ഹൂസ്റ്റണ്‍: അമേരിക്കയിലെ പ്രമുഖ മലയാളി സംഘടനയായ മലയാളി അസോസിയേഷൻ ഓഫ് ഗ്രെയ്റ്റർ ഹൂസ്റ്റണ്‍ (മാഗ്) നടത്തി വരുന്ന വിവിധ സാമൂഹ്യ സാംസ്കാരിക പ്രവർത്തനങ്ങളോടോപ്പം കായിക രംഗത്തും വീണ്ടും സജീവമാകുന്നു.
കോവിഡ് മഹാമാരി സൃഷ്ടിച്ച പ്രതിസന്ധി മൂലം ഒരു വർഷമായി കായിക പരിപാടികൾക്ക് മുടക്കം സംഭവിച്ച സാഹചര്യത്തിൽ മാഗിന്‍റെ ക്രിക്കറ്റ് ടൂർണമെന്‍റിനെ ആവേശത്തോടയാണ് ഹൂസ്റ്റണിലെ സ്പോർട്സ് പ്രേമികൾ സ്വാഗതം ചെയ്യുന്നത്.
ഏപ്രിൽ 17, 18, 24 (ശനി, ഞായർ, ശനി ) തീയതികളിലായി സ്റ്റാഫോർഡ് സിറ്റിയുടെ ഗ്രൗണ്ടിലാണ് (3108, 5th Street, Stafford, TX 77477) മൽസരങ്ങൾ അരങ്ങേറുക. 17ന് ശനിയാഴ്ച രാവിലെ 7.30 മുതൽ വൈകുന്നേരം 4 വരെയും 18 ന് ഞായറാഴ്ച ഉച്ചകഴിഞ്ഞു 1 മുതൽ വൈകുന്നേരം 5 വരെയും ഫൈനൽ മൽസരങ്ങൾ 24 ന് ശനിയാഴ്ച രാവിലെ എട്ടിന് ആരംഭിച്ചു ഉച്ചയ്ക്ക് അവസാനിപ്പിക്കത്തക്ക വിധത്തിലാണ് മൽസരങ്ങൾ ക്രമീകരിച്ചിക്കുന്നത്.
ഹൂസ്റ്റണിലെ പ്രശസ്തരായ ക്രിക്കറ്റ് താരങ്ങളെ അണി നിരത്തി ഹൂസ്റ്റണ്‍ വാരിയർസ്, സ്റ്റാഫോർഡ് ക്രിക്കറ്റ് ക്ലബ്, സ്റ്റാർസ്‌സ് ഓഫ് ഹൂസ്റ്റണ്‍, റോയൽ സാവന്ന ക്രിക്കറ്റ് ക്ലബ്, എൻസിഎസി സൂപ്പർ കിംഗ്സ്, മാഗ് ക്രിക്കറ്റ് ക്ലബ് തുടങ്ങി ആറു പ്രമുഖ ടീമുകളാണ് ഇത്തവണ മാറ്റുരക്കുന്നത്. ’മാഗിന്‍റെ സ്വന്തം ക്രിക്കറ്റ് ടീമും ആദ്യമായി മത്സരക്കളത്തിലിറങ്ങുന്നു എന്ന പ്രത്യേകതയും ഈ ടൂർണമെന്‍റിനുണ്ട്.
അപ്നാ ബസാർ, മിസോറി സിറ്റി (മെഗാ സ്പോണ്സർ) ജോബിൻ പ്രിയൻ ഗ്രൂപ്പ് (ഗ്രാൻഡ് സ്പോണ്സർ ) ആർവിഎസ് ഇൻഷുറൻസ് ഗ്രൂപ്പ്, മല്ലു കഫേ റേഡിയോ, ജോണ് ജേക്കബ് (ഫിനാൻഷ്യൽ പ്രൊഫഷണൽ) എന്നിവരാണ് ടൂർണമെന്‍റിന്‍റെ പ്രധാന സ്പോണ്സർമാർ. .
ടീമംഗൾക്കും സംഘാടകർക്കും എല്ലാവിധ പ്രോത്സാഹനവും നൽകി ഈ ടൂർണമെന്‍റിനെ വൻവിജയമാക്കി തീർക്കണമെന്ന് മാഗ് ഭാരവാഹികൾ അഭ്യർഥിച്ചു.
കൂടുതൽ വിവരങ്ങൾക്ക്,
റജി കോട്ടയം - 832 723 7995
വിനോദ് വാസുദേവൻ - 832 528 6581
ജോജി ജോസഫ് - 713 515 8432
വാവച്ചൻ - 832 468 3322
രാജേഷ് വർഗീസ് - 832 273 0361
റിപ്പോർട്ട്: ജീമോൻ റാന്നി