ഗജമുത്തശി താര ചരിഞ്ഞു
Wednesday, November 29, 2023 12:26 AM IST
തൃശൂർ: ഗുരുവായൂർ ദേവസ്വം പുന്നത്തൂർ ആനക്കോട്ടയിലെ ഗജമുത്തശി താര ചരിഞ്ഞു. ചൊവ്വാഴ്ച വൈകിട്ട് ഏഴിനാണ് 97 വയസുള്ള ആന ചരിഞ്ഞത്.
പുന്നത്തൂർ ആനക്കോട്ടയിലെ പ്രായമേറിയ ആനയാണ് താര. സർക്കസ് കലാകാരിയായിരുന്ന താരയെ ഉടമ കെ. ദാമോദരൻ 1957 ൽ ആണ് ഗുരുവായൂരിൽ നടയ്ക്കിരുത്തുന്നത്. ഗജരാജൻ ഗുരുവായൂർ കേശവൻ ഉള്ള കാലമായിരുന്നു അത്.
കഴിഞ്ഞ മൂന്നു വർഷമായി വാർധക്യസഹജമായ അവശതകളെ തുടർന്ന് പാപ്പാൻമാരുടെ പ്രത്യേക പരിചരണത്തിലായിരുന്നു ആന. ക്ഷേത്രത്തിലെ ശീവേലിയടക്കമുള്ള ചടങ്ങുകളിൽ ശാന്തമായും ഭക്തിയോടെയും തന്റെ കടമ നിർവഹിച്ച ആനയായിരുന്നു താര.
ശ്രീഗുരുവായൂരപ്പ സന്നിധിയിലെ സ്തുത്യർഹ സേവനത്തിന് കഴിഞ്ഞ ദേവസ്വം ഭരണസമിതി ഗജമുത്തശി സ്ഥാനം നൽകി താരയെ ആദരിച്ചിരുന്നു. ആനയുടെ ജഡം ബുധനാഴ്ച രാവിലെ 10ന് കോടനാടേക്ക് കൊണ്ടുപോകും. ഗുരുവായൂർ ദേവസ്വത്തിന്റെ ബഹുമതികളോടെയാവും സംസ്കാരം.