ഒറ്റപ്പാലം: വിദ്യാർഥികൾക്ക് നൽകിയ വാക്ക് പാലിച്ച് എംപി. കൂടുതൽ കുട്ടികൾ എസ്എസ്എൽസി പരീക്ഷ എഴുതുകയും കൂടുതൽ എ പ്ലസ് ഓടെ 100 മേനി നേടുകയും ചെയ്ത തൃക്കടീരി പിടിഎം ഹയർ സെക്കൻഡറി സ്കൂളിലെ 10 വിദ്യാർഥികൾക്ക് ഡൽഹി സന്ദർശിക്കാൻ അവസരം ഒരുക്കി കൊണ്ടാണ് വികെ.ശ്രീകണ്ഠൻ എംപിയുടെ തന്‍റെ വാക്കു പാലിക്കുന്നത്.
മിന്നും പ്രകടനം കാഴ്ചവച്ച് ഉന്നത വിജയം കൈവരിച്ചാൽ ഡൽഹിയിലേക്ക് കൊണ്ടുപോകാമെന്ന് വിദ്യാർഥികൾക്ക് നൽകിയ വാക്കാണ് പാലിക്കപ്പെടുന്നത്. പിടിഎമ്മിലെ കുട്ടികൾ ഇന്നലെ ഡൽഹിയിലേക്ക് യാത്രതിരിച്ചു. ഏറ്റവും കൂടുതൽ കുട്ടികൾ എസ്എസ്എൽസി പരീക്ഷ എഴുതി കൂടുതൽ എപ്ലസ് നേടി നൂറുശതമാനം വിജയവും ഒറ്റപ്പാലം വിദ്യാഭ്യാസ ജില്ലയിൽ ഒന്നാമതാവുകയും ചെയ്ത് കലാ കായിക രംഗങ്ങളിൽ കൂടി മുന്നേറ്റം കാഴ്ച്ച വയ്ക്കുകയും ചെയ്ത വിജയഗാഥയാണ് പറയാനുള്ളത്. പിടിഎമ്മിലെ വിദ്യാർഥികളുടെ വിജയോത്സവം ഉദ്ഘാടനം ചെയ്തുകൊണ്ട് തിരഞ്ഞെടുത്ത 10 കുട്ടികളെ ന്യൂഡൽഹി കാണിക്കാൻ കൊണ്ട് പോവുമെന്ന് എംപി അന്ന് വാഗ്ദാനം നൽകിയിരുന്നു. ആ വാഗ്ദാനമാണ് സാക്ഷാത്കരിക്കുന്നത്. 10 വിദ്യാർഥികളും അഞ്ച് അധ്യാപകരുമടങ്ങുന്ന സംഘം ഇന്നലെ ഉച്ചയ്ക്കുശേഷം മൂന്നിന് ഷൊർണൂരിൽ നിന്ന് മംഗള എക്സ്പ്രസിൽ ഹെഡ്മിസ്ട്രസ് എം.വി.സുധ ടീച്ചറുടെ നേതൃത്വത്തിൽ പുറപ്പെട്ടു. ഇവർ ഏഴിന് ന്യൂഡൽഹിയിൽ എത്തും. പാർലമെന്‍റ് മന്ദിരം, രാഷ്ട്രപതി ഭവൻ, രാജ്ഘട്ട്, ഇന്ദിരാഗാന്ധി മ്യൂസിയം, റെഡ് ഫോർട്ട്, കുത്തബ് മിനാർ, ജുമാമസ്ജിദ്, ലോട്ടസ് ടെംപിൾ, താജ്മഹൽ എന്നിങ്ങനെയുള്ള പ്രധാന സ്ഥലങ്ങൾ സന്ദർശിച്ച ശേഷം ഡിസംബർ 10ന് ന്യൂഡൽഹിയിൽ നിന്ന് തിരിച്ചു പോരും. എംപിയുടെ അതിഥികളായി ഡൽഹിയിൽ എത്തുന്ന സംഘത്തിന് അദ്ദേഹത്തിന്‍റെ ഫ്ലാറ്റിൽ തന്നെയാണ് താമസം ഒരുക്കിയിട്ടുള്ളത്.
കോ-ഓഡിനേറ്റർ കാസിംകുന്നത്ത്, ഗീത.ജി, അബൂബക്കർ സിദ്ധിക്ക്, വി.കെ. ഹംസത്ത് മാടാല എന്നീ അധ്യാപകരും, ഹാഫിസ് അസീം. പി, മുഹമ്മദ് ഷബീൽ, കൈലാസ് കുമാർ, ഹൈഫ. പി.എച്ച്, മുഹമ്മദ് മുസ്തഫ, ഫാത്തിമ ഫർഹാന. പി, ഫാത്തിമ ഷഹന. കെ, സഫ. കെ, ഹിതേഷ്. പി, മുഹമ്മദ് സാലിഹ് എന്നീ വിദ്യാർഥികളുമാണ് സംഘത്തിലുള്ളത്.