പ്ലസ്ടു വിദ്യാര്‍ഥിനിയെ കൊലപ്പെടുത്തിയ കേസ്; പ്രതി സഫർ ഷായ്ക്ക് ഇരട്ട ജീവപര്യന്തം
Thursday, October 5, 2023 2:19 AM IST
കൊച്ചി: പ്ലസ്ടു വിദ്യാര്‍ഥിനിയെ വാല്‍പ്പാറയില്‍ കൊണ്ടുപോയി കൊലപ്പെടുത്തിയ കേസിലെ പ്രതിക്ക് ഇരട്ട ജീവപര്യന്തം.
കുമ്പളം സഫര്‍ മന്‍സിലില്‍ സഫര്‍ ഷാ(26)യെയാണ് എറണാകുളം ജില്ലാ പോക്‌സോ കോടതി ജഡ്ജി കെ. സോമന്‍ ശിക്ഷിച്ചത്. ജീവിതാവസാനംവരെ ശിക്ഷ അനുഭവിക്കണം. എറണാകുളം കലൂരില്‍ വാടകയ്ക്ക് താമസിച്ചിരുന്ന ദമ്പതികളുടെ മകളാണ് കൊല്ലപ്പെട്ടത്.
തെളിവുനശിപ്പിക്കല്‍, തട്ടിക്കൊണ്ടുപോകല്‍ എന്നീ കുറ്റങ്ങള്‍ക്ക് അഞ്ചുവര്‍ഷം വീതം തടവും 25,000 രൂപ വീതം പിഴയുമാണ് ശിക്ഷ. ഇത് ഒരുമിച്ച് അനുഭവിച്ചാല്‍ മതിയാകും. ഇതിനുശേഷമാണ് ജീവപര്യന്തം ആരംഭിക്കുകയെന്നും കോടതി ഉത്തരവില്‍ വ്യക്തമാക്കി. പ്രതിക്കെതിരേ കൊലപാതകം, പീഡനം, തെളിവു നശിപ്പിക്കല്‍, പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച് ഗര്‍ഭിണിയാക്കുക എന്നീ കുറ്റങ്ങള്‍ തെളിഞ്ഞിരുന്നു.
2020 ജനുവരി ഏഴിനായിരുന്നു കേസിനാസ്പദമായ സംഭവം. സഫര്‍ ഷായുമായുള്ള പ്രണയത്തില്‍നിന്ന് പെണ്‍കുട്ടി പിന്മാറിയിരുന്നു. തുടര്‍ന്ന് സംഭവദിവസം പെണ്‍കുട്ടി പഠിക്കുന്ന സ്‌കൂളിലെത്തിയ പ്രതി കുട്ടിയെ കാറില്‍ കയറ്റിക്കൊണ്ടുപോയി. ജോലി ചെയ്തിരുന്ന സ്ഥാപനത്തില്‍നിന്നു സര്‍വീസ് കഴിഞ്ഞ് ഉടമയ്ക്ക് തിരികെ നല്‍കാന്‍ ഏല്‍പ്പിച്ച കാറുമായാണ് സഫര്‍ ഷാ സ്‌കൂളിലെത്തിയത്.
പെണ്‍കുട്ടിയെ കാറില്‍വച്ച് കുത്തിക്കൊലപ്പെടുത്തിയശേഷം മൃതദേഹം തേയിലത്തോട്ടത്തില്‍ ഉപേക്ഷിച്ചു. പെണ്‍കുട്ടി നാലര മാസം ഗര്‍ഭിണിയായിരുന്നു. കേസില്‍ 51 സാക്ഷികളെ വിസ്തരിച്ചു. 103 രേഖകളും 20 തൊണ്ടിമുതലും ഹാജരാക്കി. സെന്‍ട്രല്‍ സിഐ എസ്. വിജയശങ്കറാണ് കേസ് അന്വേഷിച്ചത്. പ്രോസിക്യൂഷനു വേണ്ടി പി.എ.ബിന്ദു ഹാജരായി.