ദൗത്യത്തിൽ സഹായിക്കുന്നതിന് നാല് കുംകിയാനകളെ സ്ഥലത്ത് എത്തിച്ചിരുന്നു. ആർആർ ടീം അംഗങ്ങളും മൂന്ന് വെറ്ററിനറി സർജൻമാരും ഉൾപ്പെടുന്ന സംഘം മയക്കുവെടി പ്രയോഗിക്കാൻ കാടുകയറിയപ്പോൾ ആശ്വാസത്തിലായിരുന്നു ജനം.
മുന്നൊരുക്കത്തിന്റെ ഭാഗമായി ബാവലിയിലും സമീപങ്ങളിലും താമസിക്കുന്നവർക്ക് ജാഗ്രതാനിർദേശം നൽകിയിരുന്നു. മൈസൂരു റോഡിൽ കാട്ടിക്കുളം രണ്ടാം ഗേറ്റ് മുതൽ ബാവലി വരെ ഗതാഗത നിയന്ത്രണവും ഏർപ്പെടുത്തി.
എന്നാൽ, വനസേനയുടെയും നാട്ടുകാരുടെയും അനുമാനം തെറ്റിച്ച് ആന ചെന്പകപ്പാറ വനത്തിൽനിന്നു മാറി. ആന കർണാടക വനത്തിലേക്ക് മാറിയാൽ കേരളത്തിൽനിന്നുള്ള സംഘത്തിന് മയക്കുവെടി പ്രയോഗിക്കാൻ കഴിയില്ല എന്നത് സാഹചര്യം സങ്കീർണമാക്കി.
വയനാട്ടിൽ നാളെ "മനഃസാക്ഷി’ ഹർത്താലിന് ഫാർമേഴ്സ് റിലീഫ് ഫോറം ജില്ലാ കമ്മിറ്റി ആഹ്വാനം ചെയ്തു. വന്യമൃഗ ആക്രമണത്തിൽനിന്നു മനുഷ്യരുടെ ജീവനും ജീവനോപാധികൾക്കും സംരക്ഷണം നൽകുന്നതിൽ അധികാരികൾ കാട്ടുന്ന വീഴ്ചയിൽ പ്രതിഷേധിച്ചാണ് രാവിലെ ആറു മുതൽ വൈകുന്നേരം അഞ്ചുവരെ ഹർത്താൽ ആഹ്വാനം ചെയ്തതെന്നു ഫോറം ജില്ലാ ചെയർമാൻ പി.എം. ജോർജ് അറിയിച്ചു.