കലവൂരിലുളള വീടിന്‍റെ പരിസരത്ത് മൃതദേഹം കുഴിച്ചുമൂടിയെന്ന വിവരത്തിന്‍റെ പശ്ചാത്തലത്തിലായിരുന്നു ഇന്നലത്തെ പരിശോധന. മാത്യൂസ്-ശര്‍മിള ദമ്പതികള്‍ താമസിക്കുന്ന കലവൂരിലെ വീട്ടിലാണു പരിശോധന നടത്തിയത്. വീടിനുസമീപത്തെ ശുചിമുറിക്കു സമീപമാണ് മൃതദേഹം കുഴിച്ചിട്ടത്. നൈറ്റി ധരിച്ചനിലയില്‍ വലതുഭാഗത്തേക്ക് ചെരിഞ്ഞുകിടക്കുന്ന രീതിയിലാണ് മൃതദേഹം കണ്ടെത്തിയത്.
നിലവില്‍ മാത്യൂസും ശര്‍മിളയും ഒളിവിലാണ്. ഇവരുടെ ഫോണ്‍ ലൊക്കേഷന്‍ ഉഡുപ്പിയിലാണെന്ന വിവരം ലഭിച്ചിട്ടുണ്ടെന്നും പുറത്തുവരുന്നുണ്ട്. ശര്‍മിള ഉഡുപ്പി സ്വദേശിനിയായതിനാല്‍ കേരളത്തിനു പുറത്തും അന്വേഷണം വ്യാപിപ്പിക്കുമെന്ന് ഡിവൈഎസ്പി മധുകുമാര്‍ പറഞ്ഞു. കാണാതാകുമ്പോള്‍ സുഭദ്ര ആഭരണങ്ങള്‍ ധരിച്ചിരുന്നു. എന്നാല്‍ കണ്ടെത്തിയ മൃതദേഹത്തില്‍നിന്ന് ആഭരണങ്ങള്‍ കണ്ടെത്തിയിട്ടില്ലെന്നും അദ്ദേഹം അറിയിച്ചു.
ആഭരണങ്ങൾ കവർന്നുള്ള കൊലപാതകം കാണാതാകുമ്പോള്‍ സുഭദ്ര ധരിച്ചിരുന്ന ആഭരണങ്ങള്‍ കവര്‍ന്നശേഷമുളള കൊലപാതകമാകാമെന്നാണു പോലീസിന്‍റെ പ്രാഥമിക നിഗമനം.
ശര്‍മിളയും സുഭദ്രയും മാത്യൂസും യാത്രകള്‍ പോകാറുണ്ടായിരുന്നു. ഇടയ്ക്ക് എപ്പോഴോ ഇവര്‍ സുഭദ്രയുടെ സ്വര്‍ണം മോഷ്‌ടിച്ചതായും ഇതിനെച്ചൊല്ലി സുഭദ്ര രണ്ടുപേരുമായി തെറ്റിയതായും പോലീസിന് വിവരം ലഭിച്ചിട്ടുണ്ട്. എന്നാല്‍, അതിനുശേഷം വീണ്ടും ഇവര്‍ അടുപ്പത്തിലായി. തുടര്‍ന്ന്, ശര്‍മിളയും മാത്യൂസും കൃത്യമായി പ്ലാന്‍ തയാറാക്കി സുഭദ്രയെ കലവൂരിലേക്ക് വിളിച്ചുവരുത്തി കൊലപ്പെടുത്തുകയും കൈയിലുണ്ടായിരുന്ന സ്വര്‍ണം തട്ടിയെടുത്തശേഷം കുഴിച്ചുമൂടിയെന്നുമാണ് ലഭ്യമായിരിക്കുന്ന വിവരം.
കടവന്ത്രയില്‍നിന്നു ലഭിച്ച സിസിടിവി ദൃശ്യങ്ങളാണു തിരോധാനക്കേസില്‍ തുമ്പുണ്ടാക്കിയത്. കൂടെയുള്ളത് ആരാണെന്ന അന്വേഷണം കടവന്ത്ര പോലീസിനെ ശര്‍മിളയില്‍ എത്തിക്കുകയായിരുന്നു.
പ്രതികളെ കണ്ടെത്താനും കൊലപാതകത്തിലേക്കു നയിച്ച കാരണങ്ങള്‍ ഉറപ്പിക്കാനും പോലീസ് അന്വേഷണം ഊര്‍ജിതമാണ്.