റിയാദ്: ബുധനാഴ്ച 3402 പേർക്ക് കൂടി വൈറസ് ബാധ സ്ഥിരീകരിച്ചതോടെ സൗദിയിലെ കോവിഡ് ബാധിതരുടെ എണ്ണം 1,94,225 ആയി. പുതുതായി 49 പേർ കൂടി മരണത്തിന് കീഴടങ്ങി. ആകെ മരണസംഖ്യ 1698 ആയി. പുതുതായി 1994 പേർക്ക് കൂടി രോഗമുക്തിയായതോടെ ഇപ്പോൾ ചികിത്സയിലുള്ളത് 59,767 പേർ മാത്രമാണ്. ഇതിൽ 2272 പേർ ഗുരുതരാവസ്ഥയിലാണെന്നും ആരോഗ്യ വകുപ്പ് വാർത്താകുറിപ്പിൽ അറിയിച്ചു. പുതുതായി കോവിഡ് സ്ഥിരീകരിക്കുന്നവരുടെ എണ്ണത്തിൽ വിവിധ മേഖലയിൽ നല്ല കുറവ് കാണുന്നതായി ആരോഗ്യ വകുപ്പ് പറഞ്ഞു.
ബുധനാഴ്ച മരണപ്പെട്ട 49 പേരിൽ 15 പേർ റിയാദിലും ജിദ്ദയിൽ ഒൻപതു പേരുമാണ്. മക്ക (4), തായിഫ് (4), ബുറൈദ (4), ഹഫർ അൽ ബാത്തിൻ (3), മദീന (1), ദമ്മാം (1), ഹൊഫുഫ് (2), വാദി ദവാസിർ (1), ബിഷ (1), ജീസാൻ (1), അറാർ (1), സകാക (1), ദുർമ്മ (1) എന്നിവിടങ്ങളിലാണ് മറ്റു മരണങ്ങൾ നടന്നത്.
ജിദ്ദയിൽ മരണം 501 ആയി. മക്കയിൽ 420 ഉം, റിയാദിൽ 359 പേരുമാണ് മരണപ്പെട്ടത്. റിയാദിൽ പുതുതായി 401 പേർക്ക് രോഗം സ്ഥിരീകരിച്ചു. ദമ്മാം 283, ഹൊഫൂഫ് 229, മക്ക 198, ഖതീഫ് 173, തായിഫ് 172, ജിദ്ദ 172, അൽ മുബറസ് 160, മദീന 154, ഖമീസ് മുശൈത് 132, ഖോബാർ 122, അബഹ 78, ബുറൈദ 68, നജ്റാൻ 64, ഹായിൽ 56, ഹഫർ അൽ ബാത്തിൻ 50, ഉനൈസ 44, ദഹ്റാൻ 43, ജുബൈൽ 40, അഹദ് റുഫൈദ 39, അൽ ഖർജ് 36, ബിഷ 33, രാസ്തനൂറ 31 എന്നിങ്ങനെയാണ് മറ്റിടങ്ങളിലെ പുതിയ രോഗവ്യാപനം.
സൗദി അറേബ്യയിലെ മാസ്ക് നിർമാണം കോവിഡ് ആരംഭ കാലഘട്ടത്തിൽ ഉണ്ടായിരുന്നതിനേക്കാൾ അഞ്ചുമടങ്ങ് വർധിച്ചതായി വ്യവസായ വകുപ്പ് മന്ത്രി ബന്ദർ അൽ ഖോറെയെഫ് അറിയിച്ചു. ഒരു ദിവസം 25 ലക്ഷം മാസ്ക്കുകളാണ് ഇപ്പോൾ രാജ്യത്ത് ഉൽപ്പാദിപ്പിക്കുന്നത്. ഇത് രാജ്യത്തെ റെക്കോർഡ് നിർമ്മാണമാണ്. ദിവസേന ഒരു കോടിയിലേറെ മാസ്ക്കാണ് രാജ്യം ലക്ഷ്യമിടുന്നതെന്നും മന്ത്രി പറഞ്ഞു.
റിപ്പോർട്ട്: ഷക്കീബ് കൊളക്കാടൻ