ദുരന്തത്തിൽ വീടും സ്ഥലവും നഷ്ടപ്പെട്ട കുടുംബങ്ങളെ ഒന്നാം ഘട്ടമായും വാസയോഗ്യമല്ലാത്ത സ്ഥലങ്ങളിൽ ഉൾപ്പെടുന്ന മറ്റു കുടുംബങ്ങളെ രണ്ടാം ഘട്ടമായും പുനരധിവസിപ്പിക്കും. ഒന്നും രണ്ടും ഘട്ടങ്ങളിൽ ഉൾപ്പെടുന്ന ഗുണഭോക്താക്കളുടെ കരടുപട്ടിക ജില്ലാ കളക്ടർ പ്രസിദ്ധീകരിക്കും.
പട്ടിക അന്തിമമാക്കുന്നതിനുള്ള നിർദേശങ്ങൾ പുറപ്പെടുവിക്കാൻ റവന്യു വകുപ്പിനെ ചുമതലപ്പെടുത്തി. സ്ത്രീകൾക്കു താത്പര്യമുള്ള തൊഴിലിൽ ഏർപ്പെടുന്നതിനാവശ്യമായ പരിശീലനം നൽകും. വാടക കെട്ടിടങ്ങളിൽ കച്ചവടം നടത്തുന്നവരെ സംരക്ഷിക്കും.
പുനരധിവാസ പദ്ധതികളുടെ പ്രോജക്ട് മാനേജ്മെന്റ് കണ്സൾട്ടന്റായി കിഫ്ബി മുഖേന മുന്നോട്ടുപോകാനാണ് ഉദ്ദേശ്യം. വിവിധ മേഖലകളിൽ ആവശ്യമായി വരുന്ന വിദഗ്ധരുടെ സേവനവും ഉപയോഗിക്കും.
ഇതിനായി പൊതുമരാമത്ത്, ജല അഥോറിറ്റി, കെഎസ്ഇബി, തദ്ദേശ വകുപ്പ്, ടൗണ് പ്ലാനിംഗ്, ഡിസാസ്റ്റർ മാനേജ്മെന്റ് തുടങ്ങിയവയിൽനിന്നുള്ള അഭിപ്രായം സമന്വയിപ്പിച്ച് ജില്ലാ ഭരണകൂടത്തിന്റെ സഹായത്തോടെ നിർവഹണം നടത്തും. ചീഫ് സെക്രട്ടറിയുടെ നേതൃത്വത്തിൽ ഒരു ഉന്നത അധികാര സമിതി ആയിരിക്കും പദ്ധതിക്ക് മേൽനോട്ടം നൽകുന്നത്.