മട്ടന്നൂർ നഗരസഭയിൽ ബിജെപിക്ക് കന്നിജയം; കോൺഗ്രസിന്റെ സിറ്റിംഗ് സീറ്റ് പിടിച്ചെടുത്തു
Friday, February 23, 2024 11:21 AM IST
കണ്ണൂർ: തദ്ദേശ ഉപതെരഞ്ഞെടുപ്പിൽ മട്ടന്നൂർ ടൗൺ വാർഡിൽ ബിജെപിക്ക് അട്ടിമറിജയം. കോൺഗ്രസിന്റെ സിറ്റിംഗ് വാർഡിൽ 72 വോട്ടിനാണ് ബിജെപിയുടെ ജയം. മട്ടന്നൂർ നഗരസഭയുടെ ചരിത്രത്തിൽ ആദ്യമായാണ് ബിജെപി അവിടെ ജയിക്കുന്നത്.
യുഡിഎഫ് കൗൺസിലറായിരുന്ന കെ.വി. പ്രശാന്തിന്റെ മരണത്തെ തുടർന്നാണ് മട്ടന്നൂർ ടൗൺ വാർഡിൽ ഉപതെരഞ്ഞെടുപ്പ് നടന്നത്. കഴിഞ്ഞ തവണ യുഡിഎഫ് സ്ഥാനാർഥി വെറും 12 വോട്ടിന്റെ ഭൂരിപക്ഷത്തിൽ ജയിച്ച സീറ്റാണ് ഇത്തവണ ബിജെപി സ്ഥാനാർഥി എ. മധുസൂദനൻ പിടിച്ചെടുത്തത്.
കോൺഗ്രസ് സ്ഥാനാർഥി കെ.വി. ജയചന്ദ്രനെയാണ് പരാജയപ്പെടുത്തിയത്. അതേസമയം, എൽഡിഎഫ് സ്വതന്ത്രൻ അമൽ മണി മൂന്നാം സ്ഥാനത്തേക്ക് പിന്തള്ളപ്പെട്ടു.
തദ്ദേശ ഉപതെരഞ്ഞെടുപ്പ് നടന്ന ജില്ലയിലെ രാമന്തളി പഞ്ചായത്തിലെ ഒമ്പതാം വാർഡായ പാലക്കോട് സെൻട്രലിൽ അഞ്ഞൂറിലേറെ വോട്ടിന് യുഡിഎഫ് ലീഡ് ചെയ്യുകയാണ്. മുഴുപ്പിലങ്ങാട്, മാടായി പഞ്ചായത്തുകളുടെയും ഫലം ഉടനെ പുറത്തുവരും.