ADVERTISEMENT

ADVERTISEMENT

ക്ഷേത്ര സംരക്ഷണസമിതി സമ്മേളനം

നിലമ്പൂര്‍: കേരള ക്ഷേത്ര സംരക്ഷണ സമിതി നിലമ്പൂര്‍ താലൂക്ക് സമ്മേളനവും കുടുംബ സംഗമവും കാരക്കോട് ശ്രീരാമാനന്ദാശ്രമം മഠാധിപതി ഡോ. ധര്‍മാനന്ദ സ്വാമികള്‍ ഉദ്ഘാടനം ചെയ്തു. ഡോ. കെ. മുരുകന്‍ അധ്യക്ഷത വഹിച്ചു.

സമിതി സംസ്ഥാന ഉപാധ്യക്ഷന്‍ നാരായണന്‍കുട്ടി, മാതൃസമിതി സംസ്ഥാന സമിതി അംഗം കെ. സൗമിനി എന്നിവര്‍ വിവിധ വിഷയങ്ങളില്‍ പ്രഭാഷണം നടത്തി. വി.എസ്. പ്രസാദ്, സി.വി. സുബ്രഹ്മണ്യന്‍, കെ.ആര്‍. അനൂപ്, പി. ഗോവിന്ദന്‍, എസ്. ശിവദാസന്‍, കെ. ജയന്‍, പി.ബി. ശിവദാസന്‍ എന്നിവര്‍ പ്രസംഗിച്ചു.

പുതിയ ഭാരവാഹികള്‍: പി. ഗോവിന്ദന്‍ (പ്രസിഡന്‍റ്), എസ്. ശിവദാസന്‍ (സെക്രട്ടറി), കെ. സുകുമാരന്‍ (ഖജാന്‍ജി), പി. വസുമതി. (മാതൃസമിതി പ്രസിഡന്റ്), എം.ജി. ശോഭനകുമാരി (സെക്രട്ടറി), ടി. രമണി (ഖജാന്‍ജി).

ADVERTISEMENT

ബൈക്കുകൾ കൂട്ടിയിടിച്ച് യുവാവ് മരിച്ചു

മഞ്ചേരി: ബൈക്കുകൾ കൂട്ടിയിടിച്ച് യുവാവ് മരിച്ചു. പയ്യനാട് മുക്കം ചുണ്ടിയൻമൂച്ചി പരേതനായ അബ്ദുള്ളയുടെ മകൻ ഷമീമുൽ ഹസൻ (25) ആണ് മരിച്ചത്. ഞായറാഴ്ച രാത്രി 8.30ന് പയ്യനാട് മുക്കം - പുല്ലഞ്ചേരി റോഡിലായിരുന്നു അപകടം. പുല്ലഞ്ചേരി ഭാഗത്തേക്ക് പോവുകയായിരുന്ന ഷമീം ഓടിച്ച ബൈക്കും എതിരെ വന്ന ബൈക്കും തമ്മിൽ കൂട്ടിയിടിക്കുകയായിരുന്നു. റോഡിൽ തലയടിച്ച് വീണ ഷമീമിനെ ഉടൻ മഞ്ചേരിയിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പോസ്റ്റ്മോർട്ടത്തിന് ശേഷം മൃതദേഹം പയ്യനാട് വലിയ ജുമാ മസ്ജിദിൽ കബറടക്കി. മാതാവ്: ഖദീജ. സഹോദരങ്ങൾ: നൗഷാദ്, ഷിബിലി, ജിംഷാദ്, ബുഷ്റ, ജമീല, ഷബ്ന, പരേതനായ നിസാർ.

അലിഫ് അറബിക് ടാലന്‍റ് ടെസ്റ്റ് സംഘടിപ്പിച്ചു

പെരിന്തൽമണ്ണ: കെഎടിഎഫ് സംസ്ഥാന കമ്മിറ്റിയുടെ ഭാഗമായ അലിഫ് വിംഗിന്‍റെ ആഭിമുഖ്യത്തിൽ സംസ്ഥാനത്തെ 163 ഉപജില്ലകളിലും അലിഫ് അറബിക് ടാലന്‍റ് ടെസ്റ്റും ഭാഷാസമര അനുസ്മരണവും സംഘടിപ്പിച്ചു. പെരിന്തൽമണ്ണ ഉപജില്ലാ മത്സരം കെഎംഎംയുപി സ്കൂളിൽ ബ്ലോക്ക് പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മറ്റി ചെയർമാൻ അസീസ് പട്ടിക്കാട് ഉദ്ഘാടനം ചെയ്തു. ഉപജില്ലാ പ്രസിഡന്‍റ് സി.എച്ച്. അബ്ദുൽ ഷമീർ അധ്യക്ഷത വഹിച്ചു.നഗരസഭാ കൗൺസിലർ പത്തത്ത് ജാഫർ സമ്മാനവിതരണം നടത്തി. സംസ്ഥാന എക്സിക്യൂട്ടീവ് അഗം ഹുസൈൻ പാറൽ അനുസ്മരണ പ്രഭാഷണം നടത്തി. ജില്ലാ സീനിയർ വൈസ് പ്രസിഡന്‍റ് പി.കെ. സിയാദ്,സ്കൂൾ മാനേജർ സക്കീർഹുസൈൻ, മുസ്തഫ വളപുരം,അൻവർ ഷവീം തങ്ങൾ, പി.പി. സക്കീർ ഹുസൈൻ, കെ. മുഹമ്മദ് അഷ്റഫ്, കെ.വി. മുഹമ്മദലി, വി. അനീസ്ബാബു, ഉപജില്ലാ സെക്രട്ടറി പി. മുഹ്സിൻ അഹമ്മദ്, ട്രഷറർ എം. നൗഫൽ നസീർ എന്നിവർ പ്രസംഗിച്ചു.

കുടുംബാരോഗ്യ കേന്ദ്രത്തിലേക്ക് പ്രതിഷേധ മാര്‍ച്ച് സംഘടിപ്പിച്ചു

ചങ്ങരംകുളം: ബിജെപി ആലംകോട് കുടുംബാരോഗ്യ കേന്ദ്രത്തിലേക്ക് പ്രതിഷേധ മാര്‍ച്ച് സംഘടിപ്പിച്ചു. കേരളത്തിലെ ആരോഗ്യമേഖലയുടെ തകര്‍ച്ചയില്‍ ബിജെപി സംസ്ഥാന വ്യാപകയായി നടത്തുന്ന പ്രതിഷേധങ്ങളുടെ ഭാഗമായാണ് ബിജെപി ആലംകോട് പഞ്ചായത്ത് കമ്മിയുടെ നേതൃത്വത്തില്‍ കുടുംബാരോഗ്യ കേന്ദ്രത്തിന് മുന്നില്‍ മാർച്ച് സംഘടിപ്പിച്ചത്. മണ്ഡലം പ്രസിഡന്‍റ് അനീഷ് മൂക്കുതല മാര്‍ച്ച് ഉദ്ഘാടനം ചെയ്തു.വിപിന്‍ കോക്കൂര്‍ അധ്യക്ഷത വഹിച്ചു. റിനില്‍ കാളാച്ചാല്‍, കൃഷ്ണന്‍ പാവിട്ടപ്പുറം, ബിജു മാന്തടം, ബിപിന്‍ മുല്ലക്കല്‍,വി. ലക്ഷ്മണന്‍, മണി പന്താവൂര്‍, രാജീവ് പെരുമുക്ക് എന്നിവര്‍ സംസാരിച്ചു.

ഉന്നത വിജയികളെ അനുമോദിച്ചു

പെരിന്തൽമണ്ണ: മർച്ചന്‍റ്സ് അസോസിയേഷന്‍റെ വിദ്യാഭ്യാസ പ്രോത്സാഹന പദ്ധതിയുടെ ഭാഗമായി എസ്എസ്എൽസി, പ്ലസ് ടു പരീക്ഷകളിലും മറ്റു മേഖലകളിലും ഉയർന്ന റാങ്കോടുകൂടി വിജയിച്ച വ്യാപാരികളുടെ മക്കളെ അവാർഡുകൾ നൽകി അനുമോദിച്ചു. വ്യാപാര ഭവനിൽവച്ച് നടന്ന അനുമോദന സദസ് പെരിന്തൽമണ്ണ സർക്കിൾ ഇൻസ്പെക്ടർ സുമേഷ് സുധാകർ ഉദ്ഘാടനം ചെയ്തു. പ്രസിഡന്‍റ് പി.ടി.എസ്. മൂസു അധ്യക്ഷത വഹിച്ചു. യോഗത്തിൽ സെക്രട്ടറി സി.പി. മുഹമ്മദ് ഇക്ബാൽ, ലത്തീഫ് ടാലന്‍റ്, ചമയം ബാപ്പു, ഷാലിമാർ ഷൗക്കത്ത്, യൂസഫ് രാമപുരം, ലിയാകത്തലിഖാൻ, വാരിയർ ദാസ്, പി.പി. സൈതലവി, ഗഫൂർ വള്ളൂരാൻ, ഹാരിസ് ഇന്ത്യൻ, ഷൈജൽ, ഒമർശരീഫ്, ഖാജാ മുഹിയുദ്ദീൻ, ഇബ്രാഹിം കാരയിൽ, ജമീല ഇസുദ്ദീൻ, റഷീദ ഡാലിയ തുടങ്ങിയവർ സംസാരിച്ചു.

സങ്കര വൈദ്യത്തിനെതിരേ ഐഎംഎ

പെരിന്തൽമണ്ണ: സങ്കരവൈദ്യം നടപ്പാക്കുന്നതിന് അനുമതി നൽകരുതെന്ന് ഐഎംഎ ശക്തമായി ആവശ്യപ്പെട്ടു. സങ്കരവൈദ്യം ശാസ്ത്രീയമല്ലെന്നും രോഗികളുടെ ആരോഗ്യത്തിന് അതു ഗുണം ചെയ്യില്ലെന്നും ഐഎംഎ സംസ്ഥാന പ്രസിഡന്‍റ് ഡോ. ശ്രീവിലാസൻ പറഞ്ഞു. ഡോക്ടർമാർക്കായുള്ള തുടർവിദ്യാഭ്യാസപരിപാടി പെരിന്തൽമണ്ണയിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ആധുനിക വൈദ്യശാസ്ത്രത്തിന്‍റെ അടിസ്ഥാന തത്വങ്ങളെ ലംഘിക്കുന്നതും കൃത്യമായ ശാസ്ത്രീയ അടിത്തറയില്ലാത്തതുമായ ചികിത്സാരീതീകളെ പ്രോത്സാഹിപ്പിക്കരുതെന്നും ഐഎംഎ ആവശ്യപ്പെടുന്നു. മിക്സോപതി നടപ്പാക്കുന്നതിന്‍റെ പ്രത്യാഘാതങ്ങളെ കുറിച്ച് കേന്ദ്രസർക്കാരിനെ അറിയിച്ചിട്ടുണ്ടെന്നും ഡോ. ശ്രീവിലാസൻ പറഞ്ഞു. യോഗത്തിൽ സ്റ്റേറ്റ് സെക്രട്ടറി ഡോ. ശശിധരൻ, സിജിപി ഡയറക്ടർ ഡോ. മുരുകേശൻ, സെക്രട്ടറി ഡോ. ദീപിക, നോർത്ത് സോൺ വൈസ്‌പ്രസിഡന്‍റ് ഡോ.പി. എൻ.അജിത, ഡോ. നിഷ, ബ്രാഞ്ച് പ്രസിഡന്‍റ് ഡോ. സന്തോഷ്കുമാർ, പ്രോഗ്രാം കമ്മിറ്റി ചെയർമാൻ ഡോ. നിളാർ മുഹമ്മദ്, കൺവീനർ ഡോ. ഷംജിത്ത് എന്നിവർ പ്രസംഗിച്ചു. ഡോ. ആർ. രമേഷ് സുവനീർ പ്രകാശനം ചെയ്തു. ഡോക്ടർമാരായ അനീഷ്‌ അഹ്‌മദ്‌, കെ. ദിപു, രമ കൃഷ്ണകുമാർ, പ്രദോഷ് ഗംഗാധർ, അസിം ആദിർ, അഹമ്മദ് കബീർ, അനീഷ അശോക് കുമാർ, കെ.യു. കുഞ്ഞുമോയ്‌തീൻ, ടി. മുജീബ് റഹ്മാൻ, വിഷ്ണു വാസുദേവൻ, ജിതിൻ ബെനോയ് ജോർജ് എന്നിവർ വിവിധ വിഷയങ്ങളെക്കുറിച്ച് പ്രബന്ധങ്ങൾ അവതരിപ്പിച്ചു.

പാലാങ്കര കല്ലന്തോട്മുക്ക് കാരപ്പുറം റോഡ് തകര്‍ന്നു; ജനങ്ങള്‍ ദുരിതത്തില്‍

എടക്കര: മൂത്തേടം പഞ്ചായത്തിലെ പാലാങ്കര കല്ലന്തോട്മുക്ക് കാരപ്പുറം റോഡ് തകര്‍ന്നതോടെ ജനങ്ങള്‍ ദുരിതത്തില്‍. വര്‍ഷങ്ങളായി തകര്‍ന്ന് കിടക്കുന്ന റോഡിലൂടെ മഴക്കാലം ആരംഭിച്ചതോടെ കാല്‍നടയാത്രപോലും അസാധ്യമായിരിക്കുകയാണ്. ആശുപത്രി ആവശ്യങ്ങള്‍ക്ക് പേലും വാഹനം വിളിച്ചാല്‍ വരാത്ത സാഹചര്യമാണ് നിലവിലുള്ളതെന്ന് നാട്ടുകാര്‍ പറയുന്നു. റോഡ് റീ ടാറിംഗിനായി മൂന്ന് വര്‍ഷം മുന്പ് ജില്ലാ പഞ്ചായത്ത് ഒരുകോടി രൂപ അനുവദിച്ചിരുന്നു. രണ്ട് തവണ നിര്‍മാണോദ്ഘാടനവും നടത്തി. എന്നാല്‍ നാളിതുവരെയായി പ്രവൃത്തി ആരംഭിക്കാന്‍ അധികൃതര്‍ തയാറായിട്ടില്ല. ഈ റോഡിലൂടെയുള്ള ഗതാഗതം ദുഷ്കരമായ സാഹചര്യത്തില്‍ ഗ്രാമപഞ്ചായത്ത് അധികൃതരെ പലതവണ വിവരം ധരിപ്പിച്ചിട്ടും യാതൊരു നടപടിയുമുണ്ടായിട്ടില്ല. ഇതിന് പുറമെ പഞ്ചായത്തിലെ ഗ്രാമീണ റോഡുകള്‍ ജൽജീവന്‍ മിഷന്‍ കുടിവെള്ള പദ്ധതിക്കായി കീറിമുറിച്ചതും നന്നാക്കാന്‍ തയാറായിട്ടില്ല. പഞ്ചായത്തിന്‍റെ നിരുത്തരവാദ സമീപനം മുതലെടുത്ത് കരാറുകാര്‍ അനാസ്ഥ കാണിക്കുകയാണെന്ന് ആരോപണമുയര്‍ന്നിട്ടുണ്ട്. റോഡില്‍ പലയിടങ്ങളിലും കുഴികള്‍ രൂപപ്പെടുകയും വെള്ളം കെട്ടിനിന്ന് വാഹനങ്ങള്‍ അപകടത്തില്‍പെടുന്നതും നിത്യസംഭവമായി മാറിയിരിക്കുകയാണ്. അധികൃതരുടെ നിസംഗ നിലപാടിനെതിരേ പ്രതിഷേധം ശക്തമായിട്ടുണ്ട്.

വിജയോത്സവം സംഘടിപ്പിച്ചു

എടക്കര: മണിമൂളി ക്രിസ്തുരാജാ ഹയര്‍ സെക്കന്‍ഡറി സ്‌കൂളില്‍ വിജയോത്സവം സംഘടിപ്പിച്ചു. പഞ്ചായത്ത് വൈസ് പ്രസിഡന്‍റ് റെജി ജോസഫ് കണ്ടത്തില്‍ ഉദ്ഘാടനം ചെയ്തു. തുടര്‍ച്ചയായ നൂറ് ശതമാനം വിജയങ്ങള്‍ക്ക് നേതൃത്വം വഹിച്ച മുന്‍ ഹെഡ്മാസ്റ്റര്‍ എ.ടി. ഷാജി പ്രതിഭകള്‍ക്ക് മെമന്‍റോ നല്‍കി. മത്സരപ്പരീക്ഷയില്‍ സംസ്ഥാനത്ത് ഒന്നാം സ്ഥാനം നേടിയ ആല്‍ബിന്‍ ജോണ്‍സണ്‍ സ്‌കൂളിന്‍റെ പ്രത്യേക സമ്മാനം ഏറ്റുവാങ്ങി. എല്‍എസ്എസ്, യുഎസ്എസ്, എന്‍എംഎംഎസ് സ്‌കോളര്‍ഷിപ്പ് പരീക്ഷാ വിജയികളെയും രാജ്യപുരസ്‌കാര്‍ വിജയികളെയും യോഗത്തില്‍ അനുമോദിച്ചു. പിടിഎ പ്രസിഡന്‍റ് ജൂഡി തോമസ് അധ്യക്ഷത വഹിച്ചു. പ്രധാനാധ്യാപകന്‍ സജി ആന്‍റണി, വാര്‍ഡ് മെമ്പര്‍ പി.പി. ഷിയാജ്, സ്‌കൂള്‍ പ്രിന്‍സിപ്പാള്‍ ആന്‍റോ വി. തോമസ്, സികെഎല്‍പി പ്രധാനാധ്യാപിക ടാജ് വി. തോമസ്, മുന്‍ സ്‌കൗട്ട് മാസ്റ്റര്‍ ജോര്‍ജ് കുട്ടി, അധ്യാപിക ജെസി ജേക്കബ്, വിജയഭേരി കോഓർഡിനേറ്റര്‍ ഷൈനി ജോര്‍ജ് എന്നിവര്‍ സംസാരിച്ചു.

കുറുമ്പലങ്ങോട് വില്ലേജ് ഓഫീസ് കെട്ടിടം ജീർണാവസ്ഥയിൽ

നിലമ്പൂർ: കുറുമ്പലങ്ങോട് വില്ലേജ് ഓഫീസ് ജീർണാവസ്ഥയിൽ. ഓഫീസ് പ്രവർത്തിക്കുന്നത് 43 വർഷം പഴക്കമുള്ള പൊളിഞ്ഞ കെട്ടിടത്തിലാണ്. നിലവിൽ ചുറ്റുമതിൽ തകർന്നുവീണതോടെ കെട്ടിടം ഏതു സമയത്തും നിലംപൊത്താവുന്ന അവസ്ഥയിലാണ്. കഴിഞ്ഞ മാസം ഉണ്ടായ കനത്ത മഴയിൽ സംരക്ഷണ ഭിത്തിയും ചുറ്റുമതിലും തകർന്നിരുന്നു. ദിവസവും നൂറുകണക്കിന് ആളുകളാണ് വിവിധ ആവശ്യങ്ങൾക്കായി ഇവിടെയത്തുന്നത്. ഓഫീസിന്‍റെ പല ഭാഗങ്ങളിലുമുള്ള ചുമരുകൾ അടർന്ന് വീഴാറായ നിലയിലാണ്. 1982 ലാണ് കുറുമ്പലങ്ങോട് വില്ലേജ് ഓഫീസ് കെട്ടിടവും ചുറ്റുമതിലും നിർമിച്ചത്. കെട്ടിടത്തിന്‍റെ ശോചനീയാവസ്ഥ ഓഫീസ് പ്രവർത്തനങ്ങളെയും പൊതുജനങ്ങളുടെ സുരക്ഷയെയും സാരമായി ബാധിക്കുമെന്ന ആശങ്കയും ഉയർന്നിട്ടുണ്ട്.

എരവിമംഗലം ഹെൽത്ത് സെന്‍ററിന് വീണ്ടും സംസ്ഥാന കായകൽപ്പ് അവാർഡ്

പെരിന്തൽമണ്ണ: സംസ്ഥാന കായകൽപ്പ് അവർഡ് നേടി പെരിന്തൽമണ്ണ നഗരസഭ എരവിമംഗലം ഹെൽത്ത് സെന്‍റർ. നഗര കുടുംബാരോഗ്യകേന്ദ്രം വിഭാഗത്തിൽ 90.8 ശതമാനം മാർക്കോടെയാണ് ഒന്നാം സ്ഥാനം കൈവരിച്ചത്. രണ്ടാം തവണയാണ് കായകൽപ്പ് അവർഡിന് ഹെൽത്ത് സെന്‍റർ അർഹമാകുന്നത്. രാജ്യത്തെ മികച്ച ആരോഗ്യകേന്ദ്രങ്ങളുടെ പട്ടികയിൽ ഇടംനേടിയ ജില്ലയിലെ ആരോഗ്യസ്ഥാപനങ്ങൾക്ക് നൽകുന്ന എൻക്യുഎസ് അവാർഡ് രണ്ട് തവണയും ആരോഗ്യസ്ഥാപനങ്ങളുടെ ഗുണനിലവാരം ഉയർത്തുന്നതിനായി സംസ്ഥാന സർക്കാർ നൽകുന്ന കെഎഎസ്എച്ച് അംഗീകാരം, 2023ൽ കായകൽപ്പ് അവാർഡിന്‍റെ ഭാഗമായുള്ള കമന്‍റേഷൻ പുരസ്‌കാരം തുടങ്ങി വിവിധ പുരസ്‌കാരങ്ങൾ എരവിമംഗലം ഹെൽത്ത് സെന്‍ററിന് ലഭിച്ചിരുന്നു. മെഡിക്കൽ ഓഫീസർ, ജനറൽ ഡോക്ടർ, ദന്ത ഡോക്ടർ, കുട്ടികളുടെ ഡോക്ടർ, ഗൈനക് വിഭാഗം രണ്ട് ഫാർമസിസ്റ്റ് എന്നിവരുടെ സേവനവും എല്ലാ മാസവും ആദ്യ തിങ്കളാഴ്ച കാഴ്ച്ച പരിശോധന, ലാബ് സൗകര്യം, മരുന്ന്, പ്രതിരോധ കുത്തിവയ്പ്പുകൾ എന്നിവ നിലവിൽ ഹെൽത്ത് സെന്‍ററിൽ ലഭ്യമാണ്. രാവിലെ ഒമ്പതു മുതൽ വൈകുന്നേരം ആറുവരെയാണ് പ്രവർത്തന സമയം. അവർഡിന്‍റെ ഭാഗമായി രണ്ടുലക്ഷം രൂപയാണ് സെന്‍ററിന്‍റെ പ്രവർത്തനങ്ങൾക്ക് ലഭിക്കുന്നത്.

മലയോര കർഷകരെ കുടിയിറക്കാൻ ആസൂത്രിത നീക്കം: പി.വി. അൻവർ

നിലമ്പൂർ: മലയോര ജനതയെ കുടിയിറക്കാൻ ആസൂത്രിത നീക്കമുണ്ടെന്നും ഇത് ജനകീയ പിന്തുണയോടെ നേരിടുമെന്നും പി.വി. അൻവർ പറഞ്ഞു. മൂത്തേടത്ത് തൃണമുൽ കോൺഗ്രസിന്‍റെ ഓഫീസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. വന്യമൃഗങ്ങൾ ജനവാസ മേഖലകളിൽ തമ്പടിക്കുകയാണ്. മനുഷ്യരെ കൊലപ്പെടുത്തുകയും കൃഷി നശിപ്പിക്കുകയും ചെയ്യുമ്പോൾ പ്രശ്നപരിഹാരം എന്തെന്ന് സർക്കാർ പറയുന്നില്ല. തുറന്നിട്ട മൃഗശാലയായി കേരളം മാറികഴിഞ്ഞു. ജനസാന്ദ്രമായിരുന്ന മലയോര മേഖലയിൽ നിന്നും പ്രാണരക്ഷാർഥം ജനങ്ങൾ ഇറങ്ങുകയാണ്. വന്യമൃഗ ശല്യംമൂലം ജനങ്ങൾ പ്രാണഭീതിയിൽ കഴിയുമ്പോൾ വനത്തിന്‍റെ വിസ്തൃതി കൂട്ടാനാണ് സംസ്ഥാന സർക്കാരിന് ജാഗ്രത. നിലമ്പൂരിൽ മാത്രം 161 കർഷകരുടെ ഭൂമി വാങ്ങി വനത്തോട് ചേർത്തുകഴിഞ്ഞു. ഭരണപക്ഷവും പ്രതിപക്ഷവും ഉൾപ്പെടെ നടത്തുന്ന ആസൂത്രിതമായ അജണ്ടയാണ് ഇതിന് പിന്നിലുള്ളതെന്നും അദ്ദേഹം കൂട്ടിച്ചേർത്തു. വിവിധ പാർട്ടികളിൽ നിന്നും തൃണമൂൽ കോൺഗ്രസിൽ ചേർന്ന 50പേരെ ഷാൾ അണിയിച്ച് പാർട്ടിയിലേക്ക് സ്വീകരിച്ചു. ഉന്നത വിജയംനേടിയ വിദ്യാർത്ഥികളെയും മികച്ച ക്ഷീര കർഷകനെയും ചടങ്ങിൽ ആദരിച്ചു. മുണ്ടോടൻ ഉസ്മാൻ അധ്യക്ഷത വഹിച്ചു. തൃണമൂൽ കോൺഗ്രസ് നേതാക്കളായ ഇ.കെ. സുകു, സാജിത്ത് ബാബു, ഉമ്മർ ഇണ്ടേപ്പാടൻ, ഇസ്മായിൽ മൂത്തേടം, ജോഷി, ഷെരീഫ് എന്നിവർ സംസാരിച്ചു. മൂത്തേടം ടൗണിൽ ശക്തി തെളിയിച്ച് പ്രകടനവും നടത്തി.

ജനവാസ മേഖലയിലൂടെ പകൽ സമയത്ത് തീറ്റ തേടി കരടി

ടികെ കോളനിയിലാണ് വീണ്ടും ഭീതി പരത്തി കരടിയുടെ പകൽ സഞ്ചാരം പൂക്കോട്ടുംപാടം: ജനവാസ മേഖലയിലൂടെ പകൽ സമയത്തും തീറ്റ തേടിയിറങ്ങി കരടി. അമരമ്പലം പഞ്ചായത്തിലെ ടികെ കോളനി ആന്‍റണിക്കാട്ടിലാണ് വൈകുന്നേരം ജനവാസ മേഖലയിലൂടെ കരടി തീറ്റ തേടി ഇറങ്ങിയത്. രണ്ടുമസത്തിലധികമായി പ്രദേശത്ത് രാത്രിയിലെത്തി നാശനഷ്ടം വരുത്തിയിരുന്ന കരടി പകൽ സമയത്തുമെത്തി തുടങ്ങിയതോടെ പ്രദേശത്തെ ജനങ്ങൾ കൂടുതൽ ഭീതിയിലായി. ശനിയാഴ്ച വൈകുന്നേരമാണ് മേനോൻപറമ്പിൽ ജെറീഷിന്‍റെ വീടിനോട് ചേർന്നുള്ള കൃഷിയിടത്തിലേക്ക് പൂക്കോട്ടുംപാടം ടികെ കോളനിറോഡ് മുറിച്ചുകടന്ന് കരടിയെത്തിയത്. കൃഷിയിടത്തിലൂടെ ഭയമില്ലാതെ സഞ്ചരിച്ച കരടി ചിതൽ കൂട് നശിപ്പിച്ച് അതിൽ നിന്ന് ചിതലിനെ ഭക്ഷിച്ചുവെന്നും ജെറീഷ് പറഞ്ഞു. ഇതിനിടയിൽ കരടിയുടെ ചിത്രം ജെറീഷ് പകർത്തി. വിവരമറിയിച്ചതിനെ തുടർന്ന് വനം ആർആർടി ജീവനക്കാരും സ്ഥലത്തെതി പരിശോധിച്ചപ്പോഴും കൃഷിയിടത്തിൽ കരടിയെ കണ്ടു. തുടർന്ന് റബർ ബുള്ളറ്റ് ഉപയോഗിച്ച് വെടിയുതിർത്താണ് കരടിയെ ഓടിച്ചുവിട്ടത്. മാസങ്ങളായി പ്രദേശത്തുള്ള അമ്പലങ്ങളിലെത്തി പൂജദ്രവ്യങ്ങളായ എണ്ണ, നെയ്യ്, ശർക്കര എന്നിവ ഭക്ഷിച്ച് മടങ്ങുന്നത് പതിവായിരുന്നു. ഒപ്പം ചില വീടുകൾക്ക് ഉള്ളിലടക്കം കരടി കയറാൻ ശ്രമിച്ചിട്ടുമുണ്ടായിരുന്നു. ഇതേ തുടർന്ന് കരടിയെ പിടികൂടാൻ കെണി ഒരുക്കിയിട്ടുണ്ടെങ്കിലും ഇതിൽ കയറാതെ കരടി വീണ്ടും ഭീതി പരത്തി ജനവാസ മേഖലയിലൂടെ നടക്കുകയാണ്. കൂടുതൽ കെണികൾ സ്ഥാപിക്കണമെന്നും ജനങ്ങളുടെ ഭീതി അകറ്റാൻ അധികൃതരുടെ ഭാഗത്ത് നിന്നും ശക്തമായ നടപടി വേണമെന്നും ഇല്ലെങ്കിൽ പ്രതിഷേധം നടത്തുമെന്നും വാർഡ് മെന്പർ വി.കെ ബാലസുബ്രമണ്യൻ പറഞ്ഞു.

‘മഞ്ചേരി മെഡിക്കൽ കോളജിന്‍റെ ദുരവസ്ഥക്ക് പരിഹാരം കാണണം’

മഞ്ചേരി: ആയിരക്കണക്കിന് രോഗികളുടെ ആശ്രയമായ മഞ്ചേരി മെഡിക്കൽ കോളജിന്‍റെ ഇന്നത്തെ ദുരവസ്ഥക്ക് പരിഹാരം കാണണമെന്നും മെഡിക്കൽ കോളജ് വന്നതോടെ നഷ്ടപ്പെട്ട മഞ്ചേരിയിലെ ജനറൽ ആശുപത്രി പുനഃസ്ഥാപിക്കണമെന്നും ആശുപത്രി കോമ്പൗണ്ടിലെ ഇടിഞ്ഞു വീഴാറായ കെട്ടിടങ്ങൾ പുതുക്കിപ്പണിത് ആശുപത്രിയുടെ സൗകര്യം വർധിപ്പിക്കണമെന്നും എൻസിപിഎസ് മഞ്ചേരി നിയോജക മണ്ഡലം കൺവൻഷൻ ആവശ്യപ്പെട്ടു. എൻസിപിഎസ് ജില്ലാ പ്രസിഡന്‍റ് കെ.പി. രാമനാഥൻ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് മുഹമ്മദലി ശിഹാബ് അധ്യക്ഷത വഹിച്ചു. കെ.ടി. മുജീബ്, മുഹമ്മദ് ഹാരീസ് ബാബു, ടി.സി. നാടി, ഷാജി മഞ്ചേരി, സുമേഷ് വെട്ടേക്കോട് എന്നിവർ പ്രസംഗിച്ചു.

കൈതപ്രവുമായി സംവദിച്ച് പരിയാപുരം സെന്‍റ് മേരീസ് സ്‌കൂള്‍ വിദ്യാര്‍ഥികള്‍

പരിയാപുരം: സെന്‍റ് മേരീസ് ഹയര്‍ സെക്കന്‍ഡറി സ്‌കൂള്‍ വിദ്യാരംഗം കലാസാഹിത്യവേദി പ്രവര്‍ത്തകര്‍ വായനയുടെയും എഴുത്തിന്‍റെയും പൊരുള്‍ തേടി ഗാനരചയിതാവ് കൈതപ്രം ദാമോദരന്‍ നമ്പൂതിരിക്കൊപ്പം ഒരു ദിനം ചെലവഴിച്ചു. തന്‍റെ എല്ലാ രചനകളും വായനയുടെ ഉത്പന്നങ്ങളാണെന്ന് കൈതപ്രം പറഞ്ഞു. വായന ജീവിതത്തെ മുന്നോട്ടു നയിക്കുന്ന ഇന്ധനമാണ്. സത്യത്തില്‍ നമുക്കു പോകാന്‍ ഒരു വഴിയേ ഉള്ളു, നന്മയുടെ-സ്‌നേഹത്തിന്‍റെ വഴി. അതു നിങ്ങള്‍ തിരിച്ചറിയണം. ഇല വീഴുന്നതും പുഴ ഒഴുകുന്നതും പാഠമാണെന്ന് ഓര്‍ക്കണമെന്നും കൈതപ്രം കുട്ടികളോടു പറഞ്ഞു. കൈതപ്രത്തിന്‍റെ ഗാനങ്ങള്‍ കോര്‍ത്തിണക്കി വിദ്യാര്‍ഥികളായ കെ.പി.അബിന്‍ കൃഷ്ണ, പി.സ്വാതി മഹേഷ്, കെ.പി.ആര്യ, കെ.നന്ദിക പ്രഭാത്കുമാര്‍ എന്നിവര്‍ "ഗാനമാല' സമര്‍പ്പിച്ചു. ചിത്രകാരി ജുവാന ജയിന്‍ അദ്ദേഹത്തിന്‍റെ ചിത്രം വരച്ച് സമ്മാനമായി നല്‍കി. കോഴിക്കോട് പുതിയറയിലുള്ള എസ്.കെ.പൊറ്റെക്കാട്ട് സാംസ്‌കാരിക കേന്ദ്രത്തിലെത്തി എസ്.കെ.യുടെ മകള്‍ സുമിത്ര ജയപ്രകാശുമായും കുട്ടികള്‍ കൂടിക്കാഴ്ച നടത്തി. "അച്ഛന്‍ കണ്ടതും അനുഭവിച്ചതുമാണ് അദ്ദേഹത്തിന്‍റെ കഥാപാത്രങ്ങളായി മാറിയത്. പല കഥാപാത്രങ്ങളെയും ഞാനും കണ്ടിട്ടുണ്ട്. എവിടെ ചെന്നാലും സാധാരണക്കാരുമായി അച്ഛന്‍ ആത്മബന്ധം സ്ഥാപിക്കും. അവരെല്ലാം കഥാപാത്രങ്ങളായി കൃതികളില്‍ നിറയും. സത്യത്തെ ദൈവമായി കണ്ട ആളായിരുന്നു അച്ഛന്‍. എഴുത്തിലും അതു കാണാം' എസ്.കെയുടെ മകള്‍ സുമിത്ര ജയപ്രകാശ് ഓര്‍മകള്‍ പങ്കുവച്ചു. ദേവനന്ദ ആര്‍. ലക്ഷ്മി, ജിസ് മരിയ ജെയിംസ്, സി.ടി.അദ്‌നാന്‍, എസ്.ശ്രീകാര്‍ത്തിക, എ. ഐറിന്‍ സഫീര്‍, ആല്‍ബിന എലിസബത്ത് ചാക്കോ, അന്ന ഫ്രാന്‍സിസ്, അക്ഷയ് സനീഷ്, സന മെറിന്‍, ആല്‍ഫിയ ബിജു എന്നിവര്‍ സുമിത്രയുമായി സംവദിച്ചു. കെ.വൈഗ പ്രസാദ്, വി.ഫാത്തിമ ഷെന്‍സ എന്നിവര്‍ വരച്ച എസ്.കെയുടെ ചിത്രങ്ങള്‍ സുമിത്ര ജയപ്രകാശ് ഏറ്റുവാങ്ങി. വിദ്യാരംഗം കോ ഓര്‍ഡിനേറ്റര്‍ മനോജ് വീട്ടുവേലിക്കുന്നേല്‍, അധ്യാപകരായ പി.ജി.ജോസഫ്, കെ.എന്‍.വിജില, എം.അഹമദ് മിഖ്ദാദ്, വി.അജയ് എന്നിവര്‍ നേതൃത്വം നല്‍കി.

കാട്ടുപന്നികളെ കൂട്ടത്തോടെ വെടിവയ്ക്കാൻ നടപടിയുമായി ചാലിയാർ പഞ്ചായത്ത് : 17 ഷൂട്ടർമാർക്ക് ചുമതല

നിലമ്പൂർ: കാട്ടുപന്നികളെ വെടിവയ്ക്കാൻ ശക്തമായ നടപടിയുമായി ചാലിയാർ ഗ്രാമപഞ്ചായത്ത്. ഇതിനായി തോക്ക് ലൈസൻസുള്ള 17 ഷൂട്ടർമാരെ നിയമിച്ചു. ഇന്ന് മുതൽ കാട്ടുപന്നികളെ വെടിവയ്ക്കും. ഷൂട്ടർമാരുടെ യോഗം ഇന്ന് ചാലിയാർ ഗ്രാമപഞ്ചായത്ത് ഓഫീസിൽ നടക്കും. പെരുമ്പത്തൂർ. എളമ്പിലാക്കോട്, മുട്ടിയേൽ വാർഡുകളിലാണ് ഇന്ന് രാത്രി കാട്ടുപന്നികളെ വെടിവയ്ക്കുക. രാത്രികാലങ്ങളിൽ വളർത്ത് മൃഗങ്ങളെ കൂട്ടിനുള്ളിൽ തന്നെ സംരക്ഷിക്കണമെന്ന് ജനങ്ങൾക്ക് മുന്നറിയിപ്പ് നൽകിയിട്ടുണ്ട്. ജനകീയ കൂട്ടായ്മ വാർഡ് കമ്മിറ്റി ഭാരവാഹികളുടെ നിർദേശങ്ങൾ ഓരോ വാർഡുകളിലെയും ജനങ്ങൾ പാലിക്കണം. ഇന്ന് മുതൽ ശല്യകാരായ കാട്ടുപന്നികളെ വെടിവച്ചു തുടങ്ങും. ഒരുമാസം നീണ്ടുനിൽക്കുന്ന പദ്ധതിക്കാണ് ഇന്ന് തുടക്കമാവുക. ഇതിനായി ജനകീയ കൂട്ടായ്മ പഞ്ചായത്ത് വാർഡ് കമ്മിറ്റികൾ രൂപികരിച്ചിട്ടുണ്ട്. എസ്റ്റേറ്റുകളും സ്വകാര്യ സ്ഥലങ്ങളോട് ചേർന്ന് കൃഷിയിടങ്ങളും കിടക്കുന്നതിനാൽ പഞ്ചായത്തിലെ ജനങ്ങൾ വലിയ തോതിൽ കാട്ടുപന്നി ഉൾപ്പെടെയുള്ള വന്യമൃഗങ്ങളുടെ ഭീഷണിയിലാണ്. കാട്ടുപന്നി ശല്യം അതിരൂക്ഷമായ ചാലിയാർ പഞ്ചായത്തിൽ കാട്ടുപന്നികളെ കൂട്ടത്തോടെ വെടിവയ്ക്കാനുള്ള പഞ്ചായത്ത് നടപടി ജനങ്ങൾക്ക് ആശ്വാസമാകും. കൃഷിയിടങ്ങളിലേക്കും റോഡുകളിലേക്കും എത്തുന്ന പന്നികളെയായിരിക്കും വെടിവയ്ക്കുക. അതിനാൽ ജനങ്ങൾ കടുത്ത ജാഗ്രത പുലർത്തണമെന്ന് എളമ്പിലാക്കോട്ചേർന്ന ജനകീയ കൂട്ടായ്മ യോഗത്തിൽ നിർദേശം നൽകി. കാട്ടാന ശല്യത്തിന് പരിഹാരം വേണമെങ്കിൽസോളാർ വൈദ്യുത വേലിയോ മതിലുകളോ വനാതിർത്തികളിൽ സ്ഥാപിക്കേണ്ടിവരും. ശല്യകാരായ കാട്ടാനകളെ കാടുകയറ്റാൻ വനംവകുപ്പുമായി ചേർന്ന് കർമപദ്ധതി പഞ്ചായത്ത് തയാറാക്കുകയും വേണം. കാട്ടുപന്നികളെ വെടിവെയ്ക്കാൻ നേരത്തെ തന്നെ ഗ്രാമപഞ്ചായത്തിന് അധികാരം ലഭിച്ചിരുന്നെങ്കിലും ചാലിയാർ പഞ്ചായത്തിൽ അത് കാര്യക്ഷമമായി നടപ്പാക്കിയില്ല. കാട്ടുപന്നികൾ കൂട്ടത്തോടെ റോഡുകൾ മുറിച്ച് കടക്കുകയും വലിയ തോതിൽ കൃഷിനാശം വരുത്തുകയും ചെയ്തതോടെ കർഷകരുടെ ഭാഗത്ത് നിന്നും ഉണ്ടായ വലിയ പ്രതിഷേധങ്ങളുടെ ഫലമായാണ് പഞ്ചായത്ത് അധികൃതർ ശക്തമായ നടപടിക്ക് തയാറായത്. എളമ്പിലാക്കോട് ചേർന്ന ജനകീയ കൂട്ടായ്മ യോഗത്തിൽ ചാലിയാർ ഗ്രാമപഞ്ചായത്ത് വൈസ് പ്രസിഡന്‍റ് ഗീതാ ദേവദാസ് അധ്യക്ഷത വഹിച്ചു. വികസന സ്റ്റാൻഡിംഗ് കമ്മിറ്റി ചെയർമാൻ തണിയിൽ സുരേഷ്. ഗ്രാമപഞ്ചായത്തംഗം മഞ്ജു അനിൽ, എൻസിപി ജില്ലാ ജനറൽ സെക്രട്ടറി പൂഴിത്തറ ഷാഹുൽ, വീരാൻ കുട്ടി വലിയാട്, കുന്നുമ്മൽ ഷൗക്കത്ത്, രാജു വൈലാശേരി, ഇബ്രാഹിം കാനക്കുത്ത്, അബ്ദുറഹ്മാൻ, ജേക്കബ് വൈലാശേരി എന്നിവർ പങ്കെടുത്തു.

ലയണ്‍സ് ക്ലബ് ഭാരവാഹികൾ ചുമതലയേറ്റു

പെരിന്തൽമണ്ണ: പെരിന്തൽമണ്ണ ലയണ്‍സ് ക്ലബ് പുതിയ ഭാരവാഹികളുടെ സ്ഥാനാരോഹണ ചടങ്ങ് പാസ്റ്റ് ഡിസ്ട്രിക്ട് ഗവർണർ സാജു ആന്‍റണി പത്താടൻ നിർവഹിച്ചു. പ്രസിഡന്‍റായി വർഗീസ് തെക്കെക്കോട്ട്, സെക്രട്ടറിയായി അനിൽ ജോ ഫിലിപ്പ്, ട്രഷററായി ഷീജ റോയി എന്നിവർ ചുമതലയേറ്റു. ആകാശപ്പറവ ചാരിറ്റബിൾ സംഘടനയ്ക്കും സായി സ്നേഹതീരം ട്രൈബൽ ഹോസ്റ്റലിനും സാന്പത്തിക സഹായം നൽകി സർവീസ് പ്രോജക്ടുകൾക്ക് തുടക്കം കുറിച്ചു. അങ്ങാടിപ്പുറം പെയിൻ ആൻഡ് പാലിയേറ്റീവിൽ ഒരു ഫിസിയോ തെറാപ്പി യൂണിറ്റും കൂടി ആരംഭിക്കും. പ്രസിഡന്‍റ് പേഴ്സി ടി. ജേക്കബിന്‍റെ അധ്യക്ഷതയിൽ സാജു ആന്‍റണി പത്താടൻ ഉദ്ഘാടനം ചെയ്തു. അഡീഷണൽ കാബിനറ്റ് സെക്രട്ടറിമാരായ ഡോ. കൊച്ചു എസ്. മണി, അഭിലാഷ്, ചീഫ് എഡിറ്റർ ഒ.കെ. റോയ്, ജോയിന്‍റ് കാബിനറ്റ് സെക്രട്ടറിമാരായ കെ.സി. ഇസ്മായിൽ, രഘുനാഥ് മാടവന, റീജിയൻ ചെയർമാൻ ഡോ. നഈമു റഹ്മാൻ, സോണ്‍ ചെയർമാൻ ശശികുമാർ, എസിപി ദേവിക, എഫ്ഡബ്ലിയു സി. സുലേഖ, ലേഡി സർക്കിൾ സെക്രട്ടറി ഷീജ റോയ്, പദ്മനാഭൻ എന്നിവർ പ്രസംഗിച്ചു. സെക്രട്ടറി അനിൽ ജോ ഫിലിപ്പ് നന്ദിയും പറഞ്ഞു.

കാട്ടുപന്നിയുടെ ജഡാവശിഷ്ടം കണ്ടെത്തി: കടുവ പേടിയിൽ വീണ്ടും മലയോരം

കരുവാരകുണ്ട്: മലയോര ജനതയെ ഒന്നാകെ പരിഭ്രാന്തിയിലാഴ്ത്തിയ കടുവ കൂട്ടിൽ അകപ്പെട്ടിട്ടും കടുവ പേടിയൊഴിയുന്നില്ല. കഴിഞ്ഞദിവസം കേരള എസ്റ്റേറ്റ് മഞ്ഞൾപാറ അമ്പതേക്കറിൽ പാതി ഭക്ഷിച്ച കാട്ടുപന്നിയുടെ ജഡാവശിഷ്ടം കണ്ടെത്തിയതോടെയാണ് ജനങ്ങളുടെ ഭീതി വീണ്ടും വർധിച്ചത്. കൂട്ടിൽ അകപ്പെട്ട കടുവയ്ക്ക് പുറമേ കൂടുതൽ കടുവകൾ പ്രദേശത്ത് ഉണ്ടെന്നും കടുവകൾക്ക് പുറമെ പുലി, കരടി, ചെന്നായ എന്നിവയുടെ സാന്നിധ്യവും മലയോര മേഖലകളിൽ ഉണ്ടെന്നും തൊഴിലാളികളിൽ ചിലർ പറഞ്ഞിരുന്നു. ഇവരുടെ പ്രചാരണം സത്യമാണെന്ന് തെളിയിക്കുന്നതാണ് കഴിഞ്ഞദിവസം കാട്ടുപന്നിയുടെ അവശിഷ്ടം കണ്ടെത്തിയതോടെ ബോധ്യമാകുന്നത്. കടുവ കൂട്ടിൽ അകപ്പെട്ട തൊട്ടടുത്ത ദിവസങ്ങളിൽ തന്നെ പ്രദേശത്തെ തൊഴിലാളികൾ കടുവകളെ കണ്ടിരുന്നതായി അവകാശപ്പെട്ടിരുന്ന. എന്നാൽ തോട്ടം ഉടമകളും അധികൃതരും ഇത്തരം പ്രചരണങ്ങളെ നിഷേധിക്കുകയാണ് ചെയ്തത്. കടുവ കൂട്ടിലായെങ്കിലും കൂടുതൽ അപകടകാരികളായ വന്യമൃഗങ്ങൾ പ്രദേശത്ത് ഉണ്ടെന്ന് തൊഴിലാളികൾ പറഞ്ഞതോടുകൂടി തൊഴിൽ മേഖല ഇപ്പോഴും പൂർണമായും സജീവമായിട്ടില്ല. കടുവ പേടിയിൽ പലയിടങ്ങളിലും റബർ എസ്റ്റേറ്റുകൾ വൻതോതിൽ കാടുമൂടി കിടക്കുകയാണ്. റബറിനു പുറമേ തെങ്ങ്, കമുക്, ജാതി, കൊക്കോ തുടങ്ങിയ കൃഷിത്തോട്ടങ്ങളിലും സമാന അവസ്ഥയാണുള്ളത്. ഒരു പെൺ കടുവയെ പിടികൂടി ചികിത്സക്കായി കൊണ്ടുപോയെങ്കിലും കടുവയ്ക്ക് വേണ്ടി സ്ഥാപിച്ച കൂടുകളും കാമറകളും മാറ്റരുതെന്നും ദൗത്യ സംഘത്തിന്‍റെ നിരീക്ഷണം പ്രദേശത്ത് ഉണ്ടാകണമെന്നും നാട്ടുകാർ ആവശ്യപ്പെട്ടിരുന്നു. ആവശ്യം ഉന്നയിച്ച് മലയോര സംരക്ഷണ സമിതി വനംവകുപ്പ് മേധാവികളെ നേരിൽ കാണുകയും അവരിൽനിന്ന് ഉറപ്പു വാങ്ങിക്കുകയും ചെയ്തിരുന്നു. കാട്ടുപന്നിയുടെ ജഡാവശിഷ്ടം കണ്ടെത്തിയതോടെ ദൗത്യസംഘത്തിന്‍റെ പ്രവർത്തനങ്ങൾ ഊർജിതമാക്കണമെന്നാണ് നാട്ടുകാരുടെ ആവശ്യം.

നിപ്പ മരണം: നാലുപേർ ക്വാറന്‍റൈനിൽ പ്രവേശിച്ചു

പെരിന്തൽമണ്ണ: മണ്ണാർക്കാട്ടെ സ്വകാര്യ ആശുപത്രിയിൽ നിന്ന് റഫർ ചെയ്ത മണ്ണാർക്കാട് സ്വദേശിയായ അമ്പത് വയസുകാരൻ നിപ്പ ബാധിച്ച് പെരിന്തൽമണ്ണ മൗലാന ആശുപത്രിയിൽ മരിച്ച സാഹചര്യത്തിൽ ആശുപത്രിയിലെ നാലുപേർ ക്വാറന്‍റൈനിൽ പ്രവേശിച്ചു. എമർജൻസി ഫിസിഷ്യൻ, അറ്റൻഡർ, നഴ്സ്, ജനറൽ സൂപ്പർവൈസർ എന്നിവരെയാണ് ക്വാറന്‍റൈനിൽ പ്രവേശിപ്പിച്ചത്. നിപ്പ ലക്ഷണങ്ങളുമായി സാമ്യം തോന്നിയതിനാൽചികിത്സിച്ച ഡോക്ടർമാർ പ്രത്യേകം സജ്ജീകരിച്ച ക്രിട്ടിക്കൽ കെയർ യൂണിറ്റിൽ ഐസൊലേറ്റ് ചെയ്താണ് രോഗിയെ കൈകാര്യം ചെയ്തത്. മണ്ണാർക്കാട് ചങ്ങലേരി സ്വദേശിയായ 50 വയസുകാരനെ വെള്ളിയാഴ്ചയാണ് പനിയും ശ്വാസ തടസവുമായി മൗലാന ആശുപത്രിയിൽ പ്രവേശിപ്പിച്ചത്.

നായ കുറുകെ ചാടി: ഓട്ടോ മറിഞ്ഞ് ഡ്രൈവർ മരിച്ചു

മങ്കട: കർക്കടകം അങ്ങാടിയിൽ നായ കുറുകെ ചാടി ഓട്ടോ മറിഞ്ഞ് ഡ്രൈവർ മരിച്ചു. വെള്ളില സ്വദേശി കടൂക്കുന്നൻ നൗഫൽ (43) ആണ് മരിച്ചത്. നാട്ടുകാർ ഉടനെ മഞ്ചേരി മെഡിക്കൽ കോളേജിൽ എത്തിച്ചുവെങ്കിലും ജീവൻ രക്ഷിക്കാനായില്ല. മഞ്ചേരി ഭാഗത്തുനിന്നും മങ്കടയിലേക്ക് വരികയായിരുന്ന ഓട്ടോറിക്ഷയുടെ മുൻചക്രത്തിൽ നായ ഇടിച്ചതിനെ തുടർന്ന് നിയന്ത്രണംവിട്ടു മറിയുകയായിരുന്നു. സ്ത്രീകൾ ഉൾപ്പെടെ യാത്രക്കാർ ഉണ്ടായിരുന്നെങ്കിലും ആർക്കും പരിക്കില്ല. പിതാവ്: പരേതനായ അബ്ദുറഹ്മാൻ (കുഞ്ഞു). മാതാവ്: ഉമ്മുസൽമ. ഭാര്യ: മുംതാസ് അവുലൻ (ചോഴിപ്പടി). മക്കൾ: മുസ്തഫ, നിഹാൽ. യുകെ പടി ജുമാമസ്ജിദ് കബർസ്ഥാനിൽ കബറടക്കം നടത്തി.

നിപ: കേന്ദ്രസംഘം ആശുപത്രി സന്ദർശിച്ചു

മഞ്ചേരി: നിപ പ്രതിരോധവുമായി ബന്ധപ്പെട്ട് കേന്ദ്ര സംഘം മഞ്ചേരി ഗവ. മെഡിക്കൽ കോളജ് ആശുപത്രി സന്ദർശിച്ചു. ഇന്ത്യൻ കൗണ്‍സിൽ ഓഫ് മെഡിക്കൽ റിസർച്ച് - നാഷണൽ ഇൻസ്റ്റിറ്റ്യൂട്ട് ഓഫ് വൈറോളജി ശാസ്ത്രജ്ഞരും ഒഫീഷ്യൽസുമായ ഡോ. റിമ, ഡോ. സാക്കിബ് അക്തർ,ഡോ.സുനിൽ കുമാർ, ഡോ. കഞ്ചൻ എന്നിവരടങ്ങുന്ന സംഘമാണ് ആശുപത്രിയിലെത്തിയത്. മെഡിക്കൽ കോളജ് വൈറോളജി ലാബ്, ഐസൊലേഷൻ എന്നിവ സംഘം സന്ദർശിച്ചു. നിപ സ്ഥിരീകരിച്ച് ആശുപത്രിയിൽ ചികിത്സയിൽ കഴിയുകയും രോഗം മാറി വീട്ടിലേക്ക് മടങ്ങിയ രോഗിയുടെ ആരോഗ്യസ്ഥിതി വിലയിരുത്തിയ സംഘം ആശുപത്രിയിൽ സജീകരിച്ചിട്ടുള്ള നിപ ഐസൊലേഷൻ വാർഡും പരിശോധിച്ചു.

ഫ്രാൻസിസ് ഓണാട്ടിനെ ആദരിച്ചു

‌മലപ്പുറം : ജില്ലയിലെ സീനിയർ പത്രപ്രവർത്തകൻ ഫ്രാൻസിസ് ഓണാട്ടിനെ കേരള വനം നദിജല സംരക്ഷണ സമിതി ആദരിച്ചു. വനംനദി ജല സംരക്ഷണ സമിതിയുടെ സംസ്ഥാന അവാർഡിനും വനസന്പത്ത് മറയുന്പോൾ എന്ന ലേഖന പരന്പരക്കും ഫ്രാൻസിസ് ഓണാട്ടിന് പുരസ്കാരം ലഭിച്ചിട്ടുണ്ട്. പി.എച്ച്. ഫൈസൽ, റാഫി ചെങ്ങാനി, കെ.എം. പ്രകാശ്, മജീദ് പാലമഠത്തിൽ തുടങ്ങിയവർ സംബന്ധിച്ചു.

വളർത്തുനായയെ അജ്ഞാതജീവി പിടിച്ചുകൊണ്ടുപോയി

എടക്കര: വളർത്തുനായയെ അജ്ഞാതജീവി പിടിച്ചുകൊണ്ടുപോയി. പേത്തുകൽ മുരുകാഞ്ഞിരം കളപ്പുരയ്ക്കൽ സജിയുടെ നാല് വയസ് പ്രായമുള്ള വളർത്തുനായയെയാണ് വെള്ളിയാഴ്ച രാത്രി അജ്ഞാതജീവി പിടിച്ചുകൊണ്ടുപോയത്. വീട്ടുകാർ വിവരം നൽകിയതിനെത്തുടർന്ന് കാഞ്ഞിരപ്പുഴ ഫോറസ്റ്റ് സ്റ്റേഷനിലെ സെക്ഷൻ ഫോറസ്റ്ററ്റ് ഓഫീസർ എ. ഇബ്രാഹിം, ബിഎഫ്ഒമാരായ എ.എം. ഷെഫീഖ്, എൻ. ഹരീഷ്, സുധീഷ് എന്നിവർ സജിയുടെ വീട്ടിലെത്തി പരിശോധന നടത്തി. നായയുടെ കൂടിന് സമീപം കാൽപ്പാടുകൾ കണ്ടെത്തിയെങ്കിലും പുലിയുടെയോ കടുവയുടെയോ അല്ലെന്ന നിഗമനത്തിലാണ് വനം ഉദ്യോഗസ്ഥർ. തൊട്ടടുത്ത പ്രദശമായ മലാംകുണ്ടിൽ രണ്ടാഴ്ച മുന്പ് വളർത്തുനായയെ പുലി കടിച്ചുകൊന്ന് ഭക്ഷിച്ചിരുന്നു. നായയുടെ ബാക്കിവന്ന ശരീരഭാഗങ്ങൾ കൂട്ടിലാക്കി കെണി സ്ഥാപിച്ചുവെങ്കിലും പുലി കൂട്ടിൽ കടുങ്ങിയില്ല. പ്രദേശത്ത് കാമറകളും അന്ന് സ്ഥാപിച്ചിരുന്നു. പ്രദേശത്ത് അജ്ഞാതജീവിയുടെ സാന്നിധ്യം ജനങ്ങളെ ആശങ്കയിലാഴ്ത്തിയിട്ടുണ്ട്. ഇതിനിടെ പൂക്കോട്ടുമണ്ണയിൽ സ്കൂട്ടർ യാത്രക്കാരനായ കുരീക്കൽ ബേബിയുടെ സ്കൂട്ടറിന് കുറുകെ വെള്ളിയാഴ്ച രാത്രി പുലിയുടേതിന് സമാനമായ ജീവി ചാടിയിരുന്നു. വിവരമറിഞ്ഞ് നിലന്പൂരിൽ നിന്ന് ദ്രുതകർമ സേനയെത്തി പൂക്കോട്ടുമണ് കുരിശിന്‍റെ ഭാഗത്ത് തെരച്ചിൽ നടത്തിയെങ്കിലും ഒന്നും കണ്ടെത്താനായില്ല. ശനിയാഴ്ച വള്ളുവശേരി വനം ബീറ്റിലെ സെക്ഷൻ ഫോറസ്റ്റ് ഓഫീസർ ടി. ജയകൃഷ്ണൻ, സക്കീർ കാട്ടുചാലിൽ എന്നിവർ സ്ഥലത്തെത്തി നടത്തിയ പരിശോധനയിൽ പുലിയുടേതിന് സമാനമായ നഖം പതിഞ്ഞ ചെറിയ കാൽപ്പാടുകൾ കണ്ടെത്തി. എന്നാൽ ഇത് വള്ളിപ്പുലിയുടേതാകാമെന്ന നിഗമനത്തിലാണ് വനം ഉദ്യോഗസ്ഥർ.

മരക്കൊന്പുകൾ വനം വകുപ്പ് വെട്ടിമാറ്റി

നിലന്പൂർ:റോഡിന്‍റെ ഇരുവശങ്ങളിലും വാഹനങ്ങൾക്ക് തടസമായി നിന്ന മരക്കൊന്പുകൾ മുറിച്ചുമാറ്റി വനംവകുപ്പ്. എരഞ്ഞിമങ്ങാട് മുതൽ അകന്പാടം കാഞ്ഞിരപടി വരെയുള്ള ഭാഗങ്ങളിലെ തടസമാണ് നീങ്ങിയത്. വനംവകുപ്പിന്‍റെ പത്തിന കർമ പദ്ധതിയുടെ ഭാഗമായാണ് അകന്പാടം ഡെപ്യൂട്ടി റേഞ്ചറുടെ നേതൃത്വത്തിൽ നാട്ടുകാരുടെ സഹകരണത്തോടെ പ്രവൃത്തി നടത്തിയത്. നിലന്പൂർ - നായാടംപൊയിൽ മലയോര പാതയിൽ എരഞ്ഞിമങ്ങാട് മുതൽ അകന്പാടം വരെയുള്ള വന മേഖലയിൽ റോഡിന്‍റെ ഇരുവശങ്ങളിലെ മുളകൾ ഉൾപ്പെടെ മുറിച്ചുനീക്കിയാണ് തടസങ്ങൾ ഒഴിവാക്കിയത്. വനത്തിനുള്ളിൽ വന്യമൃഗങ്ങൾക്ക് ഭക്ഷണവും വെള്ളവും ഉറപ്പുവരുത്തുന്ന എഫ്എഫ്ഡബ്ലിയു പദ്ധതിയുടെ ഭാഗമായാണ് റോഡിൽ തടസം നേരിട്ട മുളങ്കൂട്ടങ്ങളും വള്ളിപടർപ്പുകളും ഉൾപ്പെടെ നീക്കം ചെയ്തത്. കാട്ടാന, കാട്ടുപന്നികൾ ഉൾപ്പെടെ റോഡ് മുറിച്ച് കടക്കുന്നത് യാത്രക്കാർക്ക് ഭീഷണിയാകുന്ന സാഹചര്യത്തിലാണ് ഇത്തരം പ്രവൃത്തി നടത്തുന്നതെന്ന് അകന്പാടം ഡെപ്യൂട്ടി റേഞ്ച് ഓഫീസർ വി.കെ. മുഹസിൻ പറഞ്ഞു. പൊതുജന പങ്കാളിത്തതോടെ മനുഷ്യ-വന്യജീവി സംഘർഷം ഒഴിവാക്കാൻ പത്തിനകർമ പദ്ധതികളാണ് നടപ്പാക്കി വരുന്നതെന്ന് സെക്ഷൻ ഫോറസ്റ്റ് ഓഫീസർ പി.എം. ശ്രീജിത്ത് വ്യക്തമാക്കി. അകന്പാടം വനം സ്റ്റേഷന്‍റെ കീഴിലുള്ള ഇത്തരം പ്രവൃത്തികൾക്ക് നാട്ടുകാരുടെയും ക്ലബ് അംഗങ്ങളുടെയും വലിയ പിന്തുണയായി ലഭിക്കുന്നതെന്ന് വനപാലകർ പറഞ്ഞു. കഐസ്ആർടിസി ബസുകൾ ഉൾപ്പെടെ നിരവധി വാഹനങ്ങൾ കടന്നുപോകുന്ന റോഡിലേക്ക് മരക്കൊന്പുകളും മുളങ്കൂട്ടങ്ങളും ചാഞ്ഞ് നിൽക്കുന്നത് യാത്രക്കാർക്ക് ഭീഷണിയായിരുന്നു. തടസം നീങ്ങിയതോടെ വന്യമൃഗങ്ങൾ റോഡ് മുറിച്ച് കടക്കുന്നത് കാണാനാകും. കക്കാടംപൊയിൽ, എരുമമുണ്ട ഭാഗങ്ങളിലേക്ക് ഉൾപ്പെടെ പ്രതിദിനം നൂറുക്കണക്കിന് വാഹനങ്ങൾ കടന്നുപോകുന്ന റോഡാണിത്. അകന്പാടം വനം സ്റ്റേഷനിലെ വനപാലകർ, വാച്ചർമാർ, നാട്ടുകാർ, ക്ലബ് അംഗങ്ങൾ ഉൾപ്പെടെ നിരവധി പേരാണ് പ്രവൃത്തിയിൽ പങ്കാളികളായത്.

ഡി സാറ്റ് നവാഗതരെ സ്വാഗതം ചെയ്തു

‌നിലന്പൂർ: ഡി പോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജി നിലന്പൂരിൽ 2025-26 അധ്യായ വർഷത്തിന്‍റെ ഉദ്ഘാടനം നടത്തി. ഡി ബഡ്സ് 2025 എന്ന പേരിൽ സംഘടിപ്പിച്ച പരിപാടി നിലന്പൂർ ലിറ്റിൽ ഫ്ളവർ ഫൊറോന പള്ളി വികാരി ഫാ. സെബാസ്റ്റ്യൻ പുത്തേൻ തിരിതെളിയിച്ച് ഉദ്ഘാടനം ചെയ്തു. മാനേജർ ഫാ. ജെയിംസ് കോക്കണ്ടത്തിൽ അധ്യക്ഷത വഹിച്ചു. കലാലയ ജീവിതം പ്രകാശമാനമാകണം എന്നതിന്‍റെ പ്രതീകമായി ഡി സാറ്റ് പ്രിൻസിപ്പൽ ഫാ. ഡെയ്സണ്‍ വെട്ടിയാടൻ ദീപം കുട്ടികൾക്ക് പകർന്നു നൽകി പ്രതിജ്ഞ ചൊല്ലിക്കൊടുത്തു. തുടർന്ന് വിദ്യാർഥികൾക്കും രക്ഷിതാക്കൾക്കുമായി നാലുവർഷ ഡിഗ്രി പ്രോഗ്രാമുകളെക്കുറിച്ച് കരിയർ ഗൈഡ് ഡോ. ജയഫറലി അലീജെത്ത് ഓറിയന്േ‍റഷൻ ക്ലാസ് നടത്തി. പ്രോഗ്രാം കോ-ഓർഡിനേറ്റർ പി.എ. അജീഷ്, സി.വി. പ്രജിത്ത്, ബിനീഷ് ജോണ്‍ എന്നിവർ പ്രസംഗിച്ചു.

മന്ത്രി വീണാജോർജ് രാജിവയ്ക്കണം: സന്ദീപ് വാര്യർ

‌‌‌‌‌‌‌‌‌‌‌പെരിന്തൽമണ്ണ: ആരോഗ്യമന്ത്രി വീണാജോർജ് രാജിവച്ച് പഴയ ജോലിയായ ചാനലിൽ വാർത്ത വായിക്കാൻ തിരിച്ചുപോകണമെന്ന് കെപിസിസി വക്താവ് സന്ദീപ് വര്യർ. കേരളത്തിലെ രോഗികൾക്ക് ഒരു പാരസെറ്റാമോൾ വാങ്ങി നൽകാതെയാണ് പിണറായി വിജയൻ അമേരിക്കയിലേക്ക് ചികിത്സക്ക് പോയതെന്നും ജനങ്ങളോട് യാതൊരു പ്രതിബദ്ധതയില്ലാത്ത സർക്കാരാണ് ഇതെന്നും അദ്ദേഹം പറഞ്ഞു. പെരിന്തൽമണ്ണ കോണ്‍ഗ്രസ് കമ്മിറ്റി സംഘടിപ്പിച്ച പ്രതിഷേധ ധർണ ഉദ്ഘാടം ചെയ്യുകയായിരുന്നു സന്ദീപ് വാര്യർ. പെരിന്തൽമണ്ണ ബ്ലോക്ക് കോണ്‍ഗ്രസ് പ്രസിഡന്‍റ് അറഞ്ഞിക്കൽ ആനന്ദൻ അധ്യക്ഷത വഹിച്ചു. ഡിസിസി സെക്രട്ടറി സി.കെ.ഹാരിസ് മുഖ്യപ്രഭാഷണം നടത്തി. ഡിസിസി സെക്രട്ടറി ശശീന്ദ്രൻ മങ്കട, കെപിസിസി മെംബർ ബെന്നി തോമസ്, മുൻ മെംബർ ഫസൽ മുഹമ്മദ്, ഡിസിസി അംഗങ്ങളായ കെ.എസ്. അനീഷ്, അജിത്ത് മേലാറ്റൂർ, പി.ടി. മോഹൻദാസ്, ഐഎൻടിയുസി യൂത്ത് വിഭാഗം ജില്ലാ പ്രസിഡന്‍റ് ടി.കെ. സദക്ക, മഹിളാ കോണ്‍ഗ്രസ് ജില്ലാ വൈസ് പ്രസിഡന്‍റ് ഷറിന ഇഖ്ബാൽ, ബ്ലോക്ക് പ്രസിഡന്‍റ് ഭാരതി, ദളിത് കോണ്‍ഗ്രസ് ജില്ലാ സെക്രട്ടറി ദിനേഷ് മണ്ണാർമല, യൂത്ത് കോണ്‍ഗ്രസ് പ്രസിഡന്‍റ് ഷഫീഖ് ചക്കാലി തുടങ്ങിയവർ പ്രസംഗിച്ചു.

രാസവളത്തിന് വില വർധിപ്പിച്ചത് കർഷകദ്രോഹം: കിസാൻ ജനത

കരുവാരകുണ്ട്: രാസവളങ്ങളുടെ വില വർധിപ്പിച്ച കേന്ദ്ര സർക്കാർ നടപടി കർഷകരോട് കാണിക്കുന്ന കടുത്ത ദ്രോഹമാണെന്ന് കിസാൻ ജനത വണ്ടൂർ മണ്ഡലം കമ്മിറ്റി കുറ്റപ്പെടുത്തി. കാർഷികോത്പന്നങ്ങളുടെ വിലത്തകർച്ചയും കടക്കെണിയും മൂലം കർഷക സമൂഹം ആത്മഹത്യയുടെ വക്കിലാണ്. കർഷകർ ഏറ്റവും കൂടുതൽ ഉപയോഗിക്കുന്ന പൊട്ടാഷിന് മാത്രം ഒരു ചാക്കിന് ഒറ്റയടിക്ക് 250 രൂപയാണ് വർധിപ്പിച്ചിട്ടുള്ളത്. ഇത് കർഷകരോടുള്ള വഞ്ചനയാണ്. വളം വില വർധിപ്പിച്ചതോടൊപ്പം നിലവിലുണ്ടായിരുന്ന സബ്സിഡികൾ വെട്ടിക്കുറച്ചിരിക്കുന്നു. വർധിപ്പിച്ച വിലവർധനവ് പിൻവലിക്കണമെന്നും വെട്ടിക്കുറച്ച സബ്സിഡി പുന:സ്ഥാപിക്കണമെന്നും കിസാൻ ജനത വണ്ടൂർ മണ്ഡലം കമ്മിറ്റി കേന്ദ്ര സർക്കാരിനോട് ആവശ്യപ്പെട്ടു. പ്രസിഡന്‍റ് സുനിൽ ജേക്കബ് കടമപ്പുഴ അധ്യക്ഷത വഹിച്ചു. ഒ.പി. ഇസ്മായിൽ, ചന്ദ്രൻ നീലാന്പ്ര, മാനുവൽകുട്ടി മണിമല, ബെന്നി മുണ്ടമറ്റം, ടി. ബാലകൃഷ്ണൻ തുടങ്ങിയവർ പ്രസംഗിച്ചു.

പ്രിൻസിപ്പലിനെയും ആശുപത്രി സൂപ്രണ്ടിനെയും തടഞ്ഞു

മഞ്ചേരി : മഞ്ചേരി ജനറൽ ഹോസ്പിറ്റൽ താനൂരിലേക്കു പറിച്ചുനടാനുള്ള സർക്കാർ നീക്കത്തിൽ പ്രതിഷേധിച്ച് മഞ്ചേരി മെഡിക്കൽ കോളജ് പ്രിൻസിപ്പലിനെയും ജനറൽ ഹോസ്പിറ്റൽ സൂപ്രണ്ടിനെയും വഴിയിൽ തടഞ്ഞ് മഞ്ചേരി മണ്ഡലം യൂത്ത് കോണ്‍ഗ്രസ് കമ്മിറ്റി. ജനറൽ ഹോസ്പിറ്റലും മെഡിക്കൽ കോളജും മഞ്ചേരിയിൽ തന്നെ സുരക്ഷിതമായി പൂർണ തോതിൽ പ്രവർത്തിക്കാത്ത പക്ഷം ഉദ്യോഗസ്ഥരെ വഴിയിലിറങ്ങി നടക്കാൻ അനുവദിക്കില്ലെന്ന് സമരക്കാർ മുന്നറിയിപ്പ് നൽകി. ജനറൽ ഹോസ്പിറ്റൽ മഞ്ചേരിക്ക് നഷ്ടമാകില്ലെന്നും നാളെ ചേരുന്ന ഓണ്‍ലൈൻ മീറ്റിംഗിൽ മഞ്ചേരിക്ക് അനുകൂലമായ നിലപാട് സ്വീകരിക്കുമെന്ന ഉറപ്പിലുമാണ് യൂത്ത് കോണ്‍ഗ്രസ് പ്രവർത്തകർ ഉപരോധ സമരം അവസാനിപ്പിച്ചത്. പ്രതിഷേധത്തിന് യൂത്ത് കോണ്‍ഗ്രസ് മഞ്ചേരി മണ്ഡലം പ്രസിഡന്‍റ് കൃഷ്ണദാസ് വടക്കെയിൽ, അസംബ്ലി പ്രസിഡന്‍റ് മഹ്റൂഫ് പട്ടർകുളം, അസീബ് നറുകര, രോഹിത് പയ്യനാട്, ആഷിക് നറുകര, പി.കെ. നിധീഷ്, ഫജറുൽ ഹഖ് തുടങ്ങിയവർ നേതൃത്വം നൽകി.

പെരിന്തൽമണ്ണ ജില്ലാ ആശുപത്രിയിൽ പുതിയ ഒപി ബ്ലോക്ക് ഓഗസ്റ്റിൽ

പെരിന്തൽമണ്ണ: പെരിന്തൽമണ്ണ ജില്ലാ ആശുപത്രിയിൽ ദേശീയ ആരോഗ്യ ദൗത്യം അനുവദിച്ച 1.26 കോടി രൂപ ചെലവിൽ നിർമിച്ച പുതിയ ഒപി ബ്ലോക്ക് പണി പൂർത്തിയാകുന്ന സാഹചര്യത്തിൽ ഓഗസ്റ്റ് ആദ്യം മുതൽ പ്രവർത്തനം ആരംഭിക്കാൻ ജില്ലാ ആശുപത്രി മാനേജ്മെന്‍റ് സമിതി തീരുമാനിച്ചു. ആരോഗ്യമന്ത്രിയുടെ സൗകര്യമനുസരിച്ച് ഉദ്ഘാടന തിയതി തീരുമാനിക്കുമെന്ന് ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ അറിയിച്ചു. വനിതശിശു വിഭാഗത്തിൽ തുറക്കുന്ന ലക്ഷ്യ വാർഡും ഓഗസ്റ്റ് ആദ്യവാരം തുറക്കാൻ നടപടി തുടങ്ങി. ഇവിടെ സെപ്റ്റിക് ടാങ്കിന്‍റെ പ്രവൃത്തി പൂർത്തിയാക്കാനുണ്ട്. കാലപ്പഴക്കമേറിയ മെഡിക്കൽ വാർഡ്, ഓഫീസ് കെട്ടിടം എന്നിവ പൊളിച്ചുമാറ്റാൻ ഹെൽത്ത് ഡയറക്ടറേറ്റിൽ നിന്ന് അനുമതിക്കായി കാത്തിരിക്കുകയാണ്. പുതിയ കാഷ്വാലിറ്റി വാർഡ് പണിയാൻ കിഫ്ബി മുഖേന 12 കോടി അനുവദിച്ചിരിക്കേ സാങ്കേതിക നടപടികൾ പൂർത്തിയാക്കി ടെൻഡർ നടപടികൾ സ്വീകരിക്കണം. എങ്കിൽ മാത്രമേ ഇപ്പോഴത്തെ കാഷ്വാലിറ്റി വാർഡ് പൊളിക്കുന്നതിൽ തീരുമാനമാകൂവെന്ന് ആശുപത്രി മാനേജ്മെന്‍റ്് സമിതി യോഗത്തിൽ അറിയിച്ചു. ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ അധ്യക്ഷത വഹിച്ചു.

ഉന്നത വിജയികളെയും വടംവലി ജേതാക്കളെയും അനുമോദിച്ചു

‌‌മലപ്പുറം: വിവിധ പരീക്ഷകളിൽ ഉന്നത വിജയം നേടിയ മാധ്യമ പ്രവർത്തകരുടെ മക്കളെയും സംസ്ഥാന ജേണലിസ്റ്റ് വടംവലി മത്സരത്തിൽ ചാന്പ്യൻമാരായ പ്രസ് ക്ലബ് ടീമിനെയും മലപ്പുറം പ്രസ് ക്ലബ് അനുമോദിച്ചു. ചടങ്ങ് ജില്ലാ പോലീസ് മേധാവി ആർ.വിശ്വനാഥ് ഉദ്ഘാടനം ചെയ്തു. വിജയികൾക്കുള്ള കാഷ് വാർഡ് നഗരസഭാ ചെയർമാൻ മുജീബ് കാടേരി വിതരണം ചെയ്തു. പത്രപ്രവർത്തക യൂണിയൻ സംസ്ഥാന ജനറൽ സെക്രട്ടറി സുരേഷ് എടപ്പാൾ മുഖ്യാതിഥിയായിരുന്നു. മലപ്പുറം പ്രസ് ക്ലബ് പ്രസിഡന്‍റ് എസ്. മഹേഷ്കുമാർ അധ്യക്ഷത വഹിച്ചു. പ്രസ് ക്ലബ് സെക്രട്ടറി വി.പി.നിസാർ, പത്രപ്രവർത്തക യൂണിയൻ സംസ്ഥാന കമ്മിറ്റി അംഗങ്ങളായ വി. അജയകുമാർ, സമീർ കല്ലായി, സി.പ്രജോഷ്കുമാർ, പ്രസ് ക്ലബ് വൈസ് പ്രസിഡന്‍റ് ഗീതു തന്പി, ജോയിന്‍റ് സെക്രട്ടറി പി.പി.അഫ്താബ്, ഭാരവാഹികളായ കെ.ബി. സതീഷ്കുമാർ, നസീബ് കാരാട്ടിൽ, ട്രഷറർ പി.എ.അബ്ദുൾ ഹയ്യ് എന്നിവർ പ്രസംഗിച്ചു.

നിക്ഷേപ തട്ടിപ്പ്: പരാതികളുമായി കൂടുതൽ പേർ രംഗത്ത്

എടക്കര: നെടുന്പറന്പിൽ നിധി ലിമിറ്റഡ് ആൻഡ് നെട്സ്റ്റാർ നിക്ഷേപ തട്ടിപ്പ് കൂടുതൽ പേർ പരാതികളുമായി രംഗത്ത്. പൂക്കോട്ടുംപാടം സ്വദേശി സുനിൽ ചുങ്കത്തറ, എടമല കൊച്ചുതറയിൽ കുഞ്ഞുമോൻ, കവളമുക്കട്ട ആന്‍റണിക്കാട് അനിത റെജി എന്നിവരാണ് എടക്കര പോലീസ് സ്റ്റേഷനിൽ ഇന്നലെ പരാതിയുമായെത്തിയത്. നിക്ഷേപ തട്ടിപ്പ് കേസിൽ കഴിഞ്ഞ ദിവസം അറസ്റ്റിലായ നെടുന്പറന്പിൽ നിധി ലിമിറ്റഡ് ചുങ്കത്തറ ബ്രാഞ്ച് മാനേജർ മാത്യു എന്ന മോഹനനൊപ്പം എടക്കരയിലെ സ്വകാര്യ പണമിടപാട് സ്ഥാപനത്തിൽ ജോലി ചെയ്തിരുന്ന സുനിലിന് നാല്് ലക്ഷം രൂപയും മാത്യുവിന്‍റെ സഹോദരന്‍റെ മകളായ അനിത റെജിക്ക് പതിനേഴ് ലക്ഷവും കൊച്ചുതറയിൽ കുഞ്ഞുമോന് എട്ട് ലക്ഷം രൂപയുമാണ് നഷ്ടമായത്. മൂന്ന് പരാതികളിലായി 29 ലക്ഷം രൂപയുടെ തട്ടിപ്പുകൂടി ഇന്നലെ പുറത്ത് വന്നു. കിഞ്ഞ ദിവസം അറസ്റ്റിലായ മാത്യുവിന്‍റെ പരിചയത്തിലും പ്രേരണയിലും പണം നിക്ഷേപിക്കപ്പെട്ടവരാണ് ഇവരെല്ലാം. പള്ളിക്കുത്ത് കാവുങ്ങൽ വർഗീസ് എന്നയാളുടെ പരാതിയിലാണ് മാത്യു അറസ്റ്റിലായത്. 51,20,000 രൂപയാണ് വർഗീസിന് നഷ്ടപ്പെട്ടത്.

മഞ്ചേരി ജനറൽ ആശുപത്രി താനൂരിലേക്ക് മാറ്റൽ: നിർണായക യോഗം നാളെ

മഞ്ചേരി : മഞ്ചേരി ശിഹാബ് തങ്ങൾ മെമ്മോറിയൽ ജനറൽ ആശുപത്രി താനൂരിലേക്ക് മാറ്റുന്നത് സംബന്ധിച്ചുള്ള നിർണായക തീരുമാനം നാളെ നടക്കുന്ന ഓണ്‍ലൈൻ യോഗത്തിൽ ഉണ്ടായേക്കും. ഹെൽത്ത് സർവീസ് ഡയറക്ടർ, മെഡിക്കൽ വിദ്യാഭ്യാസ ഡയരക്ടർ, മഞ്ചേരി മെഡിക്കൽ കോളജ് പ്രിൻസിപ്പൽ, ആശുപത്രി സൂപ്രണ്ട് എന്നിവരോട് കന്പൈൻഡ് മീറ്റിംഗ് നടത്തി യുക്തമായ തീരുമാനമെടുക്കണമെന്ന് ഇക്കഴിഞ്ഞ അഞ്ചിന് അഡീഷണൽ ചീഫ് സെക്രട്ടറി അയച്ച കത്തിൽ ആവശ്യപ്പെട്ടിരുന്നു. ഇതിന്‍റെ അടിസ്ഥാനത്തിലാണ് യോഗം നടക്കുന്നത്. മഞ്ചേരി ഗവണ്‍മെന്‍റ് ജനറൽ ആശുപത്രി 2014ൽ മെഡിക്കൽ കോളജായി ഉയർത്തിയെന്നും നിലവിൽ മഞ്ചേരിയിൽ ജനറൽ ആശുപത്രിയില്ലെന്നും ഇവിടെയുണ്ടായിരുന്ന ഡോക്ടർമാരെയും ജീവനക്കാരെയും ജില്ലയിലെ വിവിധ താലൂക്ക് ആശുപത്രികളിലേക്ക് സ്ഥലം മാറ്റിയതായും കത്തിൽ സൂചിപ്പിക്കുന്നുണ്ട്. തീരദേശ മേഖലയിലെ രോഗികൾ ചികിത്സക്കായി ഏറെ പ്രയാസപ്പെടുന്നുവെന്നും ആയതിനാൽ താനൂർ താലൂക്ക് ആശുപത്രി അപ്ഗ്രേഡ് ചെയ്യണമെന്ന മന്ത്രി വി. അബ്ദുറഹിമാന്‍റെ അപേക്ഷ നിലനിൽക്കുന്നതായും കത്തിൽ പറയുന്നു. ജനറൽ ആശുപത്രി മഞ്ചേരിയിൽ നിന്ന് മാറ്റുന്നത് സംബന്ധിച്ച് ഉദ്യോഗസ്ഥ തലത്തിൽ പദ്ധതി തയാറാക്കി സമർപ്പിക്കാൻ അഡീഷണൽ ചീഫ് സെക്രട്ടറി ഹെൽത്ത് സർവീസ് ഡയറക്ടർക്കും മെഡിക്കൽ വിദ്യാഭ്യാസ വകുപ്പിനും നിർദേശം നൽകി. എന്നാൽ ജനറൽ ആശുപത്രി മഞ്ചേരിയിൽ നിലനിർത്തണമെന്നാവശ്യപ്പെട്ട് ആശുപത്രി സംരക്ഷണ സമിതി കണ്‍വീനർ ഷൈൻ സത്യൻ ഹൈക്കോടതിയെ സമീപിച്ചിരുന്നു. കേസ് കോടതിയുടെ പരിഗണനയിലുള്ളതിനാൽ സർക്കാരിന് അടിയന്തര തീരുമാനം എടുക്കാനാകുമോ എന്നകാര്യവും പരിശോധിക്കേണ്ടതുണ്ട്.

ജില്ലയിലെ ആരോഗ്യ മേഖല അവഗണനയിൽ; പ്രതിഷേധം ശക്തമാകുന്നു

മഞ്ചേരി : മഞ്ചേരി ജനറൽ ആശുപത്രി താനൂരിലേക്ക് മാറ്റുന്നത് സംബന്ധിച്ച നീക്കം വ്യാപകമായ പ്രതിഷേധത്തിനിടയാക്കുന്നു. താനൂരിലെ തീരദേശ മേഖലയിൽ നിന്നുള്ള രോഗികൾക്ക് ചികിത്സ ലഭ്യമാക്കുന്നതിനായി താനൂർ താലൂക്ക് ആശുപത്രി അപ്ഗ്രേഡ് ചെയ്ത് ജനറൽ ആശുപത്രിയാക്കണമെന്ന മന്ത്രിയുടെ ആവശ്യം ന്യായമാണ്. എന്നാൽ ഗൂഢല്ലൂർ മുതലിങ്ങോട്ട് ആദിവാസികളടക്കമുള്ള പാവപ്പെട്ട ആയിരക്കണക്കിന് രോഗികൾ ആശ്രയിക്കുന്ന മഞ്ചേരി ജനറൽ ആശുപത്രി ഇല്ലാതാക്കിയിട്ട് വേണമോയെന്ന ചോദ്യം അവശേഷിക്കുന്നു. കണ്ണൂർ ജില്ലയിൽ രണ്ട് സർക്കാർ മെഡിക്കൽ കോളജുകളുകളും രണ്ട് ജനറൽ ആശുപത്രികളും പ്രവർത്തിക്കുന്നു. കേവലം 19 ലക്ഷം ജനസംഖ്യയുള്ള കോട്ടയത്ത് കാഞ്ഞിരപ്പള്ളി, ചങ്ങനാശേരി, പാല, കോട്ടയം എന്നിവിടങ്ങളിലായി നാല് സർക്കാർ ജനറൽ ആശുപത്രികളാണ് പ്രവർത്തിക്കുന്നത്. 14 ജില്ലകളിലായി 17 ജനറൽ ആശുപത്രികൾ പ്രവർത്തിക്കുന്പോൾ ജനസംഖ്യയിൽ ഏറ്റവും മുന്നിൽ നിൽക്കുന്ന, ആരോഗ്യരംഗത്ത് ഏറ്റവും പിറകിൽ നിൽക്കുന്ന മലപ്പുറം ജില്ലയിൽ എന്തുകൊണ്ട് രണ്ട് ജനറൽ ആശുപത്രിയായിക്കൂടാ എന്നാണ് നാട്ടുകാർ ചോദിക്കുന്നത്. 45 ലക്ഷം ജനങ്ങൾ അധിവസിക്കുന്ന മലപ്പുറം ജില്ല ആരോഗ്യരംഗത്ത് ഇതര ജില്ലകളെ അപേക്ഷിച്ച് ഏറെ പിന്നിലാണെന്നതാണ് വസ്തുത. സംസ്ഥാനത്ത് ശരാശരി 868 പേർക്ക് ഒരു രോഗികിടക്കയെന്നതാണ് കണക്കെങ്കിൽ മലപ്പുറം ജില്ലയിൽ 1615 പേർ ഒരു കിടക്ക കൊണ്ട് തൃപ്തിപ്പെടേണ്ടി വരുന്നു. സംസ്ഥാനത്ത് ഏറ്റവും കൂടുതൽ പ്രസവം നടക്കുന്ന ആതുരാലയങ്ങളിലൊന്നാണ് മഞ്ചേരി ആശുപത്രി. മെഡിക്കൽ കോളജിന്‍റെ പേര് പറഞ്ഞ് മഞ്ചേരി ജനറൽ ആശുപത്രിയെ ഇല്ലായ്മ ചെയ്യാനുള്ള ശ്രമം അധികൃതർ നേരത്തെ ആരംഭിച്ചിരുന്നു. ഇതിന്‍റെ ഭാഗമായാണ് ജനറൽ ആശുപത്രിയിലെ ഡോക്ടർമാരെയും ജീവനക്കാരെയും മറ്റ് ആശുപത്രികളിലേക്ക് മാറ്റിയത്. സംസ്ഥാനത്ത് കോഴിക്കോട്, പാലക്കാട്, തൃശൂർ, എറണാകുളം, കോട്ടയം, കൊല്ലം, തിരുവനന്തപുരം എന്നിവിടങ്ങളിലെല്ലാം സർക്കാർ മെഡിക്കൽ കോളജുകൾ സ്ഥാപിച്ചപ്പോൾ നിലവിലുണ്ടായിരുന്ന ജില്ലാ ആശുപത്രിയോ ജനറൽ ആശുപത്രിയോ നഷ്ടപ്പെടുത്തിയിട്ടില്ല. മെഡിക്കൽ കോളജിനായി 25 ഏക്കർ സ്ഥലം സൗജന്യമായും 25 ഏക്കർ സർക്കാർ നിശ്ചയിക്കുന്ന വിലയ്ക്കും നൽകാമെന്ന് ഉടമകൾ സമ്മതിച്ചിട്ടും ഇതിനെതിരെ മുഖം തിരിയ്ക്കുന്നത് ജില്ലയോടുള്ള അവഗണനയായിട്ടാണ് ജനങ്ങൾ കാണുന്നത്.

കുടുംബശ്രീ ഐഎസ്ഒ നിലവാരത്തിലേക്ക്

പെരിന്തൽമണ്ണ :കുടുംബശ്രീ സിഡിഎസുകളെ ഐഎസ്ഒ നിലവാരത്തിലേക്ക് ഉയർത്തുന്നതിന് മുന്നോടിയായുള്ള ജില്ലാതല ഡോക്യുമെന്േ‍റഷൻ പരിശീലനം പെരിന്തൽമണ്ണ നഗരസഭ കോണ്‍ഫറൻസ് ഹാളിൽ നടത്തി. കുടുംബശ്രീയും കിലയും (കേരള ഇൻസ്റ്റിറ്റ്യൂട്ട് ഓഫ് ലോക്കൽ അഡ്മിനിസ്ട്രേഷൻ) ചേർന്ന് സംഘടിപ്പിച്ച പരിശീലനം നഗരസഭ ചെയർപേഴ്സണ്‍ പി.ഷാജി ഉദ്ഘാടനം ചെയ്തു. സിഡിഎസുകളിൽ ഡോക്യുമെന്േ‍റഷൻ ചെയ്യുന്പോൾ ശ്രദ്ധിക്കേണ്ട മാർഗരേഖകൾ, ചെയ്യേണ്ട രീതി തുടങ്ങിയ കാര്യങ്ങളും എസ്ഒപി (സ്റ്റാൻഡേർഡ് ഓപ്പറേറ്റിംഗ് പ്രൊസീജിയർ) സംബന്ധിച്ചും സെമിനാറിൽ പരിശീലനം നൽകി. നിലവിൽ ജില്ലയിൽ 58 ഗ്രാമസിഡിഎസുകളെയും രണ്ട് നഗര സിഡിഎസുകളെയുമാണ് ഐഎസ്ഒ നിലവാരത്തിലേക്ക് ഉയർത്തുന്നതിനായി തെരഞ്ഞെടുത്തിട്ടുള്ളത്. തെരഞ്ഞെടുത്ത സിഡിഎസുകളിലെ ചെയർപേഴ്സണ്‍മാർക്കും അക്കൗണ്ടന്‍റ്മാർക്കും ബിസിമാർക്കുമാണ് ഡോക്യുമെന്േ‍റഷൻ പരിശീലനം നൽകിയത്. കുടുംബശ്രീ ജില്ലാ മിഷൻ കോ ഓർഡിനേറ്റർ ബി. സുരേഷ് കുമാർ അധ്യക്ഷത വഹിച്ചു. പെരിന്തൽമണ്ണ സിഡിഎസ് ചെയർപേഴ്സണ്‍ പി.കെ. സീനത്ത്, കുടുംബശ്രീ ഐബിസിബി ജില്ലാ പ്രോഗ്രാം മാനേജർ വി.എസ്. റിജേഷ് എന്നവർ പ്രസംഗിച്ചു. കില സീനിയർ പ്രോഗ്രാം മാനേജർ താജുദ്ദീൻ ക്ലാസ് നയിച്ചു.

മഞ്ചേരി മെഡിക്കൽ കോളജ് : അത്യാഹിത വിഭാഗത്തിൽ ലിഫ്റ്റ് തകരാറിലാകുന്നത് പതിവാകുന്നു

മഞ്ചേരി : മഞ്ചേരി ഗവണ്‍മെന്‍റ് മെഡിക്കൽ കോളജ് ആശുപത്രി അത്യാഹിത വിഭാഗത്തിൽ ലിഫ്റ്റ് തകരാറിലാകുന്നത് പതിവാകുന്നു. ഇതുമൂലം രോഗികളും ബന്ധുക്കളും ദുരിതം നേരിടുന്നു. താഴെ നിലയിൽ പ്രവർത്തിക്കുന്ന അത്യാഹിത വിഭാഗത്തോടനുബന്ധിച്ച് നിരീക്ഷണ മുറി മാത്രമാണുള്ളത്. ഇവിടെ നിന്ന് ഡോക്ടർ നിർദേശിക്കുന്ന രോഗികളെ വാർഡുകളിലേക്കും മറ്റു പരിശോധനകൾക്കും എത്തിക്കണമെങ്കിൽ അത്യാഹിത വിഭാഗത്തിൽ ലിഫ്റ്റിന്‍റെ സേവനം അത്യാവശ്യമാണ്. വാർഡുകൾ, ഓപ്പറേഷൻ തിയേറ്റർ, സ്കാനിംഗ്, എക്സ്റേ എന്നിവയെല്ലാം പ്രവർത്തിക്കുന്നത് മുകളിലെ നിലയിലാണ്. ഇവിടേക്ക് സന്നദ്ധ സംഘടനാ വോളണ്ടിയർമാരും ബന്ധുക്കളും ഏറെ പാടുപെട്ടാണ് രോഗികളെ എത്തിക്കുന്നത്. അത്യാഹിത വിഭാഗത്തിലെത്തുന്ന ഗർഭിണികളെ ലേബർ റൂമിലേക്കെത്തിക്കാനും സന്നദ്ധപ്രവർത്തകരെ ആശ്രയിക്കണം. ഏഴാംവാർഡ് നാലാം നിലയിലാണ്. എല്ലുപൊട്ടി കിടപ്പിലായവരുൾപ്പെടെ ഇവിടേക്കാണ് കൊണ്ടുവരിക. ഇവിടെയെത്തിയ ശേഷമാണ് പലപ്പോഴും ഡോക്ടർമാർ സ്കാനിംഗിന് നിർദേശിക്കുന്നത്. പഴക്കമേറിയ ലിഫ്റ്റ് തകരാറിലാകുന്നത് ഇവിടെ പതിവാണ്. ലിഫ്റ്റ് സംവിധാനത്തന്‍റെ സെൻസർ തകരാറിലാകുന്നതാണ് മുടക്കത്തിന് കാരണം. ശാശ്വത പരിഹാരമുണ്ടാക്കുന്നതിന് പകരം താൽക്കാലികമായി പ്രശ്നം പരിഹരിക്കുന്നതാണ് അടിക്കടി യന്ത്രം പണിമുടക്കാനിടയാക്കുന്നത്. ലിഫ്റ്റിന് മേൽ റീത്ത് സമർപ്പിക്കുന്നതടക്കമുള്ള പല പ്രതിഷേധ സമരങ്ങൾക്ക് വിവിധ സംഘടനകൾ നടത്തിയിട്ടും അധികൃതർക്ക് അനക്കമില്ല. ലിഫ്റ്റ് നന്നാക്കാനുള്ള ഉപകരണം എത്തിച്ച് ഉടൻ പ്രവർത്തന ക്ഷമമാക്കുമെന്ന് അധികൃതർ പറയുന്നതല്ലാതെ രോഗികളുടെ ദുരിതത്തിന് അറുതിയാകുന്നില്ല.

സ്കൂട്ടറിന് കുറുകെ പുലി ചാടിയെന്ന് യാത്രക്കാരൻ

എടക്കര: പൂക്കോട്ടുമണ്ണയിൽ സ്കൂട്ടറിന് കുറുകെ ചാടിയ പുലിയെ കണ്ട് യാത്രക്കാരൻ ഭയന്നു. പൂക്കോട്ടുമണ്ണ കുരീക്കൽ ബേബിയാണ് കുരിശിന്‍റെ ഭാഗത്തു വച്ച് രാത്രി എട്ടോകാലോടെയാണ് പുലിയെ കണ്ടത്. ഇയാളുടെ സ്കൂട്ടറിന് മുന്നിലൂടെ പുലി റോഡിന് കുറുകെ ചാടിയതായാണ് ഇയാൾ പറയുന്നത്. പുലിയുടേതിന് സാമ്യമുള്ളതും അധികം ഉയരമില്ലാത്തതുമായ ജീവിയെയാണ് കണ്ടത്. നല്ലംതണ്ണിയിലും ചൂരക്കണ്ടിയിലും കഴിഞ്ഞ ദിവസങ്ങളിൽ പുലിയെ പലരും കണ്ടിരുന്നു. വള്ളുവശേരി വനം ബീറ്റിലെ ഉദ്യോഗസ്ഥർ സ്ഥലത്തത്തെി പരിശോധന നടത്തുകയും ചെയ്തിരുന്നു. എന്നാൽ വള്ളിപ്പുലിയാകാം ജനങ്ങൾ കണ്ടതെന്ന നിഗമനത്തിലാണ് വനം ഉദ്യോഗസ്ഥർ.

നിലന്പൂരിൽ കുടുംബശ്രീ വാർഷികാഘോഷം

നിലന്പൂർ: നഗരസഭാ കുടുംബശ്രീയുടെ 27-ാമത് വാർഷികം ഒസികെ ഓഡിറ്റോറിയത്തിൽ നടത്തി. ചെയർമാൻ മാട്ടുമ്മൽ സലീം പരിപാടി ഉദ്ഘാടനം ചെയ്തു. സിഡിഎസ് ചെയർപേഴ്സണ്‍ വി. വസന്ത അധ്യക്ഷത വഹിച്ചു. മോഡൽ സിഡിഎസ് വാർഷിക കർമപദ്ധതി (എഎപി) ഡോക്യൂമെന്‍റഷൻ പ്രകാശനം ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ യു.കെ. ബിന്ദു നിർവഹിച്ചു. 80 വയസിന് മുകളിലുള്ള കുടുംബശ്രീ അംഗങ്ങളെ ചടങ്ങിൽ ആദരിച്ചു. മികച്ച എഡിഎസായി കല്ലേന്പാടം എഡിഎസിനെയും മികച്ച അയൽക്കൂട്ടമായി വീട്ടിക്കുത്ത് ഐശ്വര്യ അയൽക്കൂട്ടത്തെയും മികച്ച സംരംഭകയായി അരുവാക്കോട് വിജയകുമാരിയെയും ആദരിച്ചു. പി.എം. ബഷീർ, കക്കാടൻ റഹീം, സ്കറിയ കിനാതോപ്പിൽ, ഷൈജി, ഇസ്മായിൽ എരഞ്ഞിക്കൽ, കൗണ്‍സിലർമാർ, കെ. വിനോദ്, സിനി സുന്ദരൻ എന്നിവർ പ്രസംഗിച്ചു. നിലന്പൂർ നഗരസഭ ഹെൽത്ത് ഇൻസ്പെക്ടർ സലീം, എൻയുഎൽഎം സിറ്റിമിഷൻ മാനേജർ പി. ശ്രീയേഷ്, നിലന്പൂർ ട്രൈബൽ സ്പെഷൽ പ്രൊജക്ട്് കോ ഓർഡിനേറ്റർ ഷാനു, ബ്ലോക്ക് കോ ഓർഡിനേറ്റർമാരായ ശരണ്യ, നിഷാദ്, അക്കൗണ്ടന്‍റ് ടി.പി. സജ്ന തുടങ്ങിയവർ പങ്കെടുത്തു. പരിപാടിയിൽ അയൽക്കൂട്ട അംഗങ്ങളും ബാലസഭ കുട്ടികളും കലാപരിപാടികൾ അവതരിപ്പിച്ചു.

അകന്പാടത്ത് കാട്ടാന കൃഷി നശിപ്പിച്ചു

നിലന്പൂർ:നിലന്പൂർ മേഖലയിൽ കാട്ടാന ശല്യത്തിന് അറുതിയില്ല. അകന്പാടം ആനപ്പാറയിൽ വീട്ടുമുറ്റത്തെത്തിയ കാട്ടാന വ്യാപകമായി കൃഷി നശിപ്പിച്ചു. വീട്ടുമുറ്റങ്ങളിലേക്ക് പതിവായി കാട്ടാനകൾ എത്തുന്നത് പ്രദേശവാസികളുടെ ആശങ്ക വർധിപ്പിക്കുകയാണ്. ആനപ്പാറ കോക്കുത്ത് ഹസൻകുട്ടി, സഹോദരി കോക്കുത്ത് സുബൈദ എന്നിവരുടെ വീട്ടുമുറ്റങ്ങളിലേക്കാണ് ഇന്നലെ പുലർച്ചെ രണ്ടുമണിയോടെ കാട്ടാന എത്തിയത്. ശബ്ദം കേട്ട് വീട്ടുകാർ പുറത്തിറങ്ങിയപ്പോഴാണ് കാട്ടാനയെ കണ്ടത്. രണ്ട് കൃഷിയിടങ്ങളിലായി വ്യാപകമായി വാഴ കൃഷി നശിപ്പിച്ചു. ചാലിയാർ പഞ്ചായത്തിന്‍റെ വിവിധ ഭാഗങ്ങളിലായി അപകടകാരിയായ ചുള്ളികൊന്പൻ ഉൾപ്പെടെ ആറ് കാട്ടാനകളാണ് സ്വൈര്യവിഹാരം നടത്തുന്നത്. പെരുന്പത്തൂർ, ആലോടി, കല്ലുണ്ട, ഓക്കാട്, ഇടിവണ്ണ എച്ച്ബ്ലോക്ക്, മൈലാടിപ്പൊട്ടി, വൈലാശേരി എന്നിവിടങ്ങളിലാണ് കാട്ടാനകൾ പതിവായി എത്തി കൃഷി നശിപ്പിക്കുന്നത്.

വീടുകയറി അക്രമം; മൂന്നു പേർ അറസ്റ്റിൽ

പരപ്പനങ്ങാടി: വീട്ടിലേക്കുള്ള വഴിയെ ചൊല്ലിതർക്കത്തെ തുടർന്ന് വീട് കയറി അക്രമം നടത്തിയ മൂന്നു പേരെ പരപ്പനങ്ങാടി പോലീസ് അറസ്റ്റ് ചെയ്തു. ചെട്ടിപ്പടി സ്വദേശി കട്ടുന്‍റെ പുരക്കൽ ഉസ്മാന്‍റെ മകൻ ഉബൈസ് (30), കട്ടുന്‍റെ പുരക്കൽ കമ്മദാലി മകൻ ഉസ്മാൻ (59), കട്ടുവിന്‍റെ പുരക്കൽ ഉസ്മാൻ മകൻ നബീൽ (28) എന്നിവരെയാണ് പോലീസ് അറസ്റ്റ് ചെയ്തത്. നേരത്തെ ഉണ്ടായിരുന്ന വഴി തർക്കത്തെ തുടർന്നു ചെട്ടിപ്പടി കാരക്കുളങ്ങര ഭഗവതി ക്ഷേത്രത്തിനു സമീപം മാഞ്ചേരി മുരളീധരന്‍റെ വീട്ടിൽ കയറി അക്രമം നടത്തുകയായിരുന്നുവെന്നു പോലീസ് പറഞ്ഞു. വ്യാഴാഴ്ച രാത്രി എട്ട് മണിയോടെ ആയിരുന്നു സംഭവം. വീട്ടിൽ കത്തിച്ചുവച്ച നിലവിളക്കും കിണ്ടിയും എടുത്തു തന്നെയും ഭാര്യയെയും മകനെയും മർദിക്കുകയായിരുന്നുവെന്നു മുരളീധരൻ പറഞ്ഞു. പരിക്കേറ്റവരെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അതേസമയം പ്രതികളായ ഉസ്മാന്‍റെ പരാതിയിൽ മുരളീധരനെതിരെയും മകൻ രഞ്ജിത്തിനെതിരെയും കേസ് എടുത്തതായി പരപ്പനങ്ങാടി പോലീസ് പറഞ്ഞു. പരപ്പനങ്ങാടി മുനിസിപ്പാലിറ്റി ഒന്നാം ഡിവിഷൻ കൗണ്‍സിലർ കെ.പി. മുഹ്സിനക്കെതിരെയും കേസ് എടുത്തതായി പോലീസ് അറിയിച്ചു. പ്രതികളായ ഉബൈസ്, ഉസ്മാൻ, നബീൽ എന്നിവരെ കോടതി റിമാൻഡ് ചെയ്തു. മുരളീധരന്‍റെ വീട്ടിലെ സിസി ടിവി ദൃശ്യങ്ങൾ കേസിനു കൂടുതൽ തെളിവ് ലഭിക്കാനായി എന്നും പരപ്പനങ്ങാടി സിഐ വിനോദ് വലിയാട്ടൂർ പറഞ്ഞു.

അങ്ങാടിപ്പുറം മേൽപ്പാലത്തിലൂടെ ബസുകൾ ഓടിത്തുടങ്ങി

പെരിന്തൽമണ്ണ: കോഴിക്കോട്- പാലക്കാട് ദേശീയപാതയിൽ നവീകരണത്തിനായി രണ്ടാഴ്ച അടച്ചിട്ട അങ്ങാടിപ്പുറം മേൽപാലത്തിലൂടെ ബസുകൾ ഓടി തുടങ്ങി. ഇന്നലെ രാവിലെ മുതൽ എല്ലാ വാഹനങ്ങൾക്കുമായി റോഡ് തുറന്നു കൊടുത്തു. അതേസമയം ഭാരം കൂടിയ ചരക്കുവാഹനങ്ങൾക്കു രാവിലെ 8.30 മുതൽ 10.30 വരെയും വൈകിട്ട് മൂന്നു മുതൽ അഞ്ചു വരെയും മേൽപാലത്തിലൂടെ ഗതാഗതം നിരോധിച്ചിട്ടുണ്ട്. നവീകരണം കഴിഞ്ഞ ഉടൻ ചെറിയ വണ്ടികൾക്കായി അഞ്ചു മുതൽ മേൽപാലം തുറന്നു നൽകിയിരുന്നു. നവീകരിച്ച ഭാഗം ബലപ്പെടുത്തുന്നതിനായി ബസുകളുടെയും ഭാരവാഹനങ്ങളുടെയും നിയന്ത്രണം തുടരുകയായിരുന്നു. യാത്രക്കാർ ഇതുമൂലം ഏറെ പ്രയാസം അനുഭവിച്ചിരുന്നു. ബസുകളിലേറെയും അങ്ങാടിപ്പുറം വരെയെത്തി ആളുകളെ ഇറക്കുകയും കയറ്റുകയും ചെയ്തു തിരിച്ചു പോവുകയായിരുന്നു. പെരിന്തൽമണ്ണ മുതൽ അങ്ങാടിപ്പുറം വരെയും ബസ് സർവീസ് നടത്തിയിരുന്നു. ഇതിനിടയിലുള്ള ഭാഗത്ത് കാൽനട യാത്രയോ ഓട്ടോറിക്ഷകളോ ആയിരുന്നു യാത്രക്കാർക്ക് ആശ്രയം. മങ്കട സി.എച്ച്. സെന്‍ററിന്‍റെ വാഹനം ബസ് സർവീസ് ഇല്ലാത്ത ഭാഗത്ത് യാത്രക്കാരെ സൗജന്യമായി കൊണ്ടുപോയിരുന്നത് ആശ്വാസമായിരുന്നു. നവീകരണത്തിന്‍റെ ഭാഗമായി ഏർപ്പെടുത്തിയ ഗതാഗത പരിഷ്കരണങ്ങൾ വ്യാപാരികളുടെ കടുത്ത എതിർപ്പിനെ തുടർന്ന് തൽക്കാലം മരവിപ്പിച്ചിരിക്കുകയാണ്. കൂടുതൽ പഠനം നടത്തിയ ശേഷമേ ഇനി പരിഷ്കാരങ്ങൾ നടപ്പാക്കുകയുള്ളൂ.

പെരിന്തൽമണ്ണ മാർക്കറ്റിലേക്കുള്ള വഴിയിൽ ചെളി നിറഞ്ഞു

പെരിന്തൽമണ്ണ: പെരിന്തൽമണ്ണ ഇൻഡോർ മാർക്കറ്റിന്‍റെ മുൻഭാഗം ചെളി നിറഞ്ഞ് വെള്ളക്കെട്ട് രൂപപ്പെട്ടു. ഇതിനാൽ മാർക്കറ്റിലേക്ക് ആളുകൾക്ക് വരാൻ കഴിയുന്നില്ല. ബദൽ സംവിധാനമായി ഇവിടെ ക്വാറി വേസ്റ്റ് ഇട്ട് സഞ്ചാരയോഗ്യമാക്കണമെന്ന് പെരിന്തൽമണ്ണ മർച്ചന്‍റ്സ് അസോസിയേഷൻ പ്രവർത്തക സമിതി യോഗം ആവശ്യപ്പെട്ടു. ബൈപ്പാസ് ജംഗ്ഷനിലും ടൗണിലെ പല റോഡുകളിലും കുഴികൾ കാരണം വെള്ളക്കെട്ടായി കിടക്കുകയാണ്. അഴുക്കുചാലുകൾ കുറ്റമറ്റതാക്കി വെള്ളക്കെട്ട് നീക്കം ചെയ്യാൻ നടപടി സ്വീകരിക്കണമെന്നും ആവശ്യപ്പെട്ടു. ഇത് സംബന്ധിച്ച് ബന്ധപ്പെട്ടവർക്ക് നിവേദനം നൽകി. പ്രസിഡന്‍റ് പി.ടി.എസ്. മൂസു അധ്യക്ഷതവഹിച്ചു. സെക്രട്ടറി സി.പി. മുഹമ്മദ് ഇക്ബാൽ, ലത്തീഫ് ടാലന്‍റ്്, യൂസഫ് രാമപുരം, വാര്യർദാസ്, പി.പി. സൈതലവി, ഓമർ ഷെരീഫ്, കാജാമുഹയുദ്ദീൻ, ഇബ്രാഹിം കാരയിൽ, ജമീല ഇസുദ്ദീൻ എന്നിവർ പ്രസംഗിച്ചു.

ഡ്രൈനേജിൽ വീണ് കാഴ്ചപരിമിതിയുള്ള യുവാവിന് പരിക്ക്

മഞ്ചേരി: കച്ചേരിപ്പടിയിൽ ഡ്രൈനേജിലേക്ക് വീണ് കാഴ്ചപരിമിതിയുള്ള യുവാവിന് പരിക്കേറ്റു. കുറ്റിപ്പുറം തവനൂർ ആയിങ്കലം സ്വദേശി പുല്ലാട്ടിൽ ഷഹീർ (42)ആണ് ഡ്രൈനേജിലേക്ക് വീണത്. ഇന്നലെ വൈകിട്ടാണ് സംഭവം. സ്റ്റാൻഡിൽ ബസ് ഇറങ്ങുന്നതിനിടെ ഡ്രൈനേജിലേക്ക് വീഴുകയായിരുന്നു. ഇതോടെ സ്റ്റാൻഡിൽ തന്നെ പ്രവർത്തിക്കുന്ന അഗ്നിരക്ഷാ സേനാംഗങ്ങൾ എത്തി പുറത്തെത്തിച്ച് സ്റ്റേഷനിലേക്ക് മാറ്റി. വെള്ളത്തിൽ വീണ് വസ്ത്രങ്ങളിൽ ചെളി ആയതോടെ തൊട്ടടുത്ത് പ്രവർത്തിക്കുന്ന ജെന്‍റ്സ് ഷോപ്പ് ഉടമ സൗജന്യമായി പാന്‍റ്്സും ഷർട്ടും നൽകി. സ്റ്റേഷനിൽ നിന്ന് വസ്ത്രം മാറി അദ്ദേഹത്തെ തിരിച്ച് നാട്ടിലേക്ക് ബസ് കയറ്റിവിട്ടു. സ്റ്റാൻഡിൽ നിന്ന് ബസ് പുറത്തേക്ക് പോകുന്ന ഈ ഭാഗത്ത് ഡ്രൈനേജിന് കൈവരി ഇല്ലാത്തത് അപകടത്തിന് കാരണമാകുന്നുണ്ട്. സമാനമായ രീതിയിൽ നേരത്തെയും അപകടങ്ങൾ സംഭവിച്ചിരുന്നു.

ട്രാൻസ്ഫോർമറിൽ നിന്ന് പടർന്നു: മഞ്ചേരിയിൽ പഴക്കടയ്ക്ക് തീപ്പിടിച്ചു

മഞ്ചേരി: ട്രാൻസ്ഫോർമറിൽ നിന്ന്് തീ പടർന്ന് തൊട്ടടുത്തുള്ള പഴ മൊത്തക്കച്ചവട സ്ഥാപനം കത്തി നശിച്ചു. മഞ്ചേരി ജസീല ജംഗ്ഷനു സമീപമുള്ള എബി ഫ്രൂട്ട്സ് എന്ന സ്ഥാപനമാണ് അഗ്നിക്കിരയായത്. ഒരു ലക്ഷം രൂപയുടെ നഷ്ടം സംഭവിച്ചതായി കടയുടമ നെല്ലിക്കുത്ത് പട്ടാള റഷീദ് പറഞ്ഞു. ഇന്നലെ രാവിലെ 11 മണിയോടെയാണ് സംഭവം. ട്രാൻസ്ഫോർമറിൽ നിന്ന് തെറിച്ച് വീണ തീ, പഴങ്ങൾ സൂക്ഷിക്കുന്ന പ്ലാസ്റ്റിക് പെട്ടിയിൽ വീണ് കത്തുകയായിരുന്നു. നാട്ടുകാർ അറിയിച്ചതിനെ തുടർന്ന് മഞ്ചേരി അഗ്നിരക്ഷാ നിലയത്തിൽ നിന്ന് രണ്ട് ഫയർ യൂണിറ്റുകൾ എത്തിയാണ് തീ നിയന്ത്രണ വിധേയമാക്കിയത്. തൊട്ടടുത്ത് സ്ഥിതി ചെയ്യുന്ന മൂന്നുനില കെട്ടിടത്തിലേക്ക് തീ പടരാതിരിക്കാൻ അഗ്നിരക്ഷാ സേനക്ക് ഏറെ പരിശ്രമിക്കേണ്ടി വന്നു. എങ്കിലും തൊട്ടടുത്തുള്ള ഓറിയന്‍റൽ ഇൻഷ്വറൻസ് കന്പനിയിലേക്ക് പുക അടിച്ചുകയറിയത് നാശനഷ്ടങ്ങൾക്കിടയാക്കി. അസിസ്റ്റന്‍റ് സ്റ്റേഷൻ ഓഫീസർ ടി. ഷാജിയുടെ നേതൃത്വത്തിൽ എസ്എഫ്ആർഒ അരുണ്‍ബാബു, ഫയർ ആൻഡ് റസ്ക്യൂ ഓഫീസർമാരായ എം.വി. അനൂപ്, ടി. അഖിൽ, എൻ.എം. റാഷിദ്, ഡ്രൈവർമാരായ ശ്രീലേഷ് കുമാർ, എം. സജീഷ്, സേനാംഗങ്ങളായ പി. ഗണേഷ്കുമാർ, സി. മുകുന്ദൻ, കെ. ഉണ്ണികൃഷ്ണൻ, കെ.ടി. ആബിദ്, കെ. ഹുസ്നി മുബാറക്, എ. ബിനീഷ് എന്നിവർ രക്ഷാപ്രവർത്തനത്തിൽ പങ്കെടുത്തു. ജസീല ജംഗഷനു സമീപത്തെ ട്രാൻസ്ഫോർമർ അപകടം വരുത്തിയത് പലതവണയാണ്. നേരത്തെ മേലാക്കം ജുമാമസ്ജിദിന് സമീപമുണ്ടായിരുന്ന ട്രാൻസ്ഫോർമർ അമിത ലോഡ് മൂലം കത്തിയിരുന്നു. തുടർന്നാണ് ട്രാൻസ്ഫോർമർ പുതിയ യാർഡിലേക്ക് പുന:സ്ഥാപിച്ചത്. ഇവിടെ സെക്യൂരിറ്റി ഫെൻസിംഗും സ്ഥാപിച്ചിരുന്നു. എന്നാൽ ഏഴു മാസം തികയും മുന്പേ ട്രാൻസ്ഫോർമറിൽ നിന്ന് തീക്കട്ട തെറിച്ചു വീഴുകയും സമീപത്ത് നിർത്തിയിട്ടിരുന്ന മോട്ടോർ ബൈക്ക് കത്തി നശിക്കുകയും ചെയ്തിരുന്നു. 2021 ഏപ്രിൽ മൂന്നിനുണ്ടായ ഈ അഗ്നിബാധയിൽ സമീപത്ത് പ്രവർത്തിക്കുന്ന എബി ഫ്രൂട്ടസ് എന്ന പഴ മൊത്ത വിൽപ്പനശാലയുടെ രണ്ടായിരത്തിലധികം വരുന്ന പ്ലാസ്റ്റിക് പെട്ടികളും കത്തി നശിച്ചിരുന്നു. സമാനമായ രീതിയിലാണ് ഇന്നലെയും അഗ്നിബാധയുണ്ടായത്. അന്ന് കത്തിനശിച്ച അതേ പഴക്കട തന്നെയാണ് ഇന്നലെയും അഗ്നി വിഴുങ്ങിയത്. നഗരത്തിൽ നിരവധി കെട്ടിടങ്ങൾക്ക് നടുവിലായി സ്ഥാപിച്ച ട്രാൻസ്ഫോർമറിൽ നിന്ന് തീ തെറിച്ചതെങ്ങനെയെന്ന് കഐസ്ഇബി അധികൃതർക്കും വ്യക്തതയില്ല.

ജീർണാവസ്ഥയിലായ മൃഗാശുപത്രി പൊളിച്ചുമാറ്റണമെന്ന്

അങ്ങാടിപ്പുറം: അങ്ങാടിപ്പുറം ചെരക്കാപറന്പിലെ മൃഗാശുപത്രിയുടെ പഴയ കെട്ടിടം പൊളിച്ചുമാറ്റണമെന്ന ആവശ്യം ശക്തം. പതിറ്റാണ്ടുകൾ പഴക്കമുള്ള കെട്ടിടം ജീർണാവസ്ഥയിലാണ്. ഏതു നിമിഷവും തകർന്നു വീഴാവുന്ന കെട്ടിടം ഉടനെ പൊളിച്ചുമാറ്റണമെന്നാണ് നാട്ടുകാർ ആവശ്യപ്പെടുന്നത്. ആശുപത്രി പ്രവർത്തിക്കുന്നത് പുതിയ കെട്ടിടത്തിലാണെങ്കിലും ഉപയോഗശൂന്യമായ പഴയ കെട്ടിടം നീക്കം ചെയ്യാൻ ആവശ്യമായ സാക്ഷ്യപത്രം പഞ്ചായത്ത് അധികൃതരിൽ നിന്ന് ലഭിക്കാത്തതാണ് പൊളിച്ചു മാറ്റുന്നതിനുള്ള തടസം. ആശുപത്രി വളപ്പിലെ വീഴാറായ മരങ്ങൾ ഈയിടെ മുറിച്ചുമാറ്റിയിരുന്നു. കഴിഞ്ഞ ദിവസമുണ്ടായ കനത്ത മഴയിൽ ചുറ്റുമതിൽ തകർന്നുവീഴുകയും ചെയ്തു. മാസന്തോറും മുന്നൂറോളം ഗുണഭോക്താക്കൾ ആശ്രയിക്കുന്ന ഈ മൃഗാശുപത്രി ഇപ്പോൾ നേരിടുന്ന സ്ഥല പരിമിതി പരിഹരിക്കാനും കെട്ടിടം പൊളിക്കുന്നതിലൂടെ സാധിക്കും. മങ്കട, പുഴക്കാട്ടിരി എന്നീ സമീപ പഞ്ചായത്തുകളിലുള്ളവരും മൃഗചികിത്സക്കായി ഇവിടെ എത്താറുണ്ട്. വെറ്ററിനറി സർജൻ ഉൾപ്പെടെ മുഴുവൻ തസ്തികകളിലും ഇവിടെ ജീവനക്കാരുണ്ട്. കെട്ടിടം പൊളിച്ചുമാറ്റി ചുറ്റുമതിൽ, ഗേറ്റ് എന്നിവ പണിതാൽ ആശുപത്രിയെ ആശ്രയിക്കുന്നവർക്ക് വലിയ സൗകര്യമാകും. കെട്ടിടം പൊളിച്ചുമാറ്റുന്നതിനും പുനരുദ്ധാരണത്തിനുമായി ഗ്രാമപഞ്ചായത്തിന് അപേക്ഷ നൽകി കാത്തിരിക്കുകയാണ് ആശുപത്രി വികസന സമിതി ഭാരവാഹികളും നാട്ടുകാരും.

വന്യമ്യഗശല്യം പരിഹരിക്കാൻ സർക്കാരിന്‍റെ അടിയന്തര ഇടപെടൽ വേണം: പി.വി. അൻവർ

നിലന്പൂർ: വന്യമൃഗശല്യം പരിഹരിക്കാൻ നടപടി സ്വീകരിക്കാതെ ഭരണപക്ഷവും പ്രതിപക്ഷവും മൗനം പാലിക്കുകയാണെന്ന് പി.വി. അൻവർ ആരോപിച്ചു. നിലന്പൂർ നഗരസഭാ പരിധിയിലെ പാത്തിപ്പാറയിൽ കാട്ടാന കൃഷി നശിപ്പിച്ച കർഷകരുടെ സ്ഥലങ്ങൾ സന്ദർശിച്ച ശേഷം സംസാരിക്കുകയായിരുന്നു തൃണമൂൽ കോണ്‍ഗ്രസ് സംസ്ഥാന കോഓർഡിനേറ്റർ പി.വി. അൻവർ. വന്യമൃഗശല്യം മൂലം കർഷകർ വീടുകൾ ഉപേക്ഷിച്ച് പോകേണ്ട അവസ്ഥയിലാണ്. ഇതിന് പരിഹാരം കാണേണ്ട സർക്കാർ ഒരു ഇടപെടലുകളും നടത്തുന്നില്ല. കേരളത്തിൽ വന്യമ്യഗങ്ങളെ പേടിച്ച് പുറത്തിറങ്ങാൻ കഴിയാത്ത അവസ്ഥയാണ്. മലയോര കർഷകർ തിങ്ങിപാർക്കുന്ന നിലന്പൂർ മേഖലയിൽ വീട്ടുമുറ്റങ്ങളിലേക്ക് കാട്ടാനകൾ എത്തുന്നത് തടയാൻ അടിയന്തരമായി സോളർ വൈദ്യുതിവേലി നിർമിക്കണം. സർക്കാരിനെ കൊണ്ട് വന്യമ്യഗശല്യത്തിനെതിരെ നടപടി എടുപ്പിക്കേണ്ട പ്രതിപക്ഷവും മൗനത്തിലാണ്. നാട്ടിൽ വന്യമൃഗശല്യം വർധിക്കുന്പോൾ കാർബണ്‍ ഫണ്ടിനായി വന വിസ്തൃതി കൂട്ടികൊണ്ടിരിക്കുകയാണ് സംസ്ഥാന സർക്കാരെന്നും അൻവർ ആരോപിച്ചു. നിലന്പൂരിൽ മാത്രം 161 കർഷകരുടെ ഭൂമിയാണ് ഇതിനകം വില നിശ്ചയിച്ച് വനം വകുപ്പ് ഏറ്റെടുത്തിരിക്കുന്നതെന്നും അൻവർ പറഞ്ഞു. തൃണമൂൽ കോണ്‍ഗ്രസ് വന്യമൃഗശല്യത്തിനെതിരെ സംസ്ഥാന വ്യാപകമായി സമരജാഥ സംഘടിപ്പിക്കും. കാസർഗോട്ട് നിന്നാരംഭിച്ച് തിരുവനന്തപുരത്ത് സമാപിക്കുന്നതായിരിക്കും ജാഥ. വന്യമൃഗ ആക്രമണങ്ങളിൽ മരിക്കുന്നവരുടെ ആശ്രിതർക്ക് നിലവിൽ നൽകുന്ന നഷ്ടപരിഹാര തുക 50 ലക്ഷമാക്കി ഉയർത്തണം. ആക്രമണങ്ങളിൽ പരിക്കേൽക്കുന്നവർക്ക് നൽകുന്ന നഷ്ടപരിഹാര തുക 10 ഇരട്ടിയായി ഉയർത്തണമെന്നും അദ്ദേഹം ആവശ്യപ്പെട്ടു. തൃണമുൽ കോണ്‍ഗ്രസ് മുനിസിപ്പൽ സെക്രട്ടറി ഷാജഹാൻ പാത്തിപ്പാറ ഉൾപ്പെടെയുള്ള നേതാക്കളും പ്രവർത്തകരും കൂടെ ഉണ്ടായിരുന്നു.

സ്ഥല പരിമിതിയിൽ വീർപ്പുമുട്ടി നിലന്പൂർ ജില്ലാശുപത്രി

നിലന്പൂർ:സ്ഥലപരിമിതിയിൽ വീർപ്പുമുട്ടി നിലന്പൂർ ജില്ലാ ആശുപത്രി. അടിസ്ഥാന വികസനത്തിന് ആവശ്യമായ സ്ഥലമില്ലാത്തത് കടുത്ത വെല്ലുവിളിയാവുകയാണ്. ആശുപത്രി വികസനത്തിന് നിലന്പൂർ മോഡൽ യുപി സ്കൂളിന്‍റെ സ്ഥലം ഏറ്റെടുക്കുന്നത് വൈകുന്നതാണ് നിലന്പൂർ ജില്ലാ ആശുപത്രിയുടെ പ്രവർത്തനങ്ങളെ ബാധിക്കുന്നത്. ജില്ലാ ആശുപത്രിയുടെ എച്ച്എംസി ഫണ്ടിൽ ഒന്നേകാൽ കോടി രൂപ നീക്കിയിരിപ്പുണ്ടെന്ന് സൂപ്രണ്ട് തന്നെ വ്യക്തമാക്കുന്നു. ജില്ലാ ആശുപത്രിയിൽ എത്തുന്നവരിൽ നിന്ന് പാസിനത്തിൽ വലിയ തുക വാങ്ങുന്നതിനാലാണ് ഇത്രയും വലിയ തുക എച്ച്എംസി ഫണ്ടിൽ നീക്കിയിരിപ്പ് വരാൻ കാരണം. രണ്ടു വർഷമായി ഇടക്കിടെ പ്രവർത്തനരഹിതമാകുന്ന എക്സ്റേ യന്ത്രം മാറ്റിയിടാൻ സ്ഥലമില്ലാത്തതിനാൽ പുതിയ യന്ത്രം വാങ്ങാൻ കഴിയാത്ത അവസ്ഥയാണ്. ജില്ലാ ആശുപത്രിയുടെ അത്യാഹിത വിഭാഗവും എക്സ്റേ യന്ത്രം പ്രവർത്തിക്കുന്ന ഓഫീസും തമ്മിൽ 50 മീറ്ററിനും നൂറ് മീറ്ററിനുമിടയിൽ ദൂരമുണ്ട്. അതിനാൽ അപകടങ്ങളിൽ പരിക്കേൽക്കുന്നവർ ഉൾപ്പെടെയുള്ള രോഗികളെ സ്ട്രെക്ച്ചറിൽ ഇരുത്തിയും കിടത്തിയും വേണം എക്സ് റേ എടുക്കാൻ കൊണ്ടുപോകേണ്ടത്. ഗൂഢല്ലൂർ മുതൽ മന്പാട് വരെയുള്ള ആയിരക്കണക്കിന് രോഗികളുടെ നിലന്പൂരിലെ ഏക ആശ്രയമായ ജില്ലാ ആശുപത്രിയിലാണ് അടിസ്ഥാന സൗകര്യങ്ങളില്ലാത്തതിനാൽ എക്സ് റേ എടുക്കാൻ ഉൾപ്പെടെ സ്വകാര്യ ആരോഗ്യ സ്ഥാപനങ്ങളെ ആശ്രയിക്കേണ്ട അവസ്ഥ വരുന്നത്. ഇത് സാധാരണക്കാരന് താങ്ങാനാകുന്നില്ല. ജില്ലാ ആശുപത്രി എച്ച്എംസി അടക്കം അടിസ്ഥാന സൗകര്യവികസനത്തിന്‍റെ കാര്യത്തിൽ ശക്തമായ ഇടപെടലുകൾ നടത്താത്തതാണ് നിലവിലെ അവസ്ഥക്ക് കാരണം. എക്സ് റേ യന്ത്രങ്ങൾക്കായി നവംബറിൽ പുതിയ ബ്ലോക്ക് തുറക്കും വരെ കാത്തിരിക്കേണ്ടിവരുമെന്ന സൂചനയാണ് ആശുപത്രി അധികൃതർ നൽകുന്നത്. നിലന്പൂർ ജില്ലാ ആശുപത്രിക്ക് അടിസ്ഥാന സൗകര്യം ഒരുക്കുന്നതിന് ആവശ്യമായ സ്ഥലം കണ്ടെത്തേണ്ടതും അത് ഉടൻ യാഥാർഥ്യമാക്കേണ്ടതും എച്ച്എംസി അംഗങ്ങളുടെയും സർക്കാരിന്‍റെയും ജില്ലാ പഞ്ചായത്തിന്‍റെയും ഉത്തരവാദിത്വം കൂടിയാണ്. ആശുപത്രി വികസനത്തിന് ഫണ്ട് കണ്ടെത്തുന്നതിൽ ജനപ്രതിനിധികൾ ജാഗ്രത കാണിക്കുന്നുണ്ടെങ്കിലും അടിസ്ഥാന സൗകര്യത്തിനുള്ള സ്ഥലമില്ലാത്തതിനാൽ പല ഫണ്ടുകളും ജനങ്ങൾക്ക് പ്രയോജനപ്പെടുന്ന രീതിയിൽ ആശുപത്രിയിൽ നടപ്പാക്കാൻ കഴിയുന്നില്ല.

മഞ്ഞപ്പിത്തം ബാധിച്ച് എട്ടുവയസുകാരൻ മരിച്ചു

എടവണ്ണ: മഞ്ഞപ്പിത്തം കരളിനെ ബാധിച്ച് ചികിൽസയിലായിരുന്ന വിദ്യാർഥി മരിച്ചു. ഒതായി പടിഞ്ഞാറെ ചാത്തല്ലൂർ കല്ലേച്ചിയിലെ എടപ്പരുത്തി വിജീഷ് - ജിംഷി മലയമ്മ ദന്പതിമാരുടെ മകൻ അമൽ കൃഷ്ണ (പാച്ചു-എട്ട്) യാണ് മരിച്ചത്. മുക്കം പുള്ളനൂർ ന്യൂ ജിഎൽപി സ്കൂൾ മൂന്നാംക്ലാസ് വിദ്യാർഥിയാണ്. മഞ്ഞപ്പിത്തം കരളിനെ ബാധിച്ച് കോഴിക്കോട് മെഡിക്കൽ കോളജാശുപത്രിയിൽ ചികിത്സയിലായിരുന്നു. കരൾ മാറ്റിവയ്ക്കൽ ശസ്ത്രക്രിയക്ക് നാട്ടുകാർ മുൻകൈയെടുത്ത് തയാറെടുപ്പുകൾ പൂർത്തീകരിച്ച് വരുന്പോഴാണ് അമൽ കൃഷ്ണ മരിച്ചത്. സഹോദരങ്ങൾ: അജയ് കൃഷ്ണ, അലംകൃത.

ഓട്ടോറിക്ഷക്കുള്ളിൽ ഡ്രൈവർ മരിച്ച നിലയിൽ

എരമംഗലം :പുത്തൻപള്ളിയിൽ ഓട്ടോറിക്ഷ ഡ്രൈവറെ ഓട്ടോറിക്ഷക്കുള്ളിൽ മരിച്ച നിലയിൽ കണ്ടെത്തി. വെളിയംകോട് തണ്ണിത്തുറ സ്വദേശി വലിയകത്ത് നൗഷാദി (55)നെയാണ് ഓട്ടോറിക്ഷക്കകത്ത് മരിച്ച നിലയിൽ കണ്ടെത്തിയത്. പുത്തൻപള്ളി ജാറത്തിനടുത്തുള്ള പാർക്കിംഗ് സ്ഥലത്ത് ഇന്നലെ രാവിലെ ഒന്പത് മണിയോടെയാണ് സംഭവം. പെരുന്പടപ്പ് പോലീസ് നടപടിക്രമങ്ങൾ പൂർത്തിയാക്കി. മൃതദേഹം പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ട് കൊടുത്തു.

മരം മുറിക്കുന്നതിനിടെ പരിക്കേറ്റയാൾ മരിച്ചു

എടക്കര: മരം മുറിക്കുന്നതിനിടെ കൊന്പ് ദേഹത്ത് വീണ് പരിക്കേറ്റയാൾ മരിച്ചു. മൂത്തേടം കൽക്കുളം പൊട്ടിപൊയിൽ വേലായുധൻ (49) ആണ് മരിച്ചത്. ജൂണ്‍ 27 ന് കൽക്കുളത്ത് മരം മുറിക്കുന്നതിനിടെയാണ് സംഭവം. പരിക്കേറ്റ് നിലന്പൂർ ജില്ലാ ആശുപത്രി, മഞ്ചേരി മെഡിക്കൽ കോളജ്, കോഴിക്കോട് മെഡിക്കൽ കോളജ് ആശുപത്രികളിൽ ചികിത്സയിലായിരുന്നു. ഇന്നലെ രാവിലെയാണ് മരിച്ചത്. കോഴിക്കോട് മെഡിക്കൽ കോളജ് ആശുപത്രിയിൽ പോസ്റ്റ്മോർട്ടത്തിന് ശേഷം വൈകിട്ട് സംസ്കാരം നടത്തി. ഭാര്യ: തങ്ക. മക്കൾ: മഹേഷ്ണു, വിസ്മയ, ഉണ്ണിമായ. മരുമകൻ: വിജീഷ്.

യൂത്ത് ലീഗ് പ്രതിഷേധ പ്രകടനം നടത്തി

കരുവാരകുണ്ട്: ആരോഗ്യ രംഗത്തെ തുടരുന്ന അനാസ്ഥയുടെ പശ്ചാത്തലത്തിൽ ആരോഗ്യ മന്ത്രി രാജിവയ്ക്കണമെന്നാവശ്യപ്പെട്ട് മുസ്‌ലിം യൂത്ത് ലീഗ് കമ്മിറ്റി കിഴക്കേത്തലയിൽ പ്രതിഷേധ പ്രകടനം നടത്തി. പൊതുസമ്മേളനം മുസ്‌ലിം യൂത്ത് ലീഗ് ജില്ലാ ജന. സെക്രട്ടറി മുസ്തഫ അബ്ദുൾ ലത്തീഫ് ഉദ്ഘാടനം ചെയ്തു. നിയോജക മണ്ഡലം യൂത്ത് ലീഗ് കമ്മിറ്റി പ്രസിഡന്‍റ് എം.ടി. അലി നൗഷാദ് അധ്യക്ഷത വഹിച്ചു.ജില്ലാ സെക്രട്ടറി നിസാജ് എടപ്പറ്റ, മണ്ഡലം ജന. സെക്രട്ടറി ഒ. കെ. അനീസ് മാസ്റ്റർ, മണ്ഡലം ഭാരവാഹികളായ സി.ടി. ചെറി, ജാഫർ പുൽവെട്ട, കരുവാരകുണ്ട് പഞ്ചായത്ത് യൂത്ത് ലീഗ് കമ്മിറ്റി ഭാരവാഹികളായ അഡ്വ. എൻ. മുഹമ്മദ്‌ ബാദുഷ, ടി. ആദിൽ ജഹാൻ എന്നിവർ സംസാരിച്ചു.

വിദ്യാഭ്യാസ അവാർഡുകൾ സമ്മാനിച്ചു

മങ്കട: കടന്നമണ്ണ സർവീസ് സഹകരണ ബാങ്കിന്‍റെ വിദ്യാഭ്യാസ അവാർഡുകൾ സമ്മാനിച്ചു. മങ്കട ബ്ലോക്ക് പഞ്ചായത്ത് പ്രസിഡന്‍റ് ടി.അബ്ദുൾ കരീം ഉദ്ഘാടനം ചെയ്തു. ബാങ്കിന്‍റെ പൊതുനന്മാ ഫണ്ടിൽ ഉൾപ്പെടുത്തി വെള്ളില പിടിഎം ഹൈസ്കൂളിലേക്കുള്ള സ്മാർട്ട് ടിവി മങ്കട ഗ്രാമപഞ്ചായത്ത് പ്രസിഡന്‍റ് അഡ്വ. കെ. അസ്ഗർ അലി സ്കൂൾ അധികൃതർക്ക് കൈമാറി. ബാങ്ക് പ്രസിഡന്‍റ് സി.ഷൗക്കത്തലി അധ്യക്ഷത വഹിച്ചു. ബ്ലോക്ക് പഞ്ചായത്ത് മെമ്പർ സി.ടി. ഷറഫുദ്ദീൻ, മങ്കട ഗ്രാമപഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ ഷരീഫ് ചുണ്ടയിൽ, മെമ്പർ പി. ജംഷീർ, കേരളാ ബാങ്ക് മങ്കട ശാഖ മാനേജർ എ. പ്രീത, വി.കെ. മൻസൂർ, ബാങ്ക് വൈസ് പ്രസിഡന്‍റ് പി. അബ്ദുസമദ്, സെക്രട്ടറി സൈഫുള്ള കറുമുക്കിൽ, പി.ടി. അബ്ദുൽ മജീദ്, ടി. നാരായണൻ, പി.സൈഫുന്നീസ, പി. കുഞ്ഞിമുഹമ്മദ്, ഷഫീഖ് കുന്നത്തൊടി എന്നിവർ പ്രസംഗിച്ചു.

തൊഴിലാളികൾ പോലീസ് സ്റ്റേഷന്‍ മാര്‍ച്ച് നടത്തി

മഞ്ചേരി: കഴിഞ്ഞ ദിവസം സംയുക്ത ട്രേഡ് യൂണിയനുകള്‍ ആഹ്വാനം ചെയ്ത പണിമുടക്കിനിടെ തൊഴിലാളി നേതാക്കളെ പോലീസ് മര്‍ദിച്ചെന്നാരോപിച്ച് തൊഴിലാളികള്‍ മഞ്ചേരി പോലീസ് സ്റ്റേഷനിലേക്ക് മാര്‍ച്ച് നടത്തി. സിഐടിയു സെന്‍ററില്‍ നിന്ന് പ്രകടനമായി എത്തിയ പ്രവര്‍ത്തകര്‍ പോലീസ് വലയം മറികടന്ന് സ്റ്റേഷനിലേക്ക് ഇരച്ചുകയറാന്‍ ശ്രമിച്ചെങ്കിലും പോലീസ് തടഞ്ഞു. സിഐടിയു സംസ്ഥാന വൈസ് പ്രസിഡന്‍റ് വി. ശശികുമാര്‍ മാർച്ച് ഉദ്ഘാടനം ചെയ്തു. എഐടിയുസി ജില്ലാ ട്രഷറര്‍ പി. സുബ്രമണ്യന്‍ അധ്യക്ഷത വഹിച്ചു. അഡ്വ. കെ. ഫിറോസ് ബാബു, പി. കെ. മുരളീധരന്‍, പി സകരിയ, രാജന്‍ പരുത്തിപ്പറ്റ, ടി. അന്‍സാര്‍, ഡിബോണ നാസര്‍ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]