ADVERTISEMENT

ADVERTISEMENT

സർക്കാർ പൊതുവിദ്യാഭ്യാസ മേഖലയെ ഭിന്നിപ്പിക്കുന്നു: കെപിഎസ്ടിഎ

പാലക്കാട്: പൊതുവിദ്യാഭ്യാസശക്തീകരണവുമായി രംഗത്തുവന്ന ഇടതു സർക്കാർ ഈ മേഖലയെ തകർക്കാനുള്ള റിസർച്ച് നടത്തുകയാണെന്നും യാതൊരു ആസൂത്രണവുമില്ലാതെ തയാറാക്കിയ അക്കാദമിക കലണ്ടർ അതിന്‍റെ ഭാഗമാണെന്നും കെപിഎസ് ടിഎ സംസ്ഥാന കമ്മറ്റി ആരോപിച്ചു. യോഗത്തിൽ സംസ്ഥാന പ്രസിഡന്‍റ് കെ.അബ്ദുൽ മജീദ് അധ്യക്ഷത വഹിച്ചു.

ജനറൽ സെക്രട്ടറി പി.കെ. അരവിന്ദൻ, ട്രഷറർ വട്ടപ്പാറ അനിൽകുമാർ ഭാരവാഹികളായ ഷാഹിദ റഹ്‌മാൻ, എൻ. രാജ്മോഹൻ, കെ.രമേശൻ, ബി. സുനിൽകുമാർ, ബി. ബിജു, അനിൽ വെഞ്ഞാറമൂട്, ടി.യു. സാദത്ത്, പി.എസ്. ഗിരീഷ് കുമാർ, സാജു ജോർജ്, പി.വി. ജ്യോതി, ബി.ജയചന്ദ്രൻപിള്ള, ജോൺ ബോസ്കോ, വർഗീസ് ആന്‍റണി, പി.എസ്. മനോജ് , വിനോദ് കുമാർ, പി.എം. നാസർ, ജി.കെ. ഗിരീഷ്, എം.കെ. അരുണ എന്നിവർ സംസാരിച്ചു.

ADVERTISEMENT

സാന്പത്തിക ഞെരുക്കം: സംസ്ഥാനത്തെ ഏക സർക്കാർ കമ്യൂണിറ്റി കോളജ് കഴിഞ്ഞവർഷം പ്രവർത്തിച്ചില്ല

ഫ്രാൻസിസ് തയ്യൂർ വടക്കഞ്ചേരി: സംസ്ഥാനത്തെ ഏക സർക്കാർ കമ്യൂണിറ്റി കോളജ് കഴിഞ്ഞവർഷം പ്രവർത്തിച്ചില്ല. ഈ അധ്യയനവർഷവും പ്രവർത്തിക്കുമോ എന്നതിലും അനിശ്ചിതത്വം തുടരുകയാണ്. ജൂൺമാസം അവസാനിച്ചിട്ടും തിരുവനന്തപുരത്തുനിന്നും അനുമതി വന്നിട്ടില്ലെന്നാണ് കോളജ് നടത്തിവരുന്ന ഏജൻസി നൽകുന്ന വിവരം. സർക്കാർഫണ്ട് ഉപയോഗിച്ച് പട്ടികജാതി വികസനവകുപ്പിനു കീഴിൽ തലശേരിയിലെ നെട്ടൂർ ടെക്നിക്കൽ ട്രെയ്നിംഗ് ഫൗണ്ടേഷനാണ് കോഴ്സുകൾ നടത്തുന്നത്. ബംഗളൂരുവാണ് ഏജൻസിയുടെ ആസ്ഥാനം. കോളജിന്‍റെ പ്രവർത്തനം സംബന്ധിച്ച് കഴിഞ്ഞവർഷം പ്രൊപ്പോസൽ നൽകിയിരുന്നെങ്കിലും അനുമതി ലഭിച്ചില്ലെന്നു പറയുന്നു. സർക്കാർ നൽകേണ്ട ഫണ്ടിന്‍റെ കുറവാണ് കോളജിന്‍റെ പ്രവർത്തനം താളംതെറ്റാൻ കാരണമായത്. കഴിഞ്ഞവർഷം കോളജ് പ്രവർത്തിക്കാത്തത് അധികമാരും അറിഞ്ഞതുമില്ല. ഈ വർഷവും പ്രവർത്തനാനുമതി വൈകിയതോടെയാണ് കഴിഞ്ഞവർഷവും കോളജ് പ്രവർത്തിക്കാതിരുന്നതു പുറത്തുവരാൻ കാരണമായത്. വാടകകെട്ടിടം ഉള്ളിലേക്ക് മാറിയായതും നാല്പത് കുട്ടികൾക്കുമാത്രം പ്രവേശനമുള്ളതും കോളജിന്‍റെ പ്രവർത്തനം സംബന്ധിച്ച് അധികമാർക്കും അറിയില്ല. കണക്കൻതുരുത്തി റോഡിൽ മണ്ണാംപറമ്പിൽ കോളജിനായി നിർമാണം പൂർത്തിയാകുന്ന സ്വന്തംകെട്ടിടത്തിൽ ജൂലൈ മാസംമുതൽ കോളജിന്‍റെ പ്രവർത്തനം ആരംഭിക്കുമെന്നു വടക്കഞ്ചേരി സർക്കാർ ആശുപത്രികെട്ടിട ഉദ്ഘാടനവേളയിൽ പി.പി. സുമോദ് എംഎൽഎ പറഞ്ഞിരുന്നു. പക്ഷെ, ഇതിനുള്ള നടപടികൾക്ക് ഇപ്പോഴും വേഗത വന്നിട്ടില്ല. മണ്ണാംപറമ്പിൽ കോളജിനുള്ള കെട്ടിടനിർമാണം പൂർത്തിയായിട്ടുണ്ട്. ഇതിനോടുചേർന്നുള്ള ഹോസ്റ്റൽ കെട്ടിടത്തിന്‍റെ പണികൾ പൂർത്തിയാകാൻ ഇനിയും ഒന്നരമാസംകൂടി കാലതാമസം വരുമെന്നാണ് കരാർകമ്പനി പറയുന്നത്. ടൈൽസ് വർക്ക് ഉൾപ്പെടെ നടക്കാനുണ്ട്. റോഡിൽനിന്നും കോളജിലേക്കുള്ളവഴിയും സഞ്ചാരയോഗ്യമാക്കാനുണ്ട്. 2012 ൽ ആരംഭിച്ച കോളജ് സർക്കാർ ആശുപത്രിക്ക് സമീപം വാടക കെട്ടിടത്തിലാണ് പ്രവർത്തിച്ചുവരുന്നത്. ഒരു വർഷം കോളജിന്‍റെ പ്രവർത്തനം നിലച്ചതിനാൽ വാടക കെട്ടിടവും കാടുമൂടിയ നിലയിലായി. പ്രവർത്തിക്കാതെ കോടികൾ വിലമതിക്കുന്ന കെട്ടിടത്തിലെ മെഷിനുകളും ഇപ്പോൾ കേടുവന്ന നിലയിലാണ്.

പട്ടികജാതി വിഭാഗത്തോടു കടുത്ത അവഗണന

വടക്കഞ്ചേരി: സർട്ടിഫിക്കറ്റ് പ്രോഗ്രാം ഇൻ പ്രിസിഷൻ മെഷനിസ്റ്റ് എന്ന രണ്ടു വർഷത്തെ കോഴ്സാണ് ഇവിടെ നടത്തുന്നത്. വാഹന നിർമാണ കമ്പനികളിൽ മെഷിനിസ്റ്റ് എന്ന പോസ്റ്റിലാണ് നിയമനം ലഭിക്കുക. ലെയ്ത്ത്, ഡ്രില്ലിംഗ് തുടങ്ങിയവയാണ് കോഴ്സിൽ ഉൾപ്പെടുന്നത്. പത്താം ക്ലാസാണ് അടിസ്ഥാന വിദ്യാഭ്യാസ യോഗ്യത. പട്ടികജാതി വിഭാഗത്തിന് മുൻഗണന നൽകിയാണ് പ്രവേശനം. സമൂഹത്തിലെ താഴെ തട്ടിലുള്ളവർക്ക് രണ്ടുവർഷത്തെ കോഴ്സ് പൂർത്തിയാക്കിയാൽ ഉയർന്ന ശമ്പളത്തോടു കൂടി ജോലി ലഭിക്കുന്ന സാധ്യതകളാണ് സർക്കാരിന്‍റെ അനാസ്ഥ മൂലം ഇല്ലാതാകുന്നതെന്ന ആക്ഷേപവുമുണ്ട്. കോഴ്സ് പൂർത്തിയാക്കിയവക്കെല്ലാം കമ്പനികളിൽ പ്ലെയ്സ്മെന്‍റ് ലഭിക്കുന്നുണ്ട്. 2018 ജൂണിലാണ് മണ്ണാംപറമ്പിൽ കമ്യുണിറ്റി കോളജിനായി അന്നത്തെ പട്ടികജാതി പട്ടികവർഗ വികസന വകുപ്പ് മന്ത്രിയായിരുന്ന എ. കെ. ബാലൻ ശിലാസ്ഥാപനം നിർവഹിച്ചത്. ഫണ്ടിന്‍റെ കുറവിൽ കെട്ടിടനിർമാണവും ഇടയ്ക്ക് നിർത്തിവയ്ക്കുന്ന സ്ഥിതിയുണ്ടായി.

ആലത്തൂരിൽ ലഹരിവിരുദ്ധ കൂട്ടയോട്ടം

ആലത്തൂർ: കഴനി കല്ലേപ്പുള്ളി ജയ്‌ഭാരത് വായനശാലയുടെ ആഭിമുഖ്യത്തിൽ ലഹരിവിരുദ്ധ കൂട്ടയോട്ടം സംഘടിപ്പിച്ചു. ആലത്തൂർ പോലീസ് സബ് ഇൻസ്പെക്ടർ സി. വിവേക് നാരായണൻ കൂട്ടയോട്ടം ഫ്ലാഗ്‌ഓഫ് ചെയ്തു. വായന പക്ഷാചരണത്തിന്‍റെ ഭാഗമായാണ് ലഹരിവിരുദ്ധ കൂട്ടയോട്ടം സംഘടിപ്പിച്ചത്. കല്ലേപ്പുള്ളിയിൽ നിന്നുതുടങ്ങി കഴനി തെക്കുമുറി വഴി മൂന്നുകിലോമീറ്റർപിന്നിട്ട് കഴനി ചുങ്കത്ത് അവസാനിച്ചു. വായനശാല പ്രസിഡന്‍റ് എം. കൊച്ചുകൃഷ്ണൻ, സെക്രട്ടറി ബിനു വലിയവീട് വാർഡ് മെംബർ ഗിരിജ പ്രേം പ്രകാശ് തുടങ്ങിയവർ നേതൃത്വം നൽകി.

കരിയർ ഗൈഡൻസ് സെമിനാറും അനുമോദനയോഗവും

വടക്കഞ്ചേരി: കണ്ണമ്പ്ര കൊട്ടേക്കാട് വായനശാലയുടെയും പ്രവാസി ഗ്രൂപ്പിന്‍റെയും സംയുക്താഭിമുഖ്യത്തിൽ അനുമോദനം 2025 - കരിയർ ഗൈഡൻസ് ബോധവത്കരണ സെമിനാർ നടന്നു. കെ.രാധാകൃഷ്ണൻ എംപി ഉദ്ഘാടനം ചെയ്തു.വായനശാല പ്രസിഡന്‍റ് എ. രവീന്ദ്രൻ അധ്യക്ഷത വഹിച്ചു. പഞ്ചായത്ത് മെംബർ മേഘ അനിൽകുമാർ, താലൂക്ക് ലൈബ്രറി കൗൺസിൽ ജോയിന്‍റ് സെക്രട്ടറി സി.സി. ചന്ദ്രബോസ്, യുവശക്തി വായനശാല പ്രസിഡന്‍റ് എം.കൃഷ്ണദാസ്, ലൈബ്രറി കൗൺസിൽ അംഗം അനിൽകുമാർ, വനിതാവേദി സെക്രട്ടറി ലഷ്മിക്കുട്ടി സ്വാമിനാഥൻ, വായനശാല സെകട്ടറി കെ.ആർ. ഷൺമുഖൻ, ലൈബ്രറി കൗൺസിൽ അംഗവും പാലിയേറ്റീവ് കമ്മിറ്റി സെക്രട്ടറിയുമായ അബ്ദുൾ ഷമീർ എന്നിവർ പ്രസംഗിച്ചു. എം.ആർ. രാഹുൽ ഇൻഫ്ലുവൻസർ ക്ലാസ് നയിച്ചു.

തത്തമംഗലത്തെ തെരുവുനായ്ക്കളെ ഭയന്ന് വിദ്യാർഥികളും രക്ഷിതാക്കളും

തത്തമംഗലം: ടൗണിലും സ്കൂൾ പരിസരത്തുമെല്ലാം തെരുവുനായ്ക്കളുടെ വിളയാട്ടം. ശ്രീകുറുംബക്കാവ്, ചേമ്പാടം, എൽഎസ്എസ് കരയോഗമന്ദിരത്തിനു സമീപം, ദേവിനഗര്‍ ഉൾപ്പെടെ പ്രദേശങ്ങളിൽ തെരുവുനായക്കൂട്ടം വിലസുകയാണ്. വിദ്യാർഥികളെയും മുതിർന്നവരെയും ഒരുപോലെ തുരത്തിയോടിച്ച് ആക്രമിക്കുകയാണ് തെരുവുനായകൾ. ജിയുപിഎസ്, തത്തമംഗലം എസ്എം എൽപി സ്കൂൾ, , എസ്എം ഹൈസ്കൂൾ വിദ്യാർഥികളും അധ്യാപകരും ഇതുവഴി വന്നുപോകുന്നതു ഏറെ കരുതലോടെയാണ്. മിക്ക വീടുകൾക്കു സമീപവും അലഞ്ഞുതിരിയുന്ന തെരുവുനായ്ക്കളെ കാണാം. കുട്ടികളെ വെളിയിലേക്കു വിടാൻ പോലും രക്ഷിതാക്കൾ മടിക്കുകയാണ്. കഴിഞ്ഞ വർഷം പേയിളകിയ ചെറിയ നായ അഞ്ചുപേരേയാണ് കടിച്ചു പരിക്കേൽപ്പിച്ചത്. തെരുവുനായ്ക്കളെ വന്ധ്യംകരണം നടത്താറുണ്ടെന്നു നഗരസഭ പറയുന്പോഴും അക്രമണപരന്പരകൾക്കു കുറവില്ല. രാത്രികാലങ്ങളിൽ അരക്കിലോമീറ്റർ അകലെയുള്ള വീടുകളിലെത്താൻ പലരും ഓട്ടോറിക്ഷ ആശ്രയിക്കേണ്ട ഗതികേടിലാണ്.

തത്തമംഗലം ബസ് സ്റ്റാൻഡിൽ അസൗകര്യങ്ങൾ മാത്രം...

ചിറ്റൂർ: തത്തമംഗലം ബസ് സ്റ്റാൻസിനകത്ത് യാത്രക്കാരുടെ ഇരിപ്പിടഭാഗത്ത് ചോർന്നൊലിക്കുന്നു, പ്രാവിന്‍റെ കാഷ്ഠാവശിഷ്ടം കാരണം ദുർഗന്ധമയമായിരിക്കുകയാണ്. ചീഞ്ഞ പായൽ പടർന്നുപിടിച്ച സ്ഥലത്ത് കൊതുക്, പുഴുശല്യവും അതിരൂക്ഷം. കോയമ്പത്തൂരിലേക്ക് പോവുന്ന യാത്രികർ സ്റ്റാൻഡികത്തെത്തിയാണ് ബസിൽ കയറുന്നത്. പ്രായാധിക്യമുള്ളവർക്കും കുഞ്ഞുങ്ങൾക്കും സാവധാനത്തിൽ ബസ് കയറാൻ സൗകര്യമുണ്ടായിരുന്നു. എന്നാൽ നിലവിലെ സ്ഥിതി യാത്രക്കാർക്ക് വിഷമകരമാവുന്നുണ്ട്. പലപ്പോഴും ബസുകളൊന്നും സ്റ്റാൻഡിൽ കയറാതെ പോകുന്നതു ഇത്തരം യാത്രികർക്കു വിനയാകുന്നുണ്ട്. രാത്രിയാവുന്നതോടെ സാമൂഹ്യവിരുദ്ധരുടെ താവളമായി ബസ് സ്റ്റാൻഡ് മാറുന്നെന്നും പരാതി ഉയരുന്നുണ്ട്. ബസ് സ്റ്റാൻഡിലെ ശോചനീയാവസ്ഥ നാട്ടുകാരും യാത്രക്കാരും കൗൺസിലർമാരും നിരന്തരം നഗരസഭാ സെക്രട്ടറിയെ അറിയിച്ചാലും നടപടിയുണ്ടാകുന്നില്ല. കോടികൾ ചെലവഴിച്ചു നിർമിച്ച സ്റ്റാൻഡിൽ ബസ് കയറുന്നില്ലെന്നു മാത്രമല്ല, അഞ്ചോ ആറോ വ്യാപാരസ്ഥാപന നടത്തിപ്പിനു മാത്രമായാണ് ഉപകരിക്കുന്നത്. മേൽക്കൂര പത്തുലക്ഷം ചെലവിൽ നവീകരിക്കുമെന്നു നഗരസഭയിൽ പ്രഖ്യാപനമുണ്ടായി മാസങ്ങൾ കഴിഞ്ഞും നടപടികളൊന്നമുണ്ടായില്ല.

ചിന്നത്തടാകം റോഡ് ശോച്യാവസ്ഥ പരിഹരിക്കാൻ നാട്ടുകാർ രംഗത്ത്

അഗളി: അട്ടപ്പാടിയെ അലട്ടിക്കൊണ്ടിരിക്കുന്ന വിവിധ പ്രശ്നങ്ങൾക്ക് പരിഹാരം കാണാൻ അട്ടപ്പാടിയുടെ ശബ്ദം എന്ന വാട്ട്സാപ് കൂട്ടായ്മ ഗൂളിക്കടവ് ജംഗ്ഷനിൽ യോഗം ചേർന്നു. ഗൂളിക്കടവിൽ ഓടിക്കൊണ്ടിരുന്ന ഓട്ടോറിക്ഷയിലേക്ക് മരംവീണ് യുവാവ് മരിച്ച സംഭവത്തോടെയാണ് കൂട്ടായ്മ രൂപം കൊണ്ടത്. ആയിരത്തോളംപേർ ഗ്രൂപ്പിലുണ്ട്. റോഡരികിലെ മരങ്ങളും മറ്റു തടസങ്ങളും നീക്കാൻ കൂട്ടായ്മ മുൻകൈയെടുത്ത് പ്രവർത്തിച്ചു. മണ്ണാർക്കാട് ചിന്നത്തടാകം റോഡും ചർച്ചാവിഷയമായി. വർഷങ്ങളായി റോഡ് തകർന്നു കിടക്കുകയാണ്. തെങ്കര മുതൽ ആനമൂളി വരെയുള്ള റോഡ് കുണ്ടും കുഴിയും നിറഞ്ഞ് ചെളിക്കുളമായി മാറിക്കഴിഞ്ഞു. ഗൂളിക്കടവിൽനിന്നും മണ്ണാർക്കാടുവരെ 37 കിലോമീറ്റർ സഞ്ചരിക്കാൻ രണ്ടുമണിക്കൂർ സമയം വേണ്ടിവരുന്ന സ്ഥിതിയാണ്. ഗൂളിക്കടവിൽ നിന്നും ആനക്കട്ടി വരെയുള്ള പാതയും അതിദുർഘടമാണ്. ഇതുസംബന്ധിച്ച് വാട്സ്ആപ് ഗ്രൂപ്പിൽ രണ്ടുദിവസങ്ങളിലായി നടന്ന ചർച്ചയിലാണ് യോഗം ചേർന്ന് പ്രശ്നപരിഹാരത്തിന് രൂപം നൽകാൻ തീരുമാനിച്ചത്. ഇന്നലെ ഉച്ചയ്ക്ക് 2.45 ന് വി.പി. ലോഡ്ജ് ഹാളിൽ ചേർന്ന യോഗത്തിൽ നൂറോളം പേർ പങ്കെടുത്തു. അട്ടപ്പാടിയിലേക്കുള്ള ബദൽ റോഡ്, വൈദ്യുതി പ്രശ്നം,ഭൂമി പ്രശ്നം, വന്യമൃഗം,കുടിവെള്ളം തുടങ്ങി വിവിധ വിഷയങ്ങൾ ചർച്ചയായി. ഓരോ പ്രശ്നങ്ങളും ഘട്ടംഘട്ടമായി പരിഹരിക്കുകയാണ് ലക്ഷ്യം. ജനപ്രതിനിധികളും സാമൂഹ്യപ്രവർത്തകരും നാട്ടുകാർ,ഓട്ടോ ടാക്സി ജീവനക്കാർ തുടങ്ങിയവർ യോഗത്തിൽ പങ്കെടുത്തു പ്രസംഗിച്ചു.

സ്കൂട്ടി മോഷ്ടിച്ചയാൾ പോലീസ് പിടിയിൽ

കൊല്ലങ്കോട്: ഊട്ടറയിൽ ഹോട്ടലിനു മുന്നിൽനിന്നു സ്കൂട്ടി കവർന്ന സംഭവത്തിൽ പ്രതി കൊല്ലങ്കോട് പോലീസ് പിടിയിൽ. എറണാകുളം ചേരനല്ലൂർ സെബാസ്റ്റ്യന്‍റെ മകൻ സന്തോഷ് (45) നെയാണ് ഇന്നലെ തൃശൂരിൽനിന്നും പിടികൂടിയത്. ഊട്ടറ റഹ്്മാനിയ മൻസിൽ മുജീബ് റഹ്്മാന്‍റെ സ്കൂട്ടി ശനിയാഴ്ച പുലർച്ചെ ഊട്ടറയിലെ കടയ്ക്കുമുന്നിൽ നിന്നാണ് കാണാതായത്. എസ്ഐ സത്യനാരായണൻ, ജിഎസ്ഐ അബ്ദുൾ റഹീം, എസ്‌സിപിഒ അനിൽകുമാർ എന്നിവരടങ്ങിയ സംഘമാണ് പ്രതിയേയും സ്കൂട്ടിയും കണ്ടെത്തിയത്. കോടതിയിൽ ഹാജരാക്കിയ പ്രതിയെ റിമാൻഡുചെയ്തു.

അയിലൂർ ആരോഗ്യകേന്ദ്രത്തിൽ സായാഹ്ന ഒപി ആരംഭിച്ചു

നെന്മാറ: അയിലൂർ കുടുംബാരോഗ്യ കേന്ദ്രത്തിൽ സായാഹ്ന ഒപി ആരംഭിച്ചു. ഗ്രാമീണ മേഖലയുടെ ചികിത്സാ സൗകര്യത്തിനു സായാഹ്ന ഒപി സഹായകരമാകും. ഇതോടെ മേഖലയ്ക്ക് മുഴുവൻ സമയ ചികിത്സാ സൗകര്യം ലഭ്യമാകും. ഇതിനായി പഞ്ചായത്ത് ഡോക്ടറെയും ഫാർമസിസ്റ്റിനെയും പുതുതായി നിയമിച്ചിട്ടുണ്ട്. അയിലൂർ കരിങ്കുളത്തുള്ള കുടുംബാരോഗ്യ കേന്ദ്രത്തിൽ സായാഹ്ന ഒപി ചികിത്സയുടെ പ്രവർത്തന ഉദ്ഘാടനം കെ. രാധാകൃഷ്ണൻ എംപി ഉദ്ഘാടനം ചെയ്തു. കെ. ബാബു എംഎൽഎ മുഖ്യാതിഥിയായി. അയിലൂർ ഗ്രാമപഞ്ചായത്ത് പ്രസിഡന്‍റ് എസ്. വിഗ്നേഷ് അധ്യക്ഷതവഹിച്ചു. നെന്മാറ ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി, മേഖലയിലെ ത്രിതല പഞ്ചായത്ത് ജനപ്രതിനിധികളും രാഷ്ട്രീയപാർട്ടി പ്രതിനിധികളും ചടങ്ങിൽ പങ്കെടുത്തു.

തീറ്റ തേടിയെത്തിയ കടൽകൊറ്റികൾ കണ്ണിനു വിരുന്നായി

തത്തമംഗലം: നൂറുകണക്കിനു കടൽകൊറ്റികൾ തീറ്റതേടി വയലുകളിൽ ഇറങ്ങിയതു വഴിയാത്രികർക്കു കൗതുകകാഴ്ചയായി . മേട്ടുപ്പാളം- പുഴപ്പാലം റോഡരികിലെ വയലുകളിലാണ് ദേശാടന കൊറ്റി സംഘം എത്തിയത്. കടൽക്ഷോഭമുണ്ടാവുന്ന സമയങ്ങളിലാണ് ഈ പറവകൾ തീറ്റതേടി ദൂരദിക്കുകളിലെത്തുന്നതത്രെ. എല്ലാവർഷവും ജൂൺ, ജൂലൈ മാസങ്ങളിൽ കൊറ്റികൾ എത്താറുണ്ടെന്ന് സമീപവാസികൾ സാക്ഷ്യപ്പെടുത്തുന്നു. ഭാരംകൂടിയ ശരീരവും നീണ്ടുകറുത്തകൊക്കുകളുമാണ് ഇവയുടെ ദൃശ്യഭംഗി കൂട്ടുന്നത്. പ്രദേശത്ത് കാണുന്ന നാട്ടുകൊറ്റികൾ ഇവയുമായി അടുക്കറില്ല എന്നു മാത്രമല്ല ശത്രുതമനോഭാവവും പ്രകടിപ്പിക്കാറുണ്ട്.

മംഗലംഡാം സെന്‍റ് ഫ്രാൻസിസ് സ്കൂളിൽ ലഹരിവിരുദ്ധ ദിനാചരണം

മംഗലംഡാം: സെന്‍റ് സേവിയേഴ്സ് സെൻട്രൽ സ്കൂളിൽ ലഹരിവിരുദ്ധ ദിനാചരണത്തോടനുബന്ധിച്ച് വിവിധ പരിപാടികൾ നടന്നു. ഡാം എസ്ഐ കെ.എ. ഷാജു പരിപാടികൾ ഉദ്ഘാടനം ചെയ്തു. കൂടുതൽ അറിവ് ആർജിക്കാനുള്ള ലഹരിയാകണം വിദ്യാർഥികൾക്കുണ്ടാകേണ്ടതെന്നു അദേഹം കുട്ടികളെ ഓർമിപ്പിച്ചു. പ്രിൻസിപ്പൽ ഫാ. സിബിൻ തോമസ് അധ്യക്ഷത വഹിച്ചു. ജനമൈത്രി പോലീസ് ഓഫീസർ സജ്ന, സ്കൂൾ വൈസ് പ്രിൻസിപ്പൽ ജാൻസി ഷാജി അധ്യാപകരായ മിനി, സന്ധ്യ ഹെഡ് ബോയ് ബെനഡിന്‍റ് ജോസഫ് ജിമ്മി, ഹെഡ് ഗേൾ ഹെലൻ മേരി മാത്യു പ്രസംഗിച്ചു. പ്രിൻസിപ്പൽ ഫാ. സിബിൻ തോമസ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. തുടർന്ന് പ്ലക്കാർഡുകളുമായി ലഹരിക്കെതിരെ മംഗലംഡാം ടൗണിൽ കുട്ടികൾ റാലി നടത്തി. ലഹരി വിപത്തിനെക്കുറിച്ച് പൊതുജനങ്ങളിൽ അവബോധമുണ്ടാക്കാൻ ഫ്ലാഷ് മോബും ടൗണിൽ സംഘടിപ്പിച്ചു.

കോയന്പത്തൂരിൽ സിടിഎംഎ ഉത്സവ് -2025 തുടങ്ങി

കോയന്പത്തൂർ: തമിഴ്നാട്ടിലെ പ്രവാസി മലയാളികൾക്കായി കോൺഫെഡറേഷൻ ഓഫ് തമിഴ്നാട് മലയാളി അസോസിയേഷൻസ് (സിടിഎംഎ) സംഘടിപ്പിക്കുന്ന കലോത്സവമായ ഉത്സവ് - 2025ന്‍റെ പതിമൂന്നാം എഡിഷനു തുടക്കം. ചെന്നൈയിലും കോയമ്പത്തൂരിലുമാണ് ചിത്ര- സാഹിത്യ രചനാ മത്സരങ്ങൾ അരങ്ങേറിയത്. കോയമ്പത്തൂർ കേരളസമാജത്തിൽ നടന്ന ചടങ്ങിൽ സിടിഎംഎ മുൻ പ്രസിഡന്‍റ് എം.കെ. സോമൻ മാത്യു മുഖ്യാതിഥിയായി പങ്കെടുത്ത് ഉദ്ഘാടനം നിർവഹിച്ചു. ബാബു നിലയത്തിങ്ങൽ, എം.സി. തോമസ്, ജോർജ് ആന്‍റണി യേശുദാസ്, സിടിഎംഎ വൈസ് പ്രസിഡന്‍റ് സി.സി. സണ്ണി, സെക്രട്ടറി ടി.ഷിബു, വൈസ് ചെയർമാൻ എ.കെ. ജോൺസൺ, ഉത്സവ് കോ- ഓർഡിനേറ്റർ കെ. നവീൻ, ബേബി വാൽപ്പാറ, സെബി സെബാസ്റ്റൃൻ, സി. പത്മനാഭൻ, കെ. രാമകൃഷ്ണൻ എന്നിവർ പ്രസംഗിച്ചു.

ശുചിത്വ സര്‍വേ: മലന്പുഴ ബ്ലോക്കിൽ സ്റ്റേറ്റ് ഹോള്‍ഡേഴ്സിന്‍റെ യോഗം ചേര്‌ന്നു

പാലക്കാട്: മലമ്പുഴ ബ്ലോക്ക് പഞ്ചായത്തില്‍ ശുചിത്വ സര്‍വേയുടെ ഭാഗമായി സ്റ്റേറ്റ് ഹോള്‍ഡേഴ്സിന്‍റെ യോഗം ചേര്‍ന്നു. സ്വച്ഛ് ഭാരത് മിഷന്‍റെ കീഴില്‍ വിവരിച്ചിരിക്കുന്ന മാനദണ്ഡങ്ങളുടെ അടിസ്ഥാനത്തില്‍ ഇന്ത്യയിലെ എല്ലാ സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും ജില്ലകള്‍ക്കും ദേശീയ റാങ്കിംഗ് നല്‍കുക എന്നതാണ് സര്‍വേയുടെ പ്രധാന ലക്ഷ്യം. സര്‍വേയുടെ ലോഗോ പ്രകാശനം മലമ്പുഴ ബ്ലോക്ക് പഞ്ചായത്ത് പ്രസിഡന്‍റ് വി. ബിജോയ് നിര്‍വഹിച്ചു. മലമ്പുഴ ബ്ലോക്ക് പഞ്ചായത്ത് സെക്രട്ടറി സദാശിവന്‍ സ്വച്ഛ് സര്‍വേഷന്‍ ഗ്രാമീണ്‍ 2025 സര്‍വ്വേയുടെ പ്രാധാന്യത്തക്കുറിച്ച് വിശദീകരിച്ചു. സിറ്റിസണ്‍ ഫീഡ്ബാക്ക് സര്‍വേയുടെ മൊബൈല്‍ അപ്ലിക്കേഷന്‍ ആര്‍.ജി.എസ്.എ കോര്‍ഡിനേറ്റര്‍ പ്രസീത അവതരിപ്പിച്ചു. വൃത്തിയുടെ അടിസ്ഥാനത്തില്‍ രാജ്യത്തെ ഏറ്റവും മികച്ച സംസ്ഥാനങ്ങളെയും ജില്ലകളെയും തിരഞ്ഞെടുക്കുന്നതിനാണ് ഒന്നിച്ചിറങ്ങാം ഒന്നാമതാകാം എന്ന ആപ്തവാക്യത്തില്‍ ശുചിത്വ സര്‍വേ 'സ്വച്ഛ് സര്‍വേക്ഷന്‍ ഗ്രാമീണ്‍ 2025 നടത്തുന്നത്. വീടുകള്‍, വില്ലേജുകള്‍, പൊതുസ്ഥലങ്ങള്‍ എന്നിവിടങ്ങളിലെ വ്യത്തിയാണ് സര്‍വേയില്‍ പരിശോധിക്കുക. രാജ്യത്തെ വിവിധ അംഗീകൃത ഏജന്‍സികള്‍ വഴിയാണ് സര്‍േവ നടത്തുന്നത്. തദ്ദേശവകുപ്പ്, ശുചിത്വമിഷന്‍ എന്നിവയാണ് സംസ്ഥാനത്തെ പ്രവര്‍ത്തനങ്ങള്‍ ഏകോപിപ്പിക്കുന്നത്. മലമ്പുഴ ബ്ലോക്ക് പഞ്ചായത്ത് ഹാളില്‍ നടന്ന യോഗത്തില്‍ മരുതറോഡ്, പുതുപ്പരിയാരം, പുതുശ്ശേരി, കൊടുമ്പ്, അകത്തേത്തറ, മലമ്പുഴ ഗ്രാമപഞ്ചായത്തുകളിലെ ജനപ്രതിനിധികള്‍, ഉദ്യോഗസ്ഥര്‍, കുടുംബശ്രീ ഭാരവാഹികള്‍, ആരോഗ്യ പ്രവര്‍ത്തകര്‍ എന്നിവര്‍ പങ്കെടുത്തു.

ചിറ്റൂരിൽ ബസ് സ്റ്റാൻഡ് നിർമാണം ഉടൻ തുടങ്ങാൻ നഗരസഭാ തീരുമാനം

ചിറ്റൂർ: ഷോപ്പിംഗ് കോംപ്ലക്സിൽ നിർമിക്കാൻ പോകുന്ന ബസ് സ്റ്റാൻഡിന്‍റെ ഡിപിആർ ഉടൻ തയാറാക്കും. ഇതുമായി ബന്ധപ്പെട്ട കരാർകമ്പനിയുമായി ചർച്ചനടത്തി നടപടകൾ വേഗത്തിക്കാൻ ചിറ്റൂർ-തത്തമംഗലം നഗരസഭ കൗൺസിൽ യോഗത്തിൽ തീരുമാനമായി. അണിക്കോട്ടിൽ മലിനജലം റോഡിലേക്ക് ഒഴുകുന്നതു തടയാൻ അഴുകുചാലുകൾ ഉടൻ വൃത്തിയാക്കും. തത്തമംഗലം രാജീവ് ഗാന്ധി കൺവൻഷൻ സെന്‍ററിൽ വിവാഹാവശ്യങ്ങൾക്ക് മണ്ഡപം ബുക്കുചെയ്യുന്നവർക്ക് അസൗകര്യങ്ങൾ ഏറെയുണ്ടെന്നു പരാതിയുയർന്നു. ഇവിടെ തൊഴിലാളികളുടെ നിർബന്ധപ്പിരിവ് നടക്കുന്നതായും ആരോപണമുയർന്നു. അടുക്കളപാത്രങ്ങളടക്കം മുന്തിയ വാടകയ്ക്കു പുറന്നുനിന്നും കൊണ്ടുവരേണ്ട സ്ഥിതിയുണ്ട്. മുൻകാല സൗകര്യങ്ങൾ പുനഃസ്ഥാപിക്കാൻ ജീവനക്കാക്ക് ചെയർപേഴ്സൺ നിർദേശം നൽകി. അമൃത് പദ്ധതി പ്രകാരം കുടിവെള്ള പൈപ്പിടുന്നതിനായി പൊളിക്കുന്ന റോഡുകൾ പൂർവസ്ഥിതിയിലാക്കുന്നതിനുള്ള നടപടി സ്വീകരിക്കും. മഴക്കാലത്ത് റോഡ് വെട്ടിപ്പൊളിക്കുന്നത് നിർത്തണമെന്നും യോഗത്തിൽ ആവശ്യം ഉയർന്നു. പിഎംഎവൈ പദ്ധതിയിൽ ഉൾപ്പെട്ട ഗുണഭോക്താക്കൾ ഡിസംബറിനകം നിർമാണം പൂർത്തീകരിക്കണം. അല്ലാത്തപക്ഷം തുക ലഭിക്കില്ലെന്നും സെക്രട്ടറി അറിയിച്ചു. കൗൺസിൽ യോഗത്തിൽ നഗരസഭാ ചെയർപേഴ്സൺ കെ.എൽ. കവിത അധ്യക്ഷയായി. സ്ഥിരംസമിതി അധ്യക്ഷരായ കെ. ഷീജ, എം. റാഫി, മുഹമ്മദ് സലിം, ഓമന കണ്ണൻകുട്ടി, കെ. സുമതി, കൗൺസിലർമാരായ കെ. മധു, ആർ. കിഷോർ കുമാർ, ബാബുദാസ്, എം. മുകേഷ്, ആർ. അച്യൂതാനന്ദ്, എം. ഉണ്ണികൃഷ്ണൻ, ആരോഗ്യസ്വാമി എന്നിവർ പ്രസംഗിച്ചു.

ലഹരിവിമുക്ത സന്ദേശമായി പാലക്കുഴിയിൽ സജീവം സൺഡേ കാന്പയിൻ

പാലക്കാട്‌: അന്താരാഷ്ട്ര ലഹരിവിരുദ്ധ ദിനത്തിനോട് അനുബന്ധിച്ച് പാലക്കാട് പീപ്പിൾ സർവീസ് സൊസൈറ്റിയുടെ നേതൃത്വത്തിൽ വടക്കഞ്ചേരി പാലക്കുഴി സെന്‍റ് തോമസ് ദേവാലയത്തിൽ സജീവം സൺഡേ ആചരിച്ചു. പിഎസ്എസ്പി മുൻ ഡയറക്ടറും ഇടവകവികാരിയുമായ ഫാ.ജ സ്റ്റിൻ കോലം കണ്ണി ക്ലാസ്നയിച്ചു. പ്രോജക്ട് കോ- ഓർഡിനേറ്റർ ബാബു പോൾ നേതൃത്വം നൽകി. ലഹരി വിരുദ്ധ കാന്പയിനിന്‍റെ ഭഗമായി ഒപ്പുശേഖരണം നടത്തി. ഇടവകയിലെ എല്ലാ യുവജനങ്ങളും ഇടവക അംഗങ്ങളും കാമ്പയിനിൽ പങ്കാളികളായ സജീവം സൺഡേ ആചരണം ലഹരിമുക്ത ജീവിതത്തിനും പോരട്ടത്തിനുമുള്ള പ്രചോദനവേദിയായി. ലഹരിമുക്ത കേരളം എന്ന ലക്ഷ്യത്തെ മുൻനിർത്തി കാരിത്താസ് ഇന്ത്യ, കേരള കാത്തലിക് ബിഷപ്സ് കൗൺസിൽ ,കേരള സോഷ്യൽ സർവീസ് ഫോറം എന്നിവരുടെ നേതൃത്വത്തിൽ വിവിധ സർക്കാർ സംവിധാനങ്ങളുടെ സഹായത്തോടെ സജീവം എന്ന പേരിൽ ലഹരി വിരുദ്ധ കാമ്പയിൻ കേരളത്തിലൂടനീളം നടന്നുവരുന്നുണ്ട്.

കനാലിൽ മുങ്ങിമരിച്ചനിലയിൽ കണ്ടെത്തി

കൊല്ലങ്കോട്: വടവന്നൂരിൽ ദേഹശുദ്ധി വരുത്താൻ കനാലിൽ ഇറിങ്ങിയ മധ്യവയസ്കനെ മുങ്ങിമരിച്ച നിലയിൽ കണ്ടെത്തി. വടവന്നൂർ കീഴ്ചിറ അഹമ്മദ് സാഹിബിന്‍റെ മകൻ ഷാഹുൽ ഹമീദ് (58) ആണ് മരിച്ചത്. വെള്ളത്തിൽ ഒഴുകിപ്പോയ മൃതദേഹം ഓവിന്‍റെ ഭാഗത്ത് തടഞ്ഞുനിന്നു. ആക്രി സാധനങ്ങൾ ശേഖരിച്ച് വിൽപ്പന നടത്തുന്ന ഷാഹുൽ ഹമീദ് രാവിലെ വീട്ടിൽ നിന്നുമിറങ്ങിയാൽ വൈകുന്നേരമാണ് തിരിച്ചെത്താറ്. കൊല്ലങ്കോട് പോലീസ് ഇൻക്വസ്റ്റിനു ശേഷം പോസ്റ്റുമോർട്ടം നടത്തി ബന്ധുകൾക്ക് വിട്ടു കൊടുത്തു. ഭാര്യ സുബൈദ: മക്കൾ: ഷാജഹാൻ, സാഹിത. മരുമകൻ: അബൂബക്കർ, സിദ്ധിഖ്.

വാളയാർ ഡാം മണലെടുപ്പിനു വിലക്ക്; നടപടിയുണ്ടാകുമെന്നു ജില്ലാ കളക്ടർ

പാലക്കാട്: വാളയാർ ഡാമിൽ നിന്നുള്ള മണലെടുപ്പ് അടിയന്തരമായി നിർത്തിവെക്കാൻ ജില്ലാ കളക്ടർ ജി. പ്രിയങ്കയുടെ കർശന നിർദേശം. ഡാമിൽ നിന്ന് ശേഖരിക്കുന്ന മണലിനൊപ്പം പുഴയിലെ മണലും അനധികൃതമായി കടത്തുന്നുവെന്ന പരാതിയെ തുടർന്നാണ് നടപടി. കളക്ടറേറ്റ് കോണ്‍ഫറൻസ് ഹാളിൽ ചേർന്ന ജില്ലാ വികസന സമിതി യോഗത്തിൽ എ. പ്രഭാകരൻ എംഎൽഎയുടെ ആവശ്യപ്രകാരമാണ് ജില്ല കളക്ടറുടെ നിർദേശം. ഡാമിലെ ഡീസിൽറ്റേഷൻ പ്രവൃത്തിയുടെ നിർവഹണ ഏജൻസിയായ കെഇഎംഡിഇഎല്ലിനോട് ഇനിയൊരു അറിയിപ്പുണ്ടാകുന്നതുവരെ മണലെടുപ്പ് നിർത്തിവെക്കാനാണ് നിർദേശം. നിയമലംഘനം നടത്തിയാൽ പോലീസ് കേസ് അടക്കമുള്ള നടപടികൾ നേരിടേണ്ടിവരുമെന്നും ജില്ലാ കളക്ടർ മുന്നറിയിപ്പ് നൽകി. മഴ മൂലമുള്ള മണ്ണിടിച്ചിൽ മുൻകൂട്ടി കണ്ട് മണ്ണുമാന്തി യന്ത്രങ്ങൾ ഉൾപ്പടെയുള്ള രക്ഷാപ്രവർത്തന ഉപകരണങ്ങൾ നെല്ലിയാന്പതി ഉൾപ്പെടെ എല്ലാ പഞ്ചായത്തുകളിലും തയ്യാറാക്കി വെക്കണമെന്ന് തദ്ദേശവകുപ്പ് ജോയിന്‍റ് ഡയറക്ടർക്ക് ജില്ലാ കളക്ടർ നിർദേശം നൽകി. ഭാരതപ്പുഴയിൽ അടിഞ്ഞു കൂടിയ മണൽ കാലവർഷം ശക്തിപ്പെടുന്നത് മുൻകൂട്ടി കണ്ട് നീക്കം ചെയ്യാനുള്ള നടപടികൾ സ്വീകരിക്കണമെന്ന് മുഹമ്മദ് മുഹസിൻ എംഎൽഎ യോഗത്തിൽ ആവശ്യപ്പെട്ടു. കൂടല്ലൂർ, പട്ടാന്പി ഭാഗങ്ങളിൽ ഭാരതപ്പുഴയിൽ മണൽ അടിഞ്ഞു കൂടിയത് വെള്ളപ്പൊക്കത്തിന് കാരണമായേക്കാമെന്നും എംഎൽഎ ചൂണ്ടിക്കാട്ടി. ഉപഭോക്താക്കൾക്ക് അമിത കുടിവെള്ള ബിൽ ആണ് മണ്ഡലത്തിലെ പലയിടങ്ങളിലും ലഭിക്കുന്നതെന്നും ഇക്കാര്യം ജലഅഥോറിറ്റി പരിശോധിക്കണമെന്നും എംഎൽഎ ആവശ്യപ്പെട്ടു. വന്യമൃഗശല്യംമൂലം കൃഷി നശിച്ചവർക്ക് കാലതാമസം കൂടാതെ നഷ്ടപരിഹാരതുക വിതരണം ചെയ്യണമന്ന് വനം വകുപ്പിനോട് യോഗം നിർദേശിച്ചു. നിലവിൽ 76 കർഷകർക്ക് നഷ്ടപരിഹാര തുക നൽകാനുള്ളതായി കെ. ബാബു എംഎൽഎ യോഗത്തിൽ പറഞ്ഞു. 2024-25 സീസണിൽ രണ്ടാംവിള നെല്ല് സംഭരണത്തിനായി 68785 കർഷകർ രജിസ്റ്റർ ചെയ്തതായും അതിൽ 62711 കർഷകരെ കൃഷിഭവൻതലത്തിൽ അംഗീകരിച്ചതായും കെ. ബാബു എംഎൽഎയുടെ ചോദ്യത്തിനുത്തരമായി ജില്ലാ പാഡി ഓഫീസർ അറിയിച്ചു. ഇതിൽ 57311 കർഷകരാണ് സപ്ലൈകോയിലേക്ക് നെല്ലളന്നത്. ആകെ 143954.317 മെട്രിക് ടണ്‍ നെല്ല് സംഭരിച്ചു. 407.678 കോടി രൂപയാണ് ജില്ലയിൽ ഇതിനായി ആകെ അനുവദിക്കേണ്ട തുക. 21345 കർഷകരുടെ 50779.282 മെട്രിക് ടണ്‍ നെല്ലിന്‍റെ വിലയായ 143.806 കോടി രൂപയാണ് നിലവിൽ വിതരണം ചെയ്തുകൊണ്ടിരിക്കുന്നത്. 2025 ഏപ്രിൽ 25 വരെ പിആർഎസ് ലഭിച്ച കർഷകരാണ് ഇവർ. ബാക്കിയുള്ള 35966 കർഷകർക്ക് 93175.035 ടണ്ണിന്‍റെ തുകയായ 263.871 കോടി രൂപ കൂടി ഇനി അനുവദിക്കാനുണ്ടെന്നും ജില്ലാ പാഡി ഓഫീസർ അറിയിച്ചു. പറന്പിക്കുളം ആളിയാർ പദ്ധതി കരാർ പ്രകാരം ചിറ്റൂർ പുഴയ്ക്ക് അർഹതപ്പെട്ട ജലം ലഭ്യമാക്കുന്നതിന് സർക്കാർ അടിയന്തരമായി ഇടപെടണമെന്ന് യോഗം പ്രമേയത്തിലൂടെ ആവശ്യപ്പെട്ടു. കെ ബാബു എംഎൽഎ അവതരിപ്പിച്ച പ്രമേയം കെ.ഡി. പ്രസേനൻ എംഎൽഎ പിന്താങ്ങി. ലോവർ നീരാറിൽ നിന്നുള്ള നീരൊഴുക്കും പറന്പിക്കുളം ഗ്രൂപ്പ് ഡാമുകളിലെ യീൽഡും ഇതിനകം 19 ടിഎംസിയിൽ അധികമായിട്ടുണ്ട്. പറന്പിക്കുളം ആളിയാർ പദ്ധതി കരാർപ്രകാരം 16.5 ടിഎംസിയിൽ അധികമായി വരുന്ന മുഴുവൻ ജലവും കേരളത്തിന് അവകാശപ്പെട്ടതാണ്. നെല്ല് സംഭരണ തുക ലഭിക്കുന്നതിനായി ആളുകൾ ബാങ്കുകൾ കയറിയിറങ്ങേണ്ട സാഹചര്യം ഇല്ലാതാക്കണമെന്ന് പി. മമ്മിക്കുട്ടി എംഎൽഎ ആവശ്യപ്പെട്ടു. മുണ്ടൂർ-തൂത പാതയിലെ കാക്കാതോട് പാലം തകർന്ന സമയത്ത് വാഹനങ്ങൾ സഞ്ചരിച്ച പാതയിൽ കുടിവെള്ള പൈപ്പുകൾ തകർന്ന അവസ്ഥയിലാണെന്നും അവ അടിയന്തരമായി നന്നാക്കണമെന്നും കെഎസ്ടിപി അധികൃതരോട് എംഎൽഎ ആവശ്യപ്പെട്ടു. ജില്ലാ ആശുപത്രി കഴിഞ്ഞാൽ ഏറ്റവും കൂടുതൽ രോഗികൾ എത്തുന്ന ആലത്തൂർ താലൂക്ക് ആശുപത്രിയിൽ ജനറൽ ഒപിയിൽ കൂടുതൽ ഡോക്ടർമാരെ നിയോഗിക്കണമെന്നും സൂപ്രണ്ട് തസ്തികയിൽ അടിയന്തരമായി നിയമനം നടത്തണമെന്നും കെ.ഡി. പ്രസേനൻ എംഎൽഎ ആവശ്യപ്പെട്ടു. ആശുപത്രിയിലെ മരുന്നു ക്ഷാമം പരിഹരിച്ചതായും എംഎൽഎയുടെ ചോദ്യത്തിനുത്തരമായി ജില്ലാ മെഡിക്കൽ ഓഫീസർ യോഗത്തിൽ അറിയിച്ചു. ആലത്തൂർ പറക്കുന്നം പാലം നിർമാണത്തിന്‍റെ ഡിപിആർ ഒരാഴ്ചയ്ക്കുള്ളിൽ തയ്യാറാക്കി നൽകണമെന്നും യോഗത്തിൽ ജില്ലാ കളക്ടർ നിർദേശം നൽകി. തരൂർ മണ്ഡലത്തിലെ കഴനി-പഴന്പാലക്കോട് റോഡിലെ ഒന്പത് കിലോമീറ്റർ ദൂരത്തിൽ ജൽജീവൻ മിഷന്‍റെ ഭാഗമായി എടുത്ത കുഴികൾ റീസ്റ്റോർ ചെയ്യാത്തതുമൂലം വാഹനങ്ങൾ അപകടത്തിൽപെടുന്നത് പതിവാണെന്നും കരാർ പ്രകാരം പ്രവൃത്തി പൂർത്തീകരിക്കാതെ കാലതാമസം വരുത്തുന്നതുമൂലം ബജറ്റിൽ അനുവദിച്ച ഒന്പതു കോടി വിനിയോഗിച്ച് റോഡ് പ്രവൃത്തി ആരംഭിക്കാൻ കഴിയുന്നില്ലെന്നും പി.പി സുമോദ് എംഎൽഎ യോഗത്തിൽ പറഞ്ഞു. അടിക്കടി അപകടങ്ങൾ ഉണ്ടാവുന്ന മുണ്ടൂർ ജംഗ്ഷനിൽ റിഫ്ലക്ടറുകൾ അടക്കമുള്ള മുന്നറിയിപ്പ് സംവിധാനങ്ങൾ സ്ഥാപിക്കണമെന്ന് എ. പ്രഭാകരൻ എംഎൽഎ നിർദേശിച്ചു. പൊരിയാനി കയ്യാറ അരിമണി റോഡിൽ പതിനൊന്ന് ഇലക്ട്രിക് പോസ്റ്റുകൾ സ്ഥാപിക്കുന്നത് വേഗത്തിലാക്കണം. ജൽജീവൻ മിഷൻ പദ്ധതിയുടെ ഭാഗമായി പലയിടത്തും ടാങ്കുകളുടെ പണി പൂർത്തിയായെങ്കിലും പൈപ്പിടൽ പ്രവൃത്തി ത്വരിതപ്പെടുത്തി കുടിവെള്ള വിതരണം അടിയന്തിരമായി ആരംഭിക്കണമെന്നും എംഎൽഎ ആവശ്യപ്പെട്ടു. തമിഴ്നാട്ടിൽ നിന്നും കല്ലുകയറ്റി വരുന്ന ഭാരവാഹനങ്ങൾ സ്കൂൾ സമയങ്ങളിൽ റോഡിലൂടെ സഞ്ചരിക്കുന്നുണ്ടെന്നും പരിശോധന ശക്തമാക്കണമെന്നും മന്ത്രി കെ. കൃഷ്ണൻകുട്ടിയുടെ പ്രതിനിധി യോഗത്തിൽ ആവശ്യപ്പെട്ടു. ഇത് സംബന്ധിച്ച പരിശോധന കർശനമാക്കാൻ പൊലീസിനും മോട്ടോർവാഹന വകുപ്പിനും ജില്ലാ കളക്ടർ നിർദേശം നൽകി. പാറ-പൊള്ളാച്ചി റോഡിന്‍റെ അറ്റകുറ്റപണികൾ വേഗത്തിലാക്കണമെന്നും മന്ത്രി കെ. കൃഷ്ണൻകുട്ടിയുടെ പ്രതിനിധി ആവശ്യപ്പെട്ടു. കരകലകുളന്പ് പുഴയോരം കോളനിയിലുൾപ്പെട്ട 27 അപേക്ഷകർക്ക് അടുത്ത പട്ടയമേളയിൽ പട്ടയം വിതരണം ചെയ്യാനാവുമെന്ന് ജില്ലാ കളക്ടർ അറിയിച്ചു. കാലവർഷക്കെടുതിയിൽ ജില്ലയിൽ ഈ വർഷം ഇതു വരെ 266 വീടുകൾ ഭാഗികമായും 23 വീടുകൾ പൂർണമായും തകർന്നതായി ജില്ലാ കളക്ടർ യോഗത്തിൽ അറിയിച്ചു. വന്യമൃഗശല്യത്തിൽ നിന്നും വിള സംരക്ഷിക്കുന്നതിനായി കൃഷിഭൂമികളിലും മറ്റും വൈദ്യുത വേലികൾ സ്ഥാപിക്കുന്നതിന് ഇലക്ട്രിക്കൽ ഇൻസ്പെക്ടറേറ്റ് വകുപ്പിന്‍റെ അനുമതി ആവശ്യമാണെന്നും ജില്ലാ കളക്ടർ അറിയിച്ചു.

കനത്ത മഴയിൽ വെള്ളം മുങ്ങിക്കിടന്ന നെൽപ്പാടങ്ങളിലെ കൃഷി നശിച്ചു

നെന്മാറ: കഴിഞ്ഞ ദിവസങ്ങളിൽ ഉണ്ടായ കനത്തമഴയെ തുടർന്ന് വെള്ളം മുങ്ങിക്കിടന്ന നെൽപ്പാടങ്ങളിലെ കൃഷി നശിച്ചു. മഴ കുറഞ്ഞതിനെതുടർന്ന് നെൽപ്പാടങ്ങളിലെ വെള്ളം താഴ്ന്നതോടെയാണ് ചീഞ്ഞുപോയ നെൽച്ചെടികൾ പുറത്തുകാണാൻ തുടങ്ങിയത്. നടീൽ കഴിഞ്ഞ് ദിവസങ്ങളായ നെൽപ്പാടങ്ങൾ മൂന്നുദിവസത്തിലേറെ വെള്ളം മുങ്ങിയതോടെയാണ് നെൽച്ചെടികൾ ചീഞ്ഞുപോയത്. നെൽച്ചെടികൾ നശിച്ച പാടങ്ങളിൽ ആവർത്തനകൃഷി നടത്താൻ ഞാറ്റടി ലഭ്യമല്ലാത്തതിനാൽ മിക്ക കർഷകരും ഒന്നാം വിള ഉപേക്ഷിച്ച നിലയിലാണ്. ചില കർഷകർ ആദ്യം തയ്യാറാക്കിയ ഞാറ്റടി നശിച്ചതിനെ തുടർന്ന് വീണ്ടും വിത്ത് പാകി മുളപ്പിച്ച ഞാറാണ് നട്ടിരുന്നത്. രണ്ടുപ്രാവശ്യം വിത്തുപാകി നട്ടകൃഷി നശിച്ചതോടെ ഇനിയും വിളയിറക്കാൻ തയ്യാറായാൽ മാസങ്ങളുടെ വൈകൽ ഉണ്ടാകുമെന്നും ഉഴവുകൂലിയും കൂലി ചെലവുമായി വലിയ സാമ്പത്തിക ബാധ്യത വരുമെന്നും ഇതുമൂലം രണ്ടാംവിള ഇറക്കാനും വൈകുമെന്നും കർഷകർ ചൂണ്ടിക്കാണിക്കുന്നു. അയിലൂർ പഞ്ചായത്തിലെ മരുതഞ്ചേരി, ആലംപള്ളം, കയറാടി, പയ്യാങ്കോട്, പുത്തൻതറ തുടങ്ങിയ മേഖലകളിലും നെന്മാറ പഞ്ചായത്തിലെ തേവർമണി, നെന്മാറപാടം, ചാത്തമംഗലം, പോത്തുണ്ടി മേഖലകളിലായി നൂറോളം ഏക്കർ നെൽകൃഷി നശിച്ചിട്ടുണ്ടെന്നാണ് വിവിധ പാടശേഖരസമിതി ഭാരവാഹികൾ പറയുന്നത്. നെൽച്ചെടികൾ ചീഞ്ഞു പോയതിനെ തുടർന്ന് ഒന്നാംവിള മുന്നോട്ടു കൊണ്ടുപോകാൻ കഴിയാത്ത സ്ഥിതിയായി. നെൽകൃഷി നശിച്ച കർഷകർക്ക് കാലാവസ്ഥ ഇൻഷ്വറൻസ് ആനുകൂല്യപ്രകാരം നഷ്ടപരിഹാരം ലഭ്യമാക്കണമെന്ന് കർഷകർ ആവശ്യപ്പെട്ടു.

ദേശീയപാതയുടെ അശാസ്ത്രീയ നിർമാണം: വടക്കഞ്ചേരിയിൽ സ്ട്രീറ്റുകൾ വെള്ളക്കെട്ടിൽ

വടക്കഞ്ചേരി: വടക്കഞ്ചേരി - മണ്ണുത്തി ആറുവരി ദേശീയപാതയുടെ അശാസ്ത്രീയമായ നിർമാണംമൂലം ഹോട്ടൽ ഡയാനക്കടുത്തുള്ള വിവിധ സ്ട്രീറ്റുകളിലെ മുപ്പതോളം കുടുംബങ്ങൾ രൂക്ഷമായ വെള്ളക്കെട്ടിൽ. മഴപെയ്താൽ സമീപത്തെ കുന്നുകളിൽ നിന്നുള്ള വെള്ളം വരെ ഒഴുകിയെത്തി കെട്ടിനിൽക്കുന്നത് ഇവിടുത്തെ ഉല്ലാസ് നഗർ സ്ട്രീറ്റുകളിലാണ്. ദേശീയപാത നിർമിച്ചപ്പോൾ പാതകളുടെ ഇരു ഭാഗത്തും കുത്തിയൊഴുകിയെത്തുന്ന മഴവെള്ളം ഒഴിഞ്ഞു പോകാൻ വഴിയുണ്ടാക്കാത്തതാണ് ഈ ദുരവസ്ഥയ്ക്ക് കാരണമെന്ന് വീട്ടുകാർ പറഞ്ഞു. മൂന്നടിയോളം ഉയരത്തിൽ പ്രദേശമാകെ വെള്ളം പൊങ്ങി റോഡും പറമ്പും വീടും തിരിച്ചറിയാനാകാത്ത വിധമാകും വെള്ളക്കെട്ട്. തോരാത്ത മഴ തുടർന്നാൽ വെള്ളം പൊങ്ങി വീടുകളുടെ കൂടുതൽ ഭാഗങ്ങൾ മുങ്ങും. തേനിടുക്ക്, പമ്പരംകുന്ന് എന്നിവിടങ്ങളിൽ നിന്നുള്ള വെള്ളവും ഒഴുകിയെത്തുന്നത് ഇവിടേക്കാണ്. ദേശീയപാതയുടെ സർവീസ് റോഡിൽ സ്ട്രീറ്റുകളിലേക്കുള്ള പ്രവേശന വഴികൾ അടച്ച് രാത്രി കാലങ്ങളിൽ ചരക്കു ലോറികൾ ഉൾപ്പെടെ നിർത്തിയിടുന്നതുമൂലം വീട്ടുകാർ തടങ്കലിലാകുന്ന സ്ഥിതിയുമുണ്ട്. ചികിത്സ ഉൾപ്പെടെ അത്യാവശ്യങ്ങൾക്ക് വാഹനം ഓടിച്ച് പോകാനും ഇതുമൂലം ബുദ്ധിമുട്ടുണ്ടാക്കുന്നുണ്ട്. ദേശീയപാത അഥോറിറ്റിക്കും കരാർ കമ്പനിക്കും പഞ്ചായത്തിനും വെള്ളക്കെട്ട് സംബന്ധിച്ച് നിരവധിതവണ പരാതി നൽകിയിട്ടും നടപടി സ്വീകരിക്കുന്നില്ലെന്നാണ് ആക്ഷേപം. അധികൃതരുടെ അനാസ്ഥ തുടർന്നാൽ പ്രത്യക്ഷ സമരപരിപാടികൾ ആരംഭിക്കാനുള്ള നീക്കത്തിലാണ് വീട്ടുകാരിപ്പോൾ.

വന്യജീവി ആക്രമണങ്ങൾക്ക് എതിരേ കെസിവൈഎം ഉപവാസസമരം നടത്തി

കല്ലടിക്കോട്: അനുദിനം വർധിച്ചുവരുന്ന വന്യജീവി ആക്രമണങ്ങൾക്ക് എതിരെ കെസിവൈഎം പൊന്നങ്കോട് ഫൊറോനയിലെ 30 അംഗങ്ങൾ ഏകദിന ഉപവാസ സമരം നടത്തി. രാവിലെ ആരംഭിച്ച ഉപവാസസമരം ഫൊറോന വികാരി ഫാ. മാർട്ടിൻ കളമ്പാടൻ ഉദ്ഘാടനം ചെയ്തു. കെസിവൈഎം രൂപത സെക്രട്ടറി ജിബിൻ പയസ് വിഷയാവതരണം നടത്തി. എകെസിസി ഭാരവാഹികൾ പ്രസംഗിച്ചു. വൈകുന്നേരം നടന്ന പൊതുസമ്മേളനം രൂപത വികാരി ജനറാൾ മോൺ ജീജോ ചാലയ്ക്കൽ ഉദ്ഘാടനം ചെയ്തു. പൊന്നങ്കോട് ഫൊറോന പ്രസിഡന്‍റ് ആഗിൻ നോബിൾ അധ്യക്ഷത വഹിച്ച യോഗത്തിൽ കെ. ശാന്തകുമാരി എംഎൽഎ മുഖ്യാഥിതിയായി. കെസിവൈഎം സംസ്ഥാന പ്രസിഡന്‍റ് എബിൻ കണിവയലിൽ, കെസിവൈഎം രൂപത പ്രസിഡന്‍റ് അഭിഷേക പുന്നാംതടത്തിൽ, രൂപത കെസിവൈഎം ഡയറക്ടർ ഫാ. ജോബിൻ മേലേമുറിയിൽ, കാഞ്ഞിരപ്പള്ളി രൂപത മുൻ ഡെപ്യൂട്ടി പ്രസിഡന്‍റ് ഷോൺ, പൊന്നങ്കോട് യുവജന പ്രതിനിധി ജോമിൻ, കരിമ്പ പഞ്ചായത്ത് പ്രസിഡന്‍റ് രാമചന്ദ്രൻ മാസ്റ്റർ, കെപിസിസി സെക്രട്ടറി ഹരിഗോവിന്ദൻ, മാതൃവേദി പ്രതിനിധി ബീന തകരപ്പിള്ളി, ഡോ. മാത്യു കല്ലടിക്കോട്, പൊന്നങ്കോട് ഫൊറോന കെസിവൈഎം ഡയറക്ടർ ഫാ. ജിബിൻ കണ്ടത്തിൽ, ഫാ. ജോജി വടക്കേക്കര, ഫാ. റിജോ മേടക്കൽ, ഫാ. ജോൺ പുത്തൂക്കര, എകെസിസി പ്രതിനിധികൾ തുടങ്ങിയവർ പ്രസംഗിച്ചു. കേന്ദ്ര - സംസ്ഥാന സർക്കാരുകൾ പ്രശ്നങ്ങളിൽ ദ്രുതഗതിയിൽ ഇടപെടണമെന്ന് സമരസമിതി ആവശ്യപ്പെട്ടു. മലയോരമേഖലകളിലെ ജനങ്ങൾക്ക് സംരക്ഷണം നൽകണമെന്ന ആവശ്യം മുൻനിർത്തി പ്രമേയം എംഎൽഎക്ക് കൈമാറി. കെസിവൈഎം പൊന്നങ്കോട് ഫൊറോന ഭാരവാഹികൾ പരിപാടിക്ക് നേതൃത്വം കൊടുത്തു.

കുമരംപുത്തൂർ-മേലാറ്റൂർ റോഡിൽ ഗതാഗതം ദുഷ്കരം

മണ്ണാർക്കാട്: കഴിഞ്ഞ 10 വർഷത്തോളമായി നവീകരണ പ്രവൃത്തികൾ നടക്കാത്തതിനാൽ കുമരംപുത്തൂർ-മേലാറ്റൂർ റോഡിൽ ഗതാഗതം ദുഷ്കരമായി. കുമരംപുത്തൂർ മുതൽ ഉച്ചാരക്കടവ് വരെ റോഡ് പൂർണമായും തകർന്ന അവസ്ഥയിലാണ്. കുമരംപുത്തൂർമുതൽ മേലാറ്റൂർ വരെയുള്ള സംസ്ഥാനപാത മലയോര ഹൈവേക്കായി വിട്ടുനൽകിയതോടെ റോഡ് തകർന്നിട്ടും അധികൃതർ പ്രവൃത്തികൾ നടത്താത്തതാണ് റോഡിന്‍റെ ഉപരിതലം പൂർണമായും തകർന്ന് കുഴികൾ രൂപപ്പെട്ട് ഗതാഗതയോഗ്യമല്ലാതാവാൻ കാരണമായത്. ഇതോടെ അപകടങ്ങളും ഈ പാതയിൽ നിത്യസംഭവമാണ്. കഴിഞ്ഞദിവസം കുമരംപുത്തൂർ ജംഗ്ഷനിൽ കുഴി വെട്ടിച്ച കാർ രണ്ട് സ്കൂട്ടറിൽ ഇടിച്ച് രണ്ടുപേർക്ക് പരിക്കേറ്റിരുന്നു. പലയിടങ്ങളിലായി മലയോര ഹൈവേ നിർമാണത്തിന്‍റെ ഭാഗമായി അഴുക്കുചാൽ നിർമാണം ആരംഭിച്ചിട്ടുണ്ട്. എന്നാൽ റോഡിലെ കുഴികളടയ്ക്കാൻ കരാറുകാർ തയ്യാറാവുന്നില്ല. റോഡ് നവീകരണം പൂർത്തീകരിക്കാൻ മാസങ്ങൾ വേണമെന്നിരിക്കെ റോഡിലെ കുഴികൾ അടച്ച് ഗതാഗതയോഗ്യമാക്കണമെന്നാണ് നാട്ടുകാരുടെ ആവശ്യം.

കൂമൻകാട്ടിൽ റോഡരികിലെ വാകമരം അപകടഭീഷണി

ചിറ്റൂർ: കൊടുവായൂർ -പൊള്ളാച്ചി അന്തർ സംസ്ഥാന പ്രധാന പാതയിൽ വാഹനയാത്രയ്ക്ക് ഭീഷണിയായ വാകമരത്തിന്‍റെ കൊമ്പുകൾ മുറിച്ചു നീക്കണമെന്ന് ആവശ്യം. അമ്പതിൽ കൂടുതൽ യാത്രബസുകളും വിദ്യാർഥികൾ സഞ്ചരിക്കുന്നതുൾപ്പെടെ എണ്ണമറ്റവാഹനങ്ങൾ രാപ്പകൽ സഞ്ചരിക്കുന്ന കൂമൻകാട്ടിലാണ് വാകമരത്തിന്‍റെ വലിയ ശിഖരങ്ങൾ റോഡിൽ വ്യാപിച്ച് വളർന്നിരിക്കുന്നത്. ഉണങ്ങിയ ചില്ലകൾ ഇടയ്ക്കിടെ പൊട്ടി റോഡിലും വാഹനങ്ങൾക്കു മീതേയും വീഴുന്നുണ്ട്. തമിഴ്നാട് സ്വദേശിയായ യാത്രക്കാരന്‍റെ വില കൂടിയ കാറിന്‍റെ മുകളിൽ കൊമ്പ് പൊട്ടിവീണ് ഭാഗിക നാശം ഉണ്ടായിട്ടുണ്ട്. ഈ മരത്തിനു താഴെ 11 കെവി ലൈനുമുണ്ട്. എൺപതു വർഷത്തിൽ കൂടുതൽ പഴക്കമുള്ള മരം നിലമ്പതിച്ചാൽ വലിയ രീതിലുള്ള നാശനഷ്ടങ്ങൾ ഉണ്ടാവുമെന്ന് യാത്രക്കാർ ഭയപ്പെടുന്നുണ്ട്. രണ്ടു വർഷം മുന്പ് സമീപത്തുള്ള മരം വീണ് ലൈനുകളും ഇലക്ട്രിക് പോസ്റ്റുകളും പൊട്ടി വ്യാപക നാശം വിതച്ചു അപകടം നടന്നിരുന്നു. രണ്ടു ദിവസങ്ങൾ ശേഷമാണ് വൈദ്യുതിവിതരണം പുനസ്ഥാപിച്ചത്. മുൻപ് ഈ സ്ഥലത്ത് നിരവധി തവണ വാഹന അപകടങ്ങൾ നടന്നതിൽ രണ്ടു മരണം വരെ നടന്നിട്ടുണ്ട്. ഈ മരത്തിനു താഴെയായി ഒരു ക്ഷേത്രവും തട്ടുകടയും പ്രവർത്തിച്ചു വരുന്നുണ്ട്. വണ്ടിത്താവളം ഭാഗത്തേക്ക് പോവുന്ന ബസുകൾ നിർത്തു ന്ന സ്ഥലമെന്നതിൽ യാത്രക്കാർ ബസ് കാത്തുനിൽ ക്കുന്നതും അപകടാവസ്ഥയിലുള്ള മരത്തിനു താഴെയാണ്.

മഴക്കെടുതി അവലോകനയോഗം; ഉദ്യോഗസ്ഥർക്ക് മന്ത്രിയുടെ വിമർശനം

ചിറ്റൂർ: നിയോജകമണ്ഡലത്തിൽ ഇത്തവണത്തെ മഴക്കെടുതിയിൽ തകർന്നത് 62 വീടുകൾ ഇതിൽ 59 വീടുകൾ ഭാഗികമായും മൂന്നു വീടുകൾ പൂർണമായും തകർന്നു. മഴക്കെടുതിയിൽ ഒരു മരണവും സംഭവിച്ചു. മീനാക്ഷിപുരം മുത്തുസ്വാമി പുതൂർ സ്വദേശിനി പാർവതിക്കാണ് വീടിന് മുകളിൽ മരംവീണ് ദാരുണാന്ത്യം സംഭവിച്ചത്. മഴക്കെടുതിയിൽ നാശനഷ്ടം സംഭവിച്ചവർക്കും വീടിനുമുകളിൽ മരം വീണ് ജീവൻ നഷ്ടപ്പെട്ട പാർവതിയുടെ കുടുംബത്തിനും ഉടൻ നഷ്ടപരിഹാരം നൽകാനുള്ള നടപടി സ്വീകരിക്കണമെന്ന് ഉദ്യോഗസ്ഥർക്ക് മന്ത്രി കെ കൃഷ്ണൻകുട്ടി നിർദേശം നൽകി. ചിറ്റൂർ നിയോജകമണ്ഡലത്തിൽ മഴക്കെടുതി മൂലമുണ്ടായ നാശനഷ്ടങ്ങൾ ചർച്ച ചെയ്യുന്നതിനായി മന്ത്രിയുടെ നേതൃത്വത്തിൽ റവന്യൂ, കൃഷി, വൈദ്യുതി, അഗ്നിരക്ഷാ സേന, പോലീസ് തുടങ്ങി വിവിധ വകുപ്പ് ഉദ്യോഗസ്ഥരുമായി മിനി സിവിൽ സ്റ്റേഷനിൽ ചേർന്ന യോഗത്തിലാണ് മന്ത്രിയുടെ നിർദേശം. മണ്ഡലത്തിലെ വിവിധ പ്രദേശങ്ങളിൽ കനത്തമഴയിൽ തകർന്ന വൈദ്യുത തൂണുകൾ ഉടൻ പുനസ്ഥാപിക്കുന്നതിനും പട്ടഞ്ചേരി പഞ്ചായത്തിലെ പൂപ്പാറ കനാൽ, നല്ലേപ്പിള്ളി പഞ്ചായത്തിലെ മാട്ടുപ്പെട്ടി കനാൽ എന്നിവ നവീകരിക്കാൻ നടപടി സ്വീകരിക്കണമെന്നും മന്ത്രി ആവശ്യപ്പെട്ടു. പറമ്പിക്കുളം തൂണക്കടവ് ഗ്രൂപ്പിൽ നിന്നും ലഭിക്കാനുള്ള 2.5 ടിഎംസി വെള്ളം നേടിയെടുക്കുന്നതിൽ വീഴ്ച വരുത്തിയ ഉദ്യോഗസ്ഥരെ യോഗത്തിൽ മന്ത്രി ശാസിച്ചു. തഹസിൽദാർ ആനന്ദകുമാർ യോഗത്തിൽ അധ്യക്ഷത വഹിച്ചു. ബ്ലക്ക് പഞ്ചായത്ത് പ്രസിഡന്‍റ് സുജാത, പെരുമാട്ടി പഞ്ചായത്ത് പ്രസിഡന്‍റ് ഷീബ, പെരുമാട്ടി പഞ്ചായത്ത് അംഗം വിനോദ് കുമാർ പങ്കെടുത്തു.

അന്താരാഷ്ട്ര ലഹരിവിരുദ്ധ ദിനാചരണം

പാലക്കാട്: അന്താരാഷ്ട്ര ലഹരി വിരുദ്ധ ദിനാചരണത്തിൽ സർക്കാരിന്‍റെ ലഹരിക്കെതിരെയുള്ള പ്രചാരണ പരിപാടികളുടെ അഞ്ചാംഘട്ട ഉദ്ഘാടനം പാലക്കാട് അഹല്യ ഗ്രൂപ്പ് ഓഫ് അക്കാദമിക് ഇൻസ്റ്റിറ്റ്യൂഷനിൽ എ. പ്രഭാകരൻ എംഎൽഎ നിർവഹിച്ചു. അഹല്യ ഗ്രൂപ്പ് ഓഫ് അക്കാദമിക് ഇൻസ്റ്റിറ്റ്യൂഷൻ ഡയറക്ടർ ഡോ. കൃഷ്ണകുമാർ കിഷോർ അധ്യക്ഷത വഹിച്ച ചടങ്ങിൽ ഡെപ്യൂട്ടി എക്സൈസ് കമ്മീഷണർ പ്രിൻസ് ബാബു സ്വാഗതം പറഞ്ഞു. എലപ്പുള്ളി ഗ്രാമപഞ്ചായത്ത് പ്രസിഡന്‍റ് രേവതി ബാബു, ഫാ. ആൽബർട്ട് ആനന്ദ്ര രാജ്, കസബ സബ് ഇൻസ്പെക്ടർ എച്ച്. ഹർഷാദ്, സ്റ്റേറ്റ് എക്സൈസ് സ്റ്റാഫ് അസോസിയേഷൻ ജില്ലാ സെക്രട്ടറി വി.പി. മഹേഷ്, ലഹരി വർജന ബോധവത്കരണ സമിതി ജില്ലാ പ്രസിഡന്‍റ്് കെ. കാദർ മൊയ്തീൻ, കോ-ഓർഡിനേറ്റർ ഡോ. ശ്രീജിത്ത് എം. നായർ എന്നിവർ ആശംസാപ്രസംഗം നടത്തി. വിമുക്തി മിഷൻ ജില്ലാ കോ-ഓർഡിനേറ്റർ കെ.എസ്. ദൃശ്യ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. അസിസ്റ്റന്‍റ് എക്സൈസ് ഇൻസ്പെക്ടർ എം.എൻ. സുരേഷ് ബാബു വിദ്യാർഥികൾക്ക് ലഹരിവർജന സന്ദേശം നൽകി. എക്സൈസ് ഇൻസ്പെക്ടർ എൻ. സന്തോഷ് നന്ദി പറഞ്ഞു. അഹല്യ ഗ്രൂപ്പ് ഓഫ് അക്കാദമിക് ഇൻസ്റ്റിറ്റ്യൂഷൻസിലെ വിവിധ ഡിപ്പാർട്ട്മെന്‍റുകളിലെ വിദ്യാർഥികളുടെയും എക്സൈസ് ഉദ്യോഗസ്ഥരുടെയും ലഹരിവിരുദ്ധ സന്ദേശം ഉൾക്കൊള്ളിച്ചുകൊണ്ടുള്ള ഫ്ളാഷ് മോബ്, ടാബ്ലോ എന്നിവ അരങ്ങേറി.

ലഹരിവിരുദ്ധ കാൻവാസ്

തത്തമംഗലം: തത്തമംഗലം ജിയുപി സ്കൂളിൽ ലഹരിവിരുദ്ധ കാൻവാസ് ചിത്രകാരൻ രാജേന്ദ്രൻവടക്കേപാടത്തിന്‍റെ നേതൃത്വത്തിൽ 60 അടി നീളവും 12 അടി വീതിയുമുള്ള ലഹരിവിരുദ്ധകാൻവാസ്ഏർപ്പെടുത്തി. പത്ത് ദിവസം അധ്യാപകരും, വിദ്യാർഥികളും നടത്തിയ കൂട്ടായ ശ്രമത്തിന്‍റെ ഫലമായാണ് കാൻവാസ് ഒരുക്കിയത്. ലഹരിപദാർഥങ്ങളുടെ മറ്റുഅടയാളങ്ങളോ ഇല്ലാതെയാണ് ഈ കാൻവാസിലെ ഓരോ ചിത്രങ്ങളും വരച്ചുചേർത്തിട്ടുള്ളത്. സ്കൂളിലെ കുട്ടികളുടെ കലാകായിക പ്രവർത്തനങ്ങളും ഭിന്നശേഷി സൗഹാർദ്ദ ചിത്രങ്ങളും ലഹരിവിരുദ്ധ സന്ദേശങ്ങളും ഉൾക്കൊള്ളിച്ചാണ് രചനകൾ തയാറാക്കിയിരിക്കുന്നത്. അധ്യാപകൻ ടി. തങ്കരാജു ലഹരി വിരുദ്ധദിന കാൻവാസ് ഉദ്ഘാടനം ചെയ്തു.

ലഹരിവിരുദ്ധ ബോധവത്കരണം

പാലക്കാട്: ലോക ലഹരിവിരുദ്ധ ദിനത്തോടനുബന്ധിച്ച് ഭാരതമാത ഹയർസെക്കൻഡറി സ്കൂളിൽ വിവിധ ബോധവത്കരണപരിപാടികൾ നടത്തി. കസബ സ്റ്റേഷൻ എസ്ഐ മനോജ് ബോധവത്കരണക്ലാസ് നടത്തി. പ്രിൻസിപ്പൽ ഫാ. ഫിലിപ്സ് പനയ്ക്കൽ അധ്യക്ഷത വഹിച്ചു. പോലീസ് ഉദ്യോഗസ്ഥരായ സായൂജ്, സജീവ് എന്നിവർ പങ്കെടുത്തു. വിദ്യാർഥി മാധവ് ശങ്കർ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. ലഹരിവിരുദ്ധ സന്ദേശം അടങ്ങിയ പ്ലക്കാർഡുകൾ നിർമിക്കൽ, കിക്ക് ഡ്രഗ്സ് തുടങ്ങിയ പരിപാടികളും നടന്നു.

ലഹരിവിരുദ്ധ കൂട്ടയോട്ടം സംഘടിപ്പിച്ചു

ഒലവക്കോട്: അന്താരാഷ്ട്ര ലഹരിവിരുദ്ധദിനത്തോടനുബന്ധിച്ച് ഒലവക്കോട് എംഇഎസ് ഹയർ സെക്കൻഡറി സ്കൂളും പാലക്കാട് നോർത്ത് പോലീസ് സ്റ്റേഷൻ ജനമൈത്രി പോലീസും സംയുക്തമായി ലഹരിവിരുദ്ധ കൂട്ടയോട്ടം സംഘടിപ്പിച്ചു. ഒലവക്കോട് ജംഗ്ഷൻ റെയിൽവേ സ്റ്റേഷനു മുൻവശത്തു നിന്ന് ആരംഭിച്ച കൂട്ടയോട്ടം ടൗൺ ചുറ്റി സ്കൂൾ ഗ്രൗണ്ടിൽ സമാപിച്ചു. ടൗൺ നോർത്ത് പോലീസ് സർക്കിൾ ഇൻസ്പെക്ടർ വിപിൻ കെ. വേണുഗോപാൽ കൂട്ടയോട്ടം ഫ്ലാഗ് ഓഫ് ചെയ്തു. കൂട്ടയോട്ട സമാപനത്തിൽ വിദ്യാർഥികൾ ലഹരിവിരുദ്ധ പ്രതിജ്ഞ എടുത്തു. ലഹരിവിരുദ്ധ ദിനാചരണങ്ങളോട് അനുബന്ധിച്ച് പോസ്റ്റർ രചന മത്സരം, സ്കിറ്റ് തുടങ്ങി വിവിധ ബോധവത്കരണ പരിപാടികളും അരങ്ങേറി.

സാമൂഹികസുരക്ഷാബോധവത്കരണം

പാലക്കാട്: നിത്യജീവിതത്തിൽ സാമൂഹിക സുരക്ഷയെകുറിച്ച് ജനങ്ങൾ ബോധവാൻമാരാകണമെന്ന് അഡ്വ.വി.എ. റസാക്ക് അഭിപ്രായപ്പെട്ടു. ജെസിഐ എംഎ പ്ലൈ എൻജിഒ സംഘടിപ്പിച്ച മെംബേഴ്സ് മീറ്റിൽ സോഷ്യൽ സെക്യൂരിറ്റിയെ സംബന്ധിച്ച് വിഷയാവതരണം നടത്തുകയായിരുന്നു അദ്ദേഹം. വിവാഹത്തിനു മുൻപ് യുവതി യുവാക്കൾക്ക് പ്രീമാര്യേജ് കൗണ്‍സിലിംഗ് നൽകാൻ ജെസിഐ പോലുള്ള ആഗോള സംഘടനകൾ മുന്നോട്ടുവരണമെന്നും ഭാര്യ-ഭർതൃ ബന്ധങ്ങളിൽ രൂപപ്പെടുന്ന വിള്ളലുകൾ കുറക്കാൻ പ്രീ മാര്യേജ് കൗണ്‍സിലിംഗ് ഏറെ പ്രയോജനപ്പെടും എന്നും അദ്ദേഹം കൂട്ടിച്ചേർത്തു. ചടങ്ങിൽ ജെസിഐ എംഎ പ്ലൈ എൻജിഒ പ്രസിഡന്‍റ് ഡോ. സനു നാരായണൻ അധ്യക്ഷത വഹിച്ചു. ദേശീയ മുൻ കോ-ഓർഡിനേറ്റർ ഹിതേഷ് ജെയിൻ, നിഖിൽ കൊടിയത്തൂർ, സെക്രട്ടറി ഷസീർ അഹമ്മദ്, എ. ബിജു, എ. സെമീറ, ദിയ നിഖിൽ പ്രസംഗിച്ചു.

മലന്പുഴ ഡാം പരിസരത്തെ അനധികൃത ഉൗത്തപിടിത്തം: ഫിഷറീസ് വകുപ്പ് പരിശോധന നടത്തി

പാലക്കാട്: മലന്പുഴ ഡാമിന്‍റെ വൃഷ്ടിപ്രദേശങ്ങളിൽ അനധികൃതമായി ഉൗത്തപിടിത്തം തടയുന്നതിനായി ഫിഷറീസ് വകുപ്പ് രാത്രികാല പട്രോളിംഗ് ശക്തമാക്കി. ശനിയാഴ്ച പുലർച്ചെ നടത്തിയ പരിശോധനയിൽ ഉൗത്തപിടിത്തത്തിൽ ഏർപ്പെട്ടവരിൽ നിന്ന് വലകൾ കണ്ടുകെട്ടുകയും 5000 രൂപ പിഴ ഈടാക്കുകയും ചെയ്തു. കരടിയോട്, കവ, ഒന്നാംപുഴ, മയിലാടിപ്പുഴ തുടങ്ങിയ മലന്പുഴ ഡാമിന്‍റെ വൃഷ്ടി പ്രദേശങ്ങളിലാണ് ഫിഷറീസ് ഉദ്യോഗസ്ഥർ പട്രോളിംഗ് നടത്തിയത്. മലന്പുഴ അസിസ്റ്റന്‍റ് ഫിഷറീസ് എക്സ്റ്റൻഷൻ ഓഫീസർ രഞ്ജിത്ത് കുമാർ, ഫിഷറീസ് ഓഫീസർമാരായ സന്തോഷ് കുമാർ, വേണുഗോപാലൻ, ഓഫീസ് അറ്റൻഡന്‍റ് കൃഷ്ണദാസ്, ഡ്രൈവർ ബിജു എന്നിവരടങ്ങിയ സംഘമാണ് പുലർച്ചെ 2.30 മുതൽ പരിശോധന നടത്തിയത്. കെഐഎഫ്എ നിയമം അനുസരിച്ചാണ് ഉൗത്തപിടിത്തം തടയുന്നതിനുള്ള നടപടികൾ സ്വീകരിച്ചതെന്ന് ഫിഷറീസ് വകുപ്പ് അറിയിച്ചു. പ്രജനന സമയത്ത് മത്സ്യസന്പത്ത് സംരക്ഷിക്കുന്നതിനും ജൈവവൈവിധ്യം നിലനിർത്തുന്നതിനും ഉൗത്തപിടിത്തം തടയേണ്ടത് അത്യാവശ്യമാണ്. ഈ മേഖലകളിൽ അനധികൃത മത്സ്യബന്ധനം ശ്രദ്ധയിൽപ്പെട്ടാൽ അറിയിക്കണമെന്ന് അധികൃതർ അഭ്യർഥിച്ചു.

കാടുകയറിയ ചുരുളിക്കൊന്പൻ തിരിച്ചെത്തി

പാലക്കാട്: ആറങ്ങോട്ട് കുളന്പ് വേനോലി മേഖലയിൽ ഭീതി പടർത്തിയ ചുരുളിക്കൊന്പൻ വീണ്ടും തിരിച്ചെത്തി. കഴിഞ്ഞദിവസമാണ് വനം വകുപ്പ് ഉദ്യോഗസ്ഥർ പടക്കംപൊട്ടിച്ചും മറ്റും കൊന്പനെ കാടുകയറ്റിയത്. പിടി ഫൈവ് എന്ന പേരിൽ അറിയപ്പെടുന്ന ചുരുളിക്കൊന്പൻ വേനോലി മേഖലയിൽ വൻതോതിൽ കൃഷിനാശം വരുത്തിയിരുന്നു. രാത്രിക്കാലത്തുമാത്രമല്ല പട്ടാപ്പകൽ പോലും ജനവാസമേഖലയിൽ തന്പടിച്ചുനിൽക്കുന്നതു ജനങ്ങളുടെ ജീവനും ഭീഷണിയായിരുന്നു. ഇതിനെതുടർന്ന് വനംവകുപ്പ് കാടുകയറ്റിയെങ്കിലും ഇന്നലെ വീണ്ടും തിരിച്ചെത്തിയതോടെ ജനം ഭീതിയിലാണ്. ഇതിനു പുറമെ പുതുശേരി ചുള്ളിമട സ്കൂളിനുസമീപവും കാട്ടാനക്കൂട്ടം എത്തി. പന്ത്രണ്ടോളം ആനകളാണ് ഇവിടെയത്തിയത്. ജനവാസമേഖലയോടു ചേർന്ന വനപ്രദേശത്താണ് ആനകൾ നിലയുറപ്പിച്ചത്. ഈ മാസമാദ്യം ഇതേ കാട്ടാനക്കൂട്ടം പ്രദേശത്ത് എത്തിയിരുന്നു. വനംവകുപ്പ് കാട്ടിലേക്ക് കയറ്റിയെങ്കിലും വീണ്ടും പ്രത്യക്ഷപ്പെട്ടിരിക്കുകയാണ്. കഴിഞ്ഞദിവസം അർധരാത്രി സമയത്ത് അട്ടപ്പാടിയിൽ കാട്ടാന വീടിന്‍റെ ഗേറ്റ് തുറന്ന് മുറ്റത്തുകൂടെ കടന്നുപോകുകയുണ്ടായി.

നെല്ലിയാന്പതിയിൽ കരടി ആക്രമണം: ജാഗ്രതാനിർദേശം

പാലക്കാട്: നെല്ലിയാന്പതിയിൽ കരടിയുടെ ആക്രമണത്തിൽ എസ്റ്റേറ്റ് തൊഴിലാളിക്കു പരിക്കേറ്റതിനെതുടർന്ന് പൊതുജനങ്ങൾക്ക് ജാഗ്രതാ നിർദേശം പുറപ്പെടുവിച്ചു. രാത്രിസമയങ്ങളിൽ പുറത്തിറങ്ങുന്പോൾ കൈയിൽ ടോർച്ച് കരുതണമെന്നും അത്യാവശ്യകാര്യങ്ങൾക്ക് ഒഴികെ രാത്രിസമയങ്ങളിൽ പുറത്തിറങ്ങരുതെന്നും ആരോഗ്യ വകുപ്പും വനംവകുപ്പും പാടഗിരി ജനമൈത്രി പോലീസും നിർദേശം നൽകി. കൂടാതെ വരുംദിവസങ്ങളിൽ സ്കൂൾ അസംബ്ലികളിൽ വിദ്യാർഥികൾക്ക് ബോധവത്കരണ ക്ലാസും ജാഗ്രതാനിർദേശവും നൽകുമെന്നും നെല്ലിയാന്പതി ഹെൽത്ത് ഇൻസ്പെക്ടർ ജെ. ആരോഗ്യം ജോയ്സണ്‍ അറിയിച്ചു.

ഒറ്റപ്പാലം- ചെർപ്പുളശേരി റോഡ് തകർച്ച: സർവീസ് നിർത്തുമെന്നു സ്വകാര്യബസുകൾ

ഒറ്റപ്പാലം: ഒറ്റപ്പാലം- ചെർപ്പുളശേരി റോഡ് തകർച്ച പരിഹരിച്ചില്ലെങ്കിൽ സർവീസ്‌ നിർത്തിവയ്ക്കാൻ സ്വകാര്യബസ് സംഘടനകൾ തീരുമാനിച്ചു. കുലുങ്ങിയും കുടുങ്ങിയും പാതാള ഗർത്തങ്ങളിൽപ്പെട്ട് അപകടത്തിൽ ചാടിയും നടുവൊടിക്കും ദുരിതയാത്ര തുടരേണ്ടതില്ലന്നാണ് ബസ് സർവീസ് സംഘടനകളുടെ കൂട്ടായ തീരുമാനം. വലിയതോതിൽ ഇന്ധനച്ചെലവും തേയ്മാനങ്ങളും ബസുകൾക്കു കേടുപാടുകൾ സംഭവിക്കുന്നതു മൂലമുള്ള സാമ്പത്തിക നഷ്ടവുമെല്ലാം സഹിക്കാൻ കഴിയാത്ത സ്ഥിതിയാണെന്നാണ് ആക്ഷേപം. റോഡ് നവീകരണം കാര്യക്ഷമമായി നടപ്പാക്കുമെന്ന പ്രഖ്യാപനം പാലിക്കപ്പെടാത്ത സ്ഥിതിയാണ്. മുമ്പ് ഒരുഭാഗത്ത് പണി തുടങ്ങിയിരുന്നു. എന്നാൽ ഇതുവരെ നവീകരണം കാര്യക്ഷമമാക്കാൻ കഴിഞ്ഞിട്ടില്ല. മഴക്കാലമായതോടെ ഇതുവഴിയുള്ള യാത്ര ഏറെ ബുദ്ധിമുട്ട് നിറഞ്ഞതുമായി. ഈ പാതയിൽ യാത്രക്കാർക്ക് ലഭിക്കുന്നത് ദുരിതം മാത്രമാണ്. ആംബുലൻസടക്കം റോഡിൽ കുടുങ്ങുന്നുണ്ട്. ചെർപ്പുളശേരി മുതൽ കീഴൂർ റോഡ് വരെയുള്ള ഭാഗത്താണ് ഒന്നാംഘട്ട നിർമാണം തുടങ്ങിയിരുന്നത്. എന്നാൽ ഇഴഞ്ഞിഴഞ്ഞാണ് നിർമാണം തുടരുന്നത്. രണ്ടുപദ്ധതികളിലായി കിഫ്ബിയിൽ നിന്നും 83 കോടി രൂപ ചെലവഴിച്ചാണ് റോഡ് നവീകരിക്കുന്നതിനു തീരുമാനിച്ചത്. 17 കിലോമീറ്ററുള്ള റോഡിൽ തൃക്കടീരി മുതൽ ചെർപ്പുളശേരി വരെയുള്ള ആറുകിലോമീറ്റർ നവീകരണം പൂർത്തിയായിട്ടുണ്ട്. എന്നാൽ ഈ ഭാഗത്തും റോഡ് തകർന്നു തുടങ്ങിയിട്ടുണ്ട്. അതേസമയം മഴക്കാലം ശക്തമായതോടെ ഇനി റോഡ് നിർമാണം നടക്കുമോ എന്നകാര്യം കണ്ടറിയണം.

അതിഥിത്തൊഴിലാളി ക്യാന്പുകളിൽ പരിശോധന നടത്തി

പാലക്കാട്: ജില്ലയിൽ അതിഥി തൊഴിലാളികളുടെ ക്യാന്പുകളിൽ തൊഴിൽ വകുപ്പും പോലീസും സംയുക്തമായി കെട്ടിടങ്ങളുടെ സുരക്ഷിതാവസ്ഥ സംബന്ധിച്ച് പരിശോധന നടത്തി. ജില്ലാ ലേബർ ഓഫീസറുടെ (എൻഫോഴ്സ്മെന്‍റ്) ചുമതലയുള്ള എം.പി പ്രഭാത് പരിശോധനയ്ക്ക് നേതൃത്വം നൽകി. വരും ദിവസങ്ങളിലും പരിശോധന ഉണ്ടായിരിക്കുമെന്ന് അദ്ദേഹം അറിയിച്ചു. അറ്റകുറ്റപ്പണികൾ നടത്താത്ത കെട്ടിടങ്ങളിൽ നിന്നും തൊഴിലാളികളെ മാറ്റിപാർപ്പിക്കുന്നതിനും, അറ്റകുറ്റപ്പണികൾ നടത്താനും നിർദേശം നൽകി. അസിസ്റ്റന്‍റ് ലേബർ ഓഫീസർമാരായ എ.കെ. വിജുല (പാലക്കാട് ഒന്നാം സർക്കിൾ), നൂർജഹാൻ (പാലക്കാട് രണ്ടാം സർക്കിൾ), സിവിൽ പോലീസ് ഓഫീസർ സമീർ (പാലക്കാട് നോർത്ത് പോലീസ് സ്റ്റേഷൻ) എന്നിവർ പരിശോധനയിൽ പങ്കെടുത്തു.

അസീസിയ ഹോസ്പിറ്റലിൽ ഫൈബ്രോസ്കാൻ ക്യാമ്പ് നടത്തി

ആലത്തൂർ: അസീസിയ ആശുപത്രിയിൽ ഫൈബ്രോസ്കാൻ ആരോഗ്യ പരിശോധാക്യാമ്പ് സംഘടിപ്പിച്ചു. നൂതന സാങ്കേതികവിദ്യ ഉപയോഗിച്ചുള്ള ഫൈബ്രോ സ്കാൻ കരളിന്‍റെ ഫൈബ്രോസിസ് നില കണ്ടെത്തുന്നു. ഇതിലൂടെ ആരോഗ്യപ്രശ്നങ്ങൾ നേരത്തേ കണ്ടെത്താനും തക്കതായ ചികിത്സ ഉറപ്പാക്കാനും സാധിക്കുമെന്ന് അസീസിയ ഹോസ്പിറ്റൽ മാനേജിംഗ് ഡയ റക്ടർ ഡോ. ഹാഷിം അസീസ് പറഞ്ഞു. നൂറോളംപേർ ക്യാന്പിൽ പങ്കെടുത്തു.

തോൾവേദനചികിത്സയിൽ അപൂർവനേട്ടവുമായി പി.കെ. ദാസ് മെഡിക്കൽ കോളജ്

വാണിയംകുളം: 70 വയസുകാരനായ ഉസ്മാന് പുതുജീവിതം പകർന്ന് അപൂർവ ശസ്ത്രക്രിയയിലൂടെ വാണിയംകുളം പി.കെ. ദാസ് മെഡിക്കൽ കോളജ്. 15 വർഷത്തിലധികമായി ജീവിതം ദുസഹമാക്കിയിരുന്ന കടുത്ത തോൾവേദന ഇന്നില്ല. ജില്ലയിൽ തന്നെ അപൂർവമായ റിവേഴ്സ് ഷോൾഡർ ആർത്രോപ്ലാസ്റ്റി എന്ന ശസ്ത്രക്രിയയാണ് ഉസ്മാന് നടത്തിയത്. ഇടതു തോളിൽ അതിശക്തമായ വേദനയായിരുന്നു പ്രവാസിയായ ഉസ്മാന്. ഒട്ടേറെ ആശുപത്രികളിൽ ധാരാളം ചികിൽസകൾ നടത്തി. തുടർന്നാണ് വാണിയംകുളം പി.കെ. ദാസ് ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിൽ എത്തിയത്. സീനിയർ ഓർത്തോപീഡിക് സർജൻ ഡോ. അബ്ദുൾ റഷീമിന്‍റെ നേതൃത്വത്തിൽ വിദഗ്ദസംഘം പരിശോധിച്ചു. തോളിന്‍റെ തേയ്മാനം രൂക്ഷമായതിനാൽ ശസ്ത്രക്രിയ കൂടാതെ പ്രശ്നം പരിഹരിക്കാനാവില്ലെന്ന് ബോധ്യമായി. അപൂർവമായ റിവേഴ്സ് ഷോൾഡർ ആർത്രോപ്ലാസ്റ്റി ശസ്ത്രക്രിയ നടത്തി പ്രശ്നം പരിഹരിച്ചു. ഡോ. അബ്ദുൾ റഷീമിന് പുറമെ, ഓർത്തോപീഡിക് സർജൻമാരായ ഡോ. പ്രണവ്, ഡോ. സക്കറിയ എന്നിവരും ശസ്ത്രക്രിയ സംഘത്തിൽ ഉണ്ടായിരുന്നു. തോൾ മാറ്റിവെക്കലിലെ സാധാരണ രീതിയിൽ നിന്ന് ഭിന്നമായി റിവേഴ്സ് ഷോൾഡർ ആർത്രോപ്ലാസ്റ്റിയിൽ രോഗിക്ക് വളരെ വേഗം സുഖം പ്രാപിക്കാനും കൈ സാധാരണ പോലെ മുകളിലേക്ക് ഉയർത്താനും കഴിയുമെന്ന് ഡോ. അബ്ദുൽ റഷീം പറഞ്ഞു. കൃത്യമായ ഫിസിയോ തെറാപ്പി കൂടി ഉണ്ടെങ്കിൽ മൂന്നാഴ്ചക്കകം തന്നെ സാധാരണ ജീവിതം സാധ്യമാകുകയും ചെയ്യും.

സിടിഎംഎ ഉത്സവ് 2025ന് ഇന്നു തിരശീല ഉയരും

കോയന്പത്തൂർ: സിടിഎംഎ ഉത്സവ് -2025ന് ഇന്ന് തിരശീല ഉയരും. തമിഴ്നാട്ടിലെ പ്രവാസി മലയാളികൾക്കായി കോൺഫെഡറേഷൻ ഓഫ് തമിഴ്നാട് മലയാളി അസോസിയേഷൻസ് (സിടിഎംഎ ) സംഘടിപ്പിക്കുന്ന കലോത്സവമായ ഉത്സവ് - 2025 ന്‍റെ പതിമൂന്നാം അധ്യായത്തിനാണ് ഇന്ന് രാവിലെ 9 ന് ചെന്നൈയിലും കോയമ്പത്തൂരിലും തുടക്കം കുറിക്കുന്നത്. സബ് ജൂണിയർ, ജൂണിയർ, സീനിയർ, സൂപ്പർ സീനിയർ വിഭാഗങ്ങളിലായി ചിത്ര രചന, കയ്യെഴുത്ത്, ഉപന്യാസം, കഥ, കവിതരചനാ മത്സരങ്ങളാണ് നടക്കുക. ശിവാനന്ദ കോളനിയിലുള്ള കോയമ്പത്തൂർ കേരള സമാജത്തിലാണ് മത്സരവേദി ഒരുക്കിയിരിക്കുന്നത്. രാവിലെ 9 ന് സിടിഎംഎ പേട്രനും മുൻ പ്രസിഡന്‍റുമായ എം.കെ. സോമൻ മാത്യു മുഖ്യാതിഥിയായി പങ്കെടുത്ത് പരിപാടി ഉദ്ഘാടനം ചെയ്യും. ബാബു നിലയത്തിങ്ങൽ, കോറൽ വിശ്വനാഥൻ, എം.സി. തോമസ്, ജോർജ് ആന്‍റണി യേശുദാസ് എന്നിവർ വിശിഷ്ടാതിഥികളായി ചടങ്ങിൽ സംബന്ധിക്കും. ജൂലൈ 12, 13 ദിവസങ്ങളിലായി ചെന്നെ മുഗപ്പേറിലുള്ള മാർ ഗ്രിഗോറിയസ് കോളജ് മൈതാനത്ത് തയ്യാറാക്കിയ പ്രത്യേക വേദികളിലാണ് കലാമത്സരങ്ങൾ അരങ്ങേറുന്നത്. 1600ൽ അധികം മത്സരാർഥികൾ കലാമത്സരങ്ങൾക്കായി പേര് രജിസ്റ്റർ ചെയ്തിട്ടുണ്ട്.

കൃഷിനാശം സംഭവിച്ച കർഷകർക്കു കാലാവസ്ഥാ ഇൻഷ്വറൻസ് പരിരക്ഷ നൽകണം: എൻസിപി

നെന്മാറ: എൻസിപി നെന്മാറ നിയോജകമണ്ഡലം കൺവൻഷൻ ചേർന്നു. അമിത മഴയിൽ കൃഷിനാശം സംഭവിച്ച കർഷകർക്ക് കാലാവസ്ഥാ ഇൻഷ്വറൻസ് പ്രകാരം നഷ്ടപരിഹാരം നൽകണമെന്ന് യോഗം ആവശ്യപ്പെട്ടു. ദേശീയപതാക മാറ്റി കാവി കൊടിയാക്കണമെന്ന ബിജെപി നേതാവിന്‍റെ പ്രസ്താവനക്കെതിരെ യോഗം പ്രതിഷേധം രേഖപ്പെടുത്തി. തദ്ദേശ സ്വയംഭരണ തെരഞ്ഞെടുപ്പിൽ എൻസിപി സ്വീകരിക്കേണ്ട മുന്നൊരുക്കങ്ങളെപറ്റി യോഗം ചർച്ച ചെയ്തു. നെന്മാറ നിയോജകമണ്ഡലം കൺവൻഷൻ എൻസിപി ജില്ലാ ട്രഷറർ എം.എൻ. സൈബുദ്ദീൻ കിച്ച് ലു ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് പി.ടി. ഉണ്ണികൃഷ്ണൻ അധ്യക്ഷനായ യോഗത്തിൽ ജില്ലാ സെക്രട്ടറി കെ.എസ്. രാജഗോപാലൻ, എസ്.ജെ. എൻ. നജീബ്, എം. മുഹമ്മദ് ഇബ്രാഹിം, പാർവതി, സുരേഷ് ബാബു, ആർ. സ്വാമിനാഥൻ, അബ്ദുൾ റഹ്മാൻ പുതുനഗരം എന്നിവർ പ്രസംഗിച്ചു.

ശ്വാസതടസമുണ്ടായ വയോധിക ചികിത്സയ്ക്കിടെ മരിച്ചു

പുതുനഗരം: ശ്വാസതടമുണ്ടായി ചികിത്സക്കായി കൊടുവായൂർ കുടുംബാരോഗ്യ കേന്ദ്രത്തിലും പിന്നീട് ജില്ലാ ആശുപത്രിയിലുമെത്തിച്ച വയോധിക മരിച്ചു. പുതുനഗരം കരിപ്പോട് കൃഷ്ണന്‍റെ ഭാര്യ മണി (65) ആണ് മരിച്ചത്. ഇന്നലെ രാവിലെ 8.30നായിരുന്നു അസുഖമുണ്ടായത്. പോസ്റ്റുമോർട്ടത്തിനുശേഷം മൃതദേഹം ബന്ധുക്കൾക്ക് വിട്ടുകൊടുത്തു. മക്കൾ: ശരവണൻ, സന്തോഷ്, ശരണ്യ, സന്ധ്യ, സംഗീത. മരുമക്കൾ: മിനി, ബിജു, ഷിജു.

വയൽവരമ്പിൽ കുഴഞ്ഞുവീണയാൾ മരിച്ചു

പുതുനഗരം: വയൽവരമ്പിൽ കുഴഞ്ഞു വീണനിലയിൽ കണ്ടെത്തി ജില്ലാ ആശുപത്രിയിലെത്തിച്ചയാൾ മരിച്ചു. കാക്കയൂർ ഇറക്കത്തിൽക്കുഴി പരേതനായ കണ്ടമുത്തുവിന്‍റെ മകൻ മോഹനൻ(50) ആണ് മരിച്ചത്. ഇന്നലെ രാവിലെ 10ന് നാട്ടുകാരാണ് മോഹനനെ വയൽവരമ്പിൽ കണ്ടെത്തി ആശുപത്രിയിൽ എത്തിച്ചത്. പുതുനഗരം പോലീസ് മൃതദേഹം ഇൻക്വസ്റ്റിനുശേഷം പോസ്റ്റ്മോർട്ടം നടത്തി ബന്ധുക്കൾക്ക് വിട്ടുകൊടുത്തു.

മുടപ്പല്ലൂർ ടൗൺ റോഡിൽ വാഴനട്ടു പ്രതിഷേധം

വടക്കഞ്ചേരി: കോൺഗ്രസ് വണ്ടാഴി മണ്ഡലം കമ്മിറ്റിയുടെ നേതൃത്വത്തിൽ മംഗലം- ഗോവിന്ദാപുരം റോഡിലെ മുടപ്പല്ലൂർ ടൗണിൽ കുഴികൾ അപകടകരമാവുംവിധം രൂപപ്പെട്ടതിനെ തുടർന്ന് വാഴവച്ച് പ്രതിഷേധിച്ചു. കഴിഞ്ഞദിവസം വണ്ടാഴിയിൽ വാഴവച്ച് പ്രതിഷേധിച്ചതിനെ തടയാൻ ശ്രമിച്ച സിപിഎം പ്രവർത്തകർക്കെതിരായുള്ള പ്രതിഷേധം കൂടിയായിരുന്നു സമരം. ആലത്തൂർ ബ്ലോക്ക്‌ കോൺഗ്രസ് വൈസ് പ്രസിഡന്‍റ് അരവിന്ദാക്ഷൻ മാസ്റ്റർ ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് കെ. എം. ശശീന്ദ്രൻ, ഡിസിസി മെംബർ കെ. രാമകൃഷ്ണൻ, ബ്ലോക്ക്‌ കോൺഗ്രസ് സെക്രട്ടറിമാരായ എം. സുരേഷ്‌കുമാർ, പ്രമോദ് തണ്ടലോട്, ഗഫൂർ മുടപ്പല്ലൂർ നേതൃത്വം നൽകി.

അട്ടപ്പാടിയിൽ ഭീതിപരത്തി കാട്ടാനയും പുലിയും

അഗളി: ശക്തമായ മഴതുടരുന്ന അട്ടപ്പാടിയിൽ ഭീതിവിതച്ച് കാട്ടാനയും പുലിയും. ജെല്ലിപ്പാറയിൽ കുരിശുപള്ളിക്കുസമീപം വ്യാഴാഴ്ച രാത്രി എട്ടുമണിയോടെ പുലിയെകണ്ടു എന്ന വാർത്തയാണ് ജനങ്ങളെ ഭീതിയിലാഴ്ത്തിയത്. ബൈക്ക് യാത്രികനാണു റോഡിൽ പുലിയെ കണ്ടത്. സംഭവമറിഞ്ഞ ഉടൻ വനപാലകരെത്തി പ്രദേശത്ത് പരിശോധന നടത്തിയെങ്കിലും പുലിയെ കണ്ടെത്താനായില്ല. രണ്ടാഴ്ച മുൻപ് ധോണിഗുണ്ട് മരപ്പാലത്ത് രണ്ടാളുകളെ പുലി പിടിച്ചിരുന്നു. പുലിയുടെ സാന്നിധ്യം അന്ന് വനപാലകർ സ്ഥിരീകരിക്കുകയുണ്ടായി. കൂടാതെ പുലിയെ കണ്ട ദൃക്സാക്ഷികളും ദോണിഗുണ്ടിലുണ്ട്. ഇതിനുപുറമേയാണ് ജെല്ലിപ്പാറ മഞ്ഞച്ചോല പ്രദേശങ്ങളിലും കുറവൻപാടി പുലിയറ, കട്ടേക്കാട്, പോത്തുപാടി, മൂച്ചിക്കടവ് പ്രദേശങ്ങളിൽ കാട്ടാനകൾ സ്വൈരവിഹാരം. മഞ്ഞച്ചോല വനമേഖലയിൽ തമ്പടിക്കുന്ന കാട്ടാനകൾ ജനവാസ കേന്ദ്രത്തിൽ വൻനാശം വിതയ്ക്കുകയാണ്. കനത്ത മഴയെ തുടർന്ന് പല ദിവസങ്ങളിലും വൈദ്യുതിയില്ലാത്ത സ്ഥിതിയാണിവിടെ. കാട്ടാന ഏതുസമയം വീട്ടിലെത്തുമെന്ന ഭയപ്പാടിലാണു മലയോര കർഷകർ. ഇന്നലെ മഞ്ഞചോലയിൽ വനംവകുപ്പും ആർആർടി സംഘവും നാട്ടുകാരുമടക്കം നൂറോളംപേർ ചേർന്ന് കാട്ടാനയെ തുരത്താൻ ശ്രമിച്ചെങ്കിലും പരാജയപ്പെടുകയായിരുന്നു. മൂന്നു കൊമ്പനാനകളാണ് ഇവിടെ ഭീതി വിതയ്ക്കുന്നതെന്ന് ഫോറസ്റ്റ് അധികൃതർ പറഞ്ഞു. ഇന്നലെ രാത്രിയും ആർ ആർ ടി സംഘവും ഫോറസ്റ്റ് ഉദ്യോഗസ്ഥരും മഞ്ഞച്ചോല പ്രദേശത്ത് തമ്പടിച്ചിരുന്നു. കുറുവമ്പാടി, ഉണ്ണിമല, ആട്ടപ്പാട്ടുമല, പുലിയറ, കട്ടേക്കാട് പ്രദേശങ്ങളിലും ആനശല്യം അതിരൂക്ഷമാണ്. കഴിഞ്ഞദിവസം കുറവൻപാടി സെന്‍റ് സെബാസ്റ്റ്യൻ ദേവാലയത്തിനു സമീപത്തെ തെങ്ങ് കാട്ടാന കുത്തിമറിച്ചു. പുലിയറയിൽ മണിമല നിരപ്പിൽ മീനാക്ഷിയുടെ ആറു തെങ്ങുകൾ തകർത്തു.

നഗരസഭയുടെ എംസിഎഫ് സ്ഥാപനം വൃത്തിഹീനം; പോലീസ് പരിശോധന

മണ്ണാർക്കാട്: പ്ലാസ്റ്റിക് മാലിന്യങ്ങൾ സംസ്കരിക്കുന്ന മണ്ണാർക്കാട് നഗരസഭയുടെ കീഴിലുള്ള എംസിഎഫ് സ്ഥാപനം മാനദണ്ഡങ്ങൾ പാലിക്കാതെയും മതിയായ സുരക്ഷാക്രമീകരണങ്ങൾ ഇല്ലാതെയുമാണ് പ്രവർത്തിക്കുന്നതെന്ന പരാതിയിൽ മണ്ണാർക്കാട് പോലീസ് പരിശോധന നടത്തി. മണ്ണാർക്കാട് മുൻസിപ്പൽ ബസ് സ്റ്റാൻഡിനോടുചേർന്ന് കോമ്പൗണ്ട് മതിൽ കെട്ടാതെയും ഫയർ ആൻഡ് സേഫ്റ്റിയുടെ അനുമതി വാങ്ങാതെയും പ്ലാസ്റ്റിക് മാലിന്യങ്ങൾ കൂട്ടിയിട്ട് മഴവെള്ളമിറങ്ങി വൃത്തിഹീനമായാണ് പ്രവർത്തിക്കുന്നതെന്നായിരുന്നു പരാതി. പ്ലാസ്റ്റിക് മാലിന്യങ്ങൾ ശരിയായ രീതിയിൽ കൈകാര്യം ചെയ്യാത്തതിനു പൊതുജനങ്ങൾക്കു പിഴചുമത്തുന്ന നഗരസഭ എംസിഎഫിന്‍റെ നിയമപരമല്ലാത്ത പ്രവൃത്തികൾക്ക് സ്വയംപിഴ അടക്കേണ്ടി വരുമോയെന്ന ആക്ഷേപമാണുയരുന്നത്.

കാളാണ്ടിത്തറയില്‍ വീട് തകര്‍ന്നുവീണു; വയോധിക രക്ഷപ്പെട്ടതു തലനാരിഴയ്ക്ക്

പാലക്കാട്: പുതുശ്ശേരി പത്തൊമ്പതാം വാര്‍ഡ് കാളാണ്ടിത്തറയില്‍ വീട് തകര്‍ന്നുവീണു. വയോധിക രക്ഷപ്പെട്ടതു തലനാരിഴക്ക്. ഇന്നലെ രാവിലെയാണ് അപകടമുണ്ടായത്. കാളാടിത്തറയില്‍ പരേതനായ അയ്യപ്പന്‍റെ ഭാര്യ കല്യാണിയുടെ വീടാണ് തകര്‍ന്നുവീണത്. കല്യാണി ഭക്ഷണം കഴിക്കാനായി മകള്‍ സുധയുടെ വീട്ടിലേക്കുപോയ സമയത്താണ് ഇവര്‍ തനിച്ചുതാമസിച്ചിരുന്ന വീടു വീണത്. പഴയ ഓടിട്ട വീടാണിത്. സ്ഥലത്ത് പഞ്ചായത്ത് ഉപാധ്യക്ഷന്‍ കെ. അജീഷ്, വാര്‍ഡ് മെംബര്‍ എം. കൃഷ്ണനുണ്ണിയും സന്ദര്‍ശിച്ചു. ഇവര്‍ക്ക് വീടു നിര്‍മിച്ചു നല്‍കാന്‍ നേരത്തെ പ്രധാന്‍ മന്ത്രി ആവാസ് യോജന ഭവനരഹിത പദ്ധതി പ്രകാരം അപേക്ഷ നല്‍കിയിട്ടുണ്ടെന്നു എം. കൃഷ്ണനുണ്ണി അറിയിച്ചു.

ഒമ്പതിന കർമപദ്ധതികളുമായി റോട്ടറി ക്ലബ് ഓഫ് വടക്കഞ്ചേരി

വടക്കഞ്ചേരി: ബിസിനസ് കോൺക്ലേവ്, വനിതകൾക്ക് വൊക്കേഷനൽ ട്രെയ്നിംഗ് സെന്‍ററുകൾ തുടങ്ങി നൂതന പദ്ധതികളുമായി റോട്ടറി ക്ലബ് ഓഫ് വടക്കഞ്ചേരി ഈ വർഷം ഒമ്പതിന പരിപാടികൾ നടപ്പിലാക്കുമെന്നു ഭാരവാഹികൾ പത്രസമ്മേളനത്തിൽ അറിയിച്ചു. 10 വനിതകൾ ഉൾപ്പെടുന്ന തയ്യൽ കേന്ദ്രങ്ങളാണ് ആരംഭിക്കുക. കോയമ്പത്തൂർ ആലം, ആകൃതി എന്നീ റോട്ടറി ക്ലബുകളുടെ സഹകരണത്തോടെയാണ് ഇതു നടപ്പിലാക്കുന്നത്. വടക്കഞ്ചേരി മേഖലയിലെ ആശുപത്രികളിൽ ഡയാലിസിസ് യൂണിറ്റുകൾ ആരംഭിക്കുന്നതിനായി അരക്കോടി രൂപയുടെ പ്രോജക്ടും ആവിഷ്കരിച്ചിട്ടുണ്ട്. കുട്ടികൾക്കുള്ള സൗജന്യഹൃദയ ശസ്ത്രക്രിയ, തീപ്പൊള്ളൽ മൂലം ആവശ്യമായി വരുന്ന ത്വക്ക് മാറ്റിവക്കൽ ശസ്ത്രക്രിയ, കൃത്രിമ കാൽമാറ്റിവക്കലിനും ഭവനനിർമാണ പദ്ധതികൾക്കും മുൻഗണന നൽകും. ലഹരിക്കെതിരെയുള്ള കാമ്പയിനുകൾ കൂടുതൽ സ്ഥലങ്ങളിൽ സംഘടിപ്പിക്കും. ആശുപത്രികളിൽ കഴിയുന്ന രോഗികൾക്കു സൗജന്യ ഭക്ഷണം വിതരണ പദ്ധതിക്കും തുടക്കം കുറിക്കും. വ്യത്യസ്ത മേഖലകളിൽ മികവു തെളിയിക്കുന്ന വിദ്യാർഥികൾക്ക് സ്കോളർഷിപ്പ് നൽകി അവരുടെ ഭാവി സുരക്ഷിതമാക്കും. പഴയകാല സാംസ്കാരിക നായകന്മാരെ ആദരിക്കുമെന്നും പാവപ്പെട്ട കുടുംബങ്ങളിലെ കുട്ടികൾ പഠിക്കുന്ന സ്കൂളുകൾ ദത്തെടുത്ത് അവർക്കാവശ്യമായ പഠന സൗകര്യങ്ങൾ ഒരുക്കുമെന്നും ഭാരവാഹികൾ അറിയിച്ചു. പുതിയ ഭാരവാഹികളുടെ സ്ഥാനാരോഹണ ചടങ്ങ് ഇന്നു നടക്കും. രാത്രി ഏഴരക്ക് ഡയാന ടവറിൽ നടക്കുന്ന പരിപാടിയിൽ പിന്നണിഗായകൻ പ്രദീപ് സോമസുന്ദരൻ മുഖ്യാതിഥിയാകും. റോട്ടറി ഡിസ്ട്രിക്ട് ഡയറക്ടർ മനോജ് മുടപ്പാല, അസിസ്റ്റന്‍റ് ഗവർണർ കെ. എസ്. സുധീർ, ജിജിആർ അഭിലാഷ് കല്ലടിക്കോട്, ശിവദാസ് തച്ചക്കോട്, കെ.എസ്. ബാബുരാജ്, ആർ. സുരേഷ് തുടങ്ങിയവർ പങ്കെടുക്കും. വിദ്യാർഥികൾക്കുള്ള അവാർഡ് വിതരണവും റോട്ടറി വാർത്താ സപ്ലിമെന്‍റുകളുടെ പ്രകാശനവും തദവസരത്തിൽ നടക്കും. ആർ. സുരേന്ദ്രൻ- പ്രസിഡന്‍റ് , വി. രവി- സെക്രട്ടറി, പി. ചന്ദ്രബോസ്- ട്രഷറർ എന്നിവരാണ് പുതിയ ഭാരവാഹികളായി സ്ഥാനമേൽക്കുന്നത്.

ഇരുകരയുംമുട്ടി ഭാരതപ്പുഴ

ഒറ്റപ്പാലം: മഴക്കാലത്തിനുമുമ്പ് തടയണകൾ തുറന്നുവിട്ടില്ല, ഭാരതപ്പുഴയുടെ പരിസരപ്രദേശങ്ങൾ വെള്ളപ്പൊക്ക ഭീഷണിയിൽ. കാലവർഷം കനക്കുകയും, മലമ്പുഴഡാം തുറക്കുകയും ചെയ്തതോടെ ഭാരതപ്പുഴ ഇരുകരകളും കവിഞ്ഞൊഴുകുവാൻ തുടങ്ങി. നാലുദിവസങ്ങളിലായി തുടർച്ചയായി പെയ്ത മഴയിലാണ് ഭാരതപ്പുഴയുടെ ഇരുകരകളുംമുട്ടി വെള്ളംഒഴുകാൻ തുടങ്ങിയത്. ഡാംകൂടി തുറന്നതോടെ വെള്ളത്തിന്‍റെ ഒഴുക്ക് പതിമടങ്ങ് ശക്തിയായിട്ടുണ്ട്. ഭാരതപ്പുഴയുടെ തീരത്തുള്ളവർ ജാഗ്രത പാലിക്കണമെന്നാവശ്യപ്പെട്ട് ഒറ്റപ്പാലം നഗരസഭ മൈക്ക് പ്രചരണം നടത്തി. ഭാരതപ്പുഴയിലെ തടയണകളെല്ലാം നിറഞ്ഞുകവിഞ്ഞ് ഒഴുകുകയാണ്. വർഷകാലത്തിനുമുമ്പ് തടയണകൾ തുറന്നുവിട്ടിരുന്നുവെങ്കിൽ വെള്ളത്തിന്‍റെ പ്രവാഹം കുറയ്ക്കാൻ കഴിയുമായിരുന്നു. ഇതിനൊപ്പം തടയണയിൽ അടിഞ്ഞു കൂടിയിട്ടുള്ള ചെളിയും മണ്ണും മണലും മറ്റു മാലിന്യങ്ങളും ഒഴുക്കിവിടാനും കഴിയുമായിരുന്നു. പാലപ്പുറം മീറ്റ്ന ശ്രീരാമകൃഷ്ണാശ്രമത്തിനു സമീപമത്തെ തടയണയുടെ വൃഷ്ടിപ്രദേശം ഇപ്പോൾതന്നെ വെള്ളത്തിനടിയിലാണ്. ലക്കിടി തടയണ പ്രദേശങ്ങളും വെള്ളപ്പൊക്ക ഭീഷണിയിലാണ്. ഷൊർണൂർ പഴയ കൊച്ചിൻപാലം പുഴയിലേക്കു കൂപ്പുകുത്തി നിൽക്കുന്ന അവസ്ഥയിലാണ് . ഏതുനിമിഷവും ഇതുപൂർണമായി പുഴയിലേക്കു വീഴും. കൊച്ചിൻ പാലത്തിൽ നിന്നും നൂറുമീറ്റർമാത്രം അകലെ സ്ഥിതിചെയ്യുന്ന ഭാരതപ്പുഴയിലെ തടയണയുടെ ഷട്ടറുകൾ തുറക്കണമെന്ന ആവശ്യം ശക്തമാണ്. എന്നാൽ ഇനി ഇതിനുകഴിയില്ല. തടയണ പൂർണമായും മണൽവന്ന് നിറഞ്ഞ അവസ്ഥയിലാണുള്ളത്.

മംഗലം- ഗോവിന്ദാപുരം പാതയിലെ വലിയ കുഴികൾ തത്കാലം മൂടി

വടക്കഞ്ചേരി: മംഗലം- ഗോവിന്ദാപുരം സംസ്ഥാനപാതയിൽ വലിയ കിടങ്ങുകളായി മാറിയ കുഴികൾ തത്കാലം മൂടി. ഇന്നലെ ഉച്ചയ്ക്ക് മഴമാറിനിന്ന സമയത്തായിരുന്നു മെറ്റൽ മിശ്രിതം ഉപയോഗിച്ചുള്ള കുഴിമൂടൽ ചടങ്ങ് നടന്നത്. ഇന്നലെ പകൽ മഴശല്യമില്ലാതിരുന്നതിനാൽ മൂടിയ കുഴികൾക്ക് ഏതാനും ദിവസത്തെ ആയുസുണ്ടാകുമെന്നാണു പ്രതീക്ഷിക്കുന്നത്. മംഗലം പാലത്തിനടുത്ത് ബൈപാസ് ജംഗ്ഷനിലും ഹീറോ ഷോറൂമിനുമുന്നിലും വള്ളിയോട് തേവർകാട് കൺവൻഷൻ സെന്‍ററിനു മുന്നിലുമായിരുന്നു അപായകരമായ കുഴികളുണ്ടായിരുന്നത്. മറ്റു ഭാഗങ്ങളിലും നിറയെ കുഴികളുണ്ടെങ്കിലും കിടങ്ങുകളായിട്ടില്ല. വാഹനങ്ങൾക്ക് ഇറങ്ങിക്കയറി പോകാവുന്ന കുഴികളാണ് അവിടെയെല്ലാം. കിടങ്ങുകളായ കുഴികളുടെ അപകടാവസ്ഥയെക്കുറിച്ച് കഴിഞ്ഞ രണ്ടുദിവസം ദീപികയിൽ വാർത്ത പ്രസിദ്ധീകരിച്ചിരുന്നു. തുടർന്നാണ് അധികൃതർ കണ്ണു തുറന്നത്. മഴ വിട്ടുനിന്നാൽ ടാർ ഉപയോഗിച്ച് ഓട്ടയടക്കൽ നടത്തുമെന്നാണു അധികൃതർ പറയുന്നത്. കേന്ദ്രസർക്കാരിന്‍റെ ഭാരത്‌മാല പദ്ധതിയിൽ ഉൾപ്പെടുത്തി റോഡ് നാലുവരിയായി നവീകരണത്തിന് പദ്ധതിയുള്ളതിനാൽ താത്കാലികമായ ഓട്ടയടക്കലല്ലാതെ നല്ല രീതിയിലുള്ള ടാറിംഗുണ്ടാകില്ലെന്നാണ് പൊതുമരാമത്ത് വകുപ്പ് അധികൃതർ പറയുന്നത്.

പത്തിവിടർത്തി മൂർഖൻ; ഭയപ്പാടിൽ യാത്രികർ

വടക്കഞ്ചേരി: പത്തിവിടർത്തി വഴിയാത്രക്കാരെ പേടിപ്പിച്ച മൂർഖൻ പാമ്പിനെ പിടികൂടി. കിഴക്കഞ്ചേരി ക്ഷേത്രത്തിനു പിറകിലെ വഴിയരികിലായിരുന്നു പത്തിവിടർത്തി ആടിയുള്ള മൂർഖൻ പാമ്പിന്‍റെ അഭ്യാസം. ഇന്നലെ ഉച്ചയ്ക്കായിരുന്നു സംഭവം. ആളുകൾ നടന്നുപോകുമ്പോൾ പത്തിവിരിച്ച് ഭയപ്പെടുത്തും. വീതികുറഞ്ഞ വഴിയായതിനാൽ ആളുകൾക്കു മാറിപ്പോകാനും വഴിയുണ്ടായില്ല. സമീപത്ത് മയിലിനെ കണ്ടിട്ടായിരുന്നു മൂർഖൻപാമ്പ് പത്തിയുയർത്തി നിലകൊണ്ടിരുന്നത്. ഉഗ്രവിഷകാരിയായ പാമ്പ് മയിലിനെ പേടിച്ചാണ് ഏറെനേരം പത്തിവിടർത്തി നിന്നതെങ്കിലും ആളുകൾ അതിലുംവലിയ ഭയപ്പാടിലായിരുന്നു. നാട്ടുകാർ വിവരമറിയിച്ചതിനെ തുടർന്ന് വനംവാച്ചർ മുഹമ്മദാലി സ്ഥലത്തെത്തി പാമ്പിനെ പിടികൂടി കൊണ്ടുപോയി.

അടിയന്തരാവസ്ഥ പോരാളികളുടെ സംഗമം

പാലക്കാട്: അടിയന്തരാവസ്ഥയുടെ അമ്പതാം വാര്‍ഷികത്തോടനുബന്ധിച്ച് എമര്‍ജന്‍സി വിക്ടിംഫോറം പാലക്കാട് സംഘടിപ്പിച്ച അടിയന്തരാവസ്ഥ പോരാളികളുടെ സംഗമം പൊതുപ്രവർത്തകൻ വിളയോടി വേണുഗോപാലന്‍.ഉദ്ഘാടനം ചെയ്തു. അടിയന്തരാവസ്ഥക്കാലത്ത് ജയില്‍വാസം അനുഭവിച്ച കുട്ടികൃഷ്ണന്‍ മുട്ടികുളങ്ങര അധ്യക്ഷത വഹിച്ചു. രാമന്‍കുട്ടി കാഞ്ഞിരം, നാരായണന്‍ പെരുവെമ്പ്, നാരായണന്‍ വിളയോടി, എസ്. രമണന്‍, വിജയന്‍ അമ്പലക്കാട്, സന്തോഷ് കൂട്ടാല, പിരായിരി സൈയ്ദ് മുഹമ്മദ്, ഗോപാലന്‍ മലമ്പുഴ, ടി.പി. കനകദാസ്, കൃഷ്ണന്‍കുട്ടി കുനിശേരി, പത്മമോഹനന്‍ തെക്കേമഠം, അബ്ദുല്‍ ഖാദര്‍ കണ്ണാടി, ദണ്ഡപാണി തത്തമംഗലം, കുഞ്ചന്‍ പൂവക്കോട്, അശോകന്‍ പുതുശേരി എന്നിവര്‍ പ്രസംഗിച്ചു.

ഡിഎഫ്ഒയ്ക്കു നിവേദനംനൽകി കർഷക മസ്ദൂർ സംഘം

പാലക്കാട്: മുണ്ടൂർ ഉൾപ്പടെയുള്ള ജനവാസമേഖലകളിലെ വന്യജീവി സാന്നിധ്യം കൃഷിയും മനുഷ്യജീവനും അപഹരിക്കുന്ന സാഹചര്യം ഒഴിവാക്കണമെന്നും മതിയായ സുരക്ഷാസംവിധാനങ്ങൾ ഒരുക്കണമെന്നും നഷ്ടപരിഹാരത്തുക വർധിപ്പിക്കണമെന്നും ആവശ്യപ്പെട്ട് കർഷക മസ്ദൂർ സംഘം- ബിഎംഎസ് പാലക്കാട് ഡിഎഫ്ഒയ്ക്ക് നിവേദനം നൽകി. തമിഴ്നാട് മോഡൽ ഹാൻഗിംഗ് ഫെൻസിംഗ് സ്ഥാപിക്കാനുള്ള നടപടികൾ സ്വീകരിക്കാമെന്നും മതിയായ സുരക്ഷാ സംവിധാനങ്ങൾ ഏർപ്പെടുത്താമെന്നും ഡിഎഫ്ഒ ജോസഫ് തോമസ് ഉറപ്പുനൽകി. ബിഎംഎസ് ജില്ലാ സെക്രട്ടറി കെ. രാജേഷ്, ജോയിന്‍റ് സെക്രട്ടറി ശശി ചോറോട്ടൂർ, കർഷക മസ്ദൂർ സംഘം ജില്ലാ ജനറൽ സെക്രട്ടറി എസ്. രാജേന്ദ്രൻ, ജില്ലാ ട്രഷറർ കെ.പി. ദിവാകർദാസ്, ബിഎംഎസ് മേഖലാ ഭാരവാഹികളായ എം.സി. സതീഷ്, ബി. സന്തോഷ് എന്നിവരാണ് പ്രതിനിധി സംഘത്തിലുണ്ടായിരുന്നത്.

പാലക്കാട് ഗസ്റ്റ് ഹൗസ് നവീകരണത്തിനു നാലുകോടി 64 ലക്ഷം രൂപ അനുവദിച്ചു

പാലക്കാട്: ടൂറിസം വകുപ്പിന്‍റെ കീഴില്‍ സിവില്‍സ്റ്റേഷനോടു ചേര്‍ന്നുള്ള സര്‍ക്കാര്‍ അതിഥിമന്ദിരം നവീകരിക്കുന്നതിന് 4,64,75,000 രൂപ അനുവദിച്ച് ഉത്തരവിറക്കി. 18 മാസത്തിനുള്ളില്‍ നിര്‍മാണ പ്രവൃത്തികള്‍ പൂര്‍ത്തിയാക്കാനാണ് ഉത്തരവിട്ടിരിക്കുന്നത്. വിനോദസഞ്ചാര വകുപ്പിന്‍റെ കീഴില്‍ നഗരത്തിലെ ഏറ്റവും പ്രധാനപ്പെട്ട സ്ഥലത്ത് സ്ഥിതിചെയ്യുന്ന ഗസ്റ്റ് ഹൗസ് നവീകരിക്കുന്നതിലൂടെ കുറഞ്ഞ ചെലവില്‍ മികച്ച സൗകര്യങ്ങളോടെയുള്ള താമസ സൗകര്യമാണ് പാലക്കാടുണ്ടാകുന്നതെന്ന് ടൂറിസം- പൊതുമരാമത്ത് മന്ത്രി പി.എ. മുഹമ്മദ് റിയാസ് പറഞ്ഞു. മലമ്പുഴ, കൊല്ലങ്കോട് തുടങ്ങിയ ടൂറിസം ഡെസ്റ്റിനേഷനുകളിലേക്കെത്തുന്നവര്‍ക്ക് ഇതു സഹായകരമാകും. സാധാരണക്കാര്‍ക്ക് ഉന്നത നിലവാരത്തിലുള്ള താമസ സൗകര്യം കുറഞ്ഞ ചെലവില്‍ ലഭ്യമാക്കുന്നതിനൊപ്പം ഖജനാവിലേക്ക് അധിക വരുമാനവും കൈവരുമെന്നു അദ്ദേഹം ചൂണ്ടിക്കാട്ടി. ഇന്‍ഡിഗോ ആര്‍ക്കിടെക്റ്റ്സാണ് നവീകരണത്തിനുള്ള എസ്റ്റിമേറ്റ് തയാറാക്കിയതും നിര്‍മാണപ്രവൃത്തികള്‍ ചെയ്യേണ്ടതും. സിവില്‍ നിര്‍മാണപ്രവൃത്തികള്‍, വൈദ്യുതീകരണം എന്നിവയാണ് പ്രധാന നിര്‍മാണപ്രവൃത്തികള്‍.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]