നവയുഗം : Deepika.com Sports News |

Click here for detailed news of all items

നവയുഗം

Thursday, March 21, 2024 11:57 PM IST

ഐപിഎൽ ട്വന്‍റി-20 ചരിത്രത്തിൽ ഇത് നവയുഗം. എം.എസ്. ധോണി, രോഹിത് ശർമ, വിരാട് കോഹ്‌ലി എന്നിവർ ഒന്നിച്ച് ട്രോഫി ഫോട്ടോ ഷൂട്ടിൽ ഇല്ലാത്ത ആദ്യ സീസണാണ് ഇത്തവണത്തേത്. ഇന്ത്യൻ ക്രിക്കറ്റിലെ വൻമരങ്ങളായ ഇവർ മൂവരും ക്യാപ്റ്റൻസി പദത്തിൽ ഇല്ലാത്ത ആദ്യ സീസണായി 2024 എഡിഷൻ മാറി.

റോയൽ ചലഞ്ചേഴ്സ് ബംഗളൂരുവിന്‍റെ ക്യാപ്റ്റൻ സ്ഥാനത്തുനിന്ന് സ്വയം ഒഴിവായി കോഹ്‌ലി ട്രോഫി ഫോട്ടോ ഷൂട്ട് ചിത്രത്തിൽനിന്ന് നേരത്തേ മറഞ്ഞിരുന്നു. 2021 സീസണിലാണ് കോഹ്‌ലി ആർസിബി ക്യാപ്റ്റൻ സ്ഥാനത്തുനിന്ന് പടിയിറങ്ങിയത്. തുടർന്ന് ഫാഫ് ഡുപ്ലെസി റോയൽ ചലഞ്ചേഴ്സിന്‍റെ ക്യാപ്റ്റൻ സ്ഥാനത്ത് എത്തി.

2024 സീസണിനു മുന്പായി മുംബൈ ഇന്ത്യൻസിന്‍റെ ക്യാപ്റ്റൻ സ്ഥാനത്തുനിന്ന് രോഹിത് ശർമ നിഷ്കാസിതനാക്കപ്പെടുകയായിരുന്നു. ഗുജറാത്ത് ടൈറ്റൻസിന്‍റെ ക്യാപ്റ്റനായിരുന്ന ഹാർദിക് പാണ്ഡ്യയെ തിരികെ ടീമിലെത്തിച്ച് മുംബൈ ഇന്ത്യൻസിന്‍റെ ക്യാപ്റ്റനായി അവരോധിച്ചു, തികച്ചും ഫ്രാഞ്ചൈസി തീരുമാനം. മുംബൈയെ അഞ്ച് ഐപിഎൽ കിരീടത്തിലേക്ക് നയിച്ച രോഹിത് ശർമ അതോടെ 2024 സീസണിൽ ക്യാപ്റ്റൻസിയുടെ ഭാരമില്ലാത്ത ഓപ്പണിംഗ് ബാറ്റർ മാത്രമായി മാറി.

ആർസിബി കപ്പ് സ്വന്തമാക്കാത്തതിന്‍റെ പേരിലെ ആക്രമണം അവസാനിപ്പിക്കാനായിരുന്നു കോഹ്‌ലി ക്യാപ്റ്റൻ സ്ഥാനം ഒഴിവായത്. എന്നാൽ, ധോണി പുതിയ തലമുറയ്ക്ക് വഴിമാറുകയായിരുന്നു.

2022 സീസണിൽ ക്യാപ്റ്റൻസി രവീന്ദ്ര ജഡേജയ്ക്കു നൽകിയെങ്കിലും അത് ഫലം കാണാതിരുന്നതോടെ വീണ്ടും തൽസ്ഥാനത്തെത്തി. 2024 സീസണിൽ വീണ്ടും ധോണി നായകസ്ഥാനം ഒഴിവായി. ഇവിടെത്തുടങ്ങുന്നു ഐപിഎല്ലിന്‍റെ നവയുഗം...

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.