പൊതുസ്ഥലങ്ങളിലെ കൈയേറ്റം ഒഴിപ്പിക്കൽ ഒഴികെ സംസ്ഥാന സർക്കാരുകൾ നടത്തുന്ന എല്ലാത്തരം ഇടിച്ചുനിരത്തലുകൾക്കും മുൻകൂർ അനുമതി വേണമെന്നായിരുന്നു ജസ്റ്റീസുമാരായ ബി.ആർ. ഗവായ്, കെ.വി. വിശ്വനാഥൻ എന്നിവരുടെ ബെഞ്ചിന്‍റെ ഇടക്കാല ഉത്തരവ്. ക്രിമിനൽ കേസിൽപ്പെട്ട ഒരാളുടെ വീട് ബുൾഡോസർ ഉപയോഗിച്ചു തകർക്കും എന്ന മുനിസിപ്പൽ അധികൃതരുടെ ഭീഷണിക്കെതിരേയുള്ള ഹർജി പരിഗണിക്കുകയായിരുന്നു സുപ്രീംകോടതി.
സർക്കാർ റോഡുകൾ, നടപ്പാതകൾ, റെയിൽവേ ഭൂമി, പൊതുജല സ്രോതസുകൾ എന്നിവയിലെ കൈയേറ്റമൊഴികെ എല്ലാ ഒഴിപ്പിക്കൽ നടപടികൾക്കും നിയന്ത്രണം ബാധകമാണ്.
ക്രിമിനൽ കുറ്റം ചുമത്തി അറസ്റ്റിലാകുന്നവരുടെ കെട്ടിടങ്ങൾ ഇടിച്ചുനിരത്തുന്ന സംഭവങ്ങൾ ഏറെയും റിപ്പോർട്ട് ചെയ്തിരുന്നത് ഉത്തർപ്രദേശിലായിരുന്നു. ബിജെപി ഭരിക്കുന്ന ഗുജറാത്ത്, ആസാം, മധ്യപ്രദേശ്, രാജസ്ഥാൻ, ഛത്തീസ്ഗഡ് സംസ്ഥാനങ്ങളും യുപിയുടെ മാതൃക പിന്തുടർന്ന് പ്രതികളാക്കപ്പെട്ട നിരവധി പേരുടെ വീടുകളും വ്യാപാരസ്ഥാപനങ്ങളും ഇടിച്ചുനിരത്തി.