റിയാദ്: സൗദിയിലെ സാധാരണകാർക്കിടയിൽ ജീവകാരുണ്യ പ്രവർത്തനങ്ങൾ നടത്തി ശ്രദ്ധ നേടിയ പ്രവാസി മലയാളി ഫെഡറേഷൻ സമീപകാലത്ത് ഗ്ലോബൽ തലത്തിലെ മുഖ്യരക്ഷധികാരി അടക്കമുള്ള ഭാരവാഹികൾ സംഘടനക്കു വരുത്തിയ കളങ്കത്തിൽ പ്രതിഷേധിച്ചാണ് സൗദി അറേബ്യയിൽ പ്രവാസി മലയാളി ഫൗണ്ടേഷൻ എന്ന പേരിൽ പ്രവർത്തനം തുടങ്ങുന്നത്.
റിയാദ് മേഖലാ കമ്മിറ്റിയുടെ പ്രഥമ പ്രവർത്തന സംഗമവും സൗദി തല അംഗ്വത്വ വിതരണ ഉദ്ഘാടനവും ഭാരത് ഓഡിറ്റോറിയത്തിൽ നടന്നു. സംഗമം റിയാദ് ഇന്ത്യൻ മീഡിയ ഫോറം ജീവകാരുണ്യ വിഭാഗം കണ്‍വീനർ ജലീൽ ആലപ്പുഴ ഉദ്ഘാടനം ചെയ്തു.
സൗദിയിലെ യഥാർഥ ജീവകാരുണ്യ മാതൃകയാണ് സൗദിയിലെ പിഎംഎഫ് പ്രവർത്തകർ എന്നും കളങ്കിതർക്കിടയിൽ നിന്നിറങ്ങി പുതിയ പേരിൽ പ്രവർത്തനം തുടരുന്നത് എന്തുകൊണ്ടും പ്രശംസനീയമാണെന്നും അദ്ദേഹം പറഞ്ഞു. റീജണൽ കോഡിനേറ്റർ സലിം വാലില്ലാപ്പുഴ ആമുഖ പ്രസംഗം നടത്തി. പ്രസിഡന്‍റ് മുജിബ് കായംകുളം അധ്യക്ഷത വഹിച്ചു. സൗദി നാഷണൽ കമ്മിറ്റിയുടെ അംഗത്വ വിതരണ ഉദ്ഘാടനം കോഡിനേറ്റർ സുരേഷ് ശങ്കർ നിർവഹിച്ചു.
സംഘടന നിയമാവലി നാഷണൽ കമ്മിറ്റി ജനറൽ സെക്രട്ടറി ഷിബു ഉസ്മാൻ സംഗമത്തിൽ അവതരിപ്പിച്ചു. ഖലീൽ കൊച്ചിൻ, ബഷീർ കോട്ടയം, ഷാജഹാൻ ചാവക്കാട്,കെ. ജെ. റഷീദ്, ഷാജി ഹുസൈൻ, അൻസാർ പള്ളുരുത്തി,രാധാകൃഷ്ണൻ പാലത്ത്, സുമേഷ്, ഷിറാസ് അബ്ദുൽ അസിസ് എന്നിവർ ആശംസകൾ അർപ്പിച്ചു. ജിബിൻ സമദ് കൊച്ചി, സലാം ഇടുക്കി, അലക്സ് കൊട്ടാരക്കര, ആച്ചി നാസർ, റൗഫ് ആലപിടിയൻ, നസീർ തൈക്കണ്ടി, അഫ്സൽ കല്ലന്പലം, സാജിീ പാനൂർ, അബ്ദുൽ സലാം എന്നിവർ നേതൃത്വം നൽകി. ജോയിന്റ് സെക്രട്ടറി റസൽ കൊടുങ്ങല്ലൂർ സ്വാഗതവും നാഷണൽ കമ്മിറ്റി ട്രഷർ ജോണ്സണ് മാർക്കൊസ് നന്ദിയും പറഞ്ഞു.
പുരാവസ്തു തട്ടിപ്പുമായുള്ള വിവാദത്തിൽ പ്രവാസി അല്ലാത്ത മോൻസണ് മാവുങ്കൽ രക്ഷധികാരിയായ പ്രവാസി മലയാളി ഫെഡറേഷൻ ഗ്ലോബൽ സംഘടനയിൽ നിന്നും പിരിഞ്ഞ സൗദി നാഷണൽ കമ്മറ്റിയും എല്ലാ റീജണൽ കമ്മറ്റികളും പ്രവാസി മലയാളി ഫൗണ്ടേഷൻ എന്ന പേരിലേക്ക് മാറുകയാണെന്ന് നാഷണൽ കമ്മിറ്റി പ്രസിഡന്‍റ് ഡോ. അബ്ദുൽ നാസറും ഗ്ലോബൽ കമ്മിറ്റിയിൽ നിന്ന് രാജിവെച്ച അസോസിയേറ്റ് ഡയറക്ടർ നൗഫൽ മടത്തറയും അറിയിച്ചു.
ഷക്കീബ് കൊളക്കാടൻ