിയതോടെ മണ്ണ് നഷ്ടമായി ഗർത്തം രൂപപ്പെടുന്നതാണ് സോയിൽ പൈപ്പിംഗ്. കനാലിലെ വെള്ളം വറ്റിച്ചതിനാൽ വലിയ അപകടം ഒഴിവായതായി ഉദ്യോഗസ്ഥ സംഘം വിലയിരുത്തി. ബാരാപോൾ കനാലിലെ ചോർച്ച സോയിൽ പൈപ്പിംഗ് പ്രതിഭാസമാണെന്ന് ജിയോളജി വിഭാഗത്തിന്‍റെ പരിശോധനയിലും കണ്ടെത്തിയിരുന്നു. കനാലിന്‍റെ അടിത്തട്ടിനടിയിലെ മണ്ണ് സോയിൽ പൈപ്പിംഗ് പ്രതിഭാസത്തിലൂടെ ഒഴുകിപ്പോയതിനാൽ മണ്ണ് ഇടിഞ്ഞുതാഴുകയും കനാലിന്‍റെ ഉപരിതലം കോൺക്രീറ്റോടുകൂടി ഇടിഞ്ഞുതാഴുകയുമായിരുന്നു. അടുത്തയാഴ്ച വിദഗ്‌ധ സംഘം പരിശോധനയ്ക്കെത്തും. മുന്പ് നടത്തിയ പഠനത്തിന്‍റെ അടിസ്ഥാനത്തിൽ കൂടുതൽ ചോർച്ച അനുഭവപ്പെടുന്ന 500 മീറ്റർ ദൂരം 15 കോടി ചെലവിൽ പുനർനിർമിക്കാൻ കെഎസ്ഇബി സിവിൽ വിഭാഗം പദ്ധതി രൂപരേഖ നൽകിയിരുന്നു. അതിനിടയിലാണ് കനാലിൽ വലിയ ഗർത്തം രൂപപ്പെട്ടത്. എന്നാൽ 1.4 കിലോമീറ്റർ പുനർനിർമാണം നടത്താതെ വൈദ്യുതി ഉത്പാദനം നടത്താൻ അനുവദിക്കില്ലെന്ന നിലപാടിലാണ് പ്രദേശവാസികൾ. 1.4 കിലോമീറ്റർ കനാൽ കോൺക്രീറ്റ് ചെയ്യാൻ 45 കോടിയോളം ചെലവ് വരും. നിർമാണത്തിനായി കുറഞ്ഞത് 20 മാസം വേണമെന്നാണ് കണക്കുകൂട്ടൽ. നാലു കിലോമീറ്റർ വരുന്ന കനാല്‍ ശൃംഖലയിൽ 1.4 കിലോമീറ്റർ ദൂരം കോൺക്രീറ്റ് നടത്താതെയാണ് നിർമിച്ചത്. ഈ ഭാഗത്തുകൂടിയാണ് തുടക്കം മുതൽ ചോർച്ച കണ്ടെത്തിയത്. ഓരോ ഉത്പാദന സീസണിലും ചോർച്ച അധികരിക്കുമ്പോഴും പഞ്ചായത്തും പ്രദേശവാസികളും പ്രക്ഷോഭവുമായി എത്തിയെങ്കിലും അധികൃതർ വേണ്ടത്ര പരിഗണന നൽകാത്തതാണ് നിലവിലെ സാഹചര്യത്തിന് കാരണം. കോഴിക്കോട് കെഎസ്ഇബി സിവിൽ വിഭാഗം ഡെപ്യൂട്ടി ചീഫ് എൻജിനിയർ വി.ടി. അബ്ദുൾ കരീം, എക്സിക്യുട്ടീവ് എൻജിനിയർ മണികണ്ഠൻ അസിസ്റ്റന്‍റ് എൻജിനിയർമാരായ ഡൈസൺ ചന്ദന, പി. ഷിബു, എം.സി. ഗിരീഷ് എന്നിവരാണ് സംഘത്തിൽ ഉണ്ടായിരുന്നത്. ബാരാപോളിന്‍റെ ചുമതലയുള്ള പഴശി സിവിൽ വിഭാഗം എക്സിക്യുട്ടീവ് എൻജിനിയർ കെ.സി. അനിൽകുമാർ, അസിസ്റ്റന്‍റ് എക്സിക്യുട്ടീവ് എൻജിനിയർ എം.കെ. അജിത്ത് അസിസ്റ്റന്‍റ് എൻജിനിയർമാരായ ടി.പി. മനോജ്, എം. കിഷോർ എന്നിവരും ഒപ്പം ഉണ്ടായിരുന്നു.

ലഹരി വിരുദ്ധ ബോധവത്കരണ ക്ലാസ് നടത്തി

പുന്നാട്: മീത്തലെ പുന്നാട് യുപി സ്കൂൾ സാമൂഹ്യശാസ്ത്ര ക്ലബിന്‍റെ ആഭിമുഖ്യത്തിൽ ലഹരി വിരുദ്ധ ബോധവത്കരണ ക്ലാസും പുകയില രഹിത വിദ്യാലയം പ്രഖ്യാപനവും നടന്നു. പുകയില രഹിത വിദ്യാലയ പ്രഖ്യാപനം നഗരസഭ കൗൺസിലർ എ.കെ. ഷൈജു നിർവഹിച്ചു. പിടിഎ പ്രസിഡന്‍റ് കെ.വി. രമേശൻ അധ്യക്ഷത വഹിച്ചു. ലഹരി വിരുദ്ധ പ്രതിജ്ഞയെടുത്തു. സിവിൽ എക്സൈസ് ഓഫീസർ ജി. സന്ദീപ് ലഹരി വിരുദ്ധ ബോധവത്കരണ ക്ലാസെടുത്തു. മുഖ്യാധ്യാപിക സി.കെ. അനിത, എസ്ആർജി കൺവീനർ പി.പി. അരുൺ, സാമൂഹ്യശാസ്ത്രം കൺവീനർ കെ.വി. ദിവ്യ എന്നിവർ പ്രസംഗിച്ചു.

വിജയോത്സവവും വിവിധ ക്ലബുകളുടെ ഉദ്ഘാടനവും നടത്തി

മണിക്കടവ്: മണിക്കടവ് സെന്‍റ് തോമസ് യുപി സ്കൂളിൽ വിജയോത്സവവും വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെയും ഉദ്ഘാടനവും സജീവ് ജോസഫ് എംഎൽഎ ഉദ്ഘാടനം ചെയ്തു. സ്കൂൾ മാനേജർ ഫാ. പയസ് പടിഞ്ഞാറെമുറിയിൽ അധ്യക്ഷത വഹിച്ചു. തെയ്യം, നാടൻപാട്ട് കലാകാരനായ എം.പി. സജിത്ത് മുഖ്യാതിഥിയായിരുന്നു. ചടങ്ങിൽ എൽഎസ്എസ്, യുഎസ്എസ് വിജയികൾക്കുള്ള ട്രോഫികൾ വിതരണം ചെയ്തു. സ്കൂൾ അസിസ്റ്റന്‍റ് മാനേജർ ഫാ. ജോസബിൻ ഈറ്റക്കൽ, മുഖ്യാധ്യാപിക മേരിക്കുട്ടി, പിടിഎ പ്രസിഡന്‍റ് ജിയോ തെക്കേപ്പുറം, എംപിടിഎ പ്രസിഡന്‍റ് നിമിഷ ഷിന്‍റോ, ജോമിഷ ജോസ് എന്നിവർ പ്രസംഗിച്ചു. വിവിധ കലാപരിപാടികളും അരങ്ങേറി.

കേരളത്തിൽ തൊഴിൽ നേടാനുള്ള അവസരങ്ങൾ സൃഷ്ടിക്കും: മുഖ്യമന്ത്രി

കണ്ണൂർ: കേരളത്തിൽ തൊഴിൽ നേടാനുള്ള അവസരങ്ങൾ സൃഷ്ടിക്കുന്നത് സംസ്ഥാനത്തിന്‍റെ ഉത്തരവാദിത്തമായി കാണുന്നതായി മുഖ്യമന്ത്രി പിണറായി വിജയൻ. കേരളത്തെ വൈജ്ഞാനിക മേഖലയാക്കാനാണ് ശ്രമിക്കുന്നത്. കണ്ണൂർ കൃഷ്ണമേനോൻ സ്മാരക ഗവ വനിതാ കോളേജിന്‍റെ സുവർണ ജൂബിലി ആഘോഷവും കോളജ് ഓഡിറ്റോറിയത്തിന്‍റെ ഉദ്ഘാടനവും നിർവഹിച്ചു പ്രസംഗിക്കുകയായിരുന്നു മുഖ്യമന്ത്രി. കിഫ്‌ബി പദ്ധതി പ്രകാരം കോളജിൽ 13 കോടിയുടെ നിർമാണ പ്രവർത്തനങ്ങളും അക്കാദമിക് ബ്ലോക്ക്, കാന്‍റീൻ കം സെമിനാർ കോംപ്ലക്സ്, ലൈബ്രറി ബ്ലോക്ക് തുടങ്ങിയവയുടെ നിർമാണവും ന‌ടത്തുമെന്ന് അധ്യക്ഷത വഹിച്ച മന്ത്രി ഡോ ആർ. ബിന്ദു പറഞ്ഞു. മന്ത്രി രാമചന്ദ്രൻ കടന്നപ്പള്ളി, കഥാകാരൻ ടി. പദ്ഭനാഭൻ, കോർപറേഷൻ മേയർ മുസ്‌ലിഹ്‌ മഠത്തിൽ, കെ.വി. സുമേഷ് എംഎൽഎ, ജില്ലാപഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാ കളക്ടർ അരുൺ കെ. വിജയൻ, കോളജ് വിദ്യാഭ്യാസ വകുപ്പ് ഡയറക്ടർ കെ. സുധീർ എന്നിവർ മുഖ്യാതിഥികളായി. വയനാട് മുണ്ടക്കൈ ചൂരൽമല ദുരിതബാധിതരുടെ പുനരധിവാസത്തിനായുള്ള സ്നേഹഭവനകളുടെ നിർമാണത്തിന് നാഷണൽ സർവീസ് സ്കീം ഒന്നാംഘട്ടമായി സമാഹരിച്ച 4.5 കോടിയുടെ ചെക്ക് മുഖ്യമന്ത്രിക്ക് കൈമാറി.

കോൺഗ്രസ് ജില്ലാ ആശുപത്രി സൂപ്രണ്ടിനെ ഉപരോധിച്ചു

കണ്ണൂർ: കണ്ണൂരിൽ തെരുവുനായയുടെ കടിയേറ്റ് പ്രതിരോധ കുത്തിവയ്പ്പിടുത്തിട്ടും പേവിഷബാധയേറ്റ് അഞ്ചു വയസുകാരനയ ഹാരിത്ത് എന്ന വിദ്യാർഥി മരിക്കാനിടയായത് ജില്ലാ ആശുപത്രിയുടെ വീഴ്ചയാണെന്നാരോപിച്ച് കോൺഗ്രസ് പ്രവർത്തകർ ജില്ലാ ആശുപത്രി സൂപ്രണ്ടിനെ ഓഫീസിൽ ഉപരോധിച്ചു. കണ്ണൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിലായിരുന്നു ആശുപത്രി സൂപ്രണ്ട് ഡോ. ഷാജിനെ ഇന്നലെ രാവിലെ ഉപരോധിച്ചത്. സമരക്കാരെ പോലീസ് ഇവിടെ നിന്ന് ബലം പ്രയോഗിച്ച് നീക്കി. പിന്നീട് പ്രവർത്തകർ ഒപി വിഭാത്തിനു മുന്നിൽ കുത്തിയിരിപ്പ് സമരം നടത്തിയതിനെ തുടർന്ന് അറസ്റ്റ് ചെയ്തു നീക്കി.രാഹുൽ കായക്കൂൽ, ഷിബിൻ, ഡൂഡു ജേക്കബ് എന്നിവരെയാണ് അറസ്റ്റ് ചെയ്തത്. സമരത്തിന് കോർപറേഷൻ കൗൺസിലർമാരായ ആസിമ, ജയസൂര്യൻ, നേതാക്കളായ ഷിബു ഫെർണാണ്ടസ്, പി.അനൂപ്,വിനോദ് പുതുക്കുടി, ഗിരീഷൻ നാമത്ത്, ഷീജ അനിൽ എന്നിവർ നേതൃത്വം നൽകി. മുഖത്ത് കടിയേറ്റ ഹാരിത്തിനെ ജില്ലാ ആശുപത്രിയിൽ പ്രവേശിപ്പിച്ച് ആവശ്യമായ കിടത്തിചികിത്സ ഉൾപ്പടെയുള്ള ലഭ്യമാക്കാത്തതാണ് കുട്ടിയുടെ മരണത്തിന് കാരണമെന്നായിരുന്നു സമരക്കാരുടെ ആരോപണം. എന്നാൽ ജില്ലാ ആശുപത്രിയിൽ ആവശ്യമായ ചികിത്സ നൽകിയിരുന്നുവെന്നും പിന്നീട് കണ്ണൂർ ഗവ. മെഡിക്കൽ കോളജിൽ റഫർ ചെയ്യുകയുമായിരുന്നെന്നും ആശുപത്രി സൂപ്രണ്ട് പറഞ്ഞു. പയ്യാന്പലത്ത് വീട്ടു മുറ്റത്ത് കളിച്ചു കൊണ്ടിരിക്കുന്നതിനിടെയാണ് ഹാരിത്തിന് മേയ് 31ന് തെരുവ്നായയുടെ കടിയേറ്റത്. ഇക്കഴിഞ്ഞ 28നായിരുന്നു കുട്ടി മരിച്ചത്. തമിഴ്നാട് സേലം സ്വദേശികളായ മണിമാരൻ-ജാതിയ ദന്പതികളുടെ ഏകമനായിരുന്നു യുകെജി വിദ്യാർഥിയായ ഹാരിത്ത്. പ്രതിഷേധവുമായി കെജിഎംഒഎ കണ്ണൂർ: തെരുവുനായയുടെ കടിയേറ്റ് പേവിഷബാധയേറ്റു അഞ്ചു വയസുള്ള കുട്ടി മരിച്ച അത്യന്തം ദുഃഖകരമായ സംഭവത്തിൽ കെജിഎംഒഎ അനുശോചിച്ചു. എന്നാൽ ഈ സംഭവത്തിൽ ആശുപത്രിയിൽ വീഴ്ച ആരോപിച്ച് ജില്ലാ ആശുപത്രി സൂപ്രണ്ടിനെ ഉപരോധിച്ച സംഭവത്തി ൽ സംഘടന ശക്തമായി പ്രതിഷേധിച്ചു. മുഖത്ത് കടിയേറ്റതിന്‍റെ ഗുരുതരത്വം കണക്കിലെടുത്ത് കുട്ടിയുടെ കൂട്ടിരിപ്പുകാരെ ഈ ആശങ്കകൾ വിശദീകരിച്ച് ബോധവത്കരിച്ചശേഷം കുട്ടിയെ പരിയാരം മെഡിക്കൽ കോളജിലേക്ക് റഫർ ചെയ്യുകയും ചെയ്തു. മുഖത്ത് തെരുവ് നായ കടിയേറ്റാൽ രോഗാണുക്കൾ ഉടൻ മസ്തിഷ്കത്തിലേക്ക് എത്താൻ സാധ്യത കൂടുതലാണെന്നത് ലോക വ്യാപകമായി അംഗീകരിക്കപ്പെട്ട യാഥാർഥ്യമാണ്. അതിനാൽ തന്നെ, ഇത്തരത്തിലുള്ള സംഭവങ്ങളിൽ പേവിഷബാധയിലേക്ക് നയിക്കുന്ന സാധ്യത വളരെ ഉയർന്നതാണ്.ഈ ദു:ഖകരമായ സംഭവത്തിൽ, ആശുപത്രിയെയോ അതിന്‍റെ സൂപ്രണ്ടിനെയോ കുറ്റപ്പെടുത്തുന്നത് രാഷ്ട്രീയ പ്രേരിതമാണ്. ശക്തമായി അപലപിക്കുന്നതായും പ്രസിഡന്‍റ് ഡോ. വി.എസ്. ജിതിനും സെക്രട്ടറി ഡോ. രഞ്ജിത്ത് മാത്യുവും പ്രസ്താവനയിൽ പറഞ്ഞു.

നുച്യാട് പാലം നിര്‍മാണം കിഫ്ബി ഏറ്റെടുക്കണം: സജീവ് ജോസഫ് എംഎല്‍എ

ഉളിക്കൽ: മലയോര ഹൈവേയുടെ ഭാഗമായ നുച്യാട് പാലത്തിന്‍റെ നിര്‍മാണം കിഫ്ബി ഏറ്റെടുക്കണമെന്ന് സജീവ് ജോസഫ് എംഎൽഎ ആവശ്യപ്പെട്ടു. ഇത് സംബന്ധിച്ച് കത്ത് എംഎല്‍എ കിഫ്ബി എക്സിക്യുട്ടീവ് ഡയറക്ടര്‍ക്ക് നല്‍കി. മലയോര ഹൈവേ നിര്‍മാണവുമായി ബന്ധപ്പെട്ട് പ്രസ്തുത പാലത്തിന്‍റെ നിര്‍മാണത്തിന് അനുമതി ലഭിച്ചിരുന്നെങ്കിലും സാങ്കേതിക നടപടിക്രമങ്ങള്‍ നീണ്ടുപോയതിനാല്‍ നിര്‍മാണം തുടങ്ങാന്‍ സാധിച്ചില്ല. ഇത് സംബന്ധിച്ച് ഭരണാനുമതി പുതുക്കി തുക അനുവദിക്കുന്നതിനു വേണ്ടി ഫയല്‍ ധനകാര്യ വകുപ്പിന് നല്‍കിയിരുന്നെങ്കിലും തുക അനുവദിച്ചില്ല. പാലം വളരെ ഇടുങ്ങിയതാണ്. അതിനാൽ വാഹനങ്ങൾക്കും കാൽനടയാത്രക്കാർക്കും ഇതുവഴി കടന്നുപോകുന്നത് വളരെ പ്രയാസമേറിയതും അപകടകരവുമാണ്. ഈ പാലം മലയോര ഹൈവേയുടെ ഭാഗമായതിനാൽ ഗതാഗതക്കുരുക്ക് അതി രൂക്ഷമാണ്. അനുദിനം ഗതാഗതക്കുരുക്ക് വർധിച്ചുവരികയാണ്. ഈ സാഹചര്യത്തിലാണ് പ്രവൃത്തി പൂർത്തീകരിച്ച മലയോര ഹൈവേയുടെ ഭാഗമായ നുച്യാട് പാലത്തിന്‍റെ നിര്‍മാണം മലയോര ഹൈവേ പദ്ധതിയില്‍ ഉള്‍പ്പെടുത്തി നിര്‍മ്മിക്കുന്നതിനാവശ്യമായ നടപടി സ്വീകരിക്കണമെന്ന് കിഫ്‌ബി അധികൃതരോട് എംഎല്‍എ ആവശ്യപ്പെട്ടത്.

ചിക്കൻ സ്റ്റാളിൽ കയറി പണം കവർന്ന മോഷ്ടാവ് അറസ്റ്റിൽ

കണ്ണൂർ: ചിക്കൻ സ്റ്റാളിൽ കയറി പണം കവർന്ന കുപ്രസിദ്ധ മോഷ്ടാവിനെ കണ്ണൂർ ടൗൺ പോലീസ് അറസ്റ്റ് ചെയ്തു. നിരവധി മോഷണ കേസുകളിൽ പ്രതിയായ മത്തായി എന്ന തൊരപ്പൻ മത്തായിയെയാണ്( 60) പോലീസ് അറസ്റ്റ് ചെയ്തത്. ഞായറാഴ്ച പുലർച്ചെ പള്ളിക്കുന്ന് - ഇടച്ചേരി റോഡിലെ നസീറിന്‍റെ ഉടമസ്ഥതയിലുള്ള ചിക്കൻ സ്റ്റാളിൽ കയറിയ മോഷ്ടാവ് മേശവലിപ്പിൽ സൂക്ഷിച്ചിരുന്ന 6500 രൂപയാണ് കവർന്നത്. നിരീക്ഷണ കാമറ ദൃശ്യങ്ങൾ അടക്കം പരിശോധിച്ചാണ് പോലീസ് മോഷ്ടാവിനെ പിടി കൂടിയത്. സമീപത്തെ മറ്റൊരു കടയിലും കയറി സാധനങ്ങൾ വലിച്ചിട്ടെങ്കിലും യാതൊന്നും കിട്ടിയിരുന്നില്ല.ടൗൺ എസ്ഐ അനുരൂപും സംഘവുമാണ് പ്രതിയെ പിടികൂടിയത്.

പേവിഷബാധ പ്രതിരോധം: സ്‌കൂള്‍ അസംബ്ലികളില്‍ ബോധവത്കരണം

കണ്ണൂർ: പേവിഷബാധയ്‌ക്കെതിരേ ആരോഗ്യ വകുപ്പ് വിദ്യാഭ്യാസ വകുപ്പുമായി സഹകരിച്ച് നടത്തുന്ന ബോധവത്കരണ പരിപാടിയുടെ ഭാഗമായി കണ്ണൂർ ജില്ലയിലെ മുഴുവൻ സ്കൂളുകളിലും പ്രത്യേക ക്ലാസുകൾ സംഘടിപ്പിച്ചു. റാബിസ് സ്പെഷൽ സ്കൂൾ അസംബ്ലിയുടെ കണ്ണൂർ ജില്ലാതല ഉദ്ഘാടനം മന്ത്രി കടന്നപ്പള്ളി രാമചന്ദ്രൻ നിർവഹിച്ചു. കുട്ടികൾക്കായി ആരോഗ്യ വകുപ്പ് തയാറാക്കിയ ബോധവത്കരണ പോസ്റ്ററുകൾ മന്ത്രി പ്രകാശനം ചെയ്തു. ജില്ലയിൽ പൊതു ഇടങ്ങളിൽ സ്ഥാപിക്കുന്ന ബോധവത്കരണ ഹോർഡിംഗ്സും മന്ത്രി പ്രകാശനം ചെയ്തു. കണ്ണൂർ മുൻസിപ്പൽ ഹയർ സെക്കൻഡറി സ്കൂളിൽ നടന്ന പരിപാടിയിൽ മേയർ മുസ്ലിഹ് മഠത്തിൽ അധ്യക്ഷത വഹിച്ചു. സ്‌കൂളുകളിൽ പേവിഷബാധയ്ക്കെതിരേ അവബോധം നല്കുന്നതിനാണ് അസംബ്ലി സമയത്തും പ്രത്യേക അസംബ്ലി വിളിച്ചുച്ചേർത്തും ആരോഗ്യ പ്രവര്‍ത്തകരുടെ നേതൃത്വത്തില്‍ ജില്ലയിൽ ക്ലാസുകൾ സംഘടിപ്പിച്ചത്. മൃഗങ്ങളുടെ കടിയോ മാന്തലോ, പോറലോ ഏറ്റാല്‍ രോഗ പ്രതിരോധത്തിന്‍റെ ഭാഗമായി നല്കേണ്ട പ്രഥമ ശുശ്രൂഷ, വാക്‌സിനേഷന്‍, മൃഗങ്ങളോട് ഇടപഴകുമ്പോള്‍ ശ്രദ്ധിക്കേണ്ട കാര്യങ്ങള്‍ എന്നിവയെപ്പറ്റി കുട്ടികള്‍ക്കും അധ്യാപകര്‍ക്കും ബോധവത്കരണം നൽകി. പേവിഷ ബാധ പ്രതിരോധം സംബന്ധിച്ച ക്ലാസിന് ഡെപ്യൂട്ടി ഡിഎംഒ ഡോ. കെ.സി. സച്ചിൻ നേതൃത്വം നല്കി. പേ വിഷ പ്രതിരോധത്തിനായി കുട്ടികള്‍ക്ക് വേണ്ട മാര്‍ഗനിര്‍ദേശങ്ങള്‍ നല്കുന്ന ലഘുലേഖകൾ പരിപാടിയിൽ വിതരണം ചെയ്തു. ജില്ലയിലെ മുഴുവൻ സ്കൂളുകളിലും പേ വിഷ പ്രതിരോധ ബോധ വത്കരണ പോസ്റ്ററുകൾ സ്ഥാപിക്കും. പേ വിഷ പ്രതിരോധ കാമ്പായിനിന്‍റെ ഭാഗമായി വീഡിയോ പുറത്തിറക്കും. ജൂലൈ മാസത്തില്‍ എല്ലാ അധ്യാപകര്‍ക്കും രക്ഷകര്‍ത്താക്കള്‍ക്കും പിടിഎ യോഗങ്ങളിലൂടെ സമാനമായ ബോധവത്കരണ ക്ലാസുകളും സംഘടിപ്പിക്കും.

കണ്ണൂർ ഗവ. മെഡിക്കൽ കോളജിൽ പ്രഥമ ശുശ്രൂഷ പരിശീലനം സംഘടിപ്പിച്ചു

പരിയാരം: കണ്ണൂർ ഗവ. മെഡിക്കൽ കോളജ് എമർജൻസി മെഡിസിൻ വിഭാഗം കണ്ണൂർ യൂണിവേഴ്സിറ്റി ഫിസിക്കൽ എഡ്യുക്കേഷൻ ആൻഡ്‌ സ്പോർട്സ് സയൻസ് വിദ്യാർഥികൾക്കും അധ്യാപകർക്കും ഫസ്റ്റ് എയ്ഡ്- സിപിആർ സ്കിൽസ് വർക്ക്ഷോപ്പ് ട്രെയിനിംഗ് സംഘടിപ്പിച്ചു. സ്പോർട്സ് സംബന്ധമായ അപകടങ്ങളിൽ ഫസ്റ്റ് എയ്ഡ് നൽകുന്നതിനെ കുറിച്ച് നടന്ന ട്രെയിനിംഗ് ക്ലാസിന് എമർജൻസി മെഡിസിൻ വിഭാഗം തലവൻ ഡോ. കെ.ടി. മാധവൻ, കണ്ണൂർ ഗവ. മെഡിക്കൽ കോളജ് കാഷ്വാലിറ്റി ഡപ്യൂട്ടി മെഡിക്കൽ സൂപ്രണ്ട് ഡോ. വിമൽ രോഹൻ, സീനിയർ റസിഡന്‍റ് ഡോ. മധുരഗീത, ഡോ. അരുൺ നിർമൽ, പിജി വിദ്യാർഥികളായ ഡോ. ആൽവിൻ, ഡോ. അബ്ദുൾ കലാം എന്നിവർ നേതൃത്വം നൽകി. ട്രെയിനിംഗിനോടനുബന്ധിച്ച് എമർജൻസി മെഡിസിൻ ഡിപ്പാർട്ട്മെന്‍റ് സന്ദർശനവും ഫിസിക്കൽ മെഡിസിൻ ഡിപ്പാർട്ട്മെന്‍റ് സന്ദർശനവും നടത്തി. ഫിസിക്കൽ മെഡിസിൻ ഡിപ്പാർട്ട്മെന്‍റിനെ കുറിച്ചും ഡിപ്പാർട്ട്മെന്‍റിലെ ഉപകരണത്തെക്കുറിച്ചും ഫിസിക്കൽ മെഡിസിൻ വിഭാഗം മേധാവി ഡോ. സൂരജ് രാജഗോപാൽ, പ്രഫസർ ഡോ. ഹേമലത, അസിസ്റ്റന്‍റ് പ്രഫസർ ഡോ. സാബിർ എന്നിവർ ക്ലാസെടുത്തു. കണ്ണൂർ യൂണിവേഴ്സിറ്റി ഫിസിക്കൽ എഡ്യുക്കേഷൻ മേധാവി പ്രഫ. അനിൽ രാമചന്ദ്രൻ പ്രസംഗിച്ചു.

തെങ്ങ് വീണ് പരിക്കേറ്റ് ചികിത്സയിലായിരുന്ന വീട്ടമ്മ മരിച്ചു

പഴയങ്ങാടി: കാലവർഷത്തിൽ തെങ്ങ് കടപുഴകി വീണ് ഗുരുതരമായി പരിക്കേറ്റ് ചികിത്സയിലായിരുന്ന വീട്ടമ്മ മരിച്ചു. കണ്ണപുരം ഇടക്കേപ്പുറം സ്വദേശി കെ.വി. പ്രശാന്തിനി (48) യാണ് മരിച്ചത്. കഴിഞ്ഞ മേയ് 25ന് ശക്തമായ കാറ്റിലും മഴയിലും വീടിനു സമീപത്തെ തെങ്ങ് കടപുഴകി വീണതിനെ തുടർന്ന് ഗുരുതരമായി പരിക്കേൽക്കുകയായിരുന്നു. ഉടൻ പ്രശാന്തിനിയെ കണ്ണൂരിലെ സ്വകാര്യ ആശുപത്രിയിലും തുടർന്ന് പരിക്ക് ഗുരുതരമായതിനാൽ പരിയാരത്തെ കണ്ണൂർ ഗവ. മെഡിക്കൽ കോളജിൽ പ്രവേശിപ്പിക്കുകയായിരുന്നു. ചികിത്സയിലിരിക്കെ ഇന്നലെ ഉച്ചയോടെ മരണപ്പെടുകയായിരുന്നു. കണ്ണപുരം പൂമാലക്കാവിനു സമീപം താമസിക്കുന്ന കരുണാകരൻ-കെ.വി. മൈഥിലി ദന്പതികളുടെ മകളാണ് പ്രശാന്തിനി. മക്കൾ: കിഷോർ, ആരതി കൃഷ്ണ. സഹോദരങ്ങൾ: പ്രശാന്ത്, പ്രസാദ്, പ്രിയ. കണ്ണപുരം പോലീസ് ഇൻക്വസ്റ്റ് നടത്തിയ മൃതദേഹം പോസ്റ്റ്മോർട്ടത്തിന് ശേഷം കണ്ണപുരം പൊന്നാച്ചിക്കൊവിൽ ശ്മശാനത്തിൽ സംസ്കരിച്ചു.

ബോധവത്കരണ സെമിനാർ സംഘടിപ്പിച്ചു

പയ്യാവൂർ: ചെമ്പേരി നിർമല ഹയർ സെക്കൻഡറി സ്കൂൾ, വൈഎംസിഎ ചെമ്പേരി യൂണിറ്റ് എന്നിവയുടെ സംയുക്‌താഭിമുഖ്യത്തിൽ സംഘടിപ്പിച്ച അന്താരാഷ്ട്ര ലഹരി വിരുദ്ധ ദിനാചരണവും ബോധവത്കരണ സെമിനാറും സ്കൂൾ ഓഡിറ്റോറിയത്തിൽ നടന്നു. ഏരുവേശി പഞ്ചായത്ത് പ്രസിഡന്‍റ് മിനി ഷൈബി ലഹരി വിമുക്ത കാമ്പസ് പ്രഖ്യാപനത്തിന്‍റെ പഞ്ചായത്ത് തല ഉദ്ഘാടനം നിവഹിച്ചു. വൈഎംസിഎ പ്രസിഡന്‍റ് ഷീൻ ഏബ്രഹാം അധ്യക്ഷത വഹിച്ചു. സ്കൂൾ പ്രിൻസിപ്പൽ സി.ഡി. സജീവ് ആമുഖ പ്രഭാഷണവും ചെമ്പേരി ലൂർദ് മാതാ ബസിലിക്ക റെക്ടർ റവ.ഡോ. ജോർജ് കാഞ്ഞിരക്കാട്ട് അനുഗ്രഹ പ്രഭാഷണവും നടത്തി. ഹയർ സെക്കൻഡറി സ്കൂൾ പിടിഎ പ്രസിഡന്‍റ് മാത്തുക്കുട്ടി അലക്സ്, ഏരുവേശി പ്രാഥമികാരോഗ്യകേന്ദ്രം ഹെൽത്ത് ഇൻസ്പെക്ടർമാരായ രാജേഷ് ബാബു, ശ്രീനിവാസൻ, നഴ്സ് അനഘ, വൈഎംസിഎ സെക്രട്ടറി റോബി ഇലവുങ്കൽ എന്നിവർ പ്രസംഗിച്ചു. വിമുക്തഭടനും ചെമ്പേരിയിലെ ഹോം ഗാർഡുമായ മാത്യു വരമ്പകത്തിനെ ആദരിച്ചു. സോഫ്റ്റ് സ്കിൽ ട്രെയിനർ ജോസ് മേമടം ക്ലാസ് നയിച്ചു.ട പ്രോഗ്രാം ഡയറക്ടർമാരായ ബിജു തയ്യിൽ, ബാബുക്കുട്ടി ജോർജ്, വിനോദ് അഗസ്റ്റിൻ, ട്വിങ്കിൾ ജേക്കബ്, ഷൈബി കുഴിവേലിപ്പുറത്ത്, ജോമി ജോസ് ചാലിൽ, ജെയ്സൺ മേക്കലാത്ത്, അജി കൊട്ടാരത്തിൽ, അധ്യാപകർ, സ്കൗട്ട് ആൻഡ് ഗൈഡ് വിദ്യാർഥികൾ എന്നിവർ നേതൃത്വം നൽകി.

എൻപിഎസുകാർക്ക് മിനിമം പെൻഷൻ ഉറപ്പാക്കണം

ശ്രീകണ്ഠപുരം: 12 വർഷത്തോളം സർക്കാർ സർവീസിൽ ജോലി ചെയ്ത് വിരമിക്കുന്ന പങ്കാളിത്ത പെൻഷൻ പദ്ധതിയിൽ ഉൾപെട്ട പെൻഷൻകാർക്ക് മിനിമം പെൻഷൻ ഉറപ്പുവരുത്തണമെന്ന് കേരള സ്റ്റേറ്റ് സർവീസ് പെൻഷനേഴ്സ് അസോസിയേഷന്‍റ്് ശ്രീകണ്ഠപുരം മണ്ഡലം കമ്മിറ്റി വരവേൽപ്പ് സമ്മേളനം ആവശ്യപ്പെട്ടു. സംസ്ഥാന സെക്രട്ടറി കെ. രാമകൃഷ്ണൻ ഉദ്ഘാടനം ചെയ്തു. പ്രസിഡന്‍റ് എൻ.എൽ ചാക്കോ അധ്യക്ഷത വഹിച്ചു. പുതുതായി സംഘടനയിലേക്ക് വന്നവരെ സംസ്ഥാന സെക്രട്ടേറിയറ്റംഗം പി.പി. ചന്ദ്രാംഗതൻ സ്വീകരിച്ചു. എസ്എസ്എൽസി, പ്ലസ് ടു പരീക്ഷയിൽ ഉന്നത വിജയം നേടിയവർക്കുള്ള ഉപഹാരം ജില്ലാ സെക്രട്ടറി സുഖദേവൻ സമ്മാനിച്ചു. എം.പി. കുഞ്ഞിമൊയ്തീൻ, ജോസഫ് സകറിയാസ്, കെ.ബാബു,എം.കെ. ബാലകൃഷ്ണൻ,ഡോ. വി.എ അഗസ്റ്റിൻ, എം.എം.ലീല, എം.ജനാർദ്ദനൻ, വർഗീസ് ജോൺ, ജൈനമ്മ മോഹൻ എന്നിവർ പ്രസംഗിച്ചു

സ്കൂളിൽ മെറിറ്റ് ഡേ സംഘടിപ്പിച്ചു

പൊടിക്കളം: മേരിഗിരി ഇംഗ്ലീഷ് മീഡിയം സ്കൂളിൽ സിബിഎസ്ഇ പരീക്ഷയിൽ 10, 12 ക്ലാസുകളിൽ ഉന്നത വിജയം കൈവരിച്ച വിദ്യാർഥികളെ ആദരിക്കുന്നതിനായി മെറിറ്റ് ഡേ സംഘടിപ്പിച്ചു. സജീവ് ജോസഫ് എംഎൽഎ ഉദ്ഘാടനം ചെയ്തു. സിബിഎസ്ഇ പത്താം ക്ലാസ് ബോർഡ് പരീക്ഷയിൽ 90 ശതമാനത്തിലധികം മാർക്ക് വാങ്ങിച്ച 45 വിദ്യാർഥികൾക്കും പന്ത്രണ്ടാം ക്ലാസിൽ 90 ശതമാനത്തിലധികം മാർക്ക് വാങ്ങിച്ച 75 വിദ്യാർഥികൾക്കും മെറിറ്റ് അവാർഡുകൾ വിതരണം ചെയ്തു. നീറ്റ് തുടങ്ങിയ എൻട്രൻസ് പരീക്ഷകളിൽ മികച്ച റാങ്ക് നേടിയ സ്കൂളിലെ വിദ്യാർഥികളെയും പൂർവ വിദ്യാർഥികളെയും ചടങ്ങിൽ ആദരിച്ചു. അങ്ങാടിക്കടവ് ഡോൺബോസ്കോ കോളജ് പ്രിൻസിപ്പൽ റവ. ഡോ. ഫ്രാൻസിസ് കാഞ്ഞിരക്കാട്ട് മുഖ്യാതിഥിയായിരുന്നു. സ്കൂൾ പ്രിൻസിപ്പൽ ബ്രദർ ഡോ. റെജി സ്കറിയ, മാനേജർ ബ്രദർ ജോണിജോസഫ്, പിടിഎ വൈസ് പ്രസിഡന്‍റ് സുജീഷ, വൈസ് പ്രിൻസിപ്പൽ പി.പി. പ്രദ്യുമ്നൻ, വിൻസെന്‍റ് ഫിലിപ്പ്, പി. റിനി, തോമസ് കുര്യൻ എന്നിവർ പ്രസംഗിച്ചു.

നാടിന്‍റെ മനസറിഞ്ഞ് ഒരു ലയൺസ് ക്ലബ്

ചെറുപുഴ: ജീവകാരുണ്യപ്രവർത്തനങ്ങൾ ഉൾപ്പടെ നിരവധി സന്നദ്ധ പ്രവർത്തനങ്ങൾക്ക് നേതൃത്വം നൽകി വരുന്ന പാടിയോട്ടുചാൽ ലയൺസ് ക്ലബ് പുരസ്കാര നിറവിൽ. ഏറ്റവും മികച്ച ലയൺസ് ക്ലബ് റീജണൽ പ്രസിഡന്‍റിനുള്ള പുരസ്കാരമണ് ഇത്തവണ ക്ലബിനെ തേടിയെത്തിയത്. മികച്ച റീജണൽ പ്രസിഡന്‍റിനുള്ള പുരസ്കാരം ജീവ് ജയിംസ് റീജണൽ ചെയർമാൻ അബൂബക്കർ സിദ്ദിഖിയിൽ നിന്നും ഏറ്റുവാങ്ങി. ജീവ് ജയിംസ് പ്രസിഡന്‍റായി ചുമതലയേറ്റ് ഒരു വർഷത്തിനകം നടപ്പാക്കിയ വ്യത്യസ്ത വിഭാഗങ്ങളിലായുള്ള 19 മെഡിക്കൽ ക്യാന്പുകൾ, ഡ്രഗ്, സൈബർ സെക്യൂരിറ്റി, ട്രാഫിക് റൂൾ, ഹെൽത്ത്, ഫാമിലി വെൽഫെയർ, മെന്‍റൽ ഹെൽത്ത് എന്നിവ ഉൾപ്പെടെ 23 ബോധവത്കരണ ക്ലാസുകൾ, നിർധന രോഗികൾക്കു നടപ്പാക്കിയ സഹായ പദ്ധതികൾ എന്നിവയടക്കമുള്ള പ്രവർത്തനങ്ങൾ പരിഗണിച്ചാണ് പുരസ്കാരം. മൂന്ന് സ്കൂളുകളിൽ കുടിവെള്ള പ്യൂരിഫയർ, നിർധന രോഗികൾക്ക് ചികിത്സാ സഹായം എന്നിവയും പരിസ്ഥിതി പ്രവർത്തനം, പച്ചക്കറി, ജൈവ കന്പോസ്റ്റ് നിർമാണ പദ്ധതികൾക്കൊപ്പം പൊതുസ്ഥലം ശുചിയായി സംരക്ഷിക്കുന്നതിനുള്ള പദ്ധതികളും റോഡ് സുരക്ഷാ പദ്ധതികളും നടപ്പാക്കി. എല്ലാ മാസവും ഹംഗർ റിലീഫ് പദ്ധതികളും നടത്തി വരുന്നതിനൊപ്പം വൃദ്ധസദനങ്ങളിലെ അന്തേവാസികൾക്ക് സൗജന്യമായി മരുന്നും ഭക്ഷണവും ചികിത്സാസഹായവും നൽകുന്നുണ്ട്. പ്രവർത്തന മികവിന്‍റെ അടിസ്ഥാനത്തിൽ ലയൺസ് ക്ലബ് പാടിയോട്ടുചാലിന് നിരവധി അവാർഡുകൾ ലഭിച്ചിട്ടുണ്ട്. മികച്ച പ്രസിഡന്‍റ്, സർവീസ് പ്രോജക്ടുകൾ ചെയ്തതിന് പ്രത്യേക അവാർഡുകൾ, മെംബർഷിപ്പ് ഗ്രോത്ത് അവാർഡ്, ബെസ്റ്റ് ക്ലബ് പ്രസിഡന്‍റ് അവാർഡ് തുടങ്ങിയവയും ക്ലബ്ബിന് ലഭിച്ചിട്ടുണ്ട്.

വിദ്യാർഥികൾക്ക് ക്വിസ് മത്സരം സംഘടിപ്പിച്ചു

തളിപ്പറമ്പ്: വിദ്യാരംഗം തളിപ്പറമ്പ് നോർത്ത് ഉപജില്ലാ കമ്മറ്റിയുടെ നേതൃത്വത്തിൽ വായന മാസാചരണ ഭാഗമായി വിദ്യാർഥികൾക്ക് ക്വിസ് മത്സരം സംഘടിപ്പിച്ചു. തളിപ്പറമ്പ് നോർത്ത് എഇഒ കെ. മനോജ് ഉദ്ഘാടനം ചെയ്തു. എം.എം. ജനാർദനൻ അധ്യക്ഷത വഹിച്ചു. പി. ഇബ്രാഹിം, ജിഷ ചാലിൽ, പി.വി. വന്ദന, കെ. സുമതി എന്നിവർ പ്രസംഗിച്ചു. പി.ജെ. സജി, കൃഷ്ണൻ, എ.എ നിധീഷ് എന്നിവർ ക്വിസ് മത്സരം നയിച്ചു. യുപി വിഭാഗത്തിൽ പട്ടുവം യുപി എസിലെ കെ. സാവേദ് , പുല്യാഞ്ഞോട് യുപിഎസിലെ ധനുഷ് ദേവ്, ഇരിങ്ങൽ യുപിഎസിലെ നിഗിദ് സുരേഷ്, ജി യുപിഎസ് പൂവഞ്ചാലിലെ കെ.വി.അനുനന്ദ എന്നിവരും, എൽപി വിഭാഗത്തിൽ നടുവിൽ എൽപിഎസിലെ കെ.വി. ശിവനന്ദ്, ജിഎൽപിഎസ് പനക്കാടിലെ പി.വ സരോദ്, ഇരിങ്ങൽ യുപിഎസിലെ യു അഥർവദേവ്, കൂനം എൽപിഎസിലെ പി.ആർ. ഋഷിദേവ് എന്നിവരും ഹൈസ്കൂൾ വിഭാഗത്തിൽ എൻഎസ്എസ്എച്ച്എസ്എസിലെ സഞ്ജയ് അനിൽ, ടാഗോർ വിദ്യാനികേതൻ ജിഎച്ച്എസ് എസിലെ എൻ.വി. സിദ്ധാർഥി, ബിവിജെഎംഎച്ച്എസ് എസിലെ എം.ആർ. ശിവാനി , നടുവിൽ എച്ച്എസ് എസിലെ ലക്ഷ്മി കൃഷ്ണ എന്നിവരും സമ്മാനർഹരായി.

കാറിടിച്ച് ബൈക്ക് യാത്രക്കാരനും കുടുംബവും ഗുരുതരാവസ്ഥയിൽ

നടുവിൽ: എതിർദിശയിൽ അമിത വേഗതയിൽ വന്ന കാറിടിച്ച് ബൈക്ക് യാത്രക്കാരനും കുടുംബത്തിനും പരിക്കേറ്റു. കുടുംബശ്രീ കാസർഗോഡ് ജില്ലാ പ്രോഗ്രാം ഓഫീസർ പെരുമ്പടവ് തലവിലെ പി.കെ. രത്നേഷ് (33), ഭാര്യ അശ്വതി (24), മകൾ ഇഷാനി (മൂന്ന്) എന്നിവർക്കാണു ഗുരുതരമായി പരിക്കേറ്റത്. ഇവരെ കണ്ണൂരിലുള്ള സ്വകാര്യ ആശുപത്രിയിലെ അത്യാഹിത വിഭാഗത്തിൽ പ്രവേശിപ്പിച്ചു. ഇന്നലെ ഉച്ചകഴിഞ്ഞ് രണ്ടോടെ മലയോര ഹൈവേയിൽ നടുവിൽ ബിടിഎം ഇംഗ്ലീഷ് മീഡിയം സ്കൂളിന് മുന്നിലായിരുന്നു അപകടം. രത്നേഷും കുടുംബവും തലവില്‍ നിന്നും ചേപ്പറമ്പിലുള്ള ഭാര്യവീട്ടിലേക്കു പോകുമ്പോൾ എതിർ ഭാഗത്തുനിന്നും രണ്ടു വാഹനങ്ങളെ മറികടന്ന് തെറ്റായ ദിശയിൽ അമിതവേഗതയിൽ വന്ന കാർ ഇവരെ ഇടിച്ചുതെറിപ്പിക്കുകയായിരുന്നുവെന്ന് സിസിടിവി ദൃശ്യങ്ങളിൽ നിന്നും വ്യക്തമാകുന്നു. പെരുമ്പടവ് സ്വദേശി പെരുവംകാവുങ്കൽ പി.എ. അനീഷ് (35) വാടകയ്ക്കെടുത്ത കാറാണ് അപകടമുണ്ടാക്കിയത്. ഇയാളായിരുന്നു കാറ് ഓടിച്ചിരുന്നത്. ഇവർ കുടുംബസമേതം കൊട്ടിയൂരിൽ പോയി പെരുമ്പടവിലേക്ക് മടങ്ങുകയായിരുന്നു.

തിരുഹൃദയ തിരുസ്വരൂപ പ്രയാണം നടത്തി

വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് ഫൊറോനാ ഇടവകയും തിരുഹൃദയ സന്യാസിനീ സമൂഹം തലശേരി സെന്‍റ് ജോസഫ്സ് പ്രൊവിൻസും സംയുക്തമായി വായാട്ടുപറന്പ് ഇടവകയിൽ തിരുഹൃദയ തിരുസ്വരൂപ പ്രയാണം നടത്തി. ഫൊറോനാ വികാരി റവ. ഡോ. തോമസ് തെങ്ങുംപള്ളി, അസിസ്റ്റന്‍റ് വികാരി ഫാ. നോയൽ ആനിക്കുഴിക്കാട്ടിൽ, കോ-ഓർഡിനേറ്റർ പി. ജെ.മാത്യു, പാരിഷ് സെക്രട്ടറി ജെയ്സൺ അട്ടാറിമാക്കൽ, കൈക്കാരന്മാർ, ഇടവകാ പ്രതിനിധികളും പ്രയാണത്തിന് നേതൃത്വം നൽകി. തിരുഹൃദയ സന്യാസിനീ സമൂഹം പ്രൊവിൻഷ്യൽ സുപ്പീരിയർ സിസ്റ്റർ ഡോ. ട്രീസ പാലയ്ക്കൽ എസ്എച്ച്, സിസ്റ്റർ ആൻസി ടോം പയ്യമ്പള്ളി എസ്എച്ച്, സിസ്റ്റർ പ്രീതി കണ്ണേഴത്ത് എസ്എച്ച് എന്നിവർ പള്ളിയിലും, താവുകുന്ന് ബാലപുരം എന്നിവിടങ്ങളിലുമായി സന്ദേശം നൽകി. 200ലധികം വാഹനത്തിന്‍റെ അകമ്പടിയോടുകൂടിയായിരുന്നു പ്രയാണം. ഈശോയുടെ തിരുഹൃദയം എല്ലായിടത്തും അറിയപ്പെടാനും ക്രിസ്തീയ കുടുംബങ്ങളിൽ തിരുഹൃദയ പ്രതിഷ്ഠ നടത്തുന്നതിന്‍റെ പ്രാധാന്യവും പ്രഘോഷിച്ചു കൊണ്ട് ഇടവക ദൈവാലയത്തിൽ തിരുഹൃദയ പ്രതിഷ്ഠയ്ക്കും ദിവ്യബലിയ്ക്കും ശേഷം റാലി സമാപിച്ചു. നേർച്ച ഭക്ഷണവും ഒരുക്കിയിരുന്നു.

സിന്‍ഡിക്കറ്റിനെ നോക്കുകുത്തിയാക്കി ബിഎഡ് കോഴ്‌സുകള്‍ റദ്ദാക്കി

കാസര്‍ഗോഡ്: കണ്ണൂര്‍ സര്‍വകലാശാലയുടെ കാസര്‍ഗോഡ് വിദ്യാനഗറിലെ ചാല ബിഎഡ് സെന്‍ററില്‍ മാത്തമാറ്റിക്‌സ്, ഫിസിക്കല്‍ സയന്‍സ് കോഴ്‌സ് ഓപ്ഷന്‍ വൈസ്ചാന്‍സലര്‍ റദ്ദാക്കിയത് സിന്‍ഡിക്കറ്റിനെ മറികടന്ന്. കാമ്പസിനെ സജീവമാക്കിയിരുന്ന ബഹുഭാഷാ പഠനകേന്ദ്രം അടച്ചതിനു പിന്നാലെയാണ് കാസര്‍ഗോഡ് ജില്ലയിലെ വിദ്യാഭ്യാസമേഖലയില്‍ ഒരു പൂട്ടുകൂടി വീണത്. സര്‍വകലാശാല റജിസ്ട്രാറും ഒരു സിന്‍ഡിക്കറ്റ് അംഗവും ഉള്‍പ്പെട്ട ഉപസമിതിയുടെ ശിപാര്‍ശ എന്ന പേരില്‍ വെറും ഫയല്‍ മുഖേന എടുത്ത തീരുമാനത്തിലൂടെയാണ് സിന്‍ഡിക്കറ്റ് അംഗീകാരമില്ലാതെ കോഴ്‌സുകള്‍ റദ്ദാക്കിയതെന്നാണ് ആരോപണം. കോഴ്‌സുകള്‍ അനുവദിക്കുക, ഒഴിവാക്കുക, അധ്യാപകരെ നിയമിക്കുക തുടങ്ങിയ കാര്യങ്ങളില്‍ സിന്‍ഡിക്കറ്റിന്‍റെ തീരുമാനം നിര്‍ണായകമാണ്. കോഴ്സുകള്‍ ഒഴിവാക്കുന്ന വിവരം സംബന്ധിച്ച ഉത്തരവ് ഇറങ്ങിയപ്പോഴാണു സിന്‍ഡിക്കറ്റ് അംഗങ്ങളും അധ്യാപകരും ഉള്‍പ്പെടെ അറിഞ്ഞത് എന്നാണ് പറയുന്നത്. കാമ്പസുകള്‍ ഓരോന്നായി അടച്ച് വിദ്യാര്‍ഥികള്‍ക്കുള്ള അവസരം നിഷേധിക്കുന്നതിന്‍റെ ഭാഗമായാണ് ഈ രഹസ്യനീക്കമെന്ന ആരോപണവുമുണ്ട്. രണ്ടു കോഴ്സ് റദ്ദാക്കിയാല്‍ രണ്ട് അധ്യാപക തസ്തിക കുറയും. ചെലവ് കുറയ്ക്കാന്‍ എന്ന പേരില്‍ കോഴ്‌സുകള്‍ റദ്ദാക്കുമ്പോള്‍ നഷ്ടമാകുന്നത് ഈ മേഖലയിലെ പാവപ്പെട്ട വിദ്യാര്‍ഥികളുടെ അവസരമാണ്. സ്വകാര്യസ്ഥാപനങ്ങള്‍ക്കുവേണ്ടിയാണ് സര്‍ക്കാര്‍ സ്ഥാപനങ്ങളില്‍ കോഴ്സുകള്‍ വെട്ടിക്കുറച്ചതെന്നും ആരോപണവുമുണ്ട്. കേരള-കര്‍ണാടക അതിര്‍ത്തി ജില്ലയെന്ന നിലയില്‍ കാസര്‍ഗോഡ് ജില്ലയില്‍ ഭാഷാ ന്യൂനപക്ഷ പരിഗണനപോലും ലംഘിച്ചാണ് രണ്ടു കോഴ്‌സുകളും റദ്ദാക്കിയതെന്നും പരാതികളുണ്ട്. റിട്ട. ചീഫ് സെക്രട്ടറി പി. പ്രഭാകരന്‍റെ നേതൃത്വത്തില്‍ സര്‍ക്കാരിനു സമര്‍പ്പിച്ച സമഗ്ര കാസര്‍ഗോഡ് വികസന പാക്കേജ് നിര്‍ദേശങ്ങള്‍ക്കും സര്‍വകലാശാലയുടെ തീരുമാനം വിരുദ്ധമാണ്. ആവശ്യത്തിന് വിദ്യാഭ്യാസ സൗകര്യങ്ങളുടെ അഭാവം കാരണം അയല്‍ സംസ്ഥാനങ്ങളെ ആശ്രയിക്കേണ്ട സാഹചര്യത്തില്‍ പലരും പകുതിവഴിയില്‍ പഠനം നിര്‍ത്താന്‍ നിര്‍ബന്ധിതമാകുന്നതായി പ്രഭാകരന്‍ കമ്മിഷന്‍ സംസ്ഥാന സർക്കാരിന് സമര്‍പ്പിച്ച റിപ്പോര്‍ട്ടില്‍ ചൂണ്ടിക്കാട്ടിയിരുന്നു. ജൂലൈ നാലിനു ചേരുന്ന സിന്‍ഡിക്കറ്റ് യോഗം കാസര്‍ഗോഡ് ചാല കേന്ദ്രത്തിലെ രണ്ടു കോഴ്സുകള്‍ റദ്ദാക്കിയ തീരുമാനം ചര്‍ച്ച ചെയ്‌തേക്കും. 12 അംഗ സിന്‍ഡിക്കറ്റ് തീരുമാനം ഈ കോഴ്‌സുകള്‍ പുനഃസ്ഥാപിക്കുന്നതിന് നിര്‍ണായകമാകും. കോഴ്‌സുകള്‍ റദ്ദാക്കാന്‍ ശിപാര്‍ശ ചെയ്ത ഉപസമിതിയെയും റദ്ദാക്കാന്‍ ഉത്തരവിട്ട വിസിയെയും കാര്യങ്ങള്‍ ബോധ്യപ്പെടുത്തി കോഴ്‌സുകള്‍ നിലനിര്‍ത്തുമെന്ന പ്രതീക്ഷയിലാണ് വിദ്യാര്‍ഥികളും ജില്ലയും.

ചുരുളി : നടൻ ജോജുവിനെ തള്ളി കഥാകൃത്ത് വിനോയ് തോമസ്

ഉളിക്കൽ: ചുരുളി സിനിമ സംബന്ധിച്ച് നടൻ ജോജു ഉന്നയിച്ച ആരോപണങ്ങൾ തള്ളി കഥാകൃത്തും എഴുത്തുകാരനുമായ ഉളിക്കൽ സ്വദേശി വിനോയ് തോമസ്. സിനിമയിൽ ജോജ് അഭിനയിച്ച രംഗങ്ങൾ സ്കൂളിൽ പഠിക്കുന്ന മകളെ ആൺസുഹൃത്തുക്കൾ കാട്ടികൊടുത്തതിനെ തുടർന്ന് മകൾ ഇക്കാര്യം ജോജുവിനോട് ചോദിച്ചതോടെയാണ് നടൻ സിനിമയ തള്ളിപ്പറഞ്ഞതും വിവാദം ആരംഭിച്ചതും. ഫിലം ഫെസ്റ്റിവലിൽ പ്രദർശിപ്പിക്കാൻ വേണ്ടി മാത്രമുള്ള സിനിമയാണെന്ന ഉറപ്പിലാണ് താൻ അഭിനയിച്ചതെന്നും എന്നാൽ ചിത്രം തീയറ്റുകളിൽ പ്രദർശിപ്പിച്ചുവെന്നുമാണ് ജോജു ആരോപിച്ചത്.എന്നാൽ നടന്‍റെ ആരോപണങ്ങൾ അടിസ്ഥാന രഹിതമാണെന്ന് അഞ്ചു വർഷത്തിനു ശേഷമുണ്ടായ വിവാദത്തെ കുറിച്ച് കഥാകാരൻ വിനോയ് തോമസ് ദീപികയോട് പറഞ്ഞു. കുറ്റവാളികളുടെയും പോലീസിന്‍റെയും സിനിമയിലൂടെ പറഞ്ഞത്. കേരളത്തിൽ കുറ്റം ചെയ്തതിന് ശേഷം ഒളിവിൽ പോയ പ്രതിയെ തേടി പോകുന്നതാണ് കഥ. പലകുറ്റകൃത്യങ്ങൾക്ക് ശേഷം പലരും ഇതു പോലുളള പ്രദേശങ്ങളിലെക്ക് രക്ഷപെടുന്നുണ്ട്. കുറ്റവാളികളുള്ള ഒരു ഗ്രാമത്തിലെ കഥയിൽ അവർ ഉപയോഗിക്കുന്ന സംസാര ശൈലി മാത്രമാണ് സിനിമയിൽ സംഭാഷണമാക്കിയത്. കഥയെ കഥായി ഉൾക്കൊള്ളണമെന്നും വിനോയ് തോമസ് പറഞ്ഞു. ഒടിടി പ്ലാറ്റ്ഫോമിനായി ഇനിയൊരു സിനിമയും നിർമിക്കില്ല. സിനിമ എവിടെ പ്രദശിപ്പിക്കണം എന്ന് തിരുമാനിക്കുന്നത് നിർമാതവും സംവിധായകനുമാണ്. എങ്കിലും ചുരുളി ഒടിടിയിൽ മാത്രമാണ് പ്രദശിപ്പിച്ചത്. സോണി ലൈവ് എന്ന കമ്പനിക്കാണ് പ്രദർശനാനുമതി. സിനിമ പതിനെട്ട് വയസ് പൂർത്തിയായവർ മാത്രമേ കാണാൻ പാടുള്ളൂ എന്ന് പ്രത്യേകം നിർദേശിച്ചിരുന്നു. ഈ ചിത്രം എങ്ങനെ വിദ്യാർഥികളുടെ കൈകളിൽ എത്തി എന്നത് സർക്കാർ അന്വേഷിക്കണം. സമൂഹ്യ മാധ്യമങ്ങളിൽ പ്രദർശിച്ചവർക്ക് ഐ ടി വകുപ്പനുസരിച്ച് നടപടി സ്വീകരിക്കണം. ചുരുളി ഇറങ്ങുമ്പോൾ ഒ ടി ടി പ്ലാറ്റഫോമിൽ പ്രദർശിപ്പിക്കുന്ന പടങ്ങൾക്ക് സെൻസർ ബോർഡിന്‍റെ അുമതി ആവശ്യമില്ലായിരുന്നു. ചിത്രത്തിൽ മറ്റ് അശ്ലീല രംഗങ്ങൾ ഒന്നുമില്ല. സിനിമയയുടെ പുതുമ അതിലെ സംഭാഷണം തന്നെയാണ്. ചിത്രത്തിലെ എല്ലാ അഭിനേതാക്കൾക്കും അവരുടെ ശമ്പളം കൃത്യമായി നൽകിയിട്ടുണ്ട് എന്നാണ് ബന്ധപ്പെട്ടവരിൽനിന്നും അറിയാൻ കഴിഞ്ഞത്. ജോലി ചെയ്തതിന് കൂലി ലഭിച്ചില്ലെങ്കിൽ അഞ്ചു വർഷത്തോളം മിണ്ടാതിരിക്കുന്നവരുടെ നാടാണ് കേരളമെന്ന് താൻ വ്യക്തി പരമായി കരുതുന്നില്ലെന്നും വിനോയ് തോമസ് പറഞ്ഞു.

കൊട്ടിയൂർ തീർഥാടക സംഘം സഞ്ചരിച്ച വാഹനം ബസിനു പിന്നിലിടിച്ച് ആറുപേർക്കു പരിക്ക്

ഇരിട്ടി: കൊട്ടിയൂർ തീർഥാടകർ സഞ്ചരിച്ച ടെമ്പോ ട്രാവലർ നിയന്ത്രണം വിട്ട് കെഎസ്ആർടിസി ബസിനു പിറകിലിടിച്ച് ആറുപേർക്കു പരിക്ക്. എറണാകുളത്തുനിന്നും എത്തിയ തീർഥാടകർ കൊട്ടിയൂർ ദർശനം കഴിഞ്ഞ് പറശിനിക്കടവിലേക്ക് പോകുന്നതിനിടെയായിരുന്നു അപകടം. കെ. കെ. മായ (57) വടുതല, ഷീല ഹരിദാസ് (58) കുമ്പളം, ശുഭ മുരളി (56) ചിറ്റൂർ, എറണാകുളം സ്വദേശികളായ ശ്രീനികുമാർ (52), ടി.സി. സീമ (45), സി.എസ്. ശ്രീരാഗ് (16) എന്നിവർക്കാണു പരിക്കേറ്റത്. ഇവർ ഇരിട്ടിയിലെ സ്വകാര്യ ആശുപത്രിയിൽ ചികിത്സ തേടി. ഇന്നലെ രാവിലെ 8.30 ഓടെ ഇരിട്ടി-തളിപ്പറമ്പ് റോഡിൽ പെരുമ്പറമ്പ് സ്‌കൂൾ കയറ്റത്തിലായിരുന്നു അപകടം. കൊട്ടിയൂരിൽ ദർശനം കഴിഞ്ഞ് കണ്ണൂർ പറശിനിക്കടവിലേക്ക് പോവുകയായിരുന്ന തീർഥാടക സംഘം സഞ്ചരിച്ച ട്രാവലർ ഇതിനു മുന്നിലായി തളിപ്പറമ്പിലേക്കു പോവുകയായിരുന്ന കെഎസ് ആർടിസി ബസിന്‍റെ പിറകിൽ ഇടിക്കുകയായിരുന്നു. അപകടത്തിൽ ട്രാവലറിന്‍റെ ഉള്ളിൽ കുടുങ്ങിപ്പോയവരെ ഇരിട്ടി സ്റ്റേഷൻ ഓഫീസർ ഉണ്ണികൃഷ്ണന്‍റെ നേതൃത്വത്തിലുള്ള അഗ്നിരക്ഷാസേനയെത്തി വാതിൽ വെട്ടിപ്പൊളിച്ച് പുറത്തെടുത്ത് ആശുപത്രിയിൽ എത്തിക്കുകയായിരുന്നു. അസിസ്റ്റന്‍റ് ഓഫീസർ എൻ.ജി. അശോകൻ, ഫയർമാൻമാരായ എ.സി. ഷാനിഫ്, ജസ്റ്റിൻ ജയിംസ്, സി.വി. സൂരജ്, ഹോംഗാർഡ് വി. രമേശൻ, ധനേഷ്, സരീഷ് എന്നിവരും അഗ്നിരക്ഷാസേനയുടെ സംഘത്തിലുണ്ടായിരുന്നു.

നിയമം നോക്കുകുത്തി; റാഗിംഗ് ക്രൂരത വര്‍ധിക്കുന്നു

സ്വന്തം ലേഖകന്‍ കാസര്‍ഗോഡ്: സ്‌കൂളില്‍ റാഗിംഗിനെതിരെ ബോധവത്കരണങ്ങളും പോലീസ് മുന്നറിയിപ്പുകളുമൊക്കെ ഒരു ഭാഗത്ത് നടക്കുമ്പോഴും ജില്ലയില്‍ റാഗിംഗ് ക്രൂരതയ്ക്ക് ഇരയാകുന്ന കുട്ടികളുടെ എണ്ണത്തില്‍ യാതൊരു കുറവുമുണ്ടാകുന്നില്ല. മഞ്ചേശ്വരം താലൂക്കിലെ സര്‍ക്കാര്‍ സ്‌കൂളില്‍ പ്ലസ് വണ്‍ ഹ്യുമാനിറ്റീസ് വിദ്യാര്‍ഥിയായ നജീബ് (യഥാര്‍ഥ പേരല്ല) സ്‌കൂളില്‍ വന്ന് അഞ്ചാംദിവസമാണ് പ്ലസ്ടു വിദ്യാര്‍ഥികളുടെ ക്രൂരമായ മര്‍ദ്ദനത്തിനിരയായത്. ബസ് സ്റ്റോപ്പില്‍ വെച്ച് താന്‍ മുമ്പ് പഠിച്ച സ്‌കൂളിലെ വിദ്യാര്‍ഥിനിയോട് സംസാരിച്ചതിനാണ് അഞ്ചു സീനിയര്‍ വിദ്യാര്‍ഥികള്‍ ചേര്‍ന്ന് നജീബിനെ പരസ്യമായി മര്‍ദ്ദിച്ചത്. അവരില്‍ ഒരാള്‍ തലയ്ക്കിട്ടാണ് അടിച്ചത്. ജൂണ്‍ 18ന് പ്ലസ് വണ്‍ വിദ്യാര്‍ഥികള്‍ക്കുള്ള ക്ലാസുകള്‍ ആരംഭിച്ചതുമുതല്‍ ഈ സ്‌കൂളില്‍ റാഗിംഗ് ക്രൂരത അരങ്ങേറുന്നു. ഷൂസ് ധരിച്ചതിന് നജീബ് നേരത്തെ ആക്രമിക്കപ്പെട്ടിരുന്നു. സ്‌കൂളില്‍ സീനിയര്‍ വിദ്യാര്‍ഥികള്‍ ജൂണിയര്‍ വിദ്യാര്‍ഥികള്‍ക്ക് ഡ്രസ് കോഡ് ഏര്‍പ്പെടുത്തിയിട്ടുണ്ട്. പ്ലസ് വണ്‍ വിദ്യാര്‍ഥികള്‍ ഫുള്‍ സ്ലീവ് ഷര്‍ട്ട് ധരിക്കണമെന്നും കോളര്‍ ബട്ടണ്‍ ഇടണമെന്നും വാച്ചുകളോ ഷൂസോ ഉപയോഗിക്കരുതെന്നുമാണ് ഇവരുടെ ചട്ടം. കൂടാതെ ജൂണിയര്‍ വിദ്യാര്‍ഥികളെ ശുചിമുറിയില്‍ കൊണ്ടുപോയി പുഷ്-അപ്പ് എടുപ്പിക്കും. എതിര്‍ത്താല്‍ ക്രൂരമായി മര്‍ദ്ദിക്കും. ഈ സ്‌കൂളിലേക്ക് ഇനി പോകുന്നില്ലെന്ന തീരുമാനമെടുത്ത നജീബ് മറ്റൊരു സ്‌കൂളിലേക്ക് മാറ്റത്തിനായി ശ്രമിക്കുകയാണ്. കാസര്‍ഗോഡ് താലൂക്കിലെ മറ്റൊരു ഗവ. സ്‌കൂളില്‍ പ്ലസ് വണ്‍ കൊമേഴ്‌സ് വിദ്യാര്‍ഥിയായ ഫഹദിനെ (യഥാര്‍ഥ പേരല്ല) സീനിയര്‍ വിദ്യാര്‍ഥികള്‍ മര്‍ദ്ദിക്കുകയും തള്ളിയിടുകയും ക്ലാസ് മുറിയില്‍ ഒരു ബെഞ്ച് എറിയുകയും ചെയ്തതിനെ തുടര്‍ന്ന് കൈത്തണ്ട ഒടിഞ്ഞു. ഫഹദിന് ആറ് ആഴ്ച പൂര്‍ണ വിശ്രമം ഡോക്ടര്‍ നിര്‍ദേശിച്ചിട്ടുണ്ട്. അസ്ഥിക്ക് വീണ്ടും സ്ഥാനഭ്രംശം സംഭവിച്ചാല്‍ ശസ്ത്രക്രിയ ആവശ്യമായി വന്നേക്കാം. തലയ്ക്കുനേരെയാണ് ബെഞ്ച് എറിഞ്ഞതെന്നും കൈകൊണ്ട് തടുത്തപ്പോള്‍ കൈയൊടിഞ്ഞതാണെന്നും ഫഹദിന്‍റെ അമ്മ പറയുന്നു. അക്രമമുണ്ടായ ദിവസം വീട്ടിലേക്ക് വന്നപ്പോള്‍ ഷര്‍ട്ടില്‍ മുഴുവന്‍ ഷൂസ് കൊണ്ട് ചവിട്ടിയ പാടുകളായിരുന്നെന്നും അവര്‍ കൂട്ടിച്ചേര്‍ത്തു. ഈ രണ്ടു കേസുകളിലും പോലീസ് കലാപം, നിയമവിരുദ്ധമായ സംഘം ചേരല്‍, തെറ്റായ നിയന്ത്രണം, സ്വമേധയാ പരിക്കേല്‍പ്പിക്കല്‍ തുങ്ങിയ വകുപ്പുകള്‍ പ്രകാരം എഫ്ഐആര്‍ രജിസ്റ്റര്‍ ചെയ്തത്. അതിനാല്‍ തന്നെ റാഗിംഗ് നടത്തിയ കുട്ടികളുടെ സസ്‌പെന്‍ഷനില്‍ ശിക്ഷ ഒതുങ്ങുകയാണ് ചെയ്യുക. ഇത് അവരെ സംബന്ധിച്ചിടത്തോളം അവധിക്കാലം പോലെ മാത്രമാണെന്നാണ് വിമര്‍ശനമുയരുന്നത്. എന്നാല്‍ ഇതുപോലുള്ള സംഭവങ്ങള്‍ക്കായി പ്രത്യേകം ഉദ്ദേശിച്ചിട്ടുള്ള നിയമമായ കേരള റാഗിംഗ് നിരോധന നിയമം ചുമത്തിയിട്ടില്ല. ഈ ആക്ടിലെ സെക്ഷന്‍ നാല് പ്രകാരം കുറ്റം തെളിയിക്കപ്പെട്ടാല്‍ രണ്ടുവര്‍ഷം തടവും 10,000 രൂപ പിഴയും ലഭിക്കും. സെക്ഷന്‍ ആറ് സ്‌കൂളില്‍ നിന്നു പുറത്താക്കാനും മറ്റു വിദ്യാഭ്യാസ സ്ഥാപനങ്ങളില്‍ പ്രവേശനം നേടുന്നതില്‍ നിന്നു മൂന്നുവര്‍ഷം വിലക്കാനും നിര്‍ദേശിക്കുന്നു. എന്നാല്‍ നിയമം പ്രയോഗിക്കാന്‍ പോലീസ് പലപ്പോഴും മടിക്കുകയാണ് അതിനാല്‍ തന്നെ കുറ്റകൃത്യങ്ങളും ഏറുന്നു. റാഗിംഗ് ചെയ്താലുണ്ടാകുന്ന ഭവിഷ്യത്തുകളെക്കുറിച്ച് സ് കൂളിൽ ബോധവത്കരണക്ലാസ് നടത്തിയിരുന്നതായി ഒരു പ്രിന്‍സിപ്പല്‍ പറയുന്നു. എന്നാല്‍ കുട്ടികള്‍ക്കും നിയമത്തെക്കുറിച്ച് നല്ല ബോധ്യമുണ്ടെന്നും ഏതു പോലീസ് സ്റ്റേഷനാണ് റാഗിംഗ് നടത്തിയാല്‍ തങ്ങള്‍ക്ക് ജാമ്യം നല്‍കാത്തതെന്ന് ഒരു കുട്ടി പോലും തന്നോട് ചോദിച്ചതയി അദ്ദേഹം കൂട്ടിച്ചേര്‍ത്തു. ഇന്ന് തങ്ങളുടെ പെണ്‍കുട്ടികളേക്കാള്‍ ആണ്‍കുട്ടികളെ സ്‌കൂളിലേക്ക് അയയ്ക്കാനാണ് ഭയപ്പെടുന്നതെന്ന് ആക്രമണത്തിരയായ കുട്ടികളുടെ അമ്മമാര്‍ പറയുന്നു.

കൃഷിക്കും മനുഷ്യർക്കും ഭീഷണി; ആഫ്രിക്കൻ ഒച്ചുകൾ പെരുകുന്നു

കണ്ണൂർ: കണ്ണൂർ നഗരത്തിലടക്കം ജില്ലയിലെ വിവിധ പ്രദേശങ്ങളിൽ ആഫ്രിക്കൻ ഒച്ചുകൾ പെരുകുന്നു. ജയിന്‍റ് ആഫ്രിക്കൻ സ്നെയിൽ എന്നറിയപ്പെടുന്ന ആഫ്രിക്കൻ ഒച്ച് സസ്യജാലങ്ങൾക്കും മനുഷ്യർക്കും ശരിക്കും ഭീകരൻ കൂടിയാണ്. ജില്ലയിൽ കണ്ണൂർ കോർപറേഷന്‍റെ വിവിധ ഭാഗങ്ങൾ, മുണ്ടേരി, ചക്കരക്കൽ, മയ്യിൽ, അഴിക്കോട്, കണ്ണപുരം, ചെറുകുന്ന്, ഇരിട്ടി, ചപ്പാരപ്പടവ് പഞ്ചായത്തിലെ പതിനേഴാം വാർഡായ എടക്കോം, മഠംതട്ട് എന്നിവിടങ്ങളിലെല്ലാം ഒച്ചുശല്യം രൂക്ഷമാണ്. പച്ചപ്പുകൾ കാർന്നുതിന്നു നശിപ്പിക്കുന്നതിനൊപ്പം വീട്ടിനകത്തും മറ്റും ഇഴഞ്ഞുനീങ്ങുന്നിടങ്ങളിലെ സ്രവവും വലിയ ബുദ്ധിമുട്ടാണ് സൃഷ്ടിക്കുന്നത്. മുട്ടയിൽനിന്ന് വിരിയുന്പോൾ ഒരു കടുകുമണിയോളം മാത്രമുള്ള ആഫ്രിക്കൻ ഒച്ച് കിട്ടിയതെല്ലാം കാർന്നുതിന്ന് ദിവസങ്ങൾക്കുള്ളിൽ വലിപ്പം പ്രാപിക്കും. പച്ചപ്പുകളാണ് പ്രധാന ഭക്ഷണം. പച്ചക്കറി, പൂച്ചെടികൾ, വാഴ, മഞ്ഞൾ, കവുങ്ങ്, കാപ്പി, കിഴങ്ങുവർഗങ്ങൾ, മണ്ണിലേക്ക് തുരന്നിറങ്ങി തെങ്ങിന്‍റെ വേരുകൾ എന്നിവയെല്ലാം ഇവ തിന്നുതീർക്കും. ആഫ്രിക്കൻ ഒച്ചുകൾ കാർഷികമേഖലയ്ക്ക് വലിയ ഭീഷണിയാണ് ഉയർത്തുന്നത്. കിണറുകളും മലിനമാക്കുന്നുണ്ട്. പകൽച്ചെടികളുടെ മറവിലും മണ്ണിലും പുതഞ്ഞ് നിൽക്കുന്ന ഇവ വൈകുന്നേരങ്ങളോടെയാണ് കൂടുതലായും പുറത്തുവരിക. പകൽ വെയിലിന് ചൂടേറുന്പോഴേക്കും സുരക്ഷിത സ്ഥാനങ്ങളിലേക്ക് മാറും. അതു കൊണ്ട് തന്നെ മഴക്കാലത്തും തണുപ്പുകാലത്തുമാണ് ഇവയെ കൂടുതലായി പകൽ സമയങ്ങളിൽ കണ്ടുവരുന്നത്. കട്ടിയുള്ള പുറന്തോടുള്ള ഇവയ്ക്കു മേൽ ഇരുചക്രവാഹനങ്ങൾ കയറി നിയന്ത്രണംവിട്ട് അപകടങ്ങളും സംഭവിക്കുന്നുണ്ട്. ഓമനയായെത്തി ഭീകരനായി അക്കാറ്റിന ഫുലിക് എന്ന ശാസ്ത്രനാമത്തിൽ അറിയപ്പെടുന്ന ആഫ്രിക്കൻ ഒച്ചിന്‍റെ ജന്മദേശം കിഴക്കൻ ആഫ്രിക്കയാണ്. കടൽ ശംഖിനോടു സാമ്യമുള്ള തോടും വലിപ്പവും കാരണം കാഴ്ചക്കാരിൽ കൗതുകം നിറയ്ക്കുന്ന ഇത് ഒരു കാലത്ത് വീടുകളിൽ ചില്ലുകൂട്ടിലെ വളർത്തു ജീവിയായിരുന്നു. പിന്നീട് പലരും ഉപേക്ഷിച്ചതോടെ നാട്ടിൽ പെരുകി. ഒച്ചുകൾ നാട്ടിൽ പെരുകിയതിനെ തുടർന്ന് നടത്തിയ പഠനങ്ങളിൽ ഞെട്ടിപ്പിക്കുന്ന വിവരങ്ങളാണ് കണ്ടെത്തിയത്. മനുഷ്യരിൽ ഈസിനോഫിലിക് മെനിഞ്ചൈറ്റസ് എന്ന മസ്തിഷ്ക ജ്വരത്തിനിടയാക്കുന്ന ജീവികൂടിയാണിതെന്നാണ് ഞെട്ടിപ്പിക്കുന്ന കണ്ടെത്തൽ. രോഗവാഹകരായ നിമ വിരകളെ പടർത്തുന്നതിലും ഇതിന് വലിയ പങ്കുണ്ട്. ആഫ്രിക്കൻ ഒച്ചിന്‍റെ ശരീരം നിമവിരകളുടെ ആവാസ കേന്ദ്രമാണ്. ഇഴഞ്ഞു നീങ്ങുന്നിടങ്ങളിലെ സ്രവങ്ങൾ സ്പർശിച്ച ശേഷം കൈകൾ ശരിയായ രീതിയിൽ കഴുകാതെ ഭക്ഷണം കഴിച്ചാലോ സ്രവം കലർന്ന പച്ചക്കറിയോ പഴ വർഗങ്ങളോ ശരിയാ രീതിയിൽ കഴുകാതെ ഭക്ഷിച്ചാൽ വിരകൾ ശരീരത്തിലേക്ക് കടക്കുകയും രോഗത്തിലേക്ക് നയിക്കുകയും ചെയ്യും. വർഷത്തിൽ അഞ്ചു മുതൽ ആറു തവണ മുട്ടകളിടുന്ന ജീവിയാണ് ആഫ്രിക്കൻ ഒച്ച്. ഒരു തവണ 200 മുട്ടകൾ വരെ ഇടും. ആറു മാസം കൊണ്ട് പൂർണ വളർച്ചയെത്തുന്ന ഇവയുടെ ജീവിത ദൈർഘ്യം അഞ്ചു മുതൽ പത്തു വർഷമാണ്. ജീവിത ചക്രത്തിനിടയിൽ നിരവധി തവണ മുട്ടകളിടുന്നതിനാലാണ് ഒരു പ്രദേശത്ത് പെട്ടെന്ന് ഇവയുടെ പെരുപ്പം അനുഭവപ്പെടുന്നത്. ജൈവാവിശിഷ്ടങ്ങൾ കൂട്ടിയിടുന്നിടങ്ങളിലാണ് ഇവ മുമുട്ടിയിട്ട് പെരുകുന്നത്. ജൈവാവശിഷ്ടങ്ങൾ കൂട്ടിയിടാതിരിക്കലാണ് ഇവയുടെ വംശവർധന തടയാൻ ആദ്യം ചെയ്യേണ്ടത്. പ്രതിരോധ മാർഗങ്ങൾ ആഫ്രിക്കൻ ഒച്ചുകളെ പിടികൂടി ശേഖരിച്ച് നശിപ്പിക്കൽ മാത്രമാണ് പ്രതിരോധ മാർഗമായുള്ളത്. ആഫ്രിക്കൻ ഒച്ചുകളെ പിടികൂടി കുഴി കുത്തി അവയിലിട്ട് അതിനുമേൽ ഉപ്പും കുമ്മായവും വലിയതോതിൽ ഇട്ട് മൂടി ഇവയെ നശിപ്പിക്കാറുണ്ട്. പുളിപ്പിച്ച പൈനാപ്പിൾ, പഴം, ശർക്കര, ഈസ്റ്റ് എന്നിവ ഉപയോഗിച്ച് കെണി ഉണ്ടാക്കി ആകർഷിച്ച് കുഴിയിലിട്ട് ഉപ്പിട്ട് മൂടൽ, തുരിശ് ലായനി തളിക്കൽ, പുകയില-തുരിശ് ലായനി തളിക്കൽ, കാബേജ്, കോളിഫ്ലവർ, പപ്പായ ഇവയിൽ ഏതെങ്കിലും ഒന്നിന്‍റെ ഇലകൾ ചെറുതായി മുറിച്ച് ചതച്ച് നനഞ്ഞ ചാക്കിലോ ബെഡ്ഷീറ്റിലോ ഇട്ട് ഒച്ചുകളെ ആകർഷിപ്പിച്ച ശേഷം തുരിശും ഉപ്പും കലർത്തിയ വെള്ളം സ്പ്രേ ചെയ്ത് കുഴിച്ചു മൂടൽ, ഒരിഞ്ച് താഴ്ചയിൽ കുഴിയുണ്ടാക്കി അതിൽ പുളിപ്പിച്ച പൈനാപ്പിൾ, പഴം, ശർക്കര, ഈസ്റ്റ് എന്നിവ ഇട്ട് ഒച്ചുകളെ ആകർഷിച്ച് ഇവയ്ക്കു മേൽ ഉപ്പു വിതറിയും നശിപ്പിക്കാം. ഒരു ലിറ്റർ വെള്ളത്തിൽ പത്തു ഗ്രാം തുരിശ് കലക്കി തളിക്കുന്നത് ഒച്ചുകളെ നിയന്ത്രിക്കുന്നതിന് ഫലപ്രദമാണ്. പുകയില-തുരിശ് ലായനിയാണ് മറ്റൊരു നിയന്ത്രണ മാർഗം. 25 ഗ്രാം പുകയില 1.5 ലിറ്റർ വെള്ളത്തിൽ തിളപ്പിച്ച് ഒരു ലിറ്ററാക്കി കുറയ്ക്കുക. 60 ഗ്രാം തുരിശ് ഒരു ലിറ്റർ വെള്ളത്തിൽ ലയിപ്പിച്ച് രണ്ടും കൂട്ടിക്കലർത്തി ഒച്ചുകളുടെ മുകളിൽ തളിക്കുകയാണ് ചെയ്യേണ്ടത്. മുട്ടത്തോട്: ഇഴഞ്ഞു നീങ്ങുന്ന പ്രദേശത്ത് മുട്ടത്തോടുകൾ പൊട്ടിച്ചിട്ടാൽ ഇവയുടെ സുഗമമായ സഞ്ചാരം തടസപ്പെടുന്നതായി കാണുന്നുണ്ട്. മുട്ടത്തോടുകൾ ഒച്ചിന്‍റെ ശരീരത്തിലെ സ്രവത്തിൽ പറ്റിപ്പിടിക്കുന്നത് കാരണം ഇവയക്ക് മുന്നോട്ട് പോകാനാവില്ല. പച്ചക്കറികളുടെ തടത്തിൽ മുട്ടത്തോട് ഇടുന്നതിലൂടെ ഒച്ചുകളുടെ ആക്രമണം ഒരു പരിധിവരെ തടയാൻ കഴിയുന്നുണ്ട്.

കരുവഞ്ചാലിൽ അസ്ഥികൂടം കണ്ടെത്തിയ സംഭവത്തിൽ അന്വേഷണം ഊർജിതമാക്കി

കരുവഞ്ചാൽ: കരുവഞ്ചാൽ ഹണി ഹൗസിന് സമീപം പൂട്ടിയിട്ട വീടിന്‍റെ പരിസരത്തു നിന്ന് അസ്ഥികൾ കണ്ടെത്തിയ സംഭവത്തിൽ പോലീസ് അന്വേഷണം ഊർജിതമാക്കി. കണ്ണൂർ റൂറൽ കെ 9 ഡോഗ് സ്കോഡിലെ ലോലയും കണ്ണൂർ ഫോറൻസിക് വിദഗ്ധരും സ്ഥലത്തെത്തി പരിശോധന നടത്തി. പ്രവാസിയായ കുളത്തിനാൽ ബിജുവിന്‍റെ പൂട്ടിയിട്ട വീടും പരിസരവും വൃത്തിയാക്കുന്നതിനിടയിലാണ് ശനിയാഴ്ച വൈകുന്നേരം തലയോട്ടി ഉൾപ്പെടെയുള്ള മനുഷ്യ ശരീരഭാഗങ്ങളുടെ അസ്ഥികൾ കണ്ടെത്തിയത്. വിവരമറിഞ്ഞ് സ്ഥലത്തെത്തിയ ആലക്കോട് പോലീസ് സംഭവ സ്ഥലത്ത് കാവൽ ഏർപ്പെടുത്തുകയും ഞായർ രാവിലെ ഉയർന്ന ഉദ്യോഗസ്ഥർ ഉൾപ്പെടെ സ്ഥലത്തെത്തി കൂടുതൽ പരിശോധന നടത്തുകയുമായിരുന്നു. ഇന്നലെ നടത്തിയ തെരച്ചിലിൽ സ്ഥലത്തുനിന്നും നട്ടെല്ല്, വാരിയെല്ലുകൾ, കൈകാലുകളുടെ ബാക്കിയുള്ള അസ്ഥികൾ എന്നിവ കണ്ടെത്തി. കാവിമുണ്ട്, കള്ളികളുള്ള കറുത്ത ഷർട്ട്, അടിവസ്ത്രം എന്നിവയും കണ്ടെത്തി. ഷർട്ടിന്‍റെ കീശയിൽ നിന്ന് പച്ച നിറത്തിലുള്ള ചെറിയ നീളൻ ചീർപ്പ്, ചുണ്ണാമ്പിന്‍റെ ചെറിയ കുപ്പി, മടക്കിവച്ച രീതിയിൽ നോട്ടുകൾ, പഴയ മോഡൽ മൊബൈൽ ഫോൺ എന്നിവയും കണ്ടെത്തി. ആലക്കോട് എസ്എച്ച്ഒ മഹേഷ് കെ. നായരുടെ നേതൃത്വത്തിൽ ശേഖരിച്ച അസ്ഥികൾ പോലീസ് ഇൻക്വസ്റ്റ് നടത്തി. തുടർന്ന് പോസ്റ്റ്മോർട്ടത്തിനായി പരിയാരത്തുള്ള കണ്ണൂർ സർക്കാർ മെഡിക്കൽ കോളജ് മോർച്ചറിയിലേക്ക് മാറ്റി.

മുഖ്യമന്ത്രി പൊതുജനങ്ങളിൽനിന്ന് നിവേദനങ്ങൾ സ്വീകരിച്ചു

പിണറായി: മുഖ്യമന്ത്രി പിണറായി വിജയൻ പിണറായി കൺവൻഷൻ സെന്‍ററിൽ പ്രവർത്തിക്കുന്ന ധർമടം നിയോജക മണ്ഡലം ഓഫീസിൽ വച്ച് പൊതുജനങ്ങളിൽനിന്ന് നിവേദനങ്ങൾ സ്വീകരിച്ചു. രാവിലെ പത്തുമുതൽ ഉച്ച വരെയായി അഞ്ഞൂറോളം പേർ മുഖ്യമന്ത്രിയെ നേരിട്ടുകണ്ട് നിവേദനങ്ങൾ നൽകി. മണ്ഡലത്തിന് പുറത്തുനിന്നുള്ളവരും നിവേദനങ്ങൾ നൽകാനെത്തിയിരുന്നു.

കാരുണ്യം ബഡ്സ് സ്കൂൾ ബസ് മുഖ്യമന്ത്രി ഫ്ലാഗ്ഓഫ് ചെയ്തു

അഞ്ചരക്കണ്ടി: അഞ്ചരക്കണ്ടി പഞ്ചായത്ത് കാരുണ്യം ബഡ്സ് റീഹാബിലിറ്റേഷൻ സെന്‍ററിന്‍റെ പുതിയ ബസിന്‍റെ ഫ്ലാഗ് ഓഫ് മുഖ്യമന്ത്രി പിണറായി വിജയൻ നിർവഹിച്ചു. വാഹനത്തിന്‍റെ താക്കോൽ മുഖ്യമന്ത്രിയിൽ നിന്ന് അഞ്ചരക്കണ്ടി പഞ്ചായത്ത് പ്രസിഡന്‍റ് കെ.പി ലോഹിതാക്ഷൻ ഏറ്റുവാങ്ങി. കണ്ണൂർ ജില്ലാപഞ്ചായത്തിന്‍റെ വാർഷികപദ്ധതിയിലുൾപ്പെടുത്തി ഇനോസ് എയർ പ്രൊഡക്റ്റ്സ് പ്രൈവറ്റ് ലിമിറ്റഡിന്റെ സി എസ് ആർ ഫണ്ട് ഉപയോഗിച്ചാണ് ബസ് വാങ്ങിയത്. പിണറായി കൺവൻഷൻ സെന്‍റർപരിസരത്ത് നടന്ന പരിപാടിയിൽ ഡോ. വി ശിവദാസൻ എംപി, ജില്ലാപഞ്ചായത്ത് പ്രസിഡന്‍റ് കെ.കെ രത്നകുമാരി, അഞ്ചരക്കണ്ടി പഞ്ചായത്ത് വൈസ് പ്രസിഡന്‍റ് ടി. പ്രസന്ന,സ്റ്റാൻഡിംഗ് മ്മിറ്റി ചെയർപേഴ്സൺ ഇ.കെ. സരിത, ജില്ലാ പഞ്ചായത്തംഗം ചന്ദ്രൻ കല്യാട്ട്, പഞ്ചായത്തംഗങ്ങളായ വി. സജിത, ടി.വി.പ്രജീഷ്, എം.കെ അബ്ദുൽ ഖാദർ, കെ. സുധാകരൻ, ബി.ബി വത്സല, സിഡിഎസ് ചെയർപേഴ്സൺ എൻ. ഉഷ, പഞ്ചായത്ത് അസി. സെക്രട്ടറി ടി.വി സുനീഷ്, ഇനോസ് പ്രൊഡക്റ്റ്സ് പ്രൈവറ്റ് ലിമിറ്റഡ് സിനിയർ മാനേജർ എം ചന്ദ്രമോഹൻ എന്നിവർ പങ്കെടുത്തു.

എസ്എഫ്ഐ അക്രമ-മാഫിയാ സംഘം: മുഹമ്മദ് ഷമ്മാസ്

പഴയങ്ങാടി: കാന്പസുകളിൽ നിരന്തരം അക്രമങ്ങളഅ് അഴിച്ചു വിടുകയും ലഹരി ഉൾപ്പെടെയുള്ള മാഫിയാ സംഘങ്ങളുടെ കണ്ണികളായുമാണ് എസ്എഫ്ഐ പ്രവർത്തിക്കുന്നതെന്ന് കെഎസ്‌യു സംസ്ഥാന വൈസ് പ്രസിഡന്‍റ് പി.മുഹമ്മദ് ഷമ്മാസ്. അക്രമ-മാഫിയാ സംഘത്തിന്‍റഎ വക്താക്കളായ എസ്എഫ്ഐയെ വിദ്യാർഥി സമൂഹം ഒറ്റപ്പെടുത്തുമെന്നും മുഹമ്മദ് ഷമ്മാസ് പറഞ്ഞു. കെഎസ്‌യു ജില്ലാ കമ്മിറ്റിയുടെ നേതൃത്വത്തിൽ പഴയങ്ങാടിയിൽ നടന്ന കെ.പി സജിത്ത് ലാൽ രക്തസാക്ഷി അനുസ്മരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സജിത്ത് ലാലിനെപ്പോലുള്ള രക്തസാക്ഷികളുടെ ഓർമ്മകൾ എക്കാലത്തും സിപിഎമ്മിന്‍റെ അക്രമ രാഷ്ട്രീയത്തെയും ഭീകര കൊലപാതകത്തെയും തുറന്നുകാട്ടുന്ന ഒന്നായി ജനമനസുകളിലും വിദ്യാർഥി സമൂഹത്തിനിടയിലും നിറഞ്ഞു നിൽക്കുകയാണെന്നും മുഹമ്മദ് ഷമ്മാസ് പറഞ്ഞു. ജില്ലാ പ്രസിഡന്‍റ് എം.സി അതുൽ അധ്യക്ഷത വഹിച്ചു. സംസ്ഥാനജനറൽ സെക്രട്ടറിമാരായ ഫർഹാൻ മുണ്ടേരി,പ്രവാസ് ഉണ്ണിയാടൻ,റഹ്മത്തുള്ള മൂന്നാലിങ്ങൽ സംസ്ഥാന കമ്മിറ്റി അംഗം ആകാശ് ഭാസ്കരൻ, ജില്ല വൈസ് പ്രസിഡന്‍റുമാരായ,ആഷിത്ത് അശോകൻ, അമൽ തോമസ് ,മുഹമ്മദ്‌ റാഹിബ് ,ഹരികൃഷ്ണൻ പാളാട്,അർജുൻ കോറോം, രാഗേഷ് ബാലൻ ,മുബാസ് സി എച്ച് ,അക്ഷയ് മാട്ടൂൽ, അഹമ്മദ് യാസീൻ എന്നിവർ പ്രസംഗിച്ചു.

സണ്ണി ജോസഫിന് സ്വീകരണം നൽകി

മട്ടന്നൂർ: കോൺഗ്രസ് കൂടാളി പഞ്ചായത്ത് കമ്മിറ്റിയുടെ ആഭിമുഖ്യത്തിൽ പഞ്ചായത്ത് തല കോൺഗ്രസ് പ്രവർത്തക കൺവൻഷനും കെപിസിസി പ്രസിഡന്‍റ് സണ്ണി ജോസഫ് എംഎൽഎക്ക് സ്വീകരണവും നൽകി. പട്ടാന്നൂർ കെപിസി ഹയർ സെക്കൻഡറി സ്കൂൾ ഓഡിറ്റോറിയത്തിൽ നടന്ന കൺവൻഷൻ ജില്ലാ പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. കോൺഗ്രസ് കൂടാളി പഞ്ചായത്ത് കമ്മിറ്റി ചെയർമാൻ എ.സി. മനോജ് അധ്യക്ഷത വഹിച്ചു. പുതിയ കെപിസിസി പ്രസിഡന്‍റ് സണ്ണി ജോസഫ് എംഎൽഎക്ക് കൺവൻഷനോടനുബന്ധിച്ച് നായാട്ടുപാറയിൽ ആവേശോജ്വലമായ സ്വീകരണം നൽകി. കൂടാളി പഞ്ചായത്തിലെ കോൺഗ്രസ് നേതാക്കളായ അധ്യാപക അവാർഡ് ജേതാവും ജില്ലയിലെ പ്രമുഖ സഹകാരിയുമായിരുന്ന ടി.വി. വേണു, ദീർഘകാലം കൂടാളി പഞ്ചായത്തംഗവും കോൺഗ്രസ് മണ്ഡലം പ്രസിഡന്‍റുമായിരുന്ന സി.വി. കുഞ്ഞിക്കണ്ണൻ നമ്പ്യാർ, മഹിളാ കോൺഗ്രസ് ജില്ലാ സെക്രട്ടറിയായിരുന്ന പി. ദേവി എന്നിവരെ അനുസ്മരിച്ചു കൊണ്ട് കെപിസിസി അംഗം മുഹമ്മദ് ബ്ലാത്തൂർ എന്നിവർ പ്രസംഗിച്ചു.

ആറളത്ത് കാട്ടാന ആക്രമണം തുടരുന്നു

ഇരിട്ടി: ആറളം പുനരധിവാസ മേഖലയിൽ കാട്ടാന ആക്രമണം തുടരുന്നു. ഇന്നലെ രാത്രി ബ്ലോക്ക് ഏഴിൽ കാട്ടാന ജാനകിയുടെ കോഴിക്കൂട് തകർത്തു. രാത്രി 12ന് ശേഷമാണ് ആനയെത്തി വീട്ടുമുറ്റത്തെ കമുക് ഉൾപ്പെടെ നശിപ്പിക്കുകയൂം കോഴിക്കൂട് തകർക്കുകയൂം ചെയ്തത്. ജാനകിയുടെ വീടിനു സമീപത്താണു കഴിഞ്ഞ ദിവസം ആന ഷെഡ് തകർത്തത്. കൊമ്പനാനയാണ് ആക്രമണം നടത്തിയത്. ജാനകി വീട്ടിൽ തനിച്ചാണു താമസം. അടുത്ത വീട്ടിലെ ആളുകൾ അറിയിച്ചതിനെ തുടർന്നാണ് ആർആർടി സംഘം ഇവിടെയെത്തി ആനയെ തുരത്തിയത്. രണ്ടാഴ്ച മുന്പ് ജാനകിയുടെ വീടിന്‍റെ മുന്നിലും പിറകിലും രണ്ട് ആനകൾ എത്തി ഭീതി വിതച്ചിരുന്നു. ഭയന്നുപോയ ജാനകി രക്തസമ്മർദം കുറഞ്ഞ് തലകറങ്ങി വീണിരുന്നു. ബ്ലോക്ക് ഏഴിൽ മാത്രമല്ല പുനരധിവാസ മേഖലയിലെ എല്ലാ സ്ഥലങ്ങളും താമസക്കാർക്ക് സുരക്ഷിതമല്ലാതായിരിക്കുകയാണ്. ആനയുടെ വ്യാപകമായ ആക്രമണമാണ് കഴിഞ്ഞ ദിവസങ്ങളിൽ പുനരധിവാസ മേഖലയിൽ നടക്കുന്നത്. വട്ടക്കാട് മേഖലയിൽ ഇന്നലെ മൂന്നോളം ആനകൾ പകൽ സമയത്ത് തന്പടിച്ചിരുന്നു. ആനയെ തുരത്താൻ ആർആർടി സംഘം ശ്രമം തുടരുന്നു.

വായന പക്ഷാചരണവും ഉന്നത വിജയികളെ ആദരിക്കലും നടത്തി

ചാവശേരി: ചാവശേരി പൊതുജന വായനശാല ആൻഡ് ഗ്രന്ഥാലയത്തിന്‍റെ നേതൃത്വത്തിൽ വായന പക്ഷാചരണവും ഉന്നത വിജയികളെ ആദരിക്കലും സംഘടിപ്പിച്ചു. ചാവശേരി ഗവ. ഹയർ സെക്കൻഡറി സ്കൂളിൽ ഇരിട്ടി നഗരസഭ ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ കെ. സോയ ഉദ്ഘാടനം ചെയ്തു. വായനശാല പ്രസിഡന്‍റ് ആർ.ടി.വി. രവി അധ്യക്ഷത വഹിച്ചു. ഡോ. കെ.ആർ. അപർണ പ്രഭാഷണം നടത്തി. ചാവശേരി ഗവ. ഹയർ സെക്കൻഡറി സ്കൂളിലെ മുഖ്യ അധ്യാപകൻ സി.എ. അബ്ദുൾ ഗഫൂർ വിജയികളെ അനുമോദിച്ചു. നഗരസഭ കൗൺസിലർ വി. ശശി ഉപഹാര സമർപ്പണം നടത്തി. വായനശാല സെക്രട്ടറി കെ.കെ. സുരേന്ദ്രൻ, എൻ. സുജാത തുടങ്ങിയവർ പ്രസംഗിച്ചു. എസ്എസ്എൽസി, പ്ലസ്ടു, എൽഎസ്എസ്, യുഎസ്എസ്, അബാക്കസ് തുടങ്ങിയവയിൽ ഉന്നത വിജയം നേടിയ വിദ്യാർഥികളെയാണ് അനുമോദിച്ചത്. വിദ്യാർഥികൾക്ക് ക്വിസ് മത്സരവും നടത്തി.

കർഷകർക്ക് നഷ്‌ടപരിഹാരം നൽകണം: കെ.കെ. ശൈലജ

മട്ടന്നൂർ: കണ്ണൂർ അന്താരാഷ്‌ട്ര വിമാനത്താവള പ്രദേശത്തു നിന്ന് അനിയന്ത്രിതമായ തോതിൽ വെള്ളം ഒഴുകിയെത്തിയതിനെ തുടർന്ന് കൃഷി നശിച്ച കർഷകർക്ക് മതിയായ നഷ്‌ടപരിഹാരം നൽകണമെന്നും വിമാനത്താവളത്തിൽ ശാസ്ത്രീയമായ മാലിന്യ സംസ്കരണ സൗകര്യങ്ങൾ ഏർപ്പെടുത്തണമെന്നും കെ.കെ. ശൈലജ എംഎൽഎ ആവശ്യപ്പെട്ടു. രണ്ടു വിഷയങ്ങളുമായി ബന്ധപ്പെട്ട് ജൂലൈ രണ്ടിന് കണ്ണൂർ കളക്‌ടറേറ്റിൽ ബന്ധപ്പെട്ടവരുടെ യോഗം വിളിച്ചു ചേർത്തിട്ടുണ്ടെന്ന് എംഎൽഎ പറഞ്ഞു. കൃഷിനാശം നേരിട്ട സ്ഥലങ്ങൾ ശൈലജ സന്ദർശിച്ചു. നഗരസഭാ ചെയർമാൻ എൻ. ഷാജിത്ത്, കൗൺസിലർ പി.കെ. നിഷ, സിപിഎം ലോക്കൽ സെക്രട്ടറി വി.പി. ഇസ്മയിൽ, വി.കെ. ലക്ഷ്മണൻ, കെ. മണി തുടങ്ങിയവരും കർഷകരും എംഎൽഎയുടെ കൂടെയുണ്ടായിരുന്നു.

വട്ട്യാംതോട് പുതിയ പാലം വേണം; ആവശ്യം ശക്തമാകുന്നു

ഉളിക്കൽ: വട്ട്യാംതോട് പുതിയ പാലം വേണമെന്ന ആവശ്യം ശക്തമാകുന്നു. ഉളിക്കൽ- മണിക്കടവ് - കാഞ്ഞിരക്കൊല്ലി മേഖലകളെ ബന്ധിപ്പിക്കുന്ന പ്രധാന പാതയിലാണ് വാട്ട്യാംതോട് പാലം. മൂന്ന് പതിറ്റാണ്ട് മുന്പാണ് നാട്ടുകാരുടെ ശ്രമഫലമായി വയത്തൂർ പുഴയ്ക്ക് കുറുകെ ജനകീയ പാലം നിർമിച്ചത്. പാലത്തിന്‍റെ ഉയരക്കുറവ് കാരണം മഴക്കാലത്ത് മൂന്നും നാലും തവണ പാലത്തിൽ വെള്ളം കയറി യാത്ര തടസപ്പെടുന്നത് പതിവാണ്. ഈ വർഷം രണ്ടുതവണ പാലത്തിൽ വെള്ളംകയറി ഗതാഗതം തടസപ്പെട്ടു. പാലത്തിൽ വെള്ളം കയറിയാൽ മണിക്കടവ്, കാഞ്ഞിരക്കെല്ലി ഭാഗത്തേക്ക് ഗതാഗതം മുടങ്ങും. വർഷങ്ങൾക്ക് മുമ്പുള്ള മഴവെള്ള പാച്ചിലിൽ പാലത്തിന്‍റെ കൈവരികൾ തകർന്നിരുന്നു. കഴിഞ്ഞ ദിവസം പാലത്തിൽ നിന്നു പുഴയിലേക്ക് മറിഞ്ഞ കാർ അദ്ഭുതകരമായി വള്ളിപ്പടർപ്പുകളിൽ കുടുങ്ങി നിന്നു. ഒരു വാഹനത്തിന് കടന്നുപോകാൻ മാത്രം വീതിയുള്ള പാലത്തിൽ കൈവരികൾ ഇല്ലാത്തത് അപകടങ്ങൾ വർധിപ്പിക്കുകയാണ്. വട്ട്യാംതോട് ജനകീയ പാലം കുടിയേറ്റ ചരിത്രത്തിന്‍റെ സ്മാരകം എന്നുവേണം വട്ട്യാംതോട് ജനകീയ പാലത്തെ വിശേഷിപ്പിക്കാൻ. പൂർണമായും നാട്ടുകാരുടെ സഹകരണത്തോടെ മൂന്ന് മീറ്റർ വീതിയും 35 മീറ്റർ നീളവും വരുന്ന വട്ട്യാംതോട് ജനകീയ പാലത്തിന്‍റെ നിർമാണം 1988 മാർച്ചിലാണ് ആരംഭിച്ചത്. കെ.സി. ജോസഫ് എംഎൽഎയുടെ ഇടപെടലിലൂടെ തദ്ദേശ സ്വയം ഭരണ വകുപ്പിനെക്കൊണ്ട് അനുവദിച്ച ധനസഹായവും തലശേരി അതിരൂപതയിലെ ബിഷപ്പുമാരായ മാർ സെബാസ്റ്റ്യൻ വള്ളോപള്ളി, മാർ ജോർജ് വലിയമറ്റം എന്നിവരുടെ ശ്രമഫലമായി ജർമനിയിലെ കോളോൺ രൂപതയിൽ നിന്നു ലഭിച്ച തുകയും നാട്ടുകാരിൽ നിന്ന് പിരിച്ചെടുത്ത തുകയും ഉപയോഗിച്ചാണ് പാലത്തിന്‍റെ നിർമാണം പൂർത്തീകരിച്ചത്. 1993 മേയ് ഒന്പതിന് കെ.സി ജോസഫ് എംഎൽഎയുടെ അധ്യക്ഷതയിൽ ധനമന്ത്രിയായിരുന്നപ്പോൾ ഉമ്മൻ ചാണ്ടി പാലം ഉദ്ഘാടനം ചെയ്തു. സർക്കാർ ഞങ്ങളുടെ ജീവൻ അപകടത്തിന് വിട്ടുകൊടുക്കുന്നു സർക്കാർ ഞങ്ങളുടെ ജീവൻ അപകടത്തിന് വിട്ടുകൊടുക്കുന്നു. അപകടാവസ്ഥയിലായ പാലത്തിലൂടെ ഓരോ മഴക്കാലത്തും പ്രദേശവാസികൾ യാത്രചെയ്യുന്നത് ഭീതിയോടെയാണ്. വയത്തൂർ പുഴയിൽ ഉളിക്കൽ പഞ്ചായത്തിന്‍റെ പരിധിയിലെ പ്രധാനപ്പെട്ട വട്ട്യാംതോട്, മണിക്കടവ്, വയത്തൂർ, നുച്യാട് തുടങ്ങി നാലു പാലങ്ങളാണ് അപകടാവസ്ഥയിൽ ഉള്ളത്. ഓരോ പാലവും ഒന്നിനൊന്ന് പ്രാധാന്യം അർഹിക്കുന്നതാണ്. പ്രാധാന്യം കണക്കിലെടുത്ത് ഓരോ പാലവും സമയബന്ധിതമായി പൂർത്തിയാക്കണം. മണിക്കടവ് ചപ്പാത്ത് പാലത്തിൽ ജീപ്പ് ഒഴുക്കിൽപെട്ട് യുവാവ് മരിച്ച സംഭവങ്ങൾ വരെ ഉണ്ടായിട്ടുണ്ട്. -പി.സി. ഷാജി- (ഉളിക്കൽ പഞ്ചായത്ത് പ്രസിഡന്‍റ്)

ഓട്ടോയ്ക്ക് മുകളിൽ തെങ്ങും വൈദ്യുതത്തൂണും പൊട്ടിവീണു; യാത്രക്കാർ അദ്ഭുതകരമായി രക്ഷപ്പെട്ടു

തലശേരി: യാത്രക്കാരുമായി ട്രിപ്പ് നടത്തുകയായിരുന്ന ഓട്ടോറിക്ഷയക്ക് മേൽ തെങ്ങും വൈദ്യുത തൂണും പൊട്ടി വീണു. ഡ്രൈവർ ഉൾപ്പടെ ഓട്ടോയിലുണ്ടായിരുന്ന നാലുപേർ അദ്ഭുതകരമായി രക്ഷപ്പെട്ടു. വൈദ്യുത ബന്ധം വിഛേദിക്കപ്പെട്ടതിനാലാണ് വന് ദുരന്തം ഒഴിവായത്. ടെന്പിൾ ഗേറ്റ് വാടിക്കൽ ജംഗ്ഷനിൽ ഇന്നലെ ഉച്ച കഴിഞ്ഞ മൂന്നോടെയായിരുന്നു സംഭവം. വടകര കണ്ണൂക്കരയിൽ നിന്നും മഞ്ഞോടിയിലെ ഇന്ദിരാഗാന്ധി സഹകരണ ആശുപത്രിയിലേക്ക് വരികയായിരുന്നു ഓട്ടോ റിക്ഷ. റോഡരികിലെ പറന്പിലെ തെങ്ങ് പൊട്ടി വൈദ്യുത തൂണിൽ വീഴുകയും വൈദ്യുത തൂണും തെങ്ങും ഓട്ടോയ്ക്കു മേൽ പതിക്കുകകയുമായിരുന്നു. ഒഞ്ചിയം സ്വദേശി കൈതോകുന്നുമ്മൽ കെ.കെ. മുരളിയുടെതാണ് ഓട്ടോ. അഗ്നിശമന സേനാംഗങ്ങൾ സ്ഥലത്തെത്തി തെങ്ങ് മുറിച്ചുമാറ്റി. കെഎസ്ഇബി ഉദ്യോഗസ്ഥരും സ്ഥലത്ത് എത്തിയിരുന്നു. നഗരസഭ ചെയർപേഴ്സൻ കെ.എം. ജമുനാറാണി, കൗൺസിലർ കെ. അജേഷ് എന്നിവർ സ്ഥലം സന്ദർശിച്ചു.

വീട്ടിൽ കയറി തെരുവുനായയുടെ പരാക്രമം; ഗൃഹനാഥന് ഗുരുതരം

പഴയങ്ങാടി: വീട്ടിലെ വരാന്തയിലിരുന്ന ഗൃഹനാഥനെ തെരുവുനായ ആക്രമിച്ചു. വളപട്ടണം സ്വദേശി ടി.പി. ഷാഹിറിനെയാണ് (45) തെരുവുനായ വീട്ടിൽ കയറി ആക്രമിച്ചത്. കഴിഞ്ഞ ദിവസം രാത്രി 10.30 ഓടെ കണ്ണാടിപ്പറമ്പ് ചേലേരിമുക്ക് കയ്യങ്കോടിലെ ഭാര്യ വീട്ടിലെ വരാന്തയിൽ രാത്രി ഭക്ഷണത്തിനുശേഷം വിശ്രമിക്കുമ്പോഴാണ് തെരുവുനായയുടെ ആക്രമണം ഉണ്ടായത്. മുഖത്തും കണ്ണിന് മുകളിലും തലയ്ക്കും പരിക്കേറ്റ ഷാഹിറിനെ കണ്ണൂർ ജില്ലാ ആശുപത്രിയിൽ പ്രാഥമിക ചികിത്സ നൽകിയശേഷം പരിയാരത്തെ കണ്ണൂർ ഗവ. മെഡിക്കൽ കോളജിലേക്കു മാറ്റി. പരിക്ക് ഗുരുതരമായതിനാൽ അടിയന്തര ശസ്ത്രക്രിയയ്ക്ക് വിധേയമാക്കി. അപകടനില തരണം ചെയ്തു. കണ്ണാടിപ്പറമ്പ് കൊച്ചോട് മേഖലകളിൽ തെരുവ് നായ്ക്കളുടെ ശല്യം രൂക്ഷമാണെന്നും മുമ്പും ഈ പ്രദേശങ്ങളിൽ തെരുവ് നായ്ക്കളുടെ അക്രമം ഉണ്ടായതായും നാട്ടുകാർ പറയുന്നു.

കണ്ണൂർ ബിഎംഎച്ചിൽ സമഗ്ര സെന്‍റർ ഓഫ് എക്സലൻസ് പ്രവർത്തനം തുടങ്ങി

കണ്ണൂർ: കുട്ടികളിലെ ഇടുപ്പ് (ഹിപ്) സംരക്ഷണം, സെറിബ്രൽ പാൾസി എന്നിവയ്ക്കുള്ള കേരളത്തിലെ ആദ്യത്തെ സമഗ്ര സെന്‍റർ ഓഫ് എക്സലൻസ് കണ്ണൂർ ബേബി മെമ്മോറിയൽ ആശുപത്രിയിൽ പ്രവർത്തനം തുടങ്ങി. ബിഎംഎച്ച് ഓഡിറ്റോറിയത്തിൽ കണ്ണൂർ ആൻഡ് പയ്യന്നൂർ ക്ലസ്റ്റർ സിഇഒ നിരൂപ് മുണ്ടയാടൻ ഉദ്ഘാടനം ചെയ്തു. പീഡിയാട്രിക് ഓർത്തോപീഡിക്സ് ആൻഡ് സ്കോളിയോസിസിലെ സീനിയർ കൺസൾട്ടന്‍റായ ഡോ. ഈശ്വർ ടി. രമണിയുടെ നേതൃത്വത്തിൽ പ്രവർത്തിക്കുന്ന സെന്‍റർ ആരോഗ്യ പരിപാലനത്തിൽ നിർണായക വഴിത്തിരിവായിരിക്കുമെന്ന് അധികൃതർ പറഞ്ഞു. സെറിബ്രൽ പാൾസി, ഇടുപ്പിന്‍റെ വിവിധ പ്രശ്നങ്ങൾ എന്നിവയാൽ ബുദ്ധിമുട്ടുന്ന ധാരാളം കുട്ടികൾ ക്കുള്ള സേവനത്തിന് ഇത് പ്രത്യേകം രൂപകല്പന ചെയ്തിട്ടുള്ളതാണ്. സെറിബ്രൽ പാൾസി, ഇടുപ്പിലെ ഡെവലപ്മെന്‍റൽ ഡിസ്പ്ലാസിയ, പെർത്തസ് രോഗം, സ്ലിപ്ഡ് കാപിറ്റൽ ഫെമറൽ എപിഫൈസിസ് എന്നിവ ഇതിൽ ഉൾപ്പെടുന്നു. കുട്ടികളിൽ ആക്രമണാത്മക കായിക വിനോദങ്ങൾ വർധിച്ചുവരുന്ന സാഹചര്യത്തിൽ അതിന് പരിഹാരം എന്ന നിലയിൽ ഈ സംവിധാനം ഏറെ പ്രയോജനം ചെയ്യും.മേഖലയിലെ ഒരു സുപ്രധാന ആരോഗ്യ പരിപാലന വിടവ് ഈ ക്ലിനിക് നികത്തുന്നുവെന്ന് സെന്‍ററിന്‍റെ പ്രവർത്തനങ്ങൾക്ക് നേതൃത്വം നൽകുന്ന ഡോ. ഈശ്വർ ടി. രമണി വിശദീകരിച്ചു. അന്താരാഷ്‌ട്ര തലത്തിൽ പരിശീലനം ലഭിച്ച ഒരു കൂട്ടം വിദഗ്ധരാണ് സെന്‍ററിലുള്ളത്. പീഡിയാട്രിക് ഓർത്തോപീഡിക്സ്, പീഡിയാട്രിക് ഫിസിയോതെറാപ്പിസ്റ്റ് എന്നിവരടങ്ങുന്ന ഈ മൾട്ടിഡിസിപ്ലിനറി ക്ലിനിക് സമഗ്രമായ പരിചരണം ഉറപ്പാക്കുന്നു. ഇത് രോഗിയുടെ മെഡിക്കൽ വശങ്ങൾ മാത്രമല്ല, യുവ രോഗികളുടെ പുനരധിവാസവും ദീർഘകാല പരിചരണ ആവശ്യങ്ങളും നല്കുന്നു. നേരത്തെയുള്ള രോഗനിർണയത്തിനും വിദഗ്ധ ചികിത്സയും ദീർഘകാല വൈകല്യങ്ങൾ തടയാനും ചലനശേഷി മെച്ചപ്പെടുത്താനും വേദന കുറയ്ക്കാനും ഇത്തരം കുട്ടികളുടെ ജീവിത നിലവാരം ഗണ്യമായി ഉയർത്താനും സെന്‍റർ സഹായിക്കും. ചടങ്ങിൽ ഹോസ്പിറ്റൽ മെഡിക്കൽ അഡ്വൈസർ ഇ.കെ. അബ്ദുൾ നാസർ, ഡോ. ടോണി കവലക്കാട്ട്, ഡോ. എം. ജ്യോതിപ്രശാന്ത്, ഡോ. അഖിൽ ദാസ്, മഞ്ജു ജോസഫ്, ദേവതീർഥ് എന്നിവർ പങ്കെടുത്തു.

ആറളത്തെ കാട്ടാന ശല്യം: ഫാം എംഡിയെയും ആറളം പഞ്ചായത്തിനെയും അനെർട്ടിനെയും കക്ഷി ചേർത്ത് ഹൈക്കോടതി

ഇരിട്ടി: ആറളം ഫാമിലെ കാട്ടാന പ്രശ്‌നത്തിന് ശാശ്വത പരിഹാരം കാണുന്നതിന് കർശന നടപടികളുമായി ഹൈക്കോടതി. ആറളം ഫാം എംഡിയെയും ആറളം പഞ്ചാത്തിനെയും അനെർട്ട് ഓഫീസറെയും കക്ഷി ചേർത്ത് ഹൈക്കോടതി ഇടക്കാല ഉത്തരവ് പുറപ്പെടുവിച്ചു. സുൽത്താൻ ബത്തേരി സ്വദേശി ബൈജുപോൾ മാത്യൂസ് നൽകിയ പൊതുതാത്പര്യ ഹർജി പരിഗണിക്കവേയാണ് ഹൈക്കോടതി മൂവരെയും കക്ഷി ചേർത്തത്. കേസ് പ്രത്യേകമായി പരിഗണിക്കുന്നതിന്‍റെ ഭാഗമായി എല്ലാ ബുധനാഴ്ചയും ഉച്ചകഴിഞ്ഞ് മൂന്നിന് സ്‌പെഷ്യൽ സിറ്റിംഗ് നടത്താനും ജസ്റ്റിസുമാരായ എ.കെ. ജയശങ്കരൻ നമ്പ്യാർ, പി.എം. മനോജ് എന്നിവരടങ്ങിയ ഡിവിഷൻ ബഞ്ച് ഉത്തരവിട്ടു. ഹൈക്കോടതി നിർദേശപ്രകാരം രൂപീകരിച്ച ടാസ്‌ക് ഫോഴ്‌സ് പഠന റിപ്പോർട്ടിന്‍റെ അടിസ്ഥാനത്തിൽ നൽകിയ 131 നിർദേശങ്ങൾ അടങ്ങിയ സത്യവാങ്മൂലം കണ്ണൂർ ഡിഎഫ്ഒ കോടതിയിൽ സമർപ്പിച്ചിരുന്നു. ഇതുകൂടി പരിഗണിച്ച ശേഷമാണ് ആറളം എംഡിയേയും പഞ്ചായത്തിനെയും അനെർട്ടി ഓഫീസറെയും സ്വമേധയാ കേസിൽ കക്ഷിചേർക്കാൻ ഉത്തരവിട്ടത്. ആറളം ഫാമിൽ 14 ആദിവാസികളെ കാട്ടാന കൊന്നതിന്‍റെ പശ്ചാത്തലത്തിലാണ് ബൈജു പോൾ മാത്യൂസ് പൊതുതാത്പര്യ ഹർജി നൽകിയത്. ആദിവാസികളുടെ ജീവനും സ്വത്തിനും സംരക്ഷണം ഉറപ്പാക്കാൻ സർക്കാരിനും വനം വകുപ്പിനും നിർദേശം നൽകണമെന്നായിരുന്നു ഹർജിയിൽ ആവശ്യപ്പെട്ടത്.

പൊതുശൗചാലയത്തിൽ നിന്ന് ‌മാലിന്യങ്ങൾ പഴശി പദ്ധതിയിലേക്ക് ഒഴുക്കിയതായി പരാതി

ഇരിട്ടി: ഇരിട്ടി നഗരസഭയുടെ വാർഷിക പദ്ധതിയിൽ കോടികളുടെ വികസന പ്രവർത്തനങ്ങൾ ലക്ഷ്യം വയ്ക്കുന്നുണ്ടെങ്കിലും ആയിരക്കണക്കിന് ജനങ്ങൾ ദിവസവും എത്തുന്ന താലൂക്ക് ആസ്ഥാനമായ ഇരിട്ടിയിൽ നല്ലൊരു പൊതുശൗചാലയം പോലും ഇല്ലെന്നതാണ് യാഥാർഥ്യം. ജില്ലയിൽ നിന്ന് കർണാടകയിലേക്ക് ഉൾപ്പെടെ നിരവധി അന്തർസംസ്ഥാന യാത്രക്കാർ എത്തുന്ന ഇരിട്ടിയുടെ പിന്നാമ്പുറ കാഴ്ചകളാണ് ഇവയെല്ലാം. ഇരിട്ടി പുതിയ ബസ് സ്റ്റാൻഡിൽ പ്രവർത്തിക്കുന്ന പൊതുശൗചാലയം അഞ്ചു ദിവസമായ അടഞ്ഞു കിടക്കുകയാണ്. കക്കൂസ് മാലിന്യം നിറഞ്ഞ് പഴശി പദ്ധതിയിലേക്ക് ഒഴുകാൻ തുടങ്ങിയതോടെ ബന്ധപ്പെട്ടവർ എത്തി അടച്ചിടുകയായിരുന്നു. രണ്ടുദിവസം അടഞ്ഞുകിടന്നതിനുശേഷം മൂന്നാംദിവസം അറ്റകുറ്റപ്പണികൾ പൂർത്തിയാക്കി തുറന്നെങ്കിലും വീണ്ടും പഴയതിലൂം രൂക്ഷമായ ദുർഗന്ധം പുറത്തേക്ക് വ്യാപിച്ചതോടെ വീണ്ടും അധികൃതർ എത്തി അടപ്പിച്ചു. ടാങ്കിൽ നിന്നും കക്കൂസ് മാലിന്യങ്ങൾ പൂർണമായും നീക്കം ചെയ്തതിനുശേഷം തുറക്കുമെന്ന പ്രഖ്യാപനവും ഉണ്ടായി. ഇതിനുപിന്നാലെ ശൗചാലയത്തിൽ നിന്നുള്ള മാലിന്യങ്ങൾ പഴശി പദ്ധതിയിലേക്കാണ് ഒഴുക്കിവിടുന്നതെന്ന ആക്ഷേപം ശക്തമായി. പൊതുശൗചാലത്തിനോടു ചേർന്നുള്ള നഗരസഭയുടെ ഷോപ്പിംഗ് കോംപ്ലക്‌സിലെ ഓവുചാലിൽ നിന്നും വലിയ ദുർഗന്ധത്തോടെ മലിനജലം പഴശി സംഭരണിയുടെ കുടിവെള്ളത്തിലേക്ക് ഒഴുകുന്നതും ഇതിന് തെളിവായി കാണാൻ കഴിയും. പ്രദേശമാകെ ദുർഗന്ധം നിറഞ്ഞു നിൽക്കുമ്പോഴും നഗരസഭാ ആരോഗ്യ വിഭാഗത്തിന് ദുർഗന്ധം തിരിച്ചറിയാൻ കഴിയുന്നില്ല. പൊതുശൗചാലയം അടഞ്ഞുകിടക്കുന്നതോടെ സ്റ്റാൻഡിൽ എത്തുന്ന യാത്രക്കാർക്കും ബസ് തൊഴിലാളികൾക്കും വിവിധ ഷോപ്പുകളിൽ തൊഴിലെടുക്കുന്ന തൊഴിലാളികളും ദുരിതത്തിലായിരിക്കുകയാണ്. ദീർഘദൂര യാത്രക്കാർ ടൗണിലെ ഹോട്ടലുകളെയും മറ്റും ആശ്രയിക്കേണ്ടതായി വരുന്നു.

ആറളത്ത് പകൽ സമയത്തും കാട്ടാന

ഇരിട്ടി: ആറളം ഫാം പുനരധിവാസ മേഖലയിൽ പകൽ സമയത്തും കാട്ടാനയുടെ ഭീഷണി ഒഴിയുന്നില്ല. ഇന്നലെ രാവിലെ 7.30 ഓടെയാണ് ആറളം ഫാം ബ്ലോക്ക് 10ലെ ജനവാസ മേഖലയിൽ മോഴയാന എത്തിയത്. യാതൊരു പ്രശ്നവുമില്ലാതെയാണ് ആന വീടിന് സമീപത്തുകൂടി കാട്ടിലേക്ക് കയറിപ്പൊയത്. ആറളത്ത് രണ്ട് മോഴയാനകളാണ് ഭീഷണിയാകുന്നത്. ഫെബ്രുവരിയിൽ ബ്ലോക്ക് 13ൽ വെള്ളി, ലീല ദമ്പതികളെ അക്രമിച്ച് കൊലപ്പെടുത്തിയത് മോഴയാന ആണെന്നാണ് പ്രദേശവാസികൾ പറയുന്നത്. ആനകൾ ഭീക്ഷണിയാകുന്ന പുനരധിവാസ മേഖലയിൽ ജനങ്ങൾക്ക് പകൽ സമയത്ത് പോലും സഞ്ചരിക്കാൻ കഴിയാത്ത സാഹചര്യമാണ്. പുനരധിവാസ മേഖലയിലെ കാടുപിടിച്ച പ്രദേശങ്ങളിലാണ് കാട്ടാനകൾ തങ്ങുന്നത്. രാത്രികാലങ്ങളിൽ ആനകൾ കുടിലുകൾ തകർക്കുകയും വീടുകൾക്ക് നേരെ ആക്രമണം നടത്തുന്നതും പതിവാണ്. നാലു മാസത്തിനകം 17 കുടിലുകൾ കാട്ടാനകൾ തകർത്തിട്ടുണ്ട്. പലപ്പോഴും പലരും ആനയുടെ ആക്രമണത്തിൽ നിന്നും രക്ഷപ്പെടുന്നത് ഭാഗ്യംകൊണ്ടു മാത്രമാണ്. ആർആർടി ഉൾപെടെ പ്രവർത്തിക്കുന്നുണ്ടെങ്കിലും ആനകളെ നിയന്ത്രിക്കാൻ കഴിയാത്ത സാഹചര്യമാണ്.

തെരുവുനായ ശല്യം പ്രവർത്തനങ്ങൾ ഏകോപിപ്പിച്ച് ജില്ലാ വികസന സമിതി

കണ്ണൂർ: തെരുവുനായ ശല്യം പരിഹരിക്കുന്നതിന്‍റെ ഭാഗമായി തദ്ദേശ സ്ഥാപനങ്ങൾ, വിവിധ വകുപ്പുകൾ എന്നിവയുടെ പ്രവർത്തനങ്ങൾ ഏകോപിപ്പിച്ച് പ്രവർത്തിപ്പിക്കാൻ ജില്ലാ വികസന സമിതി യോഗ തീരുമാനം. കണ്ണൂർ കോർപറേഷൻ പരിധിയിൽ നിന്ന് കഴിഞ്ഞ ദിവസങ്ങളിലായി എഴുപതോളം തെരുവ്‌നായ്ക്കളെ പിടികൂടി പടിയൂർ എബിസി സെന്‍ററിലേക്ക് മാറ്റിയതായി യോഗത്തിൽ അറിയിച്ചു. അടുത്ത ഒരാഴ്ച കൂടി കോർപറേഷൻ പരിധിയിൽ നായ പിടിത്തം തുടരും. തെരുവുനായ്ക്കളെ പിടിക്കുന്നവർക്കുള്ള പരിശീലനം പൂർത്തിയായി. ജില്ലയിലെ പ്രത്യേക സാഹചര്യത്തിൽ കോർപ്പറേഷൻ 20 ഷെൽട്ടർ ഹോമുകളാണ് ഉടൻ നിർമിക്കാൻ ഉദ്ദേശിക്കുന്നത്. ഇതിൽ ആറ് എണ്ണത്തിനെ പ്രവൃത്തി പൂർത്തിയായി. ശേഷിക്കുന്നവയുടെ നിർമാണം പുരോഗമിക്കുകയാണ്. കണ്ണൂർ കന്‍റോൺമെന്‍റ് പരിധിയിലും ഷെൽട്ടർ ഹോം നിർമിച്ചതായി മന്ത്രി കടന്നപ്പള്ളി രാമചന്ദ്രന്‍റെ അധ്യക്ഷതയിൽ ചേർന്ന യോഗം അറിയിച്ചു. തദ്ദേശ, പിഡബ്ല്യുഡി റോഡുകളുടെ നവീകരണത്തിൽ അടിയന്തര ഇടപെടൽ വേണമെന്ന് എംഎൽഎമാരായ കെ.പി. മോഹനൻ, ടി.ഐ. മധുസൂദനൻ എന്നിവർ കത്തിലൂടെ ആവശ്യപ്പെട്ടു. അപകട ഭീഷണി ഉയർത്തുന്ന മരങ്ങൾ മുറിച്ചുമാറ്റുന്നതിന്‍റെ നടപടിക്ക്രമങ്ങളുടെ ഭാഗമായി മരത്തിന്‍റെ വില നിശ്ചയിക്കുന്നതിന് തദ്ദേശ സ്ഥാപനങ്ങളിലെ അസിസ്റ്റന്‍റ് എൻജിനിയർ, പൊതുമരാമത്ത് റോഡ് വിഭാഗം എൻജിനിയർമാർ എന്നിവർക്ക് വനം വകുപ്പുമായി സഹകരിച്ച് ജൂലൈ നാലിന് പരിശീലനം നൽകും. കനത്ത മഴയിലും കാറ്റിലും ഭാഗിക നാശം സംഭവിച്ച പച്ചക്കറികളും വാഴക്കുലകളും ഹോർട്ടികോർപ്പ് വഴി ഏറ്റെടുത്ത് വിപണിയിൽ എത്തിക്കുന്നതിന് കൃഷിവകുപ്പിന് യോഗം നിർദേശം നൽകി. പഴശി പദ്ധതിയുടെ ഷട്ടർ തുറന്നതിനെത്തുടർന്നും കാലവർഷക്കെടുതിയിലും കൃഷി പൂർണമായും നശിച്ച കൂത്തുപറമ്പ് മണ്ഡലത്തിലെ കർഷകർക്ക് നഷ്ടപരിഹാരം അനുവദിക്കുന്നതിനായി വകുപ്പിന് അപേക്ഷ നൽകിയതായി പ്രിൻസിപ്പൽ കൃഷി ഓഫീസർ അറിയിച്ചു. കനത്ത മഴയിൽ 2025 മേയ് മാസം മുതൽ കണ്ണൂർ വിമാനത്താവള പ്രദേശത്തു നിന്നും ഒഴുകിവന്ന ചെളിവെള്ളം നിറഞ്ഞ് കൃഷി നാശമുണ്ടായിട്ടുള്ള കർഷകർക്ക് പ്രകൃതി ക്ഷോഭ ദുരിതാശ്വാസ പദ്ധതി, വിള ഇൻഷ്വറൻസ് പദ്ധതി എന്നിവയിൽ ഉൾപ്പെടുത്തി എഐഎംഎസ് പോർട്ടൽ വഴി ധനസഹായം വിതരണം ചെയ്യുന്നതിന് നടപടി സ്വീകരിച്ചതായി പ്രിൻസിപ്പൽ കൃഷി ഓഫീസർ അറിയിച്ചു. ഈ പദ്ധതിയിൽ ഉൾപ്പെടാത്ത കർഷകർക്ക് കൃഷി ഓഫീസർമാർ സമർപ്പിച്ച റിപ്പോർട്ടിന്‍റെ അടിസ്ഥാനത്തിൽ നഷ്ടപരിഹാര തുക അനുവദിക്കുന്നതിന് വിമാനത്താവള അതോറിറ്റിക്ക് (കിയാൽ) അപേക്ഷ സമർപ്പിക്കുന്നതിനുള്ള നടപടി സ്വീകരിച്ചു വരുന്നതായും അറിയിച്ചു. ദേശീയ പാത സർവീസ് റോഡുകൾ ഉൾപ്പെടെയുള്ള റോഡിലെ കുഴികൾ അടക്കുന്നതിന് അടിയന്തര നടപടികൾ സ്വീകരിക്കുന്നതിന് പൊതുമരാമത്ത് റോഡ് വിഭാഗത്തിന് കളക്ടർ നിർദേശം നൽകി. ആർടിഒ എൻഫോഴ്‌സ്‌മെന്‍റ് വിഭാഗം ഇത് സംബന്ധിച്ച് പരിശോധനകൾ നടത്തുകയും റിപ്പോർട്ട് സമർപ്പിക്കുകയും ചെയ്യണമെന്ന് കളക്ടർ നിർദേശിച്ചു. സ്‌കൂളുകളിൽ ലഹരി ഉപയോഗം, മറ്റ് നിയമവിരുദ്ധ പ്രവർത്തനങ്ങൾ തടയുന്നതിന് എല്ലാ സ്‌കൂളുകളിലും ജാഗ്രതാ സമിതികൾ രൂപീകരിച്ചതായി ഡിഡിഇ അറിയിച്ചു. യോഗത്തിൽ സബ് കളക്ടർ കാർത്തിക് പാണിഗ്രഹി, എഡിഎം കല ഭാസ്‌കർ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, ജനപ്രതിനിധികൾ, എംഎൽഎമാരുടെ പ്രതിനിധികൾ, ജില്ലാതല ഉദ്യാഗസ്ഥർ എന്നിവർ പങ്കെടുത്തു. കൊട്ടിയൂർ ഉത്സവത്തോടനുബന്ധിച്ച് സൗകര്യംഒരുക്കാത്തതിൽ വിമർശനമുന്നയിച്ച് സജീവ് ജോസഫ് കൊട്ടിയൂർ വൈശാഖ മഹോത്സവത്തിൽ അഭൂതപൂർവമായ ഭക്തജനപ്രവാഹമുണ്ടാകുന്പോഴും ആവശ്യമായ ക്രമീകരണങ്ങൾ ഏർപ്പെടുത്താതെ ബന്ധപ്പെട്ടവർ നിസംഗത കാട്ടുകയാണെന്ന് സജീവ് ജോസഫ് എംഎൽഎ. ജില്ലാ വികസന സമിതിയോഗത്തിലാണ് എംഎൽഎ ഇക്കാര്യം ചൂണ്ടിക്കാട്ടിയത്. കൂടുതൽ മെഡിക്കൽ സൗകര്യങ്ങൾ ഏർപ്പെടുത്തുക, ട്രാഫിക് നിയന്ത്രണങ്ങൾ ഉറപ്പുവരുത്തുക, പോലീസ് വിന്യാസം വർധിപ്പിക്കുക, ഭക്തജനങ്ങൾക്കുള്ള പ്രാഥമിക ആവശ്യങ്ങൾക്കുള്ള അടിസ്ഥാന സൗകര്യങ്ങൾ ഉറപ്പുവരുത്തുക തുടങ്ങിയ വിഷയങ്ങളിൽ കൂടുതൽ ക്രിയാത്മകമായ ഇടപെടൽ വേണമെന്ന് അദ്ദേഹം ആവശ്യപ്പെട്ടു. കാലവർഷക്കെടുതികൾ മുൻനിർത്തി ക്വാറികളുടെ പ്രവർത്തനം നിശ്ചിതകാലത്തേക്ക് നിർത്തിവയ്ക്കുക, അനധികൃത ക്വാറികളെ കണ്ടെത്തി അടച്ചു പൂട്ടുക എന്നീ കാര്യങ്ങളും യോഗത്തിൽ അവതരിപ്പിച്ചു. സാധാരണയായി ജില്ലയിൽ ഓറഞ്ച്, റെഡ് അലർട്ടുകൾ ഉണ്ടാകുമ്പോൾ ക്വാറികളുടെ പ്രവർത്തനം നിർത്തിവയ്ക്കാറുണ്ടെന്ന് ജില്ലാ കളക്ടർ അരുൺ കെ. വിജയൻ വ്യക്തമാക്കി. ലംഘനം ശ്രദ്ധയിൽപ്പെട്ടാൽ ദുരന്തനിവാരണ നിയമപ്രകാരം നടപടികൾ സ്വീകരിക്കുമെന്നും കളക്ടർ പറഞ്ഞു. തേർളായി ദ്വീപ് ഉൾപ്പെടെയുള്ള ഒറ്റപ്പെട്ട സ്ഥലങ്ങളിലേക്ക് ബസ് പെർമിറ്റുകൾ അനുവദിക്കാത്ത നടപടിയെ ശക്തമായി വിമർശിച്ചു. നാലുവർഷമായി ബസില്ലാതെ ജനം വലയുകയാണ്. പെർമിറ്റ് വൈകിക്കുന്ന ആർടിഒയുടെ നടപടി പ്രതിഷേധാർഹമാണെന്നും ഉടൻ പെർമിറ്റ് നൽകണമെന്നും നാലുവർഷമായി അടച്ചുപൂട്ടി കിടക്കുന്ന പൈതൽമലയിലെ ഡിടിപിസി റിസോർട്ട് അറ്റകുറ്റപ്പണി ചെയ്തു തുറക്കാനുള്ള നടപടി വേണമെന്നും എംഎൽഎ ആവശ്യപ്പെട്ടു.

ആൾത്താമസമില്ലാത്ത വീട്ടുപറന്പിൽ തലയോട്ടിയും അസ്ഥികളും കണ്ടെത്തി

കരുവഞ്ചാൽ: ആൾത്താമസമില്ലാത്ത വീട്ടുപറന്പിൽ ദുരൂഹ സാഹചര്യത്തിൽ മനുഷ്യന്‍റെ തലയോട്ടിയും കൈകാലുകളുടെ അസ്ഥിയും കണ്ടെത്തി. കരുവഞ്ചാൽ ഹണി ഹൗസിനു സമീപം പ്രവാസിയായ കുളത്തിനാൽ ബിജുവിന്‍റെ അടച്ചിട്ട വീടിനു സമീപത്താണ് തലയോട്ടിയും അസ്ഥികളും കണ്ടെത്തിയത്. പഴക്കമുള്ള കാവിമുണ്ടും ട്രൗസറും ഷർട്ടും ഇതിനു സമീപമായും കണ്ടെത്തി. ഒരുവർഷമായി വിദേശത്തുള്ള ബിജുവും കുടുംബവും അടുത്ത ആഴ്ച നാട്ടിലേക്ക് വരുന്നതിന് മുന്നോടിയായി തൊഴിലാളികളോട് പറന്പ് വൃത്തിയാക്കാൻ പറഞ്ഞിരുന്നു. വീടിന്‍റെ പരിസരം വൃത്തിയാക്കുന്നതിനിടെ ഇന്നലെ വൈകുന്നേരം അഞ്ചോടെയാണ് ഇവർ തലയോട്ടിയും അസ്ഥികളും കണ്ടെത്തുന്നത്. വിടിന്‍റെ പിറക് വശത്തായി പലയിടങ്ങിലായാണ് തലയോട്ടിയും അസ്ഥികളും കിടന്നിരുന്നത്. പോലീസിൽ വിവരമറിയിച്ചതിനെ തുടർന്ന് തളിപ്പറന്പ് ഡിവൈഎസ്പി കെ.ഇ. പ്രേമചന്ദ്രൻ, ആലക്കോട് എസ്എച്ച്ഒ മഹേഷ് കെ. നായർ എന്നിവരുടെ നേതൃത്വത്തിലുള്ള പോലീസ് സംഘം സ്ഥലത്തെത്തി. വീട്ടുപറന്പിലേക്ക് ആളുകളുടെ പ്രവേശനം നിരോധിച്ച് പോലീസ് കാവൽ ഏർപ്പെടുത്തിയിട്ടുണ്ട്. ഇന്ന് രാവിലെ കണ്ണൂരിൽ നിന്ന് ഫോറൻസിക് വിദഗ്ദ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തും.

മാന്പൊയിലിൽ കാട്ടാന ശല്യം രൂക്ഷം

ആലക്കോട്: ഉദയഗിരി പഞ്ചായത്തിലെ ജനവാസ മേഖലയായ മാമ്പൊയിലിൽ കാട്ടാനശല്യം രൂക്ഷം. കൂട്ടത്തോടെ എത്തുന്ന കാട്ടാനകൾ വ്യാപകമായി കൃഷി നശിപ്പിക്കുകയാണ്. ഇവിടെ നാലു കിലോമീറ്ററോളം ഭാഗത്ത് സോളർ വേലിയില്ല. വേലിയുള്ളിടങ്ങളിൽ പലയിടത്തും ഇടയ്ക്കിടെ പ്രവർത്തനരഹിതവുമാണ്. ഇതാണ് കാട്ടാനകൾ എത്താൻ ഇടയാക്കുന്നതെന്ന് പ്രദേശവാസികൾ പറഞ്ഞു. പാട്ടകൊട്ടിയും പടക്കം പൊട്ടിച്ചുമാണ് ജനം ആനകളെ തുരത്തുന്നത്. ഇത് പലപ്പോഴും ജീവൻ പണയം വച്ചുള്ള പ്രവൃത്തിയാണെന്നാണ് നാട്ടുകാർ പറയുന്നു. കാട്ടാനശല്യം കാരണം നിരവധി കുടുംബങ്ങൾ പ്രദേശത്ത് നിന്നും താമസം മാറിക്കഴിഞ്ഞു. ബാക്കിയുള്ളവർ കടുത്ത ഭീതിയിലാണ് കഴിയുന്നത്. കാട്ടാന ശല്യം പരിഹരിക്കാൻ ബന്ധപ്പെട്ടവരുടെ ഭാഗത്ത് നിന്നും നടപടി ഉണ്ടാകുന്നില്ലെന്നത് വലിയ പ്രതിഷേധത്തിനിടയാക്കുന്നുണ്ട്.

വിദ്യാരംഗം കലാസാഹിത്യവേദി ഉദ്ഘാടനം

ചന്ദനക്കാംപാറ: ചെറുപുഷ്പം യുപി സ്കൂളിൽ വായന വാരാചരണത്തോടൊപ്പം വിദ്യാരംഗം കലാസാഹിത്യ വേദി, വിവിധ ക്ലബുകൾ എന്നിവയുടെ ഉദ്ഘാടനവും നടന്നു. സ്കൂൾ ഹാളിൽ സംഘടിപ്പിച്ച ചടങ്ങിൽ സ്കൂൾ മാനേജരും ചന്ദനക്കാംപാറ ഇടവക വികാരിയുമായ ഫാ. ജോസഫ് ചാത്തനാട്ട് ഉദ്ഘാടനം നിർവഹിച്ചു. സ്കൂൾ മുഖ്യാധ്യാപിക വിജി മാത്യു അധ്യക്ഷത വഹിച്ചു. വിദ്യാരംഗം കൺവീനർ അർച്ചന ജോളി ആമുഖ പ്രഭാഷണം നടത്തി. പ്രശസ്ത സ്കിൽ ട്രെയിനറായ ടി.പി. നിഷ മുഖ്യാതിഥിയായിരുന്നു. സിസ്റ്റർ റോഷ്നി എഫ്സിസി, അനിൽ കൊച്ചുകൈപ്പേൽ, ജിഷ പുളിയ്ക്കൽ എന്നിവർ പ്രസംഗിച്ചു. വിദ്യാർഥികൾ വിവിധ കലാപരിപാടികളും അവതരിപ്പിച്ചു.

കയരളംമൊട്ടയിലെ പാന്പ് ശല്യം ആശങ്കപ്പെടേണ്ടതില്ലെന്ന് വനംവകുപ്പ്

മയ്യിൽ: കയരളം മൊട്ടയിലെ പാന്പ് ശല്യത്തിൽ ആശങ്കപ്പെടേണ്ട സാഹചര്യമില്ലെന്നും വിഷമില്ലാത്ത പെരുന്പാന്പുകളെയാണ് ഇവിടെ കൂടുതലുമുള്ളതെന്നും വനം വകുപ്പ്.

പെരുന്പാന്പുകൾ മുട്ടയിട്ട് വിരിയുന്ന കാലമാണിത്. ഒരുതവണ തന്നെ നൂറിലധികം മുട്ടകളിടും. ഇവയിൽ അന്പതിലധികം വിരിഞ്ഞ് വളരും. ഇതാണ് ഈ മേഖലയിൽ പെരുന്പാന്പുകളെ കാണാനിടയാക്കുന്നതെന്നും തളിപ്പറന്പ് ഫോറസ്റ്റ് റേഞ്ച് ഓഫീസർ സനൂപ് കൃഷ്ണൻ പറഞ്ഞു. പാന്പ്ശല്യം രൂക്ഷമായതിനെ തുടർന്ന് സ്ഥലം സന്ദർശിച്ച ശേഷം സംസാരിക്കുകയായിരുന്നു അദ്ദേഹം. പ്രദേശവാസികളുടെ ആശങ്ക പരിഹരിക്കാനള്ള എല്ലാ നടപടിയും വനംവകുപ്പ് സ്വീകരിക്കുമെന്നും സനൂപ് കൃഷ്ണൻ പറഞ്ഞു. പാന്പുകളുടെ ആധിക്യം കാരണം കഴിഞ്ഞ മൂന്നുവർഷമായി കടുത്ത പ്രയാസമാണ് നേരിടുന്നതെന്ന് നാട്ടുകാർ പറഞ്ഞു. വിടിനകത്ത് വരെ പാന്പുകളെത്തുന്നതിനാൽ പലരും താമസം മാറ്റിയിട്ടുണ്ട്.

കണ്ണൂർ സ്പെഷൽ ജയിലിൽ തടവുകാരൻ ഉദ്യോഗസ്ഥനെ ആക്രമിച്ച് കാമറ തകർത്തു

കണ്ണൂർ: സബ് ജയിലിൽ തടവുകാരൻ നിരീക്ഷണ കാമറ അടിച്ചു തകർക്കുകയും ഡ്യൂട്ടിയിലെ ഉദ്യോഗസ്ഥനെ ആക്രമിക്കുകയും ചെയ്തു. ജയിൽ സൂപ്രണ്ട് ഇ.വി. വിജേഷിന്‍റെ പരാതിയിൽ ഒന്നാം സെല്ലിലെ അന്തേവാസിയായ കല്ലായി സ്വദേശി ഇൻസുദ്ദീനെതിരെ ടൗൺ പോലീസ് കേസെടുത്തു. ഇന്നലെ രാവിലെയായിരുന്നു സംഭവം. ശുചിമുറിയുടെ വാതിൽ തകർത്ത് ഇതുപയോഗിച്ച് നിരീക്ഷണ കാമറ അടിച്ചു നശിപ്പിക്കുകയായിരുന്നു. ശബ്ദം കേട്ട് സ്ഥലത്തെത്തിയ ജയിൽ ജീവനക്കാരനെയും ആക്രമിച്ചെന്നാണ് പരാതി.

കുരുമുളക് തൈകളുടെ വിതരണം

ആലക്കോട്: കൃഷിഭവനിൽ 2025-26 ജനകീയാസൂത്രണ പദ്ധതി പ്രകാരമുള്ള കുരുമുളക് തൈകളുടെ വിതരണോദ്ഘാടനം പഞ്ചായത്ത്‌ പ്രസിഡന്‍റ് ജോജി കന്നിക്കാട്ട് നിർവഹിച്ചു. കൃഷി ഓഫീസർ അഞ്ജു എം. സണ്ണി പദ്ധതി വിശദീകരിച്ചു. വാർഡംഗം മേഴ്‌സി അധ്യക്ഷത വഹിച്ചു. പഞ്ചായത്ത്‌ പദ്ധതിയിൽ ഉൾപ്പെടുത്തി അമ്പതിനായിരത്തോളം കുരുമുളക് തൈകളാണ് ഈവർഷം വിതരണം ചെയ്യുന്നത്. ആലക്കോട് പഞ്ചായത്തിൽ കുരുമുളക് കൃഷിവ്യാപനവും പുനരുജ്ജീവനവും ലക്ഷ്യമിട്ട് നടപ്പിലാക്കുന്ന പദ്ധതിയിൽ പന്നിയൂർ 1, കരിമുണ്ട ഇനങ്ങളാണ്‌ വിതരണം ചെയ്യുന്നത്.

മഴക്കാല രോഗപ്രതിരോധ ബോധവത്കരണം നടത്തി

പെരിങ്ങാല: കത്തോലിക്ക കോൺഗ്രസ് പെരിങ്ങാല യൂണിറ്റ്, ആലക്കോട് ഹോമിയോ ഡിസ്പെൻ സറി എന്നിവയുടെ സംയുക്താഭിമുഖ്യത്തിൽ മഴക്കാല രോഗപ്രതിരോധ ബോധവത്കരണ ക്യാമ്പ് സംഘടിപ്പിച്ചു. പെരിങ്ങാല സെന്‍റ് ജൂഡ് പള്ളി ഓഡിറ്റോറിയത്തിൽ കത്തോലിക കോൺഗ്രസ് തലശേരി അതിരൂപത സെക്രട്ടറി ജയിംസ് ഇമ്മാനുവലിന് രോഗപ്രതിരോധ ഹോമിയോ മരുന്ന് നൽകി ഇടവക വികാരി ഫാ. മാത്യു കായമ്മാക്കൽ ക്യാമ്പ് ഉദ്ഘാടനം ചെയ്തു. കാത്തോലിക്ക കോൺഗ്രസ്‌ അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. സിസ്റ്റർ ജെയിനി, ജോസ് ജോസഫ്, സാജു കാരാടിയിൽ, സാബു ജോൺ എന്നിവർ പ്രസംഗിച്ചു. ഹോമിയോ മെഡിക്കൽ ഓഫിസർ ഡോ. ജാസ്മിൻ ജോസ് ബോധവത്കരണ ക്ലാസിന് നേതൃത്വം നൽകി.

ലയൺസ് ഭാരവാഹികളുടെ സ്‌ഥാനാരോഹണം ഇന്ന്

ആലക്കോട്: ആലക്കോട് ലയൺസ് ക്ലബ് ഭാരവാഹികളുടെ സ്ഥാനാരോഹണ ചടങ്ങ് ഇന്ന് വൈകുന്നേരം 6.30ന് അരങ്ങം ലയൺസ് ഹാളിൽ നടക്കും. മുൻ ഡിസ്ട്രിക്ട് ഗവർണർ ഡോ. ഒ.വി. സനൽ സ്ഥാനാരോഹണം നടത്തും. ജിമ്മി തോമസ് അധ്യക്ഷത വഹിക്കും. ലയൺസ് ക്ലബ് ഭാരവാഹികളായി കെ.എം.വത്സരാജ്-പ്രസിഡന്‍റ്, മനോജ് അള്ളുംപുറത്ത്-സെക്രട്ടറി, പി.ടി. ലൂക്കോസ്-ട്രഷറർ, ജിമ്മി നമ്പ്യാപറമ്പിൽ-ഐപിപി, വർഗീസ് ചിന്താർ മണിയിൽ, ജോൺസൺ മാട്ടേൽ, ടുട്ടു ജോസ്-വൈസ് പ്രസിഡന്‍റ്, ബിജോ തോമസ് കട്ടയ്ക്കൽ-ജോ. സെക്രട്ടറി എന്നിവരുടെ നേതൃത്വത്തിലുള്ള പുതിയ ഭരണസമിതിയാണ് ചുമതലയേൽക്കുന്നത്.

തളിപ്പറമ്പിൽ ചക്ക ഫെസ്റ്റ് സംഘടിപ്പിച്ചു

തളിപ്പറമ്പ്: തളിപ്പറമ്പ് നഗരസഭ കുടുംബശ്രീ സിഡിഎസിന്‍റെ നേതൃത്വത്തിൽ ചക്ക ഫെസ്റ്റ് സംഘടിപ്പിച്ചു. തളിപ്പറമ്പ് ടൗൺ സ്ക്വയറിൽ നടന്ന ചക്ക ഫെസ്റ്റ് നഗരസഭ ചെയർപേഴ്സൺ മുർഷിദ കൊങ്ങായി ഉദ്ഘാടനം ചെയ്തു. സിഡിഎസ് ചെയർപേഴ്സൺ രാജി നന്ദകുമാർ അധ്യക്ഷത വഹിച്ചു. ആരോഗ്യ സ്റ്റാന്‍റിംഗ് കമ്മിറ്റി ചെയർപേഴ്സൺ നബീസ ബീവി, പൊതുമരാമത്ത് സ്റ്റാന്‍റിംഗ് കമ്മിറ്റി ചെയർമാൻ പി.വി. മുഹമ്മദ് നിസാർ, വിദ്യാഭ്യാസ സ്റ്റാന്‍റിംഗ് കമ്മിറ്റി ചെയർപേഴ്സൺ കെ.പി. ഖദീജ, കൗൺസിലർമാരായ വി. വിജയൻ, രമേശൻ, റസിയ, സാഹിദ, വത്സരാജൻ, ഷൈനി, വത്സല ഗിരീശൻ, സുജാത, നഗരസഭ സെക്രട്ടറി കെ.പി. സുബൈർ, മെമ്പർ സെക്രട്ടറി പി. പ്രദീപ് കുമാർ, സിഡിഎസ് അക്കൗണ്ടന്‍റ് പി.കെ. ദിവ്യ എന്നിവർ പ്രസംഗിച്ചു. സിഡിഎസ് അംഗങ്ങൾ, കുടുംബശ്രീ അംഗങ്ങൾ തുടങ്ങിയവർ പങ്കെടുത്തു. കുടുംബശ്രീ അംഗങ്ങളുടെ ചക്ക വിഭവങ്ങളുടെ മത്സരവും വിപണനവും നടന്നു. മത്സരത്തിന് 34 വിഭവങ്ങൾ ഉണ്ടായിരുന്നു. സീസണൽ ഫ്രൂട്ട്സിന്‍റെ പ്രധാന്യത്തെക്കുറിച്ചുള്ള ബോധവത്കരണവും കുടുംബശ്രീ സംരംഭകർക്കുള്ള പ്രോത്സാഹനവുമാണ് ഈ പരിപാടിയുടെ ലക്ഷ്യമെന്ന് സംഘാടകർ പറഞ്ഞു.

വി. രതീശൻ ആറളം വൈൽഡ് ലൈഫ് വാർഡൻ

ഇരിട്ടി: ആറളം വന്യജീവി സങ്കേതം ഡിവിഷനിൽ വൈൽഡ് ലൈഫ് വാർഡനായി വി.രതീശൻ ചുമതലയേറ്റു. വനം വകുപ്പ് കണ്ണൂർ സ്പെഷൽ ഇൻവെസ്റ്റിഗേഷൻ ആൻഡ് പ്രൊട്ടക്‌ഷൻ അസിസ്റ്റന്‍റ് ഫോറസ്‌റ്റ് കൺസർവേറ്ററായിരുന്നു. ചെമ്പേരി പൂപ്പറമ്പ് സ്വദേശിയാണ്. ആറളം വൈൽഡ് ലൈഫ് വാർഡനായിരുന്ന ജി. പ്രദീപ് കണ്ണൂർ സിസിഎഫ് ഓഫിസിൽ ടെക്‌നിക്കൽ അസിസ്റ്റന്‍റ് ആൻഡ് അസിസ്റ്റന്‍റ് ഫോറസ്‌റ്റ് കൺസർവേറ്ററായി സ്‌ഥലം മാറിയ ഒഴിവിലാണ് നിയമനം.

ചാലോട് ആൽമരത്തിന്‍റെ കൊന്പ് കെട്ടിടത്തിനു മുകളിൽ പൊട്ടിവീണു

മട്ടന്നൂർ: ശക്തമായ കാറ്റിലും മഴയിലും ചാലോട് ആൽമരത്തിന്‍റെ കൊന്പ് പൊട്ടി കെട്ടിടത്തിനു മുകളിൽ വീണു. ചാലോട്-ഇരിക്കൂർ റോഡിൽ കള്ളുഷാപ്പും കൈരളി സഹകരണ ഹോട്ടലും പ്രവർത്തിക്കുന്ന കെട്ടിടത്തിനു മുകളിലാണു ആൽമരത്തിന്‍റെ വൻ ശിഖരം പൊട്ടിവീണത്. വെള്ളിയാഴ്ച രാത്രിയിലാണു ചെത്ത് തൊഴിലാളി സഹകരണ സംഘം മട്ടന്നൂർ റേഞ്ചിന്‍റെ ഉടമസ്ഥതയിലുള്ള കെട്ടിടത്തിനു മുകളിൽ ശിഖരം പൊട്ടിവീണത്. റോഡിനോടു ചേർന്നുള്ള മരത്തിന്‍റെ ശിഖരം കെട്ടിടത്തിനു മുകളിൽ വീണതുകൊണ്ട് മാത്രമാണ് വൻ അപകടം ഒഴിവായത്. കെട്ടിടത്തിന്‍റെ മേൽക്കൂരയ്ക്കും തൊട്ടടുത്ത എം. ഉത്തമന്‍റെ ഉടമസ്ഥതയിലുള്ള കെട്ടിടത്തിന്‍റെ മേൽക്കൂരയിലെ ഷീറ്റുകൾക്കും കേടുപാടുകൾ സംഭവിച്ചു. പൊട്ടിവീണ ശിഖരം പിന്നീട് മുറിച്ചുനീക്കി. അപകട ഭീഷണി ഉയർത്തുന്ന ആൽമരം മുറിച്ചുനീക്കണമെന്ന ആവശ്യം ശക്തമായിട്ടുണ്ട്.

കാർ താഴ്ചയിലേക്ക് മറിഞ്ഞു

മട്ടന്നൂർ: കല്ലേരിക്കരയിൽ കാർ നിയന്ത്രണം വിട്ട് റോഡരികിലെ താഴ്ചയിലേക്ക് മറിഞ്ഞു. യാത്രക്കാർ പരിക്കേൽക്കാതെ രക്ഷപ്പെട്ടു. ഇന്നലെ ഉച്ചകഴിഞ്ഞ് മൂന്നോടെ കല്ലേരിക്കരയിൽ വിമാനത്താവള റോഡിലേക്കെത്തുന്ന ബൈപ്പാസ് റോഡിലായിരുന്നു അപകടം. കണ്ണൂർ വിമാനത്താവളത്തിലെ കാറാണ് അപകടത്തിൽപ്പെട്ടത്. വിമാനത്താവളത്തിൽ നിന്ന് മട്ടന്നൂരിലേക്ക് വരുമ്പോൾ നിയന്ത്രണം വിട്ടുമറിയുകയായിരുന്നു. ക്രെയിൻ ഉപയോഗിച്ചാണ് കാർ ഉയർത്തി പുറത്തെടുത്തത്.

ദുരന്ത നിവാരണ പരിശീലന ക്യാന്പ് നടത്തി

കണിച്ചാർ: സംസ്ഥാന ദുരന്ത നിവാരണ അഥോറിറ്റി കണിച്ചാർ പഞ്ചായത്തിൽ ആരംഭിച്ച ലിവിംഗ് ലാബ് പദ്ധതിയുടെ ഭാഗമായി കുട്ടികൾക്കായി ദ്വിദിന ദുരന്തനിവാരണ പരിശീല ക്യാമ്പ് നടത്തി. ഡോ. പൽപു യുപി സ്കൂൾ കണിച്ചാർ, സെന്‍റ് സെബാസ്റ്റ്യൻ യുപി സ്കൂൾ കാപ്പാട്, കൊളക്കാട് സാൻതോം ഹയർ സെക്കൻഡറി എന്നിവിടങ്ങളിലെ എൻഎസ്എസ്, എസ്പിസി വിദ്യാർഥികൾക്കാണ് പരിശീലനം നൽകിയത്. കണിച്ചാർ ഇ.കെ. നായനാർ സ്മാരക ഓഡിറ്റോറിയത്തിൽ നടന്ന പരിപാടിയിൽ കണ്ണൂർ ജില്ലാ ദുരന്തനിവാരണ അഥോറിറ്റി ഹസാർഡ് അനലിസ്റ്റ് എസ്. ഐശ്യര്യ, സിയ അരുൺ, കണിച്ചാർ പഞ്ചായത്ത് റിസിലിയൻസ് ഓഫീസർ കെ. നിധിൻ, പേരാവൂർ ഫയർസ്റ്റേഷനിലെ ഫയർമാൻമാരായ മഹേഷ്, അനീഷ്, ജിതിൻ, പേരാവൂർ ആപ്ത മിത്ര വോളന്‍റിയേഴ്സ് എന്നിവർ ക്ലാസുകളെടുത്തു. സംസ്ഥാന ദുരന്തനിവാരണ അഥോറിറ്റി അംഗം ഡോ. ജോയി എളമൻ മുഖ്യാതിഥിയായിരുന്നു. കണിച്ചാർ പഞ്ചായത്ത് പ്രസിഡന്‍റ് ആന്‍റണി സെബാസ്റ്റ്യൻ, വൈസ് പ്രസിഡന്‍റ് ഷാന്‍റി തോമസ്, സ്റ്റാൻഡിംഗ് കമ്മിറ്റി ചെയർമാൻ തോമസ് വടശേരി, പഞ്ചായത്തംഗങ്ങളായ ജോജൻ എടത്താഴെ, സുരുവി റിജോ, പഞ്ചായത്ത് അസി. സെക്രട്ടറി ദീപു രാജ് എന്നിവർ പങ്കെടുത്തു.

യുവാവിന്‍റെ ആത്മഹത്യ: ഒളിച്ചോടിയ ഭാര്യയും കാമുകനും അറസ്റ്റിൽ

മട്ടന്നൂർ: ഭാര്യ ഒളിച്ചോടിയതിനെ തുടർന്ന് ഇലക്‌ട്രീഷ്യനായ യുവാവ് ആത്മഹത്യ ചെയ്ത സംഭവത്തിൽ ഭാര്യയെയും കാമുകനെയും പോലീസ് അറസ്റ്റ് ചെയ്തു. മട്ടന്നൂർ കീച്ചേരി ലൈല മൻസിലിൽ പി.കെ. സുനീറായിരുന്നു (30) ആത്മഹത്യ ചെയ്തത്. ഭാര്യ ഇരിക്കൂർ പെടയങ്ങോട്ടെ എം. നസ്മിന(28), പാലോട്ടുപള്ളി സ്വദേശി മുഹമ്മദ് അഫ്‌നാസ് (29) എന്നിവരെയാണ് ആത്മഹത്യാപ്രേരണ കുറ്റം ചുമത്തി അറസ്റ്റു ചെയ്തത്. കഴിഞ്ഞ മാർച്ച് 16നായിരുന്നു സുനീറിനെ കീച്ചേരിയിലെ വീട്ടിൽ തൂങ്ങി മരിച്ച നിലയിൽ കണ്ടെത്തിയത്. ജനുവരിയിലായിരുന്നു ഭാര്യയുടെ ഒളിച്ചോട്ടം. രണ്ട് മക്കളെയും നസ്മിന ഒപ്പം കൂട്ടിയിരുന്നു. തന്‍റെ കൈവശമുണ്ടായിരുന്ന സ്വർണവും പണവും എടുത്താണ് ഭാര്യ കാമുകനൊപ്പം പോയതെന്ന് സുനീറിന്‍റെ ആത്മഹത്യാകുറിപ്പിലുണ്ടായിരുന്നു. സ്വർണവും പണവും പോലീസ് കണ്ടെത്തി ഉമ്മയെ എൽപ്പിക്കണമെന്നും ആത്മഹത്യാകുറിപ്പിൽ എഴുതിയിരുന്നു. മട്ടന്നൂർ ഇൻസ്‌പെക്ടർ എം.അനിലിന്‍റെ മേൽനോട്ടത്തിലാണ് കേസ് അന്വേഷിക്കുന്നത്. എസ്‌ഐ കെ.എ. മധുസൂദനൻ, സിപിഒ ഷംസീർ അഹമ്മദ് എന്നിവരാണ് ഇരുവരെയും അറസ്റ്റ് ചെയ്തത്. മട്ടന്നൂർ കോടതിയിൽ ഹാജരാക്കിയ ഇവരെ റിമാൻഡ് ചെയ്തു.

അക്വാ ഫീനിക്സ് പിണറായി ജേതാക്കൾ

കണ്ണൂർ: ജില്ലാ അക്വാറ്റിക് അസോസിയേഷന്‍ സംഘടിപ്പിച്ച ജില്ലാ സബ് ജൂണിയർ, ജൂണിയർ നീന്തൽ ചാന്പ്യൻഷിപ്പിൽ അക്വാ ഫീനിക്സ് പിണറായി ഓവറോൾ ചാന്പ്യൻ. മട്ടന്നൂർ എച്ച്എസ്എസ് രണ്ടാം സ്ഥാനവും വായാട്ടുപറന്പ് സെന്‍റ് തോമസ് എച്ച്എസ്എസ് മൂന്നാം സ്ഥാനവും നേടി. മമ്പറം ഇന്ദിരാഗാന്ധി പബ്ലിക് സ്കൂൾ സ്വിമ്മിംഗ് പൂളിൽ നടന്ന ചാന്പ്യൻഷിപ്പ് വി. ശിവദാസൻ എംപി ഉദ്ഘാടനം ചെയ്തു. ജില്ലാ അക്വാറ്റിക് അസോസിയേഷൻ പ്രസിഡന്‍റ് യു.പി. ഷബിൻകുമാർ അധ്യക്ഷത വഹിച്ചു. സമാപന സമ്മേളനം ജില്ലാ അക്വാറ്റിക് അസോസിയേഷൻ പ്രസിഡന്‍റ് യു.പി. ഷബിൻകുമാർ ഉദ്ഘാടനം ചെയ്ത് വിജയികൾക്കുള്ള ട്രോഫികൾ സമ്മാനിച്ചു.

ഡിസ്ട്രിക്ട് മിനറൽ ഫൗണ്ടേഷൻ ഫണ്ടിൽ നിന്ന് 44 ലക്ഷം രൂപയുടെ പ്രവൃത്തികൾക്ക് അംഗീകാരം

കണ്ണൂർ: ഡിസ്ട്രിക്ട് മിനറൽ ഫൗണ്ടേഷൻ (ഡിഎംഎഫ്) ജനറൽ കൗൺസിൽയോഗം ഖനന പ്രദേശങ്ങളിൽ ഡിഎംഎഫ് ഫണ്ടിൽനിന്ന് 44 ലക്ഷം രൂപയുടെ ആറ് പ്രവൃത്തികൾ നടത്തുന്നതിന് അംഗീകാരം നൽകി. 81.66 ലക്ഷം രൂപയുടെ പദ്ധതികൾ മൂന്ന് പഞ്ചായത്തുകളിൽ നടപ്പിലാക്കുന്നതിന് സർക്കാറിന്‍റെ അനുമതി തേടും. നാല് പദ്ധതികൾ കണിച്ചാർ പഞ്ചായത്തിനാണ്. നവബോധിനി വായനശാല കെട്ടിടം നിർമാണം ഒമ്പത് ലക്ഷം, അരുവിക്കര അങ്കണവാടി കെട്ടിടം പുനരുദ്ധാരണം അഞ്ച് ലക്ഷം, കണിച്ചാർ പഞ്ചായത്തിലെ നെല്ലാനിക്കൽ തോടിന്‍റെ രണ്ട് സംരക്ഷണ ഭിത്തികൾ നിർമിക്കുന്നതിന് 10 ലക്ഷം വീതം എന്നീ പദ്ധതികൾക്ക് അംഗീകാരം നൽകി. ശ്രീകണ്ഠപുരം നഗരസഭയിലെ പ്രതിഭ ആർട്‌സ് ആൻഡ് സ്‌പോർട്‌സ് ക്ലബ് വയോജന വിശ്രമ കേന്ദ്രം പുനരുദ്ധാരണത്തിന് അഞ്ച് ലക്ഷം അനുവദിച്ചു. തൃപ്പങ്ങോട്ടൂർ നരിക്കോട്ടുമല ജിഎൽപി സ്‌കൂളിൽ വിനോദ പാർക്ക് നിർമാണത്തിന് അഞ്ച് ലക്ഷം അനുവദിക്കുന്നതിന് അംഗീകാരം നൽകി. 10 ലക്ഷത്തിന് മുകളിൽ വരുന്ന മൂന്ന് പദ്ധതികളാണ് സർക്കാർ അംഗീകാരത്തിനായി സമർപ്പിക്കുക. യോഗത്തിൽ മന്ത്രി കടന്നപ്പള്ളി രാമചന്ദ്രൻ, സജീവ് ജോസഫ് എംഎൽഎ, ജില്ലാ കളക്ടർ അരുൺ കെ. വിജയൻ, ജിയോളജിസ്റ്റ് കെ. ആർ. ജഗദീശൻ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, നടുവിൽ പഞ്ചായത്ത് പ്രസിഡന്‍റ് ബേബി ഓടമ്പള്ളി, ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്‌സാണ്ടർ എന്നിവർ പങ്കെടുത്തു.

ചികിത്സാപ്പിഴവില്‍ പതിനേഴുകാരൻ മരിച്ച സംഭവം ‌: പോലീസിനും മനുഷ്യവകാശ കമ്മിഷനും ഡിഎംഒ നല്കിയത് വ്യത്യസ്ത റിപ്പോര്‍ട്ടുകള്‍

കണ്ണൂര്‍: തൊണ്ടയിലെ ശസ്ത്രക്രിയയ്ക്ക് പിന്നാലെ പതിനേഴുകാരൻ മരിച്ച സംഭവത്തിൽ പോലീസിനും മനുഷ്യാവകാശ കമ്മീഷനും ഡിഎംഒ നല്കിയത് വ്യത്യസ്ത റിപ്പോർട്ടുകൾ. ആദ്യം മനുഷ്യവകാശ കമ്മീഷന് ഡോക്ടുടെ വീഴ്ച ചൂണ്ടിക്കാട്ടിയാണ് മെഡിക്കൽ ഓഫീസർ റിപ്പോർട്ട് നല്കിയത്. എന്നാൽ, പോലീസിൽ റിപ്പോർട്ട് സമർപ്പിച്ചപ്പോൾ ആശുപത്രി രേഖകളിൽ മാറ്റം വരുത്തിയാണ് നല്കിയത്. ഇത് അന്വേഷണം അട്ടിമറിക്കാനുള്ള നീക്കമാണെന്ന് കുടുംബം ആരോപിച്ചു. ആശുപത്രി രേഖകള്‍ തിരുത്തിയെന്ന് വ്യക്തമായിട്ടും ചികിത്സ നടത്തിയ ഡോക്ടറെ ഉന്നത ഇടപെടലുകളെ തുടര്‍ന്ന് സംരക്ഷിക്കാന്‍ നീക്കം നടക്കുന്നുവെന്നാണ് കുടുംബം ആരോപിക്കുന്നത്. ‌‌ കഴിഞ്ഞ വര്‍ഷം ജൂലൈയിലാണ് കണ്ണാടിപ്പറന്പിലെ സൂര്യജിത്ത് മരിച്ചത്. കണ്ണൂരിലെ സ്വകാര്യ ഇഎന്‍ടി ക്ലിനിക്കില്‍ തൊണ്ടയിലെ ശസ്ത്രക്രിയ കഴിഞ്ഞ് അഞ്ചാംനാള്‍ രക്തം വാര്‍ന്ന് മരിക്കുകയായിരുന്നു. ശസ്ത്രക്രിയയിലുണ്ടായ വീഴ്ചയാണ് മരണകാരണമെന്നാണ് പോസ്റ്റ്മോർട്ടം റിപ്പോർട്ടിലുണ്ടായിരുന്നത്. രക്തം ഛർദിച്ച കുട്ടിയെ ശസ്ത്രക്രിയ ചെയ്ത ഡോക്ടറുടെ നിര്‍ദേശ പ്രകാരം എത്തിച്ചത് മറ്റൊരു സ്വകാര്യ ആശുപത്രിയിലാണ്. അവിടെ വച്ചായിരുന്നു മരണം. അതേസമയം, പോലീസ് അന്വേഷണത്തിന്‍റെ ഭാഗമായി മെഡിക്കല്‍ ബോര്‍ഡ് സമര്‍പ്പിച്ച റിപ്പോര്‍ട്ടില്‍ അടിയന്തര ചികിത്സ നല്കിയെന്നാണ് പറയുന്നത്. ‌ഡിഎംഒയുടെ ഓഫീസില്‍ നിന്ന് രണ്ടുതരം കണ്ടെത്തലുണ്ടായത് കുറ്റക്കാരെ സംരക്ഷിക്കാനാണെന്ന് സൂര്യജിത്തിന്‍റെ അമ്മ അനില പറഞ്ഞു. സ്വകാര്യ ആശുപത്രയിൽ ആറ് മണിക്കൂറോളം കുട്ടിക്ക് ചികിത്സ ലഭിച്ചില്ലെന്നും അനില പറഞ്ഞു. നീതി ലഭിക്കണമെന്നാവശ്യപ്പെട്ട് ഹൈക്കോടതിയെ സമീപിച്ചിരിക്കുകയാണ് കുടുംബം. കൂടാതെ സംസ്ഥാന പോലീസ് മേധാവിക്കും സിറ്റി പോലീസ് കമ്മീഷണർക്കും പരാതി നല്കിയിട്ടുണ്ട്.

നടാലിൽ എൻഎച്ചിലേക്കുള്ള പ്രവേശനം ആവശ്യപ്പെട്ട് ഒന്നു മുതൽ ബസ് സമരം

കണ്ണൂർ: തോട്ടട-നടാൽ വഴി തലശേരിയിലേക്ക് സർവീസ് നടത്തുന്ന ബസുകൾക്ക് എൻഎച്ച് 66ൽ നേരിട്ടു പ്രവേശിക്കാൻ വഴിയൊരുക്കാത്ത അധികൃതരുടെ നടപടിയിൽ പ്രതിഷേധിച്ച് ഈ റൂട്ടിലോടുന്ന ബസുകൾ ജൂലൈ ഒന്നു മുതൽ പണിമുടക്കും. ഇന്നലെ ചേർന്ന കണ്ണൂർ ഡിസ്ട്രിക് ബസ് ഓപ്പറേറ്റേഴ്സ് അസോസിയേഷൻസ് കോ-ഓഡിനേഷൻ കമ്മിറ്റി യോഗമാണ് ഇക്കാര്യം തീരുമാനിച്ചത്. പ്രശ്നം പരിഹരിച്ചില്ലെങ്കിൽ നാലുമുതൽ കണ്ണൂർ-തലശേരി ബസ്‌സ്റ്റാൻഡുകളിലൂടെ സർവീസ് നടത്തുന്ന ലിമിറ്റഡ് സ്റ്റോപ്പ് ബസുകളും തോട്ടട-കിഴുന്നപ്പാറ, എടക്കാട്-ചക്കരക്കല്ല് റൂട്ടിൽ സർവീസ് നടത്തുന്ന ബസുകളും പണിമുടക്കും. എന്നിട്ടും പരിഹാര നടപടികൾ ഉണ്ടാകുന്നില്ലെങ്കിൽ ജില്ലയിലെ മുഴുവൻ ബസ് സർവീസുകളും നിർത്തിവച്ച് സമരം നടത്താൻ കോ-ഓഡിനേഷൻ കമ്മിറ്റിയോഗം തീരുമാനിച്ചു. ജനറൽ കൺവീനർ രാജ്കുമാർ കരുവാരത്ത് അധ്യക്ഷത വഹിച്ചു.

ദേശീയപാത നിർമാണത്തിലെ അപാകതകൾ വിദഗ്ധസമിതി പഠിക്കണമെന്ന്

കണ്ണൂർ: ദേശീയപാത നിർമാണത്തിലെ അപാകതകൾ സംബന്ധിച്ച് ദേശീയപാത അഥോറിറ്റി വിദഗ്ധ സമിതിയെ നിയോഗിച്ച് പഠനം ന‌ടത്താൻ അടിയന്തര നടപടി സ്വീകരിക്കണമെന്ന് പരിസ്ഥിതി ഏകോപന സമിതി ഭാരവാഹികൾ ആവശ്യപ്പെട്ടു. എൻഎച്ച് 66 ലെ ചെറുവത്തൂർ കാര്യങ്കോട് മുതൽ മുഴുപ്പിലങ്ങാട് വരെ നിർമാണത്തിൽ പരാതിയുള്ള സ്ഥലങ്ങൾ സമിതി സന്ദർശിച്ചു. ഭൂപ്രകൃതിയും സാമൂഹിക സവിശേഷതകളും പരിഗണിക്കാതെയുള്ള റോഡ് നിർമാണമാണ് നടത്തിയത്. ചെങ്കൽക്കുന്നുകളും തോടുകളും വയലും നിറഞ്ഞ പ്രദേശത്തുകൂടിയാണ് റോഡ് കടന്നുപോകുന്നത്. റോഡ് നിർമാണത്തിന് കേന്ദ്ര സർക്കാരിനു കീഴിലെ ദേശീയ റോഡ് കോൺഗ്രസ്, കേന്ദ്ര റോഡ് ഗതാഗത, ഹൈവേ മന്ത്രാലയങ്ങളുടെ മാർഗനിർദേശങ്ങൾ ലംഘിച്ചാണ് നിർമാണം നടത്തിയതെന്നു കാണാൻ കഴിഞ്ഞതായി ഭാരവാഹികൾ പറഞ്ഞു. മഴയിൽ റോഡിൽ കുഴി രൂപപ്പെട്ടാൽ പിഴവ് തീർക്കാതെ കുഴിയടയ്ക്കുന്നത് വീണ്ടും പ്രശ്നത്തിനിടയാക്കും. സിമന്‍റ് മിശ്രിതം, ഗ്രൗട്ടിംഗ് എന്നിവ ഉപയോഗിച്ച് ഭൂഗർഭ പ്രവാഹങ്ങളും നീരുറവകളും തടസപ്പെടുത്തിയത് ചിലയിടത്ത് കുടിവെള്ള ക്ഷാമത്തിനും മറ്റു ചിലയിടങ്ങളിൽ കിണർജലം മലിനമാകാനും ഇടയാക്കി. അണ്ടർ പാസുകളുടെ അശാസ്ത്രീയ നിർമാണം അപകടം കൂട്ടുമെന്നും അടിപ്പാതയിൽ നിന്ന് സർവീസ് റോഡുകളിലേക്ക് കടക്കുന്നിടങ്ങളിൽ സുരക്ഷാ മാനദണ്ഡങ്ങൾ പാലിച്ചിട്ടില്ലെന്നും ഭാരവാഹികൾ പറഞ്ഞു. പത്രസമ്മേളനത്തിൽ ജില്ലാ പരിസ്ഥിതി ഏകോപന സമിതി ഭാരവാഹികളായ ടി.പി. പദ്മനാഭൻ, എൻ. സുബ്രഹ്മണ്യൻ, കെ.ഇ. കരുണാകരൻ, സി. വിശാലാക്ഷൻ, സി. ദിവാകരൻ എന്നിവർ പങ്കെടുത്തു.

കണ്ണൂരില്‍ ശ്രവണ ഹിയറിംഗ് എയ്ഡ് സെന്‍ററിന്‍റെ നവീകരിച്ച ഷോറൂം ഉദ്ഘാടനം നാളെ

കണ്ണൂര്‍: കേള്‍വി-സംസാര പ്രശ്‌നങ്ങള്‍ നേരിടുന്നവര്‍ക്ക് അന്താരാഷ്‌ട്ര നിലവാരത്തോടു കൂടിയ ശ്രവണ സഹായികള്‍ ലഭ്യമാക്കുന്ന കണ്ണൂരിലെ ശ്രവണ ഹിയറിംഗ് എയ്ഡ് സെന്‍റര്‍ കൂടുതല്‍ സൗകര്യത്തോടെ നവീകരിച്ച ഷോറിലേക്ക്. ഷോറൂമിന്‍റെ ഉദ്ഘാടനം രാവിലെ 11.30ന് മന്ത്രി കടന്നപ്പള്ളി രാമചന്ദ്രന്‍ നിർവഹിക്കും. നിലവില്‍ പ്രവര്‍ത്തിക്കുന്ന താവക്കരയിലെ ഷോറൂമിന്‍റെ താഴത്തെ നിലയിലേക്കാണ് കൂടുതല്‍ സൗകര്യത്തോടെ നവീകരിച്ച ഷോറൂം പ്രവര്‍ത്തനമാരംഭിക്കുക. പ്രായമായവര്‍ക്കും അസുഖബാധിതകര്‍ക്കും നിലവില്‍ പ്രവര്‍ത്തിക്കുന്ന കോംപ്ലക്‌സിലെ ഒന്നാം നിലയില്‍ എത്തിച്ചേരാനുള്ള പ്രയാസം ഒഴിവാക്കുന്നതിനായാണ് താഴത്തെ നിലയിലേക്ക് പ്രവര്‍ത്തനം മാറ്റുന്നതെന്ന് മാനേജിംഗ് ഡയറക്ടര്‍ ശ്രീജിത്ത് അറിയിച്ചു. 17 വര്‍ഷമായി തളിപ്പറമ്പ് ആസ്ഥാനമായി പ്രവര്‍ത്തിക്കുന്ന ശ്രവണ ഹിയറിംഗ് എയ്ഡ് സെന്‍റര്‍ 2014 ലാണ് കണ്ണൂരില്‍ ആരംഭിച്ചത്. അന്നത്തെ ജില്ലാ കളക്ടര്‍ ബാലകിരണായിരുന്നു ഉദ്ഘാടകൻ. തളിപ്പറമ്പിനും കണ്ണൂരിനും പുറമെ കൊച്ചി, കോഴിക്കോട്, മലപ്പുറം, തലശേരി, പഴയങ്ങാടി, പിലാത്തറ, പയ്യന്നൂർ, കാഞ്ഞങ്ങാട്, ഷിമോഗ, സാഗര, ബംഗളൂരു എന്നിവിടങ്ങളിലും ബ്രാഞ്ചുകളുണ്ട്. കേള്‍വി-സംസാര ചികിത്സാ മേഖലയില്‍ വിശ്വാസം നേടിയ സ്ഥാപനമായി ശ്രവണ മാറിക്കഴിഞ്ഞു. വിദഗ്ധരായ ഓഡിയോളജിസ്റ്റുകള്‍, സ്പീച്ച് തെറാപ്പിസ്റ്റുകൾ, നൂതന സംവിധാനങ്ങള്‍, ആധുനിക ഹിയറിംഗ് എയ്ഡ് ടെക്‌നോളജി എന്നിവയോടു കൂടിയാണ് ശ്രവണ സെന്‍ററുകള്‍ പ്രവര്‍ത്തിക്കുന്നത്. ഉദ്ഘാടനത്തോടനുബന്ധിച്ച് ശ്രവണയുടെ ഉപഭോക്താക്കള്‍ക്കായി ഹിയറിംഗ് എയ്ഡ് അപഗ്രേഡ് ആന്‍ഡ് എക്‌സചേഞ്ച് ഓഫറും ലഭ്യമാണ്. പഴയ ഹിയറിംഗ് എയ്ഡ് നല്‍കി പുതിയത് എളുപ്പത്തില്‍ സ്വന്തമാക്കാനാകും. മികച്ച ബ്രാന്‍ഡുകളില്‍ ആകര്‍ഷകമായ ഓഫറുകളും പ്രഖ്യാപിച്ചിട്ടുണ്ട്. ബുക്കിംഗിന് ബന്ധപ്പെടുക. ഫോണ്‍ : 9449100200.

ഇടുക്കി സ്വദേശി കണ്ണൂരിൽ തൂങ്ങിമരിച്ച നിലയിൽ

വളപട്ടണം: കണ്ടൽക്കാടിനുള്ളിലെ മരത്തിൽ ഇടുക്കി സ്വദേശിയെ തൂങ്ങിമരിച്ച നിലയിൽ കണ്ടെത്തി. കാട്ടാന്പള്ളി കോട്ടക്കുന്നിലെ ക്വാർട്ടേഴ്സിൽ താമസക്കാരനുമായ ഷാജി തോമസാണ് (45) മരിച്ചത്. വെള്ളിയാഴ്ച വൈകുന്നേരം 5.30ഓടെയാണ് വളപട്ടണം ബിവറേജ്സിനു സമീപത്തെ കണ്ടൽക്കാട്ടിൽ ഇയാളെ മരിച്ച നിലയിൽ കാണുന്നത്. രണ്ടുദിവസമായി ഷാജി തോമസിനെ കാണാനില്ലെന്ന് പരാതിയുണ്ടായിരുന്നു. തെരച്ചിനൊടുവിലാണ് മൃതദേഹം കാണുന്നത്. കുറെ വർഷങ്ങളായി കണ്ണൂരിൽ താമസിക്കുന്ന ഇയാൾ പെയിന്‍റിംഗ് തൊഴിലാളിയാണ്. ഭാര്യയും ഒരു മകനുണ്ട്.

വിദഗ്ധസംഘം അടുത്ത ആഴ്ച സന്ദർശിക്കും

ഇരിട്ടി: ബാരാപോൾ ചെറുകിട ജലവൈദ്യുത പദ്ധതിയുടെ കനാലിൽ കണ്ടെത്തിയ ഗർത്തത്തിലേക്ക് വെള്ളം ഒഴുകാതെ മണൽ ചാക്കുകൾ അടുക്കി നീരൊഴുക്ക് തിരിച്ചുവിട്ടു. ഗുഹ പോലെ അഞ്ചു മീറ്ററിൽ അധികം താഴ്ചയുള്ളതാണ് കനാലിലെ ഗർത്തം. പുഴയിലെ ജലനിരപ്പ് ഉയർന്നതോടെ ബാരാപോൾ പദ്ധതിയിൽ നിന്ന് വൈദ്യുതി ഉത്പാദനത്തിന് ശേഷം ഒഴുക്കിവിടുന്ന വെള്ളം പുഴയെടുക്കാത്ത അവസ്ഥയിൽ ഉത്പാദനം നിർത്ത വച്ച് കനാൽ വൃത്തിയാക്കുന്നതിനിടെയാണ് കനാലിലെ ഗർത്തം ശ്രദ്ധയിൽപ്പെട്ടത്. നിലവിൽ കനാലിലെ ഗർത്തത്തിലേക്കുള്ള നീരൊഴുക്ക് തിരിച്ചുവിട്ടെങ്കിലും ഭൂമിക്കടിയിൽ വെള്ളമൊഴുകുന്ന ശബ്ദം കേൾക്കുന്നുണ്ടെന്നത് ആശങ്കയ്ക്കിടയാക്കുന്നുണ്ട്. ഗർത്തം കണ്ടെത്തിയ സ്ഥലത്തെ കനാലിനു സമീപമായി 18 കുടുംബങ്ങൾ താമസിക്കുന്നുണ്ട്. അതിനിടെ കനാലിനെ സംബന്ധിച്ചുള്ള റിപ്പോർട്ട് കെഎസ്ഇബി ബോർഡ് ഡയറക്ടർ, പ്രോജക്ട് ചീഫ് എൻജിനിയർ എന്നിവർക്ക് സമർപ്പിച്ചിട്ടുണ്ടെന്നും അടുത്ത ആഴ്ച വിദഗ്ധ സംഘം പരിശോധന നടത്തുമെന്നും കെഎസ്ഇബി അധികൃതർ അറിയിച്ചു. കനാലിന്‍റെ താഴ്ഭാഗത്തുനിന്നും മാറ്റി പാർപ്പിച്ച നാലു കുടുംബങ്ങളുടെ സുരക്ഷ ഉറപ്പാക്കാൻ വീട്ടിലേക്ക് വെള്ളമെത്താത്ത തരത്തിൽ കരിങ്കൽ ഭിത്തിയും നിർമിക്കും. നിർമാണം ഇന്നാരാംഭിക്കും. ഇവരുടെ സഞ്ചാരത്തിനായി ഒരാഴ്ചക്കുള്ളിൽ സ്റ്റീൽ നടപ്പാലവും നിർമിച്ചു നൽകുമെന്നും അധികൃതർ അറിയിച്ചു. ഗർത്തം കണ്ടെത്തിയ സ്ഥലവും അപകടാവസ്ഥയിലായ കനാലും സമീപത്തെ വീടുകളും അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ, പഞ്ചായത്ത് സ്റ്റാൻഡിംഗ് കമ്മറ്റി ചെയർ പേഴ്സൺ സിന്ധു ബെന്നി , ഇരിട്ടി ബ്ലോക്ക് പഞ്ചായത്ത് അംഗം മേരി റെജി, പഞ്ചായത്ത് അംഗങ്ങളായ സജി മച്ചിത്താന്നി , ബിജോയി പ്ലാത്തോട്ടം , സെലീന ബിനോയി, എൽസമ്മ ജോസഫ് എന്നിവർ സന്ദർശിച്ചു. ബാരാപോൾ കനാലിൽ ഗർത്തം രൂപപ്പെട്ട് ഉത്പാദനം നിർത്തിവെക്കേണ്ട സാഹചര്യമുണ്ടാക്കിയത് കെഎസ്ഇബിയുടെ അനാസ്ഥ കൊണ്ടാണെന്ന് അയ്യൻകുന്് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേൽ ആരോപിച്ചു. കനാലിന്‍റെ സുരക്ഷ പഞ്ചായത്തിനും ജനങ്ങൾക്കും ബോധ്യപ്പെട്ടാൽ മാത്രമേ ഉത്പാദനം പുനരാരംഭിക്കാൻ അനുവദിക്കുകയുള്ളൂവെന്നും അദ്ദേഹം പറഞ്ഞു.

സിപിസിആർഐയുടെ മൂന്ന് പുതിയ തെങ്ങിനങ്ങളോട് സംസ്ഥാനത്തെ നഴ്സറികൾക്ക് വിമുഖത

വൈ.എസ്. ജയകുമാർ കണ്ണൂർ: കേന്ദ്ര തോട്ടവിള ഗവേഷണ സ്ഥാപനം (സിപിസിആർഐ) കഴിഞ്ഞ വർഷം പുറത്തിറക്കിയ മൂന്ന് പുതി‍യ തെങ്ങിനങ്ങളോട് സംസ്ഥാനത്തെ നഴ്സറികൾക്ക് വിമുഖത. കഴിഞ്ഞ വർഷം ഓഗസ്റ്റിൽ പുറത്തിറക്കിയ കല്പതരു, കല്പശതാബ്ദി, കല്പ സുവർണ ഇനങ്ങളുടെ ലൈസൻസ് എടുത്ത് തൈ ഉത്പാദിപ്പിക്കാനായി കേരളത്തിൽ ആരും തയാറാകുന്നില്ല. അതേസമയം തമിഴ്നാട‌്, കർണാടക, ഗുജറാത്ത് സംസ്ഥാനങ്ങളിലെ നഴ്സറികൾ ലൈസൻസ് നേടുകയും തെങ്ങിൻതൈ ഉത്പാദനം ആരംഭിക്കുകയും ചെയ്തതായി സിപിസിആർഐ ഡയറക്ടർ ഡോ. കെ.ബി. ഹെബാർ വ്യക്തമാക്കി. രണ്ടു മുതൽ മൂന്നു ലക്ഷം രൂപവരെയാണ് ലൈസൻസ് ഫീസ്. കഴിഞ്ഞ വർഷങ്ങളിൽ തേങ്ങയ്ക്ക് വില കുറവായിരുന്നതിനാൽ ഉത്പാദിപ്പിച്ച തെങ്ങിൻതൈകൾ പലയിടത്തും വിറ്റു പോയില്ല. ഇത് പുതിയ ഇനത്തിനായി ലൈസൻസ് എടുക്കുന്നതിൽ നിന്ന് നഴ്സറി ഉടമകളെ പിന്തിരിപ്പിക്കുന്നതായി കരുതുന്നു. തൈ നട്ട് ഒരു വർഷം പിന്നിടുംമുന്പേ പലയിടത്തും രോഗബാധയുണ്ടാകുന്നു. നിരാശരായ കർഷകർ പുതിയ തെങ്ങ് നടുന്നതിൽനിന്ന് പിന്തിരിയാൻ ഇത് ഇടയാക്കുന്നു. കരിക്കിനും കൊപ്രയ്ക്കും നീര ഉത്പാദനത്തിനും അനുയോജ്യമായ ഉയരം കൂടിയ ഇനമായ കല്പ രത്ന വർഷത്തിൽ ശരാശരി 133 തേങ്ങ ഉത്പാദിപ്പിക്കും. ഉയരം കൂടിയ ഇനമായ കല്പ ശതാബ്ദിക്ക് വർഷം ശരാശരി 105 തേങ്ങവരെ ലഭിക്കും. വലുപ്പം കൂടിയ തേങ്ങ ലഭിക്കുന്ന ഇനമാണിത്. ഒരു തെങ്ങിൽ നിന്ന് ശരാശരി 28 കിലോ കൊപ്രയാണ് ലഭിക്കുക. ഒരു കരിക്കിൽ നിന്ന് 612 മില്ലി കരിക്കിൻ വെള്ളം ലഭിക്കും. കല്പ സുവർണ ഉയരംകുറഞ്ഞതും കൊപ്രയ്ക്കും കരിക്കിനും അനുയോജ്യവുമാണ്. 97 തേങ്ങയാണ് പ്രതിവർഷം ശരാശരി ലഭിക്കുക. 30-36 മാസം കൊണ്ട് പൂങ്കുല വരും. ഒരു കരിക്കിൽ 431 മില്ലി വെള്ളം ലഭിക്കും. അതേസമയം തേങ്ങ വില കൂടിയിട്ടും കേരളത്തിൽ തേങ്ങ ഉത്പാദനം കുത്തനേ കുറയുകയാണ്. തെങ്ങ് ഉണ്ടെങ്കിലും തേങ്ങ കായ്ക്കാത്ത് കർഷകർ നേരിടുന്ന വലിയ പ്രതിസന്ധിയാണ്. വേര് ചീയൽ രോഗവും ( റൂട്ട് വിൽറ്റ്) മഞ്ഞളിപ്പ് രോഗവും തിരുവനന്തപുരം മുതൽ കണ്ണൂർ ജില്ലയുടെ അതിർത്തിവരെ തെങ്ങ് കൃഷിക്ക് വെല്ലുവിളി ഉയർത്തുകയാണ്.‌‌ അതേസമയം തെങ്ങിന്‍റെ വേര് ചീയൽ രോഗത്തെ പ്രതിരോധിക്കുന്നതും മൂന്നുവർഷത്തിനകം പൂങ്കുല വിരിയുന്നതുമായ സിപിസിആർഐയുടെ കല്പശ്രീ കുറിയ ഇനം തൈകൾക്ക് വലിയ ഡിമാൻഡാണുള്ളത്. നട്ട് 54 മാസത്തിനകം പൂങ്കുല വിരിയുന്നതും വർഷത്തിൽ 65 തേങ്ങ ലഭിക്കുന്നതും വേരു ചീയലിനേയും മഞ്ഞളിപ്പ് രോഗത്തേയും പ്രതിരോധിക്കുന്നതുമായ ഇടത്തരം കുറിയ ഇനമായ (സെമി ഡാർഫ്) കല്പരക്ഷ ഇനത്തോട് കർഷകർക്ക് താല്പര്യമുണ്ട്. വലുപ്പം കുറവാണെങ്കിലും കുല നിറയെ തേങ്ങയുണ്ടാകുന്ന ചന്ദ്രകല്പയുടെ തൈ വാങ്ങാനും ആവശ്യക്കാരേറെയാണ്. ലക്ഷ ദ്വീപ് ഇനത്തിൽ നിന്ന് വേർതിരിച്ചെടുത്ത പച്ചതെങ്ങാണിത്.

പുതുതലമുറ വിദ്യാർഥികൾ അവസരങ്ങൾ പ്രയോജനപ്പെടുത്തണം: മാർ ജോസഫ് പാംപ്ലാനി

നിർമലഗിരി: പുതുതലമുറ വിദ്യാർഥികൾ അവസരങ്ങൾ പ്രയോജനപ്പെടുത്തുന്നതിൽ ഉത്സുകരാകണമെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. നിർമലഗിരി കോളജ് ഓഫ് അഡ്വാൻസ്ഡ് സ്റ്റഡീസിനുവേണ്ടി പുതുതായി പണികഴിപ്പിച്ച കെട്ടിടത്തിന്‍റെ വെഞ്ചിരിപ്പും ഉദ്ഘാടനവും നിർവഹിച്ച് പ്രസംഗിക്കുകയായിരുന്നു ആർച്ച്ബിഷപ്. അവസരങ്ങളുടെ അപര്യാപ്തതയല്ല, അവയെ പ്രയോജനപ്പെടുത്താനുള്ള ഔത്സുക്യം പുതുതലമുറയിൽ കുറഞ്ഞുപോകുന്നതാണ് യഥാർഥ പ്രതിസന്ധി. ഇത് കാലഘട്ടത്തിന്‍റെ വിപത്താണ്. സംലഭ്യമായ അവസരങ്ങളെ വിജയത്തിന്‍റെ പടികളാക്കി മാറ്റാൻ വിദ്യാർഥി സമൂഹം ശ്രമിക്കണമെന്നും കോളജ് രക്ഷാധികാരി കൂടിയായ ആർച്ച് ബിഷപ് പറഞ്ഞു. കോളജ് മാനേജർ മോൺ. ആന്‍റണി മുതുകുന്നേൽ അധ്യക്ഷത വഹിച്ചു. പ്രിൻസിപ്പൽ ഡോ. കെ.വി. ഔസേപ്പച്ചൻ ആമുഖപ്രഭാഷണം നടത്തി. കോളജിൽനിന്ന് പഠനം പൂർത്തിയാക്കിയ ആദ്യബാച്ച് കണ്ണൂർ യൂണിവേഴ്സിറ്റിയിൽ കോളജിന് മികച്ച വിജയനിലവാരം നേടിത്തന്നുവെന്ന് പ്രിൻസിപ്പൽ പറഞ്ഞു. വൈസ് പ്രിൻസിപ്പൽ ഡോ. ടെസി ജോർജ് പ്രസംഗിച്ചു. കോളജ് ബർസാർ റവ. ഡോ. തോമസ് കൊച്ചുകരോട്ട് സ്വാഗതവും ഡയറക്ടർ റവ. ഡോ. ലൂക്കോസ് മാടശേരി നന്ദിയും പറഞ്ഞു.

പന്ത്രണ്ടാം ശമ്പള പരിഷ്കരണം ന‌ടപ്പാക്കണം: ജോയിന്‍റ് കൗൺസിൽ

പയ്യാവൂർ: 2024 ജൂലൈ ഒന്നിന് കേരളത്തിലെ ജീവനക്കാർക്ക് ലഭ്യമാകേണ്ട പന്ത്രണ്ടാം ശമ്പള പരിഷ്കരണം ന‌പ്പാക്കണമെന്ന് ജോയിന്‍റ് കൗൺസിൽ ഇരിക്കൂർ മേഖലാ കൺവൻഷൻ ആവശ്യപ്പെട്ടു. ശ്രീകണ്ഠപുരത്ത് സഖാവ് കമ്മാരൻ സ്മാരക ഹാളിൽ നടന്ന കൺവൻഷൻ ജോയിന്‍റ് കൗൺസിൽ കണ്ണൂർ ജില്ലാ പ്രസിഡന്‍റ് ബീന കൊരട്ടി ഉദ്ഘാടനം ചെയ്തു. ഇരിക്കൂർ മേഖലാ പ്രസിഡന്‍റ് കെ.കെ. പ്രശാന്തൻ അധ്യക്ഷത വഹിച്ചു. മേഖലാ സെക്രട്ടറി കെ.കെ. കൃഷ്ണൻ ആമുഖ പ്രഭാഷണം നടത്തി. സംസ്ഥാന കമ്മിറ്റി അംഗം ടി.എസ്. പ്രദീപ് സമര പരിപാടികൾ വിശദീകരിച്ചു. മേഖലാ ഭാരവാഹികളായ എം.എം. മോഹനൻ, പി.കെ. വിനീഷ്, കെ.കെ. ചന്ദ്രൻ, നന്മ സാംസ്കാരിക വേദി കൺവീനർ ഉദയൻ ഇടച്ചേരി എന്നിവർ പ്രസംഗിച്ചു. ഡപ്യൂട്ടി തഹസിൽദാരായി പ്രൊമോഷൻ ലഭിച്ച മേഖലാ ഭാരവാഹികളായ എം.എം. മോഹനൻ, പി.കെ. വിനീഷ് എന്നിവർക്ക് അനുമോദനം നൽകി. കെ.കെ. ചന്ദ്രൻ, എൽ.എം. മധുസൂദനൻ എന്നിവരെ മേഖലാ കമ്മിറ്റിയിലേക്ക് തെരഞ്ഞെടുത്തു.

വിദ്യാരംഗം കലാസാഹിത്യ വേദി

പയ്യാവൂർ: പൈസക്കരി സെന്‍റ് മേരീസ് യുപി സ്കൂളിൽ വിദ്യാരംഗം കലാസാഹിത്യവേദി, വിവിധ ക്ലബുകൾ, ലഹരിവിരുദ്ധ ദിനാചരണം എന്നിവ സ്കൂൾ മാനേജരും പൈസക്കരി ഫൊറോന വികാരിയുമായ ഫാ. നോബിൾ ഓണംകുളം ഉദ്ഘാടനം ചെയ്തു. പൂർവവിദ്യാർഥിയും പ്രവാസി വ്യവസായിയും രാഷ്‌ട്രദീപിക ലിമിറ്റഡ് കന്പനി ഡയറക്‌ടറുമായ ബെന്നി വാഴപ്പള്ളിൽ അധ്യക്ഷത വഹിച്ചു. സ്കൂൾ മുഖ്യാധ്യാപകൻ സോജൻ ജോർജ് ആമുഖ പ്രഭാഷണം നടത്തി. സ്കൂളിലെ പൂർവ വിദ്യാർഥിയും എഴുത്തുകാരനുമായ ലിജു ജേക്കബ് രചിച്ച "പഴശിക്കരി‘ എന്ന പുസ്തകം ഫാ. നോബിൾ ഓണംകുളം റിട്ട. മുഖ്യാധ്യാപകൻ ടി.എം. സേവ്യറിന് കൈമാറി പ്രകാശനം ചെയ്തു. ലഹരിവിരുദ്ധ ദിനാചരണത്തിന്‍റെ ഭാഗമായി വിദ്യാർഥികൾ ലഹരിവിരുദ്ധ പ്രതിജ്ഞ ചൊല്ലി. പിടിഎ പ്രസിഡന്‍റ് ജിജി ഐപ്പൻപറമ്പിൽ, മദർ പിടിഎ പ്രസിഡന്‍റ് ബിബി നരിയാറയിൽ, സാഹിത്യതീരം പ്രസിഡന്‍റ് ബഷീർ പെരുവളത്ത്പറമ്പ് എന്നിവർ പ്രസംഗിച്ചു.

ലഹരിവിരുദ്ധ ദിനാചരണം

പയ്യാവൂര്‍: പയ്യാവൂര്‍ പഞ്ചായത്ത് കുടുംബശ്രീ സിഡിഎസ്, ജെന്‍ഡര്‍ റിസോഴ്‌സ് സെന്‍റര്‍ എന്നിവയുടെ സംയുക്താഭിമുഖ്യത്തില്‍ 'അ.ല' അരുത് ലഹരി ബോധവത്കരണ ക്ലാസ് സംഘടിപ്പിച്ചു. പൈസക്കരി ദേവമാതാ ഹയര്‍ സെക്കൻഡറി സ്‌കൂളില്‍ നടന്ന പരിപാടി സ്‌കൂള്‍ മാനേജര്‍ ഫാ. നോബിൾ ഓണംകുളം ഉദ്ഘാടനം ചെയ്തു. സ്‌കൂള്‍ അധ്യാപകന്‍ എന്‍.ഡി. സണ്ണി അധ്യക്ഷത വഹിച്ചു. ലഹരിയുടെ കൈപ്പിടിയില്‍ നിന്ന് രക്ഷപ്പെടാന്‍ സൂംബ ഡാന്‍സ് ജീവിതത്തിന്‍റെ ഭാഗമാക്കുക എന്ന ഉദ്ദേശത്തോടെ സൂംബ പരിശീലനവും നടത്തി. വിദ്യാര്‍ഥികളായ പി.എസ്. ആര്യ, എല്‍ബിറ്റ സോജന്‍ എന്നിവര്‍ സുംബ പരിശീലനത്തിന് നേതൃത്വം നല്‍കി. ലഹരി ഉപയോഗത്തിന്‍റെ ദൂഷ്യവശങ്ങളെ കുറിച്ച് ചന്ദനക്കാംപാറ ജൂണിയര്‍ ഹെല്‍ത്ത് ഇന്‍സ്‌പെക്ടര്‍ ദീപയും ലഹരിയും മാനസികാരോഗ്യവും എന്ന വിഷയത്തില്‍ ജെന്‍ഡര്‍ റിസോസ് കമ്യൂണിറ്റി കൗണ്‍സിലര്‍ രമ്യയും ക്ലാസെടുത്തു. ബിന്ദു, അനുഷ, അധ്യാപകരായ അല്‍ന, തോമസ്, സ്‌കൂള്‍ ലീഡര്‍ അലീന എന്നിവര്‍ പ്രസംഗിച്ചു. പയ്യാവൂർ സെന്‍റ് ആൻസ് ഇംഗ്ലീഷ് മീഡിയം സ്കൂളിൽ ലഹരിവിരുദ്ധ ബോധവത്കരണ ക്ലാസ് നടത്തി. സ്കൂൾ പ്രിൻസിപ്പൽ സിസ്റ്റർ ജിൽസി, വിദ്യാർഥി പ്രതിനിധി എയ്ഞ്ചലിക് പ്രിൻസ്, ജോണി ഡിനു, ആത്മിക എന്നിവർ പ്രസംഗിച്ചു. തുടർന്ന് ലഹരി വിരുദ്ധ പ്രതിജ്ഞ ചൊല്ലിയ വിദ്യാർഥികൾ ലഹരിവിരുദ്ധ സന്ദേശമെഴുതിയ പ്ലക്കാർഡുകളുമായി റാലിയും നടത്തി. വായാട്ടുപറമ്പ്: സെന്‍റ് ജോസഫ്സ് യുപി സ്കൂളിൽ സ്പെഷ്യൽ അസംബ്ലിയിൽ ലഹരി വിരുദ്ധ പ്രതിജ്ഞ, സന്ദേശം, കവിതാലാപനം, ലഹരിക്കെതിരെ ഒരു കൈ, പ്ലക്കാർഡ് പ്രദർശനം, സുംബാ ഡാൻസ് തുടങ്ങിയ പരിപാടികൾ അരങ്ങേറി. ടിജോ ലഹരി വിരുദ്ധ ബോധവത്കരണ ക്ലാസ് നയിച്ചു. ആലക്കോട്: സെന്‍റ് മേരീസ്‌ കോൺവന്‍റ് സ്കൂളിലെ ദിനാചരണം ആലക്കോട് എക്സൈസ് ഇൻസ്പെക്ടർ സി.എച്ച്. നസീബ് ഉദ്ഘാടനം ചെയ്തു. ഡിസിഎൽ അംഗങ്ങൾ ലഹരി വിരുദ്ധ സംഗീതശില്പം അവതരിപ്പിച്ചു. പ്രിൻസിപ്പൽ സിസ്റ്റർ റോസ് മേരി അധ്യക്ഷത വഹിച്ചു. സ്കൂൾ മാനേജർ സിസ്റ്റർ തോമസീന, സോജി ജോസഫ്, പ്രീത സജി, ഇ.വി. സിജോഷ്, സിജു ആന്‍റണി, ഡെയ്സി കിഷോർ, ഇന്ദു അനിൽകുമാർ, എയ്ബൽ കുര്യൻ, ദിയാ എലിസബത്ത് എന്നിവർ പ്രസംഗിച്ചു. ഏരുവേശി: ഏരുവേശി യുവജന ക്ലബ് ആൻഡ് ഗ്രന്ഥാലയത്തിന്‍റെ ആഭിമുഖ്യത്തിൽ ദീപം തെളിച്ച് ലഹരിവിരുദ്ധ പ്രതിജ്ഞ ചൊല്ലി. ഗ്രന്ഥാലയം പ്രസിഡന്‍റ് എം. നാരായണൻ അധ്യക്ഷത വഹിച്ചു. സെക്രട്ടറി എം. സന്തോഷ്കുമാർ ആമുഖപ്രഭാഷണം നടത്തി. വാർഡംഗം എം.ഡി. രാധാമണി, ലൈബ്രറി കൗൺസിൽ നേതൃത്വസമിതി കൺവീനർ ഇ.പി. ബാലകൃഷണൻ, എ.കെ. ഗംഗാധരൻ, കുടിയാന്മല പ്രാഥമികാരോഗ്യകേന്ദ്രം ഹെൽത്ത് ഇൻസ്പെക്‌ടർ പി. പ്രകാശൻ എന്നിവർ പ്രസംഗിച്ചു. കുറ്റ്യേരി: ജിഎച്ച്എസ് കുറ്റ്യേരി ലഹരി വിരുദ്ധ ദിനാചരണ ഭാഗമായി ലഹരി വിരുദ്ധ ക്ലാസ് സംഘടിപ്പിച്ചു. സിവിൽ എക്സൈസ് ഓഫീസർ എം. കലേഷ് ക്ലാസ് നയിച്ചു. കെ.വി. ഷാജി, സി.വി. അനിൽകുമാർ, എൻ.വി. ശിവദാസൻ, ഇ.പി. ലീന എന്നിവർ പ്രസംഗിച്ചു. ലഹരിവിരുദ്ധ ഗാനത്തിന്‍റെ നൃത്താവിഷ്കാരം, കാവ്യാലാപനം, പോസ്റ്റർ നിർമാണം, സൂംബ ഡാൻസ് എന്നിവയും അരങ്ങേറി.

വണ്ണായിക്കടവ് പാലം പ്രദേശവാസികൾ ഉപരോധിച്ചു

പൈസക്കരി: കാലപ്പഴക്കത്താൽ തകർന്ന് അപകടാവസ്ഥയിലായ പാലം പൊളിച്ചുമാറ്റി ഉയരമുള്ള പുതിയ പാലം നിർമിക്കണമെന്ന് ആവശ്യപ്പെട്ട് നാട്ടുകാർ പാലം ഉപരോധിച്ചു. പ്രാദേശിക വികസന സമിതിയുടെ ആഭിമുഖ്യത്തിൽ നടത്തിയ സമരം സജീവ് ജോസഫ് എംഎൽഎ ഉദ്ഘാടനം ചെയ്തു. സർക്കാരിൽ ശക്തമായ സമ്മർദം ചെലുത്തി പുതിയപാലം ഉടനടി നിർമിക്കാനാവശ്യമായ നടപടികൾ സ്വീകരിക്കുമെന്ന് സജീവ് ജോസഫ് എംഎൽഎ പറഞ്ഞു. പൈസക്കരി ഫൊറോന വികാരി ഫാ. നോബിൾ ഓണംകുളം അധ്യക്ഷത വഹിച്ചു. പയ്യാവൂർ-പൈസക്കരി പ്രധാന പാതയിയിൽനിന്ന് ചെമ്പേരി, ആലക്കോട്, ചെറുപുഴ ഭാഗങ്ങളിലേക്ക് പോകാനുള്ള എളുപ്പമാർഗമായ വണ്ണായിക്കടവ്-നെല്ലിക്കുറ്റി റോഡിൽ മൂന്നരപതിറ്റാണ്ട് മുന്പ് നിർമിച്ചതാണ് നിലവിലെ പാലം. മഴക്കാലത്ത് ഉയരം കുറഞ്ഞ പാലം വെള്ളത്തിനിടയിലാകുന്നതോടെ പ്രദേശവാസികൾ ഒറ്റപ്പെടുന്ന അവസ്ഥയിലാണ് കഴിയുന്നത്.പാലത്തിൽ നിന്ന് ഇരുപത്തഞ്ച് മീറ്റർ അകലെയുള്ള അങ്കണവാടിയിലേക്ക് ഈ പാലത്തിലൂടെ കുട്ടികളെ കൊണ്ടുപോകാൻ രക്ഷിതാക്കൾ ഭയക്കുകയാണ്. എൽപി സ്കൂൾ മുതൽ കോളജ്തലം വരെയുള്ള വിദ്യാർഥികളടക്കം നൂറുകണക്കിന് ആളുകളും വാഹനങ്ങൾളും നിത്യവും കടന്നുപോകാനും ആശ്രയിക്കുന്ന പാലമാണിത്. പ്രാദേശിക വികസന സമിതി കൺവീനർ വിൽസൺ ചാക്കോ ആമുഖ പ്രഭാഷണം നടത്തി. ഇരിക്കൂർ ബ്ലോക്ക് പഞ്ചായത്തംഗം ജയിംസ് തുരുത്തേൽ, പയ്യാവൂർ പഞ്ചായത്തംഗങ്ങളായ ടെൻസൺ കണ്ടത്തിൻകര, ടി.പി. അഷ്റഫ്, മുൻ പ്രസിഡന്‍റ് ഡെയ്സി ചിറ്റൂപ്പറമ്പിൽ, വികസന സമിതി ചെയർമാൻ ടി.ടി. സെബാസ്റ്റ്യൻ, കോ-ഓർഡിനേറ്റർ ബിനു മണ്ഡപത്തിൽ എന്നിവർ പ്രസംഗിച്ചു.

കാരുണ്യ ഭവന പദ്ധതി ഉദ്ഘാടനം ചെയ്തു

തിരുമേനി: മാർത്തോമാ ശ്ലീഹായുടെ തിരുനാളിനോടനുബന്ധിച്ച് മലങ്കര കത്തോലിക്കാ സഭയുടെ ബത്തേരി രൂപത ബിഷപ് ഡോ. ജോസഫ് മാർ തോമസിന്‍റെ നാമഹേതുക തിരുനാളാഘോഷവും കാരുണ്യ ഭവന പദ്ധതിയുടെ ഉദ്ഘാടനവും തിരുമേനി മലങ്കര കത്തോലിക്കാ പള്ളിയിൽ നടന്നു. ചടങ്ങിൽ കാസർഗോഡ് വൈദിക ജില്ലയിലെ വൈദികരും സന്യസ്തരും അല്മായ പ്രതിനിധികളും പങ്കെടുത്തു. രൂപത മുഖ്യ വികാരി ജനറാൾ മോൺ. സെബാസ്റ്റ്യൻ കീപ്പള്ളിൽ കോർ എപ്പിസ്കോപ്പ, രൂപത പ്രൊക്യുറേറ്റർ ഫാ. ചാക്കോ വെള്ളാംചാലിൽ എന്നിവർ പങ്കെടുത്തു. കാസർഗോഡ് വൈദിക ജില്ലാ പ്രോട്ടോ വികാരി റവ. ഡോ. വർഗീസ് താന്നിക്കാക്കുഴി, റവ. ഡോ. സാമുവൽ പുതുപ്പാടി, ഫാ. വർഗീസ്‌ കടക്കേത്ത്, ഫാ. ഏബ്രഹാം പുന്നവിള, ഷാജി തച്ചനംകോട്ട്, ഷേഹ തോമസ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]