ADVERTISEMENT

ADVERTISEMENT

വനിതാ സംഗമം: സംഘാടക സമിതിയായി

പെരിന്തല്‍മണ്ണ: താലൂക്ക് ലൈബ്രറി കൗണ്‍സില്‍ വനിതാ വേദിയുടെ വനിതാ സംഗമത്തിനു സംഘാടക സമിതി രൂപീകരിച്ചു. 28ന് ആനമങ്ങാട് എഎല്‍പി സ്കൂളിലാണ് വനിതാസംഗമം നടത്തുന്നത്. സംഘടക സമിതി യോഗം ലൈബ്രറി കൗണ്‍സില്‍ താലൂക്ക് സെക്രട്ടറി വേണു പാലൂര്‍ ഉദ്ഘാടനം ചെയ്തു. എം. അമ്മിണി അധ്യക്ഷത വഹിച്ചു. എം. സോമസുന്ദരന്‍, മഞ്ജുഷ പോര്‍ക്കളത്ത്, പി. നാരായണന്‍കുട്ടി, ടി. രാധ എന്നിവര്‍ പ്രസംഗിച്ചു. സി. ബാലസുബ്രഹ്മണ്യന്‍ ചെയര്‍മാനും ടി. രാധ കണ്‍വീനറുമായി 25 അംഗ സംഘാടക സമിതി രൂപീകരിച്ചു.

ADVERTISEMENT

സ്കൂട്ടറിന് കുറുകെ പുലി ചാടിയെന്ന് യാത്രക്കാരൻ

എടക്കര: പൂക്കോട്ടുമണ്ണയിൽ സ്കൂട്ടറിന് കുറുകെ ചാടിയ പുലിയെ കണ്ട് യാത്രക്കാരൻ ഭയന്നു. പൂക്കോട്ടുമണ്ണ കുരീക്കൽ ബേബിയാണ് കുരിശിന്‍റെ ഭാഗത്തു വച്ച് രാത്രി എട്ടോകാലോടെയാണ് പുലിയെ കണ്ടത്. ഇയാളുടെ സ്കൂട്ടറിന് മുന്നിലൂടെ പുലി റോഡിന് കുറുകെ ചാടിയതായാണ് ഇയാൾ പറയുന്നത്. പുലിയുടേതിന് സാമ്യമുള്ളതും അധികം ഉയരമില്ലാത്തതുമായ ജീവിയെയാണ് കണ്ടത്. നല്ലംതണ്ണിയിലും ചൂരക്കണ്ടിയിലും കഴിഞ്ഞ ദിവസങ്ങളിൽ പുലിയെ പലരും കണ്ടിരുന്നു. വള്ളുവശേരി വനം ബീറ്റിലെ ഉദ്യോഗസ്ഥർ സ്ഥലത്തത്തെി പരിശോധന നടത്തുകയും ചെയ്തിരുന്നു. എന്നാൽ വള്ളിപ്പുലിയാകാം ജനങ്ങൾ കണ്ടതെന്ന നിഗമനത്തിലാണ് വനം ഉദ്യോഗസ്ഥർ.

നിലന്പൂരിൽ കുടുംബശ്രീ വാർഷികാഘോഷം

നിലന്പൂർ: നഗരസഭാ കുടുംബശ്രീയുടെ 27-ാമത് വാർഷികം ഒസികെ ഓഡിറ്റോറിയത്തിൽ നടത്തി. ചെയർമാൻ മാട്ടുമ്മൽ സലീം പരിപാടി ഉദ്ഘാടനം ചെയ്തു. സിഡിഎസ് ചെയർപേഴ്സണ്‍ വി. വസന്ത അധ്യക്ഷത വഹിച്ചു. മോഡൽ സിഡിഎസ് വാർഷിക കർമപദ്ധതി (എഎപി) ഡോക്യൂമെന്‍റഷൻ പ്രകാശനം ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ യു.കെ. ബിന്ദു നിർവഹിച്ചു. 80 വയസിന് മുകളിലുള്ള കുടുംബശ്രീ അംഗങ്ങളെ ചടങ്ങിൽ ആദരിച്ചു. മികച്ച എഡിഎസായി കല്ലേന്പാടം എഡിഎസിനെയും മികച്ച അയൽക്കൂട്ടമായി വീട്ടിക്കുത്ത് ഐശ്വര്യ അയൽക്കൂട്ടത്തെയും മികച്ച സംരംഭകയായി അരുവാക്കോട് വിജയകുമാരിയെയും ആദരിച്ചു. പി.എം. ബഷീർ, കക്കാടൻ റഹീം, സ്കറിയ കിനാതോപ്പിൽ, ഷൈജി, ഇസ്മായിൽ എരഞ്ഞിക്കൽ, കൗണ്‍സിലർമാർ, കെ. വിനോദ്, സിനി സുന്ദരൻ എന്നിവർ പ്രസംഗിച്ചു. നിലന്പൂർ നഗരസഭ ഹെൽത്ത് ഇൻസ്പെക്ടർ സലീം, എൻയുഎൽഎം സിറ്റിമിഷൻ മാനേജർ പി. ശ്രീയേഷ്, നിലന്പൂർ ട്രൈബൽ സ്പെഷൽ പ്രൊജക്ട്് കോ ഓർഡിനേറ്റർ ഷാനു, ബ്ലോക്ക് കോ ഓർഡിനേറ്റർമാരായ ശരണ്യ, നിഷാദ്, അക്കൗണ്ടന്‍റ് ടി.പി. സജ്ന തുടങ്ങിയവർ പങ്കെടുത്തു. പരിപാടിയിൽ അയൽക്കൂട്ട അംഗങ്ങളും ബാലസഭ കുട്ടികളും കലാപരിപാടികൾ അവതരിപ്പിച്ചു.

അകന്പാടത്ത് കാട്ടാന കൃഷി നശിപ്പിച്ചു

നിലന്പൂർ:നിലന്പൂർ മേഖലയിൽ കാട്ടാന ശല്യത്തിന് അറുതിയില്ല. അകന്പാടം ആനപ്പാറയിൽ വീട്ടുമുറ്റത്തെത്തിയ കാട്ടാന വ്യാപകമായി കൃഷി നശിപ്പിച്ചു. വീട്ടുമുറ്റങ്ങളിലേക്ക് പതിവായി കാട്ടാനകൾ എത്തുന്നത് പ്രദേശവാസികളുടെ ആശങ്ക വർധിപ്പിക്കുകയാണ്. ആനപ്പാറ കോക്കുത്ത് ഹസൻകുട്ടി, സഹോദരി കോക്കുത്ത് സുബൈദ എന്നിവരുടെ വീട്ടുമുറ്റങ്ങളിലേക്കാണ് ഇന്നലെ പുലർച്ചെ രണ്ടുമണിയോടെ കാട്ടാന എത്തിയത്. ശബ്ദം കേട്ട് വീട്ടുകാർ പുറത്തിറങ്ങിയപ്പോഴാണ് കാട്ടാനയെ കണ്ടത്. രണ്ട് കൃഷിയിടങ്ങളിലായി വ്യാപകമായി വാഴ കൃഷി നശിപ്പിച്ചു. ചാലിയാർ പഞ്ചായത്തിന്‍റെ വിവിധ ഭാഗങ്ങളിലായി അപകടകാരിയായ ചുള്ളികൊന്പൻ ഉൾപ്പെടെ ആറ് കാട്ടാനകളാണ് സ്വൈര്യവിഹാരം നടത്തുന്നത്. പെരുന്പത്തൂർ, ആലോടി, കല്ലുണ്ട, ഓക്കാട്, ഇടിവണ്ണ എച്ച്ബ്ലോക്ക്, മൈലാടിപ്പൊട്ടി, വൈലാശേരി എന്നിവിടങ്ങളിലാണ് കാട്ടാനകൾ പതിവായി എത്തി കൃഷി നശിപ്പിക്കുന്നത്.

വീടുകയറി അക്രമം; മൂന്നു പേർ അറസ്റ്റിൽ

പരപ്പനങ്ങാടി: വീട്ടിലേക്കുള്ള വഴിയെ ചൊല്ലിതർക്കത്തെ തുടർന്ന് വീട് കയറി അക്രമം നടത്തിയ മൂന്നു പേരെ പരപ്പനങ്ങാടി പോലീസ് അറസ്റ്റ് ചെയ്തു. ചെട്ടിപ്പടി സ്വദേശി കട്ടുന്‍റെ പുരക്കൽ ഉസ്മാന്‍റെ മകൻ ഉബൈസ് (30), കട്ടുന്‍റെ പുരക്കൽ കമ്മദാലി മകൻ ഉസ്മാൻ (59), കട്ടുവിന്‍റെ പുരക്കൽ ഉസ്മാൻ മകൻ നബീൽ (28) എന്നിവരെയാണ് പോലീസ് അറസ്റ്റ് ചെയ്തത്. നേരത്തെ ഉണ്ടായിരുന്ന വഴി തർക്കത്തെ തുടർന്നു ചെട്ടിപ്പടി കാരക്കുളങ്ങര ഭഗവതി ക്ഷേത്രത്തിനു സമീപം മാഞ്ചേരി മുരളീധരന്‍റെ വീട്ടിൽ കയറി അക്രമം നടത്തുകയായിരുന്നുവെന്നു പോലീസ് പറഞ്ഞു. വ്യാഴാഴ്ച രാത്രി എട്ട് മണിയോടെ ആയിരുന്നു സംഭവം. വീട്ടിൽ കത്തിച്ചുവച്ച നിലവിളക്കും കിണ്ടിയും എടുത്തു തന്നെയും ഭാര്യയെയും മകനെയും മർദിക്കുകയായിരുന്നുവെന്നു മുരളീധരൻ പറഞ്ഞു. പരിക്കേറ്റവരെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അതേസമയം പ്രതികളായ ഉസ്മാന്‍റെ പരാതിയിൽ മുരളീധരനെതിരെയും മകൻ രഞ്ജിത്തിനെതിരെയും കേസ് എടുത്തതായി പരപ്പനങ്ങാടി പോലീസ് പറഞ്ഞു. പരപ്പനങ്ങാടി മുനിസിപ്പാലിറ്റി ഒന്നാം ഡിവിഷൻ കൗണ്‍സിലർ കെ.പി. മുഹ്സിനക്കെതിരെയും കേസ് എടുത്തതായി പോലീസ് അറിയിച്ചു. പ്രതികളായ ഉബൈസ്, ഉസ്മാൻ, നബീൽ എന്നിവരെ കോടതി റിമാൻഡ് ചെയ്തു. മുരളീധരന്‍റെ വീട്ടിലെ സിസി ടിവി ദൃശ്യങ്ങൾ കേസിനു കൂടുതൽ തെളിവ് ലഭിക്കാനായി എന്നും പരപ്പനങ്ങാടി സിഐ വിനോദ് വലിയാട്ടൂർ പറഞ്ഞു.

അങ്ങാടിപ്പുറം മേൽപ്പാലത്തിലൂടെ ബസുകൾ ഓടിത്തുടങ്ങി

പെരിന്തൽമണ്ണ: കോഴിക്കോട്- പാലക്കാട് ദേശീയപാതയിൽ നവീകരണത്തിനായി രണ്ടാഴ്ച അടച്ചിട്ട അങ്ങാടിപ്പുറം മേൽപാലത്തിലൂടെ ബസുകൾ ഓടി തുടങ്ങി. ഇന്നലെ രാവിലെ മുതൽ എല്ലാ വാഹനങ്ങൾക്കുമായി റോഡ് തുറന്നു കൊടുത്തു. അതേസമയം ഭാരം കൂടിയ ചരക്കുവാഹനങ്ങൾക്കു രാവിലെ 8.30 മുതൽ 10.30 വരെയും വൈകിട്ട് മൂന്നു മുതൽ അഞ്ചു വരെയും മേൽപാലത്തിലൂടെ ഗതാഗതം നിരോധിച്ചിട്ടുണ്ട്. നവീകരണം കഴിഞ്ഞ ഉടൻ ചെറിയ വണ്ടികൾക്കായി അഞ്ചു മുതൽ മേൽപാലം തുറന്നു നൽകിയിരുന്നു. നവീകരിച്ച ഭാഗം ബലപ്പെടുത്തുന്നതിനായി ബസുകളുടെയും ഭാരവാഹനങ്ങളുടെയും നിയന്ത്രണം തുടരുകയായിരുന്നു. യാത്രക്കാർ ഇതുമൂലം ഏറെ പ്രയാസം അനുഭവിച്ചിരുന്നു. ബസുകളിലേറെയും അങ്ങാടിപ്പുറം വരെയെത്തി ആളുകളെ ഇറക്കുകയും കയറ്റുകയും ചെയ്തു തിരിച്ചു പോവുകയായിരുന്നു. പെരിന്തൽമണ്ണ മുതൽ അങ്ങാടിപ്പുറം വരെയും ബസ് സർവീസ് നടത്തിയിരുന്നു. ഇതിനിടയിലുള്ള ഭാഗത്ത് കാൽനട യാത്രയോ ഓട്ടോറിക്ഷകളോ ആയിരുന്നു യാത്രക്കാർക്ക് ആശ്രയം. മങ്കട സി.എച്ച്. സെന്‍ററിന്‍റെ വാഹനം ബസ് സർവീസ് ഇല്ലാത്ത ഭാഗത്ത് യാത്രക്കാരെ സൗജന്യമായി കൊണ്ടുപോയിരുന്നത് ആശ്വാസമായിരുന്നു. നവീകരണത്തിന്‍റെ ഭാഗമായി ഏർപ്പെടുത്തിയ ഗതാഗത പരിഷ്കരണങ്ങൾ വ്യാപാരികളുടെ കടുത്ത എതിർപ്പിനെ തുടർന്ന് തൽക്കാലം മരവിപ്പിച്ചിരിക്കുകയാണ്. കൂടുതൽ പഠനം നടത്തിയ ശേഷമേ ഇനി പരിഷ്കാരങ്ങൾ നടപ്പാക്കുകയുള്ളൂ.

പെരിന്തൽമണ്ണ മാർക്കറ്റിലേക്കുള്ള വഴിയിൽ ചെളി നിറഞ്ഞു

പെരിന്തൽമണ്ണ: പെരിന്തൽമണ്ണ ഇൻഡോർ മാർക്കറ്റിന്‍റെ മുൻഭാഗം ചെളി നിറഞ്ഞ് വെള്ളക്കെട്ട് രൂപപ്പെട്ടു. ഇതിനാൽ മാർക്കറ്റിലേക്ക് ആളുകൾക്ക് വരാൻ കഴിയുന്നില്ല. ബദൽ സംവിധാനമായി ഇവിടെ ക്വാറി വേസ്റ്റ് ഇട്ട് സഞ്ചാരയോഗ്യമാക്കണമെന്ന് പെരിന്തൽമണ്ണ മർച്ചന്‍റ്സ് അസോസിയേഷൻ പ്രവർത്തക സമിതി യോഗം ആവശ്യപ്പെട്ടു. ബൈപ്പാസ് ജംഗ്ഷനിലും ടൗണിലെ പല റോഡുകളിലും കുഴികൾ കാരണം വെള്ളക്കെട്ടായി കിടക്കുകയാണ്. അഴുക്കുചാലുകൾ കുറ്റമറ്റതാക്കി വെള്ളക്കെട്ട് നീക്കം ചെയ്യാൻ നടപടി സ്വീകരിക്കണമെന്നും ആവശ്യപ്പെട്ടു. ഇത് സംബന്ധിച്ച് ബന്ധപ്പെട്ടവർക്ക് നിവേദനം നൽകി. പ്രസിഡന്‍റ് പി.ടി.എസ്. മൂസു അധ്യക്ഷതവഹിച്ചു. സെക്രട്ടറി സി.പി. മുഹമ്മദ് ഇക്ബാൽ, ലത്തീഫ് ടാലന്‍റ്്, യൂസഫ് രാമപുരം, വാര്യർദാസ്, പി.പി. സൈതലവി, ഓമർ ഷെരീഫ്, കാജാമുഹയുദ്ദീൻ, ഇബ്രാഹിം കാരയിൽ, ജമീല ഇസുദ്ദീൻ എന്നിവർ പ്രസംഗിച്ചു.

ഡ്രൈനേജിൽ വീണ് കാഴ്ചപരിമിതിയുള്ള യുവാവിന് പരിക്ക്

മഞ്ചേരി: കച്ചേരിപ്പടിയിൽ ഡ്രൈനേജിലേക്ക് വീണ് കാഴ്ചപരിമിതിയുള്ള യുവാവിന് പരിക്കേറ്റു. കുറ്റിപ്പുറം തവനൂർ ആയിങ്കലം സ്വദേശി പുല്ലാട്ടിൽ ഷഹീർ (42)ആണ് ഡ്രൈനേജിലേക്ക് വീണത്. ഇന്നലെ വൈകിട്ടാണ് സംഭവം. സ്റ്റാൻഡിൽ ബസ് ഇറങ്ങുന്നതിനിടെ ഡ്രൈനേജിലേക്ക് വീഴുകയായിരുന്നു. ഇതോടെ സ്റ്റാൻഡിൽ തന്നെ പ്രവർത്തിക്കുന്ന അഗ്നിരക്ഷാ സേനാംഗങ്ങൾ എത്തി പുറത്തെത്തിച്ച് സ്റ്റേഷനിലേക്ക് മാറ്റി. വെള്ളത്തിൽ വീണ് വസ്ത്രങ്ങളിൽ ചെളി ആയതോടെ തൊട്ടടുത്ത് പ്രവർത്തിക്കുന്ന ജെന്‍റ്സ് ഷോപ്പ് ഉടമ സൗജന്യമായി പാന്‍റ്്സും ഷർട്ടും നൽകി. സ്റ്റേഷനിൽ നിന്ന് വസ്ത്രം മാറി അദ്ദേഹത്തെ തിരിച്ച് നാട്ടിലേക്ക് ബസ് കയറ്റിവിട്ടു. സ്റ്റാൻഡിൽ നിന്ന് ബസ് പുറത്തേക്ക് പോകുന്ന ഈ ഭാഗത്ത് ഡ്രൈനേജിന് കൈവരി ഇല്ലാത്തത് അപകടത്തിന് കാരണമാകുന്നുണ്ട്. സമാനമായ രീതിയിൽ നേരത്തെയും അപകടങ്ങൾ സംഭവിച്ചിരുന്നു.

ട്രാൻസ്ഫോർമറിൽ നിന്ന് പടർന്നു: മഞ്ചേരിയിൽ പഴക്കടയ്ക്ക് തീപ്പിടിച്ചു

മഞ്ചേരി: ട്രാൻസ്ഫോർമറിൽ നിന്ന്് തീ പടർന്ന് തൊട്ടടുത്തുള്ള പഴ മൊത്തക്കച്ചവട സ്ഥാപനം കത്തി നശിച്ചു. മഞ്ചേരി ജസീല ജംഗ്ഷനു സമീപമുള്ള എബി ഫ്രൂട്ട്സ് എന്ന സ്ഥാപനമാണ് അഗ്നിക്കിരയായത്. ഒരു ലക്ഷം രൂപയുടെ നഷ്ടം സംഭവിച്ചതായി കടയുടമ നെല്ലിക്കുത്ത് പട്ടാള റഷീദ് പറഞ്ഞു. ഇന്നലെ രാവിലെ 11 മണിയോടെയാണ് സംഭവം. ട്രാൻസ്ഫോർമറിൽ നിന്ന് തെറിച്ച് വീണ തീ, പഴങ്ങൾ സൂക്ഷിക്കുന്ന പ്ലാസ്റ്റിക് പെട്ടിയിൽ വീണ് കത്തുകയായിരുന്നു. നാട്ടുകാർ അറിയിച്ചതിനെ തുടർന്ന് മഞ്ചേരി അഗ്നിരക്ഷാ നിലയത്തിൽ നിന്ന് രണ്ട് ഫയർ യൂണിറ്റുകൾ എത്തിയാണ് തീ നിയന്ത്രണ വിധേയമാക്കിയത്. തൊട്ടടുത്ത് സ്ഥിതി ചെയ്യുന്ന മൂന്നുനില കെട്ടിടത്തിലേക്ക് തീ പടരാതിരിക്കാൻ അഗ്നിരക്ഷാ സേനക്ക് ഏറെ പരിശ്രമിക്കേണ്ടി വന്നു. എങ്കിലും തൊട്ടടുത്തുള്ള ഓറിയന്‍റൽ ഇൻഷ്വറൻസ് കന്പനിയിലേക്ക് പുക അടിച്ചുകയറിയത് നാശനഷ്ടങ്ങൾക്കിടയാക്കി. അസിസ്റ്റന്‍റ് സ്റ്റേഷൻ ഓഫീസർ ടി. ഷാജിയുടെ നേതൃത്വത്തിൽ എസ്എഫ്ആർഒ അരുണ്‍ബാബു, ഫയർ ആൻഡ് റസ്ക്യൂ ഓഫീസർമാരായ എം.വി. അനൂപ്, ടി. അഖിൽ, എൻ.എം. റാഷിദ്, ഡ്രൈവർമാരായ ശ്രീലേഷ് കുമാർ, എം. സജീഷ്, സേനാംഗങ്ങളായ പി. ഗണേഷ്കുമാർ, സി. മുകുന്ദൻ, കെ. ഉണ്ണികൃഷ്ണൻ, കെ.ടി. ആബിദ്, കെ. ഹുസ്നി മുബാറക്, എ. ബിനീഷ് എന്നിവർ രക്ഷാപ്രവർത്തനത്തിൽ പങ്കെടുത്തു. ജസീല ജംഗഷനു സമീപത്തെ ട്രാൻസ്ഫോർമർ അപകടം വരുത്തിയത് പലതവണയാണ്. നേരത്തെ മേലാക്കം ജുമാമസ്ജിദിന് സമീപമുണ്ടായിരുന്ന ട്രാൻസ്ഫോർമർ അമിത ലോഡ് മൂലം കത്തിയിരുന്നു. തുടർന്നാണ് ട്രാൻസ്ഫോർമർ പുതിയ യാർഡിലേക്ക് പുന:സ്ഥാപിച്ചത്. ഇവിടെ സെക്യൂരിറ്റി ഫെൻസിംഗും സ്ഥാപിച്ചിരുന്നു. എന്നാൽ ഏഴു മാസം തികയും മുന്പേ ട്രാൻസ്ഫോർമറിൽ നിന്ന് തീക്കട്ട തെറിച്ചു വീഴുകയും സമീപത്ത് നിർത്തിയിട്ടിരുന്ന മോട്ടോർ ബൈക്ക് കത്തി നശിക്കുകയും ചെയ്തിരുന്നു. 2021 ഏപ്രിൽ മൂന്നിനുണ്ടായ ഈ അഗ്നിബാധയിൽ സമീപത്ത് പ്രവർത്തിക്കുന്ന എബി ഫ്രൂട്ടസ് എന്ന പഴ മൊത്ത വിൽപ്പനശാലയുടെ രണ്ടായിരത്തിലധികം വരുന്ന പ്ലാസ്റ്റിക് പെട്ടികളും കത്തി നശിച്ചിരുന്നു. സമാനമായ രീതിയിലാണ് ഇന്നലെയും അഗ്നിബാധയുണ്ടായത്. അന്ന് കത്തിനശിച്ച അതേ പഴക്കട തന്നെയാണ് ഇന്നലെയും അഗ്നി വിഴുങ്ങിയത്. നഗരത്തിൽ നിരവധി കെട്ടിടങ്ങൾക്ക് നടുവിലായി സ്ഥാപിച്ച ട്രാൻസ്ഫോർമറിൽ നിന്ന് തീ തെറിച്ചതെങ്ങനെയെന്ന് കഐസ്ഇബി അധികൃതർക്കും വ്യക്തതയില്ല.

ജീർണാവസ്ഥയിലായ മൃഗാശുപത്രി പൊളിച്ചുമാറ്റണമെന്ന്

അങ്ങാടിപ്പുറം: അങ്ങാടിപ്പുറം ചെരക്കാപറന്പിലെ മൃഗാശുപത്രിയുടെ പഴയ കെട്ടിടം പൊളിച്ചുമാറ്റണമെന്ന ആവശ്യം ശക്തം. പതിറ്റാണ്ടുകൾ പഴക്കമുള്ള കെട്ടിടം ജീർണാവസ്ഥയിലാണ്. ഏതു നിമിഷവും തകർന്നു വീഴാവുന്ന കെട്ടിടം ഉടനെ പൊളിച്ചുമാറ്റണമെന്നാണ് നാട്ടുകാർ ആവശ്യപ്പെടുന്നത്. ആശുപത്രി പ്രവർത്തിക്കുന്നത് പുതിയ കെട്ടിടത്തിലാണെങ്കിലും ഉപയോഗശൂന്യമായ പഴയ കെട്ടിടം നീക്കം ചെയ്യാൻ ആവശ്യമായ സാക്ഷ്യപത്രം പഞ്ചായത്ത് അധികൃതരിൽ നിന്ന് ലഭിക്കാത്തതാണ് പൊളിച്ചു മാറ്റുന്നതിനുള്ള തടസം. ആശുപത്രി വളപ്പിലെ വീഴാറായ മരങ്ങൾ ഈയിടെ മുറിച്ചുമാറ്റിയിരുന്നു. കഴിഞ്ഞ ദിവസമുണ്ടായ കനത്ത മഴയിൽ ചുറ്റുമതിൽ തകർന്നുവീഴുകയും ചെയ്തു. മാസന്തോറും മുന്നൂറോളം ഗുണഭോക്താക്കൾ ആശ്രയിക്കുന്ന ഈ മൃഗാശുപത്രി ഇപ്പോൾ നേരിടുന്ന സ്ഥല പരിമിതി പരിഹരിക്കാനും കെട്ടിടം പൊളിക്കുന്നതിലൂടെ സാധിക്കും. മങ്കട, പുഴക്കാട്ടിരി എന്നീ സമീപ പഞ്ചായത്തുകളിലുള്ളവരും മൃഗചികിത്സക്കായി ഇവിടെ എത്താറുണ്ട്. വെറ്ററിനറി സർജൻ ഉൾപ്പെടെ മുഴുവൻ തസ്തികകളിലും ഇവിടെ ജീവനക്കാരുണ്ട്. കെട്ടിടം പൊളിച്ചുമാറ്റി ചുറ്റുമതിൽ, ഗേറ്റ് എന്നിവ പണിതാൽ ആശുപത്രിയെ ആശ്രയിക്കുന്നവർക്ക് വലിയ സൗകര്യമാകും. കെട്ടിടം പൊളിച്ചുമാറ്റുന്നതിനും പുനരുദ്ധാരണത്തിനുമായി ഗ്രാമപഞ്ചായത്തിന് അപേക്ഷ നൽകി കാത്തിരിക്കുകയാണ് ആശുപത്രി വികസന സമിതി ഭാരവാഹികളും നാട്ടുകാരും.

വന്യമ്യഗശല്യം പരിഹരിക്കാൻ സർക്കാരിന്‍റെ അടിയന്തര ഇടപെടൽ വേണം: പി.വി. അൻവർ

നിലന്പൂർ: വന്യമൃഗശല്യം പരിഹരിക്കാൻ നടപടി സ്വീകരിക്കാതെ ഭരണപക്ഷവും പ്രതിപക്ഷവും മൗനം പാലിക്കുകയാണെന്ന് പി.വി. അൻവർ ആരോപിച്ചു. നിലന്പൂർ നഗരസഭാ പരിധിയിലെ പാത്തിപ്പാറയിൽ കാട്ടാന കൃഷി നശിപ്പിച്ച കർഷകരുടെ സ്ഥലങ്ങൾ സന്ദർശിച്ച ശേഷം സംസാരിക്കുകയായിരുന്നു തൃണമൂൽ കോണ്‍ഗ്രസ് സംസ്ഥാന കോഓർഡിനേറ്റർ പി.വി. അൻവർ. വന്യമൃഗശല്യം മൂലം കർഷകർ വീടുകൾ ഉപേക്ഷിച്ച് പോകേണ്ട അവസ്ഥയിലാണ്. ഇതിന് പരിഹാരം കാണേണ്ട സർക്കാർ ഒരു ഇടപെടലുകളും നടത്തുന്നില്ല. കേരളത്തിൽ വന്യമ്യഗങ്ങളെ പേടിച്ച് പുറത്തിറങ്ങാൻ കഴിയാത്ത അവസ്ഥയാണ്. മലയോര കർഷകർ തിങ്ങിപാർക്കുന്ന നിലന്പൂർ മേഖലയിൽ വീട്ടുമുറ്റങ്ങളിലേക്ക് കാട്ടാനകൾ എത്തുന്നത് തടയാൻ അടിയന്തരമായി സോളർ വൈദ്യുതിവേലി നിർമിക്കണം. സർക്കാരിനെ കൊണ്ട് വന്യമ്യഗശല്യത്തിനെതിരെ നടപടി എടുപ്പിക്കേണ്ട പ്രതിപക്ഷവും മൗനത്തിലാണ്. നാട്ടിൽ വന്യമൃഗശല്യം വർധിക്കുന്പോൾ കാർബണ്‍ ഫണ്ടിനായി വന വിസ്തൃതി കൂട്ടികൊണ്ടിരിക്കുകയാണ് സംസ്ഥാന സർക്കാരെന്നും അൻവർ ആരോപിച്ചു. നിലന്പൂരിൽ മാത്രം 161 കർഷകരുടെ ഭൂമിയാണ് ഇതിനകം വില നിശ്ചയിച്ച് വനം വകുപ്പ് ഏറ്റെടുത്തിരിക്കുന്നതെന്നും അൻവർ പറഞ്ഞു. തൃണമൂൽ കോണ്‍ഗ്രസ് വന്യമൃഗശല്യത്തിനെതിരെ സംസ്ഥാന വ്യാപകമായി സമരജാഥ സംഘടിപ്പിക്കും. കാസർഗോട്ട് നിന്നാരംഭിച്ച് തിരുവനന്തപുരത്ത് സമാപിക്കുന്നതായിരിക്കും ജാഥ. വന്യമൃഗ ആക്രമണങ്ങളിൽ മരിക്കുന്നവരുടെ ആശ്രിതർക്ക് നിലവിൽ നൽകുന്ന നഷ്ടപരിഹാര തുക 50 ലക്ഷമാക്കി ഉയർത്തണം. ആക്രമണങ്ങളിൽ പരിക്കേൽക്കുന്നവർക്ക് നൽകുന്ന നഷ്ടപരിഹാര തുക 10 ഇരട്ടിയായി ഉയർത്തണമെന്നും അദ്ദേഹം ആവശ്യപ്പെട്ടു. തൃണമുൽ കോണ്‍ഗ്രസ് മുനിസിപ്പൽ സെക്രട്ടറി ഷാജഹാൻ പാത്തിപ്പാറ ഉൾപ്പെടെയുള്ള നേതാക്കളും പ്രവർത്തകരും കൂടെ ഉണ്ടായിരുന്നു.

സ്ഥല പരിമിതിയിൽ വീർപ്പുമുട്ടി നിലന്പൂർ ജില്ലാശുപത്രി

നിലന്പൂർ:സ്ഥലപരിമിതിയിൽ വീർപ്പുമുട്ടി നിലന്പൂർ ജില്ലാ ആശുപത്രി. അടിസ്ഥാന വികസനത്തിന് ആവശ്യമായ സ്ഥലമില്ലാത്തത് കടുത്ത വെല്ലുവിളിയാവുകയാണ്. ആശുപത്രി വികസനത്തിന് നിലന്പൂർ മോഡൽ യുപി സ്കൂളിന്‍റെ സ്ഥലം ഏറ്റെടുക്കുന്നത് വൈകുന്നതാണ് നിലന്പൂർ ജില്ലാ ആശുപത്രിയുടെ പ്രവർത്തനങ്ങളെ ബാധിക്കുന്നത്. ജില്ലാ ആശുപത്രിയുടെ എച്ച്എംസി ഫണ്ടിൽ ഒന്നേകാൽ കോടി രൂപ നീക്കിയിരിപ്പുണ്ടെന്ന് സൂപ്രണ്ട് തന്നെ വ്യക്തമാക്കുന്നു. ജില്ലാ ആശുപത്രിയിൽ എത്തുന്നവരിൽ നിന്ന് പാസിനത്തിൽ വലിയ തുക വാങ്ങുന്നതിനാലാണ് ഇത്രയും വലിയ തുക എച്ച്എംസി ഫണ്ടിൽ നീക്കിയിരിപ്പ് വരാൻ കാരണം. രണ്ടു വർഷമായി ഇടക്കിടെ പ്രവർത്തനരഹിതമാകുന്ന എക്സ്റേ യന്ത്രം മാറ്റിയിടാൻ സ്ഥലമില്ലാത്തതിനാൽ പുതിയ യന്ത്രം വാങ്ങാൻ കഴിയാത്ത അവസ്ഥയാണ്. ജില്ലാ ആശുപത്രിയുടെ അത്യാഹിത വിഭാഗവും എക്സ്റേ യന്ത്രം പ്രവർത്തിക്കുന്ന ഓഫീസും തമ്മിൽ 50 മീറ്ററിനും നൂറ് മീറ്ററിനുമിടയിൽ ദൂരമുണ്ട്. അതിനാൽ അപകടങ്ങളിൽ പരിക്കേൽക്കുന്നവർ ഉൾപ്പെടെയുള്ള രോഗികളെ സ്ട്രെക്ച്ചറിൽ ഇരുത്തിയും കിടത്തിയും വേണം എക്സ് റേ എടുക്കാൻ കൊണ്ടുപോകേണ്ടത്. ഗൂഢല്ലൂർ മുതൽ മന്പാട് വരെയുള്ള ആയിരക്കണക്കിന് രോഗികളുടെ നിലന്പൂരിലെ ഏക ആശ്രയമായ ജില്ലാ ആശുപത്രിയിലാണ് അടിസ്ഥാന സൗകര്യങ്ങളില്ലാത്തതിനാൽ എക്സ് റേ എടുക്കാൻ ഉൾപ്പെടെ സ്വകാര്യ ആരോഗ്യ സ്ഥാപനങ്ങളെ ആശ്രയിക്കേണ്ട അവസ്ഥ വരുന്നത്. ഇത് സാധാരണക്കാരന് താങ്ങാനാകുന്നില്ല. ജില്ലാ ആശുപത്രി എച്ച്എംസി അടക്കം അടിസ്ഥാന സൗകര്യവികസനത്തിന്‍റെ കാര്യത്തിൽ ശക്തമായ ഇടപെടലുകൾ നടത്താത്തതാണ് നിലവിലെ അവസ്ഥക്ക് കാരണം. എക്സ് റേ യന്ത്രങ്ങൾക്കായി നവംബറിൽ പുതിയ ബ്ലോക്ക് തുറക്കും വരെ കാത്തിരിക്കേണ്ടിവരുമെന്ന സൂചനയാണ് ആശുപത്രി അധികൃതർ നൽകുന്നത്. നിലന്പൂർ ജില്ലാ ആശുപത്രിക്ക് അടിസ്ഥാന സൗകര്യം ഒരുക്കുന്നതിന് ആവശ്യമായ സ്ഥലം കണ്ടെത്തേണ്ടതും അത് ഉടൻ യാഥാർഥ്യമാക്കേണ്ടതും എച്ച്എംസി അംഗങ്ങളുടെയും സർക്കാരിന്‍റെയും ജില്ലാ പഞ്ചായത്തിന്‍റെയും ഉത്തരവാദിത്വം കൂടിയാണ്. ആശുപത്രി വികസനത്തിന് ഫണ്ട് കണ്ടെത്തുന്നതിൽ ജനപ്രതിനിധികൾ ജാഗ്രത കാണിക്കുന്നുണ്ടെങ്കിലും അടിസ്ഥാന സൗകര്യത്തിനുള്ള സ്ഥലമില്ലാത്തതിനാൽ പല ഫണ്ടുകളും ജനങ്ങൾക്ക് പ്രയോജനപ്പെടുന്ന രീതിയിൽ ആശുപത്രിയിൽ നടപ്പാക്കാൻ കഴിയുന്നില്ല.

മഞ്ഞപ്പിത്തം ബാധിച്ച് എട്ടുവയസുകാരൻ മരിച്ചു

എടവണ്ണ: മഞ്ഞപ്പിത്തം കരളിനെ ബാധിച്ച് ചികിൽസയിലായിരുന്ന വിദ്യാർഥി മരിച്ചു. ഒതായി പടിഞ്ഞാറെ ചാത്തല്ലൂർ കല്ലേച്ചിയിലെ എടപ്പരുത്തി വിജീഷ് - ജിംഷി മലയമ്മ ദന്പതിമാരുടെ മകൻ അമൽ കൃഷ്ണ (പാച്ചു-എട്ട്) യാണ് മരിച്ചത്. മുക്കം പുള്ളനൂർ ന്യൂ ജിഎൽപി സ്കൂൾ മൂന്നാംക്ലാസ് വിദ്യാർഥിയാണ്. മഞ്ഞപ്പിത്തം കരളിനെ ബാധിച്ച് കോഴിക്കോട് മെഡിക്കൽ കോളജാശുപത്രിയിൽ ചികിത്സയിലായിരുന്നു. കരൾ മാറ്റിവയ്ക്കൽ ശസ്ത്രക്രിയക്ക് നാട്ടുകാർ മുൻകൈയെടുത്ത് തയാറെടുപ്പുകൾ പൂർത്തീകരിച്ച് വരുന്പോഴാണ് അമൽ കൃഷ്ണ മരിച്ചത്. സഹോദരങ്ങൾ: അജയ് കൃഷ്ണ, അലംകൃത.

ഓട്ടോറിക്ഷക്കുള്ളിൽ ഡ്രൈവർ മരിച്ച നിലയിൽ

എരമംഗലം :പുത്തൻപള്ളിയിൽ ഓട്ടോറിക്ഷ ഡ്രൈവറെ ഓട്ടോറിക്ഷക്കുള്ളിൽ മരിച്ച നിലയിൽ കണ്ടെത്തി. വെളിയംകോട് തണ്ണിത്തുറ സ്വദേശി വലിയകത്ത് നൗഷാദി (55)നെയാണ് ഓട്ടോറിക്ഷക്കകത്ത് മരിച്ച നിലയിൽ കണ്ടെത്തിയത്. പുത്തൻപള്ളി ജാറത്തിനടുത്തുള്ള പാർക്കിംഗ് സ്ഥലത്ത് ഇന്നലെ രാവിലെ ഒന്പത് മണിയോടെയാണ് സംഭവം. പെരുന്പടപ്പ് പോലീസ് നടപടിക്രമങ്ങൾ പൂർത്തിയാക്കി. മൃതദേഹം പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ട് കൊടുത്തു.

മരം മുറിക്കുന്നതിനിടെ പരിക്കേറ്റയാൾ മരിച്ചു

എടക്കര: മരം മുറിക്കുന്നതിനിടെ കൊന്പ് ദേഹത്ത് വീണ് പരിക്കേറ്റയാൾ മരിച്ചു. മൂത്തേടം കൽക്കുളം പൊട്ടിപൊയിൽ വേലായുധൻ (49) ആണ് മരിച്ചത്. ജൂണ്‍ 27 ന് കൽക്കുളത്ത് മരം മുറിക്കുന്നതിനിടെയാണ് സംഭവം. പരിക്കേറ്റ് നിലന്പൂർ ജില്ലാ ആശുപത്രി, മഞ്ചേരി മെഡിക്കൽ കോളജ്, കോഴിക്കോട് മെഡിക്കൽ കോളജ് ആശുപത്രികളിൽ ചികിത്സയിലായിരുന്നു. ഇന്നലെ രാവിലെയാണ് മരിച്ചത്. കോഴിക്കോട് മെഡിക്കൽ കോളജ് ആശുപത്രിയിൽ പോസ്റ്റ്മോർട്ടത്തിന് ശേഷം വൈകിട്ട് സംസ്കാരം നടത്തി. ഭാര്യ: തങ്ക. മക്കൾ: മഹേഷ്ണു, വിസ്മയ, ഉണ്ണിമായ. മരുമകൻ: വിജീഷ്.

യൂത്ത് ലീഗ് പ്രതിഷേധ പ്രകടനം നടത്തി

കരുവാരകുണ്ട്: ആരോഗ്യ രംഗത്തെ തുടരുന്ന അനാസ്ഥയുടെ പശ്ചാത്തലത്തിൽ ആരോഗ്യ മന്ത്രി രാജിവയ്ക്കണമെന്നാവശ്യപ്പെട്ട് മുസ്‌ലിം യൂത്ത് ലീഗ് കമ്മിറ്റി കിഴക്കേത്തലയിൽ പ്രതിഷേധ പ്രകടനം നടത്തി. പൊതുസമ്മേളനം മുസ്‌ലിം യൂത്ത് ലീഗ് ജില്ലാ ജന. സെക്രട്ടറി മുസ്തഫ അബ്ദുൾ ലത്തീഫ് ഉദ്ഘാടനം ചെയ്തു. നിയോജക മണ്ഡലം യൂത്ത് ലീഗ് കമ്മിറ്റി പ്രസിഡന്‍റ് എം.ടി. അലി നൗഷാദ് അധ്യക്ഷത വഹിച്ചു.ജില്ലാ സെക്രട്ടറി നിസാജ് എടപ്പറ്റ, മണ്ഡലം ജന. സെക്രട്ടറി ഒ. കെ. അനീസ് മാസ്റ്റർ, മണ്ഡലം ഭാരവാഹികളായ സി.ടി. ചെറി, ജാഫർ പുൽവെട്ട, കരുവാരകുണ്ട് പഞ്ചായത്ത് യൂത്ത് ലീഗ് കമ്മിറ്റി ഭാരവാഹികളായ അഡ്വ. എൻ. മുഹമ്മദ്‌ ബാദുഷ, ടി. ആദിൽ ജഹാൻ എന്നിവർ സംസാരിച്ചു.

വിദ്യാഭ്യാസ അവാർഡുകൾ സമ്മാനിച്ചു

മങ്കട: കടന്നമണ്ണ സർവീസ് സഹകരണ ബാങ്കിന്‍റെ വിദ്യാഭ്യാസ അവാർഡുകൾ സമ്മാനിച്ചു. മങ്കട ബ്ലോക്ക് പഞ്ചായത്ത് പ്രസിഡന്‍റ് ടി.അബ്ദുൾ കരീം ഉദ്ഘാടനം ചെയ്തു. ബാങ്കിന്‍റെ പൊതുനന്മാ ഫണ്ടിൽ ഉൾപ്പെടുത്തി വെള്ളില പിടിഎം ഹൈസ്കൂളിലേക്കുള്ള സ്മാർട്ട് ടിവി മങ്കട ഗ്രാമപഞ്ചായത്ത് പ്രസിഡന്‍റ് അഡ്വ. കെ. അസ്ഗർ അലി സ്കൂൾ അധികൃതർക്ക് കൈമാറി. ബാങ്ക് പ്രസിഡന്‍റ് സി.ഷൗക്കത്തലി അധ്യക്ഷത വഹിച്ചു. ബ്ലോക്ക് പഞ്ചായത്ത് മെമ്പർ സി.ടി. ഷറഫുദ്ദീൻ, മങ്കട ഗ്രാമപഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ഷരീഫ് ചുണ്ടയിൽ, മെമ്പർ പി. ജംഷീർ, കേരളാ ബാങ്ക് മങ്കട ശാഖ മാനേജർ എ. പ്രീത, വി.കെ. മൻസൂർ, ബാങ്ക് വൈസ് പ്രസിഡന്‍റ് പി. അബ്ദുസമദ്, സെക്രട്ടറി സൈഫുള്ള കറുമുക്കിൽ, പി.ടി. അബ്ദുൽ മജീദ്, ടി. നാരായണൻ, പി.സൈഫുന്നീസ, പി. കുഞ്ഞിമുഹമ്മദ്, ഷഫീഖ് കുന്നത്തൊടി എന്നിവർ പ്രസംഗിച്ചു.

തൊഴിലാളികൾ പോലീസ് സ്റ്റേഷന്‍ മാര്‍ച്ച് നടത്തി

മഞ്ചേരി: കഴിഞ്ഞ ദിവസം സംയുക്ത ട്രേഡ് യൂണിയനുകള്‍ ആഹ്വാനം ചെയ്ത പണിമുടക്കിനിടെ തൊഴിലാളി നേതാക്കളെ പോലീസ് മര്‍ദിച്ചെന്നാരോപിച്ച് തൊഴിലാളികള്‍ മഞ്ചേരി പോലീസ് സ്റ്റേഷനിലേക്ക് മാര്‍ച്ച് നടത്തി. സിഐടിയു സെന്‍ററില്‍ നിന്ന് പ്രകടനമായി എത്തിയ പ്രവര്‍ത്തകര്‍ പോലീസ് വലയം മറികടന്ന് സ്റ്റേഷനിലേക്ക് ഇരച്ചുകയറാന്‍ ശ്രമിച്ചെങ്കിലും പോലീസ് തടഞ്ഞു. സിഐടിയു സംസ്ഥാന വൈസ് പ്രസിഡന്‍റ് വി. ശശികുമാര്‍ മാർച്ച് ഉദ്ഘാടനം ചെയ്തു. എഐടിയുസി ജില്ലാ ട്രഷറര്‍ പി. സുബ്രമണ്യന്‍ അധ്യക്ഷത വഹിച്ചു. അഡ്വ. കെ. ഫിറോസ് ബാബു, പി. കെ. മുരളീധരന്‍, പി സകരിയ, രാജന്‍ പരുത്തിപ്പറ്റ, ടി. അന്‍സാര്‍, ഡിബോണ നാസര്‍ പ്രസംഗിച്ചു.

ട്രാഫിക് ബോധവത്കരണവും അഡ്‌വൈസറി കമ്മിറ്റി യോഗവും

എടക്കര: നാരോക്കാവ് ഹയര്‍ സെക്കന്‍ഡറി സ്‌കൂള്‍ സീനിയര്‍ എസ്പിസി കാഡറ്റുകള്‍ക്കും രക്ഷിതാക്കള്‍ക്കുമായി ട്രാഫിക് ബോധവത്കരണവും 2025-26 വര്‍ഷ അഡ്വൈസറി കമ്മിറ്റി യോഗവും ചേര്‍ന്നു. വഴിക്കടവ് വനം റേഞ്ച് ഓഫിസര്‍ ശരീഫ് പനോലന്‍ ഉദ്ഘാടനം ചെയ്തു. പ്രധാനാധ്യാപകന്‍ രാജേഷ് കുമാര്‍ അധ്യക്ഷത വഹിച്ചു. വഴിക്കടവ് പോലീസ് ഇന്‍സ്‌പെക്ടര്‍ ധനഞ്ജയദാസ് ക്ലാസെടുത്തു. നിലമ്പൂര്‍ അഗ്‌നിരക്ഷാസേന നിലയം ഓഫീസര്‍ കെ.പി. ബാബുരാജ്, മോട്ടോര്‍ വെഹിക്കിള്‍ ഇന്‍സ്‌പെക്ടര്‍ രവിവര്‍മ ഏറാടി, സിവില്‍ എക്‌സൈസ് ഓഫീസര്‍ കെ. രാജേഷ്, ഡി.ഐ. ഗീത, വി.പി. റസിയ, കെ.പി. മുസഫര്‍, ദിവ്യരാജ്, ആശ രാജ്, കെ. മറിയ, കെ.വി. മൊയ്തീന്‍ കുട്ടി, മുനീറ എന്നിവര്‍ സംസാരിച്ചു. എക്‌സൈസ് വകുപ്പിന്‍റെ ലഹരി വിരുദ്ധ കൈപുസ്തകമായ "കരുതല്‍' വിതരണവും നടത്തി.

മഹിള കോണ്‍ഗ്രസ് സാഹസ് യാത്രക്ക് സ്വീകരണം നല്‍കി

എടക്കര: വഴിക്കടവ് മണ്ഡലം മഹിള കോണ്‍ഗ്രസ് കമ്മിറ്റിയുടെ നേതൃത്വത്തില്‍ ജെബി മേത്തര്‍ എംപി നയിക്കുന്ന മഹിള സാഹസ് യാത്രക്ക് മണിമൂളിയില്‍ സ്വീകരണം നല്‍കി. കെപിസിസി ജനറല്‍ സെക്രട്ടറി ആലിപ്പറ്റ ജമീല ഉദ്ഘാടനം ചെയ്തു. ഉഷാവേലു അധ്യക്ഷത വഹിച്ചു. ഡിസിസി പ്രസിഡന്‍റ് വി.എസ്. ജോയ്, മണ്ഡലം കോണ്‍ഗ്രസ് പ്രസിഡന്‍റ് സുനീര്‍ മണല്‍പ്പാടം, ടി.കെ. അഫ്‌സത്ത്, ഷില്‍ജ ബിജു, രാധാമണി, ജെസി തോമസ് എന്നിവര്‍ സംസാരിച്ചു.

ക്യാമ്പസിലെ അക്രമ സംഭവം: പ്രതിഷേധ മാർച്ച് നടത്തി എംഎസ്എഫ്

തേഞ്ഞിപ്പലം: കാലിക്കട്ട് യൂണിവേഴ്സിറ്റി ഭരണകാര്യാലയത്തിലേക്ക് എംഎസ്എഫ് പ്രതിഷേധ മാർച്ച് നടത്തി. ക്യാമ്പസിലെ സമാധാന അന്തരീക്ഷം തകർക്കുന്നവർക്കെതിരേ നടപടിയെടുക്കണമെന്ന് ആവശ്യപ്പെട്ടായിരുന്നു സമരം. സമരത്തെ തുടർന്ന് രജിസ്ട്രാറുമായി ചർച്ച നടത്തി. പ്രശ്നങ്ങൾ പരിഹരിക്കാമെന്ന് രജിസ്ട്രാർ ഉറപ്പുനൽകിയതായി നേതാക്കൾ പറഞ്ഞു. സമരം സംസ്ഥാന പ്രസിഡന്‍റ് പി.കെ നവാസ് ഉദ്ഘാടനം ചെയ്തു. ജില്ലാ, സംസ്ഥാനതല ഭാരവാഹികളായ പി.എ. ജവാദ്, ഫൈസൽ തടത്തിൽ, പി. മുസ്തഫ,സലാഹുദ്ധീൻ തെന്നല, കെ. നിസാം, അർഷാദ് തറയിട്ടാൽ, ടി.സി. മുസാഫിർ, പി.കെ. മുബഷിർ, അൽതാഫ്, ഫർഹാന എന്നിവർ സംസാരിച്ചു. .

ജില്ലാ ആശുപത്രിയിലെ അത്യാഹിത വിഭാഗം ന്യൂ സർജിക്കൽ വാർഡിലേക്ക് മാറ്റി

പെരിന്തൽമണ്ണ: ജില്ലാ ആശുപത്രിയിലെ അത്യാഹിത വിഭാഗം ന്യൂ സർജിക്കൽ വാർഡിലേക്ക് മാറ്റി.ജില്ലാ ആശുപത്രി സൂപ്രണ്ട് ഡോ. ഷീനാലാലിന്‍റെ നിർദേശാനുസരണം നിലവിൽ പ്രവർത്തിച്ചിരുന്ന അത്യാഹിത വിഭാഗത്തിലെ ഉപകരണങ്ങളും മറ്റും ന്യൂ സർജിക്കൽ വാർഡിലേക്ക് മാറ്റി. മലപ്പുറം ജില്ലാ ട്രോമാകെയർ പെരിന്തൽമണ്ണ സ്റ്റേഷൻ യൂണിറ്റ് ലീഡർ ജബ്ബാർ ജൂബിലിയുടെ നേതൃത്വത്തിൽ സുമേഷ് വലമ്പൂർ,വാഹിദ അബു, ഫാറൂഖ് പൂപ്പലം, നിസാം മാനത്ത്മംഗലം, സുബീഷ് കെ. ദാസ് പരിയാപുരം, യദു കൃഷ്ണ പാതയ്ക്കര, ശ്യാം പാതയ്ക്കര, രവീന്ദ്രൻ പാതായ്ക്കര, അൻവർ ഫൈസി പാതായ്ക്കര, ഖദീജ ജൂബിലി, കുട്ടൻ കാരുണ്യ എന്നിവർ അത്യാഹിത വിഭാഗം പുതിയ സർജിക്കൽ വാർഡിലേക്ക് മാറ്റുന്ന പ്രവൃത്തിയിൽ ഏർപ്പെട്ടു.

തണൽ ഡയാലിസിസ് സെന്‍ററിന് സഹായ ഹസ്തവുമായി ജാപ്പ

പൂക്കോട്ടുംപാടം: കേരള വ്യാപാരി വ്യവസായി ഏകോപന സമിതി അമരമ്പലം യൂണിറ്റ് നടത്തുന്ന തണൽ ഡയാലിസിസ് സെന്‍ററിന് കാരുണ്യ സ്പർശമേകി ജിദ്ദ അമരമ്പലം പ്രവാസി അസോസിയേഷൻ (ജാപ്പ ). വ്യാപാരഭവനിൽ നടന്ന പ്രവർത്തക സംഗമത്തിൽ ജാപ്പ മുഖ്യരക്ഷാധികാരി എൻ. ഹുസൈൻ ഒന്നാംഘട്ട സാമ്പത്തിക സഹായം ഡയാലിസിസ് സെന്‍റർ ഭാരവാഹികളായ ടി. അബ്ബാസ്, കെ. രാജീവൻ, ഇരുമ്പുഴി സലീം എന്നിവർക്ക് കൈമാറി. യൂണിറ്റ് പ്രസിഡന്‍റ് ടി.കെ. മുകുന്ദൻ അധ്യക്ഷത വഹിച്ചു. അമരമ്പലം ഗ്രാമപഞ്ചായത്ത് പ്രസിഡന്‍റ് ഇല്ലിക്കൽ ഹുസൈൻ മുഖ്യപ്രഭാഷണം നടത്തി. കെവിവിഇഎസ് കാരുണ്യനിധിയുടെയും യൂത്ത് വിംഗ് ഉണർവ് പദ്ധതിയുടെയും നറുക്കെടുപ്പ് അദ്ദേഹം നിർവഹിച്ചു. കെവിവിഇഎസ് ജില്ലാ ജനറൽ സെക്രട്ടറി എം. കുഞ്ഞിമുഹമ്മദ് പദ്ധതി വിശദീകരണം നടത്തി. തുടർന്ന് വനിതാ വിംഗ് സംസ്ഥാന ട്രഷററായി തെരെഞ്ഞെടുത്ത യൂണിറ്റ് പ്രസിഡന്‍റ് പി. ജാസ്മിനെ ആദരിച്ചു. വനിതാ വിംഗിന്‍റെ നേതൃത്വത്തിൽ സ്വരൂപിച്ച റജീന ഫണ്ട് കൈമാറി. ജാപ്പ പ്രസിഡന്‍റ് അനീസ് തെക്കുമ്പുറക്കും ലത്തീഫ് മാസ്റ്ററും ധനസഹായം കൈമാറി. പി.എം. സീതിക്കോയ തങ്ങൾ, വി.പി. അബ്ദുൾകരീം, അടുക്കത്ത് ഇസ്ഹാഖ്, കെ.സി. വേലായുധൻ, ബഷീർ കുറ്റമ്പാറ, അഷ്റഫ് മുണ്ടശേരി, കെ.വി. കുഞ്ഞാൻ, ഭാരവാഹികളായ കെ.അലി, റജുന പുലത്ത്, ആരിഫ , എം. മോഹൻദാസ്, മാവുങ്ങൽ അബ്ദുൾ കരീം തുടങ്ങിയവർ സംസാരിച്ചു.

എക്സ്റേ മെഷിൻ പ്രവർത്തനരഹിതം; നിലമ്പൂർ ജില്ലാ ആശുപത്രിയിലേക്ക് മാർച്ചും ധർണയും നടത്തി

നിലന്പൂർ: നിലമ്പൂർ ജില്ലാ ആശുപത്രിയിലെ എക്സ്റേ മെഷീൻ രണ്ടായ്ചയിലേറെയായി തകരാറിലായതിനെ തു‌ടർന്ന് പ്രതിഷേധവുമായി യൂത്ത് കോൺഗ്രസ്. ജില്ലാ ആശുപത്രിയിലേക്ക് മാർച്ചും ധർണയും നടത്തി. ഡിസിസി പ്രസിഡന്‍റ് വി.എസ്. ജോയ് പ്രതിഷേധം ഉദ്ഘാടനം ചെയ്തു. ആയിരകണക്കിന് രോഗികൾ ആശ്രയിക്കുന്ന നിലമ്പൂർ ജില്ലാ ആശുപത്രിയിലെ എക്സ്റേ മെഷിൻ പ്രവർത്തന രഹിതമായതിനാൽ നിർധന രോഗികൾ സ്വകാര്യ ആശുപത്രികളെ ആശ്രയിക്കേണ്ട അവസ്ഥയിലാണെന്ന് യൂത്ത് കോൺഗ്രസ് നിലമ്പൂർ നിയോജകമണ്ഡലം പ്രസിഡന്‍റ് അമീർ പൊറ്റമ്മൽ പറഞ്ഞു. അതേ സമയം മെഷിൻ പ്രവർത്തന സജ്ജമാക്കാൻ അടിയന്തര നടപടി സ്വീകരിക്കുമെന്ന് ജില്ലാ ആശുപത്രി സൂപ്രണ്ട്. ഡോ. ഷിനാസ് ബാബു വ്യക്തമാക്കി.

മഞ്ചേരി നഗരസഭയുടെ ദുര്‍ഭരണം; എല്‍ഡിഎഫ് കൗണ്‍സിലര്‍മാര്‍ പ്രതിഷേധ ധര്‍ണ നടത്തി

മഞ്ചേരി: മഞ്ചേരി നഗരസഭയുടെ ദുര്‍ഭരണത്തിനും അഴിമതിക്കുമെതിരെ എല്‍ഡിഎഫ് കൗണ്‍സിലര്‍മാര്‍ പ്രതിഷേധ ധര്‍ണ സംഘടിപ്പിച്ചു. അടിസ്ഥാന സൗകര്യ വികസനത്തിന് സര്‍ക്കാര്‍ അനുവദിച്ച 9.67 നഷ്ടപ്പെടുത്തിയെന്ന ഓഡിറ്റ് വകുപ്പിന്‍റെ കണ്ടെത്തല്‍ കൗണ്‍സില്‍ ചര്‍ച്ചയ്ക്കെടുക്കുക, ഡയാലിസിസ് രോഗികള്‍ക്കുള്ള കിറ്റ് വിതരണത്തിലും ആശുപത്രികള്‍ക്കുള്ള മരുന്ന് വിതരണത്തിലും ഗുരുതരമായ ക്രമക്കേട് നടന്നതായ ഓഡിറ്റ് പരാമര്‍ശത്തില്‍ കുറ്റക്കാര്‍ക്കെതിരേ നടപടി സ്വീകരിക്കുക, ഭവനപദ്ധതി നടപ്പിലാക്കുക തുടങ്ങി ആവശ്യങ്ങള്‍ ഉന്നയിച്ചായിരുന്നു മാര്‍ച്ച്. നടപടിക്രമങ്ങള്‍ പൂര്‍ത്തിയാക്കുന്നതില്‍ വീഴ്ച വരുത്തിയത് കാരണം കേന്ദ്ര സംസ്ഥാന സര്‍ക്കാരുകളില്‍ നിന്ന് ലഭിക്കേണ്ട 14 കോടി രൂപയുടെ ഗ്രാന്‍റും നഷ്ടപ്പെടുത്തി. ഓഡിറ്റ് റിപ്പോര്‍ട്ട് 30 ദിവസത്തിനുള്ളില്‍ കൗണ്‍സിലില്‍ ചര്‍ച്ച ചെയ്യണമെന്നാണ് ചട്ടം. എന്നാല്‍ മൂന്ന് മാസം കഴിഞ്ഞിട്ടും വിഷയം ചര്‍ച്ച ചെയ്യാന്‍ പോലും ഭരണസമിതി കൂട്ടാക്കിയില്ല. ഓഡിറ്റ് ചര്‍ച്ചെക്കെടുത്താല്‍ അഴിമതികള്‍ ഓരോന്നായി പുറത്തുവരുമെന്ന ഭയമാണ് ഇതിനുപിന്നില്‍. ഭരണപക്ഷ വാര്‍ഡുകള്‍ക്ക് 8 മുതല്‍ 15 ലക്ഷം വരെ വികസന ഫണ്ട് അനുവദിക്കുന്നു. എന്നാല്‍ പ്രതിപക്ഷ വാര്‍ഡുകള്‍ക്ക് മൂന്ന് ലക്ഷം മാത്രമാണ് അനുവദിക്കുന്നത്. ഓഡിറ്റ് റിപ്പോര്‍ട്ട് പുറത്തുവന്ന സാഹചര്യത്തില്‍ ഭരണസമിതി രാജിവയ്ക്കണെമെന്നും കുറ്റക്കാര്‍ക്കെതിരേ നടപടി സ്വീകരിക്കണമെന്നും പ്രതിപക്ഷം ആവശ്യപ്പെട്ടു. ടൗണ്‍ ചുറ്റിയ മാര്‍ച്ച് നഗരസഭാ ഓഫീസിന് മുന്നില്‍ വെച്ച് പോലീസ് തടഞ്ഞു. സിപിഎം ഏരിയാ സെക്രട്ടറി അഡ്വ. കെ. ഫിറോസ് ബാബു ഉദ്ഘാടനം ചെയ്തു. അഡ്വ. പ്രേമാ രാജീവ് അധ്യക്ഷത വഹിച്ചു. കൗണ്‍സിലര്‍ സാജിദ് ബാബു, കെ. ഉബൈദ്, എ.വി. സുലൈമാന്‍, സി.പി. അബ്ദുല്‍ കരീം, കെ. ടി. മുഹമ്മദലി എന്നിവര്‍ സംസാരിച്ചു.

കരുവാരകുണ്ട് കക്കറ വാർഡ് വിഭജനം; ഹൈക്കോടതി ഇടക്കാല ഉത്തരവ് പുറപ്പെടുവിച്ചു

കരുവാരകുണ്ട്: കരുവാരകുണ്ട് ഗ്രാമപഞ്ചായത്തിലെ കക്കറ വാർഡ് വിഭജനത്തിൽ ക്രമക്കേടുകൾ ഉണ്ടെന്നാരോപിച്ച് സമർപ്പിച്ച ഹർജിയിൽ ഹൈക്കോടതി ഇടക്കാല ഉത്തരവ് പുറപ്പെടുവിച്ചു. കേസിന്‍റെ അന്തിമവിധിക്ക് വിധേയമായിട്ടായിരിക്കും കക്കറ വാർഡ് വിഭജനം അന്തിമമാവുകയുള്ളൂയെന്ന് ഇടക്കാല ഉത്തരവിൽ ഹൈക്കോടതി വ്യക്തമാക്കി. കക്കറ വാര്‍ഡ്‌ യുഡിഎഫ് കമ്മറ്റിക്ക് വേണ്ടി നൗഫൽ കക്കറ നൽകിയ ഹർജിയിൽ ജസ്റ്റിസ് സി.എസ്. ഡൈസാണ് ഇടക്കാല ഉത്തരവ് പുറപ്പെടുവിച്ചത്. ഹര്‍ജിക്കാര്‍ക്ക് വേണ്ടി അഡ്വ. ഒ.സിദ്ധാര്‍ഥ്, അഡ്വ. എൻ.എ. മുഹമ്മദ്‌ ബാദുഷ, അഡ്വ.സുശാന്ത് ഷാജി, അഡ്വ.ആൽബിൻ എ.ജോസഫ്, അഡ്വ. നേഘാ വർഗീസ്, അഡ്വ. എം. പാർവതി എന്നിവര്‍ ഹാജരായി.

"ജനങ്ങളെ ദുരിതത്തിലാക്കി രാഷ്ട്രീയ നേട്ടമുണ്ടാക്കാൻ സിപിഎം ശ്രമിക്കുന്നു'

അങ്ങാടിപ്പുറം: വികസനം മുടക്കി ജനങ്ങളെ ദുരിതത്തിലാക്കി രാഷ്ട്രീയ ലാഭമുണ്ടാക്കാനാണ് സിപി എം ശ്രമിക്കുന്നതെന്ന് അങ്ങാടിപ്പുറം പഞ്ചായത്ത് യുഡിഎഫ് കൺവൻഷൻ ആരോപിച്ചു. ഓരാടംപാലത്തുനിന്ന് മാനത്തുമംഗലത്തേക്ക് ബൈപാസ് നിർമാണം ത്വരിതഗതിയിലാക്കി അങ്ങാടിപ്പുറത്തെ ഗതാഗത കുരുക്കിന് ശാശ്വത പരിഹാരം അടിയന്തരമായി കാണണമെന്ന് യുഡിഎഫ് ആവശ്യപ്പെട്ടു. സിപിഎം അവരുടെ മന്ത്രിമാർക്ക് നിവേദനങ്ങൾ നൽകുന്നതും മന്ത്രി നിർദിഷ്ട ബൈപാസിന്‍റെ സ്ഥലം സന്ദർശിക്കുന്നതും ജനങ്ങളെ തെറ്റിധരിപ്പിക്കുന്നതിനുള്ള നാടകം മാത്രമാണെന്നും ആരോപണം ഉയർന്നു. കൺവൻഷൻ മുസ്‌ലിംലീഗ് ജില്ലാ വൈസ് പ്രസിഡന്‍റ് ഉമ്മർ അറക്കൽ ഉദ്ഘാടനം ചെയ്തു. മുരളീധരൻ അധ്യക്ഷത വഹിച്ചു. പി. രാധാകൃഷ്ണൻ മുഖ്യപ്രഭാഷണം നടത്തി. കെ.എസ്. ഹനീഷ്, പി.വി. മാത്യു വർഗീസ്, ജബ്ബാർ, എന്നിവർ പ്രസംഗിച്ചു.

ഗഫൂർ അലിയുടെ ഭാര്യ വനംവകുപ്പിൽ താത്കാലിക ജോലിയിൽ പ്രവേശിച്ചു

നിലമ്പൂർ: കടുവാ ആക്രമണത്തിൽ കൊല്ലപ്പെ‌ട്ട ഗഫൂർ അലിയുടെ ഭാര്യ ഹന്നത്ത് വനംവകുപ്പിൽ താത്കാലിക ജീവനക്കാരിയായി ജോലിയിൽ പ്രവേശിച്ചു. നിലമ്പൂർ സൗത്ത് ഡിഎഫ്ഒ ധനിക് ലാലിന്‍റെ ഓഫീസിൽ എത്തിയാണ് ഹന്നത്ത് ജോലിയിൽ പ്രവേശിച്ചത്. വനംമന്ത്രി എ.കെ.ശശീന്ദ്രൻ ഗഫൂർ അലിയുടെ വീട്ടിലെത്തി ഹന്നത്തിന് ജോലി ഉറപ്പ് നൽകിയിരുന്നു. ഇതിന്‍റെ അടിസ്ഥാനത്തിലാണ് ഇന്നലെ നിലമ്പൂർ സൗത്ത് ഡിവിഷൻ ഓഫീസിലെത്തി ജോലിയിൽ പ്രവേശിച്ചത്. കഴിഞ്ഞ മേയ് 15 നാണ് കാളികാവ് അടക്കാക്കുണ്ട് എസ്റ്റേറ്റിൽ വെച്ച് ടാപ്പിംഗിനിടയിൽ ഗഫൂർ അലിയെ കടുവ കടിച്ചുകൊന്നത്. മലപ്പുറം ജില്ലയിൽ ആദ്യമായാണ് കടുവയുടെ ആക്രമണത്തിൽ ഒരാൾ കൊല്ലപ്പെടുന്നത്. ഗഫൂർ അലിയുടെ മരണത്തോടെ ഭാര്യയും മൂന്ന് മക്കളും നിസഹായാവസ്ഥയിലായിരുന്നു. നിലമ്പൂർ ഡിവിഷൻ ഓഫീസിലായിരിക്കും ഹന്നത്ത് ജോലി ചെയ്യുക. സഹോദരങ്ങളായ ഹർഷൽ, നാഷി, എൻസിപി നേതാക്കളായ പരുന്തൻ നൗഷാദ്, കണ്ണിയൻ കരീം, കുട്ട്യാമ്മു എന്നിവരും വനംവകുപ്പ് ഓഫീസിലെത്തിയിരുന്നു.

ഫൈബർ ഗ്ലാസ് വള്ളത്തിന്‍റെ മരക്കാൽ പൊട്ടി കടലിൽവീണു : മൂന്ന് മത്സ്യത്തൊഴിലാളികൾക്ക് പരിക്ക്

താനൂർ: ഫൈബർ ഗ്ലാസ് വള്ളത്തിന്‍റെ മരക്കാൽ പൊട്ടി കടലിൽ വീണ് മൂന്ന് മത്സ്യത്തൊഴിലാളികൾക്ക് പരിക്ക്. പരപ്പനങ്ങാടി സ്വദേശികളായ കൊങ്ങന്‍റെ പുരക്കൽ അലി അക്ബർ (47), ചീരാമാന്‍റെ പുരക്കൽ അഷ്റഫ് (57), പറമ്പിൽ വീട്ടിൽ മാമുക്കോയ (55) എന്നിവർക്കാണ് പരിക്കേറ്റത്. കൂട്ടായിക്ക് നേരെ 20 കിലോമീറ്റർ അകലെ ഇന്നലെ രാവിലെ 8.30 നാണ് അപകടം നടന്നത്. പരപ്പനങ്ങാടിയിലെ എ.പി.റഷീദ്, കെ.പി.മുനീർ എന്നിവരുടെ ഉടമസ്ഥതയിലുള്ള ബുറാഖ് വള്ളത്തിൽ പുലർച്ചെ മത്സ്യബന്ധനത്തിന് പുറപ്പെട്ടതായിരുന്നു തൊഴിലാളികൾ. വള്ളത്തിലെ കയറും മറ്റും ബന്ധിപ്പിക്കുന്ന മരക്കാലിൽ പിടിച്ചുനിൽക്കുന്നതിനിടെ അബദ്ധത്തിൽ പൊട്ടി വീഴുകയായിരുന്നു. ഇതിൽ പിടിച്ചു നിന്നിരുന്ന മൂന്ന് തൊഴിലാളികളും കടലിൽ വീണു. ഒപ്പമുണ്ടായിരുന്ന മറ്റു തൊഴിലാളികൾ ഇവരെ രക്ഷപ്പെടുത്തി ഇതേ വള്ളത്തിൽ തന്നെ തുറമുഖത്ത് അടുപ്പിക്കുകയായിരുന്നു. കാലിന് സാരമായി പരിക്കേറ്റ അലി അക്ബറിനെ കോട്ടക്കൽ സ്വകാര്യ ആശുപത്രിയിലും മറ്റു രണ്ടുപേരെ മൂലക്കൽ സ്വകാര്യ ആശുപത്രിയിലും പ്രവേശിപ്പിച്ചു.

അങ്ങാടിപ്പുറം മേൽപ്പാലം ഇന്ന് പൂർണമായി തുറക്കും

പെരിന്തൽമണ്ണ: കോഴിക്കോട്-പാലക്കാട് ദേശീയപാതയിൽ അങ്ങാടിപ്പുറം മേൽപ്പാലം ഇന്ന് ബസുകൾക്കും ചരക്കുവാഹനങ്ങൾക്കും ഉൾപ്പെടെ പൂർണമായി തുറക്കും. റോഡിൽ കട്ട പതിച്ച് നവീകരണം പൂർത്തിയാക്കി കഴിഞ്ഞ അഞ്ചിന് പാലം തുറന്നെങ്കിലും നാലുചക്ര വാഹനങ്ങൾ ഉൾപ്പെടെയുള്ള ചെറിയ വാഹനങ്ങൾക്ക് മാത്രമാണ് ഗതാഗതം അനുവദിച്ചിരുന്നത്. കട്ട പതിച്ച റോഡ് ബലപ്പെടുത്തുന്നതിനായിരുന്നു വലിയ വാഹനങ്ങളെ നിയന്ത്രിച്ചത്. ബസുകളിലേറെയും അങ്ങാടിപ്പുറം വരെയെത്തി ആളുകളെ ഇറക്കുകയും കയറ്റുകയും ചെയ്‌ത് തിരിച്ചു പോവുകയായിരുന്നു. പെരിന്തൽമണ്ണ മുതൽ അങ്ങാടിപ്പുറം വരെയും സർവീസ് നടത്തിയിരുന്നു. റോഡിലെ നിയന്ത്രണം പൂർണമായി നീക്കുമ്പോഴും ചരക്കു വാഹനങ്ങൾക്ക് രാവിലെ 8.30 മുതൽ 10.30 വരെയും വൈകുന്നേരം മൂന്ന് മുതൽ അഞ്ചുവരെയും മേൽപ്പാലത്തിലൂടെ ഗതാഗതം നിരോധിച്ചിട്ടുണ്ട്.

മങ്കട മണ്ഡലത്തിലെ നാല് പിഡബ്ല്യുഡി റോഡുകൾക്ക് ഭരണാനുമതി

മങ്കട: മങ്കട മണ്ഡലത്തിൽ ശോചനീയാവസ്ഥയിലുള്ള നാല് പിഡബ്ല്യുഡി റോഡുകളുടെ അറ്റകുറ്റ പണി നടത്തുന്നതിന് രണ്ടുകോടി എട്ടുലക്ഷം രൂപയുടെ ഭരണാനുമതി ലഭ്യമായതായി മഞ്ഞളാംകുഴി അലി എംഎൽഎ അറിയിച്ചു.തിരൂർക്കാട്-അനക്കയം റോഡ് (96.3 ലക്ഷം ), കൊളത്തൂർ-മലപ്പുറം റോഡ്, കൊളത്തൂർ വില്ലേജ്പടി-തെക്കേക്കര-എടയൂർ റോഡ് (67 ലക്ഷം ), അങ്ങാടിപ്പുറം-ചെറുകുളമ്പ് റോഡ് (43.5 ലക്ഷം) എന്നീ റോഡുകൾക്കാണ് ഫണ്ട്‌ അനുവദിച്ചത്. റണ്ണിംഗ് കോൺട്രാക്ടിൽ ഉൾപ്പെടുത്തിയാണ് ഈ റോഡുകൾ നവീകരിക്കുക. ഈ റോഡുകളുടെ ശോചനീയാവസ്ഥ മഞ്ഞളാംകുഴി അലി എംഎൽഎ നിരവധി തവണ നിയമസഭയിൽ ഉന്നയിക്കുകയും വകുപ്പ് മന്ത്രിയുടെ ശ്രദ്ധയിൽ കൊണ്ടുവരികയും ചെയ്തിരുന്നു. ടെൻഡർ നടപടി പൂർത്തിയാക്കി പ്രവൃത്തി ഉടൻ ആരംഭിക്കുമെന്നും റോഡുകൾ ബിഎംബിസി നിലവാരത്തിൽ നവീകരിക്കുന്നതുവരെ പരിശ്രമങ്ങളും ജനകീയ സമരങ്ങളും തുടരുമെന്നും എംഎൽഎ പറഞ്ഞു.

ചേറുമ്പ് ഇക്കോ ടൂറിസം വില്ലേജ് നാശത്തിന്‍റെ വക്കിൽ

കരുവാരകുണ്ട്: ചേറുമ്പ് ഇക്കോ ടൂറിസം വില്ലേജ് നാശത്തിന്‍റെ വക്കിലെന്ന് പരാതി. രണ്ടുകോടി രൂപ ചെലവഴിച്ച് 2015 ൽ നിർമിച്ച വില്ലേജ് ഇപ്പോൾ ഡിടിപിസിക്കും ഗ്രാമ പഞ്ചായത്തിനും താൽപര്യമില്ലാതെ അനാഥമായി കിടക്കുകയാണ്. കരുവാരകുണ്ട് അങ്ങാടിയോട് ചേർന്നൊഴുകുന്ന ഒലിപ്പുഴയുടെ ഇരു വശങ്ങളിലായാണ് ടൂറിസം വില്ലേജ് സ്ഥാപിച്ചിട്ടുള്ളത്. തുടക്കത്തിൽ ധാരാളം പേരെത്തിയിരുന്ന ഇവിടെ ഇപ്പോൾ മിക്ക ദിവസങ്ങളിലും അമ്പത് പേർ പോലും എത്തുന്നില്ല. ടൂറിസ്റ്റുകളെ ആകർഷിക്കുന്നതിന് നേരത്തെ ബോട്ട് സർവീസ് നടത്തിയിരുന്നതാണ്. എന്നാൽ കാടുമൂടിയും മണ്ണടിഞ്ഞും പുഴ നശിച്ചതിനാൽ ബോട്ട് സർവീസും നിലച്ചു . ജില്ലാ ടൂറിസം പ്രമോഷൻ കൗൺസിലാണ് പദ്ധതി നടപ്പാക്കിയത്. മുടക്കു മുതൽ ലഭിച്ചാൽ പദ്ധതി ഗ്രാമപഞ്ചായത്തിനു കൈമാറുമെന്നാണ് നേരത്തെ പറഞ്ഞിരുന്നത്.എന്നാൽ ഏറ്റെടുക്കാൻ പഞ്ചായത്ത് തയാറാകുന്നില്ലെന്നാണ് നാട്ടുകാർ പറയുന്നത്. കുട്ടികൾക്ക് വേണ്ടി സ്ഥാപിച്ചിരുന്ന റൈഡുകളും പൂർണമായി തുരുമ്പെടുത്ത് നശിച്ചു. ഏക്കറോളം വിസ്തൃതിയിലുള്ള പാർക്ക് നേരമ്പോക്കിനും പ്രകൃതി ആസ്വാദനത്തിനും പറ്റിയ ഇടമാണ്. ആളുകളെ ആകർഷിക്കുന്നതിന് നടപടിയുണ്ടാവുകയും പാർക്കിന്‍റെ നവീകരണത്തിനാവശ്യമായ നടപടികൾ സ്വീകരിക്കുകയും ചെയ്യണമെന്നാണ് നാട്ടുകാരുടെ ആവശ്യം.

കാറും ഓട്ടോയും കൂട്ടിയിടിച്ചു; ഓട്ടോ ഡ്രൈവർക്ക് ഗുരുതര പരിക്ക്

വണ്ടൂർ: വണ്ടൂരിൽ കാറും ഓട്ടോറിക്ഷയും കൂട്ടിയിടിച്ചുണ്ടായ അപകടത്തിൽ ഓട്ടോ ഡ്രൈവർക്ക് ഗുരുതര പരിക്ക്. അമ്പലപ്പടി പുല്ലൂർ സ്വദേശി ശബീറിനാണ് പരിക്കേറ്റത്. സിഎച്ച് ബൈപാസ് റോഡിൽ ഇന്നലെ ഉച്ചയ്ക്ക് 12നാണ് അപകടം ന‌ടന്നത്. മരക്കുലംകുന്ന് റോഡിൽ നിന്നും ബൈപാസ് റോഡിലേക്ക് പ്രവേശിക്കുകയായിരുന്ന ഓട്ടോയും ബൈപാസ് റോഡിലൂടെ കൂരിക്കുണ്ട് ഭാഗത്തേക്ക് പോവുകയായിരുന്ന കാറുമാണ് കൂട്ടിയിടിച്ചത്. പരിക്കേറ്റ ശബീറിനെ ഉടൻതന്നെ വണ്ടൂരിലെ സ്വകാര്യ ആശുപത്രിയിൽ പ്രവേശിപ്പിക്കുകയും തുടർന്ന് വിദഗ്ധ ചികിത്സക്കായി പെരിന്തൽമണ്ണയിലെ സ്വകാര്യ ആശുപത്രിയിലേക്ക് മാറ്റുകയും ചെയ്തു. അപകടത്തിൽ ഓട്ടോറിക്ഷ തകർന്ന നിലയിലാണ്. കാറിന്‍റെ മുൻഭാഗവും തകർന്നിട്ടുണ്ട്.

കാലിക്കട്ട് വാഴ്സിറ്റിയിൽ ജീവനക്കാരുടെ പെൻഡൗൺ സമരം : രണ്ടാം ദിനത്തിലും യുഡിഎഫ് ജീവനക്കാർ ജോലി ബഹിഷ്കരിച്ചു

തേഞ്ഞിപ്പലം: കാലിക്കട്ട് യൂണിവേഴ്സിറ്റിയിൽ യുഡിഎഫ് അനുകൂല സംഘടനാംഗങ്ങളായ ജീവനക്കാരുടെ പെൻഡൗൺ മൂന്നാം ദിനത്തിലേക്ക്. എസ്എഫ്ഐ അതിക്രമത്തിൽ പ്രതിഷേധിച്ച് ദേശീയ പണിമുടക്ക് ദിനത്തിലാണ് യൂണിവേഴ്‌സിറ്റി സ്റ്റാഫ് ഓര്‍ഗനൈസേഷനും സോളിഡാരിറ്റി ഓഫ് യൂണിവേഴ്‌സിറ്റി എംപ്ലോയീസും സമരം തുടങ്ങിയത്. ജീവനക്കാരെ അക്രമിച്ചവർക്കെതിരേ വിസി അച്ചടക്ക നടപടി സ്വീകരിക്കണമെന്ന് ആവശ്യപ്പെട്ടാണ് നിസഹകരണ സമരം.ബഹിഷ്കരണ സമരത്തിന്‍റെ രണ്ടാം ദിനമായ ഇന്നലെയും ഓഫീസിലെത്തിയ ജീവനക്കാര്‍ ഒപ്പിട്ട് ജോലി ചെയ്യാതെ പ്രതിഷേധിച്ചു.തുടര്‍ന്ന് സര്‍വകലാശാല പരീക്ഷാഭവനില്‍ പ്രതിഷേധ യോഗവും നടത്തി. യൂണിവേഴ്സിറ്റികളിലെ കാവിവത്കരണത്തിനെതിരേ ചാന്‍സലര്‍ക്കും വൈസ് ചാന്‍സലര്‍ക്കുമെതിരേ കാലിക്കട്ട് യൂണിവേഴ്സിറ്റിയിൽ പ്രതിഷേധ സമരം നടത്തിയ എസ്എഫ്ഐ പ്രവര്‍ത്തകര്‍ കെഎസ്‌യു നേതാവിനെ പ്രോജക്ടില്‍ ചട്ടവിരുദ്ധമായി പുനര്‍മൂല്യനിര്‍ണയം നടത്തി വിജയിപ്പിച്ചെന്നും ഇത് റദ്ദാക്കണമെന്നും ആവശ്യപ്പെട്ട് രംഗത്തെത്തിയിരുന്നു. ഭരണകാര്യാലയം അടക്കം ഉപരോധിച്ചുള്ള സമരത്തെതുടര്‍ന്ന് വിഷയത്തില്‍ അന്വേഷണം നടത്താമെന്ന് സിന്‍ഡിക്കറ്റംഗങ്ങള്‍ രേഖാമൂലം ഉറപ്പുനല്‍കിയതിനെ തുടര്‍ന്ന് പ്രവര്‍ത്തകര്‍ പിരിഞ്ഞുപോയെങ്കിലും യുഡിഎഫ് അനുകൂല ജീവനക്കാര്‍ വനിത സിന്‍ഡിക്കറ്റംഗത്തിന്‍റെ കാര്‍ തടഞ്ഞ് പ്രതിഷേധിച്ചതോടെ എസ്എഫ്ഐ പ്രവര്‍ത്തകര്‍ പ്രതികരിക്കുകയും സംഘര്‍ഷമാകുകയും ചെയ്തിരുന്നു.

നിലന്പൂർ മേഖലയിൽ കാട്ടാനശല്യം നിത്യസംഭവം; കുറുന്തോട്ടുമണ്ണയിലും പാത്തിപ്പാറയിലും കൃഷി നശിപ്പിച്ചു

നിലന്പൂർ: നിലന്പൂർ നഗരസഭയിൽ കാട്ടാനകളുടെ വിളയാട്ടം തുടരുന്നു. കാട്ടാന ജനവാസ കേന്ദ്രത്തിലെത്തി പരാക്രമം കാട്ടുന്ന സംഭവങ്ങൾ പതിവാകുകയാണ്. വീട്ടുമുറ്റങ്ങളിലേക്കുവരെ ഒറ്റയാനെത്തുന്നു. ജനങ്ങൾ ഭീതിയിൽ കഴിയുന്പോൾ വനംവകുപ്പും ജനപ്രതിനിധികളും മൗനം പാലിക്കുന്നു. നിലന്പൂർ നഗരസഭയിലെ പാത്തിപ്പാറ ഡിവിഷനിലുൾപ്പെട്ട പാത്തിപ്പാറ, കുറുന്തോട്ടമണ്ണ പ്രദേശങ്ങളിലാണ് കാട്ടാന വ്യാപകമായി കൃഷി നശിപ്പിച്ചത്. കൃഷിയിടങ്ങളിലേക്ക് എത്തുന്ന കാട്ടാനയുടെ സിസിടിവി ദൃശ്യം പുറത്ത് വന്നിട്ടുണ്ട്. വീട്ടുമുറ്റത്തേക്ക് എത്തുന്ന കാട്ടാനയും കാമറയിൽ പതിഞ്ഞിട്ടുണ്ട്. കുറുന്തോട്ടുമണ്ണ പുലിക്കുന്നേൽ ഷാഹുൽ ഹമീദിന്‍റെ കൃഷിയിടത്തിലാണ് ഇന്നലെ പുലർച്ചെ 3.15 ഓടെ കാട്ടാനയെത്തി വ്യാപകമായി വാഴ, തെങ്ങ്, കമുക് കൃഷികൾ നശിപ്പിച്ചത്. ചൊവ്വാഴ്ച്ച പുലർച്ചെ പാത്തിപ്പാറ, ഏനാന്തി ഭാഗങ്ങളിലെത്തിയ കാട്ടാനകൾ പ്രദേശത്തെ പത്തിലേറെ കർഷകരുടെ കൃഷികൾ നശിപ്പിക്കുകയും വീട്ടുമുറ്റങ്ങളിലേക്ക് എത്തുകയും ചെയ്തിരുന്നു. ഇതിന്‍റെ ആശങ്ക മാറും മുന്പാണ് കാട്ടാന വീണ്ടും ഇവിടേക്ക് എത്തിയത്. വനംവകുപ്പും നഗരസഭയും അടിയന്തരമായി ഇടപ്പെട്ട് പ്രശ്നത്തിന് പരിഹാരം കാണണമെന്നാണ് നാട്ടുകാരുടെ ആവശ്യം. ഡിഎഫ്ഒ ഓഫീസുകൾ ഉൾപ്പെടെയുള്ള നിലന്പൂർ നഗരത്തിൽ നിന്ന് നാല് കിലോമീറ്ററിനുള്ളിലാണ് കാട്ടാനകളുടെ പരാക്രമം നിത്യവും തുടരുന്നത്. വനപാലകർ സ്ഥലം സന്ദർശിച്ച് മടങ്ങി പോകുന്നതല്ലാതെ ഒരു നടപടിയും ഉണ്ടാകുന്നില്ല. കൃഷിയിലൂടെ ഉപജീവനം നടത്തുന്ന കുടുംബങ്ങളാണ് കാട്ടാനശല്യം മൂലം ജീവിതം വഴിമുട്ടി നിൽക്കുന്നത്. വന്യമൃഗശല്യം രൂക്ഷമായ നിലന്പൂർ, ഏറനാട്, വണ്ടൂർ മണ്ഡലങ്ങളിലെ എംഎൽഎമാർ ഇക്കാര്യം വനം മന്ത്രിയുടെ ശ്രദ്ധയിൽപ്പെടുത്തി അടിയന്തര പരിഹാരം കാണണമെന്ന ആവശ്യവും ശക്തമാണ്. കടക്കെണി മൂലം പ്രതിസന്ധി നേരിടുന്ന കർഷകരുടെ ഉപജീവനമാർഗങ്ങളാണ് വന്യമൃഗങ്ങൾ നശിപ്പിക്കുന്നത്.

മരുതൻപാറ കമ്മ്യൂണിറ്റി സെന്‍റർ കെട്ടിടം തകർന്ന സംഭവം : വീഴ്ച സമ്മതിച്ച് "നിർമിതി’യും കരാറുകാരും

പെരിന്തൽമണ്ണ: താഴേക്കോട് ഗ്രാമപഞ്ചായത്തിലെ മരുതൻപാറ പട്ടികജാതി സദ്ഗ്രാമത്തിൽ നിർമാണത്തിലിരുന്ന കെട്ടിടം നിലംപൊത്തിയ സംഭവത്തിൽ വീഴ്ച സമ്മതിച്ച് നിർവഹണ ഏജൻസിയായ ജില്ലാ നിർമിതി കേന്ദ്രയും കരാറുകാരും. പട്ടികജാതി വകുപ്പ് അനുവദിച്ച 26 ലക്ഷം രൂപ ചെലവഴിച്ച് കമ്മ്യൂണിറ്റി സെന്‍ററിനായി പണിയുന്ന കെട്ടിടം ഇക്കഴിഞ്ഞ വെള്ളിയാഴ്ചയാണ് നിലംപതിച്ചത്. കെട്ടിടം തകർന്ന സംഭവത്തിൽ നിർവഹണ ഏജൻസിയായ നിർമിതി കേന്ദ്രക്കും പട്ടികജാതിവകുപ്പിനും കരാറുകാർക്കുമെതിരേ ശക്തമായ പ്രതിഷേധം ഉയർന്നിരുന്നു. ഈ സാഹചര്യത്തിലാണ് മരുതൻപാറയിൽ പട്ടികജാതിവകുപ്പിന്‍റെയും നിർവഹണ ഏജൻസികളുടെയും കരാറുകാരുടെയും നാട്ടുകാരുടെയും ഗുണഭോക്താക്കളുടെയും ജനപ്രതിനിധികളുടെയും സംയുക്ത യോഗം ചേർന്നത്. പ്രവൃത്തിയുടെ ഗുണമേൻമയും പുരോഗതിയും വിലയിരുത്തുന്നതിലും പരിശോധിക്കുന്നതിലും തങ്ങൾക്ക് വീഴ്ച സംഭവിച്ചതായി പട്ടികജാതിവകുപ്പ് ജില്ലാതല ഉദ്യോഗസ്ഥരും നിർമിതി കേന്ദ്രയുടെ ഉദ്യോഗസ്ഥരും സമ്മതിച്ചു. നിലംപൊത്തിയ കെട്ടിടത്തിന് പകരം പുതിയ കെട്ടിടത്തിന്‍റെ നിർമാണം ഡിസംബർ 31-നകം പൂർത്തീകരിക്കാൻ യോഗം തീരുമാനിച്ചു. ഇക്കാര്യത്തിൽ കരാറുകാർക്കും ഉദ്യോഗസ്ഥർക്കും കർശന നിർദേശം നൽകി. വീഴ്ച വരുത്തിയാൽ ഇരുകൂട്ടർക്കുമെതിരേ നിയമനടപടി സ്വീകരിക്കുമെന്ന് നജീബ് കാന്തപുരം എംഎൽഎ പറഞ്ഞു. തകർന്നുവീണ കെട്ടിടത്തിന്‍റെ നിർമാണത്തിന് ഉപയോഗിച്ച കല്ല്, കന്പി, സിമന്‍റ്, കോണ്‍ക്രീറ്റ് മിക്സ് എന്നിവയുടെ സാന്പിൾ പരിശോധനക്ക് അയക്കാൻ തീരുമാനിച്ചു. ഇതിൽ അപാകത കണ്ടെത്തിയാൽ ബന്ധപ്പെട്ടവർക്കെതിരേയും നടപടി സ്വീകരിക്കും. നിർമാണ പ്രവൃത്തിക്കായി ഉപയോഗിച്ചിരുന്ന സാധനങ്ങളുടെ ഗുണമേന്മ സംബന്ധിച്ച് നാട്ടുകാരിൽ നിന്ന് പരാതി ഉയർന്നിരുന്നതായും ഇതിൽ വസ്തുതയുണ്ടെന്ന് ബോധ്യപ്പെട്ടതിനെ തുടർന്ന് ഗുണനിലവാരം കുറഞ്ഞ സാധനങ്ങൾ മാറ്റി പകരം ഗുണനിലവാരമുള്ള സാധനങ്ങൾ എത്തിച്ച് ഉപയോഗിക്കണമെന്ന് കരാറുകാർക്ക് നിർദേശം നൽകിയിരുന്നതായി ഉദ്യോഗസ്ഥർ യോഗത്തെ അറിയിച്ചു. പട്ടികജാതിവകുപ്പിൽ നിന്ന് യഥാസമയം ഫണ്ട് ലഭിക്കാത്തതിനാലാണ് നിർമാണം വൈകാൻ കാരണമെന്ന് ഉദ്യോഗസ്ഥർ പറഞ്ഞു. പദ്ധതിയുടെ മേൽനോട്ട ചുമതല ജില്ലാ നിർമിതി കേന്ദ്രയുടെ ചെയർമാനായ കളക്ടർക്കും മെന്പർ സെക്രട്ടറിയായ സബ് കളക്ടർക്കുമാണ്. സംഭവം നടന്നിട്ട് ദിവസങ്ങൾ കഴിഞ്ഞിട്ടും ഇവർ സ്ഥലം സന്ദർശിക്കാത്തതിൽ നാട്ടുകാർ പ്രതിഷേധമറിയിച്ചു. സംഭവത്തിൽ സിപിഎം രാഷ്ട്രീയം കളിക്കുകയാണെന്നും സർക്കാരിനും പട്ടികജാതി വകുപ്പിനും വന്ന വീഴ്ച മറച്ചുവയ്ക്കാനാണ് എംഎൽഎക്കെതിരേ സിപിഎം അടിസ്ഥാനരഹിതമായ ആരോപണങ്ങൾ ഉന്നയിക്കുന്നതെന്നും നജീബ് കാന്തപുരം എംഎൽഎ പറഞ്ഞു. യോഗത്തിൽ നജീബ് കാന്തപുരം എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ, വാർഡ് മെന്പർ ബാലൻ മരുതൻപാറ, ജില്ലാ പട്ടികജാതി ഓഫീസർ പ്രിൻസ്, ജില്ലാ നിർമിതി കേന്ദ്ര പ്രോജക്ട് മാനേജർ കെ.ആർ. ബീന, പെരിന്തൽമണ്ണ എസ്‌സിഡിഒ കെ. ഗിരിജ, കരാറുകാർ, മുഹമ്മദലി, എൻ. അഷ്റഫ്, കെ.എം. ഫത്താഹ്, കുഞ്ഞയമു ഹാജി തുടങ്ങിയവർ പങ്കെടുത്തു.

ട്രിപ്പിൾ സ്വർണം നേടി മിന്നുംതാരമായി മുഹമ്മദ് സഹിൽ

അങ്ങാടിപ്പുറം: കൊല്ലം കടയ്ക്കൽ എസ്എച്ച്എം എൻജിനിയറിംഗ് കോളജിൽ സമാപിച്ച സംസ്ഥാന സബ് ജൂണിയർ പെൻകാക്ക് സിലാട്ട് ചാന്പ്യൻഷിപ്പിൽ മൂന്നു സ്വർണമെഡൽ സ്വന്തമാക്കി പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിലെ എട്ടാംക്ലാസ് വിദ്യാർഥി കെ. മുഹമ്മദ് സഹിൽ. സോളോ, ഫൈറ്റിംഗ്, തുംഗൽ വിഭാഗങ്ങളിലാണ് സഹിൽ സ്വർണം കൊയ്തത്. ബോക്സിംഗ്, പെൻകാക്ക് സിലാട്ട് എന്നീ ഇനങ്ങളിൽ മുന്പും പലതവണ ദേശീയ, സംസ്ഥാന മത്സരങ്ങളിൽ ഈ മിടുക്കൻ മെഡൽ നേടിയിട്ടുണ്ട്. കട്ടുപ്പാറ ഐഡികെവൈ മാർഷ്യൽ ആർട്സിലെ വി.കെ.നബീൽ, കെ.സരള എന്നിവരാണ് പരിശീലകർ. കട്ടുപ്പാറ കുറുവക്കുന്നൻ മൊയ്തീൻകുട്ടിയുടെയും സീനത്തിന്‍റെയും മകനാണ്.

ഗ്രാമീണ ബാങ്ക് ഹരിത കർമസേനയെ ആദരിച്ചു

നിലന്പൂർ: കേരള ഗ്രാമീണ ബാങ്ക് നിലന്പൂർ ശാഖ, ബാങ്കിന്‍റെ സ്ഥാപകദിനാഘോഷത്തോടനുബന്ധിച്ച് നിലന്പൂർ നഗരസഭ ഹരിത കർമസേനയെ ആദരിച്ചു. നഗരസഭ ഹാളിൽ നടന്ന പരിപാടി മുനിസിപ്പൽ അധ്യക്ഷൻ മാട്ടുമ്മൽ സലീം ഉദ്ഘാടനം ചെയ്തു. ഹരിത കർമസേന കെയർ ടേക്കർ സുരാജ് അധ്യക്ഷത വഹിച്ചു. ഹരിത കർമ സേനാംഗങ്ങൾക്ക് ബാങ്കിന്‍റെ ഉപഹാരം നൽകി. ക്ഷേമകാര്യ സ്ഥിരംസമിതി അധ്യക്ഷ യു.കെ. ബിന്ദു, കേരള ഗ്രാമീണ ബാങ്ക് നിലന്പൂർ ശാഖ സീനിയർ മാനേജർ ശങ്കർ, ഹെൽത്ത് ഇൻസ്പെക്ടർ വിനോദ് എന്നിവർ പ്രസംഗിച്ചു. കൗണ്‍സിലർമാർ, നഗരസഭ ഉദ്യോഗസ്ഥർ, ബാങ്ക് ജീവനക്കാർ, ഹരിത കർമ സേനാംഗങ്ങൾ എന്നിവർ പങ്കെടുത്തു.

വുഷു ചാന്പ്യൻഷിപ്പ് ജേതാവിനെ അനുമോദിച്ചു

പെരിന്തൽമണ്ണ: ഹൈദരാബാദിൽ നടന്ന നാഷണൽ ജൂണിയർ വുഷു ചാന്പ്യൻഷിപ്പിൽ കേരളത്തെ പ്രതിനിധീകരിച്ച് പങ്കെടുത്ത് ഓൾ ഇന്ത്യതലത്തിൽ മൂന്നാം സ്ഥാനം നേടിയ പൂക്കോടൻ മുഹമ്മദ് അഷ്ഫാക്കിന് പത്താം വാർഡ് മുസ്‌ലിം ലീഗ് കമ്മിറ്റി സ്വീകരണം നൽകി. ചടങ്ങിൽ നജീബ് കാന്തപുരം എംഎൽഎ മെമന്‍റോ നൽകി അനുമോദിച്ചു. വാർഡ് മുസ്‌ലിം ലീഗ് പ്രസിഡന്‍റ് അസീസ് മണ്ണേങ്ങൽ, ജനറൽ സെക്രട്ടറി ഇസ്മായിൽ, മുനിസിപ്പൽ മുസ്‌ലിം ലീഗ് സെക്രട്ടറി ഹബീബ് മണ്ണേങ്ങൽ, വാർഡ് ഭാരവാഹികളായ നാസർ നാലകത്ത്, നവാസ് മാടശേരി, ജലീൽ കാരാട്ടിൽ, എ.വി.അത്തപ്പ, കെഎംസിസി നേതാക്കളായ കരുവാത്ത് സലാം, ഷമീർ പൂക്കോടൻ, ഷമീർ പച്ചീരി, ഷമീർ പറന്പൂർ, യൂത്ത്‌ലീഗ് ഭാരവാഹി എ.പി.ഹുസൻ എന്നിവർ പങ്കെടുത്തു.

മഹിളാ സാഹസ് യാത്രക്ക് സ്വീകരണം നൽകി

വണ്ടൂർ: മഹിളാ കോണ്‍ഗ്രസ് സംസ്ഥാന പ്രസിഡന്‍റ് ജെബി മേത്തർ എംപി നയിക്കുന്ന മഹിളാ സാഹസ് കേരള യാത്രയ്ക്ക് വണ്ടൂരിൽ ടി.കെ. ഗാർഡൻ ഓഡിറ്റോറിയത്തിൽ നൽകിയ സ്വീകരണം എ.പി. അനിൽകുമാർ എംഎൽഎ ഉദ്ഘാടനം ചെയ്തു. മഹിള കോണ്‍ഗ്രസ് വണ്ടൂർ മണ്ഡലം പ്രസിഡന്‍റ് കെ.എം. പ്രസീത അധ്യക്ഷത വഹിച്ചു. കേന്ദ്ര, സംസ്ഥാന സർക്കാരിന്‍റെ നയങ്ങളിൽ പ്രതിഷേധിച്ചാണ് സ്ത്രീ ശക്തിയുടെ പ്രതിഷേധ ജ്വാലയായി യാത്ര നടത്തുന്നത്. ജാഥാ ക്യാപ്റ്റൻ അഡ്വ. ജെബി മേത്തർ എംപി, കെപസിസി ജനറൽ സെക്രട്ടറി ആലിപ്പറ്റ ജമീല, കെപസിസി അംഗങ്ങളായ കെ.ടി. അജ്മൽ, പി. വാസുദേവൻ, സിഡിസി വൈസ് പ്രസിഡന്‍റ് കെ.സി. കുഞ്ഞുമുഹമ്മദ്, ബ്ലോക്ക് കോണ്‍ഗ്രസ് പ്രസിഡന്‍റ് ടി.പി. ഗോപാലകൃഷ്ണൻ, മണ്ഡലം കോണ്‍ഗ്രസ് പ്രസിഡന്‍റ് പി.ടി. ജബീബ് സുക്കീർ, മഹിള കോണ്‍ഗ്രസ് അഖിലേന്ത്യ സെക്രട്ടറി അഡ്വ. ഫാത്തിമ രോഷ്ന തുടങ്ങിയവർ പങ്കെടുത്തു.

നല്ലംതണ്ണിയിൽ പുലി സാന്നിധ്യം; ഭയന്നോടുന്നതിനിടയിൽ തൊഴിലാളിക്ക് വീണുപരിക്ക്

എടക്കര: നല്ലംതണ്ണിയിലും പരിസര പ്രദേശങ്ങളിലും പുലിയെ കണ്ടതായി നാട്ടുകാർ. കഴിഞ്ഞ ദിവസം പുലർച്ചെ ചോലക്കുളം ഭാഗത്ത് ടാപ്പിംഗിന് പോയ തൊഴിലാളി പുലിയെ കണ്ട് ഭയന്നോടുന്നതിനിടയിൽ വീണുപരിക്കേറ്റു. മണക്കാട് സ്വദേശി പരമേശ്വരനാണ് പരിക്കേറ്റത്. ചൂരക്കണ്ടി, ചോലക്കുളം ഭാഗങ്ങളിൽ പലരും പുലിയെ കണ്ടതായി പറയുന്നു. മൂന്ന് ദിവസം മുന്പ് കണ്ണംകല്ലേൽ അപ്പച്ചന്‍റെ ഭാര്യ ആനി വീടിന്‍റെ മുറ്റത്ത് പുലിയെ കണ്ടുവെന്ന് പറഞ്ഞിട്ടുണ്ട്. ഇവരുടെ വളർത്തുനായയെ കാണാതായിട്ടുമുണ്ട്. ഇവരുടെ വീടിന് അടുത്തായി താമസിക്കുന്ന മുഹമ്മദാലിയും പുലിയെ കണ്ടതായി പറയുന്നു. ചൊവ്വാഴ്ച പുലർച്ചെ സിപിസി കുന്നിലെ ജലനിധിയുടെ കുടിവെള്ള ടാങ്കിന് സമീപത്തെ തോട്ടത്തിൽ ടാപ്പിംഗിന് എത്തിയ പിരിച്ചിട്ടുമാക്കൽ സന്തോഷ് പുലിയുടെ അലർച്ച കേട്ട് മടങ്ങിപോന്നു. ബുധനാഴ്ച തെച്ചിയോടൻ കുഞ്ഞാപ്പയുടെ പറന്പിലെ കുറ്റിക്കാട് വെട്ടിമാറ്റുന്നതിനിടെ പുലിയുടേതിന് സമാനമായ അലർച്ച കേട്ട് കാട് വെട്ടിക്കൊണ്ടിരുന്ന സ്ത്രീകൾ ഭയന്നോടുകയും ചെയ്തിട്ടുണ്ട്. നാട്ടുകാർ നൽകിയ വിവരത്തെത്തുടർന്ന് വള്ളുവശേരി ബീറ്റിലെ വനം ജീവനക്കാർ സ്ഥലത്തെത്തി പരിശോധന നടത്തിയിരുന്നു. എന്നാൽ ശക്തമായ മഴ പെയ്തതിനാൽ പുലിയുടെ കൽപ്പാടുകൾ കണ്ടെത്താനായില്ല. വള്ളിപ്പുലിയാകാം ഇവർ കണ്ടതെന്നാണ് വനം ഉദ്യോഗസ്ഥർ പറയുന്നത്. വീണ്ടും പ്രദേശത്ത് പരിശോധന നടത്തുമെന്നും ഉദ്യോഗസ്ഥർ അറിയിച്ചു.

ബിരുദദാന ചടങ്ങ് സംഘടിപ്പിച്ചു

പെരിന്തൽമണ്ണ: മൗലാന കോളജ് ഓഫ് ഫാർമസിയിൽ ബിരുദദാന ചടങ്ങ് സംഘടിപ്പിച്ചു.ഫാർമസി കൗണ്‍സിൽ ഓഫ് ഇന്ത്യ സെൻട്രൽ കൗണ്‍സിൽ മെന്പർ ഡോ. സലീമുല്ലാഹ് ഖാൻ ഉദ്ഘാടനം ചെയ്തു. മൗലാന കോളജ് ഓഫ് ഫാർമസി പ്രിൻസിപ്പൽ ഡോ. കെ.പി. മുഹമ്മദ് ഹനീഫ അധ്യക്ഷത വഹിച്ചു. ഹോസ്പിറ്റൽ അഡ്മിനിസ്ട്രേറ്റർ വി.എം. സൈദ് മുഹമ്മദ്, വൈസ് പ്രിൻസിപ്പൽ ഡോ. പി.പി. നസീഫ്, ഡോ. ഷൈൻ സുദേവ്, ഡോ. സുജിത്ത് തോമസ്, ഡോ. സി. മുഹാസ്, ഡോ.യു.കെ. ഇല്യാസ്, ഡോ. കെ. അബ്ദുൾവാജിദ്, ഡോ. കെ. അമീന, ഡോ. വി.കെ. സുമ, കെ. മൊയ്തീൻ, പ്രശാന്ത് കുമാർ എന്നിവർ പ്രസംഗിച്ചു. മൗലാന ഫാർമസി കോളജിൽ ബിഫാം പരീക്ഷയിൽ ഒന്നാം സ്ഥാനം നേടിയ ഗാനിയ അഹമ്മദ്, രണ്ടാം സ്ഥാനം നേടിയ ഐഷ ഷൈമ എന്നിവർക്ക് സ്വർണ മെഡൽ നൽകി. മൂന്നാം സ്ഥാനം നേടിയ എം.പി. ഫസീഹയ്ക്ക് പുരസ്കാരം നൽകി. ബെസ്റ്റ് ഔട്ട് ഗോയിംഗ് സ്റ്റുഡന്‍റായി മുഹമ്മദ് നിഷാദ് തെരഞ്ഞെടുക്കപ്പെട്ടു.

72 ഗ്രാം എംഡിഎംഎയുമായി മൂന്നുപേർ അറസ്റ്റിൽ

കോട്ടയ്ക്കൽ: 72 ഗ്രാം എംഡിഎംഎയുമായി മൂന്നുപേർ അറസ്റ്റിൽ. വേങ്ങര ചേറൂർ സ്വദേശികളായ ആലുക്കൽ സഫ്‌വാൻ (29), മുട്ടുപറന്പൻ അബ്ദുൾ റൗഫ് (28), കോലേരി ബബീഷ് (29) എന്നിവരെയാണ് അറസ്റ്റ് ചെയ്തത്. ജില്ലയിൽ ആഡംബര ഫ്ളാറ്റുകൾ കേന്ദ്രീകരിച്ച് എംഡിഎംഎ പോലുള്ള മാരകമായ ലഹരിമരുന്നിന്‍റെ ഉപയോഗവും വിൽപ്പനയും നടത്തുന്ന സംഘങ്ങൾ പ്രവർത്തിക്കുന്നതായി പോലീസിന് വിവരം ലഭിച്ചിരുന്നു. കോട്ടക്കൽ മൈത്രി റോഡിൽ പ്രവർത്തിക്കുന്ന ഫ്ളാറ്റിൽ കോട്ടക്കൽ എസ്ഐ പി.ടി.സെയ്ഫുദീനും ഡാൻസാഫ് സ്ക്വാഡും രാത്രിയിൽ നടത്തിയ പരിശോധനയിലാണ് പ്രതികളെ അറസ്റ്റ് ചെയ്തത്. ലോഡ്ജുകളിലും റിസോർട്ടുകളിലും പോലീസ് നിരീക്ഷണം ശക്തമാക്കിയതോടെ ടൗണിനോട് ചേർന്നുള്ള ഫ്ളാറ്റുകൾ വാടകയ്ക്കെടുത്താണ് ലഹരിവിൽപന. ഇവിടെ വച്ച് ആവശ്യത്തിന് പാക്കറ്റുകളിലാക്കി ഗ്രാമിന് 3000 മുതൽ വിലയിട്ട് ആവശ്യക്കാർക്ക് കോട്ടക്കൽ ടൗണിലും ബൈപ്പാസിലും വച്ചും ഡ്രോപ്പിംഗ് രീതിയിലും കൈമാറുകയാണ് ചെയ്യുന്നത്. തൂക്കുന്നതിനുള്ള ചെറിയ ഇലക്ട്രോണിക് ത്രാസും മൊബൈൽ ഫോണുകളും 80,000ത്തിലധികം രൂപയും ഇവരിൽ നിന്ന് പിടിച്ചെടുത്തു. ലഹരിക്കടത്ത് സംഘത്തിലെ മറ്റു കണ്ണികളെകുറിച്ച് വിവരം ലഭിച്ചതായും അന്വേഷണം പുരോഗമിക്കുന്നതായും മലപ്പുറം ഡിവൈഎസ്പി കെ.എം.ബിജു, സിഐ സംഗീത് പുനത്തിൽ എന്നിവർ അറിയിച്ചു. മുട്ടുപറന്പൻ അബ്ദുൾ റൗഫിനെ നേരത്തെ രണ്ട് തവണ എംഡിഎംഎയുമായി പോലീസും എക്സൈസും അറസ്റ്റ് ചെയ്തിട്ടുണ്ട്. ഈ കേസുകളിൽ ജാമ്യത്തിലിറങ്ങിയതാണ്. പോലീസ് ഉദ്യോഗസ്ഥരായ വിഷ്ണു, മുഹന്നദ്, ഡാൻസാഫ് സ്ക്വാഡ് എന്നിവരടങ്ങുന്ന സംഘമാണ് പരിശോധനാ സംഘത്തിലുണ്ടായിരുന്നത്.

ജില്ലയിൽ പണിമുടക്ക് പൂർണം : ജനജീവിതം സ്തംഭിച്ചു

മലപ്പുറം: കേന്ദ്ര സർക്കാരിന്‍റെ തൊഴിലാളി നയങ്ങൾക്കെതിരേ സംയുക്ത ട്രേഡ് യൂണിയന്‍റെ നേതൃത്വത്തിൽ ആഹ്വാനം ചെയ്ത പണിമുടക്ക് ജില്ലയിൽ പൂർണം. ജനജീവിതം സ്തംഭിച്ചു. കടകന്പോളങ്ങൾ അടഞ്ഞുകിടന്നു. തുറന്ന ഏതാനും കടകൾ സമരക്കാർ അടപ്പിച്ചു. ഗ്രാമീണ മേഖലകളിൽ ചില വ്യാപാര സ്ഥാപനങ്ങൾ പ്രവർത്തിച്ചു. മഞ്ചേരി, പെരിന്തൽമണ്ണ, തിരൂർ, മലപ്പുറം, നിലന്പൂർ തുടങ്ങിയ നഗരങ്ങളിൽ വ്യാപാര സ്ഥാപനങ്ങൾ പൂർണമായും അടഞ്ഞു കിടന്നു. സർക്കാർ ഓഫീസുകളിൽ ജീവനക്കാരുടെ ഹാജർനില വളരെ കുറവായിരുന്നു. സ്കൂളുകളിൽ വിദ്യാർഥികൾ തീരെ കുറവായിരുന്നു. വാഹനങ്ങൾ നിരത്തിലിറങ്ങിയില്ല. സ്വകാര്യ ബസുകൾ ഓടിയില്ല. അത്യാവശ്യഘട്ടത്തിൽ മാത്രം ചില ഓട്ടോകൾ മാത്രമാണ് സർവീസ് നടത്തിയത്. അടിയന്തര ആവശ്യങ്ങൾക്കുള്ള സ്വകാര്യ വാഹനങ്ങൾ മാത്രമാണ് സർവീസ് നടത്തിയത്. ഇന്നലെ രാവിലെ ഏതാനും കെഎസ്ആർടിസി ബസുകൾ സർവീസ് നടത്തിയെങ്കിലും ഇതും പലയിടങ്ങളിലും സമരക്കാർ തടഞ്ഞു. ഇതോടെ പലയിടത്തും യാത്രക്കാർ ബുദ്ധിമുട്ടി. മഞ്ചേരിയിൽ പണിമുടക്ക് അനുകൂലികളും പോലീസും തമ്മിൽ കൈയാങ്കളി ഉണ്ടായി. ലോഡുമായി എത്തിയ ലോറി ഡ്രൈവറോട് സമരവുമായി സഹകരിക്കണമെന്ന് സമരാനുകൂലികൾ ആവശ്യപ്പെട്ടതോടെയാണ് പ്രശ്നങ്ങൾ തുടങ്ങിയത്. മഞ്ചേരി പോലീസ് ഇൻസ്പെക്ടർ കെ.ആർ. ജസ്റ്റിന്‍റെ നേതൃത്വത്തിലെത്തിയ പോലീസ് സമരക്കാരോട് മാറി നിൽക്കാൻ ആവശ്യപ്പെടുകയും പിടിച്ചുതള്ളുകയുമായിരുന്നു. ഇതോടെ പ്രവർത്തകർ ഒന്നടങ്കം പോലീസിന് നേരെ തിരിയുകയും പ്രശ്നം കൈയാങ്കളിയിലെത്തുകയുമായിരുന്നു. നേതാക്കൾ ഇടപെട്ടതോടെ പ്രശ്നം അവസാനിച്ചു. സംഭവത്തിൽ പോലീസ് കേസെടുത്തു. സിപിഎം ഏരിയ സെക്രട്ടറി അഡ്വ. ഫിറോസ് ബാബു ഒന്നാം പ്രതിയായും കണ്ടാലറിയാവുന്ന 20 പേർക്കെതിരേയുമാണ് കേസെടുത്തത്. ഏറനാട് താലൂക്ക് കാര്യാലയത്തിലും വില്ലേജ് ഓഫീസുകളിലുമായുള്ള 190 ജീവനക്കാരിൽ 68 പേർ ഇന്നലെ ജോലിക്കെത്തി. താലൂക്ക് ഓഫീസിൽ 57 പേരാണുള്ളത്. ഇതിൽ 18 പേർ ജോലിക്കെത്തി. 34 പേർ അംഗീകൃത അവധിയെടുത്തപ്പോൾ നാലുപേർ അനുമതിയില്ലാതെയാണ് ജോലിക്ക് ഹാജരാകാതിരുന്നത്. വില്ലേജ് ഓഫീസുകളിൽ ആകെ 133 ജീവനക്കാരിൽ 50 പേർ ജോലിക്കെത്തി. 37 പേർ അനുമതിയില്ലാതെയും 46 പേർ അവധിയെടുത്തും ജോലിയിൽ നിന്ന് വിട്ടു നിന്നു. നിലന്പൂർ: കെഎസ്ആർടിസി ഡിപ്പോയിൽ സമരാനുകൂലികൾ തടഞ്ഞ നിലന്പൂർ -ഗൂഢല്ലൂർ സർവീസ് പോലീസ് ഇടപെട്ട് നടത്തി. ഇടത് തൊഴിലാളി സംഘടനകൾ നിലന്പൂർ ടൗണിലും വലത് തൊഴിലാളി സംഘടനകൾ നിലന്പൂർ പോസ്റ്റ് ഓഫീസിലേക്കും മാർച്ച് നടത്തി. നിരവധി പേർ രണ്ട് മാർച്ചുകളിലായി പങ്കെടുത്തു. എടക്കര, ചുങ്കത്തറ, ചാലിയാർ, വഴിക്കടവ്, അമരന്പലം, കരുളായി, മൂത്തേടം, പോത്തുകൽ എന്നിവിടങ്ങളിലും പണിമുടക്ക് പൂർണമായിരുന്നു.തുറന്ന് പ്രവർത്തിച്ച പൊതുമേഖല ബാങ്കുകൾ സമരക്കാർ ഇടപ്പെട്ട് അടപ്പിച്ചു. നിലന്പൂരിൽ കടകൾ തുറന്ന് പ്രവർത്തിച്ചില്ല. ഇരുചക്ര വാഹനങ്ങളും സ്വകാര്യവാഹനങ്ങളും ഏതാനും ഓട്ടോകളും സർവീസ് നടത്തിയത് ജനങ്ങൾക്ക് ആശ്വാസമായി എൽഡിഎഫ് സംഘടനകൾ നടത്തിയ മാർച്ച് സിപിഎം ഏരിയാ സെക്രട്ടറി കെ.മോഹനനും യുഡിഎഫ് അനുകൂല സംഘടനകൾ നടത്തിയ മാർച്ച് കെപിസിസി അംഗം എൻ.എ. കരീമും ഉദ്ഘാടനം ചെയ്തു. കരുവാരകുണ്ട്: കരുവാരകുണ്ടിൽ സംയുക്ത ട്രേഡ് യൂണിയനുകൾ പ്രകടനം നടത്തി. രാവിലെ നടന്ന പ്രകടനത്തിനിടയിൽ തുറന്ന് പ്രവർത്തിച്ചിരുന്ന സ്വകാര്യബാങ്കുകൾ ഉൾപ്പെടെയുള്ള സ്ഥാപനങ്ങൾ അടപ്പിക്കുകയും ചെയ്തു. കരുവാരകുണ്ട് ഗ്രാമപഞ്ചായത്ത് ഓഫീസിൽ രണ്ടുപേർ ജോലിക്കെത്തി ഓഫീസ് തുറന്ന് പ്രവർത്തിക്കുന്നുണ്ടെന്നറിഞ്ഞ് സമരാനുകൂലികൾ ഓഫീസിലെത്തി മുദ്രാവാക്യം വിളിക്കുകയും പ്രവർത്തനം തടസപ്പെടുത്താൻ ശ്രമിക്കുകയും ചെയ്തു. പോലീസ് എത്തിയാണ് സമരാനുകൂലികളെ പുറത്തേക്ക് മാറ്റിയത്. ഗ്രാമപഞ്ചായത്തിലെ ഒട്ടുമിക്ക കടകളും അടഞ്ഞുകിടന്നു. മത്സ്യം, മാംസം, പച്ചക്കറി ഉൾപ്പെടെ ചുരുങ്ങിയ കടകൾ മാത്രമാണ് തുറന്നു പ്രവർത്തിച്ചത്. അപൂർവമായി സ്വകാര്യ വാഹനങ്ങളും നിരത്തിലിറങ്ങി. കൊണ്ടോട്ടിയിൽ രാവിലെ തന്നെ സമരക്കാർ കെഎസ്ആർടിസി തടഞ്ഞിട്ടു. മലപ്പുറം ഡിപ്പോയിൽ നിന്ന് രാവിലെ മലപ്പുറ-കോഴിക്കോട്, മലപ്പുറം-തിരൂർ റൂട്ടുകളിൽ ഒരോ സർവീസ് നടത്തി. നിലന്പൂർ ഡിപ്പോയിൽ നിന്ന് കോഴിക്കോട് റൂട്ടിൽ രണ്ട് ബസുകൾ സർവീസ് നടത്തി. ബാംഗളൂരൂവിലേക്ക് ഒരു സ്വിഫ്റ്റ് ബസും നിലന്പൂർ ഡിപ്പോയിൽ നിന്ന് സർവീസ് നടത്തി. പെരിന്തൽമണ്ണ ഡിപ്പോയിൽ നിന്ന് പെരിന്തൽമണ്ണ-ഗൂഢല്ലൂർ, പെരിന്തൽമണ്ണ - തിരുവനന്തപുരം റൂട്ടുകളിൽ ഓരോ കെഎസ്ആർടിസി വീതം സർവീസ് നടത്തി. പൊന്നാനി ഡിപ്പോയിൽ നിന്ന് ഒന്നുപോലും സർവീസ് നടത്തിയില്ല. തുറന്ന് പ്രവർത്തിച്ച പൊതുമേഖല ബാങ്കുകൾ സമരക്കാർ അടപ്പിച്ചു. പണിമുടക്ക് വിജയമാക്കിയ ബഹുജനങ്ങളെയും തൊഴിലാളികളെയും കച്ചവടക്കാരെയും സംയുക്ത ട്രേഡ് യൂണിയൻ ജില്ലാ സമിതി അഭിനന്ദിച്ചു. മലപ്പുറത്ത് കുന്നുമ്മൽ കെഎസ്ആർടിസിക്കു മുന്നിൽ നിന്ന് തുടങ്ങിയ പ്രകടനം മഞ്ചേരി റോഡ്, പെരിന്തൽമണ്ണ റോഡ് വഴി കോട്ടപ്പടി ടൗണ്‍ ചുറ്റി കുന്നുമ്മൽ സമരപ്പന്തലിൽ സമാപിച്ചു. തുടർന്ന് നടന്ന പൊതുയോഗം സിഐടിയു ജില്ലാ ജനറൽ സെക്രട്ടറിയും സംയുക്ത ട്രേഡ് യൂണിയൻ ജില്ലാ കണ്‍വീനറുമായ വി.പി.സക്കറിയ ഉദ്ഘാടനം ചെയ്തു. എഐടിയുസി ജില്ലാ പ്രസിഡന്‍റ് എം.എ.റസാഖ് അധ്യക്ഷത വഹിച്ചു. കെ.വിജയകുമാർ (ആക്‌ഷൻ കൗണ്‍സിൽ), ഡോ. പി.എം.ആശിഷ് (സമരസമിതി), കെ.സുന്ദരരാജൻ (കർഷക സംഘം), കെ.മജ്നു (കർഷക തൊഴിലാളി യൂണിയൻ), ടി.രാജേഷ് (കേന്ദ്ര കോണ്‍ഫെഡറേഷൻ), എ.കെ.വേലായുധൻ, ഇ.എൻ.ജിതേന്ദ്രൻ (സിഐടിയു), എച്ച്.വിൻസെന്‍റ്, അഡ്വ. മുസ്തഫ കൂത്രാടൻ, പുഴക്കൽ ശരീഫ് (എഐടിയുസി), കെ.യു.ഇഖ്ബാൽ (എൻആർഇജി), സി.മിഥുൻ (ബെഫി), സി.നഫീസ (വർക്കിംഗ് വിമൻ കോ-ഓർഡിനേഷൻ), വി.കെ.രാജേഷ്, സി.ഇല്യാസ്, ഒ.സഹദേവൻ, കെ.പി.ഫൈസൽ (സിഐടിയു) , ജംഷീർ ബാബു (എഐടിയുസി) എന്നിവർ പ്രസംഗിച്ചു.

ഇൻസ്റ്റഗ്രാമിൽ പോസ്റ്റിട്ട് ട്രാൻസ്ജെൻഡർ യുവതി; ആണ്‍സുഹൃത്തിന്‍റെ വീട്ടിൽ ആത്മഹത്യ ചെയ്തു

താനൂർ: ഇൻസ്റ്റഗ്രാമിൽ പോസ്റ്റിട്ടതിനുശേഷം ട്രാൻസ്ജെൻഡർ യുവതി ആണ്‍സുഹൃത്തിന്‍റെ വീട്ടിൽ ആത്മഹത്യ ചെയ്തു. തിരൂർ സ്വദേശിയായ കമീല(35)യാണ് ആണ്‍സുഹൃത്തായ കാവപ്പുര നായർപടി സ്വദേശിയുടെ വീട്ടിലെത്തി ആത്മഹത്യ ചെയ്തത്. വീട്ടിലെ കാർപോർച്ചിൽ തൂങ്ങിമരിച്ച നിലയിലാണ് കണ്ടെത്തിയത്. കമീല തൗഫി എന്ന ഇൻസ്റ്റഗ്രാം അക്കൗണ്ടിൽ ബുധനാഴ്ച രാവിലെ അഞ്ചോടെ കാവപ്പുര നായർപടി സ്വദേശിയുടെ വീട്ടിൽപോയി ആത്മഹത്യ ചെയ്യുമെന്ന് വീഡിയോ പോസ്റ്റ് ചെയ്തതിന് ശേഷമാണ് സംഭവം. തന്‍റെ മരണത്തിന് ഉത്തരവാദിയായ ഇയാളുടെ വീടിന് സമീപത്ത് പോയി മരിക്കുമെന്നാണ് വീഡിയോയിൽ പറഞ്ഞത്. ജൂലൈ ഒന്നു മുതലുള്ള ഇൻസ്റ്റഗ്രാം പോസ്റ്റുകളിൽ മുഴുവനും യുവാവുമൊത്തുള്ള നിരവധി വീഡിയോകളാണ്. പ്രണയ നൈരാശ്യമാണ് മരണത്തിലേക്ക് നയിച്ചതെന്നാണ് ഇൻസ്റ്റഗ്രാം പോസ്റ്റുകളിൽ നിന്നും വ്യക്തമാകുന്നത്. താനൂർ പോലീസ് പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുകൊടുത്തു.

പതിനൊന്നു വയസുകാരൻ കുളത്തിൽ മുങ്ങിമരിച്ചു

പെരിന്തൽമണ്ണ: പെരിന്തൽമണ്ണയ്ക്കടുത്ത് കക്കൂത്തിൽ ആറാംക്ലാസ് വിദ്യാർഥി കുളത്തിൽ മുങ്ങിമരിച്ചു. ഈസഹാജി പടിയിലെ വടക്കത്തൊടി ഫസലുൽ ആബിദിന്‍റെ മകൻ അഫ്നാനാണ് മരിച്ചത്. ഇന്നലെ ഉച്ചയ്ക്ക് 12ന് കക്കൂത്ത് ചാലിയം കുളത്തിലാണ് സംഭവം. പൂപ്പലം ഒഎയുപി സ്കൂളിലെ വിദ്യാർഥിയായ അഫ്നാൻ കൂട്ടുകാരോടൊത്ത് നീന്തുന്നതിനിടയിൽ വെള്ളത്തിൽ താഴുകയായിരുന്നു. 40 അടി നീളവും 35 അടി വീതിയുമുള്ള പായലും പുല്ലും നിറഞ്ഞ കുളമാണിത്. സ്ഥലത്തെത്തിയപെരിന്തൽമണ്ണ അഗ്നിരക്ഷാനിലയത്തിലെ സ്റ്റേഷൻ ഓഫീസർ സി. ബാബുരാജ്, അസിസ്റ്റന്‍റ് സ്റ്റേഷൻ ഓഫീസർ പി. നാസർ, സ്കൂബ ടീം ഉൾപ്പെടെ തെരച്ചിൽ നടത്തിയാണ് കുട്ടിയെ പുറത്തെടുത്തത്. സീനിയർ ഫയർ ആൻഡ് റെസ്ക്യു ഓഫീസർ സുർജിത്ത്, ഫയർ ആൻഡ് റെസ്ക്യു ഓഫീസർമാരായ രാജേഷ്, രഞ്ജിത്ത്, കിഷോർ, നിധിൻ, ഡ്രൈവർ ശരത്ത് എന്നിവർ നേതൃത്വം നൽകി. മാതാവ്: നസീമ കാരളി (കരിങ്കല്ലത്താണി). പോലീസ് നടപടികൾക്ക് ശേഷം വൈകുന്നേരം 7.30ന് മൃതദേഹം വെട്ടുപാറ ജുമാ മസ്ജിദിൽ കബറടക്കി.

അത്തോളിയിൽ വയോധികൻ മരിച്ചനിലയിൽ

അത്തോളി: ടൗണിന് സമീപം കുറ്റിക്കാട്ടിൽ വയോധികനെ മരിച്ച നിലയിൽ കണ്ടെത്തി.തിരുവങ്ങൂർ പകൽവീട് അന്തേവാസിയായ കാപ്പാട് കാക്കച്ചിക്കണ്ടി ദാറുൽ നഹീസ് വീട്ടിൽ അലവി(74) യാണ് മരിച്ചതെന്ന് ബന്ധുക്കൾ തിരിച്ചറിഞ്ഞു. വൈകുന്നേരം ആറോടെ രൂക്ഷ ഗന്ധം അനുഭവപ്പെട്ടതിനെ തുടർന്ന് പരിസരവാസികൾ നടത്തിയ തെരച്ചിലിൽ മൃതദേഹം കണ്ടെത്തുകയായിരുന്നു. പ്രദേശവാസികൾ പോലീസിൽ വിവരം അറിയിച്ചു. പേരാമ്പ്ര ഡിവൈഎസ്പി എൻ. സുനിൽകുമാർ, അത്തോളി പോലീസ് ഇൻസ്പെക്ടർ കെ. പ്രേംകുമാർ, എസ്ഐ എം.സി. മുഹമ്മദലി എന്നിവരുടെ നേതൃത്വത്തിൽ പ്രാഥമിക പരിശോധന നടത്തി. രാവിലെ ഇൻക്വസ്റ്റ് നടപടിക്ക് ശേഷം കോഴിക്കോട് മെഡിക്കൽ കോളജ് ആശുപത്രിയിൽ പോസ്റ്റ് മോർട്ടത്തിനായി മൃതദേഹം മാറ്റുമെന്ന് അത്തോളി പോലീസ് അറിയിച്ചു. ഒരാഴ്ചയായി അലവിയെ കാണാനില്ലെന്ന വിവരം സമൂഹ മാധ്യമത്തിൽ പ്രചരിപ്പിച്ചിരുന്നു.

പെരിന്തൽമണ്ണ നഗരസഭ ടൗണ്‍ഹാളിന് മുൻ ചെയർമാന്‍റെ പേരിടാൻ തീരുമാനം

പെരിന്തൽമണ്ണ: നഗരസഭയുടെ ആധുനിക ടൗണ്‍ഹാളിന് മുൻ ചെയർമാൻ കെ.ടി. നാരായണൻ മാസ്റ്ററുടെ പേര് നൽകാനും ടൗണ്‍ഹാളിന് പുതിയ ഫീസും ബൈലോയും അംഗീകരിക്കാനും നഗരസഭാ കൗണ്‍സിൽ യോഗം തീരുമാനിച്ചു. ഹരിത കർമസേനയുടെ വരുമാനവർധനത്തിന് വേണ്ടിയുള്ള ബിസിനസ് ഡെവലപ്മെന്‍റ് പ്ലാൻ യോഗം അംഗീകരിച്ചു. മാലിന്യം സംസ്കരിച്ച് നിർമിക്കുന്ന വിൻഡ്രോ വളം, ബ്രാൻഡ് ആക്കി വിപണനം നടത്തും. കെഎസ്ഡബ്ലിയുഎംപിയുടെ നേതൃത്വത്തിൽ പരിശീലനം നൽകി ഹരിതകർമസേനയെ സംരംഭകരാക്കും. നഗരസഭയിലെ മൂന്ന് വാർഡുകളിൽ 21 കുടുംബങ്ങൾക്ക് പട്ടയം അനുവദിക്കുന്നത് സംബന്ധിച്ച് ഭൂമി സർക്കാരിലേക്ക് നിക്ഷിപ്തമാക്കുന്നതിന് കൗണ്‍സിൽ യോഗം അംഗീകാരം നൽകി. പെരിന്തൽമണ്ണ അർബൻ പിഎച്ച്സിയിലും മൂന്ന് യുഎച്ച്ഡബ്ലിയുസികളിലും നിശ്ചിയിക്കപ്പെട്ട സമയങ്ങളിൽ ഡോക്ടറുടെ സേവനം ടെലി കണ്‍സൾട്ടേഷൻ സംവിധാനത്തിലൂടെ ലഭ്യമാക്കും. നഗരസഭയിൽ പാലിയേറ്റീവ് പ്രവർത്തനത്തിന് മൂന്ന് ആശാ പ്രവർത്തകരെ പുതിയതായി നിയമിക്കും. എസ്ബിഎം, ഐസി ഫണ്ടുകൾ വിനിയോഗിച്ച് നഗരത്തിലെ പൊതുസ്ഥലങ്ങളിൽ ശുചിത്വ സന്ദേശങ്ങളും മുന്നറിയിപ്പ് ബോർഡുകളും സ്ഥാപിക്കുന്നതിനും യോഗം തീരുമാനിച്ചു. നഗരസഭാ ചെയർമാൻ പി.ഷാജി അധ്യക്ഷനായിരുന്നു.

നിലന്പൂർ - അകന്പാടം റോഡിൽ അപകടങ്ങൾ തുടർക്കഥ

നിലന്പൂർ: നിലന്പൂർ - അകന്പാടം റോഡിൽ അപകടങ്ങൾ തുടർക്കഥയാകുന്നു. മഹാഗണിയിലും മൈലാടിയിലും സിസിടിവി സ്ഥാപിക്കണമെന്ന ആവശ്യം ശക്തമാകുന്നു. ഈ ഭാഗത്ത് കാറുകളുടെ അമിത വേഗത കാരണം ബൈക്ക് യാത്രക്കാരായ രണ്ട് യുവാക്കൾ കഴിഞ്ഞ ദിവസമാണ് മരിച്ചത്. ഞായറാഴ്ച ഉണ്ടായ അപകടത്തിൽ അകന്പാടം നഗറിലെ യദുകൃഷ്ണ (25)നും തിങ്കളാഴ്ച രാത്രി മൈലാടിയിൽ ഉണ്ടായ അപകടത്തിൽ നന്പൂരിപ്പൊട്ടി സ്വദേശി ആമീൻ അസ്ലവു (20)മാണ് മരിച്ചത്. ആമീൻ അസ്ലത്തെ ഇടിച്ച് വീഴ്ത്തിയ കാർ ഓടിച്ചിരുന്നത് വണ്ടൂർ സ്വദേശി ഹാരിസ് റഹ്മാനാണ്. ഇയാളെയും സഹായിയായി എത്തിയവരെയും നാട്ടുകാർ ഇന്നലെ പുലർച്ചെ ഒന്നരയോടെ പിടികൂടി നിലന്പൂർ പോലീസിന് കൈമാറി. മഹാഗണി അപകട വളവിൽ പൊതുമരാമത്ത് മുന്നറിയിപ്പ് ബോർഡ് സ്ഥാപിക്കണമെന്ന് നാട്ടുകാർ പലവട്ടം ആവശ്യപ്പെട്ടതാണ്. മൈലാടി പാലത്തിന് സമീപവും മഹാഗണിയിലും സിസിടിവികൾ വേണം. വെളിയംതോട് മുതൽ മൈലാടിപാലം വരെ മുന്നറിയിപ്പ് ബോർഡുകൾ അനിവാര്യമാണ്. നിലന്പൂർ - നായാടംപൊയിൽ മലയോര പാതയിൽ ഉൾപ്പെട്ട മൈലാടി മുതൽ അകന്പാടം വരെയുള്ള ഭാഗങ്ങൾ അപകടഭീതി ഉയർത്തുന്ന സ്ഥലമാണ്.

ദേശീയ പണിമുടക്ക് വിജയിപ്പിക്കും: ഡിബിടിയു

പെരിന്തൽമണ്ണ: കേന്ദ്രസർക്കാരിന്‍റെ തൊഴിലാളി, കർഷകവിരുദ്ധ നയങ്ങൾക്കെതിരെയും ഇന്ധന വിലവർധനവിനെതിരെയും മറ്റും ഇന്ന് നടക്കുന്ന ദേശീയ പണിമുടക്കിൽ മുഴുവൻ സ്വകാര്യ ബസ് തൊഴിലാളികളും പങ്കെടുക്കണമെന്ന് ഡിസ്ട്രിക് ബസ് തൊഴിലാളി യൂണിയൻ (ഡിബിടിയു-സിഐടിയു) ജില്ലാകമ്മിറ്റി തൊഴിലാളികളോട് അഭ്യർഥിച്ചു. രാജ്യത്തെ തൊഴിലാളികൾക്ക് സംരക്ഷണം നൽകുന്ന നിയമങ്ങൾ മാറ്റി പകരം വൻകിട മുതലാളിമാർക്ക് അനുകൂലമായ നിയമനിർമാണമാണ് ബിജെപി സർക്കാർ നടത്തുന്നത്. മോദി ഭരണത്തിൽ രാജ്യത്ത് പട്ടിണിയും വിലക്കയറ്റവും തൊഴിലില്ലായമയും ഉയർന്ന രീതിയിലാണ്. ഇക്കാര്യങ്ങളാൽ രാജ്യത്തെ തൊഴിലാളികൾ നടത്തുന്ന പണിമുടക്കിൽ മുഴുവൻ സ്വകാര്യബസ് തൊഴിലാളികളും പങ്കെടുക്കണമെന്ന് ജില്ലാ കമ്മിറ്റി ആവശ്യപ്പെട്ടു. യോഗത്തിൽ അഡ്വ.കെ.ഫിറോസ് ബാബു, കെ.അനിൽകുമാർ, കെ.ജാഫർ, മാടാല മുഹമ്മദലി, ശിവൻ എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]