മാഗ്കോമിൽ ജെഎൻയു കോഴ്സുകൾ
കോഴിക്കോട്: ഡൽഹി ജവഹർലാൽ നെഹ്റു സർവകലാശാല (ജെഎൻയു) കോഴ്സുകൾ ആദ്യമായി കേരളത്തിൽ. കോഴിക്കോട് മഹാത്മാഗാന്ധി കോളജ് ഓഫ് മാസ് കമ്മ്യൂണിക്കേഷനാ(മാഗ്കോം)ണ് ജെഎൻയു കോഴ്സുകൾ ആരംഭിച്ചത്.
പിജി ഡിപ്ലോമ ഇൻ ജേണലിസം (പിജിഡിജെ) എന്ന ജെഎൻയു കോഴ്സിലേക്കുള്ള ഈ വർഷത്തെ പ്രവേശന നടപടികൾ വരുംദിവസങ്ങളിൽ ആരംഭിക്കും. ജെഎൻയുവും മാഗ്കോമും നേരത്തേതന്നെ അക്കാദമിക സഹകരണത്തിനായുള്ള ധാരണാപത്രം ഒപ്പിട്ടിരുന്നു, തുടർന്നാണ് ഇരുസ്ഥാപനങ്ങളും ചേർന്ന് മാധ്യമപഠനത്തിനായുള്ള പിജി ഡിപ്ലോമ കോഴ്സ് വികസിപ്പിച്ചത്.
കോഴ്സിന്റെ പഠനകേന്ദ്രവും പരീക്ഷാകേന്ദ്രവും മാഗ്കോം ആണ്. പ്രായോഗിക പരിശീലനം വഴി നൈപുണ്യ വികസനം ഉറപ്പാക്കുംവിധമുള്ള പഠനത്തിനാണ് ഊന്നൽ.
ടെലിവിഷൻ ന്യൂസ്, പ്രോഗ്രാം പ്രൊഡക്ഷനുകൾക്കൊപ്പം ഡിജിറ്റൽ മീഡിയ പ്രൊഡക്ഷൻ, ലേഔട്ട്, റിപ്പോർട്ടിംഗ്, എഡിറ്റിംഗ്, ഫോട്ടോഗ്രഫി വീഡിയോഗ്രഫി, വിഡിയോ എഡിറ്റിംഗ്, പബ്ലിക് റിലേഷൻസ്, മാധ്യമഭാഷ തുടങ്ങിയ വിഷയങ്ങളിൽ പരിശീലനത്തോടുകൂടിയ ക്ലാസുകൾ ഉണ്ടായിരിക്കും. ബിരുദമാണു പിജിഡിജെ പ്രവേശനത്തിനുള്ള യോഗ്യത. അഭിരുചിനിർണയ പരീക്ഷയുടെ അടിസ്ഥാനത്തിലായിരിക്കും പ്രവേശനം.