3.50 കോടിയുടെ മാതൃകാ പദ്ധതി; 225 ഭിന്നശേഷിക്കാര്‍ക്ക് ഇലക്ട്രിക് വീല്‍ചെയറുകള്‍ നല്‍കി
1452173
Tuesday, September 10, 2024 5:05 AM IST
മലപ്പുറം: അരയ്ക്ക് താഴെ തളര്‍ന്നവരും വിവിധതരത്തില്‍ പുറംലോകം കാണാന്‍ കഴിയാത്തവരുമായ ജില്ലയിലെ ഭിന്നശേഷി ഗുണഭോക്താക്കള്‍ക്കും പവര്‍ ഇലക്ട്രിക് വീല്‍ചെയറുകള്‍ നല്‍കി മലപ്പുറം ജില്ലാ പഞ്ചായത്തിന്‍റെ കൈത്താങ്ങ്.
ജില്ലാ പഞ്ചായത്ത് ആവിഷ്കരിച്ച "ഭിന്നശേഷി സൗഹൃദ മലപ്പുറം’ പദ്ധതിയുടെ ഭാഗമായി 3.50 കോടി രൂപ ചെലവഴിച്ച് 225 പേര്‍ക്കാണ് ഇലക്ട്രിക് വീല്‍ചെയറുകള്‍ വിതരണം ചെയ്തത്. ഗ്രാമ, ബ്ലോക്ക് പഞ്ചായത്തുകളുടെ സഹകരണത്തോടെ സംയുക്ത പദ്ധതിയായാണ് മാതൃകാ പ്രോജക്ട് നടപ്പാക്കിയത്.
വീല്‍ചെയര്‍ വിതരണോദ്ഘാടനം മലപ്പുറം ടൗണ്‍ഹാളില്‍ പി.കെ. കുഞ്ഞാലിക്കുട്ടി എംഎല്‍എ നിര്‍വഹിച്ചു. ജില്ലാ പഞ്ചായത്ത് പ്രസിഡന്‍റ് എം. കെ. റഫീഖ അധ്യക്ഷത വഹിച്ചു. പി. ഉബൈദുള്ള എംഎല്‍എ മുഖ്യാതിഥിയായിരുന്നു. ജില്ലാ പഞ്ചായത്ത് വൈസ് പ്രസിഡന്‍റ് ഇസ്മായില്‍ മൂത്തേടം,
സ്റ്റാന്‍ഡിംഗ് കമ്മിറ്റി അധ്യക്ഷരായ എന്‍.എ. കരീം, സെറീന ഹസീബ്, നസീബ അസീസ്, ആലിപ്പറ്റ ജമീല, ബ്ലോക്ക് പഞ്ചായത്ത് അസോസിയേഷന്‍ ജില്ലാ പ്രസിഡന്‍റ് കാരാട്ട് അബ്ദുറഹിമാന്‍, ഗ്രാമപഞ്ചായത്ത് അസോസിയേഷന്‍ പ്രസിഡന്‍റ് കലാം, ജില്ലാ പഞ്ചായത്ത് അംഗങ്ങളായ പി.വി. മനാഫ്, കെ.ടി. അജ്മല്‍, പി.പി. മോഹന്‍ദാസ്, സെക്രട്ടറി എസ്. ബിജു, ജില്ലാ സാമൂഹികനീതി ഓഫീസര്‍ ഷീബാ മുംതാസ് എന്നിവര്‍ പ്രസംഗിച്ചു.
കഴിഞ്ഞ സാമ്പത്തിക വര്‍ഷം 60 പേര്‍ക്ക് ജില്ലാ പഞ്ചായത്ത് വീല്‍ചെയറുകള്‍ ലഭ്യമാക്കിയിരുന്നു. ഇതോടെ അര്‍ഹരായ എല്ലാവര്‍ക്കും ഇലക്ട്രിക് വീല്‍ചെയറുകള്‍ ലഭ്യമാക്കാനായി. ജില്ലാ സാമൂഹിക നീതി ഓഫീസര്‍ നിര്‍വഹണ ഉദ്യോഗസ്ഥയായാണ് പദ്ധതി നടപ്പാക്കിയത്. ആദ്യഘട്ടത്തില്‍ സര്‍ക്കാര്‍ ഏജന്‍സിയായ കെല്ട്രോണ് വഴിയും രണ്ടാംഘട്ടത്തില്‍ ഓപ്പണ്‍ ടെന്‍ഡര്‍ വഴി തെരഞ്ഞെടുത്ത സ്വകാര്യ സ്ഥാപനവുമാണ് ജില്ലാ പഞ്ചായത്തിന് വീല്‍ചെയര്‍ സപ്ലൈ ചെയ്തത്.