സോം​പു​ര​യി​ലെ പെ​രു​ന്ത​ച്ച​ന്മാ​ര്‍, രാ​മ​ക്ഷേ​ത്ര​ത്തി​ന്‍റെ ശി​ല്പി​ക​ള്‍
Thursday, August 6, 2020 7:29 PM IST
കോ​വി​ഡ് പ്ര​തി​സ​ന്ധി​ക്കി​ട​യി​ലും പ്രൗ​ഢ​ഗം​ഭീ​ര ച​ട​ങ്ങു​ക​ളോ​ടെ പ്ര​ധാ​ന​മ​ന്ത്രി വെ​ള്ളി​ക്ക​ല്ല് പാ​കി​യ​തോ​ടെ അ​യോ​ധ്യ​യി​ലെ രാ​മ​ക്ഷേ​ത്ര നി​ര്‍​മാ​ണ​ത്തി​നു തു​ട​ക്കം കു​റി​ച്ചി​രി​ക്കു​ക​യാ​ണ്.

ഇ​ന്ത്യ​യി​ല്‍ ക്ഷേ​ത്ര നി​ര്‍​മാ​ണ​ങ്ങ​ളി​ലെ പെ​രു​ന്ത​ച്ച​ന്‍​മാ​ര്‍ എ​ന്നു ത​ന്നെ വി​ശേ​ഷി​പ്പി​ക്കാ​വു​ന്ന സോം​പു​ര കു​ടും​ബ​മാ​ണ് ക്ഷേ​ത്ര നി​ര്‍​മാ​ണ​ത്തി​ന്‍റെ പ്ര​ധാ​ന രൂ​പ​ക​ല്പ​ന നി​ര്‍​വ​ഹി​ച്ച​ത്. 30 വ​ര്‍​ഷ​ങ്ങ​ള്‍​ക്ക് മു​ന്‍​പാ​ണ് ച​ന്ദ്ര​കാ​ന്ത് സോം​പു​ര എ​ന്ന എ​ഴു​പ​ത്തേ​ഴു​കാ​ര​ന്‍ അ​യോ​ധ്യ​യി​ല്‍ രാം​ല​ല്ല ക്ഷേ​ത്ര​ത്തി​ന്‍റെ നി​ര്‍​മാ​ണ പ്ര​വ​ര്‍​ത്ത​ന​ങ്ങ​ള്‍​ക്കു തു​ട​ക്കം കു​റി​ച്ച​ത്. അ​ന്നു വി​ശ്വ​ഹി​ന്ദു പ​രി​ഷ​ത് നേ​താ​വാ​യി​രു​ന്ന അ​ശോ​ക് സിം​ഗാ​ളി​നൊ​പ്പ​മാ​ണ് ച​ന്ദ്ര​കാ​ന്ത് ആ​ദ്യ​മാ​യി അ​യോ​ധ്യ​യി​ല്‍ എ​ത്തു​ന്ന​ത്. വ്യ​വ​സാ​യി ആ​യി​രു​ന്ന ഘ​ന​ശ്യാം​ദാ​സ് ബി​ര്‍​ള ആ​ണ് ച​ന്ദ്ര​കാ​ന്തി​നെ അ​ശോ​ക് സിം​ഗാ​ളി​നു പ​രി​ച​യ​പ്പെ​ടു​ത്തു​ന്ന​ത്. ബി​ര്‍​ള കു​ടും​ബ​ത്തി​നു വേ​ണ്ടി അ​തി​നോ​ട​കം നി​ര​വ​ധി ക്ഷേ​ത്ര​ങ്ങ​ളു​ടെ നി​ര്‍​മാ​ണം ച​ന്ദ്ര​കാ​ന്ത് ന​ട​ത്തി​യി​രു​ന്നു.

റാ​വു വി​ളി​ച്ച ത​ച്ച​ന്‍

അ​യോ​ധ്യ​യി​ല്‍ ബാ​ബ​റി മ​സ്ജി​ദ് ത​ക​ര്‍​ക്ക​പ്പെ​ടു​ന്ന​തി​ന് മു​ന്‍​പ് പ​ള്ളി നി​ല​നി​ര്‍​ത്തി​ക്കൊ​ണ്ടു​ത​ന്നെ ഒ​രു ക്ഷേ​ത്രം നി​ര്‍​മി​ക്കാ​മോ എ​ന്നു ച​ന്ദ്ര​കാ​ന്തി​നോ​ട് അ​ന്ന​ത്തെ പ്ര​ധാ​ന​മ​ന്ത്രി പി.​വി. ന​ര​സിം​ഹ റാ​വു ചോ​ദി​ച്ചി​രു​ന്നു. അ​ന്നു പ്ര​ധാ​ന​മ​ന്ത്രി​യു​ടെ ഓ​ഫീ​സി​ല്‍ ഒ​രു അ​യോ​ധ്യ സെ​ല്‍ ത​ന്നെ രൂ​പീ​ക​രി​ച്ചി​രു​ന്നു. ഇ​ത​നു​സ​രി​ച്ചു ച​ന്ദ്ര​കാ​ന്ത് മോ​സ്‌​കി​ന് അ​രു​കി​ലാ​യി ക്ഷേ​ത്രം വ​രു​ന്ന രീ​തി​യി​ല്‍ ഒ​രു രൂ​പ​രേ​ഖ ത​യാ​റാ​ക്കി ന​ല്‍​കി. ഇ​ക്കാ​ര്യം ന​രം​സിം​ഹ റാ​വു​വി​ന്‍റെ ആ​ത്മ​ക​ഥ​യി​ലും പ​റ​യു​ന്നു​ണ്ട്.

എ​ന്നാ​ല്‍, യ​ഥാ​ര്‍​ഥ സ്ഥ​ല​ത്ത​ല്ലാ​തെ മ​റ്റൊ​രി​ട​ത്തും രാ​മ​ക്ഷേ​ത്രം പ​ണി​യാ​നാ​കി​ല്ല എ​ന്ന നി​ല​പാ​ടി​ല്‍ വി​ശ്വ​ഹി​ന്ദു പ​രി​ഷ​ത് ഉ​റ​ച്ചു നി​ന്ന​തോ​ടെ ഈ ​ബ​ദ​ല്‍ മാ​ര്‍​ഗം ത​ള്ളി​പ്പോ​കു​ക​യാ​യി​രു​ന്നു എ​ന്നാ​ണ് ച​ന്ദ്ര​കാ​ന്ത് ത​ന്നെ അ​ടു​ത്തി​ടെ ഒ​രു അ​ഭി​മു​ഖ​ത്തി​ല്‍ പ​റ​ഞ്ഞ​ത്.

സോം​പു​ര​യു​ടെ ക്ഷേ​ത്ര​ക​ല

ഇ​തി​നോ​ട​കം രാ​ജ്യ​ത്തും വി​ദേ​ശ​ത്തു​മാ​യി ഇ​രു​ന്നൂ​റി​ല്‍ അ​ധി​കം ക്ഷേ​ത്ര​ങ്ങ​ള്‍ ച​ന്ദ്ര​കാ​ന്ത് സോം​പു​ര​യും കു​ടും​ബ​വും നി​ര്‍​വ​ഹി​ച്ചി​ട്ടു​ണ്ട്. ത​ന്‍റെ പ്രാ​യ​വും കോ​വി​ഡ് പ്ര​തി​സ​ന്ധി​യും ക​ണ​ക്കി​ലെ​ടു​ത്തു ച​ന്ദ്ര​കാ​ന്ത് ഇ​ന്ന​ലെ അ​യോ​ധ്യ​യി​ല്‍ ന​ട​ന്ന ഭൂ​മി പൂ​ജ​യി​ല്‍ പ​ങ്കെ​ടു​ത്തി​രു​ന്നി​ല്ല. എ​ന്നാ​ല്‍, അ​ദ്ദേ​ഹ​ത്തി​ന്‍റെ മ​ക​ൻ രാ​മ​ജ​ന്മ​ഭൂ​മി ക്ഷേ​ത്ര​ത്തി​ന്‍റെ രൂ​പ​രേ​ഖ ത​യാ​റാ​ക്കി​യ ആ​ശി​ഷ് അ​യോ​ധ്യ​യി​ലു​ണ്ടാ​യി​രു​ന്നു. ക്ഷേ​ത്ര​നി​ര്‍​മാ​ണ പ്ര​വ​ര്‍​ത്ത​ന​ങ്ങ​ളു​ടെ ക​രാ​ര്‍ ല​ഭി​ച്ചി​രി​ക്കു​ന്ന​ത് ലാ​ര്‍​സ​ന്‍ ആ​ൻ​ഡ് ടു​ര്‍​ബോ ക​മ്പ​നി​ക്കാ​ണ്.

ത​ല​മു​റ​വ​ഴ​ക്കം

ക്ഷേ​ത്ര നി​ര്‍​മാ​ണ​ത്തി​ന്‍റെ അ​റി​വും ക​രു​വി​രു​തും 49കാ​ര​നാ​യ ആ​ശി​ഷി​ലേ​ക്കെ​ത്തു​ന്ന​ത് അ​ച്ഛ​ന്‍ ച​ന്ദ്ര​കാ​ന്തി​ല്‍​നി​ന്നും മു​ത്ത​ച്ഛ​ന്‍ പ്ര​ഭാ​ശ​ങ്ക​റി​ല്‍​നി​ന്നു​മാ​ണ്. ഗു​ജ​റാ​ത്തി​ലെ സോ​മ​നാ​ഥ് ക്ഷേ​ത്രം നി​ര്‍​മി​ച്ച​ത് പ്ര​ഭാ​ശ​ങ്ക​റും സോ​മ​നാ​ഥും ചേ​ര്‍​ന്നാ​ണ്. 1951ല്‍ ​അ​ന്ന​ത്തെ രാ​ഷ്‌​ട്ര​പ​തി​യാ​യി​രു​ന്ന ഡോ. ​രാ​ജേ​ന്ദ്ര പ്ര​സാ​ദാ​യി​രു​ന്നു ഈ ​ക്ഷേ​ത്ര​ത്തി​ന്‍റെ ഉ​ദ്ഘാ​ട​നം നി​ര്‍​വ​ഹി​ച്ച​ത്.

പ്ര​ഭാ​ശ​ങ്ക​റി​ന് പി​ന്നീ​ടു പ​ദ്മ​ശ്രീ ന​ല്‍​കി ആ​ദ​രി​ച്ചു. ബ​ദ​രീ​നാ​ഥ് ക്ഷേ​ത്ര​ത്തി​ന്‍റെ ന​വീ​ക​ര​ണ പ്ര​വ​ര്‍​ത്ത​ന​ങ്ങ​ള്‍ ക​ഴി​ഞ്ഞു മ​ട​ങ്ങി വ​രു​ന്ന​തി​നി​ടെ​യാ​ണ് പ്ര​ഭാ​ശ​ങ്ക​റി​ന് മ​ക​ന്‍ ബ​ല്‍​വ​ന്ത് റാ​യി​യെ ഒ​രു അ​പ​ക​ട മ​ര​ണ​ത്തി​ല്‍ ന​ഷ്ട​മാ​കു​ന്ന​ത്.

വി​ശ്വ​ക​ര്‍​മാ​വി​ല്‍​നി​ന്നു നേ​രി​ട്ടു ത​ങ്ങ​ളു​ടെ പൂ​ര്‍​വി​ക​ര്‍ ക​ര​സ്ഥ​മാ​ക്കി​യ​താ​ണ് ക്ഷേ​ത്ര നി​ര്‍​മാ​ണ ക​ല എ​ന്നാ​ണ് സോം​പു​ര കു​ടും​ബം വി​ശ്വ​സി​ക്കു​ന്ന​ത്. ഇ​വ​രു​ടെ പൂ​ര്‍​വി​ക​ന്‍ രാം​ജി​യാ​ണ് പാ​ലി​റ്റാ​ന​യി​ലെ ശ​ത്രു​ഞ്ജ​യ് ഹി​ല്‍​സി​ലെ ജ​യി​ന്‍ ക്ഷേ​ത്രം നി​ര്‍​മി​ച്ച​ത്. ഇ​ദ്ദേ​ഹ​മാ​ക​ട്ടെ വാ​സ്തു​ശാ​സ്ത്ര​ത്തി​ല്‍ ഒ​രു ത​ര​ത്തി​ലു​ള്ള ഔ​പ​ചാ​രി​ക വി​ദ്യാ​ഭ്യാ​സ​വും നേ​ടി​യി​ട്ടു​മി​ല്ല. എ​ന്നാ​ല്‍, ആ​ശി​ഷ് ഉ​ള്‍​പ്പെ​ടെ കു​ടും​ബ​ത്തി​ലെ പു​തു​ത​ല​മു​റ​ക്കാ​ര്‍ എ​ന്‍​ജി​നി​യ​റിം​ഗ്, ആ​ര്‍​ക്കി​ടെ​ക്ച​ര്‍ ബി​രു​ദ​ധാ​രി​ക​ളാ​ണ്.



അ​യോ​ധ്യ​യും അ​നു​ഭ​വ​വും

ആ​ദ്യ​മാ​യി അ​യോ​ധ്യ​യി​ലെ ഉ​ള്ളി​ലെ ഗ​ര്‍​ഭ​ഗൃ​ഹ​ത്തി​ല്‍ പ്ര​വേ​ശി​ക്കു​മ്പോ​ള്‍ ച​ന്ദ്ര​കാ​ന്തി​നു ത​ന്‍റെ അ​ള​വെ​ടു​ക്കാ​നു​ള്ള ഉ​പ​ക​ര​ണ​ങ്ങ​ള്‍ പോ​ലും പു​റ​ത്തെ​ടു​ക്കാ​ന്‍ അ​നു​മ​തി​യു​ണ്ടാ​യി​രു​ന്നി​ല്ല. കാ​ല​ടി​ക​ള്‍ വ​ച്ച് അ​ള​ന്നാ​ണ് ചി​ല ക​ണ​ക്കു​ക​ള്‍ മ​ന​സി​ല്‍ കു​റി​ച്ച​ത്. ഭാ​വി​യി​ലെ ക്ഷേ​ത്ര നി​ര്‍​മാ​ണ​ത്തി​നാ​യു​ള്ള പ്ലാ​ന്‍ വ​ര​യ്ക്കാ​ന്‍ പോ​ലും അ​ന്ന് അ​നു​മ​തി ഉ​ണ്ടാ​യി​രു​ന്നി​ല്ല. മ​ട​ങ്ങി​യെ​ത്തി​യ ച​ന്ദ്ര​കാ​ന്ത് സോം​പു​ര ആ​ദ്യം പെ​ന്‍​സി​ല്‍​കൊ​ണ്ടാ​ണ് ക്ഷേ​ത്ര​ത്തി​ന്‍റെ രൂ​പ​രേ​ഖ ത​യാ​റാ​ക്കി​യ​ത്.

പി​ന്നീ​ട് വി​ദ​ഗ്ധ​ര്‍ ഇ​തി​ലേ​ക്കു മ​ഷി പ​ക​രു​ക​യാ​യി​രു​ന്നു. അ​തോ​ടെ ച​ന്ദ്ര​കാ​ന്ത് ത​ന്‍റെ പി​താ​വ് പ്ര​ഭാ​ശ​ങ്ക​റി​നൊ​പ്പം സോ​മ​നാ​ഥ് ക്ഷേ​ത്ര​ത്തി​ന്‍റെ​യും മ​ഥു​ര​യി​ലെ കൃ​ഷ്ണ ജ​ന്മ​സ്ഥാ​ന​ത്തി​ന്‍റെ​യും നി​ര്‍​മാ​ണ​ത്തി​ല്‍ പ​ങ്കാ​ളി​യാ​യ​തു പോ​ലെ 1993ല്‍ ​ആ​ശി​ഷും രാ​മ​ക്ഷേ​ത്ര നി​ര്‍​മാ​ണ​ത്തി​ല്‍ അ​ച്ഛ​ന്‍റെ ഒ​പ്പം സ​ഹാ​യ​ത്തി​നാ​യി കൂ​ടി.

രൂ​പ​രേ​ഖ​ക​ള്‍

ച​ന്ദ്ര​കാ​ന്ത് സോം​പു​ര വ​ര​ച്ച മൂ​ന്നു രൂ​പ​രേ​ഖ​ക​ളി​ല്‍​നി​ന്നാ​ണ് വി​ശ്വ​ഹി​ന്ദു പ​രി​ഷ​ത് രാ​മ​ക്ഷേ​ത്ര​ത്തി​നു​ള്ള ഒ​രു മാ​തൃ​ക തെ​ര​ഞ്ഞെ​ടു​ത്ത​ത്. ഇ​തി​ന്‍റെ മാ​തൃ​ക ത​ടി​യി​ല്‍ പൂ​ര്‍​ത്തി​യാ​ക്കി തൊ​ട്ട​ടു​ത്ത കും​ഭ​മേ​ള​യി​ല്‍ സ​ന്യാ​സി​മാ​ര്‍​ക്കു മു​ന്നി​ല്‍ പ്ര​ദ​ര്‍​ശി​പ്പി​ച്ചു. അ​വ​ര്‍ അ​തി​ന് അം​ഗീ​കാ​ര​വും ന​ല്‍​കി.



1992നും 1996​നും ഇ​ട​യി​ല്‍ അ​യോ​ധ്യ​യി​ലെ കാ​ര്യ​ശാ​ല​യി​ല്‍ ക്ഷേ​ത്ര നി​ര്‍​മാ​ണ​ത്തി​നു​ള്ള ഒ​രു​ക്ക​ങ്ങ​ള്‍ ത​കൃ​തി​യാ​യി ന​ട​ന്നു. ക്ഷേ​ത്ര​ത്തോ​ടു കൂ​ട്ടി​ച്ചേ​ര്‍​ക്കാ​നു​ള്ള പ​ല ഭാ​ഗ​ങ്ങ​ളു​ടെ​യും നി​ര്‍​മാ​ണം പൂ​ര്‍​ത്തീ​ക​രി​ക്കു​ക വ​രെ ചെ​യ്തു. എ​ന്നാ​ല്‍, അ​ക്കാ​ല​ത്തു വി​എ​ച്ച്പി​ക്കു കാ​ര്യ​മാ​യ സാ​മ്പ​ത്തി​ക ഞെ​രു​ക്കം ഉ​ണ്ടാ​കു​ക​യും നി​യ​മ പോ​രാ​ട്ട​ങ്ങ​ളി​ലേ​ക്കു വ​ഴി​മാ​റു​ക​യും ചെ​യ്തി​രു​ന്നു. അ​തോ​ടെ നി​ര്‍​മാ​ണ പ്ര​വ​ര്‍​ത്ത​നം മ​ന്ദ​ഗ​തി​യി​ലാ​യി.

ചി​ല സ​മ​യ​ത്തു കാ​ര്യ​ശാ​ല​യി​ല്‍ എ​ട്ടോ പ​ത്തോ പ​ണി​ക്കാ​ര്‍ മാ​ത്രം ശേ​ഷി​ക്കു​ന്ന സ്ഥി​തി വ​രെ​യെ​ത്തി. എ​ന്നാ​ല്‍, ക​ഴി​ഞ്ഞ ന​വം​ബ​റി​ല്‍ സു​പ്രീം​കോ​ട​തി വി​ധി വ​ന്ന​തി​നു പി​ന്നാ​ലെ നി​ര്‍​മാ​ണ പ്ര​വ​ര്‍​ത്ത​ന​ങ്ങ​ള്‍ വീ​ണ്ടും റോ​ക്ക​റ്റ് വേ​ഗ​ത്തി​ലാ​യി.

അ​ഞ്ചു വ​ര്‍​ഷം മു​ന്‍​പാ​ണ് ച​ന്ദ്ര​കാ​ന്ത് ഒ​ടു​വി​ലാ​യി അ​യോ​ധ്യ​യി​ല്‍ പോ​യ​ത്. ഇ​പ്പോ​ള്‍ മ​ക്ക​ളാ​യ നി​ഖി​ലും ആ​ശി​ഷും നി​ഖി​ലി​ന്‍റെ എ​ന്‍​ജി​നി​യ​റിം​ഗ് പൂ​ര്‍​ത്തി​യാ​ക്കി​യ മ​ക​ന്‍ അ​ശു​തോ​ഷു​മാ​ണ് നി​ര്‍​മാ​ണ പ്ര​വ​ര്‍​ത്ത​ന​ങ്ങ​ള്‍​ക്കു മേ​ല്‍​നോ​ട്ടം വ​ഹി​ക്കു​ന്ന​ത്.

അം​ബാ​നി​ക്കും ഒ​ര​മ്പ​ലം

സോം​പു​ര കു​ടും​ബ​ത്തി​ലെ ഇ​ള​മു​റ​ക്കാ​ര​നാ​യ ആ​ശി​ഷി​ന്‍റെ മേ​ല്‍​നോ​ട്ട​ത്തി​ല്‍ പ​ണി​ത​താ​ണ് റി​ല​യ​ന്‍​സ് ഉ​ട​മ അ​നി​ല്‍ അം​ബാ​നി​യു​ടെ ആ​ന്‍റി​ല എ​ന്ന കൊ​ട്ടാ​ര​ത്തി​നു​ള്ളി​ലെ ക്ഷേ​ത്രം. അ​ക്ഷ​ര്‍​ധാം ക്ഷേ​ത്രം, ഇം​ഗ്ല​ണ്ടി​ലെ ബോ​ച​ന്‍ സ്വാ​മി അ​ക്ഷ​ര്‍ പു​രു​ഷോ​ത്തം സ്വാ​മി നാ​രാ​യ​ണ്‍ സ​ന്‍​സ്ഥ ക്ഷേ​ത്രം എ​ന്നി​വ​യു​ടെ നി​ര്‍​മാ​ണ​വും സോം​പു​ര കു​ടും​ബം ന​ട​ത്തി​യ​താ​ണ്.

ത​യാ​റാ​ക്കി​യ​ത്: സെ​ബി മാ​ത്യു
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.
Copyright @ 2022 , Rashtra Deepika Ltd.