പെണ്കുട്ടിയെ തട്ടിയെടുത്തത് ലൈംഗികമായി ഉപദ്രവിക്കാനായിരുന്നെന്നു പ്രതി പോലീസിനോടു പറഞ്ഞു. തെരുവിൽ അലഞ്ഞു നടക്കലാണ് ഇയാളുടെ പ്രധാന പണി. പ്രതിയെ പിടികൂടാൻ സഹായകമായത് നൂറിലധികം സിസിടിവി ദൃശ്യങ്ങളുടെ പരിശോധനയിൽ ലഭിച്ച സൂചനകളാണെന്ന് കമ്മീഷണർ പറഞ്ഞു. 2022ൽ മിഠായി വാങ്ങി നൽകാമെന്നു പറഞ്ഞ് ഇയാൾ ഒരു പെണ്കുട്ടിയെ ഉപദ്രവിച്ചിരുന്നു. ആ കേസിൽ ജയിലിൽ കഴിയുകയായിരുന്നു. ജനുവരി 12നാണ് ഇയാൾ കൊല്ലം ജയിലിൽനിന്നു പുറത്തിറങ്ങിയത്. ഇയാൾക്കെതിരേ എട്ടു കേസുകളുണ്ടായിരുന്നു.
ഭവനഭേദനം, ഓട്ടോ മോഷണങ്ങൾ തുടങ്ങി നിരവധി കേസുകളിൽ ഇയാൾ പിടിയിലായിട്ടുണ്ട്. ഇയാൾക്ക് ആരുമായും ബന്ധമില്ല. എഴുതാനോ വായിക്കാനോ അറിയില്ല. പ്രതിക്കെതിരേ പോക്സോ കേസ് രജിസ്റ്റർ ചെയ്യും.വായ പൊത്തിപ്പിടിച്ചത് കുട്ടിയുടെ മരണത്തിനുതന്നെ കാരണമായേക്കാമെന്ന നിരീക്ഷണത്തിൽ പ്രതിക്കെതിരേ കൂടുതൽ വകുപ്പുകൾ ചുമത്തുമെന്നും കമ്മീഷണർ പറഞ്ഞു. പ്രതിയെ ഇന്ന് കോടതിയിൽ ഹാജരാക്കും.