ലണ്ടൻ: ചരിത്രത്തിലാദ്യമായി ഒഐസിസി യുകെ നാഷണൽ കമ്മിറ്റി വനിതാ അധ്യക്ഷയുടെ നേതൃത്വത്തിൽ സത്യപ്രതിജ്ഞ ചൊല്ലി അധികാരമേറ്റെടുത്തു. ലണ്ടനിലെ ക്രോയ്ഡനിൽ വച്ചു സംഘടിപ്പിച്ച സമ്മേളനം എഐസിസി സെക്രട്ടറി വിശ്വനാഥൻ പെരുമാൾ ഉദ്ഘാടനം ചെയ്തു.
ഒഐസിസി യുകെ വക്താവ് റോമി കുര്യാക്കോസ് ആമുഖവും പ്രോഗ്രാം കൺവീനറും ഒഐസിസി യുകെ സറെ റീജിയൺ പ്രസിഡന്‍റുമായ വിൽ‌സൺ ജോർജ് സ്വാഗതവും ആശംസിച്ചു.
യുകെയുടെ വിവിധ ഭാഗങ്ങളിൽ നിന്നും റീജിയണുകളിൽ നിന്നും നിരവധി പ്രവർത്തകർ സത്യപ്രതിജ്ഞാ ചടങ്ങിൽ പങ്കുചേരുന്നതിനും പുതിയ കമ്മിറ്റിക്ക് അഭിവാദ്യങ്ങൾ അർപ്പിക്കുവാനും എത്തിച്ചേർന്നു.
പുതിയതായി തെരഞ്ഞെടുക്കപ്പെട്ട ഭാരവാഹികൾക്ക് വിശ്വനാഥൻ പെരുമാൾ സത്യവാചകം ചൊല്ലി കൊടുത്തു. പ്രസിഡന്‍റ് ഷൈനു ക്ലെയർ മാത്യൂസ് ദൈവനാമത്തിലാണ് സത്യപ്രതിജ്ഞ ചെയ്തു ചുമതലയേറ്റെടുത്തത്.
പ്രസിഡന്‍റിനു പുറമെ വർക്കിംഗ് പ്രസിഡന്‍റുമാരായ ബേബികുട്ടി ജോർജ്, സുജു കെ. ഡാനിയേൽ, ഡോ. ജോഷി ജോസ്, അപ്പ ഗഫുർ എന്നിവർക്കും വിശ്വനാഥൻ പെരുമാൾ പ്രത്യേകമായി സത്യവാചകം ചൊല്ലിക്കൊടുത്തു.
തുടർന്നു വൈസ് പ്രസിഡന്‍റുമാരായ സോണി ചാക്കോ, ജോർജ് ജോസഫ്, ഫിലിപ്പ് കെ. ജോൺ, ജനറൽ സെക്രട്ടറിമാരായ തോമസ് ഫിലിപ്പ്, അജിത് വെണ്മണി, അഷ്റഫ് അബ്ദുള്ള, നാഷണൽ കമ്മിറ്റി ഔദ്യോഗിക വക്താവ് റോമി കുര്യാക്കോസ്, ജോയിന്‍റ് സെക്രട്ടറിമാർ, അഡ്വൈസറി കമ്മിറ്റി അംഗങ്ങൾ, നാഷണൽ കമ്മിറ്റി അംഗങ്ങൾ യുവജന പ്രതിനിധികൾ എന്നിവർ കൂട്ടമായിട്ടാണ് സത്യപ്രതിജ്ഞ ചെയ്തു അധികാരമേറ്റത്.
ഒഐസിസി യുകെ വർക്കിംഗ് പ്രസിഡന്‍റ് മണികണ്ഠൻ അയ്ക്കാട്, ട്രഷറർ ബിജു വർഗീസ് എന്നിവർ ഇന്ത്യയിൽ ആയിരുന്നതിനാൽ പിന്നീടൊരു അവസരത്തിൽ മാത്രമേ അവർ സത്യപ്രതിജ്ഞ ചെയ്തു ചുമതലയേൽക്കും എന്ന് നേതൃത്വം അറിയിച്ചു.
വൈസ് പ്രസിഡന്‍റ് ലിലിയ പോൾ, ജോയിന്‍റ് സെക്രട്ടറി ശാരിക അമ്പിളി എന്നിവരാണ് സത്യപ്രതിജ്ഞ ചെയ്ത വനിത പ്രതിനിധികൾ. സത്യപ്രതിജ്ഞാ ചടങ്ങിന് ശേഷം കേക്ക് മുറിച്ചു അംഗങ്ങൾ സന്തോഷം പങ്കിട്ടു.
നേതാക്കന്മാരുടെ സത്യ പ്രതിജ്ഞയ്ക്കും തന്‍റെ നയപ്രഖ്യാപനത്തിനും ശേഷം പ്രസിഡന്‍റ് ഷൈനു ക്ലെയർ മാത്യുസ് സംഘടനയുടെ 2024 25 വർഷത്തേക്കുള്ള കർമ പദ്ധതികളയുടെ കരട് രൂപം വേദിയിൽ അവതരിപ്പിച്ചു.
"നേതൃത്വം പ്രവർത്തകരിലേക്ക്' എന്ന മുദ്രാവാക്യം പ്രാവർത്തികമാക്കാൻ ഒഐസിസിയുടെ പുതിയനേതൃത്വം പ്രതിജ്ഞാ ബദ്ധരാണെന്ന് ഷൈനു ക്ലെയർ മാത്യുസ് തന്‍റെ നയ പ്രഖ്യാപനത്തിൽ കൂട്ടിച്ചേർത്തു.
കർമ പദ്ധതികളിൽ ഉൾപ്പെടുത്തിയിരിക്കുന്ന കുടുംബ സമ്മേളനം, മാതാ പിതാക്കന്മാരെ ആദരിക്കുന്ന "അമ്മ തൊട്ടിലിൽ' പദ്ധതി, യുവജന പുരോഗതിക്കായുള്ള "യുവം യുകെ' പദ്ധതി ജീവനരക്ഷക്കായുള്ള രക്തദാന പദ്ധതി, ജീവകരുണ്യ പദ്ധതികൾ തുടങ്ങിയവയുടെ കരട് രൂപ പ്രഖ്യാപനം നിറഞ്ഞ കൈയടികളോടെയാണ് നേതാക്കന്മാരും പ്രവർത്തകരും ഏറ്റെടുത്തത്.
യുകെയിലാകമാനം ഒഐസിസിയുടെ സംഘടന ശക്തി വർധിപ്പിക്കുന്നതിനും സജ്ജരായ പ്രവർത്തകരെ വാർത്തെടുക്കുന്നതിനുമായി അടുത്ത ഒരുവർഷക്കാലത്തേക്ക് യുദ്ധകലാടിസ്ഥാനത്തിലാണ് പദ്ധതികൾ രൂപീകരിച്ചിരിക്കുന്നതെന്നും ഒഐസിസിയുടെ ഓഫീസ് യുകെയിൽ തുറന്നു സജ്ജീകരിക്കുമെന്നും ഷൈനു ക്ലെയർ മാത്യൂസ് പറഞ്ഞു.
ഒറ്റക്കെട്ടായ പ്രവർത്തനത്തിലൂടെ ഒഐസിസി പ്രവർത്തകരുടെ ശോഭനമായ ഭാവി വാഗ്ദാനം ചെയ്യുന്നതായും പ്രസിഡന്‍റ് കൂട്ടിച്ചേർത്തു. ചടങ്ങിൽ അണിചേരാൻ യുകെയിലെ വിവിധ റീജിയണുകളിൽ നിന്നും സ്ഥലങ്ങളിൽ നിന്നും എത്തിച്ചേർന്ന നേതാക്കന്മാർക്കും പ്രവർത്തകർക്കും ഒഐസിസി വർക്കിംഗ് പ്രസിഡന്‍റ് ഡോ. ജോഷി ജോസ് നന്ദി അർപ്പിച്ചു. മധുര വിതരണത്തിനും സ്നേഹവിരുന്നിനും ശേഷം സമ്മേളനം അവസാനിച്ചു.
|