ത​നി​ച്ചി​രി​ക്കു​മ്പോ​ഴാ​ണ് ഓ​ർ​മി​ക്കേ​ണ്ട​ത്. ആ​രെ എ​ന്ന മ​റു​ചോ​ദ്യം ത​ത്കാ​ലം വ​ഴി​യി​ൽ വെ​യി​ൽ​കൊ​ണ്ട് നി​ൽ​ക്ക​ട്ടെ. ത​നി​ച്ചി​രി​ക്കു​മ്പോ​ൾ ഓ​ർ​മി​ക്കു​ന്ന​തെ​ല്ലാം ന​മു​ക്ക് പ്രി​യ​പ്പെ​ട്ട​താ​യി​രി​ക്കും. ആ​ൾ​ക്കൂ​ട്ട​ത്തി​ലും ന​മു​ക്ക് ഓ​ർ​മ​ക​ളു​ണ്ടാ​യി​രി​ക്കും. പ​ക്ഷേ, അ​പ്പോ​ഴ​ത്തെ ഓ​ർ​മ​ക​ൾ​ക്കൊ​ന്നും ഒ​രു ഭം​ഗി​യു​മു​ണ്ടാ​കി​ല്ല. ഗ്രീ​ഷ്മാ​കാ​ശ​ത്തി​ലെ വി​ള​റി​യ മേ​ഘം പോ​ലെ​യാ​കും ആ ​ഓ​ർ​മ​ക​ൾ.

അ​ല്ലെ​ങ്കി​ൽ നി​ശാ​രം​ഭ​ത്തി​ലെ അ​ശാ​ന്ത​ത​പോ​ലെ വി​റ​ങ്ങ​ലി​ച്ച ഒ​ന്ന്. ഉ​ള്ളം​കൈ​യി​ലെ ചെ​റി​യചെ​റി​യ രേ​ഖ​ക​ൾ​പോ​ലെ നാ​മ​തു ക​ണ്ടു​തു​ട​ങ്ങു​മ്പോ​ഴേ​ക്കും മാ​ഞ്ഞു​പോ​കും. അ​തി​ന് പൂ​ക്കാ​ല​ത്തി​ന്‍റെ സു​ഗ​ന്ധ​ഭം​ഗി​ക​ളു​ണ്ടാ​കി​ല്ല. പ​ക്ഷേ, ത​നി​ച്ചി​രി​ക്കു​മ്പോ​ൾ ഇ​ള​വെ​യി​ലി​നെ​പ്പോ​ലെ ഓ​ർ​മ​ക​ൾ ഒ​ന്നൊ​ന്നാ​യി പ​ടി​പ്പു​ര​ക​യ​റി ഉ​മ്മ​റ​ത്തു വ​ന്നി​രി​ക്കും. പി​ന്നെ സ​ല്ലാ​പ​മാ​ണ്. കു​ഞ്ഞി​രാ​മ​ൻ നാ​യ​രു​ടെ ഭാ​ഷ​യി​ൽ പ​റ​ഞ്ഞാ​ൽ പൂ​ത്ത മാ​വി​ൻ കൊ​മ്പി​ൽ കു​രു​വി​ക​ൾ വ​ന്നി​രി​ക്കു​മ്പോ​ഴു​ള്ള അ​മ​ര​സ​ല്ലാ​പം. ഒ​ര​ർ​ഥ​ത്തി​ൽ അ​താ​ണ് ന​മ്മെ ജീ​വി​ക്കാ​ൻ പ്രേ​രി​പ്പി​ക്കു​ന്ന​ത്. “ഒ​രാ​ൾ​ക്ക് ത​നി​ച്ചി​രി​ക്കാ​നാ​യി​ല്ലെ​ങ്കി​ൽ അ​യാ​ൾ ജീ​വി​ച്ചി​രു​ന്നു എ​ന്നു പ​റ​യു​ന്ന​തി​ൽ അ​ർ​ഥ​മി​ല്ല” എ​ന്ന് എ​ഴു​ത്തു​കാ​ര​ൻ മാ​ർ​ക്ക്ട്വൈ​ൻ എ​ഴു​തി​യി​ട്ടു​ണ്ട്. ഈ ​ത​നി​ച്ചി​രി​പ്പ് ഒ​രു ക​വി​ത​യാ​ണ്. അ​തെ​ഴു​തു​മ്പോ​ൾ മാ​ത്ര​മ​ല്ല; ത​നി​ച്ചി​രി​ക്കു​ന്ന എ​ല്ലാ​വ​രും ക​വി​ത​യാ​യി മാ​റി​ക്കൊ​ണ്ടി​രി​ക്കു​ക​യാ​ണ്.

കെ.​പി. അ​പ്പ​ൻ സാ​റി​ന്‍റെ ആ​ത്മ​ക​ഥ​യു​ടെ പേ​ര് ‘ത​നി​ച്ചി​രി​ക്കു​മ്പോ​ൾ ഓ​ർ​മി​ക്കു​ന്ന​ത്’ എ​ന്നാ​ണ്. ഒ​രി​ക്ക​ൽ ഒ​രു​ച്ച​ക​ഴി​ഞ്ഞ നേ​ര​ത്ത് ഞാ​ന​ദ്ദേ​ഹ​ത്തി​ന്‍റെ വീ​ട്ടി​ൽ ചെ​ന്നു. പ​ല​തും മി​ണ്ടി​പ്പ​റ​ഞ്ഞ കൂ​ട്ട​ത്തി​ൽ ആ​ത്മ​ക​ഥാ നാ​മ​ത്തി​ലേ​ക്ക് സാ​ർ എ​ത്തി​ച്ചേ​ർ​ന്ന​തെ​ങ്ങ​നെ​യെ​ന്നു ചോ​ദി​ച്ചു. സാ​ർ ചി​രി​ച്ചു. “ഇ​തി​ന്‍റെ​പേ​രി​ൽ ഒ​രു​പാ​ട് പേ​രെ​ന്നെ ചോ​ദ്യം​ചെ​യ്യാ​ൻ തു​ട​ങ്ങി​യി​ട്ടു​ണ്ട്. ത​നി​ച്ചി​രു​ന്ന​പ്പോ​ഴാ​ണ് ഞാ​നി​ത് എ​ഴു​താ​ൻ തു​ട​ങ്ങി​യ​ത്. എ​ഴു​തി​യ​തെ​ല്ലാം ഓ​ർ​മ​ക​ളാ​ണ്. അ​പ്പോ​ൾ ഈ ​ഓ​ർ​മ​ക​ളെ​ല്ലാം കൂ​ട്ടി​ക്കെ​ട്ടു​മ്പോ​ൾ ഇ​തെ​ല്ലാ​തെ ഞാ​നെ​ന്തു പേ​രി​ടും.” ഞാ​ൻ ഡി. ​വി​ന​യ​ച​ന്ദ്ര​ൻ സാ​റി​ന്‍റെ “കാ​ടി​നു ഞാ​നെ​ന്തു പേ​രി​ടും കാ​ട്ടി​ലെ കൂ​ട്ടു​കാ​ർ​ക്കെ​ന്തു പേ​രി​ടും” എ​ന്നു ചൊ​ല്ലി. “ഒ​രു പേ​രു ന​ശ്വ​ര​ത​യി​ൽ വി​ത​യ്ക്ക​പ്പെ​ടു​ക​യും അ​ന​ശ്വ​ര​ത​യി​ൽ ഉ​യി​ർ​ക്ക​പ്പെ​ടു​ക​യും ചെ​യ്യു​ന്ന ഒ​ന്നാ​ണ്.” സാ​ർ ചി​രി​ച്ചു​കൊ​ണ്ട് പ​റ​ഞ്ഞു.

ത​നി​ച്ചി​രു​ന്ന​പ്പോ​ഴാ​ണു ത​നി​ക്കു ഭ്രാ​ന്തു​പി​ടി​ച്ച​തെ​ന്ന് ബ​ഷീ​ർ പ​റ​ഞ്ഞി​ട്ടു​ണ്ട്. എ​ന്നാ​ൽ, ആ ​ഭ്രാ​ന്ത് ബ​ഷീ​റി​നെ വി​ശു​ദ്ധ​നാ​ക്കി​ത്തീ​ർ​ക്കു​ക​യാ​ണ് ചെ​യ്ത​ത്. ആ​ൾ​ക്കൂ​ട്ട​ങ്ങ​ൾ​ക്കി​ട​യി​ൽ​നി​ന്നു നി​മി​ഷ​നേ​രം​കൊ​ണ്ട് മ​ന​സി​നെ അ​പ്ര​ത്യ​ക്ഷ​മാ​ക്കാ​നും അ​തേ​നി​മി​ഷം അ​വ​ർ​ക്കി​ട​യി​ൽ ത​നി​ച്ചി​രി​ക്കാ​നും ബ​ഷീ​റി​നു ക​ഴി​ഞ്ഞി​രു​ന്നു. മാ​ങ്കോ​സ്റ്റി​ൻ മ​ര​ച്ചു​വ​ട്ടി​ൽ ആ​രാ​ധ​ക​ർ​ക്കു ന​ടു​വി​ൽ ത​നി​ച്ചി​രി​ക്കു​ന്ന ബ​ഷീ​റി​നെ എ​ത്ര​യെ​ത്ര ഫോ​ട്ടോ​ക​ളി​ലാ​ണു നാം ​ക​ണ്ടി​ട്ടു​ള്ള​ത്.

ബ​ഷീ​റി​നെ​പ്പോ​ലെ ജീ​വി​ത​ത്തി​ലു​ട​നീ​ളം ത​നി​ച്ചി​രി​ക്കാ​ൻ ഇ​ഷ്‌​ട​പ്പെ​ട്ട ഒ​രെ​ഴു​ത്തു​കാ​ര​നാ​ണ് എം. ​സു​കു​മാ​ര​ൻ. സു​കു​മാ​ര​ൻ നി​ശ​ബ്‌​ദ​നാ​യി​രു​ന്നു. തി​രു​വ​ന​ന്ത​പു​ര​ത്തെ പ​ഠ​ന​കാ​ല​ങ്ങ​ളി​ൽ ഇ​ട​യ്ക്കി​ടെ ഞാ​ൻ സു​കു​മാ​ര​നെ ഫ്ലാ​റ്റി​ൽ​ പോ​യി ക​ണ്ടി​ട്ടു​ണ്ട്. ഒ​രി​ക്ക​ൽ ക​വി അ​യ്യ​പ്പ​നു​മൊ​ത്താ​ണ് പോ​യ​ത്. ഒ​ന്നു ചി​രി​ക്കും. ഒ​ന്നു​ മി​ണ്ടും. ന​മ്മു​ടെ വാ​ക്കു​ക​ൾ​ക്കു വേ​ണ്ടി കാ​തോ​ർ​ക്കും.


ന​മ്മു​ടെ മി​ണ്ട​ലു​ക​ളി​ൽ ചോ​ദ്യ​ങ്ങ​ളു​ണ്ടെ​ങ്കി​ൽ നി​രാ​യു​ധ​നെ​പ്പോ​ലെ ഒ​ഴി​ഞ്ഞു​മാ​റും. ഒ​രി​ക്ക​ൽ അ​ദ്ദേ​ഹം പ​റ​ഞ്ഞു “യു​ദ്ധം ചെ​യ്യാ​നും കാ​ണാ​നും സ​ഞ്ജ​യ​നെ​പ്പോ​ലെ വ​ർ​ണി​ക്കാ​നും താ​ത്പ​ര്യ​മി​ല്ല” എ​ന്ന്. ജ​ന്മ​സി​ദ്ധ​മാ​യ ഒ​ര​ന്ത​ർ​മു​ഖ​ത്വം അ​ദ്ദേ​ഹ​ത്തി​നു​ണ്ടാ​യി​രു​ന്നു. അ​തു ക​വി​ത​പോ​ലെ ഭം​ഗി​യു​ള്ള ഒ​ന്നാ​യി​രു​ന്നു. ആ​ൾ​ക്കൂ​ട്ട​ത്തി​നു ന​ടു​വി​ൽ ഒ​രു ക​സേ​ര വ​ലി​ച്ചി​ട്ടി​രി​ക്കാ​ൻ അ​ദ്ദേ​ഹം ഒ​രി​ക്ക​ലും ആ​ഗ്ര​ഹി​ച്ചി​രു​ന്നി​ല്ല. ആ​ഗ്ര​ഹം മു​ഴു​വ​ൻ ത​നി​ച്ചി​രി​ക്കാ​നാ​യി​രു​ന്നു.

സു​കു​മാ​ര​ൻ ക​ട​ന്നുപോ​യ​പ്പോ​ൾ ഞാ​നി​തെ​ല്ലാം വീ​ണ്ടും ഓ​ർ​ത്തു. ത​നി​ച്ചി​രു​ന്നു ത​നി​ച്ചി​രു​ന്ന് സു​കു​മാ​ര​ൻ സൃ​ഷ്‌​ടി​ച്ച വാ​ക്കു​ക​ൾ​ക്കു ക​ലാ​പ​ങ്ങ​ളു​ടെ ആ​ര​വ​മു​ണ്ടാ​യി​രു​ന്നു. സ്വ​യം കു​ത്തി​മു​റി​വേ​ൽ​പ്പി​ക്കു​മ്പോ​ൾ കി​ട്ടു​ന്ന സു​ഖം മ​റ്റൊ​രാ​ൾ സൃ​ഷ്‌​ടി​ക്കു​ന്ന മു​റി​വി​ൽ​നി​ന്നു ല​ഭി​ക്കു​ന്നി​ല്ല എ​ന്ന് പ​റ​യാ​റു​ള്ള​തു​പോ​ലെ സു​കു​മാ​ര​ൻ ത​നി​ച്ചി​രു​ന്ന​പ്പോ​ഴെ​ല്ലാം എ​ഴു​ത്തി​ലൂ​ടെ കു​ത്തി സ്വ​യം മു​റി​വേ​ൽ​പ്പി​ക്കു​ക​യാ​യി​രു​ന്നു. ആ ​മു​റി​വു​ക​ളാ​ണ് ഇ​ന്നും ഉ​ണ​ങ്ങാ​തെ നി​ൽ​ക്കു​ന്ന അ​ദ്ദേ​ഹ​ത്തി​ന്‍റെ ക​ഥ​ക​ൾ.

മ​നു​ഷ്യ​നെ ഏ​റെ​ക്കു​റെ ത​നി​ച്ചാ​ക്കി​യ ശേ​ഷ​മേ മ​ര​ണം വ​ന്ന് വി​ളി​ക്കാ​റു​ള്ളൂ എ​ന്നു പ​റ​യാ​റു​ണ്ട്.ത​ന്‍റെ അ​വ​സാ​ന​കാ​ല​ത്ത് സി​ഗ്‌​മ​ണ്ട് ഫ്രോ​യ്ഡ് അ​നു​ഭ​വി​ച്ച ഏ​കാ​ന്ത​ത മ​ര​ണ​തു​ല്യ​മാ​യി​രു​ന്നു. ത​നി​ച്ചി​രി​ക്കാ​ൻ ഇ​ഷ്‌​ട​മി​ല്ലാ​ത്ത ഒ​രാ​ളാ​യി​രു​ന്നു ഫ്രോ​യ്ഡ്. ത​നി​ച്ചി​രി​ക്കു​ന്ന​തി​നേ​ക്കാ​ൾ മ​രി​ക്കു​ന്ന​താ​ണ് അ​ഭി​കാ​മ്യം എ​ന്നൊ​രി​ക്ക​ൽ അ​ദ്ദേ​ഹം എ​ഴു​തി. ക​ടു​ത്ത അ​ർ​ബു​ദം ഫ്രോ​യ്ഡി​നെ നി​ശ​ബ്‌​ദ​നാ​ക്കി. വാ​യി​ലാ​യി​രു​ന്നു അ​ർ​ബു​ദം. ചു​രു​ട്ട് വ​ലി​ക്കാ​നാ​കു​ന്നി​ല്ല. സു​ഹൃ​ത്തു​ക്ക​ളെ കാ​ണാ​നോ മി​ണ്ടാ​നോ ആ​കു​ന്നി​ല്ല. ക​ടു​ത്ത വേ​ദ​ന. ഒ​ന്നും വാ​യി​ക്കാ​നാ​കു​ന്നി​ല്ല. എ​ങ്കി​ലും ഒ​രു പു​സ്ത​കം വാ​യി​ക്കാ​നെ​ടു​ത്തു. ബ​ൽ​സാ​ക്കി​ന്‍റെ ‘ The Wild Ass’s Skin’. അ​തി​ലെ വി​ഖ്യാ​ത​മാ​യ തൊ​ലി​യു​ടെ അ​വ​സ്ഥ ത​നി​ക്കും ചേ​രു​മെ​ന്നു പ​റ​ഞ്ഞു സ്വ​യം ചി​രി​ക്കാ​ൻ ശ്ര​മി​ച്ചെ​ങ്കി​ലും ചി​രി​ക്കാ​നാ​യി​ല്ല.

അ​ട​ച്ചി​ട്ട മു​റി​യി​ലെ ത​നി​ച്ചി​രി​പ്പ് കൊ​ടും​ശൈ​ത്യ​ത്തി​നു ന​ടു​വി​ൽ ചെ​ന്നു​പെ​ട്ട ന​ഗ്ന​മ​നു​ഷ്യ​നെ​പ്പോ​ലെ​യാ​ണെ​ന്ന് ഫ്രോ​യ്ഡ് എ​ഴു​തി. ഒ​ടു​വി​ൽ ഡോ​ക്‌​ട​റെ നി​ർ​ബ​ന്ധി​ച്ച് മോ​ർ​ഫി​ൻ അ​മി​ത​മാ​യി കു​ത്തി​വ​യ്പ്പി​ച്ചു ത​നി​ച്ചി​രി​പ്പി​ൽ​നി​ന്ന് ഫ്രോ​യ്ഡ് എ​ന്നെ​ന്നേ​ക്കു​മാ​യി ര​ക്ഷ​പ്പെ​ടു​ക​യാ​യി​രു​ന്നു.

ത​നി​ച്ചി​രി​ക്കു​മ്പോ​ഴാ​ണു സ്വ​ർ​ഗം ന​ര​ക​മാ​കു​ന്ന​തും ന​ര​കം സ്വ​ർ​ഗ​മാ​കു​ന്ന​തും. അ​ത് അ​റി​ഞ്ഞ​തി​ൽ​നി​ന്നു​ള്ള മോ​ച​നം കൂ​ടി​യാ​ണ്.