ADVERTISEMENT

ADVERTISEMENT

സ്മാർട്ട് ഗാർബേജ് മോണിറ്ററിംഗ് ആപ്പിന്‍റെ ഉദ്ഘാടനം

വെഞ്ഞാറമൂട് : ഖരമാലിന്യ സംസ്കരണം ശക്തമാക്കി നെല്ലനാട് പഞ്ചായത്ത്. സ്മാർട്ട് ഗാർബേജ് മോണിറ്ററിംഗ് ആപ്പ് നടപ്പിലാക്കിയാണ് മാലിന്യ സംസ്കരണം സാധ്യമാകുന്നത്. ഇതിന്‍റെ ഉദ്ഘാടനം കഴിഞ്ഞ ദിവസം ഡി.കെ. മുരളി എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് ബീനാ രാജേന്ദ്രൻ അധ്യക്ഷത വഹിച്ചു. വൈസ് പ്രസിഡന്‍റ് കീഴായിക്കോണം സോമൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ അഡ്വ. സുധീർ, സജീന, പ്രസാദ്, ശാന്തകുമാരി, പി. ബാബു, നാസർ, അസിസ്റ്റന്‍റ് സെക്രട്ടറി പ്രസാദ് എന്നിവർ പങ്കെടുത്തു.

ജഴ്സി കിറ്റുകള്‍ കൈമാറി

കഴക്കൂട്ടം : ഗുജറാത്തില്‍ നടക്കുന്ന 36-ാമത് ദേശീയ ഗെയിംസിനുള്ള കേരള വനിതാ സോഫ്റ്റ് ബോള്‍ ടീമിനെ രഹ്ന (വയനാട്) നയിക്കും. അഞ്ജലി (മലപ്പുറം) ആണ് വൈസ് ക്യാപ്റ്റന്‍.ടീമംഗങ്ങളുടെ പരിശീലനക്യാമ്പ് നടന്ന ചെമ്പഴന്തി എസ്എന്‍ കോളജില്‍ നടന്ന ചടങ്ങില്‍ സോഫ്റ്റ് ബോള്‍ അസോസിയേഷന്‍ സംസ്ഥാന പ്രസിഡന്‍റുകൂടിയായ ഐജി ജി.സ്പര്‍ജന്‍കുമാര്‍ ഉദ്ഘാടനം ചെയ്ത് ജഴ്സി കിറ്റുകള്‍ കൈമാറി.

ADVERTISEMENT

ബസിനടിയില്‍പ്പെട്ട് യുവതിക്ക് ദാരുണാന്ത്യം

പേരൂര്‍ക്കട: കെഎസ്ആര്‍ടിസി ബസിനടിയില്‍പ്പെട്ട് യുവതിക്ക് ദാരുണാന്ത്യം. കളിയിക്കാവിള വെളിയങ്കോട് നേമം ഹൗസില്‍ മീരാന്‍ പിള്ളയുടെയും പരേതയായ സുല്‍സി ബീവിയുടെയും മകള്‍ സുലൈഖ അസ്‌കിന്‍ (48) ആണ് മരിച്ചത്. ബുധനാഴ്ച വൈകുന്നേരം അഞ്ചോടുകൂടി തമ്പാനൂര്‍ ബസ് ടെര്‍മിനലിനു മുന്നിലായിരുന്നു അപകടം. വീട്ടിലേക്കു പോകുന്നതിനായി ബസില്‍ കയറാന്‍ ഓടിയെത്തുന്നതിനിടെയായിരുന്നു അത്യാഹിതം. ബസില്‍ കയറാനായി റോഡിലൂടെ ഡ്രൈവര്‍ക്യാബിന്‍റെ സമീപത്തുകൂടി വരുന്നതിനിടെ ബസ് മുന്നോട്ടെടുക്കുകയായിരുന്നു. ബസിന്‍റെ മുന്‍വശത്തെയും പിന്‍വശത്തെയും ചക്രങ്ങള്‍ സുലൈഖ അസ്‌കിന്‍റെ ശരീരത്തിലൂടെ കയറിയിറങ്ങുകയായിരുന്നു. ബസിന്‍റെ മുന്നില്‍ക്കൂടി യുവതി കടന്നുപോകുന്നതു കണ്ടില്ലെന്നാണ് ബസ്‌ഡ്രൈവറുടെ മൊഴി. പ്രവാസി മലയാളിയായ അസ്‌കിന്‍ ആണ് ഭര്‍ത്താവ്. മക്കള്‍: ആശിറ യാസീന്‍, അര്‍ഷിന, ഇര്‍ഫാന്‍. മരുമകന്‍: യാസീന്‍. തമ്പാനൂര്‍ പോലീസ് കേസെടുത്തു.

റോഡുവക്കിൽ അണലിപ്പാന്പ്

നെടുമങ്ങാട്: ജനത്തിരക്കേറിയ നെടുമങ്ങാട് പുത്തൻപാലത്തിനു സമീപം റോഡ് വക്കിൽ അണലിയെ കണ്ടെത്തി. കഴിഞ്ഞ ദിവസം രാവിലെ 10.40 ഓടെയാണു വാഹനയാത്രക്കാർ അണലിയെ കണ്ടത്. റോഡിലെ പൈപ്പിൻ ചുവട്ടിൽ അബോധാവസ്ഥയിലാണ് അണലിയെ കണ്ടത്. 100 മീറ്റർ മാറി സ്ഥിതി ചെയ്യുന്ന ഗവൺമെന്‍റ് യുപിഎസിലേക്ക് വിദ്യാർഥികളടക്കം കാൽ നടയായി വരുന്ന വഴിയിൽ അണലിയെ കണ്ടത് നാട്ടുകാരെ ഭീതിയിലാഴ്ത്തി. അണലിക്ക് രണ്ടുകിലോ തൂക്കം വരും. ‌ ആർആർടി ടീമിലെ റോഷ്നിയും സംഘവും എത്തി അണലിയെ പിടികൂടി. അവശനിലയിൽ ആയിരുന്ന അണലി പിന്നീട് ചത്തുപോയി.

ദേശീയ മിനി ഗോള്‍ഫ് ചാമ്പ്യന്‍ഷിപ്പില്‍ താരമായി സായി കൃഷ്ണയിലെ കുട്ടികള്‍

പാറശാല: മഹാരാഷ്ട്രയിലെ നാഗ്പൂരില്‍ നടന്ന പത്താമത് ദേശീയ സീനിയര്‍ മിനി ഗോള്‍ഫ് ചാമ്പ്യന്‍ഷിപ്പില്‍ കേരള ടീമിനെ പ്രതിനിധീകരിച്ച് സായി കൃഷ്ണയിലെ കുട്ടികളും പങ്കെടുത്തിരുന്നു. ഹയര്‍സെക്കന്‍ഡറി വിഭാഗത്തില്‍നിന്നു ശ്രേയസും ശ്രീശാന്തുമാണ് പങ്കെടുത്തത്. പുരുഷന്മാരുടെ സ്‌ട്രോക്ക് പ്ലേ വിഭാഗത്തില്‍ ശ്രേയസ് വെള്ളിമെഡല്‍ നേടിയപ്പോള്‍ ടീം സ്പീഡ് വിഭാഗത്തില്‍ ശ്രീശാന്ത് വെള്ളിയും വ്യക്തിഗത വിഭാഗത്തില്‍ വെങ്കലവും നേടി. കേരള ടീമിന് ആകെ ഏഴു മെഡലുകളാണു ലഭിച്ചത്. മാനേജര്‍ മോഹനന്‍ കുമാര്‍ അക്കാദമിക് ഡയറക്ടര്‍ രാധാകൃഷ്ണന്‍, പ്രിന്‍സിപ്പല്‍ രേണുക എന്നിവര്‍ വിജയികളെ അനുമോദിച്ചു.

കെട്ടിടത്തിന് മുകളിൽ മരംവീണു

നെടുമങ്ങാട്: ആര്യനാട് ഗവ. ഹയർ സെക്കൻഡറി സ്കൂൾകെട്ടിടത്തിന് മുകളിലൂടെ ഗുൽമോഹർ മരം ഒടിഞ്ഞു വീണു. കഴിഞ്ഞ ദിവസം രാവിലെ 11 മണിക്കാണ് മരംവീണത്. മരം വീണപ്പോൾ കുട്ടികൾ ആരും കെട്ടിടത്തിനു വെളിയിൽ ഉണ്ടായിരുന്നില്ല. എല്ലാ കുട്ടികളും ക്ലാസ് മുറിയിൽ ആയിരുന്നതിനാൽ വൻ ദുരന്തം ഒഴിവായി. മരത്തിന്‍റെ ശിഖരങ്ങൾ കുട്ടികൾ ഉണ്ടായിരുന്ന ക്ലാസ് മുറി കെട്ടിടത്തിനു മുകളിലൂടെ വീണതിനാൽ കുട്ടികളെ മറ്റൊരു കെട്ടിടത്തിലേക്ക് മാറ്റി. സ്കൂൾ ഓഡിറ്റോറിയത്തിനു സമീപംനിന്ന മരമാണ് ഒടിഞ്ഞു വീണത്. ശുചിമുറി കെട്ടിടത്തിനും കെട്ടിടത്തിനു മുകളിൽ ഉണ്ടായിരുന്ന ശുദ്ധജല ടാങ്കുകൾക്കും നാശം ഉണ്ടായി. ഫയർഫോഴ്സ് എത്തി മരം മുറിച്ചു മാറ്റി. നെടുമങ്ങാട് തഹസിൽദാർ അനിൽ കുമാർ സ്കൂളിൽ എത്തിസ്ഥിതി ഗതികൾ വിലയിരുത്തി.

എക്സൈസ് സംഘത്തെക്കണ്ട് ഓടിയ യുവാവിനു കുഴിയിൽവീണു പരിക്ക്

നെടുമങ്ങാട്: വീട്ടിൽ പരിശോധനയ്ക്ക് എത്തിയ എക്സൈസ് സംഘത്തെക്കണ്ട് ഓടിയ യുവാവി നു കുഴിയിൽവീണു പരിക്കുപറ്റി. ആര്യനാട് വിനോബാനികേതൻ മണ്ണാറം എം.ആർ. ഹൗസിൽ ബൈജുമോന് (46) ആണ് കാലിന് ഗുരുതര പരിക്കേറ്റത്. എക് സൈസ് ഉദ്യോഗസ്ഥർ നാട്ടുകാരെ വിളിച്ചു കൂട്ടി ഇയാളെ മെഡിക്കൽ കോളജ് ആശുപത്രിയിലെത്തിച്ചു. ചൊവ്വാഴ്ച ഉച്ചയോടെയായിരുന്നു സംഭവം.വീട്ടിൽ ഭക്ഷണം കഴിക്കാനായി എത്തിയ ബൈജു വീടിനുള്ളിൽ എക് സൈസ് ഉദ്യോഗസ്ഥരെക്കണ്ട് പുറത്തേയ്ക്കിറങ്ങി ഓടുകയായിരുന്നു. വീടിന് സമീപത്തെ മുള്ളുവേലി ചാടിക്കടന്നു പോകുന്നതിനിടെ ബൈജു കുഴിയിലേക്ക് വീഴുകയായിരുന്നു. ഉടൻതന്നെ എക്സൈസ് സംഘം 108 ആംബുലൻസ് എത്തിച്ച് ഭാര്യക്കൊപ്പം കയറ്റി മെഡിക്കൽ കോളെജിലേയ്ക്ക് അയച്ചു. നെടുമങ്ങാട് എക്സൈസ് സംഘമാണ് വന്നതെന്നും ഭാര്യയിൽനിന്നും ചില വെള്ളപേപ്പറുകളിൽ സംഘം ഒപ്പിട്ടുവാങ്ങിയെന്നും ബൈജു പറയുന്നു.ബൈജുവിനെ മെഡിക്കൽ കോളജ് ആശുപത്രിയിൽ അടിയന്തിര ശസ്ത്രക്രിയയ്ക്കു വിധേയനാക്കി.

ഓണക്കാല ബന്ദി ചെടികളുടെ പഞ്ചായത്തുതല നടീൽ ഉദ്ഘാടനം

നെടുമങ്ങാട്: അരുവിക്കര പഞ്ചായത്ത് ജനകീയാസൂത്രണം 2025-26 പൂവനി പദ്ധതി പ്രകാരം ഓണക്കാല ബന്ദി ചെടികളുടെ പഞ്ചായത്തുതല നടീൽ ഉദ്ഘാടനം പാണ്ടിയോട് വാർഡിൽ മരുതംകോട് ചിറത്തലയ്ക്കലിൽ അരുവിക്കര പഞ്ചായത്ത് പ്രസിഡന്‍റ് ആർ. കല നിർവഹിച്ചു. അരുവിക്കര കൃഷി ഓഫീസർ ബി. പ്രശാന്ത് സ്വാഗതം പറഞ്ഞു. അരുവിക്കര പഞ്ചായത്ത്‌ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ജഗൽ വിനായക്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൻ മറിയക്കുട്ടി, ബ്ലോക്ക് പഞ്ചായത്ത്‌ മെമ്പർ അരുവിക്കര വിജയൻ നായർ, പഞ്ചായത്ത് ഭരണസമിതി അംഗങ്ങളായ കളത്തറ മധു, ഷജിത, അജേഷ്, അർച്ചന, രമേശ് ചന്ദ്രൻ, അരുവിക്കര ഫാർമേഴ്‌സ് സർവീസ് സഹകരണ ബാങ്ക് പ്രസിഡന്‍റ് വി.എസ്. സജീവ് കുമാർ, അരുവിക്കര ഫാർമേഴ്‌സ് സർവീസ് സഹകരണ ബാങ്ക് മുൻ പ്രസിഡന്‍റ് അഡ്വ. ആർ. രാജ്‌മോഹൻ, കാർഷിക വികസന സമിതി അംഗങ്ങൾ, കർഷകർ, കുടുംബശ്രീ അംഗങ്ങൾ, തൊഴിലുറപ്പ് അം ഗങ്ങൾ, കൃഷിഭവൻ ഉദ്യോഗസ്ഥർ തുടങ്ങിയവർ പങ്കെടുത്തു.

വെള്ളനാട് ട്രഷറിക്കു മുന്നിൽ കെഎസ്എസ്പിഎ ധർണ

നെടുമങ്ങാട്: കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ അരുവിക്കര മണ്ഡലം കമ്മിറ്റിയുടെ ആഭിമുഖ്യത്തിൽ വെള്ളനാട് ട്രഷറിക്കു മുന്നിൽ നടത്തിയ ധർണ സംസ്ഥാന സെക്രട്ടറി കമുകിൻകോട് ശശി ഉദ്ഘാടനം ചെയ്തു. സംസ്ഥാന കമ്മിറ്റി അംഗം എ.എ. റഹിം അധ്യക്ഷനായി. ജില്ലാ സെക്രട്ടറി എസ്.വി. ഗോപകുമാർ, കടുക്കാമൂട് മനോഹരൻ, വെള്ളനാട് കൃഷ്ണൻകുട്ടി, കണ്ടമത്ത്‌ ഭാസ്കരൻ, അബുസലി, കേശവൻപോറ്റി, ഒസ്സാൻ കുഞ്ഞ്, എന്നിവർ സംസാരിച്ചു. പന്ത്രണ്ടാം പെൻഷൻ പരിഷ്കരണം നടപ്പാക്കുക, 21 ശതമാനം സമാശ്വാസം നൽകുക, മുൻപ് നൽകിയ സമാശ്വാസത്തിന്‍റെ കുടിശിക അനുവദിക്കുക, മെഡിസെപ്പിലെ പോരായ്മകൾ പരിഹരിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു ധർണ. ധർണയ്ക്കു മുന്നോടിയായി പ്രവർത്തകർ വെള്ളനാട് ടൗണിൽ പ്രകടനവും നടത്തി.

എള്ളുവിളയിലെ വീടാക്രമണ കേസ്: ഒരാള്‍ അറസ്റ്റില്‍

വെള്ളറട: എള്ളുവിളയില്‍ ശത്രുവിന്‍റെ വീടെന്നു തെറ്റിദ്ധരിച്ചു മറ്റൊരു വീട്ടില്‍ കയറി 10 അംഗ അജ്ഞാത സംഘം ഭീകരാന്തരീക്ഷം സൃഷ്ടിച്ച് ആക്രമണം നടത്തിയ കേസില്‍ ഒരാള്‍ അറസ്റ്റില്‍. കുന്നത്തുകാല്‍ വണ്ടിത്തടം സ്വദേശി സുജിത്താണ് (24) അറസ്റ്റിലായത്. നിലമാമൂട് എള്ളുവിള പ്ലാങ്കാല പുത്തന്‍വീട്ടില്‍ സലിംകുമാറിന്‍റെ (59) വീട്ടിലാണ് ആക്രമണം നടത്തിയത്. ശനിയാഴ്ച രാത്രി 11.15 ഓടെയായിരുന്നു ആക്രമണം. എള്ളുവിള സ്വദേശി പ്രവീണിന്‍റെ വീടെന്നു തെറ്റിദ്ധരിച്ചാണു സമീപത്തുള്ള സലിം കുമാറിന്‍റെ വീട് ആക്രമിച്ചത്. വീട്ടില്‍ കയറി ഭീകരാന്തരീക്ഷം സൃഷ്ടിച്ച ശേഷം വാതിലുകളും ജനാലകളും മാരകായുധങ്ങള്‍ ഉപയോഗിച്ച് വെട്ടി നശിപ്പിക്കുകയായിരുന്നു. ബഹളം കേട്ട് നാട്ടുകാര്‍ എത്തിയപ്പോള്‍ പ്രതികള്‍ ഓടി രക്ഷപ്പെടുകയായിരുന്നു. ദിവസങ്ങള്‍ക്കുമുമ്പ് ആക്രമി സംഘങ്ങളില്‍ ചിലരും പ്രവീണ തമ്മില്‍ കൈയ്യാങ്കളി നടന്നിരുന്നു. തുടര്‍ന്നുള്ള പക തീര്‍ക്കാനെത്തിയ സംഘമാണു വീടുമാറി ആക്രമണം നടത്തിയതെന്ന് പോലീസ് പറഞ്ഞു. സര്‍ക്കിള്‍ ഇന്‍സ്പക്ടര്‍ പ്രസാദിന്‍റെ നേത്രത്വത്തിലുള്ള പോലീസ് സംഘമാണ് പ്രതിയെ പിടികൂടിയത്. കോടതിയില്‍ ഹാജരാക്കി റിമാൻഡ് ചെയ്തു.

വിദേശിയെ ആക്രമിച്ച കേസ്: പ്രതി അറസ്റ്റില്‍

തിരുവല്ലം: വീടിനു സമീപത്തെ മദ്യപാനം ചോദ്യം ചെയ്തതിനെത്തുടര്‍ന്ന് വിദേശിയെ ആക്രമിച്ചു പരിക്കേല്‍പ്പിച്ച കേസിലെ പ്രതിയെ തിരുവല്ലം പോലീസ് അറസ്റ്റ് ചെയ്തു. മലയിന്‍കീഴ് വിളവൂര്‍ക്കല്‍ അനന്തുഭവനില്‍ അച്ചു എന്നുവിളിക്കുന്ന അഖിലേഷിനെ (22) ആണ് പോലീസ് അറസ്റ്റ് ചെയ്തത്. തിരുവല്ലം പാച്ചല്ലൂര്‍ മുളയ്ക്കല്‍ ആറ്റരികത്തിനു സമീപം താമസിക്കുന്ന ബ്രിട്ടനില്‍ നിന്നുളള ഗായ്‌പെറി (64)ക്കാണ് പരിക്കേറ്റതെന്നു തിരുവല്ലം എസ്എച്ച്ഒ ജെ. പ്രദീപ് അറിയിച്ചു. വീടിനു മുന്നില്‍ ഭീകരാന്തരീക്ഷം സൃഷ്ടിച്ച പ്രതി വിദേശിയുടെ നേരെ ഓലമടല്‍ എറിയുകയായിരുന്നു. മടല്‍ മുതുകില്‍ പതിച്ചതിനെ തുടര്‍ന്ന് വിദേശിക്ക് പരിക്കേല്‍ക്കുകയുണ്ടായി. തുടര്‍ന്നു വെട്ടാന്‍ ഓടിച്ചുവെങ്കിലും അദ്ദേഹം വീട്ടിനുള്ളില്‍ കയറി രക്ഷപ്പെടുകയായിരുന്നു. രോഷം തീര്‍ക്കാന്‍ അഖിലേഷ് ഗേറ്റിൽ വാക്കത്തികൊണ്ടു വെട്ടി കേടുവരുത്തുകയും ചെയ്തു. പോലീസെത്തി അഖിലേഷിനെ പിടികൂടാന്‍ ശ്രമിക്കുന്നതിനിടെ ജീപ്പിന്‍റെ ഗ്ലാസ് എറിഞ്ഞു തകര്‍ക്കുകയും ചെയ്തു. സ്ഥിരം ലഹരിക്കടിമയായ ഇയാൾ ഒഴിഞ്ഞ സ്ഥലങ്ങളിലെത്തി മദ്യപിക്കുക പതിവാണെന്നു പൊലീസ് പറഞ്ഞു. ഇയാള്‍ക്കെതിരെ നിലവില്‍ മോഷണക്കേസുകളുള്ളതായി പോലീസ് അറിയിച്ചു. എസ്ഐമാരായ നൗഷാദ്, തങ്കമണി, വിനോദ്, സിപിഒ മാരായ ഷിജു, സജന്‍, അരുണ്‍ എന്നിവരുള്‍പ്പെട്ട പോലീസ് സംഘം അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ലയൺസ് ക്ലബ് 318 എ ഡിസ്ട്രിക്ടിന്‍റെ വിവിധ പദ്ധതികളുടെ ഉദ്ഘാടനം

പേയാട്: തിരുവനന്തപുരം ലയൺസ് ക്ലബ് 318 എ ഡിസ്ട്രിക്റ്റ് നടപ്പാക്കുന്ന വിവിധ പദ്ധതികളുടെ ജില്ലാതല ഉദ്ഘാടനം പേയാട് കണ്ണശ മിഷൻ ഹൈസ്കൂളിൽ മന്ത്രി വി. ശിവൻകുട്ടി നിർവഹിച്ചു. ലയൺസ് ക്ലബ് നടപ്പാക്കുന്ന സെബർ സുരക്ഷ, ഇ-മാലിന്യ സംസ്കരണവും പരിസ്ഥിതി പുനഃസ്ഥാപനവും, സ്വയം പ്രതിരോധം, ഭക്ഷണക്രമവും പോഷകാഹാരങ്ങളും തുടങ്ങിയ പദ്ധതികളുടെ ഉദ്ഘാടനമാണ് നിർവഹിച്ചത്. പെഗാസിസ്‌ ക്ലബിന്‍റെയും റീജൺ 18 സോൺ എ യുടെയും നേതൃത്വത്തിൽ പേയാട് കണ്ണശ മിഷൻ സ്കൂളിലായിരുന്നു ഉദ്ഘാടന ചടങ്ങ് സംഘടിപ്പിച്ചത്. ലയൺ സുമൻ ചന്ദ്ര അധ്യക്ഷത വഹിച്ചു. കണ്ണശ മിഷൻ സ്കൂൾ മാനേജർ ആനന്ദ് കണ്ണശ സ്വാഗതം പറഞ്ഞു. ഡിസ്ട്രിക്റ്റ് ഗവർണർ ലയൺ ജെയിൻ സി ജോബ്, ഫസ്റ്റ് വൈസ് ഡിസ്ട്രിക്ട് ഗവർണർ എൻജിനീയർ അനിൽകുമാർ, സെക്കൻഡ് വൈസ് ഡിസ്ട്രിക്ട് ഗവർണർ ആർ.വി. ബിജു എന്നിവർ പങ്കെടുത്തു. റിട്ടേർഡ് ഐപിഎസ് ഓഫീസർ ഗോപിനാഥ്, ഡോ. അനിത മോഹൻ എന്നിവർ വിവിധ വിഷയങ്ങളിൽ ക്ലാസെടുത്തു. വിവിധ പ്രൊജക്റ്റുകളുടെ ഡിസ്ട്രിക്ട് സെക്രട്ടറിമാരായ അജിത് ജി. നായർ, അഡ്വ. ഗോപിനാഥ്, ഡോ. അനിത മോഹൻ, ലയൺ സനിൽ കുമാർ, ലയൺ ആരിഫ്, കണ്ണശ സ്കൂൾ ഹെഡ്മിസ്ട്രെസ് റിൻസി സെബാസ്റ്റ്യൻ, സ്കൂൾ പിടിഎ പ്രസിഡന്‍റ് അനൂപ് എന്നിവർ പങ്കെടുത്തു.

വന്യജീവി സംഘര്‍ഷം : ആദിവാസി മരണങ്ങള്‍ പരിശോധിക്കും: മന്ത്രി

പേരൂര്‍ക്കട: വന്യജീവി സംഘര്‍ഷങ്ങളില്‍ ആദിവാസികള്‍ കൂടുതലായി കൊല്ലപ്പെടുന്നതു സങ്കടകരമാണെന്നും വിഷയം സര്‍ക്കാര്‍ വിശദമായി പരിശോധിക്കുമെന്നും മന്ത്രി എ.കെ. ശശീന്ദ്രന്‍ പറഞ്ഞു. വഴുതക്കാട്ടെ വനം ആസ്ഥാനത്ത് നടന്ന ഗോത്രഭേരി സംസ്ഥാന ശില്‍പ്പശാല ഉദ്ഘാടനം ചെയ്യുകയായിരുന്നു അദ്ദേഹം. വനം വകുപ്പു നടപ്പാക്കിവരുന്ന പത്തിന മനുഷ്യ വന്യജീവി സംഘര്‍ഷ ലഘൂകരണ പദ്ധതികള്‍ വിജയം കണ്ടുതുടങ്ങിയിട്ടുണ്ട്. 2024-25 കാലഘട്ടത്തില്‍ 67 പേര്‍ വന്യജീവി സംഘര്‍ഷത്തില്‍ മരിച്ചതില്‍ 34 പേര്‍ പാമ്പുകടി മൂലവും 19 പേര്‍ ആനയുടെ മുന്നില്‍ അകപ്പെട്ടുമാണ്. എന്നാല്‍ ആനയുടെ മുമ്പില്‍പ്പെട്ടു മരിച്ച 19 പേരില്‍ 13 പേര്‍ ആദിവാസി വിഭാഗത്തില്‍ നിന്നുള്ളവരാണ്. ഓരോ മരണവും വേദനാജനകമാണെങ്കിലും 2021-22 വര്‍ഷത്തില്‍ 113 പേര്‍ കൊല്ലപ്പെട്ട സ്ഥാനത്താണ് ഇത്രയും കുറഞ്ഞ മരണ നിരക്ക് എന്നത് മനുഷ്യ വന്യജീവി സംഘര്‍ഷ ലഘൂകരണ പദ്ധതികളുടെ വിജയത്തെ കാണിക്കുന്നു. വിഷയത്തിന്‍റെ ഗൗരവം കണക്കിലെടുത്ത് ആദിവാസി സമൂഹത്തിന്‍റെക്കൂടി അറിവുകള്‍ ശേഖരിക്കുന്നതിനായാണ് ഗോത്രഭേരി എന്ന പേരില്‍ പരിപാടി ആസൂത്രണം ചെയ്തിട്ടുള്ളതെന്നും മന്ത്രി കൂട്ടിച്ചേര്‍ത്തു. അഡീ. പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ഡോ. പി. പുകഴേന്തി അധ്യക്ഷത വഹിച്ചു. ചീഫ് വൈല്‍ഡ് ലൈഫ് വാര്‍ഡന്‍ പ്രമോദ് ജി. കൃഷ്ണന്‍, അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍മാരായ ഡോ. എല്‍. ചന്ദ്രശേഖര്‍, ഡോ. ജെ. ജസ്റ്റിന്‍ മോഹന്‍, പട്ടികവര്‍ഗ വികസന വകുപ്പ് ഡയറക്ടര്‍ ഡോ. രേണുരാജ്, ഫോറസ്റ്റ് റിസര്‍ച്ച് ഇന്‍സ്റ്റിറ്റ്യൂട്ട് ഡയറക്ടര്‍ ഡോ. സി.എസ്. കണ്ണന്‍ വാര്യര്‍, കോവില്‍മല രാജാവ് രാമന്‍ രാജമന്നാന്‍, പെരിയാര്‍ ടൈഗര്‍ റിസര്‍വ് ഫീല്‍ഡ് ഡയറക്ടര്‍ പി.പി. പ്രമോദ് എന്നിവര്‍ പങ്കെടുത്തു.

കേരള ബാങ്കിന്‍റെ സാന്പത്തിക ക്രമക്കേട് ജെഎസ്എസ് സത്യഗ്രഹസമരം നടത്തി

തിരുവനന്തപുരം: കേരള ബാങ്കിന്‍റെ സാന്പത്തിക തട്ടിപ്പ് ഇഡി അന്വേഷിക്കണമെന്ന് ആവശ്യപ്പെട്ട് സെക്രട്ടേറിയറ്റിനു മുന്നിൽ ജെഎസ്എസിന്‍റെ നേതൃത്വത്തിൽ സത്യഗ്രഹ സമരം നടത്തി. ജെഎസ്എസ് സംസ്ഥാന സെക്രട്ടറി ബാലരാമപുരം സുരേന്ദ്രന്‍റെ നേതൃത്വത്തിലായിരുന്നു സത്യഗ്രഹ സമരം. കേരളത്തിലെ കൈത്തറി സംഘങ്ങളിൽ നിന്നും ബാങ്ക് കൂടുതലായി ഈടാക്കിയ മുഴുവൻ പണവും അടിയന്തിരമായി സംഘങ്ങൾക്ക് തിരികെ നൽകുക, ക്യാഷ് ക്രഡിറ്റ് വായ്പയിൽ ക്രമക്കേട് നടത്തിയ സിഇഒ, റീജിയണൽ മാനേജർ, പരിശോധന വിഭാഗം സൂപ്രണ്ട് എന്നിവർക്കെതിരേ നടപടി സ്വീകരിക്കുക, സാന്പത്തിക തട്ടിപ്പിൽ ഇഡി അന്വേഷണം നടത്തുക തുടങ്ങിയ ആവശ്യങ്ങൾ ഉന്നയിച്ചായിരുന്നു സത്യഗ്രഹം. മുൻ എംഎൽഎ രാജൻ ബാബു സമരം ഉദ്ഘാടനം ചെയ്തു. സംസ്ഥാന നേതാക്കളായ സഞ്ജീവ് സോമരാജൻ, കാട്ടുകുളം സലീം, കേരള കോണ്‍ഗ്രസ് ജേക്കബ് വിഭാഗം സംസ്ഥാന സെക്രട്ടറി കരുമം സുന്ദരേശൻ, ചെയർമാൻ എൻ. മോഹൻരാജ് തുടങ്ങിയവർ പ്രസംഗിച്ചു.

നിയന്ത്രണംതെറ്റിയ മിനിലോറി കടകളിലേക്ക് ഇടിച്ചു കയറി

നെയ്യാറ്റിൻകര : നിയന്ത്രണം തെറ്റിയ മിനി ലോറി പാതയോരത്തെ മൂന്നു കടകളിലിടിച്ച് കയറി. ഇന്നലെ പുലര്‍ച്ചെ മൂന്നോടെ കരമന -കളിയിക്കാവിള ദേശീയപാതയില്‍ നെയ്യാറ്റിന്‍കര കൃഷ്ണപുരം ഗ്രാമത്തിലെ ടോള്‍ ജംഗ്ഷനു സമീപത്തായിരുന്നു അപകടം. തമിഴ്നാട്ടിൽ നിന്നും ചാലയിലേക്ക് വാഴക്കുലകളുമായി പോയി തിരികെ വന്ന മിനി ലോറിയാണ് നിയന്ത്രണം തെറ്റി മൂന്നു കടകളിലേയ്ക്ക് ഇടിച്ചു കയറിയത്. അടുത്തടുത്തുള്ള സിമന്‍റ് വില്‍പ്പനകേന്ദ്രം, വാടകയ്ക്ക് സാധനങ്ങള്‍ നല്‍കുന്ന വ്യാപാരസ്ഥാപനം, തട്ടുകട എന്നിവയുടെ മുന്‍വശമാകെ തകര്‍ന്നു. തട്ടുകടയിലുണ്ടായിരുന്ന ഗ്യാസ് സിലിണ്ടര്‍, റഫ്രിജറേറ്റര്‍ എന്നിവയ്ക്ക് കേടുപാടുകള്‍ സംഭവിച്ചെങ്കിലും പൊട്ടിത്തെറിക്കാത്തത് വന്‍ദുരന്തം ഒഴിവാക്കിയതായി സമീപവാസികള്‍ പറഞ്ഞു. കടകളുടെ ഷട്ടർ ബിം ഉൾപ്പടെ തകർന്നു. അഞ്ചുലക്ഷത്തോളം രൂപയുടെ നഷ്ടമുണ്ടായതായി കടയുടമ രമേശന്‍ പറഞ്ഞു. അപകടത്തില്‍ ആളപായമില്ല. നെയ്യാറ്റിന്‍കര പോലീസ് കേസെടുത്തു.

പഴ്‌സ് മോഷണം; തമിഴ്‌നാട് സ്വദേശിനികള്‍ പിടിയില്‍

പേരൂര്‍ക്കട: ബസിലെ യാത്രക്കാരിയുടെ പണമടങ്ങിയ പഴ്‌സ് മോഷ്ടിച്ച തമിഴ്‌നാട് സ്വദേശിനികളെ പേരൂര്‍ക്കട പോലീസ് പിടികൂടി. ചെന്നൈ അടയാര്‍ സ്വദേശിനികളായ പാര്‍വതി (40), മഹേശ്വരി (33) എന്നിവരാണു പിടിയിലായത്. ചൊവ്വാഴ്ച വൈകുന്നേരം നാ ലോടെയായിരുന്നു സംഭവം. പേരൂര്‍ക്കടയില്‍നിന്ന് അമ്പലമുക്കുവഴി തിരുവനന്തപുരത്തേക്ക് സര്‍വീസ് നടത്തുകയായിരുന്ന കെഎസ്ആര്‍ടിസി ബസിലെ യാത്രക്കാരിയും പാലോട് സ്വദേശിനിയുമായ ഗിരിജയുടെ പഴ്‌സാണ് പ്രതികള്‍ കവര്‍ന്നത്. ബസ് അമ്പലമുക്കിലെത്തിയപ്പോഴാണ് പഴ്‌സ് നഷ്ടപ്പെട്ട വിവരം ഗിരിജ അറിയുന്നത്. അപ്പോഴേക്കും സ്ത്രീകള്‍ മുങ്ങിയിരുന്നു. പരാതിയെത്തുടര്‍ന്നു പോലീസ് നടത്തിയ അന്വേഷണത്തില്‍ കുടപ്പനക്കുന്ന് ഭാഗത്തുനിന്നാണ് ഇരുവരും പിടിയിലാകുന്നത്. പാര്‍വതി, മഹേശ്വരി എന്നിവര്‍ക്കെതിരേ തിരുവനന്തപുരം നഗരത്തിലെ വിവിധ പോലീസ് സ്റ്റേഷനുകളില്‍ കേസുകളുണ്ട്. അറസ്റ്റിലായ പ്രതികളെ കോടതിയില്‍ ഹാജരാക്കി.

വ്യാജ പ്രമാണംചമച്ച് വീടും വസ്തുവും തട്ടിയെടുത്ത രണ്ടുപേർ പിടിയില്‍

പേരൂര്‍ക്കട: വ്യാജ പ്രമാണവും വ്യാജ ആധാര്‍ കാര്‍ഡും ചമച്ചു വീടും വസ്തുവും തട്ടിയെടുത്ത രണ്ടുപേരെ മ്യൂസിയം പോലീസ് പിടികൂടി. കൊല്ലം പുനലൂര്‍ അലയമണ്‍ കോടാലി പച്ച ഓയില്‍ ഫാം പഴയ ഫാക്ടറിക്കു പിറകുവശം പുതുപ്പറമ്പില്‍ വീട്ടില്‍ മെറിന്‍ ജേക്കബ് (27), കരകുളം മരുതൂര്‍ ചീനിവിള പാലയ്ക്കാട്ടു വീട്ടില്‍ വസന്ത (76) എന്നിവരാണ് പിടിയിലായത്. കവടിയാര്‍ ജവഹര്‍ നഗറിലെ ഡോറ അസറിയ ക്രിപ്‌സിന്‍റെ ഉടമസ്ഥതയിലുള്ള വീടും സ്ഥലവുമാണ് പ്രതികള്‍ കൈക്കലാക്കിയത്. രേഖകള്‍ വ്യാജമായി ഉണ്ടാക്കി യഥാര്‍ഥ വസ്തു ഉടമസ്ഥനെ മാറ്റിയശേഷം പകരം രൂപസാദൃശ്യമുള്ള മറ്റൊരാളെ ചേര്‍ത്തായിരുന്നു തട്ടിപ്പു നടത്തിയത്. ഡോറയുടെ പേരിലുള്ള വീട് ജനുവരി മാസം മെറിന്‍ ജേക്കബ് എന്ന ആള്‍ക്ക് ഡോറയുടെ അറിവോ സമ്മതമോ ഇല്ലാതെ ധനനിശ്ചയം എഴുതിക്കൊടുക്കുകയും മെറിന്‍ ജേക്കബ് ആ മാസം തന്നെ ചന്ദ്രസേനന്‍ എന്ന ആള്‍ക്ക് വസ്തു വിലയാധാരം എഴുതി കൊടുക്കുകയുമായിരുന്നു. ഡോറ അമേരിക്കയില്‍ താമസിച്ചുവരുന്ന കാലത്താണ് ഈ സംഭവം ഉണ്ടാകുന്നത്. ഡോറയുടെ വളര്‍ത്തുമകളാണ് മെറിന്‍ ജേക്കബ് എന്നു വരുത്തിത്തീര്‍ത്താണ് വസ്തുവിന്‍റെ പ്രമാണം നടത്തിയത്. വ്യാജ പ്രമാണം, വ്യാജ ആധാര്‍ കാര്‍ഡ് എന്നിവ പോലീസ് കണ്ടെത്തുകയും രജിസ്ട്രാര്‍ ഓഫീസിലെ റിക്കാർഡുകൾ പരിശോധിക്കുകയും ചെയ്തു. അതിലെ വിരലടയാളങ്ങള്‍ ഫിംഗര്‍പ്രിന്‍റ് ബ്യൂറോയുടെ സഹായത്തോടെ പരിശോധന നടത്തിയപ്പോഴാണ് പ്രതികളിലേക്ക് അന്വേഷണം എത്തിയത്. കേസുമായി ബന്ധപ്പെട്ട് കൂടുതല്‍ പ്രതികള്‍ ഉള്ളതായി പോലീസ് അറിയിച്ചു. അസിസ്റ്റന്‍റ് കമ്മീഷണര്‍ സ്റ്റ്യുവര്‍ട്ട് കീലറിന്‍റെ നേതൃത്വത്തില്‍ മ്യൂസിയം സിഐ വിമല്‍, എസ്ഐമാരായ വിപിന്‍, ബാലസുബ്രഹ്‌മണ്യന്‍, സിപിഒമാരായ ഉദയന്‍, രഞ്ജിത്ത്, ഷിനി, ഷംല, അരുണ്‍, അനൂപ്, സാജന്‍, പത്മരാജ് എന്നിവര്‍ ഉള്‍പ്പെട്ട സംഘമാണ് പ്രതികളെ പിടികൂടിയത്. ഇവരെ കോടതിയില്‍ ഹാജരാക്കി.

കെഎസ്ആർടിസി റിട്ട. സ്റ്റേഷൻ മാസ്റ്ററെ മരിച്ചനിലയിൽ കണ്ടെത്തിയ സംഭവം: ഭാര്യാ സഹോദരൻ അറസ്റ്റിൽ

നെടുമങ്ങാട്: കെഎസ്ആർടിസി റിട്ട. സ്റ്റേഷൻ മാസ്റ്ററെ വീട്ടിനുള്ളിൽ മരിച്ച നിലയിൽ കണ്ടെത്തിയ സംഭവത്തിൽ ഭാര്യാ സഹോദരൻ ജെ. ഷാജഹാനെ (52) നെടുമങ്ങാട് പോലീസ് അറസ്റ്റ് ചെയ്തു. നെട്ടിറച്ചിറ ആസിഫ് മൻസിലിൽ അഷറഫി (68)നെയാണ് ഇക്കഴിഞ്ഞ ശനിയാഴ്ച പുലർച്ചെ മരിച്ച നിലയിൽ കണ്ടെത്തിയത്. തൃശൂർ മെഡിക്കൽ കോളജിൽ ബിരുദാനന്തര ബിരുദ മെഡിക്കൽ വിദ്യാർഥിയായ ഏക മകൻ ഡോ. ആസിഫിനൊപ്പം താമസിച്ചിരുന്ന അഷറഫ് ഒരാഴ്ച മുൻപാണ് നെട്ടിറച്ചിറയിലെ കുടുംബ വീട്ടിൽ എത്തിയത്. ഭാര്യ മാജിദ രണ്ടു വർഷം മുൻപ് മരിച്ചതിനാൽ അഷറഫ് ഒറ്റക്കായിരുന്നു കുടുംബ വീട്ടിൽ താമസം. കുടുംബ വീട്ടിലെത്തുമ്പോഴാണ് ഭാര്യക്കു കുടുംബ ഓഹരിയായി കിട്ടിയതെന്നു പറയുന്ന ഭൂമിയിൽനിന്നും അഷറഫ് ആദായമെടുത്തിരുന്നത്. പതിവുപോലെ ഇത്തവണയും കഴിഞ്ഞ തിങ്കളാഴ്ച ആദായമെടുക്കാനായി പണിക്കാരനേയും കൂട്ടി പറമ്പിലെത്തിയ അഷറഫിനെ സമീപത്തു താമസിക്കുന്ന ഭാര്യാ സഹോദരൻ ജെ. ഷാജഹാൻ തന്‍റെ സ്ഥലത്തുനിന്ന് ആദായമെടുക്കരുതെന്നു പറഞ്ഞു വിലക്കുകയായിരുന്നു. ഇതു വകവയ്ക്കാതെ പണിക്കാരനൊപ്പം മുന്നോട്ടു നീങ്ങിയ അഷറഫിനെ ഷാജഹാൻ കൈയേറ്റം ചെയ്യുകയും ചെയ്തു. പരിക്കേറ്റ അഷറഫ് നെടുമങ്ങാട് താലൂക്കു ആശുപത്രിയിൽ ചികിത്സ തേടുകയും പോലീസിനു പരാതി നൽകുകയും ചെയ്തിരുന്നു. എന്നാൽ കഴിഞ്ഞ ദിവസം പുലർച്ചെ അഷറഫിനെ വീടിനുള്ളിൽ മരിച്ച നിലയിൽ കണ്ടെത്തുകയായിരുന്നു. പോസ്റ്റ്മോർട്ടം റിപ്പോർട്ടിൽ കാലിനേറ്റ അടിയിൽ നിന്നുമുള്ള ആഘാതത്തിലാണ് മരണം സംഭവിച്ചതെന്നു സ്ഥിരീകരിച്ചു. കാലിലേറ്റ പരിക്കുമൂലം പ്രമേഹ രോഗിയായ അഷ്റഫിനു രക്തസമ്മർദം കൂടിയാണു മരണം സംഭവിച്ചതെന്നും വ്യക്തമായി. ഇതിന്‍റെ അടിസ്ഥാനത്തിലാണു നെടുമങ്ങാട് പോലീസ് പ്രതിയെ അറസ്റ്റ് ചെയ്തത്. ചോദ്യം ചെയ്തതിൽ തർക്കമുണ്ടായതായും അഷറഫിനെ മർദിച്ചതായും പ്രതി സമ്മതിച്ചതായി പോലീസ് പറഞ്ഞു.

പെരിങ്ങമല ഇക്ബാൽ കോളജിൽ എസ്എഫ്ഐ, കെഎസ്‌യു സംഘർഷം

പാലോട്: പെരിങ്ങമല ഇക്ബാൽ കോളജിൽ എസ്എഫ് ഐ, കെഎസ്‌യു സംഘട്ടനം. ഇരു വിഭാഗങ്ങളും പരസ്പരം കൊടിമരങ്ങളും കൊടി തോരണങ്ങളും നശിപ്പിച്ചു. പാലോട് പോലീസെത്തി സംഘട്ടനം നിയന്ത്രിച്ചു. സംഭവത്തെ തുടർന്നു കോളജിന് അവധി നൽകി. ഡിഗ്രി പ്രവേശനോത്സവത്തിന്‍റെ ഭാഗമായി കെഎസ്‌യു സ്ഥാപിച്ചിരുന്ന കൊടികൾ കാണാതായതാണ് സംഘർഷത്തിനു കാരണമായത്. കൊടികൾ എസ്എഫ്ഐ എടുത്തുമാറ്റിയെന്നാരോപിച്ചു എസ്എഫ്ഐയുടെ കൊടികൾ പരസ്യമായി കെഎസ്‌യു നശിപ്പിച്ചു. ഇതിനെ തുടർന്ന് കെഎസ്‌യുവിന്‍റെ കൊടിമരം എസ്എഫ്ഐയും നശിപ്പിച്ചു. ഇതിനു പിന്നാലെ ഇരു വിഭാഗങ്ങളും ഏറ്റുമുട്ടി. തുടർന്ന് എസ്എഫ്ഐയുടെ കൊടിമരത്തിനു പോലീസ് കാവൽ ഏർപ്പെടുത്തി. എന്നാൽ പോലീസ് കാവലിനെ അവഗണിച്ച് എസ്എഫ്ഐയുടെ കൊടിമരം കെഎസ്‌യു വീണ്ടും നശിപ്പിച്ചു. ഇതിനെ തുടർന്നു പോലീസ് ലാത്തിച്ചാർജ് നടത്തി. സംഭവത്തിൽ കെഎസ്‍യു പ്രവർത്തകർക്കും പോലീസിനും പരിക്കുണ്ട്. ഇന്ന് ഇരു കൂട്ടരെയും സമാധാന ചർച്ചയ്ക്ക് വിളിച്ചിട്ടുണ്ട്. ഇതിനുശേഷം വേണ്ട നടപടി സ്വീകരിക്കുമെന്നു നെടുമങ്ങാട് ഡിവൈഎസ്പി കെ.എസ്. അരുൺ അറിയിച്ചു.

ട്രിമ - 2025 മാനേജ്മെന്‍റ് കണ്‍വൻഷൻ തിരുവനന്തപുരത്ത്

തിരുവനന്തപുരം: ട്രിവാൻഡ്രം മാനേജ്മെന്‍റ് അസോസിയേഷൻ (ടിഎംഎ) സംഘടിപ്പിക്കുന്ന ട്രിമ 2025 വാർഷിക മാനേജ്മെന്‍റ് കണ്‍വൻഷൻ 30, 31 തീയതികളിൽ തിരുവനന്തപുരത്ത് നടക്കും. ടിഎംഎയുടെ 40-ാം വാർഷികത്തോടനുബന്ധിച്ച് ഹോട്ടൽ ഒ ബൈ താമരയിൽ നടക്കുന്ന ഈ വർഷത്തെ മാനേജ്മെന്‍റ് കണ്‍വൻഷന്‍റെ പ്രമേയം "ലീഡർഷിപ്പ് ഫോർ എമർജിംഗ് വേൾഡ് നാവിഗേറ്റിംഗ് ടെക്നോളജി, എന്‍റർപ്രണർഷിപ്പ് ആൻഡ് സോഷ്യൽ വെൽബീയിംഗ്’ എന്നതാണ്. സമ്മേളനത്തിന്‍റെ ഓണ്‍ലൈൻ ഡെലിഗേറ്റ് രജിസ്ട്രേഷൻ ആരംഭിച്ചു. 1985 ൽ സ്ഥാപിതമായ ടിഎംഎ മാനേജ്മെന്‍റ് മികവ് പ്രോത്സാഹിപ്പിക്കുന്നതിനും സുസ്ഥിര വികസനം വളർത്തുന്നതിനും പ്രതിജ്ഞാബദ്ധരായ സിഇഒമാർ, വ്യവസായ പ്രമുഖർ, നയരൂപകർത്താക്കൾ എന്നിവർ ഉൾപ്പെടുന്ന ഇന്ത്യയിലെ മുൻനിര മാനേജ്മെന്‍റ് അസോസിയേഷനുകളിൽ ഒന്നാണ്. അഖിലേന്ത്യാ മാനേജ്മെന്‍റ് അസോസിയേഷനിൽ (എഐഎംഎ) ടിഎംഎ അഫിലിയേറ്റ് ചെയ്തിട്ടുണ്ട്. കേരളത്തെ ബാധിക്കുന്ന നിർണായക പ്രശ്നങ്ങൾ അഭിസംബോധന ചെയ്യുന്നതിനുള്ള വേദിയായി ട്രിമ 2025 മാറും. മാനേജ്മെന്‍റ്, വ്യവസായ പ്രമുഖർ, നയരൂപീകരണഅക്കാദമിക് വിദഗ്ധർ എന്നിവർ സമ്മേളനത്തിൽ പങ്കെടുക്കും. ഓണ്‍ലൈൻ രജിസ്ട്രേഷനും വിശദാംശങ്ങൾക്കും: : https:/t/rima.conferenceprime. com/auth/registerസമ്മേളനത്തിന്‍റെ ഭാഗമായി കന്പനികളിൽ നിന്നും കോർപറേറ്റുകളിൽ നിന്നും ടിഎംഎസിഎസ്ആർ അവാർഡിനും സ്റ്റാർട്ടപ്പുകളിൽനിന്ന് ടിഎംഎ അദാനി സ്റ്റാർട്ടപ്പ് അവാർഡിനും അപേക്ഷ ക്ഷണിച്ചിരുന്നു.

എസ്എഫ്‌ഐ, ഡിവൈഎഫ്‌ഐ രാജ്ഭവന്‍ മാര്‍ച്ചില്‍ സംഘര്‍ഷം

തിരുവനന്തപുരം: കേരള സര്‍വകലാശാല സെനറ്റ് ഹാളിലെ ഭാരതാംബ ചിത്ര വിവാദത്തില്‍ രജിസ്ട്രാര്‍ ഡോ. കെ.എസ്. അനില്‍കുമാറിനെ വൈസ് ചാന്‍സലര്‍ സസ്‌പെന്‍ഡ് ചെയ്തതില്‍ പ്രതിഷേധിച്ച് എസ്എഫ്‌ഐ, ഡിവൈഎഫ്‌ഐ പ്രവര്‍ത്തകര്‍ നടത്തിയ രാജ്ഭവന്‍ മാര്‍ച്ചില്‍ സംഘര്‍ഷം. പ്രവര്‍ത്തകരും പോലീസും തമ്മില്‍ ഉന്തും തള്ളുമുണ്ടായി. ഒടുവില്‍ പ്രവര്‍ത്തകരെ പിരിച്ചു വിടാന്‍ പോലീസ് ജലപീരങ്കി പ്രയോഗിച്ചു. രജിസ്ട്രാറെ സസ്‌പെന്‍ഡ് ചെയ്ത വിസിയുടെ നടപടി ഗവര്‍ണറുടെ ആര്‍എസ്എസ് താത്പര്യങ്ങള്‍ സംരക്ഷിക്കുന്നതിന്‍റെ ഭാഗമാണെന്നാരോപിച്ചാണ് എസ്എഫ്‌ഐ, ഡിവൈഎഫ്‌ഐ പ്രവര്‍ത്തകര്‍ രാജ്ഭവന്‍ മാര്‍ച്ചുമായി രംഗത്തെത്തിയത്. മാര്‍ച്ച് തടയുന്നതിനായി വന്‍ പോലീസ് സന്നാഹം ക്യാമ്പ് ചെയ്തിരുന്നു. വെള്ളയമ്പലത്തിനു സമീപം ബാരിക്കേഡുകള്‍ സ്ഥാപിച്ച് മാര്‍ച്ച് തടഞ്ഞു. തുടര്‍ന്ന് പോലീസും പ്രവര്‍ത്തകരും തമ്മില്‍ ഉന്തും തള്ളും വാക്കേറ്റവും ഉണ്ടായി. കൂടുതല്‍ പോലീസ് എത്തി സ്ഥിതിഗതികള്‍ നിയന്ത്രിച്ചു.

കണ്ടല ഫാർമസി കോളജിൽ സംഘർഷം; കോളജ് അടച്ചു

വിദ്യാർഥിയെയും മാതാവിനെയും ചെയർമാൻ ആക്രമിച്ചെന്ന് ആരോപണം കാട്ടാക്കട: കണ്ടല കേരള അക്കാഡമി ഓഫ് ഫാർമസി കോളജിൽ വിദ്യാർഥികളുടെ ആവശ്യങ്ങൾക്ക് പരിഹാരം കാണാൻ പഞ്ചായത്ത് അംഗങ്ങൾ ഉൾപ്പെടെ യുള്ളവരുടെ സാന്നിധ്യത്തിൽ വിളിച്ചു ചേർത്ത യോഗത്തിൽ സംഘർഷം. കോളജിലെ വിഷയങ്ങൾ സംസാരിക്കവേ ചെയർമാൻ വിദ്യാർഥിയുടെ മാതാവിന്‍റെ കൈപിടിച്ച് തിരിച്ചുന്നും വിദ്യാർഥിയെ ചവിട്ടുകയും ഷൂ എടുത്തെറിയാൻ തുനിഞ്ഞെന്നും ആരോപണം. കാട്ടാക്കട ഡിവൈഎസ്പി ഇരിക്കുന്ന വേദിയിൽ ആയിരുന്നു ചെയർമാന്‍റെ അതിക്രമം. ഇതോടെയാണ് സംഘർമുണ്ടായത്. ഇതിനെ തുടർന്നു കോളജ് കാമ്പസിനു പുറത്തുണ്ടായിരുന്ന കെഎസ്‌യു പ്രവർത്തകർ കോളജിനുള്ളിലേക്ക് ഇരച്ചുകയറി. പി ന്നീട് പ്രവർത്തകരും പോലീസും തള്ളലും ഉണ്ടായി. ഇതിനിടെ വിദ്യാർഥിയും മാതാവും പോലീസിനു പരാതിയതിന്‍റെ അടിസ്ഥാനത്തിൽ ചെയർമാനെ കസ്റ്റഡിയിലെടുക്കാൻ തീരുമാനമായി. ചെയർമാനെ വിലങ്ങുവച്ചുതന്നെ കൊണ്ടുപോകണമെന്നും ആർഡി ഒ സ്ഥലത്തെത്തി തങ്ങളുടെ പ്രശ്‌നങ്ങൾക്കു പരിഹാരം കാണാതെ ചെയർമാനെ കൊണ്ടുപോകാൻ സമ്മതിക്കില്ലെന്നും ചൂണ്ടിക്കാട്ടി വിദ്യാർഥികൾ വാതിലിനു മുന്നിൽ കുത്തിയിരുന്ന് പ്രതിഷേധിച്ചു. വൈകുന്നേരത്തോടെ മൂന്നു വിദ്യാർഥിനികൾ കെട്ടിടത്തിനു മുകളിൽ കയറി ആത്മഹത്യാ ഭീഷണിമുഴക്കി. വിദ്യാർഥികളും പോലീസുകാരും ഇവരെ അനൂനയിപ്പിക്കാൻ ശ്രമിച്ചെങ്കിലും ഇവർ കൂട്ടാക്കിയില്ല. ആർഡിഒ എത്തി പ്രശ്‌നപരിഹാരം കണ്ടില്ലെങ്കിൽ താഴേക്കു ചാടുമെന്നും വിദ്യാർഥികൾ പറഞ്ഞു. ഇതോടെ വീണ്ടും വലിയ സംഘർഷവസ്ഥയുയായി. തുടർന്നു കാട്ടാക്കട തഹസിൽദാർ ശ്രീകുമാർ സ്ഥലത്തെത്തി ഡിവൈഎസ്പിയുടെ സാന്നിധ്യത്തിൽ ചെയർമാനുമായി സംസാരിച്ചു വിദ്യാർഥികളുടെ പ്രശ്‌നങ്ങൾക്കു പരിഹാരം കാണാമെന്നു പറഞ്ഞു.ഇതോടെ ചെയർമാൻ അയഞ്ഞു. തങ്ങളുടെ ആവശ്യങ്ങൾക്ക് തീരുമാനം ഉണ്ടാക്കാമെന്നറിഞ്ഞതോടെ വിദ്യാർഥിനികൾ താഴെയിറങ്ങി. പ്രശ്‌നപരിഹാരം കാണുന്നതുവരെ കോളജ് അടച്ചിടാമെന്നു കോളജ് ചെയർമാൻ മുഹമ്മദ് ഷംസീർ ഡിവൈഎസ്പിക്ക് രേഖാമൂലം ഉറപ്പ് നൽകി. കോളജിനെതിരെയുള്ള പരാതികളെക്കുറിച്ചു വിവിധ വകുപ്പുകൾ ഏകോപിപ്പിച്ചുകൊണ്ടുള്ള അന്വേഷണം നടത്തി പരിഹാരം കാണാമെന്നും തഹസിൽദാർ ശ്രീകുമാർ ചർച്ചയ്ക്കുശേഷം വിദ്യാർഥികൾക്ക് ഉറപ്പു നൽകി.ശേഷം ചെയർമാനെ പോലീസ് കസ്റ്റഡിയിലെടുത്ത് സ്റ്റേഷനിലേക്കു കൊണ്ടുപോയി. രാത്രി ഏഴര മണിയോടെ പ്രതിഷേധങ്ങൾ അവസാനിച്ചു. ബുധനാഴ്ച ഉച്ചയോടെ യാണു യോഗം ആരംഭിച്ചത്.യൂണിവേഴ്‌സിറ്റി നിഷ്‌കർഷിച്ചിട്ടുള്ള ഫീസിനു പുറമെ പുതുതായി അഡ്മിഷൻ എടുത്ത കുട്ടികളിൽനിന്ന് അധിക തുക നൽകാൻ ആവശ്യപ്പെടുന്നുവെന്നാരോപിച്ചു ഇക്കഴിഞ്ഞ ദിവസം കോളജ് മാനേജരെ വിദ്യാർത്ഥികൾ ഗേറ്റിൽ തടഞ്ഞു പ്രതിഷേധിച്ചിരുന്നു. തുടർന്ന് കാട്ടാക്കട ഡിവൈഎസ്പി റാഫിയുടെ സാന്നിധ്യത്തിൽ നടന്ന ചർച്ചയിലാണ് ബുധനാഴ്ച പ്രശ്‌ന പരിഹാരത്തിന് യോഗം ചേരാൻ തീരുമാനിച്ചത്. ഈ യോഗത്തിനിടെയാണ് ചെയർമാൻ രക്ഷിതാവിനെയും ഇവരുടെ മകനെയും കൈയേറ്റം ചെയ്തതും തുടർന്നുള്ള സംഭവ വികാസങ്ങൾ ഉണ്ടായതും.

ഐഡി കാർഡ് വിതരണം ചെയ്തു

നെടുമങ്ങാട്: ഐഎൻടിയുസി പൂവത്തൂർ മണ്ഡലം കമ്മിറ്റിയുടെ ആഭിമുഖ്യത്തിൽ രാഷ്ട്രീയ വിശദീകരണ യോഗം നടത്തി. മണ്ഡലം പ്രസിഡന്‍റ് പ്രസന്നകുമാരൻ നായർ അധ്യക്ഷത വഹിച്ചു. കെപിസിസി സെക്രട്ടറി ബി.ആർ.എം ഷഫീർ ഉദ്ഘാടനം ചെയ്തു. ഐഎൻടിയുസി ജില്ലാ പ്രസിഡന്‍റ് വി.ആർ. പ്രതാപൻ പുതിയ അംഗങ്ങൾക്ക് ഐഡന്‍റിറ്റി കാർഡ് വിതരണം ചെയ്തു. ഡിസിസി സെക്രട്ടറി നെട്ടറച്ചിറ ജയൻ, കോൺഗ്രസ് ബ്ലോക്ക് പ്രസിഡന്‍റ് ടി. അർജുനൻ, അഡ്വ. എസ്. അരുൺകുമാർ, നൗഷാദ് ഖാൻ, ചിറമുക്ക് റാഫി, പൂങ്കുംമൂട് അജി, ജെറിൻ ജയൻ, വള്ളക്കടവ് സുധീർ, എസ്.പി. സുന്ദർ എന്നിവർ സംസാരിച്ചു. പുതുതായി യൂണിയനിൽ ചേർന്നവർക്ക് ഐഡന്‍റിറ്റി കാർഡ് നൽകി. മുതിർന്ന കോൺഗ്രസ് യൂണിയൻ പ്രവർത്തകരെയും എസ്എസ്എൽസി പ്ലസ് ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് നേടിയ വിദ്യാർഥികളെയും ആദരിച്ചു. വിദ്യാർഥികൾക്കു പഠനോപകരണങ്ങൾ വിതരണം ചെയ്തു.

പ്ലാസ്റ്റിക് മാലിന്യം കത്തിക്കൽ: പ്രതിഷേധ ധര്‍ണ നടത്തി

വെള്ളറട: ആറാട്ടുകുഴിവാര്‍ഡില്‍ ഈയ്യപ്പൊറ്റയില്‍ അനധികൃത പാറഖനനത്തിനും, പ്ലാസ്റ്റിക് മാലിന്യം കത്തിക്കുന്നതിനുമെതിരെ പ്രതിഷേധം. വെള്ളറട പഞ്ചായത്ത് അധികൃതരുടെ അലംഭാവത്തില്‍ പ്രതിഷേധിച്ച് ബിജെപി വെള്ളറട പഞ്ചായത്ത് കമ്മിറ്റിയുടെ നേതൃത്വത്തില്‍ പഞ്ചായത്തിനു മുന്നില്‍ പ്രതിഷേധ ധര്‍ണ നടത്തി. ബിജെപി തിരുവനന്തപുരം സൗത്ത് ജില്ലാ ജനറല്‍ സെക്രട്ടറി ബിജു ബി. നായര്‍ ധര്‍ണ ഉദ്ഘാടനം ചെയ്തു. ബിജെപി വെള്ളറട ഏരിയാ പ്രസിഡന്‍റ് സുരേഷ് കുമാര്‍ അധ്യക്ഷത വഹിച്ചു. ബിജെപി സൗത്ത് ജില്ലാ വൈസ് പ്രസിഡന്‍റ് മുളയറ രതീഷ് മുഖ്യ പ്രഭാഷണം നടത്തി. ജില്ലാ സെക്രട്ടറി സ്‌റ്റെഫിന്‍ സ്റ്റീഫന്‍, വെള്ളറട മണ്ഡലം പ്രസിഡന്‍റ് അഖില്‍, ജനറല്‍ സെരകട്ടറി ചൂണ്ടിക്കല്‍ ശ്രീകണ്ഠന്‍, വൈസ് പ്രസിഡന്‍റ് പത്മകുമാര്‍, കിളിയൂര്‍ ഏരിയാ പ്രസിഡന്‍റ് പ്രദീപ്, മണ്ഡലം സെക്രട്ടറിമാരായ അമ്യത പ്രദീപ്, സുമോദ്, വാര്‍ഡ് മെമ്പര്‍ അഖില മനോജ്, വിനുകുമാര്‍, രതീഷ് കുമാര്‍, കാര്‍ത്തികേയന്‍, ശിവകുമാര്‍ തുടങ്ങിയവര്‍ പ്രസംഗിച്ചു.

മുക്കോലയില്‍ പൈപ്പ്‌പൊട്ടി കുടിവെള്ളം പാഴാകുന്നു

പേരൂര്‍ക്കട: വാട്ടര്‍ അഥോറിറ്റി പിടിപി നഗര്‍ സെക്‌ഷന്‍ പരിധിയിലെ മുക്കോലയില്‍ പൈപ്പ് പൊട്ടി ജലം പാഴാകുന്നു. ഒരാഴ്ചയായി റോഡിലൂടെ ജലം പാഴാകുന്നുണ്ടെന്നും അധികൃതരെ അറിയിച്ചിട്ട് നടപടിയുണ്ടാകുന്നില്ലെന്നുമാണ് നാട്ടുകാരുടെ പരാതി. ദിനംപ്രതി ആയിരണക്കണക്കിന് ലിറ്റര്‍ ജലമാണ് റോഡിലൂടെ പാഴായിക്കൊണ്ടിരിക്കുന്നത്. പിടിപി നഗറില്‍നിന്നു നെട്ടയം വഴി മുക്കോല, കാച്ചാണി ഭാഗങ്ങളിലേക്കു ശുദ്ധജലം വിതരണം ചെയ്യുന്ന പിവിസി ലൈനിലാണ് ചോര്‍ച്ചയുള്ളതെന്നാണു സൂചന. ആഴത്തില്‍ കടന്നുപോകുന്ന പൈപ്പ് കണ്ടെത്തുന്നതിന് ജെസിബി ഉപയോഗിച്ച് റോഡ് കുഴിച്ചാല്‍ മാത്രമേ സാധിക്കൂ. പൊതുവെ ശുദ്ധജലക്ഷാമമുള്ള പ്രദേശങ്ങളാണ് വട്ടിയൂര്‍ക്കാവ് മണ്ഡലത്തിലെ മുക്കോലയും കാച്ചാണിയും. പിവിസി ലൈനുകള്‍ ഒരു മീറ്റര്‍ മുതല്‍ ഒന്നരമീറ്റര്‍ വരെ ആഴത്തിലാണ് കടന്നുപോകുന്നത്. പൈപ്പ് പൊട്ടിയിട്ട് ദിവസങ്ങള്‍ കഴിഞ്ഞിട്ടും പിടിപി സെക്‌ഷന്‍ അധികൃതര്‍ ഇതുവരെയും യാതൊരു നടപടിയും സ്വീകരിച്ചിട്ടില്ല.

വനപാലകനെ കൈയേറ്റം ചെയ്ത പ്രതി അറസ്റ്റിൽ

വിതുര: പൊന്മുടി യാത്രക്കിടയിൽ വനപാലകനെ കൈയേറ്റം ചെയ്ത പ്രതിയെ വിതുര പോലീസ് അറസ്റ്റ് ചെയ്തു. വെള്ളറട കിളിയൂർ കാരുണ്യ ഭവനിൽ സുജിയാണ് പോലീസിന്‍റെ പിടിയിലായത്. കഴിഞ്ഞദിവസം സുഹൃത്തുക്കളുമൊത്ത് ട്രാവലർ വാഹനത്തിൽ പൊന്മുടിയിൽ പോകുന്നതിനിടയിൽ കാട്ടിനുള്ളിലെ മൃഗങ്ങൾക്കു ശല്യം ഉണ്ടാവുന്ന രീതിയിൽ വാഹനത്തിലെ സൗണ്ട് സിസ്റ്റം ഉപയോഗിച്ച് വലിയ ശബ്ദം പുറപ്പെടുവിച്ചു. കൂടാതെ പൊന്മുടിയിൽ പോയി തിരിച്ചു വരുന്നവഴി ഗോൾഡൻ വാലി ചെക്ക് പോസ്റ്റിൽ എത്തിയപ്പോൾ ഡ്യൂട്ടിയിൽ ഉണ്ടായിരുന്ന ബീറ്റ് ഫോറസ്റ്റ് ഓഫീസറെ കൈയേറ്റം ചെയ്യുകയും ചെയ്തു. തുടർന്നു വിതുര പോലീസ് സ്ഥലത്തെത്തി ഇയാളെ അറസ്റ്റ് ചെയ്തു. ഇയാളുടെ പേരിൽ വെള്ളറട സ്റ്റേഷനിൽ നിരവധി കേസുകൾ നിലവിലുണ്ടെന്നു പോലീസ് അറിയിച്ചു.

ആനാട് പഞ്ചായത്തിൽ പൂവനി പുഷ്പ കൃഷിക്ക്‌ തുടക്കമായി

നെടുമങ്ങാട്: ആനാട് പഞ്ചായത്ത് വാർഷിക ജനകീയാസൂത്രണ പദ്ധതിയിൽ ഉൾപ്പെടുത്തി വനിതാ ഗ്രൂപ്പുകൾക്കായി കൃഷിഭവൻ മുഖേന നടപ്പിലാക്കുന്ന "പൂവനി" പദ്ധതിയുടെ പഞ്ചായത്തുതല നടീൽ ഉദ്ഘാടനം പഞ്ചായത്ത് പ്രസിഡന്‍റ് എൻ. ശ്രീകല നിർവഹിച്ചു. ആനാട് ബഡ്‌സ് സ്കൂളിൽ നടന്ന ചടങ്ങിൽ വൈസ് പ്രസിഡന്‍റ് പാണയം നിസാർ അധ്യക്ഷത വഹിച്ചു. കൃഷി ഓഫീസർ വി.വി ജിതിൻ പദ്ധതി വിശദീകരണം നടത്തി. പഞ്ചായത്ത് സ്ഥിരം സമിതി അധ്യക്ഷരായ എസ്. ഷൈലജ, സജി വേങ്കവിള, കെ. ലീലാമ്മ, ഭരണ സമിതി അംഗങ്ങളായ എ.എസ്. ഷീജ, അജയകുമാർ, വികസന സമിതി അംഗങ്ങളായ ടി. പദ്മകുമാർ, ഹുമയൂൺ കബീർ, പി. ഗോപകുമാർ, ഗിരീഷ് ബി. നായർ, കെ. പ്രജേഷ് കുമാർ, എൻ. ബേബി, വിനീത, കൃഷി അസിസ്റ്റന്‍റ് രമ്യ തുടങ്ങിയവർ സംസാരിച്ചു. ബഡ്സ് സ്കൂളിലെ വിദ്യാർഥികളും അധ്യാപകരും, ജീവനക്കാരും, രക്ഷിതാക്കളും പരിപാടിയുടെ ഭാഗമായി. ഈ വർഷം ഇരുപത്തഞ്ചിലധികം ഗ്രൂപ്പുകളുടെ പങ്കാളിത്തത്തോടെ ഏഴര ഏക്കറിലായാണ് പൂവനി പദ്ധതി പ്രകാരം പഞ്ചായത്തിൽ ഓണക്കാല പുഷ്പകൃഷി ഒരുക്കുന്നത്.

വിപിഎംഎച്ച്എസിലെ 1983-84 ബാച്ചിലെ വിദ്യാർഥികൾ ഒത്തുചേർന്നു

വെള്ളറട: വെള്ളറട വിപിഎംഎച്ച്എസിലെ 1983 -1984 എസ്എസ്എല്‍. വിദ്യാര്‍ഥികളുടെ ഒത്തുചേരല്‍ 'ബാക്ക് ടു ബഞ്ച്' നടന്നു. സ്‌കൂള്‍ സ്ഥാപകനായ വേലായുധ പണിക്കര്‍ സ്മാരകത്തില്‍ പുഷ്പഹാരം ചാര്‍ത്തിയാണ് ചടങ്ങുകൾ ആരംഭിച്ചത്. സ്‌കൂള്‍ ഓഡിറ്റോറിയത്തില്‍ നടന്ന സമ്മേളനത്തില്‍ മുരളി വെള്ളറട അധ്യക്ഷത വഹിച്ചു. സ്‌കൂള്‍ മാനേജറും അധ്യാപകനുമായ കെ.വി. രാജേന്ദ്രന്‍ ഉദ്ഘാടനം ചെയ്തു. ഈ വര്‍ഷം സര്‍വീസില്‍നിന്നും വിരമിച്ചവര്‍ക്ക് മെമെന്‍റോ നല്‍കി ആശംസകള്‍ നേര്‍ന്നു. വിദ്യാഭ്യാസത്തില്‍ മികവ് തെളിയിച്ചവർക്കു മെമെന്‍റോ നല്‍കി. സുരേഷ് ആനപ്പാറ സ്വാഗതവും മണലി സ്റ്റാന്‍ലി നന്ദിയും രേഖപെടുത്തി. ഒത്തുചേരലിനു ഡോ. ജയശ്രി, ഷൈല ഫാത്തിമ, സുനില്‍കുമാര്‍, അനില്‍കുമാര്‍, ക്രിസ്തുദാസ്, മനു ഗോകുല്‍, സുരേഷ് ചെമ്മണ്ണുവിള, ശ്രീകല, കെ.എസ്. ബീന, ഗിരിജകുമാരി, സുജിത്ത്, ഷാജി എന്നിവര്‍ ഉള്‍പെടെ നൂറോളം പേര്‍ പങ്കെടുത്തു. തുടര്‍ന്ന് വിവിധ കലാ പരിപാടികള്‍ നടത്തി വിജയികള്‍ക്ക് സമ്മാനം നല്‍കി. വടം വലി മത്സരത്തില്‍ ജയശ്രീയുടെയും അനില്‍കുമാറിന്‍റെയും ടീമുകൾ വിജയിച്ചു. ഉച്ചയോടെ ഒരുമിച്ചിരുന്നു ഭക്ഷണം കഴിച്ചു പിരിഞ്ഞു.

കെട്ടിടാവശിഷ്ടങ്ങള്‍ ഫുട്പാത്തില്‍; കാല്‍നടയാത്രികര്‍ ദുരിതത്തില്‍

പേരൂര്‍ക്കട: കെട്ടിടങ്ങള്‍ ഇടിച്ചുമാറ്റിയ അവശിഷ്ടങ്ങള്‍ റോഡുവശത്ത് ഫുട്പാത്തില്‍ ഉപേക്ഷിക്കപ്പെട്ടതോടെ കാല്‍നടയാത്രികര്‍ ദുരിതത്തില്‍. പേരൂര്‍ക്കട അഖിലം ഓഡിറ്റോറിയത്തിനു സമീപത്തുനിന്നു മസ്ജിദ് റോഡിനു സമീപം വരെയാണ് കെട്ടിടാവശിഷ്ടങ്ങള്‍ ഫുട്പാത്തില്‍ കൂടിക്കിടക്കുന്നത്. ട്രാഫിക് ബ്ലോക്ക് വർധിക്കുന്ന അവസരങ്ങളില്‍ സൈക്കിളുകളും മറ്റും ഫുട്പാത്തിലൂടെ ഓടിച്ചുപോകുമ്പോള്‍ അവശിഷ്ടങ്ങള്‍ ഫുട്പാത്തിലേക്കും റോഡിലേക്കു തെറിച്ചുവീഴുകയും ചെയ്യുന്നുണ്ട്. കട്ടിയുള്ള കോണ്‍ക്രീറ്റ് കട്ടകളും ചുടുകല്ലുകളും മറ്റും ഫുട്പാത്തില്‍ കിടക്കുന്നത് വയോധികരായ കാല്‍നടയാത്രികരെ കുറച്ചൊന്നുമല്ല വിഷമിപ്പിക്കുന്നത്. കച്ചവടസ്ഥാപനങ്ങള്‍ ഇടിച്ചുമാറ്റിയതിന്‍റെ അവശിഷ്ടങ്ങളാണു മാസങ്ങളായി ഫുട്പാത്തില്‍ കൂട്ടിയിട്ടിരിക്കുന്നത്. ഏകദേശം എട്ടു കടമുറികള്‍ ഈ ഭാഗത്ത് ഇടിച്ചുമാറ്റിയിട്ടുണ്ട്. ചിലതു ഇടിച്ചുമാറ്റി ഗ്രൗണ്ടാക്കി വാഹനപാര്‍ക്കിംഗിന് അനുമതി നല്‍കിയിരിക്കുകയാണ്. പിഡബ്ല്യുഡിയോ തിരുവനന്തപുരം നഗരസഭയോ ഇക്കാര്യത്തില്‍ ഒന്നും ചെയ്യുന്നില്ലെന്നു പരാതിയുണ്ട്. ശക്തമായ മഴപെയ്യുമ്പോള്‍ മണ്ണും ചുടുകട്ടയും മറ്റും വെള്ളത്തിലൂടെ ഒഴുകി കുഴഞ്ഞു കിടക്കുന്നതും കാണാം. അന്ധരായിട്ടുള്ള ലോട്ടറിടിക്കറ്റ് വില്‍പ്പനക്കാരും മറ്റും ഇതുവഴി നടന്നുപോകാന്‍ ഏറെ പ്രയാസപ്പെടുന്നുണ്ട്. ചില അവസരങ്ങളില്‍ ഇവര്‍ക്ക് പൊതുജനങ്ങളില്‍ ചിലര്‍ സഹായവുമായി എത്താറുമുണ്ട്. കെട്ടിടഭാഗങ്ങള്‍ ഇടിച്ചിട്ടതിനു സമീപത്തായി ട്രാഫിക് സിഗ്നല്‍ പോസ്റ്റുണ്ട്. വാഹനങ്ങള്‍ വരിവരിയായി നിര്‍ത്തിയിടുമ്പോള്‍ കാല്‍നടയാത്രികര്‍ക്ക് അല്‍പ്പസമയംപോലും റോഡിലൂടെ ഇറങ്ങി നടക്കാനും സാധിക്കുകയില്ല. ഏകദേശം 100 മീറ്റര്‍ ദൂരത്തിലാണ് ഫുട്പാത്തില്‍ കെട്ടിടാവശിഷ്ടങ്ങള്‍ കൂട്ടിയിട്ടിരിക്കുന്നത്. മാസങ്ങള്‍ കഴിഞ്ഞിട്ടും ഇതില്‍ അധികൃതര്‍ നടപടിയെടുക്കാത്തതെന്തെന്നാണ് പ്രദേശവാസികളുടെ ചോദ്യം.

മൂന്നുമാസത്തിനകം തുടങ്ങുമെന്ന് പറഞ്ഞ കാത്ത് ലാബ് ഇനിയും യാഥാര്‍ഥ്യമായില്ല !

മെഡിക്കൽ കോളജ് ആശുത്രിയിൽ രോഗികള്‍ ദുരിതപര്‍വത്തിൽ മെഡിക്കല്‍കോളജ്: മൂന്നുമാസത്തിനകം തുടങ്ങുമെന്ന് അധികൃതര്‍ ഉറപ്പുനല്‍കിയ തിരുവനന്തപുരം മെഡിക്കല്‍കോളജ് ആശുപത്രിയിലെ കാത്ത് ലാബ് 10 മാസമായിട്ടും യാഥാര്‍ഥ്യമായില്ല. കാത്ത് ലാബിന്‍റെ സേവനം കാത്തുകഴിയുന്നത് നിരവധി രോഗികള്‍. 2024 ഓഗസ്റ്റ് 10നാണ് കാത്ത്‌ലാബിന്‍റെ പ്രവര്‍ത്തനം അവസാനിപ്പിച്ചത്. 2009-ല്‍ സ്ഥാപിച്ച കാര്‍ഡിയോളജി കാത്ത് ലാബ് മെഷീന്‍റെ കാലാവധി 10 വര്‍ഷമാണ്. 2020-ല്‍ കാലാവധി കഴിഞ്ഞ മെഷീന്‍ സമയബന്ധിതമായി മാറ്റി സ്ഥാപിക്കാത്തതുകൊണ്ടാണ് കാത്തലാബിന്‍റെ പ്രവര്‍ത്തനം അവസാനിപ്പിക്കേണ്ടതായി വന്നത്. നിലവില്‍ എച്ച്ഡിഎസിന്‍റെ കീഴില്‍ പ്രവര്‍ത്തിക്കുന്ന ഒരു ലാബ് ഇപ്പോഴുമുള്ളത്. നൂറുകണക്കിനു രോഗികളാണു കാര്‍ഡിയോളജി വിഭാഗത്തില്‍ ആന്‍ജിയോഗ്രാം, ആന്‍ജിയോപ്ലാസ്റ്റി ടെസ്റ്റുകള്‍ക്കും ചികിത്സയ്ക്കുമായി എത്തുന്നത്. ആറു മാസമോ ഒരു വര്‍ഷമോ വരെ ഇവര്‍ ചികിത്സയ്ക്ക് കാത്തിരിക്കേണ്ടതായി വരുന്നുവെന്ന ഭീകരമായ അവസ്ഥയും തിരുവനന്തപുരം മെഡിക്കല്‍കോളജ് ആശുപത്രിയില്‍ ഇപ്പോഴുണ്ട്. കൂടാതെ ഏഴു വര്‍ഷത്തോളമായി മള്‍ട്ടി സ്പെഷാലിറ്റി ബ്ലോക്കില്‍ കാത്ത് ലാബ് സ്ഥാപിക്കുന്നതിന് സ്ഥലം സജ്ജീകരിച്ചിട്ടിരിക്കുന്നുണ്ട്. എന്നാല്‍ മെഷീന്‍ മാത്രം എത്തിയിട്ടില്ല. ഏകദേശം ഒരുവര്‍ഷത്തിലേക്കു കടക്കുമ്പോഴും പാവങ്ങളുടെ ആതുരാലയത്തില്‍ കാത്ത് ലാബ് അടഞ്ഞുകിടക്കുന്നത് ഗുരുതരമായ കൃത്യവിലോപമായി ചൂണ്ടിക്കാട്ടപ്പെടുന്നു. പുതിയ കാത്ത് ലാബ് സ്ഥാപിക്കുന്നതുവരെ ന്യൂറോ കാത്ത് ലാബിലും ഇന്‍റർവൻഷണല്‍ റേഡിയോളജി കാത്ത് ലാബിലും കാര്‍ഡിയോളജി വിഭാഗത്തിലെ രോഗികള്‍ക്ക് ടെസ്റ്റുകളും ചികല്‍സയും ലഭ്യമാക്കും എന്നാണ് ആശുപത്രി മേധാവികള്‍ പത്രക്കുറിപ്പ് നല്‍കിയിട്ടുള്ളത്. എന്നാല്‍ ഇത് അത്ര പ്രായോഗികമാകാത്തതിനാല്‍ രോഗികള്‍ യാതനയിലാണ്. ന്യൂറോളജി സ് ടോക്ക് യൂണിറ്റിലുള്ള കാത്ത് മെഷീനില്‍ തലച്ചോറിലെ രക്തക്കുഴല്‍ സംബന്ധമായ പരിശോധനയും രക്തകുഴലുകളിലെ തടസങ്ങള്‍ മാറ്റുന്നതും മാത്രമാണ് ചെയ്യുവാന്‍ കഴിയുന്നത്. ഒരു സ്ഥലത്തെ കാത്ത് മെഷീന്‍ മറ്റൊരു ഡിപ്പാര്‍ട്ട്മെന്റില്‍ ഉപയോഗിക്കണമെങ്കില്‍ നിലവിലെ സോഫ്റ്റു വെയറുകള്‍ മാറ്റി പുതിയവ ഇന്‍സ്റ്റാള്‍ ചെയ്യുകയാണ് വേണ്ടുന്നത്. അതിന് ഓരോ മെഷീനും 25 ലക്ഷത്തിലേറെ രൂപ ചെലവുവരും. കൂടാതെ ഓരോ മെഷീനും പ്രത്യകം ലൈസന്‍സും ഉണ്ടായിരിക്കണ്ടതാണ്. മാസങ്ങള്‍ കഴിഞ്ഞിട്ടും മെഷീന്‍ എത്തിക്കുന്തിനോ ലാബ് പ്രവര്‍ത്തനസജ്ജമാക്കുന്നതിനോ അധികൃതര്‍ നടപടികള്‍ സ്വീകരിച്ചിട്ടില്ല.

മദ്യം ചില്ലറ വില്‍പ്പന നടത്തിയ ആള്‍ അറസ്റ്റില്‍

പേരൂര്‍ക്കട: ബിയറും ഇന്ത്യന്‍ നിര്‍മിത വിദേശമദ്യവും ചില്ലറ വില്‍പ്പന നടത്തിയ ആളെ ഫോര്‍ട്ട് പോലീസ് അറസ്റ്റുചെയ്തു. മണക്കാട് കരിമഠം ഫ്‌ളാറ്റില്‍ താമസിക്കുന്ന റിജാസ് (32) ആണ് അറസ്റ്റിലായത്. മദ്യശാലകള്‍ തുറന്നുപ്രവര്‍ത്തിക്കാത്ത അവസരങ്ങളില്‍ അമിതമായി മദ്യം ശേഖരിച്ചശേഷം ഫ്‌ളാറ്റിനു സമീപത്തുവച്ച് ചില്ലറവില്‍പ്പന നടത്തുകയാണ് ഇയാളുടെ രീതി. ഇന്നലെ ബാര്‍ഹോട്ടലുകള്‍ അവധിയായിരുന്നതിനാല്‍ റിജാസിനെ സമീപിച്ച് മദ്യം വാങ്ങാനെന്ന വ്യാജേന പോലീസ് എത്തുകയും ഇയാളുടെ താമസസ്ഥലത്തുനിന്ന് ഇന്ത്യന്‍ നിര്‍മിത വിദേശമദ്യവും 12 കുപ്പി ബിയറും പിടിച്ചെടുക്കുകയുമായിരുന്നു. പ്രതിയെ കോടതി റിമാന്‍ഡ് ചെയ്തു.

കൈവൻകാല വിശുദ്ധ പത്രോസിന്‍റെ പള്ളിയിൽ തിരുനാൾ കൊടിയേറി

നിലമാമൂട്: കൈവൻകാല വിശുദ്ധ പത്രോസിന്‍റെ പള്ളിയിൽ ഇടവക തിരുനാളിനു ഇടവക വികാരി ഫാ. സുജിൻ ജോണ്‍സണ്‍ പതാക ഉയർത്തി. തുടർന്ന് ഫാ. ക്രിസ്റ്റഫറിന്‍റെ മുഖ്യകാർമികത്വത്തിൽ ദിവ്യബലിയും ഫാ. വി. ജിനോയുടെ വചന പ്രഘോഷണവും ഉണ്ടായിരിക്കും. ഇന്നു മുതൽ ആറുവരെ വൈകുന്നേരം അഞ്ചിനു ബൈബിൾ പാരായണം, ജപമാല, ലിറ്റിനി, നൊവേന. ആറിനു തിരുനാൾ കൊടിയിറക്കോടെ സമാപിക്കും. ഇന്നലെ വൈകുന്നേരം 5.45ന് ബിഷപ് സെക്രട്ടറി ഫാ. പ്രവീണ്‍ വിൻസന്‍റിന്‍റെ മുഖ്യകാർമികത്വത്തിൽ ദിവ്യബലി നടന്നു. ഇന്നു ഫാ. യേശുദാസിന്‍റെയും നാളെ വൈകുന്നേരം ഫാ. ജോയി മത്യാസിന്‍റെയും, നാലിനു വൈകുന്നേരം 5.45നു ഫാ. അജു അലക്സിന്‍റെയും മുഖ്യകാർമികത്വത്തിൽ ദിവ്യബലി. തുടർന്നു ഭക്തസംഘടനകളുടെ കലാപരിപാടികൾ. അഞ്ചിനു വൈകുന്നേരം 5.45നു നെയ്യാറ്റിൻകര രൂപതാ സഹമെത്രാൻ ഡോ. സെൽവരാജൻ ദാസന്‍റെ മുഖ്യകാർമികത്വത്തിൽ ദിവ്യബലി. തുടർന്ന് തിരുസ്വരൂപ പ്രദക്ഷിണം. ആറിനു രാവിലെ 10 നും വൈകുന്നേരം 4.50നും ഉണ്ടൻകോട് സെന്‍റ് ജോസഫ് ഫൊറോന ഇടവക വികാരി ഫാ. ജോസഫ് അനിലിന്‍റെ മുഖ്യകാർമികത്വത്തിൽ ദിവ്യബലി. രാത്രി 10ന് തിരുനാൾ കൊടിയിറക്കും സ് നേഹവിരുന്നും ഉണ്ടായിരിക്കും.

സെപ്റ്റിക് ടാങ്കിൽ വീണ വയോധികയ്ക്ക് രക്ഷകരായി ഫയർഫോഴ്സ് അധികൃതർ

കോവളം: മാലിന്യവും വെള്ളവും നിറഞ്ഞ സെപ്റ്റിക് ടാങ്കിൽ വീണു മുങ്ങിത്താഴാറായ വയോധികയ്ക്കു ഫയർ ഫോഴ്സ് അധികൃതർ രക്ഷകരായി. വീഴ്ചയിൽ കാലിനു ഗുരുതരമായി പരിക്കേറ്റ വാഴമുട്ടം, കുഴിവിളാകം, ബിനു ഭവനിൽ സരസ്വതി (73) യെ ആശുപത്രിയിൽ പ്രവേശിപ്പിച്ചു. വീടിനോട് ചേർന്ന് 20 അടിയോളം താഴ്ച്ചയുള്ള ഉപയോഗിച്ച് കൊണ്ടിരുന്ന സെപ്റ്റിക് ടാങ്കിന്‍റെ സ്ളാബ് പൊട്ടിവീണാണ് അപകടമുണ്ടായത്. ഇന്നലെ രാവിലെ പത്തരയോടെയായിരുന്നു സംഭവം. വീടിനു പുറകുവശത്തുകൂടെ നടക്കുന്നതിനിടയിൽ കാലപ്പഴക്കം ചെന്ന സ്ലാബിന്‍റെ അപകടാവസ്ഥയറിയാതെ ചവിട്ടിയതാണ് തകർച്ചയ്ക്ക് കാരണമായത്. സ്ലാബ് പൊട്ടിവീഴുന്ന ശബ്ദം കേട്ട് ഓടിയെത്തിയ വീട്ടുകാർ മാലിന്യം നിറഞ്ഞ വെള്ളത്തിൽ മുങ്ങിത്താണശേഷം പൊങ്ങി വരുന്ന സരസ്വതിയെ യാണു കണ്ടത്. ജീവനു വേണ്ടിയാചിച്ച സരസ്വതിയുടെ രക്ഷക്കായി വീട്ടുകാർ സമീപത്തുണ്ടായിരുന്ന ഒരു ഏണിടാങ്കിലേക്കിറക്കി.അതിൽ പിടിമുറുക്കി കഴുത്തറ്റം വെള്ളത്തിൽ താഴ്ന്നു കിടന്ന വ്യദ്ധയെ സാഹസികമായ രീതിയിൽ ഫയർഫോഴ്സ് രക്ഷപ്പെടുത്തി. 40 വർഷത്തോളം പഴക്കമുണ്ടെന്നു പറയപ്പെടുന്ന സെപ്റ്റിക് ടാങ്കിൽ കഴിഞ്ഞ ദിവസങ്ങളിൽ ചെയ്ത മഴയിൽ വെള്ളവും നിറഞ്ഞിരുന്നു. കൂടാതെ മുകളിലുണ്ടായിരുന്ന ബാക്കി സ്ലാബുകൾ ഏതുനിമിഷവും തകർന്നു താഴെക്ക് പതിക്കാവുന്ന അവസ്ഥയിലായിരുന്നു. വിവരമറിഞ്ഞ് വിഴിഞ്ഞം ഫയർസ്റ്റേഷനിൽനിന്നെത്തിയ ഫയർ ആൻഡ് റെസ്ക്യൂ ഓഫീസർമാരായ സന്തോഷ് കുമാർ, ഹരിദാസ് എന്നിവർ അപകടം നിറഞ്ഞ സെപ്റ്റിക് ടാങ്കിൽ ലാഡറിന്‍റെ സഹായത്തോടെ ഇറങ്ങി വയോധികയെ രക്ഷപ്പെടുത്തി. വീഴ്ചയിൽ ഇടത്തെ കണംകാലിനു ഗുരുതര പരിക്കേറ്റ നിലയിലായിരുന്നു.

സാൽവേഷൻ ആർമി സഭയുടെ പുതിയ സംസ്ഥാന സാരഥികൾക്ക് സ്വീകരണം നൽകി

തിരുവനന്തപുരം: സാൽവേഷൻ ആർമി ഇന്ത്യാ സൗത്ത് വെസ്റ്റേണ്‍ (കേരളം) ടെറിട്ടറിയുടെ പുതിയ സാരഥികളായി ചുമതലയേറ്റ ടെറിട്ടോറിയൽ കമാൻഡർ കേണൽ പ്രകാശ് ചന്ദ്ര പ്രധാൻ, വനിതാ ശുശ്രൂഷകളുടെ സംസ്ഥാന പ്രസിഡന്‍റ് കേണൽ റാണി ഫൂലെ പ്രധാൻ, മുഖ്യകാര്യദർശി ലെഫ്. കേണൽ ജേക്കബ് ജെ. ജോസഫ്, വനിതാ ശുശ്രൂഷകളുടെ സംസ്ഥാന സെക്രട്ടറി ലെഫ്. കേണൽ സോണിയാ ജേക്കബ് എന്നിവർക്ക് ഹൃദ്യമായ വരവേല്പ് നൽകി. കവടിയാർ സംസ്ഥാന മുഖ്യസ്ഥാനത്ത് എത്തിച്ചേർന്ന നേതാക്കളെ ബിസിനസ് അഡ്മിനിസ്ട്രേറ്റർ ലെഫ്.കേണൽ സി.ജെ. ബെന്നി മോൻ, പേഴ്സണൽ സെക്രട്ടറി ലെഫ്.കേണൽ ജോസ് പി. മാത്യു, എ. ഡിറ്റർ, ലെഫ്.കേണൽ സാറാമ്മ ബെന്നി മോൻ, ടെറിട്ടോറിയൽ ഭവന സംഘ സെക്രട്ടറി ലെഫ്. കേണൽ ആലീസ് ജോസ് എന്നിവർ ചേർന്ന് സ്വീകരിച്ചു. തുടർന്ന് നടന്ന യോഗത്തിൽ പേഴ്സണൽ സെക്രട്ടറി ലെഫ്. കേണൽ ജോസ് പി. മാത്യു അധ്യക്ഷനായി. മേജർ പി.ജെ. മൈക്കിൾ, പി.ഡി. ജയപ്രകാശ്, ക്യാപ്റ്റൻ ക്രിസ്റ്റൽ അജികുമാർ, ലെഫ്. കിരണ്‍ പി. ജോസ്, മേജർ ടി.ഇ. സ്റ്റീഫൻസണ്‍, മേജർ ലിൻസി യേശുദാസ്, ലെഫ്.കേണൽ സാറാമ്മ ബെന്നി മോൻ എന്നിവർ പ്രസംഗിച്ചു. കേണൽ പ്രകാശ് ചന്ദ്ര പ്രധാൻ, കേണൽ റാണി ഫൂലെ പ്രധാൻ, ലെഫ്.കേണൽ ജേക്കബ് ജെ. ജോസഫ്, ലെഫ്.കേണൽ സോണിയാ ജേക്കബ് എന്നിവർ മറുപടി പ്രസംഗം നടത്തി.

എകെജി സെന്‍റർ ആക്രമണ കേസ് വിചാരണക്കോടതിക്കു കൈമാറി

തിരുവനന്തപുരം: എകെജി സെന്‍റർ ആക്രമണ കേസ് വിചാരണക്കോടതിക്കു കൈമാറി. ഒന്നാം പ്രതി യൂത്ത് കോണ്‍ഗ്രസ് ആറ്റിപ്ര മണ്ഡലം പ്രസിഡന്‍റ് കണ്ണൻ എന്ന ജിതിൻ, രണ്ടാം പ്രതി സുഹൈൽ ഷാജഹാൻ, മൂന്നാം പ്രതി ചിന്നു എന്ന നവ്യ എന്നിവരടങ്ങിയ കേസാണ് കൈമാറിയത്. തിരുവനന്തപുരം ഒന്നാം ക്ലാസ് ജുഡീഷൻ മജിസ്ട്രറ്റ് കോടതി മുന്നിന്‍റേതാണു നടപടി. കഴിഞ്ഞ ദിവസം രണ്ടാം പ്രതിയുടെ ജാമ്യാപേക്ഷ ഇതേ കോടതി തള്ളിയിരുന്നു. 2022 ജൂണ്‍ 13 നു കെപിസിസി ഓഫീസും ജൂണ്‍ 23 നു രാഹുൽ ഗാന്ധിയുടെ വയനാട് ഓഫീസും ആക്രമിച്ചതിന്‍റെ പ്രതികാരമായി യൂത്ത് കോണ്‍ഗ്രസ് നേതാക്കൾ ചേർന്നു ഗൂഢാലോചന നടത്തി എകെജി സെന്‍ററിനു നേരെ ബോംബ് എറിഞ്ഞു ഭീതി പരത്തി എന്നാണു കേസ്.

വിദേശ സർവകലാശാലയുമായി ധാരണാപത്രം ഒപ്പുവച്ചു കഴക്കൂട്ടം മരിയൻ ആർക്കിടെക്‌ചർ കോളജ്

തിരുവനന്തപുരം: കഴക്കൂട്ടം മരിയൻ കോളജ് ഓഫ് ആർക്കിടെക്ചർ ആൻഡ് പ്ലാനിംഗ് റൊമാനിയയിലെ ബുക്കാറെസ്റ്റിലുള്ള ഇയോൺ മിൻസു യൂണിവേഴ്സിറ്റി ഓഫ് ആർക്കിടെക്‌ചർ ആൻഡ് അർബൻ പ്ലാനിംഗുമായി സഹകരിച്ച് ധാരണാപത്രം ഒപ്പുവച്ചു. ഈ പങ്കാളിത്തം ആഗോള പഠനം, സാംസ്‌കാരിക കൈമാറ്റം, സുസ്ഥിര വാസ്‌വിദ്യ എന്നിവയിൽ ശ്രദ്ധ കേന്ദ്രീകരിക്കുന്നു. സംയുക്ത പദ്ധതികൾ, അധ്യാപക-വിദ്യാർഥി കൈമാറ്റങ്ങൾ, പാഠ്യപദ്ധതി വികസനം എന്നിവയാണ് പ്രധാന സംരംഭങ്ങൾ. ഐഎംയുഎയുവിന്‍റെ റെക്ടർ പ്രഫ. മരിയൻ മൊയ്‌സാനുവും എംസിഎപി മാനേജർ റവ. ഡോ. എ.ആർ. ജോണും, പ്രിൻസിപ്പൽ പ്രഫ. സുജ കർത്തയും ധാരണപത്രത്തിൽ ഒപ്പുവച്ചു.

പെൻഷൻകാർ സംസ്ഥാന വ്യാപകമായി കരിദിനമാചരിച്ചു

തിരുവനന്തപുരം: അഞ്ചുവർഷത്തിലൊരിക്കൽ ശമ്പള-പെൻഷൻ പരിഷ്കരണമെന്ന കീഴ്‌വഴ ക്കം സംസ്ഥാന സർക്കാർ അട്ടിമറിച്ചുവെന്നാരോപിച്ച് പെൻഷൻ പരിഷ്കരണ ദിനമായ ഇന്നലെ കേരള സ്റ്റേറ്റ് സർവീസ് പെൻഷനേഴ്സ് അസോസിയേഷന്‍റെ നേതൃത്വത്തിൽ സംസ്ഥാന വ്യാപകമായി കരിദിനമാചരിച്ചു. 1968 മുതൽ നടന്നുവരുന്ന പരിഷ്കരണമെന്ന കീഴ്‌വഴക്കത്തെ സംസ്ഥാന സർക്കാർ അട്ടിമറിച്ചിരിക്കുകയാണെന്നു സംഘടന കുറ്റപ്പെടുത്തി. കരിദിനത്തിന്‍റെ തിരുവനന്തപുരം ജില്ലാതല ഉദ്ഘാടനം വികാസ് ഭവൻ ട്രഷറിക്കു മുൻപിൽ കെഎസ് എസ്പിഎ സംസ്ഥാന ജനറൽ സെക്രട്ടറി ആർ. രാജൻ കുരുക്കൾ ഉദ്ഘാടനം ചെയ്‌തു. ജില്ലയിലെ വിവിധ ട്രഷറികളിൽ നടന്ന ധർണയ്ക്ക് ഭാരവാഹികളായ അഡ്വ. കെ.ആർ. കുറുപ്പ്, വി. മധുസൂദനൻ, നദീറ സുരേഷ്, കൊട്ടാത്തല മോഹനൻ, തെങ്ങുംകോട് ശശി, നെയ്യാറ്റിൻകര മുരളി, വി.സി. റസൽ, എസ്. വി ഗോപകുമാർ, ബി. ബാബുരാജ്, ജെ. രാജേന്ദ്രകുമാർ, സി.കെ. രവീന്ദ്രൻ, മറുകിൽ ശശി, അജന്തൻ നായർ, കെ. അശോകൻ, എസ്. അജയൻ, എസ്.ജെ. വിജയ, ഉഷാകുമാരി, പി. ജയകുമാർ, ബോസ് ചന്ദ്രൻ സായൂർ ദേവ് തുടങ്ങിയവർ നേതൃത്വം നൽകി.‌ സർക്കാിന്‍റെ അവഗണനയ്ക്കും വഞ്ചനയ്ക്കുമെതിരെ ഓഗസ്റ്റ് ആറ്, ഏഴ് തീയതികളിൽ സെക്രട്ടറിയേറ്റ് പടിക്കലും, 13 ജില്ലാ കേന്ദ്രങ്ങളിലും ദ്വിദിന സത്യാഗ്രഹം നടത്തുമെന്നും സംസ്ഥാന ജനറൽ സെക്രട്ടറി ആർ. രാജൻ കുരുക്കൾ അറിയിച്ചു.

പാപ്പനംകോട് സെന്‍റ് മേരീസ് സ്കൂളില്‍ ലഹരിവിരുദ്ധ ദിനം

തിരുവനന്തപുരം: സേഫിന്‍റെ നേതൃത്വത്തില്‍ തിരുവനന്തപുരം സോഷ്യല്‍വര്‍ക്ക് സോണുമായി സഹകരിച്ച് പാപ്പനംകോട് സെന്‍റ് മേരീസ് സ്കൂളില്‍ അന്താരാഷ്ട്ര ലഹരിവിരുദ്ധ ദിനാചരണം സംഘ‌ടിപ്പിച്ചു. തിരുവനന്തപുരം റേഞ്ച് എക്സൈസ് ഇന്‍സ്പെക്ടര്‍ എസ്. ഹരികൃഷ്ണന്‍ ഉദ് ഘാടനം ചെയ്തു. സോഷ്യല്‍വര്‍ക്ക് ജനറല്‍ കൗണ്‍സിലര്‍ റവ. സിസ്റ്റർ ഡോ. സലോമി ജോസഫ് മുഖ്യപ്രഭാഷണം നടത്തി. സോഷ്യല്‍വര്‍ക്ക് കൗണ്‍സിലര്‍ സിസ്റ്റർ സുജ മലേക്കുടി എസ്എച്ച് അധ്യക്ഷത വഹിച്ചു. സ്കൂള്‍ പ്രിന്‍സിപ്പല്‍ സിസ്റ്റർ ജോർജീന പാറത്തട്ടേല്‍ സ്വാഗതം ആശംസിച്ചു. സോണല്‍ സെക്രട്ടറിയും അധ്യാപികയുമായ സിസ്റ്റർ റ്റെസിന്‍ ഓരത്തിങ്കല്‍ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. ദിനാചരണത്തിന്‍റെ ഭാഗമായി നടന്ന ലഹരിവിരുദ്ധ ബോധവത്കരണ സെമിനാറിന് തിരുവനന്തപുരം എക്സൈസ് സര്‍ക്കിള്‍ ഓഫീസിലെ അസിസ്റ്റന്‍റ് എക് സൈസ് ഇന്‍സ്പെക്ടറായ എസ്. ദിലീപ്കുമാര്‍ നേതൃത്വം നല്‍കി.

യുവാക്കളെ തലയ്ക്കടിച്ച് പരിക്കേല്‍പ്പിച്ച കേസിലെ പ്രതി അറസ്റ്റില്‍

വലിയതുറ: സഹോദരങ്ങളെ കമ്പികൊണ്ട് തലയ്ക്കടിച്ച് പരിക്കേല്‍പ്പിച്ച കേസിലെ പ്രതിയെ വലിയതുറ പോലീസ് അറസ്റ്റ് ചെയ്തു. വലിയതുറ കുഴിവിളാകം കുരിശടിയ്ക്ക് സമീപം താമസിക്കുന്ന നിക്‌സണ്‍ സേവിയറിനെ (28) ആണ് പോലീസ് അറസ്റ്റ് ചെയ്തത്. കഴിഞ്ഞ ഞായറാഴ്ച വൈകിട്ടോടെ ചെറിയതുറ ഫ്രണ്ട്‌സ് റോഡ് സ്വദേശികളായ സുബിന്‍ , സാനു എന്നിവരെയാണ് പ്രതി കമ്പികൊണ്ട് തലയ്ക്കടിച്ച് പരിക്കേല്‍പ്പിക്കുകയും ഇവരുടെ സ്‌കൂട്ടറിനെ അടിച്ചുപൊളിക്കുകയും ചെയ്തത്. നിക്‌സണെ സ്‌കൂട്ടറില്‍ കയറ്റാത്തതിന്‍റെ വിരോധത്തിലായിരുന്നു അക്രമണം നടത്തിയതെന്ന് പോലീസ് പറഞ്ഞു. യുവാക്കള്‍ നല്‍കിയ പരാതിയില്‍ കേസെടുത്ത പോലീസ് നടത്തിയ അന്വേഷണത്തിലാണ് നിക്‌സണെ പോലീസ് പിടികൂടിയത്. പ്രതിയെ കഴിഞ്ഞദിവസം കോടതിയില്‍ ഹാജരാക്കി.

പിണറായി സർക്കാർ സംസ്ഥാനത്തെ ആശുപത്രികളെ അസ്ഥികൂടമാക്കി മാറ്റിയെന്നു കെ. സുരേന്ദ്രൻ

തിരുവനന്തപുരം: പിണറായി വിജയൻ സർക്കാർ സംസ്ഥാനത്തെ ആശുപത്രികളെ അസ്ഥികൂടമാക്കി മാറ്റിയതായി ബി ജെ പി മുൻ സംസ്ഥാന അധ്യക്ഷൻ കെ. സുരേന്ദ്രൻ. മെഡിക്കൽ കോളജിലെ ശസ്ത്രക്രിയാ ഉപകരണ ക്ഷാമത്തിൽ പ്രതിഷേധിച്ച് ബിജെപി ഉള്ളൂർ മണ്ഡലം കമ്മിറ്റി തിരുവനന്തപുരം മെഡിക്കൽ കോളജിലേക്കു നടത്തിയ പ്രതിഷേധ മാർച്ച് ഉദ്ഘാടനം ചെയ്ത് പ്രസംഗിക്കുകയായിരുന്നു സുരേന്ദ്രൻ. മരുന്നില്ലാത്തതിൽ നന്പർ വണ്‍, ഡോക്ടർമാരില്ലാത്തതിൽ നന്പർ വണ്‍, ചികിത്സ സൗകര്യങ്ങൾ ഇല്ലാത്തതിൽ നന്പർ വണ്‍, എന്നതാണ് ആരോഗ്യമന്ത്രി വീണാ ജോർജിന്‍റെ നേട്ടം. പൊതുജനങ്ങളുടെ ആരോഗ്യത്തിൽ താല്പര്യമില്ലാത്ത മന്ത്രിയാണ് വീണാ ജോർജ്. ജനങ്ങളോട് ഉത്തരവാദിത്വം ഉണ്ടാവേണ്ട മന്ത്രിക്ക് ആ ജോലി ചെയ്യാൻ താല്പര്യവും കഴിവും ഇല്ലെന്നും പൊതുജനാരോഗ്യ മേഖലയെ വെന്‍റിലേറ്ററിലാക്കിയ മന്ത്രിയാണ് ആരോഗ്യമന്ത്രിയെന്നും സുരേന്ദ്രൻ ആരോപിച്ചു.

മരുതൂര്‍ കൊലപാതകം: പ്രതികളെ മാഞ്ഞാലിക്കുളത്തും കഴക്കൂട്ടത്തും എത്തിച്ചു തെളിവെടുത്തു

പേരൂര്‍ക്കട: മണ്ണന്തല മരുതൂരില്‍ യുവതിയുടെ കൊലപാതകവുമായി ബന്ധപ്പെട്ടു പ്രതി ഷംഷാദിനെയും സുഹൃത്ത് വിശാഖിനെയും പോലീസ് തിരുവനന്തപുരം മാഞ്ഞാലിക്കുളത്തും കഴക്കൂട്ടത്തും എത്തിച്ചു തെളിവെടുപ്പു നടത്തി. മാഞ്ഞാലിക്കുളം ടൂറിസ്റ്റ് ഹോമിലും കഴക്കൂട്ടത്തെ ഒരു ടൂറിസ്റ്റ് ഹോമിലുമാണ് പ്രതിയെ കൊണ്ടുവന്നത്. മധുരയില്‍ സുഹൃത്തിനെ ആക്രമിച്ചശേഷം ജൂണ്‍ 10നു തിരികെയെത്തിയ ഷംഷാദ് മാഞ്ഞാലിക്കുളം ടൂറിസ്റ്റ് ഹോമില്‍ മുറിയെടുക്കുകയായിരുന്നു. മരണപ്പെട്ട സഹോദരി ഷഹീനയും അന്ന് ഇയാള്‍ക്കൊപ്പം ഉണ്ടായിരുന്നതായി പോലീസ് പറഞ്ഞു. രണ്ടുമൂന്നു ദിവസം ഇവിടെ കഴിഞ്ഞശേഷമാണ് കഴക്കൂട്ടത്തെ ടൂറിസ്റ്റ് ഹോമിലേക്കു വന്നത്. പോലീസില്‍ നിന്നു രക്ഷപ്പെടുന്നതിനുവേണ്ടി ഒളിവില്‍ക്കഴിയുകയായിരുന്നു ഇവിടെയും. ജൂണ്‍ 14നാണ് മരുതൂരിലെ അത്രക്കാട്ടില്‍ എന്‍ക്ലേവ് ഹോംസ്റ്റേയില്‍ പ്രതി എത്തുന്നത്. സുഹൃത്തുക്കളാണ് ഇയാള്‍ക്ക് ഇവിടെ മുറി തരപ്പെടുത്തി നല്‍കിയത്. ചെമ്പഴന്തി സ്വദേശിയായ ഒരു സുഹൃത്തിന്‍റെയും വട്ടപ്പാറ സ്വദേശികളായ ഷെഫിന്‍, ധനു എന്നിവരുടെയും വീടുകളിലും ഷംഷാദിനെ തെളിവെടുപ്പിന് പോലീസ് കൊണ്ടുപോയിരുന്നു. തങ്ങള്‍ മുറി തരപ്പെടുത്തി കൊടുക്കുന്നതിനു മാത്രമേ അവിടെ ചെന്നിട്ടുള്ളൂ എന്നും പിന്നീട് ഷംഷാദിനെ കണ്ടിട്ടില്ലെന്നും ഇവര്‍ മൊഴി നല്‍കി. ചെമ്പഴന്തിയിലെ സുഹൃത്തില്‍നിന്ന് ഷംഷാദ് 3,000 രൂപ കടം വാങ്ങിയിരുന്നു. ആ പണം തിരികെ ചോദിക്കുന്നതിനു വേണ്ടിയാണ് കൊലപാതകം നടക്കുന്നതിനു തലേദിവസം ചെമ്പഴന്തിയിലെ സുഹൃത്ത് മരുതൂരില്‍ ഷംഷാദിനെ കാണാന്‍ എത്തിയതെന്നും മണ്ണന്തല എസ്ഐ ആര്‍.എസ്. വിപിന്‍ പറഞ്ഞു.

ബ്രെത്തലൈസർ ചതിച്ചു..! കെഎസ്ആർടിസി ഡ്രൈവർക്ക് ഡ്യൂട്ടി നിഷേധിച്ചതിൽ പ്രതിഷേധം

പൂവാർ: മദ്യപിക്കാത്തഡ്രൈവർ മദ്യപിച്ചതായി ബ്രെത്തലൈ സർ. ഡ്യൂട്ടി നിഷേധിച്ച് അധികൃതർ. കെഎസ്ആർടി പൂവാർ ഡിപ്പോയിൽ ബ്രെത്തലൈസറിനെതിരെ പ്രതിഷേധം. ജീവിതത്തിൽ ഇന്നുവരെ മദ്യപിക്കാത്ത ഡ്രൈവർ മദ്യപിച്ചതായി ബ്രെത്തലൈസറിൽ നടത്തിയ പരിശോധനയിൽ തെറ്റായി തെളിഞ്ഞതിനെതിരായാണ് പ്രതിഷേധ സമരം സംഘടിപ്പിച്ചത്. ഇന്നലെ രാവിലെ 8:30ന് പൂവാർ ഡിപ്പോയിൽ ഡ്യൂട്ടി ചെയ്യാനെത്തിയ ബദർ ഡ്രൈവർ കെ.ആർ. സ്റ്റാലിൻ രവിക്കാണ് പരിശോ ധന വിനയായത്. പരിശോധനയിൽ തെളിഞ്ഞതു ത്തെറ്റാണെങ്കിലും ഡ്യൂട്ടിയിൽനിന്നു മാറ്റി നിർത്തിയതാണു ജീവനക്കാരുടെ പ്രതിഷേധത്തിനിടയാക്കിയത്. രാവിലെ സ്റ്റാലിൻ വന്നയുടനെ അദർ ഡ്യൂട്ടി സ്റ്റേഷൻ മാസ്റ്റൽ നടത്തിയ ബ്രെത്തലൈസർ ടെസ്റ്റിൽ ഒന്പതു പോയിന്‍റ് തെളിഞ്ഞു. എന്നാൽ ഇതുവരെ മദ്യപിച്ചിട്ടില്ലാത്ത സ്റ്റാലിൽ ഇതിനെ ചോദ്യം ചെയ്തു. തുടർന്നു വീണ്ടും നടത്തിയ ടെസ്റ്റിൽ സീറോ റീഡിംഗ് കാണിക്കുകയായിരുന്നു. എന്നാൽ ചീഫ് ഓഫീസറുടെ നിർദേശപ്രകാരം ആദ്യം ഒരു പ്രാവശ്യം ഊതിയതു മാത്രമേ പരിഗണിക്കൂവെന്നു പറഞ്ഞ ഉദ്യോഗസ്ഥൻ എടിഒയുടെ നിർദേശപ്രകാരം ഡ്യൂട്ടി തടഞ്ഞുവച്ചു. ജീവിതത്തിൽ ഇതുവരെ മദ്യപിച്ചിട്ടില്ലാത്ത തന്നെ ഒരു മദ്യപാനി എന്ന് മുദ്രകുത്തി സമൂഹത്തിൽ നാണം കെടുത്തുന്നതിനെതിരെ രവി ഡിപ്പോയുടെ മുന്നിൽ കുത്തിയിരുന്നു പ്രതിഷേധിക്കു കയായിരുന്നു. പിന്നാലെ ഡ്രൈവർക്കു പിന്തുണയുമായി കെഎസ് ആർടിസി ട്രേഡ് യൂണിയൻ സംഘടനകളായ ബിഎംഎസ്, ഐ എൻടിയുസി, സിഐടിയു ഉൾപ്പെടെയുള്ള സംഘടകൾ പൂവാർ ഡിപ്പോയിൽ കുത്തിയിരുപ്പ് സമരം സംഘടിപ്പിച്ചു. തുടർന്ന് 12 മണിയോടെ എടിഒ സജിതിന്‍റെ നിർദേശപ്രകാരം തുടർ നടപടികളിൽനിന്നും ഒഴിവാക്കി സ്റ്റാൻലിനു മറ്റൊരു ഡ്യൂട്ടി തരപ്പെടുത്തി നൽകുകയായിരുന്നു. സ്വന്തം ലേഖകൻ

മാവേലിക്കര പ്രഭാകരവർമയുടെ ജീവിതം സംഗീതോപാസന: ഡോ. കെ. ഓമനക്കുട്ടി

തിരുവനന്തപുരം: സംഗീതമായിരുന്നു പ്രഫ. മാവേലിക്കര ആർ. പ്രഭാകരവർമയുടെ ജീവിതമെന്നു പ്രശസ്ത കർണാടക സംഗീതജ്ഞയും മാവേലിക്കര പ്രഭാകര വർമയുടെ ശിഷ്യയുമായ ഡോ. കെ. ഓമനക്കുട്ടി. അഭേദാനന്ദ സംഗീതസഭയുടെ രണ്ടാം വാർഷിക സംഗീതോത്സവത്തിന്‍റെയും സംഗീത ഗുരുക്കന്മാരുടെ അനുസ്മരണ യോഗത്തിന്‍റെയും ഉദ് ഘാടനം നിർവഹിച്ചു പ്രസംഗിക്കുകയായിരുന്നു സംഗീതജ്ഞ. അഭേദാശ്രമത്തിൽ നടന്ന ചടങ്ങിൽ പ്രശസ്ത കർണാടക സംഗീതജ്ഞൻ മാവേലിക്കര ആർ. പ്രഭാകര വർമ അനുസ്മരണം ഡോ. ഓമനക്കുട്ടി നടത്തി. എന്‍റെ അച്ഛൻ മലബാർ ഗോപാലൻ നായരായിരുന്നു സംഗീതത്തിലെ ആദ്യഗുരു. പിന്നീട് പ്രീയൂണിവേഴ് സിറ്റി കാലം മുതൽ ബിരുദപഠനം വരെ, നീളുന്ന കാലത്ത് എന്നെ കർണാടക സംഗീതം പഠിപ്പിച്ചത് പ്രഭാകര വർമ സാറാണ്- ഡോ. കെ. ഓമനക്കുട്ടി പറഞ്ഞു. ഒരു കീർത്തനം പഠിപ്പിക്കുംമുന്പ് കീർത്തനത്തിന്‍റെ രാഗത്തെക്കുറിച്ചും രാഗഭാവത്തെക്കുറിച്ചും സമഗ്രമായി മാവേലിക്കര സാർ പഠിപ്പിക്കുമായിരുന്നു. ഒരു കീർത്തനം പഠിച്ചു കഴിയുന്പോൾ ആ രാഗത്തിന്‍റെ സമസ്തതയും ശിഷ്യർക്കു ഹൃദിസ്ഥമാകുന്ന രീതിയിലെ അഭ്യസനം സംഗീതജീവിതത്തിൽ തനിക്കു വലിയ അനുഗ്രഹമായെന്നും ഡോ. ഓമനക്കുട്ടി വ്യക്തമാക്കി. ചടങ്ങിൽ അഭേദാശ്രമം പ്രസിഡന്‍റ് ചൂഴാൽ കൃഷ്ണൻ നന്പൂതിരി അധ്യക്ഷത വഹിച്ചു. മൃദംഗ വിദ്വാന്മാരായ തിരുവനന്തപുരം വി. സുരേന്ദ്രൻ, പ്രഫ. വൈക്കം വേണുഗോപാൽ, മാവേലിക്കര ആർ.വി. രാജേഷ്, ഘടം വിദ്വാൻ ഉടുപ്പി ശ്രീധർ എന്നിവർ ആശംസ നേർന്നു പ്രസംഗിച്ചു. പദ്മശ്രീ ലഭിച്ച ഡോ. കെ. ഓമനക്കുട്ടിയെയും കേരള സംഗീത നാടക അക്കാഡമി അവാർഡ് നേടിയ ചേപ്പാട് എ.വി. വാമനൻ നന്പൂതിരിയെയും ആശ്രമം മഠാധിപതി കേശവാനന്ദ ഭാരതി ആദരിച്ചു. ചടങ്ങിനു പിന്നണി ഗായകൻ ജി. ശ്രീറാം സ്വാഗതം ആശംസിച്ചു. പരമ ഭട്ടാരക കൾച്ചറൽ ഡവലപ്മെന്‍റ് സൊസൈറ്റി സെക്രട്ടറി എ. ചന്ദ്രശേഖർ കൃതജ്ഞത പറഞ്ഞു. വാമനൻ നന്പൂതിരി മറുപടി പ്രസംഗം നടത്തി. തുടർന്ന് വാമനൻ നന്പൂതിരിയുടെ കർണാടക സംഗീത കച്ചേരി നടന്നു. ഉടുപ്പി ശ്രീജിത്ത് വയലിനിലും മാവേലിക്കര ആർ.വി. രാജേഷ് മൃദംഗത്തിലും ഉടുപ്പി ശ്രീധർ ഘടത്തിലും താളമേകി.

മന്നം മെമ്മോറിയൽ നാഷണൽ ക്ലബ് ഭാരവാഹികൾ

തിരുവനന്തപുരം: മന്നം മെമ്മോറിയൽ നാഷണൽ ക്ലബ് പ്രസിഡന്‍റായി അഡ്വ. ജി.ടി. പ്രദീപും സെക്രട്ടറിയായി ടി. ഹരിനാരായണനും തെരഞ്ഞെടുക്കപ്പെട്ടു. കെ.എസ് അനിൽകുമാറാണ് ട്രഷറർ. മറ്റ് ഭാരവാഹികൾ: വി.ജി. സുധീർകുമാർ - വൈസ് പ്രസിഡന്‍റ്, എസ്. സുനിൽകുമാർ -ജോയിന്‍റ് സെക്രട്ടറി, ഡോ. കെ.സി ചന്ദ്രശേഖരൻ നായർ, ഡോ. ജെ. ഹരീഷ്, ആർ. കരുൺ, വി.എസ്. പ്രദീപ്കുമാർ, എൻ. സതീഷ്കുമാർ, എം.സി. പിള്ള -എക്സിക്യൂട്ടീവ് അംഗങ്ങൾ. തെരഞ്ഞെടുപ്പിന് റിട്ടേണിംഗ് ഓഫീസർ ഡി. വിനോദ്കുമാർ നേതൃത്വം നൽകി.

കുറുവാണി ചാരിറ്റബിൾ ഫൗണ്ടേഷന്‍റെ വാർഷികവും അവാർഡ് ദാനവും

നേമം: നേമം കുറുവാണി ചാരിറ്റബിൾ ആൻഡ് എഡ്യൂക്കേഷൻ ഫൗണ്ടേഷന്‍റെ രണ്ടാം വാർഷികവും അവാർഡ് ദാനവും മുൻ എംപി കെ. മുരളീധരൻ ഉദ്ഘാടനം ചെയ്തു. മികച്ച സാമൂഹിക പ്രവർത്തകനുള്ള പുരസ്‌കാരം നേടിയ ശാന്തിവിള മുജീബ് റഹ്‌മാനെയും ഐക്യ രാഷ്ട്ര സഭ മനുഷ്യാവകാശ കമ്മീഷൻ അംഗമായ ഡോ. എ.കെ. മീരസാഹിബിനെയും മന്ത്രി ജി. ആർ. അനിൽ ആദരിച്ചു. വിവിധ പരീക്ഷകളിൽ ഉന്നതവിജയം നേടിയ വിദ്യാർഥികളെ ആദരിച്ചു. 250 സാധുക്കൾക്കു സൗജന്യ ഭക്ഷ്യക്കിറ്റ് വിതരണം ചെയ്തു. പ്രഫ. കെ.എസ്. ചന്ദ്രശേഖർ, കൗൺസിലർ എം.ആർ. ഗോപൻ, ഫൗണ്ടേഷൻ സെക്രട്ടറി ഷാഹുൽ ഹമീദ്, പ്രസിഡന്‍റ് നേമം സുബൈർ, മുൻ കൗൺസിലർ സബീറ ബീഗം, ശാന്തിവിള സുബൈർ, വാർഡ് മെമ്പർ സന്ധ്യ, അഡ്വ. എ.എം.കെ. നൗഫൽ എന്നിവർ സംസാരിച്ചു.

വീതികൂട്ടി വികസിപ്പിച്ചു; പക്ഷേ, കാടുമൂടി ചെളിക്കുളമായി റോഡ്

മാറനല്ലൂർ: വീതി കൂട്ടി വികസിപ്പിച്ചു. പക്ഷേ റോഡ് കാടുമൂടി ചെളിക്കളമായി മാറി. പാൽക്കുന്ന്-പാപ്പാകോട് റോഡിനാണ് ഈ അവസ്ഥ. ഇരുചക്രവാഹനംമാത്രം സഞ്ചരിച്ചിരുന്ന റോഡ് വഴി വീതികൂട്ടി വികസിപ്പിച്ചിട്ട് ആറുവർഷം കഴിഞ്ഞിട്ടും ടാറിട്ടില്ല. ഏലാ പ്രദേശം മണ്ണിട്ടുപൊക്കി വശങ്ങളിൽ പാർശ്വഭിത്തി നിർമാണംവരെ പൂർത്തിയാക്കിയെങ്കിലും ടാർചെയ്യാത്തതുകാരണം റോഡിൽ ചെളിക്കെട്ട് രൂപപ്പെട്ടിരിക്കുകയാണ്. ഇവിടങ്ങളിൽ കാടു പന്തലിച്ച നിലയിലുമാണ്. 2019-20 കാലഘട്ടത്തിലാണ് റോഡ് നിർമിച്ച് പാർശ്വഭിത്തി കെട്ടിയുള്ള നിർമാണം നടന്നത്. ഐ.ബി. സതീഷ് എംഎൽഎയുടെ ആസ്തിവികസന ഫണ്ടിൽ 30 ലക്ഷം രൂപ വിനിയോഗിച്ചാണ് പണികൾ പൂർത്തിയാക്കിയത്. മഴക്കാലമായാൽ റോഡിലെ ചെളിക്കെട്ടുകാരണം കാൽനടയാത്രപോലും ഇപ്പോൾ സാധിക്കുന്നില്ല. ഇരുചക്രവാഹനങ്ങൾ ചെളിയിൽ പുതയുന്നതും, തെന്നിവീഴുന്നതും പതിവായിരിക്കുകയാണ്. പാൽക്കുന്ന് പ്രദേശത്തുള്ളവർക്ക് എളുപ്പത്തിൽ നെയ്യാറ്റിൻകര റോഡിൽ പ്രവേശിക്കാൻ കഴിയുന്ന റോഡാണ് ഇത്. റോഡ് നവീകരണം നടക്കാതെ വന്നതുമൂലം സ്കൂൾ ബസ് ഉൾപ്പെടെയുള്ള വാഹനങ്ങൾ കോട്ടമുകൾ-പാൽക്കുന്ന് റോഡിലും, നെയ്യാറ്റിൻകര റോഡിൽ പാപ്പാകോടും എത്തുന്നതുകാരണം രക്ഷാകർത്താക്കൾക്ക് കുട്ടികളെ ഇവിടങ്ങളിൽ കാൽനടയായി കൊണ്ടുവിടേണ്ടിവരുന്നു. റോഡ് ചെളിക്കെട്ടായി മാറിയാൽ നടന്നുപോകാൻ പോലും ബുദ്ധിമുട്ടാണ്. റോഡ് നവീകരിക്കുന്നതിനായി നിർമാണോദ്ഘാടനം നടത്തിയെന്നു പഞ്ചായത്ത് പറയുന്നുണ്ടെങ്കിലും ഇതുമായി ബന്ധപ്പെട്ട് ഒരു വിവരവും ബന്ധപ്പെട്ടവർ അറിയിച്ചില്ലെന്നാണ് പഞ്ചായത്തംഗം വി.വി. ഷീബാമോൾ പറഞ്ഞത്. എന്നാൽ, ഐ.ബി. സതീഷ് എംഎൽഎയുടെ 18 ലക്ഷം രൂപയുടെ ഫണ്ട് ഉപയോഗിച്ച് റോഡ് നവീകരണം ഉടൻ ആരംഭിക്കുമെന്ന് ബന്ധപ്പെട്ടവർ പല തവണ പറഞ്ഞു. പക്ഷേ ഒന്നും നടന്നില്ല.

മെഡിക്കല്‍കോളജ് ആശുപത്രി സ്തംഭനാവസ്ഥയില്‍: കെ. മുരളീധരന്‍

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രി സ്തംഭനാവസ്ഥയിലാണെന്നും സാധാരണ രോഗികള്‍ ചികിത്സ ലഭിക്കാതെ പിടഞ്ഞുമരിക്കുന്ന അവസ്ഥയാണ് ഇവിടെയുള്ളതെന്നും മുന്‍ എംഎല്‍എ കെ. മുരളീധരന്‍ പറഞ്ഞു. ആശുപത്രിയിലെ ശസ്ത്രക്രിയാ ഉപകരണങ്ങളുടെ ലഭ്യതയില്ലായ്മയ്ക്കും പ്രതിസന്ധികള്‍ക്കുമെതിരേയുള്ള ജില്ലാ കോണ്‍ഗ്രസ് കമ്മിറ്റിയുടെ ആശുപത്രിസൂപ്രണ്ട് ഓഫീസ് മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ ഒമ്പതു വര്‍ഷത്തിനിടയില്‍ നൂതന സംരംഭങ്ങള്‍ ഏര്‍പ്പെടുത്താന്‍ സര്‍ക്കാരിനായിട്ടില്ല. കേരളത്തിലെ ആരോഗ്യവകുപ്പ് ജീര്‍ണാവസ്ഥയിലാണ്. ആരോഗ്യമന്ത്രിയുടെ രാജി എഴുതിവാങ്ങാന്‍ മുഖ്യമന്ത്രി തയാറാകണം. കേരളത്തിലെ എല്ലാ മെഡിക്കല്‍കോളജ് ഡോക്ടര്‍മാരും പങ്കിടുന്ന അമര്‍ഷത്തിന്‍റെയും നൈരാശ്യത്തിന്‍റെയും പ്രതീകമായി മാറുകയാണു തിരുവനന്തപുരം മെഡിക്കല്‍കോളജിലെ യൂറോളജി വകുപ്പുമേധാവിയെന്നും അദ്ദേഹം പറഞ്ഞു. ഉള്ളൂര്‍ ബ്ലോക്ക് കമ്മിറ്റി പ്രസിഡന്‍റ് കുമാരപുരം രാജേഷ് അധ്യക്ഷത വഹിച്ചു. അഡ്വ. എം.എ. വാഹിദ്, മുന്‍ വാര്‍ഡ് കൗണ്‍സിലര്‍ ജി.എസ്. ശ്രീകുമാര്‍, വാര്‍ഡ് കൗണ്‍സിലര്‍ ജോണ്‍സണ്‍ ജോസഫ്, നേതാക്കളായ ജി.എസ്. ബാബു, ടി. ശരത്ചന്ദ്രപ്രസാദ്, കെ.എസ് ശബരിനാഥന്‍, മണക്കാട് സുരേഷ്, പി.കെ. വേണുഗോപാല്‍, ചെമ്പഴന്തി അനില്‍, കെ.എസ്. ഗോപകുമാര്‍, ജോണ്‍ വിനേഷ്യസ്, ജെ.എസ്. അഖില്‍, കടകംപള്ളി ഹരിദാസ്, ചെറുവയ്ക്കല്‍ പത്മകുമാര്‍, ഉള്ളൂര്‍ മുരളി, കൈമനം പ്രഭാകരന്‍, വെള്ളൈക്കടവ് വേണു, നജീവ് ബഷീര്‍, അലത്തറ അനില്‍, കൊച്ചുവേളി രാജേഷ്, മുട്ടട അജിത്ത്, ലതികാദേവി, പട്ടം തുളസി തുടങ്ങിയവര്‍ പങ്കെടുത്തു.

14 കാരിയെ പീഡിപ്പിച്ച 56-കാരനെ അറസ്റ്റു ചെയ്തു

നെടുമങ്ങാട്: 14 വയസുകാരിയെ പീഡിപ്പിച്ച് ഗർഭിണിയാക്കിയ ആര്യനാട് - അന്തിയറ സ്വദേശി ഇൻവാസി (56) നെ ആര്യനാട് പോലീസ് അറസ്റ്റ് ചെയ്തു. ഇക്കഴിഞ്ഞ ദിവസം വയറുവേദന അനുഭവപ്പെട്ട പെൺകുട്ടി നെടുമങ്ങാട് ജില്ലാ ആശുപതിയിൽ ചികിത്സയ്ക്ക് എത്തിയപ്പോഴാണ് രണ്ടു മാസം ഗർഭിണിയാണെന്നു കണ്ടെത്തിയത്. ആശുപത്രി അധികൃതർ അറിയിച്ചത് അനുസരിച്ച് പെൺകുട്ടിയുടെ മൊഴിയിൽ കേസെടുത്തു പ്രതിയെ അറസ്റ്റ് ചെയ്യുകയായിരുന്നു. അറസ്റ്റുചെയ്ത പ്രതിക്ക് വൈദ്യ പരിശോധനയിൽ ഇസിജി വ്യതിയാനം കണ്ടു മെഡിക്കൽ കോളജിൽ പ്രവേശിപ്പിച്ചു. ഇയാൾ റിമാൻഡിലാണ്.

പൊതുയോഗവും ലാഭവിഹിത വിതരണവും അനുമോദനവും

വെമ്പായം : വട്ടപ്പാറ ജവഹർ റൂറൽ കോ-ഓപറേറ്റീവ് സൊസൈറ്റിയുടെ ആഭിമുഖ്യത്തിൽ പൊതുയോഗവും അംഗങ്ങൾക്കുള്ള ലാഭവിഹിത വിതരണവും അനുമോദന സദസും സംഘടിപ്പിച്ചു. നിയമസഭ മുൻ സ്പീക്കർ എൻ. ശക്തൻ ഉദ്ഘാടനം ചെയ്തു. സംഘം പ്രസിഡന്‍റ് വട്ടപ്പാറ സതീശൻ നായർ അധ്യക്ഷത വഹിച്ചു. വിക്രമൻ നായർ വിദ്യാഭ്യാസ അവാർഡ് നേടിയ വട്ടപ്പാറ അനിൽകുമാറിനെയും വിവിധ പരീക്ഷകളിൽ മികച്ച വിജയം നേടിയ വിദ്യാർഥികളെയും അനുമോദിച്ചു. മഹാത്മാഗാന്ധി ദേശീയ തൊഴിലുറപ്പ് പദ്ധതി ഓംബുഡ്സ്മാൻ സാം ഫ്രാങ്ക്ലിൻ, വെമ്പായം പഞ്ചായത്ത് പ്രസിഡന്‍റ് ബീന ജയൻ, ലൂർദ് മൗണ്ട് പ്രിൻസിപ്പൽ ജോസ് ഡി. സുജീവ്, സംഘം സെക്രട്ടറി സന്തോഷ്, ഭരണസമിതി അംഗങ്ങളായ സാബുരാജ്, ലിവിങ്സ്റ്റൺ, കനക ചന്ദ്രൻ, ഗിരീശൻ, മഞ്ജു ഹരികൃഷ്ണൻ, കുറ്റിയാണി അശോകൻ, ജോസഫ്ഫെർണാണ്ടസ് തുടങ്ങിയവർ പങ്കെടുത്തു. സംഘാഗങ്ങൾക്കുള്ള ലാഭവിഹിതം പ്രസിഡന്‍റ് വിതരണം ചെയ്തു.

ജീവിത വിജയത്തിന്‍റെ എ പ്ലസ് നേടുന്നവരാണ് യഥാർഥ വിജയികൾ: ഡോ. അരുൺ എസ്. നായർ

തിരുവനന്തപുരം: ജീവിത വിജയത്തിന്‍റെ എ പ്ലസ് നേടുന്നവരാണ് യഥാർഥ വിജയികളായി മാറുന്നതെന്നു സംസ്ഥാന എൻഡ്രൻസ് കമ്മീഷണർ ഡോ. അരുൺ എസ്. നായർ. നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിലെ പ്രതിഭാ സം ഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. പരീക്ഷകളില ചെറിയ പരാജയങ്ങളും വീഴ്ചകളും ജീവിതത്തെ തളർത്തരുത്. ചെറിയ പ്രായത്തിൽ ലഭിക്കുന്ന വിജയങ്ങളിൽ മതിമറക്കരുതെന്നും അദ്ദേഹം പറഞ്ഞു. പ്ലസ് ടു, എസ്എസ്എൽസി പരീക്ഷകളിൽ ഉന്നത വിജയം നേടിയവരെ പുരസ് കാരങ്ങൾ നൽകി ആദരിച്ചു. പ്രിൻസിപ്പൽ ഫാ. ജോസ് ചരുവിൽ അധ്യക്ഷത വഹിച്ചു. വൈസ് പ്രിൻസിപ്പൽ അജീഷ് കുമാർ, പിടിഎ പ്രസിഡന്‍റ് ഡോ. ജോജു ജോൺ, മുൻ വൈസ് പ്രിൻസിപ്പൽ ബിജോ ഗീവറുഗീസ്, ഡോ. ജിബു തോമസ്, മദർ പിടിഎ പ്രസിഡന്‍റ് ജാൻസി തുടങ്ങിയവർ പ്രസംഗിച്ചു.

സിലിണ്ടർ മാറ്റുന്നതിനിടെ ഗ്യാസ് ചോർന്നു

വിഴിഞ്ഞം : സിലിണ്ടർ മാറ്റുന്നതിനിടയിൽ വലിയ തോതിൽഗ്യാസ് ചോർച്ചയുണ്ടായി. ഫയർഫോഴ്സ് അധികൃതരെത്തി രക്ഷാപ്രവർത്തനം നടത്തി. വിഴിഞ്ഞം വെണ്ണിയൂർ കാട്ടുകുളം സ്വദേശി അതുലിന്‍റെ വീട്ടിൽ ഇന്നലെ ഉച്ചയോടെയാണ് സംഭവം. സിലിണ്ടർ മാറ്റിസ്ഥാപിക്കാൻ റഗുലേറ്റർ ഘടിപ്പിക്കുന്നതിനിടയിൽ ശബ്ദത്തോടെ ഗ്യാസ് പുറത്തേക്കു വരുകയായിരുന്നു. പേടിച്ചു പുറത്തിറങ്ങിയ വീട്ടുകാർ വിഴിഞ്ഞം ഫയർ ഫോഴ്സിൽ വിവരമറിയിച്ചു. ഉദ്യോഗസ്ഥർ എത്തി സിലിണ്ടർ പുറത്തേക്ക് മാറ്റി അപകടം ഒഴിവാക്കി. തുടർന്ന് ഗ്യാസ് ഏജൻസിയെയും വിവരമറിയിച്ചു.

ലഹരി വിരുദ്ധ കാന്പയിന്‍ നടത്തി

നെയ്യാറ്റിന്‍കര: വിദ്യാഭ്യാസവും വിവേകവും വിദ്യാര്‍ഥികളുടെ വളര്‍ച്ചയ്ക്ക് അനിവാര്യമെന്ന് ആര്യാവര്‍ത്ത് ഇന്‍റര്‍നാഷണല്‍ യൂണിവേഴ്സിറ്റി വൈസ് ചാന്‍സിലര്‍ ഡോ. ഷൈജു ഡേവിഡ് ആല്‍ഫി അഭിപ്രായപ്പെട്ടു. നെയ്യാറ്റിന്‍കര അസോസിയേഷന്‍ ഫോര്‍ റൂറല്‍ ഡവലപ്പ്മെന്‍റ് (നാര്‍ഡ്) രൂപം നല്‍കിയ "രക്ഷ'യുടെ ലഹരിവിരുദ്ധ കാന്പയിനും നാര്‍ഡിന്‍റെ പ്രതിമാസ സാംസ്കാരിക സദസും ഉദ്ഘാടനം ചെയ്യുകയായിരുന്നു അദ്ദേഹം. നെയ്യാറ്റിന്‍കര ഡോ. ജി.ആര്‍. പബ്ലിക് സ്കൂളില്‍ നടന്ന ചടങ്ങില്‍ നാര്‍ഡ് ചെയര്‍മാന്‍ ജെ. ജോസ് ഫ്രാങ്ക്ളിന്‍ അധ്യക്ഷനായിരുന്നു. നെയ്യാറ്റിന്‍കര എക്സൈസ് റേഞ്ച് സിവില്‍ എക്സൈസ് ഓഫീസര്‍ യു.കെ. ലാല്‍കൃഷ്ണ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. സ്കൂള്‍ പ്രിന്‍സിപ്പൽ‍ ഡോ. ഷംനാ ബീഗം സന്ദേശം നല്‍കി. നഗരസഭ പൊതുമരാമത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ ആര്‍. അജിത, നഗരസഭ കൗണ്‍സിലര്‍ എസ്. സുമ, നാര്‍ഡ് രക്ഷാധികാരി മാന്പഴക്കരരാജശേഖരന്‍നായര്‍, ചീഫ് കോ-ഓര്‍ഡിനേറ്റര്‍ ജി.ആര്‍ അനില്‍, അയണിത്തോട്ടം കൃഷ്ണന്‍നായര്‍ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]