ADVERTISEMENT

ADVERTISEMENT

പോക്സോ കേസിൽ യുവാവ് അറസ്റ്റിൽ

ഗൂഡല്ലൂർ: ഗൂഡല്ലൂരിൽ 17കാരിയെ പീഡിപ്പിച്ച് ഗർഭിണിയാക്കിയ കേസിൽ യുവാവ് അറസ്റ്റിൽ. ഗൂഡല്ലൂർ സ്വദേശി കാർത്തികിനെയാണ് (22) ഗൂഡല്ലൂർ പോലീസ് അറസ്റ്റു ചെയ്തത്.

സിഐ വെങ്കിടേശ്വരി, എസ്ഐ ഉഷ എന്നിവരുടെ നേതൃത്വത്തിലുള്ള സംഘമാണ് അറസ്റ്റു ചെയ്തത്. ഇയാൾക്കെതിരേ പോക്സോ നിയമം ചുമത്തിയിട്ടുണ്ട്.

ADVERTISEMENT

കായികവിദ്യാഭ്യാസ മേഖലകളിൽ വിദ്യാർഥികൾ മുന്നേറുന്നു: മന്ത്രി ഒ.ആർ. കേളു

കൽപ്പറ്റ: ജില്ലയിലെ പൊതുവിദ്യാഭ്യാസ മേഖലയിലെ മുഴുവൻ വിദ്യാർഥികളും കായികവിദ്യാഭ്യാസ മേഖലകളിൽ മുന്നേറുകയാണെന്ന് പട്ടികജാതി-വർഗ-പിന്നാക്കക്ഷേമ മന്ത്രി ഒ.ആർ. കേളു. കാട്ടിക്കുളം ഗവ. ഹയർ സെക്കൻഡറി സ്കൂളിൽ വിജയോത്സവവും എൻഡോവ്മെന്‍റ് വിതരണവും കേരള ഗ്രാമീണ്‍ ബാങ്ക് പഠന ധനസഹായ വിതരണവും ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ഗുണനിലവാരമുള്ള വിദ്യാഭ്യാസത്തോടൊപ്പം വിദ്യാർഥികൾക്ക് ശാരീരികക്ഷമത കൈവരിക്കാൻ കായിക മേഖലയിൽ പൂർണ പിന്തുണയും മാനസികമായ സന്തോഷവും അധ്യാപകർ നൽകണമെന്നും മന്ത്രി പറഞ്ഞു. അഞ്ചാം ക്ലാസ് മുതൽ പത്ത് വരെയുള്ള പട്ടികവർഗ വിഭാഗത്തിൽപ്പെട്ട പഠനത്തിൽ മികവ് തെളിയിച്ച വിദ്യാർഥികൾക്ക് കേരള ഗ്രാമീണ്‍ ബാങ്ക് കാട്ടിക്കുളം ശാഖ പഠന ധനസഹായം വിതരണം ചെയ്തു. യുപി വിഭാഗം വിദ്യാർഥികൾക്ക് 3000 രൂപയും ഹൈസ്കൂൾ വിഭാഗം വിദ്യാർഥിൾക്ക് 5000 രൂപയുമാണ് നൽകിയത്. എൽഎസ്എസ്, യുഎസ്എസ്, എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ മന്ത്രി ആദരിച്ചു. സ്പെഷൽ എൻറിച്ച്മെന്‍റ് പ്രോഗ്രാമിന്‍റെ ഭാഗമായ ആൽബം റീലീസ് മന്ത്രി നിർവഹിച്ചു.ജില്ല പഞ്ചായത്ത് തിരുനെല്ലി ഡിവിഷൻ അംഗം എ.എൻ. സുശീല അധ്യക്ഷത വഹിച്ചു. തിരുനെല്ലി ഗ്രാമപഞ്ചായത്ത് വികസനക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം.കെ. രാധാകൃഷ്ണൻ, തിരുനെല്ലി ഗ്രാമപഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ റുഖിയ സൈനുദ്ദീൻ, മാനന്തവാടി ബ്ലോക്ക് പഞ്ചായത്ത് അംഗം വിമല ജയരാജൻ, പ്രിൻസിപ്പൽ പി.സി. മഞ്ജു, പ്രധാനാധ്യാപിക പി. സബ്രിയ ബീഗം, പിടിഎ പ്രസിഡന്‍റ് കെ. സിജിത്ത്, ബിപിസി കെ.കെ. സുരേഷ്, ട്രൈബൽ ഡെവലപ്പ്മെന്‍റ് ഓഫീസർ ടി.കെ. മനോജ്, ടിഇഒ ടി. നജിമുദ്ദീൻ, എസ്എംസി ചെയർമാൻ ടി. സന്തോഷ് കുമാർ, ജനപ്രതിനിധികൾ, ബാങ്ക് പ്രതിനിധികൾ, വകുപ്പ് ഉദ്യോഗസ്ഥർ എന്നിവർ പങ്കെടുത്തു.

ജനപ്രതിനിധികൾ നിഷ്ക്രിയത്വം അവസാനിപ്പിക്കണം: കത്തോലിക്കാ കോണ്‍ഗ്രസ്

സുൽത്താൻ ബത്തേരി: വന്യമൃഗശല്യവും കാർഷികോത്പന്നങ്ങളുടെ വിലയിടിവും തെരുവ് നായ്ക്കളുടെ വർധിച്ചുവരുന്ന ആക്രമണവും മനുഷ്യജീവിതം അസാധ്യമാക്കുന്ന വയനാട്ടിലെ ജനങ്ങളോട് യാതൊരുവിധ പരിഗണനയും കാണിക്കാത്ത ജനപ്രതിനിധികളുടെ ജനദ്രോഹ നിലപാടിനെതിരെ കത്തോലിക്ക കോണ്‍ഗ്രസ് ബത്തേരി മേഖല സമിതി ശക്തമായി പ്രതിഷേധിച്ചു. നാട്ടിലിറങ്ങുന്ന ആന, കടുവ, പുലി, കാട്ടുപന്നി തുടങ്ങിയ വന്യമൃഗങ്ങൾ കൃഷി നശിപ്പിക്കുകയും വളർത്തുമൃഗങ്ങളെയും മനുഷ്യനെപോലും ആക്രമിക്കുന്ന സാഹചര്യത്തിലും ഇതിന് ശാശ്വതമായ ഒരു പരിഹാരം കാണാൻ തിരഞ്ഞെടുക്കപ്പെട്ട പ്രതിനിധികൾ എന്ന നിലയിൽ നിയമസഭയിലും പാർലമെന്‍റിലും ശബ്ദമുയർത്താത്ത ഇവരുടെ നിലപാട് തികച്ചും ജനദ്രോഹപരമാണെന്ന് യോഗം വിലയിരുത്തി. വനയാടിന്‍റെ മന്ത്രിയും ,എം.പി യും എംഎൽഎമാരും ഒന്നും ചെയ്യുന്നില്ല. ത്രിതല പഞ്ചായത്ത് ഭരണസമിതികളും നിഷ്ക്രിയത്വം തുടരുന്നു. രാഷ്ട്രീയ പാർട്ടികൾ ജനങ്ങളുടെ കണ്ണിൽ പൊടിയിടുന്ന സമര പരിപാടികളും പ്രസ്ഥാവനകളും മാത്രമാകുന്നു. ജനകീയ പ്രശ്നങ്ങൾക്ക് പരിഹാരം കാണുന്നതിൽ പരാജയപ്പെടുന്നു. തോമാട്ടുചാൽ സെൻറ് തോമസ് ദേവാലയത്തിൽ വച്ച് ചേർന്ന ഫൊറോനസമിതി യോഗം ഫാ. ജോസ് മേച്ചേരിൽ ഉദ്ഘാടനം ചെയ്തു. ഫൊറോന പ്രസിഡൻറ് ഡേവി മാങ്കുഴ അധ്യക്ഷംവഹിച്ചു. ഫാ വിൻസൻറ് കളപ്പുരയിൽ, ശ്രീ ജോണ്‍സണ്‍ തൊഴുത്തിങ്കൽ, ശ്രീ.തോമസ് പട്ടമന, ശ്രീമതി മോളി മാമൂട്ടിൽ, ശ്രീമതി സ്മിത അടവിച്ചിറ, ശ്രീ രാജു മണക്കുന്നേൽ, ശ്രീ തോമസ് ചേലക്കൽ, ശ്രീ. സാജു പുലിക്കോട്ടിൽ എന്നിവർ സംസാരിച്ചു.

കുടിയോംവയൽ ലിഫ്റ്റ് ഇറിഗേഷൻ പദ്ധതി യാഥാർഥ്യമായി

കൽപ്പറ്റ: പനമരം ഗ്രാമപഞ്ചായത്തിലെ ചുണ്ടക്കുന്ന് കുടിയോംവയലിൽ പൂർത്തീകരിച്ച കുടിയോംവയൽ ലിഫ്റ്റ് ഇറിഗേഷൻ പദ്ധതി പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്തു. ജലലഭ്യത ഉറപ്പായതോടെ പ്രദേശത്ത് നഞ്ചയും പുഞ്ചയും കൃഷി ചെയ്യണമെന്നും ഭൂമി തരിശിടാതെ കൃത്യമായി ഉപയോഗപ്പെടുത്തണമെന്നും പാടശേഖരസമിതി പദ്ധതി നടത്തിപ്പുമായി മുന്നോട്ട് പോകണമെന്നും മന്ത്രി പറഞ്ഞു. കാർഷിക മേഖലയുടെ പുരോഗതിക്കായി കൂടുതൽ പദ്ധതികൾ ആവിഷ്കരിക്കണമെന്ന് മന്ത്രി കൃഷി ഓഫീസർക്ക് നിർദേശം നൽകി. പദ്ധതി യാഥാർഥ്യമായതോടെ കൈപ്പാട്ടുക്കുന്ന്, വാളെരികുടിയാം വയൽ പ്രാദേശത്തെ 150 ഏക്കർ വരുന്ന പാടശേഖരത്തിന് ഉപകാരപ്രദമാവും. നിലവിലുള്ള പന്പ് ഹൗസിന്‍റെയും കനാലിന്‍റെ അറ്റകുറ്റപണികൾ, സിസ്റ്റേണ്‍ ടാങ്ക്, 1253 മീറ്റർ പൈപ്പ്ലൈൻ എന്നിവ അടങ്ങുന്ന സിവിൽ പ്രവൃത്തികൾ, 50 എച്ച്പി മോട്ടോറും പന്പും മൂന്ന് എച്ച്പിയുടെ ഒരു വാക്വം പന്പും പന്പ് ഹൗസ് വയറിംഗ്, പാനൽ ബോർഡ് തുടങ്ങിയ ഇലക്ട്രിക്കൽ പ്രവൃത്തികൾ, പദ്ധതിക്ക് ആവശ്യമായ വൈദ്യുതീകരണം തുടങ്ങിയവയാണ് പൂർത്തീകരിച്ചത്. എംഎൽഎയുടെ ആസ്തി വികസന ഫണ്ടിൽ നിന്നും 90 ലക്ഷം രൂപ ചെലവഴിച്ചാണ് പദ്ധതി പൂർത്തിയാക്കിയത്. പനമരം ഗ്രാമപഞ്ചായത്ത് പ്രസിഡന്‍റ് ലക്ഷ്മി ആലക്കാമറ്റം അധ്യക്ഷത വഹിച്ചു. മൈനർ ഇറിഗേഷൻ മാനന്തവാടി ഡിവിഷൻ അസിസ്റ്റന്‍റ് എക്സിക്യുട്ടീവ് എൻജിനിയർ സി. സുരേഷ്, മലപ്പുറം ഡിവിഷൻ എക്സിക്യുട്ടീവ് എൻജിനിയർ ഷാജഹാൻ കബീർ, ഗ്രാമപഞ്ചായത്ത് കൃഷി ഓഫീസർ അരുണ്‍ ജോസ്, ജില്ലാ പഞ്ചായത്ത് അംഗം ബിന്ദു പ്രകാശ്, ബ്ലോക്ക് പഞ്ചായത്ത് അംഗം സജേഷ് സെബാസ്റ്റ്യൻ, കുടിയോംവയൽ സമിതി സെക്രട്ടറി എൽദോ തോമസ്, വാർഡ് അംഗം വി.സി. അജിത്ത്, ജനപ്രതിനിധികൾ, രാഷ്ട്രീയ കക്ഷി പ്രതിനിധികൾ, കർഷക പ്രതിനിധികൾ, ഉദ്യോഗസ്ഥർ തുടങ്ങിവർ പങ്കെടുത്തു.

ജൂലൈ 30ന് ചക്രസ്തംഭനസമരം ; പുനരധിവാസം അടിയന്തിരമായി നടപ്പിലാക്കണം: യുഡിഎഫ്

കൽപ്പറ്റ: മുണ്ടക്കൈ ദുരന്തബാധിതരുടെ പുനരധിവാസം അടിയന്തരമായി നടപ്പാക്കണമെന്നും ടൗണ്‍ഷിപ്പിന് ഏറ്റെടുത്ത ഭൂമിയിൽ ജോലി ചെയ്ത് ഉപജീവനം നടത്തിയിരുന്ന തൊഴിലാളികളെ സംരക്ഷിക്കാൻ നടപടി വേണമെന്നും യുഡിഎഫ് കൽപ്പറ്റ നിയോജക മണ്ഡലം നേതൃയോഗം ആവശ്യപ്പെട്ടു. ഉരുൾപൊട്ടി ഒരു വർഷമായിട്ടും മുണ്ടക്കൈ ദുരന്തബാധിതർക്ക് നീതി ലഭിക്കാത്തതിൽ പ്രതിഷേധിച്ച്് ദുരന്തത്തിന്‍റെ ഒന്നാം വാർഷിക ദിനമായ ജൂലൈ 30ന് ചക്രസ്തംഭന സമരം സംഘടിപ്പിക്കാനും തീരുമാനിച്ചു. പുനരധിവാസം പ്രായോഗികമായി നടപ്പിലാക്കാൻ കഴിയാത്തത് സർക്കാരിന്‍റെ കെടുകാര്യസ്ഥതയാണെന്നും നീട്ടി നീട്ടിക്കൊണ്ടുപോയി അവസാനം ടൗണ്‍ഷിപ്പിന് തറക്കല്ലിട്ട എൽസ്റ്റണ്‍ എസ്റ്റേറ്റിലെ തൊഴിലാളികളുടെ ആനുകൂല്യങ്ങൾ സംബന്ധിച്ചുള്ള തീരുമാനങ്ങളിൽ അവ്യക്തത തുടരുകയാണെന്നും സാങ്കേതികത്വവും അവ്യക്തതകളും അവസാനിപ്പിച്ച് ദുരന്തബാധിതർക്ക് നീതി നൽകാൻ അടിയന്തര നടപടി വേണമെന്നും യോഗം ഉദ്ഘാടനം ചെയ്ത ടി. സിദ്ദിഖ് എംഎൽഎ ആവശ്യപ്പെട്ടു. ഒരു വർഷമായിട്ടും ഒരു വീടു പോലും ദുരന്തബാധിതർക്ക് നൽകാൻ സംസ്ഥാന സർക്കാരിന് കഴിഞ്ഞിട്ടില്ല. ഇത് ക്രൂരവും പ്രതിഷേധാർഹവുമാണ്. പ്രധാനമന്ത്രി ദുരന്ത സ്ഥലം സന്ദർശിച്ച് ദുരന്തത്തിന്‍റെ ആഴവും വ്യാപ്തിയും ഗൗരവവും മനസിലാക്കി പോയിട്ടും കേരളം ആവശ്യപ്പെട്ട ദുരന്താനന്തര സഹായങ്ങൾ അടിയന്തരമായി നടപ്പാക്കണമെന്ന് ആവശ്യപ്പെട്ടുകൊണ്ടുള്ള പിഡിഎൻഎ (പോസ്റ്റ് ഡിസാസ്റ്റർ നീഡ്സ് അസസ്മെന്‍റ്) റിപ്പോർട്ട് വന്നിട്ടും ദുരന്തബാധിതരെ അവഗണിച്ചു പോകുന്ന കേന്ദ്രസർക്കാരിന്‍റെ നിലപാടും മുണ്ടക്കൈ ദുരന്തബാധിതരുടെ വിഷയങ്ങൾ ഉന്നയിച്ചുകൊണ്ട് നിരന്തരം സംസ്ഥാന സർക്കാരുമായി ബന്ധപ്പെട്ടിട്ടും ഒരു സഹായവും ലഭിച്ചില്ല എന്നുള്ളതും ഏറെ വേദനാജനകമാണെന്നും അദ്ദേഹം കൂട്ടിച്ചേർത്തു. 11,1 3, 14 തീയതികളിൽ പഞ്ചായത്ത് യുഡിഎഫ് യോഗങ്ങൾ വിളിക്കാനും തീരുമാനിച്ചു.

സ്വകാര്യ ബസ് പണിമുടക്ക് ആരംഭിച്ചു

സുൽത്താൻ ബത്തേരി: അശാസ്ത്രീയമായ ഗതാഗതനയം തിരുത്തണമെന്നതുൾപ്പെടെയുള്ള വിവിധ ആവശ്യങ്ങൾ ഉന്നയിച്ച് സ്വകാര്യ ബസുടമകൾ സർക്കാരിന് നൽകിയ നിവേദനത്തിനെതിരെ നിഷേധാത്മക നിലപാട് സ്വീകരിക്കുന്ന നടപടിയിൽ പ്രതിഷേധിച്ച് ഇന്ന് ജില്ലയിലെ മുഴുവൻ സ്വകാര്യ ബസുകളും നടത്തുന്ന പണിമുടക്ക് ആരംഭിച്ചു. പതിനഞ്ച് വർഷം മുന്പ് വരെ 34,000 സ്വകാര്യ ബസുകളാണ് സംസ്ഥാനത്ത് ഉണ്ടായിരുന്നത്. അത് ഇന്ന് 8,000ൽ താഴെയായി കുറഞ്ഞു. സ്വകാര്യ ബസ് വ്യവസായത്തെ സംരക്ഷിക്കുന്നതിനായി വിവിധ ആവശ്യങ്ങൾ സർക്കാരിന് സമർപ്പിച്ചെങ്കിലും അവയെല്ലാം അവഗണിക്കുകയും വ്യവസായത്തെ കൂടുതൽ തകർക്കുന്ന സമീപനവുമാണ് സ്വീകരിച്ചത്. ഇതിൽ പ്രതിഷേധിച്ചാണ് സൂചന പണിമുടക്ക്. സാധാരണ യാത്രക്കാരുടെ ബസ് ചാർജ് വർധന ആവശ്യപ്പെട്ടുകൊണ്ടുള്ളതല്ല ഈ സമരമെന്ന് ബസുടമകൾ വ്യക്തമാക്കി.

ഹയർ സെക്കൻഡറി തുല്യത: ജില്ലയിൽ പരീക്ഷയെഴുതുന്നത് 512 പേർ

കൽപ്പറ്റ: സാക്ഷരത മിഷൻ പൊതുവിദ്യാഭ്യാസ വകുപ്പിന്‍റെ സഹകരണത്തോടെ നടത്തുന്ന ഹയർസെക്കൻഡറി തുല്യത പരീക്ഷയിൽ ജില്ലയിൽ നിന്നും 512 പഠിതാക്കൾ പരീക്ഷ എഴുതും. 10ന് ആരംഭിക്കുന്ന പരീക്ഷയിൽ 179 പേർ ഹയർസെക്കൻഡറി ഒന്നാം വർഷ വിഭാഗത്തിലും 333 പേർ രണ്ടാം വർഷത്തിലുമായാണ് പരീക്ഷ എഴുതുന്നത്. ഇവരിൽ 421 പേർ സ്ത്രീകളാണ്. 512 പഠിതാക്കളിൽ 98 പട്ടികവർഗ വിഭാഗക്കാരും 17 പട്ടികജാതി വിഭാഗക്കാരുമാണുള്ളത്. കൽപ്പറ്റ ഗവ. ഹയർസെക്കൻഡറി സ്കൂൾ, സുൽത്താൻ ബത്തേരി ഗവ. സർവജന ഹയർ സെക്കൻഡറി സ്കൂൾ, കണിയാന്പറ്റ ഗവ. ഹയർ സെക്കൻഡറി സ്കൂൾ, മാനന്തവാടി ഗവ. ഹയർ സെക്കൻഡറി സ്കൂൾ എന്നിവയാണ് പരീക്ഷാ കേന്ദ്രങ്ങൾ.

കല്ലോടി സെന്‍റ് ജോസഫ്സ് യുപി സ്കൂളിൽ സ്കൂൾ ദുരന്ത നിവാരണ സുരക്ഷ സമിതി

കല്ലോടി: കല്ലോടി സെന്‍റ് ജോസഫ്സ് യുപി സ്കൂളിൽ സ്കൂൾ ദുരന്ത നിവാരണ സുരക്ഷ സമിതി രൂപീകരിച്ചു. യോഗത്തിൽ ഹെഡ് മാസ്റ്റർ പി.എം. ജോസ് അധ്യക്ഷത വഹിച്ചു. എഎസ്ഐ സുനിൽകുമാർ, സിപിഒമാരായ കെ. അനീഷ്, എ.ബി. ശ്രീജിത്ത്, എക്സൈസ് റേഞ്ച് ഓഫീസർ ടി.ആർ. പ്രണവ്, എടവക വില്ലേജ് ഓഫീസർ പി.വി. സന്തോഷ്, പിടിഎ പ്രസിഡന്‍റ് സിബി ആശാരിയോട്ട് എന്നിവർ പ്രസംഗിച്ചു. സ്കൂൾ ലഹരിവിരുദ്ധ പ്രവർത്തനങ്ങൾക്കും സ്കൂൾ സുരക്ഷ ക്രമീകരണങ്ങൾക്കും എല്ലാവിധ പിന്തുണയും പ്രോത്സാഹനവും നൽകുമെന്ന് യോഗത്തിൽ പങ്കെടുത്തവർ ഉറപ്പുനൽകി. സ്റ്റാഫ് സെക്രട്ടറി ടി. നസ്രിൻ, അധ്യാപകരായ സി. സെലിൻ ജോസഫ്, അരുണ്‍ സെബാസ്റ്റ്യൻ, കെ.ജെ. ദീപ, എംപിടിഎ പ്രസിഡന്‍റ് ബുഷ്റ നജ്മുദീൻ എന്നിവർ നേതൃത്വം നൽകി.

താന്നിത്തെരുവ് ജംഗ്ഷനിൽ ട്രാഫിക് ഐലൻഡ് സ്ഥാപിക്കണമെന്ന് ആവശ്യം

പുൽപ്പള്ളി: താന്നിത്തെരുവ് ജംഗ്ഷനിൽ ട്രാഫിക് ഐലൻഡ് സ്ഥാപിക്കമെന്ന ആവശ്യം ശക്തമാകുന്നു. വാഹനത്തിരക്കേറിയ വിവിധ റോഡുകളുടെ സംഗമസ്ഥലമായ താന്നിത്തെരുവ് ജംഗ്ഷനിൽ അപകട സാധ്യത നിലനിൽക്കുന്ന സാഹചര്യത്തിലാണിത്. പഴശിരാജാ കോളജ്, എസ്എൻ കോളജ്, സെന്‍റ് മേരീസ് ഇംഗ്ലീഷ് മീഡിയം സ്കൂൾ, കൃപാലയ സ്പെഷൽ സ്കൂൾ തുടങ്ങിയ വിദ്യാഭ്യാസ സ്ഥാപനങ്ങൾ താന്നിത്തെരുവിനു സമീപമാണ് പ്രവർത്തിക്കുന്നത്. ട്രാഫിക് ഐലൻഡ് സ്ഥാപിച്ചാൽ വാഹനങ്ങളുടെ വേഗത നിയന്ത്രിക്കാനും അപകടങ്ങൾ ഒഴിവാക്കാനും കഴിയും. നവീകരണം നടന്ന പയ്യന്പള്ളി-പുൽപ്പള്ളി-കാപ്പിസെറ്റ് റോഡിലാണ് താന്നിത്തെരുവ് ജംഗ്ഷൻ. മുള്ളൻകൊല്ലി, പെരിക്കല്ലൂർ, മരക്കടവ്, പാടിച്ചിറ, സീതാമൗണ്ട് ഭാഗങ്ങളിൽനിന്നുള്ളവർ പുൽപ്പള്ളി ടൗണിൽ പ്രവേശിക്കാതെ എളുപ്പം ബത്തേരി, കൽപ്പറ്റ ഭാഗങ്ങളിൽ എത്താൻ ആശ്രയിക്കുന്ന മുള്ളൻകൊല്ലി-ഷെഡ് റോഡ് കടന്നുപോകുന്നതും താന്നിത്തെരുവിലൂടെയാണ്. വാഹനത്തിരക്കുമൂലം വിദ്യാർഥികളടക്കം യാത്രക്കാർ താന്നിത്തെരുവ് ജംഗ്ഷൻ മുറിച്ചുകടക്കുന്നത് സാഹസപ്പെട്ടാണ്. ട്രാഫിക് ഐലൻഡ് നിർമിക്കുന്നതിന് പ്രദേശവാസികൾ പലവട്ടം പൊതുമരാമത്ത് വകുപ്പിന് അപേക്ഷ നൽകിയെങ്കിലും നടപടി ഉണ്ടാകുന്നില്ല.

നെൽക്കർഷകരോടുള്ള അവഗണന അവസാനിപ്പിക്കണമെന്ന്

കൽപ്പറ്റ: നെൽക്കർഷകരോടുള്ള അവഗണന അവസാനിപ്പിക്കണമെന്ന് ഐഎൻടിയുസി യൂത്ത് വിംഗ് ജില്ലാ കമ്മിറ്റി സർക്കാരിനോട് ആവശ്യപ്പെട്ടു. തൂക്കത്തിൽ മൂന്നു ശതമാനം കുറവോടെയാണ് കർഷകരിൽനിന്നു നെല്ല് വാങ്ങേണ്ടത്. എന്നാൽ തൂക്കത്തിൽ ആറ് മുതൽ പത്ത് ശതമാനം വരെ കുറവു വരുത്തിയാണ് മില്ലുകാർ നെല്ല് എടുക്കുന്നത്. കൃഷിക്കാരിൽനിന്നു നെല്ല് പൂർണമായും സംഭരിക്കാത്ത സാഹചര്യവും നിലനിൽക്കുകയാണ്. ഈ പ്രശ്നങ്ങൾക്ക് അടിയന്തര പരിഹാരം കാണാത്തപക്ഷം ശക്തമായ സമരം സംഘടിപ്പിക്കാൻ തീരുമാനിച്ചു. ഐഎൻടിയുസി ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. ഐഎൻടിയുസി യംഗ് വർക്കേഴ്സ് സംസ്ഥാന ക്യാന്പ് പോസ്റ്റർ പ്രകാശനം അദ്ദേഹം നിർവഹിച്ചു. യംഗ് വർക്കേഴ്സ് കൗണ്‍സിൽ ജില്ലാ പ്രസിഡന്‍റ് സി.എ. അരുണ്‍ദേവ് അധ്യക്ഷത വഹിച്ചു. ഐഎൻടിയുസി സംസ്ഥാന വൈസ് പ്രസിഡന്‍റ് ഹർഷൽ കോന്നാടൻ, സംസ്ഥാന ജനറൽ സെക്രട്ടറി മുത്തലിബ് പഞ്ചാര, കെ.പി. സുഹൈൽ, പി.പി. ഷംസുദ്ദീൻ, രമ്യ ജയപ്രസാദ്, ആഷിഖ് മൻസൂർ, മുഹമ്മദ് ഫെബിൻ, അനൂപ് ഷെയ്ഖ്, ഷിനു മാനന്തവാടി, ആഷിക് മേപ്പാടി എന്നിവർ പ്രസംഗിച്ചു.

പെൻഷൻകാരോടുള്ള വഞ്ചന അവസാനിപ്പിക്കണം: വിനോദ്കുമാർ

കൽപ്പറ്റ: പെൻഷൻകാരോടുള്ള വഞ്ചന സർക്കാർ അവസാനിപ്പിക്കണമെന്ന് കേരള സ്റ്റേറ്റ് പെൻഷനേഴ്സ് സംഘ് സംസ്ഥാന സെക്രട്ടറി വിനോദ് കുമാർ. ക്ഷാമാശ്വാസ കുടിശിക പിടിച്ചുവയ്ക്കുന്നതിലും ശന്പള പരിഷ്കരണ കമ്മീഷനെ നിയമിക്കാത്തതിലും പ്രതിഷേധിച്ച് സിവിൽ സ്റ്റേഷനു മുന്പിൽ സംഘ് ജില്ലാ കമ്മിറ്റി നടത്തിയ ധർണ ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് സി.പി. വിജയൻ അധ്യക്ഷത വഹിച്ചു. എൻജിഒ സംഘ് ജില്ലാ പ്രസിഡന്‍റ് ബ്രിഗേഷ്, ബിഎംഎസ് ജില്ലാ പ്രസിഡന്‍റ് സന്തോഷ്, കെ.ടി. സുകുമാരൻ, ജഗന്നാഥകുമാർ, എ.സി. രവീന്ദ്രൻ, കെ. അനന്തൻ എന്നിവർ പ്രസംഗിച്ചു.

പ്രതിഭകൾക്ക് പഞ്ചായത്തിന്‍റെ ആദരം

കാവുമന്ദം: വിദ്യാഭ്യാസ രംഗത്ത് വിവിധ നേട്ടങ്ങൾ കൈവരിച്ച തരിയോട് പഞ്ചായത്തിലെ പ്രതിഭകളെ തരിയോടിന്‍റെ താരങ്ങൾ എന്ന പേരിൽ ഗ്രാമപഞ്ചായത്തിന്‍റെ അഭിമുഖത്തിൽ അനുമോദിച്ചു. ടി. സിദ്ദിഖ് എംഎൽഎ ഉദ്ഘാടനം ചെയ്തു. ഗ്രാമപ്പഞ്ചായത്ത് പ്രസിഡന്‍റ് ഷമീം പാറക്കണ്ടി അധ്യക്ഷത വഹിച്ചു. എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങൾക്കും എ പ്ലസ് നേടിയ വിദ്യാർത്ഥികൾ, എൽഎസ്എസ്, യുഎസ്എസ്, എൻഎംഎംഎസ് സ്കോളർഷിപ്പുകൾ നേടിയ വിദ്യാർത്ഥികൾ, എൻട്രൻസ് പരീക്ഷയിലെ റാങ്ക് ജേതാക്കൾ, ഇൻസ്പയർ അവാർഡ് ജേതാക്കൾ അടക്കമുള്ള വിദ്യാർഥികളെയും വൈത്തിരി ഉപജില്ല വിദ്യാഭ്യാസ ഓഫീസർ ആയി തെരഞ്ഞെടുക്കപ്പെട്ട ടി. ബാബു, എസ്എസ്എൽസി പരീക്ഷയിൽ 100 ശതമാനം വിജയം നേടിയ ജിഎച്ച്എസ്എസ് തരിയോട്, നിർമല ഹൈസ്കൂൾ തരിയോട് എന്നിവരെയാണ് അനുമോദിച്ചത്.

എൽസ്റ്റണ്‍ എസ്റ്റേറ്റിലെ തൊഴിലാളികൾക്ക് സൗജന്യ റേഷൻ അനുവദിക്കണം: ടി. സിദ്ദിഖ്

കൽപ്പറ്റ: പുനരധിവാസത്തിനായി സർക്കാർ ഏറ്റെടുത്ത എൽസ്റ്റണ്‍ എസ്റ്റേറ്റിലെ തൊഴിലാളികൾക്ക് ആനുകൂല്യങ്ങളും സൗജന്യ റേഷനും അനുവദിക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയനും തൊഴിൽ മന്ത്രി വി. ശിവൻകുട്ടിക്കും ടി. സിദ്ദിഖ് എംഎൽഎ നിവേദനം നൽകി. പുൽപ്പാറ ഡിവിഷനിലെ നൂറ് തൊഴിലാളികൾ ഉൾപ്പെടെ എസ്റ്റേറ്റിന് കീഴിലെ മൂന്ന് ഡിവിഷനുകളിലായി ആകെ 274 തൊഴിലാളികളാണുള്ളത്. ഇവരിൽ 150 പേർ സർവീസിൽ നിന്നും വിരമിച്ചവരാണ്. 2014 മുതൽ തൊഴിലാളികളിൽ നിന്ന് ഈടാക്കിയ പിഎഫ് വിഹിതവും ഉടമ അടയ്ക്കേണ്ട വിഹിതവും പിഎഫ് അക്കൗണ്ടിൽ അടച്ചിട്ടില്ല. വിരമിച്ച 150 തൊഴിലാളികൾക്ക് ഗ്രാറ്റിവിറ്റി ലഭിച്ചിട്ടില്ല. ഒരു വർഷത്തെ ലീവ് വിത്ത് വേജസ്, രണ്ട് വർഷത്തെ ബോണസ്, ഏഴ് വർഷത്തെ മെഡിക്കൽ ആനുകൂല്യങ്ങൾ, അത്രയും വർഷത്തെ വെതർ പ്രൊട്ടക്ടീവ് ആനുകൂല്യങ്ങൾ, രണ്ട് ഘട്ടങ്ങളിലായി കൂലി പുതുക്കിയ സമയത്തെ കുടിശിക തുടങ്ങിയവയെ കുറിച്ച് തോട്ടം ഉടമ മൗനം തുടരുകയാണ്. പുനരധിവാസ പ്രവർത്തനങ്ങൾ ആരംഭിച്ചുവെങ്കിലും തൊഴിലാളികൾക്ക് തൊഴിൽ ഇല്ലാത്തതിനാലും അവരുടെ ആനുകൂല്യങ്ങൾ ലഭിക്കാത്തതിനാലും ദൈന്യംദിന കാര്യങ്ങൾക്ക് പോലും പ്രയാസപ്പെടുകയാണ്. ഭൂമി ഏറ്റെടുത്ത് പ്രവൃത്തികൾ ആരംഭിച്ച് മാസങ്ങളായിട്ടും ആനുകൂല്യങ്ങൾ ലഭ്യമാക്കാനുള്ള തുടർനടപടികൾ സ്വീകരിച്ചിട്ടില്ല. ശക്തമായ കാലവർഷം ആരംഭിച്ചിരിക്കെ തൊഴിലില്ലാത്തിനാൽ കുടുംബങ്ങളുടെ നിത്യചെലവ് ഉൾപ്പെടെ താളം തെറ്റിയിരിക്കുകയാണ്. അതിനാൽ തൊഴിലാളികൾക്ക് അടിയന്തരമായി സൗജന്യ റേഷൻ അനുവദിക്കണമെന്ന് എംഎൽഎ ആവശ്യപ്പെട്ടു.

നിങ്ങളോടൊപ്പം സ്റ്റാലിൻ പദ്ധതി

ഗൂഡല്ലൂർ: നിങ്ങളോടൊപ്പം സ്റ്റാലിൻ പദ്ധതി ഈ മാസം 15 മുതൽ ആരംഭിക്കുമെന്ന് ജില്ലാ കളക്ടർ ലക്ഷ്മി ഭവ്യതന്നീറു അറിയിച്ചു. നീലഗിരി ജില്ലയിൽ ആറ് താലൂക്കുകളിലായി 146 ക്യാന്പുകൾ ഇതിന്‍റെ ഭാഗമായി നടക്കും. ജനങ്ങളുടെ പ്രശ്നങ്ങൾ പരിഹരിക്കുന്നതിന് വേണ്ടിയാണ് ക്യാന്പ് സംഘടിപ്പിക്കുന്നത്. തമിഴ്നാട്ടിൽ 10,000 ക്യാന്പുകളാണ് സംഘടിപ്പിക്കുന്നത്. 680 പേരെ നീലഗിരിയിൽ സ്പെഷൽ ടീമായി നിശ്ചയിച്ചിട്ടുണ്ട്. ഈ സംഘം വീടുകൾ തോറും കയറിയിറങ്ങി ഈ ക്യാന്പിനെ കുറിച്ച് പൊതുജനങ്ങളെ ബോധവത്കരിക്കും. കലൈജ്ഞർ ധനസഹായ പദ്ധതിക്കുള്ള അപേക്ഷകളും സ്വീകരിക്കും. പ്രസ്തുത ക്യാന്പുകൾ ഉപയോഗപ്പെടുത്തണമെന്ന് കളക്ടർ അറിയിച്ചു.

ഹരിതകർമസേനാസംഗമം നടത്തി

പനമരം: കുടുംബശ്രീ ജില്ലാ മിഷൻ പഞ്ചായത്ത് ഹാളിൽ ഹരിതകർമസേനാസംഗമം സംഘടിപ്പിച്ചു. ഹരിതകർമസേനയുടെ പ്രവർത്തനം കൂടുതൽ ഫലപ്രദമാക്കുന്നതിനും അംഗങ്ങൾക്ക് ആവശ്യമായ പരിശീലനം നൽകുന്നതിനുമാണ് സംഗമം നടത്തിയത്. തദ്ദേശസ്വയംഭരണ ജോയിന്‍റ് ഡയറക്ടർ കെ.കെ. വിമൽരാജ് ഉദ്ഘാടനം ചെയ്തു. കുടുംബശ്രീ ജില്ലാ മിഷൻ കോഓർഡിനേറ്റർ പി.കെ. ബാലസുബ്രഹ്മണ്യൻ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ലക്ഷ്മി ആലക്കമുറ്റം മുഖ്യാതിഥിയായി. ആരോഗ്യ-വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ കെ.ടി. സുബൈർ, കുടുംബശ്രീ ജില്ലാ മിഷൻ അസിസ്റ്റന്‍റ് കോ ഓർഡിനേറ്റർമാരായ കെ.കെ. അമീൻ, വി.കെ. റെജീന, സിഡിഎസ് ചെയർപേഴ്സണ്‍ രജനി രജീഷ്, മെംബർ സെക്രട്ടറി ഹുസൈൻ എന്നിവർ പ്രസംഗിച്ചു. ഹരിതകർമസേനാംഗങ്ങൾ നേരിടുന്ന വെല്ലുവിളികൾ, നവീന ഇടപെടലുകൾ, സാധ്യതകൾ എന്നിവ ചർച്ച ചെയ്തു. ക്ലീൻ കേരള കന്പനി ജില്ലാ മാനേജർ പി.കെ. സുരേഷ്കുമാർ, മേരി സ്റ്റാൻലി, വി.കെ. അനുശ്രീ, പി. ഹുദൈഫ്, ശ്രുതി രാജൻ, പി.കെ. അനിൽകുമാർ, അഹമ്മദ് ബഷീർ എന്നിവർ ക്ലാസെടുത്തു.

ലഹരി വിമുക്ത കുടുംബം: കാന്പയിനുമായി പയ്യന്പള്ളി സെന്‍റ് കാതറിൻസ് സ്കൂൾ

പയ്യന്പള്ളി: ലഹരിവിരുദ്ധ പ്രവർത്തനങ്ങൾ കുടുംബങ്ങളിലേക്ക് വ്യാപിപ്പിക്കുന്നതിന് ’ലഹരി വിമുക്ത കുടുംബം സമൂഹ നൻമയ്ക്ക്’ കാന്പയിനുമായി സെന്‍റ് കാതിറിൻസ് ഹൈസ്കൂൾ വിദ്യാർഥികൾ. വിദ്യാലയത്തിലെ 1200 ഓളം വിദ്യാർഥികൾ പങ്കാളികളാകുന്നതാണ് കാന്പയിൻ. ലഹരിവിരുദ്ധ സന്ദേശം ഉൾക്കൊള്ളുന്ന സ്റ്റിക്കറുകൾ ഹെഡ്മാസ്റ്റർ ഫിലിപ്പ് ജോസഫ് കുട്ടികൾക്ക് കൈമാറി. പിടിഎ പ്രസിഡന്‍റ് ജോബി ജോസഫ് സ്കൂൾ അങ്കണത്തിൽ സ്റ്റിക്കർ ഒട്ടിച്ച് കാന്പയിൻ ഉദ്ഘാടനം ചെയ്തു.പിടിഎ ഭാരവാഹികൾ, അധ്യാപകർ, ലഹരിവിരുദ്ധ ക്ലബ് ഭാരവാഹികൾ, വിദ്യാർഥികൾ എന്നിവർ പങ്കെടുത്തു.

മിഷൻ 2025: വികസന സെമിനാർ നടത്തി

സുൽത്താൻ ബത്തേരി: കോണ്‍ഗ്രസ് നൂൽപ്പുഴ, വടക്കനാട് മണ്ഡലം കമ്മിറ്റികളുടെ സംയുക്താഭിമുഖ്യത്തിൽ മിഷൻ 2025ന്‍റെ ഭാഗമായി കല്ലൂർ സാംസ്കാരിക നിലയത്തിൽ നൂൽപ്പുഴ പഞ്ചായത്തുതല വികസന സെമിനാർ നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. നൂൽപ്പുഴ മണ്ഡലം പ്രസിഡന്‍റ് കെ.വി. ബാലകൃഷ്ണൻ അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ മുഖ്യപ്രഭാഷണം നടത്തി. നിസി അഹമ്മദ്, എൻ.സി. കൃഷ്ണകുമാർ, എടക്കൽ മോഹനൻ, എൻ.കെ. വാസു എന്നിവർ പ്രസംഗിച്ചു. നൂൽപ്പുഴ പഞ്ചായത്ത് പ്രസിഡന്‍റ് ഷീല സതീഷ് വികസനരേഖ അവതരിപ്പിച്ചു. വേണുഗോപാൽ കീഴ്ശേരി ക്ലാസെടുത്തു. വടക്കനാട് മണ്ഡലം പ്രസിഡന്‍റ് ജയൻ സ്വാഗതം പറഞ്ഞു. നെൻമേനി, ചീരാൽ മണ്ഡലം കമ്മിറ്റികളുടെ നേതൃത്വത്തിൽ കൊളിയാടി പാരിഷ് ഹാളിൽ വികസന സെമിനാർ നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. നെൻമേനി മണ്ഡലം പ്രസിഡന്‍റ് കെ.കെ. പോൾസണ്‍ അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ, എം.ജി. ബിജു, നിസി അഹമ്മദ്, ബിന്ദു ആനന്ദൻ, ടിജി ചെറുതോട്ടിൽ, ഡി.പി. രാജശേഖരൻ, അഡ്വ.രാജേഷ്കുമാർ, എടക്കൽ മോഹനൻ, ഉമ്മർ കുണ്ടാട്ടിൽ, ഷിജു കൊഴുവണ, പ്രേമൻ എന്നിവർ പ്രസംഗിച്ചു.

പുൽപ്പള്ളി-പെരിക്കല്ലൂർ റോഡിലെ കുഴികൾ യാത്രക്കാരെ വലയ്ക്കുന്നു

പുൽപ്പള്ളി: പെരിക്കല്ലൂർ റോഡിലെ കുഴികൾ യാത്രക്കാരെ വലയ്ക്കുന്നു. റോഡിൽ വടാനക്കവല മുതൽ പെരിക്കല്ലൂർ വരെ ഭാഗത്ത് അനേകം കുഴികളാണ് രൂപപ്പെട്ടത്. കുഴികളിൽച്ചാടി ബൈക്കുകൾ അടക്കം വാഹനങ്ങൾ അപകടത്തിൽപ്പെടുന്നത് തുടർക്കഥയാണ്. എന്നിട്ടും കുഴികൾ താത്കാലികമായി അടയ്ക്കാൻ പോലും പൊതുമരാമത്ത് വകുപ്പ് അധികൃതർ തയാറാകുന്നില്ല. ഇതിൽ ജനങ്ങൾക്കിടയിൽ പ്രതിഷേധം ശക്തമാണ്.

കല്ലോടി സെന്‍റ് ജോസഫ്സ് യുപി സ്കൂളിൽ ലഹരി വിരുദ്ധ ബോധവത്കരണം നടത്തി

കല്ലോടി: കല്ലോടി സെന്‍റ് ജോസഫ്സ് യുപി സ്കൂളിൽ ലഹരി വിരുദ്ധ പരിപാടിയും വിവിധ ക്ലബ്ബുകളുടെ ഉദ്ഘാടനവും നടത്തി. വിദ്യാർഥികളെ ലഹരിയുടെ ദൂഷ്യവശങ്ങളെക്കുറിച്ച് ബോധവൽക്കരിക്കുക എന്നതായിരുന്നു പരിപാടിയുടെ ലക്ഷ്യം. മുക്തി മിഷൻ ജില്ലാ കോഓർഡിനേറ്റർ എൻ.സി. സജിത്ത് കുമാർ പരിപാടി ഉദ്ഘാടനം ചെയ്തു. സ്കൂൾ അസിസ്റ്റന്‍റ് മാനേജർ ഫാ. അമൽ പന്നയ്ക്കൽ അധ്യക്ഷത വഹിച്ചു. സ്കൂൾ ഹെഡ്മാസ്റ്റർ ജോസ് പള്ളത്ത്, വിദ്യാർഥി പ്രതിനിധി വി.പി.എൻ. മാളവിക, അധ്യാപിക ആഷ്ന ജോസ്, പ്രോഗ്രാം കണ്‍വീനർ സി.എഫ്. ജോസ് എന്നിവർ പ്രസംഗിച്ചു.

ക്വിസ്: സറീൻ ബി. ഹബീബിന് ഒന്നാം സ്ഥാനം

കൽപ്പറ്റ: ജനമൈത്രി പോലീസ് കൽപ്പറ്റ പോലീസ് സ്റ്റേഷൻ പരിധിയിലെ ഹയർ സെക്കൻഡറി സ്കൂൾ വിദ്യാർഥികൾക്ക് നടത്തിയ ക്വിസ് മത്സരത്തിൽ ഡി പോൾ പബ്ലിക് സ്കൂളിലെ സറീൻ ബി. ഹബീബ് ഒന്നാം സ്ഥാനം നേടി. പിണങ്ങോട് ഡബ്ല്യുഒഎച്ച്എസ്എസിലെ അൻഷിഫ് മുഹമ്മദിനാണ് രണ്ടാം സ്ഥാനം. ഡി പോൾ പബ്ലിക് സ്കൂളിലെ പി.ഒ. ഹാജിറയാണ് മൂന്നാമത്. ഡി പോൾ സ്കൂളിലായിരുന്നു മത്സരം. പ്രിൻസിപ്പൽ പി.യു. ജോസഫ് സമ്മാന വിതരണം നിർവഹിച്ചു. പോലീസ് ഇൻസ്പെക്ടർ ബിജു ആന്‍റണി ലഹരി വിരുദ്ധ ബോധവത്കണം നൽകി. പ്രിൻസിപ്പൽ എസ്ഐ വിമൽ ചന്ദ്രൻ, എസ്ഐമാരായ ആതിര ഉണ്ണിക്കൃഷ്ണൻ, മിഥുൻ, സിൻഷ എന്നിവർ പ്രസംഗിച്ചു. ലഹരിക്കെതിരേ ജില്ലാ പോലീസ് ’ഡാർക്ക് ഡേയ്സ്’ എന്ന പേരിൽ തയാറാക്കിയ ഹ്രസ്വചിത്രത്തിന്‍റെ പ്രദർശനം നടത്തി. മത്സരത്തിൽ പങ്കെടുത്ത മുഴുവൻ വിദ്യാർഥികൾക്കും പ്രോത്സാഹന സമ്മാനം നൽകി.

‘ലഹരിക്കെതിരേ എന്‍റെ പിഞ്ചു കരങ്ങളും’ പരിപാടി നടത്തി

വാഴവറ്റ: സെന്‍റ് സെബാസ്റ്റ്യൻസ് എഎൽപി സ്കൂളിൽ ലഹരിവിരുദ്ധ പ്രവർത്തനങ്ങളുടെ ഭാഗമായി ‘ലഹരിക്കെതിരേ എന്‍റെ പിഞ്ചു കരങ്ങളും’ പരിപാടി നടത്തി. ജീവിതത്തിൽ ഒരിക്കലും ലഹരി ഉപയോഗിക്കില്ലെന്ന് പ്രഖ്യാപിച്ച് കുട്ടികൾ കാൻവാസിൽ കൈമുദ്ര പതിച്ചു. സ്കൂൾ ലീഡർ ഷംലിയ ഉദ്ഘാടനം ചെയ്തു.

പുഞ്ചരിമട്ടം ഉരുൾ ദുരന്ത ബാധിതന് മസ്കറ്റ് കെഎംസിസി നിർമിച്ച വീട് കൈമാറി

കൽപ്പറ്റ: പുഞ്ചിരിമട്ടം ഉരുൾദുരന്തത്തിൽ കുടുംബത്തിലെ 11 പേരടക്കം സർവതും നഷ്ടമായ പ്രവാസി മുണ്ടക്കൈ കളത്തുങ്കൽ നൗഫലിന് മസ്കറ്റ് കെഎംസിസി നിർമിച്ച വീടിന്‍റെ കൈമാറ്റം നടത്തി. താക്കോൽദാനം മേപ്പാടി പൂത്തകൊല്ലി മദ്രസ ഹാളിൽ പി.കെ. ബഷീർ എംഎൽഎ, മസ്കറ്റ് കഐംസിസി പ്രസിഡന്‍റ് റഹീസ് അഹമ്മദ് എന്നിവർ ചേർന്ന് നിർവഹിച്ചു. മസ്കറ്റ് കെഎംസിസി ജനറൽ സെക്രട്ടറി റഹീം വറ്റല്ലൂർ, മുസ്ലിംലീഗ് ജില്ലാ പ്രസിഡന്‍റ് കെ.കെ. അഹമ്മദ് ഹാജി, ജനറൽ സെക്രട്ടറി ടി. മുഹമ്മദ് തുടങ്ങിയവർ പങ്കെടുത്തു. മേപ്പാടി മുക്കിൽപ്പീടികയിൽ നൗഫൽ നിർദേശിച്ച എട്ട് സെന്‍റ് സ്ഥലം 1.4 ലക്ഷം രൂപയ്ക്കു വാങ്ങിയാണ് 1,200 ചതുരശ്ര അടി വിസ്തീർണത്തിൽ വീട് നിർമിച്ചതെന്ന് മസ്കറ്റ് കഐംസിസി-സ്വാഗതസംഘം ഭാരവാഹികളായ അഷ്റഫ് നാദാപുരം, ഹുസൈൻ വയനാട്, സയ്യിദ് എ.കെ.കെ. തങ്ങൾ, കെ. അഷ്റഫ്, എം.ടി. അബൂബക്കർ, നാസർ കാതിരി, ഫൈസൽ വയനാട് എന്നിവർ പറഞ്ഞു. 32 ലക്ഷം രൂപയാണ് ഭവന നിർമാണത്തിന് ആകെ ചെലവ്. പുഞ്ചിരിമട്ടം ഉരുൾദുരന്തം ഉണ്ടാകുന്പോൾ നൗഫൽ മസ്കറ്റിലായിരുന്നു.

ലഹരിവിരുദ്ധ ചുവർ ബോർഡുകൾ അനാച്ഛാദനം ചെയ്തു

മുള്ളൻകൊല്ലി: സെന്‍റ് തോമസ് എയുപി സ്കൂളിൽ ലഹരിവിരുദ്ധ വാരാചരണത്തിന്‍റെ ഭാഗമായി സ്ഥാപിച്ച ലഹരിവിരുദ്ധ ചുവർ ബോർഡുകൾ വാർഡ് മെംബർ മഞ്ജു ഷാജി അനാച്ഛാദനം ചെയ്തു. പഞ്ചായത്ത് വൈസ് പ്രസിഡന്‍റ് മോളി ആക്കാന്തിരി ലഹരിവിരുദ്ധ സന്ദേശം നൽകി. ഹെഡ്മിസ്ട്രസ് മിനി ജോണ്‍, പിടിഎ പ്രസിഡന്‍റ് നോബി പള്ളിത്തറ, മദർ പിടിഎ പ്രസിഡന്‍റ് സബിത പൂത്തോട്ടായിൽ, പിടിഎ വൈസ് പ്രസിഡന്‍റ് ചാക്കോച്ചൻ കണ്ണന്താനം, അധ്യാപകരായ എം.എം. ആന്‍റണി, കെ.എം. നൗഫൽ, സിസ്റ്റർ മെറിൻ, ധന്യ സഖറിയാസ് തുടങ്ങിയവർ പങ്കെടുത്തു.

സെന്‍റ് വിൻസന്‍റ് ഫൊറോന പള്ളിയിൽ സഭാദിനം ആഘോഷിച്ചു

കൽപ്പറ്റ: ഭക്തസംഘടനകളുടെ നേതൃത്വത്തിൽ സെന്‍റ് വിൻസന്‍റ് ഫൊറോന പള്ളിയിൽ സഭാ, സമുദായ, യുവജന ദിനാഘോഷം നടത്തി. മാനന്തവാടി രൂപത പ്രൊക്യുറേറ്റർ ഫാ.ജോസ് കൊച്ചറയ്ക്കൽ ഉദ്ഘാടനം ചെയ്തു. സമുദായാംഗങ്ങൾ പ്രത്യയശാസ്ത്ര അടിമകളാകാതെ ശരിയുടെ പക്ഷത്തുനിന്ന് സമൂഹത്തെ നേർവഴിയിൽ നയിക്കണമെന്ന് അദ്ദേഹം ആഹ്വാനം ചെയ്തു. സണ്‍ഡേ സ്കൂൾ പരീക്ഷയിലെ റാങ്ക് ജേതാക്കൾക്ക് ഫാ.ജോസ് നരിക്കുഴിയുടെ പേരിലുള്ള എൻഡോവ്മെന്‍റുകൾ പ്രൊക്യുറേറ്റർ വിതരണം ചെയ്തു. ഫൊറോന വികാരി ഫാ.ജോണ്‍ പെരുമാട്ടിക്കുന്നേൽ അധ്യക്ഷത വഹിച്ചു. ഫാ.കിരണ്‍ തൊണ്ടിപ്പറന്പിൽ, സിസ്റ്റർ ആൻസിറ്റ എസ്‌സിവി, ജോർജ് കുപ്പയിൽ, റിൻസി കാഞ്ഞിരത്തിങ്കൽ, ജോസ്ലിൻ കദളിമറ്റം, എവിയ ഷിൻസ്, രാജൻബാബു പാലംമുട്ടിൽ എന്നിവർ പ്രസംഗിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ ഇടവകാംഗങ്ങളെ അനുമോദിച്ചു. കുടുംബ വർഷാഘോഷത്തിന്‍റെ ഭാഗമായി ഇടവകയിലെ മുതിർന്ന കുടുംബാംഗത്തെയും 25 വർഷം പൂർത്തിയാക്കിയ ദന്പതികളെയും വിവിധ മേഖലകളിൽ മികവ് തെളിയിച്ച സമുദായ അംഗങ്ങളെയും ആദരിച്ചു.

യുഡിഎഫ് പ്രതിഷേധ സദസ് നടത്തി

സുൽത്താൻ ബത്തേരി: യുഡിഎഫ് നിയോജകമണ്ഡലം കമ്മിറ്റിയുടെ നേതൃത്വത്തിൽ സ്വതന്ത്രമൈതാനിയിൽ പ്രതിഷേധ സദസ് നടത്തി. സൂംബ നൃത്തവുമായി ബന്ധപ്പെട്ട് സമൂഹമാധ്യമത്തിലൂടെ വർഗീയ പരാമർശം നത്തിയ പ്രാദേശിക സിപിഎം നേതാവിനെ അറസ്റ്റുചെയ്യാത്തതിൽ പ്രതിഷധിച്ചും വർഗീയതയോട് സന്ധിയില്ലെന്ന മുദ്രാവാക്യം ഉയർത്തിയുമായിരുന്നു പരിപാടി. ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്തു. യുഡിഎഫ് നിയോജകമണ്ഡലം കമ്മിറ്റി ചെയർമാൻ ഡി.പി. രാജശേഖരൻ അധ്യക്ഷത വഹിച്ചു. കണ്‍വീനർ അബ്ദുള്ള മാടക്കര, ടി. മുഹമ്മദ്, കെ.എൽ. പൗലോസ്, പി.പി. അയ്യൂബ്, കെ.ഇ. വിനയൻ, ജയന്തി രാജൻ, സി.പി. വർഗീസ്, ഇ.എ. ശങ്കരൻ, ഉമ്മർ കുണ്ടാട്ടിൽ, സി.കെ. ഹാരിഫ്, ബൈജു ഐസക്, എം.എ. അസൈനാർ എന്നിവർ പ്രസംഗിച്ചു.

ലഹരി വിമുക്ത നടവയൽ: വിദ്യാർഥികൾ കടകളിൽ നോട്ടീസ് പതിച്ചു

നടവയൽ: ലഹരിമുക്ത നടവയൽ എന്ന ലക്ഷ്യവുമായി സെന്‍റ് തോമസ് എൽപി സ്കൂളിലെ വിദ്യാർഥികൾ അധ്യാപകരുടെ നേതൃത്വത്തിൽ വ്യാപാര സ്ഥാപനങ്ങളിൽ ബോധവത്കരണം നടത്തി. കടകളിലെ ഭിത്തികളിൽ നോട്ടീസ് പതിച്ചു. ‘ഈ സ്ഥാപനത്തിൽ ലഹരി ഉത്പന്നങ്ങൾ വിൽക്കുന്നില്ല’ എന്ന വാക്യം അടങ്ങുന്നതാണ് നോട്ടീസ്. പ്രധാനാധ്യാപകൻ ബെന്നിയും അധ്യാപകരും നാലാം ക്ലാസിലെ കുട്ടികളുമാണ് കടകൾ കയറിയിറങ്ങിയത്. പിടിഎ പിന്തുണ നൽകി.

വന്യജീവി ശല്യം: സ്വയം പ്രതിരോധത്തിന് ജനങ്ങളെ അനുവദിക്കണമെന്ന് എഎപി

കൽപ്പറ്റ: വന്യജീവി ശല്യത്തിന് പരിഹാരം കാണാൻ സർക്കാരിന് കഴിയുന്നില്ലെങ്കിൽ സ്വയം പ്രതിരോധത്തിന് ജനങ്ങളെ അനുവദിക്കണമെന്ന് ആം ആദ്മി പാർട്ടി ജില്ലാ കമ്മിറ്റി ആവശ്യപ്പെട്ടു. ജില്ലയിൽ ജനവാസകേന്ദ്രങ്ങളിൽ വന്യജീവി ശല്യം വർധിക്കുകയാണ്. ആനയും പുലിയും കടുവയും നാട്ടിലിറങ്ങുന്നതുമൂലം ജനം ഭീതിയിലാണ്. പ്രശ്നപരിഹാരത്തിന് അധികാരികൾ തയാറാകുന്നില്ലെങ്കിൽ ജനത്തിന് തെരുവിൽ ഇറങ്ങേണ്ടിവരുമെന്ന് യോഗം അഭിപ്രായപ്പെട്ടു. പ്രസിഡന്‍റ് ഡോ.എ.ടി. സുരേഷ് അധ്യക്ഷത വഹിച്ചു. സെക്രട്ടറി പോൾസണ്‍ തോമാട്ടുചാൽ, മനു മത്തായി, ബാബു തച്ചറോത്ത്, ഗഫൂർ കോട്ടത്തറ, ഇ.വി. തോമസ്, ഷെറിൻ റോയ് എന്നിവർ പ്രസംഗിച്ചു.

റാഫ് ബത്തേരി മേഖലാ കണ്‍വഷൻ നടത്തി

സുൽത്താൻ ബത്തേരി: റോഡ് ആക്സിഡന്‍റ് ആക്ഷൻ ഫോറം(റാഫ്)മേഖലാ കണ്‍വൻഷനും റോഡ് സുരക്ഷ സമ്മേളനവും വ്യാപാരഭവനിൽ നടത്തി. റാഫ് സംസ്ഥാന പ്രസിഡന്‍റ് ഡോ.കെ.എം. അബ്ദു ഉദ്ഘാടനം ചെയ്തു. കൊല്ലംതോറും നാലായിരത്തിൽപരം ആളുകൾ കൊല്ലപ്പെടുന്നതിനും അരലക്ഷത്തോളം പേർക്ക് ഗുരുതര പരിക്കേൽക്കുന്നതിനും ഇടയാക്കുന്ന വാഹനാപകടങ്ങൾക്ക് തടയിടാൻ ജനകീയ കൂട്ടായ്മയിലൂടെ കഴിയണമെന്ന് അദ്ദേഹം പറഞ്ഞു. ഗതാഗത വികസനത്തിന്‍റെ അസന്തുലിതാവസ്ഥ, ലഹരിവസ്തുക്കളുടെ ഉപയോഗം, അശ്രദ്ധയും അസഹിഷ്ണുതയും മത്സരബുദ്ധിയും കലർന്ന ഡ്രൈവിംഗ്, അമിതവേഗം തുടങ്ങിയവ അപകടങ്ങൾക്ക് കാരണമാണ്. നിയമലംഘനങ്ങൾക്കെതിരേ മുഖം നോക്കാതെ കർശന നടപടി ഉണ്ടാകണം. ’ഒരിറ്റു ശ്രദ്ധ; ഒരുപാടായുസ്’ എന്ന റാഫിന്‍റെ ആപ്തവാക്യത്തിന് ഏറെ പ്രസക്തിയുണ്ടെന്നും ഡോ.അബ്ദു പറഞ്ഞു. റാഫ് ജില്ലാ പ്രസിഡന്‍റ് മുഹമ്മദ് ഫാരിസ് സൈൻ അധ്യക്ഷത വഹിച്ചു. എക്സൈസ് അസി.ഇൻസ്പെക്ടർ കെ.വി. വിജയകുമാർ റോഡ് സുരക്ഷ ലഘുലേഖ പ്രകാശനം ചെയ്തു. പി. രാജറാണി, വൽസല സദാനന്ദൻ, ജില്ല പഞ്ചായത്ത് അംഗം സീത വിജയൻ, കെ.എ. സീനത്ത്, സി. സമീർ, ഇ.പി. ജോസഫുകുട്ടി എന്നിവർ പ്രസംഗിച്ചു. പോലീസ് ഇൻസ്പെക്ടർ ബിൻഷാദ് ക്ലാസെടുത്തു. റാഫ് വയനാട് ജില്ലാ സെക്രട്ടറി സജി മണ്ഡലത്തിൽ സ്വാഗതവും പി.സി. അസൈനാർ നന്ദിയും പറഞ്ഞു.

മിനി എംസിഎഫുകൾ നിറഞ്ഞു; മാലിന്യനിക്ഷേപം റോഡരികിൽ

സുൽത്താൻ ബത്തേരി: നെൻമേനി പഞ്ചായത്തിൽ പാതയോരത്ത് സ്ഥാപിച്ച മിനി എംസിഎഫുകൾ(മെറ്റീരിൽ കളക്ഷൻ ഫെസിലിറ്റി)നിറഞ്ഞു. കോളിയാടി, മാനിവയൽ, കോളിയാടി കോവിലകംചിറ എന്നിവിടങ്ങളിലാണ് എംസിഎഫുകൾ നിറഞ്ഞത്. മാലിന്യം കൃത്യമായി എടുത്തുമാറ്റത്തതാണ് ഇതിനു കാരണം. ചാക്കുകളിൽനിറച്ച മാലിന്യം എംസിഎഫിനു പുറത്താണ് ഇപ്പോൾ നിക്ഷേപിക്കുന്നത്. ചാക്കുകൾ പൊട്ടി മാലിന്യം റോഡിൽ ചിതറുന്നുണ്ട്. ഹരിതകർമസേന പ്രവർത്തകർ വീടുകളിൽനിന്നൂ ശേഖരിക്കുന്ന പ്ലാസ്റ്റിക് അടക്കം അജൈവ മാലിന്യമാണ് എംസിഎഫുകളിൽ നിക്ഷേപിക്കുന്നത്. മാലിന്യം എത്രയുംവേഗം നീക്കം ചെയ്യുമെന്നു പഞ്ചായത്തധികൃതർ അറിയിച്ചു.

വിദ്യാർഥികൾ ശാരീരികക്ഷമത മെച്ചപ്പെടുത്തണം: മന്ത്രി ഒ.ആർ. കേളു

മാനന്തവാടി: വിദ്യാർഥികൾ പഠനത്തിനൊപ്പം ശാരീരികക്ഷമത മെച്ചപ്പെടുത്തുന്നതിലും ശ്രദ്ധ ചെലുത്തണമെന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു. ജിവിഎച്ച്എസ്എസിൽ ഉജ്വലം സമഗ്ര ഗുണമേൻമ വിദ്യാദ്യാസ പദ്ധതിക്കു കീഴിൽ എംഎൽഎ എക്സലൻസ് അവാർഡ് വിതരണവും 1.35 കോടി രൂപ ചെലവഴിച്ച് നിർമിച്ച മൾട്ടി പർപസ് ഓഡിറ്റോറിയത്തിന്‍റെ ഉദ്ഘാടനവും നിർവഹിച്ചു പ്രസംഗിക്കുകയായിരുന്നു അദ്ദേഹം. കുട്ടികൾക്ക് ലഹരിക്കെതിരായ അവബോധം അധ്യാപകരും രക്ഷിതാക്കളും നൽകണമെന്നു മന്ത്രി പറഞ്ഞു. നഗരസഭാ ചെയർപേഴ്സണ്‍ സി.കെ. രത്നവല്ലി അധ്യക്ഷത വഹിച്ചു. ജില്ലാ പോലീസ് മേധാവി തപോഷ് ബസുമതാരി പ്രസംഗിച്ചു. കുട്ടികൾ മൊബൈൽ ഫോണിന് അടിമകളാകരുതെന്നു അദ്ദേഹം പറഞ്ഞു. എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങളിലും എ പ്ലസ് നേടിയവരെയും എൽഎസ്എസ്, എൻഎംഎംഎസ്, യുഎസ്എസ് ജേതാക്കളെയും ആദരിച്ചു. സബ് കളക്ടർ മിസാൽ സാഗർ ഭരത്, മുനിസിപ്പൽ വൈസ് ചെയർമാൻ ജേക്കബ് സെബാസ്റ്റ്യൻ, ജനപ്രതിനിധികളായ സിന്ധു സെബാസ്റ്റ്യൻ, ജസ്റ്റിൻ ബേബി, ഗിരിജ കൃഷ്ണൻ, പി.വി. ബാലകൃഷ്ണൻ, എൽസി ജോയി, സുധി രാധാകൃഷ്ണൻ, അഹമ്മദുകുട്ടി ബ്രാൻ, ജിവിഎച്എസ്എസ് പ്രിൻസിപ്പൽ പി.സി. തോമസ്, ഉപജില്ലാ വിദ്യാഭ്യാസ ഓഫീസർ എം. സുനിൽകുമാർ തുടങ്ങിയവർ പങ്കെടുത്തു.

കാട്ടാനകളെ കുങ്കിയാനകളെ ഉപയോഗിച്ച് തുരത്താൻ മുറവിളി

പുൽപ്പള്ളി: പഞ്ചായത്തിലെ വനാതിർത്തി പ്രദേശങ്ങളായ മൂഴിമല, മരകാവ്, വേലിയന്പം, കാപ്പിക്കുന്ന് പ്രദേശങ്ങളിൽ നിരന്തരം ഇറങ്ങുന്ന കാട്ടാനകളെ കുങ്കിയാനകളെ ഉപയോഗിച്ച് ഉൾവനത്തിലേക്ക് തുരത്തണമെന്ന് നാട്ടുകാർ ആവശ്യപ്പെട്ടു. ഈ പ്രദേശങ്ങൾ പകൽപോലും കാട്ടാനകൾ വിഹാരഭൂമിയാക്കുകയാണ്. നെയ്ക്കുപ്പ വനത്തിൽനിന്ന് രണ്ട് ആനകളാണ് ദിവസവും മൂഴിമലയിലും സമീപപ്രദേശങ്ങളിലും ഇറങ്ങുന്നത്. വലിയ കൃഷിനാശമാണ് ഇവ വരുത്തുന്നത്. സന്ധ്യമയങ്ങിയാൽ ആളുകൾക്കു സുരക്ഷിതമായി വഴിനടക്കാൻ കഴിയാത്ത സ്ഥിതിയാണ്. പടക്കം പൊട്ടിച്ചാലും ഒച്ചയിട്ടാലും ആനകൾക്ക് കൂസലില്ലെന്നു നാട്ടുകാർ പറയുന്നു. രൂക്ഷമായ കാട്ടാനശല്യത്തിനു പരിഹാരം കാണാൻ വനംവകുപ്പ് നടപടി സ്വീകരിക്കുന്നില്ല. പ്രതിരോധ സംവിധാനങ്ങളിലെ അപര്യാപ്തത ആനകൾക്ക് കാടിറക്കത്തിനു സൗകര്യമാകുകയാണ്.

വയനാട് സ്വദേശി കർണാടകയിൽ ബൈക്ക് അപകടത്തിൽ മരിച്ചു

കൽപ്പറ്റ: വയനാട് സ്വദേശി കർണാടകയിൽ ബൈക്ക് അപകടത്തിൽ മരിച്ചു. പിണങ്ങോട് വാഴയിൽ അസ്ലം-റഹ്മത്ത് ദന്പതികളുടെ മകൻ മുഹമ്മദ് റഫാത്താണ്(23)മരിച്ചത്. കർണാടകയിലെ ബേഗൂർ പൊലീസ് സ്റ്റേഷനു സമീപം ലോറിക്ക് പിന്നിൽ ഇടിച്ച് നിയന്ത്രണംവിട്ട ബൈക്ക് എതിർദിശയിൽ വരികയായിരുന്ന കാറിയിൽ ഇടിക്കുകയായിരുന്നു. വിദേശത്തായിരുന്ന മുഹമ്മദ് റഫാത്ത് മൂന്നു ദിവസം മുന്പാണ് നാട്ടിൽ എത്തിയത്. കച്ചവട ആവശ്യത്തിന് മൈസൂരുവിലേക്ക് പോകുകയായിരുന്നു.

പ്ലസ് ടു: പുനർമൂല്യനിർണയത്തിൽ മുഴുവൻ മാർക്കും നേടി തേജ വ്യാസ്

ദ്വാരക: കഴിഞ്ഞ അധ്യയന വർഷത്തെ പ്ലസ് ടു സയൻസ് പരീക്ഷയിൽ 1200ൽ 1200 മാർക്ക് നേടി സേക്രഡ് ഹാർട്ട് ഹയർ സെക്കൻഡറി സ്കൂൾ വിദ്യാർഥിനി തേജ വ്യാസ്. ആദ്യഫലം വന്നപ്പോൾ തേജയ്ക്ക് 1197 മാർക്കാണ് ഉണ്ടായിരുന്നത്. ഫുൾ മാർക്കിന് ഇംഗ്ലീഷിന് രണ്ടും മലയാളത്തിന് ഒന്നും മാർക്കായിരുന്നു കുറവ്. നഷ്ടമായ മൂന്നു മാർക്കും പുനർമൂല്യനിർണയത്തിൽ തേജ കരസ്ഥമാക്കി. ജില്ല വിദ്യാഭ്യാസ ഉപ ഡയറക്ടർ വി.എയ ശശീന്ദ്രവ്യാസിന്േ‍റയും നടവയൽ സെന്‍റ് തോമസ് ഹയർ സെക്കൻഡറി സ്കൂൾ അധ്യാപിക എൻ. റിനിജയുടേയും മകളാണ്.

തരിയോട് സെന്‍റ് മേരീസിൽ ബഷീർ അനുസ്മരണം നടത്തി

തരിയോട്: സെന്‍റ് മേരീസ് യുപി സ്കൂളിൽ വൈക്കം മുഹമ്മദ് ബഷീർ അനുസ്മരണം, ഡോക്യുമെന്‍ററി പ്രദർശനം, വിവിധ ക്ലബുകളുടെ ഉദ്ഘാടനം, ലഹരിവിരുദ്ധ മാഗസിൻ(നവജീവ്)പ്രകാശനം, ലഹരിക്കെതിരേ ഫ്ളാഷ്മോബ്, സംഘഗാനം, കവിതാലാപനം എന്നിവ നടത്തി. റിട്ട.അധ്യാപകൻ സി.കെ. രവീന്ദ്രൻ ഉദ്ഘാടനം ചെയ്തു. മാനേജർ ഫാ.തോമസ് പ്ലാശനാൽ അധ്യക്ഷത വഹിച്ചു. ലിസ്മരിയ വിൻസന്‍റ്, അബ്രിയാന റോസ്, ജനീറ്റ ജോഷി, സീനിയർ അസിസ്റ്റന്‍റ് എ.ജെ. റോസ എന്നിവർ പ്രസംഗിച്ചു. ഹെഡ്മാസ്റ്റർ സജി ജോണ്‍ സ്വാഗതവും എസ്ആർജി കണ്‍വീനർ സോഫിയ ജയിംസ് നന്ദിയും പറഞ്ഞു.

സെന്‍റ് തോമസ് ദിനം ആഘോഷിച്ചു

ചെറുകാട്ടൂർ: സെന്‍റ് സെബാസ്റ്റ്യൻസ് ഇടവകയിൽ സെന്‍റ് തോമസ് ദിനം ആഘോഷിച്ചു. സഭാ ദിനാഘോഷവും ഇതോടൊന്നിച്ചു നടത്തി. വികാരി ഫാ.ജോസ് കപ്യാരുമലയിൽ ഉദ്ഘാടനം ചെയ്തു. ഇടവക ട്രസ്റ്റി സെബാസ്റ്റ്യൻ ഇടയകൊണ്ടാട്ട് അധ്യക്ഷത വഹിച്ചു. ഫാ.അമൽ മന്ത്രിക്കൽ, ജോർജ്, കുര്യൻ കാരക്കുന്നേൽ, അനീഷ് കുളത്തിങ്കിൽ, ജോർജ് തെക്കേതൊട്ടിയിൽ, എം.എം. സണ്ണി, ജോർജ് ഉൗരാശേരി, സണ്ണി ചെറുകാട്ട്, സിസ്റ്റർ ട്രീന എംഎസ്ജെ, സിസ്റ്റർ ലിറ്റി എസ്ജഐൽ എന്നിവർ പ്രസംഗിച്ചു. 1951 മുതൽ 2025 വരെ ദേവലയത്തിലെ ഗായകസംഘത്തിൽ പ്രവർത്തിച്ചിരുന്നവരെ ആദരിച്ചു. ചെറുപുഷപ മിഷൻ ലീഗിന്‍റെയും മതബോധന സംഘടനകളുടെയും നേതൃത്വത്തിൽ കലാപരിപാടികൾ അവതരിപ്പിച്ചു. ഇടവകയിലെ എല്ലാ കുടുബങ്ങൾക്കും പ്ലാറ്റിനം ജൂബിലി ഓർമയ്ക്ക് വൃഷത്തൈ വിതരണം ചെയ്തു. മതബോധന ക്ലാസുകളിൽ എല്ലാ ദിവസവും പങ്കെടുത്തവർക്കും പരീക്ഷകളിൽ മികച്ച വിജയം നേടിയവർക്കും സമ്മാനം നൽകി. രഞ്ജിത്ത് മുതുപ്ലാക്കൽ, പ്രമോദ് മുള്ളൻമടയ്ക്കൽ, ബിനീഷ് തുന്പിയാംകുഴി, ടീന കുളത്തിങ്കൽ, ആൽബിൻ കുഴിമുള്ളിൽ, മതബോധന അധ്യാപകർ, ജൂബിലി കമ്മിറ്റി അംഗങ്ങൾ, ചെറുപുഷ്പ മിഷൻ ലീഗ് ഭാരവാഹികൾ എന്നിവർ നേതൃത്വം നൽകി.

വിദ്യാഭ്യാസ-ആരോഗ്യ മേഖലകളിലെ വനിതാ മുന്നേറ്റം മാതൃക: മന്ത്രി ഒ.ആർ. കേളു

മാനന്തവാടി: സംസ്ഥാനത്ത് സ്ത്രീസുരക്ഷ, വിദ്യാഭ്യാസം, ആരോഗ്യം എന്നീ മേഖലകളിലെ വനിതാ മുന്നേറ്റം മാതൃകയാണെന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു. സംസ്ഥാന വനിതാ കമ്മീഷൻ ബ്ലോക്ക് പഞ്ചായത്തുമായി സഹകരിച്ച് ഗ്രീൻസ് റസിഡൻസിയിൽ സംഘടിപ്പിച്ച സംസ്ഥാനതല സെമിനാർ ഉദ്ഘാടനം ചെയ്യുകയായിരുന്നു അദ്ദേഹം. സ്ത്രീകൾക്ക് തുല്യ അവകാശവും അവസരവും ഒരുക്കുന്നതിൽ കേരളം ഒന്നാമതാണ്. പെണ്‍കുട്ടികളെ അടുക്കളയിൽനിന്നു വിദ്യാലയങ്ങളിലേക്കും തൊഴിലിടങ്ങളിലേക്കും എത്തിച്ചതിനു പിന്നിൽ പ്രക്ഷോഭങ്ങളുടെ വലിയ ചരിത്രം തന്നെയുണ്ട്. സ്ത്രീകളുടെ ജീവിതാവസ്ഥ മെച്ചപ്പെടുത്താൻ നവോഥാന പ്രസ്ഥാനങ്ങളും തൊഴിലാളി മുന്നേറ്റങ്ങളും കാരണമായിട്ടുണ്ട്. പുരുഷന് തുല്യമായി സമൂഹത്തിൽ വനിതകൾക്ക് അവസരങ്ങൾ സാധ്യമാക്കുകയാണ് സർക്കാർ ലക്ഷ്യമെന്നു മന്ത്രി പറഞ്ഞു. വനിതാ കമ്മീഷൻ അംഗം അഡ്വ.പി. കുഞ്ഞായിഷ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, എടവക, തവിഞ്ഞാൽ പഞ്ചായത്ത് പ്രസിഡന്‍റുമാരായ അഹമ്മദുകുട്ടി ബ്രാൻ, എൽസി ജോയ്, ബ്ലോക്ക് പഞ്ചായത്ത് വൈസ് പ്രസിഡന്‍റ് എ.കെ. ജയഭാരതി, വനിതാ കമ്മീഷൻ പബ്ലിക് റിലേഷൻസ് ഓഫീസർ എസ്. സന്തോഷ് കുമാർ എന്നിവർ പ്രസംഗിച്ചു. സ്ത്രീപക്ഷ കാഴ്ചപ്പാട്, സൈബർ ലഹരി വീട്ടിടങ്ങളിൽ എന്നീ വിഷയങ്ങൾ യഥാക്രമം അനിൽകുമാർ ആലാത്തുപറന്പും രാധാകൃഷ്ണൻ കാവുംന്പായിയും അവതരിപ്പിച്ചു.

മുഴുവൻ കാറ്ററിംഗ് സ്ഥാപനങ്ങൾക്കും ഫുഡ് സേഫ്റ്റി ലൈസൻസ് നിർബന്ധമാക്കണമെന്ന്

കൽപ്പറ്റ: കുടുംബശ്രീയുടേതടക്കം മുഴുവൻ കാറ്ററിംഗ് സ്ഥാപനങ്ങൾക്കും ഫുഡ്സേഫ്റ്റി ലൈസൻസ് നിർബന്ധമാക്കണമെന്ന് ഓൾ കേരള കാറ്ററേഴ്സ് അസോസിയേഷൻ(എകെസിഎ) ജില്ലാ പ്രസിഡന്‍റ് സി.എൻ. ചന്ദ്രൻ, വൈസ് പ്രസിഡന്‍റ് സുജേഷ് ചന്ദ്രൻ, സെക്രട്ടറി കെ.സി. ജയൻ, ട്രഷറർ വിജു വർഗീസ്, പി.വി. ജിനു, ജിസ്മോൻ സൈമണ്‍, ജോബി ജോണ്‍ എന്നിവർ വാർത്താസമ്മേളനത്തിൽ ആവശ്യപ്പെട്ടു. ആവശ്യമായ ലൈസൻസുകളോടെ ജില്ലയിൽ 50 ഓളം കാറ്ററിംഗ് സ്ഥാപനങ്ങൾ പ്രവർത്തിക്കുന്നുണ്ട്. അനധികൃത കാറ്ററിംഗ് യൂണിറ്റുകളുടെ എണ്ണം ഇതിന്‍റെ ഇരട്ടിയിലധികം വരും. ലൈസൻസുകൾ ഇല്ലാത കാറ്ററിംഗ് സ്ഥാപനങ്ങൾ പ്രവർത്തിക്കുന്നത് അധികാരികൾ ഗൗരവത്തോടെ കാണണം. സംസ്ഥാനത്ത് ഒരു വർഷം ഒരു കോടി തൊഴിലവസരങ്ങൾ സൃഷ്ടിക്കുന്ന അംഗീകൃത കാറ്ററിംഗ് മേഖല പ്രതിസന്ധിയിലാണ്. അനധികൃത സ്ഥാപനങ്ങളുടെ ആധിക്യം, നിത്യോപയോഗസാധനങ്ങളുടെ വിലക്കയറ്റം, പെട്രോളിയം ഉത്പന്നങ്ങളുടെ വിലവർധന എന്നിവ പ്രതിസന്ധിക്ക് മുഖ്യ കാരണങ്ങളാണ്. കാറ്ററിംഗ് മേഖലയിലെ പ്രശ്നങ്ങൾക്ക് പരിഹാരം തേടി അസോസിയേഷൻ സംസ്ഥാന കമ്മിറ്റി എട്ടിന് നടത്തുന്ന സെക്രട്ടേറിയറ്റ് മാർച്ചിൽ ജില്ലയിൽനിന്നു കാറ്ററിംഗ് സ്ഥാപന ഉടമകളും തൊഴിലാളികളും അടക്കം 100 ഓളം പേർ പങ്കെടക്കും. ജില്ലാതല സമരപ്രഖ്യാപന കണ്‍വൻഷൻ സംസ്ഥാന സെക്രട്ടറി മാത്യു പൂവേലിന്‍റെ സാന്നിധ്യത്തിൽ പുൽപ്പള്ളിയിൽ നടത്തി. ജില്ലാ സമ്മേളനം ഓഗസ്റ്റ് നാലിന് കൽപ്പറ്റയിൽ ചേരുമെന്നും അസോസിയേഷൻ ഭാരവാഹികൾ പറഞ്ഞു.

വനമഹോത്സവം: ജില്ലാതല ഉദ്ഘാടനം

കൽപ്പറ്റ: സാമൂഹിക വനവത്കരണ വിഭാഗത്തിന്‍റെ നേതൃത്വത്തിൽ നടത്തുന്ന വനമഹോത്സവത്തിന്‍റെ ജില്ലാതല ഉദ്ഘാടനം മുണ്ടേരി ജിവിഎച്ച്എസ്എസിൽ മുനിസിപ്പൽ ചെയർമാൻ ടി.ജെ. ഐസക് നിർവഹിച്ചു. വയനാട് സോഷ്യൽ ഫോറസ്ട്രി ഡിവിഷന്‍റെ ബ്രോഷർ അദ്ദേഹം പ്രകാശനം ചെയ്തു. സോഷ്യൽ ഫോറസ്ട്രി നോർത്തേണ്‍ റീജിയണ്‍ കണ്‍സർവേറ്റർ ആർ. കീർത്തി അധ്യക്ഷത വഹിച്ചു. വനമിത്ര അവാർഡ് ജേതാവ് ശശീന്ദ്രനെ ആദരിച്ചു. സോഷ്യൽ ഫോറസ്ട്രി അസിസ്റ്റന്‍റ് കണ്‍സർവേറ്റർ എം.ടി. ഹരിലാൽ, മുനിസിപ്പൽ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സി.കെ. ശിവരാമൻ, പ്രിൻസിപ്പൽ ടി.എൻ. സജീവ് കുമാർ, മാനന്തവാടി സോഷ്യൽ ഫോറസ്ട്രി റേഞ്ച് ഓഫീസർ പി. സുനിൽ, ബ്ലോക്ക് ഹരിതസമിതി ചെയർമാൻ മനോജ്കുമാർ, പ്രധാനാധ്യാപിക എം. സൽമ, കൽപ്പറ്റ സോഷ്യൽ ഫോറസ്ട്രി റേഞ്ച് ഓഫീസർ എം.പി. സജീവ് എന്നിവർ പ്രസംഗിച്ചു.

റോഡുകളുടെ ശോച്യാവസ്ഥ പരിഹരിക്കണമെന്ന്

മുള്ളൻകൊല്ലി: മേഖലയിലെ പൊതുമരാമത്ത് റോഡുകളുടെ ശോച്യാവസ്ഥ പരിഹരിക്കണമെന്ന് പഞ്ചായത്ത് പ്രസിഡന്‍റ് പി.കെ. വിജയൻ ആവശ്യപ്പെട്ടു. വണ്ടിക്കടവ്, കൊളവള്ളി, ചാമപ്പാറ പ്രദേശങ്ങളെ പുൽപ്പള്ളിയുമായി ബന്ധിപ്പിക്കുന്ന പ്രാധാന റോഡുകൾ സഞ്ചാരയോഗ്യമല്ലാതായി. മാടപ്പള്ളിക്കുന്ന്-ചാമപ്പാറ റോഡിൽ ഇന്‍റർലോക്കുകൾ അടർന്നുമാറി ഗർത്തങ്ങൾ രൂപപ്പെട്ടു. ചാമപ്പപ്പാറ-കൊളവള്ളി റോഡിന്‍റെ അവസ്ഥയും പരിതാപകരമാണ്. റോഡുകളിലെ ചളിയും വെള്ളവും നിറഞ്ഞ കുഴികളിൽ ചാടി വാഹനങ്ങൾ അപകടത്തിൽപ്പെടുന്നത് തുടർക്കഥയാണ്. തകർന്ന റോഡുകളിലൂടെയുള്ള സർവീസ് നിർത്തിവയ്ക്കാനുള്ള നീക്കത്തിലാണ് സ്വകാര്യ ബസ് ഉടമകൾ. തകർന്ന റോഡുകളിൽ അറ്റകുറ്റപ്പണി നടത്തണമെന്ന് പലതവണ ആവശ്യപ്പെട്ടെങ്കിലും പൊതുമരാമത്ത് വകുപ്പ് അധികാരികൾ നടപടി സ്വീകരിക്കുന്നില്ല. ഈ സ്ഥിതി തുടർന്നാൽ ശക്തമായ പ്രക്ഷോഭത്തിന് പഞ്ചായത്ത് നേതൃത്വം നൽകുമെന്നും പ്രസിഡന്‍റ് പറഞ്ഞു.

മാനന്തവാടി മിനി സിവിൽ സ്റ്റേഷൻ: പുതിയ കെട്ടിടത്തിന്‍റെ പ്രവൃത്തി ഉടൻ

മാനന്തവാടി: മിനി സിവിൽ സ്റ്റേഷന് അനുവദിച്ച ഏഴ്നിലക്കെട്ടിടത്തിന്‍റെ പ്രവൃത്തി ഉടൻ തുടങ്ങുമെന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു. മാനന്തവാടി താലൂക്ക്, വില്ലേജ് ഓഫീസുകളിലേക്ക് എംഎൽഎയുടെ പ്രത്യേക വികസന നിധിയിൽനിന്നു അനുവദിച്ച 10 ലക്ഷം രൂപ വിനിയോഗിച്ചു വാങ്ങിയ 16 കംപ്യൂട്ടറുകളുടെയും അഞ്ച് പ്രിന്‍ററുകളുടെയും വിതരണം നിർവഹിച്ച് സംസാരിക്കുകയായിരുന്നു മന്ത്രി. കെട്ടിടത്തിന്‍റെ ടെൻഡർ നടപടികൾ പൂർത്തിയായതായി മന്ത്രി പറഞ്ഞു. താലൂക്ക് കോണ്‍ഫറൻസ് ഹാളിൽ നടന്ന പരിപാടിയിൽ മുനിസിപ്പൽ ചെയർപേഴ്സണ്‍ സി.കെ. രത്നവല്ലി അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, തഹസിൽദാർമാരായ എം.ജെ. അഗസ്റ്റിൻ, പി.യു. സിത്താര, ജില്ലാ പഞ്ചായത്തംഗങ്ങളായ കെ. വിജയൻ, മീനാക്ഷി രാമൻ, എ.എം. സുശീല, കൗണ്‍സിലർമാരായ വിവിൻ വേണുഗോപാൽ, പി.വി. ജോർജ്, മുഹമ്മദ് ആസിഫ് തുടങ്ങിയവർ പങ്കെടുത്തു.

ജില്ലയിൽ ചൊവ്വാഴ്ച സ്വകാര്യ ബസുകൾ ഓടില്ല

സുൽത്താൻ ബത്തേരി: അശാസ്ത്രീയ ഗതാഗതനയം തിരുത്തണമെന്നതടക്കം ആവശ്യങ്ങളോടുള്ള സർക്കാരിന്‍റെ നിഷേധാത്മക നിലപാടിൽ പ്രതിഷേധിച്ച് ചൊവ്വാഴ്ച ജില്ലയിലെ മുഴുവൻ സ്വകാര്യ ബസുകളും സർവീസ് നിർത്തിവയ്ക്കും. കാലങ്ങളായി ദീർഘദൂര സർവീസ് നടത്തുന്ന ബസുകളുടെ പെർമിറ്റ് യഥാസമയം പുതുക്കുക, കണ്‍സഷൻ അർഹതയുള്ള വിദ്യാർഥികൾക്കു മാത്രമായി പരിമിതപ്പെടുത്തുക, വിദ്യാർഥികളുടെ യാത്രാനിരക്ക് കാലോചിതമാക്കുക, ബസ് തൊഴിലാളികൾക്ക് പോലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കിയത് പിൻവലിക്കുക, ഇ ചലാൻ വഴി പിഴ ചുമത്തുന്നത് അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ച് സംസ്ഥാന വ്യാപകമായി നടത്തുന്ന പ്രക്ഷോഭത്തിന്‍റെ ഭാഗമായാണ് പണിമുടക്കെന്ന് സംയുക്ത സമരസമിതി ജില്ലാ ചെയർമാൻ പി.കെ. ഹരിദാസ്, കണ്‍വീനർ കെ.വി. പൗലോസ്, ജോർജ് പുൽപ്പാറ, ടി.എൻ. സുരേന്ദ്രൻ, സദാശിവൻ, എൽദോ, ജോസ് തണ്ണിക്കോടൻ, ടി.എൻ. ശിവൻ എന്നിവർ വാർത്താസമ്മേളനത്തിൽ അറിയിച്ചു. സർക്കാരിന്‍റെ അശാസ്ത്രീയ ഗതാഗതനയം മൂലം സംസ്ഥാനത്ത് സ്വകാര്യ ബസ് വ്യവസായം നശിക്കുകയാണ്. 15 വർഷം മുന്പുവരെ 34,000 സ്വകാര്യ ബസുകളാണ് സംസ്ഥാനത്ത്് ഉണ്ടായിരുന്നത്. നിലവിൽ ഇത് 8,000ൽ താഴെയാണ്. സ്വകാര്യ ബസ് വ്യവസായത്തെസംരക്ഷിക്കുന്നതിന് നൽകിയ നിവേദനങ്ങളെ സർക്കാർ അവഗണിക്കുകയാണ്. പ്രശ്നത്തിന് പരിഹാരം കണ്ടില്ലെങ്കിൽ 22 മുതൽ അനിശ്ചിതകാലം സർവീസ് നിർത്തിവയ്ക്കുമെന്നും സമിതി ഭാരവാഹികൾ പറഞ്ഞു.

മണ്ഡല പുനർനിർണയം; ബിജെപിയുടെ ഗൂഢതാത്പര്യമെന്ന് കെ. പ്രകാശ്ബാബു

സുൽത്താൻ ബത്തേരി: മണ്ഡല പുനർനിർണയത്തിനു പിന്നിൽ ബിജെപിയുടെ ഗൂഢതാത്പര്യമാണെന്ന് സിപിഐ ദേശീയ എക്സിക്യുട്ടീവ് കമ്മിറ്റി അംഗം അഡ്വ.കെ. പ്രകാശ് ബാബു. ചീരാലിൽ സിപിഐ ജില്ലാ സമ്മേളനത്തിന്‍റെ ഭാഗമായ പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ലോക്സഭയിൽ ഭാവിയിൽ ബിജെപിക്ക് കൃത്രിമ ഭൂരിപക്ഷം ഉണ്ടാക്കാനുള്ള തന്ത്രത്തിന്‍റെ ഭാഗമാണ് മണ്ഡല പുനർനിർണയം. നക്സൽ വിമുക്ത രാജ്യം എന്ന മുദ്രാവാക്യം ഇന്ത്യയെ കമ്മ്യൂണിസ്റ്റുമുക്ത രാഷ്ട്രമാക്കാനുളള നീക്കത്തിന്‍റെ തുടക്കമാണ്. ഇതിനെതിരേ എല്ലാ ജനാധിപത്യ ശക്തികളും രംഗത്തുവരണം. കേരളത്തിന്‍റെ ബദൽ രാഷ്ട്രീയത്തെ തകർക്കുക ബിജെപി അജൻഡയാണ്. ഭരണഘടനാസംരക്ഷണം പാർട്ടിയുടെ ഉത്തരവാദിത്തമാണെന്നും അഡ്വ.പ്രകാശ്ബാബു പറഞ്ഞു. ടി.ജെ. ചാക്കോച്ചൻ, നിഖിൽ പദ്മനാഭൻ, എം. വിജയലക്ഷ്മി എന്നിവരടങ്ങുന്ന പ്രസീഡിയം സമ്മേളനം നിയന്ത്രിച്ചു. സംസ്ഥാന അസിസ്റ്റന്‍റ് സെക്രട്ടറി പി.പി. സുനീർ എംപി, സംസ്ഥാന എക്സിക്യുട്ടീവ് കമ്മിറ്റി അംഗങ്ങളായ അഡ്വ.എൻ. രാജൻ, മന്ത്രി കെ. രാജൻ, വി. ചാമുണ്ണി എന്നിവർ പ്രസംഗിച്ചു. സ്വാഗതസംഘം കണ്‍വീനർ സജി വർഗീസ് സ്വാഗതം പറഞ്ഞു. സാംസ്കാരിക സമ്മേളനം സംസ്ഥാന എക്സിക്യുട്ടീവ് കമ്മിറ്റി അംഗം ടി.വി. ബാലൻ ഉദ്ഘാടനം ചെയ്തു. അജിത് കോളാടി മുഖ്യപ്രഭാഷണം നടത്തി. സമ്മേളനം ഇന്ന് സമാപിക്കും.

കോണ്‍ഗ്രസ് പ്രവർത്തകർ പ്രകടനം നടത്തി

സുൽത്താൻ ബത്തേരി: കോട്ടയം മെഡിക്കൽ കോളജ് ആശുപത്രി കെട്ടിടത്തിന്‍റെ ശുചിമുറി ഭാഗം തകർന്ന് വീട്ടമ്മ മരിച്ചതിന്‍റെ ഉത്തരവാദിത്തം ഏറ്റെടുത്ത് ആരോഗ്യമന്ത്രി വീണാ ജോർജ് രാജിവയ്ക്കണമെന്ന് ആവശ്യപ്പെട്ട് മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിൽ ടൗണിൽ പ്രകടനവും പ്രതിഷേധ സദസും നടത്തി. ഉമ്മർ കുണ്ടാട്ടിൽ ഉദ്ഘാടനം ചെയ്തു. മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് അഡ്വ.സതീഷ് പൂതിക്കാട് അധ്യക്ഷത വഹിച്ചു. നേതാക്കളായ ലയണൽ മാത്യു, ബാബു പഴുപ്പത്തൂർ, യൂനുസ് അലി, ടി.എൽ. സാബു, സഫീർ പഴേരി, ജോയി തേലക്കാട്, അസീസ് മാടാല, വൈ. രഞ്ജിത്ത്, ഹാരിസ് കല്ലുവയൽ, പ്രേംസുന്ദർ, ബേബി മൂഞ്ഞനാനിൽ, ശിവദാസൻ മന്ദംകൊല്ലി, ശശി കിടങ്ങിൽ, ജയരാജ് കുപ്പാടി എന്നിവർ പ്രസംഗിച്ചു. മാനന്തവാടി: ടൗണിൽ കോണ്‍ഗ്രസ് മണ്ഡലം കമ്മിറ്റിയുടെ നേതൃത്വത്തിൽ പ്രകടനവും യോഗവും നടത്തി. പി.വി. ജോർജ്, എ.എം. നിശാന്ത്, ഷിബു കെ. ജോർജ്, ജേക്കബ് സെബാസ്റ്റ്യൻ, തോമസ് കൂട്ടുങ്കൽ, ഗിരിജ മോഹൻദാസ്, ലേഖ രാജീവൻ, ബിനീഷ് കുഴിനിലം, വി.യു. ജോയ് ബാബു പുളിക്കൻ തുടങ്ങിയവർ പ്രകടനത്തിനു നേതൃത്വം നൽകി. യോഗത്തിൽ എ. സുനിൽകുമാർ അധ്യക്ഷത വഹിച്ചു.

മാനന്തവാടിയിൽ യൂത്ത് കോണ്‍ഗ്രസ് മാർച്ചിൽ സംഘർഷം

മാനന്തവാടി: ആരോഗ്യമന്ത്രി വീണാ ജോർജിന്‍റെ രാജി ആവശ്യപ്പെട്ട് യൂത്ത് കോണ്‍ഗ്രസ് ജില്ലാ കമ്മിറ്റി നടത്തിയ ഡിഎംഒ ഓഫീസ് മാർച്ചിൽ സംഘർഷം. ബാരിക്കേഡ് മറികടന്ന് ഡിഎംഒ ഓഫീസിനു മുന്പിൽ യൂത്ത് കോണ്‍ഗ്രസ് പ്രവർത്തകർ റീത്ത് വച്ചു. യൂത്ത് കോണ്‍ഗ്രസ് പ്രവർത്തകരും പോലീസും തമ്മിൽ ഉന്തും തള്ളും നടന്നു. രാവിലെ 11.30 ഓടെ ബ്ലോക്ക് കോണ്‍ഗ്രസ് കമ്മിറ്റി ഓഫീസ് പരിസരത്ത് ആരംഭിച്ച മാർച്ച് ഡിഎംഒ ഓഫീസിനു കുറച്ചകലെ പോലീസ് തടഞ്ഞു. ഇതേത്തുടർന്നു പോലീസുമായുണ്ടായ സംഘർഷത്തിനിടെയാണ് പ്രവർത്തകർ ബാരിക്കേഡ് മറികടന്ന് ഡിഎംഒയുടെ കാര്യാലയ വളപ്പിൽ പ്രവേശിച്ചത്. മാർച്ച് കെപിസിസി അംഗം കെ.ഇ. വിനയൻ ഉദ്ഘാടനം ചെയ്തു. യൂത്ത് കോണ്‍ഗ്രസ് ജില്ലാ പ്രസിഡന്‍റ് അമൽ ജോയ് അധ്യക്ഷത വഹിച്ചു. സംസ്ഥാന സെക്രട്ടറിമാരായ അജ്മൽ വെള്ളമുണ്ട, അഡ്വ.ലയണൽ മാത്യു, ജിജോ പൊടിമറ്റത്തിൽ, നിയോജകമണ്ഡലം പ്രസിഡന്‍റ് അസിസ് വാളാട്, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് എ.എം. നിശാന്ത് എന്നിവർ പ്രസംഗിച്ചു. ഹർഷൽ കോന്നാടൻ, ശ്രീജിത്ത് കുപ്പാടിത്തറ, നിത കേളു, മനാഫ് ഉപ്പി, ജിബിൻ മന്പള്ളി, ജിജി വർഗീസ്, ബിൻഷാദ് കെ. ബഷീർ, ജിനു കോളിയാടി, അനീഷ് മിനങ്ങാടി, ഡിന്േ‍റാ ജോസ്, ഷക്കീർ പുനത്തിൽ തുടങ്ങിയവർ നേതൃത്വം നൽകി.

സിപിഎം കേണിച്ചിറ ലോക്കലിൽ കലഹം മുറുകുന്നു

ഏരിയ നേതൃത്വം പൂട്ടിയ ഓഫീസ് ലോക്കലിലെ ഒരു വിഭാഗം കുത്തിത്തുറന്നു കൽപ്പറ്റ: പുൽപ്പള്ളി ഏരിയ കമ്മിറ്റി അംഗം എ.വി. ജയനെ തരംതാഴ്ത്തിയതിനു പിന്നാലെ സിപിഎം പൂതാടി ലോക്കലിൽ കലഹത്തിന് മുറുക്കം. വെള്ളിയാഴ്ച ലോക്കൽ സെക്രട്ടറി ജിഷ്ണു ഷാജിയിൽനിന്നു താക്കോൽ വാങ്ങി ഏരിയ നേതൃത്വം പൂട്ടിയ ഓഫീസ് ഇന്നലെ രാവിലെ ലോക്കലിലെ ഒരു വിഭാഗം താഴ് തകർത്ത് തുറന്നു. കർഷക സംഘം ജില്ലാ പ്രസിഡന്‍റുമായ ജയനെതിരായ നടപടി അനുചിതവും അനാവശ്യവുമാണെന്നു കരുതുന്ന പാർട്ടി പ്രവർത്തകരിൽ ഒരു വിഭാഗമാണ് ഏരിയ നേതൃത്വം പൂട്ടിയ ഓഫീസ് തുറന്ന് അകത്തുകയറിയത്. ഇത് പാർട്ടി ഏരിയ, ജില്ലാ നേതൃത്വത്തെ വെട്ടിലാക്കി. 2019ൽ നടത്തിയതായി പറയുന്ന സാന്പത്തിക ക്രമക്കേടുകളുടെ പേരിൽ ജയനെ പാർട്ടിയിലെ എല്ലാ സ്ഥാനങ്ങളിൽനിന്നും നീക്കാൻ ജൂണ്‍ 10ന് ചേർന്ന ഏരിയ കമ്മിറ്റി യോഗമാണ് തീരുമാനിച്ചത്. തീരുമാനം ഏരിയ കമ്മിറ്റി ജില്ലാ കമ്മിറ്റിയുടെ അംഗീകാരത്തിന് വിട്ടതിനു പിന്നാലെ ജയൻ അപ്പീൽ നൽകി. ഇതു പരിഗണിച്ച ജില്ലാ കമ്മിറ്റി ജയനെ ലോക്കൽ കമ്മിറ്റിയിലേക്ക് തരംതാഴ്ത്താനാണ് തീരുമാനിച്ചത്. പാർട്ടി ജില്ലാ, ഏരിയ കമ്മിറ്റികളിലെ ഒരു വിഭാഗം നടത്തിയ ആസൂത്രിത നീക്കത്തിന്‍റെ ഭാഗമാണ് ജയനെതിരായ നടപടിയെന്നു കരുതുന്നവരുണ്ട്. മാരക രോഗം ബാധിച്ച യുവാവിന്‍റെ ചികിത്സയ്ക്ക് ജയന്‍റെ നേതൃത്വത്തിൽ ധനസമാഹരണം നടത്തിയിരുന്നു. സമാഹരിച്ച തുക യുവാവിന്‍റെ കുടുംബത്തിനു കൈമാറി. ചികിത്സയ്ക്കിടെ യുവാവ് മരണപ്പെട്ടതിനെത്തുടർന്ന് കുടുംബം അക്കൗണ്ടിൽ ബാക്കിയുണ്ടായിരുന്ന തുക ചികിത്സാ സഹായ കമ്മിറ്റിയെ ഏൽപ്പിച്ചു. പിന്നീട് സിപിഎം നെല്ലിക്കര ബ്രാഞ്ച് കമ്മിറ്റി ഓഫീസ് നിർമാണത്തിനു ഭൂമി വാങ്ങുന്നതിന് പണം ആവശ്യമായിവന്നു. പ്രദേശത്തെ പാർട്ടി പ്രവർത്തകരിൽ ഭൂരിഭാഗവും ആവശ്യപ്പെട്ടതിനെത്തുടർന്ന് ചികിത്സാസഹായനിധിയിൽ ബാക്കിയുണ്ടായിരുന്ന തുകയിയിൽ ഒരു ഭാഗം നെല്ലിക്കര ബ്രാഞ്ച് സെക്രട്ടറിക്ക് ചെക്ക് മുഖേന വായ്പ നൽകി. ഈ തുക ഒരു വർഷത്തിനുശേഷം നെല്ലിക്കര ബ്രാഞ്ച് സെക്രട്ടറി തിരികെ ലഭ്യമാക്കി. ജയനെതിരേ സാന്പത്തിക ക്രമക്കേട് ആരോപിച്ച് 2024 നവംബർ 24നാണ് ഏരിയ കമ്മിറ്റിയിൽ പരാതി എത്തിയത്. പാർട്ടി പ്രവർത്തകൻ സജിമോനായിരുന്നു പരാതിക്കാരൻ. ജയൻ സിപിഎം ജില്ലാ കമ്മിറ്റിയിൽ എത്തുന്നത് തടയുന്നതിനുള്ള നീക്കത്തിന്‍റെ ഭാഗമായിരുന്നു ഈ പരാതിയെന്ന് അടക്കം പറയുന്നവർ പുൽപ്പള്ളി ഏരിയ, കേണിച്ചിറ ലോക്കൽ കമ്മിറ്റികളിലുണ്ട്. നവംബർ 27, 28 തീയതികളിൽ പുൽപ്പള്ളി ചെറ്റപ്പാലത്തായിരുന്നു ഏരിയ സമ്മേളനം. ജയനെതിരായ ആരോപണം സമ്മേളനത്തിൽ ചർച്ചയ്ക്കുവന്നു. ആരോപണം അന്വേഷിക്കുന്നതിന് ജനുവരിയിൽ ഏരിയ കമ്മിറ്റി പി.ജെ. പൗലോസ്, ബിന്ദു പ്രകാശ്, ഇ.കെ. രാഘവൻ എന്നിവരടങ്ങിയ സമിതിയെ നിയോഗിച്ചു. സമിതി ജൂണ്‍ പത്തിന് അന്വേഷണ റിപ്പോർട്ട് സമർപ്പിച്ചു. സാന്പത്തിക ഇടപാടുകളിൽ ജയൻ വ്യക്തിപരമായി കുറ്റക്കാരനല്ലെന്നും എന്നാൽ നടപടിക്രമങ്ങൾ പാലിക്കുന്നതിൽ വീഴ്ച ഉണ്ടായെന്നുമായിരുന്നു റിപ്പോർട്ടിൽ. അതേദിവസം ചേർന്ന ഏരിയ കമ്മിറ്റി യോഗത്തിലായിരുന്നു ജയനെ പാർട്ടി സ്ഥാനങ്ങളിൽനിന്നു നീക്കാനുള്ള തീരുമാനം. അതിനിടെ, ജയനെതിരേ സിപിഎം ഏരിയ കമ്മിറ്റി സ്വീകരിച്ച അച്ചടക്കനടപടിയിൽ വിശദീകരണവുമായി ജില്ലാ കമ്മിറ്റി രംഗത്തുവന്നു. ജീവകാരുണ്യപ്രവർത്തനത്തിനു സ്വരൂപിക്കുന്ന പണം ഇതര ആവശ്യങ്ങൾക്ക് ഉപയോഗിക്കുന്നത് അങ്ങേയറ്റം തെറ്റായ നടപടിയാണെന്നു വിശദീകരണക്കുറിപ്പിൽ പറയുന്നു. ചികിത്സാസഹായത്തിനു സമാഹരിച്ച പണം പൂർണമായും കുടുംബത്തിന് കൈമാറുന്നതിൽ ജയന് സംഭവിച്ച വീഴ്ചയുടെ അടിസ്ഥാനത്തിൽ തെറ്റുതിരുത്തൽ നടപടിയുടെ ഭാഗമായാണ് ജയനെ ലോക്കൽ കമ്മിറ്റിയിലേക്ക് തരംതാഴ്ത്തിയത്. പരാതി അന്വേഷിച്ചതും നടപടി സ്വീകരിച്ചതും ഏരിയ കമ്മിറ്റിയാണെന്നും കുറിപ്പിൽ പറയുന്നു. ജയനെതിരായ നടപടിയെ കേണിച്ചിറ ലോക്കലിലെ ഒരു വിഭാഗം അതീവ ഗൗരവത്തോടെയാണ് കാണുന്നത്. അങ്ങനെ സറണ്ടർ ചെയ്യാൻ തീരുമാനിച്ചിട്ടില്ലെന്ന് കേണിച്ചിറയിലെ സിപിഎം പ്രവർത്തകരിൽ ഒരാൾ പറഞ്ഞു.

യുഡിഎഫ് പ്രതിഷേധ സദസ് ഇന്ന്

സുൽത്താൻ ബത്തേരി: യുഡിഎഫ് ഇന്നു വൈകുന്നേരം നാലിന് നഗരത്തിൽ പ്രതിഷേധ സദസ് നടത്തും. ഫേസ്ബുക്കിൽ മതസ്പർധയ്ക്കു കാരണമാകുന്ന പോസ്റ്റിട്ട മൂലങ്കാവ് ഗവ.സ്കൂൾ പിടിഎ പ്രസിഡന്‍റിനെ അറസ്റ്റുചെയ്യാത്തതിൽ പ്രതിഷേധിച്ചാണ് പരിപാടിയെന്ന് നേതാക്കളായ കെ.എൽ. പൗലോസ്, അബ്ദുള്ള മാടക്കര, കെ.ഇ. വിനയൻ, പി.പി. അയ്യൂബ്, ഉമ്മർ കുണ്ടാട്ടിൽ, ബൈജു ഐസക്, പ്രഭാകരൻ നായർ, എം.എ. ഉസ്മാൻ, പി.കെ. ഹാരിസ് എന്നിവർ അറിയിച്ചു.

പൊളിച്ചുമാറ്റിയ തട്ടുകട നഗരസഭ പുനഃസ്ഥാപിച്ചു

കൽപ്പറ്റ: എസ്കെഎംജെ സ്കൂളിനു മുന്പിൽനിന്നു കഴിഞ്ഞദിവസം പൊളിച്ചുനീക്കിയ തട്ടുകട നഗരസഭ പുനഃസ്ഥാപിച്ചു. പുഞ്ചിരിമട്ടം ഉരുൾദുരന്ത ബാധിത കുടുംബം ഉപജീവനത്തിന് നടത്തിവന്ന തട്ടുകട പൊളിച്ചുമാറ്റിയത് വിവാദമായ സാഹചര്യത്തിലാണ് പുനഃസ്ഥാപിച്ചത്. മാനുഷിക പരിഗണന നൽകിയാണ് തട്ടുകട പുനഃസ്ഥാപിക്കാൻ തീരുമാനിച്ചതെന്നു നഗരസഭാധികൃതർ പറഞ്ഞു. ജനുവരി രണ്ട് മുതൽ പ്രവർത്തിക്കുന്ന തട്ടുകട എസ്കെഎംജെ സ്കൂൾ പ്രിൻസിപ്പലിന്‍റെ പരാതിയെത്തുടർന്നു ബുധനാഴ്ച രാവിലെയാണ് നഗരസഭ പൊളിച്ചുമാറ്റിയത്. സ്കൂൾ വളപ്പിലും പരിസരത്തും തെരുവുനായ ശല്യം വർധിക്കുന്നതിന് തട്ടുകട കാരണമാണെന്നും നടപടി സ്വീകരിക്കണമെന്നുമായിരുന്നു പ്രിൻസിപ്പിലിന്‍റെ പരാതി. തട്ടുകട ആരംഭിച്ചതിനുശേഷമാണ് തെരുവുനായ ശല്യം വർധിച്ചതെന്നും വിദ്യാർഥികളും അധ്യാപകരും ഭീതിയിലാണെന്നും പരാതിയിൽ ചൂണ്ടിക്കാട്ടിയിരുന്നു. ചൂരൽമല സ്വദേശി കെ. ഷാഹിദിന്‍റേതാണ് തട്ടുകട. ബുധനാഴ്ച പുലർച്ചെ രണ്ടു വരെ പ്രവർത്തിച്ച കട മുന്നറിയിപ്പില്ലാതെയാണ് പൊളിച്ചുമാറ്റിയതെന്നു അദ്ദേഹം ആരോപിച്ചിരുന്നു. ഉരുൾപൊട്ടലിൽ ഉപജീവനമാർഗങ്ങൾ അടഞ്ഞ സാഹചര്യത്തിലാണ് ഷാഹിദ് നഗരത്തിൽ തട്ടുകട തുടങ്ങിയത്.

എടിഎം കൗണ്ടറുകൾ പൂട്ടിയത് പ്രതിസന്ധിക്കിടയാക്കുന്നു

മാനന്തവാടി: ബസ് സ്റ്റാൻഡിന് സമീപം എടിഎം കൗണ്ടറുകൾ അടച്ചു പൂട്ടിയത് ഉപഭോക്താക്കളെ വലയ്ക്കുന്നു. എൽഎഫ് സ്കൂൾ ജംഗ്ഷന് സമീപം എസ്ബിഐ, ഫെഡറൽ ബാങ്ക് ബാങ്കുകളുടെ എടിഎം കൗണ്ടറുകൾ നാളുകളായി അടഞ്ഞുകിടക്കുന്നതാണ് ഉപഭോക്താക്കളെ പ്രയാസപ്പെടുന്നത്. എ ടി എം കൗണ്ടറുകൾ തേടി ടൗണിൽ അലയേണ്ട സ്ഥിതിയെന്ന് പരാതി. ഏറെ കാലമായി പ്രവർത്തിച്ചു കൊണ്ടിരുന്ന എടിഎം കൗണ്ടറുകളാണ് അടച്ചു പൂട്ടിയത്. സമീപത്തുള്ള വ്യാപാരികളെയും പണമെടുക്കാൻ എത്തുന്ന മറ്റ് ഉപഭോക്താക്കളെയും പ്രയാസത്തിലാക്കുന്നതായാണ് പരാതി. എൽഎഫ് സ്കൂളിന് സമീപമുള്ള എസ്ബിഐ എടിഎം കൗണ്ടർ അടച്ചുപൂട്ടിയിട്ട് മൂന്നുമാസത്തിലേറെയായി. മുന്പ് മികച്ച രീതിയിൽ പ്രവർത്തിച്ചിരുന്ന എടിഎം കൗണ്ടറായിരുന്നു ഇത്. ദിവസവും ഒട്ടേറെ ആളുകൾ എടിഎം കൗണ്ടർ പ്രവർത്തന സജ്ജമെന്ന് കരുതി ഈ ഭാഗത്തേക്ക് വന്ന് നിരാശരായി മടങ്ങി പോകാറുണ്ട്. 50 മീറ്ററോളം മാറി എൽഎഫ് സ്കൂൾ ജംഗ്ഷന് സമീപത്തുള്ള ഫെഡറൽ ബാങ്ക് എടിഎം കൗണ്ടറും പ്രവർത്തനരഹിതമായതിനാൽ മറ്റു ഭാഗങ്ങളിലുള്ള കൗണ്ടറുകളെ ആശ്രയിക്കേണ്ട അവസ്ഥയിലാണ് ഉപഭോക്താക്കൾ. ബസ് സ്റ്റാൻഡ് പരിസരത്ത് എടിഎം കൗണ്ടറുകൾ പ്രവർത്തനസജ്ജമാക്കി പ്രതിസന്ധിക്ക് പരിഹാരം കാണണമെന്നാണ് ആവശ്യമുയരുന്നത്.

ജീവനക്കാരുടെ സുവർണകാലം വിദൂരമല്ല: സജീവ് ജോസഫ് എംഎൽഎ

മാനന്തവാടി: ഉമ്മൻചാണ്ടി സർക്കാരിന്‍റെ കാലഘട്ടത്തിലേതിനു സമാനമായ സുവർണകാലം സിവിൽ സർവീസിൽ തിരിച്ചുവരുന്നതിന്‍റെ കാഹളം നിലന്പൂർ ഉപതെരഞ്ഞെടുപ്പിലൂടെ ഉയർന്നുകഴിഞ്ഞതായി സജീവ് ജോസഫ് എംഎൽഎ. കേരള എൻജിഒ അസോസിയേഷൻ ജില്ല പ്രവർത്തക കണ്‍വൻഷൻ ഉദ്ഘാടനം ചെയ്യുകയായിരുന്നു അദ്ദേഹം. ജീവനക്കാരുടെ ഒന്പതു വർഷത്തെ ദുരിതം അവസാനിക്കുന്നതിന്‍റെ കൃത്യമായ തെളിവാണ് ഉപതെരഞ്ഞെടുപ്പുഫലം. സാധാരണ ജനങ്ങളുടേയും ജീവിതം ദുസഹമാക്കിയ സർക്കാരാണ് നിലവിലുള്ളത്. സമയബന്ധിതമായി സേവനങ്ങൾ ലഭിക്കാതെ പൊതുജനം ജീവനക്കാരെ ശത്രുക്കളായാണ് കാണുന്നത്. യുഡിഎഫ് അധികാരത്തിലെത്തുന്നതോടെ ജീവനക്കാരുടെ പ്രശ്നങ്ങൾക്കു പരിഹാരമാകുമെന്നും എംഎൽഎ പറഞ്ഞു. അസോസിയേഷൻ ജില്ലാ പ്രസിഡന്‍റ് കെ.ടി. ഷാജി അധ്യക്ഷത വഹിച്ചു. ഗസറ്റഡ് തസ്തികയിലേക്ക് സ്ഥാനക്കയറ്റം ലഭിച്ചവരെയും പരീക്ഷകളിൽ ഉന്നത വിജയം നേടിയ വിദ്യാർഥികളെയും അനുമോദിക്കുന്നതിനും വിരമിച്ച ജീവനക്കാർക്കു യാത്രയയപ്പ് നൽകുന്നതിനും നടത്തിയ ചടങ്ങ് എഐസിസി അംഗം പി.കെ. ജയലക്ഷ്മി ഉദ്ഘാടനം ചെയ്തു. അസോസിയേഷൻ സംസ്ഥാന പ്രസിഡന്‍റ് ചവറ ജയകുമാർ മുഖ്യപ്രഭാഷണം നടത്തി. സംസ്ഥാന ട്രഷറർ ബി. പ്രദീപ്കുമാർ, സംസ്ഥാന സെക്രട്ടേറിയേറ്റംഗം മോബിഷ് പി. തോമസ്, ഡിസിസി സെക്രട്ടറി എം.ജി. ബിജു, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് എ.എം. നിഷാന്ത്, സി.കെ. ജിതേഷ്, സജി ജോണ്‍, ടി. അജിത്ത്കുമാർ, സി.ജി. ഷിബു, എം.ജി. അനിൽകുമാർ, സിനീഷ് ജോസഫ്, ഇ.എസ്. ബെന്നി, ഗ്ലോറിൻ സെക്വീര, ലൈജു ചാക്കോ, പി.എച്ച്. അഫ്റഫ്ഖാൻ, എൻ.വി. അഗസ്റ്റിൻ, എം. നസീമ, ഇ.വി. ജയൻ, എം.എ. ബൈജു, ബിജു ജോസഫ്, കെ.വി. ബിന്ദുലേഖ, ശരത് ശശിധരൻ, എം.വി. സതീഷ്, ശിവൻ പുതുശേരി എന്നിവർ പ്രസംഗിച്ചു.

ലഹരി വിരുദ്ധ ഫ്ലാഷ് മോബ് അവതരിപ്പിച്ചു

തവിഞ്ഞാൽ: തവിഞ്ഞാൽ സെന്‍റ് തോമസ് സ്കൂളിലെ വിദ്യാർഥികൾ തവിഞ്ഞാൽ ടൗണിൽ നേർവഴി ലഹരി വിരുദ്ധ ഫ്ളാഷ് മോബ് അവതരിപ്പിച്ചു. വരും തലമുറകളെ തകർത്തെറിയുന്ന ലഹരിവസ്തുക്കളിൽ നിന്നുമുള്ള മോചനമെന്ന ലക്ഷ്യത്തെ മുൻനിർത്തി വിദ്യാർഥികളെയും സമൂഹത്തെയും ബോധവത്കരിക്കാനായാണ് ഫ്ളാഷ് മോബ് അവതരിപ്പിച്ചത്. ഹെഡ്മാസ്റ്റർ ബിജു മാത്യു, മദർ പിടിഎ പ്രസിഡന്‍റ് ജൂബി സജി, അധ്യാപകരായ ജോമോൻ കുര്യൻ, സ്നേഹ രാജ്, നീതു വർഗീസ്, ജിഷ ജോസഫ്, ജോമോൻ ജോർജ്, എൻ.ജെ. ജോഷി എന്നിവർ പ്രസംഗിച്ചു.

ഇന്ത്യ മുന്നണിയെ നയിക്കാനുളള പക്വത കോണ്‍ഗ്രസിനില്ല: മന്ത്രി കെ. രാജൻ

സുൽത്താൻ ബത്തേരി: ദേശീയ തലത്തിൽ ഇന്ത്യ മുന്നണിയെ നയിക്കാനുളള പക്വത കോണ്‍ഗ്രസിനില്ലെന്ന് സിപിഐ സംസ്ഥാന എക്സിക്യുട്ടീവ് അംഗവും റവന്യു മന്ത്രിയുമായ കെ. രാജൻ. സിപിഐ ജില്ലാ സമ്മേളനത്തിന്‍റെ പൊതുസമ്മേളനം ചീരാലിൽ ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ പാർലമെന്‍റ് തെരഞ്ഞെടുപ്പിൽ ബിജെപിയെ നേരിടാൻ കോണ്‍ഗ്രസിന് താത്പര്യമില്ലായിരുന്നു. കാലാവധി കഴിയാത്ത രാജ്യസഭ അംഗങ്ങളെവരെ ലോക് സഭയിലേക്ക് മത്സരിപ്പിച്ചത് ആ പാർട്ടിയുടെ അപക്വ നിലപാടുകളാണ്. ജനാധിപത്യത്തെ അട്ടിമറിക്കാനായി ബിജെപി ഇതര സംസ്ഥാനങ്ങൾക്കെതിരേ ഗവർണർമാരെ ഉപയോഗിക്കുകയാണ്. മത ചിഹ്നങ്ങളെ ഭരണഘടനയുടെ ഭാഗമാക്കാൻ അനുവദിക്കില്ല. മത നിരപേക്ഷത സംരക്ഷിക്കാൻ കേരളത്തിലെ മന്ത്രിമാരും ഉണ്ടാകും. സാന്പത്തികമായി കേരളത്തെ കേന്ദ്രം ഞെരുക്കുകയാണ്. വിദ്യഭ്യാസ മേഖലയ്ക്ക് കേന്ദ്ര സർക്കാർ ഫണ്ട് അനുവദിക്കുന്നില്ല. ഓണക്കാലത്തേക്ക് ഭക്ഷ്യ വകുപ്പിന് ഒരു സഹായവും അനുവദിക്കില്ലെന്നാണ് കേന്ദ്ര തീരുമാനം. സാമൂഹിക സുരക്ഷ സംസ്ഥാന സർക്കാർ ഉറപ്പാക്കും. ചൂരൽമല ദുരന്ത ബാധിതരെ കേന്ദ്രം വഞ്ചിച്ചു. എല്ലാ ദുരിത ബാധിതരുടേയും സംരക്ഷണം സംസ്ഥാന സർക്കാർ ഉറപ്പ് വരുത്തും. രാജ്യത്തിന്‍റെ ഭരണ ഘടനയെ തകർക്കാൻ കേന്ദ്ര സർക്കാർ ശ്രമിക്കുകയാണ്. ക്രൂരമായ ഭരണകൂട നയമാണിത്. സോഷ്യലിസവും മതേതരത്വവും ഭരണഘടനയിൽ നിന്ന് മാറ്റാൻ ശ്രമം നടത്തുകയാണ്. ഫെഡറൽ സംവിധാനങ്ങൾ മുന്നോട്ട് പോകണമെന്ന് കേന്ദ്ര സർക്കാർ ആഗ്രഹിക്കുന്നില്ല. ഫാസിസ്റ്റ് ഭരണകൂടത്തിന് അന്ത്യം കുറിക്കാൻ എല്ലാവരും ഒന്നിക്കണം. ഇന്ത്യ മുന്നണിയെ സംഘപരിവാർ ഭയപ്പെട്ടിരുന്നു. പാർലമെന്‍റ് തെരഞ്ഞെടുപ്പിൽ നാന്നൂറിലധികെ സീറ്റുകൾ നേടുമെന്ന ബിജെപിയുടെ പ്രഖ്യാപനത്തെ പരാജയപ്പെടുത്താൻ കഴിഞ്ഞെന്നും അദ്ദേഹം പറഞ്ഞു. സിപിഐ ജില്ലാ സെക്രട്ടറി ഇ.ജെ. ബാബു അധ്യക്ഷത വഹിച്ചു. സംസ്ഥാന എക്സിക്യുട്ടീവ് അംഗം ടി.വി. ബാലൻ, പി.എം. ജോയി, സി.എസ്. സ്റ്റാൻലി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]