ന്യൂയോർക്ക്: നോർത്ത് ഈസ്റ്റ് അമേരിക്കൻ ഭദ്രാസന സെക്രട്ടറിയായി ഫാ. ഡോ. വറുഗീസ് എം. ഡാനിയൽ തെരഞ്ഞെടുക്കപ്പെട്ടു. സ്ഥാനമൊഴിഞ്ഞ ഫാ. സുജിത് തോമസിന്റെ സ്ഥാനത്തേക്ക് ഇക്കഴിഞ്ഞ ഭദ്രാസന അസംബ്ലിയിൽ വച്ചാണ് ഫാ. ഡോ. വറുഗീസ് എം. ഡാനിയലിനെ തെരഞ്ഞെടുത്തത്.
അമേരിക്കയിലെ യേൽ യൂണിവേഴ്സിറ്റിയിൽ നിന്നും പോസ്റ്റ് ഡോക്ടറൽ ഫെലോഷിപ്പ് നേടിയ വറുഗീസ് അച്ചൻ വൈദികവൃത്തിയിലെ വേറിട്ട വ്യക്തിത്വമാണ്. സെന്റ് വ്ളാഡിമിർ സെമിനാരിയിലെ പ്രൊഫസറും ഓറഞ്ച്ബർഗ് സെന്റ് ജോണ്സ് ഓർത്തഡോക്സ് പള്ളിയിലെ വികാരിയുമായി സേവനമനുഷ്ഠിക്കുകയാണ് ഇപ്പോൾ. കൗണ്സിലിംഗിനു വേണ്ടിയും സ്കൊളാസ്റ്റിക്ക് അക്കാദമി ഫോർ ഹൈ എജ്യുക്കേഷൻ ഗൈഡൻസിനും വേണ്ടിയുള്ള സ്ഥാപനത്തിന്റെ സ്ഥാപകൻ.
ഓസ്ട്രേലിയയിലെ മൊണാഷ് യൂണിവേഴ്സിറ്റി, നെതർലൻഡ്സിലെ റാഡ്ബൗണ്ട് യൂണിവേഴ്സിറ്റി, ഇറ്റലിയിലെ പാദ്വാ യൂണിവേഴ്സിറ്റി എന്നിവിടങ്ങളിൽ ഗവേഷണം നടത്തി ഓസ്ട്രേലിയയിലെ മെൽബണിലെ യൂണിവേഴ്സിറ്റി ഓഫ് ഡിവൈനിറ്റിയിൽ നിന്നും തീയോളജി ആൻഡ് എത്തിക്സിൽ ഡോക്ടർ ഓഫ് ഫിലോസഫി നേടി.
ഹൈദരാബാദിലെ ഒസ്മാനിയ യൂണിവേഴ്സിറ്റിയിൽ നിന്നും ബിഎ ബിരുദം. തുടർന്ന് കോട്ടയം തിയോളജിക്കൽ സെമിനാരിയിൽ നിന്നും സേക്രഡ് തിയോളജിയിൽ ഗ്രാജ്വേഷൻ. പിന്നീട് കൊൽക്കത്തയിലെ സേരാംപുർ യൂണിവേഴ്സിറ്റിയിൽ നിന്നും ബാച്ചിലർ ഓഫ് ഡിവിനിറ്റി, മെൽബണിലെ ഓസ്റ്റിൻ ഹോസ്പിറ്റലിൽ നിന്നും ക്ലിനിക്കൽ പാസ്റ്ററൽ എഡ്യുക്കേഷൻ (സിപിഇ), ബെൽജിയത്തിലെ കാത്തലിക്ക് യൂണിവേഴ്സിറ്റിയിൽ നിന്നും ബയോ എത്തിക്സിൽ എംഎ ബിരുദം എന്നിവ അദ്ദേഹം നേടി.
സെന്റ് വ്ളാഡിമേഴ്സിൽ നിന്നും മികച്ച ഫാക്കൽറ്റിക്കുള്ള സെന്റ് മക്രീന അവാർഡ്, ഇറാസ്മസ് മുൻഡുസ് യൂറോപ്യൻ ഫെലോഷിപ്പ്, ഓസ്ട്രേലിയൻ പോസ്റ്റ് ഗ്രാജുവേറ്റ് അവാർഡ്, ഓസ്ട്രേലിയൻ റിസർച്ച് ട്രെയിനിംഗ് സ്കീം സ്കോളർഷിപ്പ് എന്നിവ നേടി.
സാൾട്ട് ലേക്കിൽ നടന്ന പാർലമെന്റ് ഓഫ് ദി വേൾഡ് റിലീജിയൻസ്, യേൽ യൂണിവേഴ്സിറ്റിയിൽ നടന്ന പേഴ്സണ്ഹുഡ് ബിയോണ്ട് ദി ഹ്യുമൻ കോണ്ഫറൻസ്, ഗ്ലോബൽ ഹെൽത്ത് ആൻഡ് ഇന്നവേഷൻ കോണ്ഫറൻസ്, ഇറ്റലിയിലെ പാദ്വവയിൽ നടന്ന ഇന്റർനാഷണൽ വർക്ക്ഷോപ്പ് കോണ്ട്രാവേഴ്സിസ് വിത്തിൻ ദി സയന്റിഫിക്ക് റെവല്യൂഷൻ, നെതർലൻഡ്സിൽ നടന്ന ഇന്റർനാഷണൽ കോണ്ഫറൻസ് ഫോർ അഡ്വാൻസ്ഡ് ബയോ എത്തിക്സ്, ബ്രസൽസിൽ നടന്ന കാരിത്താസ് ഇന്റർനാഷണൽ കോണ്ഫറൻസ്, ല്ുവനിൽ നടന്ന യൂറോപ്യൻ ബയോ എത്തിക്സ് കോണ്ഫറൻസ്, മെൽബണിൽ നടന്ന എ.എ.എൻ. ഇസഡ്എസി ഇന്റർനാഷണൽ കോണ്ഫറൻസ് എന്നിവയിൽ പങ്കെടുത്തു.
മെൽബണിലെ സെന്റ് മേരീസ് മലങ്കര ഓർത്തഡോക്സ് ഇടവകയുടെ പ്രസിഡന്റും വികാരിയുമായി സേവനമനുഷ്ഠിച്ചു. തുടർന്ന്, ന്യൂസിലൻഡിലെ സെന്റ് ഡയനേഷ്യസ് മലങ്കര ഓർത്തഡോക്സ് ഇടവകയുടെ പ്രസിഡന്റും സ്ഥാപക വികാരിയുമായിരുന്നു. ജർമനിയിലെ കോളനിൽ സെന്റ് ഗ്രിഗോറിയോസ് മലങ്കര ഓർത്തഡോക്സ് ഇടവകയുടെ സന്ദർശക വൈദികനായിരുന്നു. ഹാർട്ട്ഫോർഡ് സെന്റ് തോമസ് ഇടവകയുടെ പ്രസിഡന്റും സ്ഥാപക വികാരിയുമായിരുന്നു. നോർത്ത് ഈസ്റ്റ് അമേരിക്കൻ ഭദ്രാസന ക്ലർജി അസോസിയേഷൻ സെക്രട്ടറിയായും രണ്ടു വർഷം ഭദ്രാസനത്തിന്റെ ഫാമിലി ആൻഡ് യൂത്ത് കോണ്ഫറൻസ് കോർഡിനേറ്ററുമായിരുന്നു.
റിപ്പോർട്ട്: ജോർജ് തുന്പയിൽ