11571 ബിരുദങ്ങള്ക്ക് സെനറ്റ് അംഗീകാരം
തേഞ്ഞിപ്പലം: ഇന്നലെ ചേര്ന്ന കാലിക്കട്ട് സര്വകലാശാലാ സെനറ്റ് 11571 ബിരുദങ്ങള്ക്ക് അംഗീകാരം നല്കി. ഒമ്പത് ഡിപ്ലോമ, 9813 ഡിഗ്രി, 1723 പിജി, അഞ്ച് എംഎഫില്, 21 പിഎച്ച്ഡി എന്നിവ ഉള്പ്പെടെയാണ് അംഗീകാരം നൽകിയത്. തെരഞ്ഞെടുപ്പ് പെരുമാറ്റച്ചട്ടം നിലനില്ക്കുന്നതിനാല് വാര്ഷിക ബജറ്റ് വോട്ട് ഓണ് അക്കൗണ്ടായാണ് പാസാക്കിയത്. വാര്ഷിക റിപ്പോര്ട്ടും സഭയില് സമര്പ്പിച്ചു. ബാക്കിയുള്ള അജണ്ടകളും ചോദ്യോത്തരങ്ങളും ചര്ച്ചകളും പെരുമാറ്റച്ചട്ട കാലാവധി അവസാനിച്ച ശേഷം ജൂണ് 11ന് തുടരുമെന്ന് യോഗത്തില് അധ്യക്ഷത വഹിച്ച വൈസ് ചാന്സലര് ഡോ. എം.കെ. ജയരാജ് പറഞ്ഞു.
ദേശീയ യുവജനോത്സവത്തിന് കാലിക്കട്ടും
തേഞ്ഞിപ്പലം: പഞ്ചാബില് നടക്കുന്ന അഖിലേന്ത്യാ അന്തർ സര്വകലാശാലാ യുവജനോത്സവത്തിന് കാലിക്കട്ട് സര്വകലാശാലയും. 28 മുതല് ഏപ്രില് ഒന്ന് വരെ ലുധിയാനയിലെ പഞ്ചാബ് കാര്ഷിക സര്വകലാശാലയില് നടക്കുന്ന പരിപാടിയില് 12 വിദ്യാര്ഥികളാണ് കാലിക്കട്ടിനെ പ്രതിനിധീകരിക്കുന്നത്. സര്വകലാശാലാ വിദ്യാര്ഥി ക്ഷേമവിഭാഗം സെക്ഷന് ഓഫീസര് കെ. ഷമീം, എം.കെ. അനില് എന്നിവരുടെ നേതൃത്വത്തിലുള്ള സംഘം യാത്ര പുറപ്പെട്ടു.
ബിടെക് പ്രവേശനം
കാലിക്കട്ട് യൂണിവേഴ്സിറ്റി ഇൻസ്റ്റിറ്റ്യൂട്ട് ഓഫ് എൻജിനീയറിംഗ് ടെക്നോളജിയിൽ 2024 2025 വർഷത്തെ അഡ്മിഷൻ ഹെൽപ്പ് ഡെസ്ക് തുടങ്ങി. കമ്പ്യൂട്ടർ സയൻസ് ആൻഡ് എൻജിനീയറിംഗ്, ഇലക്ട്രോണിക്സ് ആൻഡ് കമ്മ്യൂണിക്കേഷൻ എൻജിനീയറിംഗ്, ഇലക്ട്രോണിക്സ് ആൻഡ് കമ്പ്യൂട്ടർ സയൻസ് എൻജിനീയറിംഗ്, ഇലക്ട്രിക്കൽ ആൻഡ് ഇലക്ട്രോണിക്സ് എൻജിനീയറിംഗ്, മെക്കാനിക്കൽ എൻജിനീയറിംഗ്, പ്രിന്റിംഗ് ടെക്നോളജി എന്നീ ബ്രാഞ്ചുകളിലേക്കുള്ള പ്രവേശനവുമായി ബന്ധപ്പെട്ടാണ് ഹെൽപ്പ് ഡെസ്ക്. KEAM എക്സാം എഴുതാത്തവർക്കും പ്രവേശനം നേടാനുള്ള അവസരം ഉണ്ടായിരിക്കുന്നതാണ്. ഫോൺ: 9567172591
സിഎച്ച്എംകെ ലൈബ്രറി അവധി
ഈസ്റ്റർ അവധിയോട് അനുബന്ധിച്ച് 28, 29, 31 തീയതികളിൽ കാലിക്കട്ട് സർവകലാശാലാ സിഎച്ച്എംകെ ലൈബ്രറിക്ക് അവധിയായിരിക്കും. 30ന് രാവിലെ പത്ത് മുതൽ വൈകുന്നേരം അഞ്ചുവരെ പ്രവർത്തിക്കും.
പരീക്ഷാഫലം
മൂന്നാം സെമസ്റ്റർ എംഎ ഉറുദു (സിസിഎസ്എസ് 2021 ആൻഡ് 2022 പ്രവേശനം) നവംബർ 2023 പരീക്ഷയുടെ ഫലം പ്രസിദ്ധീകരിച്ചു.
പുനർമൂല്യനിർണയ ഫലം
ഒന്ന് മുതൽ നാല് വരെ സെമസ്റ്റർ എംഎസ്സി കെമിസ്ട്രി (2010 മുതൽ 2014 വരെ പ്രവേശനം) സെപ്റ്റംബർ 2021 ഒറ്റത്തവണ റഗുലർ സപ്ലിമെന്ററി പരീക്ഷകളുടെ പുനർമൂല്യനിർണയ ഫലം പ്രസിദ്ധീകരിച്ചു.
സൂക്ഷ്മപരിശോധനാ ഫലം
ഏഴാം സെമസ്റ്റർ ബിബിഎ എൽഎൽബി നവംബർ 2022, ഏപ്രിൽ 2023 പരീക്ഷകളുടെ സൂക്ഷ്മപരിശോധനാ ഫലം പ്രസിദ്ധീകരിച്ചു.