ADVERTISEMENT

ADVERTISEMENT

ലയൺസ് ക്ലബ് ഓഫ് വടക്കഞ്ചേരി മലബാർ പുതിയ കെട്ടിട ഉദ്ഘാടനം ഇന്ന്

വടക്കഞ്ചേരി: അണക്കപ്പാറയിൽ ഫോറസ്റ്റ് ഓഫീസിനു സമീപം നിർമാണം പൂർത്തിയായ ലയൺസ് ക്ലബ് ഓഫ് വടക്കഞ്ചേരി മലബാറിനായുള്ള പുതിയ ഓഫീസ് കെട്ടിട സമുച്ചയത്തിന്‍റെ ഉദ്ഘാടനം ഇന്നു നടക്കും.

വൈകീട്ട് നാലിന് നടക്കുന്ന പരിപാടികൾ ലയൺസ് ഡിസ്ട്രിക്ട് ഗവർണർ ടി. ജയകൃഷ്ണൻ ഉദ്ഘാടനം ചെയ്യും. സെക്കന്‍റ് വൈസ് ഡിസ്ട്രിക്ട് ഗവർണർ കെ.എം. അഷറഫ് ഓഫീസ് ഉദ്ഘാടനം നിർവഹിക്കും. പ്രസിഡന്‍റ് എബി കെ. സേവ്യർ അധ്യക്ഷത വഹിക്കും.

ബേബി വർഗീസ് റിപ്പോർട്ട് അവതരിപ്പിക്കും. ഡോ. കുട്ടമണി, ചാർട്ടർ മെംബർ എം.വി. തോമസ്, റീജണൽ ചെയർമാൻ സ്വാമിനാഥൻ, സോൺ ചെയർമാൻ സദാനന്ദൻ, ലേഡി റീജിയൻ ചെയർപേഴ്സൺ സരസ്വതി സ്വാമിനാഥൻ, ആനിയമ്മ ജോസഫ്, ബാബു പീറ്റർ, സീൻ ജോസഫ് ചെറുനിലം, രാജൻ മാത്യു തുടങ്ങിയവർ പ്രസംഗിക്കും.

ADVERTISEMENT

ജലസംരക്ഷണത്തില്‍ സുസ്ഥിര തൃത്താല പദ്ധതി മാതൃകയെന്നു മന്ത്രി എം.ബി. രാജേഷ്

തൃത്താല: ജലസംരക്ഷണത്തില്‍ കേരളത്തിനുപുറത്തും സുസ്ഥിര തൃത്താല മികച്ച മാതൃകയെന്നു മന്ത്രി എം.ബി. രാജേഷ്. തൃത്താല ബ്ലോക്ക് പഞ്ചായത്ത് ഹാളില്‍ കിഴങ്ങുവിള വിത്തുഗ്രാമങ്ങളും വികേന്ദ്രീകൃത വിത്തുത്പാദകരും പദ്ധതി -സീഡ് ഗ്രാം 2025-30 ന്‍റെ ജില്ലാതല ഉദ്ഘാടനം നിര്‍വഹിക്കുകയായിരുന്നു മന്ത്രി. ജലദൗര്‍ലഭ്യതയില്‍ പരിഹാരം കാണാനായത് സുസ്ഥിര തൃത്താലയുടെ നേട്ടമാണെന്നും മന്ത്രി പറഞ്ഞു. ജലസംരക്ഷണത്തിലൂടെ കാര്‍ഷിക മേഖലയിലും അഭിവൃദ്ധി കൈവരിക്കാനായി. കിഴങ്ങ് കൃഷിയുടെ സാധ്യതകള്‍ ഉപയോഗപ്പെടുത്തി പദ്ധതി കൂടുതല്‍ ജനകീയമാക്കുന്നതിലൂടെ അത്ഭുതകരമായ മാറ്റംവരുത്താന്‍ സാധിക്കുമെന്നും മന്ത്രി കൂട്ടിചേര്‍ത്തു. സംസ്ഥാനത്തെ മാതൃകാപദ്ധതികളിലൊന്നായി സുസ്ഥിര തൃത്താല മാറി. സുസ്ഥിര തൃത്താലയുടെ വിജയം മുന്‍നിര്‍ത്തി കുടുംബശ്രീ ഓണത്തോടനുബന്ധിച്ച് 25000 ഏക്കറില്‍ കൃഷി ചെയ്യാനൊരുങ്ങുകയാണെന്നു മന്ത്രി പറഞ്ഞു. പരിപാടിയുടെ ഭാഗമായി കിഴങ്ങുവിളകളുടെ പുതിയ ഇനങ്ങളെയും പുതിയ സാങ്കേതിക വിദ്യകളെയും മൂല്യവര്‍ധിത ഉത്പന്നങ്ങളേയും പരിചയപ്പെടുത്താനായി കാര്‍ഷിക പ്രദര്‍ശനവും സംഘടിപ്പിച്ചു. കേന്ദ്ര കിഴങ്ങുവിള ഗവേഷണകേന്ദ്രം, സുസ്ഥിര തൃത്താല പദ്ധതി, കാര്‍ഷിക വികസന കര്‍ഷക ക്ഷേമ വകുപ്പ്, തദ്ദേശ സ്വയംഭരണ വകുപ്പ് എന്നിവ സംയുക്തമായാണ് സീഡ് ഗ്രാം പദ്ധതി നടപ്പാക്കുന്നത്. മുന്തിയ കിഴങ്ങു വിളഇനങ്ങളുടെ വിത്തിന്‍റെ ലഭ്യത ഉറപ്പാക്കുകയാണ് പദ്ധതിയുടെ ലക്ഷ്യം. തൃത്താലയിലെ തെഞ്ഞെടുക്കപ്പെട്ട 50 പട്ടികജാതി വിഭാഗം കര്‍ഷകരാണ് പദ്ധതിക്കു നേതൃത്വം നല്‍കുന്നത്. ബ്ലോക്ക് പഞ്ചായത്ത് വൈസ് പ്രസിഡന്‍റ് പി.ആര്‍. കുഞ്ഞുണ്ണി അധ്യക്ഷനായി. ജില്ലാ പഞ്ചായത്ത് അംഗം ഷാനിബ ടീച്ചര്‍, പട്ടാമ്പി കൃഷി വിജ്ഞാന കേന്ദ്രം മേധാവി സുമിയ, നവകേരളം കോ- ഓര്‍ഡിനേറ്റര്‍ പി. സെയ്തലവി, സിടിസിആര്‍ഐ പ്രിന്‍സിപ്പല്‍ സയന്‍റിസ്റ്റ് കെ. സുനില്‍ കുമാര്‍, കൃഷി അസിസ്റ്റന്‍റ് ഡയറക്ടര്‍ മാരിയത്ത് കിബിത്തിയ, കൃഷി വകുപ്പുദ്യോഗസ്ഥര്‍, കര്‍ഷകര്‍ തുടങ്ങിയവര്‍ പങ്കെടുത്തു.

യഥാർഥ പ്രശ്നങ്ങളിൽ ഇടപെടുമ്പോൾ പാർട്ടി ശക്തമാകും: പി. സന്തോഷ് കുമാർ എംപി

വടക്കഞ്ചേരി: കാലത്തിന്‍റെ യഥാർഥ പ്രശ്നങ്ങളിൽ ഇടപെടുമ്പോൾ പാർട്ടി ശക്തിപ്പെടുമെന്നു സിപിഐ ദേശീയ എക്സിക്യൂട്ടീവ് അംഗവും രാജ്യസഭാംഗവുമായ പി. സന്തോഷ് കുമാർ. സിപിഐ ജില്ലാ സമ്മേളനത്തോടനുബന്ധിച്ച് നടന്ന പ്രതിനിധി സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. നിസംഗത വെടിഞ്ഞ് ആശയ പൊരാട്ടങ്ങൾക്കായി രംഗത്തിറങ്ങണം. മനുഷ്യന്‍റെ പ്രശ്നങ്ങളിൽ ഇടപെട്ടാൽ പാർട്ടിക്ക് അതിശയകരമായ വളർച്ച ഉണ്ടാക്കാൻ കഴിയുമെന്നു അദ്ദേഹം പറഞ്ഞു. സംസ്ഥാനത്ത് മെച്ചപ്പെട്ട എൽഡിഎഫ് കെട്ടിപ്പടുക്കണം. വകുപ്പുകളെകുറിച്ച് പരാതികളും നിരാശയുമുണ്ടാകാം. പാർട്ടിയിൽ വിഭാഗീയതയുണ്ടെന്നു വരുത്തിത്തീർക്കാൻ ശ്രമം നടക്കും. അതെല്ലാം തിരിച്ചറിഞ്ഞ് പ്രവർത്തിക്കണം അദേഹം കൂട്ടിച്ചേർത്തു. മന്ത്രി ജെ. ചിഞ്ചുറാണി, മുൻമന്ത്രി മുല്ലക്കര രത്നാകരൻ, ജില്ലാ സെക്രട്ടറി കെ.പി. സുരേഷ് രാജ്, വാസുദേവൻ തെന്നിലാപുരം, മുൻമന്ത്രി ഇ. ചന്ദ്രശേഖരൻ, വി. ചാമുണ്ണി, മുൻ എംഎൽഎമാരായ എൻ. രാജൻ, രാജാജി മാത്യു ടി. തോമസ്, മുൻ എംപി സി.എൻ. ജയദേവൻ, വിജയൻ കുനിശേരി, സ്വാഗതസംഘം കൺവീനർ കെ. രാമചന്ദ്രൻ , പൊറ്റശേരി മണികണ്ഠൻ, സുമലത മോഹൻദാസ്, കെ.ഇ. ഹനീഫ പ്രസംഗിച്ചു. ഇന്നു രാവിലെ റിപ്പോർട്ട്, പ്രമേയങ്ങൾ, തെരഞ്ഞെടുപ്പ് തുടങ്ങിയവയോടെ വൈകീട്ട് സമ്മേളനം സമാപിക്കും.

നിപ്പ: പ്രതിരോധ പ്രവർത്തനങ്ങൾ ഊർജിതം

പാലക്കാട്: ജില്ലയിൽ നിപ്പ വൈറസ് രോഗപ്രതിരോധപ്രവർത്തനങ്ങൾ ഊർജിതം. നിലവിൽ നിപ്പ സ്ഥിരീകരിച്ചവരുടെ എണ്ണം രണ്ടാണ്. അതിൽ തച്ചനാട്ടുകര സ്വദേശിനി കോഴിക്കോട് മെഡിക്കൽ കോളജിൽ ചികിത്സയിൽ തുടരുന്നു. നിലവിൽ പാലക്കാട് ഗവൺമെന്‍റ് മെഡിക്കൽ കോളജിൽ 13 പേർ ഐസൊലേഷനിൽ കഴിയുന്നുണ്ട്. ജില്ലയിലാകെ 435 പേരാണ് സമ്പർക്ക പട്ടികയിലുള്ളത്. നിപ്പ പ്രതിരോധ പ്രവർത്തനങ്ങളുടെ ഭാഗമായി ആരോഗ്യ പ്രവർത്തകരുടെ നേതൃത്വത്തിൽ ഇന്ന് 93 വീടുകളിൽ സന്ദർശനം നടത്തി പനിസർവ്വേ പൂർത്തീകരിച്ചു. ജില്ലാ മാനസികാരോഗ്യ വിഭാഗം ഇന്നലെ 45 പേർക്ക് ടെലഫോണിലൂടെ കൗൺസലിംഗ് സേവനം നൽകിയിട്ടുണ്ട്. കൺട്രോൾ സെല്ലിലേക്ക് ഇന്നലെ നിപ്പരോഗ വ്യാപനവുമായി ബന്ധപ്പെട്ട് 33 കോളുകളെത്തി. നിപ്പ രോഗബാധ പ്രദേശത്ത് ഇന്നലെ മൃഗങ്ങൾക്കിടയിൽ അസ്വാഭാവിക മരണമൊന്നും റിപ്പോർട്ട് ചെയ്തിട്ടില്ലെന്നും കുമരംപുത്തൂർ ഭാഗത്തുനിന്ന് 10 നായ്ക്കളുടെ രക്തസാമ്പിളുകൾ ശേഖരിച്ചിട്ടുണ്ടെന്നും മൃഗസംരക്ഷണ വകുപ്പ് അറിയിച്ചു. കണ്ടൈൻമെന്‍റ് സോൺ പ്രഖ്യാപിച്ചതിനുശേഷം ആകെ 2081 കുടുംബങ്ങൾക്ക് റേഷൻ വിതരണം നേരിട്ടു നൽകിയിട്ടുണ്ടെന്ന് ജില്ലാ സപ്ലൈ ഓഫീസർ അറിയിച്ചു. കുമരംപുത്തൂർ, കാരക്കുറുശ്ശി, കരിമ്പുഴ പഞ്ചായത്തുകളിലേയും മണ്ണാർക്കാട് മുൻസിപ്പാലിറ്റിയിലേയും കണ്ടൈൻമെന്‍റ് സോണിലെ വാർഡുകളിലുള്ളവർ നിർബന്ധമായും മാസ്ക് ധരിക്കണം. അനാവശ്യമായി കൂട്ടംകൂടി നിൽക്കരുത്. ഈ വാർഡുകളിലേക്കുള്ള അനാവശ്യമായ പ്രവേശനവും പുറത്തു കടക്കലും ഒഴിവാക്കാൻ ഡ്രോൺ ഉപയോഗിച്ചുകൊണ്ട് കർശനമായി നിരീക്ഷിക്കുകയും പരിശോധന തുടരുകയും ചെയ്യുന്നുണ്ടെന്നും പോലീസ് അറിയിച്ചു. കണ്ടെയ്ൻമെന്‍റ് സോണിൽ ജനജീവിതം പ്രതിസന്ധിയിൽ മണ്ണാർക്കാട്: നിപ്പ രോഗം റിപ്പോർട്ട് ചെയ്ത സാഹചര്യത്തിൽ മണ്ണാർക്കാട്ടെ വിവിധ പ്രദേശങ്ങൾ നിയന്ത്രണ മേഖലകളായതോടെ സാധാരണക്കാരുടെ ജീവിതം പ്രതിസന്ധിയിൽ. കൂലിപണിക്കാർ ഉൾപ്പെടെ ദിവസ വരുമാനത്തെ ആശ്രയിക്കുന്ന കുടുംബങ്ങളാണ് ഏറെ പ്രതിസന്ധിയിലായിരിക്കുന്നത്. ആവശ്യമായ ഭക്ഷണം, വിദ്യാർഥികളുടെ പഠനം, രോഗികളുടെ ചികിത്സ, മരുന്ന്, വ്യാപാരികളുടെ ഉപജീവനം, ഗതാഗത സൗകര്യങ്ങളുടെ അപര്യാപ്തത, അവശ്യവസ്തുക്കളുടെ ലഭ്യതക്കുറവ് തുടങ്ങി ഒട്ടേറെ പ്രശ്നങ്ങളാണ് ചൂണ്ടികാണിക്കുന്നത്. പ്രശ്നങ്ങളുടെ സങ്കീർണത കുറക്കാൻ സർക്കാർ സംവിധാനങ്ങൾ അടിയന്തര സഹായങ്ങൾ എത്തിക്കണമെന്ന് സോണിൽ കഴിയുന്നവർ ആവശ്യപ്പെട്ടു.

നെല്ലിയാന്പതിയിൽ മരംവീണു വൈദ്യുതി മുടങ്ങി; ഗതാഗതം തടസപ്പെട്ടു

നെല്ലിയാമ്പതി: നെല്ലിയാമ്പതി കൈകാട്ടിയിൽ മരം കടപുഴകി റോഡിലേക്കു വീണു. ഒരുമണിക്കൂർ ഗതാഗത തടസമുണ്ടായി. വൈദ്യുതി ലൈനിനു മുകളിലൂടെ വീണതിനെത്തുടർന്ന് കമ്പികൾപൊട്ടി വൈദ്യുതി വിതരണവും തടസപ്പെട്ടു. കൈകാട്ടി സഹകരണബാങ്കിനു സമീപമുള്ള സിൽവർ ഓക്ക് മരമാണ് കടപുഴകി വീണത്. നിരവധി വിനോദസഞ്ചാരികളും യാത്രക്കാരും വഴിയിൽ കുടുങ്ങി. പൊതുപ്രവർത്തകനായ പി.ഒ. ജോസഫിന്‍റെ നേതൃത്വത്തിൽ പ്രദേശവാസികളുടെ സഹായത്തോടെ മരം മുറിച്ചുമാറ്റി ഗതാഗതം പുനഃസ്ഥാപിച്ചു. വിവരമറിഞ്ഞ് നെല്ലിയാമ്പതി വില്ലേജ് ഓഫീസർ സതീശൻ, ഡെപ്യൂട്ടി റേഞ്ച് ഫോറസ്റ്റ് ഓഫീസർ ജയചന്ദ്രൻ, ജീവനക്കാരായ അഭിലാഷ്, പ്രമോദ്, ശ്രീജിത്ത് ഗതാഗതം പുനഃസ്ഥാപിക്കാൻ നേതൃത്വം നൽകി. കെഎസ്ഇബി ജീവനക്കാർ സ്ഥലത്തെത്തി വൈദ്യുതി ലൈൻ പുനഃസ്ഥാപിച്ചു.

ടോൾ നിർത്തിവയ്ക്കാൻ ഹൈക്കോടതിയിൽ ഹർജി നൽകി വോയ്സ് ഓഫ് വടക്കഞ്ചേരി

വടക്കഞ്ചേരി: വടക്കഞ്ചേരി- മണ്ണുത്തി ആറുവരി ദേശീയപാതയിൽ തുടരുന്ന രൂക്ഷമായ ഗതാഗതകുരുക്കും റോഡിന്‍റെ ശോച്യാവസ്ഥയും മൂലം പന്നിയങ്കര ടോൾ പ്ലാസയിലെ ടോൾ പിരിവ് നിർത്തിവയ്പിക്കണമെന്നാവശ്യപ്പെട്ട് വടക്കഞ്ചേരിയിലെ വോയ്സ് ഓഫ് വടക്കഞ്ചേരി കൂട്ടായ്മ ഹൈക്കോടതിയിൽ പൊതുതാൽപര്യ ഹർജി നൽകി. അഡ്വ.പി.ആർ. വെങ്കിടേഷ് മുഖേന സംഘടനയുടെ പ്രസിഡന്‍റ് നൽകിയ ഹർജി ഹൈക്കോടതി ഫയലിൽ സ്വീകരിച്ചതായി ഭാരവാഹികൾ പത്രസമ്മേളനത്തിൽ അറിയിച്ചു. ദേശീയപാതയിൽ നടക്കുന്ന മേൽപ്പാലങ്ങളുടെ നിർമാണ പ്രവർത്തനങ്ങളാണ് നിലവിലെ ഗതാഗതകുരുക്കിനു കാരണം. ഇത് വാഹനങ്ങൾക്ക് കേടുപാടുകളും യാത്രക്കാർക്ക് ദുരിതങ്ങളും ഉണ്ടാക്കുന്നു. അടിസ്ഥാന സൗകര്യങ്ങളായ മേൽപ്പാലങ്ങൾ, സർവീസ് റോഡുകൾ, ബസ് ബേകൾ, അഴുക്കുചാലുകൾ, വഴിവിളക്കുകൾ എന്നിവ പൂർത്തിയാക്കാതെയാണ് 2022 മാർച്ചിൽ ടോൾ പിരിവ് ആരംഭിച്ചത്. റോഡ് നിർമാണം പൂർത്തിയാകാതെ ടോൾ പിരിവ് തുടങ്ങിയതിൽ നേരത്തെയും വ്യാപക പ്രതിഷേധമുയർന്നിരുന്നു. പദ്ധതിയുടെ ആസൂത്രണത്തിലെ പാളിച്ചകളും കെടുകാര്യസ്ഥതയും അഴിമതിയുമാണ് യാത്രക്കാരെ ദുരിതത്തിലാക്കുന്നതെന്ന് സംഘടന ചൂണ്ടിക്കാട്ടുന്നു. തുടർച്ചയായി തകരാറിലാകുന്ന വടക്കഞ്ചേരി മേൽപ്പാലം ഇതിനുദാഹരണമാണ്. റോഡിലെ കുഴികളും ഗതാഗതകുരുക്കും താണ്ടിയെത്തുന്ന യാത്രക്കാർ ടോൾ പ്ലാസ ജീവനക്കാരുമായി വാക്കുതർക്കവും സംഘർഷങ്ങളും പതിവാണ്. സുരക്ഷിതവും സുഖകരവുമായ യാത്രയ്ക്കാണ് ടോൾ ഈടാക്കുന്നതെങ്കിലും നിലവിലെ അവസ്ഥയിൽ ടോൾ ഈടാക്കുന്നത് അന്യായവും ജനദ്രോഹവുമാണെന്ന് സംഘടന പറയുന്നു. റോഡുപണി പൂർത്തിയാകുന്നതു വരെ പന്നിയങ്കരയിലെ ടോൾ പിരിവ് നിർത്തിവയ്ക്കണമെന്നാണ് സംഘടനയുടെ പ്രധാന ആവശ്യം. പത്രസമ്മേളനത്തിൽ സംഘടന പ്രസിഡന്‍റും വടക്കഞ്ചേരി പഞ്ചായത്ത് മുൻ പ്രസിഡന്‍റുമായ പി. ഗംഗാധരൻ, കെ.പി. സണ്ണി, കിഴക്കഞ്ചേരി പഞ്ചായത്ത് മുൻ പ്രസിഡന്‍റ് കെ.ബാലൻ, സുരേഷ് വേലായുധൻ എന്നിവർ പങ്കെടുത്തു.

വിദ്യാര്‌ഥികൾക്കു ഭക്ഷ്യധാന്യകിറ്റുകൾ വിതരണം ചെയ്തു

മണ്ണാർക്കാട്: മണ്ണാർക്കാട് ജിഎംയുപി സ്കൂളിലെ കണ്ടെയ്ൻമെന്‍റ് സോണുകളിൽപ്പെട്ട വിദ്യാർഥികൾക്ക് ഭക്ഷ്യധാന കിറ്റുകൾ നൽകി. സാധരണക്കാരായ രക്ഷിതാക്കളുടെ പ്രയാസം മനസിലാക്കി അവരെ ചേർത്തുപിടിക്കുക എന്ന ഉദ്യേശത്തോടെയാണ് സോണുകളിലുള്ള മുഴുവൻ കുട്ടികളുടെ വീടുകളിലേക്കും പലചരക്കും പച്ചക്കറിയും അടങ്ങുന്ന ഭക്ഷ്യധാന്യകിറ്റ് നൽകിയത്. നഗരസഭ ചെയർമാൻ സി. മുഹമ്മദ് ബഷീർ വിതരണം ഉദ്ഘാടനം ചെയ്തു. പിടിഎ പ്രസിഡന്‍റ് ഷമീർ നമ്പിയത്ത് അധ്യക്ഷനായി. പ്രധാനധ്യാപകൻ നാരായണൻ, എഇഒ അബൂബക്കർ, എസ്എംസി ചെയർമാൻ മുജീബ് പെരിമ്പിടി, ഖാലിദ്, സക്കീർ മുല്ലക്കൽ, സമദ് പൂവ്വക്കോടൻ, അഷറഫ്, എം.കെ. അസീസ്, സ്റ്റാഫ് സെക്രട്ടറി മനോജ്, ചന്ദ്രൻ,സക്കീർ എന്നിവർ സംബന്ധിച്ചു.

സമ്പ്രദായത്തിൽ മാറ്റം വരുത്താതെ ബസ് വ്യവസായം നിലനിൽക്കില്ലെന്നു ബസുടമ സംയുക്ത സമിതി

വടക്കഞ്ചേരി:കഴിഞ്ഞ 14 വർഷമായി നിലനിൽക്കുന്ന വിദ്യാർഥി കൺസഷൻ സമ്പ്രദായത്തിൽ മാറ്റം വരുത്താതെ ബസ് വ്യവസായത്തിനു നിലനിൽക്കാനാകില്ലെന്ന് ബസ് ഉടമസംയുക്ത സമിതി പാലക്കാട് ജില്ലാ കമ്മിറ്റി. രണ്ടര കിലോമീറ്റർ യാത്ര ചെയ്യാൻ വിദ്യാർഥികൾക്ക് ഒരു രൂപയാണ് ചാർജ്. പതിനഞ്ച് കിലോമീറ്റർ യാത്ര ചെയ്യാൻ രണ്ടുരൂപയും മുപ്പതുകിലോമീറ്റർ യാത്രക്ക് മൂന്നുരൂപയുമാണ് ഇപ്പോഴുമുള്ളത്. ഭിക്ഷാടനത്തിന് വരുന്നവർപോലും ഇപ്പോൾ ഒരുരൂപ വാങ്ങാത്ത കാലത്താണ് പതിറ്റാണ്ടുകൾക്കു മുമ്പുള്ള വിദ്യാർഥികളുടെ ചാർജ് നിരക്ക് തുടരുന്നത്. വിദ്യാർഥികളുടെ കൺസഷൻ സമ്പ്രദായത്തിൽ മാറ്റം വരുത്തണമെങ്കിൽ അക്കാര്യം വിദ്യാർഥികളോട് ചോദിക്കണമെന്ന ഗതാഗത വകുപ്പു മന്ത്രിയുടെ ന്യായീകരണവും ഏറെ വിചിത്രമെന്ന് ജില്ലാ കമ്മിറ്റി ചൂണ്ടിക്കാട്ടി. വർഷങ്ങളായി സർവീസ് നടത്തിക്കൊണ്ടിരിക്കുന്ന സ്വകാര്യ ബസുകളുടെ പെർമിറ്റുകൾ കെഎസ്ആർടിസിയെ ഏൽപ്പിക്കുന്നതിനു വേണ്ടി ഏറ്റെടുക്കുന്ന നടപടി എന്തിനു വേണ്ടിയാണെന്ന് ജനങ്ങളെ ബോധ്യപ്പെടുത്തണം. സ്വകാര്യ ബസ് വ്യവസായം ഇല്ലാതായാൽ അത് യാത്രാക്ലേശം രൂക്ഷമാക്കുന്നതിനൊപ്പം രക്ഷിതാക്കൾക്ക് മക്കളുടെ വിദ്യാഭ്യാസ യാത്രാ ചെലവ് പതിന്മടങ്ങ് ഇരട്ടിയാകുന്ന സാഹചര്യമുണ്ടാകുമെന്നും യോഗം വിലയിരുത്തി. വിവിധ ആവശ്യങ്ങൾ ഉന്നയിച്ച് സംസ്ഥാനതലത്തിൽ നടത്തുന്ന അനിശ്ചിതകാല സമരപരിപാടികൾ ജില്ലയിൽ വിജയിപ്പിക്കുന്നതിനും ജില്ലാ ഭാരവാഹികളുടെ യോഗം തീരുമാനിച്ചു. സംയുക്ത സമിതി ജനറൽ കൺവീനർ ടി. ഗോപിനാഥ് അധ്യക്ഷത വഹിച്ചു. വൈസ് ചെയർമാൻ ഗോകുലം ഗോകുൽദാസ്, ജില്ലാ ഭാരവാഹികളായ കെ. സത്യൻ, എൻ. വിദ്യാധരൻ, എ.എസ്. ബേബി, കെ. സുധാകരൻ, കെ.ഐ ബഷീർ പ്രസംഗിച്ചു.

നെന്മാറ ഗവ. ഐടിഐ കെട്ടിട ഉദ്ഘാടനം നാളെ

നെന്മാറ: ഗവ. ഐടിഐ യുടെ പുതുതായി നിർമിച്ച കെട്ടിട ഉദ്ഘാടനം നാളെ. പോത്തുണ്ടിയിൽ ഐടിഐക്ക് വേണ്ടി അനുവദിച്ച ഒന്നരഏക്കർ സ്ഥലത്ത് 3.30 ലക്ഷം രൂപ ചെലവിൽ നിർമിച്ച കെട്ടിടത്തിന്‍റെ ഉദ്ഘാടനം തൊഴിൽമന്ത്രി വി. ശിവൻകുട്ടി നിർവഹിക്കും. കെ. ബാബു എംഎൽഎ അധ്യക്ഷത വഹിക്കും. കെ. രാധാകൃഷ്ണൻ എംപി മുഖ്യാതിഥിയായിരിക്കും ത്രിതല പഞ്ചായത്ത് ജനപ്രതിനിധികൾ, വകുപ്പുതല ഉദ്യോഗസ്ഥർ, ഐടിഐ ഉദ്യോഗസ്ഥർ ട്രെയിനികൾ എന്നിവർ പങ്കെടുക്കും. പോത്തുണ്ടിയിലെ പുതിയ കാമ്പസിൽ നാളെ രാവിലെ 11 നാണ് ഉദ്ഘാടനം. ഐടിഐ ആരംഭിച്ചിട്ട് 16വർഷത്തിനുശേഷമാണ് സ്വന്തംകെട്ടിടം യാഥാർഥ്യമാകുന്നത്.

പൂളക്കുണ്ടിൽ ആരോഗ്യ ഉപകേന്ദ്രം നിർമിക്കാൻ പദ്ധതി

ഒറ്റപ്പാലം: നഗരസഭാപരിധിയിൽ പൂളക്കുണ്ടിലും ആരോഗ്യ ഉപകേന്ദ്രം നിർമിക്കാൻ തീരുമാനം. മറ്റു നാല് ആരോഗ്യ ഉപകേന്ദ്രങ്ങൾക്ക് പുറമെയാണിത്. പൂളക്കുണ്ടിൽ പഴയ അറവുശാല പ്രവർത്തിച്ചിരുന്ന സ്ഥലത്ത് ഇതിനായി സ്ഥലമൊരുക്കി. കഴിഞ്ഞദിവസം കെ. പ്രേംകുമാർ എംഎൽഎ കെട്ടിടനിർമാണോദ്ഘാടനം നിർവഹിച്ചു. 2024- 25 വർഷത്തെ എംഎൽഎ ഫണ്ടിൽനിന്ന് 20 ലക്ഷംരൂപ ചെലവഴിച്ചാണ് കെട്ടിടനിർമാണം. പദ്ധതിയുടെ കേന്ദ്രം, ആരോഗ്യ ഉപകേന്ദ്രം, ഹോമിയോ ഉപകേന്ദ്രം എന്നിവയിൽ ഏതെങ്കിലും ഒരുകേന്ദ്രമായി കെട്ടിടത്തെ പ്രയോജനപ്പെടുത്തുന്ന കാര്യം ചർച്ച ചെയ്യുകയാണെന്ന് നഗരസഭാധികൃതർ പറഞ്ഞു. വയോജനങ്ങൾക്ക് ചികിത്സ ലഭ്യമാക്കുന്നതിനാവശ്യമായ വയോമിത്രം കേന്ദ്രത്തിന്‍റെ ഓഫീസ് നിലവിൽ നഗരസഭാകാര്യാലയത്തിന്‍റെ കെട്ടിടത്തിലാണ് പ്രവർത്തിക്കുന്നത്. ഇവർക്കാവശ്യമായ ക്യാമ്പുകൾ മറ്റേതെങ്കിലും കേന്ദ്രങ്ങളിൽവച്ചാണ് നടത്തുന്നത്. വയോമിത്രം കേന്ദ്രമാക്കി പുതിയകെട്ടിടത്തെ മാറ്റുകയാണെങ്കിൽ ഓഫീസടക്കം ഇവിടേക്കുമാറ്റാനാകും. മീറ്റ്നയിലാണ് സർക്കാർ ഹോമിയോ ഡിസ്പെൻസറി പ്രവർത്തിക്കുന്നത്. ഇതിന്‍റെ ഉപകേന്ദ്രം തുടങ്ങുന്നതിന് നഗരസഭയ്‌ക്കു അനുമതി ലഭിച്ചിട്ടുമുണ്ട്. മീറ്റ്ന, കിഴക്കേക്കാട്, പനമണ്ണ, വരോട് ആരോഗ്യ ഉപകേന്ദ്രങ്ങൾക്കു പുറമേ അഞ്ചാമത് ഉപകേന്ദ്രമായി മാറ്റാനാകുമോ എന്ന കാര്യമാണ് പരിഗണനയിലുള്ളത്.

നക്കപ്പതിപ്പിരിവ് പ്രദേശങ്ങളിൽ നാശംവിതച്ച് കാട്ടാനക്കൂട്ടം

അഗളി: മണ്ണാർക്കാട്- ആനക്കട്ടി പ്രധാന റോഡിൽ നക്കപ്പതിപ്പിരിവ് പ്രദേശങ്ങളിൽ ആറുദിവസമായി കാട്ടാനകളുടെ വിളയാട്ടം. ഒരു കുട്ടിയാനയടക്കം അഞ്ച് ആനകളാണ് റോഡിലും വീട്ടുമുറ്റങ്ങളിലും കൃഷിയിടങ്ങളിലും കറങ്ങി നടക്കുന്നത്. പ്രദേശത്ത് നിരവധി പേരുടെ കൃഷികൾ കാട്ടാന ഇതിനകം നശിപ്പിച്ചു. നക്കപ്പതി താഴെ ഉന്നതി, മേലെ ഉന്നതി നിവാസികളും പ്രദേശത്തെ നൂറുകണക്കിനു നിവാസികളും ദിവസങ്ങളായി ആനപ്പേടിയിൽ ഉറക്കം വെടിഞ്ഞിരിക്കുകയാണ്. തിരക്കേറിയ റോഡിന് ഇരുവശവും കാട്ടാനുകൾ ഭയരഹിതമായി വിലസുന്നു. ഗൂളിക്കടവ് ജംഗ്ഷനിൽനിന്നും ഒരുകിലോമീറ്ററിനുള്ളിലാണ് ആനകൾ കറങ്ങി നടക്കുന്നത്. നക്കപ്പതിയിൽ വനഭൂമിയോടു ചേർന്നാണ് ജനവാസ കേന്ദ്രമുള്ളത്. ആർആർടി സംഘം ആനയെ ഓടിച്ചാൽതന്നെ തൊട്ടടുത്ത കാട്ടിൽ മറഞ്ഞശേഷം വീണ്ടും കൃഷിയിടങ്ങളിലേക്ക് എത്തുകയായി. നാലുവശവും ജനവാസകേന്ദ്രമുള്ള ഒരുചെറിയ കുട്ടിവനമാണ് ഇവിടെയുള്ളത്. വനത്തിനുള്ളിലേക്ക് കടക്കുന്ന വന്യമൃഗങ്ങളെ തുരത്താൻ വനപാലകർക്കു നിയമമില്ല. അട്ടപ്പാടിയിൽ ജനവാസകേന്ദ്രത്തിൽ വളരെ ചെറുതും വലുതുമായ നിരവധി കുട്ടിവനങ്ങണ്ട് . ഇവയൊക്കെതന്നെ ആദിവാസികൾ കൃഷിചെയ്തിരുന്ന ഭൂമിയായിരുന്നു. പിന്നീടത് ഫോറസ്റ്റുകാർ വനഭൂമിയാക്കി മാറ്റുകയായിരുന്നുവെന്നു പഴമക്കാർ ചൂണ്ടിക്കാട്ടുന്നു. ജനവാസകേന്ദ്രത്തിനുള്ളിൽ കിടക്കുന്ന ഇത്തരം ചെറിയ ചെറിയ കുട്ടിവനങ്ങളാണ് കർഷകർക്ക് ഭീഷണിയായിരിക്കുന്നത്. ജനവാസ കേന്ദ്രങ്ങൾക്ക് നടുക്കുള്ള ചെറുവനങ്ങൾക്ക് ചുറ്റും ശക്തമായ ഫെൻസിംഗ് തീർത്ത് കാട്ടുപന്നി അടക്കമുള്ള വന്യമൃഗങ്ങൾ കൃഷിയിടത്തിലേക്കു കടക്കാത്തവിധം വനംവകുപ്പ് സുരക്ഷ ഏർപ്പെടുത്തണമെന്നാണ് നാട്ടുകാർ ആവശ്യപ്പെടുന്നത്. മുത്തികുളം ഫോറസ്റ്റ്, സൈലന്‍റ് വാലി ഫോറസ്റ്റ്, നീലഗിരി മലനിരകൾ തുടങ്ങിയവയൊക്കെയാണ് അട്ടപ്പാടിയിലെ വനമേഖലകളെന്നും ജനവാസ കേന്ദ്രത്തിൽ പത്തും ഇരുപതും ഹെക്ടർ വരുന്ന ചെറുവനങ്ങൾ എങ്ങനെ രൂപപ്പെട്ടുവെന്നു പഠനം നടത്തണമെന്നും നാട്ടുകാർ ആവശ്യപ്പെട്ടു.

അട്ടപ്പാടിയിലെ സ്കൂളുകളിൽ പാമ്പുകളുടെ സാന്നിധ്യം നിരീക്ഷിച്ച് വനംവകുപ്പ്

അഗളി: സ്കൂൾ വളപ്പിലെ പാമ്പുകളുടെ സാന്നിധ്യം വനംവകുപ്പ് നിരീക്ഷണം നടത്തി. പാലക്കാട് സോഷ്യൽ ഫോറസ്റ്റ് ഡിവിഷൻ അഗളി റേഞ്ചാണ് അട്ടപ്പാടിയിൽ വിവിധ സ്കൂൾ പരിസരങ്ങളിൽ നിരീക്ഷണം നടത്തിയത്. മുള്ളി ഗവ. എൽപി സ്കൂൾ, കൂക്കംപാളയം ഗവ. എൽപി സ്കൂൾ, പുതൂർ ഹയർസെക്കൻഡറി സ്കൂൾ പരിസരങ്ങളിലാണ് പരിശോധന നടത്തിയത്. പരിശോധനയിൽ പാമ്പുകളുടെ സാന്നിധ്യം കണ്ടെത്താനായില്ലെന്ന് അധികൃതർ പറഞ്ഞു. പാമ്പുകളുടെ സാന്നിധ്യമുണ്ടെന്ന് സംശയിക്കുന്ന സ്ഥാപനങ്ങളിലെ അധികാരികൾ വനംവകുപ്പിൽ വിവരം നൽകിയാൽ വനപാലകർ സ്ഥലത്തെത്തി അവയെ പിടിച്ചുകൊണ്ടുപോകുമെന്ന് ബന്ധപ്പെട്ടവർ അറിയിച്ചു. പരിശോധന നടത്തിയ സ്കൂൾ പരിസരങ്ങളിലെ കാടുകൾ വെട്ടി വൃത്തിയാക്കുവാനും ചുറ്റുമതിലിലെ ദ്വാരങ്ങൾ അടയ്ക്കുന്നതിനും സ്കൂൾ അധികൃതർക്കു നിർദേശം നൽകി. എസ്എഫ്ഒ പെരുമാൾ, സർപ്പ വോളന്‍റിയേഴ്സ്മാരായ സുഭാഷ്, കെ. സുരേഷ്, വി. അനൂപ് ഡ്രൈവർ മണി എന്നിവരടങ്ങിയ സംഘമാണ് പരിശോധന നടത്തിയത്.

ഒറ്റപ്പാലം നഗരസഭാ സെക്രട്ടറിയും പോലീസും മാസത്തിലൊരിക്കൽ ബസ് സ്റ്റാൻഡ് സന്ദർശിക്കും

ഒറ്റപ്പാലം: ഇനിമുതൽ മാസത്തിലൊരിക്കൽ നഗരസഭാ അധികൃതരും ഒറ്റപ്പാലം പോലീസും ബസ് സ്റ്റാൻഡ് സന്ദർശിച്ച് സുരക്ഷാക്രമീകരണങ്ങൾ വിലയിരുത്തും. പോലീസ് സ്റ്റേഷൻ ഹൗസ് ഓഫീസറും ബസ് സ്റ്റാൻഡ് നഗരസഭാസെക്രട്ടറിയുമടങ്ങുന്ന സംഘം ബസ് സ്റ്റാൻഡ് സന്ദർശിക്കണമെന്ന് കഴിഞ്ഞ ദിവസം മനുഷ്യാവകാശകമ്മീഷൻ ഉത്തരവിട്ടിരുന്നു. നഗരസഭാ ബസ് സ്റ്റാൻഡിൽ അപകടം സംഭവിക്കാതിരിക്കാൻ നഗരസഭാ സെക്രട്ടറിയടക്കമുള്ളവർ കർശന നടപടികൾ സ്വീകരിക്കണമെന്നാണ് കമ്മീഷൻ ഉത്തരവ്. ബസ് സ്റ്റാൻഡ് സന്ദർശിച്ച് നഗരസഭ നൽകിയ നിർദേശങ്ങൾ പാലിക്കുന്നുണ്ടോയെന്ന് ഉറപ്പാക്കുകയാണു സന്ദർശന ലക്ഷ്യം. കഴിഞ്ഞ വർഷം ബസ് സ്റ്റാൻഡിൽ അമിതവേഗതയിൽ അശ്രദ്ധമായെത്തിയ ബസിടിച്ച് ഇതരസംസ്ഥാനത്തൊഴിലാളി മരിക്കാനിടയായ സംഭവത്തിന്‍റെ പശ്ചാത്തലത്തിലാണ് നടപടി.

സ്കൂളുകളിൽ 26 ലൈബ്രേറിയൻമാരെ നിയമിച്ച് ജില്ലാ പഞ്ചായത്ത്

പാലക്കാട്: ജില്ലയിലെ വിദ്യാർഥികളിൽ വായനാശീലം വളർത്തുന്നതിനും സ്കൂൾ ലൈബ്രറികൾ ശക്തീകരിക്കുന്നതിനും ലക്ഷ്യമിട്ട് ജില്ലാ പഞ്ചായത്ത് 26 സർക്കാർ സ്കൂളുകളിലേക്ക് ലൈബ്രേറിയൻമാരെ നിയമിച്ചു. 2025- 26 സാന്പത്തിക വർഷത്തെ ജനകീയാസൂത്രണ പദ്ധതിയുടെ ഭാഗമായാണ് നിയമനം. 2023- 24 സാന്പത്തിക വർഷം മുതൽ ജില്ലാ പഞ്ചായത്ത് നടപ്പാക്കുന്ന പദ്ധതിയിലൂടെ ജില്ലയിലെ മുഴുവൻ സ്കൂളുകളിലും ലൈബ്രേറിയൻമാരെ നിയമിക്കുകയാണ് ലക്ഷ്യം. ഇതിനോടനുബന്ധിച്ചു നടന്ന യോഗത്തിൽ ജില്ലാ പഞ്ചായത്ത് വൈസ് പ്രസിഡന്‍റ് സി.കെ. ചാമുണ്ണി നിയമന ഉത്തരവുകളുടെ വിതരണോദ്ഘാടനം നിർവഹിച്ചു. ആരോഗ്യ വിദ്യാഭ്യാസകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ എ. ഷാബിറ അധ്യക്ഷയായി. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി അംഗം എം. പത്മിനി, ജില്ലാ പഞ്ചായത്ത് സെക്രട്ടറി എം. രാമൻകുട്ടി, ജില്ലാ വിദ്യാഭ്യാസ ഉപഡയറക്ടറുടെ കാര്യാലയത്തിലെ ജൂനിയർ സൂപ്രണ്ട് അരുണ്‍ വാസുദേവ്, സീനിയർ ക്ലാർക്ക് കെ.കെ. പ്രഫുല്ല എന്നിവർ പ്രസംഗിച്ചു.

പീച്ചി കാട്ടിൽ വിത്തൂട്ട് പദ്ധതിയുമായി കല്ലിങ്കൽപ്പാടം സ്കൂളിലെ വിദ്യാർഥികൾ

വടക്കഞ്ചേരി: പീച്ചി വാഴാനി വന്യജീവിസങ്കേതം വാണിയംപാറ ഫോറസ്റ്റ് സ്റ്റേഷന്‍റെ നേതൃത്വത്തിൽ കല്ലിങ്കൽപാടം ഗവ. ഹൈസ്കൂളിലെ എസ്പിസി, ജെആർസി യൂണിറ്റിലെ കുട്ടികൾ വിത്തൂട്ട് നടത്തി. കാടിനെ അറിയുക, വന്യജീവിസംഘർഷം ലഘുകരണത്തിനായി മിഷൻ ഫുഡ്‌ ഫോഡർ വാട്ടർ എന്നതായിരുന്നു ലക്ഷ്യം. പാണഞ്ചേരി ഗ്രാമ പഞ്ചായത്ത്‌ മെംബർ ഷീല അലക്സ് കാട്ടിലേക്ക് വിത്തെറിയൽ പരിപാടി ഉദ്ഘാടനം ചെയ്തു. അസിസ്റ്റന്‍റ് വൈൽഡ് ലൈഫ് വാർഡൻ രാജേഷ്, സെക്്ഷൻ ഫോറസ്റ്റ് ഓഫീസർ ജയദേവൻ, സിപിഒ ഷൈനി പ്രസംഗിച്ചു.

പെൻഷണേഴ്സ് ലഹരിവിരുദ്ധ റാലി ശ്രദ്ധേയമായി

വടക്കഞ്ചേരി: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ വടക്കഞ്ചേരി ഒന്ന്, രണ്ട് യൂണിറ്റുകൾ സംയുക്തമായി ലഹരിവിരുദ്ധ സെമിനാറും റാലിയും സംഘടിപ്പിച്ചു. യൂണിയൻ സംസ്ഥാന കൗൺസിലർ വി.വി. മുരുകൻ കുട്ടി സെമിനാർ ഉദ്ഘാടനം ചെയ്തു. യൂണിറ്റ് പ്രസിഡന്‍റ് എൻ. രവിദാസൻ അധ്യക്ഷത വഹിച്ചു. റിട്ടയേഡ് എസ്ഐ പരമേശ്വരൻ വിഷയാവതരണം നടത്തി. എം.വി. അപ്പുണ്ണി നായർ, വി. രാമചന്ദ്രൻ, അയ്യഴി ജയപ്രകാശ്, എം.ഐ. ഡാഡ്‌സ്, ജോസഫ് ചാക്കോ, യൂണിറ്റ് സെക്രട്ടറി രാമചന്ദ്രൻ, എ. ഗംഗാധരൻ പ്രസംഗിച്ചു. ലഹരിക്കെതിരെ കൈകോർക്കാം എന്ന മുദ്രാവാക്യവുമായി ടൗണിൽ ലഹരിവിരുദ്ധ റാലിയും നടത്തി.

ശ്രീലക്ഷ്മിയെ വീട്ടിലെത്തി അനുമോദിച്ച് എംഎൽഎ

ഒറ്റപ്പാലം: സിഎ ഫൈനൽ പരീക്ഷ വിജയിച്ച പി.വി. ശ്രീലക്ഷ്മിയെ ഒറ്റപ്പാലം എംഎൽഎ കെ. പ്രേംകുമാർ വീട്ടിലെത്തി അനുമോദിച്ചു. സിപിഎം ഒറ്റപ്പാലം ഏരിയ കമ്മിറ്റിയംഗം എം.ഐ.എ. റസാഖ്, എ.പി.അഷറഫ്, പി.കെ. ഗംഗാധരൻ, കലാലയ ലൈൻ നിവാസികൾ എന്നിവർ അനുമോദന ചടങ്ങിൽ പങ്കെടുത്തു. സിപിഎം പാലാട്ട് റോഡ് ബ്രാഞ്ചിന്‍റെ ഉപഹാരം എംഎൽഎ വിജയിക്കു സമ്മാനിച്ചു. ഒറ്റപ്പാലം കേരള കലാലയത്തിലെ എം.കെ. ശശിധരന്‍റെയും, കലാമണ്ഡലം സുധ ശശിധരന്‍റെയും മകളും, കലാമണ്ഡലം റാണി ബാലകൃഷ്ണൻ നായരുടെ പൗത്രിയുമാണ് പി.വി. ശ്രീലക്ഷ്മി.

പുതൂർ സ്കൂളിൽ വിവിധ ക്ലബുകളുടെ ഉദ്ഘാടനം

അഗളി: പുതൂർ ഗവ. ഹയർ സെക്കൻഡറി സ്കൂളിലെ ക്ലബുകളുടെ ഉദ്ഘാടനം സ്വതന്ത്ര ഗവേഷകൻ ഡോ.എ.ഡി. മണികണ്ഠൻ നടത്തി. പുതൂർ സ്കൂളിലെ ശാസ്ത്ര ക്ലബ്‌, നേച്ചർ ക്ലബ്‌, സോഷ്യൽ സയൻസ് ക്ലബ്‌ തുടങ്ങിയ ക്ലബ്ബുകളുടെ ഉദ്ഘാടനമാണ് നടത്തിയത്. ഹെഡ്മാസ്റ്റർ പ്രദീപ്‌, പിടിഎ പ്രസിഡന്‍റ് സുരേന്ദ്രൻ, അധ്യാപകരായ മാണിക്യൻ, വിനോദ്, ജോൺസൻ, സോണിജൻ, സുബിൻ, കല്പന, അജിത, സജിൻ, രമേഷ് എന്നിവർ പ്രസംഗിച്ചു.

മനുഷ്യാവകാശ കമ്മീഷൻ ഇടപെട്ടു ; പറന്പിക്കുളം മേഖലയിലെ പട്ടികവർഗ കുടുംബങ്ങളുടെ പരാതികൾ പരിഹരിക്കും

പാലക്കാട്: മുതലമട പഞ്ചായത്തിലെ പതിനൊന്നാം വാർഡിൽ പറന്പിക്കുളം മേഖലയിൽ താമസിക്കുന്ന 10 പട്ടികവർഗ ഉന്നതികളിലെ 598 പട്ടികവർഗ കുടുംബങ്ങളുടെ വിവിധ ആവശ്യങ്ങൾ പരിഹരിക്കാൻ നടപടിയായി. വീട് നിർമിക്കുന്നത് ഉൾപ്പെടെ വിവിധ ആവശ്യങ്ങൾ ഉന്നയിച്ച് പറന്പിക്കുളം കാടാസ് ഉന്നതി നിവാസികൾ സമർപ്പിച്ച പരാതിയിൽ നടപടിയെടുക്കാൻ കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ടതിന്‍റെ അടിസ്ഥാനത്തിലാണ് കളക്ടർ സ്വീകരിക്കാൻ ഉദ്ദേശിക്കുന്ന നടപടികളുടെ റിപ്പോർട്ട് സമർപ്പിച്ചത്. ഉന്നതി നിവാസികൾക്ക് രണ്ടു നിലകളിലുള്ള വീട് നിർമിക്കുന്നത് അപ്രായോഗികമാണെന്ന് ജില്ലാ കളക്ടർ അറിയിച്ചു. നിലവിലെ വീട് പൊളിച്ചാൽ മാത്രമേ പുതിയ നിർമാണം തുടങ്ങാൻ കഴിയുകയുള്ളുവെന്ന് റിപ്പോർട്ടിൽ പറയുന്നു. ഈ സമയത്ത് കുടുംബങ്ങൾക്ക് താമസിക്കാൻ ബദൽസംവിധാനം ഏർപ്പെടുത്തേണ്ടായി വരും. ഒരു ഹെക്ടറിൽ കുറവുള്ള സ്ഥലത്ത് 50 ഓളം കുടുംബങ്ങളാണ് തിങ്ങി പാർക്കുന്നത്. ഇവിടെ സ്ഥലപരിമിതിയുള്ളതിനാൽ ഫ്ളാറ്റ് മാതൃകയിൽ വീട് നിർമിക്കേണ്ടി വരും. നിലവിൽ വനംവകുപ്പിൽ ആദിവാസി ക്ഷേമഭവന പദ്ധതികൾ ഇല്ലാത്തതിനാൽ പട്ടികവർഗക്ഷേമ വകുപ്പുമായി കൂടിയാലോചിക്കണമെന്നും ജില്ലാ കളക്ടർ അറിയിച്ചു. ഉന്നതി നിവാസികൾക്ക് പുതുതായി ശുചിമുറി നിർമിക്കാൻ നിലവിൽ കോളനികളിൽ പര്യാപ്തമായ സ്ഥലമില്ലെന്നും റിപ്പോർട്ടിൽ പറയുന്നു. കോളനിയിൽ വൈദ്യുതി സംവിധാനം ഏർപ്പെടുത്തിയിരിക്കുന്നത് തമിഴ്നാടാണ്. സർവീസ് വയറും തെരുവുവിളക്കും മാറുന്ന കാര്യം അടുത്ത വർഷത്തെ പദ്ധതിയിൽ ഉൾപ്പെടുത്തി തുടർനടപടികൾ സ്വീകരിക്കും. കാടാസ് ഉന്നതി സംരക്ഷിത വന മേഖലയിലല്ലാത്തതിനാൽ നിർമാണ പ്രവൃത്തികൾക്കും വികസന പദ്ധതികൾക്കും പരിസ്ഥിതി നിയമവും നിയന്ത്രണവും പരിഗണിക്കേണ്ടി വരും. പറന്പിക്കുളം കടുവാ സങ്കേതമായതിനാൽ പുതുതായി റോഡ് നിർമിക്കാൻ കഴിയില്ല. നിലവിലുള്ള റോഡിന്‍റെ അറ്റകുറ്റപണികൾ നടത്തും. വൈദ്യുതി തടസമുണ്ടാകുന്പോൾ കുടിവെള്ളവിതരണം തടസപ്പെടാറുണ്ട്. ആലത്തൂർ എംപിയുടെ പ്രാദേശിക വികസന ഫണ്ടിൽനിന്നും ഇതിന് പരിഹാരമാകുന്ന പദ്ധതി ആസൂത്രണം ചെയ്തിട്ടുണ്ട്. എംപി ഫണ്ടിൽ നിന്നും റേഷൻ ഷോപ്പ് കം കരിയർ ഗൈഡൻസ് കെട്ടിടത്തിനുള്ള എസ്റ്റിമേറ്റ് തയാറാക്കി ഭരണാനുമതിക്കായി സമർപ്പിച്ചിട്ടുണ്ട്. ഇതു ലഭിച്ചാൽ പ്രവൃത്തി ആരംഭിക്കുമെന്നും റിപ്പോർട്ടിൽ പറയുന്നു. പട്ടികവർഗവികസന വകുപ്പിന്‍റെ ലാന്‍റ് ബാങ്ക് പദ്ധതി പ്രകാരം ഭൂരഹിത പട്ടികവർഗക്കാർക്ക് ഭൂമി വിലയ്ക്ക് വാങ്ങി നൽകാനുള്ള നടപടികൾ പുരോഗമിക്കുന്നുണ്ട്. കടവ് കോളനിയിൽ കൈവശാവകാശ രേഖക്ക് അപേക്ഷ ലഭിച്ചാൽ ബന്ധപ്പെട്ട നിയമങ്ങൾ പരിശോധിച്ച് നടപടിയെടുക്കും. കാടാസ് ഉന്നതിയിൽ അപകടഭീഷണിയുള്ള മരങ്ങളുണ്ടെങ്കിൽ കോളനിനിവാസികളുടെ ചെലവിൽ മുറിച്ചുമാറ്റാൻ അനുമതി നൽകുന്നതാണെന്നും റിപ്പോർട്ടിൽ പറയുന്നു. റിപ്പോർട്ടിന്‍റെ പകർപ്പ് പരാതിക്കാർക്ക് അയച്ചു നൽകിയെങ്കിലും ആക്ഷേപം സമർപ്പിക്കാത്ത സാഹചര്യത്തിൽ കേസ് തീർപ്പാക്കി. കാടാസ് ഉന്നതി നിവാസികൾ ഗിരിജന്‍റെ നേതൃത്വത്തിൽ സമർപ്പിച്ച പരാതിയിലാണ് നടപടി.

ഈസ്റ്റ് ഒറ്റപ്പാലം ഹയർസെക്കൻഡറി സ്കൂളിൽ പുതിയ കെട്ടിടം നിർമാണം തുടങ്ങി

ഒറ്റപ്പാലം: ഈസ്റ്റ് ഒറ്റപ്പാലം ഗവ. ഹയർസെക്കൻഡറി സ്കൂളിൽ പുതിയ കെട്ടിടത്തിന്‍റെ നിർമാണം തുടങ്ങി. ബിആർസിക്ക് സമീപത്തെ പഴയ കെട്ടിടം പൊളിച്ചുനീക്കിയാണ് പുതിയ കെട്ടിടത്തിന്‍റെ നിർമാണം തുടങ്ങിയത്. 2018ലാണ് പദ്ധതി ആരംഭിച്ചത്. പല കാരണങ്ങളാൽ വൈകിയ പദ്ധതി തുടരാൻ ഹൈക്കോടതി ഇടപെടലുകളും വേണ്ടിവന്നിരുന്നു. വിദ്യാഭ്യാസസംരക്ഷണയജ്ഞം പദ്ധതിയുടെ ഭാഗമായി വിദ്യാലയങ്ങളുടെ അടിസ്ഥാനസൗകര്യങ്ങൾ മെച്ചപ്പെടുത്തുന്നതിനു തെരഞ്ഞെടുക്കപ്പെട്ട 27 സ്കൂളുകളിലൊന്നാണ് ഈസ്റ്റ് ഒറ്റപ്പാലം സ്കൂൾ. 3.90 കോടി രൂപ ചെലവിൽ പുതിയ കെട്ടിടം നിർമിക്കാനാണ് അനുമതിയായത്. എന്നാൽ, സാങ്കേതിക കാരണങ്ങളാൽ നിർമാണം വൈകി. തുടർന്ന് പിടിഎ ഹൈക്കോടതിയെ സമീപിക്കുകയായിരുന്നു. കഴിഞ്ഞ ഒക്ടോബറിൽ നിർമാണം തുടങ്ങാൻ കോടതി ഉത്തരവിട്ടു. നിർമാണച്ചുമതലയുള്ള കേരള ഇൻസ്റ്റിറ്റ്യൂട്ട് ഓഫ് ലോക്കൽ അഡ്മിനിസ്ട്രേഷൻ (കില) ദർഘാസ് നടപടികളും തുടങ്ങി. എന്നാൽ നിർമാണം തുടങ്ങണമെങ്കിൽ പഴയ കെട്ടിടം പൊളിക്കണമെന്ന നില വന്നു. നഗരസഭ ദർഘാസ് വിളിച്ചാണ് പിന്നീട് പൊളിക്കാൻ തുടങ്ങിയത്. ഇതും ഇടയിൽ നിലയ്ക്കുന്ന സ്ഥിതിയുണ്ടായതോടെ വീണ്ടും കില നഗരസഭയെ സമീപിച്ചു. തുടർന്ന് നഗരസഭ പുതിയ കരാറുകാരനെ ചുമതലപ്പെടുത്തി കഴിഞ്ഞ മേയ് മാസത്തിലാണ് കെട്ടിടം പൊളിച്ചുനീക്കിയത്.

അങ്കണം ഷംസുദീൻ സ്മൃതിപുരസ്കാര സമർപ്പണം

തൃശൂർ: മൂല്യങ്ങളിൽ ഉറച്ചുനിന്ന് സാംസ്കാരികപ്രവർത്തനം നടത്തിയ ആളായിരുന്നു ആർ.ഐ. ഷംസുദീനെന്നു മുൻ നിയമസഭാ സ്പീക്കർ തേറന്പിൽ രാമകൃഷ്ണൻ. അങ്കണം ഷംസുദീൻ സ്മൃതിയുടെ എട്ടാമത് സ്മൃതിപുരസ്കാരസമർപ്പണം നിർവഹിച്ചു സംസാരിക്കുകയായിരുന്നു അദ്ദേഹം. ഡോ. പി.വി കൃഷ്ണൻനായർ ഉദ്ഘാടനം ചെയ്തു. ഡോ. പി. സരസ്വതി അധ്യക്ഷത വഹിച്ചു. സീനിയർ ജേണലിസ്റ്റ് ഫോറം സംസ്ഥാന പ്രസിഡന്‍റ് അലക്സാണ്ടർ സാം അനുസ്മരണപ്രഭാഷണം നടത്തി. കവിയും ബാലസാഹിത്യകാരനുമായ പി.കെ. ഗോപി വിശിഷ്ടസാഹിതീസേവാ പുരസ്കാരം ഏറ്റുവാങ്ങി. ഡോ. കെ. ശ്രീകുമാർ, രഘുനാഥൻ പറളി, അരുണ്‍ എഴുത്തച്ഛൻ, തെന്നൂർ രാമചന്ദ്രൻ എന്നിവർ സ്മൃതിപുരസ്കാരങ്ങളും ഏറ്റുവാങ്ങി. ജയപ്രകാശ് എറവ്, പി.കെ. ശ്രീവത്സൻ, ഡോ. നിർമല നായർ, പുഷ്പൻ ആശാരിക്കുന്ന്, സലിം കുളത്തിപ്പടി, എ.പി. നാരായണൻകുട്ടി, എം. മാധവൻ കുട്ടിമേനോൻ, സുരേഷ്കുമാർ പാർളിക്കാട്, ആർട്ടിസ്റ്റ് സോമൻ അഥീന എന്നിവർ തൂലികാശ്രീ പുരസ്കാരവും ഏറ്റുവാങ്ങി. എൻ. ശ്രീകുമാർ, തൃശിവപുരം മോഹനചന്ദ്രൻ, എം.വി. വിനീത, അനിൽ സാമ്രാട്ട്, പി. അപ്പുക്കുട്ടൻ, പി.എൻ. കൃഷ്ണൻകുട്ടി പ്രസംഗിച്ചു.

വ്യാജരേഖ കേസില്‍ പ്രതി പിടിയില്‍

ആലത്തൂർ: വ്യാജരേഖാ കേസില്‍ 15 വര്‍ഷത്തിന് ശേഷം പ്രതിപിടിയില്‍. ചിറ്റൂര്‍ പെരുമാട്ടി അയ്യന്‍വീട്ടുചള്ള സ്വദേശി സുരേഷ് (42) ആണ് പിടിയിലായത്. സര്‍ക്കാര്‍ സീലുകളും ഡെലിവറി നോട്ടും ബില്ലും വ്യാജമായി നിര്‍മിച്ചു എന്നാണ് ഇയാൾക്കെതിരെയുള്ള കേസ്. ആലത്തൂര്‍ ഇരട്ടക്കുളത്ത് 2010ലായിരുന്നു സംഭവം. ആലത്തൂർ എസ്.ഐ വിവേക് നാരായണൻ നിയോഗിച്ച സീനിയര്‍ സിപിഒ സെന്തില്‍ കുമാര്‍,മിഥുന്‍ എന്നിവര്‍ ചേര്‍ന്ന് തിരുവനന്തപുരത്ത് നിന്നാണ് പ്രതിയെ പിടികൂടിയത്. പാലക്കാട് ജില്ലാ കോടതിയിൽ ഹാജരാക്കിയ പ്രതി സുരേഷിന് കോടതി ജാമ്യം അനുവദിച്ചു.

പിരിയാരി ഗവ. ആയുർവേദ ഡിസ്പെൻസറിക്കും പുരസ്കാരം

പാലക്കാട്: പ്രഥമ സംസ്ഥാന ആയുഷ് കായകല്പ കമന്‍റേഷൻ അവാർഡ് നേടി പിരിയാരി ഗവ. ആയുർവേദ ഡിസ്പെൻസറി. 96.5 പോയിന്‍റുകളോടെയാണ് അവാർഡ് നേടിയത്. രോഗികൾക്കായി തയ്യാറാക്കിയ ആധുനിക സൗകര്യങ്ങളും പഞ്ചായത്തിലെ ജനങ്ങൾക്കിടയിൽ നടത്തുന്ന ആരോഗ്യ പ്രവർത്തനങ്ങളും കണക്കിലെടുത്ത് പ്രത്യേക അംഗീകാരത്തിനായും തെരഞ്ഞെടുത്തിട്ടുണ്ട്.

കായകല്പ പുരസ്കാരത്തിന് അർഹതനേടി കുളപ്പുള്ളി നഗര പ്രാഥമികാരോഗ്യകേന്ദ്രം

ഷൊർണൂർ: ജില്ലയിലെ ഏറ്റവും മികച്ച നഗര പ്രാഥമികാരോഗ്യ കേന്ദ്രങ്ങൾക്കു നൽകുന്ന രണ്ടുലക്ഷം രൂപയുടെ കായകല്പ പുരസ്കാരത്തിനു കുളപ്പുള്ളി നഗര പ്രാഥമികാരോഗ്യ കേന്ദ്രം അർഹത നേടി. സംസ്ഥാന സർക്കാർ ആരോഗ്യസ്ഥാപനങ്ങൾക്കു നൽകുന്ന പുരസ്കാരമാണിത്. ശുചിത്വം, മാലിന്യസംസ്കരണം, അണുബാധ നിയന്ത്രണം എന്നിവയിൽ മികവു പുലർത്തുന്ന ആരോഗ്യ സ്ഥാപനങ്ങൾക്കാണു പുരസ്കാരം നൽകുന്നതെന്നു കുളപ്പുള്ളി നഗര പ്രാഥമികാരോഗ്യകേന്ദ്രത്തിലെ നിലവിലെ മെഡിക്കൽ ഓഫിസർ ഡോ.തസ്തിമ പറഞ്ഞു. 15 ജീവനക്കാരുള്ള പ്രാഥമികാരോഗ്യകേന്ദ്രം കഴിഞ്ഞ വർഷം രണ്ടാം സ്ഥാനവും കരസ്ഥമാക്കിയിരുന്നു. കായകല്പ പുരസ്കാര മാനദണ്ഡത്തിൽ 91.3 ശതമാനം മാർക്കാണ് ആശുപത്രി നേടിയത്. 88.2 മാർക്കുനേടി കിഴക്കഞ്ചേരി കുടുംബാരോഗ്യ കേന്ദ്രം രണ്ടാം സ്ഥാനവും 85 മാർക്കുനേടി കപ്പൂർ കുടുംബാരോഗ്യകേന്ദ്രം മൂന്നാം സ്ഥാനവും കരസ്ഥമാക്കി. ഇവർക്ക് 50,000 രൂപയാണ് അവാർഡ്.

ജില്ലയിൽ ഉമ്മൻ ചാണ്ടി അനുസ്മരണം

പാലക്കാട്: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാംചരമവാർഷികം വിവിധ പരിപാടികളോടെ ആചരിച്ചു. ജില്ലാ കോണ്‍ഗ്രസ് ഓഫീസിൽ ഡിസിസി പ്രസിഡന്‍റ് എ. തങ്കപ്പന്‍റെ നേതൃത്വത്തിൽ ഉമ്മൻ ചാണ്ടിയുടെ ചിത്രത്തിന് മുന്നിൽ പുഷ്പാർച്ചന നടത്തി. തുടർന്ന് നടന്ന അനുസ്മരണയോഗത്തിൽ എ. തങ്കപ്പൻ അധ്യക്ഷനായിരുന്നു. യോഗത്തിൽ നേതാക്കളായ പി.വി. രാജേഷ്, പി. ബാലഗോപാൽ, വി. രാമചന്ദ്രൻ, സി.വി. സതീഷ്, സുധാകരൻ പ്ലാക്കാട്, രാജീവ് രാമനാഥ്, പി.എച്ച്. മുസ്തഫ, സി. കിദർ മുഹമ്മദ്, എച്ച.് മുബാറക്ക്, അസീസ് പട്ടാന്പി എന്നിവർ പ്രസംഗിച്ചു. ജവഹർരാജ്, വി. മോഹനൻ, മോഹൻ ബാബു, ബോബൻ മാട്ടുമന്ത, ഡി. വനരാജ്, എ. കൃഷ്ണൻ , മിനി ബാബു, അനുപമ പ്രശോഭ്, ഗൗതമി, കെ.ഐ. കുമാരി, എഫ്.ബി. ബഷീർ, പി.എം. ശ്രീവത്സൻ, എ. രമേശ്, എസ്. സേവ്യർ, എസ്.എം. താഹ, ഹരിദാസ് മച്ചിങ്ങൽ, അബ്ദുള്ള, നൗഷാദ് കള്ളിക്കാട്, വി. ഗോപി തുടങ്ങിയവർ പങ്കെടുത്തു. കല്ലടിക്കോട്: കേരളത്തിലെ ജനഹൃദയങ്ങളിൽ പ്രതിഷ്ഠിക്കപ്പെട്ട ജനകീയ നേതാവായിരുന്നു മുഖ്യമന്ത്രി ഉമ്മൻ ചാണ്ടി എന്ന് കെപിസിസി സെക്രട്ടറി പി. ഹരിഗോവിന്ദൻ പറഞ്ഞു. വിദ്യാഭ്യാസ മേഖലയിലും ആരോഗ്യ മേഖലയിലും വികസന മേഖലയിലും സ്തുത്യർഹമായ പരിഗണനകൾ നൽകിയ നേതാവും ആയിരുന്നു ഉമ്മൻചാണ്ടി. കരിമ്പ കോൺഗ്രസ് മണ്ഡലം കമ്മിറ്റി നടത്തിയ ഉമ്മൻചാണ്ടി അനുസ്മരണ കൺവൻഷൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കോൺഗ്രസ് മണ്ഡലം പ്രസിഡന്‍റ് സി.എം. നൗഷാദ് അധ്യക്ഷത വഹിച്ചു. കോൺഗ്രസ് കോങ്ങാട് ബ്ലോക്ക് പ്രസിഡന്‍റ് വി.കെ. ഷൈജു, എം.കെ. മുഹമ്മദ് ഇബ്രാഹിം, ആന്‍റണി മതിപ്പുറം,കെ. കെ. ചന്ദ്രൻ, ഡോ. മാത്യു കല്ലടിക്കോട്, ഹരിദാസ് മങ്ങാറംകോട് , റിയാസ് എന്നിവർ പ്രസംഗിച്ചു. നെന്മാറ: മണ്ഡലം കമ്മിറ്റിയുടെ നേതൃത്വത്തിൽ മുൻ മുഖ്യമന്ത്രി ഉമ്മൻ‌ ചാണ്ടിയുടെ രണ്ടാം ചരമവാർഷികത്തോട് അനുബന്ധിച്ചു പുഷ്പാർച്ചനയും അനുസ്മരണ യോഗവും നടത്തി. നെന്മാറ ഗവ. ആശുപത്രിയിലെ കിടപ്പ് രോഗികൾക്ക് ഉച്ചഭക്ഷണവും നൽകി. ഡിസിസി ജനറൽ സെക്രട്ടറി സി.സി. സുനിൽ ഉദ്ഘാടനം ചെയ്തു. നെന്മാറ മണ്ഡലം പ്രസിഡന്‍റ് ആർ. സുരേഷ് അധ്യക്ഷത വഹിച്ചു. ബ്ലോക്ക്‌ പ്രസിഡന്‍റ് എസ്. വിനോദ്, പത്മകുമാർ, പ്രദീപ് നെന്മാറ, എം.ആർ. നാരായണൻ, പി.പി. ശിവപ്രസാദ്, എൻ. സോമൻ, ഷാജി, എ. യൂസഫ്, വേലായുധൻ, പ്രബിത ജയൻ, കെ.പി. ജോഷി, ഗോകുൽദാസ് തുടങ്ങിയവർ പ്രസംഗിച്ചു. വടക്കഞ്ചേരി: കോൺഗ്രസ് വടക്കഞ്ചേരി മണ്ഡലം കമ്മിറ്റിയുടെ നേതൃത്വത്തിൽ ഉമ്മൻ ചാണ്ടി അനുസ്മരണം നടന്നു. ഡിസിസി സെക്രട്ടറി ഡോ. അർസലൻ നിസാം ഉദ്ഘാടനം ചെയ്തു. മണ്ഡലം പ്രസിഡന്‍റ് ഇല്ല്യാസ് പടിഞ്ഞാറെക്കളം അധ്യക്ഷത വഹിച്ചു. ബ്ലോക്ക് പ്രസിഡന്‍റ് അഡ്വ.എം. ദീലീപ്, റെജി കെ. മാത്യു, കെ. മോഹൻദാസ്, ബാബു മാധവൻ, സി. മുത്തു, ജോണി ഡയൻ, സുനിൽ ചുവട്ടുപാടം, പി.എസ്. മുജീബ് പ്രസംഗിച്ചു. വടക്കഞ്ചേരി: വണ്ടാഴിയിൽ കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ ടൗണിൽ ഉമ്മൻ ചാണ്ടി അനുസ്മരണയോഗവും പുഷ്പാർച്ചനയും നടത്തി. മണ്ഡലം പ്രസിഡന്‍റ് കെ.എം. ശശീന്ദ്രൻ, ബ്ലോക്ക്‌ സെക്രട്ടറിമാരായ എം. സുരേഷ് കുമാർ, പ്രമോദ് തണ്ടലോട്, ഡിനോയ് കോമ്പാറ, എൻ.വിഷ്ണു, കെ.കെ. ഗോപി, മുഹമ്മദ്‌ അബ്‌ദുൾ ഖാദർ മാസ്റ്റർ, വി. മനോജ്‌, എം.പി.അരുൺ, കെ. അജിത്ത്, എ.എ. അബ്‌ദുൾ ലത്തീഫ്, കണ്ടമുത്തൻ, ആദം മുഹമ്മദ്‌, എം. തങ്ങൾക്കുട്ടി പ്രസംഗിച്ചു. അയിലൂർ: മണ്ഡലം കോൺഗ്രസ് കമ്മിറ്റി ഉമ്മൻ ചാണ്ടിയുടെ രണ്ടാം ഓർമദിനാചരണവും അനുസ്മരണവും നടത്തി. ഡിസിസി ജനറൽ സെക്രട്ടറി കെ.ജി. എൽദോ ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് എസ്.എം. ഷാജഹാൻ അധ്യക്ഷനായി. ഡിസിസി ജനറൽ സെക്രട്ടറി എം.പത്മഗിരീശൻ, ഡിസിസി മെംബർ പ്രദീപ് നെന്മാറ, മുൻ ബ്ലോക്ക് കോൺഗ്രസ് പ്രസിഡന്‍റ് കെ.വി. ഗോപാലകൃഷ്ണൻ, യൂത്ത് കോൺഗ്രസ് ജില്ലാ ജനറൽ സെക്രട്ടറിമാരായ വിനീഷ് കരിമ്പാറ, ശ്യാം ദേവദാസ്, നിയോജകമണ്ഡലം പ്രസിഡന്‍റ് മനു പല്ലാവൂർ, എം. ഷാജു, എം. ദേവൻ, പി.പി. ശിവപ്രസാദ്, കെ. കുഞ്ഞൻ, എ. സുന്ദരൻ, വി.പി. രാജു, എം.ജെ ആന്‍റണി, എസ്. കാസിം, സോബി ബെന്നി, ബുഷ്റ നാസർ, ആർ. അനൂപ്, കെ.ജി. രാഹുൽ, എസ്. അരവിന്ദ് എന്നിവർ പ്രസംഗിച്ചു.

പോത്തുണ്ടിഡാം പുഴയിലേക്കു തുറന്നു

നെന്മാറ: ഓറഞ്ച് അലർട്ടിലേക്ക് പോത്തുണ്ടി അണക്കെട്ടിലെ ജലനിരപ്പ് ഉയർന്നതോടെ സ്പില്‍വേ ഷട്ടറുകൾ തുറന്ന് വെള്ളം പുഴയിലേക്ക് ഒഴുക്കി. ഇന്നലെ ഉച്ചയ്ക്ക് ഒരു മണിയോടെയാണ് അണക്കെട്ടിലെ ഷട്ടറുകൾ പുഴയിലേക്ക് തുറന്നത്. രണ്ട് സെന്‍റീമീറ്റർ വീതം 3 ഷട്ടറുകളും തുറന്നു. 55 അടി സംഭരണശേഷിയുള്ള ഡാമിൽ നിലവിൽ 52 അടിക്കു മുകളിൽ വെള്ളം എത്തിയതോടെയാണ് ജലക്രമീകരണത്തിന്‍റെ ഭാഗമായി പുഴയിലേക്ക് നിയന്ത്രിത അളവിൽ വെള്ളം തുറന്നതെന്ന് ജലസേചന വകുപ്പ് എക്സിക്യൂട്ടീവ് എൻജിനീയർ മലമ്പുഴ അറിയിച്ചു. കഴിഞ്ഞവർഷം ഇതേ ദിവസം 30 അടി വെള്ളമാണ് ഡാമിൽ ഉണ്ടായിരുന്നത്. മഴ കൂടുതൽ ശക്തമാവുകയാണെങ്കിൽ ഡാമിലേക്കുള്ള നീരൊഴുക്കിന് ആനുപാതികമായി പുഴയിലേക്ക് കൂടുതൽ വെള്ളം തുറന്നുവിടാൻ സാധ്യതയുണ്ട്. ആയതിനാൽ പോത്തുണ്ടി പുഴയുടെ തീരങ്ങളിൽ താമസിക്കുന്നവർ ജാഗ്രത പാലിക്കണമെന്ന് അധികൃതർ പറഞ്ഞു.

ജില്ലാസമ്മേളനത്തെ സ്വാഗതം ചെയ്യുന്നതു തകർന്ന റോഡുകളും നെൽകർഷകരുടെ കണ്ണീരും

വടക്കഞ്ചേരി: ഭരണകക്ഷി പാർട്ടിയായ സിപിഐയുടെ ജില്ലാ സമ്മേളനത്തിന് സ്വാഗതം ചെയ്യാൻ പൊട്ടിപ്പൊളിഞ്ഞ റോഡുകളും നെൽകർഷകരുടെ കണ്ണുനീരും. സമ്മേളന നഗരിയായ വടക്കഞ്ചേരിയിലേക്ക് ജില്ലയുടെ പലഭാഗങ്ങളിൽ നിന്നുള്ള പ്രവർത്തകരും നേതാക്കളും എത്തുന്നത് ഇതു പോലെയുള്ള റോഡുകളിലെ കുഴികൾ താണ്ടികടന്ന്. നാട്ടിലെ വികസനത്തെക്കുറിച്ച് സിപിഐ മന്ത്രിമാർ ഇന്നലെ എണ്ണം പറഞ്ഞ് പ്രസംഗിച്ചപ്പോൾ സമ്മേളനനഗരി നിശബ്ദമായി. ഇതൊക്കെ നടപ്പിലായത് നമ്മുടെ നാട്ടിൽ തന്നെയാണോ എന്ന ചിന്തയിലായിരുന്നു നാട്ടുകാർ. സിപിഐ മന്ത്രിമാർ കൈകാര്യം ചെയ്യുന്ന കൃഷിവകുപ്പിന്‍റെയും ഭക്ഷ്യ-പൊതുവിതരണ വകുപ്പിന്‍റെയും പിടിപ്പുകേടു മൂലം നെൽകർഷകർ അനുഭവിക്കുന്ന കഷ്ടപ്പാടുകളും ദുരിതങ്ങളും കുറച്ചൊന്നുമല്ല. രാപ്പകൽ പണിയെടുത്ത് ഉണ്ടാക്കുന്ന നെല്ലിന്‍റെ വില കിട്ടാൻ എത്രതവണ ഓരോ ഓഫീസുകളും രേഖകളും സംഘടിപ്പിക്കണം എന്നതിന് കണക്കില്ല. ഒടുവിൽ ബാങ്കിൽ നിന്നും വായ്പ എടുക്കുന്ന രീതിയിലാണ് നെല്ലിന്‍റെ വില നൽകുന്നത്. നാലുമാസം മുമ്പ് കൊടുത്ത രണ്ടാംവിള നെല്ലിന്‍റെ വില കിട്ടാനാണ് ഇപ്പോഴും കർഷകരുടെ നെട്ടോട്ടം. കേന്ദ്രം മതിയായ ഫണ്ട് അനുവദിക്കുന്നില്ല എന്നായിരുന്നു നെല്ലിന്‍റെ വില കൊടുക്കാത്തതു സംബന്ധിച്ച് ജില്ലാ സെക്രട്ടറി പത്രസമ്മേളനത്തിൽ വിശദീകരിച്ചത്. കർഷകർ സംഘടിതരല്ലാത്തതിനാൽ കർഷകരോട് എന്തുമാകാം എന്ന സ്ഥിതി ഇപ്പോഴും തുടരുകയാണ്. സർവീസ് ജീവനക്കാർക്ക് നാലുമാസം കഴിഞ്ഞ് ശമ്പളം തരാം എന്ന് പറഞ്ഞാൽ എന്താകും സ്ഥിതി എന്നാണ് കർഷകർ ചോദിക്കുന്നത്. ഒന്നാംവിളയ്ക്ക് വളം ഇടലും മറ്റും നടത്തേണ്ട സമയമാണ്. എന്നാൽ കൈയിൽ പണമില്ലെന്ന സങ്കടമാണ് കർഷകർ പങ്കുവക്കുന്നത്. മംഗലം - ഗോവിന്ദാപുരം സംസ്ഥാനപാത മുതൽ എല്ലാ റോഡുകളും തകർന്നുകിടക്കുകയാണ്. യാത്ര ചെയ്യാനാകാത്തവിധമാണ് റോഡുകളുടെ ദുരവസ്ഥ. സമ്മേളനത്തിന്‍റെ ഭാഗമായി ഇന്നലെ വൈകുന്നേരംനടന്ന റെഡ് വോളന്‍റിയർ മാർച്ച് തുടങ്ങിയത് തകർന്നുകിടക്കുന്ന മംഗലം പാലം ബൈപാസ് ജംഗ്ഷനിൽ നിന്നായിരുന്നു. വലിയ കിടങ്ങുകൾ പോലെയാണ് ഇവിടെ റോഡ്. ഇന്ന് രാവിലെ ആരംഭിക്കുന്ന പ്രതിനിധി സമ്മേളനത്തിനും നാളത്തെ സമ്മേളന സമാപനപരിപാടികൾക്കും പ്രവർത്തകരും നേതാക്കളുമെല്ലാം എത്തേണ്ടത് ഈ കുഴികൾ താണ്ടി കടന്നാകണം. എന്നിട്ടും നാട്ടിലെ വികസന വേഗതയെ കുറിച്ച് പറയുന്നതിലെ വൈരുദ്ധ്യമാണ് ചർച്ചയാകുന്നത്.

സിപിഐ ജില്ലാ സമ്മേളനത്തിന് വടക്കഞ്ചേരിയിൽ തുടക്കം

വടക്കഞ്ചേരി: മൂന്ന് ദിവസം നീണ്ടുനിൽക്കുന്ന സിപിഐയുടെ ജില്ലാ സമ്മേളനം ആരംഭിച്ചു. സിപിഐ സംസ്ഥാന എക്സിക്യൂട്ടീവ് അംഗവും മുൻ കൃഷി വകുപ്പു മന്ത്രിയുമായ മുല്ലക്കര രത്നാകരൻ പൊതുസമ്മേളനം ഉദ്ഘാടനം ചെയ്തു. ജില്ലാ സെക്രട്ടറി കെ.പി. സുരേഷ് രാജ് അധ്യക്ഷത വഹിച്ചു. സ്വാഗതസംഘം കൺവീനർ കെ. രാമചന്ദ്രൻ, ദേശീയ കൗൺസിൽ അംഗം മന്ത്രി ജി.ആർ. അനിൽ, സംസ്ഥാന എക്സി. അംഗം മന്ത്രി കെ. രാജൻ, മുഹമ്മദ് മുഹ്സിൻ എംഎൽഎ, ചാമുണ്ണി, വിജയൻ കുനിശേരി, സിദ്ധാർഥൻ, പൊറ്റശേരി മണികണ്ഠൻ, ഒ.കെ. സെയ്തലവി, സുമലത മോഹൻദാസ്, കബീർ, വാസുദേവൻ തെന്നിലാപുരം, മണ്ഡലം സെക്രട്ടറി പി.എം. അലി പ്രസംഗിച്ചു. മംഗലം പാലം ബൈപ്പാസ് ജംഗ്ഷനിൽ നിന്നും റെഡ് വോളന്‍റിയർമാർ മാർച്ചോടെയാണ് സമ്മേളനം തുടങ്ങിയത്. മുതിർന്ന അംഗവും മുൻ മന്ത്രി കെ.ഇ. ഇസ്മയിലിന്‍റെ സഹോദരനുമായ കെ.ഇ. ഹനീഫ സമ്മേളനനഗരിയിൽ പതാക ഉയർത്തി. ഇന്ന് രാവിലെ പത്തരയ്ക്ക് ത്രീ സ്റ്റാർ ഓഡിറ്റോറിയത്തിൽ കെ.വി. ശ്രീധരൻ നഗറിൽ പ്രതിനിധി സമ്മേളനത്തിന് മുന്നോടിയായി വിജയൻ കുനിശേരി പതാക ഉയർത്തും. പ്രതിനിധി സമ്മേളനം ദേശീയ എക്സി. അംഗം പി. സന്തോഷ്കുമാർ ഉദ്ഘാടനം ചെയ്യും. നാളെ രാവിലെ സംസ്ഥാന അസി. സെക്രട്ടറി ഇ. ചന്ദ്രശേഖരൻ, ദേശീയ കൗൺസിൽ അംഗം മന്ത്രി ജെ. ചിഞ്ചുറാണി, സംസ്ഥാന എക്സി. അംഗങ്ങളായ വി. ചാമുണ്ണി, രാജാജി മാത്യു തോമസ്, സി.എൻ. ജയദേവൻ തുടങ്ങിയവർ പ്രസംഗിക്കും. റിപ്പോർട്ട്, പ്രമേയങ്ങൾ, തെരഞ്ഞെടുപ്പ് തുടങ്ങിയവയോടെ സമ്മേളനം സമാപിക്കും.

നിപ്പ: പ്രതിരോധ പ്രവർത്തനങ്ങൾ ഊർജിതം

മണ്ണാർക്കാട്: ജില്ലയിൽ നിലവിൽ നിപ്പ സ്ഥിരീകരിച്ചവരുടെ എണ്ണം 2 ആണ്. അതിൽ തച്ചനാട്ടുകര സ്വദേശിനി കോഴിക്കോട് മെഡിക്കൽ കോളജിൽ ചികിത്സയിൽ തുടരുന്നു. കുമരംപുത്തൂർ സ്വദേശി മരണപ്പെട്ടിരുന്നു. കൂടാതെ സംശയാസ്പദമായ രോഗലക്ഷണങ്ങളുള്ള ഒരു രോഗിയുടെ സാന്പിൾ വിദഗ്ധപരിശോധനയ്ക്കായി പൂനെയിലേക്ക് അയച്ചതിന്‍റെ ഫലം നെഗറ്റീവ് ആണ്. നിലവിൽ പാലക്കാട് ഗവ. മെഡിക്കൽ കോളജിൽ 17 പേർ ഐസൊലേഷനിൽ കഴിയുന്നു. ജില്ലയിലാകെ 435 പേരാണ് സന്പർക്ക പട്ടികയിലുള്ളത്. നിപ്പ പ്രതിരോധപ്രവർത്തനങ്ങളുടെ ഭാഗമായി ആരോഗ്യപ്രവർത്തകരുടെ നേതൃത്വത്തിൽ ഇന്നലെ 1414 വീടുകളിൽ സന്ദർശനം നടത്തി പനി സർവേ പൂർത്തീകരിച്ചു. ജില്ലാ മാനസികാരോഗ്യ വിഭാഗം ഇന്നലെ 51 പേർക്ക് ടെലിഫോണിലൂടെ കൗണ്‍സലിംഗ് സേവനം നൽകിയിട്ടുണ്ട്. കണ്‍ട്രോൾ സെല്ലിലേക്ക് ഇന്നലെ നിപ്പ രോഗവ്യാപനവുമായി ബന്ധപ്പെട്ട് 34 കോളുകൾ ഉണ്ടായിട്ടുണ്ട്. നാഷണൽ ഇൻസ്റ്റിറ്റ്യൂട്ട് ഓഫ് എപിഡെമിയോളജിയുടെ നേതൃത്വത്തിലുള്ള വിദഗ്ധസംഘം ജില്ലയിലെത്തി അഡിഷണൽ ഡയറക്ടർ ഓഫ് ഹെൽത്ത് ഡോ.കെ.പി. റീത്ത, ജില്ലാ മെഡിക്കൽ ഓഫീസർ ഡോ.കെ.ആർ. വിദ്യ, ജില്ലാ സർവെയ്‌ലൻസ് ഓഫീസർ ഡോ. കാവ്യ കരുണാകരൻ എന്നിവരുമായി കൂടിക്കാഴ്ച നടത്തുകയും സ്ഥിതിഗതികൾ വിലയിരുത്തുകയും ചെയ്തു. ജിഎൽപിഎസ് പെരിന്പടാരിയിൽ ഇന്നലെ മുതൽ ആരംഭിച്ച സ്പെഷൽ ക്ലിനിക്കിൽ 76 പേർ പരിശോധനക്കായി എത്തി. മണ്ണാർക്കാട് മുൻസിപ്പാലിറ്റിയിൽനിന്നും തെങ്കരയിൽ നിന്നുമായി രണ്ടു വവ്വാലുകളുടെ ജഡം കണ്ടെത്തിയുണ്ടെന്നും നിപ്പ രോഗബാധ പ്രദേശത്ത് ഇന്നലെ മൃഗങ്ങൾക്കിടയിൽ മറ്റു അസ്വാഭാവിക മരണമൊന്നും റിപ്പോർട്ട് ചെയ്തിട്ടില്ലെന്നും മൃഗസംരക്ഷണ വകുപ്പ് അറിയിച്ചിട്ടുണ്ട്. കണ്ടെയ്ൻമെന്‍റ് സോണ്‍ പ്രഖ്യാപിച്ചതിനുശേഷം ആകെ 1514 കുടുംബങ്ങൾക്ക് റേഷൻ വിതരണം നേരിട്ട് നൽകിയിട്ടുണ്ടെന്ന് ജില്ലാ സപ്ലൈ ഓഫീസർ അറിയിച്ചു. കുമരംപുത്തൂർ, കാരാകുറുശി, കരിന്പുഴ പഞ്ചായത്തുകളിലേയും മണ്ണാർക്കാട് മുൻസിപ്പാലിറ്റിയിലേയും കണ്ടെയ്ൻമെന്‍റ് സോണിലെ വാർഡുകളിലുള്ളവർ നിർബന്ധമായും മാസ്ക്ക് ധരിക്കണം. അനാവശ്യമായി കൂട്ടംകൂടി നിൽക്കരുത്. ഈ വാർഡുകളിലേക്കുള്ള അനാവശ്യമായ പ്രവേശനവും പുറത്തു കടക്കലും ഒഴിവാക്കാൻ കർശനമായി നിരീക്ഷിക്കുകയും പരിശോധന തുടരുകയും ചെയ്യുന്നുണ്ടെന്നും പരിഭ്രാന്തി പരത്തുന്ന വിധത്തിൽ അനാവശ്യമായി ജനങ്ങൾക്കിടയിൽ വ്യാജ ഓഡിയോ സന്ദേശം പ്രചരിപ്പിച്ച ഒരാൾക്കെതിരെ കേസ് എടുത്തതായി പോലീസ് അറിയിച്ചിട്ടുണ്ട്. നിപ്പ കണ്‍ട്രോൾ റൂമിൽ വിളിച്ച് വിദഗ്ധ ഉപദേശം തേടിയതിന് ശേഷം മാത്രമേ നിപ്പ പരിശോധനയ്ക്കായി പാലക്കാട് ഗവ. മെഡിക്കൽ കോളജിൽ എത്താൻ പാടുള്ളുവെന്ന് ജില്ലാ മെഡിക്കൽ ഓഫീസർ നിർദേശിച്ചു. നിപ്പ കണ്‍ട്രോൾ റൂം നന്പർ: 0491 2504002. കൗണ്‍സലിംഗ് സേവനങ്ങൾക്ക്: 7510905080. കണ്ടെയ്ൻമെന്‍റ് സോണുകളിൽ താമസിക്കുന്നവർക്ക് ഗുരുതരമല്ലാത്ത ആശുപത്രി സേവനം ആവശ്യമായി വരുന്ന പക്ഷം ഇ-സഞ്ജീവനി വഴി ഓണ്‍ലൈനായി ഡോക്ടർ ലഭ്യമാകുന്നതാണ്. രാവിലെ 9 മുതൽ വൈകുന്നേരം 5 വരെ ജനറൽ ഒപി സേവനം ലഭ്യമാണ്.

തേനിടുക്കിൽ വാഹനാപകടം: ഒരാൾക്ക് പരിക്കേറ്റു

വടക്കഞ്ചേരി: ദേശീയപാത തേനിടുക്കിനു സമീപം വാഹനങ്ങളുടെ കൂട്ടിയിടിയിൽ ഒരാൾക്ക് പരിക്കേറ്റു. കാർ പെട്ടെന്ന് ബ്രേക്ക് ചെയ്തതിനെതുടർന്ന് പിറകെവന്ന ഓട്ടോറിക്ഷ കാറിൽ ഇടിച്ച് മറിയുകയായിരുന്നു. ഓട്ടോറിക്ഷയുടെ പിറകിൽ പിക്കപ്പ് വാനും പിക്കപ്പ് വാനിന് പുറകിൽ മറ്റൊരു കാറും ഇടിച്ചാണ് അപകടമുണ്ടായത്. ഓട്ടോ ഡ്രൈവർ കിഴക്കഞ്ചേരി തച്ചക്കോട് മുഹമ്മദ് കാസി (52) മിനാണ് പരിക്കേറ്റത്. ഇയാളെ വടക്കഞ്ചേരിയിലെ സ്വകാര്യ ആശുപത്രിയിൽ ചികിത്സ തേടി. വാഹനങ്ങൾക്ക് കേടുപാടുകളുണ്ട്.

പറമ്പിക്കുളം പട്ടികവർഗ കുടുംബങ്ങൾക്ക് വല, കുട്ടവഞ്ചി വിതരണം നടത്തി

മുതലമട: 2024-25 സാമ്പത്തിക വർഷ പദ്ധതിയിൽ ഉൾപ്പെടുത്തി പറമ്പിക്കുളം റിസർവോയറുകളിൽ മത്സ്യബന്ധന വല, കുട്ടവഞ്ചി വിതരണം മുതലമട ഗ്രാമപഞ്ചായത്ത് പ്രസിഡന്‍റ് ജാസ്മിൻ ഷെയ്ക്ക് ഉദ്ഘാടനം ചെയ്തു. വൈസ് പ്രസിഡന്‍റ് സി.വിനേഷ് അധ്യക്ഷത വഹിച്ചു. വികസനകാര്യ സ്ഥിരംസമിതി ചെയർപേഴ്സൺ ബേബിസുധ, പറമ്പിക്കുളം റേഞ്ച് ഇൻസ്പെക്ടർ ജിയോ ബെയ്സിൽ ജോസ്, പട്ടികവർഗ എക്സ്റ്റൻഷൻ ഓഫീസർ പ്രജീഷ്, വാർഡ് മെംബർ ശെൽവി, ചുള്ളിയാർമേട് ഫിഷറീസ് ഓഫീസർ രാമനാരായണൻ എന്നിവർ പ്രസംഗിച്ചു . ചടങ്ങിൽ 290 പേർക്ക് വല വിതരണം ചെയ്തു. 15,16,000 രൂപ വകയിരുത്തിയാണ് . പട്ടികവർഗ കുടുംബാംഗങ്ങൾക്കാണ് വല, കുട്ടവഞ്ചി വിതരണം നടത്തിയത്.

കോയന്പത്തൂർ കോർപറേഷൻ സംസ്ഥാനത്ത് ഒന്നാംസ്ഥാനത്ത്

കോയമ്പത്തൂർ: കേന്ദ്രസർക്കാർ പുറത്തിറക്കിയ ‘സ്വച്ഛ് സർവേക്ഷൻ’ റാങ്കിംഗ് പട്ടികയിൽ കോയമ്പത്തൂർ കോർപറേഷൻ ദേശീയതലത്തിൽ 28 ാം സ്ഥാനവും സംസ്ഥാന തലത്തിൽ ഒന്നാം സ്ഥാനവും നേടി. പട്ടികയിൽ 10 ലക്ഷത്തിലധികം ജനസംഖ്യയുള്ള നഗരങ്ങളുടെ വിഭാഗത്തിലാണ് കോർപറേഷൻ ദേശീയതലത്തിൽ 28-ാം സ്ഥാനവും സംസ്ഥാന തലത്തിൽഒന്നാം സ്ഥാനവും നേടിയത്. 12,500 പോയിന്‍റുകളിൽ 8,347 പോയിന്‍റുകളാണ് കോയന്പത്തൂർ നേടിയത്. 6,822 പോയിന്‍റുകളുമായി ചെന്നൈ ദേശീയതലത്തിൽ 38 ാം സ്ഥാനത്തും തമിഴ്‌നാട്ടിൽ രണ്ടാം സ്ഥാനത്തും എത്തി. മധുര കോർപറേഷൻ ദേശീയതലത്തിൽ 40 ാം സ്ഥാനത്തും സംസ്ഥാനത്ത് മൂന്നാം സ്ഥാനത്തും എത്തി. സംസ്ഥാനത്തെ ഏറ്റവും വൃത്തിയുള്ള നഗരങ്ങളുടെ പട്ടികയിൽ കോയമ്പത്തൂർ കോർപറേഷൻ ഒന്നാം സ്ഥാനത്ത് എത്തുന്നത് ഇത് രണ്ടാം തവണയാണ്. വീടുതോറുമുള്ള മാലിന്യ ശേഖരണം, മാലിന്യം വേർതിരിക്കൽ, പൊതുസ്ഥലങ്ങളിൽ മാലിന്യം സംസ്കരിക്കാതിരിക്കൽ, താമസസ്ഥലങ്ങളുടെ ശുചിത്വം, മാർക്കറ്റ് പ്രദേശങ്ങളുടെ ശുചിത്വം, കോർപറേഷനു കീഴിലുള്ള കുളങ്ങളുടെ ശുചിത്വം, മാലിന്യം വേർതിരിക്കുന്നതിനെക്കുറിച്ച് പൊതുജനങ്ങൾക്കിടയിൽ അവബോധം സൃഷ്ടിക്കൽ തുടങ്ങിയ നിരവധി മാനദണ്ഡങ്ങൾ അടിസ്ഥാനമാക്കിയാണ് വിലയിരുത്തി ഗ്രേഡ് നൽകിയതെന്ന് കോർപറേഷൻ കമ്മീഷണർ ശിവഗുരു പ്രഭാകരൻ പറഞ്ഞു.

കിഴങ്ങുവിളഗ്രാമമാകാൻ തൃത്താല; ജില്ലാതല ഉദ്ഘാടനം ഇന്ന്്

പാലക്കാട്: നാടൻ വിഭവങ്ങളായ കിഴങ്ങുകൾ കൃഷിചെയ്ത് കിഴങ്ങുവിള ഗ്രാമമാകാനൊരുങ്ങി തൃത്താല. തൃത്താലയിലെ തെരഞ്ഞെടുക്കപ്പെടുന്ന 50 എസ് സി കർഷകരാണ് പദ്ധതിക്ക് നേതൃത്വം നൽകുന്നത്. ഒരു കർഷകൻ 25 സെന്‍റ് ഭൂമിയിലാണ് കൃഷി ചെയ്യുക. കേന്ദ്ര കിഴങ്ങുവിള ഗവേഷണ സ്ഥാപനം, സുസ്ഥിര തൃത്താല പദ്ധതി, കാർഷിക വികസന കർഷകക്ഷേമ വകുപ്പ്, തദ്ദേശ സ്വയംഭരണവകുപ്പ് എന്നിവ സംയുക്തമായാണ് പദ്ധതി നടപ്പാക്കുന്നത്. മരച്ചീനി, മധുരക്കിഴങ്ങ്, കൂർക്ക, ചേന എന്നിവ കൃഷി ചെയ്യാനാവശ്യമായ വിത്തുകളും ഉത്പാദനോപാധികളും കേന്ദ്ര കിഴങ്ങുവിള ഗവേഷണസ്ഥാപനം കർഷകർക്ക് നൽകും. കൃഷിയിലൂടെ വിളയിച്ചെടുക്കുന്ന ഉത്പന്നങ്ങൾക്ക് ന്യായമായ വിലനൽകി കർഷകരിൽനിന്ന് വാങ്ങുകയും ചെയ്യും. ബ്ലോക്കിലെ എല്ലാ പഞ്ചായത്തിലും കിഴങ്ങുവിളകളുടെ വിത്തുഗ്രാമങ്ങൾ വികസിപ്പിക്കുന്നതിന് സഹായവും നൽകും. കിഴങ്ങുവിള വിത്തുഗ്രാമങ്ങളും വികേന്ദ്രീകൃത വിത്ത് ഉത്പാദകരും എന്ന പദ്ധതിയുടെ ജില്ലാതല ഉദ്ഘാടനം ഇന്ന് രാവിലെ 10 ന് ബ്ലോക്ക് പഞ്ചായത്ത് ഹാളിൽ മന്ത്രി എം.ബി. രാജേഷ് നിർവഹിക്കും. ബ്ലോക്ക് പഞ്ചായത്ത് പ്രസിഡന്‍റ് വി.പി. റെജീന അധ്യക്ഷയാകും. സിടിസിആർഐ ഡയറക്ടർ ഡോ.ജി. ബൈജു മുഖ്യപ്രഭാഷണം നടത്തും. എ. നിസാമുദ്ദീൻ വിശിഷ്ടാതിഥിയാകും. കിഴങ്ങുവിളകളുടെ ഇനങ്ങളേയും സാങ്കേതികവിദ്യകളേയും മൂല്യവർധിത ഉത്പന്നങ്ങളേയും പരിചയപ്പെടുത്താൻ കാർഷിക പ്രദർശനവും സംഘടിപ്പിക്കുന്നുണ്ട്.

ഒറ്റപ്പാലം നഗരസഭാ ബസ്‌ സ്റ്റാൻഡിൽ ഇനിയൊരു അപകടമുണ്ടാകരുത്: മനുഷ്യാവകാശ കമ്മീഷൻ

പാലക്കാട്: ഒറ്റപ്പാലം നഗരസഭാ ബസ് സ്റ്റാന്‍റിൽ ഇനിയൊരു അപകടം ഉണ്ടാകാതിരിക്കാനുള്ള കർശന നടപടികൾ നഗരസഭ സെക്രട്ടറി സ്വീകരിക്കണമെന്നും മാസത്തിലൊരിക്കൽ നഗരസഭ അധികൃതരും ഒറ്റപ്പാലം സ്റ്റേഷൻ ഹൗസ് ഓഫീസറും ബസ് സ്റ്റാന്‍റ് സന്ദർശിച്ച് നഗരസഭ നൽകിയ നിർദേശങ്ങൾ പാലിക്കുന്നുണ്ടോയെന്ന് ഉറപ്പാക്കണമെന്നും മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ് ഉത്തരവിട്ടു. കഴിഞ്ഞ വർഷം മാർച്ച് 30 ന് ബസ് സ്റ്റാന്‍റിൽ അമിതവേഗതയിൽ അശ്രദ്ധമായെത്തിയ ബസിടിച്ച് ഇതരസംസ്ഥാന തൊഴിലാളി മരിക്കാനിടയായ സംഭവത്തിന്‍റെ പശ്ചാത്തലത്തിൽ സമർപ്പിച്ച പരാതിയിലാണ് കമ്മീഷൻ ഉത്തരവ്. മേയ് 29 ന് കമ്മീഷൻ പാലക്കാട് ഗവ. ഗസ്റ്റ് ഹൗസിൽ നടത്തിയ സിറ്റിംഗിൽ നഗരസഭ അസിസ്റ്റന്‍റ് സെക്രട്ടറി ഹാജരായി. പരാതിയിൽ പറയുന്ന അപകടത്തിന് ശേഷം നഗരസഭ ട്രാഫിക് റഗുലേറ്ററി കമ്മിറ്റി യോഗം ചേർന്നു. ബസുകളുടെ അമിതവേഗം തടയാൻ റബർ ഹംബ് നിർമിച്ചതായി അസിസ്റ്റന്‍റ് സെക്രട്ടറി കമ്മീഷനെ അറിയിച്ചു. ദിശാബോർഡുകളും സ്ഥാപിച്ചിട്ടുണ്ട്. യാത്രക്കാർക്ക് ബസ് സ്റ്റാന്‍റ് യാർഡിൽ പ്രവേശിക്കാതെതന്നെ ബസിൽ കയറുന്നതിനും മറ്റുമായി കടമുറികളുടെ വരാന്തയ്ക്ക് അഭിമുഖമായി ബസുകൾ പാർക്ക് ചെയ്യുന്നതിന് പുനഃക്രമീകരണം എർപ്പെടുത്തിയിട്ടുണ്ട്. യാത്രക്കാർ യാർഡിൽ നേരിട്ട് പ്രവേശിക്കാതിരിക്കാൻ ഡിവൈഡറുകൾ സ്ഥാപിച്ചു. ദീർഘദൂര ബസുകൾക്ക് സ്റ്റാന്‍റിന്‍റെ തെക്കേയറ്റത്ത് പാർക്കിംഗ് സൗകര്യം നൽകി. യാർഡിൽ വണ്‍വേ സംവിധാനം ഒരുക്കിയിട്ടുണ്ട്. പോലീസ് നിരീക്ഷണം ഉൗർജിതമാക്കിയിട്ടുണ്ടെന്നും റിപ്പോർട്ടിൽ പറയുന്നു. ഒറ്റപ്പാലം നഗരസഭ കൗണ്‍സിലർ സി. സജിത്ത് സമർപ്പിച്ച പരാതിയിലാണ് ഉത്തരവ്.

പട്ടാന്പി ചെക്ക്ഡാം നിർമാണം അന്തിമഘട്ടത്തിൽ

പാലക്കാട്: പട്ടാന്പിയിലെ രൂക്ഷമായ കുടിവെള്ള പ്രശ്നത്തിനും കൃഷിജലസേചനത്തിനും പരിഹാരമായി പട്ടാന്പി ചെക്ക് ഡാം നിർമാണം അന്തിമഘട്ടത്തിൽ. പട്ടാന്പി നഗരസഭയിലെ കിഴയൂറിനെയും തിരുമിറ്റക്കോട് പഞ്ചായത്തിൽ ഞാങ്ങാട്ടിരിയെയും ബന്ധിപ്പിച്ചാണ് ചെക്ക് ഡാമും നിർമിക്കുന്നത്. ഡാമിന് 310 മീറ്റർ നീളവും രണ്ട് മീറ്റർ ഉയരവുമുണ്ട്. ചെക്ക്ഡാമിന്‍റെ നിർമാണം പൂർത്തിയാകുന്നതോടെ പട്ടാന്പി, ഓങ്ങല്ലൂർ, തൃത്താല, തിരുമിറ്റക്കോട് എന്നീ ഗ്രാമപഞ്ചായത്തുകളിലെ 947 ഹെക്ടർ സ്ഥലത്തെ കാർഷികാഭിവൃത്തിക്ക് ഗുണകരമാകും. കൂടാതെ കുടിവെള്ള സ്രോതസിനും ഉപയോഗിക്കാം. 2021-22 വർഷത്തെ സാന്പത്തിക വർഷത്തിൽ നബാർഡ് സ്കീമിൽ ഉൾപ്പെടുത്തിയാണ് ചെക്ക്ഡാമിനായി 32.5 കോടി രൂപ ഭരണാനുമതിയായത്. വിനോദസഞ്ചാര സാധ്യത മുൻനിർത്തി അടുത്തഘട്ടത്തിൽ പാർക്ക് നിർമിക്കാനും ലക്ഷ്യമിടുന്നുണ്ട്.

ശുചിത്വത്തിൽ ജില്ലയ്ക്ക് അഭിമാനനേട്ടം: നഗരസഭകൾക്കു ദേശീയ റാങ്കിംഗിൽ കുതിപ്പ്

പാലക്കാട്: കേന്ദ്ര നഗരപാർപ്പിട മന്ത്രാലയം നടത്തുന്ന സ്വച്ഛ് സർവേക്ഷണിൽ ജില്ലയിലെ നഗരസഭകൾ മികച്ച മുന്നേറ്റം. നഗരങ്ങളുടെ ശുചിത്വ നിലവാരം അളക്കുന്ന ഈ ദേശീയ സർവേയിൽ കഴിഞ്ഞ വർഷത്തെക്കാൾ മികച്ച റാങ്കുകൾ നേടിയാണ് പാലക്കാട് ജില്ല സംസ്ഥാനത്തിന് മാതൃകയായത്. ശുചിത്വമിഷന്‍റെ നേതൃത്വത്തിൽ ജില്ലാതലത്തിൽ നടപ്പാക്കിയ സമഗ്ര ശുചിത്വ പ്രവർത്തനങ്ങളാണ് ഈ ശ്രദ്ധേയമായ നേട്ടത്തിന് പിന്നിൽ. കഴിഞ്ഞ വർഷം 3697 ാം സ്ഥാനത്തായിരുന്ന ഷൊർണൂർ നഗരസഭ ഇത്തവണ ദേശീയ റാങ്കിംഗിൽ 108 ാം സ്ഥാനത്തായി. 4160 ാം സ്ഥാനത്തുണ്ടായിരുന്ന ചെർപ്പുളശേരി നഗരസഭ 161 ാം സ്ഥാനത്തും 3724 ാം സ്ഥാനത്തുണ്ടായിരുന്ന പട്ടാന്പി നഗരസഭ 221 ാം സ്ഥാനവും നേടി. പാലക്കാട് നഗരസഭ (3369 ൽ നിന്ന് 338 ലേക്ക്), ഒറ്റപ്പാലം നഗരസഭ (3611 ൽ നിന്ന് 380 ലേക്ക്), മണ്ണാർക്കാട് നഗരസഭ (3004 ൽ നിന്ന് 625 ലേക്ക്), ചിറ്റൂർ-തത്തമംഗലം നഗരസഭ (4036 ൽ നിന്ന് 1289 ലേക്ക്) എന്നിവയും റാങ്കിംഗിൽ ഗണ്യമായ പുരോഗതി രേഖപ്പെടുത്തി. നഗരസഭകളുടെ റാങ്കിംഗ് മെച്ചപ്പെടുത്തുന്നതിൽ ശുചിത്വ മിഷൻ നിർണായക പങ്കുവഹിച്ചു. പ്രീഅസസ്മെന്‍റ് സർവേയിൽ കണ്ടെത്തിയ മാലിന്യപ്ലാന്‍റുകളുമായി ബന്ധപ്പെട്ട രേഖകളുടെ കുറവ് പൊതുയിടങ്ങളിലും ജലാശയങ്ങളിലും ബിന്നുകളുടെയും വിവര ബോർഡുകളുടെയും അഭാവം, പൊതു ശുചിമുറികളിലെ ശുചിത്വക്കുറവ് തുടങ്ങിയ പോരായ്മകൾ ഫീൽഡ് പരിശോധനകൾക്ക് മുന്പായി പരിഹരിച്ചത് വലിയ നേട്ടമായി. മാലിന്യ മുക്തം നവകേരളം കാന്പയിന്‍റെ ഭാഗമായി ഡോർ ടു ഡോർ മാലിന്യ ശേഖരണം 100 ശതമാനത്തിലേക്ക് എത്തിച്ചു. ഖരമാലിന്യ സംസ്കരണത്തിൽ അടിസ്ഥാന സൗകര്യങ്ങൾ വികസിപ്പിക്കുകയും പൊതു ഇടങ്ങളിലെയും ജലാശയങ്ങളിലെയും വൃത്തി ഉറപ്പാക്കുകയും ചെയ്തു. മാലിന്യ നിക്ഷേപ കേന്ദ്രങ്ങൾ വൃത്തിയാക്കി പൂന്തോട്ടങ്ങളാക്കി മാറ്റിയതും ചുമർചിത്രങ്ങൾ, പ്രത്യേക മാലിന്യ സംസ്കരണ പ്ലാന്‍റുകൾ, നിർമാണ അവശിഷ്ട മാലിന്യ ശേഖരണ പോയിന്‍റുകൾ, വേസ്റ്റ് ടു ആർട്ട് ഉദ്യമങ്ങൾ, സീറോ വേസ്റ്റ്ഗ്രീൻ പ്രോട്ടോക്കോൾ പ്രവർത്തനങ്ങൾ, ആർആർആർ സെന്‍ററുകൾ, നിയമലംഘകർക്കെതിരെ കർശന നടപടികൾ എന്നിവയും റാങ്കിംഗ് മെച്ചപ്പെടുത്താൻ സഹായിച്ചു. ഖര ഗാർബേജ് ഫ്രീ സിറ്റി സ്റ്റാർ റേറ്റിംഗിൽ ഉയർന്ന സ്റ്റാറുകൾ നേടി ജില്ലയിലെ നഗരസഭകൾ സംസ്ഥാനത്ത് മുന്നിലെത്തി. പട്ടാന്പി, ഷൊർണൂർ നഗരസഭകൾ 3 സ്റ്റാർ റേറ്റിംഗ് കരസ്ഥമാക്കി. കേരളത്തിൽ ഈ നേട്ടം കൈവരിച്ച മൂന്ന് നഗരങ്ങളിൽ രണ്ടെണ്ണം പാലക്കാട് നിന്നാണ്. ചെർപ്പുളശേരി നഗരസഭ 1 സ്റ്റാർ നേടി. കൂടാതെ, വെളിയിട വിസർജ്ജന വിമുക്ത നഗരങ്ങൾക്കുള്ള ഒഡിഎഫ് പ്ലസ് സർട്ടിഫിക്കേഷനും ജില്ലയിലെ എല്ലാ നഗരസഭകളും നേടി.

ഒറ്റപ്പാലം പച്ചക്കറിവിപണനകേന്ദ്രത്തിന്‍റെ ശനിദശയ്ക്കു പരിഹാരമായില്ല

ഒറ്റപ്പാലം: പച്ചക്കറി വിൽക്കാൻ തുടങ്ങിയ വിപണനകേന്ദ്രത്തിന്‍റെ ശനിദശയ്ക്ക് പരിഹാരമായില്ല. കർഷകർക്കുവേണ്ടി നിർമിച്ച വിപണനകേന്ദ്രം ഇരുചക്രവാഹനങ്ങൾക്കായുള്ള പാർക്കിംഗ് കേന്ദ്രമായി തുടരുകയാണ്. ഒറ്റപ്പാലം നഗരസഭ ബസ്‌സ്റ്റാൻഡിനു പിറകുഭാഗത്താണ് ലക്ഷങ്ങൾ മുടക്കി നിർമിച്ച ഈ വിപണനകേന്ദ്രം. ഏറെനാളത്തെ കാത്തിരിപ്പും കഷ്ടപ്പാടും സഹിച്ചു നട്ടുനനച്ചുണ്ടാക്കിയ പച്ചക്കറികൾ വിൽക്കാൻ കഴിയാതെ കർഷകർ ദുരിതമനുഭവിക്കുമ്പോഴാണ് ഒറ്റപ്പാലത്തെ പച്ചക്കറി വിപണനകേന്ദ്രം ദുരവസ്ഥയിൽ കിടക്കുന്നത്. കേന്ദ്രത്തിന്‍റെ ഷെഡുകൾ ഇതിനകം നാശോന്മുഖമായിക്കഴിഞ്ഞു. കഴിഞ്ഞ ലോക്ഡൗൺ കാലത്ത് കർഷകരുടെ പ്രശ്‌നം പരിഹരിക്കാനും ഉപഭോക്താക്കൾക്ക് തദ്ദേശീയമായി കൃഷിചെയ്ത പച്ചക്കറി നൽകാനുമായി നഗരസഭയുടെ നേതൃത്വത്തിൽ ഓപ്പൺ ഓഡിറ്റോറിയത്തിൽ താത്‌കാലികകേന്ദ്രം തുറന്നിരുന്നു. കർഷക കൂട്ടായ്മകളുടെയും കൃഷിഭവന്‍റെയും സഹായത്തോടെയായിരുന്നു നടത്തിപ്പ്. 20 കർഷകർവരെ സ്ഥിരമായി പച്ചക്കറികളെത്തിച്ചിരുന്നു. ഇടനിലക്കാരില്ലാതെ ഉപഭോക്താവിന് പച്ചക്കറി കുറഞ്ഞവിലയിൽ കിട്ടാൻ തുടങ്ങിയതോടെ അന്ന് അത് വൻവിജയമായി. ഇതേത്തുടർന്നാണ് അടുത്തപദ്ധതിയിൽ ഫണ്ടുവച്ച് വിപണനകേന്ദ്രം സ്ഥിരം സംവിധാനമാക്കാൻ അന്നത്തെ ഭരണസമിതി തീരുമാനിച്ചത്. ഇതിനായി വിപണനകേന്ദ്രം നിർമിക്കുകയും ചെയ്തു. എന്നാൽ പിന്നീട് ഇതുവരെ പ്രവർത്തനം തുടങ്ങിയിട്ടില്ല. ഒറ്റപ്പാലത്ത് പനമണ്ണയുൾപ്പെടെ പലയിടങ്ങളിലും പച്ചക്കറിവിൽക്കാൻ അവസരമില്ലാതെ പാടം പൂട്ടിക്കളയുന്ന സ്ഥിതിയുണ്ടായിരുന്നു. സമീപപഞ്ചായത്തായ അമ്പലപ്പാറയിൽ കപ്പകർഷകർക്കും വിപണനസാധ്യതകളില്ലാത്ത പ്രശ്‌നങ്ങളുണ്ടായിരുന്നു. ഇവരെയെല്ലാം ഒരുമിപ്പിച്ച് കർഷകകൂട്ടായ്മകൾ രൂപീകരിച്ച് കൃഷിഭവന്‍റെ നേതൃത്വത്തിൽ ചന്ത തുടങ്ങിയാൽ ഉപഭോക്താക്കൾക്കും കർഷകർക്കും ഒരുപോലെ ഗുണംചെയ്യും.

വന്യജീവി ആക്രമണം; പരിഹാര നിർദേശങ്ങളുമായി മലയോരമേഖലയിലെ കർഷകർ

കല്ലടിക്കോട്: മുണ്ടൂർ, പുതുപ്പരിയാരം, അകത്തേത്തറ പഞ്ചായത്തുകളിൽ ഉണ്ടാകുന്ന വന്യമൃഗങ്ങളുടെ ആക്രമണത്തിൽ നിന്ന് രക്ഷ നേടുന്നതിന് പരിഹാര നിർദേശങ്ങളുമായി മലയോരമേഖലയിലെ കർഷകരും പ്രദേശവാസികളും രംഗത്തെത്തി. ധോണി മുതൽ ഞാറക്കോട് വടക്കന്‍റെ കാട് വരെയുള്ള മലയോര മേഖലയിലെ 3600 കുടുംബങ്ങളും ജനപ്രതിനിധികളും ഒപ്പുവെച്ച നിവേദനം ആണ് കഴിഞ്ഞദിവസം സർക്കാരിന് കൈമാറിയത്. ക്രിയാത്മകമായ നിർദേശങ്ങൾ അടക്കം ചെയ്തിട്ടുള്ള നിവേദനം ഒലവക്കോട് ഫോറസ്റ്റ് ചീഫ് കൺസർവേറ്ററായ കെ. വി. ജയനന്ദന് കൈമാറി. പൊതുജന കർഷക കൂട്ടായ്മ ചീഫ് കോ-ഓർഡിനേറ്റർ ഷാജി ജോസഫ്, വൈസ് കോ-ഓർഡിനേറ്റർ ടോമി കെ. ഫ്രാൻസിസ്, ജോയിന്‍റ് കോ-ഓർഡിനേറ്റർ സിജോ മാത്യു തുടങ്ങിയവരാണ് നിവേദനം ഓഫീസിൽ എത്തി കൈമാറിയത്. ഇതോടൊപ്പം സംസ്ഥാന മുഖ്യമന്ത്രിക്കും വനം മന്ത്രിക്കും ചീഫ് സെക്രട്ടറിക്കും വനംവകുപ്പ് സെക്രട്ടറിക്കും നിവേദനം നൽകിയിട്ടുണ്ട്. കഴിഞ്ഞ കുറേ വർഷങ്ങളായി ഈ മേഖലയിൽ കർഷകർ ആക്രമിക്കപ്പെടുന്നതും ആനയുടെ ചവിട്ടേറ്റ് കൊല്ലപ്പെടുന്നതും കൃഷികൾ നശിപ്പിക്കപ്പെടുന്നതും നിത്യസംഭവം ആയതിനെ തുടർന്നാണ് പ്രതിരോധ നിർദേശങ്ങളുമായി കർഷകർ രംഗത്തെത്തിയത്. വന്യജീവികളെ വനത്തിനുള്ളിൽ തന്നെ സംരക്ഷിക്കാൻ ആവശ്യമായ പ്രതിരോധ സംവിധാനങ്ങൾ ഏർപ്പെടുത്തുക, മലയോരമേഖലയിൽ സൗജന്യ ലൈഫ് മെഡിക്കൽ ക്രോപ്പ് ലൈവ് സ്റ്റോക്ക് ഇൻഷ്വറൻസ് ഏർപ്പെടുത്തുക, കൂട്ടിക്കൽ മുതൽ ധോണി വരെയുള്ള 11 കിലോമീറ്റർ പദ്ധതി പ്രദേശത്ത് നിലവിലെ 9 കിലോമീറ്റർ മരങ്ങൾ അടക്കമുള്ള വനം നവീകരിക്കുക, വനത്തിനും കൃഷിഭൂമിക്കും ഇടയിൽ പത്തടി ഉയരത്തിൽ റെയിൽ ഫെൻസിംഗ് നിർമിക്കുക, ഓരോ കിലോമീറ്റർ ദൂരത്തിലും അലാറം ഘടിപ്പിക്കുക, ഫോറസ്റ്റ് ആർആർടി സംഘങ്ങൾ അടങ്ങിയ ഔട്ട് പോസ്റ്റ് നിർമിക്കുക തുടങ്ങിയവയാണ് 20 കോടി രൂപ ചെലവ് വരുന്ന പ്രതിരോധ സംവിധാനങ്ങളിൽ പ്രധാനപ്പെട്ടവ. ഈ മേഖലയിലെ വന്യമൃഗശല്യം അവസാനിപ്പിക്കാൻ ജനപ്രതിനിധികളുടെ ഇടപെടലുകളും അനിവാര്യമാണെന്നും സമിതി ചൂണ്ടിക്കാട്ടി.

വിദ്യാർഥിയുടെ മരണം: മന്ത്രിയുടെ ഓഫീസിലേക്കു യൂത്ത് കോൺഗ്രസ് സമരം

ചിറ്റൂർ: വൈദ്യുതി വകുപ്പിനു കീഴിൽ നിരന്തരമുണ്ടാകുന്ന വീഴ്ചകൾക്ക് ഉത്തരവാദിയായ മന്ത്രി കെ. കൃഷ്ണൻകുട്ടി രാജിവെക്കണമെന്ന് ഡിസിസി വൈസ് പ്രസിഡന്‍റ് സുമേഷ് അച്യുതൻ. കൊല്ലം തേവലക്കരയിൽ സ്കൂളിൽ വിദ്യാർഥിയായ മിഥുൻ ഷോക്കേറ്റ് മരിച്ച സംഭവത്തിൽ യൂത്ത് കോണ്‍ഗ്രസ് ചിറ്റൂർ നിയോജക മണ്ഡലം കമ്മിറ്റി നടത്തിയ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. വൈദ്യുതിവകുപ്പിലെ വീഴ്ചകളും ചാർജ് വർധിപ്പിച്ചതും അനെർട്ടിലെയും ഹൈഡൽ ടൂറിസത്തിലെയും കോടികളുടെ അഴിമതിയും തനിക്ക് അറിയില്ലെന്നാണ് മന്ത്രിയുടെ വാദം. വകുപ്പിലെ കാര്യങ്ങൾ ഒന്നുമറിയാത്ത ആൾ എന്തിനാണ് മന്ത്രിസ്ഥാനത്ത് കടിച്ചുതൂങ്ങുന്നതെന്നും സുമേഷ് അച്യുതൻ കൂട്ടിച്ചേർത്തു. യൂത്ത് കോണ്‍ഗ്രസ് ചിറ്റൂർ നിയോജകമണ്ഡലം പ്രസിഡന്‍റ് കെ. സാജൻ അധ്യക്ഷത വഹിച്ചു.

ഒറ്റപ്പാലം ആയുർവേദാശുപത്രിക്ക് അഭിമാനമുഹൂർത്തം

ഒറ്റപ്പാലം: പ്രഥമ ആയുഷ് കായകൽപ്പ സർക്കാർ അവാർഡ് നേടിയ ഒറ്റപ്പാലം സർക്കാർ ആയുർവേദാശുപത്രിക്ക് അഭിമാനമുഹൂർത്തം. ഉപജില്ലാ ആശുപത്രി വിഭാഗത്തിലാണ് ഈ ആയുർവേദ ആലയം സംസ്ഥാനത്ത് ഒന്നാം സ്ഥാനം നേടിയത്. ശുചിത്വം മാനദണ്ഡമാക്കിയുള്ള പുരസ്‌ക്കാരത്തിന് 98.97 ശതമാനം മാർക്ക് നേടിയാണ് ഒന്നാംസ്ഥാനം കരസ്ഥമാക്കിയത്. 2024-2025 കാലത്തെ പ്രവർത്തനത്തെ ആധാരമാക്കിയാണിത്. പുരസ്കാരത്തിന്‍റെ ഭാഗമായി അഞ്ചുലക്ഷം രൂപ ആശുപത്രിക്ക്‌ ലഭിക്കും. രോഗം പകരാതിരിക്കാനുള്ള സംവിധാനങ്ങൾ, പ്രതിരോധ കുത്തിവെപ്പ് നടപടികൾ, കൃത്യമായ മാലിന്യ സംസ്കരണം തുടങ്ങിയ കാര്യങ്ങളിലെ മികവാണ് പുരസ്കാരത്തിന് അർഹമാക്കിയത്. ഇമേജ് വിഭാഗവുമായി ചേർന്ന് ആഴ്ചയിൽ രണ്ട് ദിവസം മാലിന്യം കൈമാറുന്ന രീതിയിലാണ് പ്രവർത്തനം. ഒപ്പം മാലിന്യം കൈകാര്യം ചെയ്യാൻ മാത്രമായി പ്രത്യേക കെട്ടിടവും ഒറ്റപ്പാലം ആയുർവേദാശുപത്രിയിലുണ്ട്. ചിട്ടയായ പ്രവർത്തനങ്ങളും അർപ്പണ മനോഭാവവും ആണ് ഈ നേട്ടത്തിന് കാരണമായതെന്നും കൂട്ടായ പ്രവർത്തനങ്ങളാണ് ആശുപത്രിയിൽ നടക്കുന്നതെന്നും ചീഫ് മെഡിക്കൽ ഓഫീസർ ഡോ.പി.എം. സിനി പറഞ്ഞു.

നിപ്പ ജാഗ്രത: മണ്ണാർക്കാട് താലൂക്കിൽ മാസ്ക് നിർബന്ധമാക്കി ഉത്തരവ്

പാലക്കാട്: ജില്ലയിൽ നിപ്പ വൈറസ് സ്ഥിരീകരിച്ച സാഹചര്യത്തിൽ രോഗവ്യാപനം തടയുന്നതിനായി കണ്ടെയ്ൻമെന്‍റ് സോണുകളിൽ കൂടുതൽ നിയന്ത്രണങ്ങളും ക്രമീകരണങ്ങളും ഏർപ്പെടുത്തി ജില്ലാ ദുരന്ത നിവാരണ അഥോറിറ്റി ചെയർപേഴ്സണ്‍ കൂടിയായ ജില്ലാ കളക്ടർ ഉത്തരവിട്ടു. ദുരന്ത നിവാരണ നിയമം 2005 വകുപ്പ് 26 (2) പ്രകാരവും, പൊതുജനാരോഗ്യ നിയമം 2023 വകുപ്പ് 42 (1) പ്രകാരവുമാണ് ഉത്തരവ്. രോഗവ്യാപനഭീഷണി നിലനിൽക്കുന്ന സാഹചര്യത്തിൽ മണ്ണാർക്കാട് താലൂക്ക് പരിധിയിൽ പൊതുഇടങ്ങളിൽ എല്ലാവരും മാസ്ക് ധരിക്കണമെന്ന് ഉത്തരവിലുണ്ട്. കണ്ടെയ്ൻമെന്‍റ് സോണുകളിൽ താമസിക്കുകയും പുറത്ത് ജോലി ചെയ്യുകയും ചെയ്യുന്ന വിവിധ വകുപ്പുകളിലെ ഉദ്യോഗസ്ഥർക്കും പുറത്ത് താമസിക്കുകയും കണ്ടെയ്ൻമെന്‍റ് സോണുകളിൽ ജോലി ചെയ്യുകയും ചെയ്യുന്ന ഉദ്യോഗസ്ഥർക്കും അതാത് ജില്ലാ ഓഫീസ് മേധാവികൾ പരമാവധി ’വർക്ക് ഫ്രം ഹോം’ സൗകര്യം ഒരുക്കണം. ’വർക്ക് ഫ്രം ഹോം’ സാധ്യമല്ലാത്ത ജീവനക്കാർക്കുള്ള പ്രത്യേക അവധി സംബന്ധിച്ച് പൊതുഭരണ വകുപ്പ് പ്രിൻസിപ്പൽ സെക്രട്ടറിക്ക് കത്ത് നൽകിയിട്ടുള്ളതായും ഉത്തരവ് ലഭിക്കുന്ന മുറയ്ക്ക് തുടർനടപടി സ്വീകരിക്കുമെന്നും ജില്ലകളക്ടർ അറിയിച്ചു. കണ്ടെയ്ൻമെന്‍റ് സോണുകളിൽ ഉൾപ്പെട്ട സ്കൂളുകളിലെയും കോളേജുകളിലെയും വിദ്യാർഥികൾക്കും കണ്ടെയിൻമെന്‍റ് സോണുകൾക്ക് പുറത്തുള്ള സ്കൂളുകളിലും കോളജുകളിലും പഠിക്കുന്ന കണ്ടെയ്ൻമെന്‍റ് സോണുകളിലെ വിദ്യാർഥികൾക്കും ഓണ്‍ലൈൻ ക്ലാസുകൾ സംഘടിപ്പിക്കാൻ ഹയർ സെക്കൻഡറി റീജണൽ ഡെപ്യൂട്ടി ഡയറക്ടർ, വിദ്യാഭ്യാസ ഉപ ഡയറക്ടർ, ബന്ധപ്പെട്ട കോളജ് പ്രിൻസിപ്പൽമാർ എന്നിവരെ ചുമതലപ്പെടുത്തിയിട്ടുണ്ട്. സ്കൂളുകളിൽ ജോലി ചെയ്യുന്ന അധ്യാപകർ ഓണ്‍ലൈൻ ക്ലാസ് സൗകര്യം നിർബന്ധമായും ഉപയോഗിക്കണമെന്നും ഉത്തരവിൽ പറയുന്നു.

വടക്കഞ്ചേരി ഫുഡ്ക്രാഫ്റ്റ് ഇൻസ്റ്റിറ്റ്യൂട്ടിന്‍റെ പ്രവർത്തനം സ്വകാര്യ ഷോപ്പിംഗ് കോംപ്ലക്സിൽ

വടക്കഞ്ചേരി: സംസ്ഥാന ടൂറിസം വകുപ്പിനു കീഴിലുള്ള വടക്കഞ്ചേരിയിലെ ഫുഡ് ക്രാഫ്റ്റ് ഇൻസ്റ്റിറ്റ്യൂട്ട് ആറു വർഷമായി പ്രവർത്തിക്കുന്നത് ഉയർന്ന തുകനൽകി ഷോപ്പിംഗ് കോംപ്ലക്സിൽ. മാസം 55,000 രൂപ വാടകയിലാണ് ഈ സർക്കാർ സ്ഥാപനം പ്രവർത്തിക്കുന്നത്. ഇതുമൂലം സർക്കാരിന് ഉണ്ടാകുന്ന സാമ്പത്തിക ബാധ്യതയും ചെറുതല്ല. വാടക കെട്ടിടമായതിനാൽ പഠനസൗകര്യങ്ങൾ വർധിപ്പിക്കുന്നതിനും പരിമിതികളുണ്ട്. സ്വന്തമായി കെട്ടിടമില്ലാത്തതിനാൽ പുതിയ കോഴ്സുകൾ ആരംഭിക്കുന്നതിനും സ്ഥാപനത്തിന് കഴിയാത്ത സ്ഥിതിയാണ്. സംസ്ഥാനത്തെ ഏക സർക്കാർ കമ്യൂണിറ്റി കോളജിനായി വടക്കഞ്ചേരി മണ്ണാംപറമ്പിൽ നിർമിക്കുന്ന ഇരുനില കെട്ടിടത്തിൽ ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിനും സ്ഥലം കണ്ടെത്താമെന്ന ധാരണയുണ്ടെങ്കിലും ഇവിടുത്തെ കെട്ടിടനിർമാണവും പേപ്പർ വർക്കുകളും പൂർത്തിയാകാൻ ഇനിയും സമയമെടുക്കും. സർക്കാർ സ്ഥാപനങ്ങൾക്കെല്ലാം സ്വന്തം കെട്ടിടം എന്ന ലക്ഷ്യത്തോടെ പി.പി. സുമോദ് എംഎൽഎ ഇക്കാര്യത്തിൽ കൂടുതൽ താത്പര്യം എടുത്ത് പ്രവർത്തിക്കുന്നുണ്ടെന്ന് സ്ഥാപനാധികൃതർ പറഞ്ഞു. സ്ഥലം എംഎൽഎയും പട്ടികജാതി - വർഗ ക്ഷേമ വകുപ്പു മന്ത്രിയുമായിരുന്ന എ.കെ.ബാലന്‍റെ ശ്രമഫലമായാണ് 2019 ജൂലൈ 23 ന് അന്നത്തെ ടൂറിസം വകുപ്പ് മന്ത്രി കടകംപള്ളി സുരേന്ദ്രൻ ഉദ്ഘാടനം ചെയ്ത് സ്ഥാപനം തുടങ്ങിയത്. അന്നുമുതൽ ഈ വാടകകെട്ടിടത്തിലാണ് സ്ഥാപനം പ്രവർത്തിക്കുന്നത്. ഒരു വർഷം ദൈർഘ്യമുള്ള ഫുഡ് ആൻഡ് ബീവറേജസ് സർവീസ്, ഫുഡ് പ്രൊഡക്ഷൻ എന്നീ രണ്ട് കോഴ്സുകളാണ് ഇവിടെ നടത്തുന്നത്. സീറ്റ് ലഭിക്കുന്നതിനുള്ള അടിസ്ഥാന യോഗ്യത രണ്ട് വർഷം മുമ്പ് വരെ എസ്എസ്എൽസിയായിരുന്നത് ഇപ്പോൾ പ്ലസ് ടു വാക്കി ഉയർത്തിയിട്ടുണ്ട്. പിഎസ്‌സി അംഗീകരിച്ചിട്ടുള്ള കേരള സർക്കാരിന്‍റെ സാങ്കേതിക വിദ്യാഭ്യാസ വകുപ്പ് നൽകുന്ന സർട്ടിഫിക്കറ്റാണ് കോഴ്സ് പൂർത്തിയാക്കുന്നവർക്ക് നൽകുന്നത്. രണ്ട് കോഴ്സുകളിലുള്ള 70 സീറ്റിൽ 60 ശതമാനം സീറ്റും പട്ടികജാതി വിദ്യാർഥികൾക്കും 15 ശതമാനം പട്ടികവർഗ വിദ്യാർഥികൾക്കും 25 ശതമാനം പൊതു വിഭാഗത്തിനുമായാണ് സംവരണം ചെയ്തിട്ടുള്ളതെന്ന് സ്ഥാപനത്തിന്‍റെ ഇൻസ്ട്രക്ടർ ഇൻ ചാർജ് പ്രിൻസിപ്പൽ ജേക്കബ് തോമസ് റോഷൻ പറഞ്ഞു. രാജ്യത്തും പുറത്തുമുള്ള സ്റ്റാർ ഹോട്ടലുകൾ, വിമാന കമ്പനികൾ, വിനോദസഞ്ചാര കപ്പലുകൾ, റെയിൽവേ, വ്യവസായ സ്ഥാപനങ്ങൾ, കാറ്ററിംഗ് കമ്പനികൾ, എസ് സി - എസ്ടി ഹോസ്റ്റലുകൾ തുടങ്ങിയ വിവിധ മേഖലകളിൽ ഈ സ്ഥാപനത്തിലെ പഠനത്തിലൂടെ തൊഴിൽ ലഭ്യമാണ്. അട്ടപ്പാടി, അഗളി തുടങ്ങി വിവിധ ജില്ലകളിലെ ആദിവാസി മേഖലയിലെ വിദ്യാർഥികളാണ് ഇവിടെ പഠിക്കാനെത്തുന്നത്. വിദ്യാർഥികൾക്ക് സ്റ്റൈപ്പന്‍റും മറ്റു ആനുകൂല്യങ്ങളുമുണ്ട്. സ്ഥാപനം സർക്കാർ വക കെട്ടിടത്തിലേക്ക് മാറ്റി സാമ്പത്തിക ബാധ്യതകൾ ഒഴിവാക്കുന്നതിനൊപ്പം വടക്കഞ്ചേരിയിൽ പുതിയ കോഴ്സുകൾ കൂടി ആരംഭിക്കാനുള്ള നടപടി ഉണ്ടാകണമെന്നാണ് ആവശ്യം.

സംഘർഷസാധ്യത; ഒറ്റപ്പാലത്തു പോലീസിനെ വിന്യസിച്ചു

ഒറ്റപ്പാലം: സംഘർഷസാധ്യത കണക്കിലെടുത്ത് ഇരുവിഭാഗങ്ങൾ തമ്മിൽ ഏറ്റുമുട്ടൽ നടന്ന ഒറ്റപ്പാലം പരിസരത്ത് പോലീസിന്‍റെ മുൻകരുതൽ. കോടതിയിൽ വിവിധ കേസുകളിൽ ഹാജരാകാനെത്തിയ ഇരുസംഘങ്ങൾ തമ്മിലാണ് ഏറ്റുമുട്ടലുണ്ടായത്. മതസ്പർധ പടർത്തണമെന്ന ഉദ്ദേശ്യത്തോടെ സംഘർഷം സൃഷ്ടിച്ചെന്ന കുറ്റം ചുമത്തി പോലീസ് കേസടുത്തിരുന്നു. ഇരുസംഘങ്ങളിൽ നിന്നുമായി നാലുപേരെ അറസ്റ്റ് ചെയ്യുകയും ചെയ്തു. ഇവരുൾപ്പെടെ ഇരുവിഭാഗങ്ങളിലെയും കണ്ടാലറിയാവുന്ന പത്തുപേർക്കെതിരേയാണ് കേസെടുത്തത്. എസ്ഡിപിഐ പ്രവർത്തകരും വരോട് സ്വദേശികളുമായ വീരമംഗലം മുഹമ്മദ് റിൻഷാദ് (23), കുളമുള്ളി കാജാഹുസൈൻ (33), ചുനങ്ങാട് പുത്തൻപീടിയേക്കൽ മുഹമ്മദ് അലി (44) എന്നിവരാണ് അറസ്റ്റിലായത്. പോലീസ് കസ്റ്റഡിയിലായതിന് പിന്നാലെ ദേഹാസ്വാസ്ഥ്യമനുഭവപ്പെട്ട വരോട് മൂച്ചിക്കൽ ഷബീർ അലി (42) യെ ജില്ലാ ആശുപത്രിയിൽ പ്രവേശിപ്പിച്ചിരുന്നു. മറുവിഭാഗത്തിൽനിന്ന് പനമണ്ണ അമ്പലവട്ടം ചക്യാവിൽ രാമചന്ദ്രനും(സ്വത്തു രാമചന്ദ്രൻ-36) അറസ്റ്റിലായിരുന്നു. ഇയാൾ ബിജെപി ബന്ധമുള്ളയാളാണെന്നും ഈ സംഘത്തിലെ നാലുപേർകൂടി പിടിയിലാകാനുണ്ടെന്നും പോലീസ് അറിയിച്ചു. സംഘർഷസാധ്യത കണക്കിലെടുത്താണ് ഒറ്റപ്പാലം പരിസരപ്രദേശങ്ങളിൽ പോലീസ് ജാഗ്രത പാലിക്കുന്നത്. ഇതിനുവേണ്ടി പ്രത്യേക പോലീസ് സേനാംഗങ്ങളെയും വിന്യസിപ്പിച്ചിട്ടുണ്ട്.

വന്യമൃഗശല്യം പരിഹരിക്കണം; പ്രതിഷേധ സായാഹ്നസദസ് നടത്തി

പാലക്കയം: മലയോരമേഖലയിൽ വർധിച്ചുവരുന്ന വന്യമൃഗശല്യം പരിഹരിക്കാൻ സംസ്ഥാന സർക്കാർ നിയമം പരിഷ്ക്കരിക്കണമെന്നും ശിരുവാണി ഡാം വഴി കോയമ്പത്തൂരിലേക്കുള്ള പാത തുറക്കണമെന്നും ആവശ്യപ്പെട്ട് യുഡിഎഫ് തച്ചമ്പാറ കമ്മിറ്റിയുടെ നേതൃത്വത്തിൽ പ്രതിഷേധ സായാഹ്നസദസ് നടത്തി. എൻ. ഷംസുദ്ദീൻ എംഎൽഎ ഉദ്ഘാടനം ചെയ്തു. എം. കുഞ്ഞുമുഹമ്മദ് അധ്യക്ഷത വഹിച്ചു. കോൺഗ്രസ് ജില്ലാ ജനറൽ സെക്രട്ടറി പി.ആർ. സുരേഷ്, കേരള കോൺഗ്രസ് ജില്ലാ പ്രസിഡന്‍റ് ജോബി ജോൺ, മണ്ഡലം പ്രസിഡന്‍റ് റിയാസ് തച്ചമ്പാറ, ബ്ലോക്ക് മെംബർ പി. കുര്യൻ, തച്ചമ്പാറ പഞ്ചായത്ത് പ്രസിഡന്‍റ് നൗഷാദ് ബാബു, യുഡിഎഫ് നിയോജകമണ്ഡലം ചെയർമാൻ പി.എസ്. ശശികുമാർ, ഷാജു പഴുക്കാത്തറ, റോയി അബ്രഹാം, കെ.സി. കുര്യാക്കോസ്, ജോയി മുണ്ടനാടൻ, സച്ചു ജോസഫ്, രാമചന്ദ്രൻ തച്ചമ്പാറ എന്നിവർ പ്രസംഗിച്ചു. ജൽജീവൻ കുടിവെള്ള പദ്ധതി പുനരാരംഭിക്കുക, തെരുവുനായശല്യം നിയന്ത്രിക്കുക, പൊട്ടിപ്പൊളിഞ്ഞ റോഡുകൾ പുനർനിർമിക്കുക, നാണ്യവിളകൾക്ക് ന്യായവില ഉറപ്പാക്കുക തുടങ്ങിയ ആവശ്യങ്ങളും ഉന്നയിച്ചു.

യൂത്ത് കോൺഗ്രസ് കൺവൻഷൻ ലോഗോ പ്രകാശനം ചെയ്തു

കല്ലടിക്കോട്: യൂത്ത് കോൺഗ്രസ് പുലാപ്പറ്റയുടെ നേതൃത്വത്തിൽ ഓഗസ്റ്റ് 10 ന് ഉമ്മനഴിയിൽ നടത്തുന്ന യൂത്ത് കോൺഗ്രസ് കൺവൻഷൻ ‘ആവേഗം’ പരിപാടിയുടെ ലോഗോപ്രകാശനം പ്രതിപക്ഷ നേതാവ് വി.ഡി. സതീശൻ നിർവഹിച്ചു. വി.കെ. ശ്രീകണ്ഠൻ എംപി, കെപിസിസി സെക്രട്ടറി പി. ഹരിഗോവിന്ദൻ, യൂത്ത് കോൺഗ്രസ് നീയോജകമണ്ഡലം സെക്രട്ടറി സി. വിപിൻ രാജ്, പുലാപ്പറ്റ മണ്ഡലം കോൺഗ്രസ് പ്രസിഡന്‍റ് പി.എ. കമറുദീൻ, വിനോദ് മണ്ടഴി, സി.കൃഷ്ണമോഹൻ, എം.ആർ. രാഹുൽ, വി.കെ. രഞ്ജിത്ത്, ടി. അനിൽ കുമാർ, സി. രാമചന്ദ്രൻ പ്രസംഗിച്ചു.

എസ്പിസി യൂണിറ്റ് ഉദ്ഘാടനം

പള്ളിക്കുറുപ്പ്: ശബരി ഹയർ സെക്കൻഡറി സ്കൂളിലെ എസ്പിസി യൂണിറ്റിന്‍റെ ഉദ്ഘാടനം കാരാകുറുശി ഗ്രാമപഞ്ചായത്ത് പ്രസിഡന്‍റ് പ്രേമലത നിർവഹിച്ചു. ഹെഡ്മാസ്റ്റർ കെ. രാമകൃഷ്ണൻ സ്വാഗതം പറഞ്ഞു. പിടിഎ പ്രസിഡന്‍റ് എ. നസറുദ്ദീൻ അധ്യക്ഷത വഹിച്ചു. മണ്ണാർക്കാട് ഇൻസ്പെക്ടർ ഓഫ് പോലീസ് എം.ബി. രാജേഷ് മുഖ്യാതിഥിയായി. എസ്പിസി സ്റ്റേറ്റ് കോർ കമ്മിറ്റി മെംബർ ബിന്ദു ഭാസ്ക്കർ മുഖ്യപ്രഭാഷണം നടത്തി. മണ്ണാർക്കാട് ഡിഇഒ ഗീതാകുമാരി, പ്രിൻസിപ്പൽ എ. ബിജു, ജനപ്രതിനിധികളായ മഠത്തിൽ ജയകൃഷ്ണൻ, സ്കൂൾ മാനേജ്മെന്‍റ് പ്രതിനിധി രവീന്ദ്രൻ, എസ്പിസി ജില്ലാ അസി.നോഡൽ ഓഫീസർ നന്ദകുമാർ, സിപിഒ അനൂപ്, സിപിഒ അനുമോൾ പി.വിൻസ്, കെ.പി. സുധ എന്നിവർ പ്രസംഗിച്ചു. അഡീഷണൽ നോഡൽ ഓഫീസർ നന്ദകുമാർ രക്ഷിതാക്കൾക്ക് ബോധവത്കരണക്ലാസ് എടുത്തു.

ചുള്ളിയാർഡാം പരിസരത്തു 1.400 കിലോ കഞ്ചാവ് ഉപേക്ഷിച്ചനിലയിൽ

മുതലമട: ചുള്ളിയാർഡാം പരിസരത്ത് ഉപേക്ഷിച്ച നിലയിൽ 1.400 കിലോ കഞ്ചാവ് കൊല്ലങ്കോട് പോലീസ് കണ്ടെത്തി. ബുധനാഴ്ച വൈകുന്നേരം ആറിന് പട്രോളിംഗ് നടത്തുന്നതിനിടെ സംശയാസ്പദമായ രീതിയിൽ പ്ലാസ്റ്റിക് കവർ കിടന്നത് പരിശോധിച്ചപ്പോഴാണ് കഞ്ചാവ് കണ്ടെത്തിയത്. പ്രദേശത്ത് ലഹരിവസ്തു വ്യാപകമായി വില്പന നടത്തുന്നതായി നാട്ടുകാർ പോലീസിൽ പരാതി നൽകിയിരുന്നു . ഇതിനെതുടർന്നാണ് ചുള്ളിയാർ ഡാം മേഖലയിൽ പോലീസ് പട്രോളിംഗ് ഊർജിതമായി നടത്തിവരുന്നത്. കണ്ടെടുത്ത കഞ്ചാവ് കോടതിയിൽ ഹാജരാക്കി. പോലീസ് വാഹനം വരുന്നത്കണ്ട് പ്രതി കഞ്ചാവ് പൊതി ഉപേക്ഷിച്ചതാണെന്നു കരുതുന്നു. സമീപപ്രദേശത്തെ സിസി ടിവി പരിശോധിച്ച് പ്രതിയെ കണ്ടെത്താനുള്ള നടപടികൾ ആരംഭിച്ചിരിക്കുയാാണ്. എസ്ഐ കെ.എൻ. സത്യനാരായണൻ, എസ് സിപിഒ അനിൽകുമാർ, സിപിഒ രവി എന്നിവരടങ്ങിയ സംഘമാണ് കഞ്ചാവ് കണ്ടെത്തിയ സംഘത്തിലുണ്ടായിരുന്നവർ. വരുംദിവസങ്ങളിൽ ചുള്ളിയാർ ഡാം പരിസരമേഖലകളിൽ നിരീക്ഷണം കർശനമാക്കാൻ പോലീസ് തീരുമാനിച്ചു.

തുടർമഴ കുരുമുളകുവിളവ് കുറയ്ക്കുമെന്ന് ആശങ്ക

വടക്കഞ്ചേരി: പ്രതീക്ഷനൽകി കുരുമുളകുകൊടികളിൽ മുളകിന്‍റെ ചെറുമണികൾ നിറയാൻ തുടങ്ങുന്നതിനിടെ തുടർമഴ വിളവ് കുറയ്ക്കുമോയെന്ന ആശങ്കയിലാണ് കർഷകരിപ്പോൾ. കുറച്ചുദിവസം മഴ മാറിനിന്നപ്പോൾ ആശ്വസിച്ച കർഷകർ ഇപ്പോൾ വീണ്ടും വിഷമത്തിലാണ്. ഇടവേളയില്ലാതെ മഴ തുടർന്നാൽ വള്ളികളിൽ തിരിയിടൽ കുറയും. ഇതു വിളവിനെ ബാധിക്കുമെന്ന് കുരുമുളക് ഗ്രാമമായ പാലക്കുഴിയിലെ കർഷകൻ ഊന്നുപാലം ജോസ് പറഞ്ഞു. ഇത്തവണ തിരികൾ കുറവാണെന്നാണ് കർഷകർ പറയുന്നത്. അടുപ്പിച്ച് കുറച്ചുദിവസം വെയിൽ കിട്ടിയാലേ പുതിയ ചെനപ്പുകളിൽ കൂടുതൽ തിരിയിടൂ. വിളവും ഒപ്പം വിലയും കുറഞ്ഞാൽ മലയോര മേഖലയിലെ കുടുംബങ്ങളിലെ ഒരു വർഷത്തെ കുടുംബ ബജറ്റുകളാണ് താളംതെറ്റുക. പാലക്കുഴി, മംഗലംഡാം മലയോരങ്ങളിലെ കർഷകരുടെ പ്രധാന വരുമാനമാണ് കുരുമുളക്. റബർ വിലയിലെ ചാഞ്ചാട്ടങ്ങൾ ബാലൻസ് ചെയ്തുപോകുന്നത് കുരുമുളകിൽ നിന്നുള്ള വരുമാനം കൊണ്ടാണ്. ഗുണമേന്മയിലും വിലയിലും എന്നും മലയോരത്തെ കുരുമുളകാണ് മുന്നിൽ. കുറഞ്ഞ സ്ഥലത്ത് ഏറ്റവും കൂടുതൽ കുരുമുളക് ഉണ്ടാക്കുന്ന പാലക്കുഴിയിലെ കർഷകരും കാലാവസ്ഥ വ്യതിയാനങ്ങൾ ഏറെ വ്യാകുലതയോടെയാണ് കാണുന്നത്.

ചങ്ങാതിക്കൊരു തൈ: വൃക്ഷത്തൈ നടീൽ പദ്ധതി ഷൊർണൂർ സെന്‍റ് തെരേസ് എൽപി സ്കൂളിലും

പാലക്കാട്: ഹരിത കേരള മിഷന്‍റെ നേതൃത്വത്തിൽ നടത്തുന്ന "ചങ്ങാതിക്കൊരു തൈ' കർമപദ്ധതി ഷൊർണൂർ സെന്‍റ് തെരേസ് എൽപി സ്കൂളിൽ സംഘടിപ്പിച്ചു. ഒരു കോടി വൃക്ഷതൈകൾ വച്ചുപിടിപ്പിക്കൽ കാന്പയിനിന്‍റെ ഭാഗമായാണ് പദ്ധതി നടപ്പാക്കുന്നത്.ഒറ്റപ്പാലം ഹരിത കേരള മിഷൻ റിസോഴ്സ് പേഴ്സണ്‍ കെ. സിതാര ഉദ്ഘാടനം ചെയ്തു. പിടിഎ പ്രസിഡന്‍റ് അബ്ദുൾ സലാം അധ്യക്ഷനായി. ഷൊർണൂർ നഗരസഭ പരിധിയിൽ ചങ്ങാതിക്കൊരു തൈ പദ്ധതി ആദ്യമായി നടപ്പാക്കുന്നത് സെന്‍റ് തെരേസ് എൽ പി സ്കൂളിലാണ്. പരിപാടിയുടെ ഭാഗമായി വിദ്യാർഥികൾക്ക് പ്രകൃതിസംരക്ഷണ പ്രതിജ്ഞ ചൊല്ലിക്കൊടുക്കുകയും ബോധവത്കരണം നൽകുകയും ചെയ്തു. പ്രധാനഅധ്യാപിക രാജി, അധ്യാപകരായ സൗമ്യ, ജിസി, ഷൊർണൂർ മുനിസിപ്പാലിറ്റി തൊഴിലുറപ്പ് എഇ കെ. ഗോവിന്ദൻ തുടങ്ങിയവർ പ്രസംഗിച്ചു.

തിരുവിഴാംകുന്ന് ഫാമിലെ മരംമുറി വിവാദം: കോടതിയെ സമീപിക്കുമെന്നു കോൺഗ്രസ്

മണ്ണാർക്കാട്: തിരുവിഴാംകുന്ന് ഫാമിലെ മരംമുറി വിവാദത്തിൽ കോടതിയെ സമീപിക്കുമെന്നു കോൺഗ്രസ് നേതാക്കൾ പത്രസമ്മേളനത്തിൽ പറഞ്ഞു. സംഭവത്തിൽ വൻഅഴിമതി നടത്തിയിട്ടുണ്ടെന്ന് കോൺഗ്രസ് ആദ്യം മുതലേ പറയുന്നതാണ്. ഇതിന് ഉത്തരവാദികളായവരെ സഹായിക്കുന്നതിനായി സർക്കാർ അനുകൂല സംഘടനകൾ ശ്രമിക്കുന്നതായും നേതാക്കൾ ആരോപിച്ചു. സംഭവം വിവാദമായതോടെ വെറ്ററിനറി യൂണിവേഴ്സിറ്റി ആദ്യം നടത്തിയ അന്വേഷണത്തിൽ 69 മരങ്ങൾ മുറിച്ചുമാറ്റിയിട്ടുണ്ടെന്ന് കണ്ടെത്തിയതാണ്. ഫാമിലെ ഏഴ് ഉദ്യോഗസ്ഥർക്കു പങ്കുണ്ടെന്നും കണ്ടെത്തിയിരുന്നു. സർക്കാറിന് സംഭവിച്ച സാമ്പത്തികനഷ്ടം ഇവർ നികത്തണമെന്നും അന്വേഷണ റിപ്പോർട്ടിൽ പറഞ്ഞിരുന്നു. പിന്നീട് റിപ്പോർട്ടിൽ പറയുന്ന അഞ്ചുപേർക്കെതിരെ നടപടിയെടുത്തു. എന്നാൽ രണ്ടുപേർക്കെതിരെ ഇപ്പോഴും ഒരുനടപടിയും സ്വീകരിച്ചിട്ടില്ല. അന്വേഷണ ഉദ്യോഗസ്ഥരെത്തുമ്പോൾ ആവശ്യമായ രേഖകൾ നൽകുന്നത് ഈ രണ്ടു ഉദ്യോഗസ്ഥരാണ്. പിന്നെ എങ്ങനെയാണ് സുതാര്യമായ അന്വേഷണം നടക്കുകയെന്നു നേതാക്കൾ ചോദിച്ചു. കൂടാതെ ഉദ്യോഗസ്ഥരെ സംരക്ഷിക്കുന്നതിനായി യൂണിവേഴ്സിറ്റി രണ്ടാമത് നടത്തിയ അന്വേഷണത്തിൽ 11 മരങ്ങൾ മാത്രമാണ് ഫാമിൽനിന്ന് നഷ്ടപ്പെട്ടിട്ടുള്ളൂവെന്നാണ് റിപ്പോർട്ട്. ഇത് അംഗീകരിക്കാനാവില്ലെന്നും സത്യം പുറത്തുകൊണ്ടുവരാൻ കോടതിയെ സമീപിക്കുമെന്നും നേതാക്കൾ പറഞ്ഞു. ബ്ലോക്ക് കോൺഗ്രസ് പ്രസിഡന്‍റ് അസീസ് ഭീമനാട്, സി.ജെ. രമേഷ്, ഷിഹാബ്, ഹമീദ് മണലടി, ഉമ്മർ മനച്ചിതൊടി, പി.പി. ഏനു, എ. ശിവദാസൻ എന്നിവർ പങ്കെടുത്തു.

ജവഹർനഗർ ഡ്രെയ്നേജ്, ഫുട്പാത്ത് ഉദ്ഘാടനം

മണ്ണാർക്കാട്: മണ്ണാർക്കാട് ബ്ലോക്ക് പഞ്ചായത്ത് 2024- 25 വാർഷിക പദ്ധതിയിൽ ഉൾപ്പെടുത്തി പത്തുലക്ഷംരൂപ വകയിരുത്തി പണിപൂർത്തീകരിച്ച മണലടി ജവഹർനഗർ ഡ്രെയ്നേജ് ആൻഡ് ഫുട്പാത്തിന്‍റെ ഉദ്ഘാടനം ബ്ലോക്ക് പഞ്ചായത്ത് സ്ഥിരംസമിതി അധ്യക്ഷനും ഡിവിഷൻ മെംബറുമായ മുഹമ്മദ് ചെറൂട്ടി നിർവഹിച്ചു. തെങ്കര ഗ്രാമപഞ്ചായത്ത് മെംബർ സി.കെ. ഗഫൂർ അധ്യക്ഷത വഹിച്ചു. ജില്ലാ പഞ്ചായത്ത് മെംബർ ഗഫൂർ കോൽക്കളത്തിൽ മുഖ്യാതിഥിയായി. ടി.എ. സലാം മാസ്റ്റർ, ഗിരീഷ് ഗുപ്ത, ലത്തീഫ് വെള്ളാരംകുന്ന്, ശിവദാസൻ കുന്നത്ത്, റഷീദ് വട്ടപറമ്പ്, ടി.എ. ഷുക്കൂർ, സി. പ്രതീഷ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]