ലേലത്തില്‍ പുതിയ റിക്കാര്‍ഡ് തീര്‍ത്ത് റാംബോ; ലിമോസിന്‍ ഇനത്തിലെ കാളയ്ക്ക് ലഭിച്ചത് 189,000 പൗണ്ട്
Saturday, May 14, 2022 11:39 AM IST
ഇംഗ്ലണ്ടിലെ കുംബ്രിയയില്‍ ബ്രിട്ടീഷ് ലിമോസിന്‍ ക്യാറ്റില്‍ സൊസൈറ്റിയുടെ നേതൃത്വത്തില്‍ നടന്ന ലേലത്തില്‍ ജെര്‍വിന്‍ ജോണ്‍സിന്‍റെ ഉടമസ്ഥതയിലുള്ള ഗ്രേഗ് ഗോച്ച് ഫാമിലെ ഗ്രേഗ് ഗോച്ച് റാംബോ എന്ന കാളയ്ക്ക് ലഭിച്ചത് 180,000 (189,000 പൗണ്ട് ) എന്ന വമ്പന്‍ തുകയാണ്.
മുന്‍പ് 2015ല്‍ ട്രൂമെന്‍ ജാഗര്‍ നടത്തിയ ലിമോസിന്‍ ഇനത്തിലെ കാളകളുടെ ലേലത്തില്‍ ലഭിച്ച 140,000 ഗിനി എന്ന റിക്കാര്‍ഡാണ് പഴങ്കഥയായത്.
ലേലത്തിനായി തന്‍റെ കാളയുമായി എത്തുമ്പോള്‍ അതിത്ര ഞെട്ടിക്കുമെന്ന് ജെര്‍വിന്‍ ജോണ്‍സ് എന്ന കര്‍ഷകര്‍ കരുതിയിരുന്നില്ല. ലഭിച്ച തുകയ്ക്ക് വേണമെങ്കില്‍ തന്‍റെ നാട്ടില്‍ ഒരുവീട് തന്നെ വാങ്ങാന്‍ കഴിയുമെന്ന് ജോണ്‍സ് പറയുന്നു.
ലിമോസിന്‍ ഇനത്തിലുള്ള ഒന്നാംനിര ഗുണമേന്മയുള്ള റാംബോ 2020 നവംബറിലാണ് ജനിച്ചത്.
18മാസം പ്രായമുള്ള റാംബോയെ ഇംഗ്ലണ്ടിലെ പെന്റിത്തിലുള്ള മെസേഴ്സ് ജെന്‍കിന്‍സണും സ്റ്റോക്ക്പോര്‍ട്ടിലുള്ള ബോഡന്‍ ആന്‍റ് ഡേവിസ് എന്നീ രണ്ട് ഫാംഹൗസുകള്‍ ചേര്‍ന്നാണ് റിക്കാര്‍ഡ് തുകയ്ക്ക് വാങ്ങിയത്.