പാലക്കാട്: കോവിഡ് പ്രതിരോധ പ്രവർത്തനത്തിന്റെ ഭാഗമായി വിവിധ പഞ്ചായത്തുകളിലെ കെട്ടിടങ്ങൾ കൂടി ഡൊമിസിലിയറി കെയർ സെന്ററുകളായി പ്രവർത്തിക്കുന്നതിന് അനുമതി നൽകി ജില്ലാ കലക്ടർ മൃണ്മയി ജോഷി ഉത്തരവിട്ടു. ഇതോടെ ജില്ലയിലെ ഡൊമിസിലിയറി കെയർ സെന്ററുകളുടെ എണ്ണം 51 ആയി.
കിഴക്കഞ്ചേരി ഗ്രാമപഞ്ചായത്ത് ഗവ.ഹയർസെക്കന്ററി സ്കൂൾ, കണ്ണാടി ഗ്രാമ പഞ്ചായത്ത് പോസ്റ്റ് മെട്രിക് ഹോസ്റ്റൽ, കണ്ണന്നൂർ, കുഴൽമന്ദം ഗ്രാമപഞ്ചായത്ത് മോഡൽ റെസിഡൻഷ്യൽ പോളിടെക്നിക്, പുതുക്കോട് കണക്കന്നൂർ കോളെജ് ഓഫ് ടെക്നോളജി, ആനക്കര എ.ഡബ്ല്യു.എച്ച് കോളജ്, ജി.എച്ച്.എസ്.വിളയൂർ, കൊടുവായൂർ അങ്കണവാടി ടീച്ചേഴ്സ് ട്രെയിനിംഗ് സെന്റർ, വി.എം.എച്ച്.എസ് വടവന്നൂർ എന്നിവയ്ക്കാണ് അനുമതി നല്കിയത്.
വില്പനശാലകളുടെ പ്രവർത്തന സമയം
പാലക്കാട്: കോവിഡ് രോഗ പ്രതിരോധതിന്റെ ഭാഗമായി ജില്ലയിലെ അവശ്യ വസ്തു വില്പനശാലകളായ റേഷൻ കടകൾ, ഭക്ഷ്യവസ്തു വില്പനശാലകൾ, പലചരക്ക്, പഴം പച്ചക്കറി, പാൽ പാലുല്പന്നങ്ങൾ വിൽക്കുന്ന കടകൾ, മത്സ്യമാംസ, കോഴിത്തീറ്റ കാലിത്തീറ്റ വില്പന ശാലകൾ, ബേക്കറികൾ, ബിൽഡിംഗ് മെറ്റീരിയലുകൾ വിൽക്കുന്ന സ്ഥാപനങ്ങൾ (ഇലക്ട്രിക്കൽ, പ്ലംബിംഗ് വസ്തുക്കൾ ഉൾപ്പെടെ), പാക്കിംഗ് മെറ്റീരിയലുകൾ ഉൾപ്പെടെ വ്യാവസായിക മേഖലയ്ക്കാവശ്യമായ അസംസ്കൃത വസ്തുക്കൾ തയ്യാറാക്കുന്ന സ്ഥാപനങ്ങൾക്ക് മാത്രം ഇന്നുമുതൽ ഒന്പത് വരെ തുറന്ന് പ്രവർത്തിക്കാൻ അനുമതി നൽകി ജില്ലാ കളക്ടർ മൃണ്മയി ജോഷി ഉത്തരവിട്ടു.
ജില്ലയിൽ പൂർണമായും അടച്ചിട്ട പ്രദേശങ്ങളിൽ ഇന്ന് ഉച്ചയ്ക്ക് ഒന്ന് വരെ വ്യാപാര സ്ഥാപനങ്ങൾ തുറന്ന് വൃത്തിയാക്കുന്നതിന് മേയ് 31 ന് നൽകിയ അനുമതി റദ്ദാക്കിയതായും ജില്ലാ ദുരന്തനിവാരണ അതോറിറ്റി അറിയിച്ചു.