അങ്കമാലി: അങ്കമാലി ലിറ്റിൽ ഫ്ലവർ ആശുപത്രിയിൽ നൂതന സംവിധാനങ്ങളുമായി എമർജൻസി വിഭാഗം (ആക്സിഡന്‍റ് ആൻഡ് എമർജൻസി ഡിപ്പാർട്ട്മെന്‍റ്) നവീകരിച്ചു. സെന്‍റ് അൽഫോൻസാ ബ്ലോക്കിന്‍റെ താഴത്തെ നിലയിലേക്ക് മാറ്റിയ എമർജൻസി വിഭാഗത്തിൽ, ആഗോള നിലവാരത്തിലുള്ള ട്രൈയേജ് സംവിധാനം അനുസരിച്ച് രോഗിക്ക് സമയബന്ധിതമായി ചികിത്സ നൽകാനുള്ള അത്യാധുനിക സജ്ജീകരണമുണ്ടാകും.
വിഷം ഉള്ളിൽ ചെല്ലുന്ന അവസ്ഥ, പകർച്ചവ്യാധികൾ എന്നിവ മുതൽ പാമ്പുകടി, കണ്ണിനേൽക്കുന്ന പരിക്കുകൾ, ഹൃദയ-ശ്വാസകോശ രോഗങ്ങൾ, കുട്ടികൾക്കുണ്ടാകുന്ന രോഗങ്ങൾ എന്നിവ ചികിത്സിക്കാൻ പ്രത്യേകം സജ്ജീകരണങ്ങളോടുകൂടിയ മുറികളും മൈനർ ഓപ്പറേഷൻ തിയറ്ററും എക്സ് റേ, ഇസിജി, പ്ലാസ്റ്ററിംഗ് മുറികൾ, പ്രത്യേക ഫാർമസി, കൗൺസിലിംഗ് റൂം, 30 രോഗീ സൗഹൃദ കിടക്കകൾ എന്നിവ ആഗോളനിലവാരത്തിൽ ഒരുക്കിയിട്ടുണ്ടെന്ന് ഇതോടനുബന്ധിച്ചു നടന്ന ചടങ്ങിൽ ഡയറക്ടർ ഫാ.തോമസ് വൈക്കത്തുപറമ്പിൽ പറഞ്ഞു.
അസി. ഡയറക്ടർമാരായ ഫാ.വർഗീസ് പാലാട്ടി, ഫാ.റോക്കി കൊല്ലംകുടി, ഫാ.പോൾസൺ പെരേപ്പാടൻ, മെഡിക്കൽ സൂപ്രണ്ട് ഡോ. സ്റ്റിജി ജോസഫ്, നഴ്സിംഗ് ഓഫീസർ സിസ്റ്റർ പൂജിത, മെഡിക്കൽ ഓഫീസർമാരായ ഡോ. ജോൺ നോബിൾ തോമസ്, ഡോ.എൽസി, ഡോ.പി.ജെ. തോമസ്, അഡ്മിനിസ്ട്രേറ്റീവ് ഓഫീസർ ജോഷി തോമസ്, സിസ്റ്റർ അൽഫോൻസ എന്നിവരും ചടങ്ങിൽ പങ്കെടുത്തു.