സെൻസെക്സ് ചരിത്രത്തിലെ ഏറ്റവും ഉയർന്ന വാരാന്ത്യ ക്ലോസിംഗായ 81,332 പോയിന്‍റിലാണ്. മുൻവാരത്തിലെ 80,604ൽ നിന്നും 79,393ലേക്ക് ഇടിഞ്ഞ ശേഷം 81,427 വരെ സൂചിക മുന്നേറി. ഈ വാരം 82,041-82,751 റേഞ്ചിൽ പ്രതിരോധമുണ്ട്. ഉയർന്ന തലത്തിൽ ലാഭമെടുപ്പിന് നീക്കം നടന്നാൽ 80,007-78,683 പോയിന്‍റിൽ താങ്ങുണ്ട്.
വിദേശ പോർട്ട്ഫോളിയോ നിക്ഷേപകർ വാങ്ങലുകാരാണ്, 349 ദശലക്ഷം ഡോളർ കഴിഞ്ഞവാരം നിക്ഷേപിച്ചു. ഈ മാസത്തെ അവരുടെ മൊത്തം നിക്ഷേപം നാല് ബില്യൻ ഡോളറായി. വിദേശ പണപ്രവാഹം നിഫ്റ്റിയെയും സെൻസെക്സിനെയും പുതിയ ഉയരങ്ങളിൽ എത്തിച്ചു.
ആഭ്യന്തര ഫണ്ടുകൾ മുൻവാരത്തിന്‍റെ ആവർത്തനം പോലെ തിങ്കളാഴ്ചയും വിൽപ്പനക്കാരായിരുന്നു. അന്ന് അവർ 1652 കോടി രൂപയുടെ വിൽപ്പന നടത്തി. എന്നാൽ ബജറ്റ് വേളയിൽ വിപണി ഇടപെടലിന് മുന്നോട്ടുവന്ന് മൊത്തം 9760 കോടി രൂപ നിക്ഷേപിച്ചു. വിദേശ ഫണ്ടുകൾ 5990 കോടി രൂപയുടെ വാങ്ങലും 10,710 കോടി രൂപയുടെ വിൽപ്പനയും നടത്തി.
രൂപയുടെ മൂല്യം 83.69ൽ നിന്നും മുൻവാരം സൂചിപ്പിച്ച 83.90 ലേക്ക് ഇടിഞ്ഞങ്കിലും ക്ലോസിംഗിൽ പഴയ നിലവാരത്തിലാണ്. സാങ്കേതികമായി രൂപ ദുർബലാവസ്ഥയിലാണ്. ഡോളറിനായി ഫണ്ടുകളും എണ്ണ ഇറക്കുമതിക്കാരും ഒന്നിച്ച് രംഗത്ത് അണിനിരന്നാൽ മൂല്യം 84ലേക്ക് ഇടിയാം. മികവിന് മുതിർന്നാൽ 83.60ൽ തടസം.
അന്താരാഷ്‌ട്ര സ്വർണ വില ട്രോയ് ഔൺസിന് 2400 ഡോളറിൽനിന്നും 2432 വരെ ഉയർന്ന വേളയിലെ വിൽപ്പനസമ്മർദത്തിൽ 50 ദിവസങ്ങളിലെ ശരാശരി വിലയായ 2376ലെ നിർണായക സപ്പോർട്ട് തകർത്ത് 2351 ലേക്ക് ഇടിഞ്ഞു. എന്നാൽ തൊട്ടടുത്ത ദിവസം അതേ വേഗതയിൽ തിരിച്ചുവരവിൽ ക്ലോസിംഗിൽ 2,386ന് മുകളിൽ ഇടംപിടിച്ചു.