ഇന്ത്യ മുന്നണി സർക്കാർ അധികാരത്തിൽ എത്തിയാൽ ദാരിദ്ര്യരേഖയ്ക്കു താഴെയുള്ള വീട്ടിലെ സ്ത്രീകൾക്ക് മാസം 8,500 രൂപ നൽകുമെന്നും പ്രഖ്യാപനമുണ്ട്. ഇതുകൂടാതെ സംസ്ഥാന സർക്കാർ 1,500 രൂപ നൽകുമെന്നും പ്രഖ്യാപിച്ചിട്ടുണ്ട്. ക്ഷീരകർഷകർക്ക് ആശ്വാസമായി സംസ്ഥാനത്തെ കോണ്ഗ്രസ് സർക്കാർ പാലിന് വിലവർധന ഏർപ്പെടുത്തിയിട്ടുണ്ട്. ബിജെപിസർക്കാർ ഹിമാചൽപ്രദേശിലെ ടൂറിസം മേഖല തകർത്തതായി കോണ്ഗ്രസ് നേതാവ് പ്രിയങ്ക ഗാന്ധി പ്രചാരണറാലിയിൽ കുറ്റപ്പെടുത്തുന്നു. സോണിയാ ഗാന്ധിയുടെ വേനൽക്കാല വസതി സ്ഥിതിചെയ്യുന്നത് ഷിംലയിലാണ്. ഇവിടെയാണ് പ്രിയങ്കയും കുടുംബവും താമസിക്കുന്നത്.
താരമണ്ഡലം മണ്ഡി ഉപതെരഞ്ഞെടുപ്പിൽ നഷ്‌ടപ്പെട്ട മണ്ഡി തിരിച്ചുപിടിക്കാൻ ബിജെപി ഇക്കുറി മത്സരിപ്പിക്കുന്നത് ബോളിവുഡ് നടി കങ്കണ റണൗതിനെയാണ്. ബോളിവുഡ് സിനിമാലോകം നുണയാണെന്നും അവിടെയുള്ളതെല്ലാം വ്യാജമാണെന്നും പറഞ്ഞിട്ടുള്ള കങ്കണ ലോക്സഭാ തെരഞ്ഞെടുപ്പ് വിജയിച്ചാൽ സിനിമാജീവിതം ഉപേക്ഷിക്കുമെന്നും പ്രഖ്യാപിച്ചിട്ടുണ്ട്.
അന്തരിച്ച മുൻ മുഖ്യമന്ത്രി വീർഭദ്ര സിംഗിന്‍റെ മകൻ വിക്രമാദിത്യ സിംഗാണു കോണ്ഗ്രസ് സ്ഥാനാർഥി. ബിഎസ്പി സ്ഥാനാർഥി പ്രകാശ് ചന്ദ് ഭരദ്വാജും മത്സരരംഗത്തുണ്ട്. വിക്രമാദിത്യ സിംഗിന്‍റെ അമ്മ പ്രതിഭാ സിംഗാണ് മണ്ഡിയിലെ സിറ്റിംഗ് എംപി. 2019ൽ മണ്ഡിയിൽനിന്നു വിജയിച്ച ബിജെപി എംപി റാം സ്വരൂപ് ശർമ അന്തരിച്ചതിനെത്തുടർന്ന് 2021ൽ നടന്ന ഉപതരഞ്ഞെടുപ്പിലാണ് പ്രതിഭാ സിംഗ് വിജയിച്ചത്.
കാംഗ്ര മണ്ഡലത്തിൽ ബിജെപിയുടെ രാജീവ് ഭരദ്വാജും കോണ്ഗ്രസിന്റെ ആനന്ദ് ശർമയും തമ്മിലാണു മത്സരം. സംവരണമണ്ഡലമായ സിംലയിൽ ബിജെപിയുടെ സുരേഷ് കുമാർ കാശ്യപും കോണ്ഗ്രസിലെ വിനോദ് സുൽത്താൻ പുരിയും ഏറ്റുമുട്ടുന്നു. ലോക്സഭാ തെരഞ്ഞെടുപ്പിന്‍റെ അവസാനഘട്ട വോട്ടെടുപ്പിലെ പരസ്യപ്രചാരണം ഇന്ന് അവസാനിക്കാനിരിക്കെ, പരസ്പരം ആരോപണം ഉന്നയിച്ചാണ് പാർട്ടികൾ മുന്നേറുന്നത്.
ഹിമാചൽപ്രദേശിൽ കോണ്ഗ്രസ് അട്ടിമറിവിജയം നേടുമെന്നാണ് രാഷ്‌ട്രീയ നിരീക്ഷകർ പറയുന്നത്. പ്രകൃതിദുരന്ത സഹായം വൈകിപ്പിച്ച കേന്ദ്രനടപടിയും അഗ്നിവീറും ബിജെപിക്കു തിരിച്ചടിയാകുമെന്നാണു വിലയിരുത്തൽ.