ബംഗാളിൽ സഖ്യമില്ല; തൃണമൂൽ ഒറ്റയ്ക്ക് മത്സരിക്കുമെന്ന് അഭിഷേക് ബാനർജി
Sunday, February 25, 2024 9:19 PM IST
കോൽക്കത്ത: ലോക്സഭാ തെരഞ്ഞെടുപ്പിൽ തനിച്ച് മത്സരിക്കുമെന്നും കോൺഗ്രസുമായി സഖ്യത്തിന് ഇല്ലെന്നും തൃണമൂൽ കോൺഗ്രസ് ജനറൽ സെക്രട്ടറി അഭിഷേക് ബാനർജി.
2019ലെ തെരഞ്ഞെടുപ്പിൽ തൃണമൂൽ 22 സീറ്റും ബിജെപി 18 സീറ്റും നേടിയപ്പോൾ കോൺഗ്രസിന് രണ്ടു സീറ്റ് നേടാനെ കഴിഞ്ഞുള്ളൂ.ബംഗാളിൽ തൃണമൂൽ ഒറ്റയ്ക്കു മത്സരിക്കുമെന്ന് മമത ആവർത്തിക്കുമ്പോൾ സഖ്യത്തിനു വീണ്ടും സാധ്യതയുണ്ടെന്നാണ് കോൺഗ്രസ് ദേശീയ നേതൃത്വം പറയുന്നത്.
എന്നാൽ ബംഗാളിൽ ഇടതുപക്ഷത്തിനൊപ്പം ലോക്സഭാ തെരഞ്ഞെടുപ്പിനെ നേരിടണമെന്നാണ് തന്റെ ആഗ്രഹമെന്ന് പിസിസി അധ്യക്ഷനും ലോക്സഭയിലെ പ്രതിപക്ഷ നേതാവുമായ അധീർ രഞ്ജൻ ചൗധരി പറഞ്ഞു.
ഉത്തർപ്രദേശിലും ഡൽഹിയിലും സീറ്റ് വിഭജന ചർച്ച വിജയകരമായി പൂർത്തിയാക്കിയ കോൺഗ്രസിനു ബംഗാളിലെ തൃണമൂലിന്റെ നിലപാട് തിരിച്ചടിയായേക്കും.