ADVERTISEMENT

ADVERTISEMENT

നവതി ആഘോഷം: രണ്ടു വീടുകളുടെ നിർമാണാശീർവാദം നടത്തി

എലിഞ്ഞിപ്ര: ചൗക്ക സെന്‍റ് മേരീസ് ലൂർദ് ഇടവക നവതിയുടെ ഭാഗമായി ഭവനരഹിതർക്കായി നിർമിച്ചുനൽകുന്ന രണ്ടുഭവനങ്ങളുടെ നിർമാണ പ്രവർത്തങ്ങളുടെ ആശീർവാദകർമം വികാരി. റവ. ഡോ. ആന്‍റോ കരിപ്പായി നിർവ ഹിച്ചു.

ഇടവകയിലെ പാരിഷ് ബുള്ളറ്റിൻ കമ്മിറ്റി, സെന്‍റ് വിൻസെന്‍റ്് ഡി പോൾ സൊസൈറ്റി എന്നിവയുടെ സഹകരണത്തോടെയാണു രണ്ടു ഭവനങ്ങളുടെ നിർമാണം നടക്കുന്നത്.

സൗജന്യമായി നൽകാൻ ഉദ്ദേശിക്കുന്ന നാലു വീടുകളിൽ രണ്ടുവീടുകളുടെ താക്കോൽദാനം നേരത്തേനടത്തി. വർഗീസ് പുല്ലോക്കാരൻ 15 സെന്‍റ് സ്ഥലവും സിഎം സി ഉദയ െപ്രാവിൻഷ്യലും ലൂർദ് മാത സോഷ്യൽ സെന്‍ററും സഹായം നൽകി.

ജോജോ മാങ്കോയി, ടൈറ്റസ് നൊച്ചുരുവളപ്പിൽ, ജോഫ്രിൻ കിഴക്കൂടൻ, കൺവീനർ സിബു ചേലേക്കാട്ട്, സിസ്റ്റർ ലൈസ സി‌എംസി, ഡേവിസ് കരിപ്പായി, ജോസ് പാണേക്കാടൻ, വിൽസൻ മേച്ചേരി എന്നിവർ പ്രസംഗിച്ചു.

ADVERTISEMENT

പ്രതിഷേധം ശക്തം; ആന്പല്ലൂരിൽ അടച്ച യൂ-ടേണ്‍ തുറന്നു

ആന്പല്ലൂർ: അടിപ്പാതനിർമാണത്തിന്‍റെ ഭാഗമായി ദേശീയപാത നിർമാണക്കന്പനി അടച്ചുകെട്ടിയ ആന്പല്ലൂരിലെ യു-ടേണ്‍ ഗതാഗതക്കുരുക്ക് രൂക്ഷമായതോടെ തുറന്നു. ദേശീയപാത വാഹനത്തിരക്കിനാൽ വീർപ്പുമുട്ടിയതോടെ വൈകീട്ട് ജനം പ്രതിഷേധവുമായി രംഗത്തെത്തുകയായിയിരുന്നു. അടിപ്പാതയുടെ പണിക്കായി സർവീസ് റോഡിനോടുചേർന്ന് കാനകീറിയതോടെയാണ് ആന്പല്ലൂരിൽ വീണ്ടും ഗതാഗതനിയന്ത്രണം ഏർപ്പെടുത്തിയത്. വരന്തരപ്പിള്ളി, കല്ലൂർ ഭാഗങ്ങളിൽനിന്നുവരുന്ന വാഹനങ്ങൾ പുതുക്കാട് സിഗ്നൽ ജംഗ്ഷനിലെത്തി തൃശൂർ ഭാഗത്തേക്കു പോകേണ്ടവിധമായിരുന്നു നിയന്ത്രണം. ഇന്നലെ രാവിലെ മുതലാണു നിയന്ത്രണം ഏർപ്പെടുത്തിയത്. ആന്പല്ലൂരിലെ തിരക്ക് നിയന്ത്രിക്കാൻ ചാലക്കുടി ഭാഗത്തേക്കുള്ള ബസ് കാത്തിരിപ്പുകേന്ദ്രവും അധികൃതർ അടച്ചു. അടിപ്പാതയുടെ റോഡുപണിക്കായി കാന കോരിയതുമൂലം നിലവിലുള്ള റോഡ് അടച്ച് വാഹനങ്ങൾ തിരിച്ചുവിടുകയായിരുന്നു. ആന്പല്ലൂരിൽനിന്ന് വാഹനങ്ങൾ ചാലക്കുടി ഭാഗത്തേക്കുള്ള സർവീസ് റോഡിലൂടെയാണു കടത്തിവിട്ടത്. വാഹനങ്ങൾ പുതുക്കാട് സ്റ്റാൻഡിനു മുന്നിലെത്തി ദേശീയപാതയിലേക്കു പ്രവേശിച്ച് ചാലക്കുടി ഭാഗത്തേക്കു വിടുകയായിരുന്നു. സർവീസ് റോഡിലൂടെ എല്ലാ വാഹനങ്ങളെയും കടത്തിവിട്ടതോടെ മേഖലയിൽ വലിയ ഗതാഗതക്കുരുക്കായി. ആന്പല്ലൂരിൽനിന്ന് പാലിയേക്കര ടോൾപ്ലാസയും കടന്ന് വാഹനങ്ങളുടെ നിര നീണ്ടു. ബസുകൾ കുറച്ചുമുന്നിലേക്കുകയറി സർവീസ് റോഡിനോടുചേർന്ന് നിർത്തണമെന്ന് നിർമാണക്കന്പനി അധികൃതരുടെ നിർദേശമുണ്ടായിരുന്നു. ഇതും വാഹനത്തിരക്കിനു കാരണമായി. ദേശീയപാതയിലൂടെ വരുന്ന വാഹനങ്ങൾ വീതികുറഞ്ഞ സർവീസ് റോഡിലൂടെ മാത്രം ഒരു കിലോമീറ്ററിലേറെ പോകേണ്ടിവന്നതും കുരുക്കിനിടയാക്കി. ഇത് യാത്രക്കാരുടെയും നാട്ടുകാരുടെയും പ്രതിഷേധത്തിനിടയാക്കി. വൈകിട്ടോടെ സ്വകാര്യ ബസുകൾ പണിമുടക്കുന്നത് ഉൾപ്പെടെയുള്ള നടപടികളിലേക്കു നീങ്ങുകയാണെന്ന് അറിയിച്ചതോടെ അടച്ച യുടേണ്‍ തുറക്കുകയായിരുന്നു. ആന്പല്ലൂരിൽ സർവീസ് റോഡിന്‍റെ വീതികൂട്ടി ടാറിടുന്നതിനുള്ള നടപടിയും കന്പനി ആരംഭിച്ചിട്ടുണ്ട്.

പെർമിറ്റില്ലാതെ ഓടിയ ബസ് കസ്റ്റഡിയിൽ

തൃശൂർ: പെർമിറ്റില്ലാതെ ഓടിയ എഎംവിഐയുടെ സഹോദരന്‍റെ ബസ് ആർടിഒ എൻഫോഴ്സ്മെന്‍റ് വിഭാഗം കസ്റ്റഡിയിലെടുത്തു. അസിസ്റ്റന്‍റ് മോട്ടോർ വെഹിക്കിൽ ഇൻസ്പെക്ടറുടെ സഹോദരൻ സി.ജെ. റിജോയുടെ ഉടമസ്ഥതയിലുള്ള ബസാണു പിടികൂടിയത്. തൃശൂരിൽനിന്നു കോഴിക്കോട്ടേക്കുള്ള യാത്രയ്ക്കിടെ കെഎസ്ആർടിസി സ്റ്റാൻഡിനു സമീപത്താണു ബസ് തടഞ്ഞത്. ഇന്നലെ രാവിലെ 5.45നാണ് ബസ് യാത്ര ആരംഭിച്ചത്. ബസിലുണ്ടായിരുന്ന 20 യാത്രക്കാരെ കെഎസ്ആർടിസി ബസിൽ കയറ്റിവിട്ടു. കഴിഞ്ഞവർഷം സെപ്റ്റംബർമുതൽ ബസിനു പെർമിറ്റില്ലെന്നു കണ്ടെത്തി. തൃശൂർ ആർടിഒ എൻഫോഴ്സ്മെന്‍റ് എംവിഐ പി.വി. ബിജു, എഎംവിഐ കെ. വിപിൻ എന്നിവരാണു ബസ് പിടികൂടിയത്. വരുംദിവസങ്ങളിൽ കൂടുതൽ സ്വകാര്യബസുകൾ പരിശോധിക്കുമെന്ന് എംവിഐ അറിയിച്ചു.

കേച്ചേരിയിൽ മൂന്നുപേര്‍ക്ക്‌ തെരുവുനായയുടെ കടിയേറ്റു

കേച്ചേരി: മണലി പാൽ സൊസൈറ്റിക്കുസമീപം തെരുവുനായയുടെ ആക്രമണത്തിൽ മൂന്നുപേർക്കു പരിക്കേറ്റു. മണലി തെങ്ങ് സ്വദേശി വാചാട്ടുപറമ്പ് അക്ബറിന്‍റെ മകൻ ഷാലിമാർ(44), മണലി സ്വദേശി തെക്കുപുറത്ത് ജലീലിന്‍റെ മകൻ ഷെഫീക്ക്(59), ഷെഫീക്കിന്‍റെ മകൻ യഹിയ(10) എന്നിവരെ കേച്ചേരി ആക്ട്സ് പ്രവർത്തകർ തൃശൂർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഈ മേഖലയിൽ തെരുവുനായ് ശല്യം രൂക്ഷമാണെന്നും അധികൃതർ ഉടൻ നടപടികൾ എടുക്കണമെന്നും പ്രദേശവാസികൾ ആവശ്യപ്പെട്ടു. പേവിഷബാധയ്ക്കുള്ള കുത്തിവയ്പുകൾ എടുക്കുവാൻമാത്രമേ സാധിക്കുകയുള്ളൂ എന്നും നവംബർമാസത്തിൽ വിവിധ വാർഡുകളിൽ കുത്തിവയ്പ് നടത്തിയെന്നും പഞ്ചായത്ത് പ്രസിഡന്‍റ് രേഖ സുനിൽ പറഞ്ഞു. വന്ധ്യംകരണത്തിനുള്ള കുത്തിവയ്പുകൾ ആദ്യകാലങ്ങളിൽ ചെയ്തിരുന്നുവെങ്കിലും പിന്നീട് അതു നിർത്തലാക്കി. തെരുവുനായകളെ പിടിച്ച് അവയെ താമസിപ്പിക്കാൻ പ്രത്യേക ഷെൽട്ടർ ഒരുക്കുവാൻ പ്ലാൻ ചെയ്തെകിലും പറ്റിയ സ്ഥലം ലഭ്യമായില്ലെന്നും പ്രസിഡന്‍റ് പറഞ്ഞു.

വീടിനുനേരേ കാട്ടാന ആക്രമണം

അതിരപ്പിള്ളി: കണ്ണംകുഴിയിൽ വീടിനുനേരേ കാട്ടാനയുടെ ആക്രമണം. പാപ്പാത്ത് പരേതനായ രജീവിന്‍റെ വീടാണ് കാട്ടാന ആക്രമിച്ചത്. ഇന്നലെ പുലർച്ചെ നാലിനാണ് സംഭവം ഉണ്ടായത്. വീടിന്‍റെ അടുക്കളഭാഗം കാട്ടാനയുടെ ആക്രമണത്തിൽ തകർന്നു. സഹായത്തിനു വേണ്ടി വനപാലകരെ വിവരം അറിയിച്ചുവെങ്കിലും എത്തിയില്ലെന്ന് വീട്ടുകാർ പറഞ്ഞു. എറെനേരം കഴിഞ്ഞാണ് കാട്ടാന ഇവിടെനിന്നു പോയത്. അതുവരെ വീട്ടുകാർ പുറത്തിറങ്ങിയില്ല. രജീവിന്‍റെ ഭാര്യയും രണ്ടു പെൺമക്കളുമാണ് വീട്ടിൽ ഉണ്ടായിരുന്നത്.

ചായ്പൻകുഴിയിൽ കാട്ടാനകൾ കൃഷി നശിപ്പിച്ചു

സത്യഗ്രഹം ആരംഭിച്ച് പഞ്ചായത്ത് പ്രസിഡന്‍റ് ചായ്പൻകുഴി: പരിയാരം റേഞ്ച് ചായ്പൻകുഴി ഡെപ്യൂട്ടി ഫോറസ്റ്റ് ഓഫീസിനു തൊട്ടുമുകളിൽ ജനവാസകേന്ദ്രത്തിൽ ഇറങ്ങിയ കാട്ടാനകൾ വ്യാപകമായി കൃഷിനശിപ്പിച്ചു. വാഴപ്പിള്ളി ജോസിന്‍റെ നൂറോളം കുലയ്ക്കാറായ നേന്ത്രവാഴകളും കൊരട്ടിക്കാരൻ ആൻഡ്രൂസിന്‍റെ നാല്പതോളം വാഴയും കാട്ടാന നശിപ്പിച്ചു. നാളുകളായി തുടരുന്ന വന്യമൃഗശല്യത്തിൽ പ്രതിഷേധിച്ച് കോടശേരി പഞ്ചായത്ത് പ്രസിഡന്‍റ് കെ.പി. ജെയിംസ് ഫോറസ്റ്റ് ഓഫീസിനു മുന്നിൽ അനിശ്ചിതകാല സത്യഗ്രഹസമരം ആരംഭിച്ചു. നാട്ടുകാർ സമരത്തിന് ഐക്യദാർഢ്യം പ്രഖ്യാപിച്ചു. സനീഷ്കുമാർ ജോസഫ് എംഎൽഎ, തഹസിൽദാർ ഷാജി എന്നിവർ സ്ഥലത്തെത്തിയിരുന്നു. പരിയാരം ബ്ലോക്ക് കോണ്‍ഗ്രസ് പ്രസിഡന്‍റ് എം.ടി. ഡേവിസ്, ബ്ലോക്ക് പഞ്ചായത്ത് അംഗം സി.വി. ആന്‍റണി, ജനറൽ സെക്രട്ടറിമാരായ കെ.എം. ജോസ്, ടി.ബി. ദേവരാജൻ, ജോജി പോൾ എന്നിവർ സ്ഥലം സന്ദർശിച്ചു.

കുടുംബശ്രീ അരങ്ങ് സർഗോത്സവം ; മുല്ലശേരി, തളിക്കുളം, അന്തിക്കാട് ക്ലസ്റ്റർ മുന്നിൽ

തൃശൂർ: കുടുംബശ്രീ അയൽക്കൂട്ട ഓക്സിലറി അംഗങ്ങളുടെ അരങ്ങ് 2025 സർഗോത്സവം ആദ്യദിനത്തിൽ 103 പോയിന്‍റുമായി മുല്ലശേരി, തളിക്കുളം, അന്തിക്കാട് ക്ലസ്റ്റർ മുന്നിൽ. 67 പോയിന്‍റുമായി ഒല്ലൂക്കര, ചേർപ്പ്, പുഴയ്ക്കൽ രണ്ടാംസ്ഥാനത്തും 66 പോയിന്‍റുമായി ഇരിങ്ങാലക്കുട, വെള്ളാങ്കല്ലൂർ മൂന്നാംസ്ഥാനത്തും തുടരുന്നു. അരിമ്പൂർ സിഡിഎസിന്‍റെ കഥാപാത്രങ്ങൾ കഥ പറയുമ്പോൾ എന്ന നാടകം ഒന്നാംസ്ഥാനവും ഗുരുവായൂർ സിഡിഎസ് 2 വിന്‍റെ പെൺറേഡിയോ രണ്ടാംസ്ഥാനവും കരസ്ഥമാക്കി. എറിയാട് സിഡിഎസിന്‍റെ കുറത്തി നാടകത്തിനാണു മൂന്നാംസ്ഥാനം. ഭരതനാട്യം, മോഹിനിയാട്ടം, കേരളനടനം, ഫാൻസി ഡ്രസ്, മൈം, കവിതാപാരായണം, കഥാരചന, ചിത്രരചന, പെൻസിൽ ഡ്രോയിംഗ്, ജലച്ചായം തുടങ്ങിയ മത്സരങ്ങളാണ് നടന്നത്. ഒപ്പന,തിരുവാതിര, സംഘഗാനം, നാടൻപാട്ട്, വയലിൻ മത്സരങ്ങൾ 19നു ടൗൺഹാൾ, ജെടിഎസ് സ്കൂൾ, ജോസഫ് മുണ്ടശേരി ഹാൾ എന്നിവിടങ്ങളിൽ നടക്കും. സമാപന സമ്മേളനം മന്ത്രി അഡ്വ. കെ. രാജൻ ഉദ്ഘാടനം ചെയ്യും. മന്ത്രി ഡോ. ആർ. ബിന്ദു പുരസ്കാരങ്ങൾ വിതരണം ചെയ്യും.

പിണറായിഭരണത്തിൽ വികേന്ദ്രീകൃതാസൂത്രണം കേന്ദ്രീകൃതമാകുന്നു: അഡ്വ. ജോസഫ് ടാജറ്റ്

തൃശൂർ: ലോകത്തിനു മാതൃകയായ കേരള മോഡൽ വികേന്ദ്രീകൃതാസൂത്രണം പിണറായിഭരണത്തിൽ കേന്ദ്രീകൃതമാവുകയാണെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ് കുറ്റപ്പെടുത്തി. കേരള ലോക്കൽ സെൽഫ് ഗവൺമെന്‍റ് ഓർഗനൈസേഷന്‍റെ കാസർഗോഡ്- തിരുവനന്തപുരം തദ്ദേശസംരക്ഷണ ജീവനയാത്രയ്ക്കു കോർപറേഷൻ ഓഫീസിനുമുന്നിൽ നല്കിയ സ്വീകരണം ഉദ്ഘാടനം ചെയ്യുകയായിരുന്നു അദ്ദേഹം. സർക്കാരിന്‍റെ വിവിധ ആഘോഷപരിപാടികളിലേക്ക് ആളെ കൂട്ടാനും നടത്തിപ്പിനുള്ള തനതുഫണ്ട് നൽകാനുംവേണ്ടി തദ്ദേശസ്വയംഭരണ സ്ഥാപനങ്ങളെ ഉപയോഗിക്കുകയാണെന്നും ജോസഫ് ടാജറ്റ് പറഞ്ഞു. കെഎൽഇഒ ജില്ലാ പ്രസിഡന്‍റ് രാജ്കുമാർ അധ്യക്ഷത വഹിച്ചു. എഐസിസി അംഗം അനിൽ അക്കര മുഖ്യപഭാഷണം നടത്തി. മുൻ ജില്ലാ പഞ്ചായത്ത് പ്രസിഡന്‍റ് സി.സി. ശ്രീകുമാർ, ജാഥാ ക്യാപ്റ്റൻ നൈറ്റോ ബേബി അരീക്കൽ, ജോൺ കെ. സ്റ്റീഫൻ തുടങ്ങിയവർ പ്രസംഗിച്ചു. സംസ്ഥാനത്തെ തദ്ദേശസ്വയംഭരണ സ്ഥാപനങ്ങളും ജീവനക്കാരും നേരിടുന്ന വെല്ലുവിളികൾ പരിഹരിക്കണമെന്നാവശ്യപ്പെട്ടാണ് തദ്ദേശസംരക്ഷണ ജീവനയാത്ര.

കൂടൽമാണിക്യം ഉത്സവത്തിൽ ഇന്ന്

(സ്പെഷൽ പന്തലിൽ) ഉച്ചതിരിഞ്ഞ് ഒരുമണി മുതൽ 4.45 വരെ തിരുവാതിരക്കളി, 4.45 മുതൽ 5.10 വരെ കയ്പമംഗലം ഭാവന സ്കൂൾ ഓഫ് ആർട്സിന്‍റെ ഭരതനാട്യം, 5.15 മുതൽ 5.30 വരെ ആദിലക്ഷ്മി, ഗായത്രി ഹരിശങ്കർ എന്നിവരുടെ പൂതപ്പാട്ട്, 5.30 മുതൽ ആറു വരെ ഇരിങ്ങാലക്കുട രംഗഭൂഷ പെർഫോമിംഗ് ആർട്സ് സെന്‍റർ രതീഷ പ്രശാന്തിന്‍റെ നൃത്തനൃത്യങ്ങൾ, 6.05 മുതൽ 6.55 വരെ കാക്കനാട് ഇന്ത്യൻ കൾച്ചറൽ ആൻഡ് ഹെറിറ്റേജ് സെന്‍ററിന്‍റെ നൃത്തനൃത്യങ്ങൾ, ഏഴുമുതൽ 7.25 വരെ ബാംഗ്ലൂർ കെ.ജി. ദിവിജയുടെ ഭരതനാട്യം, 7.30 മുതൽ 8.25 വരെ ഇരിങ്ങാലക്കുട ഓംനമശിവായ നൃത്തകലാകേന്ദ്രം ആർഎൽവി സുന്ദരന്‍റെ നൃത്തനൃത്യങ്ങൾ, 8.30 മുതൽ ഒന്പതുവരെ മഹേശ്വരി ഗിരീഷിന്‍റെ ഭരതനാട്യം, 9.05 മുതൽ 10.30 വരെ സിനി ആർടിസ്റ്റ് ശ്രുതി ജയന്‍റെ ഭരതനാട്യം. (സംഗമം വേദിയിൽ) രാവിലെ 8.30മുതൽ ശീവേലിക്കും രാത്രി 9.30 മുതൽ വിളക്കിനും പെരുവനം കുട്ടൻമാരാർ പ്രമാണം വഹിക്കും. ഉച്ചതിരിഞ്ഞ് ഒരുമണി മുതൽ 2.35 വരെ തിരുവാതിരക്കളി, 2.35 മുതൽ 3.05 വരെ ഒല്ലൂർ വേണുഗീതം ഭജനസംഘത്തിന്‍റെ ഭജന, 3.10 മുതൽ 4.05 വരെ മുരിയാട് മുരളീധരനും സംഘവും അവതരിപ്പിക്കുന്ന ഓട്ടൻതുള്ളൽ, 4.10 മുതൽ 4.55 വരെ പല്ലവി സുരേഷിന്‍റെ വീണക്കച്ചേരി, അഞ്ചുമുതൽ 5.55 വരെ ഇരിങ്ങാലക്കുട നാട്യരംഗത്തിന്‍റെ ഭരതനാട്യകച്ചേരി, ഏഴുമുതൽ 7.55 വരെ പ്രീതി നീരജിന്‍റെ നൃത്താർച്ചന, എട്ട് മുതൽ 8.55 വരെ അനുപമ മേനോന്‍റെ മോഹിനിയാട്ടം, ഒന്പത് മുതൽ 10 വരെ കണ്ണൻ ജി. നാഥിന്‍റെ ഭക്തിഗാനമേള, രാത്രി 12ന് സർവ്വതോഭദ്രം കലാകേന്ദ്രത്തിന്‍റെ കഥകളി ശ്രീരാമപട്ടാഭിഷേകം.

കണ്ണീരു കണ്ടു; നെല്ലെടുക്കാന്‍ മില്ലുടമകളെത്തി

പുല്ലൂര്‍: കൊയ്ത്തുകഴിഞ്ഞ് മൂന്നാഴ്ച പിന്നിട്ടിട്ടും നെല്ല് സംഭരിക്കാന്‍ ആരും തയ്യാറാകാഞ്ഞതിനെത്തുടര്‍ന്ന് പ്രതിസന്ധിയിലായ കര്‍ഷകര്‍ക്ക് ആശ്വാസമായി ഒടുവില്‍ നെല്ലുസംഭരിക്കാന്‍ തയ്യാറായി മില്ലുടമകളെത്തി. വലിയ കിഴിവില്‍ നെല്ല് നല്‍കണമെന്ന ആവശ്യം നിരാകരിച്ചതിനെത്തുടര്‍ന്നാണ് നെല്ലുസംഭരണം വൈകിയത്. ഇതിനെക്കുറിച്ച് ദീപിക നേരത്തേ വാര്‍ത്ത നല്‍കിയിരുന്നു. അധികാരികള്‍ ഇടപെട്ടതിനെ ത്തുടര്‍ന്ന് ഇപ്പോള്‍ മൂന്നു ശതമാനം കുറവിലാണ് കര്‍ഷകര്‍ മില്ലുടമകള്‍ക്ക് നെല്ല് കൈമാറിയത്. മുരിയാട് പൊതുമ്പുചിറ പാടശേഖരത്തിലെ 80 ഏക്കര്‍ പാടശേഖരത്തിലെ കര്‍ഷകര്‍ കൊയ്‌തെടുത്ത 60 ടണ്‍ നെല്ലാണ് പുല്ലൂര്‍ പള്ളിക്കു സമീപമുള്ള സെന്‍റ് സേവിയേഴ്‌സ് സ്‌കൂള്‍ ഗ്രൗണ്ടിലും പള്ളിപ്പറമ്പിലുമായി കൂട്ടിയിട്ടിരുന്നത്. മില്ലുകാരും ഏജന്‍റുമാരും വന്ന് നെല്ല് പരിശോധിച്ചെങ്കിലും വലിയ കിഴിവാണ് അവര്‍ ആവശ്യപ്പെട്ടിരുന്നത്. എന്നാല്‍ അതിന് കര്‍ഷകര്‍ തയ്യാറായിരുന്നില്ല. അധികാരികള്‍ ഇടപെട്ടതോടെ സ്‌കൂള്‍ ഗ്രൗണ്ടിലും പള്ളിപ്പറമ്പിലും കെട്ടിക്കിടന്നിരുന്ന നെല്ല് സംഭരിക്കാന്‍ അവര്‍ തയ്യാറാകുകയായിരുന്നു. കഴിഞ്ഞ ദിവസം വണ്ടിയുമായെത്തി അവര്‍ നെല്ല് കൊണ്ടുപോയി.

പുറമ്പോക്കുസ്ഥലം അളക്കാനെത്തിയ ഉദ്യോഗസ്ഥരെ തടഞ്ഞുവച്ചു

തിരുവില്വാമല: പുറമ്പോക്കുസ്ഥലം അളന്നുതിട്ടപ്പെടുത്താൻ എത്തിയ താലൂക്ക് സർവേയറെയും കൂടെയുണ്ടായിരുന്ന രണ്ട് വനിത ഉദ്യോഗസ്ഥരെയും വീട്ടുടമസ്ഥയും മകനും തടഞ്ഞുവച്ചതായി പരാതി. താലൂക്ക് സർവേയർ സുനിൽകുമാർ, കൂടെയുണ്ടായിരുന്ന ചെയിൻമാൻമാരായ സുമ, ജിഷ എന്നീ ഉദ്യോഗസ്ഥരെയാണ് തടഞ്ഞുവച്ചത്. ഇന്നലെ ഉച്ചയോടെ കണിയാർകോട് ഒരലാശേരി പന്തലൂർ പാടശേഖരത്തിനു സമീപമാണ് സംഭവം. തിരുവില്വാമല പഞ്ചായത്ത് സെക്രട്ടറി ആവശ്യപ്പെട്ടതിനെ തുടർന്നാണ് ബിടിആർ പ്രകാരം സർക്കാർ പുറമ്പോക്ക് അളന്നു തിട്ടപ്പെടുത്താൻ ഉദ്യോഗസ്ഥർ എത്തിയത്. പഞ്ചായത്ത് അധികൃതരും വില്ലേജ് ഉദ്യോഗസ്ഥരും പോലീസും സ്ഥലത്തെത്തിയശേഷമാണ് വിട്ടയച്ചതെന്ന് ഉദ്യോഗസ്ഥർ പറഞ്ഞു. പിന്നീട് പോലീസിന്‍റെ സഹായത്തോടെയാണ് സർവേജോലികൾ പൂർത്തിയാക്കിയത്. ഡെപ്യുട്ടി തഹസിൽദാരുടെ നേതൃത്വത്തിലുള്ള സംഘവും സ്ഥലത്തെത്തി.

ഐ ഫോൺ മോഷ്ടിച്ച കേസിൽ മൂന്നുപേര്‌ അറസ്റ്റില്‌

ഗുരുവായൂർ: കെഎസ്ആര്‌ടിസി ബസ് സ്റ്റാൻഡിൽ യുവതി ചാർജ് ചെയ്യാനിട്ടിരുന്ന ഐ ഫോൺ മോഷ്ടിച്ച കേസിൽ മൂന്നുപേരെ ടെമ്പിൾ പോലീസ് അറസ്റ്റ് ചെയ്തു. തളിക്കുളം കൈതിക്കൽ കല്ലിങ്കൽ വീട്ടിൽ ബബീഷ്(36), ഇരിങ്ങാലക്കുട വെള്ളാനി മണികണ്ഠൻ(48), ചാവക്കാട് ബ്ലാങ്ങാട് സ്വദേശി കുറ്റിക്കാട്ട് ഹുസൈൻ(43) എന്നിവരെയാണ് എസ്ഐ പ്രീത ബാബുവിന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. കഴിഞ്ഞ 12 നാണ് ഫോൺ മോഷണം പോയത്. മൊബൈൽ ഫോൺ ബബീഷും മണികണ്ഠനും ചേർന്നാണ് മോഷ്ടിച്ചത്. 60,000 രൂപയോളം വില വരുന്ന ഐ ഫോൺ ചാവക്കാട് ഏനാമാവ് റോഡിൽ മൊബൈൽ ഷോപ്പ് നടത്തുന്ന ഹുസൈന് 2000 രൂപയ്ക്കാണ് വിൽപ്പന നടത്തിയത്. മോഷണമുതലാണെന്നു മനസിലാക്കിയാണ് ഹുസൈൻ ഫോൺ വാങ്ങിയതെന്ന് പോലീസ് പറഞ്ഞു.

വടക്കാഞ്ചേരിയിലെ കോൺഗ്രസിൽ ഭിന്നത രൂക്ഷം: നഗരസഭ പ്രതിപക്ഷനേതാവ് ലീവിന്

വടക്കാഞ്ചേരി: നഗരസഭ പ്രതിപക്ഷനേതാവും ഡിസിസി സെക്രട്ടറിയുമായ കെ. അജിത്കുമാർ പാർട്ടിയിൽനിന്നു അവധിയെടുക്കുന്നു. രണ്ടുമാസത്തേക്കാണ് അവധിയെടുക്കുന്നത്. ലീവെടുക്കുന്ന കാര്യം ഡിസിസി പ്രസിഡന്‍റിനെ അറിയിക്കുമെന്നാണ് യുഡിഎഫ് കൗൺസിലർമാരുടെ വാട്സ്ആപ്പ് ഗ്രൂപ്പിൽ അയച്ച സന്ദേശത്തിൽ കെ. അജിത്കുമാർ വ്യക്തമാക്കിയിരിക്കുന്നത്. കഴിഞ്ഞദിവസങ്ങളിൽ വടക്കാഞ്ചേരിയിലെ കോൺഗ്രസിനുണ്ടായ നാടകീയരംഗങ്ങൾക്കൊടുവിലാണ് അജിത്കുമാർ ലീവ് എടുക്കുന്നത്. ഇതിനുമുമ്പും രണ്ടുതവണ പാർട്ടിയിൽനിന്നു രാജിവച്ചതായി മാധ്യമപ്രവർത്തകർക്ക് കത്ത് നൽകിയിരുന്നു. എന്നാൽ പിന്നീട് അജിത്കുമാർ രാജിപിൻവലിക്കുകയായിരുന്നു.

ഗുരുവായൂർ നഗരസഭ : തെരുവുനായ്ക്കളെ കൊല്ലുന്നതിന് കേന്ദ്രസർക്കാരിനെ സമീപിക്കും

ഗുരുവായൂർ: തെരുവ് നായ്ക്കളെ കൊല്ലുന്നതിന് അനുമതി ലഭിക്കാൻ കേന്ദ്രസർക്കാരിനെ സമീപിക്കാൻ കൗണ്‍സിൽ യോഗം തീരുമാനിച്ചു. അജന്‌ഡകൾ തുടങ്ങുന്നതിന് മുന്പ് പ്രതിപക്ഷനേതാവ് കെ.പി. ഉദയനാണ് തെരുവ് നായ്ക്കളെ നിയന്ത്രിക്കാൻ നടപടിയെടുക്കണമെന്ന് ആവശ്യപ്പെട്ടത്. കേന്ദ്രനിയമം കാരണം തദ്ദേശ സ്വയംഭരണ സ്ഥാപനങ്ങൾക്ക് തെരുവ് നായ്ക്കളെ നിയന്ത്രിക്കാൻ കഴിയാത്ത അവസ്ഥയാണെന്ന് ചെയർമാൻ എം. കൃഷ്ണദാസ് പറഞ്ഞു. കഴിഞ്ഞദിവസം മന്ത്രി എം.ബി. രാജേഷ് തെരുവുനായ്ക്കളെ കൊല്ലാൻ തദ്ദേശസ്വയംഭരണ സ്ഥാപനങ്ങളെ അനുവദിക്കണമെന്ന് കേന്ദ്ര സർക്കാരിനോട് ആവശ്യപ്പെട്ടിട്ടുണ്ട്. ഇത് നടപ്പിലാക്കണമെന്ന് ആവശ്യപ്പെട്ട് ഗുരുവായൂർ നഗരസഭ കേന്ദ്ര സർക്കാരിന് കത്ത് നൽകും. അമൃത് ജലവിതരണ പദ്ധതിയുടെ ഭാഗമായകുടിവെള്ള ടാങ്ക് ആനത്താവളത്തിൽ സ്ഥാപിക്കണമെന്ന ആവശ്യത്തിൽ നിന്ന് നഗരസഭ പിൻമാറി. ടാങ്ക് സ്ഥാപിക്കുകയാണെങ്കിൽ ദിവസേന 1.5 ലക്ഷം ലിറ്റർ വെള്ളം സൗജന്യമായി നൽകണമെന്ന ദേവസ്വത്തിന്‍റെ ആവശ്യം അംഗീകരിക്കാനാകുന്നതല്ലെന്ന് ചെയർമാൻ വ്യക്തമാക്കി. നഗരസഭയുടെ കീഴിലുള്ള ചാവക്കാട് ഹൈസ്കൂൾ ഗ്രൗണ്ട് ആർട്ടിഫിഷൽ ടർഫ് കോർട്ട് ആക്കിയതോടെ ഫുട്ബോൾ പരിശീലനത്തിനല്ലാതെ മറ്റൊന്നിനുംപറ്റാത്തവിധം ഗ്രൗണ്ട് മാറ്റിയതിനെ കെ. പി. ഉദയൻ വിമർശിച്ചു. എന്നാൽ സ്കൂൾ പരിധിയിലെ മറ്റ് സ്ഥലങ്ങൾ ഉപയോഗപ്പെടുത്തി വിദ്യാർഥികൾക്ക് ഉപയോഗപെടുത്തുമെന്ന് ചെയർമാൻ പറഞ്ഞു. വനിതകൾക്കായി നിർമാണം പൂർത്തീകരിച്ച ഷീ സ്റ്റേഹോമിന്‍റെ ഉദ്ഘാടനം 31ന് നടത്താനും തീരുമാനിച്ചു. യോഗത്തിൽ നഗരസഭ ചെയർമാൻ എം.കൃഷ്ണദാസ് അധ്യക്ഷത വഹിച്ചു.

സ്വകാര്യ ബസിന്‍റെ ചില്ലുതകർത്ത പ്രതി അറസ്റ്റിൽ

വാടാനപ്പള്ളി: സ്വകാര്യ ബസിന്‍റെ ചില്ല് ഇഷ്ടികകൊണ്ടു എറിഞ്ഞുതകർത്ത പ്രതി അറസ്റ്റിൽ. തളിക്കുളം കളാപറമ്പ് സ്വദേശി പുതിയവീട്ടിൽ സിദ്ദിഖ്(28) നെയാണ് വാടാനപ്പള്ളി പോലീസ് അറസ്റ്റ് ചെയ്തത്. ഗുരുവായൂർ - കൊടുങ്ങല്ലൂർ റൂട്ടിലോടുന്ന പുവത്തിങ്കൾ ബസിലെ കണ്ട്കടറായ തൃപ്രയാർ ഏങ്ങൂർവീട്ടിൽ ബൈജുവിനെ ടിക്കറ്റെടുക്കാൻ പറഞ്ഞതിലുള്ള വൈരാഗ്യത്താൽ അസഭ്യം പറയുകയും ഗണേശമംഗലം ബസ് സ്റ്റോപ്പിനടുത്തുവച്ച് ബസിന്‍റെ ചില്ല് ഇഷ്ടികകൊണ്ട് എറിഞ്ഞ് പൊട്ടിക്കുകയുംചെയ്തു. ചില്ല് ചിതറിത്തെറിച്ചും ഇഷ്ടികകൊണ്ടും ബസിലെ യാത്രക്കാർക്ക് അപകടം സംഭവിക്കുന്നതിന് മനപൂർവം ശ്രമംനടത്തിയെന്ന കുറ്റംചുമത്തിയാണ് വാടാനപ്പള്ളി പോലീസ് പ്രതിയെ അറസ്റ്റ് ചെയ്തത്. വാടാനപ്പള്ളി എസ്ഐ ഷാഫി യൂസഫ്, എഎസ്ഐ രഘുനാഥൻ, സീനിയർ സിവിൽ പോലീസ് ഓഫീസർമാരായ ശ്രീജിത്ത്, സുരേഖ്, സിവിൽ പോലീസ് ഓഫീസർമാരായ വിനീത്, ദീപക് എന്നിവര്‌ അന്വേഷണസംഘത്തിലുണ്ടായി

പറപ്പൂക്കര തിരുനാൾ; കൂടുതുറക്കൽ ഭക്തിസാന്ദ്രം

പറപ്പൂക്കര: വിശുദ്ധ ജോണ്‍ നെപുംസ്യാൻ ഫൊറോന പള്ളിയിലെ തിരുനാളിനോടനുബന്ധിച്ച് വിശുദ്ധ ലോനാ മുത്തപ്പനെ കൂട്ടിൽനിന്നിറക്കുന്ന അനുഗ്രഹദായകമായ ചടങ്ങിന് ആയിരങ്ങൾ ഭക്തിപൂർവം സാക്ഷ്യംവഹിച്ചു. ഇന്നലെ വൈകീട്ട് 5.30 നു നിരവധി വൈദികരുടെയും സന്യസ്തരുടെയും സാന്നിധ്യത്തിൽ നടന്ന തിരുക്കർമങ്ങൾക്കു വികാരി ഫാ. റാഫേൽ പഞ്ഞിക്കാരൻ കാർമികത്വം വഹിച്ചു. തുടർന്ന് പള്ളിചുറ്റി പ്രദക്ഷിണത്തിനുശേഷം രാത്രി ഏഴിനു വിശുദ്ധനെ പ്രത്യേകം തയാറാക്കിയ പന്തലിൽ പ്രതിഷ്ഠിച്ചു. അസിസ്റ്റന്‍റ് വികാരി ഫാ. ആൽബിൻ പുതുശേരി, ജനറൽ കണ്‍വീനർ സൈമൻ പുതുപ്പുള്ളിപ്പറന്പിൽ, കൈക്കാരന്മാരായ ടി.ടി. ജോസ്, ടി.വൈ. ജോസ്, സെക്രട്ടറി റെജിൻ പാലത്തിങ്കൽ, പ്രദക്ഷിണം കണ്‍വീനർ ജോണ്‍സൻ മാത്തള എന്നിവർ നേതൃത്വം നൽകി.

ഫാ. ലിയോ പുത്തൂരിന്‍റെ സംസ്കാരം ഇന്ന്

തൃശൂർ: കഴിഞ്ഞദിവസം അന്തരിച്ച അതിരൂപതവൈദികൻ ഫാ. ലിയോ പുത്തൂരിന്‍റെ മൃതസംസ്കാരം ഇന്ന് ഉച്ചകഴിഞ്ഞു 2.30 നു പെരിഞ്ചേരി പള്ളിയിൽ നടത്തും. ഇന്നു രാവിലെ 7.15 മുതൽ 8.30 വരെ തൃശൂർ സെന്‍റ് ജോസഫ് വൈദികമന്ദിരത്തിൽ മൃതദേഹം പൊതുദർശനത്തിനു വയ്ക്കും. തുടർന്നു പെരിഞ്ചേരിയിലെ സ്വവസതിയിലേക്കു കൊണ്ടുപോകും. ഉച്ചകഴിഞ്ഞ് 1.30ന് സംസ്കാരശുശ്രൂഷകളുടെ ആദ്യഭാഗം വീട്ടിൽ ആരംഭിക്കും. ഉച്ചകഴിഞ്ഞു 2.30ന് പള്ളിയിൽ നടത്തുന്ന സംസ്കാരശുശ്രൂഷകൾക്കു ആർച്ച്ബിഷപ് മാർ ആൻഡ്രൂസ് താഴത്ത് കാർമികത്വം വഹിക്കും. പെരിഞ്ചേരി പുത്തൂർ ഡേവിസ് - ലിസി ദന്പതികളുടെ മകനായ ഫാ. ലിയോ തൃശൂർ മൈനർ സെമിനാരി, തിരുവില്വാമല സെന്‍റ് പോൾ ഗുരുകുലം, തൃശൂർ മേരിമാത മേജർ സെമിനാരി എന്നിവിടങ്ങളിൽ വൈദികപരിശീലനം പൂർത്തിയാക്കിയശേഷം 2018 ഡിസംബർ 26ന് തിരുപ്പട്ടം സ്വീകരിച്ചു. മുണ്ടൂർ, മുക്കാട്ടുകര, പുത്തൂർ ഇടവകകളിൽ സഹവികാരിയായും തലോർ ഇടവകയിൽ സഹായി, പല്ലിശേരി ഇടവകയിൽ വികാരി ഇൻ ചാർജായും സേവനമനുഷ്ഠിച്ചു. അതിരൂപത കാര്യാലയത്തിലെ നോട്ടറി, മെത്രാപ്പോലീത്തയുടെ സെക്രട്ടറി, പറോക് ഗവേഷണകേന്ദ്രം അംഗം എന്നീ നിലകളിൽ സേവനം ചെയ്തിട്ടുണ്ട്. ക്രൈസ്റ്റ് വില്ല, വിയാനി ഭവൻ എന്നിവിടങ്ങളിൽ അസി. ഡയറക്ടറുമായിരുന്നു. പതിയാരം ഇടവകയുടെ നടത്തുവികാരിയായി സേവനം ചെയ്തുവരികയായിരുന്നു. സഹോദരങ്ങൾ: ഡെൽവിൻ, ഡിൻസി.

പനി ബാധിച്ച് മരിച്ചു

പുത്തൂർ: പനിബാധിച്ച് ചികിൽസയിലായിരുന്ന യുവാവ് മരിച്ചു. വെള്ളക്കാരിത്തടം വടക്കേടത്ത് പരേതനായ ജോർജ് മകൻ സാബു(51) ആണ് മരിച്ചത്. സംസ്‌കാരം ഇന്ന് രാവിലെ 10ന് വെള്ളക്കാരിത്തടം വിജയമാത പള്ളിയിൽ. അമ്മ: മേരി. ഭാര്യ: വിക്ടോറിയ. പുത്തൂർ കുരിശുമൂല പെട്രോൾ പമ്പ് ജീവനക്കാരനായിരുന്നു.

കാട്ടുപന്നിക്കൂട്ടം അഞ്ച് ഏക്കറോളം പടവലംകൃഷി നശിപ്പിച്ചു

കല്ലൂര്‍: അളഗപ്പനഗര്‍ പഞ്ചായത്തിലെ കാവല്ലൂര്‍ പച്ചളിപ്പുറത്ത് കാട്ടുപന്നിക്കൂട്ടം ഇറങ്ങി അഞ്ച് ഏക്കറോളം പടവലംകൃഷി നശിപ്പിച്ചു. കര്‍ഷകനായ കുഴുപ്പിള്ളി രവിയുടെ തോട്ടത്തിലാണ് കാട്ടുപന്നികള്‍ ഇറങ്ങിയത്. ഏഴ് ഏക്കര്‍ സ്ഥലം പാട്ടത്തിനെടുത്താണ് രവി കൃഷിയിറക്കിയത്. വിളവെടുത്തുതുടങ്ങിയ കൃഷി നശിച്ചതോടെ ലക്ഷങ്ങളുടെ നഷ്ടമാണ് കര്‍ഷകനു നേരിട്ടത്. 600 ഓളം വരുന്ന പടവലത്തിന്‍റെ കടഭാഗത്തെ മണ്ണ് കുത്തിയിട്ട് നശിപ്പിച്ച നിലയിലാണ്. കഴിഞ്ഞ ദിവസം മുതല്‍ പടവലത്തിനു വിലകൂടിയതോടെ തോട്ടത്തില്‍ വിളവെടുക്കാന്‍ എത്തിയപ്പോഴാണ് കൃഷി നശിച്ചനിലയില്‍ കണ്ടത്. പ്രദേശത്തെ ഉപയോഗശൂന്യമായ പറമ്പുകള്‍ കാട്ടുപന്നികളുടെ ആവാസകേന്ദ്രമായതായി കര്‍ഷകര്‍ പറയുന്നു. കര്‍ഷകന് നേരിട്ട നഷ്ടം നികത്താന്‍ പഞ്ചായത്തും കൃഷിഭവനും ഇടപെടണമെന്ന് കര്‍ഷകക്കൂട്ടായ്മ ആവശ്യപ്പെട്ടു. ജലക്ഷാമം രൂക്ഷമായ പ്രദേശത്തു കഷ്ടപ്പെട്ടാണ് കര്‍ഷകര്‍ കൃഷിയിറക്കിയത്. ഒറ്റരാത്രിയില്‍ കാട്ടുപന്നികള്‍ ഇറങ്ങി ഭൂരിഭാഗം കൃഷിയും നശിപ്പിച്ചതോടെ കര്‍ഷകന്‍ കടക്കെണിയിലായ അവസ്ഥയാണ്. രണ്ടുലക്ഷം രൂപയുടെ നഷ്ടമാണ് കര്‍ഷകന് ഉണ്ടായത്. മാസങ്ങളായി പ്രദേശത്തു കാട്ടുപന്നിശല്യം രൂക്ഷമാണ്. പഞ്ചായത്തിന്‍റെയും കര്‍ഷകരുടെയും നേതൃത്വത്തില്‍ പല തവണ കാട്ടുപന്നികളെ വെടിവച്ചുകൊന്നിരുന്നു. കൂടുതല്‍ ഷൂട്ടര്‍മാരെ നിയോഗിച്ച് മേഖലയിലെ എല്ലാ കാട്ടുപന്നികളെയും വെടിവച്ചുകൊന്ന് കൃഷി സംരക്ഷിക്കണമെന്ന് കര്‍ഷകകൂട്ടായ്മ ഭാരവാഹികളായ പി.ആര്‍. ഡേവിസ്, പി.ഡി.ആന്‍റോ, രാജു കിഴക്കൂടന്‍ എന്നിവര്‍ ആവശ്യപ്പെട്ടു.

പുതുക്കാട് ഫ്ളവര്‍ മില്‍ കത്തിനശിച്ചു

പുതുക്കാട്: ദേശീയപാതയോരത്ത് പ്രവർത്തിക്കുന്ന ഫ്‌ളവര്‍ മില്‍ കത്തിനശിച്ചു. ചൊവ്വാഴ്ച അര്‍ധരാത്രിയോടെയാണ് തീപിടിത്തമുണ്ടായത്. പുതുക്കാട് സ്വദേശി താഴത്ത് രാജന്‍റെ ഉടമസ്ഥതയിലുള്ള റോയല്‍ ഫ്ളവര്‍ മില്ലിലാണ് തീപിടിത്തം. രണ്ടു നിലകളിലുള്ള കെട്ടിടത്തില്‍ തീ ആളിപ്പടര്‍ന്നു. യന്ത്രസാമഗ്രികളും മില്ലില്‍ സൂക്ഷിച്ചിരുന്ന വസ്തുക്കളും കത്തിനശിച്ചു. ലക്ഷങ്ങളുടെ നഷ്ടമാണ് കണക്കാക്കുന്നത്. ഷോര്‍ട്ട് സര്‍ക്യൂട്ടാണ് തീപിടിത്തത്തിനു കാരണമെന്ന് കരുതുന്നു. മില്ലിന്‍റെ പിറകുവശത്തു വച്ചിരുന്ന രണ്ട് ഗ്യാസ് സിലിണ്ടറുകളിലേക്ക് തീപടരാതിരുന്നത് വലിയ അപകടം ഒഴിവായി. സമീപത്തെ വീട്ടുകാരാണ് തീപടരുന്നത് ആദ്യം കണ്ടത്. ഉടന്‍തന്നെ ഫയര്‍ഫോഴ്‌സിനെ വിവരമറിയിക്കുകയായിരുന്നു. പുതുക്കാട്, ചാലക്കുടി എന്നിവിടങ്ങളില്‍ നിന്നെത്തിയ രണ്ട് യൂണിറ്റ് ഫയർ ഫോഴ്സാണ് തീ നിയന്ത്രണവിധേയമാക്കിയത്. സീനിയര്‍ ഫയര്‍ ആൻഡ് റെസ്‌ക്യു ഓഫീസര്‍ ടി.ജി. ജയകുമാർ തീയണയ്ക്കാൻ നേതൃത്വം നല്കി. പുതുക്കാട് പോലീസും പഞ്ചായത്ത് അംഗം സെബി കൊടിയന്‍റെ നേതൃത്വത്തില്‍ നാട്ടുകാരും രക്ഷാപ്രവര്‍ത്തനം നടത്തി.

മുരിങ്ങൂർ - കൊരട്ടി - ചിറങ്ങര മേഖലകളിൽ ജനരോഷം ശക്തം

കൊരട്ടി: ഓരോ വികസനപ്രക്രിയയും നാടിന്‍റെ വളർച്ചയ്ക്ക് ആക്കംകൂട്ടുമെന്ന പൊതുധാരണയെ മാറ്റിമറിക്കുകയാണ് ദേശീയപാത - 544 ലെ മുരിങ്ങൂർ, കൊരട്ടി, ചിറങ്ങര മേഖലകളിൽ നടക്കുന്ന നിർമാണപ്രവൃത്തികൾ. യാതൊരു തത്വദീക്ഷയുമില്ലാത്ത അടിപ്പാതനിർമാണവും, വിവിധ കോണുകളിൽനിന്നു പ്രതിഷേധസ്വരങ്ങളുയരുമ്പോഴും ഭരണ-പ്രതിപക്ഷഭേദമില്ലാതെ ജനപ്രതിനിധികളും രാഷ്ട്രീയപാർട്ടി നേതൃത്വങ്ങളും പുലർത്തുന്ന മൗനവും, കളക്ടർ അടക്കമുള്ള ഉദ്യോഗസ്ഥവൃന്ദങ്ങളുടെ നിസംഗതയും പൊതുജനത്തെ അസ്വസ്ഥരാക്കുകയാണ്. മാസങ്ങളായി ദേശീയപാത വികസനം കണ്ടും കേട്ടും വിലയിരുത്തിയ സാധാരണക്കാർക്കു പറയാനുള്ളത് ഒന്നുമാത്രം: ഇതു സഹിക്കാവുന്നതിനപ്പുറമാണ്. പഠനങ്ങളോ പ്രവൃത്തിപരിചയമോ ഇല്ല കാനനിർമാണംമാത്രം വിലയിരുത്തിയാൽ മതി നിർമാണക്കമ്പനിയുടെ പരിചയക്കുറവും ആസൂത്രണത്തിന്‍റെ അഭാവവും മനസിലാക്കാൻ. അവസാനം ചിറങ്ങര അടിപ്പാതയുടെ നീളത്തിലും പിഴവു കണ്ടെത്തി. മുരിങ്ങൂരിലും കൊരട്ടിയിലും ചിറങ്ങരയിലും ദേശീയപാതയുടെ ഇരുഭാഗങ്ങളിലും നിർമിച്ച കാനകളും സ്ലാബുകളും ചിറങ്ങര അടിപ്പാതയുടെ കോൺക്രീറ്റിംഗിനായി കെട്ടിയ കമ്പികളും പലവട്ടം നിർമിക്കുകയും പൊളിക്കുകയും വീണ്ടും നിർമിക്കുകയും ചെയ്യുന്ന വിചിത്രമായ കാഴ്ചയാണ് നാട്ടുകാർ നിരന്തരം കണ്ടിരുന്നത്. ഇപ്പോൾ കാണുന്നതു ചിറങ്ങര അടിപ്പാതയുടെ ഉപറോഡിന്‍റെയും സംരക്ഷണഭിത്തിയുടെയും നീളത്തിന്‍റെ കാര്യത്തിലും ഗുരുതരമായ വീഴ്ച നിർമാണക്കമ്പനിക്കും ദേശീയപാത അഥോറിറ്റിക്കും സംഭവിച്ചുവെന്നതാണ്. ചിറങ്ങര അടിപ്പാതയുടെ നീളം തിട്ടപ്പെടുത്തി ആറടി താഴ്ചയിൽ കുഴിയെടുത്ത് പാർശ്വഭിത്തികളുടെ ജോലികൾ തുടങ്ങിയപ്പോഴാണ് അപാകതകൾ മനസിലായത്. പതിവുപോലെ ഇവിടെയും പൊളിച്ചുനീക്കേണ്ട അവസ്ഥയായി. പൊളിച്ചുനീക്കൽ തുടങ്ങിയതോടെ വരുംദിവസങ്ങളിൽ ഗതാഗതക്കുരുക്ക് കൂടുതൽ രൂക്ഷമാകും. നിർമാണത്തിൽ മന്ദഗതി ചിറങ്ങരയിലും കൊരട്ടിയിലും മുരിങ്ങൂരിലും നിലവിൽ നിർമാണം മന്ദഗതിയിലാണ്. ആവശ്യത്തിനു തൊഴിലാളികളില്ലാത്തതാണ് കാരണം. മാസങ്ങളായി ദേശീയപാത അടച്ചുകെട്ടി വാഹനങ്ങൾ ഭാഗികമായി ബദൽ റോഡിലൂടെയും മറ്റുള്ളവ ഗ്രാമീണ റോഡുകളിലൂടെയും കടത്തിവിട്ട് നിർമാണം നടത്തുമ്പോൾ അതിനു വേഗം കൂട്ടാൻ നടപടിയില്ല. സമയബന്ധിതമായി പൂർത്തിയാക്കുമെന്ന അധികൃതരുടെ ഉറപ്പ് വെറുംവാക്കാവുകയാണ്. മുറുകുന്ന കുരുക്കുകൾ വാഹനങ്ങൾ വഴിതിരിച്ചുവിട്ട് കുരുക്കുകൾ ഒഴിവാക്കാൻ നടപടി സ്വീകരിച്ചിട്ടുണ്ടെന്ന ഉറപ്പുകളും വാക്കുകളിലൊതുങ്ങി. മുരിങ്ങൂരും ചിറങ്ങരയും കടന്നുകിട്ടാൻ പൊരിവെയിലിൽ മണിക്കൂറുകളോളം കുരുങ്ങിക്കിടക്കേണ്ട ഗതികേടാണ് ടോൾ കൊടുത്തു യാത്ര ചെയ്യുന്നവർക്കുപോലും. ആംബുലൻസുകളും, എയർപോർട്ടിലേക്കും തിരിച്ചുമുള്ള വാഹനങ്ങളും ദുരിതത്തിൽപെടുകയാണ്. വിഐപികൾക്കു സുഗമമായ യാത്രയൊരുക്കുവാൻ പോലീസ് കഷ്ടപ്പെടുന്ന കാഴ്ചകളും കാണാം. പോലീസും ഹോം ഗാർഡുകളും ഫ്ലാഗ്‌മാൻമാരും ചിലയിടങ്ങളിൽ നിൽക്കുന്നുണ്ടെങ്കിലും കുരുക്കിനു മാറ്റമൊന്നുമില്ല. ദിശാബോർഡുകൾ സ്ഥാപിച്ചിരിക്കുന്നതും ഫലപ്രദമായിട്ടല്ല. ദീർഘദൂരവാഹനങ്ങൾ വഴിതിരിച്ചുവിടുന്നതു തോന്നുംപടിയാണെന്ന ആക്ഷേപവും ശക്തമാണ്. പൊങ്ങംമുതൽ മുരിങ്ങൂർവരെ പൂർണമായി സർവീസ് റോഡ് നിർമിച്ചതിനുശേഷം നിർമാണം ആരംഭിച്ചിരുന്നെങ്കിൽ ഒരു പരിധിവരെ കുരുക്ക് ഒഴിവാക്കാമായിരുന്നു. അടച്ചുപൂട്ടൽഭീഷണിയിൽ കച്ചവടക്കാരും ഭക്ഷണശാലകൾ നടത്തുന്നവരും അടച്ചുപൂട്ടൽഭീഷണി നേരിടുകയാണ്. പൊങ്ങംമുതൽ മുരിങ്ങൂർവരെ അതിരൂക്ഷമായ ഗതാഗതക്കുരുക്കും പൊടിശല്യവും, യാതൊരു മുന്നൊരുക്കവും സമയക്രമവും ഇല്ലാത്ത നിർമാണവുംമൂലം ദുരിതം പേറുന്നത് ഒട്ടേറെ വ്യാപാരികളാണ്. ലോൺ എടുത്തും കടംവാങ്ങിയും സ്ഥാപനങ്ങൾ തുടങ്ങിയിട്ട് പാതിവഴിയിൽ നിർത്തിപ്പോകേണ്ട അവസ്ഥയിലാണ് ഇവർ. ഹോട്ടൽ മേഖല പ്രതിസന്ധിയിലാണ്. പലതും അടച്ചുപൂട്ടി. ആമ്പല്ലൂരിലെ ഗതാഗതക്കുരുക്ക് : പരിഹാരനിര്‍ദേശങ്ങളുമായി എന്‍ഫോഴ്സ്മെന്‍റ് ആര്‍ടിഒ പുതുക്കാട്: ആമ്പല്ലൂരിലെ ഗതാഗതക്കുരുക്ക് പരിഹരിക്കാനുള്ള നിര്‍ദേശങ്ങളുമായി തൃശൂര്‍ എന്‍ഫോഴ്സ്മെന്‍റ് ആര്‍ടിഒ. കളക്ടറേറ്റില്‍ നടന്ന ചര്‍ച്ചകളെതുടര്‍ന്നാണ് ഇടപെടല്‍. ചാലക്കുടി ഭാഗത്തേക്കു യാത്രക്കാര്‍ കാത്തുനില്‍ക്കുന്ന ബസ് കാത്തിരിപ്പുകേന്ദ്രം പെട്രോള്‍ പമ്പിന് അപ്പുറത്തേക്കു താത്കാലികമായി മാറ്റിസ്ഥാപിക്കാന്‍ നിര്‍ദേശിച്ചതായി എന്‍ഫോഴ്സ്മെന്‍റ് ആര്‍ടിഒ പി.വി. ബിജു പറഞ്ഞു. രണ്ടുദിവസത്തിനകം താത്കാലിക ബസ് കാത്തിരിപ്പുകേന്ദ്രം നിര്‍മിക്കും. നിലവിലെ ബസ് കാത്തിരിപ്പുകേന്ദ്രം താത്കാലികമായി അടച്ചുകെട്ടി. അടിപ്പാത‌നിര്‍മാണം നടക്കുന്നതിനാല്‍ ആമ്പല്ലൂരില്‍ സര്‍വീസ് റോഡ് വഴി പരിമിതമായ വീതിയിലൂടെയാണ് വാഹനങ്ങള്‍ കടന്നുപോകുന്നത്. ഇതിനിടയില്‍ ബസുകള്‍ നിര്‍ത്തുന്നതു വലിയ ഗതാഗതക്കുരുക്കുണ്ടാക്കിയിരുന്നു. ഇത് ഒഴിവാക്കിയുള്ള പരീക്ഷണമാണ് ആദ്യഘട്ടത്തില്‍ നടത്തുന്നത്. തൃശൂര്‍ ഭാഗത്തുനിന്നു വരുമ്പോള്‍ ആമ്പല്‍ ഹോട്ടലിനുമുന്നിലായി സര്‍വീസ് റോഡ് ആരംഭിക്കുന്ന ഭാഗത്തു വാഹനങ്ങള്‍ക്കു സര്‍വീസ് റോഡിലേക്കു സുഗമമായി പ്രവേശിക്കാന്‍ ദേശീയപാതയ്ക്കും സര്‍വീസ് റോഡിനും ഇടയില്‍ ടാര്‍ ചെയ്യാനും നിര്‍ദേശിച്ചു. ആമ്പല്ലൂര്‍ ജംഗ്ഷനുസമീപം സര്‍വീസ് റോഡും ദേശീയപാതയും ചേരുന്ന യുടേണിനോടുചേര്‍ന്ന് ടാറിംഗ് നടത്താനും ഡിവൈഡര്‍ ഏതാനും മീറ്റര്‍ നീക്കംചെയ്യാനും തീരുമാനിച്ചു. ജംഗ്ഷനോടുചേര്‍ന്ന് ഡ്രെയ്നേജിന്‍റെ സ്ലാബ് പ്ലാസ്റ്റിക് വച്ച് അടച്ചഭാഗത്തു ഗ്രില്‍ സ്ഥാപിക്കാനും ആര്‍ടിഒ നിര്‍ദേശിച്ചു. അസി. എംവിഐമാരും സംഘത്തിലുണ്ടായിരുന്നു.

വിഴിഞ്ഞം സംസ്ഥാന സർക്കാരിന്‍റെ തുറമുഖം: പിണറായി വിജയൻ

സ്വന്തം ലേഖകൻ തൃശൂർ: വിഴിഞ്ഞം തുറമുഖം കേരള സർക്കാരിന്‍റേതാണെന്നും അതിൽ അദാനി മുടക്കിയതിന്‍റെ ഇരട്ടിയിലേറെ സർക്കാർ മുടക്കിയിട്ടുണ്ടെന്നും മുഖ്യമന്ത്രി പിണറായി വിജയൻ. അദാനിയുടെ തുറമുഖം എന്നു ചിലർ വിളിക്കുന്നതുകൊണ്ടാണ് ഇക്കാര്യം പറയുന്നത്. പദ്ധതിയിൽ കേന്ദ്രത്തിന്‍റെ ഫണ്ട് ഗ്രാന്‍റായി നല്കേണ്ടതാണ്. പക്ഷേ കടമായാണ് നല്കിയത്. ഈ വിഹിതം ചെറുതാണെന്നും മുഖ്യമന്ത്രി പറഞ്ഞു. സർക്കാരിന്‍റെ നാലാംവാർഷികത്തിന്‍റെ ഭാഗമായി തേക്കിൻകാട് മൈതാനിയിൽ എൽഡിഎഫ് സംഘടിപ്പിച്ച സമ്മേളനം ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. വിഴിഞ്ഞം തുറമുഖത്തിനായി ആകെ ചെലവഴിച്ചത് 8867 കോടിയാണ്. 5595 കോടി കേരളമാണ് ചെലവിട്ടത്. അദാനിയാകട്ടെ 2454 കോടി മാത്രമാണ്. ഇതു കേരളത്തിലേതുമാത്രമല്ല, രാജ്യത്തെത്തന്നെ വലിയ തുറമുഖങ്ങളിൽ ഒന്നാണ്. കേരളത്തിന്‍റെ പ്രതിസന്ധിഘട്ടത്തിൽ പ്രതിപക്ഷം കേന്ദ്രത്തിനൊപ്പംനിന്നു. എക്കാലത്തും നുണപ്രചരണം നടത്തുകയാണ് വികസനവിരോധികൾ. സംസ്ഥാനം കടക്കെണിയിലാണെന്നു പ്രചരിപ്പിക്കുന്നു. എന്നാൽ, കോവിഡിനുശേഷം കേരളം ഒരുപാടു മുന്നോട്ടുപോയി. 2016ൽ എൽഡിഎഫ് അധികാരത്തിൽ വന്നതുകൊണ്ടുമാത്രമാണ് ആരോഗ്യരംഗത്തും വിദ്യാഭ്യാസരംഗത്തും സമഗ്രമാറ്റം കൊണ്ടുവരാനായത്. കേരളത്തിൽ ദേശീയപാത വികസനവും ഗ്യാസ് പൈപ്പിടലും വൈദ്യുത ഗ്രിഡും തുടങ്ങി ഒന്നും നടക്കില്ലെന്നുപറഞ്ഞ് കന്പനികൾ പിൻമാറിയതാണ്. ഇവയെയെല്ലാം തിരികെ കൊണ്ടുവന്ന് രാജ്യത്തിനുതന്നെ മാതൃകയാകുന്ന തരത്തിൽ ദേശീയപാത വികസനം നടപ്പിലാക്കിയത് എൽഡിഎഫ് സർക്കാരാണെന്നും മുഖ്യമന്ത്രി പറഞ്ഞു. സിപിഐ തൃശൂർ ജില്ലാ സെക്രട്ടറി കെ.കെ. വത്സരാജ്, സിപിഎം ജില്ലാ സെക്രട്ടറി കെ.വി. അബ്ദുൾഖാദർ, റവന്യൂ മന്ത്രി കെ. രാജൻ എന്നിവർ പ്രസംഗിച്ചു. മണിയുടെ സ്മാരകത്തിന് 27ന് തറക്കല്ലിടും: മുഖ്യമന്ത്രി തൃശൂർ: കലാഭവൻ മണി സ്മാരകത്തിന് 27നു തറക്കല്ലിടുമെന്നു മുഖ്യമന്ത്രി പിണറായി വിജയൻ. മണിയുടെ സഹോദരൻ ആർഎൽവി രാമകൃഷ്ണൻ ഉന്നയിച്ച ചോദ്യത്തിനു മറുപടി പറയുകയായിരുന്നു അദ്ദേഹം. 2016ൽ ഇതിനായി 50 ലക്ഷം രൂപ ബജറ്റിൽ വകയിരുത്തിയിരുന്നു. 20 സെന്‍റ് സ്ഥലത്തു മൂന്നുകോടിയുടെ പദ്ധതിയാണു നടപ്പാക്കുന്നത്. ഏപ്രിലിൽ പദ്ധതിക്ക് അനുമതി ലഭിച്ചെന്നും ഫോക്‌ലോർ അക്കാദമി വഴിയാകും നിർമാണമെന്നും മുഖ്യമന്ത്രി പറഞ്ഞു. ഒളകരയെ റവന്യൂ ഗ്രാമത്തിൽ ഉൾപ്പെടുത്തും: മുഖ്യമന്ത്രി തൃശൂർ: ഒളകര ഉന്നതിയെ റവന്യൂ ഗ്രാമത്തിൽ ഉൾപ്പെടുത്തുമെന്നു മുഖ്യമന്ത്രി പിണറായി വിജയൻ. ഉന്നതിയിലെ മൂപ്പത്തി മാധവിയുടെ ചോദ്യത്തിനു മറുപടി പറയുകയായിരുന്നു അദ്ദേഹം. ഒളകര ഉൾപ്പെടെ 600 റവന്യൂ ഗ്രാമങ്ങളിൽ സർക്കാർ നടപടി പൂർത്തിയാക്കുന്നു. വനാവകാശപ്രകാരം ലഭിച്ച ഭൂമി റവന്യൂ ഭൂമിയാക്കുന്നതോടെ അടിസ്ഥാനസൗകര്യങ്ങൾ ലഭിക്കും. കാടിന്‍റെ പരിമിതികൾ മറികടക്കാനുമാകും. കൃഷി നടത്താൻ മരംമുറിക്കൽ അടക്കമുള്ള കാര്യങ്ങളിൽ ഹൈക്കോടതിവിധി പരിഗണിക്കേണ്ടിവരുമെന്നും മുഖ്യമന്ത്രി പറഞ്ഞു. ഒളകര ഉന്നതിയിൽ 44 കുടുംബങ്ങൾക്ക് ഒന്നരയേക്കർ ഭൂമിവീതം അടുത്തിടെ കൈമാറിയിരുന്നു.

തൃശൂർ റെയിൽവേ സ്റ്റേഷനിൽ പാർക്കിംഗ് നിരക്ക് പരിഷ്കരിച്ചു

തൃശൂർ: റെയിൽവേ സ്റ്റേഷനിലെ വിവിധ പാർക്കിംഗ് കേന്ദ്രങ്ങളിൽ വാഹനങ്ങളുടെ പാർക്കിംഗിനുള്ള നിരക്കുകൾ പരിഷ്കരിച്ചു. പടിഞ്ഞാറെ കവാടത്തിൽ പുതിയ നിരക്കുകൾ ഈമാസം ആദ്യവാരത്തിൽ നിലവിൽ വന്നു. കിഴക്കുഭാഗത്തുള്ള പ്രധാന കവാടത്തിലെ പുതുക്കിയ പാർക്കിംഗ് നിരക്കുകൾ ജൂണ്‍ ഒന്നുമുതൽ പ്രാബല്യത്തിൽ വരുമെന്നു റെയിൽവേ അറിയിച്ചു. ജിഎസ്ടി അടക്കമാണ് ഈ നിരക്കുകൾ. സൈക്കിൾ, ഇരുചക്രവാഹനം, മുച്ചക്ര-നാലുചക്ര വാഹനം, മിനി ബസ്/ബസ് എന്ന ക്രമത്തിൽ, വിവിധ സമയങ്ങളിലേക്കുള്ള പുതിയ പാർക്കിംഗ് നിരക്കുകൾ: രണ്ടുമണിക്കൂർ വരെ - 5, 10, 30, 130 രൂപ. രണ്ടുമുതൽ എട്ടുമണിക്കൂർവരെ - 10, 20, 50, 270. എട്ടുമുതൽ 24 മണിക്കൂർവരെ - 10, 30, 80, 380. 24 മുതൽ 48 മണിക്കൂർവരെ - 20, 60, 180, 840. 48 മുതൽ 72 മണിക്കൂർവരെ - 40, 110, 300, 1260. 72 മുതൽ 96 മണിക്കൂർവരെ - 65, 170, 600, 2100. 96 മണിക്കൂറിൽ കൂടുതൽവരുന്ന ഓരോ 24 മണിക്കൂറോ അതിൽ കുറവോ വരുന്ന സമയത്തിനും - 20, 70, 200, 840 രൂപ വീതം. ഹെൽമറ്റിന് ഓരോ 24 മണിക്കൂറോ അതിൽ കുറവോ വരുന്ന സമയത്തിനും 10 രൂപവീതം. പ്രതിമാസ പാർക്കിംഗ് നിരക്ക് സൈക്കിളിന് 200 രൂപയും ഇരുചക്രവാഹനത്തിന് 600 രൂപയും ആയിരിക്കും. പ്രതിമാസ പാർക്കിംഗ് പാസുള്ളവർ തുടർച്ചയായി 72 മണിക്കൂറിൽ കൂടുതൽ സമയം വാഹനം പാർക്ക് ചെയ്താൽ സാധാരണ പാർക്കിംഗ് നിരക്ക് നൽകണം. പ്രീമിയം പാർക്കിംഗ് നിരക്ക് രണ്ടുമണിക്കൂർവരെ ഇരുചക്രവാഹനത്തിന് 15 രൂപയും നാലുചക്ര വാഹനത്തിനു 40 രൂപയുമാണ്. തുടർന്നുവരുന്ന ഓരോ മണിക്കൂറോ അതിൽ കുറവോ വരുന്ന സമയത്തിനും യഥാക്രമം 15, 30 രൂപവീതം നൽകണം.

സർക്കാരിനു കപടമുഖം: അഡ്വ. ജോസഫ് ടാജറ്റ്

തൃശൂർ: ആശാ വർക്കർമാരോടു മുഖംതിരിക്കുന്ന മുഖ്യമന്ത്രി തൃശൂരിലെ പൗരപ്രമുഖരോടു സംസാരിക്കാൻ നേരംകണ്ടെത്തുന്പോൾ സർക്കാരിന്‍റെ കപടമുഖം പുറത്തുവരുന്നെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ്. ജില്ലയിൽ അഞ്ചുലക്ഷത്തിലേറെപ്പേർക്കു സാമൂഹികസുരക്ഷാ പെൻഷൻ ലഭിച്ചിട്ടു മൂന്നുമാസമായി. തൊഴിലില്ലായ്മയ്ക്കൊപ്പം സർക്കാർപദ്ധതിയായ ബനാന പാർക്ക്, ഫയർവർക്സ് ക്ലസ്റ്റർ എന്നിവ ആരംഭിച്ചിട്ടില്ല. ജില്ലയ്ക്ക് അനുവദിച്ച പണം ചെലവഴിക്കാതെ ലാപ്സാകുന്നു. സർക്കാർ ഫണ്ട് അനുവദിക്കാതെ 1100 കോടിയുടെ വികസനപ്രവർത്തനങ്ങൾ തദ്ദേശസ്ഥാപനങ്ങൾക്കു നഷ്ടമായി. 2000 പേർക്കു വനഭൂമിപട്ടയം ലഭിക്കാനുണ്ട്. ആശുപത്രികളിൽ പാരസിറ്റമോൾ മാത്രമാണു ലഭിക്കുന്നത്. നാലുവർഷത്തിനിടെ അന്പതോളംപേർ മരിച്ചിട്ടും വന്യജീവി ആക്രമണവിഷയത്തിൽ പരിഹാരമായില്ല. എബിസി പദ്ധതി നിലച്ചു. കോൾമേഖലയ്ക്കു കോടികൾ നൽകാനുണ്ട്. അക്രമങ്ങളും മയക്കുമരുന്നുകേസുകളും കുത്തനേ വർധിച്ചു. സമസ്തമേഖലയും താറുമാറാകുന്പോൾ സർക്കാരിന്‍റെ വാർഷികത്തിനു പൊട്ടിക്കുന്നതു 140 കോടി രൂപയാണെന്നും അഡ്വ. ജോസഫ് ടാജറ്റ് കുറ്റപ്പെടുത്തി.

വ്യാപാര സ്ഥാപനത്തിന് തീപിടിച്ചു

കുതിരാൻ: ദേശീയപാതയിൽ കൊമ്പഴയിൽ വ്യാപാരസ്ഥാപനത്തിന് തീപിടിച്ചു. ഹാപ്പി ചിപ്‌സ് എന്ന ടീഷോപ്പിനാണ് തീ പിടിച്ചത്. ഒരു ജീവനക്കാരിക്കു പൊള്ളലേറ്റു. പരിക്ക് ഗുരുതരമല്ല. ഇന്നലെ രാവിലെയായിരുന്നു സംഭവം. ചിരട്ട കത്തിക്കുന്നതിനിടയിൽ എണ്ണയിൽ തീ പടർന്നുപിടിച്ചതാണ് അപകടകാരണം. അപകടം നടന്ന സമയം ദേശീയപാതയിലൂടെ പോയിരുന്ന ഗെയിൽ ഇന്ത്യാ ലിമിറ്റഡിന്‍റെ ഫയർ യൂണിറ്റ് സ്ഥലത്തെത്തി തീ അണച്ചതിനാൽ വലിയ ദുരന്തം ഒഴിവായി.

തലപ്പിള്ളി സർക്കിൾ സഹ. യൂണിയൻ സിപിഎം പിടിച്ചെടുത്തു

വടക്കാഞ്ചേരി: തലപ്പിള്ളി സർക്കിൾ സഹകരണ യൂണിയൻ സിപിഎം പിടിച്ചെടുത്തു. 11 സീറ്റുകളിലേക്കു നടന്ന തെരഞ്ഞെടുപ്പിൽ ആറു സീറ്റ് സിപിഎമ്മിനും അഞ്ചു സീറ്റ് കോൺഗ്രസിനും ലഭിച്ചു. ഇന്നലെയായിരുന്നു തെരഞ്ഞെടുപ്പ്. കോൺഗ്രസിലെ കലഹമാണ് സിപിഎമ്മിന്‍റെ വിജയത്തിനുപിന്നിൽ. നാമനിർദേശപത്രിക പിൻവലിക്കാനുള്ള അവസാനഘട്ടത്തിൽ കോൺഗ്രസ് മുൻ ബ്ലോക്ക് സെക്രട്ടറിയും വീരോലിപ്പാടം ക്ഷീരസംഘം പ്രസിഡന്‍റുമായ ടി.വി. പൗലോസ് പത്രിക പിൻവലിച്ചതിനെതുടർന്ന് സിപിഎം നേതാവും ബ്ലോക്ക് പഞ്ചായത്ത് വൈസ് പ്രസിഡന്‍റുമായ സി.വി. സുനിൽകുമാർ എതിരില്ലാതെ തെരഞ്ഞെടുക്കപ്പെട്ടിരുന്നു. ക്ഷീരമേഖലയിൽനിന്നാണ് പൗലോസ് മത്സരിച്ചിരുന്നത്. ഈ സംഭവം കോൺഗ്രസിൽ പൊട്ടിത്തെറിക്കു വഴിവച്ചു. നേതാക്കൾ ഡിസിസിക്കും കെപിസിസിക്കും പരാതികളും നൽകിയിരുന്നു. എന്നാൽ ഇതുവരെ പൗലോസിനെതിരേയും അതിനു സഹായം ചെയ്തവർക്കെതിരെയും ഒരു നടപടിയും ഉണ്ടായില്ല. ഇതേച്ചൊല്ലി കോൺഗ്രസിലുണ്ടായ അമർഷമാണ് തെരഞ്ഞെടുപ്പുഫലത്തിൽ പ്രതിഫലിച്ചതെന്നാണ് സൂചന. തലപ്പിള്ളി സർക്കിൾ സഹകരണ യൂണിയൻ ആരംഭിച്ച അന്നുമുതൽ കോൺഗ്രസിന്‍റെ നേതൃത്വത്തിലുള്ള ഭരണസമിതിയാണ് ഭരണം നടത്തിയിരുന്നത്. ഇന്നലെ നടന്ന തെരഞ്ഞെടുപ്പിൽ പ്രാഥമിക സഹകരണസംഘം വിഭാഗത്തിലേക്കു മത്സരിച്ച നാലുപേരിൽ മൂന്നുപേർ പരാജയപ്പെടുകയായിരുന്നു. ഈ വിഭാഗത്തിലാണ് പൂർണമായും അട്ടിമറി നടന്നതെന്നു പറയുന്നു. സി.വി. സുനിൽകുമാർ, യു.എസ്. കൃഷ്ണൻകുട്ടി, എൻ.കെ. പ്രമോദ്കുമാർ, എം.കെ. മോഹനൻ, കെ.ജെ. ബിജു, എം.കെ. സുകുമാരൻ എന്നിവർ സിപിഎമ്മിൽനിന്നും പി.പി. യേശുദാസ്, സിന്ധു സുബ്രഹ്മണ്യൻ, എ. രാജു, കെ.ജെ. ജോഷി, ശശി പുവ്വത്തിൽ എന്നിവർ കോൺഗ്രസിൽനിന്നും വിജയിച്ചു.

വിജയത്തിളക്കത്തിൽ വീണ്ടും സെന്‍റ് വിൻസെന്‍റ് പള്ളോട്ടി സ്കൂൾ

തൃശൂർ: സിബിഎസ്ഇ പരീക്ഷയിൽ പ്ലസ്ടുവിനും പത്താംക്ലാസിലും നൂറുശതമാനം വിജയം കൈവരിച്ച് ചരിത്രം വീണ്ടും ആവർത്തിച്ച് സെന്‍റ് വിൻസെന്‍റ് പള്ളോട്ടി സ്കൂൾ. പ്ലസ് ടു പരീക്ഷയിൽ പാർവതി ജിനോബ് പൊറ്റെക്കാടിനും ഹരിഗോവിന്ദ് ജിനോബ് പൊറ്റെക്കാടിനും മുഴുവൻ വിഷയങ്ങൾക്കും എ വൺ നേടാൻ കഴിഞ്ഞു. 90 ശതമാനത്തിലധികം മാർക്ക് 11 കുട്ടികൾ നേടി. ബയോമാത്‌സിൽ പാർവതിയും കന്പ്യൂട്ടർ മാത്‌സിൽ ഡേവിഡ് വിൻസണും ബയോലാംഗ്വേജിൽ ഗോപിക സാജനും മിന്നുന്ന നേട്ടം കൈവരിച്ചു. പത്താംക്ലാസ് പരീക്ഷയിലും ഉന്നതവിജയം കരസ്ഥമാക്കാൻ വിദ്യാലയത്തിനു സാധിച്ചു. അക്ഷയ് ജോബി, നീഹാരിക എന്നിവർ മുഴുവൻ വിഷയങ്ങളിലും എ വൺ നേടി. എട്ടുപേർ 90 ശതമാനത്തിനു മുകളിൽ മാർക്ക് നേടി. 32 പേർ ഡിസ്റ്റിംഗ്ഷനും 22 പേർ ഫസ്റ്റ് ക്ലാസും നേടി.

അതിരൂപതാദിനം, ബൈബിൾ കണ്‍വൻഷൻ; ഒരുക്കങ്ങളായി

കണ്ടശാംകടവ്: സെന്‍റ് മേരീസ് നേറ്റിവിറ്റി ഫൊറോന പള്ളിയിൽ ഇന്നുമുതൽ ആരംഭിക്കുന്ന ബൈബിൾ കണ്‍വൻഷനും അതിരൂപതാദിനാഘോഷ പരിപാടികൾക്കുമുള്ള ഒരുക്കങ്ങൾ പൂർത്തിയായി. ജെറുസലേം ധ്യാനകേന്ദ്രത്തിന്‍റെ നേതൃത്വത്തിൽ ഫാ. ഡേവിസ് പട്ടത്ത് നയിക്കുന്ന ബൈബിൾ കണ്‍വൻഷൻ ഇന്നുമുതൽ 18 വരെ നടക്കും. എല്ലാ ദിവസവും വൈകീട്ട് അഞ്ചുമുതൽ ഒന്പതുവരെ വിശുദ്ധ കുർബാന, കുന്പസാരം, വിടുതൽആരാധന, കൗണ്‍സലിംഗ്, സൗഖ്യാരാധന എന്നിവ ഉണ്ടായിരിക്കും. 20ന് അതിരൂപതാദിനാഘോഷത്തിൽ ആർച്ച് ബിഷപ് മാർ ആൻഡ്രൂസ് താഴത്ത് സമൂഹബലി അർപ്പിക്കും. കേരള വെറ്ററിനറി ആൻഡ് ആനിമൽ സയൻസ് യൂണിവേഴ്സിറ്റി വൈസ് ചാൻസലർ ഡോ. കെ.എസ്. അനിൽ മുഖ്യാതിഥിയായിരിക്കും. കൃതജ്ഞതാബലി, അവാർഡ് ദാനം, പൊതുസമ്മേളനം, കലാപരിപാടികൾ എന്നിവ ഉണ്ടായിരിക്കും. വികാരി ജനറാൾ മോണ്‍. ജോസ് കോനിക്കര, വർക്കിംഗ് ചെയർമാൻ ഫാ. റാഫേൽ ആക്കാമറ്റത്തിൽ, ജനറൽ കണ്‍വീനർ ഫാ. സോളി തട്ടിൽ, അസി. വികാരി ഫാ. അജിത്ത് ചിറ്റിലപ്പിള്ളി, ട്രസ്റ്റിമാരായ ബൈജു ജോർജ്, ജോസഫ് അറയ്ക്കൽ, ജെയ്സണ്‍ പോൾ തേയ്ക്കാനത്ത്, ജിന്‍റോ ചാലിശേരി എന്നിവർ പരിപാടികൾക്കു നേതൃത്വം നൽകും.

കർഷക കോൺഗ്രസ് ധർണ നടത്തി

ചാലക്കുടി: കാലാവസ്ഥ വ്യതിയാനംമൂലം വിളകൾക്ക് ഉണ്ടാകുന്ന നഷ്ടങ്ങൾ പഠിക്കാനും പരിഹരിക്കാനും നെല്ല്, തെങ്ങ് തുടങ്ങിയ കൃഷികൾ പ്രത്യേകം പരിപാലിക്കാനും ലോക ബാങ്ക് സർക്കാരിനു നൽകിയ 139 കോടി രൂപ വകമാറ്റി ചെലവഴിച്ച സർക്കാർ നടപടിക്കെതിരെയും നെൽകർഷകരോട് സർക്കാർ കാണിക്കുന്ന അവഗണനക്കെതിരെയും കർഷക കോൺഗ്രസ് നിയോജകമണ്ഡലം കമ്മിറ്റിയുടെ നേതൃത്വത്തിൽ കൃഷി ഭവനു മുന്നിൽ ധർണ നടത്തി. കോൺഗ്രസ് ബ്ലോക്ക് പ്രസിഡന്‍റ് വി.ഒ. പൈലപ്പൻ ഉദ്ഘാടനം ചെയ്തു. കർഷക കോൺഗ്രസ് നിയോജകമണ്ഡലം പ്രസിഡന്‍റ് ബിജു കുരിശങ്കർ അധ്യക്ഷത വഹിച്ചു. ഡിസിസി ജനറൽ സെക്രട്ടറി പി.കെ. ജേക്കബ് മുഖ്യപ്രഭാഷണം നടത്തി. നേതാക്കളായ പി.കെ. അരുൺകുമാർ, ജോസ് കൊച്ചേക്കാടൻ, ജോർജ് കല്ലേലി, ബിജു പറമ്പി, ആന്‍റോ പീണിക്കപ്പറമ്പൻ, ആന്‍റോ മേലപ്പുറം, പ്രീതി ബാബു, ജോൺസൺ കണ്ടംകുളത്തി, മുൻ പഞ്ചായത്ത് പ്രസിഡന്‍റുമാരായ പി.പി. അഗസ്റ്റി, റിജു മാവേലി, മനേഷ് സെബാസ്റ്റ്യൻ തുടങ്ങിയവർ പ്രസംഗിച്ചു.

ഇരിങ്ങാലക്കുട ഡോണ്‍ബോസ്‌കോ തിരുനാള്‍ 17, 18 തീയതികളില്‍

ഇരിങ്ങാലക്കുട: ഡോണ്‍ബോസ്‌കോ ദേവാലയത്തിൽ സഹായമാതാവിന്‍റെ തിരുനാള്‍ 17, 18 തീയതികളില്‍ ആഘോഷിക്കും. ഇന്നു രാവിലെ 6.30 ന്‍റെ ദിവ്യബലിക്കുശേഷം ഡോണ്‍ബോസ്‌കോ റെക്ടര്‍ ഫാ. ഇമ്മാനുവേല്‍ വട്ടക്കുന്നേല്‍ എസ്ബിഡി കൊടിയേറ്റം നിര്‍വഹിക്കും. നാളെ വൈകീട്ട് 7.30ന് ദീപാലങ്കാര സ്വിച്ച് ഓണ്‍ കര്‍മം. 17 ന് രാവിലെ 6.30ന് ദിവ്യബലിക്കുശേഷം വിവിധ കുടുംബ കൂട്ടായ്മകളുടെയും സംഘടനകളുടെയും നേതൃത്വത്തില്‍ അഖണ്ഡ ജപമാല. അന്നദിവസം വൈകീട്ട് 5.30 ന് നവനാള്‍ തിരുക്കര്‍മങ്ങള്‍ക്കുശേഷം പ്രസുദേന്തി വാഴ്ച, രൂപക്കൂട് എഴുന്നള്ളിച്ചുവയ്ക്കല്‍. തിരുനാള്‍ ദിനമായ 18 ന് രാവിലെ എട്ടുമുതല്‍ വൈകീട്ട് നാലുവരെ മാതാവ് പ്രത്യക്ഷപ്പെട്ട സ്ഥലങ്ങള്‍, ജീവചരിത്രം എന്നിവ ഉള്‍ക്കൊള്ളിച്ചു കൊണ്ടുള്ള സൗജന്യ മരിയന്‍ ഫോട്ടോകളുടെയും ജപമാലകളുടെയും പ്രദര്‍ശനം. രാവിലെ 9.30 ന് ആഘോഷമായ തിരുനാള്‍ ദിവ്യബലിക്ക് പാലാ രൂപത മുന്‍ സഹായമെത്രാനും ഇപ്പോള്‍ ഏകാന്ത സന്യാസ ജീവിതം നയിക്കുന്ന മാര്‍ ജേക്കബ് മുരിക്കൻ‍ മുഖ്യകാര്‍മികത്വം വഹിക്കും. വൈകീട്ട് 5.30 ന് ജപമാല പ്രദക്ഷിണം, വര്‍ണമഴ, നേര്‍ച്ച വിതരണം. തിരുനാളിനോടനുബന്ധിച്ചു നിര്‍ധനരായ ഡയാലിസിസ് രോഗികള്‍ക്ക് 300 ഡയാലിസിസ് കിറ്റ് വിതരണം ചെയ്യും. തിരുനാളിന്‍റെ ഒരുക്കങ്ങള്‍ പൂര്‍ത്തിയായതായി ഫാ. ജിതിന്‍ മൈക്കിള്‍, ജനറല്‍ കണ്‍വീനര്‍ ജിജു കോട്ടോളി, ജെയിംസ് ആട്ടൂകാരന്‍, കെ.ജെ. ജോര്‍ജ്, സണ്ണി കണ്ടംകുളത്തി, ആന്‍റണി വടക്കുമ്പാടന്‍ എന്നിവര്‍ അറിയിച്ചു.

ചേരിപുനരധിവാസം: 45 ഗുണഭോക്താക്കൾക്ക് ഭൂമിയുടെ ഉടമസ്ഥാവകാശം നൽകും - നഗരസഭ

ചാലക്കുടി: നഗരസഭ വിവിധ ഘട്ടങ്ങളിൽ ചേരിപ്രദേശങ്ങളിൽ നിന്നും മാറ്റി പാർപ്പിച്ചവരും ഇപ്പോൾ കൈവശംവച്ച് താമസിച്ചു വരുന്നവരുമായ 45 കുടുംബങ്ങൾക്ക് ഭൂമിയുടെ ഉടമസ്ഥാവകാശം നൽകാൻ നഗരസഭ തീരുമാനിച്ചു. പതിറ്റാണ്ടുകളായി ഗാന്ധിനഗറിൽ താമസിക്കുന്ന 19, വെട്ടുകടവിലെ 18, ഉറുമ്പൻകുന്നിലെ എട്ട് കുടുംബങ്ങൾക്കാണ് ഉടമസ്ഥാവകാശം നൽകാൻ തീരുമാനിച്ചത്. മുൻ ഭരണസമിതികളുടെ കാലഘട്ടത്തിൽ ഈ കുടുംബങ്ങൾക്ക് പട്ടയം നൽകുന്നതിനുള്ള നടപടികൾ ആരംഭിച്ചെങ്കിലും സർക്കാർ തലത്തിൽനിന്നും അനുമതി ലഭിച്ചിരുന്നില്ല. ഈ വർഷത്തെ നഗരസഭ ബജറ്റിലാണ് ഈ കുടുംബങ്ങൾക്ക് കൈവശക്കാർക്ക് ഉടമസ്ഥാവകാശം നൽകാനുള്ള പ്രഖ്യാപനം ഉണ്ടായത്. ഇതിന്‍റെ അടിസ്ഥാനത്തിലാണ് തുടർ നടപടികൾ സ്വീകരിക്കാനും ഇതിനാവശ്യമായ അനുമതി ലഭ്യമാക്കാനും തീരുമാനിച്ചത്. നഗരസഭയുടെ 2025-26 വാർഷിക പദ്ധതിയിൽ സ്പിൽ ഓവർ പ്രോജക്ടുകൾ ഉൾപ്പെടെ 24.5 കോടി രൂപയുടെ പദ്ധതികൾക്കു കൗൺസിൽ അം ഗീകാരം നൽകി. ചെയർമാൻ ഷിബു വാലപ്പൻ അധ്യക്ഷത വഹിച്ചു.

കൂടല്‍മാണിക്യം ക്ഷേത്രത്തിലെ പ്രസാദ ഊട്ടിന് ആയിരങ്ങള്‍

ഇരിങ്ങാലക്കുട: ഉത്സവത്തിനെത്തുന്ന എല്ലാവര്‍ക്കും ഭക്ഷണം കൊടുക്കുന്ന സമ്പ്രദായം കൂടല്‍മാണിക്യം ക്ഷേത്രത്തിന്‍റെ മഹത്വമാണ്. കടുത്ത ചൂടിനെ നേരിട്ടും മണിക്കൂറുകള്‍ വരിനിന്നുമാണ് അന്നദാനത്തില്‍ പങ്കാളികളാകുന്നത്. ഭക്ഷണം എന്നതിലുപരിയായി വഴിപാട് എന്ന കാഴ്ചപ്പാടിലേക്ക് വളര്‍ന്നുകഴിഞ്ഞതായി ദേവസ്വം അധികൃതര്‍ പറഞ്ഞു. ഉണ്ണായിവാരിയര്‍ സ്മാരക കലാനിലയത്തിലും തെക്കേ ഊട്ടുപുരയിലുമായി പത്തു ദിവസങ്ങളിലായി നടക്കുന്ന ഉത്സവത്തിനിടെ എട്ടു ദിവസങ്ങളിലായി അറുപതിനായിരത്തോളം പേര്‍ക്കാണു ദേവസ്വം നാലുനേരങ്ങളിലായി സൗജന്യ ഭക്ഷണം നല്‍കുന്നത്. ജില്ലാ ഭരണകൂടത്തിന്‍റെ ഉത്തരവനുസരിച്ച് എത്തുന്ന ഉദ്യോഗസ്ഥര്‍, പോലീസ്, കലാകാരന്‍മാര്‍, ആനക്കാര്‍, മേളക്കാര്‍, ഉത്സവ വോളന്‍റിയര്‍മാര്‍, ആഘോഷകമ്മിറ്റി ഭാരവാഹികള്‍ എന്നിവരെല്ലാം അന്നദാനത്തില്‍ പങ്കാളികളാകുന്നുണ്ട്. ഭക്തജനങ്ങള്‍ക്ക് തെക്കേ ഊട്ടുപുരയിലും മേളക്കാര്‍ക്കും വോളന്‍റിയര്‍മാര്‍ക്കും കലാകാരന്മാര്‍ക്കും ഭാരവാഹികള്‍ക്കും മറ്റും കലാനിലയം ഹാളിലുമാണ് അന്നദാനം. രാവിലെ പ്രഭാതഭക്ഷണം, ഉച്ചക്ക് പ്രസാദഊട്ട്, ഉച്ചതിരിഞ്ഞ് ചായയും കടിയും, രാത്രി ഭക്ഷണം എന്നിങ്ങനെയാണ് നല്‍കുന്നത്. ഊരകം സ്വദേശിയും പ്രമുഖ പാചകക്കാരനുമായ ഉണ്ണികൃഷ്ണന്‍നായർക്കാണ് ഇക്കുറി പാചകത്തിന്‍റെ ചുമതല. കൂടല്‍മാണിക്യത്തില്‍ ഇന്ന് സ്‌പെഷല്‍ പന്തലില്‍ ഉച്ചയ്ക്ക് ഒന്നുമുതല്‍ 4.45 വരെ തിരുവാതിരക്കളി, 4.50 മുതല്‍ 5.10 വരെ എടക്കുളം സ്വാതി സ്റ്റാന്‍ലിയുടെ നൃത്തനൃത്യങ്ങള്‍, 5.15 മുതല്‍ 5.40 വരെ തൃശൂര്‍ അപര്‍ണ മോഹന്‍റെ ഭരതനാട്യം, 5.45 മുതല്‍ 6.10 വരെ നടവരമ്പ് മാണിക്യം കലാക്ഷേത്രയുടെ നൃത്തനൃത്യങ്ങള്‍, 6.15 മുതല്‍ 7.35 വരെ ശ്രീദേവി, ദേവിക, കാര്‍ത്തിക ഷാജി എന്നിവരുടെ ഭരതനാട്യം, 7.40 മുതല്‍ 8.35 വരെ ബാംഗ്ലൂര്‍ അര്‍ക്ക കലാ കുടീര ഭാനുപ്രിയ രാഗേഷിന്‍റെ ഭരതനാട്യം, 8.40 മുതല്‍ 10 വരെ കൊച്ചി ആര്‍ദ്ര രവിയുടെ ഭരതനാട്യം. സംഗമം വേദിയില്‍ രാവിലെ 8.30മുതല്‍ ശീവേലിക്കും രാത്രി 9.30 മുതല്‍ വിളക്കിനും കിഴക്കൂട്ട് അനിയന്‍മാരാര്‍ പ്രമാണം വഹിക്കും. ഉച്ചയ്ക്ക് ഒന്നു മുതല്‍ 2.55 വരെ തിരുവാതിരക്കളി, 2.40 മുതല്‍ 3.25 വരെ എറണാകുളം മുരളിക ഡോ. ബിനു ഉപേന്ദ്രന്‍റെ അഷ്ടപദി, 3.30 മുതല്‍ 4.10 വരെ ചേലൂര്‍ യാമു സൂരജും സംഘവും അവതരിപ്പിക്കുന്ന നൃത്തനൃത്യങ്ങള്‍. 4.15 മുതല്‍ 4.55 വരെ ചെന്നൈ ശരണ്‍ മോഹനും രേഷ്മ ശരണ്‍ എന്നിവരുടെ ഭരതനാട്യ കച്ചേരി, അഞ്ചുമുതല്‍ 5.55 വരെ അമ്പലപ്പുഴ വിജയകുമാറിന്‍റെ സോപാനസംഗീതം, ആറുമുതല്‍ 6.55 വരെ ചെന്നൈ കലൈമാമണി രശ്മി മേനോന്‍റെ മോഹിനിയാട്ടം, ഏഴ് മുതല്‍ 7.55 വരെ ബംഗ്ലൂര്‍ നവിയ നടരാജന്‍റെ ഭരതനാട്യം, എട്ട് മുതല്‍ 10 വരെ തൃപ്പുണ്ണിത്തുറ ടി.എച്ച്. സുബ്രഹ്മണ്യത്തിന്‍റെ വയലിന്‍ കച്ചേരി, രാത്രി 12ന് സര്‍വതോഭദ്രം കലാകേന്ദ്രത്തിനന്‍റെ കഥകളി സന്താനഗോപാലം, നരകാസുരവധം.

ടിപ്പർ ഇടിച്ച് യുവാവ് മരിച്ചു

പഴയന്നൂർ: ബ്ലോക്ക് ഓഫീസിനു സമീപം ടിപ്പർ ഇടിച്ച് യുവാവ് മരിച്ചു. അത്താണിപ്പറമ്പിൽ ശിവൻ മകൻ വിജയ് (17) ആണ് മരിച്ചത്. കഴിഞ്ഞദിവസം രാവിലെ വീടിന്‍റെ പരിസരത്തുവച്ച് ടിപ്പർ ഇടിച്ച് തെറിപ്പിക്കുകയായിരുന്നു. ഉടനെ നാട്ടുകാർ ചേർന്ന് ആശുപത്രിയിൽ പ്രവേശിപ്പിച്ചെങ്കിലും പിന്നീട് മരിച്ചു. പഴയന്നൂർ പോലീസ് മേൽനടപടികൾ സ്വീകരിച്ചു. സംസ്കാരം നടത്തി. അമ്മ: സിന്ധു, സഹോദരൻ: വിഷ്ണു.

ട്രെയിന്‍തട്ടി വയോധിക മരിച്ചു

പുതുക്കാട്: തെക്കേതൊറവ് റെയില്‍വെ ഗേറ്റിനു സമീപം ട്രെയിന്‍തട്ടി വയോധിക മരിച്ചു. പാഴായി സ്വദേശിനി നന്തിയാലത്ത് വീട്ടില്‍ വേലായുധന്‍ ഭാര്യ അമ്മിണി(80) ആണ് മരിച്ചത്. ഇന്നലെ രാവിലെ പത്തേകാലോടെയായിരുന്നു സംഭവം. തെക്കേ തൊറവിലുള്ള മകന്‍റെ വീട്ടില്‍ നിന്ന് ചെങ്ങാലൂരിലുള്ള മറ്റൊരു മകന്‍റെ വീട്ടില്‍ പോകാന്‍ റെയില്‍പാത മുറിച്ചുകടക്കുന്നതിനിടെയാണ് അപകടം. സംസ്‌കാരം ഇന്ന് രാവിലെ 10ന് കുരിയച്ചിറ ശാന്തിമന്ദിരം ക്രിമറ്റോറിയത്തില്‍. മക്കള്‍: രാജന്‍, ബിജു, പരേതയായ ഗീത. മരുമക്കള്‍: രജനി, ശാലിനി, കുമാരന്‍.

തെങ്ങിൽനിന്നു വീണ് മരിച്ചു

ചേലക്കര: സ്വകാര്യവ്യക്തിയുടെ പറന്പിലെ തേങ്ങ പറിക്കുന്നതിനിടെ മധ്യവയസ്കൻ തെങ്ങിൽനിന്നു വീണ് മരിച്ചു. കാളിയാറോഡ് കുന്നത്ത് വീട്ടിൽ അഷറഫ്(66) ആണ് മരിച്ചത്. കബറടക്കം നടത്തി. ഭാര്യ: നബീസ. മക്കൾ: അബ്ബാസ് (സിപിഎം കാളിയാറോഡ് ബ്രാഞ്ച് സെക്രട്ടറി), ബൾക്കീസ (മുൻ ഗ്രാമ പഞ്ചായത്ത് മെമ്പർ). മരുമക്കൾ: സുമ്മയ്യ, സാലു ഷാഹിദ്.

മരിച്ചനിലയിൽ

വടക്കേക്കാട്: നായരങ്ങാടി സെന്‍ററിനു സമീപം ഒഴിഞ്ഞ പറന്പിൽ ഗൃഹനാഥനെ തൂങ്ങി മരിച്ചനിലയിൽ കണ്ടെത്തി. ഞമ്മനേംങ്ങാട് സ്വദേശി മൂത്തേടത്ത് വീട്ടിൽ സുനിൽ (48) ആണ് മരിച്ചത്. വടക്കേക്കാട് പോലീസ് നടപടി സ്വീകരിച്ചു. പോസ്റ്റ് മോർട്ടത്തിനു ശേഷം സംസ്കാരം ഇന്ന്. ഭാര്യ: രാജേശ്വരി. മക്കൾ: ശ്രീഹരി, ശബരി.

പുതുക്കാട് സിഗ്നല്‍ മുതല്‍ സ്റ്റാൻഡ് വരെ പുതിയ സര്‍വീസ് റോഡ് നിര്‍മിക്കണം

പുതുക്കാട്: കെഎസ്ആര്‍ടിസി ബസ് സ്റ്റാൻഡിനു മുന്നിലെ ഡിവൈഡര്‍ അടച്ചത് അശാസ്ത്രീയനടപടിയെന്ന ആരോപണം വ്യാപകം. ചാലക്കുടി ഭാഗത്തുനിന്നു വരുന്ന കെഎസ്ആര്‍ടിസി ബസുകള്‍ ഇപ്പോള്‍ സ്റ്റാന്‍ഡിന് എതിര്‍വശത്തു ദേശീയപാതയിലാണ് നിര്‍ത്തുന്നത്. യാത്രക്കാര്‍ ഇറങ്ങുന്നതും കയറുന്നതും ദേശീയപാതയുടെ വശംചേര്‍ന്നാണ്. ഏറെ താമസിയാതെ ഇതും അപകടക്കെണിയായി മാറും. പുതുക്കാട് പഞ്ചായത്ത് ഓഫീസ് വളവില്‍നിന്ന് സിഗ്‌നല്‍ ജംഗ്ഷന്‍വരെ അപൂര്‍ണമായി കിടക്കുന്ന ഭാഗത്ത് സര്‍വീസ് റോഡ് നിര്‍മിച്ച്, നിലവിലെ ദേശീയപാതയുമായി ചേര്‍ക്കുക, ചാലക്കുടി ഭാഗത്തുനിന്നു വരുന്ന കെഎസ്ആര്‍ടിസി ബസുകള്‍ സിഗ്നലില്‍നിന്നു വലത്തോട്ടുതിരിഞ്ഞ് സര്‍വീസ് റോഡിലൂടെ സ്റ്റാന്‍ഡിലേക്കു പോകുക എന്നതാണ് നിലവില്‍ ഏറ്റവും പ്രായോഗികമായ മാര്‍ഗമെന്നു ചൂണ്ടിക്കാണിക്കപ്പെടുന്നു. ആമ്പല്ലൂര്‍ അടിപ്പാത പൂര്‍ത്തിയാകുന്ന ഘട്ടത്തിലാണ്, പുതുക്കാട് ഫ്ലൈ ഓവര്‍ നിർമാണം ഉടന്‍ ആരംഭിക്കുമെന്ന കാരണംപറഞ്ഞാണ് ദേശീയപാത അധികൃതര്‍ പുതുക്കാട് സിഗ്നല്‍ ജംഗ്ഷനില്‍ മറ്റ് നിര്‍മാണങ്ങള്‍ നടത്താത്തത്. എന്നാല്‍, കെഎസ്ആര്‍ടിസി സ്റ്റാന്‍ഡിനുമുന്നില്‍ അപകടങ്ങള്‍ ആവര്‍ത്തിക്കുകയും ഇപ്പോഴത്തെ താത്കാലികപരിഹാരം അശാസ്ത്രീയമെന്ന് ആരോപണം ഉയരുകയും ചെയ്യുന്ന സാഹചര്യത്തില്‍ പുതിയ നിര്‍ദേശംകൂടി പരീക്ഷിക്കാവുന്നതാണ്. സ്റ്റാൻഡിനുമുന്നിലുള്ള സര്‍വീസ് റോഡിനോടുചേര്‍ന്ന് ബസ് ബേ, സ്റ്റാൻഡിന് എതിര്‍വശത്തു യാത്രക്കാര്‍ക്കു കാത്തിരിപ്പുകേന്ദ്രം എന്നീ ആവശ്യങ്ങളും വ്യാപകമായി ഉയരുന്നുണ്ട്. ദേശീയപാത അഥോറിറ്റിയുടെ സ്ഥലത്തു നിര്‍മാണങ്ങള്‍ നടത്തുന്നതില്‍ തദ്ദേശീയഭരണകൂടങ്ങള്‍ക്കും ജനപ്രതിനിധികള്‍ക്കും കാര്യമായി ഇടപെടാനാവില്ല. അതുകൊണ്ടുതന്നെ നിലവിലെ കരാറിനുള്ളില്‍നിന്നുകൊണ്ടുള്ള താത്കാലിക‌പരിഹാരമാണ് നടപ്പാക്കാനാകുക.

കോണ്‍ഗ്രസ്‌ ധര്‍ണ നടത്തി

പുതുക്കാട്: കെഎസ്ആര്‍ടിസി ബസ് സ്റ്റാൻഡിനുമുന്നിലെ അശാസ്ത്രീയമായ ഗതാഗതനിയന്ത്രണത്തിനെതിരേ കോണ്‍ഗ്രസ് പുതുക്കാട് മണ്ഡലം കമ്മിറ്റിയുടെ നേതൃത്വത്തില്‍ സ്റ്റാൻഡിനുമുന്‍പില്‍ പ്രതിഷേധധര്‍ണ സംഘടിപ്പിച്ചു. പുതുക്കാട് പഞ്ചായത്ത് പ്രസിഡന്‍റ് കെ.എം. ബാബുരാജ് ഉദ്ഘാടനം ചെയ്തു. മണ്ഡലം പ്രസിഡന്‍റ് രാജു തളിയപ്പറമ്പില്‍ അധ്യക്ഷത വഹിച്ചു. ബ്ലോക്ക് കോണ്‍ഗ്രസ് പ്രസിഡന്‍റ് സുധന്‍ കാരയില്‍ മുഖ്യപ്രഭാഷണം നടത്തി. നേതാക്കളായ കെ.ജെ. ജോജു, ജെയിംസ് പറപ്പിള്ളി, ജസ്റ്റിന്‍ ആറ്റുപുറം എന്നിവര്‍ സംസാരിച്ചു. സ്റ്റാൻഡിനുമുന്‍പിലുള്ള സര്‍വീസ് റോഡിനോടുചേര്‍ന്ന് ബസ് ബേ നിര്‍മിക്കുക, സ്റ്റാൻഡിന് എതിര്‍വശത്തു യാത്രക്കാര്‍ക്കു വെയിറ്റിംഗ് ഷെഡ് നിര്‍മിക്കുക, അപകടകരവും അശാസ്ത്രീയവുമായ ഗതാഗത പരിഷ്‌കരണത്തില്‍ എംപിയും എംഎല്‍എയും ഇടപെടുക എന്നീ ആവശ്യങ്ങൾ കോണ്‍ഗ്രസ് ഉന്നയിച്ചു.

വിവാഹച്ചടങ്ങിനിടെ ആക്രമണം; രണ്ടുപേർകൂടി അറസ്റ്റിൽ

കൊടുങ്ങല്ലൂർ: ചൈതന്യ നഗറിലുള്ള ഹാളിൽ വിവാഹച്ചടങ്ങിനിടെയുണ്ടായ ആക്രമണത്തിൽ പ്രതികളായ രണ്ടുപേർകൂടി അറസ്റ്റിലായി. എറിയാട് ചൈതന്യനഗർ അണ്ടുരുത്തി റിജിൽ, തളിക്കൽ ദീപു, പേട്ടിക്കാട്ടിൽ വിഷ്ണു, രാമൻതറ വിശാഖൻ എന്നിവരെ ആക്രമിച്ചുകൊലപ്പെടുത്താൻ ശ്രമിച്ച സംഭവത്തിൽ പ്രതികളായ എറിയാട് പഴുവൻതുരുത്തി ചിപ്പൻ എന്നുവിളിക്കുന്ന ഫഹദ് (30), കോത്തേഴത്ത് ഷിഹാബ് (30) എന്നിവരെയാണ് കൊടുങ്ങല്ലൂർ പോലീസ് അറസ്റ്റുചെയ്തത്. ഇരുവരും ജുഡീഷൽ മജിസ്ട്രേറ്റ് കോടതിയിൽ കീഴടങ്ങുകയായിരുന്നു. തുടർന്നു പോലീസിന്‍റെ റിപ്പോർട്ട് പ്രകാരം രണ്ടുപേരെയും റിമാൻഡ് ചെയ്തു. ഫഹദിനെതിരേ കൊടുങ്ങല്ലൂർ പോലീസ് സ്റ്റേഷനിൽ രണ്ടു വധശ്രമക്കേസുണ്ട്. ഈ കേസിലെ മറ്റു പ്രതികളും എറിയാട് സ്വദേശികളുമായ ഏറ്റത്ത് ഷാലറ്റ്, സഹോദരൻ ഫ്രോബൽ, വാഴക്കാലയിൽ അഷ്കർ, കാരേക്കാട് ജിതിൻ, പള്ളിപ്പറമ്പിൽ ഷാഫി എന്നിവരെ നേരത്തേ അറസ്റ്റ് ചെയ്തിരുന്നു. ഇൻസ്പെക്ടർ ബി.കെ. അരുൺ, സബ് ഇൻസ്പെക്ടർ കെ. സാലിം, പ്രോബേഷണറി എസ്ഐ വൈഷ്ണവ്, എഎസ്ഐ സ്വപ്ന, എസ്‌സിപിഒ തോമാച്ചൻ എന്നിവരാണ് അന്വേഷണസംഘത്തിലുള്ളത്.

സംസ്ഥാന സർക്കാരിന്‍റെ നാലാംവാർഷികം;മുഖ്യമന്ത്രിയുടെ ജില്ലാതലയോഗം, റാലി ഇന്ന്

തൃശൂർ: സംസ്ഥാനസർക്കാരിന്‍റെ നാലാം വാർഷികത്തോട് അനുബന്ധിച്ച് മുഖ്യമന്ത്രിയുടെ ജില്ലാതല യോഗം ഇന്ന്. എന്‍റെ കേരളം: പ്രദർശന, വിപണന മേള 18 മുതൽ 24 വരെ തേക്കിൻകാട് മൈതാനിയിൽ നടക്കുമെന്നും മന്ത്രിമാരായ കെ. രാജൻ, ആർ. ബിന്ദു എന്നിവർ പറഞ്ഞു. പിആർഡിയുടെയും മറ്റു വകുപ്പുകളുടെയും സഹകരണത്തിലാണ് ജില്ലാതലയോഗവും വിപണനമേളയും നടത്തുന്നത്. ഇന്നു രാവിലെ 10.30 മുതൽ 12.30 വരെ തൃശൂർ കാസിനോ ഹോട്ടലിലാണു യോ ഗം. അഞ്ഞൂറോളം അതിഥികൾ പങ്കെടുക്കും. തേക്കിൻകാട് മൈതാനിയിലെ വിദ്യാർഥി കോർണറിൽ പ്രദർശനമേളയുടെ ഉദ്ഘാടനം 18 നു വൈകുന്നേരം അഞ്ചിനു മന്ത്രി കെ. രാജൻ ഉദ്ഘാടനം ചെയ്യും. അന്നു സിഎംഎസ് സ്കൂൾമുതൽ തേക്കിൻകാട് മൈതാനിവരെ സാംസ്കാരികഘോഷയാത്ര നടത്തും. മേളയിലെ 189 സ്റ്റാളുകളിൽ സർക്കാർ സേവനങ്ങളും ലഭ്യമാണ്. സെമിനാർ, സിനിമാപ്രദർശനം, കാർഷികമേള, സംഗീതനിശ എന്നിവയുണ്ടാകും. രാവിലെ പത്തുമുതൽ എട്ടുവരെയാണു പ്രദർശനം. മികച്ച മാധ്യമ റിപ്പോർട്ട്, ഫോട്ടോ, മികച്ച വീഡിയോ റിപ്പോർട്ട്, വീഡിയോ, പൊതുജനങ്ങൾക്കുള്ള സെൽഫി, മികച്ച വീഡിയോ എന്നിവയ്ക്കു പ്രത്യേക പുരസ്കാരം നൽകും. 24 നു വൈകീട്ട് അഞ്ചിനു നടക്കുന്ന സമാപനസമ്മേളനം മന്ത്രി ഡോ. ആർ. ബിന്ദു ഉദ്ഘാടനം ചെയ്യും. മന്ത്രി കെ. രാജൻ അധ്യക്ഷനാകും. രാത്രി ഏഴിനു പണ്ഡിറ്റ് രമേഷ് നാരായണനും മധുശ്രീയും അവതരിപ്പിക്കുന്ന സംഗീതനിശയുമുണ്ടാകും. സംസ്ഥാനത്തെ സാംസ്കാരികപ്രവർത്തകരുമായുള്ള മുഖ്യമന്ത്രിയുടെ മുഖാമുഖം 19നു രാവിലെ 10നു തൃശൂർ ലുലു കണ്‍വൻഷൻ സെന്‍ററിൽ നടക്കും. സാംസ്കാരികമന്ത്രി സജി ചെറിയാൻ അധ്യക്ഷനാവും. ജില്ലാ കളക്ടർ അർജുൻ പാണ്ഡ്യൻ, ജില്ലാ ഇൻഫർമേഷൻ ഓഫീസർ പി.കെ. വേലായുധൻ എന്നിവരും വാർത്താസമ്മേളനത്തിൽ പങ്കെടുത്തു. നഗരത്തിൽ ഇന്ന് ഗതാഗതനിയന്ത്രണം തൃശൂർ: കേരള സർക്കാരിന്‍റെ നാലാംവാർഷികാഘോഷ പരിപാടിയോടനുബന്ധിച്ച് നഗരത്തിൽ ഇന്നു ഗതാഗതനിയന്ത്രണം. രാവിലെ ആറുമുതൽ സ്വരാജ് റൗണ്ടിൽ പാർക്കിംഗ് നിരോധിച്ചു. രാവിലെ ഒന്പതുമുതൽ ശക്തൻ സൗത്ത് റിംഗിൽനിന്നു കൊക്കാലെയിലേക്കു ടിബി റോഡ് വണ്‍വേ ആയിരിക്കും. ആദ്യമെത്തുന്ന 400 വാഹനങ്ങൾ പരിപാടി നടക്കുന്ന കാസിനോ ഹോട്ടലിൽ പാർക്ക് ചെയ്യണം. മറ്റു വാഹനങ്ങൾ ആളുകളെ ഇറക്കിയശേഷം ശക്തൻ പാർക്കിംഗ് ഗ്രൗണ്ടിൽ പാർക്ക് ചെയ്യണം. വൈകീട്ടു നാലിനു റാലിക്കു മുന്നോടിയായി 3.30നു സ്വരാജ് റൗണ്ടിലേക്കുള്ള വാഹനഗതാഗതം നിയന്ത്രിക്കും. ആദ്യം വലിയ വാഹനങ്ങളും പിന്നീടു ചെറുവാഹനങ്ങളും വഴിതിരിച്ചുവിടും. പാലസ് സ്റ്റാൻഡ് ബസ് പാർക്കിംഗ് ഏരിയ, പള്ളിത്താമം പാർക്കിംഗ് ഗ്രൗണ്ട്, കോർപറേഷൻ ഗ്രൗണ്ട്, ഇക്കണ്ടവാരിയർ റോഡിലെ ജോസ് ആലുക്കാസ് കണ്‍വൻഷൻ ഗ്രൗണ്ട്, തേക്കിൻകാട് മൈതാനത്തെ നായ്ക്കനാൽ ഭാഗം എന്നിവിടങ്ങളിലാണു പാർക്കിംഗ്. കെഎസ്ആർടിസി, സ്വകാര്യബസുകൾക്കുള്ള ട്രാഫിക് ക്രമീകരണങ്ങളും നടപ്പാക്കിയിട്ടുണ്ട്.

ചെട്ടിക്കാട് ഊട്ടുതിരുനാളിനു തീർഥാടകപ്രവാഹം

ചെട്ടിക്കാട്: പ്രസിദ്ധ തീർഥാടനകേന്ദ്രമായ ചെട്ടിക്കാട് വിശുദ്ധ അന്തോണീസിന്‍റെ ദേവാലയത്തിൽ അത്ഭുതപ്രവർത്തകനായ വിശുദ്ധ അന്തോണീസിന്‍റെ ഊട്ടുതിരുനാളിനു വൻഭക്തജനപ്രവാഹം. പുലർച്ചെമുതൽതന്നെ മൂത്തകുന്നം - ചെട്ടിക്കാട് പാതയിൽ ഭക്തജനങ്ങളുടെയും തീർഥാടകവാഹനങ്ങളുടെയും വൻതിരക്കാണ് അനുഭവപ്പെട്ടത്. ഗതാഗതക്കുരുക്ക് ഒഴിവാക്കുന്നതിനായി വലിയ വാഹനങ്ങൾക്കു നിയന്ത്രണം ഏർപ്പെടുത്തിയിരുന്നു. തീർഥാടകരെ നിയന്ത്രിക്കുന്നതിനും വാഹനങ്ങൾ കടത്തിവിടുന്നതിനും പോലീസും വോളന്‍റിയർമാരും നന്നേ ബുദ്ധിമുട്ടി. രാവിലെ 10നു കോട്ടപ്പുറം രൂപത മെത്രാൻ ഡോ. അംബ്രോസ് പുത്തൻവീട്ടിലിനു സ്വീകരണം നൽകി. 10.15നു ബിഷപ് ഊട്ടുനേർച്ച ആശീർവദിച്ചു. ഇടുക്കി കന്പംമേടു നിന്നുവന്ന ജോയമ്മ രാജേന്ദ്രനും കുടുംബത്തിനും ആദ്യനേർച്ച ബിഷപ് വിളന്പിക്കൊടുത്തു. തുടർന്ന് ബിഷപ്പിന്‍റെ മുഖ്യകാർമികത്വത്തിൽ നടന്ന തിരുനാൾദിവ്യബലിയിൽ ഫാ. ജോസ് തോമസ് വചനസന്ദേശം നൽകി. ദിവ്യബലിക്കുശേഷം വിശുദ്ധന്‍റെ തിരുസ്വരൂപവും വഹിച്ച് പള്ളിക്കുചുറ്റും നടത്തിയ പ്രദക്ഷിണത്തിൽ വിശ്വാസികൾ പ്രാർഥനാപൂർവം പൂക്കൾ വർഷിച്ചുകൊണ്ട് വിശുദ്ധനെ വരവേറ്റു. രാവിലെ 6.15 മുതൽ രാത്രി 10.30 വരെ തുടർച്ചയായി ദിവ്യബലി, നൊവേന, ആരാധന എന്നിവയുണ്ടായിരുന്നു. ഒരു ലക്ഷത്തിലേറെപ്പേർ ഊട്ടുനേർച്ചയിൽ പങ്കുകൊണ്ടു. രാവിലെ ആരംഭിച്ച നേർച്ചസദ്യ രാത്രി വൈകുംവരെ തുടർന്നു. തിരുശേഷിപ്പുകൾ വണങ്ങുന്നതിനും പൊൻനാവ് എടുത്തുവയ്ക്കൽ നേർച്ചയ്ക്കും അടിമസമർപ്പണത്തിനും പ്രത്യേകം ക്രമീകരണങ്ങൾ ഏർപ്പെടുത്തിയിരുന്നു. 20 നാണ് എട്ടാമിടം. അന്നേദിനം ഈവർഷം ആദ്യകുർബാന സ്വീകരിച്ച കുട്ടികളുടെ കൂട്ടായ്മ നടക്കും. ആദ്യകുർബാന സ്വീകരിച്ച എല്ലാ കുട്ടികളും രാവിലെ 10ന് വെള്ളവസ്ത്രങ്ങളണിഞ്ഞു മാതാപിതാക്കളോടൊപ്പം പള്ളിയിൽ എത്തിച്ചേരും. രാവിലെ 6.15 മുതൽ വൈകീട്ട് 6.30 വരെ ദിവ്യബലി, നൊവേന, ആരാധന എന്നിവ ഉണ്ടായിരിക്കും. തിരുനാളാഘോഷങ്ങൾക്കു റെക്ടർ റവ.ഡോ. ബെന്നി വാഴക്കൂട്ടത്തിൽ, സഹവികാരി ഫാ. അജയ് ആന്‍റണി പുത്തൻപറന്പിൽ, സിസ്റ്റർ ജൂബി, ഫ്രാൻസീസ് കുറുപ്പശേരി, ആൽബി പടമാട്ടുമ്മൽ, ബീനൻ താണിപ്പിള്ളി, അലക്സ് പള്ളിയിൽ എന്നിവർ നേതൃത്വം നൽകി.

നാടൊന്നാകെ ഇന്ത്യന്‍ സൈനികര്‍ക്ക് ബിഗ്സല്യൂട്ട് നല്‍കണം: ഉണ്ണിയാടന്‍

ഇരിങ്ങാലക്കുട: പഹല്‍ഗാമില്‍ ഇന്ത്യന്‍ സഹോദരങ്ങളെ നിഷ്ഠുരമായി കൊലചെയ്ത കൊടും തീവ്രവാദികള്‍ക്കും അവരെ സഹായിച്ചവര്‍ക്കും ശക്തമായ തിരിച്ചടി നല്‍കുകയും ഇന്ത്യന്‍ ജനതയെ സുരക്ഷിതമായി കാക്കുകയും ചെയ്യുന്ന ഇന്ത്യന്‍ കര വ്യോ മ നാവിക സേനാംഗങ്ങളെ അഭിമാനപൂര്‍വം സ്മരിക്കുകയും അവര്‍ക്ക് ഐക്യദാര്‍ഢ്യം പ്രഖ്യാപിക്കുകയും ചെയ്യുന്നതായി കേരള കോണ്‍ഗ്രസ് ഡെപ്യൂട്ടി ചെയര്‍മാന്‍ അഡ്വ.തോമസ് ഉണ്ണിയാടന്‍ പറഞ്ഞു. ഭീകരര്‍ക്കെതിരേ ഇന്ത്യന്‍ സൈന്യം നല്‍കിയ ശക്തമായ തിരിച്ചടിയില്‍ സൈനികര്‍ക്ക് ബിഗ് സല്യൂട്ട് നല്‍കിയും ഐക്യദാര്‍ഢ്യം പ്രകടിപ്പിച്ചും കേരള കോണ്‍ഗ്രസ് നടത്തിയ ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. നിയോജക മണ്ഡലം പ്രസിഡന്‍റ് റോക്കി ആളൂക്കാരന്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി മിനി മോഹന്‍ദാസ്, ജില്ലാ സെക്രട്ടറി സേതുമാധവന്‍, വനിതാ കോണ്‍ഗ്രസ് പ്രസിഡന്‍റ് മാഗി വിന്‍സെന്‍റ്, നഗരസഭ കൗണ്‍സിലര്‍ ഫെനി എബിന്‍, കെ. സതീഷ്, അഡ്വ. ഷൈനി ജോജോ, ഫിലിപ്പ് ഓളാട്ടുപുറം, ലാസര്‍ കോച്ചേരി, അജിത സദാനന്ദന്‍, അഷറഫ് പാലിയത്താഴത്ത്, എം.എസ്.ശ്രീധരന്‍, എബിന്‍ വെള്ളാനിക്കാരന്‍, ലിംസി ഡാര്‍വിന്‍, ബിജോയ് ചിറയത്ത്, ലാലു വിന്‍സെന്‍റ്, അനൂപ് രാജ്, വിനീത് വിന്‍സന്‍റ്് എന്നിവര്‍ പ്രസംഗിച്ചു.

കാവടിയാട്ടത്തിനിടെ സംഘട്ടനം; അഞ്ചു യുവാക്കൾ അറസ്റ്റിൽ

കയ്പമംഗലം: ചെന്ത്രാപ്പിന്നി കൂട്ടാലപ്പറമ്പ് ക്ഷേത്രോത്സവത്തിന്‍റെ ഭാഗമായി നടന്ന രാത്രികാവടിയാട്ടത്തിനിടെയുണ്ടായ സംഘട്ടനത്തിൽ അഞ്ച് യുവാക്കൾ അറസ്റ്റിൽ. കൂട്ടാലപ്പറമ്പ് സ്വദേശി കൊട്ടുക്കല്‍ വീട്ടില്‍ ആദിത്യ കൃഷ്ണ (21), ചെന്ത്രാപ്പിന്നി സ്വദേശികളായ മുക്കാപ്പിള്ളി വീട്ടില്‍ വിഷ്ണു (27), മുക്കാപ്പിള്ളി വീട്ടില്‍ വൈഷ്ണവ് (25), ചാലിവള്ളിവീട്ടില്‍ അതുല്‍ (23), അന്തിക്കാട് ചെമ്മാപ്പിള്ളി സ്വദേശി മണിയങ്കാട്ടില്‍ വീട്ടില്‍ പാര്‍ഥിവ് (22) എന്നിവരെയാണ് കയ്പമംഗലം പോലീസ് അറസ്റ്റ് ചെയ്തത്. ഇക്കഴിഞ്ഞ ഞായറാഴ്ച രാത്രി യിലായിരുന്നു കേസിനാസ്പദമായ സംഭവം. ഹൈസ്‌കൂള്‍ കാവടിസംഘത്തിന്‍റെ കമ്മിറ്റിയിലെ ഖജാന്‍ജിയായ ചെന്ത്രാപ്പിന്നി കൂട്ടാലപ്പറമ്പ് സ്വദേശി മലയാറ്റില്‍ വീട്ടില്‍ ഋഷികേഷിനെയും സുഹൃത്തിനെയും അച്ഛനെയും മര്‍ദ്ദിച്ച് പരിക്കേല്‍പ്പിക്കുകയും ഷര്‍ട്ടിന്‍റെ ഉള്ളില്‍ ഒളിപ്പിച്ച വാള്‍ എടുത്ത് വീശി കൊല്ലുമെന്നു ഭീഷണിപ്പെടുത്തുകയും ചെയ്ത സംഭവത്തിലാണ് അറസ്റ്റ്.

ആറാം ഉത്സവം; കൂടല്‍മാണിക്യത്തില്‍ ഇന്ന് സ്‌പെഷല്‍ പന്തലില്‍

ഉച്ചതിരിഞ്ഞ് ഒന്നു മുതല്‍ തിരുവാതിരക്കളി, 4.20 ന് അനാമിക രാംപറമ്പിലിന്‍റെ ഭരതനാട്യം, 4.45 മുതല്‍ ഇരിങ്ങാലക്കുട മുദ്രാലയ നൃത്തവിദ്യാലയം ശാരിക അദിത്യന്‍റെ നൃത്താവതരണം, 5.30 മുതല്‍ പൈങ്ങോട് സ്വരപൂജ നൃത്തസംഗീത പഠനകേന്ദ്രത്തിന്‍റെ സംഗീതാര്‍ച്ചന, 6.15 മുതല്‍ ചെറുതുരുത്തി രസ ഇന്‍സ്റ്റിസ്റ്റ്യൂട്ട് ഓഫ് ആര്‍ട്‌സിന്‍റെ കുച്ചുപ്പുടി, 7.15 മുതല്‍ നാട്യാഞ്ജലി നൃത്തവിദ്യാലയം ആര്‍എല്‍വി മിഷ ബിനീഷിന്‍റെ നാട്യകച്ചേരി, 8.15 മുതല്‍ നടവരമ്പ് കൈരളി നൃത്തവിദ്യാലയത്തിന്‍റെ ശാസ്്ത്രീയനൃത്തം, 8.50 മുതല്‍ സുരേഷ് ശങ്കറിന്‍റെ ഭക്തിഗാനമേള. സംഗമം വേദിയില്‍ രാവിലെ 8.30മുതല്‍ ശീവേലിക്കും രാത്രി 9.30 മുതല്‍ വിളക്കിനും പെരുവനം സതീശന്‍ മാരാര്‍ പ്രമാണം വഹിക്കും. ഉച്ചതിരിഞ്ഞ് ഒരുമണി മുതല്‍ തിരുവാതിരക്കളി, മൂന്ന് മുതല്‍ ഇരിങ്ങാലക്കുട കലാമണ്ഡലം നാരായണന്‍ എമ്പ്രാന്തിരിയും സംഘവും അവതരിപ്പിക്കുന്ന കഥകളി സംഗീതാര്‍ച്ചന, 4.15 മുതല്‍ ഭരത് ശ്രീകുമാര്‍ മേനോന്‍റെ വയലിന്‍ കച്ചേരി, 5.15 മുതല്‍ ഡോ. അശ്വിനി നമ്പ്യാരിന്‍റെ കുച്ചിപ്പുടി, ആറു മുതല്‍ തൃപ്രയാര്‍ ശ്രീരഞ്ജിനിയുടെ ശാസ്ത്രീയസംഗീതം, 6.30 മുതല്‍ നാഥ് നൃത്തവിദ്യാലയം കലാക്ഷേത്ര അമല്‍നാഥിന്‍റെ ഭരതനാട്യം, 7.30 മുതല്‍ ആര്‍എല്‍വി ഡോ. ശാലിനി ഹരികുമാറിന്‍റെ മോഹിനിയാട്ടം, 8.30 മുതല്‍ ഡോ. ശ്രീദേവ് രാജഗോപാലിന്‍റെ സംഗീതകച്ചേരി, രാത്രി 12ന് സര്‍വതോഭദ്രം കലാകേന്ദ്രത്തിന്‍റെ കഥകളി മാര്‍ക്കണ്ഡേയ ചരിതം, ദക്ഷയാഗം.

സൈക്കിൾയാത്രക്കാരന്‍റെ മരണം: വാഹനമോടിച്ച പ്രതി അറസ്റ്റിൽ

ചാലക്കുടി: മദ്യലഹരിയിൽ വാഹനമോടിച്ച് സൈക്കിൾ യാത്രക്കാരനെ ഇടിച്ചുവീഴ്ത്തി മരണത്തിനിടയായ സംഭവത്തിൽ യുവാവ് അറസ്റ്റിൽ. മറ്റത്തൂർ മൂന്നുമുറി ചൂളക്കൽ അമൽദേവി(26) നെയാണ് പോലീസ് അറസ്റ്റ് ചെയ്തത്. ഏപ്രിൽ14 ന് രാത്രി 7.30നായിരുന്നു സംഭവം. മദ്യലഹരിയിൽ ഇന്നോവ കാർ ഓടിച്ച് സെന്‍റ്് ജെയിംസ് ആശുപത്രിക്കു സമീപംവച്ച് സൈക്കിളിൽ പോകുകയായിരുന്ന കൂടപ്പുഴ പടിയൂക്കാരൻ വീട്ടിൽ ജോണി (68) യുടെ സൈക്കിളിൻെറ പിറകിലിടിക്കുകയും ജോണി മരണപ്പെടുകയും ചെയ്ത കേസിലാണ് അറസ്റ്റ്.

ക്രൈസ്റ്റ് എന്‍ജിനീയറിംഗ് കോളജില്‍ കോഴ്‌സ് കംപ്ലീഷന്‍ സെറിമണി

ഇരിങ്ങാലക്കുട: മികവിനോടുള്ള മനോഭാവമാണ് കരിയറില്‍ എത്തിച്ചേരുന്ന ഉയരത്തിന്‍റെ മാനദണ്ഡമായി മാറുന്നതെന്നു സുപ്രീംകോ ടതി റിട്ട. ജസ്റ്റിസ് കുര്യന്‍ ജോസഫ് അഭിപ്രായപ്പെട്ടു. ക്രൈസ്റ്റ് കോളജ് ഓഫ് എന്‍ജിനീയറിംഗ് 2021 - 25 ബാച്ചിന്‍റെ കോഴ്‌സ് കംപ്ലീഷന്‍ സെറിമണി ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. എക്‌ സിക്യൂട്ടീവ് ഡയറക്ടര്‍ ഫാ. ജോണ്‍ പാലിയേക്കര അധ്യക്ഷത വഹിച്ചു. സിഎംഐ ദേവമാതാ പ്രൊവിന്‍ഷ്യല്‍ റവ. ഡോ. ജോസ് നന്തിക്കര മുഖ്യപ്രഭാഷണം നടത്തി. മാനേജര്‍ ഫാ. ജോയ് പീണിക്കപ്പറമ്പില്‍, പ്രിന്‍സിപ്പല്‍ ഡോ. സജീവ് ജോണ്‍, വൈസ് പ്രിന്‍സിപ്പല്‍ ഡോ. വി.ഡി. ജോണ്‍, മെക്കാനിക്കല്‍ വിഭാഗം മേധാവി ഡോ. എം.ടി. സിജോ തുടങ്ങിയവര്‍ പ്രസംഗിച്ചു. അക്കാദമിക് ഡയറക്ടര്‍ ഡോ. മനോജ് ജോര്‍ജ് കോഴ്‌സ് കംപ്ലീഷന്‍ പ്രതിജ്ഞ ചൊല്ലിക്കൊടുത്തു. 2025 ല്‍ ബിടെക് കോഴ്‌സ് പൂര്‍ത്തിയാക്കിയ വിദ്യാര്‍ഥികള്‍ക്കുള്ള സര്‍ട്ടിഫിക്കറ്റുകളും വിവിധ എന്‍ഡോവ്‌മെന്‍റുകളും വിതരണം ചെയ്തു.

മാർ ജോസഫ് കുണ്ടുകുളത്തിന്‍റെ നേതൃപാടവം സ്മരിക്കപ്പെടേണ്ടത്: മാർ ടോണി നീലങ്കാവിൽ

തൃശൂർ: ആധ്യാത്മികതയിൽ ഊന്നിയ ആധികാരികതയായിരുന്നു മാർ ജോസഫ് കുണ്ടുകുളമെന്നും അജപാലനശുശ്രൂഷയിലെ പ്രതിസന്ധികളിലും വെല്ലുവിളികളിലും പ്രായോഗികനിർദേശങ്ങൾ നൽകാനുള്ള അദ്ദേഹത്തിന്‍റെ നേതൃപാടവം സ്മരിക്കപ്പെടേണ്ടതാണെന്നും അതിരൂപത സഹായമെത്രാൻ മാർ ടോണി നീലങ്കാവിൽ. കുടുംബകൂട്ടായ്മ സ്ഥാപകനായ മാർ ജോസഫ് കുണ്ടുകുളത്തിന്‍റെ 27-ാം ചരമവാർഷികത്തോടനുബന്ധിച്ചുള്ള അനുസ്മരണസമ്മേളനം ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. കുടുംബകൂട്ടായ്മ ഡയറക്ടർ റവ.ഡോ. ഫ്രാൻസിസ് ട്വിങ്കിൾ വാഴപ്പിള്ളി അധ്യക്ഷനായി. മാർ ജോസഫ് കുണ്ടുകുളം വിശിഷ്ടസേവന പുരസ്കാരം പുതുശേരി ഇടവകയിലെ കെ.ടി. വർഗീസിനു സമ്മാനിച്ചു. കോട്ടയം എസ്എച്ച് സന്യാസിനിസമൂഹത്തിന്‍റെ ജനറൽ കൗണ്‍സിലറായ സിസ്റ്റർ ആൻസി പോൾ, ജനറൽ കണ്‍വീനർ ഷിന്‍റോ മാത്യു, അസി. ഡയറക്ടർ ഫാ. അനിഷ് കൂത്തൂർ, ജനറൽ സെക്രട്ടറി ഡോ. ജോർജ് അലക്സ് എന്നിവർ പ്രസംഗിച്ചു. കുടുംബകൂട്ടായ്മ ട്രഷറർ ജെയ്സൻ മാണി, മറ്റു ഭാരവാഹികളായ സി.ടി. ജോയ്, സുബി ജസ്റ്റിൻ, ഷീജ ജോണ്‍സൻ, ബിജു വർഗീസ്, ലിവിൻ വർഗീസ്, ജിനീഷ് വടക്കുഞ്ചേരി, പി.പി. ദേവസി എന്നിവർ നേതൃത്വം നൽകി.

മൂന്നുപേർക്കു തെരുവുനായയുടെ കടിയേറ്റു

ഗുരുവായൂര്‌: മമ്മിയൂരിൽ മൂന്നുപേർക്കു തെരുവുനായയുടെ കടിയേറ്റു. മമ്മിയൂർ മൂത്തേടത്ത് രാജേഷ്(35), വെളിയംപാട്ട് വിഷ്ണു(17), പശ്ചിമബംഗാൾ സ്വദേശി വിജയ്(27) എന്നിവർക്കാണ് തെരുവുനായയുടെ കടിയേറ്റത്. ഉച്ചയ്ക്ക് ഒന്നോടെയാണ് സംഭവം. ജിംനേഷ്യത്തിൽനിന്ന് പരിശീലനംകഴിഞ്ഞ് വീട്ടിലേക്കു പോകുന്നതിനിടയാണ് വിഷ്ണുവിനെ നായ കടിച്ചത്. അത്താണി സെന്‍ററിലെ സൗപർണിക സുദർശനം ഫ്ലാറ്റ് സമുച്ചയത്തിലെ ഹൗസ് കീപ്പറായ വിജയ്ക്കു ഗേറ്റിനു മുന്നിൽ നിൽക്കുമ്പോഴാണ് കടിയേറ്റത്. മൂവരുടെയും കാലിലാണ് കടിയേറ്റിട്ടുള്ളത്. ഇവർ തൃശൂർ മെഡിക്കൽ കോളജിൽ ചികിത്സതേടി.

മിന്നുംനേട്ടവുമായി നിർമലമാത സെൻട്രൽ സ്കൂൾ

തൃശൂർ: സിബിഎസ്ഇ ബോർഡ് പരീക്ഷയിൽ കിഴക്കേകോട്ട നിർമലമാത സെൻട്രൽ സ്കൂളിന് ഇത്തവണയും നൂറുമേനി വിജയം. പത്താം ക്ലാസിൽ 98 ശതമാനം മാർക്കോടെ അനിക ധലിനും പ്ലസ് ടുവിൽ 98.2 ശതമാനം മാർക്കോടെ (കോമേഴ്സ്) ആൻലിൻ ബിജുവും സ്കൂൾ ടോപ്പർമാരായി. സയൻസ് വിഭാഗത്തിൽ 97.6 ശതമാനം മാർക്ക് നേടിയ എ.ജെ. ജെസ്സ് ജൂഡ്, ആസ്റ്റിൻ ഷിനോജ് ജോസഫ് എന്നിവർ മുന്നിലെത്തി. കെമിസ്ട്രി, കന്പ്യൂട്ടർ, മലയാളം, ഇംഗ്ലീഷ്, അക്കൗണ്ടൻസി, സൈക്കോളജി, ബിസിനസ് സ്റ്റഡീസ്, ഗണിതശാസ്ത്രം, സയൻസ് വിഷയങ്ങളിൽ വിദ്യാർഥികൾ മുഴുവൻ മാർക്കും നേടി. പത്താം ക്ലാസിൽ 19 വിദ്യാർഥികളും പ്ലസ് ടുവിൽ 25 പേരും ഫുൾ എ വണ്‍ നേടി. യഥാക്രമം 68, 71 പേർക്കു 90 ശതമാനത്തിനു മുകളിൽ മാർക്കുണ്ട്.

ഗുരുവായൂർ സെന്‍റ് ആന്‍റണീസ് പള്ളി തിരുനാളിനു കൊടിയേറി

ഗുരുവായൂർ: സെന്‍റ് ആന്‍റണീസ് പള്ളി തിരുനാളിനു പാവറട്ടി സെന്‍റ് തോമസ് ആശ്രമാധിപൻ ഫാ. ജോസഫ് ആലപ്പാട്ട് കൊടിയേറ്റി. വികാരി ഫാ. സെബി ചിറ്റാട്ടുകര തിരുക്കർമങ്ങൾക്കു നേതൃത്വം നൽകി. കൈക്കാരൻമാരായ ബാബു ആന്‍റണി ചിരിയങ്കണ്ടത്ത്, ആന്‍റോ എൽ. പുത്തൂർ, ജിഷോ എസ്. പുത്തൂർ, ജനറൽ കണ്‍വീനർ എം. സ്റ്റീഫൻ ജോസ്, തോംസണ്‍ വെള്ളറ, ക്രിസ്റ്റഫർ ജോസഫ്, ടി.എ. കുരിയാക്കോസ് എന്നിവർ നേതൃത്വം നൽകി. 16, 17, 18, 19 തീയതികളിലായാണ് തിരുനാൾ.

ആറു സോണുകളാക്കി തിരിക്കും; പഴയ കെട്ടിടങ്ങൾക്കെതിരേ നടപടിക്കു കോർപറേഷൻ

തൃശൂർ: പൂരത്തിന്‍റെ ആദ്യാവസാനം വിവിധ പ്രവർത്തനങ്ങളിൽ ഏർപ്പെട്ട കൗണ്‍സിലർമാർക്കും ജീവനക്കാർക്കും കോർപറേഷൻ കൗണ്‍സിലിൽ അഭിനന്ദനം. അഭിമാനത്തോടെ ശിരസുയർത്തിയാണ് കോർപറേഷൻ നിൽക്കുന്നതെന്നു കൗണ്‍സിലർ എ.ആർ. രാഹുൽനാഥ് അവതരിപ്പിച്ച പ്രമേയത്തിൽ പറഞ്ഞു. ഭരണ-പ്രതിപക്ഷ അംഗങ്ങൾ ഒറ്റക്കെട്ടായി പിന്തുണച്ചു. കോർപറേഷൻ നടത്തിയ ഈ മാതൃകാപ്രവർത്തനത്തെ തദ്ദേശമന്ത്രി അഭിനന്ദിച്ചതും സ്വച്ഛതാ മിഷന്‍റെ ഭാഗമായി കേന്ദ്ര സർക്കാരിന്‍റെ പ്രതിനിധികൾ റിപ്പോർട്ട് ചോദിച്ചതിലും സന്തോഷമുണ്ടെന്നു മേയർ കൗണ്‍സിലിൽ അറിയിച്ചു. കോർപറേഷൻ പരിധിയിൽ അസി. എൻജിനീയറുടെ നേതൃത്വത്തിൽ ആറു സോണുകളായി തിരിച്ചു പഴക്കമേറിയ കെട്ടിടങ്ങൾക്കെതിരേ നിയമനടപടി സ്വീകരിക്കാൻ കൗണ്‍സിൽ തീരുമാനിച്ചു. സേഫ് റോഡ്, ഹാപ്പി റോഡ് പദ്ധതിയുടെ ഭാഗമായി കിഴക്കേകോട്ടമുതൽ സ്വരാജ് റൗണ്ട് വരെ ഒരു കിലോമീറ്റർ മാതൃകാറോഡാക്കി മാറ്റാനുള്ള സെന്‍റ് തോമസ് കോളജിന്‍റെ നിർദേശം അംഗീകരിച്ചു. കോർപറേഷൻതല തൊഴിൽമേള നടത്താനും മഴക്കാലപൂർവ ശുചീകരണം അടിയന്തരമായി പൂർത്തിയാക്കാനും തീരുമാനിച്ചു. തൃശൂർ കോർപറേഷൻ സ്റ്റേഡിയത്തിൽ കേന്ദ്ര സ്പോർട്സ് യുവജനകാര്യ മന്ത്രാലയത്തിന്‍റെ ധനസഹായംവഴി നിർമിക്കുന്ന എട്ടു ലൈനുകളുള്ള സിന്തറ്റിക് ട്രാക്കും ഇതിന്‍റെ ഡിസൈന് അനുസൃതമായി നിലവിലെ ഫുട്ബോൾ ടർഫ് കൂടി പുനർനിർമിക്കുന്നതിനുള്ള പരിഷ്കരിച്ച എംഒയു എംവൈഎഎസിന്‍റെ അംഗീകാരത്തോടുകൂടി സ്പോർട്സ് കേരള ഫൗണ്ടേഷന് സമർപ്പിച്ചതടക്കം 32 അജൻഡകളിൽ തീരുമാനമെടുത്തെന്നു മേയർ പറഞ്ഞു. മഴക്കാലപൂർവ ശുചീകരണത്തിനു 2.11 കോടി; നാളെ തുടങ്ങും തൃശൂർ: നാളെ തുടങ്ങുന്ന കോർപറേഷൻതല മഴക്കാലപൂർവ ശുചീകരണപ്രവർത്തനങ്ങൾക്കു 2.11 കോടി അനുവദിച്ചു. താണിക്കുടം പുഴ, പെരിങ്ങാവ് കുണ്ടുവാറ തോട്, ഗിരിജ തോട്, വഞ്ചിക്കുളം തോട് തുടങ്ങിയ കോർപറേഷൻ പരിധിയിലെ പ്രധാന തോടുകളും കോർപറേഷൻപരിധിയിൽ സ്ഥിരം വെള്ളക്കെട്ട് ഉണ്ടാകുന്ന ശക്തൻ നഗർ, ഇക്കണ്ടവാര്യർ റോഡ്, ഉദയനഗർ, വൃന്ദാപുരി, കുട്ടൻകുളങ്ങര എംജി നഗർ, ഹരിനഗർ, പെരിങ്ങാവ് തുടങ്ങിയ സ്ഥലങ്ങളും ചെറുതും വലുതുമായ 211 തോടുകളുടെ വൃത്തിയാക്കലുൾപ്പെടെ നടത്തും. കാനകൾ വൃത്തിയാക്കുന്നത് ആരോഗ്യവിഭാഗം ആരംഭിച്ചിട്ടുണ്ട്. നാളെ രാവിലെ 9.30ന് അശ്വിനി ജംഗ്ഷനിൽ പ്രവൃത്തിയുടെ ഉദ്ഘാടനം മേയർ എം.കെ. വർഗീസ് നിർവഹിക്കും. ശുചീകരണം താറുമാറായി: രാജൻ ജെ. പല്ലൻ തൃശൂർ: കഴിഞ്ഞവർഷം പൂരം ഒരുവിഭാഗം പോലീസ് ഉദ്യോഗസ്ഥർ അലങ്കോലമാക്കിയതിന്‍റെ ഉത്തരവാദിത്വത്തിൽനിന്നു മന്ത്രിമാർക്കും മുഖ്യമന്ത്രിക്കും ഒഴിയാനാകില്ലെന്നു കോർപറേഷൻ പ്രതിപക്ഷ നേതാവ് രാജൻ ജെ. പല്ലൻ. മേയ്15നുമുന്പ് മഴക്കാലപൂർവ ശുചീകരണം പൂർത്തിയാകേണ്ടതാണ്. കോർപറേഷൻ കെടുകാര്യസ്ഥതകാരണം വലിയ തോടുകളുടെ ശുചീകരണം ആരംഭിച്ചിട്ടില്ല. പണമനുവദിക്കാത്തതിനാൽ ചെറുകാനകളിലെ മണ്ണുനീക്കലും തുടങ്ങിയില്ല. ശക്തമായ മഴപെയ്താൽ ആയിരക്കണക്കിനു വീടുകളിൽ വെള്ളംകയറുമെന്നും കനത്ത നാശമുണ്ടാകും. 271 കെട്ടിടങ്ങൾ പൊളിക്കാൻ കൗണ്‍സിൽ തീരുമാനിച്ചശേഷം കോർപറേഷൻ പിന്നോട്ടുപോകുന്നതു ശരിയല്ലെന്നു പ്രതിപക്ഷനേതാവ് പറഞ്ഞു. കുറഞ്ഞവിലയ്ക്ക് ആറു ടണ്‍ ചെന്പ്, അലൂമിനിയം കന്പനികളും ഇരുന്പുപൈപ്പുകളും കൗണ്‍സിൽ അറിയാതെ വില്പന നടത്തി. ഈ ഫയൽ പാസാക്കണമെങ്കിൽ വോട്ടിംഗ് ആവശ്യപ്പെടുകയാണെന്നു പ്രതിപക്ഷ ഉപനേതാവ് ഇ.വി. സുനിൽരാജ് ആവശ്യപ്പെട്ടതോടെ മേയർ അജൻഡ മാറ്റി. എട്ടു ടണ്‍ ചെന്പുകന്പി മോഷ്ടിച്ചയാളെ പോലീസിനു കണ്ടെത്താൻ കഴിഞ്ഞില്ലെന്നും സുനിൽരാജ് പറഞ്ഞു. ഡിവിഷനിലുള്ള ശുചീകരണതൊഴിലാളികളെ നിയന്ത്രിക്കാൻ കൗണ്‍സിലർമാർക്ക് അധികാരമില്ല എന്ന മേയറുടെ പ്രസ്താവന കൗണ്‍സിലിൽ ബഹളത്തിനിടയാക്കി. ജോണ്‍ ഡാനിയൽ, ഉപനേതാവ് ഇ.വി. സുനിൽരാജ്, സെക്രട്ടറി കെ. രാമനാഥൻ, സ്റ്റാൻഡിംഗ് കമ്മിറ്റി ചെയർമാൻമാരായ ജയപ്രകാശ് പൂവത്തിങ്കൽ, മുകേഷ് കൂളപറന്പിൽ, കൗണ്‍സിലർമാരായ നിമ്മി റപ്പായി, മേഫി ഡെൽസണ്‍, സുനിതാ വിനു, വിനേഷ് തയ്യിൽ, സനോജ് പോൾ, എ.കെ.സുരേഷ്, എബി വർഗീസ്, മേഴ്സി അജി, ശ്രീലാൽ ശ്രീധർ എന്നിവർ പ്രസംഗിച്ചു.

പറപ്പൂക്കര പള്ളിയിൽ തിരുനാള്‍ 15, 16 തീയതികളില്‍

പുതുക്കാട്: പറപ്പൂക്കര ഫൊറോന തീര്‍ഥാടനകേന്ദ്രത്തിലെ വിശുദ്ധ ലോനാമുത്തപ്പന്‍റെ തിരുനാള്‍ 14,15, 16 തീയതികളില്‍ ആഘോഷിക്കുമെന്നു ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. നാളെ രാവിലെ യൂണിറ്റുകളിലേക്കു പുറപ്പെടുന്ന അമ്പുപ്രദക്ഷിണങ്ങള്‍ രാത്രിയില്‍ പള്ളിയില്‍ തിരിച്ചെത്തി സമാപിക്കും. 15 നു വൈകീട്ട് ആന എഴുന്നള്ളിപ്പോടുകൂടി അമ്പുപ്രദക്ഷിണങ്ങള്‍ പള്ളിയില്‍ എത്തിച്ചേരും. തുടര്‍ന്നു പ്രസിദ്ധമായ കൂടുതുറക്കല്‍ചടങ്ങും പ്രദക്ഷിണവും നടക്കും. രാത്രിയില്‍ പുണ്യാളന്‍റെ തിരുമുടിയെഴുന്നള്ളിപ്പ് നടക്കും. തിരുനാള്‍ദിനമായ 16നു നടക്കുന്ന ആഘോഷമായ പാട്ടുകുര്‍ബാനയ്ക്കു ഫാ. വിനില്‍ കുരിശുതറ മുഖ്യകാര്‍മികത്വം വഹിക്കും. ഫാ. ഡയസ് ആന്‍റണി വലിയമരത്തുങ്കല്‍ സന്ദേശം നല്‍കും. ഉച്ചതിരിഞ്ഞു വിശുദ്ധ കുര്‍ബാന, പ്രദക്ഷിണം എന്നിവയുണ്ടാകും. വൈകീട്ട് തിരുശേഷിപ്പ് ആശീര്‍വാദം, ബാൻഡ് വാദ്യാഘോഷം എന്നിവ നടക്കും. രാത്രിയില്‍ വിശുദ്ധന്‍റെ തിരുസ്വരൂപം മദ്ബഹയിലെ രൂപക്കൂട്ടില്‍ പ്രതിഷ്ഠിക്കും. 23 ന് എട്ടാമിടവും ഊട്ടുതിരുനാളും ആഘോഷിക്കും. വികാരി ഫാ. റാഫേല്‍ പഞ്ഞിക്കാരന്‍, സഹവികാരി ഫാ. ആല്‍ബിന്‍ പുതുശേരി, ജനറല്‍ കണ്‍വീനര്‍ സൈമണ്‍ ജോണ്‍ പുതുപ്പുള്ളിപ്പറമ്പില്‍, സെക്രട്ടറി റെജിന്‍ പാലത്തിങ്കല്‍, ട്രസ്റ്റി ജോസ് തട്ട്‌ള എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.

ആരോഗ്യശാസ്ത്ര സർവകലാശാല വിദ്യാർഥികൾക്ക് അഞ്ചുലക്ഷം വീതം ധനസഹായം നൽകി

മുളങ്കുന്നത്തുകാവ്: കളർകോട് അപകടത്തിൽ മരിച്ച മെഡിക്കൽ വിദ്യാർഥികളുടെ കുടുംബങ്ങൾക്കു കേരള ആരോഗ്യശാസ്ത്ര സർവകലാശാലയുടെ ധനസഹായം. സ്റ്റുഡന്‍റ് ബെനവലന്‍റ് ഫണ്ടിന്‍റെ ഉദ്ഘാടനവും ആദ്യവിതരണവും വൈസ് ചാൻസലർ ഡോ. മോഹനൻ കുന്നുമ്മൽ നിർവഹിച്ചു. ആലപ്പുഴ ഗവ. ടി.ഡി. മെഡിക്കൽ കോളജിലെ രണ്ടു വിദ്യാർഥികളുടെ കുടുംബങ്ങൾക്കാണ് അഞ്ചുലക്ഷം രൂപവീതം നൽകിയത്. കഴിഞ്ഞ ഡിസംബർ ആറിനു രാത്രിയിലുണ്ടായ അപകടത്തിൽ ഒന്നാംവർഷ മെഡിക്കൽ വിദ്യാർഥികളായ ആറുപേരാണു മരിച്ചത്. കോളജ് പ്രിൻസിപ്പൽ ഡോ. സി.ജെ. ജെസി, പ്രോ-വൈസ് ചാൻസലർ ഡോ. സി.പി. വിജയൻ, രജിസ്ട്രാർ ഡോ. എസ്. ഗോപകുമാർ, സർവകലാശാലാ ഡീൻ ഡോ. ആശിഷ് രാജശേഖരൻ, മുൻ പ്രിൻസിപ്പൽ ഡോ. മിറിയം വർക്കി, പിടിഎ പ്രസിഡന്‍റ് സി. ഗോപകുമാർ, യൂണിയൻ ചെയർമാൻ മുഹമ്മദ് ആഷിക് എന്നിവർ പ്രസംഗിച്ചു.

വാഴക്കോട് വാഹനങ്ങളുടെ കൂട്ടിയിടി

വടക്കാഞ്ചേരി: വാഴക്കോട് വാഹനങ്ങളുടെ കൂട്ടിയിടി. അപകടത്തിൽ ആർക്കും പരിക്കില്ല. തൃശൂർ-ഷൊർണൂർ സംസ്ഥാന പാതയിൽ ഏറെ നേരം വാഹന ഗതാഗതം തടസപ്പെട്ടു. ഇന്നലെ ഉച്ചക്ക് രണ്ടിന് വാഴക്കോട് എച്ച്പി പെട്രോൾ പമ്പിനു സമീപമായിരുന്നു അഞ്ചോളം വാഹനങ്ങൾ കൂട്ടിയിടിച്ചത്. വടക്കാഞ്ചേരി ഭാഗത്തേക്ക് വരികയായിരുന്ന ടിപ്പർ ലോറിയും, ഷൊർണൂർ ഭാഗത്തേക്ക് പോയിരുന്ന പിക്കപ്പ് വാനും കൂട്ടിയിടിക്കുകയും പിന്നാലെ വന്ന കാർ ടിപ്പറിനു പുറകിൽ ഇടിക്കുകയായിരുന്നു. അപകടത്തിൽ വാഹനങ്ങൾക്ക് കേടുപാടുകൾ സംഭവിച്ചീട്ടുണ്ട്. വിവരമറിയിച്ചതിനെ തുടർന്ന് ഹൈവേപോലീസ് സ്ഥലത്തെത്തി മേൽ നടപടികൾ സ്വീകരിച്ചു.

ഹൈടെക് പകിട്ടിൽ തിരുവില്വാമലയിലെ വഴിയോരവിശ്രമകേന്ദ്രം; ഉദ്ഘാടനം ഇന്ന്

തിരുവില്വാമല: ഗ്രാമപഞ്ചായത്ത് സംസ്ഥാന ടൂറിസം വകുപ്പിന്‍റെയും ശുചിത്വ മിഷൻന്‍റെയും സഹായത്തോടെ പണി പൂർത്തീകരിച്ച വഴിയോര വിശ്രമകേന്ദ്രം (ടേക്ക് എ ബ്രേക്ക് ) കെട്ടിടം ഇന്നു രാവിലെ 10 ന് തദ്ദേശസ്വയംഭരണ മന്ത്രി എം. ബി. രാജേഷ് ഉദ്ഘാടനം ചെയ്യും. യു.ആർ. പ്രദീപ് എംഎൽഎ അധ്യക്ഷനാകും. കെ. രാധാകൃഷ്ണൻ എംപി വിശിഷ്ടാതിഥിയായി പങ്കെടുക്കും. ശീതീകരിച്ച് ആധുനിക സൗകര്യങ്ങളോടെയാണ് കാട്ടുകുളം ഗവ. വൊക്കേഷണൽ ഹയർ സെക്കൻഡറി സ്കൂളിനു മുൻവശത്ത് ഗ്രാമപഞ്ചായത്ത് മനോഹരമായ കെട്ടിടം നിർമിച്ചിരിക്കുന്നത്. തിരുവില്വാമലയുടെ ടൂറിസം സാധ്യതകൾക്കു നിറം പകരാൻ ഈ കേന്ദ്രത്തിനു കഴിയുമെന്ന് ഗ്രാമപഞ്ചായത്ത് വൈസ് പ്രസിഡന്‍റ്് എം. ഉദയൻ പറഞ്ഞു.

ദേവാലയങ്ങളിൽ തിരുനാൾ

പറപ്പൂർ സെന്‍റ് ജോൺ നെപുംസ്യാൻ പറപ്പൂർ: സെന്‍റ്് ജോൺ നെപുംസ്യാൻ ഫൊറോന ദേവാലയത്തിൽ ഇടവകമധ്യസ്ഥനായ വിശുദ്ധ ജോൺ നെപുംസ്യാന്‍റെയും വിശുദ്ധ അൽഫോൻസാമ്മയുടെയും സംയുക്ത തിരുനാൾ ആഘോഷങ്ങൾക്കു തുടക്കമായി. ഇന്നലെ വൈകീട്ട് തിരുനാൾ ദീപാലങ്കാരത്തിന്‍റെ സ്വിച്ച്ഓൺ സേവ്യർ ചിറ്റിലപ്പിള്ളി എംഎൽഎ നിർവഹിച്ചു. ഇന്നു വൈകീ ട്ട് നടക്കുന്ന വിശുദ്ധ കുർബാനയ്ക്കുശേഷം വിശുദ്ധരുടെ കൂടുതുറക്കൽ ശുശ്രൂഷ നടക്കും. നാളെ തിരുനാൾദിനത്തിൽ രാവിലെ 10.30 ന് ഫാ. തേജസ് കുന്നപ്പിള്ളി ആഘോഷമായ തിരുനാൾ പാട്ടുകുർബാനയ്ക്ക് കാർമികത്വം വഹിക്കും. ഉച്ചകഴിഞ്ഞ് നാലിന് ആഘോഷമായ തിരുനാൾപ്രദക്ഷിണം. 12 ന് ഇടവക ദിനാഘോഷം. വികാരി ഫാ. സെബി പുത്തൂർ, അസി. വികാരി ഫാ. ക്രിസ്റ്റോ മഞ്ഞളി, തിരുനാൾ ജനറൽ കൺവീനർ പി.എ. ഷാജു, നടത്തുകൈക്കാരന്മാർ എന്നിവർ നേതൃത്വം നൽകും. ചിറ്റിലപ്പിള്ളി സെന്‍റ് റീത്താസ് ചിറ്റിലപ്പിള്ളി: സെന്‍റ് റീത്താസ് ദേവാലയത്തിൽ ഇടവകമധ്യസ്ഥയായ വിശുദ്ധ റീത്തയുടെ ഊട്ടുതിരുനാളിനു തൃശൂര്‍ അതിരൂപത ചാന്‍സലര്‍ ഫാ. ഡൊമിനിക് തലക്കോടന്‍ കൊടിയേറ്റി. 17, 18 തീയതികളിലാണ് തിരുനാൾ. തിരുനാള്‍ദിനത്തില്‍ രാവിലെ 10 നു നടക്കുന്ന ആഘോഷമായ തിരുനാള്‍കുര്‍ബാനയ്ക്ക് അതിരൂപത വികാരി ജനറാൾ മോണ്‍. ജോസ് കോനിക്കര മുഖ്യകാര്‍മികത്വം വഹിക്കും. വിശ്വാസപരിശീലന അതിരൂപത ഡയറക്ടര്‍ ഷൈജു തൈക്കാട്ടില്‍ സന്ദേശം നല്‍കും. തുടര്‍ന്ന് നേര്‍ച്ച ഊട്ട് ഉണ്ടായിരിക്കും.

സംഗമപുരിയില്‍ ക്ഷേത്രകലകള്‍ക്ക് തുടക്കമായി

ഇരിങ്ങാലക്കുട: കൂടല്‌മാണിക്യം ഉത്സവത്തെ വര്‍ണശബളമാക്കുവാന്‍ കൊടിപ്പുറത്ത് വിളക്കാഘോഷദിവസംതന്നെ വിവിധ ക്ഷേത്രകലാപരിപാടികള്‍ അരങ്ങേറി തുടങ്ങി. അമ്മന്നൂര്‍ ചാക്യാന്മാര്‍ക്ക് അടിയന്തരാവകാശമുള്ള കൂടല്‍മാണിക്യം കൂത്തമ്പലത്തില്‍ ഉത്സവത്തിന് ഒമ്പതുദിവസവും കൂത്തും നങ്ങ്യാര്‍കൂത്തും അരങ്ങേറും. ക്ഷേത്രത്തിന് കിഴക്കേനടപ്പുരയില്‍ സന്ധ്യക്ക് 7.30ന് നാദസ്വരം വടക്ക് സന്ധ്യാവേലപ്പന്തലില്‍ മദ്ദളപ്പറ്റ്, കുഴല്‍പ്പറ്റ്, കൊമ്പുപറ്റ് എന്നിവയും അരങ്ങേറും. പടിഞ്ഞാറേ നടപ്പുരയില്‍ വൈകീട്ട് ആറിന് വടക്ക് കിഴക്ക് ഭാഗത്തായി പാഠകം ആരംഭിക്കും. നാരായണന്‍ നമ്പ്യാര്‍ ആണ് പാഠകക്കാരന്‍. മാതൃക്കല്‍ബലിക്ക് വളരെ മുമ്പായി പടിഞ്ഞാറേ നടപ്പുരയില്‍ കുറത്തിയാട്ടം അരങ്ങേറും. പാഠകവും കുറത്തിയാട്ടവും ഒമ്പത് ദിനങ്ങളിലും ഉണ്ടാകും. ശീവേലിക്കുശേഷം കിഴക്കേ നടപ്പുരയില്‍ ഓട്ടന്‌‍തുള്ളലും വൈകീട്ട് 6.30ന് പടിഞ്ഞാറേ നടപ്പുരയില്‍ കുറത്തിയാട്ടവും അരങ്ങേറും. ഓട്ടന്‍തുള്ളലിനും കുറത്തിയാട്ടത്തിനും രാജീവ് വെങ്കിടങ്ങ് നേതൃത്വംനല്‍കും. വൈകീട്ട് 4.30ന് സന്ധ്യാവേലപ്പന്തലില്‍ കെ.പി. പ്രജീഷിന്‍റെ നേതൃത്വത്തില്‍ സോപാനസംഗീതവും 6.30ന് കെ.എം. ദേവദാസന്‍റെ നേതൃത്വത്തില്‍ നാഗസ്വരവും അരങ്ങേറും. കൂടല്‍മാണിക്യത്തില്‍ ഇന്ന് (സ്‌പെഷല്‍ പന്തലില്‍) ഉച്ചതിരിഞ്ഞ് ഒരുമണി മുതല്‍ 4.45വരെ തിരുവാതിരക്കളി, 4.45 മുതല്‍ 5.10 വരെ എടതിരിഞ്ഞി അമൃതവര്‍ഷിണി സംഗീതവിദ്യാലയത്തിന്റെ കീര്‍ത്തനാലാപനം, 5.15 മുതല്‍ 5.45 വരെ ഗുരുവായൂര്‍ ഷണ്‍മുഖന്‍ തെച്ചിയിലും സംഘവും അവതരിപ്പിക്കുന്ന വില്ലിന്‍മേല്‍ തായമ്പക, 5.50 മുതല്‍ 6.30 വരെ നൃത്തനൃത്യങ്ങള്‍, 6.30 മുതല്‍ 7.30 വരെ തൃശൂര്‍ പാര്‍വ്വണ നാട്യഗാനസഭയുടെ ഭരതനാട്യം, 7.35 മുതല്‍ 7.50 വരെ ശില്പ അജിത്കുമാറിന്‍റെ കഥക്, 7.55 മുതല്‍ 8.55 വരെ ഭരതനാട്യം, ഒമ്പത് മുതല്‍ 10 വരെ ഭരതനാട്യം (സംഗമം വേദിയില്‍) രാവിലെ 8.30ന് ശീവേലിക്കും രാത്രി 9.30ന് വിളക്കിനും രാജീവ് വാരിയര്‍ പ്രമാണംവഹിക്കും. ഉച്ചതിരിഞ്ഞ് ഒരുമണി മുതല്‍ 2.35 വരെ തിരുവാതിരക്കളി, 2.40 മുതല്‍ 3.35 വരെ സംഗീതസഭ, 3.40 മുതല്‍ 4.35 വരെ മോഹിനിയാട്ടം, 4.40 മുതല്‍ 5.35 വരെ സംഗീതകച്ചേരി, 5.40 മുതല്‍ 6.50 രെ സോപാനമാലിക, 6.55 മുതല്‍ 7.50 വരെ കലാമണ്ഡലം നിമ്മിയുടെ മോഹിനിയാട്ടം, 7.55 മുതല്‍ 8.55 വരെ പത്മശ്രീ കെ.കെ. രാമചന്ദ്രനും സംഘവും അവതരിപ്പിക്കുന്ന തോല്‍പ്പാവകൂത്ത്, ഒമ്പത് മുതല്‍ 10 വരെ ഉമാ മേനോന്‍റെ മോഹിനിയാട്ടം. രാത്രി 12ന് സര്‍വതോഭദ്രം കലാകേന്ദ്രത്തിന്‍റെ കഥകളി ലവണാസുരവധം, കിരാതം. കഥകളിപ്രേമികള്‍ക്ക് ഇനി ഉറക്കമില്ലാരാവുകള്‍ ഇരിങ്ങാലക്കുട: കൂടല്‍മാണിക്യ ക്ഷേത്രോത്സവത്തിന്‍റെ ഭാഗമായി സ്‌പെഷല്‍ പന്തലില്‍ ഏഴുദിവസത്തെ കഥകളിക്ക് ഇന്ന് തുടക്കമാവും. കൂടല്‍മാണിക്യ ക്ഷേത്രോത്സവം കഥകളി പ്രേമികളുടെ ഉത്സവം കൂടിയാണ്. ഇനിയുള്ള ഏഴു രാത്രികള്‍ പ്രഗത്ഭരായ കലാകാരന്മാര്‍ അണിനിരക്കുന്ന കഥകളിയാണു അരങ്ങേറുന്നത്. വിളക്കിനുശേഷം രാത്രി 12 മുതല്‍ പുലര്‍ച്ചെവരെ നീളുന്ന ഏഴുദിവസത്തെ കഥകളി കൂടല്‍മാണിക്യം ക്ഷേത്രോത്സവത്തിന്‍റെ പ്രത്യേകതയാണ്. ലവണാസുരവധം, കിരാതം, രുഗ്മാംഗദചരിതം, പ്രഹ്ലാദചരിതം, നളചരിതം ഒന്നാം ദിവസം, ബകവധം, ഉഷ, ചിത്രലേഖ (ബാണയുദ്ധം) ദുര്യോധനവധം, മാര്‍ക്കണ്ഡേയചരിതം, ദക്ഷയാഗം, സന്താനഗോപാലം, നരകാസുരവധം, ശ്രീരാമപട്ടാഭിഷേകം എന്നിവയാണു ഈ വര്‍ഷം അവതരിപ്പിക്കുന്ന കഥകള്‍. ആദ്യത്തെ ആറുദിവസം കഥ ഏതായാലും വലിയവിളക്കുദിവസം ശ്രീരാമപട്ടാഭിഷേകം അവതരിപ്പിക്കുന്നത് നൂറിലധികം വര്‍ഷമായി നിലനില്‍ക്കുന്ന നിഷ്ഠയാണ്. ‌ഡോ. സദനം കൃഷ്ണന്‍കുട്ടി, കലാനിലയം രാഘവന്‍, കലാമണ്ഡലം ബാലസുബ്രഹ്മണ്യന്‌, കലാനിലയം ബാലകൃഷ്ണന്‍, സദനം മണികണ്ഠന്‍, കലാനിലയം മധുമോഹന്‍, പീശപ്പിള്ളി രാജീവ്, തൃപ്പയ്യ പീതാംബരന്‍, കലാമണ്ഡലം ഹരിനാരായണന്‍, കലാനിലയം ഗോപി എന്നിവരാണ് വേഷമിടുന്നത്.

ചൊക്കന എസ്‌റ്റേറ്റ് മൈതാനം വീണ്ടും ഫുട്‌ബോള്‍ ആരവത്തിലേക്ക്

വെള്ളിക്കുളങ്ങര: കാല്‍പന്തുകളിയിലെ നഷ്ടപ്രതാപം തിരിച്ചുപിടിക്കാനുള്ള ശ്രമത്തിലാണ് ചൊക്കന ഗ്രാമം. കൗമാരങ്ങള്‍ മാരകലഹരിയിലേക്ക് വഴിതെറ്റിപോകാതെ അവരെ ഫുട്‌ബോള്‍ കളിയിലേക്ക് ആകര്‍ഷകിക്കുക എന്ന ദൗത്യമാണ് ഈ നാട് ഏറ്റെടുത്തിട്ടുള്ളത്. 120 വര്‍ഷം മുമ്പ് ബ്രിട്ടീഷുകാര്‍ ആരംഭിച്ച ഹാരിസന്‍ മലയാളം പ്ലാന്‍റേഷനില്‍ ഉള്‍പ്പെട്ടതാണ് ചൊക്കന റബര്‍ എസ്റ്റേറ്റടക്കമുള്ള പ്രദേശങ്ങള്‍. അക്കാലത്ത് തോട്ടങ്ങളില്‍ പണിയെടുപ്പിക്കാനായി മലപ്പുറത്തുനിന്ന് കൊണ്ടുവന്ന തൊഴിലാളികളുടെ പിന്മുറക്കാരാണ് ഇപ്പോഴും ഇവിടെയുള്ള തൊഴിലാളി കുടുംബങ്ങളില്‍ പലതും. അതുകൊണ്ടുതന്നെ മലബാറിന്‍റെ ഫുട്‌ബോള്‍ കമ്പവും ഇവര്‍ക്കിടയിലുണ്ട്. തൊഴിലാളികള്‍ക്ക് മാനസികോല്ലാസവും കായികക്ഷമതയും ലഭിക്കുന്നതിനായി ഇക്കാലത്ത് തോട്ടം മാനേജ്‌മെന്‍റ് മുന്‍കൈയെടുത്ത് എസ്റ്റേറ്റ് റിക്രിയേഷന്‍ക്ലബുകള്‍ക്ക് രൂപംനല്‍കിയിരുന്നു. ഈ ക്ലബുകള്‍ക്ക് കീഴില്‍ പാലപ്പിള്ളി - ചൊക്കന മേഖലയില്‍ നിരവധി ഫുട്‌ബോള്‍ മൈതാനങ്ങളും സജ്ജമാക്കി. ചൊക്കന, കുണ്ടായി, കാരികുളം, പാലപ്പിള്ളി തുടങ്ങിയ എസ്റ്റേറ്റുകളിലെല്ലാം ഫുട്‌ബോള്‍ മൈതാനങ്ങള്‍ നിര്‍മിച്ചു. മുന്‍തലമുറയിലെ ഒട്ടേറെപേരെ മികച്ച ഫുട്‌ബോള്‍കളിക്കാരാക്കി മാറ്റുന്നതില്‍ ഈ മൈതാനങ്ങള്‍ വലിയ പങ്കുവഹിച്ചു. ദേശീയ ഫുട്‌ബോള്‍ താരങ്ങളടക്കമുള്ളവരുടെ കാല്‍പ്പാടുകള്‍ പതിഞ്ഞിട്ടുള്ളവയാണ് ഈ മൈതാനങ്ങള്‍ പലതും. ചൊക്കന എസ്റ്റേറ്റിലുള്ള ഫുട്‌ബോള്‍ മൈതാനവും പതിറ്റാണ്ടുകളുടെ ചരിത്രംപേറുന്നതാണ്. 70കളിലും 80കളിലും ജില്ലക്കകത്തും പുറത്തും നടന്ന ടൂര്‍ണമെന്‍റുകളില്‍ ഗോള്‍വല കുലുക്കിയ നിരവധിപേര്‍ ചൊക്കനയിലുണ്ടായിരുന്നു. പിരിയാംകുഴി ഉണ്ണീന്‍, വില്ലന്‍ മുഹമ്മദുകുഞ്ഞ്, അത്താണിക്കല്‍ അബൂബക്കര്‍, ചെരിച്ചി കുഞ്ഞുമുഹമ്മദ്, വട്ടോളി റസാക്ക്, പുല്‍പ്പാടന്‍ അവലാംകുട്ടി, ലോറന്‍സ് താക്കോല്‍ക്കാരന്‍ പുളളിയില്‍ ഉണ്ണീന്‍ തുടങ്ങിയവര്‍ അവരില്‍ ചിലര്‍മാത്രം. ചൊക്കനയുടെ ഫുട്‌ബോള്‍ ചരിത്രത്തിലെ സുര്‍ണകാലമായിരുന്ന അന്ന് ചൊക്കന എസ്‌റ്റേറ്റിലെ 27 തൊഴിലാളി പാഡികളിലായി 162 കുടുംബങ്ങള്‍ താമസിച്ചിരുന്നു. തോട്ടം മേഖല തളര്‍ന്നതോടെ തഴിലാളി കുടുംബങ്ങളുടെ എണ്ണംകുറഞ്ഞു. പല പാഡികളിലും താമസക്കാരില്ലാതായി. ഇന്ന് ആകെ ചൊക്കനയിലെ പാഡികളില്‍ താമസിക്കുന്ന കുടുംബങ്ങളുടെ എണ്ണം 19 മാത്രമായി. തൊണ്ണൂറുകളുടെ പകുതിവരെ കാല്‍ക്കരുത്തിന്‍റെ ആരവം മുഴങ്ങിയിരുന്ന ഇവിടത്തെ ഫുട്‌ബോള്‍ മൈതാനത്തിലെ സായാഹ്നങ്ങള്‍ പതിയെ നിശബ്ദമാകാന്‍തുടങ്ങി. തോട്ടം തൊഴിലാളികളുടെ നാമമാത്രമായ വേതനവും ശോച്യാവസ്ഥയിലുള്ള ജീവിത സാഹചര്യങ്ങളും യുവാക്കളെ മറ്റ് തൊഴിലുകള്‍ തേടിപോകാന്‍ നിര്‍ബന്ധിതരാക്കി. മികച്ച ഫുട്‌ബോള്‍കളിക്കാരായിരുന്ന പലരും ഗള്‍ഫ് അടക്കമുള്ള നാടുകളിലേക്ക് ജീവിതം തേടിപോയതോടെയാണ് ചൊക്കന മൈതാനിയില്‍ ആരവങ്ങളില്ലാതെയായത്. നായാട്ടുകുണ്ട് സൂര്യ ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബിന്‍റെ നേതൃത്വത്തില്‍ ചൊക്കനയുടെ ഗതകാല ഫുട്‌ബോള്‍ പ്രതാപം വീണ്ടെുക്കാനുള്ള ശ്രമത്തിലാണ് ഇപ്പോള്‍ ഇവിടത്തെ നാട്ടുകാരും സാമൂഹികപ്രവര്‍ത്തകരും. ക്ലബ് സെക്രട്ടറി മുഹമ്മദലി, ജോബിള്‍ വടാശേരി, ഇന്ദുചൂഡന്‍ ഒറ്റപ്പാലം എന്നിവരുടെ നേതൃത്വത്തിലാണ് ചൊക്കനയില്‍ ഫുട്‌ബോള്‍ സജീവമാക്കാനുള്ള ശ്രമം നടക്കുന്നത്. ഹാരിസന്‍ എസ്‌റ്റേറ്റിലെ ഉദ്യോഗസ്ഥനായ അജിത്തും ഈ ഉദ്യമത്തിന് പൂര്‍ണപിന്തുണനല്‍കി ഒപ്പമുണ്ട്. കാട്ടാനശല്യമുള്ള പ്രദേശമായതിനാല്‍ ദൂരെയുള്ള ടര്‍ഫുകളും മൈതാനങ്ങളുംതേടി പോയാല്‍ വൈകുന്നേരം തിരിച്ചെത്താന്‍ പ്രയാസമാണെന്നതും ചൊക്കനയിലെ ഫുട്‌ബോള്‍ മൈതാനം നവീകരിക്കാന്‍ പ്രേരിപ്പിച്ച മറ്റൊരു ഘടകമാണ്.

ദേവാലയങ്ങളിൽ തിരുനാള്‍

പടിഞ്ഞാറെ ചാലക്കുടി നിത്യസഹായമാത ദേവാലയം തിരുനാളിന് രൂപത വികാരി ജനറാൾ മോൺ. ജോസ് മാളിയേക്കൽ കൊടി ഉയർത്തി. ഇന്ന് വൈകിട്ട് അഞ്ചിന് പ്രസുദേന്തിവാഴ്ച, വിശുദ്ധ കുർബാന, ലദീഞ്ഞ്, നോവേന, രൂപം എഴുന്നള്ളിച്ചുവയ്ക്കൽ, ഫാ. സെബാസ്റ്റ്യൻ ഈഴേക്കാടൻ കാർമികത്വം വഹിക്കും. നാളെ രാവിലെ 10ന് ആഘോഷമായ തിരുനാൾ പാട്ടുകുർബാന. ഫാ. ആന്‍റോ പാണാടൻ മുഖ്യകാർമികത്വംവഹിക്കും. ഫാ. വിൻസെന്‍റ് കുണ്ടുകുളം സന്ദേശം നൽകും. 3.30ന് സമൂഹബലി. ഇടവകയിലെ വൈദികർ കാർമികത്വംവഹിക്കും. തുടർന്ന് പ്രദക്ഷിണം. 6.45ന് പ്രദക്ഷിണം സമാപിക്കും. തുടർന്ന് ഗാനമേള. എടക്കുളം സെന്‍റ് സെബാസ്റ്റ്യന്‍സ് ദേവാലയം വിശുദ്ധ സെബസ്ത്യാനോസിന്‍റെ ഊട്ടുതിരുനാള്‍ നാളെ ആഘോഷിക്കും. ദേവാലയത്തില്‍ നിര്‍മിച്ച കൊടിമരത്തിന്‍റെ വെഞ്ചരിപ്പുകര്‍മം കല്പറമ്പ് ഫൊറോന വികാരി ഫാ. ജോസ് മഞ്ഞളി നിര്‍വഹിച്ചു. ഇന്ന് വൈകീട്ട് 5.15ന് ദിവ്യബലി, ലദീഞ്ഞ്, നൊവേന എന്നിവയ്ക്ക് വികാരി ഫാ. ജോണ്‍സണ്‍ മാനാടന്‍ മുഖ്യകാര്‍മികനാകും. തിരുനാള്‍ദിനമായ നാളെ രാവിലെ 10.30ന് നടക്കുന്ന ആഘോഷമായ തിരുനാള്‍ ദിവ്യബലിക്ക് ഫാ. ജോണ്‍ പാലിയേക്കര സിഎംഐ മുഖ്യകാര്‍മികത്വംവഹിക്കും. ഫാ. ഡയസ് ആന്‍റണി വലിയമരത്തിങ്കല്‍ സന്ദേശംനല്‍കും. തിരുനാളിന്‍റെ വിജയത്തിനായി വികാരി ഫാ. ജോണ്‍സണ്‍ മാനാടന്‍, കൈക്കാരന്‍മാരായ യു.കെ. തോമസ്, എ.വി. ജെയ്‌സന്‍, തിരുനാള്‍ കണ്‍വീനര്‍ ബിജു വിന്‍സന്‍റ് എന്നിവരുടെ നേതൃത്വത്തില്‍ വിപുലമായ കമ്മിറ്റി പ്രവര്‍ത്തിക്കുന്നു. പുല്ലൂര്‍ അങ്ങാടി കപ്പേള പുല്ലൂര്‍ സെന്‍റ് സേവിയേഴ്‌സ് ഇടവകയുടെ പുല്ലൂര്‍ അങ്ങാടി കപ്പേളയില്‍ വിശുദ്ധ അന്തോണീസിന്‍റെയും പരിശുദ്ധ വ്യാകുലമാതാവിന്‍റെയും സംയുക്തതിരുനാളിന് വികാരി റവ.ഡോ. ജോയ് വട്ടോലി സിഎംഐ കൊടിയേറ്റി. തിരുനാള്‍ദിനമായ ഇന്ന് ഉച്ചതിരിഞ്ഞ് നാലിന് തിരുസ്വരൂപപ്രതിഷ്ഠ. 5.30ന് ആഘോഷമായ തിരുനാള്‍ ദിവ്യബലിക്ക് ഫാ. ലിന്‍സ് മേലേപ്പുറം സിഎംഐ മുഖ്യകാര്‍മികത്വംവഹിക്കും. ദിവ്യബലിക്കുശേഷം ആശീര്‍വദിച്ച നേര്‍ച്ചപ്പായസം വിതരണം ഉണ്ടായിരിക്കും.

കലാഭവൻ മണി സ്മാരകനിർമാണം ആരംഭിക്കുന്നു

ചാലക്കുടി: നീണ്ടവർഷത്തെ കാത്തിരിപ്പിനും പ്രതിഷേധങ്ങൾക്കും ഒടുവിൽ കലാഭവൻ മണി സ്മാരക നിർമാണം ആരംഭിക്കുന്നു. നിർമാണ പ്രവൃത്തിയുടെ ഉദ്ഘാടനം 27ന് നടത്തുന്നതിന് നടപടികൾ ആരംഭിച്ചു. സംഘാടകസമിതി രൂപികരണയോഗം 15ന് മൂന്നിന് നഗരസഭ ജുബിലിഹാളിൽ നടത്തും. 2017ൽ ഭരണാനുമതി ലഭിച്ചിട്ടും നാലുവർഷത്തോളം പുരോഗതിയില്ലാതിരുന്ന പ്രവൃത്തിയുടെ അടങ്കൽ തുക മൂന്നുകോടി രൂപയായി വർധിപ്പിച്ച് ഭരണാനുമതിലഭിച്ചത് 2021ലാണ്. നിലവിൽ ലഭ്യമായ സ്ഥലത്തിനുപുറമേ വിദ്യാഭ്യാസവകുപ്പിന്‍റെ ഉടമസ്ഥതിയിലുള്ള 15 സെന്‍റ് സ്ഥലംകൂടി ലഭ്യമാക്കുന്നതിനുള്ള നടപടികൾ ആരംഭിച്ചിരുന്നു. പ്രവർത്തിയുടെ പദ്ധതിരേഖ തയാറാക്കി നടപ്പിലാക്കുന്നതിനായി ഊരാളുങ്കൽ ലേബർ കോൺട്രാക്ട് കോ- ഓപ്പറേറ്റീവ് സൊസൈറ്റി ലിമിറ്റഡിനെ ചുമതപ്പെടുത്തിയിട്ടും തുടർ നടപടികൾ ഉണ്ടായില്ല. ഇതിനെതുടർന്ന് നിരവധി പ്രതിഷേധസമരങ്ങൾ നടന്നു.

ഫൈബ്രോമൈൽജിയ; പ്രഭാഷണങ്ങളും ഡോക്യുമെന്‍ററി പ്രകാശനവും 12ന്

തൃശൂർ: നാദബ്രഹ്മം ഫൗണ്ടേഷന്‍റെ അഭിമുഖത്തിൽ ഫൈബ്രോമൈൽജിയ എന്ന അപൂർവരോഗാവസ്ഥയെക്കുറിച്ച് പ്രഭാഷണങ്ങളും ഡോക്യുമെന്‍ററി പ്രകാശനവും സാന്ത്വനഗാനസന്ധ്യയും തപനം- സാന്ത്വനം 12നു വൈകീട്ട് 4.30നു ടൗൺ ഹാളിൽ നടക്കും. ഡോക്ടർമാരായ ബി. രഘുനാഥ്, എം.ആർ. രാംദാസ്, കെ. ബാസ്പിൻ, ഗീത ആനലൂർ എന്നിവർ പ്രഭാഷണം നടത്തും. രോഗാവസ്ഥയെക്കുറിച്ചു യുകെ ആസ്ഥാനമായി പ്രവർത്തിക്കുന്ന ഫിലിം മേക്കർ നിഷ നായർ രചനയും സംവിധാനവും നിർവഹിച്ച ഡോക്യുമെന്‍ററിയാണു പ്രദർശിപ്പിക്കുക. ഗ്ലോബൽ മ്യൂസിക് അവാർഡ് നേടിയ പാടുംപാതിരി റവ.ഡോ. പോൾ പൂവത്തിങ്കൽ, ആകാശവാണി ടോപ് എ ഗ്രേഡ് നേടിയ മൃദംഗവിദ്വാൻ ഡോ. പാലക്കാട് ജയകൃഷ്ണൻ എന്നിവരെ ആദരിക്കും. സംഗീതത്തിലൂടെ സാന്ത്വനം വിഷയത്തിൽ പൂവത്തിങ്കലച്ചനും ഗായിക സുഗത പ്രസാദും പ്രഭാഷണം നടത്തും. നാദബ്രഹ്മം പ്രസിഡന്‍റ് എം.ഡി. സോമശേഖർ, ട്രസ്റ്റിമാരായ സുധാബിന്ദു ശശികുമാർ, പ്രവീൺ സുകുമാരൻ എന്നിവർ പ്രസംഗിക്കും. തുടർന്നു നാദബ്രഹ്മം അംഗങ്ങൾ അവതരിപ്പിക്കുന്ന സാന്ത്വനരാഗങ്ങൾ അടിസ്ഥാനമാക്കിയുള്ള ഗാനമേളയുണ്ടാകും. പത്രസമ്മേളനത്തിൽ നാദബ്രഹ്മം ട്രസ്റ്റിമാരായ വിനോദ് കുറുപ്പത്ത്, പ്രവീൺ സുകുമാരൻ, സുധാ ബിന്ദു ശശികുമാർ, ബാലകൃഷ്ണൻ കാറളം, സുസ്മിത വിഷ്ണുനാരായണൻ എന്നിവർ പങ്കെടുത്തു.

കൂടല്‍മാണിക്യം ക്ഷേത്രത്തിലെ ഉത്സവത്തിന് തുടക്കം

ഇരിങ്ങാലക്കുട: സംഗമപുരിക്ക് ആവേശം പകര്‍ന്ന് കൊടിപ്പുറത്ത് വിളക്ക് ഭക്തിസാന്ദ്രമായി. കൂടല്‍മാണിക്യം ക്ഷേത്രത്തിലെ ഉത്സവത്തിന് തുടക്കം കുറിച്ചുകൊണ്ട് ശ്രീകോവിലില്‍ നിന്നും ഭഗവാന്‍ ആദ്യമായി പുറത്തേയ്ക്ക് എഴുന്നള്ളുന്ന കൊടിപ്പുറത്ത് വിളക്ക് ദര്‍ശിക്കാന്‍ ആയിരങ്ങളാണ് എത്തിച്ചേര്‍ന്നത്. വൈകീട്ട് വിശേഷാല്‍ പൂജകള്‍ക്കുശേഷം ദേവനെ ശ്രീകോവിലില്‍ നിന്നും തിടമ്പിലേയ്ക്ക് ആവാഹിച്ച് പാണികൊട്ടി പുറത്തേയ്ക്ക് എഴുന്നള്ളിച്ചു. തുടര്‍ന്ന് ഭഗവാന്‍റെ സ്വന്തം ആനയായ മേഘാര്‍ജുനന്‍ തിടമ്പേറ്റി. ഭഗവാന്‍ പുറത്തേക്കെഴുന്നള്ളിയപ്പോള്‍ ക്ഷേത്രാങ്കണത്തില്‍ നിറഞ്ഞുനിന്ന ആയിരകണക്കിനു ഭക്തരുടെ കണ്ഠങ്ങളില്‍ സംഗമേശ്വരമന്ത്രങ്ങളുയര്‍ന്നു. ദേവന്‍ ആചാരപ്രകാരമുള്ള പ്രദക്ഷിണം പൂര്‍ത്തിയാക്കി. വിളക്കാചാരം, കേളി, പറ്റ് തുടങ്ങിയവക്കുശേഷം പ്രദക്ഷിണം പൂര്‍ത്തിയാക്കി കിഴക്കെ നടപ്പുരയിലെത്തിയപ്പോഴേക്കും സ്വര്‍ണത്തിലും വെള്ളിയിലും നെറ്റിപ്പട്ടങ്ങള്‍ അണിഞ്ഞ് മറ്റു ഗജവീരന്‍മാര്‍ വിളക്കെഴുന്നള്ളിപ്പിന് സജ്ജരായികഴിഞ്ഞിരുന്നു. 17 ആനകളാണ് വിളക്കെഴുന്നള്ളിപ്പില്‍ അണിനിരന്നത്. ആദ്യവിളക്കിന് തുടക്കം കുറിച്ചുകൊണ്ടു നടന്ന പഞ്ചാരിമേളവും ആസ്വാദകര്‍ക്ക് ആവേശം പകര്‍ന്നു. പഞ്ചാരി പടിഞ്ഞാറെ നടയ്ക്കല്‍ അവസാനിച്ച് തുടര്‍ന്ന് ചെമ്പടകൊട്ടി കിഴക്കേ നടക്കല്‍ കലാശിച്ച് മൂന്ന് പ്രദക്ഷിണം കൂടി പൂര്‍ത്തിയാക്കി അകത്തേക്കെഴുന്നള്ളിച്ചതോടെ കൊടിപ്പുറത്ത് വിളക്കാഘോഷത്തിന് സമാപ്തിയായി. മൂര്‍ക്കനാട് ദിനേശന്‍ വാരിയര്‍ പഞ്ചാരിമേളത്തിന് പ്രമാണം വഹിച്ചു.

204 സ്കൂളുകൾക്ക് നൂറുശതമാനം വിജയം

തൃശൂർ: ജില്ലയിൽ 204 സ്കൂളുകൾക്കു നൂറുശതമാനം വിജയം. വിദ്യാഭ്യാസജില്ലകളായ ഇരിങ്ങാലക്കുടയിൽ 72 സ്കൂളുകളും ചാവക്കാട് 63 സ്കൂളുകളും തൃശൂരിൽ 69 സ്കൂളുകളും നൂറുശതമാനം വിജയംനേടി. സർക്കാർ സ്കൂളുകൾ: ജിവിഎച്ച്എസ്എസ് ചേർപ്പ്, ജിഎച്ച്എസ്എസ് മണലൂർ, പിജെഎംഎസ്ജി കണ്ടശാംകടവ്, സിഎംജിഎച്ച്എസ് കുറ്റൂർ, ജിഎൻഎച്ച്എസ്എസ് കിഴുപ്പിള്ളിക്കര, ജിഎച്ച്എസ്എസ് പെരിങ്ങോട്ടുകര, ജിഎച്ച്എസ്എസ് താന്ന്യം, ജിഎച്ച്എസ്എസ് പൂങ്കുന്നം, ജിവിഎച്ച്എസ്എസ് ഗേൾസ് തൃശൂർ, ജിഎംബിഎച്ച്എസ്എസ് തൃശൂർ, ജിഎച്ച്എസ്എസ് പീച്ചി, വൈലോപ്പിള്ളി എസ്എംഎം ഗവ. വിഎച്ച്എസ്എസ് ഒല്ലൂർ, ജിഎച്ച്എസ്എസ് അഞ്ചേരി, ജിഎച്ച്എസ് കണ്ണാട്ടുപാടം, ജിവിഎച്ച്എസ്എസ് പുത്തൂർ, ജിവിഎച്ച്എസ്എസ് രാമവർമപുരം, ജിഎച്ച്എസ് വിജയരാഘവപുരം, ജിജിഎച്ച്എസ് ചാലക്കുടി, പി. ഭാസ്കരൻ മെമ്മോറിയൽ ജിഎച്ച്എസ് കൊടുങ്ങല്ലൂർ, കുഞ്ഞിക്കുട്ടി തന്പുരാട്ടി മെമ്മോറിയൽ ജിജിഎച്ച്എസ്എസ് കൊടുങ്ങല്ലൂർ, ജികെവിഎച്ച്എസ്എസ് എറിയാട്, ജിഎച്ച്എസ്എസ് എടവിലങ്ങ്, ജിഎച്ച്എസ്എസ് ഐരാണിക്കുളം, ജിഎംബിഎച്ച്എസ്എസ് ഇരിങ്ങാലക്കുട, ജിജിവിഎച്ച്എസ്എസ് ഇരിങ്ങാലക്കുട, ജിഎച്ച്എസ്എസ് കാട്ടൂർ, ജിഎച്ച്എസ് കുഴൂർ, ജിഎൻബിഎച്ച്എസ് കൊടകര, ജിഎച്ച്എസ്എസ് ചെന്പുച്ചിറ, ജിഎച്ച്എസ്എസ് കരൂപ്പടന്ന, ജിവിഎച്ച്എസ്എസ് നന്തിക്കര, ജിവിഎച്ച്എസ്എസ് പുതുക്കാട്, ജിവിഎച്ച്എസ്എസ് പുത്തൻചിറ, ഗവ. സമിതി എച്ച്എസ്എസ് മേലഡൂർ, ജിഎച്ച്എസ്എസ് ചായ്പൻകുഴി, ജിഎച്ച്എസ് പുല്ലൂറ്റ്, ജിഎച്ച്എസ്എസ് മുപ്ലിയം, എംഎആർഎംജിവിഎച്ച്എസ്എസ് ശാന്തിപുരം, എംആർഎസ് ചാലക്കുടി, ജിഎച്ച്എസ് പാന്പാടി, ജിഎച്ച്എസ് തയ്യൂർ, ഗവ. മോഡൽ എച്ച്എസ്എസ് ഗേൾസ് കുന്നംകുളം, ഗവ. ബോയ്സ് എച്ച്എസ് വടക്കാഞ്ചേരി, ജിഎച്ച്എസ്എസ് മച്ചാട്, ജിആർഎസ്ആർവിഎച്ച്എസ്എസ് വേലൂർ, ജിഎച്ച്എസ്എസ് ചാവക്കാട്, ജിഎച്ച്എസ്എസ് മുല്ലശ്ശേരി, ജിവിഎച്ച്എസ്എസ് വലപ്പാട്, ജിഎച്ച്എസ്എസ് വാടാനപ്പള്ളി, ഗവ. ഫിഷറീസ് എച്ച്എസ്എസ് നാട്ടിക, ഗവ. ഫിഷറീസ് വിഎച്ച്എസ്എസ് കയ്പമംഗലം, ജിആർഎഫ്ടിഎച്ച്എസ് ചാവക്കാട്, ജിഎച്ച്എസ്എസ് കടവല്ലൂർ, ജിഎച്ച്എസ് എളവള്ളി, ജിഎച്ച്എസ്എസ് കടിക്കാട്, ഗവ. മോഡൽ റസിഡൻഷ്യൽ സ്കൂൾ ബോയ്സ് വടക്കാഞ്ചേരി, ഗവ. മോഡൽ റസിഡൻഷ്യൽ സ്കൂൾ ചേലക്കര. എയ്ഡഡ് സ്കൂളുകൾ: സെന്‍റ് ആന്‍റണീസ് അമ്മാടം, സിഎൻഎൻബിഎച്ച്എസ് ചേർപ്പ്, സിഎൻഎൻ ചേർപ്പ്, സെന്‍റ് തോമസ് വല്ലച്ചിറ, സെന്‍റ് സേവ്യേഴ്സ് ചെവ്വൂർ, എസ്എൻബിഎച്ച്എസ് കണിമംഗലം, എസ്എൻജിഎച്ച്എസ് കണിമംഗലം, എസ്എച്ച് ഓഫ് മേരീസ് കണ്ടശാംകടവ്, എസ്എൻജിഎസ്എച്ച്എസ് കാരമുക്ക്, ടിഎച്ച്എസ് അരണാട്ടുകര, ഐജെജിഎച്ച്എസ് അരണാട്ടുകര, സെന്‍റ് ആൻസ് ജിഎച്ച്എസ് വെസ്റ്റ്ഫോർട്ട് തൃശൂർ, എച്ച്എസ് അരിന്പൂർ, സെന്‍റ് തോമസ് എച്ച്എസ് തിരൂർ, പൂമല എച്ച്എസ് പൂമല, സെറാഫിക് പെരിങ്ങോട്ടുകര, എസ്എൻഎംഎച്ച്എസ് ചാഴൂർ, സെന്‍റ് ആന്‍റണീസ് പുത്തൻപീടിക, എസ്ബിഎച്ച്എസ് കുറുന്പിലാവ്, സെന്‍റ് അലോഷ്യസ് എൽത്തുരുത്ത്, എൽഎഫ്സിജിഎച്ച്എസ് ഒളരിക്കര, സെന്‍റ് ജോസഫ്സ് മിഷൻ ക്വാർട്ടേഴ്സ് തൃശൂർ, എംടിഎച്ച്എസ് ചേലക്കോട്ടുകര, വിബിഎച്ച്എസ്എസ് തൃശൂർ, വിവിഎസ്എച്ച്എസ് മണ്ണുത്തി, സെന്‍റ് സെബാസ്റ്റ്യൻസ് നെല്ലിക്കുന്ന്, എകെഎംഎച്ച്എസ്എസ് പൂച്ചെട്ടി, സെന്‍റ് ക്ലെയേഴ്സ് തൃശൂർ, സെന്‍റ് തോമസ് കോളജ് എച്ച്എസ്എസ് തൃശൂർ, സെന്‍റ് തോമസ് തോപ്പ് തൃശൂർ, എസ്എച്ച്സിജിഎച്ച്എസ്എസ് തൃശൂർ, എച്ച്എഫ്സിജിഎച്ച്എസ് തൃശൂർ, ബിസിഎച്ച്എസ് മുക്കാട്ടുകര, സെന്‍റ് ജോസഫ്സ് അവണിശേരി, സെന്‍റ് മേരീസ് ഒല്ലൂർ, സെന്‍റ് റാഫേൽസ് ഒല്ലൂർ, ദീപ്തി എച്ച്എസ് തലോർ, ടിപിഎസ്എച്ച്എസ് തൃക്കൂർ, സിജെഎംഎഎച്ച്എസ്എസ് വരന്തരപ്പിള്ളി, സെന്‍റ് ജോസഫ്സ് വേലൂപ്പാടം, മാതാ എച്ച്എസ് മണ്ണംപേട്ട, എപിഎച്ച്എസ് അളഗപ്പനഗർ, സെന്‍റ് സെബാസ്റ്റ്യൻസ് മാന്ദാമംഗലം, എസ്എസ്ജിഎച്ച്എസ്എസ് പുറനാട്ടുകര, ശാന്ത എച്ച്എസ്എസ് അവണൂർ, ആർഎം ഹയർ സെക്കൻഡറി സ്കൂൾ ആളൂർ, ബിവിഎംഎച്ച്എസ് കല്ലേറ്റുംകര, ജിഎസ്എച്ച്എസ് അഷ്ടമിച്ചിറ, എസ്എച്ച്സിജിഎച്ച്എസ്എസ് ചാലക്കുടി, സെന്‍റ് ആന്‍റണീസ് കോട്ടാറ്റ്, സെന്‍റ് ജോസഫ്സ് മേലൂർ, സെന്‍റ് ആന്‍റണീസ് സൗത്ത് താണിശേരി, എച്ച്ഡിപിഎസ്എച്ച്എസ്എസ് എടതിരിഞ്ഞി, സെന്‍റ് മേരീസ് ഇരിങ്ങാലക്കുട, എൻഎച്ച്എസ്എസ് ഇരിങ്ങാലക്കുട, എസ്എൻഎച്ച്എസ്എസ് ഇരിങ്ങാലക്കുട, എൽഎഫ്സിഎച്ച്എസ് ഇരിങ്ങാലക്കുട, ബിവിഎംഎച്ച്എസ് കല്പറന്പ്, പിഎസ്എംവിഎച്ച്എസ്എസ് കാട്ടൂർ, സെന്‍റ് സേവ്യേഴ്സ് കരാഞ്ചിറ, എച്ച്സിഎച്ച്എസ് മാപ്രാണം, ഡോണ്‍ബോസ്കോ കൊടകര, എസ്കെഎച്ച്എസ് മറ്റത്തൂർ, പിസിജിഎച്ച്എസ് വെള്ളിക്കുളങ്ങര, എംഎഎം എച്ച്എസ് കൊരട്ടി, പിഎസ്എച്ച്എസ്എസ് തിരുമുടിക്കുന്ന്, എൽഎഫ്സി എച്ച്എസ്എസ് കൊരട്ടി, സെന്‍റ് മേരീസ് കുഴിക്കാട്ടുശേരി, സെന്‍റ് ആന്‍റണീസ് മാള, സെന്‍റ് ജോസഫ്സ് കരുവന്നൂർ, വിഎച്ച്എസ്എസ് കാറളം, പിവിഎസ്എച്ച്എസ് പറപ്പൂക്കര, എസ്കഐച്ച്എസ്എസ് ആനന്ദപുരം, സെന്‍റ് ജോർജ്സ് പരിയാരം, സെന്‍റ് സെബാസ്റ്റ്യൻസ് കുറ്റിക്കാട്, എകെഎംഎച്ച്എസ് പൊയ്യ, സെന്‍റ് ആന്‍റണീസ് പുതുക്കാട്, സെന്‍റ് മേരീസ് ചെങ്ങാലൂർ, ആർഎച്ച്എസ് തുന്പൂർ, ടിഎച്ച്എസ് പുത്തൻചിറ, എൻഎസ്എച്ച്എസ് വള്ളൂർ, യുഎച്ച്എസ്എസ് മാന്പ്ര, സെന്‍റ് മേരീസ് വൈന്തല, എച്ച്എസ്എസ് പനങ്ങാട്, സെന്‍റ് ജോസഫ്സ് മതിലകം, യുഎച്ച്എസ് അന്നനാട്, എസ്‌സിജിഎച്ച്എസ്എസ് കോട്ടയ്ക്കൽ മാള, ഒഎൽഎഫ്ജിഎച്ച്എസ്എസ് മതിലകം, എംഇഎസ്എച്ച്എസ്എസ്പി വെന്പല്ലൂർ, സെന്‍റ് ജോസഫ്സ് എച്ച്എസ് പങ്ങാരപ്പിള്ളി, ൽഎഫ് ഗേൾസ് എച്ച്എസ് ചേലക്കര, എൻഎസ്എസ്എച്ച്എസ് മുള്ളൂർക്കര, എംജെഡിഎച്ച്എസ് കുന്നംകുളം, ബിസിജിഎച്ച്എസ് കുന്നംകുളം, എൽഐജിഎച്ച്എസ് ചൂണ്ടൽ, സെന്‍റ് ഫ്രാൻസിസ് മറ്റം, എഎംഎച്ച്എസ് ചെമ്മണ്ണൂർ, സെന്‍റ് ഫ്രാൻസിസ് മറ്റം, എൻഎസ്എസ്‌വിഎച്ച്എസ്എസ് മുണ്ടത്തിക്കോട്, സെന്‍റ് ജോസഫ്സ് ആൻഡ് സെന്‍റ് സിറിൾസ് വെസ്റ്റ് മങ്ങാട്, എച്ച്എസ് പെങ്ങാമുക്ക്, എംഎഎസ്എംവിഎച്ച്എസ്എസ് വെന്മേനാട്, ക്രൈസ്റ്റ് കിംഗ് പാവറട്ടി, സെന്‍റ് തെരേസാസ് ഗേൾസ് എച്ച്എസ് ബ്രഹ്മകുളം, വിആർഎഎംഎംഎച്ച്എസ് തൈക്കാട് സൗത്ത്, ഇസ്ലാമിക് വിഎച്ച്എസ്എസ് ഒരുമനയൂർ, എംആർആർഎംഎച്ച്എസ് ചാവക്കാട്, നാഷണൽ എച്ച്എസ്എസ് ഏങ്ങണ്ടിയൂർ, സെന്‍റ് തോമസ് ഏങ്ങണ്ടിയൂർ, സെന്‍റ് ജോസഫ്സ് ഏനാമാക്കൽ, വിപിഎംഎസ്എൻഡിപിഎച്ച്എസ്എസ് കഴിന്പ്രം, ആർഎംവിഎച്ച്എസ്എസ് പെരിഞ്ഞനം, സെന്‍റ് ആൻസ് ഗേൾസ് എടത്തിരുത്തി, സെന്‍റ് മേരീസ് ചൊവ്വന്നൂർ, സെന്‍റ് സെബാസ്റ്റ്യൻസ് ചിറ്റാട്ടുകര, സെന്‍റ് ജോണ്‍സ് എളനാട്, എംഐസി അൽ അമീൻ കേച്ചേരി, ശ്രീനാരായണ ട്രസ്റ്റ് നാട്ടിക. അണ്‍എയ്ഡഡ് സ്കൂളുകൾ: എൻഎസ്എസ് വെസ്റ്റ്ഫോർട്ട്, സെന്‍റ് ജോസഫ്സ് മോഡൽ കുരിയച്ചിറ, കെഎയുഎച്ച്എസ് വെള്ളാനിക്കര, ഡോണ്‍ ബോസ്കോ മണ്ണുത്തി, ഹോളി ഏഞ്ചൽസ് ഒല്ലൂർ, സെന്‍റ് പോൾസ് കുരിയച്ചിറ, സെന്‍റ് ജോസഫ്സ് എറവ്, ലൂർദ്മാത ചേർപ്പ്, സെന്‍റ് ജോസഫ്സ് ആളൂർ, കാർമൽ ചാലക്കുടി, എച്ച്സിസി സ്നേഹഗിരി, ലിസ്യു കോണ്‍വെന്‍റ് ഇഎംഎച്ച്എസ് കാട്ടുങ്ങച്ചിറ, വിദ്യാജോതി അരിപ്പാലം, ബഥനി സെന്‍റ് ജോണ്‍സ് കുന്നംകുളം, ഡിപോൾ ചൂണ്ടൽ, ഫോക്കസ് ഇസ്ലാമിക് തൊട്ടാപ്പ്, റഹ്‌മത്ത് ഇംഗ്ലീഷ് എച്ച്എസ് തൊഴിയൂർ, ഐസിഎഇഎച്ച്എസ്എസ് വടക്കേക്കാട്, ജെഎംജെ അത്താണി, കോണ്‍കോഡ് ഇംഗ്ലീഷ് മീഡിയം ചിറമനേങ്ങാട്, അസീസി തലക്കോട്ടുകര, ഐഡിസി ഒരുമനയൂർ, സിറാജുൾ ഉലൂം കല്ലുംപുറം, ഡിക്യുആർഎച്ച്എസ് കല്ലുംപുറം, സെന്‍റ് എംഎംസി കാണിപ്പയ്യൂർ, മോഡൽ എച്ച്എസ് പുതിയങ്ങാടി, അൽ-അമീൻ കരിക്കാട്, തഖ്വ ആർഇഎച്ച്എസ് അണ്ടത്തോട്, ക്ലേലിയ ബാർബിയേരി ഹോളി ഏഞ്ചൽസ് വടക്കാഞ്ചേരി, മാംബൗൾഹുദ കേച്ചേരി, നിർമല ഇഎംഎച്ച്എസ് എരുമപ്പെട്ടി.

അലങ്കാരദീപങ്ങൾ മിഴിതുറന്നു, പാവറട്ടി തിരുനാളിനു തുടക്കം

പാവറട്ടി: ദേവാലയ മുഖമണ്ഡപത്തിലെ അലങ്കാരവൈദ്യുതദീപങ്ങൾ മിഴിതുറന്നതോടെ പാവറട്ടി സെന്‍റ് ജോസഫ് തീർഥകേന്ദ്രത്തിലെ വിശുദ്ധ യൗസേപ്പിതാവിന്‍റെ ഊട്ടുതിരുനാളിനു തുടക്കമായി. പാവറട്ടി സെന്‍റ് തോമസ് ആശ്രമാധിപൻ ഫാ. ജോസഫ് ആലപ്പാട്ട് സ്വിച്ച്ഓൺ കർമം നിർവഹിച്ചതോടെ ദേവാലയവും പരിസരവും ബഹുവർണദീപപ്രഭയിൽ മുങ്ങി. തീർഥകേന്ദ്രം റെക്ടർ റവ.ഡോ. ആന്‍റണി ചെമ്പകശേരി ചടങ്ങിൽ അധ്യക്ഷത വഹിച്ചു. പാവറട്ടി ഗ്രാമപഞ്ചായത്ത് പ്രസിഡന്‍റ് എം.എം. റജീന, മാനേജിംഗ് ട്രസ്റ്റി ഒ.ജെ. ഷാജൻ, ഇല്യുമിനേഷൻ കമ്മിറ്റി കൺവീനർ വി.എൽ. ഷാജു, ജോയിന്‍റ് കൺവീനർ കെ.എൽ. ഷാജി തുടങ്ങിയവർ പ്രസംഗിച്ചു. ആസ്വാദകർക്കു ദൃശ്യവിസ്മയം പകർന്ന ദേവാലയദീപാലങ്കാരം ഇത്തവണ ഒരുക്കിയതു സി.ജെ. ലൈറ്റ് ആൻഡ് സൗണ്ട് ആണ്. സ്വിച്ച്ഓൺ കർമത്തിനുശേഷം പാവറട്ടിയിലെ നിർമാണമേഖലയിലെ തൊഴിലാളികളുടെ നേതൃത്വത്തിലുള്ള വെടിക്കെട്ട് നടന്നു. തുടർന്നു തെക്കുഭാഗം വെടിക്കെട്ടുകമ്മിറ്റിയുടെ നേതൃത്വത്തിലുള്ള തിരുമുറ്റ മെഗാ ഫ്യൂഷൻ അരങ്ങേറി. ഇന്നുരാവിലെ പത്തിനു തൃശൂർ അതിരുപത വികാരി ജനറാൾ മോൺ. ജെയ്സൺ കൂനംപ്ലാക്കലിന്‍റെ മുഖ്യകാർമികത്വത്തിൽ നടക്കുന്ന നൈവേദ്യപൂജയ്ക്കുശേഷം നേർച്ചഭക്ഷണ ആശീർവാദവും വിതരണവും നടക്കും. വൈകീട്ട് 5.30 നു രാമനാഥപുരം രൂപത മെത്രാൻ മാർ പോൾ ആലപ്പാട്ടിന്‍റെ മുഖ്യകാർമികത്വത്തിൽ നടക്കുന്ന സമൂഹബലിക്കുശേഷം ഭക്തിസാന്ദ്രമായ കൂടുതുറക്കൽ ശുശ്രൂഷ നടക്കും. രാത്രി എട്ടിനു മട്ടന്നൂർ ശങ്കരൻകുട്ടിമാരാരും നൂറ്റിയൊന്നു കലാകാരന്മാരും അണിനിരക്കുന്ന തിരുനടയ്ക്കൽമേളം നടക്കും. രാത്രി വിവിധ കുടുംബകൂട്ടായ്മകളുടെ നേതൃത്വത്തിലുള്ള വള എഴുന്നള്ളിപ്പുകൾ തീർഥകേന്ദ്രത്തിലെത്തി സമാപിക്കും. നാളെയാണ് പ്രധാന തിരുനാൾദിവസം.

എസ്എസ്എൽസി പരീക്ഷാഫലം; തൃശൂരിൽ 99.48 ശതമാനം വിജയം

തൃശൂർ: ജില്ലയിൽ എസ്എസ്എൽസിക്ക് 99.48 ശതമാനം വിജയം. 5253 വിദ്യാർഥികൾക്ക് ഫുൾ എ പ്ലസ്. തൃശൂർ ഉപജില്ല - 1683, ഇരിങ്ങാലക്കുട- 2042, ചാവക്കാട്- 1528 എന്നിങ്ങനെയാണു ഫുൾ എ പ്ലസ് നേടിയവർ. മൂന്ന് ഉപജില്ലകളിലും ആണ്‍കുട്ടികളുടെ ഇരട്ടിയിലേറെ പെണ്‍കുട്ടികൾ ഫുൾ എ പ്ലസ് നേടി. ജില്ലയിൽ ആകെ പരീക്ഷയെഴുതിയ 35963 വിദ്യാർഥികളിൽ 18235 ആണ്‍കുട്ടികളും 17541 പെണ്‍കുട്ടികളുമടക്കം 35776 പേർ ഉപരിപഠനത്തിനു യോഗ്യത നേടി. ഇരിങ്ങാലക്കുട ഉപജില്ലയിൽ ആകെ 10842 പേർ പരീക്ഷയെഴുതിയതിൽ 5489 ആണ്‍കുട്ടികളും 5341 പെണ്‍കുട്ടികളുമടക്കം 10830 പേർ ഉപരിപഠനത്തിനു യോഗ്യത നേടി. 99.89 ആണു വിജയശതമാനം. ചാവക്കാട് 15290 പേരിൽ 7821 ആണ്‍കുട്ടികളും 7329 പെണ്‍കുട്ടികളുമടക്കം 15150 (99.64 ശതമാനം) പേരും, തൃശൂർ ഉപജില്ലയിൽ 98321 പേരിൽ 4925 ആണ്‍കുട്ടികളും 4871 പെണ്‍കുട്ടികളുമടക്കം 9796 (99.64 ശതമാനം) പേരും ഉപരിപഠനത്തിനു യോഗ്യത നേടി. കേരള കലാമണ്ഡലം ആർട്ട് ഹയർ സെക്കൻഡറി സ്കൂളിൽ പരീക്ഷയെഴുതിയ 66 വിദ്യാർഥികളിൽ മുഴുവൻ പേരും ഉന്നത വിദ്യാഭ്യാസത്തിന് അർഹതനേടി.

കൊരട്ടിയിൽ കാറിടിച്ച് സൈക്കിൾ യാത്രികൻ മരിച്ചു

കൊരട്ടി: ദേശീയപാത ലത്തീൻ പള്ളിക്ക് സമീപം സൈക്കിൾ യാത്രികൻ കാറിടിച്ച് മരിച്ചു. ബംഗാൾ സ്വദേശി സ്വാഭാൻ മണ്ഡൽ (51)ആണ് മരിച്ചത്. നിയന്ത്രണം വിട്ട കാർ ആദ്യം സൈക്കിളിലും തുടർന്ന് നിർത്തിയിട്ടുന്ന ചരക്ക് ലോറിയുടെ പിന്നിലും ഇടിക്കുകയുമായിരുന്നു. ഇതിനിടയിൽപ്പെട്ടാണ് സൈക്കിൾ യാത്രികൻ മരിച്ചത്. അപകടത്തിൽ കാർ യാത്രികർക്കും പരിക്കേറ്റു. കാർ യാത്രികരായ പാലക്കാട് കള്ളിക്കാട് സ്വദേശികളായ നീത ഫർസിൻ (40), താറമോനി സോറിൻ(18) എന്നി വരെ കറുകുറ്റിയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ രാവിലെയായിരുന്നു അപകടം. പാലക്കാട് നിന്ന് എറണാകുളം ഭാഗത്തേക്ക് പോകുകയായിരുന്നു കാർ. അപകടത്തെ തുടർന്ന് രക്തവും, ഓയിലും തളംകെട്ടി കിടന്നത് സ്ഥലത്തെത്തിയ ഫയർഫോഴ്സിന്‍റെ നേതൃത്വത്തിൽ നീക്കം ചെയ്തു. ചാലക്കുടി അഗ്നിരക്ഷാനിലയത്തിലെ സീനിയർ ഫയർ ആൻഡ് റെസ്ക്യൂ ഓഫീസർ എം.എസ്. അനീഷിന്‍റെ നേതൃത്വത്തിലായിരുന്നു രക്ഷാപ്രവർത്തനം.

പുതുക്കാട് കെഎസ്ആര്‍ടിസി ബസില്‍ ബൈക്ക് ഇടിച്ച് യുവാവ് മരിച്ചു; ഒരാള്‍ക്ക് ഗുരുതര പരിക്ക്

പുതുക്കാട്: സ്റ്റാൻഡിന് മുന്‍പില്‍ കെഎസ്ആര്‍ടിസി ബസില്‍ ബൈക്ക് ഇടിച്ചുകയറി ബൈക്ക് യാത്രക്കാരനായ യുവാവ് മരിച്ചു. കൂടെയുണ്ടായിരുന്ന സുഹൃത്തിന് ഗുരുതരമായി പരിക്കേറ്റു. വരാക്കര സ്വദേശി മേച്ചേരിപ്പടി വീട്ടില്‍ ആന്‍സന്‍റെ മകന്‍ ആന്‍സ്റ്റിന്‍ (19) ആണ് മരിച്ചത്. വരന്തരപ്പിള്ളി പള്ളിക്കുന്ന് സ്വദേശി വെണ്ണാട്ടുപറമ്പില്‍ വീട്ടില്‍ അലനാണ് (19) പരിക്കേറ്റത്. ഗുരുതരമായി പരിക്കേറ്റ അലന്‍ തൃശൂരിലെ സ്വകാര്യ ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലാണ്. ഇന്നലെ രാവിലെ പതിനൊന്നരയോടെയായിരുന്നു അപകടം. ചാലക്കുടിയില്‍ നിന്ന് മുളങ്കുന്നത്തുകാവിലേക്ക് പോയിരുന്ന ബസ് സ്റ്റാൻഡിലേക്ക് പ്രവേശിക്കുന്നതിനിടെ ആമ്പല്ലൂരില്‍ നിന്ന് വന്നിരുന്ന ബൈക്ക് ബസില്‍ ഇടിക്കുകയായിരുന്നു. റോഡിലേക്ക് തെറിച്ചുവീണ ഇരുവരെയും നാട്ടുകാര്‍ ചേര്‍ന്ന് ആശുപത്രിയില്‍ എത്തിച്ചെങ്കിലും ആന്‍സ്റ്റിന്‍റെ ജീവന്‍ രക്ഷിക്കാനായില്ല. പുതുക്കാട് പോലീസ് സ്ഥലത്തെത്തിയിരുന്നു. ദേശീയപാതയിലൂടെ വരുന്ന വാഹനങ്ങള്‍ ശ്രദ്ധിക്കാതെ ബസുകള്‍ സ്റ്റാൻഡിലേക്ക് കടക്കുന്നതും തിരിച്ചുപോകുന്നതും മൂലം നിരവധി അപകടങ്ങളാണ് ഉണ്ടായിട്ടുള്ളത്. മാതാവ് : ജാന്‍സി. സഹോദന്‍ : സ്റ്റിനില്‍.

ലോറിയിടിച്ച് വഴിയാത്രക്കാരന്‍ മരിച്ചു

കൊടകര: ദേശീയപാതയില്‍ പാഴ്‌സല്‍ ലോറിയിടിച്ച് വഴിയാത്രികന്‍ മരിച്ചു. കൊടകര അഴകത്ത് കൂടാരത്തില്‍ രാജമണി(55) യാണ് മരിച്ചത്. വ്യാഴാഴ്ച രാത്രിയിലായിരുന്നു അപകടം. കൊടകര പോലീസ് മേല്‍നടപടി സ്വീകരിച്ചു. സംസ്‌കാരം നടത്തി. ഭാര്യ: സിന്ധു. മക്കള്‍: രാഗേഷ്, രാജി , രേഖ . മരുമക്കള്‍: സുമേഷ്, ധനേഷ്, രവീണ.

അന്നമനട പുളിക്കക്കടവിൽ അജ്ഞാത മൃതദേഹം കണ്ടെത്തി

അന്നമനട: ചാലക്കുടി പുഴയുടെ ഭാഗമായ അന്നമനട പുളിക്കകടവിൽ അജ്ഞാത മൃതദേഹം കണ്ടെത്തി. ഇന്നലെ രാവിലെ പുഴയോട് ചേർന്ന പുൽതകിടിയിൽ തട്ടിനിൽക്കുന്ന നിലയിൽ നാട്ടുകാരാണ് മൃതദേഹം കണ്ടത്. ചാലക്കുടി, മാള അഗ്നി രക്ഷാസേനയെത്തി മൃതദേഹം കരക്കെത്തിച്ചു. തിരിച്ചറിയാനാവാത്ത വിധമാണ് മുഖം. 35 വയസ് തോന്നിക്കുന്ന പുരുഷന്‍റേതാണ് മൃതദേഹം. മഞ്ഞയിൽ വെള്ള വരകളുള്ള ഷർട്ടും കറുത്ത ട്രാക്ക് സ്യൂട്ടുമാണ് ധരിച്ചിരിക്കുന്നത്. ഏകദേശം 162 സെൻറീമീറ്റർ ഉയരമുണ്ട്. രണ്ട് ദിവസത്തെ പഴക്കം ഉണ്ടെന്നാണ് നിഗമനം. കൊരട്ടി പോലീസ് സ്ഥലത്തെത്തി മേൽനടപടികൾ സ്വീകരിച്ചു. മൃതദേഹം ജില്ലാ മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി.

രാസലഹരിക്കതിരേ പാട്ടുരാവുമായി എന്‍എസ്എസിന്‍റെ നോവ

ഇരിങ്ങാലക്കുട: രാസലഹരിക്കെതിരെ ബോധവത്്കരണം ലക്ഷ്യമിട്ട് ഇരിങ്ങാലക്കുട ക്രൈസ്റ്റ് കോളജിലെ നാഷണല്‍ സര്‍വീസ് സ്‌കീം പൂര്‍വ വിദ്യാര്‍ഥി സംഘടനയായ നോവ കോളജില്‍ പുതിയതായി പണികഴിപ്പിച്ച ആംഫി തിയറ്ററില്‍ സംഘടിപ്പിച്ച പാട്ടുരാവ് ശ്രദ്ധേയമായി. പ്രിന്‍സിപ്പല്‍ റവ. ഡോ. ജോളി ആന്‍ഡ്രൂസ് "ഈശ്വരനെത്തേടി ഞാനലഞ്ഞു' എന്ന ഗാനം ആലപിച്ച് ഉദ്ഘാടനം ചെയ്തു. മാനേജര്‍ ഫാ. ജോയ് പീണിക്കപ്പറമ്പില്‍ "പരിശുദ്ധാത്മാവേ' എന്ന ഗാനവും പ്രയോര്‍ ഫാ. ജോണ്‍ പാലിയേക്കര "അല്ലിയാമ്പല്‍ക്കടവില്‍'എന്ന ഗാനവും ആലപിച്ച് പാട്ടുരാവിന് മിഴിവേകി. പാട്ടുരാവില്‍ ഇരുപതോളം എന്‍എസ്എസ് പൂര്‍വവിദ്യാര്‍ഥി വോളന്‍റിയര്‍മാരായ ഗായകര്‍ ഗസലുകളും മെലഡികളും ആലപിച്ചു. നോവ ഭാരവാഹിയായ അഭി തുമ്പൂര്‍ രചിച്ച "പണ്ടത്തെ നാരങ്ങാ മിഠായി നുണയുമ്പോള്‍' എന്ന കവിതാ സമാഹാരം മാനേജര്‍ ഫാ. ജോയ് പീണിക്കപ്പറമ്പിലും നോവ രക്ഷാധികാരി പ്രഫ. കെ.ജെ. ജോസഫും ചേര്‍ന്ന് പ്രകാശനം ചെയ്തു. വോയ്സ് ഓഫ് ദ വേള്‍ഡ് മലയാളി കൗണ്‍സിലിന്‍റെ ഗുരുശ്രേഷ്ഠ പുരസ്‌കാരം നേടിയ നോവ രക്ഷാധികാരി ഡോ. സെബാസ്റ്റ്യന്‍ ജോസഫ്, മികച്ച എന്‍എസ്എസ് പ്രോഗ്രാം ഓഫീസര്‍ക്കുള്ള ജില്ലാതല അവാര്‍ഡ് നേടിയ വിജീഷ് ലാല്‍ എന്നിവരെ ആദരിച്ചു. നോവ ചെയര്‍പേഴ്‌സണ്‍ എ.വി. പ്രിയദര്‍ശിനി, പ്രഫ. വി.പി. ആന്‍റോ, ലാലു അയ്യപ്പന്‍കാവ്, പി.എഫ്. വിന്‍സെന്‍റ്, സിന്‍റോ കോങ്കോത്ത് എന്നിവര്‍ പ്രസംഗിച്ചു.

ദേവാലയങ്ങളിൽ തിരുനാൾ

മേലൂർ സെന്‍റ് ജോസഫ് മേലൂർ: സെന്‍റ്് ജോസഫ് ദേവാലയത്തിൽ വിശുദ്ധ യൗസേപ്പിതാവിന്‍റെ മാദ്ധ്യസ്ഥതിരുനാളും പരിശുദ്ധ കന്യകാമറിയത്തിന്‍റെ ദർശനതിരുനാളും വികാരി ഫാ. ടോമി കണ്ടത്തിൽ കൊടി ഉയർത്തിയതോടെ ആരംഭിച്ചു. ഇന്നു രാവിലെ ആറിന് ലൈത്തോരൻമാരുടെ വാഴ്ച, ദിവ്യബലി, പ്രസുദേന്തിമാരുടെ തെരഞ്ഞെടുപ്പ്, അഞ്ചിന് പ്രസുദേന്തിവാഴ്ച, ദിവ്യബലി, സാൾ വെ ലദീഞ്ഞ്. നാളെ ആറിന് ദിവ്യബലി, 4.30ന് തിരി വെഞ്ചരിപ്പ്, രൂപം എഴുന്നള്ളിച്ചുവയ്ക്കൽ, ദിവ്യബലി, പ്രദക്ഷിണം. ഞായറാഴ്ച രാവിലെ 6.30 നും 7.30 നും ദിവ്യബലി, വൈകിട്ട് 4.30 ന് ആഘോഷമായ തിരുനാൾ പാട്ടുകുർബാനയ്ക്ക് ഫാ. എഡ്‌വിൻ വട്ടക്കുഴിയിൽ കാർമികത്വം വഹിക്കും. ഫാ. മാർട്ടിൻ കല്ലുങ്കൽ സന്ദേശം നൽകും. തുടർന്ന് പ്രദക്ഷിണം. വേളൂക്കര കപ്പേളയിൽ തൂമ്പാക്കോട്: സെന്‍റ് സെബാസ്റ്റ്യൻസ് ദേവാലയം വേളൂക്കര കപ്പേളയിൽ വിശുദ്ധ അന്തോണീസിന്‍റെ തിരുനാളിന് വികാരി ഫാ. ജിജൊ മേനോത്ത് കൊടി ഉയർത്തി. ശനിയാഴ്ച വൈകിട്ട് ആറിന് ലദീഞ്ഞ്, പ്രസുദേന്തിവാഴ്ച, ആഘോഷമായ തിരുനാൾ പാട്ടുകുർബാന, നോവേന എന്നിവയ്ക്ക് ഫാ. അഖിൽ തിരുത്തനത്തി കാർമികത്വം വഹിക്കും. തുടർന്ന് നേർച്ച വിതരണം.

ചാലക്കുടി ജിഎംബിഎച്ച്എസ്എസിൽ നൈപുണ്യവികസന കേന്ദ്രം

ചാലക്കുടി: ഔപചാരിക വിദ്യാഭ്യാസത്തോടൊപ്പം തൊഴിൽ നൈപുണ്യം വളർത്തിയെടുക്കുക എന്ന ലക്ഷ്യത്തോടെ സംസ്ഥാന സർക്കാർ പൊതുവിദ്യാഭ്യാസ വകുപ്പിന്‍റെ സമഗ്രശിക്ഷ കേരള പദ്ധതിയുടെ ഭാഗമായി ചാലക്കുടി ജിഎംബിഎച്ച്എസ്എസിൽ നൈപുണ്യ വികസന കേന്ദ്രം ആരംഭിക്കുന്നു. പദ്ധതിയുടെ പോസ്റ്റർ പ്രകാശനം സനീഷ്കുമാർ ജോസഫ് എം എൽ എ നിർവഹിച്ചു. നഗരസഭ ചെയർമാൻ ഷിബു വാലപ്പൻ അധ്യക്ഷത വഹിച്ചു. നഗരസഭ വിദ്യാഭാസ സ്റ്റാൻഡിംഗ് കമ്മറ്റി ചെയർമാൻ എം.എം. അനിൽകുമാർ, പ്രിൻസിപ്പൽ വി. കമലം, പിടിഎ പ്രസിഡന്‍റ്് പി.വി. സന്തോഷ് , ജോർജ് കല്ലിങ്കൽ, എസ്എംസി ചെയർമാൻ, ലിജോ ജോസഫ്, ബിപിസി ബിആർസി ഇ.വി. ബിന്ദു, പി.എസ്. സംഗീത, പി.കെ. അനിത, ആര്യ മോൾ എന്നിവർ പ്രസംഗിച്ചു. ഡ്രോൺ സർവീസ് ടെക്നീഷ്യൻ, ഇലക്ട്രിക് വെഹിക്കിൾ സർവീസ് ടെക്നീഷ്യൻ എന്നീ തൊഴിൽ സാധ്യതകൾ ഉള്ള കോഴ്സുകളിലേക്ക് പ്രവേശനം ആരംഭിച്ചു. പത്താം ക്ലാസ് വിജയിച്ച് 15 നും 23നും ഇടയിൽ പ്രായമുള്ളവർക്ക് അപേക്ഷിക്കാം. പിന്നാ ക്ക വിഭാഗക്കാർക്ക് നിയമാനുസൃതമായി ഇളവ് ലഭിക്കും. കോഴ്സ് തികച്ചും സൗജന്യം. അപേക്ഷകൾ 15ന് മുൻപ് ഓഫീസിൽ സമർപ്പിക്കണം. കൂടുതൽ വിവരങ്ങൾക്ക്: 9947812151, 9947327102

ക്രൈസ്റ്റ് എന്‍ജിനീയറിംഗ് കോളജില്‍ അധ്യാപക ശില്പശാല സംഘടിപ്പിച്ചു

ഇരിങ്ങാലക്കുട: സാമൂഹിക പ്രസക്തിയുള്ള ഗവേഷണ പ്രോജക്ടുകള്‍ എങ്ങനെ രൂപകല്പന ചെയ്യാം എന്ന വിഷയത്തില്‍ ക്രൈസ്റ്റ് കോളജ് ഓഫ് എന്‍ജിനീയറിംഗ് അധ്യാപക ശില്പശാല സംഘടിപ്പിച്ചു. എട്ട് സെഷനുകളും ഫീല്‍ഡ് വിസിറ്റും അടങ്ങിയ ശില്പശാലയില്‍ ഗവേഷണ പ്രോജക്ടുകളുടെ വിഷയരൂപീകരണം, രൂപരേഖ തയാറാക്കല്‍, ഫണ്ടിംഗ് സാധ്യതകള്‍, ബജറ്റിംഗ്, നടത്തിപ്പ് എന്നിങ്ങനെ വിവിധ വശങ്ങള്‍ ചര്‍ച്ച ചെയ്തു. ഡോ. എ. സീമ (സയന്‍റിസ്റ്റ്, സി മെറ്റ്), ഡോ. സുധ ബാലഗോപാലന്‍ (ഡയറക്ടര്‍ ഔട്ട് റീച്ച്, ക്രൈസ്റ്റ് കോളജ് ഓഫ് എന്‍ജിനീയറിംഗ്), ഡോ. സി.ജി. നന്ദകുമാര്‍ (റിട്ട. പ്രഫസര്‍, കുസാറ്റ്), പ്രഫ. വി.കെ. ദാമോദരന്‍ ( ചെയര്‍മാന്‍, സെന്‍റര്‍ ഫോര്‍ എന്‍വയോൺമെന്‍റ്് ആന്‍ഡ് ഡവലപ്‌മെന്‍റ്്), എസ്. ഗോപകുമാര്‍ (ചെയര്‍മാന്‍, ഐ ട്രിപ്പിള്‍ ഇ ലൈഫ് മെമ്പര്‍ അഫിനിറ്റി ഗ്രൂപ്പ്), ഡോ. സൂരജ് പ്രഭ (പ്രഫസര്‍, വിദ്യ അക്കാദമി), ഡോ. എസ്.എന്‍. പോറ്റി (സയന്‍റിസ്റ്റ്, സി മെറ്റ്), അഭിനവ് രാജീവ് (ഡയറക്ടര്‍, ബംബിള്‍ ബീ ഇന്‍സ്ട്രൂമെന്‍റ്സ്) എന്നിവര്‍ വിവിധ വിഷയങ്ങള്‍ അവതരിപ്പിച്ചു. ശില്പശാലയുടെ ഭാഗമായി എല്ലാ അധ്യാപകരും പ്രോജക്ട് പ്രൊപ്പോസല്‍ സംഗ്രഹം തയാറാക്കി. ശില്പശാലയുടെ ഭാഗമായി ആനപ്പന്തം ട്രൈബല്‍ കോളനിയിലേക്ക് ഫീല്‍ഡ് വിസിറ്റും സംഘടിപ്പിച്ചിരുന്നു. സമാപന സമ്മേളനത്തില്‍ എക്‌സിക്യൂട്ടീവ് ഡയറക്ടര്‍ ഫാ. ജോണ്‍ പാലിയേക്കര അധ്യക്ഷത വഹിച്ചു. നാരീശക്തി അവാര്‍ഡ് ജേതാവായ ഡോ. എ. സീമയെ ആദരിച്ചു. പ്രിന്‍സിപ്പല്‍ ഡോ. സജീവ് ജോണ്‍, ഡയറക്ടര്‍മാരായ ഡോ. എലിസബത്ത് ഏലിയാസ്, ഡോ. സുധ ബാലഗോപാലന്‍, ഡോ. മനോജ് ജോര്‍ജ് തുടങ്ങിയവര്‍ സംബന്ധിച്ചു. ഡോ. നീതു വര്‍ഗീസ് കണ്‍വീനറായുള്ള സംഘാടകസമിതി പരിപാടിക്കു നേതൃത്വം നല്‍കി.

റോഡരികില്‍ അപകടം പതിയിരിക്കുന്നു, സുരക്ഷാഭിത്തി നിര്‍മിക്കണമെന്ന് ആവശ്യം

ഇഞ്ചക്കുണ്ട്: മറ്റത്തൂര്‍-വരന്തരപ്പിള്ളി പഞ്ചായത്തുകളെ ബന്ധിപ്പിക്കുന്ന ഇഞ്ചക്കുണ്ട്-കാല്‍ക്കുഴി റോഡരുകില്‍ അപകടം പതിയിരിക്കുന്നു. 150 അടിയിലേറെ താഴ്ചയുള്ള പഴയ കരിങ്കല്‍ക്വാറിയാണ് ഇവിടെ റോഡരുകില്‍ വാപിളര്‍ന്നു നില്‍ക്കുന്നത്. റോഡിനേയും ക്വാറിയേയും വേര്‍തിരിക്കുന്ന ഭാഗത്ത് കമ്പിവേലി സ്ഥാപിച്ചിട്ടുണ്ടെങ്കിലും അപകടസാധ്യത കുറയ്ക്കാന്‍ ഇതു പര്യാപ്തമല്ലെന്നു നാട്ടുകാര്‍ പറയുന്നു. റോഡില്‍ കുത്തനെ ഇറക്കമുള്ള ഈ ഭാഗത്ത് ഏതെങ്കിലും വാഹനങ്ങള്‍ നിയന്ത്രണം വിട്ടാല്‍ ആഴമേറിയ ക്വാറിയില്‍ ചെന്നുവീണ് ആളപായമുണ്ടാകാന്‍ സാധ്യതയുണ്ട്. ഇഞ്ചക്കുണ്ടിലും പരിസരപ്രദേശങ്ങളിലുമുള്ള വിദ്യാലയങ്ങളിലേക്ക് കുട്ടികള്‍ സൈക്കിളില്‍ പോകുന്നത് ഇതുവഴിയാണ്. കൂടാതെ ചൊക്കന, പാലപ്പിള്ളി, കുണ്ടായി, മൈസൂര്‍ ഘബര്‍ എസ്റ്റേറ്റുകളിലേക്കുള്ള തോട്ടം തൊഴിലാളികളും പുലര്‍ച്ചെ ഇരുചക്രവാഹനങ്ങളില്‍ ജോലിക്കു പോകുന്നതും ഇതുവഴിയാണ്. അപകട സാധ്യത കണക്കിലെടുത്ത് ക്വാറിയോടു ചേര്‍ന്നുള്ള റോഡരികില്‍ ഉറപ്പേറിയ റെയില്‍ഗാര്‍ഡുകള്‍ ഉപയോഗിച്ചുള്ള സുരക്ഷഭിത്തി നിര്‍മിക്കാന്‍ നടപടി ഉണ്ടാകണമെന്നാണ് ആവശ്യമുയരുന്നത്. അതുവരെ മുന്നറിയിപ്പ് ബോര്‍ഡും രാത്രിയില്‍ കൂടുതല്‍ വെളിച്ചം കിട്ടുന്ന തരത്തിലുള്ള വഴിവിളക്കും സ്ഥാപിച്ച് അപകട സാധ്യത ഒഴിവാക്കണമെന്നും ആവശ്യപ്പെട്ട് മനുഷ്യാവകാശ പ്രവര്‍ത്തകന്‍ കെ.ജി. രവീന്ദ്രനാഥ് അധികൃതര്‍ക്കു നിവേദനം നല്‍കി.

കടമ്പോട് ഒരേക്കര്‍ തരിശുനിലത്തില്‍ കൃഷി ആരംഭിച്ചു

കടമ്പോട്: കോടാലി കാര്‍ഷിക ഉത്പാദന സംഭരണ സംസ്‌കരണ വിപണന സംഘത്തിന്‍റെ നേതൃത്വത്തില്‍ കടമ്പോടുള്ള ഒരേക്കര്‍ തരിശുനിലത്തില്‍ വാഴകൃഷി ആരംഭിച്ചു. മറ്റത്തൂരിനെ തരിശുരഹിത പഞ്ചായത്താക്കാനുള്ള പദ്ധതിയിലുള്‍പ്പെടുത്തി ആരംഭിച്ച വാഴകൃഷിയുടെ വിത്തുനടീല്‍ ഉദ്ഘാടനം മറ്റത്തൂര്‍ പഞ്ചായത്ത് പ്രസിഡന്‍റ്് അശ്വതി വിബി നിര്‍വഹിച്ചു. സംഘം പ്രസിഡന്‍റ് പി.എസ്. സുരേന്ദ്രന്‍ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ഷാന്‍റോ കൈതാരത്ത്, കൊടകര ബ്ലോക്ക് പഞ്ചായത്തംഗങ്ങളായ എം.ആര്‍. രഞ്ജിത്, സജിത രാജീവന്‍, ഗ്രാമപഞ്ചായത്തംഗം സുമിത ഗിരീഷ്, മറ്റത്തൂര്‍ കൃഷി ഓഫീസര്‍ ഡോ. വി.യു. ദിവ്യ, ഐ.ആര്‍. ബാലകൃഷ്ണന്‍, പി.കെ. രാജന്‍, സംഘം വൈസ് പ്രസിഡന്‍റ്് ഇ.കെ. ശശി, സെക്രട്ടറി സി.എസ്. സുരമ്യ എന്നിവര്‍ പ്രസംഗിച്ചു.

സംഗമേശന്‍റെ 12 അടി ശില്പവുമായി ദീപു കളരിക്കല്‍

ഇരിങ്ങാലക്കുട: കൂടല്‍മാണിക്യ സ്വാമിയുടെ 12 അടി വലുപ്പമുള്ള തെര്‍മോകോള്‍ ശില്പവുമായി മാപ്രാണം സ്വദേശി ദീപു കളരിക്കല്‍. കലാകാരനായ അദ്ദേഹം 50,000 രൂപയോളം ചെലവാക്കിയാണു ശില്പം നിര്‍മിച്ചെടുത്തത്. ഫെവിക്കോളും തെര്‍മോക്കോളും ചേര്‍ത്ത് ഒരഴ്ച കൊണ്ടാണ് വളരെ മനോഹരമായ രീതിയില്‍ ഭക്തിതുളുമ്പുന്ന പ്രസരിപ്പുള്ള സംഗമേശന്‍റെ ശില്പം പൂര്‍ത്തീകരിച്ചത്. ക്ഷേത്രത്തിനായി എന്തെങ്കിലും നിര്‍മിച്ചു സമര്‍പ്പിക്കണമെന്ന് താനും ഭാര്യയും ആഗ്രഹിച്ചിരുന്നതായും ഒടുവില്‍ ഭഗവാന്‍റെത്തന്നെ രൂപം സമര്‍പ്പിക്കാനായതില്‍ സന്തോഷമുണ്ടെന്നും ദീപു പറഞ്ഞു. ചേലുകാവില്‍ ദീപാര്‍ട്‌സ് എന്ന ഒരു സ്ഥാപനം നടത്തുകയാണ് ഇദ്ദേഹം. 23 വര്‍ഷമായി ഈ രംഗത്തുണ്ട്. ബുദ്ധന്‍റെ ഉള്‍പ്പടെ നിരവധി ശില്പങ്ങള്‍ നിര്‍മിച്ചുനല്‍കിയിട്ടുണ്ട്. ദീപു സമര്‍പ്പിച്ച ശില്പം അര്‍ഹിക്കുന്ന പ്രാധാന്യത്തോടെ കൂടല്‍മാണിക്യം ദേവസ്വം പറ്റിയ ഒരിടത്തു സ്ഥിരമായി പ്രദര്‍ശിപ്പിക്കാമെന്നു ദേവസ്വം ചെയര്‍മാന്‍ അഡ്വ. സി.കെ. ഗോപി പറഞ്ഞു. മനോഹരമായ ശില്പം നിര്‍മിച്ച ശില്പിയെ അദ്ദേഹം അഭിനന്ദിച്ചു.

ആക്ട്സ് വിളിപ്പുറത്തുള്ള പ്രസ്ഥാനം: കെ. രാധാകൃഷ്ണൻ

വടക്കാഞ്ചേരി: വിളിച്ചാൽ വിളിപ്പുറത്തുള്ള പ്രസ്ഥാനമാണ് ആക്ട്സ് എന്ന് കെ. രാധാകൃഷ്ണൻ എംപി. ആക്ട്സ് സ്ഥാപകദിന ജില്ലാസമ്മേളനം ഓട്ടുപാറ - വാഴാനി റോഡിൽ എക്സിബിഷൻ ഗ്രൗണ്ടിൽ ഉദ്ഘാടനം ചെയ്തു പ്രസംഗിക്കുകയായിരുന്നു എംപി. രാവിലെ മേയർ എം.കെ. വർഗീസ് പതാക ഉയർത്തിയതോടെ നിസ്വാർഥസേവനത്തിന്‍റെ 25 വർഷം പൂർത്തീകരിച്ച ആക്ട്സിന്‍റെ സ്ഥാപകദിന സമ്മേളനത്തിനു തുടക്കമായി. വർക്കിംഗ് പ്രസിഡന്‍റ് ടി.എ. അബൂബക്കർ അധ്യക്ഷത വഹിച്ചു. മേയർ എം.കെ. വർഗീസ് മുഖ്യപ്രഭാഷണം നടത്തി. പുതിയ ആംബുലൻസ് സർവീസ് സമർപ്പണം സേവ്യർ ചിറ്റിലപ്പിള്ളി എംഎൽഎ നിർവഹിച്ചു. നഗരസഭ ചെയർമാൻ പി.എൻ. സുരേന്ദ്രൻ സ്വപ്നസൗധം ഭവനനിർമ്മാണപദ്ധതി പ്രഖാപനം നടത്തി. കുന്നംകുളം എസിപി പി.ആർ. സന്തോഷ്, സിനിമാതാരം കലാഭവൻ നവാസ്, ആക്ട്സ് ജില്ലാ സെക്രട്ടറി ലൈജു സെബാസ്റ്റ്യൻ, നഗരസഭ വൈസ് ചെയർപേഴ്സണ്‍ ഷീല മോഹൻ, പ്രതിപക്ഷനേതാവ് കെ. അജിത്കുമാർ, ആക്ട്സ് യൂണിറ്റ് പ്രസിഡന്‍റ് വി.വി. ഫ്രാൻസിസ്, അഡ്വ. ശ്രീദേവി രതീഷ്, സി.ആർ. വത്സൻ, വി. അനിരുദ്ധൻ, അജിത്കുമാർ മല്ലയ്യ, വി. സുരേഷ്കുമാർ, അജീഷ് കർക്കിടകത്ത്, കെ.എം. അബ്ദുൾ സലീം തുടങ്ങിയവർ പ്രസംഗിച്ചു.

പറക്കോട്ടുകാവ് താലപ്പൊലി 11ന്; നാളെ ചമയപ്രദർശനം

തിരുവില്വാമല: പറക്കോട്ടുകാവ് താലപ്പൊലി മഹോത്സവത്തിനു തട്ടകദേശങ്ങൾ ഒരുങ്ങി. മധ്യകേരളത്തിലെ പൂരാഘോഷങ്ങളുടെ കൊട്ടിക്കലാശമായ പറക്കോട്ടുകാവ് താലപ്പൊലി മേടത്തിലെ ഒടുവിലത്തെ ഞായറാഴ്ചയായ 11നാണ്. നാളെ ചമയപ്രദർശനം. മൂന്നുദേശങ്ങളുടെയും കാഴ്ചപ്പന്തലുകളുടെ പണി പൂർത്തിയാകുന്നു. പടിഞ്ഞാറ്റുമുറി, കിഴക്കുമുറി ദേശങ്ങൾ തിരുവില്വാമല ടൗണിലും പാന്പാടി ദേശം പാന്പാടി സെന്‍ററിലുമാണു പന്തൽ ഒരുക്കുന്നത്. പടിഞ്ഞാറ്റുമുറി ദേശം കൊച്ചു പറക്കോട്ടുകാവ് ഭഗവതി ഓഡിറ്റോറിയത്തിൽ ഇന്നു രാവിലെ ഒന്പതിനും കിഴക്കുമുറിദേശം മല്ലിച്ചിറ അയ്യപ്പൻകാവിൽ താലപ്പൊലിദിനത്തിൽ രാവിലെ 10നും സമൂഹ പറവയ്പ് നടത്തും. പാന്പാടി ദേശത്തിന്‍റെ സംസ്കൃതി സാംസ്കാരികസദസിൽ ഇന്നു വൈകിട്ട് ഗാനമേള. 11നു രാവിലെ 7.30ന് വടക്കേ കൂട്ടാല ദേവീക്ഷേത്രത്തിൽനിന്ന് പടിഞ്ഞാറ്റുമുറി ദേശത്തിനുവേണ്ടി തെച്ചിക്കോട്ടുകാവ് രാമചന്ദ്രൻ ഭഗവതിയുടെ കോലമേന്തുന്നതോടെ താലപ്പൊലി ഉത്സവത്തിനു തുടക്കമാകും. പഞ്ചവാദ്യം, പൂതൻ തിറ, വെള്ളാട്ട്, കരിവേഷം എന്നിവ എഴുന്നള്ളിപ്പിന് അകന്പടിയാകും. കിഴക്കുമുറി ദേശത്തിന്‍റെ എഴുന്നള്ളിപ്പ് മല്ലിച്ചിറ അയ്യപ്പൻകാവിൽനിന്ന് ഉച്ചക്ക് 12.30ന് ആരംഭിക്കും. പുതുപ്പള്ളി കേശവൻ കോലമേന്തും. പഞ്ചവാദ്യവും നാടൻകലാരൂപങ്ങളും എഴുന്നള്ളിപ്പിനു മാറ്റുകൂട്ടും. പാന്പാടിദേശത്തിന്‍റെ പരിപാടികൾക്ക് ഉച്ചക്ക് 1.15ന് പാന്പാടി മന്ദംക്ഷേത്രത്തിൽ നിന്നാണു തുടക്കമാകുക. തിരുവന്പാടി ചന്ദ്രശേഖരൻ ഭഗവതിയുടെ തിടന്പേറ്റും. പഞ്ചവാദ്യം, പൂതൻ, തിറ, വെള്ളാട്ട് എന്നിവയുടെ അകന്പടിയോടെ എഴുന്നള്ളിപ്പ് പാന്പാടി സെന്‍ററിലെ പഞ്ചവാദ്യത്തിനുശേഷം ശ്രീവില്വാദ്രിനാഥക്ഷേത്രത്തിന്‍റെ വടക്കേനട വഴി താലപ്പൊലിപ്പാറയിലെത്തി അണിനിരക്കും. രാത്രി എട്ടിനും 9.30നും തിങ്കളാഴ്ച പുലർച്ചെ രണ്ടിനും നാലിനുമാണു വെടിക്കെട്ട്.

പെർമിറ്റ് ഇല്ലാതെ സർവീസ് നടത്തിയ സ്വകാര്യ ബസ് പിടികൂടി

തൃശൂർ: പെർമിറ്റ് ഇല്ലാതെ സർവീസ് നടത്തിയ സ്വകാര്യ ബസ് മോട്ടോർ വാഹനവകുപ്പ് പിടികൂടി. തൃശൂർ -വരാക്കര റൂട്ടിൽ സർവീസ് നടത്തുന്ന കെഎല്‍ 38 1921 നന്പർ ബസാണ് തൃശൂർ ആർടിഒ എൻഫോഴ്സ്മെന്‍റ് എംവിഐ പി.വി. ബിജുവും എഎംവിഐ പി.എസ്. ശ്രീജിത്തും ചേർന്നു പിടികൂടിയത്. ഏപ്രിൽ 30ന് ഈ വാഹനത്തിന്‍റെ പെർമിറ്റ്കാലാവധി തീർന്നിരുന്നു. ഇന്നലെ വൈകീട്ട് നാലരയ്ക്കു തൃശൂരിൽനിന്നു യാത്രക്കാരുമായി വരാക്കരയ്ക്കു പുറപ്പെട്ട ബസ് ആന്പല്ലൂർ ടോൾ പ്ലാസയ്ക്കു സമീപം പിടികൂടുകയായിരുന്നു. പെർമിറ്റില്ലാതെ സർവീസ് നടത്തിയതിനും യാത്രക്കാർക്ക് ടിക്കറ്റ് നൽകാതിരുന്നതിനും കണ്ടക്ടർ ലൈസൻസ് ഇല്ലാതെ ജോലി നോക്കിയതിനും എയർഹോണ്‍ പിടിപ്പിച്ചതിനും ഫ്രണ്ട് ഗ്രിൽ ഉൗരിവച്ചതിനുംകൂടി 16,000 രൂപ പിഴ ചുമത്തി. യാത്രക്കാർ ഉണ്ടായിരുന്നതിനാൽ സർവീസ് വരാക്കര വരെ തുടരാനും തുടർന്ന് ഗ്യാരേജ് ചെയ്യുന്നതിനും നിർദേശം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]