ജെഡിഎസിന് കേരളത്തില്‍ പുതിയ പാര്‍ട്ടി; തീരുമാനം ഏഴിന്
Sunday, October 1, 2023 1:33 AM IST
കോഴിക്കോട്: കര്‍ണാടകത്തില്‍ ബിജെപിയുമായി ജെഡിഎസ് സഖ്യത്തിലായ സാഹചര്യത്തില്‍ കേരളത്തിലെ ജെഡിഎസ് പ്രവര്‍ത്തകര്‍ പുതിയ പാര്‍ട്ടി രൂപീകരിക്കുന്നതിനെക്കുറിച്ച് ആലോചിക്കുന്നു.
ജനതാദള്‍ കേരള എന്ന പേരാണ് പരിഗണനയില്‍. ഒരു മന്ത്രിയും ഒരു എംഎല്‍എയും തദ്ദേശസ്ഥാപനങ്ങളിലെ ജനപ്രതിനിധികളും ഉള്ളതിനാല്‍ പുതിയ പാര്‍ട്ടിയുണ്ടാക്കുന്നതിന്‍റെ നിയമ പ്രശ്‌നങ്ങളും പരിശോധിക്കുന്നുണ്ട്. മറ്റു പാര്‍ട്ടികളില്‍ ലയിക്കുന്ന കാര്യവും പരിഗണനയിലുണ്ട്. ഭാവികാര്യങ്ങള്‍ തീരുമാനിക്കുന്നതിന് ഒക്ടോബര് ഏഴിന് എറണാകുളത്ത് സംസ്ഥാന കമ്മിറ്റി യോഗം വിളിച്ചുചേര്‍ത്തിട്ടുണ്ട്.
ദേശീയ തലത്തില്‍ ബിജെപിക്കൊപ്പമുള്ള ജെഡിഎസ് സംസ്ഥാനത്ത് ഇടതുമുന്നണിക്കൊപ്പം നില്‍ക്കുന്നതിന്‍റെ സാംഗത്യം ചോദ്യംചെയ്യപ്പെട്ട സാഹചര്യത്തിലാണ് ധൃതിപിടിച്ച് തീരുമാനമെടുക്കാന്‍ പാര്‍ട്ടി നീക്കം.
സിപിഎം നേതൃത്വം അടിയന്തരമായി തീരുമാനമെടുക്കാന്‍ ജെഡിഎസിന് നിര്‍ദേശം നല്‍കിയിട്ടുണ്ട്.നിലവില്‍ ഇടതുമുന്നണിയുടെ ഭാഗമാണ് ജെഡിഎസ്. പാര്‍ട്ടി നേതാവായ കെ. കൃഷ്ണന്‍കുട്ടി വൈദ്യുതി മന്ത്രിയാണ്. സംസ്ഥാന പ്രസിഡന്‍റ് മാത്യു ടി.തോമസാണ് മറ്റൊരു എംഎല്‍എ. ത്രിതല പഞ്ചായത്തുകളിലും പാര്‍ട്ടിക്ക് പ്രതിനിധികളുണ്ട്.
എന്നാല്‍ പുതിയ പാര്‍ട്ടിയുണ്ടാക്കുന്നതിനുള്ള നിയമപരമായ പ്രശ്‌നങ്ങളാണ് നേതൃത്വത്തെ അലട്ടുന്നത്. നിയമസഭാ തെരഞ്ഞെടുപ്പിലും തദ്ദേശസ്ഥാപന തെരഞ്ഞെടുപ്പിലും പാര്‍ട്ടി പ്രതിനിധികള്‍ക്ക് മത്സരിക്കാന്‍ ചിഹ്‌നം നല്‍കിയത് ദേശീയ പ്രസിഡന്‍റ് എച്ച്.ഡി. ദേവഗൗഡയാണ്. ആ ചിഹ്‌നത്തിലാണ് ജയിച്ചുവന്നതും.
പുതിയ പാര്‍ട്ടിയുണ്ടാക്കുമ്പോള്‍ മന്ത്രിയും എംഎല്‍എയും മറ്റു ജനപ്രതിനിധികളും അതിന്‍റെ ഭാഗമാകാതെ പുറത്തുനില്‍ക്കേണ്ടിവരും. എന്നാല്‍ പ്രാദേശിക പാര്‍ട്ടിയായി രജിസ്റ്റര്‍ ചെയ്തതിനാല്‍ പ്രശ്‌നമില്ലെന്ന അഭിപ്രായക്കാരും ഉണ്ട്. അതുകൊണ്ടാണ് നിയമപരമായ കാര്യങ്ങള്‍ പഠിക്കാന്‍ തീരുമാനിച്ചിട്ടുള്ളത്. പുതിയ പാര്‍ട്ടിയുണ്ടാക്കി എസ്പിയില്‍ ലയിക്കാനാണ് ആലോചന.
ജെഡിഎസിന് ആര്‍ജെഡിയില്‍ ലയിക്കാന്‍ താല്‍പര്യമുണ്ടെങ്കിലും എല്‍ജെഡി-ആര്‍ജെഡി ലയനം ഈ മാസം കോഴിക്കോട്ടു നടക്കുന്നതിനാല്‍ തല്‍ക്കാലം വേണ്ടെന്ന് വയ്ക്കുകയാണുണ്ടായത്.
നിലപാട് അറിയിക്കണമെന്ന് സിപിഎം
തിരുവനന്തപുരം: ജനതാദൾ-എസ് ബിജെപി ഘടകകക്ഷിയായി എൻഡിഎയിൽ ചേരാൻ തീരുമാനിച്ച സാഹചര്യത്തിൽ സംസ്ഥാനത്തു സ്വീകരിക്കുന്ന നിലപാട് കേരള ഘടകം വേഗത്തിൽ അറിയിക്കണമെന്നു സിപിഎം നേതൃത്വം നിർദേശിച്ചു.
ദേവഗൗഡ നേതൃത്വം നൽകുന്ന ജനതാദൾ- എസ് ബിജെപി മുന്നണിയുടെ ഭാഗമായിട്ട് ആഴ്ചകൾ കഴിഞ്ഞിട്ടും ഇതേച്ചൊല്ലി പ്രതിപക്ഷം ആക്ഷേപം ഉന്നയിക്കുന്ന സാഹചര്യത്തിലുമാണ് നിലപാടു വ്യക്തമാക്കാൻ നിർദേശിച്ചത്.
ഇന്നലെ തീരുമാനം അറിയിക്കാമെന്ന് ജെഡിഎസ് സംസ്ഥാന നേതാക്കൾ നേരത്തേ വ്യക്തമാക്കിയിരുന്ന സാഹചര്യത്തിലാണ് സിപിഎം വിശദീകരണം തേടിയത്. ഏഴിനു ചേരുന്ന യോഗത്തിനു ശേഷം തീരുമാനം അറിയിക്കാമെന്നാണ് ഇപ്പോൾ വ്യക്തമാക്കിയിട്ടുള്ളത്.
അതേസമയം, ബിജെപി മുന്നണിയോട് യോജിക്കാനാവില്ലെന്ന നിലപാട് ദേവഗൗഡയെ ധരിപ്പിക്കാനായി ജെഡിഎസ് സംസ്ഥാന പ്രസിഡന്‍റ് മാത്യു.ടി. തോമസും മന്ത്രി കെ. കൃഷ്ണൻകുട്ടിയും ഇന്ന് ബംഗലൂരുവിൽ എച്ച്.ഡി. ദേവഗൗഡയെ കാണും.