മരം വീണ് തൊഴുത്ത് തകർന്നു; കറവപ്പശുക്കൾക്ക് പരിക്ക് : Deepika.com Nattu Visesham

KOTTAYAM

മരം വീണ് തൊഴുത്ത് തകർന്നു; കറവപ്പശുക്കൾക്ക് പരിക്ക്

Friday, May 10, 2024 7:26 AM IST

ഉദയനാപുരം: ശക്തമായ കാറ്റിൽ വൻമരം കടപുഴകി പശുത്തൊഴുത്തിനു മീതെ വീണതിനെത്തുടർന്ന് തൊഴുത്തിലുണ്ടായിരുന്ന ആറു പശുക്കളിൽ നാലെണ്ണത്തിനു പരിക്കേറ്റു. കെട്ടിടഭാഗം കാലിൽവീണ് കാലു തകർന്ന ഒരു കറവപ്പശു മൃതപ്രായയായി.

മറ്റ് മൂന്നു പശുക്കളുടെ പുറംഭാഗത്ത് വലിയ മുറിവുകളുണ്ട്. തൊഴുത്തിനു സമീപത്ത് കെട്ടിയിരുന്ന ആടുകൾ നിസാര പരിക്കോടെ രക്ഷപ്പെട്ടു. ഉദയനാപുരം ചെട്ടിമംഗലം നിമ്മി നിവാസിൽ കുമാരിയുടെ പശുക്കൾക്കാണ് പരിക്കേറ്റത്.

കാറ്റിന്‍റെ ശക്തിയിൽ തൊഴുത്തിന്‍റെ ഷിൻഷീറ്റ് മേഞ്ഞ മേൽക്കൂര പറന്നു വീടിന്‍റെ മുറ്റത്ത് വേലിയോട് ചേർന്ന് തങ്ങിനിന്നു. ശബ്ദം കേട്ട് ഓടിയെത്തിയ കുമാരിയും ഭർത്താവ് പദ്മനാഭനും മറ്റും തലനാരിഴയ്ക്കാണ് പരിക്കേൽക്കാതെ രക്ഷപ്പെട്ടത്.

തൊഴുത്തു പൂർണമായി തകർന്നു. 2010മുതൽ പശു വളർത്തി ഉപജീവനം നടത്തിവരികയാണ് കുമാരിയും കുടുംബവും. ആറു വയസ് പ്രായമുള്ള പത്ത് ലിറ്ററോളം പാൽ ലഭിച്ചിരുന്ന പശുവിന്‍റെ കാലാണ് ഗുരുതരമായി പരിക്കേറ്റത്. മറ്റു മൂന്ന് പശുക്കൾക്കും പരിക്കേറ്റു.

കാലുതകർന്ന കറവപ്പശുവിനെ രക്ഷിച്ചെടുക്കുന്നത് പ്രയാസമാണെന്നും മറ്റു മൂന്ന് പശുക്കൾക്ക് വിദഗ്ധ ചികിത്സ നൽകിയാൽ രക്ഷിച്ചെടുക്കാനാകുമെന്നും മൃഗസംരക്ഷണ വകുപ്പ് അധികൃതർ പറഞ്ഞു. ദിനംപ്രതി 30ലിറ്ററോളം പാൽ ഇവർക്ക് ലഭിച്ചിരുന്നു.