എയ്‌ൽസ്‌ഫോർഡ്: ഇംഗ്ലണ്ടിന്‍റെ ആരാമമായ കെന്‍റിലെ പുണ്യപുരാതന മരിയൻ തീർഥാടനകേന്ദ്രമാണ് എയ്‌ൽസ്‌ഫോർഡ് പ്രയറി. പരിശുദ്ധ കന്യാമറിയം വിശുദ്ധ സൈമൺ സ്റ്റോക്ക് പിതാവിന് പ്രത്യക്ഷപ്പെട്ട് ഉത്തരീയം (വെന്തിങ്ങ) നൽകിയ വിശുദ്ധ ഭൂമിയും ലോകമെമ്പാടുമുള്ള മരിയഭക്തരുടെ ആത്മീയ സങ്കേതവുമാണ് എയ്‌ൽസ്‌ഫോർഡ്.
കേരളത്തിലെ സുറിയാനി ക്രിസ്ത്യാനികളുടെ ആത്മീയ ജീവിതവുമായി അഭേദ്യം ബന്ധപെട്ടു നിൽക്കുന്ന വെന്തിങ്ങയുടെ ഉത്ഭവസ്ഥാനം എന്ന നിലയിൽ ബ്രിട്ടനിലെ സുറിയാനിക്രിസ്ത്യാനികളുടെ അനുഗ്രഹാരാമം കൂടിയാണ് ഈ പുണ്യഭൂമി.
ഗ്രേറ്റ് ബ്രിട്ടൻ സീറോ മലബാർ രൂപതയുടെ രണ്ടാമത് മരിയൻ തീർഥാടനമാണ് മേയ് 25 ന് മാർ ജോസഫ് സ്രാമ്പിക്കൽ പിതാവിന്റെ നേതൃത്വത്തിൽ നടക്കുന്നത്. വിശ്വാസികളുടെ ബാഹുല്യം നിമിത്തം ശ്രദ്ധേയമായ കഴിഞ്ഞവർഷത്തെ തീർഥാടനം അനന്യമായ ആത്മീയ ഉണർവാണ് രൂപതയ്ക്ക് ആകമാനം നൽകിയത്. രൂപതയിലെ എട്ടു റീജിയനുകൾ കേന്ദ്രീകരിച്ചു തീർഥാടനത്തിന്‍റെ വിജയത്തിനായി വിപുലമായ ഒരുക്കങ്ങളാണ് നടത്തിവരുന്നത്.
എയ്‌ൽസ്‌ഫോർഡ് ഡിറ്റൻ ഹാളിൽ ചീഫ് കോ-ഓർഡിനേറ്റർ ഫാ. ടോമി എടാട്ടിന്‍റെ അധ്യക്ഷതയിൽ കൂടിയ യോഗത്തിൽ തീർത്ഥാടനത്തിന്റെ സുഗമമായ നടത്തിപ്പിനായി വിവിധ കമ്മിറ്റികൾക്ക് രൂപം കൊടുത്തു. ജനറൽ കോ-ഓർഡിനേറ്റേഴ്സ് ആയി ഡീക്കൻ ജോയ്‌സ് പള്ളിക്കമ്യാലിൽ, ലിജോ സെബാസ്റ്റ്യൻ മെയ്‌ഡ്‌സ്റ്റോൺ എന്നിവരെയും ഫിനാൻസ് കോ-ഓർഡിനേറ്റേഴ്സ് ആയി ഷാജി ലോനപ്പൻ ക്യാറ്റ്‌ഫോർഡ്, ജസ്റ്റിൻ ജോസഫ് ആഷ്‌ഫോർഡ് എന്നിവരെയും തെരഞ്ഞെടുത്തു.
വിവിധ കമ്മിറ്റികൾക്ക് നേതൃത്വം കൊടുക്കുന്നവർ: ജോസുകുട്ടി ജില്ലിംഗ്ഹാം (ലിറ്റർജി), ബിനു മാത്യു മെയ്‌ഡ്‌സ്റ്റോൺ (റിസപ്ഷൻ), ടോമി വർക്കി സൗത്ത്ബറോ, ജോസഫ് കുര്യൻ ജില്ലിംഗ്ഹാം (പ്രദക്ഷിണം), റോജോ കുര്യൻ മെയ്‌ഡ്‌സ്റ്റോൺ (ട്രാൻസ്‌പോർട്ട്, പാർക്കിംഗ്), ജോമി ടോൾവർത്ത് (കേറ്ററിംഗ്), അജീഷ് സെബാസ്റ്റ്യൻ മെയ്‌ഡ്‌സ്റ്റോൺ (ഡെക്കറേഷൻ), ആൽബി ജോസഫ് മെയ്‌ഡ്‌സ്റ്റോൺ (ഹെൽത്ത് ആൻഡ് സേഫ്റ്റി). കൂടാതെ സെന്‍റ് പാദ്രെ പിയോ മിഷൻ എയ്‌ൽസ്‌ഫോർഡ് ട്രസ്റ്റിമാരായ ജോബി ജോസഫ്, അനൂപ് ജോൺ, ജോഷി ആനിത്തോട്ടത്തിൽ എന്നിവർ തീർഥാടനത്തിന്‍റെ സുഗമമായ നടത്തിപ്പിന് നേതൃത്വം നൽകും. സീറോ മലബാർ ലണ്ടൻ മിഷൻ ഡയറക്ടറായ ഫാ. സെബാസ്റ്റ്യൻ ചാമക്കാല ഗാനശുശ്രൂഷകൾക്ക് നേതൃത്വം നൽകും.
ഉച്ചക്ക് 12നു എയ്‌ൽസ്‌ഫോർഡിലെ പ്രശസ്തമായ ജപമാലരാമത്തിലൂടെ നടത്തപെടുന്ന കൊന്തപ്രദക്ഷിണത്തിൽ വിശ്വാസികൾ പങ്കുചേരും. അതിനുശേഷം ഗ്രേറ്റ് ബ്രിട്ടൻ സീറോ മലബാർ രൂപതാധ്യക്ഷൻ മാർ ജോസഫ് സ്രാമ്പിക്കലിന്‍റെ മുഖ്യകാർമികത്വത്തിൽ ആഘോഷപൂർവമായ തിരുനാൾ കുർബാന നടക്കും. സ്വർഗാരോപിതമാതാവിന്റെ ഗ്രോട്ടോയ്‌ക്ക്‌ മുൻപിൽ പ്രത്യേകം തയാറാക്കിയ ബലിപീഠത്തിലായിരിക്കും വിശുദ്ധ കുർബാന അർപ്പിക്കുക.രൂപതയുടെ എല്ലാ റീജിയനുകളിൽനിന്നും വിശ്വാസികൾക്കൊപ്പം എത്തുന്ന വൈദികർ തിരുക്കർമ്മങ്ങൾക്ക് സഹകാർമികരാകും. വിശുദ്ധകുർബാനക്കു ശേഷം വിശ്വാസപ്രഘോഷണത്തിന്റെ പ്രതീകമായി വാദ്യമേളങ്ങളുടെ അകമ്പടിയോടുകൂടി കർമ്മലമാതാവിന്റെയും മറ്റു വിശുദ്ധരുടെയും തിരുസ്വരൂപങ്ങൾ വഹിച്ചുകൊണ്ടുള്ള ആഘോഷമായ തിരുനാൾ പ്രദക്ഷിണം നടക്കും.
തീർഥാടകർക്കായി കാറുകളും കോച്ചുകളും പാർക്ക് ചെയ്യുന്നതിനാവശ്യമായി വിശാലമായ പാർക്കിംഗ് സൗകര്യം ഏർപ്പെടുത്തിയിട്ടുണ്ട്. മിതമായ നിരക്കിൽ ഭക്ഷണശാലകളും ഭക്തസാധങ്ങളുടെ കൗണ്ടറുകളും ഒരുക്കിയിട്ടുണ്ട്. തീർഥാടനത്തോടനുബന്ധിച്ചു നേർച്ചകാഴ്ചകൾ സമർപ്പിക്കാനും കഴുന്ന്, മുടി, എന്നിവ എഴുന്നള്ളിക്കുന്നതിനും അടിമ വയ്ക്കുന്നതിനും സൗകര്യം ഉണ്ടായിരിക്കും. തിരുനാൾ പ്രസുദേന്തിയാകാൻ ആഗ്രഹിക്കുന്നവർ തങ്ങളുടെ മിഷൻ ഡയറക്ടേഴ്‌സുമായോ തിരുനാൾ കമ്മിറ്റി അംഗങ്ങളുമായോ ബന്ധപ്പെടാവുന്നതാണ്.
വിവരങ്ങൾക്ക് : ഫാ. ടോമി എടാട്ട് 07438434372, ഡീക്കൻ ജോയ്‌സ് പള്ളിക്കമ്യാലിൽ 07832374201, ലിജോ സെബാസ്റ്റ്യൻ 07828874708.
വിലാസം: The Friars, Aylesford, Kent, ME20 7BX
റിപ്പോർട്ട്: ഫാ. ബിജു കുന്നയ്ക്കാട്ട്